𑁫. 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄

𑁧. 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁩. ‘‘𑀫𑀳𑀸𑀲𑀢𑁆𑀢𑁄 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁩𑁮) 𑀉𑀴𑀸𑀭𑀢𑀸 𑀯𑀺𑀲𑀬𑁄, ‘‘𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀻’’𑀢𑀺𑀆𑀤𑀻𑀲𑀼 𑀲𑀫𑁆𑀩𑀳𑀼𑀮𑀪𑀸𑀯𑀯𑀺𑀲𑀬𑁄, 𑀇𑀥 𑀧𑀦 𑀢𑀤𑀼𑀪𑀬𑀫𑁆𑀧𑀺𑀲𑁆𑀲 𑀅𑀢𑁆𑀣𑁄𑀢𑀺 ‘‘𑀫𑀳𑀢𑀸𑀢𑀺 𑀕𑀼𑀡𑀫𑀳𑀢𑁆𑀢𑁂𑀦𑀧𑀺 𑀫𑀳𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀦𑁆𑀢𑀼𑀝𑁆𑀞𑀺𑀲𑀮𑁆𑀮𑁂𑀔𑀧𑀯𑀺𑀯𑁂𑀓𑀅𑀲𑀁𑀲𑀕𑁆𑀕𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀖𑀸𑀢𑀲𑀗𑁆𑀔𑀸𑀢𑁂𑀦𑀸𑀢𑀺 𑀏𑀢𑁆𑀣 ‘‘𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’ (𑀲𑀁. 𑀦𑀺. 𑁨.𑁪𑁧; 𑁩.𑁯𑁯𑁮, 𑁧𑁦𑁦𑁪) 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀤𑀺𑀝𑁆𑀞𑀺𑀲𑀻𑀮𑀸𑀦𑀁 𑀦𑀺𑀬𑀢𑀲𑀪𑀸𑀯𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀅𑀜𑁆𑀜𑀫𑀜𑁆𑀜𑀁 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀸, 𑀧𑀕𑁂𑀯 𑀲𑀓𑀤𑀸𑀕𑀸𑀫𑀺𑀆𑀤𑀬𑁄. ‘‘𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁬; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀅. 𑀦𑀺. 𑁬.𑁧𑁧; 𑀧𑀭𑀺. 𑁨𑁭𑁪) 𑀢𑀣𑀸𑀭𑀽𑀧𑁂𑀳𑀺 𑀲𑀻𑀮𑁂𑀳𑀺 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀅. 𑀦𑀺. 𑁬.𑁧𑁨; 𑀧𑀭𑀺. 𑁨𑁭𑁪) 𑀯𑀘𑀦𑀢𑁄 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑁄 𑀮𑀩𑁆𑀪𑀢𑀺𑀬𑁂𑀯.

𑀑𑀝𑁆𑀞𑀧𑀳𑀢𑀓𑀭𑀡𑀯𑀲𑁂𑀦 𑀅𑀢𑁆𑀣𑀯𑀺𑀪𑀸𑀕𑀯𑀲𑁂𑀦. 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀦𑁆𑀢𑀺 𑀏𑀢𑁆𑀣 𑀦𑀺𑀖𑀡𑁆𑀟𑀽𑀢𑀺 𑀯𑀘𑀦𑀻𑀬𑀯𑀸𑀘𑀓𑀪𑀸𑀯𑁂𑀦 𑀅𑀢𑁆𑀣𑀁 𑀲𑀤𑁆𑀤𑀜𑁆𑀘 𑀔𑀡𑁆𑀟𑀢𑀺 𑀯𑀺𑀪𑀚𑁆𑀚 𑀤𑀲𑁆𑀲𑁂𑀢𑀻𑀢𑀺 𑀦𑀺𑀔𑀡𑁆𑀟𑀼. 𑀲𑁄 𑀏𑀯 𑀇𑀥 𑀔-𑀓𑀸𑀭𑀲𑁆𑀲 𑀖-𑀓𑀸𑀭𑀁 𑀓𑀢𑁆𑀯𑀸 ‘‘𑀦𑀺𑀖𑀡𑁆𑀟𑀽’’𑀢𑀺 𑀯𑀼𑀢𑁆𑀢𑁄. 𑀓𑀺𑀝𑀢𑀺 𑀕𑀫𑁂𑀢𑀺 𑀓𑀺𑀭𑀺𑀬𑀸𑀤𑀺𑀯𑀺𑀪𑀸𑀕𑀁, 𑀢𑀁 𑀯𑀸 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁄 𑀕𑀫𑁂𑀦𑁆𑀢𑁄 𑀧𑀽𑀭𑁂𑀢𑀻𑀢𑀺 𑀓𑁂𑀝𑀼𑀪𑀁. 