𑁯. 𑀭𑀢𑀦𑀯𑀕𑁆𑀕𑁄

𑁧. 𑀅𑀦𑁆𑀢𑁂𑀧𑀼𑀭𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑁪𑁯𑁪. 𑀭𑀸𑀚𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀭𑀺𑀢𑁆𑀢𑀓𑁄𑀢𑀺 𑀕𑀼𑀡𑁂𑀦 𑀔𑀼𑀤𑁆𑀤𑀓𑁄. 𑀧𑀸𑀲𑀸𑀤𑀯𑀭𑀲𑀤𑁆𑀤𑀲𑁆𑀲 𑀉𑀧𑀭𑀺𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀸𑀲𑀸𑀤𑀯𑀭𑀲𑁆𑀲 𑀉𑀧𑀭𑀺 𑀕𑀢𑁄’’𑀢𑀺. 𑀇𑀫𑀺𑀦𑀸 𑀧𑀸𑀲𑀸𑀤𑀯𑀭𑀲𑁆𑀲 𑀉𑀧𑀭𑀺 𑀉𑀧𑀭𑀺𑀧𑀸𑀲𑀸𑀤𑀯𑀭𑀁, 𑀢𑀁 𑀕𑀢𑁄 𑀉𑀧𑀕𑀢𑁄𑀢𑀺 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀬𑁆𑀬𑀸𑀦𑀦𑁆𑀢𑀺 𑀪𑀺𑀓𑁆𑀔𑀽𑀦𑀁. ‘‘𑀓𑀸𑀭𑀡𑀸’’𑀢𑀺 𑀇𑀫𑀺𑀦𑀸 ‘‘𑀯𑀸𑀳𑀲𑀸’’𑀢𑀺 𑀧𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑁂𑀳𑀻𑀢𑀺 𑀅𑀬𑁆𑀬𑁂𑀳𑀺.

𑁪𑁯𑁭. 𑀅𑀦𑁆𑀢𑀭𑀦𑁆𑀢𑀺 𑀔𑀡𑀁, 𑀑𑀓𑀸𑀲𑀁 𑀯𑀸 𑀯𑀺𑀯𑀭𑀁 𑀯𑀸. 𑀖𑀸𑀢𑁂𑀢𑀼𑀦𑁆𑀢𑀺 𑀳𑀦𑀺𑀢𑀼𑀁. 𑀇𑀘𑁆𑀙𑀢𑀻𑀢𑀺 𑀇𑀫𑀺𑀦𑀸 𑀧𑀢𑁆𑀣𑀥𑀸𑀢𑀼𑀬𑀸 𑀬𑀸𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀭𑀸𑀚𑀦𑁆𑀢𑁂𑀧𑀼𑀭𑀁 𑀳𑀢𑁆𑀣𑀺𑀲𑀫𑁆𑀫𑀤𑁆𑀤’’𑀦𑁆𑀢𑀺𑀆𑀤𑀻𑀲𑀼 𑀯𑀘𑀦𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀳𑀢𑁆𑀣𑀺𑀲𑀫𑁆𑀫𑀤𑁆𑀤𑀦𑁆𑀢𑀺 𑀳𑀢𑁆𑀣𑀺𑀲𑀫𑁆𑀩𑀸𑀥𑀝𑁆𑀞𑀸𑀦𑀁. 𑀅𑀲𑁆𑀲𑁂𑀳𑀺 𑀲𑀫𑁆𑀫𑀤𑁆𑀤𑁄 𑀏𑀢𑁆𑀣𑀸𑀢𑀺 𑀅𑀲𑁆𑀲𑀲𑀫𑁆𑀫𑀤𑁆𑀤𑁄. 𑀭𑀣𑁂𑀳𑀺 𑀲𑀫𑁆𑀫𑀤𑁆𑀤𑁄 𑀏𑀢𑁆𑀣𑀸𑀢𑀺 𑀭𑀣𑀲𑀫𑁆𑀫𑀤𑁆𑀤𑁄𑀢𑀺 𑀯𑀘𑀦𑀢𑁆𑀣𑀁 𑀅𑀢𑀺𑀤𑀺𑀲𑀦𑁆𑀢𑁄 𑀆𑀳 ‘‘𑀏𑀲𑁂𑀯 𑀦𑀬𑁄’’𑀢𑀺. ‘‘𑀲𑀫𑁆𑀫𑀢𑁆𑀢’’𑀦𑁆𑀢𑀺 𑀧𑀞𑀫𑀓𑁆𑀔𑀭𑁂𑀦 𑀧𑀸𑀞𑀲𑁆𑀲 𑀲𑀫𑁆𑀩𑀸𑀥𑀲𑁆𑀲 𑀅𑀯𑀸𑀘𑀓𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑀁 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀧𑀸𑀞𑁂. ‘‘𑀳𑀢𑁆𑀣𑀻𑀦𑀁 𑀲𑀫𑁆𑀫𑀤𑁆𑀤’’𑀦𑁆𑀢𑀺 𑀇𑀫𑀺𑀦𑀸 𑀉𑀢𑁆𑀢𑀭𑀧𑀤𑀲𑁆𑀲 𑀲𑀫𑁆𑀫𑀤𑁆𑀤𑀦𑀁 𑀲𑀫𑁆𑀫𑀤𑁆𑀤𑀦𑁆𑀢𑀺 𑀪𑀸𑀯𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀧𑀼𑀭𑀺𑀫𑀧𑀤𑁂𑀦 𑀙𑀝𑁆𑀞𑀻𑀲𑀫𑀸𑀲𑀜𑁆𑀘. 𑀧𑀼𑀭𑀺𑀫𑀧𑀸𑀞𑁂 𑀧𑀦 𑀉𑀢𑁆𑀢𑀭𑀧𑀤𑀲𑁆𑀲 𑀅𑀥𑀺𑀓𑀭𑀡𑀢𑁆𑀣𑀜𑁆𑀘 𑀧𑀼𑀩𑁆𑀩𑀧𑀤𑁂𑀦 𑀢𑀢𑀺𑀬𑀸𑀲𑀫𑀸𑀲𑀜𑁆𑀘 𑀤𑀲𑁆𑀲𑁂𑀢𑀺. 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀙𑀺𑀫𑀧𑀸𑀞𑁂 ‘‘𑀳𑀢𑁆𑀣𑀺𑀲𑀫𑁆𑀫𑀤𑁆𑀤’’𑀦𑁆𑀢𑀺𑀆𑀤𑀺𑀧𑀤𑀲𑁆𑀲 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀜𑁆𑀘 ‘‘𑀅𑀢𑁆𑀣𑀻’’𑀢𑀺 𑀧𑀸𑀞𑀲𑁂𑀲𑁂𑀦 𑀬𑁄𑀚𑁂𑀢𑀩𑁆𑀩𑀢𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀳𑀢𑁆𑀣𑀺𑀲𑀫𑁆𑀫𑀤𑁆𑀤𑁄 𑀅𑀢𑁆𑀣𑀻’’𑀢𑀺. 𑀭𑀚𑀺𑀢𑀩𑁆𑀩𑀸𑀦𑀻𑀢𑀺 𑀭𑀚𑀦𑀻𑀬𑀸𑀦𑀺, 𑀭𑀚𑀺𑀢𑀼𑀁 𑀅𑀭𑀳𑀸𑀦𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀓𑀸𑀮𑁂 𑀧𑀼𑀭𑀺𑀫𑀧𑀸𑀞𑁂 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑁂𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀓𑀸𑀢𑀩𑁆𑀩𑁄𑀢𑀺. 𑀧𑀘𑁆𑀙𑀺𑀫𑀧𑀸𑀞𑁂 𑀧𑀦 𑀫𑀼𑀔𑁆𑀬𑀢𑁄𑀯 𑀬𑀼𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀁 𑀅𑀦𑁆𑀢𑁂𑀧𑀼𑀭𑁂’’𑀢𑀺.

