𑁪. 𑀪𑁄𑀚𑀦𑀯𑀕𑁆𑀕𑁄

𑁧. 𑀆𑀯𑀲𑀣𑀧𑀺𑀡𑁆𑀟𑀲𑀺𑀓𑁆𑀔𑀸𑀧𑀤-𑀅𑀢𑁆𑀣𑀬𑁄𑀚𑀦𑀸

𑁨𑁦𑁩. 𑀪𑁄𑀚𑀦𑀯𑀕𑁆𑀕𑀲𑁆𑀲 𑀧𑀞𑀫𑁂 𑀆𑀯𑀲𑀣𑁂 𑀧𑀜𑁆𑀜𑀢𑁆𑀢𑁄 𑀧𑀺𑀡𑁆𑀟𑁄 𑀆𑀯𑀲𑀣𑀧𑀺𑀡𑁆𑀟𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀦𑁆𑀢𑀸’’𑀢𑀺𑀆𑀤𑀺. 𑀧𑀭𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀧𑀭𑀺𑀯𑀼𑀢𑀁 𑀆𑀯𑀲𑀣𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀤𑁆𑀥𑀁 𑀧𑀣𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀤𑁆𑀥𑀺𑀓𑀸. 𑀕𑀺𑀮𑀸𑀬𑀦𑁆𑀢𑀺 𑀭𑀼𑀚𑀦𑁆𑀢𑀻𑀢𑀺 𑀕𑀺𑀮𑀸𑀦𑀸. 𑀕𑀩𑁆𑀪𑁄 𑀓𑀼𑀘𑁆𑀙𑀺𑀝𑁆𑀞𑀲𑀢𑁆𑀢𑁄 𑀏𑀢𑀸𑀲𑀦𑁆𑀢𑀺 𑀕𑀩𑁆𑀪𑀺𑀦𑀺𑀬𑁄. 𑀫𑀮𑀁 𑀧𑀩𑁆𑀩𑀸𑀚𑁂𑀦𑁆𑀢𑀻𑀢𑀺 𑀧𑀩𑁆𑀩𑀚𑀺𑀢𑀸, 𑀢𑁂𑀲𑀁 𑀬𑀣𑀸𑀦𑀼𑀭𑀽𑀧𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀜𑁆𑀜𑀢𑁆𑀢𑀸𑀦𑀺 𑀫𑀜𑁆𑀘𑀧𑀻𑀞𑀸𑀦𑀺 𑀏𑀢𑁆𑀣𑀸𑀢𑀺 𑀧𑀜𑁆𑀜𑀢𑁆𑀢𑀫𑀜𑁆𑀘𑀧𑀻𑀞𑁄, 𑀢𑀁. 𑀅𑀦𑁂𑀓𑀕𑀩𑁆𑀪𑀧𑀭𑀺𑀘𑁆𑀙𑁂𑀤𑀁 𑀅𑀦𑁂𑀓𑀧𑀫𑀼𑀔𑀧𑀭𑀺𑀘𑁆𑀙𑁂𑀤𑀁 𑀆𑀯𑀲𑀣𑀁 𑀓𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀆𑀯𑀲𑀣𑁂. 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀅𑀤𑁆𑀥𑀺𑀓𑀸𑀤𑀻𑀦𑀁. 𑀳𑀺𑀬𑁆𑀬𑁄𑀲𑀤𑁆𑀤𑀲𑁆𑀲 𑀅𑀢𑀻𑀢𑀸𑀦𑀦𑁆𑀢𑀭𑀸𑀳𑀲𑁆𑀲 𑀘 𑀅𑀦𑀸𑀕𑀢𑀸𑀦𑀦𑁆𑀢𑀭𑀸𑀳𑀲𑁆𑀲 𑀘 𑀯𑀸𑀘𑀓𑀢𑁆𑀢𑀸 𑀇𑀥 𑀅𑀦𑀸𑀕𑀢𑀸𑀦𑀦𑁆𑀢𑀭𑀸𑀳𑀯𑀸𑀘𑀓𑁄𑀢𑀺 𑀆𑀳 ‘‘𑀲𑁆𑀯𑁂𑀧𑀻’’𑀢𑀺. 𑀓𑀼𑀳𑀺𑀁 𑀕𑀢𑀸 𑀇𑀢𑀺 𑀯𑀼𑀢𑁆𑀢𑁂𑀢𑀺 𑀬𑁄𑀚𑀦𑀸. ‘‘𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄’’𑀢𑀺𑀧𑀤𑀲𑁆𑀲 𑀦𑀸𑀫𑀥𑀸𑀢𑀼𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀼𑀓𑁆𑀓𑀼𑀘𑁆𑀘𑀁 𑀓𑀭𑁄𑀦𑁆𑀢𑁄’’𑀢𑀺.

𑁨𑁦𑁬. ‘‘𑀅𑀤𑁆𑀥𑀬𑁄𑀚𑀦𑀁 𑀯𑀸 𑀬𑁄𑀚𑀦𑀁 𑀯𑀸’’𑀢𑀺𑀇𑀫𑀺𑀦𑀸 ‘‘𑀧𑀓𑁆𑀓𑀫𑀺𑀢𑀼’’𑀦𑁆𑀢𑀺𑀧𑀤𑀲𑁆𑀲 𑀓𑀫𑁆𑀫𑀁 𑀤𑀲𑁆𑀲𑁂𑀢𑀺. ‘‘𑀕𑀦𑁆𑀢𑀼’’𑀦𑁆𑀢𑀺𑀇𑀫𑀺𑀦𑀸 𑀓𑀫𑀼𑀲𑀤𑁆𑀤𑀲𑁆𑀲 𑀧𑀤𑀯𑀺𑀓𑁆𑀔𑁂𑀧𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀦𑁄𑀤𑀺𑀲𑁆𑀲𑀸’’𑀢𑀺𑀧𑀤𑀲𑁆𑀲 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀤𑁆𑀤𑀺𑀲𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀸𑀲𑀁 𑀟𑁂𑀢𑀻𑀢𑀺 𑀧𑀸𑀲𑀡𑁆𑀟𑁄, 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑁂𑀲𑀼 𑀤𑀺𑀝𑁆𑀞𑀺𑀧𑀸𑀲𑀁 𑀔𑀺𑀧𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀡𑁆𑀳𑀸𑀧𑀸𑀲𑀁, 𑀤𑀺𑀝𑁆𑀞𑀺𑀧𑀸𑀲𑀜𑁆𑀘 𑀟𑁂𑀢𑀺 𑀉𑀟𑁆𑀟𑁂𑀢𑀻𑀢𑀺 𑀧𑀸𑀲𑀡𑁆𑀟𑁄, 𑀢𑀁 𑀧𑀸𑀲𑀡𑁆𑀟𑀁. 𑀬𑀸𑀯𑀢𑀢𑁆𑀣𑁄 𑀧𑀜𑁆𑀜𑀢𑁆𑀢𑁄 𑀳𑁄𑀢𑀻𑀢𑀺 𑀬𑀸𑀯𑀢𑀸 𑀅𑀢𑁆𑀣𑁄 𑀳𑁄𑀢𑀺, 𑀢𑀸𑀯𑀢𑀸 𑀧𑀜𑁆𑀜𑀢𑁆𑀢𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. ‘‘𑀬𑀸𑀯𑀤𑀢𑁆𑀣𑁄’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀤𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀲𑀓𑀺𑀁 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀏𑀓𑀤𑀺𑀯𑀲𑀁 𑀲𑀓𑀺𑀁 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺.

𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀏𑀓𑀓𑀼𑀮𑁂𑀦 𑀯𑀸 𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀜𑁆𑀜𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀸𑀦𑀸𑀓𑀼𑀮𑁂𑀳𑀺 𑀧𑀜𑁆𑀜𑀢𑁆𑀢𑀁 𑀧𑀺𑀡𑁆𑀟𑀦𑁆𑀢𑀺 𑀬𑁄𑀚𑀦𑀸. 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺 𑀦𑀸𑀦𑀸𑀓𑀼𑀮𑀸𑀦𑀺 𑀏𑀓𑀢𑁄 𑀅𑀳𑀼𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀜𑁆𑀜𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁄𑀧𑀺 𑀧𑀺𑀡𑁆𑀟𑁄 𑀙𑀺𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀲𑀤𑁆𑀥𑀺𑀬𑀸𑀤𑀺𑀧𑀸𑀧𑀘𑀺𑀢𑁆𑀢𑀢𑁆𑀢𑀸 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸.

𑁨𑁦𑁮. 𑀅𑀦𑀼𑀯𑀲𑀺𑀢𑁆𑀯𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀲𑀺𑀢𑁆𑀯𑀸. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀘𑁆𑀙𑀦𑁆𑀢𑀢𑁆𑀢𑀸 ‘‘𑀕𑀘𑁆𑀙𑀦𑁆𑀢𑁄 𑀪𑀼𑀜𑁆𑀚𑀢𑀻’’𑀢𑀺 𑀇𑀤𑀁 𑀢𑀸𑀯 𑀬𑀼𑀢𑁆𑀢𑀁 𑀳𑁄𑀢𑀼, 𑀕𑀢𑀝𑁆𑀞𑀸𑀦𑁂 𑀧𑀦 𑀕𑀫𑀺𑀢𑀢𑁆𑀢𑀸 𑀓𑀣𑀁? 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀻𑀧𑁄𑀧𑀺 𑀅𑀢𑀻𑀢𑁄 𑀢𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀬𑀼𑀢𑁆𑀢𑀁. ‘‘𑀓𑀼𑀢𑁄 𑀦𑀼 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀕𑀘𑁆𑀙𑀲𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁩𑁦) 𑀯𑀺𑀬. 𑀢𑀁𑀲𑀫𑀻𑀧𑁄𑀧𑀺 𑀳𑀺 𑀢𑀸𑀤𑀺𑀲𑁄. 𑀦𑀸𑀦𑀸𑀝𑁆𑀞𑀸𑀦𑁂𑀲𑀼 𑀦𑀸𑀦𑀸𑀓𑀼𑀮𑀸𑀦𑀁 𑀲𑀦𑁆𑀢𑀓𑁂 𑀧𑀓𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀪𑀸𑀯𑀢𑁄 𑀦𑀸𑀦𑀸𑀝𑁆𑀞𑀸𑀦𑁂𑀲𑀼 𑀏𑀓𑀓𑀼𑀮𑀲𑁆𑀲𑁂𑀯 𑀲𑀦𑁆𑀢𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀦𑀸𑀧𑀢𑁆𑀢𑀻’’𑀢𑀺. 𑀆𑀭𑀤𑁆𑀥𑀲𑁆𑀲 𑀯𑀺𑀘𑁆𑀙𑁂𑀤𑀢𑁆𑀢𑀸 ‘‘𑀧𑀼𑀦 𑀏𑀓𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀑𑀤𑀺𑀲𑁆𑀲𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁂𑀧𑀺 𑀪𑀺𑀓𑁆𑀔𑀽𑀬𑁂𑀯 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀪𑀺𑀓𑁆𑀔𑀽𑀦𑀁𑀬𑁂𑀯𑀸’’𑀢𑀺. 𑀧𑀞𑀫𑀁.

𑁨. 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁

𑁨𑁦𑁯. 𑀤𑀼𑀢𑀺𑀬𑁂 𑀧𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀲𑁆𑀲 𑀳𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺. 𑀲𑁄𑀢𑀺 𑀤𑁂𑀯𑀤𑀢𑁆𑀢𑁄. ‘‘𑀅𑀳𑁄𑀲𑀻’’𑀢𑀺 𑀘 ‘‘𑀧𑀸𑀓𑀝𑁄 𑀚𑀸𑀢𑁄’’𑀢𑀺 𑀘 𑀬𑁄𑀚𑁂𑀢𑀩𑁆𑀩𑁄. 𑀅𑀚𑀸𑀢𑀲𑀢𑁆𑀢𑀼𑀦𑀸𑀢𑀺 𑀅𑀚𑀸𑀢𑀲𑁆𑀲𑁂𑀬𑁂𑀯 𑀧𑀺𑀢𑀼𑀭𑀸𑀚𑀲𑁆𑀲 𑀲𑀢𑁆𑀢𑀼𑀪𑀸𑀯𑀢𑁄 𑀅𑀚𑀸𑀢𑀲𑀢𑁆𑀢𑀼𑀦𑀸, ‘‘𑀫𑀸𑀭𑀸𑀧𑁂𑀢𑁆𑀯𑀸’’𑀢𑀺𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. 𑀭𑀸𑀚𑀸𑀦𑀦𑁆𑀢𑀺 𑀩𑀺𑀫𑁆𑀩𑀺𑀲𑀸𑀭𑀭𑀸𑀚𑀁, ‘‘𑀫𑀸𑀭𑀸𑀧𑁂𑀢𑁆𑀯𑀸’’𑀢𑀺𑀧𑀤𑁂 𑀥𑀸𑀢𑀼𑀓𑀫𑁆𑀫𑀁. 𑀅𑀪𑀺𑀫𑀸𑀭𑁂𑀢𑀺 𑀅𑀪𑀺𑀦𑀺𑀮𑀻𑀬𑀺𑀢𑁆𑀯𑀸 𑀪𑀕𑀯𑀢𑁄 𑀫𑀸𑀭𑀡𑀢𑁆𑀣𑀸𑀬 𑀧𑁂𑀲𑀺𑀢𑁂 𑀥𑀦𑀼𑀥𑀭𑁂. 𑀕𑀽𑀴𑁆𑀳𑀧𑀝𑀺𑀘𑁆𑀙𑀦𑁆𑀦𑁄𑀢𑀺 𑀕𑀼𑀳𑀺𑀢𑁄 𑀳𑀼𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑁄. 𑀧𑀭𑀺𑀓𑀣𑀸𑀬𑀸𑀢𑀺 𑀧𑀭𑀺𑀕𑀼𑀳𑀦𑀸𑀬 𑀓𑀣𑀸𑀬. ‘‘𑀭𑀸𑀚𑀸𑀦𑀫𑁆𑀧𑀻’’𑀢𑀺𑀧𑀤𑀁 ‘‘𑀫𑀸𑀭𑀸𑀧𑁂𑀲𑀻’’𑀢𑀺𑀧𑀤𑁂 𑀥𑀸𑀢𑀼𑀓𑀫𑁆𑀫𑀁. 𑀧𑀯𑀺𑀚𑁆𑀛𑀻𑀢𑀺 𑀧𑀯𑀝𑁆𑀝𑁂𑀲𑀺. 𑀢𑀢𑁄𑀢𑀺 𑀢𑀢𑁄 𑀯𑀼𑀢𑁆𑀢𑀢𑁄 𑀧𑀭𑀁 𑀉𑀝𑁆𑀞𑀳𑀺𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀕𑀭𑁂 𑀦𑀺𑀯𑀲𑀦𑁆𑀢𑀻𑀢𑀺 𑀦𑀸𑀕𑀭𑀸. 𑀭𑀸𑀚𑀸𑀢𑀺 𑀅𑀚𑀸𑀢𑀲𑀢𑁆𑀢𑀼𑀭𑀸𑀚𑀸. 𑀲𑀸𑀲𑀦𑀓𑀡𑁆𑀝𑀓𑀦𑁆𑀢𑀺𑀲𑀸𑀲𑀦𑀲𑁆𑀲 𑀓𑀡𑁆𑀝𑀓𑀲𑀤𑀺𑀲𑀢𑁆𑀢𑀸 𑀲𑀸𑀲𑀦𑀓𑀡𑁆𑀝𑀓𑀁. 𑀢𑀢𑁄𑀢𑀺 𑀦𑀻𑀳𑀭𑀢𑁄. 𑀉𑀧𑀝𑁆𑀞𑀸𑀦𑀫𑁆𑀧𑀻𑀢𑀺 𑀉𑀧𑀝𑁆𑀞𑀸𑀦𑀫𑁆𑀧𑀺, 𑀉𑀧𑀝𑁆𑀞𑀸𑀦𑀢𑁆𑀣𑀸𑀬𑀧𑀺 𑀯𑀸. 𑀅𑀜𑁆𑀜𑁂𑀧𑀻𑀢𑀺 𑀭𑀸𑀚𑀢𑁄 𑀅𑀜𑁆𑀜𑁂𑀧𑀺. 𑀅𑀲𑁆𑀲𑀸𑀢𑀺 𑀤𑁂𑀯𑀤𑀢𑁆𑀢𑀲𑁆𑀲. 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 ‘‘𑀤𑀸𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀓𑀺𑀜𑁆𑀘𑀺 𑀯𑀸 𑀅𑀪𑀺𑀯𑀸𑀤𑀦𑀸𑀤𑀺 ‘‘𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀓𑀼𑀮𑁂𑀲𑀼 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑀲𑁆𑀲 𑀳𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸 𑀫𑁂’’𑀢𑀺𑀆𑀤𑀺. 𑀧𑁄𑀲𑁂𑀦𑁆𑀢𑁄 𑀳𑀼𑀢𑁆𑀯𑀸 𑀪𑀼𑀜𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁧𑁧. 𑀪𑀢𑁆𑀢𑀁 𑀅𑀦𑀥𑀺𑀯𑀸𑀲𑁂𑀦𑁆𑀢𑀸𑀦𑀁 𑀓𑀲𑁆𑀫𑀸 𑀘𑀻𑀯𑀭𑀁 𑀧𑀭𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀪𑀢𑁆𑀢𑀁 𑀅𑀕𑀡𑁆𑀳𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺.

𑁨𑁧𑁨. 𑀘𑀻𑀯𑀭𑀓𑀸𑀭𑀓𑁂 𑀪𑀺𑀓𑁆𑀔𑀽 𑀪𑀢𑁆𑀢𑁂𑀦 𑀓𑀲𑁆𑀫𑀸 𑀦𑀺𑀫𑀦𑁆𑀢𑁂𑀦𑁆𑀢𑀻𑀢𑀺 𑀆𑀳 ‘‘𑀕𑀸𑀫𑁂’’𑀢𑀺𑀆𑀤𑀺.

𑁨𑁧𑁫. 𑀦𑀸𑀦𑀸𑀯𑁂𑀭𑀚𑁆𑀚𑀓𑁂𑀢𑀺 𑀏𑀢𑁆𑀣 𑀭𑀜𑁆𑀜𑁄 𑀇𑀤𑀁 𑀭𑀚𑁆𑀚𑀁, 𑀯𑀺𑀲𑀤𑀺𑀲𑀁 𑀭𑀚𑁆𑀚𑀁 𑀯𑀺𑀭𑀚𑁆𑀚𑀁, 𑀦𑀸𑀦𑀧𑁆𑀧𑀓𑀸𑀭𑀁 𑀯𑀺𑀭𑀚𑁆𑀚𑀁 𑀦𑀸𑀦𑀸𑀯𑀺𑀭𑀚𑁆𑀚𑀁. 𑀦𑀸𑀦𑀸𑀯𑀺𑀭𑀚𑁆𑀚𑁂𑀳𑀺 𑀆𑀕𑀢𑀸 𑀦𑀸𑀦𑀸𑀯𑁂𑀭𑀚𑁆𑀚𑀓𑀸. 𑀫𑀚𑁆𑀛𑁂 𑀯𑀼𑀤𑁆𑀥𑀺 𑀳𑁄𑀢𑀻𑀢𑀺 𑀆𑀳 ‘‘𑀦𑀸𑀦𑀸𑀯𑀺𑀥𑁂𑀳𑀺 𑀅𑀜𑁆𑀜𑀭𑀚𑁆𑀚𑁂𑀳𑀺 𑀆𑀕𑀢𑁂’’𑀢𑀺. 𑀅𑀜𑁆𑀜𑀭𑀚𑁆𑀚𑁂𑀳𑀻𑀢𑀺 𑀭𑀸𑀚𑀕𑀳𑀢𑁄 𑀅𑀜𑁆𑀜𑁂𑀳𑀺 𑀭𑀚𑁆𑀚𑁂𑀳𑀺. 𑀭𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀭𑀜𑁆𑀚𑀦𑁆𑀢𑀺 𑀯𑀼𑀢𑁆𑀢𑁂 𑀦𑀺𑀕𑁆𑀕𑀳𑀺𑀢𑀲𑁆𑀲 𑀅𑀦𑀸𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀸𑀦𑀸𑀯𑁂𑀭𑀜𑁆𑀚𑀓𑁂𑀇𑀢𑀺𑀧𑀺 𑀧𑀸𑀞𑁄’’𑀢𑀺.

𑁨𑁧𑁮. 𑀕𑀡𑀪𑁄𑀚𑀦𑁂𑀢𑀺 𑀕𑀡𑀲𑁆𑀲 𑀪𑁄𑀚𑀦𑀁 𑀕𑀡𑀪𑁄𑀚𑀦𑀁, 𑀕𑀡𑀪𑁄𑀚𑀦𑀲𑁆𑀲 𑀪𑁄𑀚𑀦𑀁 𑀕𑀡𑀪𑁄𑀚𑀦𑀁, 𑀢𑀲𑁆𑀫𑀺𑀁 𑀕𑀡𑀪𑁄𑀚𑀦𑁂 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀭𑀢𑁆𑀢𑀽𑀧𑀭𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁦; 𑀫. 𑀦𑀺. 𑁧.𑁨𑁯𑁩) 𑀯𑀺𑀬 𑀏𑀓𑀲𑁆𑀲 𑀪𑁄𑀚𑀦𑀲𑀤𑁆𑀤𑀲𑁆𑀲 𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀦𑀦𑀼 𑀉𑀧𑁄𑀲𑀣𑁂 𑀯𑀺𑀬 𑀤𑁆𑀯𑁂 𑀢𑀬𑁄 𑀕𑀡𑁄 𑀦𑀸𑀫𑀸𑀢𑀺 𑀆𑀳 ‘‘𑀇𑀥 𑀕𑀡𑁄 𑀦𑀸𑀫 𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺. 𑀢𑁂𑀦 𑀤𑁆𑀯𑁂 𑀢𑀬𑁄 𑀕𑀡𑁄 𑀦𑀸𑀫 𑀦 𑀳𑁄𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀧𑀦 𑀆𑀤𑀺𑀁 𑀓𑀢𑁆𑀯𑀸 𑀢𑀤𑀼𑀢𑁆𑀢𑀭𑀺 𑀕𑀡𑁄 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀧𑀦𑁂𑀢𑀦𑁆𑀢𑀺 𑀏𑀢𑁆𑀣 𑀏𑀢𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁄 𑀤𑁆𑀯𑀻𑀲𑀼 𑀲𑀩𑁆𑀩𑀦𑀸𑀫𑁂𑀲𑀼 𑀧𑀼𑀩𑁆𑀩𑀲𑁆𑀲𑁂𑀯 𑀬𑁂𑀪𑀼𑀬𑁆𑀬𑁂𑀦 𑀧𑀥𑀸𑀦𑀢𑁆𑀢𑀸. 𑀧𑀲𑀯𑀢𑀻𑀢𑀺 𑀯𑀟𑁆𑀠𑀢𑀺, 𑀚𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀯𑁂𑀯𑀘𑀦𑁂𑀦 𑀯𑀸𑀢𑀺 ‘‘𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀫𑀺, 𑀪𑁄𑀚𑀦𑁂𑀦 𑀦𑀺𑀫𑀦𑁆𑀢𑁂𑀫𑀻’’𑀢𑀺 𑀧𑀭𑀺𑀬𑀸𑀬𑁂𑀦 𑀯𑀸. 𑀪𑀸𑀲𑀦𑁆𑀢𑀭𑁂𑀦 𑀯𑀸𑀢𑀺 𑀫𑀽𑀮𑀪𑀸𑀲𑀸𑀢𑁄 𑀅𑀜𑁆𑀜𑀸𑀬 𑀪𑀸𑀲𑀸𑀬 𑀯𑀸. 𑀏𑀓𑀢𑁄 𑀦𑀺𑀫𑀦𑁆𑀢𑀺𑀢𑀸 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀧𑀫𑀸𑀡𑀦𑁆𑀢𑀺 𑀓𑀸𑀭𑀡𑀁. ‘‘𑀘𑀢𑁆𑀢𑀸𑀭𑁄’’𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀁 𑀓𑀢𑁆𑀯𑀸 ‘‘𑀯𑀺𑀳𑀸𑀭𑁂’’𑀢𑀺𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀞𑀺𑀢𑁂𑀲𑀼𑀬𑁂𑀯𑀸𑀢𑀺 𑀧𑀤𑀁 𑀦𑀺𑀤𑁆𑀥𑀸𑀭𑀡𑀲𑀫𑀼𑀤𑀸𑀬𑁄. 𑀏𑀓𑁄 𑀦𑀺𑀫𑀦𑁆𑀢𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀯𑀺𑀜𑁆𑀜𑀸𑀧𑁂𑀬𑁆𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀝𑁂𑀓𑁆𑀓𑀦𑁆𑀢𑀺 𑀧𑀢𑀺𑀏𑀓𑀲𑁆𑀲 𑀪𑀸𑀯𑁄 𑀧𑀸𑀝𑁂𑀓𑁆𑀓𑀁, 𑀯𑀺𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀯𑀺𑀜𑁆𑀜𑀸𑀧𑁂𑀬𑁆𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀙𑀯𑀺𑀲𑀗𑁆𑀔𑀸𑀢𑀢𑁄 𑀩𑀸𑀳𑀺𑀭𑀘𑀫𑁆𑀫𑀢𑁄 𑀅𑀩𑁆𑀪𑀦𑁆𑀢𑀭𑀘𑀫𑁆𑀫𑀲𑁆𑀲 𑀣𑀽𑀮𑀢𑁆𑀢𑀸 ‘‘𑀫𑀳𑀸𑀘𑀫𑁆𑀫𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀨𑀸𑀮𑀁 𑀏𑀢𑁂𑀲𑀁 𑀧𑀸𑀤𑀸𑀦𑀁 𑀲𑀜𑁆𑀚𑀸𑀢𑀦𑁆𑀢𑀺 𑀨𑀸𑀮𑀺𑀢𑀸, 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀳𑀝𑀫𑀢𑁆𑀢𑁂 𑀲𑀢𑀻𑀢𑀺 𑀬𑁄𑀚𑀦𑀸. 𑀮𑁂𑀲𑁂𑀦 𑀓𑀧𑁆𑀧𑀦𑁆𑀢𑀺 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀮𑁂𑀲𑀓𑀧𑁆𑀧𑀺𑀬𑀁.

𑀲𑀼𑀢𑁆𑀢𑀜𑁆𑀘𑀸𑀢𑀺 𑀲𑀽𑀘𑀺𑀧𑀸𑀲𑀧𑀯𑁂𑀲𑀦𑀲𑀼𑀢𑁆𑀢𑀜𑁆𑀘. 𑀦𑀦𑀼 𑀯𑀺𑀲𑀼𑀁 𑀘𑀻𑀯𑀭𑀤𑀸𑀦𑀲𑀫𑀬𑁄 𑀯𑀺𑀬 𑀘𑀻𑀯𑀭𑀓𑀸𑀭𑀲𑀫𑀬𑁄𑀧𑀺 𑀅𑀢𑁆𑀣𑀺, 𑀓𑀲𑁆𑀫𑀸 ‘‘𑀬𑀤𑀸 𑀢𑀤𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀺𑀲𑀼𑀁 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀯𑀺𑀲𑀼𑀁 𑀘𑀻𑀯𑀭𑀤𑀸𑀦𑀲𑀫𑀬𑁄 𑀯𑀺𑀬 𑀘𑀻𑀯𑀭𑀓𑀸𑀭𑀲𑀫𑀬𑁄 𑀦𑀸𑀫 𑀬𑀲𑁆𑀫𑀸 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀬𑀤𑀸 𑀢𑀤𑀸’’𑀢𑀺 𑀫𑀬𑀸 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀓𑀭𑁄𑀢𑀺, 𑀢𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀲𑀽𑀘𑀺𑀯𑁂𑀞𑀦𑀓𑁄𑀢𑀺 𑀲𑀺𑀩𑁆𑀩𑀦𑀢𑁆𑀣𑀸𑀬 𑀤𑁆𑀯𑁂 𑀧𑀺𑀮𑁄𑀢𑀺𑀓𑀔𑀡𑁆𑀟𑁂 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀲𑀽𑀘𑀺𑀬𑀸 𑀯𑀺𑀚𑁆𑀛𑀦𑀓𑁄. 𑀯𑀺𑀘𑀸𑀭𑁂𑀢𑀻𑀢𑀺 𑀧𑀜𑁆𑀘𑀔𑀡𑁆𑀟𑀲𑀢𑁆𑀢𑀔𑀡𑁆𑀟𑀸𑀤𑀺𑀯𑀲𑁂𑀦 𑀲𑀁𑀯𑀺𑀤𑀳𑀢𑀺. 𑀙𑀺𑀦𑁆𑀤𑀢𑀻𑀢𑀺 𑀲𑀢𑁆𑀣𑀓𑁂𑀦 𑀯𑀸 𑀳𑀢𑁆𑀣𑁂𑀦 𑀯𑀸 𑀙𑀺𑀦𑁆𑀤𑀢𑀺. 𑀫𑁄𑀖𑀲𑀼𑀢𑁆𑀢𑀦𑁆𑀢𑀺 𑀫𑀼𑀬𑁆𑀳𑀦𑀁 𑀫𑁄𑀖𑁄, 𑀅𑀢𑁆𑀣𑀢𑁄 𑀕𑀳𑁂𑀢𑀩𑁆𑀩𑀙𑀝𑁆𑀝𑁂𑀢𑀩𑁆𑀩𑀝𑁆𑀞𑀸𑀦𑁂 𑀫𑀼𑀬𑁆𑀳𑀦𑀘𑀺𑀢𑁆𑀢𑀁, 𑀢𑀲𑁆𑀲 𑀙𑀺𑀦𑁆𑀤𑀦𑀁 𑀲𑀼𑀢𑁆𑀢𑀦𑁆𑀢𑀺 𑀫𑁄𑀖𑀲𑀼𑀢𑁆𑀢𑀁. 𑀆𑀕𑀦𑁆𑀢𑀼𑀓𑀧𑀝𑁆𑀝𑀦𑁆𑀢𑀺 𑀤𑀼𑀧𑀝𑁆𑀝𑀘𑀻𑀯𑀭𑁂 𑀫𑀽𑀮𑀧𑀝𑁆𑀝𑀲𑁆𑀲 𑀉𑀧𑀭𑀺 𑀞𑀧𑀺𑀢𑀧𑀝𑁆𑀝𑀁. 𑀧𑀘𑁆𑀘𑀸𑀕𑀢𑀦𑁆𑀢𑀺 𑀧𑀝𑁆𑀝𑀘𑀻𑀯𑀭𑀸𑀤𑀻𑀲𑀼 𑀮𑀩𑁆𑀪𑀢𑀺. 𑀩𑀦𑁆𑀥𑀢𑀻𑀢𑀺 𑀫𑀽𑀮𑀧𑀝𑁆𑀝𑁂𑀦 𑀆𑀕𑀦𑁆𑀢𑀼𑀓𑀧𑀝𑁆𑀝𑀁. 𑀩𑀦𑁆𑀥𑀢𑀺. 𑀅𑀦𑀼𑀯𑀸𑀢𑀦𑁆𑀢𑀺 𑀘𑀻𑀯𑀭𑀁 𑀅𑀦𑀼𑀧𑀭𑀺𑀬𑀸𑀬𑀺𑀢𑁆𑀯𑀸 𑀯𑀻𑀬𑀢𑀺 𑀩𑀦𑁆𑀥𑀻𑀬𑀢𑀻𑀢𑀺 𑀅𑀦𑀼𑀯𑀸𑀢𑀁, 𑀢𑀁 𑀙𑀺𑀦𑁆𑀤𑀢𑀺. 𑀖𑀝𑁆𑀝𑁂𑀢𑀻𑀢𑀺 𑀤𑁆𑀯𑁂 𑀅𑀦𑀼𑀯𑀸𑀢𑀦𑁆𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀚𑁆𑀛𑀢𑀺. 𑀆𑀭𑁄𑀧𑁂𑀢𑀻𑀢𑀺 𑀘𑀻𑀯𑀭𑀲𑁆𑀲 𑀉𑀧𑀭𑀺 𑀆𑀭𑁄𑀧𑁂𑀢𑀺. 𑀢𑀢𑁆𑀣𑀸𑀢𑀺 𑀘𑀻𑀯𑀭𑁂. 𑀲𑀼𑀢𑁆𑀢𑀁 𑀓𑀭𑁄𑀢𑀻𑀢𑀺 𑀲𑀽𑀘𑀺𑀧𑀸𑀲𑀧𑀯𑁂𑀲𑀦𑀲𑀼𑀢𑁆𑀢𑀁 𑀯𑀝𑁆𑀝𑁂𑀢𑀺. 𑀯𑀮𑁂𑀢𑀻𑀢𑀺 𑀯𑀝𑁆𑀝𑀺𑀢𑁆𑀯𑀸 𑀲𑀼𑀢𑁆𑀢𑀯𑁂𑀞𑀦𑀤𑀡𑁆𑀟𑀓𑁂 𑀆𑀯𑀝𑁆𑀝𑁂𑀢𑀺. 𑀧𑀺𑀧𑁆𑀨𑀮𑀺𑀓𑀦𑁆𑀢𑀺 𑀲𑀢𑁆𑀣𑀓𑀁. 𑀢𑀜𑁆𑀳𑀺 𑀧𑀺𑀬𑀫𑁆𑀧𑀺 𑀨𑀸𑀮𑁂𑀢𑀻𑀢𑀺 𑀧𑀺𑀧𑁆𑀨𑀮𑀺, 𑀲𑀸𑀬𑁂𑀯 𑀧𑀺𑀧𑁆𑀨𑀮𑀺𑀓𑀦𑁆𑀢𑀺 𑀓𑀢𑁆𑀯𑀸 𑀧𑀺𑀧𑁆𑀨𑀮𑀺𑀓𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀦𑀺𑀲𑁂𑀢𑀺 𑀦𑀺𑀲𑀸𑀦𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀧𑀦 𑀓𑀣𑁂𑀢𑀺, 𑀏𑀢𑀁 𑀞𑀧𑁂𑀢𑁆𑀯𑀸𑀢𑀺 𑀬𑁄𑀚𑀦𑀸.

𑀅𑀤𑁆𑀥𑀸𑀦𑀫𑀕𑁆𑀕𑀲𑁆𑀲 𑀤𑁆𑀯𑀺𑀕𑀸𑀯𑀼𑀢𑀢𑁆𑀢𑀸 ‘‘𑀅𑀤𑁆𑀥𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀕𑀸𑀯𑀼𑀢𑁂’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀭𑀽𑀴𑁆𑀳𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. ‘‘𑀲𑀦𑁆𑀦𑀺𑀧𑀢𑀦𑁆𑀢𑀻’’𑀢𑀺 𑀩𑀳𑀼𑀓𑀢𑁆𑀢𑀼𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀁 𑀧𑀭𑀺𑀯𑀚𑁆𑀚𑁂𑀢𑀻𑀢𑀺 𑀧𑀭𑀺𑀩𑁆𑀩𑀸𑀚𑀓𑁄, 𑀧𑀩𑁆𑀩𑀚𑁆𑀚𑀯𑁂𑀲𑀁 𑀯𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀚𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀭𑀺𑀩𑁆𑀩𑀸𑀚𑀓𑁄. 𑀯𑀺𑀦𑀸 𑀪𑀸𑀯𑀧𑀘𑁆𑀘𑀬𑁂𑀦 𑀪𑀸𑀯𑀢𑁆𑀣𑀲𑁆𑀲 𑀜𑀸𑀢𑀩𑁆𑀩𑀢𑁄 𑀧𑀭𑀺𑀩𑁆𑀩𑀸𑀚𑀓𑀪𑀸𑀯𑁄 𑀧𑀭𑀺𑀩𑁆𑀩𑀸𑀚𑀓𑁄, 𑀢𑀁 𑀲𑀫𑀸𑀧𑀦𑁆𑀦𑁄𑀢𑀺 𑀧𑀭𑀺𑀩𑁆𑀩𑀸𑀚𑀓𑀲𑀫𑀸𑀧𑀦𑁆𑀦𑁄. 𑀅𑀣 𑀯𑀸 𑀧𑀭𑀺𑀩𑁆𑀩𑀸𑀚𑀓𑁂𑀲𑀼 𑀲𑀫𑀸𑀧𑀦𑁆𑀦𑁄 𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀧𑀭𑀺𑀩𑁆𑀩𑀸𑀚𑀓𑀲𑀫𑀸𑀧𑀦𑁆𑀦𑁄. ‘‘𑀏𑀢𑁂𑀲’’𑀦𑁆𑀢𑀺𑀧𑀤𑀁 ‘‘𑀬𑁂𑀦 𑀓𑁂𑀦𑀘𑀻’’𑀢𑀺𑀧𑀤𑁂 𑀦𑀺𑀤𑁆𑀥𑀸𑀭𑀡𑀲𑀫𑀼𑀤𑀸𑀬𑁄.

