𑁩. 𑀑𑀯𑀸𑀤𑀯𑀕𑁆𑀕𑁄

𑁧. 𑀑𑀯𑀸𑀤𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑁧𑁪𑁪. 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑀲𑁆𑀲 𑀧𑀞𑀫𑁂 𑀢𑁂𑀲𑀦𑁆𑀢𑀺 𑀣𑁂𑀭𑀸𑀦𑀁. 𑀫𑀳𑀸𑀓𑀼𑀮𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀢𑀺 𑀬𑁄𑀚𑀦𑀸. 𑀓𑀼𑀮𑀥𑀻𑀢𑀭𑁄 𑀯𑀺𑀚𑁆𑀚𑀫𑀸𑀦𑀕𑀼𑀡𑀁 𑀓𑀣𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀜𑀸𑀢𑀺𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀧𑀤𑀁 ‘‘𑀓𑀣𑀬𑀦𑁆𑀢𑀻’’𑀢𑀺𑀧𑀤𑁂 𑀲𑀫𑁆𑀧𑀤𑀸𑀦𑀁. 𑀓𑀼𑀢𑁄𑀢𑀺 𑀓𑀲𑁆𑀲 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀦𑁆𑀢𑀺 𑀣𑁂𑀭𑀸𑀦𑀁 𑀕𑀼𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀓𑀣𑁂𑀢𑀼’’𑀦𑁆𑀢𑀺𑀧𑀤𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀯𑀺𑀚𑁆𑀚𑀫𑀸𑀦𑀕𑀼𑀡𑁂’’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀯𑀢𑁆𑀯𑀸 ‘‘𑀯𑀝𑁆𑀝𑀦𑁆𑀢𑀻’’𑀢𑀺𑀧𑀤𑀫𑀧𑁂𑀓𑁆𑀔𑀺𑀬 ‘‘𑀯𑀺𑀚𑁆𑀚𑀫𑀸𑀦𑀕𑀼𑀡𑀸’’𑀢𑀺 𑀯𑀼𑀢𑁆𑀢𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀢𑁄𑀢𑀺 𑀓𑀣𑀦𑀓𑀸𑀭𑀡𑀸 𑀅𑀪𑀺𑀳𑀭𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀅𑀪𑀺𑀳𑀭𑀡𑀳𑁂𑀢𑀼𑀦𑀸.

𑀢𑁂𑀲𑀦𑁆𑀢𑀺 𑀙𑀩𑁆𑀩𑀕𑁆𑀕𑀺𑀬𑀸𑀦𑀁. 𑀢𑀸𑀲𑀽𑀢𑀺 𑀪𑀺𑀓𑁆𑀔𑀼𑀦𑀻𑀲𑀼. ‘‘𑀪𑀺𑀓𑁆𑀔𑀼𑀦𑀺𑀬𑁄’’𑀢𑀺𑀧𑀤𑀁 ‘‘𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺𑀧𑀤𑁂 𑀓𑀫𑁆𑀫𑀁. 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀼𑀦𑀻𑀲𑀼 𑀉𑀧𑀲𑀗𑁆𑀓𑀫𑀦𑀁 𑀮𑀸𑀪𑀢𑀡𑁆𑀳𑀸𑀬 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀙𑀩𑁆𑀩𑀕𑁆𑀕𑀻𑀲𑀼 𑀉𑀧𑀲𑀗𑁆𑀓𑀫𑀦𑀁 𑀘𑀮𑀘𑀺𑀢𑁆𑀢𑀢𑀸𑀬 𑀳𑁄𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀽𑀧𑀲𑀗𑁆𑀓𑀫𑀦𑁆𑀢𑀸𑀦𑀁 𑀯𑀺𑀲𑁂𑀲𑁄. 𑀢𑀺𑀭𑀘𑁆𑀙𑀸𑀦𑀪𑀽𑀢𑀸 𑀓𑀣𑀸 𑀢𑀺𑀭𑀘𑁆𑀙𑀸𑀦𑀓𑀣𑀸 𑀦𑀺𑀭𑀢𑁆𑀣𑀓𑀓𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀺𑀭𑀘𑁆𑀙𑀸𑀦𑀓𑀣𑀦𑁆𑀢𑀻’’𑀢𑀺. 𑀲𑀕𑁆𑀕𑀫𑀕𑁆𑀕𑀕𑀫𑀦𑁂𑀧𑀻𑀢𑀺 𑀧𑀺𑀲𑀤𑁆𑀤𑁄 𑀫𑁄𑀓𑁆𑀔𑀕𑀫𑀦𑁂 𑀧𑀦 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀭𑀸𑀚𑀸𑀦𑁄 𑀆𑀭𑀩𑁆𑀪 𑀧𑀯𑀢𑁆𑀢𑀸 𑀓𑀣𑀸 𑀭𑀸𑀚𑀓𑀣𑀸. 𑀆𑀤𑀺𑀲𑀤𑁆𑀤𑁂𑀦 𑀘𑁄𑀭𑀓𑀣𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁪𑁭. 𑀢𑁂 𑀪𑀺𑀓𑁆𑀔𑀽𑀢𑀺 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀯𑁂𑀬𑁆𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀤𑀺𑀝𑁆𑀞𑀁 𑀲𑀘𑁆𑀘𑀁 𑀬𑁂𑀳𑀻𑀢𑀺 𑀅𑀤𑀺𑀝𑁆𑀞𑀲𑀘𑁆𑀘𑀸, 𑀢𑁂𑀲𑀁 𑀪𑀸𑀯𑁄 𑀅𑀤𑀺𑀝𑁆𑀞𑀲𑀘𑁆𑀘𑀢𑁆𑀢𑀁, 𑀢𑀲𑁆𑀫𑀸 𑀅𑀤𑀺𑀝𑁆𑀞𑀲𑀘𑁆𑀘𑀢𑁆𑀢𑀸 𑀩𑀦𑁆𑀥𑀺𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀦𑁂𑀲𑀦𑁆𑀢𑀺 𑀙𑀩𑁆𑀩𑀕𑁆𑀕𑀺𑀬𑀸𑀦𑀁. 𑀅𑀜𑁆𑀜𑁂𑀦𑁂𑀯 𑀉𑀧𑀸𑀬𑁂𑀦𑀸𑀢𑀺 𑀅𑀮𑀤𑁆𑀥𑀲𑀫𑁆𑀫𑀼𑀢𑀺𑀢𑁄 𑀅𑀜𑁆𑀜𑁂𑀦𑁂𑀯 𑀮𑀤𑁆𑀥𑀲𑀫𑁆𑀫𑀼𑀢𑀺𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦 𑀓𑀢𑁆𑀢𑀼𑀓𑀸𑀫𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀢𑁄𑀢𑀺 𑀧𑀭𑀲𑁆𑀫𑀺𑀁 𑀧𑀘𑁆𑀙𑀸, 𑀉𑀧𑀭𑀻𑀢𑀺 𑀅𑀢𑁆𑀣𑁄. 𑀓𑀭𑁄𑀦𑁆𑀢𑁄 𑀯𑀸𑀢𑀺 𑀧𑀭𑀺𑀩𑀸𑀳𑀺𑀭𑁂 𑀓𑀭𑁄𑀦𑁆𑀢𑁄 𑀏𑀯 𑀳𑀼𑀢𑁆𑀯𑀸 𑀆𑀳𑀸𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀬𑀲𑁆𑀫𑀸 𑀦 𑀪𑀽𑀢𑀧𑀼𑀩𑁆𑀩𑀸𑀦𑀺, 𑀇𑀢𑀺 𑀢𑀲𑁆𑀫𑀸 𑀧𑀭𑀺𑀩𑀸𑀳𑀺𑀭𑀁 𑀓𑀭𑁄𑀦𑁆𑀢𑁄 𑀯𑀸𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺 ‘‘𑀅𑀦𑀼𑀚𑀸𑀦𑀸𑀫𑀻’’𑀢𑀺𑀆𑀤𑀺𑀯𑀘𑀦𑁂. 𑀲𑀻𑀮𑀯𑀸𑀢𑀺 𑀏𑀢𑁆𑀣 𑀯𑀦𑁆𑀢𑀼𑀲𑀤𑁆𑀤𑁄 𑀧𑀲𑀁𑀲𑀢𑁆𑀣𑁂 𑀘 𑀅𑀢𑀺𑀲𑀬𑀢𑁆𑀣𑁂 𑀘 𑀦𑀺𑀘𑁆𑀘𑀬𑁄𑀕𑀢𑁆𑀣𑁂 𑀘 𑀳𑁄𑀢𑀺. 𑀢𑀲𑁆𑀲𑀸𑀢𑀺 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲. 𑀢𑀦𑁆𑀢𑀺 𑀲𑀻𑀮𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀤𑁆𑀤𑀸𑀦𑀁 𑀓𑀫𑁆𑀫𑀥𑀸𑀭𑀬𑀪𑀸𑀯𑀁, 𑀢𑁂𑀳𑀺 𑀘 𑀲𑀁𑀯𑀼𑀢𑀲𑀤𑁆𑀤𑀲𑁆𑀲 𑀢𑀧𑁆𑀧𑀼𑀭𑀺𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀸𑀢𑀺𑀫𑁄𑀓𑁆𑀔𑁄𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀯𑀲𑀤𑁆𑀤𑁂𑀦 𑀓𑀫𑁆𑀫𑀥𑀸𑀭𑀬𑀪𑀸𑀯𑀁, 𑀏𑀦𑀲𑀤𑁆𑀤𑁂𑀦 𑀘 𑀢𑀧𑁆𑀧𑀼𑀭𑀺𑀲𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀢𑁆𑀢𑀢𑀻𑀢𑀺 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀢𑀺. 𑀓𑀸𑀭𑀺𑀢𑀧𑀘𑁆𑀘𑀬𑁄 𑀳𑀺 𑀅𑀤𑀲𑁆𑀲𑀦𑀁 𑀕𑀢𑁄. 𑀇𑀫𑀺𑀦𑀸 𑀇𑀭𑀺𑀬𑀸𑀧𑀣𑀯𑀺𑀳𑀸𑀭 𑀤𑀺𑀩𑁆𑀩𑀯𑀺𑀳𑀸𑀭 𑀩𑁆𑀭𑀳𑁆𑀫𑀯𑀺𑀳𑀸𑀭 𑀅𑀭𑀺𑀬𑀯𑀺𑀳𑀸𑀭𑁂𑀲𑀼 𑀘𑀢𑀽𑀲𑀼 𑀯𑀺𑀳𑀸𑀭𑁂𑀲𑀼 𑀅𑀢𑁆𑀢𑀪𑀸𑀯𑀯𑀢𑁆𑀢𑀦𑀁 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑀦𑁆𑀢𑀺 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀻’’𑀢𑀺𑀯𑀘𑀦𑀁. 𑀯𑀺𑀪𑀗𑁆𑀕𑁂𑀢𑀺 𑀛𑀸𑀦𑀯𑀺𑀪𑀗𑁆𑀕𑁂.

‘‘𑀲𑀻𑀮’’𑀦𑁆𑀢𑀺𑀆𑀤𑀻𑀦𑀺 𑀅𑀝𑁆𑀞 𑀧𑀤𑀸𑀦𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀸𑀦𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑁋 𑀲𑀻𑀮𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀸 𑀆𑀤𑀺 𑀘𑀭𑀡𑀁 𑀲𑀁𑀬𑀫𑁄 𑀲𑀁𑀯𑀭𑁄 𑀫𑁄𑀓𑁆𑀔𑀁 𑀧𑀫𑁄𑀓𑁆𑀔𑀦𑁆𑀢𑀺. 𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀲𑀫𑀸𑀧𑀢𑁆𑀢𑀢𑁆𑀣𑀸𑀬. ‘‘𑀉𑀧𑁂𑀢𑁄’’𑀢𑀺𑀆𑀤𑀻𑀦𑀺 𑀲𑀢𑁆𑀢 𑀧𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀢𑀢𑁆𑀣 𑀉𑀧𑀧𑀦𑁆𑀦𑁄𑀢𑀺 𑀬𑀼𑀢𑁆𑀢𑁄 𑀅𑀦𑀼𑀬𑀼𑀢𑁆𑀢𑁄. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀫𑀦𑁆𑀢𑀢𑁄 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁 𑀆𑀕𑀢𑁄𑀢𑀺 𑀲𑀫𑀦𑁆𑀦𑀸𑀕𑀢𑁄, 𑀲𑀫𑀗𑁆𑀕𑀻𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀺 𑀲𑀁𑀲𑀤𑁆𑀤𑁄 𑀲𑀫𑀦𑁆𑀢𑀢𑁆𑀣𑀯𑀸𑀘𑀓𑁄, 𑀅𑀦𑀼𑀲𑀤𑁆𑀤𑁄 𑀦𑀉𑀧𑀘𑁆𑀙𑀺𑀦𑁆𑀦𑀢𑁆𑀣𑀯𑀸𑀘𑀓𑁄. 𑀢𑁂𑀦𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀧𑀸𑀮𑁂𑀢𑀻𑀢𑀺 𑀅𑀢𑁆𑀢𑀪𑀸𑀯𑀁 𑀩𑀸𑀥𑀦𑀢𑁄 𑀭𑀓𑁆𑀔𑀢𑀺. 𑀬𑀧𑁂𑀢𑀻𑀢𑀺 𑀅𑀢𑁆𑀢𑀪𑀸𑀯𑁄 𑀧𑀯𑀢𑁆𑀢𑀢𑀺. 𑀬𑀸𑀧𑁂𑀢𑀻𑀢𑀺 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑀸𑀧𑁂𑀢𑀺. 𑀬𑀧 𑀬𑀸𑀧𑀦𑁂. 𑀬𑀸𑀧𑀦𑀁 𑀧𑀯𑀢𑁆𑀢𑀦𑀦𑁆𑀢𑀺 𑀳𑀺 𑀥𑀸𑀢𑀼𑀧𑀸𑀞𑁂𑀲𑀼 𑀯𑀼𑀢𑁆𑀢𑀁 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁮 𑀧𑀓𑀸𑀭𑀦𑁆𑀢𑀥𑀸𑀢𑀼). 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀏𑀓𑁄 𑀆𑀓𑀸𑀭𑀢𑁆𑀣𑀯𑀸𑀘𑀓𑁄 𑀇𑀢𑀺𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀇𑀢𑀺 𑀯𑀼𑀘𑁆𑀘𑀢𑀺, 𑀇𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀸 𑀬𑁄𑀚𑀦𑀸.

𑀆𑀘𑀸𑀭𑀕𑁄𑀘𑀭𑀲𑀤𑁆𑀤𑀸𑀦𑀁 𑀤𑁆𑀯𑀦𑁆𑀤𑀪𑀸𑀯𑀁, 𑀢𑁂𑀳𑀺 𑀘 𑀲𑀫𑁆𑀧𑀦𑁆𑀦𑀲𑀤𑁆𑀤𑀲𑁆𑀲 𑀢𑀧𑁆𑀧𑀼𑀭𑀺𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺. 𑀢𑀢𑁆𑀣 𑀘𑀲𑀤𑁆𑀤𑁂𑀦 𑀤𑁆𑀯𑀦𑁆𑀤𑀪𑀸𑀯𑀁, 𑀏𑀦𑀲𑀤𑁆𑀤𑁂𑀦 𑀘 𑀢𑀧𑁆𑀧𑀼𑀭𑀺𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀡𑀼𑀲𑀤𑁆𑀤𑁄 𑀅𑀧𑁆𑀧𑀢𑁆𑀣𑁄, 𑀫𑀢𑁆𑀢𑀲𑀤𑁆𑀤𑁄 𑀧𑀫𑀸𑀡𑀢𑁆𑀣𑁄𑀢𑀺 𑀆𑀳 ‘‘𑀅𑀧𑁆𑀧𑀫𑀢𑁆𑀢𑀓𑁂𑀲𑀽’’𑀢𑀺. ‘‘𑀤𑀲𑁆𑀲𑀦𑀲𑀻𑀮𑁄’’𑀢𑀺𑀇𑀫𑀺𑀦𑀸 ‘‘𑀤𑀲𑁆𑀲𑀸𑀯𑀻’’𑀢𑀺𑀏𑀢𑁆𑀣 𑀆𑀯𑀻𑀲𑀤𑁆𑀤𑀲𑁆𑀲 𑀢𑀲𑁆𑀲𑀻𑀮𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀲𑀫𑀸𑀤𑀸𑀬𑀸’’𑀢𑀺 𑀏𑀢𑁆𑀣 𑀲𑀁𑀧𑀼𑀩𑁆𑀩𑀆𑀧𑀼𑀩𑁆𑀩𑀲𑁆𑀲 𑀤𑀸𑀲𑀤𑁆𑀤𑀲𑁆𑀲 𑀓𑀫𑁆𑀫𑀸𑀧𑁂𑀓𑁆𑀔𑀢𑁆𑀢𑀸 𑀢𑀲𑁆𑀲 𑀓𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺. 𑀇𑀫𑀺𑀦𑀸 ‘‘𑀲𑀺𑀓𑁆𑀔𑀸𑀧𑀤𑁂𑀲𑀽’’𑀢𑀺 𑀉𑀧𑀬𑁄𑀕𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀫𑁂𑀢𑀁. ‘‘𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀓𑀫𑁆𑀫𑀁 𑀧𑀦 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀫𑀸𑀤𑀸𑀬𑀸’’𑀢𑀺 𑀏𑀢𑁆𑀣 𑀲𑀁𑀲𑀤𑁆𑀤𑀲𑁆𑀲 𑀘 𑀆𑀧𑀼𑀩𑁆𑀩𑀲𑁆𑀲 𑀤𑀸𑀲𑀤𑁆𑀤𑀲𑁆𑀲 𑀘 𑀬𑀓𑀸𑀭𑀲𑁆𑀲 𑀘 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀥𑀼𑀓𑀁 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀇𑀫𑀺𑀲𑁆𑀲𑀁 𑀅𑀝𑁆𑀞𑀓𑀣𑀸𑀬𑀁. 𑀯𑀺𑀢𑁆𑀣𑀸𑀭𑁄 𑀧𑀦 𑀕𑀳𑁂𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀬𑁄𑀢𑀺 𑀓𑀼𑀮𑀧𑀼𑀢𑁆𑀢𑁄.

𑀅𑀲𑁆𑀲𑀸𑀢𑀺 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲. 𑀬𑀁 𑀢𑀁 𑀩𑀳𑀼 𑀲𑀼𑀢𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀦 𑀲𑀼𑀢𑀫𑀢𑁆𑀢𑀫𑁂𑀯𑀸𑀢𑀺 𑀬𑁄𑀚𑀦𑀸. 𑀫𑀜𑁆𑀚𑀽𑀲𑀸𑀬𑀦𑁆𑀢𑀺 𑀧𑁂𑀴𑀸𑀬𑀁. 𑀲𑀸 𑀳𑀺 𑀲𑀸𑀫𑀺𑀓𑀲𑁆𑀲 𑀲𑀥𑀦𑀢𑁆𑀢𑀁 𑀫𑀜𑁆𑀜𑀢𑁂 𑀇𑀫𑀸𑀬𑀸𑀢𑀺 ‘‘𑀫𑀜𑁆𑀚𑀽𑀲𑀸’’𑀢𑀺 𑀯𑀼𑀘𑁆𑀘𑀢𑀺. 𑀫𑀜𑁆𑀚𑀽𑀲𑀸𑀬𑀁 𑀭𑀢𑀦𑀁 𑀲𑀦𑁆𑀦𑀺𑀘𑀺𑀢𑀁 𑀯𑀺𑀬 𑀲𑀼𑀢𑀁 𑀲𑀦𑁆𑀦𑀺𑀘𑀺𑀢𑀁 𑀅𑀲𑁆𑀫𑀺𑀁 𑀧𑀼𑀕𑁆𑀕𑀮𑁂𑀢𑀺 𑀬𑁄𑀚𑀦𑀸, 𑀏𑀢𑁂𑀦𑀸𑀢𑀺 ‘‘𑀲𑀦𑁆𑀦𑀺𑀘𑀺𑀢’’𑀦𑁆𑀢𑀺𑀧𑀤𑁂𑀦, 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁄 𑀪𑀺𑀓𑁆𑀔𑀼. 𑀲𑀦𑁆𑀦𑀺𑀘𑀺𑀢𑀭𑀢𑀦𑀲𑁆𑀲𑁂𑀯𑀸𑀢𑀺 𑀲𑀦𑁆𑀦𑀺𑀘𑀺𑀢𑀭𑀢𑀦𑀲𑁆𑀲 𑀇𑀯. 𑀢𑀦𑁆𑀢𑀺 ‘‘𑀬𑁂 𑀢𑁂 𑀥𑀫𑁆𑀫𑀸’’𑀢𑀺𑀆𑀤𑀺𑀯𑀘𑀦𑀁. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀅𑀲𑁆𑀲𑀸𑀢𑀺 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀢𑀢𑁆𑀣𑀸𑀢𑀺 ‘‘𑀯𑀘𑀲𑀸 𑀧𑀭𑀺𑀘𑀺𑀢𑀸’’𑀢𑀺𑀆𑀤𑀺𑀯𑀘𑀦𑁂. 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀧𑀕𑀼𑀡𑀸𑀢𑀺 𑀉𑀚𑀼𑀓𑀸. 𑀉𑀚𑀼𑀓𑁄 𑀳𑀺 𑀅𑀚𑀺𑀫𑁆𑀳𑀢𑁆𑀢𑀸 𑀧𑀓𑀝𑁆𑀞𑁄 𑀉𑀢𑁆𑀢𑀫𑁄 𑀕𑀼𑀡𑁄𑀢𑀺 𑀅𑀢𑁆𑀣𑁂𑀦 ‘‘𑀧𑀕𑀼𑀡𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑀕𑀦𑁆𑀢𑁆𑀯𑀸 𑀇𑀓𑁆𑀔𑀺𑀢𑀸, 𑀧𑀲𑁆𑀲𑀺𑀢𑀸 𑀤𑀲𑁆𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀢𑁄𑀢𑀺 𑀅𑀪𑀺𑀥𑁂𑀬𑁆𑀬𑀢𑁆𑀣𑀢𑁄, 𑀅𑀝𑁆𑀞𑀓𑀣𑀸𑀢𑁄𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀢𑁄𑀢𑀺 𑀥𑀫𑁆𑀫𑀢𑁄, 𑀧𑀸𑀴𑀺𑀢𑁄𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀲𑀤𑁆𑀤𑀲𑁆𑀲 𑀧𑀜𑁆𑀜𑀸𑀲𑀤𑁆𑀤𑀯𑁂𑀯𑀘𑀦𑀢𑁆𑀢𑀸 ‘‘𑀧𑀜𑁆𑀜𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀧𑀘𑁆𑀘𑀓𑁆𑀔𑀓𑀢𑀸𑀢𑀺 𑀲𑀼𑀝𑁆𑀞𑀼 𑀅𑀓𑁆𑀔𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀝𑀺𑀫𑀼𑀔𑀁 𑀓𑀢𑀸.