𑁪𑁯𑁮. 𑀅𑀯𑀲𑀺𑀢𑁆𑀢𑀲𑁆𑀲𑀸𑀢𑀺 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀢𑁆𑀢𑀲𑁆𑀲. 𑀇𑀢𑁄𑀢𑀺 𑀲𑀬𑀦𑀺𑀖𑀭𑀢𑁄. 𑀇𑀫𑀺𑀦𑀸 𑀧𑀜𑁆𑀘𑀫𑀻𑀩𑀸𑀳𑀺𑀭𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀭𑀜𑁆𑀜𑁄 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁 𑀯𑀼𑀘𑁆𑀘𑀢𑀺 𑀫𑀳𑁂𑀲𑀻. 𑀫𑀳𑁂𑀲𑀻𑀢𑀺 𑀘 𑀲𑀸𑀪𑀺𑀲𑁂𑀓𑀸 𑀤𑁂𑀯𑀻. 𑀦𑀺𑀧𑀼𑀩𑁆𑀩 𑀕𑀫𑀼𑀥𑀸𑀢𑀼𑀲𑁆𑀲 𑀦𑀺𑀧𑀼𑀩𑁆𑀩𑀓𑀫𑀼𑀥𑀸𑀢𑀼𑀬𑀸 𑀧𑀭𑀺𑀬𑀸𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀦𑀺𑀕𑁆𑀕𑀢𑀦𑁆𑀢𑀺 𑀦𑀺𑀓𑁆𑀔𑀦𑁆𑀢’’𑀦𑁆𑀢𑀺. 𑀧𑀞𑀫𑀁.

