𑁬. 𑀲𑀼𑀭𑀸𑀧𑀸𑀦𑀯𑀕𑁆𑀕𑁄

𑁧. 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑁩𑁨𑁬. 𑀲𑀼𑀭𑀸𑀧𑀸𑀦𑀯𑀕𑁆𑀕𑀲𑁆𑀲 𑀧𑀞𑀫𑁂 𑀪𑀤𑁆𑀤𑀸 𑀯𑀢𑀺 𑀏𑀢𑁆𑀣𑀸𑀢𑀺 𑀪𑀤𑁆𑀤𑀯𑀢𑀺𑀓𑀸𑀢𑀺 𑀘, 𑀪𑀤𑁆𑀤𑀸 𑀯𑀢𑀺 𑀪𑀤𑁆𑀤𑀯𑀢𑀺, 𑀲𑀸 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀪𑀤𑁆𑀤𑀯𑀢𑀺𑀓𑀸𑀢𑀺 𑀘 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄’’𑀢𑀺𑀆𑀤𑀺. 𑀲𑁄𑀢𑀺 𑀕𑀸𑀫𑁄 𑀮𑀪𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀣𑀁 𑀕𑀘𑁆𑀙𑀦𑁆𑀢𑀻𑀢𑀺 𑀧𑀣𑀸𑀯𑀺𑀦𑁄𑀢𑀺 𑀓𑀢𑁂 𑀅𑀤𑁆𑀥𑀺𑀓𑀸𑀬𑁂𑀯𑀸𑀢𑀺 𑀆𑀳 ‘‘𑀅𑀤𑁆𑀥𑀺𑀓𑀸’’𑀢𑀺. 𑀅𑀤𑁆𑀥𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀤𑁆𑀥𑀺𑀓𑀸. ‘‘𑀧𑀣𑀺𑀓𑀸’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. ‘‘𑀢𑁂𑀚𑀲𑀸 𑀢𑁂𑀚’’𑀦𑁆𑀢𑀺𑀧𑀤𑀸𑀦𑀺 𑀲𑀫𑁆𑀩𑀦𑁆𑀥𑀸𑀧𑁂𑀓𑁆𑀔𑀸𑀦𑀺 𑀘 𑀳𑁄𑀦𑁆𑀢𑀺, 𑀧𑀤𑀸𑀦𑀁 𑀲𑀫𑀸𑀦𑀢𑁆𑀢𑀸 𑀲𑀫𑁆𑀩𑀦𑁆𑀥𑁄 𑀘 𑀲𑀫𑀸𑀦𑁄𑀢𑀺 𑀫𑀜𑁆𑀜𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀘 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀲𑀫𑁆𑀩𑀦𑁆𑀥𑀜𑁆𑀘 𑀢𑀲𑁆𑀲 𑀅𑀲𑀫𑀸𑀦𑀢𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀢𑁂𑀚𑀲𑀸 𑀦𑀸𑀕𑀲𑁆𑀲 𑀢𑁂𑀚’’𑀦𑁆𑀢𑀺. ‘‘𑀆𑀦𑀼𑀪𑀸𑀯𑁂𑀦𑀸’’𑀢𑀺𑀇𑀫𑀺𑀦𑀸 𑀧𑀦 𑀢𑁂𑀚𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀓𑀧𑁄𑀢𑀲𑁆𑀲 𑀧𑀸𑀤𑁄 𑀓𑀧𑁄𑀢𑁄 𑀉𑀧𑀘𑀸𑀭𑁂𑀦, 𑀢𑀲𑁆𑀲 𑀏𑀲𑁄 𑀓𑀸𑀧𑁄𑀢𑁄, 𑀯𑀡𑁆𑀡𑁄. 𑀓𑀸𑀧𑁄𑀢𑁄 𑀯𑀺𑀬 𑀯𑀡𑁆𑀡𑁄 𑀅𑀲𑁆𑀲𑀸𑀢𑀺 𑀓𑀸𑀧𑁄𑀢𑀺𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀧𑁄𑀢𑀧𑀸𑀤𑀲𑀫𑀯𑀡𑁆𑀡𑀭𑀢𑁆𑀢𑁄𑀪𑀸𑀲𑀸’’𑀢𑀺. 𑀧𑀲𑀦𑁆𑀦𑀲𑀤𑁆𑀤𑀲𑁆𑀲 𑀧𑀲𑀸𑀤𑀲𑀤𑁆𑀥𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀲𑀼𑀭𑀸𑀫𑀡𑁆𑀟𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀸𑀪𑀺𑀜𑁆𑀜𑀲𑁆𑀲 𑀲𑀢𑁄𑀢𑀺 𑀧𑀜𑁆𑀘𑀸𑀪𑀺𑀜𑁆𑀜𑀲𑁆𑀲 𑀲𑀫𑀸𑀦𑀲𑁆𑀲 𑀲𑀸𑀕𑀢𑀲𑁆𑀲𑀸𑀢𑀺 𑀬𑁄𑀚𑀦𑀸.

