𑁩. 𑀲𑀼𑀜𑁆𑀜𑀢𑀯𑀕𑁆𑀕𑁄

𑁧. 𑀘𑀽𑀴𑀲𑀼𑀜𑁆𑀜𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁬. 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸𑀢𑀺 𑀲𑀫𑀸𑀧𑀚𑁆𑀚𑀦𑁆𑀢𑁂𑀳𑀺 𑀦𑀸𑀫 𑀓𑀸𑀮𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀣𑁂𑀭𑁄 𑀧𑀦 𑀪𑀕𑀯𑀢𑁄 𑀯𑀢𑁆𑀢𑀓𑀭𑀡𑀢𑁆𑀣𑀁 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀭𑁄𑀢𑀺, ‘‘𑀏𑀢𑁆𑀢𑀓𑁂 𑀓𑀸𑀮𑁂 𑀯𑀻𑀢𑀺𑀯𑀢𑁆𑀢𑁂 𑀇𑀤𑀁 𑀦𑀸𑀫 𑀪𑀕𑀯𑀢𑁄 𑀓𑀸𑀢𑀩𑁆𑀩’’𑀦𑁆𑀢𑀺. 𑀲𑁄 𑀢𑀢𑁆𑀣𑀓𑀁𑀬𑁂𑀯 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸’’𑀢𑀺. 𑀲𑀼𑀜𑁆𑀜𑀢𑀸𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸𑀢𑀺 𑀏𑀢𑁂𑀦 𑀇𑀢𑀭𑁂, ‘‘𑀦 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀯𑀸𑀤𑀁 𑀧𑀝𑀺𑀲𑁂𑀥𑁂𑀢𑀺. 𑀲𑀼𑀜𑁆𑀜𑀢𑁄𑀢𑀺 𑀅𑀢𑁆𑀢𑀲𑀼𑀜𑁆𑀜𑀢𑁄 𑀘 𑀦𑀺𑀘𑁆𑀘𑀲𑀼𑀜𑁆𑀜𑀢𑁄 𑀘 𑀲𑀗𑁆𑀔𑀸𑀭𑀸 𑀉𑀧𑀝𑁆𑀞𑀳𑀺𑀁𑀲𑀼. 𑀲𑁂𑀓𑁆𑀔𑀸𑀦𑀜𑁆𑀳𑀺 𑀲𑀼𑀜𑁆𑀜𑀢𑀸𑀧𑀝𑀺𑀯𑁂𑀥𑁄 𑀧𑀸𑀤𑁂𑀲𑀺𑀓𑁄 𑀲𑀼𑀪𑀲𑀼𑀔𑀲𑀜𑁆𑀜𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸, 𑀢𑀲𑁆𑀫𑀸 𑀲𑁄 𑀣𑁂𑀭𑁄 𑀲𑀼𑀜𑁆𑀜𑀢𑀸𑀓𑀣𑀁 𑀲𑁄𑀢𑀼𑀓𑀸𑀫𑁄 𑀚𑀸𑀢𑁄. 𑀥𑀼𑀭𑁂𑀦 𑀥𑀼𑀭𑀁 𑀧𑀳𑀭𑀦𑁆𑀢𑁂𑀦 𑀯𑀺𑀬𑀸𑀢𑀺 𑀭𑀣𑀥𑀼𑀭𑁂𑀦 𑀭𑀣𑀥𑀼𑀭𑀁 𑀧𑀳𑀭𑀦𑁆𑀢𑁂𑀦 𑀯𑀺𑀬 𑀓𑀢𑁆𑀯𑀸 𑀉𑀚𑀼𑀓𑀫𑁂𑀯 𑀲𑀼𑀜𑁆𑀜𑀢𑀸…𑀧𑁂… 𑀯𑀢𑁆𑀣𑀼𑀁 𑀦 𑀲𑀓𑁆𑀓𑀸𑀢𑀺 𑀬𑁄𑀚𑀦𑀸. 𑀏𑀓𑀁 𑀧𑀤𑀦𑁆𑀢𑀺 𑀏𑀓𑀁 𑀲𑀼𑀜𑁆𑀜𑀢𑀸𑀧𑀤𑀁.

𑀧𑀼𑀩𑁆𑀩𑁂𑀧𑀸𑀳𑀦𑁆𑀢𑀺𑀆𑀤𑀺𑀦𑀸 𑀪𑀕𑀯𑀸 𑀧𑀞𑀫𑀩𑁄𑀥𑀺𑀬𑀫𑁆𑀧𑀺 𑀅𑀢𑁆𑀢𑀦𑁄 𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑀩𑀸𑀳𑀼𑀮𑁆𑀮𑀁 𑀧𑀓𑀸𑀲𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀞𑀫𑀩𑁄𑀥𑀺𑀬𑀫𑁆𑀧𑀻’’𑀢𑀺 𑀆𑀳. 𑀏𑀓𑁄𑀢𑀺𑀆𑀤𑀺 𑀣𑁂𑀭𑀲𑁆𑀲 𑀲𑀼𑀜𑁆𑀜𑀢𑀸𑀓𑀣𑀸𑀬 𑀪𑀸𑀚𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀲𑁄𑀢𑀼𑀦𑁆𑀢𑀺 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀢𑁆𑀯𑀸 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀲𑁄𑀢𑀼𑀫𑁆𑀧𑀺. 𑀉𑀕𑁆𑀕𑀳𑁂𑀢𑀼𑀫𑁆𑀧𑀺𑀢𑀺 𑀬𑀣𑀸𑀪𑀽𑀢𑀁 𑀥𑀫𑁆𑀫𑀁 𑀥𑀸𑀭𑀡𑀧𑀭𑀺𑀧𑀼𑀘𑁆𑀙𑀸𑀧𑀭𑀺𑀘𑀬𑀯𑀲𑁂𑀦 𑀳𑀤𑀬𑁂𑀦 𑀉𑀕𑁆𑀕𑀳𑀺𑀢𑀁 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀅𑀯𑀺𑀦𑀝𑁆𑀞𑁂 𑀓𑀸𑀢𑀼𑀫𑁆𑀧𑀺. 𑀓𑀣𑁂𑀢𑀼𑀫𑁆𑀧𑀻𑀢𑀺 𑀯𑀺𑀢𑁆𑀣𑀸𑀭𑁂𑀦 𑀧𑀭𑁂𑀲𑀁 𑀤𑀲𑁆𑀲𑁂𑀢𑀼𑀫𑁆𑀧𑀺 𑀲𑀓𑁆𑀓𑀸. 𑀢𑀢𑁆𑀣𑀸𑀢𑀺 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂. 𑀓𑀝𑁆𑀞𑀭𑀽𑀧𑀧𑁄𑀢𑁆𑀣𑀓𑀭𑀽𑀧𑀘𑀺𑀢𑁆𑀢𑀭𑀽𑀧𑀯𑀲𑁂𑀦 𑀓𑀢𑀸𑀢𑀺 𑀣𑀫𑁆𑀪𑀸𑀤𑀻𑀲𑀼 𑀉𑀢𑁆𑀢𑀺𑀭𑀺𑀢𑁆𑀯𑀸 𑀓𑀢𑀸𑀦𑀁 𑀓𑀝𑁆𑀞𑀭𑀽𑀧𑀸𑀦𑀁, 𑀦𑀺𑀬𑁆𑀬𑀽𑀳𑀸𑀤𑀻𑀲𑀼 𑀧𑀝𑀺𑀫𑀸𑀯𑀲𑁂𑀦 𑀭𑀘𑀺𑀢𑀸𑀦𑀁 𑀧𑁄𑀢𑁆𑀣𑀓𑀭𑀽𑀧𑀸𑀦𑀁, 𑀲𑀺𑀢𑁆𑀢𑀺𑀧𑀲𑁆𑀲𑁂 𑀘𑀺𑀢𑁆𑀢𑀓𑀫𑁆𑀫𑀯𑀲𑁂𑀦 𑀯𑀺𑀭𑀘𑀺𑀢𑀸𑀦𑀁 𑀘𑀺𑀢𑁆𑀢𑀭𑀽𑀧𑀸𑀦𑀜𑁆𑀘 𑀓𑀢𑀸 𑀦𑀺𑀝𑁆𑀞𑀧𑀺𑀢𑀸. 𑀯𑁂𑀲𑁆𑀲𑀯𑀡𑀫𑀦𑁆𑀥𑀸𑀢𑀸𑀤𑀻𑀦𑀦𑁆𑀢𑀺 𑀧𑀝𑀺𑀫𑀸𑀭𑀽𑀧𑁂𑀦 𑀓𑀢𑀸𑀦𑀁 𑀯𑁂𑀲𑁆𑀲𑀯𑀡𑀫𑀦𑁆𑀥𑀸𑀢𑀼𑀲𑀓𑁆𑀓𑀸𑀤𑀻𑀦𑀁. 𑀘𑀺𑀢𑁆𑀢𑀓𑀫𑁆𑀫𑀯𑀲𑁂𑀦𑀸𑀢𑀺 𑀆𑀭𑀸𑀫𑀸𑀤𑀺𑀘𑀺𑀢𑁆𑀢𑀓𑀫𑁆𑀫𑀯𑀲𑁂𑀦. 𑀲𑀡𑁆𑀞𑀺𑀢𑀫𑁆𑀧𑀻𑀢𑀺 𑀅𑀯𑀬𑀯𑀪𑀸𑀯𑁂𑀦 𑀲𑀡𑁆𑀞𑀺𑀢𑀁 𑀳𑀼𑀢𑁆𑀯𑀸 𑀞𑀺𑀢𑀫𑁆𑀧𑀺. 𑀚𑀺𑀡𑁆𑀡𑀧𑀝𑀺𑀲𑀗𑁆𑀔𑀭𑀡𑀢𑁆𑀣𑀦𑁆𑀢𑀺 𑀚𑀺𑀡𑁆𑀡𑀸𑀦𑀁 𑀦𑀺𑀬𑁆𑀬𑀽𑀳𑀓𑀽𑀝𑀸𑀕𑀸𑀭𑀧𑀸𑀲𑀸𑀤𑀸𑀯𑀬𑀯𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀢𑁆𑀣𑀸𑀬 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀭𑀳𑀲𑁆𑀲𑀲𑀜𑁆𑀜𑀸𑀡𑁂𑀦 𑀞𑀧𑀺𑀢𑀁. ‘‘𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀺𑀘𑁆𑀘𑁂 𑀯𑀺𑀦𑀺𑀬𑀼𑀜𑁆𑀚𑀦𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀲𑁆𑀲. 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺, ‘‘𑀅𑀬𑀁 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄 𑀲𑀼𑀜𑁆𑀜𑁄’’𑀢𑀺𑀆𑀤𑀺𑀓𑀁 𑀯𑀼𑀢𑁆𑀢𑀁.

𑀦𑀺𑀘𑁆𑀘𑀦𑁆𑀢𑀺 𑀲𑀩𑁆𑀩𑀓𑀸𑀮𑀁 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘. 𑀏𑀓𑀪𑀸𑀯𑀁 𑀏𑀓𑀁 𑀅𑀲𑀼𑀜𑁆𑀜𑀢𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀁, 𑀏𑀓𑀢𑁆𑀢𑀁 𑀏𑀓𑁄 𑀅𑀲𑀼𑀜𑁆𑀜𑀢𑁄𑀢𑀺 𑀅𑀢𑁆𑀣𑁄. 𑀕𑀸𑀫𑁄𑀢𑀺 𑀧𑀯𑀢𑁆𑀢𑀦𑀯𑀲𑁂𑀦𑀸𑀢𑀺 𑀕𑁂𑀳𑀲𑀦𑁆𑀦𑀺𑀯𑁂𑀲𑀯𑀻𑀣𑀺𑀘𑀘𑁆𑀘𑀭𑀲𑀺𑀗𑁆𑀖𑀸𑀝𑀓𑀸𑀤𑀺𑀓𑁂 𑀉𑀧𑀸𑀤𑀸𑀬 𑀕𑀸𑀫𑁄𑀢𑀺 𑀮𑁄𑀓𑀼𑀧𑁆𑀧𑀢𑁆𑀢𑀺𑀯𑀲𑁂𑀦. 𑀓𑀺𑀮𑁂𑀲𑀯𑀲𑁂𑀦𑀸𑀢𑀺 𑀢𑀢𑁆𑀣 𑀅𑀦𑀼𑀦𑀬𑀧𑀝𑀺𑀖𑀯𑀲𑁂𑀦. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 ‘‘𑀧𑀯𑀢𑁆𑀢𑀯𑀲𑁂𑀦 𑀯𑀸 𑀓𑀺𑀮𑁂𑀲𑀯𑀲𑁂𑀦 𑀯𑀸 𑀉𑀧𑁆𑀧𑀦𑁆𑀦𑀁 𑀫𑀦𑀼𑀲𑁆𑀲𑀲𑀜𑁆𑀜’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀏𑀢𑁆𑀣 𑀘 𑀬𑀣𑀸 𑀕𑀸𑀫𑀕𑁆𑀕𑀳𑀡𑁂𑀦 𑀖𑀭𑀸𑀤𑀺𑀲𑀜𑁆𑀜𑀸 𑀲𑀗𑁆𑀕𑀳𑀺𑀢𑀸, 𑀏𑀯𑀁 𑀫𑀦𑀼𑀲𑁆𑀲𑀕𑁆𑀕𑀳𑀡𑁂𑀦 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀲𑀜𑁆𑀜𑀸 𑀲𑀗𑁆𑀕𑀳𑀺𑀢𑀸. 𑀬𑀲𑁆𑀫𑀸 𑀭𑀼𑀓𑁆𑀔𑀸𑀤𑀺𑀓𑁂 𑀧𑀝𑀺𑀘𑁆𑀘 𑀅𑀭𑀜𑁆𑀜𑀲𑀜𑁆𑀜𑀸 𑀢𑀢𑁆𑀣 𑀧𑀩𑁆𑀩𑀢𑀯𑀦𑀲𑀡𑁆𑀟𑀸𑀤𑀬𑁄 𑀅𑀦𑁆𑀢𑁄𑀕𑀥𑀸, 𑀢𑀲𑁆𑀫𑀸 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀢𑀁 𑀯𑀺𑀪𑀸𑀕𑀁 𑀅𑀕𑁆𑀕𑀳𑁂𑀢𑁆𑀯𑀸 𑀏𑀓𑀁 𑀅𑀭𑀜𑁆𑀜𑀁𑀬𑁂𑀯 𑀧𑀝𑀺𑀘𑁆𑀘 𑀅𑀭𑀜𑁆𑀜𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀢𑀺. 𑀑𑀢𑀭𑀢𑀻𑀢𑀺 𑀅𑀦𑀼𑀧𑁆𑀧𑀯𑀺𑀲𑀢𑀺. 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀦𑀺𑀘𑁆𑀙𑀺𑀦𑁄𑀢𑀺. 𑀧𑀯𑀢𑁆𑀢𑀤𑀭𑀣𑀸𑀢𑀺 𑀢𑀣𑀸𑀭𑀽𑀧𑀸𑀬 𑀧𑀲𑁆𑀲𑀤𑁆𑀥𑀺𑀬𑀸 𑀅𑀪𑀸𑀯𑀢𑁄 𑀑𑀴𑀸𑀭𑀺𑀓𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀲𑀺𑀤𑁆𑀥𑀸 𑀤𑀭𑀣𑀸. 𑀓𑀺𑀮𑁂𑀲𑀤𑀭𑀣𑀸𑀢𑀺 𑀅𑀦𑀼𑀦𑀬𑀧𑀝𑀺𑀖𑀲𑀫𑁆𑀪𑀯𑀸 𑀓𑀺𑀮𑁂𑀲𑀤𑀭𑀣𑀸. 𑀤𑀼𑀢𑀺𑀬𑀧𑀤𑁂𑀢𑀺 ‘‘𑀬𑁂 𑀅𑀲𑁆𑀲𑀼 𑀤𑀭𑀣𑀸 𑀫𑀦𑀼𑀲𑁆𑀲𑀲𑀜𑁆𑀜𑀁 𑀧𑀝𑀺𑀘𑁆𑀘𑀸’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂. 𑀫𑀦𑀲𑀺𑀓𑀸𑀭𑀲𑀦𑁆𑀢𑀢𑀸𑀬, 𑁋 ‘‘𑀦𑀸𑀬𑀁 𑀧𑀼𑀩𑁆𑀩𑁂 𑀯𑀺𑀬 𑀑𑀴𑀸𑀭𑀺𑀓𑀸, 𑀥𑀫𑁆𑀫𑀧𑁆𑀧𑀯𑀢𑁆𑀢𑀻’’𑀢𑀺 𑀲𑀗𑁆𑀔𑀸𑀭𑀤𑀲𑁆𑀲𑀦𑀤𑀭𑀣𑀸𑀦𑀁 𑀲𑀼𑀔𑀼𑀫𑀢𑀸 𑀲𑀮𑁆𑀮𑀳𑀼𑀓𑀢𑀸 𑀘 𑀘𑀭𑀺𑀢𑀢𑁆𑀣𑀸𑀢𑀺 𑀆𑀳 ‘‘𑀧𑀯𑀢𑁆𑀢𑀤𑀭𑀣𑀫𑀢𑁆𑀢𑀸 𑀅𑀢𑁆𑀣𑀻’’𑀢𑀺.

𑀬𑀁 𑀓𑀺𑀮𑁂𑀲𑀤𑀭𑀣𑀚𑀸𑀢𑀁, 𑀢𑀁 𑀇𑀫𑀺𑀲𑁆𑀲𑀸 𑀤𑀭𑀣𑀲𑀜𑁆𑀜𑀸𑀬 𑀦 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀧𑀯𑀢𑁆𑀢𑀤𑀭𑀣𑀫𑀢𑁆𑀢𑀁 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺, 𑀯𑀺𑀚𑁆𑀚𑀫𑀸𑀦𑀫𑁂𑀯 𑀅𑀢𑁆𑀣𑀺 𑀇𑀤𑀦𑁆𑀢𑀺 𑀧𑀚𑀸𑀦𑀸𑀢𑀻𑀢𑀺 𑀬𑁄𑀚𑀦𑀸. 𑀲𑀼𑀜𑁆𑀜𑀢𑀸 𑀦𑀺𑀩𑁆𑀩𑀢𑁆𑀢𑀻𑀢𑀺 𑀲𑀼𑀜𑁆𑀜𑀢𑀦𑁆𑀢𑀺 𑀧𑀯𑀢𑁆𑀢𑀺. 𑀲𑀼𑀜𑁆𑀜𑀢𑀸 𑀲𑀳𑀘𑀭𑀺𑀢𑀜𑁆𑀳𑀺 𑀲𑀼𑀜𑁆𑀜𑀁, 𑀇𑀥 𑀲𑀼𑀜𑁆𑀜𑀢𑀸𑀢𑀺 𑀯𑀼𑀢𑁆𑀢𑀸.

𑁧𑁭𑁭. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄 𑀏𑀯𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀅𑀳𑁄𑀲𑀺. 𑀅𑀘𑁆𑀘𑀦𑁆𑀢𑀲𑀼𑀜𑁆𑀜𑀢𑀦𑁆𑀢𑀺 ‘‘𑀧𑀭𑀫𑀸𑀦𑀼𑀢𑁆𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁 𑀅𑀭𑀳𑀢𑁆𑀢𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺. 𑀅𑀭𑀜𑁆𑀜𑀲𑀜𑁆𑀜𑀸𑀬 𑀯𑀺𑀲𑁂𑀲𑀸𑀦𑀥𑀺𑀕𑀫𑀦𑀢𑁄𑀢𑀺, ‘‘𑀅𑀭𑀜𑁆𑀜𑀁 𑀅𑀭𑀜𑁆𑀜’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁂𑀦 𑀛𑀸𑀦𑀸𑀤𑀺𑀯𑀺𑀲𑁂𑀲𑀲𑁆𑀲 𑀅𑀥𑀺𑀕𑀫𑀸𑀪𑀸𑀯𑀢𑁄, ‘‘𑀧𑀣𑀯𑀻’’𑀢𑀺 𑀫𑀦𑀲𑀺𑀓𑀸𑀭𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑀦𑀢𑁄. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀯𑀧𑀺𑀢𑁂 𑀲𑀸𑀮𑀺𑀆𑀤𑀬𑁄 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀥𑀼𑀯𑀲𑁂𑀯𑀦𑀦𑁆𑀢𑀺 𑀦𑀺𑀬𑀢𑀲𑁂𑀯𑀦𑀁 𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦𑀁. 𑀧𑀝𑀺𑀘𑁆𑀘𑀸𑀢𑀺 𑀏𑀢𑁆𑀣 ‘‘𑀲𑀫𑁆𑀪𑀽𑀢’’𑀦𑁆𑀢𑀺 𑀯𑀘𑀦𑀲𑁂𑀲𑁄 𑀇𑀘𑁆𑀙𑀺𑀢𑁄𑀢𑀺 𑀆𑀳 ‘‘𑀧𑀝𑀺𑀘𑁆𑀘 𑀲𑀫𑁆𑀪𑀽𑀢’’𑀦𑁆𑀢𑀺. 𑀧𑀣𑀯𑀺𑀁 𑀧𑀝𑀺𑀘𑁆𑀘 𑀲𑀫𑁆𑀪𑀽𑀢𑀸 𑀳𑀺 𑀲𑀜𑁆𑀜𑀸𑀢𑀺.

𑀧𑀣𑀯𑀻𑀓𑀲𑀺𑀡𑁂 𑀲𑁄 𑀧𑀣𑀯𑀻𑀲𑀜𑁆𑀜𑀻 𑀳𑁄𑀢𑀺, 𑀦 𑀧𑀓𑀢𑀺𑀧𑀣𑀯𑀺𑀬𑀁. 𑀢𑀲𑁆𑀲𑀸𑀢𑀺 𑀧𑀣𑀯𑀻𑀓𑀲𑀺𑀡𑀲𑁆𑀲. 𑀢𑁂𑀳𑀻𑀢𑀺 𑀕𑀡𑁆𑀟𑀸𑀤𑀻𑀳𑀺. 𑀲𑀼𑀝𑁆𑀞𑀼 𑀯𑀺𑀳𑀢𑀦𑁆𑀢𑀺 𑀬𑀣𑀸 𑀯𑀮𑀻𑀦𑀁 𑀮𑁂𑀲𑁄𑀧𑀺 𑀦 𑀳𑁄𑀢𑀺, 𑀏𑀯𑀁 𑀲𑀫𑁆𑀫𑀤𑁂𑀯 𑀆𑀓𑁄𑀝𑀺𑀢𑀁. 𑀦𑀤𑀻𑀢𑀴𑀸𑀓𑀸𑀤𑀻𑀦𑀁 𑀢𑀻𑀭𑀧𑁆𑀧𑀤𑁂𑀲𑁄 𑀉𑀤𑀓𑀲𑁆𑀲 𑀆𑀓𑀭𑀝𑁆𑀞𑁂𑀦 𑀓𑀽𑀮𑀁, 𑀉𑀦𑁆𑀦𑀢𑀪𑀸𑀯𑀢𑁄 𑀉𑀕𑁆𑀕𑀢𑀁 𑀓𑀽𑀮𑀁 𑀯𑀺𑀬𑀸𑀢𑀺 𑀉𑀓𑁆𑀓𑀽𑀮𑀁, 𑀪𑀽𑀫𑀺𑀬𑀸 𑀉𑀘𑁆𑀘𑀝𑁆𑀞𑀸𑀦𑀁. 𑀯𑀺𑀕𑀢𑀁 𑀓𑀽𑀮𑀦𑁆𑀢𑀺 𑀯𑀺𑀓𑁆𑀓𑀽𑀮𑀁, 𑀦𑀻𑀘𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀉𑀘𑁆𑀘𑀦𑀻𑀘’’𑀦𑁆𑀢𑀺. 𑀏𑀓𑀁 𑀲𑀜𑁆𑀜𑀦𑁆𑀢𑀺 𑀏𑀓𑀁 𑀧𑀣𑀯𑀻𑀢𑀺𑀲𑀜𑁆𑀜𑀁𑀬𑁂𑀯.

𑁧𑁮𑁨. 𑀲𑀢𑀺𑀧𑀺 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀯𑀺𑀭𑀳𑁂 𑀬𑀸𑀤𑀺𑀲𑀸𑀦𑀁 𑀦𑀺𑀫𑀺𑀢𑁆𑀢𑀸𑀦𑀁 𑀅𑀪𑀸𑀯𑁂𑀦 ‘‘𑀅𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁, ‘‘𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀺𑀯𑀺𑀭𑀳𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀫𑀳𑀸𑀪𑀽𑀢𑀺𑀓𑀁 𑀘𑀢𑀼𑀫𑀳𑀸𑀪𑀽𑀢𑀦𑀺𑀲𑁆𑀲𑀺𑀢𑀁. 𑀲𑀴𑀸𑀬𑀢𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀘𑀓𑁆𑀔𑀸𑀬𑀢𑀦𑀸𑀤𑀺𑀲𑀴𑀸𑀬𑀢𑀦𑀲𑀳𑀺𑀢𑀁.

𑁧𑁮𑁩. 𑀯𑀺𑀧𑀲𑁆𑀲𑀦𑀸𑀬 𑀧𑀝𑀺𑀯𑀺𑀧𑀲𑁆𑀲𑀦𑀦𑁆𑀢𑀺 𑀥𑀫𑁆𑀫𑀸𑀦𑀜𑁆𑀘 𑀧𑀼𑀦 𑀯𑀺𑀧𑀲𑁆𑀲𑀦𑀁. 𑀇𑀥𑀸𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀪𑀽𑀢𑀬𑀣𑀸𑀥𑀺𑀕𑀢𑀫𑀕𑁆𑀕𑀨𑀮𑀁 𑀯𑀤𑀢𑀻𑀢𑀺 𑀆𑀳 𑁋 ‘‘𑀅𑀭𑀺𑀬𑀫𑀕𑁆𑀕𑁂 𑀘𑁂𑀯 𑀅𑀭𑀺𑀬𑀨𑀮𑁂 𑀘𑀸’’𑀢𑀺. 𑀉𑀧𑀸𑀤𑀺𑀲𑁂𑀲𑀤𑀭𑀣𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀲𑀩𑁆𑀩𑀲𑁄 𑀓𑀺𑀮𑁂𑀲𑀼𑀧𑀥𑀺𑀬𑀸 𑀧𑀳𑀻𑀦𑀸𑀬 𑀔𑀦𑁆𑀥𑁄𑀧𑀥𑀺 𑀅𑀯𑀺𑀲𑀺𑀝𑁆𑀞𑀸, 𑀢𑀧𑁆𑀧𑀘𑁆𑀘𑀬𑀸 𑀤𑀭𑀣𑀸 𑀉𑀧𑀸𑀤𑀺𑀲𑁂𑀲𑀤𑀭𑀣𑀸, 𑀢𑀁 𑀤𑀲𑁆𑀲𑀦𑀢𑁆𑀣𑀁. 𑀬𑀲𑁆𑀫𑀸 𑀯𑀺𑀲𑀬𑀢𑁄 𑀕𑀸𑀫𑀲𑀜𑁆𑀜𑀸 𑀑𑀴𑀸𑀭𑀺𑀓𑀸, 𑀫𑀦𑀼𑀲𑁆𑀲𑀲𑀜𑁆𑀜𑀸 𑀲𑀼𑀔𑀼𑀫𑀸, 𑀢𑀲𑁆𑀫𑀸 𑀫𑀦𑀼𑀲𑁆𑀲𑀲𑀜𑁆𑀜𑀸𑀬 𑀕𑀸𑀫𑀲𑀜𑁆𑀜𑀁 𑀦𑀺𑀯𑀢𑁆𑀢𑁂𑀢𑁆𑀯𑀸. 𑀬𑀲𑁆𑀫𑀸 𑀧𑀦 𑀫𑀦𑀼𑀲𑁆𑀲𑀲𑀜𑁆𑀜𑀸𑀧𑀺 𑀲𑀪𑀸𑀕𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀢𑁄 𑀑𑀴𑀸𑀭𑀺𑀓𑀸, 𑀲𑀪𑀸𑀕𑀯𑀢𑁆𑀣𑀼𑀢𑁄 𑀅𑀭𑀜𑁆𑀜𑀲𑀜𑁆𑀜𑀸 𑀲𑀼𑀔𑀼𑀫𑀸, 𑀢𑀲𑁆𑀫𑀸 𑀅𑀭𑀜𑁆𑀜𑀲𑀜𑁆𑀜𑀸𑀬 𑀫𑀦𑀼𑀲𑁆𑀲𑀲𑀜𑁆𑀜𑀁 𑀦𑀺𑀯𑀢𑁆𑀢𑁂𑀢𑁆𑀯𑀸. 𑀧𑀣𑀯𑀻𑀲𑀜𑁆𑀜𑀸𑀤𑀺𑀦𑀺𑀯𑀢𑁆𑀢𑀦𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀲𑀼𑀢𑁆𑀢𑀦𑁆𑀢𑀭𑁂𑀲𑀼 𑀘 𑀯𑀼𑀢𑁆𑀢𑀫𑁂𑀯. 𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 𑀫𑀕𑁆𑀕𑀧𑁆𑀧𑀝𑀺𑀧𑀸𑀝𑀺𑀬𑀸. 𑀦𑀺𑀘𑁆𑀘𑀲𑀸𑀭𑀸𑀤𑀻𑀦𑀁 𑀲𑀩𑁆𑀩𑀲𑁄 𑀅𑀯𑀢𑁆𑀣𑀼𑀢𑀸𑀬 𑀅𑀘𑁆𑀘𑀦𑁆𑀢𑀫𑁂𑀯 𑀲𑀼𑀜𑁆𑀜𑀢𑁆𑀢𑀸 𑀅𑀘𑁆𑀘𑀦𑁆𑀢𑀲𑀼𑀜𑁆𑀜𑀢𑀸.

𑁧𑁮𑁪. 𑀲𑀼𑀜𑁆𑀜𑀢𑀨𑀮𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀲𑁆𑀲 𑀨𑀮𑀪𑀽𑀢𑀢𑁆𑀢𑀸, 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀬 𑀯𑀲𑁂𑀦 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀘 𑀲𑀼𑀜𑁆𑀜𑀢𑀨𑀮𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀁. 𑀬𑀲𑁆𑀫𑀸 𑀅𑀢𑀻𑀢𑁂 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀅𑀳𑁂𑀲𑀼𑀁, 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀦𑁆𑀢𑀺, 𑀇𑀤𑀸𑀦𑀺 𑀧𑀦 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀥𑀭𑀫𑀸𑀦𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦 𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀕𑁆𑀕𑀳𑀡𑀁 𑀅𑀓𑀢𑁆𑀯𑀸, ‘‘𑀏𑀢𑀭𑀳𑀺𑀧𑀺 𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀲𑀗𑁆𑀔𑀸𑀢𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀦 𑀳𑀺 𑀩𑀼𑀤𑁆𑀥𑀲𑀸𑀲𑀦𑁂 𑀥𑀭𑀦𑁆𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀪𑀯𑀦𑁆𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀽𑀴𑀲𑀼𑀜𑁆𑀜𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀫𑀳𑀸𑀲𑀼𑀜𑁆𑀜𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁫. 𑀙𑀯𑀺𑀯𑀡𑁆𑀡𑁂𑀦 𑀲𑁄 𑀓𑀸𑀴𑁄, 𑀦 𑀦𑀸𑀫𑁂𑀦. 𑀧𑀮𑀸𑀮𑀲𑀦𑁆𑀣𑀸𑀭𑁄𑀢𑀺 𑀆𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑁄𑀘𑁆𑀙𑀘𑀺𑀫𑀺𑀮𑀺𑀓𑀸𑀓𑀝𑀲𑀸𑀭𑀸𑀤𑀻𑀦𑀁 𑀕𑀳𑀡𑀁. 𑀕𑀡𑀪𑀺𑀓𑁆𑀔𑀽𑀦𑀦𑁆𑀢𑀺 𑀕𑀡𑀩𑀦𑁆𑀥𑀦𑀯𑀲𑁂𑀦 𑀪𑀺𑀓𑁆𑀔𑀽𑀦𑀁.

𑀬𑀤𑀺 𑀲𑀁𑀲𑀬𑁄 𑀦𑀸𑀫 𑀦𑀢𑁆𑀣𑀺, ‘‘𑀲𑀫𑁆𑀩𑀳𑀼𑀮𑀸 𑀦𑀼 𑀔𑁄’’𑀢𑀺 𑀇𑀤𑀁 𑀓𑀣𑀦𑁆𑀢𑀺 𑀆𑀳 ‘‘𑀯𑀺𑀢𑀓𑁆𑀓𑀧𑀼𑀩𑁆𑀩𑀪𑀸𑀕𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀢𑀓𑁆𑀓𑁄 𑀧𑀼𑀩𑁆𑀩𑀪𑀸𑀕𑁄 𑀏𑀢𑀺𑀲𑁆𑀲𑀸𑀢𑀺 𑀯𑀺𑀢𑀓𑁆𑀓𑀧𑀼𑀩𑁆𑀩𑀪𑀸𑀕𑀸, 𑀧𑀼𑀘𑁆𑀙𑀸. 𑀲𑀸 ‘‘𑀲𑀫𑁆𑀩𑀳𑀼𑀮𑀸 𑀦𑁄 𑀏𑀢𑁆𑀣 𑀪𑀺𑀓𑁆𑀔𑀽𑀯𑀺𑀳𑀭𑀦𑁆𑀢𑀻’’𑀢𑀺 𑀯𑀘𑀦𑀁, 𑀯𑀺𑀢𑀓𑁆𑀓𑁄 𑀧𑀦 ‘‘𑀲𑀫𑁆𑀩𑀳𑀼𑀮𑀸 𑀦𑀼 𑀔𑁄 𑀇𑀥 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀢𑀤𑀸 𑀪𑀕𑀯𑀢𑁄 𑀉𑀧𑁆𑀧𑀦𑁆𑀦𑁄 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄, 𑀢𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀲𑁆𑀲 𑀢𑀩𑁆𑀪𑀸𑀯𑀚𑁄𑀢𑀦𑁄𑀬𑀁 𑀦𑀼-𑀓𑀸𑀭𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀯𑀺𑀢𑀓𑁆𑀓𑀧𑀼𑀩𑁆𑀩𑀪𑀸𑀕𑁂 𑀘𑀸𑀬𑀁 𑀦𑀼-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄’’𑀢𑀺. 𑀓𑀺𑀜𑁆𑀘𑀸𑀧𑀺 𑀕𑀘𑁆𑀙𑀦𑁆𑀢𑁄 𑀤𑀺𑀲𑁆𑀯𑀸, ‘‘𑀲𑀫𑁆𑀩𑀳𑀼𑀮𑀸 𑀦𑁄 𑀏𑀢𑁆𑀣 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀸𑀯𑀲𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑁄, 𑀅𑀣 𑀔𑁄 ‘‘𑀦 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀲𑁄𑀪𑀢𑀺 𑀲𑀗𑁆𑀕𑀡𑀺𑀓𑀸𑀭𑀸𑀫𑁄’’𑀢𑀺𑀆𑀤𑀺 (𑀫. 𑀦𑀺. 𑁩.𑁧𑁮𑁫) 𑀉𑀧𑀭𑀺𑀤𑁂𑀲𑀦𑀸𑀯𑀲𑁂𑀦 𑀫𑀢𑁆𑀣𑀓𑀁 𑀕𑀘𑁆𑀙𑀦𑁆𑀢𑁂 𑀅𑀯𑀺𑀦𑀺𑀘𑁆𑀙𑀺𑀢𑁄 𑀦𑀸𑀫 𑀦 𑀳𑁄𑀢𑀺, 𑀅𑀣 𑀔𑁄 𑀯𑀺𑀲𑀼𑀁 𑀯𑀺𑀦𑀺𑀘𑁆𑀙𑀺𑀢𑁄 𑀏𑀯 𑀳𑁄𑀢𑀺, 𑀤𑀺𑀲𑁆𑀯𑀸 𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀯 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀢𑀣𑀸 𑀧𑀼𑀘𑁆𑀙𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀻’’𑀢𑀺 (𑀧𑀸𑀭𑀸. 𑁧𑁬). 𑀢𑁂𑀦𑀸𑀳 ‘‘𑀇𑀢𑁄 𑀓𑀺𑀭𑀸’’𑀢𑀺𑀆𑀤𑀺.

𑀬𑀣𑀸 𑀦𑀤𑀻𑀑𑀢𑀺𑀡𑁆𑀡𑀁 𑀉𑀤𑀓𑀁 𑀬𑀣𑀸𑀦𑀺𑀦𑁆𑀦𑀁 𑀧𑀓𑁆𑀔𑀦𑁆𑀤𑀢𑀺, 𑀏𑀯𑀁 𑀲𑀢𑁆𑀢𑀸 𑀥𑀸𑀢𑀼𑀲𑁄 𑀲𑀁𑀲𑀦𑁆𑀤𑀦𑁆𑀢𑀺, 𑀢𑀲𑁆𑀫𑀸 ‘‘𑀕𑀡𑀯𑀸𑀲𑁄 𑀦𑀤𑀻𑀑𑀢𑀺𑀡𑁆𑀡𑀉𑀤𑀓𑀲𑀤𑀺𑀲𑁄’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑁋 ‘‘𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀯𑀺𑀦𑁆𑀤𑀸𑀤𑀺𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀸𑀦𑀺 𑀲𑀡𑁆𑀳𑀲𑀼𑀔𑀼𑀫𑀪𑀸𑀯𑀢𑁄 𑀦𑀸𑀴𑀺𑀬𑀁 𑀧𑀓𑁆𑀔𑀺𑀢𑁆𑀢𑀸𑀦𑀺 𑀦𑀺𑀭𑀦𑁆𑀢𑀭𑀸𑀦𑁂𑀯 𑀢𑀺𑀝𑁆𑀞𑀦𑁆𑀢𑀻𑀢𑀺 𑀆𑀳 𑁋 ‘‘𑀘𑀼𑀡𑁆𑀡𑀪𑀭𑀺𑀢𑀸 𑀦𑀸𑀴𑀺 𑀯𑀺𑀬𑀸’’𑀢𑀺. 𑀲𑀢𑁆𑀢𑀧𑀡𑁆𑀡𑀸𑀲 𑀓𑀼𑀮𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀧𑀜𑁆𑀜𑀸𑀲 𑀓𑀼𑀮𑀸𑀦𑀁𑀬𑁂𑀯 𑀲𑀢𑀲𑀳𑀲𑁆𑀲𑀸𑀦𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀯𑀲𑁂𑀦 𑀲𑀢𑁆𑀢 𑀓𑁄𑀝𑀺𑀬𑁄 𑀢𑀤𑀸 𑀢𑀢𑁆𑀣 𑀯𑀲𑀺𑀁𑀲𑀼.

𑀢𑀢𑁄 𑀘𑀺𑀦𑁆𑀢𑁂𑀲𑀺, 𑀓𑀣𑀁? 𑀓𑀸𑀫𑀜𑁆𑀘𑀸𑀬𑀁 𑀮𑁄𑀓𑀧𑀓𑀢𑀺, 𑀫𑀬𑁆𑀳𑀁 𑀧𑀦 𑀲𑀸𑀲𑀦𑁂 𑀅𑀬𑀼𑀢𑁆𑀢𑁄𑀯 𑀲𑁄𑀢𑀺 𑀆𑀳 𑁋 ‘‘𑀫𑀬𑀸’’𑀢𑀺𑀆𑀤𑀺. 𑀥𑀫𑁆𑀫𑀦𑁆𑀢𑀺 𑀲𑀪𑀸𑀯𑀲𑀺𑀤𑁆𑀥𑀁. 𑀲𑀁𑀯𑁂𑀕𑁄𑀢𑀺 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁 𑀯𑀼𑀘𑁆𑀘𑀢𑀺. 𑀦 𑀔𑁄 𑀧𑀦𑁂𑀢𑀁 𑀲𑀓𑁆𑀓𑀸 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀆𑀤𑀺𑀯𑀲𑁂𑀦 𑀲𑀫𑀸𑀕𑀫𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀕𑀡𑀪𑁂𑀤𑀦𑀦𑁆𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀬 𑀯𑀺𑀯𑁂𑀘𑀦𑀁.

𑁧𑁮𑁬. 𑀓𑀢𑀧𑀭𑀺𑀪𑀡𑁆𑀟𑀦𑁆𑀢𑀺 𑀧𑀼𑀩𑁆𑀩𑁂 𑀓𑀢𑀲𑀁𑀯𑀺𑀥𑀸𑀦𑀲𑁆𑀲 𑀘𑀻𑀯𑀭𑀲𑁆𑀲 𑀯𑀼𑀢𑁆𑀢𑀸𑀓𑀸𑀭𑁂𑀦 𑀧𑀝𑀺𑀲𑀗𑁆𑀔𑀭𑀡𑀁. 𑀦𑁄𑀢𑀺 𑀅𑀫𑁆𑀳𑀸𑀓𑀁. 𑀅𑀦𑀢𑁆𑀢𑀫𑀦𑁄𑀢𑀺 𑀅𑀦𑀸𑀭𑀸𑀥𑀺𑀢𑀘𑀺𑀢𑁆𑀢𑁄.

