𑁧. 𑀤𑁂𑀯𑀤𑀳𑀯𑀕𑁆𑀕𑁄

𑁧. 𑀤𑁂𑀯𑀤𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀤𑀺𑀩𑁆𑀩𑀦𑁆𑀢𑀺 𑀓𑀸𑀫𑀕𑀼𑀡𑁂𑀳𑀺 𑀓𑀻𑀴𑀦𑁆𑀢𑀺, 𑀮𑀴𑀦𑁆𑀢𑀺, 𑀢𑁂𑀲𑀼 𑀯𑀸 𑀯𑀺𑀳𑀭𑀦𑁆𑀢𑀺, 𑀯𑀺𑀚𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀧𑀘𑁆𑀘𑀢𑁆𑀣𑀺𑀓𑁂 𑀯𑀺𑀚𑁂𑀢𑀼𑀁 𑀇𑀘𑁆𑀙𑀦𑁆𑀢𑀺; 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀸𑀤𑀺𑀲𑀓𑁆𑀓𑀸𑀭𑀤𑀸𑀦𑀕𑁆𑀕𑀳𑀡𑀁 𑀢𑀁𑀢𑀁𑀅𑀢𑁆𑀣𑀸𑀦𑀼𑀲𑀸𑀲𑀦𑀜𑁆𑀘 𑀓𑀭𑁄𑀦𑁆𑀢𑀸 𑀯𑁄𑀳𑀭𑀦𑁆𑀢𑀺, 𑀧𑀼𑀜𑁆𑀜𑀸𑀦𑀼𑀪𑀸𑀯𑀧𑁆𑀧𑀢𑁆𑀢𑀸𑀬 𑀚𑀼𑀢𑀺𑀬𑀸 𑀚𑁄𑀢𑁂𑀦𑁆𑀢𑀺 𑀯𑀸𑀢𑀺 𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀭𑀸𑀚𑀸𑀦𑁄. 𑀢𑀣𑀸 𑀳𑀺 𑀢𑁂 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀚𑀦𑀁 𑀭𑀜𑁆𑀚𑀬𑀦𑁆𑀢𑀸 𑀲𑀬𑀁 𑀬𑀣𑀸𑀯𑀼𑀢𑁆𑀢𑁂𑀳𑀺 𑀯𑀺𑀲𑁂𑀲𑁂𑀳𑀺 𑀭𑀸𑀚𑀦𑁆𑀢𑀺 𑀤𑀺𑀩𑁆𑀩𑀦𑁆𑀢𑀺 𑀲𑁄𑀪𑀦𑁆𑀢𑀻𑀢𑀺 𑀘, ‘‘𑀭𑀸𑀚𑀸𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀦𑀺𑀕𑀫𑀤𑁂𑀲𑁂. 𑀲𑀸𑀢𑀺 𑀧𑁄𑀓𑁆𑀔𑀭𑀡𑀻. 𑀢𑀦𑁆𑀢𑀺 𑀢𑀁, ‘‘𑀤𑁂𑀯𑀤𑀳’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀧𑁄𑀓𑁆𑀔𑀭𑀡𑀺𑀁 𑀉𑀧𑀸𑀤𑀸𑀬, 𑀢𑀲𑁆𑀲 𑀅𑀤𑀽𑀭𑀪𑀯𑀢𑁆𑀢𑀸𑀢𑀺 𑀓𑁂𑀘𑀺. 𑀲𑀩𑁆𑀩𑀁 𑀲𑀼𑀔𑀸𑀤𑀺𑀪𑁂𑀤𑀁 𑀯𑁂𑀤𑀬𑀺𑀢𑀁. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀺𑀫𑀚𑀸𑀢𑀺𑀬𑀁. 𑀓𑀢𑀓𑀫𑁆𑀫𑀧𑀘𑁆𑀘𑀬𑀸𑀢𑀺 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄 𑀚𑀸𑀢𑀁 𑀓𑀫𑁆𑀫𑀁 𑀧𑀝𑀺𑀘𑁆𑀘. 𑀢𑁂𑀦 𑀲𑀩𑁆𑀩𑀸𑀧𑀺 𑀯𑁂𑀤𑀦𑀸 𑀓𑀫𑁆𑀫𑀨𑀮𑀪𑀽𑀢𑀸 𑀏𑀯 𑀅𑀦𑀼𑀪𑀯𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀇𑀫𑀺𑀦𑀸’’𑀢𑀺𑀆𑀤𑀺. 𑀅𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺, ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄’’𑀢𑀺 𑀏𑀯𑀁 𑀇𑀫𑁂 𑀦𑀸𑀫𑀸𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀫𑀢𑁆𑀣𑀁. 𑀦𑀺𑀬𑀫𑁂𑀢𑁆𑀯𑀸𑀢𑀺, ‘‘𑀏𑀯𑀁𑀯𑀸𑀤𑀺𑀦𑁄, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸’’𑀢𑀺 𑀏𑀯𑀁 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀓𑀮𑀺𑀲𑀸𑀲𑀦𑀦𑁆𑀢𑀺 𑀧𑀭𑀸𑀚𑀬𑀁. 𑀓𑀮𑀻𑀢𑀺 𑀳𑀺 𑀅𑀦𑀢𑁆𑀣𑁄 𑀯𑀼𑀘𑁆𑀘𑀢𑀺, 𑀓𑀮𑀻𑀢𑀺 𑀲𑀲𑀢𑀺 𑀯𑀺𑀧𑁆𑀨𑀭𑀢𑀻𑀢𑀺 𑀓𑀮𑀺𑀲𑀸𑀲𑀦𑀁, 𑀧𑀭𑀸𑀚𑀬𑁄. 𑀓𑀮𑀻𑀢𑀺 𑀯𑀸 𑀓𑁄𑀥𑀫𑀸𑀦𑀸𑀤𑀺𑀓𑀺𑀮𑁂𑀲𑀚𑀸𑀢𑀺, 𑀢𑀸𑀬 𑀧𑀦 𑀅𑀬𑀼𑀢𑁆𑀢𑀯𑀸𑀤𑀺𑀢𑀸 𑀓𑀮𑀺𑀲𑀸𑀲𑀦𑀁. 𑀢𑀁 𑀆𑀭𑁄𑀧𑁂𑀢𑀼𑀓𑀸𑀫𑁄 𑀯𑀺𑀪𑀸𑀯𑁂𑀢𑀼𑀓𑀸𑀫𑁄. 𑀬𑁂 𑀓𑀫𑁆𑀫𑀁 𑀓𑀢𑀁 𑀅𑀓𑀢𑀁 𑀯𑀸𑀢𑀺 𑀦 𑀚𑀸𑀦𑀦𑁆𑀢𑀺, 𑀢𑁂 𑀓𑀣𑀁 𑀢𑀁 𑀏𑀤𑀺𑀲𑀦𑁆𑀢𑀺 𑀚𑀸𑀦𑀺𑀲𑁆𑀲𑀦𑁆𑀢𑀺. 𑀬𑁂 𑀘 𑀓𑀫𑁆𑀫𑀁 𑀧𑀪𑁂𑀤𑀢𑁄 𑀦 𑀚𑀸𑀦𑀦𑁆𑀢𑀺, 𑀢𑁂 𑀓𑀣𑀁 𑀢𑀲𑁆𑀲 𑀯𑀺𑀧𑀸𑀓𑀁 𑀚𑀸𑀦𑀺𑀲𑁆𑀲𑀦𑁆𑀢𑀺; 𑀯𑀺𑀧𑀸𑀓𑀧𑀭𑀺𑀬𑁄𑀲𑀺𑀢𑀪𑀸𑀯𑀁 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀬𑁂 𑀘 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲 𑀧𑀝𑀺𑀧𑀓𑁆𑀔𑀫𑁂𑀯 𑀦 𑀚𑀸𑀦𑀦𑁆𑀢𑀺; 𑀢𑁂 𑀓𑀣𑀁 𑀢𑀲𑁆𑀲 𑀧𑀳𑀸𑀦𑀁 𑀓𑀼𑀲𑀮𑀓𑀫𑁆𑀫𑀲𑁆𑀲 𑀘 𑀲𑀫𑁆𑀧𑀸𑀤𑀦𑀯𑀺𑀥𑀺𑀁 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀉𑀢𑁆𑀢𑀭𑀺 𑀧𑀼𑀘𑁆𑀙𑀸𑀬𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀆𑀳.

𑁨. 𑀓𑀺𑀜𑁆𑀘𑀸𑀧𑀺 𑀘𑀽𑀴𑀤𑀼𑀓𑁆𑀔𑀓𑁆𑀔𑀦𑁆𑀥𑁂𑀧𑀺, (𑀫. 𑀦𑀺. 𑁧.𑁧𑁮𑁦) ‘‘𑀏𑀯𑀁 𑀲𑀦𑁆𑀢𑁂’’𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀦𑀺𑀕𑀡𑁆𑀞𑀸𑀦𑀁 𑀅𑀚𑀸𑀦𑀦𑀪𑀸𑀯𑁄 𑀏𑀯 𑀉𑀚𑀼𑀓𑀁 𑀧𑀓𑀸𑀲𑀺𑀢𑁄 𑀳𑁂𑀝𑁆𑀞𑀸 𑀤𑁂𑀲𑀦𑀸𑀬 𑀢𑀣𑀸 𑀧𑀯𑀢𑁆𑀢𑀢𑁆𑀢𑀸. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁧𑁮𑁦) 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀲𑀦𑁆𑀢𑁂𑀢𑀺 𑀢𑀼𑀫𑁆𑀳𑀸𑀓𑀁 𑀏𑀯𑀁 𑀅𑀚𑀸𑀦𑀦𑀪𑀸𑀯𑁂 𑀲𑀢𑀻’’𑀢𑀺, 𑀢𑀣𑀸𑀧𑀺 𑀢𑀢𑁆𑀣 𑀉𑀧𑀭𑀺𑀤𑁂𑀲𑀦𑀸𑀬 𑀲𑀫𑁆𑀩𑀤𑁆𑀥𑁄 𑀏𑀯𑀫𑀢𑁆𑀣𑁄 𑀯𑀼𑀘𑁆𑀘𑀫𑀸𑀦𑁄 𑀬𑀼𑀚𑁆𑀚𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀢𑀼𑀁 𑀇𑀥, ‘‘𑀫𑀳𑀸𑀦𑀺𑀕𑀡𑁆𑀞𑀲𑁆𑀲 𑀯𑀘𑀦𑁂 𑀲𑀘𑁆𑀘𑁂 𑀲𑀦𑁆𑀢𑁂𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀢𑀓𑀲𑁆𑀲 𑀞𑀸𑀦𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀜𑁆𑀘𑀧𑀭𑀺𑀫𑀸𑀡𑀲𑁆𑀲 𑀓𑀸𑀭𑀡𑀲𑁆𑀲.

𑁩. 𑀅𑀦𑁂𑀓𑀯𑀸𑀭𑀁 𑀯𑀺𑀲𑀭𑀜𑁆𑀚𑀦𑀁 𑀇𑀥 𑀕𑀸𑀴𑁆𑀳𑀸𑀧𑀮𑁂𑀧𑀦𑀁, 𑀦 𑀲𑀸𑀝𑀓𑀲𑁆𑀲 𑀯𑀺𑀬 𑀮𑀺𑀢𑁆𑀢𑀢𑀸𑀢𑀺 𑀆𑀳 𑁋 ‘‘𑀩𑀳𑀮𑀽𑀧…𑀧𑁂… 𑀮𑀺𑀢𑁆𑀢𑁂𑀦 𑀯𑀺𑀬𑀸’’𑀢𑀺. 𑀯𑀼𑀢𑁆𑀢𑀫𑁂𑀯, 𑀦 𑀧𑀼𑀦 𑀯𑀢𑁆𑀢𑀩𑁆𑀩𑀁, 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀫𑁂𑀲𑀁 𑀦𑀺𑀕𑀡𑁆𑀞𑀸𑀦𑀁 𑀢𑀸𑀤𑀺𑀲𑀲𑁆𑀲 𑀢𑁂𑀲𑀁 𑀅𑀪𑀸𑀯𑀢𑁄, ‘‘𑀚𑀸𑀦𑀦𑀓𑀸𑀮𑁄 𑀲𑀺𑀬𑀸’’𑀢𑀺 𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀤𑀢𑀺. 𑀢𑁂𑀦 𑀏𑀯𑀁 𑀚𑀸𑀦𑀺𑀢𑀼𑀁 𑀢𑁂𑀳𑀺 𑀲𑀓𑁆𑀓𑀸 𑀲𑀺𑀬𑀸, 𑀢𑁂𑀲𑀜𑁆𑀘 𑀤𑀲𑁆𑀲𑀦𑀁 𑀲𑀘𑁆𑀘𑀁 𑀲𑀺𑀬𑀸. 𑀬𑀲𑁆𑀫𑀸 𑀢𑁂𑀲𑀁 𑀤𑀲𑁆𑀲𑀦𑀁 𑀅𑀲𑀘𑁆𑀘𑀁, 𑀢𑀲𑁆𑀫𑀸 𑀢𑁂 𑀦 𑀚𑀸𑀦𑀺𑀁𑀲𑀽𑀢𑀺 𑀤𑀲𑁆𑀲𑁂𑀢𑀺. 𑀘𑀢𑀽𑀲𑀼 𑀓𑀸𑀮𑁂𑀲𑀽𑀢𑀺 𑀯𑀡𑀫𑀼𑀔𑀲𑁆𑀲 𑀧𑀭𑀺𑀓𑀦𑁆𑀢𑀦𑀓𑀸𑀮𑁄, 𑀲𑀮𑁆𑀮𑀲𑁆𑀲 𑀏𑀲𑀦𑀓𑀸𑀮𑁄, 𑀅𑀩𑁆𑀩𑀼𑀳𑀦𑀓𑀸𑀮𑁄, 𑀯𑀡𑀫𑀼𑀔𑁂 𑀅𑀕𑀤𑀗𑁆𑀕𑀸𑀭𑀑𑀤𑀳𑀦𑀓𑀸𑀮𑁄𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀓𑀸𑀮𑁂𑀲𑀼. 𑀲𑀼𑀤𑁆𑀥𑀦𑁆𑀢𑁂𑀢𑀺 𑀲𑀼𑀤𑁆𑀥𑀓𑁄𑀝𑁆𑀞𑀸𑀲𑁂, 𑀤𑀼𑀓𑁆𑀔𑀲𑁆𑀲 𑀅𑀦𑀯𑀲𑁂𑀲𑀢𑁄 𑀦𑀺𑀚𑁆𑀚𑀻𑀭𑀡𑀝𑁆𑀞𑁂𑀦 𑀦𑀺𑀤𑁆𑀤𑀼𑀓𑁆𑀔𑀪𑀸𑀯𑁂𑀢𑀺 𑀅𑀢𑁆𑀣𑁄. 𑀏𑀓𑀸𑀬 𑀉𑀧𑀫𑀸𑀬𑀸𑀢𑀺, ‘‘𑀲𑀮𑁆𑀮𑁂𑀦 𑀯𑀺𑀤𑁆𑀥𑀲𑁆𑀲 𑀳𑀺 𑀯𑀺𑀤𑁆𑀥𑀓𑀸𑀮𑁂 𑀯𑁂𑀤𑀦𑀸𑀬 𑀧𑀸𑀓𑀝𑀓𑀸𑀮𑁄 𑀯𑀺𑀬𑀸’’𑀢𑀺 𑀇𑀫𑀸𑀬 𑀏𑀓𑀸𑀬 𑀉𑀧𑀫𑀸𑀬. 𑀢𑀬𑁄 𑀅𑀢𑁆𑀣𑀸𑀢𑀺 𑀧𑀼𑀩𑁆𑀩𑁂 𑀅𑀳𑀼𑀯𑀫𑁆𑀳𑀸 𑀯𑀸 𑀦𑁄 𑀯𑀸, 𑀧𑀸𑀧𑀓𑀫𑁆𑀫𑀁 𑀅𑀓𑀭𑀺𑀫𑁆𑀳𑀸 𑀯𑀸 𑀦𑁄 𑀯𑀸, 𑀏𑀯𑀭𑀽𑀧𑀁 𑀯𑀸 𑀧𑀸𑀧𑀓𑀫𑁆𑀫𑀁 𑀅𑀓𑀭𑀺𑀫𑁆𑀳𑀸𑀢𑀺 𑀇𑀫𑁂 𑀢𑀬𑁄 𑀅𑀢𑁆𑀣𑀸. 𑀘𑀢𑀽𑀳𑀺 𑀉𑀧𑀫𑀸𑀳𑀻𑀢𑀺 𑀯𑀡𑀫𑀼𑀔𑀧𑀭𑀺𑀓𑀦𑁆𑀢𑀦𑀸𑀤𑀻𑀳𑀺 𑀘𑀢𑀽𑀳𑀺 𑀉𑀧𑀫𑀸𑀳𑀺. 𑀏𑀓𑁄 𑀅𑀢𑁆𑀣𑁄𑀢𑀺, ‘‘𑀏𑀢𑁆𑀢𑀓𑀁 𑀤𑀼𑀓𑁆𑀔𑀁 𑀦𑀺𑀚𑁆𑀚𑀺𑀡𑁆𑀡’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀏𑀓𑁄 𑀅𑀢𑁆𑀣𑁄. 𑀲𑁄 𑀳𑀺 𑀤𑀼𑀓𑁆𑀔𑀦𑀺𑀚𑁆𑀚𑀻𑀭𑀡𑀪𑀸𑀯𑀲𑀸𑀫𑀜𑁆𑀜𑀸 𑀏𑀓𑁄 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑁄.

𑁪. 𑀇𑀫𑁂 𑀧𑀦 𑀦𑀺𑀕𑀡𑁆𑀞𑀸. 𑀆𑀲𑀗𑁆𑀓𑀸𑀬 𑀯𑀺𑀤𑁆𑀥𑁄𑀲𑁆𑀫𑀻𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀧𑀘𑁆𑀘𑀸𑀳𑀭𑀺𑀢𑀼𑀦𑁆𑀢𑀺 𑀧𑀘𑁆𑀘𑀸𑀯𑀢𑁆𑀢𑀺𑀢𑀼𑀁, 𑀧𑀭𑀺𑀳𑀭𑀺𑀢𑀼𑀦𑁆𑀢𑀺 𑀅𑀢𑁆𑀣𑁄.

𑁫. 𑀅𑀢𑀻𑀢𑀯𑀸𑀤𑀁 𑀲𑀤𑁆𑀤𑀳𑀦𑁆𑀢𑀸𑀦𑀦𑁆𑀢𑀺, ‘‘𑀅𑀢𑁆𑀣𑀺 𑀔𑁄, 𑀪𑁄, 𑀦𑀺𑀕𑀡𑁆𑀞𑀸 𑀧𑀼𑀩𑁆𑀩𑁂 𑀧𑀸𑀧𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀏𑀯𑀁 𑀅𑀢𑀻𑀢𑀁𑀲𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀫𑀳𑀸𑀦𑀺𑀕𑀡𑁆𑀞𑀲𑁆𑀲 𑀯𑀸𑀤𑀁 𑀲𑀤𑁆𑀤𑀳𑀦𑁆𑀢𑀸𑀦𑀁. 𑀪𑀽𑀢𑀢𑁆𑀢𑀸𑀢𑀺 𑀬𑀣𑀸𑀪𑀽𑀢𑀢𑁆𑀢𑀸 𑀓𑀺𑀁 𑀅𑀯𑀺𑀧𑀭𑀻𑀢𑀫𑁂𑀯 𑀅𑀢𑁆𑀣𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸𑀢𑀺 𑀧𑀼𑀘𑁆𑀙𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀳 𑀥𑀫𑁆𑀫𑁂𑀦𑀸𑀢𑀺 𑀲𑀳𑀥𑀫𑁆𑀫𑁄, 𑀲𑁄 𑀏𑀯 𑀲𑀳𑀥𑀫𑁆𑀫𑀺𑀓𑁄 𑀬𑀣𑀸 ‘‘𑀯𑁂𑀦𑀬𑀺𑀓𑁄’’𑀢𑀺 (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁮). ‘‘𑀥𑀫𑁆𑀫𑁄’’𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 𑁋 ‘‘𑀲𑀳𑁂𑀢𑀼𑀓𑀁 𑀲𑀓𑀸𑀭𑀡’’𑀦𑁆𑀢𑀺. 𑀧𑀝𑀺𑀳𑀭𑀢𑀺 𑀧𑀝𑀺𑀯𑀢𑁆𑀢𑁂𑀢𑀻𑀢𑀺 𑀧𑀝𑀺𑀳𑀸𑀭𑁄, 𑀯𑀸𑀤𑁄 𑀏𑀯 𑀧𑀝𑀺𑀳𑀸𑀭𑁄 𑀯𑀸𑀤𑀧𑀝𑀺𑀳𑀸𑀭𑁄; 𑀢𑀁, 𑀉𑀢𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀧𑀘𑁆𑀘𑀸𑀕𑀫𑀦𑀓𑀯𑀸𑀤’’𑀦𑁆𑀢𑀺, 𑀘𑁄𑀤𑀦𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀝𑀺𑀧𑀸𑀓𑀢𑀺𑀓𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀲𑀦𑁆𑀢𑀺 𑀇𑀤𑀁 𑀆𑀯𑀼𑀢𑁆𑀢𑀺𑀯𑀲𑁂𑀦 𑀕𑀳𑁂𑀢𑀩𑁆𑀩𑀁, ‘‘𑀢𑁂𑀲𑀁 𑀲𑀤𑁆𑀥𑀸𑀙𑁂𑀤𑀓𑀯𑀸𑀤𑀁 𑀦𑀸𑀫 𑀢𑁂𑀲𑀁 𑀤𑀲𑁆𑀲𑁂𑀢𑀻’’𑀢𑀺.

𑁬. 𑀅𑀯𑀺𑀚𑁆𑀚𑀸 𑀅𑀜𑁆𑀜𑀸𑀡𑀸 𑀲𑀫𑁆𑀫𑁄𑀳𑀸𑀢𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁. 𑀅𑀯𑀺𑀚𑁆𑀚𑀸𑀢𑀺 𑀯𑀸 𑀅𑀯𑀺𑀚𑁆𑀚𑀸𑀬 𑀓𑀭𑀡𑀪𑀽𑀢𑀸𑀬. 𑀅𑀜𑁆𑀜𑀸𑀡𑁂𑀦𑀸𑀢𑀺 𑀅𑀚𑀸𑀦𑀦𑁂𑀦. 𑀲𑀫𑁆𑀫𑁄𑀳𑁂𑀦𑀸𑀢𑀺 𑀲𑀫𑁆𑀫𑀼𑀬𑁆𑀳𑀦𑁂𑀦 𑀫𑀳𑀸𑀫𑀼𑀴𑁆𑀳𑀢𑀸𑀬. 𑀲𑀸𑀫𑀁𑀬𑁂𑀯 𑀑𑀧𑀓𑁆𑀓𑀫𑀺𑀓𑀸 𑀏𑀢𑀭𑀳𑀺 𑀅𑀢𑁆𑀢𑀦𑁄 𑀉𑀧𑀓𑁆𑀓𑀫𑀳𑁂𑀢𑀼 𑀤𑀼𑀓𑁆𑀔𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑀁 𑁋 ‘‘𑀬𑀁𑀓𑀺𑀜𑁆𑀘𑀸𑀬𑀁…𑀧𑁂… 𑀧𑀼𑀩𑁆𑀩𑁂𑀓𑀢𑀳𑁂𑀢𑀽’’𑀢𑀺 𑀯𑀺𑀧𑀭𑀻𑀢𑀢𑁄 𑀲𑀤𑁆𑀤𑀳𑀣. 𑀧𑀼𑀩𑁆𑀩𑁂𑀓𑀢𑀳𑁂𑀢𑀼𑀯𑀸𑀤𑀲𑀜𑁆𑀜𑀺𑀢𑀁 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀁 𑀕𑀡𑁆𑀳𑀣.

𑁭. 𑀤𑀺𑀝𑁆𑀞𑀥𑀫𑁆𑀫𑁄 𑀯𑀼𑀘𑁆𑀘𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑁄, 𑀢𑀢𑁆𑀣 𑀯𑁂𑀤𑀺𑀢𑀩𑁆𑀩𑀁 𑀨𑀮𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁. 𑀢𑁂𑀦𑀸𑀳 𑁋 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀤𑀸𑀬𑀓’’𑀦𑁆𑀢𑀺. 𑀧𑀬𑁄𑀕𑁂𑀦𑀸𑀢𑀺 𑀓𑀸𑀬𑀺𑀓𑁂𑀦 𑀧𑀬𑁄𑀕𑁂𑀦 𑀯𑀸 𑀯𑀸𑀘𑀲𑀺𑀓𑁂𑀦 𑀯𑀸 𑀧𑀬𑁄𑀕𑁂𑀦. 𑀧𑀥𑀸𑀦𑁂𑀦𑀸𑀢𑀺 𑀧𑀤𑀳𑀦𑁂𑀦 𑀘𑁂𑀢𑀲𑀺𑀓𑁂𑀦 𑀉𑀲𑁆𑀲𑀸𑀳𑀦𑁂𑀦. 𑀆𑀲𑀦𑁆𑀦𑁂 𑀪𑀯𑀦𑁆𑀢𑀭𑁂 𑀯𑀺𑀧𑀸𑀘𑁂𑀢𑀼𑀁 𑀦 𑀲𑀓𑁆𑀓𑀸, 𑀧𑀕𑁂𑀯 𑀤𑀽𑀭𑁂𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀤𑀼𑀢𑀺𑀬𑁂 𑀯𑀸 𑀢𑀢𑀺𑀬𑁂 𑀯𑀸 𑀅𑀢𑁆𑀢𑀪𑀸𑀯𑁂’’𑀢𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀢𑁆𑀢𑀓𑀪𑀸𑀯𑀢𑁄 𑀲𑀼𑀔𑀯𑁂𑀤𑀦𑀸𑀬 𑀳𑀺𑀢𑀦𑁆𑀢𑀺 𑀲𑀼𑀔𑀯𑁂𑀤𑀦𑀻𑀬𑀁. 𑀲𑀸 𑀧𑀦 𑀯𑀺𑀧𑀸𑀓𑀯𑁂𑀤𑀦𑀸𑀪𑀸𑀯𑀢𑁄 𑀏𑀓𑀦𑁆𑀢𑀢𑁄 𑀇𑀝𑁆𑀞𑀸𑀭𑀫𑁆𑀫𑀡𑀸 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀇𑀝𑁆𑀞𑀸𑀭𑀫𑁆𑀫𑀡𑀯𑀺𑀧𑀸𑀓𑀤𑀸𑀬𑀓’’𑀦𑁆𑀢𑀺. 𑀯𑀺𑀧𑀭𑀻𑀢𑀦𑁆𑀢𑀺 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀯𑀺𑀧𑀸𑀓𑀤𑀸𑀬𑀓𑀁. 𑀦𑀺𑀧𑁆𑀨𑀦𑁆𑀦𑁂𑀢𑀺 𑀲𑀤𑁆𑀥𑀺𑀁 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑁂. 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀲𑁆𑀲𑀸𑀢𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀲𑁆𑀲 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀲𑁆𑀲. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀓𑀸𑀫𑀁 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀫𑁂𑀯 𑀯𑀼𑀘𑁆𑀘𑀢𑀺, 𑀢𑀣𑀸𑀧𑀺 𑀅𑀢𑁆𑀣𑁂𑀢𑁆𑀣 𑀅𑀢𑀺𑀲𑀬𑁄 𑀤𑀺𑀝𑁆𑀞𑀥𑀫𑁆𑀫𑀯𑀺𑀲𑁂𑀲𑀪𑀸𑀯𑀢𑁄 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀅𑀬𑀫𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀺𑀁 𑀤𑀺𑀯𑀲𑁂 𑀓𑀢𑀁, 𑀢𑀢𑁄 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀓𑀫𑁆𑀫𑀲𑁆𑀲 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀯𑀺𑀧𑀸𑀓𑀤𑀸𑀦𑁂. 𑀏𑀓𑀯𑀸𑀭𑀁 𑀓𑀲𑀺𑀢𑁆𑀯𑀸 𑀦𑀺𑀲𑀻𑀤𑀺 𑀙𑀸𑀢𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸. 𑀆𑀕𑀘𑁆𑀙𑀦𑁆𑀢𑀻 𑀆𑀳 𑁋 ‘‘𑀉𑀲𑁆𑀲𑀽𑀭𑁂 𑀪𑀢𑁆𑀢𑀁 𑀆𑀳𑀭𑀻𑀬𑀺𑀢𑁆𑀣𑀸’’𑀢𑀺 𑀤𑁄𑀫𑀦𑀲𑁆𑀲𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀬𑀣𑀸 𑀓𑀢𑀧𑀼𑀜𑁆𑀜𑀁 𑀅𑀦𑀼𑀫𑁄𑀤𑀢𑀺. 𑀯𑀺𑀚𑁆𑀚𑁄𑀢𑀫𑀸𑀦𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀦𑀼 𑀔𑁄 𑀇𑀤𑀫𑁆𑀧𑀺 𑀢𑀧𑁆𑀧𑀓𑀸𑀭𑁄, 𑀫𑀫 𑀘𑀺𑀢𑁆𑀢𑀯𑀺𑀓𑀧𑁆𑀧𑀫𑀢𑁆𑀢𑀁, 𑀉𑀤𑀸𑀳𑀼 𑀲𑀼𑀯𑀡𑁆𑀡𑀫𑁂𑀯𑀸’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀬𑀝𑁆𑀞𑀺𑀬𑀸 𑀧𑀳𑀭𑀺𑀢𑁆𑀯𑀸.

𑀯𑀸𑀴𑀬𑀓𑁆𑀔𑀲𑀜𑁆𑀘𑀭𑀡𑀢𑁆𑀢𑀸 𑀭𑀸𑀚𑀕𑀳𑀽𑀧𑀘𑀸𑀭𑀲𑁆𑀲 𑀦𑀕𑀭𑁂 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀘𑀸𑀭𑁂𑀲𑀼𑀁. 𑀉𑀧𑁆𑀧𑀦𑁆𑀦𑀭𑀸𑀕𑁄 𑀘𑀽𑀴𑀸𑀬 𑀟𑀁𑀲𑀺. 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀢𑁆𑀯𑀸𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀢𑁆𑀯𑀸. 𑀫𑀮𑁆𑀮𑀺𑀓𑀸𑀬 𑀯𑀢𑁆𑀣𑀼 𑀥𑀫𑁆𑀫𑀧𑀤𑀯𑀢𑁆𑀣𑀼𑀫𑁆𑀳𑀺 (𑀥. 𑀧. 𑀅𑀝𑁆𑀞. 𑁨.𑀫𑀮𑁆𑀮𑀺𑀓𑀸𑀤𑁂𑀯𑀻𑀯𑀢𑁆𑀣𑀼) 𑀆𑀕𑀢𑁂𑀦 𑀦𑀬𑁂𑀦 𑀓𑀣𑁂𑀢𑀩𑁆𑀩𑀁.

𑀫𑀭𑀡𑀲𑀦𑁆𑀢𑀺𑀓𑁂𑀧𑀺 𑀓𑀢𑀁, 𑀧𑀕𑁂𑀯 𑀢𑀢𑁄 𑀧𑀼𑀭𑁂𑀢𑀭𑀁 𑀅𑀢𑀻𑀢𑀢𑁆𑀢𑀪𑀸𑀯𑁂𑀲𑀼 𑀘 𑀓𑀢𑀁. 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑁄 𑀅𑀯𑀲𑁆𑀲𑀁𑀪𑀸𑀯𑀺𑀪𑀸𑀯𑀢𑁄. 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀫𑁂𑀯 𑀪𑀯𑀦𑁆𑀢𑀭𑁂 𑀯𑀺𑀧𑀸𑀓𑀤𑀸𑀬𑀓𑀪𑀸𑀯𑀢𑁄. 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀕𑀼𑀡𑁄𑀢𑁆𑀯𑁂𑀯 𑀯𑀼𑀢𑁆𑀢𑁄, 𑀦 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀯𑀺𑀧𑀸𑀓𑁄𑀢𑀺 𑀯𑀺𑀫𑀼𑀢𑁆𑀢𑀺𑀪𑀸𑀯𑀢𑁄. 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀮𑀓𑁆𑀔𑀡𑀸𑀦𑀢𑀺𑀯𑀢𑁆𑀢𑀦𑀢𑁄. 𑀲𑀩𑁆𑀩𑀮𑀳𑀼𑀁 𑀨𑀮𑀤𑀸𑀬𑀺𑀓𑀸𑀢𑀺 𑀏𑀢𑁂𑀦 𑀨𑀮𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀓𑀫𑁆𑀫𑀲𑁆𑀲 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀘𑀢𑀼𑀧𑁆𑀧𑀜𑁆𑀘𑀓𑁆𑀔𑀦𑁆𑀥𑀨𑀮𑀢𑀸𑀬 𑀲𑀜𑁆𑀜𑀸𑀪𑀯𑀽𑀧𑀕𑀁 𑀓𑀫𑁆𑀫𑀁 𑀩𑀳𑀼𑀯𑁂𑀤𑀦𑀻𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀓𑀔𑀦𑁆𑀥𑀨𑀮𑀢𑁆𑀢𑀸 𑀅𑀲𑀜𑁆𑀜𑀸𑀪𑀯𑀽𑀧𑀕𑀁 𑀓𑀫𑁆𑀫𑀁 𑀅𑀧𑁆𑀧𑀯𑁂𑀤𑀦𑀻𑀬𑀁. 𑀓𑁂𑀘𑀺 𑀧𑀦, ‘‘𑀅𑀭𑀽𑀧𑀸𑀯𑀘𑀭𑀓𑀫𑁆𑀫𑀁 𑀩𑀳𑀼𑀓𑀸𑀮𑀁 𑀯𑁂𑀤𑀺𑀢𑀩𑁆𑀩𑀨𑀮𑀢𑁆𑀢𑀸 𑀩𑀳𑀼𑀯𑁂𑀤𑀦𑀻𑀬𑀁, 𑀇𑀢𑀭𑀁 𑀅𑀧𑁆𑀧𑀯𑁂𑀤𑀦𑀻𑀬𑀁. 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀁 𑀯𑀸 𑀩𑀳𑀼𑀯𑁂𑀤𑀦𑀻𑀬𑀁, 𑀧𑀭𑀺𑀢𑁆𑀢𑀓𑀫𑁆𑀫𑀁 𑀅𑀧𑁆𑀧𑀯𑁂𑀤𑀦𑀻𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀲𑀯𑀺𑀧𑀸𑀓𑀁 𑀓𑀫𑁆𑀫𑀦𑁆𑀢𑀺 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀁, 𑀦 𑀆𑀭𑀤𑁆𑀥𑀯𑀺𑀧𑀸𑀓𑀫𑁂𑀯. 𑀅𑀯𑀺𑀧𑀸𑀓𑀁 𑀓𑀫𑁆𑀫𑀦𑁆𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀯𑀺𑀧𑀘𑁆𑀘𑀺𑀢𑀼𑀁 𑀅𑀲𑀫𑀢𑁆𑀣𑀁 𑀅𑀳𑁄𑀲𑀺𑀓𑀫𑁆𑀫𑀸𑀤𑀺𑀪𑁂𑀤𑀁.

𑁮. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀻𑀦𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀻𑀦𑀁 𑀤𑀲𑀦𑁆𑀦𑀁 𑀓𑀫𑁆𑀫𑀸𑀦𑀁 𑀉𑀧𑀓𑁆𑀓𑀫𑁂𑀦 𑀓𑀫𑁆𑀫𑀸𑀦𑀁 𑀅𑀜𑁆𑀜𑀸𑀣𑀸𑀪𑀸𑀯𑀲𑁆𑀲 𑀅𑀦𑀸𑀧𑀸𑀤𑀦𑀻𑀬𑀢𑁆𑀢𑀸 𑀬𑀣𑀸𑀲𑀪𑀸𑀯𑁂𑀦𑁂𑀯 𑀓𑀫𑁆𑀫𑀸𑀦𑀺 𑀢𑀺𑀝𑁆𑀞𑀦𑁆𑀢𑀺. 𑀢𑀢𑁆𑀣 𑀦𑀺𑀕𑀡𑁆𑀞𑀸𑀦𑀁 𑀉𑀧𑀓𑁆𑀓𑀫𑁄 𑀦𑀺𑀧𑁆𑀧𑀬𑁄𑀚𑀦𑁄𑀢𑀺 𑀆𑀳 ‘‘𑀅𑀨𑀮𑁄’’𑀢𑀺. 𑀦𑀺𑀕𑀡𑁆𑀞𑀸𑀦𑀁 𑀧𑀤𑀳𑀦𑀲𑁆𑀲 𑀫𑀺𑀘𑁆𑀙𑀸𑀯𑀸𑀬𑀸𑀫𑀲𑁆𑀲 𑀦𑀺𑀧𑁆𑀨𑀮𑀪𑀸𑀯𑀧𑁆𑀧𑀯𑁂𑀤𑀦𑁄 𑀧𑀥𑀸𑀦𑀘𑁆𑀙𑁂𑀤𑀓𑀯𑀸𑀤𑁄. 𑀧𑀭𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀳𑀻𑀢𑀺 𑀬𑁂𑀳𑀺 𑀓𑀸𑀭𑀡𑁂𑀳𑀺 𑀦𑀺𑀕𑀡𑁆𑀞𑀸𑀦𑀁 𑀯𑀸𑀤𑁂𑀲𑀼 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑀺. 𑀢𑁂𑀳𑀺 𑀧𑀭𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀳𑀺. 𑀦 𑀳𑀺 𑀮𑀓𑁆𑀔𑀡𑀬𑀼𑀢𑁆𑀢𑁂𑀦 𑀳𑁂𑀢𑀼𑀦𑀸 𑀯𑀺𑀦𑀸 𑀧𑀭𑀯𑀸𑀤𑁂𑀲𑀼 𑀤𑁄𑀲𑀁 𑀤𑀲𑁆𑀲𑁂𑀢𑀼𑀁 𑀲𑀓𑁆𑀓𑀸. 𑀢𑁂𑀦𑀸𑀳 ‘‘𑀲𑀓𑀸𑀭𑀡𑀸 𑀳𑀼𑀢𑁆𑀯𑀸’’𑀢𑀺. 𑀦𑀺𑀕𑀡𑁆𑀞𑀸𑀦𑀁 𑀯𑀸𑀤𑀸 𑀘 𑀅𑀦𑀼𑀯𑀸𑀤𑀸 𑀘𑀸𑀢𑀺 𑀦𑀺𑀕𑀡𑁆𑀞𑁂𑀳𑀺 𑀯𑀼𑀘𑁆𑀘𑀫𑀸𑀦𑀸 𑀲𑀓𑀲𑀓𑀲𑀫𑀬𑀧𑁆𑀧𑀯𑁂𑀤𑀺𑀓𑀸 𑀯𑀸𑀤𑀸𑀘𑁂𑀯 𑀲𑀸𑀯𑀓𑁂𑀳𑀺 𑀯𑀼𑀘𑁆𑀘𑀫𑀸𑀦𑀸 𑀢𑁂𑀲𑀁 𑀅𑀦𑀼𑀯𑀸𑀤𑀸 𑀘. 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀁 𑀓𑀸𑀭𑀡𑀁 𑀆𑀕𑀘𑁆𑀙𑀦𑁆𑀢𑀻𑀢𑀺, ‘‘𑀅𑀬𑀫𑁂𑀢𑁆𑀣 𑀤𑁄𑀲𑁄’’𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀜𑁆𑀜𑀽𑀳𑀺 𑀧𑀡𑁆𑀟𑀺𑀢𑁂𑀳𑀺 𑀕𑀭𑀳𑀸𑀭𑀳𑀁 𑀓𑀸𑀭𑀡𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀢𑁆𑀣𑁄𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄, ‘‘𑀯𑀼𑀢𑁆𑀢𑀦𑀬𑁂𑀦 𑀧𑀭𑁂𑀳𑀺 𑀯𑀼𑀢𑁆𑀢𑁂𑀦 𑀓𑀸𑀭𑀡𑁂𑀦 𑀲𑀓𑀸𑀭𑀡𑀸 𑀳𑀼𑀢𑁆𑀯𑀸 𑀤𑁄𑀲𑀤𑀲𑁆𑀲𑀦𑀯𑀲𑁂𑀦 𑀦𑀺𑀕𑀡𑁆𑀞𑀸𑀦𑀁 𑀯𑀸𑀤𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀢𑀢𑁄 𑀏𑀯 𑀢𑀁 𑀯𑀸𑀤𑀁 𑀅𑀧𑁆𑀧𑀲𑀸𑀤𑀦𑀻𑀬𑀪𑀸𑀯𑀤𑀲𑁆𑀲𑀦𑁂𑀦 𑀲𑁄𑀲𑁂𑀦𑁆𑀢𑀸 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀯𑁄𑀳𑀸𑀭𑀲𑀼𑀓𑁆𑀔𑀦𑁂𑀦 𑀫𑀺𑀮𑀸𑀧𑁂𑀦𑁆𑀢𑀸 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀺𑀦𑁄𑀢𑀺𑀆𑀤𑀬𑁄 𑀤𑀲 𑀕𑀸𑀭𑀬𑁆𑀳𑀸𑀧𑀤𑁂𑀲𑀸 𑀉𑀧𑀕𑀘𑁆𑀙𑀦𑁆𑀢𑀻’’𑀢𑀺.

𑁯. 𑀲𑀗𑁆𑀕𑀢𑀺𑀪𑀸𑀯𑀳𑁂𑀢𑀽𑀢𑀺 𑀢𑀢𑁆𑀣 𑀢𑀢𑁆𑀣 𑀬𑀤𑀺𑀘𑁆𑀙𑀸𑀬 𑀲𑀫𑀼𑀝𑁆𑀞𑀺𑀢𑀲𑀗𑁆𑀕𑀢𑀺𑀦𑀺𑀫𑀺𑀢𑁆𑀢𑀁. 𑀲𑀸 𑀧𑀦 𑀲𑀗𑁆𑀕𑀢𑀺 𑀦𑀺𑀬𑀢𑀺𑀮𑀓𑁆𑀔𑀡𑀸𑀢𑀺 𑀆𑀳 ‘‘𑀦𑀺𑀬𑀢𑀺𑀪𑀸𑀯𑀓𑀸𑀭𑀡𑀸’’𑀢𑀺. 𑀅𑀘𑁆𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀅𑀪𑁂𑀚𑁆𑀚𑀫𑀡𑀺 𑀯𑀺𑀬 𑀳𑀺 𑀧𑀝𑀺𑀦𑀺𑀬𑀢𑀢𑀸 𑀦𑀺𑀬𑀢𑀺𑀧𑀯𑀢𑁆𑀢𑀻𑀢𑀺. 𑀙𑀴𑀪𑀺𑀚𑀸𑀢𑀺𑀳𑁂𑀢𑀽𑀢𑀺 𑀓𑀡𑁆𑀳𑀸𑀪𑀺𑀚𑀸𑀢𑀺 𑀦𑀻𑀮𑀸𑀪𑀺𑀚𑀸𑀢𑀺 𑀮𑁄𑀳𑀺𑀢𑀸𑀪𑀺𑀚𑀸𑀢𑀺 𑀳𑀮𑀺𑀤𑁆𑀤𑀸𑀪𑀺𑀚𑀸𑀢𑀺 𑀲𑀼𑀓𑁆𑀓𑀸𑀪𑀺𑀚𑀸𑀢𑀺 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺 𑀇𑀫𑀸𑀲𑀼 𑀅𑀪𑀺𑀚𑀸𑀢𑀻𑀲𑀼 𑀚𑀸𑀢𑀺𑀦𑀺𑀫𑀺𑀢𑁆𑀢𑀁. 𑀧𑀸𑀧𑀲𑀗𑁆𑀕𑀢𑀺𑀓𑀸𑀢𑀺 𑀦𑀺𑀳𑀻𑀦𑀲𑀗𑁆𑀕𑀢𑀺𑀓𑀸.

𑁧𑁦. 𑀅𑀦𑀤𑁆𑀥𑀪𑀽𑀢𑀦𑁆𑀢𑀺 𑀏𑀢𑁆𑀣 𑀅𑀥𑀺-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄 𑀅𑀤𑁆𑀥-𑀲𑀤𑁆𑀤𑁄𑀢𑀺 𑀆𑀳 𑁋 ‘‘𑀅𑀦𑀤𑁆𑀥𑀪𑀽𑀢𑀦𑁆𑀢𑀺 𑀅𑀦𑀥𑀺𑀪𑀽𑀢’’𑀦𑁆𑀢𑀺. 𑀬𑀣𑀸 𑀆𑀧𑀸𑀬𑀺𑀓𑁄 𑀅𑀢𑁆𑀢𑀪𑀸𑀯𑁄 𑀫𑀳𑀢𑀸 𑀤𑀼𑀓𑁆𑀔𑁂𑀦 𑀅𑀪𑀺𑀪𑀼𑀬𑁆𑀬𑀢𑀺, 𑀦 𑀢𑀣𑀸 𑀅𑀬𑀦𑁆𑀢𑀺 𑀆𑀳 𑁋 ‘‘𑀤𑀼𑀓𑁆𑀔𑁂𑀦 𑀅𑀦𑀥𑀺𑀪𑀽𑀢𑁄 𑀦𑀸𑀫 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁄 𑀯𑀼𑀘𑁆𑀘𑀢𑀻’’𑀢𑀺. ‘‘𑀅𑀘𑁂𑀮𑀓𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁩𑁯𑁪) 𑀯𑀼𑀢𑁆𑀢𑀸𑀬 𑀦𑀸𑀦𑀧𑁆𑀧𑀓𑀸𑀭𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀓𑀺𑀮𑀫𑀣𑁂𑀦. 𑀬𑀤𑀺 𑀏𑀯𑀁 𑀓𑀣𑀁 𑀥𑀼𑀢𑀗𑁆𑀕𑀥𑀭𑀸𑀢𑀺 𑀆𑀳 ‘‘𑀬𑁂 𑀧𑀦𑀸’’𑀢𑀺𑀆𑀤𑀺. 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀲𑁆𑀫𑀺𑀜𑁆𑀳𑀺 𑀯𑀻𑀭𑀺𑀬𑀦𑁆𑀢𑀺 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀫𑀸𑀦𑀁 𑀯𑀻𑀭𑀺𑀬𑀁 𑀲𑀭𑀻𑀭𑀁 𑀔𑁂𑀤𑀦𑁆𑀢𑀫𑁆𑀧𑀺 𑀲𑀫𑁆𑀫𑀸𑀯𑀸𑀬𑀸𑀫𑁄 𑀦𑀸𑀫 𑀳𑁄𑀢𑀺 𑀜𑀸𑀬𑀸𑀭𑀤𑁆𑀥𑀪𑀸𑀯𑀢𑁄.

𑀣𑁂𑀭𑁄𑀢𑀺 𑀏𑀢𑁆𑀣 𑀆𑀕𑀢𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑁄. 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑀫𑀦𑀼𑀲𑁆𑀲𑀤𑁂𑀯𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀬𑁄, 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑁄 𑀯𑀸. 𑀔𑀼𑀭𑀕𑁆𑀕𑁂𑀬𑁂𑀯𑀸𑀢𑀺 𑀔𑀼𑀭𑁂 𑀲𑀻𑀲𑀕𑁆𑀕𑁂 𑀏𑀯, 𑀔𑀼𑀭𑁂 𑀲𑀻𑀲𑀕𑁆𑀕𑀢𑁄 𑀅𑀧𑀦𑀻𑀢𑁂 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀦𑁆𑀢𑀺, ‘‘𑀇𑀲𑁆𑀲𑀭𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄. 𑀦 𑀲𑀩𑁆𑀩𑁂 𑀏𑀯 𑀲𑀓𑁆𑀓𑀸𑀭𑀧𑀼𑀩𑁆𑀩𑀓𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀆𑀳 ‘‘𑀬𑁄 𑀤𑀸𑀲𑀺𑀓𑀼𑀘𑁆𑀙𑀺𑀬’’𑀦𑁆𑀢𑀺𑀆𑀤𑀺. 𑀭𑀚𑀢𑀫𑀼𑀤𑁆𑀤𑀺𑀓𑀦𑁆𑀢𑀺 𑀭𑀚𑀢𑀫𑀬𑀁 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀁. 𑀕𑁄𑀭𑀓𑀧𑀺𑀬𑀗𑁆𑀕𑀼𑀫𑀢𑁆𑀢𑁂𑀦𑀧𑀻𑀢𑀺 𑀓𑀧𑀺𑀢𑁆𑀣𑀙𑀮𑁆𑀮𑀺𑀓𑀗𑁆𑀕𑀼𑀧𑀼𑀧𑁆𑀨𑀕𑀦𑁆𑀥𑀫𑀢𑁆𑀢𑁂𑀦𑀧𑀺.

𑀥𑀫𑁆𑀫𑁂𑀦 𑀜𑀸𑀬𑁂𑀦 𑀆𑀕𑀢𑀲𑀼𑀔𑀁 𑀥𑀫𑁆𑀫𑀲𑀼𑀔𑀦𑁆𑀢𑀺 𑀆𑀳 𑁋 ‘‘𑀲𑀗𑁆𑀖𑀢𑁄 𑀯𑀸…𑀧𑁂… 𑀧𑀘𑁆𑀘𑀬𑀲𑀼𑀔’’𑀦𑁆𑀢𑀺. 𑀅𑀫𑀼𑀘𑁆𑀙𑀺𑀢𑁄𑀢𑀺 𑀅𑀦𑀚𑁆𑀛𑀸𑀧𑀦𑁆𑀦𑁄. 𑀇𑀤𑀸𑀦𑀺 𑀢𑀁 𑀅𑀦𑀚𑁆𑀛𑀸𑀧𑀦𑁆𑀦𑀢𑀁 𑀢𑀲𑁆𑀲 𑀘 𑀨𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀺𑀓𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀲𑀸𑀢𑀺 𑀲𑀫𑀼𑀤𑀬𑀲𑁆𑀲. 𑀲𑁄 𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀲𑁆𑀲 𑀤𑀼𑀓𑁆𑀔𑀲𑁆𑀲 𑀓𑀸𑀭𑀡𑀪𑀽𑀢𑀢𑁆𑀢𑀸 𑀆𑀲𑀦𑁆𑀦𑁄 𑀧𑀘𑁆𑀘𑀓𑁆𑀔𑁄 𑀓𑀢𑁆𑀯𑀸 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦’’𑀦𑁆𑀢𑀺𑀆𑀤𑀺. 𑀲𑀗𑁆𑀔𑀸𑀭𑀦𑁆𑀢𑀺 𑀬𑀣𑀸𑀭𑀤𑁆𑀥𑀸𑀬 𑀲𑀸𑀢𑀺𑀲𑀬𑀁 𑀓𑀭𑀡𑀢𑁄 𑀲𑀗𑁆𑀔𑀸𑀭𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀩𑀮𑀯𑀯𑀻𑀭𑀺𑀬𑀁 𑀉𑀲𑁆𑀲𑁄𑀴𑁆𑀳𑀺𑀁. 𑀧𑀤𑀳𑀢𑁄𑀢𑀺 𑀧𑀬𑀼𑀜𑁆𑀚𑀦𑁆𑀢𑀲𑁆𑀲 𑀧𑀯𑀢𑁆𑀢𑁂𑀦𑁆𑀢𑀲𑁆𑀲. 𑀫𑀕𑁆𑀕𑁂𑀦 𑀯𑀺𑀭𑀸𑀕𑁄 𑀳𑁄𑀢𑀻𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀤𑀼𑀓𑁆𑀔𑀦𑀺𑀤𑀸𑀦𑀲𑁆𑀲 𑀯𑀺𑀭𑀚𑁆𑀚𑀦𑀸 𑀳𑁄𑀢𑀺. 𑀢𑁂𑀦𑀸𑀳 ‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀇𑀫𑀺𑀦𑀸 𑀲𑀼𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀓𑀣𑀺𑀢𑀸 𑀅𑀓𑀲𑀺𑀭𑁂𑀦𑁂𑀯 𑀲𑀻𑀖𑀢𑀭𑀁 𑀫𑀕𑁆𑀕𑀧𑀚𑀸𑀦𑀢𑀸𑀬 𑀩𑁄𑀥𑀺𑀢𑀢𑁆𑀢𑀸. 𑀫𑀚𑁆𑀛𑀢𑁆𑀢𑀢𑀸𑀓𑀸𑀭𑁄𑀢𑀺 𑀯𑀻𑀭𑀺𑀬𑀽𑀧𑁂𑀓𑁆𑀔𑀫𑀸𑀳. 𑀲𑀗𑁆𑀔𑀸𑀭𑀁 𑀢𑀢𑁆𑀣 𑀧𑀤𑀳𑀢𑀻𑀢𑀺 𑀧𑀥𑀸𑀦𑀲𑀗𑁆𑀔𑀸𑀭𑀁 𑀢𑀢𑁆𑀣 𑀤𑀼𑀓𑁆𑀔𑀦𑀺𑀤𑀸𑀦𑀲𑁆𑀲 𑀯𑀺𑀭𑀚𑁆𑀚𑀦𑀦𑀺𑀫𑀺𑀢𑁆𑀢𑀁 𑀯𑀺𑀭𑀚𑁆𑀚𑀦𑀢𑁆𑀣𑀁 𑀧𑀤𑀳𑀢𑀺. 𑀓𑀣𑀁? 𑀫𑀕𑁆𑀕𑀧𑁆𑀧𑀥𑀸𑀦𑁂𑀦 𑀘𑀢𑀼𑀓𑀺𑀘𑁆𑀘𑀧𑁆𑀧𑀥𑀸𑀦𑁂 𑀅𑀭𑀺𑀬𑀫𑀕𑁆𑀕𑁂 𑀯𑀸𑀬𑀸𑀫𑁂𑀦 𑀧𑀤𑀳𑀢𑀺 𑀯𑀸𑀬𑀫𑀢𑀺. 𑀅𑀚𑁆𑀛𑀼𑀧𑁂𑀓𑁆𑀔𑀢𑁄𑀢𑀺 𑀯𑀻𑀭𑀺𑀬𑀲𑁆𑀲 𑀅𑀦𑀘𑁆𑀘𑀸𑀭𑀤𑁆𑀥𑀦𑀸𑀢𑀺𑀲𑀺𑀣𑀺𑀮𑀢𑀸𑀬 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑁂 𑀩𑁆𑀬𑀸𑀧𑀸𑀭𑀸𑀓𑀭𑀡𑁂𑀦 𑀅𑀚𑁆𑀛𑀼𑀧𑁂𑀓𑁆𑀔𑀢𑁄. 𑀢𑁂𑀦𑀸𑀳 ‘‘𑀉𑀧𑁂𑀓𑁆𑀔𑀁 𑀪𑀸𑀯𑁂𑀦𑁆𑀢𑀲𑁆𑀲𑀸’’𑀢𑀺. 𑀉𑀧𑁂𑀓𑁆𑀔𑀸𑀪𑀸𑀯𑀦𑀸 𑀘 𑀦𑀸𑀫𑁂𑀢𑁆𑀣 𑀢𑀣𑀸𑀧𑀯𑀢𑁆𑀢𑀸 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸 𑀏𑀯𑀸𑀢𑀺 𑀆𑀳 𑁋 ‘‘𑀫𑀕𑁆𑀕𑀪𑀸𑀯𑀦𑀸𑀬 𑀪𑀸𑀯𑁂𑀢𑀻’’𑀢𑀺.

