𑁨. 𑀉𑀚𑁆𑀚𑀕𑁆𑀖𑀺𑀓𑀯𑀕𑁆𑀕-𑀅𑀢𑁆𑀣𑀬𑁄𑀚𑀦𑀸

𑁫𑁮𑁬. 𑀉𑀘𑁆𑀘𑀸𑀲𑀤𑁆𑀤𑀁 𑀓𑀢𑁆𑀯𑀸 𑀚𑀕𑁆𑀖𑀦𑀁 𑀳𑀲𑀦𑀁 𑀉𑀚𑁆𑀚𑀕𑁆𑀖𑁄, 𑀲𑁄𑀬𑁂𑀯 𑀉𑀚𑁆𑀚𑀕𑁆𑀖𑀺𑀓𑀸, 𑀢𑀸𑀬. 𑀇𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀳𑀸𑀳𑀲𑀺𑀢𑀁 𑀳𑀲𑀦𑁆𑀢𑁄’’𑀢𑀺. 𑀏𑀢𑁆𑀣𑀸𑀢𑀺 ‘‘𑀉𑀚𑁆𑀚𑀕𑁆𑀖𑀺𑀓𑀸𑀬𑀸’’𑀢𑀺𑀧𑀤𑁂.

𑁫𑁮𑁮. 𑀓𑀺𑀢𑁆𑀢𑀸𑀯𑀢𑀸𑀢𑀺 𑀓𑀺𑀢𑁆𑀢𑀓𑁂𑀦 𑀧𑀫𑀸𑀡𑁂𑀦, 𑀏𑀯𑀁 𑀦𑀺𑀲𑀺𑀦𑁆𑀦𑁂𑀲𑀼 𑀣𑁂𑀭𑁂𑀲𑀽𑀢𑀺 𑀲𑀫𑁆𑀩𑀦𑁆𑀥𑁄, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀯𑀯𑀢𑁆𑀣𑀧𑁂𑀢𑀻𑀢𑀺 𑀇𑀤𑀜𑁆𑀘𑀻𑀤𑀜𑁆𑀘 𑀓𑀣𑁂𑀢𑀻𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀧𑀫𑀸𑀡𑁂𑀦.

𑁫𑁯𑁦. 𑀦𑀺𑀘𑁆𑀘𑀮𑀁 𑀓𑀢𑁆𑀯𑀸 𑀓𑀸𑀬𑀲𑁆𑀲 𑀉𑀚𑀼𑀝𑁆𑀞𑀧𑀦𑀁 𑀓𑀸𑀬𑀧𑀕𑁆𑀕𑀳𑁄 𑀦𑀸𑀫𑀸𑀢𑀺 𑀆𑀳 ‘‘𑀦𑀺𑀘𑁆𑀘𑀮𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀏𑀲𑁂𑀯 𑀦𑀬𑁄 𑀩𑀸𑀳𑀼𑀧𑀕𑁆𑀕𑀳𑀲𑀻𑀲𑀧𑀕𑁆𑀕𑀳𑁂𑀲𑀼𑀧𑀻𑀢𑀺. 𑀤𑀼𑀢𑀺𑀬𑁄 𑀯𑀕𑁆𑀕𑁄.