‘‘𑀩𑀳𑀼𑀲𑁆𑀲𑀼𑀢𑁄’’𑀢𑀺 𑀏𑀢𑁆𑀣 𑀩𑀳𑀼𑀲𑁆𑀲𑀼𑀢𑀲𑁆𑀲 𑀢𑀺𑀯𑀺𑀥𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺. 𑀦𑀺𑀲𑁆𑀲𑀬𑀢𑁄 𑀫𑀼𑀘𑁆𑀘𑀢𑀻𑀢𑀺 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑁄. 𑀧𑀭𑀺𑀲𑀁 𑀉𑀧𑀝𑁆𑀞𑀸𑀧𑁂𑀢𑀻𑀢𑀺 𑀧𑀭𑀺𑀲𑀼𑀧𑀝𑁆𑀞𑀸𑀓𑁄. 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀢𑀻𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄. 𑀢𑀢𑁆𑀣𑀸𑀢𑀺 𑀢𑀺𑀯𑀺𑀥𑁂𑀲𑀼 𑀩𑀳𑀼𑀲𑁆𑀲𑀼𑀢𑁂𑀲𑀼. 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑁂𑀦 𑀏𑀢𑁆𑀢𑀓𑀁 𑀉𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀲𑀫𑁆𑀧𑀤𑀸𑀬𑀸𑀢𑀺 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸. 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀏𑀢𑀲𑁆𑀲𑀸𑀢𑀺 𑀧𑀜𑁆𑀘𑀯𑀲𑁆𑀲𑁄. 𑀢𑁂𑀦 𑀉𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀲𑀩𑁆𑀩𑀦𑁆𑀢𑀺𑀫𑁂𑀦𑀸𑀢𑀺 𑀲𑀩𑁆𑀩𑁂𑀲𑀁 𑀧𑀭𑀺𑀘𑁆𑀙𑁂𑀤𑀸𑀦𑀁 𑀅𑀦𑁆𑀢𑁂 𑀮𑀸𑀫𑀓𑁂 𑀧𑀯𑀢𑁆𑀢𑁂𑀦. 𑀧𑀕𑀼𑀡𑀸𑀢𑀺 𑀅𑀚𑀺𑀫𑁆𑀳𑀸 𑀉𑀚𑀼𑀓𑀸. 𑀯𑀸𑀘𑀼𑀕𑁆𑀕𑀢𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀬𑀲𑁆𑀲 𑀳𑀺 𑀧𑀸𑀴𑀺𑀧𑀸𑀞𑀸 𑀲𑀚𑁆𑀛𑀸𑀬𑀦𑀓𑀸𑀮𑁂 𑀧𑀕𑀼𑀡𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀯𑀸𑀘𑀼𑀕𑁆𑀕𑀢𑀸. 𑀬𑀲𑁆𑀲 𑀯𑀸 𑀧𑀦 𑀯𑀸𑀘𑀼𑀕𑁆𑀕𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀲 𑀧𑀕𑀼𑀡𑀸. 𑀢𑀲𑁆𑀫𑀸 𑀢𑀸𑀦𑀺 𑀧𑀤𑀸𑀦𑀺 𑀅𑀜𑁆𑀜𑀫𑀜𑁆𑀜𑀓𑀸𑀭𑀡𑀯𑁂𑀯𑀘𑀦𑀸𑀦𑀺. 𑀧𑀓𑁆𑀔𑀤𑀺𑀯𑀲𑁂𑀲𑀽𑀢𑀺 𑀚𑀼𑀡𑁆𑀳𑀧𑀓𑁆𑀔𑀓𑀸𑀴𑀧𑀓𑁆𑀔𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀤𑀺𑀯𑀲𑁂𑀲𑀼. 𑀥𑀫𑁆𑀫𑀲𑀸𑀯𑀦𑀢𑁆𑀣𑀸𑀬𑀸𑀢𑀺 𑀲𑀫𑁆𑀧𑀢𑁆𑀢𑀸𑀦𑀁 𑀧𑀭𑀺𑀲𑀸𑀦𑀁 𑀥𑀫𑁆𑀫𑀲𑁆𑀲 𑀲𑀸𑀯𑀦𑀢𑁆𑀣𑀸𑀬 𑀲𑀼𑀡𑀸𑀧𑀦𑀢𑁆𑀣𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀯𑀦𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 𑀬𑀼𑀧𑀘𑁆𑀘𑀬𑀧𑀭𑀢𑁆𑀢𑀸 𑀓𑀸𑀭𑀺𑀢𑀧𑀘𑁆𑀘𑀬𑁄 𑀮𑁄𑀧𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀫𑀸 𑀲𑀸𑀯𑀻𑀬𑀢𑁂 𑀲𑀼𑀡𑀸𑀧𑀻𑀬𑀢𑁂 𑀲𑀸𑀯𑀦𑀦𑁆𑀢𑀺 𑀯𑀘𑀦𑀢𑁆𑀣𑁄 𑀓𑀸𑀢𑀩𑁆𑀩𑁄. 𑀪𑀸𑀡𑀯𑀸𑀭𑀸 𑀉𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀧𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀲𑀫𑁆𑀧𑀢𑁆𑀢𑀸𑀦𑀁. 𑀧𑀭𑀺𑀓𑀣𑀦𑀢𑁆𑀣𑀸𑀬𑀸𑀢𑀺 𑀧𑀭𑀺𑀲𑁆𑀲𑀗𑁆𑀕𑁂𑀦 𑀆𑀮𑀺𑀗𑁆𑀕𑀦𑁂𑀦 𑀓𑀣𑀦𑀢𑁆𑀣𑀁, 𑀅𑀧𑁆𑀧𑀲𑀤𑁆𑀤𑀲𑀗𑁆𑀔𑀸𑀢𑀸𑀬 𑀯𑀸𑀘𑀸𑀬 𑀓𑀣𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. ‘‘𑀓𑀣𑀸𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀢𑁆𑀣𑀼𑀓𑀣𑀸𑀬𑁂𑀯 𑀅𑀥𑀺𑀧𑁆𑀧𑁂𑀢𑀸, 𑀦 𑀲𑀼𑀢𑁆𑀢𑀲𑀗𑁆𑀔𑀸𑀢𑁄 𑀧𑀸𑀴𑀺𑀧𑀸𑀞𑁄. 𑀅𑀦𑀼 𑀧𑀘𑁆𑀙𑀸, 𑀧𑀼𑀦𑀧𑁆𑀧𑀼𑀦𑀁 𑀯𑀸 𑀤𑀸𑀬𑀓𑀸 𑀫𑁄𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀅𑀦𑀼𑀫𑁄𑀤𑀦𑀸. 𑀛𑀸𑀦𑀁 𑀯𑀸 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸 𑀲𑀫𑀡𑀥𑀫𑁆𑀫𑁄 𑀦𑀸𑀫. 𑀢𑀲𑁆𑀲 𑀓𑀭𑀡𑀢𑁆𑀣𑀁 𑀉𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀧𑀝𑀺𑀳𑀢𑁄𑀢𑀺 𑀘𑀸𑀢𑀼𑀤𑁆𑀤𑀺𑀲𑁄, 𑀅𑀧𑀝𑀺𑀳𑀢𑀢𑁆𑀣𑁂 𑀡𑀧𑀘𑁆𑀘𑀬𑁄.

𑀧𑀭𑀺𑀲𑀼𑀧𑀝𑁆𑀞𑀸𑀧𑀓𑁂𑀦 𑀓𑀸𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀅𑀪𑀺𑀯𑀺𑀦𑀬𑁂𑀢𑀺 𑀅𑀜𑁆𑀜𑀫𑀜𑁆𑀜𑀧𑀭𑀺𑀘𑁆𑀙𑀺𑀦𑁆𑀦𑁂 𑀯𑀺𑀦𑀬𑀧𑀺𑀝𑀓𑁂. 𑀤𑁆𑀯𑁂 𑀯𑀺𑀪𑀗𑁆𑀕𑀸𑀢𑀺 𑀪𑀺𑀓𑁆𑀔𑀼𑀯𑀺𑀪𑀗𑁆𑀕𑁄 𑀘 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁄 𑀘. 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀭𑀺𑀲𑀼𑀧𑀝𑁆𑀞𑀸𑀧𑀓𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀉𑀕𑁆𑀕𑀳𑁂𑀢𑀩𑁆𑀩𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀲𑀸𑀬 𑀅𑀢𑁆𑀣𑀸𑀬 𑀉𑀕𑁆𑀕𑀳𑁂𑀢𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑀺𑀲𑀸𑀬 𑀧𑀦𑀸’’𑀢𑀺𑀆𑀤𑀺. 𑀅𑀪𑀺𑀥𑀫𑁆𑀫𑁂𑀢𑀺 𑀅𑀜𑁆𑀜𑀫𑀜𑁆𑀜𑀧𑀭𑀺𑀘𑁆𑀙𑀺𑀦𑁆𑀦𑁂 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀏𑀯, 𑀦 𑀅𑀪𑀺𑀥𑀫𑁆𑀫𑀧𑀺𑀝𑀓𑁂. 𑀢𑀬𑁄 𑀯𑀕𑁆𑀕𑀸𑀢𑀺 𑀲𑀕𑀸𑀣𑀸𑀯𑀕𑁆𑀕𑁄 𑀦𑀺𑀤𑀸𑀦𑀯𑀕𑁆𑀕𑁄 𑀔𑀦𑁆𑀥𑀯𑀕𑁆𑀕𑁄𑀢𑀺 𑀢𑀬𑁄 𑀯𑀕𑁆𑀕𑀸. 𑀯𑀸𑀲𑀤𑁆𑀤𑁄 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑁄. 𑀏𑀓𑀦𑁆𑀢𑀺 𑀏𑀓𑀁 𑀦𑀺𑀧𑀸𑀢𑀁. 𑀢𑀢𑁄 𑀢𑀢𑁄𑀢𑀺 𑀦𑀺𑀓𑀸𑀬𑀢𑁄. 𑀲𑀫𑀼𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀭𑀸𑀲𑀺𑀁 𑀓𑀢𑁆𑀯𑀸. 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀦 𑀓𑀣𑀺𑀢𑀁. 𑀬𑀲𑁆𑀲 𑀧𑀦 𑀦𑀢𑁆𑀣𑀺, 𑀲𑁄 𑀦 𑀮𑀪𑀢𑀻𑀢𑀺 𑀬𑁄𑀚𑀦𑀸. 𑀲𑀼𑀢𑁆𑀢𑀦𑁆𑀢𑁂 𑀘𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀧𑀦. 𑀉𑀕𑁆𑀕𑀳𑀺𑀢𑁄𑀢𑀺 𑀲𑀭𑀽𑀧𑀓𑀣𑀦𑁂𑀦 𑀕𑀳𑀺𑀢𑁄, 𑀉𑀘𑁆𑀘𑀸𑀭𑀺𑀢𑁄𑀢𑀺 𑀅𑀢𑁆𑀣𑁄. 𑀤𑀺𑀲𑀸𑀧𑀸𑀫𑁄𑀓𑁆𑀔𑁄𑀢𑀺 𑀤𑀺𑀲𑀸𑀲𑀼 𑀞𑀺𑀢𑀸𑀦𑀁 𑀪𑀺𑀓𑁆𑀔𑀼𑀆𑀤𑀻𑀦𑀁 𑀧𑀸𑀫𑁄𑀓𑁆𑀔𑁄. 𑀬𑁂𑀦 𑀓𑀸𑀫𑀁 𑀕𑀫𑁄𑀢𑀺 𑀬𑀣𑀸𑀓𑀸𑀫𑀁 𑀕𑀫𑁄.

𑀘𑀢𑀽𑀲𑀼 𑀦𑀺𑀓𑀸𑀬𑁂𑀲𑀽𑀢𑀺 𑀔𑀼𑀤𑁆𑀤𑀓𑀦𑀺𑀓𑀸𑀬𑀢𑁄 𑀅𑀜𑁆𑀜𑁂𑀲𑀼 𑀤𑀻𑀖𑀦𑀺𑀓𑀸𑀬𑀸𑀤𑀻𑀲𑀼. 𑀏𑀓𑀲𑁆𑀲𑀸𑀢𑀺 𑀅𑀜𑁆𑀜𑀢𑀭𑀲𑁆𑀲 𑀏𑀓𑀲𑁆𑀲. 𑀏𑀓𑀦𑀺𑀓𑀸𑀬𑁂𑀦𑀸𑀢𑀺 𑀏𑀓𑀲𑁆𑀫𑀺𑀁 𑀦𑀺𑀓𑀸𑀬𑁂 𑀮𑀤𑁆𑀥𑀦𑀬𑁂𑀦. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀢𑁆𑀣𑀸𑀢𑀺 𑀘𑀢𑀼𑀧𑁆𑀧𑀓𑀭𑀡𑀲𑁆𑀲 𑀅𑀝𑁆𑀞𑀓𑀣𑀸𑀬𑀁. 𑀦𑀸𑀦𑀢𑁆𑀣𑀦𑁆𑀢𑀺 𑀦𑀸𑀦𑀸𑀧𑀬𑁄𑀚𑀦𑀁. 𑀢𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑀁. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑀧𑀫𑀸𑀡𑁂𑀦 𑀧𑀕𑀼𑀡𑁂𑀦. 𑀳𑁄𑀢𑀻𑀢𑀺 𑀇𑀢𑀺𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑀢𑁆𑀣𑁄. 𑀇𑀢𑀺 𑀧𑀭𑀺𑀲𑀫𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲𑀸𑀢𑀺 𑀆𑀤𑀺 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀯𑀺𑀦𑀬𑀧𑀺𑀝𑀓𑀢𑁄 𑀇𑀢𑀭𑀲𑁆𑀫𑀺𑀁. 𑀢𑀢𑁆𑀣𑀸𑀢𑀺 ‘‘𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑁂. 𑀬𑀣𑀸 𑀬𑁂𑀦𑀸𑀓𑀸𑀭𑁂𑀦 𑀆𑀕𑀢𑀸𑀦𑀺, 𑀢𑀁 𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀧𑀤𑀧𑀘𑁆𑀘𑀸𑀪𑀝𑁆𑀞𑀲𑀗𑁆𑀓𑀭𑀤𑁄𑀲𑀯𑀺𑀭𑀳𑀺𑀢𑀸𑀦𑀻𑀢𑀺 𑀧𑀤𑀸𑀦𑀁 𑀧𑀘𑁆𑀘𑀸𑀪𑀝𑁆𑀞𑀲𑀗𑁆𑀓𑀭𑀪𑀽𑀢𑁂𑀳𑀺 𑀤𑁄𑀲𑁂𑀳𑀺 𑀯𑀺𑀭𑀳𑀺𑀢𑀸𑀦𑀺. 𑀏𑀢𑁆𑀣 𑀘 𑀧𑀤𑀧𑀘𑁆𑀘𑀸𑀪𑀝𑁆𑀞𑀦𑁆𑀢𑀺 𑀧𑀤𑀸𑀦𑀁 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀪𑀲𑁆𑀲𑀦𑀁 𑀕𑀴𑀦𑀁, 𑀘𑀼𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀤𑀲𑀗𑁆𑀓𑀭𑀦𑁆𑀢𑀺 𑀧𑀤𑀸𑀦𑀁 𑀯𑀺𑀧𑀢𑁆𑀢𑀺, 𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. ‘‘𑀲𑀼𑀢𑁆𑀢𑀲𑁄’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀔𑀦𑁆𑀥𑀓𑀧𑀭𑀺𑀯𑀸𑀭𑀲𑀼𑀢𑁆𑀢𑀁 𑀏𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀔𑀦𑁆𑀥𑀓𑀧𑀭𑀺𑀯𑀸𑀭𑀢𑁄’’𑀢𑀺. 𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀢𑀺 𑀏𑀢𑁆𑀣 𑀩𑁆𑀬𑀜𑁆𑀚𑀦𑀲𑀤𑁆𑀤𑁄 𑀅𑀓𑁆𑀔𑀭𑀲𑁆𑀲 𑀘 𑀧𑀤𑀲𑁆𑀲 𑀘 𑀯𑀸𑀘𑀓𑁄𑀢𑀺 𑀆𑀳 ‘‘𑀅𑀓𑁆𑀔𑀭𑀧𑀤𑀧𑀸𑀭𑀺𑀧𑀽𑀭𑀺𑀬𑀸 𑀘𑀸’’𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸.

