𑁭. 𑀲𑁂𑀔𑀺𑀬𑀓𑀡𑁆𑀟𑀁

𑁧. 𑀧𑀭𑀺𑀫𑀡𑁆𑀟𑀮𑀯𑀕𑁆𑀕-𑀅𑀢𑁆𑀣𑀬𑁄𑀚𑀦𑀸

𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁂𑀦 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁂𑀦 𑀢𑀸𑀤𑀺𑀦𑀸 𑀅𑀝𑁆𑀞𑀳𑀺 𑀮𑁄𑀓𑀥𑀫𑁆𑀫𑁂𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀢𑀸𑀤𑀺𑀦𑀸, 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀯𑀸 𑀅𑀯𑀺𑀓𑀸𑀭𑀝𑁆𑀞𑁂𑀦 𑀢𑀸𑀤𑀺𑀦𑀸 𑀪𑀕𑀯𑀢𑀸 𑀬𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ‘‘𑀲𑁂𑀔𑀺𑀬𑀸𑀦𑀻’’𑀢𑀺 𑀪𑀸𑀲𑀺𑀢𑀸𑀦𑀺, 𑀤𑀸𑀦𑀺 𑀢𑁂𑀲𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀬𑀫𑁆𑀧𑀺 𑀯𑀡𑁆𑀡𑀦𑀸𑀓𑁆𑀓𑀫𑁄 𑀪𑀯𑀢𑀻𑀢𑀺 𑀬𑁄𑀚𑀦𑀸.

𑁫𑁭𑁬. 𑀢𑀢𑁆𑀣𑀸𑀢𑀺 𑀲𑁂𑀔𑀺𑀬𑀲𑀺𑀓𑁆𑀔𑀸𑀧𑀤𑁂𑀲𑀼, 𑀅𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. ‘‘𑀲𑀫𑀦𑁆𑀢𑀢𑁄’’𑀢𑀺𑀇𑀫𑀺𑀦𑀸 𑀧𑀭𑀺𑀢𑁆𑀬𑀽𑀧𑀲𑀕𑁆𑀕𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀦𑀸𑀪𑀺𑀫𑀡𑁆𑀟𑀮𑀁 𑀚𑀸𑀡𑀼𑀫𑀡𑁆𑀟𑀮’’𑀦𑁆𑀢𑀺 𑀏𑀢𑁆𑀣 𑀉𑀤𑁆𑀥𑀁𑀲𑀤𑁆𑀤𑁄 𑀘 𑀅𑀥𑁄𑀲𑀤𑁆𑀤𑁄 𑀘 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀉𑀤𑁆𑀥’’𑀦𑁆𑀢𑀺𑀆𑀤𑀺. 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀦𑀺𑀯𑀸𑀲𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀢𑁄. 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀏𑀯𑀁 𑀦𑀺𑀯𑀸𑀲𑁂𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀺𑀤𑀁 𑀧𑀫𑀸𑀡𑀦𑁆𑀢𑀺 𑀢𑀲𑁆𑀲 𑀦𑀺𑀯𑀸𑀲𑀦𑀲𑁆𑀲 𑀇𑀤𑀁 𑀧𑀫𑀸𑀡𑀁. 𑀢𑀸𑀤𑀺𑀲𑀲𑁆𑀲𑀸𑀢𑀺 𑀤𑀻𑀖𑀢𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑀲𑁆𑀲 𑀢𑀺𑀭𑀺𑀬𑀁 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀲𑁆𑀲 𑀦𑀺𑀯𑀸𑀲𑀦𑀲𑁆𑀲. 𑀚𑀸𑀡𑀼𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀘𑀻𑀯𑀭𑁂𑀲𑀼. 𑀦 𑀢𑀺𑀝𑁆𑀞𑀢𑀻𑀢𑀺 𑀯𑀺𑀭𑀴𑀢𑁆𑀢𑀸 𑀦 𑀢𑀺𑀝𑁆𑀞𑀢𑀺. 𑀢𑀺𑀝𑁆𑀞𑀢𑀻𑀢𑀺 𑀖𑀦𑀢𑁆𑀢𑀸 𑀢𑀺𑀝𑁆𑀞𑀢𑀺.

𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀘𑀸𑀢𑀺𑀏𑀢𑁆𑀣 𑀘𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄, 𑀦𑀺𑀯𑀸𑀲𑁂𑀦𑁆𑀢𑀲𑁆𑀲𑁂𑀯𑀸𑀢𑀺 𑀅𑀢𑁆𑀣𑁄. 𑀓𑁂𑀯𑀮𑀁 𑀏𑀯𑀁 𑀦𑀺𑀯𑀸𑀲𑁂𑀦𑁆𑀢𑀲𑁆𑀲𑁂𑀯 𑀤𑀼𑀓𑁆𑀓𑀝𑀁 𑀦 𑀳𑁄𑀢𑀺, 𑀅𑀣 𑀔𑁄 𑀢𑀣𑀸 𑀦𑀺𑀯𑀸𑀲𑁂𑀦𑁆𑀢𑀲𑁆𑀲𑀸𑀧𑀺 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀬𑁄𑀚𑀦𑀸. 𑀬𑁂 𑀧𑀦 𑀦𑀺𑀯𑀸𑀲𑀦𑀤𑁄𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁂𑀢𑀺 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀑𑀮𑀫𑁆𑀩𑁂𑀢𑁆𑀯𑀸 𑀦𑀺𑀯𑀲𑀦𑀢𑁄 𑀅𑀜𑁆𑀜𑁂. 𑀢𑁂 𑀲𑀩𑁆𑀩𑁂𑀢𑀺 𑀲𑀩𑁆𑀩𑁂 𑀢𑁂 𑀦𑀺𑀯𑀸𑀲𑀦𑀤𑁄𑀲𑀸. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀯𑀺𑀪𑀗𑁆𑀕𑁂. 𑀢𑀢𑁆𑀣𑁂𑀯𑀸𑀢𑀺 𑀔𑀦𑁆𑀥𑀓𑁂𑀬𑁂𑀯.

𑀅𑀲𑀜𑁆𑀘𑀺𑀘𑁆𑀘 𑀦𑀺𑀯𑀸𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲𑁂𑀯 𑀦𑀬𑁄 ‘‘𑀅𑀲𑀢𑀺𑀬𑀸’’𑀢𑀺 𑀏𑀢𑁆𑀣𑀸𑀧𑀺. 𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀅𑀚𑀸𑀦𑀦𑀁 𑀤𑀼𑀯𑀺𑀥𑀁 𑀦𑀺𑀯𑀸𑀲𑀦𑀯𑀢𑁆𑀢𑀲𑁆𑀲 𑀅𑀚𑀸𑀦𑀦𑀁, 𑀆𑀭𑀽𑀴𑁆𑀳𑁄𑀭𑀽𑀴𑁆𑀳𑀪𑀸𑀯𑀲𑁆𑀲 𑀅𑀚𑀸𑀦𑀦𑀦𑁆𑀢𑀺. 𑀢𑀢𑁆𑀣 𑀆𑀭𑀽𑀴𑁆𑀳𑁄𑀭𑀽𑀴𑁆𑀳𑀪𑀸𑀯𑀲𑁆𑀲 𑀅𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁. 𑀢𑀲𑁆𑀲𑀸𑀢𑀺 𑀦𑀺𑀯𑀸𑀲𑀦𑀯𑀢𑁆𑀢𑀲𑁆𑀲. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀢𑀁 𑀧𑀦𑀸𑀢𑀺 𑀆𑀧𑀢𑁆𑀢𑀺𑀢𑁄 𑀅𑀫𑁄𑀓𑁆𑀔𑀦𑀁 𑀧𑀦. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸. 𑀬𑁄𑀢𑀺 𑀪𑀺𑀓𑁆𑀔𑀼. 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀓𑁆𑀔𑀸 𑀚𑀗𑁆𑀖𑀸 𑀇𑀫𑀲𑁆𑀲𑀸𑀢𑀺 𑀲𑀼𑀓𑁆𑀔𑀚𑀗𑁆𑀖𑁄. 𑀫𑀳𑀦𑁆𑀢𑀁 𑀧𑀺𑀡𑁆𑀟𑀺𑀓𑀫𑀁𑀲𑀁 𑀇𑀫𑀲𑁆𑀲𑀸𑀢𑀺 𑀫𑀳𑀸𑀧𑀺𑀡𑁆𑀟𑀺𑀓𑀫𑀁𑀲𑁄. 𑀢𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲.

𑀯𑀡𑁄𑀢𑀺 𑀅𑀭𑀼. 𑀢𑀜𑁆𑀳𑀺 𑀯𑀡𑀢𑀺 𑀕𑀢𑁆𑀢𑀯𑀺𑀘𑀼𑀡𑁆𑀡𑀦𑀁 𑀓𑀭𑁄𑀢𑀻𑀢𑀺 𑀯𑀡𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀸𑀴𑀫𑀺𑀕𑀸 𑀯𑀸 𑀘𑁄𑀭𑀸 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀅𑀜𑁆𑀜𑀸𑀧𑀺 𑀉𑀤𑀓𑀘𑀺𑀓𑁆𑀔𑀮𑁆𑀮𑀸𑀤𑀬𑁄 𑀆𑀧𑀤𑀸 𑀲𑀗𑁆𑀕𑀬𑁆𑀳𑀦𑁆𑀢𑀺.

