𑁯. 𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬𑁨. 𑀢𑀼𑀤𑀺𑀲𑀜𑁆𑀜𑀸𑀢𑁄 𑀕𑀸𑀫𑁄 𑀦𑀺𑀕𑀫𑁄 𑀏𑀢𑀲𑁆𑀲𑀸𑀢𑀺 𑀢𑁄𑀤𑁂𑀬𑁆𑀬𑁄, 𑀢𑀲𑁆𑀲 𑀅𑀢𑁆𑀢𑀚𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄𑀢𑀺 𑀆𑀳 ‘‘𑀢𑀼𑀤𑀺𑀕𑀸𑀫𑀸’’𑀢𑀺𑀆𑀤𑀺. 𑀆𑀭𑀸𑀥𑀓𑁄𑀢𑀺 𑀲𑀁𑀭𑀸𑀥𑀓𑁄. 𑀥𑀫𑁆𑀫𑀦𑀺𑀲𑀦𑁆𑀢𑀺 𑀬𑀲𑁆𑀫𑀸 𑀲𑀫𑁆𑀧𑀸𑀤𑀦𑁂𑀦 𑀧𑀭𑀺𑀧𑀽𑀭𑀡𑁂𑀦 𑀇𑀘𑁆𑀙𑀺𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀸𑀤𑀓𑁄 𑀧𑀭𑀺𑀧𑀽𑀭𑀓𑁄’’𑀢𑀺. 𑀜𑀸𑀬𑀢𑀺 𑀦𑀺𑀘𑁆𑀙𑀬𑁂𑀦 𑀕𑀫𑁂𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀯𑀸 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀏𑀢𑁂𑀦𑀸𑀢𑀺 𑀜𑀸𑀬𑁄, 𑀢𑀢𑁄 𑀏𑀢𑀲𑁆𑀲 𑀲𑀫𑁆𑀧𑀸𑀤𑀓𑀳𑁂𑀢𑀼𑀪𑀸𑀯𑀢𑁄 𑀜𑀸𑀬𑁄 𑀥𑀫𑁆𑀫𑁄 𑀅𑀭𑀺𑀬𑀫𑀕𑁆𑀕𑁄 𑀢𑀁 𑀜𑀸𑀬𑀁 𑀥𑀫𑁆𑀫𑀁. 𑀢𑁂𑀦𑀸𑀳 ‘‘𑀓𑀸𑀭𑀡𑀥𑀫𑁆𑀫’’𑀦𑁆𑀢𑀺. 𑀅𑀦𑀯𑀚𑁆𑀚𑀦𑁆𑀢𑀺 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀁.

𑁪𑁬𑁩. 𑀯𑀝𑁆𑀝𑀘𑀸𑀭𑀓𑀢𑁄 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀈𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀬-𑀓𑀸𑀭𑀲𑁆𑀲 𑀘 𑀓-𑀓𑀸𑀭𑀁 𑀓𑀢𑁆𑀯𑀸. 𑀦𑀺𑀬𑁆𑀬𑀸𑀦𑁂 𑀯𑀸 𑀦𑀺𑀬𑀼𑀢𑁆𑀢𑀁, 𑀦𑀺𑀬𑁆𑀬𑀸𑀦𑀁 𑀲𑀻𑀮𑀦𑁆𑀢𑀺 𑀯𑀸 𑀦𑀺𑀬𑁆𑀬𑀸𑀦𑀺𑀓𑀁, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀁. 𑀲𑀸 𑀧𑀦 𑀅𑀢𑁆𑀣𑀢𑁄 𑀅𑀓𑀼𑀲𑀮𑀓𑀺𑀭𑀺𑀬𑀸𑀢𑀺 𑀆𑀳 ‘‘𑀅𑀓𑀼𑀲𑀮𑀧𑀝𑀺𑀧𑀤’’𑀦𑁆𑀢𑀺.

