𑁭. 𑀲𑀧𑁆𑀧𑀸𑀡𑀓𑀯𑀕𑁆𑀕𑁄

𑁧. 𑀲𑀜𑁆𑀘𑀺𑀘𑁆𑀘𑀧𑀸𑀡𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑁩𑁮𑁨. 𑀲𑀧𑁆𑀧𑀸𑀡𑀓𑀯𑀕𑁆𑀕𑀲𑁆𑀲 𑀧𑀞𑀫𑁂 𑀉𑀲𑀼𑀁 𑀅𑀲𑀢𑀺 𑀔𑀺𑀧𑀢𑀺 𑀅𑀦𑁂𑀦𑀸𑀢𑀺 𑀇𑀲𑁆𑀲𑀸𑀲𑁄𑀢𑀺 𑀓𑀢𑁂 𑀥𑀦𑀼𑀬𑁂𑀯 𑀫𑀼𑀔𑁆𑀬𑀢𑁄 𑀇𑀲𑁆𑀲𑀸𑀲𑁄 𑀦𑀸𑀫, 𑀥𑀦𑀼𑀕𑁆𑀕𑀳𑀸- 𑀘𑀭𑀺𑀬𑁄 𑀧𑀦 𑀉𑀧𑀘𑀸𑀭𑁂𑀦. 𑀉𑀲𑀼𑀁 𑀅𑀲𑀢𑀺 𑀔𑀺𑀧𑀢𑀻𑀢𑀺 𑀇𑀲𑁆𑀲𑀸𑀲𑁄𑀢𑀺 𑀓𑀢𑁂 𑀥𑀦𑀼𑀕𑁆𑀕𑀳𑀸𑀘𑀭𑀺𑀬𑁄 𑀇𑀲𑁆𑀲𑀸𑀲𑁄 𑀦𑀸𑀫, 𑀇𑀥 𑀧𑀦 𑀉𑀧𑀘𑀸𑀭𑀢𑁆𑀣𑁄 𑀯𑀸 𑀓𑀢𑁆𑀢𑀼𑀢𑁆𑀣𑁄 𑀯𑀸 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀥𑀦𑀼𑀕𑁆𑀕𑀳𑀸𑀘𑀭𑀺𑀬𑁄 𑀳𑁄𑀢𑀻’’𑀢𑀺. 𑀧𑀩𑁆𑀩𑀚𑀺𑀢𑀓𑀸𑀮𑁂 𑀇𑀲𑁆𑀲𑀸𑀲𑀲𑁆𑀲 𑀅𑀬𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀕𑀺𑀳𑀺𑀓𑀸𑀮𑁂’’𑀢𑀺. 𑀯𑁄𑀭𑁄𑀧𑀺𑀢𑀸𑀢𑀺 𑀏𑀢𑁆𑀣 𑀯𑀺 𑀅𑀯 𑀧𑀼𑀩𑁆𑀩𑀲𑁆𑀲 𑀭𑀼𑀳𑀥𑀸𑀢𑀼𑀲𑁆𑀲 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀯𑀺𑀬𑁄𑀚𑀺𑀢𑀸’’𑀢𑀺.

𑀬𑀲𑁆𑀫𑀸 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑀦𑁆𑀢𑀺 ‘‘𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸’’𑀢𑀺𑀯𑀘𑀦𑀁. 𑀓𑀲𑁆𑀫𑀸 𑀯𑁄𑀳𑀸𑀭𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦𑀦𑀼 𑀬𑀢𑁄 𑀓𑀼𑀢𑁄𑀘𑀺 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀁𑀘𑀺 𑀯𑀺𑀬𑁄𑀚𑀺𑀢𑁂 𑀤𑁆𑀯𑁂 𑀯𑀢𑁆𑀣𑀽𑀦𑀺 𑀯𑀺𑀬 𑀯𑀺𑀲𑀼𑀁 𑀢𑀺𑀝𑁆𑀞𑀦𑁆𑀢𑀺 𑀧𑀸𑀡𑀢𑁄 𑀚𑀻𑀯𑀺𑀢𑁂 𑀯𑀺𑀬𑁄𑀚𑀺𑀢𑁂 𑀧𑀸𑀡𑀚𑀻𑀯𑀺𑀢𑀸𑀧𑀻𑀢𑀺 𑀆𑀳 ‘‘𑀦 𑀳𑁂𑀢𑁆𑀣𑀸’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑁆𑀣𑀸𑀢𑀺 ‘‘𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸’’𑀢𑀺𑀯𑀘𑀦𑁂 𑀤𑀲𑁆𑀲𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀜𑁆𑀘𑀺 𑀚𑀻𑀯𑀺𑀢𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀲𑀫𑁆𑀩𑀦𑁆𑀥𑁄 𑁋 𑀲𑀻𑀲𑀸𑀮𑀗𑁆𑀓𑀸𑀭𑁂 𑀲𑀻𑀲𑀢𑁄 𑀯𑀺𑀬𑁄𑀚𑀺𑀢𑁂 𑀲𑀻𑀲𑀁 𑀅𑀮𑀗𑁆𑀓𑀸𑀭𑀢𑁄 𑀯𑀺𑀲𑀼𑀁 𑀢𑀺𑀝𑁆𑀞𑀢𑀺 𑀬𑀣𑀸, 𑀏𑀯𑀁 𑀚𑀻𑀯𑀺𑀢𑁂 𑀧𑀸𑀡𑀢𑁄 𑀯𑀺𑀬𑁄𑀚𑀺𑀢𑁂 𑀚𑀻𑀯𑀺𑀢𑀁 𑀧𑀸𑀡𑀢𑁄 𑀯𑀺𑀲𑀼𑀁 𑀦 𑀢𑀺𑀝𑁆𑀞𑀢𑀺 𑀦𑀸𑀫𑀸𑀢𑀺. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑁂𑀦. ‘‘𑀧𑀸𑀡’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁄𑀧𑀺 𑀫𑀦𑀼𑀲𑁆𑀲𑀧𑀸𑀡𑀲𑁆𑀲 𑀧𑀸𑀭𑀸𑀚𑀺𑀓𑀝𑁆𑀞𑀸𑀦𑁂 𑀕𑀳𑀺𑀢𑀢𑁆𑀢𑀸 𑀇𑀥 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀢𑀺𑀭𑀘𑁆𑀙𑀸𑀦𑀧𑀸𑀡𑁄𑀯 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀢𑀺𑀭𑀘𑁆𑀙𑀸𑀦𑀕𑀢𑁄𑀬𑁂𑀯 𑀧𑀸𑀡𑁄’’𑀢𑀺. 𑀢𑀦𑁆𑀢𑀺 𑀧𑀸𑀡𑀁. 𑀫𑀳𑀦𑁆𑀢𑁂 𑀧𑀦 𑀧𑀸𑀡𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁮𑁫. 𑀲𑁄𑀥𑁂𑀦𑁆𑀢𑁄 𑀅𑀧𑀦𑁂𑀢𑀻𑀢𑀺 𑀬𑁄𑀚𑀦𑀸. 𑀫𑀗𑁆𑀕𑀼𑀮𑁄𑀢𑀺 𑀫𑀦𑀼𑀲𑁆𑀲𑀭𑀢𑁆𑀢𑀧𑁄 𑀏𑀓𑁄 𑀓𑀺𑀫𑀺𑀯𑀺𑀲𑁂𑀲𑁄. 𑀲𑁄 𑀳𑀺 𑀭𑀢𑁆𑀢𑀧𑀺𑀯𑀦𑀢𑁆𑀣𑀸𑀬 𑀫𑀗𑁆𑀕𑀢𑀺 𑀇𑀢𑁄 𑀘𑀺𑀢𑁄 𑀘 𑀇𑀫𑀁 𑀘𑀺𑀫𑀜𑁆𑀘 𑀞𑀸𑀦𑀁 𑀕𑀘𑁆𑀙𑀢𑀻𑀢𑀺 ‘‘𑀫𑀗𑁆𑀕𑀼𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀤𑀓𑁆𑀔𑀭𑀸𑀦𑀜𑁆𑀳𑀺 𑀅𑀯𑀺𑀧𑀭𑀺𑀢𑀢𑁆𑀣𑀁, 𑀲𑁄𑀢𑀽𑀦𑀜𑁆𑀘 𑀲𑀚𑁆𑀛𑀸𑀬𑁄𑀧𑀤𑁂𑀲𑀮𑀪𑀦𑀢𑁆𑀣𑀁 𑀓𑀢𑁆𑀣𑀘𑀺 𑀞𑀸𑀦𑁂 𑀯𑀘𑀦𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲 𑀩𑀻𑀚𑀫𑁂𑀯 𑀔𑀼𑀤𑁆𑀤𑀓𑀝𑁆𑀞𑁂𑀦 𑀫𑀗𑁆𑀕𑀼𑀮𑀩𑀻𑀚𑀓𑀁, 𑀢𑀲𑁆𑀫𑀺𑀁. 𑀢𑀦𑁆𑀢𑀺 𑀫𑀗𑁆𑀕𑀼𑀮𑀩𑀻𑀚𑀓𑀁. 𑀪𑀺𑀦𑁆𑀤𑀦𑁆𑀢𑁄 𑀳𑀼𑀢𑁆𑀯𑀸𑀢𑀺 𑀬𑁄𑀚𑀦𑀸𑀢𑀺. 𑀧𑀞𑀫𑀁.

