𑁧𑁦. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀁

𑁧𑁪𑁦. 𑀤𑀲𑀫𑁂 ‘‘𑀚𑀸𑀦’’𑀦𑁆𑀢𑀺 𑀕𑀘𑁆𑀙𑀦𑁆𑀢𑀸𑀤𑀺𑀕𑀡𑁄𑀢𑀺 𑀆𑀳 ‘‘𑀚𑀸𑀦𑀦𑁆𑀢𑁄’’𑀢𑀺. 𑀲𑀁 𑀯𑀺𑀚𑁆𑀚𑀢𑀺 𑀧𑀸𑀡𑁄 𑀏𑀢𑁆𑀣𑀸𑀢𑀺 𑀲𑀧𑀸𑀡𑀓𑀁. 𑀏𑀢𑀦𑁆𑀢𑀺 𑀉𑀤𑀓𑀁. 𑀲𑀬𑀁 𑀚𑀸𑀦𑀦𑁆𑀢𑁄𑀧𑀺 𑀧𑀭𑁂𑀦 𑀚𑀸𑀦𑀸𑀧𑁂𑀦𑁆𑀢𑁄𑀧𑀺 𑀚𑀸𑀦𑀸𑀢𑀺𑀬𑁂𑀯 𑀦𑀸𑀫𑀸𑀢𑀺 𑀆𑀳 ‘‘𑀬𑀣𑀸 𑀢𑀣𑀸 𑀯𑀸’’𑀢𑀺. 𑀲𑀧𑀸𑀡𑀓𑀁 𑀉𑀤𑀓𑀦𑁆𑀢𑀺 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁, 𑀢𑁂𑀦𑀸𑀳 ‘‘𑀢𑁂𑀦 𑀉𑀤𑀓𑁂𑀦𑀸’’𑀢𑀺. 𑀧𑀼𑀩𑁆𑀩𑁂𑀢𑀺 𑀧𑀣𑀯𑀺𑀔𑀡𑀦𑀲𑀺𑀓𑁆𑀔𑀸𑀧𑀤𑀸𑀤𑀺𑀓𑁂.

𑀢𑀢𑁆𑀣𑀸𑀢𑀺 ‘‘𑀲𑀺𑀜𑁆𑀘𑁂𑀬𑁆𑀬 𑀯𑀸 𑀲𑀺𑀜𑁆𑀘𑀸𑀧𑁂𑀬𑁆𑀬 𑀯𑀸’’𑀢𑀺𑀧𑀤𑁂. 𑀥𑀸𑀭𑀦𑁆𑀢𑀺 𑀲𑁄𑀢𑀁. 𑀫𑀸𑀢𑀺𑀓𑀁 𑀧𑀫𑀼𑀔𑀦𑁆𑀢𑀺 𑀫𑀸𑀢𑀺𑀓𑀁 𑀅𑀪𑀺𑀫𑀼𑀔𑀁. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂. 𑀅𑀜𑁆𑀜𑀢𑁄 𑀞𑀸𑀦𑀢𑁄 𑀅𑀜𑁆𑀜𑀁 𑀞𑀸𑀦𑀁 𑀦𑁂𑀢𑀻𑀢𑀺 𑀬𑁄𑀚𑀦𑀸. ‘‘𑀲𑀧𑀸𑀡𑀓𑀁 𑀉𑀤𑀓’’𑀦𑁆𑀢𑀺 𑀲𑀸𑀫𑀜𑁆𑀜𑀯𑀘𑀦𑀲𑁆𑀲𑀧𑀺 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄, 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑀲𑁆𑀲 𑀅𑀦𑀼𑀧𑀬𑁄𑀚𑀺𑀢𑀩𑁆𑀩𑀢𑁄 𑀇𑀥 𑀯𑀺𑀲𑁂𑀲𑀉𑀤𑀓𑀦𑁆𑀢𑀺 𑀲𑀦𑁆𑀥𑀸𑀬𑀪𑀸𑀲𑀺𑀢𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀤𑀁 𑀧𑀦𑀸’’𑀢𑀺𑀆𑀤𑀺. 𑀇𑀤𑀁 𑀧𑀦 𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 𑀉𑀤𑀓𑀁 ‘‘𑀕𑀘𑁆𑀙𑀢𑀻’’𑀢𑀺𑀧𑀤𑁂 𑀓𑀢𑁆𑀢𑀸. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀉𑀤𑀓𑁂𑀢𑀺. 𑀤𑀲𑀫𑀁.

𑀪𑀽𑀢𑀕𑀸𑀫𑀯𑀕𑁆𑀕𑁄 𑀤𑀼𑀢𑀺𑀬𑁄.