𑁯. 𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀢𑀲𑁆𑀫𑀺𑀁 𑀅𑀳𑀽𑀢𑀺 𑀢𑀲𑁆𑀫𑀺𑀁 𑀅𑀳𑀦𑀻𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀤𑀺𑀯𑀲𑁂’’𑀢𑀺. 𑀅𑀦𑀲𑀦𑁂𑀦𑀸𑀢𑀺 𑀲𑀩𑁆𑀩𑀲𑁄 𑀆𑀳𑀸𑀭𑀲𑁆𑀲 𑀅𑀪𑀼𑀜𑁆𑀚𑀦𑁂𑀦 𑀲𑀸𑀲𑀦𑀺𑀓𑀲𑀻𑀮𑁂𑀦 𑀩𑀸𑀳𑀺𑀭𑀓𑀅𑀦𑀲𑀦𑁂𑀦 𑀉𑀧𑁂𑀢𑀸 𑀳𑀼𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀯𑀸-𑀲𑀤𑁆𑀤𑁂𑀦 𑀔𑀻𑀭𑀧𑀸𑀦𑀫𑀥𑀼𑀲𑀸𑀬𑀦𑀸𑀤𑀺𑀯𑀺𑀥𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀧𑁂𑀘𑁆𑀘 𑀯𑀲𑀺𑀢𑀩𑁆𑀩𑀢𑁄 𑀉𑀧𑁄𑀲𑀣𑁄, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀉𑀧𑁂𑀢𑁂𑀦 𑀲𑀫𑀦𑁆𑀦𑀸𑀕𑀢𑁂𑀦 𑀳𑀼𑀢𑁆𑀯𑀸 𑀯𑀲𑀺𑀢𑀩𑁆𑀩𑀢𑁄 𑀲𑀦𑁆𑀢𑀸𑀦𑁂 𑀯𑀸𑀲𑁂𑀢𑀩𑁆𑀩𑀢𑁄 𑀉𑀧𑁄𑀲𑀣𑁄, 𑀲𑀻𑀮𑀁. 𑀅𑀦𑀲𑀦𑀸𑀤𑀺𑀥𑀫𑁆𑀫𑀸𑀤𑀺𑀁 𑀯𑀸 𑀉𑀧𑁂𑀘𑁆𑀘 𑀯𑀲𑀦𑀁 𑀉𑀧𑀯𑀸𑀲𑁄 𑀉𑀧𑁄𑀲𑀣𑁄. 𑀢𑀣𑀸𑀭𑀽𑀧𑁂 𑀳𑀢𑁆𑀣𑀺𑀚𑀸𑀢𑀺𑀯𑀺𑀲𑁂𑀲𑁂 𑀉𑀧𑁄𑀲𑀣𑁄𑀢𑀺 𑀲𑀫𑀜𑁆𑀜𑀸𑀫𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀻’’𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀉𑀧𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑁄, 𑀤𑀺𑀯𑀲𑁄. 𑀲𑁄 𑀧𑀦𑁂𑀲 𑀉𑀧𑁄𑀲𑀣𑁄. 𑀫𑀸𑀲𑀧𑀼𑀡𑁆𑀡𑀢𑀸𑀬𑀸𑀢𑀺 𑀫𑀸𑀲𑀲𑁆𑀲 𑀧𑀽𑀭𑀺𑀢𑀪𑀸𑀯𑁂𑀦. 𑀲𑀫𑁆𑀧𑀼𑀡𑁆𑀡𑀸𑀢𑀺 𑀲𑀩𑁆𑀩𑀲𑁄 𑀧𑀼𑀡𑁆𑀡𑀸. 𑀢𑀸𑀬 𑀳𑀺 𑀭𑀢𑁆𑀢𑀺𑀬𑀸 𑀯𑀲𑁂𑀦 𑀫𑀸𑀲𑁄 𑀅𑀦𑀯𑀲𑁂𑀲𑀢𑁄 𑀧𑀼𑀡𑁆𑀡𑁄 𑀳𑁄𑀢𑀺. 𑀫𑀸𑀲𑀤𑁆𑀥𑀫𑀸𑀲𑀸𑀤𑀺𑀪𑁂𑀤𑀁 𑀓𑀸𑀮𑀁 𑀫𑀸𑀢𑀺 𑀫𑀺𑀦𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀘 ‘‘𑀫𑀸’’𑀇𑀢𑀺 𑀘𑀦𑁆𑀤𑁄 𑀯𑀼𑀘𑁆𑀘𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀸 𑀭𑀢𑁆𑀢𑀺𑀬𑀸. 𑀧𑀼𑀡𑁆𑀡𑁄 𑀧𑀭𑀺𑀧𑀼𑀡𑁆𑀡𑀓𑀮𑁄 𑀚𑀸𑀢𑁄𑀢𑀺 𑀧𑀼𑀡𑁆𑀡𑀫𑀸. 𑀢𑀜𑁆𑀳𑀺 𑀘𑀦𑁆𑀤𑀧𑀸𑀭𑀺𑀧𑀽𑀭𑀺𑀬𑀸 𑀫𑀸𑀲𑀧𑀸𑀭𑀺𑀧𑀽𑀭𑀺𑀬𑀸 𑀏𑀯𑀫𑀸𑀳. 