𑁧𑁦. 𑀲𑀗𑁆𑀔𑀸𑀭𑀼𑀧𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁦. 𑀲𑀗𑁆𑀔𑀸𑀭𑀼𑀧𑀧𑀢𑁆𑀢𑀺𑀦𑁆𑀢𑀺 𑀯𑀺𑀧𑀸𑀓𑀓𑁆𑀔𑀦𑁆𑀥𑀲𑀜𑁆𑀜𑀺𑀢𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀢𑁆𑀢𑀺𑀁, 𑀦𑀺𑀩𑁆𑀩𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀅𑀯𑀥𑀸𑀭𑀡𑀁 𑀏𑀢𑀲𑁆𑀫𑀺𑀁 𑀧𑀤𑁂 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺, ‘‘𑀲𑀗𑁆𑀔𑀸𑀭𑀸𑀦𑀁𑀬𑁂𑀯 𑀉𑀧𑀧𑀢𑁆𑀢𑀺’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀦 𑀦𑀺𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀦 𑀲𑀢𑁆𑀢𑀲𑁆𑀲𑀸’’𑀢𑀺 𑀆𑀳. 𑀢𑁂𑀦 𑀲𑀢𑁆𑀢𑁄 𑀚𑀻𑀯𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀏𑀯𑀁 𑀉𑀧𑁆𑀧𑀚𑁆𑀚𑀦𑀓𑀥𑀫𑁆𑀫𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀉𑀧𑁆𑀧𑀢𑁆𑀢𑀺𑀚𑀦𑀓𑀥𑀫𑁆𑀫𑀯𑀲𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀦 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀫𑁂𑀲𑀼 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀦𑀧𑀺 𑀉𑀧𑀧𑀢𑁆𑀢𑀺 𑀳𑁄𑀢𑀺, 𑀲𑀸 𑀧𑀦 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀕𑀳𑀺𑀢𑀸𑀢𑀺. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀦 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀢𑁆𑀣𑀸𑀧𑁂𑀓𑁆𑀔𑀡𑀯𑀺𑀓𑀧𑁆𑀧𑀢𑁆𑀣𑁄, 𑀅𑀯𑀼𑀢𑁆𑀢𑀢𑁆𑀣𑀸𑀧𑁂𑀓𑁆𑀔𑀸𑀬 𑀧𑀦 𑀦 𑀆𑀕𑀢𑁄 ‘‘𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁂𑀦𑀸’’𑀢𑀺. 𑀅𑀣 𑀯𑀸 𑀉𑀧𑀧𑀢𑁆𑀢𑀺 𑀆𑀕𑀢𑀸, 𑀏𑀯𑀁 𑀓𑀺𑀘𑁆𑀘𑀁 𑀆𑀕𑀢𑀁, 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀧𑀦𑁂𑀢𑁆𑀣 𑀲𑀭𑀽𑀧𑁂𑀦 𑀅𑀦𑀸𑀕𑀢𑁄𑀧𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁂𑀦𑀸’’𑀢𑀺 𑀧𑀞𑀦𑁆𑀢𑀺. 𑀪𑀯𑀽𑀧𑀕𑀓𑁆𑀔𑀦𑁆𑀥𑀸𑀦𑀦𑁆𑀢𑀺 𑀲𑀼𑀕𑀢𑀺𑀪𑀯𑀽𑀧𑀕𑀸𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁.