𑀲𑀓𑀕𑀡𑁂𑀦 𑀲𑀳𑀪𑀸𑀯𑀢𑁄 𑀲𑀗𑁆𑀕𑀡𑀺𑀓𑀸𑀢𑀺 𑀆𑀳 ‘‘𑀲𑀓𑀧𑀭𑀺𑀲𑀲𑀫𑁄𑀥𑀸𑀦’’𑀦𑁆𑀢𑀺. 𑀕𑀡𑁄𑀢𑀺 𑀧𑀦 𑀇𑀥 𑀚𑀦𑀲𑀫𑀽𑀳𑁄𑀢𑀺 𑀯𑀼𑀢𑁆𑀢𑀁 ‘‘𑀦𑀸𑀦𑀸𑀚𑀦𑀲𑀫𑁄𑀥𑀸𑀦’’𑀦𑁆𑀢𑀺. 𑀲𑁄𑀪𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑀢𑁄. 𑀓𑀸𑀫𑀢𑁄 𑀦𑀺𑀓𑁆𑀔𑀫𑀢𑀻𑀢𑀺 𑀦𑀺𑀓𑁆𑀔𑀫𑁄, 𑀏𑀯𑀁 𑀦𑀺𑀓𑁆𑀔𑀫𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀲𑀼𑀔𑀁. 𑀕𑀡𑀲𑀗𑁆𑀕𑀡𑀺𑀓𑀸𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀳𑀺 𑀧𑀯𑀺𑀯𑀺𑀢𑁆𑀢𑀺 𑀧𑀯𑀺𑀯𑁂𑀓𑁄. 𑀧𑀯𑀺𑀯𑁂𑀓𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀲𑀼𑀔𑀁. 𑀭𑀸𑀕𑀸𑀤𑀻𑀦𑀁 𑀉𑀧𑀲𑀫𑀸𑀯𑀳𑀁 𑀲𑀼𑀔𑀁 𑀉𑀧𑀲𑀫𑀲𑀼𑀔𑀁. 𑀫𑀕𑁆𑀕𑀲𑀫𑁆𑀩𑁄𑀥𑀸𑀯𑀳𑀁 𑀲𑀼𑀔𑀁 𑀲𑀫𑁆𑀩𑁄𑀥𑀺𑀲𑀼𑀔𑀁. 𑀦𑀺𑀓𑀸𑀫𑁂𑀢𑀩𑁆𑀩𑀲𑁆𑀲, 𑀦𑀺𑀓𑀸𑀫𑀁 𑀯𑀸 𑀮𑀸𑀪𑀻 𑀦𑀺𑀓𑀸𑀫𑀮𑀸𑀪𑀻. 𑀦𑀺𑀤𑀼𑀓𑁆𑀔𑀁 𑀲𑀼𑀔𑁂𑀦𑁂𑀯 𑀮𑀪𑀢𑀻𑀢𑀺 𑀅𑀤𑀼𑀓𑁆𑀔𑀮𑀸𑀪𑀻. 𑀓𑀲𑀺𑀭𑀁 𑀯𑀼𑀘𑁆𑀘𑀢𑀺 𑀅𑀧𑁆𑀧𑀓𑀦𑁆𑀢𑀺 𑀆𑀳 𑁋 ‘‘𑀅𑀓𑀲𑀺𑀭𑀮𑀸𑀪𑀻𑀢𑀺 𑀯𑀺𑀧𑀼𑀮𑀮𑀸𑀪𑀻’’𑀢𑀺.

𑀲𑀸𑀫𑀸𑀬𑀺𑀓𑀦𑁆𑀢𑀺 𑀲𑀫𑀬𑁂 𑀓𑀺𑀮𑁂𑀲𑀯𑀺𑀫𑀼𑀘𑁆𑀘𑀦𑀁 𑀅𑀘𑁆𑀘𑀦𑁆𑀢𑀫𑁂𑀯𑀸𑀢𑀺 𑀲𑀸𑀫𑀸𑀬𑀺𑀓𑀁 𑀫-𑀓𑀸𑀭𑁂 𑀅-𑀓𑀸𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸. 𑀢𑁂𑀦𑀸𑀳 𑁋 ‘‘𑀅𑀧𑁆𑀧𑀺𑀢𑀧𑁆𑀧𑀺𑀢𑀲𑀫𑀬𑁂 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀓𑀦𑁆𑀢𑀦𑁆𑀢𑀺 𑀅𑀗𑁆𑀕𑀲𑀦𑁆𑀢𑀢𑀸𑀬 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀘 𑀓𑀫𑀦𑀻𑀬𑀁 𑀫𑀦𑁄𑀭𑀫𑁆𑀫𑀁. 𑀅𑀲𑀸𑀫𑀸𑀬𑀺𑀓𑀁 𑀅𑀘𑁆𑀘𑀦𑁆𑀢𑀯𑀺𑀫𑀼𑀢𑁆𑀢𑀁.

𑀏𑀢𑁆𑀢𑀸𑀯𑀢𑀸𑀢𑀺𑀆𑀤𑀺𑀦𑀸 𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑁆𑀲 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀅𑀦𑁆𑀢𑀭𑀸𑀬𑀺𑀓𑀪𑀸𑀯𑀁 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀲𑀳 𑀦𑀺𑀤𑀲𑁆𑀲𑀦𑁂𑀦 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑀸 𑀤𑀼𑀯𑀺𑀥𑀸 𑀅𑀦𑁆𑀢𑀭𑀸𑀬𑀺𑀓𑀢𑀸 𑀯𑁄𑀤𑀸𑀦𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀓𑀸, 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀓𑀸 𑀘.

𑀢𑁂 𑀧𑀞𑀫𑀁 ‘‘𑀲𑀗𑁆𑀕𑀡𑀺𑀓𑀸𑀭𑀸𑀫𑁄’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑁂𑀢𑁆𑀯𑀸 𑀇𑀢𑀭𑀁 𑀯𑀺𑀪𑀸𑀯𑁂𑀢𑀼𑀁, ‘‘𑀇𑀤𑀸𑀦𑀺 𑀤𑁄𑀲𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀝𑁆𑀞𑀺𑀜𑁆𑀘 𑀧𑀝𑀺𑀘𑁆𑀘 𑀦𑁆𑀳𑀸𑀭𑀼𑀜𑁆𑀘 𑀧𑀝𑀺𑀘𑁆𑀘 𑀘𑀫𑁆𑀫𑀜𑁆𑀘 𑀧𑀝𑀺𑀘𑁆𑀘 𑀫𑀁𑀲𑀜𑁆𑀘 𑀧𑀝𑀺𑀘𑁆𑀘 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀭𑀽𑀧𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁦𑁬) 𑀯𑀺𑀬 𑀇𑀥 𑀭𑀽𑀧𑀲𑀤𑁆𑀤𑁄 𑀓𑀭𑀚𑀓𑀸𑀬𑀧𑀭𑀺𑀬𑀸𑀬𑁄𑀢𑀺 ‘‘𑀭𑀽𑀧𑀦𑁆𑀢𑀺 𑀲𑀭𑀻𑀭’’𑀦𑁆𑀢𑀺 𑀆𑀳. ‘‘𑀦𑀸𑀳𑀁, 𑀆𑀦𑀦𑁆𑀤…𑀧𑁂… 𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀘𑀺𑀢𑁆𑀢𑀸𑀦𑀁 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀸𑀦𑀫𑁆𑀧𑀺 𑀅𑀲𑀧𑁆𑀧𑀸𑀬𑀯𑀚𑁆𑀚𑀦𑀲𑀧𑁆𑀧𑀸𑀬𑀲𑁂𑀯𑀦𑀯𑀲𑁂𑀦 𑀓𑀸𑀬𑀲𑁆𑀲 𑀧𑀭𑀺𑀳𑀭𑀡𑀁 𑀳𑁄𑀢𑀻𑀢𑀺? 𑀲𑀘𑁆𑀘𑀁, 𑀢𑀁 𑀧𑀦 𑀬𑁄 𑀓𑀮𑁆𑀮𑀲𑀭𑀻𑀭𑀁 𑀦𑀺𑀲𑁆𑀲𑀸𑀬 𑀥𑀫𑁆𑀫𑀲𑀸𑀥𑀦𑀸𑀬 𑀅𑀦𑀼𑀬𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀲𑁂𑀯 𑀥𑀫𑁆𑀫𑀲𑀸𑀥𑀦𑀢𑀸𑀯𑀲𑁂𑀦. 𑀥𑀫𑁆𑀫𑀲𑀸𑀥𑀦𑀪𑀸𑀯𑀜𑁆𑀳𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 𑀅𑀲𑀧𑁆𑀧𑀸𑀬𑀁 𑀯𑀚𑁆𑀚𑁂𑀢𑁆𑀯𑀸 𑀲𑀧𑁆𑀧𑀸𑀬𑀯𑀲𑁂𑀦 𑀧𑁄𑀲𑁂𑀢𑁆𑀯𑀸 𑀲𑀼𑀝𑁆𑀞𑀼𑀢𑀭𑀁 𑀳𑀼𑀢𑁆𑀯𑀸 𑀅𑀦𑀼𑀬𑀼𑀜𑁆𑀚𑀦𑀢𑁄 𑀓𑀸𑀬𑀲𑁆𑀲 𑀧𑀭𑀺𑀳𑀭𑀡𑀁, 𑀦 𑀲𑁄 𑀓𑀸𑀬𑁂 𑀅𑀪𑀺𑀭𑀢𑁄 𑀦𑀸𑀫 𑀳𑁄𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀬𑀢𑁆𑀢𑀢𑁆𑀢𑀸 𑀅𑀧𑁂𑀓𑁆𑀔𑀸𑀬 𑀯𑀺𑀦𑁄𑀤𑀺𑀢𑀩𑁆𑀩𑁄 𑀢𑀸𑀤𑀺𑀲𑁄𑀢𑀺. 𑀉𑀧𑀸𑀮𑀺𑀕𑀳𑀧𑀢𑀺𑀦𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀤𑀲𑀩𑀮𑀲𑀸𑀯𑀓𑀢𑁆𑀢𑀼𑀧𑀕𑀫𑀦𑀲𑀗𑁆𑀔𑀸𑀢𑁂𑀦𑀸’’𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑁧𑁮𑁭. 𑀫𑀳𑀸𑀓𑀭𑀼𑀡𑀸𑀯𑀲𑁂𑀦 𑀧𑀭𑀺𑀯𑀼𑀢𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄𑀧𑀺 𑀏𑀓𑀦𑁆𑀢𑀯𑀺𑀯𑁂𑀓𑀚𑁆𑀛𑀸𑀲𑀬𑀢𑁆𑀢𑀸 𑀏𑀓𑀓𑁄𑀯. 𑀏𑀢𑁂𑀦 𑀲𑀢𑁆𑀣𑀼𑀦𑁄 𑀧𑀯𑀺𑀯𑀺𑀢𑁆𑀢𑀲𑁆𑀲 𑀧𑀯𑀺𑀯𑁂𑀓𑀢𑁆𑀢𑁂𑀦 𑀯𑀺𑀯𑀺𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀭𑀽𑀧𑀸𑀭𑀽𑀧𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂𑀳𑀺 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀭𑀽𑀧𑀸𑀤𑀻𑀦𑀁 𑀲𑀗𑁆𑀔𑀢𑀦𑀺𑀫𑀺𑀢𑁆𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀯𑀺𑀬 𑀲𑀦𑁆𑀢𑀢𑀭𑀧𑀡𑀻𑀢𑀢𑀫𑀪𑀸𑀯𑁂𑀦 𑀯𑀺𑀲𑁂𑀲𑀢𑁄 𑀲𑀺𑀦𑁄𑀢𑀺 𑀩𑀦𑁆𑀥𑀢𑀻𑀢𑀺 𑀯𑀺𑀲𑀬𑁄, 𑀲𑁄 𑀏𑀯 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀅𑀚𑁆𑀛𑀢𑁆𑀢𑀁. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 𑁋 ‘‘𑀲𑀼𑀜𑁆𑀜𑀢𑀦𑁆𑀢𑀺 𑀲𑀼𑀜𑁆𑀜𑀢𑀨𑀮𑀲𑀫𑀸𑀧𑀢𑁆𑀢𑀺’’𑀦𑁆𑀢𑀺. 𑀉𑀧𑀥𑀺𑀯𑀺𑀯𑁂𑀓𑀢𑀸𑀬 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀇𑀥 𑀯𑀺𑀯𑁂𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 𑁋 ‘‘𑀯𑀺𑀯𑁂𑀓𑀦𑀺𑀦𑁆𑀦𑁂𑀦𑀸’’𑀢𑀺𑀆𑀤𑀺. 𑀪𑀗𑁆𑀕𑀫𑀢𑁆𑀢𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀆𑀲𑀯𑀝𑁆𑀞𑀸𑀦𑀺𑀬𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀢𑀢𑁆𑀣 𑀯𑀺𑀕𑀢𑀢𑁆𑀢𑀸 𑀢𑁂𑀲𑀁 𑀯𑀲𑁂𑀦 𑀯𑀺𑀕𑀢𑀦𑁆𑀢𑁂𑀦, 𑀏𑀯𑀁𑀪𑀽𑀢𑀁 𑀢𑁂𑀲𑀁 𑀩𑁆𑀬𑀦𑁆𑀢𑀺𑀪𑀸𑀯𑀁 𑀧𑀢𑁆𑀢𑀦𑁆𑀢𑀺 𑀧𑀸𑀴𑀺𑀬𑀁 ‘‘𑀩𑁆𑀬𑀦𑁆𑀢𑀺𑀪𑀽𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀉𑀬𑁆𑀬𑁄𑀚𑀦𑀁 𑀯𑀺𑀲𑁆𑀲𑀚𑁆𑀚𑀦𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀺, 𑀉𑀬𑁆𑀬𑁄𑀚𑁂𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀯𑀸 𑀉𑀬𑁆𑀬𑁄𑀚𑀦𑀺𑀓𑀁. 𑀬𑀲𑁆𑀫𑀸 𑀦 𑀲𑀩𑁆𑀩𑀓𑀣𑀸 𑀉𑀬𑁆𑀬𑁄𑀚𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀬𑁆𑀬𑁄𑀚𑀦𑀺𑀓𑀧𑀝𑀺𑀲𑀁𑀬𑀼𑀢𑁆𑀢’’𑀦𑁆𑀢𑀺.

𑀢𑁂𑀮𑀧𑀸𑀓𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬𑀸𑀢𑀺 𑀬𑀣𑀸 𑀢𑁂𑀮𑀧𑀸𑀓𑁄 𑀦𑀸𑀫 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁄 𑀦 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑁄, 𑀏𑀯𑀁 𑀅𑀢𑁆𑀢𑀦𑁄 𑀲𑀫𑀸𑀧𑀢𑁆𑀢𑀺𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸. 𑀬𑀣𑀸 𑀳𑀺 𑀓𑀼𑀲𑀮𑁄 𑀯𑁂𑀚𑁆𑀚𑁄 𑀢𑁂𑀮𑀁 𑀧𑀘𑀦𑁆𑀢𑁄 𑀢𑀁 𑀢𑀁 𑀢𑁂𑀮𑀓𑀺𑀘𑁆𑀘𑀁 𑀘𑀺𑀦𑁆𑀢𑁂𑀢𑁆𑀯𑀸 𑀬𑀤𑀺 𑀯𑀸 𑀧𑀢𑁆𑀣𑀺𑀦𑁆𑀦𑀧𑀸𑀓𑁄, 𑀬𑀤𑀺 𑀯𑀸 𑀫𑀚𑁆𑀛𑀺𑀫𑀧𑀸𑀓𑁄, 𑀬𑀤𑀺 𑀯𑀸 𑀔𑀭𑀧𑀸𑀓𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀢𑀲𑁆𑀲 𑀓𑀸𑀮𑀁 𑀉𑀧𑀥𑀸𑀭𑁂𑀢𑁆𑀯𑀸 𑀧𑀘𑀢𑀺, 𑀏𑀯𑀁 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀁 𑀉𑀧𑀥𑀸𑀭𑁂𑀢𑁆𑀯𑀸 𑀢𑀁 𑀢𑀁 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀧𑀭𑀺𑀲𑀁 𑀉𑀬𑁆𑀬𑁄𑀚𑁂𑀦𑁆𑀢𑁄 𑀘 𑀯𑀺𑀯𑁂𑀓𑀦𑀺𑀦𑁆𑀦𑁂𑀦𑁂𑀯 𑀘𑀺𑀢𑁆𑀢𑁂𑀦 𑀉𑀬𑁆𑀬𑁄𑀚𑁂𑀢𑀺. 𑀤𑁆𑀯𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺𑀧𑀺 𑀢𑀤𑀪𑀺𑀦𑀻𑀳𑀢𑀫𑀦𑁄𑀯𑀺𑀜𑁆𑀜𑀸𑀡𑀯𑀲𑁂𑀦 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀸𑀦𑁂𑀯. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀗𑁆𑀔𑀸𑀭𑀸𑀦𑀁 𑀲𑀼𑀝𑁆𑀞𑀼 𑀧𑀭𑀺𑀜𑁆𑀜𑀸𑀢𑀢𑀸𑀬 𑀧𑀡𑀻𑀢𑀸𑀦𑀫𑁆𑀧𑀺 𑀭𑀽𑀧𑀸𑀤𑀻𑀦𑀁 𑀆𑀧𑀸𑀣𑀕𑀫𑀦𑁂 𑀧𑀕𑁂𑀯 𑀇𑀢𑀭𑁂𑀲𑀁 𑀧𑀝𑀺𑀓𑀽𑀮𑀢𑀸𑀯 𑀲𑀼𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀢𑀲𑁆𑀫𑀸 𑀖𑀫𑁆𑀫𑀸𑀪𑀺𑀢𑀢𑁆𑀢𑀲𑁆𑀲 𑀯𑀺𑀬 𑀲𑀻𑀢𑀚𑀮𑀝𑁆𑀞𑀸𑀦𑀦𑀺𑀦𑁆𑀦𑀢𑀸 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀫𑁂𑀯 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲 𑀅𑀢𑀺𑀯𑀺𑀬 𑀲𑀦𑁆𑀢𑀧𑀡𑀻𑀢𑀪𑀸𑀯𑀢𑁄.

𑁧𑁮𑁮. 𑀅𑀚𑁆𑀛𑀢𑁆𑀢𑀫𑁂𑀯𑀸𑀢𑀺 𑀇𑀥 𑀛𑀸𑀦𑀸𑀭𑀫𑁆𑀫𑀡𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀕𑁄𑀘𑀭𑀚𑁆𑀛𑀢𑁆𑀢𑀫𑁂𑀯𑀸’’𑀢𑀺. 𑀇𑀥 𑀦𑀺𑀬𑀓𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁. 𑀅𑀧𑀕𑀼𑀡𑀧𑀸𑀤𑀓𑀚𑁆𑀛𑀸𑀦𑀜𑁆𑀳𑀺 𑀏𑀢𑁆𑀣 ‘‘𑀦𑀺𑀬𑀓𑀚𑁆𑀛𑀢𑁆𑀢’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁 𑀯𑀺𑀧𑀲𑁆𑀲𑀦𑀸𑀯𑀺𑀲𑁂𑀲𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀦𑀺𑀬𑀓𑀚𑁆𑀛𑀢𑁆𑀢𑀁 𑀦𑀺𑀚𑁆𑀚𑀻𑀯𑀦𑀺𑀲𑁆𑀲𑀢𑁆𑀢𑀢𑀁, 𑀅𑀦𑀢𑁆𑀢𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀫𑁆𑀧𑀚𑁆𑀚𑀦𑀪𑀸𑀯𑀚𑀸𑀦𑀦𑁂𑀦𑀸𑀢𑀺 𑀇𑀤𑀸𑀦𑀺 𑀫𑁂 𑀓𑀫𑁆𑀫𑀝𑁆𑀞𑀸𑀦𑀁 𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀦 𑀳𑁄𑀢𑀺, 𑀉𑀧𑁆𑀧𑀣𑀫𑁂𑀯 𑀧𑀯𑀢𑁆𑀢𑀢𑀻𑀢𑀺 𑀚𑀸𑀦𑀦𑁂𑀦.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀪𑀕𑀯𑀢𑀸 𑀯𑀺𑀧𑀲𑁆𑀲𑀦𑀸𑀬 𑀏𑀯 𑀧𑀸𑀤𑀓𑁂 𑀛𑀸𑀦𑁂 𑀅𑀯𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀁 𑀕𑀳𑀺𑀢𑀦𑁆𑀢𑀺 𑀆𑀳 𑁋 ‘‘𑀅𑀧𑁆𑀧𑀕𑀼𑀡𑀧𑀸𑀤𑀓𑀚𑁆𑀛𑀸𑀦𑀢𑁄’’𑀢𑀺𑀆𑀤𑀺. 𑀦 𑀧𑀓𑁆𑀔𑀦𑁆𑀤𑀢𑀺 𑀲𑀫𑁆𑀫𑀸 𑀦 𑀲𑀫𑀸𑀳𑀺𑀢𑀢𑁆𑀢𑀸. 𑀲𑁄 𑀧𑀦 ‘‘𑀅𑀚𑁆𑀛𑀢𑁆𑀢𑀥𑀫𑁆𑀫𑀸 𑀫𑀬𑁆𑀳𑀁 𑀦𑀺𑀚𑁆𑀚𑀝𑀸 𑀦𑀺𑀕𑀼𑀫𑁆𑀩𑀸 𑀳𑀼𑀢𑁆𑀯𑀸 𑀦 𑀉𑀧𑀝𑁆𑀞𑀳𑀦𑁆𑀢𑀺, 𑀳𑀦𑁆𑀤𑀸𑀳𑀁 𑀩𑀳𑀺𑀤𑁆𑀥𑀸𑀥𑀫𑁆𑀫𑁂 𑀫𑀦𑀲𑀺 𑀓𑀭𑁂𑀬𑁆𑀬𑀁 𑀏𑀓𑀘𑁆𑀘𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀉𑀧𑀝𑁆𑀞𑀺𑀢𑁂𑀲𑀼 𑀇𑀢𑀭𑁂𑀧𑀺 𑀉𑀧𑀝𑁆𑀞𑀳𑁂𑀬𑁆𑀬𑀼𑀫𑁂𑀯𑀸’’𑀢𑀺 𑀧𑀭𑀲𑁆𑀲…𑀧𑁂… 𑀫𑀦𑀲𑀺 𑀓𑀭𑁄𑀢𑀺. 𑀧𑀸𑀤𑀓𑀚𑁆𑀛𑀸𑀦𑀯𑀲𑁂𑀦 𑀯𑀺𑀬 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀯𑀲𑁂𑀦𑀧𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀺𑀬𑁂𑀯𑀸𑀢𑀺 𑀆𑀳 𑁋 ‘‘𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀁 𑀦𑀼 𑀔𑁄 𑀓𑀣𑀦𑁆𑀢𑀺 𑀆𑀦𑁂𑀜𑁆𑀚𑀁 𑀫𑀦𑀲𑀺 𑀓𑀭𑁄𑀢𑀻’’𑀢𑀺. 𑀦 𑀫𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀫𑀬𑁆𑀳𑀁 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀳𑀼𑀢𑁆𑀯𑀸 𑀦 𑀯𑀳𑀢𑀻𑀢𑀺. 𑀧𑀸𑀤𑀓𑀚𑁆𑀛𑀸𑀦𑀫𑁂𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀪𑀽𑀢𑀫𑁂𑀯 𑀛𑀸𑀦𑀁. 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺 𑀓𑀸𑀢𑀩𑁆𑀩𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀯𑀺𑀧𑀲𑁆𑀲𑀦𑀸𑀬 𑀢𑀺𑀓𑁆𑀔𑀯𑀺𑀲𑀤𑀢𑀸𑀧𑀸𑀤𑀦𑀸𑀬. 𑀅𑀯𑀳𑀦𑁆𑀢𑁂 𑀦𑀺𑀧𑀼𑀡𑀸𑀪𑀸𑀯𑁂𑀦 𑀙𑁂𑀤𑀦𑀓𑀺𑀭𑀺𑀬𑀸𑀬 𑀅𑀧𑁆𑀧𑀯𑀢𑁆𑀢𑀦𑁆𑀢𑁂. 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀢𑀺𑀓𑁆𑀔𑀓𑀫𑁆𑀫𑀓𑀭𑀡𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀺𑀳𑀸𑀭𑁂𑀦𑀸𑀢𑀺 𑀆𑀳 𑁋 ‘‘𑀓𑀫𑁆𑀫𑀝𑁆𑀞𑀸𑀦𑁂 𑀫𑀦𑀲𑀺𑀓𑀸𑀭𑁄 𑀯𑀳𑀢𑀻’’𑀢𑀺.

𑁧𑁮𑁯. 𑀲𑀫𑁆𑀧𑀚𑁆𑀚𑀢𑀺 𑀫𑁂𑀢𑀺 𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀸𑀪𑀸𑀯𑀢𑁄 𑀲𑀫𑁆𑀧𑀚𑁆𑀚𑀢𑀺 𑀫𑁂 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀚𑀸𑀦𑀦𑁂𑀦. 𑀇𑀭𑀺𑀬𑀸𑀧𑀣𑀁 𑀅𑀳𑀸𑀧𑁂𑀢𑁆𑀯𑀸𑀢𑀺 𑀬𑀣𑀸 𑀧𑀭𑀺𑀲𑁆𑀲𑀫𑁄 𑀦𑀸𑀕𑀘𑁆𑀙𑀢𑀺, 𑀏𑀯𑀁 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑀁 𑀢𑀲𑁆𑀲 𑀓𑀸𑀮𑀁 𑀦𑁂𑀢𑁆𑀯𑀸 𑀧𑀫𑀸𑀡𑀫𑁂𑀯 𑀧𑀯𑀢𑁆𑀢𑀦𑁂𑀦 𑀇𑀭𑀺𑀬𑀸𑀧𑀣𑀁 𑀅𑀳𑁄𑀧𑁂𑀢𑁆𑀯𑀸. 𑀲𑀩𑁆𑀩𑀯𑀸𑀭𑁂𑀲𑀽𑀢𑀺 𑀞𑀸𑀦𑀦𑀺𑀲𑀚𑁆𑀚𑀸𑀲𑀬𑀦𑀯𑀸𑀭𑁂𑀲𑀼. 𑀓𑀣𑀸𑀯𑀸𑀭𑁂𑀲𑀼 𑀧𑀦 𑀯𑀺𑀲𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀯𑀤𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀇𑀤𑀁, ‘‘𑀇𑀫𑀺𑀦𑀸 𑀯𑀺𑀳𑀸𑀭𑁂𑀦𑀸’’𑀢𑀺𑀆𑀤𑀺𑀯𑀘𑀦𑀁 𑀯𑀼𑀢𑁆𑀢𑀁.

𑁧𑁯𑁦. 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀑𑀴𑀸𑀭𑀺𑀓𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀲𑀪𑀸𑀕𑀸𑀢𑀺 𑀆𑀳 𑁋 ‘‘𑀯𑀺𑀢𑀓𑁆𑀓𑀧𑀳𑀸𑀦𑁂𑀦 𑀤𑁆𑀯𑁂 𑀫𑀕𑁆𑀕𑁂 𑀓𑀣𑁂𑀢𑁆𑀯𑀸’’𑀢𑀺. 𑀓𑀸𑀫𑀕𑀼𑀡𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑁂𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀲𑀩𑁆𑀩𑁂𑀧𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀫𑁂𑀯. 𑀲𑀫𑀼𑀤𑀸𑀘𑀭𑀢𑀻𑀢𑀺 𑀲𑀫𑀼𑀤𑀸𑀘𑀸𑀭𑁄𑀢𑀺 𑀆𑀳 ‘‘𑀲𑀫𑀼𑀤𑀸𑀘𑀭𑀡𑀢𑁄’’𑀢𑀺. 𑀲𑁄 𑀧𑀦 𑀬𑀲𑁆𑀫𑀸 𑀘𑀺𑀢𑁆𑀢𑀲𑁆𑀲, 𑀦 𑀲𑀢𑁆𑀢𑀲𑁆𑀲, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀘𑁂𑀢𑀲𑁄’’𑀢𑀺. 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄 𑀏-𑀓𑀸𑀭𑀲𑁆𑀲 𑀘 𑀅𑀓𑀸𑀭𑁄 𑀓𑀢𑁄𑀢𑀺 𑀆𑀳 ‘‘𑀏𑀯𑀁 𑀲𑀦𑁆𑀢𑁂 𑀏𑀢𑀦𑁆𑀢𑀺.

𑁧𑁯𑁧. 𑀅𑀦𑀼𑀲𑀬𑁄𑀢𑀺 𑀫𑀸𑀦𑀸𑀦𑀼𑀲𑀬𑁄 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄𑀢𑀺 𑀢𑀺𑀯𑀺𑀥𑁄𑀧𑀺 𑀅𑀦𑀼𑀲𑀬𑁄 𑀧𑀳𑀻𑀬𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺, ‘‘𑀢𑀢𑁄 𑀫𑀕𑁆𑀕𑀸𑀦𑀦𑁆𑀢𑀭𑀁 𑀨𑀮𑀁, 𑀨𑀮𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀧𑀳𑀻𑀦𑀪𑀸𑀯𑀁 𑀚𑀸𑀦𑀸𑀢𑀺, 𑀢𑀲𑁆𑀲 𑀚𑀸𑀦𑀦𑁂𑀦 𑀲𑀫𑁆𑀧𑀚𑀸𑀦𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀦𑀬𑁂𑀦.

𑀓𑀼𑀲𑀮𑀢𑁄 𑀆𑀬𑀸𑀢𑀻𑀢𑀺 𑀆𑀬𑀢𑁄, 𑀲𑁄 𑀏𑀢𑁂𑀲𑀦𑁆𑀢𑀺 𑀓𑀼𑀲𑀮𑀸𑀬𑀢𑀺𑀓𑀸. 𑀢𑁂𑀦𑀸𑀳 ‘‘𑀓𑀼𑀲𑀮𑀢𑁄 𑀆𑀕𑀢𑀸’’𑀢𑀺. 𑀢𑀁 𑀧𑀦 𑀦𑁂𑀲𑀁 𑀓𑀼𑀲𑀮𑀸𑀬𑀢𑀺𑀓𑀢𑁆𑀢𑀁 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀳𑁄𑀢𑀺 𑀲𑀳𑀚𑀸𑀢𑀯𑀲𑁂𑀦𑀧𑀻𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁, ‘‘𑀲𑁂𑀬𑁆𑀬𑀣𑀺𑀤’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑀲𑁆𑀫𑀸 𑀧𑀦 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑁂𑀲𑀼 𑀓𑁂𑀘𑀺 𑀮𑁄𑀓𑀺𑀬𑀸, 𑀓𑁂𑀘𑀺 𑀮𑁄𑀓𑀼𑀢𑁆𑀢𑀭𑀸; 𑀅𑀣 𑀓𑀲𑁆𑀫𑀸 𑀯𑀺𑀲𑁂𑀲𑁂𑀦 ‘‘𑀮𑁄𑀓𑀼𑀢𑁆𑀢𑀭𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀮𑁄𑀓𑁂 𑀉𑀢𑁆𑀢𑀭𑀸 𑀯𑀺𑀲𑀺𑀝𑁆𑀞𑀸’’𑀢𑀺. 𑀢𑁂𑀦 𑀮𑁄𑀓𑀺𑀬𑀥𑀫𑁆𑀫𑁂𑀲𑀼 𑀉𑀢𑁆𑀢𑀫𑀪𑀸𑀯𑁂𑀦 𑀛𑀸𑀦𑀸𑀤𑀬𑁄 𑀮𑁄𑀓𑀼𑀢𑁆𑀢𑀭𑀸 𑀯𑀼𑀢𑁆𑀢𑀸, 𑀦 𑀮𑁄𑀓𑀲𑁆𑀲 𑀉𑀢𑁆𑀢𑀭𑀡𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀓𑀺𑀜𑁆𑀘𑀺 𑀫𑀳𑀕𑁆𑀕𑀢𑀘𑀺𑀢𑁆𑀢𑀁 𑀫𑀸𑀭𑀲𑁆𑀲 𑀅𑀯𑀺𑀲𑀬𑁄 𑀅𑀓𑀸𑀫𑀸𑀯𑀘𑀭𑀢𑁆𑀢𑀸, 𑀧𑀕𑁂𑀯 𑀢𑀁 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀪𑀽𑀢𑀁 𑀲𑀼𑀯𑀺𑀓𑁆𑀔𑀸𑀮𑀺𑀢𑀫𑀮𑀦𑁆𑀢𑀺 𑀆𑀳 𑁋 ‘‘𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀏𑀓𑁄 𑀆𑀦𑀺𑀲𑀁𑀲𑁄 𑀅𑀢𑁆𑀣𑀺 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀲𑀧𑁆𑀧𑀸𑀬𑀥𑀫𑁆𑀫𑀓𑀣𑀸𑀧𑀝𑀺𑀮𑀸𑀪𑁄.

𑁧𑁯𑁨. 𑀏𑀢𑀤𑀢𑁆𑀣𑀦𑁆𑀢𑀺 𑀓𑁂𑀯𑀮𑀲𑁆𑀲 𑀲𑀼𑀢𑀲𑁆𑀲 𑀅𑀢𑁆𑀣𑀸𑀬. 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀯𑀲𑁂𑀦𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀲𑀧𑁆𑀧𑀸𑀬𑀯𑀲𑁂𑀦 𑀤𑀲𑀓𑀣𑀸𑀯𑀢𑁆𑀣𑀽𑀦𑀺 𑀆𑀕𑀢𑀸𑀦𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀲𑀧𑁆𑀧𑀸𑀬𑀓𑀣𑀸𑀯𑀚𑁆𑀚𑀦𑀧𑀼𑀩𑁆𑀩𑀺𑀓𑀸𑀬 𑀲𑀧𑁆𑀧𑀸𑀬 𑀓𑀣𑀸𑀬 𑀯𑀲𑁂𑀦 𑀆𑀕𑀢𑀢𑁆𑀢𑀸 ‘‘𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀯𑀲𑁂𑀦 𑀆𑀕𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀲𑀼𑀢𑀧𑀭𑀺𑀬𑀢𑁆𑀢𑀺𑀯𑀲𑁂𑀦𑀸𑀢𑀺 𑀲𑀭𑀽𑀧𑁂𑀦 𑀢𑀢𑁆𑀣 𑀅𑀦𑀸𑀕𑀢𑀸𑀦𑀺𑀧𑀺 𑀤𑀲𑀓𑀣𑀸𑀯𑀢𑁆𑀣𑀽𑀦𑀺 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀅𑀦𑁆𑀢𑁄𑀕𑀥𑀢𑁆𑀢𑀸, ‘‘𑀲𑀼𑀢𑀧𑀭𑀺𑀬𑀢𑁆𑀢𑀺𑀯𑀲𑁂𑀦 𑀆𑀕𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀧𑀽𑀭𑀡𑀯𑀲𑁂𑀦 𑀲𑀭𑀽𑀧𑀢𑁄 𑀆𑀕𑀢𑀢𑁆𑀢𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀞𑀢𑁆𑀯𑀸 𑀓𑀣𑁂𑀢𑀩𑁆𑀩𑀸𑀦𑀺. 𑀅𑀢𑁆𑀣𑁄𑀢𑀺 𑀲𑀸𑀫𑀜𑁆𑀜𑀢𑁆𑀣𑁄.

𑁧𑁯𑁩. 𑀅𑀦𑀼𑀆𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀼𑀅𑀦𑀼 𑀅𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀯𑀢𑁆𑀢𑀦𑁆𑀢𑀺, 𑀧𑀬𑀺𑀭𑀼𑀧𑀸𑀲𑀦𑀸𑀤𑀺𑀯𑀲𑁂𑀦 𑀅𑀦𑀼𑀓𑀽𑀮𑀬𑀦𑁆𑀢𑀺. 𑀫𑀼𑀘𑁆𑀙𑀦𑀢𑀡𑁆𑀳𑀦𑁆𑀢𑀺 𑀧𑀘𑁆𑀘𑀬𑁂𑀲𑀼 𑀫𑀼𑀘𑁆𑀙𑀦𑀸𑀓𑀸𑀭𑀁. 𑀢𑀡𑁆𑀳𑀸𑀬 𑀧𑀢𑁆𑀣𑀦𑀸 𑀦𑀸𑀫 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀻𑀢𑀺 𑀆𑀳 𑁋 ‘‘𑀧𑀢𑁆𑀣𑁂𑀢𑀺 𑀧𑀯𑀢𑁆𑀢𑁂𑀢𑀻’’𑀢𑀺. 𑀓𑀺𑀮𑁂𑀲𑀽𑀧𑀤𑁆𑀤𑀯𑁂𑀦𑀸𑀢𑀺 𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦 𑀉𑀧𑀤𑁆𑀤𑀯𑁂𑀦. 𑀓𑀺𑀮𑁂𑀲𑀸 𑀳𑀺 𑀲𑀢𑁆𑀢𑀸𑀦𑀁 𑀫𑀳𑀸𑀦𑀢𑁆𑀣𑀓𑀭𑀡𑀢𑁄 ‘‘𑀉𑀧𑀤𑁆𑀤𑀯𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀢𑁆𑀢𑀦𑁄 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑁂𑀦 𑀓𑀺𑀮𑁂𑀲𑀽𑀧𑀤𑁆𑀤𑀯𑁂𑀦 𑀅𑀦𑁆𑀢𑁂𑀯𑀸𑀲𑀺𑀦𑁄, 𑀉𑀧𑀤𑁆𑀤𑀯𑁄 𑀅𑀦𑁆𑀢𑁂𑀯𑀸𑀲𑀽𑀧𑀤𑁆𑀤𑀯𑁄, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀉𑀧𑀤𑁆𑀤𑀯𑁄 𑀩𑁆𑀭𑀳𑁆𑀫𑀘𑀸𑀭𑀼𑀧𑀤𑁆𑀤𑀯𑁄𑀢𑀺 𑀇𑀫𑀫𑀢𑁆𑀣𑀁 ‘‘𑀲𑁂𑀲𑀼𑀧𑀤𑁆𑀤𑀯𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀅𑀢𑀺𑀤𑀺𑀲𑀢𑀺. 𑀕𑀼𑀡𑀫𑀭𑀡𑀁 𑀓𑀣𑀺𑀢𑀁, 𑀦 𑀚𑀻𑀯𑀺𑀢𑀫𑀭𑀡𑀁.

𑀅𑀧𑁆𑀧𑀮𑀸𑀪𑀸𑀢𑀺 𑀅𑀧𑁆𑀧𑀫𑀢𑁆𑀢𑀓𑀮𑀸𑀪𑀻 𑀯𑀺𑀲𑁂𑀲𑀸𑀦𑀁. 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀩𑁆𑀭𑀳𑁆𑀫𑀘𑀸𑀭𑀼𑀧𑀤𑁆𑀤𑀯𑁄 𑀤𑀼𑀓𑁆𑀔𑀯𑀺𑀧𑀸𑀓𑀢𑀭𑁄 𑀘𑁂𑀯 𑀓𑀝𑀼𑀓𑀯𑀺𑀧𑀸𑀓𑀢𑀭𑁄 𑀘𑀸𑀢𑀺 𑀏𑀯𑀁 𑀯𑀼𑀢𑁆𑀢𑁄. 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑀽𑀧𑀤𑁆𑀤𑀯𑁄 𑀳𑀺 𑀩𑀸𑀳𑀺𑀭𑀓𑀲𑀫𑀬𑀯𑀲𑁂𑀦 𑀯𑀼𑀢𑁆𑀢𑁄, 𑀩𑁆𑀭𑀳𑁆𑀫𑀘𑀸𑀭𑀼𑀧𑀤𑁆𑀤𑀯𑁄 𑀧𑀦 𑀲𑀸𑀲𑀦𑀯𑀲𑁂𑀦. 𑀤𑀼𑀭𑀓𑁆𑀔𑀸𑀢𑁂 𑀳𑀺 𑀥𑀫𑁆𑀫𑀯𑀺𑀦𑀬𑁂 𑀤𑀼𑀧𑁆𑀧𑀝𑀺𑀧𑀢𑁆𑀢𑀺 𑀦 𑀫𑀳𑀸𑀲𑀸𑀯𑀚𑁆𑀚𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑁆𑀲 𑀲𑀺𑀣𑀺𑀮𑀯𑀸𑀬𑀸𑀫𑀪𑀸𑀯𑀢𑁄; 𑀲𑁆𑀯𑀸𑀔𑁆𑀬𑀸𑀢𑁂 𑀧𑀦 𑀥𑀫𑁆𑀫𑀯𑀺𑀦𑀬𑁂 𑀤𑀼𑀧𑁆𑀧𑀝𑀺𑀧𑀢𑁆𑀢𑀺 𑀫𑀳𑀸𑀲𑀸𑀯𑀚𑁆𑀚𑀸 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀩𑀸𑀳𑀺𑀭𑀪𑀸𑀯𑀓𑀭𑀡𑀢𑁄. 𑀢𑁂𑀦𑀸𑀳 ‘‘𑀲𑀸𑀲𑀦𑁂 𑀧𑀦𑀸’’𑀢𑀺𑀆𑀤𑀺.