𑀯𑁂𑀯𑀘𑀦𑀧𑁆𑀧𑀓𑀸𑀲𑀓𑀦𑁆𑀢𑀺 𑀧𑀭𑀺𑀬𑀸𑀬𑀲𑀤𑁆𑀤𑀤𑀻𑀧𑀓𑀁, 𑀏𑀓𑁂𑀓𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑁂𑀓𑀧𑀭𑀺𑀬𑀸𑀬𑀯𑀘𑀦𑀯𑀺𑀪𑀸𑀯𑀓𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀅𑀦𑁂𑀓𑁂𑀲𑀫𑁆𑀧𑀺 𑀅𑀢𑁆𑀣𑀸𑀦𑀁 𑀏𑀓𑀲𑀤𑁆𑀤𑀯𑀘𑀦𑀻𑀬𑀢𑀸𑀯𑀺𑀪𑀸𑀯𑀦𑀯𑀲𑁂𑀦𑀧𑀺 𑀢𑀲𑁆𑀲 𑀕𑀦𑁆𑀣𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀯𑀘𑀻𑀪𑁂𑀤𑀸𑀤𑀺𑀮𑀓𑁆𑀔𑀡𑀸 𑀓𑀺𑀭𑀺𑀬𑀸 𑀓𑀧𑁆𑀧𑀻𑀬𑀢𑀺 𑀏𑀢𑁂𑀦𑀸𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑁄, 𑀲𑁄 𑀧𑀦 𑀯𑀡𑁆𑀡𑀧𑀤𑀲𑀫𑁆𑀩𑀦𑁆𑀥𑀧𑀤𑀢𑁆𑀣𑀯𑀺𑀪𑀸𑀕𑀢𑁄 𑀩𑀳𑀼𑀯𑀺𑀓𑀧𑁆𑀧𑁄𑀢𑀺 𑀆𑀳 ‘‘𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄’’𑀢𑀺. 𑀇𑀤𑀜𑁆𑀘 𑀫𑀽𑀮𑀓𑀺𑀭𑀺𑀬𑀸𑀓𑀧𑁆𑀧𑀕𑀦𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑁄 𑀦𑀮𑀘𑀭𑀺𑀬𑀸𑀤𑀺𑀧𑀓𑀭𑀡𑀁. 𑀞𑀸𑀦𑀓𑀭𑀡𑀸𑀤𑀺𑀯𑀺𑀪𑀸𑀕𑀢𑁄 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑀢𑁄 𑀘 𑀅𑀓𑁆𑀔𑀭𑀸 𑀧𑀪𑁂𑀤𑀻𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀅𑀓𑁆𑀔𑀭𑀧𑁆𑀧𑀪𑁂𑀤𑀸, 𑀲𑀺𑀓𑁆𑀔𑀸𑀦𑀺𑀭𑀼𑀢𑁆𑀢𑀺𑀬𑁄. 𑀏𑀢𑁂𑀲𑀦𑁆𑀢𑀺 𑀯𑁂𑀤𑀸𑀦𑀁. 𑀢𑁂 𑀏𑀯 𑀯𑁂𑀤𑁂 𑀧𑀤𑀲𑁄 𑀓𑀸𑀬𑀢𑀻𑀢𑀺 𑀧𑀤𑀓𑁄. 𑀢𑀁 𑀢𑀁 𑀲𑀤𑁆𑀤𑀁 𑀢𑀤𑀢𑁆𑀣𑀜𑁆𑀘 𑀩𑁆𑀬𑀸𑀓𑀭𑁄𑀢𑀺 𑀩𑁆𑀬𑀸𑀘𑀺𑀓𑁆𑀔𑀢𑀺 𑀏𑀢𑁂𑀦𑀸𑀢𑀺 𑀩𑁆𑀬𑀸𑀓𑀭𑀡𑀁, 𑀲𑀤𑁆𑀤𑀲𑀢𑁆𑀣𑀁. 𑀆𑀬𑀢𑀺𑀁 𑀳𑀺𑀢𑀁 𑀢𑁂𑀦 𑀮𑁄𑀓𑁄 𑀦 𑀬𑀢𑀢𑀺 𑀦 𑀈𑀳𑀢𑀻𑀢𑀺 𑀮𑁄𑀓𑀸𑀬𑀢𑀁. 𑀢𑀜𑁆𑀳𑀺 𑀕𑀦𑁆𑀣𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀯𑀬𑀢𑀻𑀢𑀺 𑀯𑀬𑁄, 𑀦 𑀯𑀬𑁄 𑀅𑀯𑀬𑁄, 𑀦 𑀅𑀯𑀬𑁄 𑀅𑀦𑀯𑀬𑁄, 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀓𑀢𑁆𑀣𑀘𑀺 𑀅𑀧𑀭𑀺𑀓𑀺𑀮𑀦𑁆𑀢𑁄 𑀅𑀯𑀺𑀢𑁆𑀣𑀸𑀬𑀦𑁆𑀢𑁄 𑀢𑁂 𑀕𑀦𑁆𑀣𑁂 𑀲𑀦𑁆𑀥𑀸𑀭𑁂𑀢𑀺 𑀧𑀽𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀧𑀝𑀺𑀲𑁂𑀥𑀸 𑀧𑀓𑀢𑀺𑀁 𑀕𑀫𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀬𑁄 𑀦 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀅𑀯𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀬𑁄…𑀧𑁂… 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑁩𑁮𑁪. 𑀕𑀭𑀽𑀢𑀺 𑀪𑀸𑀭𑀺𑀬𑀁 𑀅𑀢𑁆𑀢𑀸𑀦𑀁 𑀢𑀢𑁄 𑀫𑁄𑀘𑁂𑀢𑁆𑀯𑀸 𑀕𑀫𑀦𑀁 𑀤𑀼𑀓𑁆𑀓𑀭𑀁 𑀳𑁄𑀢𑀺. 𑀅𑀦𑀢𑁆𑀣𑁄𑀧𑀺 𑀉𑀧𑁆𑀧𑀚𑁆𑀚𑀢𑀺 𑀦𑀺𑀦𑁆𑀤𑀸𑀩𑁆𑀬𑀸𑀭𑁄𑀲𑀉𑀧𑀸𑀭𑀫𑁆𑀪𑀸𑀤𑀺. 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑀬𑁄𑀕𑁂𑀦 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁.