𑁨𑁨𑁦. 𑀬𑁂𑀧𑀺 𑀪𑀺𑀓𑁆𑀔𑀽 𑀪𑀼𑀜𑁆𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 ‘‘𑀤𑁆𑀯𑁂 𑀢𑀬𑁄 𑀏𑀓𑀢𑁄’’𑀢𑀺𑀯𑀘𑀦𑁂. 𑀅𑀦𑀺𑀫𑀦𑁆𑀢𑀺𑀢𑁄 𑀘𑀢𑀼𑀢𑁆𑀣𑁄 𑀬𑀲𑁆𑀲 𑀘𑀢𑀼𑀓𑁆𑀓𑀲𑁆𑀲𑀸𑀢𑀺 𑀅𑀦𑀺𑀫𑀦𑁆𑀢𑀺𑀢𑀘𑀢𑀼𑀢𑁆𑀣𑀁, 𑀅𑀦𑀺𑀫𑀦𑁆𑀢𑀺𑀢𑁂𑀦 𑀯𑀸 𑀘𑀢𑀼𑀢𑁆𑀣𑀁 𑀅𑀦𑀺𑀫𑀦𑁆𑀢𑀺𑀢𑀘𑀢𑀼𑀢𑁆𑀣𑀁. 𑀏𑀲𑁂𑀯 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀘𑀢𑀼𑀢𑁆𑀣𑁂𑀲𑀼. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀦𑀺𑀫𑀦𑁆𑀢𑁂𑀢𑀻𑀢𑀺 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑁂𑀦 𑀦𑀺𑀫𑀦𑁆𑀢𑁂𑀢𑀺. 𑀢𑁂𑀲𑀽𑀢𑀺 𑀘𑀢𑀽𑀲𑀼 𑀪𑀺𑀓𑁆𑀔𑀽𑀲𑀼. 𑀲𑁄𑀢𑀺 𑀉𑀧𑀸𑀲𑀓𑁄. 𑀅𑀜𑁆𑀜𑀦𑁆𑀢𑀺 𑀦𑀸𑀕𑀢𑀪𑀺𑀓𑁆𑀔𑀼𑀢𑁄 𑀅𑀜𑁆𑀜𑀁, 𑀦𑀺𑀫𑀦𑁆𑀢𑀺𑀢𑀪𑀺𑀓𑁆𑀔𑀼𑀢𑁄 𑀯𑀸. 𑀢𑀗𑁆𑀔𑀡𑀧𑁆𑀧𑀢𑁆𑀢𑀦𑁆𑀢𑀺 𑀢𑀲𑁆𑀫𑀺𑀁 𑀧𑀼𑀘𑁆𑀙𑀦𑀓𑀣𑀦𑀓𑁆𑀔𑀡𑁂 𑀧𑀢𑁆𑀢𑀁. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂, 𑀕𑁂𑀳𑁂 𑀯𑀸. 𑀢𑁂𑀳𑀻𑀢𑀺 𑀓𑀭𑀡𑀪𑀽𑀢𑁂𑀳𑀺 𑀪𑀺𑀓𑁆𑀔𑀽𑀳𑀺.

𑀲𑁄𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑁄. 𑀅𑀦𑀸𑀕𑀘𑁆𑀙𑀦𑁆𑀢𑀫𑁆𑀧𑀻𑀢𑀺 𑀲𑀬𑀁 𑀦 𑀆𑀕𑀘𑁆𑀙𑀦𑁆𑀢𑀫𑁆𑀧𑀺. 𑀮𑀘𑁆𑀙𑀣𑀸𑀢𑀺 𑀮𑀪𑀺𑀲𑁆𑀲𑀣.

𑀲𑁄𑀧𑀻𑀢𑀺 𑀲𑀸𑀫𑀡𑁂𑀭𑁄𑀧𑀺, 𑀦 𑀧𑀺𑀡𑁆𑀟𑀧𑀸𑀢𑀺𑀓𑁄𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺 𑀕𑀺𑀮𑀸𑀦𑀘𑀢𑀼𑀢𑁆𑀣𑁂, 𑀢𑁂𑀲𑀼 𑀘𑀢𑀽𑀲𑀼 𑀯𑀸. 𑀕𑀺𑀮𑀸𑀦𑁄 𑀇𑀢𑀭𑁂𑀲𑀁 𑀧𑀦 𑀕𑀡𑀧𑀽𑀭𑀓𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸.

𑀕𑀡𑀧𑀽𑀭𑀓𑀢𑁆𑀢𑀸𑀢𑀺 𑀲𑀫𑀬𑀮𑀤𑁆𑀥𑀲𑁆𑀲 𑀕𑀡𑀧𑀽𑀭𑀓𑀢𑁆𑀢𑀸. 𑀘𑀢𑀼𑀓𑁆𑀓𑀸𑀦𑀻𑀢𑀺 𑀘𑀻𑀯𑀭𑀤𑀸𑀦𑀘𑀢𑀼𑀢𑁆𑀣𑀁 𑀘𑀻𑀯𑀭𑀓𑀸𑀭𑀘𑀢𑀼𑀢𑁆𑀣𑀁 𑀅𑀤𑁆𑀥𑀸𑀦𑀕𑀫𑀦𑀘𑀢𑀼𑀢𑁆𑀣𑀁 𑀦𑀸𑀯𑀸𑀪𑀺𑀭𑀼𑀳𑀦𑀘𑀢𑀼𑀢𑁆𑀣𑀁 𑀫𑀳𑀸𑀲𑀫𑀬𑀘𑀢𑀼𑀢𑁆𑀣𑀁, 𑀲𑀫𑀡𑀪𑀢𑁆𑀢𑀘𑀢𑀼𑀢𑁆𑀣𑀦𑁆𑀢𑀺 𑀙 𑀘𑀢𑀼𑀓𑁆𑀓𑀸𑀦𑀺. 𑀧𑀼𑀭𑀺𑀫𑁂𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀏𑀓𑀸𑀤𑀲 𑀘𑀢𑀼𑀓𑁆𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀓𑁄 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀽𑀢𑀺 𑀢𑀻𑀲𑀼 𑀪𑀺𑀓𑁆𑀔𑀽𑀲𑀼, 𑀕𑀢𑁂𑀲𑀼 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀪𑀼𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀞𑀺𑀢𑁂𑀲𑀼𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯. 𑀓𑀲𑁆𑀫𑀸 𑀲𑀩𑁆𑀩𑁂𑀲𑀁 𑀅𑀦𑀸𑀧𑀢𑁆𑀢𑀺, 𑀦𑀦𑀼 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀏𑀓𑀢𑁄 𑀕𑀡𑁆𑀳𑀦𑁆𑀢𑀻𑀢𑀺 𑀆𑀳 ‘‘𑀧𑀜𑁆𑀘𑀦𑁆𑀦𑀁 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀪𑁄𑀚𑀦𑀸𑀦𑀁𑀬𑁂𑀯𑀸𑀢𑀺 𑀦 𑀬𑀸𑀕𑀼𑀔𑀚𑁆𑀚𑀓𑀨𑀮𑀸𑀨𑀮𑀸𑀤𑀻𑀦𑀁. 𑀢𑀸𑀦𑀺 𑀘𑀸𑀢𑀺 𑀬𑁂𑀳𑀺 𑀪𑁄𑀚𑀦𑁂𑀳𑀺 𑀯𑀺𑀲𑀗𑁆𑀓𑁂𑀢𑀁 𑀦𑀢𑁆𑀣𑀺, 𑀢𑀸𑀦𑀺 𑀘 𑀪𑁄𑀚𑀦𑀸𑀦𑀺. 𑀢𑁂𑀳𑀻𑀢𑀺 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺. 𑀢𑀸𑀦𑀻𑀢𑀺 𑀬𑀸𑀕𑀼𑀆𑀤𑀻𑀦𑀺. 𑀇𑀢𑀻𑀢𑀺 𑀢𑀲𑁆𑀫𑀸 𑀅𑀦𑀸𑀧𑀢𑁆𑀢𑀺𑀦𑁆𑀢𑀺 𑀬𑁄𑀚𑀦𑀸.

𑀓𑁄𑀘𑀺 𑀧𑁂𑀲𑀺𑀢𑁄 𑀅𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑁄 𑀯𑀤𑀢𑀻𑀢𑀺 𑀬𑁄𑀚𑀦𑀸. 𑀓𑀢𑁆𑀢𑀼𑀓𑀸𑀫𑁂𑀦 𑀧𑁂𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀢𑁆𑀢𑀁 𑀕𑀡𑁆𑀳𑀣𑀸𑀢𑀺 𑀯𑀸𑀢𑀺 𑀯𑀸𑀲𑀤𑁆𑀤𑁄 ‘‘𑀑𑀤𑀦𑀁 𑀕𑀡𑁆𑀳𑀣, 𑀪𑁄𑀚𑀦𑀁 𑀕𑀡𑁆𑀳𑀣, 𑀅𑀦𑁆𑀦𑀁 𑀕𑀡𑁆𑀳𑀣, 𑀓𑀼𑀭𑀁 𑀕𑀡𑁆𑀳𑀣𑀸’’𑀢𑀺 𑀯𑀘𑀦𑀸𑀦𑀺𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀦𑁆𑀢𑀻𑀢𑀺 𑀦𑁂𑀫𑀦𑁆𑀢𑀦𑀺𑀓𑀸. 𑀧𑀺𑀡𑁆𑀟𑀧𑀸𑀢𑁂 𑀥𑀼𑀢𑀗𑁆𑀕𑁂 𑀦𑀺𑀬𑀼𑀢𑁆𑀢𑀸𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀸. 𑀧𑀼𑀦𑀤𑀺𑀯𑀲𑁂 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑁂𑀢𑀺 𑀬𑁄𑀚𑀦𑀸. 𑀳𑀭𑀺𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸. 𑀢𑀢𑁄𑀢𑀺 𑀢𑀢𑁄 𑀯𑀤𑀦𑀢𑁄 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀓𑁆𑀔𑁂𑀧𑀦𑁆𑀢𑀺 𑀯𑀺𑀯𑀺𑀥𑀁 𑀔𑁂𑀧𑀁. 𑀢𑁂𑀢𑀺 𑀅𑀲𑀼𑀓𑀸 𑀘 𑀅𑀲𑀼𑀓𑀸 𑀘 𑀕𑀸𑀫𑀺𑀓𑀸. 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑁂𑀢𑀺 𑀬𑁄𑀚𑀦𑀸. 𑀲𑁄𑀧𑀻𑀢𑀺 𑀅𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑁄𑀧𑀺, 𑀦 𑀕𑀸𑀫𑀺𑀓𑀸𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀦 𑀮𑀪𑀸𑀫𑀺 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑁂𑀢𑀺 𑀬𑁄𑀚𑀦𑀸. 𑀏𑀯𑀁 ‘‘𑀓𑀣𑀁 𑀦𑀺𑀫𑀦𑁆𑀢𑁂𑀲𑀼𑀁 𑀪𑀦𑁆𑀢𑁂’’𑀢𑀺 𑀏𑀢𑁆𑀣𑀸𑀧𑀺. 𑀢𑀢𑁄𑀢𑀺 𑀢𑀲𑁆𑀫𑀸 𑀓𑀸𑀭𑀡𑀸. 𑀏𑀲𑀸𑀢𑀺 𑀏𑀲𑁄 𑀕𑀸𑀫𑁄. 𑀢𑀦𑁆𑀢𑀺 𑀪𑀽𑀫𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀫𑀺𑀁 𑀕𑀸𑀫𑁂 𑀘𑀭𑀣𑀸𑀢𑀺 𑀳𑀺 𑀅𑀢𑁆𑀣𑁄. 𑀓𑀺𑀁 𑀏𑀢𑁂𑀦𑀸𑀢𑀺 𑀏𑀢𑁂𑀦 𑀧𑀼𑀘𑁆𑀙𑀦𑁂𑀦 𑀓𑀺𑀁 𑀧𑀬𑁄𑀚𑀦𑀁. 𑀏𑀢𑁆𑀣𑀸𑀢𑀺 𑀧𑀼𑀘𑁆𑀙𑀦𑁂. 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸𑀢𑀺 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀢𑀺𑀬𑀤𑀺𑀯𑀲𑁂𑀢𑀺 𑀦𑀺𑀫𑀦𑁆𑀢𑀦𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂. 𑀥𑀼𑀭𑀕𑀸𑀫𑁂𑀢𑀺 𑀧𑀥𑀸𑀦𑀕𑀸𑀫𑁂, 𑀅𑀦𑁆𑀢𑀺𑀓𑀕𑀸𑀫𑁂 𑀯𑀸. 𑀪𑀸𑀯𑁄 𑀦𑀸𑀫 𑀓𑀺𑀭𑀺𑀬𑀢𑁆𑀢𑀸 𑀏𑀓𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀓𑀢𑁆𑀢𑀸𑀭𑀁 𑀯𑀸 𑀓𑀫𑁆𑀫𑀁 𑀯𑀸 𑀲𑀫𑁆𑀩𑀦𑁆𑀥𑀁 𑀯𑀸 𑀅𑀧𑁂𑀓𑁆𑀔𑀺𑀢𑁆𑀯𑀸 𑀩𑀳𑀼𑀯𑀘𑀦𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀤𑀼𑀩𑁆𑀩𑀘𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀢𑁂𑀲𑀽𑀢𑀺 𑀕𑀸𑀫𑀺𑀓𑁂𑀲𑀼 𑀪𑁄𑀚𑁂𑀦𑁆𑀢𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑀦𑀲𑀸𑀮𑀸𑀬𑀦𑁆𑀢𑀺 𑀪𑁄𑀚𑀦𑀲𑀸𑀮𑀸𑀬𑀁. 𑀲𑀸 𑀳𑀺 𑀅𑀲𑀢𑀺 𑀪𑀼𑀜𑁆𑀚𑀢𑀺 𑀏𑀢𑁆𑀣𑀸𑀢𑀺 𑀅𑀲𑀦𑀸, 𑀲𑀮𑀦𑁆𑀢𑀺 𑀧𑀯𑀺𑀲𑀦𑁆𑀢𑀺 𑀅𑀲𑁆𑀲𑀦𑁆𑀢𑀺 𑀲𑀸𑀮𑀸, 𑀅𑀲𑀦𑀸 𑀘 𑀲𑀸 𑀲𑀸𑀮𑀸𑀘𑁂𑀢𑀺 𑀅𑀲𑀦𑀲𑀸𑀮𑀸𑀢𑀺 𑀅𑀢𑁆𑀣𑁂𑀦 ‘‘𑀅𑀲𑀦𑀲𑀸𑀮𑀸’’𑀢𑀺 𑀯𑀼𑀘𑁆𑀘𑀢𑀺.

𑀅𑀣 𑀧𑀦𑀸𑀢𑀺 𑀢𑀢𑁄 𑀅𑀜𑁆𑀜𑀣𑀸 𑀧𑀦. 𑀅𑀧𑀸𑀤𑀸𑀦𑀢𑁆𑀣𑁄 𑀳𑀺 𑀅𑀣𑀲𑀤𑁆𑀤𑁄. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀦𑁆𑀢𑀭𑀯𑀻𑀣𑀺𑀆𑀤𑀻𑀲𑀽𑀢𑀺 𑀅𑀢𑁆𑀣𑁄. 𑀧𑀝𑀺𑀓𑀘𑁆𑀘𑁂𑀯𑀸𑀢𑀺 𑀧𑀞𑀫𑀁 𑀓𑀢𑁆𑀯𑀸 𑀏𑀯. 𑀪𑀺𑀓𑁆𑀔𑀽𑀲𑀼 𑀕𑀸𑀫𑀢𑁄 𑀅𑀦𑀺𑀓𑁆𑀔𑀦𑁆𑀢𑁂𑀲𑀼 𑀧𑀕𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀯𑀝𑁆𑀝𑀢𑀻𑀢𑀺 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀧𑀳𑀺𑀡𑀢𑁆𑀢𑀸 𑀦 𑀯𑀝𑁆𑀝𑀢𑀺. 𑀬𑁂 𑀧𑀦 𑀫𑀦𑀼𑀲𑁆𑀲𑀸 𑀪𑁄𑀚𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀯𑀢𑁆𑀢𑀣𑀸𑀢𑀺 𑀯𑀼𑀢𑁆𑀢𑀧𑀤𑁂𑀢𑀺 ‘‘𑀦𑀺𑀯𑀢𑁆𑀢𑀣𑀸’’𑀢𑀺 𑀯𑀼𑀢𑁆𑀢𑁂 𑀓𑀺𑀭𑀺𑀬𑀸𑀧𑀤𑁂. 𑀬𑀲𑁆𑀲𑀓𑀲𑁆𑀲𑀘𑀺 𑀳𑁄𑀢𑀻𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀸𑀬 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀦𑀺𑀯𑀢𑁆𑀢𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀦𑀺𑀯𑀢𑁆𑀢𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸𑀢𑀺 ‘‘𑀦𑀺𑀯𑀢𑁆𑀢𑀣 𑀪𑀦𑁆𑀢𑁂’’𑀢𑀺 𑀪𑀦𑁆𑀢𑁂𑀲𑀤𑁆𑀤𑁂𑀦 𑀅𑀩𑁆𑀬𑀯𑀳𑀺𑀢𑀁 𑀓𑀢𑁆𑀯𑀸. 𑀦𑀺𑀲𑀻𑀤𑀣 𑀪𑀦𑁆𑀢𑁂, 𑀪𑀢𑁆𑀢𑀁 𑀕𑀡𑁆𑀳𑀣𑀸𑀢𑀺 𑀪𑀦𑁆𑀢𑁂𑀲𑀤𑁆𑀤𑁂𑀦 𑀩𑁆𑀬𑀯𑀳𑀺𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑁂 ‘‘𑀦𑀺𑀲𑀻𑀤𑀣𑀸’’𑀢𑀺𑀧𑀤𑁂 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀅𑀣 𑀪𑀦𑁆𑀢𑁂𑀲𑀤𑁆𑀤𑁂𑀦 𑀩𑁆𑀬𑀯𑀳𑀺𑀢𑀁 𑀅𑀓𑀢𑁆𑀯𑀸 ‘‘𑀦𑀺𑀲𑀻𑀤𑀣, 𑀪𑀢𑁆𑀢𑀁 𑀕𑀡𑁆𑀳𑀣𑀸’’𑀢𑀺 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀼𑀢𑁆𑀢𑁂 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀇𑀘𑁆𑀘𑁂𑀢𑀁 𑀦𑀬𑀁 𑀅𑀢𑀺𑀤𑀺𑀲𑀢𑀺 ‘‘𑀏𑀲𑁂𑀯 𑀦𑀬𑁄’’𑀢𑀺𑀇𑀫𑀺𑀦𑀸𑀢𑀺. 𑀤𑀼𑀢𑀺𑀬𑀁.

𑁩. 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁

𑁨𑁨𑁧. 𑀢𑀢𑀺𑀬𑁂 ‘‘𑀦 𑀔𑁄…𑀧𑁂… 𑀓𑀭𑁄𑀦𑁆𑀢𑀻’’𑀢𑀺𑀧𑀸𑀞𑀲𑁆𑀲 𑀅𑀢𑁆𑀣𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁂𑀦 𑀦𑀺𑀬𑀸𑀫𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀬𑁂𑀦 𑀦𑀺𑀬𑀸𑀫𑁂𑀦𑀸’’𑀢𑀺𑀇𑀫𑀺𑀦𑀸 ‘‘𑀬𑀣𑀬𑀺𑀫𑁂 𑀫𑀦𑀼𑀲𑁆𑀲𑀸’’𑀢𑀺 𑀏𑀢𑁆𑀣 𑀬𑀣𑀸𑀲𑀤𑁆𑀤𑀲𑁆𑀲 𑀬𑀁𑀲𑀤𑁆𑀤𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀢𑀺 𑀢𑁂𑀦 𑀦𑀺𑀬𑀸𑀫𑁂𑀦. 𑀇𑀫𑀺𑀦𑀸 𑀬𑀣𑀸𑀲𑀤𑁆𑀤𑀲𑁆𑀲 𑀦𑀺𑀬𑀫𑀦𑀺𑀤𑁆𑀤𑀺𑀝𑁆𑀞𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀜𑀸𑀬𑀢𑀻’’𑀢𑀺𑀇𑀫𑀺𑀦𑀸 𑀓𑀺𑀭𑀺𑀬𑀸𑀧𑀸𑀞𑀲𑁂𑀲𑀁 𑀤𑀲𑁆𑀲𑁂𑀢𑀺. ‘‘𑀲𑀸𑀲𑀦𑀁 𑀯𑀸 𑀤𑀸𑀦𑀁 𑀯𑀸’’𑀢𑀺𑀧𑀤𑁂𑀳𑀺 𑀇𑀤𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀩𑀼𑀤𑁆𑀥𑀧𑁆𑀧𑀫𑀼𑀔𑁂 𑀲𑀗𑁆𑀖𑁂𑀢𑀺 𑀲𑀫𑁆𑀧𑀤𑀸𑀦𑀢𑁆𑀣𑁂 𑀘𑁂𑀢𑀸𑀦𑀺 𑀪𑀼𑀫𑁆𑀫𑀯𑀘𑀦𑀸𑀦𑀺, 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀤𑀸𑀦𑀁 𑀯𑀸𑀢𑀺 𑀅𑀢𑁆𑀣𑁄. ‘‘𑀧𑀭𑀺𑀢𑁆𑀢’’𑀦𑁆𑀢𑀺𑀇𑀫𑀺𑀦𑀸 𑀑𑀭𑀓𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀮𑀸𑀫𑀓’’𑀦𑁆𑀢𑀺𑀇𑀫𑀺𑀦𑀸 𑀧𑀭𑀺𑀢𑁆𑀢𑀲𑀤𑁆𑀤𑀲𑁆𑀲 𑀧𑀭𑀺𑀯𑀸𑀭𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀺. 𑀓𑀺𑀭𑁄 𑀏𑀯 𑀧𑀢𑀺𑀪𑀸𑀯𑁂 𑀦𑀺𑀬𑀼𑀢𑁆𑀢𑁄 𑀓𑀺𑀭𑀧𑀢𑀺𑀓𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀺𑀭𑀧𑀢𑀺𑀓𑁄𑀢𑀺 𑀏𑀢𑁆𑀣𑀸’’𑀢𑀺 𑀆𑀤𑀺. 𑀲𑁄𑀢𑀺 𑀓𑀺𑀭𑀧𑀢𑀺𑀓𑁄. 𑀓𑀫𑁆𑀫𑀁 𑀓𑀸𑀭𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀧𑀘𑀸𑀭𑀯𑀲𑁂𑀦𑀸𑀢𑀺 𑀯𑁄𑀳𑀸𑀭𑀯𑀲𑁂𑀦, 𑀉𑀧𑀮𑀓𑁆𑀔𑀡𑀯𑀲𑁂𑀦, 𑀧𑀥𑀸𑀦𑀯𑀲𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮𑀁 𑀩𑀤𑀭𑀸𑀬𑁂𑀯, 𑀅𑀜𑁆𑀜𑁂𑀧𑀺 𑀧𑀦 𑀩𑀳𑀽 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸 𑀧𑀝𑀺𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀤𑀭𑁂𑀦 𑀫𑀺𑀲𑁆𑀲𑁄 𑀩𑀤𑀭𑀫𑀺𑀲𑁆𑀲𑁄, 𑀩𑀤𑀭𑀲𑀸𑀴𑀯𑁄𑀢𑀺 𑀆𑀳 ‘‘𑀩𑀤𑀭𑀲𑀸𑀴𑀯𑁂𑀦𑀸’’𑀢𑀺. 𑀩𑀤𑀭𑀘𑀼𑀡𑁆𑀡𑁂𑀦 𑀫𑀺𑀲𑁆𑀲𑁄 𑀫𑀥𑀼𑀲𑀓𑁆𑀔𑀭𑀸𑀤𑀺 ‘‘𑀩𑀤𑀭𑀲𑀸𑀴𑀯𑁄’’𑀢𑀺 𑀯𑀼𑀘𑁆𑀘𑀢𑀺.

𑁨𑁨𑁨. 𑀉𑀤𑁆𑀥𑀁 𑀲𑀽𑀭𑁄 𑀉𑀕𑁆𑀕𑀢𑁄 𑀅𑀲𑁆𑀫𑀺𑀁 𑀓𑀸𑀮𑁂𑀢𑀺 𑀉𑀲𑁆𑀲𑀽𑀭𑁄𑀢𑀺 𑀯𑀼𑀢𑁆𑀢𑁂 𑀅𑀢𑀺𑀤𑀺𑀯𑀸𑀓𑀸𑀮𑁄𑀢𑀺 𑀆𑀳 ‘‘𑀅𑀢𑀺𑀤𑀺𑀯𑀸’’𑀢𑀺.

𑁨𑁨𑁬. 𑀅𑀬𑀁 𑀪𑀢𑁆𑀢𑀯𑀺𑀓𑀧𑁆𑀧𑀦𑀸 𑀦𑀸𑀫 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑀲𑀫𑀼𑀤𑀸𑀬𑁄, 𑀇𑀢𑁆𑀣𑀦𑁆𑀦𑀸𑀫𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀤𑀺 𑀧𑀦 𑀲𑀫𑁆𑀫𑀼𑀔𑀸𑀧𑀺 𑀯𑀺𑀓𑀧𑁆𑀧𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀤𑀸 𑀅𑀢𑁆𑀢𑀦𑀸 𑀲𑀳 𑀞𑀺𑀢𑀲𑁆𑀲 𑀪𑀕𑀯𑀢𑁄 𑀓𑀲𑁆𑀫𑀸 𑀦 𑀯𑀺𑀓𑀧𑁆𑀧𑁂𑀢𑀻𑀢𑀺 𑀆𑀳 ‘‘𑀲𑀸 𑀘𑀸𑀬’’𑀦𑁆𑀢𑀺𑀆𑀤𑀺. 𑀲𑀸 𑀅𑀬𑀁 𑀯𑀺𑀓𑀧𑁆𑀧𑀦𑀸 𑀲𑀗𑁆𑀕𑀳𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑁆𑀫𑀸 𑀪𑀕𑀯𑀢𑁄 𑀯𑀺𑀓𑀧𑁆𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀪𑀕𑀯𑀢𑀺 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀲𑀗𑁆𑀖𑁂𑀦 𑀓𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁨𑁯. ‘‘𑀤𑁆𑀯𑁂 𑀢𑀬𑁄 𑀦𑀺𑀫𑀦𑁆𑀢𑀦𑁂’’𑀢𑀺𑀧𑀤𑀸𑀦𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀸𑀦𑀻𑀢𑀺 𑀆𑀳 ‘‘𑀤𑁆𑀯𑁂 𑀢𑀻𑀡𑀺 𑀦𑀺𑀫𑀦𑁆𑀢𑀦𑀸𑀦𑀻’’𑀢𑀺. 𑀦𑀺𑀫𑀦𑁆𑀢𑀺𑀢𑀩𑁆𑀩𑁄 𑀏𑀢𑁂𑀳𑀻𑀢𑀺 𑀦𑀺𑀫𑀦𑁆𑀢𑀦𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁆𑀯𑁂 𑀢𑀻𑀡𑀺 𑀓𑀼𑀮𑀸𑀦𑀺 𑀆𑀓𑀺𑀭𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀲𑀽𑀧𑀩𑁆𑀬𑀜𑁆𑀚𑀦𑀦𑁆𑀢𑀺 𑀲𑀽𑀧𑁄 𑀘 𑀩𑁆𑀬𑀜𑁆𑀚𑀦𑀜𑁆𑀘 𑀲𑀽𑀧𑀩𑁆𑀬𑀜𑁆𑀚𑀦𑀁. 𑀅𑀦𑀸𑀧𑀢𑁆𑀢𑀺 𑀏𑀓𑀢𑁄 𑀫𑀺𑀲𑁆𑀲𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀽𑀮𑀦𑀺𑀫𑀦𑁆𑀢𑀦𑀦𑁆𑀢𑀺 𑀧𑀞𑀫𑀦𑀺𑀫𑀦𑁆𑀢𑀦𑀁 𑀪𑁄𑀚𑀦𑀁. 𑀅𑀦𑁆𑀢𑁄𑀢𑀺 𑀳𑁂𑀝𑁆𑀞𑀸. 𑀏𑀓𑀫𑁆𑀧𑀺 𑀓𑀩𑀴𑀦𑁆𑀢𑀺 𑀏𑀓𑀫𑁆𑀧𑀺 𑀆𑀮𑁄𑀧𑀁. 𑀬𑀣𑀸 𑀢𑀣𑀸 𑀯𑀸𑀢𑀺 𑀬𑁂𑀦 𑀯𑀸 𑀢𑁂𑀦 𑀯𑀸 𑀆𑀓𑀸𑀭𑁂𑀦. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀪𑁄𑀚𑀦𑁂. 𑀭𑀲𑀁 𑀯𑀸𑀢𑀺 𑀔𑀻𑀭𑀢𑁄 𑀅𑀜𑁆𑀜𑀁 𑀭𑀲𑀁 𑀯𑀸. 𑀬𑁂𑀦 𑀔𑀻𑀭𑀭𑀲𑁂𑀦 𑀅𑀚𑁆𑀛𑁄𑀢𑁆𑀣𑀢𑀁 𑀪𑀢𑁆𑀢𑀁 𑀏𑀓𑀭𑀲𑀁 𑀳𑁄𑀢𑀺, 𑀢𑀁 𑀔𑀻𑀭𑀁 𑀯𑀸 𑀢𑀁 𑀭𑀲𑀁 𑀯𑀸 𑀆𑀓𑀺𑀭𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀬𑀁𑀲𑀤𑁆𑀤𑁄 𑀳𑀺 𑀉𑀢𑁆𑀢𑀭𑀯𑀸𑀓𑁆𑀬𑁂 𑀞𑀺𑀢𑁄 𑀧𑀼𑀩𑁆𑀩𑀯𑀸𑀓𑁆𑀬𑁂 𑀢𑀁𑀲𑀤𑁆𑀤𑀁 𑀅𑀯𑀕𑀫𑀬𑀢𑀺. 𑀔𑀻𑀭𑁂𑀦 𑀲𑀁𑀲𑀝𑁆𑀞𑀁 𑀪𑀢𑁆𑀢𑀁 𑀔𑀻𑀭𑀪𑀢𑁆𑀢𑀁. 𑀏𑀯𑀁 𑀭𑀲𑀪𑀢𑁆𑀢𑀁. 𑀅𑀜𑁆𑀜𑁂𑀧𑀻𑀢𑀺 𑀔𑀻𑀭𑀪𑀢𑁆𑀢𑀭𑀲𑀪𑀢𑁆𑀢𑀤𑀸𑀬𑀓𑀢𑁄 𑀅𑀜𑁆𑀜𑁂𑀧𑀺. 𑀅𑀦𑀸𑀧𑀢𑁆𑀢𑀺 𑀪𑀢𑁆𑀢𑁂𑀦 𑀅𑀫𑀺𑀲𑁆𑀲𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀪𑀼𑀜𑁆𑀚𑀦𑁆𑀢𑁂𑀦𑀸’’𑀢𑀺𑀧𑀤𑀁 ‘‘𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺𑀧𑀤𑁂 𑀪𑀸𑀯𑀓𑀢𑁆𑀢𑀸. 𑀲𑀧𑁆𑀧𑀺𑀧𑀸𑀬𑀸𑀲𑁂𑀧𑀻𑀢𑀺 𑀲𑀧𑁆𑀧𑀺𑀦𑀸 𑀘 𑀧𑀸𑀬𑀸𑀲𑁂𑀦 𑀘 𑀓𑀢𑁂 𑀪𑀢𑁆𑀢𑁂𑀧𑀺.

𑀢𑀲𑁆𑀲𑀸𑀢𑀺 𑀫𑀳𑀸𑀉𑀧𑀸𑀲𑀓𑀲𑁆𑀲. 𑀆𑀧𑀢𑁆𑀢𑀻𑀢𑀺 𑀘 𑀯𑀝𑁆𑀝𑀢𑀻𑀢𑀺 𑀘 𑀤𑁆𑀯𑀺𑀦𑁆𑀦𑀁 𑀅𑀝𑁆𑀞𑀓𑀣𑀸𑀯𑀸𑀤𑀸𑀦𑀁 𑀬𑀼𑀢𑁆𑀢𑀪𑀸𑀯𑀁 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑁂𑀦 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀫𑀳𑀸𑀧𑀘𑁆𑀘𑀭𑀺𑀬’’𑀦𑁆𑀢𑀺𑀆𑀤𑀺. 𑀤𑁆𑀯𑁂 𑀅𑀝𑁆𑀞𑀓𑀣𑀸𑀯𑀸𑀤𑀸 𑀳𑀺 𑀲𑀦𑁆𑀥𑀸𑀬𑀪𑀸𑀲𑀺𑀢𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑀸, 𑀅𑀢𑁆𑀣𑀢𑁄 𑀧𑀦 𑀏𑀓𑀸. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑁄𑀯𑀸𑀢𑀺 𑀓𑀼𑀫𑁆𑀪𑀺𑀬𑀸 𑀏𑀓𑁄𑀯. 𑀧𑀭𑀫𑁆𑀧𑀭𑀪𑁄𑀚𑀦𑀦𑁆𑀢𑀺 𑀧𑀭𑀲𑁆𑀲 𑀧𑀭𑀲𑁆𑀲 𑀪𑁄𑀚𑀦𑀁. 𑀦𑀺𑀫𑀦𑁆𑀢𑀺𑀢𑀫𑁆𑀳𑀸𑀢𑀺 𑀅𑀳𑀁 𑀦𑀺𑀫𑀦𑁆𑀢𑀺𑀢𑁄 𑀅𑀫𑁆𑀳𑀺 𑀦𑀦𑀽𑀢𑀺 𑀅𑀢𑁆𑀣𑁄. 𑀆𑀧𑀼𑀘𑁆𑀙𑀺𑀢𑁆𑀯𑀸𑀧𑀻𑀢𑀺 𑀫𑀳𑀸𑀉𑀧𑀸𑀲𑀓𑀁 𑀆𑀧𑀼𑀘𑁆𑀙𑀺𑀢𑁆𑀯𑀸𑀧𑀺.

𑀲𑁄𑀢𑀺 𑀅𑀦𑀼𑀫𑁄𑀤𑀓𑁄 𑀪𑀺𑀓𑁆𑀔𑀼. 𑀢𑀦𑁆𑀢𑀺 𑀪𑀺𑀓𑁆𑀔𑀼𑀁. 𑀅𑀜𑁆𑀜𑁄𑀢𑀺 𑀅𑀜𑁆𑀜𑀢𑀭𑁄. 𑀓𑀺𑀦𑁆𑀢𑀺 𑀓𑀲𑁆𑀫𑀸. 𑀦𑀺𑀫𑀦𑁆𑀢𑀺𑀢𑀢𑁆𑀢𑀸𑀢𑀺 𑀦𑀺𑀫𑀦𑁆𑀢𑀺𑀢𑀪𑀸𑀯𑀢𑁄.

𑀲𑀓𑀮𑁂𑀦 𑀕𑀸𑀫𑁂𑀦 𑀦𑀺𑀫𑀦𑁆𑀢𑀺𑀢𑁄𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸𑀯 𑀦𑀺𑀫𑀦𑁆𑀢𑀺𑀢𑀲𑁆𑀲 𑀓𑀧𑁆𑀧𑀢𑀺, 𑀦 𑀯𑀺𑀲𑀼𑀁 𑀯𑀺𑀲𑀼𑀦𑁆𑀢𑀺 𑀆𑀳 ‘‘𑀏𑀓𑀢𑁄 𑀳𑀼𑀢𑁆𑀯𑀸’’𑀢𑀺. 𑀧𑀽𑀕𑁂𑀧𑀻𑀢𑀺 𑀲𑀫𑀸𑀤𑀧𑁂𑀢𑁆𑀯𑀸 𑀧𑀼𑀜𑁆𑀜𑀁 𑀓𑀭𑁄𑀦𑁆𑀢𑀸𑀦𑀁 𑀲𑀫𑀽𑀳𑁂𑀧𑀺. ‘‘𑀦𑀺𑀫𑀦𑁆𑀢𑀺𑀬𑀫𑀸𑀦𑁄’’𑀢𑀺𑀧𑀤𑀲𑁆𑀲 𑀦𑀺𑀫𑀦𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀢𑁆𑀢𑀁 𑀕𑀡𑁆𑀳𑀸’’𑀢𑀺. 𑀬𑀤𑀕𑁆𑀕𑁂𑀦𑀸𑀢𑀺 𑀬𑀁 𑀅𑀕𑁆𑀕𑁂𑀦 𑀬𑁂𑀦 𑀓𑁄𑀝𑁆𑀞𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀤𑁆𑀯𑀻𑀲𑀼 𑀣𑁂𑀭𑀯𑀸𑀤𑁂𑀲𑀼 𑀫𑀳𑀸𑀲𑀼𑀫𑀢𑁆𑀣𑁂𑀭𑀯𑀸𑀤𑁄𑀯 𑀬𑀼𑀢𑁆𑀢𑁄𑀢𑀺 𑀲𑁄 𑀧𑀘𑁆𑀙𑀸 𑀯𑀼𑀢𑁆𑀢𑁄𑀢𑀺. 𑀢𑀢𑀺𑀬𑀁.