𑁨. 𑀭𑀢𑀦𑀲𑀺𑀓𑁆𑀔𑀸𑀧𑀤𑀁

𑁫𑁦𑁨. 𑀤𑀼𑀢𑀺𑀬𑁂 𑀧𑀫𑀼𑀲𑁆𑀲𑀺𑀢𑁆𑀯𑀸𑀢𑀺 𑀲𑀢𑀺𑀯𑀺𑀧𑁆𑀧𑀯𑀸𑀲𑁂𑀦 𑀧𑀫𑀼𑀲𑁆𑀲𑀺𑀢𑁆𑀯𑀸. 𑀧𑀼𑀡𑁆𑀡𑀧𑀢𑁆𑀢𑀦𑁆𑀢𑀺 𑀢𑀼𑀝𑁆𑀞𑀺𑀤𑀸𑀬𑀁. 𑀢𑀜𑁆𑀳𑀺 𑀫𑀦𑁄𑀭𑀣𑀧𑀼𑀡𑁆𑀡𑁂𑀦 𑀧𑀢𑁆𑀢𑀩𑁆𑀩𑀪𑀸𑀕𑀢𑁆𑀢𑀸 ‘‘𑀧𑀼𑀡𑁆𑀡𑀧𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀢𑀢𑁄 𑀧𑀜𑁆𑀘 𑀓𑀳𑀸𑀧𑀡𑀸’’𑀢𑀺. 𑀇𑀥 𑀧𑀦 𑀓𑀳𑀸𑀧𑀡𑀸𑀦𑀁 𑀧𑀜𑁆𑀘𑀲𑀢𑀢𑁆𑀢𑀸 𑀧𑀜𑁆𑀘𑀯𑀻𑀲𑀓𑀳𑀸𑀧𑀡𑀸 𑀅𑀥𑀺𑀧𑁆𑀧𑁂𑀢𑀸. 𑀆𑀪𑀭𑀡𑀲𑀤𑁆𑀤𑀲𑁆𑀲 𑀅𑀮𑀗𑁆𑀓𑀸𑀭𑀲𑀤𑁆𑀤𑁂𑀦 𑀧𑀭𑀺𑀬𑀸𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀮𑀗𑁆𑀓𑀸𑀭’’𑀦𑁆𑀢𑀺. ‘‘𑀫𑀳𑀸𑀮𑀢𑀁 𑀦𑀸𑀫𑀸’’𑀢𑀺 𑀇𑀫𑀺𑀦𑀸 𑀦 𑀬𑁄 𑀯𑀸 𑀲𑁄 𑀯𑀸 𑀅𑀮𑀗𑁆𑀓𑀸𑀭𑁄, 𑀅𑀣 𑀔𑁄 𑀯𑀺𑀲𑁂𑀲𑀸𑀮𑀗𑁆𑀓𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀫𑀳𑀦𑁆𑀢𑀸𑀦𑀺 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀦𑀺 𑀏𑀢𑁆𑀣𑀸𑀢𑀺 𑀫𑀳𑀸𑀮𑀢𑀸. 𑀮𑀢𑀸𑀕𑀳𑀡𑁂𑀦 𑀳𑀺 𑀫𑀸𑀮𑀸𑀧𑀺 𑀕𑀳𑀺𑀢𑀸. 𑀦𑀯𑀳𑀺 𑀓𑁄𑀝𑀻𑀳𑀺 𑀅𑀕𑁆𑀖𑀁 𑀇𑀫𑀲𑁆𑀲𑀸𑀢𑀺 𑀦𑀯𑀓𑁄𑀝𑀺𑀅𑀕𑁆𑀖𑀦𑀓𑀁, 𑀦𑀯𑀓𑁄𑀝𑀺𑀲𑀗𑁆𑀔𑀸𑀢𑀁 𑀅𑀕𑁆𑀖𑀁 𑀅𑀭𑀳𑀢𑀻𑀢𑀺 𑀯𑀸 𑀦𑀯𑀓𑁄𑀝𑀺𑀅𑀕𑁆𑀖𑀦𑀓𑀁.

𑁫𑁦𑁪. 𑀅𑀦𑁆𑀢𑁂 𑀲𑀫𑀻𑀧𑁂 𑀯𑀲𑀦𑀲𑀻𑀮𑀢𑁆𑀢𑀸 𑀧𑀭𑀺𑀘𑀸𑀭𑀺𑀓𑁄 ‘‘𑀅𑀦𑁆𑀢𑁂𑀯𑀸𑀲𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀧𑀭𑀺𑀘𑀸𑀭𑀺𑀓𑁄’’𑀢𑀺.