𑁧𑁯𑁬. 𑀢𑀲𑁆𑀫𑀸𑀢𑀺 𑀇𑀤𑀁 𑀧𑀼𑀩𑁆𑀩𑀧𑀭𑀸𑀧𑁂𑀓𑁆𑀔𑀁 𑀧𑀼𑀭𑀺𑀫𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀦𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀫𑀺𑀢𑁆𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀺𑀢𑁆𑀢𑀯𑀸, 𑀢𑀲𑁆𑀲 𑀪𑀸𑀯𑁄 𑀫𑀺𑀢𑁆𑀢𑀯𑀢𑀸, 𑀢𑀸𑀬. 𑀫𑀺𑀢𑁆𑀢𑀯𑀲𑁂𑀦 𑀧𑀝𑀺𑀧𑀚𑁆𑀚𑀦𑀦𑁆𑀢𑀺 𑀆𑀳 ‘‘𑀫𑀺𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸’’𑀢𑀺. 𑀲𑀧𑀢𑁆𑀢𑀯𑀢𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀢𑀫𑁆𑀧𑀻𑀢𑀺 𑀇𑀫𑀺𑀦𑀸 𑀧𑀕𑁂𑀯 𑀇𑀢𑀭𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀯𑀓𑁂𑀲𑀼 𑀳𑀺𑀢𑀧𑀭𑀓𑁆𑀓𑀫𑀦𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀳𑀺 𑀧𑀝𑀺𑀧𑀚𑁆𑀚𑀦𑀦𑁆𑀢𑀺 𑀆𑀳 𑁋 ‘‘𑀢𑀣𑀸 𑀦 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺. 𑀆𑀫𑀓𑀫𑀢𑁆𑀢𑀦𑁆𑀢𑀺 𑀓𑀼𑀮𑀸𑀮𑀪𑀸𑀚𑀦𑀁 𑀯𑀼𑀘𑁆𑀘𑀢𑀺. 𑀦𑀸𑀳𑀁 𑀢𑀼𑀫𑁆𑀳𑁂𑀲𑀼 𑀢𑀣𑀸 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀓𑀼𑀫𑁆𑀪𑀓𑀸𑀭𑁄 𑀯𑀺𑀬 𑀆𑀫𑀓𑀪𑀸𑀚𑀦𑁂𑀲𑀼 𑀅𑀳𑀁 𑀢𑀼𑀫𑁆𑀳𑁂𑀲𑀼 𑀓𑁂𑀯𑀮𑀁 𑀚𑀸𑀦𑀸𑀧𑁂𑀦𑁆𑀢𑁄 𑀦 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀺. 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. 𑀮𑁄𑀓𑀺𑀬𑀕𑀼𑀡𑀸𑀧𑀺 𑀇𑀥 𑀲𑀸𑀭𑁄𑀢𑁆𑀯𑁂𑀯 𑀅𑀥𑀺𑀧𑁆𑀧𑁂𑀢𑀸 𑀮𑁄𑀓𑀼𑀢𑁆𑀢𑀭𑀕𑀼𑀡𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀲𑀼𑀜𑁆𑀜𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁭. 𑀯𑀺𑀪𑀢𑁆𑀢𑀺𑀧𑀢𑀺𑀭𑀽𑀧𑀓𑀸 𑀘 𑀦𑀺𑀧𑀸𑀢𑀸 𑀳𑁄𑀦𑁆𑀢𑀻𑀢𑀺 𑀬𑀣𑀸𑀭𑀳𑀁 𑀢𑀁𑀢𑀁𑀯𑀺𑀪𑀢𑁆𑀢𑀺𑀅𑀢𑁆𑀣𑀤𑀻𑀧𑀓𑀸, 𑀇𑀥 𑀧𑀘𑁆𑀘𑀢𑁆𑀢𑀯𑀘𑀦𑁄 𑀬𑀢𑁆𑀭𑀲𑀤𑁆𑀤𑁄, 𑀳𑀺𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄, 𑀦𑀸𑀫𑀲𑀤𑁆𑀤𑁄 𑀅𑀘𑁆𑀙𑀭𑀺𑀬𑀢𑁆𑀣𑁄, 𑀧𑀤𑀢𑁆𑀢𑀬𑀲𑁆𑀲 𑀧𑀦 𑀅𑀘𑁆𑀙𑀭𑀺𑀬𑀢𑁆𑀣𑀦𑀺𑀤𑁆𑀤𑀺𑀝𑁆𑀞𑀢𑀸𑀬 ‘‘𑀅𑀘𑁆𑀙𑀭𑀺𑀬𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀓𑀁𑀲𑀢𑁄 𑀧𑀦𑁂𑀢𑀁 𑀧𑀤𑀢𑁆𑀢𑀬𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺, ‘‘𑀬𑀢𑁆𑀭𑀸𑀢𑀺 𑀦𑀺𑀧𑀸𑀢𑀯𑀲𑁂𑀦 𑀅𑀦𑀸𑀕𑀢𑀯𑀘𑀦’’𑀦𑁆𑀢𑀺. 𑀧𑀧𑀜𑁆𑀘𑀲𑀤𑁆𑀤𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄. 𑀙𑀺𑀦𑁆𑀦𑀯𑀝𑀼𑀫𑁂𑀢𑀺 𑀇𑀫𑀺𑀦𑀸 𑀲𑀩𑁆𑀩𑀓𑀺𑀮𑁂𑀲𑀯𑀝𑁆𑀝𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀯𑀝𑁆𑀝𑀲𑁆𑀲 𑀘 𑀙𑀺𑀦𑁆𑀦𑀢𑁆𑀢𑀸 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀘 𑀉𑀧𑀭𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀆𑀳 𑁋 ‘‘𑀯𑀝𑀼𑀫𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀯𑀝𑁆𑀝𑀁 𑀯𑀼𑀘𑁆𑀘𑀢𑀻’’𑀢𑀺. 𑀦𑀺𑀧𑀸𑀢𑀯𑀲𑁂𑀦 𑀬𑀢𑁆𑀭𑀲𑀤𑁆𑀤𑀬𑁄𑀕𑁂𑀦. 𑀅𑀦𑀸𑀕𑀢𑀯𑀘𑀦𑀦𑁆𑀢𑀺 𑀇𑀤𑀁 𑀅𑀦𑀸𑀕𑀢𑀯𑀘𑀦𑀲𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀦𑀸𑀕𑀢𑀢𑁆𑀣𑀯𑀸𑀘𑀻 𑀳𑀺 𑀅𑀦𑀸𑀕𑀢𑀯𑀘𑀦𑀁, 𑀅𑀢𑁆𑀣𑁄 𑀘𑁂𑀢𑁆𑀣 𑀅𑀢𑀻𑀢𑁄𑀢𑀺. 𑀅𑀦𑀼𑀲𑁆𑀲𑀭𑀻𑀢𑀺 𑀇𑀤𑀁 𑀅𑀦𑀼𑀲𑁆𑀲𑀭𑀺𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀦 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀻’’𑀢𑀺 𑀲𑀤𑁆𑀤𑀧𑀬𑁄𑀕𑀲𑁆𑀲 𑀅𑀢𑀻𑀢𑀯𑀺𑀲𑀬𑀢𑁆𑀢𑀸. 𑀬𑀤𑀸 𑀧𑀦 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀬𑀸 𑀓𑀣𑀸 𑀧𑀯𑀢𑁆𑀢𑀺𑀢𑀸, 𑀢𑀢𑁄 𑀧𑀘𑁆𑀙𑀸𑀧𑀺 𑀪𑀕𑀯𑀢𑁄 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀅𑀦𑀼𑀲𑁆𑀲𑀭𑀡𑀁 𑀳𑁄𑀢𑀺𑀬𑁂𑀯.

𑀔𑀢𑁆𑀢𑀺𑀬𑀚𑀘𑁆𑀘𑀸𑀢𑀺𑀆𑀤𑀺𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀲𑀫𑁆𑀪𑀺𑀦𑁆𑀦𑀸𑀬 𑀔𑀢𑁆𑀢𑀺𑀬𑀚𑀸𑀢𑀺𑀬𑀸 𑀉𑀤𑀺𑀢𑁄𑀤𑀺𑀢𑀸𑀬. 𑀩𑁆𑀭𑀳𑁆𑀫𑀚𑀘𑁆𑀘𑀸𑀢𑀺 𑀩𑁆𑀭𑀸𑀳𑁆𑀫𑀡𑀚𑀘𑁆𑀘𑀸. 𑀏𑀯𑀁𑀕𑁄𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑁂𑀦𑀸𑀢𑀺 𑀧𑀸𑀭𑀫𑀺𑀢𑀸𑀲𑀫𑁆𑀪𑀽𑀢𑁂𑀦 𑀩𑀼𑀤𑁆𑀥𑀸𑀯𑁂𑀡𑀺𑀓𑀢𑁆𑀢𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀮𑁄𑀓𑀺𑀬𑁂𑀦 𑀮𑁄𑀓𑀼𑀢𑁆𑀢𑀭𑁂𑀦 𑀘 𑀲𑀻𑀮𑁂𑀦. 𑀏𑀯𑀁𑀲𑀻𑀮𑀸𑀢𑀺 𑀅𑀦𑀯𑀲𑁂𑀲𑀲𑀻𑀮𑀸𑀦𑀁 𑀯𑀺𑀲𑀼𑀁 𑀧𑀘𑁆𑀘𑀯𑁂𑀓𑁆𑀔𑀡𑀓𑀭𑀡𑁂𑀦 𑀏𑀯𑀁𑀲𑀻𑀮𑀸𑀢𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀬𑀣𑀸 𑀯𑀺𑀚𑁆𑀚𑀸𑀪𑀸𑀕𑀺𑀬𑀸 𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸, 𑀏𑀯𑀁 𑀲𑀫𑀸𑀥𑀺𑀧𑀓𑁆𑀔𑀸 𑀲𑀫𑀸𑀥𑀺𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀲𑀢𑀺𑀯𑀻𑀭𑀺𑀬𑀸𑀤𑀬𑁄𑀢𑀺 𑀆𑀳 𑁋 ‘‘𑀳𑁂𑀝𑁆𑀞𑀸 𑀲𑀫𑀸𑀥𑀺𑀧𑀓𑁆𑀔𑀸𑀦𑀁 𑀥𑀫𑁆𑀫𑀸𑀦𑀁 𑀕𑀳𑀺𑀢𑀢𑁆𑀢𑀸 𑀯𑀺𑀳𑀸𑀭𑁄 𑀕𑀳𑀺𑀢𑁄𑀯𑀸’’𑀢𑀺. 𑀢𑀲𑁆𑀫𑀸 𑀲𑀫𑀸𑀥𑀺𑀧𑀓𑁆𑀔𑀥𑀫𑁆𑀫𑀯𑀺𑀦𑀺𑀫𑀼𑀢𑁆𑀢𑁄 𑀏𑀯 𑀇𑀥 𑀯𑀺𑀳𑀸𑀭𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀇𑀤𑀁 𑀳𑀻’’𑀢𑀺𑀆𑀤𑀺.

𑀬𑀣𑀸 𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀗𑁆𑀕𑀳𑀺𑀢𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀫𑀸𑀥𑀺𑀧𑀜𑁆𑀜𑀸 ‘‘𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸’’𑀢𑀺 𑀧𑀤𑁂𑀳𑀺 𑀳𑁂𑀝𑁆𑀞𑀸 𑀕𑀳𑀺𑀢𑀸𑀧𑀺 𑀬𑀣𑀸𑀲𑀓𑀁 𑀧𑀝𑀺𑀧𑀓𑁆𑀔𑀢𑁄 𑀫𑀼𑀘𑁆𑀘𑀦𑀲𑁆𑀲 𑀧𑀯𑀢𑁆𑀢𑀺𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 ‘‘𑀏𑀯𑀁𑀯𑀺𑀫𑀼𑀢𑁆𑀢𑀸’’𑀢𑀺 𑀏𑀢𑁆𑀣 𑀧𑀼𑀦 𑀕𑀳𑀺𑀢𑀸, 𑀢𑀣𑀸 ‘‘𑀏𑀯𑀁𑀥𑀫𑁆𑀫𑀸’’𑀢𑀺 𑀏𑀢𑁆𑀣 𑀕𑀳𑀺𑀢𑀸𑀧𑀺 𑀲𑀫𑀸𑀥𑀺𑀧𑀓𑁆𑀔𑀥𑀫𑁆𑀫𑀸 𑀤𑀺𑀩𑁆𑀩𑀩𑁆𑀭𑀳𑁆𑀫𑀆𑀦𑁂𑀜𑁆𑀚𑀅𑀭𑀺𑀬𑀯𑀺𑀳𑀸𑀭𑀲𑀗𑁆𑀔𑀸𑀢𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀯𑀺𑀲𑁂𑀲𑀁 𑀉𑀧𑀸𑀤𑀸𑀬, ‘‘𑀏𑀯𑀁𑀯𑀺𑀳𑀸𑀭𑀻’’𑀢𑀺 𑀏𑀢𑁆𑀣 𑀧𑀼𑀦 𑀕𑀳𑀺𑀢𑀸𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀨𑀮𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀓𑀸𑀮𑁂𑀧𑀺 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀦 𑀢𑀁𑀆𑀦𑀼𑀪𑀸𑀯𑀚𑀸𑀢𑀸, 𑀅𑀣 𑀔𑁄 𑀅𑀭𑀺𑀬𑀫𑀕𑁆𑀕𑁂𑀦 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀆𑀳 𑁋 ‘‘𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑀲𑁆𑀲𑀤𑁆𑀥𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸’’𑀢𑀺. 𑀬𑁄 𑀬𑀁 𑀧𑀚𑀳𑀢𑀺, 𑀲𑁄 𑀧𑀳𑀸𑀬𑀓𑁄 𑀧𑀳𑀸𑀢𑀩𑁆𑀩𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺 𑀯𑀺𑀲𑀁𑀲𑀝𑁆𑀞𑀪𑀸𑀯𑀢𑁄𑀢𑀺 𑀧𑀳𑀸𑀦𑀯𑀺𑀪𑀸𑀕𑁂𑀦 𑀯𑀼𑀘𑁆𑀘𑀫𑀸𑀦𑁂 𑀅𑀧𑀳𑀸𑀬𑀓𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀓𑀣𑀁 𑀯𑀺𑀫𑀼𑀢𑁆𑀢𑀢𑀸? 𑀯𑀺𑀲𑀁𑀲𑀝𑁆𑀞𑀸𑀪𑀸𑀯𑀢𑁄 𑀏𑀯. 𑀢𑀜𑁆𑀳𑀺 𑀧𑀓𑀢𑀺𑀬𑀸𑀯 𑀲𑀩𑁆𑀩𑀲𑁄 𑀓𑀺𑀮𑁂𑀲𑁂𑀳𑀺 𑀯𑀺𑀲𑀁𑀲𑀝𑁆𑀞𑀁 𑀯𑀺𑀦𑀺𑀲𑁆𑀲𑀝𑀁 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂 𑀞𑀺𑀢𑀁, 𑀢𑀲𑁆𑀫𑀸𑀲𑁆𑀲 𑀢𑀢𑁄 𑀦𑀺𑀲𑁆𑀲𑀝𑀢𑁆𑀢𑀸 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀺 𑀦𑀺𑀲𑁆𑀲𑀭𑀡𑀧𑀳𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺𑀆𑀤𑀺.

𑁧𑁯𑁯. 𑀇𑀫𑁂 𑀢𑀣𑀸𑀕𑀢𑀲𑁆𑀲 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑀸, 𑀦 𑀲𑀸𑀯𑀓𑀯𑀺𑀲𑀬𑀸, 𑀫𑀫 𑀧𑀦 𑀤𑁂𑀲𑀦𑀸 𑀢𑀬𑀸 𑀲𑀼𑀢𑀸 𑀏𑀯𑀸𑀢𑀺 𑀢𑁂 𑀣𑁂𑀭𑀲𑁆𑀲𑁂𑀯 𑀪𑀸𑀭𑀁 𑀓𑀭𑁄𑀦𑁆𑀢𑁄, ‘‘𑀢𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀝𑀺𑀪𑀦𑁆𑀢𑀽’’𑀢𑀺 𑀆𑀳. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀏𑀢𑁆𑀣 𑀓𑀸𑀮𑀪𑁂𑀤𑀯𑀲𑁂𑀦 𑀮𑀩𑁆𑀪𑀫𑀸𑀦𑀫𑁆𑀧𑀺 𑀲𑀫𑁆𑀧𑀚𑀸𑀦𑀪𑀸𑀯𑀁 𑀅𑀦𑀸𑀫𑀲𑀺𑀢𑁆𑀯𑀸 𑀕𑀢𑀺𑀯𑀺𑀪𑀸𑀕𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀤𑁆𑀯𑁂 𑀲𑀫𑁆𑀧𑀚𑀜𑁆𑀜𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑁋 𑀅𑀝𑁆𑀞 𑀯𑀭𑁂 𑀕𑀡𑁆𑀳𑀦𑁆𑀢𑁄𑀢𑀺 𑀏𑀢𑁆𑀣 𑀓𑀣𑀁 𑀯𑀭𑀁 𑀤𑁂𑀯𑀢𑀸 𑀤𑁂𑀢𑀺, 𑀧𑀭𑀲𑁆𑀲 𑀤𑀻𑀬𑀫𑀸𑀦𑀜𑁆𑀘 𑀢𑀁 𑀓𑀣𑀁 𑀧𑀭𑀲𑁆𑀲 𑀲𑀫𑀺𑀚𑁆𑀛𑀢𑀻𑀢𑀺? 𑀓𑀫𑁆𑀫𑀩𑀮𑁂𑀦𑁂𑀯. 𑀬𑀤𑀺 𑀳𑀺 𑀢𑀁 𑀓𑀫𑁆𑀫𑀁 𑀓𑀢𑁄𑀓𑀸𑀲𑀁 𑀬𑀲𑁆𑀲 𑀢𑀤𑀧𑀤𑁂𑀲𑁂𑀦 𑀨𑀮𑀁 𑀯𑀺𑀧𑀘𑁆𑀘𑀢𑀺, 𑀏𑀯𑀁 𑀤𑁂𑀯𑀢𑀸𑀬 𑀢𑀲𑁆𑀲 𑀯𑀭𑀁 𑀤𑀺𑀦𑁆𑀦𑀁, 𑀇𑀢𑀭𑁂𑀦 𑀘 𑀮𑀤𑁆𑀥𑀦𑁆𑀢𑀺 𑀯𑁄𑀳𑀸𑀭𑁄 𑀳𑁄𑀢𑀻𑀢𑀺. 𑀅𑀧𑀺𑀘 𑀧𑀭𑀲𑁆𑀲 𑀧𑀢𑁆𑀣𑀺𑀢𑀯𑀭𑀸𑀦𑀺 𑀦𑀸𑀫 𑀯𑀺𑀧𑀘𑁆𑀘𑀫𑀸𑀦𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀪𑀽𑀢𑁄 𑀧𑀬𑁄𑀕𑀯𑀺𑀲𑁂𑀲𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀸𑀦𑀺 𑀯𑀺𑀧𑀘𑁆𑀘𑀦𑁂 𑀏𑀓𑀦𑁆𑀢𑀺𑀓𑀸𑀦𑀺𑀧𑀺 𑀅𑀧𑁆𑀧𑁂𑀲𑀓𑁆𑀔𑀸 𑀤𑁂𑀯𑀢𑀸 𑁋 ‘‘𑀅𑀬𑀫𑀲𑁆𑀲 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺𑀲𑁆𑀲𑀢𑀺, 𑀦𑁄’’𑀢𑀺 𑀦 𑀚𑀸𑀦𑀦𑁆𑀢𑀺, 𑀲𑀓𑁆𑀓𑁄 𑀧𑀦 𑀧𑀜𑁆𑀜𑀯𑀸 𑀢𑀸𑀦𑀺 𑀏𑀓𑀘𑁆𑀘𑀁 𑀚𑀸𑀦𑀸𑀢𑀺𑀬𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀓𑁆𑀓𑁂𑀦 𑀧𑀲𑀻𑀤𑀺𑀢𑁆𑀯𑀸 𑀤𑀺𑀦𑁆𑀦𑁂 𑀅𑀝𑁆𑀞 𑀯𑀭𑁂 𑀕𑀡𑁆𑀳𑀦𑁆𑀢𑁄’’𑀢𑀺𑀆𑀤𑀺.

𑀧𑀞𑀫𑀚𑀯𑀦𑀯𑀸𑀭𑁂𑀢𑀺 𑀉𑀧𑁆𑀧𑀦𑁆𑀦𑀲𑁆𑀲 𑀲𑀩𑁆𑀩𑀧𑀞𑀫𑀚𑀯𑀦𑀯𑀸𑀭𑁂. 𑀲𑁄 𑀳𑀺 𑀧𑀝𑀺𑀲𑀦𑁆𑀥𑀺𑀬𑀸 𑀆𑀲𑀦𑁆𑀦𑀪𑀸𑀯𑀢𑁄 𑀅𑀯𑀺𑀲𑀤𑁄 𑀳𑁄𑀢𑀺, 𑀤𑁂𑀯𑀪𑀸𑀯𑁂 𑀦𑀺𑀓𑀦𑁆𑀢𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀦 𑀚𑀸𑀦𑀸𑀢𑀺. 𑀅𑀜𑁆𑀜𑀸𑀳𑀺 𑀤𑁂𑀯𑀢𑀸𑀳𑀺 𑀅𑀲𑀸𑀥𑀸𑀭𑀡𑀚𑀸𑀦𑀦𑀁 𑀳𑁄𑀢𑀺 𑀤𑀼𑀢𑀺𑀬𑀚𑀯𑀦𑀯𑀸𑀭𑀢𑁄 𑀧𑀝𑁆𑀞𑀸𑀬 𑀧𑀯𑀢𑁆𑀢𑀦𑀢𑁄.

𑀅𑀜𑁆𑀜𑁂𑀧𑀺 𑀤𑁂𑀯𑀸𑀢𑀺𑀆𑀤𑀺𑀦𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀢𑁆𑀣 𑀲𑀫𑁆𑀧𑀚𑀜𑁆𑀜𑁂𑀦𑁂𑀯 𑀞𑀺𑀢𑀪𑀸𑀯𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀪𑀸𑀯𑁂𑀢𑀺. 𑀆𑀳𑀸𑀭𑀽𑀧𑀘𑁆𑀙𑁂𑀤𑁂𑀦 𑀓𑀸𑀮𑀗𑁆𑀓𑀭𑁄𑀦𑁆𑀢𑀻𑀢𑀺 𑀇𑀤𑀁 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀢𑀭𑁂𑀲𑀫𑁆𑀧𑀺 𑀤𑀺𑀩𑁆𑀩𑀪𑁄𑀕𑁂𑀳𑀺 𑀫𑀼𑀘𑁆𑀙𑀺𑀢𑀢𑀁 𑀅𑀚𑁆𑀛𑀸𑀧𑀦𑁆𑀦𑀸𑀦𑀁 𑀢𑀺𑀝𑁆𑀞𑀦𑁆𑀢𑀸𑀦𑀁 𑀲𑀫𑁆𑀧𑀚𑀜𑁆𑀜𑀸𑀪𑀸𑀯𑁄 𑀳𑁄𑀢𑀺𑀬𑁂𑀯. 𑀓𑀺𑀁 𑀢𑀣𑀸𑀭𑀽𑀧𑀁 𑀆𑀭𑀫𑁆𑀫𑀡𑀁 𑀦𑀢𑁆𑀣𑀻𑀢𑀺 𑀬𑀣𑀸𑀭𑀽𑀧𑀁 𑀉𑀴𑀸𑀭𑀁 𑀧𑀡𑀻𑀢𑀜𑁆𑀘 𑀆𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀢𑁂 𑀤𑁂𑀯𑀸 𑀲𑀁𑀫𑀼𑀘𑁆𑀙𑀺𑀢𑀸 𑀆𑀳𑀸𑀭𑀽𑀧𑀘𑁆𑀙𑁂𑀤𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀓𑀺𑀁 𑀢𑀣𑀸𑀭𑀽𑀧𑀁 𑀉𑀴𑀸𑀭𑀁 𑀧𑀡𑀻𑀢𑀜𑁆𑀘 𑀆𑀭𑀫𑁆𑀫𑀡𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀢𑁆𑀣𑀻𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀫𑁆𑀧𑀚𑀜𑁆𑀜𑀸𑀦𑀼𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀺? 𑀩𑁄𑀥𑀺𑀲𑀢𑁆𑀢𑁄 𑀳𑀺 𑀬𑀢𑁆𑀣 𑀬𑀢𑁆𑀣 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀢𑁆𑀣 𑀢𑀢𑁆𑀣 𑀅𑀜𑁆𑀜𑁂 𑀲𑀢𑁆𑀢𑁂 𑀤𑀲𑀳𑀺 𑀯𑀺𑀲𑁂𑀲𑁂𑀳𑀺 𑀅𑀥𑀺𑀕𑁆𑀕𑀡𑁆𑀳𑀸𑀢𑀺, 𑀧𑀕𑁂𑀯 𑀢𑀢𑁆𑀣 𑀤𑁂𑀯𑀪𑀽𑀢𑁄, 𑀢𑀣𑀸𑀧𑀺 ‘‘𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺 𑀅𑀬𑀫𑁂𑀢𑁆𑀣 𑀅𑀘𑁆𑀙𑀭𑀺𑀬𑀥𑀫𑁆𑀫𑁄 𑀯𑀼𑀢𑁆𑀢𑁄.

𑁨𑁦𑁦. 𑀲𑀫𑁆𑀧𑀢𑁆𑀢𑀺𑀪𑀯𑁂 𑀤𑀻𑀖𑀸𑀬𑀼𑀓𑀢𑀸 𑀦𑀸𑀫 𑀧𑀜𑁆𑀜𑀸𑀩𑀮𑁂𑀦 𑀳𑁄𑀢𑀺, 𑀩𑁄𑀥𑀺𑀲𑀢𑁆𑀢𑁄 𑀘 𑀫𑀳𑀸𑀧𑀜𑁆𑀜𑁄, 𑀢𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀢𑁂𑀦 𑀤𑀻𑀖𑀸𑀬𑀼𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦, ‘‘𑀲𑁂𑀲𑀢𑁆𑀢𑀪𑀸𑀯𑁂𑀲𑀼 𑀓𑀺𑀁 𑀬𑀸𑀯𑀢𑀸𑀬𑀼𑀓𑀁 𑀦 𑀢𑀺𑀝𑁆𑀞𑀢𑀻’’𑀢𑀺 𑀘𑁄𑀤𑁂𑀢𑀺. 𑀇𑀢𑀭𑁄 ‘‘𑀆𑀫 𑀦 𑀢𑀺𑀝𑁆𑀞𑀢𑀻’’𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸, ‘‘𑀅𑀜𑁆𑀜𑀤𑀸 𑀳𑀻’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳. ‘‘𑀇𑀥 𑀦 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀓𑀸𑀮𑀓𑀺𑀭𑀺𑀬𑀸 𑀅𑀥𑀺𑀫𑀼𑀢𑁆𑀢𑀺𑀓𑀸𑀮𑀓𑀺𑀭𑀺𑀬𑀸. 𑀧𑀸𑀭𑀫𑀺𑀥𑀫𑁆𑀫𑀸𑀦𑀜𑁆𑀳𑀺 𑀉𑀓𑁆𑀓𑀁𑀲𑀧𑁆𑀧𑀢𑁆𑀢𑀺𑀬𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀻𑀳𑀺 𑀲𑀦𑁆𑀢𑀸𑀦𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸 𑀅𑀢𑁆𑀢𑀲𑀺𑀦𑁂𑀳𑀲𑁆𑀲 𑀢𑀦𑀼𑀪𑀸𑀯𑁂𑀦 𑀲𑀢𑁆𑀢𑁂𑀲𑀼 𑀘 𑀫𑀳𑀸𑀓𑀭𑀼𑀡𑀸𑀬 𑀉𑀴𑀸𑀭𑀪𑀸𑀯𑁂𑀦 𑀅𑀥𑀺𑀝𑁆𑀞𑀸𑀦𑀲𑁆𑀲 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀸𑀧𑀢𑁆𑀢𑀺𑀬𑀸 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀸 𑀲𑀫𑀺𑀚𑁆𑀛𑀦𑁆𑀢𑀺, 𑀘𑀺𑀢𑁆𑀢𑁂 𑀯𑀺𑀬 𑀓𑀫𑁆𑀫𑁂𑀲𑀼 𑀘 𑀢𑁂𑀲𑀁 𑀯𑀲𑀺𑀪𑀸𑀯𑁄, 𑀢𑀲𑁆𑀫𑀸 𑀬𑀢𑁆𑀣𑀼𑀧𑀧𑀦𑁆𑀦𑀸𑀦𑀁 𑀧𑀸𑀭𑀫𑀺𑀬𑁄 𑀲𑀫𑁆𑀫𑀤𑁂𑀯 𑀧𑀭𑀺𑀩𑁆𑀭𑀽𑀳𑁂𑀦𑁆𑀢𑀺, 𑀯𑀼𑀢𑁆𑀢𑀦𑀬𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀉𑀧𑀧𑀚𑁆𑀚𑀦𑁆𑀢𑀺. 𑀢𑀣𑀸 𑀳𑀺 𑀅𑀬𑀁 𑀫𑀳𑀸𑀲𑀢𑁆𑀢𑁄 𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀦𑀸𑀦𑀸𑀚𑀸𑀢𑀻𑀲𑀼 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀅𑀧𑁆𑀧𑀓𑀫𑁂𑀯 𑀓𑀸𑀮𑀁 𑀢𑀢𑁆𑀣 𑀞𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀇𑀥 𑀦𑀺𑀩𑁆𑀩𑀢𑁆𑀢𑁄. 𑀢𑁂𑀦𑀸𑀳 𑁋 ‘‘𑀅𑀬𑀁 𑀓𑀸𑀮𑀓𑀺𑀭𑀺𑀬𑀸 𑀅𑀜𑁆𑀜𑁂𑀲𑀁 𑀦 𑀳𑁄𑀢𑀻’’𑀢𑀺. 𑀲𑀩𑁆𑀩𑀧𑀸𑀭𑀫𑀻𑀦𑀁 𑀧𑀽𑀭𑀺𑀢𑀢𑁆𑀢𑀸𑀢𑀺 𑀇𑀫𑀺𑀦𑀸 𑀧𑀬𑁄𑀚𑀦𑀸𑀪𑀸𑀯𑀢𑁄 𑀢𑀢𑁆𑀣 𑀞𑀢𑁆𑀯𑀸 𑀅𑀥𑀺𑀫𑀼𑀢𑁆𑀢𑀺𑀓𑀸𑀮𑀓𑀺𑀭𑀺𑀬𑀸 𑀦𑀸𑀫 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀺𑀘 𑀘𑀭𑀺𑀫𑀪𑀯𑁂 𑀘𑀢𑀼𑀫𑀳𑀸𑀦𑀺𑀥𑀺𑀲𑀫𑀼𑀝𑁆𑀞𑀸𑀦𑀧𑀼𑀩𑁆𑀩𑀺𑀓𑀸𑀬 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀸𑀬 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑀢𑁆𑀢𑀺 𑀯𑀺𑀬 𑀩𑀼𑀤𑁆𑀥𑀪𑀽𑀢𑀲𑁆𑀲 𑀅𑀲𑀤𑀺𑀲𑀤𑀸𑀦𑀸𑀤𑀺𑀯𑀲𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀮𑀸𑀪𑀼𑀧𑁆𑀧𑀢𑁆𑀢𑀺 𑀯𑀺𑀬 𑀘 𑀇𑀢𑁄 𑀧𑀭𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀅𑀦𑀼𑀪𑀯𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀬𑀸𑀯𑀢𑀸𑀬𑀼𑀓𑀝𑁆𑀞𑀸𑀦𑀁 𑀉𑀲𑁆𑀲𑀸𑀳𑀚𑀸𑀢𑀲𑁆𑀲 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀜𑁆𑀳𑁂𑀢𑁆𑀣 𑀥𑀫𑁆𑀫𑀢𑀸.

𑀫𑀦𑀼𑀲𑁆𑀲𑀕𑀡𑀦𑀸𑀯𑀲𑁂𑀦, 𑀦 𑀤𑁂𑀯𑀕𑀡𑀦𑀸𑀯𑀲𑁂𑀦. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀘𑀼𑀢𑀺𑀬𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺. 𑀅𑀫𑀺𑀮𑀸𑀬𑀺𑀢𑁆𑀯𑀸𑀢𑀺 𑀏𑀢𑁆𑀣 𑀅𑀫𑀺𑀮𑀸𑀢𑀕𑁆𑀕𑀳𑀡𑁂𑀦𑁂𑀯 𑀢𑀸𑀲𑀁 𑀫𑀸𑀮𑀸𑀦𑀁 𑀯𑀡𑁆𑀡𑀲𑀫𑁆𑀧𑀤𑀸𑀧𑀺 𑀕𑀦𑁆𑀥𑀲𑀫𑁆𑀧𑀤𑀸𑀧𑀺 𑀲𑁄𑀪𑀸𑀲𑀫𑁆𑀧𑀤𑀸𑀧𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀸𑀦𑀁 𑀭𑀚𑁄𑀚𑀮𑁆𑀮𑀸𑀦𑀁 𑀮𑁂𑀲𑀲𑁆𑀲𑀧𑀺 𑀅𑀪𑀸𑀯𑀢𑁄 𑀤𑁂𑀯𑀸𑀦𑀁 𑀲𑀭𑀻𑀭𑀕𑀢𑀸𑀦𑀺 𑀯𑀢𑁆𑀣𑀸𑀦𑀺 𑀲𑀩𑁆𑀩𑀓𑀸𑀮𑀁 𑀧𑀭𑀺𑀲𑀼𑀤𑁆𑀥𑀧𑀪𑀲𑁆𑀲𑀭𑀸𑀦𑁂𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀆𑀳 ‘‘𑀯𑀢𑁆𑀣𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀦𑁂𑀯 𑀲𑀻𑀢𑀁 𑀦 𑀉𑀡𑁆𑀳𑀦𑁆𑀢𑀺 𑀬𑀲𑁆𑀲 𑀲𑀻𑀢𑀲𑁆𑀲 𑀧𑀢𑀻𑀓𑀸𑀭𑀯𑀲𑁂𑀦 𑀅𑀥𑀺𑀓𑀁 𑀲𑁂𑀯𑀺𑀬𑀫𑀸𑀦𑀁 𑀉𑀡𑁆𑀳𑀁, 𑀲𑀬𑀫𑁂𑀯 𑀯𑀸 𑀔𑀭𑀢𑀭𑀁 𑀳𑀼𑀢𑁆𑀯𑀸 𑀅𑀥𑀺𑀪𑀯𑀦𑁆𑀢𑀁 𑀲𑀭𑀻𑀭𑁂 𑀲𑁂𑀤𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀢𑀸𑀤𑀺𑀲𑀁 𑀦𑁂𑀯 𑀲𑀻𑀢𑀁 𑀦 𑀉𑀡𑁆𑀳𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀫𑀭𑀡𑀸𑀲𑀦𑁆𑀦𑀓𑀸𑀮𑁂. 𑀩𑀺𑀦𑁆𑀤𑀼𑀩𑀺𑀦𑁆𑀤𑀼𑀯𑀲𑁂𑀦𑀸𑀢𑀺 𑀫𑀼𑀢𑁆𑀢𑀕𑀼𑀴𑀺𑀓𑀸 𑀯𑀺𑀬 𑀩𑀺𑀦𑁆𑀤𑀼 𑀩𑀺𑀦𑁆𑀤𑀼 𑀳𑀼𑀢𑁆𑀯𑀸 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀤𑀦𑁆𑀢𑀸𑀦𑀁 𑀔𑀡𑁆𑀟𑀺𑀢𑀪𑀸𑀯𑁄 𑀔𑀡𑁆𑀟𑀺𑀘𑁆𑀘𑀁. 𑀓𑁂𑀲𑀸𑀦𑀁 𑀧𑀮𑀺𑀢𑀪𑀸𑀯𑁄 𑀧𑀸𑀮𑀺𑀘𑁆𑀘𑀁. 𑀆𑀤𑀺-𑀲𑀤𑁆𑀤𑁂𑀦 𑀯𑀮𑀺𑀢𑁆𑀢𑀘𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀺𑀮𑀦𑁆𑀢𑀭𑀽𑀧𑁄 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀦 𑀧𑀦 𑀔𑀡𑁆𑀟𑀺𑀘𑁆𑀘𑀧𑀸𑀮𑀺𑀘𑁆𑀘𑀸𑀤𑀻𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀓𑁆𑀓𑀡𑁆𑀞𑀺𑀢𑀸𑀢𑀺 𑀅𑀦𑀪𑀺𑀭𑀢𑀺, 𑀲𑀸 𑀦𑀢𑁆𑀣𑀺 𑀉𑀧𑀭𑀽𑀧𑀭𑀺 𑀉𑀴𑀸𑀭𑀼𑀴𑀸𑀭𑀸𑀦𑀫𑁂𑀯 𑀪𑁄𑀕𑀸𑀦𑀁 𑀯𑀺𑀲𑁂𑀲𑀢𑁄 𑀭𑀼𑀘𑀺𑀚𑀦𑀓𑀸𑀦𑀁 𑀉𑀧𑀢𑀺𑀝𑁆𑀞𑀦𑀢𑁄.

𑀧𑀡𑁆𑀟𑀺𑀢𑀸 𑀏𑀯𑀸𑀢𑀺 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑀸 𑀏𑀯 𑀤𑁂𑀯𑀢𑀸. 𑀬𑀣𑀸 𑀤𑁂𑀯𑀢𑀸 ‘‘𑀲𑀫𑁆𑀧𑀢𑀺 𑀚𑀸𑀢𑀸 𑀓𑀻𑀤𑀺𑀲𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀇𑀫𑀺𑀦𑀸 𑀦𑀸𑀫 𑀧𑀼𑀜𑁆𑀜𑀓𑀫𑁆𑀫𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀚𑀸𑀦𑀦𑁆𑀢𑀺, 𑀏𑀯𑀁 𑀅𑀢𑀻𑀢𑀪𑀯𑁂 𑀅𑀢𑁆𑀢𑀦𑀸 𑀓𑀢𑀁 𑀏𑀓𑀘𑁆𑀘𑀁 𑀅𑀜𑁆𑀜𑀫𑁆𑀧𑀺 𑀧𑀼𑀜𑁆𑀜𑀁 𑀚𑀸𑀦𑀦𑁆𑀢𑀺𑀬𑁂𑀯 𑀫𑀳𑀸𑀧𑀼𑀜𑁆𑀜𑀸𑀢𑀺 𑀆𑀳 𑁋 ‘‘𑀬𑁂 𑀫𑀳𑀸𑀧𑀼𑀜𑁆𑀜𑀸’’𑀢𑀺𑀆𑀤𑀺.

𑀦 𑀧𑀜𑁆𑀜𑀸𑀬𑀦𑁆𑀢𑀺 𑀘𑀺𑀭𑀢𑀭𑀓𑀸𑀮𑀢𑁆𑀢𑀸 𑀧𑀭𑀫𑀸𑀬𑀼𑀦𑁄. 𑀅𑀦𑀺𑀬𑁆𑀬𑀸𑀦𑀺𑀓𑀦𑁆𑀢𑀺 𑀦 𑀦𑀺𑀬𑁆𑀬𑀸𑀦𑀸𑀯𑀳𑀁 𑀲𑀢𑁆𑀢𑀸𑀦𑀁 𑀅𑀪𑀸𑀚𑀦𑀪𑀸𑀯𑀢𑁄. 𑀲𑀢𑁆𑀢𑀸 𑀦 𑀧𑀭𑀫𑀸𑀬𑀼𑀦𑁄 𑀳𑁄𑀦𑁆𑀢𑀺 𑀦𑀸𑀫 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬𑀸𑀢𑀺 𑀆𑀳 𑁋 ‘‘𑀢𑀤𑀸 𑀳𑀺 𑀲𑀢𑁆𑀢𑀸 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀳𑁄𑀦𑁆𑀢𑀻’’𑀢𑀺. 𑀏𑀢𑁆𑀣𑀸𑀳 𑁋 ‘‘𑀓𑀲𑁆𑀫𑀸 𑀲𑀫𑁆𑀩𑀼𑀤𑁆𑀥𑀸 𑀫𑀦𑀼𑀲𑁆𑀲𑀮𑁄𑀓𑁂 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑁂𑀲𑀽’’𑀢𑀺. 𑀤𑁂𑀯𑀮𑁄𑀓𑁂 𑀢𑀸𑀯 𑀦𑀼𑀧𑁆𑀧𑀚𑁆𑀚𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀅𑀦𑁄𑀓𑀸𑀲𑀪𑀸𑀯𑀢𑁄 𑀢𑀣𑀸 𑀅𑀦𑀘𑁆𑀙𑀭𑀺𑀬𑀪𑀸𑀯𑀢𑁄. 𑀅𑀘𑁆𑀙𑀭𑀺𑀬𑀥𑀫𑁆𑀫𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀢𑁂𑀲𑀁 𑀲𑀸 𑀅𑀘𑁆𑀙𑀭𑀺𑀬𑀥𑀫𑁆𑀫𑀢𑀸 𑀤𑁂𑀯𑀢𑁆𑀢𑀪𑀸𑀯𑁂 𑀞𑀺𑀢𑀸𑀦𑀁 𑀦 𑀧𑀸𑀓𑀝𑀸 𑀳𑁄𑀢𑀺 𑀬𑀣𑀸 𑀫𑀦𑀼𑀲𑁆𑀲𑀪𑀽𑀢𑀸𑀦𑀁. 𑀤𑁂𑀯𑀪𑀽𑀢𑁂 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀤𑀺𑀲𑁆𑀲𑀫𑀸𑀦𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑁂𑀯𑀸𑀦𑀼𑀪𑀸𑀯𑀢𑁄𑀯 𑀮𑁄𑀓𑁄 𑀤𑀳𑀢𑀺, 𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑀢𑁄, 𑀢𑀣𑀸 𑀲𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺 𑀇𑀲𑁆𑀲𑀭𑀓𑀼𑀢𑁆𑀢𑀕𑁆𑀕𑀸𑀳𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀤𑁂𑀯𑀢𑁆𑀢𑀪𑀸𑀯𑀲𑁆𑀲 𑀘 𑀘𑀺𑀭𑀓𑀸𑀮𑀧𑀯𑀢𑁆𑀢𑀦𑀢𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀢𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺. ‘‘𑀩𑁆𑀭𑀳𑁆𑀫𑀮𑁄𑀓𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀢𑁆𑀢𑀸𑀦𑀁 𑀢𑀸𑀤𑀺𑀲𑀕𑀸𑀳𑀯𑀺𑀫𑁄𑀘𑀦𑀢𑁆𑀣𑀜𑁆𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀫𑀦𑀼𑀲𑁆𑀲𑀲𑀼𑀕𑀢𑀺𑀬𑀁𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺; 𑀦 𑀤𑁂𑀯𑀲𑀼𑀕𑀢𑀺𑀬𑀁, 𑀫𑀦𑀼𑀲𑁆𑀲𑀲𑀼𑀕𑀢𑀺𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀑𑀧𑀧𑀸𑀢𑀺𑀓𑀸 𑀦 𑀳𑁄𑀦𑁆𑀢𑀺, 𑀲𑀢𑀺 𑀘 𑀑𑀧𑀧𑀸𑀢𑀺𑀓𑀽𑀧𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀤𑁄𑀲𑀸𑀦𑀢𑀺𑀯𑀢𑁆𑀢𑀦𑀢𑁄. 𑀥𑀫𑁆𑀫𑀯𑁂𑀦𑁂𑀬𑁆𑀬𑀸𑀦𑀁 𑀅𑀢𑁆𑀣𑀸𑀬 𑀥𑀫𑁆𑀫𑀢𑀦𑁆𑀢𑀺𑀬𑀸 𑀞𑀧𑀦𑀲𑁆𑀲 𑀯𑀺𑀬 𑀥𑀸𑀢𑀼𑀯𑁂𑀦𑁂𑀬𑁆𑀬𑀸𑀦𑀁 𑀅𑀢𑁆𑀣𑀸𑀬 𑀥𑀸𑀢𑀽𑀦𑀁 𑀞𑀧𑀦𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀘. 𑀦 𑀳𑀺 𑀑𑀧𑀧𑀸𑀢𑀺𑀓𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀉𑀤𑁆𑀥𑀁 𑀲𑀭𑀻𑀭𑀥𑀸𑀢𑀼𑀬𑁄 𑀢𑀺𑀝𑁆𑀞𑀦𑁆𑀢𑀺, 𑀢𑀲𑁆𑀫𑀸 𑀦 𑀑𑀧𑀧𑀸𑀢𑀺𑀓𑀸 𑀳𑁄𑀦𑁆𑀢𑀺, 𑀘𑀭𑀺𑀫𑀪𑀯𑁂 𑀘 𑀫𑀳𑀸𑀩𑁄𑀥𑀺𑀲𑀢𑁆𑀢𑀸, 𑀫𑀦𑀼𑀲𑁆𑀲𑀪𑀸𑀯𑀲𑁆𑀲 𑀧𑀸𑀓𑀝𑀓𑀭𑀡𑀸𑀬 𑀤𑀸𑀭𑀧𑀭𑀺𑀕𑁆𑀕𑀳𑀫𑁆𑀧𑀺 𑀓𑀭𑁄𑀦𑁆𑀢𑀸 𑀬𑀸𑀯 𑀧𑀼𑀢𑁆𑀢𑀫𑀼𑀔𑀤𑀲𑁆𑀲𑀦𑀸 𑀅𑀕𑀸𑀭𑀫𑀚𑁆𑀛𑁂 𑀢𑀺𑀝𑁆𑀞𑀦𑁆𑀢𑀺. 𑀧𑀭𑀺𑀧𑀸𑀓𑀕𑀢𑀲𑀻𑀮𑀦𑁂𑀓𑁆𑀔𑀫𑁆𑀫𑀧𑀜𑁆𑀜𑀸𑀤𑀺𑀧𑀸𑀭𑀫𑀺𑀓𑀸𑀧𑀺 𑀦 𑀅𑀪𑀺𑀦𑀺𑀓𑁆𑀔𑀫𑀦𑁆𑀢𑀺, 𑀓𑀺𑀁 𑀯𑀸 𑀏𑀢𑀸𑀬 𑀓𑀸𑀭𑀡𑀘𑀺𑀦𑁆𑀢𑀸𑀬? 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀸, 𑀬𑀤𑀺𑀤𑀁 𑀫𑀦𑀼𑀲𑁆𑀲𑀪𑀽𑀢𑀸𑀦𑀁𑀬𑁂𑀯 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀸, 𑀦 𑀤𑁂𑀯𑀪𑀽𑀢𑀸𑀦𑀦𑁆𑀢𑀺 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸. 𑀢𑀣𑀸 𑀳𑀺 𑀢𑀤𑀢𑁆𑀣𑁄 𑀫𑀳𑀸𑀪𑀺𑀦𑀻𑀳𑀸𑀭𑁄𑀧𑀺 𑀫𑀦𑀼𑀲𑁆𑀲𑀪𑀽𑀢𑀸𑀦𑀁𑀬𑁂𑀯 𑀇𑀚𑁆𑀛𑀢𑀺, 𑀦 𑀇𑀢𑀭𑁂𑀲𑀁.