𑀏𑀢𑁆𑀣 𑀘 𑀏𑀯𑀁 𑀧𑀸𑀴𑀺𑀬𑀸 𑀧𑀤𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸, 𑁋 ‘‘𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺. 𑀓𑀣𑀁? 𑀲𑀗𑁆𑀔𑀸𑀭𑀁 𑀫𑁂 𑀧𑀤𑀳𑀢𑁄 𑀲𑀗𑁆𑀔𑀸𑀭𑀧𑀤𑀳𑀦𑀸 𑀇𑀫𑀲𑁆𑀲 𑀤𑀼𑀓𑁆𑀔𑀦𑀺𑀤𑀸𑀦𑀲𑁆𑀲 𑀯𑀺𑀭𑀸𑀕𑁄 𑀳𑁄𑀢𑀺, 𑀅𑀚𑁆𑀛𑀼𑀧𑁂𑀓𑁆𑀔𑀢𑁄 𑀫𑁂 𑀉𑀧𑁂𑀓𑁆𑀔𑀦𑀸 𑀇𑀫𑀲𑁆𑀲 𑀤𑀼𑀓𑁆𑀔𑀦𑀺𑀤𑀸𑀦𑀲𑁆𑀲 𑀯𑀺𑀭𑀸𑀕𑁄 𑀳𑁄𑀢𑀻’’𑀢𑀺. 𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲 𑀘𑀸𑀬𑀁 𑀧𑀼𑀩𑁆𑀩𑀪𑀸𑀕𑀯𑀻𑀫𑀁𑀲𑀲𑁆𑀲𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀲𑀗𑁆𑀔𑀸𑀭𑀧𑁆𑀧𑀥𑀸𑀦𑀸𑀢𑀺 𑀲𑀫𑁆𑀫𑀲𑀦𑀧𑀤𑁂𑀦 𑀲𑀼𑀔𑁂𑀦𑁂𑀯 𑀔𑀺𑀧𑁆𑀧𑀢𑀭𑀁 𑀪𑀸𑀯𑀦𑀸𑀉𑀲𑁆𑀲𑀼𑀓𑁆𑀓𑀸𑀧𑀦𑀯𑀻𑀭𑀺𑀬𑀁 𑀤𑀲𑁆𑀲𑀺𑀢𑀦𑁆𑀢𑀺 𑀲𑀼𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀤𑀲𑁆𑀲𑀺𑀢𑀸. 𑀅𑀚𑁆𑀛𑀼𑀧𑁂𑀓𑁆𑀔𑀢𑁄𑀢𑀺 𑀏𑀢𑁆𑀣 𑀓𑀲𑁆𑀲𑀘𑀺 𑀦𑀸𑀢𑀺𑀤𑀴𑁆𑀳𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀻𑀭𑀺𑀬𑁂𑀦𑀧𑀺 𑀤𑀼𑀓𑁆𑀔𑀦𑀺𑀤𑀸𑀦𑀲𑁆𑀲 𑀯𑀺𑀭𑀸𑀕𑁄 𑀳𑁄𑀢𑀺 𑀯𑀺𑀧𑀲𑁆𑀲𑀦𑀫𑀦𑀼𑀬𑀼𑀜𑁆𑀚𑀢𑀻𑀢𑀺 𑀤𑀲𑁆𑀲𑀺𑀢𑀁. 𑀉𑀪𑀬𑀢𑁆𑀣𑀸𑀧𑀺 𑀘𑀢𑀼𑀢𑁆𑀣𑀻𑀬𑁂𑀯 𑀧𑀝𑀺𑀧𑀤𑀸 𑀯𑀺𑀪𑀸𑀯𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀤𑀸𑀦𑀺, ‘‘𑀬𑀲𑁆𑀲 𑀳𑀺 𑀔𑁆𑀯𑀸𑀲𑁆𑀲…𑀧𑁂… 𑀉𑀧𑁂𑀓𑁆𑀔𑀁 𑀢𑀢𑁆𑀣 𑀪𑀸𑀯𑁂𑀢𑀻’’𑀢𑀺 𑀯𑀸𑀭𑁂𑀳𑀺 𑀢𑀸𑀲𑀁𑀬𑁂𑀯 𑀧𑀝𑀺𑀧𑀤𑀸𑀦𑀁 𑀯𑀲𑁂𑀦 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀧𑀝𑀺𑀧𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀯𑀝𑁆𑀝𑀤𑀼𑀓𑁆𑀔𑀦𑀺𑀤𑀸𑀦𑀲𑁆𑀲 𑀧𑀭𑀺𑀚𑀺𑀡𑁆𑀡𑀁 𑀇𑀫𑁂𑀳𑀺 𑀯𑀸𑀭𑁂𑀳𑀺 𑀤𑀼𑀓𑁆𑀔𑀓𑁆𑀔𑀬𑁄 𑀯𑀺𑀪𑀸𑀯𑀺𑀢𑁄.

𑁧𑁧. 𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀲𑀫𑁆𑀩𑀤𑁆𑀥𑀘𑀺𑀢𑁆𑀢𑁄. 𑀩𑀳𑀮𑀘𑁆𑀙𑀦𑁆𑀤𑁄𑀢𑀺 𑀩𑀳𑀮𑀢𑀡𑁆𑀳𑀸𑀙𑀦𑁆𑀤𑁄. 𑀅𑀢𑀺𑀘𑀭𑀺𑀢𑁆𑀯𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀦𑀝𑀲𑀢𑁆𑀣𑀯𑀺𑀥𑀺𑀦𑀸 𑀦𑀘𑁆𑀘𑀦𑀓𑀸 𑀦𑀝𑀸, 𑀦𑀘𑁆𑀘𑀓𑀸 𑀇𑀢𑀭𑁂. 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, ‘‘𑀈𑀤𑀺𑀲𑀁 𑀦𑀸𑀫 𑀇𑀢𑁆𑀣𑀺𑀁 𑀧𑀭𑀺𑀘𑁆𑀘𑀚𑀺’’𑀦𑁆𑀢𑀺. 𑀙𑀺𑀚𑁆𑀚𑀸𑀢𑀺 𑀤𑁆𑀯𑀺𑀥𑀸 𑀳𑁄𑀢𑀼. 𑀪𑀺𑀚𑁆𑀚𑀸𑀢𑀺 𑀪𑀺𑀚𑁆𑀚𑀢𑀼. ‘‘𑀙𑀺𑀚𑁆𑀚 𑀯𑀸 𑀪𑀺𑀚𑁆𑀚𑀯𑀸’’𑀢𑀺 𑀧𑀤𑀤𑁆𑀯𑀬𑁂𑀦𑀧𑀺 𑀯𑀺𑀦𑀸𑀲𑀫𑁂𑀯 𑀯𑀤𑀢𑀺. 𑀜𑀢𑁆𑀯𑀸𑀢𑀺 𑀧𑀼𑀩𑁆𑀩𑀪𑀸𑀕𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀢𑀤𑀼𑀪𑀬𑀦𑁆𑀢𑀺 𑀲𑀗𑁆𑀔𑀸𑀭𑀧𑀤𑀳𑀦𑀉𑀧𑁂𑀓𑁆𑀔𑀸𑀪𑀸𑀯𑀦𑀁.

𑁧𑁨. 𑀧𑁂𑀲𑁂𑀦𑁆𑀢𑀲𑁆𑀲𑀸𑀢𑀺 𑀯𑀸𑀬𑀫𑀦𑁆𑀢𑀲𑁆𑀲. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬 𑀦𑀺𑀬𑁆𑀬𑀸𑀦𑀢𑀁 𑀲𑀦𑁆𑀥𑀸𑀬.

𑀉𑀲𑀼𑀓𑀸𑀭𑁄 𑀯𑀺𑀬 𑀬𑁄𑀕𑀻 𑀢𑁂𑀚𑀦𑀲𑁆𑀲 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀉𑀚𑀼𑀓𑀭𑀡𑀢𑁄. 𑀕𑁄𑀫𑀼𑀢𑁆𑀢𑀯𑀗𑁆𑀓𑀁, 𑀘𑀦𑁆𑀤𑀮𑁂𑀔𑀸𑀓𑀼𑀝𑀺𑀮𑀁, 𑀦𑀗𑁆𑀕𑀮𑀓𑁄𑀝𑀺𑀚𑀺𑀫𑁆𑀳𑀁 𑀘𑀺𑀢𑁆𑀢𑀁. 𑀅𑀮𑀸𑀢𑀸 𑀯𑀺𑀬 𑀯𑀻𑀭𑀺𑀬𑀁 𑀆𑀢𑀸𑀧𑀦-𑀧𑀭𑀺𑀢𑀸𑀧𑀦𑀢𑁄. 𑀓𑀜𑁆𑀘𑀺𑀓𑀢𑁂𑀮𑀁 𑀯𑀺𑀬 𑀲𑀤𑁆𑀥𑀸 𑀲𑀺𑀦𑁂𑀳𑀦𑀢𑁄. 𑀦𑀫𑀦𑀤𑀡𑁆𑀟𑀓𑁄 𑀯𑀺𑀬 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀦𑀸𑀫𑀦𑀢𑁄. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁂𑀦 𑀘𑀺𑀢𑁆𑀢𑀲𑁆𑀲 𑀉𑀚𑀼𑀓𑀭𑀡𑀁 𑀪𑀸𑀯𑀦𑀸𑀪𑀺𑀲𑀫𑀬𑀢𑁄 𑀤𑀝𑁆𑀞𑀩𑁆𑀩𑀁. 𑀅𑀦𑁆𑀢𑀤𑁆𑀯𑀬𑀯𑀚𑁆𑀚𑀺𑀢𑀸 𑀫𑀚𑁆𑀛𑀺𑀫𑀸 𑀧𑀝𑀺𑀧𑀢𑁆𑀢𑀻𑀢𑀺 𑀓𑀢𑁆𑀯𑀸 𑀓𑀺𑀮𑁂𑀲𑀕𑀡𑀯𑀺𑀚𑁆𑀛𑀦𑀁 𑀧𑀳𑀸𑀦𑀸𑀪𑀺𑀲𑀫𑀬𑁄. 𑀇𑀢𑀭𑀸 𑀧𑀦 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀇𑀫𑀸𑀲𑀼 𑀤𑁆𑀯𑀻𑀲𑀼 𑀬𑀣𑀸𑀯𑀼𑀢𑁆𑀢𑀸𑀲𑀼 𑀔𑀺𑀧𑁆𑀧𑀸𑀪𑀺𑀜𑁆𑀜𑀸𑀲𑀼 𑀓𑀣𑀺𑀢𑀸𑀲𑀼, 𑀇𑀢𑀭𑀸𑀧𑀺 𑀓𑀣𑀺𑀢𑀸𑀯 𑀳𑁄𑀦𑁆𑀢𑀺 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀧𑀝𑀺𑀧𑀤𑀸𑀲𑀸𑀫𑀜𑁆𑀜𑀢𑁄. 𑀲𑀳𑀸𑀕𑀫𑀦𑀻𑀬𑀸𑀧𑀺 𑀯𑀸 𑀧𑀝𑀺𑀧𑀤𑀸 𑀓𑀣𑀺𑀢𑀸𑀯, ‘‘𑀦 𑀳𑁂𑀯 𑀅𑀦𑀤𑁆𑀥𑀪𑀽𑀢𑀁 𑀅𑀢𑁆𑀣𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀓𑀣𑀺𑀢𑀢𑁆𑀢𑀸. ‘‘𑀆𑀕𑀫𑀦𑀻𑀬𑀧𑀝𑀺𑀧𑀤𑀸 𑀧𑀦 𑀦 𑀓𑀣𑀺𑀢𑀸’’𑀢𑀺 𑀇𑀤𑀁 𑀲𑀯𑀺𑀲𑁂𑀲𑀁 𑀅𑀚𑁆𑀛𑀼𑀧𑁂𑀓𑁆𑀔𑀲𑁆𑀲 𑀅𑀓𑀣𑀺𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀓𑁆𑀔𑀫𑀦𑀤𑁂𑀲𑀦𑀦𑁆𑀢𑀺 𑀦𑀺𑀓𑁆𑀔𑀫𑀦𑀼𑀧𑀸𑀬𑀁 𑀤𑁂𑀲𑀦𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑁂𑀯𑀤𑀳𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀧𑀜𑁆𑀘𑀢𑁆𑀢𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀏𑀓𑁂𑀢𑀺 𑀏𑀢𑁆𑀣 𑀏𑀓-𑀲𑀤𑁆𑀤𑁄 𑀅𑀜𑁆𑀜𑀢𑁆𑀣𑁄, 𑀦 𑀕𑀡𑀦𑀸𑀤𑀺𑀅𑀢𑁆𑀣𑁄𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀘𑁆𑀘𑁂’’𑀢𑀺 𑀆𑀳. 𑀬𑀁 𑀧𑀦 𑀧𑀸𑀴𑀺𑀬𑀁 ‘‘𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑀸𑀬 𑀅𑀯𑀺𑀘𑁆𑀙𑀺𑀦𑁆𑀦𑀢𑀸; 𑀢𑀢𑁄 𑀘 𑀦𑁂𑀲𑀁 𑀫𑀺𑀘𑁆𑀙𑀸𑀕𑀳𑀡𑀢𑁄 𑀲𑀺𑀣𑀺𑀮𑀓𑀭𑀡𑀯𑀺𑀯𑁂𑀘𑀦𑁂𑀳𑀺 𑀅𑀢𑁆𑀢𑀦𑁄 𑀤𑁂𑀲𑀦𑀸𑀬 𑀓𑀺𑀘𑁆𑀘𑀓𑀸𑀭𑀺𑀢𑀸 𑀅𑀯𑀺𑀢𑀣𑀢𑀸 𑀘 𑀤𑀻𑀧𑀺𑀢𑀸 𑀳𑁄𑀢𑀺. 𑀧𑀭𑀫𑀢𑁆𑀣𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀢𑀸𑀬 𑀮𑁂𑀲𑁄𑀧𑀺 𑀦𑀢𑁆𑀣𑀻𑀢𑀺 𑀆𑀳 ‘‘𑀧𑀭𑀺𑀩𑁆𑀩𑀚𑀼𑀧𑀕𑀢𑀪𑀸𑀯𑁂𑀦𑀸’’𑀢𑀺𑀆𑀤𑀺. 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 𑀅𑀧𑀭𑀦𑁆𑀢𑀁 𑀓𑀧𑁆𑀧𑁂𑀦𑁆𑀢𑀻𑀢𑀺 𑀅𑀧𑀭𑀦𑁆𑀢𑀓𑀧𑁆𑀧𑀺𑀦𑁄, 𑀢𑁂 𑀏𑀯 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸. 𑀬𑀲𑁆𑀫𑀸 𑀢𑁂𑀳𑀺 𑀅𑀧𑀭𑀦𑁆𑀢𑀁 𑀧𑀼𑀭𑀺𑀫𑀢𑀭𑀲𑀺𑀤𑁆𑀥𑁂𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑁂𑀳𑀺 𑀓𑀧𑁆𑀧𑁂𑀢𑁆𑀯𑀸 𑀆𑀲𑁂𑀯𑀦𑀩𑀮𑀯𑀢𑀸𑀬 𑀘 𑀯𑀺𑀓𑀧𑁆𑀧𑁂𑀢𑁆𑀯𑀸 𑀅𑀧𑀭𑀪𑀸𑀕𑀲𑀺𑀤𑁆𑀥𑁂𑀳𑀺 𑀅𑀪𑀺𑀦𑀺𑀯𑁂𑀲𑀪𑀽𑀢𑁂𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑁆𑀕𑀸𑀳𑁂𑀳𑀺 𑀕𑀡𑁆𑀳𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺; 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀅𑀧𑀭𑀦𑁆𑀢𑀁 𑀓𑀧𑁆𑀧𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀻’’𑀢𑀺. 𑀢𑀡𑁆𑀳𑀼𑀧𑀸𑀤𑀸𑀦𑀯𑀲𑁂𑀦 𑀓𑀧𑁆𑀧𑀦𑀕𑀳𑀡𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀡𑁆𑀳𑀸𑀧𑀘𑁆𑀘𑀬𑀸 𑀳𑀺 𑀉𑀧𑀸𑀤𑀸𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 𑀉𑀤𑁆𑀤𑀸𑀦𑀢𑁄 𑀲𑀗𑁆𑀔𑁂𑀧𑀢𑁄. 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀬 𑀤𑀺𑀝𑁆𑀞𑀺𑀬𑀸 𑀘 𑀯𑀲𑁂𑀦. 𑀤𑀺𑀝𑁆𑀝𑀺𑀬𑀸 𑀯𑀸 𑀉𑀧𑀦𑀺𑀲𑁆𑀲𑀬𑀪𑀽𑀢𑀸𑀬 𑀲𑀳𑀚𑀸𑀢𑀸𑀬 𑀅𑀪𑀺𑀦𑀦𑁆𑀤𑀦𑀓𑀸𑀬 𑀘 𑀢𑀡𑁆𑀳𑀸𑀬 𑀲𑀲𑁆𑀲𑀢𑀸𑀤𑀺𑀆𑀓𑀸𑀭𑁂𑀦 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑀲𑁆𑀲 𑀘 𑀯𑀲𑁂𑀦. 𑀅𑀦𑀸𑀕𑀢𑀥𑀫𑁆𑀫𑀯𑀺𑀲𑀬𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀅𑀦𑀸𑀕𑀢𑀓𑀸𑀮𑀯𑀸𑀘𑀓𑁄 𑀇𑀥 𑀅𑀧𑀭-𑀲𑀤𑁆𑀤𑁄. 𑀭𑀽𑀧𑀸𑀤𑀺𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀧𑁆𑀧𑀦𑀯𑀢𑁆𑀣𑀼𑀦𑁄 𑀅𑀪𑀸𑀯𑀸 𑀅𑀦𑁆𑀢-𑀲𑀤𑁆𑀤𑁄 𑀪𑀸𑀕𑀯𑀸𑀘𑀓𑁄𑀢𑀺 𑀆𑀳 𑁋 ‘‘𑀅𑀦𑀸𑀕𑀢𑀁 𑀔𑀦𑁆𑀥𑀓𑁄𑀝𑁆𑀞𑀸𑀲’’𑀦𑁆𑀢𑀺. 𑀓𑀧𑁆𑀧𑁂𑀢𑁆𑀯𑀸𑀢𑀺 𑀘 𑀢𑀲𑁆𑀫𑀺𑀁 𑀅𑀧𑀭𑀦𑁆𑀢𑁂 𑀢𑀡𑁆𑀳𑀸𑀬 𑀦𑀸𑀪𑀺𑀦𑀺𑀯𑁂𑀲𑀸𑀦𑀁 𑀲𑀫𑀢𑁆𑀢𑀦𑀁 𑀧𑀭𑀺𑀦𑀺𑀝𑁆𑀞𑀸𑀧𑀦𑀫𑀸𑀳. 𑀞𑀺𑀢𑀸𑀢𑀺 𑀢𑀲𑁆𑀲𑀸 𑀮𑀤𑁆𑀥𑀺𑀬𑀸 𑀅𑀯𑀺𑀚𑀳𑀦𑀁.

𑀅𑀦𑀼𑀕𑀢𑀸𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀦𑀼 𑀅𑀦𑀼 𑀕𑀢𑀸 𑀅𑀧𑀭𑀦𑁆𑀢𑁂 𑀧𑀯𑀢𑁆𑀢𑀸. 𑀆𑀭𑀩𑁆𑀪𑀸𑀢𑀺 𑀆𑀮𑀫𑁆𑀩𑀺𑀢𑁆𑀯𑀸. 𑀯𑀺𑀲𑀬𑁄 𑀳𑀺 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀅𑀧𑀭𑀦𑁆𑀢𑁄. 𑀯𑀺𑀲𑀬𑀪𑀸𑀯𑀢𑁄 𑀏𑀯 𑀳𑀺 𑀲𑁄 𑀢𑀲𑁆𑀲𑀸 𑀆𑀕𑀫𑀦𑀝𑁆𑀞𑀸𑀦𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀆𑀕𑀫𑁆𑀫 𑀧𑀝𑀺𑀘𑁆𑀘𑀸’’𑀢𑀺. 𑀅𑀥𑀺𑀯𑀘𑀦𑀧𑀤𑀸𑀦𑀻𑀢𑀺 𑀧𑀜𑁆𑀜𑀢𑁆𑀢𑀺𑀧𑀤𑀸𑀦𑀺, 𑀤𑀸𑀲𑀸𑀤𑀻𑀲𑀼 𑀲𑀺𑀭𑀺𑀯𑀟𑁆𑀠𑀓𑀸𑀤𑀺𑀲𑀤𑁆𑀤𑁄 𑀯𑀺𑀬 𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀅𑀥𑀺𑀯𑀘𑀦𑀁 𑀧𑀜𑁆𑀜𑀢𑁆𑀢𑀺. 𑀅𑀣 𑀯𑀸 𑀅𑀥𑀺-𑀲𑀤𑁆𑀤𑁄 𑀉𑀧𑀭𑀺𑀪𑀸𑀯𑁂, 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀉𑀧𑀭𑀺 𑀯𑀘𑀦𑀁 𑀅𑀥𑀺𑀯𑀘𑀦𑀁, 𑀉𑀧𑀸𑀤𑀸𑀦𑀪𑀽𑀢𑀭𑀽𑀧𑀸𑀤𑀻𑀦𑀁 𑀉𑀧𑀭𑀺 𑀧𑀜𑁆𑀜𑀸𑀧𑀺𑀬𑀫𑀸𑀦𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀧𑀜𑁆𑀜𑀢𑁆𑀢𑀺𑀤𑀻𑀧𑀓𑀧𑀤𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀜𑁆𑀳𑁂𑀢𑀁 𑀯𑀼𑀘𑁆𑀘𑀢𑀺, 𑀬𑀤𑀺𑀤𑀁, ‘‘𑀅𑀢𑁆𑀢𑀸 𑀮𑁄𑀓𑁄’’𑀢𑀺 𑀘, 𑀦 𑀭𑀽𑀧𑀯𑁂𑀤𑀦𑀸𑀤𑀬𑁄 𑀯𑀺𑀬 𑀧𑀭𑀫𑀢𑁆𑀣𑁄. 𑀅𑀥𑀺𑀓𑀯𑀼𑀢𑁆𑀢𑀺𑀢𑀸𑀬 𑀯𑀸 𑀅𑀥𑀺𑀫𑀼𑀢𑁆𑀢𑀺𑀬𑁄𑀢𑀺 𑀤𑀺𑀝𑁆𑀞𑀺𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀅𑀥𑀺𑀓𑀜𑁆𑀳𑀺 𑀲𑀪𑀸𑀯𑀥𑀫𑁆𑀫𑁂𑀲𑀼 𑀲𑀲𑁆𑀲𑀢𑀸𑀤𑀺𑀁 𑀧𑀓𑀢𑀺𑀆𑀤𑀺𑀁 𑀤𑁆𑀭𑀩𑁆𑀬𑀸𑀤𑀺𑀁 𑀚𑀻𑀯𑀸𑀤𑀺𑀁 𑀓𑀸𑀬𑀸𑀤𑀺𑀜𑁆𑀘 𑀅𑀪𑀽𑀢𑀫𑀢𑁆𑀣𑀁 𑀅𑀚𑁆𑀛𑀸𑀭𑁄𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀬𑁄 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀅𑀪𑀺𑀯𑀤𑀦𑁆𑀢𑀻𑀢𑀺, ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀤𑀦𑁆𑀢𑀺, ‘‘𑀅𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀯𑀺𑀯𑀤𑀦𑁆𑀢𑀺. 𑀅𑀪𑀺𑀯𑀤𑀦𑀓𑀺𑀭𑀺𑀬𑀸𑀬 𑀅𑀚𑁆𑀚𑀸𑀧𑀺 𑀅𑀯𑀺𑀘𑁆𑀙𑁂𑀤𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀢𑁆𑀢𑀫𑀸𑀦𑀓𑀸𑀮𑀯𑀘𑀦𑀁.

𑀲𑀜𑁆𑀜𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀜𑁆𑀜𑀻𑀢𑀺 𑀆𑀳 ‘‘𑀲𑀜𑁆𑀜𑀸𑀲𑀫𑀗𑁆𑀕𑀻’’𑀢𑀺. 𑀦𑀢𑁆𑀣𑀺 𑀏𑀢𑀲𑁆𑀲 𑀭𑁄𑀕𑁄 𑀪𑀗𑁆𑀕𑁄𑀢𑀺 𑀅𑀭𑁄𑀕𑁄𑀢𑀺 𑀅𑀭𑁄𑀕𑀲𑀤𑁆𑀤𑀲𑁆𑀲 𑀦𑀺𑀘𑁆𑀘𑀧𑀭𑀺𑀬𑀸𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀭𑁄𑀕𑀭𑀳𑀺𑀢𑀢𑀸𑀲𑀻𑀲𑁂𑀦 𑀯𑀸 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀦𑀺𑀘𑁆𑀘𑀢𑀁 𑀧𑀝𑀺𑀚𑀸𑀦𑀸𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁄𑀢𑀺 𑀆𑀳 ‘‘𑀅𑀭𑁄𑀕𑁄𑀢𑀺 𑀦𑀺𑀘𑁆𑀘𑁄’’𑀢𑀺. 𑀇𑀫𑀺𑀦𑀸𑀢𑀺, ‘‘𑀲𑀜𑁆𑀜𑀻 𑀅𑀢𑁆𑀢𑀸 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦. 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸𑀢𑀺 𑁋 𑀭𑀽𑀧𑀻𑀘𑀢𑀼𑀓𑁆𑀓𑀁, 𑀅𑀭𑀽𑀧𑀻𑀘𑀢𑀼𑀓𑁆𑀓𑀁, 𑀅𑀦𑁆𑀢𑀯𑀸𑀘𑀢𑀼𑀓𑁆𑀓𑀁, 𑀏𑀓𑀦𑁆𑀢𑀲𑀼𑀔𑀻𑀘𑀢𑀼𑀓𑁆𑀓𑀦𑁆𑀢𑀺 𑁋 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸 𑀓𑀣𑀺𑀢𑀸. 𑀇𑀫𑁂𑀲𑀼𑀬𑁂𑀯 𑀧𑀼𑀭𑀺𑀫𑀸𑀦𑀁 𑀤𑁆𑀯𑀺𑀦𑁆𑀦𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞 𑀲𑀜𑁆𑀜𑀻𑀯𑀸𑀤𑀸 𑀅𑀝𑁆𑀞 𑀘 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸𑀢𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀓𑀸𑀫𑀸𑀯𑀘𑀭𑀤𑁂𑀯𑀢𑁆𑀢𑀪𑀸𑀯𑁂 𑀭𑀽𑀧𑀸𑀯𑀘𑀭𑀤𑁂𑀯𑀢𑁆𑀢𑀪𑀸𑀯𑁂 𑀘𑀢𑀼𑀩𑁆𑀩𑀺𑀥𑀸𑀭𑀼𑀧𑁆𑀧𑀢𑁆𑀢𑀪𑀸𑀯𑁂 𑀘𑀯𑀺𑀢𑁆𑀯𑀸 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀧𑀜𑁆𑀜𑀸𑀧𑀦𑀯𑀲𑁂𑀦 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸 𑀓𑀣𑀺𑀢𑀸. 𑀅𑀲𑀢𑁄 𑀯𑀺𑀦𑀸𑀲𑀸𑀲𑀫𑁆𑀪𑀯𑀢𑁄 𑀅𑀢𑁆𑀣𑀺𑀪𑀸𑀯𑀦𑀺𑀩𑀦𑁆𑀥𑀦𑁄 𑀉𑀘𑁆𑀙𑁂𑀤𑀯𑀸𑀤𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀢𑁄𑀢𑀺 𑀯𑀺𑀚𑁆𑀚𑀫𑀸𑀦𑀲𑁆𑀲𑀸’’𑀢𑀺. 𑀬𑀸𑀯𑀸𑀬𑀁 𑀅𑀢𑁆𑀢𑀸 𑀦 𑀉𑀘𑁆𑀙𑀺𑀚𑁆𑀚𑀢𑀺, 𑀢𑀸𑀯 𑀯𑀺𑀚𑁆𑀚𑀢𑀺 𑀏𑀯𑀸𑀢𑀺 𑀕𑀳𑀡𑀢𑁄 𑀦𑀺𑀭𑀼𑀤𑀬𑀯𑀺𑀦𑀸𑀲𑁄 𑀇𑀥 𑀉𑀘𑁆𑀙𑁂𑀤𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀉𑀧𑀘𑁆𑀙𑁂𑀤’’𑀦𑁆𑀢𑀺. 𑀯𑀺𑀲𑁂𑀲𑁂𑀦 𑀦𑀸𑀲𑁄 𑀯𑀺𑀦𑀸𑀲𑁄, 𑀅𑀪𑀸𑀯𑁄, 𑀲𑁄 𑀧𑀦 𑀫𑀁𑀲𑀘𑀓𑁆𑀔𑀼-𑀧𑀜𑁆𑀜𑀸𑀘𑀓𑁆𑀔𑀼-𑀤𑀲𑁆𑀲𑀦𑀧𑀣𑀸𑀢𑀺𑀓𑁆𑀓𑀫𑁄𑀯𑀸𑀢𑀺 𑀆𑀳 ‘‘𑀅𑀤𑀲𑁆𑀲𑀦’’𑀦𑁆𑀢𑀺. 𑀅𑀤𑀲𑁆𑀲𑀦𑁂 𑀳𑀺 𑀦𑀸𑀲-𑀲𑀤𑁆𑀤𑁄 𑀮𑁄𑀓𑁂 𑀦𑀺𑀭𑀼𑀴𑁆𑀳𑁄. 𑀪𑀯𑀯𑀺𑀕𑀫𑀦𑁆𑀢𑀺 𑀲𑀪𑀸𑀯𑀸𑀧𑀕𑀫𑀦𑀁 𑀬𑁄 𑀳𑀺 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀉𑀘𑁆𑀙𑀺𑀚𑁆𑀚𑀢𑀺, 𑀦 𑀲𑁄 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀢𑀺𑀝𑁆𑀞𑀢𑀺.

𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀲𑀼𑀔𑀫𑀦𑀼𑀪𑁄𑀕𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀭𑀽𑀧𑀚𑁆𑀛𑀸𑀦𑀲𑀼𑀔𑀧𑀭𑀺𑀪𑁄𑀕𑀯𑀲𑁂𑀦 𑀘 𑀤𑀺𑀝𑁆𑀞𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀧𑀜𑁆𑀜𑀸𑀧𑀦𑀯𑀸𑀤𑀸. 𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀉𑀧𑀮𑀤𑁆𑀥𑀥𑀫𑁆𑀫𑁄. 𑀢𑀢𑁆𑀣 𑀬𑁄 𑀅𑀦𑀺𑀦𑁆𑀤𑁆𑀭𑀺𑀬𑀯𑀺𑀲𑀬𑁄, 𑀲𑁄𑀧𑀺 𑀲𑀼𑀧𑀸𑀓𑀝𑀪𑀸𑀯𑁂𑀦 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 𑁋 ‘‘𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀧𑀘𑁆𑀘𑀓𑁆𑀔𑀥𑀫𑁆𑀫𑁄 𑀯𑀼𑀘𑁆𑀘𑀢𑀻’’𑀢𑀺. 𑀢𑁂𑀦𑁂𑀯 𑀘, ‘‘𑀢𑀢𑁆𑀣 𑀢𑀢𑁆𑀣 𑀧𑀝𑀺𑀮𑀤𑁆𑀥𑀅𑀢𑁆𑀢𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀜𑁆𑀜𑀻𑀢𑀺 𑀆𑀤𑀺𑀯𑀲𑁂𑀦 𑀢𑀻𑀳𑀸𑀓𑀸𑀭𑁂𑀳𑀺 𑀲𑀦𑁆𑀢𑀦𑁆𑀢𑀺 𑀲𑀜𑁆𑀜𑀻 𑀅𑀲𑀜𑁆𑀜𑀻 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀯𑀺𑀚𑁆𑀚𑀫𑀸𑀦𑀁, 𑀲𑀤𑀸 𑀉𑀧𑀮𑀩𑁆𑀪𑀫𑀸𑀦𑀁 𑀲𑀲𑁆𑀲𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀜𑁆𑀜𑀻 𑀅𑀢𑁆𑀢𑀸𑀢𑀺𑀆𑀤𑀻𑀦𑀺 𑀢𑀻𑀡𑀺 𑀤𑀲𑁆𑀲𑀦𑀸𑀦𑀺. 𑀲𑀦𑁆𑀢𑀅𑀢𑁆𑀣𑀯𑀲𑁂𑀦 𑀏𑀓𑀦𑁆𑀢𑀺 𑀲𑀲𑁆𑀲𑀢𑀲𑁆𑀲 𑀅𑀢𑁆𑀢𑀦𑁄 𑀯𑀲𑁂𑀦 𑀏𑀓𑀁 𑀤𑀲𑁆𑀲𑀦𑀁. 𑀇𑀢𑀭𑀸𑀦𑀺 𑀤𑁆𑀯𑁂𑀢𑀺 𑀉𑀘𑁆𑀙𑁂𑀤𑀯𑀸𑀤-𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀲𑀜𑁆𑀜𑀺𑀢𑀸𑀦𑀺 𑀤𑁆𑀯𑁂 𑀤𑀲𑁆𑀲𑀦𑀸𑀦𑀺. 𑀢𑀻𑀡𑀺 𑀳𑀼𑀢𑁆𑀯𑀸 𑀧𑀜𑁆𑀘 𑀳𑁄𑀦𑁆𑀢𑀻𑀢𑀺 𑀇𑀤𑀁, ‘‘𑀲𑀦𑁆𑀢𑀅𑀢𑁆𑀣𑀯𑀲𑁂𑀦 𑀏𑀓’’𑀦𑁆𑀢𑀺 𑀲𑀗𑁆𑀕𑀳𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀲𑀜𑁆𑀜𑀻𑀢𑀺 𑀆𑀤𑀺𑀯𑀺𑀪𑀸𑀕𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀦 𑀉𑀤𑁆𑀥𑀝𑀁.

𑁨𑁨. 𑀭𑀽𑀧𑀻𑀁 𑀯𑀸𑀢𑀺 𑀏𑀢𑁆𑀣 (𑀤𑀻. 𑀦𑀺. 𑀝𑀻. 𑁧.𑁭𑁬-𑁭𑁭) 𑀬𑀤𑀺 𑀭𑀽𑀧𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻𑀢𑀺 𑀅𑀬𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀏𑀯𑀁 𑀲𑀢𑀺 𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑁂𑀦 𑀅𑀢𑁆𑀢𑀦𑀸 𑀪𑀯𑀺𑀢𑀩𑁆𑀩𑀁 𑀲𑀜𑁆𑀜𑀸𑀬 𑀯𑀺𑀬 𑀭𑀽𑀧𑀲𑁆𑀲𑀧𑀺 𑀅𑀢𑁆𑀢𑀦𑀺𑀬𑀢𑁆𑀢𑀸. 𑀦 𑀳𑀺 𑀲𑀜𑁆𑀜𑀻 𑀅𑀢𑁆𑀢𑀸𑀢𑀺 𑀏𑀢𑁆𑀣 𑀲𑀜𑁆𑀜𑀸 𑀅𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁭𑁬-𑁭𑁭) ‘‘𑀢𑀢𑁆𑀣 𑀧𑀯𑀢𑁆𑀢𑀲𑀜𑁆𑀜𑀜𑁆𑀘𑀲𑁆𑀲 𑀲𑀜𑁆𑀜𑀸𑀢𑀺 𑀕𑀳𑁂𑀢𑁆𑀯𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂, ‘‘𑀓𑀲𑀺𑀡𑀭𑀽𑀧𑀁 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀻’’𑀢𑀺 𑀇𑀤𑀁 𑀓𑀣𑀦𑁆𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁 𑁋 ‘‘𑀭𑀽𑀧𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻’’𑀢𑀺, 𑀅𑀣 𑀔𑁄 ‘‘𑀭𑀼𑀧𑁆𑀧𑀦𑀲𑀻𑀮𑁄 𑀭𑀽𑀧𑀻’’𑀢𑀺. 𑀭𑀼𑀧𑁆𑀧𑀦𑀜𑁆𑀘𑁂𑀢𑁆𑀣 𑀭𑀽𑀧𑀲𑀭𑀺𑀓𑁆𑀔𑀢𑀸𑀬 𑀓𑀲𑀺𑀡𑀭𑀽𑀧𑀲𑁆𑀲 𑀯𑀟𑁆𑀠𑀺𑀢𑀸𑀯𑀟𑁆𑀠𑀺𑀢𑀓𑀸𑀮𑀯𑀲𑁂𑀦 𑀯𑀺𑀲𑁂𑀲𑀸𑀧𑀢𑁆𑀢𑀺, 𑀲𑀸 𑀘 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀧𑀭𑀺𑀢𑁆𑀢𑀯𑀺𑀧𑀼𑀮𑀢𑀸𑀤𑀺𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. 𑀬𑀤𑀺 𑀏𑀯𑀁 𑀇𑀫𑀲𑁆𑀲 𑀯𑀸𑀤𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 𑀦 𑀬𑀼𑀚𑁆𑀚𑀢𑀻𑀢𑀺? 𑀦𑁄 𑀦 𑀬𑀼𑀚𑁆𑀚𑀢𑀺 𑀓𑀸𑀬𑀪𑁂𑀤𑀢𑁄 𑀉𑀤𑁆𑀥𑀁 𑀅𑀢𑁆𑀢𑀦𑁄 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀢𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’𑀢𑀺. 𑀅𑀣 𑀯𑀸 ‘‘𑀭𑀽𑀧𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁂𑀧𑀺 𑀦 𑀤𑁄𑀲𑁄. 𑀓𑀧𑁆𑀧𑀦𑀸𑀲𑀺𑀤𑁆𑀥𑁂𑀦𑀧𑀺 𑀳𑀺 𑀪𑁂𑀤𑁂𑀦 𑀲𑀸𑀫𑀺𑀦𑀺𑀤𑁆𑀤𑁂𑀲𑀤𑀲𑁆𑀲𑀦𑀢𑁄 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺. 𑀭𑀼𑀧𑁆𑀧𑀦𑀁 𑀯𑀸 𑀭𑀼𑀧𑁆𑀧𑀦𑀲𑀪𑀸𑀯𑁄 𑀭𑀽𑀧𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻, 𑀅𑀢𑁆𑀢𑀸 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁧 𑀤𑀼𑀓𑀫𑀸𑀢𑀺𑀓𑀸) 𑀯𑀺𑀬. 𑀏𑀯𑀜𑁆𑀘 𑀓𑀢𑁆𑀯𑀸 𑀭𑀽𑀧𑀲𑀪𑀸𑀯𑀢𑁆𑀢𑀸 𑀅𑀢𑁆𑀢𑀦𑁄 ‘‘𑀭𑀽𑀧𑀁 𑀅𑀢𑁆𑀢𑀸’’𑀢𑀺 𑀯𑀘𑀦𑀁 𑀜𑀸𑀬𑀸𑀕𑀢𑀫𑁂𑀯𑀸𑀢𑀺 ‘‘𑀓𑀲𑀺𑀡𑀭𑀽𑀧𑀁 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀭𑀽𑀧𑀺𑀦𑁆𑀢𑀺 𑀏𑀢𑁆𑀢𑀸𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀬𑀣𑀸𑀭𑀳𑀁 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀲𑀦𑁆𑀢𑀲𑀼𑀔𑀼𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀢𑀩𑁆𑀩𑀺𑀧𑀭𑀻𑀢𑀲𑁆𑀲 𑀕𑀳𑀡𑁂 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀮𑀸𑀪𑀻, ‘‘𑀓𑀲𑀺𑀡𑀭𑀽𑀧𑀁 𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀸𑀢𑀻𑀢𑀺 𑀮𑀸𑀪𑀺𑀢𑀓𑁆𑀓𑀺𑀦𑁄 𑀞𑀧𑁂𑀢𑁆𑀯𑀸, 𑀲𑁂𑀲𑀢𑀓𑁆𑀓𑀻 𑀮𑀸𑀪𑀺𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸. 𑀅𑀦𑀼𑀲𑁆𑀲𑀼𑀢𑀺𑀢𑀓𑁆𑀓𑀺𑀓𑁄𑀧𑀺 𑀲𑀼𑀤𑁆𑀥𑀢𑀓𑁆𑀓𑀺𑀓𑁄𑀧𑀺 𑀯𑀸 𑀦𑀺𑀭𑀗𑁆𑀓𑀼𑀲𑀢𑁆𑀢𑀸 𑀢𑀓𑁆𑀓𑀦𑀲𑁆𑀲 𑀓𑀲𑀺𑀡𑀭𑀽𑀧𑀫𑁆𑀧𑀺 𑀅𑀢𑁆𑀢𑀸𑀢𑀺 𑀓𑀤𑀸𑀘𑀺𑀧𑀺 𑀕𑀡𑁆𑀳𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀉𑀪𑁄𑀧𑀺 𑀭𑀽𑀧𑀸𑀦𑀺 𑀕𑀡𑁆𑀳𑀸𑀢𑀺𑀬𑁂𑀯𑀸’’𑀢𑀺. 𑀲𑀼𑀤𑁆𑀥𑀢𑀓𑁆𑀓𑀺𑀓𑀲𑁆𑀲 𑀉𑀪𑀬𑀕𑁆𑀕𑀳𑀡𑀁 𑀦 𑀓𑀢𑀁, 𑀢𑀲𑁆𑀫𑀸 𑀲𑀸𑀲𑀗𑁆𑀓𑀯𑀘𑀦𑀁.

𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲-𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡-𑀦𑀢𑁆𑀣𑀺𑀪𑀸𑀯𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀦𑀺 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁. 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀦𑁆𑀢𑀺 𑀇𑀤𑀁 𑀲𑀜𑁆𑀜𑀸𑀬 𑀅𑀢𑁆𑀢𑀦𑀺𑀬𑀢𑀁 𑀳𑀤𑀬𑁂 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀭𑀽𑀧𑀺𑀁 𑀯𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀅𑀢𑁆𑀣𑁂 𑀯𑀼𑀘𑁆𑀘𑀫𑀸𑀦𑁂 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀩𑀳𑀺𑀤𑁆𑀥𑀸 𑀅𑀓𑀢𑁆𑀯𑀸 ‘‘𑀅𑀭𑀽𑀧𑀥𑀫𑁆𑀫𑁂’’𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀫𑀺𑀲𑁆𑀲𑀓𑀕𑁆𑀕𑀸𑀳𑀯𑀲𑁂𑀦𑀸𑀢𑀺 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀦𑀺𑀫𑀺𑀢𑁆𑀢𑀸𑀦𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸, ‘‘𑀏𑀓𑁄 𑀅𑀢𑁆𑀢𑀸’’𑀢𑀺, 𑀢𑀢𑁆𑀣 𑀧𑀯𑀢𑁆𑀢𑀲𑀜𑁆𑀜𑀜𑁆𑀘𑀲𑁆𑀲, ‘‘𑀲𑀜𑁆𑀜𑀸’’𑀢𑀺 𑀕𑀳𑀡𑀯𑀲𑁂𑀦. 𑀅𑀬𑀜𑁆𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀢𑀸𑀬 𑀢𑀁𑀦𑀺𑀫𑀺𑀢𑁆𑀢𑀁 𑀭𑀽𑀧𑀪𑀸𑀯𑁂𑀦 𑀅𑀭𑀽𑀧𑀪𑀸𑀯𑁂𑀦 𑀘 𑀕𑀳𑁂𑀢𑁆𑀯𑀸 𑀉𑀧𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸, ‘‘𑀭𑀽𑀧𑀻 𑀅𑀭𑀽𑀧𑀻 𑀘𑀸’’𑀢𑀺 𑀅𑀪𑀺𑀦𑀺𑀯𑁂𑀲𑀁 𑀚𑀦𑁂𑀢𑀺 𑀅𑀚𑁆𑀛𑀢𑁆𑀢𑀯𑀸𑀤𑀺𑀦𑁄 𑀯𑀺𑀬 𑀢𑀓𑁆𑀓𑀫𑀢𑁆𑀢𑁂𑀦𑁂𑀯 𑀯𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀫𑀺𑀲𑁆𑀲𑀓𑀯𑀲𑁂𑀦 𑀕𑀳𑁂𑀢𑁆𑀯𑀸, ‘‘𑀭𑀽𑀧𑀻 𑀘 𑀅𑀭𑀽𑀧𑀻𑀘 𑀅𑀢𑁆𑀢𑀸 𑀳𑁄𑀢𑀻’’𑀢𑀺. 𑀢𑀓𑁆𑀓𑀕𑀸𑀳𑁂𑀦𑁂𑀯𑀸𑀢𑀺 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀥𑀫𑁆𑀫𑀸 𑀯𑀺𑀬 𑀘 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀪𑀸𑀯𑀧𑀢𑁆𑀢𑀺𑀬𑀸 𑀲𑀓𑀺𑀘𑁆𑀘𑀲𑀸𑀥𑀦𑀸𑀲𑀫𑀢𑁆𑀣𑀢𑀸𑀬 𑀣𑀫𑁆𑀪𑀓𑀼𑀝𑁆𑀝𑀳𑀢𑁆𑀣𑀧𑀸𑀤𑀸𑀦𑀁 𑀲𑀗𑁆𑀖𑀸𑀢𑁄 𑀯𑀺𑀬 𑀦𑁂𑀯 𑀭𑀽𑀧𑀻, 𑀭𑀽𑀧𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀦 𑀅𑀭𑀽𑀧𑀻𑀢𑀺 𑀏𑀯𑀁 𑀧𑀯𑀢𑁆𑀢𑀢𑀓𑁆𑀓𑀕𑀸𑀳𑁂𑀦. 𑀮𑀸𑀪𑀺𑀯𑀲𑁂𑀦𑀧𑀺 𑀯𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀘𑀢𑀼𑀢𑁆𑀣𑀯𑀸𑀤𑁂 𑀯𑀓𑁆𑀔𑀫𑀸𑀦𑀦𑀬𑁂𑀦 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀁 𑀧𑀦 𑀢𑀢𑁆𑀣 𑀤𑁂𑀲𑀓𑀸𑀮𑀪𑁂𑀤𑀯𑀲𑁂𑀦 𑀢𑀢𑀺𑀬𑀘𑀢𑀼𑀢𑁆𑀣𑀯𑀸𑀤𑀸 𑀇𑀘𑁆𑀙𑀺𑀢𑀸; 𑀇𑀥 𑀓𑀸𑀮𑀯𑀢𑁆𑀣𑀼 𑀪𑁂𑀤𑀯𑀲𑁂𑀦𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀓𑀸𑀮𑀪𑁂𑀤𑀯𑀲𑁂𑀦 𑀘𑁂𑀢𑁆𑀣 𑀢𑀢𑀺𑀬𑀯𑀸𑀤𑀲𑁆𑀲 𑀧𑀯𑀢𑁆𑀢𑀺 𑀭𑀽𑀧𑀸𑀭𑀽𑀧𑀦𑀺𑀫𑀺𑀢𑁆𑀢𑀸𑀦𑀁 𑀲𑀳 𑀅𑀦𑀼𑀧𑀝𑁆𑀞𑀸𑀦𑀢𑁄; 𑀘𑀢𑀼𑀢𑁆𑀣𑀯𑀸𑀤𑀲𑁆𑀲 𑀧𑀦 𑀯𑀢𑁆𑀣𑀼𑀪𑁂𑀤𑀯𑀲𑁂𑀦 𑀧𑀯𑀢𑁆𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀽𑀳𑀢𑁄, ‘‘𑀏𑀓𑁄 𑀅𑀢𑁆𑀢𑀸’’𑀢𑀺 𑀢𑀓𑁆𑀓𑀯𑀲𑁂𑀦𑀸𑀢𑀺 𑀢𑀢𑁆𑀣 𑀯𑀓𑁆𑀔𑀫𑀸𑀦𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀬𑀤𑀺𑀧𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀯𑀲𑁂𑀦 𑀲𑀫𑀸𑀧𑀢𑁆𑀢𑀺𑀪𑁂𑀤𑁂𑀦 𑀲𑀜𑁆𑀜𑀸𑀦𑀸𑀦𑀢𑁆𑀢𑀲𑀫𑁆𑀪𑀯𑀢𑁄 𑀤𑀼𑀢𑀺𑀬𑀤𑀺𑀝𑁆𑀞𑀺𑀧𑀺 𑀲𑀫𑀸𑀧𑀦𑁆𑀦𑀓𑀯𑀲𑁂𑀦 𑀮𑀩𑁆𑀪𑀢𑀺; 𑀢𑀣𑀸𑀧𑀺 𑀲𑀫𑀸𑀧𑀢𑁆𑀢𑀺𑀬𑀁 𑀏𑀓𑀭𑀽𑀧𑁂𑀦𑁂𑀯 𑀲𑀜𑁆𑀜𑀸𑀬 𑀉𑀧𑀝𑁆𑀞𑀸𑀦𑀢𑁄, ‘‘𑀧𑀞𑀫𑀤𑀺𑀝𑁆𑀞𑀺 𑀲𑀫𑀸𑀧𑀦𑁆𑀦𑀓𑀯𑀸𑀭𑁂𑀦 𑀓𑀣𑀺𑀢𑀸’’𑀢𑀺 𑀆𑀳. 𑀢𑁂𑀦𑁂𑀯𑁂𑀢𑁆𑀣 𑀲𑀫𑀸𑀧𑀦𑁆𑀦𑀓𑀕𑁆𑀕𑀳𑀡𑀁 𑀓𑀢𑀁. 𑀏𑀓𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀏𑀯 𑀯𑀸 𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀸𑀧𑀢𑁆𑀢𑀺 𑀪𑁂𑀤𑁂𑀦 𑀲𑀜𑁆𑀜𑀸𑀪𑁂𑀤𑀲𑀫𑁆𑀪𑀯𑁂𑀧𑀺 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀲𑀜𑁆𑀜𑀸𑀦𑀸𑀦𑀢𑁆𑀢𑁂𑀦 𑀑𑀴𑀸𑀭𑀺𑀓𑁂𑀦 𑀦𑀸𑀦𑀢𑁆𑀢𑀲𑀜𑁆𑀜𑀻𑀢𑀺, ‘‘𑀤𑀼𑀢𑀺𑀬𑀤𑀺𑀝𑁆𑀞𑀺 𑀅𑀲𑀫𑀸𑀧𑀦𑁆𑀦𑀓𑀯𑀸𑀭𑁂𑀦𑀸’’𑀢𑀺 𑀆𑀳. 𑀅𑀯𑀟𑁆𑀠𑀺𑀢𑀓𑀲𑀺𑀡𑀯𑀲𑁂𑀦 𑀧𑀭𑀺𑀢𑁆𑀢𑀲𑀜𑁆𑀜𑀺𑀢𑀁, 𑀯𑀟𑁆𑀠𑀺𑀢𑀓𑀲𑀺𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑀲𑀜𑁆𑀜𑀺𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀢𑀢𑀺𑀬𑀤𑀺𑀝𑁆𑀞𑀺 𑀲𑀼𑀧𑁆𑀧𑀫𑀢𑁆𑀢𑁂𑀦 𑀯𑀸 𑀲𑀭𑀸𑀯𑀫𑀢𑁆𑀢𑁂𑀦 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀗𑁆𑀕𑀼𑀝𑁆𑀞𑀧𑁆𑀧𑀫𑀸𑀡𑁄 𑀯𑀸 𑀅𑀢𑁆𑀢𑀸 𑀬𑀯𑀧𑁆𑀧𑀫𑀸𑀡𑁄, 𑀅𑀡𑀼𑀫𑀢𑁆𑀢𑁄 𑀯𑀸 𑀅𑀢𑁆𑀢𑀸’’𑀢𑀺𑀆𑀤𑀺𑀤𑀲𑁆𑀲𑀦𑀯𑀲𑁂𑀦 (𑀉𑀤𑀸. 𑀅𑀝𑁆𑀞. 𑁫𑁪; 𑀤𑀻. 𑀦𑀺. 𑀝𑀻. 𑁧.𑁭𑁬-𑁭𑁭) 𑀧𑀭𑀺𑀢𑁆𑀢𑁄 𑀲𑀜𑁆𑀜𑀻𑀢𑀺 𑀧𑀭𑀺𑀢𑁆𑀢𑀲𑀜𑁆𑀜𑀻. 𑀓𑀧𑀺𑀮𑀓𑀡𑀸𑀤𑀸𑀤𑀬𑁄 (𑀯𑀺𑀪. 𑀅𑀦𑀼𑀝𑀻. 𑁧𑁮𑁯) 𑀯𑀺𑀬 𑀅𑀢𑁆𑀢𑀦𑁄 𑀲𑀩𑁆𑀩𑀕𑀢𑀪𑀸𑀯𑀧𑀝𑀺𑀚𑀸𑀦𑀦𑀯𑀲𑁂𑀦 𑀅𑀧𑁆𑀧𑀫𑀸𑀡𑁄 𑀲𑀜𑁆𑀜𑀻𑀢𑀺 𑀅𑀧𑁆𑀧𑀫𑀸𑀡𑀲𑀜𑁆𑀜𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀏𑀢𑀦𑁆𑀢𑀺, ‘‘𑀭𑀽𑀧𑀺𑀁 𑀯𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀅𑀢𑁆𑀢𑀯𑀸𑀤𑀁. 𑀏𑀓𑁂𑀲𑀦𑁆𑀢𑀺 𑀏𑀓𑀘𑁆𑀘𑀸𑀦𑀁. 𑀉𑀧𑀸𑀢𑀺𑀯𑀢𑁆𑀢𑀢𑀦𑁆𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑀸𑀦𑀁. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀯𑀺𑀜𑁆𑀜𑀸𑀡𑀓𑀲𑀺𑀡𑀫𑁂𑀓𑁂 𑀅𑀪𑀺𑀯𑀤𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 𑁋 ‘‘𑀲𑀜𑁆𑀜𑀁…𑀧𑁂… 𑀅𑀪𑀺𑀯𑀤𑀦𑁆𑀢𑀻’’𑀢𑀺. 𑀢𑀢𑁆𑀣 ‘‘𑀲𑀜𑁆𑀜𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀢𑀻𑀡𑀻’’𑀢𑀺 𑀇𑀤𑀁 𑀲𑀜𑁆𑀜𑀸𑀬 𑀘𑀢𑀼𑀓𑁆𑀓𑀫𑁆𑀧𑀺 𑀧𑀭𑀺𑀧𑀼𑀡𑁆𑀡𑀫𑁂𑀯 𑀕𑀳𑁂𑀢𑁆𑀯𑀸, 𑀅𑀧𑀭𑁂 𑀅𑀝𑁆𑀞𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀤𑀼𑀪𑀬𑀦𑁆𑀢𑀺 𑀢𑀁 𑀲𑀜𑁆𑀜𑀸𑀅𑀝𑁆𑀞𑀓𑀦𑁆𑀢𑀺 𑀯𑀼𑀢𑁆𑀢𑀁 𑀉𑀪𑀬𑀁. 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺, ‘‘𑀘𑀢𑀲𑁆𑀲𑁄 𑀭𑀽𑀧𑀲𑀜𑁆𑀜𑀻’’𑀢𑀺𑀆𑀤𑀺𑀦𑀸 𑀉𑀧𑀭𑀺 𑀧𑀓𑀸𑀲𑁂𑀲𑁆𑀲𑀢𑀺. 𑀯𑀓𑁆𑀔𑀢𑀺 𑀳𑀺 𑁋 ‘‘𑀓𑁄𑀝𑁆𑀞𑀸𑀲𑀢𑁄 𑀅𑀝𑁆𑀞, 𑀅𑀢𑁆𑀣𑀢𑁄 𑀧𑀦 𑀲𑀢𑁆𑀢 𑀲𑀜𑁆𑀜𑀸 𑀳𑁄𑀦𑁆𑀢𑀻’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁨𑁨). 𑀏𑀢𑁆𑀣𑀸𑀢𑀺, ‘‘𑀏𑀢𑀁 𑀯𑀸 𑀧𑀦𑀸’’𑀢𑀺 𑀏𑀢𑀲𑁆𑀫𑀺𑀁 𑀯𑀸𑀓𑁆𑀬𑁂. 𑀲𑀫𑀢𑀺𑀓𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺 𑀢𑀢𑁆𑀣 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀢𑀤𑀼𑀤𑁆𑀥𑀁 𑀆𑀦𑀺𑀲𑀁𑀲𑀤𑀲𑁆𑀲𑀦𑁂𑀦 𑀘 𑀩𑁆𑀭𑀽𑀳𑀺𑀢𑀲𑀤𑁆𑀥𑀸𑀤𑀺 𑀕𑀼𑀡𑀢𑁆𑀢𑀸, 𑀯𑀺𑀧𑀭𑀺𑀬𑀸𑀬𑁂𑀦 𑀅𑀲𑀓𑁆𑀓𑀼𑀡𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑁂 𑀲𑀓𑁆𑀓𑁄𑀦𑁆𑀢𑀺, 𑀢𑁂𑀯 𑀕𑀳𑀺𑀢𑀸 𑀢𑁂𑀲𑀁𑀬𑁂𑀯 𑀯𑀲𑁂𑀦 𑀯𑀓𑁆𑀔𑀫𑀸𑀦𑀲𑁆𑀲 𑀯𑀺𑀲𑁂𑀲𑀲𑁆𑀲 𑀯𑀢𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀲𑀓𑁆𑀓𑁄𑀦𑁆𑀢𑀸𑀦𑀜𑁆𑀘 𑀦𑁂𑀲𑀁 𑀉𑀧𑀸𑀢𑀺𑀯𑀢𑁆𑀢𑀦𑀁 𑀅𑀢𑁆𑀢𑀦𑁄 𑀜𑀸𑀡𑀩𑀮𑀸𑀦𑀼𑀭𑀽𑀧𑀦𑁆𑀢𑀺 𑀇𑀫𑀫𑀢𑁆𑀣𑀁 𑀉𑀧𑀫𑀸𑀬 𑀤𑀲𑁆𑀲𑁂𑀢𑀼𑀁, ‘‘𑀢𑁂𑀲𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀧𑁆𑀧𑀫𑀸𑀡𑀦𑁆𑀢𑀺 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑁄, 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀸 𑀘𑀲𑁆𑀲 𑀆𑀕𑀫𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸 𑀅𑀦𑀦𑁆𑀢𑀸𑀭𑀫𑁆𑀫𑀡𑀢𑁄 𑀯𑀸. 𑀦 𑀳𑀺 𑀆𑀭𑀫𑁆𑀫𑀡𑁂 𑀅𑀦𑀦𑁆𑀢𑀦𑁆𑀢𑀺 𑀧𑀭𑀫𑀸𑀦𑀦𑁆𑀢𑀲𑁆𑀲 𑀧𑀫𑀸𑀡𑀁 𑀯𑀸 𑀕𑀡𑁆𑀳𑀸𑀢𑀺. 𑀲𑀼𑀔𑀤𑀼𑀓𑁆𑀔𑁂𑀳𑀺 𑀅𑀦𑀺𑀜𑁆𑀚𑀦𑀢𑁄 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀯𑀺𑀲𑁂𑀲𑀢𑀸𑀬 𑀘 𑀆𑀦𑁂𑀜𑁆𑀚𑀁 𑀧𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀅𑀬𑀁 𑀦𑁄 𑀅𑀢𑁆𑀢𑀸𑀢𑀺 𑀅𑀪𑀺𑀯𑀤𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺. 𑀯𑀺𑀜𑁆𑀜𑀸𑀡𑀓𑀲𑀺𑀡𑀫𑁂𑀓𑁂𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀏𑀓𑁂 𑀤𑀺𑀝𑁆𑀞𑀺𑀕𑀢𑀺𑀓𑀸 𑀅𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀢𑀸𑀯 𑀤𑀲𑁆𑀲𑁂𑀢𑀼’’𑀦𑁆𑀢𑀺. 𑀢𑀲𑁆𑀲 𑀧𑀦 𑀆𑀭𑀫𑁆𑀫𑀡𑀪𑀽𑀢𑀁 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑁂 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀧𑀭𑁂. 𑀢𑀜𑁆𑀳𑀺 𑀓𑀲𑀺𑀡𑀁 𑀫𑀦𑀲𑀺𑀓𑀸𑀭𑀯𑀲𑁂𑀦, ‘‘𑀯𑀺𑀜𑁆𑀜𑀸𑀡𑀓𑀲𑀺𑀡’’𑀦𑁆𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘 𑀢𑀁 𑀆𑀭𑀫𑁆𑀫𑀡𑀝𑁆𑀞𑁂𑀦 𑀆𑀬𑀢𑀦𑀜𑁆𑀘𑀸𑀢𑀺, ‘‘𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑁂𑀓𑁂𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀢𑀬𑀺𑀤𑀦𑁆𑀢𑀺 𑀬-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄𑀢𑀺 𑀆𑀳 ‘‘𑀢𑀁 𑀇𑀤’’𑀦𑁆𑀢𑀺. 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀬𑀣𑀸 𑀯𑀼𑀢𑁆𑀢𑀁 ‘‘𑀲𑀜𑁆𑀜𑀻 𑀅𑀢𑁆𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀤𑀺𑀝𑁆𑀞𑀺𑀁. 𑀤𑀺𑀝𑁆𑀞𑀺𑀬𑁂𑀯 𑀳𑀺 𑀤𑀺𑀝𑁆𑀞𑀺𑀕𑀢𑀁 ‘‘𑀫𑀼𑀢𑁆𑀢𑀕𑀢𑀁 (𑀫. 𑀦𑀺. 𑁨.𑁧𑁧𑁯; 𑀅. 𑀦𑀺. 𑁯.𑁧𑁧), 𑀲𑀗𑁆𑀔𑀸𑀭𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁪𑁧) 𑀯𑀺𑀬. 𑀕𑀦𑁆𑀢𑀩𑁆𑀩𑀸𑀪𑀸𑀯𑀢𑁄 𑀯𑀸 𑀤𑀺𑀝𑁆𑀞𑀺𑀬𑀸 𑀕𑀢𑀫𑀢𑁆𑀢𑀁 𑀤𑀺𑀝𑁆𑀞𑀺𑀕𑀢𑀁, 𑀤𑀺𑀝𑁆𑀞𑀺𑀬𑀸 𑀕𑀳𑀡𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀧𑀓𑀸𑀭𑁄 𑀯𑀸 𑀤𑀺𑀝𑁆𑀞𑀺𑀕𑀢𑀁. 𑀮𑁄𑀓𑀺𑀬𑀸 𑀳𑀺 𑀯𑀺𑀥𑀬𑀼𑀢𑁆𑀢𑀕𑀢𑀧𑀓𑀸𑀭𑀲𑀤𑁆𑀤𑁂 𑀲𑀫𑀸𑀦𑀢𑁆𑀣𑁂 𑀇𑀘𑁆𑀙𑀦𑁆𑀢𑀺. 𑀤𑀺𑀝𑁆𑀞𑀺𑀧𑀘𑁆𑀘𑀬𑁄 𑀤𑀺𑀝𑁆𑀞𑀺𑀓𑀸𑀭𑀡𑀁, 𑀅𑀯𑀺𑀚𑁆𑀚𑀸𑀤𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀧𑀺 𑀳𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑀢𑁄. 𑀬𑀣𑀸𑀳 𑁋 ‘‘𑀅𑀲𑁆𑀲𑀼𑀢𑀯𑀸, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄’’𑀢𑀺𑀆𑀤𑀺 (𑀥. 𑀲. 𑁧𑁦𑁦𑁭). 𑀨𑀲𑁆𑀲𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀬𑀣𑀸𑀳 ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 (𑀤𑀻. 𑀦𑀺. 𑁧.𑁧𑁧𑁮-𑁧𑁨𑁪). 𑀲𑀜𑁆𑀜𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀬𑀣𑀸𑀳 ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺 (𑀲𑀼. 𑀦𑀺. 𑁮𑁮𑁦; 𑀫𑀳𑀸𑀦𑀺. 𑁧𑁦𑁯). 𑀯𑀺𑀢𑀓𑁆𑀓𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀬𑀣𑀸𑀳 𑁋 ‘‘𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸, 𑀲𑀘𑁆𑀘𑀁 𑀫𑀼𑀲𑀸𑀢𑀺 𑀤𑁆𑀯𑀬𑀥𑀫𑁆𑀫𑀫𑀸𑀳𑀽’’𑀢𑀺 (𑀲𑀼. 𑀦𑀺. 𑁮𑁯𑁨; 𑀫𑀳𑀸𑀦𑀺. 𑁧𑁨𑁧). 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀬𑀣𑀸𑀳 𑁋 ‘‘𑀢𑀲𑁆𑀲𑁂𑀯𑀁 𑀫𑀦𑀲𑀺𑀓𑀭𑁄𑀢𑁄 𑀙𑀦𑁆𑀦𑀁 𑀤𑀺𑀝𑁆𑀞𑀻𑀦𑀁 𑀅𑀜𑁆𑀜𑀢𑀭𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸𑀢𑀺 𑀢𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁧.𑁧𑁯). 𑀤𑀺𑀝𑁆𑀞𑀸𑀭𑀫𑁆𑀫𑀡𑀦𑁆𑀢𑀺 𑀤𑀺𑀝𑁆𑀞𑀺𑀆𑀭𑀫𑁆𑀫𑀡𑀪𑀽𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁. 𑀢𑁂𑀦𑀸𑀳 𑁋 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺 (𑀧𑀝𑀺. 𑀫. 𑁧.𑁧𑁩𑁦). 𑀭𑀽𑀧𑀯𑁂𑀤𑀦𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀤𑀺𑀝𑁆𑀞𑀺𑀬𑀸 𑀆𑀭𑀫𑁆𑀫𑀡𑀲𑁆𑀲 𑀅𑀪𑀸𑀯𑀢𑁄 𑀅𑀦𑀸𑀤𑀺𑀬𑀺𑀢𑁆𑀯𑀸 𑀇𑀤𑀫𑁂𑀯 𑀤𑀲𑁆𑀲𑁂𑀢𑀺 𑁋 ‘‘𑀇𑀫𑀺𑀦𑀸 𑀧𑀘𑁆𑀘𑀬𑁂𑀦 𑀇𑀤𑀁 𑀦𑀸𑀫 𑀤𑀲𑁆𑀲𑀦𑀁 𑀕𑀳𑀺𑀢’’𑀦𑁆𑀢𑀺. 𑀇𑀫𑀺𑀦𑀸 𑀧𑀘𑁆𑀘𑀬𑁂𑀦𑀸𑀢𑀺 𑀯𑀸 𑀏𑀢𑁆𑀣 𑀧𑀘𑁆𑀘𑀬𑀕𑁆𑀕𑀳𑀡𑁂𑀦 𑀆𑀭𑀫𑁆𑀫𑀡𑀫𑁆𑀧𑀺 𑀕𑀳𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀤𑁂𑀯𑀸𑀢𑀺 𑀤𑀺𑀝𑁆𑀞𑀺𑀕𑀢𑀜𑁆𑀘𑁂𑀯 𑀤𑀺𑀝𑁆𑀞𑀺𑀧𑀘𑁆𑀘𑀬𑀜𑁆𑀘. 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀏𑀯𑀁-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, ‘‘𑀬𑀤𑀺 𑀭𑀽𑀧𑀲𑀜𑁆𑀜𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀓𑀸𑀭𑁂𑀦 𑀯𑀼𑀢𑁆𑀢𑀲𑀜𑁆𑀜𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀸 𑀦𑀻𑀯𑀭𑀡𑀸𑀤𑀺 𑀉𑀧𑀓𑁆𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺𑀢𑁄. 𑀉𑀢𑁆𑀢𑀫𑀸 𑀧𑀡𑀻𑀢𑀪𑀸𑀯𑀧𑁆𑀧𑀢𑁆𑀢𑀺𑀢𑁄, 𑀢𑀢𑁄 𑀏𑀯 𑀲𑁂𑀝𑁆𑀞𑀸, 𑀲𑁂𑀝𑁆𑀞𑀢𑁆𑀢𑀸 𑀏𑀯 𑀉𑀢𑁆𑀢𑀭𑀺𑀢𑀭𑀸𑀪𑀸𑀯𑀢𑁄 𑀅𑀦𑀼𑀢𑁆𑀢𑀭𑀺𑀬𑀸. 𑀅𑀓𑁆𑀔𑀸𑀬𑀢𑀻𑀢𑀺 𑀉𑀧𑀝𑁆𑀞𑀸𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀯𑀺𑀲𑀼𑀁 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀲𑀜𑁆𑀜𑀸𑀬 𑀘 𑀇𑀫𑀲𑁆𑀫𑀺𑀁 𑀲𑀜𑁆𑀜𑀻𑀯𑀸𑀤𑁂 𑀅𑀦𑁄𑀢𑀭𑀡𑀢𑁄, ‘‘𑀬𑀤𑀺 𑀆𑀭𑀼𑀧𑁆𑀧𑀲𑀜𑁆𑀜𑀸𑀦𑀦𑁆𑀢𑀺 𑀇𑀫𑀺𑀦𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦-𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀇𑀢𑀭𑁂𑀳𑀺 𑀧𑀦 𑀤𑁆𑀯𑀻𑀳𑀻𑀢𑀺, ‘‘𑀬𑀤𑀺 𑀏𑀓𑀢𑁆𑀢𑀲𑀜𑁆𑀜𑀸𑀦𑀁, 𑀬𑀤𑀺 𑀦𑀸𑀦𑀢𑁆𑀢𑀲𑀜𑁆𑀜𑀸𑀦’’𑀦𑁆𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺. 𑀲𑀫𑀸𑀧𑀦𑁆𑀦𑀓𑀯𑀸𑀭𑁄 𑀘 𑀢𑀣𑀸 𑀇𑀥 𑀓𑀣𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁄𑀝𑁆𑀞𑀸𑀲𑀢𑁄 𑀅𑀝𑁆𑀞 𑀲𑀜𑁆𑀜𑀸 𑀘𑀢𑀼𑀓𑁆𑀓𑀤𑁆𑀯𑀬𑀲𑀗𑁆𑀕𑀳𑀢𑁄. 𑀏𑀓𑀢𑁆𑀢𑀲𑀜𑁆𑀜𑀻𑀧𑀤𑀁 𑀞𑀧𑁂𑀢𑁆𑀯𑀸 𑀅𑀢𑁆𑀣𑀢𑁄 𑀧𑀦 𑀲𑀢𑁆𑀢 𑀲𑀜𑁆𑀜𑀸 𑀳𑁄𑀦𑁆𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 𑁋 ‘‘𑀲𑀫𑀸𑀧𑀦𑁆𑀦𑀓…𑀧𑁂… 𑀲𑀗𑁆𑀕𑀳𑀺𑀢𑁄𑀬𑁂𑀯𑀸’’𑀢𑀺.