𑁧𑁬𑁧. 𑀮𑁄𑀓𑀺𑀓𑀸 𑀯𑀝𑁆𑀝𑀦𑁆𑀢𑀺 𑀓𑀫𑁆𑀫𑀯𑀝𑁆𑀝𑀲𑁆𑀲 𑀕𑀳𑀡𑀢𑁄. 𑀪𑀯𑀽𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀑𑀓𑀧𑁆𑀧𑀦𑀻𑀬𑀲𑀤𑁆𑀥𑀸 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀢𑀸𑀤𑀺𑀲𑀁 𑀩𑀼𑀤𑁆𑀥𑀯𑀘𑀦𑀩𑀸𑀳𑀼𑀲𑀘𑁆𑀘𑀁 𑀆𑀫𑀺𑀲𑀧𑀭𑀺𑀘𑁆𑀘𑀸𑀕𑁄 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀁 𑀓𑀫𑁆𑀫𑀨𑀮𑀤𑀺𑀝𑁆𑀞𑀺 𑀘 𑀇𑀫𑁂 𑀲𑀤𑁆𑀥𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀞𑀧𑁂𑀢𑀻𑀢𑀺 𑀧𑀡𑀺𑀤𑀳𑀦𑀯𑀲𑁂𑀦 𑀞𑀧𑁂𑀢𑀺. 𑀧𑀡𑀺𑀤𑀳𑀢𑀻𑀢𑀺 𑀳𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀢𑀢𑁆𑀣 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁 𑀓𑀢𑁆𑀯𑀸 𑀞𑀧𑁂𑀢𑀺. 𑀲𑀳𑀧𑀢𑁆𑀣𑀦𑀸𑀬𑀸𑀢𑀺, ‘‘𑀅𑀳𑁄 𑀯𑀢𑀸𑀳𑀁…𑀧𑁂… 𑀉𑀧𑀧𑀚𑁆𑀚𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀧𑀢𑁆𑀣𑀦𑀸𑀬 𑀲𑀳. 𑀲𑀤𑁆𑀥𑀸𑀤𑀬𑁄𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀸 𑀲𑀤𑁆𑀥𑀸𑀤𑀬𑁄 𑀏𑀯 𑀧𑀜𑁆𑀘 𑀥𑀫𑁆𑀫𑀸 𑀉𑀧𑀧𑀢𑁆𑀢𑀺𑀬𑀸 𑀲𑀗𑁆𑀔𑀭𑀡𑀝𑁆𑀞𑁂𑀦 𑀲𑀗𑁆𑀔𑀸𑀭𑀸, 𑀢𑀲𑁆𑀫𑀸 𑀏𑀯 𑀅𑀜𑁆𑀜𑁂𑀳𑀺 𑀯𑀺𑀲𑀺𑀝𑁆𑀞𑀪𑀯𑀽𑀧𑀳𑀭𑀡𑀝𑁆𑀞𑁂𑀦 𑀯𑀺𑀳𑀸𑀭𑀸 𑀦𑀸𑀫𑀸𑀢𑀺. 𑀢𑀲𑁆𑀫𑀺𑀁 𑀞𑀸𑀦𑁂𑀢𑀺 𑀢𑀲𑁆𑀫𑀺𑀁 𑀉𑀧𑀧𑀢𑁆𑀢𑀺𑀝𑁆𑀞𑀸𑀦𑁂.

𑀧𑀜𑁆𑀘𑀥𑀫𑁆𑀫𑀸𑀯 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀉𑀧𑀧𑀢𑁆𑀢𑀺𑀁 𑀫𑀕𑁆𑀕𑀢𑀺 𑀕𑀯𑁂𑀲𑀢𑀺 𑀏𑀢𑁂𑀦𑀸𑀢𑀺 𑀫𑀕𑁆𑀕𑁄. 𑀧𑀝𑀺𑀧𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀧𑀝𑀺𑀧𑀤𑀸. 𑀘𑁂𑀢𑀦𑀸 𑀧𑀦𑁂𑀢𑁆𑀣 𑀲𑀼𑀤𑁆𑀥𑀲𑀗𑁆𑀔𑀸𑀭𑀢𑀸𑀬 𑀲𑀤𑁆𑀥𑀸𑀤𑀺𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸, 𑀢𑀲𑁆𑀫𑀸 𑀅𑀯𑀥𑀸𑀭𑀡𑀁 𑀓𑀢𑀁. 𑀉𑀧𑀧𑀢𑁆𑀢𑀺𑀧𑀓𑀧𑁆𑀧𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀺𑀬𑀸 𑀧𑀢𑁆𑀣𑀦𑀸𑀕𑀳𑀡𑁂𑀦𑁂𑀯 𑀢𑀲𑁆𑀲𑀸 𑀕𑀳𑀡𑀦𑁆𑀢𑀺 𑀓𑁂𑀘𑀺. 𑀘𑀺𑀢𑁆𑀢𑀓𑀭𑀬𑀼𑀢𑁆𑀢𑀕𑀢𑀺𑀦𑀺𑀩𑁆𑀩𑀢𑁆𑀢𑀦𑀥𑀫𑁆𑀫𑀯𑀲𑁂𑀦 𑀅𑀯𑀥𑀸𑀭𑀡𑀲𑁆𑀲 𑀓𑀢𑀢𑁆𑀢𑀸. 