𑀏𑀢𑁂𑀦 𑀢𑀲𑁆𑀲 𑀉𑀧𑁄𑀲𑀣𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀤𑀺𑀲𑁆𑀲𑀢𑀺 𑀨𑀮𑀁 𑀲𑀦𑁆𑀤𑀺𑀲𑁆𑀲𑀢𑀻𑀢𑀺 𑀤𑁂𑀲𑁄, 𑀳𑁂𑀢𑀽𑀢𑀺 𑀆𑀳 ‘‘𑀤𑁂𑀲𑀦𑁆𑀢𑀺 𑀓𑀸𑀭𑀡’’𑀦𑁆𑀢𑀺. 𑀲𑀩𑁆𑀩𑀁 𑀓𑀣𑁂𑀦𑁆𑀢𑀺 𑀲𑀩𑁆𑀩𑀁 𑀅𑀢𑁆𑀢𑀦𑀸 𑀧𑀭𑀺𑀕𑁆𑀕𑀳𑀺𑀢𑀧𑁆𑀧𑀓𑀸𑀭𑀁 𑀓𑀣𑁂𑀦𑁆𑀢𑀺. 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀯𑀺𑀲𑀬𑀢𑁆𑀢𑀸. 𑀧𑀸𑀲𑀸𑀤𑀧𑀭𑀺𑀯𑁂𑀡𑁂𑀢𑀺 𑀧𑀸𑀲𑀸𑀤𑀲𑁆𑀲 𑀧𑀼𑀭𑀢𑁄 𑀯𑀺𑀯𑀝𑀗𑁆𑀕𑀡𑁂. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀲𑁂𑀔𑀲𑀼𑀢𑁆𑀢𑁂 (𑀫. 𑀦𑀺. 𑀅𑀝𑁆𑀞. 𑁨.𑁨𑁨) 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁮𑁬. 𑀇𑀫𑁂 𑀦𑀼 𑀔𑁄𑀢𑀺 𑀏𑀢𑁆𑀣 𑀦𑀽𑀢𑀺 𑀲𑀁𑀲𑀬𑀚𑁄𑀢𑀦𑁄𑀢𑀺 𑀆𑀳 𑁋 ‘‘𑀯𑀺𑀫𑀢𑀺𑀧𑀼𑀘𑁆𑀙𑀸 𑀯𑀺𑀬 𑀓𑀣𑀺𑀢𑀸’’𑀢𑀺. 𑀚𑀸𑀦𑀦𑁆𑀢𑁂𑀦𑀸𑀢𑀺𑀆𑀤𑀺 𑀧𑀼𑀘𑁆𑀙𑀸𑀯𑀢𑁆𑀢𑀤𑀲𑁆𑀲𑀦𑀧𑀭𑀁 𑀤𑀝𑁆𑀞𑀩𑁆𑀩𑀁, 𑀦 𑀧𑀼𑀘𑁆𑀙𑀓𑀲𑁆𑀲 𑀲𑀢𑁆𑀣𑀼 𑀅𑀢𑁆𑀢𑀦𑁄 𑀅𑀚𑀸𑀦𑀦𑀪𑀸𑀯𑀤𑀻𑀧𑀦𑀧𑀭𑀁. 𑀚𑀸𑀦𑀸𑀢𑀺 𑀳𑀺 𑀪𑀕𑀯𑀸. 𑀅𑀚𑀸𑀦𑀦𑁆𑀢𑁂𑀦 𑀯𑀺𑀬 𑀳𑀼𑀢𑁆𑀯𑀸 𑀧𑀼𑀘𑁆𑀙𑀺𑀢𑁂. 𑀬𑀣𑀸𑀪𑀽𑀢𑀲𑀪𑀸𑀯𑀁 𑀚𑀸𑀦𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀢𑀺 𑀓𑁄𑀳𑀜𑁆𑀜𑁂 𑀞𑀢𑁆𑀯𑀸. 𑀢𑁂𑀦𑀸𑀳 𑁋 ‘‘𑀣𑁂𑀭𑁄 𑀏𑀯𑀭𑀽𑀧𑀁 𑀯𑀘𑀦𑀁 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀓𑀸𑀭𑀡𑀲𑁆𑀲 𑀲𑀼𑀧𑁆𑀧𑀳𑀻𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀙𑀦𑁆𑀤𑀫𑀽𑀮𑀓𑀸𑀢𑀺 𑀢𑀡𑁆𑀳𑀸𑀙𑀦𑁆𑀤𑀫𑀽𑀮𑀓𑀸. 𑀢𑀡𑁆𑀳𑀸 𑀳𑀺 𑀤𑀼𑀓𑁆𑀔𑀲𑀫𑀼𑀤𑀬𑁄. 𑀓𑀼𑀲𑀮𑀲𑀜𑁆𑀜𑁄 𑀯𑀸 𑀣𑀺𑀭𑀯𑀺𑀲𑀤𑀦𑀺𑀧𑀼𑀡𑀲𑀜𑁆𑀜𑁄 𑀯𑀸, 𑀓𑀼𑀲𑀮𑀲𑀗𑁆𑀔𑀸𑀭𑁄 𑀯𑀸 𑀢𑀺𑀔𑀺𑀡𑀣𑀺𑀭𑀯𑀺𑀲𑀤𑀲𑀗𑁆𑀔𑀸𑀭𑁄 𑀯𑀸; 𑀲𑀼𑀯𑀺𑀲𑀼𑀤𑁆𑀥𑀯𑀺𑀧𑀼𑀮𑁄𑀤𑀸𑀭𑀯𑀺𑀜𑁆𑀜𑀸𑀡𑁄 𑀯𑀸𑀢𑀺 𑀇𑀫𑀫𑀢𑁆𑀣𑀁 ‘‘𑀲𑀜𑁆𑀜𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀅𑀢𑀺𑀤𑀺𑀲𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀦𑀸𑀕𑀢𑀓𑀸𑀮𑀯𑀲𑁂𑀦𑁂𑀯 𑀤𑁂𑀲𑀦𑀸 𑀆𑀕𑀢𑀸𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺.

𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀡𑁆𑀡𑀢𑁆𑀢𑀻𑀢𑀺 𑀔𑀦𑁆𑀥𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀸𑀦𑀁 𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀲𑀜𑁆𑀚𑀸𑀦𑀦𑀸𑀪𑀺𑀲𑀗𑁆𑀔𑀭𑀯𑀺𑀚𑀸𑀦𑀦𑀲𑀪𑀸𑀯𑀸𑀦𑀁 𑀅𑀢𑁆𑀣𑀸𑀦𑀁 ‘‘𑀔𑀦𑁆𑀥𑁄’’𑀢𑀺 𑀅𑀬𑀁 𑀲𑀫𑀜𑁆𑀜𑀸. 𑀓𑀺𑀢𑁆𑀢𑀓𑁂𑀦𑀸𑀢𑀺 𑀓𑀺𑀁𑀧𑀭𑀺𑀫𑀸𑀡𑁂𑀦 𑀅𑀢𑁆𑀣𑁂𑀦, 𑀭𑀸𑀲𑀢𑁆𑀣𑀪𑀸𑀕𑀢𑁆𑀣𑀸𑀤𑀻𑀲𑀼 𑀓𑀻𑀤𑀺𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀳𑁂𑀢𑀼𑀳𑁂𑀢𑀽𑀢𑀺 𑀳𑁂𑀢𑀼𑀧𑀘𑁆𑀘𑀬𑀪𑀽𑀢𑁄 𑀳𑁂𑀢𑀼. 𑀬𑁄 𑀳𑀺 𑀮𑁄𑀪𑀸𑀤𑀻𑀦𑀁 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀫𑀽𑀮𑀝𑁆𑀞𑁂𑀦𑀼𑀧𑀓𑀸𑀭𑀓𑀪𑀸𑀯𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀳𑁂𑀢𑀼𑀢𑁆𑀣𑁄; 𑀲𑁄 𑀧𑀣𑀯𑀻𑀆𑀤𑀻𑀲𑀼𑀧𑀺 𑀧𑀘𑁆𑀘𑀬𑀪𑀸𑀯𑀫𑀢𑁆𑀢𑁂𑀦 𑀳𑁂𑀢𑀼𑀧𑀭𑀺𑀬𑀸𑀬𑀤𑀲𑁆𑀲𑀦𑀢𑁄 𑀤𑀼𑀢𑀺𑀬𑁂𑀦 𑀳𑁂𑀢𑀼-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑁄 ‘‘𑀳𑁂𑀢𑀼𑀳𑁂𑀢𑀽’’𑀢𑀺. 𑀅𑀯𑀺𑀚𑁆𑀚𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀲𑀸𑀥𑀸𑀭𑀡𑀧𑀘𑁆𑀘𑀬𑀢𑁆𑀢𑀸 𑀲𑀸𑀥𑀸𑀭𑀡𑀳𑁂𑀢𑀼, ‘‘𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀞𑀸𑀦𑀲𑁄 𑀳𑁂𑀢𑀼𑀲𑁄 𑀯𑀺𑀧𑀸𑀓’’𑀦𑁆𑀢𑀺 𑀏𑀢𑁆𑀣 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀧𑀘𑁆𑀘𑀬𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀸𑀓𑀦𑀺𑀬𑀸𑀫𑀓𑀢𑁆𑀢𑀸 𑀓𑀫𑁆𑀫𑀁 𑀢𑀲𑁆𑀲 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀓𑀼𑀲𑀮𑀸𑀓𑀼𑀲𑀮𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀧𑀸𑀓𑀤𑀸𑀦𑁂 𑀉𑀢𑁆𑀢𑀫𑀳𑁂𑀢𑀽’’𑀢𑀺. ‘‘𑀫𑀳𑀸𑀪𑀽𑀢𑀸 𑀳𑁂𑀢𑀽’’𑀢𑀺 𑀅𑀬𑀫𑁂𑀯𑀢𑁆𑀣𑁄 ‘‘𑀫𑀳𑀸𑀪𑀽𑀢𑀸 𑀧𑀘𑁆𑀘𑀬𑁄’’𑀢𑀺 𑀇𑀫𑀺𑀦𑀸𑀧𑀺 𑀯𑀼𑀢𑁆𑀢𑁄𑀢𑀺 𑀳𑁂𑀢𑀼𑀲𑀤𑁆𑀤𑀧𑀘𑁆𑀘𑀬𑀲𑀤𑁆𑀤𑀸𑀦𑀁 𑀲𑀫𑀸𑀦𑀢𑁆𑀣𑀢𑁆𑀢𑀸 𑀧𑀘𑁆𑀘𑀬𑁄 𑀏𑀯 𑀳𑁂𑀢𑀼 𑀧𑀘𑁆𑀘𑀬𑀳𑁂𑀢𑀼, 𑀬𑁄 𑀘 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀳𑁂𑀢𑀼, 𑀲𑁄 𑀏𑀯 𑀢𑀲𑁆𑀲 𑀧𑀜𑁆𑀜𑀸𑀧𑀦𑀸𑀬 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 𑁋 ‘‘𑀇𑀥 𑀧𑀘𑁆𑀘𑀬𑀳𑁂𑀢𑀼 𑀅𑀥𑀺𑀧𑁆𑀧𑁂𑀢𑁄’’𑀢𑀺. 𑀬𑀤𑀕𑁆𑀕𑁂𑀦 𑀧𑀘𑁆𑀘𑀬𑀥𑀫𑁆𑀫𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀸𑀤𑀸𑀬 𑀞𑀺𑀢𑀺𑀬𑀸 𑀘 𑀧𑀘𑁆𑀘𑀬𑁄, 𑀢𑀤𑀕𑁆𑀕𑁂𑀦 𑀢𑀲𑁆𑀲 𑀪𑀸𑀯𑀢𑁄 𑀲𑀫𑀜𑁆𑀜𑀸𑀢𑁄 𑀧𑀜𑁆𑀜𑀸𑀧𑀦𑀸𑀬𑀧𑀺 𑀲𑁄 𑀧𑀘𑁆𑀘𑀬𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺. 𑀧𑀸𑀴𑀺𑀬𑀁 𑀅𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁, ‘‘𑀢𑀢𑁆𑀣 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀜𑁆𑀜𑀸𑀧𑀦𑀸𑀬𑀸𑀢𑀺 𑀲𑀳𑁂𑀢𑀼𑀅𑀳𑁂𑀢𑀼𑀓𑀦𑁆𑀢𑀺𑀆𑀤𑀺𑀆𑀓𑀸𑀭𑁂𑀳𑀺 𑀩𑁄𑀥𑀦𑀸𑀬. 𑀢𑀁 𑀧𑀦 𑀲𑀩𑁆𑀩𑁄𑀥𑀦𑀁 𑀜𑀸𑀡𑁂𑀦 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀤𑀲𑁆𑀲𑀦𑀢𑁆𑀣𑀸𑀬𑀸’’𑀢𑀺.

