𑁨. 𑀅𑀦𑀼𑀧𑀤𑀯𑀕𑁆𑀕𑁄

𑁧. 𑀅𑀦𑀼𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀇𑀤𑁆𑀥𑀺𑀫𑀸𑀢𑀺 𑀕𑀼𑀡𑁄 𑀧𑀸𑀓𑀝𑁄 𑀧𑀭𑀢𑁄𑀖𑁄𑀲𑁂𑀦 𑀯𑀺𑀦𑀸 𑀧𑀸𑀲𑀸𑀤𑀓𑀫𑁆𑀧𑀦𑀤𑁂𑀯𑀘𑀸𑀭𑀺𑀓𑀸𑀤𑀻𑀳𑀺 𑀲𑀬𑀫𑁂𑀯 𑀧𑀓𑀸𑀲𑀪𑀸𑀯𑀢𑁄; 𑀥𑀼𑀢𑀯𑀸𑀤𑀸𑀤𑀺𑀕𑀼𑀡𑀸𑀦𑀫𑁆𑀧𑀺 𑀢𑀣𑀸𑀪𑀸𑀯𑁂 𑀏𑀢𑁂𑀦𑁂𑀯 𑀦𑀬𑁂𑀦 𑀢𑁂𑀲𑀁 𑀕𑀼𑀡𑀸𑀦𑀁 𑀧𑀸𑀓𑀝𑀬𑁄𑀕𑀢𑁄 𑀘 𑀧𑀭𑁂𑀲𑀁 𑀦𑀺𑀘𑁆𑀙𑀺𑀢𑀪𑀸𑀯𑀢𑁄 𑀘. 𑀧𑀜𑁆𑀜𑀯𑀢𑁄 𑀕𑀼𑀡𑀸𑀢𑀺 𑀧𑀜𑁆𑀜𑀸𑀧𑀪𑁂𑀤𑀧𑀪𑀸𑀯𑀺𑀢𑁂 𑀕𑀼𑀡𑀯𑀺𑀲𑁂𑀲𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀧𑀭𑁂𑀲𑀁 𑀅𑀯𑀺𑀲𑀬𑀸. 𑀢𑁂𑀦𑀸𑀳 𑁋 ‘‘𑀦 𑀲𑀓𑁆𑀓𑀸 𑀅𑀓𑀣𑀺𑀢𑀸 𑀚𑀸𑀦𑀺𑀢𑀼’’𑀦𑁆𑀢𑀺. 𑀯𑀺𑀲𑀪𑀸𑀕𑀸 𑀲𑀪𑀸𑀕𑀸 𑀦𑀸𑀫 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑁂𑀲𑀼 𑀧𑀼𑀣𑀼𑀚𑁆𑀚𑀦𑁂𑀲𑀼, 𑀢𑁂 𑀧𑀦 𑀅𑀧𑁆𑀧𑀳𑀻𑀦𑀭𑀸𑀕𑀤𑁄𑀲𑀢𑀸𑀬 𑀧𑀭𑀲𑁆𑀲 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀼𑀡𑀁 𑀫𑀓𑁆𑀔𑁂𑀢𑁆𑀯𑀸 𑀅𑀯𑀺𑀚𑁆𑀚𑀫𑀸𑀦𑀁 𑀅𑀯𑀡𑁆𑀡𑀫𑁂𑀯 𑀖𑁄𑀲𑁂𑀦𑁆𑀢𑀻𑀢𑀺 𑀆𑀳 𑁋 ‘‘𑀯𑀺𑀲𑀪𑀸𑀕…𑀧𑁂… 𑀓𑀣𑁂𑀦𑁆𑀢𑀻’’𑀢𑀺.

𑀬𑀸 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀸, 𑀅𑀬𑀁 𑀥𑀸𑀢𑀼𑀓𑀼𑀲𑀮𑀢𑀸. 𑀆𑀬𑀢𑀦𑀓𑀼𑀲𑀮𑀢𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀅𑀯𑀺𑀚𑁆𑀚𑀸𑀤𑀻𑀲𑀼 𑀤𑁆𑀯𑀸𑀤𑀲𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀓𑁄𑀲𑀮𑁆𑀮𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀢𑀸. 𑀇𑀤𑀁 𑀇𑀫𑀲𑁆𑀲 𑀨𑀮𑀲𑁆𑀲 𑀞𑀸𑀦𑀁 𑀓𑀸𑀭𑀡𑀁, 𑀇𑀤𑀁 𑀅𑀝𑁆𑀞𑀸𑀦𑀁 𑀅𑀓𑀸𑀭𑀡𑀦𑁆𑀢𑀺 𑀏𑀯𑀁 𑀞𑀸𑀦𑀜𑁆𑀘 𑀞𑀸𑀦𑀢𑁄, 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀸, 𑀅𑀬𑀁 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑀢𑀸. 𑀬𑁄 𑀧𑀦 𑀇𑀫𑁂𑀲𑀼 𑀥𑀸𑀢𑀼𑀆𑀤𑀻𑀲𑀼 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀦𑀺𑀲𑁆𑀲𑀗𑁆𑀕𑀕𑀢𑀺𑀬𑀸 𑀧𑀡𑁆𑀟𑀸𑀢𑀺 𑀮𑀤𑁆𑀥𑀦𑀸𑀫𑁂𑀦 𑀜𑀸𑀡𑁂𑀦 𑀇𑀢𑁄 𑀕𑀢𑁄 𑀧𑀯𑀢𑁆𑀢𑁄, 𑀅𑀬𑀁 𑀧𑀡𑁆𑀟𑀺𑀢𑁄 𑀦𑀸𑀫𑀸𑀢𑀺 𑀆𑀳 𑁋 ‘‘𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀡𑁆𑀟𑀺𑀢𑁄’’𑀢𑀺. 𑀫𑀳𑀦𑁆𑀢𑀸𑀦𑀁 𑀅𑀢𑁆𑀣𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑀢𑁄 𑀫𑀳𑀢𑀻 𑀧𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀫𑀳𑀸𑀧𑀜𑁆𑀜𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀆𑀳 𑁋 ‘‘𑀫𑀳𑀸𑀧𑀜𑁆𑀜𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄’’𑀢𑀺.

𑀦𑀸𑀦𑀢𑁆𑀢𑀦𑁆𑀢𑀺 𑀬𑀸𑀳𑀺 𑀫𑀳𑀸𑀧𑀜𑁆𑀜𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑁄 ‘‘𑀫𑀳𑀸𑀧𑀜𑁆𑀜𑁄’’𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑀻𑀬𑀢𑀺, 𑀢𑀸𑀲𑀁 𑀫𑀳𑀸𑀧𑀜𑁆𑀜𑀸𑀤𑀻𑀦𑀁 𑀇𑀤𑀁 𑀦𑀸𑀦𑀢𑁆𑀢𑀁 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀬𑀲𑁆𑀲 𑀓𑀲𑁆𑀲𑀘𑀺 (𑀤𑀻. 𑀦𑀺. 𑀝𑀻. 𑁩.𑁨𑁧𑁬; 𑀲𑀁. 𑀦𑀺. 𑀝𑀻. 𑁧.𑁧.𑁧𑁧𑁦; 𑀅. 𑀦𑀺. 𑀝𑀻. 𑁧.𑁧.𑁫𑁮𑁪) 𑀯𑀺𑀲𑁂𑀲𑀢𑁄 𑀅𑀭𑀽𑀧𑀥𑀫𑁆𑀫𑀲𑁆𑀲 𑀫𑀳𑀢𑁆𑀢𑀁 𑀦𑀸𑀫 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀢𑀤𑀲𑁆𑀲 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀤𑀲𑁆𑀲𑁂𑀦𑁆𑀢𑁄, ‘‘𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑁂𑀢𑀼𑀫𑀳𑀦𑁆𑀢𑀢𑀸𑀬 𑀧𑀘𑁆𑀘𑀬𑀫𑀳𑀦𑁆𑀢𑀢𑀸𑀬 𑀦𑀺𑀲𑁆𑀲𑀬𑀫𑀳𑀦𑁆𑀢𑀢𑀸𑀬 𑀧𑀪𑁂𑀤𑀫𑀳𑀦𑁆𑀢𑀢𑀸𑀬 𑀓𑀺𑀘𑁆𑀘𑀫𑀳𑀦𑁆𑀢𑀢𑀸𑀬 𑀨𑀮𑀫𑀳𑀦𑁆𑀢𑀢𑀸𑀬 𑀆𑀦𑀺𑀲𑀁𑀲𑀫𑀳𑀦𑁆𑀢𑀢𑀸𑀬 𑀘 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀳𑁂𑀢𑀽 𑀅𑀮𑁄𑀪𑀸𑀤𑀬𑁄, 𑀧𑀘𑁆𑀘𑀬𑀸 𑀳𑀺𑀭𑁄𑀢𑁆𑀢𑀧𑁆𑀧𑀲𑀤𑁆𑀥𑀸𑀲𑀢𑀺𑀯𑀻𑀭𑀺𑀬𑀸𑀤𑀬𑁄. 𑀦𑀺𑀲𑁆𑀲𑀬𑀸 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑀺𑀬𑀢𑀢𑀸 𑀢𑀁𑀲𑀫𑀗𑁆𑀕𑀺𑀦𑁄 𑀘 𑀧𑀼𑀭𑀺𑀲𑀯𑀺𑀲𑁂𑀲𑀸. 𑀧𑀪𑁂𑀤𑁄 𑀘𑀸𑀭𑀺𑀢𑁆𑀢𑀸𑀤𑀺𑀯𑀺𑀪𑀸𑀕𑁄. 𑀓𑀺𑀘𑁆𑀘𑀁 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀧𑀝𑀺𑀧𑀓𑁆𑀔𑀲𑁆𑀲 𑀯𑀺𑀥𑀫𑀦𑀁. 𑀨𑀮𑀁 𑀲𑀕𑁆𑀕𑀲𑀫𑁆𑀧𑀤𑀸 𑀦𑀺𑀩𑁆𑀩𑀸𑀦𑀲𑀫𑁆𑀧𑀤𑀸 𑀘. 𑀆𑀦𑀺𑀲𑀁𑀲𑁄 𑀧𑀺𑀬𑀫𑀦𑀸𑀧𑀢𑀸𑀤𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁯) 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁧.𑁬𑁪 𑀆𑀤𑀬𑁄) 𑀘 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑀸𑀤𑀻𑀦𑀫𑁆𑀧𑀺 𑀫𑀳𑀦𑁆𑀢𑀢𑀸 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸, 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀁 𑀧𑀦 𑀫𑀳𑀦𑁆𑀢𑀪𑀸𑀯𑁄 𑀫𑀳𑀸𑀯𑀺𑀲𑀬𑀢𑀸𑀬 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀞𑀸𑀦𑀸𑀝𑁆𑀞𑀸𑀦𑀸𑀦𑀁 𑀫𑀳𑀸𑀯𑀺𑀲𑀬𑀢𑀸 𑀩𑀳𑀼𑀥𑀸𑀢𑀼𑀓𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁧𑁨𑁪 𑀆𑀤𑀬𑁄) 𑀲𑀬𑀫𑁂𑀯 𑀆𑀕𑀫𑀺𑀲𑁆𑀲𑀢𑀺. 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀦𑀺𑀤𑁆𑀥𑀸𑀭𑀺𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀅𑀭𑀺𑀬𑀲𑀘𑁆𑀘𑀸𑀦𑀁 𑀲𑀓𑀮𑀲𑀸𑀲𑀦𑀲𑀗𑁆𑀕𑀳𑀡𑀢𑁄 𑀲𑀘𑁆𑀘𑀯𑀺𑀪𑀗𑁆𑀕𑁂 (𑀯𑀺𑀪. 𑁧𑁮𑁯 𑀆𑀤𑀬𑁄) 𑀢𑀁𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀪. 𑀅𑀝𑁆𑀞. 𑁧𑁮𑁯 𑀆𑀤𑀬𑁄) 𑀆𑀕𑀢𑀦𑀬𑁂𑀦. 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀯𑀺𑀪𑀗𑁆𑀕𑀸𑀤𑀻𑀲𑀼 (𑀯𑀺𑀪. 𑁩𑁫𑁫 𑀆𑀤𑀬𑁄) 𑀢𑀁𑀲𑀁𑀯𑀡𑁆𑀡𑀦𑀸𑀤𑀻𑀲𑀼 (𑀯𑀺𑀪. 𑀅𑀝𑁆𑀞. 𑁩𑁫𑁫 𑀆𑀤𑀬𑁄) 𑀘 𑀆𑀕𑀢𑀦𑀬𑁂𑀦. 𑀲𑀸𑀫𑀜𑁆𑀜𑀨𑀮𑀸𑀦𑀁 𑀫𑀳𑀢𑁄 𑀳𑀺𑀢𑀲𑁆𑀲 𑀫𑀳𑀢𑁄 𑀲𑀼𑀔𑀲𑁆𑀲 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀫𑀳𑀢𑁄 𑀬𑁄𑀕𑀓𑁆𑀔𑁂𑀫𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀪𑀸𑀯𑀢𑁄 𑀲𑀦𑁆𑀢𑀧𑀡𑀻𑀢𑀦𑀺𑀧𑀼𑀡𑀅𑀢𑀓𑁆𑀓𑀸𑀯𑀘𑀭𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀪𑀸𑀯𑀢𑁄 𑀘. 𑀅𑀪𑀺𑀜𑁆𑀜𑀸𑀦𑀁 𑀫𑀳𑀸𑀲𑀫𑁆𑀪𑀸𑀭𑀢𑁄 𑀫𑀳𑀸𑀯𑀺𑀲𑀬𑀢𑁄 𑀫𑀳𑀸𑀓𑀺𑀘𑁆𑀘𑀢𑁄 𑀫𑀳𑀸𑀦𑀼𑀪𑀸𑀯𑀢𑁄 𑀫𑀳𑀸𑀦𑀺𑀧𑁆𑀨𑀢𑁆𑀢𑀺𑀢𑁄 𑀘. 𑀦𑀺𑀩𑁆𑀩𑀸𑀦𑀲𑁆𑀲 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀫𑀳𑀢𑁆𑀣𑀲𑀺𑀤𑁆𑀥𑀺𑀢𑁄 𑀫𑀳𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀣𑀼𑀧𑀜𑁆𑀜𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀦𑀸𑀦𑀸𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺, ‘‘𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫…𑀧𑁂… 𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦𑀸𑀫𑀸’’𑀢𑀺, 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑁂𑀲𑀼𑀧𑀺 ‘‘𑀏𑀓𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀏𑀓𑀸𑀤𑀲𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀏𑀓𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀩𑀳𑀼𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀏𑀓𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄…𑀧𑁂… 𑀏𑀓𑀯𑀺𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀩𑀳𑀼𑀯𑀺𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀏𑀯𑀁 𑀏𑀓𑁂𑀓𑀲𑁆𑀲 𑀔𑀦𑁆𑀥𑀲𑁆𑀲 𑀏𑀓𑀯𑀺𑀥𑀸𑀤𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀪𑁂𑀤𑀯𑀲𑁂𑀦𑀧𑀺 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑀣𑀸 ‘‘𑀇𑀤𑀁 𑀘𑀓𑁆𑀔𑀸𑀬𑀢𑀦𑀁 𑀦𑀸𑀫…𑀧𑁂… 𑀇𑀤𑀁 𑀥𑀫𑁆𑀫𑀸𑀬𑀢𑀦𑀁 𑀦𑀸𑀫. 𑀢𑀢𑁆𑀣 𑀤𑀲𑀸𑀬𑀢𑀦𑀸 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀢𑀼𑀪𑀽𑀫𑀓𑀸’’𑀢𑀺 𑀏𑀯𑀁 𑀆𑀬𑀢𑀦𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀦𑀸𑀦𑀸𑀥𑀸𑀢𑀽𑀲𑀽𑀢𑀺 ‘‘𑀅𑀬𑀁 𑀘𑀓𑁆𑀔𑀼𑀥𑀸𑀢𑀼 𑀦𑀸𑀫…𑀧𑁂… 𑀅𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀢𑀢𑁆𑀣 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀢𑀼𑀪𑀽𑀫𑀓𑀸’’𑀢𑀺 𑀏𑀯𑀁 𑀦𑀸𑀦𑀸𑀥𑀸𑀢𑀽𑀲𑀼 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑀬𑀺𑀤𑀁 𑀉𑀧𑀸𑀤𑀺𑀡𑁆𑀡𑀓𑀥𑀸𑀢𑀼𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀤𑁆𑀯𑀺𑀦𑁆𑀦𑀜𑁆𑀘 𑀅𑀕𑁆𑀕𑀲𑀸𑀯𑀓𑀸𑀦𑀁 𑀉𑀧𑀸𑀤𑀺𑀡𑁆𑀡𑀓𑀥𑀸𑀢𑀽𑀲𑀼𑀬𑁂𑀯 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑀜𑁆𑀘 𑀔𑁄 𑀏𑀓𑀤𑁂𑀲𑀢𑁄𑀯, 𑀦𑁄 𑀦𑀺𑀧𑁆𑀧𑀤𑁂𑀲𑀢𑁄, 𑀅𑀦𑀼𑀧𑀸𑀤𑀺𑀡𑁆𑀡𑀓𑀥𑀸𑀢𑀽𑀦𑀁 𑀧𑀦 𑀦𑀸𑀦𑀸𑀓𑀭𑀡𑀁 𑀦 𑀚𑀸𑀦𑀦𑁆𑀢𑀺𑀬𑁂𑀯. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁𑀬𑁂𑀯 𑀧𑀦, ‘‘𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁄 𑀲𑁂𑀢𑁄 𑀳𑁄𑀢𑀺, 𑀇𑀫𑀲𑁆𑀲 𑀓𑀡𑁆𑀳𑁄, 𑀇𑀫𑀲𑁆𑀲 𑀩𑀳𑀮𑀢𑁆𑀢𑀘𑁄, 𑀇𑀫𑀲𑁆𑀲 𑀢𑀦𑀼𑀢𑁆𑀢𑀘𑁄, 𑀇𑀫𑀲𑁆𑀲 𑀧𑀢𑁆𑀢𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀏𑀯𑀭𑀽𑀧𑀁, 𑀇𑀫𑀲𑁆𑀲 𑀧𑀼𑀧𑁆𑀨𑀁 𑀦𑀻𑀮𑀁 𑀧𑀻𑀢𑀁 𑀮𑁄𑀳𑀺𑀢𑀁 𑀑𑀤𑀸𑀢𑀁 𑀲𑀼𑀕𑀦𑁆𑀥𑀁 𑀤𑀼𑀕𑁆𑀕𑀦𑁆𑀥𑀁, 𑀨𑀮𑀁 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀁 𑀤𑀻𑀖𑀁 𑀯𑀝𑁆𑀝𑀁 𑀲𑀼𑀲𑀡𑁆𑀞𑀸𑀦𑀁 𑀫𑀝𑁆𑀞𑀁 𑀨𑀭𑀼𑀲𑀁 𑀲𑀼𑀕𑀦𑁆𑀥𑀁 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀅𑀫𑁆𑀩𑀺𑀮𑀁 𑀓𑀝𑀼𑀓𑀁 𑀓𑀲𑀸𑀯𑀁, 𑀓𑀡𑁆𑀝𑀓𑁄 𑀢𑀺𑀔𑀺𑀡𑁄 𑀅𑀢𑀺𑀔𑀺𑀡𑁄 𑀉𑀚𑀼𑀓𑁄 𑀓𑀼𑀝𑀺𑀮𑁄 𑀮𑁄𑀳𑀺𑀢𑁄 𑀑𑀤𑀸𑀢𑁄 𑀳𑁄𑀢𑀻’’𑀢𑀺 𑀥𑀸𑀢𑀼𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀅𑀢𑁆𑀣𑁂𑀲𑀽𑀢𑀺 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼. 𑀦𑀸𑀦𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀽𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑀢𑁄 𑀲𑀦𑁆𑀢𑀸𑀦𑀪𑁂𑀤𑀢𑁄 𑀘 𑀦𑀸𑀦𑀧𑁆𑀧𑀪𑁂𑀤𑁂𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼. 𑀅𑀯𑀺𑀚𑁆𑀚𑀸𑀤𑀺𑀅𑀗𑁆𑀕𑀸𑀦𑀜𑁆𑀳𑀺 𑀧𑀘𑁆𑀘𑁂𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀜𑁆𑀜𑀺𑀢𑀸𑀢𑀺. 𑀢𑁂𑀦𑀸𑀳 𑁋 𑀲𑀗𑁆𑀔𑀸𑀭𑀧𑀺𑀝𑀓𑁂 ‘‘𑀤𑁆𑀯𑀸𑀤𑀲 𑀧𑀘𑁆𑀘𑀬𑀸 𑀤𑁆𑀯𑀸𑀤𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸’’𑀢𑀺. 𑀦𑀸𑀦𑀸𑀲𑀼𑀜𑁆𑀜𑀢𑀫𑀦𑀼𑀧𑀮𑀩𑁆𑀪𑁂𑀲𑀽𑀢𑀺 𑀦𑀸𑀦𑀸𑀲𑀪𑀸𑀯𑁂𑀲𑀼 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀢𑁄 𑀲𑀼𑀜𑁆𑀜𑀲𑀪𑀸𑀯𑁂𑀲𑀼, 𑀢𑀢𑁄 𑀏𑀯 𑀇𑀢𑁆𑀣𑀺𑀧𑀼𑀭𑀺𑀲𑀅𑀢𑁆𑀢𑀅𑀢𑁆𑀢𑀦𑀺𑀬𑀸𑀤𑀺𑀯𑀲𑁂𑀦 𑀅𑀦𑀼𑀧𑀮𑀩𑁆𑀪𑁂𑀲𑀼 𑀲𑀪𑀸𑀯𑁂𑀲𑀼. 𑀫-𑀓𑀸𑀭𑁄 𑀳𑁂𑀢𑁆𑀣 𑀧𑀤𑀲𑀦𑁆𑀥𑀺𑀓𑀭𑁄. 𑀦𑀸𑀦𑀸𑀅𑀢𑁆𑀣𑁂𑀲𑀽𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀤𑀺𑀦𑀸𑀦𑀸𑀅𑀢𑁆𑀣𑁂𑀲𑀼. 𑀥𑀫𑁆𑀫𑁂𑀲𑀽𑀢𑀺 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂𑀲𑀼 𑀧𑀘𑁆𑀘𑀬𑀸𑀤𑀺𑀦𑀸𑀦𑀸𑀥𑀫𑁆𑀫𑁂𑀲𑀼. 𑀦𑀺𑀭𑀼𑀢𑁆𑀢𑀻𑀲𑀽𑀢𑀺 𑀢𑁂𑀲𑀁𑀬𑁂𑀯 𑀅𑀢𑁆𑀣𑀥𑀫𑁆𑀫𑀸𑀦𑀁 𑀦𑀺𑀤𑁆𑀥𑀸𑀭𑀡𑀯𑀘𑀦𑀲𑀗𑁆𑀔𑀸𑀢𑀸𑀲𑀼 𑀦𑀸𑀦𑀸𑀦𑀺𑀭𑀼𑀢𑁆𑀢𑀻𑀲𑀼. 𑀧𑀝𑀺𑀪𑀸𑀦𑁂𑀲𑀽𑀢𑀺 𑀏𑀢𑁆𑀣 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀼 𑀯𑀺𑀲𑀬𑀪𑀽𑀢𑁂𑀲𑀼, ‘‘𑀇𑀫𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻’’𑀢𑀺 (𑀯𑀺𑀪. 𑁭𑁨𑁫-𑁭𑁪𑁫) 𑀢𑀣𑀸 𑀢𑀣𑀸 𑀧𑀝𑀺𑀪𑀸𑀦𑀢𑁄 𑀧𑀝𑀺𑀪𑀸𑀦𑀸𑀦𑀻𑀢𑀺 𑀮𑀤𑁆𑀥𑀦𑀸𑀫𑁂𑀲𑀼 𑀜𑀸𑀡𑁂𑀲𑀼. 𑀧𑀼𑀣𑀼 𑀦𑀸𑀦𑀸𑀲𑀻𑀮𑀓𑁆𑀔𑀦𑁆𑀥𑁂𑀲𑀽𑀢𑀺𑀆𑀤𑀻𑀲𑀼 𑀲𑀻𑀮𑀲𑁆𑀲 𑀧𑀼𑀣𑀼𑀢𑁆𑀢𑀁 𑀦𑀸𑀦𑀢𑁆𑀢𑀜𑁆𑀘 𑀯𑀼𑀢𑁆𑀢𑀫𑁂𑀯. 𑀇𑀢𑀭𑁂𑀲𑀁 𑀧𑀦 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀧𑀸𑀓𑀝𑀫𑁂𑀯. 𑀬𑀁 𑀧𑀦 𑀅𑀪𑀺𑀦𑁆𑀦𑀁 𑀏𑀓𑀫𑁂𑀯 𑀦𑀺𑀩𑁆𑀩𑀸𑀦𑀁, 𑀢𑀢𑁆𑀣 𑀉𑀧𑀘𑀸𑀭𑀯𑀲𑁂𑀦 𑀧𑀼𑀣𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀧𑀼𑀣𑀼 𑀦𑀸𑀦𑀸𑀚𑀦𑀲𑀸𑀥𑀸𑀭𑀡𑁂 𑀥𑀫𑁆𑀫𑁂 𑀲𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺. 𑀢𑁂𑀦𑀲𑁆𑀲 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀧𑀭𑀺𑀬𑀸𑀬𑁂𑀦 𑀧𑀼𑀣𑀼𑀢𑁆𑀢𑀁 𑀧𑀭𑀺𑀤𑀻𑀧𑀺𑀢𑀁 𑀳𑁄𑀢𑀺.

𑀏𑀯𑀁 𑀯𑀺𑀲𑀬𑀯𑀲𑁂𑀦 𑀧𑀜𑁆𑀜𑀸𑀬 𑀫𑀳𑀢𑁆𑀢𑀁 𑀧𑀼𑀣𑀼𑀢𑁆𑀢𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦 𑀳𑀸𑀲𑀪𑀸𑀯𑀁, 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀚𑀯𑀦𑀪𑀸𑀯𑀁, 𑀓𑀺𑀘𑁆𑀘𑀯𑀲𑁂𑀦 𑀢𑀺𑀓𑁆𑀔𑀸𑀤𑀺𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁, ‘‘𑀓𑀢𑀫𑀸 𑀳𑀸𑀲𑀧𑀜𑁆𑀜𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀸𑀲𑀩𑀳𑀼𑀮𑁄𑀢𑀺 𑀧𑀻𑀢𑀺𑀩𑀳𑀼𑀮𑁄. 𑀲𑁂𑀲𑀧𑀤𑀸𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀕𑁆𑀕𑀼𑀤𑀕𑁆𑀕𑁄 𑀳𑀼𑀢𑁆𑀯𑀸 𑀧𑀻𑀢𑀺𑀲𑀳𑀕𑀢𑀸𑀬 𑀧𑀜𑁆𑀜𑀸𑀬. 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀳𑀺 𑀧𑀜𑁆𑀜𑀸 𑀅𑀪𑀺𑀭𑀢𑀺𑀯𑀲𑁂𑀦 𑀆𑀭𑀫𑁆𑀫𑀡𑁂 𑀨𑀼𑀮𑁆𑀮𑀸 𑀯𑀺𑀓𑀲𑀺𑀢𑀸 𑀯𑀺𑀬 𑀧𑀯𑀢𑁆𑀢𑀢𑀺; 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀁 𑀞𑀧𑁂𑀢𑁆𑀯𑀸 𑀳𑀸𑀲𑀦𑀻𑀬𑀁 𑀧𑀭𑀁 𑀢𑀺𑀯𑀺𑀥𑀫𑁆𑀧𑀺 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸 𑀧𑀼𑀦 𑀲𑀻𑀮𑀓𑁆𑀔𑀦𑁆𑀥𑀫𑀸𑀳. 𑀲𑀫𑀸𑀥𑀺𑀓𑁆𑀔𑀦𑁆𑀥𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀁 𑀅𑀦𑀺𑀘𑁆𑀘𑀦𑁆𑀢𑀺 𑀲𑀻𑀖𑀁 𑀯𑁂𑀕𑁂𑀦 𑀧𑀯𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑁂𑀦 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸 𑀇𑀦𑁆𑀤𑁂𑀦 𑀯𑀺𑀲𑁆𑀲𑀝𑁆𑀞𑀯𑀚𑀺𑀭𑀁 𑀯𑀺𑀬 𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀻 𑀅𑀤𑀦𑁆𑀥𑀸𑀬𑀦𑁆𑀢𑀻 𑀭𑀽𑀧𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀯𑁂𑀕𑀲𑀸 𑀧𑀝𑀺𑀯𑀺𑀚𑁆𑀛𑀢𑀺, 𑀢𑀲𑁆𑀫𑀸 𑀲𑀸 𑀚𑀯𑀦𑀧𑀜𑁆𑀜𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀚𑀯𑀦𑀧𑀜𑁆𑀜𑀁 𑀤𑀲𑁆𑀲𑁂𑀢𑁆𑀯𑀸 𑀩𑀮𑀯𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀤𑀲𑁆𑀲𑁂𑀢𑀼𑀁, ‘‘𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀔𑀬𑀝𑁆𑀞𑁂𑀦𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑀢𑁄 𑀔𑀬𑀲𑀪𑀸𑀯𑀢𑁆𑀢𑀸. 𑀪𑀬𑀝𑁆𑀞𑁂𑀦𑀸𑀢𑀺 𑀪𑀬𑀸𑀦𑀓𑀪𑀸𑀯𑀢𑁄. 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀅𑀢𑁆𑀢𑀲𑀸𑀭𑀯𑀺𑀭𑀳𑀢𑁄 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀢𑁄 𑀘. 𑀢𑀼𑀮𑀬𑀺𑀢𑁆𑀯𑀸𑀢𑀺 𑀢𑀼𑀮𑀸𑀪𑀽𑀢𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀢𑀼𑀮𑁂𑀢𑁆𑀯𑀸. 𑀢𑀻𑀭𑀬𑀺𑀢𑁆𑀯𑀸𑀢𑀺 𑀢𑀸𑀬 𑀏𑀯 𑀢𑀻𑀭𑀡𑀪𑀽𑀢𑀸𑀬 𑀢𑀻𑀭𑁂𑀢𑁆𑀯𑀸. 𑀯𑀺𑀪𑀸𑀯𑀬𑀺𑀢𑁆𑀯𑀸𑀢𑀺 𑀬𑀸𑀣𑀸𑀯𑀢𑁄 𑀧𑀓𑀸𑀲𑁂𑀢𑁆𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑀁 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀭𑀽𑀧𑀦𑀺𑀭𑁄𑀥𑁂𑀢𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑀪𑀽𑀢𑁂 𑀦𑀺𑀩𑁆𑀩𑀸𑀦𑁂 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀯𑀲𑁂𑀦. 𑀇𑀤𑀸𑀦𑀺 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀚𑀯𑀦𑀧𑀜𑁆𑀜𑀁 𑀤𑀲𑁆𑀲𑁂𑀢𑀼𑀁, 𑀧𑀼𑀦 ‘‘𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸𑀢𑀺 𑀓𑁂𑀘𑀺.

𑀜𑀸𑀡𑀲𑁆𑀲 𑀢𑀺𑀓𑁆𑀔𑀪𑀸𑀯𑁄 𑀦𑀸𑀫 𑀲𑀯𑀺𑀲𑁂𑀲𑀁 𑀧𑀝𑀺𑀧𑀓𑁆𑀔𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺, ‘‘𑀔𑀺𑀧𑁆𑀧𑀁 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸’’𑀢𑀺 𑀯𑀢𑁆𑀯𑀸 𑀢𑁂 𑀧𑀦 𑀓𑀺𑀮𑁂𑀲𑁂 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄, ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀺𑀓𑁆𑀔𑀧𑀜𑁆𑀜𑁄 𑀳𑀺 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀳𑁄𑀢𑀺, 𑀧𑀝𑀺𑀧𑀤𑀸 𑀘𑀲𑁆𑀲 𑀦 𑀘𑀮𑀢𑀻𑀢𑀺 𑀆𑀳 𑁋 ‘‘𑀏𑀓𑀲𑁆𑀫𑀺𑀁 𑀆𑀲𑀦𑁂 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀅𑀥𑀺𑀕𑀢𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺.

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸’’𑀢𑀺 𑀬𑀸𑀣𑀸𑀯𑀢𑁄 𑀤𑀲𑁆𑀲𑀦𑁂𑀦 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑁄 𑀇𑀚𑁆𑀛𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀓𑀸𑀭𑀡𑀫𑀼𑀔𑁂𑀦 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀁 𑀤𑀲𑁆𑀲𑁂𑀢𑀼𑀁, ‘‘𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀉𑀩𑁆𑀩𑁂𑀕𑀩𑀳𑀼𑀮𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀩𑁆𑀩𑁂𑀕𑀩𑀳𑀼𑀮𑁄𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀲𑀁𑀯𑁂𑀕𑁄. 𑀉𑀢𑁆𑀢𑀸𑀲𑀩𑀳𑀼𑀮𑁄𑀢𑀺 𑀜𑀸𑀡𑀼𑀢𑁆𑀭𑀸𑀲𑀯𑀲𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀩𑀳𑀼𑀲𑁄 𑀉𑀢𑁆𑀭𑀲𑁆𑀢𑀫𑀸𑀦𑀲𑁄. 𑀢𑁂𑀦 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀫𑀸𑀳. 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄𑀢𑀺 𑀧𑀦 𑀇𑀫𑀺𑀦𑀸 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀁 𑀆𑀳 𑁋 𑀅𑀭𑀢𑀺𑀩𑀳𑀼𑀮𑁄𑀢𑀺𑀆𑀤𑀺𑀦𑀸 𑀢𑀲𑁆𑀲𑀸 𑀏𑀯 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀁. 𑀩𑀳𑀺𑀫𑀼𑀔𑁄𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀢𑁄 𑀩𑀳𑀺𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀜𑀸𑀡𑀫𑀼𑀔𑁄, 𑀢𑀣𑀸 𑀯𑀸 𑀧𑀯𑀢𑁆𑀢𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑁄. 𑀦𑀺𑀩𑁆𑀩𑀺𑀚𑁆𑀛𑀦𑀁 𑀦𑀺𑀩𑁆𑀩𑁂𑀥𑁄, 𑀲𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀺, 𑀦𑀺𑀩𑁆𑀩𑀺𑀚𑁆𑀛𑀢𑀻𑀢𑀺 𑀯𑀸 𑀦𑀺𑀩𑁆𑀩𑁂𑀥𑀸, 𑀲𑀸𑀯 𑀧𑀜𑁆𑀜𑀸 𑀦𑀺𑀩𑁆𑀩𑁂𑀥𑀺𑀓𑀸. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀚𑁆𑀚𑀢𑀺 𑀏𑀢𑁂𑀦 𑀯𑀺𑀧𑀲𑁆𑀲𑀦𑀸𑀤𑀺𑀓𑁄𑀢𑀺 𑀧𑀤𑀁, 𑀲𑀫𑀸𑀧𑀢𑁆𑀢𑀺, 𑀢𑀲𑁆𑀫𑀸 𑀅𑀦𑀼𑀧𑀤𑀦𑁆𑀢𑀺 𑀅𑀦𑀼𑀲𑀫𑀸𑀧𑀢𑁆𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀧𑀤𑀁 𑀯𑀸 𑀲𑀫𑁆𑀫𑀲𑀦𑀼𑀧𑀕𑀸 𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀸’’𑀢𑀺. 𑀛𑀸𑀦𑀗𑁆𑀕𑀯𑀲𑁂𑀦 𑀯𑀸𑀢𑀺 𑀛𑀸𑀦𑀗𑁆𑀕𑀯𑀲𑁂𑀦𑀸𑀢𑀺 𑀘 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀓𑀫𑀢𑁆𑀣𑁄 𑀇𑀥 𑀧𑀤𑀲𑀤𑁆𑀤𑁄, 𑀢𑀲𑁆𑀫𑀸 𑀅𑀦𑀼𑀧𑀤𑀁 𑀅𑀦𑀼𑀓𑁆𑀓𑀫𑁂𑀦𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀦𑀼𑀧𑀝𑀺𑀧𑀸𑀝𑀺𑀬𑀸’’𑀢𑀺. 𑀥𑀫𑁆𑀫𑀯𑀺𑀧𑀲𑁆𑀲𑀦𑀦𑁆𑀢𑀺 𑀢𑀁𑀢𑀁𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀲𑁆𑀲𑀦𑀁. 𑀯𑀺𑀧𑀲𑁆𑀲𑀢𑀻𑀢𑀺 𑀲𑀫𑀸𑀧𑀢𑁆𑀢𑀺𑀬𑁄 𑀛𑀸𑀦𑀫𑀼𑀔𑁂𑀦 𑀢𑁂 𑀢𑁂 𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸, ‘‘𑀇𑀢𑀺𑀧𑀺 𑀤𑀼𑀓𑁆𑀔𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀫𑀲𑀢𑀺. 𑀅𑀤𑁆𑀥𑀫𑀸𑀲𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀉𑀓𑁆𑀓𑀁𑀲𑀕𑀢𑀲𑁆𑀲 𑀲𑀸𑀯𑀓𑀸𑀦𑀁 𑀲𑀫𑁆𑀫𑀲𑀦𑀘𑀸𑀭𑀲𑁆𑀲 𑀦𑀺𑀧𑁆𑀧𑀤𑁂𑀲𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀢𑁆𑀢𑀸, 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀘 𑀢𑀣𑀸 𑀧𑀝𑀺𑀧𑀸𑀤𑁂𑀢𑀩𑁆𑀩𑀢𑁆𑀢𑀸. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀬𑀤𑀺𑀧𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄; 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀦 𑀢𑀢𑁄 𑀘𑀺𑀭𑁂𑀦, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄𑀧𑀺 𑀫𑀳𑀸𑀧𑀜𑁆𑀜𑁄𑀯, 𑀢𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀯 𑀫𑀳𑀸𑀧𑀜𑁆𑀜𑀢𑀭𑁄𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁, ‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑁆𑀫𑀲𑀦𑀁 𑀘𑀭𑀢𑀺 𑀏𑀢𑁆𑀣𑀸𑀢𑀺 𑀲𑀫𑁆𑀫𑀲𑀦𑀘𑀸𑀭𑁄, 𑀯𑀺𑀧𑀲𑁆𑀲𑀦𑀸𑀪𑀽𑀫𑀺, 𑀢𑀁 𑀲𑀫𑁆𑀫𑀲𑀦𑀘𑀸𑀭𑀁. 𑀏𑀓𑀤𑁂𑀲𑀫𑁂𑀯𑀸𑀢𑀺 𑀲𑀓𑀅𑀢𑁆𑀢𑀪𑀸𑀯𑁂 𑀲𑀗𑁆𑀔𑀸𑀭𑁂 𑀅𑀦𑀯𑀲𑁂𑀲𑀢𑁄 𑀧𑀭𑀺𑀕𑁆𑀕𑀳𑁂𑀢𑀼𑀜𑁆𑀘 𑀲𑀫𑁆𑀫𑀲𑀺𑀢𑀼𑀜𑁆𑀘 𑀅𑀲𑀓𑁆𑀓𑁄𑀦𑁆𑀢𑀁 𑀅𑀢𑁆𑀢𑀦𑁄 𑀅𑀪𑀺𑀦𑀻𑀳𑀸𑀭𑀲𑀫𑀼𑀤𑀸𑀕𑀢𑀜𑀸𑀡𑀩𑀮𑀸𑀦𑀼𑀭𑀽𑀧𑀁 𑀏𑀓𑀤𑁂𑀲𑀫𑁂𑀯 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑁄. 𑀦𑀦𑀼 𑀘 ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺 (𑀲𑀁. 𑀦𑀺. 𑁪.𑁨𑁬) 𑀯𑀘𑀦𑀢𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑁂𑀦 𑀲𑀩𑁆𑀩𑀁 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀺𑀢𑀩𑁆𑀩𑀫𑁂𑀯? 𑀲𑀘𑁆𑀘𑀫𑁂𑀢𑀁, 𑀢𑀜𑁆𑀘 𑀔𑁄 𑀲𑀫𑁆𑀫𑀲𑀦𑀼𑀧𑀕𑀥𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀲𑀦𑁆𑀢𑀸𑀦𑀕𑀢𑁂 𑀲𑀩𑁆𑀩𑀥𑀫𑁆𑀫𑁂, 𑀧𑀭𑀲𑀦𑁆𑀢𑀸𑀦𑀕𑀢𑁂 𑀘 𑀢𑁂𑀲𑀁 𑀲𑀦𑁆𑀢𑀸𑀦𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀩𑀳𑀺𑀤𑁆𑀥𑀸𑀪𑀸𑀯𑀲𑀸𑀫𑀜𑁆𑀜𑀢𑁄 𑀲𑀫𑁆𑀫𑀲𑀦𑀁, 𑀅𑀬𑀁 𑀲𑀸𑀯𑀓𑀸𑀦𑀁 𑀲𑀫𑁆𑀫𑀲𑀦𑀘𑀸𑀭𑁄. 𑀣𑁂𑀭𑁄 𑀧𑀦 𑀩𑀳𑀺𑀤𑁆𑀥𑀸𑀥𑀫𑁆𑀫𑁂𑀧𑀺 𑀲𑀦𑁆𑀢𑀸𑀦𑀯𑀺𑀪𑀸𑀕𑁂𑀦 𑀓𑁂𑀘𑀺 𑀓𑁂𑀘𑀺 𑀉𑀤𑁆𑀥𑀭𑀺𑀢𑁆𑀯𑀸 𑀲𑀫𑁆𑀫𑀲𑀺, 𑀢𑀜𑁆𑀘 𑀔𑁄 𑀜𑀸𑀡𑁂𑀦 𑀨𑀼𑀝𑁆𑀞𑀫𑀢𑁆𑀢𑀁 𑀓𑀢𑁆𑀯𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀝𑁆𑀞𑀺𑀓𑁄𑀝𑀺𑀬𑀸 𑀉𑀧𑁆𑀧𑀻𑀴𑁂𑀦𑁆𑀢𑁄 𑀯𑀺𑀬 𑀏𑀓𑀤𑁂𑀲𑀫𑁂𑀯 𑀲𑀫𑁆𑀫𑀲𑀦𑁆𑀢𑁄’’𑀢𑀺. 𑀢𑀢𑁆𑀣 𑀜𑀸𑀡𑁂𑀦 𑀦𑀸𑀫 𑀬𑀸𑀯𑀢𑀸 𑀦𑁂𑀬𑁆𑀬𑀁 𑀧𑀯𑀢𑁆𑀢𑀺𑀢𑀩𑁆𑀩𑀁, 𑀢𑀣𑀸 𑀅𑀧𑀯𑀢𑁆𑀢𑀦𑀢𑁄 ‘‘𑀬𑀝𑁆𑀞𑀺𑀓𑁄𑀝𑀺𑀬𑀸 𑀉𑀧𑁆𑀧𑀻𑀴𑁂𑀦𑁆𑀢𑁄 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬 𑀅𑀪𑀸𑀯𑀢𑁄 ‘‘𑀏𑀓𑀤𑁂𑀲𑀫𑁂𑀯 𑀲𑀫𑁆𑀫𑀲𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁.

𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀲𑀦𑀘𑀸𑀭𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀁 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀸, 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀘 𑀲𑀗𑁆𑀔𑀸𑀭𑀸𑀢𑀺 𑀯𑀤𑀦𑁆𑀢𑀺, 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀽𑀢𑀺 𑀅𑀧𑀭𑁂. 𑀢𑀣𑀸 𑀳𑀺 𑀅𑀤𑁆𑀥𑀢𑁆𑀢𑀬𑀯𑀲𑁂𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑀁 𑀑𑀲𑀭𑀺𑀢𑁆𑀯𑀸 𑀙𑀢𑁆𑀢𑀺𑀁𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀩𑀼𑀤𑁆𑀥𑀸𑀦𑀁 𑀫𑀳𑀸𑀯𑀚𑀺𑀭𑀜𑀸𑀡𑀁 𑀧𑀯𑀢𑁆𑀢𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀲𑀦𑁆𑀢𑀸𑀦𑀕𑀢𑁂𑀳𑀺 𑀲𑀤𑁆𑀥𑀺𑀁 𑀫𑀚𑁆𑀛𑀺𑀫𑀤𑁂𑀲𑀯𑀸𑀲𑀺𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀸 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀘 𑀲𑀫𑁆𑀫𑀲𑀦𑀘𑀸𑀭𑁄𑀢𑀺 𑀯𑀤𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀸𑀢𑀺 𑀓𑁂𑀘𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄𑀧𑀺 𑀬𑀣𑀸𑀯𑀼𑀢𑁆𑀢𑀲𑀸𑀯𑀓𑀸𑀦𑀁 𑀯𑀺𑀧𑀲𑁆𑀲𑀦𑀸𑀪𑀽𑀫𑀺𑀬𑁂𑀯 𑀲𑀫𑁆𑀫𑀲𑀦𑀘𑀸𑀭𑁄. 𑀢𑀢𑁆𑀣 𑀧𑀦 𑀣𑁂𑀭𑁄 𑀲𑀸𑀢𑀺𑀲𑀬𑀁 𑀦𑀺𑀭𑀯𑀲𑁂𑀲𑀁 𑀅𑀦𑀼𑀧𑀤𑀥𑀫𑁆𑀫𑀁 𑀯𑀺𑀧𑀲𑁆𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀸𑀯𑀓𑀸𑀦𑀁 𑀲𑀫𑁆𑀫𑀲𑀦𑀘𑀸𑀭𑀁 𑀦𑀺𑀧𑁆𑀧𑀤𑁂𑀲𑀁 𑀲𑀫𑁆𑀫𑀲𑀻’’𑀢𑀺.