𑁩𑁨𑁮. ‘‘𑀫𑀥𑀼𑀓𑀧𑀼𑀧𑁆𑀨𑀸𑀤𑀻𑀦𑀁 𑀭𑀲𑁂𑀦 𑀓𑀢𑁄’’𑀢𑀺𑀇𑀫𑀺𑀦𑀸 𑀧𑀼𑀧𑁆𑀨𑀸𑀦𑀁 𑀭𑀲𑁂𑀦 𑀓𑀢𑁄 𑀆𑀲𑀯𑁄 𑀧𑀼𑀧𑁆𑀨𑀸𑀲𑀯𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 ‘‘𑀨𑀮𑀸𑀲𑀯𑁄’’𑀢𑀺𑀆𑀤𑀻𑀲𑀼𑀧𑀺. 𑀲𑀼𑀭𑀸𑀫𑁂𑀭𑀬𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀼𑀭𑀸 𑀦𑀸𑀫𑀸’’𑀢𑀺𑀆𑀤𑀺. 𑀧𑀺𑀝𑁆𑀞𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸𑀢𑀺 𑀧𑀺𑀝𑁆𑀞𑁂𑀦 𑀘 𑀓𑀺𑀡𑁆𑀡𑁂𑀦 𑀘 𑀧𑀓𑁆𑀔𑀺𑀢𑁆𑀢𑀸 𑀓𑀢𑀸 𑀯𑀸𑀭𑀼𑀡𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀡𑁆𑀡𑀸𑀢𑀺 𑀘 𑀲𑀼𑀭𑀸𑀬 𑀩𑀻𑀚𑀁. 𑀢𑀜𑁆𑀳𑀺 𑀓𑀺𑀭𑀦𑁆𑀢𑀺 𑀦𑀸𑀦𑀸𑀲𑀫𑁆𑀪𑀸𑀭𑀸𑀦𑀺 𑀫𑀺𑀲𑁆𑀲𑀻𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀺𑀡𑁆𑀡𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀸𑀬𑁂𑀯 𑀫𑀡𑁆𑀟𑁂𑀢𑀺 𑀬𑁄𑀚𑀦𑀸. 𑀲𑀼𑀭𑀦𑀸𑀫𑀓𑁂𑀦 𑀏𑀓𑁂𑀦 𑀯𑀦𑀘𑀭𑀓𑁂𑀦 𑀓𑀢𑀸𑀢𑀺 𑀲𑀼𑀭𑀸. 𑀫𑀤𑀁 𑀚𑀦𑁂𑀢𑀻𑀢𑀺 𑀫𑁂𑀭𑀬𑀁.

𑁩𑁨𑁯. 𑀮𑁄𑀡𑀲𑁄𑀯𑀻𑀭𑀓𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀧𑀸𑀦𑀁. 𑀲𑀼𑀢𑁆𑀢𑀦𑁆𑀢𑀺𑀧𑀺 𑀏𑀯𑀫𑁂𑀯. 𑀢𑀲𑁆𑀫𑀺𑀦𑁆𑀢𑀺 𑀲𑀽𑀧𑀲𑀁𑀧𑀸𑀓𑁂. 𑀢𑁂𑀮𑀁 𑀧𑀦 𑀧𑀘𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀢𑁆𑀣𑀺 𑀢𑀺𑀔𑀺𑀡𑀁 𑀫𑀚𑁆𑀚𑀁 𑀏𑀢𑁆𑀣𑀸𑀢𑀺 𑀅𑀢𑀺𑀔𑀺𑀡𑀫𑀚𑁆𑀚𑀁, 𑀅𑀢𑀺𑀔𑀺𑀡𑀫𑀚𑁆𑀚𑁂 𑀢𑀲𑁆𑀫𑀺𑀁𑀬𑁂𑀯 𑀢𑁂𑀮𑁂𑀢𑀺 𑀅𑀢𑁆𑀣𑁄. 𑀬𑀁 𑀧𑀦𑀸𑀢𑀺 𑀢𑁂𑀮𑀁 𑀧𑀦. 𑀢𑀺𑀔𑀺𑀡𑀁 𑀫𑀚𑁆𑀚𑀁 𑀇𑀫𑀲𑁆𑀲 𑀢𑁂𑀮𑀲𑁆𑀲𑀸𑀢𑀺 𑀢𑀺𑀔𑀺𑀡𑀫𑀚𑁆𑀚𑀁. 𑀬𑀢𑁆𑀣𑀸𑀢𑀺 𑀢𑁂𑀮𑁂. 𑀅𑀭𑀺𑀝𑁆𑀞𑁄𑀢𑀺 𑀏𑀯𑀁𑀦𑀸𑀫𑀓𑀁 𑀪𑁂𑀲𑀚𑁆𑀚𑀁. 𑀢𑀦𑁆𑀢𑀺 𑀅𑀭𑀺𑀝𑁆𑀞𑀁, ‘‘𑀲𑀦𑁆𑀥𑀸𑀬𑀸’’𑀢𑀺𑀧𑀤𑁂 𑀅𑀯𑀼𑀢𑁆𑀢𑀓𑀫𑁆𑀫𑀁. 𑀏𑀢𑀦𑁆𑀢𑀺 ‘‘𑀅𑀫𑀚𑁆𑀚𑀁 𑀅𑀭𑀺𑀝𑁆𑀞’’𑀦𑁆𑀢𑀺𑀯𑀘𑀦𑀁, ‘‘𑀯𑀼𑀢𑁆𑀢’’𑀦𑁆𑀢𑀺𑀧𑀤𑁂 𑀯𑀼𑀢𑁆𑀢𑀓𑀫𑁆𑀫𑀦𑁆𑀢𑀺. 𑀧𑀞𑀫𑀁.