‘‘𑀲𑀺𑀣𑀺𑀮𑀥𑀦𑀺𑀢𑀸𑀤𑀻𑀦’’𑀦𑁆𑀢𑀺𑀧𑀤𑀁 ‘‘𑀯𑀘𑀦𑁂𑀦𑀸’’𑀢𑀺𑀧𑀤𑁂 𑀓𑀫𑁆𑀫𑀁, ‘‘𑀯𑀘𑀦𑁂𑀦𑀸’’𑀢𑀺𑀧𑀤𑀁 ‘‘𑀲𑀫𑁆𑀧𑀦𑁆𑀦𑀸𑀕𑀢𑁄’’𑀢𑀺𑀧𑀤𑁂 𑀳𑁂𑀢𑀼, ‘‘𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀴𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸’’𑀢𑀺𑀧𑀤𑀸𑀦𑀺 ‘‘𑀯𑀸𑀘𑀸𑀬𑀸’’𑀢𑀺𑀧𑀤𑁂 𑀯𑀺𑀲𑁂𑀲𑀦𑀸𑀦𑀺. 𑀲𑀺𑀣𑀺𑀮𑀥𑀦𑀺𑀢𑀸𑀤𑀻𑀦𑀦𑁆𑀢𑀺 𑀆𑀤𑀺𑀲𑀤𑁆𑀤𑁂𑀦 𑀦𑀺𑀕𑁆𑀕𑀳𑀺𑀢𑀯𑀺𑀫𑀼𑀢𑁆𑀢𑀲𑀫𑁆𑀩𑀦𑁆𑀥𑀯𑀯𑀢𑁆𑀣𑀺𑀢𑀤𑀻𑀖 𑀭𑀲𑁆𑀲 𑀕𑀭𑀼 𑀮𑀳𑀼 𑀲𑀗𑁆𑀔𑀸𑀢𑀸 𑀅𑀝𑁆𑀞 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀣𑀸𑀯𑀺𑀥𑀸𑀦𑀯𑀘𑀦𑁂𑀦𑀸𑀢𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸𑀦𑀁 𑀬𑀣𑀸 𑀲𑀁𑀯𑀺𑀤𑀳𑀦𑀯𑀘𑀦𑁂𑀦. 𑀯𑀸𑀘𑀸𑀬𑁂𑀯 𑀓𑀭𑀻𑀬𑀢𑀺 𑀓𑀣𑀻𑀬𑀢𑀺 𑀉𑀘𑁆𑀘𑀸𑀭𑀻𑀬𑀢𑀺 𑀯𑀸𑀓𑁆𑀓𑀭𑀡𑀁 𑀘𑀓𑀸𑀭𑀲𑁆𑀲 𑀓𑀓𑀸𑀭𑀁 𑀓𑀢𑁆𑀯𑀸. 𑀳𑀻𑀢𑀺 𑀢𑀤𑁂𑀯 𑀬𑀼𑀢𑁆𑀢𑀁. 𑀫𑀸𑀢𑀼𑀕𑀸𑀫𑁄 𑀬𑀲𑁆𑀫𑀸 𑀲𑀭𑀲𑀫𑁆𑀧𑀢𑁆𑀢𑀺𑀭𑀢𑁄, 𑀢𑀲𑁆𑀫𑀸 𑀳𑀻𑀴𑁂𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀭𑀲𑀫𑁆𑀧𑀢𑁆𑀢𑀺𑀭𑀳𑀺𑀢’’𑀦𑁆𑀢𑀺𑀧𑀤𑀁 ‘‘𑀯𑀘𑀦’’𑀦𑁆𑀢𑀺𑀧𑀤𑁂 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀺𑀲𑁂𑀲𑀁 𑀓𑀢𑁆𑀯𑀸 ‘‘𑀳𑀻𑀴𑁂𑀢𑀻’’𑀢𑀺𑀧𑀤𑁂 𑀳𑁂𑀢𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑀢𑁄 𑀳𑁂𑀢𑀼𑀅𑀦𑁆𑀢𑁄𑀕𑀥𑀯𑀺𑀲𑁂𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀸𑀲𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁. ‘‘𑀲𑀻𑀮𑀸𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸’’𑀢𑀺𑀇𑀫𑀺𑀦𑀸 𑀚𑀸𑀢𑀺 𑀕𑁄𑀢𑁆𑀢 𑀭𑀽𑀧 𑀪𑁄𑀕𑀸𑀤𑀺𑀦𑀸𑀢𑀺𑀅𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀺. 𑀓𑀸𑀭𑀡𑀜𑁆𑀘𑀸𑀢𑀺 𑀅𑀝𑁆𑀞𑀓𑀣𑀜𑁆𑀘. 𑀢𑀚𑁆𑀚𑁂𑀢𑁆𑀯𑀸𑀢𑀺 𑀉𑀩𑁆𑀩𑁂𑀚𑁂𑀢𑁆𑀯𑀸. 𑀢𑀸𑀲𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁. 𑀕𑀺𑀳𑀺𑀓𑀸𑀮𑁂𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑁆𑀲 𑀕𑀺𑀳𑀺𑀓𑀸𑀮𑁂 𑀅𑀦𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀺 𑀢𑀤𑁂𑀯 𑀬𑀼𑀢𑁆𑀢𑀁. ‘‘𑀫𑀸𑀢𑀼𑀕𑀸𑀫𑁄’’𑀢𑀺𑀧𑀤𑀁 ‘‘𑀦 𑀓𑀭𑁄𑀢𑀻’’𑀢𑀺𑀧𑀤𑁂 𑀲𑀼𑀤𑁆𑀥𑀓𑀢𑁆𑀢𑀸, ‘‘𑀉𑀧𑁆𑀧𑀸𑀤𑁂𑀢𑀻’’𑀢𑀺𑀧𑀤𑁂 𑀳𑁂𑀢𑀼𑀓𑀢𑁆𑀢𑀸. 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸𑀧𑀻𑀢𑀺 𑀬𑁄𑀚𑀦𑀸. 𑀅𑀧𑀺𑀲𑀤𑁆𑀤𑁄 𑀕𑀭𑀳𑀢𑁆𑀣𑁄. 𑀯𑀺𑀲𑀪𑀸𑀕𑁂𑀳𑀻𑀢𑀺 𑀯𑀺𑀭𑀼𑀤𑁆𑀥𑁂𑀳𑀺 𑀯𑀢𑁆𑀣𑀸𑀭𑀫𑁆𑀫𑀡𑁂𑀳𑀺. 𑀅𑀬𑀼𑀢𑁆𑀢𑀝𑁆𑀞𑀸𑀦𑁂𑀢𑀺 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀦𑀼𑀭𑀽𑀧𑀝𑁆𑀞𑀸𑀦𑁂. 𑀙𑀦𑁆𑀤𑀭𑀸𑀕𑀦𑁆𑀢𑀺 𑀩𑀮𑀯𑀢𑀡𑁆𑀳𑀁. 𑀢𑁂𑀦𑀸𑀢𑀺 𑀢𑁂𑀦 𑀳𑁂𑀢𑀼𑀦𑀸.

‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑁆𑀳𑀺 𑀅𑀬𑀁 𑀧𑀦 𑀲𑀗𑁆𑀕𑀳𑁄 𑁋

‘‘𑀲𑀻𑀮𑀯𑀸 𑀩𑀳𑀼𑀲𑁆𑀲𑀼𑀢𑁄 𑀘, 𑀲𑁆𑀯𑀸𑀕𑀢𑁄 𑀘 𑀲𑀼𑀯𑀸𑀘𑀓𑁄;

𑀧𑀺𑀬𑁄 𑀧𑀝𑀺𑀩𑀮𑁄 𑀘𑀸𑀧𑀺, 𑀦𑀚𑁆𑀛𑀸𑀧𑀦𑁆𑀦𑁄 𑀘 𑀯𑀻𑀲𑀢𑀻’’𑀢𑀺.

𑁧𑁪𑁮. 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁. 𑀓𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 𑀕𑀭𑀼𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀕𑀭𑀼𑀓𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺. 𑀢𑁂𑀢𑀺 𑀕𑀭𑀼𑀥𑀫𑁆𑀫𑀸. 𑀳𑀻𑀢𑀺 𑀬𑀲𑁆𑀫𑀸. ‘‘𑀏𑀓𑀢𑁄’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀯𑀘𑀦𑀲𑁆𑀲 𑀯𑀺𑀲𑁂𑀲𑁂𑀦 𑀕𑀳𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂’’𑀢𑀺. 𑀬𑀣𑀸𑀯𑀢𑁆𑀣𑀼𑀓𑀫𑁂𑀯𑀸𑀢𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀢𑀜𑁆𑀳𑀺 𑀯𑀢𑁆𑀣𑀼𑀲𑁆𑀲 𑀆𑀧𑀢𑁆𑀢𑀺𑀓𑀸𑀭𑀡𑀲𑁆𑀲 𑀅𑀦𑀼𑀭𑀽𑀧𑀁 𑀧𑀯𑀢𑁆𑀢𑀢𑁆𑀢𑀸 ‘‘𑀬𑀣𑀸𑀯𑀢𑁆𑀣𑀼𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁧𑁪𑁯. 𑀧𑀸𑀢𑁄𑀢𑀺 𑀧𑀕𑁂𑀯, 𑀧𑀞𑀫𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀫𑁆𑀫𑀝𑁆𑀞𑀁 𑀲𑀫𑁆𑀫𑀚𑁆𑀚𑀻𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑀫𑁆𑀫𑀚𑁆𑀚𑀦𑁂 𑀤𑁄𑀲𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀅𑀲𑀫𑁆𑀫𑀝𑁆𑀞𑀁 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀢𑀧𑁆𑀧𑀸𑀓𑀝𑀻𑀓𑀭𑀡𑀚𑁄𑀢𑀓𑁄. 𑀢𑀦𑁆𑀢𑀺 𑀧𑀭𑀺𑀯𑁂𑀡𑀁. 𑀤𑀺𑀲𑁆𑀯𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀅𑀲𑁄𑀢𑀼𑀓𑀸𑀫𑀸𑀦𑀁 𑀯𑀺𑀬 𑀪𑀯𑀦𑀳𑁂𑀢𑀼𑀦𑀸. 𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀲𑁆𑀲 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀉𑀧𑀝𑁆𑀞𑀸𑀦𑀲𑁆𑀲 𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁆𑀢𑁄 𑀕𑀸𑀫𑀢𑁄 𑀧𑀦𑀸’’𑀢𑀺 𑀆𑀤𑀺. 𑀢𑀲𑁆𑀫𑀺𑀦𑁆𑀢𑀺 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑁂.

𑀲𑀸𑀔𑀸𑀪𑀗𑁆𑀕𑀫𑁆𑀧𑀻𑀢𑀺 𑀪𑀜𑁆𑀚𑀺𑀢𑀩𑁆𑀩𑀲𑀸𑀔𑀫𑁆𑀧𑀺. 𑀤𑀼𑀢𑀺𑀬𑁄𑀢𑀺 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀤𑀼𑀢𑀺𑀬𑁄. 𑀦𑀺𑀲𑀻𑀤𑀺𑀢𑀩𑁆𑀩𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺. ‘‘𑀯𑀺𑀳𑀸𑀭𑀫𑀚𑁆𑀛𑁂’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀢𑁆𑀯𑀸 𑀯𑀺𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀤𑁆𑀯𑀸𑀭𑁂’’𑀢𑀺. 𑀑𑀲𑀭𑀦𑁆𑀢𑀺 𑀅𑀯𑀲𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀑𑀲𑀭𑀡𑀁, 𑀢𑀜𑁆𑀘 𑀢𑀁 𑀞𑀸𑀦𑀜𑁆𑀘𑁂𑀢𑀺 𑀑𑀲𑀭𑀡𑀝𑁆𑀞𑀸𑀦𑀁, 𑀢𑀲𑁆𑀫𑀺𑀁. 𑀲𑀫𑀕𑁆𑀕𑀢𑁆𑀣𑀸𑀢𑀺 𑀏𑀢𑁆𑀣 𑀲𑀁𑀧𑀼𑀩𑁆𑀩𑁄 𑀘 𑀆𑀧𑀼𑀩𑁆𑀩𑁄 𑀘 𑀕𑀫𑀼𑀲𑀤𑁆𑀤𑁄 𑀳𑁄𑀢𑀺, 𑀢𑀢𑁄 𑀳𑀺𑀬𑁆𑀬𑀢𑁆𑀢𑀦𑀻𑀲𑀗𑁆𑀔𑀸𑀢𑀁 𑀢𑁆𑀣𑀯𑀘𑀦𑀁 𑀯𑀸 𑀳𑁄𑀢𑀺, 𑀧𑀜𑁆𑀘𑀫𑀻𑀲𑀗𑁆𑀔𑀸𑀢𑀲𑁆𑀲 𑀣𑀯𑀘𑀦𑀲𑁆𑀲 𑀢𑁆𑀣𑀢𑁆𑀢𑀁 𑀯𑀸 𑀳𑁄𑀢𑀺, 𑀲𑀁𑀬𑁄𑀕𑀧𑀭𑀢𑁆𑀢𑀸 𑀆 𑀉𑀧𑀲𑀕𑁆𑀕𑁄 𑀭𑀲𑁆𑀲𑁄 𑀘 𑀳𑁄𑀢𑀺, 𑀇𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑁆𑀫𑀸 𑀆𑀕𑀢𑀢𑁆𑀣𑀸’’𑀢𑀺. 𑀢𑀢𑁆𑀣 ‘‘𑀲𑀫𑁆𑀫𑀸’’𑀢𑀺𑀧𑀤𑁂𑀦 𑀲𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀆’’𑀇𑀢𑀺𑀧𑀤𑁂𑀦 𑀆𑀢𑁆𑀬𑀽𑀧𑀲𑀕𑁆𑀕𑀁, ‘‘𑀕𑀢’’𑀇𑀢𑀺𑀧𑀤𑁂𑀦 𑀕𑀫𑀼𑀥𑀸𑀢𑀼𑀁, ‘‘𑀢𑁆𑀣’’𑀇𑀢𑀺𑀧𑀤𑁂𑀦 𑀳𑀺𑀬𑁆𑀬𑀢𑁆𑀢𑀦𑀻𑀲𑀗𑁆𑀔𑀸𑀢𑀁 𑀢𑁆𑀣𑀯𑀘𑀦𑀁 𑀯𑀸, 𑀧𑀜𑁆𑀘𑀫𑀻𑀲𑀗𑁆𑀔𑀸𑀢𑀲𑁆𑀲 𑀣𑀯𑀘𑀦𑀲𑁆𑀲 𑀢𑁆𑀣𑀢𑁆𑀢𑀁 𑀯𑀸 𑀤𑀲𑁆𑀲𑁂𑀢𑀺. 𑀅𑀬𑀁 𑀧𑀦𑁂𑀢𑁆𑀣𑀢𑁆𑀣𑁄 𑁋 𑀲𑀫𑀁 𑀢𑀼𑀫𑁆𑀳𑁂 𑀆𑀕𑀢𑀢𑁆𑀣𑀸𑀢𑀺. 𑀧𑀜𑁆𑀘𑀫𑀻𑀲𑀗𑁆𑀔𑀸𑀢𑀲𑁆𑀲 𑀣𑀯𑀘𑀦𑀲𑁆𑀲 𑀢𑁆𑀣𑀢𑁆𑀢𑀓𑀸𑀮𑁂 𑀲𑀫𑀁 𑀢𑀼𑀫𑁆𑀳𑁂 𑀆𑀕𑀸 𑀅𑀢𑁆𑀣 𑀪𑀯𑀣𑀸𑀢𑀺. ‘‘𑀆𑀕𑀘𑁆𑀙𑀦𑁆𑀢𑀻’’𑀢𑀺𑀧𑀤𑁂𑀦 ‘‘𑀯𑀢𑁆𑀢𑀦𑁆𑀢𑀻’’𑀢𑀺 𑀏𑀢𑁆𑀣 𑀯𑀢𑀼𑀥𑀸𑀢𑀼𑀬𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸’’𑀢𑀺𑀧𑀤𑁂𑀳𑀺 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀺. 𑀧𑀸𑀴𑀻𑀢𑀺 𑀕𑀭𑀼𑀥𑀫𑁆𑀫𑀧𑀸𑀴𑀺.

𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀧𑀸𑀴𑀺𑀬𑀁, 𑀢𑁂𑀲𑀼 𑀯𑀸 𑀅𑀪𑀺𑀯𑀸𑀤𑀦𑀸𑀤𑀻𑀲𑀼 𑀘𑀢𑀽𑀲𑀼. 𑀫𑀕𑁆𑀕𑀲𑀫𑁆𑀧𑀤𑀸𑀦𑀦𑁆𑀢𑀺 𑀫𑀕𑁆𑀕𑀁 𑀧𑀭𑀺𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀑𑀓𑀸𑀲𑀤𑀸𑀦𑀁. 𑀩𑀻𑀚𑀦𑀦𑁆𑀢𑀺 𑀩𑀻𑀚𑀦𑀺𑀬𑀸 𑀯𑀺𑀥𑀽𑀧𑀦𑀁. 𑀧𑀸𑀦𑀻𑀬𑀸𑀧𑀼𑀘𑁆𑀙𑀦𑀦𑁆𑀢𑀺 𑀧𑀸𑀦𑀻𑀬𑀲𑁆𑀲 𑀆𑀧𑀼𑀘𑁆𑀙𑀦𑀁. 𑀆𑀤𑀺𑀲𑀤𑁆𑀤𑁂𑀦 𑀧𑀭𑀺𑀪𑁄𑀚𑀦𑀻𑀬𑀸𑀧𑀼𑀘𑁆𑀙𑀦𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀘𑀸𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀅𑀪𑀺𑀯𑀸𑀤𑀦𑀸𑀤𑀻𑀲𑀼. ‘‘𑀅𑀦𑁆𑀢𑁄 𑀕𑀸𑀫𑁂 𑀯𑀸’’𑀢𑀺𑀆𑀤𑀻𑀦𑀺 𑀙 𑀧𑀤𑀸𑀦𑀺 ‘‘𑀓𑀸𑀢𑀩𑁆𑀩𑀫𑁂𑀯𑀸’’𑀢𑀺𑀧𑀤𑁂 𑀆𑀥𑀸𑀭𑁄. 𑀭𑀸𑀚𑀼𑀲𑁆𑀲𑀸𑀭𑀡𑀸𑀬𑀸𑀢𑀺 𑀭𑀜𑁆𑀜𑁄 𑀆𑀦𑀼𑀪𑀸𑀯𑁂𑀦 𑀚𑀦𑀸𑀦𑀁 𑀉𑀲𑁆𑀲𑀸𑀭𑀡𑀸𑀬. 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀢𑀺 𑀏𑀢𑁆𑀣𑀸𑀢𑀺 𑀫𑀳𑀸𑀲𑀦𑁆𑀦𑀺𑀧𑀸𑀢𑀁, 𑀢𑀲𑁆𑀫𑀺𑀁 𑀫𑀳𑀸𑀲𑀦𑁆𑀦𑀺𑀧𑀸𑀢𑁂 𑀞𑀸𑀦𑁂 𑀦𑀺𑀲𑀺𑀦𑁆𑀦𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀧𑀘𑁆𑀘𑀼𑀝𑁆𑀞𑀸𑀦𑀦𑁆𑀢𑀺 𑀧𑀝𑀺𑀓𑀘𑁆𑀘𑁂𑀯 𑀉𑀝𑁆𑀞𑀸𑀦𑀁. 𑀢𑀁 𑀢𑀦𑁆𑀢𑀺 𑀲𑀸𑀫𑀻𑀘𑀺𑀓𑀫𑁆𑀫𑀁.

𑀲𑀓𑁆𑀓𑀢𑁆𑀯𑀸𑀢𑀺 𑀘𑀺𑀢𑁆𑀢𑀺𑀁 𑀓𑀢𑁆𑀯𑀸, 𑀲𑀁 𑀆𑀤𑀭𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀣𑀸 𑀓𑀢𑁄’’𑀢𑀺𑀆𑀤𑀺. 𑀢𑀺𑀡𑁆𑀡𑀁 𑀓𑀺𑀘𑁆𑀘𑀸𑀦𑀦𑁆𑀢𑀺 ‘‘𑀲𑀓𑁆𑀓𑀢𑁆𑀯𑀸 𑀕𑀭𑀼𑀁𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸’’𑀢𑀺𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀓𑀺𑀘𑁆𑀘𑀸𑀦𑀁. 𑀅𑀦𑀻𑀬𑀲𑀤𑁆𑀤𑁄 𑀓𑀫𑁆𑀫𑀢𑁆𑀣𑁄𑀢𑀺 𑀆𑀳 ‘‘𑀦 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑁄’’𑀢𑀺.