𑀢𑀢𑁆𑀣 ‘‘𑀲𑀸𑀯𑀓𑀸𑀦𑀁 𑀯𑀺𑀧𑀲𑁆𑀲𑀦𑀸𑀪𑀽𑀫𑀻’’𑀢𑀺 𑀏𑀢𑁆𑀣 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀮𑁄𑀓𑀺𑀬𑀸𑀪𑀺𑀜𑁆𑀜𑀧𑁆𑀧𑀢𑁆𑀢𑀸 𑀧𑀓𑀢𑀺𑀲𑀸𑀯𑀓𑀸 𑀅𑀕𑁆𑀕𑀲𑀸𑀯𑀓𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀢𑀺 𑀙𑀲𑀼 𑀚𑀦𑁂𑀲𑀼 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸𑀦𑀁 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀅𑀦𑀥𑀺𑀕𑀢𑀧𑀜𑁆𑀜𑀸𑀦𑁂𑀧𑀼𑀜𑁆𑀜𑀢𑁆𑀢𑀸 𑀅𑀦𑁆𑀥𑀸𑀦𑀁 𑀯𑀺𑀬 𑀇𑀘𑁆𑀙𑀺𑀢𑀧𑀤𑁂𑀲𑁄𑀓𑁆𑀓𑀫𑀦𑀁 𑀯𑀺𑀧𑀲𑁆𑀲𑀦𑀸𑀓𑀸𑀮𑁂 𑀇𑀘𑁆𑀙𑀺𑀓𑀺𑀘𑁆𑀙𑀺𑀢𑀥𑀫𑁆𑀫𑀯𑀺𑀧𑀲𑁆𑀲𑀦𑀸 𑀦𑀢𑁆𑀣𑀺. 𑀢𑁂 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀥𑀫𑁆𑀫𑀫𑀢𑁆𑀢𑁂𑀬𑁂𑀯 𑀞𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀺. 𑀮𑁄𑀓𑀺𑀬𑀸𑀪𑀺𑀜𑁆𑀜𑀧𑁆𑀧𑀢𑁆𑀢𑀸 𑀧𑀦 𑀧𑀓𑀢𑀺𑀲𑀸𑀯𑀓𑀸 𑀬𑁂𑀦 𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀆𑀭𑀪𑀦𑁆𑀢𑀺; 𑀢𑀢𑁄 𑀅𑀜𑁆𑀜𑁂𑀦 𑀯𑀺𑀧𑀲𑁆𑀲𑀦𑀁 𑀯𑀺𑀢𑁆𑀣𑀸𑀭𑀺𑀓𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺 𑀯𑀺𑀧𑀼𑀮𑀜𑀸𑀡𑀢𑁆𑀢𑀸. 𑀫𑀳𑀸𑀲𑀸𑀯𑀓𑀸 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀢𑁆𑀢𑀸 𑀢𑀢𑁄 𑀲𑀸𑀢𑀺𑀲𑀬𑀁 𑀯𑀺𑀧𑀲𑁆𑀲𑀦𑀁 𑀯𑀺𑀢𑁆𑀣𑀸𑀭𑀺𑀓𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀅𑀕𑁆𑀕𑀲𑀸𑀯𑀓𑁂𑀲𑀼 𑀤𑀼𑀢𑀺𑀬𑁄 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑀸𑀥𑀸𑀦𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸 𑀯𑀺𑀧𑀲𑁆𑀲𑀦𑀁 𑀢𑀢𑁄𑀧𑀺 𑀯𑀺𑀢𑁆𑀣𑀸𑀭𑀺𑀓𑀁 𑀓𑀭𑁄𑀢𑀺. 𑀧𑀞𑀫𑁄 𑀧𑀦 𑀢𑀢𑁄 𑀫𑀳𑀸𑀧𑀜𑁆𑀜𑀢𑀸𑀬 𑀲𑀸𑀯𑀓𑁂𑀳𑀺 𑀅𑀲𑀸𑀥𑀸𑀭𑀡𑀁 𑀯𑀺𑀢𑁆𑀣𑀸𑀭𑀺𑀓𑀁 𑀓𑀭𑁄𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑁂𑀳𑀺𑀧𑀺 𑀫𑀳𑀸𑀪𑀺𑀦𑀻𑀳𑀸𑀭𑀢𑀸𑀬 𑀅𑀢𑁆𑀢𑀦𑁄 𑀅𑀪𑀺𑀦𑀻𑀳𑀸𑀭𑀸𑀦𑀼𑀭𑀽𑀧𑀁 𑀢𑀢𑁄𑀧𑀺 𑀯𑀺𑀢𑁆𑀣𑀸𑀭𑀺𑀓𑀯𑀺𑀧𑀲𑁆𑀲𑀦𑀁 𑀓𑀭𑁄𑀦𑁆𑀢𑀺. 𑀩𑀼𑀤𑁆𑀥𑀸𑀦𑀁, 𑀲𑀫𑁆𑀫𑀤𑁂𑀯, 𑀧𑀭𑀺𑀧𑀽𑀭𑀺𑀢𑀧𑀜𑁆𑀜𑀸𑀧𑀸𑀭𑀫𑀺𑀧𑀪𑀸𑀯𑀺𑀢-𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀥𑀺𑀕𑀫𑀦𑀲𑁆𑀲 𑀅𑀦𑀼𑀭𑀽𑀧𑀸𑀬𑀸𑀢𑀺. 𑀬𑀣𑀸 𑀦𑀸𑀫 𑀓𑀢𑀯𑀸𑀮𑀯𑁂𑀥𑀧𑀭𑀺𑀘𑀬𑁂𑀦 𑀲𑀭𑀪𑀗𑁆𑀕𑀲𑀤𑀺𑀲𑁂𑀦 𑀥𑀦𑀼𑀕𑁆𑀕𑀳𑁂𑀦 𑀔𑀺𑀢𑁆𑀢𑁄 𑀲𑀭𑁄 𑀅𑀦𑁆𑀢𑀭𑀸 𑀭𑀼𑀓𑁆𑀔𑀮𑀢𑀸𑀤𑀻𑀲𑀼 𑀅𑀲𑀚𑁆𑀚𑀫𑀸𑀦𑁄 𑀮𑀓𑁆𑀔𑀡𑁂𑀬𑁂𑀯 𑀧𑀢𑀢𑀺; 𑀦 𑀲𑀚𑁆𑀚𑀢𑀺 𑀦 𑀯𑀺𑀭𑀚𑁆𑀛𑀢𑀺, 𑀏𑀯𑀁 𑀅𑀦𑁆𑀢𑀭𑀸 𑀅𑀲𑀚𑁆𑀚𑀫𑀸𑀦𑀸 𑀅𑀯𑀺𑀭𑀚𑁆𑀛𑀫𑀸𑀦𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀲𑀦𑀻𑀬𑀥𑀫𑁆𑀫𑁂𑀲𑀼 𑀬𑀸𑀣𑀸𑀯𑀢𑁄 𑀦𑀸𑀦𑀸𑀦𑀬𑁂𑀳𑀺 𑀧𑀯𑀢𑁆𑀢𑀢𑀺. 𑀬𑀁 𑀫𑀳𑀸𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁄 𑀕𑀡𑀢𑁄 𑀯𑀼𑀢𑁆𑀢𑁄𑀬𑁂𑀯.

𑀏𑀢𑁂𑀲𑀼 𑀘 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸𑀦𑀁 𑀯𑀺𑀧𑀲𑁆𑀲𑀦𑀸𑀘𑀸𑀭𑁄 𑀔𑀚𑁆𑀚𑁄𑀢𑀧𑀪𑀸𑀲𑀤𑀺𑀲𑁄, 𑀅𑀪𑀺𑀜𑁆𑀜𑀧𑁆𑀧𑀢𑁆𑀢𑀧𑀓𑀢𑀺𑀲𑀸𑀯𑀓𑀸𑀦𑀁 𑀤𑀻𑀧𑀧𑀪𑀸𑀲𑀤𑀺𑀲𑁄, 𑀫𑀳𑀸𑀲𑀸𑀯𑀓𑀸𑀦𑀁 𑀑𑀓𑁆𑀓𑀸𑀧𑀪𑀸𑀲𑀤𑀺𑀲𑁄, 𑀅𑀕𑁆𑀕𑀲𑀸𑀯𑀓𑀸𑀦𑀁 𑀑𑀲𑀥𑀺𑀢𑀸𑀭𑀓𑀸𑀧𑀪𑀸𑀲𑀤𑀺𑀲𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀘𑀦𑁆𑀤𑀧𑀪𑀸𑀲𑀤𑀺𑀲𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀭𑀲𑁆𑀫𑀺𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀲𑀭𑀤𑀲𑀽𑀭𑀺𑀬𑀫𑀡𑁆𑀟𑀮𑀲𑀤𑀺𑀲𑁄 𑀉𑀧𑀝𑁆𑀞𑀸𑀲𑀺. 𑀢𑀣𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸𑀦𑀁 𑀯𑀺𑀧𑀲𑁆𑀲𑀦𑀸𑀘𑀸𑀭𑁄 𑀅𑀦𑁆𑀥𑀸𑀦𑀁 𑀬𑀝𑁆𑀞𑀺𑀓𑁄𑀝𑀺𑀬𑀸 𑀕𑀫𑀦𑀲𑀤𑀺𑀲𑁄, 𑀮𑁄𑀓𑀺𑀬𑀸𑀪𑀺𑀜𑁆𑀜𑀧𑁆𑀧𑀢𑁆𑀢𑀧𑀓𑀢𑀺𑀲𑀸𑀯𑀓𑀸𑀦𑀁 𑀤𑀡𑁆𑀟𑀓𑀲𑁂𑀢𑀼𑀕𑀫𑀦𑀲𑀤𑀺𑀲𑁄, 𑀫𑀳𑀸𑀲𑀸𑀯𑀓𑀸𑀦𑀁 𑀚𑀗𑁆𑀖𑀲𑁂𑀢𑀼𑀕𑀫𑀦𑀲𑀤𑀺𑀲𑁄, 𑀅𑀕𑁆𑀕𑀲𑀸𑀯𑀓𑀸𑀦𑀁 𑀲𑀓𑀝𑀲𑁂𑀢𑀼𑀕𑀫𑀦𑀲𑀤𑀺𑀲𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀫𑀳𑀸𑀚𑀗𑁆𑀖𑀫𑀕𑁆𑀕𑀕𑀫𑀦𑀲𑀤𑀺𑀲𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀫𑀳𑀸𑀲𑀓𑀫𑀕𑁆𑀕𑀕𑀫𑀦𑀲𑀤𑀺𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀳𑀢𑁆𑀢𑀜𑁆𑀘 𑀓𑀺𑀭 𑀧𑀢𑁆𑀯𑀸𑀢𑀺 𑀏𑀢𑁆𑀣 𑀓𑀺𑀭-𑀲𑀤𑁆𑀤𑁄 𑀅𑀦𑀼𑀲𑁆𑀲𑀯𑀮𑀤𑁆𑀥𑁄𑀬𑀫𑀢𑁆𑀣𑁄𑀢𑀺 𑀤𑀻𑀧𑁂𑀢𑀼𑀁 𑀯𑀼𑀢𑁆𑀢𑁄. 𑀧𑀢𑁆𑀯𑀸 𑀅𑀜𑁆𑀜𑀸𑀲𑀺 𑀅𑀢𑁆𑀢𑀦𑁄 𑀯𑀺𑀧𑀲𑁆𑀲𑀦𑀸𑀘𑀸𑀭𑀲𑁆𑀲 𑀫𑀳𑀸𑀯𑀺𑀲𑀬𑀢𑁆𑀢𑀸 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀪𑀸𑀯𑀲𑁆𑀲 𑀘 𑀲𑀮𑁆𑀮𑀓𑁆𑀔𑀡𑁂𑀦. 𑀓𑀣𑀁 𑀧𑀦𑀸𑀬𑀁 𑀫𑀳𑀸𑀣𑁂𑀭𑁄 𑀤𑀦𑁆𑀥𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑁄 𑀲𑀻𑀖𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑀢𑁄 𑀧𑀜𑁆𑀜𑀸𑀬 𑀅𑀢𑁆𑀢𑀸𑀦𑀁 𑀲𑀸𑀢𑀺𑀲𑀬𑀁 𑀓𑀢𑁆𑀯𑀸 𑀅𑀜𑁆𑀜𑀸𑀲𑀻𑀢𑀺 𑀆𑀳 𑁋 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀫𑀳𑀸𑀚𑀝𑀦𑁆𑀢𑀺 𑀫𑀳𑀸𑀚𑀸𑀮𑀲𑀸𑀔𑀁 𑀅𑀢𑀺𑀯𑀺𑀬 𑀲𑀺𑀩𑁆𑀩𑀺𑀢𑀚𑀸𑀮𑀁. 𑀬𑀝𑁆𑀞𑀺𑀁 𑀧𑀦 𑀲𑀸𑀭𑀁 𑀯𑀸 𑀉𑀚𑀼𑀁 𑀯𑀸 𑀦 𑀮𑀪𑀢𑀺 𑀯𑁂𑀡𑀼𑀕𑁆𑀕𑀳𑀡𑁂 𑀅𑀦𑀼𑀘𑁆𑀘𑀺𑀦𑀺𑀢𑁆𑀯𑀸 𑀯𑁂𑀡𑀼𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀏𑀯𑀁𑀲𑀫𑁆𑀧𑀤𑀦𑁆𑀢𑀺 𑀬𑀣𑀸 𑀢𑁂𑀲𑀼 𑀧𑀼𑀭𑀺𑀲𑁂𑀲𑀼 𑀏𑀓𑁄 𑀯𑁂𑀴𑀼𑀕𑁆𑀕𑀳𑀡𑁂 𑀅𑀦𑀼𑀘𑁆𑀘𑀺𑀦𑀺𑀢𑁆𑀯𑀸 𑀯𑁂𑀴𑀼𑀬𑀝𑁆𑀞𑀺𑀁 𑀕𑀡𑁆𑀳𑀸𑀢𑀺, 𑀏𑀓𑁄 𑀉𑀘𑁆𑀘𑀺𑀦𑀺𑀢𑁆𑀯𑀸, 𑀏𑀯𑀁 𑀦𑀺𑀧𑁆𑀨𑀢𑁆𑀢𑀺𑀓𑀁. 𑀧𑀥𑀸𑀦𑀦𑁆𑀢𑀺 𑀪𑀸𑀯𑀦𑀸𑀦𑀼𑀬𑀼𑀜𑁆𑀚𑀦𑀁.

𑀲𑀢𑁆𑀢𑀲𑀝𑁆𑀞𑀺 𑀜𑀸𑀡𑀸𑀦𑀻𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁭𑁩 𑀫𑀸𑀢𑀺𑀓𑀸) 𑀆𑀕𑀢𑁂𑀲𑀼 𑀢𑁂𑀲𑀢𑁆𑀢𑀢𑀺𑀬𑀸 𑀜𑀸𑀡𑁂𑀲𑀼 𑀞𑀧𑁂𑀢𑁆𑀯𑀸 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀲𑀼𑀢𑀫𑀬𑀜𑀸𑀡𑀸𑀤𑀻𑀦𑀺 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀧𑀭𑀺𑀬𑁄𑀲𑀸𑀦𑀸𑀦𑀺 𑀲𑀢𑁆𑀢𑀲𑀝𑁆𑀞𑀺 𑀜𑀸𑀡𑀸𑀦𑀺. 𑀢𑀸𑀦𑀺 𑀳𑀺 𑀲𑀸𑀯𑀓𑁂𑀳𑀺 𑀧𑀯𑀺𑀘𑀺𑀢𑀩𑁆𑀩𑀸𑀦𑀺, 𑀦 𑀇𑀢𑀭𑀸𑀦𑀺. 𑀲𑁄𑀴𑀲𑀯𑀺𑀥𑀁 𑀧𑀜𑁆𑀜𑀦𑁆𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁩𑁭𑁯; 𑀲𑀁. 𑀦𑀺. 𑀝𑀻. 𑁩.𑁫.𑁩𑁭𑁯) 𑀫𑀳𑀸𑀧𑀜𑁆𑀜𑀸𑀤𑀺𑀓𑀸, 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀧𑀜𑁆𑀜𑀸𑀢𑀺 𑀇𑀤𑀁 𑀲𑁄𑀴𑀲𑀯𑀺𑀥𑀁 𑀧𑀜𑁆𑀜𑀁.

𑀢𑀢𑁆𑀭𑀸𑀢𑀺 𑀢𑀲𑁆𑀲. 𑀇𑀤𑀁 𑀳𑁄𑀢𑀻𑀢𑀺 𑀇𑀤𑀁 𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀅𑀦𑀼𑀧𑀼𑀩𑁆𑀩𑀲𑀫𑁆𑀫𑀲𑀦𑀁 𑀳𑁄𑀢𑀺. 𑀯𑀺𑀧𑀲𑁆𑀲𑀦𑀸𑀓𑁄𑀝𑁆𑀞𑀸𑀲𑀦𑁆𑀢𑀺 𑀯𑀺𑀢𑀓𑁆𑀓𑀸𑀤𑀺𑀲𑀫𑁆𑀫𑀲𑀺𑀢𑀩𑁆𑀩𑀥𑀫𑁆𑀫𑀯𑀺𑀪𑀸𑀕𑁂𑀦 𑀯𑀺𑀪𑀢𑁆𑀢𑀯𑀺𑀧𑀲𑁆𑀲𑀦𑀸𑀪𑀸𑀕𑀁.

𑁯𑁪. 𑀧𑀞𑀫𑁂 𑀛𑀸𑀦𑁂𑀢𑀺 𑀉𑀧𑀲𑀺𑀮𑁂𑀲𑁂 𑀪𑀼𑀫𑁆𑀫𑀁, 𑀢𑀲𑁆𑀫𑀸 𑀬𑁂 𑀧𑀞𑀫𑁂 𑀛𑀸𑀦𑁂 𑀥𑀫𑁆𑀫𑀸𑀢𑀺 𑀬𑁂 𑀧𑀞𑀫𑀚𑁆𑀛𑀸𑀦𑀲𑀁𑀲𑀝𑁆𑀞𑀸 𑀥𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀦𑁆𑀢𑀺 𑀘 𑀲𑀫𑀸𑀧𑀢𑁆𑀢𑀺𑀲𑀳𑀕𑀢𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀲𑀫𑀸𑀧𑀢𑁆𑀢𑀺𑀲𑀫𑀜𑁆𑀜𑀁 𑀆𑀭𑁄𑀧𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀯𑀢𑁆𑀣𑀺𑀢𑀸𑀢𑀺 𑀓𑀢𑀯𑀯𑀢𑁆𑀣𑀦𑀸 𑀦𑀺𑀘𑁆𑀙𑀺𑀢𑀸. 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸 𑀲𑀮𑀓𑁆𑀔𑀡𑀢𑁄 𑀧𑀭𑀺𑀘𑁆𑀙𑀺𑀚𑁆𑀚 𑀜𑀸𑀢𑀸. 𑀑𑀮𑁄𑀓𑁂𑀦𑁆𑀢𑁄𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑁄. 𑀅𑀪𑀺𑀦𑀺𑀭𑁄𑀧𑀦𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀆𑀭𑁄𑀧𑀦𑀁. 𑀅𑀦𑀼𑀫𑀚𑁆𑀚𑀦𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀦𑀼𑀯𑀺𑀘𑀸𑀭𑀡𑀁. 𑀨𑀭𑀡𑀁 𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲 𑀩𑁆𑀬𑀸𑀧𑀦𑀁, 𑀯𑀺𑀧𑁆𑀨𑀸𑀭𑀺𑀓𑀪𑀸𑀯𑁄 𑀯𑀸. 𑀲𑀸𑀢𑀦𑁆𑀢𑀺 𑀲𑀸𑀢𑀫𑀥𑀼𑀭𑀢𑀸. 𑀅𑀥𑀺𑀓𑁆𑀔𑁂𑀧𑁄 𑀯𑀺𑀓𑁆𑀔𑁂𑀧𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀲𑀫𑀸𑀥𑀸𑀦𑀁. 𑀨𑀼𑀲𑀦𑀁 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀯𑀺𑀜𑁆𑀜𑀸𑀡𑀲𑁆𑀲 𑀢𑀢𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀓𑀸𑀭𑁂𑀦 𑀯𑀺𑀬 𑀧𑀯𑀢𑁆𑀢𑀺. 𑀯𑁂𑀤𑀬𑀺𑀢𑀁 𑀆𑀭𑀫𑁆𑀫𑀡𑀸𑀦𑀼𑀪𑀯𑀦𑀁. 𑀲𑀜𑁆𑀚𑀸𑀦𑀦𑀁 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀲𑀮𑁆𑀮𑀓𑁆𑀔𑀡𑀁. 𑀘𑁂𑀢𑀬𑀺𑀢𑀁 𑀘𑁂𑀢𑀲𑁄 𑀩𑁆𑀬𑀸𑀧𑀸𑀭𑁄. 𑀯𑀺𑀚𑀸𑀦𑀦𑀁 𑀆𑀭𑀫𑁆𑀫𑀡𑀽𑀧𑀮𑀤𑁆𑀥𑀺. 𑀓𑀢𑁆𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂𑀦 𑀅𑀢𑁆𑀣𑀺𑀓𑀢𑀸. 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀥𑀺𑀫𑀼𑀘𑁆𑀘𑀦𑀁, 𑀲𑀦𑁆𑀦𑀺𑀝𑁆𑀞𑀸𑀦𑀁 𑀯𑀸 𑀅𑀥𑀺𑀫𑁄𑀓𑁆𑀔𑁄. 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀁 𑀧𑀕𑁆𑀕𑀸𑀳𑁄, 𑀅𑀥𑀺𑀕𑁆𑀕𑀳𑁄𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀸𑀦𑀁, 𑀅𑀦𑀺𑀲𑁆𑀲𑀚𑁆𑀚𑀦𑀁 𑀯𑀸 𑀉𑀧𑀝𑁆𑀞𑀸𑀦𑀁. 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀅𑀲𑁆𑀲𑁂𑀲𑀼 𑀲𑀸𑀭𑀣𑀺 𑀯𑀺𑀬 𑀲𑀓𑀺𑀘𑁆𑀘𑀧𑀲𑀼𑀢𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀫𑀚𑁆𑀛𑀢𑁆𑀢𑀢𑀸. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑁂 𑀅𑀦𑀼𑀦𑀬𑀦𑀁 𑀲𑀁𑀘𑀭𑀡𑀁 𑀅𑀦𑀼𑀦𑀬𑁄. 𑀲𑀪𑀸𑀯𑀢𑁄𑀢𑀺 𑀬𑀣𑀸𑀪𑀽𑀢𑀲𑀪𑀸𑀯𑀢𑁄. 𑀲𑁄𑀴𑀲𑀦𑁆𑀦𑀁 𑀏𑀯 𑀘𑁂𑀢𑁆𑀣 𑀥𑀫𑁆𑀫𑀸𑀦𑀁 𑀕𑀳𑀡𑀁 𑀢𑁂𑀲𑀁𑀬𑁂𑀯 𑀣𑁂𑀭𑁂𑀦 𑀯𑀯𑀢𑁆𑀣𑀸𑀧𑀺𑀢𑀪𑀸𑀯𑀢𑁄, 𑀢𑁂 𑀏𑀯𑀲𑁆𑀲 𑀢𑀤𑀸 𑀉𑀧𑀝𑁆𑀞𑀳𑀺𑀁𑀲𑀼, 𑀦 𑀇𑀢𑀭𑁂𑀢𑀺 𑀯𑀤𑀦𑁆𑀢𑀺. 𑀯𑀻𑀭𑀺𑀬𑀲𑀢𑀺𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀇𑀦𑁆𑀤𑁆𑀭𑀺𑀬𑀪𑀸𑀯𑀲𑀸𑀫𑀜𑁆𑀜𑀢𑁄 𑀲𑀤𑁆𑀥𑀸𑀧𑀜𑁆𑀜𑀸; 𑀲𑀢𑀺𑀕𑁆𑀕𑀳𑀡𑁂𑀦𑁂𑀯 𑀏𑀓𑀦𑁆𑀢𑀸𑀦𑀯𑀚𑁆𑀚𑀪𑀸𑀯𑀲𑀸𑀫𑀜𑁆𑀜𑀢𑁄 𑀧𑀲𑁆𑀲𑀤𑁆𑀥𑀺𑀆𑀤𑀬𑁄 𑀙 𑀬𑀼𑀕𑀴𑀸; 𑀅𑀮𑁄𑀪𑀸𑀤𑁄𑀲𑀸 𑀘 𑀲𑀗𑁆𑀕𑀳𑀺𑀢𑀸 𑀛𑀸𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁. 𑀣𑁂𑀭𑁂𑀦 𑀘 𑀥𑀫𑁆𑀫𑀸 𑀯𑀯𑀢𑁆𑀣𑀸𑀦𑀲𑀸𑀫𑀜𑁆𑀜𑀢𑁄 𑀆𑀭𑀤𑁆𑀥𑀸. 𑀢𑁂 𑀦 𑀉𑀧𑀝𑁆𑀞𑀳𑀺𑀁𑀲𑀽𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀅𑀧𑀭𑁂.

𑀯𑀺𑀤𑀺𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀉𑀧𑁆𑀧𑀸𑀤𑁂𑀧𑀺 𑀦𑁂𑀲𑀁 𑀯𑁂𑀤𑀦𑀸𑀦𑀁 𑀧𑀚𑀸𑀦𑀦𑀁 𑀳𑁄𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀁 𑀚𑀸𑀦𑀸𑀢𑀻𑀢𑀺 𑀢𑀁𑀜𑀸𑀡𑁄, 𑀢𑀲𑁆𑀲 𑀪𑀸𑀯𑁄 𑀢𑀁𑀜𑀸𑀡𑀢𑀸, 𑀜𑀸𑀡𑀲𑁆𑀲 𑀅𑀢𑁆𑀢𑀲𑀁𑀯𑁂𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁𑀲𑀫𑀸𑀦𑀬𑁄𑀕𑀓𑁆𑀔𑀫𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸. 𑀜𑀸𑀡𑀩𑀳𑀼𑀢𑀸𑀢𑀺 𑀜𑀸𑀡𑀲𑁆𑀲 𑀩𑀳𑀼𑀪𑀸𑀯𑁄, 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀅𑀦𑁂𑀓𑀜𑀸𑀡𑀢𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑀼𑀁, ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 𑀆𑀭𑀫𑁆𑀫𑀡𑀓𑀭𑀡𑀲𑁆𑀲 𑀅𑀪𑀸𑀯𑀢𑁄. 𑀅𑀲𑀫𑁆𑀫𑁄𑀳𑀸𑀯𑀩𑁄𑀥𑁄 𑀘 𑀈𑀤𑀺𑀲𑀲𑁆𑀲 𑀜𑀸𑀡𑀲𑁆𑀲 𑀦𑀢𑁆𑀣𑀺. 𑀏𑀓𑁂𑀓𑀫𑁂𑀯 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀏𑀓𑀲𑁆𑀲𑁂𑀯 𑀆𑀯𑀚𑁆𑀚𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄, 𑀦 𑀘 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀅𑀢𑁆𑀣𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀓𑀧𑁆𑀧𑀸 𑀢𑀺𑀝𑁆𑀞𑀦𑁆𑀢𑀺 𑀬𑁂 𑀫𑀭𑀽;

𑀦 𑀢𑁆𑀯𑁂𑀯 𑀢𑁂𑀧𑀺 𑀚𑀻𑀯𑀦𑁆𑀢𑀺, 𑀤𑁆𑀯𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀁𑀬𑀼𑀢𑀸’’𑀢𑀺. (𑀫𑀳𑀸𑀦𑀺. 𑁧𑁦, 𑁩𑁯) 𑀘,

‘‘𑀦𑀢𑁆𑀣𑀺 𑀘𑀺𑀢𑁆𑀢𑁂 𑀬𑀼𑀕𑀸 𑀕𑀳𑀻’’𑀢𑀺 𑀘 𑁋

𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀢𑀸𑀬𑀸𑀢𑀺 𑀬𑀲𑁆𑀫𑀺𑀜𑁆𑀘 𑀆𑀭𑀫𑁆𑀫𑀡𑁂 𑀬𑁂 𑀛𑀸𑀦𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺, 𑀢𑁂𑀲𑀁 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀧𑀕𑁂𑀯 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀺𑀢𑀢𑁆𑀢𑀸. 𑀬𑀣𑀸 𑀦𑀸𑀫 𑀫𑀺𑀕𑀲𑀽𑀓𑀭𑀸𑀤𑀻𑀦𑀁 𑀆𑀲𑀬𑁂𑀧𑀭𑀺𑀕𑁆𑀕𑀳𑀺𑀢𑁂 𑀢𑀢𑁆𑀭 𑀞𑀺𑀢𑀸 𑀫𑀺𑀕𑀸 𑀯𑀸 𑀲𑀽𑀓𑀭𑀸 𑀯𑀸 𑀢𑀢𑁄 𑀉𑀝𑁆𑀞𑀸𑀦𑀢𑁄𑀧𑀺 𑀆𑀕𑀫𑀦𑀢𑁄𑀧𑀺 𑀦𑁂𑀲𑀸𑀤𑀲𑁆𑀲 𑀲𑀼𑀔𑀕𑁆𑀕𑀳𑀡𑀸 𑀳𑁄𑀦𑁆𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁. 𑀢𑁂𑀦𑀸𑀳 ‘‘𑀣𑁂𑀭𑁂𑀦 𑀳𑀻’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑁂𑀦. 𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲. 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀛𑀸𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀥𑀫𑁆𑀫𑀸𑀦𑀁. 𑀉𑀧𑁆𑀧𑀸𑀤𑀁 𑀆𑀯𑀚𑁆𑀚𑀦𑁆𑀢𑀲𑁆𑀲𑀸𑀢𑀺𑀆𑀤𑀺𑀦𑀸 𑀉𑀧𑁆𑀧𑀸𑀤𑀸𑀤𑀻𑀲𑀼 𑀬𑀁 𑀬𑀤𑁂𑀯 𑀆𑀭𑀩𑁆𑀪 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺; 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑀡𑁂 𑀢𑀲𑁆𑀲 𑀢𑀲𑁆𑀲𑁂𑀯 𑀘𑀲𑁆𑀲 𑀧𑀸𑀓𑀝𑀪𑀸𑀯𑁄 𑀤𑀻𑀧𑀺𑀢𑁄. 𑀦 𑀳𑀺 𑀆𑀯𑀚𑁆𑀚𑀦𑁂𑀦 𑀯𑀺𑀦𑀸 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀦𑁆𑀢𑀻𑀢𑀺 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀫𑀸𑀦𑀸 𑀳𑀼𑀢𑁆𑀯𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀤𑀬𑀁 𑀧𑀲𑁆𑀲𑀢𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁, ‘‘𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀦𑁆𑀢𑀻’’𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑀲𑀫𑀗𑁆𑀕𑀺𑀪𑀸𑀯𑀤𑀲𑁆𑀲𑀦𑀢𑁄. 𑀧𑀼𑀩𑁆𑀩𑁂 𑀅𑀪𑀸𑀯𑀩𑁄𑀥𑀓𑁄 𑀳𑀺 𑀅𑀢𑁆𑀢𑀮𑀸𑀪𑁄 𑀥𑀫𑁆𑀫𑀸𑀦𑀁 𑀉𑀤𑀬𑁄. 𑀳𑀼𑀢𑁆𑀯𑀸𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸. 𑀧𑀝𑀺𑀯𑁂𑀦𑁆𑀢𑀻𑀢𑀺 𑀧𑀝𑀺 𑀔𑀡𑁂 𑀔𑀡𑁂 𑀯𑀺𑀦𑀲𑁆𑀲𑀦𑁆𑀢𑀺. 𑀯𑀬𑀁 𑀧𑀲𑁆𑀲𑀢𑀺, ‘‘𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀻’’𑀢𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀪𑀗𑁆𑀕𑀓𑁆𑀔𑀡𑀲𑀫𑀗𑁆𑀕𑀺𑀪𑀸𑀯𑀤𑀲𑁆𑀲𑀦𑀢𑁄. 𑀯𑀺𑀤𑁆𑀥𑀁𑀲𑀪𑀸𑀯𑀩𑁄𑀥𑀓𑁄 𑀳𑀺 𑀥𑀫𑁆𑀫𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑁄 𑀯𑀬𑁄.

𑀢𑁂𑀲𑀼 𑀥𑀫𑁆𑀫𑁂𑀲𑀼 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀧𑀬𑁄 𑀭𑀸𑀕𑀯𑀲𑁂𑀦 𑀉𑀧𑀕𑀫𑀦𑀦𑁆𑀢𑀺 𑀅𑀦𑀼𑀧𑀬𑁄, 𑀅𑀦𑀦𑀼𑀭𑁄𑀥𑁄. 𑀳𑀼𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀬𑁄𑀚𑀦𑀸. 𑀢𑀣𑀸 𑀦𑀢𑁆𑀣𑀺 𑀏𑀢𑀲𑁆𑀲 𑀅𑀧𑀸𑀬𑁄 𑀧𑀝𑀺𑀖𑀯𑀲𑁂𑀦 𑀅𑀧𑀕𑀫𑀦𑀦𑁆𑀢𑀺 𑀅𑀦𑀧𑀸𑀬𑁄, 𑀅𑀯𑀺𑀭𑁄𑀥𑁄. ‘‘𑀏𑀢𑀁 𑀫𑀫, 𑀏𑀲𑁄 𑀫𑁂 𑀅𑀢𑁆𑀣𑀸’’𑀢𑀺 𑀢𑀲𑁆𑀲 𑀢𑀡𑁆𑀳𑀸𑀤𑀺𑀝𑁆𑀞𑀺𑀅𑀪𑀺𑀦𑀺𑀯𑁂𑀲𑀸𑀪𑀸𑀯𑀢𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁂𑀳𑀺 𑀅𑀦𑀺𑀲𑁆𑀲𑀺𑀢𑁄. 𑀅𑀧𑁆𑀧𑀝𑀺𑀩𑀤𑁆𑀥𑁄𑀢𑀺 𑀅𑀦𑀼𑀧𑀬𑀸𑀦𑀺𑀲𑁆𑀲𑀺𑀢𑀪𑀸𑀯𑀢𑁄 𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀩𑀦𑁆𑀥𑀯𑀲𑁂𑀦 𑀙𑀦𑁆𑀤𑀭𑀸𑀕𑁂𑀦 𑀦 𑀧𑀝𑀺𑀩𑀤𑁆𑀥𑁄 𑀦 𑀯𑀺𑀩𑀦𑁆𑀥𑀺𑀢𑁄. 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀢𑀢𑁄 𑀏𑀯 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀓𑀸𑀫𑀭𑀸𑀕𑀢𑁄 𑀯𑀺𑀫𑀼𑀢𑁆𑀢𑁄. 𑀯𑀺𑀲𑀁𑀬𑀼𑀢𑁆𑀢𑁄 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑁂𑀯 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀳𑀺 𑀯𑀺𑀲𑀁𑀬𑀼𑀢𑁆𑀢𑁄.

𑀓𑀺𑀮𑁂𑀲𑀫𑀭𑀺𑀬𑀸𑀤𑀸 𑀢𑁂𑀦 𑀓𑀢𑀸 𑀪𑀯𑁂𑀬𑁆𑀬𑀸𑀢𑀺 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑁂 𑀲𑁄𑀴𑀲 𑀥𑀫𑁆𑀫𑁂 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑀁 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀘𑁂 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁; 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀬𑀸 𑀓𑀺𑀮𑁂𑀲𑀫𑀭𑀺𑀬𑀸𑀤𑀸 𑀢𑁂𑀦 𑀘𑀺𑀢𑁆𑀢𑁂𑀦, 𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑀸 𑀯𑀸 𑀓𑀢𑀸 𑀪𑀯𑁂𑀬𑁆𑀬. 𑀢𑁂𑀲𑀽𑀢𑀺 𑀢𑁂𑀲𑀼 𑀥𑀫𑁆𑀫𑁂𑀲𑀼. 𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲. 𑀏𑀓𑁄𑀧𑀻𑀢𑀺 𑀭𑀸𑀕𑀸𑀤𑀻𑀲𑀼 𑀏𑀓𑁄𑀧𑀻𑀢𑀺 𑀘 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀸𑀓𑀸𑀭𑁂𑀦 𑀏𑀓𑀘𑁆𑀘𑀸𑀦𑀁 𑀅𑀦𑀸𑀧𑀸𑀣𑀕𑀫𑀦𑁂 𑀲𑀢𑀺 𑀯𑀺𑀧𑀲𑁆𑀲𑀦𑀸 𑀦 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀭𑀦𑁆𑀢𑀭𑀧𑁆𑀧𑀯𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀫𑀭𑀺𑀬𑀸𑀤𑀸 𑀪𑀯𑁂𑀬𑁆𑀬. 𑀯𑀺𑀓𑁆𑀔𑀫𑁆𑀪𑀺𑀢𑀧𑀘𑁆𑀘𑀦𑀻𑀓𑀢𑁆𑀢𑀸𑀢𑀺 𑀯𑀺𑀧𑀲𑁆𑀲𑀦𑀸𑀬 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀧𑀕𑁂𑀯 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀇𑀤𑀸𑀦𑀺𑀧𑀺 𑀯𑀺𑀓𑁆𑀔𑀫𑁆𑀪𑁂𑀢𑀩𑁆𑀩𑀸 𑀓𑀺𑀮𑁂𑀲𑀸 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁.

𑀇𑀢𑁄𑀢𑀺 𑀧𑀞𑀫𑀚𑁆𑀛𑀸𑀦𑀢𑁄. 𑀅𑀦𑀦𑁆𑀢𑀭𑁄𑀢𑀺 𑀉𑀧𑀭𑀺𑀫𑁄 𑀛𑀸𑀦𑀸𑀤𑀺𑀯𑀺𑀲𑁂𑀲𑁄. 𑀢𑀲𑁆𑀲 𑀧𑀚𑀸𑀦𑀦𑀲𑁆𑀲𑀸𑀢𑀺, ‘‘𑀅𑀢𑁆𑀣𑀺 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀚𑀸𑀦𑀦𑀲𑁆𑀲. 𑀩𑀳𑀼𑀮𑀻𑀓𑀭𑀡𑁂𑀦𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀸𑀤𑀦𑁂𑀦.

𑀲𑀫𑁆𑀧𑀲𑀸𑀤𑀦𑀝𑁆𑀞𑁂𑀦𑀸𑀢𑀺 𑀓𑀺𑀮𑁂𑀲𑀓𑀸𑀮𑀼𑀲𑀺𑀬𑀸𑀧𑀕𑀫𑀦𑁂𑀦, 𑀢𑀲𑁆𑀲 𑀯𑀺𑀘𑀸𑀭𑀓𑁆𑀔𑁄𑀪𑀯𑀺𑀕𑀫𑁂𑀦 𑀯𑀸 𑀘𑁂𑀢𑀲𑁄 𑀲𑀫𑁆𑀫𑀤𑁂𑀯 𑀧𑀸𑀲𑀸𑀤𑀺𑀓𑀪𑀸𑀯𑁂𑀦.

𑀯𑀻𑀭𑀺𑀬𑀁 𑀲𑀢𑀺 𑀉𑀧𑁂𑀓𑁆𑀔𑀸𑀢𑀺 𑀆𑀕𑀢𑀝𑁆𑀞𑀸𑀦𑁂 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁂𑀓𑁆𑀔𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸𑀯𑁂𑀤𑀦𑀸𑀢𑀺 𑀏𑀢𑁆𑀣 𑀛𑀸𑀦𑀼𑀧𑁂𑀓𑁆𑀔𑀸𑀢𑀺, ‘‘𑀲𑀼𑀔𑀝𑁆𑀞𑀸𑀦𑁂 𑀯𑁂𑀤𑀦𑀼𑀧𑁂𑀓𑁆𑀔𑀸𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀔𑀝𑁆𑀞𑀸𑀦𑁂𑀢𑀺 𑀘 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀲𑀼𑀔𑀲𑁆𑀲 𑀯𑀼𑀢𑁆𑀢𑀝𑁆𑀞𑀸𑀦𑁂. 𑀧𑀲𑁆𑀲𑀤𑁆𑀥𑀢𑁆𑀢𑀸𑀢𑀺 𑀲𑀫𑀥𑀼𑀭𑀘𑁂𑀢𑀬𑀺𑀢𑀪𑀸𑀯𑁂𑀦 𑀆𑀭𑀫𑁆𑀫𑀡𑁂 𑀯𑀺𑀲𑀝𑀯𑀺𑀢𑁆𑀣𑀢𑀪𑀸𑀯𑀢𑁄 𑀬𑁄 𑀲𑁄 𑀘𑁂𑀢𑀲𑁄 𑀆𑀪𑁄𑀕𑁄 𑀯𑀼𑀢𑁆𑀢𑁄. 𑀲𑀸𑀫𑀜𑁆𑀜𑀨𑀮𑀸𑀤𑀻𑀲𑀼 𑀲𑀢𑀺𑀬𑀸 𑀧𑀸𑀭𑀺𑀲𑀼𑀤𑁆𑀥𑀺, 𑀲𑀸 𑀣𑀦 𑀅𑀢𑁆𑀣𑀢𑁄 𑀲𑀢𑀺𑀯𑀺𑀦𑀺𑀫𑀼𑀢𑁆𑀢𑀸 𑀦𑀢𑁆𑀣𑀻𑀢𑀺 𑀆𑀳 ‘‘𑀧𑀭𑀺𑀲𑀼𑀤𑁆𑀥𑀸𑀲𑀢𑀺𑀬𑁂𑀯𑀸’’𑀢𑀺. 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁂𑀓𑁆𑀔𑀸, 𑀦 𑀛𑀸𑀦𑀼𑀧𑁂𑀓𑁆𑀔𑀸𑀤𑀬𑁄.

𑁯𑁫. 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀢𑀺𑀬𑀸 𑀦 𑀓𑀤𑀸𑀘𑀺𑀧𑀺 𑀜𑀸𑀡𑀯𑀺𑀭𑀳𑁄 𑀅𑀢𑁆𑀣𑀻𑀢𑀺 𑀆𑀳 𑁋 ‘‘𑀜𑀸𑀡𑁂𑀦 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸’’𑀢𑀺. 𑀢𑀣𑀸 𑀳𑀺 𑀢𑀢𑀺𑀬𑀚𑁆𑀛𑀸𑀦𑁂, ‘‘𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺 𑀏𑀢𑁆𑀣 𑀲𑀫𑁆𑀧𑀚𑀸𑀦𑁄𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀺. 𑀦 𑀲𑀸𑀯𑀓𑀸𑀦𑀁 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸 𑀳𑁄𑀢𑀺 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀧𑁆𑀧𑀯𑀢𑁆𑀢𑀺𑀬𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀢𑁄. 𑀢𑁂𑀦𑀸𑀳 𑁋 ‘‘𑀓𑀮𑀸𑀧𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳𑀸’’𑀢𑀺.

𑁯𑁬. 𑀧𑀜𑁆𑀜𑀸𑀬 𑀘𑀲𑁆𑀲𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀲𑀫𑀓𑀸𑀮𑀁 𑀔𑀻𑀬𑀫𑀸𑀦𑀸 𑀆𑀲𑀯𑀸, ‘‘𑀤𑀺𑀲𑁆𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸. 𑀲𑀫𑀸𑀦𑀓𑀸𑀮𑁂𑀧𑀺 𑀳𑀺 𑀏𑀤𑀺𑀲𑁄 𑀲𑀤𑁆𑀤𑀧𑁆𑀧𑀬𑁄𑀕𑁄 𑀤𑀺𑀲𑁆𑀲𑀢𑀺 𑁋

‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁩-𑁪𑁫; 𑁨.𑁪.𑁬𑁦; 𑀓𑀣𑀸. 𑁪𑁬𑁫, 𑁪𑁬𑁭).