𑁨. 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑀲𑀺𑀓𑁆𑀔𑀸𑀧𑀤𑀁

𑁩𑁩𑁦. 𑀤𑀼𑀢𑀺𑀬𑁂 𑀅𑀗𑁆𑀕𑀼𑀮𑀻𑀳𑀺 𑀧𑀢𑀼𑀚𑁆𑀚𑀦𑀁 𑀅𑀗𑁆𑀕𑀼𑀮𑀺𑀧𑀢𑁄𑀤𑁄, 𑀲𑁄𑀬𑁂𑀯 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀗𑁆𑀕𑀼𑀮𑀻𑀳𑀻’’𑀢𑀺𑀆𑀤𑀺. 𑀉𑀢𑁆𑀢𑀦𑁆𑀢𑁄𑀢𑀺 𑀅𑀯𑀢𑀧𑀦𑁆𑀢𑁄. 𑀅𑀯𑀢𑀧𑀦𑁆𑀢𑁄𑀢𑀺 𑀘 𑀅𑀢𑁆𑀣𑀢𑁄 𑀓𑀺𑀮𑀫𑀦𑁆𑀢𑁄𑀬𑁂𑀯𑀸𑀢𑀺 𑀆𑀳 ‘‘𑀓𑀺𑀮𑀫𑀦𑁆𑀢𑁄’’𑀢𑀺. 𑀓𑀺𑀮𑀫𑀦𑁆𑀢𑁄 𑀳𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀸𑀲𑀕𑀳𑀡𑁂𑀦 𑀧𑀲𑁆𑀲𑀸𑀲𑁄𑀧𑀺 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀜𑁆𑀘𑀸𑀭𑁄’’𑀢𑀺. 𑀢𑀫𑁆𑀧𑀻𑀢𑀺 𑀪𑀺𑀓𑁆𑀔𑀼𑀦𑀺𑀫𑁆𑀧𑀻𑀢𑀺. 𑀤𑀼𑀢𑀺𑀬𑀁.

𑁩. 𑀳𑀲𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀁

𑁩𑁩𑁫. 𑀢𑀢𑀺𑀬𑁂 𑀧𑀓𑀸𑀭𑁂𑀦 𑀓𑀭𑀻𑀬𑀢𑀺 𑀞𑀧𑀻𑀬𑀢𑀻𑀢𑀺 𑀧𑀓𑀢𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀁 𑀪𑀕𑀯𑀢𑀸’’𑀢𑀺𑀆𑀤𑀺. 𑀬𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀁.

𑁩𑁩𑁬. 𑀳𑀲𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀲𑀪𑀸𑀯𑁄 𑀳𑀲𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁂 𑀅𑀢𑁆𑀣𑀢𑁄 𑀓𑀻𑀴𑀺𑀓𑀸𑀬𑁂𑀯𑀸𑀢𑀺 𑀆𑀳 ‘‘𑀓𑀻𑀴𑀺𑀓𑀸 𑀯𑀼𑀘𑁆𑀘𑀢𑀻’’𑀢𑀺.

𑁩𑁩𑁭. 𑀕𑁄𑀧𑁆𑀨𑀓𑀸𑀦𑀦𑁆𑀢𑀺 𑀘𑀭𑀡𑀕𑀡𑁆𑀞𑀺𑀓𑀸𑀦𑀁. 𑀢𑁂 𑀳𑀺 𑀧𑀸𑀤𑁂 𑀧𑀸𑀤𑀁 𑀞𑀧𑀦𑀓𑀸𑀮𑁂 𑀅𑀜𑁆𑀜𑀫𑀜𑁆𑀜𑀽𑀧𑀭𑀺 𑀞𑀧𑀦𑀢𑁄 𑀕𑁄𑀧𑀻𑀬𑀦𑁆𑀢𑀻𑀢𑀺 𑀕𑁄𑀧𑁆𑀨𑀸, 𑀢𑁂 𑀏𑀯 𑀕𑁄𑀧𑁆𑀨𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀸𑀤𑀲𑁆𑀲 𑀳𑀺 𑀉𑀧𑀭𑀺 𑀧𑀸𑀤𑀁 𑀞𑀧𑀦𑀓𑀸𑀮𑁂 𑀏𑀓𑀲𑁆𑀲 𑀉𑀧𑀭𑀺 𑀏𑀓𑁄 𑀦 𑀞𑀧𑁂𑀢𑀩𑁆𑀩𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬𑀸’’𑀢𑀺 (𑀤𑀻. 𑀦𑀺. 𑁨.𑁧𑁯𑁬; 𑀫. 𑀦𑀺. 𑁧.𑁪𑁨𑁩; 𑀅. 𑀦𑀺. 𑁩.𑁧𑁬). 𑀑𑀝𑁆𑀞𑀚𑁄 𑀤𑀼𑀢𑀺𑀬𑁄. 𑀑𑀭𑁄𑀳𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀲𑀫𑁆𑀩𑀦𑁆𑀥𑁄.