𑁫𑁭𑁭. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀺𑀪𑀗𑁆𑀕𑁂, 𑀲𑀺𑀓𑁆𑀔𑀸𑀧𑀤𑁂 𑀯𑀸. 𑀉𑀪𑁄 𑀓𑀡𑁆𑀡𑁂𑀢𑀺 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀦𑀺𑀕𑁆𑀕𑀢𑁂 𑀤𑁆𑀯𑁂 𑀓𑀡𑁆𑀡𑁂. 𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀅𑀦𑁆𑀢𑀭𑀖𑀭𑁂’’𑀢𑀺 𑀘 ‘‘𑀆𑀭𑀸𑀫𑁂’’𑀢𑀺 𑀘 𑀯𑀺𑀲𑁂𑀲𑀁 𑀅𑀓𑀢𑁆𑀯𑀸 𑀲𑀸𑀫𑀜𑁆𑀜𑁂𑀦. 𑀯𑀺𑀳𑀸𑀭𑁂𑀧𑀻𑀢𑀺 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀣𑁂𑀭𑀼𑀧𑀝𑁆𑀞𑀸𑀦𑀸𑀤𑀺𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁫𑁭𑁮. 𑀓𑀸𑀬𑁂𑀓𑀤𑁂𑀲𑁂 𑀓𑀸𑀬𑀲𑀤𑁆𑀤𑁄 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀚𑀸𑀡𑀼𑀫𑁆𑀧𑀺 𑀉𑀭𑀫𑁆𑀧𑀻’’𑀢𑀺. ‘‘𑀦 𑀲𑀻𑀲𑀁 𑀧𑀸𑀭𑀼𑀢𑁂𑀦𑀸’’𑀢𑀺𑀇𑀫𑀺𑀦𑀸 ‘‘𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁂𑀦𑀸’’𑀢𑀺𑀧𑀤𑀲𑁆𑀲 𑀅𑀢𑀺𑀩𑁆𑀬𑀸𑀧𑀺𑀢𑀤𑁄𑀲𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀕𑀡𑁆𑀞𑀺𑀓𑀦𑁆𑀢𑀺 𑀧𑀸𑀲𑁄. 𑀲𑁄 𑀳𑀺 𑀕𑀦𑁆𑀣𑁂𑀢𑀺 𑀩𑀦𑁆𑀥𑀢𑀻𑀢𑀺 𑀯𑀸, 𑀕𑀦𑁆𑀣𑁂𑀢𑀺 𑀩𑀦𑁆𑀥𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀓𑀢𑁆𑀯𑀸 𑀕𑀦𑁆𑀣𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀦𑁆𑀣𑀓𑀸𑀭𑀲𑁆𑀲 𑀯𑀸𑀡𑁆𑀞𑀓𑀸𑀭𑁂 𑀓𑀢𑁂 𑀕𑀡𑁆𑀞𑀺𑀓𑁄, 𑀢𑀁 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸. 𑀉𑀪𑁄 𑀓𑀡𑁆𑀡𑁂𑀢𑀺 𑀘𑀻𑀯𑀭𑀲𑁆𑀲 𑀤𑁆𑀯𑁂 𑀓𑁄𑀡𑁂. 𑀕𑀮𑀯𑀸𑀝𑀓𑀢𑁄𑀢𑀺 𑀏𑀢𑁆𑀣 𑀕𑀮𑁄𑀢𑀺 𑀓𑀡𑁆𑀞𑁄. 𑀲𑁄 𑀳𑀺 𑀔𑀚𑁆𑀚𑀪𑁄𑀚𑁆𑀚𑀮𑁂𑀬𑁆𑀬𑀧𑁂𑀬𑁆𑀬𑀲𑀗𑁆𑀔𑀸𑀢𑀁 𑀘𑀢𑀼𑀩𑁆𑀩𑀺𑀥𑀁 𑀅𑀲𑀦𑀁 𑀕𑀮𑀢𑀺 𑀧𑀦𑁆𑀦𑁄 𑀳𑀼𑀢𑁆𑀯𑀸 𑀓𑀼𑀘𑁆𑀙𑀺𑀬𑀁 𑀧𑀢𑀢𑀺 𑀇𑀢𑁄𑀢𑀺 𑀕𑀮𑁄𑀢𑀺 𑀯𑀼𑀘𑁆𑀘𑀢𑀺. 𑀆𑀯𑀸𑀝𑁄𑀬𑁂𑀯 𑀔𑀼𑀤𑁆𑀤𑀓𑀝𑁆𑀞𑁂𑀦 𑀆𑀯𑀸𑀝𑀓𑁄, 𑀔𑀼𑀤𑁆𑀤𑀓𑀢𑁆𑀣𑁂 𑀓𑁄. 𑀕𑀮𑁂 𑀞𑀺𑀢𑁄 𑀆𑀯𑀸𑀝𑀓𑁄 𑀕𑀮𑀯𑀸𑀝𑀓𑁄. 𑀅𑀓𑀸𑀭𑀢𑁄 𑀳𑀺 𑀆𑀓𑀸𑀭𑀲𑁆𑀲 𑀮𑁄𑀧𑁄 ‘‘𑀧𑀧’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧.𑁨) 𑀯𑀺𑀬. 𑀏𑀢𑁆𑀣 𑀳𑀺 𑀧𑀆𑀧𑀦𑁆𑀢𑀺 𑀧𑀤𑀘𑁆𑀙𑁂𑀤𑁄, 𑀅𑀓𑀸𑀭𑀢𑁄 𑀆𑀓𑀸𑀭𑀲𑁆𑀲 𑀘 𑀮𑁄𑀧𑁄. 𑀧𑀯𑀤𑁆𑀥𑀁 𑀆𑀧𑀁 𑀧𑀧𑀁, 𑀫𑀳𑀦𑁆𑀢𑀁 𑀉𑀤𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀲𑀁 𑀯𑀺𑀯𑀭𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁫𑁭𑁯. 𑀯𑀸𑀲𑀁 𑀉𑀧𑀕𑀢𑁄𑀢𑀺 𑀯𑀸 𑀯𑀸𑀲𑁂𑀦 𑀉𑀧𑀕𑀢𑁄𑀢𑀺 𑀯𑀸 𑀅𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀯𑀸𑀲𑀢𑁆𑀣𑀸𑀬 𑀉𑀧𑀕𑀢𑀲𑁆𑀲𑀸’’𑀢𑀺.

𑁫𑁮𑁦. 𑀳𑀢𑁆𑀣𑀧𑀸𑀤𑁂 𑀅𑀓𑀻𑀴𑀦𑁆𑀢𑁄 𑀲𑀼𑀲𑀁𑀯𑀼𑀢𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀅𑀓𑀻𑀴𑀸𑀧𑁂𑀦𑁆𑀢𑁄’’𑀢𑀺.

𑁫𑁮𑁨. 𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀽𑀢𑀺 𑀏𑀢𑁆𑀣 𑀑𑀲𑀤𑁆𑀤𑁄 𑀳𑁂𑀝𑁆𑀞𑀸𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀳𑁂𑀝𑁆𑀞𑀸 𑀔𑀺𑀢𑁆𑀢𑀘𑀓𑁆𑀔𑀽’’𑀢𑀺. ‘‘𑀳𑀼𑀢𑁆𑀯𑀸’’𑀢𑀺𑀇𑀫𑀺𑀦𑀸 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀬𑀼𑀕𑀬𑀼𑀢𑁆𑀢𑀓𑁄𑀢𑀺 𑀬𑀼𑀕𑁂 𑀬𑀼𑀢𑁆𑀢𑀓𑁄. 𑀤𑀫𑀺𑀬𑀺𑀢𑁆𑀣𑀸𑀢𑀺 𑀤𑀦𑁆𑀢𑁄. 𑀆𑀪𑀼𑀲𑁄 𑀚𑀸𑀦𑀸𑀢𑀺 𑀓𑀸𑀭𑀡𑀸𑀓𑀸𑀭𑀡𑀦𑁆𑀢𑀺 𑀆𑀚𑀸𑀦𑁂𑀬𑁆𑀬𑁄. 𑀏𑀢𑁆𑀢𑀓𑀦𑁆𑀢𑀺 𑀘𑀢𑀼𑀳𑀢𑁆𑀣𑀧𑀫𑀸𑀡𑀁. 𑀬𑁄 𑀕𑀘𑁆𑀙𑀢𑀺, 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀸 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀧𑀭𑀺𑀲𑁆𑀲𑀬𑀪𑀸𑀯’’𑀦𑁆𑀢𑀺 𑀘 ‘‘𑀧𑀭𑀺𑀲𑁆𑀲𑀬𑀸𑀪𑀸𑀯’’𑀦𑁆𑀢𑀺 𑀘 𑀤𑁆𑀯𑁂 𑀧𑀸𑀞𑀸 𑀬𑀼𑀚𑁆𑀚𑀦𑁆𑀢𑀺𑀬𑁂𑀯.

𑁫𑁮𑁪. 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂𑀢𑀺 𑀇𑀫𑀁 𑀧𑀓𑀸𑀭𑀁 𑀇𑀢𑁆𑀣𑀁 𑀘𑀻𑀯𑀭𑀼𑀓𑁆𑀔𑀺𑀧𑀦𑀁, 𑀪𑀯𑀢𑀺 𑀕𑀘𑁆𑀙𑀢𑀻𑀢𑀺 𑀪𑀽𑀢𑁄, 𑀪𑀺𑀓𑁆𑀔𑀼. 𑀮𑀓𑁆𑀔𑀻𑀬𑀢𑀺 𑀅𑀦𑁂𑀦𑀸𑀢𑀺 𑀮𑀓𑁆𑀔𑀡𑀁, 𑀘𑀻𑀯𑀭𑀁. 𑀇𑀢𑁆𑀣𑀁 𑀪𑀽𑀢𑁄 𑀇𑀢𑁆𑀣𑀫𑁆𑀪𑀽𑀢𑁄, 𑀢𑀲𑁆𑀲 𑀮𑀓𑁆𑀔𑀡𑀁 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑀁, 𑀢𑀲𑁆𑀫𑀺𑀁. 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑀁 𑀦𑀸𑀫 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀲𑁆𑀲 𑀲𑀪𑀸𑀯𑁄𑀢𑀺 𑀆𑀳 ‘‘𑀏𑀓𑀢𑁄 𑀯𑀸…𑀧𑁂… 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀅𑀦𑁆𑀢𑁄𑀇𑀦𑁆𑀤𑀔𑀻𑀮𑀢𑁄𑀢𑀺 𑀕𑀸𑀫𑀲𑁆𑀲 𑀅𑀦𑁆𑀢𑁄𑀇𑀦𑁆𑀤𑀔𑀻𑀮𑀢𑁄𑀢𑀺. 𑀧𑀞𑀫𑁄 𑀯𑀕𑁆𑀕𑁄.