𑁨. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀁

𑁩𑁮𑁭. 𑀤𑀼𑀢𑀺𑀬𑁂 𑀲𑀳 𑀧𑀸𑀡𑁂𑀳𑀻𑀢𑀺 𑀲𑀧𑁆𑀧𑀸𑀡𑀓𑀁 𑀉𑀤𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂 𑀧𑀸𑀡𑀓𑀸’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁. 𑀧𑀢𑁆𑀢𑀧𑀽𑀭𑀫𑁆𑀧𑀺 𑀉𑀤𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀤𑀺𑀲𑁂𑀦𑀸𑀢𑀺 𑀲𑀧𑁆𑀧𑀸𑀡𑀓𑁂𑀦. 𑀥𑁄𑀯𑀢𑁄𑀧𑀺 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀬𑁄𑀚𑀦𑀸. 𑀉𑀤𑀓𑀲𑁄𑀡𑁆𑀟𑀺𑀦𑁆𑀢𑀺 𑀲𑀺𑀮𑀸𑀫𑀬𑀁 𑀉𑀤𑀓𑀲𑁄𑀡𑁆𑀟𑀺𑀁. 𑀧𑁄𑀓𑁆𑀔𑀭𑀡𑀺𑀦𑁆𑀢𑀺 𑀲𑀺𑀮𑀸𑀫𑀬𑀁 𑀧𑁄𑀓𑁆𑀔𑀭𑀡𑀺𑀁. 𑀉𑀝𑁆𑀞𑀸𑀧𑀬𑀢𑁄𑀧𑀺 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀲𑁄𑀡𑁆𑀟𑀺𑀧𑁄𑀓𑁆𑀔𑀭𑀡𑀻𑀳𑀺. 𑀉𑀤𑀓𑀲𑁆𑀲𑀸𑀢𑀺 𑀉𑀤𑀓𑁂𑀦, 𑀧𑀽𑀭𑁂 𑀖𑀝𑁂 𑀆𑀲𑀺𑀜𑁆𑀘𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀉𑀤𑀓𑁂. 𑀉𑀤𑀓𑁂𑀢𑀺 𑀉𑀤𑀓𑀲𑀡𑁆𑀞𑀸𑀦𑀓𑀧𑀤𑁂𑀲𑁂 𑀆𑀲𑀺𑀜𑁆𑀘𑀺𑀢𑀉𑀤𑀓𑁂. 𑀧𑀢𑀺𑀲𑁆𑀲𑀢𑀻𑀢𑀺 𑀲𑁄𑀡𑁆𑀟𑀺𑀧𑁄𑀓𑁆𑀔𑀭𑀡𑀻𑀳𑀺 𑀕𑀳𑀺𑀢𑀉𑀤𑀓𑀁 𑀧𑀢𑀺𑀲𑁆𑀲𑀢𑀻𑀢𑀺. 𑀤𑀼𑀢𑀺𑀬𑀁.

𑁩. 𑀉𑀓𑁆𑀓𑁄𑀝𑀦𑀲𑀺𑀓𑁆𑀔𑀸𑀧𑀤𑀁

𑁩𑁯𑁨. 𑀢𑀢𑀺𑀬𑁂 ‘‘𑀉𑀘𑁆𑀘𑀸𑀮𑁂𑀦𑁆𑀢𑀻’’𑀢𑀺𑀇𑀫𑀺𑀦𑀸 𑀉𑀓𑁆𑀓𑁄𑀝𑁂𑀦𑁆𑀢𑀻𑀢𑀺 𑀏𑀢𑁆𑀣 𑀉𑀧𑀼𑀩𑁆𑀩𑀲𑁆𑀲 𑀓𑀼𑀝𑀥𑀸𑀢𑀼𑀲𑁆𑀲 𑀉𑀘𑁆𑀘𑀸𑀮𑀦𑀢𑁆𑀣𑀁 𑀤𑀲𑁆𑀲𑁂𑀢𑀺 𑀥𑀸𑀢𑀽𑀦, 𑀫𑀦𑁂𑀓𑀢𑁆𑀣𑀢𑁆𑀢𑀸. 𑀬𑀁 𑀬𑀁 𑀧𑀢𑀺𑀝𑁆𑀞𑀺𑀢𑀁 𑀬𑀣𑀸𑀧𑀢𑀺𑀝𑁆𑀞𑀺𑀢𑀁, 𑀢𑀲𑁆𑀲 𑀪𑀸𑀯𑁄 𑀬𑀣𑀸𑀧𑀢𑀺𑀝𑁆𑀞𑀺𑀢𑀪𑀸𑀯𑁄, 𑀢𑁂𑀦.

𑁩𑁯𑁩. 𑀬𑁄 𑀥𑀫𑁆𑀫𑁄𑀢𑀺 𑀬𑁄 𑀲𑀫𑀣𑀥𑀫𑁆𑀫𑁄. 𑀥𑀫𑁆𑀫𑁂𑀦𑀸𑀢𑀺 𑀏𑀢𑁆𑀣 𑀏𑀦𑀲𑀤𑁆𑀤𑁂𑀦 ‘‘𑀬𑀣𑀸𑀥𑀫𑁆𑀫’’𑀦𑁆𑀢𑀺 𑀏𑀢𑁆𑀣 𑀅𑀁𑀇𑀢𑀺𑀓𑀸𑀭𑀺𑀬𑀲𑁆𑀲 𑀓𑀸𑀭𑀺𑀁 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 ‘‘𑀬𑀣𑀸𑀥𑀫𑁆𑀫’’𑀦𑁆𑀢𑀺 𑀧𑀤𑀲𑁆𑀲 ‘‘𑀦𑀺𑀳𑀢𑀸𑀥𑀺𑀓𑀭𑀡’’𑀦𑁆𑀢𑀺 𑀏𑀢𑁆𑀣 𑀦𑀺𑀳𑀢𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀲𑀢𑁆𑀣𑀸𑀭𑀸’’𑀢𑀺𑀧𑀤𑀁 ‘‘𑀯𑀼𑀢𑁆𑀢𑀁’’ 𑀇𑀢𑀺𑀧𑀤𑁂 𑀓𑀢𑁆𑀢𑀸. 𑀦𑀢𑁆𑀣𑀺 𑀳𑀢𑀁 𑀳𑀦𑀦𑀁 𑀇𑀫𑀲𑁆𑀲𑀸𑀢𑀺 𑀦𑀺𑀳𑀢𑀦𑁆𑀢𑀺 𑀯𑀼𑀢𑁆𑀢𑁂 𑀅𑀢𑁆𑀣𑀢𑁄 𑀯𑀽𑀧𑀲𑀫𑀦𑀫𑁂𑀯𑀸𑀢𑀺 𑀆𑀳 ‘‘𑀯𑀽𑀧𑀲𑀫𑀺𑀢’’𑀦𑁆𑀢𑀺.

𑁩𑁯𑁫. 𑀬𑀁 𑀯𑀸 𑀢𑀁 𑀯𑀸 𑀓𑀫𑁆𑀫𑀁 𑀥𑀫𑁆𑀫𑀓𑀫𑁆𑀫𑀁 𑀦𑀸𑀫 𑀦 𑀳𑁄𑀢𑀺, 𑀅𑀣 𑀔𑁄 𑀅𑀥𑀺𑀓𑀭𑀡𑀯𑀽𑀧𑀲𑀫𑀓𑀫𑁆𑀫𑀫𑁂𑀯 𑀥𑀫𑁆𑀫𑀓𑀫𑁆𑀫𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂𑀦 𑀓𑀫𑁆𑀫𑁂𑀦𑀸’’𑀢𑀺𑀆𑀤𑀺. 𑀅𑀬𑀫𑁆𑀧𑀻𑀢𑀺 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼. 𑀲𑁂𑀲𑀧𑀤𑀸𑀦𑀺𑀧𑀻𑀢𑀺 ‘‘𑀥𑀫𑁆𑀫𑀓𑀫𑁆𑀫𑁂 𑀯𑁂𑀫𑀢𑀺𑀓𑁄’’𑀢𑀺𑀆𑀤𑀻𑀦𑀺 𑀲𑁂𑀲𑀧𑀤𑀸𑀦𑀺𑀧𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑁂𑀯𑀸𑀢𑀺 𑀧𑀭𑀺𑀯𑀸𑀭𑁂 𑀏𑀯. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂, 𑀯𑀺𑀪𑀗𑁆𑀕𑁂 𑀯𑀸𑀢𑀺. 𑀢𑀢𑀺𑀬𑀁.