𑀨𑀲𑁆𑀲𑁄𑀢𑀺 𑀨𑀲𑁆𑀲𑀲𑀫𑀗𑁆𑀕𑀻𑀪𑀸𑀯𑁄. 𑀲𑁄 𑀘𑁂𑀢𑁆𑀣 𑀲𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀲𑁆𑀲 𑀨𑀲𑁆𑀲𑀲𑁆𑀲 𑀦𑀺𑀩𑁆𑀩𑀢𑁆𑀢𑀺. 𑀦𑀺𑀩𑁆𑀩𑀢𑁆𑀢𑁄 𑀳𑀺 𑀨𑀲𑁆𑀲𑁄 𑀢𑀣𑀸𑀭𑀽𑀧𑀸𑀬 𑀯𑁂𑀤𑀦𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀏𑀢𑀤𑀢𑁆𑀣𑀫𑁂𑀯𑁂𑀢𑁆𑀣 𑀪𑀕𑀯𑀢𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸 𑀓𑀢𑀸, 𑀢𑀲𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀓𑀸𑀮𑀯𑀲𑁂𑀦 𑀤𑁆𑀯𑀺𑀓𑀸𑀮𑀺𑀓𑁄 𑀨𑀲𑁆𑀲𑀲𑀤𑁆𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀨𑀲𑁆𑀲𑁂 𑀲𑀢𑀺 𑀯𑁂𑀤𑁂𑀢𑀺 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑁂𑀯 𑀳𑀺 𑀯𑁂𑀤𑀦𑀸𑀬 𑀏𑀯𑀁 𑀲𑀜𑁆𑀜𑀸𑀬 𑀲𑀗𑁆𑀔𑀸𑀭𑀸𑀦𑀫𑁆𑀧𑀺 𑀨𑀲𑁆𑀲𑁄 𑀯𑀺𑀲𑁂𑀲𑀧𑀘𑁆𑀘𑀬𑁄 𑀢𑀲𑁆𑀫𑀺𑀁 𑀅𑀲𑀢𑀺 𑀅𑀪𑀸𑀯𑀢𑁄. 𑀘𑁂𑀢𑀦𑀸𑀕𑁆𑀕𑀳𑀡𑁂𑀦 𑀆𑀬𑀽𑀳𑀦𑀸𑀦𑀼𑀭𑀽𑀧𑀢𑀸𑀬 𑀢𑀧𑁆𑀧𑀥𑀸𑀦𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸 𑀕𑀳𑀺𑀢𑀸. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀪𑀸𑀚𑀦𑀻𑀬𑁂 (𑀯𑀺𑀪. 𑁨𑁧, 𑁨𑁨) 𑀘 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 𑀘𑁂𑀢𑀦𑀸𑀯 𑀦𑀺𑀤𑁆𑀤𑀺𑀝𑁆𑀞𑀸. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀏𑀢𑁆𑀣 𑀏𑀓𑀲𑁆𑀫𑀺𑀁 𑀪𑀯𑁂 𑀆𑀤𑀺𑀪𑀽𑀢𑀯𑀺𑀜𑁆𑀜𑀸𑀡𑀲𑁆𑀲 𑀦𑀸𑀫𑀭𑀽𑀧𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀢𑀸𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀕𑀩𑁆𑀪𑀲𑁂𑀬𑁆𑀬𑀓𑀲𑁆𑀲 𑀲𑀪𑀸𑀯𑀓𑀲𑁆𑀲 𑀭𑀽𑀧𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀉𑀧𑀭𑀺𑀫𑀧𑀭𑀺𑀘𑁆𑀙𑁂𑀤𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀲𑀫𑀢𑀺𑀁𑀲𑀢𑁄 𑀉𑀧𑀭𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀲𑁆𑀲 𑀭𑀽𑀧𑀸𑀦𑀁 𑀅𑀲𑀫𑁆𑀪𑀯𑀢𑁄. 𑀇𑀤𑀸𑀦𑀺 𑀧𑀯𑀢𑁆𑀢𑀺𑀯𑀺𑀜𑁆𑀜𑀸𑀡𑀲𑁆𑀲 𑀦𑀸𑀫𑀭𑀽𑀧𑀧𑀘𑁆𑀘𑀬𑀁 𑀤𑁆𑀯𑀸𑀭𑀯𑀲𑁂𑀦 𑀤𑀲𑁆𑀲𑁂𑀢𑀼𑀁, ‘‘𑀘𑀓𑁆𑀔𑀼𑀤𑁆𑀯𑀸𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀦𑀼 𑀘 𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀨𑀲𑁆𑀲𑁄 𑀧𑀘𑁆𑀘𑀬𑁄, 𑀓𑀲𑁆𑀫𑀸 𑀢𑀬𑁄 𑀏𑀯 𑀔𑀦𑁆𑀥𑀸 𑀨𑀲𑁆𑀲𑀧𑀘𑁆𑀘𑀬𑀸 𑀯𑀼𑀢𑁆𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀬𑀣𑀸 𑀧𑀦 𑀯𑀺𑀜𑁆𑀜𑀸𑀡𑀲𑀳𑀺𑀢𑁄 𑀨𑀲𑁆𑀲𑁄 𑀯𑁂𑀤𑀦𑀸𑀤𑀻𑀦𑀁 𑀧𑀘𑁆𑀘𑀬𑁄, 𑀦 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺 (𑀫. 𑀦𑀺. 𑁧.𑁨𑁦𑁪; 𑀫. 𑀦𑀺. 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁪, 𑁪𑁫; 𑁨.𑁪.𑁬𑁦) 𑀨𑀲𑁆𑀲𑁄 𑀯𑀺𑀬 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄 𑀬𑀣𑀸 𑀦𑀸𑀫𑀭𑀽𑀧𑀧𑀘𑁆𑀘𑀬𑀸𑀧𑀺 𑀯𑀺𑀜𑁆𑀜𑀸𑀡𑀦𑁆𑀢𑀺. 𑀢𑀲𑁆𑀫𑀸 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀦𑀸𑀫𑀭𑀽𑀧𑀲𑁆𑀲𑁂𑀯 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸, 𑀦 𑀨𑀲𑁆𑀲𑀲𑁆𑀲.

