𑁬. 𑀧𑀸𑀝𑀺𑀤𑁂𑀲𑀦𑀻𑀬𑀓𑀡𑁆𑀟𑀁

𑁧. 𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑀔𑀼𑀤𑁆𑀤𑀓𑀸𑀦𑀁 𑀅𑀦𑀦𑁆𑀢𑀭𑀸 𑀧𑀸𑀝𑀺𑀤𑁂𑀲𑀦𑀻𑀬𑀸 𑀬𑁂 𑀥𑀫𑁆𑀫𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸, 𑀇𑀤𑀸𑀦𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀬𑀁 𑀯𑀡𑁆𑀡𑀦𑀸 𑀪𑀯𑀢𑀻𑀢𑀺 𑀬𑁄𑀚𑀦𑀸.

𑁫𑁫𑁨. 𑀧𑀞𑀫𑀧𑀸𑀝𑀺𑀤𑁂𑀲𑀦𑀻𑀬𑁂 𑀢𑀸𑀯 𑀅𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀧𑀝𑀺𑀆𑀕𑀫𑀦𑀓𑀸𑀮𑁂𑀢𑀺 𑀧𑀺𑀡𑁆𑀟𑀸𑀬 𑀘𑀭𑀡𑀝𑁆𑀞𑀸𑀦𑀢𑁄 𑀧𑀓𑁆𑀓𑀫𑀺𑀢𑁆𑀯𑀸, 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀸 𑀆𑀕𑀫𑀦𑀓𑀸𑀮𑁂. 𑀲𑀩𑁆𑀩𑁂𑀯𑀸𑀢𑀺 𑀏𑀢𑁆𑀣 𑀦𑀺𑀕𑁆𑀕𑀳𑀻𑀢𑀮𑁄𑀧𑀯𑀲𑁂𑀦 𑀲𑀦𑁆𑀥𑀺 𑀳𑁄𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀫𑁂𑀯𑀸’’𑀢𑀺. ‘‘𑀓𑀫𑁆𑀧𑀫𑀸𑀦𑀸’’𑀢𑀺 𑀇𑀫𑀺𑀦𑀸 𑀧𑀧𑀼𑀩𑁆𑀩𑀯𑀺𑀥𑀥𑀸𑀢𑀼𑀬𑀸 𑀓𑀫𑁆𑀧𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀧𑁂𑀳𑀻𑀢𑀺 𑀏𑀢𑁆𑀣 𑀅𑀧𑀧𑀼𑀩𑁆𑀩𑀇𑀥𑀸𑀢𑀼 𑀕𑀢𑁆𑀬𑀢𑁆𑀣𑁄𑀢𑀺 𑀆𑀳 ‘‘𑀅𑀧𑀕𑀘𑁆𑀙𑀸’’𑀢𑀺.