𑀓𑀲𑁆𑀫𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀲𑁂𑀲𑀤𑀻𑀧𑁂𑀲𑀽𑀢𑀺? 𑀓𑁂𑀘𑀺 𑀢𑀸𑀯 𑀆𑀳𑀼 𑁋 ‘‘𑀬𑀲𑁆𑀫𑀸 𑀧𑀣𑀯𑀺𑀬𑀸 𑀦𑀸𑀪𑀺𑀪𑀽𑀢𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑀲𑀳𑀺𑀢𑀸 𑀅𑀘𑀮𑀝𑁆𑀞𑀸𑀦𑀪𑀽𑀢𑀸 𑀩𑁄𑀥𑀺𑀫𑀡𑁆𑀟𑀪𑀽𑀫𑀺 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺; ‘‘𑀢𑀣𑀸 𑀇𑀢𑀭𑁂𑀲𑀫𑁆𑀧𑀺 𑀅𑀯𑀺𑀚𑀳𑀺𑀢𑀝𑁆𑀞𑀸𑀦𑀸𑀦𑀁 𑀢𑀢𑁆𑀣𑁂𑀯 𑀮𑀩𑁆𑀪𑀫𑀸𑀦𑀢𑁄’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 𑁋 𑀬𑀲𑁆𑀫𑀸 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀸𑀯𑀓𑀩𑁄𑀥𑀺𑀬𑀸 𑀅𑀪𑀺𑀦𑀻𑀳𑀸𑀭𑁄 𑀲𑀸𑀯𑀓𑀧𑀸𑀭𑀫𑀻𑀦𑀁 𑀲𑀫𑁆𑀪𑀭𑀡𑀁 𑀧𑀭𑀺𑀧𑀸𑀘𑀦𑀜𑁆𑀘 𑀩𑀼𑀤𑁆𑀥𑀔𑁂𑀢𑁆𑀢𑀪𑀽𑀢𑁂 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀇𑀚𑁆𑀛𑀢𑀺, 𑀦 𑀅𑀜𑁆𑀜𑀢𑁆𑀣. 𑀯𑁂𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀦𑀢𑁆𑀣𑁄 𑀘 𑀩𑀼𑀤𑁆𑀥𑀼𑀧𑁆𑀧𑀸𑀤𑁄𑀢𑀺 𑀅𑀕𑁆𑀕𑀲𑀸𑀯𑀓𑀸𑀤𑀺𑀯𑁂𑀦𑁂𑀬𑁆𑀬𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬 𑀏𑀓𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀦 𑀲𑁂𑀲𑀤𑀻𑀧𑁂𑀲𑀼. 𑀅𑀬𑀜𑁆𑀘 𑀦𑀬𑁄 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄𑀢𑀺 𑀢𑁂𑀲𑀁 𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 𑀢𑀢𑁆𑀣𑁂𑀯 𑀉𑀧𑁆𑀧𑀢𑁆𑀢𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀦𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀼𑀧𑀦𑀺𑀲𑁆𑀲𑀬𑀢𑁄 𑀅𑀧𑀭𑀸𑀧𑀭𑀁 𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 𑁋 ‘‘𑀢𑀻𑀲𑀼 𑀤𑀻𑀧𑁂𑀲𑀼 𑀩𑀼𑀤𑁆𑀥𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀤𑀻𑀧𑀁 𑀧𑀲𑁆𑀲𑀢𑀻’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀤𑁂𑀲𑀦𑀺𑀬𑀫𑁂𑀧𑀺 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁.

𑀇𑀤𑀸𑀦𑀺 𑀘 𑀔𑀢𑁆𑀢𑀺𑀬𑀓𑀼𑀮𑀁 𑀮𑁄𑀓𑀲𑀫𑁆𑀫𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀫𑁆𑀧𑀺 𑀧𑀽𑀚𑀦𑀻𑀬𑀪𑀸𑀯𑀢𑁄. 𑀭𑀸𑀚𑀸 𑀫𑁂 𑀧𑀺𑀢𑀸 𑀪𑀯𑀺𑀲𑁆𑀲𑀢𑀻𑀢𑀺 𑀓𑀼𑀮𑀁 𑀧𑀲𑁆𑀲𑀺 𑀧𑀺𑀢𑀼𑀯𑀲𑁂𑀦 𑀓𑀼𑀮𑀲𑁆𑀲 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁄. 𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀉𑀧𑀭𑀺 𑀲𑀢𑁆𑀢 𑀤𑀺𑀯𑀲𑀸𑀦𑀻𑀢𑀺 𑀧𑀲𑁆𑀲𑀺 𑀢𑁂𑀦 𑀅𑀢𑁆𑀢𑀦𑁄 𑀅𑀦𑁆𑀢𑀭𑀸𑀬𑀸𑀪𑀸𑀯𑀁 𑀅𑀜𑁆𑀜𑀸𑀲𑀺, 𑀢𑀲𑁆𑀲𑀸 𑀘 𑀢𑀼𑀲𑀺𑀢𑀪𑀯𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀦𑀼𑀪𑀯𑀦𑀁.

𑀢𑀸 𑀤𑁂𑀯𑀢𑀸𑀢𑀺 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑀤𑁂𑀯𑀢𑀸. 𑀓𑀣𑀁 𑀧𑀦 𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀽𑀭𑀺𑀢𑀧𑀸𑀭𑀫𑀺𑀪𑀸𑀯𑀁 𑀪𑀸𑀯𑀺𑀦𑀜𑁆𑀘 𑀲𑀫𑁆𑀩𑀼𑀤𑁆𑀥𑀪𑀸𑀯𑀁 𑀚𑀸𑀦𑀦𑁆𑀢𑀻𑀢𑀺? 𑀫𑀳𑁂𑀲𑀓𑁆𑀔𑀸𑀦𑀁 𑀤𑁂𑀯𑀢𑀸𑀦𑀁 𑀯𑀲𑁂𑀦, 𑀬𑁂𑀪𑀼𑀬𑁆𑀬𑁂𑀦 𑀘 𑀢𑀸 𑀤𑁂𑀯𑀢𑀸 𑀅𑀪𑀺𑀲𑀫𑀬𑀪𑀸𑀕𑀺𑀦𑁄. 𑀢𑀣𑀸 𑀳𑀺 𑀪𑀕𑀯𑀢𑁄 𑀘 𑀥𑀫𑁆𑀫𑀤𑀸𑀦𑀲𑀁𑀯𑀺𑀪𑀸𑀕𑁂 𑀅𑀦𑁂𑀓𑀯𑀸𑀭𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀯𑀸𑀲𑀺𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺.

𑀘𑀯𑀸𑀫𑀻𑀢𑀺 𑀧𑀚𑀸𑀦𑀸𑀢𑀺 𑀘𑀼𑀢𑀺𑀆𑀲𑀦𑁆𑀦𑀚𑀯𑀦𑁂𑀳𑀺 𑀜𑀸𑀡𑀲𑀳𑀺𑀢𑁂𑀳𑀺 𑀘𑀼𑀢𑀺𑀬𑀸 𑀉𑀧𑀝𑁆𑀞𑀺𑀢𑀪𑀸𑀯𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀢𑁆𑀢𑀸. 𑀘𑀼𑀢𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺 𑀘𑀼𑀢𑀺𑀘𑀺𑀢𑁆𑀢𑀓𑁆𑀔𑀡𑀲𑁆𑀲 𑀇𑀢𑁆𑀢𑀭𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀲𑁆𑀲𑀧𑀺 𑀅𑀯𑀺𑀲𑀬𑁄 𑀏𑀯. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀆𑀯𑀚𑁆𑀚𑀦𑀧𑀭𑀺𑀬𑀸𑀬𑁄𑀢𑀺 𑀆𑀯𑀚𑁆𑀚𑀦𑀓𑁆𑀓𑀫𑁄. 𑀬𑀲𑁆𑀫𑀸 𑀏𑀓𑀯𑀸𑀭𑀁 𑀆𑀯𑀚𑁆𑀚𑀺𑀢𑀫𑀢𑁆𑀢𑁂𑀦 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑀺𑀦𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀢𑀫𑁂𑀯𑀸𑀭𑀫𑁆𑀫𑀡𑀁 𑀤𑀼𑀢𑀺𑀬𑀁 𑀢𑀢𑀺𑀬𑀜𑁆𑀘 𑀆𑀯𑀚𑁆𑀚𑀺𑀢𑁆𑀯𑀸 𑀦𑀺𑀘𑁆𑀙𑀻𑀬𑀢𑀺, 𑀆𑀯𑀚𑁆𑀚𑀦𑀲𑀻𑀲𑁂𑀦 𑀘𑁂𑀢𑁆𑀣 𑀚𑀯𑀦𑀯𑀸𑀭𑁄 𑀕𑀳𑀺𑀢𑁄. 𑀢𑁂𑀦𑀸𑀳 𑁋 ‘‘𑀤𑀼𑀢𑀺𑀬𑀢𑀢𑀺𑀬𑀘𑀺𑀢𑁆𑀢𑀯𑀸𑀭𑁂𑀬𑁂𑀯 𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀘𑀼𑀢𑀺𑀬𑀸 𑀧𑀼𑀭𑁂𑀢𑀭𑀁 𑀓𑀢𑀺𑀧𑀬𑀘𑀺𑀢𑁆𑀢𑀯𑀸𑀭𑀢𑁄 𑀧𑀝𑁆𑀞𑀸𑀬 𑀫𑀭𑀡𑀁 𑀫𑁂 𑀆𑀲𑀦𑁆𑀦𑀦𑁆𑀢𑀺 𑀚𑀸𑀦𑀦𑀢𑁄, ‘‘𑀘𑀼𑀢𑀺𑀓𑁆𑀔𑀡𑁂𑀧𑀺 𑀘𑀯𑀸𑀫𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀲𑀦𑁆𑀥𑀺𑀬𑀸 𑀧𑀦 𑀅𑀧𑀼𑀩𑁆𑀩𑀪𑀸𑀯𑀢𑁄 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀦𑀺𑀓𑀦𑁆𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀢𑁄 𑀧𑀭𑀢𑁄 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀫𑀬𑀸 𑀧𑀝𑀺𑀲𑀦𑁆𑀥𑀺 𑀕𑀳𑀺𑀢𑀸𑀢𑀺 𑀧𑀚𑀸𑀦𑀸𑀢𑀺, 𑀤𑀼𑀢𑀺𑀬𑀚𑀯𑀦𑀢𑁄 𑀧𑀝𑁆𑀞𑀸𑀬 𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂. 𑀤𑀲𑀲𑀳𑀲𑁆𑀲𑀻 𑀓𑀫𑁆𑀧𑀢𑀻𑀢𑀺 𑀏𑀢𑁆𑀣 𑀓𑀫𑁆𑀧𑀦𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀫𑀳𑀸𑀓𑀸𑀭𑀼𑀡𑀺𑀓𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀢𑀸𑀬 𑀩𑀳𑀼𑀮𑀁 𑀲𑁄𑀫𑀦𑀲𑁆𑀲𑀺𑀓𑀸𑀯 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀧𑀞𑀫𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀅𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁭; 𑀥. 𑀲. 𑁪𑁯𑁮; 𑀫. 𑀦𑀺. 𑀅𑀝𑁆𑀞. 𑁩.𑁧𑁯𑁯) 𑀯𑀼𑀢𑁆𑀢𑀁. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 𑀬𑀤𑀺𑀧𑀺 𑀫𑀳𑀸𑀓𑀸𑀭𑀼𑀡𑀺𑀓𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸, 𑀯𑀺𑀯𑁂𑀓𑀚𑁆𑀛𑀸𑀲𑀬𑀸 𑀧𑀦 𑀯𑀺𑀲𑀗𑁆𑀔𑀸𑀭𑀦𑀺𑀦𑁆𑀦𑀸 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀚𑁆𑀛𑀼𑀧𑁂𑀓𑁆𑀔𑀡𑀩𑀳𑀼𑀮𑀸𑀢𑀺 𑀧𑀜𑁆𑀘𑀫𑁂𑀦 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀫𑀸𑀳.

𑀧𑀼𑀭𑁂 𑀧𑀼𑀡𑁆𑀡𑀫𑀸𑀬 𑀲𑀢𑁆𑀢𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀼𑀡𑁆𑀡𑀫𑀸𑀬 𑀧𑀼𑀭𑁂 𑀲𑀢𑁆𑀢𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬, 𑀲𑀼𑀓𑁆𑀓𑀧𑀓𑁆𑀔𑁂 𑀦𑀯𑀫𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀫𑁂 𑀤𑀺𑀯𑀲𑁂𑀢𑀺 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸𑀬. 𑀇𑀤𑀁 𑀲𑀼𑀧𑀺𑀦𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑀁 𑀲𑀼𑀧𑀺𑀦𑀁. 𑀦𑁂𑀲𑀁 𑀤𑁂𑀯𑀺𑀬𑁄𑀢𑀺 𑀫𑀳𑀸𑀭𑀸𑀚𑀽𑀦𑀁 𑀤𑁂𑀯𑀺𑀬𑁄.

𑀲𑁄 𑀘 𑀔𑁄 𑀧𑀼𑀭𑀺𑀲𑀕𑀩𑁆𑀪𑁄, 𑀦 𑀇𑀢𑁆𑀣𑀺𑀕𑀩𑁆𑀪𑁄, 𑀧𑀼𑀢𑁆𑀢𑁄 𑀢𑁂 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑁄 𑀲𑀼𑀧𑀺𑀦𑀲𑀢𑁆𑀣𑀦𑀬𑁂𑀦 𑀓𑀣𑁂𑀲𑀼𑀁. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀻𑀢𑀺𑀆𑀤𑀺 𑀧𑀦 𑀤𑁂𑀯𑀢𑀸𑀯𑀺𑀕𑁆𑀕𑀳𑁂𑀦 𑀪𑀸𑀯𑀺𑀦𑀫𑀢𑁆𑀣𑀁 𑀬𑀸𑀣𑀸𑀯𑀢𑁄 𑀧𑀯𑁂𑀤𑁂𑀲𑀼𑀁.

𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀬𑁄𑀢𑀺 𑀏𑀢𑁆𑀣 𑀕𑀩𑁆𑀪𑁄 𑀯𑀼𑀘𑁆𑀘𑀢𑀺 𑀫𑀸𑀢𑀼𑀓𑀼𑀘𑁆𑀙𑀺, 𑀢𑀢𑁆𑀣 𑀉𑀧𑁆𑀧𑀢𑁆𑀢𑀺 𑀅𑀯𑀓𑁆𑀓𑀦𑁆𑀢𑀺, 𑀢𑀸𑀯 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺, 𑀬𑀸𑀯 𑀦 𑀦𑀺𑀓𑁆𑀔𑀫𑀢𑀺. 𑀞𑀺𑀢𑀓𑀸𑀯 𑀦𑀺𑀓𑁆𑀔𑀫𑀦𑁆𑀢𑀺 𑀥𑀫𑁆𑀫𑀸𑀲𑀦𑀢𑁄 𑀑𑀢𑀭𑀦𑁆𑀢𑁄 𑀥𑀫𑁆𑀫𑀓𑀣𑀺𑀓𑁄 𑀯𑀺𑀬.

𑁨𑁦𑁧. 𑀯𑀢𑁆𑀢𑀫𑀸𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑁂 𑀯𑀺𑀬 𑀯𑁄𑀳𑀭𑀻𑀬𑀢𑀻𑀢𑀺 𑀑𑀓𑁆𑀓𑀫𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀑𑀓𑁆𑀓𑀦𑁆𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀏𑀯𑀁 𑀳𑁄𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑀲𑁆𑀲 𑀲𑀫𑁆𑀧𑀚𑀸𑀦𑀦𑀸 𑀳𑁄𑀢𑀺. 𑀦 𑀑𑀓𑁆𑀓𑀫𑀫𑀸𑀦𑁂 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑀲𑁆𑀲 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸. 𑀢𑀣𑀸 𑀘 𑀯𑀼𑀢𑁆𑀢𑀁 𑁋 ‘‘𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀻’’𑀢𑀺. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀢𑁆𑀣𑀭𑀡𑁂𑀦 𑀯𑀸 𑀅𑀧𑁆𑀧𑀫𑀸𑀡𑁄. 𑀅𑀢𑀺𑀯𑀺𑀬 𑀲𑀫𑀼𑀚𑁆𑀚𑀮𑀪𑀸𑀯𑁂𑀦 𑀉𑀴𑀸𑀭𑁄. 𑀤𑁂𑀯𑀸𑀦𑀼𑀪𑀸𑀯𑀦𑁆𑀢𑀺 𑀤𑁂𑀯𑀸𑀦𑀁 𑀧𑀪𑀸𑀦𑀼𑀪𑀸𑀯𑀁. 𑀤𑁂𑀯𑀸𑀦𑀜𑁆𑀳𑀺 𑀧𑀪𑀁𑀲𑁄 𑀑𑀪𑀸𑀲𑁄 𑀅𑀥𑀺𑀪𑀯𑀢𑀺, 𑀦 𑀢𑁂𑀲𑀁 𑀆𑀥𑀺𑀧𑀘𑁆𑀘𑀁. 𑀢𑁂𑀦𑀸𑀳 ‘‘𑀤𑁂𑀯𑀸𑀦’’𑀦𑁆𑀢𑀺𑀆𑀤𑀺.

𑀭𑀼𑀓𑁆𑀔𑀕𑀘𑁆𑀙𑀸𑀤𑀺𑀦𑀸 𑀓𑁂𑀦𑀘𑀺 𑀦 𑀳𑀜𑁆𑀜𑀢𑀻𑀢𑀺 𑀅𑀖𑀸, 𑀅𑀩𑀸𑀥𑀸. 𑀢𑁂𑀦𑀸𑀳 ‘‘𑀦𑀺𑀘𑁆𑀘𑀯𑀺𑀯𑀝𑀸’’𑀢𑀺. 𑀅𑀲𑀁𑀯𑀼𑀢𑀸𑀢𑀺 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀓𑁂𑀦 𑀘𑀺 𑀦 𑀧𑀺𑀳𑀺𑀢𑀸. 𑀢𑁂𑀦𑀸𑀳 ‘‘𑀳𑁂𑀝𑁆𑀞𑀸𑀧𑀺 𑀅𑀧𑁆𑀧𑀢𑀺𑀝𑁆𑀞𑀸’’𑀢𑀺. 𑀢𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀬𑀣𑀸 𑀳𑁂𑀝𑁆𑀞𑀸 𑀉𑀤𑀓𑀲𑁆𑀲 𑀧𑀺𑀥𑀸𑀬𑀺𑀓𑀸 𑀧𑀣𑀯𑀻 𑀦𑀢𑁆𑀣𑀻𑀢𑀺 𑀅𑀲𑀁𑀯𑀼𑀢𑀸 𑀮𑁄𑀓𑀦𑁆𑀢𑀭𑀺𑀓𑀸, 𑀏𑀯𑀁 𑀉𑀧𑀭𑀺𑀧𑀺 𑀘𑀓𑁆𑀓𑀯𑀸𑀴𑁂𑀲𑀼 𑀯𑀺𑀬 𑀤𑁂𑀯𑀯𑀺𑀫𑀸𑀦𑀸𑀦𑀁 𑀅𑀪𑀸𑀯𑀢𑁄 𑀅𑀲𑀁𑀯𑀼𑀢𑀸 𑀅𑀧𑁆𑀧𑀢𑀺𑀝𑁆𑀞𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀦𑁆𑀥𑀓𑀸𑀭𑁄 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀅𑀦𑁆𑀥𑀓𑀸𑀭𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀚𑀸𑀬𑀢𑀺 𑀆𑀮𑁄𑀓𑀲𑁆𑀲𑀸𑀪𑀸𑀯𑀢𑁄, 𑀦 𑀘𑀓𑁆𑀔𑀼𑀦𑁄. 𑀢𑀣𑀸 𑀳𑀺 ‘‘𑀢𑁂𑀦 𑀑𑀪𑀸𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀚𑀸𑀦𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀚𑀫𑁆𑀩𑀼𑀤𑀻𑀧𑁂 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬𑀁 𑀧𑀼𑀩𑁆𑀩𑀯𑀺𑀤𑁂𑀳𑀯𑀸𑀲𑀻𑀦𑀁 𑀅𑀢𑁆𑀣𑀗𑁆𑀕𑀫𑀦𑀯𑀲𑁂𑀦 𑀉𑀧𑀟𑁆𑀠𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀧𑀜𑁆𑀜𑀸𑀬𑀢𑀺, 𑀅𑀧𑀭𑀕𑁄𑀬𑀸𑀦𑀯𑀸𑀲𑀻𑀦𑀁 𑀉𑀕𑁆𑀕𑀫𑀦𑀯𑀲𑁂𑀦, 𑀏𑀯𑀁 𑀲𑁂𑀲𑀤𑀻𑀧𑁂𑀲𑀼𑀧𑀻𑀢𑀺 𑀆𑀳 𑁋 ‘‘𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀢𑀻𑀲𑀼 𑀤𑀻𑀧𑁂𑀲𑀼 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺. 𑀇𑀢𑁄 𑀅𑀜𑁆𑀜𑀣𑀸 𑀧𑀦 𑀤𑁆𑀯𑀻𑀲𑀼 𑀏𑀯 𑀤𑀻𑀧𑁂𑀲𑀼 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀧𑀜𑁆𑀜𑀸𑀬𑀢𑀻𑀢𑀺. 𑀏𑀓𑁂𑀓𑀸𑀬 𑀤𑀺𑀲𑀸𑀬 𑀦𑀯 𑀦𑀯 𑀬𑁄𑀚𑀦𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀫𑁆𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀤𑀝𑁆𑀞𑀩𑁆𑀩𑀁. 𑀧𑀪𑀸𑀬 𑀦𑀧𑁆𑀧𑀳𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀧𑀪𑀸𑀬 𑀑𑀪𑀸𑀲𑀺𑀢𑀼𑀁 𑀦 𑀅𑀪𑀺𑀲𑀫𑁆𑀪𑀼𑀡𑀦𑁆𑀢𑀺. 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀫𑀢𑁆𑀣𑀓𑀧𑁆𑀧𑀫𑀸𑀡𑁂 𑀆𑀓𑀸𑀲𑁂 𑀯𑀺𑀘𑀭𑀡𑀢𑁄, ‘‘𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂𑀦 𑀘𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀯𑀸𑀯𑀝𑀸𑀢𑀺 𑀔𑀸𑀤𑀦𑀢𑁆𑀣𑀁 𑀕𑀡𑁆𑀳𑀺𑀢𑀼𑀁 𑀉𑀧𑀓𑁆𑀓𑀫𑀦𑁆𑀢𑀸. 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀯𑀺𑀯𑀝𑁆𑀝𑀺𑀢𑁆𑀯𑀸. 𑀙𑀺𑀚𑁆𑀚𑀺𑀢𑁆𑀯𑀸𑀢𑀺 𑀫𑀼𑀘𑁆𑀙𑀸𑀧𑀢𑁆𑀢𑀺𑀬𑀸 𑀞𑀺𑀢𑀝𑁆𑀞𑀸𑀦𑀢𑁄 𑀫𑀼𑀘𑁆𑀘𑀺𑀢𑁆𑀯𑀸, 𑀅𑀗𑁆𑀕𑀧𑀘𑁆𑀘𑀗𑁆𑀕𑀘𑁆𑀙𑁂𑀤𑀦𑀯𑀲𑁂𑀦 𑀯𑀸 𑀙𑀺𑀚𑁆𑀚𑀺𑀢𑁆𑀯𑀸. 𑀅𑀘𑁆𑀘𑀦𑁆𑀢𑀔𑀸𑀭𑁂𑀢𑀺 𑀆𑀢𑀧𑀲𑀦𑁆𑀢𑀸𑀧𑀸𑀪𑀸𑀯𑁂𑀦 𑀅𑀢𑀺𑀲𑀻𑀢𑀪𑀸𑀯𑀁 𑀲𑀦𑁆𑀥𑀸𑀬 𑀅𑀘𑁆𑀘𑀦𑁆𑀢𑀔𑀸𑀭𑀢𑀸 𑀯𑀼𑀢𑁆𑀢𑀸 𑀲𑀺𑀬𑀸. 𑀦 𑀳𑀺 𑀢𑀁 𑀓𑀧𑁆𑀧𑀲𑀡𑁆𑀞𑀸𑀦𑀉𑀤𑀓𑀁 𑀲𑀫𑁆𑀧𑀢𑁆𑀢𑀺𑀓𑀭𑀫𑀳𑀸𑀫𑁂𑀖𑀯𑀼𑀝𑁆𑀞𑀁 𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀓𑀧𑁆𑀧𑀯𑀺𑀦𑀸𑀲𑀓𑀉𑀤𑀓𑀁 𑀯𑀺𑀬 𑀔𑀸𑀭𑀁 𑀪𑀯𑀺𑀢𑀼𑀫𑀭𑀳𑀢𑀺. 𑀢𑀣𑀸 𑀳𑀺 𑀲𑀢𑀺 𑀧𑀣𑀯𑀻𑀧𑀺 𑀯𑀺𑀮𑀻𑀬𑁂𑀬𑁆𑀬. 𑀢𑁂𑀲𑀁 𑀯𑀸 𑀧𑀸𑀧𑀓𑀫𑁆𑀫𑀩𑀮𑁂𑀦 𑀧𑁂𑀢𑀸𑀦𑀁 𑀧𑀓𑀢𑀺𑀉𑀤𑀓𑀲𑁆𑀲 𑀧𑀼𑀩𑁆𑀩𑀔𑁂𑀴𑀪𑀸𑀯𑀸𑀧𑀢𑁆𑀢𑀺 𑀯𑀺𑀬 𑀢𑀲𑁆𑀲 𑀉𑀤𑀓𑀲𑁆𑀲 𑀢𑀤𑀸 𑀔𑀸𑀭𑀪𑀸𑀯𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀘𑁆𑀘𑀦𑁆𑀢𑀔𑀸𑀭𑁂 𑀉𑀤𑀓𑁂’’𑀢𑀺. 𑀲𑀫𑀦𑁆𑀢𑀢𑁄𑀢𑀺 𑀲𑀩𑁆𑀩𑀪𑀸𑀕𑀢𑁄 𑀙𑀧𑁆𑀧𑀓𑀸𑀭𑀫𑁆𑀧𑀺.

𑁨𑁦𑁨. 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀽𑀦𑀁 𑀯𑀲𑁂𑀦𑀸𑀢𑀺 𑀯𑁂𑀲𑁆𑀲𑀯𑀡𑀸𑀤𑀺𑀘𑀢𑀼𑀫𑀳𑀸𑀭𑀸𑀚𑀪𑀸𑀯𑀲𑀸𑀫𑀜𑁆𑀜𑁂𑀦.

𑁨𑁦𑁩. 𑀲𑀪𑀸𑀯𑁂𑀦𑁂𑀯𑀸𑀢𑀺 𑀧𑀭𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑀡𑁂𑀦 𑀯𑀺𑀦𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀲𑀬𑀫𑁂𑀯 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑀸.

𑀫𑀦𑀼𑀲𑁆𑀲𑁂𑀲𑀽𑀢𑀺 𑀇𑀤𑀁 𑀧𑀓𑀢𑀺𑀘𑀸𑀭𑀺𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁 𑁋 ‘‘𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀦𑀸𑀫 𑀫𑀦𑀼𑀲𑁆𑀲𑀧𑀼𑀭𑀺𑀲𑁂𑀲𑀼 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺, 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀧𑀦 𑀤𑁂𑀯𑁂𑀲𑀽𑀧𑀺 𑀢𑀸𑀤𑀺𑀲𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑁂𑀯. 𑀬𑀣𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀦𑀼𑀪𑀸𑀯𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀢𑀲𑁆𑀲 𑀆𑀦𑀼𑀪𑀸𑀯𑁂𑀦𑁂𑀯 𑀲𑀸 𑀓𑁂𑀦𑀘𑀺 𑀧𑀼𑀭𑀺𑀲𑁂𑀦 𑀅𑀦𑀢𑀺𑀓𑁆𑀓𑀫𑀦𑀻𑀬𑀸𑀢𑀺 𑀆𑀳 𑁋 ‘‘𑀧𑀸𑀤𑀸 𑀦 𑀯𑀳𑀦𑁆𑀢𑀺, 𑀤𑀺𑀩𑁆𑀩𑀲𑀗𑁆𑀔𑀮𑀺𑀓𑀸 𑀯𑀺𑀬 𑀩𑀚𑁆𑀛𑀦𑁆𑀢𑀻’’𑀢𑀺.

𑀧𑀼𑀩𑁆𑀩𑁂 ‘‘𑀓𑀸𑀫𑀕𑀼𑀡𑀽𑀧𑀲𑀁𑀳𑀺𑀢𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀧𑀼𑀦 ‘‘𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀣𑀫𑀺𑀤𑀁 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀳 ‘‘𑀧𑀼𑀩𑁆𑀩𑁂’’𑀢𑀺𑀆𑀤𑀺. 𑀯𑀢𑁆𑀣𑀼𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀩𑁆𑀭𑀳𑁆𑀫𑀘𑀭𑀺𑀬𑀯𑀢𑁆𑀣𑀼𑀧𑀝𑀺𑀲𑁂𑀥𑁄. 𑀢𑁂𑀦𑀸𑀳 ‘‘𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀯𑀲𑁂𑀦𑀸’’𑀢𑀺. 𑀆𑀭𑀫𑁆𑀫𑀡𑀧𑀝𑀺𑀮𑀸𑀪𑁄𑀢𑀺 𑀭𑀽𑀧𑀸𑀤𑀺𑀧𑀜𑁆𑀘𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑀲𑁆𑀲𑁂𑀯 𑀧𑀝𑀺𑀮𑀸𑀪𑁄.

𑁨𑁦𑁪. 𑀓𑀺𑀮𑀫𑀣𑁄𑀢𑀺 𑀔𑁂𑀤𑁄. 𑀓𑀸𑀬𑀲𑁆𑀲 𑀳𑀺 𑀕𑀭𑀼𑀪𑀸𑀯𑀓𑀞𑀺𑀦𑀪𑀸𑀯𑀸𑀤𑀬𑁄𑀧𑀺 𑀢𑀲𑁆𑀲𑀸 𑀢𑀤𑀸 𑀦 𑀳𑁄𑀦𑁆𑀢𑀺 𑀏𑀯. ‘‘𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀤𑀸 𑀧𑀝𑁆𑀞𑀸𑀬 𑀧𑀲𑁆𑀲𑀢𑀻𑀢𑀺 𑀆𑀳 𑁋 ‘‘𑀓𑀮𑀮𑀸𑀤𑀺𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺𑀆𑀤𑀺. 𑀤𑀲𑁆𑀲𑀦𑁂 𑀧𑀬𑁄𑀚𑀦𑀁 𑀲𑀬𑀫𑁂𑀯 𑀯𑀤𑀢𑀺, 𑀢𑀲𑁆𑀲 𑀅𑀪𑀸𑀯𑀢𑁄 𑀓𑀮𑀮𑀸𑀤𑀺𑀓𑀸𑀮𑁂 𑀦 𑀧𑀲𑁆𑀲𑀢𑀺. 𑀧𑀼𑀢𑁆𑀢𑁂𑀦𑀸𑀢𑀺 𑀤𑀳𑀭𑁂𑀦 𑀫𑀦𑁆𑀤𑁂𑀦 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁂𑀦. 𑀬𑀁 𑀢𑀁 𑀫𑀸𑀢𑀽𑀢𑀺𑀆𑀤𑀺 𑀧𑀓𑀢𑀺𑀘𑀸𑀭𑀺𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀘𑀓𑁆𑀓𑀯𑀢𑁆𑀢𑀺𑀕𑀩𑁆𑀪𑀢𑁄𑀧𑀺 𑀳𑀺 𑀲𑀯𑀺𑀲𑁂𑀲𑀁 𑀩𑁄𑀥𑀺𑀲𑀢𑁆𑀢𑀕𑀩𑁆𑀪𑁄 𑀧𑀭𑀺𑀳𑀸𑀭𑀁 𑀮𑀪𑀢𑀺 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸, 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀅𑀢𑀺𑀯𑀺𑀬 𑀲𑀧𑁆𑀧𑀸𑀬𑀸𑀳𑀸𑀭𑀸𑀘𑀸𑀭𑀸 𑀘 𑀳𑀼𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀧𑀭𑀺𑀳𑀭𑀢𑀺. 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄𑀢𑀺 𑀫𑀸𑀢𑀼 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄. 𑀇𑀤𑀸𑀦𑀺 𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀲𑁆𑀲 𑀤𑀺𑀲𑁆𑀲𑀫𑀸𑀦𑀢𑀸𑀬 𑀅𑀩𑁆𑀪𑀦𑁆𑀢𑀭𑀁 𑀩𑀸𑀳𑀺𑀭𑀜𑁆𑀘 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁, ‘‘𑀧𑀼𑀩𑁆𑀩𑁂 𑀓𑀢𑀓𑀫𑁆𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀤𑁂𑀯𑀺𑀬𑀸. 𑀯𑀢𑁆𑀣𑀼𑀦𑁆𑀢𑀺 𑀓𑀼𑀘𑁆𑀙𑀺𑀁. 𑀨𑀮𑀺𑀓𑀅𑀩𑁆𑀪𑀧𑀝𑀮𑀸𑀤𑀺𑀦𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀓𑀼𑀘𑁆𑀙𑀺𑀢𑀘𑀲𑁆𑀲 𑀧𑀝𑀮𑀪𑀸𑀯𑁂𑀦 𑀆𑀮𑁄𑀓𑀲𑁆𑀲 𑀯𑀺𑀩𑀦𑁆𑀥𑀸𑀪𑀸𑀯𑀢𑁄 𑀬𑀣𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀓𑀼𑀘𑁆𑀙𑀺𑀕𑀢𑀁 𑀩𑁄𑀥𑀺𑀲𑀢𑁆𑀢𑀁 𑀧𑀲𑁆𑀲𑀢𑀺, 𑀓𑀺𑀫𑁂𑀯𑀁 𑀩𑁄𑀥𑀺𑀲𑀢𑁆𑀢𑁄𑀧𑀺 𑀫𑀸𑀢𑀭𑀁 𑀅𑀜𑁆𑀜𑀜𑁆𑀘 𑀧𑀼𑀭𑀢𑁄 𑀭𑀽𑀧𑀕𑀢𑀁 𑀧𑀲𑁆𑀲𑀢𑀺, 𑀦𑁄𑀢𑀺 𑀆𑀳, ‘‘𑀩𑁄𑀥𑀺𑀲𑀢𑁆𑀢𑁄 𑀧𑀦𑀸’’𑀢𑀺𑀆𑀤𑀺. 𑀓𑀲𑁆𑀫𑀸 𑀧𑀦 𑀲𑀢𑀺 𑀘𑀓𑁆𑀔𑀼𑀫𑁆𑀳𑀺 𑀆𑀮𑁄𑀓𑁂 𑀘 𑀦 𑀧𑀲𑁆𑀲𑀢𑀻𑀢𑀺 𑀆𑀳 𑁋 ‘‘𑀦 𑀳𑀺 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀯𑀺𑀬 𑀳𑀺 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺 𑀢𑀚𑁆𑀚𑀸𑀲𑀫𑀦𑁆𑀦𑀸𑀳𑀸𑀭𑀲𑁆𑀲𑀸𑀪𑀸𑀯𑀢𑁄.

𑁨𑁦𑁫. 𑀬𑀣𑀸 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀯𑀺𑀚𑀸𑀢𑀧𑀘𑁆𑀘𑀬𑀸 𑀢𑀸𑀤𑀺𑀲𑁂𑀦 𑀭𑁄𑀕𑁂𑀦 𑀅𑀪𑀺𑀪𑀽𑀢𑀸𑀧𑀺 𑀳𑀼𑀢𑁆𑀯𑀸 𑀫𑀭𑀦𑁆𑀢𑀺, 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀧𑀦 𑀩𑁄𑀥𑀺𑀲𑀢𑁆𑀢𑁂 𑀓𑀼𑀘𑁆𑀙𑀺𑀕𑀢𑁂 𑀦 𑀓𑁄𑀘𑀺 𑀭𑁄𑀕𑁄 𑀉𑀧𑁆𑀧𑀚𑁆𑀚𑀢𑀺; 𑀓𑁂𑀯𑀮𑀁 𑀆𑀬𑀼𑀧𑀭𑀺𑀓𑁆𑀔𑀬𑁂𑀦𑁂𑀯 𑀓𑀸𑀮𑀁 𑀓𑀭𑁄𑀢𑀺, 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀩𑁄𑀥𑀺𑀲𑀢𑁆𑀢𑁂𑀦 𑀯𑀲𑀺𑀢𑀝𑁆𑀞𑀸𑀦𑀁 𑀳𑀻𑀢𑀺𑀆𑀤𑀺𑀦𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳. 𑀅𑀧𑀦𑁂𑀢𑁆𑀯𑀸𑀢𑀺 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑀢𑁄 𑀦𑀻𑀳𑀭𑀺𑀢𑁆𑀯𑀸. 𑀅𑀦𑀼𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀫𑁆𑀫𑀸 𑀕𑀩𑁆𑀪𑀧𑀭𑀺𑀳𑀸𑀭𑀁 𑀦𑀸𑀦𑀼𑀬𑀼𑀜𑁆𑀚𑀢𑀺, 𑀢𑁂𑀦 𑀕𑀩𑁆𑀪𑁄 𑀩𑀳𑁆𑀯𑀸𑀩𑀸𑀥𑁄 𑀳𑁄𑀢𑀺. 𑀯𑀢𑁆𑀣𑀼𑀯𑀺𑀲𑀤𑀁 𑀳𑁄𑀢𑀻𑀢𑀺 𑀕𑀩𑁆𑀪𑀸𑀲𑀬𑁄 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺. 𑀫𑀸𑀢𑀼 𑀫𑀚𑁆𑀛𑀺𑀫𑀯𑀬𑀲𑁆𑀲 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀩𑁆𑀪𑁄𑀓𑁆𑀓𑀫𑀦𑀫𑁆𑀧𑀺 𑀢𑀲𑁆𑀲𑀸 𑀆𑀬𑀼𑀧𑀭𑀺𑀫𑀸𑀡𑀯𑀺𑀮𑁄𑀓𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀁 𑀯𑀬𑁄𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑀺𑀓𑀸𑀭𑀲𑁆𑀲 𑀧𑀭𑀺𑀯𑀚𑁆𑀚𑀦𑀢𑁄, 𑀇𑀢𑁆𑀣𑀺𑀲𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑀺𑀓𑀸𑀭𑁄 𑀧𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀦𑀼𑀪𑀸𑀯𑁂𑀦𑁂𑀯 𑀯𑀽𑀧𑀲𑀫𑁆𑀫𑀢𑀺.

𑀲𑀢𑁆𑀢𑀫𑀸𑀲𑀚𑀸𑀢𑁄𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀲𑀢𑁆𑀢𑀫𑁂 𑀫𑀸𑀲𑁂 𑀚𑀸𑀢𑁄. 𑀲𑁄 𑀲𑀻𑀢𑀼𑀡𑁆𑀳𑀓𑁆𑀔𑀫𑁄 𑀦 𑀳𑁄𑀢𑀺 𑀅𑀢𑀺𑀯𑀺𑀬 𑀲𑀼𑀔𑀼𑀫𑀸𑀮𑀢𑀸𑀬. 𑀅𑀝𑁆𑀞𑀫𑀸𑀲𑀚𑀸𑀢𑁄 𑀓𑀸𑀫𑀁 𑀲𑀢𑁆𑀢𑀫𑀸𑀲𑀚𑀸𑀢𑀢𑁄 𑀩𑀼𑀤𑁆𑀥𑀺𑀅𑀯𑀬𑀯𑁄, 𑀏𑀓𑀘𑁆𑀘𑁂 𑀧𑀦 𑀘𑀫𑁆𑀫𑀧𑀤𑁂𑀲𑀸 𑀩𑀼𑀤𑁆𑀥𑀺𑀁 𑀧𑀸𑀧𑀼𑀡𑀦𑁆𑀢𑀸 𑀖𑀝𑁆𑀝𑀦𑀁 𑀦 𑀲𑀳𑀦𑁆𑀢𑀺, 𑀢𑁂𑀦 𑀲𑁄 𑀦 𑀚𑀻𑀯𑀢𑀺. 𑀲𑀢𑁆𑀢𑀫𑀸𑀲𑀚𑀸𑀢𑀲𑁆𑀲 𑀧𑀦 𑀦 𑀢𑀸𑀯 𑀢𑁂 𑀚𑀸𑀢𑀸𑀢𑀺 𑀯𑀤𑀦𑁆𑀢𑀺.