𑁫𑁦𑁬. 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑀸𑀢𑀺 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑀸. 𑀲𑀗𑁆𑀖…𑀧𑁂… 𑀦𑀯𑀓𑀫𑁆𑀫𑀸𑀦𑀁 𑀅𑀢𑁆𑀣𑀸𑀬 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀯𑀸 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑀲𑁆𑀲 𑀯𑀸 𑀤𑀼𑀓𑁆𑀓𑀝𑀦𑁆𑀢𑀺 𑀬𑁄𑀚𑀦𑀸. 𑀅𑀯𑀲𑁂𑀲𑀦𑁆𑀢𑀺 𑀚𑀸𑀢𑀭𑀽𑀧𑀭𑀚𑀢𑀢𑁄 𑀅𑀯𑀲𑁂𑀲𑀁. 𑀫𑀸𑀢𑀼𑀓𑀡𑁆𑀡𑀧𑀺𑀴𑀦𑁆𑀥𑀦𑀢𑀸𑀮𑀧𑀡𑁆𑀡𑀫𑁆𑀧𑀻𑀢𑀺 𑀫𑀸𑀢𑀼𑀬𑀸 𑀓𑀡𑁆𑀡𑁂 𑀧𑀺𑀴𑀦𑁆𑀥𑀺𑀢𑀢𑀸𑀮𑀧𑀡𑁆𑀡𑀫𑁆𑀧𑀺, 𑀧𑀝𑀺𑀲𑀸𑀫𑁂𑀦𑁆𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀓𑀧𑁆𑀧𑀺𑀬𑀪𑀡𑁆𑀟𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀅𑀓𑀧𑁆𑀧𑀺𑀬𑀪𑀡𑁆𑀟𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀦𑁆𑀢𑀺 𑀪𑀡𑁆𑀟𑀁. 𑀧𑀮𑀺𑀩𑁄𑀥𑁄 𑀦𑀸𑀫𑀸𑀢𑀺 𑀅𑀢𑁆𑀢𑀦𑁄 𑀧𑀮𑀺𑀩𑁄𑀥𑁄 𑀦𑀸𑀫. 𑀙𑀦𑁆𑀤𑁂𑀦𑀧𑀻𑀢𑀺 𑀯𑀟𑁆𑀠𑀓𑀻𑀆𑀤𑀻𑀦𑀁 𑀙𑀦𑁆𑀤𑀳𑁂𑀢𑀼𑀦𑀸𑀧𑀺. 𑀪𑀬𑁂𑀦𑀧𑀻𑀢𑀺 𑀭𑀸𑀚𑀯𑀮𑁆𑀮𑀪𑀸𑀦𑀁 𑀪𑀬𑀳𑁂𑀢𑀼𑀦𑀸𑀧𑀺. 𑀩𑀮𑀓𑁆𑀓𑀸𑀭𑁂𑀦𑀸𑀢𑀺 𑀓𑀭𑀡𑀁 𑀓𑀸𑀭𑁄, 𑀩𑀮𑁂𑀦 𑀓𑀸𑀭𑁄 𑀩𑀮𑀓𑁆𑀓𑀸𑀭𑁄, 𑀢𑁂𑀦, 𑀩𑀮𑀓𑁆𑀓𑀸𑀭𑁄 𑀳𑀼𑀢𑁆𑀯𑀸 𑀧𑀸𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺 𑀫𑀳𑀸𑀭𑀸𑀫𑁂. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂, 𑀲𑀗𑁆𑀓𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀸𑀚𑀦𑀲𑀜𑁆𑀘𑀭𑀡𑀝𑁆𑀞𑀸𑀦𑁂𑀲𑀽𑀢𑀺 𑀩𑀳𑀽𑀦𑀁 𑀚𑀦𑀸𑀦𑀁 𑀲𑀜𑁆𑀘𑀭𑀡𑀲𑀗𑁆𑀔𑀸𑀢𑁂𑀲𑀼 𑀞𑀸𑀦𑁂𑀲𑀼. 𑀦𑀕𑀳𑁂𑀢𑀩𑁆𑀩𑀲𑁆𑀲 𑀳𑁂𑀢𑀼𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀮𑀺𑀩𑁄𑀥𑁄 𑀦 𑀳𑁄𑀢𑀻’’𑀢𑀺. 𑀬𑀲𑁆𑀫𑀸 𑀧𑀮𑀺𑀩𑁄𑀥𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀓𑁄𑀢𑀺 𑀏𑀓𑁄 𑀪𑀺𑀓𑁆𑀔𑀼 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀑𑀓𑁆𑀓𑀫𑁆𑀫𑀸𑀢𑀺 𑀑𑀓𑁆𑀓𑀫𑀺𑀢𑁆𑀯𑀸.

𑀭𑀽𑀧𑀲𑀤𑁆𑀤𑁄 𑀪𑀡𑁆𑀟𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀪𑀡𑁆𑀟’’𑀦𑁆𑀢𑀺. 𑀪𑀡𑁆𑀟𑀁 𑀭𑀽𑀧𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀪𑀡𑁆𑀟𑀺𑀓𑀦𑁆𑀢𑀺 𑀪𑀡𑁆𑀟𑁂𑀦 𑀦𑀺𑀬𑀼𑀢𑁆𑀢𑀁 𑀧𑀼𑀝𑀓𑀁. 𑀕𑀡𑁂𑀢𑁆𑀯𑀸𑀢𑀺 𑀕𑀡𑀦𑀁 𑀓𑀢𑁆𑀯𑀸. 𑀦𑀺𑀫𑀺𑀢𑁆𑀢𑀦𑁆𑀢𑀻𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀦𑀸𑀫𑀧𑀭𑀺𑀬𑀸𑀬𑁄. 𑀮𑀜𑁆𑀙𑀦𑀸𑀤𑀺 𑀦𑀺𑀫𑀺𑀢𑁆𑀢𑀁 𑀦𑀸𑀫𑀸𑀢𑀺 𑀳𑀺 𑀬𑁄𑀚𑀦𑀸. 𑀮𑀜𑁆𑀙𑀦𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀦𑀻𑀮𑀧𑀺𑀮𑁄𑀢𑀺𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀮𑀸𑀔𑀸𑀬𑀸𑀢𑀺 𑀚𑀢𑀼𑀦𑀸.