𑁫𑁫𑁩. 𑀧𑀝𑀺𑀤𑁂𑀲𑁂𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀢𑀺 𑀅𑀦𑁂𑀦𑀸𑀢𑀺 𑀧𑀝𑀺𑀤𑁂𑀲𑁂𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀁. 𑀤𑁆𑀯𑀺𑀦𑁆𑀦𑀁 𑀲𑀤𑁆𑀤𑀸𑀦𑀁 𑀧𑀭𑀺𑀬𑀸𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀭𑀣𑀺𑀓𑀸𑀢𑀺 𑀭𑀘𑁆𑀙𑀸’’𑀢𑀺. 𑀭𑀣𑀲𑁆𑀲 𑀳𑀺𑀢𑀸 𑀭𑀣𑀺𑀓𑀸. 𑀡𑁆𑀬𑀧𑀘𑁆𑀘𑀬𑁂 𑀓𑀢𑁂 ‘‘𑀭𑀘𑁆𑀙𑀸’’𑀢𑀺 (𑀫𑁄𑀕𑁆𑀕𑀮𑁆𑀮𑀸𑀦𑁂 𑁪.𑁭𑁨 𑀲𑀼𑀢𑁆𑀢𑁂) 𑀯𑀼𑀘𑁆𑀘𑀢𑀺. 𑀭𑀘𑁆𑀙𑀦𑁆𑀢𑀭𑁂𑀦 𑀅𑀦𑀺𑀩𑁆𑀩𑀺𑀤𑁆𑀥𑀸 𑀭𑀘𑁆𑀙𑀸 𑀩𑁆𑀬𑀽𑀳𑁄 𑀦𑀸𑀫𑀸𑀢𑀺 𑀆𑀳 ‘‘𑀅𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸’’𑀢𑀺𑀆𑀤𑀺. 𑀩𑁆𑀬𑀽𑀳𑁂𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺 𑀚𑀦𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀫𑀧𑀤𑀸𑀦𑀯𑀲𑁂𑀦𑀸𑀢𑀺 𑀩𑁆𑀬𑀽𑀳𑁄. 𑀲𑀺𑀗𑁆𑀖𑀸𑀝𑀓𑀁 𑀦𑀸𑀫 𑀫𑀕𑁆𑀕𑀲𑀦𑁆𑀥𑀻𑀢𑀺 𑀆𑀳 ‘‘𑀫𑀕𑁆𑀕𑀲𑀫𑁄𑀥𑀸𑀦𑀝𑁆𑀞𑀸𑀦’’𑀦𑁆𑀢𑀺. 𑀲𑀺𑀗𑁆𑀖𑀢𑀺 𑀫𑀕𑁆𑀕𑀲𑀫𑁄𑀥𑀸𑀦𑀁 𑀓𑀭𑁄𑀢𑀺 𑀏𑀢𑁆𑀣𑀸𑀢𑀺 𑀲𑀺𑀗𑁆𑀖𑀸𑀝𑀓𑀁. 𑀏𑀢𑁂𑀲𑀽𑀢𑀺 𑀭𑀣𑀺𑀓𑀸𑀤𑀻𑀲𑀼. 𑀏𑀲𑁂𑀯 𑀦𑀬𑁄𑀢𑀺 𑀤𑀼𑀓𑁆𑀓𑀝𑀧𑀸𑀝𑀺𑀤𑁂𑀲𑀦𑀻𑀬𑁂 𑀅𑀢𑀺𑀤𑀺𑀲𑀢𑀺. 𑀳𑀻𑀢𑀺 𑀲𑀘𑁆𑀘𑀁. ‘‘𑀯𑀘𑀦𑀢𑁄’’𑀢𑀺 𑀧𑀤𑀁 ‘‘𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀧𑀤𑁂 𑀜𑀸𑀧𑀓𑀳𑁂𑀢𑀼. 𑀤𑀤𑀫𑀸𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀲𑁂𑀦𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣𑀸𑀢𑀺 𑀲𑀺𑀓𑁆𑀔𑀸𑀧𑀤𑁂. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀧𑀫𑀸𑀡𑀁, 𑀢𑀲𑁆𑀫𑀸.

𑀇𑀤𑀦𑁆𑀢𑀺 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀪𑀺𑀦𑁆𑀦𑁂 𑀏𑀓𑀭𑀲𑁂 𑀓𑀸𑀮𑀺𑀓𑀢𑁆𑀢𑀬𑁂𑀢𑀺 𑀬𑁄𑀚𑀦𑀸.

𑁫𑁫𑁬. ‘‘𑀤𑀸𑀧𑁂𑀢𑀻’’𑀢𑀺 𑀳𑁂𑀢𑀼𑀢𑁆𑀣𑀓𑀺𑀭𑀺𑀬𑀸𑀬 𑀓𑀸𑀭𑀺𑀢𑀓𑀢𑁆𑀢𑀼𑀓𑀸𑀭𑀺𑀢𑀓𑀫𑁆𑀫𑀸𑀦𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀸𑀢𑀺𑀓𑀸𑀬 𑀅𑀜𑁆𑀜𑁂𑀦 𑀓𑁂𑀦𑀘𑀻’’𑀢𑀺. 𑀅𑀜𑁆𑀜𑁂𑀦𑀸𑀢𑀺 𑀅𑀢𑁆𑀢𑀦𑀸 𑀅𑀜𑁆𑀜𑁂𑀦. ‘‘𑀢𑀸𑀬 𑀏𑀯 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀻’’𑀢𑀺 𑀧𑀤𑀸𑀦𑀺 ‘‘𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸’’𑀢𑀺𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀸𑀦𑀻𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀁

𑁫𑁫𑁮. 𑀤𑀼𑀢𑀺𑀬𑁂 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺 𑀅𑀦𑁆𑀢𑀭𑀖𑀭𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺 𑀪𑀯𑁂𑀬𑁆𑀬 𑀯𑁄𑀲𑀸𑀲𑀫𑀸𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁂𑀦𑁆𑀢𑀺𑀬𑀸 𑀧𑀦 𑀦𑁂𑀯 𑀇𑀫𑀺𑀦𑀸, 𑀦 𑀧𑀼𑀭𑀺𑀫𑁂𑀦 𑀆𑀧𑀢𑁆𑀢𑀺 𑀅𑀜𑁆𑀜𑀲𑁆𑀲 𑀪𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺. 𑀤𑀼𑀢𑀺𑀬𑀁.