𑀦𑀢𑁆𑀣𑀺 𑀪𑀺𑀓𑁆𑀔𑀼 𑀏𑀢𑁆𑀣𑀸𑀢𑀺 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄, 𑀲𑁄 𑀓𑀺𑀢𑁆𑀢𑀓𑁂 𑀞𑀸𑀦𑁂 𑀅𑀪𑀺𑀓𑁆𑀔𑀼𑀓𑁄, 𑀬𑁄 𑀆𑀯𑀸𑀲𑁄 𑀅𑀪𑀺𑀓𑁆𑀔𑀼𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀘𑁂’’𑀢𑀺 𑀆𑀤𑀺. ‘‘𑀉𑀧𑀲𑁆𑀲𑀬𑀢𑁄’’𑀢𑀺𑀧𑀤𑀁 ‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀧𑀤𑁂 𑀅𑀧𑀸𑀤𑀸𑀦𑀁. 𑀏𑀢𑁆𑀣𑀸𑀢𑀺 𑀅𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂. 𑀳𑀻𑀢𑀺 𑀲𑀘𑁆𑀘𑀁. 𑀢𑀢𑁄𑀢𑀺 𑀅𑀟𑁆𑀠𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀞𑀺𑀢𑀆𑀯𑀸𑀲𑀢𑁄. 𑀧𑀭𑀦𑁆𑀢𑀺 𑀅𑀜𑁆𑀜𑀲𑁆𑀫𑀺𑀁 𑀆𑀯𑀸𑀲𑁂, 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀧𑀘𑁆𑀙𑀸𑀪𑀢𑁆𑀢𑀦𑁆𑀢𑀺 𑀪𑀢𑁆𑀢𑀢𑁄 𑀧𑀘𑁆𑀙𑀸. 𑀢𑀢𑁆𑀣𑀸𑀢𑀺 𑀅𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂. ‘‘𑀪𑀺𑀓𑁆𑀔𑀼𑀦𑀺𑀬𑁄’’𑀢𑀺𑀧𑀤𑀁 ‘‘𑀯𑀤𑀦𑁆𑀢𑀻’’𑀢𑀺𑀧𑀤𑁂 𑀓𑀫𑁆𑀫𑀁. 𑀯𑀼𑀢𑁆𑀢𑀧𑁆𑀧𑀫𑀸𑀡𑁂𑀢𑀺 𑀅𑀟𑁆𑀠𑀬𑁄𑀚𑀦𑀩𑁆𑀪𑀦𑁆𑀢𑀭𑀲𑀗𑁆𑀔𑀸𑀢𑁂 𑀯𑀼𑀢𑁆𑀢𑀧𑁆𑀧𑀫𑀸𑀡𑁂. 𑀲𑀸𑀔𑀸𑀫𑀡𑁆𑀟𑀧𑁂𑀧𑀻𑀢𑀺 𑀲𑀸𑀔𑀸𑀬 𑀙𑀸𑀤𑀺𑀢𑀫𑀡𑁆𑀟𑀧𑁂𑀧𑀺. 𑀧𑀺𑀲𑀤𑁆𑀤𑁂𑀦 𑀆𑀯𑀸𑀲𑁂 𑀧𑀦 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀼𑀢𑁆𑀢𑀸𑀢𑀺 𑀯𑀲𑀺𑀢𑀸. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀓𑀭𑀢𑁆𑀢𑀁 𑀯𑀲𑀺𑀢𑀫𑀢𑁆𑀢𑁂𑀦. 𑀏𑀢𑁆𑀣𑀸𑀢𑀺 𑀲𑀪𑀺𑀓𑁆𑀔𑀼𑀓𑁂 𑀆𑀯𑀸𑀲𑁂. 𑀉𑀧𑀕𑀘𑁆𑀙𑀦𑁆𑀢𑀻𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀬𑀸𑀘𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀧𑀓𑁆𑀔𑀲𑁆𑀲𑀸𑀢𑀺 𑀆𑀲𑀴𑁆𑀳𑀻𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀲𑁆𑀲. ‘‘𑀢𑁂𑀭𑀲𑀺𑀬’’𑀦𑁆𑀢𑀺𑀧𑀤𑁂𑀦 𑀅𑀯𑀬𑀯𑀺𑀅𑀯𑀬𑀯𑀪𑀸𑀯𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀫𑀬𑀦𑁆𑀢𑀺 𑀅𑀫𑁆𑀳𑁂. 𑀬𑀢𑁄𑀢𑀺 𑀬𑁂𑀦 𑀉𑀚𑀼𑀦𑀸 𑀫𑀕𑁆𑀕𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀳 ‘‘𑀢𑁂𑀦 𑀫𑀕𑁆𑀕𑁂𑀦𑀸’’𑀢𑀺. 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦𑀸𑀢𑀺 𑀉𑀚𑀼𑀫𑀕𑁆𑀕𑀢𑁄 𑀅𑀜𑁆𑀜𑁂𑀦 𑀚𑀺𑀫𑁆𑀳𑀫𑀕𑁆𑀕𑁂𑀦. 𑀅𑀬𑀦𑁆𑀢𑀺 𑀅𑀬𑀁 𑀆𑀯𑀸𑀲𑁄. 𑀢𑀢𑁄𑀢𑀺 𑀪𑀺𑀓𑁆𑀔𑀽𑀦𑀁 𑀆𑀯𑀸𑀲𑀢𑁄, 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀢𑁄 𑀯𑀸, 𑀇𑀤𑀫𑁂𑀯 𑀬𑀼𑀢𑁆𑀢𑀢𑀭𑀁. 𑀯𑀓𑁆𑀔𑀢𑀺 𑀳𑀺 ‘‘𑀅𑀫𑁆𑀳𑀸𑀓𑀁 𑀉𑀧𑀲𑁆𑀲𑀬𑀢𑁄 𑀕𑀸𑀯𑀼𑀢𑀫𑀢𑁆𑀢𑁂’’𑀢𑀺. 𑀔𑁂𑀫𑀝𑁆𑀞𑀸𑀦𑁂𑀢𑀺 𑀅𑀪𑀬𑀝𑁆𑀞𑀸𑀦𑁂. 𑀢𑀜𑁆𑀳𑀺 𑀔𑀻𑀬𑀦𑁆𑀢𑀺 𑀪𑀬𑀸 𑀏𑀢𑁆𑀣𑀸𑀢𑀺 𑀔𑁂𑀫𑀁, 𑀔𑁂𑀫𑀜𑁆𑀘 𑀢𑀁 𑀞𑀸𑀦𑀜𑁆𑀘𑁂𑀢𑀺 𑀔𑁂𑀫𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀔𑁂𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀻𑀢𑀺 𑀅𑀟𑁆𑀠𑀬𑁄𑀚𑀦𑀫𑀢𑁆𑀢𑁂 𑀞𑀸𑀦𑁂 𑀯𑀲𑀦𑁆𑀢𑀻𑀳𑀺. 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄𑀢𑀺 𑀕𑀸𑀯𑀼𑀢𑀫𑀢𑁆𑀢𑁂 𑀞𑀸𑀦𑁂 𑀯𑀲𑀦𑁆𑀢𑀺𑀬𑁄. 𑀅𑀦𑁆𑀢𑀭𑀸𑀢𑀺 𑀢𑀼𑀫𑁆𑀳𑀸𑀓𑀁, 𑀅𑀫𑁆𑀳𑀸𑀓𑀜𑁆𑀘 𑀦𑀺𑀯𑀸𑀲𑀦𑀝𑁆𑀞𑀸𑀦𑀲𑁆𑀲, 𑀦𑀺𑀯𑀸𑀲𑀦𑀝𑁆𑀞𑀸𑀦𑀢𑁄 𑀯𑀸 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂. 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀞𑀺𑀢𑁂 𑀫𑀕𑁆𑀕𑁂𑀢𑀺 𑀲𑀫𑁆𑀩𑀦𑁆𑀥𑁄 ‘‘𑀲𑀦𑁆𑀢𑀺𑀓𑀸’’𑀢𑀺𑀧𑀤𑀁 ‘‘𑀆𑀕𑀢’’𑀇𑀢𑀺𑀧𑀤𑁂 𑀅𑀧𑀸𑀤𑀸𑀦𑀁. 𑀢𑀢𑁆𑀣𑀸𑀢𑀺 𑀅𑀜𑁆𑀜𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀲𑁆𑀲𑀬𑁂. 𑀇𑀢𑀺 𑀬𑀸𑀘𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀪𑀺𑀓𑁆𑀔𑀽𑀦𑀁 𑀬𑀸𑀘𑀺𑀢𑀩𑁆𑀩𑀢𑁄, 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀘𑀸𑀢𑀼𑀤𑁆𑀤𑀲𑁂𑀢𑀺 𑀆𑀲𑀴𑁆𑀳𑀻𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀲𑁆𑀲 𑀘𑀢𑀼𑀤𑁆𑀤𑀲𑀦𑁆𑀦𑀁 𑀤𑀺𑀯𑀲𑀸𑀦𑀁 𑀧𑀽𑀭𑀡𑁂 𑀤𑀺𑀯𑀲𑁂. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂. ‘‘𑀑𑀯𑀸𑀤’’𑀦𑁆𑀢𑀺𑀧𑀤𑀁 ‘‘𑀅𑀦𑀼’’𑀇𑀢𑀺𑀧𑀤𑁂 𑀓𑀫𑁆𑀫𑀁. 𑀅𑀦𑀼𑀚𑀻𑀯𑀦𑁆𑀢𑀺𑀬𑁄𑀢𑀺 𑀅𑀦𑀼𑀕𑀦𑁆𑀢𑁆𑀯𑀸 𑀚𑀻𑀯𑀦𑀁 𑀯𑀼𑀢𑁆𑀢𑀺𑀁 𑀓𑀭𑁄𑀦𑁆𑀢𑀺𑀬𑁄. 𑀯𑀼𑀢𑁆𑀢𑀸 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀢𑀺𑀬𑀤𑀺𑀯𑀲𑁂𑀢𑀺 𑀆𑀲𑀴𑁆𑀳𑀻𑀧𑀼𑀡𑁆𑀡𑀫𑀺𑀬𑀁. 𑀅𑀣𑀸𑀢𑀺 𑀧𑀓𑁆𑀓𑀫𑀦𑀸𑀦𑀦𑁆𑀢𑀭𑀁. 𑀏𑀢𑁆𑀣𑀸𑀢𑀺 𑀪𑀺𑀓𑁆𑀔𑀽𑀦𑀁 𑀧𑀓𑁆𑀓𑀦𑁆𑀢𑀢𑁆𑀢𑀸 𑀅𑀧𑀲𑁆𑀲𑀦𑁂. ‘‘𑀆𑀪𑁄𑀕𑀁 𑀓𑀢𑁆𑀯𑀸’’𑀢𑀺𑀇𑀫𑀺𑀦𑀸 𑀆𑀪𑁄𑀕𑀁 𑀅𑀓𑀢𑁆𑀯𑀸 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀲𑀪𑀺𑀓𑁆𑀔𑀼𑀓𑀸𑀯𑀸𑀲𑀁 𑀕𑀦𑁆𑀢𑀩𑁆𑀩𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀢𑀺 𑀯𑀲𑁆𑀲𑀘𑁆𑀙𑁂𑀤𑀸𑀧𑀢𑁆𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀓𑁂𑀦𑀘𑀺 𑀓𑀸𑀭𑀡𑁂𑀦𑀸𑀢𑀺 𑀪𑀺𑀓𑁆𑀔𑀸𑀘𑀸𑀭𑀲𑁆𑀲 𑀅𑀲𑀫𑁆𑀧𑀤𑀸𑀤𑀺𑀦𑀸 𑀓𑁂𑀦𑀘𑀺 𑀦𑀺𑀫𑀺𑀢𑁆𑀢𑁂𑀦. 𑀳𑀻𑀢𑀺 𑀲𑀘𑁆𑀘𑀁. 𑀪𑀺𑀓𑁆𑀔𑀽𑀦𑀁 𑀧𑀓𑁆𑀓𑀦𑁆𑀢𑀸𑀤𑀺𑀓𑀸𑀭𑀡𑀸 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑁂 𑀯𑀲𑀦𑁆𑀢𑀺𑀬𑀸 𑀓𑀺𑀁 𑀅𑀪𑀺𑀓𑁆𑀔𑀼𑀓𑀸𑀯𑀸𑀲𑁂𑀯 𑀧𑀯𑀸𑀭𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀯𑀸𑀭𑁂𑀦𑁆𑀢𑀺𑀬𑀸 𑀧𑀦𑀸’’𑀢𑀺𑀆𑀤𑀺.

𑀅𑀦𑁆𑀯𑀤𑁆𑀥𑀫𑀸𑀲𑀦𑁆𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑁄 𑀯𑀺𑀘𑁆𑀙𑀢𑁆𑀣𑀯𑀸𑀘𑀓𑁄 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑁄, 𑀢𑁂𑀦 𑀧𑀬𑁄𑀕𑀢𑁆𑀢𑀸 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀤𑁆𑀥𑀫𑀸𑀲𑁂 𑀅𑀤𑁆𑀥𑀫𑀸𑀲𑁂’’𑀢𑀺. 𑀧𑀘𑁆𑀘𑀸𑀲𑀻𑀲𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 𑀧𑀢𑀺𑀧𑀼𑀩𑁆𑀩𑁄 𑀘 𑀆𑀧𑀼𑀩𑁆𑀩𑁄 𑀘 𑀲𑀺𑀥𑀸𑀢𑀼 𑀇𑀘𑁆𑀙𑀢𑁆𑀣𑁂𑀢𑀺 𑀆𑀳 ‘‘𑀇𑀘𑁆𑀙𑀺𑀢𑀩𑁆𑀩𑀸’’𑀢𑀺. 𑀲𑀺𑀥𑀸𑀢𑀼𑀬𑀸 𑀤𑁆𑀯𑁂𑀪𑀸𑀯𑁄 𑀳𑁄𑀢𑀺. 𑀆𑀧𑀼𑀩𑁆𑀩𑁄 𑀲𑀺𑀲𑀺 𑀇𑀘𑁆𑀙𑀸𑀬𑀦𑁆𑀢𑀺𑀧𑀺 𑀥𑀸𑀢𑀼𑀧𑀸𑀞𑁂𑀲𑀼 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 ‘‘𑀉𑀧𑁄𑀲𑀣𑀧𑀼𑀘𑁆𑀙𑀓’’𑀦𑁆𑀢𑀺𑀯𑀘𑀦𑁂. 𑀧𑀓𑁆𑀔𑀲𑁆𑀲𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀧𑀓𑁆𑀔𑀲𑁆𑀲. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀑𑀯𑀸𑀤𑀲𑁆𑀲 𑀬𑀸𑀘𑀦𑀁 𑀑𑀯𑀸𑀤𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀲𑁄𑀬𑁂𑀯 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀑𑀯𑀸𑀤𑀢𑁆𑀣𑁄, 𑀢𑀤𑀢𑁆𑀣𑀸𑀬. 𑀧𑀸𑀝𑀺𑀧𑀤𑀤𑀺𑀯𑀲𑀢𑁄𑀢𑀺 𑀤𑀼𑀢𑀺𑀬𑀤𑀺𑀯𑀲𑀢𑁄. 𑀲𑁄 𑀳𑀺 𑀘𑀦𑁆𑀤𑁄 𑀯𑀼𑀤𑁆𑀥𑀺𑀜𑁆𑀘 𑀳𑀸𑀦𑀺𑀜𑁆𑀘 𑀧𑀝𑀺𑀫𑀼𑀔𑀁 𑀧𑀚𑁆𑀚𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀧𑀸𑀝𑀺𑀧𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦. 𑀪𑀕𑀯𑀸 𑀧𑀜𑁆𑀜𑀧𑁂𑀢𑀻𑀢𑀺 𑀬𑁄𑀚𑀦𑀸. 𑀅𑀜𑁆𑀜𑀲𑁆𑀲𑀸𑀢𑀺 𑀥𑀫𑁆𑀫𑀲𑁆𑀲𑀯𑀦𑀓𑀫𑁆𑀫𑀢𑁄 𑀅𑀜𑁆𑀜𑀲𑁆𑀲. 𑀦𑀺𑀭𑀦𑁆𑀢𑀭𑀦𑁆𑀢𑀺 𑀅𑀪𑀺𑀓𑁆𑀔𑀡𑀁, ‘‘𑀧𑀜𑁆𑀜𑀧𑁂𑀢𑀻’’𑀢𑀺𑀧𑀤𑁂 𑀪𑀸𑀯𑀦𑀧𑀼𑀁𑀲𑀓𑀁. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀏𑀯𑀜𑁆𑀘 𑀲𑀢𑀻𑀢𑀺 𑀏𑀯𑀁 𑀩𑀳𑀽𑀧𑀓𑀸𑀭𑁂 𑀲𑀢𑀺 𑀘. 𑀬𑀦𑁆𑀢𑀺 𑀬𑀁 𑀥𑀫𑁆𑀫𑀁. 𑀲𑀸𑀢𑁆𑀣𑀺𑀓𑀦𑁆𑀢𑀺 𑀲𑀧𑀬𑁄𑀚𑀦𑀁. 𑀬𑀣𑀸𑀦𑀼𑀲𑀺𑀝𑁆𑀞𑀦𑁆𑀢𑀺 𑀅𑀦𑀼𑀲𑀺𑀝𑁆𑀞𑀺𑀬𑀸 𑀅𑀦𑀼𑀭𑀽𑀧𑀁. 𑀲𑀩𑁆𑀩𑀸𑀬𑁂𑀯 𑀪𑀺𑀓𑁆𑀔𑀼𑀦𑀺𑀬𑁄𑀧𑀻𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀲𑀘𑁆𑀘𑀁.

𑀑𑀯𑀸𑀤𑀁 𑀕𑀘𑁆𑀙𑀢𑀻𑀢𑀺 𑀑𑀯𑀸𑀤𑀁 𑀬𑀸𑀘𑀺𑀢𑀼𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑀸𑀫𑀁 𑀕𑀘𑁆𑀙𑀢𑀺. 𑀦 𑀑𑀯𑀸𑀤𑁄 𑀕𑀦𑁆𑀢𑀩𑁆𑀩𑁄𑀢𑀺 𑀑𑀯𑀸𑀤𑀁 𑀬𑀸𑀘𑀺𑀢𑀼𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑀸𑀫𑁄 𑀦 𑀕𑀦𑁆𑀢𑀩𑁆𑀩𑁄. 𑀑𑀯𑀸𑀤𑁄𑀢𑀺 𑀘 𑀉𑀧𑀬𑁄𑀕𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑀣𑀸 𑀳𑀺 𑀲𑀤𑁆𑀤𑀧𑀬𑁄𑀕𑁄 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀑𑀯𑀸𑀤𑀁 𑀕𑀦𑁆𑀢𑀼𑀦𑁆𑀢𑀺 𑀑𑀯𑀸𑀤𑀁 𑀬𑀸𑀘𑀦𑀢𑁆𑀣𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑀸𑀫𑀁 𑀕𑀦𑁆𑀢𑀼𑀁.

‘‘𑀤𑁆𑀯𑁂 𑀢𑀺𑀲𑁆𑀲𑁄 𑀪𑀺𑀓𑁆𑀔𑀼𑀦𑀺𑀬𑁄’’𑀢𑀺𑀧𑀤𑀁 ‘‘𑀬𑀸𑀘𑀺𑀢𑁆𑀯𑀸’’𑀢𑀺𑀧𑀤𑁂 𑀤𑀼𑀢𑀺𑀬𑀸𑀓𑀫𑁆𑀫𑀁. ‘‘𑀧𑁂𑀲𑁂𑀢𑀩𑁆𑀩𑀸’’𑀢𑀺𑀧𑀤𑁂 𑀧𑀞𑀫𑀸𑀓𑀫𑁆𑀫𑀁. 𑀑𑀯𑀸𑀤𑀽𑀧𑀲𑀗𑁆𑀓𑀫𑀦𑀦𑁆𑀢𑀺 𑀑𑀯𑀸𑀤𑀲𑁆𑀲 𑀕𑀳𑀡𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀦𑀁. 𑀆𑀭𑀸𑀫𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑀸𑀫𑀁. 𑀢𑀢𑁄𑀢𑀺 𑀕𑀫𑀦𑀢𑁄 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀑𑀯𑀸𑀤𑀧𑀝𑀺𑀕𑁆𑀕𑀸𑀳𑀓𑁂𑀦 𑀪𑀺𑀓𑁆𑀔𑀼𑀦𑀸. 𑀢𑀦𑁆𑀢𑀺 𑀲𑀫𑁆𑀫𑀢𑀁 𑀪𑀺𑀓𑁆𑀔𑀼𑀁.

𑀉𑀲𑁆𑀲𑀳𑀢𑀻𑀢𑀺 𑀲𑀓𑁆𑀓𑁄𑀢𑀺. 𑀧𑀸𑀲𑀸𑀤𑀺𑀓𑁂𑀦𑀸𑀢𑀺 𑀧𑀲𑀸𑀤𑀁 𑀆𑀯𑀳𑁂𑀦 𑀧𑀲𑀸𑀤𑀚𑀦𑀓𑁂𑀦 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀸𑀤𑁂𑀢𑀽𑀢𑀺 𑀢𑀺𑀯𑀺𑀥𑀁 𑀲𑀺𑀓𑁆𑀔𑀁 𑀲𑀫𑁆𑀧𑀸𑀤𑁂𑀢𑀼. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 ‘‘𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀢𑀽’’𑀢𑀺 𑀯𑀘𑀦𑀫𑀢𑁆𑀢𑁂𑀦. 𑀳𑀻𑀢𑀺 𑀨𑀮𑀚𑁄𑀢𑀓𑁄. 𑀏𑀢𑀦𑁆𑀢𑀺 ‘‘𑀢𑀸𑀳𑀻’’𑀢𑀺𑀯𑀘𑀦𑀁.

𑀏𑀢𑁆𑀣 𑀘 𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀯𑀲𑁂𑀦 𑀯𑀘𑀦𑀯𑀸𑀭𑁄 𑀢𑀺𑀯𑀺𑀥𑁄 𑀳𑁄𑀢𑀺, 𑀢𑀁 𑀢𑀺𑀯𑀺𑀥𑀁 𑀯𑀘𑀦𑀯𑀸𑀭𑀁 𑀪𑀺𑀓𑁆𑀔𑀼𑀦𑀻𑀦𑀁 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀯𑀲𑁂𑀦 𑀢𑀻𑀳𑀺 𑀯𑀘𑀦𑀯𑀸𑀭𑁂𑀳𑀺 𑀕𑀼𑀡𑀺𑀢𑀁 𑀓𑀢𑁆𑀯𑀸 𑀦𑀯 𑀯𑀘𑀦𑀯𑀸𑀭𑀸 𑀳𑁄𑀦𑁆𑀢𑀺, 𑀢𑀁 𑀆𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀭𑀸𑀬𑀁 𑀯𑀘𑀦𑀓𑁆𑀓𑀫𑁄’’𑀢𑀺. 𑀢𑀢𑁆𑀭𑀸𑀢𑀺 𑀧𑀼𑀭𑀺𑀫𑀯𑀘𑀦𑀸𑀧𑁂𑀓𑁆𑀔𑀁. 𑀯𑀘𑀦𑀸𑀓𑀸𑀭𑁄 𑀧𑀸𑀓𑀝𑁄𑀯.