𑀘𑁂𑀢𑀦𑀸 𑀳𑀺 𑀦𑀸𑀫 𑀓𑀫𑁆𑀫𑀁, 𑀢𑀲𑁆𑀲𑀸 𑀉𑀧𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀢𑀲𑁆𑀲𑀸 𑀧𑀦 𑀓𑀺𑀘𑁆𑀘𑀓𑀭𑀡𑀸 𑀲𑀤𑁆𑀥𑀸𑀤𑀬𑁄 𑀧𑀢𑁆𑀣𑀦𑀸 𑀘𑀸𑀢𑀺 𑀇𑀫𑁂 𑀥𑀫𑁆𑀫𑀸 𑀲𑀳𑀓𑀸𑀭𑀺𑀦𑁄 𑀪𑀯𑀽𑀧𑀧𑀢𑁆𑀢𑀺𑀬𑀸 𑀦𑀺𑀬𑀸𑀫𑀓𑀸 𑀳𑁄𑀦𑁆𑀢𑀻𑀢𑀺 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑁂𑀲𑀁 𑀫𑀕𑁆𑀕𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺. 𑀢𑁂𑀦 𑀲𑀤𑁆𑀥𑀸 𑀧𑀢𑁆𑀣𑀦𑀸 𑀘𑀸𑀢𑀺 𑀉𑀪𑀬𑁂 𑀥𑀫𑁆𑀫𑀸 𑀲𑀳𑀺𑀢𑀸 𑀳𑀼𑀢𑁆𑀯𑀸 𑀓𑀫𑁆𑀫𑀁 𑀯𑀺𑀲𑁂𑀲𑁂𑀦𑁆𑀢𑀸 𑀕𑀢𑀺𑀁 𑀦𑀺𑀬𑀫𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀅𑀦𑀺𑀬𑀢𑀁 𑀓𑁂𑀯𑀮𑀲𑁆𑀲 𑀓𑀫𑁆𑀫𑀲𑁆𑀲 𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀓𑀫𑁆𑀫𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀓𑀫𑁆𑀫𑀸𑀬𑀽𑀳𑀦𑀢𑁄 𑀧𑀦 𑀧𑀕𑁂𑀯 𑀧𑀢𑁆𑀣𑀦𑀁 𑀞𑀧𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀘𑁂𑀢𑁆𑀣 ‘‘𑀢𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀪𑀼𑀢𑁆𑀯𑀸 𑀲𑀬𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀦 𑀓𑀸𑀮𑀦𑀺𑀬𑀫𑁄, 𑀓𑀫𑁆𑀫𑀁 𑀓𑀢𑁆𑀯𑀸 𑀬𑀤𑀸 𑀓𑀤𑀸𑀘𑀺 𑀧𑀢𑁆𑀣𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘 𑀇𑀤𑀁 𑀘𑀸𑀭𑀺𑀢𑁆𑀢𑀤𑀲𑁆𑀲𑀦𑀁 𑀯𑀺𑀬 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀪𑀯𑀧𑀢𑁆𑀣𑀦𑀸 𑀬𑀸𑀯 𑀫𑀕𑁆𑀕𑁂𑀦 𑀦 𑀲𑀫𑀼𑀘𑁆𑀙𑀺𑀚𑁆𑀚𑀢𑀺, 𑀢𑀸𑀯 𑀅𑀦𑀼𑀧𑁆𑀧𑀦𑁆𑀦𑀸𑀪𑀺𑀦𑀯𑀓𑀢𑀽𑀧𑀘𑀺𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. 𑀧𑀼𑀦 𑀢𑀣𑀸 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀬𑀣𑀸 𑀦𑀺𑀬𑀫𑁂𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀲𑁆𑀲 𑀧𑀜𑁆𑀘 𑀥𑀫𑁆𑀫𑀸 𑀅𑀢𑁆𑀣𑀺, 𑀦 𑀧𑀢𑁆𑀣𑀦𑀸 𑀢𑀲𑁆𑀲 𑀕𑀢𑀺 𑀅𑀦𑀺𑀩𑀤𑁆𑀥𑀸’’𑀢𑀺.

