𑁮. 𑀲𑀳𑀥𑀫𑁆𑀫𑀺𑀓𑀯𑀕𑁆𑀕𑁄

𑁧. 𑀲𑀳𑀥𑀫𑁆𑀫𑀺𑀓𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑁪𑁩𑁪. 𑀲𑀳𑀥𑀫𑁆𑀫𑀺𑀓𑀯𑀕𑁆𑀕𑀲𑁆𑀲 𑀧𑀞𑀫𑁂 𑀬𑀦𑁆𑀢𑀺 𑀬𑀁 𑀧𑀜𑁆𑀜𑀢𑁆𑀢𑀁. ‘‘𑀲𑀺𑀓𑁆𑀔𑀫𑀸𑀦𑁂𑀦𑀸’’𑀢𑀺 𑀏𑀢𑁆𑀣 𑀫𑀸𑀦𑀧𑀘𑁆𑀘𑀬𑀲𑁆𑀲 𑀅𑀦𑀸𑀕𑀢𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀺𑀓𑁆𑀔𑀺𑀢𑀼𑀓𑀸𑀫𑁂𑀦𑀸’’𑀢𑀺. ‘‘𑀲𑀺𑀓𑁆𑀔𑀫𑀸𑀦𑁂𑀦𑀸’’𑀢𑀺𑀧𑀤𑀁 ‘‘𑀪𑀺𑀓𑁆𑀔𑀼𑀦𑀸’’𑀢𑀺𑀧𑀤𑁂 𑀏𑀯 𑀦 𑀓𑁂𑀯𑀮𑀁 𑀓𑀸𑀭𑀓𑀯𑀺𑀲𑁂𑀲𑀦𑀁 𑀳𑁄𑀢𑀺, 𑀅𑀣 𑀔𑁄 ‘‘𑀅𑀜𑁆𑀜𑀸𑀢𑀩𑁆𑀩’’𑀦𑁆𑀢𑀺𑀆𑀤𑀺𑀧𑀤𑁂𑀲𑀼𑀧𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑀼𑀢𑁆𑀯𑀸’’𑀢𑀺. 𑀧𑀤𑀢𑁆𑀣𑀢𑁄𑀢𑀺 𑀧𑀤𑀢𑁄 𑀘 𑀅𑀢𑁆𑀣𑀢𑁄 𑀘, 𑀧𑀤𑀸𑀦𑀁 𑀅𑀢𑁆𑀣𑀢𑁄 𑀯𑀸𑀢𑀺. 𑀧𑀞𑀫𑀁.

𑁨. 𑀯𑀺𑀮𑁂𑀔𑀦𑀲𑀺𑀓𑁆𑀔𑀸𑀧𑀤𑀁

𑁪𑁩𑁮. 𑀤𑀼𑀢𑀺𑀬𑁂 𑀯𑀺𑀦𑀬𑁂 𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀯𑀺𑀦𑀬𑀓𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀬𑀓𑀣𑀸 𑀦𑀸𑀫𑀸’’𑀢𑀺𑀆𑀤𑀺. 𑀢𑀦𑁆𑀢𑀺 𑀯𑀺𑀦𑀬𑀓𑀣𑀁. 𑀧𑀤𑀪𑀸𑀚𑀦𑁂𑀦 𑀯𑀡𑁆𑀡𑀦𑀸 𑀯𑀺𑀦𑀬𑀲𑁆𑀲 𑀯𑀡𑁆𑀡𑁄 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀯𑀺𑀦𑀬𑀲𑁆𑀲 𑀯𑀡𑁆𑀡𑀁. 𑀧𑀭𑀺𑀬𑀸𑀧𑀼𑀡𑀦𑀁 𑀧𑀭𑀺𑀬𑀢𑁆𑀢𑀺, 𑀯𑀺𑀦𑀬𑀲𑁆𑀲 𑀧𑀭𑀺𑀬𑀢𑁆𑀢𑀺 𑀯𑀺𑀦𑀬𑀧𑀭𑀺𑀬𑀢𑁆𑀢𑀺, 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀲𑀗𑁆𑀔𑀸𑀢𑀁 𑀫𑀽𑀮𑀫𑀲𑁆𑀲 𑀯𑀡𑁆𑀡𑀲𑁆𑀲𑀸𑀢𑀺 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀫𑀽𑀮𑀓𑁄, 𑀢𑀁. 𑀯𑀺𑀦𑀬𑀥𑀭𑁄 𑀮𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀢𑁂 𑀲𑀩𑁆𑀩𑁂 𑀪𑀕𑀯𑀸 𑀪𑀸𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁.

𑀅𑀲𑁆𑀲𑀸𑀢𑀺 𑀯𑀺𑀦𑀬𑀥𑀭𑀲𑁆𑀲. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀅𑀮𑀚𑁆𑀚𑀺𑀢𑀸𑀢𑀺𑀆𑀤𑀻𑀲𑀼 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀅𑀮𑀚𑁆𑀚𑀺𑀢𑀸𑀬𑀸𑀢𑀺 𑀳𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀣𑀁 𑀅𑀮𑀚𑁆𑀚𑀺𑀢𑀸𑀬𑀸’’𑀢𑀺𑀆𑀤𑀺. 𑀘𑀸𑀢𑀺 𑀲𑀘𑁆𑀘𑀁. ‘‘𑀲𑀜𑁆𑀘𑀺𑀘𑁆𑀘𑀸’’𑀢𑀺 𑀧𑀤𑀁 𑀢𑀻𑀲𑀼 𑀯𑀸𑀓𑁆𑀬𑁂𑀲𑀼 𑀬𑁄𑀚𑁂𑀢𑀩𑁆𑀩𑀁. 𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀧𑀭𑀺𑀕𑀽𑀳𑀢𑀺, 𑀲𑀜𑁆𑀘𑀺𑀘𑁆𑀘 𑀅𑀕𑀢𑀺𑀕𑀫𑀦𑀜𑁆𑀘 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀫𑀦𑁆𑀤𑁄𑀢𑀺 𑀩𑀸𑀮𑁄. 𑀫𑁄𑀫𑀽𑀳𑁄𑀢𑀺 𑀅𑀢𑀺𑀲𑀫𑁆𑀫𑀽𑀴𑁆𑀳𑁄. 𑀯𑀺𑀭𑀸𑀥𑁂𑀢𑀻𑀢𑀺 𑀯𑀺𑀭𑀚𑁆𑀛𑀸𑀧𑁂𑀢𑀺. 𑀓𑀼𑀓𑁆𑀓𑀼𑀘𑁆𑀘𑁂 𑀉𑀧𑁆𑀧𑀦𑁆𑀦𑁂𑀢𑀺 ‘‘𑀓𑀧𑁆𑀧𑀢𑀺 𑀦𑀼 𑀔𑁄, 𑀦𑁄’’𑀢𑀺 𑀯𑀺𑀦𑀬𑀓𑀼𑀓𑁆𑀓𑀼𑀘𑁆𑀘𑁂 𑀉𑀧𑁆𑀧𑀦𑁆𑀦𑁂. 𑀅𑀬𑀁 𑀧𑀦𑀸𑀢𑀺 𑀅𑀬𑀁 𑀧𑀼𑀕𑁆𑀕𑀮𑁄 𑀧𑀦 𑀯𑀻𑀢𑀺𑀓𑁆𑀓𑀫𑀢𑀺𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀘𑁆𑀙𑀫𑀁𑀲𑁂𑀦 𑀲𑀽𑀓𑀭𑀫𑀁𑀲𑀲𑁆𑀲 𑀯𑀡𑁆𑀡𑀲𑀡𑁆𑀞𑀸𑀦𑁂𑀦 𑀲𑀤𑀺𑀲𑀢𑁆𑀢𑀸, 𑀤𑀻𑀧𑀺𑀫𑀁𑀲𑁂𑀦 𑀘 𑀫𑀺𑀕𑀫𑀁𑀲𑀲𑁆𑀲 𑀲𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀘𑁆𑀙𑀫𑀁𑀲𑀁 𑀲𑀽𑀓𑀭𑀫𑀁𑀲’’𑀦𑁆𑀢𑀺𑀆𑀤𑀺.