𑀏𑀓𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀩𑀳𑀽𑀳𑀺 𑀪𑀺𑀓𑁆𑀔𑀼𑀦𑀻𑀉𑀧𑀲𑁆𑀲𑀬𑁂𑀳𑀺 𑀑𑀯𑀸𑀤𑀢𑁆𑀣𑀸𑀬 𑀧𑁂𑀲𑀺𑀢𑁂 𑀯𑀘𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘 𑀅𑀬𑁆𑀬𑀸’’𑀢𑀺𑀆𑀤𑀺.

𑀢𑁂𑀦𑀸𑀧𑀻𑀢𑀺 𑀑𑀯𑀸𑀤𑀧𑀝𑀺𑀕𑁆𑀕𑀸𑀳𑀓𑁂𑀦𑀸𑀧𑀺 ‘‘𑀑𑀯𑀸𑀤’’𑀦𑁆𑀢𑀺𑀧𑀤𑀁 ‘‘𑀧𑀝𑀺𑀕𑁆𑀕𑀸𑀳𑀓𑁂𑀦𑀸’’𑀢𑀺 𑀧𑀤𑁂 𑀓𑀫𑁆𑀫𑀁. 𑀧𑀼𑀦 ‘‘𑀑𑀯𑀸𑀤’’𑀦𑁆𑀢𑀺𑀧𑀤𑀁 ‘‘𑀅𑀧𑀝𑀺𑀕𑁆𑀕𑀳𑁂𑀢𑀼’’𑀦𑁆𑀢𑀺𑀧𑀤𑁂 𑀓𑀫𑁆𑀫𑀁. 𑀩𑀮𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀫𑀢𑁆𑀢𑁂𑀦 𑀚𑀻𑀯𑀢𑀺, 𑀦 𑀧𑀜𑁆𑀜𑀸𑀚𑀻𑀯𑀺𑀢𑁂𑀦𑀸𑀢𑀺 𑀩𑀸𑀮𑁄. 𑀕𑀺𑀮𑀸𑀬𑀢𑀺 𑀭𑀼𑀚𑀢𑀻𑀢𑀺 𑀕𑀺𑀮𑀸𑀦𑁄. 𑀕𑀫𑀺𑀲𑁆𑀲𑀢𑀺 𑀕𑀦𑁆𑀢𑀼𑀁 𑀪𑀩𑁆𑀩𑁄𑀢𑀺 𑀕𑀫𑀺𑀓𑁄. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀕𑀦𑁆𑀢𑀼𑀁 𑀪𑀩𑁆𑀩𑁄 𑀬𑁄 𑀪𑀺𑀓𑁆𑀔𑀼 𑀕𑀫𑀺𑀲𑁆𑀲𑀢𑀺 𑀕𑀫𑀦𑀁 𑀓𑀭𑀺𑀲𑁆𑀲𑀢𑀺, 𑀇𑀢𑀺 𑀢𑀲𑁆𑀫𑀸 𑀲𑁄 𑀪𑀺𑀓𑁆𑀔𑀼 𑀕𑀫𑀺𑀓𑁄 𑀦𑀸𑀫. 𑀅𑀣 𑀯𑀸 𑀬𑁄 𑀪𑀺𑀓𑁆𑀔𑀼 𑀕𑀦𑁆𑀢𑀼𑀁 𑀪𑀩𑁆𑀩𑀢𑁆𑀢𑀸 𑀕𑀫𑀺𑀲𑁆𑀲𑀢𑀺 𑀕𑀫𑀦𑀁 𑀓𑀭𑀺𑀲𑁆𑀲𑀢𑀺, 𑀇𑀢𑀺 𑀢𑀲𑁆𑀫𑀸 𑀲𑁄 𑀪𑀺𑀓𑁆𑀔𑀼 𑀕𑀫𑀺𑀓𑁄 𑀦𑀸𑀫𑀸𑀢𑀺. ‘‘𑀪𑀩𑁆𑀩𑁄’’𑀢𑀺 𑀘 𑀳𑁂𑀢𑀼𑀅𑀦𑁆𑀢𑁄𑀕𑀥𑀯𑀺𑀲𑁂𑀲𑀦𑀁.

𑀢𑀢𑁆𑀣𑀸𑀢𑀺 𑀩𑀸𑀮𑀸𑀤𑀻𑀲𑀼 𑀢𑀻𑀲𑀼 𑀧𑀼𑀕𑁆𑀕𑀮𑁂𑀲𑀼. 𑀤𑀼𑀢𑀺𑀬𑀧𑀓𑁆𑀔𑀤𑀺𑀯𑀲𑁂𑀢𑀺 𑀧𑀸𑀝𑀺𑀧𑀤𑀢𑁄 𑀤𑀼𑀢𑀺𑀬𑀧𑀓𑁆𑀔𑀤𑀺𑀯𑀲𑁂. 𑀉𑀧𑁄𑀲𑀣𑀕𑁆𑀕𑁂𑀢𑀺 𑀉𑀧𑁄𑀲𑀣𑀕𑁂𑀳𑁂. 𑀢𑀜𑁆𑀳𑀺 𑀉𑀧𑁄𑀲𑀣𑀁 𑀕𑀡𑁆𑀳𑀦𑁆𑀢𑀺, 𑀉𑀧𑁄𑀲𑀣𑁄 𑀯𑀸 𑀕𑀬𑁆𑀳𑀢𑀺 𑀅𑀲𑁆𑀫𑀺𑀦𑁆𑀢𑀺 ‘‘𑀉𑀧𑁄𑀲𑀣𑀕𑁆𑀕’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀉𑀧𑁄𑀲𑀣𑀕𑁆𑀕𑁂. ‘‘𑀅𑀦𑀸𑀭𑁄𑀘𑁂𑀢𑀼’’𑀦𑁆𑀢𑀺 𑀯𑀘𑀦𑀲𑁆𑀲 𑀜𑀸𑀧𑀓𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀧𑀘𑁆𑀘𑀸𑀳𑀭𑀺𑀢𑀼’’𑀦𑁆𑀢𑀺 𑀯𑀘𑀦𑀲𑁆𑀲 𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀧𑀭𑀫𑁆𑀧𑀺 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺.

𑀢𑀢𑁆𑀣𑀸𑀢𑀺 𑀑𑀯𑀸𑀤𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀪𑀺𑀓𑁆𑀔𑀽𑀲𑀼. 𑀦𑁄 𑀘𑀲𑁆𑀲𑀸𑀢𑀺 𑀦𑁄 𑀘𑁂 𑀅𑀲𑁆𑀲. 𑀲𑀪𑀁 𑀯𑀸𑀢𑀺 𑀲𑀫𑀚𑁆𑀚𑀁 𑀯𑀸. 𑀲𑀸 𑀳𑀺 𑀲𑀳 𑀪𑀸𑀲𑀦𑁆𑀢𑀺 𑀏𑀢𑁆𑀣, 𑀲𑀦𑁆𑀢𑁂𑀳𑀺 𑀯𑀸 𑀪𑀸𑀢𑀺 𑀤𑀺𑀩𑁆𑀩𑀢𑀻𑀢𑀺 ‘‘𑀲𑀪𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀲𑀪𑀁 𑀯𑀸 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀲𑀪𑀸𑀤𑀺𑀓𑁂. 𑀏𑀯𑀁 ‘‘𑀢𑀢𑁆𑀣𑀸’’𑀢𑀺𑀧𑀤𑁂𑀧𑀺.

𑀘𑀢𑀼𑀤𑁆𑀤𑀲𑀦𑁆𑀦𑀁 𑀧𑀽𑀭𑀡𑁄 𑀘𑀸𑀢𑀼𑀤𑁆𑀤𑀲𑁄, 𑀢𑀲𑁆𑀫𑀺𑀁 𑀧𑀯𑀸𑀭𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀺𑀓𑁆𑀔𑀼𑀲𑀗𑁆𑀖𑁂𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑁂, 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀅𑀚𑁆𑀚𑀢𑀦𑀸𑀢𑀺 𑀏𑀢𑁆𑀣 𑀅𑀲𑁆𑀫𑀺𑀁 𑀅𑀳𑀦𑀺 𑀅𑀚𑁆𑀚, 𑀇𑀫𑀲𑀤𑁆𑀤𑀢𑁄 𑀅𑀳𑀦𑀻𑀢𑀺 𑀅𑀢𑁆𑀣𑁂 𑀚𑁆𑀚𑀧𑀘𑁆𑀘𑀬𑁄, 𑀇𑀫𑀲𑀤𑁆𑀤𑀲𑁆𑀲 𑀘 𑀅𑀓𑀸𑀭𑁄, 𑀅𑀚𑁆𑀚 𑀏𑀯 𑀅𑀚𑁆𑀚𑀢𑀦𑀸, 𑀲𑁆𑀯𑀢𑁆𑀣𑁄 𑀳𑀺 𑀢𑀦𑀧𑀘𑁆𑀘𑀬𑁄. 𑀅𑀧𑀭𑀲𑁆𑀫𑀺𑀁 𑀅𑀳𑀦𑀺 𑀅𑀧𑀭𑀚𑁆𑀚, 𑀅𑀧𑀭𑀲𑀤𑁆𑀤𑀢𑁄 𑀅𑀳𑀦𑀻𑀢𑀺 𑀅𑀢𑁆𑀣𑁂 𑀚𑁆𑀚𑀧𑀘𑁆𑀘𑀬𑁄 𑀲𑀢𑁆𑀢𑀫𑁆𑀬𑀦𑁆𑀢𑁄𑀬𑁂𑀯. 𑀏𑀢𑁆𑀣𑀸𑀢𑀺 𑀧𑀯𑀸𑀭𑀡𑁂, ‘‘𑀅𑀦𑀼𑀚𑀸𑀦𑀸𑀫𑀻’’𑀢𑀺𑀆𑀤𑀺𑀯𑀘𑀦𑁂 𑀯𑀸. 𑀳𑀻𑀢𑀺 𑀲𑀘𑁆𑀘𑀁.

𑀓𑁄𑀮𑀸𑀳𑀮𑀦𑁆𑀢𑀺 𑀓𑁄𑀢𑀽𑀳𑀮𑀁. 𑀧𑀞𑀫𑀁 𑀪𑀺𑀓𑁆𑀔𑀼𑀦𑀻 𑀬𑀸𑀘𑀺𑀢𑀩𑁆𑀩𑀸𑀢𑀺 𑀲𑀗𑁆𑀖𑁂𑀦 𑀧𑀞𑀫𑀁 𑀪𑀺𑀓𑁆𑀔𑀼𑀦𑀻 𑀬𑀸𑀘𑀺𑀢𑀩𑁆𑀩𑀸.

𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀯𑀘𑀦𑀻𑀬𑁄 𑀅𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀧𑀲𑁆𑀲𑀦𑁆𑀢𑁄 𑀧𑀝𑀺𑀓𑀭𑀺𑀲𑁆𑀲𑀢𑀻𑀢𑀺 𑀯𑀚𑁆𑀚𑀸𑀯𑀚𑁆𑀚𑀁 𑀧𑀲𑁆𑀲𑀦𑁆𑀢𑁄 𑀳𑀼𑀢𑁆𑀯𑀸 𑀧𑀝𑀺𑀓𑀭𑀺𑀲𑁆𑀲𑀢𑀺.

𑀉𑀪𑀺𑀦𑁆𑀦𑀦𑁆𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁. 𑀬𑀣𑀸𑀞𑀸𑀦𑁂𑀬𑁂𑀯𑀸𑀢𑀺 𑀬𑀁 𑀬𑀁 𑀞𑀸𑀦𑀁 𑀬𑀣𑀸𑀞𑀸𑀦𑀁, 𑀢𑀲𑁆𑀫𑀺𑀁 𑀬𑀣𑀸𑀞𑀸𑀦𑁂𑀬𑁂𑀯. 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑁂𑀦𑀘𑀺 𑀓𑀸𑀭𑀡𑁂𑀦. 𑀅𑀯𑀧𑀼𑀩𑁆𑀩𑁄 𑀯𑀭𑀲𑀤𑁆𑀤𑁄 𑀧𑀺𑀳𑀺𑀢𑀢𑁆𑀣𑁄𑀢𑀺 𑀆𑀳 ‘‘𑀧𑀺𑀳𑀺𑀢𑁄’’𑀢𑀺. 𑀯𑀘𑀦𑀁𑀬𑁂𑀯𑀸𑀢𑀺 𑀑𑀯𑀸𑀤𑀯𑀘𑀦𑀁𑀬𑁂𑀯. 𑀧𑀣𑁄𑀢𑀺 𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀞𑀸𑀦𑀲𑁆𑀲 𑀓𑀸𑀭𑀡𑀢𑁆𑀢𑀸 𑀧𑀣𑁄. 𑀤𑁄𑀲𑀁 𑀧𑀦𑀸𑀢𑀺 𑀅𑀪𑀺𑀓𑁆𑀓𑀫𑀦𑀸𑀤𑀻𑀲𑀼 𑀆𑀤𑀻𑀦𑀯𑀁 𑀧𑀦. 𑀅𑀜𑁆𑀚𑁂𑀦𑁆𑀢𑀻𑀢𑀺 𑀫𑀓𑁆𑀔𑁂𑀦𑁆𑀢𑀺. 𑀪𑀺𑀓𑁆𑀔𑀽𑀳𑀺 𑀧𑀦 𑀑𑀯𑀤𑀺𑀢𑀼𑀁 𑀅𑀦𑀼𑀲𑀸𑀲𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑀅𑀜𑁆𑀜𑀦𑁆𑀢𑀺 𑀑𑀯𑀸𑀤𑀢𑁄 𑀅𑀜𑁆𑀜𑀁. 𑀏𑀲𑁄𑀢𑀺 𑀕𑀭𑀼𑀥𑀫𑁆𑀫𑁄.

𑁧𑁫𑁦. ‘‘𑀅𑀥𑀫𑁆𑀫𑀓𑀫𑁆𑀫𑁂’’𑀢𑀺 𑀏𑀢𑁆𑀣 𑀓𑀢𑀫𑀁 𑀓𑀫𑁆𑀫𑀁 𑀦𑀸𑀫𑀸𑀢𑀺 𑀆𑀳 ‘‘𑀅𑀥𑀫𑁆𑀫𑀓𑀫𑁆𑀫𑁂𑀢𑀺𑀆𑀤𑀻𑀲𑀽’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀅𑀥𑀫𑁆𑀫𑀓𑀫𑁆𑀫𑀥𑀫𑁆𑀫𑀓𑀫𑁆𑀫𑁂𑀲𑀼.

𑁧𑁫𑁨. 𑀉𑀤𑁆𑀤𑁂𑀲𑀁 𑀤𑁂𑀦𑁆𑀢𑁄 𑀪𑀡𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀬𑁄𑀚𑀦𑀸. 𑀑𑀲𑀸𑀭𑁂𑀢𑀻𑀢𑀺 𑀓𑀣𑁂𑀢𑀺. 𑀘𑀢𑀼𑀧𑀭𑀺𑀲𑀢𑀻𑀢𑀺 𑀘𑀢𑀼𑀧𑀭𑀺𑀲𑀲𑁆𑀫𑀺𑀁. 𑀢𑀢𑁆𑀭𑀸𑀧𑀻𑀢𑀺 𑀢𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀲𑀼𑀡𑀦𑀓𑀸𑀭𑀡𑁂𑀦𑀸𑀢𑀺. 𑀧𑀞𑀫𑀁.

𑁨. 𑀅𑀢𑁆𑀣𑀗𑁆𑀕𑀢𑀲𑀺𑀓𑁆𑀔𑀸𑀧𑀤𑀁

𑁧𑁫𑁩. 𑀤𑀼𑀢𑀺𑀬𑁂 𑀧𑀭𑀺𑀬𑀸𑀬𑀲𑀤𑁆𑀤𑁄 𑀯𑀸𑀭𑀢𑁆𑀣𑁄𑀢𑀺 𑀆𑀳 ‘‘𑀯𑀸𑀭𑁂𑀦𑀸’’𑀢𑀺. 𑀯𑀸𑀭𑁄𑀢𑀺 𑀘 𑀅𑀦𑀼𑀓𑁆𑀓𑀫𑁄𑀬𑁂𑀯𑀸𑀢𑀺 𑀆𑀳 ‘‘𑀧𑀝𑀺𑀧𑀸𑀝𑀺𑀬𑀸𑀢𑀺 𑀅𑀢𑁆𑀣𑁄’’𑀢𑀺. 𑀅𑀥𑀺𑀓𑀁 𑀘𑀺𑀢𑁆𑀢𑀁 𑀇𑀫𑀲𑁆𑀲𑀸𑀢𑀺 𑀅𑀥𑀺𑀘𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀥𑀺𑀘𑀺𑀢𑁆𑀢𑀯𑀢𑁄’’𑀢𑀺𑀆𑀤𑀺. 𑀅𑀥𑀺𑀘𑀺𑀢𑁆𑀢𑀁 𑀦𑀸𑀫 𑀇𑀥 𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢𑀫𑁂𑀯, 𑀦 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀪𑀽𑀢𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀨𑀮𑀘𑀺𑀢𑁆𑀢𑁂𑀦𑀸’’𑀢𑀺. ‘‘𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁪𑁫; 𑀤𑀻. 𑀦𑀺. 𑁩.𑁩𑁦𑁫; 𑀫. 𑀦𑀺. 𑁧.𑁪𑁯𑁭; 𑀅. 𑀦𑀺. 𑁬.𑁧𑁦𑁫; 𑀫𑀳𑀸𑀦𑀺. 𑁧𑁦) 𑀳𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀪𑀽𑀢𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 ‘‘𑀅𑀥𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦 𑀧𑀫𑀚𑁆𑀚𑀢𑁄𑀢𑀺 𑀦 𑀧𑀫𑀚𑁆𑀚𑀦𑁆𑀢𑀲𑁆𑀲. 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬𑀸𑀢𑀺 𑀲𑀢𑀢𑀓𑀭𑀡𑁂𑀦. 𑀉𑀪𑁄 𑀮𑁄𑀓𑁂 𑀫𑀼𑀦𑀢𑀺 𑀚𑀸𑀦𑀸𑀢𑀻𑀢𑀺 𑀫𑀼𑀦𑀻𑀢𑀺 𑀘, 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁 𑀫𑀼𑀦𑀦𑀝𑁆𑀞𑁂𑀦 𑀚𑀸𑀦𑀦𑀢𑁆𑀣𑁂𑀦, 𑀢𑀫𑀲𑁆𑀲𑀢𑁆𑀣𑀻𑀢𑀺 𑀫𑀼𑀦𑀻𑀢𑀺 𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀼𑀦𑀺𑀦𑁄𑀢𑀻’’𑀢𑀺𑀆𑀤𑀺. 𑀢𑀢𑁆𑀣 ‘‘𑀬𑁄 𑀫𑀼𑀦𑀢𑀺…𑀧𑁂… 𑀫𑀼𑀦𑀦𑁂𑀦 𑀯𑀸’’𑀢𑀺𑀇𑀫𑀺𑀦𑀸 𑀧𑀞𑀫𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀫𑁄𑀦𑀁 𑀯𑀼𑀘𑁆𑀘𑀢𑀺…𑀧𑁂… 𑀯𑀼𑀘𑁆𑀘𑀢𑀻’’𑀢𑀺𑀇𑀫𑀺𑀦𑀸 𑀤𑀼𑀢𑀺𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀼𑀦 𑀕𑀢𑀺𑀬𑀦𑁆𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁫 𑀧𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀢𑁆𑀢𑀸 ‘‘𑀬𑁄 𑀫𑀼𑀦𑀢𑀻’’𑀢𑀺 𑀏𑀢𑁆𑀣 𑀪𑀽𑀯𑀸𑀤𑀺𑀕𑀡𑀺𑀓𑁄 𑀫𑀼𑀦𑀥𑀸𑀢𑀼𑀬𑁂𑀯, 𑀦 𑀓𑀻𑀬𑀸𑀤𑀺𑀕𑀡𑀺𑀓𑁄 𑀫𑀼𑀥𑀸𑀢𑀽𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀫𑀼𑀦 𑀜𑀸𑀡𑁂𑀢𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁭 𑀓𑀺𑀬𑀸𑀤𑀺𑀕𑀡𑀺𑀓) 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀼𑀦𑀸𑀢𑀻’’𑀢𑀺 𑀓𑀻𑀬𑀸𑀤𑀺𑀕𑀡𑀺𑀓𑁄𑀯. 𑀥𑀸𑀢𑁆𑀯𑀦𑁆𑀢𑀦𑀓𑀸𑀭𑀮𑁄𑀧𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡’’𑀦𑁆𑀢𑀺 𑀘𑁂𑀢𑁆𑀣 𑀜𑀸𑀡𑀁 𑀦𑀸𑀫 𑀅𑀭𑀳𑀢𑁆𑀢𑀜𑀸𑀡𑀫𑁂𑀯. 𑀫𑁄𑀦𑀲𑁆𑀲 𑀧𑀣𑁄 𑀫𑁄𑀦𑀧𑀣𑁄𑀢𑀺 𑀯𑀼𑀢𑁆𑀢𑁂 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀽’’𑀢𑀺. 𑀅𑀣 𑀯𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀢𑀻𑀲𑀼 𑀯𑀸 𑀲𑀺𑀓𑁆𑀔𑀸𑀲𑀽’’𑀢𑀺. 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀦𑁆𑀢𑀺 𑀅𑀭𑀳𑀢𑁆𑀢𑀜𑀸𑀡𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀁 𑀲𑀻𑀮𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀁 𑀧𑀝𑀺𑀧𑀤𑀁. 𑀧𑀼𑀩𑁆𑀩𑀪𑀸𑀕𑁂𑀢𑀺 𑀅𑀭𑀳𑀢𑁆𑀢𑀜𑀸𑀡𑀲𑁆𑀲 𑀧𑀼𑀩𑁆𑀩𑀪𑀸𑀕𑁂. 𑀏𑀢𑁆𑀣𑀸𑀢𑀺 ‘‘𑀅𑀥𑀺𑀘𑁂𑀢𑀲𑁄…𑀧𑁂… 𑀲𑀺𑀓𑁆𑀔𑀢𑁄’’𑀢𑀺 𑀯𑀘𑀦𑁂. ‘‘𑀢𑀸𑀤𑀺𑀦𑁄’’𑀢𑀺𑀧𑀤𑀁 ‘‘𑀫𑀼𑀦𑀺𑀦𑁄’’𑀢𑀺𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀢𑀸𑀤𑀺𑀲𑀲𑁆𑀲 𑀔𑀻𑀡𑀸𑀲𑀯𑀫𑀼𑀦𑀺𑀦𑁄’’𑀢𑀺. 𑀏𑀢𑁆𑀣𑀸𑀢𑀺 ‘‘𑀲𑁄𑀓𑀸 𑀦 𑀪𑀯𑀦𑁆𑀢𑀺 𑀢𑀸𑀤𑀺𑀦𑁄’’𑀢𑀺 𑀯𑀘𑀦𑁂. 𑀭𑀸𑀕𑀸𑀤𑀬𑁄 𑀉𑀧𑀲𑀫𑁂𑀢𑀻𑀢𑀺 𑀉𑀧𑀲𑀦𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀭𑀸𑀕𑀸𑀤𑀻𑀦’’𑀦𑁆𑀢𑀺. 𑀲𑀢𑀺 𑀅𑀲𑁆𑀲𑀢𑁆𑀣𑀻𑀢𑀺 𑀲𑀢𑀺𑀫𑀸𑀢𑀺 𑀓𑀢𑁆𑀯𑀸 𑀫𑀦𑁆𑀢𑀼𑀲𑀤𑁆𑀤𑁄 𑀦𑀺𑀘𑁆𑀘𑀬𑁄𑀕𑀢𑁆𑀣𑁄𑀢𑀺 𑀆𑀳 ‘‘𑀲𑀢𑀺𑀬𑀸 𑀅𑀯𑀺𑀭𑀳𑀺𑀢𑀲𑁆𑀲𑀸’’𑀢𑀺.