𑁧𑁬𑁫. 𑀲𑀩𑁆𑀩𑀲𑁄𑀯𑀸𑀢𑀺 ‘‘𑀇𑀤𑀁 𑀓𑀸𑀴𑀓𑀁 𑀲𑀸𑀫𑀁 𑀲𑁂𑀢𑀁 𑀳𑀭𑀺𑀢𑀁 𑀫𑀡𑁆𑀟𑀮𑀁 𑀅𑀧𑀭𑀺𑀫𑀡𑁆𑀟𑀮𑀁 𑀘𑀢𑀼𑀭𑀁𑀲𑀁 𑀧𑀭𑀺𑀧𑀼𑀡𑁆𑀡𑀁 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑀲𑁄𑀯 𑀧𑀸𑀓𑀝𑀁 𑀳𑁄𑀢𑀺.

𑁧𑁬𑁭. 𑀲𑀼𑀦𑁆𑀤𑀭𑁄𑀢𑀺 𑀓𑀸𑀴𑀓𑀸𑀤𑀺𑀤𑁄𑀲𑀭𑀳𑀺𑀢𑀢𑀸𑀬 𑀲𑁄𑀪𑀦𑁄. 𑀆𑀓𑀭𑀲𑀫𑁆𑀧𑀦𑁆𑀦𑁄 𑀲𑀫𑁆𑀧𑀦𑁆𑀦𑀆𑀓𑀭𑀼𑀧𑁆𑀧𑀢𑁆𑀢𑀺𑀬𑀸. 𑀥𑁄𑀯𑀦𑀸𑀤𑀻𑀳𑀻𑀢𑀺 𑀥𑁄𑀯𑀦𑀢𑀸𑀧𑀦𑀫𑀚𑁆𑀚𑀦𑀸𑀤𑀻𑀳𑀺.

𑁧𑁬𑁮. 𑀮𑁄𑀓𑀥𑀸𑀢𑀽𑀦𑀁 𑀲𑀢𑀲𑀳𑀲𑁆𑀲𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀦𑀢𑁄 𑀲𑀢𑀲𑀳𑀲𑁆𑀲𑁄. 𑀢𑀲𑁆𑀲 𑀧𑀦 𑀢𑀢𑁆𑀣 𑀑𑀪𑀸𑀲𑀓𑀭𑀡𑀁 𑀧𑀸𑀓𑀝𑀦𑁆𑀢𑀺 𑀆𑀳 ‘‘𑀆𑀮𑁄𑀓𑀨𑀭𑀡𑀩𑁆𑀭𑀳𑁆𑀫𑀸’’𑀢𑀺. 𑀅𑀬𑀫𑁂𑀯 𑀦𑀬𑁄 𑀳𑁂𑀝𑁆𑀞𑀸 ‘‘𑀲𑀳𑀲𑁆𑀲𑁄 𑀩𑁆𑀭𑀳𑁆𑀫𑀸’’𑀢𑀺𑀆𑀤𑀻𑀲𑀼𑀧𑀺. 𑀦𑀺𑀓𑁆𑀔𑁂𑀦 𑀓𑀢𑀦𑁆𑀢𑀺 𑀦𑀺𑀓𑁆𑀔𑀧𑀭𑀺𑀫𑀸𑀡𑁂𑀦 𑀚𑀫𑁆𑀩𑁄𑀦𑀤𑁂𑀦 𑀓𑀢𑀁. 