𑁪. 𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑀁

𑁨𑁩𑁦. 𑀘𑀢𑀼𑀢𑁆𑀣𑁂 ‘‘𑀦𑀓𑀼𑀮𑀫𑀸𑀢𑀸𑀢𑀺’’𑀆𑀤𑀻𑀲𑀼 (𑀅. 𑀦𑀺. 𑁧.𑁨𑁬𑁬; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁬𑁬) 𑀦𑀓𑀼𑀮𑀲𑁆𑀲 𑀪𑀕𑀯𑀢𑁄 𑀫𑀸𑀢𑀸 𑀦𑀓𑀼𑀮𑀫𑀸𑀢𑀸𑀢𑀺 𑀘 𑀦𑀓𑀼𑀮𑀜𑁆𑀘 𑀪𑀕𑀯𑀢𑁄 𑀢𑀁 𑀫𑀸𑀢𑀸 𑀘𑀸𑀢𑀺 𑀦𑀓𑀼𑀮𑀫𑀸𑀢𑀸𑀢𑀺 𑀘 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺, ‘‘𑀉𑀢𑁆𑀢𑀭𑀫𑀸𑀢𑀸𑀢𑀺’’𑀆𑀤𑀻𑀲𑀼 𑀉𑀢𑁆𑀢𑀭𑀸𑀬 𑀫𑀸𑀢𑀸 𑀉𑀢𑁆𑀢𑀭𑀫𑀸𑀢𑀸𑀢𑀺 𑀅𑀢𑁆𑀣𑁄𑀬𑁂𑀯 𑀲𑀫𑁆𑀪𑀯𑀢𑀺. 𑀢𑁂𑀲𑀼 ‘‘𑀉𑀢𑁆𑀢𑀭𑀫𑀸𑀢𑀸’’𑀢𑀺𑀧𑀤𑀲𑁆𑀲𑁂𑀯 ‘‘𑀓𑀸𑀡𑀫𑀸𑀢𑀸’’𑀢𑀺𑀧𑀤𑀲𑁆𑀲 𑀓𑀸𑀡𑀸𑀬 𑀫𑀸𑀢𑀸 𑀓𑀸𑀡𑀫𑀸𑀢𑀸𑀢𑀺 𑀅𑀢𑁆𑀣𑁄𑀬𑁂𑀯 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀓𑀸𑀡𑀸𑀬 𑀫𑀸𑀢𑀸’’𑀢𑀺. 𑀢𑀲𑁆𑀲𑀸 𑀥𑀻𑀢𑀼𑀬𑀸 ‘‘𑀓𑀸𑀡𑀸’’𑀢𑀺𑀦𑀸𑀫𑁂𑀦 𑀯𑀺𑀲𑁆𑀲𑀼𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀸 𑀓𑀺𑀭𑀸’’𑀢𑀺𑀆𑀤𑀺. 𑀲𑀸𑀢𑀺 𑀤𑀸𑀭𑀺𑀓𑀸 𑀯𑀺𑀲𑁆𑀲𑀼𑀢𑀸 𑀅𑀳𑁄𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀫𑀳𑀸𑀉𑀧𑀸𑀲𑀺𑀓𑀸𑀬. 𑀬𑁂 𑀬𑁂𑀢𑀺 𑀧𑀼𑀭𑀺𑀲𑀸. ‘‘𑀭𑀸𑀕𑁂𑀦 𑀓𑀸𑀡𑀸 𑀳𑁄𑀦𑁆𑀢𑀻’’𑀢𑀺𑀇𑀫𑀺𑀦𑀸 𑀓𑀡𑀦𑁆𑀢𑀺 𑀦𑀺𑀫𑀺𑀮𑀦𑁆𑀢𑀺 𑀭𑀸𑀕𑁂𑀦 𑀧𑀼𑀭𑀺𑀲𑀸 𑀏𑀢𑀸𑀬𑀸𑀢𑀺 𑀓𑀸𑀡𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸𑀢𑀺 𑀓𑀸𑀡𑀸𑀬. 𑀆𑀕𑀢𑀦𑁆𑀢𑀺 𑀏𑀢𑁆𑀣 𑀪𑀸𑀯𑀢𑁆𑀣𑁂 𑀢𑁄𑀢𑀺 𑀆𑀳 ‘‘𑀆𑀕𑀫𑀦’’𑀦𑁆𑀢𑀺. 𑀅𑀥𑀺𑀧𑁆𑀧𑀸𑀬𑁄𑀢𑀺 ‘‘𑀓𑀺𑀲𑁆𑀫𑀺𑀁 𑀯𑀺𑀬𑀸’’𑀢𑀺𑀧𑀤𑀲𑁆𑀲, 𑀓𑀸𑀡𑀫𑀸𑀢𑀸𑀬 𑀯𑀸 𑀅𑀥𑀺𑀧𑁆𑀧𑀸𑀬𑁄. 𑀭𑀺𑀢𑁆𑀢𑀸𑀢𑀺 𑀢𑀼𑀘𑁆𑀙𑀸, 𑀲𑀼𑀜𑁆𑀜𑀸𑀢𑀺 𑀅𑀢𑁆𑀣𑁄. ‘‘𑀅𑀲𑁆𑀫𑀺𑀁 𑀕𑀫𑀦𑁂’’𑀢𑀺𑀇𑀫𑀺𑀦𑀸 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. ‘‘𑀅𑀭𑀺𑀬𑀲𑀸𑀯𑀺𑀓𑀸’’𑀢𑀺𑀆𑀤𑀺𑀦𑀸 𑀅𑀭𑀺𑀬𑀸𑀦𑀁 𑀪𑀺𑀓𑁆𑀔𑀽𑀳𑀺 𑀅𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀁 𑀤𑀲𑁆𑀲𑁂𑀢𑀺. 𑀦 𑀓𑁂𑀯𑀮𑀁 𑀓𑀺𑀜𑁆𑀘𑀺 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺, 𑀅𑀣 𑀔𑁄 𑀲𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀁 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀻’’𑀢𑀺. 𑀓𑀸𑀡𑀸𑀧𑀻𑀢𑀺 𑀧𑀺𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀫𑀸𑀢𑀸𑀬𑁂𑀯 𑀫𑀕𑁆𑀕𑀨𑀮𑀪𑀸𑀕𑀺𑀦𑀻 𑀅𑀳𑁄𑀲𑀺, 𑀅𑀣 𑀔𑁄 𑀓𑀸𑀡𑀸𑀧𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁄𑀧𑀺 𑀧𑀼𑀭𑀺𑀲𑁄𑀢𑀺 𑀓𑀸𑀡𑀸𑀬 𑀧𑀢𑀺𑀪𑀽𑀢𑁄 𑀲𑁄𑀧𑀺 𑀧𑀼𑀭𑀺𑀲𑁄. 𑀧𑀓𑀢𑀺𑀝𑁆𑀞𑀸𑀦𑁂𑀬𑁂𑀯𑀸𑀢𑀺 𑀚𑁂𑀝𑁆𑀞𑀓𑀧𑀚𑀸𑀧𑀢𑀺𑀝𑁆𑀞𑀸𑀦𑁂𑀬𑁂𑀯.

𑁨𑁩𑁧. 𑀇𑀫𑀲𑁆𑀫𑀺𑀁 𑀧𑀦 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀽𑀯𑀯𑀢𑁆𑀣𑀼𑀲𑁆𑀫𑀺𑀁. 𑀏𑀢𑀦𑁆𑀢𑀺 𑀧𑀸𑀣𑁂𑀬𑁆𑀬𑀯𑀢𑁆𑀣𑀼𑀁. 𑀅𑀭𑀺𑀬𑀲𑀸𑀯𑀓𑀢𑁆𑀢𑀸𑀢𑀺 𑀅𑀭𑀺𑀬𑀪𑀽𑀢𑀲𑁆𑀲 𑀲𑀸𑀯𑀓𑀲𑁆𑀲 𑀪𑀸𑀯𑀢𑁄, 𑀅𑀭𑀺𑀬𑀲𑁆𑀲 𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀪𑀸𑀯𑀢𑁄.

𑁨𑁩𑁩. 𑀧𑀳𑁂𑀡𑀓𑀧𑀡𑁆𑀡𑀸𑀓𑀸𑀭𑀲𑀤𑁆𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀳𑁂𑀡𑀓𑀢𑁆𑀣𑀸𑀬𑀸𑀢𑀺 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬𑀸’’𑀢𑀺. 𑀇𑀥𑀸𑀢𑀺 ‘‘𑀧𑀽𑀯𑁂𑀳𑀺 𑀯𑀸’’𑀢𑀺𑀧𑀤𑁂, 𑀲𑀺𑀓𑁆𑀔𑀸𑀧𑀤𑁂 𑀯𑀸. 𑀩𑀤𑁆𑀥𑀲𑀢𑁆𑀢𑀽𑀢𑀺 𑀫𑀥𑀼𑀲𑀓𑁆𑀔𑀭𑀸𑀤𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀩𑀤𑁆𑀥𑀲𑀢𑁆𑀢𑀼. 𑀣𑀽𑀧𑀻𑀓𑀢𑀦𑁆𑀢𑀺 𑀣𑀽𑀧𑀻𑀓𑀢𑀁 𑀓𑀢𑁆𑀯𑀸.

‘‘𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑁂’’𑀢𑀺𑀧𑀤𑀲𑁆𑀲 𑀯𑀺𑀲𑁂𑀲𑀦𑀼𑀢𑁆𑀢𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀧𑀽𑀭𑁂 𑀧𑀢𑁆𑀢𑁂’’𑀢𑀺. 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀧𑀢𑁆𑀢𑀸𑀢𑀺 𑀤𑁆𑀯𑀢𑁆𑀢𑀺𑀧𑀢𑁆𑀢𑀸, 𑀯𑀸𑀲𑀤𑁆𑀤𑀢𑁆𑀣𑁂 𑀲𑀗𑁆𑀔𑁆𑀬𑁄𑀪𑀬𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄, 𑀢𑀺𑀲𑀤𑁆𑀤𑀧𑀭𑀢𑁆𑀢𑀸 𑀤𑁆𑀯𑀺𑀲𑁆𑀲 𑀘 𑀅𑀓𑀸𑀭𑁄 𑀳𑁄𑀢𑀺, 𑀤𑁆𑀯𑀢𑁆𑀢𑀺𑀧𑀢𑁆𑀢𑀸 𑀘 𑀢𑁂 𑀧𑀽𑀭𑀸 𑀘𑀸𑀢𑀺 𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑀸, 𑀢𑁂 𑀤𑁆𑀯𑀢𑁆𑀢𑀺𑀧𑀢𑁆𑀢𑀧𑀽𑀭𑁂 𑀕𑀳𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. ‘‘𑀆𑀘𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀆𑀘𑀺𑀓𑁆𑀔𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀭 𑀫𑀬𑀸’’𑀢𑀺𑀆𑀤𑀺. 𑀢𑁂𑀦𑀸𑀧𑀻𑀢𑀺 𑀤𑀼𑀢𑀺𑀬𑁂𑀦𑀸𑀧𑀺. 𑀧𑀞𑀫𑀪𑀺𑀓𑁆𑀔𑀼 𑀏𑀓𑀁 𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑀦𑀜𑁆𑀘 𑀤𑀼𑀢𑀺𑀬𑀪𑀺𑀓𑁆𑀔𑀼 𑀏𑀓𑀁 𑀕𑀳𑁂𑀢𑁆𑀯𑀸 𑀢𑀢𑀺𑀬𑀪𑀺𑀓𑁆𑀔𑀼𑀲𑁆𑀲 𑀆𑀭𑁄𑀘𑀦𑀜𑁆𑀘 𑀅𑀢𑀺𑀤𑀺𑀲𑀦𑁆𑀢𑁄 𑀆𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑁂𑀦𑀸𑀢𑀺 𑀧𑀞𑀫𑀪𑀺𑀓𑁆𑀔𑀼𑀦𑀸. 𑀧𑀝𑀺𑀓𑁆𑀓𑀫𑀦𑁆𑀢𑀺 𑀪𑀼𑀜𑁆𑀚𑀻𑀢𑁆𑀯𑀸 𑀏𑀢𑁆𑀣𑀸𑀢𑀺 𑀧𑀝𑀺𑀓𑁆𑀓𑀫𑀦𑀦𑁆𑀢𑀺 𑀯𑀼𑀢𑁆𑀢𑁂 𑀅𑀲𑀦𑀲𑀸𑀮𑀸𑀯 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀅𑀲𑀦𑀲𑀸𑀮’’𑀦𑁆𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀲𑀁 𑀅𑀲𑀦𑀲𑀸𑀮𑀸𑀬𑀁. 𑀫𑀼𑀔𑁄𑀮𑁄𑀓𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀺. 𑀅𑀜𑁆𑀜𑀢𑁆𑀣𑀸𑀢𑀺 𑀧𑀝𑀺𑀓𑁆𑀓𑀫𑀦𑀢𑁄 𑀅𑀜𑁆𑀜𑀢𑁆𑀣. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲.

‘‘𑀲𑀁𑀯𑀺𑀪𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀲𑀁𑀯𑀺𑀪𑀚𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀘𑁂 𑀢𑀬𑁄’’𑀢𑀺𑀆𑀤𑀺. 𑀬𑀣𑀸𑀫𑀺𑀢𑁆𑀢𑀦𑁆𑀢𑀺 𑀬𑀲𑁆𑀲 𑀬𑀲𑁆𑀲 𑀫𑀺𑀢𑁆𑀢𑀲𑁆𑀲. 𑀅𑀓𑀸𑀫𑀸𑀢𑀺 𑀦 𑀓𑀸𑀫𑁂𑀦. 𑀓𑀸𑀭𑀡𑀢𑁆𑀣𑁂 𑀘𑁂𑀢𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀁.

𑁨𑁩𑁫. 𑀅𑀦𑁆𑀢𑀭𑀸𑀫𑀕𑁆𑀕𑁂𑀢𑀺 𑀫𑀕𑁆𑀕𑀲𑁆𑀲 𑀅𑀦𑁆𑀢𑀭𑁄 𑀅𑀦𑁆𑀢𑀭𑀸𑀫𑀕𑁆𑀕𑁄, 𑀲𑀼𑀔𑀼𑀘𑁆𑀘𑀸𑀭𑀡𑀢𑁆𑀣𑀁 𑀫𑀚𑁆𑀛𑁂 𑀤𑀻𑀖𑁄, 𑀢𑀲𑁆𑀫𑀺𑀁. 𑀩𑀳𑀼𑀫𑁆𑀧𑀺 𑀤𑁂𑀦𑁆𑀢𑀸𑀦𑀁 𑀏𑀢𑁂𑀲𑀁 𑀜𑀸𑀢𑀓𑀧𑀯𑀸𑀭𑀺𑀢𑀸𑀦𑀁 𑀩𑀳𑀼𑀫𑁆𑀧𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀝𑁆𑀞𑀓𑀣𑀸𑀦𑀁 𑀯𑀘𑀦𑀁 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀁

𑁨𑁩𑁬. 𑀧𑀜𑁆𑀘𑀫𑁂 𑀧𑀯𑀸𑀭𑀺𑀢𑀸𑀢𑀺 𑀏𑀢𑁆𑀣 𑀯𑀲𑁆𑀲𑀁𑀯𑀼𑀢𑁆𑀣𑀧𑀯𑀸𑀭𑀡𑀸, 𑀧𑀘𑁆𑀘𑀬𑀧𑀯𑀸𑀭𑀡𑀸, 𑀧𑀝𑀺𑀓𑁆𑀔𑁂𑀧𑀧𑀯𑀸𑀭𑀡𑀸, 𑀬𑀸𑀯𑀤𑀢𑁆𑀣𑀧𑀯𑀸𑀭𑀡𑀸 𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑀸𑀲𑀼 𑀧𑀯𑀸𑀭𑀡𑀸𑀲𑀼 𑀬𑀸𑀯𑀤𑀢𑁆𑀣𑀧𑀯𑀸𑀭𑀡𑀸 𑀘 𑀧𑀝𑀺𑀓𑁆𑀔𑁂𑀧𑀧𑀯𑀸𑀭𑀡𑀸 𑀘𑀸𑀢𑀺 𑀤𑁆𑀯𑁂 𑀧𑀯𑀸𑀭𑀡𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑁆𑀭𑀸𑀳𑁆𑀫𑀡𑁂𑀦𑀸’’𑀢𑀺𑀆𑀤𑀺. 𑀩𑁆𑀭𑀸𑀳𑁆𑀫𑀡𑁂𑀦 𑀧𑀯𑀸𑀭𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀬𑀦𑁆𑀢𑀺 𑀢𑀢𑀺𑀬𑀦𑁆𑀢𑀦𑀺𑀧𑀸𑀢𑁄 ‘‘𑀧𑀯𑀸𑀭𑀺𑀢𑀸’’𑀢𑀺𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀘𑀲𑀤𑁆𑀤𑁄 𑀅𑀜𑁆𑀜𑀢𑁆𑀣 𑀬𑁄𑀚𑁂𑀢𑀩𑁆𑀩𑁄 𑀬𑀸𑀯𑀤𑀢𑁆𑀣𑀧𑀯𑀸𑀭𑀡𑀸𑀬 𑀘 𑀧𑀝𑀺𑀓𑁆𑀔𑁂𑀧𑀧𑀯𑀸𑀭𑀡𑀸𑀬 𑀘𑀸𑀢𑀺. 𑀧𑀝𑀺𑀫𑀼𑀔𑀁 𑀅𑀢𑁆𑀢𑀦𑁄 𑀕𑁂𑀳𑀁 𑀯𑀺𑀲𑀦𑁆𑀢𑀺 𑀧𑀯𑀺𑀲𑀦𑁆𑀢𑀻𑀢𑀺 𑀧𑀝𑀺𑀯𑀺𑀲𑁆𑀲𑀓𑀸𑀢𑀺 𑀯𑀼𑀢𑁆𑀢𑁂 𑀆𑀲𑀦𑁆𑀦𑀕𑁂𑀳𑀯𑀸𑀲𑀺𑀓𑀸 𑀕𑀳𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀲𑀸𑀫𑀦𑁆𑀢𑀖𑀭𑀯𑀸𑀲𑀺𑀓𑁂’’𑀢𑀺.

𑁨𑁩𑁭. 𑀉𑀤𑁆𑀥𑀗𑁆𑀕𑀫𑁄 𑀭𑀯𑁄 𑀑𑀭𑀯𑁄, 𑀲𑁄𑀬𑁂𑀯 𑀲𑀤𑁆𑀤𑁄 𑀑𑀭𑀯𑀲𑀤𑁆𑀤𑁄, 𑀓𑀸𑀓𑀸𑀦𑀁 𑀑𑀭𑀯𑀲𑀤𑁆𑀤𑁄 𑀓𑀓𑁄𑀭𑀯𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀸𑀓𑀸𑀦’’𑀦𑁆𑀢𑀺𑀆𑀤𑀺.

𑁨𑁩𑁯. 𑀢𑀯𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀅𑀢𑀻𑀢𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀘𑀸’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 ‘‘𑀪𑀼𑀢𑁆𑀢𑀯𑀸’’𑀢𑀺𑀧𑀤𑁂. 𑀬𑀲𑁆𑀫𑀸 𑀬𑁂𑀦 𑀪𑀺𑀓𑁆𑀔𑀼𑀦𑀸 𑀅𑀚𑁆𑀛𑁄𑀳𑀭𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑁄 ‘‘𑀪𑀼𑀢𑁆𑀢𑀸𑀯𑀻’’𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀲𑀗𑁆𑀔𑀸𑀤𑀺𑀢𑁆𑀯𑀸𑀢𑀺 𑀤𑀦𑁆𑀢𑁂𑀳𑀺 𑀘𑀼𑀡𑁆𑀡𑀁 𑀓𑀢𑁆𑀯𑀸. 𑀢𑁂𑀦𑀸𑀢𑀺 𑀢𑁂𑀦 𑀳𑁂𑀢𑀼𑀦𑀸. 𑀅𑀲𑁆𑀲𑀸𑀢𑀺 ‘‘𑀪𑀼𑀢𑁆𑀢𑀸𑀯𑀻’’𑀢𑀺𑀧𑀤𑀲𑁆𑀲. 𑀧𑀯𑀸𑀭𑁂𑀢𑀺 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀧𑀯𑀸𑀭𑀺𑀢𑁄 𑀪𑀺𑀓𑁆𑀔𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀢𑀧𑀯𑀸𑀭𑀡𑁄’’𑀢𑀺. 𑀲𑁄𑀧𑀺 𑀘𑀸𑀢𑀺 𑀲𑁄 𑀧𑀝𑀺𑀓𑁆𑀔𑁂𑀧𑁄 𑀘 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 ‘‘𑀧𑀯𑀸𑀭𑀺𑀢𑁄’’𑀢𑀺𑀧𑀤𑀲𑁆𑀲. 𑀢𑀢𑁆𑀣𑀸𑀢𑀺 ‘‘𑀅𑀲𑀦𑀁 𑀧𑀜𑁆𑀜𑀸𑀬𑀢𑀻’’𑀢𑀺𑀆𑀤𑀺𑀯𑀘𑀦𑁂. 𑀬𑀲𑁆𑀫𑀸 𑀪𑀼𑀢𑁆𑀢𑀸𑀯𑀻𑀢𑀺𑀧𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀦 𑀧𑀲𑁆𑀲𑀸𑀫𑀸𑀢𑀺 𑀬𑁄𑀚𑀦𑀸. ‘‘𑀅𑀲𑀦𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀧𑀤𑀪𑀸𑀚𑀦𑀺𑀬𑀸 ‘‘𑀪𑀼𑀢𑁆𑀢𑀸𑀯𑀻’’𑀢𑀺 𑀫𑀸𑀢𑀺𑀓𑀸𑀧𑀤𑀲𑁆𑀲 𑀅𑀲𑀁𑀲𑀦𑁆𑀤𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀲𑀦𑀁 𑀧𑀜𑁆𑀜𑀸𑀬𑀢𑀻𑀢𑀺 𑀇𑀫𑀺𑀦𑀸’’𑀢𑀺𑀆𑀤𑀺. 𑀬𑀜𑁆𑀘𑀸𑀢𑀺 𑀬𑀜𑁆𑀘 𑀪𑁄𑀚𑀦𑀁. 𑀤𑀺𑀭𑀢𑁆𑀢𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀧𑀜𑁆𑀘𑀸𑀤𑀺𑀯𑀘𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑀦𑁆𑀢𑀺 ‘‘𑀪𑀼𑀢𑁆𑀢𑀸𑀯𑀻’’𑀢𑀺𑀧𑀤𑀁.

‘‘𑀅𑀲𑀦𑀁 𑀧𑀜𑁆𑀜𑀸𑀬𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀜𑁆𑀜𑀸𑀬𑀢𑀻’’𑀢𑀺 𑀏𑀢𑁆𑀣 𑀜𑀸𑀥𑀸𑀢𑀼𑀬𑀸 𑀔𑀸𑀬𑀦𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀤𑀺𑀲𑁆𑀲𑀢𑀻’’𑀢𑀺. ‘‘𑀳𑀢𑁆𑀣𑀧𑀸𑀲𑁂’’𑀢𑀺𑀧𑀤𑀲𑁆𑀲 𑀤𑁆𑀯𑀸𑀤𑀲𑀳𑀢𑁆𑀣𑀧𑁆𑀧𑀫𑀸𑀡𑁄 𑀳𑀢𑁆𑀣𑀧𑀸𑀲𑁄 𑀦𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀧𑁆𑀧𑀫𑀸𑀡𑁂’’𑀢𑀺. 𑀯𑀸𑀘𑀸𑀬 𑀅𑀪𑀺𑀳𑀭𑀡𑀁 𑀦𑀸𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 ‘‘𑀓𑀸𑀬𑁂𑀦𑀸’’𑀢𑀺. 𑀅𑀪𑀺𑀳𑀭𑀢𑀻𑀢𑀺 𑀅𑀪𑀺𑀫𑀼𑀔𑀁 𑀳𑀭𑀢𑀺. 𑀢𑀦𑁆𑀢𑀺 𑀪𑁄𑀚𑀦𑀁. 𑀏𑀢𑀦𑁆𑀢𑀺 𑀧𑀜𑁆𑀘𑀗𑁆𑀕𑀪𑀸𑀯𑀁, ‘‘𑀧𑀜𑁆𑀘𑀳𑀺…𑀧𑁂… 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀘𑀦𑀁 𑀯𑀸.

𑀢𑀢𑁆𑀭𑀸𑀢𑀺 ‘‘𑀅𑀲𑀦𑀁 𑀧𑀜𑁆𑀜𑀸𑀬𑀢𑀻’’𑀢𑀺𑀆𑀤𑀺𑀯𑀘𑀦𑁂. 𑀅𑀲𑁆𑀦𑀸𑀢𑀻𑀢𑀺 𑀓𑀻𑀬𑀸𑀤𑀺𑀕𑀡𑀢𑁆𑀢𑀸, 𑀢𑀲𑁆𑀲 𑀘 𑀏𑀓𑀓𑁆𑀔𑀭𑀥𑀸𑀢𑀼𑀢𑁆𑀢𑀸 𑀲𑀓𑀸𑀭𑀦𑀓𑀸𑀭𑀸𑀦𑀁 𑀲𑀁𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀢𑀦𑁆𑀢𑀺 𑀪𑁄𑀚𑀦𑀁. 𑀉𑀦𑁆𑀤𑀢𑀺 𑀧𑀲𑀯𑀢𑀺 𑀪𑀼𑀜𑁆𑀚𑀦𑁆𑀢𑀸𑀦𑀁 𑀆𑀬𑀼𑀩𑀮𑀁 𑀚𑀦𑁂𑀢𑀻𑀢𑀺 𑀑𑀤𑀦𑁄. 𑀬𑀯𑀸𑀤𑀬𑁄 𑀧𑀽𑀢𑀺𑀁 𑀓𑀢𑁆𑀯𑀸 𑀓𑀢𑀢𑁆𑀢𑀸 𑀓𑀼𑀘𑁆𑀙𑀺𑀢𑁂𑀦 𑀫𑀲𑀻𑀬𑀢𑀺 𑀆𑀫𑀲𑀻𑀬𑀢𑀻𑀢𑀺 𑀓𑀼𑀫𑀸𑀲𑁄. 𑀲𑀘𑀢𑀺 𑀲𑀫𑀯𑀸𑀬𑁄 𑀳𑀼𑀢𑁆𑀯𑀸 𑀪𑀯𑀢𑀻𑀢𑀺 𑀲𑀢𑁆𑀢𑀼. 𑀩𑁆𑀬𑀜𑁆𑀚𑀦𑀢𑁆𑀣𑀸𑀬 𑀫𑀸𑀭𑁂𑀢𑀩𑁆𑀩𑁄𑀢𑀺 𑀫𑀘𑁆𑀙𑁄. 𑀫𑀸𑀦𑀻𑀬𑀢𑀺 𑀪𑀼𑀜𑁆𑀚𑀦𑁆𑀢𑁂𑀳𑀻𑀢𑀺 𑀫𑀁𑀲𑀁. 𑀢𑀢𑁆𑀣𑀸𑀢𑀺 𑀑𑀤𑀦𑀸𑀤𑀻𑀲𑀼 𑀧𑀜𑁆𑀘𑀲𑀼 𑀪𑁄𑀚𑀦𑁂𑀲𑀼. 𑀲𑀸𑀭𑁄 𑀅𑀲𑁆𑀲𑀢𑁆𑀣𑀺 𑀅𑀜𑁆𑀜𑁂𑀲𑀁 𑀥𑀜𑁆𑀜𑀸𑀦𑀦𑁆𑀢𑀺 𑀲𑀸𑀮𑀻. 𑀯𑀳𑀢𑀺 𑀪𑀼𑀜𑁆𑀚𑀦𑁆𑀢𑀸𑀦𑀁 𑀚𑀻𑀯𑀺𑀢𑀦𑁆𑀢𑀺 𑀯𑀻𑀳𑀺. 𑀬𑀯𑀢𑀺 𑀅𑀫𑀺𑀲𑁆𑀲𑀺𑀢𑁄𑀧𑀺 𑀫𑀺𑀲𑁆𑀲𑀺𑀢𑁄 𑀯𑀺𑀬 𑀪𑀯𑀢𑀻𑀢𑀺 𑀬𑀯𑁄. 𑀕𑀼𑀥𑀢𑀺 𑀧𑀭𑀺𑀯𑁂𑀞𑀢𑀺 𑀫𑀺𑀮𑀓𑁆𑀔𑀪𑁄𑀚𑀦𑀢𑁆𑀢𑀸𑀢𑀺 𑀕𑁄𑀥𑀼𑀫𑁄. 𑀲𑁄𑀪𑀦𑀲𑀻𑀲𑀢𑁆𑀢𑀸 𑀓𑀫𑀦𑀻𑀬𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀓𑀗𑁆𑀕𑀼. 𑀫𑀳𑀦𑁆𑀢𑀲𑀻𑀲𑀢𑁆𑀢𑀸, 𑀫𑀥𑀼𑀭𑀭𑀲𑀦𑀸𑀴𑀢𑁆𑀢𑀸 𑀘 𑀯𑀭𑀻𑀬𑀢𑀺 𑀧𑀢𑁆𑀣𑀻𑀬𑀢𑀺 𑀚𑀦𑁂𑀳𑀻𑀢𑀺 𑀯𑀭𑀓𑁄. 𑀓𑁄𑀭𑀁 𑀭𑀼𑀥𑀺𑀭𑀁 𑀤𑀽𑀲𑀢𑀺 𑀪𑀼𑀜𑁆𑀚𑀦𑁆𑀢𑀸𑀦𑀦𑁆𑀢𑀺 𑀓𑀼𑀤𑁆𑀭𑀽𑀲𑀓𑁄. 𑀦𑀺𑀩𑁆𑀩𑀢𑁆𑀢𑁄 𑀑𑀤𑀦𑁄 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀲𑀢𑁆𑀢𑀲𑀼 𑀥𑀜𑁆𑀜𑁂𑀲𑀼. 𑀲𑀸𑀮𑀻𑀢𑀻𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀦𑀸𑀫𑀧𑀭𑀺𑀬𑀸𑀬𑁄. 𑀲𑀸𑀮𑀻 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀏𑀲𑁂𑀯 𑀦𑀬𑁄 ‘‘𑀯𑀻𑀳𑀻𑀢𑀻’’𑀢𑀺𑀆𑀤𑀻𑀲𑀼𑀧𑀺.

𑀏𑀢𑁆𑀣𑀸𑀢𑀺 𑀢𑀺𑀡𑀥𑀜𑁆𑀜𑀚𑀸𑀢𑀻𑀲𑀼. 𑀦𑀻𑀯𑀸𑀭𑁄 𑀲𑀸𑀮𑀺𑀬𑀸 𑀅𑀦𑀼𑀮𑁄𑀫𑁄, 𑀯𑀭𑀓𑀘𑁄𑀭𑀓𑁄 𑀯𑀭𑀓𑀲𑁆𑀲 𑀅𑀦𑀼𑀮𑁄𑀫𑁄. 𑀅𑀫𑁆𑀩𑀺𑀮𑀧𑀸𑀬𑀸𑀲𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀔𑀻𑀭𑀪𑀢𑁆𑀢𑀸𑀤𑀬𑁄 𑀲𑀗𑁆𑀕𑀡𑁆𑀳𑀦𑁆𑀢𑀺. 𑀑𑀥𑀻𑀢𑀺 𑀅𑀯𑀥𑀺, 𑀫𑀭𑀺𑀬𑀸𑀤𑁄𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀅𑀯𑀳𑀻𑀬𑀢𑀺 𑀘𑀚𑀻𑀬𑀢𑀺 𑀅𑀲𑁆𑀫𑀸𑀢𑀺 𑀑𑀥𑀻𑀢𑀺 𑀯𑀼𑀘𑁆𑀘𑀢𑀺.

𑀬𑁄𑀧𑀺 𑀧𑀸𑀬𑀸𑀲𑁄 𑀯𑀸 𑀬𑀸𑀧𑀺 𑀅𑀫𑁆𑀩𑀺𑀮𑀬𑀸𑀕𑀼 𑀯𑀸 𑀑𑀥𑀺𑀁 𑀦 𑀤𑀲𑁆𑀲𑁂𑀢𑀺, 𑀲𑁄 𑀧𑀯𑀸𑀭𑀡𑀁 𑀦 𑀚𑀦𑁂𑀢𑀻𑀢𑀺 𑀬𑁄𑀚𑀦𑀸. 𑀧𑀬𑁂𑀦 𑀔𑀻𑀭𑁂𑀦 𑀓𑀢𑀢𑁆𑀢𑀸 𑀧𑀸𑀬𑀸𑀲𑁄. 𑀧𑀸𑀢𑀩𑁆𑀩𑀲𑁆𑀲, 𑀅𑀲𑀺𑀢𑀩𑁆𑀩𑀲𑁆𑀲 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀩𑁆𑀬𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀲𑀫𑁆𑀪𑀯𑀢𑁄 𑀯𑀸 𑀧𑀸𑀬𑀸𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀉𑀤𑁆𑀥𑀦𑀢𑁄𑀢𑀺 𑀘𑀼𑀮𑁆𑀮𑀺𑀢𑁄. 𑀲𑀸 𑀳𑀺 𑀉𑀧𑀭𑀺 𑀥𑀻𑀬𑀦𑁆𑀢𑀺 𑀞𑀧𑀺𑀬𑀦𑁆𑀢𑀺 𑀣𑀸𑀮𑁆𑀬𑀸𑀤𑀬𑁄 𑀏𑀢𑁆𑀣𑀸𑀢𑀺 𑀉𑀤𑁆𑀥𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀯𑀚𑁆𑀚𑀺𑀢𑁆𑀯𑀸𑀢𑀺 𑀧𑀭𑀺𑀡𑀸𑀫𑁂𑀢𑁆𑀯𑀸. 𑀖𑀦𑀪𑀸𑀯𑀦𑁆𑀢𑀺 𑀓𑀣𑀺𑀦𑀪𑀸𑀯𑀁. 𑀏𑀢𑁆𑀣𑀸𑀧𑀺 𑀯𑀸𑀓𑁆𑀬𑁂 ‘‘𑀬𑁄 𑀲𑁄’’𑀢𑀺 𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀧𑀼𑀩𑁆𑀩𑁂𑀢𑀺 𑀅𑀩𑁆𑀪𑀼𑀡𑁆𑀳𑀓𑀸𑀮𑁂. 𑀦𑀺𑀫𑀦𑁆𑀢𑀦𑁂𑀢𑀺 𑀦𑀺𑀫𑀦𑁆𑀢𑀦𑀝𑁆𑀞𑀸𑀦𑁂. 𑀪𑀢𑁆𑀢𑁂 𑀆𑀓𑀺𑀭𑀺𑀢𑁆𑀯𑀸 𑀤𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀧𑀦𑀁 𑀕𑀘𑁆𑀙𑀢𑀺 𑀇𑀫𑀸𑀬𑀸𑀢𑀺 𑀬𑀸𑀕𑀼. 𑀓𑀺𑀜𑁆𑀘𑀸𑀧𑀺 𑀢𑀦𑀼𑀓𑀸 𑀳𑁄𑀢𑀺, 𑀢𑀣𑀸𑀧𑀻𑀢𑀺 𑀬𑁄𑀚𑀦𑀸. 𑀉𑀤𑀓𑀸𑀤𑀻𑀲𑀽𑀢𑀺𑀆𑀤𑀺𑀲𑀤𑁆𑀤𑁂𑀦 𑀓𑀺𑀜𑁆𑀚𑀺𑀓𑀔𑀻𑀭𑀸𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀬𑀸𑀕𑀼𑀲𑀗𑁆𑀕𑀳𑀫𑁂𑀯 𑀕𑀘𑁆𑀙𑀢𑀺, 𑀓𑀲𑁆𑀫𑀸? 𑀉𑀤𑀓𑀸𑀤𑀻𑀦𑀁 𑀧𑀓𑁆𑀓𑀼𑀣𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀺𑀁 𑀯𑀸𑀢𑀺 𑀲𑀪𑀢𑁆𑀢𑁂, 𑀧𑀓𑁆𑀓𑀼𑀣𑀺𑀢𑀉𑀤𑀓𑀸𑀤𑀺𑀓𑁂 𑀯𑀸. 𑀅𑀜𑁆𑀜𑀲𑁆𑀫𑀺𑀁 𑀯𑀸𑀢𑀺 𑀧𑀓𑁆𑀓𑀼𑀣𑀺𑀢𑀉𑀤𑀓𑀸𑀤𑀺𑀢𑁄 𑀅𑀜𑁆𑀜𑀲𑁆𑀫𑀺𑀁 𑀉𑀤𑀓𑀸𑀤𑀺𑀓𑁂 𑀯𑀸. 𑀬𑀢𑁆𑀣 𑀬𑀲𑁆𑀫𑀺𑀁 𑀉𑀤𑀓𑀸𑀤𑀺𑀓𑁂 𑀧𑀓𑁆𑀔𑀺𑀧𑀦𑁆𑀢𑀺, 𑀢𑀁 𑀧𑀯𑀸𑀭𑀡𑀁 𑀚𑀦𑁂𑀢𑀻𑀢𑀺 𑀬𑁄𑀚𑀦𑀸.