‘‘𑀦𑀺𑀳𑀦𑁆𑀢𑁆𑀯𑀸 𑀢𑀺𑀫𑀺𑀭𑀁 𑀲𑀩𑁆𑀩𑀁, 𑀉𑀕𑁆𑀕𑀢𑁂𑀚𑁄 𑀲𑀫𑀼𑀕𑁆𑀕𑀢𑁄;

𑀯𑁂𑀭𑁄𑀘𑀦𑁄 𑀭𑀲𑁆𑀫𑀺𑀫𑀸𑀮𑀻, 𑀮𑁄𑀓𑀘𑀓𑁆𑀔𑀼𑀧𑀪𑀗𑁆𑀓𑀭𑁄’’𑀢𑀺. (𑀧𑀝𑁆𑀞𑀸. 𑀅𑀦𑀼𑀝𑀻. 𑁧.𑁨𑁫-𑁩𑁪; 𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁫𑁮𑁦) 𑀘 𑁋

𑀏𑀯𑀫𑀸𑀤𑀻𑀲𑀼. 𑀳𑁂𑀢𑀼𑀅𑀢𑁆𑀣𑁄 𑀯𑀸 𑀅𑀬𑀁 𑀤𑀺𑀲𑁆𑀯𑀸𑀲𑀤𑁆𑀤𑁄 𑀅𑀲𑀫𑀸𑀦𑀓𑀢𑁆𑀢𑀼𑀓𑁄 𑀬𑀣𑀸 𑁋 ‘‘𑀖𑀢𑀁 𑀧𑀺𑀯𑀺𑀢𑁆𑀯𑀸 𑀩𑀮𑀁 𑀳𑁄𑀢𑀺, 𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀳𑁄𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁮𑁦𑁨). 𑀤𑀲𑁆𑀲𑀦𑀳𑁂𑀢𑀼𑀓𑁄 𑀳𑀺 𑀆𑀲𑀯𑀸𑀦𑀁 𑀧𑀭𑀺𑀓𑁆𑀔𑀬𑁄 𑀧𑀭𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑁂 𑀲𑀢𑀺 𑀧𑀳𑀸𑀦𑀸𑀪𑀺𑀲𑀫𑀬𑀲𑁆𑀲 𑀮𑀩𑁆𑀪𑀦𑀢𑁄. 𑀬𑀼𑀕𑀦𑀤𑁆𑀥𑀁 𑀆𑀳𑀭𑀺𑀢𑁆𑀯𑀸𑀢𑀺 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀛𑀸𑀦𑀥𑀫𑁆𑀫𑁂 𑀲𑀫𑁆𑀫𑀲𑀦𑁆𑀢𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀺. 𑀏𑀯𑀁 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀢𑀢𑁆𑀣 𑀲𑀫𑁆𑀫𑀲𑀦𑁆𑀢𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀓𑀢𑁆𑀯𑀸 𑀬𑀣𑀸 𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀭𑀳𑀢𑁆𑀢𑀁 𑀧𑀢𑁆𑀢𑀯𑀸𑀭𑁄 𑀇𑀥 𑀕𑀳𑀺𑀢𑁄’’𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀤𑀻𑀖𑀦𑀔𑀲𑀼𑀢𑁆𑀢𑀤𑁂𑀲𑀦𑀸𑀬 (𑀫. 𑀦𑀺. 𑁨.𑁨𑁦𑁫-𑁨𑁦𑁬) 𑀳𑀺 𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀢𑀤𑀸 𑀘 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀯𑀘𑀦𑀅𑀯𑀲𑀭𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀅𑀭𑀳𑀢𑁆𑀢𑀁 𑀧𑀢𑁆𑀢𑀯𑀸𑀭𑁄 𑀇𑀥 𑀕𑀳𑀺𑀢𑁄’’𑀢𑀺. 𑀬𑀤𑀺 𑀏𑀯𑀁 𑁋 ‘‘𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀣𑁂𑀭𑁂 𑀯𑀺𑀚𑁆𑀚𑀫𑀸𑀦𑁂 𑀧𑀡𑁆𑀟𑀺𑀢𑀕𑀼𑀡𑁂 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀢𑀼𑀁. 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀁 𑀧𑀦 𑀣𑁂𑀭𑀲𑁆𑀲 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀁. 𑀢𑁂𑀦𑀸𑀳 ‘‘𑀦𑀺𑀭𑁄𑀥𑀁 𑀧𑀦…𑀧𑁂… 𑀯𑀤𑀦𑁆𑀢𑀻’’𑀢𑀺. 𑀢𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀫𑁆𑀧𑀺 𑀅𑀦𑁆𑀢𑀭𑀸 𑀲𑀫𑀸𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀯𑁄𑀫𑀺𑀲𑁆𑀲𑀁 𑀯𑀺𑀯𑀭𑀺𑀢𑀼𑀁 ‘‘𑀢𑀢𑁆𑀣𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀆𑀳𑀭𑀺𑀢𑁆𑀯𑀸 𑀞𑀺𑀢𑀲𑁆𑀲 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀲𑀻𑀲𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀲 𑀆𑀪𑁄𑀕𑀯𑀲𑁂𑀦 𑀦𑀺𑀭𑁄𑀥𑀲𑁆𑀲 𑀯𑀸𑀭𑁄 𑀆𑀕𑀘𑁆𑀙𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺 𑀕𑀽𑀴𑁆𑀳𑁄 𑀳𑁄𑀢𑀺, ‘‘𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀪𑁄𑀕𑀲𑁆𑀲 𑀅𑀪𑀸𑀯𑀢𑁄. 𑀨𑀮𑀲𑀫𑀸𑀧𑀢𑁆𑀢𑀺 𑀲𑀻𑀲𑀁 𑀳𑁄𑀢𑀻𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁂𑀦 𑀆𑀪𑁄𑀕𑀧𑀝𑀺𑀩𑀤𑁆𑀥𑀫𑁂𑀢𑁂𑀲𑀁 𑀆𑀕𑀫𑀦𑀦𑁆𑀢𑀺 𑀤𑀻𑀧𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀣𑁂𑀭𑀸 𑀧𑀦𑀸𑀢𑀺𑀆𑀤𑀺 𑀅𑀝𑁆𑀞𑀓𑀣𑀸𑀭𑀼𑀴𑁆𑀳𑀫𑁂𑀯 𑀢𑀁 𑀯𑀘𑀦𑀁. 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀦𑁆𑀢𑀺 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀓𑀸𑀮𑁂. 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀥𑀫𑁆𑀫𑁂𑀢𑀺 𑀉𑀢𑀼𑀓𑀫𑁆𑀫𑀸𑀳𑀸𑀭𑀯𑀲𑁂𑀦 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀥𑀫𑁆𑀫𑁂.

𑁯𑁭. 𑀘𑀺𑀡𑁆𑀡𑀯𑀲𑀺𑀢𑀦𑁆𑀢𑀺 𑀧𑀝𑀺𑀧𑀓𑁆𑀔𑀤𑀽𑀭𑀺𑀪𑀸𑀯𑁂𑀦 𑀲𑀼𑀪𑀸𑀯𑀺𑀢𑀯𑀲𑀻𑀪𑀸𑀯𑀁. 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄𑀢𑀺 𑀉𑀓𑁆𑀓𑀁𑀲𑀧𑀭𑀺𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄. 𑀉𑀭𑁂 𑀯𑀸𑀬𑀸𑀫𑀚𑀦𑀺𑀢𑀸𑀬 𑀑𑀭𑀲𑁄. 𑀧𑀪𑀸𑀯𑀺𑀢𑀦𑁆𑀢𑀺 𑀉𑀧𑁆𑀧𑀸𑀤𑀺𑀢𑀁. 𑀥𑀫𑁆𑀫𑁂𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁂𑀦. 𑀢𑀲𑁆𑀲 𑀳𑀺 𑀅𑀥𑀺𑀕𑀫𑁂𑀦 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄 𑀦𑀺𑀩𑁆𑀩𑀢𑁆𑀢𑁄𑀢𑀺 𑀓𑀢𑁆𑀯𑀸, ‘‘𑀥𑀫𑁆𑀫𑀚𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀤𑀸𑀬𑀲𑁆𑀲𑀸𑀢𑀺 𑀦𑀯𑀯𑀺𑀥𑀲𑁆𑀲 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀤𑀸𑀬𑀲𑁆𑀲. 𑀆𑀤𑀺𑀬𑀦𑀢𑁄𑀢𑀺 𑀕𑀡𑁆𑀳𑀦𑀢𑁄, 𑀲𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀦𑀼𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀙𑀩𑁆𑀩𑀺𑀲𑁄𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮. 𑀔𑀻𑀡𑀸 𑀚𑀸𑀢𑀻𑀢𑀺 𑀅𑀢𑁆𑀢𑀦𑁄 𑀚𑀸𑀢𑀺𑀓𑁆𑀔𑀬𑀁 𑀧𑀝𑀺𑀚𑀸𑀦𑀦𑁆𑀢𑁂𑀦 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀢𑀁 𑀳𑁄𑀢𑀺 𑀅𑀭𑀳𑀢𑁄 𑀢𑀤𑀪𑀸𑀯𑀢𑁄. 𑀢𑀣𑀸 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀫𑁂 𑀧𑀭𑀺𑀬𑁄𑀲𑀺𑀢𑁄𑀢𑀺 𑀧𑀝𑀺𑀚𑀸𑀦𑀦𑁆𑀢𑁂𑀦𑀧𑀺. 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀧𑀭𑀺𑀜𑁆𑀜𑀸𑀤𑀺𑀯𑀲𑁂𑀦 𑀲𑁄𑀴𑀲𑀯𑀺𑀥𑀲𑁆𑀲𑀧𑀺 𑀓𑀺𑀘𑁆𑀘𑀲𑁆𑀲 𑀅𑀢𑁆𑀢𑀦𑀸 𑀦𑀺𑀝𑁆𑀞𑀸𑀧𑀺𑀢𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑁂𑀦𑀧𑀺. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀸𑀯𑀁, 𑀆𑀬𑀢𑀺𑀁 𑀯𑀸 𑀧𑀭𑀺𑀜𑁆𑀜𑀸𑀤𑀺𑀓𑀭𑀡𑀻𑀬𑀸𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑁂𑀦𑀧𑀻𑀢𑀺 𑀆𑀳 𑁋 ‘‘𑀏𑀓𑁂𑀦𑀧𑀺 𑀧𑀤𑁂𑀦 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸𑀯 𑀳𑁄𑀢𑀻’’𑀢𑀺. 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀩𑀤𑁆𑀥𑀁 𑀧𑀦 𑀲𑀼𑀩𑀤𑁆𑀥𑀁 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀅𑀜𑁆𑀜𑀸𑀩𑁆𑀬𑀸𑀓𑀭𑀡𑀁 𑀘𑀢𑀽𑀳𑀺 𑀧𑀤𑁂𑀳𑀺 𑀆𑀕𑀢𑀁, 𑀢𑀲𑁆𑀫𑀸 𑀯𑀢𑁆𑀢𑀩𑁆𑀩𑀫𑁂𑀯 𑀘𑁂𑀢𑁆𑀣 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑁂𑀢𑀦𑀸𑀬 𑀤𑀺𑀝𑁆𑀞𑀯𑀸𑀤𑀺𑀢𑀸 𑀦𑀸𑀫 𑀅𑀭𑀺𑀬𑀯𑁄𑀳𑀸𑀭𑁄. 𑀲𑀪𑀸𑀯𑁄𑀢𑀺 𑀧𑀓𑀢𑀺𑀅𑀢𑁆𑀣𑁄 𑀳𑀺 𑀅𑀬𑀁 𑀥𑀫𑁆𑀫𑀲𑀤𑁆𑀤𑁄, ‘‘𑀚𑀸𑀢𑀺𑀥𑀫𑁆𑀫𑀸 𑀚𑀭𑀸𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁭𑁪-𑁨𑁭𑁫) 𑀯𑀺𑀬 𑀢𑀲𑁆𑀫𑀸, 𑀅𑀦𑀼𑀥𑀫𑁆𑀫𑁄𑀢𑀺 𑀅𑀭𑀺𑀬𑀪𑀸𑀯𑀁 𑀅𑀦𑀼𑀕𑀢𑀸 𑀧𑀓𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀫𑀧𑁆𑀧𑀺𑀘𑁆𑀙𑀢𑀸𑀬 𑀅𑀭𑀺𑀬𑀸 𑀅𑀢𑁆𑀢𑀦𑁄 𑀕𑀼𑀡𑁂 𑀅𑀦𑀸𑀯𑀺𑀓𑀭𑁄𑀦𑁆𑀢𑀸𑀧𑀺 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀧𑀯𑁂𑀤𑀦𑀢𑁆𑀣𑀜𑁆𑀘𑁂𑀯 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀜𑁆𑀘 𑀢𑀸𑀤𑀺𑀲𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂𑀬𑁂𑀯 𑀆𑀯𑀺𑀓𑀭𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 𑁋 ‘‘𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲…𑀧𑁂… 𑀓𑀸𑀢𑀩𑁆𑀩𑁄’’𑀢𑀺.

𑁯𑁯. 𑀤𑀼𑀩𑁆𑀩𑀮𑀦𑁆𑀢𑀺 𑀨𑁂𑀕𑁆𑀕𑀼 𑀯𑀺𑀬 𑀲𑀼𑀪𑁂𑀚𑁆𑀚𑀦𑀻𑀬𑀁 𑀩𑀮𑀯𑀺𑀭𑀳𑀺𑀢𑀁, 𑀅𑀲𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀭𑀸𑀕𑀼𑀢𑀦𑁆𑀢𑀺 𑀧𑀮𑀼𑀚𑁆𑀚𑀦𑀲𑀪𑀸𑀯𑀁. 𑀯𑀺𑀕𑀘𑁆𑀙𑀦𑀲𑀪𑀸𑀯𑀦𑁆𑀢𑀺 𑀯𑀺𑀦𑀸𑀲𑀕𑀫𑀦𑀲𑀪𑀸𑀯𑀁. 𑀅𑀦𑀺𑀘𑁆𑀘𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀢𑁆𑀢𑀸 𑀅𑀲𑁆𑀲𑀸𑀲𑀮𑁂𑀲𑀲𑁆𑀲𑀧𑀺 𑀅𑀪𑀸𑀯𑀢𑁄 𑀅𑀲𑁆𑀲𑀸𑀲𑀯𑀺𑀭𑀳𑀺𑀢𑀁. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀲𑀫𑀦𑁆𑀦𑀸𑀕𑀫𑀦𑀯𑀲𑁂𑀦 𑀘 𑀬𑀣𑀸𑀭𑀳𑀁 𑀉𑀧𑁂𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀉𑀧𑀬𑀸, ‘‘𑀏𑀢𑀁 𑀫𑀫, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀤𑀴𑁆𑀳𑀕𑁆𑀕𑀸𑀳𑀁 𑀕𑀡𑁆𑀳𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀸. 𑀅𑀥𑀺𑀢𑀺𑀝𑁆𑀞𑀢𑀺 𑀘𑁂𑀢𑀲𑁄 𑀅𑀪𑀺𑀦𑀦𑁆𑀤𑀦𑀪𑀽𑀢𑀸𑀢𑀺 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀁. 𑀢𑀸𑀳𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺. 𑀢𑀦𑁆𑀢𑀺 𑀘𑀺𑀢𑁆𑀢𑀁. 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀅𑀪𑀺𑀭𑀢𑀺𑀯𑀲𑁂𑀦 𑀦𑀺𑀯𑀺𑀲𑀢𑀺, 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀲𑀓𑁆𑀓𑀸𑀬𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀢𑀺 ‘‘𑀏𑀢𑀁 𑀫𑀫𑀁, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺 𑀏𑀢𑀸𑀳𑀺 𑀅𑀪𑀺𑀦𑀺𑀯𑁂𑀲𑀸𑀳𑀺, 𑀢𑀣𑀸 𑀲𑀓𑁆𑀓𑀸𑀬𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀅𑀦𑀼𑀲𑁂𑀢𑀺 𑀏𑀢𑀸𑀳𑀻𑀢𑀺 𑀅𑀦𑀼𑀲𑀬𑀸, 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄. 𑀬𑀤𑀕𑁆𑀕𑁂𑀦 𑀳𑀺 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀭𑀸𑀕𑀸𑀤𑀬𑁄 𑀅𑀦𑀼𑀲𑁂𑀦𑁆𑀢𑀺, 𑀢𑀤𑀕𑁆𑀕𑁂𑀦 𑀢𑀁𑀲𑀳𑀕𑀢𑀥𑀫𑁆𑀫𑀸 𑀢𑀢𑁆𑀣 𑀅𑀦𑀼𑀲𑁂𑀦𑁆𑀢𑀻𑀢𑀺 𑀧𑀭𑀺𑀬𑀸𑀬𑁂𑀦, ‘‘𑀢𑀁 𑀅𑀦𑀼𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀔𑀬𑀸 𑀯𑀺𑀭𑀸𑀕𑀸𑀢𑀺 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 ‘‘𑀔𑀬𑁂𑀦 𑀯𑀺𑀭𑀸𑀕𑁂𑀦𑀸’’𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀯𑀺𑀭𑀸𑀕𑁂𑀦𑀸𑀢𑀺 𑀘 𑀇𑀢𑀺𑀲𑀤𑁆𑀤𑁄 𑀆𑀤𑀺 𑀅𑀢𑁆𑀣𑁄. 𑀢𑁂𑀦 ‘‘𑀦𑀺𑀭𑁄𑀥𑁂𑀦𑀸’’𑀢𑀺 𑀏𑀯𑀫𑀸𑀤𑀺𑀓𑀁 𑀕𑀳𑀺𑀢𑀁 𑀳𑁄𑀢𑀺. 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯 𑀉𑀧𑀬𑀸𑀤𑀻𑀦𑀁 𑀲𑀫𑀼𑀘𑁆𑀙𑁂𑀤𑀲𑁆𑀲𑁂𑀯 𑀩𑁄𑀥𑀦𑀢𑁄.

𑁧𑁦𑁦. 𑀧𑀢𑀺𑀝𑁆𑀞𑀸𑀢𑀺 𑀏𑀢𑁆𑀣 𑀲𑁂𑀲𑀪𑀽𑀢𑀢𑁆𑀢𑀬𑀁 𑀉𑀧𑀸𑀤𑀸𑀭𑀽𑀧𑀜𑁆𑀘𑀸𑀢𑀺 𑀧𑀢𑀺𑀝𑁆𑀞𑀸𑀦𑀸, 𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀸𑀢𑀼𑀘𑀸𑀢𑀺 𑀧𑀢𑀺𑀝𑁆𑀞𑀸𑀦𑀥𑀸𑀢𑀼. 𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀁 𑀩𑀸𑀳𑀺𑀭𑀉𑀤𑀓𑀁 𑀯𑀺𑀬 𑀲𑁂𑀲𑀪𑀽𑀢𑀢𑁆𑀢𑀬𑀁 𑀆𑀩𑀦𑁆𑀥𑀢𑀻𑀢𑀺 𑀆𑀩𑀦𑁆𑀥𑀦𑀁. 𑀧𑀘𑀦𑀻𑀬𑀪𑀢𑁆𑀢𑀁 𑀩𑀸𑀳𑀺𑀭𑀢𑁂𑀚𑁄 𑀯𑀺𑀬 𑀲𑁂𑀲𑀪𑀽𑀢𑀢𑁆𑀢𑀬𑀁 𑀧𑀭𑀺𑀧𑀸𑀘𑁂𑀢𑀻𑀢𑀺 𑀧𑀭𑀺𑀧𑀸𑀘𑀦𑀁. 𑀩𑀸𑀳𑀺𑀭𑀯𑀸𑀢𑁄 𑀯𑀺𑀬 𑀲𑁂𑀲𑀪𑀽𑀢𑀢𑁆𑀢𑀬𑀁 𑀯𑀺𑀢𑁆𑀣𑀫𑁆𑀪𑁂𑀢𑀻𑀢𑀺 𑀯𑀺𑀢𑁆𑀣𑀫𑁆𑀪𑀦𑀁. 𑀥𑀸𑀢𑀼𑀲𑀤𑁆𑀤𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀅𑀲𑀫𑁆𑀨𑀼𑀝𑁆𑀞𑀥𑀸𑀢𑀽𑀢𑀺 𑀅𑀲𑀫𑁆𑀨𑀼𑀲𑀺𑀢𑀪𑀸𑀯𑁄 𑀢𑁂𑀲𑀁 𑀯𑀺𑀧𑀭𑀺𑀫𑀝𑁆𑀞𑀢𑀸𑀪𑀸𑀯𑀢𑁄. 𑀯𑀺𑀚𑀸𑀦𑀦𑀁 𑀆𑀭𑀫𑁆𑀫𑀡𑀽𑀧𑀮𑀤𑁆𑀥𑀺. 𑀅𑀳𑀁 𑀅𑀢𑁆𑀢𑀸𑀢𑀺 𑀅𑀳𑀁, ‘‘𑀭𑀽𑀧𑀥𑀫𑁆𑀫𑁄 𑀫𑁂 𑀅𑀢𑁆𑀢𑀸’’𑀢𑀺 𑀅𑀢𑁆𑀢𑀓𑁄𑀝𑁆𑀞𑀸𑀲𑁂𑀦 𑀅𑀢𑁆𑀢𑀪𑀸𑀯𑁂𑀦 𑀦 𑀉𑀧𑀕𑀫𑀺𑀁 𑀦 𑀕𑀡𑁆𑀳𑀺𑀁. 𑀦𑀺𑀲𑁆𑀲𑀺𑀢𑀦𑀺𑀲𑁆𑀲𑀺𑀢𑀸𑀧𑀺 𑀦𑀺𑀲𑁆𑀲𑀺𑀢𑀸 𑀏𑀯 𑀦𑀸𑀫𑀸𑀢𑀺 𑀆𑀳 ‘‘𑀧𑀣𑀯𑀻𑀥𑀸𑀢𑀼𑀦𑀺𑀲𑁆𑀲𑀺𑀢𑀸𑀯𑀸’’𑀢𑀺. 𑀅𑀢𑁆𑀢𑀦𑀸 𑀯𑀸 𑀧𑀦 𑀢𑀦𑁆𑀦𑀺𑀲𑁆𑀲𑀺𑀢𑀸𑀢𑀺 ‘‘𑀏𑀓𑁂𑀦 𑀧𑀭𑀺𑀬𑀸𑀬𑁂𑀦𑀸’’𑀢𑀺. 𑀉𑀧𑀸𑀤𑀸𑀭𑀼𑀧𑀫𑁆𑀧𑀺 𑀓𑀸𑀫𑀁 𑀦𑀺𑀲𑁆𑀲𑀺𑀢𑀫𑁆𑀧𑀺 𑀳𑁄𑀢𑀺. 𑀢𑀣𑀸𑀧𑀺 𑀢𑀁 𑀦𑀺𑀲𑁆𑀲𑀺𑀢𑀁 𑀳𑁄𑀢𑀺𑀬𑁂𑀯𑀸𑀢𑀺 𑀢𑀁 𑀦 𑀉𑀤𑁆𑀥𑀝𑀁. 𑀧𑀭𑀺𑀘𑁆𑀙𑁂𑀤𑀓𑀭𑀢𑁆𑀢𑀸 𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑀲𑁆𑀲 ‘‘𑀅𑀯𑀺𑀦𑀺𑀩𑁆𑀪𑁄𑀕𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀘 𑀢𑀣𑀸 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀩𑁆𑀩𑀫𑁆𑀧𑀺 𑀪𑀽𑀢𑀼𑀧𑀸𑀤𑀸𑀭𑀽𑀧𑀁 𑀆𑀓𑀸𑀲𑀥𑀸𑀢𑀼𑀦𑀺𑀲𑁆𑀲𑀺𑀢𑀁 𑀦𑀸𑀫. 𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺𑀬𑀸 𑀉𑀧𑀸𑀤𑀸𑀭𑀽𑀧𑀁 𑀯𑀺𑀬 𑀪𑀽𑀢𑀭𑀽𑀧𑀸𑀦𑀺, 𑀅𑀭𑀽𑀧𑀓𑁆𑀔𑀦𑁆𑀥𑀸 𑀯𑀺𑀬 𑀘 𑀯𑀢𑁆𑀣𑀼𑀭𑀽𑀧𑀸𑀦𑀺, ‘‘𑀢𑀁𑀦𑀺𑀲𑁆𑀲𑀺𑀢𑀭𑀽𑀧𑀯𑀢𑁆𑀣𑀼𑀓𑀸 𑀅𑀭𑀽𑀧𑀓𑁆𑀔𑀦𑁆𑀥𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀆𑀓𑀸𑀲𑀥𑀸𑀢𑀼𑀦𑀺𑀲𑁆𑀲𑀺𑀢𑀘𑀓𑁆𑀔𑀸𑀤𑀺𑀭𑀽𑀧𑀥𑀫𑁆𑀫𑀯𑀢𑁆𑀣𑀼𑀓𑀸 𑀯𑁂𑀤𑀦𑀸𑀤𑀬𑁄 𑀅𑀭𑀽𑀧𑀓𑁆𑀔𑀦𑁆𑀥𑀸 𑀆𑀓𑀸𑀲𑀥𑀸𑀢𑀼𑀦𑀺𑀲𑁆𑀲𑀺𑀢𑀸 𑀦𑀸𑀫𑀸𑀢𑀺 𑀇𑀫𑀫𑀢𑁆𑀣𑀁 𑀢𑀣𑀸-𑀲𑀤𑁆𑀤𑁂𑀦 𑀉𑀧𑀲𑀁𑀳𑀭𑀢𑀺. 𑀇𑀥𑀸𑀧𑀻𑀢𑀺 𑀆𑀓𑀸𑀲𑀥𑀸𑀢𑀼𑀦𑀺𑀲𑁆𑀲𑀺𑀢𑀧𑀤𑁂𑀧𑀺, 𑀦 𑀧𑀣𑀯𑀻𑀥𑀸𑀢𑀼𑀦𑀺𑀲𑁆𑀲𑀺𑀢𑀧𑀤𑀸𑀤𑀻𑀲𑀼 𑀏𑀯. 𑀭𑀽𑀧𑀸𑀭𑀽𑀧𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀭𑀽𑀧𑀸𑀭𑀽𑀧𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺, 𑀅𑀕𑁆𑀕𑀳𑀺𑀢𑀁 𑀦𑀢𑁆𑀣𑀺. 𑀲𑀳𑀚𑀸𑀢𑀸…𑀧𑁂… 𑀦𑀺𑀲𑁆𑀲𑀺𑀢𑀦𑁆𑀢𑀺 𑀇𑀤𑀁 𑀦𑀺𑀧𑁆𑀧𑀭𑀺𑀬𑀸𑀬𑀲𑀺𑀤𑁆𑀥𑀁 𑀦𑀺𑀲𑁆𑀲𑀬𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀬𑀸𑀬𑀲𑀺𑀤𑁆𑀥𑁂 𑀦𑀺𑀲𑁆𑀲𑀬𑀢𑁆𑀢𑁂 𑀕𑀬𑁆𑀳𑀫𑀸𑀦𑁂 𑁋 ‘‘𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄𑀢𑀺 𑀧𑀘𑁆𑀙𑀸𑀚𑀸𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀼𑀭𑁂𑀚𑀸𑀢𑀲𑁆𑀲 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧𑁧) 𑀯𑀘𑀦𑀢𑁄 𑀲𑀩𑁆𑀩𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀁, ‘‘𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀣𑀸 𑀅𑀦𑀦𑁆𑀢𑀭𑀯𑀺𑀜𑁆𑀜𑀸𑀡𑀥𑀸𑀢𑀼𑀧𑀘𑁆𑀘𑀬𑀸 𑀧𑀯𑀢𑁆𑀢𑀦𑀢𑁄, ‘‘𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁.

𑁧𑁦𑁧. 𑀭𑀼𑀧𑁆𑀧𑀢𑀺 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀭𑀽𑀧𑀦𑁆𑀢𑀺 𑀅𑀬𑀫𑀢𑁆𑀣𑁄 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀧𑀸𑀣𑀕𑀢𑁂 𑀭𑀽𑀧𑀸𑀬𑀢𑀦𑁂 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀮𑀩𑁆𑀪𑀢𑀺, 𑀦 𑀆𑀧𑀸𑀣𑀫𑀦𑀸𑀕𑀢𑁂. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑀪𑀸𑀯𑁄 𑀧𑀦 𑀆𑀧𑀸𑀣𑀫𑀦𑀸𑀕𑀢𑁂𑀧𑀺 𑀢𑀲𑁆𑀫𑀺𑀁 𑀮𑀩𑁆𑀪𑀢𑁂𑀯 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀣𑀦𑀢𑁄. 𑀭𑀽𑀧𑀸𑀬𑀢𑀦𑀁 𑀤𑁆𑀯𑀺𑀥𑀸 𑀯𑀺𑀪𑀚𑀺𑀢𑁆𑀯𑀸. 𑀣𑁂𑀭𑁄 𑀧𑀦 𑀆𑀧𑀸𑀣𑀁 𑀅𑀦𑀸𑀕𑀢𑀲𑁆𑀲𑀸𑀧𑀺 𑀭𑀽𑀧𑀸𑀬𑀢𑀦𑀲𑁆𑀲 𑀭𑀽𑀧𑀪𑀸𑀯𑀁 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀤𑁆𑀯𑀺𑀥𑀸𑀓𑀭𑀡𑀁 𑀦𑀸𑀦𑀼𑀚𑀸𑀦𑀦𑁆𑀢𑁄 𑀙𑀦𑁆𑀦𑁄𑀯𑀸𑀤𑀁 𑀦𑀺𑀤𑀲𑁆𑀲𑁂𑀢𑀺, ‘‘𑀉𑀧𑀭𑀺 𑀙𑀦𑁆𑀦𑁄𑀯𑀸𑀤𑁂 𑀓𑀺𑀦𑁆𑀢𑀺 𑀓𑀭𑀺𑀲𑁆𑀲𑀣𑀸’’𑀢𑀺. 𑀢𑀢𑁆𑀣 𑀳𑀺 ‘‘𑀘𑀓𑁆𑀔𑀼𑀁, 𑀆𑀯𑀼𑀲𑁄 𑀙𑀦𑁆𑀦, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂’’𑀢𑀺 (𑀫. 𑀦𑀺. 𑁩.𑁩𑁯𑁧) 𑀆𑀕𑀢𑀁, 𑀦 𑀘𑁂𑀢𑁆𑀣 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀧𑀸𑀣𑀁 𑀆𑀕𑀢𑀫𑁂𑀯 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑀧𑀤𑁂𑀦 𑀕𑀳𑀺𑀢𑀁, 𑀦 𑀆𑀧𑀸𑀣𑀁 𑀅𑀦𑀸𑀕𑀢𑀦𑁆𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀅𑀯𑀺𑀲𑁂𑀲𑁂𑀦𑁂𑀯 𑀭𑀽𑀧𑀸𑀬𑀢𑀦𑁂𑀦 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑀸𑀳𑀸𑀪𑀸𑀯𑀲𑁆𑀲 𑀚𑁄𑀢𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀦 𑀬𑀺𑀤𑀁 𑀮𑀩𑁆𑀪𑀢𑀻’’𑀢𑀺. 𑀭𑀽𑀧𑀫𑁂𑀯𑀸𑀢𑀺 𑀭𑀽𑀧𑀸𑀬𑀢𑀦𑀫𑁂𑀯. 𑀬𑀤𑀺 𑀏𑀯𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀧𑀤𑀁 𑀓𑀣𑀁 𑀦𑁂𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀧𑀦𑀸’’𑀢𑀺𑀆𑀤𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀽𑀢𑀺 𑀬𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀢𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀽𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀙𑀦𑁆𑀤𑁄𑀢𑀺 𑀢𑀲𑁆𑀲𑀦𑀲𑀪𑀸𑀯𑁄 𑀙𑀦𑁆𑀤𑁄, 𑀦 𑀓𑀢𑁆𑀢𑀼𑀓𑀫𑁆𑀬𑀢𑀸 𑀙𑀦𑁆𑀤𑁄𑀬𑁂𑀯𑀸𑀢𑀺 𑀢𑀡𑁆𑀳𑀸𑀙𑀦𑁆𑀤𑁄. 𑀭𑀚𑁆𑀚𑀦𑀯𑀲𑁂𑀦𑀸𑀢𑀺 𑀯𑀢𑁆𑀣𑀁 𑀯𑀺𑀬 𑀭𑀗𑁆𑀕𑀚𑀸𑀢𑀁 𑀘𑀺𑀢𑁆𑀢𑀲𑁆𑀲 𑀅𑀦𑀼𑀭𑀜𑁆𑀚𑀦𑀯𑀲𑁂𑀦. 𑀅𑀪𑀺𑀦𑀦𑁆𑀤𑀦𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑁂 𑀅𑀪𑀺𑀭𑀫𑀺𑀢𑁆𑀯𑀸 𑀦𑀦𑁆𑀤𑀦𑀯𑀲𑁂𑀦. 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸 𑀳𑀺 𑀦𑀦𑁆𑀤𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀡𑁆𑀳𑀸𑀬𑀦𑀯𑀲𑁂𑀦 𑀢𑀡𑁆𑀳𑀸.

𑁧𑁦𑁨. 𑀅𑀳𑀗𑁆𑀓𑀸𑀭𑁄𑀢𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁨𑁧, 𑁧𑁨𑁩𑁯; 𑀯𑀺𑀪. 𑁮𑁩𑁨, 𑁮𑁬𑁬; 𑀲𑀁. 𑀦𑀺. 𑁪.𑁧𑁦𑁮; 𑀫𑀳𑀸𑀦𑀺. 𑁨𑁧, 𑁧𑁭𑁮) 𑀅𑀳𑀁𑀓𑀭𑀡𑀁. 𑀬𑁂𑀦 𑀳𑀺 𑀫𑀫𑀁 𑀓𑀭𑁄𑀢𑀺, 𑀏𑀢𑀁 𑀫𑀫𑀗𑁆𑀓𑀸𑀭𑁄. 𑀲𑁆𑀯𑁂𑀯𑀸𑀢𑀺 ‘‘𑀅𑀳𑀗𑁆𑀓𑀸𑀭𑁄’’𑀢𑀺 𑀯𑀼𑀢𑁆𑀢𑀫𑀸𑀦𑁄. 𑀏𑀯𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑁂 𑀲𑀩𑁆𑀩𑀸𑀲𑀼 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀼 𑀯𑀼𑀘𑁆𑀘𑀫𑀸𑀦𑀸𑀲𑀼 𑀳𑁂𑀝𑁆𑀞𑀸 𑀯𑀺𑀚𑁆𑀚𑀸𑀤𑁆𑀯𑀬𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦, ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑁆𑀘 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀯𑀼𑀢𑁆𑀢’’𑀦𑁆𑀢𑀺 𑀆𑀳? 𑀇𑀢𑀭𑁄 𑀇𑀥 𑀲𑀩𑁆𑀩𑀯𑀸𑀭𑁂𑀲𑀼𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀧𑀼𑀘𑁆𑀙𑀸 𑀅𑀥𑀺𑀓𑀢𑀸 𑀢𑀲𑁆𑀫𑀸 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂’’𑀢𑀺𑀆𑀤𑀺𑀦𑀸 𑀢𑀢𑀺𑀬𑀸 𑀯𑀺𑀚𑁆𑀚𑀸 𑀓𑀣𑀺𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀪𑀺𑀓𑁆𑀔𑀽 𑀮𑁄𑀓𑀺𑀬𑀥𑀫𑁆𑀫𑀁 𑀦 𑀧𑀼𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀏𑀓𑀯𑀺𑀲𑁆𑀲𑀚𑁆𑀚𑀺𑀢𑀲𑀼𑀢𑁆𑀢𑀁 𑀦𑀸𑀫𑁂𑀢𑀁 𑀢𑀢𑀺𑀬𑀯𑀺𑀚𑁆𑀚𑀸𑀬 𑀏𑀯 𑀆𑀕𑀢𑀢𑁆𑀢𑀸. 𑀅𑀭𑀺𑀬𑀥𑀫𑁆𑀫𑀯𑀲𑁂𑀦𑀧𑀺𑀲𑁆𑀲 𑀲𑀫𑀜𑁆𑀜𑀸 𑀅𑀢𑁆𑀣𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀙𑀩𑁆𑀩𑀺𑀲𑁄𑀥𑀦𑀦𑁆𑀢𑀺𑀧𑀺𑀲𑁆𑀲 𑀦𑀸𑀫’’𑀦𑁆𑀢𑀺 𑀯𑀢𑁆𑀯𑀸 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀪𑁂𑀤𑀁 𑀤𑀲𑁆𑀲𑁂𑀢𑀼𑀁, ‘‘𑀏𑀢𑁆𑀣 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀲𑀼𑀤𑁆𑀥𑀸𑀢𑀺 𑀢𑀲𑁆𑀲𑀸 𑀘𑁄𑀤𑀦𑀸𑀬 𑀲𑁄𑀥𑀦𑀯𑀲𑁂𑀦 𑀯𑀺𑀲𑁄𑀥𑀺𑀢𑀸. 𑀏𑀓𑀫𑁂𑀯 𑀓𑀢𑁆𑀯𑀸𑀢𑀺 𑀏𑀓𑀯𑀸𑀭𑀯𑀲𑁂𑀦𑁂𑀯 𑀧𑀸𑀴𑀺𑀬𑀁 𑀏𑀓𑀚𑁆𑀛𑀁 𑀆𑀕𑀢𑀢𑁆𑀢𑀸 𑀏𑀓𑀫𑁂𑀯 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸. 𑀬𑀤𑀺 𑀏𑀯𑀁 𑀓𑀣𑀁 𑀯𑀸 𑀙𑀩𑁆𑀩𑀺𑀲𑁄𑀥𑀦𑀢𑀸𑀢𑀺 𑀆𑀳 𑁋 ‘‘𑀘𑀢𑀽𑀳𑀺 𑀆𑀳𑀸𑀭𑁂𑀳𑀺 𑀲𑀤𑁆𑀥𑀺’’𑀦𑁆𑀢𑀺 𑀓𑀣𑀁 𑀧𑀦𑁂𑀢𑁆𑀣 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀕𑀳𑁂𑀢𑀩𑁆𑀩𑀸𑀢𑀺? 𑀓𑁂𑀘𑀺 𑀢𑀸𑀯 𑀆𑀳𑀼 𑁋 ‘‘𑀲𑀸𑀥𑀽𑀢𑀺 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀢𑁆𑀢𑀭𑀺 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺 𑀳𑁂𑀝𑁆𑀞𑀸 𑀆𑀕𑀢𑁂𑀦 𑀦𑀬𑁂𑀦 𑀆𑀳𑀸𑀭𑀯𑀸𑀭𑁄 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄𑀢𑀺. ‘‘𑀩𑀳𑀺𑀤𑁆𑀥𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀽’’𑀢𑀺 𑀏𑀢𑁆𑀣 𑀆𑀳𑀸𑀭𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀆𑀳𑀸𑀭𑀸 𑀅𑀢𑁆𑀣𑀢𑁄 𑀆𑀕𑀢𑀸 𑀏𑀯𑀸𑀢𑀺 𑀅𑀜𑁆𑀜𑁂. 𑀅𑀧𑀭𑁂 𑀧𑀦 𑀭𑀽𑀧𑀓𑁆𑀔𑀦𑁆𑀥𑀕𑁆𑀕𑀳𑀡𑁂𑀦 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀕𑁆𑀕𑀳𑀡𑁂𑀦 𑀨𑀲𑁆𑀲𑀸𑀳𑀸𑀭𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀕𑁆𑀕𑀳𑀡𑁂𑀦 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀲𑀭𑀽𑀧𑀢𑁄𑀧𑀺 𑀕𑀳𑀺𑀢𑁄𑀢𑀺 𑀯𑀤𑀦𑁆𑀢𑀺.

‘‘𑀙𑀩𑁆𑀩𑀺𑀲𑁄𑀥𑀦’’𑀦𑁆𑀢𑀺 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀫𑀜𑁆𑀜𑀸𑀬 𑀅𑀦𑁆𑀯𑀢𑁆𑀣𑀢𑀁 𑀤𑀲𑁆𑀲𑁂𑀢𑁆𑀯𑀸 𑀆𑀬𑀢𑀺𑀫𑁆𑀧𑀺 𑀢𑀸𑀤𑀺𑀲𑁂𑀦 𑀩𑁆𑀬𑀸𑀓𑀭𑀡𑁂𑀦 𑀪𑀺𑀓𑁆𑀔𑀽𑀦𑀁 𑀧𑀝𑀺𑀧𑀢𑁆𑀢𑀺𑀫𑁆𑀧𑀺 𑀤𑀲𑁆𑀲𑀦𑀢𑁆𑀣𑀁, ‘‘𑀇𑀫𑁂 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀯𑀺𑀦𑀬𑀦𑀺𑀤𑁆𑀤𑁂𑀲𑀧𑀭𑀺𑀬𑀸𑀬𑁂𑀦𑀸𑀢𑀺 𑀯𑀺𑀦𑀬𑀦𑀺𑀤𑁆𑀤𑁂𑀲𑁂 𑀆𑀕𑀢𑁂𑀦 𑀓𑀸𑀭𑀡𑁂𑀦. 𑀯𑀺𑀦𑀬𑁂 𑀯𑀸 𑀆𑀕𑀢𑀦𑀺𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑁂𑀦.

𑀅𑀥𑀺𑀕𑀦𑁆𑀢𑀩𑁆𑀩𑀢𑁄 𑀅𑀥𑀺𑀕𑀫𑁄, 𑀛𑀸𑀦𑀸𑀤𑀺𑀅𑀥𑀺𑀕𑀫𑀧𑀼𑀘𑁆𑀙𑀸. 𑀢𑁂𑀦𑀸𑀳 𑁋 ‘‘𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀻𑀲𑀽’’𑀢𑀺𑀆𑀤𑀺. 𑀉𑀧𑀸𑀬𑀧𑀼𑀘𑁆𑀙𑀸𑀢𑀺 𑀅𑀥𑀺𑀕𑀫𑁄𑀧𑀸𑀬𑀧𑀼𑀘𑁆𑀙𑀸. 𑀓𑀺𑀦𑁆𑀢𑀻𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀯𑀺𑀥𑀺𑀦𑀸𑀢𑀺 𑀅𑀢𑁆𑀣𑁄.

𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻𑀢𑀺 𑀇𑀤𑀁 𑀧𑀦 𑀧𑀼𑀩𑁆𑀩𑁂 ‘‘𑀓𑀺𑀁 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀅𑀦𑀺𑀤𑁆𑀥𑀸𑀭𑀺𑀢𑀪𑁂𑀤𑀸 𑀛𑀸𑀦𑀸𑀤𑀺𑀯𑀺𑀲𑁂𑀲𑀸 𑀧𑀼𑀘𑁆𑀙𑀺𑀢𑀸𑀢𑀺 𑀇𑀤𑀸𑀦𑀺 𑀢𑁂𑀲𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀧𑀼𑀘𑁆𑀙𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀆𑀓𑀸𑀭𑁂𑀳𑀺 𑀅𑀥𑀺𑀕𑀫𑀩𑁆𑀬𑀸𑀓𑀭𑀡𑀁 𑀲𑁄𑀥𑁂𑀢𑀩𑁆𑀩𑀁, 𑀢𑀲𑁆𑀫𑀸. 𑀏𑀢𑁆𑀢𑀸𑀯𑀢𑀸𑀯𑀸𑀢𑀺 𑀏𑀢𑁆𑀢𑀓𑁂𑀦 𑀩𑁆𑀬𑀸𑀓𑀭𑀡𑀫𑀢𑁆𑀢𑁂𑀦𑁂𑀯 𑀦 𑀲𑀓𑁆𑀓𑀸𑀭𑁄 𑀓𑀸𑀢𑀩𑁆𑀩𑁄. 𑀩𑁆𑀬𑀸𑀓𑀭𑀡𑀜𑁆𑀳𑀺 𑀏𑀓𑀘𑁆𑀘𑀲𑁆𑀲 𑀅𑀬𑀸𑀣𑀸𑀯𑀢𑁄𑀧𑀺 𑀳𑁄𑀢𑀺, 𑀬𑀣𑀸 𑀦𑀸𑀫 𑀚𑀸𑀢𑀭𑀽𑀧𑀧𑀢𑀺𑀭𑀽𑀧𑀁 𑀚𑀸𑀢𑀭𑀽𑀧𑀁 𑀯𑀺𑀬 𑀔𑀸𑀬𑀢𑀻𑀢𑀺 𑀚𑀸𑀢𑀭𑀽𑀧𑀁 𑀦𑀺𑀖𑀁𑀲𑀦𑀢𑀸𑀧𑀦𑀙𑁂𑀤𑀦𑁂𑀳𑀺 𑀲𑁄𑀥𑁂𑀢𑀩𑁆𑀩𑀁 𑀏𑀯𑀫𑁂𑀯𑀁 𑀇𑀫𑁂𑀲𑀼 𑀇𑀤𑀸𑀦𑁂𑀯 𑀯𑀼𑀢𑁆𑀢𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑁄𑀥𑀦𑀢𑁆𑀣𑀁 𑀯𑀢𑁆𑀢𑀩𑁆𑀩𑁄 𑀯𑀺𑀫𑁄𑀓𑁆𑀔𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀸𑀥𑀺-𑀲𑀫𑀸𑀧𑀢𑁆𑀢𑀺-𑀜𑀸𑀡𑀤𑀲𑁆𑀲𑀦-𑀫𑀕𑁆𑀕𑀪𑀸𑀯𑀦𑀸-𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀲𑀗𑁆𑀕𑀡𑁆𑀳𑀸𑀢𑀺.