𑀦𑀺𑀓𑁆𑀔𑀁 𑀧𑀦 𑀯𑀻𑀲𑀢𑀺𑀲𑀼𑀯𑀡𑁆𑀡𑀦𑁆𑀢𑀺 𑀓𑁂𑀘𑀺. 𑀧𑀜𑁆𑀘𑀯𑀻𑀲𑀢𑀺𑀲𑀼𑀯𑀡𑁆𑀡𑀦𑁆𑀢𑀺 𑀅𑀧𑀭𑁂. 𑀲𑀼𑀯𑀡𑁆𑀡𑀁 𑀦𑀸𑀫 𑀘𑀢𑀼𑀥𑀭𑀡𑀦𑁆𑀢𑀺 𑀯𑀤𑀦𑁆𑀢𑀺. 𑀖𑀝𑁆𑀝𑀦𑀫𑀚𑁆𑀚𑀦𑀓𑁆𑀔𑀫𑀁 𑀦 𑀳𑁄𑀢𑀺 𑀧𑀭𑀺𑀢𑁆𑀢𑀪𑀸𑀯𑀢𑁄. 𑀅𑀢𑀺𑀭𑁂𑀓𑁂𑀦𑀸𑀢𑀺 𑀧𑀜𑁆𑀘𑀲𑀼𑀯𑀡𑁆𑀡𑀅𑀢𑀺𑀭𑁂𑀓𑁂𑀦 𑀦𑀺𑀓𑁆𑀔𑀧𑁆𑀧𑀫𑀸𑀡𑀁 𑀅𑀲𑀫𑁆𑀧𑀢𑁆𑀢𑁂𑀦. 𑀯𑀡𑁆𑀡𑀯𑀦𑁆𑀢𑀁 𑀧𑀦 𑀦 𑀳𑁄𑀢𑀺 𑀅𑀯𑀺𑀧𑀼𑀮𑀢𑀸𑀬 𑀉𑀴𑀸𑀭𑀁 𑀳𑀼𑀢𑁆𑀯𑀸 𑀅𑀦𑀼𑀧𑀝𑁆𑀞𑀸𑀦𑀢𑁄. 𑀅𑀯𑀡𑁆𑀡𑀯𑀦𑁆𑀢𑀢𑀸𑀬 𑀏𑀯 𑀨𑀭𑀼𑀲𑀥𑀸𑀢𑀼𑀓𑀁 𑀔𑀸𑀬𑀢𑀺. 𑀢𑀸𑀲𑀽𑀢𑀺 𑀢𑀸𑀲𑀼 𑀪𑀽𑀫𑀻𑀲𑀼, 𑀬𑀢𑁆𑀣 𑀲𑀸𑀔𑀸 𑀯𑀟𑁆𑀠𑀺𑀢𑁆𑀯𑀸 𑀞𑀺𑀢𑀸. 𑀢𑁂𑀢𑀺 𑀲𑀼𑀯𑀡𑁆𑀡𑀗𑁆𑀓𑀼𑀭𑀸. 𑀧𑀘𑀺𑀢𑁆𑀯𑀸𑀢𑀺 𑀢𑀸𑀧𑁂𑀢𑁆𑀯𑀸. 𑀲𑀫𑁆𑀧𑀳𑀝𑁆𑀞𑀦𑁆𑀢𑀺 𑀲𑀫𑀼𑀚𑁆𑀚𑀮𑀻𑀓𑀢𑀦𑁆𑀢𑀺 𑀆𑀳 𑁋 ‘‘𑀥𑁄𑀢𑀖𑀝𑁆𑀝𑀺𑀢𑀧𑀫𑀚𑁆𑀚𑀺𑀢’’𑀦𑁆𑀢𑀺, 𑀢𑀫𑁆𑀩𑀫𑀢𑁆𑀢𑀺𑀓𑀮𑁂𑀧𑀁 𑀓𑀢𑁆𑀯𑀸 𑀥𑁄𑀢𑀜𑁆𑀘𑁂𑀯 𑀧𑀸𑀲𑀸𑀡𑀸𑀤𑀺𑀦𑀸 𑀖𑀝𑁆𑀝𑀺𑀢𑀜𑁆𑀘 𑀏𑀴𑀓𑀮𑁄𑀫𑀸𑀤𑀺𑀦𑀸 𑀧𑀫𑀚𑁆𑀚𑀺𑀢𑀜𑁆𑀘𑀸𑀢𑀺 𑀅𑀢𑁆𑀣𑁄.