𑀩𑀳𑀼𑀪𑀸𑀯𑀯𑀸𑀘𑀓𑁄 𑀇𑀥 𑀫𑀳𑀸𑀲𑀤𑁆𑀤𑁄 ‘‘𑀫𑀳𑀸𑀚𑀦𑁄’’𑀢𑀺𑀆𑀤𑀻𑀲𑀼𑀯𑀺𑀬𑀸𑀢𑀺 𑀆𑀳 ‘‘𑀫𑀳𑀦𑁆𑀢𑁂𑀳𑀺 𑀩𑀳𑀽𑀳𑀻’’𑀢𑀺. 𑀅𑀢𑁆𑀣𑁄𑀢𑀺 𑀧𑀬𑁄𑀚𑀦𑀁. 𑀫𑀳𑀦𑁆𑀢𑀸𑀦𑀻𑀢𑀺 𑀩𑀳𑀼𑀮𑀸𑀦𑀺. 𑀓𑀺𑀘𑁆𑀘𑀸𑀦𑀻𑀢𑀺 𑀓𑀸𑀢𑀩𑁆𑀩𑀸𑀦𑀺. 𑀅𑀥𑀺𑀓𑀭𑀡𑀸𑀦𑀻𑀢𑀺 𑀅𑀥𑀺𑀓𑀸𑀭𑀚𑀻𑀯𑀺𑀓𑀸𑀭𑀽𑀧𑀸𑀦𑀺. 𑀖𑀭𑀸𑀯𑀸𑀲𑀓𑀫𑁆𑀫𑀫𑁂𑀯 𑀧𑀜𑁆𑀘𑀩𑀮𑀺𑀓𑀭𑀡𑀤𑀲𑀅𑀢𑁆𑀣𑀝𑁆𑀞𑀸𑀦𑀪𑀸𑀯𑀢𑁄 𑀮𑁄𑀓𑀬𑀸𑀢𑁆𑀭𑀸𑀬 𑀘 𑀲𑀫𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸 𑀯𑀸 𑀳𑁂𑀢𑀼𑀪𑀸𑀯𑀢𑁄 𑀖𑀭𑀸𑀯𑀸𑀲𑀓𑀫𑁆𑀫𑀝𑁆𑀞𑀸𑀦𑀁.

‘‘𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫’’𑀦𑁆𑀢𑀺. (𑀚𑀸. 𑁧.𑁧.𑁪);

𑀕𑀸𑀣𑀸𑀬 𑀯𑀼𑀢𑁆𑀢𑀦𑀬𑁂𑀦 𑀘𑀽𑀴𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀺𑀬.

𑁪𑁬𑁪. 𑀅𑀬𑁄𑀦𑀺𑀲𑁄 𑀧𑀯𑀢𑁆𑀢𑀺𑀢𑀁 𑀯𑀸𑀡𑀺𑀚𑁆𑀚𑀓𑀫𑁆𑀫𑀁 𑀯𑀺𑀬 𑀅𑀧𑀸𑀬𑀪𑀽𑀢𑀁 𑀓𑀲𑀺𑀓𑀫𑁆𑀫𑀁 𑀦𑀺𑀤𑀲𑁆𑀲𑀦𑀪𑀸𑀯𑁂 𑀞𑀧𑁂𑀢𑁆𑀯𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀁 𑀖𑀭𑀸𑀯𑀸𑀲𑀓𑀺𑀘𑁆𑀘𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀬𑀣𑀸 𑀓𑀲𑀺…𑀧𑁂… 𑀏𑀯𑀁 𑀖𑀭𑀸𑀯𑀸𑀲𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀻’’𑀢𑀺. 𑀩𑁆𑀭𑀸𑀳𑁆𑀫𑀡𑀪𑀢𑁆𑀢𑁄 𑀅𑀳𑁄𑀲𑀻𑀢𑀺 𑀲𑁄 𑀓𑀺𑀭 𑀩𑀳𑀽 𑀩𑁆𑀭𑀸𑀳𑁆𑀫𑀡𑁂 𑀥𑀦𑀁 𑀤𑀢𑁆𑀯𑀸 𑀬𑀜𑁆𑀜𑀁 𑀓𑀸𑀭𑁂𑀲𑀺. 𑀉𑀧𑀭𑀻𑀢𑀺 ‘‘𑀉𑀧𑀭𑀺 𑀉𑀧𑀝𑁆𑀞𑀸𑀢𑀻𑀢𑀺 𑀯𑀤𑁂𑀳𑀻’’𑀢𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀅𑀢𑁆𑀢𑀦𑁄 𑀲𑀫𑀬𑁂𑀦 𑀆𑀘𑀺𑀓𑁆𑀔𑀸𑀧𑀺𑀢𑁄𑀧𑀺 𑀬𑀣𑀸 𑀉𑀧𑀝𑁆𑀞𑀺𑀢𑀫𑁂𑀯 𑀓𑀣𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄, 