𑁩𑁩𑁮. 𑀨𑀺𑀬𑀸𑀭𑀺𑀢𑁆𑀢𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀮𑀗𑁆𑀓𑀸𑀭𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀓𑁂𑀘𑀺 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑀦𑀼𑀧𑁆𑀧𑀢𑀦𑀯𑀸𑀭𑁂𑀲𑀽𑀢𑀺 𑀧𑀢𑀦𑀯𑀸𑀭 𑀉𑀧𑁆𑀧𑀢𑀦𑀯𑀸𑀭𑁂𑀲𑀼. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀔𑀺𑀢𑁆𑀢𑀓𑀣𑀮𑀸𑀬𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀞𑀧𑁂𑀢𑁆𑀯𑀸 𑀓𑀻𑀴𑀦𑁆𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀺𑀔𑀺𑀢𑀼𑀁 𑀯𑀝𑁆𑀝𑀢𑀺 𑀓𑀻𑀴𑀸𑀥𑀺𑀧𑁆𑀧𑀸𑀬𑀲𑁆𑀲 𑀯𑀺𑀭𑀳𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀻𑀴𑀸𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀣𑀚𑁄𑀢𑀓𑀁 𑀅𑀓𑁆𑀔𑀭𑀁 𑀮𑀺𑀔𑀦𑁆𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂𑀢𑀺. 𑀢𑀢𑀺𑀬𑀁.

𑁪. 𑀅𑀦𑀸𑀤𑀭𑀺𑀬𑀲𑀺𑀓𑁆𑀔𑀸𑀧𑀤𑀁

𑁩𑁪𑁨. 𑀘𑀢𑀼𑀢𑁆𑀣𑁂 𑀥𑀫𑁆𑀫𑁄 𑀦𑀸𑀫 𑀢𑀦𑁆𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀢𑀦𑁆𑀢𑀻’’𑀢𑀺. 𑀧𑀯𑁂𑀡𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. ‘‘𑀢𑀁 𑀯𑀸 𑀦 𑀲𑀺𑀓𑁆𑀔𑀺𑀢𑀼𑀓𑀸𑀫𑁄’’𑀢𑀺 𑀏𑀢𑁆𑀣 𑀢𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀯𑀺𑀓𑀸𑀢𑀼𑀁 𑀯𑀼𑀢𑁆𑀢𑀁 ‘‘𑀬𑁂𑀦 𑀧𑀜𑁆𑀜𑀢𑁆𑀢𑁂𑀦𑀸’’𑀢𑀺. 𑀯𑀺𑀦𑀬𑁂 𑀅𑀧𑀜𑁆𑀜𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀧𑀜𑁆𑀜𑀢𑁆𑀢𑁂𑀦𑀸’’𑀢𑀺 𑀆𑀳 ‘‘𑀲𑀼𑀢𑁆𑀢𑁂 𑀯𑀸 𑀅𑀪𑀺𑀥𑀫𑁆𑀫𑁂 𑀯𑀸 𑀆𑀕𑀢𑁂𑀦𑀸’’𑀢𑀺.

𑁩𑁪𑁪. 𑀧𑀯𑁂𑀡𑀺𑀬𑀸𑀢𑀺 𑀉𑀧𑀸𑀮𑀺𑀆𑀤𑀺𑀓𑀸𑀬 𑀆𑀘𑀭𑀺𑀬𑀧𑀭𑀫𑁆𑀧𑀭𑀲𑀗𑁆𑀔𑀸𑀢𑀸𑀬 𑀢𑀦𑁆𑀢𑀺𑀬𑀸. 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀲𑀩𑁆𑀩𑀦𑁆𑀢𑀺 𑀓𑀼𑀭𑀼𑀦𑁆𑀤𑀺𑀯𑀸𑀤𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑀲𑀗𑁆𑀔𑀸𑀢𑀁 𑀲𑀩𑁆𑀩𑀁 𑀢𑀁 𑀯𑀘𑀦𑀁. 𑀧𑀯𑁂𑀡𑀺𑀬𑀸 𑀆𑀕𑀢𑁂𑀢𑀺 𑀧𑀯𑁂𑀡𑀺𑀬𑀸 𑀆𑀕𑀢𑀲𑀗𑁆𑀔𑀸𑀢𑁂 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑁂𑀢𑀺. 𑀘𑀢𑀼𑀢𑁆𑀣𑀁.

𑁩𑁪𑁫. 𑀧𑀜𑁆𑀘𑀫𑁂 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑁂𑀢𑀺. 𑀧𑀜𑁆𑀘𑀫𑀁.

