𑁮. 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀓𑀫𑁆𑀫𑀁𑀬𑁂𑀯 𑀓𑀫𑁆𑀫𑀦𑁆𑀢𑁄, 𑀲𑁄 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀁 ‘‘𑀓𑀫𑁆𑀫𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀓𑀫𑁆𑀫𑀦𑁆𑀢𑀝𑁆𑀞𑀸𑀦’’𑀦𑁆𑀢𑀺. 𑀢𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀩𑀼𑀤𑁆𑀥𑀕𑀼𑀡𑁂𑀳𑀺. 𑀢𑁂 𑀧𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀫𑀼𑀔𑀸𑀢𑀺 𑀓𑀢𑁆𑀯𑀸 𑀆𑀳 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀥𑀫𑁆𑀫𑁂𑀳𑀻’’𑀢𑀺. 𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀅𑀦𑀯𑀲𑁂𑀲𑀁, 𑀏𑀢𑁆𑀢𑀓𑁄 𑀕𑀼𑀡𑀸𑀦𑀁 𑀧𑀓𑀸𑀭𑀪𑁂𑀤𑁄, 𑀢𑁂𑀲𑀼 𑀓𑀺𑀜𑁆𑀘𑀺𑀧𑀺 𑀧𑀓𑀸𑀭𑀁 𑀅𑀦𑀯𑀲𑁂𑀲𑁂𑀢𑁆𑀯𑀸. 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀳𑀺 𑀲𑀩𑁆𑀩𑀦𑁆𑀢𑀺 𑀬𑀢𑁆𑀢𑀓𑀸 𑀕𑀼𑀡𑀪𑀸𑀕𑀸, 𑀢𑁂𑀳𑀺 𑀲𑀩𑁆𑀩𑁂𑀳𑀺 𑀅𑀦𑀯𑀲𑁂𑀲𑀁 𑀦𑀺𑀲𑁆𑀲𑁂𑀲𑀫𑁂𑀯 𑀓𑀢𑁆𑀯𑀸. 𑀬𑁄𑀧𑀺 𑀅𑀳𑁄𑀲𑀻𑀢𑀺 𑀬𑁄𑀧𑀺 𑀓𑁄𑀲𑀫𑁆𑀩𑀺𑀯𑀸𑀲𑀻𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀓𑁄𑀲𑀫𑁆𑀩𑀺𑀬𑀁 𑀓𑀮𑀳𑁄 𑀅𑀳𑁄𑀲𑀺. 𑀲𑁄𑀧𑀺 𑀢𑀢𑁆𑀣𑁂𑀯 𑀉𑀧𑁆𑀧𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀉𑀧𑁆𑀧𑀦𑁆𑀦𑀫𑀢𑁆𑀢𑁄 𑀯𑀽𑀧𑀲𑀫𑀺𑀢𑁄. 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀧𑀦𑀲𑁆𑀲𑀸𑀢𑀺 𑀅𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀧𑀦. 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸 𑀚𑀸𑀢𑀸, 𑀓𑀣𑀜𑁆𑀘 𑀲𑀁𑀯𑁂𑀕𑁄 𑀚𑀸𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀲𑀝𑁆𑀞𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸𑀢𑀺𑀲𑀬𑀁 𑀅𑀪𑀺𑀡𑁆𑀳𑀜𑁆𑀘 𑀉𑀧𑀲𑀫𑀧𑁆𑀧𑀢𑁆𑀢𑀺𑀬𑀸 𑀅𑀢𑀺𑀯𑀺𑀬 𑀉𑀧𑀲𑀦𑁆𑀢𑀼𑀧𑀲𑀦𑁆𑀢𑀸. 𑀅𑀦𑀼𑀲𑀁𑀬𑀸𑀬𑀫𑀸𑀦𑁄𑀢𑀺 𑀅𑀦𑀼 𑀅𑀦𑀼 𑀲𑀫𑁆𑀫𑀤𑁂𑀯 𑀚𑀸𑀦𑀦𑁆𑀢𑁄 𑀯𑀺𑀘𑀸𑀭𑁂𑀦𑁆𑀢𑁄 𑀯𑁄𑀲𑀸𑀲𑀫𑀸𑀦𑁄. ‘‘𑀅𑀦𑀼𑀲𑀜𑁆𑀜𑀸𑀬𑀫𑀸𑀦𑁄’’𑀢𑀺 𑀯𑀸 𑀧𑀸𑀞𑁄. 𑀢𑀢𑁆𑀣 𑀬-𑀓𑀸𑀭𑀲𑁆𑀲 𑀜-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀦𑀼𑀯𑀺𑀘𑀭𑀫𑀸𑀦𑁄’’𑀢𑀺.