𑀦 𑀓𑀲𑀻𑀬𑀢𑀺 𑀦 𑀯𑀺𑀮𑁂𑀔𑀻𑀬𑀢𑀻𑀢𑀺 𑀅𑀓𑀸𑀲𑁄, 𑀲𑁄𑀬𑁂𑀯 𑀆𑀓𑀸𑀲𑁄. 𑀅𑀦𑁆𑀢𑀭𑁂𑀦 𑀙𑀺𑀤𑁆𑀤𑁂𑀦 𑀇𑀓𑁆𑀔𑀺𑀢𑀩𑁆𑀩𑁄𑀢𑀺 𑀅𑀦𑁆𑀢𑀮𑀺𑀓𑁆𑀔𑁄. 𑀆𑀓𑀸𑀲𑁄 𑀳𑀺 𑀘𑀢𑀼𑀩𑁆𑀩𑀺𑀥𑁄 𑀅𑀚𑀝𑀸𑀓𑀸𑀲𑁄, 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁄, 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑁄, 𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑁄𑀢𑀺. 𑀢𑀢𑁆𑀣 𑀅𑀚𑀝𑀸𑀓𑀸𑀲𑁄𑀯 𑀇𑀥𑀸𑀥𑀺𑀧𑁆𑀧𑁂𑀢𑁄 ‘‘𑀅𑀦𑁆𑀢𑀮𑀺𑀓𑁆𑀔𑁂’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀦 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑁂, 𑀦 𑀧𑀦 𑀭𑀽𑀧𑀧𑀭𑀺𑀘𑁆𑀙𑁂𑀤𑁂’’𑀢𑀺. 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑁄𑀧𑀺 𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑁂𑀦 𑀲𑀗𑁆𑀕𑀳𑀺𑀢𑁄. ‘‘𑀫’’𑀦𑁆𑀢𑀺 𑀧𑀤𑀁 ‘‘𑀅𑀯𑀫𑀜𑁆𑀜𑀦𑁆𑀢𑀻’’𑀢𑀺 𑀧𑀤𑁂 𑀓𑀫𑁆𑀫𑀁. 𑀏𑀢𑁆𑀢𑀓𑀫𑁂𑀯𑀸𑀢𑀺 𑀏𑀢𑀧𑁆𑀧𑀫𑀸𑀡𑀁 ‘‘𑀅𑀥𑀺𑀘𑁂𑀢𑀲𑁄’’𑀢𑀺𑀆𑀤𑀺𑀲𑀗𑁆𑀔𑀸𑀢𑀁 𑀯𑀘𑀦𑀫𑁂𑀯, 𑀦 𑀅𑀜𑁆𑀜𑀁 𑀩𑀼𑀤𑁆𑀥𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀦𑁆𑀢𑀺 𑀘𑀽𑀴𑀧𑀦𑁆𑀣𑀓𑁄 𑀣𑁂𑀭𑁄. 𑀳𑀦𑁆𑀤𑀸𑀢𑀺 𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀫𑀫 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀫𑀺, 𑀢𑀼𑀫𑁆𑀳𑁂 𑀧𑀲𑁆𑀲𑀣 𑀕𑀡𑁆𑀳𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀝𑁆𑀞𑀸𑀬𑀸𑀢𑀺 𑀢𑀢𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸. 𑀅𑀦𑁆𑀢𑀭𑀸𑀧𑀺 𑀥𑀸𑀬𑀢𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑀲𑁆𑀲 𑀅𑀝𑁆𑀞𑀸𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑁆𑀢𑀭𑀥𑀸𑀬𑀢𑀺𑀧𑀻’’𑀢𑀺. 𑀏𑀲𑁂𑀯 𑀦𑀬𑁄 ‘‘𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀻’’𑀢𑀺 𑀏𑀢𑁆𑀣𑀧𑀺. 𑀣𑁂𑀭𑁄𑀢𑀺 𑀘𑀽𑀴𑀧𑀦𑁆𑀣𑀓𑁄 𑀣𑁂𑀭𑁄. 𑀇𑀤𑀁 𑀧𑀤𑀁 𑀅𑀦𑁆𑀢𑀭𑀦𑁆𑀢𑀭𑀸 𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 ‘‘𑀢𑀜𑁆𑀘𑁂𑀯 𑀪𑀡𑀢𑀻’’𑀢𑀺𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀪𑀸𑀢𑀼𑀣𑁂𑀭𑀲𑁆𑀲𑀸𑀢𑀺 𑀚𑁂𑀝𑁆𑀞𑀓𑀪𑀸𑀢𑀼𑀪𑀽𑀢𑀲𑁆𑀲 𑀫𑀳𑀸𑀧𑀦𑁆𑀣𑀓𑀣𑁂𑀭𑀲𑁆𑀲.

𑀧𑀤𑁆𑀫𑀦𑁆𑀢𑀺 𑀕𑀸𑀣𑀸𑀬𑀁 𑀢𑀬𑁄 𑀧𑀸𑀤𑀸 𑀇𑀦𑁆𑀤𑀯𑀚𑀺𑀭𑀸, 𑀘𑀢𑀼𑀢𑁆𑀣𑀧𑀸𑀤𑁄 𑀉𑀧𑁂𑀦𑁆𑀤𑀯𑀚𑀺𑀭𑁄. 𑀢𑀲𑁆𑀫𑀸 𑀧𑀤𑁆𑀫𑀦𑁆𑀢𑀺 𑀏𑀢𑁆𑀣 𑀫𑀓𑀸𑀭𑁂 𑀧𑀭𑁂 𑀤𑀼𑀓𑀸𑀭𑀼𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀧𑀭𑀓𑁆𑀔𑀭𑀁 𑀦𑁂𑀢𑁆𑀯𑀸 ‘‘𑀧𑀤𑁆𑀫’’𑀦𑁆𑀢𑀺 𑀤𑁆𑀯𑀺𑀪𑀸𑀯𑁂𑀦 𑀮𑀺𑀔𑀺𑀢𑀩𑁆𑀩𑀁. 𑀅𑀯𑀻𑀢𑀕𑀦𑁆𑀥𑀦𑁆𑀢𑀺 𑀏𑀢𑁆𑀣 𑀯𑀻𑀢𑀺 𑀤𑀻𑀖𑀼𑀘𑁆𑀘𑀸𑀭𑀡𑀫𑁂𑀯 𑀬𑀼𑀢𑁆𑀢𑀁. 𑀧𑀗𑁆𑀓𑁂 𑀤𑀯𑀢𑀺 𑀕𑀘𑁆𑀙𑀢𑀻𑀢𑀺 𑀧𑀤𑀼𑀫𑀁. 𑀓𑁄𑀓𑀁 𑀤𑀼𑀕𑁆𑀕𑀦𑁆𑀥𑀲𑁆𑀲 𑀆𑀤𑀸𑀦𑀁 𑀦𑀼𑀤𑀢𑀺 𑀅𑀧𑀦𑁂𑀢𑀻𑀢𑀺 𑀓𑁄𑀓𑀦𑀼𑀤𑀁. 𑀲𑀼𑀦𑁆𑀤𑀭𑁄 𑀕𑀦𑁆𑀥𑁄 𑀇𑀫𑀲𑁆𑀲𑀸𑀢𑀺 𑀲𑀼𑀕𑀦𑁆𑀥𑀁. 𑀅𑀬𑀁 𑀧𑀦𑁂𑀢𑁆𑀣 𑀬𑁄𑀚𑀦𑀸 𑁋 𑀬𑀣𑀸 𑀓𑁄𑀓𑀦𑀼𑀤𑀲𑀗𑁆𑀔𑀸𑀢𑀁 𑀲𑀼𑀕𑀦𑁆𑀥𑀁 𑀧𑀸𑀢𑁄 𑀧𑀕𑁂𑀯 𑀩𑀸𑀮𑀸𑀢𑀧𑁂𑀦 𑀨𑀼𑀮𑁆𑀮𑀁 𑀯𑀺𑀓𑀲𑀺𑀢𑀁 𑀅𑀯𑀻𑀢𑀕𑀦𑁆𑀥𑀁 𑀳𑀼𑀢𑁆𑀯𑀸 𑀯𑀺𑀭𑁄𑀘𑀫𑀸𑀦𑀁 𑀧𑀤𑀼𑀫𑀁 𑀲𑀺𑀬𑀸, 𑀢𑀣𑀸 𑀅𑀗𑁆𑀕𑀻𑀭𑀲𑀁 𑀅𑀗𑁆𑀕𑀺𑀢𑁄 𑀲𑀭𑀻𑀭𑀢𑁄 𑀦𑀺𑀘𑁆𑀙𑀭𑀡𑀧𑀪𑀲𑁆𑀲𑀭𑀭𑀲𑀁 𑀳𑀼𑀢𑁆𑀯𑀸 𑀯𑀺𑀭𑁄𑀘𑀫𑀸𑀦𑀪𑀽𑀢𑀁 𑀅𑀦𑁆𑀢𑀮𑀺𑀓𑁆𑀔𑁂 𑀢𑀧𑀦𑁆𑀢𑀁 𑀆𑀤𑀺𑀘𑁆𑀘𑀁 𑀇𑀯 𑀢𑁂𑀥𑀸𑀢𑀼𑀓𑁂 𑀢𑀧𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀲𑁆𑀲𑀸𑀢𑀺.

𑀧𑀕𑀼𑀡𑀦𑁆𑀢𑀺 𑀯𑀸𑀘𑀼𑀕𑁆𑀕𑀢𑀁. 𑀢𑀢𑁄𑀢𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄. 𑀦𑀦𑁆𑀢𑀺 𑀘𑀽𑀴𑀧𑀦𑁆𑀣𑀓𑀁. 𑀣𑁂𑀭𑁄𑀢𑀺 𑀫𑀳𑀸𑀧𑀦𑁆𑀣𑀓𑁄 𑀣𑁂𑀭𑁄 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺 𑀘𑀽𑀴𑀧𑀦𑁆𑀣𑀓𑁄. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂. 𑀪𑀕𑀯𑀸 𑀆𑀳𑀸𑀢𑀺 𑀬𑁄𑀚𑀦𑀸. 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀢𑀺 𑀆𑀲𑀬𑀸𑀦𑀼𑀲𑀬𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀲𑀗𑁆𑀔𑀸𑀢𑁂𑀦 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀘𑀓𑁆𑀔𑀼𑀦𑀸. 𑀢𑀦𑁆𑀢𑀺 𑀘𑀽𑀴𑀧𑀦𑁆𑀣𑀓𑀁. 𑀢𑀲𑁆𑀲𑀸𑀢𑀺 𑀘𑀽𑀴𑀧𑀦𑁆𑀣𑀓𑀲𑁆𑀲. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀆𑀭𑁄𑀘𑀦𑀓𑀸𑀮𑁂. 𑀅𑀲𑁆𑀲𑀸𑀢𑀺 𑀘𑀽𑀴𑀧𑀦𑁆𑀣𑀓𑀲𑁆𑀲, 𑀤𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀚𑀁 𑀫𑀮𑀁 𑀳𑀭𑀢𑀺 𑀅𑀧𑀦𑁂𑀢𑀻𑀢𑀺 𑀭𑀚𑁄𑀳𑀭𑀡𑀁, 𑀧𑀺𑀮𑁄𑀢𑀺𑀓𑀔𑀡𑁆𑀟𑀁. 𑀲𑁄𑀢𑀺 𑀘𑀽𑀴𑀧𑀦𑁆𑀣𑀓𑁄. 𑀢𑀲𑁆𑀲𑀸𑀢𑀺 𑀧𑀺𑀮𑁄𑀢𑀺𑀓𑀔𑀡𑁆𑀟𑀲𑁆𑀲, ‘‘𑀅𑀦𑁆𑀢’’𑀦𑁆𑀢𑀺𑀧𑀤𑁂 𑀅𑀯𑀬𑀯𑀺𑀲𑀫𑁆𑀩𑀦𑁆𑀥𑁄. 𑀧𑀭𑀺𑀲𑀼𑀤𑁆𑀥𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑁄 𑀅𑀧𑀭𑀺𑀲𑀼𑀤𑁆𑀥𑁂 𑀧𑀺𑀮𑁄𑀢𑀺𑀓𑀔𑀡𑁆𑀟𑁂 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀁𑀯𑁂𑀕𑀦𑁆𑀢𑀺 𑀲𑀦𑁆𑀢𑀸𑀲𑀁 𑀪𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀆𑀭𑀫𑁆𑀪𑀓𑀸𑀮𑁂. 𑀅𑀲𑁆𑀲𑀸𑀢𑀺 𑀘𑀽𑀴𑀧𑀦𑁆𑀣𑀓𑀲𑁆𑀲. ‘‘𑀢’’𑀦𑁆𑀢𑀺𑀧𑀤𑀁 ‘‘𑀫𑀫𑀸𑀬𑀦𑀪𑀸𑀯’’𑀦𑁆𑀢𑀺𑀧𑀤𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺. 𑀤𑀼𑀢𑀺𑀬𑀁.

𑁩. 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀺𑀓𑁆𑀔𑀸𑀧𑀤𑀁

𑁧𑁬𑁨. 𑀢𑀢𑀺𑀬𑁂 ‘‘𑀑𑀯𑀤𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀯𑀺𑀲𑁂𑀲𑀢𑁄 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀝𑁆𑀞𑀳𑀺 𑀕𑀭𑀼𑀥𑀫𑁆𑀫𑁂𑀳𑀺 𑀑𑀯𑀤𑀦𑁆𑀢𑀲𑁆𑀲𑁂𑀯 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀇𑀢𑁄𑀢𑀺 𑀇𑀫𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀫𑁆𑀳𑀸. 𑀬𑀢𑁆𑀣 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀲𑀩𑁆𑀩𑀢𑁆𑀣 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀬𑁄𑀚𑀦𑀸𑀢𑀺. 𑀢𑀢𑀺𑀬𑀁.

𑀧𑀓𑀺𑀡𑁆𑀡𑀓𑀓𑀣𑀸

𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀇𑀤𑀁 𑀧𑀓𑀺𑀡𑁆𑀡𑀓𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀻𑀢𑀺 𑀪𑀺𑀓𑁆𑀔𑀼𑀦𑁄 𑀅𑀲𑀫𑁆𑀫𑀢𑀢𑁆𑀢𑀸 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀽𑀭𑀺𑀬𑀲𑁆𑀲 𑀅𑀢𑁆𑀣𑀗𑁆𑀕𑀢𑀢𑁆𑀢𑀸 𑀏𑀓𑀁, 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀉𑀧𑀲𑀗𑁆𑀓𑀫𑀺𑀢𑀢𑁆𑀢𑀸 𑀏𑀓𑀦𑁆𑀢𑀺 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀓𑀣𑀦𑁆𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁. 𑀢𑀲𑁆𑀲𑁂𑀯𑀸𑀢𑀺 𑀲𑀫𑁆𑀫𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄. 𑀅𑀜𑁆𑀜𑁂𑀦 𑀥𑀫𑁆𑀫𑁂𑀦𑀸𑀢𑀺 𑀕𑀭𑀼𑀥𑀫𑁆𑀫𑁂𑀳𑀺 𑀅𑀜𑁆𑀜𑁂𑀦 𑀥𑀫𑁆𑀫𑁂𑀦. 𑀤𑀺𑀯𑀸 𑀧𑀦𑀸𑀢𑀺 𑀲𑀽𑀭𑀺𑀬𑀼𑀕𑁆𑀕𑀫𑀦𑀢𑁄 𑀢𑀲𑁆𑀲 𑀅𑀦𑀢𑁆𑀣𑀗𑁆𑀕𑀢𑁂𑀬𑁂𑀯𑀸𑀢𑀺.

𑁪. 𑀆𑀫𑀺𑀲𑀲𑀺𑀓𑁆𑀔𑀸𑀧𑀤𑀁

𑁧𑁬𑁪. 𑀘𑀢𑀼𑀢𑁆𑀣𑁂 𑀩𑀳𑀼𑀁 𑀫𑀸𑀦𑀁 𑀓𑀢𑀁 𑀬𑁂𑀳𑀻𑀢𑀺 𑀩𑀳𑀼𑀓𑀢𑀸. 𑀩𑀳𑀼𑀓𑀢𑀸 𑀳𑀼𑀢𑁆𑀯𑀸 𑀦 𑀑𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀩𑀳𑀼𑀓𑀢𑀸’’𑀢𑀺𑀆𑀤𑀺. 𑀥𑀫𑁆𑀫𑁂𑀢𑀺 𑀲𑀻𑀮𑀸𑀤𑀺𑀥𑀫𑁆𑀫𑁂. 𑀅𑀥𑀺𑀧𑁆𑀧𑀸𑀬𑁄𑀢𑀺 ‘‘𑀦 𑀩𑀳𑀼𑀓𑀢𑀸’’𑀢𑀺𑀧𑀤𑀲𑁆𑀲, 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀯𑀸 𑀅𑀥𑀺𑀧𑁆𑀧𑀸𑀬𑁄𑀢𑀺 𑀬𑁄𑀚𑀦𑀸. ‘‘𑀓𑀢𑁆𑀢𑀼𑀓𑀸𑀫𑁄𑀢𑀺 𑀆𑀤𑀻𑀦’’𑀦𑁆𑀢𑀺𑀧𑀤𑀁 ‘‘𑀅𑀢𑁆𑀣𑁄’’𑀢𑀺𑀧𑀤𑁂 𑀯𑀸𑀘𑀓𑀲𑀫𑁆𑀩𑀦𑁆𑀥𑁄.