𑁬. 𑀚𑁄𑀢𑀺𑀲𑀺𑀓𑁆𑀔𑀸𑀧𑀤𑀁

𑁩𑁫𑁦. 𑀙𑀝𑁆𑀞𑁂 𑀚𑀦𑀧𑀤𑀲𑁆𑀲 𑀦𑀸𑀫𑀢𑁆𑀢𑀸 𑀩𑀳𑀼𑀯𑀘𑀦𑀯𑀲𑁂𑀦 ‘‘𑀪𑀕𑁆𑀕𑁂𑀲𑀽’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀲𑀼𑀲𑀼𑀫𑀸𑀭𑀲𑀡𑁆𑀞𑀸𑀦𑁄 𑀧𑀩𑁆𑀩𑀢𑀲𑀗𑁆𑀔𑀸𑀢𑁄 𑀕𑀺𑀭𑀺 𑀏𑀢𑁆𑀣𑀸𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑀺, 𑀏𑀢𑀲𑁆𑀲 𑀯𑀸 𑀫𑀸𑀧𑀺𑀢𑀓𑀸𑀮𑁂 𑀲𑀼𑀲𑀼𑀫𑀸𑀭𑁄 𑀕𑀺𑀭𑀢𑀺 𑀲𑀤𑁆𑀤𑀁 𑀦𑀺𑀕𑁆𑀕𑀺𑀭𑀢𑀺 𑀏𑀢𑁆𑀣𑀸𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑀻𑀢𑀺 𑀅𑀢𑁆𑀣𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀦𑀕𑀭𑀲𑁆𑀲 𑀦𑀸𑀫’’𑀦𑁆𑀢𑀺. 𑀢𑀁 𑀧𑀦𑀸𑀢𑀺 𑀯𑀦𑀁 𑀧𑀦. ‘‘𑀫𑀺𑀕𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀫𑀺𑀕𑀸𑀦𑀁 𑀅𑀪𑀬𑁄 𑀤𑀻𑀬𑀢𑀺 𑀏𑀢𑁆𑀣𑀸𑀢𑀺 𑀫𑀺𑀕𑀤𑀸𑀬𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁩𑁫𑁨. ‘‘𑀚𑁄𑀢𑀺𑀓𑁂’’𑀢𑀺𑀧𑀤𑀲𑁆𑀲 𑀚𑁄𑀢𑀺𑀲𑁆𑀲 𑀅𑀕𑁆𑀕𑀺𑀲𑁆𑀲 𑀓𑀭𑀡𑀁 𑀚𑁄𑀢𑀺𑀓𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀚𑁄𑀢𑀺𑀓𑀭𑀡𑁂’’𑀢𑀺.

𑁩𑁫𑁪. ‘‘𑀲𑀫𑀸𑀤𑀳𑀺𑀢𑀼𑀓𑀸𑀫𑀢𑀸𑀬𑀸’’𑀢𑀺𑀧𑀤𑀁 ‘‘𑀅𑀭𑀡𑀺𑀲𑀡𑁆𑀞𑀸𑀧𑀦𑀢𑁄’’𑀢𑀺𑀧𑀤𑁂 𑀳𑁂𑀢𑀼. 𑀚𑀸𑀮𑀸𑀢𑀺 𑀲𑀺𑀔𑀸. 𑀲𑀸 𑀳𑀺 𑀚𑀮𑀢𑀺 𑀤𑀺𑀩𑁆𑀩𑀢𑀻𑀢𑀺 𑀚𑀸𑀮𑀸𑀢𑀺 𑀯𑀼𑀘𑁆𑀘𑀢𑀺.

𑀧𑀢𑀺𑀮𑀸𑀢𑀁 𑀉𑀓𑁆𑀔𑀺𑀧𑀢𑀻𑀢𑀺 𑀏𑀢𑁆𑀣 ‘‘𑀧𑀢𑀺𑀢𑀸𑀮𑀸𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀢𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 𑀲𑀦𑁆𑀥𑀺𑀯𑀲𑁂𑀦 𑀧𑀢𑀺𑀮𑀸𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀮𑀸𑀢𑀁 𑀧𑀢𑀺𑀢𑀁 𑀉𑀓𑁆𑀔𑀺𑀧𑀢𑀻’’𑀢𑀺. 𑀅𑀮𑀸𑀢𑀦𑁆𑀢𑀺 𑀉𑀫𑁆𑀫𑀼𑀓𑁆𑀓𑀁. 𑀢𑀜𑁆𑀳𑀺 𑀆𑀤𑀺𑀢𑁆𑀢𑀁 𑀳𑀼𑀢𑁆𑀯𑀸 𑀅𑀢𑀺𑀉𑀡𑁆𑀳𑀢𑁆𑀢𑀸 𑀦 𑀮𑀸𑀢𑀩𑁆𑀩𑀁 𑀦 𑀕𑀡𑁆𑀳𑀺𑀢𑀩𑁆𑀩𑀦𑁆𑀢𑀺 𑀅𑀮𑀸𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀯𑀺𑀚𑁆𑀛𑀸𑀢𑀦𑁆𑀢𑀺 𑀛𑀸𑀬𑀦𑀢𑁄 𑀟𑀬𑁆𑀳𑀦𑀢𑁄 𑀅𑀯𑀺𑀕𑀢𑀁 𑀅𑀮𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀛𑀸𑀬𑀦𑀁 𑀟𑀬𑁆𑀳𑀦𑀁 𑀛𑀸𑀢𑀁, 𑀯𑀺𑀕𑀢𑀁 𑀛𑀸𑀢𑀁 𑀇𑀫𑀲𑁆𑀲𑀸𑀮𑀸𑀢𑀲𑁆𑀲𑀸𑀢𑀺 𑀯𑀺𑀚𑁆𑀛𑀸𑀢𑀁.