𑁨. 𑀉𑀚𑁆𑀚𑀕𑁆𑀖𑀺𑀓𑀯𑀕𑁆𑀕-𑀅𑀢𑁆𑀣𑀬𑁄𑀚𑀦𑀸

𑁫𑁮𑁬. 𑀉𑀘𑁆𑀘𑀸𑀲𑀤𑁆𑀤𑀁 𑀓𑀢𑁆𑀯𑀸 𑀚𑀕𑁆𑀖𑀦𑀁 𑀳𑀲𑀦𑀁 𑀉𑀚𑁆𑀚𑀕𑁆𑀖𑁄, 𑀲𑁄𑀬𑁂𑀯 𑀉𑀚𑁆𑀚𑀕𑁆𑀖𑀺𑀓𑀸, 𑀢𑀸𑀬. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑁄’’𑀢𑀺. 𑀏𑀢𑁆𑀣𑀸𑀢𑀺 ‘‘𑀉𑀚𑁆𑀚𑀕𑁆𑀖𑀺𑀓𑀸𑀬𑀸’’𑀢𑀺𑀧𑀤𑁂.

𑁫𑁮𑁮. 𑀓𑀺𑀢𑁆𑀢𑀸𑀯𑀢𑀸𑀢𑀺 𑀓𑀺𑀢𑁆𑀢𑀓𑁂𑀦 𑀧𑀫𑀸𑀡𑁂𑀦, 𑀏𑀯𑀁 𑀦𑀺𑀲𑀺𑀦𑁆𑀦𑁂𑀲𑀼 𑀣𑁂𑀭𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀯𑀯𑀢𑁆𑀣𑀧𑁂𑀢𑀻𑀢𑀺 𑀇𑀤𑀜𑁆𑀘𑀻𑀤𑀜𑁆𑀘 𑀓𑀣𑁂𑀢𑀻𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀧𑀫𑀸𑀡𑁂𑀦.

𑁫𑁯𑁦. 𑀦𑀺𑀘𑁆𑀘𑀮𑀁 𑀓𑀢𑁆𑀯𑀸 𑀓𑀸𑀬𑀲𑁆𑀲 𑀉𑀚𑀼𑀝𑁆𑀞𑀧𑀦𑀁 𑀓𑀸𑀬𑀧𑀕𑁆𑀕𑀳𑁄 𑀦𑀸𑀫𑀸𑀢𑀺 𑀆𑀳 ‘‘𑀦𑀺𑀘𑁆𑀘𑀮𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀏𑀲𑁂𑀯 𑀦𑀬𑁄 𑀩𑀸𑀳𑀼𑀧𑀕𑁆𑀕𑀳𑀲𑀻𑀲𑀧𑀕𑁆𑀕𑀳𑁂𑀲𑀼𑀧𑀻𑀢𑀺. 𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁩. 𑀔𑀫𑁆𑀪𑀓𑀢𑀯𑀕𑁆𑀕-𑀅𑀢𑁆𑀣𑀬𑁄𑀚𑀦𑀸

𑁫𑁯𑁬. 𑀔𑀫𑁆𑀪𑁄 𑀓𑀢𑁄 𑀬𑁂𑀦𑀸𑀢𑀺 𑀔𑀫𑁆𑀪𑀓𑀢𑁄. 𑀔𑀫𑁆𑀪𑁄𑀢𑀺 𑀘 𑀧𑀝𑀺𑀩𑀤𑁆𑀥𑁄. 𑀓𑀢𑁆𑀣 𑀧𑀝𑀺𑀩𑀤𑁆𑀥𑁄𑀢𑀺 𑀆𑀳 ‘‘𑀓𑀝𑀺𑀬𑀁 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸’’𑀢𑀺. 𑀲𑀲𑀻𑀲𑀁 𑀅𑀯𑀕𑀼𑀡𑁆𑀞𑀬𑀢𑀺 𑀧𑀭𑀺𑀯𑁂𑀞𑀢𑀻𑀢𑀺 𑀑𑀕𑀼𑀡𑁆𑀞𑀺𑀢𑁄𑀢𑀺 𑀆𑀳 ‘‘𑀲𑀲𑀻𑀲𑀁 𑀧𑀸𑀭𑀼𑀢𑁄’’𑀢𑀺.

𑁬𑁦𑁦. 𑀉𑀤𑁆𑀥𑀁 𑀏𑀓𑀸 𑀓𑁄𑀝𑀺 𑀇𑀫𑀺𑀲𑁆𑀲𑀸 𑀕𑀫𑀦𑀸𑀬𑀸𑀢𑀺 𑀉𑀓𑁆𑀓𑀼𑀝𑀺𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀓𑁆𑀓𑀼𑀝𑀺𑀓𑀸 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 ‘‘𑀉𑀓𑁆𑀓𑀼𑀝𑀺𑀓𑀸𑀬𑀸’’𑀢𑀺𑀧𑀤𑁂.

𑁬𑁦𑁧. 𑀳𑀢𑁆𑀣𑀧𑀮𑁆𑀮𑀢𑁆𑀣𑀻𑀓𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀻𑀓𑁂𑀲𑀼 𑀤𑁆𑀯𑀻𑀲𑀼 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑁂 𑀆𑀬𑁄𑀕𑀧𑀮𑁆𑀮𑀢𑁆𑀣𑀻𑀓𑀸𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀆𑀬𑁄𑀕𑀧𑀮𑁆𑀮𑀢𑁆𑀣𑀺𑀓𑀸𑀧𑀺 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀸 𑀏𑀯𑀸’’𑀢𑀺.

𑁬𑁦𑁨. 𑀲𑀢𑀺𑀬𑀸 𑀉𑀧𑀝𑁆𑀞𑀸𑀦𑀁 𑀲𑀓𑁆𑀓𑀘𑁆𑀘𑀦𑁆𑀢𑀺 𑀆𑀳 ‘‘𑀲𑀢𑀺𑀁𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺.

𑁬𑁦𑁩. 𑀧𑀺𑀡𑁆𑀟𑀧𑀸𑀢𑀁 𑀤𑁂𑀦𑁆𑀢𑁂𑀧𑀻𑀢𑀺 𑀧𑀺𑀡𑁆𑀟𑀧𑀸𑀢𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀦𑁆𑀢𑁂𑀧𑀺. 𑀧𑀢𑁆𑀢𑁂 𑀲𑀜𑁆𑀜𑀸 𑀧𑀢𑁆𑀢𑀲𑀜𑁆𑀜𑀸, 𑀲𑀸 𑀅𑀲𑁆𑀲𑀢𑁆𑀣𑀻𑀢𑀺 𑀧𑀢𑁆𑀢𑀲𑀜𑁆𑀜𑀻. ‘‘𑀓𑀢𑁆𑀯𑀸’’ 𑀢𑀺𑀇𑀫𑀺𑀦𑀸 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀺.

𑁬𑁦𑁪. 𑀲𑀫𑀲𑀽𑀧𑀓𑀁 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀏𑀢𑁆𑀣 𑀲𑀽𑀧𑀧𑀺𑀡𑁆𑀟𑀧𑀸𑀢𑀸𑀦𑀁 𑀲𑀫𑀉𑀧𑀟𑁆𑀠𑀪𑀸𑀯𑀁 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬𑀸𑀢𑀺 𑀆𑀳 ‘‘𑀲𑀫𑀲𑀽𑀧𑀓𑁄 𑀦𑀸𑀫𑀸’’𑀢𑀺𑀆𑀤𑀺. 𑀬𑀢𑁆𑀣𑀸𑀢𑀺 𑀧𑀺𑀡𑁆𑀟𑀧𑀸𑀢𑁂. 𑀪𑀢𑁆𑀢𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑀫𑀸𑀡𑁄 𑀲𑀽𑀧𑁄 𑀳𑁄𑀢𑀺, 𑀲𑁄 𑀧𑀺𑀡𑁆𑀟𑀧𑀸𑀢𑁄 𑀲𑀫𑀲𑀽𑀧𑀓𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀑𑀮𑁄𑀡𑀻 𑀘 𑀲𑀸𑀓𑀲𑀽𑀧𑁂𑀬𑁆𑀬𑀜𑁆𑀘 𑀫𑀘𑁆𑀙𑀭𑀲𑁄 𑀘 𑀫𑀁𑀲𑀭𑀲𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀢𑀢𑁆𑀣 𑀑𑀮𑁄𑀡𑀻𑀢𑀺 𑀏𑀓𑀸 𑀩𑁆𑀬𑀜𑁆𑀚𑀦𑀯𑀺𑀓𑀢𑀺. 𑀲𑀸𑀓𑀲𑀽𑀧𑁂𑀬𑁆𑀬𑀦𑁆𑀢𑀺 𑀲𑀽𑀧𑀲𑁆𑀲 𑀳𑀺𑀢𑀁 𑀲𑀽𑀧𑁂𑀬𑁆𑀬𑀁, 𑀲𑀸𑀓𑀫𑁂𑀯 𑀲𑀽𑀧𑁂𑀬𑁆𑀬𑀁 𑀲𑀸𑀓𑀲𑀽𑀧𑁂𑀬𑁆𑀬𑀁. 𑀇𑀫𑀺𑀦𑀸 𑀲𑀩𑁆𑀩𑀸𑀧𑀺 𑀲𑀸𑀓𑀲𑀽𑀧𑁂𑀬𑁆𑀬𑀩𑁆𑀬𑀜𑁆𑀚𑀦𑀯𑀺𑀓𑀢𑀺 𑀕𑀳𑀺𑀢𑀸. 𑀫𑀘𑁆𑀙𑀭𑀲𑀫𑀁𑀲𑀭𑀲𑀸𑀤𑀻𑀦𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀅𑀯𑀲𑁂𑀲𑀸 𑀲𑀩𑁆𑀩𑀸𑀧𑀺 𑀩𑁆𑀬𑀜𑁆𑀚𑀦𑀯𑀺𑀓𑀢𑀺 𑀲𑀗𑁆𑀕𑀳𑀺𑀢𑀸. 𑀢𑀁 𑀲𑀩𑁆𑀩𑀁 𑀭𑀲𑀸𑀦𑀁 𑀭𑀲𑁄 𑀭𑀲𑀭𑀲𑁄𑀢𑀺 𑀓𑀢𑁆𑀯𑀸 ‘‘𑀭𑀲𑀭𑀲𑁄’’𑀢𑀺 𑀯𑀼𑀘𑁆𑀘𑀢𑀺.