𑀅𑀣 𑀩𑁆𑀭𑀸𑀳𑁆𑀫𑀡𑀸 𑁋 ‘‘𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀬𑀜𑁆𑀜𑁂 𑀤𑁄𑀲𑁄 𑀤𑀺𑀦𑁆𑀦𑁄’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀢𑀲𑁆𑀲 𑀓𑀴𑁂𑀯𑀭𑀁 𑀲𑀼𑀲𑀸𑀦𑀁 𑀦𑁂𑀢𑀼𑀁 𑀦𑀸𑀤𑀁𑀲𑀼. 𑀅𑀣𑀲𑁆𑀲 𑀜𑀸𑀢𑀓𑁂𑀳𑀺 𑀲𑀳𑀲𑁆𑀲𑁂 𑀤𑀺𑀦𑁆𑀦𑁂 𑀢𑀁 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀕𑁂𑀳𑀢𑁄 𑀦𑀻𑀳𑀭𑀺𑀢𑀼𑀁 𑀅𑀤𑀁𑀲𑀼. 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀙𑀢𑁆𑀢𑀺𑀁𑀲 𑀇𑀢𑁆𑀣𑀺𑀬𑁄 ‘‘𑀏𑀓𑀸 𑀯𑀢𑁆𑀣𑀁 𑀅𑀤𑀸𑀲𑀺, 𑀏𑀓𑀸 𑀕𑀦𑁆𑀥𑀁, 𑀏𑀓𑀸 𑀲𑀼𑀫𑀦𑀫𑀸𑀮’’𑀦𑁆𑀢𑀺𑀆𑀤𑀺𑀦𑀸 𑀢𑀁 𑀢𑀁 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀭𑀺𑀘𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼 𑀲𑀳𑀲𑁆𑀲𑀅𑀘𑁆𑀙𑀭𑀸𑀧𑀭𑀺𑀯𑀸𑀭𑀺𑀓𑀸, 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀯𑁂𑀚𑀬𑀦𑁆𑀢𑀭𑀣𑀁 𑀧𑁂𑀲𑁂𑀢𑁆𑀯𑀸 𑀧𑀓𑁆𑀓𑁄𑀲𑀸𑀧𑀺𑀢𑁂𑀦 𑀕𑀼𑀢𑁆𑀢𑀺𑀮𑀸𑀘𑀭𑀺𑀬𑀪𑀽𑀢𑁂𑀦 𑀫𑀳𑀸𑀩𑁄𑀥𑀺𑀲𑀢𑁆𑀢𑁂𑀦 𑀧𑀼𑀘𑁆𑀙𑀺𑀢𑀸 𑀢𑀁 𑀢𑀁 𑀅𑀢𑁆𑀢𑀦𑀸 𑀓𑀢𑀁 𑀧𑀼𑀜𑁆𑀜𑀁 𑀩𑁆𑀬𑀸𑀓𑀭𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀓𑀮𑀸𑀬 𑀕𑀼𑀢𑁆𑀢𑀺𑀮𑀯𑀺𑀫𑀸𑀦𑀓𑀣𑀸𑀬 𑀤𑀻𑀧𑁂𑀢𑀩𑁆𑀩’’𑀦𑁆𑀢𑀺. 𑀯𑀡𑀺𑀚𑁆𑀚𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀧𑀚𑁆𑀚𑀫𑀸𑀦𑀦𑁆𑀢𑀺 𑀏𑀢𑁆𑀣 𑀢𑀲𑁆𑀲 𑀯𑀺𑀧𑀚𑁆𑀚𑀫𑀸𑀦𑀸𑀓𑀸𑀭𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄. 