𑀞𑀺𑀢𑀸𑀯 𑀳𑀼𑀢𑁆𑀯𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑀢𑀸𑀬 𑀞𑀺𑀢𑀸 𑀏𑀯 𑀳𑀼𑀢𑁆𑀯𑀸. 𑀤𑀼𑀓𑁆𑀔𑀲𑁆𑀲 𑀳𑀺 𑀩𑀮𑀯𑀪𑀸𑀯𑀢𑁄 𑀢𑀁 𑀤𑀼𑀓𑁆𑀔𑀁 𑀅𑀲𑀳𑀫𑀸𑀦𑀸 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀦𑀺𑀲𑀺𑀦𑁆𑀦𑀸 𑀯𑀸 𑀦𑀺𑀧𑀦𑁆𑀦𑀸 𑀯𑀸 𑀯𑀺𑀚𑀸𑀬𑀦𑁆𑀢𑀺. 𑀉𑀧𑀯𑀺𑀚𑀜𑁆𑀜𑀸𑀢𑀺 𑀉𑀧𑀕𑀢𑀯𑀺𑀚𑀸𑀬𑀦𑀓𑀸𑀮𑀸. 𑀲𑀓𑀮𑀦𑀕𑀭𑀯𑀸𑀲𑀺𑀦𑁄𑀢𑀺 𑀓𑀧𑀺𑀮𑀯𑀢𑁆𑀣𑀼𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂𑀲𑀼 𑀤𑁂𑀯𑀤𑀳𑀸𑀤𑀻𑀲𑀼 𑀙𑀲𑀼 𑀦𑀕𑀭𑁂𑀲𑀼 𑀯𑀲𑀦𑁆𑀢𑀸.

𑀤𑁂𑀯𑀸 𑀦𑀁 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀮𑁄𑀓𑀦𑀸𑀣𑀁 𑀫𑀳𑀸𑀧𑀼𑀭𑀺𑀲𑀁 𑀫𑀬𑀫𑁂𑀯 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀲𑀜𑁆𑀚𑀸𑀢𑀕𑀸𑀭𑀯𑀩𑀳𑀼𑀫𑀸𑀦𑀸 𑀅𑀢𑁆𑀢𑀦𑁄 𑀧𑀻𑀢𑀺𑀁 𑀧𑀯𑁂𑀤𑁂𑀦𑁆𑀢𑀸 𑀔𑀻𑀡𑀸𑀲𑀯𑀸 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸𑀦𑁄 𑀆𑀤𑀺𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀲𑀽𑀢𑀺𑀯𑁂𑀲𑀦𑁆𑀢𑀺 𑀲𑀽𑀢𑀺𑀚𑀕𑁆𑀕𑀦𑀥𑀸𑀢𑀺𑀯𑁂𑀲𑀁. 𑀏𑀓𑁂𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. 𑀫𑀘𑁆𑀙𑀓𑁆𑀔𑀺𑀲𑀤𑀺𑀲𑀁 𑀙𑀯𑀺𑀯𑀲𑁂𑀦.

𑁨𑁦𑁬. 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸𑀢𑀺 𑀅𑀚𑀺𑀦𑀘𑀫𑁆𑀫𑁂𑀳𑀺 𑀲𑀺𑀩𑁆𑀩𑁂𑀢𑁆𑀯𑀸 𑀓𑀢𑀧𑀯𑁂𑀡𑀺𑀬𑀸. 𑀫𑀳𑀸𑀢𑁂𑀚𑁄𑀢𑀺 𑀫𑀳𑀸𑀦𑀼𑀪𑀸𑀯𑁄. 𑀫𑀳𑀸𑀬𑀲𑁄𑀢𑀺 𑀫𑀳𑀸𑀧𑀭𑀺𑀯𑀸𑀭𑁄 𑀯𑀺𑀧𑀼𑀮𑀓𑀺𑀢𑁆𑀢𑀺𑀖𑁄𑀲𑁄 𑀘.

𑀪𑀕𑁆𑀕𑀯𑀺𑀪𑀕𑁆𑀕𑀸𑀢𑀺 𑀲𑀫𑁆𑀩𑀸𑀥𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀦𑁂𑀦 𑀯𑀺𑀪𑀸𑀯𑀺𑀢𑀢𑁆𑀢𑀸 𑀪𑀕𑁆𑀕𑀸 𑀯𑀺𑀪𑀕𑁆𑀕𑀸 𑀯𑀺𑀬 𑀘 𑀳𑀼𑀢𑁆𑀯𑀸. 𑀢𑁂𑀦 𑀦𑁂𑀲𑀁 𑀅𑀯𑀺𑀲𑀤𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺. 𑀅𑀮𑀕𑁆𑀕𑁄 𑀳𑀼𑀢𑁆𑀯𑀸𑀢𑀺 𑀕𑀩𑁆𑀪𑀸𑀲𑀬𑁂 𑀬𑁄𑀦𑀺𑀧𑀤𑁂𑀲𑁂 𑀘 𑀓𑀢𑁆𑀣𑀘𑀺 𑀅𑀮𑀕𑁆𑀕𑁄 𑀅𑀲𑀢𑁆𑀢𑁄 𑀳𑀼𑀢𑁆𑀯𑀸. 𑀉𑀤𑀓𑁂𑀦𑀸𑀢𑀺 𑀕𑀩𑁆𑀪𑀸𑀲𑀬𑀕𑀢𑁂𑀦 𑀉𑀤𑀓𑁂𑀦 𑀅𑀫𑀓𑁆𑀔𑀺𑀢𑁄 𑀦𑀺𑀓𑁆𑀔𑀫𑀢𑀺 𑀲𑀫𑁆𑀫𑀓𑁆𑀔𑀺𑀢𑀲𑁆𑀲 𑀢𑀸𑀤𑀺𑀲𑀲𑁆𑀲 𑀉𑀤𑀓𑀲𑁂𑀫𑁆𑀳𑀸𑀤𑀺𑀓𑀲𑁆𑀲𑁂𑀯 𑀢𑀢𑁆𑀣 𑀅𑀪𑀸𑀯𑀢𑁄. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀢𑀁 𑀞𑀸𑀦𑀁 𑀯𑀺𑀲𑀼𑀤𑁆𑀥𑀁 𑀧𑀭𑀫𑀲𑀼𑀕𑀦𑁆𑀥𑀕𑀦𑁆𑀥𑀓𑀼𑀝𑀺 𑀯𑀺𑀬 𑀘𑀦𑁆𑀤𑀦𑀕𑀦𑁆𑀥𑀁 𑀯𑀸𑀬𑀦𑁆𑀢𑀁 𑀢𑀺𑀝𑁆𑀞𑀢𑀺. 𑀉𑀤𑀓𑀯𑀝𑁆𑀝𑀺𑀬𑁄𑀢𑀺 𑀉𑀤𑀓𑀓𑁆𑀔𑀦𑁆𑀥𑀸.

𑁨𑁦𑁭. 𑀫𑀼𑀳𑀼𑀢𑁆𑀢𑀚𑀸𑀢𑁄𑀢𑀺 𑀫𑀼𑀳𑀼𑀢𑁆𑀢𑁂𑀦 𑀚𑀸𑀢𑁄 𑀳𑀼𑀢𑁆𑀯𑀸 𑀫𑀼𑀳𑀼𑀢𑁆𑀢𑀫𑀢𑁆𑀢𑁄𑀯. 𑀅𑀦𑀼𑀥𑀸𑀭𑀺𑀬𑀫𑀸𑀦𑁂𑀢𑀺 𑀅𑀦𑀼𑀓𑀽𑀮𑀯𑀲𑁂𑀦 𑀦𑀻𑀬𑀫𑀸𑀦𑁂. 𑀆𑀕𑀢𑀸𑀦𑁂𑀯𑀸𑀢𑀺 𑀢𑀁 𑀞𑀸𑀦𑀁 𑀉𑀧𑀕𑀢𑀸𑀦𑀺 𑀏𑀯.

𑀅𑀦𑁂𑀓𑀲𑀸𑀔𑀦𑁆𑀢𑀺 𑀭𑀢𑀦𑀫𑀬𑀸𑀦𑁂𑀓𑀲𑀢𑀧𑀢𑀺𑀝𑁆𑀞𑀸𑀦𑀳𑀻𑀭𑀓𑀁. 𑀲𑀳𑀲𑁆𑀲𑀫𑀡𑁆𑀟𑀮𑀦𑁆𑀢𑀺 𑀢𑁂𑀲𑀁 𑀉𑀧𑀭𑀺 𑀧𑀢𑀺𑀝𑁆𑀞𑀺𑀢𑀁 𑀅𑀦𑁂𑀓𑀲𑀳𑀲𑁆𑀲𑀫𑀡𑁆𑀟𑀮𑀳𑀻𑀭𑀓𑀁. 𑀫𑀭𑀽𑀢𑀺 𑀤𑁂𑀯𑀸.

𑀦 𑀔𑁄 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀢𑁄 𑀧𑀕𑁂𑀯 𑀤𑀺𑀲𑀸𑀯𑀺𑀮𑁄𑀓𑀦𑀲𑁆𑀲 𑀓𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀫𑀳𑀸𑀲𑀢𑁆𑀢𑁄 𑀳𑀻’’𑀢𑀺𑀆𑀤𑀺. 𑀏𑀓𑀗𑁆𑀕𑀡𑀸𑀦𑀻𑀢𑀺 𑀯𑀺𑀯𑀝𑀪𑀸𑀯𑁂𑀦 𑀯𑀺𑀳𑀸𑀭𑀗𑁆𑀕𑀡𑀧𑀭𑀺𑀯𑁂𑀡𑀗𑁆𑀕𑀡𑀸𑀦𑀺 𑀯𑀺𑀬 𑀏𑀓𑀗𑁆𑀕𑀡𑀲𑀤𑀺𑀲𑀸𑀦𑀺 𑀅𑀳𑁂𑀲𑀼𑀁. 𑀲𑀤𑀺𑀲𑁄𑀧𑀺 𑀦𑀢𑁆𑀣𑀻𑀢𑀺 𑀢𑀼𑀫𑁆𑀳𑀸𑀓𑀁 𑀇𑀤𑀁 𑀯𑀺𑀮𑁄𑀓𑀦𑀁 𑀯𑀺𑀲𑀺𑀝𑁆𑀞𑁂 𑀧𑀲𑁆𑀲𑀺𑀢𑀼𑀁 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄𑀢𑀺 𑀆𑀳𑀁𑀲𑀼. 𑀲𑀩𑁆𑀩𑀧𑀞𑀫𑁄𑀢𑀺 𑀲𑀩𑁆𑀩𑀧𑁆𑀧𑀥𑀸𑀦𑁄. 𑀧𑀥𑀸𑀦𑀧𑀭𑀺𑀬𑀸𑀬𑁄 𑀳𑀺 𑀇𑀥 𑀧𑀞𑀫𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀇𑀢𑀭𑀸𑀦𑀻’’𑀢𑀺𑀆𑀤𑀺. 𑀏𑀢𑁆𑀣 𑀘 𑀫𑀳𑁂𑀲𑀓𑁆𑀔𑀸 𑀢𑀸𑀯 𑀤𑁂𑀯𑀸 𑀢𑀣𑀸 𑀯𑀤𑀦𑁆𑀢𑀺, 𑀇𑀢𑀭𑁂 𑀧𑀦 𑀓𑀣𑀦𑁆𑀢𑀺? 𑀫𑀳𑀸𑀲𑀢𑁆𑀢𑀲𑁆𑀲 𑀆𑀦𑀼𑀪𑀸𑀯𑀤𑀲𑁆𑀲𑀦𑁂𑀦𑁂𑀯. 𑀫𑀳𑁂𑀲𑀓𑁆𑀔𑀸𑀦𑀜𑁆𑀳𑀺 𑀤𑁂𑀯𑀸𑀦𑀁 𑀫𑀳𑀸𑀲𑀢𑁆𑀢𑀲𑁆𑀲 𑀆𑀦𑀼𑀪𑀸𑀯𑁄 𑀯𑀺𑀬 𑀢𑁂𑀦 𑀲𑀤𑀺𑀲𑀸𑀦𑀫𑁆𑀧𑀺 𑀆𑀦𑀼𑀪𑀸𑀯𑁄 𑀧𑀘𑁆𑀘𑀓𑁆𑀔𑁄 𑀅𑀳𑁄𑀲𑀺. 𑀇𑀢𑀭𑁂 𑀧𑀦 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀤𑁆𑀤𑀳𑀦𑁆𑀢𑀸 𑀅𑀦𑀼𑀫𑀺𑀦𑀦𑁆𑀢𑀸 𑀢𑀣𑀸 𑀆𑀳𑀁𑀲𑀼.

𑀚𑀸𑀢𑀫𑀢𑁆𑀢𑀲𑁆𑀲𑁂𑀯 𑀩𑁄𑀥𑀺𑀲𑀢𑁆𑀢𑀲𑁆𑀲 𑀞𑀸𑀦𑀸𑀤𑀻𑀦𑀺 𑀬𑁂𑀲𑀁 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀻𑀢𑀺 𑀢𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄, ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀢𑀺𑀝𑁆𑀞𑀸𑀦𑀁 𑀘𑀢𑀼𑀇𑀤𑁆𑀥𑀺𑀧𑀸𑀤𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀇𑀤𑁆𑀥𑀺𑀧𑀸𑀤𑀯𑀲𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀫𑀺𑀚𑁆𑀛𑀦𑀢𑁄. 𑀉𑀢𑁆𑀢𑀭𑀸𑀪𑀺𑀫𑀼𑀔𑀪𑀸𑀯𑁄 𑀮𑁄𑀓𑀲𑁆𑀲 𑀉𑀢𑁆𑀢𑀭𑀡𑀯𑀲𑁂𑀦 𑀕𑀫𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀲𑀢𑁆𑀢𑀧𑀤𑀕𑀫𑀦𑀁 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀸𑀤𑀺𑀕𑀫𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀯𑀺𑀲𑀼𑀤𑁆𑀥𑀙𑀢𑁆𑀢𑀥𑀸𑀭𑀡𑀁 𑀲𑀼𑀯𑀺𑀲𑀼𑀤𑁆𑀥𑀯𑀺𑀫𑀼𑀢𑁆𑀢𑀺𑀙𑀢𑁆𑀢𑀥𑀸𑀭𑀡𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀧𑀜𑁆𑀘𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀧𑀜𑁆𑀘𑀯𑀺𑀥𑀯𑀺𑀫𑀼𑀢𑁆𑀢𑀺𑀕𑀼𑀡𑀧𑀭𑀺𑀯𑀸𑀭𑀢𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀅𑀦𑀸𑀯𑀝𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀁 𑀅𑀦𑀸𑀯𑀝𑀜𑀸𑀡𑀢𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, ‘‘𑀅𑀕𑁆𑀕𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀯𑀘𑀦𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁; 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀻𑀢𑀺 𑀆𑀬𑀢𑀺𑀁 𑀚𑀸𑀢𑀺𑀬𑀸 𑀅𑀪𑀸𑀯𑀓𑀺𑀢𑁆𑀢𑀦𑀸 𑀅𑀦𑀼𑀧𑀸𑀤𑀺…𑀧𑁂… 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁; 𑀢𑀲𑁆𑀲 𑀢𑀲𑁆𑀲 𑀅𑀦𑀸𑀕𑀢𑁂 𑀮𑀤𑁆𑀥𑀩𑁆𑀩𑀯𑀺𑀲𑁂𑀲𑀲𑁆𑀲 𑀢𑀁 𑀢𑀁 𑀦𑀺𑀫𑀺𑀢𑁆𑀢𑀁 𑀅𑀩𑁆𑀬𑀪𑀺𑀘𑀸𑀭𑀻𑀦𑀺𑀫𑀺𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀆𑀕𑀢𑁄𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀜𑁆𑀜𑀢𑁆𑀣 𑀘 𑀯𑀓𑁆𑀔𑀫𑀸𑀦𑀸𑀬 𑀅𑀦𑀼𑀧𑀼𑀩𑁆𑀩𑀺𑀬𑀸 𑀅𑀦𑀸𑀕𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀳𑀭𑀺𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀝𑁆𑀞𑀓𑀣𑀸𑀲𑀼 𑀘 𑀆𑀕𑀢𑀦𑀬𑁂𑀦 𑀆𑀳𑀭𑀺𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑁄.

𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀻𑀢𑀺 𑀧𑀦 𑀇𑀤𑀁 𑀲𑀢𑀺𑀧𑀺 𑀇𑀥 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑁂 𑀯𑀓𑁆𑀔𑀫𑀸𑀦𑀸𑀦𑀫𑀘𑁆𑀙𑀭𑀺𑀬𑀸𑀦𑀁 𑀫𑀽𑀮𑀪𑀽𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀏𑀯𑀁 𑀅𑀜𑁆𑀜𑀫𑁆𑀧𑀻𑀤𑀺𑀲𑀁 𑀤𑀝𑁆𑀞𑀩𑁆𑀩𑀁. 𑀢𑀦𑁆𑀢𑀺 𑀩𑀤𑁆𑀥𑀸 𑀯𑀻𑀡𑀸, 𑀘𑀫𑁆𑀫𑀩𑀤𑁆𑀥𑀸 𑀪𑁂𑀭𑀺𑀬𑁄𑀢𑀺 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑁆𑀲 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀘-𑀲𑀤𑁆𑀤𑁂𑀦 𑀯𑀸 𑀇𑀢𑀭𑁂𑀲𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀪𑀺𑀚𑁆𑀚𑀺𑀁𑀲𑀽𑀢𑀺 𑀧𑀸𑀤𑁂𑀲𑀼 𑀩𑀤𑁆𑀥𑀝𑁆𑀞𑀸𑀦𑁂𑀲𑀼𑀬𑁂𑀯 𑀪𑀺𑀚𑁆𑀚𑀺𑀁𑀲𑀼. 𑀯𑀺𑀕𑀘𑁆𑀙𑀺𑀁𑀲𑀽𑀢𑀺 𑀯𑀽𑀧𑀲𑀫𑀺𑀁𑀲𑀼. 𑀲𑀓𑀢𑁂𑀚𑁄𑀪𑀸𑀲𑀺𑀢𑀸𑀦𑀻𑀢𑀺 𑀅𑀢𑀺𑀯𑀺𑀬 𑀲𑀫𑀼𑀚𑁆𑀚𑀮𑀸𑀬 𑀅𑀢𑁆𑀢𑀦𑁄 𑀧𑀪𑀸𑀬 𑀑𑀪𑀸𑀲𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀦 𑀧𑀯𑀢𑁆𑀢𑀻𑀢𑀺 𑀦 𑀲𑀦𑁆𑀤𑀻. 𑀯𑀸𑀢𑁄 𑀦 𑀯𑀸𑀬𑀻𑀢𑀺 𑀔𑀭𑁄 𑀯𑀸𑀢𑁄 𑀦 𑀯𑀸𑀬𑀺, 𑀫𑀼𑀤𑀼𑀲𑀼𑀔𑁄 𑀧𑀦 𑀲𑀢𑁆𑀢𑀸𑀦𑀁 𑀲𑀼𑀔𑀸𑀯𑀳𑁄 𑀯𑀸𑀬𑀺. 𑀧𑀣𑀯𑀻𑀕𑀢𑀸 𑀅𑀳𑁂𑀲𑀼𑀁 𑀉𑀘𑁆𑀘𑀝𑁆𑀞𑀸𑀦𑁂 𑀞𑀸𑀢𑀼𑀁 𑀅𑀯𑀺𑀲𑀳𑀦𑁆𑀢𑀸. 𑀉𑀢𑀼𑀲𑀫𑁆𑀧𑀦𑁆𑀦𑁄𑀢𑀺 𑀅𑀦𑀼𑀡𑁆𑀳𑀸𑀲𑀻𑀢𑀢𑀸𑀲𑀗𑁆𑀔𑀸𑀢𑁂𑀦 𑀉𑀢𑀼𑀦𑀸 𑀲𑀫𑁆𑀧𑀦𑁆𑀦𑁄. 𑀯𑀸𑀫𑀳𑀢𑁆𑀣𑀁 𑀉𑀭𑁂 𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀼𑀣𑀼𑀧𑀸𑀡𑀺𑀦𑀸 𑀳𑀢𑁆𑀣𑀢𑀸𑀴𑀦𑁂𑀦 𑀲𑀤𑁆𑀤𑀓𑀭𑀡𑀁 𑀅𑀧𑁆𑀨𑁄𑀝𑀦𑀁. 𑀫𑀼𑀔𑁂𑀦 𑀉𑀲𑁆𑀲𑁂𑀴𑀦𑀁 𑀲𑀤𑁆𑀤𑀫𑀼𑀜𑁆𑀘𑀦𑀁 𑀲𑁂𑀴𑀦𑀁. 𑀏𑀓𑀤𑁆𑀥𑀚𑀫𑀸𑀮𑀸 𑀅𑀳𑁄𑀲𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 𑀯𑀺𑀘𑀺𑀢𑁆𑀢𑀧𑀼𑀧𑁆𑀨𑀲𑀼𑀕𑀦𑁆𑀥𑀧𑀼𑀧𑁆𑀨𑀯𑀲𑁆𑀲𑀤𑁂𑀯𑀸 𑀯𑀲𑁆𑀲𑀺𑀁𑀲𑀼, 𑀲𑀽𑀭𑀺𑀬𑁂 𑀤𑀺𑀩𑁆𑀩𑀫𑀸𑀦𑁂 𑀏𑀯 𑀢𑀸𑀭𑀓𑀸 𑀑𑀪𑀸𑀲𑀺𑀁𑀲𑀼, 𑀅𑀘𑁆𑀙𑀁 𑀯𑀺𑀧𑁆𑀧𑀲𑀦𑁆𑀦𑀁 𑀉𑀤𑀓𑀁 𑀧𑀣𑀯𑀺𑀢𑁄 𑀉𑀩𑁆𑀪𑀺𑀚𑁆𑀚𑀺, 𑀩𑀺𑀮𑀸𑀲𑀬𑀸 𑀤𑀭𑀺𑀲𑀬𑀸 𑀢𑀺𑀭𑀘𑁆𑀙𑀸𑀦𑀸 𑀆𑀲𑀬𑀢𑁄 𑀦𑀺𑀓𑁆𑀔𑀫𑀺𑀁𑀲𑀼; 𑀭𑀸𑀕𑀤𑁄𑀲𑀫𑁄𑀳𑀸𑀧𑀺 𑀢𑀦𑀼 𑀪𑀯𑀺𑀁𑀲𑀼, 𑀧𑀣𑀯𑀺𑀬𑀁 𑀭𑀚𑁄 𑀯𑀽𑀧𑀲𑀫𑀺, 𑀅𑀦𑀺𑀝𑁆𑀞𑀕𑀦𑁆𑀥𑁄 𑀯𑀺𑀕𑀘𑁆𑀙𑀺, 𑀤𑀺𑀩𑁆𑀩𑀕𑀦𑁆𑀥𑁄 𑀯𑀸𑀬𑀺, 𑀭𑀽𑀧𑀺𑀦𑁄 𑀤𑁂𑀯𑀸 𑀲𑀭𑀽𑀧𑁂𑀦𑁂𑀯 𑀫𑀦𑀼𑀲𑁆𑀲𑀸𑀦𑀁 𑀆𑀧𑀸𑀣𑀫𑀕𑀫𑀁𑀲𑀼, 𑀲𑀢𑁆𑀢𑀸𑀦𑀁 𑀘𑀼𑀢𑀼𑀧𑀧𑀸𑀢𑀸 𑀦𑀸𑀳𑁂𑀲𑀼𑀦𑁆𑀢𑀺 𑀇𑀫𑁂𑀲𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀬𑀸𑀦𑀺 𑀫𑀳𑀸𑀪𑀺𑀦𑀻𑀳𑀸𑀭𑀲𑀫𑀬𑁂 𑀉𑀧𑁆𑀧𑀦𑁆𑀦𑀸𑀦𑀺 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀅𑀦𑀯𑀲𑁂𑀲𑀸𑀦𑀺 𑀢𑀤𑀸 𑀅𑀳𑁂𑀲𑀼𑀦𑁆𑀢𑀺.

𑀢𑀢𑁆𑀭𑀸𑀧𑀻𑀢𑀺 𑀢𑁂𑀲𑀼𑀧𑀺 𑀧𑀣𑀯𑀺𑀓𑀫𑁆𑀧𑀸𑀤𑀻𑀲𑀼 𑀏𑀯𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀓𑁂𑀯𑀮𑀁 𑀲𑀫𑁆𑀧𑀢𑀺𑀚𑀸𑀢𑀲𑁆𑀲 𑀞𑀸𑀦𑀸𑀤𑀻𑀲𑀼 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀲𑀩𑁆𑀩𑀲𑁆𑀲 𑀜𑁂𑀬𑁆𑀬𑀲𑁆𑀲 𑀢𑀺𑀢𑁆𑀣𑀓𑀭𑀫𑀢𑀲𑁆𑀲 𑀘 𑀘𑀸𑀮𑀦𑀢𑁄. 𑀓𑁂𑀦𑀘𑀺 𑀅𑀦𑀼𑀲𑁆𑀲𑀸𑀳𑀺𑀢𑀸𑀦𑀁𑀬𑁂𑀯 𑀇𑀫𑀲𑁆𑀫𑀺𑀁𑀬𑁂𑀯 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀸𑀢𑁄, 𑀓𑁂𑀦𑀘𑀺 𑀅𑀦𑀼𑀲𑁆𑀲𑀸𑀳𑀺𑀢𑀸𑀦𑀁𑀬𑁂𑀯 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀧𑀝𑀺𑀕𑁆𑀕𑀡𑁆𑀳𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀧𑀞𑀫𑀁 𑀤𑁂𑀯𑀢𑀸𑀦𑀁 𑀧𑀝𑀺𑀕𑁆𑀕𑀳𑀡𑀁 𑀤𑀺𑀩𑁆𑀩𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲, 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀕𑁆𑀕𑀳𑀡𑀁 𑀢𑀢𑁆𑀣𑁂𑀯 𑀞𑀸𑀦𑀲𑁆𑀲 𑀦𑀺𑀘𑁆𑀘𑀮𑀲𑀪𑀸𑀯𑀢𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀯𑀻𑀡𑀸𑀦𑀁 𑀲𑀬𑀁 𑀯𑀚𑁆𑀚𑀦𑀁 𑀧𑀭𑀽𑀧𑀤𑁂𑀲𑁂𑀦 𑀯𑀺𑀦𑀸 𑀲𑀬𑀫𑁂𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀪𑁂𑀭𑀻𑀦𑀁 𑀯𑀚𑁆𑀚𑀦𑀁 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸𑀬 𑀧𑀭𑀺𑀲𑀸𑀬 𑀧𑀯𑁂𑀤𑀦𑀲𑀫𑀢𑁆𑀣𑀲𑁆𑀲 𑀥𑀫𑁆𑀫𑀪𑁂𑀭𑀺𑀬𑀸 𑀅𑀦𑀼𑀲𑀸𑀯𑀦𑀲𑁆𑀲 𑀅𑀫𑀢𑀤𑀼𑀦𑁆𑀤𑀼𑀪𑀺𑀖𑁄𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀦𑀁 𑀙𑁂𑀤𑁄 𑀫𑀸𑀦𑀯𑀺𑀦𑀺𑀩𑀦𑁆𑀥𑀙𑁂𑀤𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁; 𑀲𑀼𑀧𑀝𑁆𑀝𑀦𑀲𑀫𑁆𑀧𑀸𑀧𑀼𑀡𑀦𑀁 𑀅𑀢𑁆𑀣𑀸𑀤𑀺 𑀅𑀦𑀼𑀭𑀽𑀧𑀁 𑀅𑀢𑁆𑀣𑀸𑀤𑀻𑀲𑀼 𑀜𑀸𑀡𑀲𑁆𑀲 𑀪𑁂𑀤𑀸𑀥𑀺𑀕𑀫𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁.

𑀦𑀺𑀩𑁆𑀩𑀸𑀦𑀭𑀲𑁂𑀦𑀸𑀢𑀺 𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀸𑀬𑀦𑀭𑀲𑁂𑀦. 𑀏𑀓𑀭𑀲𑀪𑀸𑀯𑀲𑁆𑀲𑀸𑀢𑀺 𑀲𑀸𑀲𑀦𑀲𑁆𑀲 𑀲𑀩𑁆𑀩𑀢𑁆𑀣 𑀏𑀓𑀭𑀲𑀪𑀸𑀯𑀲𑁆𑀲. 𑀯𑀸𑀢𑀲𑁆𑀲 𑀅𑀯𑀸𑀬𑀦𑀁 𑀓𑀺𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀪𑀺𑀦𑁆𑀤𑀦𑀲𑁆𑀲𑀸’’𑀢𑀺. 𑀆𑀓𑀸𑀲𑀸𑀤𑀺𑀅𑀧𑁆𑀧𑀢𑀺𑀝𑁆𑀞𑀯𑀺𑀲𑀫𑀘𑀜𑁆𑀘𑀮𑀝𑁆𑀞𑀸𑀦𑀁 𑀧𑀳𑀸𑀬 𑀲𑀓𑀼𑀡𑀸𑀦𑀁 𑀧𑀣𑀯𑀻𑀕𑀫𑀦𑀁 𑀢𑀸𑀤𑀺𑀲𑀁 𑀫𑀺𑀘𑁆𑀙𑀸𑀕𑀸𑀳𑀁 𑀧𑀳𑀸𑀬 𑀲𑀢𑁆𑀢𑀸𑀦𑀁 𑀧𑀸𑀡𑁂𑀳𑀺 𑀭𑀢𑀦𑀢𑁆𑀢𑀬𑀲𑀭𑀡𑀕𑀫𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀤𑁂𑀯𑀢𑀸𑀦𑀁 𑀅𑀧𑁆𑀨𑁄𑀝𑀦𑀸𑀤𑀻𑀳𑀺 𑀓𑀻𑀴𑀦𑀁 𑀧𑀫𑁄𑀤𑀦𑀼𑀧𑁆𑀧𑀢𑁆𑀢𑀺𑀉𑀤𑀸𑀦𑀲𑁆𑀲 𑀪𑀯𑀯𑀦𑁆𑀢𑀕𑀫𑀦𑁂𑀦 𑀥𑀫𑁆𑀫𑀲𑀪𑀸𑀯𑀩𑁄𑀥𑀦𑁂𑀦 𑀘 𑀧𑀫𑁄𑀤𑀯𑀺𑀪𑀸𑀯𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀥𑀫𑁆𑀫𑀯𑁂𑀕𑀯𑀲𑁆𑀲𑀦𑀲𑁆𑀲𑀸𑀢𑀺 𑀤𑁂𑀲𑀦𑀸𑀜𑀸𑀡𑀯𑁂𑀕𑁂𑀦 𑀥𑀫𑁆𑀫𑀸𑀫𑀢𑀲𑁆𑀲 𑀯𑀲𑁆𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀓𑀸𑀬𑀕𑀢𑀸𑀲𑀢𑀺𑀯𑀲𑁂𑀦 𑀮𑀤𑁆𑀥𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑀨𑀮𑀲𑀼𑀔𑀸𑀦𑀼𑀪𑀯𑁄 𑀓𑀸𑀬𑀕𑀢𑀸𑀲𑀢𑀺𑀅𑀫𑀢𑀧𑀝𑀺𑀮𑀸𑀪𑁄, 𑀢𑀲𑁆𑀲 𑀧𑀦 𑀓𑀸𑀬𑀲𑁆𑀲𑀧𑀺 𑀅𑀢𑀧𑁆𑀧𑀓𑀲𑀼𑀔𑀸𑀯𑀳𑀢𑁆𑀢𑀸 𑀔𑀼𑀤𑀸𑀧𑀺𑀧𑀸𑀲𑀸𑀧𑀻𑀴𑀦𑀸𑀪𑀸𑀯𑁄 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀯𑀼𑀢𑁆𑀢𑁄. 𑀅𑀭𑀺𑀬𑀤𑁆𑀥𑀚𑀫𑀸𑀮𑀸𑀫𑀸𑀮𑀺𑀢𑀸𑀬𑀸𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀭𑀺𑀬𑀫𑀕𑁆𑀕𑀩𑁄𑀚𑁆𑀛𑀗𑁆𑀕𑀥𑀚𑀫𑀸𑀮𑀸𑀳𑀺 𑀫𑀸𑀮𑀺𑀢𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀅𑀦𑀼𑀤𑁆𑀥𑀝𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀢𑁆𑀣𑀸𑀢𑀺 ‘‘𑀲𑀫𑁆𑀧𑀢𑀺𑀚𑀸𑀢𑁄’’𑀢𑀺𑀆𑀤𑀺𑀦𑀸 𑀆𑀕𑀢𑁂 𑀇𑀫𑀲𑁆𑀫𑀺𑀁 𑀞𑀸𑀦𑁂. 𑀯𑀺𑀲𑁆𑀲𑀚𑁆𑀚𑀺𑀢𑁄𑀯, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 𑀇𑀥 𑀅𑀧𑀼𑀩𑁆𑀩𑀁 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀤𑀸 𑀧𑀣𑀯𑀺𑀬𑀁 𑀕𑀘𑁆𑀙𑀦𑁆𑀢𑁄𑀧𑀺 𑀫𑀳𑀸𑀲𑀢𑁆𑀢𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀫𑀳𑀸𑀚𑀦𑀲𑁆𑀲 𑀉𑀧𑀝𑁆𑀞𑀸𑀲𑀻𑀢𑀺 𑀅𑀬𑀫𑁂𑀢𑁆𑀣 𑀦𑀺𑀬𑀢𑀺 𑀥𑀫𑁆𑀫𑀦𑀺𑀬𑀸𑀫𑁄 𑀩𑁄𑀥𑀺𑀲𑀢𑁆𑀢𑀸𑀦𑀁 𑀥𑀫𑁆𑀫𑀢𑀸𑀢𑀺 𑀇𑀤𑀁 𑀦𑀺𑀬𑀢𑀺𑀯𑀸𑀤𑀯𑀲𑁂𑀦 𑀓𑀣𑀦𑀁. ‘‘𑀧𑀼𑀩𑁆𑀩𑁂 𑀧𑀼𑀭𑀺𑀫𑀚𑀸𑀢𑀻𑀲𑀼 𑀢𑀸𑀤𑀺𑀲𑀲𑁆𑀲 𑀧𑀼𑀜𑁆𑀜𑀲𑀫𑁆𑀪𑀸𑀭𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀫𑀳𑀸𑀚𑀦𑀲𑁆𑀲 𑀢𑀣𑀸 𑀉𑀧𑀝𑁆𑀞𑀸𑀲𑀻’’𑀢𑀺 𑀇𑀤𑀁 𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀯𑀸𑀤𑀯𑀲𑁂𑀦 𑀓𑀣𑀦𑀁. 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑀭𑀺 𑀈𑀲𑀦𑀲𑀻𑀮𑀢𑀸𑀬 𑀬𑀣𑀸𑀲𑀓𑀁 𑀓𑀫𑁆𑀫𑀫𑁂𑀯 𑀇𑀲𑁆𑀲𑀭𑁄 𑀦𑀸𑀫, 𑀢𑀲𑁆𑀲 𑀦𑀺𑀫𑁆𑀫𑀸𑀦𑀁 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀁, 𑀫𑀳𑀸𑀧𑀼𑀭𑀺𑀲𑁄𑀧𑀺 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀪𑀺𑀪𑀯𑀺𑀢𑀼𑀁 𑀲𑀫𑀢𑁆𑀣𑁂𑀦 𑀉𑀴𑀸𑀭𑁂𑀦 𑀧𑀼𑀜𑁆𑀜𑀓𑀫𑁆𑀫𑀼𑀦𑀸 𑀦𑀺𑀩𑁆𑀩𑀢𑁆𑀢𑀺𑀢𑁄 𑀢𑁂𑀦 𑀇𑀲𑁆𑀲𑀭𑁂𑀦 𑀦𑀺𑀫𑁆𑀫𑀺𑀢𑁄 𑀦𑀸𑀫, 𑀢𑀲𑁆𑀲 𑀘𑀸𑀬𑀁 𑀦𑀺𑀫𑁆𑀫𑀸𑀦𑀯𑀺𑀲𑁂𑀲𑁄, 𑀬𑀤𑀺𑀤𑀁 𑀫𑀳𑀸𑀦𑀼𑀪𑀸𑀯𑀢𑀸. 𑀬𑀸𑀬 𑀫𑀳𑀸𑀚𑀦𑀲𑁆𑀲 𑀢𑀣𑀸 𑀉𑀧𑀝𑁆𑀞𑀸𑀲𑀻𑀢𑀺 𑀇𑀤𑀁 𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀸𑀤𑀯𑀲𑁂𑀦 𑀓𑀣𑀦𑀁. 𑀏𑀯𑀁 𑀢𑀁 𑀢𑀁 𑀩𑀳𑀼𑀁 𑀯𑀢𑁆𑀯𑀸 𑀓𑀺𑀁 𑀇𑀫𑀸𑀬 𑀧𑀭𑀺𑀬𑀸𑀬𑀓𑀣𑀸𑀬𑀸𑀢𑀺 𑀅𑀯𑀲𑀸𑀦𑁂 𑀉𑀚𑀼𑀓𑀫𑁂𑀯 𑀏𑀯𑀁 𑀩𑁆𑀬𑀸𑀓𑀸𑀲𑀺. 𑀲𑀫𑁆𑀧𑀢𑀺𑀚𑀸𑀢𑁄 𑀧𑀣𑀯𑀺𑀬𑀁 𑀓𑀣𑀁 𑀧𑀤𑀲𑀸 𑀕𑀘𑁆𑀙𑀢𑀺, 𑀏𑀯𑀁𑀫𑀳𑀸𑀦𑀼𑀪𑀸𑀯𑁄 𑀆𑀓𑀸𑀲𑁂𑀦 𑀫𑀜𑁆𑀜𑁂 𑀕𑀘𑁆𑀙𑀢𑀻𑀢𑀺 𑀧𑀭𑀺𑀓𑀧𑁆𑀧𑀦𑀲𑁆𑀲 𑀯𑀲𑁂𑀦 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑀻𑀖𑀢𑀭𑀁 𑀧𑀦 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀢𑀢𑁆𑀢𑀸 𑀤𑀺𑀲𑁆𑀲𑀫𑀸𑀦𑀭𑀽𑀧𑁄𑀧𑀺 𑀫𑀳𑀸𑀚𑀦𑀲𑁆𑀲 𑀅𑀤𑀺𑀲𑁆𑀲𑀫𑀸𑀦𑁄 𑀯𑀺𑀬 𑀅𑀳𑁄𑀲𑀺. 𑀅𑀘𑁂𑀮𑀓𑀪𑀸𑀯𑁄 𑀔𑀼𑀤𑁆𑀤𑀓𑀲𑀭𑀻𑀭𑀢𑀸 𑀘 𑀢𑀸𑀤𑀺𑀲𑀲𑁆𑀲 𑀇𑀭𑀺𑀬𑀸𑀧𑀣𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑀸𑀢𑀺 𑀓𑀫𑁆𑀫𑀸𑀦𑀼𑀪𑀸𑀯𑀲𑀜𑁆𑀚𑀦𑀺𑀢𑀧𑀸𑀝𑀺𑀳𑀸𑀭𑀺𑀬𑀯𑀲𑁂𑀦 𑀅𑀮𑀗𑁆𑀓𑀸𑀭𑀧𑀝𑀺𑀬𑀢𑁆𑀢𑁄 𑀯𑀺𑀬; 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀺𑀬 𑀘 𑀫𑀳𑀸𑀚𑀦𑀲𑁆𑀲 𑀉𑀧𑀝𑁆𑀞𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁; 𑀩𑀼𑀤𑁆𑀥𑀪𑀸𑀯𑀸𑀦𑀼𑀘𑁆𑀙𑀯𑀺𑀓𑀲𑁆𑀲 𑀩𑁄𑀥𑀺𑀲𑀢𑁆𑀢𑀸𑀦𑀼𑀪𑀸𑀯𑀲𑁆𑀲 𑀬𑀸𑀣𑀸𑀯𑀢𑁄 𑀧𑀯𑁂𑀤𑀺𑀢𑀢𑁆𑀢𑀸 𑀩𑀼𑀤𑁆𑀥𑁂𑀦 𑀯𑀺𑀬…𑀧𑁂… 𑀅𑀢𑁆𑀢𑀫𑀦𑀸 𑀅𑀳𑁄𑀲𑀺.