𑀅𑀲𑀫𑁆𑀫𑀢𑁄 𑀦𑀸𑀫 𑀞𑀧𑀺𑀢𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀫𑁆𑀫𑀼𑀢𑀺𑀦𑁆𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀲𑀫𑁆𑀫𑀼𑀢𑀺𑀁. 𑀧𑀘𑁆𑀙𑀸 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁄𑀢𑀺 𑀬𑁄𑀚𑀦𑀸𑀢𑀺. 𑀘𑀢𑀼𑀢𑁆𑀣𑀁.

𑁫. 𑀘𑀻𑀯𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀁

𑁧𑁬𑁯. 𑀧𑀜𑁆𑀘𑀫𑁂 𑀭𑀣𑀺𑀓𑀸𑀬𑀸𑀢𑀺 𑀭𑀘𑁆𑀙𑀸𑀬. 𑀲𑀸 𑀳𑀺 𑀭𑀣𑀲𑁆𑀲 𑀳𑀺𑀢𑀢𑁆𑀢𑀸 𑀭𑀣𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀲𑀦𑁆𑀤𑀺𑀝𑁆𑀞𑀸𑀢𑀺 𑀲𑀫𑁄𑀥𑀸𑀦𑀯𑀲𑁂𑀦 𑀤𑀲𑁆𑀲𑀻𑀬𑀺𑀢𑁆𑀣𑀸𑀢𑀺 𑀲𑀦𑁆𑀤𑀺𑀝𑁆𑀞𑀸. 𑀤𑀺𑀝𑁆𑀞𑀫𑀢𑁆𑀢𑀓𑀸 𑀫𑀺𑀢𑁆𑀢𑀸𑀢𑀺 𑀆𑀳 ‘‘𑀫𑀺𑀢𑁆𑀢𑀸’’𑀢𑀺. 𑀲𑁂𑀲𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀢𑁄 𑀲𑁂𑀲𑀁 𑀯𑀘𑀦𑀁. 𑀢𑀢𑁆𑀭𑀸𑀢𑀺 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑁂. 𑀳𑀻𑀢𑀺 𑀯𑀺𑀲𑁂𑀲𑀚𑁄𑀢𑀓𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀘𑀻𑀯𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑁂𑀢𑀺. 𑀧𑀜𑁆𑀘𑀫𑀁.

𑁬. 𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀁

𑁧𑁭𑁫. 𑀙𑀝𑁆𑀞𑁂 𑀉𑀤𑀸𑀬𑀻𑀢𑀺 𑀏𑀢𑁆𑀣 𑀫𑀳𑀸𑀉𑀤𑀸𑀬𑀻, 𑀓𑀸𑀴𑀼𑀤𑀸𑀬𑀻, 𑀮𑀸𑀴𑀼𑀤𑀸𑀬𑀻𑀢𑀺 𑀢𑀬𑁄 𑀉𑀤𑀸𑀬𑀻 𑀳𑁄𑀦𑁆𑀢𑀺. 𑀢𑁂𑀲𑀼 𑀢𑀢𑀺𑀬𑁄𑀯𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀮𑀸𑀴𑀼𑀤𑀸𑀬𑀻’’𑀢𑀺. 𑀧𑀪𑀸𑀯𑁂𑀦 𑀞𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀝𑁆𑀞𑁄𑀢𑀺 𑀓𑀢𑁂 𑀧𑀝𑀺𑀩𑀮𑁄𑀯 𑀮𑀩𑁆𑀪𑀢𑀺. 𑀢𑁂𑀦𑀸𑀳 ‘‘𑀧𑀝𑀺𑀩𑀮𑁄’’𑀢𑀺. 𑀦𑀺𑀧𑀼𑀡𑁄𑀢𑀺 𑀓𑀼𑀲𑀮𑁄. ‘‘𑀧𑀝𑀺𑀪𑀸𑀦𑁂𑀦 𑀓𑀢𑀘𑀺𑀢𑁆𑀢’’𑀦𑁆𑀢𑀺𑀇𑀫𑀺𑀦𑀸 ‘‘𑀧𑀝𑀺𑀪𑀸𑀦𑀘𑀺𑀢𑁆𑀢’’𑀦𑁆𑀢𑀺 𑀧𑀤𑀲𑁆𑀲 𑀫𑀚𑁆𑀛𑁂 𑀧𑀤𑀮𑁄𑀧𑀁 𑀤𑀲𑁆𑀲𑁂𑀢𑀺. 𑀲𑁄𑀢𑀺 𑀮𑀸𑀴𑀼𑀤𑀸𑀬𑀻 𑀅𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀘𑀻𑀯𑀭𑀲𑁆𑀲. ‘‘𑀬𑀣𑀸𑀲𑀁𑀳𑀝’’𑀦𑁆𑀢𑀺 𑀏𑀢𑁆𑀣 𑀏𑀯𑀲𑀤𑁆𑀤𑁄 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀬𑀣𑀸𑀲𑀁𑀳𑀝𑀫𑁂𑀯𑀸’’𑀢𑀺.

𑁧𑁭𑁬. 𑀬𑀁 𑀘𑀻𑀯𑀭𑀁 𑀦𑀺𑀯𑀸𑀲𑀺𑀢𑀼𑀁 𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀸 𑀲𑀓𑁆𑀓𑀸 𑀳𑁄𑀢𑀺, 𑀢𑀁 𑀘𑀻𑀯𑀭𑀁 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀏𑀯𑀁 𑀳𑀻𑀢𑀺 𑀏𑀯𑀫𑁂𑀯. ‘‘𑀤𑀼𑀓𑁆𑀓𑀝’’𑀦𑁆𑀢𑀺𑀇𑀫𑀺𑀦𑀸 ‘‘𑀲𑀬𑀁 𑀲𑀺𑀩𑁆𑀩𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀏𑀢𑁆𑀣 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀆𑀭𑀸𑀢𑀺 𑀲𑀽𑀘𑀺. 𑀲𑀸 𑀳𑀺 𑀅𑀭𑀢𑀺 𑀦𑀺𑀲𑁆𑀲𑀗𑁆𑀕𑀯𑀲𑁂𑀦 𑀕𑀘𑁆𑀙𑀢𑀺 𑀧𑀯𑀺𑀲𑀢𑀻𑀢𑀺 ‘‘𑀆𑀭𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀸 𑀧𑀣𑁄 𑀕𑀫𑀦𑀁 𑀆𑀭𑀸𑀧𑀣𑁄, 𑀢𑀲𑁆𑀫𑀺𑀁, 𑀆𑀭𑀸𑀧𑀣𑀲𑁆𑀲 𑀦𑀻𑀳𑀭𑀡𑀸𑀯𑀲𑀸𑀦𑀢𑁆𑀢𑀸 ‘‘𑀦𑀻𑀳𑀭𑀡𑁂’’𑀢𑀺 𑀯𑀼𑀢𑁆𑀢𑀁. 𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀻𑀢𑀺 𑀅𑀦𑁂𑀓𑀓𑁆𑀔𑀢𑁆𑀢𑀼𑀫𑁆𑀧𑀺. 𑀆𑀡𑀢𑁆𑀢𑁄𑀢𑀺 𑀆𑀡𑀸𑀧𑀻𑀬𑀢𑀻𑀢𑀺 𑀆𑀡𑀢𑁆𑀢𑁄. ‘‘𑀆𑀡𑀸𑀧𑀺𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀡𑀸𑀧𑁂𑀲𑀤𑁆𑀤𑀲𑁆𑀲 𑀮𑁄𑀧𑀁, 𑀇𑀓𑀸𑀭𑀲𑁆𑀲 𑀘 𑀅𑀓𑀸𑀭𑀁 𑀓𑀢𑁆𑀯𑀸, ‘‘𑀆𑀤𑀢𑁆𑀢𑁂’’𑀢𑀺 𑀆𑀔𑁆𑀬𑀸𑀢𑀧𑀤𑁂 𑀢𑁂𑀯𑀺𑀪𑀢𑁆𑀢𑀺𑀬𑀸 𑀯𑀺𑀬 𑀢𑀧𑀘𑁆𑀘𑀬𑀲𑁆𑀲 𑀘 𑀤𑁆𑀯𑀺𑀪𑀸𑀯𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀓𑀺𑀁 𑀘𑀻𑀯𑀭𑀁 𑀲𑀺𑀩𑁆𑀩𑀸𑀢𑀺 𑀯𑀼𑀢𑁆𑀢𑁄’’𑀢𑀺. 𑀅𑀣 𑀧𑀦𑀸𑀢𑀺 𑀢𑀢𑁄 𑀅𑀜𑁆𑀜𑀣𑀸 𑀧𑀦. 𑀆𑀡𑀢𑁆𑀢𑀲𑁆𑀲𑀸𑀢𑀺 𑀆𑀡𑀸𑀧𑀺𑀢𑀲𑁆𑀲. 𑀲𑀫𑁆𑀩𑀳𑀼𑀮𑀸𑀦𑀺𑀧𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀬𑁂𑀧𑀺 𑀦𑀺𑀲𑁆𑀲𑀺𑀢𑀓𑀸 𑀲𑀺𑀩𑁆𑀩𑀦𑁆𑀢𑀻𑀢𑀺 𑀬𑁄𑀚𑀦𑀸, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀲𑀺𑀩𑁆𑀩𑀦𑁆𑀢𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀦𑁆𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁. 𑀢𑁂𑀲𑀫𑁆𑀧𑀻𑀢𑀺 𑀦𑀺𑀲𑁆𑀲𑀺𑀢𑀓𑀸𑀦𑀫𑁆𑀧𑀺. 𑀜𑀸𑀢𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀘𑀻𑀯𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀻’’𑀢𑀺𑀧𑀤𑀁 ‘‘𑀲𑀺𑀩𑁆𑀩𑀸𑀧𑁂𑀦𑁆𑀢𑀻’’𑀢𑀺𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀢𑀢𑁆𑀭𑀸𑀧𑀻𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀲𑀺𑀩𑁆𑀩𑀸𑀧𑀦𑁂𑀧𑀺. ‘‘𑀅𑀦𑁆𑀢𑁂𑀯𑀸𑀲𑀺𑀓𑁂’’𑀢𑀺𑀧𑀤𑀁 ‘‘𑀯𑀜𑁆𑀘𑁂𑀢𑁆𑀯𑀸’’𑀢𑀺𑀧𑀤𑁂 𑀲𑀼𑀤𑁆𑀥𑀓𑀫𑁆𑀫𑀁, ‘‘𑀲𑀺𑀩𑁆𑀩𑀸𑀧𑁂𑀦𑁆𑀢𑀻’’𑀢𑀺𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀇𑀢𑀭𑁂𑀲𑀦𑁆𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀦𑁆𑀢𑀺. 𑀙𑀝𑁆𑀞𑀁.

𑁭. 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀁

𑁧𑁮𑁧. 𑀲𑀢𑁆𑀢𑀫𑁂 ‘‘𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀘𑁆𑀙𑀸 𑀕𑀘𑁆𑀙𑀦𑁆𑀢𑀻𑀦’’𑀦𑁆𑀢𑀺 𑀧𑀤𑀸𑀦𑀺 ‘‘𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀧𑀸𑀞𑀲𑁂𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀧𑀘𑁆𑀙𑀸 𑀕𑀘𑁆𑀙𑀦𑁆𑀢𑀻𑀦𑀁 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺. 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀧𑀘𑁆𑀙𑀸 𑀕𑀘𑁆𑀙𑀦𑁆𑀢𑀺𑀬𑁄𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀁 𑀓𑀢𑁆𑀯𑀸 ‘‘𑀤𑀽𑀲𑁂𑀲𑀼’’𑀦𑁆𑀢𑀺𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀘𑁄𑀭𑀸 𑀤𑀽𑀲𑀬𑀺𑀁𑀲𑀽’’𑀢𑀺. 𑀅𑀣 𑀯𑀸 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀫𑀓𑀢𑁆𑀯𑀸 ‘‘𑀅𑀘𑁆𑀙𑀺𑀦𑁆𑀤𑀺𑀁𑀲𑀽’’𑀢𑀺 𑀧𑀤𑁂 ‘‘𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺𑀧𑀤𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 ‘‘𑀤𑀽𑀲𑁂𑀲𑀼’’𑀦𑁆𑀢𑀺𑀧𑀤𑁂 ‘‘𑀲𑀻𑀮’’𑀦𑁆𑀢𑀺 𑀧𑀸𑀞𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁮𑁨-𑁩. 𑀲𑀁𑀧𑀼𑀩𑁆𑀩𑁄, 𑀯𑀺𑀧𑀼𑀩𑁆𑀩𑁄 𑀘 𑀥𑀸𑀥𑀸𑀢𑀼 𑀢𑁆𑀯𑀸𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀁𑀯𑀺𑀤𑀳𑀺𑀢𑁆𑀯𑀸’’𑀢𑀺. 𑀓𑀼𑀓𑁆𑀓𑀼𑀝𑁄𑀢𑀺 𑀢𑀫𑁆𑀩𑀘𑀽𑀴𑁄. 𑀲𑁄 𑀳𑀺 𑀓𑀼𑀓𑀢𑀺 𑀆𑀳𑀸𑀭𑀢𑁆𑀣𑀁 𑀧𑀸𑀡𑀓𑀸𑀤𑀬𑁄 𑀆𑀤𑀤𑀸𑀢𑀻𑀢𑀺 𑀓𑀼𑀓𑁆𑀓𑀼𑀝𑁄. 𑀅𑀬𑀦𑁆𑀢𑀺 𑀕𑀸𑀫𑁄. 𑀅𑀥𑀺𑀓𑀭𑀡𑁂 𑀡𑁄𑀢𑀺 𑀆𑀳 ‘‘𑀲𑀫𑁆𑀧𑀤𑀦𑁆𑀢𑀺 𑀏𑀢𑁆𑀣𑀸’’𑀢𑀺. 𑀏𑀢𑁆𑀣𑀸𑀢𑀺 𑀘 𑀏𑀢𑀲𑁆𑀫𑀺𑀁 𑀕𑀸𑀫𑁂. 𑀉𑀢𑁆𑀢𑀭𑀧𑀤𑀲𑁆𑀲 𑀅𑀥𑀺𑀓𑀭𑀡𑀢𑁆𑀣𑀢𑁆𑀢𑀸 𑀧𑀼𑀩𑁆𑀩𑀧𑀤𑁂𑀦 𑀙𑀝𑁆𑀞𑀻𑀲𑀫𑀸𑀲𑁄𑀢𑀺 𑀆𑀳 ‘‘𑀓𑀼𑀓𑁆𑀓𑀼𑀝𑀸𑀦’’𑀦𑁆𑀢𑀺𑀆𑀤𑀺. 𑀏𑀯𑀁 𑀡𑀲𑀤𑁆𑀤𑀲𑁆𑀲 𑀅𑀥𑀺𑀓𑀭𑀡𑀢𑁆𑀣𑀁, 𑀧𑀼𑀩𑁆𑀩𑀧𑀤𑁂𑀦 𑀙𑀝𑁆𑀞𑀻𑀲𑀫𑀸𑀲𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀡𑀲𑀤𑁆𑀤𑀲𑁆𑀲 𑀪𑀸𑀯𑀢𑁆𑀣𑀁, 𑀧𑀼𑀩𑁆𑀩𑀧𑀤𑁂𑀦 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀣 𑀯𑀸’’𑀢𑀺. 𑀢𑀢𑁆𑀣𑀸𑀢𑀺 𑀧𑀘𑁆𑀙𑀺𑀫𑀧𑀸𑀞𑁂. 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀉𑀟𑁆𑀟𑀺𑀢𑁆𑀯𑀸 𑀉𑀤𑁆𑀥𑀁 𑀆𑀓𑀸𑀲𑀁 𑀮𑀗𑁆𑀕𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀧𑀘𑁆𑀙𑀺𑀫𑀧𑀸𑀞𑁂. 𑀤𑁆𑀯𑀺𑀥𑀸𑀢𑀺 𑀧𑀤𑀕𑀫𑀦𑀧𑀓𑁆𑀔𑀕𑀫𑀦𑀯𑀲𑁂𑀦 𑀤𑁆𑀯𑀺𑀧𑀓𑀸𑀭𑁂𑀦. ‘‘𑀉𑀧𑀘𑀸𑀭𑁄 𑀦 𑀮𑀩𑁆𑀪𑀢𑀻’’𑀢𑀺𑀇𑀫𑀺𑀦𑀸 𑀕𑀸𑀫𑀦𑁆𑀢𑀭𑁄 𑀦 𑀳𑁄𑀢𑀺, 𑀏𑀓𑀕𑀸𑀫𑁄𑀬𑁂𑀯 𑀧𑀦 𑀳𑁄𑀢𑀺, 𑀢𑀲𑁆𑀫𑀸 𑀆𑀧𑀢𑁆𑀢𑀺𑀧𑀺 𑀏𑀓𑀸𑀬𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀽𑀲𑁂𑀢𑀺 𑀧𑀪𑀸𑀢𑁂. 𑀲𑁄 𑀳𑀺 𑀧𑀝𑀺𑀯𑀺𑀭𑀼𑀤𑁆𑀥𑀁 𑀢𑀺𑀫𑀺𑀭𑀁 𑀉𑀲𑁂𑀢𑀺 𑀦𑀸𑀲𑁂𑀢𑀻𑀢𑀺 𑀧𑀘𑁆𑀘𑀽𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀭𑀯𑀦𑁆𑀢𑀲𑁆𑀲. ‘‘𑀯𑀘𑀦𑀢𑁄’’𑀢𑀺𑀧𑀤𑀁 ‘‘𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺𑀧𑀤𑁂 𑀜𑀸𑀧𑀓𑀳𑁂𑀢𑀼. 𑀭𑀢𑀦𑀫𑀢𑁆𑀢𑀦𑁆𑀢𑀭𑁄𑀢𑀺 𑀓𑀼𑀓𑁆𑀓𑀼𑀧𑀫𑀸𑀡𑁂𑀦 𑀩𑁆𑀬𑀯𑀥𑀸𑀦𑁄.

𑀢𑀢𑁆𑀭𑀸𑀢𑀺 ‘‘𑀕𑀸𑀫𑀦𑁆𑀢𑀭𑁂 𑀕𑀸𑀫𑀦𑁆𑀢𑀭𑁂’’𑀢𑀺 𑀯𑀘𑀦𑁂. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀉𑀪𑁄𑀧𑀻𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀲𑀁𑀯𑀺𑀤𑀳𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀯𑀤𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀦 𑀓𑀣𑀬𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀲𑀫𑀸𑀕𑀫𑀝𑁆𑀞𑀸𑀦𑀁 𑀘𑀢𑀼𑀓𑁆𑀓𑀁, 𑀤𑁆𑀯𑀺𑀦𑁆𑀦𑀁, 𑀢𑀺𑀡𑁆𑀡𑀁, 𑀘𑀢𑀼𑀓𑁆𑀓𑀢𑁄 𑀅𑀢𑀺𑀭𑁂𑀓𑀸𑀦𑀁 𑀯𑀸 𑀫𑀕𑁆𑀕𑀸𑀦𑀁 𑀲𑀫𑁆𑀩𑀤𑁆𑀥𑀝𑁆𑀞𑀸𑀦𑀁 𑀲𑀺𑀗𑁆𑀖𑀸𑀝𑀓𑀁. 𑀢𑀢𑁆𑀭𑀸𑀧𑀻𑀢𑀺 𑀉𑀧𑀘𑀸𑀭𑁄𑀓𑁆𑀓𑀫𑀦𑁂𑀧𑀺. 𑀕𑀸𑀫𑀢𑁄𑀢𑀺 𑀅𑀢𑁆𑀢𑀦𑁄 𑀕𑀸𑀫𑀢𑁄. 𑀬𑀸𑀯 𑀦 𑀑𑀓𑁆𑀓𑀫𑀦𑁆𑀢𑀺, 𑀢𑀸𑀯𑀸𑀢𑀺 𑀬𑁄𑀚𑀦𑀸. 𑀲𑀦𑁆𑀥𑀸𑀬𑀸𑀢𑀺 𑀆𑀭𑀩𑁆𑀪. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀦𑀺𑀓𑁆𑀔𑀫𑀦𑀓𑀸𑀮𑁂. 𑀤𑁆𑀯𑁂𑀧𑀻𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀕𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀯𑀘𑀦𑀁.

𑀳𑀻𑀢𑀺 𑀯𑀺𑀲𑁂𑀲𑁄. ‘‘𑀕𑀸𑀫𑀦𑁆𑀢𑀭𑁂 𑀕𑀸𑀫𑀦𑁆𑀢𑀭𑁂’’𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀦𑀬𑁂 𑀅𑀢𑀺𑀓𑁆𑀓𑀫𑁂 𑀅𑀦𑀸𑀧𑀢𑁆𑀢𑀺, 𑀑𑀓𑁆𑀓𑀫𑀦𑁂 𑀆𑀧𑀢𑁆𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄.