𑀆𑀧𑀢𑁆𑀢𑀺𑀁𑀘 𑀲𑀢𑀺𑀲𑀫𑁆𑀫𑁄𑀲𑀸𑀬𑀸𑀢𑀺 𑀏𑀢𑁆𑀣 𑀘𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀸𑀓𑁆𑀬𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀓𑀢𑁆𑀢𑀩𑁆𑀩𑀜𑁆𑀘 𑀦 𑀳𑀺 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀏𑀯𑀁 𑀅𑀯𑀺𑀦𑀬𑀥𑀭𑀲𑁆𑀲 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀦𑀬𑀥𑀭𑀲𑁆𑀲 𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀬𑀥𑀭𑁄 𑀧𑀦𑀸’’𑀢𑀺𑀆𑀤𑀺. 𑀲𑁄𑀢𑀺 𑀯𑀺𑀦𑀬𑀥𑀭𑁄. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀧𑀭𑀽𑀧𑀯𑀸𑀤𑀦𑁆𑀢𑀺 𑀧𑀭𑁂𑀲𑀁 𑀉𑀧𑀯𑀸𑀤𑀁. 𑀲𑀼𑀤𑁆𑀥𑀦𑁆𑀢𑁂𑀢𑀺 𑀲𑀼𑀤𑁆𑀥𑀲𑁆𑀲 𑀓𑁄𑀝𑁆𑀞𑀸𑀲𑁂. 𑀢𑀢𑁄𑀢𑀺 𑀧𑀢𑀺𑀝𑁆𑀞𑀸𑀦𑀢𑁄 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀯𑀺𑀦𑀬𑀥𑀭𑀲𑁆𑀲. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁. 𑀅𑀲𑁆𑀲𑀸𑀢𑀺 𑀯𑀺𑀦𑀬𑀥𑀭𑀲𑁆𑀲. 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸𑀦𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑁂𑀦 𑀅𑀪𑀺𑀪𑀽𑀢𑀸𑀦𑀁. 𑀲𑁄𑀢𑀺 𑀯𑀺𑀦𑀬𑀥𑀭𑁄. 𑀢𑁂𑀳𑀻𑀢𑀺 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑁂𑀳𑀺. 𑀲𑀗𑁆𑀖𑀫𑀚𑁆𑀛𑁂 𑀓𑀣𑁂𑀦𑁆𑀢𑀲𑁆𑀲 𑀅𑀯𑀺𑀦𑀬𑀥𑀭𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀢𑀦𑁆𑀢𑀺 𑀪𑀬𑀁 𑀲𑀸𑀭𑀚𑁆𑀚𑀁.

𑀧𑀝𑀺𑀧𑀓𑁆𑀔𑀁, 𑀧𑀝𑀺𑀯𑀺𑀭𑀼𑀤𑁆𑀥𑀁 𑀯𑀸 𑀅𑀢𑁆𑀣𑀬𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀧𑀘𑁆𑀘𑀢𑁆𑀣𑀻𑀓𑀸, 𑀡𑁆𑀬𑀲𑀤𑁆𑀤𑁄 𑀩𑀳𑀼𑀮𑀁 𑀓𑀢𑁆𑀢𑀸𑀪𑀺𑀥𑀸𑀬𑀓𑁄, 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀺𑀓𑀸 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸. 𑀢𑀢𑁆𑀣𑀸𑀢𑀺 𑀤𑀼𑀯𑀺𑀥𑁂𑀲𑀼 𑀧𑀘𑁆𑀘𑀢𑁆𑀣𑀺𑀓𑁂𑀲𑀼. 𑀇𑀫𑁂𑀢𑀺 𑀫𑁂𑀢𑁆𑀢𑀺𑀬𑀪𑀼𑀫𑁆𑀫𑀚𑀓𑀯𑀟𑁆𑀠𑀮𑀺𑀘𑁆𑀙𑀯𑀺𑀦𑁄. 𑀅𑀜𑁆𑀜𑁂𑀧𑀺 𑀬𑁂 𑀯𑀸 𑀧𑀦 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀭𑀺𑀝𑁆𑀞𑀪𑀺𑀓𑁆𑀔𑀼 𑀘 𑀓𑀡𑁆𑀝𑀓𑀲𑀸𑀫𑀡𑁂𑀭𑁄 𑀘 𑀯𑁂𑀲𑀸𑀮𑀺𑀓𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀘 𑀅𑀭𑀺𑀝𑁆𑀞…𑀧𑁂… 𑀯𑀚𑁆𑀚𑀻𑀧𑀼𑀢𑁆𑀢𑀓𑀸. 𑀢𑁂 𑀘 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀽𑀧𑀳𑀸𑀭𑁄 𑀘 𑀅𑀜𑁆𑀜𑀸𑀡𑁄 𑀘 𑀓𑀗𑁆𑀔𑀸𑀧𑀭𑀯𑀺𑀢𑀭𑀡𑁄 𑀘 𑀧𑀭𑀽…𑀧𑁂… 𑀯𑀺𑀢𑀭𑀡𑀸. 𑀢𑁂 𑀆𑀤𑀬𑁄 𑀬𑁂𑀲𑀁 𑀯𑀸𑀤𑀸𑀦𑀦𑁆𑀢𑀺 𑀧𑀭𑀽…𑀧𑁂… 𑀯𑀺𑀢𑀭𑀡𑀸𑀤𑀬𑁄. 𑀢𑁂 𑀏𑀯 𑀯𑀸𑀤𑀸 𑀏𑀢𑁂𑀲𑀦𑁆𑀢𑀺 𑀧𑀭𑀽…𑀧𑁂… 𑀯𑀺𑀢𑀭𑀡𑀸𑀤𑀺𑀯𑀸𑀤𑀸. 𑀢𑁂 𑀘 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀩𑀼𑀤𑁆𑀥𑀲𑀸𑀲𑀦𑀁 𑀩𑀼𑀤𑁆𑀥𑀲𑀸𑀲𑀦𑀦𑁆𑀢𑀺 𑀯𑀢𑁆𑀯𑀸 𑀓𑀢𑀧𑀕𑁆𑀕𑀳𑀸 𑀫𑀳𑀸𑀲𑀗𑁆𑀖𑀺𑀓𑀸𑀤𑀬𑁄 𑀘 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀓𑀗𑁆𑀔𑀸𑀧𑀭𑀯𑀺𑀢𑀭𑀡𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀓𑀣𑀸𑀯𑀢𑁆𑀣𑀼𑀧𑀓𑀭𑀡𑁂 𑀆𑀕𑀢𑀸 𑀯𑀸𑀤𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀫𑀳𑀸𑀲𑀗𑁆𑀖𑀺𑀓𑀸𑀤𑀬𑁄𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀤𑀻𑀧𑀯𑀁𑀲𑁂 𑀆𑀕𑀢𑀸 𑀕𑀡𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀆𑀤𑀺𑀫𑁆𑀳𑀺 ‘‘𑀯𑀺𑀧𑀭𑀻𑀢𑀤𑀲𑁆𑀲𑀦𑀸’’𑀢𑀺 𑀧𑀤𑀁 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀲𑀳𑀥𑀫𑁆𑀫𑁂𑀦𑀸’’𑀢𑀺 𑀧𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀳 𑀓𑀸𑀭𑀡𑁂𑀦𑀸’’𑀢𑀺. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀦𑀺𑀕𑁆𑀕𑀬𑁆𑀳𑀫𑀸𑀦𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣𑀸𑀢𑀺 𑀢𑀺𑀯𑀺𑀥𑁂𑀲𑀼 𑀲𑀤𑁆𑀥𑀫𑁆𑀫𑁂𑀲𑀼. 𑀫𑀳𑀸𑀯𑀢𑁆𑀢𑀸𑀦𑀺 𑀲𑀦𑁆𑀢𑀺, 𑀅𑀬𑀁 𑀲𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀘𑀸𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣 𑀘𑀓𑀸𑀭𑁂𑀦 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸 𑀲𑀗𑁆𑀕𑀳𑀺𑀢𑀸 𑀢𑀸𑀲𑀫𑁆𑀧𑀺 𑀅𑀥𑀺𑀕𑀫𑀲𑀸𑀲𑀦𑀪𑀸𑀯𑀢𑁄.