𑀧𑀸𑀓𑀝𑀸 𑀳𑀼𑀢𑁆𑀯𑀸𑀢𑀺 𑀯𑀺𑀪𑀽𑀢𑀸 𑀳𑀼𑀢𑁆𑀯𑀸. 𑀩𑀼𑀤𑁆𑀥𑀸𑀦𑀁 𑀬𑁂 𑀬𑁂 𑀲𑀗𑁆𑀔𑀸𑀭𑁂 𑀯𑀯𑀢𑁆𑀣𑀧𑁂𑀢𑀼𑀓𑀸𑀫𑀸, 𑀢𑁂 𑀢𑁂 𑀉𑀧𑁆𑀧𑀸𑀤𑀓𑁆𑀔𑀡𑁂𑀧𑀺 𑀲𑀩𑁆𑀩𑀲𑁄 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀸 𑀲𑀼𑀧𑀸𑀓𑀝𑀸 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀼𑀝𑁆𑀞𑀼 𑀯𑀺𑀪𑀽𑀢𑀸 𑀏𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦𑀸𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀅𑀦𑁄𑀓𑀸𑀲𑀕𑀢𑁂𑀢𑀺 𑀧𑀭𑀺𑀕𑁆𑀕𑀳𑀲𑁆𑀲 𑀅𑀦𑁄𑀓𑀸𑀲𑀓𑀸𑀮𑁂 𑀧𑀯𑀢𑁆𑀢𑁂. 𑀦𑀺𑀧𑁆𑀧𑀤𑁂𑀲𑁂𑀢𑀺 𑀦𑀺𑀭𑀯𑀲𑁂𑀲𑁂. 𑀑𑀓𑀸𑀲𑀧𑁆𑀧𑀢𑁆𑀢𑁂𑀢𑀺 𑀞𑀸𑀦𑀕𑀫𑀦𑀸𑀤𑀺𑀓𑀸𑀮𑁂 𑀉𑀧𑁆𑀧𑀦𑁆𑀦𑁂, 𑀢𑁂 𑀳𑀺 𑀲𑀫𑁆𑀫𑀲𑀦𑀲𑁆𑀲 𑀬𑁄𑀕𑁆𑀬𑀓𑀸𑀮𑁂 𑀉𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀧𑁆𑀧𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂𑀢𑀺 𑀇𑀤𑀁 𑀩𑀼𑀤𑁆𑀥𑀸𑀦𑀁 𑀧𑀸𑀓𑀢𑀺𑀓𑀲𑀫𑁆𑀫𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀆𑀓𑀗𑁆𑀔𑀦𑁆𑀢𑀸 𑀧𑀦 𑀢𑁂 𑀬𑀤𑀸 𑀓𑀤𑀸𑀘𑀺 𑀉𑀧𑁆𑀧𑀦𑁆𑀦𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀺𑀬𑁂𑀯. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀩𑀸𑀓𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁯. 𑀬𑀣𑀸 ‘‘𑀤𑁆𑀯𑀢𑁆𑀢𑀺𑀁𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀤𑁆𑀯𑀺-𑀲𑀤𑁆𑀤𑀲𑁆𑀲 𑀩𑀸-𑀆𑀤𑁂𑀲𑀁 𑀓𑀢𑁆𑀯𑀸 𑀩𑀸𑀢𑁆𑀢𑀺𑀁𑀲𑀸𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀏𑀢𑁆𑀣 𑀩𑀸-𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸 𑀩𑀸𑀓𑀼𑀮𑁄𑀢𑀺 𑀲𑀫𑀜𑁆𑀜𑀸 𑀅𑀳𑁄𑀲𑀺, 𑀲𑀸𑀬𑀁 𑀢𑀲𑁆𑀲 𑀅𑀦𑁆𑀯𑀢𑁆𑀣𑀲𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸𑀢𑀺 𑀫𑀗𑁆𑀕𑀮𑀢𑁆𑀣𑀁 𑀫𑀳𑀸𑀕𑀗𑁆𑀕𑀸𑀬 𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸. 𑀦𑀺𑀫𑀼𑀚𑁆𑀚𑀦𑀯𑀲𑁂𑀦𑀸𑀢𑀺 𑀚𑀡𑁆𑀡𑀼𑀧𑀫𑀸𑀡𑁂 𑀉𑀤𑀓𑁂 𑀣𑁄𑀓𑀁𑀬𑁂𑀯 𑀦𑀺𑀫𑀼𑀚𑁆𑀚𑀦𑀯𑀲𑁂𑀦. 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀢𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸. 𑀧𑀳𑀭𑀺𑀬𑀫𑀸𑀦𑀸 𑀫𑀭𑀦𑁆𑀢𑀺, 𑀦 𑀚𑀸𑀮𑁂𑀦 𑀩𑀦𑁆𑀥𑀺𑀢𑀫𑀢𑁆𑀢𑁂𑀦. 𑀤𑀸𑀭𑀓𑀲𑁆𑀲 𑀢𑁂𑀚𑁂𑀦𑀸𑀢𑀺 𑀤𑀸𑀭𑀓𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦. 𑀦𑀻𑀳𑀝𑀫𑀢𑁆𑀢𑁄𑀯 𑀫𑀢𑁄, 𑀢𑀲𑁆𑀲 𑀫𑀭𑀡𑀢𑁆𑀣𑀁 𑀉𑀧𑀓𑁆𑀓𑀫𑁄 𑀦 𑀓𑀢𑁄, 𑀬𑁂𑀦 𑀉𑀧𑀓𑁆𑀓𑀫𑁂𑀦 𑀤𑀸𑀭𑀓𑀲𑁆𑀲 𑀩𑀸𑀥𑁄 𑀲𑀺𑀬𑀸. 𑀢𑀦𑁆𑀢𑀺 𑀫𑀘𑁆𑀙𑀁. 𑀲𑀓𑀮𑀫𑁂𑀯𑀸𑀢𑀺 𑀧𑀭𑀺𑀧𑀼𑀡𑁆𑀡𑀸𑀯𑀬𑀯𑀫𑁂𑀯.

𑀦 𑀓𑁂𑀮𑀸𑀬𑀢𑀻𑀢𑀺 𑀦 𑀫𑀫𑀸𑀬𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀦 𑀫𑀜𑁆𑀜𑀢𑀺. 𑀤𑀸𑀭𑀓𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀧𑀺𑀝𑁆𑀞𑀺𑀢𑁄 𑀨𑀸𑀮𑁂𑀦𑁆𑀢𑀻. 𑀤𑀸𑀭𑀓𑀁 𑀮𑀪𑀢𑀻𑀢𑀺 𑀉𑀕𑁆𑀖𑁄𑀲𑀦𑀯𑀲𑁂𑀦 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸. 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺, 𑀅𑀢𑁆𑀢𑀦𑁄 𑀧𑀼𑀢𑁆𑀢𑀪𑀸𑀯𑀁 𑀓𑀣𑁂𑀲𑀺. 𑀓𑀼𑀘𑁆𑀙𑀺𑀬𑀸 𑀥𑀸𑀭𑀺𑀢𑀢𑁆𑀢𑀸 𑀅𑀫𑀸𑀢𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸 𑀚𑀦𑀦𑀻𑀪𑀸𑀯𑀢𑁄. 𑀫𑀘𑁆𑀙𑀁 𑀕𑀡𑁆𑀳𑀦𑁆𑀢𑀸𑀧𑀻𑀢𑀺 𑀫𑀘𑁆𑀙𑀁 𑀓𑀺𑀡𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀸𑀧𑀺. 𑀢𑀣𑀸 𑀕𑀡𑁆𑀳𑀦𑁆𑀢𑀸 𑀘 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀁 𑀲𑀩𑁆𑀩𑀁 𑀕𑀡𑁆𑀳𑀸𑀢𑀺 𑀦𑀸𑀫𑀸𑀢𑀺 𑀆𑀳 𑁋 ‘‘𑀯𑀓𑁆𑀓𑀬𑀓𑀦𑀸𑀤𑀻𑀦𑀺 𑀩𑀳𑀺 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀸 𑀦𑀸𑀫 𑀦𑀢𑁆𑀣𑀻’’𑀢𑀺. 𑀅𑀬𑀫𑁆𑀧𑀺 𑀅𑀫𑀸𑀢𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸 𑀲𑀸𑀫𑀺𑀓𑀪𑀸𑀯𑀢𑁄. 𑀤𑀸𑀭𑀓𑁄 𑀉𑀪𑀺𑀦𑁆𑀦𑀫𑁆𑀧𑀺 𑀓𑀼𑀮𑀸𑀦𑀁 𑀤𑀸𑀬𑀸𑀤𑁄 𑀳𑁄𑀢𑀼 𑀤𑁆𑀯𑀺𑀦𑁆𑀦𑀁 𑀧𑀼𑀢𑁆𑀢𑀪𑀸𑀯𑀢𑁄.

𑀅𑀲𑀻𑀢𑀺𑀫𑁂𑀢𑀺 𑀚𑀸𑀢𑀺𑀬𑀸 𑀅𑀲𑀻𑀢𑀺𑀫𑁂 𑀯𑀲𑁆𑀲𑁂. 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑁂𑀦 𑀓𑀺𑀮𑁂𑀲𑀸𑀦𑀁 𑀅𑀲𑀫𑀼𑀘𑁆𑀙𑀺𑀚𑁆𑀚𑀦𑀢𑁄 𑀯𑀻𑀢𑀺𑀓𑁆𑀓𑀫𑀺𑀢𑀼𑀁 𑀓𑀸𑀫𑀲𑀜𑁆𑀜𑀸 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸𑀢𑀺 𑀧𑀼𑀘𑁆𑀙𑀸 𑀧𑀦 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀢𑁂𑀦𑀸𑀳 𑁋 ‘‘𑀏𑀯𑀜𑁆𑀘 𑀔𑁄 𑀫𑀁, 𑀆𑀯𑀼𑀲𑁄 𑀓𑀲𑁆𑀲𑀧, 𑀧𑀼𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺.

𑁨𑁧𑁦. 𑀦𑀺𑀬𑀫𑁂𑀢𑁆𑀯𑀸𑀢𑀺 𑀢𑀁 𑀢𑀁𑀯𑀸𑀭𑁂 𑀲𑁂𑀲𑀯𑀸𑀭𑁂𑀦 𑀦𑀺𑀬𑀫𑁂𑀢𑁆𑀯𑀸. 𑀓𑀫𑁆𑀫𑀧𑀣𑀪𑁂𑀤𑀓𑁄𑀢𑀺 𑀓𑀫𑁆𑀫𑀧𑀣𑀯𑀺𑀲𑁂𑀲𑀓𑀭𑁄. 𑀢𑀢𑁆𑀣 𑀓𑀸𑀫𑀯𑀺𑀢𑀓𑁆𑀓𑁄 𑀬𑀣𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀘𑁄𑀧𑀦𑀧𑁆𑀧𑀢𑁆𑀢𑁄 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺; 𑀫𑀦𑁄𑀤𑁆𑀯𑀸𑀭𑁂 𑀧𑀭𑀪𑀡𑁆𑀟𑀲𑁆𑀲 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀯𑀲𑁂𑀦 𑀧𑀯𑀢𑁆𑀢𑀅𑀪𑀺𑀚𑁆𑀛𑀸𑀲𑀳𑀕𑀢𑁄; 𑀏𑀯𑀁 𑀓𑀸𑀫𑀲𑀜𑁆𑀜𑀸𑀢𑀺, 𑀢𑀣𑀸 𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀲𑀜𑁆𑀜𑀸𑀢𑀺 𑀣𑁂𑀭𑁄, ‘‘𑀉𑀪𑀬𑀫𑁆𑀧𑁂𑀢𑀁 𑀓𑀫𑁆𑀫𑀧𑀣𑀪𑁂𑀤𑀓𑀫𑁂𑀯𑀸’’𑀢𑀺 𑀆𑀳. 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀁 𑀲𑀜𑁆𑀜𑀁 𑀲𑀦𑁆𑀥𑀸𑀬, ‘‘𑀲𑀜𑁆𑀜𑀸 𑀉𑀧𑁆𑀧𑀦𑁆𑀦𑀫𑀢𑁆𑀢𑀸𑀯𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁂 𑀯𑀺𑀢𑀓𑁆𑀓𑀺𑀢𑀫𑁆𑀧𑀺 𑀲𑀫𑀸𑀦𑀁 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀫𑁂𑀯, 𑀉𑀪𑀬𑀲𑁆𑀲 𑀧𑀦 𑀯𑀲𑁂𑀦 𑀲𑀼𑀢𑁆𑀢𑀧𑀤𑀁 𑀧𑀯𑀢𑁆𑀢𑀦𑁆𑀢𑀺 𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄.

𑁨𑁧𑁧. 𑀆𑀬𑀽𑀳𑀦𑀓𑀫𑁆𑀫𑀦𑁆𑀢𑀺 𑀅𑀢𑁆𑀢𑀦𑀸 𑀆𑀬𑀽𑀳𑀺𑀢𑀩𑁆𑀩𑀓𑀫𑁆𑀫𑀁. 𑀮𑁄𑀫𑀓𑀺𑀮𑀺𑀝𑁆𑀞𑀸𑀦𑀻𑀢𑀺 𑀓𑀺𑀮𑀺𑀝𑁆𑀞𑀮𑁄𑀫𑀸𑀦𑀺, 𑀓𑀺𑀮𑀺𑀝𑁆𑀞𑀁𑀲𑀽𑀦𑀻𑀢𑀺 𑀅𑀢𑁆𑀣𑁄. 𑀓𑀺𑀫𑁂𑀯𑀁 𑀪𑁄𑀕𑁂𑀲𑀼 𑀧𑀭𑀦𑀺𑀫𑁆𑀫𑀺𑀢𑀪𑀯𑁂 𑀯𑀲𑀯𑀢𑁆𑀢𑀺𑀤𑁂𑀯𑀸𑀦𑀁 𑀯𑀺𑀬 𑀲𑀩𑁆𑀩𑀲𑁄 𑀆𑀬𑀽𑀳𑀦𑀓𑀫𑁆𑀫𑁂𑀦 𑀯𑀺𑀦𑀸 𑀅𑀜𑁆𑀜𑀲𑁆𑀲𑀧𑀺 𑀧𑀩𑁆𑀩𑀚𑀺𑀢𑀲𑁆𑀲 𑀧𑀘𑁆𑀘𑀬𑀮𑀸𑀪𑁄 𑀤𑀺𑀝𑁆𑀞𑀧𑀼𑀩𑁆𑀩𑁄 𑀲𑀼𑀢𑀧𑀼𑀩𑁆𑀩𑁄𑀢𑀺 𑀆𑀳 ‘‘𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢’’𑀦𑁆𑀢𑀺. 𑀓𑀼𑀮𑀽𑀧𑀓𑀣𑁂𑀭𑀸𑀦𑀫𑁂𑀢𑀁 𑀓𑀫𑁆𑀫𑀁, 𑀣𑁂𑀭𑁄 𑀧𑀦 𑀓𑀤𑀸𑀘𑀺𑀧𑀺 𑀓𑀼𑀮𑀽𑀧𑀓𑁄 𑀦𑀸𑀳𑁄𑀲𑀺.

𑀕𑀤𑁆𑀤𑀼𑀳𑀦𑀫𑀢𑁆𑀢𑀦𑁆𑀢𑀺 𑀕𑁄𑀤𑀼𑀳𑀦𑀫𑀢𑁆𑀢𑀓𑀸𑀮𑀁. 𑀇𑀥 𑀧𑀦 𑀲𑀓𑀮𑁄 𑀕𑁄𑀤𑀼𑀳𑀦𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀕𑀸𑀯𑀺𑀁…𑀧𑁂… 𑀓𑀸𑀮𑀫𑀢𑁆𑀢𑀫𑁆𑀧𑀻’’𑀢𑀺 𑀆𑀳. 𑀦𑀺𑀩𑀦𑁆𑀥𑀻𑀢𑀺 𑀦𑀺𑀩𑀤𑁆𑀥𑀤𑀸𑀢𑀩𑁆𑀩𑀁 𑀓𑀢𑁆𑀯𑀸 𑀞𑀧𑁂𑀲𑀺.

𑀲𑀓𑀺𑀮𑁂𑀲𑀧𑀼𑀕𑁆𑀕𑀮𑀲𑁆𑀲 𑀅𑀲𑁂𑀭𑀺𑀪𑀸𑀯𑀓𑀭𑀡𑁂𑀦 𑀭𑀡𑁂𑀦 𑀲𑀤𑀺𑀲𑀢𑀸𑀬 𑀭𑀡𑁄, 𑀲𑀁𑀓𑀺𑀮𑁂𑀲𑁄. 𑀅𑀜𑁆𑀜𑀸 𑀉𑀤𑀧𑀸𑀤𑀻𑀢𑀺 𑀧𑀦𑀸𑀳, 𑀢𑀲𑁆𑀫𑀸 𑀅𑀭𑀳𑀢𑁆𑀢𑀁 𑀦 𑀧𑀝𑀺𑀜𑁆𑀜𑀸𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀢𑀣𑀸 𑀯𑀘𑀦𑀁 𑀧𑀝𑀺𑀚𑀸𑀦𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺.

𑁨𑁧𑁨. 𑀅𑀯𑀸𑀧𑀼𑀭𑀢𑀺 𑀤𑁆𑀯𑀸𑀭𑀁 𑀏𑀢𑁂𑀦𑀸𑀢𑀺 𑀅𑀯𑀸𑀧𑀼𑀭𑀡𑀁. 𑀧𑀞𑀫𑀲𑀗𑁆𑀕𑀳𑀢𑁄 𑀧𑀘𑁆𑀙𑀸 𑀤𑁂𑀲𑀺𑀢𑀢𑁆𑀢𑀸 𑀤𑀼𑀢𑀺𑀬𑀲𑀗𑁆𑀕𑀳𑁂 𑀲𑀗𑁆𑀕𑀺𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀩𑀸𑀓𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀤𑀦𑁆𑀢𑀪𑀽𑀫𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁩. 𑀨𑀼𑀲𑁂𑀬𑁆𑀬𑀸𑀢𑀺 𑀜𑀸𑀡𑀨𑀼𑀲𑀦𑀸 𑀦𑀸𑀫 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀮𑀪𑁂𑀬𑁆𑀬𑀸𑀢𑀺 𑀅𑀥𑀺𑀕𑀘𑁆𑀙𑁂𑀬𑁆𑀬. 𑀏𑀯𑀁 𑀧𑀝𑀺𑀧𑀦𑁆𑀦𑁄𑀢𑀺, ‘‘𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀝𑀺𑀧𑀦𑁆𑀦𑁄. 𑀅𑀚𑀸𑀦𑀦𑀓𑁄𑀝𑁆𑀞𑀸𑀲𑁂𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀅𑀢𑁆𑀢𑀦𑀺 𑀓𑀢𑀁 𑀤𑁄𑀲𑀸𑀭𑁄𑀧𑀦𑀁 𑀦𑀺𑀯𑀢𑁆𑀢𑁂𑀢𑀺.

𑁨𑁧𑁪. 𑀅𑀧𑁆𑀧𑀦𑀸𑀉𑀧𑀘𑀸𑀭𑀦𑁆𑀢𑀺 𑀅𑀧𑁆𑀧𑀦𑀜𑁆𑀘𑁂𑀯 𑀉𑀧𑀘𑀸𑀭𑀜𑁆𑀘 𑀧𑀸𑀧𑁂𑀢𑁆𑀯𑀸 𑀓𑀣𑁂𑀲𑀻𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀅𑀧𑁆𑀧𑀦𑀸𑀲𑀳𑀺𑀢𑁄 𑀧𑀦 𑀉𑀧𑀘𑀸𑀭𑁄 𑀅𑀧𑁆𑀧𑀦𑀸𑀉𑀧𑀘𑀸𑀭𑁄, 𑀢𑀁 𑀧𑀸𑀧𑁂𑀢𑁆𑀯𑀸 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄.

𑀦𑀺𑀓𑁆𑀔𑀫𑀢𑀻𑀢𑀺 𑀦𑀺𑀓𑁆𑀔𑀫𑁄, 𑀅𑀯𑀕𑁆𑀕𑀸𑀳𑀓𑀸𑀫𑀢𑁄 𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑁄 𑀏𑀯 𑀦𑁂𑀓𑁆𑀔𑀫𑁆𑀫𑁄, 𑀧𑀞𑀫𑀚𑁆𑀛𑀸𑀦𑀸𑀤𑀺. 𑀲𑀢𑀺 𑀓𑀺𑀮𑁂𑀲𑀓𑀸𑀫𑁂 𑀅𑀢𑁆𑀢𑀦𑁄 𑀉𑀧𑀳𑀸𑀭𑀁 𑀉𑀧𑀘𑀸𑀭𑁂𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺 𑀦𑀸𑀫𑀸𑀢𑀺 𑀆𑀳 𑁋 ‘‘𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀫𑀸𑀦𑁄’’𑀢𑀺. 𑀤𑀼𑀯𑀺𑀥𑁂𑀧𑀻𑀢𑀺 𑀳𑀻𑀦𑀧𑀡𑀻𑀢𑀸𑀤𑀺𑀯𑀲𑁂𑀦 𑀤𑀼𑀯𑀺𑀥𑁂.

𑁨𑁧𑁫. 𑀓𑀽𑀝𑀸𑀓𑀸𑀭𑀦𑁆𑀢𑀺 𑀕𑀸𑀴𑁆𑀳𑀲𑀸𑀞𑁂𑀬𑁆𑀬𑀁 𑀅𑀧𑁆𑀧𑀢𑀺𑀭𑀽𑀧𑁂 𑀞𑀸𑀦𑁂 𑀔𑀦𑁆𑀥𑀕𑀢𑀧𑀸𑀢𑀦𑀸𑀤𑀺. 𑀤𑀦𑁆𑀢𑀕𑀫𑀦𑀦𑁆𑀢𑀺 𑀤𑀦𑁆𑀢𑁂𑀳𑀺 𑀦𑀺𑀩𑁆𑀩𑀺𑀲𑁂𑀯𑀦𑁂𑀳𑀺 𑀕𑀦𑁆𑀥𑀩𑁆𑀩𑀕𑀢𑀺𑀁. 𑀧𑀢𑁆𑀢𑀩𑁆𑀩𑀁 𑀪𑀽𑀫𑀺𑀦𑁆𑀢𑀺 𑀲𑀫𑁆𑀫𑀸𑀓𑀺𑀭𑀺𑀬𑀸𑀬 𑀮𑀤𑁆𑀥𑀩𑁆𑀩𑀲𑀫𑁆𑀧𑀢𑁆𑀢𑀺𑀁.

𑁨𑁧𑁬. 𑀩𑁆𑀬𑀢𑀺𑀳𑀭𑀡𑀯𑀲𑁂𑀦 𑀮𑀗𑁆𑀖𑀓𑀁 𑀯𑀺𑀮𑀗𑁆𑀖𑀓𑀁, 𑀅𑀜𑁆𑀜𑀫𑀜𑁆𑀜𑀳𑀢𑁆𑀣𑀕𑁆𑀕𑀳𑀡𑀁. 𑀢𑁂𑀦𑀸𑀳 𑁋 ‘‘𑀳𑀢𑁆𑀣𑁂𑀦 𑀳𑀢𑁆𑀣𑀁 𑀕𑀳𑁂𑀢𑁆𑀯𑀸’’𑀢𑀺.

𑁨𑁧𑁭. 𑀕𑀳𑁂𑀢𑀼𑀁 𑀲𑀫𑀢𑁆𑀣𑁄𑀢𑀺 𑀕𑀡𑀺𑀓𑀸𑀭𑀳𑀢𑁆𑀣𑀺𑀦𑀻𑀳𑀺 𑀉𑀧𑀮𑀸𑀧𑁂𑀢𑁆𑀯𑀸 𑀅𑀭𑀜𑁆𑀜𑀳𑀢𑁆𑀣𑀺𑀁 𑀯𑀘𑀦𑀯𑀲𑁂𑀦 𑀕𑀳𑁂𑀢𑀼𑀁 𑀲𑀫𑀢𑁆𑀣𑁄. 𑀅𑀢𑀺𑀧𑀲𑁆𑀲𑀺𑀢𑁆𑀯𑀸 𑀅𑀢𑀺𑀝𑁆𑀞𑀸𑀦𑀯𑀲𑁂𑀦 𑀧𑀲𑁆𑀲𑀺𑀢𑁆𑀯𑀸. 𑀏𑀢𑁆𑀣𑀕𑁂𑀥𑀸𑀢𑀺 𑀏𑀢𑀲𑁆𑀫𑀺𑀁 𑀅𑀭𑀜𑁆𑀜𑁂 𑀦𑀸𑀕𑀯𑀦𑁂 𑀧𑀯𑀢𑁆𑀢𑀕𑁂𑀥𑀸. 𑀲𑀼𑀔𑀸𑀬𑀢𑀻𑀢𑀺 𑀲𑀼𑀔𑀁 𑀅𑀬𑀢𑀺 𑀧𑀯𑀢𑁆𑀢𑁂𑀢𑀺, ‘‘𑀲𑀼𑀔𑀁 𑀳𑀭𑀢𑀻’’𑀢𑀺 𑀯𑀸 𑀧𑀸𑀞𑁄. 𑀟𑀺𑀡𑁆𑀟𑀺𑀫𑁄 𑀆𑀦𑀓𑁄. 𑀦𑀺𑀳𑀺𑀢𑀲𑀩𑁆𑀩𑀯𑀗𑁆𑀓𑀤𑁄𑀲𑁄𑀢𑀺 𑀅𑀧𑀕𑀢𑀲𑀩𑁆𑀩𑀲𑀸𑀞𑁂𑀬𑁆𑀬𑀤𑁄𑀲𑁄. 𑀅𑀧𑀦𑀻𑀢𑀓𑀲𑀸𑀯𑁄𑀢𑀺 𑀅𑀧𑁂𑀢𑀲𑀸𑀭𑀫𑁆𑀪𑀓𑀲𑀸𑀯𑁄.

𑁨𑁧𑁯. 𑀧𑀜𑁆𑀘𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀲𑀻𑀮𑀸𑀦𑀦𑁆𑀢𑀺 𑀅𑀓𑀼𑀲𑀮𑀸𑀦𑀁. 𑀕𑁂𑀳𑀲𑁆𑀲𑀺𑀢𑀲𑀻𑀮𑀸𑀦𑀦𑁆𑀢𑀺 𑀯𑀸 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀸𑀦𑀁.

𑁨𑁨𑁨. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸𑀢𑀺, ‘‘𑀫𑀚𑁆𑀛𑀺𑀫𑁄, 𑀤𑀳𑀭𑁄’’𑀢𑀺 𑀆𑀕𑀢𑁂𑀲𑀼 𑀉𑀧𑀫𑀸𑀯𑀸𑀭𑁂𑀲𑀼, ‘‘𑀣𑁂𑀭𑁄’’𑀢𑀺𑀆𑀤𑀺𑀦𑀸 𑀆𑀕𑀢𑁂𑀲𑀼 𑀉𑀧𑀫𑁂𑀬𑁆𑀬𑀯𑀸𑀭𑁂𑀲𑀽𑀢𑀺 𑀧𑀜𑁆𑀘𑀲𑀼 𑀲𑀁𑀓𑀺𑀮𑁂𑀲𑀧𑀓𑁆𑀔𑀺𑀬𑁂𑀲𑀼 𑀯𑀸𑀭𑁂𑀲𑀼 𑀏𑀲 𑀬𑀣𑀸𑀯𑀼𑀢𑁆𑀢𑁄𑀯 𑀦𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀦𑁆𑀢𑀪𑀽𑀫𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀪𑀽𑀫𑀺𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁩. 𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸𑀢𑀺, ‘‘𑀇𑀫𑀺𑀦𑀸𑀳𑀁 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀤𑁂𑀯𑁄 𑀯𑀸 𑀪𑀯𑁂𑀬𑁆𑀬𑀁 𑀤𑁂𑀯𑀜𑁆𑀜𑀢𑀭𑁄 𑀯𑀸, 𑀤𑀼𑀓𑁆𑀔𑀢𑁄 𑀯𑀸 𑀫𑀼𑀘𑁆𑀘𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀘𑁂𑀧𑀺 𑀘𑀭𑀦𑁆𑀢𑀺, 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬 𑀢𑀡𑁆𑀳𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀺𑀤𑀽𑀲𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀸𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀧𑀢𑁆𑀣𑀦𑀁 𑀅𑀓𑀢𑁆𑀯𑀸. 𑀅𑀪𑀩𑁆𑀩𑀸 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬 𑀅𑀦𑀺𑀬𑀫𑀺𑀢𑀪𑀸𑀯𑀢𑁄. 𑀧𑀡𑀺𑀥𑀸𑀦𑀯𑀲𑁂𑀦 𑀳𑀺 𑀧𑀼𑀜𑁆𑀜𑀨𑀮𑀁 𑀦𑀺𑀬𑀢𑀁 𑀦𑀸𑀫 𑀳𑁄𑀢𑀺, 𑀢𑀤𑀪𑀸𑀯𑀢𑁄 𑀓𑀢𑀁 𑀧𑀼𑀜𑁆𑀜𑀁 𑀦 𑀮𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑀺𑀬𑀧𑀓𑁆𑀔𑁂 𑀉𑀪𑀬𑀝𑁆𑀞𑀸𑀦𑁂𑀳𑀺 𑀯𑀼𑀢𑁆𑀢𑀁, 𑀘𑀢𑀼𑀢𑁆𑀣𑀧𑀓𑁆𑀔𑁄 𑀲𑀫𑁆𑀫𑀸𑀯𑀢𑀸𑀭𑁄 𑀇𑀢𑀺 𑀘𑀢𑀼𑀓𑁄𑀝𑀺𑀓𑁄 𑀧𑀜𑁆𑀳𑁄 𑀚𑀸𑀮𑀯𑀲𑁂𑀦 𑀆𑀳𑀝𑁄, 𑀢𑀢𑁆𑀣 𑀆𑀲𑀸 𑀦𑀸𑀫 𑀧𑀢𑁆𑀣𑀦𑀸, 𑀫𑀺𑀘𑁆𑀙𑀸𑀕𑀸𑀳𑀲𑁆𑀫𑀺𑀁 𑀲𑀢𑀺 𑀦 𑀯𑀺𑀧𑀘𑁆𑀘𑀢𑀺, 𑀲𑀫𑁆𑀫𑀸𑀕𑀸𑀳𑀲𑁆𑀫𑀺𑀁 𑀲𑀢𑀺 𑀯𑀺𑀧𑀘𑁆𑀘𑀢𑀺, 𑀉𑀪𑀬𑀣𑀸𑀧𑀺 𑀉𑀪𑀬𑀸𑀧𑁂𑀓𑁆𑀔𑀸𑀦𑀸𑀫, 𑀬𑁄 𑀫𑀺𑀘𑁆𑀙𑀢𑁆𑀢𑀥𑀫𑁆𑀫𑁂 𑀧𑀼𑀭𑀓𑁆𑀔𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀢𑀲𑁆𑀲 𑀬𑀣𑀸𑀥𑀺𑀧𑁆𑀧𑀸𑀬𑀨𑀮𑀁 𑀲𑀫𑀺𑀚𑁆𑀛𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀅𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀡𑁆𑀡𑀢𑁆𑀢𑀸; 𑀬𑁄 𑀧𑀦 𑀲𑀫𑁆𑀫𑀢𑁆𑀢𑀁 𑀧𑀼𑀭𑀓𑁆𑀔𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀢𑀲𑁆𑀲 𑀬𑀣𑀸𑀥𑀺𑀧𑁆𑀧𑀸𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀨𑀮𑀁 𑀦 𑀲𑀫𑀺𑀚𑁆𑀛𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀡𑁆𑀡𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀆𑀲𑀜𑁆𑀘𑁂𑀧𑀺 𑀓𑀭𑀺𑀢𑁆𑀯𑀸 𑀅𑀬𑁄𑀦𑀺𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻’’𑀢𑀺𑀆𑀤𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀪𑀽𑀫𑀺𑀚𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁭. 𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁦. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀽𑀢𑀺 𑀯𑀼𑀢𑁆𑀢𑀁 𑀉𑀧𑀲𑀗𑁆𑀓𑀫𑀦𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀅𑀨𑀸𑀲𑀼𑀓𑀓𑀸𑀮𑁄 𑀅𑀳𑁄𑀲𑀻’’𑀢𑀺 𑀆𑀳. 𑀅𑀯𑀺𑀭𑀸𑀥𑀺𑀢𑀦𑁆𑀢𑀺 𑀅𑀯𑀺𑀭𑀚𑁆𑀛𑀦𑀓𑀁. 𑀬𑀤𑀺 𑀯𑀸 𑀢𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸, 𑀬𑀤𑀺 𑀯𑀸 𑀏𑀓𑀢𑁆𑀣𑀸, 𑀬𑀁 𑀢𑀢𑁆𑀣 𑀅𑀯𑀺𑀭𑀚𑁆𑀛𑀦𑀓𑀁, 𑀢𑀁 𑀢𑀁𑀬𑁂𑀯 𑀧𑀝𑀺𑀪𑀸𑀢𑀽𑀢𑀺 𑀬𑁄𑀚𑀦𑀸. 𑀛𑀸𑀦𑀫𑁂𑀯𑀸𑀢𑀺 𑀅𑀧𑁆𑀧𑀫𑀸𑀡𑀚𑁆𑀛𑀸𑀦𑀫𑁂𑀯, ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬𑁂𑀯 𑀏𑀯𑀁 𑀯𑀼𑀘𑁆𑀘𑀢𑀻𑀢𑀺 𑀉𑀧𑀸𑀲𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄.

𑁨𑁩𑁧. 𑀬𑀸𑀯𑀢𑀸 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀙𑀸𑀬𑀸 𑀨𑀭𑀢𑀺, 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 ‘‘𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀏𑀓𑀭𑀼𑀓𑁆𑀔𑀫𑀽𑀮𑀧𑁆𑀧𑀫𑀸𑀡𑀝𑁆𑀞𑀸𑀦𑀁. 𑀓𑀲𑀺𑀡𑀦𑀺𑀫𑀺𑀢𑁆𑀢𑁂𑀦 𑀑𑀢𑁆𑀣𑀭𑀺𑀢𑁆𑀯𑀸𑀢𑀺 𑀓𑀲𑀺𑀡𑀸𑀭𑀫𑁆𑀫𑀡𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀢𑀲𑁆𑀫𑀺𑀁 𑀓𑀲𑀺𑀡…𑀧𑁂… 𑀯𑀺𑀳𑀭𑀢𑀻𑀢𑀺 𑀯𑀼𑀢𑁆𑀢𑁄. 𑀆𑀪𑁄𑀕𑁄 𑀦𑀢𑁆𑀣𑀺 𑀛𑀸𑀦𑀓𑁆𑀔𑀡𑁂. 𑀓𑀸𑀫𑀁 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀆𑀪𑁄𑀕𑁄 𑀦𑀢𑁆𑀣𑀺 𑀢𑀢𑁄 𑀧𑀦 𑀧𑀼𑀩𑁆𑀩𑁂 𑀯𑀸 𑀲𑀺𑀬𑀸 𑀲𑁄 𑀆𑀪𑁄𑀕𑁄, 𑀢𑀫𑁆𑀧𑀺 𑀲𑀦𑁆𑀥𑀸𑀬 𑀫𑀳𑀕𑁆𑀕𑀢𑀦𑁆𑀢𑀺 𑀓𑁂𑀘𑀺. 𑀇𑀤𑀸𑀦𑀺 𑀢𑀸𑀲𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀦𑀁 𑀲𑀢𑀺𑀧𑀺 𑀓𑁂𑀦𑀘𑀺 𑀯𑀺𑀲𑁂𑀲𑁂𑀦 𑀅𑀪𑁂𑀤𑁂 𑀯𑀺𑀲𑀬𑀸𑀤𑀺𑀢𑁄 𑀮𑀩𑁆𑀪𑀫𑀸𑀦𑀪𑁂𑀤𑀁 𑀤𑀲𑁆𑀲𑁂𑀢𑀼𑀁, ‘‘𑀏𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀫𑀺𑀢𑁆𑀢𑀁 𑀦 𑀯𑀟𑁆𑀠𑀢𑀺 𑀯𑀟𑁆𑀠𑁂𑀢𑀩𑁆𑀩𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀧𑀣𑀯𑀻𑀓𑀲𑀺𑀡𑀸𑀤𑀻𑀦𑀁 𑀯𑀺𑀬 𑀆𑀓𑀸𑀲𑀪𑀸𑀯𑀦𑀸𑀬 𑀉𑀕𑁆𑀖𑀸𑀝𑀦𑀁 𑀦 𑀚𑀸𑀬𑀢𑀺. 𑀢𑀸𑀦𑀺 𑀛𑀸𑀦𑀸𑀦𑀻𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀚𑁆𑀛𑀸𑀦𑀸𑀦𑀺. 𑀘𑀼𑀤𑁆𑀤𑀲𑀯𑀺𑀥𑁂𑀦 𑀧𑀭𑀺𑀤𑀫𑀦𑀸𑀪𑀸𑀯𑀢𑁄 𑀅𑀪𑀺𑀜𑁆𑀜𑀸𑀦𑀁 𑀧𑀸𑀤𑀓𑀸𑀦𑀺 𑀦 𑀳𑁄𑀦𑁆𑀢𑀺. 𑀦𑀺𑀫𑀺𑀢𑁆𑀢𑀼𑀕𑁆𑀖𑀸𑀝𑀲𑁆𑀲𑁂𑀯 𑀅𑀪𑀸𑀯𑀢𑁄 𑀅𑀭𑀽𑀧𑀚𑁆𑀛𑀸𑀦𑀸𑀦𑀁 𑀅𑀦𑀥𑀺𑀝𑁆𑀞𑀸𑀦𑀢𑀸𑀬 𑀦𑀺𑀭𑁄𑀥𑀲𑁆𑀲 𑀧𑀸𑀤𑀓𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺. 𑀓𑀫𑁆𑀫𑀯𑀝𑁆𑀝𑀪𑀸𑀯𑁂𑀦 𑀓𑀺𑀮𑁂𑀲𑀯𑀝𑁆𑀝𑀯𑀺𑀧𑀸𑀓𑀯𑀝𑁆𑀝𑀸𑀦𑀁 𑀢𑀺𑀡𑁆𑀡𑀁 𑀯𑀝𑁆𑀝𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀯𑀝𑁆𑀝𑀧𑀸𑀤𑀓𑀢𑀸. 𑀉𑀧𑀧𑀚𑁆𑀚𑀦𑀯𑀲𑁂𑀦𑁂𑀯 𑀢𑀁 𑀢𑀁 𑀪𑀯𑀁 𑀑𑀓𑁆𑀓𑀫𑀢𑀺 𑀏𑀢𑁂𑀳𑀻𑀢𑀺 𑀪𑀯𑁄𑀓𑁆𑀓𑀫𑀦𑀸𑀦𑀺. 𑀤𑀼𑀢𑀺𑀬𑀦𑀬𑀲𑁆𑀲 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀕𑁆𑀖𑀸𑀝𑀦𑀲𑁆𑀲 𑀮𑀩𑁆𑀪𑀦𑀢𑁄 𑀅𑀭𑀽𑀧𑀚𑁆𑀛𑀸𑀦𑁄𑀧𑀭𑀺 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀻𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀏𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀸𑀯𑀟𑁆𑀠𑀦𑀦𑀺𑀫𑀺𑀢𑁆𑀢𑀯𑀟𑁆𑀠𑀦𑀸𑀤𑀺𑀧𑁆𑀧𑀓𑀸𑀭𑁂𑀦. 𑀦𑀸𑀦𑀢𑁆𑀣𑀸𑀢𑀺 𑀦𑀸𑀦𑀸𑀲𑀪𑀸𑀯𑀸. 𑀏𑀯𑀦𑁆𑀢𑀺 𑀅𑀧𑁆𑀧𑀫𑀸𑀡𑀫𑀳𑀕𑁆𑀕𑀢𑀲𑀤𑁆𑀤𑀯𑀘𑀦𑀻𑀬𑀢𑀸𑀬 𑀦𑀸𑀦𑀸𑀩𑁆𑀬𑀜𑁆𑀚𑀦𑀸. 𑀓𑀸𑀫𑀜𑁆𑀘𑁂𑀢𑁆𑀣 𑀅𑀧𑁆𑀧𑀫𑀸𑀡𑀲𑀫𑀸𑀧𑀢𑁆𑀢𑀺𑀢𑁄𑀧𑀺 𑀦𑀻𑀳𑀭𑀺𑀢𑁆𑀯𑀸 𑀯𑀓𑁆𑀔𑀫𑀸𑀦𑀪𑀯𑀽𑀧𑀧𑀢𑁆𑀢𑀺𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀲𑀓𑁆𑀓𑀸, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀓𑀲𑀺𑀡𑀛𑀸𑀦𑀢𑁄𑀯 𑀦𑀻𑀳𑀭𑀺𑀢𑁆𑀯𑀸 𑀬𑁄𑀚𑀦𑀸 𑀓𑀢𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀅𑀣 𑀯𑀸 𑀫𑀳𑀕𑁆𑀕𑀢𑀕𑀳𑀡𑁂𑀦𑁂𑀢𑁆𑀣 𑀅𑀧𑁆𑀧𑀫𑀸𑀡𑀸𑀢𑀺 𑀯𑀼𑀢𑁆𑀢𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄 𑀢𑀲𑁆𑀲𑀸 𑀲𑀫𑀜𑁆𑀜𑀸𑀬 𑀉𑀪𑀬𑁂𑀲𑀫𑁆𑀧𑀺 𑀲𑀸𑀥𑀸𑀭𑀡𑀪𑀸𑀯𑀢𑁄.

