𑁧𑁦. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁩. 𑀅𑀪𑀺𑀧𑁆𑀧𑀲𑀦𑁆𑀦𑀸𑀢𑀺 𑀅𑀪𑀺𑀲𑀫𑁂𑀘𑁆𑀘 𑀧𑀲𑀦𑁆𑀦𑀸. 𑀢𑁂𑀦𑀸𑀳 𑁋 ‘‘𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀯𑀲𑁂𑀦 𑀧𑀲𑀦𑁆𑀦𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑀻 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸𑀬 ‘‘𑀢𑀼𑀬𑁆𑀳𑀁 𑀤𑁂𑀬𑁆𑀬𑀥𑀫𑁆𑀫𑀁 𑀭𑀼𑀘𑁆𑀘𑀦𑀓𑀝𑁆𑀞𑀸𑀦𑁂 𑀤𑁂𑀳𑀻’’𑀢𑀺 𑀆𑀳. 𑀫𑀕𑁆𑀕𑁂𑀦𑁂𑀯 𑀳𑀺𑀲𑁆𑀲𑀸 𑀫𑀘𑁆𑀙𑀭𑀺𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀩𑀼𑀤𑁆𑀥𑀧𑀓𑁆𑀔𑀩𑁆𑀭𑀸𑀳𑁆𑀫𑀡𑀧𑀓𑁆𑀔𑀯𑀲𑁂𑀦 𑀉𑀪𑀢𑁄𑀧𑀓𑁆𑀔𑀺𑀓𑀸.

𑀓𑀺𑀁𑀲𑀽𑀢𑀺 𑀓𑀺𑀦𑁆𑀢𑀺 𑀧𑀼𑀘𑁆𑀙𑀸𑀯𑀘𑀦𑀁. 𑀙𑁂𑀢𑁆𑀯𑀸 𑀅𑀦𑀸𑀤𑀺𑀬𑀺𑀢𑁆𑀯𑀸 𑀯𑀺𑀦𑀸𑀲𑁂𑀢𑁆𑀯𑀸. 𑀲𑀼𑀔𑀁 𑀲𑁂𑀢𑀻𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀧𑀸𑀪𑀸𑀯𑁂𑀦 𑀲𑀼𑀔𑁂𑀦 𑀲𑀼𑀧𑀢𑀺. 𑀦 𑀲𑁄𑀘𑀢𑀻𑀢𑀺 𑀢𑀢𑁄 𑀏𑀯 𑀲𑁄𑀓𑀁 𑀦𑀸𑀫 𑀯𑀺𑀦𑀸𑀲𑁂𑀢𑀺. 𑀓𑁄𑀥𑀦𑁆𑀢𑀺 𑀓𑀼𑀚𑁆𑀛𑀦𑀮𑀓𑁆𑀔𑀡𑀁 𑀓𑁄𑀥𑀁. 𑀙𑁂𑀢𑁆𑀯𑀸 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀲𑀼𑀔𑀁 𑀲𑁂𑀢𑀻𑀢𑀺 𑀓𑁄𑀥𑀧𑀭𑀺𑀴𑀸𑀳𑁂𑀦 𑀅𑀧𑀭𑀺𑀟𑀬𑁆𑀳𑀫𑀸𑀦𑀢𑁆𑀢𑀸 𑀲𑀼𑀔𑀁 𑀲𑀼𑀧𑀢𑀺. 𑀓𑁄𑀥𑀯𑀺𑀦𑀸𑀲𑁂𑀦 𑀯𑀺𑀦𑀝𑁆𑀞𑀤𑁄𑀫𑀦𑀲𑁆𑀲𑀢𑁆𑀢𑀸 𑀦 𑀲𑁄𑀘𑀢𑀺. 𑀯𑀺𑀲𑀫𑀽𑀮𑀲𑁆𑀲𑀸𑀢𑀺 𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲. 𑀫𑀥𑀼𑀭𑀕𑁆𑀕𑀲𑁆𑀲𑀸𑀢𑀺 𑀅𑀓𑁆𑀓𑁄𑀲𑀓𑀲𑁆𑀲 𑀧𑀘𑁆𑀘𑀓𑁆𑀓𑁄𑀲𑀦𑁂𑀦, 𑀧𑀳𑀸𑀭𑀓𑀲𑁆𑀲 𑀧𑀝𑀺𑀧𑁆𑀧𑀳𑀭𑀡𑁂𑀦 𑀬𑀁 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀯 ‘‘𑀫𑀥𑀼𑀭𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄. 𑀇𑀫𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀧𑀭𑀺𑀬𑁄𑀲𑀸𑀦𑀁 ‘‘𑀅𑀕𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀭𑀺𑀬𑀸𑀢𑀺 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸.