𑀢𑀢𑁆𑀣𑀸𑀢𑀺 𑀢𑀺𑀯𑀺𑀥𑁂𑀲𑀼 𑀲𑀤𑁆𑀥𑀫𑁆𑀫𑁂𑀲𑀼. 𑀓𑁂𑀘𑀺 𑀣𑁂𑀭𑀸𑀢𑀺 𑀥𑀫𑁆𑀫𑀓𑀣𑀺𑀓𑀸 𑀓𑁂𑀘𑀺 𑀣𑁂𑀭𑀸. ‘‘𑀬𑁄 𑀔𑁄’’𑀢𑀺 𑀓𑀡𑁆𑀞𑀚𑀤𑀼𑀢𑀺𑀬𑀓𑁆𑀔𑀭𑁂𑀦 𑀧𑀞𑀺𑀢𑀩𑁆𑀩𑁄. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀬𑁄 𑀯𑁄’’𑀢𑀺 𑀯𑀓𑀸𑀭𑁂𑀦 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀅𑀬𑀼𑀢𑁆𑀢𑁄. 𑀓𑀲𑁆𑀫𑀸? ‘‘𑀲𑁄 𑀯𑁄’’𑀢𑀺 𑀧𑀭𑀢𑁄 𑀯𑀼𑀢𑁆𑀢𑀢𑁆𑀢𑀸, 𑀏𑀓𑀲𑁆𑀫𑀺𑀁 𑀯𑀸𑀓𑁆𑀬𑁂 𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀲𑀼𑀢𑀺𑀲𑀤𑁆𑀤𑀸𑀦𑀁 𑀅𑀬𑀼𑀢𑁆𑀢𑀢𑁆𑀢𑀸 𑀘. 𑀓𑁂𑀘𑀺 𑀣𑁂𑀭𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑀸 𑀓𑁂𑀘𑀺 𑀣𑁂𑀭𑀸 𑀆𑀳𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑁂 𑀧𑀦 𑀣𑁂𑀭𑀸𑀢𑀺 𑀥𑀫𑁆𑀫𑀓𑀣𑀺𑀓𑀣𑁂𑀭𑁂𑀳𑀺 𑀘 𑀧𑀁𑀲𑀼𑀓𑀽𑀮𑀺𑀓𑀣𑁂𑀭𑁂𑀳𑀺 𑀘 𑀅𑀜𑁆𑀜𑁂 𑀣𑁂𑀭𑀸. 𑀢𑁂𑀢𑀺 𑀧𑀜𑁆𑀘 𑀪𑀺𑀓𑁆𑀔𑀽 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀫𑁆𑀩𑀼𑀤𑀻𑀧𑀲𑁆𑀲 𑀧𑀘𑁆𑀘𑀦𑁆𑀢𑁂 𑀢𑀺𑀝𑁆𑀞𑀢𑀻𑀢𑀺 𑀧𑀘𑁆𑀘𑀦𑁆𑀢𑀺𑀫𑁄, 𑀢𑀲𑁆𑀫𑀺𑀁. 𑀚𑀫𑁆𑀩𑀼𑀤𑀻𑀧𑀲𑁆𑀲 𑀫𑀚𑁆𑀛𑁂 𑀯𑁂𑀫𑀚𑁆𑀛𑁂 𑀢𑀺𑀝𑁆𑀞𑀢𑀻𑀢𑀺 𑀫𑀚𑁆𑀛𑀺𑀫𑁄. 𑀅𑀣 𑀯𑀸 𑀫𑀚𑁆𑀛𑀸𑀦𑀁 𑀲𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀦𑀺𑀯𑀸𑀲𑁄 𑀫𑀚𑁆𑀛𑀺𑀫𑁄, 𑀢𑀲𑁆𑀫𑀺𑀁. 𑀯𑀻𑀲𑀢𑀺 𑀯𑀕𑁆𑀕𑀸 𑀇𑀫𑀲𑁆𑀲𑀸𑀢𑀺 𑀯𑀻𑀲𑀢𑀺𑀯𑀕𑁆𑀕𑁄, 𑀲𑁄𑀬𑁂𑀯 𑀕𑀡𑁄 𑀯𑀻𑀲𑀢𑀺𑀯𑀕𑁆𑀕𑀕𑀡𑁄, 𑀢𑀁. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀢𑀲𑁆𑀲𑀸𑀥𑁂𑀬𑁆𑀬𑁄𑀢𑀺 𑀢𑀲𑁆𑀲𑀸𑀬𑀢𑁆𑀢𑁄, 𑀢𑀲𑁆𑀲 𑀲𑀦𑁆𑀢𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀯𑀸𑀭𑀡𑀸 𑀆𑀥𑁂𑀬𑁆𑀬𑀸, 𑀲𑀗𑁆𑀖𑀓𑀫𑁆𑀫𑀁 𑀆𑀥𑁂𑀬𑁆𑀬𑀁, 𑀧𑀩𑁆𑀩𑀚𑁆𑀚𑀸 𑀆𑀥𑁂𑀬𑁆𑀬𑀸, 𑀉𑀧𑀲𑀫𑁆𑀧𑀤𑀸 𑀆𑀥𑁂𑀬𑁆𑀬𑀸𑀢𑀺 𑀬𑁄𑀚𑀦𑀸.

𑀬𑁂𑀧𑀺 𑀇𑀫𑁂 𑀦𑀯 𑀉𑀧𑁄𑀲𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀧𑀺 𑀘 𑀇𑀫𑀸 𑀦𑀯 𑀧𑀯𑀸𑀭𑀡𑀸𑀬𑁄𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀯𑀺𑀦𑀬𑀥𑀭𑀲𑁆𑀲. 𑀢𑀸𑀲𑀦𑁆𑀢𑀺 𑀦𑀯𑀧𑀯𑀸𑀭𑀡𑀸𑀦𑀁.

𑀬𑀸𑀦𑀺𑀧𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀗𑁆𑀖𑀓𑀫𑁆𑀫𑀸𑀦𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣 𑀘 𑀢𑀸𑀦𑀺 𑀯𑀺𑀦𑀬𑀥𑀭𑀸𑀬𑀢𑁆𑀢𑀸𑀦𑁂𑀯𑀸𑀢𑀺 𑀧𑀸𑀞𑀲𑁂𑀲𑁄 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄.

𑀬𑀸𑀧𑀺 𑀘 𑀅𑀬𑀁 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀓𑀸𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀲𑀘𑁆𑀘𑀁. 𑀅𑀜𑁆𑀜𑁄𑀢𑀺 𑀯𑀺𑀦𑀬𑀥𑀭𑀢𑁄 𑀧𑀭𑁄. 𑀲𑁄 𑀏𑀯𑀸𑀢𑀺 𑀯𑀺𑀦𑀬𑀥𑀭𑁄 𑀏𑀯. ‘‘𑀉𑀧𑀚𑁆𑀛’’𑀦𑁆𑀢𑀺 𑀥𑀸𑀢𑀼𑀓𑀫𑁆𑀫𑀁, ‘‘𑀲𑀸𑀫𑀡𑁂𑀭𑁂𑀦𑀸’’𑀢𑀺 𑀓𑀸𑀭𑀺𑀢𑀓𑀫𑁆𑀫𑀁 𑀉𑀧𑀦𑁂𑀢𑀩𑁆𑀩𑀁. 𑀏𑀢𑁆𑀣 𑀘𑀸𑀢𑀺 𑀉𑀧𑁄𑀲𑀣𑀸𑀤𑀻𑀲𑀼 𑀘. 𑀦𑀺𑀲𑁆𑀲𑀬𑀤𑀸𑀦𑀜𑁆𑀘 𑀲𑀸𑀫𑀡𑁂𑀭𑀽𑀧𑀝𑁆𑀞𑀸𑀦𑀜𑁆𑀘 𑀯𑀺𑀲𑀼𑀁 𑀓𑀢𑁆𑀯𑀸 𑀤𑁆𑀯𑀸𑀤𑀲𑀸𑀦𑀺𑀲𑀁𑀲𑁂 𑀮𑀪𑀢𑀻𑀢𑀺𑀧𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁.

𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀯𑀸𑀢𑀺 ‘‘𑀧𑀜𑁆𑀘𑀸𑀢𑀺 𑀘…𑀧𑁂… 𑀏𑀓𑀸𑀤𑀲𑀸’’𑀢𑀺 𑀘 𑀓𑁄𑀝𑁆𑀞𑀸𑀲𑀁 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸, 𑀲𑀢𑁆𑀢 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀪𑀸𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀣𑁄𑀫𑁂𑀢𑀻𑀢𑀺 𑀲𑀫𑁆𑀫𑀼𑀔𑀸 𑀣𑁄𑀫𑁂𑀢𑀺. 𑀧𑀲𑀁𑀲𑀢𑀻𑀢𑀺 𑀧𑀭𑀫𑁆𑀫𑀼𑀔𑀸 𑀧𑀲𑀁𑀲𑀢𑀺. ‘‘𑀉𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺𑀧𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩’’𑀦𑁆𑀢𑀺. 𑀅𑀤𑁆𑀥𑀦𑀺 𑀤𑀻𑀖𑁂 𑀲𑀸𑀥𑀽𑀢𑀺 𑀅𑀤𑁆𑀥𑀦𑀺𑀬𑀁 𑀅𑀤𑁆𑀥𑀓𑁆𑀔𑀫𑀁 𑀅𑀤𑁆𑀥𑀬𑁄𑀕𑁆𑀬𑀦𑁆𑀢𑀺 𑀅𑀢𑁆𑀣𑁄 𑀲𑀸𑀥𑀼𑀅𑀢𑁆𑀣𑁂 𑀦𑀺𑀬𑀧𑀘𑁆𑀘𑀬𑁄 (𑀫𑁄𑀕𑁆𑀕𑀮𑁆𑀮𑀸𑀦𑁂 𑁪.𑁩𑁩.𑁭𑁩).

𑀣𑁂𑀭𑀸 𑀘 𑀦𑀯𑀸 𑀘 𑀫𑀚𑁆𑀛𑀺𑀫𑀸 𑀘 𑀩𑀳𑀽 𑀢𑁂 𑀪𑀺𑀓𑁆𑀔𑀽 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀬𑁄𑀚𑀦𑀸.

𑁪𑁩𑁯. ‘‘𑀉𑀤𑁆𑀤𑀺𑀲𑁆𑀲𑀫𑀸𑀦𑁂’’𑀢𑀺 𑀧𑀤𑀲𑁆𑀲 𑀓𑀫𑁆𑀫𑀭𑀽𑀧𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀉𑀤𑁆𑀤𑀺𑀲𑀺𑀬𑀫𑀸𑀦𑁂’’𑀢𑀺. 𑀲𑁄 𑀧𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁄 𑀧𑀦. 𑀬𑀲𑁆𑀫𑀸 𑀉𑀤𑁆𑀤𑀺𑀲𑁆𑀲𑀫𑀸𑀦𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸𑀢𑀺 𑀬𑁄𑀚𑀦𑀸. 𑀉𑀤𑁆𑀤𑀺𑀲𑀦𑁆𑀢𑁂 𑀯𑀸𑀢𑀺 𑀉𑀤𑁆𑀤𑀺𑀲𑀺𑀬𑀫𑀸𑀦𑁂 𑀯𑀸. 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁂 𑀯𑀸𑀢𑀺 𑀉𑀤𑁆𑀤𑀺𑀲𑀸𑀧𑀺𑀬𑀫𑀸𑀦𑁂 𑀯𑀸. 𑀅𑀦𑁆𑀢𑀲𑀤𑁆𑀤𑁄 𑀳𑀺 𑀫𑀸𑀦𑀲𑀤𑁆𑀤𑀓𑀸𑀭𑀺𑀬𑁄. 𑀬𑁄𑀢𑀺 𑀪𑀺𑀓𑁆𑀔𑀼. 𑀦𑀦𑁆𑀢𑀺 𑀢𑀁 𑀧𑀸𑀢𑀺𑀫𑁄𑀓𑁆𑀔𑀁. 𑀘𑀲𑀤𑁆𑀤𑁄 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀧𑀤𑀲𑁆𑀲 𑀤𑁆𑀯𑀦𑁆𑀦𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀺, 𑀧𑀼𑀩𑁆𑀩𑀧𑀤𑁂 𑀓𑀓𑀸𑀭𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀲𑀦𑁆𑀢𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀸𑀓𑀸𑀦𑀁. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑀸𑀦𑀻𑀢𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺. 𑀬𑁂𑀢𑀺 𑀪𑀺𑀓𑁆𑀔𑀽. ‘‘𑀬𑀸𑀯 𑀉𑀧𑁆𑀧𑀚𑁆𑀚𑀢𑀺𑀬𑁂𑀯, 𑀢𑀸𑀯 𑀲𑀁𑀯𑀢𑁆𑀢𑀦𑁆𑀢𑀺 𑀇𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸 𑀇𑀫𑀲𑁆𑀲 𑀦𑀬𑀲𑁆𑀲 𑀧𑀸𑀞𑀲𑁂𑀲𑁂𑀳𑀺 𑀬𑁄𑀚𑁂𑀢𑀩𑁆𑀩𑀢𑁆𑀢𑀸. 𑀕𑀭𑀼𑀓𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀮𑀳𑀼𑀓𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀣 𑀯𑀸’’𑀢𑀺𑀆𑀤𑀺. 𑀅𑀢𑀺𑀯𑀺𑀬𑀸𑀢𑀺 𑀅𑀢𑀺 𑀇 𑀏𑀯. 𑀇𑀓𑀸𑀭𑁄 𑀳𑀺 𑀲𑀦𑁆𑀥𑀺𑀯𑀲𑁂𑀦 𑀅𑀤𑀲𑁆𑀲𑀦𑀁 𑀕𑀢𑁄. 𑀯𑀺𑀬𑀲𑀤𑁆𑀤𑁄 𑀏𑀯𑀓𑀸𑀭𑀢𑁆𑀣𑀯𑀸𑀘𑀓𑁄 ‘‘𑀯𑀭𑀫𑁆𑀳𑀸𑀓𑀁 𑀪𑀼𑀲𑀸𑀫𑀺𑀯𑀸’’𑀢𑀺 𑀏𑀢𑁆𑀣 (𑀚𑀸. 𑁧.𑁩.𑁧𑁦𑁮) 𑀇𑀯𑀲𑀤𑁆𑀤𑁄 𑀯𑀺𑀬, 𑀅𑀢𑀺 𑀳𑀼𑀢𑁆𑀯𑀸 𑀏𑀯𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀉𑀧𑀲𑀫𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀲𑀫𑀻𑀧𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 (𑀭𑀼𑀧𑀲𑀺𑀤𑁆𑀥𑀺𑀬𑀁 𑁩𑁧𑁬 𑀲𑀼𑀢𑁆𑀢𑁂) 𑀆𑀳 ‘‘𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺. 𑀢𑀲𑁆𑀲𑀸𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲. 𑀢𑀲𑁆𑀫𑀺𑀦𑁆𑀢𑀺 𑀯𑀺𑀦𑀬𑁂. 𑀯𑀺𑀯𑀡𑁆𑀡𑁂𑀢𑀻𑀢𑀺 𑀦 𑀓𑁂𑀯𑀮𑀁 𑀢𑀲𑁆𑀲𑁂𑀯 𑀯𑀺𑀯𑀡𑁆𑀡𑀫𑀢𑁆𑀢𑀫𑁂𑀯, 𑀅𑀣 𑀔𑁄 𑀦𑀺𑀦𑁆𑀤𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀦𑀺𑀦𑁆𑀤𑀢𑀻’’𑀢𑀺. 𑀕𑀭𑀳𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀣 𑀯𑀸 𑀦𑀺𑀦𑁆𑀤𑀢𑀻𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀫𑁆𑀫𑀼𑀔𑀸 𑀦𑀺𑀦𑁆𑀤𑀢𑀺. 𑀕𑀭𑀳𑀢𑀻𑀢𑀺 𑀧𑀭𑀫𑁆𑀫𑀼𑀔𑀸 𑀕𑀭𑀳𑀢𑀻𑀢𑀺. 𑀤𑀼𑀢𑀺𑀬𑀁.