𑀲𑀜𑁆𑀜𑀸𑀕𑀢𑀦𑁆𑀢𑀺 𑀲𑀜𑁆𑀜𑀸𑀯𑀲𑁂𑀦 𑀕𑀢𑀁, 𑀲𑀜𑁆𑀜𑀸𑀲𑀗𑁆𑀕𑀳𑀁 𑀕𑀢𑀁 𑀯𑀸. 𑀢𑀲𑁆𑀲 𑀧𑀦 𑀅𑀤𑀺𑀝𑁆𑀞𑀺𑀕𑀢𑀲𑁆𑀲𑀧𑀺 𑀉𑀧𑀮𑀩𑁆𑀪𑀫𑀸𑀦𑀢𑁆𑀢𑀸, ‘‘𑀲𑀤𑁆𑀥𑀺𑀁 𑀤𑀺𑀝𑁆𑀞𑀺𑀕𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀦𑁆𑀢𑀺 𑀲𑀳 𑀓𑀸𑀭𑀡𑀪𑀽𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀢𑁂𑀦𑁂𑀯 𑀲𑀳 𑀓𑀸𑀭𑀡𑀪𑀸𑀯𑁂𑀦 𑀲𑀫𑀸𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑀁; 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀢𑀢𑁆𑀢𑀸 𑀑𑀴𑀸𑀭𑀺𑀓𑀁 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀲𑀩𑁆𑀪𑀸𑀯𑀢𑁄. 𑀬𑀲𑁆𑀲 𑀳𑀺 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀢𑀁 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀲𑀪𑀸𑀯𑀢𑁄 𑀧𑀲𑁆𑀲𑀦𑁆𑀢𑀲𑁆𑀲 𑀧𑀸𑀓𑀝𑀪𑀽𑀢𑀯𑀺𑀓𑀸𑀭𑀁 𑀑𑀴𑀸𑀭𑀺𑀓𑀁 𑀲𑀺𑀬𑀸. 𑀦 𑀘𑁂𑀢𑁆𑀣 𑀫𑀕𑁆𑀕𑀨𑀮𑀥𑀫𑁆𑀫𑀸 𑀦𑀺𑀤𑀲𑁆𑀲𑁂𑀢𑀩𑁆𑀩𑀸 𑀢𑁂𑀲𑀁 𑀢𑀣𑀸 𑀅𑀦𑀦𑀼𑀧𑀲𑁆𑀲𑀺𑀢𑀩𑁆𑀩𑀢𑁄; 𑀢𑁂𑀲𑀫𑁆𑀧𑀺 𑀲𑀗𑁆𑀔𑀢𑀪𑀸𑀯𑁂𑀦 𑀇𑀢𑀭𑁂𑀳𑀺 𑀲𑀫𑀸𑀦𑀬𑁄𑀕𑀓𑁆𑀔𑀫𑀢𑀸𑀬 𑀤𑀼𑀦𑁆𑀦𑀺𑀯𑀸𑀭𑀬𑀪𑀸𑀯𑀢𑁄. 𑀢𑀣𑀸 𑀳𑀺 ‘‘𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸’’𑀢𑀺 (𑀉𑀤𑀸. 𑁩) 𑀯𑀘𑀦𑀢𑁄 𑀫𑀕𑁆𑀕𑀲𑁆𑀲𑀧𑀺 𑀦𑀺𑀲𑁆𑀲𑀭𑀡𑀪𑀸𑀯𑁂𑀦 ‘‘𑀅𑀢𑁆𑀣𑀺 𑀔𑁄 𑀧𑀦 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑁄’’𑀢𑀺 𑀦𑀺𑀩𑁆𑀩𑀸𑀦𑀫𑁂𑀯𑁂𑀢𑁆𑀣 𑀧𑀝𑀺𑀬𑁄𑀕𑀪𑀸𑀯𑁂𑀦 𑀉𑀤𑁆𑀥𑀝𑀁 ‘‘𑀦𑀺𑀭𑀼𑀚𑁆𑀛𑀦𑁆𑀢𑀺 𑀏𑀢𑁆𑀣𑀸’’𑀢𑀺 𑀓𑀢𑁆𑀯𑀸. 𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀏𑀢𑁆𑀣, 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀚𑀸𑀢𑀁 𑀅𑀪𑀽𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀲𑀼𑀢𑁆𑀢𑀧𑀤𑀁 (𑀉𑀤𑀸. 𑁭𑁩) 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀦𑀺𑀩𑁆𑀩𑀸𑀦𑀤𑀲𑁆𑀲𑀻𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀦𑀺𑀩𑁆𑀩𑀸𑀦𑀤𑀲𑁆𑀲𑀻, 𑀢𑀢𑁄 𑀏𑀯 𑀇𑀢𑀭𑀸𑀪𑀺𑀲𑀫𑀬𑀢𑁆𑀣𑀲𑀺𑀤𑁆𑀥𑀺𑀬𑀸 𑀢𑀁 𑀲𑀗𑁆𑀔𑀢𑀁 𑀅𑀢𑀺𑀓𑁆𑀓𑀦𑁆𑀢𑁄.

𑁨𑁩. 𑀅𑀝𑁆𑀞𑀲𑀼 𑀅𑀲𑀜𑁆𑀜𑀻𑀯𑀸𑀤𑁂𑀲𑀽𑀢𑀺 𑀇𑀤𑀁 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑁧.𑁭𑁮-𑁮𑁦) 𑀆𑀕𑀢𑀦𑀬𑁂𑀦 𑀯𑀼𑀢𑁆𑀢𑀫𑁂𑀯 𑀳𑀺 𑀲𑀦𑁆𑀥𑀸𑀬 𑀳𑁂𑀝𑁆𑀞𑀸, ‘‘𑀲𑀜𑁆𑀜𑀻𑀢𑀺 𑀇𑀫𑀺𑀦𑀸 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀘𑀢𑁆𑀢𑀸𑀭𑁄 𑀯𑀸𑀤𑀸 𑀏𑀯 𑀉𑀤𑁆𑀥𑀝𑀸. 𑀢𑁂𑀦𑀸𑀳 ‘‘𑀅𑀲𑀜𑁆𑀜𑀻’’𑀢𑀺𑀆𑀤𑀺. 𑀏𑀲 𑀦𑀬𑁄 𑀧𑀭𑀢𑁄 ‘‘𑀅𑀝𑁆𑀞𑀲𑀼 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑁂𑀲𑀽’’𑀢𑀺 𑀏𑀢𑁆𑀣𑀸𑀧𑀺. 𑀲𑀜𑁆𑀜𑀸𑀬 𑀲𑀢𑀺 𑀢𑀸𑀬 𑀯𑁂𑀤𑀦𑀸𑀕𑀸𑀳𑀲𑀩𑁆𑀪𑀸𑀯𑀢𑁄 ‘‘𑀆𑀩𑀸𑀥𑀦𑀝𑁆𑀞𑁂𑀦 𑀲𑀜𑁆𑀜𑀸 𑀭𑁄𑀕𑁄’’𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀢𑀸𑀲𑀽𑀮𑀬𑁄𑀕𑀢𑁄 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑁂𑀳𑀺 𑀉𑀤𑁆𑀥𑀼𑀫𑀸𑀢𑀧𑀓𑁆𑀓𑀧𑀪𑀺𑀚𑁆𑀚𑀦𑀢𑁄 𑀘 𑀲𑀜𑁆𑀜𑀸 𑀕𑀡𑁆𑀟𑁄; 𑀲𑁆𑀯𑀸𑀬𑀫𑀢𑁆𑀣𑁄 𑀤𑁄𑀲𑀤𑀼𑀝𑁆𑀞𑀢𑀸𑀬 𑀏𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀲𑀤𑁄𑀲𑀝𑁆𑀞𑁂𑀦 𑀕𑀡𑁆𑀟𑁄’’𑀢𑀺. 𑀧𑀻𑀴𑀸𑀚𑀦𑀦𑀢𑁄 𑀅𑀦𑁆𑀢𑁄𑀢𑀼𑀤𑀦𑀢𑁄 𑀤𑀼𑀭𑀼𑀤𑁆𑀥𑀭𑀡𑀢𑁄 𑀘 𑀲𑀜𑁆𑀜𑀸 𑀲𑀮𑁆𑀮𑀁; 𑀲𑁆𑀯𑀸𑀬𑀫𑀢𑁆𑀣𑁄 𑀅𑀢𑁆𑀢𑀪𑀸𑀯𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀅𑀯𑀝𑁆𑀞𑀸𑀦𑁂𑀦𑀸𑀢𑀺 𑀆𑀳 ‘‘𑀅𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦 𑀲𑀮𑁆𑀮’’𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀯𑀺𑀜𑁆𑀜𑀸𑀡𑀁 𑀓𑀼𑀢𑁄𑀘𑀺 𑀆𑀕𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑀺’’𑀦𑁆𑀢𑀺. 𑀕𑀢𑀺𑀦𑁆𑀢𑀺 𑀧𑀯𑀢𑁆𑀢𑀺𑀁. 𑀲𑀸 𑀧𑀦 𑀢𑀸𑀲𑀼 𑀢𑀸𑀲𑀼 𑀕𑀢𑀻𑀲𑀼 𑀯𑀼𑀢𑁆𑀢𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀘𑀼𑀢𑀺𑀯𑀲𑁂𑀦 𑀕𑀢𑀺’’𑀦𑁆𑀢𑀺; 𑀯𑀟𑁆𑀠𑀦𑀯𑀲𑁂𑀦 𑀖𑀦𑀧𑀩𑀦𑁆𑀥𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀧𑀭𑀸𑀧𑀭’’𑀦𑁆𑀢𑀺. 𑀅𑀧𑀭𑀸𑀧𑀭𑀜𑁆𑀳𑀺 𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀯𑀺𑀜𑁆𑀜𑀸𑀡𑀁 𑀦𑀦𑁆𑀤𑀽𑀧𑀲𑁂𑀘𑀦𑀁; 𑀇𑀢𑀭𑀁 𑀔𑀦𑁆𑀥𑀢𑁆𑀢𑀬𑀁 𑀯𑀸 𑀦𑀺𑀲𑁆𑀲𑀸𑀬 𑀅𑀪𑀺𑀯𑀼𑀤𑁆𑀥𑀺𑀁 𑀧𑀢𑀺𑀝𑁆𑀞𑀁 𑀫𑀳𑀦𑁆𑀢𑀜𑁆𑀘 𑀧𑀸𑀧𑀼𑀡𑀸𑀢𑀻𑀢𑀺. 𑀧𑀯𑀟𑁆𑀠𑀯𑀲𑁂𑀦 𑀯𑀸 𑀕𑀢𑀺𑀁, 𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀼𑀢𑀺𑀁, 𑀢𑀢𑁄 𑀅𑀧𑀭𑀸𑀧𑀭𑀜𑁆𑀘 𑀭𑀽𑀧𑀧𑀯𑀢𑁆𑀢𑀦𑀯𑀲𑁂𑀦 𑀉𑀧𑀧𑀢𑁆𑀢𑀺𑀁, 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀯𑀲𑁂𑀦 𑀯𑀼𑀟𑁆𑀠𑀺𑀁 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀽𑀧𑀘𑀺𑀢𑀪𑀸𑀯𑁂𑀦 𑀯𑀺𑀭𑀼𑀴𑁆𑀳𑀺𑀁; 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀨𑀮𑀦𑀺𑀩𑁆𑀩𑀢𑁆𑀢𑀺𑀬𑀸 𑀯𑁂𑀧𑀼𑀮𑁆𑀮𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀓𑀸𑀫𑀜𑁆𑀘𑀸𑀢𑀺𑀆𑀤𑀺𑀦𑀸 ‘‘𑀅𑀜𑁆𑀜𑀢𑁆𑀭 𑀭𑀽𑀧𑀸’’𑀢𑀺𑀆𑀤𑀺𑀓𑀸 𑀘𑁄𑀤𑀦𑀸 𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑁆𑀯𑀸 𑀅𑀬𑀜𑁆𑀘 𑀦𑀬𑁄 𑀘𑁄𑀤𑀦𑀸𑀬 𑀅𑀯𑀺𑀲𑀺𑀝𑁆𑀞𑀯𑀺𑀲𑀬𑀢𑀸𑀬 𑀲𑀺𑀬𑀸; 𑀯𑀺𑀲𑀺𑀝𑁆𑀞𑀯𑀺𑀲𑀬𑀸 𑀧𑀦𑀸𑀬𑀁 𑀘𑁄𑀤𑀦𑀸𑀢𑀺 𑀤𑀲𑁆𑀲𑁂𑀢𑀼𑀁, ‘‘𑀅𑀬𑀁 𑀧𑀦 𑀧𑀜𑁆𑀳𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀢𑀓𑁂 𑀔𑀦𑁆𑀥𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀭𑀽𑀧𑀯𑁂𑀤𑀦𑀸𑀤𑀺𑀓𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂. 𑀅𑀜𑁆𑀜𑀢𑁆𑀭 𑀭𑀽𑀧𑀸𑀢𑀺 𑀇𑀫𑀺𑀦𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀭𑀽𑀧𑁂𑀦 𑀯𑀺𑀦𑀸 𑀯𑀺𑀜𑁆𑀜𑀸𑀡𑀲𑁆𑀲 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀪𑀯𑀯𑀺𑀲𑁂𑀲𑀘𑁄𑀤𑀦𑀸𑀬 𑀲𑀪𑀸𑀯𑀢𑁄 𑀏𑀯 𑀯𑀺𑀜𑁆𑀜𑀸𑀡𑁂𑀦 𑀯𑀺𑀦𑀸 𑀭𑀽𑀧𑀲𑁆𑀲𑀧𑀺 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀅𑀭𑀽𑀧𑀪𑀯𑁂𑀧𑀺 𑀭𑀽𑀧𑀁, 𑀅𑀲𑀜𑁆𑀜𑀸𑀪𑀯𑁂 𑀘 𑀯𑀺𑀜𑁆𑀜𑀸𑀡𑀁 𑀅𑀢𑁆𑀣𑀻’’𑀢𑀺. 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀲𑁆𑀲𑀸𑀢𑀺 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲𑀧𑀺 𑀯𑀺𑀜𑁆𑀜𑀸𑀡𑀁 𑀅𑀢𑁆𑀣𑀺. 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀘𑁂 𑀅𑀢𑁆𑀣𑀁 𑀧𑀝𑀺𑀩𑀸𑀳𑀲𑀻𑀢𑀺 𑀬𑀤𑀺 𑀲𑀤𑁆𑀤𑀢𑁆𑀣𑀫𑁂𑀯 𑀕𑀳𑁂𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀁 𑀦 𑀕𑀡𑁆𑀳𑀲𑀺 𑀦𑁂𑀬𑁆𑀬𑀢𑁆𑀣𑀁 𑀲𑀼𑀢𑁆𑀢𑀦𑁆𑀢𑀺. 𑀏𑀢𑁆𑀣 𑀘 𑀅𑀲𑀜𑁆𑀜𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀯𑀲𑁂𑀦 𑀧𑀞𑀫𑀯𑀸𑀤𑁄; 𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀲𑀜𑁆𑀜𑀁𑀬𑁂𑀯 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂𑀦 𑀞𑀺𑀢𑀸𑀬 𑀅𑀜𑁆𑀜𑀸𑀬 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 𑀅𑀲𑀜𑁆𑀜𑀻𑀢𑀺 𑀧𑀯𑀢𑁆𑀢𑁄 𑀤𑀼𑀢𑀺𑀬𑀯𑀸𑀤𑁄; 𑀢𑀣𑀸 𑀲𑀜𑁆𑀜𑀸𑀬 𑀲𑀳 𑀭𑀽𑀧𑀥𑀫𑁆𑀫𑁂 𑀲𑀩𑁆𑀩𑁂 𑀏𑀯 𑀯𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄 𑀢𑀢𑀺𑀬𑀯𑀸𑀤𑁄; 𑀢𑀓𑁆𑀓𑀕𑁆𑀕𑀸𑀳𑀯𑀲𑁂𑀦𑁂𑀯 𑀧𑀯𑀢𑁆𑀢𑁄 𑀘𑀢𑀼𑀢𑁆𑀣𑀯𑀸𑀤𑁄. 𑀢𑁂𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑁂𑀧𑀺 𑀅𑀲𑀜𑁆𑀜𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀢𑁆𑀢𑀲𑁆𑀲 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀼; 𑀲𑀩𑁆𑀩𑀢𑁆𑀣 𑀯𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀸𑀬 𑀲𑀼𑀔𑀼𑀫𑀸𑀬 𑀲𑀜𑁆𑀜𑀸𑀬 𑀅𑀢𑁆𑀣𑀺𑀪𑀸𑀯𑀧𑀝𑀺𑀚𑀸𑀦𑀦𑀯𑀲𑁂𑀦 𑀧𑀞𑀫𑀯𑀸𑀤𑁄; 𑀅𑀲𑀜𑁆𑀜𑀻𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦 𑀲𑀼𑀔𑀼𑀫𑀸𑀬 𑀲𑀜𑁆𑀜𑀸𑀬 𑀯𑀲𑁂𑀦 𑀲𑀜𑁆𑀚𑀸𑀦𑀦𑀲𑀪𑀸𑀯𑀢𑀸𑀧𑀝𑀺𑀚𑀸𑀦𑀦𑀯𑀲𑁂𑀦 𑀘 𑀤𑀼𑀢𑀺𑀬𑀯𑀸𑀤𑀸𑀤𑀬𑁄 𑀧𑀯𑀢𑁆𑀢𑀸𑀢𑀺. 𑀏𑀯𑀫𑁂𑀢𑁆𑀣 𑀏𑀢𑁂𑀲𑀁 𑀯𑀸𑀤𑀸𑀦𑀁 𑀲𑀩𑁆𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁨𑁪. 𑀬𑀢𑁆𑀣 𑀦 𑀲𑀜𑁆𑀜𑀸, 𑀢𑀢𑁆𑀣 𑀜𑀸𑀡𑀲𑁆𑀲 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀻𑀢𑀺 𑀆𑀳 𑁋 ‘‘𑀅𑀲𑀜𑁆𑀜𑀸 𑀲𑀫𑁆𑀫𑁄𑀳𑁄’’𑀢𑀺, 𑀅𑀲𑀜𑁆𑀜𑀪𑀸𑀯𑁄 𑀦𑀸𑀫 𑀲𑀫𑁆𑀫𑁄𑀳𑀧𑁆𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀦𑀺𑀬𑁆𑀬𑀦𑁆𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀬𑀸𑀢𑀺 𑀩𑀳𑀼𑀮𑀁 𑀯𑀘𑀦𑀢𑁄 𑀓𑀢𑁆𑀢𑀼𑀲𑀸𑀥𑀦𑁄 𑀦𑀺𑀬𑁆𑀬𑀸𑀦𑀺𑀬𑀲𑀤𑁆𑀤𑁄, 𑀏𑀯𑀁 𑀇𑀥 𑀯𑀺𑀜𑁆𑀜𑀸𑀢𑀩𑁆𑀩𑀲𑀤𑁆𑀤𑁄𑀢𑀺 𑀆𑀳 𑁋 ‘‘𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩’’𑀦𑁆𑀢𑀺, 𑀯𑀺𑀚𑀸𑀦𑀦𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑀫𑀢𑁆𑀢𑁂𑀦𑀸𑀢𑀺 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀡𑀧𑁆𑀧𑀫𑀸𑀡𑁂𑀦𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 𑁋 ‘‘𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀜𑁆𑀜𑀸𑀧𑀯𑀢𑁆𑀢𑀺𑀫𑀢𑁆𑀢𑁂𑀦𑀸’’𑀢𑀺, 𑀦𑀺𑀩𑁆𑀩𑀺𑀓𑀧𑁆𑀧𑀪𑀸𑀯𑀢𑁄 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀜𑁆𑀜𑀸𑀧𑀯𑀢𑁆𑀢𑀺𑀲𑀫𑁂𑀦 𑀪𑀸𑀯𑀦𑀸𑀪𑀺𑀦𑀻𑀳𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀑𑀴𑀸𑀭𑀺𑀓𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑁂𑀦𑀸𑀢𑀺 𑀑𑀴𑀸𑀭𑀺𑀓𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑀺𑀬𑀸. 𑀑𑀴𑀸𑀭𑀺𑀓𑀲𑀗𑁆𑀔𑀸𑀭𑀸𑀢𑀺 𑀘𑁂𑀢𑁆𑀣 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀧𑀭𑀺𑀬𑁄𑀲𑀸𑀦𑀸 𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸. 𑀉𑀧𑀲𑀫𑁆𑀧𑀤𑀦𑁆𑀢𑀺 𑀬𑁂 𑀲𑀜𑁆𑀜𑀸𑀬, 𑀅𑀲𑀜𑁆𑀜𑀺𑀪𑀸𑀯𑁂 𑀘 𑀤𑁄𑀲𑀁 𑀤𑀺𑀲𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀯𑀡𑁆𑀡𑁂𑀦𑁆𑀢𑀸𑀧𑀺 𑀭𑀽𑀧𑀚𑁆𑀛𑀸𑀦𑀧𑀝𑀺𑀮𑀸𑀪𑀫𑀢𑁆𑀢𑁂𑀦 𑀢𑀲𑁆𑀲 𑀲𑀫𑁆𑀧𑀸𑀤𑀦𑀁 𑀧𑀝𑀺𑀮𑀸𑀪𑀁 𑀅𑀥𑀺𑀕𑀫𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂𑀲𑀁 𑀢𑀲𑁆𑀲 𑀩𑁆𑀬𑀲𑀦𑀁 𑀅𑀓𑁆𑀔𑀸𑀬𑀢𑀺 𑀅𑀦𑀼𑀧𑀸𑀬𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀯𑀺𑀦𑀸𑀲𑁄’’𑀢𑀺𑀆𑀤𑀺. 𑀯𑀼𑀝𑁆𑀞𑀸𑀦𑀦𑁆𑀢𑀺 𑀲𑀤𑀺𑀲𑀲𑀫𑀸𑀧𑀚𑁆𑀚𑀦𑀧𑀼𑀩𑁆𑀩𑀓𑀁 𑀧𑀭𑀺𑀯𑀼𑀝𑁆𑀞𑀸𑀦𑀁. 𑀲𑀫𑀸𑀧𑀢𑁆𑀢𑀺 𑀏𑀯 𑀢𑁂𑀲𑀁 𑀦𑀢𑁆𑀣𑀺 𑀅𑀦𑀥𑀺𑀕𑀢𑀢𑁆𑀢𑀸. 𑀑𑀴𑀸𑀭𑀺𑀓𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀅𑀦𑁆𑀢𑀫𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀺𑀬𑀸𑀧𑀺 𑀧𑀢𑁆𑀢𑀩𑁆𑀩𑀦𑁆𑀢𑀺 𑀦 𑀅𑀓𑁆𑀔𑀸𑀬𑀢𑀺 𑀢𑁂𑀧𑀺 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀢𑁆𑀢𑀩𑁆𑀩𑀢𑁄. 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀅𑀯𑀲𑁂𑀲𑀸𑀢𑀺 𑀇𑀢𑁄 𑀧𑀭𑀁 𑀲𑀼𑀔𑀼𑀫𑀪𑀸𑀯𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀼𑀔𑀼𑀫𑀪𑀸𑀯𑀸𑀧𑀢𑁆𑀢𑀺𑀬𑀸 𑀅𑀯𑀲𑁂𑀲𑀸. 𑀢𑁂𑀦𑀸𑀳 𑁋 ‘‘𑀪𑀸𑀯𑀦𑀸𑀯𑀲𑁂𑀦 𑀲𑀩𑁆𑀩𑀲𑀼𑀔𑀼𑀫𑀪𑀸𑀯𑀁 𑀧𑀢𑁆𑀢𑀸 𑀲𑀗𑁆𑀔𑀸𑀭𑀸’’𑀢𑀺. 𑀏𑀢𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁, 𑀧𑀢𑁆𑀢𑀩𑁆𑀩𑀁 𑀦𑀸𑀫 𑀳𑁄𑀢𑀺 𑀢𑀸𑀤𑀺𑀲𑀲𑀗𑁆𑀔𑀸𑀭𑀧𑁆𑀧𑀢𑁆𑀢𑀺𑀬𑀁 𑀢𑀩𑁆𑀩𑁄𑀳𑀸𑀭𑀢𑁄. 𑀲𑀗𑁆𑀔𑀢𑀁 𑀲𑀫𑁂𑀘𑁆𑀘 𑀲𑀫𑁆𑀪𑀼𑀬𑁆𑀬 𑀧𑀘𑁆𑀘𑀬𑁂𑀳𑀺 𑀓𑀢𑀢𑁆𑀢𑀸.

𑁨𑁫. ‘‘𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁨𑁫) 𑀯𑀓𑁆𑀔𑀫𑀸𑀦𑀢𑁆𑀢𑀸 𑀲𑀩𑀼𑀤𑁆𑀥𑀺𑀬𑀁 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑁂 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸, ‘‘𑀢𑀢𑁆𑀭𑀸’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀢𑀢𑁆𑀭𑀸𑀢𑀺 𑀲𑀢𑁆𑀢𑀲𑀼 𑀉𑀘𑁆𑀙𑁂𑀤𑀯𑀸𑀤𑁂𑀲𑀼 𑀪𑀼𑀫𑁆𑀫’’𑀦𑁆𑀢𑀺. 𑀉𑀤𑁆𑀥𑀁 𑀲𑀭𑀦𑁆𑀢𑀺 𑀉𑀤𑁆𑀥𑀁 𑀕𑀢𑀁 𑀲𑀭𑀦𑁆𑀢𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀤𑁆𑀥𑀁 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺. 𑀲𑀭𑀦𑁆𑀢𑀸𑀢𑀺 𑀬𑀢𑁆𑀣 𑀧𑀢𑁆𑀣𑁂𑀦𑁆𑀢𑀺 𑀦 𑀮𑀪𑀦𑁆𑀢𑀺, 𑀢𑀁 𑀚𑀸𑀦𑀦𑁆𑀢𑀸. 𑀆𑀲𑀢𑁆𑀢𑀺𑀦𑁆𑀢𑀺 𑀆𑀲𑀻𑀲𑀦𑀁. 𑀧𑁂𑀘𑁆𑀘𑀸𑀢𑀺 𑀧𑀭𑀮𑁄𑀓𑁂. 𑀯𑀸𑀡𑀺𑀚𑀽𑀧𑀫𑀸 𑀯𑀺𑀬𑀸𑀢𑀺 𑀪𑀯𑀧𑀭𑀺𑀬𑀸𑀧𑀦𑁆𑀦𑀨𑀮𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬 𑀧𑀝𑀺𑀧𑀚𑁆𑀚𑀦𑀢𑁄. 𑀲𑀓𑁆𑀓𑀸𑀬𑀲𑁆𑀲 𑀪𑀬𑀸𑀢𑀺 𑀲𑀦𑁆𑀢𑁄 𑀓𑀸𑀬𑁄𑀢𑀺 𑀲𑀓𑁆𑀓𑀸𑀬𑁄, 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑁄 𑀥𑀫𑁆𑀫𑀲𑀫𑀽𑀳𑁄𑀢𑀺 𑀓𑀢𑁆𑀯𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁, 𑀢𑀢𑁄 𑀪𑀸𑀬𑀦𑁂𑀦. 𑀫𑀸 𑀔𑀻𑀬𑀺 𑀫𑀸 𑀧𑀭𑀺𑀓𑁆𑀔𑀬𑀁 𑀅𑀕𑀫𑀸𑀲𑀺. 𑀫𑀸 𑀑𑀲𑀻𑀤𑀺 𑀫𑀸 𑀳𑁂𑀝𑁆𑀞𑀸 𑀪𑀲𑁆𑀲𑀺. 𑀅𑀩𑁆𑀪𑀦𑁆𑀢𑀺 𑀆𑀓𑀸𑀲𑀁 𑀫𑀸 𑀉𑀦𑁆𑀤𑁆𑀭𑀺𑀬𑀺 𑀫𑀸 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀺. 𑀕𑀤𑁆𑀤𑀼𑀮𑁂𑀦 𑀩𑀤𑁆𑀥𑁄 𑀕𑀤𑁆𑀤𑀼𑀮𑀩𑀤𑁆𑀥𑁄. 𑀤𑀴𑁆𑀳𑀣𑀫𑁆𑀪𑁄 𑀯𑀺𑀬 𑀔𑀻𑀮𑁄 𑀯𑀺𑀬 𑀘 𑀲𑀓𑁆𑀓𑀸𑀬𑁄 𑀤𑀼𑀫𑁆𑀫𑁄𑀘𑀦𑀻𑀬𑀢𑁄. 𑀲𑀸 𑀯𑀺𑀬 𑀤𑀺𑀝𑁆𑀞𑀺𑀕𑀢𑀺𑀓𑁄 𑀢𑀲𑁆𑀲 𑀅𑀦𑀼𑀧𑀭𑀺𑀯𑀢𑁆𑀢𑀦𑀢𑁄. 𑀤𑀡𑁆𑀟𑀓𑁄 𑀯𑀺𑀬 𑀤𑀺𑀝𑁆𑀞𑀺 𑀙𑁂𑀤𑀦𑀓𑀭𑀡𑀸𑀬 𑀅𑀲𑀫𑀢𑁆𑀣𑀪𑀸𑀯𑀓𑀭𑀡𑀢𑁄. 𑀭𑀚𑁆𑀚𑀼 𑀯𑀺𑀬 𑀢𑀡𑁆𑀳𑀸 𑀩𑀦𑁆𑀥𑀦𑀢𑁄 𑀘, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀲𑀫𑀦𑁆𑀦𑀸𑀕𑀫𑀦𑀯𑀲𑁂𑀦 𑀘 𑀲𑀫𑁆𑀩𑀤𑁆𑀥𑀪𑀸𑀯𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀺𑀝𑁆𑀞𑀺𑀤𑀡𑁆𑀟𑀓𑁂 𑀧𑀯𑁂𑀲𑀺𑀢𑀸𑀬 𑀢𑀡𑁆𑀳𑀸𑀭𑀚𑁆𑀚𑀼𑀬𑀸’’𑀢𑀺.

𑁨𑁬. 𑀪𑀕𑀯𑀸 𑀅𑀢𑁆𑀢𑀦𑁄 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 (𑀘𑀢𑀼𑀘𑀢𑁆𑀢𑀸𑀭𑀻𑀲 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀯𑀸𑀤𑀸 𑀢𑀢𑁆𑀣 𑀢𑀢𑁆𑀣 𑀅𑀦𑁆𑀢𑁄𑀕𑀥𑀸𑀢𑀺) 𑀉𑀤𑁆𑀤𑁂𑀲𑀯𑀲𑁂𑀦 𑀧𑀜𑁆𑀘𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀬𑀣𑀼𑀤𑁆𑀤𑁂𑀲𑀁 𑀦𑀺𑀕𑀫𑁂𑀦𑁆𑀢𑁄, ‘‘𑀇𑀫𑀸𑀦𑁂𑀯 𑀧𑀜𑁆𑀘𑀸𑀬𑀢𑀦𑀸𑀦𑀻’’𑀢𑀺 𑀆𑀳. 𑀢𑀢𑁆𑀣 𑀤𑀼𑀓𑁆𑀔𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀤𑀺𑀝𑁆𑀞𑀺𑀕𑀢𑀸𑀦𑀁 𑀓𑀸𑀭𑀡𑀝𑁆𑀞𑁂𑀦 𑀆𑀬𑀢𑀦𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑁋 ‘‘𑀇𑀫𑀸𑀦𑁂𑀯 𑀧𑀜𑁆𑀘 𑀓𑀸𑀭𑀡𑀸𑀦𑀻’’𑀢𑀺. 𑀲𑀜𑁆𑀜𑀻𑀆𑀤𑀺𑀯𑀲𑁂𑀦 𑀢𑀻𑀡𑀺 𑀉𑀘𑁆𑀙𑁂𑀤𑀯𑀸𑀤𑁄𑀢𑀺 𑀘𑀢𑁆𑀢𑀸𑀭𑀺 𑀪𑀸𑀚𑀺𑀢𑀸𑀦𑀺. 𑀇𑀢𑀭𑀁 𑀧𑀦 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀓𑀼𑀳𑀺𑀁 𑀧𑀯𑀺𑀝𑁆𑀞𑀁? 𑀲𑀭𑀽𑀧𑀢𑁄 𑀅𑀪𑀸𑀚𑀺𑀢𑀢𑁆𑀢𑀸 𑀬𑀣𑀸𑀪𑀸𑀚𑀺𑀢𑁂𑀲𑀼 𑀯𑀸𑀤𑁂𑀲𑀼 𑀓𑀢𑁆𑀣 𑀅𑀦𑁆𑀢𑁄𑀕𑀥𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀉𑀤𑁆𑀤𑁂𑀲𑁂 𑀧𑀦 𑀲𑀭𑀽𑀧𑀢𑁄 𑀕𑀳𑀺𑀢𑀫𑁂𑀯, ‘‘𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀯𑀸 𑀧𑀦𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺. 𑀇𑀢𑀭𑁄 𑀏𑀓𑀢𑁆𑀢𑀲𑀜𑁆𑀜𑀻𑀯𑀸𑀤𑁂 𑀦𑀸𑀦𑀢𑁆𑀢𑀲𑀜𑁆𑀜𑀻𑀯𑀸𑀤𑁂 𑀅𑀦𑁆𑀢𑁄𑀕𑀥𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀢𑁆𑀢…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀆𑀳 𑀬𑀣𑀸𑀲𑀼𑀔𑀜𑁆𑀘𑁂𑀢𑀁 𑀯𑀼𑀢𑁆𑀢𑀁. 𑀧𑀞𑀫𑁄 𑀳𑀺 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑁄 𑀦𑀸𑀦𑀢𑁆𑀢𑀲𑀜𑁆𑀜𑀻𑀯𑀸𑀤𑁂 𑀅𑀦𑁆𑀢𑁄𑀕𑀥𑁄, 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀏𑀓𑀢𑁆𑀢𑀲𑀜𑁆𑀜𑀻𑀯𑀸𑀤𑁂.