𑀏𑀯𑀁 𑀧𑀩𑁆𑀩𑀚𑁆𑀚𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀯𑀺𑀧𑀚𑁆𑀚𑀫𑀸𑀦𑀁 𑀅𑀧𑁆𑀧𑀨𑀮𑀁 𑀳𑁄𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀲𑀻𑀮𑁂𑀲𑀼 𑀅𑀧𑀭𑀺𑀧𑀽𑀭𑀓𑀸𑀭𑀺𑀦𑁄𑀢𑀺𑀆𑀤𑀺 𑀢𑀲𑁆𑀲 𑀯𑀺𑀧𑀚𑁆𑀚𑀦𑀸𑀓𑀸𑀭𑀤𑀲𑁆𑀲𑀦𑀁. 𑀛𑀸𑀦𑀸𑀤𑀺𑀲𑀼𑀔𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀅𑀪𑀺𑀜𑁆𑀜𑀸𑀯𑀺𑀧𑀲𑁆𑀲𑀦𑀸𑀤𑀺𑀲𑀼𑀔𑀲𑁆𑀲 𑀯𑀺𑀬 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀲𑀻𑀮𑀲𑀫𑁆𑀧𑀤𑀸𑀤𑀺𑀲𑀼𑀔𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀭𑀳𑀢𑁆𑀢𑀫𑁆𑀧𑀺 𑀧𑀸𑀧𑀼𑀡𑀸𑀢𑀺 𑀧𑀕𑁂𑀯 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀘𑀸𑀕𑀲𑀻𑀲𑁂𑀦𑀸𑀢𑀺 𑀧𑀥𑀸𑀦𑀪𑀽𑀢𑁂𑀦 𑀘𑀸𑀕𑁂𑀦 𑀤𑀸𑀦𑁂𑀦 𑀢𑀁 𑀅𑀯𑀲𑁆𑀲𑀬𑀁 𑀓𑀢𑁆𑀯𑀸. 𑀏𑀢𑁆𑀣 𑀢𑁂 𑀦 𑀓𑁄𑀘𑀺 𑀅𑀨𑀸𑀲𑀼𑀓𑀪𑀸𑀯𑁄𑀢𑀺. 𑀉𑀚𑀼𑀓𑀁 𑀓𑀢𑁆𑀯𑀸 𑀅𑀯𑀺𑀭𑀼𑀤𑁆𑀥𑀁 𑀓𑀢𑁆𑀯𑀸, 𑀲𑀫𑁆𑀧𑀬𑁄𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀧𑀘𑀭𑀺𑀬𑀦𑁆𑀢𑀺 𑀅𑀕𑁆𑀕𑀺𑀧𑀭𑀺𑀘𑀭𑀡𑀁, 𑀢𑀧𑀘𑀭𑀺𑀬𑀜𑁆𑀘 𑀩𑁆𑀭𑀳𑁆𑀫𑀘𑀭𑀺𑀬𑀕𑁆𑀕𑀳𑀡𑀸 𑀤𑀼𑀝𑁆𑀞𑀼𑀮𑁆𑀮𑀪𑀸𑀯𑀢𑁄.

𑁪𑁬𑁬. 𑀅𑀚𑀸𑀦𑀦𑀪𑀸𑀯𑀦𑁆𑀢𑀺 𑀅𑀲𑀩𑁆𑀩𑀜𑁆𑀜𑀼𑀪𑀸𑀯𑀁. 𑀪𑀕𑀯𑀢𑁄 𑀧𑀦 𑀲𑀩𑁆𑀩𑀜𑁆𑀜𑀼𑀪𑀸𑀯𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀚𑀮𑀢𑀮𑁂 𑀧𑀓𑁆𑀔𑀺𑀢𑁆𑀢𑀢𑁂𑀮𑀁 𑀯𑀺𑀬 𑀧𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑁄, 𑀦 𑀫𑁂 𑀇𑀤𑀁 𑀧𑀢𑀺𑀭𑀽𑀧𑀁, 𑀢𑀢𑁄 𑀧𑀭𑀺𑀯𑀢𑁆𑀢𑀺𑀲𑁆𑀲𑀸𑀫𑀻𑀢𑀺 ‘‘𑀩𑁆𑀭𑀸𑀳𑁆𑀫𑀡𑁄, 𑀪𑁄, 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳. 𑀧𑀘𑁆𑀘𑀸𑀳𑀭𑀺𑀢𑀼𑀁 𑀧𑀝𑀺𑀧𑀓𑁆𑀔𑁂𑀦 𑀅𑀧𑀳𑀭𑀺𑀢𑀼𑀁. 