𑁪. 𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑀁

𑁩𑁯𑁯. 𑀘𑀢𑀼𑀢𑁆𑀣𑁂 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑀺𑀢𑀸𑀦𑀺 𑀤𑀼𑀝𑁆𑀞𑀼𑀮𑁆𑀮𑀲𑀤𑁆𑀤𑀢𑁆𑀣𑀪𑀸𑀯𑁂𑀦 𑀲𑀤𑀺𑀲𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀥𑀼𑀭’’𑀦𑁆𑀢𑀺 𑀏𑀢𑁆𑀣 𑀮𑀓𑁆𑀔𑀡𑀯𑀦𑁆𑀢𑀢𑁆𑀢𑀸 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀥𑀼𑀭𑁂’’𑀢𑀺. 𑀥𑀼𑀭𑁂 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀲𑀢𑀻𑀢𑀺 𑀬𑁄𑀚𑀦𑀸.

𑀏𑀯𑀁 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 ‘‘𑀅𑀜𑁆𑀜𑀲𑁆𑀲 𑀦𑀸𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀅𑀜𑁆𑀜𑀲𑁆𑀲𑀸𑀢𑀺 𑀯𑀢𑁆𑀣𑀼, 𑀧𑀼𑀕𑁆𑀕𑀮𑀢𑁄 𑀅𑀜𑁆𑀜𑀲𑁆𑀲 𑀤𑀼𑀢𑀺𑀬𑀲𑁆𑀲. 𑀲𑁄𑀧𑀻𑀢𑀺 𑀤𑀼𑀢𑀺𑀬𑁄𑀧𑀺. 𑀅𑀜𑁆𑀜𑀲𑁆𑀲𑀸𑀢𑀺 𑀢𑀢𑀺𑀬𑀲𑁆𑀲. 𑀬𑀸𑀯 𑀓𑁄𑀝𑀺 𑀦 𑀙𑀺𑀚𑁆𑀚𑀢𑀺, 𑀢𑀸𑀯 𑀆𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀢𑀲𑁆𑀲𑁂𑀯𑀸𑀢𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀧𑀼𑀕𑁆𑀕𑀮𑀲𑁆𑀲. 𑀯𑀢𑁆𑀣𑀼𑀧𑀼𑀕𑁆𑀕𑀮𑁄𑀬𑁂𑀯𑀸𑀢𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀧𑀼𑀕𑁆𑀕𑀮𑁄𑀬𑁂𑀯. 𑀅𑀬𑀦𑁆𑀢𑀺 𑀧𑀞𑀫𑀪𑀺𑀓𑁆𑀔𑀼. 𑀅𑀜𑁆𑀜𑀲𑁆𑀲𑀸𑀢𑀺 𑀤𑀼𑀢𑀺𑀬𑀲𑁆𑀲. 𑀲𑁄𑀢𑀺 𑀤𑀼𑀢𑀺𑀬𑁄 𑀆𑀭𑁄𑀘𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁂𑀦𑀸𑀢𑀺 𑀧𑀞𑀫𑀪𑀺𑀓𑁆𑀔𑀼𑀦𑀸. 𑀅𑀲𑁆𑀲𑀸𑀢𑀺 𑀤𑀼𑀢𑀺𑀬𑀲𑁆𑀲. 𑀢𑀲𑁆𑀲𑁂𑀯𑀸𑀢𑀺 𑀧𑀞𑀫𑀪𑀺𑀓𑁆𑀔𑀼𑀲𑁆𑀲𑁂𑀯. 𑀯𑀢𑁆𑀣𑀼𑀧𑀼𑀕𑁆𑀕𑀮𑀁 𑀉𑀧𑀦𑀺𑀥𑀸𑀬 ‘‘𑀢𑀢𑀺𑀬𑁂𑀦 𑀧𑀼𑀕𑁆𑀕𑀮𑁂𑀦 𑀤𑀼𑀢𑀺𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁.

𑁪𑁦𑁦. 𑀧𑀜𑁆𑀘𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀢𑀺 𑀣𑀼𑀮𑁆𑀮𑀘𑁆𑀘𑀬𑀸𑀤𑀺𑀓𑁂 𑀧𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂. 𑀅𑀚𑁆𑀛𑀸𑀘𑀸𑀭𑁄 𑀦𑀸𑀫𑀸𑀢𑀺 𑀅𑀥𑀺𑀪𑀯𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀺𑀢𑁆𑀯𑀸 𑀆𑀘𑀭𑀺𑀢𑀩𑁆𑀩𑀢𑁆𑀢𑀸 𑀅𑀚𑁆𑀛𑀸𑀘𑀸𑀭𑁄 𑀦𑀸𑀫𑀸𑀢𑀺. 𑀘𑀢𑀼𑀢𑁆𑀣𑀁.

𑁫. 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀁

𑁪𑁦𑁨. 𑀧𑀜𑁆𑀘𑀫𑁂 𑀅𑀗𑁆𑀕𑀼𑀮𑀺𑀬𑁄𑀢𑀺 𑀓𑀭𑀲𑀸𑀔𑀸𑀬𑁄. 𑀢𑀸 𑀳𑀺 𑀅𑀗𑁆𑀕𑀦𑁆𑀢𑀺 𑀳𑀢𑁆𑀣𑀢𑁄 𑀧𑀜𑁆𑀘𑀥𑀸 𑀪𑀺𑀚𑁆𑀚𑀺𑀢𑁆𑀯𑀸 𑀉𑀕𑁆𑀕𑀘𑁆𑀙𑀦𑁆𑀢𑀻𑀢𑀺 𑀅𑀗𑁆𑀕𑀼𑀮𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀮𑀺𑀔𑀦𑁆𑀢𑀲𑁆𑀲 𑀉𑀧𑀸𑀮𑀺𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀩𑀳𑀼𑀘𑀺𑀦𑁆𑀢𑁂𑀢𑀩𑁆𑀩𑀓𑀸𑀭𑀡𑁂𑀦. 𑀅𑀲𑁆𑀲𑀸𑀢𑀺 𑀉𑀧𑀸𑀮𑀺𑀲𑁆𑀲. 𑀉𑀭𑁄𑀢𑀺 𑀳𑀤𑀬𑀁. 𑀢𑀜𑁆𑀳𑀺 𑀉𑀲𑀢𑀺 𑀘𑀺𑀢𑁆𑀢𑀢𑀸𑀧𑁄 𑀤𑀳𑀢𑀺 𑀏𑀢𑁆𑀣𑀸𑀢𑀺 𑀉𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀭𑀽𑀧𑀲𑀼𑀢𑁆𑀢𑀦𑁆𑀢𑀺 𑀳𑁂𑀭𑀜𑁆𑀜𑀺𑀓𑀸𑀦𑀁 𑀭𑀽𑀧𑀲𑀼𑀢𑁆𑀢𑀁, 𑀬𑀣𑀸 𑀳𑀢𑁆𑀣𑀸𑀘𑀭𑀺𑀬𑀸𑀦𑀁 𑀳𑀢𑁆𑀣𑀺𑀲𑀼𑀢𑁆𑀢𑀦𑁆𑀢𑀺. 𑀅𑀓𑁆𑀔𑀻𑀦𑀻𑀢𑀺 𑀘𑀓𑁆𑀔𑀽𑀦𑀺. 𑀢𑀸𑀦𑀺 𑀳𑀺 𑀅𑀓𑁆𑀔𑀦𑁆𑀢𑀺 𑀯𑀺𑀲𑀬𑁂𑀲𑀼 𑀩𑁆𑀬𑀸𑀧𑀻𑀪𑀯𑀦𑁆𑀢𑀺, 𑀭𑀽𑀧𑀁 𑀯𑀸 𑀧𑀲𑁆𑀲𑀢𑀺 𑀇𑀫𑁂𑀳𑀻𑀢𑀺 𑀅𑀓𑁆𑀔𑀻𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀓𑀲𑁂𑀦 𑀲𑀽𑀘𑀺𑀫𑀼𑀔𑀸𑀦𑀁 𑀕𑀳𑀺𑀢𑀢𑁆𑀢𑀸 𑀟𑀁𑀲𑁂𑀦 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀬𑁄𑀯 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀬𑁄’’𑀢𑀺. 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀬𑁄 𑀳𑀺 𑀟𑀁𑀲𑀦𑀝𑁆𑀞𑁂𑀦 𑀔𑀸𑀤𑀦𑀝𑁆𑀞𑁂𑀦 𑀟𑀁𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀤𑀼𑀓𑁆𑀓𑀭𑁄 𑀔𑀫𑁄 𑀏𑀢𑀸𑀲𑀦𑁆𑀢𑀺 𑀤𑀼𑀓𑁆𑀔𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀤𑀼𑀓𑁆𑀔𑀫𑀸𑀦’’𑀦𑁆𑀢𑀺. 𑀯𑁂𑀤𑀦𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑀸𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀫𑀥𑀼𑀭𑀸𑀦’’𑀦𑁆𑀢𑀺. 𑀇𑀫𑀺𑀦𑀸 𑀅𑀫𑀥𑀼𑀭𑀢𑁆𑀢𑀸 𑀦 𑀲𑀸𑀤𑀺𑀢𑀩𑁆𑀩𑀸𑀢𑀺 𑀅𑀲𑀸𑀢𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀸𑀡𑀲𑀤𑁆𑀤𑀚𑀻𑀯𑀺𑀢𑀲𑀤𑁆𑀤𑀸𑀦𑀁 𑀧𑀭𑀺𑀬𑀸𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀚𑀻𑀯𑀺𑀢𑀳𑀭𑀸𑀦’’𑀦𑁆𑀢𑀺. 𑀧𑀸𑀡𑀁 𑀳𑀭𑀦𑁆𑀢𑀺 𑀅𑀧𑀦𑁂𑀦𑁆𑀢𑀻𑀢𑀺 𑀧𑀸𑀡𑀳𑀭𑀸, 𑀢𑀸𑀲𑀁 𑀯𑁂𑀤𑀦𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁦𑁪. 𑀯𑀺𑀚𑀸𑀬𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄 𑀦 𑀕𑀳𑁂𑀢𑀩𑁆𑀩𑁄, 𑀕𑀩𑁆𑀪𑀕𑀳𑀡𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬𑀸’’𑀢𑀺. 𑀕𑀩𑁆𑀪𑁂 𑀲𑀬𑀺𑀢𑀓𑀸𑀮𑁂𑀦 𑀲𑀤𑁆𑀥𑀺𑀁 𑀯𑀻𑀲𑀢𑀺𑀫𑀁 𑀯𑀲𑁆𑀲𑀁 𑀧𑀭𑀺𑀧𑀼𑀡𑁆𑀡𑀫𑀲𑁆𑀲𑀸𑀢𑀺 𑀕𑀩𑁆𑀪𑀯𑀻𑀲𑁄 𑀧𑀼𑀕𑁆𑀕𑀮𑁄. 𑀳𑀻𑀢𑀺 𑀲𑀘𑁆𑀘𑀁. 𑀬𑀣𑀸𑀳𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑁂𑀦𑀸𑀓𑀸𑀭𑁂𑀦 𑀪𑀕𑀯𑀸 𑀆𑀳𑀸𑀢𑀺 𑀬𑁄𑀚𑀦𑀸. 𑀅𑀣 𑀯𑀸 𑀬𑀣𑀸 𑀓𑀺𑀁 𑀯𑀘𑀦𑀁 𑀪𑀕𑀯𑀸 𑀆𑀳𑀸𑀢𑀺 𑀬𑁄𑀚𑀦𑀸.

