𑁬. 𑀆𑀭𑀸𑀫𑀯𑀕𑁆𑀕𑁄

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑁧𑁦𑁨𑁫. 𑀆𑀭𑀸𑀫𑀯𑀕𑁆𑀕𑀲𑁆𑀲 𑀧𑀞𑀫𑁂 𑀉𑀧𑀘𑀸𑀭𑀦𑁆𑀢𑀺 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀆𑀭𑀸𑀫𑀲𑁆𑀲 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀉𑀧𑀘𑀸𑀭𑀁.

𑁧𑁦𑁨𑁭. ‘‘𑀲𑀻𑀲𑀸𑀦𑀼𑀮𑁄𑀓𑀺𑀓𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀪𑀺𑀓𑁆𑀔𑀼𑀦𑀻𑀦𑀫𑁂𑀯 𑀲𑀻𑀲𑀦𑁆𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀦𑀻𑀦’’𑀦𑁆𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀁

𑁧𑁦𑁨𑁮. 𑀤𑀼𑀢𑀺𑀬𑁂 𑀅𑀩𑁆𑀪𑀦𑁆𑀢𑀭𑁄𑀢𑀺 𑀅𑀩𑁆𑀪𑀦𑁆𑀢𑀭𑁂 𑀧𑀭𑀺𑀬𑀸𑀧𑀦𑁆𑀦𑁄, 𑀚𑀸𑀢𑁄 𑀯𑀸. ‘‘𑀲𑀗𑁆𑀓𑀸𑀫𑁂𑀲𑀻’’𑀢𑀺 𑀇𑀫𑀺𑀦𑀸 𑀲𑀁𑀳𑀭𑀻𑀢𑀺 𑀏𑀢𑁆𑀣 𑀳𑀭𑀥𑀸𑀢𑀼𑀬𑀸 𑀲𑀗𑁆𑀓𑀫𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑁆𑀳𑀸𑀧𑀺𑀢𑀸𑀢𑀺 𑀓𑀧𑁆𑀧𑀓𑀸. 𑀢𑁂 𑀳𑀺 𑀦𑀳𑀸𑀧𑁂𑀦𑁆𑀢𑀺 𑀲𑁄𑀘𑀸𑀧𑁂𑀦𑁆𑀢𑀻𑀢𑀺 𑀦𑁆𑀳𑀸𑀧𑀺𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀦𑁆𑀢𑀺 𑀓𑀸𑀲𑀸𑀯𑀦𑀺𑀯𑀸𑀲𑀦𑀦𑁆𑀢𑀺. 𑀤𑀼𑀢𑀺𑀬𑀁.

𑁩-𑁪. 𑀢𑀢𑀺𑀬-𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁

𑁧𑁦𑁩𑁬. 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀅𑀦𑀼𑀢𑁆𑀢𑀸𑀦𑀝𑁆𑀞𑀸𑀦𑀁 𑀦𑀢𑁆𑀣𑀻𑀢𑀺. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀁

𑁧𑁦𑁪𑁩. 𑀧𑀜𑁆𑀘𑀫𑁂 ‘‘𑀓𑀼𑀮𑁂 𑀫𑀘𑁆𑀙𑀭𑁄’’𑀢𑀺 𑀏𑀢𑁆𑀣 𑀫𑀘𑁆𑀙𑀭𑀦𑀁 𑀫𑀘𑁆𑀙𑀭𑁄𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. ‘‘𑀢𑀁 𑀓𑀼𑀮𑀁 𑀅𑀲𑁆𑀲𑀤𑁆𑀥𑀁 𑀅𑀧𑁆𑀧𑀲𑀦𑁆𑀦’’𑀦𑁆𑀢𑀺 𑀓𑀼𑀮𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀬𑁄𑀚𑀦𑀸. ‘‘𑀪𑀺𑀓𑁆𑀔𑀼𑀦𑀺𑀬𑁄 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸’’𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀬𑁄𑀚𑀦𑀸.

𑁧𑁦𑁪𑁫. ‘‘𑀲𑀦𑁆𑀢𑀁𑀬𑁂𑀯 𑀆𑀤𑀻𑀦𑀯’’𑀦𑁆𑀢𑀺 𑀲𑀫𑁆𑀩𑀦𑁆𑀥𑀺𑀬𑀸 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀓𑀼𑀮𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀯𑀸’’𑀢𑀺 𑀇𑀫𑀺𑀦𑀸 𑀤𑁆𑀯𑀻𑀲𑀼 𑀅𑀜𑁆𑀜𑀢𑀭𑀫𑁂𑀯 𑀦 𑀲𑀫𑁆𑀩𑀦𑁆𑀥𑁄 𑀳𑁄𑀢𑀺, 𑀅𑀣 𑀔𑁄 𑀤𑁆𑀯𑀬𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀻𑀢𑀺. 𑀧𑀜𑁆𑀘𑀫𑀁.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁

𑁧𑁦𑁪𑁮. 𑀙𑀝𑁆𑀞𑁂 𑀑𑀯𑀸𑀤𑀸𑀬𑀸𑀢𑀺 𑀏𑀢𑁆𑀣 𑀦 𑀬𑁄 𑀯𑀸 𑀲𑁄 𑀯𑀸 𑀑𑀯𑀸𑀤𑁄 𑀳𑁄𑀢𑀺, 𑀅𑀣 𑀔𑁄 𑀕𑀭𑀼𑀥𑀫𑁆𑀫𑁄𑀬𑁂𑀯𑀸𑀢𑀺 𑀆𑀳 ‘‘𑀕𑀭𑀼𑀥𑀫𑁆𑀫𑀢𑁆𑀣𑀸𑀬𑀸’’𑀢𑀺. 𑀲𑀳 𑀯𑀲𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀲𑀁𑀯𑀸𑀲𑁄𑀢𑀺 𑀯𑀘𑀦𑀢𑁆𑀣𑁂𑀦 𑀉𑀧𑁄𑀲𑀣𑀧𑀯𑀸𑀭𑀡𑀸 𑀲𑀁𑀯𑀸𑀲𑁄 𑀦𑀸𑀫𑀸𑀢𑀺 𑀆𑀳 ‘‘𑀉𑀧𑁄𑀲𑀣𑀧𑀯𑀸𑀭𑀡𑀸𑀧𑀼𑀘𑁆𑀙𑀦𑀢𑁆𑀣𑀸𑀬𑀸’’𑀢𑀺. ‘‘𑀧𑀼𑀘𑁆𑀙𑀦𑀢𑁆𑀣𑀸𑀬𑀸’’𑀢𑀺 𑀇𑀫𑀺𑀦𑀸 ‘‘𑀲𑀁𑀯𑀸𑀲𑀸𑀬𑀸’’𑀢𑀺 𑀏𑀢𑁆𑀣 𑀉𑀢𑁆𑀢𑀭𑀧𑀤𑀮𑁄𑀧𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂, 𑀲𑀺𑀓𑁆𑀔𑀸𑀧𑀤𑁂 𑀯𑀸 𑀧𑀸𑀴𑀺𑀬𑀁 𑀯𑀸𑀢𑀺. 𑀙𑀝𑁆𑀞𑀁.

𑁭-𑁯. 𑀲𑀢𑁆𑀢𑀫-𑀅𑀝𑁆𑀞𑀫-𑀦𑀯𑀫𑀲𑀺𑀓𑁆𑀔𑀸𑀧𑀤𑀁

𑁧𑁦𑁫𑁩. 𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑁂𑀲𑀼 𑀅𑀦𑀼𑀢𑁆𑀢𑀸𑀦𑀯𑀘𑀦𑀁 𑀦𑀢𑁆𑀣𑀺. 𑀓𑁂𑀯𑀮𑀁 𑀧𑀦 ‘‘𑀇𑀫𑀺𑀲𑁆𑀲𑀸𑀧𑀻’’𑀢𑀺 𑀧𑀤𑀁 𑀯𑀺𑀲𑁂𑀲𑁄, 𑀇𑀫𑀺𑀲𑁆𑀲𑀸𑀧𑀺 𑀧𑀸𑀴𑀺𑀬𑀸𑀢𑀺 𑀅𑀢𑁆𑀣𑁄𑀢𑀺. 𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑀸𑀦𑀺.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀁

𑁧𑁦𑁬𑁨. 𑀤𑀲𑀫𑁂 𑀤𑁆𑀯𑁂 𑀓𑀸𑀬𑀸 𑀉𑀧𑀭𑀺𑀫𑀓𑀸𑀬𑁄 𑀳𑁂𑀝𑁆𑀞𑀺𑀫𑀓𑀸𑀬𑁄𑀢𑀺. 𑀢𑀢𑁆𑀣 𑀓𑀝𑀺𑀢𑁄 𑀉𑀤𑁆𑀥𑀁 𑀉𑀧𑀭𑀺𑀫𑀓𑀸𑀬𑁄, 𑀳𑁂𑀝𑁆𑀞𑀸 𑀳𑁂𑀝𑁆𑀞𑀺𑀫𑀓𑀸𑀬𑁄. 𑀢𑀢𑁆𑀣 ‘‘𑀧𑀲𑀸𑀔𑁂’’𑀢𑀺 𑀇𑀤𑀁 𑀳𑁂𑀝𑁆𑀞𑀺𑀫𑀓𑀸𑀬𑀲𑁆𑀲 𑀦𑀸𑀫𑀦𑁆𑀢𑀺 𑀆𑀳 ‘‘𑀅𑀥𑁄𑀓𑀸𑀬𑁂’’𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀢𑀢𑁄𑀢𑀺 𑀅𑀥𑁄𑀓𑀸𑀬𑀢𑁄. 𑀇𑀫𑀺𑀦𑀸 𑀧𑀜𑁆𑀘𑀫𑀻𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸 𑀧𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀸 𑀯𑀺𑀬 𑀉𑀪𑁄 𑀊𑀭𑀽 𑀧𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀸𑀢𑀺 𑀬𑁄𑀚𑀦𑀸.

𑁧𑁦𑁬𑁫. 𑀨𑀸𑀮𑁂𑀳𑀻𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄. 𑀢𑁂𑀦 ‘‘𑀥𑁄𑀯𑀸’’𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀡𑀢𑁆𑀢𑀺𑀤𑀼𑀓𑁆𑀓𑀝𑀸𑀦𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀤𑀼𑀓𑁆𑀓𑀝𑁂𑀲𑀼 𑀯𑀺𑀦𑀬𑀤𑀼𑀓𑁆𑀓𑀝𑀫𑁂𑀯. 𑀲𑁂𑀲𑁂𑀲𑀽𑀢𑀺 𑀪𑀺𑀦𑁆𑀤𑀦𑀢𑁄 𑀲𑁂𑀲𑁂𑀲𑀼 𑀨𑀸𑀮𑀦𑀸𑀤𑀻𑀲𑀽𑀢𑀺. 𑀤𑀲𑀫𑀁.

𑀆𑀭𑀸𑀫𑀯𑀕𑁆𑀕𑁄 𑀙𑀝𑁆𑀞𑁄.