𑁮𑁭. 𑀬𑀸𑀯 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀲𑀫𑀼𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀯𑀝𑁆𑀝𑀲𑁆𑀲 𑀧𑀭𑀺𑀬𑀦𑁆𑀢𑁄 𑀦𑀢𑁆𑀣𑁂𑀯𑀸𑀢𑀺 𑀅𑀧𑁆𑀧𑀳𑀻𑀦𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑁄 𑀯𑀝𑁆𑀝𑁂 𑀧𑀭𑀺𑀩𑁆𑀪𑀫𑀢𑀻𑀢𑀺 𑀆𑀳 𑁋 ‘‘𑀓𑀣𑀁 𑀧𑀦, 𑀪𑀦𑁆𑀢𑁂𑀢𑀺 𑀯𑀝𑁆𑀝𑀁 𑀧𑀼𑀘𑁆𑀙𑀦𑁆𑀢𑁄’’𑀢𑀺. 𑀬𑀣𑀸 𑀘 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀚𑁄𑀢𑀦𑀸 𑀯𑀝𑁆𑀝𑀧𑀼𑀘𑁆𑀙𑀸, 𑀏𑀯𑀁 𑀢𑀩𑁆𑀪𑁂𑀤𑀦𑀚𑁄𑀢𑀦𑀸 𑀯𑀺𑀯𑀝𑁆𑀝𑀧𑀼𑀘𑁆𑀙𑀸𑀢𑀺 𑀆𑀳 𑁋 ‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀳𑁄𑀢𑀻𑀢𑀺 𑀯𑀺𑀯𑀝𑁆𑀝𑀁 𑀧𑀼𑀘𑁆𑀙𑀦𑁆𑀢𑁄’’𑀢𑀺.

𑁮𑁮. 𑀅𑀬𑀁 𑀭𑀽𑀧𑁂 𑀅𑀲𑁆𑀲𑀸𑀤𑁄𑀢𑀺 𑀬𑀸𑀣𑀸𑀯𑀢𑁄 𑀤𑀲𑁆𑀲𑀦𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁄, 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀜𑁆𑀘 𑀭𑀽𑀧𑀦𑁆𑀢𑀺 𑀆𑀳 𑁋 ‘‘𑀇𑀫𑀺𑀦𑀸 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁄 𑀘𑁂𑀯 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀓𑀣𑀺𑀢’’𑀦𑁆𑀢𑀺. ‘‘𑀬𑀁 𑀭𑀽𑀧𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁄 𑀢𑀢𑁆𑀣 𑀆𑀤𑀻𑀦𑀯𑁄, 𑀲𑁄 𑀘𑀲𑁆𑀲 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀧𑀘𑁆𑀘𑀬𑁄 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦 𑀆𑀤𑀻𑀦𑀯𑀲𑀫𑀢𑀺𑀓𑁆𑀓𑀫𑁄𑀢𑀺 𑀆𑀤𑀻𑀦𑀯𑀕𑁆𑀕𑀳𑀡𑁂𑀦 𑀲𑀺𑀤𑁆𑀥𑀫𑀢𑁆𑀣𑀫𑀸𑀳 𑁋 ‘‘𑀧𑀳𑀸𑀦𑀧𑀝𑀺𑀯𑁂𑀥𑁄 𑀘𑁂𑀯 𑀲𑀫𑀼𑀤𑀬𑀲𑀘𑁆𑀘𑀜𑁆𑀘𑀸’’𑀢𑀺. 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀭𑀡𑀁 𑀦𑀺𑀩𑁆𑀩𑀸𑀦𑀜𑁆𑀘 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀇𑀫𑀺𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁄 𑀘𑁂𑀯 𑀦𑀺𑀭𑁄𑀥𑀲𑀘𑁆𑀘𑀜𑁆𑀘𑀸’’𑀢𑀺. 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀤𑀼𑀓𑁆𑀔𑀸𑀤𑀻𑀲𑀼 𑀢𑀻𑀲𑀼 𑀅𑀪𑀺𑀲𑀫𑀬𑀝𑁆𑀞𑀸𑀦𑁂𑀲𑀼. 𑀬𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀥𑀫𑁆𑀫𑀸𑀢𑀺 𑀬𑁂 𑀅𑀭𑀺𑀬𑀫𑀕𑁆𑀕𑀲𑀜𑁆𑀜𑀺𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀝𑁆𑀞, 𑀲𑀢𑁆𑀢 𑀯𑀸 𑀥𑀫𑁆𑀫𑀸. 𑀪𑀸𑀯𑀦𑀸𑀧𑀝𑀺𑀯𑁂𑀥𑁄 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀯𑀢𑁆𑀢𑀁 𑀫𑀕𑁆𑀕𑀲𑀘𑁆𑀘𑀁. 𑀲𑁂𑀲𑀧𑀤𑁂𑀲𑀼𑀧𑀻𑀢𑀺, ‘‘𑀅𑀬𑀁 𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄’’𑀢𑀺𑀆𑀤𑀺𑀧𑀤𑁂𑀲𑀼𑀧𑀺.