𑀧𑀢𑀺𑀭𑀽𑀧𑀸 𑀦𑀸𑀫 𑀇𑀥 𑀮𑀚𑁆𑀚𑀺𑀓𑀼𑀓𑁆𑀓𑀼𑀘𑁆𑀘𑀓𑀸𑀢𑀺 𑀆𑀳 ‘‘𑀮𑀚𑁆𑀚𑀺𑀦𑁄 𑀓𑀼𑀓𑁆𑀓𑀼𑀘𑁆𑀘𑀓𑀸’’𑀢𑀺. 𑀣𑀸𑀯𑀭𑀦𑁆𑀢𑀺 𑀚𑀗𑁆𑀕𑀫𑀸 𑀅𑀜𑁆𑀜𑀁 𑀣𑀸𑀯𑀭𑀁. 𑀅𑀤𑁆𑀥𑀼𑀦𑁄𑀢𑀺 𑀓𑀸𑀮𑀲𑁆𑀲. 𑀲𑀫𑀸𑀤𑀧𑁂𑀢𑁆𑀯𑀸𑀢𑀺 𑀅𑀜𑁆𑀜𑁂 𑀲𑀫𑀸𑀤𑀧𑁂𑀢𑁆𑀯𑀸. 𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸’’𑀢𑀺 (𑀚𑀸. 𑁧.𑁭.𑁫𑁯) 𑀯𑀼𑀢𑁆𑀢𑀦𑀬𑁂𑀦 𑀬𑀸𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁫𑁦𑁭. 𑀭𑀢𑀦𑀲𑀫𑁆𑀫𑀢𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑀺𑀲𑀦𑀲𑀺𑀓𑁆𑀔𑀸𑀧𑀤𑀁

𑁫𑁦𑁮. 𑀢𑀢𑀺𑀬𑁂 ‘‘𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀓𑀣’’𑀦𑁆𑀢𑀺 𑀇𑀫𑀺𑀦𑀸 ‘‘𑀢𑀺𑀭𑀘𑁆𑀙𑀸𑀦𑀓𑀣’’𑀦𑁆𑀢𑀺 𑀧𑀤𑀲𑁆𑀲 𑀢𑀼𑀮𑁆𑀬𑀦𑀺𑀲𑁆𑀲𑀺𑀢𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀭𑀸𑀚𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀭𑀸𑀚𑀽𑀳𑀺 𑀧𑀝𑀺𑀲𑀁𑀬𑀼𑀢𑁆𑀢𑀁.

𑁫𑁧𑁨. 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀺𑀁 𑀕𑀸𑀫𑁂𑀢𑀺 𑀢𑀲𑁆𑀫𑀺𑀁 𑀧𑀞𑀫𑀧𑀯𑀺𑀲𑀦𑀕𑀸𑀫𑁂. 𑀢𑀁 𑀓𑀫𑁆𑀫𑀦𑁆𑀢𑀺 𑀢𑀁 𑀇𑀘𑁆𑀙𑀺𑀢𑀓𑀫𑁆𑀫𑀁. 𑀅𑀦𑁆𑀢𑀭𑀸𑀢𑀺 𑀕𑀸𑀫𑀯𑀺𑀳𑀸𑀭𑀸𑀦𑀫𑀦𑁆𑀢𑀭𑁂. 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀁.

𑀓𑀼𑀮𑀖𑀭𑁂 𑀯𑀸𑀢𑀺 𑀜𑀸𑀢𑀺𑀓𑀼𑀮𑀉𑀧𑀝𑁆𑀞𑀸𑀓𑀓𑀼𑀮𑀖𑀭𑁂 𑀯𑀸. 𑀢𑁂𑀮𑀪𑀺𑀓𑁆𑀔𑀸𑀬 𑀯𑀸𑀢𑀺 𑀢𑁂𑀮𑀬𑀸𑀘𑀦𑀢𑁆𑀣𑀸𑀬 𑀯𑀸. 𑀧𑀲𑁆𑀲𑁂𑀢𑀺 𑀅𑀢𑁆𑀢𑀦𑁄 𑀧𑀲𑁆𑀲𑁂 𑀲𑀫𑀻𑀧𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀢𑀺 𑀕𑀸𑀫𑀫𑀚𑁆𑀛𑀫𑀕𑁆𑀕𑁂𑀦. 𑀅𑀦𑁄𑀓𑁆𑀓𑀫𑁆𑀫𑀸𑀢𑀺 𑀅𑀦𑁄𑀓𑁆𑀓𑀫𑀺𑀢𑁆𑀯𑀸, 𑀅𑀧𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄𑀢𑀺. 𑀢𑀢𑀺𑀬𑀁.

𑁪. 𑀲𑀽𑀘𑀺𑀖𑀭𑀲𑀺𑀓𑁆𑀔𑀸𑀧𑀤𑀁

𑁫𑁧𑁭. 𑀘𑀢𑀼𑀢𑁆𑀣𑁂 𑀓𑀓𑀸𑀭𑀲𑁆𑀲 𑀧𑀤𑀧𑀽𑀭𑀡𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀪𑁂𑀤𑀦𑀫𑁂𑀯 𑀪𑁂𑀤𑀦𑀓’’𑀦𑁆𑀢𑀺. 𑀅𑀲𑁆𑀲𑀢𑁆𑀣𑀺𑀅𑀢𑁆𑀣𑁂 𑀅𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀢𑀁 𑀅𑀲𑁆𑀲 𑀅𑀢𑁆𑀣𑀻’’𑀢𑀺. 𑀅𑀲𑁆𑀲𑀸𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀧𑀞𑀫𑀁 𑀲𑀽𑀘𑀺𑀖𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀸 𑀧𑀸𑀘𑀺𑀢𑁆𑀢𑀺𑀬𑀁 𑀤𑁂𑀲𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀭𑀡𑀺𑀥𑀦𑀼𑀓𑁂𑀢𑀺 𑀅𑀭𑀡𑀺𑀬𑀸 𑀥𑀦𑀼𑀓𑁂. 𑀯𑁂𑀥𑀓𑁂𑀢𑀺 𑀓𑀸𑀬𑀩𑀦𑁆𑀥𑀦𑀯𑁂𑀥𑀓𑁂𑀢𑀺. 𑀘𑀢𑀼𑀢𑁆𑀣𑀁.