𑁮𑁦. 𑀳𑁂𑀝𑁆𑀞𑀺𑀫𑀧𑀼𑀘𑁆𑀙𑀫𑁂𑀯𑀸𑀢𑀺 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀫𑁂𑀯. 𑀲𑁄 𑀳𑀺 ‘‘𑀢𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺𑀆𑀤𑀺𑀦𑀸, ‘‘𑀅𑀢𑁆𑀣𑀺 𑀓𑁄𑀘𑀺 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑀲𑁆𑀲 𑀲𑀸𑀭𑀪𑀽𑀢𑁄 𑀪𑀺𑀓𑁆𑀔𑀽’’𑀢𑀺 𑀧𑀼𑀘𑁆𑀙𑀺. 𑀅𑀬𑀜𑁆𑀘 𑀢𑀫𑁂𑀯 ‘‘𑀧𑀝𑀺𑀲𑀭𑀡𑁄’’𑀢𑀺 𑀧𑀭𑀺𑀬𑀸𑀬𑁂𑀦 𑀧𑀼𑀘𑁆𑀙𑀺. 𑀅𑀧𑁆𑀧𑀝𑀺𑀲𑀭𑀡𑁂𑀢𑀺 𑀬𑀁 𑀢𑀼𑀫𑁆𑀳𑁂 𑀪𑀺𑀓𑁆𑀔𑀼𑀁 𑀧𑀝𑀺𑀩𑁄𑀥𑁂𑀬𑁆𑀬𑀸𑀣, 𑀢𑀸𑀤𑀺𑀲𑀲𑁆𑀲 𑀅𑀪𑀸𑀯𑁂𑀦 𑀅𑀧𑁆𑀧𑀝𑀺𑀲𑀭𑀡𑁂. 𑀢𑀣𑀸𑀕𑀢𑁂𑀦 𑀧𑀯𑁂𑀤𑀺𑀢𑁄 𑀥𑀫𑁆𑀫𑁄 𑀧𑀝𑀺𑀲𑀭𑀡𑀁 𑀏𑀢𑁂𑀲𑀦𑁆𑀢𑀺 𑀥𑀫𑁆𑀫𑀧𑀝𑀺𑀲𑀭𑀡𑀸. 𑀢𑁂𑀦𑀸𑀳 ‘‘𑀥𑀫𑁆𑀫𑁄 𑀅𑀯𑀲𑁆𑀲𑀬𑁄’’𑀢𑀺.

𑁮𑁧. 𑀆𑀕𑀘𑁆𑀙𑀢𑀻𑀢𑀺 𑀯𑀸𑀘𑀼𑀕𑁆𑀕𑀢𑀪𑀸𑀯𑁂𑀦 𑀆𑀕𑀘𑁆𑀙𑀢𑀺. 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁂 𑀕𑀭𑀼𑀕𑀭𑀼𑀢𑀭𑀮𑀳𑀼𑀮𑀳𑀼𑀢𑀭𑀸𑀤𑀺𑀪𑁂𑀤𑁂 𑀅𑀚𑁆𑀛𑀸𑀘𑀸𑀭𑁂 𑀆𑀧𑀢𑁆𑀢𑀺𑀲𑀫𑀜𑁆𑀜𑀸𑀢𑀺 𑀆𑀳 𑁋 ‘‘𑀆𑀧𑀢𑁆𑀢𑀺…𑀧𑁂… 𑀆𑀡𑀸𑀢𑀺𑀓𑁆𑀓𑀫𑀦𑀫𑁂𑀯𑀸’’𑀢𑀺. 𑀬𑀣𑀸𑀥𑀫𑁆𑀫𑀦𑁆𑀢𑀺 𑀥𑀫𑁆𑀫𑀸𑀦𑀼𑀭𑀽𑀧𑀁. 𑀬𑀣𑀸𑀲𑀺𑀝𑁆𑀞𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁. 𑀥𑀫𑁆𑀫𑁄 𑀦𑁄𑀢𑀺 𑀏𑀢𑁆𑀣 𑀦𑁄-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂 ‘‘𑀦 𑀦𑁄 𑀲𑀫𑀁 𑀅𑀢𑁆𑀣𑀺 𑀢𑀣𑀸𑀕𑀢𑁂𑀦𑀸’’𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁬.𑁩; 𑀲𑀼. 𑀦𑀺. 𑁨𑁨𑁬) 𑀯𑀺𑀬. 𑀢𑁂𑀦𑁂𑀯𑀸𑀳 ‘‘𑀥𑀫𑁆𑀫𑁄𑀯 𑀓𑀸𑀭𑁂𑀢𑀻’’𑀢𑀺.