𑁩. 𑀢𑀢𑀺𑀬𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀁

𑁫𑁬𑁨. 𑀢𑀢𑀺𑀬𑁂 ‘‘𑀉𑀪𑀢𑁄’’𑀢𑀺 𑀏𑀢𑁆𑀣 𑀓𑀭𑀡𑀢𑁆𑀣𑁂 𑀢𑁄𑀢𑀺 𑀆𑀳 ‘‘𑀤𑁆𑀯𑀻𑀳𑀻’’𑀢𑀺. ‘‘𑀉𑀪𑀢𑁄𑀧𑀲𑀦𑁆𑀦’’𑀦𑁆𑀢𑀺 𑀩𑁆𑀬𑀸𑀲𑁄𑀧𑀺 𑀲𑀫𑀸𑀲𑁄𑀧𑀺 𑀬𑀼𑀢𑁆𑀢𑁄𑀬𑁂𑀯, 𑀲𑀫𑀸𑀲𑁂 𑀢𑁄𑀧𑀘𑁆𑀘𑀬𑀲𑁆𑀲 𑀅𑀮𑁄𑀧𑁄 𑀳𑁄𑀢𑀺. ‘‘𑀉𑀪𑀢𑁄’’𑀢𑀺𑀧𑀤𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀉𑀧𑀸𑀲𑀓𑁂𑀦𑀧𑀺 𑀉𑀧𑀸𑀲𑀺𑀓𑀸𑀬𑀧𑀻’’𑀢𑀺. 𑀓𑀲𑁆𑀫𑀸 𑀉𑀪𑀢𑁄 𑀧𑀲𑀦𑁆𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀓𑀺𑀭𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀓𑀼𑀮𑁂…𑀧𑁂… 𑀲𑁄𑀢𑀸𑀧𑀦𑁆𑀦𑀸𑀬𑁂𑀯 𑀳𑁄𑀦𑁆𑀢𑀺 𑀓𑀺𑀭, 𑀢𑀲𑁆𑀫𑀸 ‘‘𑀉𑀪𑀢𑁄𑀧𑀲𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀘𑁂𑀧𑀻’’𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁂𑀦 𑀅𑀲𑀻𑀢𑀺𑀓𑁄𑀝𑀺𑀥𑀦𑀢𑁄 𑀅𑀥𑀺𑀓𑀫𑁆𑀧𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀳𑀸𑀬𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺 ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀦𑀸.

𑁫𑁬𑁯. ‘‘𑀖𑀭𑀢𑁄 𑀦𑀻𑀳𑀭𑀺𑀢𑁆𑀯𑀸’’𑀢𑀺 𑀏𑀢𑁆𑀣 ‘‘𑀦𑀻𑀳𑀭𑀺𑀢𑁆𑀯𑀸’’𑀢𑀺 𑀧𑀤𑀲𑁆𑀲 𑀓𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀆𑀲𑀦𑀲𑀸𑀮𑀁 𑀯𑀸 𑀯𑀺𑀳𑀸𑀭𑀁 𑀯𑀸’’𑀢𑀺. ‘‘𑀆𑀦𑁂𑀢𑁆𑀯𑀸’’𑀢𑀺𑀇𑀫𑀺𑀦𑀸 𑀦𑀻𑀧𑀼𑀩𑁆𑀩𑀳𑀭𑀥𑀸𑀢𑀼𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑁆𑀯𑀸𑀭𑁂𑀢𑀺 𑀅𑀢𑁆𑀢𑀦𑁄 𑀕𑁂𑀳𑀤𑁆𑀯𑀸𑀭𑁂𑀢𑀺. 𑀢𑀢𑀺𑀬𑀁.