𑁩. 𑀫𑁄𑀳𑀦𑀲𑀺𑀓𑁆𑀔𑀸𑀧𑀤𑀁

𑁪𑁪𑁪. 𑀢𑀢𑀺𑀬𑁂 𑀅𑀦𑀼𑀲𑀤𑁆𑀤𑁄 𑀧𑀝𑀺𑀧𑀸𑀝𑀺𑀅𑀢𑁆𑀣𑀁 𑀅𑀦𑁆𑀢𑁄𑀓𑀢𑁆𑀯𑀸 𑀯𑀺𑀘𑁆𑀙𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀅𑀤𑁆𑀥𑀫𑀸𑀲𑁂 𑀅𑀤𑁆𑀥𑀫𑀸𑀲𑁂’’𑀢𑀺. 𑀲𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀉𑀧𑁄𑀲𑀣𑁂 𑀉𑀧𑁄𑀲𑀣𑁂 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑀅𑀦𑀼𑀧𑁄𑀲𑀣𑀺𑀓𑀁. 𑀏𑀢𑁆𑀣𑀸𑀧𑀺 𑀳𑀺 𑀅𑀦𑀼𑀲𑀤𑁆𑀤𑁄 𑀯𑀺𑀘𑁆𑀙𑀢𑁆𑀣𑀯𑀸𑀘𑀓𑁄. 𑀲𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀉𑀤𑁆𑀤𑀺𑀲𑀺𑀬𑀫𑀸𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀢𑀲𑁆𑀫𑀺𑀁 𑀅𑀦𑀸𑀘𑀸𑀭𑁂’’𑀢𑀺 𑀧𑀤𑁂𑀦 ‘‘𑀢𑀢𑁆𑀣𑀸’’𑀢𑀺 𑀧𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀬𑀁 𑀆𑀧𑀢𑁆𑀢𑀺’’𑀦𑁆𑀢𑀺 𑀧𑀤𑁂𑀦 𑀬𑀁𑀲𑀤𑁆𑀤𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺. 𑀬𑀣𑀸𑀥𑀫𑁆𑀫𑁄𑀢𑀺 𑀏𑀢𑁆𑀣 𑀥𑀫𑁆𑀫𑀲𑀤𑁆𑀤𑁂𑀦 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘𑀸’’𑀢𑀺. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦. 𑀲𑀸𑀥𑀼𑀲𑀤𑁆𑀤𑁄 𑀲𑀼𑀦𑁆𑀤𑀭𑀢𑁆𑀣𑁄, 𑀓𑀲𑀤𑁆𑀤𑁄 𑀧𑀤𑀧𑀽𑀭𑀡𑁄𑀢𑀺 𑀆𑀳 ‘‘𑀲𑀼𑀝𑁆𑀞𑀽’’𑀢𑀺. 𑀅𑀝𑁆𑀞𑀺𑀦𑁆𑀢𑀺 𑀘 ‘‘𑀓𑀢𑁆𑀯𑀸’’𑀢𑀺 𑀘 𑀤𑁆𑀯𑁂 𑀧𑀤𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺. ‘‘𑀅𑀝𑁆𑀞𑀺𑀓𑀢𑁆𑀯𑀸’’𑀢𑀺 𑀯𑀸 𑀏𑀓𑀁 𑀧𑀤𑀁. 𑀢𑀢𑁆𑀣 𑀧𑀼𑀩𑁆𑀩𑀦𑀬𑁂 𑀅𑀢𑁆𑀣𑁄 𑀬𑀲𑁆𑀲𑀢𑁆𑀣𑀻𑀢𑀺 𑀅𑀝𑁆𑀞𑀺 𑀢𑁆𑀣𑀓𑀸𑀭𑀲𑁆𑀲 𑀝𑁆𑀞𑀓𑀸𑀭𑀁 𑀓𑀢𑁆𑀯𑀸, 𑀢𑀁 𑀅𑀝𑁆𑀞𑀺𑀁. 𑀓𑀢𑁆𑀯𑀸𑀢𑀺 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀉𑀢𑁆𑀢𑀭𑀧𑀤𑁂𑀦 𑀲𑀫𑀸𑀲𑁄 𑀦 𑀳𑁄𑀢𑀺. 𑀅𑀝𑁆𑀞𑀺𑀓𑀪𑀸𑀯𑀦𑁆𑀢𑀺 𑀏𑀢𑁆𑀣 𑀇𑀓𑀲𑀤𑁆𑀤𑁂𑀦 ‘‘𑀅𑀝𑁆𑀞𑀻’’𑀢𑀺 𑀏𑀢𑁆𑀣 𑀈𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑀺. ‘‘𑀪𑀸𑀯’’𑀦𑁆𑀢𑀺𑀧𑀤𑁂𑀦 𑀪𑀸𑀯𑀧𑀘𑁆𑀘𑀬𑁂𑀦 𑀯𑀺𑀦𑀸 𑀪𑀸𑀯𑀢𑁆𑀣𑀲𑁆𑀲 𑀜𑀸𑀧𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀣𑁄 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑁄 𑁋 𑀅𑀝𑁆𑀞𑀺𑀪𑀸𑀯𑀁 𑀓𑀢𑁆𑀯𑀸𑀢𑀺. 𑀧𑀘𑁆𑀙𑀺𑀫𑀦𑀬𑁂 𑀅𑀢𑁆𑀣𑁄 𑀬𑀲𑁆𑀲𑀢𑁆𑀣𑀻𑀢𑀺 𑀅𑀝𑁆𑀞𑀺𑀓𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀢𑁆𑀣𑀓𑀸𑀭𑀲𑁆𑀲 𑀝𑁆𑀞𑀓𑀸𑀭𑀁 𑀓𑀢𑁆𑀯𑀸. 𑀅𑀢𑁆𑀣𑀬𑀺𑀢𑀩𑁆𑀩𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀯𑀸 𑀅𑀝𑁆𑀞𑀺𑀓𑁄, 𑀅𑀝𑁆𑀞𑀺𑀓𑀇𑀢𑀺 𑀦𑀸𑀫𑀲𑀤𑁆𑀤𑀢𑁄 𑀢𑁆𑀯𑀸𑀧𑀘𑁆𑀘𑀬𑁄 𑀓𑀸𑀢𑀩𑁆𑀩𑁄. ‘‘𑀅𑀝𑁆𑀞𑀺𑀓𑀢𑁆𑀯𑀸’’𑀢𑀺 𑀇𑀤𑀁 𑀧𑀤𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁. 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑁂 𑀯𑀢𑁆𑀢𑀫𑀸𑀦𑁂 𑀓𑀭𑀥𑀸𑀢𑀼 𑀯𑀸 𑀪𑀽𑀥𑀸𑀢𑀼 𑀯𑀸 𑀬𑁄𑀚𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀪𑀼𑀁 𑀯𑀼𑀢𑁆𑀢𑀁 ‘‘𑀓𑀢𑁆𑀯𑀸 𑀳𑀼𑀢𑁆𑀯𑀸’’𑀢𑀺. 𑀢𑀁 𑀲𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀝𑁆𑀞𑀺𑀓𑀢𑁆𑀯𑀸𑀢𑀺 𑀅𑀝𑁆𑀞𑀺𑀓𑀪𑀸𑀯𑀁 𑀓𑀢𑁆𑀯𑀸, 𑀅𑀝𑁆𑀞𑀺𑀓𑁄 𑀳𑀼𑀢𑁆𑀯𑀸’’𑀢𑀺. 𑀢𑀢𑀺𑀬𑀁.