𑁨𑁩𑁨. 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀅𑀲𑀢𑀺𑀧𑀺 𑀢𑀣𑀸𑀭𑀽𑀧𑁂 𑀆𑀪𑁄𑀕𑁂 ‘‘𑀧𑀭𑀺𑀢𑁆𑀢𑀸𑀪𑀸𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺 𑀯𑀼𑀢𑁆𑀢𑁄. 𑀅𑀧𑁆𑀧𑀫𑀸𑀡𑀁 𑀓𑀢𑁆𑀯𑀸 𑀓𑀲𑀺𑀡𑀁 𑀯𑀟𑁆𑀠𑁂𑀦𑁆𑀢𑀲𑁆𑀲 𑀓𑀲𑀺𑀡𑀯𑀟𑁆𑀠𑀦𑀯𑀲𑁂𑀦 𑀩𑀳𑀼𑀮𑀻𑀓𑀸𑀭𑀲𑀫𑁆𑀪𑀯𑀢𑁄 𑀲𑀺𑀬𑀸 𑀛𑀸𑀦𑀲𑁆𑀲 𑀩𑀮𑀯𑀢𑀭𑀢𑀸, 𑀢𑀤𑀪𑀸𑀯𑁂 𑀘 𑀤𑀼𑀩𑁆𑀩𑀮𑀢𑀸, 𑀆𑀘𑀺𑀡𑁆𑀡𑀯𑀲𑀺𑀢𑀸𑀬 𑀧𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀲𑀫𑁆𑀫𑀸 𑀅𑀧𑀭𑀺𑀲𑁄𑀥𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀛𑀸𑀦𑀲𑁆𑀲 𑀅𑀧𑁆𑀧𑀕𑀼𑀡𑀢𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀲𑀼𑀧𑁆𑀧𑀫𑀢𑁆𑀢𑁂 𑀯𑀸’’𑀢𑀺𑀆𑀤𑀺𑀫𑀸𑀳. 𑀛𑀸𑀦𑀲𑁆𑀲 𑀅𑀧𑁆𑀧𑀸𑀦𑀼𑀪𑀸𑀯𑀢𑀸𑀬 𑀏𑀯 𑀢𑀦𑁆𑀦𑀺𑀫𑀺𑀢𑁆𑀢𑀸 𑀧𑀪𑀸𑀧𑀺 𑀅𑀧𑁆𑀧𑀢𑀭𑀸 𑀅𑀧𑀭𑀺𑀲𑀼𑀤𑁆𑀥𑀸𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀯𑀡𑁆𑀡𑁄…𑀧𑁂… 𑀲𑀁𑀓𑀺𑀮𑀺𑀝𑁆𑀞𑁄 𑀘𑀸’’𑀢𑀺. 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣𑀸𑀧𑀺 𑀓𑀲𑀺𑀡𑀲𑁆𑀲 𑀧𑀭𑀺𑀢𑁆𑀢𑀪𑀸𑀯𑁂𑀦 𑀯𑀡𑁆𑀡𑀲𑁆𑀲 𑀧𑀭𑀺𑀢𑁆𑀢𑀢𑀸, 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀬 𑀅𑀦𑀼𑀭𑀽𑀧𑀢𑀸𑀬 𑀯𑀸 𑀦𑀺𑀫𑀺𑀢𑁆𑀢𑀁 𑀧𑀪𑀸𑀫𑀡𑁆𑀟𑀮𑀓𑀫𑁆𑀧𑀺 𑀧𑀭𑀺𑀢𑁆𑀢𑀫𑁂𑀯 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑀼𑀮𑀧𑀭𑀺𑀓𑀫𑁆𑀫𑀦𑁆𑀢𑀺 𑀯𑀺𑀧𑀼𑀮𑀪𑀸𑀯𑁂𑀦 𑀧𑀭𑀺𑀓𑀫𑁆𑀫𑀁. 𑀲𑁂𑀲𑀁 𑀢𑀢𑀺𑀬𑀘𑀢𑀼𑀢𑁆𑀣𑀦𑀬𑁂𑀲𑀼 𑀯𑀢𑁆𑀢𑀩𑁆𑀩𑀁 𑀧𑀞𑀫𑀤𑀼𑀢𑀺𑀬𑀦𑀬𑁂𑀲𑀼 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀯𑀡𑁆𑀡𑀦𑀸𑀦𑀢𑁆𑀢𑀦𑁆𑀢𑀺 𑀬𑀤𑀺 𑀧𑀻𑀢𑀁 𑀬𑀤𑀺 𑀮𑁄𑀳𑀺𑀢𑀁 𑀬𑀤𑀺 𑀯𑀸 𑀑𑀤𑀸𑀢𑀦𑁆𑀢𑀺 𑀲𑀭𑀻𑀭𑀯𑀡𑁆𑀡𑀦𑀸𑀦𑀢𑁆𑀢𑀁. 𑀆𑀪𑀸𑀦𑀸𑀦𑀢𑁆𑀢𑀦𑁆𑀢𑀺 𑀧𑀭𑀺𑀢𑁆𑀢𑀯𑀺𑀧𑀼𑀮𑀢𑀸𑀯𑀲𑁂𑀦 𑀧𑀪𑀸𑀬 𑀦𑀸𑀦𑀢𑁆𑀢𑀁. 𑀅𑀘𑁆𑀘𑀺𑀦𑀸𑀦𑀢𑁆𑀢𑀦𑁆𑀢𑀺 𑀢𑁂𑀚𑁄𑀥𑀸𑀢𑀼𑀲𑁆𑀲 𑀤𑀻𑀖𑀸𑀤𑀺𑀯𑀲𑁂𑀦 𑀯𑁂𑀫𑀢𑁆𑀢𑀢𑀸. 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺 𑀅𑀪𑀺𑀭𑀢𑀺𑀯𑀲𑁂𑀦 𑀦𑀺𑀯𑀺𑀲𑀦𑁆𑀢𑀺 𑀦𑀺𑀲𑀻𑀤𑀦𑁆𑀢𑀺 𑀢𑀺𑀝𑁆𑀞𑀦𑁆𑀢𑀺. 𑀢𑁂𑀦𑀸𑀳 ‘‘𑀯𑀲𑀦𑁆𑀢𑀻’’𑀢𑀺.

𑁨𑁩𑁪. 𑀆𑀪𑀦𑁆𑀢𑀺 𑀤𑀺𑀩𑁆𑀩𑀦𑁆𑀢𑀻𑀢𑀺 𑀆𑀪𑀸𑀢𑀺 𑀆𑀳 ‘‘𑀆𑀪𑀸𑀲𑀫𑁆𑀧𑀦𑁆𑀦𑀸’’𑀢𑀺. 𑀢𑀤𑀗𑁆𑀕𑁂𑀦𑀸𑀢𑀺 𑀯𑀸 𑀢𑀲𑁆𑀲𑀸 𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀫𑀸𑀡𑀢𑀸𑀬 𑀘 𑀆𑀪𑀸𑀓𑀸𑀭𑀡𑀁, 𑀢𑀁 𑀧𑀦 𑀅𑀢𑁆𑀣𑀢𑁄 𑀪𑀯𑀽𑀧𑀧𑀢𑁆𑀢𑀺𑀓𑀸𑀭𑀡𑀫𑁂𑀯𑀸𑀢𑀺 𑀆𑀳 𑁋 ‘‘𑀢𑀲𑁆𑀲𑀸 𑀪𑀯𑀽𑀧𑀧𑀢𑁆𑀢𑀺𑀬𑀸 𑀅𑀗𑁆𑀕𑁂𑀦𑀸’’𑀢𑀺. 𑀓𑀸𑀬𑀸𑀮𑀲𑀺𑀬𑀪𑀸𑀯𑁄 𑀢𑀦𑁆𑀤𑀻𑀆𑀤𑀻𑀦𑀁 𑀳𑁂𑀢𑀼𑀪𑀽𑀢𑀸 𑀓𑀸𑀬𑀲𑁆𑀲 𑀯𑀺𑀢𑁆𑀣𑀸𑀬𑀺𑀢𑀢𑀸.

𑁨𑁩𑁫. 𑀧𑀸𑀭𑀫𑀺𑀬𑁄𑀢𑀺 𑀫𑀳𑀸𑀲𑀸𑀯𑀓𑀲𑀁𑀯𑀢𑁆𑀢𑀦𑀺𑀓𑀸 𑀲𑀸𑀯𑀓𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄. 𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂, 𑀩𑁆𑀭𑀳𑁆𑀫𑀮𑁄𑀓𑁂 𑀯𑀸 𑀉𑀧𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀺, 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀣𑁂𑀭𑀕𑀸𑀣𑀸𑀲𑀼. 𑀅𑀯𑁄𑀓𑀺𑀡𑁆𑀡𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀲𑀜𑁆𑀘𑀭𑀺𑀢𑀦𑁆𑀢𑀺 𑀅𑀢𑀻𑀢𑀪𑀯𑁂𑀲𑀼 𑀚𑀸𑀢𑀺𑀯𑀲𑁂𑀦 𑀲𑀜𑁆𑀘𑀭𑀡𑀁 𑀫𑀫, 𑀲𑀜𑁆𑀘𑀭𑀺𑀢𑀦𑁆𑀢𑀺 𑀢𑀁 𑀫𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁮. 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁬. 𑀢𑀲𑁆𑀫𑀸𑀢𑀺 𑀅𑀢𑁆𑀣𑀓𑀸𑀫𑀢𑁆𑀢𑀸 𑀏𑀯𑀫𑀸𑀳, 𑀦 𑀪𑀕𑀯𑀢𑁄 𑀯𑀘𑀦𑀁 𑀅𑀦𑀸𑀤𑀺𑀬𑀦𑁆𑀢𑁄. 𑀬𑁂 𑀧𑀦 𑀢𑀤𑀸 𑀲𑀢𑁆𑀣𑀼𑀯𑀘𑀦𑀁 𑀦 𑀕𑀡𑁆𑀳𑀺𑀁𑀲𑀼, 𑀢𑁂 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑀸 𑀫𑀗𑁆𑀓𑀼𑀪𑀽𑀢𑀸 𑀅𑀝𑁆𑀞𑀁𑀲𑀼, 𑀢𑀲𑁆𑀫𑀸 𑀉𑀪𑀬𑁂𑀲𑀫𑁆𑀧𑀺 𑀲𑀢𑁆𑀣𑀭𑀺 𑀅𑀕𑀸𑀭𑀯𑀧𑀝𑀺𑀧𑀢𑁆𑀢𑀺 𑀦𑀸𑀳𑁄𑀲𑀺.

𑀬𑁂𑀦𑀧𑀺 𑀚𑀦𑁂𑀦 𑀦 𑀤𑀺𑀝𑁆𑀞𑁄𑀢𑀺 𑀬𑁂𑀦 𑀉𑀪𑀬𑀚𑀦𑁂𑀦 𑀅𑀜𑁆𑀜𑀯𑀺𑀳𑀺𑀢𑀢𑀸𑀬 𑀓𑀼𑀟𑁆𑀟𑀓𑀯𑀸𑀝𑀸𑀤𑀺𑀅𑀦𑁆𑀢𑀭𑀺𑀓𑀢𑀸𑀬 𑀯𑀸 𑀦 𑀤𑀺𑀝𑁆𑀞𑁄. 𑀤𑀫𑀦𑀢𑁆𑀣𑀦𑁆𑀢𑀺 𑀢𑁂𑀳𑀺 𑀉𑀧𑀸𑀲𑀓𑁂𑀳𑀺 𑀦𑀺𑀫𑁆𑀫𑀤𑀪𑀸𑀯𑀁 𑀆𑀧𑀸𑀤𑀺𑀢𑀸𑀦𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑀫𑀦𑀢𑁆𑀣𑀁. 𑀞𑀧𑀬𑀺𑀁𑀲𑀽𑀢𑀺 𑀬𑁄 𑀇𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑁂𑀢𑀺, 𑀢𑀲𑁆𑀲 𑀲𑀢𑀁 𑀤𑀡𑁆𑀟𑁄𑀢𑀺, 𑀲𑀳𑀲𑁆𑀲𑀦𑁆𑀢𑀺 𑀘 𑀯𑀤𑀦𑁆𑀢𑀺.

𑁨𑁩𑁭. 𑀯𑀕𑁆𑀕𑀪𑀸𑀯𑁂𑀦𑁂𑀯 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕𑁄 𑁩.𑁪𑁬𑁪) 𑀦𑀸𑀦𑀸𑀲𑀤𑁆𑀤𑁄 𑀅𑀲𑁆𑀲𑀸𑀢𑀺 𑀧𑀼𑀣𑀼𑀲𑀤𑁆𑀤𑁄. 𑀲𑀫𑀚𑀦𑁄𑀢𑀺 𑀪𑀡𑁆𑀟𑀦𑁂 𑀲𑀫𑀚𑁆𑀛𑀸𑀲𑀬𑁄 𑀚𑀦𑁄. 𑀩𑀸𑀮𑀮𑀓𑁆𑀔𑀡𑁂 𑀞𑀺𑀢𑁄𑀧𑀺 ‘‘𑀅𑀳𑀁 𑀩𑀸𑀮𑁄’’𑀢𑀺 𑀦 𑀫𑀜𑁆𑀜𑀢𑀺. 𑀪𑀺𑀬𑁆𑀬𑁄 𑀘𑀸𑀢𑀺 𑀅𑀢𑁆𑀢𑀦𑁄 𑀩𑀸𑀮𑀪𑀸𑀯𑀲𑁆𑀲 𑀅𑀚𑀸𑀦𑀦𑀢𑁄𑀧𑀺 𑀪𑀺𑀬𑁆𑀬𑁄 𑀘 𑀪𑀡𑁆𑀟𑀦𑀲𑁆𑀲 𑀉𑀧𑀭𑀺 𑀨𑁄𑀝𑁄 𑀯𑀺𑀬 𑀲𑀗𑁆𑀖𑀪𑁂𑀤𑀲𑁆𑀲 𑀅𑀢𑁆𑀢𑀦𑁄 𑀓𑀸𑀭𑀡𑀪𑀸𑀯𑀫𑁆𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑀁 𑀦 𑀫𑀜𑁆𑀜𑀺 𑀦𑀜𑁆𑀜𑀸𑀲𑀺.

𑀓𑀮𑀳𑀯𑀲𑁂𑀦 𑀧𑀯𑀢𑁆𑀢𑀯𑀸𑀘𑀸𑀬𑁂𑀯 𑀕𑁄𑀘𑀭𑁄 𑀏𑀢𑁂𑀲𑀦𑁆𑀢𑀺 𑀯𑀸𑀘𑀸𑀕𑁄𑀘𑀭𑀸 𑀳𑀼𑀢𑁆𑀯𑀸. 𑀫𑀼𑀔𑀸𑀬𑀸𑀫𑀦𑁆𑀢𑀺 𑀯𑀺𑀯𑀸𑀤𑀯𑀲𑁂𑀦 𑀫𑀼𑀔𑀁 𑀆𑀬𑀫𑁂𑀢𑁆𑀯𑀸 𑀪𑀸𑀡𑀺𑀦𑁄. 𑀦 𑀢𑀁 𑀚𑀸𑀦𑀦𑁆𑀢𑀻𑀢𑀺 𑀢𑀁 𑀓𑀮𑀳𑀁 𑀦 𑀚𑀸𑀦𑀦𑁆𑀢𑀺. 𑀓𑀮𑀳𑀁 𑀓𑀭𑁄𑀦𑁆𑀢𑁄 𑀘 𑀢𑀁 𑀦 𑀚𑀸𑀦𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀧𑀦 𑀦 𑀚𑀸𑀦𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀆𑀳 𑁋 ‘‘𑀏𑀯𑀁 𑀲𑀸𑀤𑀻𑀦𑀯𑁄 𑀅𑀬’’𑀦𑁆𑀢𑀺. 𑀅𑀬𑀁 𑀓𑀮𑀳𑁄 𑀦𑀸𑀫 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀢𑁆𑀣𑀚𑀸𑀧𑀦𑀢𑁄 𑀅𑀦𑀢𑁆𑀣𑀼𑀧𑁆𑀧𑀸𑀤𑀦𑀢𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀫𑁆𑀧𑀭𑀸𑀬𑁂 𑀘 𑀲𑀸𑀤𑀻𑀦𑀯𑁄, 𑀲𑀤𑁄𑀲𑁄𑀢𑀺 𑀅𑀢𑁆𑀣𑁄.

𑀉𑀧𑀦𑀬𑁆𑀳𑀦𑁆𑀢𑀻𑀢𑀺 𑀉𑀧𑀦𑀸𑀳𑀯𑀲𑁂𑀦 𑀅𑀦𑀼𑀩𑀦𑁆𑀥𑀦𑁆𑀢𑀺. 𑀧𑁄𑀭𑀸𑀡𑁄𑀢𑀺 𑀧𑀼𑀭𑀺𑀫𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀢𑀸𑀬 𑀧𑀼𑀭𑀸𑀢𑀦𑁄.

𑀦 𑀚𑀸𑀦𑀦𑁆𑀢𑀻𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀁 𑀦 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀦𑁆𑀢𑀺.

𑀢𑀣𑀸 𑀧𑀯𑀢𑁆𑀢𑀯𑁂𑀭𑀸𑀦𑀦𑁆𑀢𑀺 𑀅𑀝𑁆𑀞𑀺𑀙𑀺𑀦𑁆𑀦𑀸𑀤𑀺𑀪𑀸𑀯𑀁 𑀦𑀺𑀲𑁆𑀲𑀸𑀬 𑀉𑀧𑀦𑀬𑀯𑀲𑁂𑀦 𑀘𑀺𑀭𑀓𑀸𑀮𑀁 𑀧𑀯𑀢𑁆𑀢𑀯𑁂𑀭𑀸𑀦𑀁.

𑀩𑀸𑀮𑀲𑀳𑀸𑀬𑀢𑀸𑀬 𑀇𑀫𑁂 𑀪𑀺𑀓𑁆𑀔𑀽 𑀓𑀮𑀳𑀧𑀲𑀼𑀢𑀸, 𑀧𑀡𑁆𑀟𑀺𑀢𑀲𑀳𑀸𑀬𑀸𑀦𑀁 𑀧𑀦 𑀇𑀤𑀁 𑀦 𑀲𑀺𑀬𑀸𑀢𑀺 𑀧𑀡𑁆𑀟𑀺𑀢𑀲𑀳𑀸𑀬𑀲𑁆𑀲 𑀩𑀸𑀮𑀲𑀳𑀸𑀬𑀲𑁆𑀲 𑀘 𑀯𑀡𑁆𑀡𑀸𑀯𑀡𑁆𑀡𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀓𑁂 𑀧𑀸𑀓𑀝𑀧𑀭𑀺𑀲𑁆𑀲𑀬𑁂 𑀭𑀸𑀕𑀤𑁄𑀲𑀸𑀤𑀺𑀓𑁂 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁂 𑀘 𑀅𑀪𑀺𑀪𑀯𑀺𑀢𑁆𑀯𑀸.

𑀫𑀸𑀢𑀗𑁆𑀕𑁄 𑀅𑀭𑀜𑁆𑀜𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀢𑀺 𑀲𑀭𑀮𑁄𑀧𑁂𑀦 𑀲𑀦𑁆𑀥𑀺. 𑀫𑀸𑀢𑀗𑁆𑀕𑀲𑀤𑁆𑀤𑁂𑀦𑁂𑀯 𑀳𑀢𑁆𑀣𑀺𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀦𑀸𑀕𑀯𑀘𑀦𑀁 𑀢𑀲𑁆𑀲 𑀫𑀳𑀢𑁆𑀢𑀯𑀺𑀪𑀸𑀯𑀦𑀢𑁆𑀣𑀦𑁆𑀢𑀺 𑀆𑀳 𑁋 ‘‘𑀦𑀸𑀕𑁄𑀢𑀺 𑀫𑀳𑀦𑁆𑀢𑀸𑀥𑀺𑀯𑀘𑀦𑀫𑁂𑀢’’𑀦𑁆𑀢𑀺. 𑀫𑀳𑀦𑁆𑀢𑀧𑀭𑀺𑀬𑀸𑀬𑁄𑀧𑀺 𑀳𑀺 𑀦𑀸𑀕-𑀲𑀤𑁆𑀤𑁄 𑀳𑁄𑀢𑀺 ‘‘𑀏𑀯𑀁 𑀦𑀸𑀕𑀲𑁆𑀲 𑀦𑀸𑀕𑁂𑀦, 𑀈𑀲𑀸𑀤𑀦𑁆𑀢𑀲𑁆𑀲 𑀳𑀢𑁆𑀣𑀺𑀦𑁄’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁫; 𑀫𑀳𑀸𑀯. 𑁪𑁬𑁭).

𑁨𑁩𑁮. 𑀓𑀺𑀭𑀲𑀤𑁆𑀤𑁄 𑀅𑀦𑀼𑀲𑁆𑀲𑀯𑀲𑀽𑀘𑀦𑀢𑁆𑀣𑁄 𑀦𑀺𑀧𑀸𑀢𑁄. 𑀢𑁂𑀦 𑀅𑀬𑀫𑁂𑀢𑁆𑀣 𑀲𑀼𑀢𑀺𑀧𑀭𑀫𑁆𑀧𑀭𑀸𑀢𑀺 𑀤𑀲𑁆𑀲𑁂𑀢𑀺. 𑀪𑀕𑀯𑀢𑀸 𑀳𑀺 𑀲𑁄 𑀆𑀤𑀻𑀦𑀯𑁄 𑀧𑀕𑁂𑀯 𑀧𑀭𑀺𑀜𑁆𑀜𑀸𑀢𑁄, 𑀦 𑀢𑁂𑀦 𑀲𑀢𑁆𑀣𑀸 𑀦𑀺𑀩𑁆𑀩𑀺𑀡𑁆𑀡𑁄 𑀳𑁄𑀢𑀺; 𑀢𑀲𑁆𑀫𑀺𑀁 𑀧𑀦 𑀅𑀦𑁆𑀢𑁄𑀯𑀲𑁆𑀲𑁂 𑀓𑁂𑀘𑀺 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀸 𑀦𑀸𑀳𑁂𑀲𑀼𑀁; 𑀢𑁂𑀦 𑀅𑀜𑁆𑀜𑀢𑁆𑀣 𑀕𑀫𑀦𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑀫𑀦𑀼𑀧𑀸𑀬𑁄𑀢𑀺 𑀧𑀸𑀮𑀺𑀮𑁂𑀬𑁆𑀬𑀓𑀁 𑀉𑀤𑁆𑀤𑀺𑀲𑁆𑀲 𑀕𑀘𑁆𑀙𑀦𑁆𑀢𑁄 𑀏𑀓𑀯𑀺𑀳𑀸𑀭𑀺𑀁 𑀆𑀬𑀲𑁆𑀫𑀦𑁆𑀢𑀁 𑀪𑀕𑀼𑀁, 𑀲𑀫𑀕𑁆𑀕𑀯𑀸𑀲𑀁 𑀯𑀲𑀦𑁆𑀢𑁂 𑀘 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀸𑀤𑀺𑀓𑁂 𑀲𑀫𑁆𑀧𑀳𑀁𑀲𑁂𑀢𑀼𑀁 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀘. 𑀇𑀫𑀁 𑀉𑀧𑀓𑁆𑀓𑀺𑀮𑁂𑀲𑁄𑀯𑀸𑀤𑀁 𑀤𑀸𑀢𑀼𑀁 𑀢𑀢𑁆𑀣 𑀕𑀢𑁄, 𑀢𑀲𑁆𑀫𑀸 𑀓𑀮𑀳𑀓𑀸𑀭𑀓𑁂 𑀓𑀺𑀭𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 𑀓𑀺𑀭𑀲𑀤𑁆𑀤𑀕𑁆𑀕𑀳𑀡𑁂 𑀏𑀲𑁂𑀯 𑀦𑀬𑁄. 𑀯𑀼𑀢𑁆𑀢𑀦𑀬𑀫𑁂𑀯 𑀕𑁄𑀲𑀺𑀗𑁆𑀕𑀲𑀸𑀮𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁩𑁨𑁫 𑀆𑀤𑀬𑁄).

𑁨𑁪𑁧. ‘‘𑀬𑀣𑀸 𑀓𑀣𑀁 𑀧𑀦𑀸’’𑀢𑀺 𑀯𑀼𑀢𑁆𑀢𑀧𑀼𑀘𑁆𑀙𑀸𑀦𑀁 𑀧𑀘𑁆𑀙𑀺𑀫𑀪𑀸𑀯𑀢𑁄 ‘‘𑀅𑀢𑁆𑀣𑀺 𑀧𑀦 𑀯𑁄𑀢𑀺 𑀧𑀘𑁆𑀙𑀺𑀫𑀧𑀼𑀘𑁆𑀙𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀦 𑀧𑀼𑀦 ‘‘𑀅𑀢𑁆𑀣𑀺 𑀧𑀦 𑀯𑁄’’𑀢𑀺 𑀧𑀯𑀢𑁆𑀢𑀦𑀲𑁆𑀲 𑀧𑀼𑀘𑁆𑀙𑀦𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄. 𑀲𑁄 𑀧𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄. 𑀣𑁂𑀭𑀸𑀦𑀦𑁆𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀸𑀤𑀻𑀦𑀁 𑀦𑀢𑁆𑀣𑀺. 𑀧𑀭𑀺𑀓𑀫𑁆𑀫𑁄𑀪𑀸𑀲𑀁 𑀧𑀼𑀘𑁆𑀙𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀢𑀲𑁆𑀲 𑀉𑀧𑁆𑀧𑀸𑀤𑀦𑀢𑁆𑀣𑀁 𑀧𑀭𑀺𑀓𑀫𑁆𑀫𑁄𑀪𑀸𑀲𑀁 𑀧𑀼𑀘𑁆𑀙𑀢𑀺. 𑀧𑀭𑀺𑀓𑀫𑁆𑀫𑁄𑀪𑀸𑀲𑀦𑁆𑀢𑀺 𑀧𑀭𑀺𑀓𑀫𑁆𑀫𑀲𑀫𑀸𑀥𑀺𑀦𑀺𑀩𑁆𑀩𑀢𑁆𑀢𑀁 𑀑𑀪𑀸𑀲𑀁, 𑀉𑀧𑀘𑀸𑀭𑀚𑁆𑀛𑀸𑀦𑀲𑀜𑁆𑀚𑀦𑀺𑀢𑀁 𑀑𑀪𑀸𑀲𑀦𑁆𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑀮𑀸𑀪𑀻 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀓𑀫𑁆𑀫𑀢𑁆𑀣𑀁 𑀑𑀪𑀸𑀲𑀓𑀲𑀺𑀡𑀁 𑀪𑀸𑀯𑁂𑀢𑁆𑀯𑀸 𑀉𑀧𑀘𑀸𑀭𑁂 𑀞𑀧𑀺𑀢𑁄 𑀲𑀫𑀸𑀥𑀺 𑀧𑀭𑀺𑀓𑀫𑁆𑀫𑀲𑀫𑀸𑀥𑀺, 𑀢𑀢𑁆𑀣 𑀑𑀪𑀸𑀲𑁄 𑀧𑀭𑀺𑀓𑀫𑁆𑀫𑁄𑀪𑀸𑀲𑁄𑀢𑀺 𑀯𑀼𑀢𑁆𑀢𑁄. 𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫𑀸𑀢𑀺 𑀧𑀭𑀺𑀓𑀫𑁆𑀫𑁄𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀸’’𑀢𑀺. 𑀬𑀢𑁆𑀢𑀓𑁂 𑀳𑀺 𑀞𑀸𑀦𑁂 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀭𑀽𑀧𑀕𑀢𑀁 𑀤𑀝𑁆𑀞𑀼𑀓𑀸𑀫𑁄, 𑀢𑀢𑁆𑀢𑀓𑀁 𑀞𑀸𑀦𑀁 𑀑𑀪𑀸𑀲𑀓𑀲𑀺𑀡𑀁 𑀨𑀭𑀺𑀢𑁆𑀯𑀸 𑀞𑀺𑀢𑁄. 𑀢𑀁 𑀑𑀪𑀸𑀲𑀁 𑀢𑀢𑁆𑀣 𑀘 𑀭𑀽𑀧𑀕𑀢𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 𑀧𑀲𑁆𑀲𑀢𑀺, 𑀣𑁂𑀭𑀸 𑀘 𑀢𑀣𑀸 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦’’𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀢𑁂𑀲𑀁 𑀭𑀽𑀧𑀕𑀢𑀁 𑀧𑀲𑁆𑀲𑀦𑁆𑀢𑀸𑀦𑀁 𑀧𑀭𑀺𑀓𑀫𑁆𑀫𑀯𑀸𑀭𑁄 𑀅𑀢𑀺𑀓𑁆𑀓𑀫𑀺, 𑀢𑀢𑁄 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀺, 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀭𑀽𑀧𑀕𑀢𑀫𑁆𑀧𑀺 𑀦 𑀧𑀜𑁆𑀜𑀸𑀬𑀢𑀺. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀳𑀺 𑀬𑀣𑀸𑀯𑀼𑀢𑁆𑀢𑀓𑀲𑀺𑀡𑀸𑀭𑀫𑁆𑀫𑀡𑀁 𑀉𑀧𑀘𑀸𑀭𑀚𑁆𑀛𑀸𑀦𑀁, 𑀭𑀽𑀧𑀕𑀢𑀁 𑀧𑀲𑁆𑀲𑀦𑁆𑀢𑀸𑀦𑀁 𑀓𑀲𑀺𑀡𑁄𑀪𑀸𑀲𑀯𑀲𑁂𑀦 𑀭𑀽𑀧𑀕𑀢𑀤𑀲𑁆𑀲𑀦𑀁, 𑀓𑀲𑀺𑀡𑁄𑀪𑀸𑀲𑁄 𑀘 𑀧𑀭𑀺𑀓𑀫𑁆𑀫𑀯𑀲𑁂𑀦𑀸𑀢𑀺 𑀢𑀤𑀼𑀪𑀬𑀫𑁆𑀧𑀺 𑀧𑀭𑀺𑀓𑀫𑁆𑀫𑀲𑁆𑀲 𑀅𑀧𑁆𑀧𑀯𑀢𑁆𑀢𑀺𑀬𑀸 𑀦𑀸𑀳𑁄𑀲𑀺, 𑀢𑀬𑀺𑀤𑀁 𑀓𑀸𑀭𑀡𑀁 𑀆𑀤𑀺𑀓𑀫𑁆𑀫𑀺𑀓𑀪𑀸𑀯𑀢𑁄 𑀣𑁂𑀭𑀸 𑀦 𑀫𑀜𑁆𑀜𑀺𑀁𑀲𑀼, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀧𑁆𑀧𑀝𑀺𑀯𑀺𑀚𑁆𑀛𑀸𑀫𑀸’’𑀢𑀺.

𑀦𑀺𑀫𑀺𑀢𑁆𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀦𑁆𑀢𑀺 𑀓𑀸𑀭𑀡𑀁 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀢𑁆𑀯𑀸 𑀲𑀼𑀯𑀺𑀲𑀼𑀤𑁆𑀥𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂 𑀣𑁂𑀭𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄 𑀲𑀢𑁆𑀣𑀸 𑀯𑀤𑀢𑀺. 𑀓𑀺𑀁 𑀦 𑀆𑀴𑀼𑀮𑁂𑀲𑁆𑀲𑀦𑁆𑀢𑀻𑀢𑀺 𑀓𑀺𑀁 𑀦 𑀩𑁆𑀬𑀸𑀫𑁄𑀳𑁂𑀲𑁆𑀲𑀦𑁆𑀢𑀺, 𑀩𑁆𑀬𑀸𑀫𑁄𑀳𑁂𑀲𑁆𑀲𑀦𑁆𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀘𑀺𑀓𑀺𑀘𑁆𑀙𑀸 𑀉𑀤𑀧𑀸𑀤𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀬𑀣𑀸𑀉𑀧𑀝𑁆𑀞𑀺𑀢𑁂𑀲𑀼 𑀭𑀽𑀧𑀕𑀢𑁂𑀲𑀼 𑀅𑀧𑀼𑀩𑁆𑀩𑀢𑀸𑀬, ‘‘𑀇𑀤𑀁 𑀦𑀼 𑀔𑁄 𑀭𑀽𑀧𑀕𑀢𑀁 𑀓𑀺𑀁, 𑀇𑀤𑀁 𑀦𑀼 𑀔𑁄 𑀓𑀺’’𑀦𑁆𑀢𑀺 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀺𑀘𑀺𑀓𑀺𑀘𑁆𑀙𑀸 𑀲𑀁𑀲𑀬𑁄 𑀉𑀧𑁆𑀧𑀚𑁆𑀚𑀺. 𑀲𑀫𑀸𑀥𑀺 𑀘𑀯𑀻𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀭𑀺𑀓𑀫𑁆𑀫𑀲𑀫𑀸𑀥𑀺 𑀯𑀺𑀕𑀘𑁆𑀙𑀺. 𑀢𑀢𑁄 𑀏𑀯 𑀳𑀺 𑀧𑀭𑀺𑀓𑀫𑁆𑀫𑁄𑀪𑀸𑀲𑁄𑀧𑀺 𑀅𑀦𑁆𑀢𑀭𑀥𑀸𑀬𑀺, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 𑀭𑀽𑀧𑀁 𑀦 𑀧𑀲𑁆𑀲𑀺. 𑀦 𑀫𑀦𑀲𑀺 𑀓𑀭𑀺𑀲𑁆𑀲𑀸𑀫𑀻𑀢𑀺 𑀫𑀦𑀲𑀺𑀓𑀸𑀭𑀯𑀲𑁂𑀦 𑀫𑁂 𑀭𑀽𑀧𑀸𑀦𑀺 𑀉𑀧𑀝𑁆𑀞𑀳𑀺𑀁𑀲𑀼, 𑀭𑀽𑀧𑀸𑀦𑀺 𑀧𑀲𑁆𑀲𑀢𑁄 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀇𑀤𑀸𑀦𑀺 𑀓𑀺𑀜𑁆𑀘𑀺 𑀦 𑀫𑀦𑀲𑀺 𑀓𑀭𑀺𑀲𑁆𑀲𑀸𑀫𑀻𑀢𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺 𑀢𑀁 𑀧𑀦 𑀢𑀼𑀡𑁆𑀳𑀻𑀪𑀸𑀯𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀫𑀦𑀲𑀺𑀓𑀸𑀭𑁄 𑀉𑀤𑀧𑀸𑀤𑀻’’𑀢𑀺.

𑀢𑀣𑀸𑀪𑀽𑀢𑀲𑁆𑀲 𑀅𑀫𑀦𑀲𑀺𑀓𑀸𑀭𑀲𑁆𑀲 𑀅𑀪𑀸𑀯𑀁 𑀆𑀕𑀫𑁆𑀫 𑀉𑀧𑁆𑀧𑀺𑀮𑀁 𑀉𑀤𑀧𑀸𑀤𑀺. 𑀯𑀻𑀭𑀺𑀬𑀁 𑀕𑀸𑀴𑁆𑀳𑀁 𑀧𑀕𑁆𑀕𑀳𑀺𑀢𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀙𑀫𑁆𑀪𑀺𑀢𑀢𑁆𑀢𑀸𑀦𑀁 𑀯𑀽𑀧𑀲𑀫𑀦𑀢𑁆𑀣𑀁 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀅𑀳𑁄𑀲𑀺, 𑀢𑁂𑀦 𑀘𑀺𑀢𑁆𑀢𑁂 𑀲𑀫𑀸𑀥𑀺𑀤𑀽𑀲𑀺𑀓𑀸 𑀕𑁂𑀳𑀲𑁆𑀲𑀺𑀢𑀸 𑀩𑀮𑀯𑀧𑀻𑀢𑀺 𑀉𑀧𑁆𑀧𑀦𑁆𑀦𑀸. 𑀢𑁂𑀦𑀸𑀳 ‘‘𑀉𑀧𑁆𑀧𑀺𑀮𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀢𑀢𑁄𑀢𑀺 𑀲𑀺𑀣𑀺𑀮𑀯𑀻𑀭𑀺𑀬𑀢𑁆𑀢𑀸. 𑀧𑀢𑀫𑁂𑀬𑁆𑀬𑀸𑀢𑀺 𑀅𑀢𑀺𑀯𑀺𑀬 𑀔𑀺𑀦𑁆𑀦𑀁 𑀪𑀯𑁂𑀬𑁆𑀬. 𑀢𑀁 𑀫𑀫𑀸𑀢𑀺 𑀧𑀢𑁆𑀣𑀦𑀸𑀅𑀪𑀺𑀪𑀯𑀦𑀻𑀬𑀫𑀦𑀲𑀻𑀲𑁂𑀦 𑀚𑀧𑁆𑀧𑁂𑀢𑀻𑀢𑀺 𑀅𑀪𑀺𑀚𑀧𑁆𑀧𑀸, 𑀢𑀡𑁆𑀳𑀸. 𑀦𑀸𑀦𑀢𑁆𑀢𑀸 𑀦𑀸𑀦𑀸𑀲𑀪𑀸𑀯𑀸 𑀲𑀜𑁆𑀜𑀸 𑀦𑀸𑀦𑀢𑁆𑀢𑀲𑀜𑁆𑀜𑀸. 𑀅𑀢𑀺𑀯𑀺𑀬 𑀉𑀧𑀭𑀺 𑀓𑀢𑁆𑀯𑀸 𑀦𑀺𑀚𑁆𑀛𑀸𑀦𑀁 𑀧𑁂𑀓𑁆𑀔𑀦𑀁 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁.

𑁨𑁪𑁩. 𑀧𑀭𑀺𑀓𑀫𑁆𑀫𑁄𑀪𑀸𑀲𑀫𑁂𑀯𑀸𑀢𑀺 𑀧𑀭𑀺𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑀁 𑀑𑀪𑀸𑀲𑀫𑁂𑀯. 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀻𑀢𑀺 𑀑𑀪𑀸𑀲𑀫𑀦𑀲𑀺𑀓𑀸𑀭𑀧𑀲𑀼𑀢𑀢𑀸𑀬 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀭𑀽𑀧𑀸𑀦𑀺 𑀦 𑀧𑀲𑁆𑀲𑀸𑀫𑀺. 𑀯𑀺𑀲𑀬𑀭𑀽𑀧𑀫𑁂𑀯𑀸𑀢𑀺 𑀢𑁂𑀦 𑀨𑀭𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀯𑀺𑀲𑀬𑀪𑀽𑀢𑀁 𑀭𑀽𑀧𑀕𑀢𑀫𑁂𑀯 𑀫𑀦𑀲𑀺 𑀓𑀭𑁄𑀫𑀺.

𑀓𑀲𑀺𑀡𑀭𑀽𑀧𑀸𑀦𑀁 𑀯𑀲𑁂𑀦𑁂𑀢𑁆𑀣 𑀑𑀪𑀸𑀲𑀲𑁆𑀲 𑀧𑀭𑀺𑀢𑁆𑀢𑀢𑀸𑀢𑀺 𑀆𑀳 ‘‘𑀧𑀭𑀺𑀢𑁆𑀢𑀝𑁆𑀞𑀸𑀦𑁂 𑀑𑀪𑀸𑀲’’𑀦𑁆𑀢𑀺. 𑀧𑀭𑀺𑀢𑁆𑀢𑀸𑀦𑀺 𑀭𑀽𑀧𑀸𑀦𑀻𑀢𑀺 𑀓𑀢𑀺𑀧𑀬𑀸𑀦𑀺, 𑀲𑀸 𑀘 𑀦𑁂𑀲𑀁 𑀧𑀭𑀺𑀢𑁆𑀢𑀢𑀸 𑀞𑀸𑀦𑀯𑀲𑁂𑀦𑁂𑀯𑀸𑀢𑀺 𑀆𑀳 ‘‘𑀧𑀭𑀺𑀢𑁆𑀢𑀓𑀝𑁆𑀞𑀸𑀦𑁂 𑀭𑀽𑀧𑀸𑀦𑀻’’𑀢𑀺. ‘‘𑀅𑀧𑁆𑀧𑀫𑀸𑀡𑀜𑁆𑀘𑁂𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀤𑀼𑀢𑀺𑀬𑀯𑀸𑀭𑁄. 𑀑𑀪𑀸𑀲𑀧𑀭𑀺𑀢𑁆𑀢𑀢𑀁 𑀲𑀦𑁆𑀥𑀸𑀬 𑀧𑀭𑀺𑀓𑀫𑁆𑀫𑀲𑀫𑀸𑀥𑀺 ‘‘𑀧𑀭𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄 𑀢𑀲𑁆𑀲𑁂𑀯 𑀑𑀪𑀸𑀲𑀲𑁆𑀲 𑀅𑀧𑁆𑀧𑀫𑀸𑀡𑀢𑀸𑀬 𑀅𑀧𑁆𑀧𑀫𑀸𑀡𑀲𑀫𑀸𑀥𑀻𑀢𑀺 𑀯𑀘𑀦𑀢𑁄. 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀢𑀲𑁆𑀫𑀺𑀁 𑀧𑀭𑀺𑀢𑁆𑀢𑀲𑀫𑀸𑀥𑀺𑀦𑁄 𑀉𑀧𑁆𑀧𑀦𑁆𑀦𑀲𑀫𑀬𑁂. 𑀤𑀺𑀩𑁆𑀩𑀘𑀓𑁆𑀔𑀼𑀧𑀺 𑀧𑀭𑀺𑀢𑁆𑀢𑀓𑀁 𑀳𑁄𑀢𑀺 𑀧𑀭𑀺𑀢𑁆𑀢𑀭𑀽𑀧𑀕𑀢𑀤𑀲𑁆𑀲𑀦𑀢𑁄.

𑁨𑁪𑁫. 𑀤𑀼𑀓𑀢𑀺𑀓𑀚𑁆𑀛𑀸𑀦𑀲𑀫𑀸𑀥𑀺𑀦𑁆𑀢𑀺 𑀘𑀢𑀼𑀓𑁆𑀓𑀦𑀬𑁂 𑀤𑀼𑀓𑀚𑁆𑀛𑀸𑀦𑀲𑀫𑀸𑀥𑀺𑀁, 𑀧𑀜𑁆𑀘𑀓𑀦𑀬𑁂 𑀢𑀺𑀓𑀚𑁆𑀛𑀸𑀦𑀲𑀫𑀸𑀥𑀺𑀦𑁆𑀢𑀺 𑀬𑁄𑀚𑀦𑀸. 𑀤𑀼𑀓𑀚𑁆𑀛𑀸𑀦𑀲𑀫𑀸𑀥𑀺𑀦𑁆𑀢𑀺 𑀘𑀢𑀼𑀓𑁆𑀓𑀦𑀬𑁂 𑀢𑀢𑀺𑀬𑀘𑀢𑀼𑀢𑁆𑀣𑀯𑀲𑁂𑀦 𑀤𑀼𑀓𑀚𑁆𑀛𑀸𑀦𑀲𑀫𑀸𑀥𑀺𑀁, 𑀧𑀜𑁆𑀘𑀓𑀦𑀬𑁂 𑀘𑀢𑀼𑀢𑁆𑀣𑀧𑀜𑁆𑀘𑀫𑀯𑀲𑁂𑀦 𑀤𑀼𑀓𑀚𑁆𑀛𑀸𑀦𑀲𑀫𑀸𑀥𑀺𑀁. 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀲𑀫𑀸𑀥𑀺𑀦𑁆𑀢𑀺 𑀘𑀢𑀼𑀓𑁆𑀓𑀦𑀬𑁂 𑀢𑀺𑀓𑀚𑁆𑀛𑀸𑀦𑀲𑀫𑀸𑀥𑀺𑀁, 𑀧𑀜𑁆𑀘𑀓𑀦𑀬𑁂 𑀘𑀢𑀼𑀓𑁆𑀓𑀚𑁆𑀛𑀸𑀦𑀲𑀫𑀸𑀥𑀺𑀦𑁆𑀢𑀺 𑀬𑁄𑀚𑀦𑀸.