𑁮𑁯. 𑀇𑀫𑀲𑁆𑀫𑀺𑀦𑁆𑀢𑀺 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀢𑀸𑀬 𑀲𑀓𑀅𑀢𑁆𑀢𑀪𑀸𑀯𑁄 𑀕𑀳𑀺𑀢𑁄, 𑀢𑀤𑁂𑀯 𑀅𑀚𑁆𑀛𑀢𑁆𑀢𑀸 𑀔𑀦𑁆𑀥𑀸𑀢𑀺 𑀢𑀧𑁆𑀧𑀝𑀺𑀬𑁄𑀕𑀺𑀢𑀸𑀬, ‘‘𑀩𑀳𑀺𑀤𑁆𑀥𑀸𑀢𑀺 𑀧𑀭𑀲𑁆𑀲 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀽𑀢𑀺 𑀲𑀩𑁆𑀩𑁂𑀲𑀼 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀻𑀲𑀼𑀧𑀺. 𑀢𑀸𑀦𑀺 𑀧𑀦 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀺𑀧𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀺𑀧𑀺 𑀢𑀁𑀲𑀪𑀸𑀯𑀸𑀦𑀻𑀢𑀺 𑀆𑀳 ‘‘𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀻’’𑀢𑀺. 𑀯𑀺𑀜𑁆𑀜𑀸𑀡𑀕𑁆𑀕𑀳𑀡𑁂𑀦𑁂𑀯𑁂𑀢𑁆𑀣 𑀯𑁂𑀤𑀦𑀸𑀤𑀬𑁄𑀧𑀺 𑀕𑀳𑀺𑀢𑀸 𑀅𑀯𑀺𑀦𑀸𑀪𑀸𑀯𑀢𑁄𑀢𑀺, ‘‘𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂’’𑀢𑀺 𑀯𑀼𑀢𑁆𑀢𑀁. ‘‘𑀓𑀸𑀬𑁄’’𑀢𑀺 𑀯𑀸 𑀔𑀦𑁆𑀥𑀲𑀫𑀽𑀳𑁄𑀢𑀺 𑀅𑀢𑁆𑀣𑁄.

𑁯𑁦. 𑀅𑀦𑀢𑁆𑀢𑀦𑀺 𑀞𑀢𑁆𑀯𑀸𑀢𑀺 𑀅𑀢𑁆𑀢𑀭𑀳𑀺𑀢𑁂 𑀅𑀦𑀢𑁆𑀢𑀲𑀪𑀸𑀯𑁂 𑀔𑀦𑁆𑀥𑀓𑁄𑀝𑁆𑀞𑀸𑀲𑁂 𑀞𑀢𑁆𑀯𑀸 𑀢𑀁 𑀆𑀥𑀸𑀭𑀁 𑀓𑀢𑁆𑀯𑀸 𑀓𑀢𑀸𑀦𑀺 𑀓𑀫𑁆𑀫𑀸𑀦𑀺. 𑀓𑀢𑀭𑀲𑁆𑀫𑀺𑀁 𑀅𑀢𑁆𑀢𑀦𑀺 𑀞𑀢𑁆𑀯𑀸𑀢𑀺 𑀓𑀻𑀤𑀺𑀲𑁂 𑀅𑀢𑁆𑀢𑀦𑀺 𑀦𑀺𑀲𑁆𑀲𑀬𑀯𑀺𑀧𑀸𑀓𑀁 𑀤𑀲𑁆𑀲𑀦𑁆𑀢𑀺 𑀯𑀺𑀧𑀘𑁆𑀘𑀺𑀲𑁆𑀲𑀦𑁆𑀢𑀺. 𑀏𑀢𑁂𑀦 𑀓𑀸𑀭𑀓𑀯𑁂𑀤𑀓𑀭𑀳𑀺𑀢𑀢𑁆𑀢𑀸 𑀅𑀢𑁆𑀢𑀧𑀓𑁆𑀔𑀓𑀫𑁆𑀫𑀓𑀸𑀦𑀺 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀔𑀦𑁆𑀥𑀸𑀦𑀁 𑀔𑀡𑀺𑀓𑀢𑁆𑀢𑀸 𑀘 𑀓𑀢𑀦𑀸𑀲𑀅𑀓𑀢𑀩𑁆𑀪𑀸𑀕𑀫𑀤𑁄𑀲𑁄 𑀘 𑀆𑀧𑀚𑁆𑀚𑀢𑀻𑀢𑀺.

𑀢𑀢𑁆𑀭𑀸𑀬𑀁 (𑀇𑀢𑀺𑀯𑀼. 𑀅𑀝𑁆𑀞. 𑁭𑁪; 𑀲𑀸𑀭𑀢𑁆𑀣. 𑀝𑀻. 𑁧.𑁫) 𑀘𑁄𑀤𑀦𑀸𑀲𑁄𑀥𑀦𑀸𑀯𑀺𑀥𑀺 𑁋 𑀧𑀸𑀡𑀸𑀢𑀺𑀧𑀸𑀢𑀯𑀲𑁂𑀦 𑀢𑀸𑀯 𑀓𑀫𑁆𑀫𑀧𑀣𑀲𑀫𑁆𑀩𑀦𑁆𑀥𑀯𑀺𑀪𑀸𑀯𑀦𑀸, 𑀔𑀡𑁂 𑀔𑀡𑁂 𑀳𑀺 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀓𑁄 𑀳𑀦𑁆𑀢𑀺, 𑀓𑁄 𑀯𑀸 𑀳𑀜𑁆𑀜𑀢𑀺, 𑀬𑀤𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀦𑁆𑀢𑀸𑀦𑁄, 𑀲𑁄 𑀅𑀭𑀽𑀧𑀢𑁆𑀢𑀸 𑀦 𑀙𑁂𑀤𑀦𑀪𑁂𑀤𑀦𑀸𑀤𑀺𑀯𑀲𑁂𑀦 𑀯𑀺𑀓𑁄𑀧𑀦𑀲𑀫𑀢𑁆𑀣𑁄, 𑀦𑀧𑀺 𑀯𑀺𑀓𑁄𑀧𑀦𑀻𑀬𑁄. 𑀅𑀣 𑀭𑀽𑀧𑀲𑀦𑁆𑀢𑀸𑀦𑁄, 𑀲𑁄 𑀅𑀘𑁂𑀢𑀦𑀢𑁆𑀢𑀸 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑁄𑀢𑀺 𑀦 𑀢𑀢𑁆𑀣 𑀙𑁂𑀤𑀦𑀸𑀤𑀺𑀦𑀸 𑀧𑀸𑀡𑀸𑀢𑀺𑀧𑀸𑀢𑀸𑀧𑀼𑀜𑁆𑀜𑀁 𑀧𑀲𑀯𑀢𑀺 𑀬𑀣𑀸 𑀫𑀢𑀲𑀭𑀻𑀭𑁂. 