𑁩. 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑀺𑀲𑀦𑀲𑀺𑀓𑁆𑀔𑀸𑀧𑀤𑀁

𑁫𑁦𑁮. 𑀢𑀢𑀺𑀬𑁂 ‘‘𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀓𑀣’’𑀦𑁆𑀢𑀺 𑀇𑀫𑀺𑀦𑀸 ‘‘𑀢𑀺𑀭𑀘𑁆𑀙𑀸𑀦𑀓𑀣’’𑀦𑁆𑀢𑀺 𑀧𑀤𑀲𑁆𑀲 𑀢𑀼𑀮𑁆𑀬𑀦𑀺𑀲𑁆𑀲𑀺𑀢𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀭𑀸𑀚𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀭𑀸𑀚𑀽𑀳𑀺 𑀧𑀝𑀺𑀲𑀁𑀬𑀼𑀢𑁆𑀢𑀁.

𑁫𑁧𑁨. 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀺𑀁 𑀕𑀸𑀫𑁂𑀢𑀺 𑀢𑀲𑁆𑀫𑀺𑀁 𑀧𑀞𑀫𑀧𑀯𑀺𑀲𑀦𑀕𑀸𑀫𑁂. 𑀢𑀁 𑀓𑀫𑁆𑀫𑀦𑁆𑀢𑀺 𑀢𑀁 𑀇𑀘𑁆𑀙𑀺𑀢𑀓𑀫𑁆𑀫𑀁. 𑀅𑀦𑁆𑀢𑀭𑀸𑀢𑀺 𑀕𑀸𑀫𑀯𑀺𑀳𑀸𑀭𑀸𑀦𑀫𑀦𑁆𑀢𑀭𑁂. 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀁.

𑀓𑀼𑀮𑀖𑀭𑁂 𑀯𑀸𑀢𑀺 𑀜𑀸𑀢𑀺𑀓𑀼𑀮𑀉𑀧𑀝𑁆𑀞𑀸𑀓𑀓𑀼𑀮𑀖𑀭𑁂 𑀯𑀸. 𑀢𑁂𑀮𑀪𑀺𑀓𑁆𑀔𑀸𑀬 𑀯𑀸𑀢𑀺 𑀢𑁂𑀮𑀬𑀸𑀘𑀦𑀢𑁆𑀣𑀸𑀬 𑀯𑀸. 𑀧𑀲𑁆𑀲𑁂𑀢𑀺 𑀅𑀢𑁆𑀢𑀦𑁄 𑀧𑀲𑁆𑀲𑁂 𑀲𑀫𑀻𑀧𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀢𑀺 𑀕𑀸𑀫𑀫𑀚𑁆𑀛𑀫𑀕𑁆𑀕𑁂𑀦. 𑀅𑀦𑁄𑀓𑁆𑀓𑀫𑁆𑀫𑀸𑀢𑀺 𑀅𑀦𑁄𑀓𑁆𑀓𑀫𑀺𑀢𑁆𑀯𑀸, 𑀅𑀧𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄𑀢𑀺. 𑀢𑀢𑀺𑀬𑀁.