𑀲𑀼𑀤𑁆𑀥𑀭𑀲𑀓𑁄𑀢𑀺 𑀫𑀘𑁆𑀙𑀫𑀁𑀲𑀔𑀡𑁆𑀟𑀦𑁆𑀳𑀸𑀭𑀽𑀳𑀺 𑀅𑀫𑀺𑀲𑁆𑀲𑁄 𑀲𑀼𑀤𑁆𑀥𑁄 𑀫𑀘𑁆𑀙𑀸𑀤𑀺𑀭𑀲𑀓𑁄. 𑀭𑀲𑀓𑀬𑀸𑀕𑀽𑀢𑀺 𑀭𑀲𑀓𑀪𑀽𑀢𑀸 𑀤𑁆𑀭𑀯𑀪𑀽𑀢𑀸 𑀬𑀸𑀕𑀼. 𑀖𑀦𑀬𑀸𑀕𑀽𑀢𑀺 𑀓𑀣𑀺𑀦𑀬𑀸𑀕𑀼. 𑀏𑀢𑁆𑀣𑀸𑀢𑀺 𑀖𑀦𑀬𑀸𑀕𑀼𑀬𑀁. 𑀧𑀼𑀧𑁆𑀨𑀺𑀅𑀢𑁆𑀣𑀸𑀬𑀸𑀢𑀺 𑀧𑀼𑀧𑁆𑀨𑀁 𑀨𑀼𑀮𑁆𑀮𑀁 𑀇𑀫𑀲𑁆𑀲 𑀔𑀚𑁆𑀚𑀓𑀲𑁆𑀲𑀸𑀢𑀺 𑀧𑀼𑀧𑁆𑀨𑀻, 𑀧𑀼𑀧𑁆𑀨𑀺𑀦𑁄 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀧𑀼𑀧𑁆𑀨𑀺𑀅𑀢𑁆𑀣𑁄, 𑀢𑀤𑀢𑁆𑀣𑀸𑀬 𑀓𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂 𑀢𑀡𑁆𑀟𑀼𑀮𑁂𑀢𑀺 𑀢𑁂 𑀲𑁂𑀤𑀺𑀢𑀢𑀡𑁆𑀟𑀼𑀮𑁂. 𑀅𑀘𑀼𑀡𑁆𑀡𑀢𑁆𑀢𑀸 𑀦𑁂𑀯 𑀲𑀢𑁆𑀢𑀼𑀲𑀗𑁆𑀔𑁆𑀬𑀁, 𑀅𑀧𑀓𑁆𑀓𑀢𑁆𑀢𑀸 𑀦 𑀪𑀢𑁆𑀢𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀳𑀻𑀢𑀺 𑀲𑁂𑀤𑀺𑀢𑀢𑀡𑁆𑀟𑀼𑀮𑁂𑀳𑀺. 𑀢𑁂 𑀢𑀡𑁆𑀟𑀼𑀮𑁂 𑀧𑀘𑀦𑁆𑀢𑀺, 𑀓𑀭𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀬𑀯𑁂𑀳𑀻’’𑀢𑀺 𑀩𑀳𑀼𑀯𑀘𑀦𑁂𑀦 𑀲𑀢𑁆𑀢 𑀥𑀜𑁆𑀜𑀸𑀦𑀺𑀧𑀺 𑀕𑀳𑀺𑀢𑀸𑀦𑀺. 𑀏𑀲 𑀦𑀬𑁄 𑀲𑀸𑀮𑀺𑀯𑀻𑀳𑀺𑀬𑀯𑁂𑀳𑀻𑀢𑀺 𑀏𑀢𑁆𑀣𑀸𑀧𑀺. 𑀣𑀼𑀲𑁂𑀢𑀺 𑀥𑀜𑁆𑀜𑀢𑀘𑁂. 𑀧𑀮𑀸𑀧𑁂𑀢𑁆𑀯𑀸𑀢𑀺 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸. 𑀢𑀦𑁆𑀢𑀺 𑀘𑀼𑀡𑁆𑀡𑀁 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀔𑀭𑀧𑀸𑀓𑀪𑀚𑁆𑀚𑀺𑀢𑀸𑀦𑀦𑁆𑀢𑀺 𑀔𑀭𑁄 𑀧𑀸𑀓𑁄 𑀔𑀭𑀧𑀸𑀓𑁄, 𑀔𑀭𑀧𑀸𑀓𑁂𑀦 𑀪𑀚𑁆𑀚𑀺𑀢𑀸 𑀔𑀭𑀧𑀸𑀓𑀪𑀚𑁆𑀚𑀺𑀢𑀸, 𑀢𑁂𑀲𑀁. 𑀦 𑀧𑀯𑀸𑀭𑁂𑀦𑁆𑀢𑀺 𑀅𑀲𑀢𑁆𑀢𑀼𑀲𑀗𑁆𑀕𑀳𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀼𑀡𑁆𑀟𑀓𑀫𑁆𑀧𑀻𑀢𑀺 𑀓𑀡𑀫𑁆𑀧𑀺. 𑀧𑀯𑀸𑀭𑁂𑀢𑀺 𑀲𑀢𑁆𑀢𑀼𑀲𑀗𑁆𑀕𑀳𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀳𑀻𑀢𑀺 𑀮𑀸𑀚𑁂𑀳𑀺. 𑀲𑀼𑀤𑁆𑀥𑀔𑀚𑁆𑀚𑀓𑀦𑁆𑀢𑀺 𑀧𑀺𑀝𑁆𑀞𑁂𑀳𑀺 𑀅𑀫𑀺𑀲𑁆𑀲𑀺𑀢𑀁 𑀲𑀼𑀤𑁆𑀥𑀁 𑀨𑀮𑀸𑀨𑀮𑀸𑀤𑀺𑀔𑀚𑁆𑀚𑀓𑀁. 𑀬𑀸𑀕𑀼𑀁 𑀧𑀺𑀯𑀦𑁆𑀢𑀲𑁆𑀲 𑀤𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀸𑀦𑀻𑀢𑀺 𑀤𑁆𑀯𑁂 𑀫𑀘𑁆𑀙𑀫𑀁𑀲𑀔𑀡𑁆𑀟𑀸𑀦𑀺. 𑀦 𑀧𑀯𑀸𑀭𑁂𑀢𑀺 𑀤𑁆𑀯𑀺𑀦𑁆𑀦𑀁 𑀫𑀘𑁆𑀙𑀫𑀁𑀲𑀔𑀡𑁆𑀟𑀸𑀦𑀁 𑀅𑀔𑀸𑀤𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄𑀢𑀺 𑀤𑁆𑀯𑁂𑀫𑀘𑁆𑀙𑀫𑀁𑀲𑀔𑀡𑁆𑀟𑀢𑁄 𑀦𑀻𑀳𑀭𑀺𑀢𑁆𑀯𑀸 𑀏𑀓𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀢𑁂𑀲𑀼 𑀯𑀸. 𑀲𑁄𑀢𑀺 𑀔𑀸𑀤𑀓𑁄 𑀪𑀺𑀓𑁆𑀔𑀼. 𑀅𑀜𑁆𑀜𑀦𑁆𑀢𑀺 𑀤𑁆𑀯𑀻𑀳𑀺 𑀫𑀘𑁆𑀙𑀫𑀁𑀲𑀔𑀡𑁆𑀟𑁂𑀳𑀺 𑀅𑀜𑁆𑀜𑀁 𑀧𑀯𑀸𑀭𑀡𑀧𑀳𑁄𑀦𑀓𑀁 𑀪𑁄𑀚𑀦𑀁.

𑀅𑀯𑀢𑁆𑀣𑀼𑀢𑀸𑀬𑀸𑀢𑀺 𑀧𑀯𑀸𑀭𑀡𑀸𑀬 𑀅𑀯𑀢𑁆𑀣𑀼𑀪𑀸𑀯𑀢𑁄. 𑀢𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀳 ‘‘𑀬𑀁 𑀳𑀻’’𑀢𑀺. 𑀳𑀺𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀚𑁄𑀢𑀓𑁄. 𑀬𑀦𑁆𑀢𑀺 𑀫𑀁𑀲𑀁. 𑀇𑀤𑀁 𑀧𑀦𑀸𑀢𑀺 𑀇𑀤𑀁 𑀫𑀁𑀲𑀁 𑀧𑀦. 𑀧𑀝𑀺𑀓𑁆𑀔𑀺𑀢𑁆𑀢𑀫𑀁𑀲𑀁 𑀓𑀧𑁆𑀧𑀺𑀬𑀪𑀸𑀯𑀢𑁄 𑀅𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀫𑁆𑀧𑀺 𑀫𑀁𑀲𑀪𑀸𑀯𑀁 𑀦 𑀚𑀳𑀸𑀢𑀺. 𑀦𑀦𑀼 𑀔𑀸𑀤𑀺𑀢𑀫𑀁𑀲𑀁 𑀧𑀦 𑀅𑀓𑀧𑁆𑀧𑀺𑀬𑀪𑀸𑀯𑀢𑁄 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀔𑀸𑀤𑀺𑀬𑀫𑀸𑀦𑀫𑁆𑀧𑀺 𑀫𑀁𑀲𑀪𑀸𑀯𑀁 𑀚𑀳𑀸𑀢𑀻𑀢𑀺 𑀆𑀳 ‘‘𑀬𑀁 𑀧𑀦𑀸’’𑀢𑀺𑀆𑀤𑀺. 𑀓𑀼𑀮𑀤𑀽𑀲𑀓𑀓𑀫𑁆𑀫𑀜𑁆𑀘 𑀯𑁂𑀚𑁆𑀚𑀓𑀫𑁆𑀫𑀜𑁆𑀘 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀭𑁄𑀘𑀦𑀜𑁆𑀘 𑀲𑀸𑀤𑀺𑀢𑀭𑀽𑀧𑀺𑀬𑀜𑁆𑀘 𑀓𑀼𑀮…𑀧𑁂… 𑀭𑀽𑀧𑀺𑀬𑀸𑀦𑀺, 𑀢𑀸𑀦𑀺 𑀆𑀤𑀻𑀦𑀺 𑀬𑁂𑀲𑀁 𑀓𑀼𑀳𑀦𑀸𑀤𑀻𑀦𑀦𑁆𑀢𑀺 𑀓𑀼𑀮…𑀧𑁂… 𑀭𑀽𑀧𑀺𑀬𑀸𑀤𑀬𑁄, 𑀢𑁂𑀳𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀯𑀸𑀭𑁂𑀲𑀼.

𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀦𑀺𑀤𑀲𑁆𑀲𑀦𑀁. 𑀢𑀦𑁆𑀢𑀺 𑀪𑁄𑀚𑀦𑀁. 𑀬𑀣𑀸𑀢𑀺 𑀬𑁂𑀦𑀸𑀓𑀸𑀭𑁂𑀦. 𑀬𑁂𑀦 𑀅𑀚𑁆𑀛𑁄𑀳𑀝𑀁 𑀳𑁄𑀢𑀺, 𑀲𑁄 𑀧𑀝𑀺𑀓𑁆𑀔𑀺𑀧𑀢𑀺 𑀧𑀯𑀸𑀭𑁂𑀢𑀻𑀢𑀺 𑀬𑁄𑀚𑀦𑀸. 𑀓𑀢𑁆𑀣𑀘𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀧𑀢𑁆𑀢𑀸𑀤𑀺𑀓𑁂. 𑀢𑀲𑁆𑀫𑀺𑀁 𑀘𑁂 𑀅𑀦𑁆𑀢𑀭𑁂𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀘𑁂. 𑀅𑀜𑁆𑀜𑀢𑁆𑀭𑀸𑀢𑀺 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂. 𑀧𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑀪𑁄𑀚𑀦𑀁 𑀅𑀦𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑁄 𑀳𑁄𑀢𑀺 𑀬𑀣𑀸, 𑀏𑀯𑀦𑁆𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀲𑀘𑁆𑀘𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀧𑀤𑁂𑀲𑀼. 𑀢𑀢𑁆𑀣𑀸𑀢𑀺 𑀓𑀼𑀭𑀼𑀦𑁆𑀤𑀻𑀬𑀁. 𑀆𑀦𑀺𑀲𑀤𑀲𑁆𑀲𑀸𑀢𑀺 𑀆𑀕𑀫𑁆𑀫 𑀦𑀺𑀲𑀻𑀤𑀢𑀺 𑀏𑀢𑁂𑀦𑀸𑀢𑀺 𑀆𑀦𑀺𑀲𑀤𑁄, 𑀢𑀲𑁆𑀲 𑀧𑀘𑁆𑀙𑀺𑀫𑀦𑁆𑀢𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀡𑁆𑀳𑀺𑀅𑀦𑁆𑀢𑀢𑁄𑀢𑀺 𑀧𑀲𑀢𑀺 𑀞𑀺𑀢𑀓𑀸𑀮𑁂 𑀯𑀸 𑀕𑀫𑀦𑀓𑀸𑀮𑁂 𑀯𑀸 𑀪𑀽𑀫𑀺𑀁 𑀨𑀼𑀲𑀢𑀻𑀢𑀺 𑀧𑀡𑁆𑀳𑀻, 𑀢𑀲𑁆𑀲 𑀅𑀦𑁆𑀢𑀢𑁄. ‘‘𑀤𑀸𑀬𑀓𑀲𑁆𑀲𑀸’’𑀢𑀺𑀧𑀤𑀁 ‘‘𑀧𑀲𑀸𑀭𑀺𑀢𑀳𑀢𑁆𑀣’’𑀦𑁆𑀢𑀺 𑀧𑀤𑁂𑀦 𑀘 ‘‘𑀅𑀗𑁆𑀕’’𑀦𑁆𑀢𑀺 𑀧𑀤𑁂𑀦 𑀘 𑀅𑀯𑀬𑀯𑀻𑀲𑀫𑁆𑀩𑀦𑁆𑀥𑁄. 𑀳𑀢𑁆𑀣𑀧𑀸𑀲𑁄𑀢𑀺 𑀳𑀢𑁆𑀣𑀲𑁆𑀲 𑀧𑀸𑀲𑁄 𑀲𑀫𑀻𑀧𑁄 𑀳𑀢𑁆𑀣𑀧𑀸𑀲𑁄, 𑀳𑀢𑁆𑀣𑁄 𑀧𑀲𑀢𑀺 𑀨𑀼𑀲𑀢𑀺 𑀅𑀲𑁆𑀫𑀺𑀁 𑀞𑀸𑀦𑁂𑀢𑀺 𑀯𑀸 𑀳𑀢𑁆𑀣𑀧𑀸𑀲𑁄, 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑁄 𑀧𑀤𑁂𑀲𑁄. 𑀢𑀲𑁆𑀫𑀺𑀦𑁆𑀢𑀺 𑀳𑀢𑁆𑀣𑀧𑀸𑀲𑁂.

𑀉𑀧𑀦𑀸𑀫𑁂𑀢𑀻𑀢𑀺 𑀲𑀫𑀻𑀧𑀁 𑀦𑀸𑀫𑁂𑀢𑀺. 𑀅𑀦𑀦𑁆𑀢𑀭𑀦𑀺𑀲𑀺𑀦𑁆𑀦𑁄𑀧𑀻𑀢𑀺 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀅𑀦𑀦𑁆𑀢𑀭𑁂 𑀞𑀸𑀦𑁂 𑀦𑀺𑀲𑀺𑀦𑁆𑀦𑁄𑀧𑀺 𑀪𑀺𑀓𑁆𑀔𑀼 𑀯𑀤𑀢𑀻𑀢𑀺 𑀬𑁄𑀚𑀦𑀸. 𑀪𑀢𑁆𑀢𑀧𑀘𑁆𑀙𑀺𑀦𑁆𑀢𑀺 𑀪𑀢𑁆𑀢𑁂𑀦 𑀧𑀓𑁆𑀔𑀺𑀢𑁆𑀢𑀁 𑀧𑀘𑁆𑀙𑀺𑀁. 𑀈𑀲𑀓𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁. 𑀉𑀤𑁆𑀥𑀭𑀺𑀢𑁆𑀯𑀸 𑀯𑀸 𑀅𑀧𑀦𑀸𑀫𑁂𑀢𑁆𑀯𑀸 𑀯𑀸𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀤𑀽𑀭𑁂𑀢𑀺 𑀦𑀯𑀸𑀲𑀦𑁂. 𑀇𑀢𑁄𑀢𑀺 𑀧𑀢𑁆𑀢𑀢𑁄. 𑀕𑀢𑁄 𑀤𑀽𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀭𑀺𑀯𑁂𑀲𑀦𑀸𑀬𑀸𑀢𑀺 𑀧𑀭𑀺𑀯𑁂𑀲𑀦𑀢𑁆𑀣𑀸𑀬, 𑀪𑀢𑁆𑀢𑀕𑁆𑀕𑁂 𑀯𑀸. 𑀢𑀢𑁆𑀭𑀸𑀢𑀺 𑀅𑀲𑁆𑀫𑀺𑀁 𑀧𑀭𑀺𑀯𑁂𑀲𑀦𑁂. 𑀢𑀦𑁆𑀢𑀺 𑀪𑀢𑁆𑀢𑀧𑀘𑁆𑀙𑀺𑀁. 𑀨𑀼𑀝𑁆𑀞𑀫𑀢𑁆𑀢𑀸𑀯𑀸𑀢𑀺 𑀨𑀼𑀲𑀺𑀬𑀫𑀢𑁆𑀢𑀸𑀯. 𑀓𑀝𑀘𑁆𑀙𑀼𑀦𑀸 𑀉𑀤𑁆𑀥𑀝𑀪𑀢𑁆𑀢𑁂 𑀧𑀦 𑀧𑀯𑀸𑀭𑀡𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀲𑁆𑀲𑀸𑀢𑀺 𑀧𑀭𑀺𑀯𑁂𑀲𑀓𑀲𑁆𑀲. 𑀅𑀪𑀺𑀳𑀝𑁂 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸𑀢𑀺 𑀅𑀪𑀺𑀳𑀝𑀲𑁆𑀲 𑀪𑀢𑁆𑀢𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀪𑀸𑀯𑀢𑁄.

‘‘𑀓𑀸𑀬𑁂𑀦 𑀯𑀸𑀘𑀸𑀬 𑀯𑀸 𑀧𑀝𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀯𑀸𑀭𑀡𑀸 𑀳𑁄𑀢𑀻’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀓𑀸𑀬𑀯𑀸𑀘𑀸𑀧𑀝𑀺𑀓𑁆𑀔𑁂𑀧𑁂𑀲𑀼. 𑀫𑀘𑁆𑀙𑀺𑀓𑀩𑀻𑀚𑀦𑀺𑀦𑁆𑀢𑀺 𑀫𑀓𑁆𑀔𑀺𑀓𑀸𑀦𑀁 𑀉𑀢𑁆𑀢𑀸𑀲𑀦𑀺𑀁 𑀩𑀻𑀚𑀦𑀺𑀁. 𑀔𑀓𑀸𑀭𑀲𑁆𑀲 𑀳𑀺 𑀙𑀓𑀸𑀭𑀁 𑀓𑀢𑁆𑀯𑀸 ‘‘𑀫𑀘𑁆𑀙𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺 ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 (𑀅. 𑀦𑀺. 𑁩.𑁧𑁦𑁩). 𑀏𑀢𑁆𑀣 𑀳𑀺 ‘‘𑀲𑀓𑁆𑀔𑀺𑀓𑀢𑁆𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀔𑀓𑀸𑀭𑀲𑁆𑀲 𑀙𑀓𑀸𑀭𑁄 𑀳𑁄𑀢𑀺.

𑀏𑀓𑁄 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀦𑁂𑀢𑁆𑀯𑀸𑀢𑀺 𑀧𑀢𑁆𑀢𑀢𑁄 𑀅𑀧𑀦𑁂𑀢𑁆𑀯𑀸. 𑀏𑀢𑁆𑀣𑀸𑀢𑀺 𑀯𑀘𑀦𑁂. 𑀓𑀣𑀦𑁆𑀢𑀺 𑀓𑁂𑀦𑀸𑀓𑀸𑀭𑁂𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀯𑀤𑀦𑁆𑀢𑀲𑁆𑀲 𑀦𑀸𑀫𑀸𑀢𑀺 𑀏𑀢𑁆𑀣 𑀦𑀸𑀫𑀲𑀤𑁆𑀤𑁄 𑀕𑀭𑀳𑀢𑁆𑀣𑁄 ‘‘𑀅𑀢𑁆𑀣𑀻’’𑀢𑀺𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀅𑀢𑁆𑀣𑀺 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀇𑀢𑁄𑀧𑀻𑀢𑀺 𑀧𑀢𑁆𑀢𑀢𑁄𑀧𑀺. 𑀢𑀢𑁆𑀭𑀸𑀧𑀻𑀢𑀺 𑀢𑀲𑁆𑀫𑀺𑀁 𑀯𑀘𑀦𑁂𑀧𑀺.

𑀲𑀫𑀁𑀲𑀓𑀦𑁆𑀢𑀺 𑀫𑀁𑀲𑁂𑀦 𑀲𑀳 𑀧𑀯𑀢𑁆𑀢𑀁. 𑀭𑀲𑀦𑁆𑀢𑀺 𑀤𑁆𑀭𑀯𑀁. 𑀢𑀦𑁆𑀢𑀺 𑀯𑀘𑀦𑀁. 𑀧𑀝𑀺𑀓𑁆𑀔𑀺𑀧𑀢𑁄 𑀳𑁄𑀢𑀺. 𑀓𑀲𑁆𑀫𑀸? 𑀫𑀘𑁆𑀙𑁄 𑀘 𑀭𑀲𑁄 𑀘 𑀫𑀘𑁆𑀙𑁂𑀦 𑀫𑀺𑀲𑁆𑀲𑁄 𑀭𑀲𑁄 𑀘𑀸𑀢𑀺 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄. 𑀇𑀤𑀦𑁆𑀢𑀺 𑀯𑀢𑁆𑀣𑀼𑀁. 𑀫𑀁𑀲𑀁 𑀯𑀺𑀲𑀼𑀁 𑀓𑀢𑁆𑀯𑀸𑀢𑀺 ‘‘𑀫𑀁𑀲𑀲𑁆𑀲 𑀭𑀲𑀁 𑀫𑀁𑀲𑀭𑀲’’𑀦𑁆𑀢𑀺 𑀫𑀁𑀲𑀧𑀤𑀢𑁆𑀣𑀲𑁆𑀲 𑀧𑀥𑀸𑀦𑀪𑀸𑀯𑀁 𑀅𑀓𑀢𑁆𑀯𑀸, 𑀭𑀲𑀧𑀤𑀢𑁆𑀣𑀲𑁆𑀲𑁂𑀯 𑀧𑀥𑀸𑀦𑀪𑀸𑀯𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀆𑀧𑀼𑀘𑁆𑀙𑀦𑁆𑀢𑀦𑁆𑀢𑀺 ‘‘𑀫𑀁𑀲𑀭𑀲𑀁 𑀕𑀡𑁆𑀳𑀣𑀸’’𑀢𑀺 𑀆𑀧𑀼𑀘𑁆𑀙𑀦𑁆𑀢𑀁. 𑀢𑀦𑁆𑀢𑀺 𑀫𑀁𑀲𑀁. 𑀓𑀭𑀫𑁆𑀩𑀓𑁄𑀢𑀺 𑀫𑀺𑀲𑁆𑀲𑀓𑀸𑀥𑀺𑀯𑀘𑀦𑀫𑁂𑀢𑀁. 𑀬𑀜𑁆𑀳𑀺 𑀅𑀜𑁆𑀜𑁂𑀦 𑀅𑀜𑁆𑀜𑁂𑀦 𑀫𑀺𑀲𑁆𑀲𑁂𑀢𑁆𑀯𑀸 𑀓𑀭𑁄𑀦𑁆𑀢𑀺, 𑀲𑁄 ‘‘𑀓𑀭𑀫𑁆𑀩𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀓𑀭𑁄𑀢𑀺 𑀲𑀫𑀽𑀳𑀁 𑀅𑀯𑀬𑀯𑀺𑀦𑁆𑀢𑀺 𑀓𑀭𑁄, 𑀓𑀭𑀻𑀬𑀢𑀺 𑀯𑀸 𑀲𑀫𑀽𑀳𑁂𑀦 𑀅𑀯𑀬𑀯𑀺𑀦𑀸𑀢𑀺 𑀓𑀭𑁄, 𑀅𑀯𑀬𑀯𑁄, 𑀢𑀁 𑀯𑀓𑀢𑀺 𑀆𑀤𑀤𑀸𑀢𑀻𑀢𑀺 𑀓𑀭𑀫𑁆𑀩𑀓𑁄, 𑀲𑀫𑀽𑀳𑁄. ‘‘𑀓𑀤𑀫𑁆𑀩𑀓𑁄’’𑀢𑀺𑀧𑀺 𑀧𑀸𑀞𑁄, 𑀲𑁄𑀧𑀺 𑀬𑀼𑀢𑁆𑀢𑁄𑀬𑁂𑀯 𑀅𑀦𑀼𑀫𑀢𑀢𑁆𑀢𑀸 𑀧𑀡𑁆𑀟𑀺𑀢𑁂𑀳𑀺. 𑀅𑀪𑀺𑀥𑀸𑀦𑁂𑀧𑀺 𑀏𑀯𑀫𑁂𑀯 𑀅𑀢𑁆𑀣𑀻. 𑀅𑀢𑁆𑀣𑁄 𑀧𑀦 𑀅𑀜𑁆𑀜𑀣𑀸 𑀘𑀺𑀦𑁆𑀢𑁂𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀯𑀸 𑀅𑀢𑁆𑀣𑁂 𑀭𑀓𑀸𑀭𑀲𑁆𑀲 𑀤𑀓𑀸𑀭𑁄 𑀓𑀸𑀢𑀩𑁆𑀩𑁄. 𑀫𑀁𑀲𑁂𑀦 𑀫𑀺𑀲𑁆𑀲𑁄, 𑀮𑀓𑁆𑀔𑀺𑀢𑁄 𑀯𑀸 𑀓𑀭𑀫𑁆𑀩𑀓𑁄 𑀫𑀁𑀲𑀓𑀭𑀫𑁆𑀩𑀓𑁄. 𑀦 𑀧𑀯𑀸𑀭𑁂𑀢𑀻𑀢𑀺 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀫𑀺𑀲𑁆𑀲𑀓𑀢𑁆𑀢𑀸 𑀦 𑀧𑀯𑀸𑀭𑁂𑀢𑀺. 𑀧𑀯𑀸𑀭𑁂𑀢𑀻𑀢𑀺 𑀫𑀁𑀲𑁂𑀦 𑀫𑀺𑀲𑁆𑀲𑀺𑀢𑀢𑁆𑀢𑀸 𑀧𑀯𑀸𑀭𑁂𑀢𑀺.

𑀬𑁄 𑀧𑀦 𑀧𑀝𑀺𑀓𑁆𑀔𑀺𑀧𑀢𑀺, 𑀲𑁄 𑀧𑀯𑀸𑀭𑀺𑀢𑁄𑀯 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀦𑀺𑀫𑀦𑁆𑀢𑀦𑁂𑀢𑀺 𑀦𑀺𑀫𑀦𑁆𑀢𑀦𑀝𑁆𑀞𑀸𑀦𑁂. 𑀳𑀻𑀢𑀺 𑀲𑀘𑁆𑀘𑀁. 𑀢𑀢𑁆𑀣𑀸𑀢𑀺 𑀓𑀼𑀭𑀼𑀦𑁆𑀤𑀺𑀬𑀁. 𑀬𑁂𑀦𑀸𑀢𑀺 𑀬𑁂𑀦 𑀪𑀢𑁆𑀢𑁂𑀦. 𑀏𑀢𑁆𑀣𑀸𑀢𑀺 ‘‘𑀬𑀸𑀕𑀼𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀯𑀘𑀦𑁂. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀸𑀢𑀺 ‘‘𑀬𑀸𑀕𑀼𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀯𑀘𑀦𑁂. 𑀤𑀼𑀤𑁆𑀤𑀲𑀦𑁆𑀢𑀺 𑀤𑀼𑀓𑁆𑀓𑀭𑀁 𑀤𑀲𑁆𑀲𑀦𑀁. 𑀇𑀤𑀜𑁆𑀘𑀸𑀢𑀺 ‘‘𑀫𑀺𑀲𑁆𑀲𑀓𑀁 𑀕𑀡𑁆𑀳𑀣𑀸’’𑀢𑀺𑀯𑀘𑀦𑀜𑁆𑀘. 𑀦 𑀲𑀫𑀸𑀦𑁂𑀢𑀩𑁆𑀩𑀦𑁆𑀢𑀺 𑀲𑀫𑀁 𑀦 𑀆𑀦𑁂𑀢𑀩𑁆𑀩𑀁, 𑀲𑀫𑀸𑀦𑀁 𑀯𑀸 𑀦 𑀓𑀸𑀢𑀩𑁆𑀩𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀇𑀤𑀁 𑀧𑀦𑀸𑀢𑀺 𑀫𑀺𑀲𑁆𑀲𑀓𑀁 𑀧𑀦. 𑀏𑀢𑁆𑀣𑀸𑀢𑀺 𑀫𑀺𑀲𑁆𑀲𑀓𑁂. 𑀯𑀺𑀲𑀼𑀁 𑀓𑀢𑁆𑀯𑀸𑀢𑀺 𑀭𑀲𑀔𑀻𑀭𑀲𑀧𑁆𑀧𑀻𑀦𑀺 𑀆𑀯𑁂𑀡𑀺𑀁 𑀓𑀢𑁆𑀯𑀸. 𑀢𑀦𑁆𑀢𑀺 𑀭𑀲𑀸𑀤𑀺𑀁.

𑀓𑀤𑁆𑀤𑀻𑀬𑀢𑀺 𑀫𑀤𑁆𑀤𑀻𑀬𑀢𑀻𑀢𑀺 𑀓𑀤𑁆𑀤𑀫𑁄. 𑀉𑀦𑁆𑀤𑀢𑀺 𑀧𑀲𑀯𑀢𑀺 𑀯𑀟𑁆𑀠𑀢𑀻𑀢𑀺 𑀉𑀤𑀓𑀁. 𑀉𑀦𑁆𑀤𑀢𑀺 𑀯𑀸 𑀓𑁆𑀮𑁂𑀤𑀦𑀁 𑀓𑀭𑁄𑀢𑀻𑀢𑀺 𑀉𑀤𑀓𑀁, 𑀦𑀺𑀮𑀻𑀦𑁂 𑀲𑀢𑁆𑀢𑁂 𑀕𑀼𑀧𑀢𑀺 𑀭𑀓𑁆𑀔𑀢𑀻𑀢𑀺 𑀕𑀼𑀫𑁆𑀩𑁄, 𑀕𑀼𑀳𑀢𑀺 𑀲𑀁𑀯𑀭𑀢𑀻𑀢𑀺 𑀯𑀸 𑀕𑀼𑀫𑁆𑀩𑁄. 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑁂𑀦𑀸𑀢𑀺 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀆𑀬𑀦𑁆𑀢𑁂𑀦. 𑀢𑀦𑁆𑀢𑀺 𑀦𑀸𑀯𑀁 𑀯𑀸 𑀲𑁂𑀢𑀼𑀁 𑀯𑀸. 𑀫𑀚𑁆𑀛𑀦𑁆𑀳𑀺𑀓𑀦𑁆𑀢𑀺 𑀅𑀳𑀲𑁆𑀲 𑀫𑀚𑁆𑀛𑀁 𑀫𑀚𑁆𑀛𑀦𑁆𑀳𑀁, 𑀅𑀳𑀲𑀤𑁆𑀤𑀲𑁆𑀲 𑀦𑁆𑀳𑀸𑀤𑁂𑀲𑁄, 𑀫𑀚𑁆𑀛𑀦𑁆𑀳𑀁 𑀏𑀯 𑀫𑀚𑁆𑀛𑀦𑁆𑀳𑀺𑀓𑀁. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀫𑀚𑁆𑀛𑀦𑁆𑀢𑀺𑀓𑀦𑁆𑀢𑀺 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀅𑀧𑀸𑀞𑁄𑀬𑁂𑀯. 𑀬𑁄 𑀞𑀺𑀢𑁄 𑀧𑀯𑀸𑀭𑁂𑀢𑀺, 𑀢𑁂𑀦 𑀞𑀺𑀢𑁂𑀦𑁂𑀯 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀆𑀦𑀺𑀲𑀤𑀦𑁆𑀢𑀺 𑀧𑀻𑀞𑁂 𑀨𑀼𑀝𑁆𑀞𑀆𑀦𑀺𑀲𑀤𑀫𑀁𑀲𑀁. 𑀅𑀘𑀸𑀮𑁂𑀢𑁆𑀯𑀸𑀢𑀺 𑀅𑀘𑀸𑀯𑁂𑀢𑁆𑀯𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀉𑀧𑀭𑀺 𑀘 𑀧𑀲𑁆𑀲𑁂𑀲𑀼 𑀘 𑀅𑀫𑁄𑀘𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀺𑀬 𑀞𑀸𑀦𑀸𑀘𑀸𑀯𑀦𑀁 𑀦 𑀯𑁂𑀤𑀺𑀢𑀩𑁆𑀩𑀁. 𑀲𑀁𑀲𑀭𑀺𑀢𑀼𑀦𑁆𑀢𑀺 𑀲𑀁𑀲𑀩𑁆𑀩𑀺𑀢𑀼𑀁. 𑀦𑀦𑁆𑀢𑀺 𑀪𑀺𑀓𑁆𑀔𑀼𑀁.

𑀅𑀢𑀺𑀭𑁂𑀓𑀁 𑀭𑀺𑀘𑀢𑀺 𑀕𑀘𑁆𑀙𑀢𑀻𑀢𑀺 𑀅𑀢𑀺𑀭𑀺𑀢𑁆𑀢𑀁, 𑀦 𑀅𑀢𑀺𑀭𑀺𑀢𑁆𑀢𑀁 𑀅𑀦𑀢𑀺𑀭𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀅𑀢𑀺𑀭𑀺𑀢𑁆𑀢’’𑀦𑁆𑀢𑀺. ‘‘𑀅𑀥𑀺𑀓’’𑀦𑁆𑀢𑀺𑀇𑀫𑀺𑀦𑀸 𑀅𑀢𑀺𑀭𑀺𑀢𑁆𑀢𑀲𑀤𑁆𑀤𑀲𑁆𑀲 𑀅𑀢𑀺𑀲𑀼𑀜𑁆𑀜𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀥𑀺 𑀳𑀼𑀢𑁆𑀯𑀸 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀥𑀺𑀓𑀁. 𑀢𑀁 𑀧𑀦𑀸𑀢𑀺 𑀅𑀦𑀢𑀺𑀭𑀺𑀢𑁆𑀢𑀁 𑀧𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 ‘‘𑀅𑀓𑀧𑁆𑀧𑀺𑀬𑀓𑀢’’𑀦𑁆𑀢𑀺𑀆𑀤𑀺𑀯𑀘𑀦𑁂. 𑀯𑀺𑀢𑁆𑀣𑀸𑀭𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀅𑀢𑀺𑀭𑀺𑀢𑁆𑀢𑀁 𑀓𑀸𑀢𑀩𑁆𑀩𑁂𑀲𑀼 𑀯𑀢𑁆𑀣𑀽𑀲𑀼. 𑀬𑀁 𑀨𑀮𑀁 𑀯𑀸 𑀬𑀁 𑀓𑀦𑁆𑀤𑀫𑀽𑀮𑀸𑀤𑀺 𑀯𑀸 𑀅𑀓𑀢𑀦𑁆𑀢𑀺 𑀬𑁄𑀚𑀦𑀸. 𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀯𑀸𑀢𑀺 𑀓𑀼𑀮𑀤𑀽𑀲𑀓𑀓𑀫𑁆𑀫𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀁 𑀅𑀓𑀧𑁆𑀧𑀺𑀬𑀪𑁄𑀚𑀦𑀁 𑀯𑀸 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄𑀢𑀺 𑀯𑀺𑀦𑀬𑀥𑀭𑁄 𑀪𑀺𑀓𑁆𑀔𑀼. 𑀢𑁂𑀦 𑀓𑀢𑀦𑁆𑀢𑀺 𑀬𑁄𑀚𑀦𑀸. ‘‘𑀪𑀼𑀢𑁆𑀢𑀸𑀯𑀺𑀦𑀸 𑀧𑀯𑀸𑀭𑀺𑀢𑁂𑀦 𑀆𑀲𑀦𑀸 𑀯𑀼𑀝𑁆𑀞𑀺𑀢𑁂𑀦 𑀓𑀢’’𑀦𑁆𑀢𑀺𑀯𑀘𑀦𑀢𑁄 𑀪𑀼𑀢𑁆𑀢𑀸𑀯𑀺𑀦𑀸 𑀅𑀧𑀯𑀸𑀭𑀺𑀢𑁂𑀦 𑀆𑀲𑀦𑀸 𑀯𑀼𑀝𑁆𑀞𑀺𑀢𑁂𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁. 𑀢𑀲𑁆𑀫𑀸 𑀧𑀸𑀢𑁄 𑀅𑀤𑁆𑀥𑀸𑀦𑀁 𑀕𑀘𑁆𑀙𑀦𑁆𑀢𑁂𑀲𑀼 𑀤𑁆𑀯𑀻𑀲𑀼 𑀏𑀓𑁄 𑀧𑀯𑀸𑀭𑀺𑀢𑁄, 𑀢𑀲𑁆𑀲 𑀇𑀢𑀭𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀁 𑀪𑀺𑀓𑁆𑀔𑀁 𑀅𑀢𑁆𑀢𑀦𑀸 𑀅𑀪𑀼𑀢𑁆𑀯𑀸𑀧𑀺 ‘‘𑀅𑀮𑀫𑁂𑀢𑀁 𑀲𑀩𑁆𑀩’’𑀦𑁆𑀢𑀺 𑀓𑀸𑀢𑀼𑀁 𑀮𑀪𑀢𑀺 𑀏𑀯. 𑀬𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁. ‘‘𑀢𑀤𑀼𑀪𑀬𑀫𑁆𑀧𑀻’’𑀢𑀺𑀇𑀫𑀺𑀦𑀸 𑀅𑀢𑀺𑀭𑀺𑀢𑁆𑀢𑀜𑁆𑀘 𑀅𑀢𑀺𑀭𑀺𑀢𑁆𑀢𑀜𑁆𑀘 𑀅𑀢𑀺𑀭𑀺𑀢𑁆𑀢𑀁, 𑀦 𑀅𑀢𑀺𑀭𑀺𑀢𑁆𑀢𑀁 𑀅𑀦𑀢𑀺𑀭𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀢𑀲𑁆𑀲𑁂𑀯𑀸𑀢𑀺 𑀅𑀦𑀢𑀺𑀭𑀺𑀢𑁆𑀢𑀲𑁆𑀲𑁂𑀯. 𑀏𑀢𑁆𑀣𑀸𑀢𑀺 𑀅𑀦𑀢𑀺𑀭𑀺𑀢𑁆𑀢𑁂, ‘‘𑀓𑀧𑁆𑀧𑀺𑀬𑀓𑀢’’𑀦𑁆𑀢𑀺 𑀆𑀤𑀻𑀲𑀼 𑀲𑀢𑁆𑀢𑀲𑀼 𑀯𑀺𑀦𑀬𑀓𑀫𑁆𑀫𑀸𑀓𑀸𑀭𑁂𑀲𑀼 𑀯𑀸. 𑀅𑀦𑀦𑁆𑀢𑀭𑁂𑀢𑀺 𑀯𑀺𑀦𑀬𑀥𑀭𑀲𑁆𑀲 𑀅𑀦𑀦𑁆𑀢𑀭𑁂 𑀆𑀲𑀦𑁂. 𑀧𑀢𑁆𑀢𑀢𑁄 𑀦𑀻𑀳𑀭𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑁂𑀯𑀸𑀢𑀺 𑀪𑀼𑀜𑁆𑀚𑀦𑀝𑁆𑀞𑀸𑀦𑁂𑀬𑁂𑀯. 𑀢𑀲𑁆𑀲𑀸𑀢𑀺 𑀦𑀺𑀲𑀺𑀦𑁆𑀦𑀲𑁆𑀲. 𑀢𑁂𑀦𑀸𑀢𑀺 𑀪𑀢𑁆𑀢𑀁 𑀆𑀦𑁂𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. ‘‘𑀦𑀺𑀲𑀺𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸’’𑀢𑀺 𑀓𑀸𑀭𑀺𑀢𑀓𑀫𑁆𑀫𑀁 𑀆𑀦𑁂𑀢𑀩𑁆𑀩𑀁. 𑀓𑀲𑁆𑀫𑀸 ‘‘𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑁄 𑀆𑀳 ‘‘𑀓𑀲𑁆𑀫𑀸’’𑀢𑀺. 𑀳𑀻𑀢𑀺 𑀓𑀸𑀭𑀡𑀁. 𑀬𑀲𑁆𑀫𑀸 𑀅𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀳𑀢𑁆𑀣𑀁 𑀥𑁄𑀯𑀺𑀢𑁆𑀯𑀸𑀢𑀺 𑀫𑀬𑀸 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲𑀸𑀢𑀺 𑀪𑀢𑁆𑀢𑀁 𑀆𑀦𑁂𑀦𑁆𑀢𑀲𑁆𑀲. 𑀬𑁂𑀦𑀸𑀢𑀺 𑀯𑀺𑀦𑀬𑀥𑀭𑁂𑀦. 𑀧𑀼𑀦 𑀬𑁂𑀦𑀸𑀢𑀺 𑀏𑀯𑀫𑁂𑀯. 𑀬𑀜𑁆𑀘𑀸𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀜𑁆𑀘. 𑀬𑁂𑀦 𑀯𑀺𑀦𑀬𑀥𑀭𑁂𑀦 𑀧𑀞𑀫𑀁 𑀅𑀓𑀢𑀁, 𑀢𑁂𑀦𑁂𑀯 𑀓𑀢𑁆𑀢𑀩𑁆𑀩𑀁. 𑀬𑀜𑁆𑀘 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀧𑀞𑀫𑀁 𑀅𑀓𑀢𑀁, 𑀢𑀜𑁆𑀜𑁂𑀯 𑀓𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀢𑀺 𑀧𑀞𑀫𑀪𑀸𑀚𑀦𑁂. 𑀳𑀻𑀢𑀺 𑀲𑀘𑁆𑀘𑀁. 𑀧𑀞𑀫𑀪𑀸𑀚𑀦𑀁 𑀲𑀼𑀤𑁆𑀥𑀁 𑀥𑁄𑀯𑀺𑀢𑁆𑀯𑀸 𑀓𑀢𑀫𑁆𑀧𑀺 𑀦𑀺𑀤𑁆𑀤𑁄𑀲𑀫𑁂𑀯. 𑀢𑁂𑀦 𑀪𑀺𑀓𑁆𑀔𑀼𑀦𑀸𑀢𑀺 𑀧𑀯𑀸𑀭𑀺𑀢𑁂𑀦 𑀪𑀺𑀓𑁆𑀔𑀼𑀦𑀸.