𑀧𑀸𑀓𑀝𑁄 𑀳𑁄𑀢𑀺 𑀅𑀥𑀺𑀕𑀢𑀯𑀺𑀲𑁂𑀲𑀲𑁆𑀲 𑀲𑀢𑀺𑀲𑀫𑁆𑀫𑁄𑀲𑀸𑀪𑀸𑀯𑀢𑁄. 𑀲𑁂𑀲𑀧𑀼𑀘𑁆𑀙𑀸𑀲𑀼𑀧𑀺 ‘‘𑀧𑀸𑀓𑀝𑁄 𑀳𑁄𑀢𑀻’’𑀢𑀺 𑀧𑀤𑁂 𑀏𑀲𑁂𑀯 𑀦𑀬𑁄. 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀓𑀼𑀲𑀮𑀸𑀢𑀺 𑀲𑀚𑁆𑀛𑀸𑀬𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀲𑀼 𑀦𑀺𑀧𑀼𑀡𑀸. 𑀬𑀸𑀬 𑀧𑀝𑀺𑀧𑀤𑀸𑀬 𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑁄 𑀆𑀕𑀘𑁆𑀙𑀢𑀺, 𑀲𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺 𑀆𑀕𑀫𑀦𑀧𑀝𑀺𑀧𑀤𑀸. 𑀲𑁄𑀥𑁂𑀢𑀩𑁆𑀩𑀸𑀢𑀺 𑀲𑀼𑀤𑁆𑀥𑀸 𑀉𑀤𑀸𑀳𑀼 𑀅𑀲𑀼𑀤𑁆𑀥𑀸𑀢𑀺 𑀯𑀺𑀘𑀸𑀭𑀡𑀯𑀲𑁂𑀦 𑀲𑁄𑀥𑁂𑀢𑀩𑁆𑀩𑀸. 𑀦 𑀲𑀼𑀚𑁆𑀛𑀢𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄. 𑀅𑀧𑀦𑁂𑀢𑀩𑁆𑀩𑁄 𑀅𑀢𑁆𑀢𑀦𑁄 𑀧𑀝𑀺𑀜𑁆𑀜𑀸𑀬. ‘‘𑀲𑀼𑀚𑁆𑀛𑀢𑀻’’𑀢𑀺 𑀯𑀢𑁆𑀯𑀸 𑀲𑀼𑀚𑁆𑀛𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁, ‘‘𑀤𑀻𑀖𑀭𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀜𑀸𑀬𑀢𑀻𑀢𑀺 𑀏𑀢𑁆𑀣 ‘‘𑀬𑀤𑀻’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑀤𑀺 𑀲𑁄 𑀪𑀺𑀓𑁆𑀔𑀼 𑀢𑀸𑀬 𑀧𑀝𑀺𑀧𑀤𑀸𑀬 𑀬𑀤𑀺 𑀧𑀜𑁆𑀜𑀸𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀔𑀻𑀡𑀸𑀲𑀯𑀧𑀝𑀺𑀧𑀢𑁆𑀢𑀺𑀲𑀤𑀺𑀲𑀸 𑀧𑀝𑀺𑀧𑀤𑀸 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀢𑁆𑀢𑀸.

𑀦𑀤𑀺𑀬𑀸 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀦𑀝𑁆𑀞𑀸𑀦𑀁 𑀦𑀤𑀻𑀫𑀼𑀔𑀤𑁆𑀯𑀸𑀭𑀁. 𑀫𑀤𑁆𑀤𑀫𑀸𑀦𑁄𑀢𑀺 𑀩𑀤𑀭𑀲𑀸𑀴𑀯𑀁 𑀲𑀭𑀲𑀁 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑁄 𑀳𑀼𑀢𑁆𑀯𑀸 𑀫𑀤𑁆𑀤𑀫𑀸𑀦𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀙𑀩𑁆𑀩𑀺𑀲𑁄𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫. 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑀪𑀸𑀯𑀓𑀭𑀁 𑀥𑀫𑁆𑀫𑀁. 𑀲𑁄 𑀧𑀦 𑀬𑀲𑁆𑀫𑀸 𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀯𑁂𑀡𑀺𑀓𑁄 𑀥𑀫𑁆𑀫𑁄 𑀳𑁄𑀢𑀺. 𑀢𑀲𑁆𑀫𑀸 𑀆𑀳 𑁋 ‘‘𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫’’𑀦𑁆𑀢𑀺, 𑀏𑀲 𑀦𑀬𑁄 𑀅𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀏𑀯𑀁 𑀧𑀥𑀸𑀦𑀁 𑀅𑀦𑀼𑀝𑁆𑀞𑀸𑀢𑀩𑁆𑀩𑀜𑁆𑀘 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀁 𑀆𑀤𑀺𑀁 𑀓𑀢𑁆𑀯𑀸 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀅𑀬𑀣𑀸𑀦𑀼𑀧𑀼𑀩𑁆𑀩𑀺𑀬𑀸 𑀦𑀺𑀤𑁆𑀤𑀺𑀲𑀦𑁆𑀢𑁄 ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁄’’𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀧𑀦 𑀦𑀺𑀤𑁆𑀤𑀺𑀲𑀦𑁆𑀢𑁄 𑀉𑀤𑀸𑀳𑀭𑀡𑀧𑀼𑀩𑁆𑀩𑀓𑀁 𑀳𑁂𑀢𑀼𑀁 𑀤𑀲𑁆𑀲𑁂𑀢𑀼𑀁, ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀇𑀘𑁆𑀙𑀺𑀢𑀩𑁆𑀩𑀧𑀭𑀺𑀘𑁆𑀘𑀸𑀕𑀧𑀼𑀩𑁆𑀩𑀓𑀁 𑀕𑀳𑁂𑀢𑀩𑁆𑀩𑀕𑁆𑀕𑀳𑀡𑀁 𑀦𑀸𑀫 𑀜𑀸𑀬𑀧𑀝𑀺𑀧𑀢𑁆𑀢𑀺, 𑀢𑀲𑁆𑀫𑀸 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀸 𑀲𑀫𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀤𑀻𑀧𑁂𑀦𑁆𑀢𑁄 𑀲𑀢𑁆𑀣𑀸 𑀅𑀬𑀣𑀸𑀦𑀼𑀧𑀼𑀩𑁆𑀩𑀺𑀬𑀸 𑀦𑀺𑀤𑁆𑀥𑀸𑀭𑀻𑀬𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦𑀁, 𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸’’𑀢𑀺. 𑀏𑀢𑀤𑁂𑀯 𑀳𑀺 𑀓𑀼𑀮𑀤𑁆𑀯𑀬𑀁 ‘‘𑀉𑀘𑁆𑀘𑀓𑀼𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄. 𑀢𑀣𑀸𑀳𑀺 𑀅𑀦𑁆𑀢𑀺𑀫𑀪𑀯𑀺𑀓𑀸 𑀩𑁄𑀥𑀺𑀲𑀢𑁆𑀢𑀸 𑀢𑀢𑁆𑀣𑁂𑀯 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺. 𑀲𑁄𑀢𑀺 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼. 𑀅𑀦𑁆𑀢𑀭𑀁 𑀓𑀭𑀺𑀢𑁆𑀯𑀸𑀢𑀺 𑀢𑀁 𑀓𑀸𑀭𑀡𑀁 𑀓𑀢𑁆𑀯𑀸. 𑀧𑀝𑀺𑀧𑀤𑀸 𑀳𑀺 𑀯𑀺𑀜𑁆𑀜𑀽𑀦𑀁 𑀧𑀽𑀚𑀸𑀬 𑀓𑀸𑀭𑀡𑀁, 𑀦 𑀉𑀘𑁆𑀘𑀓𑀼𑀮𑀻𑀦𑀢𑀸. 𑀫𑀳𑀸𑀓𑀼𑀮𑀸𑀢𑀺 𑀯𑀺𑀧𑀼𑀮𑀓𑀼𑀮𑀸 𑀉𑀧𑀸𑀤𑀺𑀢𑁄𑀤𑀺𑀢𑀓𑀼𑀮𑀲𑀫𑁆𑀧𑀯𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄.

𑁧𑁦𑁬. 𑀬𑀲𑀲𑀤𑁆𑀤𑁄 𑀧𑀭𑀺𑀯𑀸𑀭𑀯𑀸𑀘𑀓𑁄. 𑀬𑀲𑀲𑁆𑀲𑀻𑀢𑀺 𑀘 𑀲𑀸𑀢𑀺𑀲𑀬𑀧𑀭𑀺𑀯𑀸𑀭𑀯𑀦𑁆𑀢𑀢𑀸 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄’’𑀢𑀺. 𑀆𑀥𑀺𑀧𑀢𑁂𑀬𑁆𑀬𑀸𑀪𑀸𑀯𑀢𑁄 𑀧𑀭𑁂𑀲𑀁 𑀉𑀧𑀭𑀺𑀦𑀢𑁆𑀢𑀺 𑀏𑀢𑁂𑀲𑀁 𑀈𑀲𑁄 𑀈𑀲𑀦𑀁 𑀇𑀲𑁆𑀲𑀭𑀺𑀬𑀦𑁆𑀢𑀺 𑀅𑀓𑁆𑀔𑀸𑀢𑀩𑁆𑀩𑀸𑀢𑀺 𑀅𑀧𑁆𑀧𑁂𑀲𑀓𑁆𑀔𑀸. 𑀢𑁂𑀦𑀸𑀳 ‘‘𑀅𑀧𑁆𑀧𑀧𑀭𑀺𑀯𑀸𑀭𑀸’’𑀢𑀺. 𑀅𑀪𑀸𑀯𑀢𑁆𑀣𑁄 𑀳𑀺 𑀇𑀥 𑀅𑀧𑁆𑀧-𑀲𑀤𑁆𑀤𑁄.

𑁧𑁦𑁭. 𑀦𑀯𑁂𑀯 𑀥𑀼𑀢𑀗𑁆𑀕𑀸𑀦𑀺 𑀆𑀕𑀢𑀸𑀦𑀻𑀢𑀺 𑀏𑀢𑁆𑀣 𑀬𑀣𑀸 𑀉𑀓𑁆𑀓𑀝𑁆𑀞𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀢𑁂𑀘𑀻𑀯𑀭𑀺𑀓𑀢𑀸 𑀲𑀼𑀓𑀭𑀸. 𑀏𑀯𑀁 𑀉𑀓𑁆𑀓𑀝𑁆𑀞𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀲𑀧𑀤𑀸𑀦𑀘𑀸𑀭𑀺𑀓𑀢𑀸 𑀲𑀼𑀓𑀭𑀸. 𑀏𑀓𑀸𑀲𑀦𑀺𑀓𑀲𑁆𑀲 𑀘 𑀧𑀢𑁆𑀢𑀧𑀺𑀡𑁆𑀟𑀺𑀓𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀢𑀸 𑀲𑀼𑀓𑀭𑀸 𑀏𑀯𑀸𑀢𑀺 𑁋 ‘‘𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑁂𑀦𑁂𑀯 𑀧𑀸𑀴𑀺𑀬𑀸 𑀅𑀦𑀸𑀕𑀢𑀸𑀦𑀫𑁆𑀧𑀺 𑀆𑀕𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 𑀧𑀭𑀺𑀳𑀭𑀡𑀲𑀼𑀓𑀭𑀢𑀸𑀬 𑀢𑁂𑀲𑀫𑁆𑀧𑀺 𑀲𑀫𑀸𑀤𑀸𑀦𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 ‘‘𑀢𑁂𑀭𑀲 𑀳𑁄𑀦𑁆𑀢𑀻’’𑀢𑀺.

𑁧𑁦𑁮. 𑀓𑀸𑀫𑀢𑀡𑁆𑀳𑀸𑀤𑀺𑀓𑀸𑀬 𑀢𑀸𑀬 𑀢𑀡𑁆𑀳𑀸𑀬 𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑀫𑁆𑀫𑀬𑀸, 𑀧𑀼𑀣𑀼𑀚𑁆𑀚𑀦𑀸, 𑀧𑀓𑀢𑀺𑀪𑀸𑀯𑀽𑀧𑀕𑀫𑀦𑁂𑀦 𑀢𑁂𑀲𑀁 𑀪𑀸𑀯𑁄 𑀢𑀫𑁆𑀫𑀬𑀢𑀸, 𑀢𑀧𑁆𑀧𑀝𑀺𑀓𑁆𑀔𑁂𑀧𑀢𑁄 𑀅𑀢𑀫𑁆𑀫𑀬𑀢𑀸, 𑀦𑀺𑀢𑁆𑀢𑀡𑁆𑀳𑀢𑀸. 𑀢𑀁𑀬𑁂𑀯 𑀓𑀸𑀭𑀡𑀁 𑀓𑀢𑁆𑀯𑀸𑀢𑀺 𑀧𑀞𑀫𑀚𑁆𑀛𑀸𑀦𑁂𑀧𑀺 𑀢𑀡𑁆𑀳𑀸𑀧𑀳𑀸𑀦𑀁𑀬𑁂𑀯 𑀓𑀸𑀭𑀡𑀁 𑀓𑀢𑁆𑀯𑀸. 𑀘𑀺𑀢𑁆𑀢𑁂 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑀫𑁆𑀫𑀬𑀢𑀸𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁂 𑀢𑀡𑁆𑀳𑀸𑀬 𑀧𑀝𑀺𑀧𑀓𑁆𑀔𑀥𑀫𑁆𑀫𑁂 𑀲𑀫𑁆𑀧𑀸𑀤𑁂𑀢𑁆𑀯𑀸. 𑀦 𑀫𑀜𑁆𑀜𑀢𑀻𑀢𑀺 𑀫𑀜𑁆𑀜𑀦𑀸𑀦𑀁 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀓𑀺𑀲𑁆𑀫𑀺𑀜𑁆𑀘𑀺 𑀑𑀓𑀸𑀲𑁂 𑀓𑀸𑀫𑀪𑀯𑀸𑀤𑀺𑀓𑁂 𑀓𑁂𑀦𑀘𑀺 𑀯𑀢𑁆𑀣𑀼𑀦𑀸 𑀳𑀢𑁆𑀣𑀺𑀅𑀲𑁆𑀲𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀦𑀸 𑀧𑀢𑁆𑀢𑀘𑀻𑀯𑀭𑀯𑀺𑀳𑀸𑀭𑀧𑀭𑀺𑀯𑁂𑀡𑀸𑀤𑀺𑀦𑀸 𑀘 𑀧𑀼𑀕𑁆𑀕𑀮𑀁 𑀦 𑀫𑀜𑁆𑀜𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯. 𑀅𑀜𑁆𑀜𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑀁 𑀅𑀜𑁆𑀜𑀁. 𑀢𑁂𑀦𑀸𑀳 ‘‘𑀅𑀜𑁆𑀜𑀁 𑀲𑁂𑀯𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺. 𑀲𑀢𑁆𑀢𑀳𑀺 𑀧𑀤𑁂𑀳𑀻𑀢𑀺 𑀲𑀢𑁆𑀢𑀳𑀺 𑀯𑀸𑀓𑁆𑀬𑁂𑀳𑀺. 𑀧𑀚𑁆𑀚𑀢𑀺 𑀏𑀢𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄𑀢𑀺 𑀧𑀤𑀁, 𑀯𑀸𑀓𑁆𑀬𑀁. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀑𑀓𑀸𑀲𑀓𑀭𑀡𑀁 𑀥𑀫𑁆𑀫𑀤𑀸𑀬𑀸𑀤𑁂 (𑀫. 𑀦𑀺. 𑁧.𑁩𑁧) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁧𑁧𑁩. 𑀤𑀺𑀝𑁆𑀞𑀺𑀬𑁂𑀯 𑀧𑀘𑁆𑀘𑀬𑀯𑀲𑁂𑀦 𑀧𑀝𑀺𑀮𑀤𑁆𑀥𑀢𑀸𑀬 𑀤𑀺𑀝𑁆𑀞𑀺𑀧𑀝𑀺𑀮𑀸𑀪𑁄. 𑀲𑀜𑁆𑀜𑀸𑀧𑀝𑀺𑀮𑀸𑀪𑁂𑀧𑀺 𑀏𑀲𑁂𑀯 𑀦𑀬𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁄…𑀧𑁂… 𑀦 𑀕𑀳𑀺𑀢𑀸 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀁 𑀢𑁂𑀲𑀁 𑀫𑀦𑁄𑀲𑀫𑀸𑀘𑀸𑀭𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀤𑀺𑀝𑁆𑀞𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀸𑀭𑁂 𑀦 𑀕𑀳𑀺𑀢𑀸𑀢𑀺? 𑀓𑀸𑀫𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀅𑀯𑀬𑀯𑀺𑀪𑀸𑀯𑁄 𑀮𑀩𑁆𑀪𑀢𑀺, 𑀢𑀣𑀸𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑁆𑀔𑀡𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀓𑀫𑁆𑀫𑀧𑀣𑀓𑁄𑀝𑁆𑀞𑀸𑀲𑁄 𑀦 𑀉𑀤𑁆𑀥𑀝𑁄.

𑁧𑁧𑁫. 𑀓𑀸𑀫𑀲𑀜𑁆𑀜𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀬𑀣𑀸 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀲𑀗𑁆𑀕𑀳𑀺𑀢𑀸, 𑀏𑀯𑀁 𑀅𑀦𑀪𑀺𑀚𑁆𑀛𑀸𑀅𑀩𑁆𑀬𑀸𑀧𑀸𑀤𑀅𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀲𑀗𑁆𑀕𑀳𑀺𑀢𑀸 𑀧𑀞𑀫𑁂𑀦 𑀆𑀤𑀺𑀲𑀤𑁆𑀤𑁂𑀦 ‘‘𑀅𑀦𑀪𑀺𑀚𑁆𑀛𑀸𑀲𑀳𑀕𑀢𑀸𑀬 𑀲𑀜𑁆𑀜𑀸𑀬𑀸’’𑀢𑀺𑀆𑀤𑀺𑀧𑀸𑀞𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸.

𑁧𑁧𑁭. 𑀢𑀺 𑀓𑀸𑀫𑀪𑀯𑀸𑀤𑀻𑀦𑀁 𑀅𑀧𑀭𑀺𑀬𑁄𑀲𑀸𑀦𑀸𑀬 𑀧𑀭𑀺𑀬𑁄𑀲𑀸𑀦𑀁 𑀇𑀘𑁆𑀙𑀢𑁄𑀧𑀺 𑀢𑀸𑀤𑀺𑀲𑀲𑁆𑀲 𑀪𑀯𑀸𑀦𑀁 𑀅𑀧𑀭𑀺𑀬𑁄𑀲𑀸𑀦𑀫𑁂𑀯 𑀳𑁄𑀢𑀺. 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺 𑀧𑀼𑀕𑁆𑀕𑀮𑀯𑀲𑁂𑀦. 𑀢𑁂𑀦𑀸𑀳 ‘‘𑀧𑀼𑀣𑀼𑀚𑁆𑀚𑀦𑁄𑀧𑀺 𑀳𑀻’’𑀢𑀺𑀆𑀤𑀺. 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀻𑀢𑀺 𑀢𑁂𑀲𑀁 𑀧𑀳𑀸𑀦𑀸𑀬 𑀅𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀢𑁄 𑀏𑀯 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺. 𑀢𑁂𑀦𑀲𑁆𑀲 𑀓𑀺𑀮𑁂𑀲𑀤𑀼𑀓𑁆𑀔𑁂𑀦 𑀯𑀺𑀧𑀸𑀓𑀤𑀼𑀓𑁆𑀔𑁂𑀦 𑀘 𑀲𑀤𑀼𑀓𑁆𑀔𑀫𑁂𑀯 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀧𑀳𑀸𑀬 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑁄 𑀅𑀦𑀸𑀕𑀸𑀫𑀻 𑀓𑀣𑀁…𑀧𑁂… 𑀅𑀪𑀺𑀯𑀟𑁆𑀠𑀦𑁆𑀢𑀻𑀢𑀺 𑀆𑀳 ‘‘𑀅𑀦𑀸𑀕𑀸𑀫𑀻𑀧𑀻’’𑀢𑀺𑀆𑀤𑀺. 𑀲𑀤𑀼𑀓𑁆𑀔𑀫𑁂𑀯 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀬𑀸𑀬 𑀮𑀩𑁆𑀪𑀫𑀸𑀦𑀅𑀓𑀼𑀲𑀮𑀸𑀪𑀺𑀯𑀼𑀤𑁆𑀥𑀺𑀁 𑀓𑀼𑀲𑀮𑀧𑀭𑀺𑀳𑀸𑀦𑀺𑀜𑁆𑀘 𑀕𑀳𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀦𑁄𑀧𑀺 𑀲𑀩𑁆𑀬𑀸𑀩𑀚𑁆𑀛𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀦𑀁 𑀯𑀼𑀢𑁆𑀢𑀁. 𑀏𑀯𑀁 𑀬𑀣𑀸𑀮𑀩𑁆𑀪𑀫𑀸𑀦𑀁 𑀅𑀓𑀼𑀲𑀮𑀧𑀭𑀺𑀳𑀸𑀦𑀺𑀁 𑀓𑀼𑀲𑀮𑀸𑀪𑀺𑀯𑀼𑀤𑁆𑀥𑀺𑀜𑁆𑀘 𑀕𑀳𑁂𑀢𑁆𑀯𑀸 𑀧𑀼𑀣𑀼𑀚𑁆𑀚𑀦𑀲𑁆𑀲𑀧𑀺 𑀅𑀦𑁆𑀢𑀺𑀫𑀪𑀯𑀺𑀓𑀲𑁆𑀲 𑀅𑀩𑁆𑀬𑀸𑀩𑀚𑁆𑀛𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀧𑀼𑀣𑀼𑀚𑁆𑀚𑀦𑁄𑀧𑀻’’𑀢𑀺𑀆𑀤𑀺. 𑀅𑀓𑀼𑀲𑀮𑀫𑁂𑀯 𑀳𑀸𑀬𑀢𑀺,𑀦 𑀓𑀼𑀲𑀮𑀁 𑀢𑀲𑁆𑀲 𑀩𑀼𑀤𑁆𑀥𑀺𑀧𑀓𑁆𑀔𑁂 𑀞𑀺𑀢𑀢𑁆𑀢𑀸. 𑀢𑀢𑁆𑀣𑀸𑀧𑀺 𑀯𑀺𑀧𑀲𑁆𑀲𑀦𑀫𑁂𑀯 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑀺, 𑀦 𑀯𑀝𑁆𑀝𑀕𑀩𑁆𑀪𑀁 𑀅𑀦𑁆𑀢𑀺𑀫𑀪𑀯𑀺𑀓𑀢𑀸𑀬 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀺𑀢𑀢𑁆𑀢𑀸 𑀅𑀚𑁆𑀛𑀸𑀲𑀬𑀲𑁆𑀲, 𑀜𑀸𑀡𑀲𑁆𑀲 𑀘 𑀧𑀸𑀓𑀕𑀫𑀦𑀢𑁄.

𑁧𑁧𑁯. 𑀏𑀓𑀘𑁆𑀘𑀲𑁆𑀲𑀸𑀢𑀺 𑀲𑀸𑀫𑀺𑀯𑀘𑀦𑀁 ‘‘𑀅𑀪𑀺𑀦𑀦𑁆𑀤𑀢𑀻’’𑀢𑀺𑀆𑀤𑀻𑀲𑀼 𑀧𑀘𑁆𑀘𑀢𑁆𑀢𑀯𑀲𑁂𑀦 𑀧𑀭𑀺𑀡𑀸𑀫𑁂𑀢𑀩𑁆𑀩𑀁, 𑀢𑀣𑀸 ‘‘𑀦𑀺𑀩𑁆𑀩𑀺𑀦𑁆𑀤𑀢𑀻’’𑀢𑀺𑀆𑀤𑀻𑀲𑀼𑀧𑀺. 𑀉𑀕𑁆𑀕𑀡𑁆𑀳𑀺𑀢𑁆𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀪𑀕𑀯𑀢𑁄 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑀸 𑀢𑀸𑀯 𑀤𑀻𑀖𑀭𑀢𑁆𑀢𑀁 𑀳𑀺𑀢𑀲𑀼𑀔𑀢𑁄 𑀧𑀭𑀺𑀩𑀸𑀳𑀺𑀭𑀸 𑀳𑁄𑀦𑁆𑀢𑀼 𑀚𑀸𑀦𑀦𑁆𑀢𑀸𑀦𑀫𑁆𑀧𑀺 𑀲𑀩𑁆𑀩𑁂𑀲𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀻𑀢𑀺 𑀅𑀦𑁂𑀓𑀁𑀲𑀺𑀓𑀢𑀁 𑀘𑁄𑀤𑁂𑀦𑁆𑀢𑁄 ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀲𑀩𑁆𑀩𑁂𑀲𑀫𑁆𑀧𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺𑀬𑁂𑀯𑀸𑀢𑀺, ‘‘𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀁𑀲𑀺𑀓𑀢𑀁 𑀧𑀭𑀺𑀳𑀭𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀩𑀳𑀼𑀥𑀸𑀢𑀼𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁪. 𑀪𑀬𑀦𑁆𑀢𑀺 (𑀅. 𑀦𑀺. 𑀝𑀻. 𑁨.𑁩.𑁧) 𑀘𑀺𑀢𑁆𑀢𑀲𑀁𑀲𑀧𑁆𑀧𑀢𑀸𑀢𑀺 𑀆𑀳 ‘‘𑀘𑀺𑀢𑁆𑀢𑀼𑀢𑁆𑀭𑀸𑀲𑁄’’𑀢𑀺. 𑀉𑀧𑀤𑁆𑀤𑀯𑁄𑀢𑀺 𑀅𑀦𑁆𑀢𑀭𑀸𑀬𑁄. 𑀢𑀲𑁆𑀲 𑀧𑀦 𑀯𑀺𑀓𑁆𑀔𑁂𑀧𑀓𑀸𑀭𑀡𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀦𑁂𑀓𑀕𑁆𑀕𑀢𑀸𑀓𑀸𑀭𑁄’’𑀢𑀺. 𑀉𑀧𑀲𑀕𑁆𑀕𑁄𑀢𑀺 𑀉𑀧𑀲𑀚𑁆𑀚𑀦𑀁. 𑀢𑀢𑁄 𑀅𑀧𑁆𑀧𑀢𑀻𑀓𑀸𑀭𑀯𑀺𑀖𑀸𑀢𑀸𑀧𑀢𑁆𑀢𑀺 𑀬𑀲𑁆𑀫𑀸 𑀧𑀢𑀻𑀓𑀸𑀭𑀸𑀪𑀸𑀯𑁂𑀦 𑀯𑀺𑀳𑀜𑁆𑀜𑀫𑀸𑀦𑀲𑁆𑀲 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀅𑀲𑀫𑀢𑁆𑀣𑀲𑁆𑀲 𑀑𑀲𑀻𑀤𑀦𑀓𑀸𑀭𑀡𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀣 𑀢𑀢𑁆𑀣 𑀮𑀕𑁆𑀕𑀦𑀸𑀓𑀸𑀭𑁄’’𑀢𑀺. 𑀯𑀜𑁆𑀘𑁂𑀢𑁆𑀯𑀸 𑀆𑀕𑀦𑁆𑀢𑀼𑀁 𑀬𑀣𑀸𑀯𑀼𑀢𑁆𑀢𑁂 𑀤𑀺𑀯𑀲𑁂 𑀅𑀦𑀸𑀕𑀘𑁆𑀙𑀦𑁆𑀢𑁂𑀲𑀼. 𑀩𑀳𑀺 𑀅𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀤𑁆𑀯𑀸𑀭𑁂 𑀅𑀕𑁆𑀕𑀺𑀁 𑀤𑀢𑁆𑀯𑀸.

𑀦𑀴𑁂𑀳𑀻𑀢𑀺 𑀦𑀴𑀘𑁆𑀙𑀦𑁆𑀦𑀲𑀗𑁆𑀔𑁂𑀧𑁂𑀦 𑀉𑀧𑀭𑀺 𑀙𑀸𑀤𑁂𑀢𑁆𑀯𑀸 𑀢𑁂𑀳𑀺𑀬𑁂𑀯 𑀤𑀸𑀭𑀼𑀓𑀘𑁆𑀙𑀤𑀦𑀦𑀺𑀬𑀸𑀫𑁂𑀦 𑀧𑀭𑀺𑀢𑁄𑀧𑀺 𑀙𑀸𑀤𑀺𑀢𑀸. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀢𑀺𑀡𑁂𑀳𑀺 𑀙𑀦𑁆𑀦𑀢𑀁, 𑀲𑁂𑀲𑀲𑀫𑁆𑀪𑀸𑀭𑀸𑀦𑀁 𑀭𑀼𑀓𑁆𑀔𑀫𑀬𑀢𑀜𑁆𑀘 𑀅𑀢𑀺𑀤𑀺𑀲𑀢𑀺. 𑀯𑀺𑀥𑀯𑀸𑀧𑀼𑀢𑁆𑀢𑁂𑀢𑀺 𑀅𑀤𑀦𑁆𑀢𑀪𑀸𑀯𑁄𑀧𑀮𑀓𑁆𑀔𑀡𑀁. 𑀢𑁂 𑀳𑀺 𑀦𑀺𑀧𑁆𑀧𑀺𑀢𑀺𑀓𑀸 𑀅𑀯𑀺𑀦𑀻𑀢𑀸 𑀅𑀲𑀁𑀬𑀢𑀸 𑀅𑀓𑀺𑀘𑁆𑀘𑀓𑀸𑀭𑀺𑀦𑁄 𑀳𑁄𑀦𑁆𑀢𑀺.

𑀫𑀢𑁆𑀣𑀓𑀁 𑀅𑀧𑀸𑀧𑁂𑀢𑁆𑀯𑀸𑀯 𑀦𑀺𑀝𑁆𑀞𑀸𑀧𑀺𑀢𑀸𑀢𑀺 𑀓𑀲𑁆𑀫𑀸 𑀪𑀕𑀯𑀸 𑀏𑀯𑀫𑀓𑀸𑀲𑀻𑀢𑀺? 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀧𑀼𑀘𑁆𑀙𑀸𑀓𑁄𑀲𑀮𑁆𑀮𑀤𑀻𑀧𑀦𑀢𑁆𑀣𑀫𑁂𑀯, 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀪𑀺𑀓𑁆𑀔𑀽𑀦𑀁 𑀤𑁂𑀲𑀦𑀸𑀬 𑀚𑀸𑀦𑀦𑀢𑁆𑀣𑀜𑁆𑀘. 𑀢𑁂 𑀓𑀺𑀭 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀅𑀚𑀸𑀦𑀦𑁆𑀢𑀸 𑀅𑀦𑁆𑀥𑀓𑀸𑀭𑀁 𑀧𑀯𑀺𑀝𑁆𑀞𑀸 𑀯𑀺𑀬 𑀞𑀺𑀢𑀸. 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀧𑀭𑀺𑀕𑁆𑀕𑀬𑁆𑀳 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺.

𑁧𑁨𑁫. 𑀭𑀽𑀧𑀧𑀭𑀺𑀕𑁆𑀕𑀳𑁄𑀯 𑀓𑀣𑀺𑀢𑁄, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀢𑁄 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁, ‘‘𑀲𑀩𑁆𑀩𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀻𑀢𑀺 𑀅𑀤𑁆𑀥𑁂𑀓𑀸𑀤𑀲 𑀥𑀸𑀢𑀼𑀬𑁄 𑀭𑀽𑀧𑀓𑁆𑀔𑀦𑁆𑀥𑁄, 𑀅𑀤𑁆𑀥𑀝𑁆𑀞𑀫𑀸 𑀥𑀸𑀢𑀼𑀬𑁄 𑀬𑀣𑀸𑀭𑀳𑀁 𑀯𑁂𑀤𑀦𑀸𑀤𑀬𑁄 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀏𑀯𑀁 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀺. 𑀧𑀜𑁆𑀘𑀧𑀺 𑀔𑀦𑁆𑀥𑀸 𑀢𑀡𑁆𑀳𑀸𑀯𑀚𑁆𑀚𑀸 𑀤𑀼𑀓𑁆𑀔𑀲𑀘𑁆𑀘𑀁. 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁. 𑀦𑀺𑀭𑁄𑀥𑀧𑀚𑀸𑀦𑀦𑀸𑀢𑀺 𑀧𑀜𑁆𑀜𑀸𑀲𑀻𑀲𑁂𑀦 𑀫𑀕𑁆𑀕𑀓𑀺𑀘𑁆𑀘𑀫𑀸𑀳. 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀫𑀼𑀔𑁄 𑀳𑀺 𑀅𑀭𑀺𑀬𑀫𑀕𑁆𑀕𑁄. 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑀁 𑀳𑁄𑀢𑀺 𑀲𑀫𑁆𑀫𑀲𑀦𑀲𑁆𑀲 𑀪𑀽𑀫𑀺𑀬𑀸 𑀦𑀺𑀧𑁆𑀨𑀢𑁆𑀢𑀺𑀬𑀸 𑀘 𑀓𑀣𑀺𑀢𑀢𑁆𑀢𑀸. 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀜𑀸𑀡𑀤𑀲𑁆𑀲𑀦𑀁 𑀓𑀣𑀺𑀢𑀁 𑀢𑀁 𑀧𑀦 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀤𑀼𑀯𑀺𑀥𑀦𑁆𑀢𑀺 𑀢𑀤𑀼𑀪𑀬𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀯𑀼𑀢𑁆𑀢𑁄’’𑀢𑀺.

𑀏𑀢𑁆𑀢𑀸𑀯𑀢𑀸𑀧𑀺 𑀔𑁄𑀢𑀺 𑀧𑀺-𑀲𑀤𑁆𑀤𑀕𑁆𑀕𑀳𑀡𑁂𑀦 𑀅𑀜𑁆𑀜𑁂𑀦 𑀧𑀭𑀺𑀬𑀸𑀬𑁂𑀦 𑀲𑀢𑁆𑀣𑀸 𑀥𑀸𑀢𑀼𑀓𑁄𑀲𑀮𑁆𑀮𑀁 𑀤𑁂𑀲𑁂𑀢𑀼𑀓𑀸𑀫𑁄𑀢𑀺 𑀣𑁂𑀭𑁄, ‘‘𑀲𑀺𑀬𑀸 𑀧𑀦, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀢𑀻𑀢𑀺 𑀪𑀕𑀯𑀸 𑀧𑀣𑀯𑀻𑀥𑀸𑀢𑀼𑀆𑀤𑀺𑀯𑀲𑁂𑀦𑀧𑀺 𑀥𑀸𑀢𑀼𑀓𑁄𑀲𑀮𑁆𑀮𑀁 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀧𑀣𑀯𑀻𑀥𑀸𑀢𑀼𑀆𑀤𑀺𑀲𑀤𑁆𑀤𑁂𑀦 𑀤𑁂𑀲𑀦𑀸𑀓𑀸𑀭𑀡𑀁 𑀯𑀺𑀪𑀸𑀯𑁂𑀦𑁆𑀢𑁄, ‘‘𑀧𑀣𑀯𑀻𑀥𑀸𑀢𑀼…𑀧𑁂… 𑀯𑀼𑀢𑁆𑀢𑀸’’𑀢𑀺 𑀆𑀳. 𑀢𑀸𑀧𑀺 𑀳𑀺 𑀆𑀤𑀺𑀢𑁄 𑀙 𑀥𑀸𑀢𑀼𑀬𑁄. ‘‘𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑁆𑀯𑀸 𑀧𑀽𑀭𑁂𑀢𑀩𑁆𑀩𑀸’’𑀢𑀺 𑀯𑀢𑁆𑀯𑀸 𑀓𑀣𑀁 𑀭𑀽𑀧𑀥𑀸𑀢𑀼𑀬𑁄 𑀦𑀻𑀳𑀭𑀻𑀬𑀦𑁆𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 𑀢𑀁 𑀦𑀬𑀁 𑀤𑀲𑁆𑀲𑁂𑀢𑀼𑀁, ‘‘𑀯𑀺𑀜𑁆𑀜𑀸𑀡𑀥𑀸𑀢𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀆𑀭𑀫𑁆𑀫𑀡𑀁 𑀨𑁄𑀝𑁆𑀞𑀩𑁆𑀩𑀥𑀸𑀢𑀼𑀧𑀣𑀯𑀻𑀥𑀸𑀢𑀼 𑀆𑀤𑀺𑀯𑀲𑁂𑀦 𑀤𑁂𑀲𑀦𑀸𑀭𑀼𑀴𑀫𑁂𑀯, 𑀓𑀸𑀬𑀥𑀸𑀢𑀼 𑀧𑀦 𑀦𑀻𑀳𑀭𑀺𑀢𑀩𑁆𑀩𑀸𑀢𑀺 𑀏𑀓𑀁𑀲𑀫𑁂𑀯 𑀦𑀻𑀳𑀭𑀡𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸’’𑀢𑀺 𑀆𑀳. 𑀧𑀼𑀭𑀺𑀫𑀧𑀘𑁆𑀙𑀺𑀫𑀯𑀲𑁂𑀦 𑀫𑀦𑁄𑀥𑀸𑀢𑀽𑀢𑀺 𑀧𑀘𑁆𑀙𑀺𑀫𑀪𑀸𑀕𑀯𑀲𑁂𑀦 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼 𑀕𑀳𑁂𑀢𑀩𑁆𑀩𑀸 𑀢𑀲𑁆𑀲𑀸𑀦𑀼𑀭𑀽𑀧𑀪𑀸𑀯𑀢𑁄. 𑀦𑀦𑀼 𑀘𑁂𑀢𑁆𑀣 𑀫𑀦𑁄𑀥𑀸𑀢𑀼 𑀦𑀸𑀫𑀸𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀅𑀲𑀁𑀲𑀝𑁆𑀞𑀸, 𑀯𑀺𑀲𑀼𑀁𑀬𑁂𑀯 𑀘𑁂𑀲𑀸 𑀥𑀸𑀢𑀽𑀢𑀺? 𑀲𑀘𑁆𑀘𑀫𑁂𑀢𑀁 𑀅𑀝𑁆𑀞𑀸𑀭𑀲𑀥𑀸𑀢𑀼𑀤𑁂𑀲𑀦𑀸𑀬, 𑀘𑀺𑀢𑁆𑀢𑀯𑀺𑀪𑀢𑁆𑀢𑀺𑀦𑀺𑀤𑁆𑀤𑁂𑀲𑁂 𑀙𑀯𑀺𑀜𑁆𑀜𑀸𑀡𑀓𑀸𑀬𑀤𑁂𑀲𑀦𑀸𑀬𑀁 𑀧𑀦 𑀲𑀸 𑀫𑀦𑁄𑀯𑀺𑀜𑁆𑀜𑀸𑀡𑀓𑀸𑀬𑀲𑀗𑁆𑀕𑀳𑀺𑀢𑀸𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁫𑁧𑁭) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀯𑀲𑁂𑀦𑀸𑀢𑀺 𑀧𑀼𑀭𑁂𑀘𑀭𑀸𑀦𑀼𑀘𑀭𑀯𑀲𑁂𑀦. 𑀫𑀦𑁄𑀥𑀸𑀢𑀽𑀢𑀺 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀕𑀳𑁂𑀢𑀩𑁆𑀩𑀸 𑀧𑀼𑀭𑁂𑀘𑀭𑀡𑀢𑁄, 𑀧𑀭𑀢𑁄 𑀉𑀧𑁆𑀧𑀚𑁆𑀚𑀦𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀅𑀦𑀦𑁆𑀢𑀭𑀁 𑀫𑀦𑁄𑀥𑀸𑀢𑀼𑀬𑀸, 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀬𑀸 𑀅𑀦𑀦𑁆𑀢𑀭𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀘.