𑀧𑀜𑁆𑀳𑀁 𑀓𑀣𑁂𑀲𑀻𑀢𑀺 𑀩𑁆𑀭𑀸𑀳𑁆𑀫𑀡𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀮𑁄𑀓𑀧𑀽𑀚𑀺𑀢𑁄, 𑀦 𑀲𑀓𑁆𑀓𑀸 𑀬𑀁 𑀯𑀸 𑀢𑀁 𑀯𑀸 𑀯𑀢𑁆𑀯𑀸 𑀲𑀦𑁆𑀢𑀚𑁆𑀚𑁂𑀢𑀼𑀁, 𑀏𑀓𑀁 𑀲𑀡𑁆𑀳𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀏𑀓𑀁 𑀧𑀼𑀘𑁆𑀙𑀸𑀕𑀸𑀣𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 ‘‘𑀲𑀘𑁂 𑀅𑀲𑀼𑀓𑀲𑁆𑀲 𑀦𑀸𑀫 𑀯𑀥𑀁 𑀭𑁄𑀘𑁂𑀫𑀻𑀢𑀺 𑀯𑀓𑁆𑀔𑀢𑀺, 𑀬𑁂 𑀢𑀼𑀬𑁆𑀳𑀁 𑀦 𑀭𑀼𑀘𑁆𑀘𑀦𑁆𑀢𑀺, 𑀢𑁂 𑀫𑀸𑀭𑁂𑀢𑀼𑀓𑀸𑀫𑁄𑀲𑀺, 𑀮𑁄𑀓𑀯𑀥𑀸𑀬 𑀉𑀧𑁆𑀧𑀦𑁆𑀦𑁄 𑀓𑀺𑀁 𑀢𑀼𑀬𑁆𑀳𑀁 𑀲𑀫𑀡𑀪𑀸𑀯𑁂𑀦𑀸𑀢𑀺 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀺. 𑀲𑀘𑁂 𑀦 𑀓𑀲𑁆𑀲𑀘𑀺 𑀯𑀥𑀁 𑀭𑁄𑀘𑁂𑀫𑀻𑀢𑀺 𑀯𑀓𑁆𑀔𑀢𑀺, 𑀅𑀣 𑀦𑀁 𑀢𑁆𑀯𑀁 𑀭𑀸𑀕𑀸𑀤𑀻𑀦𑀫𑁆𑀧𑀺 𑀯𑀥𑀁 𑀦 𑀇𑀘𑁆𑀙𑀲𑀺, 𑀢𑀲𑁆𑀫𑀸 𑀲𑀫𑀡𑁄 𑀳𑀼𑀢𑁆𑀯𑀸 𑀆𑀳𑀺𑀡𑁆𑀟𑀲𑀻𑀢𑀺 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀇𑀫𑀁 𑀉𑀪𑀢𑁄𑀓𑁄𑀝𑀺𑀓𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀡𑁄 𑀕𑁄𑀢𑀫𑁄 𑀦𑁂𑀯 𑀕𑀺𑀮𑀺𑀢𑀼𑀁 𑀦 𑀉𑀕𑁆𑀕𑀺𑀮𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀧𑀬𑁆𑀳𑀁 𑀧𑀼𑀘𑁆𑀙𑀺. 𑀢𑀲𑁆𑀲 𑀪𑀕𑀯𑀸 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀓𑀣𑁂𑀲𑀺. 𑀲𑁄 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀆𑀭𑀸𑀥𑀺𑀢𑀘𑀺𑀢𑁆𑀢𑁄 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 𑀢𑀁 𑀧𑀩𑁆𑀩𑀸𑀚𑁂𑀲𑀺, 𑀲𑁄 𑀧𑀩𑁆𑀩𑀚𑁆𑀚𑀸𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺.