𑁨𑁭. 𑀅𑀢𑀻𑀢𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢𑀦𑁆𑀢𑀺 𑀅𑀢𑀻𑀢𑀁 𑀔𑀦𑁆𑀥𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢𑀁 𑀧𑀼𑀩𑁆𑀩𑀦𑁆𑀢𑀁. 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀥𑀫𑁆𑀫𑀯𑀺𑀲𑀬𑀸 𑀓𑀧𑁆𑀧𑀦𑀸 𑀇𑀥𑀸𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀅𑀢𑀻𑀢𑀓𑀸𑀮𑀯𑀸𑀘𑀓𑁄 𑀇𑀥 𑀧𑀼𑀩𑁆𑀩𑀲𑀤𑁆𑀤𑁄, 𑀭𑀽𑀧𑀸𑀤𑀺𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀜𑁆𑀘 𑀓𑀧𑁆𑀧𑀦𑀸𑀯𑀢𑁆𑀣𑀼 𑀦𑀢𑁆𑀣𑀺, 𑀅𑀦𑁆𑀢𑀲𑀤𑁆𑀤𑁄 𑀘 𑀓𑁄𑀝𑁆𑀞𑀸𑀲𑀯𑀸𑀘𑀓𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑀻𑀢𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢𑀁 𑀧𑀼𑀩𑁆𑀩𑀦𑁆𑀢𑀁 𑀓𑀧𑁆𑀧𑁂𑀢𑁆𑀯𑀸’’𑀢𑀺. ‘‘𑀓𑀧𑁆𑀧𑁂𑀢𑁆𑀯𑀸’’𑀢𑀺 𑀘 𑀢𑀲𑁆𑀫𑀺𑀁 𑀧𑀼𑀩𑁆𑀩𑀦𑁆𑀢𑁂 𑀢𑀡𑁆𑀳𑀸𑀬𑀦𑀸𑀪𑀺𑀦𑀺𑀯𑀺𑀲𑀸𑀦𑀁 𑀲𑀫𑀢𑁆𑀣𑀦𑀁 𑀧𑀭𑀺𑀦𑀺𑀝𑁆𑀞𑀸𑀧𑀦𑀁 𑀯𑀤𑀢𑀺. 𑀲𑁂𑀲𑀫𑁆𑀧𑀻𑀢𑀺 ‘‘𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀻’’𑀢𑀺 𑀏𑀯𑀫𑀸𑀤𑀺𑀓𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 ‘‘𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑀁. 𑀏𑀓𑁂𑀓𑀲𑁆𑀫𑀺𑀜𑁆𑀘 𑀅𑀢𑁆𑀢𑀸𑀢𑀺 𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀓𑀢𑁆𑀯𑀸, 𑀮𑁄𑀓𑁄𑀢𑀺 𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀸𑀦𑀺 𑀢𑀩𑁆𑀩𑀺𑀧𑀸𑀓𑀸 𑀘𑀸𑀢𑀺 𑀓𑀢𑁆𑀯𑀸, 𑀢𑀁 𑀢𑀁 𑀕𑀳𑀡𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑀦𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀅𑀢𑁆𑀢𑀸𑀢𑀺 𑀘 𑀮𑁄𑀓𑁄𑀢𑀺 𑀘 𑀕𑀳𑁂𑀢𑁆𑀯𑀸’’𑀢𑀺. 𑀲𑀩𑁆𑀩𑀤𑀸𑀪𑀸𑀯𑁂𑀦 𑀲𑀲𑁆𑀲𑀢𑁄. 𑀅𑀫𑀭𑁄 𑀦𑀺𑀘𑁆𑀘𑁄 𑀥𑀼𑀯𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀫𑀭𑀡𑀸𑀪𑀸𑀯𑁂𑀦 𑀅𑀫𑀭𑁄, 𑀉𑀧𑁆𑀧𑀸𑀤𑀸𑀪𑀸𑀯𑁂𑀦 𑀲𑀩𑁆𑀩𑀓𑀸𑀮𑀁 𑀯𑀢𑁆𑀢𑀦𑀢𑁄 𑀦𑀺𑀘𑁆𑀘𑁄, 𑀣𑀺𑀭𑀝𑁆𑀞𑁂𑀦 𑀯𑀺𑀓𑀸𑀭𑀸𑀪𑀸𑀯𑁂𑀦 𑀥𑀼𑀯𑁄, 𑀬𑀣𑀸𑀳𑀸𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀤𑁆𑀤𑁂𑀲𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀻𑀳𑀺 𑀯𑀺𑀪𑀸𑀯𑁂𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁩𑁦-𑁧𑁩𑁧) 𑀇𑀫𑀺𑀲𑁆𑀲𑀸 𑀧𑀜𑁆𑀘𑀯𑀺𑀥𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑁄. ‘‘𑀭𑀽𑀧𑀯𑀦𑁆𑀢’’𑀦𑁆𑀢𑀺𑀆𑀤𑀺𑀓𑀸𑀬 (𑀧𑀝𑀺. 𑀫. 𑁧.𑁧𑁩𑁦-𑁧𑁩𑁧) 𑀧𑀦 𑀧𑀜𑁆𑀘𑀤𑀲𑀯𑀺𑀥𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂, ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀤𑀜𑁆𑀜𑀁 𑁋 ‘‘𑀮𑁄𑀓𑁄’’𑀢𑀺 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀣𑀸 𑀏𑀓𑀁 𑀔𑀦𑁆𑀥𑀁, ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀤𑀜𑁆𑀜𑁂 ‘‘𑀮𑁄𑀓𑁄’’𑀢𑀺 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀬𑀣𑀸 ‘‘𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀅𑀢𑁆𑀢𑀸𑀢𑀺 𑀘 𑀮𑁄𑀓𑁄𑀢𑀺 𑀘 𑀕𑀳𑁂𑀢𑁆𑀯𑀸 𑀲𑀲𑁆𑀲𑀢𑁄…𑀧𑁂… 𑀥𑀼𑀯𑁄’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄; 𑀏𑀯𑀁 𑀅𑀲𑀲𑁆𑀲𑀢𑁄 𑀅𑀦𑀺𑀘𑁆𑀘𑁄 𑀅𑀥𑀼𑀯𑁄 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸; 𑀦𑀺𑀘𑁆𑀘𑁄 𑀘 𑀅𑀦𑀺𑀘𑁆𑀘𑁄 𑀘 𑀦𑁂𑀯𑀦𑀺𑀘𑁆𑀘𑁄 𑀦𑀸𑀦𑀺𑀘𑁆𑀘𑁄𑀢𑀺 𑀏𑀯𑀫𑀸𑀤𑀺𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸𑀢𑀺 𑀮𑀸𑀪𑀻𑀯𑀲𑁂𑀦 𑀢𑀬𑁄, 𑀢𑀓𑁆𑀓𑀻𑀯𑀲𑁂𑀦 𑀏𑀓𑁄𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀮𑀸𑀪𑀻 𑀢𑀺𑀢𑁆𑀣𑀺𑀬𑁄 𑀫𑀦𑁆𑀤𑀧𑀜𑁆𑀜𑁄 𑀅𑀦𑁂𑀓𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑀢𑁆𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀫𑀚𑁆𑀛𑀺𑀫𑀧𑀜𑁆𑀜𑁄 𑀤𑀲 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑀸𑀦𑀺, 𑀢𑀺𑀓𑁆𑀔𑀧𑀜𑁆𑀜𑁄 𑀘𑀢𑁆𑀢𑀸𑀭𑀻𑀲 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑀸𑀦𑀺, 𑀦 𑀢𑀢𑁄 𑀧𑀭𑀁. 𑀲𑁄 𑀏𑀯𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀅𑀪𑀺𑀯𑀤𑀢𑀺. 𑀢𑀓𑁆𑀓𑀻 𑀧𑀦 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁𑀧𑀝𑀺𑀪𑀸𑀦𑀁 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀅𑀪𑀺𑀯𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀮𑀸𑀪𑀻𑀯𑀲𑁂𑀦 𑀢𑀬𑁄, 𑀢𑀓𑁆𑀓𑀻𑀯𑀲𑁂𑀦 𑀏𑀓𑁄𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸’’𑀢𑀺. 𑀏𑀢𑁂𑀦𑁂𑀯 𑀘 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀓𑀯𑀸𑀤𑁄 𑀯𑀺𑀬 𑀲𑀲𑁆𑀲𑀢𑀯𑀸𑀤𑁄 𑀓𑀲𑁆𑀫𑀸 𑀤𑀼𑀯𑀺𑀥𑁂𑀦 𑀦 𑀯𑀺𑀪𑀢𑁆𑀢𑁄𑀢𑀺 𑀘𑁂? 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀘, ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀯𑀸𑀤𑁂 𑀅𑀬𑀫𑀬𑀼𑀢𑁆𑀢𑀢𑀸𑀯𑀺𑀪𑀸𑀯𑀦𑀸 𑁋 𑀬𑀤𑀺 𑀳𑀺 𑀧𑀭𑁂𑀦 𑀧𑀭𑀺𑀓𑀧𑁆𑀧𑀺𑀢𑁄 𑀅𑀢𑁆𑀢𑀸, 𑀮𑁄𑀓𑁄 𑀯𑀸 𑀲𑀲𑁆𑀲𑀢𑁄 𑀲𑀺𑀬𑀸, 𑀢𑀲𑁆𑀲 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀧𑀼𑀭𑀺𑀫𑀭𑀽𑀧𑀸𑀯𑀺𑀚𑀳𑀦𑀢𑁄 𑀓𑀲𑁆𑀲𑀘𑀺 𑀯𑀺𑀲𑁂𑀲𑀸𑀥𑀸𑀦𑀲𑁆𑀲 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀳𑀺𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀳𑀺𑀢𑁂 𑀘 𑀧𑀝𑀺𑀧𑀢𑁆𑀢𑀺𑀅𑀢𑁆𑀣𑀁 𑀉𑀧𑀤𑁂𑀲𑁄 𑀏𑀯 𑀦𑀺𑀧𑁆𑀧𑀬𑁄𑀚𑀦𑁄 𑀲𑀺𑀬𑀸 𑀲𑀲𑁆𑀲𑀢𑀯𑀸𑀤𑀺𑀦𑁄. 𑀓𑀣𑀁 𑀯𑀸 𑀲𑁄 𑀉𑀧𑀤𑁂𑀲𑁄 𑀧𑀯𑀢𑁆𑀢𑀻𑀬𑀢𑀺 𑀯𑀺𑀓𑀸𑀭𑀸𑀪𑀸𑀯𑀢𑁄; 𑀏𑀯𑀜𑁆𑀘 𑀅𑀢𑁆𑀢𑀦𑁄 𑀅𑀚𑀝𑀸𑀓𑀸𑀲𑀲𑁆𑀲 𑀯𑀺𑀬 𑀤𑀸𑀦𑀸𑀤𑀺𑀓𑀺𑀭𑀺𑀬𑀸 𑀳𑀺𑀁𑀲𑀸𑀤𑀺𑀓𑀺𑀭𑀺𑀬𑀸 𑀘 𑀦 𑀲𑀫𑁆𑀪𑀯𑀢𑀺; 𑀢𑀣𑀸 𑀲𑀼𑀔𑀲𑁆𑀲 𑀤𑀼𑀓𑁆𑀔𑀲𑁆𑀲 𑀘 𑀅𑀦𑀼𑀪𑀯𑀦𑀦𑀺𑀩𑀦𑁆𑀥𑁄 𑀏𑀯 𑀲𑀲𑁆𑀲𑀢𑀯𑀸𑀤𑀺𑀦𑁄 𑀦 𑀬𑀼𑀚𑁆𑀚𑀢𑀺 𑀓𑀫𑁆𑀫𑀩𑀤𑁆𑀥𑀸𑀪𑀸𑀯𑀢𑁄, 𑀚𑀸𑀢𑀺𑀆𑀤𑀻𑀦𑀁 𑀅𑀲𑀫𑁆𑀪𑀯𑀢𑁄 𑀓𑀼𑀢𑁄 𑀯𑀺𑀫𑁄𑀓𑁆𑀔𑁄. 𑀅𑀣 𑀧𑀦 𑀥𑀫𑁆𑀫𑀫𑀢𑁆𑀢𑀁 𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀯𑀺𑀦𑀲𑁆𑀲𑀢𑀺 𑀘, 𑀬𑀲𑁆𑀲 𑀯𑀲𑁂𑀦𑀸𑀬𑀁 𑀓𑀺𑀭𑀺𑀬𑀸𑀤𑀺𑀯𑁄𑀳𑀸𑀭𑁄𑀢𑀺 𑀯𑀤𑁂𑀬𑁆𑀬. 𑀏𑀯𑀫𑁆𑀧𑀺 𑀧𑀼𑀭𑀺𑀫𑀭𑀽𑀧𑀸𑀯𑀺𑀚𑀳𑀦𑁂𑀦 𑀅𑀯𑀝𑁆𑀞𑀺𑀢𑀲𑁆𑀲 𑀅𑀢𑁆𑀢𑀦𑁄 𑀥𑀫𑁆𑀫𑀫𑀢𑁆𑀢𑀦𑁆𑀢𑀺 𑀦 𑀲𑀓𑁆𑀓𑀸 𑀲𑀫𑁆𑀪𑀸𑀯𑁂𑀢𑀼𑀁; 𑀢𑁂 𑀯𑀸 𑀧𑀦𑀲𑁆𑀲 𑀥𑀫𑁆𑀫𑀸 𑀅𑀯𑀢𑁆𑀣𑀸𑀪𑀽𑀢𑀸 𑀢𑀢𑁄 𑀅𑀜𑁆𑀜𑁂 𑀯𑀸 𑀲𑀺𑀬𑀼𑀁 𑀅𑀦𑀜𑁆𑀜𑁂 𑀯𑀸, 𑀬𑀤𑀺 𑀅𑀜𑁆𑀜𑁂, 𑀦 𑀢𑀸𑀳𑀺 𑀢𑀲𑁆𑀲 𑀉𑀧𑁆𑀧𑀦𑁆𑀦𑀸𑀳𑀺𑀧𑀺 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀬𑁄 𑀳𑀺 𑀓𑀭𑁄𑀢𑀺 𑀧𑀝𑀺𑀲𑀁𑀯𑁂𑀤𑁂𑀢𑀺 𑀘𑀯𑀢𑀺 𑀉𑀧𑀧𑀚𑁆𑀚𑀢𑀺 𑀘𑀸𑀢𑀺 𑀇𑀘𑁆𑀙𑀺𑀢𑀁. 𑀢𑀲𑁆𑀫𑀸 𑀢𑀤𑀯𑀢𑁆𑀣𑁄 𑀏𑀯 𑀬𑀣𑀸𑀯𑀼𑀢𑁆𑀢𑀤𑁄𑀲𑁄, 𑀓𑀺𑀜𑁆𑀘 𑀥𑀫𑁆𑀫𑀓𑀧𑁆𑀧𑀦𑀸𑀧𑀺 𑀦𑀺𑀭𑀢𑁆𑀣𑀓𑀸 𑀲𑀺𑀬𑀸. 𑀅𑀣 𑀅𑀦𑀜𑁆𑀜𑁂, 𑀉𑀧𑁆𑀧𑀸𑀤𑀯𑀺𑀦𑀸𑀲𑀯𑀦𑁆𑀢𑀻𑀳𑀺 𑀅𑀯𑀢𑁆𑀣𑀸𑀳𑀺 𑀅𑀦𑀜𑁆𑀜𑀲𑁆𑀲 𑀅𑀢𑁆𑀢𑀦𑁄 𑀢𑀸𑀲𑀁 𑀯𑀺𑀬 𑀉𑀧𑁆𑀧𑀸𑀤𑀯𑀺𑀦𑀸𑀲𑀲𑀫𑁆𑀪𑀯𑀸𑀧𑀢𑁆𑀢𑀺𑀢𑁄 𑀓𑀼𑀢𑁄 𑀦𑀺𑀘𑁆𑀘𑀢𑀸𑀯𑀓𑀸𑀲𑁄. 𑀢𑀸𑀲𑀫𑁆𑀧𑀺 𑀯𑀸 𑀅𑀢𑁆𑀢𑀦𑁄 𑀯𑀺𑀬 𑀦𑀺𑀘𑁆𑀘𑀢𑀸𑀢𑀺 𑀩𑀦𑁆𑀥𑀦𑀯𑀺𑀫𑁄𑀓𑁆𑀔𑀸𑀦𑀁 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀦 𑀬𑀼𑀚𑁆𑀚𑀢𑀺 𑀏𑀯 𑀲𑀲𑁆𑀲𑀢𑀯𑀸𑀤𑁄; 𑀦 𑀘𑁂𑀢𑁆𑀣 𑀓𑁄𑀘𑀺 𑀯𑀸𑀤𑀻 𑀥𑀫𑁆𑀫𑀸𑀦𑀁 𑀲𑀲𑁆𑀲𑀢𑀪𑀸𑀯𑁂 𑀧𑀭𑀺𑀲𑀼𑀤𑁆𑀥𑀁 𑀬𑀼𑀢𑁆𑀢𑀺𑀁 𑀯𑀢𑁆𑀢𑀼𑀁 𑀲𑀫𑀢𑁆𑀣𑁄 𑀅𑀢𑁆𑀣𑀺; 𑀬𑀼𑀢𑁆𑀢𑀺𑀭𑀳𑀺𑀢𑀜𑁆𑀘 𑀯𑀘𑀦𑀁 𑀦 𑀧𑀡𑁆𑀟𑀺𑀢𑀸𑀦𑀁 𑀘𑀺𑀢𑁆𑀢𑀫𑀸𑀭𑀸𑀥𑁂𑀢𑀻𑀢𑀺 𑀯𑀺𑀜𑁆𑀜𑀽𑀳𑀺 𑀙𑀟𑁆𑀟𑀺𑀢𑁄 𑀏𑀯𑀸𑀬𑀁 𑀲𑀲𑁆𑀲𑀢𑀯𑀸𑀤𑁄𑀢𑀺.

𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸𑀢𑀺 𑀏𑀢𑁆𑀣 𑀢𑁂 𑀲𑀭𑀽𑀧𑀫𑀢𑁆𑀢𑀢𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀸 𑀏𑀯, 𑀢𑀢𑁆𑀣 𑀤𑁆𑀯𑁂 𑀚𑀦𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺 𑀮𑀸𑀪𑀻 𑀘 𑀅𑀮𑀸𑀪𑀻 𑀘. 𑀢𑀢𑁆𑀣 𑀮𑀸𑀪𑀻 𑀦𑀸𑀫 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀮𑀸𑀪𑀻 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀅𑀭𑀳𑀢𑁄 𑀘𑀼𑀢𑀺𑀁 𑀤𑀺𑀲𑁆𑀯𑀸 𑀉𑀧𑀧𑀢𑁆𑀢𑀺𑀁 𑀅𑀧𑀲𑁆𑀲𑀦𑁆𑀢𑁄. 𑀬𑁄 𑀯𑀸 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀘𑀼𑀢𑀺𑀫𑀢𑁆𑀢𑀫𑁂𑀯 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀺, 𑀧𑀼𑀩𑁆𑀩𑀬𑁄𑀕𑀸𑀪𑀸𑀯𑁂𑀦 𑀧𑀭𑀺𑀓𑀫𑁆𑀫𑀸𑀓𑀭𑀡𑁂𑀦 𑀯𑀸 𑀉𑀧𑀧𑀸𑀢𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 ‘‘𑀢𑀢𑁆𑀣 𑀢𑀢𑁆𑀣𑁂𑀯 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀅𑀮𑀸𑀪𑀻 𑁋 ‘‘𑀓𑁄 𑀧𑀭𑀮𑁄𑀓𑀁 𑀚𑀸𑀦𑀸𑀢𑀺, 𑀏𑀢𑁆𑀢𑀓𑁄 𑀚𑀻𑀯𑀯𑀺𑀲𑀬𑁄, 𑀬𑀸𑀯 𑀇𑀦𑁆𑀤𑁆𑀭𑀺𑀬𑀕𑁄𑀘𑀭𑁄’’𑀢𑀺 𑀅𑀢𑁆𑀢𑀦𑁄 𑀥𑀻𑀢𑀼𑀬𑀸 𑀳𑀢𑁆𑀣𑀕𑁆𑀕𑀡𑁆𑀳𑀦𑀓𑀭𑀸𑀚𑀸 𑀯𑀺𑀬 𑀓𑀸𑀫𑀲𑀼𑀔𑀕𑀺𑀤𑁆𑀥𑀢𑀸𑀬 𑀯𑀸, ‘‘𑀬𑀣𑀸 𑀭𑀼𑀓𑁆𑀔𑀧𑀡𑁆𑀡𑀸𑀦𑀺 𑀭𑀼𑀓𑁆𑀔𑀢𑁄 𑀧𑀢𑀺𑀢𑀸𑀦𑀺 𑀦 𑀧𑀝𑀺𑀲𑀦𑁆𑀥𑀺𑀬𑀦𑁆𑀢𑀺, 𑀏𑀯𑀁 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀫𑀭𑀡𑀫𑁂𑀯 𑀕𑀘𑁆𑀙𑀦𑁆𑀢𑀺, 𑀚𑀮𑀩𑀼𑀩𑁆𑀩𑀼𑀴𑀓𑀽𑀧𑀫𑀸 𑀲𑀢𑁆𑀢𑀸’’𑀢𑀺 𑀢𑀓𑁆𑀓𑀫𑀢𑁆𑀢𑀯𑀲𑁂𑀦 𑀯𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑁋 ‘‘𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀓𑀸𑀫𑀸𑀯𑀘𑀭𑀤𑁂𑀯𑀢𑁆𑀢𑀪𑀸𑀯𑁂 𑀭𑀽𑀧𑀸𑀯𑀘𑀭𑀤𑁂𑀯𑀢𑁆𑀢𑀪𑀸𑀯𑁂 𑀘𑀢𑀼𑀩𑁆𑀩𑀺𑀥𑀅𑀭𑀽𑀧𑀢𑁆𑀢𑀪𑀸𑀯𑁂 𑀘𑀯𑀺𑀢𑁆𑀯𑀸 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀧𑀜𑁆𑀜𑀸𑀧𑀦𑀯𑀲𑁂𑀦 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸 𑀓𑀣𑀺𑀢𑀸’’𑀢𑀺. 𑀢𑀢𑁆𑀣 𑀬𑀼𑀢𑁆𑀢𑀁 𑀢𑀸𑀯 𑀧𑀼𑀭𑀺𑀫𑁂𑀲𑀼 𑀢𑀻𑀲𑀼 𑀯𑀸𑀤𑁂𑀲𑀼 ‘‘𑀓𑀸𑀬𑀲𑁆𑀲 𑀪𑁂𑀤𑀸’’𑀢𑀺 𑀯𑀼𑀢𑁆𑀢𑀁; 𑀧𑀜𑁆𑀘𑀯𑁄𑀓𑀸𑀭𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀅𑀢𑁆𑀢𑀪𑀸𑀯𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀢𑁂𑀲𑀁 𑀯𑀸𑀤𑀸𑀦𑀁, 𑀦 𑀬𑀼𑀢𑁆𑀢𑀁 𑀘𑀢𑀼𑀯𑁄𑀓𑀸𑀭𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁂𑀲𑀼 𑀘𑀢𑀼𑀢𑁆𑀣𑀸𑀤𑀻𑀲𑀼 𑀘𑀢𑀽𑀲𑀼 𑀯𑀸𑀤𑁂𑀲𑀼, ‘‘𑀓𑀸𑀬𑀲𑁆𑀲 𑀪𑁂𑀤𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀅𑀭𑀽𑀧𑀻𑀦𑀁 𑀓𑀸𑀬𑁄 𑀅𑀢𑁆𑀣𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀭𑀽𑀧𑀪𑀯𑁂 𑀧𑀯𑀢𑁆𑀢𑀯𑁄𑀳𑀸𑀭𑁂𑀦𑁂𑀯 𑀤𑀺𑀝𑁆𑀞𑀺𑀕𑀢𑀺𑀓𑁄 𑀅𑀭𑀽𑀧𑀪𑀯𑁂𑀧𑀺 𑀓𑀸𑀬𑀯𑁄𑀳𑀸𑀭𑀫𑀸𑀭𑁄𑀧𑁂𑀢𑁆𑀯𑀸 𑀆𑀳 ‘‘𑀓𑀸𑀬𑀲𑁆𑀲 𑀪𑁂𑀤𑀸’’𑀢𑀺. 𑀬𑀣𑀸 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀤𑀺𑀝𑁆𑀞𑀺𑀬𑁄 𑀧𑀜𑁆𑀜𑀢𑁆𑀢𑀸, 𑀢𑀣𑁂𑀯 𑀪𑀕𑀯𑀸 𑀤𑀲𑁆𑀲𑁂𑀲𑀻𑀢𑀺. 𑀅𑀭𑀽𑀧𑀓𑀸𑀬𑀪𑀸𑀯𑀢𑁄 𑀯𑀸 𑀨𑀲𑁆𑀲𑀸𑀤𑀺𑀥𑀫𑁆𑀫𑀲𑀫𑀽𑀳𑀪𑀽𑀢𑁂 𑀅𑀭𑀽𑀧𑀢𑁆𑀢𑀪𑀸𑀯𑁂 𑀓𑀸𑀬𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄.

𑀏𑀢𑁆𑀣𑀸𑀳 𑁋 ‘‘𑀓𑀸𑀫𑀸𑀯𑀘𑀭𑀤𑁂𑀯𑀢𑁆𑀢𑀪𑀸𑀯𑀸𑀤𑀺𑀦𑀺𑀭𑀯𑀲𑁂𑀲𑀯𑀺𑀪𑀯𑀧𑀢𑀺𑀝𑁆𑀞𑀸𑀧𑀓𑀸𑀦𑀁 𑀤𑀼𑀢𑀺𑀬𑀯𑀸𑀤𑀸𑀤𑀻𑀦𑀁 𑀬𑀼𑀢𑁆𑀢𑁄 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀪𑀸𑀯𑁄 𑀅𑀦𑀸𑀕𑀢𑀤𑁆𑀥𑀯𑀺𑀲𑀬𑀢𑁆𑀢𑀸 𑀢𑁂𑀲𑀁 𑀯𑀸𑀤𑀸𑀦𑀁; 𑀦 𑀧𑀦 𑀤𑀺𑀝𑁆𑀞𑀺𑀕𑀢𑀺𑀓-𑀧𑀘𑁆𑀘𑀓𑁆𑀔𑀪𑀽𑀢-𑀫𑀦𑀼𑀲𑁆𑀲𑀢𑁆𑀢𑀪𑀸𑀯-𑀲𑀫𑀼𑀘𑁆𑀙𑁂𑀤𑀧𑀢𑀺𑀝𑁆𑀞𑀸𑀧𑀓𑀲𑁆𑀲 𑀧𑀞𑀫𑀯𑀸𑀤𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀲𑀬𑀢𑁆𑀢𑀸’’𑀢𑀺. 𑀬𑀤𑀺 𑀏𑀯𑀁 𑀬𑀣𑀸 𑀳𑀺 𑀤𑀼𑀢𑀺𑀬𑀸𑀤𑀺𑀯𑀸𑀤𑀸𑀦𑀁, 𑀧𑀼𑀭𑀺𑀫𑀧𑀼𑀭𑀺𑀫𑀯𑀸𑀤𑀲𑀗𑁆𑀕𑀳𑀺𑀢𑀲𑁆𑀲𑁂𑀯 𑀅𑀢𑁆𑀢𑀦𑁄 𑀉𑀢𑁆𑀢𑀭𑀼𑀢𑁆𑀢𑀭𑀪𑀯𑁄𑀧𑀧𑀢𑁆𑀢𑀺𑀬𑀸 𑀲𑀫𑀼𑀘𑁆𑀙𑁂𑀤𑀦𑀢𑁄 𑀬𑀼𑀚𑁆𑀚𑀢𑀺 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀢𑀸, 𑀢𑀣𑀸 𑀘 ‘‘𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀅𑀦𑀸𑀕𑀢𑀲𑁆𑀲𑁂𑀯 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀲𑀫𑀼𑀘𑁆𑀙𑁂𑀤𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀧𑀞𑀫𑀯𑀸𑀤𑀲𑁆𑀲𑀧𑀺 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀢𑀸 𑀬𑀼𑀚𑁆𑀚𑀢𑀺. 𑀏𑀯𑀁 𑀲𑀩𑁆𑀩𑀲𑁆𑀲𑀧𑀺 𑀧𑀼𑀩𑁆𑀩𑀦𑁆𑀢𑀢𑁄 𑀆𑀕𑀢𑀲𑁆𑀲 𑀉𑀘𑁆𑀙𑁂𑀤𑀧𑀜𑁆𑀜𑀸𑀧𑀦𑀯𑀲𑁂𑀦 𑀇𑀥 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑁂𑀲𑀼 𑀤𑁂𑀲𑀦𑀸 𑀕𑀢𑀸. 𑀏𑀢𑁂 𑀉𑀘𑁆𑀙𑁂𑀤𑀯𑀸𑀤𑀸 𑀳𑁂𑀝𑁆𑀞𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑁂𑀲𑀼 𑀤𑁂𑀲𑀦𑀸 𑀕𑀢𑀸. 𑀏𑀢𑁂 𑀉𑀘𑁆𑀙𑁂𑀤𑀯𑀸𑀤𑀸 𑀳𑁂𑀝𑁆𑀞𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑁂𑀲𑀼 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀢𑀺, 𑀦 𑀢𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀚𑀮𑀩𑀼𑀩𑁆𑀩𑀼𑀴𑀓𑀽𑀧𑀫𑀸 𑀳𑀺 𑀲𑀢𑁆𑀢𑀸𑀢𑀺 𑀢𑀲𑁆𑀲 𑀮𑀤𑁆𑀥𑀺.

𑀇𑀥𑀸𑀢𑀺 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑁂𑀲𑀼. 𑀇𑀥𑁂𑀯 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀸𑀤𑀺𑀓𑁂 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀝𑁆𑀞𑀯𑀺𑀦𑀸𑀲𑀯𑀲𑁂𑀦. 𑀏𑀯𑀁 𑀅𑀦𑀸𑀕𑀢𑁂 𑀅𑀦𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀧𑀭𑀸𑀦𑀁 𑀉𑀘𑁆𑀙𑁂𑀤𑀯𑀸𑀤𑀸𑀦𑀁 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑁂𑀲𑀼 𑀕𑀳𑀡𑀁; 𑀧𑀼𑀩𑁆𑀩𑀦𑁆𑀢𑀢𑁄 𑀧𑀦 𑀆𑀕𑀢𑀲𑁆𑀲 𑀅𑀢𑁆𑀢𑀦𑁄 𑀇𑀥𑁂𑀯 𑀉𑀘𑁆𑀙𑁂𑀤𑀤𑀲𑁆𑀲𑀦𑀧𑀭𑀸𑀦𑀁 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑁂𑀲𑀼 𑀕𑀳𑀡𑀁. 𑀇𑀢𑁄 𑀧𑀭𑀁 𑀦 𑀕𑀘𑁆𑀙𑀢𑀻𑀢𑀺 𑀧𑀦 𑀇𑀤𑀁 𑀅𑀢𑁆𑀣𑀢𑁄 𑀆𑀧𑀦𑁆𑀦𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑀦𑀁. 𑀲𑀢𑁆𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀘 𑀏𑀓𑀘𑁆𑀘𑀲𑀲𑁆𑀲𑀢𑀦𑁆𑀢𑀺 𑀧𑀯𑀢𑁆𑀢𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄. 𑀲𑁄 𑀧𑀦 𑀩𑁆𑀭𑀳𑁆𑀫𑀓𑀸𑀬𑀺𑀓-𑀔𑀺𑀟𑁆𑀟𑀸𑀧𑀤𑁄𑀲𑀺𑀓-𑀫𑀦𑁄𑀧𑀤𑁄𑀲𑀺𑀓𑀢𑁆𑀢𑀪𑀸𑀯𑀢𑁄 𑀘𑀯𑀺𑀢𑁆𑀯𑀸 𑀇𑀥𑀸𑀕𑀢𑀸𑀦𑀁 𑀢𑀓𑁆𑀓𑀺𑀦𑁄 𑀘 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸’’𑀢𑀺. ‘‘𑀲𑀗𑁆𑀔𑀸𑀭𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸’’𑀢𑀺 𑀇𑀤𑀁 𑀢𑁂𑀳𑀺 𑀲𑀲𑁆𑀲𑀢𑀪𑀸𑀯𑁂𑀦 𑀕𑀬𑁆𑀳𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀧𑀦𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀫𑀢𑀤𑀲𑁆𑀲𑀦𑀯𑀲𑁂𑀦. 𑀢𑀲𑁆𑀲 𑀳𑀺 𑀲𑀲𑁆𑀲𑀢𑀸𑀪𑀺𑀫𑀢𑀁 𑀅𑀲𑀗𑁆𑀔𑀢𑀫𑁂𑀯𑀸𑀢𑀺 𑀮𑀤𑁆𑀥𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 (𑀤𑀻. 𑀦𑀺. 𑁧.𑁪𑁯) 𑀩𑁆𑀭𑀳𑁆𑀫𑀚𑀸𑀮𑁂 𑁋 ‘‘𑀘𑀺𑀢𑁆𑀢𑀦𑁆𑀢𑀺 𑀯𑀸 𑀫𑀦𑁄𑀢𑀺 𑀯𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀸 𑀅𑀬𑀁 𑀅𑀢𑁆𑀢𑀸 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀻’’𑀢𑀺. 𑀦 𑀳𑀺 𑀬𑀲𑁆𑀲 𑀪𑀸𑀯𑀲𑁆𑀲 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀗𑁆𑀔𑀢𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀺; 𑀢𑀲𑁆𑀲𑁂𑀯 𑀦𑀺𑀘𑁆𑀘𑀥𑀼𑀯𑀸𑀤𑀺𑀪𑀸𑀯𑁄 𑀅𑀦𑀼𑀫𑁆𑀫𑀢𑁆𑀢𑀓𑁂𑀦 𑀦 𑀲𑀓𑁆𑀓𑀸 𑀧𑀝𑀺𑀜𑁆𑀜𑀸𑀢𑀼𑀁. 𑀏𑀢𑁂𑀦, ‘‘𑀉𑀧𑁆𑀧𑀸𑀤𑀯𑀬𑀥𑀼𑀯𑀢𑀸𑀬𑀼𑀢𑁆𑀢𑀪𑀸𑀯𑀸 𑀲𑀺𑀬𑀸 𑀦𑀺𑀘𑁆𑀘𑀸, 𑀲𑀺𑀬𑀸 𑀅𑀦𑀺𑀘𑁆𑀘𑀸, 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀲𑁆𑀲 𑀲𑀢𑁆𑀢𑀪𑀗𑁆𑀕𑀯𑀸𑀤𑀲𑁆𑀲 𑀅𑀬𑀼𑀢𑁆𑀢𑀢𑀸 𑀯𑀺𑀪𑀸𑀯𑀺𑀢𑀸 𑀳𑁄𑀢𑀺.

𑀢𑀢𑁆𑀣𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁩𑁮) 𑀅𑀬𑀼𑀢𑁆𑀢𑀢𑀸𑀯𑀺𑀪𑀸𑀯𑀦𑀸 𑁋 𑀬𑀤𑀺, ‘‘𑀬𑁂𑀦 𑀲𑀪𑀸𑀯𑁂𑀦 𑀬𑁄 𑀥𑀫𑁆𑀫𑁄 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀲𑁄 𑀥𑀫𑁆𑀫𑁄 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑁂𑀬𑁆𑀬, 𑀲𑀺𑀬𑀸 𑀅𑀦𑁂𑀓𑀦𑁆𑀢𑀯𑀸𑀤𑁄; 𑀅𑀣 𑀅𑀜𑁆𑀜𑁂𑀦, 𑀲𑀺𑀬𑀸 𑀦 𑀅𑀦𑁂𑀓𑀦𑁆𑀢𑀯𑀸𑀤𑁄; 𑀦 𑀘𑁂𑀢𑁆𑀣 𑀤𑁂𑀲𑀦𑁆𑀢𑀭𑀸𑀤𑀺𑀲𑀫𑁆𑀩𑀤𑁆𑀥𑀪𑀸𑀯𑁄 𑀬𑀼𑀢𑁆𑀢𑁄 𑀯𑀢𑁆𑀢𑀼𑀁 𑀢𑀲𑁆𑀲 𑀲𑀩𑁆𑀩𑀮𑁄𑀓𑀲𑀺𑀤𑁆𑀥𑀢𑁆𑀢𑀸 𑀯𑀺𑀯𑀸𑀤𑀸𑀪𑀸𑀯𑀢𑁄. 𑀬𑁂 𑀧𑀦 𑀯𑀤𑀦𑁆𑀢𑀺 𑁋 ‘‘𑀬𑀣𑀸 𑀲𑀼𑀯𑀡𑁆𑀡𑀖𑀝𑁂 𑀫𑀓𑀼𑀝𑁂 𑀓𑀢𑁂 𑀖𑀝𑀪𑀸𑀯𑁄 𑀦𑀲𑁆𑀲𑀢𑀺, 𑀫𑀓𑀼𑀝𑀪𑀸𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀯𑀡𑁆𑀡𑀪𑀸𑀯𑁄 𑀢𑀺𑀝𑁆𑀞𑀢𑀺𑀬𑁂𑀯, 𑀏𑀯𑀁 𑀲𑀩𑁆𑀩𑀪𑀸𑀯𑀸𑀦𑀁 𑀓𑁄𑀘𑀺 𑀥𑀫𑁆𑀫𑁄 𑀦𑀲𑁆𑀲𑀢𑀺, 𑀓𑁄𑀘𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀪𑀸𑀯𑁄 𑀧𑀦 𑀢𑀺𑀝𑁆𑀞𑀢𑀻’’𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 𑁋 𑀓𑀺𑀁 𑀢𑀁 𑀲𑀼𑀯𑀡𑁆𑀡𑀁, 𑀬𑀁 𑀖𑀝𑁂 𑀫𑀓𑀼𑀝𑁂 𑀘 𑀅𑀯𑀝𑁆𑀞𑀺𑀢𑀁? 𑀬𑀤𑀺 𑀭𑀽𑀧𑀸𑀤𑀺, 𑀲𑁄 𑀲𑀤𑁆𑀤𑁄 𑀯𑀺𑀬 𑀅𑀦𑀺𑀘𑁆𑀘𑁄, 𑀅𑀣 𑀭𑀽𑀧𑀸𑀤𑀺𑀲𑀫𑀽𑀳𑁄, 𑀲𑀫𑀽𑀳𑁄 𑀦𑀸𑀫 𑀲𑀫𑁆𑀫𑀼𑀢𑀺𑀫𑀢𑁆𑀢𑀁. 𑀢𑀲𑁆𑀲 𑀯𑁄𑀳𑀸𑀭𑀫𑀢𑁆𑀢𑀲𑁆𑀲 𑀅𑀢𑁆𑀣𑀺𑀢𑀸 𑀦𑀢𑁆𑀣𑀺𑀢𑀸 𑀦𑀺𑀘𑁆𑀘𑀢𑀸 𑀯𑀸 𑀦 𑀯𑀢𑁆𑀢𑀩𑁆𑀩𑀸. 𑀢𑀲𑁆𑀲 𑀧𑀭𑀫𑀢𑁆𑀣𑀲𑀪𑀸𑀯𑁂𑀦 𑀅𑀦𑀼𑀧𑀮𑀩𑁆𑀪𑀦𑀢𑁄𑀢𑀺 𑀅𑀦𑁂𑀓𑀦𑁆𑀢𑀯𑀸𑀤𑁄 𑀦 𑀲𑀺𑀬𑀸. 𑀥𑀫𑁆𑀫𑀸 𑀘 𑀥𑀫𑁆𑀫𑀺𑀢𑁄 𑀅𑀜𑁆𑀜𑁂 𑀯𑀸 𑀲𑀺𑀬𑀼𑀁 𑀅𑀦𑀜𑁆𑀜𑁂 𑀯𑀸. 𑀬𑀤𑀺 𑀅𑀜𑁆𑀜𑁂, 𑀦 𑀢𑁂𑀲𑀁 𑀅𑀦𑀺𑀘𑁆𑀘𑀢𑀸𑀬 𑀥𑀫𑁆𑀫𑀻 𑀅𑀦𑀺𑀘𑁆𑀘𑁄 𑀅𑀜𑁆𑀜𑀢𑁆𑀢𑀸. 𑀦 𑀳𑀺 𑀭𑀽𑀧𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀅𑀜𑁆𑀜𑀢𑁆𑀢𑀸, 𑀦 𑀘 𑀭𑀽𑀧𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀤𑁆𑀤𑁄 𑀳𑁄𑀢𑀺; 𑀓𑀺𑀜𑁆𑀘 𑀥𑀫𑁆𑀫𑀓𑀧𑁆𑀧𑀦𑀸𑀧𑀺 𑀦𑀺𑀭𑀢𑁆𑀣𑀺𑀓𑀸 𑀲𑀺𑀬𑀸 𑀥𑀫𑁆𑀫𑀺𑀦𑁄 𑀦𑀺𑀘𑁆𑀘𑀸𑀦𑀺𑀘𑁆𑀘𑀢𑀸𑀬 𑀅𑀲𑀺𑀚𑁆𑀛𑀦𑀢𑁄 𑀅𑀣 𑀅𑀦𑀜𑁆𑀜𑁂; 𑀉𑀧𑁆𑀧𑀸𑀤𑀯𑀺𑀦𑀸𑀲𑀯𑀦𑁆𑀢𑁂𑀳𑀺 𑀅𑀦𑀜𑁆𑀜𑀲𑁆𑀲 𑀥𑀫𑁆𑀫𑀺𑀦𑁄 𑀢𑁂𑀲𑀁 𑀯𑀺𑀬 𑀉𑀧𑁆𑀧𑀸𑀤𑀯𑀺𑀦𑀸𑀲𑀲𑀩𑁆𑀪𑀸𑀯𑀢𑁄 𑀓𑀼𑀢𑁄 𑀦𑀺𑀘𑁆𑀘𑀢𑀸𑀯𑀓𑀸𑀲𑁄, 𑀢𑁂𑀲𑀫𑁆𑀧𑀺 𑀯𑀸 𑀥𑀫𑁆𑀫𑀺𑀦𑁄 𑀯𑀺𑀬 𑀦𑀺𑀘𑁆𑀘𑀢𑀸𑀧𑀢𑁆𑀢𑀺 𑀲𑀺𑀬𑀸. 𑀅𑀧𑀺𑀘 𑀦𑀺𑀘𑁆𑀘𑀸𑀦𑀺𑀘𑁆𑀘𑀦𑀯𑀢𑁆𑀢𑀩𑁆𑀩𑀭𑀽𑀧𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀢𑀸𑀧𑀝𑀺𑀚𑀸𑀦𑀦𑀢𑁄 𑀬𑀣𑀸 𑀦𑀺𑀘𑁆𑀘𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀭𑀽𑀧𑀁, 𑀬𑀣𑀸 𑀯𑀸 𑀤𑀻𑀧𑀸𑀤𑀬𑁄. 𑀦 𑀳𑀺 𑀤𑀻𑀧𑀸𑀤𑀻𑀦𑀁 𑀉𑀤𑀬𑀩𑁆𑀩𑀬𑀲𑀪𑀸𑀯𑀸𑀦𑀁 𑀦𑀺𑀘𑁆𑀘𑀸𑀦𑀺𑀘𑁆𑀘𑀦𑀯𑀢𑁆𑀢𑀩𑁆𑀩𑀲𑀪𑀸𑀯𑀢𑀸 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀚𑀻𑀯𑀲𑁆𑀲 𑀦𑀺𑀘𑁆𑀘𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀭𑀽𑀧𑀁 𑀯𑀺𑀬𑀸𑀢𑀺 𑀏𑀯𑀁 𑀲𑀢𑁆𑀢𑀪𑀗𑁆𑀕𑀲𑁆𑀲 𑀯𑀺𑀬 𑀲𑁂𑀲𑀪𑀗𑁆𑀕𑀸𑀦𑀫𑁆𑀧𑀺 𑀅𑀲𑀫𑁆𑀪𑀯𑁄𑀬𑁂𑀯𑀸𑀢𑀺 𑀲𑀢𑁆𑀢𑀪𑀗𑁆𑀕𑀯𑀸𑀤𑀲𑁆𑀲 𑀅𑀬𑀼𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀏𑀢𑁆𑀣 𑀘, ‘‘𑀇𑀲𑁆𑀲𑀭𑁄 𑀦𑀺𑀘𑁆𑀘𑁄, 𑀅𑀜𑁆𑀜𑁂 𑀲𑀢𑁆𑀢𑀸 𑀅𑀦𑀺𑀘𑁆𑀘𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀸𑀤𑀸 𑀲𑀢𑁆𑀢𑁂𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸; 𑀲𑁂𑀬𑁆𑀬𑀣𑀸𑀧𑀺 𑀇𑀲𑁆𑀲𑀭𑀯𑀸𑀤𑀸𑀤𑀬𑁄. ‘‘𑀧𑀭𑀫𑀸𑀡𑀯𑁄 𑀦𑀺𑀘𑁆𑀘𑀸 𑀥𑀼𑀯𑀸, 𑀤𑁆𑀯𑀺𑀅𑀡𑀼𑀓𑀸𑀤𑀬𑁄 𑀅𑀦𑀺𑀘𑁆𑀘𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀸𑀤𑀸 𑀲𑀗𑁆𑀔𑀸𑀭𑁂𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸; 𑀲𑁂𑀬𑁆𑀬𑀣𑀸𑀧𑀺 𑀓𑀡𑀸𑀤𑀯𑀸𑀤𑀸𑀤𑀬𑁄. 𑀦𑀦𑀼 𑀘 ‘‘𑀏𑀓𑀘𑁆𑀘𑁂 𑀥𑀫𑁆𑀫𑀸 𑀲𑀲𑁆𑀲𑀢𑀸, 𑀏𑀓𑀘𑁆𑀘𑁂 𑀅𑀲𑀲𑁆𑀲𑀢𑀸’’𑀢𑀺; 𑀏𑀢𑀲𑁆𑀫𑀺𑀁 𑀯𑀸𑀤𑁂 𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀢𑀸𑀲𑀦𑁆𑀦𑀺𑀝𑁆𑀞𑀸𑀦𑀁 𑀬𑀣𑀸𑀲𑀪𑀸𑀯𑀸𑀯𑀩𑁄𑀥𑁄 𑀏𑀯, 𑀢𑀬𑀺𑀤𑀁 𑀓𑀣𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀦𑁆𑀢𑀺, 𑀓𑁄 𑀏𑀯𑀫𑀸𑀳 𑁋 ‘‘𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑀁 𑀫𑀺𑀘𑁆𑀙𑀸𑀤𑀲𑁆𑀲𑀦’’𑀦𑁆𑀢𑀺? 𑀅𑀲𑀲𑁆𑀲𑀢𑁂𑀲𑀼𑀬𑁂𑀯 𑀧𑀦 𑀓𑁂𑀲𑀜𑁆𑀘𑀺 𑀥𑀫𑁆𑀫𑀸𑀦𑀁 𑀲𑀲𑁆𑀲𑀢𑀪𑀸𑀯𑀸𑀪𑀺𑀦𑀺𑀯𑁂𑀲𑁄 𑀇𑀥 𑀫𑀺𑀘𑁆𑀙𑀸𑀤𑀲𑁆𑀲𑀦𑀁; 𑀢𑁂𑀦 𑀧𑀦 𑀏𑀓𑀯𑀸𑀭𑁂 𑀧𑀯𑀢𑁆𑀢𑀫𑀸𑀦𑁂𑀦 𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀪𑀸𑀯𑀸𑀯𑀩𑁄𑀥𑁄 𑀯𑀺𑀤𑀽𑀲𑀺𑀢𑁄 𑀲𑀁𑀲𑀝𑁆𑀞𑀪𑀸𑀯𑀢𑁄; 𑀯𑀺𑀲𑀲𑀁𑀲𑀝𑁆𑀞𑁄 𑀯𑀺𑀬 𑀲𑀧𑁆𑀧𑀺𑀫𑀡𑁆𑀟𑁄 𑀲𑀓𑀺𑀘𑁆𑀘𑀓𑀸𑀭𑀡𑀸𑀲𑀫𑀢𑁆𑀢𑀢𑀸𑀬 𑀲𑀫𑁆𑀫𑀸𑀤𑀲𑁆𑀲𑀦𑀧𑀓𑁆𑀔𑁂 𑀞𑀧𑁂𑀢𑀩𑁆𑀩𑀢𑀁 𑀦𑀸𑀭𑀳𑀢𑀺. 𑀅𑀣 𑀯𑀸 𑀅𑀲𑀲𑁆𑀲𑀢𑀪𑀸𑀯𑁂𑀦 𑀦𑀺𑀘𑁆𑀙𑀺𑀢𑀸𑀧𑀺 𑀘𑀓𑁆𑀔𑀼𑀆𑀤𑀬𑁄 𑀲𑀫𑀸𑀭𑁄𑀧𑀺𑀢𑀚𑀻𑀯𑀲𑀪𑀸𑀯𑀸 𑀏𑀯 𑀤𑀺𑀝𑁆𑀞𑀺𑀕𑀢𑀺 𑀓𑁂𑀳𑀺 𑀕𑀬𑁆𑀳𑀦𑁆𑀢𑀻𑀢𑀺 𑀢𑀤𑀯𑀩𑁄𑀥𑀲𑁆𑀲 𑀫𑀺𑀘𑁆𑀙𑀸𑀤𑀲𑁆𑀲𑀦𑀪𑀸𑀯𑁄 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑁧.𑁪𑁯) 𑁋 ‘‘𑀘𑀓𑁆𑀔𑀼𑀦𑁆𑀢𑀺 𑀯𑀸…𑀧𑁂… 𑀓𑀸𑀬𑁄𑀢𑀺 𑀯𑀸 𑀅𑀬𑀁 𑀫𑁂 𑀅𑀢𑁆𑀢𑀸’’𑀢𑀺𑀆𑀤𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀲𑀗𑁆𑀔𑀢𑀸𑀬 𑀲𑀗𑁆𑀔𑀢𑀸𑀬 𑀘 𑀥𑀸𑀢𑀼𑀬𑀸 𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 𑀏𑀓𑀘𑁆𑀘𑁂 𑀥𑀫𑁆𑀫𑀸 𑀲𑀲𑁆𑀲𑀢𑀸; 𑀏𑀓𑀘𑁆𑀘𑁂 𑀅𑀲𑀲𑁆𑀲𑀢𑀸𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀯𑀺𑀪𑀚𑁆𑀚𑀯𑀸𑀤𑁄𑀧𑀺 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄 𑀆𑀧𑀚𑁆𑀚𑀢𑀻𑀢𑀺 𑀏𑀯𑀁𑀧𑀓𑀸𑀭𑀸 𑀘𑁄𑀤𑀦𑀸 𑀅𑀦𑁄𑀓𑀸𑀲𑀸 𑀳𑁄𑀢𑀺 𑀅𑀯𑀺𑀧𑀭𑀻𑀢𑀥𑀫𑁆𑀫𑀲𑀪𑀸𑀯𑀲𑀫𑁆𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄.

𑀦 𑀫𑀭𑀢𑀻𑀢𑀺 𑀅𑀫𑀭𑀸. 𑀓𑀸 𑀲𑀸? ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁬𑁨) 𑀦𑀬𑁂𑀦 𑀧𑀭𑀺𑀬𑀦𑁆𑀢𑀭𑀳𑀺𑀢𑀸 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀤𑀺𑀝𑁆𑀞𑀺 𑀘 𑀯𑀸𑀘𑀸 𑀘, 𑀅𑀫𑀭𑀸𑀬 𑀤𑀺𑀝𑁆𑀞𑀺𑀬𑀸 𑀯𑀸𑀘𑀸𑀬 𑀯𑀺𑀯𑀺𑀥𑁄 𑀔𑁂𑀧𑁄𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑁄. 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑁄. 𑀅𑀣 𑀯𑀸 𑀅𑀫𑀭𑀸𑀢𑀺 𑀏𑀓𑀸 𑀫𑀘𑁆𑀙𑀚𑀸𑀢𑀺, 𑀲𑀸 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑁆𑀫𑀼𑀚𑁆𑀚𑀦𑀸𑀤𑀺𑀯𑀲𑁂𑀦 𑀉𑀤𑀓𑁂 𑀲𑀦𑁆𑀥𑀸𑀯𑀫𑀸𑀦𑀸 𑀕𑀸𑀳𑀁 𑀦 𑀕𑀘𑁆𑀙𑀢𑀺; 𑀏𑀯𑀫𑁂𑀯𑀁 𑀅𑀬𑀫𑁆𑀧𑀺 𑀯𑀸𑀤𑁄 𑀇𑀢𑁄 𑀘𑀺𑀢𑁄 𑀘 𑀲𑀦𑁆𑀥𑀸𑀯𑀢𑀺, 𑀕𑀸𑀳𑀁 𑀦𑀸𑀕𑀘𑁆𑀙𑀢𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑁄, 𑀲𑁄 𑀏𑀯 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑁄. 𑀲𑁆𑀯𑀸𑀬𑀁 𑀯𑀸𑀤𑁄 𑀫𑀼𑀲𑀸𑀯𑀸𑀤𑀅𑀦𑀼𑀬𑁄𑀕𑀙𑀦𑁆𑀤𑀭𑀸𑀕𑀫𑁄𑀳𑀳𑁂𑀢𑀼𑀓𑀢𑀸𑀬 𑀘𑀢𑀼𑀥𑀸 𑀧𑀯𑀢𑁆𑀢𑁄𑀢𑀺 𑀆𑀳 𑁋 ‘‘𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀯𑀼𑀢𑁆𑀢𑀸’’𑀢𑀺. 𑀦𑀦𑀼 𑀘𑁂𑀢𑁆𑀣 (𑀤𑀻. 𑀦𑀺. 𑀝𑀻. 𑁧.𑁬𑁫-𑁬𑁬) 𑀘𑀢𑀼𑀩𑁆𑀩𑀺𑀥𑁄𑀧𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑁄 𑀓𑀼𑀲𑀮𑀸𑀤𑀺𑀓𑁂 𑀥𑀫𑁆𑀫𑁂 𑀧𑀭𑀮𑁄𑀓𑀢𑁆𑀢𑀺𑀓𑀸𑀤𑀻𑀦𑀺 𑀘 𑀬𑀣𑀸𑀪𑀽𑀢𑀁 𑀅𑀦𑀯𑀩𑀼𑀚𑁆𑀛𑀫𑀸𑀦𑁄, 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀦𑀫𑀢𑁆𑀢𑀁 𑀆𑀧𑀚𑁆𑀚𑀢𑀻𑀢𑀺 𑀢𑀲𑁆𑀲 𑀓𑀣𑀁 𑀤𑀺𑀝𑁆𑀞𑀺𑀕𑀢𑀺𑀓𑀪𑀸𑀯𑁄. 𑀦 𑀳𑀺 𑀅𑀯𑀢𑁆𑀢𑀼𑀓𑀸𑀫𑀲𑁆𑀲 𑀯𑀺𑀬 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀅𑀚𑀸𑀦𑀦𑁆𑀢𑀲𑁆𑀲 𑀯𑀺𑀓𑁆𑀔𑁂𑀧𑀓𑀭𑀡𑀫𑀢𑁆𑀢𑁂𑀦 𑀤𑀺𑀝𑁆𑀞𑀺𑀕𑀢𑀺𑀓𑀢𑀸 𑀬𑀼𑀢𑁆𑀢𑀸𑀢𑀺? 𑀦 𑀳𑁂𑀯𑀁 𑀧𑀼𑀘𑁆𑀙𑀸𑀯𑀺𑀓𑁆𑀔𑁂𑀧𑀓𑀭𑀡𑀫𑀢𑁆𑀢𑁂𑀦 𑀢𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀢𑀸 𑀇𑀘𑁆𑀙𑀺𑀢𑀸, 𑀅𑀣 𑀔𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂𑀦. 𑀲𑀲𑁆𑀲𑀢𑀯𑀲𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀝𑁆𑀞𑁄𑀬𑁂𑀯 𑀳𑀺 𑀫𑀦𑁆𑀤𑀩𑀼𑀤𑁆𑀥𑀺𑀢𑀸𑀬 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀧𑀭𑀮𑁄𑀓𑀢𑁆𑀢𑀺𑀓𑀸𑀤𑀻𑀦𑀺 𑀘, 𑀬𑀸𑀣𑀸𑀯𑀢𑁄 𑀅𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑁄 𑀅𑀢𑁆𑀢𑀦𑀸 𑀅𑀯𑀺𑀜𑁆𑀜𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀫𑀼𑀲𑀸𑀯𑀸𑀤𑀸𑀤𑀺𑀪𑀬𑁂𑀦 𑀘 𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀻𑀢𑀺. 𑀢𑀣𑀸 𑀳𑀺𑀲𑁆𑀲 𑀯𑀸𑀤𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 𑀯𑀼𑀢𑁆𑀢𑁄. 𑀅𑀣 𑀯𑀸 𑀧𑀼𑀜𑁆𑀜𑀧𑀸𑀧𑀸𑀦𑀁, 𑀢𑀩𑁆𑀩𑀺𑀧𑀸𑀓𑀸𑀦𑀜𑁆𑀘 𑀅𑀦𑀯𑀩𑁄𑀥𑁂𑀦, 𑀅𑀲𑀤𑁆𑀤𑀳𑀦𑁂𑀦 𑀘, ‘‘𑀢𑀩𑁆𑀩𑀺𑀲𑀬𑀸𑀬 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀓𑀭𑀡𑀁𑀬𑁂𑀯 𑀬𑀼𑀢𑁆𑀢𑀁 𑀲𑀼𑀦𑁆𑀤𑀭𑀜𑁆𑀘𑀸’’𑀢𑀺, 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀯𑀺𑀲𑀼𑀁𑀬𑁂𑀯𑁂𑀓𑀸 𑀏𑀲𑀸 𑀤𑀺𑀝𑁆𑀞𑀺 𑀲𑀢𑁆𑀢𑀪𑀗𑁆𑀕𑀤𑀺𑀝𑁆𑀞𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀣𑀸 𑀘𑁂𑀯 𑀯𑀼𑀢𑁆𑀢𑀁 𑁋 ‘‘𑀧𑀭𑀺𑀬𑀦𑁆𑀢𑀭𑀳𑀺𑀢𑀸 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀤𑀺𑀝𑁆𑀞𑀺 𑀘𑁂𑀯 𑀯𑀸𑀘𑀸 𑀘𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁬𑁧). 𑀓𑀣𑀁 𑀧𑀦𑀲𑁆𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄? 𑀉𑀘𑁆𑀙𑁂𑀤𑀯𑀲𑁂𑀦 𑀅𑀦𑀪𑀺𑀦𑀺𑀯𑁂𑀲𑀢𑁄. ‘‘𑀦𑀢𑁆𑀣𑀺 𑀓𑁄𑀘𑀺 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀯𑁂𑀤𑀻 𑀯𑀺𑀯𑀸𑀤𑀩𑀳𑀼𑀮𑀢𑁆𑀢𑀸 𑀮𑁄𑀓𑀲𑁆𑀲; ‘𑀏𑀯𑀫𑁂𑀯’𑀦𑁆𑀢𑀺 𑀧𑀦 𑀲𑀤𑁆𑀤𑀦𑁆𑀢𑀭𑁂𑀦 𑀥𑀫𑁆𑀫𑁂 𑀦𑀺𑀚𑁆𑀛𑀸𑀦𑀦𑀸 𑀅𑀦𑀸𑀤𑀺𑀓𑀸𑀮𑀺𑀓𑀸 𑀮𑁄𑀓𑁂’’𑀢𑀺 𑀕𑀸𑀳𑀯𑀲𑁂𑀦 𑀲𑀲𑁆𑀲𑀢𑀮𑁂𑀲𑁄𑀧𑁂𑀢𑁆𑀣 𑀮𑀩𑁆𑀪𑀢𑀺𑀬𑁂𑀯.