𑀏𑀢𑀤𑁂𑀯𑀸𑀢𑀺 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀏𑀢𑁆𑀣 𑀆𑀮𑁄𑀓𑀨𑀭𑀡𑀫𑁂𑀯. 𑀅𑀣 𑀯𑀸 𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀨𑀭𑀡𑀁, 𑀆𑀮𑁄𑀓𑀨𑀭𑀡𑀫𑁆𑀧𑀺 𑀏𑀢𑀤𑁂𑀯. 𑀬𑀢𑁆𑀢𑀓𑀜𑁆𑀳𑀺 𑀞𑀸𑀦𑀁 𑀬𑁄𑀕𑀻 𑀓𑀲𑀺𑀡𑀸𑀮𑁄𑀓𑁂𑀦 𑀨𑀭𑀢𑀺; 𑀢𑀢𑁆𑀢𑀓𑀁 𑀞𑀸𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀨𑀼𑀲𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀨𑀭𑀡𑁂 𑀤𑀲𑁆𑀲𑀺𑀢𑁂 𑀆𑀮𑁄𑀓𑀨𑀭𑀡𑀁 𑀤𑀲𑁆𑀲𑀺𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 ‘‘𑀨𑀭𑀺𑀢𑁆𑀯𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂. 𑀅𑀯𑀺𑀦𑀸𑀲𑁂𑀦𑁆𑀢𑁂𑀦𑀸𑀢𑀺 𑀅𑀲𑀫𑁆𑀪𑀺𑀦𑁆𑀦𑁂𑀦.

𑀓𑀲𑀺𑀡𑀨𑀭𑀡𑀁 𑀯𑀺𑀬𑀸𑀢𑀺 𑀓𑀲𑀺𑀡𑁄𑀪𑀸𑀲𑁂𑀦 𑀨𑀭𑀡𑀁 𑀯𑀺𑀬 𑀤𑀺𑀲𑁆𑀲𑀢𑀺 𑀉𑀧𑀝𑁆𑀞𑀸𑀢𑀺, 𑀫𑀡𑀺𑀧𑀪𑀸𑀨𑀭𑀡𑀲𑁆𑀲 𑀯𑀺𑀬 𑀩𑁆𑀭𑀳𑁆𑀫𑀮𑁄𑀓𑁂 𑀥𑀸𑀢𑀼𑀨𑀭𑀡𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀭𑀻𑀭𑀧𑀪𑀸 𑀧𑀦 𑀦𑀺𑀓𑁆𑀔𑀧𑀪𑀸𑀲𑀤𑀺𑀲𑀸𑀢𑀺, ‘‘𑀦𑀺𑀓𑁆𑀔𑁄𑀧𑀫𑁆𑀫𑁂 𑀲𑀭𑀻𑀭𑀨𑀭𑀡𑀁 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀸𑀴𑀺𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀬 𑀦𑀸𑀫 𑀦𑀺𑀘𑁆𑀙𑀺𑀢𑀸𑀬 𑀪𑀯𑀺𑀢𑀩𑁆𑀩𑀁, 𑀅𑀯𑀺𑀦𑀺𑀘𑁆𑀙𑀺𑀢𑀸𑀬 𑀧𑀦 𑀦𑀢𑁆𑀣𑀺 𑀯𑀺𑀬𑀸𑀢𑀺 𑀅𑀓𑀣𑀦𑀁 𑀦𑀸𑀫 𑀅𑀝𑁆𑀞𑀓𑀣𑀸𑀬 𑀅𑀦𑀸𑀘𑀺𑀡𑁆𑀡𑀦𑁆𑀢𑀺 𑀢𑀲𑁆𑀲 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀬𑀣𑀸 𑀳𑀺 𑀯𑀢𑁆𑀢𑀩𑁆𑀩𑀁, 𑀢𑀣𑀸 𑀅𑀯𑀢𑁆𑀯𑀸 ‘‘𑀯𑀺𑀬𑀸’’𑀢𑀺 𑀯𑀘𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀼𑀤𑁆𑀥𑀸𑀦𑀁 𑀩𑁆𑀬𑀸𑀫𑀧𑁆𑀧𑀪𑀸 𑀩𑁆𑀬𑀸𑀫𑀧𑁆𑀧𑀤𑁂𑀲𑁂 𑀲𑀩𑁆𑀩𑀓𑀸𑀮𑀁 𑀅𑀥𑀺𑀝𑁆𑀞𑀸𑀢𑀺 𑀯𑀺𑀬 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀲𑀭𑀻𑀭𑀨𑀭𑀡𑀁 𑀲𑀭𑀻𑀭𑀸𑀪𑀸𑀬 𑀧𑀢𑁆𑀣𑀭𑀡𑀁 𑀲𑀩𑁆𑀩𑀓𑀸𑀮𑀺𑀓𑀁. 