𑁪. 𑀧𑀳𑀸𑀭𑀲𑀺𑀓𑁆𑀔𑀸𑀧𑀤𑀁

𑁪𑁪𑁯. 𑀘𑀢𑀼𑀢𑁆𑀣𑁂 𑀓𑀲𑁆𑀫𑀸 𑀙𑀩𑁆𑀩𑀕𑁆𑀕𑀺𑀬𑀸 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸𑀦𑀁 𑀧𑀳𑀸𑀭𑀁 𑀤𑁂𑀦𑁆𑀢𑀺, 𑀦𑀦𑀼 𑀅𑀓𑀸𑀭𑀡𑁂𑀦 𑀧𑀳𑀸𑀭𑀁 𑀤𑁂𑀦𑁆𑀢𑀻𑀢𑀺 𑀆𑀳 ‘‘𑀆𑀯𑀼𑀲𑁄’’𑀢𑀺𑀆𑀤𑀺. 𑀇𑀫𑀺𑀦𑀸 𑀬𑀣𑀸 𑀯𑀤𑀦𑁆𑀢𑀺, 𑀢𑀣𑀸 𑀅𑀓𑀢𑀢𑁆𑀢𑀸 𑀧𑀳𑀸𑀭𑀁 𑀤𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁪𑁫𑁧. 𑀲𑀘𑁂𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁂𑀦 𑀲𑀘𑁂 𑀅𑀫𑀭𑀢𑀺, 𑀓𑀸 𑀦𑀸𑀫 𑀓𑀣𑀸, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀳𑀸𑀭𑁂𑀦𑀸𑀢𑀺 𑀧𑀳𑀸𑀭𑀳𑁂𑀢𑀼𑀦𑀸. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦. 𑀅𑀬𑀦𑁆𑀢𑀺 𑀪𑀺𑀓𑁆𑀔𑀼. 𑀦 𑀯𑀺𑀭𑁄𑀘𑀢𑀻𑀢𑀺 𑀦 𑀲𑁄𑀪𑀢𑀺.

𑁪𑁫𑁨. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀅𑀓𑀸𑀭𑀲𑁆𑀲 𑀅𑀜𑁆𑀜𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀕𑀳𑀝𑁆𑀞𑀲𑁆𑀲 𑀯𑀸’’𑀢𑀺𑀆𑀤𑀺. 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸𑀢𑀺 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 𑀲𑀸𑀫𑀡𑁂𑀭𑀲𑁆𑀲 𑀯𑀸.

𑁪𑁫𑁩. ‘‘𑀓𑁂𑀦𑀘𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀫𑀦𑀼𑀲𑁆𑀲𑁂𑀦 𑀯𑀸’’𑀢𑀺𑀆𑀤𑀺. 𑀢𑀢𑁄𑀢𑀺 𑀯𑀺𑀳𑁂𑀞𑀦𑀢𑁄, 𑀇𑀫𑀺𑀦𑀸 𑀫𑁄𑀓𑁆𑀔𑀲𑁆𑀲 𑀅𑀧𑀸𑀤𑀸𑀦𑀁 𑀤𑀲𑁆𑀲𑁂𑀢𑀺, ‘‘𑀅𑀢𑁆𑀢𑀦𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀺. ‘‘𑀧𑀢𑁆𑀣𑀬𑀫𑀸𑀦𑁄’’𑀢𑀺 𑀇𑀫𑀺𑀦𑀸 ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀧𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀼𑀕𑁆𑀕𑀭𑁂𑀦 𑀯𑀸𑀢𑀺 𑀘𑀢𑀼𑀳𑀢𑁆𑀣𑀤𑀡𑁆𑀟𑀲𑁆𑀲 𑀅𑀤𑁆𑀥𑁂𑀦 𑀤𑀡𑁆𑀟𑁂𑀦 𑀯𑀸. 𑀲𑁄𑀢𑀺 𑀘𑁄𑀭𑀸𑀤𑀺𑀓𑁄𑀢𑀺. 𑀘𑀢𑀼𑀢𑁆𑀣𑀁.

𑁫. 𑀢𑀮𑀲𑀢𑁆𑀢𑀺𑀓𑀲𑀺𑀓𑁆𑀔𑀸𑀧𑀤𑀁

𑁪𑁫𑁪. 𑀧𑀜𑁆𑀘𑀫𑁂 𑀢𑀮𑀦𑁆𑀢𑀺 𑀳𑀢𑁆𑀣𑀢𑀮𑀁. 𑀢𑀜𑁆𑀳𑀺 𑀢𑀮𑀢𑀺 𑀬𑀁𑀓𑀺𑀜𑁆𑀘𑀺 𑀕𑀳𑀺𑀢𑀯𑀢𑁆𑀣𑀼 𑀧𑀢𑀺𑀝𑁆𑀞𑀸𑀢𑀺 𑀏𑀢𑁆𑀣𑀸𑀢𑀺 ‘‘𑀢𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀢𑁆𑀢𑀻𑀢𑀺 𑀓𑀼𑀦𑁆𑀢𑁄. 𑀲𑁄 𑀳𑀺 𑀲𑀓𑀢𑀺 𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑁂𑀢𑀻𑀢𑀺 ‘‘𑀲𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀮𑀫𑁂𑀯 𑀲𑀢𑁆𑀢𑀺𑀲𑀤𑀺𑀲𑀢𑁆𑀢𑀸 𑀢𑀮𑀲𑀢𑁆𑀢𑀺𑀓𑀁, 𑀲𑀤𑀺𑀲𑀢𑁆𑀣𑁂 𑀓𑁄, 𑀢𑀁 𑀢𑀮𑀲𑀢𑁆𑀢𑀺𑀓𑀁 𑀉𑀧𑀘𑀸𑀭𑁂𑀦 𑀕𑀳𑁂𑀢𑁆𑀯𑀸 ‘‘𑀓𑀸𑀬𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀓𑀸𑀬𑀢𑁄 𑀅𑀜𑁆𑀜𑀁 𑀯𑀢𑁆𑀣𑀼𑀫𑁆𑀧𑀺 𑀢𑀮𑀲𑀢𑁆𑀢𑀺𑀓𑀲𑀗𑁆𑀔𑀸𑀢𑁂𑀦 𑀓𑀸𑀬𑁂𑀦 𑀕𑀳𑁂𑀢𑁆𑀯𑀸 𑀉𑀕𑁆𑀕𑀺𑀭𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀓𑀸𑀬𑀧𑀝𑀺𑀩𑀤𑁆𑀥𑀫𑁆𑀧𑀻’’𑀢𑀺. ‘‘𑀧𑀳𑀸𑀭𑀲𑀫𑀼𑀘𑁆𑀘𑀺𑀢𑀸’’𑀢𑀺 𑀏𑀢𑁆𑀣 𑀲𑀁𑀧𑀼𑀩𑁆𑀩𑁄 𑀘 𑀉𑀧𑀼𑀩𑁆𑀩𑁄 𑀘 𑀘𑀺𑀲𑀤𑁆𑀤𑁄 𑀧𑀕𑀼𑀡𑀦𑀲𑀗𑁆𑀔𑀸𑀢𑁂 𑀧𑀭𑀺𑀘𑀺𑀢𑁂 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀧𑀳𑀸𑀭𑀧𑀭𑀺𑀘𑀺𑀢𑀸’’𑀢𑀺. 𑀧𑀳𑀸𑀭𑁂𑀦 𑀲𑀁 𑀧𑀼𑀦𑀧𑁆𑀧𑀼𑀦𑀁 𑀉𑀘𑁆𑀘𑀺𑀢𑀸 𑀧𑀭𑀺𑀘𑀺𑀢𑀸𑀢𑀺 𑀅𑀢𑁆𑀣𑁄. 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑁂𑀧𑀺…𑀧𑁂… 𑀅𑀢𑁆𑀣𑁄’’𑀢𑀺. 𑀅𑀜𑁆𑀜𑀫𑁆𑀧𑀺 𑀲𑀚𑁆𑀛𑀸𑀬𑀦𑀦𑀬𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀳𑀸𑀭𑀲𑁆𑀲 𑀉𑀩𑁆𑀩𑀺𑀕𑀸’’𑀢𑀺. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀧𑀸𑀞𑀲𑁆𑀲. 𑀧𑀳𑀸𑀭𑀲𑁆𑀲𑀸𑀢𑀺 𑀧𑀳𑀸𑀭𑀢𑁄. 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. ‘‘𑀪𑀻𑀢𑀸’’𑀢𑀺 𑀇𑀫𑀺𑀦𑀸 ‘‘𑀉𑀩𑁆𑀩𑀺𑀕𑀸’’𑀢𑀺 𑀏𑀢𑁆𑀣 𑀉𑀧𑀼𑀩𑁆𑀩 𑀯𑀺𑀚𑀥𑀸𑀢𑀼𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁪𑁫𑁭-𑁮. 𑀯𑀺𑀭𑀤𑁆𑀥𑁄𑀢𑀺 𑀧𑀡𑁆𑀡𑀓𑁄 𑀳𑀼𑀢𑁆𑀯𑀸. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂. 𑀯𑀼𑀢𑁆𑀢𑁂𑀲𑀼 𑀯𑀢𑁆𑀣𑀽𑀲𑀽𑀢𑀺 ‘‘𑀘𑁄𑀭𑀁 𑀯𑀸 𑀧𑀘𑁆𑀘𑀢𑁆𑀣𑀻𑀓𑀁 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀯𑀢𑁆𑀣𑀽𑀲𑀽𑀢𑀺. 𑀧𑀜𑁆𑀘𑀫𑀁.