𑁩𑁫𑁬. 𑀧𑀤𑀻𑀧𑀸𑀤𑀻𑀦𑀻𑀢𑀺 𑀧𑀤𑀻𑀧𑀚𑁄𑀢𑀺𑀓𑀸𑀤𑀻𑀦𑀺. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀤𑀼𑀝𑁆𑀞𑀯𑀸𑀴𑀫𑀺𑀕𑀅𑀫𑀦𑀼𑀲𑁆𑀲𑀲𑀗𑁆𑀔𑀸𑀢𑀸𑀲𑀼 𑀆𑀧𑀤𑀸𑀲𑀼 𑀦𑀺𑀫𑀺𑀢𑁆𑀢𑀪𑀽𑀢𑀸𑀲𑀼. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀦𑁆𑀢𑀺. 𑀙𑀝𑁆𑀞𑀁.

𑁭. 𑀦𑀳𑀸𑀦𑀲𑀺𑀓𑁆𑀔𑀸𑀧𑀤𑀁

𑁩𑁬𑁬. 𑀲𑀢𑁆𑀢𑀫𑁂 𑀧𑀸𑀭𑀁 𑀕𑀘𑁆𑀙𑀦𑁆𑀢𑁄 𑀦 𑀓𑁂𑀯𑀮𑀁 𑀲𑀉𑀤𑀓𑀸𑀬 𑀦𑀤𑀺𑀬𑀸 𑀏𑀯 𑀦𑁆𑀳𑀸𑀬𑀺𑀢𑀼𑀁 𑀯𑀝𑁆𑀝𑀢𑀺, 𑀲𑀼𑀓𑁆𑀔𑀸𑀬 𑀦𑀤𑀺𑀬𑀸𑀧𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀼𑀓𑁆𑀔𑀸𑀬𑀸’’𑀢𑀺𑀆𑀤𑀺. 𑀉𑀓𑁆𑀓𑀺𑀭𑀺𑀢𑁆𑀯𑀸𑀢𑀺 𑀯𑀺𑀬𑀽𑀳𑀺𑀢𑁆𑀯𑀸. 𑀆𑀯𑀸𑀝𑀸𑀬𑁂𑀯 𑀔𑀼𑀤𑁆𑀤𑀓𑀝𑁆𑀞𑁂𑀦 𑀆𑀯𑀸𑀝𑀓𑀸, 𑀢𑁂𑀲𑀽𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀩𑁆𑀩𑀡𑁆𑀡𑀓𑀭𑀡𑀲𑀺𑀓𑁆𑀔𑀸𑀧𑀤𑀁