𑀢𑀺𑀯𑀺𑀥𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀯𑀲𑁂𑀦 𑀢𑀺𑀧𑁆𑀧𑀓𑀸𑀭𑀁 𑀲𑀫𑀸𑀥𑀺𑀁. 𑀢𑀤𑀦𑁆𑀢𑁄𑀕𑀥𑀸𑀢𑀺 𑀲𑀧𑁆𑀧𑀻𑀢𑀺𑀓𑀸𑀤𑀺𑀲𑀪𑀸𑀯𑀸. 𑀓𑀸𑀫𑀁 𑀪𑀕𑀯𑀸 𑀧𑀼𑀭𑀺𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁, 𑀧𑀘𑁆𑀙𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄𑀧𑀺 𑀇𑀫𑀸𑀦𑀺 𑀜𑀸𑀡𑀸𑀦𑀺 𑀪𑀸𑀯𑁂𑀲𑀺𑀬𑁂𑀯. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺 𑀧𑀦 𑀜𑀸𑀡𑀸𑀦𑀺 𑀲𑀦𑁆𑀥𑀸𑀬, ‘‘𑀧𑀘𑁆𑀙𑀺𑀫𑀬𑀸𑀫𑁂’’𑀢𑀺 𑀯𑀼𑀢𑁆𑀢𑀁, 𑀢𑁂𑀦𑀸𑀳 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺. 𑀧𑀜𑁆𑀘𑀫𑀚𑁆𑀛𑀸𑀦𑀲𑁆𑀲𑀸𑀢𑀺 𑀧𑀜𑁆𑀘𑀫𑀚𑁆𑀛𑀸𑀦𑀺𑀓𑀲𑁆𑀲 𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀺𑀓𑁄 𑀫𑀕𑁆𑀕𑁄 𑀦𑀢𑁆𑀣𑀺. 𑀲𑁄𑀢𑀺 𑀧𑀜𑁆𑀘𑀓𑀦𑀬𑁄 𑀪𑀕𑀯𑀢𑁄 𑀮𑁄𑀓𑀺𑀬𑁄 𑀅𑀳𑁄𑀲𑀺. 𑀏𑀢𑀦𑁆𑀢𑀺 𑀏𑀢𑀁, ‘‘𑀲𑀯𑀺𑀢𑀓𑁆𑀓𑀫𑁆𑀧𑀺 𑀲𑀯𑀺𑀘𑀸𑀭𑀁 𑀲𑀫𑀸𑀥𑀺𑀁 𑀪𑀸𑀯𑁂𑀫𑀻’’𑀢𑀺𑀆𑀤𑀺𑀯𑀘𑀦𑀁. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 ‘‘𑀮𑁄𑀓𑀺𑀬𑀁 𑀯𑀸 𑀮𑁄𑀓𑀼𑀢𑁆𑀢𑀭𑀫𑁂𑀯 𑀯𑀸’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁯. 𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁬. 𑀏𑀢𑁂𑀳𑀻𑀢𑀺 𑀤𑀼𑀘𑀺𑀦𑁆𑀢𑀺𑀢𑀸𑀤𑀻𑀳𑀺. 𑀏𑀢𑁂𑀦 𑀮𑀓𑁆𑀔𑀡𑀲𑀤𑁆𑀤𑀲𑁆𑀲 𑀓𑀭𑀡𑀢𑁆𑀣𑀢𑀫𑀸𑀳. 𑀢𑀸𑀦𑁂𑀯𑀸𑀢𑀺 𑀮𑀓𑁆𑀔𑀡𑀸𑀦𑀺 𑀏𑀯. 𑀢𑀲𑁆𑀲𑀸𑀢𑀺 𑀩𑀸𑀮𑀲𑁆𑀲. ‘‘𑀅𑀬𑀁 𑀩𑀸𑀮𑁄’’𑀢𑀺 𑀦𑀺𑀫𑀻𑀬𑀢𑀺 𑀲𑀜𑁆𑀘𑀸𑀦𑀻𑀬𑀢𑀺 𑀏𑀢𑁂𑀳𑀻𑀢𑀺 𑀩𑀸𑀮𑀦𑀺𑀫𑀺𑀢𑁆𑀢𑀸𑀦𑀺. 𑀅𑀧𑀤𑀸𑀦𑀁 𑀯𑀼𑀘𑁆𑀘𑀢𑀺 𑀯𑀺𑀔𑁆𑀬𑀸𑀢𑀁 𑀓𑀫𑁆𑀫𑀁. 𑀤𑀼𑀘𑀺𑀦𑁆𑀢𑀺𑀢𑀸𑀤𑀻𑀦𑀺 𑀘 𑀩𑀸𑀮𑁂 𑀯𑀺𑀔𑁆𑀬𑀸𑀢𑀸𑀦𑀺, 𑀅𑀯𑀥𑀸𑀭𑀡𑀪𑀸𑀯𑁂 𑀯𑀸, 𑀢𑀲𑁆𑀫𑀸 𑀩𑀸𑀮𑀲𑁆𑀲 𑀅𑀧𑀤𑀸𑀦𑀸𑀦𑀻𑀢𑀺 𑀩𑀸𑀮𑀸𑀧𑀤𑀸𑀦𑀸𑀦𑀺. 𑀅𑀪𑀺𑀚𑁆𑀛𑀸𑀤𑀻𑀳𑀺 𑀤𑀼𑀝𑁆𑀞𑀁 𑀤𑀽𑀲𑀺𑀢𑀁 𑀘𑀺𑀦𑁆𑀢𑁂𑀢𑀻𑀢𑀺 𑀤𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻. 𑀮𑁄𑀪𑀸𑀤𑀻𑀳𑀺 𑀤𑀼𑀝𑁆𑀞𑀁 𑀪𑀸𑀲𑀺𑀢𑀁 𑀫𑀼𑀲𑀸𑀯𑀸𑀤𑀸𑀤𑀺𑀁 𑀪𑀸𑀲𑀢𑀻𑀢𑀺 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻. 𑀢𑁂𑀲𑀁 𑀢𑁂𑀲𑀁𑀬𑁂𑀯 𑀯𑀲𑁂𑀦 𑀓𑀢𑁆𑀢𑀩𑁆𑀩𑀢𑁄 𑀤𑀼𑀓𑁆𑀓𑀝𑀓𑀫𑁆𑀫𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀁 𑀓𑀭𑁄𑀢𑀻𑀢𑀺 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻. 𑀢𑁂𑀦𑀸𑀳 ‘‘𑀘𑀺𑀦𑁆𑀢𑀬𑀦𑁆𑀢𑁄’’𑀢𑀺𑀆𑀤𑀺. 𑀢𑀸𑀦𑀺 𑀉𑀧𑀦𑀺𑀲𑁆𑀲𑀸𑀬 𑀚𑀸𑀢𑀦𑁆𑀢𑀺 𑀢𑀚𑁆𑀚𑀁. 𑀢𑀢𑁄 𑀏𑀯 𑀢𑁂𑀲𑀁 𑀲𑀸𑀭𑀼𑀧𑁆𑀧𑀁 𑀅𑀦𑀼𑀭𑀽𑀧𑀦𑁆𑀢𑀺 𑀢𑀲𑁆𑀲𑀸𑀭𑀼𑀧𑁆𑀧𑀁. 𑀢𑁂𑀦𑀸𑀳 ‘‘𑀢𑀚𑁆𑀚𑀸𑀢𑀺𑀓’’𑀦𑁆𑀢𑀺𑀆𑀤𑀺. 𑀓𑀘𑁆𑀙𑀫𑀸𑀦𑀸𑀬𑀸𑀢𑀺 𑀓𑀣𑀺𑀬𑀫𑀸𑀦𑀸𑀬.

𑁨𑁪𑁮. 𑀬𑀲𑁆𑀫𑀸 𑀲𑀢𑁆𑀢𑀸𑀦𑀁 𑀬𑀣𑀽𑀧𑀘𑀺𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑁄𑀓𑀸𑀲𑀸𑀦𑀺 𑀢𑀤𑀼𑀧𑀝𑁆𑀞𑀸𑀧𑀺𑀢𑀸𑀦𑀺 𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀫𑀭𑀡𑀲𑁆𑀲 𑀆𑀲𑀦𑁆𑀦𑀓𑀸𑀮𑁂 𑀘𑀺𑀢𑁆𑀢𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀸𑀦𑀺, 𑀢𑀤𑀸 𑀑𑀮𑀫𑁆𑀩𑀦𑁆𑀢𑀸𑀦𑀺 𑀯𑀺𑀬 𑀅𑀪𑀺𑀪𑀯𑀦𑁆𑀢𑀸𑀦𑀺 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀸𑀦𑀺 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀑𑀮𑀫𑁆𑀩𑀦𑀸𑀤𑀺𑀆𑀓𑀸𑀭𑁂𑀦 𑀳𑀺 𑀢𑀸𑀦𑀺 𑀉𑀧𑀝𑁆𑀞𑀳𑀦𑁆𑀢𑀻’’𑀢𑀺. 𑀉𑀧𑀝𑁆𑀞𑀸𑀦𑀸𑀓𑀸𑀭𑁄 𑀏𑀯 𑀢𑀤𑀸 𑀘𑀺𑀢𑁆𑀢𑀲𑁆𑀲 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀆𑀳 𑁋 ‘‘𑀢𑀲𑁆𑀫𑀺𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑁂 𑀆𑀧𑀸𑀣𑀕𑀢𑁂’’𑀢𑀺.

𑁨𑁪𑁯. 𑀦 𑀲𑀓𑁆𑀓𑀸𑀢𑀺 𑀦 𑀯𑀤𑀢𑀻𑀢𑀺 𑀏𑀢𑁂𑀦 𑀤𑁆𑀯𑁂𑀧𑀺 𑀧𑀝𑀺𑀲𑁂𑀥𑀸 𑀧𑀓𑀢𑀺𑀅𑀢𑁆𑀣𑀸𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀦 𑀲𑀼𑀓𑀭𑀸𑀢𑀺 𑀧𑀦 𑀇𑀫𑀺𑀦𑀸 𑀤𑀼𑀓𑁆𑀓𑀭𑀪𑀸𑀯𑁄 𑀤𑀻𑀧𑀺𑀢𑁄, 𑀤𑀼𑀓𑁆𑀓𑀭𑀜𑁆𑀘 𑀢𑀸𑀯 𑀉𑀧𑀸𑀬𑁂𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀦 𑀲𑀼𑀓𑀭𑀁 𑀧𑀦𑀸’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀫𑀦𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀁𑀯𑀺𑀚𑁆𑀛𑀦𑁂𑀦. 𑀅𑀲𑁆𑀲𑀸𑀢𑀺 𑀘𑁄𑀭𑀲𑁆𑀲. 𑀇𑀢𑁄 𑀉𑀢𑁆𑀢𑀭𑀺𑀧𑀻𑀢𑀺 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀲𑀸𑀬𑀦𑁆𑀳𑀲𑀫𑀬𑀜𑁆𑀘 𑀲𑀢𑁆𑀢𑀺𑀲𑀢𑁂𑀦.

𑁨𑁫𑁦. 𑀲𑀗𑁆𑀔𑀫𑁆𑀧𑀺 𑀦 𑀉𑀧𑁂𑀢𑀻𑀢𑀺 𑀇𑀫𑀺𑀦𑀸 𑀲𑀗𑁆𑀔𑀸𑀢𑀩𑁆𑀩𑀫𑀢𑁆𑀢𑀁 𑀦𑀢𑁆𑀣𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀕𑀡𑀦𑀸𑀫𑀢𑁆𑀢𑀫𑁆𑀧𑀺 𑀦 𑀕𑀘𑁆𑀙𑀢𑀻’’𑀢𑀺. 𑀉𑀧𑀦𑀺𑀓𑁆𑀔𑁂𑀧𑀦𑀫𑀢𑁆𑀢𑀫𑁆𑀧𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀮𑀪𑀸𑀕𑀦𑁆𑀢𑀺 𑀓𑀮𑀸𑀦𑀁 𑀲𑀗𑁆𑀕𑀡𑀦𑀓𑁄𑀝𑁆𑀞𑀸𑀲𑀁. 𑀢𑁂𑀦𑀸𑀳 ‘‘𑀲𑀢𑀺𑀫𑀁 𑀓𑀮’’𑀦𑁆𑀢𑀺𑀆𑀤𑀺. 𑀑𑀮𑁄𑀓𑀺𑀢𑀫𑀢𑁆𑀢𑀫𑁆𑀧𑀻𑀢𑀺 𑀉𑀧𑀦𑀺𑀓𑁆𑀔𑁂𑀧𑀦𑀯𑀲𑁂𑀦 𑀑𑀮𑁄𑀓𑀦𑀫𑀢𑁆𑀢𑀓𑀫𑁆𑀧𑀺. 𑀢𑀁 𑀓𑀫𑁆𑀫𑀓𑀸𑀭𑀡𑀦𑁆𑀢𑀺 𑀢𑀁 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀁 𑀘𑀢𑀼𑀦𑁆𑀦𑀫𑁆𑀧𑀺 𑀧𑀲𑁆𑀲𑀸𑀦𑀁 𑀯𑀲𑁂𑀦 𑀲𑀫𑁆𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀭𑁄𑀦𑁆𑀢𑀺𑀬𑁂𑀯, 𑀧𑀸𑀴𑀺𑀬𑀁 𑀧𑀦 𑀏𑀓𑀧𑀲𑁆𑀲𑀯𑀲𑁂𑀦 𑀆𑀕𑀢𑀸. 𑀕𑁂𑀳𑀲𑁆𑀲𑀸𑀢𑀺 𑀫𑀳𑀢𑁄 𑀕𑁂𑀳𑀲𑁆𑀲. 𑀲𑀩𑁆𑀩𑀢𑁄𑀢𑀺 𑀲𑀩𑁆𑀩𑀸𑀯𑀬𑀯𑀢𑁄. 𑀲𑀫𑁆𑀧𑀚𑁆𑀚𑀮𑀺𑀢𑁂 𑀏𑀓𑀚𑀸𑀮𑀻𑀪𑀽𑀢𑁂. 𑀲𑀼𑀧𑀓𑁆𑀓𑀼𑀣𑀺𑀢𑀸𑀬𑀸𑀢𑀺 𑀲𑀼𑀝𑁆𑀞𑀼 𑀦𑀺𑀧𑀓𑁆𑀓𑀸𑀬.

𑀯𑀺𑀪𑀢𑁆𑀢𑁄𑀢𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀓𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀓𑀫𑁆𑀫𑀼𑀦𑀸 𑀯𑀺𑀪𑀢𑁆𑀢𑁄 𑀯𑀺𑀬 𑀦𑀺𑀩𑁆𑀩𑀢𑁆𑀢𑁄. 𑀅𑀬𑁄𑀧𑀸𑀓𑀸𑀭𑁂𑀦 𑀧𑀭𑀺𑀢𑁄 𑀅𑀢𑁆𑀢𑁄 𑀕𑀳𑀺𑀢𑁄𑀢𑀺 𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀢𑁆𑀢𑁄 𑀧𑀭𑀺𑀓𑁆𑀔𑀺𑀢𑁆𑀢𑁄.

𑀬𑀫𑀓𑀕𑁄𑀴𑀓𑀸𑀢𑀺 𑀤𑀸𑀭𑀓𑀸𑀦𑀁 𑀓𑀻𑀴𑀦𑀬𑀼𑀕𑀴𑀸. 𑀏𑀯𑀫𑁆𑀧𑀺 𑀤𑀼𑀓𑁆𑀔𑁄𑀢𑀺 𑀬𑀣𑀸𑀯𑀼𑀢𑁆𑀢𑀉𑀲𑁆𑀲𑀤𑀦𑀺𑀭𑀬𑀯𑀲𑁂𑀦𑀧𑀺 𑀲𑁄𑀢-𑀖𑀸𑀦-𑀚𑀺𑀯𑁆𑀳𑀸-𑀓𑀸𑀬-𑀫𑀦𑁄-𑀕𑁄𑀘𑀭𑀢𑀸𑀯𑀲𑁂𑀦𑀧𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀤𑀼𑀓𑁆𑀔𑁄𑀢𑀺.

𑁨𑁫𑁧. 𑀤𑀦𑁆𑀢𑁂𑀳𑀺 𑀉𑀮𑁆𑀮𑁂𑀳𑀺𑀢𑁆𑀯𑀸𑀢𑀺 𑀉𑀢𑁆𑀢𑀭𑀤𑀦𑁆𑀢𑁂𑀳𑀺 𑀅𑀜𑁆𑀙𑀺𑀢𑁆𑀯𑀸. 𑀭𑀲𑀯𑀲𑁂𑀦 𑀅𑀢𑀺𑀢𑁆𑀢𑁄 𑀅𑀲𑁆𑀲𑀸𑀤𑁄 𑀭𑀲𑀸𑀤𑁄. 𑀢𑁂𑀦𑀸𑀳 ‘‘𑀭𑀲𑀕𑁂𑀥𑁂𑀦 𑀧𑀭𑀺𑀪𑀼𑀢𑁆𑀢𑀭𑀲𑁄’’𑀢𑀺.

𑁨𑁫𑁨. 𑀤𑀼𑀭𑀽𑀧𑁄𑀢𑀺 𑀯𑀺𑀭𑀽𑀧𑁄. 𑀤𑀼𑀤𑁆𑀤𑀲𑁄𑀢𑀺 𑀢𑁂𑀦𑁂𑀯 𑀯𑀺𑀭𑀽𑀧𑀪𑀸𑀯𑁂𑀦 𑀅𑀦𑀺𑀝𑁆𑀞𑀤𑀲𑁆𑀲𑀦𑁄. 𑀮𑀓𑀼𑀡𑁆𑀞𑀓𑁄𑀢𑀺 𑀭𑀲𑁆𑀲𑁄. 𑀧𑀯𑀺𑀝𑁆𑀞𑀕𑀻𑀯𑁄𑀢𑀺 𑀔𑀦𑁆𑀥𑀦𑁆𑀢𑀭𑀁 𑀅𑀦𑀼𑀧𑀯𑀺𑀝𑁆𑀞𑀕𑀻𑀯𑁄. 𑀫𑀳𑁄𑀤𑀭𑁄𑀢𑀺 𑀯𑀺𑀧𑀼𑀮𑀓𑀼𑀘𑁆𑀙𑀺. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀮𑀓𑀼𑀡𑁆𑀝𑀓𑀸 𑀲𑀢𑁆𑀢𑀸 𑀭𑀲𑁆𑀲𑀕𑀻𑀯𑀸 𑀧𑀼𑀣𑀼𑀮𑀓𑀼𑀘𑁆𑀙𑀺𑀓𑀸𑀯 𑀳𑁄𑀦𑁆𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀓𑀸𑀡𑁄 𑀦𑀸𑀫 𑀘𑀓𑁆𑀔𑀼𑀯𑀺𑀓𑀮𑁄𑀢𑀺 𑀯𑀼𑀢𑁆𑀢𑀁 𑁋 ‘‘𑀏𑀓𑀓𑁆𑀔𑀺𑀓𑀸𑀡𑁄 𑀯𑀸 𑀉𑀪𑀬𑀓𑁆𑀔𑀺𑀓𑀸𑀡𑁄 𑀯𑀸’’𑀢𑀺. 𑀓𑀼𑀡𑀻𑀢𑀺 𑀳𑀢𑁆𑀣𑀯𑀺𑀓𑀮𑁄 𑀯𑀼𑀘𑁆𑀘𑀢𑀻𑀢𑀺 𑀆𑀳 𑁋 ‘‘𑀏𑀓𑀳𑀢𑁆𑀣𑀓𑀼𑀡𑀻 𑀯𑀸 𑀉𑀪𑀬𑀳𑀢𑁆𑀣𑀓𑀼𑀡𑀻 𑀯𑀸’’𑀢𑀺. 𑀯𑀸𑀢𑀸𑀤𑀺𑀦𑀸 𑀉𑀧𑀳𑀢𑀓𑀸𑀬𑀧𑀓𑁆𑀔𑁄 𑀇𑀥 𑀧𑀓𑁆𑀔𑀳𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀧𑀓𑁆𑀔𑀺𑀳𑀢𑁄𑀢𑀺 𑀆𑀳 𑁋 ‘‘𑀧𑀓𑁆𑀔𑀳𑀢𑁄𑀢𑀺 𑀧𑀻𑀞𑀲𑀧𑁆𑀧𑀻’’𑀢𑀺. 𑀤𑀼𑀓𑁆𑀔𑀸𑀦𑀼𑀧𑀩𑀦𑁆𑀥𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀧𑀭𑀸𑀧𑀭𑀚𑀸𑀢𑀻𑀲𑀼 𑀯𑀺𑀧𑀸𑀓𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁.

𑀓𑀮𑀻𑀬𑀢𑀺 𑀔𑀮𑀻𑀬𑀢𑀺 𑀅𑀧𑁆𑀧𑀳𑀻𑀬𑀢𑀺 𑀲𑀸𑀲𑀦𑀁 𑀏𑀢𑁂𑀦𑀸𑀢𑀺 𑀓𑀮𑀺, 𑀚𑀼𑀢𑀧𑀭𑀸𑀚𑀬𑁄. 𑀲𑁄 𑀏𑀯 𑀕𑀳𑀲𑀤𑀺𑀲𑀢𑀸𑀬 ‘‘𑀓𑀮𑀺𑀕𑁆𑀕𑀳𑁄’’𑀢𑀺 𑀯𑀼𑀢𑁆𑀢𑁄. 𑀅𑀥𑀺𑀩𑀦𑁆𑀥𑀦𑁆𑀢𑀺 𑀓𑀼𑀝𑀼𑀫𑁆𑀩𑀲𑁆𑀲 𑀅𑀥𑀺𑀯𑀼𑀢𑁆𑀣𑀲𑁆𑀲 𑀫𑀽𑀮𑀪𑀽𑀢𑀲𑁆𑀲 𑀅𑀢𑁆𑀢𑀦𑁄 𑀩𑀦𑁆𑀥𑀺𑀢𑀩𑁆𑀩𑀢𑀁. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑀸𑀧𑀺 𑀩𑀦𑁆𑀥𑀁 𑀦𑀺𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀩𑀸𑀮𑀪𑀽𑀫𑀺𑀬𑀸 𑀩𑀸𑀮𑀪𑀸𑀯𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀺 𑀦𑀺𑀭𑀬𑀕𑀸𑀫𑀺𑀓𑀫𑁆𑀫𑀓𑀸𑀭𑀺𑀢𑀸𑀢𑀺 ‘‘𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀢𑀕𑁆𑀕𑀳𑀡𑁂𑀦𑁂𑀯 𑀧𑀦 𑀢𑀢𑁄 𑀫𑀼𑀤𑀼𑀫𑀼𑀤𑀼𑀢𑀭𑀸𑀤𑀺𑀓𑀫𑁆𑀫𑀯𑀲𑁂𑀦 𑀲𑁂𑀲𑀸𑀧𑀸𑀬𑁂𑀲𑀼 𑀅𑀧𑀭𑀸𑀧𑀭𑀦𑀺𑀩𑁆𑀩𑀢𑁆𑀢𑀸𑀤𑀺𑀩𑀸𑀮𑀪𑀽𑀫𑀺 𑀯𑀺𑀪𑀸𑀯𑀺𑀢𑀸 𑀳𑁄𑀢𑀻𑀢𑀺.

𑁨𑁫𑁩. 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑀸𑀢𑀺 ‘‘𑀩𑀸𑀮𑁄 𑀅𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀘𑀦𑀲𑁆𑀲 ‘‘𑀧𑀡𑁆𑀟𑀺𑀢𑁄 𑀅𑀬’’𑀦𑁆𑀢𑀺 𑀏𑀢𑁂𑀳𑀺 𑀮𑀓𑁆𑀔𑀻𑀬𑀢𑀻𑀢𑀺𑀆𑀤𑀺𑀦𑀸 𑀅𑀦𑀼𑀲𑀸𑀭𑁂𑀦. 𑀫𑀦𑁄𑀲𑀼𑀘𑀭𑀺𑀢𑀸𑀤𑀻𑀦𑀁 𑀯𑀲𑁂𑀦𑀸𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀦𑀪𑀺𑀚𑁆𑀛𑀸-𑀅𑀩𑁆𑀬𑀸𑀧𑀸𑀤-𑀲𑀫𑁆𑀫𑀸𑀤𑀲𑁆𑀲𑀦𑀁 𑀲𑀼𑀘𑀺𑀦𑁆𑀢𑀺𑀢𑀫𑁂𑀯 𑀘𑀺𑀦𑁆𑀢𑁂𑀢𑀻𑀢𑀺𑀆𑀤𑀺𑀦𑀸 𑀫𑀦𑁄𑀲𑀼𑀘𑀭𑀺𑀢𑀸𑀦𑀁 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀘𑀓𑁆𑀓𑀭𑀢𑀦𑀯𑀡𑁆𑀡𑀦𑀸

𑁨𑁫𑁬. 𑀉𑀧𑁄𑀲𑀣𑀁 (𑀤𑀻. 𑀦𑀺. 𑀝𑀻. 𑁨.𑁨𑁪𑁩) 𑀯𑀼𑀘𑁆𑀘𑀢𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀲𑀩𑁆𑀩𑀤𑀺𑀯𑀲𑁂𑀲𑀼 𑀕𑀳𑀝𑁆𑀞𑁂𑀳𑀺 𑀭𑀓𑁆𑀔𑀺𑀢𑀩𑁆𑀩𑀲𑀻𑀮𑀁, 𑀲𑀫𑀸𑀤𑀸𑀦𑀯𑀲𑁂𑀦 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀉𑀧𑁄𑀲𑀣𑀺𑀓𑁄, 𑀢𑀲𑁆𑀲. 𑀢𑁂𑀦𑀸𑀳 ‘‘𑀲𑀫𑀸𑀤𑀺𑀦𑁆𑀦𑀉𑀧𑁄𑀲𑀣𑀗𑁆𑀕𑀲𑁆𑀲𑀸’’𑀢𑀺. 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂, 𑀬𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀲𑀁𑀯𑀢𑁆𑀢𑀦𑀺𑀬-𑀤𑀸𑀦-𑀲𑀻𑀮𑀸𑀤𑀺-𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑀫𑀼𑀤𑀸𑀕𑀫𑀲𑀫𑁆𑀧𑀦𑁆𑀦𑁄 𑀧𑀽𑀭𑀺𑀢𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁄 𑀓𑀸𑀤𑀻𑀧𑀤𑁂𑀲𑀯𑀺𑀲𑁂𑀲𑀧𑀘𑁆𑀘𑀸𑀚𑀸𑀢𑀺𑀬𑀸 𑀘𑁂𑀯 𑀓𑀼𑀮𑀭𑀽𑀧𑀪𑁄𑀕𑀸𑀥𑀺𑀧𑀢𑁂𑀬𑁆𑀬𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀫𑁆𑀧𑀢𑁆𑀢𑀺𑀬𑀸 𑀘 𑀢𑀤𑀦𑀼𑀭𑀽𑀧𑁂 𑀅𑀢𑁆𑀢𑀪𑀸𑀯𑁂 𑀞𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂. 𑀢𑀸𑀤𑀺𑀲𑁂 𑀳𑀺 𑀓𑀸𑀮𑁂 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀻 𑀧𑀼𑀭𑀺𑀲𑀼𑀢𑁆𑀢𑀫𑁄 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀯𑀺𑀲𑀼𑀤𑁆𑀥𑀲𑀻𑀮𑁄 𑀅𑀦𑀼𑀧𑁄𑀲𑀣𑀁 𑀲𑀢𑀲𑀳𑀲𑁆𑀲𑀯𑀺𑀲𑁆𑀲𑀚𑁆𑀚𑀦𑀸𑀤𑀺𑀦𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀢𑀺, 𑀦 𑀬𑀤𑀸 𑀘𑀓𑁆𑀓𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀏𑀯. 𑀢𑁂𑀦𑀸𑀳 𑁋 ‘‘𑀧𑀸𑀢𑁄…𑀧𑁂… 𑀥𑀫𑁆𑀫𑀢𑀸’’𑀢𑀺. (𑀢𑀢𑁆𑀣 𑀤𑀫𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, 𑀲𑀁𑀬𑀫𑁄 𑀲𑀻𑀮𑀲𑀁𑀯𑀭𑁄.)

𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀼𑀜𑁆𑀜𑀓𑀫𑁆𑀫𑀧𑀘𑁆𑀘𑀬𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀪𑀸𑀯𑀸𑀯𑀳𑀤𑀸𑀦𑀤𑀫𑀲𑀁𑀬𑀫𑀸𑀤𑀺𑀧𑀼𑀜𑁆𑀜𑀓𑀫𑁆𑀫𑀳𑁂𑀢𑀼𑀓𑀁. 𑀦𑀻𑀮𑀫𑀡𑀺𑀲𑀗𑁆𑀖𑀸𑀝𑀲𑀤𑀺𑀲𑀦𑁆𑀢𑀺 𑀇𑀦𑁆𑀤𑀦𑀻𑀮𑀫𑀡𑀺𑀲𑀜𑁆𑀘𑀬𑀲𑀫𑀸𑀦𑀁. 𑀤𑀺𑀩𑁆𑀩𑀸𑀦𑀼𑀪𑀸𑀯𑀬𑀼𑀢𑁆𑀢𑀢𑁆𑀢𑀸𑀢𑀺 𑀤𑀲𑁆𑀲𑀦𑀻𑀬𑀢𑀸 𑀫𑀦𑀼𑀜𑁆𑀜𑀖𑁄𑀲𑀢𑀸 𑀆𑀓𑀸𑀲𑀕𑀸𑀫𑀺𑀢𑀸 𑀑𑀪𑀸𑀲𑀯𑀺𑀲𑁆𑀲𑀚𑁆𑀚𑀦𑀸 𑀅𑀧𑁆𑀧𑀝𑀺𑀖𑀸𑀢𑀢𑀸 𑀭𑀜𑁆𑀜𑁄 𑀇𑀘𑁆𑀙𑀺𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀓𑀸𑀭𑀡𑀢𑀸𑀢𑀺 𑀏𑀯𑀫𑀸𑀤𑀻𑀳𑀺 𑀤𑀺𑀩𑁆𑀩𑀲𑀤𑀺𑀲𑁂𑀳𑀺 𑀆𑀦𑀼𑀪𑀸𑀯𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸. 𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀲𑀩𑁆𑀩𑁂𑀳𑀺 𑀲𑀼𑀦𑁆𑀤𑀭𑁂𑀳𑀺 𑀆𑀓𑀸𑀭𑁂𑀳𑀺. 𑀧𑀭𑀺𑀧𑀽𑀭𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁. 𑀲𑀸 𑀘𑀲𑁆𑀲 𑀧𑀸𑀭𑀺𑀧𑀽𑀭𑀺 𑀇𑀤𑀸𑀦𑁂𑀯 𑀯𑀺𑀢𑁆𑀣𑀸𑀭𑀻𑀬𑀢𑀺.

𑀧𑀦𑀸𑀴𑀻𑀢𑀺 𑀙𑀺𑀤𑁆𑀤𑀁. 𑀲𑀼𑀤𑁆𑀥𑀲𑀺𑀦𑀺𑀤𑁆𑀥𑀤𑀦𑁆𑀢𑀧𑀦𑁆𑀢𑀺𑀬𑀸 𑀦𑀺𑀩𑁆𑀩𑀺𑀯𑀭𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀸𑀪𑀺𑀧𑀦𑀸𑀴𑀺 𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁂𑀲𑀽𑀢𑀺 𑀦𑀸𑀪𑀺𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁂 𑀘𑁂𑀯 𑀦𑀸𑀪𑀺𑀬𑀸 𑀧𑀦𑀸𑀴𑀺𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁂 𑀘. 𑀲𑀼𑀯𑀺𑀪𑀢𑁆𑀢𑀸𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀲𑀁𑀓𑀺𑀡𑁆𑀡𑀢𑁆𑀢𑀸 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀸. 𑀧𑀭𑀺𑀘𑁆𑀙𑁂𑀤𑀮𑁂𑀔𑀦𑁆𑀢𑀭𑁂𑀲𑀼 𑀫𑀡𑀺𑀓𑀸 𑀲𑀼𑀯𑀺𑀪𑀢𑁆𑀢𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀯𑀤𑀦𑁆𑀢𑀺.

𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀸𑀮𑀸𑀓𑀫𑁆𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀭𑀢𑁆𑀢𑀸𑀢𑀺𑀆𑀤𑀻𑀲𑀼 𑀲𑀼𑀭𑀢𑁆𑀢𑀕𑁆𑀕𑀳𑀡𑁂𑀦 𑀫𑀳𑀸𑀦𑀸𑀫𑀯𑀡𑁆𑀡𑀢𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀲𑀼𑀤𑁆𑀥𑀕𑁆𑀕𑀳𑀡𑁂𑀦 𑀲𑀁𑀓𑀺𑀮𑀺𑀝𑁆𑀞𑀢𑀁, 𑀲𑀺𑀦𑀺𑀤𑁆𑀥𑀕𑁆𑀕𑀳𑀡𑁂𑀦 𑀮𑀽𑀔𑀢𑀁. 𑀓𑀸𑀫𑀁 𑀢𑀲𑁆𑀲 𑀘𑀓𑁆𑀓𑀭𑀢𑀦𑀲𑁆𑀲 𑀦𑁂𑀫𑀺𑀫𑀡𑁆𑀟𑀮𑀁 𑀅𑀲𑀦𑁆𑀥𑀺𑀓𑀁𑀯 𑀦𑀺𑀩𑁆𑀩𑀢𑁆𑀢𑀁, 𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀦 𑀓𑁂𑀯𑀮𑀁 𑀧𑀯𑀸𑀴𑀯𑀡𑁆𑀡𑁄𑀯 𑀦 𑀲𑁄𑀪𑀢𑀻𑀢𑀺 𑀧𑀓𑀢𑀺𑀘𑀓𑁆𑀓𑀲𑁆𑀲 𑀲𑀦𑁆𑀥𑀺𑀬𑀼𑀢𑁆𑀢𑁂𑀲𑀼 𑀞𑀸𑀦𑁂𑀲𑀼 𑀭𑀢𑁆𑀢𑀚𑀫𑁆𑀩𑀼𑀦𑀤𑀧𑀭𑀺𑀓𑁆𑀔𑀢𑀁 𑀅𑀳𑁄𑀲𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀦𑁆𑀥𑀻𑀲𑀼 𑀧𑀦𑀲𑁆𑀲𑀸’’𑀢𑀺𑀆𑀤𑀺.

𑀦𑁂𑀫𑀺𑀫𑀡𑁆𑀟𑀮𑀧𑀺𑀝𑁆𑀞𑀺𑀬𑀦𑁆𑀢𑀺 𑀦𑁂𑀫𑀺𑀫𑀡𑁆𑀟𑀮𑀲𑁆𑀲 𑀧𑀺𑀝𑁆𑀞𑀺𑀧𑀤𑁂𑀲𑁂. 𑀤𑀲𑀦𑁆𑀦𑀁 𑀤𑀲𑀦𑁆𑀦𑀁 𑀅𑀭𑀸𑀦𑀫𑀦𑁆𑀢𑀭𑁂𑀢𑀺 𑀤𑀲𑀦𑁆𑀦𑀁 𑀤𑀲𑀦𑁆𑀦𑀁 𑀅𑀭𑀸𑀦𑀁 𑀅𑀦𑁆𑀢𑀭𑀲𑀫𑀻𑀧𑁂 𑀧𑀤𑁂𑀲𑁂. 𑀙𑀺𑀤𑁆𑀤𑀫𑀡𑁆𑀟𑀮𑀘𑀺𑀢𑁆𑀢𑁄𑀢𑀺 𑀫𑀡𑁆𑀟𑀮𑀲𑀡𑁆𑀞𑀸𑀦𑀙𑀺𑀤𑁆𑀤𑀯𑀺𑀘𑀺𑀢𑁆𑀢𑁄. 𑀲𑀼𑀓𑀼𑀲𑀮𑀲𑀫𑀦𑁆𑀦𑀸𑀳𑀢𑀲𑁆𑀲𑀸𑀢𑀺 𑀲𑀼𑀝𑁆𑀞𑀼 𑀓𑀼𑀲𑀮𑁂𑀦 𑀲𑀺𑀧𑁆𑀧𑀺𑀦𑀸 𑀧𑀳𑀢𑀲𑁆𑀲, 𑀯𑀸𑀤𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀕𑁆𑀕𑀽𑀢𑀺 𑀫𑀦𑁄𑀭𑀫𑁄 𑀭𑀚𑀦𑀻𑀬𑁄𑀢𑀺 𑀲𑀼𑀡𑀦𑁆𑀢𑀸𑀦𑀁 𑀭𑀸𑀕𑀼𑀧𑁆𑀧𑀸𑀤𑀓𑁄. 𑀓𑀫𑀦𑀻𑀬𑁄𑀢𑀺 𑀓𑀦𑁆𑀢𑁄. 𑀲𑀫𑁄𑀲𑀭𑀺𑀢𑀓𑀼𑀲𑀼𑀫𑀤𑀸𑀫𑀸𑀢𑀺 𑀑𑀮𑀫𑁆𑀩𑀺𑀢𑀲𑀼𑀕𑀦𑁆𑀥𑀓𑀼𑀲𑀼𑀫𑀤𑀸𑀫𑀸. 𑀦𑁂𑀫𑀺𑀧𑀭𑀺𑀓𑁆𑀔𑁂𑀧𑀲𑁆𑀲𑀸𑀢𑀺 𑀦𑁂𑀫𑀺𑀧𑀭𑀺𑀬𑀦𑁆𑀢𑀧𑀭𑀺𑀓𑁆𑀔𑁂𑀧𑀲𑁆𑀲. 𑀦𑀸𑀪𑀺𑀧𑀦𑀸𑀴𑀺𑀬𑀸 𑀤𑁆𑀯𑀺𑀦𑁆𑀦𑀁 𑀧𑀲𑁆𑀲𑀸𑀦𑀁 𑀯𑀲𑁂𑀦 ‘‘𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀸𑀪𑀺𑀧𑀦𑀸𑀴𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀓𑀸 𑀏𑀯 𑀳𑀺 𑀲𑀸 𑀧𑀦𑀸𑀴𑀺. 𑀬𑁂𑀳𑀻𑀢𑀺 𑀬𑁂𑀳𑀺 𑀤𑁆𑀯𑀻𑀳𑀺 𑀲𑀻𑀳𑀫𑀼𑀔𑁂𑀳𑀺. 𑀧𑀼𑀦 𑀬𑁂𑀳𑀻𑀢𑀺 𑀫𑀼𑀢𑁆𑀢𑀸𑀓𑀮𑀸𑀧𑁂𑀳𑀺.

𑀑𑀥𑀸𑀧𑀬𑀫𑀸𑀦𑀦𑁆𑀢𑀺 𑀲𑁄𑀢𑀼𑀁 𑀅𑀯𑀳𑀺𑀢𑀸𑀦𑀺 𑀓𑀼𑀭𑀼𑀫𑀸𑀦𑀁. 𑀘𑀦𑁆𑀤𑁄 𑀧𑀼𑀭𑀢𑁄, 𑀘𑀓𑁆𑀓𑀭𑀢𑀦𑀁 𑀧𑀘𑁆𑀙𑀸𑀢𑀺 𑀏𑀯𑀁 𑀧𑀼𑀩𑁆𑀩𑀸𑀧𑀭𑀺𑀬𑁂𑀦 𑀧𑀼𑀩𑁆𑀩𑀸𑀧𑀭𑀪𑀸𑀕𑁂𑀦.

𑀅𑀦𑁆𑀢𑁂 𑀧𑀼𑀭𑀲𑁆𑀲𑀸𑀢𑀺 𑀅𑀦𑀼𑀭𑀸𑀥𑀧𑀼𑀭𑁂 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑀲𑁆𑀲 𑀉𑀢𑁆𑀢𑀭𑀲𑀻𑀳𑀧𑀜𑁆𑀚𑀭𑀆𑀲𑀦𑁆𑀦𑁂 𑀢𑀤𑀸 𑀭𑀜𑁆𑀜𑁄 𑀧𑀸𑀲𑀸𑀤𑁂 𑀢𑀸𑀤𑀺𑀲𑀲𑁆𑀲 𑀉𑀢𑁆𑀢𑀭𑀤𑀺𑀲𑀸𑀬 𑀲𑀻𑀳𑀧𑀜𑁆𑀚𑀭𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀼𑀔𑁂𑀦 𑀲𑀓𑁆𑀓𑀸𑀢𑀺 𑀓𑀺𑀜𑁆𑀘𑀺 𑀅𑀦𑀸𑀭𑀼𑀳𑀺𑀢𑁆𑀯𑀸 𑀲𑀭𑀻𑀭𑀜𑁆𑀘 𑀅𑀦𑀼𑀮𑁆𑀮𑀗𑁆𑀖𑀺𑀢𑁆𑀯𑀸 𑀬𑀣𑀸𑀞𑀺𑀢𑁂𑀦𑁂𑀯 𑀳𑀢𑁆𑀣𑁂𑀦 𑀧𑀼𑀧𑁆𑀨𑀫𑀼𑀝𑁆𑀞𑀺𑀬𑁄 𑀔𑀺𑀧𑀺𑀢𑁆𑀯𑀸 𑀲𑀼𑀔𑁂𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀽𑀚𑁂𑀢𑀼𑀁.

𑀦𑀸𑀦𑀸𑀯𑀺𑀭𑀸𑀕𑀭𑀢𑀦𑀧𑁆𑀧𑀪𑀸𑀲𑀫𑀼𑀚𑁆𑀚𑀮𑀦𑁆𑀢𑀺 𑀦𑀸𑀦𑀸𑀯𑀺𑀥𑀘𑀺𑀢𑁆𑀢𑀯𑀡𑁆𑀡𑀭𑀢𑀦𑁄𑀪𑀸𑀲𑀧𑀪𑀲𑁆𑀲𑀭𑀁. 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑁂𑀢𑀺. 𑀆𑀕𑀦𑁆𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄 𑀉𑀧𑀭𑀺 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑁂.

𑀲𑀦𑁆𑀦𑀺𑀯𑁂𑀲𑀓𑁆𑀔𑀫𑁄𑀢𑀺 𑀔𑀦𑁆𑀥𑀯𑀸𑀭𑀲𑀦𑁆𑀦𑀺𑀯𑁂𑀲𑀬𑁄𑀕𑁆𑀬𑁄. 𑀲𑀼𑀮𑀪𑀸𑀳𑀸𑀭𑀽𑀧𑀓𑀭𑀡𑁄𑀢𑀺 𑀲𑀼𑀔𑁂𑀦𑁂𑀯 𑀮𑀤𑁆𑀥𑀩𑁆𑀩𑀥𑀜𑁆𑀜𑀕𑁄𑀭𑀲𑀤𑀸𑀭𑀼𑀢𑀺𑀡𑀸𑀤𑀺𑀪𑁄𑀚𑀦𑀲𑀸𑀥𑀦𑁄. 𑀧𑀭𑀘𑀓𑁆𑀓𑀦𑁆𑀢𑀺 𑀧𑀭𑀲𑁆𑀲 𑀭𑀜𑁆𑀜𑁄 𑀲𑁂𑀦𑀸, 𑀆𑀡𑀸 𑀯𑀸.