𑀥𑀫𑁆𑀫𑀸𑀦𑀁 𑀬𑀸𑀯𑀤𑁂𑀯 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀯𑀺𑀪𑀸𑀯𑀦𑀢𑁆𑀣𑀸𑀬 𑀲𑀢𑁆𑀣𑀼 𑀥𑀸𑀢𑀼𑀤𑁂𑀲𑀦𑀸𑀢𑀺 𑀅𑀜𑁆𑀜𑁂𑀲𑀼 𑀲𑀪𑀸𑀯𑀥𑀸𑀭𑀡𑀸𑀤𑀺𑀅𑀢𑁆𑀣𑁂𑀲𑀼 𑀮𑀩𑁆𑀪𑀫𑀸𑀦𑁂𑀲𑀼𑀧𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀧𑀥𑀸𑀦𑁄𑀢𑀺 𑀆𑀳 𑁋 ‘‘𑀏𑀲𑀦𑀬𑁄 𑀲𑀩𑁆𑀩𑀢𑁆𑀣𑀸’’𑀢𑀺. 𑀲𑀧𑁆𑀧𑀝𑀺𑀧𑀓𑁆𑀔𑀯𑀲𑁂𑀦𑀸𑀢𑀺 𑀲𑀧𑁆𑀧𑀝𑀺𑀪𑀸𑀕𑀯𑀲𑁂𑀦 𑀲𑀼𑀔𑀁 𑀤𑀼𑀓𑁆𑀔𑁂𑀦 𑀲𑀧𑁆𑀧𑀝𑀺𑀪𑀸𑀕𑀁, 𑀤𑀼𑀓𑁆𑀔𑀁 𑀲𑀼𑀔𑁂𑀦, 𑀏𑀯𑀁 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀢𑀺. 𑀬𑀣𑀸 𑀲𑀼𑀔𑀸𑀤𑀻𑀦𑀁𑀬𑁂𑀯 𑀲𑀫𑀼𑀤𑀸𑀘𑀸𑀭𑁄 𑀯𑀺𑀪𑀽𑀢𑁄, 𑀦 𑀉𑀧𑁂𑀓𑁆𑀔𑀸𑀬, 𑀏𑀯𑀁 𑀭𑀸𑀕𑀸𑀤𑀻𑀦𑀁𑀬𑁂𑀯 𑀲𑀫𑀼𑀤𑀸𑀘𑀸𑀭𑁄 𑀯𑀺𑀪𑀽𑀢𑁄, 𑀦 𑀫𑁄𑀳𑀲𑁆𑀲, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀯𑀺𑀪𑀽𑀢𑀪𑀸𑀯𑁂𑀦𑀸’’𑀢𑀺. 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀭𑀺𑀕𑁆𑀕𑀳𑀺𑀢𑀸𑀯 𑀳𑁄𑀢𑀺 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀲𑁂𑀲𑀸𑀲𑀼 𑀲𑁄𑀫𑀦𑀲𑁆𑀲𑀥𑀸𑀢𑀼𑀆𑀤𑀻𑀲𑀼, 𑀧𑀭𑀺𑀕𑁆𑀕𑀳𑀺𑀢𑀸𑀯 𑀳𑁄𑀢𑀺 𑀅𑀯𑀺𑀦𑀸𑀪𑀸𑀯𑀢𑁄 𑀏𑀯. 𑀦 𑀳𑀺 𑀲𑁄𑀫𑀦𑀲𑁆𑀲𑀸𑀤𑀬𑁄 𑀫𑀦𑁄𑀥𑀸𑀢𑀼𑀬𑀸 𑀯𑀺𑀦𑀸 𑀯𑀢𑁆𑀢𑀦𑁆𑀢𑀺. 𑀉𑀧𑁂𑀓𑁆𑀔𑀸𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑁆𑀯𑀸𑀢𑀺 𑀏𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀆𑀤𑀬𑁄 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄 𑀢𑀸𑀲𑀁 𑀯𑀢𑁆𑀣𑀸𑀭𑀫𑁆𑀫𑀡𑀪𑀽𑀢𑀸 𑀘𑀓𑁆𑀔𑀼𑀥𑀸𑀢𑀼𑀆𑀤𑀬𑁄 𑀘𑀸𑀢𑀺 𑀅𑀝𑁆𑀞 𑀭𑀽𑀧𑀥𑀸𑀢𑀼𑀬𑁄, 𑀫𑀦𑁄𑀥𑀸𑀢𑀼, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀏𑀯 𑀥𑀫𑁆𑀫𑀥𑀸𑀢𑀽𑀢𑀺 𑀏𑀯𑀁 𑀧𑀦𑁆𑀦𑀭𑀲 𑀥𑀸𑀢𑀼𑀬𑁄 𑀉𑀧𑁂𑀓𑁆𑀔𑀸𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑀩𑁆𑀩𑀸. 𑀲𑁄𑀫𑀦𑀲𑁆𑀲𑀥𑀸𑀢𑀼𑀆𑀤𑀬𑁄 𑀧𑀦 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀥𑀫𑁆𑀫𑀥𑀸𑀢𑀼𑀅𑀦𑁆𑀢𑁄𑀕𑀥𑀸, 𑀏𑀯𑀁 𑀲𑀼𑀔𑀥𑀸𑀢𑀼𑀢𑁄 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀲𑁆𑀲𑀸 𑀯𑀢𑁆𑀣𑀸𑀭𑀫𑁆𑀫𑀡𑀪𑀽𑀢𑀸𑀦𑀁 𑀓𑀸𑀬𑀥𑀸𑀢𑀼𑀨𑁄𑀝𑁆𑀞𑀩𑁆𑀩𑀥𑀸𑀢𑀽𑀦𑀜𑁆𑀘 𑀦𑀻𑀳𑀭𑀡𑀸 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀦𑀬𑀸𑀢𑀺, ‘‘𑀉𑀧𑁂𑀓𑁆𑀔𑀸𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑁆𑀯𑀸 𑀧𑀽𑀭𑁂𑀢𑀩𑁆𑀩𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀇𑀥 𑀓𑀸𑀫𑀥𑀸𑀢𑀼𑀆𑀤𑀺𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸𑀢𑀺 ‘‘𑀓𑀸𑀫𑀥𑀸𑀢𑀼𑀆𑀤𑀻𑀦𑀁 𑀤𑁆𑀯𑁂𑀥𑀸𑀯𑀺𑀢𑀓𑁆𑀓𑁂 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳. 𑀢𑀢𑁆𑀣 𑀳𑀺 ‘‘𑀓𑀸𑀫𑀯𑀺𑀢𑀓𑁆𑀓𑁄𑀢𑀺 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄𑀢𑀺 𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄𑀢𑀺 𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄, 𑀦𑁂𑀓𑁆𑀔𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄, 𑀲𑁄 𑀬𑀸𑀯 𑀧𑀞𑀫𑀚𑁆𑀛𑀸𑀦𑀸 𑀯𑀝𑁆𑀝𑀢𑀺. 𑀅𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀲𑁄 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀞𑀫𑀚𑁆𑀛𑀸𑀦𑀸 𑀯𑀝𑁆𑀝𑀢𑀺. 𑀅𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄, 𑀲𑁄 𑀓𑀭𑀼𑀡𑀸𑀬 𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀞𑀫𑀚𑁆𑀛𑀸𑀦𑀸 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦𑀢𑁆𑀣𑁄 𑀅𑀪𑀺𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑁄 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀅𑀪𑀺𑀥𑀫𑁆𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀫𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑁆𑀯𑀸𑀢𑀺 𑀏𑀢𑁆𑀣 𑀓𑀸𑀫𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀭𑀽𑀧𑀥𑀸𑀢𑀼𑀆𑀤𑀬𑁄 𑀙, 𑀢𑀁𑀯𑀺𑀲𑀬𑀸 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄, 𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀘𑀓𑁆𑀔𑀼𑀥𑀸𑀢𑀼𑀆𑀤𑀬𑁄 𑀧𑀜𑁆𑀘𑀸𑀢𑀺 𑀅𑀝𑁆𑀞𑀸𑀭𑀲. 𑀦𑁂𑀓𑁆𑀔𑀫𑁆𑀫𑀥𑀸𑀢𑀼𑀆𑀤𑀬𑁄 𑀧𑀦 𑀥𑀫𑁆𑀫𑀥𑀸𑀢𑀼𑀅𑀦𑁆𑀢𑁄𑀕𑀥𑀸 𑀏𑀯.

𑀓𑀸𑀫𑀢𑀡𑁆𑀳𑀸𑀬 𑀯𑀺𑀲𑀬𑀪𑀽𑀢𑀸 𑀥𑀫𑁆𑀫𑀸 𑀓𑀸𑀫𑀥𑀸𑀢𑀽𑀢𑀺 𑀆𑀳 𑁋 ‘‘𑀧𑀜𑁆𑀘 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑀸 𑀓𑀸𑀫𑀥𑀸𑀢𑀽’’𑀢𑀺. 𑀢𑀣𑀸 𑀭𑀽𑀧𑀢𑀡𑁆𑀳𑀸𑀬 𑀯𑀺𑀲𑀬𑀪𑀽𑀢𑀸 𑀥𑀫𑁆𑀫𑀸 𑀭𑀽𑀧𑀥𑀸𑀢𑀼, 𑀅𑀭𑀽𑀧𑀢𑀡𑁆𑀳𑀸𑀬 𑀯𑀺𑀲𑀬𑀪𑀽𑀢𑀸 𑀥𑀫𑁆𑀫𑀸 𑀅𑀭𑀽𑀧𑀥𑀸𑀢𑀽𑀢𑀺 𑀆𑀳 𑁋 ‘‘𑀘𑀢𑁆𑀢𑀸𑀭𑁄 𑀅𑀭𑀽𑀧𑀸𑀯𑀘𑀭𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺. 𑀓𑀸𑀫𑀢𑀡𑁆𑀳𑀸 𑀓𑀸𑀫𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀏𑀯𑀁 𑀭𑀽𑀧𑀸𑀭𑀽𑀧𑀢𑀡𑁆𑀳𑀸 𑀭𑀽𑀧𑀸𑀭𑀽𑀧𑀁. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀢𑀸 𑀬𑀢𑁆𑀣 𑀅𑀯𑀘𑀭𑀦𑁆𑀢𑀺, 𑀢𑁂 𑀓𑀸𑀫𑀸𑀯𑀘𑀭𑀸𑀤𑀬𑁄𑀢𑀺 𑀏𑀯𑀁 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑀸𑀤𑀻𑀦𑀁 𑀓𑀸𑀫𑀢𑀡𑁆𑀳𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 𑀏𑀢𑁂𑀦 ‘‘𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀏𑀢𑁆𑀣𑀸𑀯𑀘𑀭𑀸’’𑀢𑀺𑀆𑀤𑀺𑀧𑀸𑀴𑀺𑀁 (𑀯𑀺𑀪. 𑁧𑁦𑁨𑁦) 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣𑀸𑀯𑀘𑀭𑀸𑀢𑀺 𑀅𑀯𑀻𑀘𑀺𑀧𑀭𑀦𑀺𑀫𑁆𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑁄𑀓𑀸𑀲𑀸𑀬 𑀓𑀸𑀫𑀢𑀡𑁆𑀳𑀸𑀬 𑀯𑀺𑀲𑀬𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀤𑁄𑀓𑀸𑀲𑀢𑀸 𑀘 𑀢𑀡𑁆𑀳𑀸𑀬 𑀢𑀦𑁆𑀦𑀺𑀦𑁆𑀦𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀭𑀺𑀧𑀼𑀡𑁆𑀡𑀅𑀝𑁆𑀞𑀸𑀭𑀲𑀥𑀸𑀢𑀼𑀓𑀢𑁆𑀢𑀸 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀦𑀁 ‘‘𑀓𑀸𑀫𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑁆𑀯𑀸 𑀧𑀽𑀭𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀥𑀫𑁆𑀫𑀥𑀸𑀢𑀼 𑀏𑀓𑀤𑁂𑀲𑀫𑀢𑁆𑀢𑀫𑁂𑀯 𑀳𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀥𑀫𑁆𑀫𑀸𑀢𑀺.

𑀲𑀫𑀸𑀕𑀦𑁆𑀢𑁆𑀯𑀸𑀢𑀺 𑀲𑀳𑀺𑀢𑀸 𑀳𑀼𑀢𑁆𑀯𑀸. 𑀬𑀢𑁆𑀢𑀓𑀜𑁆𑀳𑀺 𑀧𑀘𑁆𑀘𑀬𑀥𑀫𑁆𑀫𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀓𑀸𑀭𑀡𑀁, 𑀢𑀢𑁆𑀣 𑀢𑀦𑁆𑀦𑀺𑀩𑁆𑀩𑀢𑁆𑀢𑀦𑁂 𑀲𑀫𑀸𑀕𑀢𑀸 𑀯𑀺𑀬 𑀳𑁄𑀢𑀺 𑀯𑁂𑀓𑀮𑁆𑀮𑁂 𑀢𑀤𑀦𑀺𑀩𑁆𑀩𑀢𑁆𑀢𑀦𑀢𑁄. 𑀲𑀗𑁆𑀔𑀢𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑁆𑀯𑀸 𑀧𑀽𑀭𑁂𑀢𑀩𑁆𑀩𑀸 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀥𑀫𑁆𑀫𑀥𑀸𑀢𑀼𑀏𑀓𑀤𑁂𑀲𑀪𑀸𑀯𑀢𑁄.

𑁧𑁨𑁬. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀸 𑀫𑀬𑀁 𑀅𑀢𑁆𑀢𑀸𑀢𑀺 𑀕𑀳𑀡𑀁 𑀕𑀫𑀺𑀲𑁆𑀲𑀸𑀫𑀸𑀢𑀺 𑀇𑀫𑀺𑀦𑀸 𑀯𑀺𑀬 𑀅𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀸 𑀅𑀚𑁆𑀛𑀢𑁆𑀢𑀸, 𑀢𑁂𑀲𑀼 𑀪𑀯𑀸 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺. 𑀢𑀢𑁄 𑀩𑀳𑀺𑀪𑀽𑀢𑀸𑀦𑀺 𑀩𑀸𑀳𑀺𑀭𑀸𑀦𑀺. 𑀆𑀬𑀢𑀦𑀓𑀣𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁫𑁧𑁦, 𑁫𑁭𑁦, 𑁫𑁭𑁧) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺 𑀦 𑀯𑀺𑀢𑁆𑀣𑀸𑀭𑀺𑀢𑀸.

𑁧𑁨𑁭. 𑀅𑀯𑀺𑀚𑁆𑀚𑀫𑀸𑀦𑀁 𑀞𑀸𑀦𑀁 𑀅𑀝𑁆𑀞𑀸𑀦𑀁 (𑀅. 𑀦𑀺. 𑀝𑀻. 𑁧.𑁧.𑁨𑁬𑁮; 𑀯𑀺𑀪. 𑀫𑀽𑀮𑀝𑀻. 𑁮𑁦𑁯), 𑀦𑀢𑁆𑀣𑀺 𑀞𑀸𑀦𑀦𑁆𑀢𑀺 𑀯𑀸 𑀅𑀝𑁆𑀞𑀸𑀦𑀁. 𑀅𑀦𑀯𑀓𑀸𑀲𑁄𑀢𑀺 𑀏𑀢𑁆𑀣 𑀏𑀲𑁂𑀯 𑀦𑀬𑁄. 𑀢𑀤𑀢𑁆𑀣𑀦𑀺𑀕𑀫𑀦𑀫𑁂𑀯 𑀳𑀺 ‘‘𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀯𑀘𑀦𑀦𑁆𑀢𑀺. 𑀢𑁂𑀦𑀸𑀳 ‘‘𑀉𑀪𑀬𑁂𑀦𑀧𑀻’’𑀢𑀺𑀆𑀤𑀺. 𑀬𑀦𑁆𑀢𑀺 𑀓𑀸𑀭𑀡𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀳𑁂𑀢𑀼𑀅𑀢𑁆𑀣𑁄 𑀘 𑀓𑀸𑀭𑀡𑀢𑁆𑀣𑁄𑀢𑀺 𑀆𑀳 𑁋 ‘‘𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦𑀸’’𑀢𑀺. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀏𑀢𑁆𑀣 𑀤𑀺𑀝𑁆𑀞𑀺𑀲𑀫𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀦𑁆𑀦𑁄’’𑀢𑀺. 𑀓𑀼𑀢𑁄 𑀧𑀦𑀸𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺? 𑀮𑀺𑀗𑁆𑀕𑀢𑁄. 𑀮𑀺𑀗𑁆𑀕𑀜𑁆𑀳𑁂𑀢𑀁, 𑀬𑀤𑀺𑀤𑀁 𑀦𑀺𑀘𑁆𑀘𑀢𑁄 𑀉𑀧𑀕𑀫𑀦𑀧𑀝𑀺𑀓𑁆𑀔𑁂𑀧𑁄. 𑀘𑀢𑀼𑀪𑀽𑀫𑀓𑁂𑀲𑀽𑀢𑀺 𑀇𑀤𑀁 𑀘𑀢𑀼𑀢𑁆𑀣𑀪𑀽𑀫𑀓𑀲𑀗𑁆𑀔𑀸𑀭𑀸𑀦𑀁 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀺𑀲𑀬𑀪𑀸𑀯𑀽𑀧𑀕𑀫𑀦𑀢𑁄 𑀯𑀼𑀢𑁆𑀢𑀁; 𑀦 𑀧𑀦 𑀢𑁂 𑀆𑀭𑀩𑁆𑀪 𑀦𑀺𑀘𑁆𑀘𑀢𑁄 𑀉𑀧𑀕𑀫𑀦𑀲𑀩𑁆𑀪𑀸𑀯𑀢𑁄. 𑀯𑀓𑁆𑀔𑀢𑀺 𑀘 ‘‘𑀘𑀢𑀼𑀢𑁆𑀣𑀪𑀽𑀫𑀓𑀲𑀗𑁆𑀔𑀸𑀭𑀸 𑀧𑀦𑀸’’𑀢𑀺𑀆𑀤𑀺𑀦𑀸. 𑀅𑀪𑀺𑀲𑀗𑁆𑀔𑀢𑀲𑀗𑁆𑀔𑀸𑀭𑀅𑀪𑀺𑀲𑀗𑁆𑀔𑀭𑀡𑀓𑀲𑀗𑁆𑀔𑀸𑀭𑀸𑀦𑀁 𑀲𑀧𑁆𑀧𑀤𑁂𑀲𑀢𑁆𑀢𑀸 𑀦𑀺𑀧𑁆𑀧𑀤𑁂𑀲𑀲𑀗𑁆𑀔𑀸𑀭𑀕𑁆𑀕𑀳𑀡𑀢𑁆𑀣𑀁 ‘‘𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀮𑁄𑀓𑀼𑀢𑁆𑀢𑀭𑀲𑀗𑁆𑀔𑀸𑀭𑀸𑀦𑀁 𑀧𑀦 𑀦𑀺𑀯𑀢𑁆𑀢𑀦𑁂 𑀓𑀸𑀭𑀡𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀏𑀢𑀁 𑀓𑀸𑀭𑀡𑀁 𑀦𑀢𑁆𑀣𑀺 𑀲𑁂𑀢𑀼𑀖𑀸𑀢𑀢𑁆𑀢𑀸. 𑀢𑁂𑀚𑀼𑀲𑁆𑀲𑀤𑀢𑁆𑀢𑀸𑀢𑀺 𑀲𑀁𑀓𑀺𑀮𑁂𑀲𑀯𑀺𑀥𑀫𑀦𑀢𑁂𑀚𑀲𑁆𑀲 𑀅𑀥𑀺𑀓𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑁂 𑀕𑀫𑁆𑀪𑀻𑀭𑀪𑀸𑀯𑁂𑀦 𑀤𑀼𑀤𑁆𑀤𑀲𑀸. 𑀅𑀓𑀼𑀲𑀮𑀸𑀦𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀻𑀢𑀺 𑀇𑀤𑀁 𑀧𑀓𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀸𑀦𑀁 𑀲𑀢𑁆𑀢𑀸𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀫𑁆𑀧𑀺 𑀢𑁂 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀺.

𑀅𑀲𑀼𑀔𑁂 ‘‘𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀘 𑀇𑀥 𑀲𑀼𑀔𑀢𑁄 𑀉𑀧𑀕𑀫𑀦𑀲𑁆𑀲 𑀞𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀏𑀓𑀦𑁆𑀢…𑀧𑁂… 𑀯𑀼𑀢𑁆𑀢’’𑀦𑁆𑀢𑀺. 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 𑀧𑀥𑀸𑀦𑀤𑀺𑀝𑁆𑀞𑀺𑀫𑀸𑀳. 𑀤𑀺𑀝𑁆𑀞𑀺𑀬𑀸 𑀦𑀺𑀩𑁆𑀩𑀸𑀦𑀲𑁆𑀲 𑀅𑀯𑀺𑀲𑀬𑀪𑀸𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀏𑀯𑀸𑀢𑀺 ‘‘𑀓𑀲𑀺𑀡𑀸𑀤𑀺𑀧𑀡𑁆𑀡𑀢𑁆𑀢𑀺𑀲𑀗𑁆𑀕𑀳𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀘𑁆𑀙𑁂𑀤𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀲𑀗𑁆𑀔𑀸𑀭𑀸𑀦𑀁 𑀧𑀭𑀺𑀘𑁆𑀙𑀺𑀚𑁆𑀚𑀕𑀳𑀡𑀁. 𑀲𑁆𑀯𑀸𑀬𑀁 𑀬𑁂𑀲𑀁 𑀦𑀺𑀘𑁆𑀘𑀸𑀤𑀺𑀢𑁄 𑀉𑀧𑀕𑀫𑀦𑀁 𑀪𑀯𑀢𑀺 𑀢𑁂𑀲𑀁𑀬𑁂𑀯 𑀯𑀲𑁂𑀦 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀯𑀸𑀭𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀯𑀸𑀭𑁂𑀲𑀽𑀢𑀺 𑀦𑀺𑀘𑁆𑀘𑀸𑀤𑀺𑀲𑀩𑁆𑀩𑀯𑀸𑀭𑁂𑀲𑀼. 𑀧𑀼𑀣𑀼𑀚𑁆𑀚𑀦𑁄 𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀬𑀁 𑀬𑀁 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀉𑀧𑀕𑀘𑁆𑀙𑀢𑀺, 𑀢𑀁 𑀢𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀡𑁆𑀳𑀦𑁆𑀢𑁄 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁄 𑀢𑀁 𑀕𑀸𑀳𑀁 𑀢𑀁 𑀤𑀺𑀝𑁆𑀞𑀺𑀁 𑀯𑀺𑀦𑀺𑀯𑁂𑀞𑁂𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀲𑁆𑀫𑀸 𑀬𑀢𑁆𑀣 𑀕𑀸𑀳𑁄 𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀸𑀢𑀺 𑀘𑀢𑀼𑀢𑁆𑀣𑀪𑀽𑀫𑀓𑀲𑀗𑁆𑀔𑀸𑀭𑀸 𑀇𑀥 𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀦 𑀕𑀬𑁆𑀳𑀢𑀻𑀢𑀺 𑀅𑀢𑁆𑀣𑁄.

𑁧𑁨𑁮. 𑀧𑀼𑀢𑁆𑀢𑀲𑀫𑁆𑀩𑀦𑁆𑀥𑁂𑀦 𑀫𑀸𑀢𑀸𑀧𑀺𑀢𑀼𑀲𑀫𑀜𑁆𑀜𑀸, 𑀤𑀢𑁆𑀢𑀓𑀺𑀢𑁆𑀢𑀺𑀫𑀸𑀤𑀺𑀯𑀲𑁂𑀦𑀧𑀺 𑀧𑀼𑀢𑁆𑀢𑀯𑁄𑀳𑀸𑀭𑁄 𑀮𑁄𑀓𑁂 𑀤𑀺𑀲𑁆𑀲𑀢𑀺, 𑀲𑁄 𑀘 𑀔𑁄 𑀧𑀭𑀺𑀬𑀸𑀬𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑀲𑀺𑀤𑁆𑀥𑀁 𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀚𑀦𑀺𑀓𑀸 𑀯 𑀫𑀸𑀢𑀸 𑀚𑀦𑀓𑁄 𑀧𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀫𑀦𑀼𑀲𑁆𑀲𑀪𑀽𑀢𑁄𑀯 𑀔𑀻𑀡𑀸𑀲𑀯𑁄 𑀅𑀭𑀳𑀸𑀢𑀺 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀯𑀼𑀢𑁆𑀢𑀁. ‘‘𑀅𑀝𑁆𑀞𑀸𑀦𑀫𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀫𑀸𑀢𑀼𑀆𑀤𑀻𑀦𑀁𑀬𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑁂 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀪𑀩𑁆𑀩𑀪𑀸𑀯𑀤𑀲𑁆𑀲𑀦𑀢𑁄 𑀢𑀤𑀜𑁆𑀜𑀁 𑀅𑀭𑀺𑀬𑀲𑀸𑀯𑀓𑁄 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀻𑀢𑀺 𑀇𑀤𑀁 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯𑀸𑀢𑀺 𑀫𑀜𑁆𑀜𑀫𑀸𑀦𑁄 𑀯𑀤𑀢𑀺 𑁋 ‘‘𑀓𑀺𑀁 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸’’𑀢𑀺? ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀯𑀘𑀦𑀢𑁄, ‘‘𑀏𑀢𑀫𑁆𑀧𑀺 𑀅𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀘𑁂𑀧𑀺 𑀳𑀻’’𑀢𑀺𑀆𑀤𑀺. 𑀩𑀮𑀤𑀻𑀧𑀦𑀢𑁆𑀣𑀦𑁆𑀢𑀺 𑀲𑀤𑁆𑀥𑀸𑀤𑀺𑀩𑀮𑀲𑀫𑀦𑁆𑀦𑀸𑀕𑀫𑀤𑀻𑀧𑀦𑀢𑁆𑀣𑀁. 𑀅𑀭𑀺𑀬𑀫𑀕𑁆𑀕𑁂𑀦𑀸𑀕𑀢𑀲𑀤𑁆𑀥𑀸𑀤𑀺𑀩𑀮𑀯𑀲𑁂𑀦 𑀳𑀺 𑀅𑀭𑀺𑀬𑀲𑀸𑀯𑀓𑁄 𑀢𑀸𑀤𑀺𑀲𑀁 𑀲𑀸𑀯𑀚𑁆𑀚𑀁 𑀦 𑀓𑀭𑁄𑀢𑀺.

𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀻𑀢𑀺 𑀇𑀤𑀁 𑀅𑀢𑁆𑀣𑀦𑀺𑀧𑁆𑀨𑀸𑀤𑀓𑀸𑀦𑀺 𑀢𑁂𑀲𑀁 𑀧𑀼𑀩𑁆𑀩𑀪𑀸𑀕𑀺𑀬𑀸𑀦𑀺 𑀘 𑀓𑀸𑀭𑀡𑀸𑀦𑀺 𑀓𑀸𑀭𑀡𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀧𑀦 𑀲𑀩𑁆𑀩𑁂𑀲𑀁 𑀧𑀜𑁆𑀘𑀦𑁆𑀦𑀁 𑀲𑀳𑀬𑁄𑀕𑀓𑁆𑀔𑀫𑀢𑁄. 𑀆𑀓𑀸𑀭𑁂𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀅𑀦𑀼𑀲𑁆𑀲𑀸𑀯𑀦𑁂𑀦𑀸𑀢𑀺 𑀅𑀦𑀼𑀭𑀽𑀧𑀁 𑀲𑀸𑀯𑀦𑁂𑀦. 𑀪𑁂𑀤𑀲𑁆𑀲 𑀅𑀦𑀼𑀭𑀽𑀧𑀁 𑀬𑀣𑀸 𑀪𑁂𑀤𑁄 𑀳𑁄𑀢𑀺, 𑀏𑀯𑀁 𑀪𑀺𑀦𑁆𑀤𑀺𑀢𑀩𑁆𑀩𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀢𑁆𑀢𑀦𑁄 𑀯𑀘𑀦𑀲𑁆𑀲 𑀲𑀸𑀯𑀦𑁂𑀦 𑀯𑀺𑀜𑁆𑀜𑀸𑀧𑀦𑁂𑀦. 𑀢𑁂𑀦𑀸𑀳 ‘‘𑀦𑀦𑀼 𑀢𑀼𑀫𑁆𑀳𑁂’’𑀢𑀺𑀆𑀤𑀺. 𑀓𑀡𑁆𑀡𑀫𑀽𑀮𑁂 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸𑀢𑀺 𑀏𑀢𑁂𑀦 ‘‘𑀧𑀸𑀓𑀝𑀁 𑀓𑀢𑁆𑀯𑀸 𑀪𑁂𑀤𑀓𑀭𑀯𑀢𑁆𑀣𑀼𑀤𑀻𑀧𑀦𑀁 𑀯𑁄𑀳𑀸𑀭𑁄, 𑀢𑀢𑁆𑀣 𑀅𑀢𑁆𑀢𑀦𑁄 𑀦𑀺𑀘𑁆𑀙𑀺𑀢𑀫𑀢𑁆𑀣𑀁 𑀭𑀳𑀲𑁆𑀲𑀯𑀲𑁂𑀦 𑀯𑀺𑀜𑁆𑀜𑀸𑀧𑀦𑀁 𑀅𑀦𑀼𑀲𑁆𑀲𑀸𑀯𑀦’’𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀓𑀫𑁆𑀫𑀫𑁂𑀯 𑀉𑀤𑁆𑀤𑁂𑀲𑁄 𑀯𑀸 𑀧𑀫𑀸𑀡𑀦𑁆𑀢𑀺 𑀢𑁂𑀳𑀺 𑀲𑀗𑁆𑀖𑀪𑁂𑀤𑀲𑀺𑀤𑁆𑀥𑀺𑀢𑁄 𑀯𑀼𑀢𑁆𑀢𑀁, 𑀇𑀢𑀭𑁂 𑀧𑀦 𑀢𑁂𑀲𑀁 𑀧𑀼𑀩𑁆𑀩𑀪𑀸𑀕𑀪𑀽𑀢𑀸. 𑀢𑁂𑀦𑀸𑀳 ‘‘𑀯𑁄𑀳𑀸𑀭𑀸’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀯𑁄𑀳𑀸𑀭𑁂. 𑀘𑀼𑀢𑀺𑀅𑀦𑀦𑁆𑀢𑀭𑀁 𑀨𑀮𑀁 𑀅𑀦𑀦𑁆𑀢𑀭𑀁 𑀦𑀸𑀫, 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀸𑀦𑀺 𑀢𑀦𑁆𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀦𑁆𑀢𑀭𑀓𑀭𑀡𑀲𑀻𑀮𑀸𑀦𑀺, 𑀅𑀦𑀦𑁆𑀢𑀭𑀧𑁆𑀧𑀬𑁄𑀚𑀦𑀸𑀦𑀺 𑀘𑀸𑀢𑀺 𑀆𑀦𑀦𑁆𑀢𑀭𑀺𑀬𑀸𑀦𑀺, 𑀢𑀸𑀦𑀺 𑀏𑀯 ‘‘𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺.

𑀓𑀫𑁆𑀫𑀢𑁄𑀢𑀺 ‘‘𑀏𑀯𑀁 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀳𑁄𑀢𑀺, 𑀏𑀯𑀁 𑀅𑀦𑀦𑁆𑀢𑀭𑀺𑀬𑀓𑀫𑁆𑀫𑀲𑀤𑀺𑀲’’𑀦𑁆𑀢𑀺 𑀏𑀯𑀁 𑀓𑀫𑁆𑀫𑀯𑀺𑀪𑀸𑀕𑀢𑁄. 𑀤𑁆𑀯𑀸𑀭𑀢𑁄𑀢𑀺 𑀓𑀸𑀬𑀸𑀤𑀺𑀤𑁆𑀯𑀸𑀭𑀢𑁄. 𑀓𑀧𑁆𑀧𑀝𑁆𑀞𑀺𑀢𑀺𑀬𑀢𑁄𑀢𑀺 ‘‘𑀇𑀤𑀁 𑀓𑀧𑁆𑀧𑀝𑁆𑀞𑀺𑀢𑀺𑀓𑀯𑀺𑀧𑀸𑀓𑀁, 𑀇𑀤𑀁 𑀦 𑀓𑀧𑁆𑀧𑀝𑁆𑀞𑀺𑀢𑀺𑀓𑀯𑀺𑀧𑀸𑀓’’𑀦𑁆𑀢𑀺 𑀏𑀯𑀁 𑀓𑀧𑁆𑀧𑀝𑁆𑀞𑀺𑀢𑀺𑀬𑀯𑀺𑀪𑀸𑀕𑀢𑁄. 𑀧𑀸𑀓𑀸𑀢𑀺 ‘‘𑀇𑀤𑀫𑁂𑀢𑁆𑀣 𑀯𑀺𑀧𑀘𑁆𑀘𑀢𑀺, 𑀇𑀤𑀁 𑀦 𑀯𑀺𑀧𑀘𑁆𑀘𑀢𑀻’’𑀢𑀺 𑀯𑀺𑀧𑀘𑁆𑀘𑀦𑀯𑀺𑀪𑀸𑀕𑀢𑁄. 𑀲𑀸𑀥𑀸𑀭𑀡𑀸𑀤𑀻𑀳𑀻𑀢𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀢𑁄, 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀤𑀦𑀸𑀤𑀺𑀯𑀺𑀪𑀸𑀕𑀢𑁄 𑀘.

𑀬𑀲𑁆𑀫𑀸 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲𑁂𑀯 𑀘 𑀓𑀼𑀲𑀮𑀥𑀫𑁆𑀫𑀸𑀦𑀁 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀪𑀸𑀯𑀸𑀧𑀢𑁆𑀢𑀺, 𑀬𑀣𑀸 𑀢𑀁 𑀢𑀺𑀡𑁆𑀡𑀫𑁆𑀧𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑁄𑀥𑀺𑀢𑁆𑀢𑀬𑀦𑀺𑀩𑁆𑀩𑀢𑁆𑀢𑀺𑀬𑀁, 𑀏𑀯𑀁 𑀫𑀦𑀼𑀲𑁆𑀲𑀪𑀸𑀯𑁂 𑀞𑀺𑀢𑀲𑁆𑀲𑁂𑀯 𑀅𑀓𑀼𑀲𑀮𑀥𑀫𑁆𑀫𑀸𑀦𑀫𑁆𑀧𑀺 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀪𑀸𑀯𑀸𑀧𑀢𑁆𑀢𑀻𑀢𑀺 𑀆𑀳 ‘‘𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑁂𑀯𑀸’’𑀢𑀺. 𑀧𑀸𑀓𑀢𑀺𑀓𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀘 𑀓𑀼𑀲𑀮𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀧𑁆𑀧𑀢𑁆𑀢𑀺 𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 (𑀯𑀺. 𑀯. 𑀅𑀝𑁆𑀞. 𑁩) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀯𑀼𑀢𑁆𑀢𑁄 𑀘 𑀅𑀢𑁆𑀣𑁄 𑀲𑀫𑀸𑀦𑀚𑀸𑀢𑀺𑀬𑀲𑁆𑀲 𑀯𑀺𑀓𑁄𑀧𑀦𑁂 𑀓𑀫𑁆𑀫𑀁 𑀕𑀭𑀼𑀢𑀭𑀁, 𑀦 𑀢𑀣𑀸 𑀯𑀺𑀚𑀸𑀢𑀺𑀬𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸’’𑀢𑀺. 𑀮𑀺𑀗𑁆𑀕𑁂 𑀧𑀭𑀺𑀯𑀢𑁆𑀢𑁂 𑀘 𑀲𑁄 𑀏𑀯 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁄 𑀪𑀯𑀗𑁆𑀕𑀧𑁆𑀧𑀩𑀦𑁆𑀥𑁄, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀩𑀦𑁆𑀥𑁄 𑀘, 𑀦 𑀅𑀜𑁆𑀜𑁄𑀢𑀺 𑀆𑀳 ‘‘𑀅𑀧𑀺 𑀧𑀭𑀺𑀯𑀢𑁆𑀢𑀮𑀺𑀗𑁆𑀕’’𑀦𑁆𑀢𑀺. 𑀅𑀭𑀳𑀦𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀲 𑀯𑀺𑀧𑀸𑀓𑀦𑁆𑀢𑀺𑀆𑀤𑀺 𑀓𑀫𑁆𑀫𑀲𑁆𑀲 𑀆𑀦𑀦𑁆𑀢𑀭𑀺𑀬𑀪𑀸𑀯𑀲𑀫𑀢𑁆𑀣𑀦𑀁, 𑀘𑀢𑀼𑀓𑁄𑀝𑀺𑀓𑀜𑁆𑀘𑁂𑀢𑁆𑀣 𑀲𑀫𑁆𑀪𑀯𑀢𑀺. 𑀢𑀢𑁆𑀣 𑀧𑀞𑀫𑀸 𑀓𑁄𑀝𑀺 𑀤𑀲𑁆𑀲𑀺𑀢𑀸, 𑀇𑀢𑀭𑀸𑀲𑀼 𑀯𑀺𑀲𑀗𑁆𑀓𑁂𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀬𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺𑀧𑀺 𑀢𑀢𑁆𑀣 𑀯𑀺𑀲𑀗𑁆𑀓𑁂𑀢𑁄, 𑀓𑀫𑁆𑀫𑀁 𑀧𑀦 𑀕𑀭𑀼𑀢𑀭𑀁 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀁 𑀪𑀸𑀬𑀺𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀆𑀦𑀦𑁆𑀢𑀭𑀺𑀬𑀁 𑀆𑀳𑀘𑁆𑀘𑁂𑀯 𑀢𑀺𑀝𑁆𑀞𑀢𑀻’’𑀢𑀺. 𑀅𑀬𑀁 𑀧𑀜𑁆𑀳𑁄𑀢𑀺 𑀜𑀸𑀧𑀦𑀺𑀘𑁆𑀙𑀸𑀦𑀺𑀩𑁆𑀩𑀢𑁆𑀢𑀸 𑀓𑀣𑀸.

𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦𑁂𑀯 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀦𑁄 𑀯𑀺𑀓𑁄𑀧𑀺𑀢𑀢𑁆𑀢𑀸. 𑀆𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀺 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀅𑀪𑀸𑀯𑀢𑁄. 𑀲𑀩𑁆𑀩𑀢𑁆𑀣 𑀳𑀺 𑀧𑀼𑀭𑀺𑀫𑀁 𑀅𑀪𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀁, 𑀯𑀥𑀓𑀘𑀺𑀢𑁆𑀢𑀁 𑀧𑀦 𑀢𑀤𑀸𑀭𑀫𑁆𑀫𑀡𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀆𑀦𑀦𑁆𑀢𑀭𑀺𑀬𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑁂 𑀧𑀫𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀗𑁆𑀕𑀸𑀫𑀘𑀢𑀼𑀓𑁆𑀓𑀁 𑀲𑀫𑁆𑀧𑀢𑁆𑀢𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀢𑁂𑀦𑁂𑀯𑀸𑀢𑀺 𑀢𑁂𑀦𑁂𑀯 𑀧𑀬𑁄𑀕𑁂𑀦. 𑀅𑀭𑀳𑀦𑁆𑀢𑀖𑀸𑀢𑁄 𑀳𑁄𑀢𑀺𑀬𑁂𑀯 𑀅𑀭𑀳𑀢𑁄 𑀫𑀸𑀭𑀺𑀢𑀢𑁆𑀢𑀸. 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀤𑀺𑀦𑁆𑀦𑀁 𑀳𑁄𑀢𑀻𑀢𑀺 𑀬𑀲𑁆𑀫𑀸 𑀬𑀣𑀸 𑀯𑀥𑀓𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀫𑁆𑀧𑀺 𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑀯𑀲𑁂𑀦 𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀦 𑀏𑀯𑀁 𑀘𑀸𑀕𑀘𑁂𑀢𑀦𑀸, 𑀲𑀸 𑀳𑀺 𑀘𑀚𑀺𑀢𑀩𑁆𑀩𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀚𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀅𑀜𑁆𑀜𑀲𑀦𑁆𑀢𑀓𑀪𑀸𑀯𑀓𑀭𑀡𑀜𑁆𑀘 𑀢𑀲𑁆𑀲 𑀘𑀚𑀦𑀁, 𑀢𑀲𑁆𑀫𑀸 𑀬𑀲𑁆𑀲 𑀢𑀁 𑀲𑀦𑁆𑀢𑀓𑀁 𑀓𑀢𑀁. 𑀢𑀲𑁆𑀲𑁂𑀯 𑀤𑀺𑀦𑁆𑀦𑀁 𑀳𑁄𑀢𑀻𑀢𑀺.

𑀮𑁄𑀳𑀺𑀢𑀁 𑀲𑀫𑁄 𑀲𑀭𑀢𑀻𑀢𑀺 𑀅𑀪𑀺𑀖𑀸𑀢𑁂𑀦 𑀧𑀓𑀼𑀧𑁆𑀧𑀫𑀸𑀦𑀁 𑀲𑀜𑁆𑀘𑀺𑀢𑀁 𑀳𑁄𑀢𑀺. 𑀫𑀳𑀦𑁆𑀢𑀢𑀭𑀦𑁆𑀢𑀺 𑀕𑀭𑀼𑀢𑀭𑀁. 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁂 𑀯𑀺𑀬𑀸𑀢𑀺 𑀲𑀢𑁆𑀣𑀼𑀭𑀽𑀧𑀓𑀸𑀬𑀧𑀝𑀺𑀚𑀕𑁆𑀕𑀦𑁂 𑀯𑀺𑀬.

𑀅𑀲𑀦𑁆𑀦𑀺𑀧𑀢𑀺𑀢𑁂𑀢𑀺 𑀇𑀤𑀁 𑀲𑀸𑀫𑀕𑁆𑀕𑀺𑀬𑀤𑀻𑀧𑀦𑀁. 𑀪𑁂𑀤𑁄 𑀘 𑀳𑁄𑀢𑀻𑀢𑀺 𑀲𑀗𑁆𑀖𑀲𑁆𑀲 𑀪𑁂𑀤𑁄 𑀳𑁄𑀢𑀺. 𑀯𑀝𑁆𑀝𑀢𑀻𑀢𑀺 𑀲𑀜𑁆𑀜𑀸𑀬𑀸𑀢𑀺 𑀈𑀤𑀺𑀲𑀓𑀭𑀡𑀁 𑀲𑀗𑁆𑀖𑀲𑁆𑀲 𑀪𑁂𑀤𑀸𑀬 𑀦 𑀳𑁄𑀢𑀻𑀢𑀺 𑀲𑀜𑁆𑀜𑀸𑀬. 𑀦𑀯𑀢𑁄 𑀊𑀦𑀧𑀭𑀺𑀲𑀸𑀬𑀁 𑀓𑀭𑁄𑀦𑁆𑀢𑀲𑁆𑀲 𑀢𑀣𑀸𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀢𑀣𑀸𑀢𑀺 𑀇𑀫𑀺𑀦𑀸 ‘‘𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀦𑁆𑀢𑀺’’ 𑀇𑀫𑀁 𑀆𑀓𑀟𑁆𑀠𑀢𑀺, 𑀦 𑀧𑀦 ‘‘𑀪𑁂𑀤𑁄 𑀳𑁄𑀢𑀻’’𑀢𑀺 𑀇𑀤𑀁. 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀳𑀺 𑀦𑀯𑀦𑁆𑀦𑀫𑁂𑀯 𑀯𑀲𑁂𑀦 𑀲𑀗𑁆𑀖𑀪𑁂𑀤𑁄. 𑀥𑀫𑁆𑀫𑀯𑀸𑀤𑀺𑀦𑁄 𑀅𑀦𑀯𑀚𑁆𑀚𑀸 𑀬𑀣𑀸𑀥𑀫𑁆𑀫𑀁 𑀅𑀯𑀝𑁆𑀞𑀸𑀦𑀢𑁄. 𑀲𑀗𑁆𑀖𑀪𑁂𑀤𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀲𑀗𑁆𑀖𑀭𑀸𑀚𑀺.

𑀓𑀸𑀬𑀤𑁆𑀯𑀸𑀭𑀫𑁂𑀯 𑀧𑀽𑀭𑁂𑀦𑁆𑀢𑀺 𑀓𑀸𑀬𑀓𑀫𑁆𑀫𑀪𑀸𑀯𑁂𑀦𑁂𑀯 𑀮𑀓𑁆𑀔𑀺𑀢𑀩𑁆𑀩𑀢𑁄.

‘‘𑀲𑀡𑁆𑀞𑀳𑀦𑁆𑀢𑁂 𑀳𑀺…𑀧𑁂… 𑀫𑀼𑀘𑁆𑀘𑀢𑀻’’𑀢𑀺 𑀇𑀤𑀁 𑀓𑀧𑁆𑀧𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. 𑀢𑀣𑀸 𑀳𑀺 𑀓𑀧𑁆𑀧𑀝𑁆𑀞𑀓𑀣𑀸𑀬𑀁 (𑀓𑀣𑀸. 𑀅𑀝𑁆𑀞. 𑁬𑁫𑁪-𑁬𑁫𑁭) 𑀯𑀼𑀢𑁆𑀢𑀁 𑁋 ‘‘𑀆𑀧𑀸𑀬𑀺𑀓𑁄𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀬𑀁 𑀲𑁄 𑀏𑀓𑀁 𑀓𑀧𑁆𑀧𑀁 𑀅𑀲𑀻𑀢𑀺𑀪𑀸𑀕𑁂 𑀓𑀢𑁆𑀯𑀸 𑀢𑀢𑁄 𑀏𑀓𑀪𑀸𑀕𑀫𑀢𑁆𑀢𑀁 𑀓𑀸𑀮𑀁 𑀢𑀺𑀝𑁆𑀞𑁂𑀬𑁆𑀬, 𑀢𑀁 𑀆𑀬𑀼𑀓𑀧𑁆𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯𑀸𑀢𑀺 𑀧𑀦 𑀆𑀬𑀼𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯𑀸𑀢𑀺 𑀅𑀢𑁆𑀣𑁂 𑀲𑀢𑀺 𑀦𑀢𑁆𑀣𑀺 𑀯𑀺𑀭𑁄𑀥𑁄. 𑀏𑀢𑁆𑀣 𑀘 𑀲𑀡𑁆𑀞𑀳𑀦𑁆𑀢𑁂𑀢𑀺 𑀇𑀤𑀫𑁆𑀧𑀺 ‘‘𑀲𑁆𑀯𑁂𑀯𑀯𑀺𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀯𑀺𑀬 𑀅𑀪𑀽𑀢𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀓𑀤𑀺𑀯𑀲𑀫𑁂𑀯 𑀦𑀺𑀭𑀬𑁂 𑀧𑀘𑁆𑀘𑀢𑀺 𑀢𑀢𑁄 𑀧𑀭𑀁 𑀓𑀧𑁆𑀧𑀸𑀪𑀸𑀯𑁂 𑀆𑀬𑀼𑀓𑀧𑁆𑀧𑀲𑁆𑀲𑀧𑀺 𑀅𑀪𑀸𑀯𑀢𑁄𑀢𑀺 𑀅𑀯𑀺𑀭𑁄𑀥𑀢𑁄 𑀅𑀢𑁆𑀣𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀲𑁂𑀲𑀸𑀦𑀻𑀢𑀺 𑀲𑀗𑁆𑀖𑀪𑁂𑀤𑀢𑁄 𑀅𑀜𑁆𑀜𑀸𑀦𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺.