𑁬𑁦𑁫. 𑀲𑀫𑀧𑀼𑀡𑁆𑀡𑀁 𑀲𑀫𑀪𑀭𑀺𑀢𑀦𑁆𑀢𑀺 𑀯𑁂𑀯𑀘𑀦𑀫𑁂𑀯. 𑀣𑀽𑀧𑀁 𑀓𑀢𑁄 𑀣𑀽𑀧𑀻𑀓𑀢𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀣𑀽𑀧𑀻𑀓𑀢𑁄 𑀦𑀸𑀫𑀸’’𑀢𑀺𑀆𑀤𑀺.

𑀢𑀢𑁆𑀣𑀸𑀢𑀺 ‘‘𑀣𑀽𑀧𑀻𑀓𑀢’’𑀦𑁆𑀢𑀺𑀆𑀤𑀺𑀯𑀘𑀦𑁂. 𑀢𑁂𑀲𑀦𑁆𑀢𑀺 𑀅𑀪𑀬𑀢𑁆𑀣𑁂𑀭𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀸𑀦𑀁. 𑀇𑀢𑀺 𑀧𑀼𑀘𑁆𑀙𑀺𑀁𑀲𑀼, 𑀢𑁂𑀲𑀜𑁆𑀘 𑀣𑁂𑀭𑀸𑀦𑀁 𑀯𑀸𑀤𑀁 𑀆𑀭𑁄𑀘𑁂𑀲𑀼𑀦𑁆𑀢𑀺 𑀬𑁄𑀚𑀦𑀸. 𑀣𑁂𑀭𑁄𑀢𑀺 𑀘𑀽𑀴𑀲𑀼𑀫𑀦𑀢𑁆𑀣𑁂𑀭𑁄. 𑀏𑀢𑀲𑁆𑀲𑀸𑀢𑀺 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀲𑁆𑀲. 𑀲𑀢𑁆𑀢𑀓𑁆𑀔𑀢𑁆𑀢𑀼𑀦𑁆𑀢𑀺 𑀲𑀢𑁆𑀢 𑀯𑀸𑀭𑁂. 𑀓𑀼𑀢𑁄𑀢𑀺 𑀓𑀲𑁆𑀲𑀸𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀸𑀯𑀓𑀸𑀮𑀺𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀢𑀲𑁆𑀫𑀸. 𑀆𑀫𑀺𑀲𑀚𑀸𑀢𑀺𑀓𑀁 𑀬𑀸𑀕𑀼𑀪𑀢𑁆𑀢𑀁 𑀯𑀸 𑀨𑀮𑀸𑀨𑀮𑀁 𑀯𑀸𑀢𑀺 𑀬𑁄𑀚𑀦𑀸. 𑀢𑀜𑁆𑀘 𑀔𑁄𑀢𑀺 𑀢𑀜𑁆𑀘 𑀲𑀫𑀢𑀺𑀢𑁆𑀣𑀺𑀓𑀁. 𑀇𑀢𑀭𑁂𑀦 𑀧𑀦𑀸𑀢𑀺 𑀦𑀸𑀥𑀺𑀝𑁆𑀞𑀸𑀦𑀼𑀧𑀕𑁂𑀦 𑀧𑀢𑁆𑀢𑁂𑀦 𑀧𑀦. 𑀬𑀁 𑀧𑀽𑀯𑀉𑀘𑁆𑀙𑀼𑀔𑀡𑁆𑀟𑀨𑀮𑀸𑀨𑀮𑀸𑀤𑀺 𑀳𑁂𑀝𑁆𑀞𑀸 𑀑𑀭𑁄𑀳𑀢𑀺, 𑀢𑀁 𑀧𑀽𑀯𑀉𑀘𑁆𑀙𑀼𑀔𑀡𑁆𑀟𑀨𑀮𑀸𑀨𑀮𑀸𑀤𑀻𑀢𑀺 𑀬𑁄𑀚𑀦𑀸. 𑀧𑀽𑀯𑀯𑀝𑀁𑀲𑀓𑁄𑀢𑀺 𑀏𑀢𑁆𑀣 𑀯𑀝𑀁𑀲𑀓𑁄𑀢𑀺 𑀉𑀢𑁆𑀢𑀁𑀲𑁄. 𑀲𑁄 𑀳𑀺 𑀉𑀤𑁆𑀥𑀁 𑀢𑀲𑀻𑀬𑀢𑁂 𑀅𑀮𑀗𑁆𑀓𑀭𑀻𑀬𑀢𑁂𑀢𑀺 𑀯𑀝𑀁𑀲𑁄𑀢𑀺 𑀯𑀼𑀘𑁆𑀘𑀢𑀺 𑀉𑀓𑀸𑀭𑀲𑁆𑀲 𑀯𑀓𑀸𑀭𑀁, 𑀢𑀓𑀸𑀭𑀲𑁆𑀲 𑀘 𑀝𑀓𑀸𑀭𑀁 𑀓𑀢𑁆𑀯𑀸, 𑀲𑁄𑀬𑁂𑀯 𑀯𑀝𑀁𑀲𑀓𑁄, 𑀫𑀼𑀤𑁆𑀥𑀦𑀺 𑀧𑀺𑀮𑀦𑁆𑀥𑀺𑀢𑁄 𑀏𑀓𑁄 𑀅𑀮𑀗𑁆𑀓𑀸𑀭𑀯𑀺𑀲𑁂𑀲𑁄. 𑀧𑀽𑀯𑀫𑁂𑀯 𑀢𑀁𑀲𑀤𑀺𑀲𑀢𑁆𑀢𑀸 𑀧𑀽𑀯𑀯𑀝𑀁𑀲𑀓𑁄, 𑀢𑀁. 𑀧𑀼𑀧𑁆𑀨𑀯𑀝𑀁𑀲𑀓𑁄 𑀘 𑀢𑀓𑁆𑀓𑁄𑀮𑀓𑀝𑀼𑀓𑀨𑀮𑀸𑀤𑀺𑀯𑀝𑀁𑀲𑀓𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄, 𑀢𑁂.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀦𑀦𑀼 𑀲𑀩𑁆𑀩𑀣𑀽𑀧𑀻𑀓𑀢𑁂𑀲𑀼 𑀧𑀝𑀺𑀕𑁆𑀕𑀳𑀡𑀲𑁆𑀲 𑀅𑀓𑀧𑁆𑀧𑀺𑀬𑀢𑁆𑀢𑀸 𑀧𑀭𑀺𑀪𑀼𑀜𑁆𑀚𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀢𑁆𑀣 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀣𑀽𑀧𑀻𑀓𑀢𑁂𑀲𑀽𑀢𑀺. 𑀢𑀢𑀺𑀬𑁄 𑀯𑀕𑁆𑀕𑁄.

𑁪. 𑀲𑀓𑁆𑀓𑀘𑁆𑀘𑀯𑀕𑁆𑀕-𑀅𑀢𑁆𑀣𑀬𑁄𑀚𑀦𑀸

𑁬𑁦𑁮. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂. 𑀑𑀥𑀺𑀦𑁆𑀢𑀺 𑀅𑀯𑀥𑀺𑀁 𑀫𑀭𑀺𑀬𑀸𑀤𑀁.

𑁬𑁧𑁦. 𑀣𑀽𑀧𑀓𑀢𑁄𑀢𑀺 𑀣𑀽𑀧𑀫𑁂𑀯 𑀣𑀽𑀧𑀓𑀁, 𑀢𑀢𑁄 𑀣𑀽𑀧𑀓𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀢𑁆𑀣𑀓𑀢𑁄’’𑀢𑀺.

𑁬𑁧𑁧. 𑀫𑀸𑀖𑀸𑀢𑀲𑀫𑀬𑀸𑀤𑀻𑀲𑀽𑀢𑀺 ‘‘𑀧𑀸𑀡𑁂 𑀫𑀸 𑀖𑀸𑀢𑁂𑀣𑀸’’𑀢𑀺 𑀭𑀸𑀚𑀸𑀦𑁄 𑀪𑁂𑀭𑀺𑀁 𑀘𑀭𑀸𑀧𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀫𑀸𑀖𑀸𑀢𑁄, 𑀲𑁄𑀬𑁂𑀯 𑀲𑀫𑀬𑁄 𑀫𑀸𑀖𑀸𑀢𑀲𑀫𑀬𑁄. 𑀆𑀤𑀺𑀲𑀤𑁆𑀤𑁂𑀦 𑀅𑀜𑁆𑀜𑀁 𑀧𑀝𑀺𑀘𑁆𑀙𑀦𑁆𑀦𑀓𑀸𑀭𑀡𑀁 𑀕𑀳𑁂𑀢𑀩𑁆𑀩𑀁.

𑁬𑁧𑁫. 𑀢𑁂𑀲𑀦𑁆𑀢𑀺 𑀫𑀬𑀽𑀭𑀡𑁆𑀟𑀓𑀼𑀓𑁆𑀓𑀼𑀝𑀡𑁆𑀟𑀸𑀦𑀦𑁆𑀢𑀺. 𑀘𑀢𑀼𑀢𑁆𑀣𑁄 𑀯𑀕𑁆𑀕𑁄.