𑀅𑀫𑀢𑀺 𑀕𑀘𑁆𑀙𑀢𑀺 𑀏𑀢𑁆𑀣 𑀲𑀪𑀸𑀯𑁄 𑀑𑀲𑀸𑀦𑀦𑁆𑀢𑀺 𑀅𑀦𑁆𑀢𑁄, 𑀫𑀭𑀺𑀬𑀸𑀤𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀦𑁆𑀢𑀯𑀸. 𑀢𑁂𑀦𑀸𑀳 ‘‘𑀲𑀧𑀭𑀺𑀬𑀦𑁆𑀢𑁄’’𑀢𑀺. 𑀅𑀯𑀟𑁆𑀠𑀺𑀢𑀓𑀲𑀺𑀡𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀯𑀁 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀤𑀼𑀢𑀺𑀬𑀯𑀸𑀤𑁄 ‘‘𑀅𑀦𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑀯𑀸𑀤𑁄. 𑀢𑀢𑀺𑀬𑀯𑀸𑀤𑁄 ‘‘𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘𑀸’’𑀢𑀺 𑀯𑀸𑀤𑁄. 𑀘𑀢𑀼𑀢𑁆𑀣𑀯𑀸𑀤𑁄 ‘‘𑀦𑁂𑀯𑀦𑁆𑀢𑀯𑀸 𑀦𑀸𑀦𑀦𑁆𑀢𑀯𑀸’’𑀢𑀺 𑀯𑀸𑀤𑁄. 𑀏𑀢𑁂 𑀏𑀯 𑀘𑀢𑁆𑀢𑀸𑀭𑁄 𑀯𑀸𑀤𑀺𑀦𑁄 𑀲𑀦𑁆𑀥𑀸𑀬 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑁧.𑁫𑁩) 𑁋 ‘‘𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 (𑀤𑀻. 𑀦𑀺. 𑀝𑀻. 𑁧.𑁫𑁩) 𑀬𑀼𑀢𑁆𑀢𑀁 𑀢𑀸𑀯 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀯𑀸𑀤𑀻𑀦𑀁 𑀅𑀦𑁆𑀢𑀢𑁆𑀢𑀜𑁆𑀘 𑀅𑀦𑀦𑁆𑀢𑀢𑁆𑀢𑀜𑁆𑀘 𑀅𑀦𑁆𑀢𑀸𑀦𑀦𑁆𑀢𑀢𑁆𑀢𑀜𑁆𑀘 𑀆𑀭𑀩𑁆𑀪 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀁. 𑀧𑀘𑁆𑀙𑀺𑀫𑀲𑁆𑀲 𑀧𑀦 𑀢𑀤𑀼𑀪𑀬𑀧𑀝𑀺𑀲𑁂𑀥𑀯𑀲𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀓𑀣𑀫𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀦𑁆𑀢𑀺? 𑀢𑀤𑀼𑀪𑀬𑀧𑀝𑀺𑀲𑁂𑀥𑀯𑀲𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀏𑀯. 𑀬𑀲𑁆𑀫𑀸 𑀧𑀝𑀺𑀲𑁂𑀥𑀯𑀸𑀤𑁄𑀧𑀺 𑀅𑀦𑁆𑀢𑀸𑀦𑀦𑁆𑀢𑀯𑀺𑀲𑀬𑁄 𑀏𑀯 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸. 𑀅𑀧𑀭𑁂 𑀆𑀳𑀼 𑁋 ‘‘𑀬𑀣𑀸 𑀢𑀢𑀺𑀬𑀯𑀸𑀤𑁂 𑀲𑀫𑁆𑀪𑁂𑀤𑀯𑀲𑁂𑀦 𑀏𑀢𑀲𑁆𑀲𑁂𑀯 𑀅𑀦𑁆𑀢𑀯𑀦𑁆𑀢𑀢𑀸 𑀅𑀦𑀦𑁆𑀢𑀢𑀸 𑀘 𑀲𑀫𑁆𑀪𑀯𑀢𑀺, 𑀏𑀯𑀁 𑀢𑀓𑁆𑀓𑀻𑀯𑀸𑀤𑁂𑀧𑀺 𑀓𑀸𑀮𑀪𑁂𑀤𑀯𑀲𑁂𑀦 𑀉𑀪𑀬𑀲𑀫𑁆𑀪𑀯𑀢𑁄 𑀅𑀜𑁆𑀜𑀫𑀜𑁆𑀜𑀧𑀝𑀺𑀲𑁂𑀥𑁂𑀦 𑀉𑀪𑀬𑀜𑁆𑀜𑁂𑀯 𑀯𑀼𑀘𑁆𑀘𑀢𑀺. 𑀓𑀣𑀁? 𑀅𑀦𑁆𑀢𑀯𑀦𑁆𑀢𑀢𑀸𑀧𑀝𑀺𑀲𑁂𑀥𑁂𑀦 𑀳𑀺 𑀅𑀦𑀦𑁆𑀢𑀢𑀸 𑀯𑀼𑀘𑁆𑀘𑀢𑀺, 𑀅𑀦𑀦𑁆𑀢𑀢𑀸𑀧𑀝𑀺𑀲𑁂𑀥𑁂𑀦 𑀘 𑀅𑀦𑁆𑀢𑀯𑀦𑁆𑀢𑀢𑀸, 𑀅𑀦𑁆𑀢𑀸𑀦𑀦𑁆𑀢𑀸𑀦𑀜𑁆𑀘 𑀢𑀢𑀺𑀬𑀯𑀸𑀤𑀪𑀸𑀯𑁄 𑀓𑀸𑀮𑀪𑁂𑀤𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑀬𑀲𑁆𑀫𑀸 𑀅𑀬𑀁 𑀮𑁄𑀓𑀲𑀜𑁆𑀜𑀺𑀢𑁄 𑀅𑀢𑁆𑀢𑀸 𑀛𑀸𑀬𑀻𑀳𑀺 𑀅𑀥𑀺𑀕𑀢𑀯𑀺𑀲𑁂𑀲𑁂𑀳𑀺 𑀅𑀦𑀦𑁆𑀢𑁄 𑀓𑀤𑀸𑀘𑀺 𑀲𑀓𑁆𑀔𑀺 𑀤𑀺𑀝𑁆𑀞𑁄 𑀅𑀦𑀼𑀲𑀼𑀬𑁆𑀬𑀢𑀺; 𑀢𑀲𑁆𑀫𑀸 𑀦𑁂𑀯𑀦𑁆𑀢𑀯𑀸. 𑀬𑀲𑁆𑀫𑀸 𑀧𑀦 𑀢𑁂𑀳𑀺 𑀏𑀯 𑀓𑀤𑀸𑀘𑀺 𑀅𑀦𑁆𑀢𑀯𑀸 𑀲𑀓𑁆𑀔𑀺 𑀤𑀺𑀝𑁆𑀞𑁄 𑀅𑀦𑀼𑀲𑀼𑀬𑁆𑀬𑀢𑀺, 𑀢𑀲𑁆𑀫𑀸 𑀦 𑀧𑀦 𑀅𑀦𑀦𑁆𑀢𑀯𑀸’’𑀢𑀺. 𑀬𑀣𑀸 𑀘 𑀅𑀦𑀼𑀲𑁆𑀲𑀼𑀢𑀺𑀢𑀓𑁆𑀓𑀻𑀯𑀲𑁂𑀦, 𑀏𑀯𑀁 𑀚𑀸𑀢𑀺𑀲𑁆𑀲𑀭𑀢𑀓𑁆𑀓𑀺𑀆𑀤𑀻𑀦𑀜𑁆𑀘 𑀯𑀲𑁂𑀦 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀢𑀓𑁆𑀓𑀺𑀓𑁄 𑀅𑀯𑀟𑁆𑀠𑀺𑀢𑀪𑀸𑀯𑀧𑀼𑀩𑁆𑀩𑀓𑀢𑁆𑀢𑀸 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀦𑀁 𑀯𑀟𑁆𑀠𑀺𑀢𑀪𑀸𑀯𑀲𑁆𑀲 𑀯𑀟𑁆𑀠𑀺𑀢𑀓𑀸𑀮𑀯𑀲𑁂𑀦 𑀅𑀧𑀘𑁆𑀘𑀓𑁆𑀔𑀓𑀸𑀭𑀺𑀢𑀸𑀬 𑀅𑀦𑀼𑀲𑁆𑀲𑀯𑀸𑀤𑀺𑀫𑀢𑁆𑀢𑁂 𑀞𑀢𑁆𑀯𑀸 𑁋 ‘‘𑀦𑁂𑀯𑀦𑁆𑀢𑀯𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀯𑀟𑁆𑀠𑀺𑀢𑀓𑀸𑀮𑀯𑀲𑁂𑀦 𑀧𑀦 ‘‘𑀦𑀸𑀦𑀦𑁆𑀢𑁄’’𑀢𑀺. 𑀦 𑀧𑀦 𑀅𑀦𑁆𑀢𑀯𑀦𑁆𑀢𑀢𑀸𑀦𑀦𑁆𑀢𑀢𑀸𑀦𑀁 𑀅𑀘𑁆𑀘𑀦𑁆𑀢𑀫𑀪𑀸𑀯𑁂𑀦 𑀬𑀣𑀸 𑀢𑀁 ‘‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’’𑀢𑀺, 𑀅𑀯𑀲𑁆𑀲𑀜𑁆𑀘 𑀏𑀢𑀁 𑀏𑀯𑀁 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀯𑀺𑀓𑁆𑀔𑁂𑀧𑀧𑀓𑁆𑀔𑀁𑀬𑁂𑀯 𑀪𑀚𑁂𑀬𑁆𑀬 𑀘𑀢𑀼𑀢𑁆𑀣𑀯𑀸𑀤𑁄. 𑀦 𑀳𑀺 𑀅𑀦𑁆𑀢𑀯𑀦𑁆𑀢𑀢𑀸𑀦𑀦𑁆𑀢𑀢𑀸𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑁄 𑀅𑀢𑁆𑀢𑀦𑁄 𑀧𑀓𑀸𑀭𑁄 𑀅𑀢𑁆𑀣𑀺, 𑀢𑀓𑁆𑀓𑀻𑀯𑀸𑀤𑀻 𑀘 𑀬𑀼𑀢𑁆𑀢𑀺𑀫𑀕𑁆𑀕𑀓𑁄, 𑀓𑀸𑀮𑀪𑁂𑀤𑀯𑀲𑁂𑀦 𑀘 𑀢𑀤𑀼𑀪𑀬𑀫𑁆𑀧𑀺 𑀏𑀓𑀲𑁆𑀫𑀺𑀁 𑀦 𑀦 𑀬𑀼𑀚𑁆𑀚𑀢𑀻𑀢𑀺. 𑀅𑀦𑀦𑁆𑀢𑀭𑀘𑀢𑀼𑀓𑁆𑀓𑀦𑁆𑀢𑀺 𑀏𑀓𑀢𑁆𑀢𑀲𑀜𑁆𑀜𑀻𑀢𑀺 𑀆𑀕𑀢𑀲𑀜𑁆𑀜𑀻𑀘𑀢𑀼𑀓𑁆𑀓𑀁.

𑀏𑀓𑀦𑁆𑀢𑀲𑀼𑀔𑀻𑀢𑀺 𑀏𑀓𑀦𑁆𑀢𑁂𑀦𑁂𑀯 𑀲𑀼𑀔𑀻. 𑀢𑀁 𑀧𑀦𑀲𑁆𑀲 𑀲𑀼𑀔𑀁 𑀤𑀼𑀓𑁆𑀔𑁂𑀦 𑀅𑀯𑁄𑀫𑀺𑀲𑁆𑀲𑀁 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀭𑀦𑁆𑀢𑀭𑀲𑀼𑀔𑀻’’𑀢𑀺. 𑀏𑀓𑀦𑁆𑀢𑀲𑀼𑀔𑀫𑁂𑀯𑀸𑀢𑀺 𑀇𑀤𑀁 𑀲𑀼𑀔𑀩𑀳𑀼𑀮𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑀻𑀢𑀸𑀲𑀼 𑀲𑀢𑁆𑀢𑀲𑀼 𑀚𑀸𑀢𑀻𑀲𑀽𑀢𑀺 𑀇𑀤𑀁 𑀢𑀢𑁄 𑀧𑀭𑀁 𑀚𑀸𑀢𑀺𑀲𑁆𑀲𑀭𑀜𑀸𑀡𑁂𑀦 𑀅𑀦𑀼𑀲𑁆𑀲𑀭𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀸𑀤𑀺𑀲𑀫𑁂𑀯𑀸𑀢𑀺 𑀲𑀼𑀔𑀲𑀫𑀗𑁆𑀕𑀺𑀫𑁂𑀯 𑀅𑀢𑁆𑀢𑀪𑀸𑀯𑀁. ‘‘𑀏𑀯𑀁 𑀲𑀼𑀔𑀲𑀫𑀗𑁆𑀕𑀻’’𑀢𑀺 𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀚𑀸𑀢𑀺𑀲𑁆𑀲𑀭𑀲𑁆𑀲 𑀅𑀢𑀻𑀢𑀚𑀸𑀢𑀺𑀬𑀫𑁆𑀧𑀺 𑀇𑀥 𑀯𑀺𑀬 𑀤𑀼𑀓𑁆𑀔𑀨𑀼𑀝𑁆𑀞𑀲𑁆𑀲 𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲.

𑀲𑀩𑁆𑀩𑁂𑀲𑀫𑁆𑀧𑀻𑀢𑀺 𑀮𑀸𑀪𑀻𑀦𑀁 𑀢𑀓𑁆𑀓𑀻𑀦𑀫𑁆𑀧𑀺. 𑀢𑀣𑀸𑀢𑀺 𑀇𑀫𑀺𑀦𑀸 ‘‘𑀲𑀩𑁆𑀩𑁂𑀲𑀫𑁆𑀧𑀻’’𑀢𑀺 𑀇𑀤𑀁 𑀧𑀤𑀁 𑀆𑀓𑀟𑁆𑀠𑀢𑀺. 𑀓𑀸𑀫𑀸𑀯𑀘𑀭𑀁 𑀦𑀸𑀫 𑀅𑀤𑀼𑀓𑁆𑀔𑀫𑀲𑀼𑀔𑀁 𑀅𑀦𑀼𑀴𑀸𑀭𑀁 𑀅𑀯𑀺𑀪𑀽𑀢𑀦𑁆𑀢𑀺 𑀆𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦𑀸’’𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀓𑀸𑀭𑀡𑀪𑀽𑀢𑀁 𑀏𑀢𑀲𑁆𑀲 𑀅𑀢𑁆𑀣𑀺, 𑀢𑁂𑀦 𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁. 𑀫𑀚𑁆𑀛𑀢𑁆𑀢𑀲𑁆𑀲𑀸𑀢𑀺 𑀫𑀚𑁆𑀛𑀢𑁆𑀢𑀪𑀽𑀢𑀲𑁆𑀲 𑀫𑀚𑁆𑀛𑀢𑁆𑀢𑀯𑁂𑀤𑀦𑀸𑀩𑀳𑀼𑀮𑀲𑁆𑀲. 𑀫𑀚𑁆𑀛𑀢𑁆𑀢𑀪𑀽𑀢𑀝𑁆𑀞𑀸𑀦𑀫𑁂𑀯 𑀅𑀢𑁆𑀢𑀦𑁄 𑀫𑀚𑁆𑀛𑀢𑁆𑀢𑀢𑀸𑀧𑀢𑁆𑀢𑀫𑁂𑀯 𑀪𑀽𑀢𑀧𑀼𑀩𑁆𑀩𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲. 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀺𑀦𑁄 𑀯𑀼𑀢𑁆𑀢𑀸. 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀳𑀺 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀯𑀸𑀤𑁄 𑀲𑀲𑁆𑀲𑀢𑀯𑀸𑀤𑀲𑀫𑀼𑀤𑁆𑀤𑀺𑀝𑁆𑀞𑁄𑀢𑀺 𑀓𑀢𑁆𑀯𑀸 ‘‘𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸’’𑀢𑀺 𑀘 𑀯𑀼𑀢𑁆𑀢𑀁.

𑁨𑁮. 𑀤𑀺𑀝𑁆𑀞𑀼𑀤𑁆𑀥𑀸𑀭𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀤𑀺𑀝𑁆𑀞𑀻𑀦𑀁 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀧𑀤𑀼𑀤𑁆𑀥𑀭𑀡𑀁. 𑀧𑀘𑁆𑀘𑀢𑁆𑀢𑀁𑀬𑁂𑀯 𑀜𑀸𑀡𑀦𑁆𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑀁 𑀅𑀢𑁆𑀢𑀦𑀺𑀬𑁂𑀯 𑀜𑀸𑀡𑀁. 𑀢𑀁 𑀧𑀦 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀘𑁆𑀘𑀓𑁆𑀔𑀜𑀸𑀡’’𑀦𑁆𑀢𑀺. 𑀲𑀼𑀯𑀡𑁆𑀡𑀲𑁆𑀲 𑀯𑀺𑀬 𑀤𑁄𑀲𑀸𑀧𑀕𑀫𑁂𑀦 𑀉𑀧𑀓𑁆𑀓𑀺𑀮𑁂𑀲𑀯𑀺𑀕𑀫𑁂𑀦 𑀜𑀸𑀡𑀲𑁆𑀲 𑀯𑀺𑀲𑀼𑀤𑁆𑀥𑀦𑁆𑀢𑀺 𑀆𑀳 ‘‘𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲’’𑀦𑁆𑀢𑀺. 𑀓𑀺𑀮𑁂𑀲𑀦𑁆𑀥𑀓𑀸𑀭𑀯𑀺𑀕𑀫𑀢𑁄 𑀲𑀧𑁆𑀧𑀪𑀸𑀲𑀫𑀼𑀚𑁆𑀚𑀮𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀧𑀭𑀺𑀬𑁄𑀤𑀸𑀢𑀦𑁆𑀢𑀺 𑀧𑀪𑀲𑁆𑀲𑀭’’𑀦𑁆𑀢𑀺 𑀩𑀸𑀳𑀺𑀭𑀲𑀫𑀬𑀲𑁆𑀫𑀺𑀫𑁆𑀧𑀺 𑀳𑁄𑀦𑁆𑀢𑀺 𑀛𑀸𑀦𑀲𑁆𑀲 𑀲𑀫𑀺𑀚𑁆𑀛𑀦𑀢𑁄. 𑀫𑀬𑀫𑀺𑀤𑀁 𑀚𑀸𑀦𑀸𑀫𑀸𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀘 𑀫𑀺𑀘𑁆𑀙𑀸𑀕𑀸𑀳𑀯𑀲𑁂𑀦 𑀅𑀜𑁆𑀜𑀸𑀡𑀪𑀸𑀕𑀫𑁂𑀯 𑀧𑀭𑀺𑀩𑁆𑀭𑀽𑀳𑁂𑀢𑁆𑀯𑀸 𑀢𑀢𑁄 𑀏𑀯 𑀬𑀣𑀸𑀕𑀳𑀺𑀢𑀁 𑀕𑀸𑀳𑀁 𑀲𑀦𑁆𑀥𑀸𑀬 𑁋 ‘‘𑀫𑀬𑀫𑀺𑀤𑀁 𑀅𑀢𑁆𑀣𑀁 𑀢𑀢𑁆𑀣 𑀚𑀸𑀦𑀸𑀫𑀸’’𑀢𑀺 𑀏𑀯𑀁 𑀢𑀢𑁆𑀣 𑀫𑀺𑀘𑁆𑀙𑀸𑀕𑀸𑀳𑁂 𑀅𑀯𑀺𑀚𑁆𑀚𑀫𑀸𑀦𑀁 𑀜𑀸𑀡𑀓𑁄𑀝𑁆𑀞𑀸𑀲𑀁 𑀑𑀢𑀸𑀭𑁂𑀦𑁆𑀢𑀺𑀬𑁂𑀯 𑀅𑀦𑀼𑀧𑁆𑀧𑀯𑁂𑀲𑁂𑀦𑁆𑀢𑀺𑀬𑁂𑀯. 𑀦 𑀢𑀁 𑀜𑀸𑀡𑀁, 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀦𑀸𑀫𑁂𑀢𑀁, 𑀓𑀺𑀁 𑀧𑀦 𑀢𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀦𑀸𑀫? 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺𑀆𑀤𑀺𑀦𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀢𑀤𑀧𑀺…𑀧𑁂… 𑀅𑀢𑁆𑀣𑁄’’𑀢𑀺. 𑀬𑀁 𑀢𑀁 𑀤𑀺𑀝𑁆𑀞𑀺𑀬𑀸 𑀉𑀧𑀦𑀺𑀲𑁆𑀲𑀬𑀪𑀽𑀢𑀁 𑀜𑀸𑀡𑀁, 𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀚𑀸𑀦𑀦𑀫𑀢𑁆𑀢𑀮𑀓𑁆𑀔𑀡𑀢𑁆𑀢𑀸 𑀜𑀸𑀡𑀪𑀸𑀕𑀫𑀢𑁆𑀢𑀫𑁂𑀯𑀸’’𑀢𑀺. 𑀜𑀸𑀡𑀫𑁆𑀧𑀺 𑀳𑀺 𑀤𑀺𑀝𑁆𑀞𑀺𑀬𑀸 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺𑀬𑁂𑀯 𑀮𑀸𑀪𑀺𑀦𑁄 𑀇𑀢𑀭𑀲𑁆𑀲 𑀘 𑀢𑀣𑀸 𑀢𑀣𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀢𑁄. 𑀅𑀦𑀼𑀧𑀸𑀢𑀺𑀯𑀢𑁆𑀢𑀦𑀢𑁄 𑀅𑀦𑀢𑀺𑀓𑁆𑀓𑀫𑀦𑀢𑁄. 𑀅𑀲𑀸𑀥𑀸𑀭𑀡𑀢𑁄 𑀦 𑀉𑀧𑀸𑀢𑀺𑀯𑀢𑁆𑀢𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀦𑀼𑀧𑀸𑀢𑀺𑀯𑀢𑁆𑀢𑀦𑀁, 𑀢𑀢𑁄. 𑀉𑀧𑀸𑀤𑀸𑀦𑀧𑀘𑁆𑀘𑀬𑀢𑁄𑀢𑀺 𑀉𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄. 𑀏𑀢𑁂𑀦 𑀨𑀮𑀽𑀧𑀘𑀸𑀭𑁂𑀦𑁂𑀯 𑀉𑀧𑀸𑀤𑀸𑀦𑀫𑀸𑀳. 𑀬𑀤𑀺 𑀩𑁆𑀭𑀳𑁆𑀫𑀚𑀸𑀮𑁂 𑀆𑀕𑀢𑀸 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺𑀬𑁄 𑀇𑀥 𑀓𑀣𑀺𑀢𑀸 𑀳𑁄𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀇𑀤𑀁 𑀲𑀼𑀢𑁆𑀢𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑁂𑀦 𑀏𑀓𑀲𑀤𑀺𑀲𑀦𑁆𑀢𑀺 𑀆𑀳 𑁋 ‘‘𑀩𑁆𑀭𑀳𑁆𑀫𑀚𑀸𑀮𑁂 𑀧𑀦𑀸’’𑀢𑀺𑀆𑀤𑀺. ‘‘𑀅𑀜𑁆𑀜𑀢𑁆𑀭 𑀭𑀽𑀧𑀁 𑀅𑀜𑁆𑀜𑀢𑁆𑀭 𑀯𑁂𑀤𑀦𑀸 𑀲𑀓𑁆𑀓𑀸𑀬𑀁𑀬𑁂𑀯 𑀅𑀦𑀼𑀧𑀭𑀺𑀥𑀸𑀯𑀦𑁆𑀢𑀻’’𑀢𑀺 𑀯𑀘𑀦𑀢𑁄 𑀇𑀥 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀆𑀕𑀢𑀸. 𑀩𑁆𑀭𑀳𑁆𑀫𑀚𑀸𑀮𑀁 𑀓𑀣𑀺𑀢𑀫𑁂𑀯 𑀳𑁄𑀢𑀺 𑀢𑀢𑁆𑀣 𑀆𑀕𑀢𑀸𑀦𑀁 𑀤𑁆𑀯𑀸𑀲𑀝𑁆𑀞𑀺𑀬𑀸𑀧𑀺 𑀤𑀺𑀝𑁆𑀞𑀻𑀦𑀁 𑀇𑀥𑀸𑀕𑀢𑀢𑁆𑀢𑀸. 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑁄 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀧𑀼𑀩𑁆𑀩𑀓𑁄, ‘‘𑀅𑀢𑁆𑀢𑀸 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀉𑀘𑁆𑀙𑁂𑀤𑁄’’𑀢𑀺 𑀧𑀯𑀢𑁆𑀢𑀦𑀢𑁄.

𑁩𑁦. 𑀤𑁆𑀯𑀸𑀲𑀝𑁆𑀞𑀺…𑀧𑁂… 𑀤𑀲𑁆𑀲𑁂𑀢𑀼𑀦𑁆𑀢𑀺 𑀓𑀣𑀁 𑀧𑀦𑀸𑀬𑀫𑀢𑁆𑀣𑁄 ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄’’𑀢𑀺𑀆𑀤𑀺𑀧𑀸𑀴𑀺𑀬𑀸 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺? 𑀅𑀧𑁆𑀧𑀳𑀻𑀦𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀤𑀺𑀝𑁆𑀞𑀺𑀉𑀧𑀸𑀤𑀺𑀬𑀦𑀚𑁄𑀢𑀦𑀢𑁄. 𑀧𑀭𑀺𑀘𑁆𑀘𑀸𑀕𑁂𑀦𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑁂𑀦. 𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑀺𑀭𑁄𑀥𑀸 𑀢𑀢𑀺𑀬𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀦 𑀧𑀭𑀺𑀳𑀻𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀢𑀢𑀺𑀬𑀚𑁆𑀛𑀸𑀦𑀁 𑀪𑀯𑀢𑀺, 𑀢𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀺𑀢𑀲𑁆𑀲 𑀧𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀺𑀢𑀲𑁆𑀲 𑀘 𑀢𑀢𑀺𑀬𑀁 𑀧𑀝𑀺𑀮𑁄𑀫𑀦𑀬𑁂𑀦 𑀲𑀫𑁆𑀪𑀯𑀢𑀺. 𑀢𑁂𑀦𑀸𑀳 ‘‘𑀅𑀬𑀁 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 ‘‘𑀧𑀯𑀺𑀯𑁂𑀓𑀸 𑀧𑀻𑀢𑀺 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀇𑀤𑀁, ‘‘𑀦𑀺𑀭𑀸𑀫𑀺𑀲𑀲𑀼𑀔𑀲𑁆𑀲𑀦𑀺𑀭𑁄𑀥𑀸’’𑀢𑀺 𑀏𑀢𑁆𑀣 𑀯𑀺𑀬 𑀯𑀼𑀝𑁆𑀞𑀸𑀦𑀦𑀺𑀭𑁄𑀥𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀳𑀻𑀦𑀚𑁆𑀛𑀸𑀦𑀧𑀭𑀺𑀬𑀸𑀤𑀸𑀦𑀓𑀤𑁄𑀫𑀦𑀲𑁆𑀲𑀦𑁆𑀢𑀺 𑀦𑀻𑀯𑀭𑀡𑀲𑀳𑀕𑀢𑀤𑁄𑀫𑀦𑀲𑁆𑀲𑀫𑀸𑀳. 𑀢𑀜𑁆𑀳𑀺 𑀛𑀸𑀦𑀧𑀭𑀺𑀬𑀸𑀤𑀸𑀦𑀓𑀭𑀁. 𑀓𑀫𑁆𑀫𑀦𑀻𑀬𑀪𑀸𑀯𑁄𑀢𑀺 𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀢𑁄 𑀯𑀺𑀬 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀪𑀸𑀯𑁂 𑀓𑀫𑁆𑀫𑀓𑁆𑀔𑀫𑀪𑀸𑀯𑁄. 𑀲𑁄𑀫𑀦𑀲𑁆𑀲𑀯𑀺𑀥𑀼𑀭𑀢𑁆𑀢𑀸 𑀤𑁄𑀫𑀦𑀲𑁆𑀲𑀁 𑀯𑀺𑀬𑀸𑀢𑀺 𑀤𑁄𑀫𑀦𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀉𑀧𑁆𑀧𑀚𑁆𑀚𑀢𑀺 𑀧𑀯𑀺𑀯𑁂𑀓𑀸 𑀧𑀻𑀢𑀻’’𑀢𑀺 𑀧𑀼𑀦 𑀯𑀼𑀢𑁆𑀢𑀸 𑀧𑀻𑀢𑀺 𑀛𑀸𑀦𑀤𑁆𑀯𑀬𑀧𑀻𑀢𑀺. 𑀬𑀁 𑀞𑀸𑀦𑀁 𑀙𑀸𑀬𑀸 𑀚𑀳𑀢𑀻𑀢𑀺 𑀬𑀁 𑀧𑀤𑁂𑀲𑀁 𑀆𑀢𑀧𑁂𑀦 𑀅𑀪𑀺𑀪𑀼𑀬𑁆𑀬𑀫𑀸𑀦𑀁 𑀙𑀸𑀬𑀸 𑀚𑀳𑀢𑀺. 𑀢𑀢𑁆𑀣 𑀆𑀢𑀧𑁂 𑀙𑀸𑀬𑀸𑀢𑀺 𑀧𑀤𑁂𑀲𑁂𑀦 𑀆𑀢𑀧𑀲𑀜𑁆𑀜𑀺𑀢𑀸𑀦𑀁 𑀪𑀽𑀢𑀲𑀗𑁆𑀔𑀢𑀸𑀦𑀁 𑀧𑀳𑀸𑀦𑀝𑁆𑀞𑀸𑀦𑀫𑀸𑀳. 𑀢𑁂𑀦𑀸𑀳 ‘‘𑀬𑀲𑁆𑀫𑀺𑀁 𑀞𑀸𑀦𑁂’’𑀢𑀺𑀆𑀤𑀺.

𑁩𑁧. 𑀦𑀺𑀭𑀸𑀫𑀺𑀲𑀁 𑀲𑀼𑀔𑀦𑁆𑀢𑀺 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀁 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀓𑀸𑀫𑀸𑀫𑀺𑀲𑀢𑁆𑀢𑀸.

𑁩𑁨. 𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑁂𑀤𑀦𑀁, 𑀦 𑀬𑀁 𑀓𑀺𑀜𑁆𑀘𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀁.

𑁩𑁩. 𑀦𑀺𑀕𑁆𑀕𑀳𑀡𑁄𑀢𑀺 𑀫𑀫𑀁𑀓𑀸𑀭𑀪𑀸𑀯𑁂𑀦 𑀓𑀺𑀜𑁆𑀘𑀺𑀧𑀺 𑀅𑀕𑀡𑁆𑀳𑀦𑁆𑀢𑁄. 𑀦𑀺𑀩𑁆𑀩𑀸𑀦𑀲𑁆𑀲 𑀲𑀧𑁆𑀧𑀸𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀯𑀸 𑀅𑀯𑀺𑀮𑁄𑀫𑀯𑀲𑁂𑀦 𑀏𑀓𑀦𑁆𑀢𑀺𑀓𑀼𑀧𑀸𑀬𑀢𑀸𑀬 𑀲𑀧𑁆𑀧𑀸𑀬𑀁. 𑀢𑁂𑀦𑀸𑀳 ‘‘𑀉𑀧𑀓𑀸𑀭𑀪𑀽𑀢’’𑀦𑁆𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼. 𑀏𑀢𑀦𑁆𑀢𑀺 𑀏𑀢𑀁 𑀬𑀣𑀸𑀯𑀼𑀢𑁆𑀢𑀲𑀫𑀣𑀪𑀸𑀯𑀦𑀸𑀬 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀁. 𑀲𑀩𑁆𑀩𑀢𑁆𑀣 𑀦𑀺𑀓𑀦𑁆𑀢𑀺𑀬𑀸 𑀅𑀲𑀼𑀓𑁆𑀔𑀸𑀧𑀺𑀢𑀢𑁆𑀢𑀸 𑀓𑀣𑀁 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑀓𑀸𑀭𑀧𑀝𑀺𑀧𑀤𑀸 𑀦𑀸𑀫 𑀚𑀸𑀢𑀁? 𑀦 𑀚𑀸𑀬𑀢𑁂 𑀯𑀸𑀢𑁆𑀬𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀆𑀤𑀺𑀓𑁂 𑀲𑀩𑁆𑀩𑀲𑁆𑀫𑀺𑀁. 𑀅𑀕𑁆𑀕𑀡𑁆𑀳𑀦𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀕𑀸𑀳𑁂𑀦 𑀅𑀕𑁆𑀕𑀳𑀡𑀯𑀲𑁂𑀦. 𑀬𑀢𑁆𑀣 𑀳𑀺 𑀢𑀡𑁆𑀳𑀸𑀕𑀸𑀳𑁄 𑀯𑀺𑀫𑁄𑀘𑀺𑀢𑁄, 𑀢𑀢𑁆𑀣 𑀤𑀺𑀝𑁆𑀞𑀺𑀫𑀸𑀦𑀕𑁆𑀕𑀸𑀳𑀸 𑀲𑀼𑀓𑁆𑀔𑀸 𑀯𑀺𑀬 𑀳𑁄𑀦𑁆𑀢𑀺 𑀢𑀤𑁂𑀓𑀝𑁆𑀞𑀪𑀸𑀯𑀢𑁄. 𑀢𑀸𑀤𑀺𑀲𑀲𑁆𑀲 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀏𑀯 𑀆𑀲𑀦𑁆𑀦𑁂, 𑀦 𑀤𑀽𑀭𑁂. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀧𑀓𑀸𑀭𑀧𑀝𑀺𑀧𑀤𑀸 𑀦𑀸𑀫 𑀚𑀸𑀢’’𑀦𑁆𑀢𑀺. 𑀢𑀸𑀤𑀺𑀲𑀲𑁆𑀲 𑀘 𑀲𑀦𑁆𑀢𑁄𑀳𑀫𑀲𑁆𑀫𑀻𑀢𑀺𑀆𑀤𑀺𑀓𑀸 𑀲𑀫𑀦𑀼𑀧𑀲𑁆𑀲𑀦𑀸 𑀅𑀥𑀺𑀫𑀸𑀦𑀧𑀓𑁆𑀔𑁂 𑀢𑀺𑀝𑁆𑀞𑀢𑀻𑀢𑀺 𑀆𑀳 𑁋 ‘‘𑀅𑀪𑀺𑀯𑀤𑀢𑀻𑀢𑀺 𑀅𑀪𑀺𑀫𑀸𑀦𑁂𑀦 𑀉𑀧𑀯𑀤𑀢𑀻’’𑀢𑀺. 𑀇𑀤𑀫𑁂𑀯 𑀉𑀧𑀸𑀤𑀺𑀬𑀢𑀻𑀢𑀺 𑀦𑀺𑀬𑀫𑀸𑀪𑀸𑀯𑀢𑁄 ‘‘𑀅𑀝𑁆𑀞𑀸𑀭𑀲𑀯𑀺𑀥𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀤𑀺𑀝𑁆𑀞𑀼𑀧𑀸𑀤𑀸𑀦𑁂 𑀲𑀢𑀺 𑀲𑁂𑀲𑀉𑀧𑀸𑀤𑀸𑀦𑀲𑀫𑁆𑀪𑀯𑁄 𑀅𑀯𑀼𑀢𑁆𑀢𑀲𑀺𑀤𑁆𑀥𑁄𑀢𑀺 𑀢𑀤𑁂𑀯 𑀉𑀤𑁆𑀥𑀝𑀁.

𑀲𑁂 𑀆𑀬𑀢𑀦𑁂 𑀯𑁂𑀤𑀺𑀢𑀩𑁆𑀩𑁂𑀢𑀺 𑀦𑀺𑀭𑁄𑀥𑀲𑁆𑀲 𑀓𑀸𑀭𑀡𑀁 𑀦𑀺𑀩𑁆𑀩𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀤𑁆𑀯𑀺𑀦𑁆𑀦𑀁 𑀆𑀬𑀢𑀦𑀸𑀦𑀦𑁆𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀁 𑀤𑁆𑀯𑀺𑀦𑁆𑀦𑀁 𑀆𑀬𑀢𑀦𑀸𑀦𑀁. 𑀧𑀝𑀺𑀓𑁆𑀔𑁂𑀧𑁂𑀦 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀺𑀢𑀁 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦.

𑀦 𑀕𑀸𑀥𑀢𑀻𑀢𑀺 𑀦 𑀧𑀢𑀺𑀝𑁆𑀞𑀸𑀢𑀺. 𑀅𑀢𑁄𑀢𑀺 𑀅𑀲𑁆𑀫𑀸 𑀦𑀺𑀩𑁆𑀩𑀸𑀦𑀸. 𑀲𑀭𑀸𑀢𑀺 𑀢𑀡𑁆𑀳𑀸. 𑀲𑀗𑁆𑀔𑀸𑀭𑀧𑀝𑀺𑀓𑁆𑀔𑁂𑀧𑁂𑀦𑀸𑀢𑀺 𑀲𑀗𑁆𑀔𑀸𑀭𑁂𑀓𑀤𑁂𑀲𑀪𑀽𑀢𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀧𑀝𑀺𑀓𑁆𑀔𑁂𑀧𑁂𑀦.

𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀁. 𑀢𑀢𑁄 𑀏𑀯 𑀅𑀦𑀺𑀤𑀲𑁆𑀲𑀦𑀁 𑀅𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀅𑀦𑀺𑀦𑁆𑀤𑁆𑀭𑀺𑀬𑀕𑁄𑀘𑀭𑀁. 𑀅𑀦𑀦𑁆𑀢𑀦𑁆𑀢𑀺 𑀅𑀦𑁆𑀢𑀭𑀳𑀺𑀢𑀁, 𑀦𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀢𑁄 𑀧𑀪𑀦𑁆𑀢𑀺 𑀓𑀺𑀮𑁂𑀲𑀦𑁆𑀥𑀓𑀸𑀭𑀸𑀪𑀸𑀯𑀢𑁄 𑀘 𑀲𑀫𑀦𑁆𑀢𑀢𑁄 𑀧𑀪𑀲𑁆𑀲𑀭𑀁. ‘‘𑀲𑀩𑁆𑀩𑀢𑁄 𑀧𑀧’’𑀦𑁆𑀢𑀺 𑀯𑀸 𑀧𑀸𑀞𑁄, 𑀲𑀩𑁆𑀩𑀢𑁄 𑀧𑀢𑀢𑀺𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀘𑀢𑁆𑀢𑀸𑀭𑀻𑀲𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂𑀳𑀺 𑀢𑀺𑀢𑁆𑀣𑁂𑀳𑀺 𑀑𑀢𑀭𑀺𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑀩𑁆𑀩𑀁 𑀅𑀫𑀢𑀲𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀧𑀸𑀤𑀸 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑁄, 𑀦𑀺𑀩𑁆𑀩𑀸𑀦𑀁. 𑀅𑀦𑀼𑀧𑀸𑀤𑀸 𑀯𑀺𑀫𑀼𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑁄, 𑀅𑀕𑁆𑀕𑀫𑀕𑁆𑀕𑁄. 𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀢𑀸𑀬 𑀧𑀦 𑀅𑀭𑀳𑀢𑁆𑀢𑀨𑀮𑀁 𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑁄𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀜𑁆𑀘𑀢𑁆𑀢𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀓𑀺𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀪𑀯𑁄𑀢𑀺 𑀧𑀭𑀺𑀢𑁆𑀢𑁄. 𑀅𑀪𑀯𑁄𑀢𑀺 𑀫𑀳𑀦𑁆𑀢𑁄. 𑀯𑀼𑀤𑁆𑀥𑀺𑀅𑀢𑁆𑀣𑁄 𑀳𑀺 𑀅𑀬𑀁 𑀅-𑀓𑀸𑀭𑁄, ‘‘𑀲𑀁𑀯𑀭𑀸𑀲𑀁𑀯𑀭𑁄, 𑀨𑀮𑀸𑀨𑀮’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬, 𑀢𑀲𑁆𑀫𑀸 𑀪𑀯𑀸𑀪𑀯𑀳𑁂𑀢𑀽𑀢𑀺 𑀔𑀼𑀤𑁆𑀤𑀓𑀲𑁆𑀲 𑀫𑀳𑀦𑁆𑀢𑀲𑁆𑀲 𑀯𑀸 𑀪𑀯𑀲𑁆𑀲 𑀳𑁂𑀢𑀼, 𑀢𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀲𑀼𑀔𑀁 𑀯𑁂𑀤𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺.

𑁩𑁫. 𑀮𑁄𑀓𑀼𑀢𑁆𑀢𑀭𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀉𑀤𑁆𑀤𑀺𑀲𑁆𑀲 𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀺𑀯𑀸𑀤𑁄 𑀲𑀫𑁆𑀪𑀯𑀢𑀻𑀢𑀺 𑀆𑀳 𑁋 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀯 𑀓𑀣𑀺𑀢𑀸’’𑀢𑀺. 𑀮𑁄𑀓𑀺𑀬𑀸𑀧𑀺 𑀳𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀥𑀺𑀕𑀫𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸 𑀯𑀺𑀲𑁂𑀲𑀓𑀸𑀭𑀡𑀦𑁆𑀢𑀺 𑀬𑀸𑀯 𑀅𑀜𑁆𑀜𑁂𑀳𑀺 𑀮𑁄𑀓𑀺𑀬𑀥𑀫𑁆𑀫𑁂𑀳𑀺 𑀅𑀪𑀺𑀯𑀺𑀲𑀺𑀝𑁆𑀞𑁄𑀢𑀺 𑀓𑀢𑁆𑀯𑀸, ‘‘𑀇𑀫𑁂𑀲𑀼 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀽’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀦𑀸𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑀢𑁄 𑀪𑁂𑀤𑁄 𑀳𑁄𑀢𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀲𑀫𑀥𑀺𑀕𑀢𑀢𑁆𑀢𑀸. 𑀦 𑀳𑀺 𑀓𑀸𑀬𑀸𑀤𑀬𑁄 𑀪𑀸𑀯𑁂𑀢𑀩𑁆𑀩𑀸, 𑀲𑀢𑀺𑀬𑁂𑀯 𑀧𑀦 𑀪𑀸𑀯𑁂𑀢𑀩𑁆𑀩𑀸𑀢𑀺. 𑀩𑁆𑀬𑀜𑁆𑀚𑀦𑀢𑁄 𑀦𑀸𑀦𑀁 𑀪𑁂𑀤𑀁. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦𑀸𑀢𑀺 𑀇𑀫𑀸𑀬𑀧𑀺 𑀬𑀼𑀢𑁆𑀢𑀺𑀬𑀸. 𑀇𑀤𑀸𑀦𑀺 𑀢𑀁 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀅𑀢𑁆𑀣𑀜𑁆𑀘 𑀩𑁆𑀬𑀜𑁆𑀚𑀦𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀸𑀦𑁂𑀢𑁆𑀯𑀸𑀢𑀺 𑀲𑀼𑀢𑁆𑀢𑀦𑁆𑀢𑀭𑀢𑁄 𑀲𑀫𑀸𑀦𑁂𑀢𑁆𑀯𑀸, 𑀲𑀼𑀢𑁆𑀢𑀦𑁆𑀢𑀭𑀧𑀤𑁂𑀳𑀺 𑀘 𑀲𑀫𑀸𑀦𑁂𑀢𑁆𑀯𑀸. 𑀅𑀜𑁆𑀜𑀣𑀸𑀢𑀺 𑀅𑀜𑁆𑀜𑀢𑁄, 𑀪𑀽𑀢𑀢𑁄 𑀅𑀧𑀕𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀺𑀘𑁆𑀙𑀸 𑀭𑁄𑀧𑀺𑀢𑀪𑀸𑀯𑁄𑀢𑀺 𑀅𑀬𑀸𑀣𑀸𑀯𑀢𑁄 𑀞𑀧𑀺𑀢𑀪𑀸𑀯𑁄. 𑀅𑀢𑁆𑀣𑀜𑁆𑀘 𑀩𑁆𑀬𑀜𑁆𑀚𑀦𑀜𑁆𑀘 𑀯𑀺𑀜𑁆𑀜𑀸𑀧𑀦𑀓𑀸𑀭𑀡𑀫𑁂𑀯𑀸𑀢𑀺 𑀅𑀯𑀺𑀧𑀭𑀻𑀢𑀢𑁆𑀣𑀲𑁆𑀲 𑀲𑀤𑁆𑀤𑀲𑁆𑀲 𑀘 𑀩𑀼𑀚𑁆𑀛𑀦𑀳𑁂𑀢𑀼𑀢𑀸𑀬.

𑁩𑁭. 𑀇𑀥 𑀥𑀫𑁆𑀫𑀯𑀺𑀦𑀬𑀝𑁆𑀞𑀸𑀦𑁂 𑀲𑀢𑀺𑀬𑁂𑀯 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀕𑀳𑀺𑀢𑀸, 𑀅𑀢𑁆𑀣𑀢𑁄 𑀲𑀫𑁂𑀢𑀺 𑀦𑀸𑀫 𑀬𑀸𑀣𑀸𑀯𑀢𑁄 𑀅𑀢𑁆𑀣𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀅𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑀢𑁄 𑀩𑁆𑀬𑀜𑁆𑀚𑀦𑀢𑁄 𑀦𑀸𑀦𑀢𑁆𑀢𑀦𑁆𑀢𑀺 𑀢𑀁 𑀮𑀺𑀗𑁆𑀕𑀪𑁂𑀤𑁂𑀦 𑀯𑀘𑀦𑀪𑁂𑀤𑁂𑀦 𑀘 𑀤𑀲𑁆𑀲𑁂𑀦𑁆𑀢𑁄, ‘‘𑀲𑀢𑀺𑀧𑀝𑁆𑀞𑀸𑀦𑁄𑀢𑀺 𑀯𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀯𑀸 𑀫𑀺𑀘𑁆𑀙𑀸 𑀭𑁄𑀧𑁂𑀣𑀸’’𑀢𑀺 𑀆𑀳. 𑀅𑀧𑁆𑀧𑀫𑀢𑁆𑀢𑀓𑀦𑁆𑀢𑀺 𑀅𑀡𑀼𑀫𑀢𑁆𑀢𑀁 𑀲𑀮𑁆𑀮𑀳𑀼𑀓𑀁, 𑀦 𑀕𑀭𑀼𑀢𑀭𑀁 𑀅𑀥𑀦𑀺𑀢𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀫𑁆𑀧𑀺 𑀥𑀦𑀺𑀢𑀁 𑀖𑁄𑀲𑀯𑀦𑁆𑀢𑀁 𑀓𑀢𑁆𑀯𑀸 𑀭𑁄𑀧𑀺𑀢𑁂 𑀯𑀼𑀢𑁆𑀢𑀤𑁄𑀲𑀸𑀪𑀸𑀯𑀢𑁄𑀢𑀺 𑀢𑁂𑀦𑀸𑀳 𑁋 ‘‘𑀦𑀺𑀩𑁆𑀩𑀼𑀢𑀺𑀁 𑀧𑀢𑁆𑀢𑀼𑀁 𑀲𑀓𑁆𑀓𑀸 𑀳𑁄𑀢𑀻’’𑀢𑀺.

𑀩𑁆𑀬𑀜𑁆𑀚𑀦𑀲𑁆𑀲 𑀫𑀺𑀘𑁆𑀙𑀸𑀭𑁄𑀧𑀦𑀁 𑀦 𑀯𑀺𑀲𑁂𑀲𑀦𑁆𑀢𑀭𑀸𑀬𑀓𑀭𑀁 𑀳𑁄𑀢𑀻𑀢𑀺 𑀜𑀸𑀧𑀦𑀢𑁆𑀣𑀁, 𑀘𑀢𑀼𑀲𑀼 𑀫𑀕𑁆𑀕𑁂𑀲𑀼 𑀧𑀜𑁆𑀳𑀁 𑀓𑀣𑁂𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀲𑀼𑀢𑁆𑀢𑀦𑁆𑀢𑀩𑁆𑀬𑀜𑁆𑀚𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑀸’’𑀢𑀺.

𑁩𑁮. 𑀅𑀣 𑀘𑀢𑀼𑀢𑁆𑀣𑀯𑀸𑀭𑁂 𑀯𑀺𑀯𑀸𑀤𑁄 𑀓𑀲𑁆𑀫𑀸 𑀚𑀸𑀢𑁄? 𑀬𑀸𑀯𑀢𑀸 𑀦𑁂𑀲𑀁 𑀯𑀘𑀦𑀁 𑀅𑀢𑁆𑀣𑀢𑁄 𑀘𑁂𑀯 𑀲𑀫𑁂𑀢𑀺 𑀩𑁆𑀬𑀜𑁆𑀚𑀦𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀜𑁆𑀜𑀸𑀬 𑀯𑀺𑀯𑀸𑀤𑁄𑀢𑀺 𑀓𑀺𑀜𑁆𑀘𑀸𑀧𑀺 𑀲𑀫𑁂𑀢𑀺 𑀅𑀢𑁆𑀣𑀢𑁄 𑀘𑁂𑀯 𑀩𑁆𑀬𑀜𑁆𑀚𑀦𑀢𑁄 𑀘, 𑀲𑀜𑁆𑀜𑀸 𑀧𑀦 𑀦𑁂𑀲𑀁 𑀅𑀯𑀺𑀲𑀼𑀤𑁆𑀥𑀸, 𑀢𑀸𑀬 𑀲𑀜𑁆𑀜𑀸𑀬 𑀯𑀲𑁂𑀦 𑀯𑀺𑀯𑀸𑀤𑁄 𑀚𑀸𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀳𑀁 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀯𑀤𑀸𑀫𑀺, 𑀅𑀬𑀁 𑀲𑀢𑀺𑀧𑀝𑁆𑀞𑀸𑀦𑁄𑀢𑀺 𑀯𑀤𑀢𑀻𑀢𑀺 𑀏𑀯𑀁 𑀢𑁂𑀲𑀁 𑀜𑀸𑀡𑀁 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁, ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀅𑀢𑀺𑀤𑀺𑀲𑀢𑀺.

𑁩𑁯. 𑀦 𑀘𑁄𑀤𑀦𑀢𑁆𑀣𑀸𑀬 𑀯𑁂𑀕𑀸𑀬𑀺𑀢𑀩𑁆𑀩𑀦𑁆𑀢𑀺 𑀲𑀻𑀖𑀁 𑀲𑀻𑀖𑀁 𑀦 𑀘𑁄𑀤𑀦𑀸 𑀓𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀓𑀘𑁆𑀘𑁄 𑀓𑁄𑀥𑀦𑀪𑀸𑀯𑁂𑀦 𑀏𑀯𑀁 𑀧𑀝𑀺𑀧𑁆𑀨𑀭𑀺, 𑀢𑀲𑁆𑀫𑀸. 𑀅𑀦𑀸𑀤𑀸𑀦𑀤𑀺𑀝𑁆𑀞𑀻𑀢𑀺 𑀆𑀤𑀺𑀬𑀺𑀢𑁆𑀯𑀸 𑀅𑀦𑀪𑀺𑀦𑀺𑀯𑀺𑀲𑀦𑀢𑁄 𑀅𑀦𑀸𑀤𑀸𑀦𑀤𑀺𑀝𑁆𑀞𑀻 𑀅𑀤𑀴𑁆𑀳𑀕𑁆𑀕𑀸𑀳𑀻. 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬𑀸𑀢𑀺 𑀕𑀺𑀮𑀺𑀢𑁆𑀯𑀸 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬.

𑀉𑀧𑀖𑀸𑀢𑁄𑀢𑀺 𑀘𑀺𑀢𑁆𑀢𑀧𑁆𑀧𑀖𑀸𑀢𑁄 𑀨𑀭𑀲𑀼𑀧𑀖𑀸𑀢𑁄 𑀯𑀺𑀬. 𑀯𑀡𑀖𑀝𑁆𑀝𑀺𑀢𑀲𑁆𑀲 𑀯𑀺𑀬𑀸𑀢𑀺 𑀯𑀡𑁂 𑀖𑀝𑁆𑀝𑀺𑀢𑀲𑁆𑀲 𑀯𑀺𑀬 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀘𑀺𑀢𑁆𑀢𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺. 𑀤𑁆𑀯𑁂 𑀯𑀸𑀭𑁂 𑀯𑀢𑁆𑀯𑀸𑀧𑀺 𑀯𑀺𑀲𑀚𑁆𑀚𑁂𑀢𑀻𑀢𑀺 𑀲𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻 𑀏𑀯𑀁 𑀧𑀕𑁂𑀯 𑀘𑁄𑀤𑀺𑀢𑀫𑀢𑁆𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑀺 𑀘𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀣𑀦𑀯𑀲𑁂𑀦 𑀘 𑀓𑀸𑀬𑀘𑀺𑀢𑁆𑀢𑀓𑀺𑀮𑀫𑀣𑁄. 𑀏𑀯𑀭𑀽𑀧𑁄𑀢𑀺 𑀲𑀳𑀲𑀸 𑀅𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦 𑀘𑁄𑀤𑀓𑀲𑁆𑀲 𑀯𑀺𑀳𑁂𑀲𑀸𑀯𑀸𑀤𑁄 𑀳𑀼𑀢𑁆𑀯𑀸𑀧𑀺 𑀅𑀓𑁆𑀓𑁄𑀥𑀦𑀸𑀤𑀺𑀲𑀪𑀸𑀯𑁄.

𑀉𑀧𑁂𑀓𑁆𑀔𑀸𑀢𑀺 𑀲𑀓𑁂𑀦 𑀓𑀫𑁆𑀫𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀚𑁆𑀛𑀼𑀧𑁂𑀓𑁆𑀔𑀡𑀸. 𑀉𑀧𑁂𑀓𑁆𑀔𑀁 𑀅𑀢𑀺𑀫𑀜𑁆𑀜𑀢𑀺 𑀦𑀸𑀫 𑀢𑀲𑁆𑀲 𑀅𑀦𑀸𑀘𑀸𑀭𑀲𑁆𑀲 𑀅𑀦𑀚𑁆𑀛𑀼𑀧𑁂𑀓𑁆𑀔𑀡𑀢𑁄.

𑁪𑁦. 𑀯𑀘𑀦𑀲𑀜𑁆𑀘𑀸𑀭𑁄𑀢𑀺 𑀧𑁂𑀲𑀼𑀜𑁆𑀜𑀯𑀲𑁂𑀦 𑀅𑀜𑁆𑀜𑀣𑀸𑀯𑀘𑀦𑀼𑀧𑀲𑀁𑀳𑀸𑀭𑁄. 𑀤𑀺𑀝𑁆𑀞𑀺𑀧𑀴𑀸𑀲𑁄𑀢𑀺 𑀬𑀼𑀕𑀕𑁆𑀕𑀸𑀳𑀯𑀲𑁂𑀦 𑀮𑀤𑁆𑀥𑀺. 𑀲𑀸 𑀧𑀦 𑀘𑀺𑀢𑁆𑀢𑀲𑁆𑀲 𑀅𑀦𑀸𑀭𑀸𑀥𑀦𑀺𑀬𑀪𑀸𑀯𑁄 𑀲𑀢𑁆𑀣𑀼𑀘𑀺𑀢𑁆𑀢𑀲𑁆𑀲 𑀅𑀦𑀸𑀭𑀸𑀥𑀓𑀪𑀸𑀯𑁄. 𑀓𑀮𑀳𑁄𑀢𑀺 𑀅𑀥𑀺𑀓𑀭𑀡𑀼𑀧𑁆𑀧𑀸𑀤𑀯𑀲𑁂𑀦 𑀧𑀯𑀢𑁆𑀢𑁄 𑀯𑀺𑀕𑁆𑀕𑀳𑁄 𑀪𑀡𑁆𑀟𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁄.

𑀬𑁂𑀦 𑀓𑀸𑀭𑀡𑁂𑀦𑀸𑀢𑀺 𑀬𑁂𑀦 𑀥𑀫𑁆𑀫𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦. 𑀢𑀫𑁂𑀯 𑀳𑀺 𑀲𑀦𑁆𑀥𑀸𑀬 𑀯𑀤𑀢𑀺 𑁋 ‘‘𑀥𑀫𑁆𑀫𑁄𑀢𑀺 𑀲𑀸𑀭𑀡𑀻𑀬𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄’’𑀢𑀺. 𑀏𑀢𑁆𑀣𑀸𑀢𑀺 ‘‘𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫’’𑀦𑁆𑀢𑀺 𑀏𑀢𑁆𑀣. 𑀥𑀫𑁆𑀫𑁄𑀢𑀺 𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀲𑁆𑀲 𑀢𑀣𑀸 𑀧𑀯𑀢𑁆𑀢𑀁 𑀩𑁆𑀬𑀸𑀓𑀭𑀡𑀁 𑀬𑀣𑀸 𑀯𑀺𑀯𑀸𑀤𑀸𑀧𑀦𑁆𑀦𑀸 𑀲𑀜𑁆𑀜𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀢𑁆𑀢𑀺𑀓𑀭𑀡’’𑀦𑁆𑀢𑀺. 𑀢𑀤𑁂𑀯 𑀩𑁆𑀬𑀸𑀓𑀭𑀡𑀁 𑀅𑀦𑀼𑀥𑀫𑁆𑀫𑁄𑀢𑀺 𑀪𑀺𑀓𑁆𑀔𑀼𑀦𑀸 𑀯𑀼𑀘𑁆𑀘𑀫𑀸𑀦𑁄 𑀅𑀦𑀼𑀧𑀯𑀢𑁆𑀢𑁄 𑀥𑀫𑁆𑀫𑁄. 𑀢𑁂𑀦𑀸𑀳 𑁋 ‘‘𑀢𑀤𑁂𑀯 𑀩𑁆𑀬𑀸𑀓𑀭𑁄𑀢𑀺 𑀦𑀸𑀫𑀸’’𑀢𑀺. 𑀓𑁄𑀘𑀻𑀢𑀺 𑀬𑁄 𑀓𑁄𑀘𑀺. 𑀲𑀳𑀥𑀫𑁆𑀫𑀺𑀓𑁄 𑀲𑀓𑀸𑀭𑀡𑁄. 𑀅𑀜𑁆𑀜𑀢𑁆𑀣𑁄 𑀅𑀬𑀁 𑀓𑀺𑀁 𑀲𑀤𑁆𑀤𑁄𑀢𑀺 𑀆𑀳 ‘‘𑀅𑀜𑁆𑀜𑁄’’𑀢𑀺. 𑀅𑀲𑁆𑀲𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀦𑁆𑀦𑀪𑀺𑀓𑁆𑀔𑀼𑀦𑁄, 𑀢𑀲𑁆𑀲 𑀧𑀝𑀺𑀧𑀢𑁆𑀢𑀺 𑀦 𑀓𑁂𑀦𑀘𑀺 𑀕𑀭𑀳𑀡𑀻𑀬𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑀺𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀲𑀸𑀫𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀤𑁆𑀯𑁂𑀥𑀺𑀓𑀚𑀸𑀢𑀸𑀢𑀺 𑀚𑀸𑀢𑀤𑁆𑀯𑁂𑀥𑀺𑀓𑀸 𑀲𑀜𑁆𑀚𑀸𑀢𑀪𑁂𑀤𑀸. 𑀤𑁆𑀯𑁂𑀚𑁆𑀛𑀚𑀸𑀢𑀸𑀢𑀺 𑀤𑀼𑀯𑀺𑀥𑀪𑀸𑀯𑀁 𑀧𑀢𑁆𑀢𑀸. 𑀪𑀡𑁆𑀟𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀪𑀡𑁆𑀟𑀦𑀁, 𑀯𑀺𑀭𑀼𑀤𑁆𑀥𑀘𑀺𑀢𑁆𑀢𑀢𑀸. 𑀢𑀦𑁆𑀢𑀺 𑀪𑀡𑁆𑀟𑀦𑀁. 𑀥𑀫𑁆𑀫𑀯𑀺𑀦𑀬𑀦𑁆𑀢𑀺 𑀧𑀸𑀯𑀘𑀦𑀁. 𑀯𑀺𑀢𑀼𑀚𑁆𑀚𑀦𑁆𑀢𑀸 𑀫𑀼𑀔𑀲𑀢𑁆𑀢𑀻𑀳𑀺. 𑀲𑀳𑀺𑀢𑀁 𑀫𑁂𑀢𑀺 𑀫𑀬𑁆𑀳𑀁 𑀯𑀘𑀦𑀁 𑀲𑀳𑀺𑀢𑀁 𑀲𑀺𑀮𑀺𑀝𑁆𑀞𑀁 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑀁 𑀅𑀢𑁆𑀣𑀬𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀢𑁆𑀣𑀲𑀁𑀳𑀺𑀢’’𑀦𑁆𑀢𑀺. 𑀅𑀥𑀺𑀘𑀺𑀡𑁆𑀡𑀦𑁆𑀢𑀺 𑀆𑀘𑀺𑀡𑁆𑀡𑀁. 𑀯𑀺𑀧𑀭𑀸𑀯𑀢𑁆𑀢𑀦𑁆𑀢𑀺 𑀯𑀺𑀭𑁄𑀥𑀤𑀲𑁆𑀲𑀦𑀯𑀲𑁂𑀦 𑀧𑀭𑀸𑀯𑀢𑁆𑀢𑀺𑀢𑀁, 𑀧𑀭𑀸𑀯𑀢𑁆𑀢𑀁 𑀤𑀽𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀘𑀺𑀭𑀓𑀸𑀮𑀯𑀲𑁂𑀦…𑀧𑁂… 𑀦𑀺𑀯𑀢𑁆𑀢’’𑀦𑁆𑀢𑀺. 𑀧𑀭𑀺𑀬𑁂𑀲𑀫𑀸𑀦𑁄 𑀘𑀭, 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀸𑀳𑀻𑀢𑀺 𑀅𑀢𑁆𑀣𑁄. 𑀲𑀘𑁂 𑀲𑀓𑁆𑀓𑁄𑀲𑀺, 𑀇𑀤𑀸𑀦𑀺𑀫𑁂𑀯 𑀫𑀬𑀸 𑀯𑁂𑀞𑀺𑀢𑀤𑁄𑀲𑀁 𑀦𑀺𑀩𑁆𑀩𑁂𑀞𑁂𑀳𑀺. 𑀫𑀭𑀡𑀫𑁂𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀖𑀸𑀢𑀯𑀲𑁂𑀦 𑀫𑀭𑀡𑀫𑁂𑀯.