𑀕𑀩𑁆𑀪𑀯𑀻𑀲𑁄 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀫𑁆𑀳𑀻𑀢𑀺 𑀅𑀲𑁆𑀫𑀺. 𑀦𑀼𑀲𑀤𑁆𑀤𑁄 𑀧𑀭𑀺𑀯𑀺𑀢𑀓𑁆𑀓𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀦𑁆𑀢𑀺 𑀬𑀸𑀤𑀺𑀲𑀁 𑀧𑀞𑀫𑀁 𑀘𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀤𑀲𑁆𑀲𑁂𑀢𑀺. ‘‘𑀧𑀞𑀫𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑀦𑁆𑀢𑀺 𑀧𑀞𑀫𑀁 𑀘𑀺𑀢𑁆𑀢𑀁 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁. 𑀅𑀲𑁆𑀲𑀸𑀢𑀺 𑀲𑀢𑁆𑀢𑀲𑁆𑀲. 𑀲𑀸𑀯 𑀚𑀸𑀢𑀻𑀢𑀺 𑀲𑀸 𑀏𑀯 𑀧𑀝𑀺𑀲𑀦𑁆𑀥𑀺, 𑀕𑀩𑁆𑀪𑁄 𑀦𑀸𑀫 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣𑀸𑀢𑀺 𑀧𑀸𑀴𑀺𑀬𑀁, 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀬𑁄𑀢𑀺 𑀧𑀼𑀕𑁆𑀕𑀮𑁄. 𑀫𑀳𑀸𑀧𑀯𑀸𑀭𑀡𑀸𑀬𑀸𑀢𑀺 𑀅𑀲𑁆𑀲𑀬𑀼𑀚𑀧𑀼𑀡𑁆𑀡𑀫𑀺𑀬𑀁. 𑀲𑀸 𑀳𑀺 𑀧𑀽𑀚𑀺𑀢𑀧𑀯𑀸𑀭𑀡𑀢𑁆𑀢𑀸 𑀫𑀳𑀸𑀧𑀯𑀸𑀭𑀡𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄𑀢𑀺 𑀧𑀯𑀸𑀭𑀡𑀸𑀬 𑀚𑀸𑀢𑀓𑀸𑀮𑀢𑁄. 𑀢𑀦𑁆𑀢𑀺 𑀫𑀳𑀸𑀧𑀯𑀸𑀭𑀡𑀁. 𑀧𑀸𑀝𑀺𑀧𑀤𑁂 𑀘𑀸𑀢𑀺 𑀏𑀢𑁆𑀣 𑀘𑀲𑀤𑁆𑀤𑁄 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑁄, 𑀧𑀯𑀸𑀭𑀡𑀤𑀺𑀯𑀲𑀧𑀸𑀝𑀺𑀧𑀤𑀤𑀺𑀯𑀲𑁂𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀤𑀺𑀯𑀲𑁂 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀳𑀸𑀬𑀦𑀯𑀟𑁆𑀠𑀦𑀦𑁆𑀢𑀺 𑀓𑀼𑀘𑁆𑀙𑀺𑀫𑁆𑀳𑀺 𑀯𑀲𑀺𑀢𑀫𑀸𑀲𑁂𑀲𑀼 𑀅𑀥𑀺𑀓𑁂𑀲𑀼 𑀳𑀸𑀬𑀦𑀜𑁆𑀘 𑀊𑀦𑁂𑀲𑀼 𑀯𑀟𑁆𑀠𑀼𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀧𑀦 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀦𑁆𑀢𑀺 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀁 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀁. 𑀦𑀺𑀓𑁆𑀔𑀫𑀦𑀻𑀬𑁄𑀢𑀺 𑀲𑀸𑀯𑀡𑀫𑀸𑀲𑁄. 𑀲𑁄 𑀳𑀺 𑀅𑀦𑁆𑀢𑁄𑀯𑀻𑀣𑀺𑀢𑁄 𑀩𑀸𑀳𑀺𑀭𑀯𑀻𑀣𑀺𑀁 𑀦𑀺𑀓𑁆𑀔𑀫𑀢𑀺 𑀲𑀽𑀭𑀺𑀬𑁄 𑀅𑀲𑁆𑀫𑀺𑀦𑁆𑀢𑀺 ‘‘𑀦𑀺𑀓𑁆𑀔𑀫𑀦𑀻𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀝𑀺𑀧𑀤𑀤𑀺𑀯𑀲𑁂𑀢𑀺 𑀧𑀘𑁆𑀙𑀺𑀫𑀺𑀓𑀸𑀬 𑀯𑀲𑁆𑀲𑀽𑀧𑀕𑀫𑀦𑀤𑀺𑀯𑀲𑁂. 𑀢𑀁 𑀉𑀧𑀲𑀫𑁆𑀧𑀸𑀤𑀦𑀁. 𑀓𑀲𑁆𑀫𑀸𑀢𑀺 𑀧𑀼𑀘𑁆𑀙𑀸. 𑀏𑀢𑁆𑀣 𑀞𑀢𑁆𑀯𑀸 𑀧𑀭𑀺𑀳𑀸𑀭𑁄 𑀯𑀼𑀘𑁆𑀘𑀢𑁂 𑀫𑀬𑀸𑀢𑀺 𑀬𑁄𑀚𑀦𑀸. 𑀯𑀻𑀲𑀢𑀺𑀬𑀸 𑀯𑀲𑁆𑀲𑁂𑀲𑀽𑀢𑀺 𑀉𑀧𑀲𑀫𑁆𑀧𑀦𑁆𑀦𑀧𑀼𑀕𑁆𑀕𑀮𑀲𑁆𑀲 𑀯𑀻𑀲𑀢𑀺𑀬𑀸 𑀯𑀲𑁆𑀲𑁂𑀲𑀼. 𑀢𑀺𑀁𑀲𑀭𑀢𑁆𑀢𑀺𑀤𑀺𑀯𑀲𑁆𑀲 𑀏𑀓𑀫𑀸𑀲𑀢𑁆𑀢𑀸 ‘‘𑀘𑀢𑁆𑀢𑀸𑀭𑁄 𑀫𑀸𑀲𑀸 𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀓𑁆𑀓𑀟𑁆𑀠𑀦𑁆𑀢𑀻𑀢𑀺 𑀏𑀓𑀲𑁆𑀲 𑀅𑀥𑀺𑀓𑀫𑀸𑀲𑀲𑁆𑀲 𑀦𑀸𑀲𑀦𑀢𑁆𑀣𑀸𑀬 𑀯𑀲𑁆𑀲𑀁 𑀉𑀧𑀭𑀺 𑀓𑀟𑁆𑀠𑀦𑁆𑀢𑀺. 𑀢𑀢𑁄𑀢𑀺 𑀙𑀫𑀸𑀲𑀢𑁄 𑀅𑀧𑀦𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 ‘‘𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲’’𑀦𑁆𑀢𑀺𑀆𑀤𑀺𑀯𑀘𑀦𑁂. 𑀧𑀦-𑀲𑀤𑁆𑀤𑁄 𑀳𑀺𑀲𑀤𑁆𑀤𑀢𑁆𑀣𑁄, 𑀲𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀬𑁄𑀢𑀺 𑀧𑀼𑀕𑁆𑀕𑀮𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀕𑀩𑁆𑀪𑀫𑀸𑀲𑀸𑀦𑀫𑁆𑀧𑀺 𑀕𑀡𑀦𑀽𑀧𑀕𑀢𑁆𑀢𑀸 𑀕𑀳𑁂𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀙 𑀫𑀸𑀲𑁂 𑀯𑀲𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀝𑁆𑀞 𑀫𑀸𑀲𑁂 𑀯𑀲𑀺𑀢𑁆𑀯𑀸 𑀚𑀸𑀢𑁄𑀧𑀺 𑀦 𑀚𑀻𑀯𑀢𑀻𑀢𑀺 𑀲𑀼𑀢𑁆𑀢𑀦𑁆𑀢𑀅𑀝𑁆𑀞𑀓𑀣𑀸𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁪-𑁨𑁫; 𑀫. 𑀦𑀺. 𑀅𑀝𑁆𑀞. 𑁩.𑁨𑁦𑁫) 𑀯𑀼𑀢𑁆𑀢𑀁.