𑁫. 𑀓𑀩𑀴𑀯𑀕𑁆𑀕-𑀅𑀢𑁆𑀣𑀬𑁄𑀚𑀦𑀸

𑁬𑁧𑁭. ‘‘𑀫𑀼𑀔𑀤𑁆𑀯𑀸𑀭’’𑀦𑁆𑀢𑀺 𑀓𑀫𑁆𑀫𑀲𑁆𑀲 ‘‘𑀅𑀦𑀸𑀳𑀝𑁂’’𑀢𑀺 𑀘 ‘‘𑀯𑀺𑀯𑀭𑀺𑀲𑁆𑀲𑀸𑀫𑀻’’𑀢𑀺 𑀘 𑀤𑁆𑀯𑀻𑀲𑀼 𑀓𑀺𑀭𑀺𑀬𑀸𑀲𑀼 𑀲𑀫𑁆𑀩𑀦𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀦𑀸𑀳𑀭𑀺𑀢𑁂 𑀫𑀼𑀔𑀤𑁆𑀯𑀸𑀭’’𑀦𑁆𑀢𑀺.

𑁬𑁧𑁮. 𑀲𑀓𑀮𑀁 𑀳𑀢𑁆𑀣𑀦𑁆𑀢𑀺 𑀧𑀜𑁆𑀘𑀗𑁆𑀕𑀼𑀮𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁬𑁧𑁯. 𑀲𑀓𑀩𑀴𑁂𑀦𑀸𑀢𑀺 𑀏𑀢𑁆𑀣 𑀓𑀩𑀴𑀲𑀤𑁆𑀤𑁂𑀦 𑀯𑀘𑀦𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀓𑀸𑀭𑀡𑀁 𑀲𑀩𑁆𑀩𑀫𑁆𑀧𑀺 𑀕𑀳𑁂𑀢𑀩𑁆𑀩𑀁.

𑁬𑁨𑁦. 𑀧𑀺𑀡𑁆𑀟𑀼𑀓𑁆𑀔𑁂𑀧𑀓𑀦𑁆𑀢𑀺𑀆𑀤𑀻𑀲𑀼 𑀯𑀺𑀘𑁆𑀙𑀢𑁆𑀣𑁂 𑀓𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀧𑀺𑀡𑁆𑀟𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺. 𑀢𑁆𑀯𑀸𑀲𑀤𑁆𑀤𑁂𑀦 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀺.

𑁬𑁨𑁪. ‘‘𑀅𑀯𑀓𑀺𑀭𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀲𑀺𑀢𑁆𑀣𑀸𑀯𑀓𑀸𑀭𑀓𑀦𑁆𑀢𑀺 𑀏𑀢𑁆𑀣 𑀅𑀯𑀧𑀼𑀩𑁆𑀩𑁄 𑀓𑀺𑀭𑀥𑀸𑀢𑀼𑀬𑁂𑀯, 𑀦 𑀓𑀭𑀥𑀸𑀢𑀽𑀢𑀺 𑀤𑀲𑁆𑀲𑁂𑀢𑀺.

𑁬𑁨𑁬. ‘‘𑀘𑀧𑀼𑀘𑀧𑀽’’𑀢𑀺 𑀏𑀯𑀁 𑀲𑀤𑁆𑀤𑀦𑁆𑀢𑀺 ‘‘𑀘𑀧𑀼𑀘𑀧𑀽’’𑀢𑀺 𑀏𑀯𑀁 𑀅𑀦𑀼𑀓𑀭𑀡𑀭𑀯𑀦𑁆𑀢𑀺. 𑀧𑀜𑁆𑀘𑀫𑁄 𑀯𑀕𑁆𑀕𑁄.

𑁬. 𑀲𑀼𑀭𑀼𑀲𑀼𑀭𑀼𑀯𑀕𑁆𑀕-𑀅𑀢𑁆𑀣𑀬𑁄𑀚𑀦𑀸

𑁬𑁨𑁭. ‘‘𑀲𑀼𑀭𑀼𑀲𑀼𑀭𑀽’’𑀢𑀺 𑀏𑀯𑀁 𑀲𑀤𑁆𑀤𑀦𑁆𑀢𑀺 ‘‘𑀲𑀼𑀭𑀼𑀲𑀼𑀭𑀽’’𑀢𑀺 𑀏𑀯𑀁 𑀅𑀦𑀼𑀓𑀭𑀡𑀭𑀯𑀁. 𑀤𑀯𑀦𑀁 𑀓𑀻𑀴𑀦𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑀢𑁆𑀣𑁂𑀦 𑀧𑀭𑀺𑀳𑀸𑀲𑁄 𑀤𑀯𑁄 𑀦𑀸𑀫𑀸𑀢𑀺 𑀆𑀳 ‘‘𑀤𑀯𑁄𑀢𑀺 𑀧𑀭𑀺𑀳𑀸𑀲𑀯𑀘𑀦’’𑀦𑁆𑀢𑀺. 𑀢𑀦𑁆𑀢𑀺 𑀲𑁄 𑀤𑀯𑁄. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀳𑁂𑀲. 𑀦 𑀓𑀸𑀢𑀩𑁆𑀩𑀁 𑀦 𑀓𑀸𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀺𑀮𑀓𑀩𑀼𑀤𑁆𑀥𑁄𑀢𑀺 𑀲𑀺𑀮𑀸𑀬 𑀓𑀢𑁄, 𑀲𑀺𑀮𑁂𑀦 𑀦𑀺𑀬𑀼𑀢𑁆𑀢𑁄 𑀯𑀸 𑀩𑀼𑀤𑁆𑀥𑁄. 𑀅𑀧𑀝𑀺𑀩𑀼𑀤𑁆𑀥𑁄𑀢𑀺 𑀅𑀧𑀝𑀺𑀯𑀺𑀤𑁆𑀥𑁄 𑀩𑀼𑀤𑁆𑀥𑁄, 𑀧𑀭𑀺𑀳𑀸𑀲𑀯𑀘𑀦𑀫𑁂𑀢𑀁. 𑀕𑁄𑀥𑀫𑁆𑀫𑁄𑀢𑀺 𑀕𑀼𑀦𑁆𑀦𑀁 𑀥𑀫𑁆𑀫𑁄. 𑀅𑀚𑀥𑀫𑁆𑀫𑁄𑀢𑀺 𑀅𑀚𑀸𑀦𑀁 𑀥𑀫𑁆𑀫𑁄. 𑀫𑀺𑀕𑀲𑀗𑁆𑀖𑁄𑀢𑀺 𑀫𑀺𑀕𑀸𑀦𑀁 𑀲𑀗𑁆𑀖𑁄. 𑀧𑀲𑀼𑀲𑀗𑁆𑀖𑁄𑀢𑀺 𑀧𑀲𑀽𑀦𑀁 𑀲𑀗𑁆𑀖𑁄.

𑁬𑁨𑁮. ‘‘𑀪𑀼𑀜𑁆𑀚𑀦𑁆𑀢𑁂𑀦𑀸’’𑀢𑀺 𑀧𑀤𑀁 ‘‘𑀦𑀺𑀮𑁆𑀮𑁂𑀳𑀺𑀢𑀼’’𑀦𑁆𑀢𑀺 𑀧𑀤𑁂 𑀪𑀸𑀯𑀓𑀢𑁆𑀢𑀸.

𑁬𑁩𑁧. 𑀏𑀯𑀁𑀦𑀸𑀫𑀓𑁂𑀢𑀺 ‘‘𑀓𑁄𑀓𑀦𑀼𑀤’’𑀦𑁆𑀢𑀺 𑀏𑀯𑀁 𑀦𑀸𑀫𑀁 𑀅𑀲𑁆𑀲 𑀧𑀸𑀲𑀸𑀤𑀲𑁆𑀲𑀸𑀢𑀺 𑀏𑀯𑀁𑀦𑀸𑀫𑀓𑁄, 𑀧𑀸𑀲𑀸𑀤𑁄, 𑀢𑀲𑁆𑀫𑀺𑀁. ‘‘𑀧𑀤𑀼𑀫𑀲𑀡𑁆𑀞𑀸𑀦𑁄’’𑀢𑀺 𑀇𑀫𑀺𑀦𑀸 𑀧𑀸𑀲𑀸𑀤𑀲𑁆𑀲 𑀲𑀤𑀺𑀲𑀽𑀧𑀘𑀸𑀭𑁂𑀦 ‘‘𑀓𑁄𑀓𑀦𑀼𑀤𑁄’’𑀢𑀺 𑀦𑀸𑀫𑀮𑀪𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀢𑀺 𑀧𑀤𑀼𑀫𑀲𑀡𑁆𑀞𑀸𑀦𑀢𑁆𑀢𑀸. 𑀅𑀲𑁆𑀲𑀸𑀢𑀺 𑀧𑀸𑀲𑀸𑀤𑀲𑁆𑀲. 𑀧𑀼𑀕𑁆𑀕𑀮𑀺𑀓𑀫𑁆𑀧𑀻𑀢𑀺 𑀧𑀭𑀧𑀼𑀕𑁆𑀕𑀮𑀲𑀦𑁆𑀢𑀓𑀁 𑀕𑀳𑁂𑀢𑀩𑁆𑀩𑀁 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑀫𑁆𑀧𑀻’’𑀢𑀺 𑀅𑀢𑁆𑀢𑀧𑀼𑀕𑁆𑀕𑀮𑀲𑀦𑁆𑀢𑀓𑀲𑁆𑀲 𑀯𑀺𑀲𑀼𑀁 𑀕𑀬𑁆𑀳𑀫𑀸𑀦𑀢𑁆𑀢𑀸. 𑀲𑀗𑁆𑀔𑀫𑁆𑀧𑀻𑀢𑀺 𑀧𑀸𑀦𑀻𑀬𑀲𑀗𑁆𑀔𑀫𑁆𑀧𑀺. 𑀲𑀭𑀸𑀯𑀫𑁆𑀧𑀻𑀢𑀺 𑀧𑀸𑀦𑀻𑀬𑀲𑀭𑀸𑀯𑀫𑁆𑀧𑀺. 𑀣𑀸𑀮𑀓𑀫𑁆𑀧𑀻𑀢𑀺 𑀧𑀸𑀦𑀻𑀬𑀣𑀸𑀮𑀓𑀫𑁆𑀧𑀺.