𑀘𑀢𑁆𑀢𑀸𑀭𑀺𑀫𑀸𑀦𑀺 𑀇𑀢𑀭𑀸𑀦𑀺 𑀨𑀭𑀡𑀸𑀦𑀺 𑀅𑀯𑀺𑀦𑀸𑀲𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀫𑀪𑀺𑀦𑁆𑀤𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀨𑀭𑀡𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁 ‘‘𑀅𑀥𑀺𑀫𑀼𑀘𑁆𑀘𑀦𑁂𑀦𑁂𑀯 𑀨𑀭𑀡’’𑀦𑁆𑀢𑀺. 𑀧𑀢𑁆𑀣𑀭𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀁 𑀨𑀭𑀡𑀯𑀲𑁂𑀦 𑀧𑀢𑁆𑀣𑀭𑀢𑀺. 𑀚𑀸𑀦𑀸𑀢𑀻𑀢𑀺 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀚𑀸𑀦𑀸𑀢𑀺.

𑁧𑁬𑁯. 𑀆𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀼𑀪𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀪𑀸𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀓𑁂 𑀤𑁂𑀯𑁂 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀲𑀸𑀥𑀸𑀭𑀡𑀢𑁄 𑀯𑀼𑀢𑁆𑀢𑀁. 𑀢𑀢𑁄 𑀲𑀼𑀪𑀸𑀢𑀺 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀓𑁂. 𑀢𑁂𑀦𑀸𑀳 𑁋 ‘‘𑀧𑀸𑀝𑀺𑀬𑁂𑀓𑁆𑀓𑀸 𑀤𑁂𑀯𑀸 𑀦𑀢𑁆𑀣𑀻’’𑀢𑀺𑀆𑀤𑀺. 𑀲𑀸𑀥𑀸𑀭𑀡𑀢𑁄 𑀓𑀢𑀸𑀬𑀧𑀺 𑀧𑀢𑁆𑀣𑀦𑀸𑀬 𑀛𑀸𑀦𑀗𑁆𑀕𑀁 𑀧𑀭𑀺𑀢𑁆𑀢𑀁 𑀪𑀸𑀯𑀺𑀢𑀜𑁆𑀘𑁂, 𑀧𑀭𑀺𑀢𑁆𑀢𑀸𑀪𑁂𑀲𑀼 𑀉𑀧𑀧𑀢𑁆𑀢𑀺 𑀳𑁄𑀢𑀺, 𑀫𑀚𑁆𑀛𑀺𑀫𑀜𑁆𑀘𑁂, 𑀅𑀧𑁆𑀧𑀫𑀸𑀡𑀸𑀪𑁂𑀲𑀼, 𑀧𑀡𑀻𑀢𑀜𑁆𑀘𑁂, 𑀆𑀪𑀲𑁆𑀲𑀭𑁂𑀲𑀼 𑀉𑀧𑀧𑀢𑁆𑀢𑀺 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀼𑀪𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀆𑀳 𑁋 ‘‘𑀯𑁂𑀳𑀧𑁆𑀨𑀮𑀸𑀤𑀺𑀯𑀸𑀭𑀸 𑀧𑀸𑀓𑀝𑀸𑀬𑁂𑀯𑀸’’𑀢𑀺.