𑁪𑁦𑁬. 𑀤𑀲𑀯𑀲𑁆𑀲𑀘𑁆𑀘𑀬𑁂𑀦𑀸𑀢𑀺 𑀉𑀧𑀲𑀫𑁆𑀧𑀤𑀢𑁄 𑀤𑀲𑀯𑀲𑁆𑀲𑀸𑀢𑀺𑀓𑁆𑀓𑀫𑁂𑀦. 𑀉𑀧𑀲𑀫𑁆𑀧𑀸𑀤𑁂𑀢𑀻𑀢𑀺 𑀉𑀧𑀚𑁆𑀛𑀸𑀬𑁄 𑀯𑀸 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄 𑀯𑀸 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀺. 𑀢𑀦𑁆𑀢𑀺 𑀉𑀧𑀚𑁆𑀛𑀸𑀘𑀭𑀺𑀬𑀪𑀽𑀢𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀧𑀼𑀕𑁆𑀕𑀮𑀁. 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄 𑀳𑀼𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁄 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀘𑁂 𑀅𑀜𑁆𑀜𑁄𑀧𑀺 𑀓𑀫𑁆𑀫𑀯𑀸𑀘𑀸𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀽𑀧𑀲𑀫𑁆𑀧𑀦𑁆𑀦𑁄. 𑀲𑁄𑀯 𑀲𑀘𑁂 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑀺, 𑀦𑀼𑀧𑀲𑀫𑁆𑀧𑀦𑁆𑀦𑁄. 𑀜𑀢𑁆𑀯𑀸 𑀧𑀦 𑀧𑀼𑀦 𑀅𑀦𑀼𑀧𑀲𑀫𑁆𑀧𑀸𑀤𑁂𑀦𑁆𑀢𑁂 𑀲𑀕𑁆𑀕𑀦𑁆𑀢𑀭𑀸𑀬𑁄𑀧𑀺 𑀫𑀕𑁆𑀕𑀦𑁆𑀢𑀭𑀸𑀬𑁄𑀧𑀺 𑀳𑁄𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀣𑁂𑀬𑁆𑀬𑀲𑀢𑁆𑀣𑀲𑀺𑀓𑁆𑀔𑀸𑀧𑀤𑀁

𑁪𑁦𑁭. 𑀙𑀝𑁆𑀞𑁂 ‘‘𑀧𑀝𑀺𑀬𑀸𑀮𑁄𑀓’’𑀦𑁆𑀢𑀺 𑀏𑀢𑁆𑀣 𑀆𑀮𑁄𑀓𑀲𑀤𑁆𑀤𑁂𑀦 𑀲𑀽𑀭𑀺𑀬𑁄 𑀯𑀼𑀢𑁆𑀢𑁄 𑀉𑀧𑀘𑀸𑀭𑁂𑀦. 𑀲𑀽𑀭𑀺𑀬𑁄 𑀳𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀤𑀺𑀲𑀁 𑀕𑀢𑁄, 𑀢𑀲𑁆𑀫𑀸 𑀲𑀽𑀭𑀺𑀬𑀲𑀗𑁆𑀔𑀸𑀢𑀲𑁆𑀲 𑀆𑀮𑁄𑀓𑀲𑁆𑀲 𑀧𑀝𑀺𑀫𑀼𑀔𑀁 ‘‘𑀧𑀝𑀺𑀬𑀸𑀮𑁄𑀓’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀘𑁆𑀙𑀺𑀫𑀤𑀺𑀲𑀸𑀬𑁂𑀯 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀧𑀘𑁆𑀙𑀺𑀫𑀁 𑀤𑀺𑀲𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀓𑀫𑁆𑀫𑀺𑀓𑀸𑀢𑀺 𑀓𑀫𑁆𑀫𑁂 𑀬𑀼𑀢𑁆𑀢𑀸 𑀧𑀬𑀼𑀢𑁆𑀢𑀸.

𑁪𑁦𑁯. 𑀭𑀸𑀚𑀸𑀦𑀦𑁆𑀢𑀺 𑀏𑀢𑁆𑀣 𑀭𑀜𑁆𑀜𑁄 𑀲𑀦𑁆𑀢𑀓𑀁 ‘‘𑀭𑀸𑀚𑀸’’𑀢𑀺 𑀯𑀼𑀘𑁆𑀘𑀢𑀺 𑀉𑀧𑀘𑀸𑀭𑁂𑀦, 𑀅𑀣 𑀯𑀸 𑀭𑀜𑁆𑀜𑁄 𑀏𑀲𑁄 ‘‘𑀭𑀸𑀚𑀸’’𑀢𑀺 𑀓𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀓𑀁 ‘‘𑀭𑀸𑀚𑀸’’𑀢𑀺 𑀯𑀼𑀘𑁆𑀘𑀢𑀺. 𑀣𑁂𑀬𑁆𑀬𑀦𑁆𑀢𑀺 𑀣𑁂𑀦𑁂𑀢𑁆𑀯𑀸 ‘‘𑀲𑀓𑁆𑀓𑀘𑁆𑀘’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁦𑁬) 𑀯𑀺𑀬 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀳𑁄𑀢𑀺. 𑀭𑀸𑀚𑀸𑀦𑀁, 𑀭𑀜𑁆𑀜𑁄 𑀲𑀦𑁆𑀢𑀓𑀁 𑀯𑀸 𑀣𑁂𑀬𑁆𑀬𑀁 𑀣𑁂𑀦𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀸𑀚𑀸𑀦𑀁 𑀯𑀸 𑀣𑁂𑀦𑁂𑀢𑁆𑀯𑀸’’𑀢𑀺𑀆𑀤𑀺.

𑁪𑁧𑁧. 𑀘𑀢𑀽𑀲𑀼 𑀯𑀺𑀲𑀗𑁆𑀓𑁂𑀢𑁂𑀲𑀼 𑀤𑁆𑀯𑀻𑀳𑀺 𑀅𑀦𑀸𑀧𑀢𑁆𑀢𑀺, 𑀤𑁆𑀯𑀻𑀳𑀺 𑀆𑀧𑀢𑁆𑀢𑀺𑀬𑁂𑀯𑀸𑀢𑀺. 𑀙𑀝𑁆𑀞𑀁.