𑀅𑀯𑀪𑀽𑀢𑀸𑀢𑀺 𑀅𑀥𑁄𑀪𑀽𑀢𑀸. 𑀅𑀥𑁄𑀪𑀸𑀯𑁄 𑀲𑀢𑁆𑀢𑀸𑀦𑀁 𑀅𑀯𑀟𑁆𑀠𑀺 𑀅𑀯𑀫𑀗𑁆𑀕𑀮𑀦𑁆𑀢𑀺 𑀆𑀳 𑁋 ‘‘𑀅𑀯𑀟𑁆𑀠𑀺𑀪𑀽𑀢𑀸 𑀅𑀯𑀫𑀗𑁆𑀕𑀮𑀪𑀽𑀢𑀸𑀬𑁂𑀯𑀸’’𑀢𑀺. 𑀧𑀭𑀺𑀪𑀽𑀢𑀸𑀢𑀺 𑀧𑀭𑀺𑀪𑀯𑀧𑁆𑀧𑀢𑁆𑀢𑀸. 𑀯𑀺𑀚𑁆𑀚𑀫𑀸𑀦𑀸𑀦𑀦𑁆𑀢𑀺 𑀧𑀸𑀴𑀺𑀬𑀁 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀚𑁆𑀚𑀫𑀸𑀦𑁂𑀲𑀽’’𑀢𑀺𑀆𑀳. 𑀧𑀓𑀝𑁆𑀞𑀁, 𑀧𑀯𑀟𑁆𑀠𑀁 𑀯𑀸 𑀜𑀸𑀡𑀦𑁆𑀢𑀺 𑀧𑀜𑁆𑀜𑀸𑀡𑀦𑁆𑀢𑀺 𑀪𑀕𑀯𑀢𑁄 𑀜𑀸𑀡𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁.

𑁪𑁭𑁪. 𑀅𑀪𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀯𑁄𑀲𑀺𑀢𑀯𑁄𑀲𑀸𑀦𑀸𑀢𑀺 𑀓𑀢𑀓𑀭𑀡𑀻𑀬𑀢𑀸𑀬 𑀲𑀩𑁆𑀩𑀲𑁄 𑀧𑀭𑀺𑀲𑁄𑀲𑀺𑀢𑀦𑀺𑀝𑁆𑀞𑀸. 𑀧𑀸𑀭𑀫𑀺𑀲𑀗𑁆𑀔𑀸𑀢𑀦𑁆𑀢𑀺 𑀧𑀭𑀫𑀼𑀓𑁆𑀓𑀁𑀲𑀪𑀸𑀯𑀢𑁄 𑀧𑀸𑀭𑀫𑀻𑀢𑀺 𑀲𑀗𑁆𑀔𑀸𑀢𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀥𑀫𑁆𑀫𑀸𑀦𑀁 𑀧𑀸𑀭𑀪𑀽𑀢’’𑀦𑁆𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸𑀢𑀺 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀁. 