𑀲𑁂𑀢𑀧𑁄𑀓𑁆𑀔𑀭𑀲𑀤𑀺𑀲𑁄𑀢𑀺 𑀧𑀼𑀡𑁆𑀟𑀭𑀻𑀓𑀧𑀢𑁆𑀢𑀲𑀤𑀺𑀲𑀯𑀡𑁆𑀡𑁄. 𑀲𑀼𑀯𑀝𑁆𑀝𑀺𑀢𑀸𑀢𑀺 𑀯𑀝𑁆𑀝𑀪𑀸𑀯𑀬𑀼𑀢𑁆𑀢𑀝𑁆𑀞𑀸𑀦𑁂 𑀲𑀼𑀯𑀝𑁆𑀝𑀸. 𑀦𑀸𑀫𑀓𑀁𑀬𑁂𑀯𑀸𑀢𑀺 𑀦𑀸𑀫𑀫𑀢𑁆𑀢𑀫𑁂𑀯 𑀯𑀘𑀦𑀫𑀢𑁆𑀢𑀫𑁂𑀯. 𑀢𑀣𑀸𑀪𑀽𑀢𑀸𑀦𑀁 𑀪𑀸𑀯𑀲𑁆𑀲𑀧𑀺 𑀅𑀪𑀸𑀯𑁂𑀦 𑀦𑀺𑀳𑀻𑀦𑀁 𑀦𑀸𑀫 𑀳𑁄𑀢𑀺, 𑀦𑀸𑀫-𑀲𑀤𑁆𑀤𑁄 𑀦𑀺𑀳𑀻𑀦𑀧𑀭𑀺𑀬𑀸𑀬𑁄. 𑀢𑁂𑀦𑀸𑀳 𑁋 ‘‘𑀮𑀸𑀫𑀓𑀁𑀬𑁂𑀯𑀸’’𑀢𑀺.

𑁪𑁬𑁭. 𑀓𑀢𑀫𑀸 𑀯𑀸𑀘𑀸 𑀢𑁂𑀲𑀁 𑀲𑁂𑀬𑁆𑀬𑁄𑀢𑀺 𑀢𑁂𑀲𑀁 𑀘𑀗𑁆𑀓𑀺𑀬𑀸𑀤𑀻𑀦𑀁 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀦𑀁 𑀯𑀼𑀘𑁆𑀘𑀫𑀸𑀦𑀯𑀺𑀪𑀸𑀕𑀸𑀲𑀼 𑀯𑀸𑀘𑀸𑀲𑀼 𑀓𑀢𑀫𑀸 𑀯𑀸𑀘𑀸 𑀲𑁂𑀬𑁆𑀬𑁄𑀢𑀺. ‘‘𑀲𑁂𑀬𑁆𑀬𑀸’’𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. 𑀲𑀫𑁆𑀫𑀼𑀢𑀺𑀬𑀸𑀢𑀺 𑀅𑀯𑀺𑀮𑀗𑁆𑀖𑀺𑀢𑀲𑀸𑀥𑀼𑀫𑀭𑀺𑀬𑀸𑀤𑀸𑀬 𑀮𑁄𑀓𑀲𑀫𑁆𑀫𑀼𑀢𑀺𑀬𑀸. 𑀢𑁂𑀦𑀸𑀳 ‘‘𑀮𑁄𑀓𑀯𑁄𑀳𑀸𑀭𑁂𑀦𑀸’’𑀢𑀺. 𑀫𑀦𑁆𑀢𑀸𑀢𑀺 𑀫𑀦𑁆𑀢𑀸𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀫𑀦𑁆𑀢𑁂𑀢𑁆𑀯𑀸 𑀚𑀸𑀦𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀢𑀼𑀮𑀬𑀺𑀢𑁆𑀯𑀸’’𑀢𑀺. 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀳𑁂𑀢𑀼𑀲𑀜𑁆𑀳𑀺𑀢𑀁. 𑀢𑀁 𑀧𑀦 𑀏𑀓𑀁𑀲𑀢𑁄 𑀬𑀼𑀢𑁆𑀢𑀺𑀬𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀓𑀸𑀭𑀡𑀦𑀺𑀲𑁆𑀲𑀺𑀢’’𑀦𑁆𑀢𑀺. 𑀆𑀯𑀼𑀢𑁄𑀢𑀺𑀆𑀤𑀻𑀲𑀼 𑀆𑀤𑀺𑀢𑁄 𑀅𑀪𑀺𑀫𑀼𑀔𑀁 𑀜𑀸𑀡𑀕𑀢𑀺𑀬𑀸 𑀯𑀺𑀩𑀦𑁆𑀥𑀦𑁂𑀦 𑀆𑀯𑀼𑀢𑁄, 𑀆𑀯𑀭𑀺𑀬𑁂𑀦 𑀯𑀺𑀲𑁂𑀲𑀢𑁄 𑀜𑀸𑀡𑀕𑀢𑀺𑀬𑀸 𑀦𑀺𑀩𑀦𑁆𑀥𑀦𑁂𑀦 𑀦𑀺𑀯𑀼𑀢𑁄, 𑀏𑀯𑀁 𑀑𑀨𑀼𑀝𑁄 𑀧𑀮𑀺𑀕𑀼𑀡𑁆𑀞𑀺𑀢𑁄. 𑀧𑀭𑀺𑀬𑁄𑀦𑀤𑁆𑀥𑁄𑀢𑀺 𑀲𑀫𑀦𑁆𑀢𑀢𑁄 𑀑𑀦𑀤𑁆𑀥𑁄 𑀙𑀸𑀤𑀺𑀢𑁄. 𑀢𑁂𑀦𑀸𑀳 ‘‘𑀧𑀮𑀺𑀯𑁂𑀞𑀺𑀢𑁄’’𑀢𑀺.