𑁭. 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀁

𑁪𑁧𑁨. 𑀲𑀢𑁆𑀢𑀫𑁂 ‘‘𑀧𑀥𑀽𑀧𑁂𑀦𑁆𑀢𑁄’’𑀢𑀺 𑀏𑀢𑁆𑀣 𑀧𑀧𑀼𑀩𑁆𑀩 𑀥𑀽𑀧𑀥𑀸𑀢𑀼 𑀧𑀭𑀺𑀪𑀸𑀲𑀦𑀢𑁆𑀣𑁂 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀧𑀭𑀺𑀪𑀸𑀲𑀦𑁆𑀢𑁄’’𑀢𑀺. 𑀢𑁆𑀯𑀁 𑀲𑀫𑀡𑁄𑀧𑀺 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀲𑀺, 𑀢𑀼𑀬𑁆𑀳𑁂𑀯𑁂𑀲𑁄 𑀤𑁄𑀲𑁄, 𑀦𑁂𑀢𑀲𑁆𑀲 𑀧𑀼𑀭𑀺𑀲𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀁𑀬𑁂𑀯 𑀧𑀭𑀺𑀪𑀸𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀦𑀺𑀓𑁆𑀔𑀸𑀫𑁂𑀲𑀻’’𑀢𑀺𑀇𑀫𑀺𑀦𑀸 ‘‘𑀦𑀺𑀧𑁆𑀧𑀸𑀢𑁂𑀲𑀻’’𑀢𑀺𑀏𑀢𑁆𑀣 𑀦𑀺𑀧𑀼𑀩𑁆𑀩 𑀧𑀢𑀥𑀸𑀢𑀼 𑀕𑀢𑁆𑀬𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀻𑀢𑀺. 𑀲𑀢𑁆𑀢𑀫𑀁.

𑁮. 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀁

𑁪𑁧𑁭. 𑀅𑀝𑁆𑀞𑀫𑁂 𑀕𑀦𑁆𑀥𑁂𑀢𑀺 𑀕𑀺𑀚𑁆𑀛𑁂. 𑀢𑁂 𑀳𑀺 𑀕𑀺𑀥𑀦𑁆𑀢𑀺 𑀓𑀼𑀡𑀧𑀁 𑀅𑀪𑀺𑀓𑀗𑁆𑀔𑀦𑁆𑀢𑀻𑀢𑀺 ‘‘𑀕𑀦𑁆𑀥𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀕𑀤𑁆𑀥𑁂𑀢𑀺𑀧𑀺 𑀧𑀸𑀞𑁄, 𑀲𑁄𑀧𑀺 𑀬𑀼𑀚𑁆𑀚𑀢𑀺 𑀬𑀣𑀸 ‘‘𑀬𑀼𑀕𑀦𑀦𑁆𑀥𑁄, 𑀬𑀼𑀕𑀦𑀤𑁆𑀥𑁄’’𑀢𑀺 𑀘 ‘‘𑀧𑀝𑀺𑀩𑀦𑁆𑀥𑁄 𑀧𑀝𑀺𑀩𑀤𑁆𑀥𑁄’’𑀢𑀺 𑀘. 𑀩𑀸𑀥𑀬𑀺𑀁𑀲𑀽𑀢𑀺 𑀳𑀦𑀺𑀁𑀲𑀼. 𑀅𑀲𑁆𑀲𑀸𑀢𑀺 𑀅𑀭𑀺𑀝𑁆𑀞𑀲𑁆𑀲.

𑀢𑀤𑁆𑀥𑀺𑀢𑁂𑀦 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑁂’’𑀢𑀺𑀆𑀤𑀺. 𑀢𑁂𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀢𑀢𑁆𑀣𑀸𑀢𑀺 𑀧𑀜𑁆𑀘𑀯𑀺𑀥𑁂𑀲𑀼 𑀅𑀦𑁆𑀢𑀭𑀸𑀬𑀺𑀓𑁂𑀲𑀼. ‘‘𑀢𑀣𑀸’’𑀢𑀺𑀧𑀤𑁂𑀦 ‘‘𑀓𑀫𑁆𑀫𑀦𑁆𑀢𑀭𑀸𑀬𑀺𑀓𑀁 𑀦𑀸𑀫𑀸’’𑀢𑀺 𑀧𑀤𑀁 𑀅𑀢𑀺𑀤𑀺𑀲𑀢𑀺. 𑀢𑀁 𑀧𑀦𑀸𑀢𑀺 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀓𑀫𑁆𑀫𑀁 𑀧𑀦. 𑀫𑁄𑀓𑁆𑀔𑀲𑁆𑀲𑁂𑀯𑀸𑀢𑀺 𑀫𑀕𑁆𑀕𑀦𑀺𑀩𑁆𑀩𑀸𑀦𑀲𑁆𑀲𑁂𑀯. 𑀫𑀕𑁆𑀕𑁄 𑀳𑀺 𑀓𑀺𑀮𑁂𑀲𑁂𑀳𑀺 𑀫𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁂𑀦 𑀫𑁄𑀓𑁆𑀔𑁄 𑀦𑀸𑀫. 𑀛𑀸𑀦𑀫𑁆𑀧𑁂𑀢𑁆𑀣 𑀲𑀗𑁆𑀕𑀳𑀺𑀢𑀁 𑀦𑀻𑀯𑀭𑀡𑁂𑀳𑀺 𑀯𑀺𑀫𑀼𑀘𑁆𑀘𑀦𑀢𑁆𑀢𑀸. 𑀦𑀺𑀩𑁆𑀩𑀸𑀦𑀁 𑀯𑀺𑀫𑀼𑀘𑁆𑀘𑀻𑀢𑀺 𑀅𑀢𑁆𑀣𑁂𑀦 𑀫𑁄𑀓𑁆𑀔𑁄 𑀦𑀸𑀫. 𑀨𑀮𑀫𑁆𑀧𑁂𑀢𑁆𑀣 𑀲𑀗𑁆𑀕𑀳𑀺𑀢𑀁 𑀯𑀺𑀫𑀼𑀘𑁆𑀘𑀺𑀢𑀢𑁆𑀢𑀸. 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑀸𑀢𑀺 𑀦𑀺𑀬𑀢𑀪𑀸𑀯𑀁 𑀧𑀢𑁆𑀢𑀸, 𑀦𑀺𑀬𑀢𑀯𑀲𑁂𑀦 𑀯𑀸 𑀧𑀯𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸 𑀥𑀫𑁆𑀫𑀸. 𑀢𑁂 𑀧𑀦 𑀦𑀢𑁆𑀣𑀺𑀓𑀅𑀳𑁂𑀢𑀼𑀓 𑀅𑀓𑀺𑀭𑀺𑀬𑀯𑀲𑁂𑀦 𑀢𑀺𑀯𑀺𑀥𑀸. 𑀧𑀡𑁆𑀟𑀓𑀸𑀤𑀺𑀕𑀳𑀡𑀲𑁆𑀲 𑀦𑀺𑀤𑀲𑁆𑀲𑀦𑀫𑀢𑁆𑀢𑀢𑁆𑀢𑀸 ‘𑀧𑀝𑀺𑀲𑀦𑁆𑀥𑀺𑀥𑀫𑁆𑀫𑀸’’𑀢𑀺𑀧𑀤𑁂𑀦 𑀅𑀳𑁂𑀢𑀼𑀓𑀤𑁆𑀯𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀥𑀫𑁆𑀫𑀸 𑀕𑀳𑁂𑀢𑀩𑁆𑀩𑀸 𑀲𑀩𑁆𑀩𑁂𑀲𑀫𑁆𑀧𑀺 𑀯𑀺𑀧𑀸𑀓𑀦𑁆𑀢𑀭𑀸𑀬𑀺𑀓𑀪𑀸𑀯𑀢𑁄. 𑀢𑁂𑀧𑀺 𑀫𑁄𑀓𑁆𑀔𑀲𑁆𑀲𑁂𑀯 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀺, 𑀦 𑀲𑀕𑁆𑀕𑀲𑁆𑀲. 𑀢𑁂 𑀧𑀦𑀸𑀢𑀺 𑀅𑀭𑀺𑀬𑀽𑀧𑀯𑀸𑀤𑀸 𑀧𑀦. 𑀢𑀸𑀯𑀤𑁂𑀯 𑀉𑀧𑀯𑀸𑀤𑀦𑁆𑀢𑀭𑀸𑀬𑀺𑀓𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀢𑀸𑀧𑀻𑀢𑀺 𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀸 𑀆𑀧𑀢𑁆𑀢𑀺𑀬𑁄𑀧𑀺. 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀪𑀸𑀯𑀁 𑀯𑀸 𑀧𑀝𑀺𑀚𑀸𑀦𑀸𑀢𑀻’’𑀢𑀺. 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦 𑀯𑀼𑀝𑁆𑀞𑀸𑀢𑀺 𑀯𑀸’’𑀢𑀺. 𑀮𑀳𑀼𑀓𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦 𑀤𑁂𑀲𑁂𑀢𑀺 𑀯𑀸’’𑀢𑀺.