𑀢𑁂𑀦𑀸𑀳 ‘‘𑀉𑀧𑁆𑀧𑀸𑀤𑀓𑀸 𑀚𑀦𑀓𑀸’’𑀢𑀺. ‘‘𑀇𑀤𑀫𑁂𑀯𑀁 𑀪𑀯𑀺𑀲𑁆𑀲𑀢𑀺 𑀇𑀤𑀫𑁂𑀯’’𑀦𑁆𑀢𑀺 𑀢𑀓𑁆𑀓𑀦𑀁 𑀢𑀓𑁆𑀓𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀓𑁆𑀓𑀻. 𑀬𑀲𑁆𑀫𑀸 𑀲𑁄 𑀢𑀁 𑀢𑀁 𑀯𑀢𑁆𑀣𑀼𑀁 𑀢𑀣𑀸 𑀢𑀣𑀸 𑀢𑀓𑁆𑀓𑀺𑀢𑁆𑀯𑀸 𑀕𑀡𑁆𑀳𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀓𑁆𑀓𑀕𑀸𑀳𑀻’’𑀢𑀺. 𑀯𑀻𑀫𑀁𑀲𑀦𑀲𑀻𑀮𑁄 𑀯𑀻𑀫𑀁𑀲𑀻 𑀧𑀘𑁆𑀘𑀓𑁆𑀔𑀪𑀽𑀢𑀫𑀢𑁆𑀣𑀁 𑀯𑀻𑀫𑀁𑀲𑀦𑀪𑀽𑀢𑀸𑀬 𑀧𑀜𑁆𑀜𑀸𑀬 𑀓𑁂𑀯𑀮𑀁 𑀯𑀻𑀫𑀁𑀲𑀦𑀢𑁄. 𑀢𑁂𑀦𑀸𑀳 ‘‘𑀧𑀜𑁆𑀜𑀸𑀘𑀸𑀭𑀁 𑀘𑀭𑀸𑀧𑁂𑀢𑁆𑀯𑀸 𑀏𑀯𑀁𑀯𑀸𑀤𑀻’’𑀢𑀺. 𑀬𑀣𑀸𑀯𑀼𑀢𑁆𑀢𑀢𑀓𑁆𑀓𑀻𑀯𑀻𑀫𑀁𑀲𑀻𑀪𑀸𑀯𑁂𑀦 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁𑀧𑀝𑀺𑀪𑀸𑀦𑀁 𑀏𑀯𑀫𑁂𑀢𑀦𑁆𑀢𑀺 𑀯𑀢𑁆𑀯𑀸.

𑁪𑁮𑁫. 𑀅𑀝𑁆𑀞𑀺𑀢𑀧𑀥𑀸𑀦𑀯𑀢𑀦𑁆𑀢𑀺 𑀅𑀜𑁆𑀜𑀢𑁆𑀣 𑀓𑀺𑀲𑁆𑀫𑀺𑀜𑁆𑀘𑀺 𑀧𑀼𑀕𑁆𑀕𑀮𑁂 𑀅𑀝𑁆𑀞𑀺𑀢𑀧𑀥𑀸𑀦𑀯𑀢𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀧𑀥𑀸𑀦𑀁 𑀅𑀳𑁄𑀲𑀺. 𑀲𑀧𑁆𑀧𑀼𑀭𑀺𑀲𑀧𑀥𑀸𑀦𑀯𑀢𑀁 𑀅𑀳𑁄𑀲𑀺 𑀲𑀧𑁆𑀧𑀼𑀭𑀺𑀲𑀧𑀥𑀸𑀦𑀯𑀢𑀸𑀥𑀺𑀕𑀢𑀸𑀦𑀁 𑀏𑀢𑀸𑀤𑀺𑀲𑀸𑀦𑀁 𑀅𑀭𑀳𑀢𑀁 𑀅𑀘𑁆𑀙𑀭𑀺𑀬𑀧𑀼𑀕𑁆𑀕𑀮𑀸𑀦𑀁𑀬𑁂𑀯 𑀆𑀯𑁂𑀡𑀺𑀓𑀧𑀥𑀸𑀦𑀯𑀢𑀁 𑀅𑀳𑁄𑀲𑀺. 𑀅𑀚𑀸𑀦𑀦𑁆𑀢𑁄𑀯 𑀧𑀓𑀸𑀲𑁂𑀢𑀻𑀢𑀺 𑀅𑀬𑀁 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀲𑀬𑀁 𑀧𑀘𑁆𑀘𑀓𑁆𑀔𑀢𑁄 𑀅𑀚𑀸𑀦𑀦𑁆𑀢𑁄 𑀏𑀯 𑀓𑁂𑀯𑀮𑀁 𑀲𑀤𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀯 𑀧𑀓𑀸𑀲𑁂𑀲𑀻𑀢𑀺 𑀲𑀜𑁆𑀜𑀸𑀬 𑀆𑀳. 