𑁩𑁬𑁮. 𑀅𑀝𑁆𑀞𑀫𑁂 𑀅𑀮𑀪𑀻𑀢𑀺 𑀮𑀪𑁄𑀢𑀺 𑀯𑀘𑀦𑀢𑁆𑀣𑁂 𑀅𑀧𑀘𑁆𑀘𑀬𑀁 𑀓𑀢𑁆𑀯𑀸 𑀡𑀧𑀘𑁆𑀘𑀬𑀲𑁆𑀲 𑀲𑁆𑀯𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀮𑀪𑁄𑀬𑁂𑀯 𑀮𑀸𑀪𑁄’’𑀢𑀺. 𑀅𑀧𑀘𑁆𑀘𑀬𑀫𑀓𑀢𑁆𑀯𑀸 𑀧𑀓𑀢𑀺𑀬𑀸 𑀡𑀧𑀘𑁆𑀘𑀬𑁄𑀧𑀺 𑀬𑀼𑀢𑁆𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀤𑁆𑀤𑀦𑁆𑀢𑀭𑁄𑀧𑀺 𑀅𑀢𑁆𑀣𑀦𑁆𑀢𑀭𑀸𑀪𑀸𑀯𑀸 𑀲𑀫𑀸𑀲𑁄 𑀳𑁄𑀢𑀻𑀢𑀺 𑀆𑀳 ‘‘𑀦𑀯𑀘𑀻𑀯𑀭𑀮𑀸𑀪𑁂𑀦𑀸𑀢𑀺 𑀯𑀢𑁆𑀢𑀩𑁆𑀩𑁂’’𑀢𑀺. 𑀅𑀦𑀼𑀦𑀸𑀲𑀺𑀓𑀮𑁄𑀧𑀦𑁆𑀢𑀺 ‘‘𑀦𑀯’’𑀦𑁆𑀢𑀺 𑀏𑀢𑁆𑀣 𑀦𑀺𑀕𑁆𑀕𑀳𑀻𑀢𑀲𑁆𑀲 𑀯𑀺𑀦𑀸𑀲𑀁. 𑀦𑀺𑀕𑁆𑀕𑀳𑀻𑀢𑀜𑁆𑀳𑀺 𑀦𑀸𑀲𑀁 𑀅𑀦𑀼𑀕𑀢𑀢𑁆𑀢𑀸 ‘‘𑀅𑀦𑀼𑀦𑀸𑀲𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀅𑀤𑀲𑁆𑀲𑀦, 𑀫𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀚𑁆𑀛𑁂 𑀞𑀺𑀢𑀧𑀤𑀤𑁆𑀯𑀬𑁂𑀢𑀺 ‘‘𑀦𑀯’’𑀦𑁆𑀢𑀺 𑀘 ‘‘𑀘𑀻𑀯𑀭𑀮𑀸𑀪𑁂𑀦𑀸’’𑀢𑀺 𑀘 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀫𑀦𑁆𑀢𑀭𑁂 ‘‘𑀞𑀺𑀢𑁂 𑀧𑀦𑀸’’𑀢𑀺 𑀘 ‘‘𑀪𑀺𑀓𑁆𑀔𑀼𑀦𑀸’’𑀢𑀺 𑀘 𑀧𑀤𑀤𑁆𑀯𑀬𑁂. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀦𑀺𑀧𑀸𑀢𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀮𑀪𑀻𑀢𑀺 𑀮𑀪𑁄𑀢𑀺 𑀯𑀘𑀦𑀢𑁆𑀣𑀲𑁆𑀲 𑀅𑀪𑀺𑀥𑁂𑀬𑁆𑀬𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀺𑀓𑁆𑀔𑀼𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀪𑀺𑀓𑁆𑀔𑀼𑀦𑀸’’𑀢𑀺𑀆𑀤𑀺. 𑀧𑀤𑀪𑀸𑀚𑀦𑁂 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 𑀬𑀁 𑀘𑀻𑀯𑀭𑀁. ‘‘𑀘𑀻𑀯𑀭’’𑀦𑁆𑀢𑀺 𑀏𑀢𑁆𑀣 𑀘𑀻𑀯𑀭𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀁 𑀦𑀺𑀯𑀸𑀲𑁂𑀢𑀼𑀁 𑀯𑀸’’𑀢𑀺𑀆𑀤𑀺. 𑀘𑀫𑁆𑀫𑀓𑀸𑀭𑀦𑀻𑀮𑀦𑁆𑀢𑀺 𑀘𑀫𑁆𑀫𑀓𑀸𑀭𑀸𑀦𑀁 𑀢𑀺𑀨𑀮𑁂 𑀧𑀓𑁆𑀔𑀺𑀢𑁆𑀢𑀲𑁆𑀲 𑀅𑀬𑀕𑀽𑀣𑀲𑁆𑀲 𑀦𑀻𑀮𑀁. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀩𑁆𑀩𑀡𑁆𑀡𑁄 𑀓𑀭𑀻𑀬𑀢𑀺 𑀅𑀦𑁂𑀦𑀸𑀢𑀺 𑀤𑀼𑀩𑁆𑀩𑀡𑁆𑀡𑀓𑀭𑀡𑀁, 𑀓𑀧𑁆𑀧𑀩𑀺𑀦𑁆𑀤𑀼𑀦𑁆𑀢𑀺 𑀆𑀳 ‘‘𑀓𑀧𑁆𑀧𑀩𑀺𑀦𑁆𑀤𑀼𑀁 𑀲𑀦𑁆𑀥𑀸𑀬𑀸’’𑀢𑀺. 𑀆𑀤𑀺𑀬𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀆𑀤𑀸𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁄𑀡𑁂𑀲𑀽𑀢𑀺 𑀅𑀦𑁆𑀢𑁂𑀲𑀼. 𑀯𑀸𑀲𑀤𑁆𑀤𑁄 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑁄. 𑀅𑀓𑁆𑀔𑀺𑀫𑀡𑁆𑀟𑀮𑀫𑀢𑁆𑀢𑀁 𑀯𑀸𑀢𑀺 𑀅𑀓𑁆𑀔𑀺𑀫𑀡𑁆𑀟𑀮𑀲𑁆𑀲 𑀧𑀫𑀸𑀡𑀁 𑀯𑀸 𑀓𑀧𑁆𑀧𑀩𑀺𑀦𑁆𑀤𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀝𑁆𑀝𑁂 𑀯𑀸𑀢𑀺 𑀅𑀦𑀼𑀯𑀸𑀢𑀧𑀝𑁆𑀝𑁂 𑀯𑀸. 𑀕𑀡𑁆𑀞𑀺𑀬𑀁 𑀯𑀸𑀢𑀺 𑀕𑀡𑁆𑀞𑀺𑀓𑀧𑀝𑁆𑀝𑁂 𑀯𑀸. 𑀧𑀸𑀴𑀺𑀓𑀧𑁆𑀧𑁄𑀢𑀺 𑀤𑁆𑀯𑁂 𑀯𑀸 𑀢𑀺𑀲𑁆𑀲𑁄 𑀯𑀸 𑀢𑀢𑁄 𑀅𑀥𑀺𑀓𑀸 𑀯𑀸 𑀩𑀺𑀦𑁆𑀤𑀼𑀆𑀯𑀮𑀻 𑀓𑀢𑁆𑀯𑀸 𑀓𑀢𑁄 𑀓𑀧𑁆𑀧𑁄. 𑀓𑀡𑁆𑀡𑀺𑀓𑀓𑀧𑁆𑀧𑁄𑀢𑀺 𑀓𑀡𑁆𑀡𑀺𑀓𑀁 𑀯𑀺𑀬 𑀩𑀺𑀦𑁆𑀤𑀼𑀕𑁄𑀘𑁆𑀙𑀓𑀁 𑀓𑀢𑁆𑀯𑀸 𑀓𑀢𑁄 𑀓𑀧𑁆𑀧𑁄. 𑀆𑀤𑀺𑀲𑀤𑁆𑀤𑁂𑀦 𑀅𑀕𑁆𑀖𑀺𑀬𑀓𑀧𑁆𑀧𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀸𑀲𑀼 𑀅𑀝𑁆𑀞𑀓𑀣𑀸𑀲𑀼. 𑀏𑀓𑁄𑀧𑀺 𑀩𑀺𑀦𑁆𑀤𑀼 𑀯𑀝𑁆𑀝𑁄𑀬𑁂𑀯 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀏𑀓𑀁 𑀯𑀝𑁆𑀝𑀩𑀺𑀦𑁆𑀤𑀼’’𑀦𑁆𑀢𑀺.