𑀦𑀸𑀝𑀧𑀼𑀢𑁆𑀢𑀲𑁆𑀲 𑀇𑀫𑁂𑀢𑀺 𑀦𑀸𑀝𑀧𑀼𑀢𑁆𑀢𑀺𑀬𑀸. 𑀢𑁂 𑀧𑀦 𑀢𑀲𑁆𑀲 𑀲𑀺𑀲𑁆𑀲𑀸𑀢𑀺 𑀆𑀳 ‘‘𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀽’’𑀢𑀺. 𑀧𑀼𑀭𑀺𑀫𑀧𑀝𑀺𑀧𑀢𑁆𑀢𑀺𑀢𑁄 𑀧𑀝𑀺𑀦𑀺𑀯𑀢𑁆𑀢𑀦𑀁 𑀧𑀝𑀺𑀯𑀸𑀦𑀁, 𑀢𑀁 𑀭𑀽𑀧𑀁 𑀲𑀪𑀸𑀯𑁄 𑀏𑀢𑁂𑀲𑀦𑁆𑀢𑀺 𑀧𑀝𑀺𑀯𑀸𑀦𑀭𑀽𑀧𑀸. 𑀢𑁂𑀦𑀸𑀳 ‘‘𑀦𑀺𑀯𑀢𑁆𑀢𑀦𑀲𑀪𑀸𑀯𑀸’’𑀢𑀺. 𑀓𑀣𑀦𑀁 𑀅𑀢𑁆𑀣𑀲𑁆𑀲 𑀆𑀘𑀺𑀓𑁆𑀔𑀦𑀁. 𑀧𑀯𑁂𑀤𑀦𑀁 𑀢𑀲𑁆𑀲 𑀳𑁂𑀢𑀼𑀤𑀸𑀳𑀭𑀡𑀸𑀦𑀺 𑀆𑀳𑀭𑀺𑀢𑁆𑀯𑀸 𑀩𑁄𑀥𑀦𑀁. 𑀦 𑀉𑀧𑀲𑀫𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀁, 𑀢𑀤𑁂𑀯 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑀁, 𑀢𑀲𑁆𑀫𑀺𑀁. 𑀲𑀫𑀼𑀲𑁆𑀲𑀺𑀢𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀸𑀳𑁂𑀢𑀼𑀪𑀸𑀯𑀢𑁄 𑀣𑀽𑀧𑀁 𑀧𑀢𑀺𑀝𑁆𑀞𑀸𑀢𑀺 𑀆𑀳 𑁋 ‘‘𑀪𑀺𑀦𑁆𑀦𑀣𑀽𑀧𑁂𑀢𑀺 𑀪𑀺𑀦𑁆𑀦𑀧𑀢𑀺𑀝𑁆𑀞𑁂’’𑀢𑀺. 𑀣𑀽𑀧𑁄𑀢𑀺 𑀯𑀸 𑀥𑀫𑁆𑀫𑀲𑁆𑀲 𑀦𑀺𑀬𑁆𑀬𑀸𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀜𑁆𑀜𑀥𑀫𑁆𑀫𑁂 𑀅𑀪𑀺𑀪𑀼𑀬𑁆𑀬 𑀲𑀫𑀼𑀲𑁆𑀲𑀺𑀢𑀝𑁆𑀞𑁂𑀦. 𑀲𑁄 𑀦𑀺𑀕𑀡𑁆𑀞𑀲𑁆𑀲 𑀲𑀫𑀬𑁂 𑀓𑁂𑀳𑀺𑀘𑀺 𑀅𑀪𑀺𑀦𑁆𑀦𑀲𑀫𑁆𑀫𑀢𑁄𑀧𑀺 𑀪𑀺𑀦𑁆𑀦𑁄 𑀯𑀺𑀦𑀝𑁆𑀞𑁄𑀬𑁂𑀯 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀢𑁄𑀢𑀺 𑀪𑀺𑀦𑁆𑀦𑀣𑀽𑀧𑁄. 𑀲𑁄 𑀏𑀯 𑀦𑀺𑀬𑁆𑀬𑀸𑀦𑀪𑀸𑀯𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑀸𑀦𑀁 𑀧𑀝𑀺𑀲𑀭𑀡𑀁, 𑀢𑀁 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀅𑀧𑁆𑀧𑀝𑀺𑀲𑀭𑀡𑁄, 𑀢𑀲𑁆𑀫𑀺𑀁 𑀪𑀺𑀦𑁆𑀦𑀣𑀽𑀧𑁂 𑀅𑀧𑁆𑀧𑀝𑀺𑀲𑀭𑀡𑁂𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀘𑀭𑀺𑀬𑀧𑁆𑀧𑀫𑀸𑀡𑀦𑁆𑀢𑀺 𑀆𑀘𑀭𑀺𑀬𑀫𑀼𑀝𑁆𑀞𑀺 𑀳𑀼𑀢𑁆𑀯𑀸 𑀧𑀫𑀸𑀡𑀪𑀽𑀢𑀁. 𑀦𑀸𑀦𑀸𑀦𑀻𑀳𑀸𑀭𑁂𑀦𑀸𑀢𑀺 𑀦𑀸𑀦𑀸𑀓𑀸𑀭𑁂𑀦. ‘‘𑀯𑀺𑀯𑀸𑀤𑁄 𑀦 𑀉𑀧𑁆𑀧𑀚𑁆𑀚𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀲𑀢𑁆𑀣𑀸 𑀳𑀺…𑀧𑁂… 𑀅𑀯𑀺𑀯𑀸𑀤𑀓𑀸𑀭𑀡𑀁 𑀓𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀯𑀢𑁆𑀯𑀸 𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀪𑀕𑀯𑀢𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀢𑀺𑀝𑁆𑀞𑀸 𑀘 𑀅𑀯𑀲𑁆𑀲𑀬𑁄 𑀘, ‘‘𑀅𑀬𑀁 𑀥𑀫𑁆𑀫𑁄 𑀅𑀬𑀁 𑀯𑀺𑀦𑀬𑁄 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’’𑀦𑁆𑀢𑀺 𑀯𑀺𑀦𑀺𑀘𑁆𑀙𑀬𑀦𑁂 𑀫𑀳𑀸𑀧𑀤𑁂𑀲𑀸, 𑀧𑀜𑁆𑀳𑀩𑁆𑀬𑀸𑀓𑀭𑀡𑀸𑀦𑀺 𑀘, 𑀬𑀲𑁆𑀫𑀸 𑀢𑁂𑀲𑀼 𑀧𑀢𑀺𑀝𑁆𑀞𑀸𑀬 𑀢𑁂 𑀅𑀯𑀲𑁆𑀲𑀸𑀬 𑀥𑀫𑁆𑀫𑀯𑀺𑀦𑀬𑀥𑀭𑀸 𑀘 𑀦𑀺𑀘𑁆𑀙𑀬𑀁 𑀕𑀘𑁆𑀙𑀦𑁆𑀢𑀺. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀫𑀳𑀸𑀧𑀤𑁂𑀲𑀢𑁄 𑀯𑀺𑀦𑀬𑁂 𑀓𑁂𑀦𑀘𑀺 𑀧𑀼𑀘𑁆𑀙𑀺𑀢𑁄 𑀅𑀢𑁆𑀣𑁄 𑀘𑀢𑀼𑀦𑁆𑀦𑀁 𑀧𑀜𑁆𑀳𑀩𑁆𑀬𑀸𑀓𑀭𑀡𑀸𑀦𑀁 𑀯𑀲𑁂𑀦 𑀲𑀼𑀯𑀺𑀦𑀺𑀘𑁆𑀙𑀺𑀢𑀭𑀽𑀧𑁄, 𑀢𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑁄 𑀇𑀥 𑀲𑀢𑁆𑀣𑀼 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀆𑀳 𑁋 ‘‘𑀢𑁂𑀦𑁂𑀯𑀸’’𑀢𑀺𑀆𑀤𑀺, 𑀢𑀲𑁆𑀫𑀸 𑀉𑀴𑀸𑀭𑀸𑀬 𑀤𑁂𑀲𑀦𑀸𑀬 𑀪𑀸𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁨. 𑀧𑀝𑀺𑀧𑀯𑀺𑀝𑁆𑀞𑀁 𑀓𑀢𑁆𑀯𑀸 𑀆𑀳𑀭𑀺𑀢𑀩𑁆𑀩𑀢𑁄, 𑀲𑀘𑁆𑀘𑀁 𑀓𑀸𑀭𑀺𑀢𑀩𑁆𑀩𑀢𑁄 𑀧𑀸𑀪𑀢𑀁 𑀫𑀽𑀮𑀦𑁆𑀢𑀺 𑀆𑀳 𑁋 ‘‘𑀓𑀣𑀸𑀧𑀸𑀪𑀢’’𑀦𑁆𑀢𑀺, 𑀥𑀫𑁆𑀫𑀓𑀣𑀸𑀬 𑀫𑀽𑀮𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀬𑁂𑀲𑀁 𑀯𑀲𑁂𑀦 𑀯𑀺𑀯𑀸𑀤𑁄 𑀉𑀧𑁆𑀧𑀦𑁆𑀦𑁄, 𑀢𑁂𑀬𑁂𑀯 𑀅𑀥𑀫𑁆𑀫𑀯𑀸𑀤𑀺𑀦𑁄, 𑀢𑁂𑀲𑀁 𑀢𑀸𑀯 𑀲𑁄 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀢𑀼, 𑀢𑀢𑁄 𑀅𑀜𑁆𑀜𑁂𑀲𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀓𑀣𑀦𑁆𑀢𑀺, 𑀘𑁄𑀤𑀦𑀸 𑀧𑀭𑀫𑁆𑀧𑀭𑀸𑀬 𑀲𑀁𑀓𑀺𑀮𑁂𑀲𑀯𑀢𑁆𑀣𑀼𑀪𑀸𑀯𑀢𑁄𑀢𑀺 𑀧𑀭𑀺𑀳𑀸𑀭𑁄. 𑀢𑁂𑀦𑀸𑀳 𑁋 ‘‘𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀯𑀺𑀬𑀸’’𑀢𑀺𑀆𑀤𑀺.

𑁪𑁩. 𑀅𑀪𑀺𑀜𑁆𑀜𑀸 𑀤𑁂𑀲𑀺𑀢𑀸𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀩𑁄𑀥𑀺𑀢𑀸. 𑀧𑀢𑀺𑀲𑁆𑀲𑀬𑀫𑀸𑀦𑀭𑀽𑀧𑀸𑀢𑀺 𑀅𑀧𑀤𑀺𑀲𑁆𑀲 𑀧𑀢𑀺𑀲𑁆𑀲𑀬𑀫𑀸𑀦𑀸 𑀕𑀭𑀼𑀓𑀯𑀲𑁂𑀦 𑀦𑀺𑀲𑁆𑀲𑀬𑀫𑀸𑀦𑀲𑀪𑀸𑀯𑀸. 𑀢𑁂𑀦𑀸𑀳 𑁋 ‘‘𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀻’’𑀢𑀺, 𑀕𑀭𑀼𑀢𑀭𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀯𑀸𑀭𑁂 𑀧𑀜𑁆𑀜𑀢𑁆𑀢𑀸𑀦𑀻𑀢𑀺, ‘‘𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸’’𑀢𑀺, 𑀏𑀯𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀧𑀭𑀺𑀯𑀸𑀭𑀧𑀸𑀴𑀺𑀬𑀁 (𑀧𑀭𑀺. 𑁩𑁩𑁬) 𑀆𑀲𑀗𑁆𑀓𑀭𑀯𑀲𑁂𑀦 𑀞𑀧𑀺𑀢𑀸𑀦𑀺. ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁩𑁯, 𑁪𑁨, 𑁪𑁩) 𑀯𑀺𑀪𑀗𑁆𑀕𑀧𑀸𑀞𑀯𑀲𑁂𑀦𑁂𑀯 𑀳𑀺 𑀢𑀸𑀦𑀺 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀸𑀦𑀺. 𑀢𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀥𑀺𑀧𑀸𑀢𑀺𑀫𑁄𑀓𑁆𑀔𑀁 𑀦𑀸𑀫𑀸𑀢𑀺, 𑀇𑀤𑀁 𑀕𑁄𑀩𑀮𑀻𑀩𑀤𑁆𑀤𑀜𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 𑀢𑁂𑀲𑀫𑁆𑀧𑀺 𑀅𑀥𑀺𑀧𑀸𑀢𑀺𑀫𑁄𑀓𑁆𑀔𑀪𑀸𑀯𑀢𑁄.

𑀢𑀢𑁆𑀭𑀸𑀬𑀁 𑀦𑀬𑁄𑀢𑀺 𑀢𑀲𑁆𑀫𑀺𑀁 𑀲𑀼𑀧𑁆𑀧𑀚𑀳𑀦𑀸𑀬 𑀅𑀧𑁆𑀧𑀫𑀢𑁆𑀢𑀓𑀪𑀸𑀯𑁂 𑀅𑀬𑀁 𑀯𑀓𑁆𑀔𑀫𑀸𑀦𑁄. 𑀢𑀸𑀦𑀻𑀢𑀺 𑀧𑀡𑀻𑀢𑀪𑁄𑀚𑀦𑀸𑀦𑀺. 𑀬𑁄 𑀓𑁄𑀘𑀻𑀢𑀺 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸. 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀯𑀢𑁆𑀣𑀼𑀓𑀁. 𑀢𑁂𑀦𑀸𑀢𑀺 𑀲𑀼𑀧𑁆𑀧𑀚𑀳𑀦𑀪𑀸𑀯𑁂𑀦 𑀫𑀽𑀮𑀸𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀲𑁆𑀲 𑀅𑀡𑀼𑀫𑀢𑁆𑀢𑀢𑀸𑀬.

𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀦𑁆𑀢𑀺 𑀮𑁄𑀓𑀺𑀬𑀫𑀕𑁆𑀕𑀁. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀁 𑀦𑀺𑀲𑁆𑀲𑀸𑀬 𑀯𑀺𑀯𑀸𑀤𑀼𑀧𑁆𑀧𑀸𑀤𑁂. 𑀑𑀪𑀸𑀲𑀜𑀸𑀡𑀦𑁆𑀢𑀺 𑀑𑀪𑀸𑀲𑀲𑁆𑀲 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀜𑀸𑀡𑀁. 𑀢𑀢𑁆𑀣 𑀧𑀦 𑀲𑁄 𑀫𑀕𑁆𑀕𑀲𑀜𑁆𑀜𑀺𑀪𑀸𑀯𑁂𑀦 𑀫𑀕𑁆𑀕𑁄 𑀘 𑀘𑀢𑀼𑀩𑁆𑀩𑀺𑀥𑁄𑀢𑀺 𑀲𑀼𑀢𑀢𑁆𑀢𑀸, ‘‘𑀧𑀝𑁆𑀞𑀫𑀫𑀕𑁆𑀕𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀏𑀯𑀦𑁆𑀢𑀺 𑀏𑀯𑀁 𑀅𑀲𑀦𑁆𑀤𑀺𑀤𑁆𑀥𑀁 𑀅𑀧𑀭𑀺𑀲𑀗𑁆𑀓𑀺𑀢𑀁 𑀧𑀭𑀺𑀘𑁆𑀘𑀢𑁆𑀢𑀁 𑀓𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀘𑁂𑀢𑀺𑀬𑀁 𑀦 𑀤𑀺𑀝𑁆𑀞𑀦𑁆𑀢𑀺 𑀢𑀲𑁆𑀲 𑀓𑀢𑀁 𑀣𑀽𑀧𑀁 𑀯𑀤𑀢𑀺. 𑀦𑀺𑀦𑁆𑀤𑀺𑀬𑁂 𑀧𑀼𑀣𑀼𑀚𑁆𑀚𑀦𑀪𑀸𑀯𑁂 𑀞𑀺𑀢𑀁 𑀧𑀸𑀲𑀁𑀲𑀁 𑀅𑀭𑀺𑀬𑀪𑀸𑀯𑀁 𑀆𑀭𑁄𑀧𑁂𑀢𑁆𑀯𑀸 𑀢𑀁 𑀫𑀺𑀘𑁆𑀙𑀸𑀮𑀤𑁆𑀥𑀺𑀁 𑀅𑀪𑀺𑀦𑀺𑀯𑀺𑀲𑁆𑀲 𑀧𑀕𑁆𑀕𑀬𑁆𑀳 𑀯𑁄𑀳𑀭𑀡𑀢𑁄 𑀲𑀕𑁆𑀕𑁄𑀧𑀺 𑀫𑀕𑁆𑀕𑁄𑀧𑀺 𑀯𑀸𑀭𑀺𑀢𑁄𑀬𑁂𑀯𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁄 𑀦𑀺𑀦𑁆𑀤𑀺𑀬𑀁 𑀧𑀲𑀁𑀲𑀢𑀺, 𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄;

𑀯𑀺𑀘𑀺𑀦𑀸𑀢𑀺 𑀫𑀼𑀔𑁂𑀦 𑀲𑁄 𑀓𑀮𑀺𑀁, 𑀓𑀮𑀺𑀦𑀸 𑀢𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀻’’𑀢𑀺. (𑀲𑀼. 𑀦𑀺. 𑁬𑁬𑁩; 𑀲𑀁. 𑀦𑀺. 𑁧.𑁧𑁮𑁦-𑁧𑁮𑁧; 𑀅. 𑀦𑀺. 𑁪.𑁩; 𑀦𑁂𑀢𑁆𑀢𑀺. 𑁯𑁨);

‘‘𑀔𑀡𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑀓𑀫𑁆𑀫𑀝𑁆𑀞𑀸𑀦𑀓𑀣𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀳𑀺 𑀇𑀫𑀺𑀦𑀸 𑀢𑀢𑁆𑀣 𑀓𑁄𑀳𑀜𑁆𑀜𑀫𑁆𑀧𑀺 𑀤𑀺𑀲𑁆𑀲𑀢𑀺; 𑀇𑀢𑀭𑁂𑀲𑀼 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀉𑀧𑁆𑀧𑀸𑀝𑁂𑀢𑁆𑀯𑀸𑀢𑀺 𑀉𑀤𑁆𑀥𑀭𑀺𑀢𑁆𑀯𑀸. ‘‘𑀅𑀣 𑀢𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺 𑀲𑁂𑀲𑀁 𑀦𑀸𑀫. ‘‘𑀅𑀫𑀢𑀁 𑀢𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀬𑁂 𑀓𑀸𑀬𑀕𑀢𑀸𑀲𑀢𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺 (𑀅. 𑀦𑀺. 𑁧.𑁬𑁦𑁦) 𑀯𑀘𑀦𑀁 𑀤𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀸𑀧𑁂𑀢𑁆𑀯𑀸, ‘‘𑀏𑀢𑁆𑀢𑀸𑀯𑀢𑀸 𑀯𑁄 𑀅𑀫𑀢𑀁 𑀧𑀭𑀺𑀪𑀼𑀢𑁆𑀢𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳.

𑁪𑁪. 𑀏𑀯𑀦𑁆𑀢𑀺 𑀆𑀓𑀸𑀭𑀮𑀓𑁆𑀔𑀡𑀫𑁂𑀢𑀁, 𑀦 𑀆𑀓𑀸𑀭𑀦𑀺𑀬𑀫𑀦𑀁. 𑀢𑁂𑀦 𑀇𑀫𑀺𑀦𑀸𑀯 𑀓𑀸𑀭𑀡𑁂𑀦 𑀘 𑀬𑁄 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀭𑀼𑀲𑁆𑀫𑀺𑀁 𑀕𑀭𑀽𑀢𑀺 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀕𑀭𑀼𑀯𑀺𑀲𑀬𑀢𑁆𑀢𑀸 𑀢𑀁𑀲𑀳𑀘𑀭𑀺𑀢𑀢𑁆𑀢𑀸 𑀕𑀭𑀼, 𑀢𑀲𑁆𑀲 𑀪𑀸𑀯𑁄 𑀕𑀸𑀭𑀯𑀁, 𑀕𑀭𑀼𑀓𑀭𑀡𑀁, 𑀢𑀁 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀅𑀕𑀸𑀭𑀯𑁄. 𑀢𑁂𑀦𑀸𑀳 ‘‘𑀕𑀸𑀭𑀯𑀯𑀺𑀭𑀳𑀺𑀢𑁄’’𑀢𑀺. 𑀕𑀭𑀼𑀲𑁆𑀲 𑀕𑀸𑀭𑀯𑀯𑀲𑁂𑀦 𑀧𑀢𑀺𑀲𑁆𑀲𑀬𑀦𑀁 𑀧𑀢𑀺𑀲𑁆𑀲𑁄𑀢𑀺 𑀯𑀼𑀘𑁆𑀘𑀢𑀺 𑀦𑀻𑀘𑀯𑀼𑀢𑁆𑀢𑀺𑀢𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀧𑁆𑀧𑀢𑀺𑀲𑁆𑀲𑁄𑀢𑀺 𑀆𑀳 𑁋 ‘‘𑀅𑀧𑁆𑀧𑀢𑀺𑀲𑁆𑀲𑀬𑁄 𑀅𑀦𑀻𑀘𑀯𑀼𑀢𑁆𑀢𑀻’’𑀢𑀺. 𑀏𑀢𑁆𑀣 𑀬𑀣𑀸𑀬𑀁 𑀧𑀼𑀕𑁆𑀕𑀮𑁄 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀻𑀲𑀼𑀓𑀸𑀮𑁂𑀲𑀼 𑀉𑀧𑀝𑁆𑀞𑀸𑀦𑀁 𑀦 𑀬𑀸𑀢𑀻𑀢𑀺𑀆𑀤𑀺 𑀲𑀫𑀼𑀤𑀸𑀬𑀓𑀺𑀢𑁆𑀢𑀦𑀅𑀦𑀯𑀲𑁂𑀲𑀤𑀲𑁆𑀲𑀦𑀁, 𑀅𑀯𑀬𑀯𑀢𑁄 𑀧𑀦 𑀅𑀕𑀸𑀭𑀯𑀲𑀺𑀤𑁆𑀥𑀺 𑀬𑀣𑀸 𑀢𑀁 𑀲𑀸𑀫𑀜𑁆𑀜𑀢𑁄 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑀁 𑀢𑀩𑁆𑀩𑀺𑀲𑁂𑀲𑁄 𑀪𑁂𑀤𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀲𑀓𑁆𑀓𑀘𑁆𑀘𑀁 𑀦 𑀕𑀘𑁆𑀙𑀢𑀻𑀢𑀺 𑀆𑀤𑀭𑀯𑀲𑁂𑀦 𑀦 𑀕𑀘𑁆𑀙𑀢𑀺. 𑀲𑀗𑁆𑀖𑁂 𑀓𑀢𑁄𑀬𑁂𑀯 𑀳𑁄𑀢𑀺 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑀲𑁆𑀲, 𑀬𑀣𑀸 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑀺𑀢𑀁 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀅𑀧𑀭𑀺𑀧𑀽𑀭𑀬𑀫𑀸𑀦𑁄𑀯 𑀲𑀺𑀓𑁆𑀔𑀸𑀬 𑀅𑀕𑀸𑀭𑀯𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 (𑀫. 𑀦𑀺. 𑁨.𑁧𑁩𑁫). 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀉𑀧𑁆𑀧𑀦𑁆𑀦𑀁 𑀯𑀺𑀯𑀸𑀤𑀫𑀽𑀮𑀁 𑀯𑀺𑀲𑁂𑀲𑀢𑁄 𑀅𑀢𑁆𑀢𑀦𑀸 𑀯𑀽𑀧𑀲𑀫𑁂𑀢𑀩𑁆𑀩𑀢𑁄 𑀅𑀢𑁆𑀢𑀦𑁄 𑀘 𑀅𑀦𑀢𑁆𑀣𑀸𑀯𑀳𑀢𑁄 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀩𑀳𑀺𑀤𑁆𑀥𑀸𑀢𑀺 𑀏𑀢𑁆𑀣𑀸𑀧𑀺.

𑁪𑁬. 𑀙𑀞𑀸𑀦𑀸𑀦𑀻𑀢𑀺 𑀙𑀫𑀽𑀮𑀸𑀦𑀺. 𑀬𑀣𑀸 𑀲𑀫𑀦𑀯𑀲𑁂𑀦 𑀲𑀫𑀣𑀸𑀦𑀁 𑀯𑀺𑀯𑀸𑀤𑀸𑀤𑀻𑀲𑀼 𑀅𑀥𑀺𑀓𑀢𑁆𑀢𑀼𑀪𑀸𑀯𑁄, 𑀏𑀯𑀁 𑀯𑀺𑀯𑀸𑀤𑀸𑀤𑀻𑀦𑀁 𑀢𑁂𑀳𑀺 𑀅𑀥𑀺𑀓𑀢𑁆𑀢𑀩𑁆𑀩𑀢𑀸𑀧𑀻𑀢𑀺 𑀆𑀳 𑁋 ‘‘𑀯𑀽𑀧𑀲𑀫𑀦𑀢𑁆𑀣𑀸𑀬…𑀧𑁂… 𑀅𑀥𑀺𑀓𑀭𑀡𑀸𑀦𑀻’’𑀢𑀺. 𑀢𑁂𑀦 𑀅𑀥𑀺𑀓𑀭𑀡𑀲𑀤𑁆𑀤𑀲𑁆𑀲 𑀓𑀫𑁆𑀫𑀢𑁆𑀣𑀢𑀁 𑀆𑀳. 𑀲𑀫𑀣𑀸 𑀯𑀸 𑀲𑀫𑀦𑀯𑀲𑁂𑀦 𑀅𑀥𑀺𑀓𑀭𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀥𑀺𑀓𑀭𑀡𑀸𑀦𑀺, 𑀯𑀺𑀯𑀸𑀤𑀸𑀤𑀬𑁄.

𑀯𑀺𑀯𑀸𑀤𑁄 𑀉𑀧𑁆𑀧𑀦𑁆𑀦𑀫𑀢𑁆𑀢𑁄𑀯 𑀳𑀼𑀢𑁆𑀯𑀸 𑀧𑀭𑀢𑁄 𑀓𑀓𑁆𑀔𑀴𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀢𑁄 𑀬𑀁 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀞𑀫𑀁 𑀉𑀧𑁆𑀧𑀦𑁆𑀦𑁄 𑀯𑀺𑀯𑀸𑀤𑀸𑀦𑀼𑀲𑀸𑀭𑁂𑀦 𑀫𑀽𑀮𑀓𑀁 𑀯𑀺𑀬 𑀅𑀦𑀼𑀩𑀦𑁆𑀥𑀭𑁄𑀕𑁄 𑀢𑀫𑁂𑀯 𑀢𑀤𑀜𑁆𑀜𑀁 𑀯𑀸 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀧𑀯𑀟𑁆𑀠𑀦𑁆𑀢𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀧𑀢𑁆𑀯𑀸 𑀉𑀧𑀭𑀺 𑀯𑀟𑁆𑀠𑀢𑀺 𑀦𑀸𑀫, 𑀅𑀦𑀼𑀯𑀸𑀤𑀸𑀧𑀢𑁆𑀢𑀺𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀧𑀢𑁆𑀯𑀸 𑀯𑀺𑀯𑀸𑀤𑀲𑁆𑀲 𑀘 𑀯𑀟𑁆𑀠𑀦𑀁 𑀧𑀸𑀓𑀝𑀫𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑀧𑀢𑁆𑀯𑀸 𑀉𑀧𑀭𑀺 𑀯𑀟𑁆𑀠𑀦𑁆𑀢𑁄 𑀲𑁄 𑀯𑀺𑀯𑀸𑀤𑁄’’𑀢𑀺. 𑀉𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁩.𑁩𑁩𑁧) 𑀉𑀝𑁆𑀞𑀺𑀢𑀸𑀦𑀁 𑀉𑀝𑁆𑀞𑀺𑀢𑀸𑀦𑀁. 𑀲𑀫𑀣𑀢𑁆𑀣𑀦𑁆𑀢𑀺 𑀲𑀫𑀦𑀢𑁆𑀣𑀁.

𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀻𑀢𑀺 𑀮𑀓𑁆𑀔𑀡𑀯𑀘𑀦𑀫𑁂𑀢𑀁 𑀬𑀣𑀸 ‘‘𑀬𑀤𑀺 𑀫𑁂 𑀩𑁆𑀬𑀸𑀥𑀻 𑀤𑀸𑀳𑁂𑀬𑁆𑀬𑀼𑀁. 𑀤𑀸𑀢𑀩𑁆𑀩𑀫𑀺𑀤𑀫𑁄𑀲𑀥’’𑀦𑁆𑀢𑀺 (𑀲𑀁. 𑀦𑀺. 𑀝𑀻. 𑁨.𑁩.𑁩𑁯-𑁪𑁨; 𑀓𑀗𑁆𑀔𑀸. 𑀅𑀪𑀺. 𑀝𑀻. 𑀅𑀥𑀺𑀓𑀭𑀡𑀲𑀫𑀣𑀯𑀡𑁆𑀡𑀦𑀸), 𑀢𑀲𑁆𑀫𑀸 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦 𑀯𑀺𑀯𑀤𑀦𑁆𑀢𑀸, ‘‘𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀯𑀺𑀯𑀤𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀉𑀧𑀯𑀤𑀦𑀸𑀢𑀺 𑀅𑀓𑁆𑀓𑁄𑀲𑁄. 𑀘𑁄𑀤𑀦𑀸𑀢𑀺 𑀅𑀦𑀼𑀬𑁄𑀕𑁄.

𑀅𑀥𑀺𑀓𑀭𑀡𑀲𑁆𑀲 𑀲𑀫𑁆𑀫𑀼𑀔𑀸𑀯 𑀯𑀺𑀦𑀬𑀦𑀢𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁄. 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 𑀥𑀫𑁆𑀫𑀯𑀸𑀤𑀻𑀦𑀁 𑀬𑁂𑀪𑀼𑀬𑁆𑀬𑀢𑀸𑀬 𑀬𑁂𑀪𑀼𑀬𑁆𑀬𑀲𑀺𑀓𑀓𑀫𑁆𑀫𑀲𑁆𑀲 𑀓𑀭𑀡𑀁 𑀬𑁂𑀪𑀼𑀬𑁆𑀬𑀲𑀺𑀓𑀸. 𑀓𑀸𑀭𑀓𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀺𑀯𑀲𑁂𑀦 𑀲𑀫𑁆𑀫𑀼𑀔𑀻𑀪𑀸𑀯𑁄, 𑀦 𑀬𑀣𑀸 𑀢𑀣𑀸 𑀓𑀸𑀭𑀓𑀧𑀼𑀕𑁆𑀕𑀮𑀸𑀦𑀁 𑀲𑀫𑁆𑀫𑀼𑀔𑀢𑀸𑀫𑀢𑁆𑀢𑀁. 𑀪𑀽𑀢𑀢𑀸𑀢𑀺 𑀢𑀘𑁆𑀙𑀢𑀸. 𑀲𑀘𑁆𑀘𑀧𑀭𑀺𑀬𑀸𑀬𑁄 𑀳𑀺 𑀇𑀥 𑀥𑀫𑁆𑀫-𑀲𑀤𑁆𑀤𑁄 ‘‘𑀥𑀫𑁆𑀫𑀯𑀸𑀤𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁯) 𑀯𑀺𑀬. 𑀯𑀺𑀦𑁂𑀢𑀺 𑀏𑀢𑁂𑀦𑀸𑀢𑀺 𑀯𑀺𑀦𑀬𑁄, 𑀢𑀲𑁆𑀲 𑀢𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀯𑀽𑀧𑀲𑀫𑀸𑀬 𑀪𑀕𑀯𑀢𑀸 𑀯𑀼𑀢𑁆𑀢𑀯𑀺𑀥𑀺, 𑀢𑀲𑁆𑀲 𑀯𑀺𑀦𑀬𑀲𑁆𑀲 𑀲𑀫𑁆𑀫𑀼𑀔𑀢𑀸 𑀯𑀺𑀦𑀬𑀲𑀫𑁆𑀫𑀼𑀔𑀢𑀸. 𑀯𑀺𑀯𑀸𑀤𑀯𑀢𑁆𑀣𑀼𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 𑀧𑀘𑁆𑀘𑀢𑁆𑀣𑀺𑀓𑀸 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸, 𑀢𑁂𑀲𑀁 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸𑀦𑀁. 𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀧𑀭𑀺𑀳𑀸𑀬𑀢𑀺 𑀲𑀫𑁆𑀫𑀢𑀧𑀼𑀕𑁆𑀕𑀮𑁂𑀳𑁂𑀯 𑀯𑀽𑀧𑀲𑀫𑀦𑀢𑁄.

𑀦𑀦𑁆𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. ‘‘𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁩𑁮𑁩) 𑀯𑀼𑀢𑁆𑀢𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁. 𑀕𑀼𑀴𑁆𑀳𑀓𑀸𑀤𑀻𑀲𑀼 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀸𑀬 𑀧𑀭𑀺𑀲𑀸𑀬 𑀕𑀼𑀴𑁆𑀳𑀓𑁄 𑀲𑀮𑀸𑀓𑀕𑁆𑀕𑀸𑀳𑁄 𑀓𑀸𑀢𑀩𑁆𑀩𑁄; 𑀮𑀚𑁆𑀚𑀼𑀲𑁆𑀲𑀦𑁆𑀦𑀸𑀬 𑀯𑀺𑀯𑀝𑀓𑁄, 𑀩𑀸𑀮𑀼𑀲𑁆𑀲𑀦𑁆𑀦𑀸𑀬 𑀲𑀓𑀡𑁆𑀡𑀚𑀧𑁆𑀧𑀓𑁄. 𑀬𑀲𑁆𑀲𑀸 𑀓𑀺𑀭𑀺𑀬𑀸𑀬 𑀥𑀫𑁆𑀫𑀯𑀸𑀤𑀺𑀦𑁄 𑀩𑀳𑀼𑀢𑀭𑀸, 𑀲𑀸 𑀬𑁂𑀪𑀼𑀬𑁆𑀬𑀲𑀺𑀓𑀸𑀢𑀺 𑀆𑀳 𑁋 ‘‘𑀥𑀫𑁆𑀫𑀯𑀸𑀤𑀻𑀦𑀁 𑀬𑁂𑀪𑀼𑀬𑁆𑀬𑀢𑀸𑀬𑀸’’𑀢𑀺𑀆𑀤𑀺.

𑀏𑀯𑀁 𑀯𑀺𑀦𑀺𑀘𑁆𑀙𑀺𑀢𑀦𑁆𑀢𑀺 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀭𑁄𑀧𑀦𑀯𑀲𑁂𑀦 𑀯𑀺𑀦𑀺𑀘𑁆𑀙𑀺𑀢𑀁, 𑀧𑀝𑀺𑀓𑀫𑁆𑀫𑀁 𑀧𑀦 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑀫𑀣𑁂 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀦 𑀲𑀫𑀡𑀲𑀸𑀭𑀼𑀧𑁆𑀧𑀁 𑀅𑀲𑁆𑀲𑀸𑀫𑀡𑀓𑀁, 𑀲𑀫𑀡𑁂𑀳𑀺 𑀅𑀓𑀸𑀢𑀩𑁆𑀩𑀁, 𑀢𑀲𑁆𑀫𑀺𑀁. 𑀅𑀚𑁆𑀛𑀸𑀘𑀸𑀭𑁂 𑀯𑀻𑀢𑀺𑀓𑁆𑀓𑀫𑁂𑀲𑀢𑀺. 𑀧𑀝𑀺𑀘𑀭𑀢𑁄𑀢𑀺 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲. 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬 𑀧𑀸𑀧𑀺𑀬𑁄, 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀓𑀸𑀢𑀩𑁆𑀩𑀓𑀫𑁆𑀫𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀁.

𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀯𑀽𑀧𑀲𑀫𑁄 𑀦𑀢𑁆𑀣𑀺 𑀧𑀝𑀺𑀜𑁆𑀜𑀸𑀬, 𑀢𑀣𑀸𑀭𑀽𑀧𑀸𑀬 𑀔𑀦𑁆𑀢𑀺𑀬𑀸 𑀯𑀸 𑀯𑀺𑀦𑀸 𑀅𑀯𑀽𑀧𑀲𑀫𑀦𑀢𑁄. 𑀏𑀢𑁆𑀣𑀸𑀢𑀺 𑀆𑀧𑀢𑁆𑀢𑀺𑀤𑁂𑀲𑀦𑀸𑀬𑀁. 𑀧𑀝𑀺𑀜𑁆𑀜𑀸𑀢𑁂 𑀆𑀧𑀦𑁆𑀦𑀪𑀸𑀯𑀸𑀤𑀺𑀓𑁂 𑀓𑀭𑀡𑀓𑀺𑀭𑀺𑀬𑀸, ‘‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺, 𑀧𑀭𑀺𑀯𑀸𑀲𑀤𑀸𑀦𑀸𑀤𑀺𑀯𑀲𑁂𑀦 𑀘 𑀧𑀯𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁.

𑀬𑀣𑀸𑀦𑀼𑀭𑀽𑀧𑀦𑁆𑀢𑀺 ‘‘𑀤𑁆𑀯𑀻𑀳𑀺 𑀘𑀢𑀽𑀳𑀺 𑀢𑀺𑀳𑀺 𑀏𑀓𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀬𑀣𑀸𑀦𑀼𑀭𑀽𑀧𑀁. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂, 𑀏𑀢𑀲𑁆𑀫𑀺𑀁 𑀯𑀸 𑀲𑀫𑀣𑀯𑀺𑀘𑀸𑀭𑁂. 𑀯𑀺𑀦𑀺𑀘𑁆𑀙𑀬𑀦𑀬𑁄𑀢𑀺 𑀯𑀺𑀦𑀺𑀘𑁆𑀙𑀬𑁂 𑀦𑀬𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀯𑀺𑀢𑁆𑀣𑀸𑀭𑁄 𑀧𑀦𑀸’’𑀢𑀺𑀆𑀤𑀺.

𑁪𑁭. 𑀲𑀗𑁆𑀔𑁂𑀧𑀢𑁄𑀯 𑀯𑀼𑀢𑁆𑀢𑁄, 𑀦 𑀲𑀫𑀣𑀓𑁆𑀔𑀦𑁆𑀥𑀓𑁂 𑀯𑀺𑀬 𑀯𑀺𑀢𑁆𑀣𑀸𑀭𑀢𑁄. 𑀢𑀣𑀸𑀢𑀺 𑀇𑀫𑀺𑀦𑀸 ‘‘𑀥𑀫𑁆𑀫𑀸’’𑀢𑀺 𑀧𑀤𑀁 𑀆𑀓𑀟𑁆𑀠𑀢𑀺, 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀏𑀯𑀫𑀸𑀤𑀺𑀦𑀸 𑀇𑀫𑀺𑀦𑀸 𑀧𑀓𑀸𑀭𑁂𑀦𑀸𑀢𑀺 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀏𑀓𑀦𑁆𑀢𑀸𑀦𑀯𑀚𑁆𑀚𑀪𑀸𑀯𑀢𑁄 𑀦𑀢𑁆𑀣𑀺 𑀅𑀥𑀫𑁆𑀫𑀪𑀸𑀯𑁄, 𑀪𑀕𑀯𑀢𑁄 𑀤𑁂𑀲𑀺𑀢𑀸𑀓𑀸𑀭𑀁 𑀳𑀸𑀧𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀯𑀸 𑀓𑀣𑀦𑀁 𑀬𑀣𑀸𑀥𑀫𑁆𑀫𑀁 𑀅𑀓𑀢𑀦𑁆𑀢𑀺 𑀓𑀢𑁆𑀯𑀸 𑀅𑀥𑀫𑁆𑀫𑀪𑀸𑀯𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺.

𑀦𑀺𑀬𑁆𑀬𑀸𑀦𑀺𑀓𑀦𑁆𑀢𑀺 𑀲𑀧𑀸𑀝𑀺𑀳𑀻𑀭𑀁 𑀅𑀧𑁆𑀧𑀝𑀺𑀯𑀸𑀦𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀢𑀣𑁂𑀯𑀸𑀢𑀺 𑀇𑀫𑀺𑀦𑀸 ‘‘𑀏𑀯𑀁 𑀅𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀆𑀓𑀟𑁆𑀠𑀢𑀺. 𑀪𑀽𑀢𑁂𑀦…𑀧𑁂… 𑀓𑀸𑀢𑀩𑁆𑀩𑀓𑀫𑁆𑀫𑀁 𑀥𑀫𑁆𑀫𑁄 𑀦𑀸𑀫 𑀬𑀣𑀸𑀥𑀫𑁆𑀫𑀁 𑀓𑀭𑀡𑀢𑁄, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀇𑀢𑁄 𑀧𑀭𑀁 𑀅𑀥𑀫𑁆𑀫𑁄. 𑀅𑀬𑀁 𑀯𑀺𑀦𑀬𑁄 𑀦𑀸𑀫 𑀭𑀸𑀕𑀸𑀤𑀻𑀦𑀁 𑀲𑀁𑀯𑀭𑀡𑀢𑁄 𑀧𑀳𑀸𑀦𑀢𑁄 𑀧𑀝𑀺𑀲𑀗𑁆𑀔𑀸𑀦𑀢𑁄 𑀘. 𑀅𑀬𑀁 𑀅𑀯𑀺𑀦𑀬𑁄 𑀦𑀸𑀫 𑀭𑀸𑀕𑀸𑀤𑀻𑀦𑀁 𑀅𑀯𑀺𑀦𑀬𑀦𑀢𑁄. 𑀅𑀬𑀁 𑀯𑀺𑀦𑀬𑁄 𑀦𑀸𑀫 𑀬𑀣𑀸𑀯𑀺𑀦𑀬𑀓𑀭𑀡𑀢𑁄, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀇𑀢𑀭𑁄 𑀅𑀯𑀺𑀦𑀬𑁄. 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀆𑀤𑀺𑀦𑀸 𑀏𑀯 𑀲𑀩𑁆𑀩𑁂𑀲𑀁 𑀯𑀺𑀦𑀬𑀓𑀫𑁆𑀫𑀸𑀦𑀁 𑀅𑀓𑀼𑀧𑁆𑀧𑀢𑀸𑀢𑀺 𑀆𑀳 𑁋 ‘‘𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺…𑀧𑁂… 𑀅𑀬𑀁 𑀯𑀺𑀦𑀬𑁄 𑀦𑀸𑀫𑀸’’𑀢𑀺, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀯𑀺𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀯𑀢𑁆𑀣𑀼𑀯𑀺𑀧𑀢𑁆𑀢𑀻’’𑀢𑀺𑀆𑀤𑀺.

𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀦𑀬𑀦𑀝𑁆𑀞𑁂𑀦 𑀬𑀣𑀸𑀯𑀼𑀢𑁆𑀢𑁄 𑀥𑀫𑁆𑀫𑁄 𑀏𑀯 𑀦𑁂𑀢𑁆𑀢𑀺, 𑀢𑀢𑁄 𑀏𑀯 𑀲𑀢𑁆𑀢𑀲𑁆𑀲 𑀯𑀺𑀬 𑀭𑀚𑁆𑀚𑀼 𑀅𑀲𑀺𑀣𑀺𑀮𑀧𑀯𑀢𑁆𑀢𑀺𑀳𑁂𑀢𑀼𑀢𑀸𑀬 𑀥𑀫𑁆𑀫𑀭𑀚𑁆𑀚𑀽𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀢𑀸𑀯 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀥𑀫𑁆𑀫𑁄𑀢𑀺 𑀏𑀯𑀁 𑀯𑀼𑀢𑁆𑀢𑀸. 𑀲𑀸 𑀏𑀯 𑀯𑀸 𑀳𑁄𑀢𑀼 𑀥𑀫𑁆𑀫𑀦𑁂𑀢𑁆𑀢𑀺, 𑀬𑁄 𑀇𑀥 𑀇𑀫𑀺𑀲𑁆𑀲𑀸 𑀯𑀡𑁆𑀡𑀦𑀸𑀬, ‘‘𑀙𑀢𑁆𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀥𑀫𑁆𑀫𑁂𑀦 𑀘 𑀯𑀺𑀦𑀬𑁂𑀦 𑀘 𑀯𑀼𑀢𑁆𑀢𑁄, 𑀲𑁄 𑀏𑀯 𑀯𑀸 𑀥𑀫𑁆𑀫𑀦𑁂𑀢𑁆𑀢𑀺 𑀳𑁄𑀢𑀽𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀢𑀸𑀬 𑀥𑀫𑁆𑀫𑀦𑁂𑀢𑁆𑀢𑀺𑀬𑀸 𑀲𑀫𑁂𑀢𑀺 𑀢𑀸𑀬 𑀬𑀣𑀸𑀯𑀼𑀢𑁆𑀢𑀸𑀬 𑀥𑀫𑁆𑀫𑀦𑁂𑀢𑁆𑀢𑀺𑀬𑀸 𑀲𑀁𑀲𑀦𑁆𑀤𑀢𑀺, 𑀏𑀓𑀮𑀓𑁆𑀔𑀡𑀫𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀺𑀯𑀸𑀤𑀯𑀢𑁆𑀣𑀼𑀪𑀽𑀢𑁄 𑀥𑀫𑁆𑀫𑁄 𑀘𑁂 ‘‘𑀥𑀫𑁆𑀫𑁄’’𑀢𑀺, 𑀅𑀥𑀫𑁆𑀫𑁄 𑀘𑁂 ‘‘𑀅𑀥𑀫𑁆𑀫𑁄’’𑀢𑀺, 𑀯𑀺𑀦𑀬𑁄 𑀘𑁂 ‘‘𑀯𑀺𑀦𑀬𑁄’’𑀢𑀺, 𑀅𑀯𑀺𑀦𑀬𑁄 𑀘𑁂 ‘‘𑀅𑀯𑀺𑀦𑀬𑁄’’𑀢𑀺 𑀦𑀺𑀘𑁆𑀙𑀺𑀦𑀦𑁆𑀢𑁂𑀦 𑀏𑀓𑀘𑁆𑀘𑀸𑀦𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀫𑁂𑀯 𑀤𑀲𑁆𑀲𑀺𑀢𑀁 𑀢𑀲𑁆𑀲 𑀯𑀽𑀧𑀲𑀫𑀥𑀫𑁆𑀫𑀸𑀦𑀁 𑀅𑀧𑀭𑀺𑀬𑁄𑀲𑀸𑀧𑀺𑀢𑀢𑁆𑀢𑀸.

𑁪𑁮. 𑀢𑀁 𑀧𑀦𑁂𑀢𑀦𑁆𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀧𑀘𑁆𑀘𑀸𑀫𑀲𑀢𑀺. 𑀯𑀸𑀭𑁂 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀧𑀢𑁆𑀢𑁂𑀧𑀺. 𑀤𑁆𑀯𑀻𑀳𑀻𑀢𑀺 𑀬𑀲𑁆𑀫𑀺𑀁 𑀆𑀯𑀸𑀲𑁂 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁆𑀣 𑀯𑀸𑀲𑀻𑀳𑀺 𑀤𑁆𑀯𑀻𑀳𑀺𑀧𑀺 𑀪𑀺𑀓𑁆𑀔𑀽𑀳𑀺 𑀅𑀢𑀺𑀭𑁂𑀓𑀢𑀭𑀸.

𑁪𑁯. 𑀔𑀦𑁆𑀥𑀲𑀸𑀫𑀦𑁆𑀢𑀦𑁆𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀪𑀸𑀯𑁂𑀦 𑀲𑀫𑀻𑀧𑀁. 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀁 𑀦𑀸𑀫 𑀧𑀼𑀩𑁆𑀩𑀪𑀸𑀕𑀸 𑀆𑀧𑀚𑁆𑀚𑀺𑀢𑀩𑁆𑀩𑀆𑀧𑀢𑁆𑀢𑀺. 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀓𑀸𑀬𑀲𑀁𑀲𑀕𑁆𑀕𑁂 𑀤𑀼𑀓𑁆𑀓𑀝𑀲𑁆𑀲 𑀯𑀢𑁆𑀣𑀽𑀢𑀺 𑀆𑀳 𑁋 ‘‘𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀤𑀼𑀓𑁆𑀓𑀝’’𑀦𑁆𑀢𑀺. 𑀲𑁂𑀲𑀸𑀦𑀁 𑀢𑀺𑀡𑁆𑀡𑀁 𑀧𑀸𑀭𑀸𑀚𑀺𑀓𑀸𑀦𑀁 𑀧𑀼𑀩𑁆𑀩𑀪𑀸𑀕𑁂 𑀣𑀼𑀮𑁆𑀮𑀘𑁆𑀘𑀬𑀫𑁂𑀯.

𑁫𑁦. 𑀧𑀭𑀺𑀓𑁆𑀓𑀫𑀺𑀢𑁆𑀯𑀸 𑀉𑀧𑀓𑁆𑀓𑀫𑀺𑀢𑁆𑀯𑀸. 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀤𑀲𑁆𑀲𑀺𑀢𑀁 𑀢𑀢𑁆𑀣𑁂𑀯 𑀯𑀺𑀲𑁂𑀲𑀢𑁄 𑀧𑀝𑀺𑀜𑁆𑀜𑀸𑀬 𑀓𑀸𑀭𑁂𑀢𑀩𑁆𑀩𑀢𑀸𑀬 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸.

𑁫𑁨. 𑀓𑀫𑁆𑀫𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑀺𑀢𑀁 𑀦 𑀲𑀫𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀘𑀸𑀬𑀁 𑀲𑀫𑀣𑀸𑀥𑀺𑀓𑀸𑀭𑁄𑀢𑀺? 𑀲𑀘𑁆𑀘𑀁, 𑀲𑀫𑀣𑀲𑁆𑀲 𑀧𑀦 𑀓𑀸𑀭𑀡𑁂 𑀤𑀲𑁆𑀲𑀺𑀢𑁂 𑀲𑀫𑀣𑁄 𑀤𑀲𑁆𑀲𑀺𑀢𑁄𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀭𑀽𑀧𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁫𑁩. 𑀇𑀤𑀁 𑀓𑀫𑁆𑀫𑀦𑁆𑀢𑀺 ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀪𑀡𑁆𑀟𑀦𑀚𑀸𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀓𑀫𑁆𑀫𑀁. 𑀢𑀺𑀡𑀯𑀢𑁆𑀣𑀸𑀭𑀓𑀲𑀤𑀺𑀲𑀢𑁆𑀢𑀸𑀢𑀺 𑀢𑀁𑀲𑀤𑀺𑀲𑀢𑀸𑀬 𑀢𑀩𑁆𑀩𑁄𑀳𑀸𑀭𑁄𑀢𑀺 𑀤𑀲𑁆𑀲𑁂𑀢𑀺 𑀬𑀣𑀸 𑁋 ‘‘𑀏𑀲 𑀩𑁆𑀭𑀳𑁆𑀫𑀤𑀢𑁆𑀢𑁄’’𑀢𑀺. 𑀆𑀓𑀸𑀭𑀫𑀢𑁆𑀢𑀫𑁂𑀯 𑀢𑀺𑀡𑀯𑀢𑁆𑀣𑀸𑀭𑀓𑀓𑀫𑁆𑀫𑀁 𑀦𑀸𑀫, 𑀦 𑀧𑀦 𑀢𑀲𑁆𑀲 𑀲𑀩𑁆𑀩𑀲𑁄 𑀓𑀭𑀡𑀯𑀺𑀥𑀸𑀦𑀁. 𑀢𑁂𑀦𑀸𑀳 ‘‘𑀔𑀦𑁆𑀥𑀓𑁂’’𑀢𑀺𑀆𑀤𑀺. 𑀕𑀺𑀳𑀻𑀦𑀁 𑀳𑀻𑀦𑁂𑀦 𑀔𑀼𑀁𑀲𑀦𑀯𑀫𑁆𑀪𑀦𑀁 𑀬𑀣𑀸 ‘‘𑀢𑀺𑀮𑀲𑀁𑀕𑀼𑀴𑀺𑀓𑀸 𑀦𑀢𑁆𑀣𑀻’’𑀢𑀺. 𑀥𑀫𑁆𑀫𑀺𑀓𑀧𑀝𑀺𑀲𑁆𑀲𑀯𑁂𑀲𑀼 𑀯𑀺𑀲𑀁𑀯𑀸𑀤𑀦𑀯𑀲𑁂𑀦 𑀆𑀧𑀦𑁆𑀦𑀸 𑀆𑀧𑀢𑁆𑀢𑀺. 𑀅𑀲𑁆𑀲𑀸𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲. 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀯𑀽𑀧𑀲𑀫𑁄 𑀲𑀗𑁆𑀖𑀲𑀫𑁆𑀫𑀼𑀔𑀢𑀸𑀤𑀺𑀦𑀸𑀯 𑀯𑀽𑀧𑀲𑀫𑀦𑀢𑁄.