𑀓𑀼𑀡𑁆𑀟𑁂𑀧𑀻𑀢𑀺 𑀉𑀓𑁆𑀔𑀮𑀺𑀬𑀫𑁆𑀧𑀺. 𑀲𑀸 𑀳𑀺 𑀓𑀼𑀟𑀢𑀺 𑀑𑀤𑀦𑀸𑀤𑀺𑀁 𑀤𑀸𑀳𑀁 𑀓𑀭𑁄𑀢𑀻𑀢𑀺 𑀓𑀼𑀡𑁆𑀟𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀦𑁆𑀢𑀺 𑀅𑀢𑀺𑀭𑀺𑀢𑁆𑀢𑀓𑀢𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁. 𑀬𑁂𑀦 𑀧𑀦𑀸𑀢𑀺 𑀯𑀺𑀦𑀬𑀥𑀭𑁂𑀦 𑀧𑀦. 𑀪𑀺𑀓𑁆𑀔𑀼𑀁 𑀦𑀺𑀲𑀻𑀤𑀸𑀧𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀗𑁆𑀕𑀮𑀦𑀺𑀫𑀦𑁆𑀢𑀦𑁂𑀢𑀺 𑀫𑀗𑁆𑀕𑀮𑀢𑁆𑀣𑀸𑀬 𑀦𑀺𑀫𑀦𑁆𑀢𑀦𑀝𑁆𑀞𑀸𑀦𑁂. 𑀢𑀢𑁆𑀣𑀸𑀢𑀺 𑀫𑀗𑁆𑀕𑀮𑀦𑀺𑀫𑀦𑁆𑀢𑀦𑁂. 𑀓𑀭𑁄𑀦𑁆𑀢𑁂𑀦𑀸𑀢𑀺 𑀓𑀭𑁄𑀦𑁆𑀢𑁂𑀦 𑀯𑀺𑀦𑀬𑀥𑀭𑁂𑀦.

𑀕𑀺𑀮𑀸𑀦𑁂𑀦 𑀪𑀼𑀜𑁆𑀚𑀺𑀢𑀸𑀯𑀲𑁂𑀲𑀫𑁂𑀯 𑀦 𑀓𑁂𑀯𑀮𑀁 𑀕𑀺𑀮𑀸𑀦𑀸𑀢𑀺𑀭𑀺𑀢𑁆𑀢𑀁 𑀦𑀸𑀫, 𑀕𑀺𑀮𑀸𑀦𑀁 𑀧𑀦 𑀉𑀤𑁆𑀤𑀺𑀲𑁆𑀲 𑀆𑀪𑀢𑀁 𑀕𑀺𑀮𑀸𑀦𑀸𑀢𑀺𑀭𑀺𑀢𑁆𑀢𑀫𑁂𑀯 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺. 𑀬𑀁𑀓𑀺𑀜𑁆𑀘𑀺 𑀕𑀺𑀮𑀸𑀦𑀦𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀁 𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀕𑀺𑀮𑀸𑀦𑀁. 𑀬𑀁 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀢𑀁 𑀅𑀲𑀁𑀲𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀅𑀦𑀸𑀳𑀸𑀭𑀢𑁆𑀣𑀸𑀬𑀸𑀢𑀺 𑀧𑀺𑀧𑀸𑀲𑀘𑁆𑀙𑁂𑀤𑀦𑀆𑀩𑀸𑀥𑀯𑀽𑀧𑀲𑀫𑀢𑁆𑀣𑀸𑀬.

𑁨𑁪𑁧. 𑀲𑀢𑀺 𑀧𑀘𑁆𑀘𑀬𑁂𑀢𑀺 𑀏𑀢𑁆𑀣 𑀧𑀘𑁆𑀘𑀬𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀺𑀧𑀸𑀲𑀸𑀬 𑀲𑀢𑀻’’𑀢𑀺 𑀘 ‘‘𑀆𑀩𑀸𑀥𑁂 𑀲𑀢𑀻’’𑀢𑀺 𑀘 𑀯𑀼𑀢𑁆𑀢𑀁. 𑀢𑁂𑀦 𑀢𑁂𑀦𑀸𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦 𑀘 𑀬𑀸𑀯𑀚𑀻𑀯𑀺𑀓𑁂𑀦 𑀘. 𑀢𑀲𑁆𑀲𑀸𑀢𑀺 𑀆𑀩𑀸𑀥𑀲𑁆𑀲. 𑀇𑀤𑀁 𑀧𑀤𑀁 ‘‘𑀉𑀧𑀲𑀫𑀦𑀢𑁆𑀣’’𑀦𑁆𑀢𑀺 𑀏𑀢𑁆𑀣 𑀲𑀫𑀼𑀥𑀸𑀢𑀼𑀬𑀸 𑀲𑀫𑁆𑀩𑀦𑁆𑀥𑁂 𑀲𑀫𑁆𑀩𑀦𑁆𑀥𑁄, 𑀬𑀼𑀧𑀘𑁆𑀘𑀬𑁂𑀦 𑀲𑀫𑁆𑀩𑀦𑁆𑀥𑁂 𑀓𑀫𑁆𑀫𑀦𑁆𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑀁

𑁨𑁪𑁨. 𑀙𑀝𑁆𑀞𑁂 𑀦 𑀆𑀘𑀭𑀺𑀢𑀩𑁆𑀩𑁄𑀢𑀺 𑀅𑀦𑀸𑀘𑀸𑀭𑁄𑀢𑀺 𑀯𑀼𑀢𑁆𑀢𑁂 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁄𑀢𑀺 𑀆𑀳 ‘‘𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫’’𑀦𑁆𑀢𑀺. ‘‘𑀓𑀭𑁄𑀢𑀻’’𑀢𑀺𑀇𑀫𑀺𑀦𑀸 ‘‘𑀅𑀢𑁆𑀢𑀸𑀦𑀫𑀸𑀘𑀭𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀘𑀭𑀲𑀤𑁆𑀤𑁄 𑀓𑀭𑀲𑀤𑁆𑀤𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀦𑀦𑁆𑀥𑀻𑀢𑀺 𑀏𑀢𑁆𑀣 𑀉𑀧𑀲𑀤𑁆𑀤𑁄 𑀉𑀧𑀦𑀸𑀳𑀢𑁆𑀣𑁄, 𑀦𑀳𑀥𑀸𑀢𑀼 𑀩𑀦𑁆𑀥𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀧𑀦𑀸𑀳’’𑀦𑁆𑀢𑀺𑀆𑀤𑀺. 𑀚𑀦𑀺𑀢𑁄 𑀉𑀧𑀦𑀸𑀳𑁄 𑀬𑁂𑀦𑀸𑀢𑀺 𑀚𑀦𑀺𑀢𑀉𑀧𑀦𑀸𑀳𑁄. 𑀇𑀫𑀺𑀦𑀸 ‘‘𑀉𑀧𑀦𑀦𑁆𑀥𑁄’’𑀢𑀺 𑀧𑀤𑀲𑁆𑀲 𑀉𑀧𑀦𑀳𑀢𑀻𑀢𑀺 𑀉𑀧𑀦𑀦𑁆𑀥𑁄𑀢𑀺 𑀓𑀢𑁆𑀣𑀼𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁨𑁪𑁩. 𑀅𑀪𑀺𑀳𑀝𑁆𑀞𑀼𑀦𑁆𑀢𑀺 𑀏𑀢𑁆𑀣 𑀢𑀼𑀁𑀧𑀘𑁆𑀘𑀬𑁄 𑀢𑁆𑀯𑀸𑀧𑀘𑁆𑀘𑀬𑀢𑁆𑀣𑁄𑀢𑀺 𑀆𑀳 ‘‘𑀅𑀪𑀺𑀳𑀭𑀺𑀢𑁆𑀯𑀸’’𑀢𑀺. 𑀧𑀤𑀪𑀸𑀚𑀦𑁂 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀥𑀸𑀭𑀡𑀫𑁂𑀯 𑀅𑀢𑁆𑀣𑀦𑁆𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀲𑁆𑀲. 𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀲𑀸𑀫𑀁 𑀚𑀸𑀦𑀦𑁂𑀦 𑀘 𑀅𑀜𑁆𑀜𑁂𑀲𑀫𑀸𑀭𑁄𑀘𑀦𑁂𑀦 𑀘 𑀢𑀲𑁆𑀲𑀸𑀭𑁄𑀘𑀦𑁂𑀦 𑀘𑀸𑀢𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀆𑀲𑀸𑀤𑀻𑀬𑀢𑁂 𑀫𑀗𑁆𑀓𑀼𑀁 𑀓𑀭𑀻𑀬𑀢𑁂 𑀆𑀲𑀸𑀤𑀦𑀁, 𑀢𑀁 𑀅𑀧𑁂𑀓𑁆𑀔𑁄 𑀆𑀲𑀸𑀤𑀦𑀸𑀧𑁂𑀓𑁆𑀔𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀲𑀸𑀤𑀦’’𑀦𑁆𑀢𑀺𑀆𑀤𑀺.

𑀬𑀲𑁆𑀲 𑀅𑀢𑁆𑀣𑀸𑀬 𑀅𑀪𑀺𑀳𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀭𑀲𑁆𑀲𑀸𑀢𑀺 𑀅𑀪𑀺𑀳𑀸𑀭𑀓𑀢𑁄 𑀅𑀜𑁆𑀜𑀲𑁆𑀲 𑀪𑀼𑀢𑁆𑀢𑀲𑁆𑀲𑀸𑀢𑀺. 𑀙𑀝𑁆𑀞𑀁.

𑁭. 𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁

𑁨𑁪𑁭. 𑀲𑀢𑁆𑀢𑀫𑁂 𑀕𑀺𑀭𑀺𑀫𑁆𑀳𑀻𑀢𑀺 𑀧𑀩𑁆𑀩𑀢𑀫𑁆𑀳𑀺. 𑀲𑁄 𑀳𑀺 𑀳𑀺𑀫𑀯𑀫𑀦𑀸𑀤𑀺𑀯𑀲𑁂𑀦 𑀚𑀮𑀁, 𑀲𑀸𑀭𑀪𑀽𑀢𑀸𑀦𑀺 𑀘 𑀪𑁂𑀲𑀚𑁆𑀚𑀸𑀤𑀺𑀯𑀢𑁆𑀣𑀽𑀦𑀺 𑀕𑀺𑀭𑀢𑀺 𑀦𑀺𑀕𑁆𑀕𑀺𑀭𑀢𑀻𑀢𑀺 𑀕𑀺𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀕𑁆𑀕𑀲𑀫𑀚𑁆𑀚𑁄𑀢𑀺 𑀉𑀢𑁆𑀢𑀫𑀲𑀫𑀚𑁆𑀚𑁄. 𑀇𑀫𑁂𑀳𑀺 𑀧𑀤𑁂𑀳𑀺 𑀅𑀕𑁆𑀕𑁄 𑀲𑀫𑀚𑁆𑀚𑁄 𑀅𑀕𑁆𑀕𑀲𑀫𑀚𑁆𑀚𑁄, 𑀕𑀺𑀭𑀺𑀫𑁆𑀳𑀺 𑀧𑀯𑀢𑁆𑀢𑁄 𑀅𑀕𑁆𑀕𑀲𑀫𑀚𑁆𑀚𑁄 𑀕𑀺𑀭𑀕𑁆𑀕𑀲𑀫𑀚𑁆𑀚𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀫𑀚𑁆𑀚𑁄𑀢𑀺 𑀘 𑀲𑀪𑀸. 𑀲𑀸 𑀳𑀺 𑀲𑀫𑀸𑀕𑀫𑀁 𑀅𑀚𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀚𑀦𑀸 𑀏𑀢𑁆𑀣𑀸𑀢𑀺 𑀲𑀫𑀚𑁆𑀚𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀕𑀺𑀭𑀺𑀲𑁆𑀲 𑀯𑀸’’𑀢𑀺𑀆𑀤𑀺𑀦𑀸 𑀕𑀺𑀭𑀺𑀲𑁆𑀲 𑀅𑀕𑁆𑀕𑁄 𑀓𑁄𑀝𑀺 𑀕𑀺𑀭𑀕𑁆𑀕𑁄, 𑀢𑀲𑁆𑀫𑀺𑀁 𑀧𑀯𑀢𑁆𑀢𑁄 𑀲𑀫𑀚𑁆𑀚𑁄 𑀕𑀺𑀭𑀕𑁆𑀕𑀲𑀫𑀚𑁆𑀚𑁄𑀢𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀲𑁄𑀢𑀺 𑀕𑀺𑀭𑀕𑁆𑀕𑀲𑀫𑀚𑁆𑀚𑁄. 𑀪𑀯𑀺𑀲𑁆𑀲𑀢𑀺 𑀓𑀺𑀭𑀸𑀢𑀺 𑀬𑁄𑀚𑀦𑀸. 𑀪𑀽𑀫𑀺𑀪𑀸𑀕𑁂𑀢𑀺 𑀅𑀯𑀬𑀯𑀺𑀆𑀥𑀸𑀭𑁄, 𑀲𑀦𑁆𑀦𑀺𑀧𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀝𑀜𑁆𑀘 𑀦𑀸𑀝𑀓𑀜𑁆𑀘 𑀦𑀝𑀦𑀸𑀝𑀓𑀸𑀦𑀺. ‘‘𑀦𑀘𑁆𑀘𑀁 𑀕𑀻𑀢𑀁 𑀯𑀸𑀤𑀺𑀢𑀜𑁆𑀘𑀸’’𑀢𑀺 𑀇𑀤𑀁 𑀢𑀬𑀁 ‘‘𑀦𑀸𑀝𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀦𑁆𑀢𑀺 𑀦𑀝𑀦𑀸𑀝𑀓𑀸𑀦𑀁. 𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀲𑁆𑀲𑀦𑀸𑀬 𑀘 𑀲𑀯𑀦𑀸𑀬 𑀘. 𑀲𑀯𑀦𑀫𑁆𑀧𑀺 𑀳𑀺 𑀤𑀲𑁆𑀲𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀁. 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀊𑀦𑀯𑀻𑀲𑀢𑀺𑀯𑀲𑁆𑀲𑀲𑀺𑀓𑁆𑀔𑀸𑀧𑀤𑀲𑁆𑀲 𑀢𑀸𑀯 𑀅𑀧𑀜𑁆𑀜𑀢𑁆𑀢𑀢𑁆𑀢𑀸. 𑀢𑁂𑀢𑀺 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸. 𑀢𑀢𑁆𑀣𑀸𑀢𑀺 𑀕𑀺𑀭𑀕𑁆𑀕𑀲𑀫𑀚𑁆𑀚𑀁. 𑀅𑀣𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂. 𑀦𑁂𑀲𑀦𑁆𑀢𑀺 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸𑀦𑀁 𑀅𑀤𑀁𑀲𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀮𑀺𑀫𑁆𑀧𑁂𑀢𑁆𑀯𑀸𑀢𑀺 𑀯𑀺𑀮𑁂𑀧𑀦𑁂𑀳𑀺 𑀯𑀺𑀯𑀺𑀥𑀸𑀓𑀸𑀭𑁂𑀦 𑀮𑀺𑀫𑁆𑀧𑁂𑀢𑁆𑀯𑀸.

𑁨𑁪𑁯. ‘‘𑀯𑀺𑀓𑀸𑀮𑁂’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 𑀯𑀺𑀲𑁂𑀲𑀓𑀸𑀮𑁄𑀯 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀓𑀸𑀮𑁄’’𑀢𑀺𑀆𑀤𑀺. 𑀲𑁄 𑀘𑀸𑀢𑀺 𑀪𑁄𑀚𑀦𑀓𑀸𑀮𑁄 𑀘. 𑀫𑀚𑁆𑀛𑀦𑁆𑀳𑀺𑀓𑁄 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦𑁂𑀯𑀸𑀢𑀺 𑀪𑁄𑀚𑀦𑀓𑀸𑀮𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀏𑀯. 𑀅𑀲𑁆𑀲𑀸𑀢𑀺 ‘‘𑀯𑀺𑀓𑀸𑀮𑁂’’𑀢𑀺𑀧𑀤𑀲𑁆𑀲. ‘‘𑀯𑀺𑀓𑀸𑀮𑁄 𑀦𑀸𑀫…𑀧𑁂… 𑀅𑀭𑀼𑀡𑀼𑀕𑁆𑀕𑀫𑀦𑀸’’𑀢𑀺 𑀧𑀤𑀪𑀸𑀚𑀦𑁂𑀦 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸 𑀓𑀸𑀮𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄 𑀦𑀬𑁂𑀦 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑀢𑁄𑀢𑀺 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀢𑁄. 𑀲𑀽𑀭𑀺𑀬𑀲𑁆𑀲 𑀅𑀢𑀺𑀲𑀻𑀖𑀢𑁆𑀢𑀸 𑀯𑁂𑀕𑁂𑀦 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀁 𑀯𑀻𑀢𑀺𑀯𑀢𑁆𑀢𑁂𑀬𑁆𑀬𑀸𑀢𑀺 𑀆𑀳 ‘‘𑀓𑀼𑀓𑁆𑀓𑀼𑀘𑁆𑀘𑀓𑁂𑀦 𑀧𑀦 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺. 𑀓𑀸𑀮𑀢𑁆𑀣𑀫𑁆𑀪𑁄𑀢𑀺 𑀓𑀸𑀮𑀲𑁆𑀲 𑀚𑀸𑀦𑀦𑀢𑁆𑀣𑀸𑀬 𑀣𑀽𑀡𑁄. 𑀓𑀸𑀮𑀦𑁆𑀢𑀭𑁂𑀢𑀺 𑀓𑀸𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑁂.

𑀅𑀯𑀲𑁂𑀲𑀁 𑀔𑀸𑀤𑀦𑀻𑀬𑀁 𑀦𑀸𑀫𑀸𑀢𑀺 𑀏𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀬𑀦𑁆𑀢𑀺 𑀔𑀸𑀤𑀦𑀻𑀬𑀁 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀦𑀫𑀽𑀮𑀸𑀤𑀺𑀧𑀪𑁂𑀤𑀁 𑀬𑀫𑁆𑀧𑀺 𑀔𑀸𑀤𑀦𑀻𑀬𑀁 𑀅𑀢𑁆𑀣𑀺, 𑀢𑀫𑁆𑀧𑀺 𑀆𑀫𑀺𑀲𑀕𑀢𑀺𑀓𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀧𑀼𑀘𑁆𑀙𑀸𑀯𑀸𑀘𑀓𑀦𑀺𑀧𑀸𑀢𑀲𑀫𑀼𑀤𑀸𑀬𑁄. 𑀇𑀤𑀁 𑀔𑀸𑀤𑀦𑀻𑀬𑀁 𑀲𑁂𑀬𑁆𑀬𑀣𑀸 𑀓𑀢𑀫𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀫𑁆𑀧𑀻𑀢𑀺 𑀇𑀤𑀁 𑀤𑁆𑀯𑀸𑀤𑀲𑀯𑀺𑀥𑀫𑁆𑀧𑀺. 𑀧𑀺𑀲𑀤𑁆𑀤𑁂𑀦 𑀦 𑀧𑀽𑀯𑀸𑀤𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁆𑀣𑀸𑀢𑀺 𑀤𑁆𑀯𑀸𑀤𑀲𑀲𑀼 𑀔𑀸𑀤𑀦𑀻𑀬𑁂𑀲𑀼, 𑀆𑀥𑀸𑀭𑁂 𑀪𑀼𑀫𑁆𑀫𑀁. 𑀫𑀽𑀮𑀢𑀺 𑀧𑀢𑀺𑀝𑁆𑀞𑀸𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀫𑀽𑀮𑀁. 𑀔𑀸𑀤𑀺𑀢𑀩𑁆𑀩𑀦𑁆𑀢𑀺 𑀔𑀸𑀤𑀦𑀻𑀬𑀁. 𑀫𑀽𑀮𑀫𑁂𑀯 𑀔𑀸𑀤𑀦𑀻𑀬𑀁 𑀫𑀽𑀮𑀔𑀸𑀤𑀦𑀻𑀬𑀁, 𑀢𑀲𑁆𑀫𑀺𑀁 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀫𑀽𑀮𑀓𑀫𑀽𑀮𑀸𑀤𑀻𑀦𑀺 𑀮𑁄𑀓𑀲𑀗𑁆𑀓𑁂𑀢𑁄 𑀧𑀤𑁂𑀲𑀢𑁄𑀬𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀁 𑀢𑀜𑁆𑀳𑀺 𑀦𑀸𑀫𑀁 𑀅𑀚𑀸𑀦𑀦𑁆𑀢𑀸𑀦𑀁 𑀅𑀢𑀺𑀲𑀫𑁆𑀫𑀽𑀴𑁆𑀳𑀓𑀸𑀭𑀡𑀢𑁆𑀢𑀸 𑀲𑀳 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀯𑀘𑀦𑀢𑁆𑀣𑀁 𑀯𑀓𑁆𑀔𑀸𑀫. 𑀲𑀽𑀧𑀲𑁆𑀲 𑀳𑀺𑀢𑀁 𑀲𑀽𑀧𑁂𑀬𑁆𑀬𑀁, 𑀲𑀽𑀧𑁂𑀬𑁆𑀬𑀁 𑀧𑀡𑁆𑀡𑀁 𑀏𑀢𑁂𑀲𑀦𑁆𑀢𑀺 𑀲𑀽𑀧𑁂𑀬𑁆𑀬𑀧𑀡𑁆𑀡𑀸, 𑀢𑁂𑀲𑀁 𑀫𑀽𑀮𑀸𑀦𑀺 𑀲𑀽𑀧𑁂𑀬𑁆𑀬𑀧𑀡𑁆𑀡𑀫𑀽𑀮𑀸𑀦𑀺. 𑀆𑀫𑀻𑀬𑀢𑀺 𑀅𑀦𑁆𑀢𑁄 𑀧𑀯𑁂𑀲𑀻𑀬𑀢𑀻𑀢𑀺 𑀆𑀫𑀺𑀲𑁄, 𑀆𑀓𑀸𑀭𑁄 𑀅𑀦𑁆𑀢𑁄𑀓𑀭𑀡𑀢𑁆𑀣𑁄, 𑀆𑀫𑀺𑀲𑀲𑁆𑀲 𑀕𑀢𑀺 𑀯𑀺𑀬 𑀕𑀢𑀺 𑀏𑀢𑁂𑀲𑀦𑁆𑀢𑀺 𑀆𑀫𑀺𑀲𑀕𑀢𑀺𑀓𑀸𑀦𑀺 . 𑀏𑀢𑁆𑀣𑀸𑀢𑀺 𑀫𑀽𑀮𑁂𑀲𑀼. 𑀚𑀭𑀟𑁆𑀠𑀦𑁆𑀢𑀺 𑀚𑀭𑀪𑀽𑀢𑀁 𑀉𑀧𑀟𑁆𑀠𑀁. 𑀅𑀜𑁆𑀜𑀫𑁆𑀧𑀻𑀢𑀺 𑀯𑀚𑀓𑀮𑀺𑀫𑀽𑀮𑀢𑁄 𑀅𑀜𑁆𑀜𑀫𑁆𑀧𑀺.

𑀬𑀸𑀦𑀺 𑀧𑀦 𑀫𑀽𑀮𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀻𑀢𑀺 𑀬𑁄𑀚𑀦𑀸. 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀔𑀸𑀤𑀦𑀻𑀬𑀢𑁆𑀣𑀦𑁆𑀢𑀺 𑀔𑀸𑀤𑀦𑀻𑀬𑀲𑁆𑀲, 𑀔𑀸𑀤𑀦𑀻𑀬𑁂 𑀯𑀸 𑀯𑀺𑀚𑁆𑀚𑀫𑀸𑀦𑀁, 𑀔𑀸𑀤𑀦𑀻𑀬𑁂𑀦 𑀯𑀸 𑀓𑀸𑀢𑀩𑁆𑀩𑀁 𑀓𑀺𑀘𑁆𑀘𑀁, 𑀧𑀬𑁄𑀚𑀦𑀁 𑀯𑀸𑀢𑀺 𑀔𑀸𑀤𑀦𑀻𑀬𑀢𑁆𑀣𑀁. ‘‘𑀔𑀸𑀤𑀦𑀻𑀬𑁂’’𑀢𑀺𑀇𑀫𑀺𑀦𑀸 ‘‘𑀢𑀢𑁆𑀣 𑀯𑀼𑀢𑁆𑀢𑀸𑀪𑀺𑀥𑀫𑁆𑀫𑀢𑁆𑀣𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀔𑀸𑀤𑀦𑀻𑀬𑀢𑁆𑀣𑀧𑀤𑀲𑁆𑀲 𑀉𑀢𑁆𑀢𑀭𑀧𑀤𑀢𑁆𑀣𑀧𑀥𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀔𑀸𑀤𑀦𑀻𑀬𑀲𑁆𑀲, 𑀔𑀸𑀤𑀦𑀻𑀬𑁂 𑀯𑀸 𑀯𑀺𑀚𑁆𑀚𑀫𑀸𑀦𑀁, 𑀔𑀸𑀤𑀦𑀻𑀬𑁂𑀦 𑀯𑀸 𑀓𑀸𑀢𑀩𑁆𑀩𑀁 𑀓𑀺𑀘𑁆𑀘𑀁 𑀦𑀸𑀫 𑀚𑀺𑀖𑀘𑁆𑀙𑀸𑀳𑀭𑀡𑀫𑁂𑀯. 𑀬𑀜𑁆𑀳𑀺 𑀧𑀽𑀯𑀸𑀤𑀺𑀔𑀸𑀤𑀦𑀻𑀬𑀁 𑀔𑀸𑀤𑀺𑀢𑁆𑀯𑀸 𑀚𑀺𑀖𑀘𑁆𑀙𑀸𑀳𑀭𑀡𑀁 𑀳𑁄𑀢𑀺, 𑀢𑀲𑁆𑀲 𑀓𑀺𑀘𑁆𑀘𑀁 𑀓𑀺𑀘𑁆𑀘𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀓𑀺𑀘𑁆𑀘𑀁, 𑀧𑀬𑁄𑀚𑀦𑀁 𑀯𑀸 𑀦𑁂𑀯 𑀨𑀭𑀦𑁆𑀢𑀺, 𑀦𑁂𑀯 𑀦𑀺𑀧𑁆𑀨𑀸𑀤𑁂𑀦𑁆𑀢𑀺. 𑀏𑀲𑁂𑀯 𑀦𑀬𑁄 ‘‘𑀦 𑀪𑁄𑀚𑀦𑀻𑀬𑁂 𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀦𑁆𑀢𑀻’’𑀢𑀺𑀏𑀢𑁆𑀣𑀸𑀧𑀺.

𑀢𑁂𑀲𑀦𑁆𑀢𑀺 𑀫𑀽𑀮𑀸𑀦𑀁 𑀅𑀦𑁆𑀢𑁄, 𑀮𑀓𑁆𑀔𑀡𑀦𑁆𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀏𑀓𑀲𑁆𑀫𑀺𑀁 𑀚𑀦𑀧𑀤𑁂 𑀔𑀸𑀤𑀦𑀻𑀬𑀢𑁆𑀣𑀪𑁄𑀚𑀦𑀻𑀬𑀢𑁆𑀣𑁂𑀲𑀼 𑀨𑀭𑀫𑀸𑀦𑁂𑀲𑀼 𑀅𑀜𑁆𑀜𑁂𑀲𑀼𑀧𑀺 𑀚𑀦𑀧𑀤𑁂𑀲𑀼 𑀨𑀭𑀦𑁆𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀽’’𑀢𑀺 𑀯𑀺𑀘𑁆𑀙𑀸𑀧𑀤𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀳𑀺 𑀩𑀳𑀽𑀲𑀼 𑀚𑀦𑀧𑀤𑁂𑀲𑀼 𑀧𑀣𑀯𑀻𑀭𑀲𑀆𑀧𑁄𑀭𑀲𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀔𑀸𑀤𑀦𑀻𑀬𑀢𑁆𑀣𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀫𑀸𑀦𑀫𑁆𑀧𑀺 𑀏𑀓𑀲𑁆𑀫𑀺𑀁 𑀚𑀦𑀧𑀤𑁂 𑀧𑀣𑀯𑀻𑀭𑀲𑀆𑀧𑁄𑀭𑀲𑀯𑀺𑀧𑀢𑁆𑀢𑀺𑀯𑀲𑁂𑀦 𑀅𑀨𑀭𑀫𑀸𑀦𑀁 𑀪𑀯𑁂𑀬𑁆𑀬, 𑀯𑀺𑀓𑀸𑀭𑀯𑀲𑁂𑀦 𑀧𑀦 𑀢𑀢𑁆𑀣 𑀧𑀯𑀢𑁆𑀢𑀢𑁆𑀢𑀸 𑀢𑀁 𑀚𑀦𑀧𑀤𑀁 𑀧𑀫𑀸𑀡𑀁 𑀦 𑀓𑀸𑀢𑀩𑁆𑀩𑀁, 𑀕𑀳𑁂𑀢𑀩𑁆𑀩𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀓𑀢𑀺𑀆𑀳𑀸𑀭𑀯𑀲𑁂𑀦𑀸𑀢𑀺 𑀅𑀜𑁆𑀜𑁂𑀳𑀺 𑀬𑀸𑀯𑀓𑀸𑀮𑀺𑀓, 𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀳𑀺 𑀅𑀫𑀺𑀲𑁆𑀲𑀺𑀢𑀁 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸𑀯 𑀆𑀳𑀸𑀭𑀓𑀺𑀘𑁆𑀘𑀓𑀭𑀡𑀯𑀲𑁂𑀦. ‘‘𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀇𑀫𑀺𑀦𑀸 𑀅𑀜𑁆𑀜𑁂𑀲𑀁 𑀢𑀺𑀭𑀘𑁆𑀙𑀸𑀦𑀸𑀤𑀻𑀦𑀁 𑀔𑀸𑀤𑀦𑀻𑀬𑀢𑁆𑀣𑀪𑁄𑀚𑀦𑀻𑀬𑀢𑁆𑀣𑀁 𑀨𑀭𑀫𑀸𑀦𑀫𑁆𑀧𑀺 𑀦 𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀦𑁆𑀢𑀺 𑀫𑀽𑀮𑀁. 𑀳𑀻𑀢𑀺 𑀲𑀘𑁆𑀘𑀁. 𑀦𑀸𑀫𑀲𑀜𑁆𑀜𑀸𑀲𑀽𑀢𑀺 𑀦𑀸𑀫𑀲𑀗𑁆𑀔𑀸𑀢𑀸𑀲𑀼 𑀲𑀜𑁆𑀜𑀸𑀲𑀼.

𑀬𑀣𑀸 𑀫𑀽𑀮𑁂 𑀮𑀓𑁆𑀔𑀡𑀁 𑀤𑀲𑁆𑀲𑀺𑀢𑀁, 𑀏𑀯𑀁 𑀓𑀦𑁆𑀤𑀸𑀤𑀻𑀲𑀼𑀧𑀺 𑀬𑀁 𑀮𑀓𑁆𑀔𑀡𑀁 𑀤𑀲𑁆𑀲𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀦 𑀓𑁂𑀯𑀮𑀁 𑀧𑀸𑀴𑀺𑀬𑀁 𑀆𑀕𑀢𑀸𑀦𑀁 𑀳𑀮𑀺𑀤𑁆𑀤𑀸𑀤𑀻𑀦𑀁 𑀫𑀽𑀮𑀁𑀬𑁂𑀯 𑀬𑀸𑀯𑀚𑀻𑀯𑀺𑀓𑀁 𑀳𑁄𑀢𑀺, 𑀅𑀣 𑀔𑁄 𑀢𑀘𑀸𑀤𑀬𑁄𑀧𑀻𑀢𑀺 𑀆𑀳 ‘‘𑀬𑀜𑁆𑀘𑁂𑀢’’𑀦𑁆𑀢𑀺𑀆𑀤𑀺. 𑀬𑀁 𑀏𑀢𑀁 𑀅𑀝𑁆𑀞𑀯𑀺𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀯𑀁 𑀫𑀽𑀮𑀔𑀸𑀤𑀦𑀻𑀬𑁂 𑀯𑀺𑀦𑀺𑀘𑁆𑀙𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀦𑁆𑀤𑀔𑀸𑀤𑀦𑀻𑀬𑁂 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀦𑁆𑀤𑀔𑀸𑀤𑀦𑀻𑀬𑁂’’𑀢𑀺𑀆𑀤𑀺. 𑀢𑀢𑁆𑀣 𑀓𑀦𑁆𑀤𑀔𑀸𑀤𑀦𑀻𑀬𑁂𑀢𑀺 𑀓𑀁 𑀲𑀼𑀔𑀁 𑀤𑀤𑀸𑀢𑀻𑀢𑀺 𑀓𑀦𑁆𑀤𑁄, 𑀧𑀤𑀼𑀫𑀸𑀤𑀺𑀓𑀦𑁆𑀤𑁄, 𑀲𑀼𑀔𑀲𑁆𑀲 𑀅𑀤𑀸𑀬𑀓𑀸 𑀧𑀦 𑀓𑀦𑁆𑀤𑀸 𑀭𑀼𑀴𑁆𑀳𑀻𑀯𑀲𑁂𑀦 𑀓𑀦𑁆𑀤𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀓𑀦𑁆𑀤𑁄 𑀏𑀯 𑀔𑀸𑀤𑀦𑀻𑀬𑀁 𑀓𑀦𑁆𑀤𑀔𑀸𑀤𑀦𑀻𑀬𑀁, 𑀢𑀲𑁆𑀫𑀺𑀁 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀉𑀧𑀭𑀺𑀧𑀺. 𑀬𑀦𑁆𑀢𑀺 𑀓𑀦𑁆𑀤𑀁. 𑀇𑀫𑀺𑀦𑀸 𑀢𑀁𑀲𑀤𑁆𑀤𑀸𑀦𑀧𑁂𑀓𑁆𑀔𑁄 𑀬𑀁𑀲𑀤𑁆𑀤𑁄𑀧𑀺 𑀅𑀢𑁆𑀣𑀻𑀢𑀺 𑀜𑀸𑀧𑁂𑀢𑀺. 𑀢𑀢𑁆𑀣𑀸𑀢𑀺 𑀓𑀦𑁆𑀤𑀔𑀸𑀤𑀦𑀻𑀬𑁂. 𑀢𑀭𑀼𑀡𑁄, 𑀲𑀼𑀔𑀔𑀸𑀤𑀦𑀻𑀬𑁄𑀢𑀺 𑀯𑀺𑀲𑁂𑀲𑀦𑀧𑀤𑀸𑀦𑀺 𑀬𑀣𑀸𑀯𑀘𑀦𑀁 𑀉𑀧𑀭𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀏𑀯𑀫𑀸𑀤𑀬𑁄 𑀨𑀭𑀡𑀓𑀓𑀦𑁆𑀤𑀸 𑀬𑀸𑀯𑀓𑀸𑀮𑀺𑀓𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀥𑁄𑀢𑁄𑀢𑀺 𑀯𑀺𑀲𑀭𑀲𑁄 𑀉𑀤𑀓𑁂𑀦 𑀅𑀥𑀽𑀦𑀺𑀢𑁄. 𑀢𑁂𑀢𑀺 𑀓𑀦𑁆𑀤𑀸 𑀲𑀗𑁆𑀕𑀳𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀫𑀽𑀮𑁂 𑀅𑀮𑀢𑀺 𑀧𑀯𑀢𑁆𑀢𑀢𑀻𑀢𑀺 𑀫𑀼𑀴𑀸𑀮𑁄, 𑀉𑀤𑀓𑀢𑁄 𑀯𑀸 𑀉𑀤𑁆𑀥𑀝𑀫𑀢𑁆𑀢𑁂 𑀫𑀺𑀮𑀢𑀺 𑀦𑀺𑀫𑀺𑀮𑀢𑀻𑀢𑀺 𑀫𑀼𑀴𑀸𑀮𑀁. 𑀏𑀯𑀫𑀸𑀤𑀺 𑀨𑀭𑀡𑀓𑀫𑀼𑀴𑀸𑀮𑀁 𑀬𑀸𑀯𑀓𑀸𑀮𑀺𑀓𑀦𑁆𑀢𑀺 𑀬𑁄𑀚𑀦𑀸. 𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀲𑀩𑁆𑀩𑀫𑁆𑀧𑀺 𑀢𑀁 𑀫𑀼𑀴𑀸𑀮𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀫𑀲𑀢𑀺 𑀯𑀺𑀚𑁆𑀛𑀢𑀻𑀢𑀺 𑀫𑀢𑁆𑀣𑀓𑁄. 𑀏𑀯𑀫𑀸𑀤𑀺 𑀫𑀢𑁆𑀣𑀓𑁄 𑀬𑀸𑀯𑀓𑀸𑀮𑀺𑀓𑁄𑀢𑀺 𑀬𑁄𑀚𑀦𑀸. 𑀚𑀭𑀟𑁆𑀠𑀩𑀼𑀦𑁆𑀤𑁄𑀢𑀺 𑀚𑀭𑀪𑀽𑀢𑀅𑀟𑁆𑀠𑀲𑀗𑁆𑀔𑀸𑀢𑁄 𑀧𑀸𑀤𑁄.