𑁧𑁮𑁪. 𑀕𑀢𑀧𑀼𑀩𑁆𑀩𑀢𑁆𑀣𑀸𑀢𑀺 𑀕𑀢𑀧𑀼𑀩𑁆𑀩𑀸 𑀅𑀢𑁆𑀣 𑀪𑀯𑀣𑀸𑀢𑀺 𑀅𑀢𑁆𑀣𑁄. 𑀏𑀳𑀺 𑀕𑀘𑁆𑀙𑀸𑀫𑀸𑀢𑀺 𑀯𑀸 𑀆𑀕𑀘𑁆𑀙𑁂𑀬𑁆𑀬𑀸𑀲𑀻𑀢𑀺 𑀯𑀸 𑀯𑀤𑀢𑀻𑀢𑀺 𑀬𑁄𑀚𑀦𑀸. 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀦𑁆𑀢𑀺 𑀣𑀽𑀧𑀲𑁆𑀲 𑀯𑀦𑁆𑀤𑀺𑀢𑀼𑀁.

𑁧𑁮𑁫. 𑀯𑀺𑀲𑀗𑁆𑀓𑁂𑀢𑁂𑀦𑀸𑀢𑀺 𑀏𑀢𑁆𑀣 𑀓𑀸𑀮𑀯𑀺𑀲𑀗𑁆𑀓𑁂𑀢𑁄, 𑀤𑁆𑀯𑀸𑀭𑀯𑀺𑀲𑀗𑁆𑀓𑁂𑀢𑁄, 𑀫𑀕𑁆𑀕𑀯𑀺𑀲𑀗𑁆𑀓𑁂𑀢𑁄𑀢𑀺 𑀢𑀺𑀯𑀺𑀥𑁄. 𑀢𑀢𑁆𑀣 𑀓𑀸𑀮𑀯𑀺𑀲𑀗𑁆𑀓𑁂𑀢𑁂𑀦𑁂𑀯 𑀅𑀦𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀯𑀺𑀲𑀗𑁆𑀓𑁂𑀢𑁂𑀦 𑀕𑀘𑁆𑀙𑀦𑁆𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀆𑀳. 𑀤𑁆𑀯𑀸𑀭𑀯𑀺𑀲𑀗𑁆𑀓𑁂𑀢𑁂𑀦 𑀯𑀸 𑀫𑀕𑁆𑀕𑀯𑀺𑀲𑀗𑁆𑀓𑁂𑀢𑁂𑀦 𑀯𑀸 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀦𑀢𑁆𑀣𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀭𑁂𑀪𑀢𑁆𑀢’’𑀦𑁆𑀢𑀺𑀆𑀤𑀺. 𑀘𑀓𑁆𑀓𑀲𑀫𑀸𑀭𑀼𑀴𑁆𑀳𑀸𑀢𑀺 𑀇𑀭𑀺𑀬𑀸𑀧𑀣𑀘𑀓𑁆𑀓𑀁 𑀯𑀸 𑀲𑀓𑀝𑀘𑀓𑁆𑀓𑀁 𑀯𑀸 𑀲𑀫𑁆𑀫𑀸 𑀆𑀭𑀼𑀴𑁆𑀳𑀸. 𑀚𑀦𑀧𑀤𑀸𑀢𑀺 𑀚𑀦𑀓𑁄𑀝𑁆𑀞𑀸𑀲𑀸. 𑀧𑀭𑀺𑀬𑀸𑀬𑀦𑁆𑀢𑀻𑀢𑀺 𑀧𑀭𑀺 𑀧𑀼𑀦𑀧𑁆𑀧𑀼𑀦𑀁 𑀬𑀦𑁆𑀢𑀺 𑀘 𑀆𑀬𑀦𑁆𑀢𑀺 𑀘𑀸𑀢𑀺. 𑀲𑀢𑁆𑀢𑀫𑀁.

𑁮. 𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀁

𑁧𑁮𑁮. 𑀅𑀝𑁆𑀞𑀫𑁂 𑀲𑀳 𑀅𑀜𑁆𑀜𑀫𑀜𑁆𑀜𑀁 𑀣𑀯𑀦𑀁 𑀅𑀪𑀺𑀢𑁆𑀣𑀯𑀦𑀁 𑀲𑀦𑁆𑀣𑀯𑁄, 𑀲𑀗𑁆𑀕𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀺𑀢𑁆𑀢𑀪𑀸𑀯𑁂𑀦 𑀲𑀦𑁆𑀣𑀯𑁄 𑀫𑀺𑀢𑁆𑀢𑀲𑀦𑁆𑀣𑀯𑁄, 𑀮𑁄𑀓𑁂𑀳𑀺 𑀅𑀲𑁆𑀲𑀸𑀤𑁂𑀢𑀩𑁆𑀩𑁄 𑀘 𑀲𑁄 𑀫𑀺𑀢𑁆𑀢𑀲𑀦𑁆𑀣𑀯𑁄 𑀘𑁂𑀢𑀺 𑀮𑁄𑀓𑀲𑁆𑀲𑀸𑀤𑀫𑀺𑀢𑁆𑀢𑀲𑀦𑁆𑀣𑀯𑁄, 𑀢𑀲𑁆𑀲 𑀯𑀲𑁄 𑀧𑀪𑀽, 𑀢𑁂𑀦 𑀯𑀸 𑀆𑀬𑀢𑁆𑀢𑁄𑀢𑀺 𑀮𑁄𑀓𑀲𑁆𑀲𑀸𑀤𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁄, 𑀢𑁂𑀦. 𑀉𑀤𑁆𑀥𑀁 𑀕𑀘𑁆𑀙𑀢𑀻𑀢𑀺 𑀉𑀤𑁆𑀥𑀁𑀕𑀸𑀫𑀺𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀤𑁆𑀥’’𑀦𑁆𑀢𑀺𑀆𑀤𑀺. 𑀉𑀤𑁆𑀥𑀦𑁆𑀢𑀺 𑀘 𑀇𑀥 𑀧𑀝𑀺𑀲𑁄𑀢𑁄. 𑀢𑁂𑀦𑀸𑀳 ‘‘𑀦𑀤𑀺𑀬𑀸 𑀧𑀝𑀺𑀲𑁄𑀢’’𑀦𑁆𑀢𑀺. ‘‘𑀉𑀤𑁆𑀥𑀁𑀕𑀸𑀫𑀺𑀦𑀺’’𑀦𑁆𑀢𑀺𑀫𑀸𑀢𑀺𑀓𑀸𑀧𑀤𑀁 ‘‘𑀉𑀚𑁆𑀚𑀯𑀦𑀺𑀓𑀸𑀬𑀸’’𑀢𑀺𑀧𑀤𑀪𑀸𑀚𑀦𑀺𑀬𑀸 𑀲𑀁𑀲𑀦𑁆𑀤𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀬𑁄𑀢𑀺 𑀪𑀺𑀓𑁆𑀔𑀼. 𑀉𑀤𑁆𑀥𑀁 𑀚𑀯𑀦𑀢𑁄𑀢𑀺 𑀧𑀝𑀺𑀲𑁄𑀢𑀁 𑀕𑀫𑀦𑀢𑁄. 𑀢𑁂𑀦𑀸𑀢𑀺 𑀢𑁂𑀦 𑀳𑁂𑀢𑀼𑀦𑀸. 𑀅𑀲𑁆𑀲𑀸𑀢𑀺 ‘‘𑀉𑀤𑁆𑀥𑀁𑀕𑀸𑀫𑀺𑀦𑀺’’𑀦𑁆𑀢𑀺𑀧𑀤𑀲𑁆𑀲. 𑀅𑀦𑀼𑀲𑁄𑀢𑀁 𑀇𑀥 𑀅𑀥𑁄 𑀦𑀸𑀫𑀸𑀢𑀺 𑀆𑀳 ‘‘𑀅𑀦𑀼𑀲𑁄𑀢’’𑀦𑁆𑀢𑀺. 𑀅𑀲𑁆𑀲𑀧𑀻𑀢𑀺 𑀧𑀺𑀲𑀤𑁆𑀤𑁄 𑀧𑀼𑀭𑀺𑀫𑀸𑀧𑁂𑀓𑁆𑀔𑁄. 𑀢𑀢𑁆𑀣𑀸𑀢𑀺 ‘‘𑀉𑀤𑁆𑀥𑀁𑀕𑀸𑀫𑀺𑀦𑀺𑀁 𑀯𑀸 𑀅𑀥𑁄𑀕𑀸𑀫𑀺𑀦𑀺𑀁 𑀯𑀸’’𑀢𑀺𑀯𑀘𑀦𑁂. 𑀬𑀦𑁆𑀢𑀺 𑀦𑀸𑀯𑀁 𑀳𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑀦𑁆𑀢𑀺 𑀲𑀫𑁆𑀫𑀸 𑀧𑀝𑀺𑀫𑀼𑀔𑀁 𑀧𑀸𑀤𑀦𑀢𑁆𑀣𑀁, 𑀉𑀚𑀼𑀧𑀚𑁆𑀚𑀸𑀧𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀦𑀸𑀯𑀸𑀬𑀁. ‘‘𑀞𑀧𑁂𑀢𑁆𑀯𑀸’’𑀢𑀺𑀧𑀤𑀪𑀸𑀚𑀦𑀺𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀉𑀧𑀬𑁄𑀕𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦’’𑀦𑁆𑀢𑀺 𑀆𑀳. ‘‘𑀅𑀜𑁆𑀜𑀢𑁆𑀭𑀸’’𑀢𑀺 𑀫𑀸𑀢𑀺𑀓𑀸𑀧𑀤𑁂 𑀅𑀧𑁂𑀓𑁆𑀔𑀺𑀢𑁂 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀫𑁆𑀧𑀺 𑀬𑀼𑀚𑁆𑀚𑀢𑁂𑀯.

𑁧𑁮𑁯. 𑀏𑀓𑀁 𑀢𑀻𑀭𑀁 𑀅𑀕𑀸𑀫𑀓𑀁 𑀅𑀭𑀜𑁆𑀜𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀅𑀤𑁆𑀥𑀬𑁄𑀚𑀦𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀚𑁆𑀛𑁂𑀦 𑀕𑀫𑀦𑁂𑀧𑀻𑀢𑀺 𑀧𑀺𑀲𑀤𑁆𑀤𑁄 𑀅𑀕𑀸𑀫𑀓𑀅𑀭𑀜𑁆𑀜𑀢𑀻𑀭𑀧𑀲𑁆𑀲𑁂𑀦 𑀕𑀫𑀦𑁂 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀦 𑀓𑁂𑀯𑀮𑀁 𑀦𑀤𑀺𑀬𑀸𑀢𑀺 𑀓𑁂𑀯𑀮𑀁 𑀦𑀤𑀺𑀬𑀸 𑀏𑀯 𑀅𑀦𑀸𑀧𑀢𑁆𑀢𑀺 𑀦𑀸𑀢𑀺 𑀬𑁄𑀚𑀦𑀸, 𑀅𑀜𑁆𑀜𑁂𑀲𑀼𑀧𑀺 𑀲𑀫𑀼𑀤𑁆𑀤𑀸𑀤𑀻𑀲𑀼 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁄𑀧𑀺 𑀪𑀺𑀓𑁆𑀔𑀼 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸.

𑁧𑁯𑁧. 𑀓𑀸𑀮𑀯𑀺𑀲𑀗𑁆𑀓𑁂𑀢𑁄, 𑀢𑀺𑀢𑁆𑀣𑀯𑀺𑀲𑀗𑁆𑀓𑁂𑀢𑁄, 𑀦𑀸𑀯𑀸𑀯𑀺𑀲𑀗𑁆𑀓𑁂𑀢𑁄𑀢𑀺 𑀢𑀺𑀯𑀺𑀥𑁄 𑀯𑀺𑀲𑀗𑁆𑀓𑁂𑀢𑁄. 𑀢𑀢𑁆𑀣 𑀓𑀸𑀮𑀯𑀺𑀲𑀗𑁆𑀓𑁂𑀢𑁂𑀦 𑀅𑀦𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀯𑀺𑀲𑀗𑁆𑀓𑁂𑀢𑁂𑀦 𑀅𑀪𑀺𑀭𑀼𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀦 𑀯𑀺𑀲𑀗𑁆𑀓𑁂𑀢𑁂𑀦 𑀆𑀧𑀢𑁆𑀢𑀺𑀬𑁂𑀯, 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀥𑀸𑀧𑀻’’𑀢𑀺𑀆𑀤𑀻𑀢𑀺. 𑀅𑀝𑁆𑀞𑀫𑀁.

𑁯. 𑀧𑀭𑀺𑀧𑀸𑀘𑀺𑀢𑀲𑀺𑀓𑁆𑀔𑀸𑀧𑀤𑀁

𑁧𑁯𑁨. 𑀦𑀯𑀫𑁂 𑀫𑀳𑀸𑀦𑀸𑀕𑁂𑀲𑀽𑀢𑀺 𑀫𑀳𑀸𑀅𑀭𑀳𑀦𑁆𑀢𑁂𑀲𑀼 𑀢𑀺𑀝𑁆𑀞𑀫𑀸𑀦𑁂𑀲𑀼 𑀲𑀦𑁆𑀢𑁂𑀲𑀼, 𑀘𑁂𑀢𑀓𑁂 𑀧𑁂𑀲𑁆𑀲𑀪𑀽𑀢𑁂 𑀦𑀯𑀓𑁂 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀭𑀣𑀸𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑀢𑁄 𑀯𑀸 𑀧𑀸𑀞𑀲𑁂𑀲𑀢𑁄 𑀯𑀸 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦. 𑀅𑀦𑁆𑀢𑀭𑀁 𑀫𑀚𑁆𑀛𑀁 𑀧𑀢𑁆𑀢𑀸 𑀓𑀣𑀸 𑀅𑀦𑁆𑀢𑀭𑀓𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀲𑀸𑀦’’𑀦𑁆𑀢𑀺𑀆𑀤𑀺. 𑀧𑀓𑀺𑀭𑀻𑀬𑀺𑀢𑁆𑀣𑀸𑀢𑀺 𑀧𑀓𑀢𑀸, 𑀦 𑀧𑀓𑀢𑀸 𑀯𑀺𑀧𑁆𑀧𑀓𑀢𑀸𑀢𑀺 𑀯𑀼𑀢𑁆𑀢𑁂 𑀓𑀭𑀺𑀬𑀫𑀸𑀦𑀓𑀣𑀸𑀯𑀸𑀢𑀺 𑀆𑀳 ‘‘𑀓𑀭𑀺𑀬𑀫𑀸𑀦𑀸 𑀳𑁄𑀢𑀻’’𑀢𑀺. 𑀅𑀤𑁆𑀥𑀘𑁆𑀙𑀺𑀓𑁂𑀦𑀸𑀢𑀺 𑀉𑀧𑀟𑁆𑀠𑀘𑀓𑁆𑀔𑀼𑀦𑀸. 𑀢𑁂𑀳𑀻𑀢𑀺 𑀣𑁂𑀭𑁂𑀳𑀺.

𑁧𑁯𑁪. 𑀮𑀤𑁆𑀥𑀩𑁆𑀩𑀦𑁆𑀢𑀺 𑀮𑀤𑁆𑀥𑀸𑀭𑀳𑀁. 𑀅𑀲𑁆𑀲𑀸𑀢𑀺 ‘‘𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢’’𑀦𑁆𑀢𑀺𑀧𑀤𑀲𑁆𑀲. 𑀲𑀫𑁆𑀫𑀸 𑀆𑀭𑀪𑀺𑀢𑀩𑁆𑀩𑁄𑀢𑀺 𑀲𑀫𑀸𑀭𑀫𑁆𑀪𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀸𑀭𑀤𑁆𑀥𑀁 𑀯𑀼𑀘𑁆𑀘𑀢𑀻’’𑀢𑀺. 𑀧𑀝𑀺𑀬𑀸𑀤𑀺𑀢𑀲𑁆𑀲𑀸𑀢𑀺 𑀧𑀭𑀺𑀧𑀸𑀘𑀺𑀢𑀲𑁆𑀲 𑀪𑀢𑁆𑀢𑀲𑁆𑀲. 𑀕𑀺𑀳𑀻𑀦𑀁 𑀲𑀫𑀸𑀭𑀫𑁆𑀪𑁄𑀢𑀺 𑀕𑀺𑀳𑀺𑀲𑀫𑀸𑀭𑀫𑁆𑀪𑁄, 𑀓𑀢𑁆𑀯𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀢𑀢𑁄𑀢𑀺 𑀢𑀢𑁄 𑀪𑀢𑁆𑀢𑀢𑁄. 𑀅𑀜𑁆𑀜𑀢𑁆𑀭𑀸𑀢𑀺 𑀯𑀺𑀦𑀸. 𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 𑀆𑀳 ‘‘𑀢𑀁 𑀧𑀺𑀡𑁆𑀟𑀧𑀸𑀢𑀁 𑀞𑀧𑁂𑀢𑁆𑀯𑀸’’𑀢𑀺. 𑀧𑀤𑀪𑀸𑀚𑀦𑁂 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀜𑀸𑀢𑀓𑀧𑀯𑀸𑀭𑀺𑀢𑁂𑀳𑀻’’𑀢𑀺𑀧𑀤𑀁 ‘‘𑀅𑀲𑀫𑀸𑀭𑀤𑁆𑀥𑁄’’𑀢𑀺𑀧𑀤𑁂 𑀓𑀢𑁆𑀢𑀸. 𑀅𑀢𑁆𑀣𑀢𑁄𑀢𑀺 𑀪𑀺𑀓𑁆𑀔𑀼𑀦𑀺𑀅𑀧𑀭𑀺𑀧𑀸𑀘𑀺𑀢𑀅𑀢𑁆𑀣𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀢𑁆𑀣𑀢𑁄 𑀲𑀫𑀸𑀭𑀤𑁆𑀥𑁄𑀯 𑀳𑁄𑀢𑀺, 𑀢𑀲𑁆𑀫𑀸.

𑁧𑁯𑁫. 𑀧𑀝𑀺𑀬𑀸𑀤𑀺𑀢𑀦𑁆𑀢𑀺 𑀧𑀝𑀺𑀬𑀢𑁆𑀢𑀁. 𑀧𑀓𑀢𑀺𑀬𑀸 𑀧𑀝𑀺𑀬𑀢𑁆𑀢𑀁 𑀧𑀓𑀢𑀺𑀧𑀝𑀺𑀬𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀓𑀢𑀺𑀬𑀸’’𑀢𑀺𑀆𑀤𑀺. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄. 𑀅𑀜𑁆𑀜𑀲𑁆𑀲𑀸𑀢𑀺 𑀢𑀢𑁄 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁧𑁯𑁭. 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑁂𑀧𑀻𑀢𑀺 𑀧𑀺𑀲𑀤𑁆𑀤𑁄 𑀪𑀺𑀓𑁆𑀔𑀼𑀦𑀺𑀅𑀧𑀭𑀺𑀧𑀸𑀘𑀺𑀢𑁂 𑀓𑀸 𑀦𑀸𑀫 𑀓𑀣𑀸𑀢𑀺 𑀤𑀲𑁆𑀲𑁂𑀢𑀻𑀢𑀺. 𑀦𑀯𑀫𑀁.

𑁧𑁦. 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀁

𑁧𑁯𑁮. 𑀤𑀲𑀫𑁂 𑀧𑀸𑀴𑀺𑀅𑀢𑁆𑀣𑁄 𑀘𑀸𑀢𑀺 𑀏𑀢𑁆𑀣 𑀧𑀸𑀴𑀺𑀲𑀤𑁆𑀤𑁄 𑀯𑀺𑀦𑀺𑀘𑁆𑀙𑀺𑀬𑀲𑀤𑁆𑀤𑁂 𑀘 𑀬𑁄𑀚𑁂𑀢𑀩𑁆𑀩𑁄 ‘‘𑀧𑀸𑀴𑀺𑀯𑀺𑀦𑀺𑀘𑁆𑀙𑀬𑁄’’𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. ‘‘𑀇𑀤𑀁 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺𑀧𑀤𑀁 ‘‘𑀏𑀓𑀧𑀭𑀺𑀘𑁆𑀙𑁂𑀤’’𑀦𑁆𑀢𑀺𑀧𑀤𑁂 𑀢𑀼𑀮𑁆𑀬𑀢𑁆𑀣𑀓𑀢𑁆𑀢𑀸, ‘‘𑀧𑀜𑁆𑀜𑀢𑁆𑀢’’𑀦𑁆𑀢𑀺𑀧𑀤𑁂 𑀓𑀫𑁆𑀫𑀁. 𑀉𑀧𑀭𑀻𑀢𑀺 𑀅𑀘𑁂𑀮𑀓𑀯𑀕𑁆𑀕𑁂𑀢𑀺. 𑀤𑀲𑀫𑀁.

𑀑𑀯𑀸𑀤𑀯𑀕𑁆𑀕𑁄 𑀢𑀢𑀺𑀬𑁄.