𑁬. 𑀅𑀫𑀽𑀮𑀓𑀲𑀺𑀓𑁆𑀔𑀸𑀧𑀤𑀁

𑁪𑁫𑁯. 𑀙𑀝𑁆𑀞𑁂 𑀢𑁂𑀢𑀺 𑀙𑀩𑁆𑀩𑀕𑁆𑀕𑀺𑀬𑀸. 𑀘𑁄𑀤𑁂𑀦𑁆𑀢𑀺 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀓𑀺𑀡𑁆𑀡𑀤𑁄𑀲𑀢𑁆𑀢𑀸𑀢𑀺 𑀢𑁂𑀲𑀁 𑀆𑀓𑀼𑀮𑀆𑀤𑀻𑀦𑀯𑀢𑁆𑀢𑀸. 𑀏𑀯𑀦𑁆𑀢𑀺 𑀘𑁄𑀤𑀺𑀬𑀫𑀸𑀦𑁂. 𑀅𑀢𑁆𑀢𑀧𑀭𑀺𑀢𑁆𑀢𑀸𑀡𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀫𑀦𑁆𑀢𑀢𑁄 𑀢𑀸𑀡𑀁 𑀭𑀓𑁆𑀔𑀦𑀁 𑀓𑀭𑁄𑀦𑁆𑀢𑀸 𑀘𑁄𑀤𑁂𑀦𑁆𑀢𑀻𑀢𑀺 𑀬𑁄𑀚𑀦𑀸𑀢𑀺. 𑀙𑀝𑁆𑀞𑀁.

𑁭. 𑀲𑀜𑁆𑀘𑀺𑀘𑁆𑀘𑀲𑀺𑀓𑁆𑀔𑀸𑀧𑀤𑀁

𑁪𑁬𑁪. 𑀲𑀢𑁆𑀢𑀫𑁂 𑀉𑀧𑀧𑀼𑀩𑁆𑀩𑀤𑀳𑀥𑀸𑀢𑀼𑀲𑁆𑀲 𑀲𑀓𑀫𑁆𑀫𑀺𑀓𑀢𑁆𑀢𑀸 𑀓𑀸𑀭𑀺𑀢𑀦𑁆𑀢𑁄𑀕𑀥𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀸𑀤𑁂𑀦𑁆𑀢𑀻’’𑀢𑀺. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲𑀸’’𑀢𑀺 𑀏𑀢𑁆𑀣 𑀅𑀓𑀸𑀭𑀲𑁆𑀲 𑀲𑀤𑀺𑀲𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀸𑀫𑀡𑁂𑀭𑀲𑁆𑀲𑀸’’𑀢𑀺. 𑀲𑀸𑀫𑀡𑁂𑀭𑁄𑀧𑀺 𑀳𑀺 𑀉𑀧𑀲𑀫𑁆𑀧𑀦𑁆𑀦𑁂𑀦 𑀲𑀤𑀺𑀲𑁄 𑀳𑁄𑀢𑀺 𑀲𑀡𑁆𑀞𑀸𑀦𑁂𑀦 𑀘 𑀧𑀼𑀭𑀺𑀲𑀪𑀸𑀯𑁂𑀦 𑀘. 𑀲𑀸𑀫𑀡𑁂𑀭𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑀤𑀳𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀲𑀺𑀦𑁆𑀦𑀁 𑀫𑀜𑁆𑀜𑁂, 𑀦𑀺𑀧𑀦𑁆𑀦𑀁 𑀫𑀜𑁆𑀜𑁂, 𑀪𑀼𑀢𑁆𑀢𑀁 𑀫𑀜𑁆𑀜𑁂, 𑀧𑀻𑀢𑀁 𑀫𑀜𑁆𑀜𑁂, 𑀓𑀢𑀁 𑀫𑀜𑁆𑀜𑁂𑀢𑀺 𑀬𑁄𑀚𑀦𑀸. 𑀦𑀺𑀲𑀺𑀦𑁆𑀦𑀦𑁆𑀢𑀺 𑀦𑀺𑀲𑀻𑀤𑀺𑀢𑀁. 𑀦𑀺𑀧𑀦𑁆𑀦𑀦𑁆𑀢𑀺 𑀦𑀺𑀧𑀚𑁆𑀚𑀺𑀢𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀉𑀧𑀲𑁆𑀲𑀼𑀢𑀺𑀲𑀺𑀓𑁆𑀔𑀸𑀧𑀤𑀁

𑁪𑁭𑁧. 𑀅𑀝𑁆𑀞𑀫𑁂 ‘‘𑀅𑀥𑀺𑀓𑀭𑀡𑀚𑀸𑀢𑀸𑀦’’𑀦𑁆𑀢𑀺 𑀏𑀢𑁆𑀣 𑀅𑀥𑀺𑀓𑀭𑀡𑀲𑁆𑀲 𑀧𑀓𑀭𑀡𑀢𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀪𑀸𑀯𑀜𑁆𑀘 𑀯𑀺𑀲𑁂𑀲𑀦𑀧𑀭𑀧𑀤𑀪𑀸𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑁆𑀧𑀦𑁆𑀦𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀦’’𑀦𑁆𑀢𑀺. 𑀢𑀢𑁆𑀣 𑀉𑀧𑁆𑀧𑀦𑁆𑀦𑀲𑀤𑁆𑀤𑁂𑀦 𑀚𑀸𑀢𑀲𑀤𑁆𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀺𑀯𑀸𑀤𑀲𑀤𑁆𑀤𑁂𑀦 𑀅𑀥𑀺𑀓𑀭𑀡𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀲𑀼𑀬𑁆𑀬𑀢𑀻𑀢𑀺 𑀲𑀼𑀢𑀺 𑀯𑀘𑀦𑀁, 𑀲𑀼𑀢𑀺𑀬𑀸 𑀲𑀫𑀻𑀧𑀁 𑀉𑀧𑀲𑁆𑀲𑀼𑀢𑀺 𑀞𑀸𑀦𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀼𑀢𑀺𑀲𑀫𑀻𑀧’’𑀦𑁆𑀢𑀺. ‘‘𑀲𑀫𑀻𑀧’’𑀦𑁆𑀢𑀺 𑀇𑀫𑀺𑀦𑀸 𑀉𑀧𑀲𑀤𑁆𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀬𑀢𑁆𑀣𑀸’’𑀢𑀺𑀆𑀤𑀺𑀦𑀸 ‘‘𑀉𑀧𑀲𑁆𑀲𑀼𑀢𑀻’’𑀢𑀺 𑀏𑀢𑁆𑀣 𑀉𑀧𑀲𑀤𑁆𑀤𑀲𑁆𑀲 𑀧𑀥𑀸𑀦𑀢𑁆𑀢𑀸 𑀢𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀫𑀦𑁆𑀢𑁂𑀦𑁆𑀢𑀦𑁆𑀢𑀺 𑀏𑀢𑁆𑀣 𑀉𑀧𑀬𑁄𑀕𑀯𑀘𑀦𑀲𑁆𑀲 𑀪𑀼𑀫𑁆𑀫𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀫𑀦𑁆𑀢𑀬𑀫𑀸𑀦𑁂’’𑀢𑀺.