𑀧𑀬𑁄𑀕𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀳𑀭𑀡𑀧𑁆𑀧𑀳𑀸𑀭𑀸𑀤𑀺𑀓𑁄 𑀅𑀢𑀻𑀢𑁂𑀲𑀼 𑀯𑀸 𑀲𑀗𑁆𑀔𑀸𑀭𑁂𑀲𑀼 𑀪𑀯𑁂𑀬𑁆𑀬, 𑀅𑀦𑀸𑀕𑀢𑁂𑀲𑀼, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀯𑀸, 𑀢𑀢𑁆𑀣 𑀦 𑀢𑀸𑀯 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀲𑀫𑁆𑀪𑀯𑀢𑀺 𑀢𑁂𑀲𑀁 𑀅𑀪𑀸𑀯𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀘 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀢𑁆𑀢𑀸 𑀲𑀭𑀲𑁂𑀦𑁂𑀯 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀢𑀸𑀬 𑀯𑀺𑀦𑀸𑀲𑀸𑀪𑀺𑀫𑀼𑀔𑁂𑀲𑀼 𑀦𑀺𑀧𑁆𑀧𑀬𑁄𑀚𑀦𑁄 𑀧𑀬𑁄𑀕𑁄 𑀲𑀺𑀬𑀸, 𑀯𑀺𑀦𑀸𑀲𑀲𑁆𑀲 𑀘 𑀓𑀸𑀭𑀡𑀭𑀳𑀺𑀢𑀢𑁆𑀢𑀸 𑀦 𑀧𑀳𑀭𑀡𑀧𑁆𑀧𑀳𑀸𑀭𑀸𑀤𑀺𑀧𑁆𑀧𑀬𑁄𑀕𑀳𑁂𑀢𑀼𑀓𑀁 𑀫𑀭𑀡𑀁, 𑀦𑀺𑀭𑀻𑀳𑀓𑀢𑀸𑀬 𑀘 𑀲𑀗𑁆𑀔𑀸𑀭𑀸𑀦𑀁 𑀓𑀲𑁆𑀲 𑀲𑁄 𑀧𑀬𑁄𑀕𑁄? 𑀔𑀡𑀺𑀓𑀢𑁆𑀢𑀸 𑀯𑀥𑀸𑀥𑀺𑀧𑁆𑀧𑀸𑀬𑀲𑀫𑀓𑀸𑀮𑀪𑀺𑀚𑁆𑀚𑀦𑀓𑀲𑁆𑀲 𑀓𑀺𑀭𑀺𑀬𑀸𑀧𑀭𑀺𑀬𑁄𑀲𑀸𑀦𑀓𑀸𑀮𑀸𑀦𑀯𑀝𑁆𑀞𑀸𑀦𑀢𑁄 𑀓𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀩𑀤𑁆𑀥𑁄𑀢𑀺?

𑀯𑀼𑀘𑁆𑀘𑀢𑁂𑀬𑀣𑀸𑀯𑀼𑀢𑁆𑀢𑀯𑀥𑀓𑀘𑁂𑀢𑀦𑀸𑀲𑀳𑀺𑀢𑁄 𑀲𑀗𑁆𑀔𑀸𑀭𑀧𑀼𑀜𑁆𑀚𑁄 𑀲𑀢𑁆𑀢𑀲𑀗𑁆𑀔𑀸𑀢𑁄 𑀳𑀦𑁆𑀢𑀺. 𑀢𑁂𑀦 𑀧𑀯𑀢𑁆𑀢𑀺𑀢𑀯𑀥𑀧𑁆𑀧𑀬𑁄𑀕𑀦𑀺𑀫𑀺𑀢𑁆𑀢𑀁 𑀅𑀧𑀕𑀢𑀉𑀲𑁆𑀫𑀸𑀯𑀺𑀜𑁆𑀜𑀸𑀡𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀫𑀢𑀯𑁄𑀳𑀸𑀭𑀧𑀯𑀢𑁆𑀢𑀺𑀦𑀺𑀩𑀦𑁆𑀥𑀦𑁄 𑀬𑀣𑀸𑀯𑀼𑀢𑁆𑀢𑀯𑀧𑁆𑀧𑀬𑁄𑀕𑀓𑀭𑀡𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀲𑀫𑀽𑀳𑁄 𑀳𑀜𑁆𑀜𑀢𑀺, 𑀓𑁂𑀯𑀮𑁄 𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀦𑁆𑀢𑀸𑀦𑁄. 𑀯𑀥𑀧𑁆𑀧𑀬𑁄𑀕𑀸𑀯𑀺𑀲𑀬𑀪𑀸𑀯𑁂𑀧𑀺 𑀢𑀲𑁆𑀲 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀭𑀽𑀧𑀲𑀦𑁆𑀢𑀸𑀦𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀭𑀽𑀧𑀲𑀦𑁆𑀢𑀸𑀦𑁂 𑀧𑀭𑁂𑀦 𑀧𑀬𑁄𑀚𑀺𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑀬𑁄𑀕𑀯𑀲𑁂𑀦 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀢𑀯𑀺𑀩𑀦𑁆𑀥𑀓𑀯𑀺𑀲𑀤𑀺𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀕𑀢𑁂 𑀯𑀺𑀘𑁆𑀙𑁂𑀤𑁄 𑀳𑁄𑀢𑀻𑀢𑀺 𑀦 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀅𑀲𑀫𑁆𑀪𑀯𑁄; 𑀦𑀸𑀧𑀺 𑀅𑀳𑁂𑀢𑀼𑀓𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀦 𑀘 𑀧𑀬𑁄𑀕𑁄 𑀦𑀺𑀧𑁆𑀧𑀬𑁄𑀚𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀓𑀢𑀧𑁆𑀧𑀬𑁄𑀕𑀯𑀲𑁂𑀦 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲 𑀲𑀗𑁆𑀔𑀸𑀭𑀓𑀮𑀸𑀧𑀲𑁆𑀲 𑀢𑀣𑀸 𑀅𑀦𑀼𑀧𑁆𑀧𑀢𑁆𑀢𑀺𑀢𑁄. 