𑁫𑁪. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀯𑀘𑀦𑀢𑁄 𑀓𑁄𑀲𑀫𑁆𑀩𑀺𑀬𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁪𑁯𑁨) 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀓𑀣𑀺𑀢𑀸, 𑀇𑀥 𑀧𑀦 ‘‘𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀢𑁆𑀢𑀸, ‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀧𑀸𑀧𑀓𑀫𑁆𑀫𑀲𑁆𑀲 𑀅𑀧𑁆𑀧𑀢𑀸 𑀫𑀳𑀦𑁆𑀢𑀢𑀸 𑀲𑀸𑀯𑀚𑁆𑀚𑀪𑀸𑀯𑀲𑁆𑀲 𑀫𑀼𑀤𑀼𑀢𑀺𑀓𑁆𑀔𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀅𑀡𑀼𑀦𑁆𑀢𑀺 𑀅𑀧𑁆𑀧𑀲𑀸𑀯𑀚𑁆𑀚𑀁. 𑀣𑀽𑀮𑀦𑁆𑀢𑀺 𑀫𑀳𑀸𑀲𑀸𑀯𑀚𑁆𑀚’’𑀦𑁆𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀸𑀫𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀲𑀼𑀦𑀓𑁆𑀔𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀳𑀺 𑀜𑀸𑀢𑀫𑀭𑀺𑀬𑀸𑀤𑀸𑀬 𑀧𑀚𑀸𑀦𑀦𑀢𑁄 𑀅𑀜𑁆𑀜𑀸, 𑀫𑀕𑁆𑀕𑀧𑀜𑁆𑀜𑀸. 𑀢𑀲𑁆𑀲 𑀨𑀮𑀪𑀸𑀯𑀢𑁄 𑀅𑀕𑁆𑀕𑀨𑀮𑀧𑀜𑁆𑀜𑀸, 𑀢𑀁𑀲𑀳𑀕𑀢𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀘 ‘‘𑀅𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀅𑀜𑁆𑀜𑀸𑀢𑀺 𑀅𑀭𑀳𑀢𑁆𑀢’’𑀦𑁆𑀢𑀺. 𑀘𑀢𑀽𑀳𑀺 𑀧𑀤𑁂𑀳𑀺 𑀓𑀣𑀺𑀢𑀸, ‘‘𑀧𑀭𑀺𑀘𑀺𑀡𑁆𑀡𑀸 𑀫𑁂 𑀪𑀕𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀦 𑀏𑀓𑀧𑀤𑁂𑀦𑁂𑀯. ‘‘𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀅𑀥𑀺𑀕𑀢𑁄 𑀫𑀬𑀸’’𑀢𑀺 𑀫𑀜𑁆𑀜𑀦𑀸𑀫𑀢𑁆𑀢𑀁 𑀅𑀥𑀺𑀫𑀸𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀦𑁄’’𑀢𑀺𑀆𑀤𑀺𑀫𑀸𑀳.

𑁫𑁬. 𑀇𑀤𑀁 𑀞𑀸𑀦𑀦𑁆𑀢𑀺 𑀇𑀤𑀁 𑀑𑀪𑀸𑀲𑀸𑀤𑀺𑀲𑀫𑁆𑀫𑀼𑀢𑀺𑀳𑁂𑀢𑀼𑀪𑀽𑀢𑀁 𑀉𑀴𑀸𑀭𑀢𑀭𑀁 𑀉𑀤𑀬𑀩𑁆𑀩𑀬𑀜𑀸𑀡𑀁. 𑀉𑀴𑀸𑀭𑀢𑀭𑀪𑀸𑀯𑁂𑀦 𑀳𑀺 𑀢𑀁 𑀫𑀕𑁆𑀕𑀨𑀮𑀧𑀜𑁆𑀜𑀸𑀬 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀬𑀸𑀣𑀸𑀯𑀢𑁄 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑀸𑀬 𑀯𑀺𑀧𑀲𑁆𑀲𑀓𑀁 𑀯𑀺𑀲𑀁𑀯𑀸𑀤𑁂𑀢𑀺. 𑀢𑁂𑀦𑀸𑀳 ‘‘𑀅𑀯𑀺𑀪𑀽𑀢𑀁 𑀅𑀦𑁆𑀥𑀓𑀸𑀭’’𑀦𑁆𑀢𑀺. 𑀇𑀫𑀁 𑀧𑀜𑁆𑀳𑀦𑁆𑀢𑀺 𑀇𑀫𑀁 𑀲𑀼𑀢𑁆𑀢𑀁 𑀕𑀫𑁆𑀪𑀻𑀭𑀁 𑀮𑁄𑀓𑀼𑀢𑁆𑀢𑀭𑀧𑀝𑀺𑀲𑀁𑀬𑀼𑀢𑁆𑀢𑀁 𑀅𑀢𑁆𑀢𑀦𑀸 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁 𑀅𑀢𑁆𑀣𑀁. 𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀓𑁂𑀯𑀮𑀁 𑀧𑀺𑀝𑀓𑀲𑀫𑁆𑀧𑀸𑀤𑀦𑀯𑀲𑁂𑀦𑁂𑀯 𑀉𑀕𑁆𑀕𑀡𑁆𑀳𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀚𑀸𑀦𑀺𑀢𑁆𑀯𑀸’’𑀢𑀺. 𑀯𑀺𑀲𑁂𑀯𑀫𑀸𑀦𑀸𑀢𑀺 𑀓𑀺𑀮𑁂𑀲𑀯𑀺𑀲𑁂 𑀅𑀯𑀫𑀸𑀦𑁂𑀦𑁆𑀢𑀸, 𑀲𑀸𑀲𑀦𑀲𑁆𑀲 𑀯𑀸 𑀅𑀦𑀼𑀧𑀓𑀸𑀭𑀯𑀺𑀭𑀽𑀧𑀧𑀘𑁆𑀘𑀬𑁂 𑀲𑁂𑀯𑀫𑀸𑀦𑀸. 𑀏𑀯𑀫𑀲𑁆𑀲𑀸𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀢𑁂𑀲𑀁 𑀓𑀭𑀡𑀳𑁂𑀢𑀼 𑀅𑀲𑁆𑀲 𑀘𑀺𑀢𑁆𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀲𑁆𑀲. 𑀅𑀜𑁆𑀜𑀣𑀸𑀪𑀸𑀯𑁄 𑀅𑀤𑁂𑀲𑁂𑀢𑀼𑀓𑀸𑀫𑀢𑀸 𑀳𑁄𑀢𑀺. 𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀦𑁆𑀥𑀸𑀬. 𑀏𑀢𑀦𑁆𑀢𑀺 ‘‘𑀢𑀲𑁆𑀲𑀧𑀺 𑀳𑁄𑀢𑀺 𑀅𑀜𑁆𑀜𑀣𑀢𑁆𑀢’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁.

𑁫𑁮. 𑀓𑀺𑀮𑁂𑀲𑁂𑀳𑀺 𑀆𑀫𑀲𑀻𑀬𑀢𑀻𑀢𑀺 𑀆𑀫𑀺𑀲𑀁, 𑀮𑁄𑀓𑁂𑀧𑀭𑀺𑀬𑀸𑀧𑀦𑁆𑀦𑀁 𑀆𑀫𑀺𑀲𑀦𑁆𑀢𑀺 𑀇𑀥 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀢𑁂𑀲𑀼 𑀯𑀝𑁆𑀝𑀸𑀫𑀺𑀲𑀪𑀸𑀯𑁂𑀧𑀺 𑀮𑀪𑀺𑀢𑁂 𑀓𑀸𑀫𑀸𑀫𑀺𑀲𑀪𑀸𑀯𑁄 𑀲𑀺𑀤𑁆𑀥𑁄𑀢𑀺 𑀆𑀳 𑁋 ‘‘𑀯𑀝𑁆𑀝𑀸𑀫𑀺𑀲𑀓𑀸𑀫𑀸𑀫𑀺𑀲𑀮𑁄𑀓𑀸𑀫𑀺𑀲𑀪𑀽𑀢𑁂𑀲𑀽’’𑀢𑀺. 𑀓𑀸𑀫𑀕𑀼𑀡𑀸 𑀳𑀺 𑀯𑀝𑁆𑀝𑀲𑁆𑀲 𑀯𑀟𑁆𑀠𑀦𑀢𑁄 𑀯𑀝𑁆𑀝𑀸𑀫𑀺𑀲𑀁, 𑀓𑀸𑀫𑁂𑀢𑀩𑁆𑀩𑀢𑁄 𑀓𑀸𑀫𑀢𑀡𑁆𑀳𑀸𑀬 𑀆𑀫𑀲𑀺𑀢𑀩𑁆𑀩𑀢𑁄 𑀓𑀸𑀫𑀸𑀫𑀺𑀲𑀁, 𑀬𑁂𑀪𑀽𑀬𑁆𑀬𑀢𑁄 𑀲𑀢𑁆𑀢𑀮𑁄𑀓𑀲𑁆𑀲 𑀆𑀫𑀺𑀲𑀪𑀸𑀯𑀢𑁄 𑀮𑁄𑀓𑀸𑀫𑀺𑀲𑀁. 𑀓𑀸𑀫𑀕𑀼𑀡𑀲𑀪𑀸𑀕𑀸𑀢𑀺 𑀓𑀸𑀫𑀕𑀼𑀡𑀸𑀦𑀼𑀮𑁄𑀫𑀸 𑀓𑀸𑀫𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀸. 𑀆𑀦𑁂𑀜𑁆𑀚𑀲𑀫𑀸𑀧𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀬𑀸𑀢𑀺 𑀓𑀺𑀮𑁂𑀲𑀺𑀜𑁆𑀚𑀦𑀭𑀳𑀺𑀢𑀢𑀸𑀬 𑀇𑀥 𑀆𑀦𑁂𑀜𑁆𑀚𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀳𑀺 𑀳𑁂𑀝𑁆𑀞𑀺𑀫𑀸𑀳𑀺 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀳𑀺 𑀧𑀝𑀺𑀲𑀁𑀬𑀼𑀢𑁆𑀢𑀸𑀬. 𑀏𑀯𑀭𑀽𑀧𑁄𑀢𑀺 𑀮𑁄𑀓𑀸𑀫𑀺𑀲𑀪𑀽𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀅𑀥𑀺𑀫𑀼𑀢𑁆𑀢𑁄 𑀢𑀦𑁆𑀦𑀺𑀦𑁆𑀦𑁄 𑀢𑀕𑁆𑀕𑀭𑀼𑀓𑁄 𑀢𑀧𑁆𑀧𑀩𑁆𑀪𑀸𑀭𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀯𑀁 𑀲𑀤𑁆𑀥𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀤𑀲𑁆𑀲𑀦𑁂𑀦 𑀢𑁂𑀲𑀁 𑀧𑀯𑀢𑁆𑀢𑀺𑀢𑀸𑀲𑀬𑁂𑀦 𑀘. 𑀲𑀻𑀲𑀁 𑀦𑀺𑀓𑁆𑀔𑀦𑁆𑀢𑀁 𑀳𑁄𑀢𑀻𑀢𑀺 𑀮𑀸𑀪𑀸𑀲𑀸𑀬 𑀲𑀻𑀲𑀁 𑀩𑀳𑀺 𑀦𑀺𑀓𑁆𑀔𑀦𑁆𑀢𑀁 𑀯𑀺𑀬 𑀳𑁄𑀢𑀺. 𑀉𑀤𑀭𑀁 𑀨𑀮𑀺𑀢𑀦𑁆𑀢𑀺 𑀅𑀢𑀺𑀩𑀳𑀼𑀪𑀡𑁆𑀟𑀁 𑀧𑀓𑁆𑀔𑀺𑀧𑀺𑀬𑀫𑀸𑀦𑀁 𑀧𑀲𑀺𑀩𑁆𑀩𑀓𑀁 𑀯𑀺𑀬 𑀮𑀤𑁆𑀥𑀩𑁆𑀩𑀲𑁆𑀲 𑀅𑀢𑀺𑀧𑀳𑀽𑀢𑀪𑀸𑀯𑁂𑀦 𑀉𑀤𑀭𑀁 𑀨𑀻𑀢𑀁 𑀳𑁄𑀢𑀺.

𑁫𑁯. 𑀬𑀣𑀸 𑀧𑀼𑀭𑀺𑀫𑀸 𑀤𑁆𑀯𑁂 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀅𑀦𑀺𑀜𑁆𑀚𑀦𑀢𑁄 ‘‘𑀅𑀦𑀺𑀜𑁆𑀚𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀇𑀢𑀭𑀸𑀧𑀺. 𑀢𑀁 𑀧𑀯𑀼𑀢𑁆𑀢𑀦𑁆𑀢𑀺 𑀮𑁄𑀓𑀸𑀫𑀺𑀲𑀲𑀁𑀬𑁄𑀚𑀦𑀁 𑀯𑀺𑀕𑀢𑀁.

𑁬𑁦. 𑀦𑀺𑀖𑀁𑀲𑀦𑁆𑀢𑀺 ‘‘𑀏𑀢𑁆𑀢𑀓𑁄 𑀅𑀬’’𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀅𑀢𑁆𑀣𑁄. 𑀲𑀺𑀮𑁂𑀲𑁂𑀦𑀸𑀢𑀺 𑀘𑀫𑁆𑀫𑀓𑀸𑀭𑀲𑀺𑀮𑁂𑀲𑀸𑀤𑀺𑀲𑀺𑀮𑁂𑀲𑁂𑀦, 𑀯𑀚𑀺𑀭𑀮𑁂𑀧𑀲𑀺𑀮𑁂𑀲𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀁 𑀪𑀺𑀦𑁆𑀦𑀦𑁆𑀢𑀺 𑀆𑀦𑁂𑀜𑁆𑀚𑀲𑀁𑀬𑁄𑀚𑀦𑀁 𑀪𑀺𑀦𑁆𑀦𑀁 𑀯𑀺𑀥𑀫𑀺𑀢𑀁 𑀲𑀫𑀢𑀺𑀓𑁆𑀓𑀦𑁆𑀢𑀁 𑀢𑀸𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀅𑀧𑁂𑀓𑁆𑀔𑀸𑀪𑀸𑀯𑀢𑁄. 𑀅𑀚𑁆𑀛𑀸𑀲𑀬𑁂𑀦 𑀅𑀲𑀫𑁆𑀩𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀤𑁆𑀯𑁂𑀥𑀸𑀪𑀺𑀦𑁆𑀦𑀸 𑀲𑁂𑀮𑀸 𑀯𑀺𑀬 𑀳𑁄𑀢𑀻’’𑀢𑀺. 𑀢𑁂𑀦𑀸𑀳 𑁋 ‘‘𑀢𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀻’’𑀢𑀺.

𑁬𑁧. 𑀯𑀦𑁆𑀢𑀦𑁆𑀢𑀺 𑀙𑀟𑁆𑀟𑀺𑀢𑀁, 𑀯𑀺𑀲𑁆𑀲𑀝𑁆𑀞𑀦𑁆𑀢𑀺 𑀅𑀢𑁆𑀣𑁄.

𑁬𑁨. 𑀉𑀧𑀭𑀺𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄𑀢𑀺 𑀏𑀢𑁆𑀣 𑀉𑀧𑀭𑀺𑀲𑀫𑀸𑀧𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀅𑀭𑀳𑀢𑁄 𑀘 𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 𑀅𑀦𑀸𑀕𑀸𑀫𑀺𑀨𑀮𑀲𑀫𑀸𑀧𑀢𑁆𑀢𑀺, 𑀲𑁂𑀓𑁆𑀔𑀸𑀦𑀁 𑀯𑀺𑀲𑀬𑀸 𑀳𑁂𑀝𑁆𑀞𑀺𑀫𑀸 𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸. 𑀮𑁄𑀓𑀺𑀬𑀸 𑀧𑀦 𑀦𑀺𑀓𑀦𑁆𑀢𑀺𑀧𑁆𑀧𑀳𑀸𑀦𑁂𑀦 𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀢𑀺 𑀆𑀳 𑁋 ‘‘𑀳𑁂𑀝𑁆𑀞𑀸…𑀧𑁂… 𑀦 𑀉𑀧𑁆𑀧𑀚𑁆𑀚𑀢𑀻’’𑀢𑀺.

𑁬𑁩. ‘‘𑀧𑀜𑁆𑀘 𑀔𑁄 𑀇𑀫𑁂, 𑀲𑀼𑀦𑀓𑁆𑀔𑀢𑁆𑀢, 𑀓𑀸𑀫𑀕𑀼𑀡𑀸’’𑀢𑀺𑀆𑀤𑀺𑀦𑀸 𑀆𑀭𑀤𑁆𑀥𑀤𑁂𑀲𑀦𑀸, ‘‘𑀲𑀫𑁆𑀫𑀸 𑀦𑀺𑀩𑁆𑀩𑀸𑀦𑀸𑀥𑀺𑀫𑀼𑀢𑁆𑀢𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’’𑀢𑀺 𑀅𑀭𑀳𑀢𑁆𑀢𑀓𑀺𑀢𑁆𑀢𑀦𑁂𑀦 𑀦𑀺𑀝𑁆𑀞𑀸𑀧𑀺𑀢𑀸𑀢𑀺 𑀢𑀢𑁄 𑀧𑀭𑀁, ‘‘𑀞𑀸𑀦𑀁 𑀔𑁄 𑀧𑀦𑀸’’𑀢𑀺𑀆𑀤𑀺𑀓𑀸 𑀤𑁂𑀲𑀦𑀸, ‘‘𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀻’’𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀳𑁂𑀝𑁆𑀞𑀸 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀬𑀣𑀸 𑀔𑀻𑀡𑀸𑀲𑀯𑀲𑁆𑀲 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄𑀢𑀺 𑀬𑁄𑀚𑀦𑀸, 𑀏𑀯𑀁 𑀯𑀸 𑀔𑀻𑀡𑀸𑀲𑀯𑀲𑁆𑀲 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲𑀸𑀢𑀺 𑀬𑁄𑀚𑁂𑀢𑀩𑁆𑀩𑀸. 𑀧𑀝𑀺𑀓𑁆𑀔𑀺𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁. 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀅𑀥𑀺𑀫𑀸𑀦𑀺𑀓𑁄 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀲𑀫𑀸𑀦𑀬𑁄𑀕𑀓𑁆𑀔𑀫𑁄 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀢𑀸𑀬 𑀪𑁂𑀤𑀸𑀪𑀸𑀯𑀢𑁄, 𑀏𑀯𑀁 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀔𑀻𑀡𑀸𑀲𑀯𑁄 𑀲𑀫𑀸𑀦𑀬𑁄𑀕𑀓𑁆𑀔𑀫𑁄 𑀔𑀻𑀡𑀸𑀲𑀯𑀪𑀸𑀯𑁂𑀦 𑀯𑀺𑀲𑁂𑀲𑀸𑀪𑀸𑀯𑀢𑁄, 𑀢𑀲𑁆𑀫𑀸 ‘‘𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀫𑁆𑀳𑀺 𑀓𑀣𑀺𑀢𑁂 𑀇𑀢𑀭𑁄𑀧𑀺 𑀓𑀣𑀺𑀢𑁄𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀅𑀥𑀺𑀫𑀸𑀦𑀺𑀓𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀘. 𑀢𑁂𑀦𑁂𑀯𑀸𑀳 ‘‘𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑀸𑀯𑀸’’𑀢𑀺𑀆𑀤𑀺.

𑀬𑀤𑀕𑁆𑀕𑁂𑀦𑀸𑀢𑀺 𑀬𑁂𑀦 𑀪𑀸𑀕𑁂𑀦. 𑀬𑀤𑀺𑀧𑀺 𑀔𑀻𑀡𑀸𑀲𑀯𑀲𑁆𑀲 𑀅𑀲𑀧𑁆𑀧𑀸𑀬𑀸𑀭𑀫𑁆𑀫𑀡𑀁 𑀓𑀺𑀮𑁂𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀦 𑀳𑁄𑀢𑀺 𑀢𑁂𑀲𑀁 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀲𑀦𑁆𑀢𑀯𑀺𑀳𑀸𑀭𑀧𑀭𑀺𑀧𑀦𑁆𑀣𑁄 𑀧𑀦 𑀲𑀺𑀬𑀸 𑀯𑀺𑀲𑀪𑀸𑀕𑀢𑁄𑀢𑀺 𑀯𑀼𑀢𑁆𑀢𑀁 𑁋 ‘‘𑀔𑀻𑀡𑀸𑀲𑀯𑀲𑁆𑀲𑀧𑀺 𑀅𑀲𑀧𑁆𑀧𑀸𑀬𑀫𑁂𑀯𑀸’’𑀢𑀺. 𑀢𑁂𑀦𑀸𑀳 𑁋 ‘‘𑀯𑀺𑀲𑀁 𑀦𑀸𑀫…𑀧𑁂… 𑀯𑀺𑀲𑀫𑁂𑀯𑀸’’𑀢𑀺. 𑀏𑀢𑁂𑀦 ‘‘𑀬𑀣𑀸 𑀯𑀺𑀲𑀚𑀸𑀦𑀦𑀁 𑀅𑀧𑁆𑀧𑀫𑀸𑀡𑀁, 𑀯𑀺𑀓𑀸𑀭𑀼𑀧𑁆𑀧𑀸𑀤𑀦𑀢𑁄 𑀧𑀦 𑀢𑀁 𑀧𑀭𑀺𑀳𑀭𑀺𑀢𑀩𑁆𑀩𑀁, 𑀏𑀯𑀁 𑀧𑀭𑀺𑀜𑁆𑀜𑀸𑀢𑀫𑁆𑀧𑀺 𑀯𑀢𑁆𑀢𑀼 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑁂𑀦 𑀏𑀓𑀭𑀽𑀧𑀫𑁂𑀯𑀸𑀢𑀺 𑀢𑀁 𑀧𑀭𑀺𑀳𑀭𑀺𑀢𑀩𑁆𑀩𑀫𑁂𑀯𑀸’’𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀦 𑀳𑀺 𑀅𑀲𑀁𑀯𑀼𑀢𑁂𑀦 𑀪𑀯𑀺𑀢𑀩𑁆𑀩𑀁 𑀅𑀲𑀸𑀭𑀼𑀧𑁆𑀧𑀪𑀸𑀯𑀢𑁄. 𑀬𑀼𑀢𑁆𑀢𑀧𑀬𑀼𑀢𑁆𑀢𑁂𑀦𑁂𑀯𑀸𑀢𑀺 𑀲𑀪𑀸𑀕𑀸𑀭𑀫𑁆𑀫𑀡𑀲𑁆𑀲 𑀆𑀮𑁄𑀓𑀦𑀸𑀤𑀻𑀲𑀼 𑀬𑀼𑀢𑁆𑀢𑁂𑀦𑁂𑀯 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺.

𑁬𑁪. 𑀬𑀢𑁆𑀣 𑀲𑀬𑀁 𑀦𑀺𑀧𑀢𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀦𑁆𑀢𑀸𑀦𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀯𑀲𑁂𑀦 𑀭𑀼𑀧𑁆𑀧𑀦𑀢𑁄, 𑀯𑀺𑀲𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀫𑀽𑀮𑀪𑀸𑀯𑀢𑁄 𑀘 ‘‘𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑁄 𑀯𑀺𑀲𑀤𑁄𑀲𑁄’’𑀢𑀺 𑀯𑀼𑀢𑁆𑀢𑀁. 𑀭𑀼𑀧𑁆𑀧𑀢𑀻𑀢𑀺 𑀓𑀢𑁆𑀢𑀩𑁆𑀩𑀸𑀤𑀺𑀫𑀼𑀘𑁆𑀙𑀸𑀧𑀸𑀤𑀦𑁂𑀦 𑀯𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑀺. 𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀯𑀺𑀩𑀸𑀥𑁂𑀬𑁆𑀬. 𑀭𑀸𑀕𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀑𑀓𑀸𑀲𑀁 𑀅𑀤𑁂𑀦𑁆𑀢𑁄 𑀢𑀁 𑀯𑀺𑀩𑀸𑀥𑀢𑀺; 𑀢𑀣𑀸𑀪𑀽𑀢𑁄 𑀲𑀤𑁆𑀥𑀸𑀲𑀺𑀦𑁂𑀳𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀺𑀯𑀼𑀟𑁆𑀠𑀺𑀬𑀸 𑀯𑀫𑀦𑁂𑀦 𑀘 𑀢𑀁 𑀯𑀺𑀲𑁄𑀲𑁂𑀢𑀺 𑀫𑀺𑀮𑀸𑀧𑁂𑀢𑀺. 𑀢𑁂𑀦𑀸𑀳 ‘‘𑀲𑁄𑀲𑁂𑀬𑁆𑀬 𑀫𑀺𑀮𑀸𑀧𑁂𑀬𑁆𑀬𑀸’’𑀢𑀺. 𑀲𑀕𑀳𑀡𑀲𑁂𑀲𑀦𑁆𑀢𑀺 𑀕𑀳𑁂𑀢𑀩𑁆𑀩𑀯𑀺𑀲𑀁 𑀲𑀸𑀯𑀲𑁂𑀲𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦 𑀅𑀮𑀁 𑀦 𑀲𑀫𑀢𑁆𑀣𑀦𑁆𑀢𑀺 𑀅𑀦𑀮𑀁. 𑀲𑀽𑀓𑀧𑀭𑀺𑀬𑀸𑀬𑁄 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄 𑀲𑀼𑀓-𑀲𑀤𑁆𑀤𑁄𑀢𑀺 𑀆𑀳 𑁋 ‘‘𑀯𑀻𑀳𑀺𑀲𑀼𑀓𑀸𑀤𑀺 𑀘 𑀲𑀽𑀓’’𑀦𑁆𑀢𑀺.

𑀲𑀉𑀧𑀸𑀤𑀸𑀦𑀲𑀮𑁆𑀮𑀼𑀤𑁆𑀥𑀸𑀭𑁄 𑀯𑀺𑀬 𑀅𑀧𑁆𑀧𑀳𑀻𑀦𑁄 𑀅𑀯𑀺𑀚𑁆𑀚𑀸𑀯𑀺𑀲𑀤𑁄𑀲𑁄 𑀤𑀝𑁆𑀞𑀩𑁆𑀩𑁄 𑀫𑀳𑀸𑀦𑀢𑁆𑀣𑀼𑀧𑁆𑀧𑀸𑀤𑀦𑀢𑁄. 𑀅𑀲𑀧𑁆𑀧𑀸𑀬…𑀧𑁂… 𑀅𑀲𑀁𑀯𑀼𑀢𑀓𑀸𑀮𑁄 𑀤𑀝𑁆𑀞𑀩𑁆𑀩𑁄 𑀅𑀢𑁆𑀢𑀪𑀸𑀯𑀲𑁆𑀲 𑀅𑀧𑀭𑀺𑀳𑀭𑀡𑀪𑀸𑀯𑀢𑁄. 𑀫𑀭𑀡𑀁 𑀯𑀺𑀬 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀦𑀁 𑀅𑀥𑀺𑀲𑀻𑀮𑀲𑀗𑁆𑀔𑀸𑀢𑀲𑁆𑀲 𑀆𑀬𑀼𑀦𑁄 𑀅𑀧𑁂𑀢𑀢𑁆𑀢𑀸. 𑀫𑀭𑀡𑀫𑀢𑁆𑀢𑀁 𑀤𑀼𑀓𑁆𑀔𑀁 𑀯𑀺𑀬 𑀆𑀧𑀢𑁆𑀢𑀺𑀬𑀸 𑀆𑀧𑀚𑁆𑀚𑀦𑀁 𑀬𑀣𑀸𑀯𑀼𑀢𑁆𑀢𑀲𑁆𑀲 𑀆𑀬𑀼𑀦𑁄 𑀉𑀧𑀧𑀻𑀴𑀦𑀓𑀪𑀸𑀯𑀢𑁄. 𑀇𑀫𑀺𑀦𑀸𑀯 𑀦𑀬𑁂𑀦 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀦𑁆𑀢𑀺 𑀏𑀢𑁆𑀣 𑀅𑀦𑀼𑀧𑀸𑀤𑀺𑀲𑁂𑀲𑀲𑀮𑁆𑀮𑀼𑀤𑁆𑀥𑀸𑀭𑁄 𑀯𑀺𑀬 𑀧𑀳𑀻𑀦𑁄 𑀅𑀯𑀺𑀚𑁆𑀚𑀸𑀯𑀺𑀲𑀤𑁄𑀲𑁄; 𑀲𑀧𑁆𑀧𑀸𑀬…𑀧𑁂… 𑀲𑀼𑀲𑀁𑀯𑀼𑀢𑀓𑀸𑀮𑁄, 𑀢𑀤𑀼𑀪𑀬𑁂𑀦 𑀯𑀡𑁂 𑀧𑀼𑀣𑀼𑀢𑁆𑀢𑀁 𑀦 𑀕𑀢𑁂 𑀫𑀭𑀡𑀸𑀪𑀸𑀯𑁄 𑀯𑀺𑀬 𑀲𑀺𑀓𑁆𑀔𑀸𑀬 𑀅𑀧𑀘𑁆𑀘𑀓𑁆𑀔𑀸𑀦𑀁, 𑀫𑀭𑀡𑀫𑀢𑁆𑀢𑀤𑀼𑀓𑁆𑀔𑀸𑀪𑀸𑀯𑁄 𑀯𑀺𑀬 𑀅𑀜𑁆𑀜𑀢𑀭𑀸𑀬 𑀲𑀁𑀓𑀺𑀮𑀺𑀝𑁆𑀞𑀸𑀬 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀚𑁆𑀚𑀦𑀦𑁆𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁬𑁫. 𑀲𑀢𑀺𑀬𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 ‘‘𑀅𑀭𑀺𑀬𑀸𑀬𑀸’’𑀢𑀺 𑀦 𑀯𑀺𑀲𑁂𑀲𑀺𑀢𑀦𑁆𑀢𑀺 𑀆𑀳 𑁋 ‘‘𑀲𑀢𑀺 𑀧𑀜𑁆𑀜𑀸𑀕𑀢𑀺𑀓𑀸’’𑀢𑀺𑀆𑀤𑀺. 𑀧𑀜𑁆𑀜𑀸 𑀘𑁂𑀢𑁆𑀣 𑀮𑁄𑀓𑀺𑀬𑀸 𑀅𑀥𑀺𑀧𑁆𑀧𑁂𑀢𑀸, 𑀦 𑀮𑁄𑀓𑀼𑀢𑁆𑀢𑀭𑀸𑀢𑀺 𑀆𑀳 𑁋 ‘‘𑀧𑀭𑀺𑀲𑀼𑀤𑁆𑀥𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬𑀸’’𑀢𑀺.

𑀔𑀻𑀡𑀸𑀲𑀯𑀲𑁆𑀲 𑀩𑀮𑀦𑁆𑀢𑀺 𑀉𑀴𑀸𑀭𑀢𑀫𑁂𑀲𑀼 𑀤𑀺𑀩𑁆𑀩𑀲𑀤𑀺𑀲𑁂𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀦𑀼𑀧𑀦𑀫𑀦𑀳𑁂𑀢𑀼𑀪𑀽𑀢𑀁 𑀲𑀼𑀲𑀁𑀯𑀼𑀢𑀓𑀸𑀭𑀺𑀲𑀗𑁆𑀔𑀸𑀢𑀁 𑀔𑀻𑀡𑀸𑀲𑀯𑀩𑀮𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀲𑀁𑀯𑀼𑀢𑀓𑀸𑀭𑀻’’𑀢𑀺 𑀯𑀼𑀢𑁆𑀢𑀁, 𑀉𑀓𑁆𑀓𑀁𑀲𑀕𑀢𑀲𑀢𑀺𑀯𑁂𑀧𑀼𑀮𑁆𑀮𑀢𑁆𑀢𑀸 𑀬𑀣𑀸 𑀅𑀲𑀁𑀯𑀭𑀲𑁆𑀲 𑀅𑀲𑀁𑀯𑀭𑁄 𑀳𑁄𑀢𑀺, 𑀏𑀯𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑀸𑀦𑀺 𑀲𑀁𑀯𑀭𑀺𑀢𑁆𑀯𑀸 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀓𑀸𑀭𑀻. 𑀏𑀯𑀁 𑀚𑀸𑀦𑀺𑀢𑁆𑀯𑀸𑀢𑀺 ‘‘𑀉𑀧𑀥𑀺 𑀤𑀼𑀓𑁆𑀔𑀲𑁆𑀲 𑀫𑀽𑀮’’𑀦𑁆𑀢𑀺 𑀏𑀯𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸. 𑀉𑀧𑀥𑀻𑀬𑀢𑀺 𑀤𑀼𑀓𑁆𑀔𑀁 𑀏𑀢𑁂𑀳𑀻𑀢𑀺 𑀉𑀧𑀥𑀻, 𑀓𑀺𑀮𑁂𑀲𑀸𑀢𑀺 𑀆𑀳 𑁋 ‘‘𑀓𑀺𑀮𑁂𑀲𑀼𑀧𑀥𑀺𑀧𑀳𑀸𑀦𑀸 𑀦𑀺𑀭𑀼𑀧𑀥𑀻’’𑀢𑀺. 𑀢𑀢𑁄 𑀏𑀯 𑀉𑀧𑀸𑀤𑀻𑀬𑀢𑀺 𑀤𑀼𑀓𑁆𑀔𑀁 𑀏𑀢𑁂𑀳𑀻𑀢𑀺 𑀓𑀺𑀮𑁂𑀲𑀸 ‘‘𑀉𑀧𑀸𑀤𑀸𑀦𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 𑁋 ‘‘𑀦𑀺𑀭𑀼𑀧𑀸𑀤𑀸𑀦𑁄𑀢𑀺 𑀅𑀢𑁆𑀣𑁄’’𑀢𑀺. 𑀉𑀧𑀥𑀻 𑀲𑀫𑁆𑀫𑀤𑁂𑀯 𑀔𑀻𑀬𑀦𑁆𑀢𑀺 𑀏𑀢𑁆𑀢𑀸𑀢𑀺 𑀉𑀧𑀥𑀺𑀲𑀗𑁆𑀔𑀬𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀆𑀳 𑁋 ‘‘𑀉𑀧𑀥𑀻𑀦𑀁 𑀲𑀗𑁆𑀔𑀬𑀪𑀽𑀢𑁂 𑀦𑀺𑀩𑁆𑀩𑀸𑀦𑁂’’𑀢𑀺. 𑀆𑀭𑀫𑁆𑀫𑀡𑀢𑁄𑀢𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑀤𑀸𑀭𑀫𑁆𑀫𑀡𑀸𑀬 𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁄. 𑀓𑀸𑀫𑀼𑀧𑀥𑀺𑀲𑁆𑀫𑀺𑀁 𑀓𑀸𑀬𑀁 𑀉𑀧𑀲𑀁𑀳𑀭𑀺𑀲𑁆𑀲𑀢𑀻𑀢𑀺 ‘‘𑀓𑀸𑀫𑁂𑀲𑁂𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀓𑀸𑀬𑀁 𑀉𑀧𑀦𑀸𑀫𑁂𑀲𑁆𑀲𑀢𑀺; 𑀓𑀸𑀬𑀽𑀧𑀲𑀁𑀳𑀸𑀭𑁄 𑀢𑀸𑀯 𑀢𑀺𑀝𑁆𑀞𑀢𑀼, 𑀢𑀣𑀸 𑀘𑀺𑀢𑁆𑀢𑀁 𑀯𑀸 𑀉𑀧𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀏𑀢𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀼𑀦𑀓𑁆𑀔𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀔𑀡𑀧𑀪𑀗𑁆𑀕𑀼𑀢𑀸𑀬 𑀦 𑀦𑀺𑀘𑁆𑀘𑀸 𑀦 𑀥𑀼𑀯𑀸𑀢𑀺 𑀅𑀦𑀺𑀘𑁆𑀘𑀸. 𑀢𑀢𑁄 𑀏𑀯 𑀧𑀡𑁆𑀟𑀺𑀢𑁂𑀳𑀺 𑀦 𑀇𑀘𑁆𑀘𑀸 𑀦 𑀉𑀧𑀕𑀦𑁆𑀢𑀩𑁆𑀩𑀸𑀢𑀺𑀧𑀺 𑀅𑀦𑀺𑀘𑁆𑀘𑀸. 𑀲𑁄 𑀘𑀸𑀬𑀁 𑀅𑀦𑀺𑀘𑁆𑀘𑀢𑁆𑀣𑁄 𑀉𑀤𑀬𑀯𑀬𑀧𑀭𑀺𑀘𑁆𑀙𑀺𑀦𑁆𑀦𑀢𑀸𑀬 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸’’𑀢𑀺 𑀆𑀳; 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀯𑀺𑀦𑀲𑁆𑀲𑀦𑀢𑁄𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀘 𑀅𑀦𑀺𑀘𑁆𑀘𑀢𑀸 𑀯𑀓𑁆𑀔𑀫𑀸𑀦𑀸 𑀘 𑀢𑀼𑀘𑁆𑀙𑀸𑀤𑀺𑀢𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀸𑀫𑀸𑀦𑀁 𑀲𑀸𑀥𑀸𑀭𑀡𑁄𑀢𑀺 𑀆𑀳 𑁋 ‘‘𑀯𑀢𑁆𑀣𑀼𑀓𑀸𑀫𑀸𑀧𑀺 𑀓𑀺𑀮𑁂𑀲𑀓𑀸𑀫𑀸𑀧𑀻’’𑀢𑀺. 𑀭𑀺𑀢𑁆𑀢𑀸 𑀯𑀺𑀯𑀺𑀢𑁆𑀢𑀸, 𑀢𑁂𑀲𑀁 𑀦𑀺𑀘𑁆𑀘𑀲𑀸𑀭𑀸𑀤𑀻𑀦𑀁 𑀅𑀢𑁆𑀢𑀦𑀺 𑀅𑀪𑀸𑀯𑀢𑁄 𑀢𑁂𑀳𑀺 𑀯𑀺𑀲𑀼𑀁𑀪𑀽𑀢𑀸. 𑀬𑀣𑀸 𑀧𑀦 𑀲𑀩𑁆𑀩𑀲𑁄 𑀲𑀪𑀸𑀯𑀭𑀳𑀺𑀢𑀫𑀸𑀓𑀸𑀲𑀁 ‘‘𑀢𑀼𑀘𑁆𑀙𑀁 𑀭𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀦 𑀏𑀯𑀫𑁂𑀢𑁂. 𑀏𑀢𑁂 𑀧𑀦 𑀓𑁂𑀯𑀮𑀁 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀢𑁄 𑀏𑀯 𑀢𑀼𑀘𑁆𑀙𑀸 𑀭𑀺𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀦 𑀳𑀺 𑀢𑀼𑀘𑁆𑀙𑀫𑀼𑀝𑁆𑀞𑀺 𑀦𑀸𑀫 𑀦𑀢𑁆𑀣𑀻’’𑀢𑀺 𑀇𑀤𑀁 𑀮𑁄𑀓𑀲𑀫𑀜𑁆𑀜𑀸𑀯𑀲𑁂𑀦 𑀯𑀼𑀢𑁆𑀢𑀁, 𑀮𑁄𑀓𑀲𑀫𑀜𑁆𑀜𑀸 𑀮𑁄𑀓𑀺𑀬𑀓𑀣𑀸 𑀦 𑀮𑀗𑁆𑀖𑀺𑀢𑀩𑁆𑀩𑀸.

𑀫𑀼𑀲𑀸𑀢𑀺 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸𑀬 𑀦 𑀤𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀫𑀼𑀲𑀸𑀢𑀺 𑀦𑀸𑀲𑀦𑀓𑀸’’𑀢𑀺. 𑀯𑀺𑀲𑀁𑀯𑀸𑀤𑀦𑀝𑁆𑀞𑁂𑀦 𑀯𑀸 𑀫𑀼𑀲𑀸. 𑀏𑀢𑁂 𑀳𑀺 𑀅𑀲𑀼𑀪𑀸𑀤𑀺𑀲𑀪𑀸𑀯𑀸𑀧𑀺 𑀩𑀸𑀮𑀸𑀦𑀁 𑀲𑀼𑀪𑀸𑀤𑀺𑀪𑀸𑀯𑁂𑀦 𑀉𑀧𑀝𑁆𑀞𑀳𑀦𑁆𑀢𑀸 𑀲𑀼𑀪𑀸𑀤𑀺𑀕𑁆𑀕𑀳𑀡𑀲𑁆𑀲 𑀧𑀘𑁆𑀘𑀓𑁆𑀔𑀪𑀸𑀯𑁂𑀦 𑀲𑀢𑁆𑀢𑁂 𑀯𑀺𑀲𑀁𑀯𑀸𑀤𑁂𑀦𑁆𑀢𑀺. 𑀦𑀲𑁆𑀲𑀦𑀲𑀪𑀸𑀯𑀸𑀢𑀺 𑀔𑀡𑀪𑀗𑁆𑀕𑀢𑁆𑀢𑀸 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀸𑀬 𑀤𑀺𑀲𑁆𑀲𑀫𑀸𑀦𑀸 𑀯𑀺𑀬𑀧𑀺 𑀳𑀼𑀢𑁆𑀯𑀸 𑀅𑀧𑀜𑁆𑀜𑀸𑀬𑀦𑀓𑀧𑀓𑀢𑀺𑀓𑀸. 𑀢𑁂𑀦𑀸𑀳 ‘‘𑀔𑁂𑀢𑁆𑀢𑀁 𑀯𑀺𑀬𑀸’’𑀢𑀺𑀆𑀤𑀺. 𑀥𑀫𑁆𑀫𑀲𑀤𑁆𑀤𑁄 𑀘𑁂𑀢𑁆𑀣 ‘‘𑀚𑀸𑀢𑀺𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁯𑁮) 𑀯𑀺𑀬 𑀧𑀓𑀢𑀺𑀧𑀭𑀺𑀬𑀸𑀬𑁄, 𑀢𑀣𑀸 𑀲𑀪𑀸𑀯𑀲𑀤𑁆𑀤𑁄 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀫𑁄𑀲𑀥𑀫𑁆𑀫𑀸𑀢𑀺 𑀫𑁄𑀲𑀦𑀧𑀓𑀢𑀺𑀓𑀸, 𑀓𑀼𑀲𑀮𑀪𑀡𑁆𑀟𑀳𑀭𑀡𑀲𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀫𑀸𑀬𑀸𑀓𑀢𑀦𑁆𑀢𑀺 𑀫𑀸𑀬𑀸𑀬 𑀓𑀢𑀁 𑀉𑀤𑀓𑀸𑀤𑀺𑀫𑀡𑀺𑀆𑀤𑀺𑀆𑀓𑀸𑀭𑁂𑀦 𑀫𑀸𑀬𑀸𑀤𑀺𑀦𑀸 𑀉𑀧𑀝𑁆𑀞𑀸𑀧𑀺𑀢𑀁; 𑀫𑀸𑀬𑀸𑀓𑀢𑀁 𑀯𑀺𑀬 𑀫𑀸𑀬𑀸𑀓𑀢𑀁 𑀅𑀜𑁆𑀜𑀲𑀪𑀸𑀯𑀸 𑀳𑀼𑀢𑁆𑀯𑀸 𑀅𑀢𑀣𑀸 𑀉𑀧𑀝𑁆𑀞𑀳𑀦𑀢𑁄. 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀘𑀓𑁆𑀔𑀼𑀧𑀣𑁂 𑀏𑀯 𑀓𑀢𑀯𑀺𑀚𑁆𑀚𑀸𑀬, 𑀦 𑀢𑀢𑁄 𑀧𑀭𑀦𑁆𑀢𑀺 𑀯𑀼𑀢𑁆𑀢𑀁 𑁋 ‘‘𑀤𑀲𑁆𑀲𑀦𑀽𑀧𑀘𑀸𑀭𑁂 𑀞𑀺𑀢𑀲𑁆𑀲𑁂𑀯 𑀢𑀣𑀸 𑀧𑀜𑁆𑀜𑀸𑀬𑀢𑀻’’𑀢𑀺. 𑀢𑀬𑀺𑀤𑀁 𑀲𑀫𑁆𑀩𑀭𑀯𑀺𑀚𑁆𑀚𑀸𑀯𑀲𑁂𑀦 𑀯𑀼𑀢𑁆𑀢𑀁.

𑀏𑀯𑀁 𑀢𑀸𑀯𑀓𑀸𑀮𑀺𑀓𑀪𑀸𑀯𑁂𑀦 𑀓𑀸𑀫𑀸𑀦𑀁 𑀫𑀸𑀬𑀸𑀓𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁄 𑀅𑀜𑁆𑀜𑁂𑀦𑀧𑀺 𑀧𑀓𑀸𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀸𑀦𑀁 𑀓𑀸𑀫𑀸𑀦𑀁 𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀤𑀲𑁆𑀲𑀦𑀁 𑀯𑀺𑀧𑀮𑁆𑀮𑀸𑀲𑀲𑀳𑀕𑀢𑀢𑀸𑀬 𑀯𑁂𑀤𑀺𑀢𑀩𑁆𑀩𑀁. 𑀩𑀸𑀮𑀸𑀦𑀁 𑀮𑀸𑀧𑀦𑀢𑁄𑀢𑀺 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀁 𑀅𑀦𑁆𑀥𑀩𑀸𑀮𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀢𑁄. 𑀫𑀦𑀼𑀲𑁆𑀲𑀮𑁄𑀓𑁂 𑀞𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀯𑀲𑁂𑀦 𑀪𑀕𑀯𑀢𑀸 𑀪𑀸𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀓𑀸𑀫𑀸𑀢𑀺 𑀫𑀸𑀦𑀼𑀲𑀓𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺. 𑀢𑀢𑁄 𑀏𑀯 𑀘 ‘‘𑀲𑀫𑁆𑀧𑀭𑀸𑀬𑀺𑀓𑀸𑀢𑀺 𑀢𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀸 𑀧𑀘𑁆𑀘𑀓𑁆𑀔𑀲𑀪𑀸𑀯𑀸 𑀆𑀭𑀫𑁆𑀫𑀡𑀪𑀽𑀢𑀸 𑀏𑀢𑀸𑀲𑀁 𑀅𑀢𑁆𑀣𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸. 𑀲𑀫𑁆𑀧𑀭𑀸𑀬𑀺𑀓𑁂 𑀓𑀸𑀫𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀲𑀜𑁆𑀜𑀸 𑀲𑀫𑁆𑀧𑀭𑀸𑀬𑀺𑀓𑀸. 𑀢𑁂 𑀲𑀫𑁂𑀘𑁆𑀘 𑀥𑀻𑀬𑀢𑀺 𑀏𑀢𑁆𑀣 𑀆𑀡𑀸𑀢𑀺 𑀥𑁂𑀬𑁆𑀬𑀁, 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀫𑀸𑀭𑀲𑁆𑀲 𑀥𑁂𑀬𑁆𑀬𑀦𑁆𑀢𑀺 𑀫𑀸𑀭𑀥𑁂𑀬𑁆𑀬𑀁 𑀢𑀲𑁆𑀲 𑀇𑀲𑁆𑀲𑀭𑀺𑀬𑀧𑀯𑀢𑁆𑀢𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀬𑁂𑀳𑀻’’𑀢𑀺𑀆𑀤𑀺. 𑀕𑀳𑀺𑀢𑀦𑁆𑀢𑀺 𑀯𑀺𑀲𑀬𑀯𑀺𑀲𑀬𑀻𑀪𑀸𑀯𑁂𑀦 𑀕𑀳𑀺𑀢𑀁, 𑀆𑀭𑀫𑁆𑀫𑀡𑀯𑀲𑁂𑀦 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀘 𑀕𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀕𑀳𑀡𑀁 𑀦𑀸𑀫 ‘‘𑀇𑀤𑀁 𑀫𑀬𑁆𑀳’’𑀦𑁆𑀢𑀺 𑀅𑀯𑀺𑀪𑀸𑀕𑁂𑀦 𑀧𑀭𑀺𑀕𑁆𑀕𑀳𑀓𑀭𑀡𑀁; 𑀆𑀭𑀫𑁆𑀫𑀡𑀯𑀲𑁂𑀦 𑀧𑀦 𑀕𑀳𑀡𑀁 𑀪𑀸𑀕𑀲𑁄 𑀆𑀭𑀫𑁆𑀫𑀡𑀸𑀦𑀼𑀪𑀯𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀉𑀪𑀬𑀲𑁆𑀲𑀧𑀺 𑀧𑀦 𑀢𑀡𑁆𑀳𑀸𑀭𑀸𑀕𑀯𑀲𑁂𑀦 𑀕𑀳𑀡𑀁 𑀲𑀦𑁆𑀥𑀸𑀬, ‘‘𑀉𑀪𑀬𑀫𑁂𑀢𑀁 𑀕𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀸𑀭𑁄𑀢𑀺 𑀓𑀺𑀮𑁂𑀲𑀫𑀸𑀭𑁄. 𑀬𑀤𑀕𑁆𑀕𑁂𑀦 𑀓𑀺𑀮𑁂𑀲𑀫𑀸𑀭𑁄, 𑀢𑀤𑀕𑁆𑀕𑁂𑀦 𑀤𑁂𑀯𑀧𑀼𑀢𑁆𑀢𑀫𑀸𑀭𑁄𑀧𑀺 𑀢𑁂 𑀅𑀢𑁆𑀢𑀦𑁄 𑀯𑀲𑀁 𑀯𑀢𑁆𑀢𑁂𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀥𑀫𑁆𑀫𑀫𑀼𑀔𑁂𑀦 𑀧𑀼𑀕𑁆𑀕𑀮𑀕𑁆𑀕𑀳𑀡𑀁 𑀲𑀦𑁆𑀥𑀸𑀬.

𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀸 𑀳𑀺 𑀧𑀼𑀕𑁆𑀕𑀮𑀸 𑀓𑀸𑀫𑀸𑀥𑀺𑀫𑀼𑀢𑁆𑀢𑀸 𑀫𑀸𑀭𑀲𑁆𑀲 𑀇𑀲𑁆𑀲𑀭𑀺𑀬𑀯𑀢𑁆𑀢𑀦𑀝𑁆𑀞𑀸𑀦𑀢𑀸𑀬 ‘‘𑀫𑀸𑀭𑀥𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀸, 𑀢𑀣𑀸 𑀫𑀸𑀭𑀲𑁆𑀲 𑀦𑀺𑀯𑀸𑀧𑀕𑁄𑀘𑀭𑀧𑀭𑀺𑀬𑀸𑀬𑁂𑀳𑀺𑀧𑀺 𑀢𑁂 𑀏𑀯𑀁 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀬𑀣𑀸 𑀘𑁄𑀴𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀦𑀺𑀯𑀧𑀢𑀻𑀢𑀺 𑀦𑀺𑀯𑀸𑀧𑁄, 𑀲𑁄 𑀏𑀯 𑀩𑀻𑀚𑀦𑁆𑀢𑀺 𑀦𑀺𑀯𑀸𑀧𑀩𑀻𑀚𑀁. 𑀢𑁂𑀢𑀺 𑀓𑀸𑀫𑀕𑀼𑀡𑀸. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂.

𑀫𑀦𑀲𑀺 𑀪𑀯𑀸𑀢𑀺 𑀫𑀸𑀦𑀲𑀸𑀢𑀺 𑀆𑀳 ‘‘𑀘𑀺𑀢𑁆𑀢𑀲𑀫𑁆𑀪𑀽𑀢𑀸’’𑀢𑀺. 𑀢𑁂 𑀧𑀦 𑀅𑀯𑀺𑀚𑁆𑀚𑀸𑀤𑀬𑁄 𑀧𑀸𑀴𑀺𑀬𑀁 𑀆𑀕𑀢𑀸. 𑀏𑀯𑀜𑁆𑀳𑀺 𑀮𑁄𑀳𑀺𑀢𑀲𑀦𑁆𑀦𑀺𑀲𑁆𑀲𑀬𑁄 𑀧𑀼𑀩𑁆𑀩𑁄 𑀯𑀺𑀬 𑀅𑀦𑀼𑀭𑁄𑀥𑀽𑀧𑀦𑀺𑀲𑁆𑀲𑀬𑁄 𑀯𑀺𑀭𑁄𑀥𑁄𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀫𑀫𑀸𑀬𑀺𑀢𑁂 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀥𑀸𑀢𑀺 𑀏𑀢𑁆𑀣 𑀇𑀥𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀪𑀼𑀢𑁆𑀢𑀸𑀯𑀻 𑀅𑀲𑁆𑀲’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁦) 𑀯𑀺𑀬. 𑀓𑀸𑀫𑀮𑁄𑀓𑀦𑁆𑀢𑀺 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀁 𑀲𑀗𑁆𑀔𑀸𑀭𑀮𑁄𑀓𑀁, 𑀬𑀢𑁆𑀣 𑀯𑀸 𑀮𑁄𑀓𑁂 𑀓𑀸𑀫𑀕𑀼𑀡𑀯𑀦𑁆𑀢𑀁 𑀮𑁄𑀓𑀁. 𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀛𑀸𑀦𑀸𑀭𑀫𑁆𑀫𑀡𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀪𑀸𑀯𑀦𑀸𑀘𑀺𑀢𑁆𑀢𑁂𑀦 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀧𑀭𑀺𑀢𑁆𑀢𑀁 𑀦𑀸𑀫 𑀯𑀺𑀓𑁆𑀔𑀫𑁆𑀪𑀦𑀅𑀲𑀫𑀢𑁆𑀣𑀢𑁆𑀢𑀸 𑀓𑀺𑀮𑁂𑀲𑁂𑀳𑀺 𑀧𑀭𑀺𑀢𑁄 𑀔𑀡𑁆𑀟𑀺𑀢𑀁 𑀯𑀺𑀬 𑀳𑁄𑀢𑀺. 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁂𑀦𑀸𑀢𑀺 𑀧𑀭𑀺𑀢𑁆𑀢𑀪𑀸𑀯𑀧𑀝𑀺𑀓𑁆𑀔𑁂𑀧𑁂𑀦. 𑀧𑀫𑀸𑀡𑀦𑁆𑀢𑀺𑀧𑀺 𑀓𑀸𑀫𑀸𑀯𑀘𑀭𑀫𑁂𑀯 𑀧𑀸𑀧𑀓𑀸𑀦𑀁 𑀧𑀫𑀸𑀡𑀓𑀭𑀡𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀅𑀧𑁆𑀧𑀚𑀳𑀦𑀢𑁄. 𑀢𑀧𑁆𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀅𑀧𑁆𑀧𑀫𑀸𑀡𑀁 𑀦𑀸𑀫 𑀫𑀳𑀕𑁆𑀕𑀢𑀦𑁆𑀢𑀺 𑀆𑀳 𑁋 ‘‘𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭’’𑀦𑁆𑀢𑀺. 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀳𑀸𑀦𑁂𑀦 𑀫𑀳𑀕𑁆𑀕𑀢𑀚𑁆𑀛𑀸𑀦𑀫𑁆𑀧𑀺 𑀲𑀼𑀪𑀸𑀯𑀺𑀢𑀁 𑀦𑀸𑀫 𑀦 𑀳𑁄𑀢𑀺, 𑀧𑀕𑁂𑀯 𑀧𑀭𑀺𑀢𑁆𑀢𑀚𑁆𑀛𑀸𑀦𑀦𑁆𑀢𑀺 𑀆𑀳 𑁋 ‘‘𑀲𑀼𑀪𑀸𑀯𑀺𑀢𑀦𑁆𑀢𑀺…𑀧𑁂… 𑀮𑁄𑀓𑀼𑀢𑁆𑀢𑀭𑀲𑁆𑀲𑁂𑀯𑁂𑀢𑀁 𑀦𑀸𑀫’’𑀦𑁆𑀢𑀺. 𑀏𑀢𑀲𑁆𑀲 𑀯𑀲𑁂𑀦𑀸𑀢𑀺 ‘‘𑀲𑀼𑀪𑀸𑀯𑀺𑀢’’𑀦𑁆𑀢𑀺 𑀧𑀤𑀲𑁆𑀲 𑀯𑀲𑁂𑀦.