𑁬𑁩𑁨. ‘‘𑀉𑀤𑁆𑀥𑀭𑀺𑀢𑁆𑀯𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀯𑀘𑀦𑀲𑁆𑀲 𑀓𑀫𑁆𑀫𑀸𑀧𑀸𑀤𑀸𑀦𑀸𑀦𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀺𑀢𑁆𑀣𑀸𑀦𑀺 𑀉𑀤𑀓𑀢𑁄’’𑀢𑀺. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸𑀦𑀺 𑀓𑀢𑁆𑀯𑀸. 𑀩𑀳𑀻𑀢𑀺 𑀅𑀦𑁆𑀢𑀭𑀖𑀭𑀢𑁄 𑀩𑀳𑀺.

𑁬𑁩𑁪. 𑀲𑁂𑀢𑀘𑁆𑀙𑀢𑁆𑀢𑀦𑁆𑀢𑀺 𑀏𑀢𑁆𑀣 𑀲𑁂𑀢𑀲𑀤𑁆𑀤𑁄 𑀧𑀡𑁆𑀟𑀭𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀧𑀡𑁆𑀟𑀭𑀘𑁆𑀙𑀢𑁆𑀢’’𑀦𑁆𑀢𑀺. 𑀯𑀢𑁆𑀣𑀧𑀮𑀺𑀕𑀼𑀡𑁆𑀞𑀺𑀢𑀦𑁆𑀢𑀺 𑀯𑀢𑁆𑀣𑁂𑀳𑀺 𑀲𑀫𑀦𑁆𑀢𑀢𑁄 𑀯𑁂𑀞𑀺𑀢𑀁. 𑀲𑁂𑀢𑀁 𑀙𑀢𑁆𑀢𑀁 𑀲𑁂𑀢𑀘𑁆𑀙𑀢𑁆𑀢𑀁. 𑀓𑀺𑀴𑀜𑁆𑀚𑁂𑀳𑀺 𑀓𑀢𑀁 𑀙𑀢𑁆𑀢𑀁 𑀓𑀺𑀴𑀜𑁆𑀚𑀘𑁆𑀙𑀢𑁆𑀢𑀁. 𑀧𑀡𑁆𑀡𑁂𑀳𑀺 𑀓𑀢𑀁 𑀙𑀢𑁆𑀢𑀁 𑀧𑀡𑁆𑀡𑀘𑁆𑀙𑀢𑁆𑀢𑀁. 𑀫𑀡𑁆𑀟𑀮𑁂𑀦 𑀩𑀤𑁆𑀥𑀁 𑀫𑀡𑁆𑀟𑀮𑀩𑀤𑁆𑀥𑀁. 𑀲𑀮𑀸𑀓𑀸𑀳𑀺 𑀩𑀤𑁆𑀥𑀁 𑀲𑀮𑀸𑀓𑀩𑀤𑁆𑀥𑀁. 𑀢𑀸𑀦𑀻𑀢𑀺 𑀢𑀻𑀡𑀺 𑀙𑀢𑁆𑀢𑀸𑀦𑀺. 𑀳𑀻𑀢𑀺 𑀲𑀘𑁆𑀘𑀁. 𑀬𑀫𑁆𑀧𑀺 𑀏𑀓𑀧𑀡𑁆𑀡𑀘𑁆𑀙𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀏𑀢𑁂𑀲𑀽𑀢𑀺 𑀢𑀻𑀲𑀼 𑀙𑀢𑁆𑀢𑁂𑀲𑀼. 𑀅𑀲𑁆𑀲𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸. 𑀲𑁄𑀢𑀺 𑀬𑁄 𑀓𑁄𑀘𑀺 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸. 𑀙𑀢𑁆𑀢𑀧𑀸𑀤𑀼𑀓𑀸𑀬 𑀯𑀸𑀢𑀺 𑀙𑀢𑁆𑀢𑀤𑀡𑁆𑀟𑀦𑀺𑀓𑁆𑀔𑁂𑀧𑀦𑀸𑀬 𑀧𑀸𑀤𑀼𑀓𑀸𑀬 𑀯𑀸. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂.

𑁬𑁩𑁫. 𑀫𑀚𑁆𑀛𑀺𑀫𑀲𑁆𑀲𑀸𑀢𑀺 𑀧𑀫𑀸𑀡𑀫𑀚𑁆𑀛𑀺𑀫𑀲𑁆𑀲. ‘‘𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑁄’’𑀢𑀺𑀇𑀫𑀺𑀦𑀸 𑀘𑀢𑀼𑀳𑀢𑁆𑀣𑀢𑁄 𑀊𑀦𑀸𑀢𑀺𑀭𑁂𑀓𑁄 𑀤𑀡𑁆𑀟𑁄 𑀦 𑀤𑀡𑁆𑀟𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀤𑀡𑁆𑀟𑁄 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀯𑀘𑀦𑀢𑁆𑀣𑀁 𑀅𑀢𑀺𑀤𑀺𑀲𑀦𑁆𑀢𑁄 𑀆𑀳 ‘‘𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺.

𑁬𑁩𑁬. ‘‘𑀲𑀢𑁆𑀣𑀧𑀸𑀡𑀺𑀫𑁆𑀳𑀻’’𑀢𑀺 𑀏𑀢𑁆𑀣 𑀅𑀲𑀺 𑀏𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀅𑀲𑀺’’𑀦𑁆𑀢𑀺. 𑀅𑀲𑀺𑀦𑁆𑀢𑀺 𑀔𑀕𑁆𑀕𑀁.

𑁬𑁩𑁭. ‘‘𑀆𑀯𑀼𑀥𑀁 𑀦𑀸𑀫 𑀘𑀸𑀧𑁄 𑀓𑁄𑀤𑀡𑁆𑀟𑁄’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀯𑀘𑀦𑀁 𑀉𑀧𑀮𑀓𑁆𑀔𑀡𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀯𑀼𑀥𑀧𑀸𑀡𑀺𑀲𑁆𑀲𑀸𑀢𑀺 𑀏𑀢𑁆𑀣𑀸’’𑀢𑀺𑀆𑀤𑀺. 𑀲𑀩𑁆𑀩𑀸𑀧𑀺 𑀥𑀦𑀼𑀯𑀺𑀓𑀢𑀺 𑀆𑀯𑀼𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀅𑀲𑀺𑀁 𑀲𑀦𑁆𑀦𑀳𑀺𑀢𑁆𑀯𑀸 𑀞𑀺𑀢𑁄 𑀲𑀢𑁆𑀣𑀧𑀸𑀡𑀻𑀢𑀺 𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺, 𑀏𑀯𑀁 𑀥𑀦𑀼𑀁 𑀓𑀡𑁆𑀞𑁂 𑀧𑀝𑀺𑀫𑀼𑀓𑁆𑀓𑁄 𑀆𑀯𑀼𑀥𑀧𑀸𑀡𑀻𑀢𑀺 𑀆𑀳 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺, 𑀇𑀫𑀺𑀦𑀸 𑀆𑀯𑀼𑀥𑁄 𑀧𑀸𑀡𑀺𑀦𑀸 𑀕𑀳𑀺𑀢𑁄𑀬𑁂𑀯 𑀆𑀯𑀼𑀥𑀧𑀸𑀡𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀻𑀢𑀺. 𑀙𑀝𑁆𑀞𑁄 𑀯𑀕𑁆𑀕𑁄.

𑁭. 𑀧𑀸𑀤𑀼𑀓𑀯𑀕𑁆𑀕-𑀅𑀢𑁆𑀣𑀬𑁄𑀚𑀦𑀸

𑁬𑁩𑁮. 𑀅𑀗𑁆𑀕𑀼𑀮𑀦𑁆𑀢𑀭𑀦𑁆𑀢𑀺 𑀧𑀸𑀤𑀗𑁆𑀕𑀼𑀮𑀯𑀺𑀯𑀭𑀁. 𑀧𑀸𑀤𑀼𑀓𑀦𑁆𑀢𑀺 𑀉𑀧𑀸𑀳𑀦𑀯𑀺𑀲𑁂𑀲𑁄. 𑀲𑁄 𑀳𑀺 𑀧𑀚𑁆𑀚𑀢𑁂 𑀇𑀫𑀸𑀬𑀸𑀢𑀺 𑀧𑀸𑀤𑀼𑀓𑀸𑀢𑀺 𑀯𑀼𑀘𑁆𑀘𑀢𑀺, 𑀲𑀸 𑀩𑀳𑀼𑀧𑀝𑀮𑀸 𑀘𑀫𑁆𑀫𑀫𑀬𑀸 𑀯𑀸 𑀳𑁄𑀢𑀺 𑀓𑀝𑁆𑀞𑀫𑀬𑀸 𑀯𑀸. 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀧𑀸𑀤𑀼𑀓𑀁 𑀧𑀝𑀺𑀫𑀼𑀜𑁆𑀘𑀻𑀢𑁆𑀯𑀸.