𑀔𑀦𑀻𑀬𑀢𑀺 𑀅𑀯𑀤𑀸𑀭𑀻𑀬𑀢𑀻𑀢𑀺 𑀔𑀦𑁆𑀥𑁄, 𑀔𑀸𑀬𑀢𑀻𑀢𑀺 𑀯𑀸 𑀔𑀦𑁆𑀥𑁄. ‘‘𑀅𑀦𑁆𑀢𑁄𑀧𑀣𑀯𑀻𑀕𑀢𑁄’’𑀢𑀺𑀧𑀤𑀁 ‘‘𑀲𑀸𑀮𑀓𑀮𑁆𑀬𑀸𑀡𑀺𑀔𑀦𑁆𑀥𑁄’’𑀢𑀺𑀧𑀤𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁, 𑀦 𑀅𑀜𑁆𑀜𑁂𑀳𑀺. 𑀏𑀯𑀫𑀸𑀤𑀺 𑀔𑀦𑁆𑀥𑁄 𑀬𑀸𑀯𑀓𑀸𑀮𑀺𑀓𑁄𑀢𑀺 𑀬𑁄𑀚𑀦𑀸. 𑀅𑀯𑀲𑁂𑀲𑀸𑀢𑀺 𑀢𑀻𑀳𑀺 𑀤𑀡𑁆𑀟𑀓𑀸𑀤𑀻𑀳𑀺 𑀅𑀯𑀲𑁂𑀲𑀸.

𑀢𑀘𑀢𑀺 𑀲𑀁𑀯𑀭𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀢𑀘𑁄. 𑀲𑀭𑀲𑁄𑀢𑀺 𑀏𑀢𑁆𑀣 𑀏𑀯𑀓𑀸𑀭𑁄 𑀬𑁄𑀚𑁂𑀢𑀩𑁆𑀩𑁄, 𑀲𑀭𑀲𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀲𑀗𑁆𑀕𑀳𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀏𑀢𑀦𑁆𑀢𑀺 𑀓𑀲𑀸𑀯𑀪𑁂𑀲𑀚𑁆𑀚𑀁, ‘‘𑀅𑀦𑀼𑀚𑀸𑀦𑀸𑀫𑀺 …𑀧𑁂… 𑀪𑁄𑀚𑀦𑀻𑀬𑀢𑁆𑀣’’𑀦𑁆𑀢𑀺 𑀯𑀘𑀦𑀁 𑀯𑀸. 𑀏𑀢𑁆𑀣𑀸𑀢𑀺 𑀓𑀲𑀸𑀯𑀪𑁂𑀲𑀚𑁆𑀚𑁂. 𑀏𑀢𑁂𑀲𑀫𑁆𑀧𑀻𑀢𑀺 𑀫𑀢𑁆𑀣𑀓𑀔𑀦𑁆𑀥𑀢𑁆𑀢𑀘𑀸𑀦𑀫𑁆𑀧𑀺.

𑀧𑀢𑀢𑀻𑀢𑀺 𑀧𑀢𑁆𑀢𑀁. 𑀏𑀢𑁂𑀲𑀦𑁆𑀢𑀺 𑀫𑀽𑀮𑀓𑀸𑀤𑀻𑀦𑀁. 𑀏𑀯𑀭𑀽𑀧𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀏𑀓𑀁𑀲𑁂𑀦 𑀬𑀸𑀯𑀓𑀸𑀮𑀺𑀓𑀸𑀦𑀻𑀢𑀺 𑀬𑁄𑀚𑀦𑀸. 𑀬𑀸 𑀮𑁄𑀡𑀻 𑀆𑀭𑁄𑀳𑀢𑀺, 𑀢𑀲𑁆𑀲𑀸 𑀮𑁄𑀡𑀺𑀬𑀸 𑀧𑀢𑁆𑀢𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀬𑁄𑀚𑀦𑀸. 𑀤𑀻𑀧𑀯𑀸𑀲𑀺𑀦𑁄𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀯𑀸𑀲𑀺𑀦𑁄, 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀯𑀸. 𑀬𑀸𑀦𑀺 𑀯𑀸 𑀨𑀭𑀦𑁆𑀢𑀻𑀢𑀺 𑀯𑀼𑀢𑁆𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀦𑁆𑀢𑀺 𑀦𑀺𑀫𑁆𑀩𑀸𑀤𑀻𑀦𑀁. 𑀇𑀤𑀁 𑀧𑀤𑀁 𑀧𑀼𑀩𑁆𑀩𑀧𑀭𑀸𑀧𑁂𑀓𑁆𑀔𑀓𑀁, 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀫𑀚𑁆𑀛𑁂 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀡𑁆𑀡𑀸𑀦𑀁 𑀅𑀦𑁆𑀢𑁄 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀼𑀧𑁆𑀨𑀢𑀺 𑀯𑀺𑀓𑀲𑀢𑀻𑀢𑀺 𑀧𑀼𑀧𑁆𑀨𑀁. 𑀏𑀯𑀫𑀸𑀤𑀺 𑀧𑀼𑀧𑁆𑀨𑀁 𑀬𑀸𑀯𑀓𑀸𑀮𑀺𑀓𑀦𑁆𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀧𑀼𑀧𑁆𑀨𑀲𑁆𑀲. 𑀅𑀲𑁆𑀲𑀸𑀢𑀺 𑀏𑀯𑀫𑁂𑀯.

𑀨𑀮𑀢𑀻𑀢𑀺 𑀨𑀮𑀁. 𑀬𑀸𑀦𑀻𑀢𑀺 𑀨𑀮𑀸𑀦𑀺. 𑀨𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑁂𑀲𑀦𑁆𑀢𑀺 𑀨𑀮𑀸𑀦𑀁 𑀧𑀭𑀺𑀬𑀦𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀸𑀯𑀚𑀻𑀯𑀺𑀓𑀸𑀦𑀻𑀢𑀺 𑀬𑁄𑀚𑀦𑀸. 𑀢𑁂𑀲𑀫𑁆𑀧𑀻𑀢𑀺 𑀨𑀮𑀸𑀦𑀫𑁆𑀧𑀺 𑀧𑀭𑀺𑀬𑀦𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀲𑀻𑀬𑀢𑀺 𑀔𑀺𑀧𑀻𑀬𑀢𑀺, 𑀙𑀟𑁆𑀟𑀻𑀬𑀢𑀻𑀢𑀺 𑀯𑀸 𑀅𑀝𑁆𑀞𑀺. 𑀏𑀯𑀫𑀸𑀤𑀻𑀦𑀺 𑀨𑀭𑀡𑀓𑀸𑀦𑀺 𑀅𑀝𑁆𑀞𑀻𑀦𑀺 𑀬𑀸𑀯𑀓𑀸𑀮𑀺𑀓𑀸𑀦𑀻𑀢𑀺 𑀬𑁄𑀚𑀦𑀸. 𑀢𑁂𑀲𑀦𑁆𑀢𑀺 𑀅𑀝𑁆𑀞𑀻𑀦𑀁.

𑀧𑀺𑀲𑀻𑀬𑀢𑀺 𑀘𑀼𑀡𑁆𑀡𑀁 𑀓𑀭𑀻𑀬𑀢𑀻𑀢𑀺 𑀧𑀺𑀝𑁆𑀞𑀁. 𑀏𑀯𑀫𑀸𑀤𑀻𑀦𑀺 𑀨𑀭𑀡𑀓𑀸𑀦𑀺 𑀧𑀺𑀝𑁆𑀞𑀸𑀦𑀺 𑀬𑀸𑀯𑀓𑀸𑀮𑀺𑀓𑀸𑀦𑀻𑀢𑀺 𑀬𑁄𑀚𑀦𑀸. 𑀅𑀥𑁄𑀢𑀓𑀦𑁆𑀢𑀺 𑀉𑀤𑀓𑁂𑀦 𑀅𑀥𑀽𑀦𑀺𑀢𑀁. 𑀢𑁂𑀲𑀦𑁆𑀢𑀺 𑀧𑀺𑀝𑁆𑀞𑀸𑀦𑀁.

𑀦𑀺𑀭𑀦𑁆𑀢𑀭𑀁 𑀅𑀲𑀢𑀺 𑀲𑀫𑁆𑀩𑀚𑁆𑀛𑀢𑀻𑀢𑀺 𑀦𑀺𑀬𑁆𑀬𑀸𑀲𑁄. 𑀲𑁂𑀲𑀸𑀢𑀺 𑀉𑀘𑁆𑀙𑀼𑀦𑀺𑀬𑁆𑀬𑀸𑀲𑀢𑁄 𑀲𑁂𑀲𑀸. 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑀺𑀬𑁆𑀬𑀸𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀦𑀺𑀬𑁆𑀬𑀸𑀲𑀔𑀸𑀤𑀦𑀻𑀬𑁂. 𑀲𑀗𑁆𑀕𑀳𑀺𑀢𑀸𑀦𑀁 𑀦𑀺𑀬𑁆𑀬𑀸𑀲𑀸𑀦𑀁 𑀧𑀭𑀺𑀬𑀦𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀏𑀯𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀯𑀼𑀢𑁆𑀢𑀫𑁂𑀯𑀸𑀢𑀺 𑀳𑁂𑀝𑁆𑀞𑀸 𑀧𑀞𑀫𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀫𑁂𑀯𑀸𑀢𑀺. 𑀲𑀢𑁆𑀢𑀫𑀁.

𑁮. 𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑀺𑀓𑁆𑀔𑀸𑀧𑀤𑀁

𑁨𑁫𑁨. 𑀅𑀝𑁆𑀞𑀫𑁂 𑀅𑀩𑁆𑀪𑀦𑁆𑀢𑀭𑁂 𑀚𑀸𑀢𑁄 𑀅𑀩𑁆𑀪𑀦𑁆𑀢𑀭𑁄. 𑀫𑀳𑀸𑀣𑁂𑀭𑁄𑀢𑀺 𑀫𑀳𑀦𑁆𑀢𑁂𑀳𑀺 𑀣𑀺𑀭𑀕𑀼𑀡𑁂𑀳𑀺 𑀬𑀼𑀢𑁆𑀢𑁄. 𑀇𑀫𑀺𑀦𑀸 ‘‘𑀩𑁂𑀮𑀝𑁆𑀞𑁄’’𑀢𑀺 𑀲𑀜𑁆𑀜𑀸𑀦𑀸𑀫𑀲𑁆𑀲 𑀲𑀜𑁆𑀜𑀺𑀦𑀸𑀫𑀺𑀁 𑀤𑀲𑁆𑀲𑁂𑀢𑀺. 𑀧𑀥𑀸𑀦𑀖𑀭𑁂𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀧𑀤𑀳𑀦𑀝𑁆𑀞𑀸𑀦𑀖𑀭𑀲𑀗𑁆𑀔𑀸𑀢𑁂 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂. 𑀲𑀼𑀓𑁆𑀔𑀓𑀼𑀭𑀦𑁆𑀢𑀺 𑀏𑀢𑁆𑀣 𑀲𑁄𑀲𑀦𑀓𑀼𑀭𑀢𑁆𑀢𑀸 𑀦 𑀲𑀼𑀓𑁆𑀔𑀓𑀼𑀭𑀁 𑀳𑁄𑀢𑀺, 𑀓𑁂𑀯𑀮𑀁 𑀧𑀦 𑀅𑀲𑀽𑀧𑀩𑁆𑀬𑀜𑁆𑀚𑀦𑀢𑁆𑀢𑀸𑀢𑀺 𑀆𑀳 ‘‘𑀅𑀲𑀽𑀧𑀩𑁆𑀬𑀜𑁆𑀚𑀦𑀁 𑀑𑀤𑀦’’𑀦𑁆𑀢𑀺. 𑀲𑁄𑀲𑀦𑀓𑀼𑀭𑀫𑁆𑀧𑀺 𑀬𑀼𑀢𑁆𑀢𑀫𑁂𑀯. 𑀯𑀓𑁆𑀔𑀢𑀺 𑀳𑀺 ‘‘𑀢𑀁 𑀧𑀺𑀡𑁆𑀟𑀧𑀸𑀢𑀁 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸’’𑀢𑀺. ‘‘𑀑𑀤𑀦’’𑀦𑁆𑀢𑀺𑀇𑀫𑀺𑀦𑀸 𑀓𑀼𑀭𑀲𑀤𑁆𑀤𑀲𑁆𑀲 𑀑𑀤𑀦𑀧𑀭𑀺𑀬𑀸𑀬𑀢𑀁 𑀤𑀲𑁆𑀲𑁂𑀢𑀺. 𑀑𑀤𑀦𑀜𑁆𑀳𑀺 𑀓𑀭𑁄𑀢𑀺 𑀆𑀬𑀼𑀯𑀡𑁆𑀡𑀸𑀤𑀬𑁄𑀢𑀺 ‘‘𑀓𑀼𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁄𑀢𑀺 𑀩𑁂𑀮𑀝𑁆𑀞𑀲𑀻𑀲𑁄. 𑀢𑀜𑁆𑀘 𑀔𑁄𑀢𑀺 𑀢𑀜𑁆𑀘 𑀲𑀼𑀓𑁆𑀔𑀓𑀼𑀭𑀁 𑀆𑀳𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀘𑁆𑀘𑀬𑀕𑀺𑀤𑁆𑀥𑀢𑀸𑀬𑀸𑀢𑀺 𑀧𑀺𑀡𑁆𑀟𑀧𑀸𑀢𑀧𑀘𑁆𑀘𑀬𑁂 𑀮𑀼𑀤𑁆𑀥𑀢𑀸𑀬. 𑀣𑁂𑀭𑁄 𑀪𑀼𑀜𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀦𑀼𑀲𑁆𑀲𑀸𑀦𑀁 𑀏𑀓𑀸𑀳𑀸𑀭𑀲𑁆𑀲 𑀲𑀢𑁆𑀢𑀸𑀳𑀫𑀢𑁆𑀢𑀝𑁆𑀞𑀺𑀢𑀢𑁆𑀢𑀸 ‘‘𑀲𑀢𑁆𑀢𑀸𑀳’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁄𑀢𑀺 𑀪𑀼𑀜𑁆𑀚𑀦𑀢𑁄 𑀧𑀭𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑁆𑀢𑀸𑀭𑀺𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁂𑀦 𑀅𑀥𑀺𑀓𑀸𑀦𑀺𑀧𑀺 𑀲𑀢𑁆𑀢𑀸𑀳𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺.

𑁨𑁫𑁩. 𑀇𑀢𑀻𑀢𑀺 𑀇𑀤𑀁 𑀢𑀬𑀁. ‘‘𑀲𑀦𑁆𑀦𑀺𑀥𑀺 𑀓𑀸𑀭𑁄 𑀅𑀲𑁆𑀲𑀸’’𑀢𑀺 𑀲𑀫𑀸𑀲𑁄 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑀯𑀲𑁂𑀦 𑀕𑀳𑁂𑀢𑀩𑁆𑀩𑁄. ‘‘𑀲𑀦𑁆𑀦𑀺𑀥𑀺𑀓𑀺𑀭𑀺𑀬𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀇𑀫𑀺𑀦𑀸 𑀓𑀭𑀻𑀬𑀢𑀻𑀢𑀺 𑀓𑀸𑀭𑁄𑀢𑀺 𑀓𑀫𑁆𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀏𑀓𑀭𑀢𑁆𑀢𑀦𑁆𑀢𑀺 𑀅𑀦𑁆𑀢𑀺𑀫𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀁 𑀢𑀤𑀥𑀺𑀓𑀸𑀦𑀫𑁆𑀧𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀲𑁆𑀲𑀸𑀢𑀺 ‘‘𑀲𑀦𑁆𑀦𑀺𑀥𑀺𑀓𑀸𑀭𑀓’’𑀦𑁆𑀢𑀺 𑀧𑀤𑀲𑁆𑀲.

𑀲𑀦𑁆𑀦𑀺𑀥𑀺𑀓𑀸𑀭𑀓𑀲𑁆𑀲 𑀲𑀢𑁆𑀢𑀸𑀳𑀓𑀸𑀮𑀺𑀓𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀢𑁆𑀢𑀸 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀬𑀸𑀫𑀓𑀸𑀮𑀺𑀓𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀅𑀲𑀫𑀸𑀦𑀫𑁆𑀧𑀺 𑀲𑀼𑀤𑁆𑀥𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀬𑀸𑀫𑀓𑀸𑀮𑀺𑀓𑀁 𑀯𑀸’’𑀢𑀺. 𑀧𑀝𑀺𑀕𑁆𑀕𑀳𑀡𑁂𑀢𑀺 𑀧𑀝𑀺𑀕𑁆𑀕𑀳𑀡𑁂 𑀘 𑀕𑀳𑀡𑁂 𑀘. 𑀅𑀚𑁆𑀛𑁄𑀳𑀭𑀺𑀢𑀼𑀓𑀸𑀫𑀢𑀸𑀬 𑀳𑀺 𑀧𑀝𑀺𑀕𑁆𑀕𑀳𑀡𑁂 𑀘 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀕𑀳𑀡𑁂 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀁 𑀧𑀢𑁆𑀢𑀁 𑀅𑀗𑁆𑀕𑀼𑀮𑀺𑀬𑀸 𑀖𑀁𑀲𑀦𑁆𑀢𑀲𑁆𑀲 𑀮𑁂𑀔𑀸 𑀧𑀜𑁆𑀜𑀸𑀬𑀢𑀺, 𑀲𑁄 𑀧𑀢𑁆𑀢𑁄 𑀤𑀼𑀤𑁆𑀥𑁄𑀢𑁄 𑀳𑁄𑀢𑀺 𑀲𑀘𑁂𑀢𑀺 𑀬𑁄𑀚𑀦𑀸 𑀉𑀢𑁆𑀢𑀭𑀯𑀸𑀓𑁆𑀬𑁂 𑀬𑀁𑀲𑀤𑁆𑀤𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑀯𑀸𑀓𑁆𑀬𑁂 𑀢𑀁𑀲𑀤𑁆𑀤𑀲𑁆𑀲 𑀕𑀫𑀦𑀻𑀬𑀢𑁆𑀢𑀸. 𑀕𑀡𑁆𑀞𑀺𑀓𑀧𑀢𑁆𑀢𑀲𑁆𑀲𑀸𑀢𑀺 𑀩𑀦𑁆𑀥𑀦𑀧𑀢𑁆𑀢𑀲𑁆𑀲. 𑀲𑁄𑀢𑀺 𑀲𑁆𑀦𑁂𑀳𑁄. 𑀧𑀕𑁆𑀖𑀭𑀢𑀺 𑀲𑀦𑁆𑀤𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀸𑀤𑀺𑀲𑁂𑀢𑀺 𑀤𑀼𑀤𑁆𑀥𑁄𑀢𑁂, 𑀕𑀡𑁆𑀞𑀺𑀓𑁂 𑀯𑀸. 𑀢𑀢𑁆𑀣𑀸𑀢𑀺 𑀥𑁄𑀯𑀺𑀢𑀧𑀢𑁆𑀢𑁂 𑀆𑀲𑀺𑀜𑁆𑀘𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀅𑀩𑁆𑀩𑁄𑀳𑀸𑀭𑀺𑀓𑀸𑀢𑀺 𑀦 𑀯𑁄𑀳𑀭𑀺𑀢𑀩𑁆𑀩𑀸, 𑀯𑁄𑀳𑀭𑀺𑀢𑀼𑀁 𑀦 𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀧𑀭𑀺𑀘𑁆𑀘𑀚𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀢𑁄𑀢𑀺 𑀅𑀧𑀭𑀺𑀘𑁆𑀘𑀢𑁆𑀢𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀢𑁄 𑀦𑀻𑀳𑀭𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀓𑀧𑁆𑀧𑀺𑀬𑀫𑀁𑀲𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑀲𑀫𑀼𑀤𑀸𑀬𑁄. 𑀲𑀢𑀺 𑀧𑀘𑁆𑀘𑀬𑁂𑀢𑀺 𑀧𑀺𑀧𑀸𑀲𑀲𑀗𑁆𑀔𑀸𑀢𑁂 𑀧𑀘𑁆𑀘𑀬𑁂 𑀲𑀢𑀺. 𑀅𑀦𑀢𑀺𑀭𑀺𑀢𑁆𑀢𑀓𑀢𑀦𑁆𑀢𑀺 𑀅𑀢𑀺𑀭𑀺𑀢𑁆𑀢𑁂𑀦 𑀅𑀓𑀢𑀁 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀦𑁆𑀢𑀺 𑀬𑁄𑀚𑀦𑀸. 𑀏𑀓𑀫𑁂𑀯 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀓𑀧𑁆𑀧𑀤𑁆𑀯𑀬𑁂𑀢𑀺 𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀲𑀗𑁆𑀔𑀸𑀢𑁂 𑀯𑀺𑀓𑀧𑁆𑀧𑀤𑁆𑀯𑀬𑁂. 𑀲𑀩𑁆𑀩𑀯𑀺𑀓𑀧𑁆𑀧𑁂𑀲𑀽𑀢𑀺 𑀯𑀺𑀓𑀸𑀮𑀲𑀦𑁆𑀦𑀺𑀥𑀺𑀅𑀓𑀧𑁆𑀧𑀺𑀬𑀫𑀁𑀲𑀬𑀸𑀫𑀓𑀸𑀮𑀺𑀓𑀧𑀘𑁆𑀘𑀬𑀲𑀗𑁆𑀔𑀸𑀢𑁂𑀲𑀼 𑀲𑀩𑁆𑀩𑁂𑀲𑀼 𑀯𑀺𑀓𑀧𑁆𑀧𑁂𑀲𑀼.

𑁨𑁫𑁫. 𑀆𑀫𑀺𑀲𑀲𑀁𑀲𑀝𑁆𑀞𑀦𑁆𑀢𑀺 𑀆𑀫𑀺𑀲𑁂𑀦 𑀲𑀁𑀲𑀝𑁆𑀞𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁.

𑁨𑁫𑁬. 𑀘𑀢𑀼𑀩𑁆𑀩𑀺𑀥𑀓𑀸𑀮𑀺𑀓𑀲𑁆𑀲 𑀲𑀭𑀽𑀧𑀜𑁆𑀘 𑀯𑀘𑀦𑀢𑁆𑀣𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂’’𑀢𑀺𑀆𑀤𑀺. 𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬’’𑀦𑁆𑀢𑀺𑀇𑀫𑀺𑀦𑀸 𑀬𑀸𑀯𑀓𑀸𑀮𑀺𑀓𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀬𑀸𑀯…𑀧𑁂… 𑀓𑀸𑀮𑀺𑀓’’𑀦𑁆𑀢𑀺𑀇𑀫𑀺𑀦𑀸 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀲𑀤𑁆𑀥𑀺𑀁…𑀧𑁂… 𑀧𑀸𑀦’’𑀦𑁆𑀢𑀺𑀇𑀫𑀺𑀦𑀸 𑀬𑀸𑀫𑀓𑀸𑀮𑀺𑀓𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀬𑀸𑀯…𑀧𑁂… 𑀓𑀸𑀮𑀺𑀓’’𑀦𑁆𑀢𑀺𑀇𑀫𑀺𑀦𑀸 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀲𑀩𑁆𑀩𑀺𑀆𑀤𑀺 𑀧𑀜𑁆𑀘𑀯𑀺𑀥𑀁 𑀪𑁂𑀲𑀚𑁆𑀚’’𑀦𑁆𑀢𑀺𑀇𑀫𑀺𑀦𑀸 𑀲𑀢𑁆𑀢𑀸𑀳𑀓𑀸𑀮𑀺𑀓𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀲𑀢𑁆𑀢𑀸𑀳𑀁…𑀧𑁂… 𑀓𑀸𑀮𑀺𑀓’’𑀦𑁆𑀢𑀺𑀇𑀫𑀺𑀦𑀸 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀞𑀧𑁂𑀢𑁆𑀯𑀸…𑀧𑁂… 𑀲𑀩𑁆𑀩𑀫𑁆𑀧𑀻’’𑀢𑀺𑀇𑀫𑀺𑀦𑀸 𑀬𑀸𑀯𑀚𑀻𑀯𑀺𑀓𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀬𑀸𑀯…𑀧𑁂… 𑀚𑀻𑀯𑀺𑀓’’𑀦𑁆𑀢𑀺𑀇𑀫𑀺𑀦𑀸 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀯𑀘𑀦𑀢𑁆𑀣𑁄 𑀮𑀳𑀼𑀓𑀫𑀢𑁆𑀢𑀫𑁂𑀯, 𑀕𑀭𑀼𑀓𑁄 𑀧𑀦𑁂𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀬𑀸𑀯 𑀬𑀢𑁆𑀢𑀓𑁄 𑀫𑀚𑁆𑀛𑀦𑁆𑀳𑀺𑀓𑁄 𑀓𑀸𑀮𑁄 𑀬𑀸𑀯𑀓𑀸𑀮𑁄, 𑀲𑁄 𑀅𑀲𑁆𑀲𑀢𑁆𑀣𑀻, 𑀢𑀁 𑀯𑀸 𑀓𑀸𑀮𑀁 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑀸𑀯𑀓𑀸𑀮𑀺𑀓𑀁. 𑀬𑀸𑀫𑁄 𑀓𑀸𑀮𑁄 𑀬𑀸𑀫𑀓𑀸𑀮𑁄, 𑀲𑁄 𑀅𑀲𑁆𑀲𑀢𑁆𑀣𑀺, 𑀢𑀁 𑀯𑀸 𑀓𑀸𑀮𑀁 𑀧𑀭𑀺𑀪𑀼𑀜𑁆𑀚𑀻𑀢𑀩𑁆𑀩𑀦𑁆𑀢𑀺 𑀬𑀸𑀫𑀓𑀸𑀮𑀺𑀓𑀁. 𑀲𑀢𑁆𑀢𑀸𑀳𑁄 𑀓𑀸𑀮𑁄 𑀲𑀢𑁆𑀢𑀸𑀳𑀓𑀸𑀮𑁄, 𑀲𑁄 𑀅𑀲𑁆𑀲𑀢𑁆𑀣𑀺, 𑀢𑀁 𑀯𑀸 𑀓𑀸𑀮𑀁 𑀦𑀺𑀤𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀁. 𑀬𑀸𑀯 𑀬𑀢𑁆𑀢𑀓𑁄 𑀚𑀻𑀯𑁄 𑀬𑀸𑀯𑀚𑀻𑀯𑁄, 𑀲𑁄 𑀅𑀲𑁆𑀲𑀢𑁆𑀣𑀺, 𑀬𑀸𑀯𑀚𑀻𑀯𑀁 𑀯𑀸 𑀧𑀭𑀺𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀬𑀸𑀯𑀚𑀻𑀯𑀺𑀓𑀦𑁆𑀢𑀺.

𑀢𑀢𑁆𑀣𑀸𑀢𑀺 𑀘𑀢𑀼𑀩𑁆𑀩𑀺𑀥𑁂𑀲𑀼 𑀓𑀸𑀮𑀺𑀓𑁂𑀲𑀼. 𑀲𑀢𑀓𑁆𑀔𑀢𑁆𑀢𑀼𑀦𑁆𑀢𑀺 𑀅𑀦𑁂𑀓𑀯𑀸𑀭𑀁. 𑀬𑀸𑀯 𑀓𑀸𑀮𑁄 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀅𑀳𑁄𑀭𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄𑀢𑀺. 𑀅𑀝𑁆𑀞𑀫𑀁.

𑁯. 𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁

𑁨𑁫𑁭. 𑀦𑀯𑀫𑁂 𑀧𑀓𑀝𑁆𑀞𑀪𑀸𑀯𑀁 𑀦𑀻𑀢𑀦𑁆𑀢𑀺 𑀧𑀡𑀻𑀢𑀦𑁆𑀢𑀺 𑀯𑀼𑀢𑁆𑀢𑁂 𑀧𑀡𑀻𑀢𑀲𑀤𑁆𑀤𑁄 𑀉𑀢𑁆𑀢𑀫𑀢𑁆𑀣𑁄𑀢𑀺 𑀆𑀳 ‘‘𑀉𑀢𑁆𑀢𑀫𑀪𑁄𑀚𑀦𑀸𑀦𑀻’’𑀢𑀺. 𑀲𑀫𑁆𑀧𑀦𑁆𑀦𑁄 𑀦𑀸𑀫 𑀦 𑀫𑀥𑀼𑀭𑀕𑀼𑀡𑁄, 𑀅𑀣 𑀔𑁄 𑀫𑀥𑀼𑀭𑀕𑀼𑀡𑀬𑀼𑀢𑁆𑀢𑀁 𑀪𑁄𑀚𑀦𑀫𑁂𑀯𑀸𑀢𑀺 𑀆𑀳 ‘‘𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢’’𑀦𑁆𑀢𑀺. 𑀓𑀲𑁆𑀲𑀸𑀢𑀺 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁, 𑀓𑁂𑀦𑀸𑀢𑀺 𑀳𑀺 𑀅𑀢𑁆𑀣𑁄. ‘‘𑀲𑀼𑀭𑀲’’𑀦𑁆𑀢𑀺𑀇𑀫𑀺𑀦𑀸 𑀲𑀸𑀤𑀻𑀬𑀢𑀺 𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀲𑀸𑀤𑀽𑀢𑀺 𑀯𑀘𑀦𑀢𑁆𑀣𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺.

𑁨𑁫𑁯. ‘‘𑀬𑁄 𑀧𑀦…𑀧𑁂… 𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀲𑀼𑀤𑁆𑀥𑀸𑀦𑀻𑀢𑀺 𑀑𑀤𑀦𑁂𑀦 𑀅𑀲𑀁𑀲𑀝𑁆𑀞𑀸𑀦𑀺. 𑀑𑀤𑀦𑀲𑀁𑀲𑀝𑁆𑀞𑀸𑀦𑀺 𑀲𑀩𑁆𑀩𑀺𑀆𑀤𑀻𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. 𑀳𑀻𑀢𑀺 𑀲𑀘𑁆𑀘𑀁. ‘‘𑀧𑀡𑀻𑀢𑀲𑀁𑀲𑀝𑁆𑀞𑀸𑀦𑀻’’𑀢𑀺𑀇𑀫𑀺𑀦𑀸 𑀧𑀡𑀻𑀢𑁂𑀳𑀺 𑀲𑀩𑁆𑀩𑀺𑀆𑀤𑀻𑀳𑀺 𑀲𑀁𑀲𑀝𑁆𑀞𑀸𑀦𑀺 𑀪𑁄𑀚𑀦𑀸𑀦𑀺 𑀧𑀡𑀻𑀢𑀪𑁄𑀚𑀦𑀸𑀦𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀲𑀢𑁆𑀢𑀥𑀜𑁆𑀜𑀦𑀺𑀩𑁆𑀩𑀢𑁆𑀢𑀸𑀦𑀻’’𑀢𑀺 𑀇𑀫𑀺𑀦𑀸 𑀪𑁄𑀚𑀦𑀸𑀦𑀁 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺.

‘‘𑀲𑀩𑁆𑀩𑀺𑀦𑀸 𑀪𑀢𑁆𑀢’’𑀦𑁆𑀢𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀯𑀺𑀓𑀧𑁆𑀧𑀸𑀦𑀁 𑀫𑀚𑁆𑀛𑁂 𑀢𑀻𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 ‘‘𑀪𑀢𑁆𑀢’’𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀯𑀸𑀓𑁆𑀬𑀁 𑀓𑀢𑁆𑀯𑀸 𑀯𑀺𑀜𑁆𑀜𑀸𑀧𑀦𑁂 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀲𑀁 𑀓𑀢𑁆𑀯𑀸 𑀯𑀺𑀜𑁆𑀜𑀸𑀧𑀦𑁂 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀺𑀪𑀢𑁆𑀢𑀁 𑀤𑁂𑀳𑀻’’𑀢𑀺𑀆𑀤𑀺.

𑀇𑀢𑁄𑀢𑀺 𑀕𑀸𑀯𑀺𑀢𑁄 𑀮𑀤𑁆𑀥𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀗𑁆𑀓𑁂𑀢𑀦𑁆𑀢𑀺 𑀲𑀗𑁆𑀓𑁂𑀢𑀢𑁄 𑀜𑀸𑀧𑀺𑀢𑀢𑁄 𑀯𑀺𑀕𑀢𑀁 𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀳𑀻𑀢𑀺 𑀲𑀘𑁆𑀘𑀁. 𑀇𑀫𑀺𑀦𑀸 𑀯𑀺𑀲𑀗𑁆𑀓𑁂𑀢𑀲𑁆𑀲 𑀕𑀼𑀡𑀤𑁄𑀲𑀁 𑀤𑀲𑁆𑀲𑁂𑀢𑀺.

𑀓𑀧𑁆𑀧𑀺𑀬𑀲𑀩𑁆𑀩𑀺𑀦𑀸 𑀤𑁂𑀳𑀻𑀢𑀺 𑀓𑀧𑁆𑀧𑀺𑀬𑀲𑀩𑁆𑀩𑀺𑀦𑀸 𑀲𑀁𑀲𑀝𑁆𑀞𑀁 𑀪𑀢𑁆𑀢𑀁 𑀤𑁂𑀳𑀻𑀢𑀺 𑀬𑁄𑀚𑀦𑀸. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀬𑁂𑀦 𑀬𑁂𑀦𑀸𑀢𑀺 𑀬𑁂𑀦 𑀬𑁂𑀦 𑀲𑀩𑁆𑀩𑀺𑀆𑀤𑀺𑀦𑀸. 𑀢𑀲𑁆𑀫𑀺𑀁 𑀢𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 𑀯𑀺𑀘𑁆𑀙𑀸𑀯𑀲𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀸𑀴𑀺𑀬𑀁 𑀆𑀕𑀢𑀲𑀩𑁆𑀩𑀺 𑀦𑀸𑀫 𑀕𑁄𑀲𑀩𑁆𑀩𑀺, 𑀅𑀚𑀺𑀓𑀸𑀲𑀩𑁆𑀩𑀺, 𑀫𑀳𑀺𑀁𑀲𑀲𑀩𑁆𑀩𑀺, 𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀩𑁆𑀩𑀺 𑀘. 𑀦𑀯𑀦𑀻𑀢𑀁 𑀦𑀸𑀫 𑀏𑀯𑀫𑁂𑀯. 𑀢𑁂𑀮𑀁 𑀦𑀸𑀫 𑀢𑀺𑀮𑀢𑁂𑀮𑀁, 𑀲𑀸𑀲𑀧𑀢𑁂𑀮𑀁, 𑀫𑀥𑀼𑀓𑀢𑁂𑀮𑀁, 𑀏𑀭𑀡𑁆𑀟𑀢𑁂𑀮𑀁, 𑀯𑀲𑀸𑀢𑁂𑀮𑀜𑁆𑀘. 𑀫𑀥𑀼 𑀦𑀸𑀫 𑀫𑀓𑁆𑀔𑀺𑀓𑀸𑀫𑀥𑀼. 𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢𑀁. 𑀫𑀘𑁆𑀙𑁄 𑀦𑀸𑀫 𑀉𑀤𑀓𑀘𑀭𑁄. 𑀧𑀸𑀴𑀺𑀅𑀦𑀸𑀕𑀢𑁄 𑀫𑀘𑁆𑀙𑁄 𑀦𑀸𑀫 𑀦𑀢𑁆𑀣𑀺. 𑀫𑀁𑀲𑀁 𑀦𑀸𑀫 𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀺, 𑀢𑁂𑀲𑀁 𑀫𑀁𑀲𑀁. 𑀔𑀻𑀭𑀤𑀥𑀻𑀦𑀺 𑀲𑀩𑁆𑀩𑀺𑀲𑀤𑀺𑀲𑀸𑀦𑁂𑀯. 𑀯𑀼𑀢𑁆𑀢𑀁 𑀬𑀣𑀸 𑀏𑀯𑀁 ‘‘𑀦𑀯𑀦𑀻𑀢𑀪𑀢𑁆𑀢𑀁 𑀤𑁂𑀳𑀻’’𑀢𑀺𑀆𑀤𑀻𑀲𑀼𑀧𑀺 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀫𑁂𑀯 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀳𑀻𑀢𑀺 𑀲𑀘𑁆𑀘𑀁. 𑀲𑁄 𑀘𑀸𑀢𑀺 𑀲𑁄 𑀘𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀓𑀺𑀁 𑀧𑀬𑁄𑀚𑀦𑀁. 𑀦𑀢𑁆𑀣𑁂𑀯 𑀧𑀬𑁄𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀝𑀺𑀮𑀤𑁆𑀥𑀁 𑀪𑁄𑀚𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀓𑀭𑀲𑀦𑁆𑀢𑀺 𑀏𑀓𑀓𑀺𑀘𑁆𑀘𑀁. 𑀢𑀢𑁄𑀢𑀺 𑀦𑀯𑀧𑀡𑀻𑀢𑀪𑁄𑀚𑀦𑀢𑁄 𑀦𑀻𑀳𑀭𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀩𑁆𑀩𑀸𑀦𑀻𑀢𑀺 𑀦𑀯 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁨𑁬𑁧. 𑀉𑀪𑀬𑁂𑀲𑀫𑁆𑀧𑀻𑀢𑀺 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺. 𑀲𑀩𑁆𑀩𑀻𑀢𑀺 𑀘𑁂𑀢𑁆𑀣 𑀬𑁄 𑀦𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀲𑁆𑀲 𑀩𑀮𑀸𑀬𑀼𑀯𑀟𑁆𑀠𑀦𑀢𑁆𑀣𑀁 𑀲𑀩𑁆𑀩𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀩𑁆𑀩𑀺, 𑀖𑀢𑀁. 𑀢𑀢𑀺𑀬𑀓𑁆𑀔𑀭𑁂𑀦𑁂𑀯 𑀲𑀚𑁆𑀛𑀸𑀬𑀺𑀢𑀩𑁆𑀩𑀁 𑀮𑀺𑀔𑀺𑀢𑀩𑁆𑀩𑀜𑁆𑀘. 𑀓𑀲𑁆𑀫𑀸? 𑀢𑀢𑀺𑀬𑀓𑁆𑀔𑀭𑀝𑁆𑀞𑀸𑀦𑁂𑀬𑁂𑀯 𑀲𑀩𑁆𑀩 𑀕𑀢𑀺𑀬𑀦𑁆𑀢𑀺 𑀕𑀢𑀺𑀅𑀢𑁆𑀣𑀲𑁆𑀲 𑀲𑀩𑁆𑀩𑀥𑀸𑀢𑀼𑀲𑁆𑀲 𑀥𑀸𑀢𑀼𑀧𑀸𑀞𑁂𑀲𑀼 𑀆𑀕𑀢𑀢𑁆𑀢𑀸𑀢𑀺. 𑀦𑀯𑀫𑀁.