𑀢𑀫𑁂𑀯 𑀧𑀝𑀺𑀧𑀤𑀦𑁆𑀢𑀺 𑀢𑀫𑁂𑀯 𑀅𑀪𑀺𑀚𑁆𑀛𑀸𑀤𑀺𑀧𑀳𑀸𑀦𑀸𑀯𑀳𑀁 𑀛𑀸𑀦𑀧𑀝𑀺𑀧𑀤𑀁. 𑀅𑀭𑀳𑀢𑁆𑀢𑁂 𑀢𑀲𑁆𑀲 𑀉𑀧𑀸𑀬𑀪𑀽𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀢𑀲𑁆𑀲 𑀉𑀧𑀸𑀬𑀪𑀽𑀢𑁂 𑀉𑀧𑀘𑀸𑀭𑁂 𑀯𑀸 𑀲𑀢𑀺 𑀘𑀺𑀢𑁆𑀢𑀁 𑀧𑀲𑀦𑁆𑀦𑀫𑁂𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀅𑀭𑀳𑀢𑁆𑀢𑀁 𑀯𑀸…𑀧𑁂… 𑀉𑀧𑀘𑀸𑀭𑀁 𑀯𑀸’’𑀢𑀺. 𑀅𑀥𑀺𑀫𑁄𑀓𑁆𑀔𑀲𑀫𑁆𑀧𑀲𑀸𑀤𑁄𑀢𑀺 ‘‘𑀅𑀚𑁆𑀚𑁂𑀯 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀸 𑀯𑀺𑀧𑀲𑁆𑀲𑀦𑀸𑀬 𑀯𑀻𑀣𑀺𑀧𑀝𑀺𑀧𑀦𑁆𑀦𑀢𑁆𑀢𑀸; ‘‘𑀅𑀚𑁆𑀚𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀯𑀸 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀘𑀺𑀢𑁆𑀢𑀲𑁆𑀲 𑀲𑀫𑀸𑀳𑀺𑀢𑀢𑁆𑀢𑀸 𑀅𑀥𑀺𑀫𑀼𑀘𑁆𑀘𑀦𑀪𑀽𑀢𑁄 𑀲𑀫𑁆𑀧𑀲𑀸𑀤𑁄. 𑀧𑀝𑀺𑀮𑀸𑀪𑀲𑀫𑁆𑀧𑀲𑀸𑀤𑁄𑀢𑀺 𑀅𑀭𑀳𑀢𑁆𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀯𑀸 𑀅𑀥𑀺𑀕𑀫𑀲𑀗𑁆𑀔𑀸𑀢𑁄 𑀲𑀫𑁆𑀧𑀲𑀸𑀤𑁄. 𑀧𑀝𑀺𑀮𑀸𑀪𑁄𑀧𑀺 𑀳𑀺 𑀓𑀺𑀮𑁂𑀲𑀓𑀸𑀮𑀼𑀲𑀺𑀬𑀸𑀪𑀺𑀪𑀯𑀦𑀢𑁄 𑀘𑀺𑀢𑁆𑀢𑀲𑁆𑀲 𑀲𑀼𑀧𑁆𑀧𑀲𑀦𑁆𑀦𑀪𑀸𑀯𑀸𑀯𑀳𑀢𑁆𑀢𑀸 ‘‘𑀲𑀫𑁆𑀧𑀲𑀸𑀤𑁄’’𑀢𑀺 𑀯𑀼𑀢𑁆𑀢𑁄. 𑀧𑀘𑁆𑀘𑀬𑀸𑀢𑀺 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸𑀤𑀬𑁄. 𑀲𑀩𑁆𑀩𑀣𑀸𑀢𑀺 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀢𑁄𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦. 𑀆𑀲𑀸𑀢𑀺 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀆𑀲𑀻𑀲𑀦𑀸. 𑀢𑁂𑀦𑀸𑀳 𑁋 ‘‘𑀆𑀲𑀸 𑀲𑀦𑁆𑀢𑀺𑀝𑁆𑀞𑀢𑀺, 𑀅𑀥𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀻’’𑀢𑀺.

𑀧𑀸𑀤𑀓𑀦𑁆𑀢𑀺 𑀧𑀤𑀝𑁆𑀞𑀸𑀦𑀁. 𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀻𑀤𑀦𑁆𑀢𑀻𑀢𑀺 𑀦𑀻𑀯𑀭𑀡𑀲𑀳𑀕𑀢𑀸 𑀏𑀯 𑀓𑀺𑀮𑁂𑀲𑀸 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀽𑀧𑀲𑀫𑀦𑁆𑀢𑀺. 𑀲𑀢𑀻𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑀸𑀯𑀳𑀸 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺. 𑀲𑀗𑁆𑀔𑀸𑀭𑀕𑀢𑀦𑁆𑀢𑀺 𑀪𑀸𑀯𑀦𑀸𑀬 𑀲𑀫𑀢𑀸𑀬 𑀧𑀯𑀢𑁆𑀢𑀫𑀸𑀦𑀢𑁆𑀢𑀸, 𑀇𑀫𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀏𑀓𑀭𑀲𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻𑀢𑀺, 𑀪𑀸𑀯𑀦𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀪𑀽𑀢𑀁 𑀧𑀸𑀓𑀝𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀪𑀸𑀯𑀦𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀮𑁂𑀧𑀧𑀺𑀡𑁆𑀟𑁂𑀢𑀺 𑀲𑀺𑀮𑁂𑀲𑀧𑀺𑀡𑁆𑀟𑁂 𑀮𑀕𑁆𑀕𑀫𑀸𑀦𑁄 𑀯𑀺𑀬 𑀅𑀧𑁆𑀧𑀺𑀢𑁄 𑀯𑀺𑀬 𑀳𑁄𑀢𑀺. 𑀉𑀧𑀘𑀸𑀭𑁂𑀦 𑀲𑀫𑀸𑀥𑀺𑀬𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑁂𑀦 𑀲𑀫𑀸𑀥𑀺𑀬𑀢𑀺. 𑀅𑀬𑀦𑁆𑀢𑀺 𑀅𑀬𑀁 𑀤𑀼𑀯𑀺𑀥𑁄𑀧𑀺 𑀅𑀥𑀺𑀫𑀼𑀘𑁆𑀘𑀦𑀸𑀓𑀸𑀭𑁄 𑀅𑀥𑀺𑀫𑁄𑀓𑁆𑀔𑀲𑀫𑁆𑀧𑀲𑀸𑀤𑁄 𑀦𑀸𑀫. 𑀢𑀲𑁆𑀫𑀺𑀁 𑀲𑀫𑁆𑀧𑀲𑀸𑀤𑁂 𑀲𑀢𑀻𑀢𑀺 𑀏𑀢𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑁂, 𑀉𑀧𑀘𑀸𑀭𑀚𑁆𑀛𑀸𑀦𑁂 𑀯𑀸 𑀅𑀥𑀺𑀫𑁄𑀓𑁆𑀔𑀲𑀫𑁆𑀧𑀲𑀸𑀤𑁂 𑀲𑀢𑀺. 𑀬𑁄 𑀧𑀦 𑀅𑀭𑀳𑀢𑁆𑀢𑀁 𑀯𑀸 𑀧𑀝𑀺𑀮𑀪𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀯𑀸, 𑀢𑀲𑁆𑀲 𑀘𑀺𑀢𑁆𑀢𑀁 𑀯𑀺𑀧𑁆𑀧𑀲𑀦𑁆𑀦𑀁 𑀳𑁄𑀢𑀺𑀬𑁂𑀯, 𑀅𑀬𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀝𑀺𑀮𑀸𑀪𑀲𑀫𑁆𑀧𑀲𑀸𑀤𑁄, 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀥𑀸𑀫𑀺𑀧𑁆𑀧𑁂𑀢𑀫𑁂𑀯 𑀤𑀲𑁆𑀲𑁂𑀢𑀼𑀁, ‘‘𑀇𑀥 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸 𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲 𑀲𑀫𑀢𑁆𑀣𑀦𑀁. 𑀢𑀢𑁆𑀣 𑀧𑀜𑁆𑀜𑀸𑀬𑀸𑀢𑀺 𑀅𑀭𑀳𑀢𑁆𑀢𑀧𑀜𑁆𑀜𑀸𑀬. 𑀅𑀥𑀺𑀫𑀼𑀘𑁆𑀘𑀦𑀲𑁆𑀲𑀸𑀢𑀺 𑀲𑀤𑁆𑀤𑀳𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑀚𑁆𑀚𑀦𑀲𑁆𑀲. 𑀉𑀧𑀘𑀸𑀭𑀦𑁆𑀢𑀺 𑀉𑀧𑀘𑀸𑀭𑀚𑁆𑀛𑀸𑀦𑀁. 𑀆𑀦𑁂𑀜𑁆𑀚𑀲𑀫𑀸𑀧𑀢𑁆𑀢𑀺𑀬𑀸 𑀅𑀥𑀺𑀫𑀼𑀘𑁆𑀘𑀦𑀲𑁆𑀲 𑀓𑀸𑀭𑀡𑀦𑁆𑀢𑀺 𑀬𑁄𑀚𑀦𑀸.

𑀏𑀢𑀭𑀳𑀺 𑀯𑀸𑀢𑀺 𑀇𑀤𑀸𑀦𑀺𑀫𑁂𑀯. 𑀆𑀦𑁂𑀜𑁆𑀚𑀁 𑀯𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀯𑀸. 𑀲𑀫𑀸𑀧𑀚𑁆𑀚𑀢𑀻𑀢𑀺 𑀅𑀥𑀺𑀕𑀘𑁆𑀙𑀢𑀺. 𑀇𑀤𑀁 𑀳𑀻𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀢𑀺. 𑀅𑀭𑀳𑀢𑁆𑀢𑀲𑀘𑁆𑀙𑀺𑀓𑀺𑀭𑀺𑀬𑀸 𑀦𑀸𑀫 𑀅𑀕𑁆𑀕𑀫𑀕𑁆𑀕𑀪𑀸𑀯𑀦𑀸𑀬 𑀲𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀸 𑀳𑁄𑀢𑀺, 𑀅𑀕𑁆𑀕𑀫𑀕𑁆𑀕𑀧𑀜𑁆𑀜𑀸 𑀏𑀯 𑀢𑀤𑀢𑁆𑀣𑀁 𑀅𑀥𑀺𑀫𑀼𑀘𑁆𑀘𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀅𑀣 𑀯𑀸’’𑀢𑀺 𑀯𑀺𑀓𑀧𑁆𑀧𑀦𑁆𑀢𑀭𑀫𑀸𑀳. 𑀢𑀢𑁆𑀣 𑀬𑀣𑀸 𑀦𑀸𑀫 𑀧𑀸𑀲𑀸𑀤𑀲𑁆𑀲 𑀅𑀢𑁆𑀣𑀸𑀬 𑀲𑀫𑀸𑀦𑀻𑀢𑀤𑀩𑁆𑀩𑀲𑀫𑁆𑀪𑀸𑀭𑀸𑀯𑀬𑀯𑁂 𑀅𑀧𑁆𑀧𑀳𑁄𑀦𑁆𑀢𑁂 𑀓𑀽𑀝𑀸𑀕𑀸𑀭𑀁 𑀓𑀸𑀢𑀼𑀁 𑀦 𑀧𑀳𑁄𑀦𑁆𑀢𑀺𑀬𑁂𑀯, 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀢𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀆𑀦𑁂𑀜𑁆𑀚𑀁 𑀯𑀸 𑀲𑀫𑀸𑀧𑀚𑁆𑀚𑀢𑀻’’𑀢𑀺 𑀆𑀳. 𑀘𑀢𑀼𑀲𑀘𑁆𑀘𑀁 𑀯𑀸 𑀲𑀘𑁆𑀙𑀺𑀓𑀭𑁄𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀸𑀥𑀺𑀕𑀫𑀦𑀯𑀲𑁂𑀦 𑀆𑀦𑁂𑀜𑁆𑀚𑀁 𑀯𑀸 𑀲𑀫𑀸𑀧𑀚𑁆𑀚𑀢𑀺 𑀉𑀪𑀬𑀲𑁆𑀲𑀧𑀺 𑀳𑁂𑀢𑀼𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 ‘‘𑀧𑀜𑁆𑀜𑀸𑀬 𑀯𑀸 𑀅𑀥𑀺𑀫𑀼𑀘𑁆𑀘𑀢𑀺, 𑀆𑀦𑁂𑀜𑁆𑀚𑀁 𑀯𑀸 𑀲𑀫𑀸𑀧𑀚𑁆𑀚𑀢𑀻’’𑀢𑀺 𑀬𑀣𑀸𑀯𑀼𑀢𑁆𑀢𑁂 𑀯𑀺𑀲𑁂𑀲𑀸𑀥𑀺𑀕𑀫𑁂 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀬𑁄𑀚𑀦𑀸𑀦𑀬𑁄. 𑀏𑀯𑀁 𑀳𑁄𑀢𑀻𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦 𑀘𑀺𑀢𑁆𑀢𑀸𑀪𑀺𑀦𑀻𑀳𑀸𑀭𑁄 𑀳𑁄𑀢𑀺. 𑀓𑀺𑀘𑁆𑀘𑀦𑁆𑀢𑀺 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁. 𑀢𑀢𑁄𑀢𑀺 𑀅𑀭𑀳𑀢𑁆𑀢𑀸𑀥𑀺𑀕𑀫𑀦𑀢𑁄. 𑀑𑀲𑀓𑁆𑀓𑀺𑀢𑀫𑀸𑀦𑀲𑁄𑀢𑀺 𑀲𑀁𑀓𑀼𑀘𑀺𑀢𑀘𑀺𑀢𑁆𑀢𑁄. 𑀅𑀦𑁆𑀢𑀭𑀸 𑀦 𑀢𑀺𑀝𑁆𑀞𑀢𑀻𑀢𑀺 𑀅𑀲𑀫𑀸𑀳𑀺𑀢𑀪𑀽𑀫𑀺𑀬𑀁 𑀦 𑀢𑀺𑀝𑁆𑀞𑀢𑀺. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀦𑀫𑀳𑀺𑀁𑀲𑀁 𑀕𑀳𑁂𑀢𑀼𑀁 𑀉𑀲𑁆𑀲𑀸𑀳𑀯𑀢𑁄 𑀑𑀲𑀓𑁆𑀓𑀦𑁆𑀢𑀲𑁆𑀲 𑀲𑀲𑀕𑁄𑀥𑀸𑀤𑀺𑀕𑁆𑀕𑀳𑀡𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀏𑀯𑀁 𑀇𑀫𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀅𑀭𑀳𑀢𑁆𑀢𑀁 𑀕𑀳𑁂𑀢𑀼𑀁 𑀉𑀲𑁆𑀲𑀸𑀳𑀯𑀢𑁄 𑀢𑀢𑁄 𑀑𑀲𑀓𑁆𑀓𑀺𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀬𑀣𑀸𑀯𑀼𑀢𑁆𑀢𑀁 𑀉𑀧𑀫𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀜𑁆𑀘 𑀫𑀕𑁆𑀕𑀪𑀸𑀯𑀦𑀸𑀬𑁄𑀚𑀦𑀸𑀬𑀁 𑀘𑀢𑀼𑀲𑀘𑁆𑀘𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑁄𑀚𑀦𑀸𑀬𑀜𑁆𑀘 𑀅𑀢𑀺𑀤𑀺𑀲𑀢𑀺.

𑀳𑁂𑀢𑀼𑀅𑀢𑁆𑀣𑀚𑁄𑀢𑀦𑁄 𑀬𑀦𑁆𑀢𑀺 𑀦𑀺𑀧𑀸𑀢𑁄, 𑀓𑀭𑀡𑁂 𑀯𑀸 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀬𑁂𑀦 𑀓𑀸𑀭𑀡𑁂𑀦𑀸’’𑀢𑀺. 𑀢𑀲𑁆𑀲 𑀲𑀁𑀯𑀢𑁆𑀢𑀦𑀁 𑀅𑀭𑀳𑀢𑀺, 𑀢𑀁 𑀯𑀸 𑀧𑀬𑁄𑀚𑀦𑀁 𑀏𑀢𑀲𑁆𑀲𑀸𑀢𑀺 𑀢𑀁𑀲𑀁𑀯𑀢𑁆𑀢𑀦𑀺𑀓𑀁. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁. 𑀆𑀦𑁂𑀜𑁆𑀚𑀲𑀪𑀸𑀯𑀁 𑀉𑀧𑀕𑀘𑁆𑀙𑀢𑀻𑀢𑀺 𑀆𑀦𑁂𑀜𑁆𑀚𑀽𑀧𑀕𑀁. 𑀬𑀣𑀸 𑀓𑀼𑀲𑀮𑀁 𑀆𑀦𑁂𑀜𑁆𑀚𑀲𑀪𑀸𑀯𑀁, 𑀏𑀯𑀁 𑀢𑀁 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀫𑁆𑀧𑀺 𑀆𑀦𑁂𑀜𑁆𑀚𑀲𑀪𑀸𑀯𑀁 𑀉𑀧𑀕𑀢𑀁 𑀅𑀲𑁆𑀲 𑀪𑀯𑁂𑀬𑁆𑀬. 𑀢𑁂𑀦𑀸𑀳 𑁋 ‘‘𑀓𑀸𑀤𑀺𑀲𑀫𑁂𑀯 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄’’𑀢𑀺. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀓𑀼𑀲𑀮𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀫𑁆𑀧𑀺 𑀢𑀁 𑀓𑀼𑀲𑀮𑀁 𑀯𑀺𑀬 𑀯𑀤𑀦𑁆𑀢𑀺. 𑀢𑀦𑁆𑀦𑀸𑀫𑀓𑀫𑁂𑀯𑀸𑀢𑀺 𑀓𑀼𑀲𑀮𑀁 𑀯𑀺𑀬 𑀆𑀦𑁂𑀜𑁆𑀚𑀦𑀸𑀫𑀓𑀫𑁂𑀯 𑀲𑀺𑀬𑀸. 𑀏𑀢𑁆𑀣 𑀘 𑀧𑀼𑀭𑀺𑀫𑀯𑀺𑀓𑀧𑁆𑀧𑁂 ‘‘𑀆𑀦𑁂𑀜𑁆𑀚𑀽𑀧𑀕’’𑀦𑁆𑀢𑀺 𑀢𑀁𑀲𑀤𑀺𑀲𑀢𑀸 𑀯𑀼𑀢𑁆𑀢𑀸, 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀢𑀢𑁄 𑀏𑀯 𑀢𑀁𑀲𑀫𑀜𑁆𑀜𑀢𑀸. 𑀲𑁄 𑀧𑀦𑀸𑀬𑀫𑀢𑁆𑀣𑁄𑀢𑀺 𑀆𑀦𑁂𑀜𑁆𑀚𑀲𑀤𑀺𑀲𑀢𑀸𑀬 𑀯𑀺𑀧𑀸𑀓𑀓𑀸𑀮𑁂𑀧𑀺 𑀢𑀁𑀦𑀸𑀫𑀓𑀫𑁂𑀯 𑀅𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑁄. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀏𑀢𑁆𑀣 𑀳𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀳𑁂𑀢𑀼𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 ‘‘𑀆𑀦𑁂𑀜𑁆𑀚𑀽𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀁𑀦𑀸𑀫𑀓𑀫𑁂𑀯 𑀓𑀢𑁆𑀯𑀸 𑀤𑀻𑀧𑀺𑀢𑀁. 𑀅𑀭𑀳𑀢𑁆𑀢𑀲𑁆𑀲𑀸𑀧𑀻𑀢𑀺 𑀅𑀧𑀺𑀲𑀤𑁆𑀤𑁂𑀦 𑀅𑀕𑁆𑀕𑀫𑀕𑁆𑀕𑀪𑀸𑀯𑀦𑀸𑀬𑀧𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀪𑀸𑀯𑀦𑀸𑀬𑀧𑀻𑀢𑀺 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀲𑀫𑀸𑀥𑀺𑀯𑀲𑁂𑀦 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸𑀢𑀺 ‘‘𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 𑀲𑀫𑀣𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀤𑁂𑀲𑀦𑀸 𑀓𑀣𑀺𑀢𑀸.

𑁬𑁭. 𑀅𑀬𑀜𑁆𑀳𑀺 𑀪𑀺𑀓𑁆𑀔𑀽𑀢𑀺 𑀬𑀁 𑀉𑀤𑁆𑀤𑀺𑀲𑁆𑀲 𑀅𑀬𑀁 𑀤𑀼𑀢𑀺𑀬𑀸𑀦𑁂𑀜𑁆𑀚𑀲𑀧𑁆𑀧𑀸𑀬𑀤𑁂𑀲𑀦𑀸𑀬 𑀪𑀺𑀓𑁆𑀔𑀼 𑀯𑀼𑀢𑁆𑀢𑁄. 𑀧𑀜𑁆𑀜𑀯𑀦𑁆𑀢𑀢𑀭𑁄𑀢𑀺 𑀯𑀢𑁆𑀯𑀸 𑀢𑀁 𑀤𑀲𑁆𑀲𑁂𑀢𑀼𑀁, ‘‘𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀫𑁆𑀫𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀺𑀫𑀲𑁆𑀲 𑀳𑀺 ‘‘𑀬𑁂 𑀘 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀓𑀸𑀫𑀸’’𑀢𑀺𑀆𑀤𑀺𑀦𑀸 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀦𑁂𑀯 𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀓𑀢𑁄, 𑀇𑀫𑀲𑁆𑀲 𑀧𑀦 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀲𑀓𑀮𑀭𑀽𑀧𑀥𑀫𑁆𑀫𑀯𑀲𑁂𑀦. 𑀪𑀕𑀯𑀸 𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀸𑀭𑀡𑀩𑀮𑀸𑀦𑀼𑀭𑀽𑀧𑀫𑁂𑀯 𑀧𑀞𑀫𑀁 𑀪𑀸𑀯𑀦𑀸𑀪𑀺𑀦𑀺𑀯𑁂𑀲𑀁 𑀤𑀲𑁆𑀲𑁂𑀢𑀺; 𑀲𑁄 𑀧𑀘𑁆𑀙𑀸 𑀜𑀸𑀡𑁂 𑀯𑀺𑀧𑀼𑀮𑀁 𑀕𑀘𑁆𑀙𑀦𑁆𑀢𑁂 𑀅𑀦𑀯𑀲𑁂𑀲𑀢𑁄 𑀥𑀫𑁆𑀫𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀭𑀽𑀧𑀧𑀝𑀺𑀩𑀸𑀳𑀦𑁂𑀦𑀸𑀢𑀺 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀬 𑀲𑀩𑁆𑀩𑀲𑁄 𑀲𑀫𑀢𑀺𑀓𑁆𑀓𑀫𑁂𑀦. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀢𑀢𑀺𑀬𑀸𑀦𑁂𑀜𑁆𑀚𑀸𑀤𑀻𑀲𑀼.

𑀧𑀜𑁆𑀜𑀯𑀦𑁆𑀢𑀢𑀭𑁄𑀢𑀺 𑀧𑀜𑁆𑀜𑀼𑀢𑁆𑀢𑀭𑁄. 𑀢𑀺𑀡𑁆𑀡𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸𑀢𑀺 𑀓𑀸𑀫𑀕𑀼𑀡𑀸 𑀲𑀩𑁆𑀩𑀭𑀽𑀧𑀥𑀫𑁆𑀫𑀸 𑀓𑀸𑀫𑀲𑀜𑁆𑀜𑀸𑀢𑀺 𑀏𑀯𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀢𑀺𑀥𑀸 𑀯𑀼𑀢𑁆𑀢𑁂 𑀲𑀫𑁆𑀫𑀲𑀦𑀽𑀧𑀕𑀥𑀫𑁆𑀫𑁂 𑀏𑀓𑀢𑁄 𑀓𑀢𑁆𑀯𑀸, ‘‘𑀲𑀩𑁆𑀩𑀫𑁂𑀢𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸, 𑀲𑀫𑁆𑀫𑀲𑀢𑀺 𑀬𑀣𑀸 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 (𑀤𑀻. 𑀦𑀺. 𑁧.𑁨𑁯𑁮; 𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁬; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪, 𑁭, 𑁮; 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁦, 𑁧𑁧; 𑀧𑀝𑀺. 𑀫. 𑁨.𑁩𑁦). 𑀢𑁂𑀦𑀸𑀳 𑁋 ‘‘𑀉𑀪𑀬𑀫𑁂𑀢𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺. 𑀓𑀸𑀫𑀭𑀽𑀧𑀲𑀜𑁆𑀜𑀸𑀯𑀲𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀪𑁂𑀤𑀢𑁄 𑀅𑀝𑁆𑀞 𑀏𑀓𑁂𑀓𑀓𑁄𑀝𑁆𑀞𑀸𑀲𑀸𑀢𑀺 𑀏𑀯𑀁 𑀓𑀢𑀁 𑀉𑀪𑀬𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓…𑀧𑁂… 𑀯𑀲𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀉𑀪𑀬𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸𑀯𑀲𑁂𑀦 ‘‘𑀏𑀢𑀁 𑀫𑀫𑀸’’𑀢𑀺, 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀯𑀲𑁂𑀦 ‘‘𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀏𑀯𑀁 𑀅𑀪𑀺𑀦𑀦𑁆𑀤𑀺𑀢𑀼𑀁. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 ‘‘𑀏𑀢𑀁 𑀫𑀫, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀦𑁆𑀤𑀺𑀢𑀼𑀁 𑀅𑀚𑁆𑀛𑁄𑀲𑀸𑀬 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀞𑀸𑀢𑀼𑀦𑁆𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀓𑀸𑀫𑀧𑀝𑀺𑀩𑀸𑀳𑀦𑁂𑀦𑀸𑀢𑀺 𑀇𑀤𑀁 𑀆𑀕𑀫𑀦𑀧𑀝𑀺𑀧𑀤𑀸𑀤𑀲𑁆𑀲𑀦𑀢𑁆𑀣𑀁, 𑀯𑀡𑁆𑀡𑀪𑀡𑀦𑀢𑁆𑀣𑀜𑁆𑀘 𑀯𑀼𑀢𑁆𑀢𑀁. 𑀭𑀽𑀧𑀧𑀝𑀺𑀩𑀸𑀳𑀦𑀁 𑀳𑀺𑀲𑁆𑀲 𑀆𑀲𑀦𑁆𑀦𑀁, 𑀢𑀢𑁄𑀧𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀢𑀺𑀓𑁆𑀓𑀫𑁄, 𑀢𑀁𑀲𑀫𑀢𑀺𑀓𑁆𑀓𑀫𑁂𑀦 𑀲𑀳𑁂𑀯 𑀲𑀩𑁆𑀩𑁂 𑀢𑀸 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸 ‘‘𑀉𑀪𑀬𑀫𑁂𑀢𑀁 𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄.

𑁬𑁮. 𑀇𑀥 𑀅𑀢𑁆𑀢𑀦𑁄 𑀘𑀸𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀦𑀺𑀭𑀼𑀚𑁆𑀛𑀦𑁆𑀢𑀺 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀦𑀺𑀭𑁄𑀥𑁂𑀦, 𑀲𑀫𑀸𑀧𑀚𑁆𑀚𑀦𑀓𑁆𑀔𑀡𑁂 𑀧𑀦 𑀅𑀦𑀼𑀧𑁆𑀧𑀸𑀤𑀦𑁂𑀦𑀧𑀺. 𑀢𑁂𑀦𑀸𑀳 ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀧𑀢𑁆𑀯𑀸’’𑀢𑀺. 𑀅𑀢𑀧𑁆𑀧𑀓𑀝𑁆𑀞𑁂𑀦𑀸𑀢𑀺 𑀉𑀴𑀸𑀭𑀢𑀭𑀪𑀸𑀯𑁂𑀦 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸 𑀅𑀢𑀺𑀢𑁆𑀢𑀺𑀓𑀭𑀪𑀸𑀯𑁂𑀦. 𑀢𑀫𑁂𑀯 𑀧𑀝𑀺𑀧𑀤𑀦𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀪𑀸𑀯𑀦𑀫𑀸𑀳. 𑀲𑀫𑀸𑀥𑀺𑀯𑀲𑁂𑀦 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸 𑀢𑀢𑀺𑀬𑀸𑀭𑀼𑀧𑁆𑀧𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀬𑀢𑁆𑀣𑁂𑀢𑀸’’𑀢𑀺𑀆𑀤𑀺𑀦𑀸.

𑀇𑀥 𑀅𑀢𑁆𑀢𑀦𑁄𑀢𑀺 𑀤𑁆𑀯𑀺𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀫𑀦𑀲𑀺𑀓𑀸𑀭𑀲𑀗𑁆𑀔𑀸𑀢𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀝𑀺𑀧𑀤𑀦𑁆𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑀁. 𑀲𑀢𑀺 𑀲𑀫𑀣𑀪𑀸𑀯𑀦𑀸𑀬𑀁 𑀲𑀼𑀜𑁆𑀜𑀢𑀸𑀫𑀦𑀲𑀺𑀓𑀸𑀭𑀲𑁆𑀲 𑀇𑀥 𑀲𑀸𑀢𑀺𑀲𑀬𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀤𑀼𑀢𑀺𑀬𑀸𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸’’𑀢𑀺.

𑁭𑁦. 𑀢𑀢𑀺𑀬𑀸𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀅𑀢𑁆𑀢𑀦𑁄𑀢𑀺 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀫𑀦𑀲𑀺𑀓𑀸𑀭𑀲𑀗𑁆𑀔𑀸𑀢𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀥𑀺𑀓𑀸𑀭𑁂. 𑀓𑁆𑀯𑀘𑀻𑀢𑀺 𑀓𑀢𑁆𑀣𑀘𑀺 𑀞𑀸𑀦𑁂, 𑀓𑀸𑀮𑁂, 𑀥𑀫𑁆𑀫𑁂 𑀯𑀸. 𑀅𑀣 𑀯𑀸 𑀓𑁆𑀯𑀘𑀻𑀢𑀺 𑀅𑀚𑁆𑀛𑀢𑁆𑀢𑀁, 𑀩𑀳𑀺𑀤𑁆𑀥𑀸 𑀯𑀸. 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀦𑁆𑀢𑀺 𑀲𑀓𑀢𑁆𑀢𑀸𑀦𑀁. ‘‘𑀅𑀬𑀁 𑀔𑁄, 𑀪𑁄 𑀩𑁆𑀭𑀳𑁆𑀫𑀸…𑀧𑁂… 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁪𑁨) 𑀧𑀭𑀧𑀭𑀺𑀓𑀧𑁆𑀧𑀺𑀢𑀁 𑀅𑀢𑁆𑀢𑀸𑀦𑀜𑁆𑀘 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀪𑀽𑀢𑀁 𑀦 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀲𑁆𑀲𑀘𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀲𑁆𑀲𑀸𑀢𑀺 ‘‘𑀧𑀭𑀸 𑀧𑀚𑀸’’𑀢𑀺 ‘‘𑀧𑀭𑁄 𑀧𑀼𑀭𑀺𑀲𑁄’’𑀢𑀺 𑀘 𑀏𑀯𑀁 𑀕𑀳𑀺𑀢𑀲𑁆𑀲. 𑀦 𑀘 𑀫𑀫 𑀓𑁆𑀯𑀘𑀦𑀻𑀢𑀺 𑀏𑀢𑁆𑀣 𑀫𑀫-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑀬𑀼𑀢𑁆𑀢𑁄𑀢𑀺 𑀆𑀳 ‘‘𑀫𑀫𑀲𑀤𑁆𑀤𑀁 𑀢𑀸𑀯 𑀞𑀧𑁂𑀢𑁆𑀯𑀸’’𑀢𑀺. 𑀧𑀭𑀲𑁆𑀲 𑀘𑀸𑀢𑀺 𑀅𑀢𑁆𑀢𑀢𑁄 𑀅𑀜𑁆𑀜𑀲𑁆𑀲, ‘‘𑀧𑀭𑁄 𑀧𑀼𑀭𑀺𑀲𑁄 𑀦𑀸𑀫 𑀅𑀢𑁆𑀣𑀺 𑀫𑀫𑀢𑁆𑀣𑀸𑀬 𑀲𑀚𑀺𑀢𑁄, 𑀢𑀲𑁆𑀲 𑀯𑀲𑁂𑀦 𑀫𑀬𑁆𑀳𑀁 𑀲𑀩𑁆𑀩𑀁 𑀇𑀚𑁆𑀛𑀢𑀻’’𑀢𑀺 𑀏𑀯𑀁 𑀏𑀓𑀘𑁆𑀘𑀤𑀺𑀝𑁆𑀞𑀺𑀕𑀢𑀺𑀓𑀧𑀭𑀺𑀓𑀧𑁆𑀧𑀺𑀢𑀯𑀲𑁂𑀦 𑀧𑀭𑀁 𑀅𑀢𑁆𑀢𑀸𑀦𑀁, 𑀢𑀜𑁆𑀘 𑀅𑀢𑁆𑀢𑀦𑁄 𑀓𑀺𑀜𑁆𑀘𑀦𑀪𑀽𑀢𑀁 𑀦 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀦 𑀘 𑀓𑁆𑀯𑀘𑀦𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀦𑀸𑀳𑀁 𑀓𑁆𑀯𑀘𑀦𑀻𑀢𑀺 𑀲𑀓𑀅𑀢𑁆𑀢𑀦𑁄 𑀅𑀪𑀸𑀯𑀁 𑀧𑀲𑁆𑀲𑀢𑀺. 𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀦𑁆𑀢𑀺 𑀲𑀓𑀅𑀢𑁆𑀢𑀦𑁄 𑀏𑀯 𑀓𑀲𑁆𑀲𑀘𑀺 𑀅𑀦𑀢𑁆𑀢𑀦𑀺𑀬𑀢𑀁 𑀧𑀲𑁆𑀲𑀢𑀺. 𑀦 𑀘, 𑀫𑀫𑀸𑀢𑀺 𑀏𑀢𑀁 𑀤𑁆𑀯𑀬𑀁 𑀬𑀣𑀸𑀲𑀗𑁆𑀔𑁆𑀬𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀅𑀢𑁆𑀣𑀻𑀢𑀺 𑀧𑀘𑁆𑀘𑁂𑀓𑀁. ‘‘𑀦 𑀘 𑀓𑁆𑀯𑀘𑀦𑀺 𑀧𑀭𑀲𑁆𑀲 𑀅𑀢𑁆𑀢𑀸 𑀅𑀢𑁆𑀣𑀻’’𑀢𑀺 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀅𑀪𑀸𑀯𑀁 𑀧𑀲𑁆𑀲𑀢𑀺, ‘‘𑀢𑀲𑁆𑀲 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀫𑀫 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀢𑀸 𑀦 𑀘𑀢𑁆𑀣𑀻’’𑀢𑀺 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀅𑀦𑀢𑁆𑀢𑀦𑀺𑀬𑀢𑀁 𑀧𑀲𑁆𑀲𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀔𑀦𑁆𑀥𑀸𑀦𑀁 𑀅𑀢𑁆𑀢𑀢𑁆𑀢𑀦𑀺𑀬𑀲𑀼𑀜𑁆𑀜𑀢𑀸 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑀢𑀸 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀤𑀺𑀝𑁆𑀞𑀸 𑀳𑁄𑀢𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀝𑀺𑀧𑀤𑀦𑁆𑀢𑀺 𑀇𑀥𑀸𑀧𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀯𑀤𑀢𑀺. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑀯𑀺𑀲𑁂𑀲𑀪𑀸𑀯𑀢𑁄, 𑀢𑀧𑁆𑀧𑀥𑀸𑀦𑀢𑁆𑀢𑀸 𑀘𑀲𑁆𑀲 𑀫𑀦𑀲𑀺𑀓𑀸𑀭𑀲𑁆𑀲.

𑀇𑀥 𑀅𑀢𑁆𑀢𑀦𑁄𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑀫𑀸𑀳. 𑀲𑀩𑁆𑀩𑀲𑀜𑁆𑀜𑀸𑀢𑀺 𑀭𑀽𑀧𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸 𑀦𑀸𑀦𑀢𑁆𑀢𑀲𑀜𑁆𑀜𑀸 𑀳𑁂𑀝𑁆𑀞𑀺𑀫𑀸 𑀢𑀺𑀲𑁆𑀲𑁄 𑀅𑀭𑀽𑀧𑀲𑀜𑁆𑀜𑀸𑀢𑀺 𑀏𑀯𑀁 𑀲𑀩𑁆𑀩𑀲𑀜𑁆𑀜𑀸 𑀅𑀦𑀯𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀳𑁂𑀝𑁆𑀞𑀸 𑀯𑀼𑀢𑁆𑀢𑀸’’𑀢𑀺 𑀧𑀦 𑀯𑀺𑀲𑁂𑀲𑀺𑀢𑀢𑁆𑀢𑀸 𑀇𑀫𑀲𑁆𑀫𑀺𑀁 𑀆𑀕𑀢𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀜𑁆𑀜𑀸𑀤𑀬𑁄 𑀅𑀧𑀺 𑀲𑀜𑁆𑀜𑀸𑀢𑀺 𑀅𑀧𑀭𑁂. 𑀢𑀦𑁆𑀢𑀺 𑀲𑀫𑁆𑀫𑀼𑀢𑀺𑀫𑀢𑁆𑀢𑀁 𑀓𑀸𑀫𑀲𑀜𑁆𑀜𑀸𑀧𑀝𑀺𑀩𑀸𑀳𑀦𑀯𑀲𑁂𑀦𑁂𑀯 𑀢𑁂𑀲𑀁 𑀦𑀸𑀦𑀢𑁆𑀢𑀲𑀜𑁆𑀜𑀸𑀤𑀺𑀦𑀺𑀭𑁄𑀥𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀢𑁆𑀢𑀸. 𑀲𑀫𑀸𑀥𑀺𑀯𑀲𑁂𑀦 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀪𑀸𑀯𑀦𑀸𑀬 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀢𑁄.

𑁭𑁧. 𑀧𑀼𑀩𑁆𑀩𑁂 𑀧𑀜𑁆𑀘𑀯𑀺𑀥𑀁 𑀓𑀫𑁆𑀫𑀯𑀝𑁆𑀝𑀦𑁆𑀢𑀺 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀫𑁄𑀳𑁄 𑀅𑀯𑀺𑀚𑁆𑀚𑀸 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸 𑀦𑀺𑀓𑀦𑁆𑀢𑀺𑀢𑀡𑁆𑀳𑀸 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀁 𑀘𑁂𑀢𑀦𑀸 𑀪𑀯𑁄𑀢𑀺 𑀏𑀯𑀫𑀸𑀕𑀢𑁄 𑀲𑀧𑀭𑀺𑀓𑁆𑀔𑀸𑀭𑁄 𑀓𑀫𑁆𑀫𑀧𑁆𑀧𑀩𑀦𑁆𑀥𑁄. 𑀦 𑀆𑀬𑀽𑀳𑀺𑀢𑀁 𑀅𑀲𑁆𑀲𑀸𑀢𑀺 𑀦 𑀘𑁂𑀢𑀺𑀢𑀁 𑀧𑀓𑀧𑁆𑀧𑀺𑀢𑀁 𑀪𑀯𑁂𑀬𑁆𑀬. 𑀏𑀢𑀭𑀳𑀺 𑀏𑀯𑀁 𑀧𑀜𑁆𑀘𑀯𑀺𑀥𑀁 𑀯𑀺𑀧𑀸𑀓𑀯𑀝𑁆𑀝𑀦𑁆𑀢𑀺 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸𑀲𑀗𑁆𑀔𑀸𑀢𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀯𑀺𑀧𑀸𑀓𑀧𑁆𑀧𑀩𑀦𑁆𑀥𑁄 𑀦𑀧𑁆𑀧𑀯𑀢𑁆𑀢𑁂𑀬𑁆𑀬 𑀓𑀸𑀭𑀡𑀲𑁆𑀲 𑀅𑀦𑀺𑀧𑁆𑀨𑀦𑁆𑀦𑀢𑁆𑀢𑀸. 𑀲𑀘𑁂 𑀆𑀬𑀽𑀳𑀺𑀢𑀁 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀬𑀤𑀺 𑀘𑁂𑀢𑀺𑀢𑀁 𑀧𑀓𑀧𑁆𑀧𑀺𑀢𑀁 𑀦 𑀲𑀺𑀬𑀸. 𑀬𑀁 𑀅𑀢𑁆𑀣𑀻𑀢𑀺 𑀬𑀁 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀓𑀁. 𑀢𑁂𑀦𑀸𑀳 ‘‘𑀪𑀽𑀢’’𑀦𑁆𑀢𑀺. 𑀢𑀜𑁆𑀳𑀺 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀢𑀸𑀬 ‘‘𑀪𑀽𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀚𑀳𑀸𑀫𑀻𑀢𑀺 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀢𑀢𑁄 𑀏𑀯 𑀆𑀬𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀯𑀲𑁂𑀦 𑀧𑀚𑀳𑀸𑀫𑀺 𑀧𑀭𑀺𑀘𑁆𑀘𑀚𑀸𑀫𑀺.

𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀲𑀳 𑀧𑀭𑀺𑀓𑀧𑁆𑀧𑀦𑁂𑀦 𑀅𑀢𑀻𑀢𑀢𑁆𑀣𑁂𑀢𑀺 𑀆𑀳 ‘‘𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀸’’𑀢𑀺. 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬 𑀦𑀼 𑀔𑁄𑀢𑀺 𑀯𑀸 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀦 𑀓𑀺𑀜𑁆𑀘𑀺 𑀓𑀣𑀺𑀢𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑁂𑀦 𑀜𑀸𑀡𑀼𑀢𑁆𑀢𑀭𑀲𑁆𑀲𑁂𑀯 𑀯𑀺𑀲𑀬𑀪𑀸𑀯𑀢𑁄 𑀲𑀭𑀽𑀧𑀢𑁄 𑀦 𑀓𑀺𑀜𑁆𑀘𑀺 𑀓𑀣𑀺𑀢𑀁, 𑀦𑀬𑁂𑀦 𑀧𑀦𑀲𑁆𑀲 𑀯𑀺𑀲𑁂𑀲𑀁 𑀜𑀸𑀧𑁂𑀢𑀼𑀓𑀸𑀫𑀢𑁆𑀢𑀸. 𑀪𑀕𑀯𑀢𑁄 𑀓𑀺𑀭 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀺𑀲𑁆𑀲𑀁𑀬𑁂𑀯 𑀧𑀭𑀺𑀲𑀢𑀺 𑀦𑀺𑀲𑀺𑀦𑁆𑀦𑁄 𑀆𑀦𑀦𑁆𑀤𑁄 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑀢𑀸𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀦𑁆𑀥𑀺𑀁 𑀅𑀭𑀳𑀢𑁆𑀢𑀜𑁆𑀘 𑀲𑀦𑁆𑀥𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀇𑀫𑀺𑀦𑀸 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀦𑀸 𑀢𑀫𑀢𑁆𑀣𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀑𑀲𑀓𑁆𑀓𑀦𑀸𑀬 𑀘 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀪𑀺𑀦𑁆𑀦𑀭𑀲𑀤𑁂𑀲𑀦𑀸 𑀳𑁄𑀢𑀻𑀢𑀺 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺 𑀧𑀼𑀘𑁆𑀙𑀺𑀢𑀸. 𑀢𑀲𑁆𑀫𑀺𑀜𑁆𑀳𑀺 𑀅𑀲𑀢𑀺 𑀅𑀦𑀼𑀲𑀦𑁆𑀥𑀺𑀪𑁂𑀤𑀪𑀺𑀦𑁆𑀦𑁂𑀲𑀸 𑀤𑁂𑀲𑀦𑀸, 𑀦 𑀘 𑀩𑀼𑀤𑁆𑀥𑀸𑀘𑀺𑀡𑁆𑀡𑀸 𑀪𑀺𑀦𑁆𑀦𑀭𑀲𑀤𑁂𑀲𑀦𑀸𑀢𑀺. 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀺𑀢𑀦𑁆𑀢𑀺 𑀢𑀦𑁆𑀦𑀺𑀲𑁆𑀲𑀺𑀢𑀁. 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀉𑀧𑀸𑀤𑀺𑀬𑀢𑀺 𑀏𑀢𑁂𑀦𑀸𑀢𑀺 𑀘 𑀉𑀧𑀸𑀤𑀸𑀦𑀁. 𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀧𑀳𑀸𑀢𑀩𑁆𑀩𑀲𑁆𑀲 𑀅𑀧𑁆𑀧𑀚𑀳𑀦𑀢𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀥𑀫𑁆𑀫𑀸𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀳𑀸𑀢𑀩𑁆𑀩𑀸, 𑀧𑀕𑁂𑀯 𑀅𑀥𑀫𑁆𑀫𑀸’’𑀢𑀺 (𑀫. 𑀦𑀺. 𑁧.𑁨𑁪𑁦). 𑀉𑀧𑀸𑀤𑀸𑀦𑀲𑁂𑀝𑁆𑀞𑀦𑁆𑀢𑀺 𑀇𑀤𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀪𑀯𑀲𑁆𑀲 𑀲𑀩𑁆𑀩𑀪𑀯𑀕𑁆𑀕𑀢𑀸𑀤𑀲𑁆𑀲𑀦𑀧𑀭𑀁, 𑀦 𑀧𑀦 𑀅𑀭𑀺𑀬𑀪𑀯𑀕𑁆𑀕𑀲𑁆𑀲 𑀉𑀧𑀸𑀤𑀸𑀦𑀲𑁂𑀝𑁆𑀞𑀢𑀸𑀧𑀝𑀺𑀲𑁂𑀥𑀧𑀭𑀁.

𑁭𑁩. 𑀦𑀺𑀲𑁆𑀲𑀸𑀬𑀸𑀢𑀺 𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀦𑀸𑀫 𑀥𑀫𑁆𑀫𑀁 𑀦𑀺𑀲𑁆𑀲𑀸𑀬 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀁 𑀦𑀸𑀫 𑀦𑀺𑀲𑁆𑀲𑀸𑀬 𑀑𑀖𑀦𑀺𑀢𑁆𑀣𑀭𑀡𑀸 𑀪𑀕𑀯𑀢𑀸 𑀅𑀓𑁆𑀔𑀸𑀢𑀸; 𑀅𑀳𑁄 𑀅𑀘𑁆𑀙𑀭𑀺𑀬𑀫𑁂𑀢𑀁, 𑀅𑀳𑁄 𑀅𑀩𑁆𑀪𑀼𑀢𑀫𑁂𑀢𑀦𑁆𑀢𑀺.

𑀦𑀯𑀲𑀼𑀧𑀺 𑀞𑀸𑀦𑁂𑀲𑀼 𑀲𑀫𑀣𑀬𑀸𑀦𑀺𑀓𑀲𑁆𑀲𑁂𑀯 𑀯𑀲𑁂𑀦 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸, 𑀇𑀥 𑀘 𑀓𑀲𑁆𑀲𑀘𑀺𑀧𑀺 𑀧𑀸𑀤𑀓𑀚𑁆𑀛𑀸𑀦𑀲𑁆𑀲 𑀅𑀦𑀸𑀫𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀅𑀭𑀺𑀬𑀲𑀸𑀯𑀓𑁄𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀅𑀭𑀺𑀬𑀲𑀸𑀯𑀓𑁄’’𑀢𑀺. 𑀦𑀯𑀦𑁆𑀦𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀫𑁆𑀫𑀲𑀢𑀻𑀢𑀺 𑀇𑀤𑀁 𑀛𑀸𑀦𑀥𑀫𑁆𑀫𑁂𑀧𑀺 𑀅𑀦𑀼𑀲𑁆𑀲𑀯𑀮𑀤𑁆𑀥𑁂 𑀕𑀳𑁂𑀢𑁆𑀯𑀸 𑀲𑀫𑁆𑀫𑀲𑀦𑀁 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁; 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀕𑀢𑀁 𑀇𑀥 𑀯𑀼𑀢𑁆𑀢𑀦𑁆𑀢𑀺 𑀅𑀦𑀯𑀲𑁂𑀲𑀢𑁄 𑀧𑀭𑀺𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀬𑀸𑀯𑀢𑀸 𑀲𑀓𑁆𑀓𑀸𑀬𑁄’’𑀢𑀺.

𑀏𑀢𑀁 𑀅𑀫𑀢𑀦𑁆𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀸 𑀏𑀢𑀁 𑀅𑀭𑀳𑀢𑁆𑀢𑀁 𑀅𑀫𑀢𑀭𑀲𑀁. 𑀢𑁂𑀦𑀸𑀳 𑁋 ‘‘𑀏𑀢𑀁 𑀅𑀫𑀢𑀁 𑀲𑀦𑁆𑀢𑀁, 𑀏𑀢𑀁 𑀧𑀡𑀻𑀢’’𑀦𑁆𑀢𑀺. ‘‘𑀅𑀦𑀼𑀧𑀸𑀤𑀸𑀬 𑀓𑀺𑀜𑁆𑀘𑀺𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀧𑀺 𑀅𑀦𑀼𑀧𑀸𑀤𑀸 𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄 𑀦𑀺𑀩𑁆𑀩𑀸𑀦𑀁 𑀅𑀜𑁆𑀜𑀢𑁆𑀣 𑀲𑀼𑀢𑁆𑀢𑁂 𑀯𑀼𑀘𑁆𑀘𑀢𑀺.

𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑀪𑁂𑀤𑁂𑀦 𑀢𑀺𑀯𑀺𑀥𑀸𑀦𑀁. 𑀧𑀸𑀤𑀓𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀑𑀲𑀓𑁆𑀓𑀦𑀸𑀬 𑀅𑀪𑀸𑀯𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀫𑁄𑀥𑀸𑀦𑁂𑀢𑁆𑀯𑀸𑀢𑀺 𑀲𑀫𑁆𑀫𑀤𑁂𑀯 𑀑𑀤𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀧𑁂𑀢𑁆𑀯𑀸. 𑀲𑀼𑀓𑀣𑀺𑀢𑀁 𑀦𑀸𑀫 𑀳𑁄𑀢𑀺 𑀓𑀣𑁂𑀢𑀩𑁆𑀩𑀲𑁆𑀲 𑀅𑀦𑀯𑀲𑁂𑀲𑁂𑀢𑁆𑀯𑀸 𑀓𑀣𑀺𑀢𑀢𑁆𑀢𑀸.

𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁭. 𑀕𑀡𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀬𑀣𑀸 𑀳𑁂𑀝𑁆𑀞𑀺𑀫𑀲𑁄𑀧𑀸𑀦𑀨𑀮𑀓𑀁 𑀑𑀭𑁄𑀳𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑀁 𑀦𑀸𑀫 𑀳𑁄𑀢𑀺, 𑀏𑀯𑀁 𑀆𑀭𑁄𑀳𑀦𑁆𑀢𑀲𑁆𑀲 𑀧𑀞𑀫𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀬𑀸𑀯 𑀧𑀘𑁆𑀙𑀺𑀫𑀲𑁄𑀧𑀸𑀦𑀓𑀴𑁂𑀯𑀭𑀸𑀢𑀺 𑀬𑀸𑀯 𑀧𑀞𑀫𑀲𑁄𑀧𑀸𑀦𑀨𑀮𑀓𑀸’’𑀢𑀺. 𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸𑀢𑀺 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁂𑀦 𑀯𑀼𑀢𑁆𑀢𑀯𑀺𑀥𑀺𑀦𑀸 𑀧𑀸𑀲𑀸𑀤𑀯𑀢𑁆𑀣𑀼𑀦𑁄 𑀲𑁄𑀥𑀦𑀯𑀺𑀥𑀺𑀁 𑀓𑀢𑁆𑀯𑀸. 𑀏𑀢𑁆𑀣𑀸𑀢𑀺 𑀧𑀸𑀲𑀸𑀤𑀓𑀭𑀡𑁂. 𑀲𑀢𑁆𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀕𑁆𑀕𑀲𑁆𑀲 𑀅𑀁𑀲𑀼𑀓𑁄𑀝𑀺𑀯𑁂𑀥𑀓𑁄 𑀯𑀸𑀮𑀯𑁂𑀥𑀺 𑀦𑀸𑀫. 𑀞𑀸𑀦𑀲𑀫𑁆𑀧𑀸𑀤𑀦𑀦𑁆𑀢𑀺 𑀯𑁂𑀲𑀸𑀔𑀫𑀡𑁆𑀟𑀮𑀸𑀤𑀻𑀦𑀁 𑀲𑀫𑁆𑀧𑀸𑀤𑀦𑀁. 𑀫𑀼𑀝𑁆𑀞𑀺𑀓𑀭𑀡𑀸𑀤𑀻𑀳𑀻𑀢𑀺 𑀉𑀲𑀼𑀫𑀼𑀝𑁆𑀞𑀺𑀓𑀭𑀡𑀚𑀺𑀬𑀸𑀕𑀸𑀳𑀚𑀺𑀬𑀸𑀯𑀺𑀚𑁆𑀛𑀸𑀤𑀻𑀳𑀺. 𑀏𑀯𑀁 𑀕𑀡𑀸𑀧𑁂𑀫𑀸𑀢𑀺 𑀏𑀓𑀁 𑀦𑀸𑀫 𑀏𑀓𑀫𑁂𑀯, 𑀤𑁆𑀯𑁂 𑀤𑀼𑀓𑀸 𑀘𑀢𑁆𑀢𑀸𑀭𑀺, 𑀢𑀻𑀡𑀺 𑀢𑀺𑀓𑀸𑀦𑀺 𑀦𑀯, 𑀘𑀢𑁆𑀢𑀸𑀭𑀺 𑀘𑀢𑀼𑀓𑁆𑀓𑀸𑀦𑀺 𑀲𑁄𑀴𑀲𑀸𑀢𑀺𑀆𑀤𑀺𑀦𑀸 𑀏𑀯𑀁 𑀕𑀡𑀦𑀁 𑀲𑀺𑀓𑁆𑀔𑀸𑀧𑁂𑀫.

𑁭𑁫. 𑀓𑁂𑀭𑀸𑀝𑀺𑀓𑀸 𑀳𑁄𑀦𑁆𑀢𑀻𑀢𑀺 𑀲𑀫𑀬𑀲𑁆𑀲 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀓𑀭𑀡𑀫𑀸𑀬𑀸𑀲𑀸𑀞𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺. 𑀢𑀁 𑀤𑀫𑀦𑀁 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀢𑀺, 𑀅𑀬𑀫𑀲𑁆𑀲 𑀚𑀸𑀢𑀺𑀤𑁄𑀲𑀸𑀪𑀸𑀯𑁄.

𑁭𑁬. 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀳𑀺 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑀸𑀬𑀸𑀢𑀺 𑀲𑀢𑀢𑀯𑀺𑀳𑀸𑀭𑀺𑀪𑀸𑀯𑀲𑀸𑀥𑀦𑁂𑀳𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀳𑀺 𑀲𑀫𑀦𑁆𑀦𑀸𑀕𑀫𑀢𑁆𑀣𑀸𑀬. 𑀦𑀦𑀼 𑀘 𑀔𑀻𑀡𑀸𑀲𑀯𑀸 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀘, 𑀓𑀣𑀁 𑀢𑀲𑁆𑀲 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀬𑁄𑀕𑀲𑀸𑀥𑀦𑀻𑀬𑀁 𑀧𑀯𑀢𑁆𑀢𑀦𑁆𑀢𑀺 𑀆𑀳 ‘‘𑀤𑁆𑀯𑁂 𑀳𑀻’’𑀢𑀺𑀆𑀤𑀺. 𑀲𑀢𑀢𑀯𑀺𑀳𑀸𑀭𑀻𑀢𑀺 𑀲𑀢𑀢𑀁 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀺𑀩𑀳𑀼𑀮𑀸, 𑀢𑀲𑁆𑀫𑀸 𑀢𑁂 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀦𑁄𑀲𑀢𑀢𑀯𑀺𑀳𑀸𑀭𑀺𑀦𑁄 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀅𑀦𑀸𑀘𑀺𑀡𑁆𑀡𑀪𑀸𑀯𑀢𑁄.