𑁮𑁩. ‘‘𑀬𑀣𑀸 𑀢𑀁 𑀢𑀼𑀫𑁆𑀳𑀸𑀤𑀺𑀲𑁂𑀳𑀺 𑀭𑀓𑁆𑀔𑀓𑁂𑀳𑀺 𑀕𑁄𑀧𑀓𑁂𑀳𑀻’’𑀢𑀺 𑀏𑀯𑀁 𑀧𑀲𑀦𑁆𑀦𑀯𑁂𑀲𑁂𑀦 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑀸𑀧𑁂𑀢𑀼𑀓𑀸𑀫𑁄. 𑀅𑀭𑀺𑀬𑀽𑀧𑀯𑀸𑀤𑀧𑀸𑀧𑀁 𑀔𑀫𑀸𑀧𑀦𑁂 𑀲𑀢𑀺 𑀅𑀦𑁆𑀢𑀭𑀸𑀬𑀸𑀬 𑀦 𑀳𑁄𑀢𑀻𑀢𑀺 𑀆𑀳 𑁋 ‘‘𑀇𑀘𑁆𑀘𑁂𑀢𑀁 𑀓𑀼𑀲𑀮’’𑀦𑁆𑀢𑀺. 𑀕𑁄𑀦𑀗𑁆𑀕𑀮𑀫𑀓𑁆𑀓𑀝𑁄𑀢𑀺 𑀕𑁄𑀦𑀗𑁆𑀕𑀼𑀝𑁆𑀞𑀫𑀓𑁆𑀓𑀝𑁄.

𑁮𑁪. 𑀅𑀬𑀁 𑀉𑀓𑁆𑀓𑀁𑀲𑀸𑀧𑁂𑀢𑀼𑀁 𑀇𑀘𑁆𑀙𑀺𑀢𑀁 𑀬𑀣𑀸𑀭𑀤𑁆𑀥𑀫𑀢𑁆𑀣𑀁 𑀯𑀺𑀲𑀁𑀯𑀸𑀤𑁂𑀢𑀺 𑀅𑀯𑀡𑁆𑀡𑀺𑀢𑀫𑁆𑀧𑀺 𑀯𑀡𑁆𑀡𑀺𑀢𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄; 𑀇𑀫𑀲𑁆𑀲 𑀯𑀘𑀦𑀲𑁆𑀲 𑀧𑀝𑀺𑀓𑁆𑀔𑁂𑀧𑁂𑀦 𑀇𑀫𑀺𑀦𑀸 𑀤𑀸𑀢𑀩𑁆𑀩𑀧𑀺𑀡𑁆𑀟𑀧𑀸𑀢𑀲𑁆𑀲 𑀅𑀦𑁆𑀢𑀭𑀸𑀬𑁄 𑀫𑀸 𑀳𑁄𑀢𑀽𑀢𑀺 𑀏𑀯𑀁 𑀧𑀺𑀡𑁆𑀟𑀧𑀸𑀢𑀁 𑀭𑀓𑁆𑀔𑀺𑀢𑀼𑀁 𑀦 𑀔𑁄 𑀧𑀦 𑀲𑀓𑁆𑀓𑀸𑀢𑀺 𑀬𑁄𑀚𑀦𑀸. 𑀇𑀤𑀦𑁆𑀢𑀺 ‘‘𑀦 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀤𑁂𑀲𑀦𑀁. 𑀅𑀩𑁆𑀪𑀦𑁆𑀢𑀭𑀁 𑀓𑀭𑀺𑀢𑁆𑀯𑀸𑀢𑀺 𑀦𑀺𑀩𑁆𑀩𑀸𑀦𑀦𑁆𑀢𑁄𑀕𑀥𑀁 𑀓𑀢𑁆𑀯𑀸, 𑀅𑀦𑁆𑀢𑀭𑀁 𑀯𑀸 𑀢𑀲𑁆𑀲 𑀦𑀺𑀚𑁆𑀛𑀸𑀦𑀲𑁆𑀲 𑀓𑀸𑀭𑀡𑀁 𑀓𑀢𑁆𑀯𑀸. 𑀓𑀸𑀫𑀭𑀸𑀕𑀯𑀲𑁂𑀦 𑀳𑀺 𑀢𑀁 𑀦𑀺𑀚𑁆𑀛𑀸𑀦𑀁 𑀳𑁄𑀢𑀻𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀧𑀤𑁂𑀲𑁂. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀚𑁆𑀛𑀸𑀦𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑁆𑀲 𑀅𑀦𑁆𑀢𑀭𑀸𑀬𑁄 𑀫𑀸 𑀳𑁄𑀢𑀽𑀢𑀺 𑀏𑀯𑀁 𑀓𑀢𑁆𑀯𑀸𑀧𑀺 𑀭𑀽𑀧𑀸𑀯𑀘𑀭𑀲𑁆𑀲 𑀫𑀕𑁆𑀕𑀛𑀸𑀦𑀲𑁆𑀲 𑀨𑀮𑀛𑀸𑀦𑀲𑁆𑀲𑀸𑀢𑀺 𑀲𑀩𑁆𑀩𑀲𑁆𑀲𑀧𑀺 𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸 𑀲𑀩𑁆𑀩𑀲𑀗𑁆𑀕𑀸𑀳𑀓𑀚𑁆𑀛𑀸𑀦𑀁 𑀦𑀸𑀫 𑀓𑀣𑀺𑀢𑀁.

𑀬𑀁 𑀦𑁄 𑀫𑀬𑀦𑁆𑀢𑀺 𑀏𑀢𑁆𑀣 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀢𑀁 𑀦𑁄𑀢𑀺 𑀏𑀢𑁆𑀣 𑀧𑀦 𑀦𑁄𑀢𑀺 𑀅𑀫𑁆𑀳𑀸𑀓𑀦𑁆𑀢𑀺 𑀅𑀢𑁆𑀣𑁄. 𑀉𑀲𑀽𑀬𑀢𑀺 𑀭𑀸𑀚𑀓𑀺𑀘𑁆𑀘𑀧𑀲𑀼𑀢𑀢𑀸𑀥𑀻𑀦𑀢𑀸𑀬 𑀏𑀓𑀢𑁆𑀣𑀸𑀪𑀺𑀦𑀺𑀯𑁂𑀲𑀪𑀸𑀯𑀢𑁄. 𑀫𑀦𑁆𑀤𑀧𑀜𑁆𑀜𑀢𑀸𑀬 𑀯𑀲𑁆𑀲𑀓𑀸𑀭𑀕𑀢𑀇𑀲𑁆𑀲𑀸𑀪𑀺𑀪𑀽𑀢𑀘𑀺𑀢𑁆𑀢𑀢𑀸𑀬 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀼𑀢𑁆𑀢𑀫𑁆𑀧𑀺 𑀅𑀢𑁆𑀣𑀁 𑀅𑀦𑀼𑀧𑀥𑀸𑀭𑁂𑀦𑁆𑀢𑁄 𑀆𑀳 𑁋 ‘‘𑀏𑀓𑀤𑁂𑀲𑀫𑁂𑀯 𑀓𑀣𑁂𑀲𑀻’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.