𑀢𑀢𑁆𑀭𑀸𑀢𑀺 𑀧𑀜𑁆𑀘𑀯𑀺𑀥𑁂𑀲𑀼 𑀅𑀦𑁆𑀢𑀭𑀸𑀬𑀺𑀓𑁂𑀲𑀼. 𑀅𑀬𑀁 𑀪𑀺𑀓𑁆𑀔𑀽𑀢𑀺 𑀅𑀭𑀺𑀝𑁆𑀞𑁄 𑀕𑀦𑁆𑀥𑀩𑀸𑀥𑀺𑀧𑀼𑀩𑁆𑀩𑁄 𑀪𑀺𑀓𑁆𑀔𑀼. 𑀲𑁂𑀲𑀦𑁆𑀢𑀭𑀸𑀬𑀺𑀓𑁂𑀢𑀺 𑀆𑀡𑀸𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑀢𑁄 𑀲𑁂𑀲𑁂 𑀘𑀢𑀼𑀩𑁆𑀩𑀺𑀥𑁂 𑀅𑀦𑁆𑀢𑀭𑀸𑀬𑀺𑀓𑁂. 𑀇𑀫𑁂 𑀆𑀕𑀸𑀭𑀺𑀓𑀸𑀢𑀺 𑀅𑀕𑀸𑀭𑁂 𑀯𑀲𑀦𑀲𑀻𑀮𑀸 𑀇𑀫𑁂 𑀫𑀦𑀼𑀲𑁆𑀲𑀸. 𑀪𑀺𑀓𑁆𑀔𑀽𑀧𑀺 𑀧𑀲𑁆𑀲𑀦𑁆𑀢𑀺 𑀨𑀼𑀲𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀦 𑀯𑀝𑁆𑀝𑀦𑁆𑀢𑀺, 𑀯𑀝𑁆𑀝𑀦𑁆𑀢𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀲𑁂𑀦 𑀭𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀉𑀧𑀸𑀤𑀺𑀡𑁆𑀡𑀓𑀭𑀲𑁂𑀦 𑀅𑀦𑀼𑀧𑀸𑀤𑀺𑀡𑁆𑀡𑀓𑀭𑀲𑀁, 𑀅𑀦𑀼𑀧𑀸𑀤𑀺𑀡𑁆𑀡𑀓𑀭𑀲𑁂𑀦 𑀯𑀸 𑀉𑀧𑀸𑀤𑀺𑀡𑁆𑀡𑀓𑀭𑀲𑀁 𑀲𑀫𑀸𑀦𑁂𑀢𑁆𑀯𑀸. 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀡𑀲𑁆𑀲 𑀅𑀪𑀸𑀯𑀢𑁄 𑀲𑀁𑀯𑀺𑀚𑁆𑀚𑀢𑀺 𑀙𑀦𑁆𑀤𑀭𑀸𑀕𑁄 𑀏𑀢𑁆𑀣𑀸𑀢𑀺 𑀲𑀘𑁆𑀙𑀦𑁆𑀤𑀭𑀸𑀕𑁄, 𑀲𑁄𑀬𑁂𑀯 𑀧𑀭𑀺𑀪𑁄𑀕𑁄 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁄, 𑀢𑀁. 𑀏𑀓𑀁 𑀓𑀢𑁆𑀯𑀸𑀢𑀺 𑀲𑀫𑀸𑀦𑀁 𑀓𑀢𑁆𑀯𑀸. 𑀖𑀝𑁂𑀦𑁆𑀢𑁄 𑀯𑀺𑀬 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀓𑀺𑀁𑀲𑀤𑁆𑀤𑁄 𑀕𑀭𑀳𑀢𑁆𑀣𑁄, 𑀓𑀲𑁆𑀫𑀸 𑀪𑀕𑀯𑀢𑀸 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁, 𑀦 𑀧𑀜𑁆𑀜𑀸𑀧𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀸𑀲𑀫𑀼𑀤𑁆𑀤𑀁 𑀩𑀦𑁆𑀥𑀦𑁆𑀢𑁄 𑀬𑀣𑀸 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺, 𑀢𑀣𑀸 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑁄 𑀪𑀕𑀯𑀸 𑀅𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀸𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑁂. 𑀆𑀲𑀦𑁆𑀢𑀺 𑀪𑀩𑁆𑀩𑀸𑀲𑀁. 𑀆𑀡𑀸𑀘𑀓𑁆𑀓𑁂𑀢𑀺 𑀆𑀡𑀸𑀲𑀗𑁆𑀔𑀸𑀢𑁂 𑀘𑀓𑁆𑀓𑁂.

𑀅𑀝𑁆𑀞𑀺𑀬𑁂𑀯 𑀅𑀝𑁆𑀞𑀺𑀓𑀁 𑀓𑀼𑀘𑁆𑀙𑀺𑀢𑀢𑁆𑀣𑁂𑀦, 𑀓𑀼𑀘𑁆𑀙𑀺𑀢𑀢𑁆𑀣𑁂 𑀳𑀺 𑀓𑁄. 𑀅𑀝𑁆𑀞𑀺𑀓𑀫𑁂𑀯 𑀔𑀮𑁄 𑀦𑀻𑀘𑀝𑁆𑀞𑁂𑀦 𑀮𑀸𑀫𑀓𑀝𑁆𑀞𑁂𑀦𑀸𑀢𑀺 𑀅𑀝𑁆𑀞𑀺𑀓𑀗𑁆𑀔𑀮𑁄 𑀦𑀺𑀕𑁆𑀕𑀳𑀻𑀢𑀸𑀕𑀫𑀁 𑀓𑀢𑁆𑀯𑀸. 𑀢𑁂𑀦 𑀉𑀧𑀫𑀸 𑀲𑀤𑀺𑀲𑀸𑀢𑀺 𑀅𑀝𑁆𑀞𑀺𑀓𑀗𑁆𑀔𑀮𑀽𑀧𑀫𑀸. ‘‘𑀅𑀝𑁆𑀞𑀻’’𑀢𑀺 𑀘 ‘‘𑀓𑀗𑁆𑀔𑀮’’𑀦𑁆𑀢𑀺 𑀘 𑀧𑀤𑀁 𑀕𑀳𑁂𑀢𑁆𑀯𑀸 𑀯𑀡𑁆𑀡𑁂𑀦𑁆𑀢𑀺 𑀆𑀘𑀭𑀺𑀬𑀸 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁪𑁧𑁭; 𑀯𑀺. 𑀯𑀺. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁨.𑁪𑁧𑁭; 𑀫. 𑀦𑀺. 𑀅𑀝𑁆𑀞. 𑁨.𑁪𑁨; 𑀫. 𑀦𑀺. 𑀝𑀻. 𑁩.𑁪𑁨). 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸𑀢𑀺 𑀅𑀗𑁆𑀕𑀸𑀭𑀭𑀸𑀲𑀺𑀲𑀤𑀺𑀲𑀸, 𑀅𑀗𑁆𑀕𑀸𑀭𑁂𑀳𑀺 𑀯𑀸 𑀧𑀭𑀺𑀧𑀼𑀡𑁆𑀡𑀸 𑀆𑀯𑀸𑀝𑀲𑀤𑀺𑀲𑀸. 𑀅𑀲𑀺𑀲𑀽𑀦𑀽𑀧𑀫𑀸𑀢𑀺 𑀏𑀢𑁆𑀣 𑀅𑀲𑀻𑀢𑀺 𑀔𑀕𑁆𑀕𑁄. 𑀲𑁄 𑀳𑀺 𑀅𑀲𑀢𑁂 𑀔𑀺𑀧𑀢𑁂 𑀅𑀦𑁂𑀦𑀸𑀢𑀺 ‘‘𑀅𑀲𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀽𑀦𑀸𑀢𑀺 𑀅𑀥𑀺𑀓𑁄𑀝𑁆𑀝𑀦𑀁. 𑀢𑀜𑁆𑀳𑀺 𑀲𑀼𑀦𑀢𑀺 𑀲𑀜𑁆𑀘𑀼𑀡𑁆𑀡𑀪𑀸𑀯𑀁 𑀕𑀘𑁆𑀙𑀢𑀺 𑀏𑀢𑁆𑀣𑀸𑀢𑀺 ‘‘𑀲𑀽𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀲𑀺𑀦𑀸 𑀲𑀽𑀦𑀸𑀢𑀺 𑀅𑀲𑀺𑀲𑀽𑀦𑀸, 𑀢𑀸𑀬 𑀉𑀧𑀫𑀸 𑀲𑀤𑀺𑀲𑀸𑀢𑀺 𑀅𑀲𑀺𑀲𑀽𑀦𑀽𑀧𑀫𑀸. 𑀲𑀢𑁆𑀢𑀺𑀲𑀽𑀮𑀽𑀧𑀫𑀸𑀢𑀺 𑀲𑀢𑁆𑀢𑀺𑀬𑀸 𑀘 𑀲𑀽𑀮𑁂𑀦 𑀘 𑀲𑀤𑀺𑀲𑀸. 𑀏𑀢𑁆𑀣𑀸𑀢𑀺 𑀇𑀫𑀺𑀲𑁆𑀲𑀁 𑀅𑀝𑁆𑀞𑀓𑀣𑀸𑀬𑀁. 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀁 𑀅𑀮𑀕𑀤𑁆𑀤𑀽𑀧𑀫𑀲𑀼𑀢𑁆𑀢𑁂 (𑀫. 𑀦𑀺. 𑀅𑀝𑁆𑀞. 𑁧.𑁨𑁩𑁪 𑀆𑀤𑀬𑁄) 𑀕𑀳𑁂𑀢𑀩𑁆𑀩𑁄. 𑀏𑀯𑀁𑀲𑀤𑁆𑀤𑀔𑁄𑀲𑀤𑁆𑀤𑀸𑀦𑀫𑀦𑁆𑀢𑀭𑁂 𑀯𑀺𑀬𑀲𑀤𑁆𑀤𑀲𑁆𑀲 𑀩𑁆𑀬𑀸𑀤𑁂𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀏𑀯𑀁 𑀯𑀺𑀬 𑀔𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀉𑀓𑁆𑀔𑀺𑀢𑁆𑀢𑀲𑀫𑁆𑀪𑁄𑀕𑀲𑀺𑀓𑁆𑀔𑀸𑀧𑀤𑀁