𑁫. 𑀫𑀜𑁆𑀘𑀲𑀺𑀓𑁆𑀔𑀸𑀧𑀤𑀁

𑁫𑁨𑁨. 𑀧𑀜𑁆𑀘𑀫𑁂 𑀙𑁂𑀤𑀦𑀫𑁂𑀯 𑀙𑁂𑀤𑀦𑀓𑀁, 𑀢𑀫𑀲𑁆𑀲𑀢𑁆𑀣𑀻𑀢𑀺 𑀙𑁂𑀤𑀦𑀓𑀦𑁆𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺.

𑀦𑀺𑀔𑀡𑀺𑀢𑁆𑀯𑀸𑀢𑀺 𑀧𑀫𑀸𑀡𑀸𑀢𑀺𑀭𑁂𑀓𑀁 𑀦𑀺𑀔𑀡𑀺𑀢𑁆𑀯𑀸. 𑀉𑀢𑁆𑀢𑀸𑀦𑀁 𑀯𑀸 𑀓𑀢𑁆𑀯𑀸𑀢𑀺 𑀳𑁂𑀝𑁆𑀞𑀼𑀧𑀭𑀺 𑀧𑀭𑀺𑀯𑀢𑁆𑀢𑀦𑀁 𑀯𑀸 𑀓𑀢𑁆𑀯𑀸. 𑀞𑀧𑁂𑀢𑁆𑀯𑀸𑀢𑀺 𑀮𑀫𑁆𑀩𑀡𑀯𑀲𑁂𑀦 𑀞𑀧𑁂𑀢𑁆𑀯𑀸𑀢𑀺. 𑀧𑀜𑁆𑀘𑀫𑀁.

𑁬. 𑀢𑀽𑀮𑁄𑀦𑀤𑁆𑀥𑀲𑀺𑀓𑁆𑀔𑀸𑀧𑀤𑀁

𑁫𑁨𑁬. 𑀙𑀝𑁆𑀞𑁂 𑀏𑀢𑁆𑀣𑀸𑀢𑀺 𑀫𑀜𑁆𑀘𑀧𑀻𑀞𑁂. 𑀅𑀯𑀦𑀳𑀺𑀢𑀩𑁆𑀩𑀦𑁆𑀢𑀺 𑀑𑀦𑀤𑁆𑀥𑀁, 𑀢𑀽𑀮𑁂𑀦 𑀑𑀦𑀤𑁆𑀥𑀁 𑀢𑀽𑀮𑁄𑀦𑀤𑁆𑀥𑀦𑁆𑀢𑀺 𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑀺. 𑀢𑀽𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀫𑀜𑁆𑀘𑀧𑀻𑀞𑁂 𑀘𑀺𑀫𑀺𑀮𑀺𑀓𑀁 𑀧𑀢𑁆𑀣𑀭𑀺𑀢𑁆𑀯𑀸 𑀢𑀲𑁆𑀲𑀼𑀧𑀭𑀺 𑀢𑀽𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄𑀢𑀺. 𑀙𑀝𑁆𑀞𑀁.

