𑁭. 𑀕𑀡𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀬𑀣𑀸 𑀳𑁂𑀝𑁆𑀞𑀺𑀫𑀲𑁄𑀧𑀸𑀦𑀨𑀮𑀓𑀁 𑀑𑀭𑁄𑀳𑀦𑁆𑀢𑀲𑁆𑀲 𑀧𑀘𑁆𑀙𑀺𑀫𑀁 𑀦𑀸𑀫 𑀳𑁄𑀢𑀺, 𑀏𑀯𑀁 𑀆𑀭𑁄𑀳𑀦𑁆𑀢𑀲𑁆𑀲 𑀧𑀞𑀫𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀬𑀸𑀯 𑀧𑀘𑁆𑀙𑀺𑀫𑀲𑁄𑀧𑀸𑀦𑀓𑀴𑁂𑀯𑀭𑀸𑀢𑀺 𑀬𑀸𑀯 𑀧𑀞𑀫𑀲𑁄𑀧𑀸𑀦𑀨𑀮𑀓𑀸’’𑀢𑀺. 𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸𑀢𑀺 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁂𑀦 𑀯𑀼𑀢𑁆𑀢𑀯𑀺𑀥𑀺𑀦𑀸 𑀧𑀸𑀲𑀸𑀤𑀯𑀢𑁆𑀣𑀼𑀦𑁄 𑀲𑁄𑀥𑀦𑀯𑀺𑀥𑀺𑀁 𑀓𑀢𑁆𑀯𑀸. 𑀏𑀢𑁆𑀣𑀸𑀢𑀺 𑀧𑀸𑀲𑀸𑀤𑀓𑀭𑀡𑁂. 𑀲𑀢𑁆𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀕𑁆𑀕𑀲𑁆𑀲 𑀅𑀁𑀲𑀼𑀓𑁄𑀝𑀺𑀯𑁂𑀥𑀓𑁄 𑀯𑀸𑀮𑀯𑁂𑀥𑀺 𑀦𑀸𑀫. 𑀞𑀸𑀦𑀲𑀫𑁆𑀧𑀸𑀤𑀦𑀦𑁆𑀢𑀺 𑀯𑁂𑀲𑀸𑀔𑀫𑀡𑁆𑀟𑀮𑀸𑀤𑀻𑀦𑀁 𑀲𑀫𑁆𑀧𑀸𑀤𑀦𑀁. 𑀫𑀼𑀝𑁆𑀞𑀺𑀓𑀭𑀡𑀸𑀤𑀻𑀳𑀻𑀢𑀺 𑀉𑀲𑀼𑀫𑀼𑀝𑁆𑀞𑀺𑀓𑀭𑀡𑀚𑀺𑀬𑀸𑀕𑀸𑀳𑀚𑀺𑀬𑀸𑀯𑀺𑀚𑁆𑀛𑀸𑀤𑀻𑀳𑀺. 𑀏𑀯𑀁 𑀕𑀡𑀸𑀧𑁂𑀫𑀸𑀢𑀺 𑀏𑀓𑀁 𑀦𑀸𑀫 𑀏𑀓𑀫𑁂𑀯, 𑀤𑁆𑀯𑁂 𑀤𑀼𑀓𑀸 𑀘𑀢𑁆𑀢𑀸𑀭𑀺, 𑀢𑀻𑀡𑀺 𑀢𑀺𑀓𑀸𑀦𑀺 𑀦𑀯, 𑀘𑀢𑁆𑀢𑀸𑀭𑀺 𑀘𑀢𑀼𑀓𑁆𑀓𑀸𑀦𑀺 𑀲𑁄𑀴𑀲𑀸𑀢𑀺𑀆𑀤𑀺𑀦𑀸 𑀏𑀯𑀁 𑀕𑀡𑀦𑀁 𑀲𑀺𑀓𑁆𑀔𑀸𑀧𑁂𑀫.

𑁭𑁫. 𑀓𑁂𑀭𑀸𑀝𑀺𑀓𑀸 𑀳𑁄𑀦𑁆𑀢𑀻𑀢𑀺 𑀲𑀫𑀬𑀲𑁆𑀲 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀓𑀭𑀡𑀫𑀸𑀬𑀸𑀲𑀸𑀞𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺. 𑀢𑀁 𑀤𑀫𑀦𑀁 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀢𑀺, 𑀅𑀬𑀫𑀲𑁆𑀲 𑀚𑀸𑀢𑀺𑀤𑁄𑀲𑀸𑀪𑀸𑀯𑁄.