𑀓𑀸𑀫𑀸𑀯𑀘𑀭𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀽𑀢𑀺𑀆𑀤𑀺𑀦𑀸 𑀲𑀤𑁆𑀥𑀸𑀤𑀻𑀦𑀁 𑀅𑀚𑁆𑀛𑀸𑀦𑀯𑀺𑀧𑀲𑁆𑀲𑀦𑀸𑀦𑀁 𑀓𑀣𑀁 𑀢𑀤𑀥𑀺𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀆𑀲𑀗𑁆𑀓𑀢𑀺. 𑀇𑀢𑀭𑁄 𑀲𑀤𑁆𑀥𑀸𑀤𑀻𑀦𑀁 𑀅𑀚𑁆𑀛𑀸𑀦𑀲𑀪𑀸𑀯𑀢𑁆𑀢𑁂𑀧𑀺 𑀛𑀸𑀦𑀯𑀺𑀧𑀲𑁆𑀲𑀦𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀲𑀧𑁆𑀧𑀘𑁆𑀘𑀬𑀢𑁆𑀢𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀁 𑀦𑀺𑀩𑁆𑀩𑀸𑀦𑀜𑁆𑀘 𑀆𑀯𑀳𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑀦𑁆𑀢𑀺 𑀲𑀫𑁆𑀪𑀸𑀭𑀲𑀻𑀮𑀁. 𑀅𑀦𑀸𑀕𑀸𑀫𑀻 𑀲𑀫𑀼𑀘𑁆𑀙𑀺𑀦𑁆𑀦𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑁄 𑀲𑀫𑀸𑀦𑁄 𑀲𑀘𑁂 𑀲𑀩𑁆𑀩𑀲𑁄 𑀉𑀧𑀧𑀢𑁆𑀢𑀺𑀬𑁄 𑀅𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀭𑀺𑀬𑀪𑀽𑀫𑀻𑀲𑀼 𑀏𑀯 𑀦𑀺𑀩𑁆𑀩𑀢𑁆𑀢𑀢𑀺 𑀬𑀣𑀽𑀧𑀘𑀺𑀢𑀛𑀸𑀦𑀓𑀫𑁆𑀫𑀼𑀦𑀸𑀢𑀺 𑀆𑀳 𑁋 ‘‘𑀅𑀦𑀸𑀕𑀸𑀫𑀺…𑀧𑁂… 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺. 𑀉𑀧𑀭𑀺𑀫𑀕𑁆𑀕𑀦𑁆𑀢𑀺 𑀅𑀕𑁆𑀕𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸. 𑀆𑀲𑀯𑀓𑁆𑀔𑀬𑀦𑁆𑀢𑀺 𑀲𑀩𑁆𑀩𑀲𑁄 𑀆𑀲𑀯𑀸𑀦𑀁 𑀔𑀬𑀁 𑀧𑀳𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀗𑁆𑀔𑀸𑀭𑀼𑀧𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀅𑀦𑀼𑀧𑀤𑀯𑀕𑁆𑀕𑀯𑀡𑁆𑀡𑀦𑀸.