𑁪. 𑀘𑀢𑀼𑀢𑁆𑀣𑀧𑀸𑀝𑀺𑀤𑁂𑀲𑀦𑀻𑀬𑀲𑀺𑀓𑁆𑀔𑀸𑀧𑀤𑀁

𑁫𑁭𑁦. 𑀘𑀢𑀼𑀢𑁆𑀣𑁂 𑀅𑀯𑀭𑀼𑀤𑁆𑀥𑀲𑀤𑁆𑀤𑁄 𑀧𑀭𑀺𑀭𑀼𑀤𑁆𑀥𑀲𑀤𑁆𑀤𑀲𑁆𑀲 𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀧𑀭𑀺𑀭𑀼𑀤𑁆𑀥𑀸 𑀳𑁄𑀦𑁆𑀢𑀻’’𑀢𑀺. 𑀆𑀭𑀜𑁆𑀜𑀓𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀧𑀭𑀺𑀲𑀫𑀦𑁆𑀢𑀢𑁄 𑀭𑀼𑀤𑁆𑀥𑀸 𑀆𑀯𑀼𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁫𑁭𑁩. ‘‘𑀧𑀜𑁆𑀘𑀦𑁆𑀦’’𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀪𑀸𑀯𑀜𑁆𑀘 ‘‘𑀬𑀁𑀓𑀺𑀜𑁆𑀘𑀻’’𑀢𑀺 𑀦𑀺𑀤𑁆𑀥𑀸𑀭𑀡𑀻𑀬𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀬𑀁 𑀓𑀺𑀜𑁆𑀘𑀻’’𑀢𑀺. ‘‘𑀧𑁂𑀲𑁂𑀢𑁆𑀯𑀸 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺𑀇𑀫𑀺𑀦𑀸 𑀧𑀝𑀺𑀲𑀁𑀯𑀺𑀤𑀺𑀢𑀸𑀓𑀸𑀭𑀤𑀲𑁆𑀲𑀦𑀁. ‘‘𑀆𑀭𑀸𑀫’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀲𑁆𑀲 𑀆𑀭𑀸𑀫𑁄 𑀏𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀸𑀭𑀸𑀫𑀜𑁆𑀘𑀸’’𑀢𑀺. 𑀢𑀲𑁆𑀲𑀸𑀢𑀺 𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀸𑀭𑀸𑀫𑀲𑁆𑀲. ‘‘𑀓𑀲𑁆𑀫𑀸’’𑀢𑀺 𑀧𑀼𑀘𑁆𑀙𑀸𑀬 ‘‘𑀧𑀝𑀺𑀫𑁄𑀘𑀦𑀢𑁆𑀣’’𑀦𑁆𑀢𑀺 𑀯𑀺𑀲𑀚𑁆𑀚𑀦𑀸𑀬 𑀲𑀫𑁂𑀢𑀼𑀁 𑀲𑀫𑁆𑀧𑀤𑀸𑀦𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀓𑀸𑀢𑀩𑁆𑀩𑀁. 𑀓𑀺𑀫𑀢𑁆𑀣𑀦𑁆𑀢𑀺 𑀳𑀺 𑀅𑀢𑁆𑀣𑁄. 𑀧𑀝𑀺𑀫𑁄𑀘𑀦𑀢𑁆𑀣𑀦𑁆𑀢𑀺 𑀢𑀤𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀧𑀝𑀺𑀫𑁄𑀘𑀦𑀲𑀗𑁆𑀔𑀸𑀢𑀸𑀬 𑀅𑀢𑁆𑀣𑀸𑀬𑀸𑀢𑀺 𑀳𑀺 𑀅𑀢𑁆𑀣𑁄. 𑀅𑀢𑁆𑀣𑀲𑀤𑁆𑀤𑁄 𑀘 𑀧𑀬𑁄𑀚𑀦𑀯𑀸𑀘𑀓𑁄. 𑀧𑀬𑁄𑀚𑀦𑀸𑀬𑀸𑀢𑀺 𑀳𑀺 𑀅𑀢𑁆𑀣𑁄. 𑀅𑀣 𑀯𑀸 ‘‘𑀧𑀝𑀺𑀫𑁄𑀘𑀦𑀢𑁆𑀣’’𑀦𑁆𑀢𑀺 𑀯𑀺𑀲𑀚𑁆𑀚𑀦𑀸𑀬𑀁. ‘‘𑀓𑀲𑁆𑀫𑀸’’𑀢𑀺 𑀧𑀼𑀘𑁆𑀙𑀸𑀬 𑀲𑀫𑁂𑀢𑀼𑀁 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 𑀓𑀸𑀢𑀩𑁆𑀩𑀁. 𑀧𑀝𑀺𑀫𑁄𑀘𑀦𑀲𑀗𑁆𑀔𑀸𑀢𑀸 𑀅𑀢𑁆𑀣𑀸𑀢𑀺 𑀳𑀺 𑀅𑀢𑁆𑀣𑁄. 𑀅𑀢𑁆𑀣𑀲𑀤𑁆𑀤𑁄 𑀘 𑀓𑀸𑀭𑀡𑀯𑀸𑀘𑀓𑁄. 𑀓𑀸𑀭𑀡𑀸𑀢𑀺 𑀳𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀧𑀼𑀘𑁆𑀙𑀸𑀯𑀺𑀲𑀚𑁆𑀚𑀦𑀸𑀦𑀁 𑀧𑀼𑀩𑁆𑀩𑀸𑀧𑀭𑀲𑀫𑀲𑀗𑁆𑀔𑀸𑀢𑁄 𑀯𑀺𑀘𑀬𑁄 𑀳𑀸𑀭𑁄 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀫𑁆𑀳𑀸𑀓𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀧𑀝𑀺𑀳𑀭𑀦𑁆𑀢𑀸𑀦𑀁 𑀅𑀫𑁆𑀳𑀸𑀓𑀁. 𑀅𑀫𑁆𑀳𑁂𑀢𑀺 𑀘𑁄𑀭𑀲𑀗𑁆𑀔𑀸𑀢𑁂 𑀅𑀫𑁆𑀳𑁂.