𑀅𑀳𑁄𑀲𑀺𑀓𑀫𑁆𑀫𑀁…𑀧𑁂… 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀲𑀢𑀺 𑀓𑀣𑀁 𑀦𑁂𑀲𑀁 𑀆𑀦𑀦𑁆𑀢𑀭𑀺𑀬𑀢𑀸 𑀘𑀼𑀢𑀺𑀅𑀦𑀦𑁆𑀢𑀭𑀁 𑀯𑀺𑀧𑀸𑀓𑀤𑀸𑀦𑀸𑀪𑀸𑀯𑀢𑁄. 𑀅𑀣 𑀲𑀢𑀺 𑀨𑀮𑀤𑀸𑀦𑁂 𑀘𑀼𑀢𑀺𑀅𑀦𑀦𑁆𑀢𑀭𑁄 𑀏𑀯 𑀏𑀢𑁂𑀲𑀁 𑀨𑀮𑀓𑀸𑀮𑁄, 𑀦 𑀅𑀜𑁆𑀜𑁄𑀢𑀺 𑀨𑀮𑀓𑀸𑀮𑀦𑀺𑀬𑀫𑁂𑀦 𑀦𑀺𑀬𑀢𑀢𑀸 𑀦𑀺𑀘𑁆𑀙𑀺𑀢𑀸, 𑀦 𑀨𑀮𑀤𑀸𑀦𑀦𑀺𑀬𑀫𑁂𑀦, 𑀏𑀯𑀫𑁆𑀧𑀺 𑀦𑀺𑀬𑀢𑀨𑀮𑀓𑀸𑀮𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀦𑀜𑁆𑀘 𑀦𑀺𑀬𑀢𑀢𑀸 𑀆𑀧𑀚𑁆𑀚𑁂𑀬𑁆𑀬. 𑀢𑀲𑁆𑀫𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀦𑁆𑀢𑀭𑀯𑀺𑀓𑀮𑀢𑀸𑀤𑀻𑀳𑀺 𑀅𑀯𑀺𑀧𑀘𑁆𑀘𑀫𑀸𑀦𑀸𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀯𑀺𑀧𑀸𑀓𑀥𑀫𑁆𑀫𑀢𑀸 𑀯𑀺𑀬 𑀩𑀮𑀯𑀢𑀸 𑀆𑀦𑀦𑁆𑀢𑀭𑀺𑀬𑁂𑀦 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀅𑀯𑀺𑀧𑀘𑁆𑀘𑀫𑀸𑀦𑀸𑀦𑀫𑁆𑀧𑀺 𑀆𑀦𑀦𑁆𑀢𑀭𑀺𑀬𑀸𑀦𑀁 𑀨𑀮𑀤𑀸𑀦𑁂 𑀦𑀺𑀬𑀢𑀲𑀪𑀸𑀯𑀸 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀘 𑀧𑀯𑀢𑁆𑀢𑀻𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀨𑀮𑀤𑀸𑀦𑀦𑀺𑀬𑀫𑁂𑀦𑁂𑀯 𑀦𑀺𑀬𑀢𑀢𑀸 𑀆𑀦𑀦𑁆𑀢𑀭𑀺𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀲𑁆𑀲𑀜𑁆𑀘 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀢𑀢𑁄 𑀏𑀯 𑀦𑀺𑀬𑀢𑀲𑀪𑀸𑀯𑀸 𑀘 𑀢𑁂𑀲𑀁 𑀧𑀯𑀢𑁆𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀢𑀁 𑀅𑀜𑁆𑀜𑀲𑁆𑀲 𑀩𑀮𑀯𑀢𑁄 𑀆𑀦𑀦𑁆𑀢𑀭𑀺𑀬𑀲𑁆𑀲 𑀅𑀪𑀸𑀯𑁂 𑀘𑀼𑀢𑀺𑀅𑀦𑀦𑁆𑀢𑀭𑀁 𑀏𑀓𑀦𑁆𑀢𑁂𑀦 𑀨𑀮𑀤𑀸𑀦𑀢𑁄.

𑀦𑀦𑀼 𑀏𑀯𑀁 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀁 𑀅𑀜𑁆𑀜𑀲𑁆𑀫𑀺𑀁 𑀯𑀺𑀧𑀸𑀓𑀤𑀸𑀬𑀓𑁂 𑀅𑀲𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀫𑁂𑀓𑀦𑁆𑀢𑁂𑀦 𑀨𑀮𑀤𑀸𑀦𑀢𑁄 𑀦𑀺𑀬𑀢𑀲𑀪𑀸𑀯𑀸 𑀅𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀘 𑀧𑀯𑀢𑁆𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺. 𑀅𑀲𑀫𑀸𑀦𑀚𑀸𑀢𑀺𑀓𑁂𑀦 𑀘𑁂𑀢𑁄𑀧𑀡𑀺𑀥𑀺𑀯𑀲𑁂𑀦 𑀉𑀧𑀖𑀸𑀢𑀓𑁂𑀦 𑀘 𑀦𑀺𑀯𑀢𑁆𑀢𑁂𑀢𑀩𑁆𑀩𑀯𑀺𑀧𑀸𑀓𑀢𑁆𑀢𑀸 𑀅𑀦𑀦𑁆𑀢𑀭𑁂 𑀏𑀓𑀦𑁆𑀢𑀨𑀮𑀤𑀸𑀬𑀓𑀢𑁆𑀢𑀸𑀪𑀸𑀯𑀸. 𑀦 𑀧𑀦 𑀆𑀦𑀦𑁆𑀢𑀭𑀺𑀬𑀓𑀸𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀯𑀺𑀬 𑀅𑀲𑀫𑀸𑀦𑀚𑀸𑀢𑀺𑀓𑀁 𑀨𑀮𑀦𑀺𑀯𑀢𑁆𑀢𑀓𑀁 𑀅𑀢𑁆𑀣𑀺 𑀲𑀩𑁆𑀩𑀸𑀦𑀦𑁆𑀢𑀭𑀺𑀬𑀸𑀦𑀁 𑀅𑀯𑀻𑀘𑀺𑀨𑀮𑀢𑁆𑀢𑀸. 𑀦 𑀘 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀁 𑀇𑀘𑁆𑀙𑀢𑁄 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀬 𑀉𑀧𑀭𑀽𑀧𑀧𑀢𑁆𑀢𑀺𑀚𑀦𑀓𑀓𑀫𑁆𑀫𑀨𑀮𑀁 𑀆𑀦𑀦𑁆𑀢𑀭𑀺𑀬𑀨𑀮𑀁 𑀦𑀺𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑁄 𑀘𑁂𑀢𑁄𑀧𑀡𑀺𑀥𑀺 𑀅𑀢𑁆𑀣𑀺 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀅𑀯𑀻𑀘𑀺𑀧𑀸𑀢𑀦𑀢𑁄, 𑀦 𑀘 𑀆𑀦𑀦𑁆𑀢𑀭𑀺𑀬𑁄𑀧𑀖𑀸𑀢𑀓𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑁂𑀲𑀁𑀬𑁂𑀯 𑀅𑀦𑀦𑁆𑀢𑀭𑁂 𑀏𑀓𑀦𑁆𑀢𑀯𑀺𑀧𑀸𑀓𑀚𑀦𑀓𑀲𑀪𑀸𑀯𑀸 𑀧𑀯𑀢𑁆𑀢𑀻𑀢𑀺. 𑀅𑀦𑁂𑀓𑀸𑀦𑀺 𑀘 𑀆𑀦𑀦𑁆𑀢𑀭𑀺𑀬𑀸𑀦𑀺 𑀓𑀢𑀸𑀦𑀺 𑀏𑀓𑀦𑁆𑀢𑁂𑀦𑁂𑀯 𑀯𑀺𑀧𑀸𑀓𑁂 𑀦𑀺𑀬𑀢𑀲𑀪𑀸𑀯𑀢𑁆𑀢𑀸 𑀉𑀧𑀭𑀢𑀸𑀯𑀺𑀧𑀘𑁆𑀘𑀦𑀲𑀪𑀸𑀯𑀸𑀲𑀗𑁆𑀓𑀢𑁆𑀢𑀸 𑀦𑀺𑀘𑁆𑀙𑀺𑀢𑀸𑀦𑀺 𑀲𑀪𑀸𑀯𑀢𑁄 𑀦𑀺𑀬𑀢𑀸𑀦𑁂𑀯. 𑀢𑁂𑀲𑀼 𑀧𑀦 𑀲𑀫𑀸𑀦𑀲𑀪𑀸𑀯𑁂𑀲𑀼 𑀏𑀓𑁂𑀦 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀇𑀢𑀭𑀸𑀦𑀺 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀢𑁂𑀦𑁂𑀯 𑀓𑀢𑀢𑁆𑀢𑀸 𑀦 𑀤𑀼𑀢𑀺𑀬𑀁 𑀢𑀢𑀺𑀬𑀁 𑀯𑀸 𑀧𑀝𑀺𑀲𑀦𑁆𑀥𑀺𑀁 𑀓𑀭𑁄𑀦𑁆𑀢𑀺. 𑀦 𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑀢𑁆𑀢𑀸𑀢𑀺 𑀦𑀢𑁆𑀣𑀺 𑀢𑁂𑀲𑀁 𑀆𑀦𑀦𑁆𑀢𑀭𑀺𑀬𑀓𑀢𑀸 𑀦𑀺𑀯𑀢𑁆𑀢𑀺; 𑀕𑀭𑀼𑀢𑀭𑀪𑀸𑀯𑁄 𑀧𑀦 𑀢𑁂𑀲𑀼 𑀮𑀩𑁆𑀪𑀢𑁂𑀯𑀸𑀢𑀺 𑀲𑀗𑁆𑀖𑀪𑁂𑀤𑀲𑁆𑀲 𑀲𑀺𑀬𑀸 𑀕𑀭𑀼𑀢𑀭𑀪𑀸𑀯𑁄𑀢𑀺, ‘‘𑀬𑁂𑀦…𑀧𑁂… 𑀯𑀺𑀧𑀘𑁆𑀘𑀢𑀻’’𑀢𑀺 𑀆𑀳. 𑀏𑀓𑀲𑁆𑀲 𑀧𑀦 𑀅𑀜𑁆𑀜𑀸𑀦𑀺 𑀉𑀧𑀢𑁆𑀣𑀫𑁆𑀪𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀻𑀢𑀺 𑀯𑀘𑀦𑁂𑀦 𑀇𑀢𑀭𑁂𑀲𑀁 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀢𑀸 𑀅𑀦𑀼𑀜𑁆𑀜𑀸𑀢𑀸 𑀯𑀺𑀬 𑀤𑀺𑀲𑁆𑀲𑀢𑀺. 𑀦𑁄 𑀯𑀸 𑀢𑀣𑀸 𑀲𑀻𑀮𑀯𑀢𑀻𑀢𑀺 𑀬𑀣𑀸 𑀧𑀺𑀢𑀸 𑀲𑀻𑀮𑀯𑀸, 𑀢𑀣𑀸 𑀲𑀻𑀮𑀯𑀢𑀻 𑀦𑁄 𑀯𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀘𑁂 𑀫𑀸𑀢𑀸 𑀲𑀻𑀮𑀯𑀢𑀻, 𑀫𑀸𑀢𑀼𑀖𑀸𑀢𑁄 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑀧𑀓𑀢𑀢𑁆𑀢𑁄𑀢𑀺 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀲𑀫𑀸𑀦𑀲𑀁𑀯𑀸𑀲𑀓𑁄𑀢𑀺 𑀅𑀧𑀸𑀭𑀸𑀚𑀺𑀓𑁄. 𑀲𑀫𑀸𑀦𑀲𑀻𑀫𑀸𑀬𑀦𑁆𑀢𑀺 𑀏𑀓𑀲𑀻𑀫𑀸𑀬𑀁.

𑀲𑀢𑁆𑀣𑀼𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄𑀢𑀺 𑀬𑀁 𑀲𑀢𑁆𑀣𑀸𑀭𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀁 𑀅𑀦𑀼𑀲𑀸𑀲𑀦𑀸𑀤𑀺, 𑀢𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄𑀢𑀺 𑀪𑀕𑀯𑀦𑁆𑀢𑀁 𑀧𑀘𑁆𑀘𑀓𑁆𑀔𑀸𑀬. 𑀅𑀜𑁆𑀜𑀁 𑀢𑀺𑀢𑁆𑀣𑀓𑀭𑀦𑁆𑀢𑀺 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁.

𑁧𑁨𑁯. 𑀅𑀪𑀺𑀚𑀸𑀢𑀺𑀆𑀤𑀺𑀲𑀼 (𑀅. 𑀦𑀺. 𑀝𑀻. 𑁧.𑁧.𑁨𑁭𑁭) 𑀧𑀓𑀧𑁆𑀧𑀦𑁂𑀦 𑀤𑁂𑀯𑀢𑀽𑀧𑀲𑀗𑁆𑀓𑀫𑀦𑀸𑀤𑀺𑀦𑀸 𑀚𑀸𑀢𑀘𑀓𑁆𑀓𑀯𑀸𑀴𑁂𑀦 𑀲𑀫𑀸𑀦𑀬𑁄𑀕𑀓𑁆𑀔𑁂𑀫𑀁 𑀤𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀞𑀸𑀦𑀁 𑀚𑀸𑀢𑀺𑀔𑁂𑀢𑁆𑀢𑀁, 𑀲𑀭𑀲𑁂𑀦𑁂𑀯 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀆𑀡𑀸𑀔𑁂𑀢𑁆𑀢𑀁, 𑀯𑀺𑀲𑀬𑀪𑀽𑀢𑀁 𑀞𑀸𑀦𑀁 𑀯𑀺𑀲𑀬𑀔𑁂𑀢𑁆𑀢𑀁. 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀽𑀢𑀺 𑀇𑀫𑀸𑀬 𑀮𑁄𑀓𑀥𑀸𑀢𑀼𑀬𑀸 𑀲𑀤𑁆𑀥𑀺𑀁 𑀇𑀫𑀁 𑀮𑁄𑀓𑀥𑀸𑀢𑀼𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼. 𑀢𑀢𑁆𑀢𑀓𑀸𑀦𑀁𑀬𑁂𑀯 𑀚𑀸𑀢𑀺𑀔𑁂𑀢𑁆𑀢𑀪𑀸𑀯𑁄 𑀥𑀫𑁆𑀫𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀭𑀺𑀕𑁆𑀕𑀳𑀯𑀲𑁂𑀦𑀸’’𑀢𑀺 𑀓𑁂𑀘𑀺. ‘‘𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀢𑀢𑁆𑀢𑀓𑀁 𑀏𑀯 𑀚𑀸𑀢𑀺𑀔𑁂𑀢𑁆𑀢𑀁 𑀢𑀦𑁆𑀦𑀺𑀯𑀸𑀲𑀻𑀦𑀁𑀬𑁂𑀯 𑀘 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄’’𑀢𑀺 𑀘 𑀯𑀤𑀦𑁆𑀢𑀺. 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑀓𑀸𑀮𑀸𑀤𑀻𑀦𑀁 𑀙𑀦𑁆𑀦𑀁 𑀏𑀯 𑀕𑀳𑀡𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀫𑀳𑀸𑀪𑀺𑀦𑀻𑀳𑀸𑀭𑀸𑀤𑀺𑀓𑀸𑀮𑁂𑀧𑀺 𑀢𑀲𑁆𑀲 𑀧𑀓𑀫𑁆𑀧𑀦𑀲𑁆𑀲 𑀮𑀩𑁆𑀪𑀫𑀸𑀦𑀢𑁄. 𑀆𑀡𑀸𑀔𑁂𑀢𑁆𑀢𑀁 𑀦𑀸𑀫 𑀬𑀁 𑀏𑀓𑀚𑁆𑀛𑀁 𑀲𑀁𑀯𑀝𑁆𑀝𑀢𑀺 𑀘 𑀯𑀺𑀯𑀝𑁆𑀝𑀢𑀺 𑀘. 𑀆𑀡𑀸 𑀯𑀢𑁆𑀢𑀢𑀺 𑀆𑀡𑀸𑀬 𑀢𑀦𑁆𑀦𑀺𑀯𑀸𑀲𑀻𑀦𑀁 𑀤𑁂𑀯𑀢𑀸𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀦𑁂𑀦, 𑀢𑀜𑁆𑀘 𑀔𑁄 𑀓𑁂𑀯𑀮𑀁 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁂𑀦𑁂𑀯, 𑀦 𑀅𑀥𑀺𑀧𑁆𑀧𑀸𑀬𑀯𑀲𑁂𑀦, 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀧𑀦 ‘‘𑀬𑀸𑀯𑀢𑀸 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁩.𑁮𑁧) 𑀯𑀘𑀦𑀢𑁄 𑀢𑀢𑁄 𑀧𑀭𑀫𑁆𑀧𑀺 𑀆𑀡𑀸 𑀧𑀯𑀢𑁆𑀢𑁂𑀬𑁆𑀬.

𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀻𑀢𑀺, ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺𑀁 (𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧; 𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫; 𑀫𑀺. 𑀧. 𑁪.𑁫.𑁧𑁧) 𑀇𑀫𑀺𑀲𑁆𑀲𑀁 𑀮𑁄𑀓𑀥𑀸𑀢𑀼𑀬𑀁 𑀞𑀢𑁆𑀯𑀸 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸, ‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀅𑀢𑁆𑀣𑁂𑀢𑀭𑀳𑀺 𑀅𑀜𑁆𑀜𑁂 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀪𑀕𑀯𑀢𑀸 𑀲𑀫𑀲𑀫𑀸 𑀲𑀫𑁆𑀩𑁄𑀥𑀺𑀬𑀦𑁆𑀢𑀺, 𑀏𑀯𑀁 𑀧𑀼𑀝𑁆𑀞𑁄 𑀅𑀳𑀁, 𑀪𑀦𑁆𑀢𑁂, 𑀦𑁄𑀢𑀺 𑀯𑀤𑁂𑀬𑁆𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁬𑁧), 𑀯𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁, ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀇𑀫𑀁 𑀲𑀼𑀢𑁆𑀢𑀁 (𑀤𑀻. 𑀦𑀺. 𑁩.𑁧𑁬𑁧; 𑀫𑀺. 𑀧. 𑁫.𑁧.𑁧) 𑀤𑀲𑁆𑀲𑁂𑀦𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀩𑀼𑀤𑁆𑀥𑀔𑁂𑀢𑁆𑀢𑀪𑀽𑀢𑀁 𑀇𑀫𑀁 𑀮𑁄𑀓𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀦𑀼𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑀢𑁄𑀢𑀺 𑀲𑀳, 𑀏𑀓𑀲𑁆𑀫𑀺𑀁 𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀓𑀸𑀮𑁄 𑀓𑀣𑀁 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀘𑀭𑀺𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀯𑀤𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀝𑁆𑀞𑀸𑀬. 𑀏𑀢𑁆𑀣𑀦𑁆𑀢𑀭𑁂𑀢𑀺 𑀘𑀭𑀺𑀫𑀪𑀯𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀢𑁂𑀲𑀁 𑀅𑀦𑁆𑀢𑀭𑁂.

𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦 𑀦𑀺𑀯𑀸𑀭𑀺𑀢𑀸, 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀻𑀡𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑁂𑀦 𑀳𑀺 𑀲𑀸𑀲𑀦𑀲𑁆𑀲 𑀑𑀲𑀓𑁆𑀓𑀺𑀢𑀢𑁆𑀢𑀸 𑀅𑀧𑀭𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀮𑀤𑁆𑀥𑀸𑀯𑀲𑀭𑀸 𑀳𑁄𑀢𑀺. 𑀧𑀝𑀺𑀧𑀤𑀸𑀢𑀺 𑀧𑀝𑀺𑀯𑁂𑀥𑀸𑀯𑀳𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸. ‘‘𑀧𑀭𑀺𑀬𑀢𑁆𑀢𑀺 𑀧𑀫𑀸𑀡’’𑀦𑁆𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀩𑁄𑀥𑀺𑀲𑀢𑁆𑀢𑀁 𑀦𑀺𑀤𑀲𑁆𑀲𑀦𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁, ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀢𑀬𑀺𑀤𑀁 𑀳𑀻𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀲𑁆𑀲 𑀞𑀺𑀢𑀺𑀜𑁆𑀳𑀺 𑀤𑀲𑁆𑀲𑁂𑀦𑁆𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀁 𑀦𑀺𑀤𑀲𑁆𑀲𑁂𑀢𑀺.

𑀫𑀸𑀢𑀺𑀓𑀸𑀬 𑀅𑀦𑁆𑀢𑀭𑀳𑀺𑀢𑀸𑀬𑀸𑀢𑀺, ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀬𑀧𑁆𑀧𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀧𑀸𑀴𑀺 𑀫𑀸𑀢𑀺𑀓𑀸, 𑀢𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀦𑀺𑀤𑀸𑀦𑀼𑀤𑁆𑀤𑁂𑀲𑀲𑀗𑁆𑀔𑀸𑀢𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀧𑀩𑁆𑀩𑀚𑁆𑀚𑀸𑀬𑀼𑀧𑀲𑀫𑁆𑀧𑀤𑀸𑀓𑀫𑁆𑀫𑁂𑀲𑀼 𑀘 𑀲𑀸𑀲𑀦𑀁 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀸𑀢𑀺𑀫𑁄𑀓𑁆𑀔𑁂 𑀥𑀭𑀦𑁆𑀢𑁂𑀬𑁂𑀯 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸 𑀘, 𑀏𑀯𑀁 𑀲𑀢𑀺 𑀢𑀤𑀼𑀪𑀬𑀁 𑀧𑀸𑀢𑀺𑀫𑁄𑀓𑁆𑀔𑁂 𑀅𑀦𑁆𑀢𑁄𑀕𑀥𑀁 𑀢𑀤𑀼𑀪𑀬𑀸𑀪𑀸𑀯𑁂 𑀧𑀸𑀢𑀺𑀫𑁄𑀓𑁆𑀔𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀢𑀬𑀺𑀤𑀁 𑀢𑀬𑀁 𑀲𑀸𑀲𑀦𑀲𑁆𑀲 𑀞𑀺𑀢𑀺𑀳𑁂𑀢𑀽𑀢𑀺 𑀆𑀳 𑁋 ‘‘𑀧𑀸𑀢𑀺𑀫𑁄𑀓𑁆𑀔𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀲𑀼 𑀞𑀺𑀢𑀸𑀲𑀼 𑀲𑀸𑀲𑀦𑀁 𑀢𑀺𑀝𑁆𑀞𑀢𑀻’’𑀢𑀺. 𑀬𑀲𑁆𑀫𑀸 𑀯𑀸 𑀉𑀧𑀲𑀫𑁆𑀧𑀤𑀸𑀥𑀻𑀦𑀁 𑀧𑀸𑀢𑀺𑀫𑁄𑀓𑁆𑀔𑀁, 𑀉𑀧𑀲𑀫𑁆𑀧𑀤𑀸 𑀘 𑀧𑀩𑁆𑀩𑀚𑁆𑀚𑀸𑀥𑀻𑀦𑀸, 𑀢𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑁂 𑀲𑀺𑀤𑁆𑀥𑁂, 𑀲𑀺𑀤𑁆𑀥𑀸𑀲𑀼 𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀲𑀼 𑀘 𑀲𑀸𑀲𑀦𑀁 𑀢𑀺𑀝𑁆𑀞𑀢𑀺. 𑀧𑀘𑁆𑀙𑀺𑀫𑀧𑀝𑀺𑀯𑁂𑀥𑀢𑁄 𑀳𑀺 𑀧𑀭𑀁 𑀧𑀝𑀺𑀯𑁂𑀥𑀲𑀸𑀲𑀦𑀁, 𑀧𑀘𑁆𑀙𑀺𑀫𑀲𑀻𑀮𑀢𑁄 𑀘 𑀧𑀭𑀁 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀁 𑀯𑀺𑀦𑀝𑁆𑀞𑀁 𑀦𑀸𑀫 𑀳𑁄𑀢𑀺. 𑀑𑀲𑀓𑁆𑀓𑀺𑀢𑀁 𑀦𑀸𑀫𑀸𑀢𑀺 𑀧𑀘𑁆𑀙𑀺𑀫𑀓𑀧𑀝𑀺𑀯𑁂𑀥𑀲𑀻𑀮𑀪𑁂𑀤𑀤𑁆𑀯𑀬𑀁 𑀏𑀓𑀢𑁄 𑀓𑀢𑁆𑀯𑀸 𑀢𑀢𑁄 𑀧𑀭𑀁 𑀯𑀺𑀦𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀢𑁂𑀦 𑀓𑀸𑀫𑀁 ‘‘𑀲𑀸𑀲𑀦𑀝𑁆𑀞𑀺𑀢𑀺𑀬𑀸 𑀧𑀭𑀺𑀬𑀢𑁆𑀢𑀺 𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀧𑀭𑀺𑀬𑀢𑁆𑀢𑀺 𑀧𑀦 𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀓𑀸𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀅𑀲𑀢𑀺 𑀅𑀧𑁆𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀢𑀲𑁆𑀫𑀸 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁 𑀲𑀸𑀲𑀦𑁄𑀲𑀓𑁆𑀓𑀦𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀢𑀬𑀺𑀤𑀁 𑀲𑀸𑀲𑀦𑁄𑀲𑀓𑁆𑀓𑀦𑀁 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑁄𑀲𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀢𑀻𑀡𑀺 𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀓𑀸𑀭𑀼𑀜𑁆𑀜𑀦𑁆𑀢𑀺 𑀧𑀭𑀺𑀤𑁂𑀯𑀦𑀓𑀸𑀭𑀼𑀜𑁆𑀜𑀁. 𑀚𑀫𑁆𑀩𑀼𑀤𑀻𑀧𑁂 𑀤𑀻𑀧𑀦𑁆𑀢𑀭𑁂𑀲𑀼 𑀤𑁂𑀯𑀦𑀸𑀕𑀩𑁆𑀭𑀳𑁆𑀫𑀮𑁄𑀓𑁂𑀲𑀼 𑀘 𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸 𑀞𑀺𑀢𑀸𑀦𑀁 𑀥𑀸𑀢𑀽𑀦𑀁 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀦𑀁, 𑀭𑀲𑁆𑀫𑀺𑀯𑀺𑀲𑁆𑀲𑀚𑁆𑀚𑀦𑀁, 𑀢𑀢𑁆𑀣 𑀢𑁂𑀚𑁄𑀥𑀸𑀢𑀼𑀬𑀸 𑀉𑀝𑁆𑀞𑀸𑀦𑀁, 𑀏𑀓𑀚𑀸𑀮𑀻𑀪𑀸𑀯𑁄 𑀘𑀸𑀢𑀺 𑀲𑀩𑁆𑀩𑀫𑁂𑀢𑀁 𑀲𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀘𑁆𑀙𑀭𑀺𑀬𑀢𑁆𑀢𑀸𑀢𑀺 𑀤𑁆𑀯𑀻𑀲𑀼𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀅𑀘𑁆𑀙𑀭𑀺𑀬𑀢𑁆𑀢𑀸𑀪𑀸𑀯𑀤𑁄𑀲𑀢𑁄𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀸 𑀦𑀸𑀫 𑀫𑀚𑁆𑀛𑁂 𑀪𑀺𑀦𑁆𑀦𑀁 𑀲𑀼𑀯𑀡𑁆𑀡𑀁 𑀯𑀺𑀬 𑀏𑀓𑀲𑀤𑀺𑀲𑀸𑀢𑀺 𑀢𑁂𑀲𑀁 𑀤𑁂𑀲𑀦𑀸𑀧𑀺 𑀏𑀓𑀭𑀲𑀸 𑀏𑀯𑀸𑀢𑀺 𑀆𑀳 𑁋 ‘‘𑀤𑁂𑀲𑀦𑀸𑀬 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄’’𑀢𑀺. 𑀏𑀢𑁂𑀦𑀧𑀺 𑀅𑀦𑀘𑁆𑀙𑀭𑀺𑀬𑀢𑁆𑀢𑀫𑁂𑀯 𑀲𑀸𑀥𑁂𑀢𑀺. 𑀯𑀺𑀯𑀸𑀤𑀪𑀸𑀯𑀢𑁄𑀢𑀺 𑀏𑀢𑁂𑀦 𑀯𑀺𑀯𑀸𑀤𑀸𑀪𑀸𑀯𑀢𑁆𑀣𑀁 𑀤𑁆𑀯𑁂 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁆𑀣𑀸𑀢𑀺 𑀫𑀺𑀮𑀺𑀦𑁆𑀤𑀧𑀜𑁆𑀳𑁂. 𑀏𑀓𑀁 𑀩𑀼𑀤𑁆𑀥𑀁 𑀥𑀸𑀭𑁂𑀢𑀻𑀢𑀺 𑀏𑀓𑀩𑀼𑀤𑁆𑀥𑀥𑀸𑀭𑀡𑀻. 𑀏𑀢𑁂𑀦 𑀏𑀯𑀁 𑀲𑀪𑀸𑀯𑀸 𑀏𑀢𑁂 𑀩𑀼𑀤𑁆𑀥𑀕𑀼𑀡𑀸, 𑀬𑁂𑀦 𑀤𑀼𑀢𑀺𑀬𑀩𑀼𑀤𑁆𑀥𑀕𑀼𑀡𑁂 𑀥𑀸𑀭𑁂𑀢𑀼𑀁 𑀅𑀲𑀫𑀢𑁆𑀣𑀸 𑀅𑀬𑀁 𑀮𑁄𑀓𑀥𑀸𑀢𑀽𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀬𑀯𑀺𑀲𑁂𑀲𑀦𑀺𑀧𑁆𑀨𑀦𑁆𑀦𑀸𑀦𑀜𑁆𑀳𑀺 𑀕𑀼𑀡𑀥𑀫𑁆𑀫𑀸𑀦𑀁 𑀪𑀸𑀭𑀺𑀬𑁄 𑀯𑀺𑀲𑁂𑀲𑁄 𑀦 𑀲𑀓𑁆𑀓𑀸 𑀥𑀸𑀭𑁂𑀢𑀼𑀦𑁆𑀢𑀺, ‘‘𑀦 𑀥𑀸𑀭𑁂𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀅𑀥𑀸𑀭𑀡𑀁 𑀧𑀭𑀺𑀬𑀸𑀬𑀦𑁆𑀢𑀭𑁂𑀦𑀧𑀺 𑀧𑀓𑀸𑀲𑁂𑀦𑁆𑀢𑁄 ‘‘𑀘𑀮𑁂𑀬𑁆𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀮𑁂𑀬𑁆𑀬𑀸𑀢𑀺 𑀧𑀭𑀺𑀧𑁆𑀨𑀦𑁆𑀤𑁂𑀬𑁆𑀬. 𑀓𑀫𑁆𑀧𑁂𑀬𑁆𑀬𑀸𑀢𑀺 𑀧𑀯𑁂𑀥𑁂𑀬𑁆𑀬. 𑀦𑀫𑁂𑀬𑁆𑀬𑀸𑀢𑀺 𑀏𑀓𑀧𑀲𑁆𑀲𑁂𑀦 𑀦𑀫𑁂𑀬𑁆𑀬. 𑀑𑀦𑀫𑁂𑀬𑁆𑀬𑀸𑀢𑀺 𑀑𑀲𑀻𑀤𑁂𑀬𑁆𑀬. 𑀯𑀺𑀦𑀫𑁂𑀬𑁆𑀬𑀸𑀢𑀺 𑀯𑀺𑀯𑀺𑀥𑀁 𑀇𑀢𑁄𑀘𑀺𑀢𑁄 𑀘 𑀦𑀫𑁂𑀬𑁆𑀬. 𑀯𑀺𑀓𑀺𑀭𑁂𑀬𑁆𑀬𑀸𑀢𑀺 𑀯𑀸𑀢𑁂𑀦 𑀣𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀧𑁆𑀧𑀓𑀺𑀭𑁂𑀬𑁆𑀬. 𑀯𑀺𑀥𑀫𑁂𑀬𑁆𑀬𑀸𑀢𑀺 𑀯𑀺𑀦𑀲𑁆𑀲𑁂𑀬𑁆𑀬. 𑀯𑀺𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀲𑀩𑁆𑀩𑀲𑁄 𑀯𑀺𑀤𑁆𑀥𑀲𑁆𑀢𑀸 𑀪𑀯𑁂𑀬𑁆𑀬. 𑀢𑀣𑀸𑀪𑀽𑀢𑀸 𑀘 𑀓𑀢𑁆𑀣𑀘𑀺 𑀦 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀆𑀳 ‘‘𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬𑀸’’𑀢𑀺.

𑀇𑀤𑀸𑀦𑀺 𑀢𑀢𑁆𑀣 𑀦𑀺𑀤𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀬𑀣𑀸, 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀼𑀧𑀸𑀤𑀺𑀓𑀸𑀢𑀺 𑀲𑀫𑀁 𑀉𑀤𑁆𑀥𑀁 𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀫𑀼𑀧𑀸𑀤𑀺𑀓𑀸, 𑀉𑀤𑀓𑀲𑁆𑀲 𑀉𑀧𑀭𑀺 𑀲𑀫𑀁 𑀕𑀸𑀫𑀺𑀦𑀻𑀢𑀺 𑀅𑀢𑁆𑀣𑁄. 𑀯𑀡𑁆𑀡𑁂𑀦𑀸𑀢𑀺 𑀲𑀡𑁆𑀞𑀸𑀦𑁂𑀦. 𑀧𑀫𑀸𑀡𑁂𑀦𑀸𑀢𑀺 𑀆𑀭𑁄𑀳𑁂𑀦. 𑀓𑀺𑀲𑀣𑀽𑀮𑁂𑀦𑀸𑀢𑀺 𑀓𑀺𑀲𑀣𑀽𑀮𑀪𑀸𑀯𑁂𑀦, 𑀧𑀭𑀺𑀡𑀸𑀳𑁂𑀦𑀸𑀢𑀺 𑀅𑀢𑁆𑀣𑁄.

𑀙𑀸𑀤𑁂𑀦𑁆𑀢𑀦𑁆𑀢𑀺 𑀭𑁄𑀘𑁂𑀦𑁆𑀢𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀁. 𑀢𑀦𑁆𑀤𑀻𑀓𑀢𑁄𑀢𑀺 𑀢𑁂𑀦 𑀪𑁄𑀚𑀦𑁂𑀦 𑀢𑀦𑁆𑀤𑀻𑀪𑀽𑀢𑁄. 𑀅𑀦𑁄𑀦𑀫𑀺𑀢𑀤𑀡𑁆𑀟𑀚𑀸𑀢𑁄𑀢𑀺 𑀬𑀸𑀯𑀤𑀢𑁆𑀣𑀁 𑀪𑁄𑀚𑀦𑁂𑀦 𑀑𑀦𑀫𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀦𑁄𑀦𑀫𑀺𑀢𑀤𑀡𑁆𑀟𑁄 𑀯𑀺𑀬 𑀚𑀸𑀢𑁄. 𑀲𑀓𑀺𑀁 𑀪𑀼𑀢𑁆𑀢𑁄 𑀯𑀫𑁂𑀬𑁆𑀬𑀸𑀢𑀺 𑀏𑀓𑀫𑁆𑀧𑀺 𑀆𑀮𑁄𑀧𑀁 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀯𑀫𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀻 𑀘𑀮𑀢𑀻𑀢𑀺 𑀥𑀫𑁆𑀫𑁂𑀦 𑀦𑀸𑀫 𑀧𑀣𑀯𑀻 𑀢𑀺𑀝𑁆𑀞𑁂𑀬𑁆𑀬. 𑀲𑀸 𑀓𑀺𑀁 𑀢𑁂𑀦𑁂𑀯 𑀘𑀮𑀢𑀺 𑀯𑀺𑀦𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀢𑀺. 𑀧𑀼𑀦 𑀣𑁂𑀭𑁄 ‘‘𑀭𑀢𑀦𑀁 𑀦𑀸𑀫 𑀮𑁄𑀓𑁂 𑀓𑀼𑀝𑀼𑀫𑁆𑀩𑀁 𑀲𑀦𑁆𑀥𑀸𑀭𑁂𑀦𑁆𑀢𑀁 𑀅𑀪𑀺𑀫𑀢𑀜𑁆𑀘 𑀮𑁄𑀓𑁂𑀦 𑀅𑀢𑁆𑀢𑀦𑁄 𑀕𑀭𑀼𑀲𑀪𑀸𑀯𑀢𑀸𑀬 𑀲𑀓𑀝𑀪𑀗𑁆𑀕𑀲𑁆𑀲 𑀓𑀸𑀭𑀡𑀁 𑀅𑀢𑀺𑀪𑀸𑀭𑀪𑀽𑀢𑀁 𑀤𑀺𑀝𑁆𑀞𑀁. 𑀏𑀯𑀁𑀥𑀫𑁆𑀫𑁄 𑀘 𑀳𑀺𑀢𑀲𑀼𑀔𑀯𑀺𑀲𑁂𑀲𑁂𑀳𑀺 𑀢𑀁𑀲𑀫𑀗𑁆𑀕𑀺𑀦𑀁 𑀥𑀸𑀭𑁂𑀦𑁆𑀢𑁄 𑀅𑀪𑀺𑀫𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀕𑀫𑁆𑀪𑀻𑀭𑀧𑁆𑀧𑀫𑁂𑀬𑁆𑀬𑀪𑀸𑀯𑁂𑀦 𑀕𑀭𑀼𑀲𑀪𑀸𑀯𑀢𑁆𑀢𑀸 𑀅𑀢𑀺𑀪𑀸𑀭𑀪𑀽𑀢𑁄 𑀧𑀣𑀯𑀻𑀘𑀮𑀦𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀇𑀥, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀓𑀝𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁂𑀦𑁂𑀯 𑀢𑀣𑀸𑀕𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑀸𑀤𑀺𑀓𑀸𑀮𑁂 𑀧𑀣𑀯𑀻𑀓𑀫𑁆𑀧𑀦𑀓𑀸𑀭𑀡𑀁 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀲𑀓𑀝𑀢𑁄 𑀭𑀢𑀦𑀦𑁆𑀢𑀺 𑀏𑀓𑀲𑁆𑀫𑀸, 𑀏𑀓𑀲𑁆𑀲 𑀯𑀸 𑀲𑀓𑀝𑀲𑁆𑀲 𑀭𑀢𑀦𑀁, 𑀢𑀲𑁆𑀫𑀸 𑀲𑀓𑀝𑀢𑁄 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀑𑀲𑀸𑀭𑀺𑀢𑀦𑁆𑀢𑀺 𑀉𑀘𑁆𑀘𑀸𑀭𑀺𑀢𑀁, 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀕𑁆𑀕𑁄𑀢𑀺 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀕𑁆𑀕𑁄.

𑀲𑀪𑀸𑀯𑀧𑀓𑀢𑀻𑀢𑀺 𑀲𑀪𑀸𑀯𑀪𑀽𑀢𑀸 𑀅𑀓𑀺𑀢𑁆𑀢𑀺𑀫𑀸 𑀧𑀓𑀢𑀺. 𑀓𑀸𑀭𑀡𑀫𑀳𑀦𑁆𑀢𑀢𑀸𑀬𑀸𑀢𑀺 𑀫𑀳𑀦𑁆𑀢𑁂𑀳𑀺 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑁂𑀳𑀺 𑀧𑀸𑀭𑀫𑀺𑀢𑀸𑀲𑀗𑁆𑀔𑀸𑀢𑁂𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀕𑀼𑀡𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀣𑀯𑀺𑀆𑀤𑀻𑀦𑀺 𑀫𑀳𑀦𑁆𑀢𑀸𑀦𑀺 𑀯𑀢𑁆𑀣𑀽𑀦𑀺, 𑀫𑀳𑀦𑁆𑀢𑀸 𑀘 𑀲𑀓𑁆𑀓𑀪𑀸𑀯𑀸𑀤𑀬𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀓𑁂𑀓𑀸 𑀏𑀯, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀫𑀳𑀦𑁆𑀢𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀓𑁄𑀯, 𑀓𑁄 𑀘 𑀢𑀲𑁆𑀲 𑀯𑀺𑀲𑀬𑁄? 𑀩𑀼𑀤𑁆𑀥𑀪𑀽𑀫𑀺, 𑀬𑀸𑀯𑀢𑀓𑀁 𑀯𑀸 𑀜𑁂𑀬𑁆𑀬𑀁. 𑀏𑀯𑀁 ‘‘𑀆𑀓𑀸𑀲𑁄 𑀯𑀺𑀬 𑀅𑀦𑀦𑁆𑀢𑀯𑀺𑀲𑀬𑁄 𑀪𑀕𑀯𑀸 𑀏𑀓𑁄𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑁄 𑀧𑀭𑀘𑀓𑁆𑀓𑀯𑀸𑀴𑁂𑀲𑀼 𑀤𑀼𑀢𑀺𑀬𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀇𑀫𑀺𑀦𑀸𑀯 𑀧𑀤𑁂𑀦𑀸𑀢𑀺 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺 𑀇𑀫𑀺𑀦𑀸 𑀏𑀯 𑀧𑀤𑁂𑀦. 𑀤𑀲𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀕𑀳𑀺𑀢𑀸𑀦𑀺 𑀚𑀸𑀢𑀺𑀔𑁂𑀢𑁆𑀢𑀢𑁆𑀢𑀸. 𑀏𑀓𑀘𑀓𑁆𑀓𑀯𑀸𑀴𑁂𑀦𑁂𑀯𑀸𑀢𑀺 𑀇𑀫𑀺𑀦𑀸 𑀏𑀓𑀘𑀓𑁆𑀓𑀯𑀸𑀴𑁂𑀦𑁂𑀯. 𑀬𑀣𑀸 𑁋 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀇𑀫𑀲𑁆𑀫𑀺𑀫𑁆𑀧𑀺 𑀘𑀓𑁆𑀓𑀯𑀸𑀴𑁂 𑀚𑀫𑁆𑀩𑀼𑀤𑀻𑀧𑁂𑀬𑁂𑀯, 𑀢𑀢𑁆𑀣𑀧𑀺 𑀫𑀚𑁆𑀛𑀺𑀫𑀧𑀤𑁂𑀲𑁂 𑀏𑀯𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺; 𑀏𑀯𑀁 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺 𑀚𑀸𑀢𑀺𑀔𑁂𑀢𑁆𑀢𑁂 𑀅𑀥𑀺𑀧𑁆𑀧𑁂𑀢𑁂𑀧𑀺 𑀇𑀫𑀺𑀦𑀸𑀯 𑀘𑀓𑁆𑀓𑀯𑀸𑀴𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺.

𑀯𑀺𑀯𑀸𑀤𑀽𑀧𑀘𑁆𑀙𑁂𑀤𑀢𑁄𑀢𑀺 𑀯𑀺𑀯𑀸𑀤𑀽𑀧𑀘𑁆𑀙𑁂𑀤𑀓𑀸𑀭𑀡𑀸. 𑀤𑁆𑀯𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀬𑁄 𑀯𑀺𑀯𑀸𑀤𑁄 𑀪𑀯𑁂𑀬𑁆𑀬, 𑀢𑀲𑁆𑀲 𑀅𑀦𑀼𑀧𑁆𑀧𑀸𑀤𑁄𑀬𑁂𑀯𑁂𑀢𑁆𑀣 𑀯𑀺𑀯𑀸𑀤𑀼𑀧𑀘𑁆𑀙𑁂𑀤𑁄. 𑀏𑀓𑀲𑁆𑀫𑀺𑀁 𑀤𑀻𑀧𑁂𑀢𑀺𑀆𑀤𑀺𑀦𑀸 𑀤𑀻𑀧𑀦𑁆𑀢𑀭𑁂𑀧𑀺 𑀏𑀓𑀚𑁆𑀛𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀕𑁂𑀯 𑀏𑀓𑀤𑀻𑀧𑁂𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀧𑀭𑀺𑀳𑀸𑀬𑁂𑀣𑀸𑀢𑀺 𑀘𑀓𑁆𑀓𑀯𑀸𑀴𑀲𑁆𑀲 𑀧𑀤𑁂𑀲𑁂 𑀏𑀯 𑀯𑀢𑁆𑀢𑀺𑀢𑀩𑁆𑀩𑀢𑁆𑀢𑀸 𑀧𑀭𑀺𑀳𑀸𑀬𑁂𑀬𑁆𑀬.