𑁪𑁬𑁮. 𑀲𑀘𑁂 𑀏𑀢𑀁 𑀓𑀸𑀭𑀡𑀫𑀢𑁆𑀣𑀻𑀢𑀺 ‘‘𑀦𑀺𑀲𑁆𑀲𑀝𑁆𑀞𑀢𑀺𑀡𑀓𑀝𑁆𑀞𑀼𑀧𑀸𑀤𑀸𑀦𑁄 𑀅𑀕𑁆𑀕𑀺 𑀚𑀮𑀢𑀻’’𑀢𑀺 𑀏𑀢𑀁 𑀓𑀸𑀭𑀡𑀁 𑀲𑀘𑁂 𑀅𑀢𑁆𑀣𑀺 𑀬𑀤𑀺 𑀲𑀺𑀬𑀸, 𑀲𑁄 𑀅𑀧𑀭𑁄 𑀢𑀺𑀡𑀓𑀝𑁆𑀞𑀼𑀧𑀸𑀤𑀸𑀦𑁄 𑀅𑀕𑁆𑀕𑀺 𑀬𑀤𑀺 𑀪𑀯𑁂𑀬𑁆𑀬. 𑀲𑀤𑁄𑀲𑁄 𑀲𑀸𑀤𑀻𑀦𑀯𑁄 𑀲𑀧𑀭𑀺𑀓𑁆𑀓𑀺𑀮𑁂𑀲𑁄. 𑀧𑀭𑀺𑀲𑀼𑀤𑁆𑀥𑁄𑀢𑀺 𑀉𑀧𑀓𑁆𑀓𑀺𑀮𑁂𑀲𑀸𑀪𑀸𑀯𑁂𑀦 𑀲𑀩𑁆𑀩𑀲𑁄 𑀲𑀼𑀤𑁆𑀥𑁄. 𑀚𑀸𑀢𑀺 𑀆𑀤𑀻𑀦𑀁 𑀅𑀪𑀸𑀯𑁂𑀦𑀸𑀢𑀺 𑀚𑀸𑀢𑀺𑀧𑀘𑁆𑀘𑀬𑀸𑀦𑀁 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀦𑀺𑀕𑁆𑀕𑀫𑁂𑀦.

𑁪𑁬𑁯. 𑀦 𑀦𑀺𑀘𑁆𑀘𑀮𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀢𑀢𑁆𑀣 𑀧𑀓𑁆𑀔𑀺𑀧𑀺𑀢𑀩𑁆𑀩𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸 𑀬𑀣𑀸𑀧𑀜𑁆𑀜𑀢𑁆𑀢𑀁 𑀳𑀼𑀢𑁆𑀯𑀸 𑀦𑀺𑀘𑁆𑀘𑀮𑀸 𑀅𑀓𑀫𑁆𑀧𑀺𑀬𑀸 𑀦 𑀢𑀺𑀝𑁆𑀞𑀦𑁆𑀢𑀺. 𑀢𑀁 𑀤𑁄𑀲𑀁 𑀢𑀁 𑀊𑀦𑀢𑀸𑀤𑁄𑀲𑀁.