‘‘𑀢𑀲𑁆𑀲𑀸’’𑀢𑀺 𑀧𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀏𑀢𑀺𑀲𑁆𑀲𑀸 𑀬𑀸𑀕𑀼𑀬𑀸’’𑀢𑀺. 𑀅𑀜𑁆𑀜𑀸𑀦𑀺𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀓𑀼𑀮𑀢𑁄 𑀅𑀜𑁆𑀜𑀸𑀦𑀺𑀧𑀺 𑀓𑀼𑀮𑀸𑀦𑀺. 𑀢𑁂𑀦𑀸𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀓𑀼𑀮𑁂𑀦. 𑀓𑀼𑀭𑀼𑀦𑁆𑀤𑀺𑀯𑀸𑀤𑁂 𑀬𑀸𑀕𑀼𑀬𑀸 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀢𑁆𑀯𑀸 𑀬𑀸𑀕𑀼𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀽𑀯𑀸𑀤𑀻𑀦𑀺 𑀆𑀳𑀭𑀦𑁆𑀢𑀺, 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁭𑁫. 𑀏𑀓𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀢𑀲𑁆𑀲𑀸𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀪𑀺𑀓𑁆𑀔𑀼𑀲𑁆𑀲, 𑀘𑀢𑀼𑀦𑁆𑀦𑀁 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬𑀸𑀢𑀺 𑀬𑁄𑀚𑀦𑀸. 𑀅𑀜𑁆𑀜𑁂𑀲𑀫𑁆𑀧𑀻𑀢𑀺 𑀘𑀢𑀼𑀧𑀜𑁆𑀘𑀪𑀺𑀓𑁆𑀔𑀼𑀢𑁄 𑀅𑀜𑁆𑀜𑁂𑀲𑀫𑁆𑀧𑀺. 𑀅𑀥𑀺𑀓𑀫𑁂𑀯𑀸𑀢𑀺 𑀧𑀭𑀺𑀪𑀼𑀢𑁆𑀢𑀢𑁄 𑀅𑀢𑀺𑀭𑁂𑀓𑀫𑁂𑀯. 𑀬𑀁 𑀧𑀦𑀸𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀧𑀦, 𑀬𑀫𑁆𑀧𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀯𑀦𑀢𑁄 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀢𑁆𑀣𑀚𑀸𑀢𑀓’’𑀦𑁆𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀆𑀭𑀸𑀫𑁂’’𑀢𑀺. 𑀅𑀜𑁆𑀜𑁂𑀦 𑀤𑀺𑀦𑁆𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑁆𑀢𑀺 𑀫𑀽𑀮𑀔𑀸𑀤𑀦𑀻𑀬𑀸𑀤𑀺𑀁. 𑀧𑀝𑀺𑀲𑀁𑀯𑀺𑀤𑀺𑀢𑀦𑁆𑀢𑀺 𑀧𑀝𑀺𑀓𑀘𑁆𑀘𑁂𑀯 𑀲𑀼𑀝𑁆𑀞𑀼 𑀚𑀸𑀦𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄𑀢𑀺. 𑀘𑀢𑀼𑀢𑁆𑀣𑀁.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀧𑀸𑀝𑀺𑀤𑁂𑀲𑀦𑀻𑀬𑀯𑀡𑁆𑀡𑀦𑀸𑀬

𑀬𑁄𑀚𑀦𑀸 𑀲𑀫𑀢𑁆𑀢𑀸.