𑁧𑁩𑁦. 𑀫𑀦𑀼𑀲𑁆𑀲𑀢𑁆𑀢𑀦𑁆𑀢𑀺 𑀫𑀦𑀼𑀲𑁆𑀲𑀪𑀸𑀯𑁄 𑀢𑀲𑁆𑀲𑁂𑀯 𑀧𑀩𑁆𑀩𑀚𑁆𑀚𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀆𑀤𑀻𑀦𑀁 𑀬𑁄𑀕𑁆𑀕𑀪𑀸𑀯𑀢𑁄. 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀻𑀢𑀺 𑀧𑀼𑀭𑀺𑀲𑀪𑀸𑀯𑁄. 𑀳𑁂𑀢𑀽𑀢𑀺 𑀫𑀦𑁄𑀯𑀘𑀻𑀧𑀡𑀺𑀥𑀸𑀦𑀧𑀼𑀩𑁆𑀩𑀺𑀓𑀸 𑀳𑁂𑀢𑀼𑀲𑀫𑁆𑀧𑀤𑀸. 𑀲𑀢𑁆𑀣𑀸𑀭𑀤𑀲𑁆𑀲𑀦𑀦𑁆𑀢𑀺 𑀲𑀢𑁆𑀣𑀼𑀲𑀫𑁆𑀫𑀼𑀔𑀻𑀪𑀸𑀯𑁄. 𑀧𑀩𑁆𑀩𑀚𑁆𑀚𑀸𑀢𑀺 𑀓𑀫𑁆𑀫𑀓𑀺𑀭𑀺𑀬𑀯𑀸𑀤𑀻𑀲𑀼 𑀢𑀸𑀧𑀲𑁂𑀲𑀼, 𑀪𑀺𑀓𑁆𑀔𑀽𑀲𑀼 𑀯𑀸 𑀧𑀩𑁆𑀩𑀚𑁆𑀚𑀸. 𑀕𑀼𑀡𑀲𑀫𑁆𑀧𑀢𑁆𑀢𑀻𑀢𑀺 𑀅𑀪𑀺𑀜𑁆𑀜𑀸𑀤𑀺𑀕𑀼𑀡𑀲𑀫𑁆𑀧𑀤𑀸. 𑀅𑀥𑀺𑀓𑀸𑀭𑁄𑀢𑀺 𑀩𑀼𑀤𑁆𑀥𑀁 𑀉𑀤𑁆𑀤𑀺𑀲𑁆𑀲 𑀅𑀥𑀺𑀓𑁄 𑀲𑀓𑁆𑀓𑀸𑀭𑁄. 𑀙𑀦𑁆𑀤𑀢𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀉𑀤𑁆𑀤𑀺𑀲𑁆𑀲 𑀲𑀸𑀢𑀺𑀲𑀬𑁄 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑁄. 𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸𑀢𑀺 𑀏𑀢𑁂𑀲𑀁 𑀅𑀝𑁆𑀞𑀦𑁆𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀬𑁄𑀕𑁂𑀦. 𑀅𑀪𑀺𑀦𑀻𑀳𑀸𑀭𑁄𑀢𑀺 𑀓𑀸𑀬𑀧𑀡𑀺𑀥𑀸𑀦𑀁. 𑀲𑀫𑀺𑀚𑁆𑀛𑀢𑀻𑀢𑀺 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀘𑀭𑀺𑀬𑀸𑀧𑀺𑀝𑀓𑀯𑀡𑁆𑀡𑀦𑀸𑀬 (𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀫𑁂𑀯𑀸𑀢𑀺 𑀧𑀭𑀺𑀧𑀼𑀡𑁆𑀡𑀮𑀓𑁆𑀔𑀡𑀢𑀸𑀬 𑀲𑀢𑁆𑀢𑀼𑀲𑁆𑀲𑀤𑀸𑀤𑀻𑀳𑀺 𑀲𑀩𑁆𑀩𑀸𑀓𑀸𑀭𑁂𑀳𑀺 𑀲𑀫𑁆𑀧𑀦𑁆𑀦𑀫𑁂𑀯. 𑀦 𑀳𑀺 𑀇𑀢𑁆𑀣𑀺𑀬𑀸 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀢𑀸 𑀲𑀫𑁆𑀪𑀯𑀢𑀺, 𑀤𑀼𑀢𑀺𑀬𑀧𑀓𑀢𑀺 𑀘 𑀦𑀸𑀫 𑀧𑀞𑀫𑀧𑀓𑀢𑀺𑀢𑁄 𑀦𑀺𑀳𑀻𑀦𑀸 𑀏𑀯. 𑀢𑁂𑀦𑁂𑀯𑀸𑀳 𑀅𑀦𑀦𑁆𑀢𑀭𑀯𑀸𑀭𑁂 ‘‘𑀬𑀲𑁆𑀫𑀸’’𑀢𑀺𑀆𑀤𑀺.

𑀇𑀥 𑀧𑀼𑀭𑀺𑀲𑀲𑁆𑀲 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀢𑁄𑀢𑀺 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀧𑀼𑀭𑀺𑀲𑀪𑀽𑀢𑀲𑁆𑀲 𑀢𑀢𑁆𑀣 𑀩𑁆𑀭𑀳𑁆𑀫𑀮𑁄𑀓𑁂 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀦𑀢𑁄. 𑀢𑁂𑀦 𑀅𑀲𑀢𑀺𑀧𑀺 𑀧𑀼𑀭𑀺𑀲𑀮𑀺𑀗𑁆𑀕𑁂 𑀧𑀼𑀭𑀺𑀲𑀸𑀓𑀸𑀭𑀸 𑀩𑁆𑀭𑀳𑁆𑀫𑀸𑀦𑁄 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀁𑀬𑁂𑀯 𑀳𑀺 𑀧𑀼𑀭𑀺𑀲𑀸𑀓𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀬𑀁 𑀧𑀼𑀭𑀺𑀲𑁄 𑀩𑁆𑀭𑀳𑁆𑀫𑀢𑁆𑀢𑀁 𑀓𑀭𑁂𑀬𑁆𑀬𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀫𑀸𑀦𑁂𑀧𑀻’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀇𑀢𑁆𑀣𑀺𑀬𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀆𑀳 ‘‘𑀩𑁆𑀭𑀳𑁆𑀫𑀢𑁆𑀢’’𑀦𑁆𑀢𑀺𑀆𑀤𑀺.

𑁧𑁩𑁧. 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲𑀸𑀢𑀺𑀆𑀤𑀺𑀧𑀸𑀴𑀺𑀬𑀸 𑀓𑀫𑁆𑀫𑀦𑀺𑀬𑀸𑀫𑁄 𑀦𑀸𑀫 𑀓𑀣𑀺𑀢𑁄. 𑀲𑀫𑀜𑁆𑀚𑀦𑀁 𑀲𑀫𑀗𑁆𑀕𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀫𑀗𑁆𑀕𑀻, 𑀲𑀫𑀦𑁆𑀦𑀸𑀕𑀢𑁄. 𑀲𑀫𑀜𑁆𑀚𑀦𑀲𑀻𑀮𑁄 𑀯𑀸 𑀲𑀫𑀗𑁆𑀕𑀻. 𑀧𑀼𑀩𑁆𑀩𑀪𑀸𑀕𑁂 𑀆𑀬𑀽𑀳𑀦𑀲𑀫𑀗𑁆𑀕𑀺𑀢𑀸, 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸. 𑀘𑁂𑀢𑀦𑀸𑀲𑀦𑁆𑀢𑀢𑀺𑀯𑀲𑁂𑀦 𑀯𑀸 𑀆𑀬𑀽𑀳𑀦𑀲𑀫𑀗𑁆𑀕𑀺𑀢𑀸, 𑀢𑀁𑀢𑀁𑀘𑁂𑀢𑀦𑀸𑀔𑀡𑀯𑀲𑁂𑀦 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸. 𑀓𑀢𑀽𑀧𑀘𑀺𑀢𑀲𑁆𑀲 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀲𑁆𑀲 𑀯𑀲𑁂𑀦 𑀓𑀫𑁆𑀫𑀲𑀫𑀗𑁆𑀕𑀺𑀢𑀸, 𑀓𑀫𑁆𑀫𑁂 𑀧𑀦 𑀯𑀺𑀧𑀘𑁆𑀘𑀺𑀢𑀼𑀁 𑀆𑀭𑀤𑁆𑀥𑁂 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀯𑀺𑀧𑀸𑀓𑀲𑀫𑀗𑁆𑀕𑀺𑀢𑀸. 𑀓𑀫𑁆𑀫𑀸𑀤𑀻𑀦𑀁 𑀉𑀧𑀝𑁆𑀞𑀸𑀦𑀓𑀸𑀮𑀯𑀲𑁂𑀦 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸. 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂𑀢𑀺 𑀓𑀼𑀲𑀮𑀓𑀫𑁆𑀫𑀲𑁆𑀲 𑀘 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀘 𑀲𑀫𑀻𑀳𑀦𑀓𑁆𑀔𑀡𑁂. 𑀢𑀣𑀸𑀢𑀺 𑀇𑀫𑀺𑀦𑀸 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀧𑀤𑀁 𑀆𑀓𑀟𑁆𑀠𑀢𑀺. 𑀬𑀣𑀸 𑀓𑀢𑀁 𑀓𑀫𑁆𑀫𑀁 𑀨𑀮𑀤𑀸𑀦𑀲𑀫𑀢𑁆𑀣𑀁 𑀳𑁄𑀢𑀺, 𑀢𑀣𑀸 𑀓𑀢𑀁 𑀉𑀧𑀘𑀺𑀢𑀁. 𑀯𑀺𑀧𑀸𑀓𑀸𑀭𑀳𑀦𑁆𑀢𑀺 𑀤𑀼𑀢𑀺𑀬𑀪𑀯𑀸𑀤𑀻𑀲𑀼 𑀯𑀺𑀧𑀘𑁆𑀘𑀦𑀸𑀭𑀳𑀁. 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀻𑀢𑀺 𑀬𑁄𑀚𑀦𑀸. 𑀘𑀮𑀢𑀻𑀢𑀺 𑀧𑀭𑀺𑀯𑀢𑁆𑀢𑀢𑀺. 𑀏𑀓𑁂𑀦 𑀳𑀺 𑀓𑀫𑁆𑀫𑀼𑀦𑀸 𑀢𑀚𑁆𑀚𑁂 𑀦𑀺𑀫𑀺𑀢𑁆𑀢𑁂 𑀉𑀧𑀝𑁆𑀞𑀸𑀧𑀺𑀢𑁂 𑀧𑀘𑁆𑀘𑀬𑀯𑀺𑀲𑁂𑀲𑀯𑀲𑁂𑀦 𑀢𑀢𑁄 𑀅𑀜𑁆𑀜𑁂𑀦 𑀓𑀫𑁆𑀫𑀼𑀦𑀸 𑀅𑀜𑁆𑀜𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀧𑀭𑀺𑀯𑀢𑁆𑀢𑀦𑀁.

𑀲𑀼𑀦𑀔𑀚𑀻𑀯𑀺𑀓𑁄𑀢𑀺 𑀲𑀼𑀦𑀔𑁂𑀳𑀺 𑀚𑀻𑀯𑀦𑀲𑀻𑀮𑁄. 𑀢𑀮𑀲𑀦𑁆𑀣𑀭𑀡𑀧𑀽𑀚𑀦𑁆𑀢𑀺 𑀪𑀽𑀫𑀺𑀢𑀮𑀲𑁆𑀲 𑀧𑀼𑀧𑁆𑀨𑁂𑀳𑀺 𑀲𑀦𑁆𑀢𑀭𑀡𑀧𑀽𑀚𑀁. 𑀆𑀬𑀽𑀳𑀦𑀘𑁂𑀢𑀦𑀸𑀓𑀫𑁆𑀫𑀲𑀫𑀗𑁆𑀕𑀺𑀢𑀸𑀯𑀲𑁂𑀦𑀸𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀅𑀧𑀭𑀸𑀧𑀭𑀁 𑀆𑀬𑀽𑀳𑀦𑁂𑀦 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀢𑀲𑁆𑀲𑁂𑀯 𑀧𑀓𑀧𑁆𑀧𑀦𑁂 𑀓𑀫𑁆𑀫𑀓𑁆𑀔𑀬𑀓𑀭𑀜𑀸𑀡𑁂𑀦 𑀅𑀔𑁂𑀧𑀺𑀢𑀢𑁆𑀢𑀸 𑀬𑀣𑀽𑀧𑀘𑀺𑀢𑀓𑀫𑁆𑀫𑀼𑀦𑀸 𑀘 𑀲𑀫𑀗𑁆𑀕𑀺𑀪𑀸𑀯𑀲𑁆𑀲 𑀯𑀲𑁂𑀦.

𑁧𑁩𑁨. 𑀏𑀯𑀁 𑀲𑀲𑁆𑀲𑀺𑀭𑀺𑀓𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀦𑁂𑀓𑀥𑀸𑀢𑀼𑀯𑀺𑀪𑀚𑀦𑀸𑀤𑀺𑀦𑀸 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀢𑀸𑀬 𑀧𑀭𑀫𑀦𑀺𑀧𑀼𑀡𑀕𑀫𑁆𑀪𑀻𑀭𑀢𑀸𑀬 𑀘 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀲𑀲𑁄𑀪𑀁 𑀓𑀢𑁆𑀯𑀸.

𑀦𑀁 𑀥𑀸𑀭𑁂𑀳𑀻𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀥𑀸𑀢𑀼𑀆𑀤𑀺𑀯𑀲𑁂𑀦 𑀧𑀭𑀺𑀯𑀝𑁆𑀝𑀻𑀬𑀦𑁆𑀢𑀺 𑀅𑀢𑁆𑀣𑀸 𑀏𑀢𑁂𑀳𑀻𑀢𑀺 𑀧𑀭𑀺𑀯𑀝𑁆𑀝𑀸, 𑀤𑁂𑀲𑀦𑀸𑀪𑁂𑀤𑀸. 𑀘𑀢𑁆𑀢𑀸𑀭𑁄 𑀧𑀭𑀺𑀯𑀝𑁆𑀝𑀸 𑀏𑀢𑀲𑁆𑀲, 𑀏𑀢𑀲𑁆𑀫𑀺𑀁 𑀯𑀸𑀢𑀺 𑀘𑀢𑀼𑀧𑀭𑀺𑀯𑀝𑁆𑀝𑁄, 𑀥𑀫𑁆𑀫𑀧𑀭𑀺𑀬𑀸𑀬𑁄. 𑀥𑀫𑁆𑀫𑁄 𑀘 𑀲𑁄 𑀧𑀭𑀺𑀬𑀢𑁆𑀢𑀺𑀪𑀸𑀯𑀢𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀆𑀤𑀸𑀲𑁄𑀢𑀺 𑀥𑀫𑁆𑀫𑀸𑀤𑀸𑀲𑁄. 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀬𑀣𑀸𑀥𑀫𑁆𑀫𑀸𑀦𑀁 𑀆𑀤𑀸𑀲𑁄𑀢𑀺𑀧𑀺 𑀥𑀫𑁆𑀫𑀸𑀤𑀸𑀲𑁄. 𑀬𑀣𑀸 𑀳𑀺 𑀆𑀤𑀸𑀲𑁂𑀦 𑀲𑀢𑁆𑀢𑀸𑀦𑀁 𑀫𑀼𑀔𑁂 𑀫𑀮𑀤𑁄𑀲𑀳𑀭𑀡𑀁, 𑀏𑀯𑀁 𑀇𑀫𑀺𑀦𑀸𑀧𑀺 𑀲𑀼𑀢𑁆𑀢𑁂𑀦 𑀬𑁄𑀕𑀻𑀦𑀁 𑀫𑀼𑀔𑁂 𑀫𑀮𑀤𑁄𑀲𑀳𑀭𑀡𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀓𑀺𑀮𑁂𑀲𑁂 𑀫𑀤𑁆𑀤𑀺𑀢𑁆𑀯𑀸 𑀲𑀫𑀣𑀸𑀥𑀺𑀕𑀫𑁂𑀦 𑀬𑁄𑀕𑀺𑀦𑁄 𑀚𑀬𑀧𑁆𑀧𑀢𑁆𑀢𑀸; 𑀢𑀲𑁆𑀫𑀸 𑀅𑀫𑀢𑀧𑀼𑀭𑀧𑁆𑀧𑀯𑁂𑀲𑀦𑁂 𑀉𑀕𑁆𑀖𑁄𑀲𑀦𑀫𑀳𑀸𑀪𑁂𑀭𑀺𑀢𑀸𑀬 𑀘 𑀅𑀫𑀢𑀤𑀼𑀦𑁆𑀤𑀼𑀪𑀺. 𑀇𑀥 𑀯𑀼𑀢𑁆𑀢𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁. 𑀅𑀦𑀼𑀢𑁆𑀢𑀭𑁄 𑀲𑀗𑁆𑀕𑀸𑀫𑀯𑀺𑀚𑀬𑁄𑀢𑀺 𑀅𑀦𑀼𑀢𑁆𑀢𑀭𑀪𑀸𑀯𑀢𑁄 𑀓𑀺𑀮𑁂𑀲𑀲𑀗𑁆𑀕𑀸𑀫𑀯𑀺𑀚𑀬𑁄, ‘‘𑀯𑀺𑀚𑁂𑀢𑀺 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀩𑀳𑀼𑀥𑀸𑀢𑀼𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀇𑀲𑀺𑀕𑀺𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁩. 𑀲𑀫𑀜𑁆𑀜𑀸𑀬𑀢𑀺 𑀏𑀢𑀸𑀬𑀸𑀢𑀺 𑀲𑀫𑀜𑁆𑀜𑀸, 𑀦𑀸𑀫𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀫𑀬𑀁 𑀦𑀸𑀫𑀸𑀢𑀺 𑀧𑀜𑁆𑀜𑀸𑀧𑁂𑀦𑁆𑀢𑀺 𑀏𑀢𑀸𑀬, 𑀢𑀣𑀸𑀧𑀜𑁆𑀜𑀸𑀧𑀦𑀫𑀢𑁆𑀢𑀦𑁆𑀢𑀺 𑀯𑀸 𑀧𑀜𑁆𑀜𑀢𑁆𑀢𑀺, 𑀦𑀸𑀫𑀫𑁂𑀯. 𑀢𑁂𑀦𑀸𑀳 ‘‘𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀲𑁂𑀲𑁂𑀲𑀼𑀧𑀻𑀢𑀺 ‘‘𑀧𑀡𑁆𑀟𑀯𑀲𑁆𑀲 𑀧𑀩𑁆𑀩𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀢𑀻𑀲𑀼 𑀯𑀸𑀭𑁂𑀲𑀼𑀧𑀺.

𑀲𑀫𑀼𑀝𑁆𑀞𑀸𑀦𑀁 𑀢𑀸𑀯 𑀲𑀼𑀢𑁆𑀢𑀲𑁆𑀲 𑀓𑀣𑁂𑀢𑁆𑀯𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀓𑀸𑀢𑀼𑀁 ‘‘𑀢𑀤𑀸 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀧𑀩𑁆𑀩𑀢𑁂𑀳𑀺 𑀅𑀢𑁆𑀣𑁄𑀢𑀺 𑀦 𑀪𑀕𑀯𑀢𑁄 𑀧𑀩𑁆𑀩𑀢𑁂𑀳𑀺 𑀓𑀣𑀺𑀢𑁂𑀳𑀺 𑀅𑀢𑁆𑀣𑁄 𑀅𑀢𑁆𑀣𑀺. 𑀇𑀲𑀺𑀕𑀺𑀮𑀺𑀪𑀸𑀯𑁄𑀢𑀺 𑀇𑀲𑀺𑀕𑀺𑀮𑀺𑀦𑀸𑀫𑀢𑀸. 𑀇𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦, 𑀇𑀫𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀅𑀯𑁂𑀓𑁆𑀔𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀘𑁂𑀢𑀺𑀬𑀕𑀩𑁆𑀪𑁂𑀢𑀺 𑀘𑁂𑀢𑀺𑀬𑀖𑀭𑁂 𑀘𑁂𑀢𑀺𑀬𑀲𑁆𑀲 𑀅𑀩𑁆𑀪𑀦𑁆𑀢𑀭𑁂. 𑀬𑀫𑀓𑀫𑀳𑀸𑀤𑁆𑀯𑀸𑀭𑀦𑁆𑀢𑀺 𑀬𑀫𑀓𑀓𑀯𑀸𑀝𑀬𑀼𑀢𑁆𑀢𑀁 𑀫𑀳𑀦𑁆𑀢𑀁 𑀤𑁆𑀯𑀸𑀭𑀁. 𑀤𑁆𑀯𑁂𑀥𑀸 𑀓𑀢𑁆𑀯𑀸𑀢𑀺 𑀧𑀩𑁆𑀩𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀫𑀡𑁆𑀟𑀧𑀲𑀗𑁆𑀔𑁂𑀧𑁂𑀦 𑀮𑁂𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀤𑁆𑀯𑁂𑀥𑀸 𑀓𑀢𑁆𑀯𑀸 𑀢𑀤𑀸 𑀢𑁂 𑀢𑀢𑁆𑀣 𑀯𑀲𑀺𑀁𑀲𑀼.

𑀯𑀲𑀺𑀢𑀓𑀸𑀮𑀜𑁆𑀘 𑀓𑀣𑁂𑀦𑁆𑀢𑁄 𑀢𑁂𑀲𑀁 𑀫𑀸𑀢𑀼𑀬𑀸 𑀬𑀸𑀯 𑀢𑀢𑀺𑀬𑀪𑀯𑀢𑁄 𑀧𑀝𑁆𑀞𑀸𑀬 𑀲𑀫𑀼𑀤𑀸𑀕𑀫𑀁 𑀤𑀲𑁆𑀲𑁂𑀢𑀼𑀁, ‘‘𑀅𑀢𑀻𑀢𑁂 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀢𑁆𑀣𑁂𑀲𑀻𑀢𑀺 𑀢𑀲𑁆𑀲𑀸 𑀓𑀺𑀭 𑀔𑁂𑀢𑁆𑀢𑀓𑀼𑀝𑀺𑀬𑀸 𑀯𑀻𑀳𑀬𑁄 𑀪𑀚𑁆𑀚𑀦𑁆𑀢𑀺𑀬𑀸 𑀢𑀢𑁆𑀣 𑀫𑀳𑀸𑀓𑀭𑀜𑁆𑀚𑀧𑀼𑀧𑁆𑀨𑀧𑁆𑀧𑀫𑀸𑀡𑀸 𑀫𑀳𑀦𑁆𑀢𑀸 𑀫𑀦𑁄𑀳𑀭𑀸 𑀧𑀜𑁆𑀘𑀲𑀢𑀫𑀢𑁆𑀢𑀸 𑀮𑀸𑀚𑀸 𑀚𑀸𑀬𑀺𑀁𑀲𑀼. 𑀲𑀸 𑀢𑀸 𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑁂 𑀧𑀤𑀼𑀫𑀺𑀦𑀺𑀧𑀢𑁆𑀢𑁂 𑀞𑀧𑁂𑀲𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀲𑁆𑀲𑀸 𑀅𑀦𑀼𑀕𑁆𑀕𑀳𑀢𑁆𑀣𑀁 𑀅𑀯𑀺𑀤𑀽𑀭𑁂 𑀔𑁂𑀢𑁆𑀢𑀧𑀸𑀴𑀺𑀬𑀸 𑀕𑀘𑁆𑀙𑀢𑀺. 𑀲𑀸 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀲𑀼𑀧𑀼𑀧𑁆𑀨𑀺𑀢𑀁 𑀫𑀳𑀦𑁆𑀢𑀁 𑀏𑀓𑀁 𑀧𑀤𑀼𑀫𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀮𑀸𑀚𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸, ‘‘𑀇𑀫𑀲𑁆𑀲, 𑀪𑀦𑁆𑀢𑁂, 𑀧𑀼𑀜𑁆𑀜𑀲𑁆𑀲 𑀆𑀦𑀼𑀪𑀸𑀯𑁂𑀦 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁂 𑀧𑀜𑁆𑀘𑀲𑀢𑀧𑀼𑀢𑁆𑀢𑁂 𑀮𑀪𑁂𑀬𑁆𑀬’’𑀦𑁆𑀢𑀺 𑀧𑀜𑁆𑀘 𑀧𑀼𑀢𑁆𑀢𑀲𑀢𑀸𑀦𑀺 𑀧𑀢𑁆𑀣𑁂𑀲𑀺. 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂𑀢𑀺 𑀬𑀤𑀸 𑀲𑀸 𑀬𑀣𑀸𑀯𑀼𑀢𑁆𑀢𑀁 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺; 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀧𑀜𑁆𑀘𑀲𑀢𑀸 𑀫𑀺𑀕𑀮𑀼𑀤𑁆𑀤𑀓𑀸 𑀲𑀫𑁆𑀪𑀢𑀲𑀫𑁆𑀪𑀸𑀭𑀸 𑀧𑀭𑀺𑀧𑀓𑁆𑀓𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀸 𑀢𑀲𑁆𑀲𑁂𑀯 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀫𑀥𑀼𑀭𑀫𑀁𑀲𑀁 𑀤𑀢𑁆𑀯𑀸, ‘‘𑀏𑀢𑀺𑀲𑁆𑀲𑀸 𑀧𑀼𑀢𑁆𑀢𑀸 𑀪𑀯𑁂𑀬𑁆𑀬𑀸𑀫𑀸’’𑀢𑀺 𑀧𑀢𑁆𑀣𑀬𑀺𑀁𑀲𑀼. 𑀅𑀢𑀻𑀢𑀸𑀲𑀼 𑀅𑀦𑁂𑀓𑀚𑀸𑀢𑀻𑀲𑀼 𑀢𑀲𑁆𑀲𑀸 𑀧𑀼𑀢𑁆𑀢𑀪𑀸𑀯𑁂𑀦 𑀆𑀕𑀢𑀢𑁆𑀢𑀸 𑀢𑀣𑀸 𑀢𑁂𑀲𑀁 𑀅𑀳𑁄𑀲𑀻𑀢𑀺 𑀯𑀤𑀦𑁆𑀢𑀺. 𑀧𑀸𑀤𑀼𑀤𑁆𑀥𑀸𑀭𑁂𑀢𑀺 𑀧𑀸𑀤𑀼𑀤𑁆𑀥𑀸𑀭𑁂 𑀧𑀸𑀤𑀼𑀤𑁆𑀥𑀸𑀭𑁂. 𑀧𑀸𑀤𑀼𑀤𑁆𑀥𑀸𑀭𑀲𑀻𑀲𑁂𑀦 𑀘𑁂𑀢𑁆𑀣 𑀦𑀺𑀓𑁆𑀔𑀺𑀧𑀦𑀁 𑀆𑀳.

𑀕𑀩𑁆𑀪𑀫𑀮𑀁 𑀦𑀺𑀲𑁆𑀲𑀸𑀬𑀸𑀢𑀺 𑀩𑀳𑀺 𑀦𑀺𑀓𑁆𑀔𑀦𑁆𑀢𑀁 𑀕𑀩𑁆𑀪𑀫𑀮𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀲𑀁𑀲𑁂𑀤𑀚𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀸. 𑀑𑀧𑀧𑀸𑀢𑀺𑀓𑀪𑀸𑀯𑁂𑀦𑀸𑀢𑀺 𑀓𑁂𑀘𑀺. 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸. 𑀯𑀺𑀧𑀲𑁆𑀲𑀦𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀧𑀼𑀩𑁆𑀩𑀺𑀓𑀸 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀧𑀼𑀩𑁆𑀩𑀺𑀓𑀸 𑀘, 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀅𑀦𑀺𑀘𑁆𑀘𑀮𑀓𑁆𑀔𑀡𑁂 𑀤𑀺𑀝𑁆𑀞𑁂, ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸’’𑀢𑀺 𑀲𑁂𑀲𑀮𑀓𑁆𑀔𑀡𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯 𑀳𑁄𑀦𑁆𑀢𑀺. 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑀬𑀺𑀁𑀲𑀽𑀢𑀺 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀜𑁆𑀘 𑀧𑀘𑁆𑀘𑁂𑀓𑀩𑁄𑀥𑀺𑀧𑀸𑀭𑀫𑀺𑀢𑀸𑀬 𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀢𑁆𑀢𑀸 𑀯𑀼𑀢𑁆𑀢𑀦𑀬𑁂𑀦 𑀲𑀬𑀫𑁂𑀯 𑀯𑀺𑀧𑀲𑁆𑀲𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀅𑀥𑀺𑀕𑀘𑁆𑀙𑀺𑀁𑀲𑀼. 𑀲𑀩𑁆𑀩𑁂𑀧𑀺 𑀢𑁂 𑀢𑀁𑀬𑁂𑀯 𑀕𑀸𑀣𑀁 𑀅𑀪𑀸𑀲𑀺𑀁𑀲𑀽𑀢𑀺 𑀆𑀳 𑁋 ‘‘𑀅𑀬𑀁 𑀢𑁂𑀲𑀁 𑀩𑁆𑀬𑀸𑀓𑀭𑀡𑀕𑀸𑀣𑀸 𑀅𑀳𑁄𑀲𑀻’’𑀢𑀺.

𑀲𑀭𑁄𑀭𑀼𑀳𑀦𑁆𑀢𑀺 𑀲𑀭𑀲𑀺 𑀚𑀸𑀢𑀁. 𑀧𑀤𑀼𑀫𑀧𑀮𑀸𑀲𑀧𑀢𑁆𑀢𑀚𑀦𑁆𑀢𑀺 𑀔𑀼𑀤𑁆𑀤𑀓𑀫𑀳𑀦𑁆𑀢𑁂𑀳𑀺 𑀓𑀫𑀮𑀤𑀮𑁂𑀳𑀺 𑀲𑀳𑀚𑀸𑀢𑀁. 𑀔𑀼𑀤𑁆𑀤𑀓𑀫𑀳𑀦𑁆𑀢𑀓𑀫𑀮𑀤𑀮𑀲𑀗𑁆𑀔𑀸𑀢𑀸𑀦𑀺 𑀯𑀸 𑀧𑀤𑀼𑀫𑀧𑀮𑀸𑀲𑀧𑀢𑁆𑀢𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀧𑀤𑀼𑀫𑀧𑀮𑀸𑀲𑀧𑀢𑁆𑀢𑀁, 𑀧𑀤𑀼𑀫𑀕𑀘𑁆𑀙𑀁. 𑀢𑀢𑁆𑀣 𑀚𑀸𑀢𑀦𑁆𑀢𑀺 𑀧𑀤𑀼𑀫𑀧𑀮𑀸𑀲𑀧𑀢𑁆𑀢𑀚𑀁. 𑀲𑀼𑀧𑀼𑀧𑁆𑀨𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀧𑀼𑀧𑁆𑀨𑀺𑀢𑀁 𑀲𑀫𑁆𑀫𑀸 𑀯𑀺𑀓𑀲𑀺𑀢𑀁. 𑀪𑀫𑀭𑀕𑀡𑀸𑀦𑀼𑀘𑀺𑀡𑁆𑀡𑀦𑁆𑀢𑀺 𑀪𑀫𑀭𑀕𑀡𑁂𑀳𑀺 𑀅𑀦𑀼𑀓𑀼𑀮𑀜𑁆𑀘𑁂𑀯 𑀅𑀦𑀼𑀧𑀭𑀺𑀩𑁆𑀪𑀫𑀺𑀢𑀜𑁆𑀘. 𑀅𑀦𑀺𑀘𑁆𑀘𑀢𑀸𑀬𑀼𑀧𑀕𑀢𑀦𑁆𑀢𑀺 𑀔𑀡𑁂 𑀔𑀡𑁂 𑀯𑀡𑁆𑀡𑀪𑁂𑀤𑀸𑀤𑀺𑀯𑀲𑁂𑀦 𑀅𑀦𑀺𑀘𑁆𑀘𑀢𑀸𑀬 𑀉𑀧𑀕𑀢𑀁. 𑀯𑀺𑀤𑀺𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸. 𑀏𑀓𑁄 𑀘𑀭𑁂𑀢𑀺 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀫𑀸𑀤𑀺𑀲𑁄 𑀳𑁄𑀢𑀼𑀓𑀸𑀫𑁄 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺.

𑁧𑁩𑁫. 𑀲𑀢𑀺𑀲𑀸𑀭𑀲𑀻𑀮𑀲𑀸𑀭𑀸𑀤𑀺𑀲𑀫𑀦𑁆𑀦𑀸𑀕𑀫𑀦𑁂𑀦 𑀲𑀢𑁆𑀢𑁂𑀲𑀼 𑀲𑀸𑀭𑀪𑀽𑀢𑀸. 𑀲𑀩𑁆𑀩𑀲𑁄 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀯𑀺𑀕𑀢𑀢𑁆𑀢𑀸 𑀦𑀺𑀤𑁆𑀤𑀼𑀓𑁆𑀔𑀸. 𑀲𑀫𑀼𑀘𑁆𑀙𑀺𑀦𑁆𑀦𑀢𑀡𑁆𑀳𑀢𑀸𑀬 𑀦𑀺𑀢𑁆𑀢𑀡𑁆𑀳𑀸. 𑀫𑀸𑀦𑀘𑁆𑀙𑀺𑀤𑁄𑀢𑀺 𑀣𑀼𑀢𑀺𑀯𑀘𑀦𑀁.

𑀏𑀢𑁂𑀲𑀁 𑀏𑀓𑀦𑀸𑀫𑀓𑀸𑀬𑁂𑀯𑀸𑀢𑀺 𑀏𑀢𑁂𑀲𑀁 𑀆𑀕𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸 𑀅𑀜𑁆𑀜𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀲𑀫𑀸𑀦𑀦𑀸𑀫𑀓𑀸 𑀏𑀯. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀻𑀓𑀭𑀡𑀢𑁆𑀣𑀁 ‘‘𑀇𑀫𑁂𑀲𑀼 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀯𑀢𑁆𑀯𑀸𑀢𑀺 𑀧𑀘𑁆𑀘𑁂𑀓𑀁 𑀲𑀭𑀽𑀧𑀢𑁄 𑀅𑀯𑀢𑁆𑀯𑀸. 𑀅𑀜𑁆𑀜𑁂 𑀘𑀸𑀢𑀺 𑀅𑀲𑀸𑀥𑀸𑀭𑀡𑀢𑁆𑀢𑀸 𑀆𑀳. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀲𑀺𑀕𑀺𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁭. 𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁬. 𑀤𑁄𑀲𑁂𑀳𑀺 𑀆𑀭𑀓𑀸𑀢𑀺 𑀅𑀭𑀺𑀬𑀁. 𑀢𑁂𑀦𑀸𑀳 ‘‘𑀦𑀺𑀤𑁆𑀤𑁄𑀲’’𑀦𑁆𑀢𑀺. 𑀲𑀸 𑀧𑀦 𑀦𑀺𑀤𑁆𑀤𑁄𑀲𑀢𑀸 𑀮𑁄𑀓𑀼𑀢𑁆𑀢𑀭𑀪𑀸𑀯𑁂𑀦 𑀲𑀯𑀺𑀲𑁂𑀲𑀸𑀢𑀺 𑀆𑀳 ‘‘𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺. 𑀲𑀫𑁆𑀫𑀸 𑀲𑀼𑀦𑁆𑀤𑀭𑁄 𑀧𑀲𑀢𑁆𑀣𑁄 𑀦𑀺𑀬𑁆𑀬𑀸𑀦𑀺𑀓𑁄 𑀲𑀫𑀸𑀥𑀺 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀆𑀳 𑁋 ‘‘𑀲𑀫𑁆𑀫𑀸𑀲𑀫𑀸𑀥𑀺𑀦𑁆𑀢𑀺 𑀫𑀕𑁆𑀕𑀲𑀫𑀸𑀥𑀺’’𑀦𑁆𑀢𑀺. 𑀉𑀧𑀦𑀺𑀲𑀻𑀤𑀢𑀺 𑀏𑀢𑁆𑀣 𑀨𑀮𑀁 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀉𑀧𑀦𑀺𑀲𑀁, 𑀓𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀲𑀉𑀧𑀦𑀺𑀲𑀦𑁆𑀢𑀺 𑀲𑀧𑁆𑀧𑀘𑁆𑀘𑀬’’𑀦𑁆𑀢𑀺. 𑀧𑀭𑀺𑀓𑀭𑁄𑀢𑀺 𑀧𑀭𑀺𑀯𑀸𑀭𑁂𑀢𑀻𑀢𑀺 𑀧𑀭𑀺𑀓𑁆𑀔𑀸𑀭𑁄𑀢𑀺 𑀆𑀳 𑁋 ‘‘𑀲𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀲𑀧𑀭𑀺𑀯𑀸𑀭’’𑀦𑁆𑀢𑀺.

𑀧𑀭𑀺𑀯𑀸𑀭𑀺𑀢𑀸𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦 𑀧𑀭𑀺𑀯𑀸𑀭𑀦𑁆𑀢𑁂𑀳𑀺 𑀯𑀺𑀬 𑀉𑀧𑀕𑀢𑀸. 𑀧𑀼𑀭𑁂𑀘𑀸𑀭𑀺𑀓𑀸𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀪𑀸𑀯𑀦𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀧𑀘𑁆𑀘𑀬𑀢𑁆𑀢𑀸 𑀧𑀼𑀭𑀲𑁆𑀲𑀭𑀸. 𑀢𑁂𑀦𑀸𑀳 𑁋 ‘‘𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀘𑀸’’𑀢𑀺. 𑀇𑀤𑀸𑀦𑀺 𑀢𑀸𑀦𑀺 𑀓𑀺𑀘𑁆𑀘𑀢𑁄 𑀤𑀲𑁆𑀲𑁂𑀢𑀼𑀁, ‘‘𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀺𑀯𑀻𑀫𑀁𑀲𑀕𑁆𑀕𑀳𑀡𑀁 𑀢𑀢𑁆𑀣 𑀢𑀢𑁆𑀣 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀯𑀻𑀫𑀁𑀲𑀸𑀥𑀺𑀧𑀢𑁂𑀬𑁆𑀬𑁂𑀦 𑀧𑀯𑀢𑁆𑀢𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑁂𑀦𑀲𑁆𑀲 𑀫𑀕𑁆𑀕𑀲𑀫𑀸𑀥𑀺𑀲𑁆𑀲 𑀦𑀸𑀦𑀸𑀔𑀡𑀺𑀓𑀁 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀻𑀫𑀁𑀲𑀦𑀧𑀭𑀺𑀬𑁄𑀲𑀸𑀦𑁂𑀢𑀺 𑀢𑀣𑀸𑀧𑀯𑀢𑁆𑀢𑀅𑀦𑀼𑀮𑁄𑀫𑀜𑀸𑀡𑀲𑁆𑀲 𑀑𑀲𑀸𑀦𑁂. 𑀪𑀽𑀫𑀺𑀮𑀤𑁆𑀥𑀁 𑀯𑀝𑁆𑀝𑀁 𑀲𑀫𑀼𑀕𑁆𑀖𑀸𑀝𑀬𑀫𑀸𑀦𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀤𑀻𑀖𑀭𑀢𑁆𑀢𑀁 𑀅𑀦𑀼𑀲𑀬𑀺𑀢𑀁 𑀓𑀺𑀮𑁂𑀲𑀯𑀝𑁆𑀝𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺. 𑀯𑀽𑀧𑀲𑀫𑀬𑀫𑀸𑀦𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀯𑀽𑀧𑀲𑀫𑀬𑀫𑀸𑀦𑀸𑀢𑀺 𑀯𑀸 𑀢𑀢𑁄 𑀏𑀯 𑀅𑀯𑀲𑀺𑀝𑁆𑀞𑀫𑁆𑀧𑀺 𑀯𑀝𑁆𑀝𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀯𑀽𑀧𑀲𑀫𑁂𑀦𑁆𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀲𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀤𑀼𑀯𑀺𑀥𑀸𑀧𑀻𑀢𑀺 𑀬𑀣𑀸𑀯𑀼𑀢𑁆𑀢𑀸 𑀤𑀼𑀯𑀺𑀥𑀸𑀧𑀺. 𑀇𑀥 𑀅𑀥𑀺𑀧𑁆𑀧𑁂𑀢𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀓𑀺𑀘𑁆𑀘𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸.

𑀮𑀓𑁆𑀔𑀡𑁂 𑀧𑀝𑀺𑀯𑀺𑀚𑁆𑀛𑀫𑀸𑀦𑁂 𑀮𑀓𑁆𑀔𑀡𑀺𑀓𑁄 𑀥𑀫𑁆𑀫𑁄 𑀧𑀝𑀺𑀯𑀺𑀤𑁆𑀥𑁄 𑀳𑁄𑀢𑀻𑀢𑀺 𑀆𑀳 𑁋 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁…𑀧𑁂… 𑀆𑀭𑀫𑁆𑀫𑀡𑀢𑁄 𑀧𑀚𑀸𑀦𑀸𑀢𑀻’’𑀢𑀺. 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀓𑀺𑀘𑁆𑀘𑀢𑁄𑀢𑀺 𑀪𑀸𑀯𑀦𑀸𑀓𑀺𑀘𑁆𑀘𑀢𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀢𑀤𑀥𑀺𑀕𑀢𑀅𑀲𑀫𑁆𑀫𑁄𑀳𑀢𑀸𑀬 𑀅𑀲𑀫𑁆𑀫𑁄𑀳𑀢𑁄 𑀧𑀚𑀸𑀦𑀸𑀢𑀺. 𑀓𑀺𑀘𑁆𑀘𑀢𑁄𑀢𑀺 𑀧𑀝𑀺𑀯𑁂𑀥𑀓𑀺𑀘𑁆𑀘𑀢𑁄. 𑀢𑀁 𑀧𑀦 𑀲𑀩𑁆𑀩𑀣𑀸 𑀅𑀲𑀫𑁆𑀫𑀼𑀬𑁆𑀳𑀦𑀫𑁂𑀯𑀸𑀢𑀺 𑀆𑀳 ‘‘𑀅𑀲𑀫𑁆𑀫𑁄𑀳𑀢𑁄’’𑀢𑀺. 𑀏𑀯𑀁 𑀧𑀚𑀸𑀦𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀬𑀸𑀣𑀸𑀯𑀢𑁄 𑀅𑀯𑀩𑁄𑀥𑁄. 𑀅𑀲𑁆𑀲𑀸𑀢𑀺 𑀢𑀁𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲.

𑀤𑁆𑀯𑀸𑀬𑀦𑁆𑀢𑀺 -𑀓𑀸𑀭𑁄 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀤𑁆𑀯𑀬𑀁 𑀯𑀤𑀸𑀫𑀻’’𑀢𑀺. 𑀤𑁆𑀯𑁂 𑀅𑀯𑀬𑀯𑀸 𑀏𑀢𑀲𑁆𑀲𑀸𑀢𑀺 𑀤𑁆𑀯𑀬𑀁. 𑀢𑁂𑀦𑀸𑀳 ‘‘𑀤𑀼𑀯𑀺𑀥𑀓𑁄𑀝𑁆𑀞𑀸𑀲𑀁 𑀯𑀤𑀸𑀫𑀻’’𑀢𑀺. 𑀧𑀼𑀜𑁆𑀜𑀲𑁆𑀲 𑀏𑀓𑁄 𑀪𑀸𑀕𑁄 𑀲𑁄 𑀏𑀯 𑀧𑀼𑀜𑁆𑀜𑀪𑀸𑀕𑀺𑀓𑁄, 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 ‘‘𑀧𑀼𑀜𑁆𑀜𑀪𑀸𑀕𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑀥𑀺𑀲𑀗𑁆𑀔𑀸𑀢𑀲𑁆𑀲𑀸𑀢𑀺 𑀔𑀦𑁆𑀥𑀧𑀩𑀦𑁆𑀥𑀲𑀗𑁆𑀔𑀸𑀢𑀲𑁆𑀲.