𑁬𑁪𑁦. 𑀤𑁆𑀯𑀻𑀳𑀺 𑀚𑀦𑁂𑀳𑀺 𑀕𑀳𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀁𑀲𑁂𑀦𑀸𑀢𑀺 𑀯𑁂𑀡𑀼𑀦𑀸, 𑀬𑀸𑀦𑁂 𑀦𑀺𑀲𑀺𑀦𑁆𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 𑀯𑀺𑀧𑀢𑁆𑀢𑀺𑀁 𑀓𑀭𑀺𑀢𑁆𑀯𑀸. 𑀤𑁆𑀯𑁂𑀧𑀻𑀢𑀺 𑀥𑀫𑁆𑀫𑀓𑀣𑀺𑀓𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀲𑀗𑁆𑀔𑀸𑀢𑀸 𑀉𑀪𑁄𑀧𑀺 𑀚𑀦𑀸. 𑀯𑀝𑁆𑀝𑀢𑀻𑀢𑀺 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺.

𑁬𑁪𑁧. 𑀲𑀬𑀦𑀕𑀢𑀲𑁆𑀲𑀸𑀢𑀺 𑀲𑀬𑀦𑀁 𑀕𑀢𑀲𑁆𑀲, 𑀲𑀬𑀦𑁂 𑀦𑀺𑀧𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦𑀺𑀧𑀦𑁆𑀦𑀲𑁆𑀲 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁪𑁨. 𑀢𑀻𑀲𑀼 𑀧𑀮𑁆𑀮𑀢𑁆𑀣𑀺𑀓𑀸𑀲𑀼 𑀬𑀸𑀬 𑀓𑀸𑀬𑀘𑀺 𑀧𑀮𑁆𑀮𑀢𑁆𑀣𑀺𑀓𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀮𑁆𑀮𑀢𑁆𑀣𑀺𑀓𑀸𑀬𑀸’’𑀢𑀺𑀆𑀤𑀺.

𑁬𑁪𑁩. 𑀬𑀣𑀸 𑀯𑁂𑀞𑀺𑀬𑀫𑀸𑀦𑁂 𑀓𑁂𑀲𑀦𑁆𑀢𑁄 𑀦 𑀤𑀺𑀲𑁆𑀲𑀢𑀺, 𑀏𑀯𑀁 𑀯𑁂𑀞𑀺𑀢𑀲𑀻𑀲𑀲𑁆𑀲𑀸𑀢𑀺 𑀬𑁄𑀚𑀦𑀸.

𑁬𑁪𑁭. 𑀙𑀧𑀓𑀲𑀤𑁆𑀤𑀲𑁆𑀲 𑀘 𑀘𑀡𑁆𑀟𑀸𑀮𑀲𑀤𑁆𑀤𑀲𑁆𑀲 𑀘 𑀯𑁂𑀯𑀘𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀘𑀡𑁆𑀟𑀸𑀮𑀲𑁆𑀲𑀸’’𑀢𑀺. 𑀘𑀡𑁆𑀟𑀸𑀮𑁄 𑀳𑀺 𑀲𑀁 𑀲𑀼𑀦𑀔𑀁 𑀧𑀘𑀢𑀻𑀢𑀺 𑀙𑀧𑀓𑁄𑀢𑀺 𑀯𑀼𑀘𑁆𑀘𑀢𑀺 𑀲𑀓𑀸𑀭𑀲𑁆𑀲 𑀙𑀓𑀸𑀭𑀁 𑀓𑀢𑁆𑀯𑀸. 𑀙𑀧𑀓𑀲𑁆𑀲 𑀏𑀲𑀸 𑀙𑀧𑀓𑀻, 𑀘𑀡𑁆𑀟𑀸𑀮𑀪𑀭𑀺𑀬𑀸. 𑀬𑀢𑁆𑀭𑀸𑀢𑀺 𑀏𑀢𑁆𑀣 𑀢𑁆𑀭𑀧𑀘𑁆𑀘𑀬𑁄 𑀧𑀘𑁆𑀘𑀢𑁆𑀢𑁂 𑀳𑁄𑀢𑀻𑀢𑀺 𑀆𑀳 ‘‘𑀬𑁄 𑀳𑀺 𑀦𑀸𑀫𑀸’’𑀢𑀺. 𑀬𑁄 𑀭𑀸𑀚𑀸 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀦𑁆𑀢𑀁 𑀧𑀭𑀺𑀬𑀸𑀧𑀼𑀡𑀺𑀲𑁆𑀲𑀢𑀺 𑀦𑀸𑀫, 𑀅𑀬𑀁 𑀭𑀸𑀚𑀸 𑀬𑀸𑀯 𑀅𑀢𑀺𑀯𑀺𑀬 𑀅𑀥𑀫𑁆𑀫𑀺𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀩𑁆𑀩𑀫𑀺𑀤’’𑀦𑁆𑀢𑀺 𑀅𑀬𑀁 𑀲𑀤𑁆𑀤𑁄 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄𑀢𑀺 𑀆𑀳 ‘‘𑀲𑀩𑁆𑀩𑁄 𑀅𑀬’’𑀦𑁆𑀢𑀺. ‘‘𑀮𑁄𑀓𑁄’’𑀢𑀺 𑀇𑀫𑀺𑀦𑀸 𑀇𑀥𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀘𑀭𑀺𑀫𑀲𑀤𑁆𑀤𑁄 𑀅𑀦𑁆𑀢𑀺𑀫𑀧𑀭𑀺𑀬𑀸𑀬𑁄. 𑀅𑀦𑁆𑀢𑀺𑀫𑁄𑀢𑀺 𑀘 𑀮𑀸𑀫𑀓𑁄. 𑀮𑀸𑀫𑀓𑁄𑀢𑀺 𑀘 𑀦𑀸𑀫 𑀇𑀥 𑀯𑀺𑀧𑀢𑁆𑀢𑀻𑀢𑀺 𑀆𑀳 ‘‘𑀲𑀗𑁆𑀓𑀭’’𑀦𑁆𑀢𑀺. 𑀲𑀗𑁆𑀓𑀭𑀦𑁆𑀢𑀺 𑀯𑀺𑀧𑀢𑁆𑀢𑀺𑀁. ‘‘𑀦𑀺𑀫𑁆𑀫𑀭𑀺𑀬𑀸𑀤𑁄’’𑀢𑀺 𑀇𑀫𑀺𑀦𑀸 ‘‘𑀲𑀗𑁆𑀓𑀭𑀁 𑀕𑀢𑁄’’𑀢𑀺 𑀧𑀤𑀸𑀦𑀁 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀘𑀭𑀺𑀫𑀁 𑀕𑀢𑀁 𑀘𑀭𑀺𑀫𑀕𑀢𑀁, 𑀲𑀩𑁆𑀩𑁄 𑀅𑀬𑀁 𑀮𑁄𑀓𑁄 𑀘𑀭𑀺𑀫𑀕𑀢𑁄𑀢𑀺 𑀅𑀢𑁆𑀣𑁄. 𑀇𑀥 𑀘 𑀚𑀸𑀢𑀓𑁂 (𑀚𑀸. 𑁧.𑁪.𑁩𑁩) 𑀘 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀘𑀫𑀭𑀺𑀓𑀢’’𑀦𑁆𑀢𑀺 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀅𑀬𑀼𑀢𑁆𑀢𑁄𑀬𑁂𑀯. 𑀢𑀢𑁆𑀣𑁂𑀯𑀸𑀢𑀺 𑀅𑀫𑁆𑀩𑀭𑀼𑀓𑁆𑀔𑀫𑀽𑀮𑁂𑀬𑁂𑀯. 𑀢𑁂𑀲𑀦𑁆𑀢𑀺 𑀭𑀸𑀚𑀩𑁆𑀭𑀸𑀳𑁆𑀫𑀡𑀸𑀦𑀁.

𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀕𑀸𑀣𑀸𑀬𑀁. 𑀧𑀸𑀴𑀺𑀬𑀸𑀢𑀺 𑀅𑀢𑁆𑀢𑀦𑁄 𑀆𑀘𑀸𑀭𑀧𑀓𑀸𑀲𑀓𑀕𑀦𑁆𑀣𑀲𑀗𑁆𑀔𑀸𑀢𑀸𑀬 𑀧𑀸𑀴𑀺𑀬𑀸. 𑀦 𑀧𑀲𑁆𑀲𑀭𑁂𑀢𑀺 𑀏𑀢𑁆𑀣 𑀭𑁂𑀲𑀤𑁆𑀤𑁄 𑀅𑀦𑁆𑀢𑀺𑀲𑁆𑀲 𑀓𑀸𑀭𑀺𑀬𑁄𑀢𑀺 𑀆𑀳 ‘‘𑀦 𑀧𑀲𑁆𑀲𑀦𑁆𑀢𑀻’’𑀢𑀺. 𑀬𑁄 𑀘𑀸𑀬𑀦𑁆𑀢𑀺 𑀬𑁄 𑀘 𑀅𑀬𑀁. 𑀅𑀬𑀁𑀲𑀤𑁆𑀤𑁄 𑀧𑀤𑀸𑀮𑀗𑁆𑀓𑀸𑀭𑀫𑀢𑁆𑀢𑁄, 𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀢𑁆𑀣𑁄. 𑀅𑀥𑀻𑀬𑀢𑀻𑀢𑀺 𑀅𑀚𑁆𑀛𑀸𑀬𑀢𑀺, 𑀲𑀺𑀓𑁆𑀔𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁄𑀢𑀺 𑀩𑁄𑀥𑀺𑀲𑀢𑁆𑀢𑁂𑀦 𑀯𑀼𑀢𑁆𑀢𑀕𑀸𑀣𑀸𑀢𑁄 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀕𑀸𑀣𑀸𑀬. 𑀪𑁄𑀢𑀺 𑀩𑁄𑀥𑀺𑀲𑀢𑁆𑀢𑀁 𑀆𑀫𑀦𑁆𑀢𑁂𑀢𑀺. ‘‘𑀪𑀼𑀢𑁆𑀢𑁄’’𑀢𑀺 𑀧𑀤𑀲𑁆𑀲 𑀓𑀫𑁆𑀫𑀯𑀸𑀘𑀓𑀪𑀸𑀯𑀫𑀸𑀯𑀺𑀓𑀸𑀢𑀼𑀁 𑀯𑀼𑀢𑁆𑀢𑀁 ‘‘𑀫𑀬𑀸’’𑀢𑀺. 𑀅𑀲𑁆𑀲𑀸𑀢𑀺 𑀑𑀤𑀦𑀲𑁆𑀲. 𑀇𑀫𑀺𑀦𑀸 𑀲𑀼𑀘𑀺 𑀧𑀭𑀺𑀲𑀼𑀤𑁆𑀥𑀁 𑀫𑀁𑀲𑀁 𑀲𑀼𑀘𑀺𑀫𑀁𑀲𑀁, 𑀢𑁂𑀦 𑀉𑀧𑀲𑁂𑀘𑀦𑀫𑀲𑁆𑀲𑀸𑀢𑀺 𑀲𑀼𑀘𑀺𑀫𑀁𑀲𑀽𑀧𑀲𑁂𑀘𑀦𑁄𑀢𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀥𑀫𑁆𑀫𑁂𑀢𑀺 𑀆𑀘𑀸𑀭𑀥𑀫𑁆𑀫𑁂. 𑀩𑀤𑁆𑀥𑁄 𑀳𑀼𑀢𑁆𑀯𑀸𑀢𑀺 𑀣𑀤𑁆𑀥𑁄 𑀳𑀼𑀢𑁆𑀯𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀯𑀡𑁆𑀡𑀲𑀤𑁆𑀤𑀲𑁆𑀲 𑀲𑀡𑁆𑀞𑀸𑀦𑀸𑀤𑀺𑀓𑁂 𑀅𑀜𑁆𑀜𑁂 𑀅𑀢𑁆𑀣𑁂 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀲𑀢𑁆𑀣𑁄’’𑀢𑀺. 𑀣𑁄𑀫𑀺𑀢𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀅𑀣𑀸𑀢𑀺 𑀅𑀦𑀦𑁆𑀢𑀭𑁂. 𑀦𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀁. 𑀢𑀲𑁆𑀲𑀸𑀢𑀺 𑀕𑀸𑀣𑀸𑀤𑁆𑀯𑀬𑀲𑁆𑀲. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀧𑀼𑀭𑁄𑀳𑀺𑀢𑀁 𑀆𑀮𑀧𑀢𑀺. 𑀲𑀫𑁆𑀧𑀢𑀻𑀢𑀺 𑀲𑀦𑁆𑀤𑀻𑀝𑁆𑀞𑀺𑀓𑁂. ‘‘𑀬𑀸 𑀯𑀼𑀢𑁆𑀢𑀺 𑀯𑀺𑀦𑀺𑀧𑀸𑀢𑁂𑀦, 𑀅𑀥𑀫𑁆𑀫𑀘𑀭𑀡𑁂𑀦 𑀯𑀸’’𑀢𑀺 𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀦𑀺𑀧𑁆𑀧𑀚𑁆𑀚𑀢𑀻’’𑀢𑀺.

𑀫𑀳𑀸𑀩𑁆𑀭𑀳𑁆𑀫𑁂𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀲𑀤𑁆𑀤𑁄 𑀩𑁆𑀭𑀸𑀳𑁆𑀫𑀡𑀯𑀸𑀘𑀓𑁄𑀢𑀺 𑀆𑀳 ‘‘𑀫𑀳𑀸𑀩𑁆𑀭𑀸𑀳𑁆𑀫𑀡𑀸’’𑀢𑀺. 𑀅𑀜𑁆𑀜𑁂𑀧𑀻𑀢𑀺 𑀭𑀸𑀚𑀩𑁆𑀭𑀸𑀳𑁆𑀫𑀡𑁂𑀳𑀺 𑀅𑀧𑀭𑁂𑀧𑀺. ‘‘𑀧𑀘𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀅𑀯𑀺𑀦𑀸𑀪𑀸𑀯𑀢𑁄 ‘‘𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀅𑀢𑁆𑀣𑁄𑀧𑀺 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀧𑀘𑀦𑁆𑀢𑀺 𑀘𑁂𑀯 𑀪𑀼𑀜𑁆𑀚𑀦𑁆𑀢𑀺 𑀘𑀸’’𑀢𑀺. ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺𑀦𑀸 𑀅𑀜𑁆𑀜𑁂𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑀲𑁆𑀲 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀢𑁆𑀯𑀁 𑀆𑀘𑀭𑀺𑀲𑁆𑀲𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀦 𑀢𑁆𑀯𑀦𑁆𑀢𑀺 𑀢𑀁, 𑀉𑀧𑀬𑁄𑀕𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, ‘‘𑀫𑀸 𑀪𑀺𑀤𑀸’’𑀢𑀺𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. ‘‘𑀧𑀸𑀲𑀸𑀡𑁄’’𑀢𑀺𑀇𑀫𑀺𑀦𑀸 𑀅𑀲𑁆𑀫𑀲𑀤𑁆𑀤𑁄 𑀧𑀸𑀲𑀸𑀡𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀢𑀺 𑀪𑀺𑀦𑁆𑀤𑀦𑀳𑁂𑀢𑀼𑀦𑀸.

𑁬𑁪𑁮. 𑀅𑀢𑁆𑀢𑀦𑁄 𑀓𑀗𑁆𑀔𑀸𑀞𑀸𑀦𑀲𑁆𑀲 𑀧𑀼𑀘𑁆𑀙𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦 𑀓𑀣𑁂𑀢𑀩𑁆𑀩’’𑀦𑁆𑀢𑀺.

𑁬𑁪𑁯. 𑀲𑀫𑀥𑀼𑀭𑁂𑀦𑀸𑀢𑀺 𑀲𑀫𑀁 𑀥𑀼𑀭𑁂𑀦, 𑀲𑀫𑀁 𑀫𑀼𑀔𑁂𑀦𑀸𑀢𑀺 𑀅𑀢𑁆𑀣𑁄.

𑁬𑁫𑁨. 𑀬𑀁 𑀫𑀽𑀮𑀁 𑀯𑀸 𑀬𑀸 𑀲𑀸𑀔𑀸 𑀯𑀸 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀔𑀦𑁆𑀥𑁂𑀢𑀺 𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁂. 𑀦𑀺𑀓𑁆𑀔𑀫𑀢𑀻𑀢𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀦𑀺𑀓𑁆𑀔𑀫𑀢𑀺. 𑀢𑀺𑀡𑀡𑁆𑀟𑀼𑀧𑀓𑀦𑁆𑀢𑀺 𑀢𑀺𑀡𑁂𑀦 𑀓𑀢𑀁, 𑀢𑀺𑀡𑀫𑀬𑀁 𑀯𑀸 𑀅𑀡𑁆𑀟𑀼𑀧𑀓𑀁. 𑀏𑀢𑁆𑀣𑀸𑀢𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀔𑁂𑀴𑁂𑀲𑀼.

𑁬𑁫𑁩. 𑀅𑀥𑀺𑀧𑁆𑀧𑁂𑀢𑀉𑀤𑀓𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀭𑀺𑀪𑁄𑀕𑀉𑀤𑀓𑀫𑁂𑀯𑀸’’𑀢𑀺. 𑀲𑀢𑁆𑀢𑀫𑁄 𑀯𑀕𑁆𑀕𑁄.

𑀏𑀢𑁆𑀣𑀸𑀢𑀺 𑀲𑁂𑀔𑀺𑀬𑁂𑀲𑀼. 𑀲𑀽𑀧𑀩𑁆𑀬𑀜𑁆𑀚𑀦𑀧𑀝𑀺𑀘𑁆𑀙𑀸𑀤𑀦𑁂𑀢𑀺 𑀲𑀽𑀧𑀩𑁆𑀬𑀜𑁆𑀚𑀦𑁂 𑀑𑀤𑀦𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀲𑀫𑀢𑁆𑀢𑀸 𑀲𑁂𑀔𑀺𑀬𑀸.

𑁮. 𑀲𑀢𑁆𑀢𑀸𑀥𑀺𑀓𑀭𑀡𑀲𑀫𑀣-𑀅𑀢𑁆𑀣𑀬𑁄𑀚𑀦𑀸

𑁬𑁫𑁫. 𑀲𑀗𑁆𑀔𑁆𑀬𑀁 𑀧𑀭𑀺𑀘𑁆𑀙𑀺𑀚𑁆𑀚𑀢𑀻𑀢𑀺 𑀲𑀗𑁆𑀔𑁆𑀬𑀸𑀧𑀭𑀺𑀘𑁆𑀙𑁂𑀤𑁄. 𑀢𑁂𑀲𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀸𑀦𑀫𑀥𑀺𑀓𑀭𑀡𑀸𑀦𑀁. 𑀢𑀲𑁆𑀲𑀸𑀢𑀺 𑀢𑁂𑀲𑀁 𑀔𑀦𑁆𑀥𑀓𑀧𑀭𑀺𑀯𑀸𑀭𑀸𑀦𑀁. 𑀢𑀢𑁆𑀣𑁂𑀯𑀸𑀢𑀺 𑀢𑁂𑀲𑀼 𑀏𑀯 𑀔𑀦𑁆𑀥𑀓𑀧𑀭𑀺𑀯𑀸𑀭𑁂𑀲𑀼. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺.

𑀇𑀢𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬

𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬 𑀬𑁄𑀚𑀦𑀸 𑀲𑀫𑀢𑁆𑀢𑀸.

𑀚𑀸𑀤𑀺𑀮𑀜𑁆𑀙𑀺𑀢𑀦𑀸𑀫𑁂𑀦 𑀦𑁂𑀓𑀸𑀦𑀁 𑀯𑀸𑀘𑀺𑀢𑁄 𑀫𑀬𑀸.

𑀲𑀸𑀥𑀼𑀁 𑀫𑀳𑀸𑀯𑀺𑀪𑀗𑁆𑀕𑀲𑁆𑀲, 𑀲𑀫𑀢𑁆𑀢𑁄 𑀬𑁄𑀚𑀦𑀸𑀦𑀬𑁄𑀢𑀺.