𑁧𑁦. 𑀤𑀦𑁆𑀢𑀧𑁄𑀦𑀲𑀺𑀓𑁆𑀔𑀸𑀧𑀤𑀁

𑁨𑁬𑁩. 𑀤𑀲𑀫𑁂 𑀤𑀦𑁆𑀢𑀓𑀝𑁆𑀞𑀦𑁆𑀢𑀺 𑀤𑀦𑁆𑀢𑀧𑁄𑀦𑀁. 𑀢𑀜𑁆𑀳𑀺 𑀤𑀦𑁆𑀢𑁄 𑀓𑀲𑀻𑀬𑀢𑀺 𑀯𑀺𑀮𑁂𑀔𑀻𑀬𑀢𑀺 𑀅𑀦𑁂𑀦𑀸𑀢𑀺 ‘‘𑀤𑀦𑁆𑀢𑀓𑀝𑁆𑀞’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀩𑁆𑀩’’𑀦𑁆𑀢𑀺 𑀆𑀤𑀺𑀦𑀸 𑀲𑀩𑁆𑀩𑀫𑁂𑀯 𑀧𑀁𑀲𑀼𑀓𑀽𑀮𑀁 𑀲𑀩𑁆𑀩𑀧𑀁𑀲𑀼𑀓𑀽𑀮𑀁, 𑀢𑀫𑀲𑁆𑀲𑀢𑁆𑀣𑀻𑀢𑀺 ‘‘𑀲𑀩𑁆𑀩𑀧𑀁𑀲𑀼𑀓𑀽𑀮𑀺𑀓𑁄’’𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀲𑁄𑀢𑀺 𑀪𑀺𑀓𑁆𑀔𑀼 𑀧𑀭𑀺𑀪𑀼𑀜𑁆𑀚𑀢𑀺 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀲𑀸𑀦𑁂𑀢𑀺 𑀆𑀴𑀳𑀦𑁂. 𑀢𑀜𑁆𑀳𑀺 𑀙𑀯𑀸𑀦𑀁 𑀲𑀬𑀦𑀝𑁆𑀞𑀸𑀦𑀢𑁆𑀢𑀸 ‘‘𑀲𑀼𑀲𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀢𑀢𑁆𑀣𑀸𑀢𑀺 𑀲𑀼𑀲𑀸𑀦𑁂. 𑀧𑀼𑀦 𑀢𑀢𑁆𑀣𑀸𑀢𑀺 𑀏𑀯𑀫𑁂𑀯. 𑀅𑀬𑁆𑀬𑀲𑀭𑀽𑀧𑀜𑁆𑀘 𑀯𑁄𑀲𑀸𑀝𑀺𑀢𑀓𑀲𑀭𑀽𑀧𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀬𑁆𑀬𑀯𑁄𑀲𑀸𑀝𑀺𑀢𑀓𑀸𑀦𑀻𑀢𑀺 𑀏𑀢𑁆𑀣𑀸’’𑀢𑀺. 𑀢𑀢𑁆𑀣 ‘‘𑀅𑀬𑁆𑀬𑀸…𑀧𑁂… 𑀧𑀺𑀢𑀸𑀫𑀳𑀸’’𑀢𑀺𑀇𑀫𑀺𑀦𑀸 𑀅𑀬𑁆𑀬𑀲𑀭𑀽𑀧𑀁 𑀤𑀲𑁆𑀲𑁂𑀢𑀺. ‘‘𑀯𑁄…𑀧𑁂… 𑀪𑁄𑀚𑀦𑀻𑀬𑀸𑀦𑀻’’𑀢𑀺𑀇𑀫𑀺𑀦𑀸 𑀯𑁄𑀲𑀸𑀝𑀺𑀢𑀓𑀲𑀭𑀽𑀧𑀁. 𑀅𑀬𑁆𑀬𑀲𑀗𑁆𑀔𑀸𑀢𑀸𑀦𑀁 𑀧𑀺𑀢𑀺𑀧𑀺𑀢𑀸𑀫𑀳𑀸𑀦𑀁 𑀅𑀢𑁆𑀣𑀸𑀬, 𑀢𑁂 𑀯𑀸 𑀉𑀤𑁆𑀤𑀺𑀲𑁆𑀲 𑀙𑀟𑁆𑀟𑀺𑀢𑀸𑀦𑀺 𑀯𑁄𑀲𑀸𑀝𑀺𑀢𑀓𑀲𑀗𑁆𑀔𑀢𑀸𑀦𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀦𑀺 𑀅𑀬𑁆𑀬𑀯𑁄𑀲𑀸𑀝𑀺𑀢𑀓𑀸𑀦𑀻𑀢𑀺 𑀯𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄. 𑀫𑀦𑀼𑀲𑁆𑀲𑀸 𑀞𑀧𑁂𑀦𑁆𑀢𑀺 𑀓𑀺𑀭𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁. 𑀢𑁂𑀲𑀦𑁆𑀢𑀺 𑀜𑀸𑀢𑀓𑀸𑀦𑀁. 𑀧𑀺𑀡𑁆𑀟𑀁 𑀧𑀺𑀡𑁆𑀟𑀁 𑀓𑀢𑁆𑀯𑀸𑀢𑀺 𑀲𑀗𑁆𑀖𑀸𑀝𑀁 𑀲𑀗𑁆𑀖𑀸𑀝𑀁 𑀓𑀢𑁆𑀯𑀸. 𑀅𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀢𑁄 𑀅𑀜𑁆𑀜𑀁. 𑀉𑀫𑁆𑀫𑀸𑀭𑁂𑀧𑀻𑀢𑀺 𑀲𑀼𑀲𑀸𑀦𑀲𑁆𑀲 𑀇𑀦𑁆𑀤𑀔𑀻𑀮𑁂𑀧𑀺. 𑀲𑁄 𑀳𑀺 𑀉𑀤𑁆𑀥𑀝𑁄 𑀓𑀺𑀮𑁂𑀲𑀫𑀸𑀭𑁄 𑀏𑀢𑁆𑀣𑀸𑀢𑀺 ‘‘𑀉𑀫𑁆𑀫𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀳𑀺 𑀅𑀪𑀺𑀦𑀺𑀓𑁆𑀔𑀫𑀦𑀓𑀸𑀮𑁂 𑀧𑀼𑀢𑁆𑀢𑀁 𑀘𑀼𑀫𑁆𑀩𑀺𑀲𑁆𑀲𑀸𑀫𑀻𑀢𑀺 𑀑𑀯𑀭𑀓𑀲𑁆𑀲 𑀇𑀦𑁆𑀤𑀔𑀻𑀮𑁂 𑀞𑀢𑁆𑀯𑀸 𑀧𑀲𑁆𑀲𑀦𑁆𑀢𑁄 𑀫𑀸𑀢𑀭𑀁 𑀧𑀼𑀢𑁆𑀢𑀲𑁆𑀲 𑀦𑀮𑀸𑀝𑁂 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀲𑀬𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀫𑁂 𑀧𑀼𑀢𑁆𑀢𑀁 𑀕𑀡𑁆𑀳𑁂𑀬𑁆𑀬𑀁, 𑀫𑀸𑀢𑀸 𑀢𑀲𑁆𑀲 𑀧𑀩𑀼𑀚𑁆𑀛𑁂𑀬𑁆𑀬, 𑀧𑀩𑀼𑀚𑁆𑀛𑀫𑀸𑀦𑀸𑀬 𑀅𑀦𑁆𑀢𑀭𑀸𑀬𑁄 𑀪𑀯𑁂𑀬𑁆𑀬𑀸’’𑀢𑀺 𑀅𑀪𑀺𑀦𑀺𑀓𑁆𑀔𑀫𑀦𑀦𑁆𑀢𑀭𑀸𑀬𑀪𑀬𑁂𑀦 𑀧𑀼𑀢𑁆𑀢𑀤𑀸𑀭𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀇𑀦𑁆𑀤𑀔𑀻𑀮𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺. 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀞𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑁂𑀲𑀼 𑀅𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀲𑁆𑀲 𑀫𑀸𑀭𑀲𑁆𑀲 𑀉𑀤𑁆𑀥𑀝𑀝𑁆𑀞𑀸𑀦𑀢𑁆𑀢𑀸 𑀲𑁄 𑀇𑀦𑁆𑀤𑀔𑀻𑀮𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀉𑀫𑁆𑀫𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀅𑀜𑁆𑀜𑁂 𑀧𑀦 𑀭𑀽𑀴𑁆𑀳𑀻𑀯𑀲𑁂𑀦. 𑀣𑀺𑀭𑁄𑀢𑀺 𑀣𑀤𑁆𑀥𑁄. 𑀖𑀦𑀩𑀤𑁆𑀥𑁄𑀢𑀺 𑀖𑀦𑁂𑀦 𑀩𑀤𑁆𑀥𑁄. 𑀓𑀣𑀺𑀦𑁂𑀦 𑀫𑀁𑀲𑁂𑀦 𑀆𑀩𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀯𑀞𑀢𑀺 𑀣𑀽𑀮𑁄 𑀪𑀯𑀢𑀻𑀢𑀺 𑀯𑀞𑁄, 𑀫𑀼𑀤𑁆𑀥𑀚𑀤𑀼𑀢𑀺𑀬𑁄𑀬𑀁, 𑀲𑁄 𑀅𑀲𑁆𑀲𑀢𑁆𑀣𑀻𑀢𑀺 𑀯𑀞𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀞𑀭𑁄𑀢𑀺 𑀣𑀽𑀮𑁄’’𑀢𑀺. ‘‘𑀲𑀮𑁆𑀮𑀓𑁆𑀔𑁂𑀫𑀸’’𑀢𑀺𑀇𑀫𑀺𑀦𑀸 ‘‘𑀫𑀜𑁆𑀜𑁂’’𑀢𑀺 𑀏𑀢𑁆𑀣 𑀫𑀦𑀥𑀸𑀢𑀼 𑀲𑀮𑁆𑀮𑀓𑁆𑀔𑀡𑀢𑁆𑀣𑁄, 𑀫𑀓𑀸𑀭𑀲𑁆𑀲𑁂𑀓𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀳𑀻𑀢𑀺 𑀲𑀘𑁆𑀘𑀁. 𑀢𑁂𑀲𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁.

𑁨𑁬𑁪. 𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀁. 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀆𑀳𑀸𑀭𑀲𑀤𑁆𑀤𑀲𑁆𑀲 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀲𑀼 𑀦𑀺𑀭𑀽𑀴𑁆𑀳𑀪𑀸𑀯𑀁 𑀅𑀫𑀜𑁆𑀜𑀺𑀢𑁆𑀯𑀸. 𑀪𑀕𑀯𑀸 𑀧𑀦 𑀞𑀧𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸𑀉𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀉𑀧𑁆𑀧𑀦𑁆𑀦𑀲𑁆𑀲. 𑀧𑀺𑀢𑀸 𑀧𑀼𑀢𑁆𑀢𑀲𑀗𑁆𑀔𑀸𑀢𑁂 𑀤𑀸𑀭𑀓𑁂 𑀲𑀜𑁆𑀜𑀸𑀧𑁂𑀦𑁆𑀢𑁄 𑀯𑀺𑀬 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀦𑁆𑀢𑁄𑀢𑀺 𑀬𑁄𑀚𑀦𑀸.

𑁨𑁬𑁫. 𑀏𑀢𑀤𑁂𑀯𑀸𑀢𑀺 𑀢𑀺𑀡𑁆𑀡𑀫𑀸𑀓𑀸𑀭𑀸𑀦𑀫𑀜𑁆𑀜𑀢𑀭𑀯𑀲𑁂𑀦 𑀅𑀤𑀺𑀦𑁆𑀦𑀫𑁂𑀯 𑀲𑀦𑁆𑀥𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀲𑀘𑁆𑀘𑀁. 𑀫𑀸𑀢𑀺𑀓𑀸𑀬𑀁 ‘‘𑀤𑀺𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀅𑀣 𑀓𑀲𑁆𑀫𑀸 𑀧𑀤𑀪𑀸𑀚𑀦𑁂𑀬𑁂𑀯 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀺𑀦𑁆𑀦𑀦𑁆𑀢𑀺 𑀇𑀤’’𑀦𑁆𑀢𑀺𑀆𑀤𑀺. ‘‘𑀤𑀺𑀦𑁆𑀦’’𑀦𑁆𑀢𑀺 𑀇𑀤𑀁 𑀉𑀤𑁆𑀥𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 ‘‘𑀤𑀺𑀦𑁆𑀦’’𑀦𑁆𑀢𑀺 𑀧𑀤𑀲𑁆𑀲. 𑀦𑀺𑀤𑁆𑀤𑁂𑀲𑁂 𑀘 ‘‘𑀓𑀸𑀬𑁂𑀦…𑀧𑁂… 𑀤𑁂𑀦𑁆𑀢𑁂’’𑀢𑀺 𑀉𑀤𑁆𑀥𑀝𑀦𑁆𑀢𑀺 𑀬𑁄𑀚𑀦𑀸. 𑀏𑀯𑀦𑁆𑀢𑀺 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀤𑀤𑀫𑀸𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀦𑁆𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺. 𑀆𑀤𑀻𑀬𑀫𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀣𑀭𑁂𑀡𑀼𑀫𑁆𑀧𑀻𑀢𑀺 𑀭𑀣𑀺𑀓𑀯𑀻𑀣𑀺𑀬𑀁 𑀉𑀝𑁆𑀞𑀺𑀢𑀧𑀁𑀲𑀼𑀫𑁆𑀧𑀺. 𑀧𑀼𑀩𑁆𑀩𑁂𑀢𑀺 𑀧𑀞𑀫𑀧𑀯𑀸𑀭𑀡𑀲𑀺𑀓𑁆𑀔𑀸𑀧𑀤𑁂. 𑀏𑀯𑀁 𑀧𑀝𑀺𑀕𑁆𑀕𑀳𑀺𑀢𑀁 𑀏𑀢𑀁 𑀆𑀳𑀸𑀭𑀁 𑀤𑀺𑀦𑁆𑀦𑀁 𑀦𑀸𑀫 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. ‘‘𑀏𑀢𑀫𑁂𑀯𑀸’’𑀢𑀺 𑀏𑀯𑀲𑁆𑀲 𑀲𑀫𑁆𑀪𑀯𑀢𑁄 𑀢𑀲𑁆𑀲 𑀨𑀮𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀦 𑀇𑀤’’𑀦𑁆𑀢𑀺𑀆𑀤𑀺. 𑀦𑀺𑀲𑁆𑀲𑀝𑁆𑀞𑀁 𑀦 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀣𑀸𑀢𑀺 ‘‘𑀓𑀸𑀬𑁂𑀦𑀸’’𑀢𑀺𑀆𑀤𑀺𑀯𑀘𑀦𑁂. 𑀳𑀻𑀢𑀺 𑀲𑀘𑁆𑀘𑀁. 𑀦𑀢𑁆𑀣𑀼 𑀓𑀭𑀻𑀬𑀢𑀺 𑀇𑀫𑀸𑀬𑀸𑀢𑀺 𑀦𑀢𑁆𑀣𑀼𑀓𑀭𑀡𑀻, 𑀢𑀸𑀬. 𑀦𑀸𑀲𑀸𑀧𑀼𑀝𑁂𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀓𑀮𑁆𑀮𑀓𑁄𑀢𑀺 𑀕𑀺𑀮𑀸𑀦𑁄. 𑀳𑀻𑀢𑀺 𑀲𑀘𑁆𑀘𑀁. 𑀓𑀸𑀬𑁂𑀦 𑀧𑀝𑀺𑀩𑀤𑁆𑀥𑁄 𑀓𑀸𑀬𑀧𑀝𑀺𑀩𑀤𑁆𑀥𑁄 𑀓𑀝𑀘𑁆𑀙𑀼𑀆𑀤𑀻𑀢𑀺 𑀆𑀳 ‘‘𑀓𑀝𑀘𑁆𑀙𑀼𑀆𑀤𑀻𑀲𑀽’’𑀢𑀺𑀆𑀤𑀺. 𑀳𑀻𑀢𑀺 𑀲𑀘𑁆𑀘𑀁. 𑀧𑀸𑀢𑀺𑀬𑀫𑀸𑀦𑀦𑁆𑀢𑀺 𑀧𑀸𑀢𑀸𑀧𑀺𑀬𑀫𑀸𑀦𑀁.

𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂. ‘‘𑀧𑀜𑁆𑀘𑀳𑀗𑁆𑀕𑁂𑀳𑀻’’𑀢𑀺 𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀣𑀸𑀫𑀫𑀚𑁆𑀛𑀺𑀫𑀲𑁆𑀲𑀸’’𑀢𑀺𑀆𑀤𑀺. 𑀢𑀦𑁆𑀢𑀺 𑀤𑀸𑀢𑀩𑁆𑀩𑀯𑀢𑁆𑀣𑀼𑀁.

𑀢𑀢𑁆𑀣𑀸𑀢𑀺 ‘‘𑀳𑀢𑁆𑀣𑀧𑀸𑀲𑁄 𑀧𑀜𑁆𑀜𑀸𑀬𑀢𑀻’’𑀢𑀺𑀯𑀘𑀦𑁂. 𑀕𑀘𑁆𑀙𑀦𑁆𑀢𑁄𑀧𑀺 𑀞𑀺𑀢𑁂𑀦𑁂𑀯 𑀲𑀗𑁆𑀕𑀳𑀺𑀢𑁄. 𑀪𑀽𑀫𑀝𑁆𑀞𑀲𑁆𑀲𑀸𑀢𑀺 𑀪𑀽𑀫𑀺𑀬𑀁 𑀞𑀺𑀢𑀲𑁆𑀲. 𑀆𑀓𑀸𑀲𑀝𑁆𑀞𑀲𑁆𑀲𑀸𑀢𑀺 𑀆𑀓𑀸𑀲𑁂 𑀞𑀺𑀢𑀲𑁆𑀲. ‘‘𑀳𑀢𑁆𑀣𑀁 𑀅𑀗𑁆𑀕’’𑀦𑁆𑀢𑀺 𑀧𑀤𑁂𑀳𑀺 𑀅𑀯𑀬𑀯𑀺𑀲𑀫𑁆𑀩𑀦𑁆𑀥𑁄 𑀓𑀸𑀢𑀩𑁆𑀩𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀪𑀽𑀫𑀝𑁆𑀞𑀲𑁆𑀲 𑀘 𑀲𑀻𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀧𑀓𑁆𑀔𑀻𑀢𑀺 𑀲𑀓𑀼𑀡𑁄. 𑀲𑁄 𑀳𑀺 𑀧𑀓𑁆𑀔𑀬𑀼𑀢𑁆𑀢𑀢𑁆𑀢𑀸 𑀧𑀓𑁆𑀔𑀻𑀢𑀺 𑀯𑀼𑀘𑁆𑀘𑀢𑀺. 𑀳𑀢𑁆𑀣𑀻𑀢𑀺 𑀓𑀼𑀜𑁆𑀚𑀭𑁄. 𑀲𑁄 𑀳𑀺 𑀲𑁄𑀡𑁆𑀟𑀲𑀗𑁆𑀔𑀸𑀢𑀳𑀢𑁆𑀣𑀬𑀼𑀢𑁆𑀢𑀢𑁆𑀢𑀸 𑀳𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀤𑁆𑀥𑁂𑀦 𑀅𑀝𑁆𑀞𑀫𑀁 𑀭𑀢𑀦𑀫𑀲𑁆𑀲𑀸𑀢𑀺 𑀅𑀤𑁆𑀥𑀝𑁆𑀞𑀫𑀭𑀢𑀦𑁄, 𑀳𑀢𑁆𑀣𑀻, 𑀢𑀲𑁆𑀲. 𑀢𑁂𑀦𑀸𑀢𑀺 𑀳𑀢𑁆𑀣𑀺𑀦𑀸.

𑀏𑀓𑁄 𑀤𑀸𑀬𑀓𑁄 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀑𑀡𑀫𑀢𑀻𑀢𑀺 𑀳𑁂𑀝𑁆𑀞𑀸 𑀦𑀫𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀓𑀤𑁂𑀲𑀲𑀫𑁆𑀧𑀝𑀺𑀘𑁆𑀙𑀦𑀫𑀢𑁆𑀢𑁂𑀦. 𑀢𑀢𑁄𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀢𑁄. 𑀉𑀕𑁆𑀖𑀸𑀝𑁂𑀢𑁆𑀯𑀸𑀢𑀺 𑀯𑀺𑀯𑀭𑀺𑀢𑁆𑀯𑀸. 𑀓𑀸𑀚𑁂𑀦𑀸𑀢𑀺 𑀩𑁆𑀬𑀸𑀪𑀗𑁆𑀕𑀺𑀬𑀸. 𑀲𑀸 𑀳𑀺 𑀓𑀘𑀢𑀺 𑀩𑀦𑁆𑀥𑀢𑀺 𑀯𑀺𑀯𑀺𑀥𑀁 𑀪𑀸𑀭𑀁 𑀅𑀲𑁆𑀫𑀺𑀦𑁆𑀢𑀺 𑀓𑀸𑀘𑁄𑀢𑀺 𑀯𑀼𑀘𑁆𑀘𑀢𑀺, 𑀘𑀓𑀸𑀭𑀲𑁆𑀲 𑀚𑀓𑀸𑀭𑁂 𑀓𑀢𑁂 𑀓𑀸𑀚𑁄𑀧𑀺 𑀬𑀼𑀢𑁆𑀢𑁄𑀬𑁂𑀯. 𑀢𑀺𑀁𑀲 𑀳𑀢𑁆𑀣𑀸 𑀭𑀢𑀦𑀸𑀦𑀺 𑀇𑀫𑀲𑁆𑀲𑀸𑀢𑀺 𑀢𑀺𑀁𑀲𑀳𑀢𑁆𑀣𑁄, 𑀯𑁂𑀡𑀼. 𑀕𑀼𑀴𑀓𑀼𑀫𑁆𑀪𑁄𑀢𑀺 𑀨𑀸𑀡𑀺𑀢𑁂𑀦 𑀧𑀽𑀭𑀺𑀢𑁄 𑀖𑀝𑁄. 𑀧𑀝𑀺𑀕𑁆𑀕𑀳𑀺𑀢𑀫𑁂𑀯𑀸𑀢𑀺 𑀓𑀼𑀫𑁆𑀪𑁂𑀲𑀼 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀞𑀺𑀢𑁂𑀲𑀼𑀧𑀺 𑀅𑀪𑀺𑀳𑀸𑀭𑀓𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀺𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀺𑀢𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀘𑁆𑀙𑀼𑀬𑀦𑁆𑀢𑀤𑁄𑀡𑀺𑀢𑁄𑀢𑀺 𑀉𑀘𑁆𑀙𑀼𑀁 𑀧𑀻𑀴𑀦𑀬𑀦𑁆𑀢𑀲𑁆𑀲 𑀅𑀫𑁆𑀩𑀡𑀢𑁄.

𑀩𑀳𑀽 𑀧𑀢𑁆𑀢𑀸 𑀞𑀧𑀺𑀢𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀳𑀢𑁆𑀣𑀧𑀸𑀲𑁂𑀢𑀺 𑀬𑁄𑀚𑀦𑀸. 𑀞𑀢𑁆𑀯𑀸 𑀨𑀼𑀲𑀺𑀢𑁆𑀯𑀸 ‘‘𑀦𑀺𑀲𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺 𑀧𑀸𑀞𑀲𑁂𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀞𑀺𑀢𑁂𑀦 𑀯𑀸 𑀦𑀺𑀲𑀺𑀦𑁆𑀦𑁂𑀦 𑀯𑀸 𑀦𑀺𑀧𑀦𑁆𑀦𑁂𑀦 𑀯𑀸 𑀤𑀸𑀬𑀓𑁂𑀦 𑀤𑀺𑀬𑁆𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀣𑀯𑀺𑀬𑀁 𑀞𑀺𑀢𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀬𑀦𑁆𑀢𑀺 𑀬𑀁 𑀬𑀁 𑀧𑀢𑁆𑀢𑀁. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀬𑁂𑀲𑀼 𑀓𑁂𑀲𑀼𑀘𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀢𑀁 𑀯𑀘𑀦𑀁.

𑀢𑀢𑁆𑀣 𑀢𑀲𑁆𑀫𑀺𑀁 𑀞𑀸𑀦𑁂 𑀚𑀸𑀢𑁄 𑀢𑀢𑁆𑀣𑀚𑀸𑀢𑁄, 𑀅𑀮𑀼𑀢𑁆𑀢𑀲𑀫𑀸𑀲𑁄𑀬𑀁, 𑀲𑁄𑀬𑁂𑀯 𑀢𑀢𑁆𑀣𑀚𑀸𑀢𑀓𑁄, 𑀢𑀲𑁆𑀫𑀺𑀁. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀢𑁆𑀣𑀚𑀸𑀢𑀓𑁂 𑀦 𑀭𑀼𑀳𑀢𑀺 𑀬𑀣𑀸, 𑀏𑀯𑀁 𑀦 𑀭𑀼𑀳𑀢𑀺𑀬𑁂𑀯𑀸𑀢𑀺 𑀬𑁄𑀚𑀦𑀸. 𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀲𑀼𑀝𑁆𑀞𑀼 𑀳𑀭𑀺𑀢𑀩𑁆𑀩𑀦𑁆𑀢𑀺 𑀲𑀁𑀳𑀸𑀭𑀺𑀬𑀁, 𑀢𑀁𑀬𑁂𑀯 𑀲𑀁𑀳𑀸𑀭𑀺𑀫𑀁 𑀬𑀓𑀸𑀭𑀲𑁆𑀲 𑀫𑀓𑀸𑀭𑀁 𑀓𑀢𑁆𑀯𑀸, 𑀦 𑀲𑀁𑀳𑀸𑀭𑀺𑀫𑀁 𑀅𑀲𑀁𑀳𑀸𑀭𑀺𑀫𑀁, 𑀢𑀲𑁆𑀫𑀺𑀁. 𑀢𑁂𑀧𑀻𑀢𑀺 𑀢𑁂 𑀅𑀲𑀁𑀳𑀸𑀭𑀺𑀫𑀸𑀧𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀢𑁆𑀣𑀚𑀸𑀢𑀓𑀲𑀗𑁆𑀔𑁂𑀧𑀽𑀧𑀕𑀸𑀢𑀺 𑀢𑀢𑁆𑀣𑀚𑀸𑀢𑀓𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀔𑁂𑀧𑀁 𑀧𑀓𑁆𑀔𑁂𑀧𑀁 𑀉𑀧𑀕𑀢𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀇𑀤𑀜𑁆𑀳𑀺 𑀯𑀸𑀓𑁆𑀬𑀦𑁆𑀢𑀭𑀢𑁆𑀢𑀸 𑀧𑀼𑀦𑀧𑁆𑀧𑀼𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀸𑀦𑀻𑀢𑀺 𑀢𑀺𑀦𑁆𑀢𑀺𑀡𑀺𑀓𑀸𑀤𑀺𑀧𑀡𑁆𑀡𑀸𑀦𑀺. 𑀲𑀦𑁆𑀥𑀸𑀭𑁂𑀢𑀼𑀦𑁆𑀢𑀺 𑀲𑀫𑁆𑀫𑀸 𑀥𑀸𑀭𑁂𑀢𑀼𑀁. 𑀞𑀺𑀢𑁄 𑀤𑀸𑀬𑀓𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀮𑀤𑁆𑀥𑀲𑁆𑀲 𑀮𑀤𑁆𑀥𑀲𑁆𑀲 𑀯𑀢𑁆𑀣𑀼𑀲𑁆𑀲 𑀲𑀦𑁆𑀦𑀺𑀥𑀺𑀝𑁆𑀞𑀸𑀦𑀢𑁆𑀢𑀸, 𑀧𑀓𑁆𑀔𑀺𑀢𑁆𑀢𑀝𑁆𑀞𑀸𑀦𑀢𑁆𑀢𑀸 𑀯𑀸 𑀣𑀯𑀻𑀬𑀢𑀺 𑀧𑀲𑀁𑀲𑀻𑀬𑀢𑀻𑀢𑀺 𑀣𑀯𑀺𑀓𑀸, 𑀢𑀢𑁄. 𑀧𑀼𑀜𑁆𑀙𑀺𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 ‘‘𑀧𑀼𑀜𑁆𑀙𑀺𑀢𑁆𑀯𑀸 𑀯𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀯𑀸’’𑀢𑀺 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑁄 𑀯𑀸𑀲𑀤𑁆𑀤𑁄 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄. 𑀢𑁂𑀲𑀼 𑀢𑁂𑀲𑀼 𑀯𑀢𑁆𑀣𑀽𑀲𑀼 𑀭𑀜𑁆𑀚𑀢𑀺 𑀮𑀕𑁆𑀕𑀢𑀻𑀢𑀺 𑀭𑀚𑁄, 𑀢𑀁. 𑀯𑀺𑀦𑀬𑁂 𑀧𑀜𑁆𑀜𑀢𑁆𑀢𑀁 𑀤𑀼𑀓𑁆𑀓𑀝𑀁 𑀯𑀺𑀦𑀬𑀤𑀼𑀓𑁆𑀓𑀝𑀁. 𑀢𑀁 𑀧𑀦𑀸𑀢𑀺 𑀪𑀺𑀓𑁆𑀔𑀁 𑀧𑀦. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀤𑁂𑀣𑀸𑀢𑀺 𑀫𑀁 𑀧𑀝𑀺𑀕𑁆𑀕𑀳𑀸𑀧𑁂𑀢𑁆𑀯𑀸 𑀫𑀫 𑀤𑁂𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁄 𑀢𑀢𑁄𑀢𑀺 𑀢𑀲𑁆𑀫𑀸 𑀢𑀲𑁆𑀫𑀸 𑀞𑀸𑀦𑀸 𑀉𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀪𑀺𑀓𑁆𑀔𑀁. 𑀢𑀲𑁆𑀲𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲.

𑀲𑁄 𑀯𑀢𑁆𑀢𑀩𑁆𑀩𑁄𑀢𑀺 𑀲𑁄 𑀤𑀺𑀬𑁆𑀬𑀫𑀸𑀦𑁄 𑀪𑀺𑀓𑁆𑀔𑀼 𑀤𑀸𑀬𑀓𑁂𑀦 𑀪𑀺𑀓𑁆𑀔𑀼𑀦𑀸 𑀯𑀢𑁆𑀢𑀩𑁆𑀩𑁄𑀢𑀺 𑀬𑁄𑀚𑀦𑀸. 𑀇𑀫𑀦𑁆𑀢𑀺 𑀲𑀭𑀚𑀧𑀢𑁆𑀢𑀁. 𑀢𑁂𑀦𑀸𑀢𑀺 𑀤𑀺𑀬𑁆𑀬𑀫𑀸𑀦𑀪𑀺𑀓𑁆𑀔𑀼𑀦𑀸. 𑀢𑀣𑀸 𑀓𑀸𑀢𑀩𑁆𑀩𑀦𑁆𑀢𑀺 𑀬𑀣𑀸 𑀤𑀸𑀬𑀓𑁂𑀦 𑀪𑀺𑀓𑁆𑀔𑀼𑀦𑀸 𑀯𑀼𑀢𑁆𑀢𑀁, 𑀢𑀣𑀸 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀉𑀧𑁆𑀮𑀯𑀢𑀻𑀢𑀺 𑀉𑀧𑀭𑀺 𑀕𑀘𑁆𑀙𑀢𑀺, 𑀧𑁆𑀮𑀼 𑀕𑀢𑀺𑀬𑀦𑁆𑀢𑀺 𑀳𑀺 𑀥𑀸𑀢𑀼𑀧𑀸𑀞𑁂𑀲𑀼 (𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑁧𑁬 𑀴𑀓𑀸𑀭𑀦𑁆𑀢𑀥𑀸𑀢𑀼) 𑀯𑀼𑀢𑁆𑀢𑀁. 𑀏𑀢𑁆𑀣 𑀉𑀇𑀢𑀺 𑀉𑀧𑀲𑀕𑁆𑀕𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀢𑁆𑀣𑀁 ‘‘𑀉𑀧𑀭𑀻’’𑀢𑀺 𑀯𑀼𑀢𑁆𑀢𑀁, 𑀧𑀓𑀸𑀭𑀮𑀓𑀸𑀭𑀲𑀁𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀉𑀧𑁆𑀧𑀺𑀮𑀯𑀢𑀻’’𑀢𑀺 𑀮𑀺𑀔𑀦𑁆𑀢𑀺, 𑀲𑁄 𑀅𑀧𑀸𑀞𑁄. 𑀓𑀜𑁆𑀚𑀺𑀓𑀦𑁆𑀢𑀺 𑀩𑀺𑀮𑀗𑁆𑀕𑀁. 𑀢𑀜𑁆𑀳𑀺 𑀓𑁂𑀦 𑀚𑀮𑁂𑀦 𑀅𑀜𑁆𑀚𑀺𑀬𑀁 𑀅𑀪𑀺𑀩𑁆𑀬𑀢𑁆𑀢𑀁 𑀅𑀲𑁆𑀲𑀸𑀢𑀺 ‘‘𑀓𑀜𑁆𑀚𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀫𑁂𑀯 𑀓𑀜𑁆𑀚𑀺𑀓𑀁 𑀬𑀓𑀸𑀭𑀲𑁆𑀲 𑀓𑀓𑀸𑀭𑀁 𑀓𑀢𑁆𑀯𑀸. 𑀢𑀁 𑀧𑀯𑀸𑀳𑁂𑀢𑁆𑀯𑀸, 𑀅𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂. 𑀲𑀼𑀓𑁆𑀔𑀫𑁂𑀯 𑀪𑀢𑁆𑀢𑀁 𑀪𑀚𑀺𑀢𑀩𑁆𑀩𑀝𑁆𑀞𑁂𑀦 𑀲𑁂𑀯𑀺𑀢𑀩𑁆𑀩𑀝𑁆𑀞𑁂𑀦𑀸𑀢𑀺 𑀲𑀼𑀓𑁆𑀔𑀪𑀢𑁆𑀢𑀁, 𑀢𑀲𑁆𑀫𑀺𑀁. 𑀧𑀼𑀭𑀢𑁄𑀢𑀺 𑀪𑀺𑀓𑁆𑀔𑀼𑀲𑁆𑀲 𑀧𑀼𑀭𑀢𑁄, 𑀧𑀼𑀩𑁆𑀩𑁂 𑀯𑀸. 𑀨𑀼𑀲𑀺𑀢𑀸𑀦𑀻𑀢𑀺 𑀩𑀺𑀦𑁆𑀤𑀽𑀦𑀺. 𑀢𑀸𑀦𑀺 𑀳𑀺 𑀲𑀫𑁆𑀩𑀸𑀥𑀝𑁆𑀞𑀸𑀦𑁂𑀲𑀼𑀧𑀺 𑀨𑀼𑀲𑀦𑁆𑀢𑀻𑀢𑀺 𑀨𑀼𑀲𑀺𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀉𑀴𑀼𑀗𑁆𑀓𑁄𑀢𑀺 𑀓𑁄𑀲𑀺𑀬𑀲𑀓𑀼𑀡𑀦𑀸𑀫𑁄 𑀤𑀻𑀖𑀤𑀡𑁆𑀟𑀓𑁄 𑀏𑀓𑁄 𑀪𑀸𑀚𑀦𑀯𑀺𑀲𑁂𑀲𑁄, 𑀢𑁂𑀦. 𑀣𑁂𑀯𑀸𑀢𑀺 𑀨𑀼𑀲𑀺𑀢𑀸𑀦𑀺. 𑀢𑀸𑀦𑀺 𑀳𑀺 𑀲𑀫𑁆𑀩𑀸𑀥𑀝𑁆𑀞𑀸𑀦𑁂𑀲𑀼𑀧𑀺 𑀨𑀼𑀲𑀺𑀢𑀢𑁆𑀢𑀸 𑀣𑀯𑀻𑀬𑀦𑁆𑀢𑀺 𑀧𑀲𑀁𑀲𑀻𑀬𑀦𑁆𑀢𑀻𑀢𑀺 ‘‘𑀣𑁂𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀘𑀭𑀼𑀓𑁂𑀦𑀸𑀢𑀺 𑀘𑀭𑀻𑀬𑀢𑀺 𑀪𑀓𑁆𑀔𑀻𑀬𑀢𑀻𑀢𑀺 𑀘𑀭𑀼, 𑀳𑀩𑁆𑀬𑀧𑀸𑀓𑁄, 𑀢𑀁 𑀓𑀭𑁄𑀢𑀺 𑀅𑀦𑁂𑀦𑀸𑀢𑀺 𑀘𑀭𑀼𑀓𑀁, 𑀣𑀸𑀮𑁆𑀬𑀸𑀤𑀺𑀓𑀁 𑀔𑀼𑀤𑁆𑀤𑀓𑀪𑀸𑀚𑀦𑀁, 𑀢𑁂𑀦 𑀆𑀓𑀺𑀭𑀺𑀬𑀫𑀸𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀴𑀯𑀡𑁆𑀡𑀓𑀸𑀫𑁂𑀳𑀺 𑀫𑀸𑀦𑀻𑀬𑀢𑀻𑀢𑀺 𑀫𑀲𑀺. 𑀔𑀸𑀤𑀢𑀻𑀢𑀺 𑀙𑀸𑀭𑁄 𑀔𑀓𑀸𑀭𑀲𑁆𑀲 𑀙𑀓𑀸𑀭𑀁, 𑀤𑀓𑀸𑀭𑀲𑁆𑀲 𑀘 𑀭𑀓𑀸𑀭𑀁 𑀓𑀢𑁆𑀯𑀸, 𑀔𑀸𑀭𑀭𑀲𑁄, 𑀲𑁄 𑀇𑀫𑀺𑀲𑁆𑀲𑀢𑁆𑀣𑀻𑀢𑀺 𑀙𑀸𑀭𑀺𑀓𑀸. 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀉𑀤𑁆𑀥𑀁 𑀕𑀦𑁆𑀢𑁆𑀯𑀸. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸.