𑀅𑀫𑀢𑀤𑁆𑀯𑀸𑀭𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀁. 𑀧𑀜𑁆𑀜𑀧𑁂𑀢𑀻𑀢𑀺 𑀦𑀺𑀬𑁆𑀬𑀸𑀦𑀸𑀤𑀺𑀧𑀓𑀸𑀭𑀢𑁄 𑀧𑀜𑁆𑀜𑀧𑁂𑀢𑀺. 𑀢𑁂𑀦𑀸𑀳 ‘‘𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀻’’𑀢𑀺. 𑀢𑀢𑁆𑀣 𑀲𑀫𑁆𑀫𑁄𑀳𑀲𑁆𑀲 𑀯𑀺𑀤𑁆𑀥𑀁𑀲𑀦𑁂𑀦 𑀅𑀲𑀫𑁆𑀫𑁄𑀳𑀢𑁄 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀅𑀫𑀢𑀤𑁆𑀯𑀸𑀭𑀧𑀜𑁆𑀜𑀸𑀧𑀦𑁂 𑀅𑀢𑁆𑀣𑁂. 𑀩𑁄𑀚𑁆𑀛𑀗𑁆𑀕𑀧𑁆𑀧𑀢𑁆𑀢𑀸𑀢𑀺 𑀩𑁄𑀚𑁆𑀛𑀗𑁆𑀕𑀪𑀸𑀯𑀧𑁆𑀧𑀢𑁆𑀢𑀸. 𑀫𑀕𑁆𑀕𑀪𑀸𑀯𑁂𑀦 𑀦𑀺𑀬𑁆𑀬𑀸𑀦𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸 𑀫𑀕𑁆𑀕𑀧𑀜𑁆𑀜𑀸𑀬 𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀢𑁆𑀢𑀸 𑀲𑀫𑀼𑀤𑀸𑀬𑀲𑁆𑀲 𑀘 𑀅𑀯𑀬𑀯𑁄 𑀅𑀗𑁆𑀕𑀦𑁆𑀢𑀺 𑀓𑀢𑁆𑀯𑀸 𑀲𑁂𑀲𑀥𑀫𑁆𑀫𑁂 𑀅𑀗𑁆𑀕𑀺𑀓𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀗𑁆𑀕’’𑀦𑁆𑀢𑀺 𑀆𑀳. 𑀲𑁄 𑀪𑀺𑀓𑁆𑀔𑀽𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀻’’𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀚𑀸𑀦𑀦𑁆𑀢𑁄 𑀪𑀺𑀓𑁆𑀔𑀼. 𑀧𑀚𑀳𑀦𑀢𑁆𑀣𑀸𑀬𑀸𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀚𑀳𑀦𑀸𑀬. 𑀧𑀝𑀺𑀮𑀸𑀪𑀢𑁆𑀣𑀸𑀬𑀸𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀥𑀺𑀕𑀫𑀸𑀬. 𑀓𑀼𑀲𑀮𑀯𑀸𑀬𑀸𑀫𑁄𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑁄𑀯 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁄 𑀯𑀸𑀬𑀸𑀫𑁄. 𑀲𑀭𑀢𑀻𑀢𑀺 𑀲𑀢𑁄, 𑀢𑀁 𑀧𑀦𑀲𑁆𑀲 𑀲𑀭𑀡𑀁 𑀲𑀢𑀺𑀲𑀫𑀗𑁆𑀕𑀺𑀢𑀸𑀬𑀸𑀢𑀺 𑀆𑀳 ‘‘𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀬𑀣𑀸𑀪𑀽𑀢𑀸 𑀲𑀫𑁆𑀫𑀸𑀯𑀸𑀬𑀸𑀫𑀲𑀢𑀺𑀬𑁄 𑀲𑀳𑀚𑀸𑀢𑀸 𑀘 𑀧𑀼𑀭𑁂𑀚𑀸𑀢𑀸 𑀘 𑀳𑀼𑀢𑁆𑀯𑀸 𑀧𑀭𑀺𑀯𑀸𑀭𑁂𑀦𑁆𑀢𑀺, ‘‘𑀇𑀢𑀺𑀬𑀺𑀫𑁂 𑀢𑀬𑁄 𑀥𑀫𑁆𑀫𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀅𑀦𑀼𑀧𑀭𑀺𑀥𑀸𑀯𑀦𑁆𑀢𑀺 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺 𑀧𑀦 𑀯𑀘𑀦𑀢𑁄, ‘‘𑀏𑀢𑁆𑀣 𑀳𑀻’’𑀢𑀺𑀆𑀤𑀺𑀦𑀸 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀏𑀯 𑀲𑁂𑀲𑀥𑀫𑁆𑀫𑀸𑀦𑀁 𑀬𑀣𑀸𑀭𑀳𑀁 𑀲𑀳𑀘𑀭𑀡𑀪𑀸𑀯𑁂𑀦 𑀧𑀭𑀺𑀯𑀸𑀭𑀡𑀁 𑀬𑁄𑀚𑀺𑀢𑀁. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀦𑀁 𑀕𑀳𑀡𑀁 𑀇𑀢𑀭𑁂𑀲𑀁 𑀧𑀭𑀺𑀯𑀸𑀭𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸. 𑀦 𑀳𑀺 𑀲𑀓𑁆𑀓𑀸 𑀢𑁂 𑀏𑀯 𑀧𑀭𑀺𑀯𑀸𑀭𑁂 𑀧𑀭𑀺𑀯𑀸𑀭𑀯𑀦𑁆𑀢𑁂 𑀘 𑀓𑀢𑁆𑀯𑀸 𑀯𑀢𑁆𑀢𑀼𑀁 𑀲𑀗𑁆𑀓𑀭𑀢𑁄 𑀲𑀫𑁆𑀫𑁄𑀳𑀚𑀦𑀦𑀢𑁄 𑀘. 𑀢𑀬𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀸𑀬𑀸𑀫𑀲𑀢𑀺𑀬𑁄 𑀲𑀳𑀚𑀸𑀢𑀧𑀭𑀺𑀯𑀸𑀭𑀸𑀯 𑀳𑁄𑀦𑁆𑀢𑀺 𑀫𑀕𑁆𑀕𑀓𑁆𑀔𑀡𑀺𑀓𑀸𑀦𑀁 𑀢𑁂𑀲𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀔𑀡𑀯𑀺𑀭𑀢𑀻𑀦𑀁 𑀅𑀲𑀫𑁆𑀪𑀯𑀢𑁄.

𑁧𑁩𑁭. 𑀢𑀓𑁆𑀓𑀦𑀯𑀲𑁂𑀦 𑀮𑁄𑀓𑀲𑀺𑀤𑁆𑀥𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀯𑀜𑁆𑀘𑁂𑀯𑀜𑁆𑀘 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀺𑀯𑀺𑀥𑀁 𑀢𑀓𑁆𑀓𑀦𑀁 𑀓𑀽𑀧𑁂 𑀯𑀺𑀬 𑀉𑀤𑀓𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀆𑀓𑀟𑁆𑀠𑀦𑀁 𑀯𑀺𑀢𑀓𑁆𑀓𑀦𑀁 𑀯𑀺𑀢𑀓𑁆𑀓𑁄. 𑀲𑀗𑁆𑀓𑀧𑁆𑀧𑀦𑀯𑀲𑁂𑀦𑀸𑀢𑀺 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀓𑀧𑁆𑀧𑀦𑀯𑀲𑁂𑀦. 𑀢𑀓𑁆𑀓𑀦𑀁 𑀓𑀧𑁆𑀧𑀦𑀦𑁆𑀢𑀺 𑀘 𑀅𑀢𑀁𑀲𑀳𑀚𑀸𑀢𑀸𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀕𑁆𑀕𑁄𑀢𑀺 𑀇𑀫𑀺𑀦𑀸 𑀲𑀫𑀸𑀥𑀺𑀦𑀸 𑀮𑀤𑁆𑀥𑀼𑀧𑀓𑀸𑀭𑀲𑁆𑀲𑁂𑀯 𑀯𑀺𑀢𑀓𑁆𑀓𑀲𑁆𑀲 𑀅𑀧𑁆𑀧𑀦𑀸𑀧𑀭𑀺𑀬𑀸𑀬𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀲𑁂𑀲𑁂𑀦 𑀯𑀸 𑀅𑀧𑁆𑀧𑀦𑀸 𑀯𑀺𑀢𑀓𑁆𑀓𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀅𑀪𑀺𑀭𑁄𑀧𑁂𑀢𑀺, 𑀯𑀺𑀢𑀓𑁆𑀓𑁂 𑀅𑀲𑀢𑀺 𑀓𑀣𑀦𑁆𑀢𑀺 𑀆𑀳 ‘‘𑀯𑀺𑀢𑀓𑁆𑀓𑁂 𑀧𑀦𑀸’’𑀢𑀺𑀆𑀤𑀺. 𑀅𑀢𑁆𑀢𑀦𑁄𑀬𑁂𑀯 𑀥𑀫𑁆𑀫𑀢𑀸𑀬 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀅𑀪𑀺𑀭𑀼𑀳𑀢𑀻𑀢𑀺, 𑀏𑀢𑁂𑀦 𑀆𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀕𑀳𑀡𑀁 𑀦𑀸𑀫 𑀲𑀪𑀸𑀯𑀲𑀺𑀤𑁆𑀥𑀁, 𑀦 𑀥𑀫𑁆𑀫𑀦𑁆𑀢𑀭𑀫𑀧𑁂𑀓𑁆𑀔𑀢𑀺, 𑀯𑀺𑀢𑀓𑁆𑀓𑁄 𑀧𑀦 𑀧𑀯𑀢𑁆𑀢𑀫𑀸𑀦𑁄 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀪𑀸𑀯𑀸𑀯𑀺𑀢𑀓𑁆𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀢𑁄 𑀲𑀯𑀺𑀢𑀓𑁆𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀆𑀭𑀫𑁆𑀫𑀡𑀕𑁆𑀕𑀳𑀡𑀯𑀺𑀲𑁂𑀲𑁄 𑀯𑀺𑀢𑀓𑁆𑀓𑁂𑀦 𑀚𑀸𑀢𑁄𑀢𑀺 𑀓𑀢𑁆𑀯𑀸 𑀯𑀺𑀢𑀓𑁆𑀓𑁄 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 𑁋 𑀬𑀣𑀸 𑀓𑁄𑀘𑀺 𑀭𑀸𑀚𑀯𑀮𑁆𑀮𑀪𑀁, 𑀢𑀁𑀲𑀫𑁆𑀩𑀦𑁆𑀥𑀻𑀦𑀁 𑀫𑀺𑀢𑁆𑀢𑀁 𑀯𑀸 𑀦𑀺𑀲𑁆𑀲𑀸𑀬 𑀭𑀸𑀚𑀕𑁂𑀳𑀁 𑀆𑀭𑁄𑀳𑀢𑀺 𑀅𑀦𑀼𑀧𑀯𑀺𑀲𑀢𑀺, 𑀏𑀯𑀁 𑀯𑀺𑀢𑀓𑁆𑀓𑀁 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺 𑀯𑀺𑀢𑀓𑁆𑀓𑀲𑁆𑀲 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦𑀲𑀪𑀸𑀯𑀢𑁆𑀢𑀸, 𑀅𑀜𑁆𑀜𑁂𑀲𑀁 𑀥𑀫𑁆𑀫𑀸𑀦𑀜𑁆𑀘 𑀅𑀯𑀺𑀢𑀓𑁆𑀓𑀲𑀪𑀸𑀯𑀢𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀸’’𑀢𑀺 (𑀥. 𑀲. 𑁭).

𑀬𑀤𑀺 𑀏𑀯𑀁 𑀓𑀣𑀁 𑀅𑀯𑀺𑀢𑀓𑁆𑀓𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀻𑀢𑀺? 𑀯𑀺𑀢𑀓𑁆𑀓𑀩𑀮𑁂𑀦𑁂𑀯. 𑀬𑀣𑀸 𑀳𑀺 𑀲𑁄 𑀧𑀼𑀭𑀺𑀲𑁄 𑀧𑀭𑀺𑀘𑀬𑁂𑀦 𑀢𑁂𑀦 𑀯𑀺𑀦𑀸𑀧𑀺 𑀦𑀺𑀭𑀸𑀲𑀗𑁆𑀓𑁄 𑀭𑀸𑀚𑀕𑁂𑀳𑀁 𑀧𑀯𑀺𑀲𑀢𑀺, 𑀏𑀯𑀁 𑀧𑀭𑀺𑀘𑀬𑁂𑀦 𑀯𑀺𑀢𑀓𑁆𑀓𑁂𑀦 𑀯𑀺𑀦𑀸𑀧𑀺 𑀅𑀯𑀺𑀢𑀓𑁆𑀓𑀁 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀆𑀭𑁄𑀳𑀢𑀺. 𑀧𑀭𑀺𑀘𑀬𑁂𑀦𑀸𑀢𑀺 𑀘 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀯𑀺𑀢𑀓𑁆𑀓𑀪𑀸𑀯𑀦𑀸𑀲𑀗𑁆𑀔𑀸𑀢𑁂𑀦 𑀧𑀭𑀺𑀘𑀬𑁂𑀦. 𑀯𑀺𑀢𑀓𑁆𑀓𑀲𑁆𑀲 𑀳𑀺 𑀲𑀦𑁆𑀢𑀸𑀦𑁂 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀸𑀪𑀺𑀭𑀼𑀳𑀦𑀁 𑀘𑀺𑀭𑀧𑀭𑀺𑀘𑀺𑀢𑀁; 𑀢𑁂𑀦 𑀢𑀁 𑀓𑀤𑀸𑀘𑀺 𑀯𑀺𑀢𑀓𑁆𑀓𑁂𑀦 𑀯𑀺𑀦𑀸𑀧𑀺 𑀢𑀢𑁆𑀣 𑀧𑀯𑀢𑁆𑀢𑀢𑁂𑀯; 𑀬𑀣𑀸 𑀜𑀸𑀡𑀲𑀳𑀕𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀲𑀦𑀯𑀲𑁂𑀦 𑀘𑀺𑀭𑀧𑀭𑀺𑀘𑀺𑀢𑀁 𑀓𑀤𑀸𑀘𑀺 𑀜𑀸𑀡𑀭𑀳𑀺𑀢𑀫𑁆𑀧𑀺 𑀲𑀫𑁆𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑀺; 𑀬𑀣𑀸 𑀯𑀸 𑀓𑀺𑀮𑁂𑀲𑀲𑀳𑀺𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀁 𑀲𑀩𑁆𑀩𑀲𑁄 𑀓𑀺𑀮𑁂𑀲𑀭𑀳𑀺𑀢𑀫𑁆𑀧𑀺 𑀧𑀭𑀺𑀘𑀬𑁂𑀦 𑀓𑀺𑀮𑁂𑀲𑀯𑀸𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀯𑀸𑀘𑀁 𑀲𑀗𑁆𑀔𑀭𑁄𑀢𑀻𑀢𑀺 𑀯𑀸𑀘𑀁 𑀉𑀧𑁆𑀧𑀸𑀤𑁂𑀢𑀺, 𑀯𑀘𑀻𑀖𑁄𑀲𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀮𑁄𑀓𑀺𑀬𑀯𑀺𑀢𑀓𑁆𑀓𑁄 𑀤𑁆𑀯𑀢𑁆𑀢𑀺𑀁𑀲𑀘𑀺𑀢𑁆𑀢𑀲𑀳𑀕𑀢𑁄 𑀯𑀸𑀘𑀁 𑀲𑀗𑁆𑀔𑀭𑁄𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀚𑀦𑀦𑀢𑁄. 𑀯𑀘𑀻𑀲𑀗𑁆𑀔𑀸𑀭𑁄𑀢𑁆𑀯𑁂𑀯 𑀧𑀦𑀲𑁆𑀲 𑀦𑀸𑀫𑀁 𑀳𑁄𑀢𑀺 𑀭𑀼𑀴𑁆𑀳𑀺𑀢𑁄, 𑀢𑀁𑀲𑀫𑀢𑁆𑀣𑀢𑀸𑀦𑀺𑀭𑁄𑀥𑀢𑁄 𑀯𑀸 𑀲𑀫𑁆𑀪𑀯𑀢𑁄 𑀧𑀦 𑀲𑀗𑁆𑀔𑀸𑀭𑁄𑀢𑀺. ‘‘𑀮𑁄𑀓𑀼𑀢𑁆𑀢𑀭𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀁 𑀧𑀭𑀺𑀯𑀸𑀭𑁂𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀺𑀯𑀺𑀥𑁂 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂 𑀓𑀤𑀸𑀘𑀺 𑀓𑀢𑀫𑀁 𑀧𑀭𑀺𑀯𑀸𑀭𑁂𑀦𑁆𑀢𑀻𑀢𑀺? 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀢𑁆𑀣𑀸’’𑀢𑀺𑀆𑀤𑀺. 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀦𑁆𑀢𑀺 𑀦𑀸𑀦𑀸𑀲𑀫𑀦𑁆𑀦𑀸𑀳𑀸𑀭𑀳𑁂𑀢𑀼𑀓𑀢𑁆𑀢𑀸, 𑀧𑀼𑀩𑁆𑀩𑀪𑀸𑀕𑁂𑀬𑁂𑀯 𑀘 𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀢𑀺𑀯𑀺𑀥𑀲𑁆𑀲𑀧𑀺 𑀧𑀝𑀺𑀧𑀓𑁆𑀔𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀲𑀸𑀢𑀺𑀲𑀬𑀁 𑀢𑀺𑀡𑁆𑀡𑀫𑁆𑀧𑀺 𑀓𑀺𑀘𑁆𑀘𑀓𑀭𑀡𑀢𑁄. 𑀏𑀲 𑀦𑀬𑁄 𑀲𑀫𑁆𑀫𑀸𑀯𑀸𑀘𑀸𑀤𑀻𑀲𑀼𑀧𑀺.

𑁧𑁩𑁮. 𑀯𑀺𑀭𑀫𑀢𑀺 𑀏𑀢𑀸𑀬𑀸𑀢𑀺 𑀯𑁂𑀭𑀫𑀡𑀻 𑀯𑀺𑀭𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀫𑀼𑀲𑀸𑀯𑀸𑀤𑀢𑁄 𑀯𑀺𑀭𑀫𑀡𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀘𑁂𑀢𑀦𑀸𑀧𑀺 𑀯𑁂𑀭𑀲𑁆𑀲 𑀫𑀡𑀦𑀢𑁄 𑀯𑀺𑀦𑀸𑀲𑀦𑀢𑁄 𑀯𑀺𑀭𑀢𑀺𑀧𑀻𑀢𑀺 𑀆𑀳 𑁋 ‘‘𑀯𑀺𑀭𑀢𑀺𑀧𑀺 𑀘𑁂𑀢𑀦𑀸𑀧𑀺 𑀯𑀝𑁆𑀝𑀢𑀻’’𑀢𑀺. 𑀆𑀭𑀓𑀸 𑀭𑀫𑀢𑀻𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑁂𑀳𑀺 𑀤𑀽𑀭𑀢𑁄 𑀲𑀫𑀼𑀲𑁆𑀲𑀸𑀭𑁂𑀢𑀺. 𑀯𑀺𑀦𑀸 𑀢𑁂𑀳𑀺 𑀭𑀫𑀢𑀻𑀢𑀺 𑀅𑀘𑁆𑀘𑀦𑁆𑀢𑀫𑁂𑀯 𑀢𑁂𑀳𑀺 𑀯𑀺𑀦𑀸 𑀪𑀯𑀢𑀺. 𑀢𑀢𑁄 𑀢𑀢𑁄𑀢𑀺 𑀤𑀺𑀝𑁆𑀞𑁂 𑀅𑀤𑀺𑀝𑁆𑀞𑀯𑀸𑀤𑀸𑀤𑀺𑀢𑁄 𑀫𑀼𑀲𑀸𑀯𑀸𑀤𑀸. 𑀯𑀺𑀲𑁂𑀲𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑁆𑀢𑀸 𑀧𑀝𑀺𑀦𑀺𑀯𑀢𑁆𑀢𑀸 𑀳𑀼𑀢𑁆𑀯𑀸.

𑁧𑁪𑁦. 𑀢𑀺𑀯𑀺𑀥𑁂𑀦 𑀓𑀼𑀳𑀦𑀯𑀢𑁆𑀣𑀼𑀦𑀸𑀢𑀺 𑀧𑀘𑁆𑀘𑀬𑀧𑀝𑀺𑀲𑁂𑀯𑀦-𑀲𑀸𑀫𑀦𑁆𑀢𑀚𑀧𑁆𑀧𑀦-𑀇𑀭𑀺𑀬𑀸𑀧𑀣𑀧𑀯𑀢𑁆𑀢𑀦𑀲𑀗𑁆𑀔𑀸𑀢𑁂𑀦 𑀧𑀸𑀧𑀺𑀘𑁆𑀙𑀢𑀸 𑀦𑀺𑀩𑁆𑀩𑀢𑁆𑀢𑁂𑀦 𑀢𑀺𑀯𑀺𑀥𑁂𑀦 𑀓𑀼𑀳𑀦𑀯𑀢𑁆𑀣𑀼𑀦𑀸. 𑀏𑀢𑀸𑀬 𑀓𑀼𑀳𑀦𑀸𑀬 𑀓𑀭𑀡𑀪𑀽𑀢𑀸𑀬 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀫𑀺𑀢𑁆𑀢𑀁 𑀲𑀻𑀮𑀁 𑀏𑀢𑁂𑀲𑀦𑁆𑀢𑀺 𑀬𑁄𑀚𑀦𑀸. 𑀅𑀢𑁆𑀢𑀯𑀺𑀲𑀬𑀮𑀸𑀪𑀳𑁂𑀢𑀼 𑀅𑀓𑁆𑀓𑁄𑀲𑀦𑀔𑀼𑀁𑀲𑀦𑀯𑀫𑁆𑀪𑀦𑀸𑀤𑀺𑀯𑀲𑁂𑀦 𑀧𑀺𑀲𑀦𑀁 𑀖𑀝𑁆𑀝𑀦𑀁 𑀯𑀺𑀳𑁂𑀞𑀦𑀁 𑀦𑀺𑀧𑁆𑀧𑁂𑀲𑁄. 𑀇𑀢𑁄 𑀮𑀤𑁆𑀥𑀁 𑀅𑀜𑁆𑀜𑀲𑁆𑀲, 𑀢𑀢𑁄 𑀮𑀤𑁆𑀥𑀁 𑀧𑀭𑀲𑁆𑀲 𑀤𑀢𑁆𑀯𑀸 𑀏𑀯𑀁 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀁𑀲𑀢𑀻𑀢𑀺 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀁𑀲𑀦𑀸. 𑀧𑀸𑀴𑀺𑀬𑀁 𑀆𑀕𑀢𑁄 𑀓𑀼𑀳𑀦𑀸𑀤𑀺𑀯𑀲𑁂𑀦 𑀫𑀺𑀘𑁆𑀙𑀸𑀆𑀚𑀻𑀯𑁄. 𑀓𑁄 𑀧𑀦 𑀲𑁄𑀢𑀺 𑀆𑀳 ‘‘𑀆𑀚𑀻𑀯𑀳𑁂𑀢𑀽’’𑀢𑀺𑀆𑀤𑀺. 𑀢𑀸𑀲𑀁𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁, ‘‘𑀆𑀚𑀻𑀯𑁄 𑀓𑀼𑀧𑁆𑀧𑀫𑀸𑀦𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀏𑀯 𑀓𑀼𑀧𑁆𑀧𑀢𑀻’’𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑁧𑁪𑁧. 𑀲𑀫𑁆𑀫𑀸 𑀧𑀲𑀢𑁆𑀣𑀸 𑀲𑁄𑀪𑀦𑀸 𑀦𑀺𑀬𑁆𑀬𑀸𑀦𑀺𑀓𑀸 𑀤𑀺𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀧𑀼𑀕𑁆𑀕𑀮𑁄. 𑀢𑀲𑁆𑀲 𑀧𑀦 𑀬𑀲𑁆𑀫𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀘𑁆𑀘𑀸𑀪𑀺𑀲𑀫𑀬𑀲𑁆𑀲 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀅𑀯𑀲𑁆𑀲𑀬𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀞𑀺𑀢𑀲𑁆𑀲𑀸’’𑀢𑀺. 𑀧𑀳𑁄𑀢𑀺 𑀪𑀯𑀢𑀺 𑀢𑀸𑀬 𑀲𑀳𑁂𑀯 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀬𑀸𑀣𑀸𑀯𑀢𑁄 𑀚𑀸𑀦𑀦𑀝𑁆𑀞𑁂𑀦 𑀲𑀫𑁆𑀫𑀸𑀜𑀸𑀡𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀢𑀜𑁆𑀘 𑀔𑁄 𑀫𑀕𑁆𑀕𑀲𑀫𑀸𑀥𑀺𑀫𑁆𑀳𑀺 𑀞𑀺𑀢𑁂 𑀏𑀯 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀆𑀳 𑁋 ‘‘𑀫𑀕𑁆𑀕𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺…𑀧𑁂… 𑀲𑀫𑁆𑀫𑀸𑀜𑀸𑀡𑀁 𑀧𑀳𑁄𑀢𑀻’’𑀢𑀺𑀆𑀤𑀺. 𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀻𑀢𑀺? 𑀬𑀣𑀸 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀞𑀺𑀢𑁄 𑀧𑀼𑀕𑁆𑀕𑀮𑁄, ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀯𑀼𑀢𑁆𑀢𑁄, 𑀏𑀯𑀁 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂 𑀞𑀺𑀢𑁄, ‘‘𑀲𑀫𑁆𑀫𑀸𑀜𑀸𑀡𑁄’’𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀘 𑀫𑀕𑁆𑀕𑀨𑀮𑀲𑀫𑁆𑀫𑀸𑀲𑀫𑀸𑀥𑀺𑀧𑀯𑀢𑁆𑀢𑀺𑀬𑀸 𑀧𑀳𑁄𑀢𑀺 𑀲𑀫𑁆𑀫𑀸𑀜𑀸𑀡𑀲𑁆𑀲 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀧𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀨𑀮𑀲𑀫𑀸𑀥𑀺 𑀢𑀸𑀯 𑀧𑀯𑀢𑁆𑀢𑀢𑀼, 𑀫𑀕𑁆𑀕𑀲𑀫𑀸𑀥𑀺 𑀧𑀦 𑀓𑀣𑀦𑁆𑀢𑀺? 𑀢𑀫𑁆𑀧𑀺 𑀅𑀓𑀼𑀧𑁆𑀧𑀪𑀸𑀯𑀢𑀸𑀬 𑀅𑀘𑁆𑀘𑀦𑁆𑀢𑀲𑀫𑀸𑀥𑀺𑀪𑀸𑀯𑀢𑁄 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀧𑀯𑀢𑁆𑀢𑀢𑁂𑀯𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀞𑀧𑁂𑀢𑁆𑀯𑀸 𑀅𑀝𑁆𑀞𑀨𑀮𑀗𑁆𑀕𑀸𑀦𑀻𑀢𑀺 𑀨𑀮𑀪𑀽𑀢𑀸𑀦𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀺 𑀅𑀝𑁆𑀞𑀗𑁆𑀕𑀸𑀦𑀺, ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀞𑀧𑁂𑀢𑁆𑀯𑀸. 𑀲𑀫𑁆𑀫𑀸𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 𑀓𑀢𑁆𑀯𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀲𑀫𑁆𑀫𑀸𑀜𑀸𑀡𑀁 𑀓𑀢𑁆𑀯𑀸. 𑀨𑀮𑀁 𑀓𑀸𑀢𑀼𑀦𑁆𑀢𑀺 𑀨𑀮𑀥𑀫𑁆𑀫𑀲𑀳𑀘𑀭𑀺𑀢𑀢𑀸𑀬 𑀯𑀺𑀧𑀸𑀓𑀲𑀪𑀸𑀯𑀢𑀸𑀬 𑀘 ‘‘𑀨𑀮’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀨𑀮𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀘 𑀯𑀼𑀢𑁆𑀢𑀁 𑀲𑀮𑁆𑀮𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁮𑁩) ‘‘𑀨𑀮𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀺 𑀅𑀝𑁆𑀞𑀗𑁆𑀕𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀥𑀫𑁆𑀫𑀸 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑁧𑁪𑁨. 𑀦𑀺𑀚𑁆𑀚𑀺𑀡𑁆𑀡𑀸𑀢𑀺 𑀦𑀺𑀚𑁆𑀚𑀻𑀭𑀺𑀢𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀸𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀨𑀮𑀁 𑀓𑀣𑀺𑀢𑀦𑁆𑀢𑀺 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀯𑀸𑀭𑁂𑀦 𑀲𑀸𑀫𑀜𑁆𑀜𑀨𑀮𑀁 𑀓𑀣𑀺𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀦𑀺𑀚𑁆𑀚𑀻𑀭𑀡𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀚𑁆𑀚𑀻𑀭𑀡𑀁 𑀧𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑀦𑁆𑀢𑀺 𑀓𑀢𑁆𑀯𑀸, 𑀫𑀚𑁆𑀛𑀺𑀫𑀪𑀸𑀡𑀓𑀸…𑀧𑁂… 𑀫𑀕𑁆𑀕𑁄 𑀓𑀣𑀺𑀢𑁄𑀢𑀺 𑀯𑀤𑀦𑁆𑀢𑀺. 𑀤𑀲𑁆𑀲𑀦𑀝𑁆𑀞𑁂𑀦𑀸𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀝𑁆𑀞𑁂𑀦. 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦𑀸𑀢𑀺 𑀧𑀘𑁆𑀘𑀓𑁆𑀔𑁂𑀦 𑀬𑀣𑀸𑀤𑀺𑀝𑁆𑀞𑀸𑀦𑀁 𑀫𑀕𑁆𑀕𑀨𑀮𑀸𑀦𑀁 𑀧𑀸𑀓𑀝𑀓𑀭𑀡𑀝𑁆𑀞𑁂𑀦. 𑀢𑀤𑀥𑀺𑀫𑀼𑀢𑁆𑀢𑀝𑁆𑀞𑁂𑀦𑀸𑀢𑀺 𑀢𑀲𑁆𑀫𑀺𑀁 𑀬𑀣𑀸𑀲𑀘𑁆𑀙𑀺𑀓𑀢𑁂 𑀦𑀺𑀩𑁆𑀩𑀸𑀦𑁂 𑀅𑀥𑀺𑀫𑀼𑀘𑁆𑀘𑀦𑀪𑀸𑀯𑁂𑀦.

𑀓𑀼𑀲𑀮𑀧𑀓𑁆𑀔𑀸𑀢𑀺 𑀅𑀦𑀯𑀚𑁆𑀚𑀓𑁄𑀝𑁆𑀞𑀸𑀲𑀸. 𑀫𑀳𑀸𑀯𑀺𑀧𑀸𑀓𑀤𑀸𑀦𑁂𑀦𑀸𑀢𑀺 𑀫𑀳𑀢𑁄 𑀯𑀺𑀧𑀼𑀮𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑁆𑀲 𑀲𑀼𑀔𑀯𑀺𑀧𑀸𑀓𑀲𑁆𑀲 𑀘𑁂𑀯 𑀓𑀸𑀬𑀺𑀓𑀸𑀤𑀺𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲 𑀘 𑀤𑀸𑀦𑁂𑀦.

𑀬𑀣𑀸 𑀫𑀳𑀸𑀯𑀺𑀧𑀸𑀓𑀲𑁆𑀲 𑀤𑀸𑀦𑁂𑀦 𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑀁, 𑀢𑀣𑀸 𑀩𑀳𑀼𑀢𑀸𑀬𑀧𑀺 𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑁄𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀇𑀫𑀲𑁆𑀫𑀺𑀜𑁆𑀘 𑀧𑀦 𑀲𑀼𑀢𑁆𑀢𑁂 𑀧𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁄 𑀓𑀣𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀳𑀼𑀅𑀢𑁆𑀣𑁄𑀧𑀺 𑀳𑀺 𑀫𑀳𑀸-𑀲𑀤𑁆𑀤𑁄 𑀳𑁄𑀢𑀺 ‘‘𑀫𑀳𑀸𑀚𑀦𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁬𑁫). 𑀏𑀢𑁆𑀣 𑀘 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀢𑁆𑀣𑀼𑀪𑁂𑀤𑁂𑀦 𑀤𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑀸 𑀓𑀣𑀺𑀢𑀸, 𑀯𑀢𑁆𑀣𑀼𑀪𑁂𑀤𑁂𑀦𑁂𑀯, ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀤𑀲 𑀲𑀫𑁆𑀫𑀸𑀤𑀺𑀝𑁆𑀞𑀺𑀥𑀫𑁆𑀫𑀸𑀢𑀺 𑀯𑀻𑀲𑀢𑀺 𑀳𑁄𑀢𑀺. 𑀬𑀣𑀸 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀫𑀕𑁆𑀕𑀯𑀲𑁂𑀦 𑀤𑀲 𑀲𑀫𑁆𑀫𑀢𑁆𑀢𑀥𑀫𑁆𑀫𑀸, 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑁆𑀲 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀢𑁄 𑀤𑀲 𑀫𑀺𑀘𑁆𑀙𑀢𑁆𑀢𑀥𑀫𑁆𑀫𑀸𑀢𑀺 𑀯𑀻𑀲𑀢𑀺, 𑀢𑀣𑀸 𑀨𑀮𑀯𑀲𑁂𑀦 𑀢𑁂𑀲𑀼 𑀏𑀯𑀁 𑀯𑀻𑀲𑀢𑀺. 𑀓𑀣𑀁 𑀯𑀸𑀭𑁂𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀤𑀲𑀸𑀢𑀺 𑀯𑀻𑀲𑀢𑀺? 𑀏𑀯𑀫𑁂𑀢𑁂 𑀤𑁆𑀯𑁂 𑀘𑀢𑁆𑀢𑀸𑀭𑀻𑀲𑀓𑀸𑀦𑀺 𑀧𑀼𑀭𑀺𑀫𑁂𑀦 𑀲𑀤𑁆𑀥𑀺𑀁 𑀢𑀬𑁄 𑀘𑀢𑁆𑀢𑀸𑀭𑀻𑀲𑀓𑀸 𑀯𑀺𑀪𑀸𑀯𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁪𑁩. 𑀧𑀲𑀁𑀲𑀺𑀬𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀁 𑀦𑀺𑀦𑁆𑀤𑀺𑀬𑀁 𑀧𑀲𑀁𑀲𑀦𑁆𑀢𑁄𑀧𑀺 𑀅𑀢𑁆𑀣𑀢𑁄 𑀧𑀲𑀁𑀲𑀺𑀬𑀁 𑀦𑀺𑀦𑁆𑀤𑀦𑁆𑀢𑁄 𑀦𑀸𑀫 𑀳𑁄𑀢𑀺. 𑀧𑀲𑀁𑀲𑀺𑀬𑀲𑁆𑀲 𑀕𑀼𑀡𑀧𑀭𑀺𑀥𑀁𑀲𑀦𑀫𑀼𑀔𑁂𑀦𑁂𑀯 𑀳𑀺 𑀦𑀺𑀦𑁆𑀤𑀺𑀬𑀲𑁆𑀲 𑀧𑀲𑀁𑀲𑀸𑀬 𑀧𑀯𑀢𑁆𑀢𑀦𑀢𑁄𑀢𑀺 𑀆𑀳 𑁋 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑀸𑀫𑀸𑀬𑀁 𑀲𑁄𑀪𑀦𑀸𑀢𑀺 𑀯𑀤𑀦𑁆𑀢𑁄𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀕𑀭𑀳𑀢𑀺 𑀦𑀸𑀫𑀸’’𑀢𑀺𑀆𑀤𑀺. 𑀏𑀯𑀫𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 ‘‘𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁮; 𑀫. 𑀦𑀺. 𑁨.𑁨𑁨𑁭) 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺; 𑀢𑀲𑁆𑀫𑀸 𑀏𑀯𑀁𑀯𑀸𑀤𑀺𑀦𑁄𑀢𑀺 𑀏𑀯𑀁 𑀳𑁂𑀢𑀼 𑀧𑀝𑀺𑀓𑁆𑀔𑁂𑀧𑀯𑀸𑀤𑀺𑀦𑁄𑀢𑀺 𑀅𑀢𑁆𑀣𑁄. 𑀑𑀓𑁆𑀓𑀦𑁆𑀢𑀦𑀺𑀬𑀸𑀫𑀸𑀢𑀺 𑀑𑀕𑀸𑀴𑁆𑀳𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑀸. 𑀏𑀯𑀭𑀽𑀧𑀁 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀘𑀽𑀴𑀧𑀼𑀡𑁆𑀡𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑀫𑁂𑀯 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀤𑀺𑀲𑁄 𑀳𑀺 ‘‘𑀩𑀼𑀤𑁆𑀥𑀸𑀦𑀫𑁆𑀧𑀺 𑀅𑀢𑁂𑀓𑀺𑀘𑁆𑀙𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀲𑀤𑀺𑀲𑁄.

𑀅𑀢𑁆𑀢𑀦𑁄 𑀦𑀺𑀦𑁆𑀤𑀸𑀪𑀬𑁂𑀦𑀸𑀢𑀺 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀜𑁆𑀘 𑀦𑀸𑀫𑁂𑀢𑁂 𑀕𑀭𑀳𑀦𑁆𑀢𑀻’’𑀆𑀤𑀺𑀦𑀸 𑀉𑀧𑀭𑀺 𑀧𑀭𑁂𑀳𑀺 𑀯𑀢𑁆𑀢𑀩𑁆𑀩𑀦𑀺𑀦𑁆𑀤𑀸𑀪𑀬𑁂𑀦. 𑀖𑀝𑁆𑀝𑀦𑀪𑀬𑁂𑀦𑀸𑀢𑀺 𑀢𑀣𑀸 𑀧𑀭𑁂𑀲𑀁 𑀆𑀲𑀸𑀤𑀦𑀸𑀪𑀬𑁂𑀦. 𑀲𑀳𑀥𑀫𑁆𑀫𑁂𑀦 𑀧𑀭𑁂𑀦 𑀅𑀢𑁆𑀢𑀦𑁄 𑀉𑀧𑀭𑀺 𑀓𑀸𑀢𑀩𑁆𑀩𑀦𑀺𑀕𑁆𑀕𑀳𑁄 𑀉𑀧𑀸𑀭𑀫𑁆𑀪𑁄, 𑀕𑀭𑀳𑀢𑁄 𑀧𑀭𑀺𑀢𑁆𑀢𑀸𑀲𑁄 𑀉𑀧𑀸𑀭𑀫𑁆𑀪𑀪𑀬𑀁, 𑀢𑀁 𑀧𑀦 𑀅𑀢𑁆𑀣𑀢𑁄 𑀉𑀧𑀯𑀸𑀤𑀪𑀬𑀁 𑀳𑁄𑀢𑀻𑀢𑀺 𑀆𑀳 ‘‘𑀉𑀧𑀯𑀸𑀤𑀪𑀬𑁂𑀦𑀸’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁮. 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁪. 𑀧𑀼𑀩𑁆𑀩𑁂𑀦𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁. ‘‘𑀅𑀧𑀭𑀁 𑀯𑀺𑀲𑁂𑀲’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀲𑁂𑀲𑀯𑀺𑀲𑀬𑁄 𑀘 𑀧𑀼𑀩𑁆𑀩𑀲𑀤𑁆𑀤𑁄𑀢𑀺 𑀆𑀳 𑁋 ‘‘𑀲𑀻𑀮𑀧𑀭𑀺𑀧𑀽𑀭𑀡𑀸𑀤𑀺𑀢𑁄 𑀧𑀼𑀩𑁆𑀩𑀯𑀺𑀲𑁂𑀲𑀢𑁄’’𑀢𑀺.

𑁧𑁪𑁫. 𑀆𑀭𑀤𑁆𑀥𑁄 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀬𑀸 𑀆𑀭𑀸𑀥𑀺𑀢𑁄. 𑀬𑀤𑀢𑁆𑀣𑀸𑀬 𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀸, 𑀯𑀺𑀲𑁂𑀲𑀸𑀧𑀢𑁆𑀢𑀺 𑀘, 𑀢𑀤𑁂𑀯𑁂𑀢𑁆𑀣 𑀅𑀧𑁆𑀧𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀛𑀸𑀦𑀯𑀺𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀅𑀧𑁆𑀧𑀢𑁆𑀢𑀲𑁆𑀲 𑀅𑀭𑀳𑀢𑁆𑀢𑀲𑁆𑀲𑀸’’𑀢𑀺. 𑀓𑁄𑀫𑀼𑀤𑀻𑀢𑀺 𑀓𑀼𑀫𑀼𑀤𑀯𑀢𑀻. 𑀢𑀤𑀸 𑀓𑀺𑀭 𑀓𑀼𑀫𑀼𑀤𑀸𑀦𑀺 𑀲𑀼𑀧𑀼𑀧𑁆𑀨𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀓𑀼𑀫𑀼𑀤𑀸𑀦𑀁 𑀅𑀢𑁆𑀣𑀺𑀢𑀸𑀬 𑀓𑁄𑀫𑀼𑀤𑀻’’𑀢𑀺. 𑀓𑀼𑀫𑀼𑀤𑀸𑀦𑀁 𑀲𑀫𑀽𑀳𑁄, 𑀓𑀼𑀫𑀼𑀤𑀸𑀦𑀺 𑀏𑀯 𑀯𑀸 𑀓𑁄𑀫𑀼𑀤𑀸, 𑀢𑁂 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀓𑁄𑀫𑀼𑀤𑀻𑀢𑀺. 𑀧𑀯𑀸𑀭𑀡𑀲𑀗𑁆𑀕𑀳𑀦𑁆𑀢𑀺 𑀫𑀳𑀸𑀧𑀯𑀸𑀭𑀡𑀁 𑀅𑀓𑀢𑁆𑀯𑀸 𑀆𑀕𑀫𑀦𑀻𑀬𑀲𑀗𑁆𑀕𑀳𑀡𑀁.

𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲𑀸𑀢𑀺 𑀆𑀭𑀪𑀺𑀢𑀯𑀺𑀧𑀲𑁆𑀲𑀦𑀲𑁆𑀲, 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀲𑁆𑀲. 𑀪𑀺𑀓𑁆𑀔𑀽 𑀇𑀥 𑀑𑀲𑀭𑀺𑀲𑁆𑀲𑀦𑁆𑀢𑀺 𑀯𑀼𑀢𑁆𑀣𑀯𑀲𑁆𑀲𑀸 𑀧𑀯𑀸𑀭𑀺𑀢𑀧𑀯𑀸𑀭𑀡𑀸 ‘‘𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀲𑁆𑀲𑀸𑀫, 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀲𑁆𑀲𑀸𑀫, 𑀬𑀣𑀸𑀮𑀤𑁆𑀥𑀁 𑀯𑀺𑀲𑁂𑀲𑀜𑁆𑀘 𑀧𑀯𑁂𑀤𑀺𑀲𑁆𑀲𑀸𑀫𑀸’’𑀢𑀺 𑀅𑀚𑁆𑀛𑀸𑀲𑀬𑁂𑀦. 𑀇𑀫𑁂 𑀪𑀺𑀓𑁆𑀔𑀽𑀢𑀺 𑀇𑀫𑁂 𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀸 𑀪𑀺𑀓𑁆𑀔𑀽. 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀸𑀤𑀺𑀅𑀮𑀸𑀪𑁂𑀦. 𑀅𑀧𑀮𑀺𑀩𑀼𑀤𑁆𑀥𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀦𑀼𑀧𑀤𑁆𑀤𑀼𑀢𑀁. 𑀲𑁂𑀦𑀸𑀲𑀦𑀁 𑀕𑀳𑁂𑀢𑀼𑀁 𑀦 𑀮𑀪𑀦𑁆𑀢𑀺 𑀅𑀦𑁆𑀢𑁄𑀯𑀲𑁆𑀲𑀪𑀸𑀯𑀢𑁄. 𑀏𑀓𑀲𑁆𑀲 𑀤𑀺𑀦𑁆𑀦𑁄𑀧𑀺 𑀲𑀩𑁆𑀩𑁂𑀲𑀁 𑀤𑀺𑀦𑁆𑀦𑁄𑀬𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀢𑀲𑀼𑀢𑀝𑁆𑀞𑀸𑀦𑁂𑀬𑁂𑀯 𑀏𑀓𑀫𑀸𑀲𑀁 𑀯𑀲𑀺𑀢𑁆𑀯𑀸 𑀑𑀲𑀭𑀺𑀁𑀲𑀼.

𑁧𑁪𑁬. 𑀅𑀮𑀦𑁆𑀢𑀺 𑀬𑀼𑀢𑁆𑀢𑀁, 𑀑𑀧𑀸𑀬𑀺𑀓𑀦𑁆𑀢𑀺 𑀅𑀢𑁆𑀣𑁄, ‘‘𑀅𑀮𑀫𑁂𑀯 𑀦𑀺𑀩𑁆𑀩𑀺𑀦𑁆𑀤𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁭𑁨; 𑀲𑀁. 𑀦𑀺. 𑁨.𑁧𑁨𑁪, 𑁧𑁨𑁮, 𑁧𑁩𑁪, 𑁧𑁪𑁩) 𑀯𑀺𑀬. 𑀧𑀼𑀝𑀩𑀤𑁆𑀥𑀁 𑀧𑀭𑀺𑀳𑀭𑀺𑀢𑁆𑀯𑀸 𑀅𑀲𑀺𑀢𑀁 𑀧𑀼𑀝𑁄𑀲𑀁 𑀅-𑀓𑀸𑀭𑀲𑁆𑀲 𑀑-𑀓𑀸𑀭𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀧𑀸𑀣𑁂𑀬𑁆𑀬’’𑀦𑁆𑀢𑀺.

𑁧𑁪𑁭. 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀸𑀫𑀼𑀔𑁂𑀦𑁂𑀯 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸 𑀓𑀣𑀺𑀢𑀸. 𑀦 𑀳𑀺 𑀓𑁂𑀯𑀮𑀸𑀬 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀧𑀲𑁆𑀲𑀦𑀸𑀓𑀺𑀘𑁆𑀘𑀁 𑀲𑀫𑀺𑀚𑁆𑀛𑀢𑀺. 𑀩𑀳𑀽 𑀪𑀺𑀓𑁆𑀔𑀽 𑀢𑁂 𑀘 𑀯𑀺𑀢𑁆𑀣𑀸𑀭𑀭𑀼𑀘𑀺𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.