𑁭. 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑀁

𑁫𑁩𑁧. 𑀲𑀢𑁆𑀢𑀫𑁂 𑀓𑀢𑁆𑀣𑀸𑀢𑀺 𑀓𑀺𑀲𑁆𑀫𑀺𑀁 𑀔𑀦𑁆𑀥𑀓𑁂, 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀯𑀸. 𑀳𑀻𑀢𑀺 𑀲𑀘𑁆𑀘𑀁. 𑀢𑀢𑁆𑀣𑀸𑀢𑀺 𑀘𑀻𑀯𑀭𑀓𑁆𑀔𑀦𑁆𑀥𑀓𑁂, 𑀧𑀡𑀻𑀢𑀪𑁄𑀚𑀦𑀯𑀢𑁆𑀣𑀼𑀲𑁆𑀫𑀺𑀁 𑀯𑀸. ‘‘𑀬𑀣𑀸 𑀦𑀸𑀫𑀸’’𑀢𑀺 𑀇𑀫𑀺𑀦𑀸 ‘‘𑀲𑁂𑀬𑁆𑀬𑀣𑀸𑀧𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀧𑀼𑀭𑀸𑀡𑁄 𑀘𑀫𑁆𑀫𑀓𑀸𑀭𑁄’’𑀢𑀺 𑀇𑀫𑀺𑀦𑀸 ‘‘𑀧𑀼𑀭𑀸𑀡𑀸𑀲𑀺𑀓𑁄𑀝𑁆𑀞𑁄’’𑀢𑀺 𑀧𑀤𑀲𑁆𑀲. 𑀘𑀫𑁆𑀫𑀓𑀸𑀭𑁄 𑀳𑀺 𑀅𑀲𑀺𑀦𑀸 𑀘𑀫𑁆𑀫𑀁 𑀓𑀼𑀝𑀢𑀺 𑀙𑀺𑀦𑁆𑀤𑀢𑀻𑀢𑀺 ‘‘𑀅𑀲𑀺𑀓𑁄𑀝𑁆𑀞𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑀢𑁆𑀣𑀼𑀧𑁆𑀧𑀦𑁆𑀦𑀓𑀸𑀮𑀫𑀼𑀧𑀦𑀺𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀼𑀭𑀸𑀡𑁄’’𑀢𑀺. 𑀢𑀫𑁂𑀯𑀽𑀧𑀫𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀬𑀣𑀸 𑀳𑀻’’𑀢𑀺. 𑀳𑀻𑀢𑀺 𑀢𑀧𑁆𑀧𑀸𑀓𑀝𑀻𑀓𑀭𑀡𑀁, 𑀢𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀳𑀺 𑀅𑀢𑁆𑀣𑁄. 𑀘𑀫𑁆𑀫𑀓𑀸𑀭𑁄 𑀓𑀟𑁆𑀠𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀢𑁆𑀣𑀢𑀦𑁆𑀢𑀺 𑀯𑀺𑀲𑀸𑀮𑀁. 𑀲𑁄𑀧𑀻𑀢𑀺 𑀉𑀤𑀸𑀬𑀻𑀧𑀺. 𑀢𑀁 𑀦𑀺𑀲𑀻𑀤𑀦𑀁 𑀓𑀟𑁆𑀠𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀢𑀺 𑀓𑀟𑁆𑀠𑀦𑀳𑁂𑀢𑀼𑀦𑀸. 𑀢𑀦𑁆𑀢𑀺 𑀉𑀤𑀸𑀬𑀺𑀁. 𑀲𑀦𑁆𑀣𑀢𑀲𑀤𑀺𑀲𑀦𑁆𑀢𑀺 𑀲𑀦𑁆𑀣𑀢𑁂𑀦 𑀲𑀤𑀺𑀲𑀁. 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂𑀢𑀺 𑀏𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂, 𑀨𑀸𑀮𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄𑀢𑀺. 𑀲𑀢𑁆𑀢𑀫𑀁.

𑁮. 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺𑀲𑀺𑀓𑁆𑀔𑀸𑀧𑀤𑀁

𑁫𑁩𑁭. 𑀅𑀝𑁆𑀞𑀫𑁂 ‘‘𑀓𑀢𑁆𑀣𑀸’’𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯.

𑁫𑁩𑁯. ‘‘𑀬𑀲𑁆𑀲𑀸’’𑀢𑀺 𑀧𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀦𑁄’’𑀢𑀺. ‘‘𑀦𑀸𑀪𑀺𑀬𑀸 𑀳𑁂𑀝𑁆𑀞𑀸’’𑀢𑀺 𑀇𑀫𑀺𑀦𑀸 𑀦𑀸𑀪𑀺𑀬𑀸 𑀅𑀥𑁄 𑀅𑀥𑁄𑀦𑀸𑀪𑀻𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀚𑀸𑀡𑀼𑀫𑀡𑁆𑀟𑀮𑀸𑀦𑀁 𑀉𑀧𑀭𑀻’’𑀢𑀺 𑀇𑀫𑀺𑀦𑀸 𑀚𑀸𑀡𑀼𑀫𑀡𑁆𑀟𑀮𑀸𑀦𑀁 𑀉𑀩𑁆𑀪 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀦𑁆𑀢𑀺. 𑀉𑀩𑁆𑀪𑀲𑀤𑁆𑀤𑁄 𑀳𑀺 𑀉𑀧𑀭𑀺𑀧𑀭𑀺𑀬𑀸𑀬𑁄 𑀲𑀢𑁆𑀢𑀫𑁆𑀬𑀦𑁆𑀢𑀦𑀺𑀧𑀸𑀢𑁄. 𑀓𑀡𑁆𑀟𑀼𑀔𑀚𑁆𑀚𑀼𑀲𑀤𑁆𑀤𑀸𑀦𑀁 𑀯𑁂𑀯𑀘𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀓𑀡𑁆𑀟𑀽𑀢𑀺 𑀔𑀚𑁆𑀚𑀽’’𑀢𑀺. 𑀓𑀡𑁆𑀟𑀢𑀺 𑀪𑁂𑀤𑀦𑀁 𑀓𑀭𑁄𑀢𑀻𑀢𑀺 𑀓𑀡𑁆𑀟𑀼. 𑀔𑀚𑁆𑀚𑀢𑀺 𑀩𑁆𑀬𑀥𑀦𑀁 𑀓𑀭𑁄𑀢𑀻𑀢𑀺 𑀔𑀚𑁆𑀚𑀼. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀓𑀘𑁆𑀙𑀽’’𑀢𑀺 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀅𑀬𑀼𑀢𑁆𑀢𑁄.