𑀅𑀚𑀸𑀦𑀦𑀪𑀸𑀯𑁂 𑀲𑀦𑁆𑀢𑁂𑀢𑀺 𑀇𑀫𑁂 𑀅𑀥𑀺𑀤𑁂𑀯𑀸𑀢𑀺 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀦𑁂 𑀅𑀲𑀢𑀺. 𑀧𑀡𑁆𑀟𑀺𑀢𑁂𑀦 𑀫𑀦𑀼𑀲𑁆𑀲𑁂𑀦𑀸𑀢𑀺 𑀮𑁄𑀓𑀯𑁄𑀳𑀸𑀭𑀓𑀼𑀲𑀮𑁂𑀦 𑀫𑀦𑀼𑀲𑁆𑀲𑁂𑀦, 𑀢𑁆𑀯𑀁 𑀧𑀦 𑀮𑁄𑀓𑀯𑁄𑀳𑀸𑀭𑁂𑀧𑀺 𑀅𑀓𑀼𑀲𑀮𑁄. 𑀯𑀘𑀦𑀢𑁆𑀣𑀜𑁆𑀳𑀺 𑀅𑀚𑀸𑀦𑀦𑁆𑀢𑁄 𑀬𑀁 𑀓𑀺𑀜𑁆𑀘𑀺 𑀯𑀤𑀢𑀺. 𑀉𑀘𑁆𑀘𑁂𑀦 𑀲𑀫𑁆𑀫𑀢𑀦𑁆𑀢𑀺 𑀉𑀘𑁆𑀘𑀁 𑀲𑀼𑀧𑀸𑀓𑀝𑀁 𑀲𑀩𑁆𑀩𑀲𑁄 𑀢𑀭𑀼𑀡𑀤𑀸𑀭𑀓𑁂𑀳𑀺𑀧𑀺 𑀲𑀫𑁆𑀫𑀢𑀁. 𑀜𑀸𑀢𑀫𑁂𑀢𑀁 𑀬𑀤𑀺𑀤𑀁 𑀅𑀢𑁆𑀣𑀺 𑀤𑁂𑀯𑀸𑀢𑀺. 𑀢𑁂𑀦𑀸𑀳 ‘‘𑀲𑀼𑀲𑀼𑀤𑀸𑀭𑀓𑀸𑀧𑀻’’𑀢𑀺𑀆𑀤𑀺. 𑀤𑁂𑀯𑀸𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀸. 𑀅𑀥𑀺𑀤𑁂𑀯𑀸 𑀦𑀸𑀫 𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀅𑀥𑀺𑀓𑀤𑁂𑀯𑀸𑀢𑀺 𑀓𑀢𑁆𑀯𑀸, 𑀢𑀤𑀜𑁆𑀜𑁂 𑀘 𑀫𑀦𑀼𑀲𑁆𑀲𑁂 𑀅𑀥𑀺𑀓𑀪𑀸𑀯𑁂 𑀓𑀺𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑀯𑀡𑁆𑀡𑀦𑀸.

𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀝𑀻𑀓𑀸 𑀲𑀫𑀢𑁆𑀢𑀸.