𑁪𑁭𑁩. ‘‘𑀯𑀽𑀧𑀲𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁆𑀣 𑀇𑀥𑀸𑀢𑀼𑀬𑀸 𑀕𑀢𑁆𑀬𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀯𑀽𑀧𑀲𑀫𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀅𑀓𑀸𑀭𑀓𑀪𑀸𑀯𑀦𑁆𑀢𑀺 𑀦𑀺𑀤𑁆𑀤𑁄𑀲𑀪𑀸𑀯𑀁. 𑀲𑁄𑀢𑀼𑀓𑀸𑀫𑀢𑀸𑀬 𑀕𑀫𑀦𑀯𑀲𑁂𑀦 𑀲𑀺𑀬𑀸 𑀓𑀺𑀭𑀺𑀬𑀦𑁆𑀢𑀺 𑀬𑁄𑀚𑀦𑀸. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄𑀢𑀺. 𑀅𑀝𑁆𑀞𑀫𑀁.

𑁯. 𑀓𑀫𑁆𑀫𑀧𑀝𑀺𑀩𑀸𑀳𑀦𑀲𑀺𑀓𑁆𑀔𑀸𑀧𑀤𑀁

𑁪𑁭𑁪. 𑀦𑀯𑀫𑁂 𑀫𑀬𑀦𑁆𑀢𑀺 𑀙𑀩𑁆𑀩𑀕𑁆𑀕𑀺𑀬𑀦𑀸𑀫𑀓𑀸 𑀅𑀫𑁆𑀳𑁂. 𑀓𑀢𑀢𑁆𑀢𑀸𑀢𑀺 𑀓𑀫𑁆𑀫𑀸𑀦𑀁 𑀓𑀢𑀢𑁆𑀢𑀸. 𑀥𑀫𑁆𑀫𑁄𑀢𑀺 𑀪𑀽𑀢𑁄 𑀲𑀪𑀸𑀯𑁄. 𑀏𑀢𑁂𑀲𑀽𑀢𑀺 𑀘𑀢𑀽𑀲𑀼 𑀲𑀗𑁆𑀖𑀓𑀫𑁆𑀫𑁂𑀲𑀽𑀢𑀺. 𑀦𑀯𑀫𑀁.

𑁧𑁦. 𑀙𑀦𑁆𑀤𑀁 𑀅𑀤𑀢𑁆𑀯𑀸𑀕𑀫𑀦𑀲𑀺𑀓𑁆𑀔𑀸𑀧𑀤𑀁

𑁪𑁮𑁧. 𑀤𑀲𑀫𑁂 𑀘𑁄𑀤𑁂𑀢𑀺 𑀧𑀭𑀲𑁆𑀲 𑀤𑁄𑀲𑀁 𑀆𑀭𑁄𑀧𑁂𑀢𑀻𑀢𑀺 𑀘𑁄𑀤𑀓𑁄. 𑀢𑁂𑀦 𑀘 𑀘𑁄𑀤𑀓𑁂𑀦 𑀘𑁄𑀤𑁂𑀢𑀩𑁆𑀩𑁄 𑀤𑁄𑀲𑀁 𑀆𑀭𑁄𑀧𑁂𑀢𑀩𑁆𑀩𑁄𑀢𑀺 𑀘𑀼𑀤𑀺𑀢𑁄, 𑀲𑁄𑀬𑁂𑀯 𑀘𑀼𑀤𑀺𑀢𑀓𑁄, 𑀢𑁂𑀦 𑀘. ‘‘𑀅𑀦𑀼𑀯𑀺𑀚𑁆𑀚𑀓𑁄𑀢𑀺 𑀘 𑀯𑀺𑀦𑀬𑀥𑀭𑁄. 𑀲𑁄 𑀳𑀺 𑀘𑁄𑀤𑀓𑀘𑀼𑀤𑀺𑀢𑀓𑀸𑀦𑀁 𑀫𑀢𑀁 𑀅𑀦𑀼𑀫𑀺𑀦𑁂𑀢𑁆𑀯𑀸 𑀯𑀺𑀤𑀢𑀺 𑀚𑀸𑀦𑀸𑀢𑀻𑀢𑀺 𑀅𑀦𑀼𑀯𑀺𑀚𑁆𑀚𑀓𑁄. 𑀏𑀢𑁆𑀢𑀸𑀯𑀢𑀸𑀧𑀻𑀢𑀺 𑀏𑀢𑁆𑀢𑀓𑁂𑀦𑀧𑀺 𑀧𑀫𑀸𑀡𑁂𑀦𑀸𑀢𑀺. 𑀤𑀲𑀫𑀁.

𑁧𑁧. 𑀤𑀼𑀩𑁆𑀩𑀮𑀲𑀺𑀓𑁆𑀔𑀸𑀧𑀤𑀁

𑁪𑁮𑁪. 𑀏𑀓𑀸𑀤𑀲𑀫𑁂 ‘‘𑀅𑀮𑀚𑁆𑀚𑀻𑀢𑀸’’𑀢𑀺𑀆𑀤𑀻𑀲𑀼 (𑀧𑀭𑀺. 𑁨𑁯𑁫) 𑀯𑀺𑀬 𑀬𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀬𑀣𑀸𑀫𑀺𑀢𑁆𑀢𑀢𑀸𑀬𑀸’’𑀢𑀺. ‘‘𑀬𑁄 𑀬𑁄’’𑀢𑀺 𑀇𑀫𑀺𑀦𑀸 𑀬𑀣𑀸𑀲𑀤𑁆𑀤𑀲𑁆𑀲 𑀯𑀺𑀘𑁆𑀙𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑀣𑀸𑀯𑀼𑀟𑁆𑀠𑀦𑁆𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁧𑁧 𑀆𑀤𑀬𑁄) 𑀯𑀺𑀬 𑀬𑁄 𑀬𑁄 𑀫𑀺𑀢𑁆𑀢𑁄 ‘‘𑀬𑀣𑀸𑀫𑀺𑀢𑁆𑀢’’𑀦𑁆𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀬𑀣𑀸𑀲𑀦𑁆𑀤𑀺𑀝𑁆𑀞𑀢𑀸’’𑀢𑀺𑀆𑀤𑀻𑀲𑀼 𑀲𑀩𑁆𑀩𑁂𑀲𑀼 𑀧𑀤𑁂𑀲𑀽𑀢𑀺. 𑀏𑀓𑀸𑀤𑀲𑀫𑀁.

𑁧𑁨. 𑀧𑀭𑀺𑀡𑀸𑀫𑀦𑀲𑀺𑀓𑁆𑀔𑀸𑀧𑀤𑀁

𑁪𑁮𑁯. 𑀤𑁆𑀯𑀸𑀤𑀲𑀫𑁂 𑀬𑀦𑁆𑀢𑀺 𑀧𑀤𑀢𑁆𑀣𑀯𑀺𑀦𑀺𑀘𑁆𑀙𑀬𑀢𑁆𑀣𑀲𑀗𑁆𑀔𑀸𑀢𑀁 𑀬𑀁 𑀯𑀘𑀦𑀁. 𑀢𑀢𑁆𑀣𑀸𑀢𑀺 𑀢𑀺𑀁𑀲𑀓𑀓𑀡𑁆𑀟𑁂. 𑀇𑀥𑀸𑀢𑀺 𑀤𑁆𑀯𑁂𑀦𑀯𑀼𑀢𑀺𑀓𑀡𑁆𑀟𑁂, 𑀲𑀺𑀓𑁆𑀔𑀸𑀧𑀤𑁂 𑀯𑀸. 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀧𑀭𑀧𑀼𑀕𑁆𑀕𑀮𑀲𑁆𑀲𑀸𑀢𑀺. 𑀤𑁆𑀯𑀸𑀤𑀲𑀫𑀁.

𑀲𑀳𑀥𑀫𑁆𑀫𑀺𑀓𑀯𑀕𑁆𑀕𑁄 𑀅𑀝𑁆𑀞𑀫𑁄.