𑁪𑁨𑁪. 𑀦𑀯𑀫𑁂 𑀅𑀦𑀼𑀥𑀫𑁆𑀫𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀦𑀼𑀮𑁄𑀫𑀯𑀢𑁆𑀢𑀁 𑀤𑀺𑀲𑁆𑀯𑀸 𑀓𑀢𑀸 𑀑𑀲𑀸𑀭𑀡𑀸’’𑀢𑀺. 𑀇𑀫𑀺𑀦𑀸 𑀅𑀦𑀼𑀮𑁄𑀫𑀯𑀢𑁆𑀢𑀁 𑀤𑀺𑀲𑁆𑀯𑀸 𑀓𑀢𑁄 𑀑𑀲𑀸𑀭𑀡𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀅𑀦𑀼𑀥𑀫𑁆𑀫𑁄𑀢𑀺 𑀤𑀲𑁆𑀲𑁂𑀢𑀺. 𑀑𑀲𑀸𑀭𑀡𑀸𑀢𑀺 𑀧𑀯𑁂𑀲𑀦𑀸. 𑀢𑁂𑀦𑁂𑀯𑀸𑀢𑀺 𑀉𑀓𑁆𑀔𑀺𑀢𑁆𑀢𑀓𑀲𑁆𑀲 𑀅𑀓𑀝𑀸𑀦𑀼𑀥𑀫𑁆𑀫𑀢𑁆𑀢𑀸 𑀏𑀯. 𑀅𑀲𑁆𑀲𑀸𑀢𑀺 ‘‘𑀅𑀓𑀝𑀸𑀦𑀼𑀥𑀫𑁆𑀫𑁂𑀦𑀸’’𑀢𑀺 𑀧𑀤𑀲𑁆𑀲.

𑀤𑀤𑀢𑁄 𑀯𑀸 𑀕𑀡𑁆𑀳𑀢𑁄 𑀯𑀸𑀢𑀺 𑀯𑀸𑀲𑀤𑁆𑀤𑁄 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑁄𑀢𑀺. 𑀦𑀯𑀫𑀁.

𑁧𑁦. 𑀓𑀡𑁆𑀝𑀓𑀲𑀺𑀓𑁆𑀔𑀸𑀧𑀤𑀁

𑁪𑁨𑁮. 𑀤𑀲𑀫𑁂 𑀅𑀭𑀺𑀝𑁆𑀞𑀲𑁆𑀲 𑀉𑀧𑁆𑀧𑀦𑁆𑀦𑀁 𑀯𑀺𑀬 𑀏𑀢𑀲𑁆𑀲𑀸𑀧𑀺 𑀉𑀧𑁆𑀧𑀦𑁆𑀦𑀦𑁆𑀢𑀺 𑀬𑁄𑀚𑀦𑀸. 𑀉𑀫𑁆𑀫𑀚𑁆𑀚𑀦𑁆𑀢𑀲𑁆𑀲𑀸𑀢𑀺 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲. 𑀲𑀁𑀯𑀸𑀲𑀲𑁆𑀲 𑀦𑀸𑀲𑀦𑀸 𑀲𑀁𑀯𑀸𑀲𑀦𑀸𑀲𑀦𑀸. 𑀮𑀺𑀗𑁆𑀕𑀲𑁆𑀲 𑀦𑀸𑀲𑀦𑀸 𑀮𑀺𑀗𑁆𑀕𑀦𑀸𑀲𑀦𑀸. 𑀤𑀡𑁆𑀟𑀓𑀫𑁆𑀫𑁂𑀦 𑀦𑀸𑀲𑀦𑀸 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸. 𑀢𑀢𑁆𑀣𑀸𑀢𑀺 𑀢𑀺𑀯𑀺𑀥𑀸𑀲𑀼 𑀦𑀸𑀲𑀦𑀸𑀲𑀼. 𑀤𑀽𑀲𑀓𑁄…𑀧𑁂… 𑀦𑀸𑀲𑁂𑀣𑀸𑀢𑀺 𑀏𑀢𑁆𑀣 𑀅𑀬𑀁 𑀦𑀸𑀲𑀦𑀸 𑀮𑀺𑀗𑁆𑀕𑀦𑀸𑀲𑀦𑀸 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀅𑀬𑀦𑁆𑀢𑀺 𑀤𑀡𑁆𑀟𑀓𑀫𑁆𑀫𑀦𑀸𑀲𑀦𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂, ‘‘𑀦𑀸𑀲𑁂𑀢𑀽’’𑀢𑀺 𑀧𑀤𑁂 𑀯𑀸. 𑀢𑀢𑁆𑀣𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁, ‘‘𑀏𑀯𑀜𑁆𑀘 𑀧𑀦 𑀪𑀺𑀓𑁆𑀔𑀯𑁂’’𑀢𑀺 𑀆𑀤𑀺𑀯𑀘𑀦𑁂𑀢𑀺 𑀅𑀢𑁆𑀣𑁄. 𑀧𑀺𑀭𑁂𑀢𑀺 𑀆𑀫𑀦𑁆𑀢𑀦𑀧𑀤𑀁 𑀧𑀭𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀦𑁆𑀢𑀺 𑀆𑀳 ‘‘𑀧𑀭𑀸’’𑀢𑀺. ‘‘𑀅𑀫𑁆𑀳𑀸𑀓𑀁 𑀅𑀦𑀚𑁆𑀛𑀢𑁆𑀢𑀺𑀓𑀪𑀽𑀢’’𑀇𑀢𑀺 𑀯𑀸 ‘‘𑀅𑀫𑁆𑀳𑀸𑀓𑀁 𑀧𑀘𑁆𑀘𑀦𑀻𑀓𑀪𑀽𑀢’’ 𑀇𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀅𑀫𑀸𑀫𑀓’’𑀇𑀢𑀺𑀧𑀤𑁂𑀦 ‘‘𑀧𑀭’’𑀇𑀢𑀺𑀧𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀫𑁆𑀳𑁂 𑀦𑀫𑀫𑀸𑀬𑀓, 𑀅𑀫𑁆𑀳𑁂𑀳𑀺 𑀯𑀸 𑀦𑀫𑀫𑀸𑀬𑀺𑀢𑀩𑁆𑀩 𑀇𑀢𑀺 𑀅𑀢𑁆𑀣𑁄. ‘‘𑀅𑀫𑁆𑀳𑀸𑀫𑀓’’𑀇𑀢𑀺𑀧𑀺 𑀳𑀓𑀸𑀭𑀬𑀼𑀢𑁆𑀢𑁄 𑀧𑀸𑀞𑁄. 𑀅𑀫𑁆𑀳𑁂𑀳𑀺 𑀆𑀫𑀓𑀇𑀢𑀺 𑀅𑀢𑁆𑀣𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀢𑁂𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀯 𑀭𑀽𑀧𑀲𑀤𑁆𑀤𑁂 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀧𑀲𑁆𑀲𑀸𑀫𑀸𑀢𑀺 𑀦 𑀧𑀲𑁆𑀲𑀸𑀫, 𑀦 𑀲𑀼𑀡𑀸𑀫.

𑁪𑁨𑁯. 𑀢𑁂𑀦𑀸𑀢𑀺 𑀲𑀸𑀫𑀡𑁂𑀭𑁂𑀦. ‘‘𑀓𑀸𑀭𑀸𑀧𑁂𑀬𑁆𑀬𑀸’’𑀢𑀺 𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀦𑁆𑀢𑀺. 𑀤𑀲𑀫𑀁.

𑀲𑀧𑁆𑀧𑀸𑀡𑀓𑀯𑀕𑁆𑀕𑁄 𑀲𑀢𑁆𑀢𑀫𑁄.