𑀨𑀸𑀮𑁂𑀢𑁆𑀯𑀸𑀢𑀺 𑀙𑀺𑀦𑁆𑀤𑀺𑀢𑁆𑀯𑀸. 𑀤𑁂𑀦𑁆𑀢𑀸𑀦𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀸𑀬𑀸𑀲𑀲𑁆𑀲𑀸𑀢𑀺 𑀧𑀸𑀬𑀸𑀲𑁂𑀦. 𑀢𑀣𑀸𑀧𑀻𑀢𑀺 𑀢𑁂𑀦 𑀫𑀼𑀔𑀯𑀝𑁆𑀝𑀺𑀬𑀸 𑀕𑀳𑀡𑀸𑀓𑀸𑀭𑁂𑀦𑀧𑀺.

𑀆𑀪𑁄𑀕𑀁 𑀓𑀢𑁆𑀯𑀸𑀢𑀺 ‘‘𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀫𑀦𑀲𑀺𑀓𑀸𑀭𑀁 𑀓𑀢𑁆𑀯𑀸. 𑀲𑁄𑀢𑀺 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁄 𑀪𑀺𑀓𑁆𑀔𑀼. 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀆𑀪𑁄𑀕𑀲𑁆𑀲 𑀓𑀢𑀢𑁆𑀢𑀸 𑀯𑀝𑁆𑀝𑀢𑀺𑀬𑁂𑀯. 𑀅𑀦𑀸𑀤𑀭𑀦𑁆𑀢𑀺 𑀅𑀦𑀸𑀤𑀭𑁂𑀦, 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁, 𑀅𑀦𑀸𑀤𑀭𑀁 𑀳𑀼𑀢𑁆𑀯𑀸𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀓𑀸𑀬𑁂𑀦 𑀧𑀝𑀺𑀩𑀤𑁆𑀥𑁄 𑀓𑀸𑀬𑀧𑀝𑀺𑀩𑀤𑁆𑀥𑁄, 𑀢𑁂𑀦 𑀧𑀝𑀺𑀩𑀤𑁆𑀥𑁄 𑀓𑀸𑀬𑀧𑀝𑀺𑀩𑀤𑁆𑀥𑀧𑀝𑀺𑀩𑀤𑁆𑀥𑁄, 𑀢𑁂𑀦. 𑀯𑀘𑀦𑀫𑀢𑁆𑀢𑀫𑁂𑀯𑀸𑀢𑀺 ‘‘𑀧𑀝𑀺𑀩𑀤𑁆𑀥𑀧𑀝𑀺𑀩𑀤𑁆𑀥’’𑀦𑁆𑀢𑀺 𑀏𑀓𑀁 𑀅𑀢𑀺𑀭𑁂𑀓𑀁 𑀧𑀝𑀺𑀩𑀤𑁆𑀥𑀯𑀘𑀦𑀫𑀢𑁆𑀢𑀫𑁂𑀯 𑀦𑀸𑀦𑀁, 𑀅𑀢𑁆𑀣𑀢𑁄 𑀧𑀦 𑀓𑀸𑀬𑀧𑀝𑀺𑀩𑀤𑁆𑀥𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀫𑁆𑀧𑀻𑀢𑀺 𑀬𑀫𑁆𑀧𑀺 𑀯𑀢𑁆𑀣𑀼. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀯𑀝𑁆𑀝𑀦𑁂. 𑀢𑀦𑁆𑀢𑀺 𑀅𑀦𑀼𑀚𑀸𑀦𑀦𑀁.

𑀦𑁂𑀬𑁆𑀬𑁄 𑀅𑀥𑀺𑀧𑁆𑀧𑀸𑀬𑀁 𑀦𑁂𑀢𑁆𑀯𑀸 𑀜𑀸𑀢𑁄 𑀅𑀢𑁆𑀣𑁄 𑀇𑀫𑀲𑁆𑀲𑀸𑀢𑀺 𑀦𑁂𑀬𑁆𑀬𑀢𑁆𑀣𑀁. 𑀏𑀢𑁆𑀣𑀸𑀢𑀺 𑀲𑀼𑀢𑁆𑀢𑁂, 𑀲𑀼𑀢𑁆𑀢𑀲𑁆𑀲 𑀯𑀸. 𑀬𑀦𑁆𑀢𑀺 𑀯𑀢𑁆𑀣𑀼 𑀧𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀕𑀴𑀺𑀢𑁆𑀯𑀸𑀢𑀺 𑀪𑀲𑁆𑀲𑀺𑀢𑁆𑀯𑀸. 𑀲𑀼𑀤𑁆𑀥𑀸𑀬𑀸𑀢𑀺 𑀦𑀺𑀭𑀚𑀸𑀬. 𑀲𑀸𑀫𑀦𑁆𑀢𑀺 𑀲𑀬𑀁. 𑀧𑀼𑀜𑁆𑀙𑀺𑀢𑁆𑀯𑀸 𑀯𑀸𑀢𑀺𑀆𑀤𑀻𑀲𑀼 𑀢𑀬𑁄 𑀯𑀸𑀲𑀤𑁆𑀤𑀸 𑀅𑀦𑀺𑀬𑀫𑀯𑀺𑀓𑀧𑁆𑀧𑀢𑁆𑀣𑀸. 𑀧𑀼𑀜𑁆𑀙𑀺𑀢𑀸𑀤𑀻𑀲𑀼 𑀳𑀺 𑀏𑀓𑀲𑁆𑀫𑀺𑀁 𑀓𑀺𑀘𑁆𑀘𑁂 𑀓𑀢𑁂 𑀇𑀢𑀭𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀢𑀺 𑀢𑁂𑀦 𑀪𑀺𑀓𑁆𑀔𑀼𑀦𑀸, ‘‘𑀆𑀳𑀭𑀸𑀧𑁂𑀢𑀼𑀫𑁆𑀧𑀻’’𑀢𑀺𑀧𑀤𑁂 𑀓𑀸𑀭𑀺𑀢𑀓𑀫𑁆𑀫𑀁. ‘‘𑀓𑀲𑁆𑀫𑀸 𑀦 𑀯𑀝𑁆𑀝𑀢𑀻’’𑀢𑀺 𑀧𑀼𑀘𑁆𑀙𑀸. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀲𑀼𑀢𑁆𑀢𑀯𑀘𑀦𑁂𑀲𑀼. ‘‘𑀧𑀭𑀺𑀘𑁆𑀘𑀢𑁆𑀢𑀁 𑀢𑀁 𑀪𑀺𑀓𑁆𑀔𑀯𑁂 𑀤𑀸𑀬𑀓𑁂𑀳𑀻’’𑀢𑀺 𑀯𑀘𑀦𑁂𑀦𑀸𑀢𑀺 𑀬𑁄𑀚𑀦𑀸. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀦𑀻𑀢𑀢𑁆𑀣𑁄 𑀅𑀥𑀺𑀧𑁆𑀧𑀸𑀬𑁄, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀇𑀢𑀢𑁆𑀣𑁄 𑀜𑀸𑀢𑀢𑁆𑀣𑁄 𑀅𑀥𑀺𑀧𑁆𑀧𑀸𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀦𑀻𑀢𑀢𑁆𑀣𑀫𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀦𑁂𑀬𑁆𑀬𑀢𑁆𑀣, 𑀫𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀫𑀸 𑀘𑀸’’𑀢𑀺 𑀆𑀤𑀺. 𑀢𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀦𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀢𑀺𑀬𑀤𑀺𑀯𑀲𑁂𑀧𑀻𑀢𑀺 𑀧𑀺𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀅𑀧𑀭𑀤𑀺𑀯𑀲𑁂𑀧𑀻𑀢𑀺 𑀅𑀢𑁆𑀣𑁄. 𑀅𑀥𑀺𑀧𑁆𑀧𑀸𑀬𑁄𑀢𑀺 𑀦𑁂𑀬𑁆𑀬𑀢𑁆𑀣𑁄 𑀅𑀥𑀺𑀧𑁆𑀧𑀸𑀬𑁄 𑀦𑁂𑀢𑁆𑀯𑀸 𑀇𑀬𑁆𑀬𑀢𑁆𑀣𑁄 𑀜𑀸𑀢𑀢𑁆𑀣𑁄 𑀅𑀥𑀺𑀧𑁆𑀧𑀸𑀬𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑀼𑀜𑁆𑀚𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀤𑀦𑁆𑀢𑀸𑀢𑀺 𑀤𑀲𑀦𑀸. 𑀢𑁂 𑀳𑀺 𑀤𑀁𑀲𑀻𑀬𑀦𑁆𑀢𑀺 𑀪𑀓𑁆𑀔𑀻𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 ‘‘𑀤𑀦𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀢𑁆𑀣𑀁𑀬𑁂𑀯 𑀲𑀢𑁆𑀣𑀓𑀁 𑀔𑀼𑀤𑁆𑀤𑀓𑀝𑁆𑀞𑁂𑀦, 𑀢𑁂𑀦 𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀢𑁆𑀣𑀓𑁂𑀦. 𑀏𑀢𑀦𑁆𑀢𑀺 𑀫𑀮𑀁. 𑀢𑀦𑁆𑀢𑀺 𑀮𑁄𑀳𑀕𑀦𑁆𑀥𑀫𑀢𑁆𑀢𑀁. 𑀧𑀭𑀺𑀳𑀭𑀦𑁆𑀢𑀻𑀢𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀳𑀭𑀦𑁆𑀢𑀺. 𑀳𑀻𑀢𑀺 𑀲𑀘𑁆𑀘𑀁, 𑀬𑀲𑁆𑀫𑀸 𑀯𑀸. 𑀢𑀁 𑀲𑀢𑁆𑀣𑀓𑀁 𑀧𑀭𑀺𑀪𑁄𑀕𑀢𑁆𑀣𑀸𑀬 𑀬𑀲𑁆𑀫𑀸 𑀦 𑀧𑀭𑀺𑀳𑀭𑀦𑁆𑀢𑀺, 𑀢𑀲𑁆𑀫𑀸 𑀏𑀲𑁂𑀯 𑀦𑀬𑁄𑀢𑀺 𑀅𑀢𑁆𑀣𑁄. 𑀉𑀕𑁆𑀕𑀳𑀺𑀢𑀧𑀘𑁆𑀘𑀬𑀸, 𑀲𑀦𑁆𑀦𑀺𑀥𑀺𑀧𑀘𑁆𑀘𑀬𑀸 𑀯𑀸 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀓𑁆𑀓𑀔𑀻𑀭𑁂𑀲𑀼. 𑀦𑀻𑀮𑀺𑀓𑀸𑀢𑀺 𑀦𑀻𑀮𑀯𑀡𑁆𑀡𑀸 𑀲𑁆𑀦𑁂𑀳𑀸. 𑀆𑀫𑀓𑀢𑀓𑁆𑀓𑀸𑀤𑀻𑀲𑀽𑀢𑀺 𑀅𑀧𑀓𑁆𑀓𑁂𑀲𑀼 𑀢𑀓𑁆𑀓𑀔𑀻𑀭𑁂𑀲𑀼.

𑀓𑀺𑀮𑀺𑀝𑁆𑀞𑀉𑀤𑀓𑀦𑁆𑀢𑀺 𑀲𑀫𑀮𑀁 𑀉𑀤𑀓𑀁. 𑀢𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀧𑀢𑁆𑀢𑀕𑀢𑀁 𑀑𑀤𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀉𑀕𑁆𑀕𑀳𑀺𑀢𑀓𑁄𑀢𑀺 𑀅𑀯𑀕𑀳𑀺𑀢𑀓𑁄. ‘‘𑀉𑀜𑁆𑀜𑀸𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁧𑁨) 𑀯𑀺𑀬 𑀉𑀓𑀸𑀭𑁄 𑀑𑀓𑀸𑀭𑀯𑀺𑀧𑀭𑀻𑀢𑁄 𑀳𑁄𑀢𑀺, 𑀅𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 𑀤𑀼𑀕𑁆𑀕𑀳𑀺𑀢𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁂𑀦𑀸𑀢𑀺 𑀑𑀤𑀦𑁂𑀦. 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺 𑀳𑀢𑁆𑀣𑀢𑁄 𑀅𑀫𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁 𑀲𑀸𑀧𑁂𑀓𑁆𑀔𑁂 𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀢𑁄𑀢𑀺 𑀇𑀢𑁄 𑀧𑀢𑁆𑀢𑀢𑁄. 𑀲𑀸𑀫𑀡𑁂𑀭𑁄 𑀧𑀓𑁆𑀔𑀺𑀧𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀢𑀺 𑀧𑀢𑁆𑀢𑀢𑁄. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀢𑀦𑁆𑀢𑀺 ‘‘𑀧𑀼𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀸𑀦𑀁 𑀓𑁂𑀲𑀜𑁆𑀘𑀺 𑀆𑀘𑀭𑀺𑀬𑀸𑀦𑀁 𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 𑀧𑀽𑀯𑀪𑀢𑁆𑀢𑀸𑀤𑀺.

𑀅𑀢𑁆𑀢𑀦𑁄 𑀯𑀸𑀢𑀺 𑀲𑀸𑀫𑀡𑁂𑀭𑀲𑁆𑀲 𑀯𑀸. 𑀲𑀸𑀫𑀡𑁂𑀭𑀸𑀢𑀺 𑀆𑀫𑀦𑁆𑀢𑀦𑀁. 𑀢𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀪𑀸𑀚𑀦𑁂𑀢𑀺 𑀬𑀸𑀕𑀼𑀧𑀘𑀦𑀓𑀪𑀸𑀚𑀦𑁂. 𑀬𑀸𑀕𑀼𑀓𑀼𑀝𑀦𑁆𑀢𑀺 𑀬𑀸𑀕𑀼𑀬𑀸 𑀧𑀽𑀭𑀺𑀢𑀁 𑀓𑀼𑀝𑀁. 𑀢𑀦𑁆𑀢𑀺 𑀬𑀸𑀕𑀼𑀓𑀼𑀝𑀁. ‘‘𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀡𑁆𑀳𑀸𑀧𑁂𑀢𑀼’’𑀦𑁆𑀢𑀺 𑀓𑀸𑀭𑀺𑀢𑀓𑀫𑁆𑀫𑀁 𑀉𑀧𑀦𑁂𑀢𑀩𑁆𑀩𑀁. 𑀕𑀻𑀯𑀁 𑀞𑀧𑁂𑀢𑁆𑀯𑀸 𑀆𑀯𑀚𑁆𑀚𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀯𑀚𑁆𑀚𑁂𑀢𑀻𑀢𑀺 𑀧𑀭𑀺𑀡𑀸𑀫𑁂𑀢𑀺.

𑀧𑀝𑀺𑀕𑁆𑀕𑀳𑀡𑀽𑀧𑀕𑀁 𑀪𑀸𑀭𑀦𑁆𑀢𑀺 𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀲𑀁𑀳𑀸𑀭𑀺𑀫𑀁 𑀪𑀸𑀭𑀁. 𑀩𑀮𑀯𑀢𑀸 𑀲𑀸𑀫𑀡𑁂𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀮𑀖𑀝𑀁 𑀯𑀸𑀢𑀺 𑀢𑁂𑀮𑁂𑀦 𑀧𑀓𑁆𑀔𑀺𑀢𑁆𑀢𑀁 𑀖𑀝𑀁 𑀯𑀸. 𑀮𑀕𑁆𑀕𑁂𑀦𑁆𑀢𑀻𑀢𑀺 𑀮𑀫𑁆𑀩𑁂𑀦𑁆𑀢𑀺. 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀦𑀸𑀕𑀲𑁆𑀲 𑀤𑀦𑁆𑀢𑁄 𑀯𑀺𑀬𑀸𑀢𑀺 𑀦𑀸𑀕𑀤𑀦𑁆𑀢𑀓𑁄, 𑀲𑀤𑀺𑀲𑀢𑁆𑀣𑁂 𑀓𑁄. 𑀅𑀗𑁆𑀓𑀻𑀬𑀢𑁂 𑀮𑀓𑁆𑀔𑀻𑀬𑀢𑁂 𑀅𑀦𑁂𑀦𑀸𑀢𑀺 𑀅𑀗𑁆𑀓𑀼𑀲𑁄, 𑀕𑀚𑀫𑀢𑁆𑀣𑀓𑀫𑁆𑀳𑀺 𑀯𑀺𑀚𑁆𑀛𑀦𑀓𑀡𑁆𑀟𑀓𑁄. 𑀅𑀗𑁆𑀓𑀼𑀲𑁄 𑀯𑀺𑀬𑀸𑀢𑀺 𑀅𑀗𑁆𑀓𑀼𑀲𑀓𑁄, 𑀢𑀲𑁆𑀫𑀺𑀁 𑀅𑀗𑁆𑀓𑀼𑀲𑀓𑁂 𑀯𑀸 𑀮𑀕𑁆𑀕𑀺𑀢𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀡𑁆𑀳𑀢𑁄𑀢𑀺 𑀕𑀡𑁆𑀳𑀦𑁆𑀢𑀲𑁆𑀲. 𑀫𑀜𑁆𑀘𑀲𑁆𑀲 𑀳𑁂𑀝𑁆𑀞𑀸 𑀳𑁂𑀝𑁆𑀞𑀸𑀫𑀜𑁆𑀘𑁄, 𑀢𑀲𑁆𑀫𑀺𑀁. 𑀢𑀦𑁆𑀢𑀺 𑀢𑁂𑀮𑀣𑀸𑀮𑀓𑀁.

𑀆𑀭𑁄𑀳𑀦𑁆𑀢𑁂𑀳𑀺 𑀘 𑀑𑀭𑁄𑀳𑀦𑁆𑀢𑁂𑀳𑀺 𑀘 𑀦𑀺𑀘𑁆𑀘𑀁 𑀲𑁂𑀯𑀻𑀬𑀢𑀻𑀢𑀺 𑀦𑀺𑀲𑁆𑀲𑁂𑀡𑀻, 𑀢𑀲𑁆𑀲𑀸 𑀫𑀚𑁆𑀛𑀁 𑀦𑀺𑀲𑁆𑀲𑁂𑀡𑀺𑀫𑀚𑁆𑀛𑀁, 𑀢𑀲𑁆𑀫𑀺𑀁. 𑀓𑀡𑁆𑀡𑁂 𑀉𑀝𑁆𑀞𑀺𑀢𑀁 𑀓𑀡𑁆𑀡𑀺𑀓𑀁, 𑀓𑀡𑁆𑀡𑀫𑀮𑀁, 𑀓𑀡𑁆𑀡𑀺𑀓𑀁 𑀯𑀺𑀬 𑀓𑀡𑁆𑀡𑀺𑀓𑀁, 𑀬𑀣𑀸 𑀳𑀺 𑀓𑀡𑁆𑀡𑀫𑀮𑀁 𑀓𑀡𑁆𑀡𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀲𑀬𑀁 𑀧𑀯𑀢𑁆𑀢𑀢𑀺, 𑀏𑀯𑀁 𑀢𑁂𑀮𑀸𑀤𑀺𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀲𑀬𑀁 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀖𑀦𑀘𑀼𑀡𑁆𑀡𑀦𑁆𑀢𑀺 𑀓𑀣𑀺𑀦𑀘𑀼𑀡𑁆𑀡𑀁. 𑀢𑀁𑀲𑀫𑀼𑀝𑁆𑀞𑀸𑀦𑀫𑁂𑀯 𑀦𑀸𑀫𑀸𑀢𑀺 𑀢𑀢𑁄 𑀢𑁂𑀮𑀸𑀤𑀺𑀢𑁄 𑀲𑀫𑀼𑀝𑁆𑀞𑀸𑀦𑀫𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑀦𑁆𑀢𑀺 𑀓𑀡𑁆𑀡𑀺𑀓𑀸𑀤𑀺. 𑀇𑀤𑀁 𑀧𑀤𑀁 𑀧𑀼𑀩𑁆𑀩𑀸𑀧𑀭𑀸𑀧𑁂𑀓𑁆𑀔𑀁.

𑀬𑁄𑀢𑁆𑀢𑁂𑀦𑀸𑀢𑀺 𑀭𑀚𑁆𑀚𑀼𑀦𑀸. 𑀅𑀜𑁆𑀜𑁄 𑀤𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀯𑀺𑀲𑀦𑁆𑀢𑁂 𑀘 𑀦𑀺𑀓𑁆𑀔𑀫𑀦𑁆𑀢𑁂 𑀘 𑀯𑀭𑀢𑀺 𑀆𑀯𑀭𑀢𑀺 𑀇𑀫𑀸𑀬𑀸𑀢𑀺 𑀯𑀢𑀺, 𑀢𑀁. 𑀉𑀘𑁆𑀙𑀽𑀢𑀺 𑀭𑀲𑀸𑀮𑁄. 𑀲𑁄 𑀳𑀺 𑀉𑀲𑀢𑀺 𑀯𑀺𑀲𑀁 𑀤𑀸𑀳𑁂𑀢𑀻𑀢𑀺 𑀉𑀘𑁆𑀙𑀽𑀢𑀺 𑀯𑀼𑀘𑁆𑀘𑀢𑀺, 𑀢𑀁. 𑀢𑀺𑀫𑁆𑀩𑀭𑀼𑀲𑀓𑀦𑁆𑀢𑀺 𑀢𑀺𑀦𑁆𑀤𑀼𑀓𑀁. 𑀢𑀜𑁆𑀳𑀺 𑀢𑁂𑀫𑁂𑀢𑀺 𑀪𑀼𑀜𑁆𑀚𑀦𑁆𑀢𑀁 𑀧𑀼𑀕𑁆𑀕𑀮𑀁 𑀅𑀤𑁆𑀤𑁂𑀢𑀺 𑀭𑀲𑁂𑀦𑀸𑀢𑀺 𑀢𑀺𑀫𑁆𑀩𑁄, 𑀭𑀼𑀲𑀢𑀺 𑀔𑀼𑀤𑁆𑀤𑀺𑀢𑀁 𑀦𑀸𑀲𑁂𑀢𑀻𑀢𑀺 𑀭𑀼𑀲𑀓𑁄, 𑀢𑀺𑀫𑁆𑀩𑁄 𑀘 𑀲𑁄 𑀭𑀼𑀲𑀓𑁄 𑀘𑀸𑀢𑀺 ‘‘𑀢𑀺𑀫𑁆𑀩𑀭𑀼𑀲𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁. 𑀯𑀢𑀺𑀤𑀡𑁆𑀟𑀓𑁂𑀲𑀽𑀢𑀺 𑀯𑀢𑀺𑀬𑀸 𑀅𑀢𑁆𑀣𑀸𑀬 𑀦𑀺𑀓𑁆𑀔𑀡𑀺𑀢𑁂𑀲𑀼 𑀤𑀡𑁆𑀟𑀓𑁂𑀲𑀼. 𑀫𑀬𑀁 𑀧𑀦𑀸𑀢𑀺 𑀲𑀗𑁆𑀕𑀳𑀓𑀸𑀭𑀸𑀘𑀭𑀺𑀬𑀪𑀽𑀢𑀸 𑀩𑀼𑀤𑁆𑀥𑀖𑁄𑀲𑀦𑀸𑀫𑀓𑀸 𑀫𑀬𑀁 𑀧𑀦, 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀩𑀳𑀼𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀧𑀼𑀣𑀼𑀮𑁄 𑀧𑀸𑀓𑀸𑀭𑁄𑀢𑀺 𑀅𑀟𑁆𑀠𑀢𑁂𑀬𑁆𑀬𑀳𑀢𑁆𑀣𑀧𑀸𑀲𑀸𑀦𑀢𑀺𑀓𑁆𑀓𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀳𑀢𑁆𑀣𑀲𑀢𑀫𑁆𑀧𑀻𑀢𑀺 𑀭𑀢𑀦𑀲𑀢𑀫𑁆𑀧𑀺.

𑀲𑁄𑀢𑀺 𑀲𑀸𑀫𑀡𑁂𑀭𑁄. 𑀪𑀺𑀓𑁆𑀔𑀼𑀲𑁆𑀲 𑀤𑁂𑀢𑀻𑀢𑀺 𑀬𑁄𑀚𑀦𑀸. 𑀅𑀧𑀭𑁄𑀢𑀺 𑀲𑀸𑀫𑀡𑁂𑀭𑁄.

𑀨𑀮𑀁 𑀇𑀫𑀺𑀲𑁆𑀲𑀢𑁆𑀣𑀻𑀢𑀺 𑀨𑀮𑀺𑀦𑀻, 𑀇𑀦𑀧𑀘𑁆𑀘𑀬𑁄 𑀇𑀢𑁆𑀣𑀺𑀮𑀺𑀗𑁆𑀕𑀚𑁄𑀢𑀓𑁄 𑀈, 𑀢𑀁 𑀲𑀸𑀔𑀦𑁆𑀢𑀺 𑀬𑁄𑀚𑀦𑀸. 𑀨𑀮𑀺𑀦𑀺𑀲𑀸𑀔𑀦𑁆𑀢𑀺 𑀲𑀫𑀸𑀲𑀢𑁄𑀧𑀺 𑀧𑀸𑀞𑁄 𑀅𑀢𑁆𑀣𑀺. 𑀫𑀘𑁆𑀙𑀺𑀓𑀯𑀸𑀭𑀡𑀢𑁆𑀣𑀦𑁆𑀢𑀺 𑀫𑀥𑀼𑀨𑀸𑀡𑀺𑀢𑀸𑀤𑀻𑀳𑀺 𑀫𑀓𑁆𑀔𑀦𑀝𑁆𑀞𑀸𑀦𑁂 𑀦𑀺𑀮𑀻𑀬𑀦𑁆𑀢𑀻𑀢𑀺 𑀫𑀓𑁆𑀔𑀺𑀓𑀸, 𑀢𑀸𑀬𑁂𑀯 𑀫𑀘𑁆𑀙𑀺𑀓𑀸 𑀔𑀓𑀸𑀭𑀲𑁆𑀲 𑀙𑀓𑀸𑀭𑀁 𑀓𑀢𑁆𑀯𑀸, 𑀢𑀸𑀲𑀁 𑀦𑀺𑀯𑀸𑀭𑀡𑀸𑀬. 𑀫𑀽𑀮𑀧𑀝𑀺𑀕𑁆𑀕𑀳𑀫𑁂𑀯𑀸𑀢𑀺 𑀫𑀽𑀮𑁂 𑀧𑀝𑀺𑀕𑁆𑀕𑀳𑀡𑀫𑁂𑀯, 𑀧𑀞𑀫𑀧𑀝𑀺𑀕𑁆𑀕𑀳𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀪𑀺𑀓𑁆𑀔𑀼 𑀕𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀭𑀺𑀢𑁆𑀢𑁂𑀦𑀸𑀢𑀺 𑀓𑁂𑀦𑀺𑀧𑀸𑀢𑁂𑀦. 𑀢𑀜𑁆𑀳𑀺 𑀅𑀭𑀢𑀺 𑀦𑀸𑀯𑀸 𑀕𑀘𑁆𑀙𑀢𑀺 𑀅𑀦𑁂𑀦𑀸𑀢𑀺 𑀅𑀭𑀺𑀢𑁆𑀢𑀁, 𑀢𑁂𑀦. 𑀢𑀦𑁆𑀢𑀺 𑀧𑀝𑀺𑀕𑁆𑀕𑀳𑀡𑀸𑀭𑀳𑀁 𑀪𑀡𑁆𑀟𑀁. 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦𑀸𑀢𑀺 𑀓𑀸𑀭𑀺𑀢𑀓𑀫𑁆𑀫𑀁. 𑀢𑀲𑁆𑀫𑀺𑀫𑁆𑀧𑀻𑀢𑀺 𑀘𑀸𑀝𑀺𑀓𑀼𑀡𑁆𑀟𑀓𑁂𑀧𑀺. 𑀢𑀦𑁆𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀁.

𑀧𑀸𑀣𑁂𑀬𑁆𑀬𑀢𑀡𑁆𑀟𑀼𑀮𑁂𑀢𑀺 𑀧𑀣𑀲𑁆𑀲 𑀳𑀺𑀢𑁂 𑀢𑀡𑁆𑀟𑀼𑀮𑁂. 𑀢𑁂𑀲𑀦𑁆𑀢𑀺 𑀲𑀸𑀫𑀡𑁂𑀭𑀸𑀦𑀁. 𑀇𑀢𑀭𑁂𑀳𑀻𑀢𑀺 𑀪𑀺𑀓𑁆𑀔𑀽𑀳𑀺 𑀕𑀳𑀺𑀢𑀢𑀡𑁆𑀟𑀼𑀮𑁂𑀳𑀺. 𑀲𑀩𑁆𑀩𑁂𑀳𑀺 𑀪𑀺𑀓𑁆𑀔𑀽𑀳𑀺 𑀪𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀪𑀺𑀓𑁆𑀔𑀽𑀳𑀺 𑀕𑀳𑀺𑀢𑁂𑀳𑀺 𑀲𑀸𑀫𑀡𑁂𑀭𑀲𑁆𑀲 𑀢𑀡𑁆𑀟𑀼𑀮𑁂𑀳𑀺 𑀬𑀸𑀕𑀼𑀧𑀘𑀦𑁂 𑀦 𑀤𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀭𑀡𑀦𑁆𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀪𑀼𑀢𑁆𑀢𑀲𑁆𑀲 𑀘 𑀅𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀪𑀼𑀢𑁆𑀢𑀲𑁆𑀲 𑀘 𑀓𑀸𑀭𑀡𑀁.

𑀪𑀢𑁆𑀢𑀁 𑀧𑀘𑀺𑀢𑀼𑀓𑀸𑀫𑁄 𑀲𑀸𑀫𑀡𑁂𑀭𑁄𑀢𑀺 𑀬𑁄𑀚𑀦𑀸. 𑀪𑀺𑀓𑁆𑀔𑀼𑀦𑀸 𑀆𑀭𑁄𑀧𑁂𑀢𑀩𑁆𑀩𑀁, 𑀅𑀕𑁆𑀕𑀺 𑀦 𑀓𑀸𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀦 𑀧𑀝𑀺𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺 𑀫𑀽𑀮𑁂 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀲𑁆𑀲𑀸𑀢𑀺 𑀲𑀸𑀫𑀡𑁂𑀭𑀲𑁆𑀲. 𑀢𑀢𑁄𑀢𑀺 𑀅𑀕𑁆𑀕𑀺𑀚𑀸𑀮𑀦𑀢𑁄.

𑀢𑀢𑁆𑀢𑁂 𑀉𑀤𑀓𑁂𑀢𑀺 𑀉𑀤𑀓𑁂 𑀢𑀸𑀧𑁂. 𑀢𑀢𑁄𑀢𑀺 𑀢𑀡𑁆𑀟𑀼𑀮𑀧𑀓𑁆𑀔𑀺𑀧𑀦𑀢𑁄.

𑀧𑀺𑀥𑀸𑀦𑀦𑁆𑀢𑀺 𑀉𑀓𑁆𑀔𑀮𑀺𑀧𑀺𑀥𑀸𑀦𑀁. 𑀢𑀲𑁆𑀲𑁂𑀯𑀸𑀢𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯. 𑀤𑀩𑁆𑀩𑀺𑀁 𑀯𑀸𑀢𑀺 𑀓𑀝𑀘𑁆𑀙𑀼𑀁 𑀯𑀸. 𑀲𑁄 𑀳𑀺 𑀤𑀭𑀻𑀬𑀢𑀺 𑀯𑀺𑀮𑁄𑀴𑀻𑀬𑀢𑀺 𑀇𑀫𑀸𑀬𑀸𑀢𑀺 𑀤𑀩𑁆𑀩𑀻𑀢𑀺 𑀯𑀼𑀘𑁆𑀘𑀢𑀺.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀞𑀧𑀦𑁂. 𑀢𑀲𑁆𑀲𑁂𑀯𑀸𑀢𑀺 𑀮𑁄𑀮𑀪𑀺𑀓𑁆𑀔𑀼𑀲𑁆𑀲𑁂𑀯. 𑀢𑀢𑁄𑀢𑀺 𑀧𑀢𑁆𑀢𑀢𑁄. 𑀧𑀼𑀦 𑀢𑀢𑁄𑀢𑀺 𑀲𑀸𑀔𑀸𑀤𑀺𑀢𑁄. 𑀢𑀢𑁆𑀣𑀸𑀢𑀺 𑀨𑀮𑀭𑀼𑀓𑁆𑀔𑁂.

𑀯𑀺𑀢𑀓𑁆𑀓𑀁 𑀲𑁄𑀥𑁂𑀢𑀼𑀦𑁆𑀢𑀺 ‘‘𑀫𑀬𑁆𑀳𑀫𑁆𑀧𑀺 𑀤𑀲𑁆𑀲𑀢𑀻’’𑀢𑀺 𑀯𑀺𑀢𑀓𑁆𑀓𑀁 𑀲𑁄𑀥𑁂𑀢𑀼𑀁. 𑀢𑀢𑁄𑀢𑀺 𑀅𑀫𑁆𑀩𑀨𑀮𑀸𑀤𑀺𑀢𑁄.

𑀧𑀼𑀦 𑀢𑀢𑁄𑀢𑀺 𑀫𑀸𑀢𑀸𑀧𑀺𑀢𑀽𑀦𑀫𑀢𑁆𑀣𑀸𑀬 𑀕𑀳𑀺𑀢𑀢𑁂𑀮𑀸𑀤𑀺𑀢𑁄. 𑀢𑁂𑀢𑀺 𑀫𑀸𑀢𑀸𑀧𑀺𑀢𑀭𑁄. 𑀢𑀢𑁄𑀬𑁂𑀯𑀸𑀢𑀺 𑀢𑁂𑀳𑀺𑀬𑁂𑀯 𑀢𑀡𑁆𑀟𑀼𑀮𑁂𑀳𑀺 𑀲𑀫𑁆𑀧𑀸𑀤𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀢𑁆𑀣𑀸𑀢𑀺 𑀢𑀸𑀧𑀺𑀢𑀉𑀤𑀓𑁂. 𑀅𑀫𑀼𑀜𑁆𑀘𑀦𑁆𑀢𑁂𑀦𑁂𑀯 𑀳𑀢𑁆𑀣𑁂𑀦𑀸𑀢𑀺 𑀬𑁄𑀚𑀦𑀸. 𑀅𑀗𑁆𑀕𑀦𑁆𑀢𑀺 𑀯𑀺𑀦𑀸𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀗𑁆𑀕𑀸𑀭𑀸. 𑀤𑀭𑀻𑀬𑀦𑁆𑀢𑀺 𑀨𑀮𑀻𑀬𑀦𑁆𑀢𑀻𑀢𑀺 𑀤𑀸𑀭𑀽𑀦𑀺.

𑀯𑀼𑀢𑁆𑀢𑁄 𑀲𑀸𑀫𑀡𑁂𑀭𑁄𑀢𑀺 𑀬𑁄𑀚𑀦𑀸.

𑀕𑀯𑀢𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀯𑀺𑀲𑁆𑀲𑀝𑁆𑀞𑀁 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀕𑀼𑀴𑁄, 𑀕𑀼𑀴𑀢𑀺 𑀯𑀺𑀲𑀢𑁄 𑀚𑀻𑀯𑀺𑀢𑀁 𑀭𑀓𑁆𑀔𑀢𑀻𑀢𑀺 𑀯𑀸 𑀕𑀼𑀴𑁄, 𑀢𑀁 𑀪𑀸𑀚𑁂𑀦𑁆𑀢𑁄 𑀪𑀺𑀓𑁆𑀔𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀮𑁄𑀮𑀲𑀸𑀫𑀡𑁂𑀭𑀲𑁆𑀲.

𑀥𑀽𑀫𑀲𑁆𑀲𑀢𑁆𑀣𑀸𑀬 𑀯𑀝𑁆𑀝𑀻𑀬𑀢𑀺 𑀯𑀝𑁆𑀝𑀺𑀢𑁆𑀯𑀸 𑀓𑀭𑀻𑀬𑀢𑀻𑀢𑀺 𑀥𑀽𑀫𑀯𑀝𑁆𑀝𑀺, 𑀢𑀁. 𑀫𑀼𑀔𑀻𑀬𑀢𑀺 𑀯𑀺𑀧𑀭𑀻𑀬𑀢𑀻𑀢𑀺 𑀫𑀼𑀔𑀁. 𑀓𑀁 𑀯𑀼𑀘𑁆𑀘𑀢𑀺 𑀲𑀻𑀲𑀁, 𑀢𑀁 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀓𑀡𑁆𑀞𑁄.

𑀪𑀢𑁆𑀢𑀼𑀕𑁆𑀕𑀸𑀭𑁄𑀢𑀺 𑀉𑀤𑁆𑀥𑀁 𑀕𑀺𑀭𑀢𑀺 𑀦𑀺𑀕𑁆𑀕𑀺𑀭𑀢𑀻𑀢𑀺 𑀉𑀕𑁆𑀕𑀸𑀭𑁄, 𑀪𑀢𑁆𑀢𑀫𑁂𑀯 𑀉𑀕𑁆𑀕𑀸𑀭𑁄 𑀪𑀢𑁆𑀢𑀼𑀕𑁆𑀕𑀸𑀭𑁄, 𑀉𑀕𑁆𑀕𑀸𑀭𑀪𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀦𑁆𑀢𑀦𑁆𑀢𑀭𑁂𑀢𑀺 𑀤𑀦𑁆𑀢𑀯𑀺𑀯𑀭𑁂.