𑀔𑀡𑀺𑀓𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀫𑀭𑀡𑀲𑁆𑀲 𑀇𑀥 𑀫𑀭𑀡𑀪𑀸𑀯𑁂𑀦 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑀦𑁆𑀢𑀢𑀺𑀫𑀭𑀡𑀲𑁆𑀲 𑀘 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀳𑁂𑀢𑀼𑀓𑀪𑀸𑀯𑀢𑁄 𑀦 𑀅𑀳𑁂𑀢𑀼𑀓𑀁 𑀫𑀭𑀡𑀁; 𑀦 𑀘 𑀓𑀢𑁆𑀢𑀼𑀭𑀳𑀺𑀢𑁄 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀬𑁄𑀕𑁄 𑀦𑀺𑀭𑀻𑀳𑀓𑁂𑀲𑀼𑀧𑀺 𑀲𑀗𑁆𑀔𑀸𑀭𑁂𑀲𑀼 𑀲𑀦𑁆𑀦𑀺𑀳𑀺𑀢𑀢𑀸𑀫𑀢𑁆𑀢𑁂𑀦 𑀉𑀧𑀓𑀸𑀭𑀓𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀨𑀮𑀼𑀧𑁆𑀧𑀸𑀤𑀦𑁂 𑀦𑀺𑀬𑀢𑁂𑀲𑀼 𑀓𑀸𑀭𑀡𑁂𑀲𑀼 𑀓𑀢𑁆𑀢𑀼𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄 𑀬𑀣𑀸 𑁋 ‘‘𑀧𑀤𑀻𑀧𑁄 𑀧𑀓𑀸𑀲𑁂𑀢𑀺, 𑀦𑀺𑀲𑀸𑀓𑀭𑁄 𑀘𑀦𑁆𑀤𑀺𑀫𑀸’’𑀢𑀺. 𑀦 𑀘 𑀓𑁂𑀯𑀮𑀲𑁆𑀲 𑀯𑀘𑀸𑀥𑀺𑀧𑁆𑀧𑀸𑀬𑀲𑀳𑀪𑀼𑀦𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀓𑀮𑀸𑀧𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄 𑀇𑀘𑁆𑀙𑀺𑀢𑁄 𑀲𑀦𑁆𑀢𑀸𑀦𑀯𑀲𑁂𑀦 𑀅𑀯𑀝𑁆𑀞𑀺𑀢𑀲𑁆𑀲𑁂𑀯 𑀧𑀝𑀺𑀚𑀸𑀦𑀦𑀢𑁄; 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀜𑁆𑀘 𑀧𑀤𑀻𑀧𑀸𑀤𑀻𑀦𑀁 𑀅𑀢𑁆𑀣𑀓𑀺𑀭𑀺𑀬𑀲𑀺𑀤𑁆𑀥𑀺 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁂𑀯 𑀧𑀸𑀡𑀸𑀢𑀺𑀧𑀸𑀢𑁂𑀦 𑀓𑀫𑁆𑀫𑀼𑀦𑀸 𑀩𑀤𑁆𑀥𑁄; 𑀢𑀢𑁄 𑀏𑀯 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸 𑀧𑀯𑀢𑁆𑀢𑀸; 𑀢𑀢𑁆𑀣𑁂𑀯 𑀲𑀦𑁆𑀢𑀸𑀦𑁂 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂𑀦 𑀪𑀯𑀦𑁆𑀢𑀭𑁂 𑀦𑀺𑀭𑀬𑀸𑀤𑀻𑀲𑀼 𑀢𑀲𑁆𑀲𑀸 𑀨𑀮𑀧𑁆𑀧𑀯𑀢𑁆𑀢𑀻𑀢𑀺 𑀦𑀢𑁆𑀣𑁂𑀯 𑀓𑀢𑀯𑀺𑀦𑀸𑀲𑁄 𑀅𑀓𑀢𑀩𑁆𑀪𑀸𑀕𑀫𑁄 𑀘. 𑀇𑀫𑀺𑀦𑀸 𑀦𑀬𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀜𑁆𑀘 𑀯𑀲𑁂𑀦 𑀬𑀣𑀸𑀭𑀳𑀁 𑀓𑀫𑁆𑀫𑀧𑀣𑀲𑀫𑁆𑀩𑀦𑁆𑀥𑀯𑀺𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀲𑀩𑁆𑀩𑁄 𑀤𑀺𑀝𑁆𑀞𑀺𑀕𑁆𑀕𑀸𑀳𑁄 𑀢𑀡𑁆𑀳𑀸𑀯𑀲𑀕𑀢𑀲𑁆𑀲𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁂𑀦𑀸’’𑀢𑀺. 𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀫𑀬𑀸 𑀤𑁂𑀲𑀺𑀬𑀫𑀸𑀦𑀤𑀲𑁆𑀲𑀦𑀥𑀫𑁆𑀫𑁂𑀲𑀼. 𑀧𑀓𑀢𑀺𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀕𑀳𑁂𑀢𑁆𑀯𑀸 𑀧𑀭𑀺𑀳𑀭𑀺𑀬𑀫𑀸𑀦𑀓𑀫𑁆𑀫𑀝𑁆𑀞𑀸𑀦𑀁. 𑀅𑀜𑁆𑀜𑀁 𑀦𑀯𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀪𑀕𑀯𑀢𑁄 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀕𑀳𑀺𑀢𑀁 𑀅𑀜𑁆𑀜𑀁 𑀦𑀯𑀁 𑀓𑀫𑁆𑀫𑀝𑁆𑀞𑀸𑀦𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.