𑀅𑀜𑁆𑀜𑀲𑁆𑀫𑀺𑀁 𑀅𑀲𑀢𑀻𑀢𑀺 𑀅𑀢𑁆𑀣𑀪𑀜𑁆𑀚𑀓𑀫𑀼𑀲𑀸𑀯𑀸𑀤𑁂 𑀅𑀲𑀢𑀺. 𑀲𑁄 𑀳𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀅𑀤𑀸𑀢𑀼𑀓𑀸𑀫𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀅𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑀪𑀸𑀯𑀲𑁆𑀲 𑀯𑀺𑀧𑀭𑀻𑀢𑁄 𑀅𑀜𑁆𑀜𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀢𑀣𑀸 𑀳𑀺 𑀇𑀢𑀭𑁄 𑀬𑁂𑀪𑀼𑀬𑁆𑀬𑁂𑀦 𑀯𑀴𑀜𑁆𑀚𑀺𑀢𑀩𑁆𑀩𑀢𑁄 𑀯𑁄𑀳𑀭𑀺𑀢𑀩𑁆𑀩𑀢𑁄 𑀯𑀴𑀜𑁆𑀚𑀓𑀫𑀼𑀲𑀸𑀯𑀸𑀤𑁄𑀢𑀺 𑀆𑀳. 𑀦 𑀓𑀤𑀸𑀘𑀺 𑀫𑀼𑀲𑀸𑀯𑀸𑀤𑀻𑀢𑀺 𑀤𑁆𑀯𑁂 𑀓𑀣𑀸 𑀦 𑀓𑀣𑁂𑀦𑁆𑀢𑀺. 𑀩𑀸𑀳𑀺𑀭𑀓𑀸𑀦𑀁 𑀅𑀦𑀯𑀚𑁆𑀚𑀢𑀧𑀲𑀫𑁆𑀫𑀢𑀸𑀬𑀧𑀺 𑀦𑀺𑀲𑁆𑀲𑀺𑀢𑁄𑀢𑀺 𑀯𑀢𑁆𑀢𑀼𑀁 𑀆𑀳 ‘‘𑀲𑀻𑀮𑀯𑀸 𑀢𑀧𑀦𑀺𑀲𑁆𑀲𑀺𑀢𑀓𑁄 𑀳𑁄𑀢𑀺’’𑀢𑀺. 𑀯𑀺𑀯𑀝𑀫𑀼𑀔𑀸 𑀫𑀦𑁆𑀢𑀚𑁆𑀛𑁂𑀦𑀫𑀡𑁆𑀟𑀺𑀢𑀸 𑀲𑀩𑁆𑀩𑀲𑁄 𑀲𑀚𑁆𑀛𑀸𑀬𑀸 𑀳𑁄𑀦𑁆𑀢𑀺, 𑀦 𑀇𑀢𑀭𑁂𑀢𑀺 𑀆𑀳 ‘‘𑀧𑀩𑁆𑀩𑀚𑀺𑀢𑀸 𑀦𑀺𑀘𑁆𑀘𑀁 𑀲𑀚𑁆𑀛𑀸𑀬𑀦𑁆𑀢𑀻’’𑀢𑀺.