𑀮𑁄𑀳𑀺𑀢𑀁 𑀢𑀼𑀡𑁆𑀟𑀁 𑀏𑀢𑀺𑀲𑁆𑀲𑀸𑀢𑀺 𑀮𑁄𑀳𑀺𑀢𑀢𑀼𑀡𑁆𑀟𑀺𑀓𑀸. 𑀧𑀺𑀴𑀬𑀢𑀺 𑀯𑀺𑀩𑀸𑀥𑀬𑀢𑀻𑀢𑀺 𑀧𑀺𑀴𑀓𑀸. 𑀆 𑀪𑀼𑀲𑁄 𑀅𑀲𑀼𑀘𑀺𑀁 𑀲𑀯𑀢𑀺 𑀧𑀕𑁆𑀖𑀭𑀸𑀧𑁂𑀢𑀻𑀢𑀺 𑀅𑀲𑁆𑀲𑀸𑀯𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀲𑀼𑀘𑀺𑀧𑀕𑁆𑀖𑀭𑀡’’𑀦𑁆𑀢𑀺. 𑀅𑀭𑀺𑀲𑀜𑁆𑀘 𑀪𑀕𑀦𑁆𑀤𑀭𑀸 𑀘 𑀫𑀥𑀼𑀫𑁂𑀳𑁄 𑀘. 𑀆𑀤𑀺𑀲𑀤𑁆𑀤𑁂𑀦 𑀤𑀼𑀦𑁆𑀦𑀸𑀫𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀅𑀭𑀺 𑀯𑀺𑀬 𑀈𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀅𑀭𑀺𑀲𑀁. 𑀪𑀕𑀁 𑀯𑀼𑀘𑁆𑀘𑀢𑀺 𑀯𑀘𑁆𑀘𑀫𑀕𑁆𑀕𑀁, 𑀢𑀁 𑀤𑀭𑀢𑀺 𑀨𑀸𑀮𑁂𑀢𑀻𑀢𑀺 𑀪𑀕𑀦𑁆𑀤𑀭𑀸, 𑀕𑀽𑀣𑀲𑀫𑀻𑀧𑁂 𑀚𑀸𑀢𑁄 𑀯𑀡𑀯𑀺𑀲𑁂𑀲𑁄. 𑀫𑀥𑀼 𑀯𑀺𑀬 𑀫𑀼𑀢𑁆𑀢𑀸𑀤𑀺𑀁 𑀫𑀺𑀳𑀢𑀺 𑀲𑁂𑀘𑀢𑀻𑀢𑀺 𑀫𑀥𑀼𑀫𑁂𑀳𑁄, 𑀲𑁄 𑀆𑀩𑀸𑀥𑁄 𑀫𑀼𑀢𑁆𑀢𑀫𑁂𑀳𑁄 𑀲𑀼𑀓𑁆𑀓𑀫𑁂𑀳𑁄 𑀭𑀢𑁆𑀢𑀫𑁂𑀳𑁄𑀢𑀺 𑀅𑀦𑁂𑀓𑀯𑀺𑀥𑁄. 𑀣𑀼𑀮𑁆𑀮𑀲𑀤𑁆𑀤𑁄 𑀫𑀳𑀦𑁆𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀫𑀳𑀸’’𑀢𑀺. 𑀅𑀝𑁆𑀞𑀫𑀁.

𑁯. 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀁

𑁫𑁪𑁨. 𑀦𑀯𑀫𑁂 𑀯𑀲𑁆𑀲𑁂 𑀯𑀲𑁆𑀲𑀓𑀸𑀮𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀢𑀺 𑀯𑀲𑁆𑀲𑀺𑀓𑀸, 𑀯𑀲𑁆𑀲𑀺𑀓𑀸 𑀘 𑀲𑀸 𑀲𑀸𑀝𑀺𑀓𑀸 𑀘𑁂𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀢𑀺. 𑀦𑀯𑀫𑀁.

𑁧𑁦. 𑀦𑀦𑁆𑀤𑀢𑁆𑀣𑁂𑀭𑀲𑀺𑀓𑁆𑀔𑀸𑀧𑀤𑀁

𑁫𑁪𑁭. 𑀤𑀲𑀫𑁂 ‘‘𑀘𑀢𑀽𑀳𑀺 𑀅𑀗𑁆𑀕𑀼𑀮𑁂𑀳𑀻’’𑀢𑀺 𑀇𑀫𑀺𑀦𑀸 𑀘𑀢𑀼𑀭𑁄 𑀅𑀗𑁆𑀕𑀼𑀮𑀸 𑀘𑀢𑀼𑀭𑀗𑁆𑀕𑀼𑀮𑀸𑀢𑀺 𑀅𑀲𑀫𑀸𑀳𑀸𑀭𑀤𑀺𑀕𑀼𑀁 𑀤𑀲𑁆𑀲𑁂𑀢𑀺. 𑀊𑀦𑀓𑀧𑁆𑀧𑀫𑀸𑀡𑁄𑀢𑀺 𑀪𑀕𑀯𑀢𑁄 𑀮𑀸𑀫𑀓𑀧𑀫𑀸𑀡𑁄. 𑀇𑀫𑀺𑀦𑀸 𑀑𑀫𑀓𑀲𑀤𑁆𑀤𑀲𑁆𑀲 𑀮𑀸𑀫𑀓𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀤𑀲𑀫𑀁.

𑀭𑀢𑀦𑀯𑀕𑁆𑀕𑁄 𑀦𑀯𑀫𑁄.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀔𑀼𑀤𑁆𑀤𑀓𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.