𑁩𑁭𑁧. 𑀅𑀕𑁆𑀕𑀴𑀸𑀤𑀻𑀦𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀅𑀦𑀼𑀯𑀸𑀢𑀧𑀭𑀺𑀪𑀡𑁆𑀟𑁂 𑀲𑀗𑁆𑀕𑀡𑁆𑀳𑀸𑀢𑀻𑀢𑀺. 𑀅𑀝𑁆𑀞𑀫𑀁.

𑁯. 𑀯𑀺𑀓𑀧𑁆𑀧𑀦𑀲𑀺𑀓𑁆𑀔𑀸𑀧𑀤𑀁

𑁩𑁭𑁪. 𑀦𑀯𑀫𑁂 𑀢𑀲𑁆𑀲𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑁄 𑀘𑀻𑀯𑀭𑀲𑀸𑀫𑀺𑀓𑁄𑀬𑁂𑀯𑀸𑀢𑀺 𑀆𑀳 ‘‘𑀘𑀻𑀯𑀭𑀲𑀸𑀫𑀺𑀓𑀲𑁆𑀲𑀸’’𑀢𑀺. 𑀤𑀼𑀢𑀺𑀬𑀲𑁆𑀲 𑀢𑀲𑀤𑁆𑀤𑀲𑁆𑀲 𑀯𑀺𑀲𑀬𑁄 𑀯𑀺𑀦𑀬𑀥𑀭𑁄𑀬𑁂𑀯𑀸𑀢𑀺 𑀆𑀳 ‘‘𑀬𑁂𑀦𑀸’’𑀢𑀺𑀆𑀤𑀺. ‘‘𑀅𑀯𑀺𑀲𑁆𑀲𑀸𑀲𑀦𑁆𑀢𑁄’’𑀢𑀺𑀧𑀤𑀲𑁆𑀲 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀯𑀺𑀲𑁆𑀲𑀸𑀲𑁂𑀦𑀸’’𑀢𑀺. 𑀢𑁂𑀦𑀸𑀢𑀺 𑀯𑀺𑀦𑀬𑀥𑀭𑁂𑀦𑀸𑀢𑀺. 𑀦𑀯𑀫𑀁.

𑁧𑁦. 𑀘𑀻𑀯𑀭𑀸𑀧𑀦𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀁

𑁩𑁭𑁭. 𑀤𑀲𑀫𑁂 ‘‘𑀅𑀧𑀦𑁂𑀢𑁆𑀯𑀸’’𑀢𑀺𑀇𑀫𑀺𑀦𑀸 𑀅𑀧𑀇𑀢𑁆𑀬𑀽𑀧𑀲𑀕𑁆𑀕𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑀺𑀥𑁂𑀦𑁆𑀢𑀻𑀢𑀺 𑀦𑀺𑀕𑀽𑀳𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀳𑀲𑀸𑀥𑀺𑀧𑁆𑀧𑀸𑀬𑁄𑀢𑀺 𑀳𑀲𑀁, 𑀳𑀲𑀦𑀢𑁆𑀣𑀸𑀬 𑀯𑀸 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀓𑁆𑀔𑀸𑀭𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀺’’𑀦𑁆𑀢𑀺. 𑀧𑀢𑁆𑀢𑀲𑁆𑀲 𑀧𑀸𑀴𑀺𑀬𑀫𑀸𑀕𑀢𑀢𑁆𑀢𑀸 𑀧𑀢𑁆𑀢𑀲𑁆𑀲 𑀣𑀯𑀺𑀓𑀸𑀢𑀺 𑀅𑀢𑁆𑀣𑁄𑀬𑁂𑀯 𑀕𑀳𑁂𑀢𑀩𑁆𑀩𑁄, 𑀦 𑀧𑀢𑁆𑀢𑁄 𑀘 𑀣𑀯𑀺𑀓𑀸 𑀘𑀸𑀢𑀺. ‘‘𑀲𑀫𑀡𑁂𑀦 𑀦𑀸𑀫𑀸’’𑀢𑀺𑀧𑀤𑀁 ‘‘𑀪𑀯𑀺𑀢𑀼’’𑀦𑁆𑀢𑀺𑀧𑀤𑁂 𑀪𑀸𑀯𑀓𑀢𑁆𑀢𑀸𑀢𑀺. 𑀤𑀲𑀫𑀁.

𑀲𑀼𑀭𑀸𑀧𑀸𑀦𑀯𑀕𑁆𑀕𑁄 𑀙𑀝𑁆𑀞𑁄.