𑁭𑁬. 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀳𑀺 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑀸𑀬𑀸𑀢𑀺 𑀲𑀢𑀢𑀯𑀺𑀳𑀸𑀭𑀺𑀪𑀸𑀯𑀲𑀸𑀥𑀦𑁂𑀳𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀳𑀺 𑀲𑀫𑀦𑁆𑀦𑀸𑀕𑀫𑀢𑁆𑀣𑀸𑀬. 𑀦𑀦𑀼 𑀘 𑀔𑀻𑀡𑀸𑀲𑀯𑀸 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀘, 𑀓𑀣𑀁 𑀢𑀲𑁆𑀲 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀧𑀬𑁄𑀕𑀲𑀸𑀥𑀦𑀻𑀬𑀁 𑀧𑀯𑀢𑁆𑀢𑀦𑁆𑀢𑀺 𑀆𑀳 ‘‘𑀤𑁆𑀯𑁂 𑀳𑀻’’𑀢𑀺𑀆𑀤𑀺. 𑀲𑀢𑀢𑀯𑀺𑀳𑀸𑀭𑀻𑀢𑀺 𑀲𑀢𑀢𑀁 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀺𑀩𑀳𑀼𑀮𑀸, 𑀢𑀲𑁆𑀫𑀸 𑀢𑁂 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀦𑁄𑀲𑀢𑀢𑀯𑀺𑀳𑀸𑀭𑀺𑀦𑁄 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀅𑀦𑀸𑀘𑀺𑀡𑁆𑀡𑀪𑀸𑀯𑀢𑁄.

𑀢𑀁 𑀯𑀺𑀢𑀓𑁆𑀓𑁂𑀦𑁆𑀢𑁄𑀢𑀺 ‘‘𑀲𑀸𑀫𑀡𑁂𑀭𑀲𑁆𑀲 𑀲𑁂𑀦𑀸𑀲𑀦𑀁 𑀦𑀢𑁆𑀣𑀺, 𑀅𑀭𑀜𑁆𑀜𑀜𑁆𑀘 𑀲𑀻𑀳𑀸𑀤𑀻𑀳𑀺 𑀲𑀧𑀭𑀺𑀲𑁆𑀲𑀬𑀁, 𑀓𑀺𑀁 𑀦𑀼 𑀔𑁄 𑀢𑀲𑁆𑀲 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀯𑀺𑀢𑀓𑁆𑀓𑁂𑀦𑁆𑀢𑁄. 𑀏𑀯𑀭𑀽𑀧𑁄𑀢𑀺 𑀏𑀤𑀺𑀲𑁄 𑀬𑀣𑀸𑀯𑀼𑀢𑁆𑀢𑀲𑀸𑀫𑀡𑁂𑀭𑀲𑀤𑀺𑀲𑁄 𑀔𑀻𑀡𑀸𑀲𑀯𑁄. 𑀇𑀫𑁂 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑁂 𑀲𑀻𑀮𑀸𑀤𑀺𑀥𑀫𑁆𑀫𑁂. 𑀆𑀯𑀚𑁆𑀚𑀺𑀢𑁆𑀯𑀸𑀯𑀸𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀼𑀤𑁆𑀥𑀲𑀻𑀮𑀢𑀸𑀤𑀺𑀆𑀯𑀚𑁆𑀚𑀦𑀳𑁂𑀢𑀼 𑀏𑀯 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺.

𑁭𑁮. ‘‘𑀬𑁂𑀫𑁂, 𑀪𑁄 𑀕𑁄𑀢𑀫𑀸’’𑀢𑀺 𑀯𑀘𑀦𑀲𑁆𑀲 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁, ‘‘𑀢𑀣𑀸𑀕𑀢𑁂 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀦𑁆𑀢𑀺 ‘‘𑀬𑁂𑀫𑁂, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀆𑀓𑀸𑀭𑁂𑀳𑀺 𑀯𑀢𑁆𑀢𑀼𑀫𑀸𑀭𑀤𑁆𑀥𑁄.

𑀅𑀚𑁆𑀚𑀥𑀫𑁆𑀫𑁂𑀲𑀽𑀢𑀺 𑀅𑀧𑀼𑀭𑀸𑀢𑀦𑀥𑀫𑁆𑀫𑁂𑀲𑀼. 𑀢𑀓𑁆𑀓𑀦𑀫𑀢𑁆𑀢𑀸𑀦𑀺 𑀳𑀺 𑀢𑁂𑀳𑀺 𑀓𑀧𑁆𑀧𑁂𑀢𑁆𑀯𑀸 𑀲𑀬𑀁𑀧𑀝𑀺𑀪𑀸𑀦𑀁 𑀯𑀺𑀭𑀘𑀺𑀢𑀸𑀦𑀺. 𑀧𑀼𑀭𑀸𑀢𑀦𑀢𑀸𑀬 𑀧𑀭𑀺𑀧𑀼𑀡𑁆𑀡𑀢𑀸𑀬 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀺𑀓𑀢𑀸𑀬 𑀘 𑀧𑀭𑀫𑁄 𑀉𑀢𑁆𑀢𑀫𑁄. 𑀢𑁂𑀦𑀸𑀳 𑁋 ‘‘𑀢𑁂𑀲𑀼…𑀧𑁂… 𑀉𑀢𑁆𑀢𑀫𑁄𑀢𑀺 𑀅𑀢𑁆𑀣𑁄’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀕𑀡𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.