𑁪𑁭𑁦. 𑀘𑀺𑀭𑀁 𑀦𑀺𑀓𑁆𑀔𑀦𑁆𑀢𑁄𑀢𑀺 𑀦𑀺𑀕𑁆𑀕𑀢𑁄 𑀳𑀼𑀢𑁆𑀯𑀸 𑀘𑀺𑀭𑀓𑀸𑀮𑁂. 𑀦 𑀲𑀩𑁆𑀩𑀲𑁄 𑀧𑀘𑁆𑀘𑀓𑁆𑀔𑀸 𑀳𑁄𑀦𑁆𑀢𑀺 𑀲𑀢𑀺𑀲𑀫𑁆𑀫𑁄𑀳𑀢𑁄 𑀫𑀕𑁆𑀕𑀸𑀦𑀜𑁆𑀘 𑀅𑀜𑁆𑀜𑀣𑀸 𑀓𑀭𑀡𑀢𑁄. 𑀘𑀺𑀭𑀸𑀬𑀺𑀢𑀢𑁆𑀢𑀦𑁆𑀢𑀺 ‘‘𑀅𑀬𑀁 𑀫𑀕𑁆𑀕𑁄’’𑀢𑀺 𑀓𑀣𑀦𑀲𑁆𑀲 𑀘𑀺𑀭𑀸𑀬𑀦𑀁. 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀦𑁆𑀢𑀺 𑀅𑀲𑀧𑁆𑀧𑀝𑀺𑀪𑀸𑀦𑀁. 𑀢𑀁 𑀧𑀦 𑀲𑀉𑀧𑀫𑀸𑀳 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀩𑀮𑀲𑀫𑁆𑀧𑀦𑁆𑀦𑁄𑀢𑀺 𑀓𑀸𑀬𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀧𑀫𑀸𑀡𑀓𑀭𑀸𑀦𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀁 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 ‘‘𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀓𑀸𑀫𑀸𑀯𑀘𑀭’’𑀦𑁆𑀢𑀺 𑀆𑀳, 𑀢𑁂𑀲𑀁 𑀧𑀦 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀭𑀽𑀧𑀸𑀭𑀽𑀧𑀸𑀯𑀘𑀭’’𑀦𑁆𑀢𑀺. 𑀢𑀢𑁆𑀣𑀸𑀧𑀺 𑀯𑀺𑀲𑁂𑀲𑀢𑁄 𑀅𑀧𑁆𑀧𑀫𑀜𑁆𑀜𑀸𑀪𑀸𑀯𑀦𑀸 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀢𑁂𑀲𑀼𑀧𑀻’’𑀢𑀺𑀆𑀤𑀺. 𑀦𑀺𑀭𑀻𑀳𑀓𑀢𑁆𑀢𑀸 𑀬𑀣𑀸 𑀅𑀧𑁆𑀧𑀫𑀸𑀡𑀲𑀫𑀜𑁆𑀜𑀸 𑀮𑀩𑁆𑀪𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀫𑀸𑀡𑀁…𑀧𑁂… 𑀯𑀼𑀘𑁆𑀘𑀢𑀻’’𑀢𑀺 𑀆𑀳. 𑀦 𑀑𑀳𑀻𑀬𑀢𑀺 𑀦 𑀢𑀺𑀝𑁆𑀞𑀢𑀻𑀢𑀺 𑀓𑀢𑀽𑀧𑀘𑀺𑀢𑀫𑁆𑀧𑀺 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀬𑀣𑀸𑀥𑀺𑀕𑀢𑁂 𑀫𑀳𑀕𑁆𑀕𑀢𑀚𑁆𑀛𑀸𑀦𑁂 𑀅𑀧𑀭𑀺𑀳𑀻𑀦𑁂 𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀆𑀲𑀻𑀤𑁂𑀢𑁆𑀯𑀸 𑀧𑀲𑁆𑀲𑁂 𑀑𑀳𑀻𑀬𑀓𑀁 𑀓𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀁 𑀤𑀸𑀢𑀼𑀁 𑀲𑀫𑀢𑁆𑀣𑀪𑀸𑀯𑁂𑀦 𑀦 𑀢𑀺𑀝𑁆𑀞𑀢𑀺. 𑀮𑀕𑁆𑀕𑀺𑀢𑀼𑀦𑁆𑀢𑀺 𑀆𑀯𑀭𑀺𑀢𑀼𑀁. 𑀞𑀸𑀢𑀼𑀦𑁆𑀢𑀺 𑀧𑀢𑀺𑀝𑁆𑀞𑀸𑀢𑀼𑀁. 𑀨𑀭𑀺𑀢𑁆𑀯𑀸𑀢𑀺 𑀧𑀝𑀺𑀧𑁆𑀨𑀭𑀺𑀢𑁆𑀯𑀸. 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸𑀢𑀺 𑀢𑀲𑁆𑀲 𑀲𑀸𑀫𑀢𑁆𑀣𑀺𑀬𑀁 𑀔𑁂𑀧𑁂𑀢𑁆𑀯𑀸. 𑀓𑀫𑁆𑀫𑀲𑁆𑀲 𑀧𑀭𑀺𑀬𑀸𑀤𑀺𑀬𑀦𑀁 𑀦𑀸𑀫 𑀯𑀺𑀧𑀸𑀓𑀼𑀧𑁆𑀧𑀸𑀤𑀩𑀦𑁆𑀥𑀦𑀫𑁂𑀯𑀸𑀢𑀺 𑀆𑀳 𑁋 ‘‘𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.