𑀮𑀓𑁆𑀔𑀡𑀸𑀦𑀻𑀢𑀺 𑀮𑀓𑁆𑀔𑀡𑀤𑀻𑀧𑀦𑀸𑀦𑀺 𑀫𑀦𑁆𑀢𑀧𑀤𑀸𑀦𑀺. 𑀅𑀦𑁆𑀢𑀭𑀥𑀸𑀬𑀦𑁆𑀢𑀻𑀢𑀺 𑀦 𑀓𑁂𑀯𑀮𑀁 𑀮𑀓𑁆𑀔𑀡𑀫𑀦𑁆𑀢𑀸𑀦𑀺𑀬𑁂𑀯, 𑀅𑀜𑁆𑀜𑀸𑀦𑀺𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀜𑀸𑀡𑀩𑀮𑀸𑀪𑀸𑀯𑁂𑀦 𑀅𑀦𑀼𑀓𑁆𑀓𑀫𑁂𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀢𑀣𑀸 𑀳𑀺 𑀯𑀤𑀦𑁆𑀢𑀺 ‘‘𑀏𑀓𑀲𑀢𑀁 𑀅𑀤𑁆𑀥𑀭𑀺𑀬𑀁 𑀤𑀺𑀧𑀜𑁆𑀜𑀸𑀲𑀫𑀢𑁆𑀢𑀢𑁄 𑀲𑀸𑀫𑀸’’𑀢𑀺𑀆𑀤𑀺. 𑀧𑀡𑀺𑀥𑀺𑀫𑀳𑀢𑁄 𑀲𑀫𑀸𑀤𑀸𑀦𑀫𑀳𑀢𑁄𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀫𑀳-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀧𑀡𑀺𑀥𑀺𑀫𑀳𑀦𑁆𑀢𑀢𑀸𑀤𑀺 𑀘𑀲𑁆𑀲 𑀩𑀼𑀤𑁆𑀥𑀯𑀁𑀲𑀘𑀭𑀺𑀬𑀸𑀧𑀺𑀝𑀓𑀯𑀡𑁆𑀡𑀦𑀸𑀤𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀝𑁆𑀞𑀸𑀢𑀺 𑀦𑀺𑀧𑁆𑀨𑀢𑁆𑀢𑀺𑀬𑁄. 𑀚𑀸𑀢𑀺𑀲𑀸𑀫𑀜𑁆𑀜𑀢𑁄𑀢𑀺 𑀮𑀓𑁆𑀔𑀡𑀚𑀸𑀢𑀺𑀬𑀸 𑀮𑀓𑁆𑀔𑀡𑀪𑀸𑀯𑁂𑀦 𑀲𑀫𑀸𑀦𑀪𑀸𑀯𑀢𑁄. 𑀬𑀣𑀸 𑀳𑀺 𑀩𑀼𑀤𑁆𑀥𑀸𑀦𑀁 𑀮𑀓𑁆𑀔𑀡𑀸𑀦𑀺 𑀲𑀼𑀯𑀺𑀲𑀼𑀤𑁆𑀥𑀸𑀦𑀺 𑀲𑀼𑀧𑀭𑀺𑀩𑁆𑀬𑀢𑁆𑀢𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀘 𑀳𑁄𑀦𑁆𑀢𑀺, 𑀦 𑀏𑀯𑀁 𑀘𑀓𑁆𑀓𑀯𑀢𑁆𑀢𑀻𑀦𑀁. 𑀢𑁂𑀦𑀸𑀳 ‘‘𑀦 𑀢𑁂𑀳𑁂𑀯 𑀩𑀼𑀤𑁆𑀥𑁄 𑀳𑁄𑀢𑀻’’𑀢𑀺.

𑀅𑀪𑀺𑀭𑀽𑀧𑀢𑀸 𑀤𑀻𑀖𑀸𑀬𑀼𑀓𑀢𑀸, 𑀅𑀧𑁆𑀧𑀸𑀢𑀗𑁆𑀓𑀢𑀸 𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀧𑀺𑀬𑀫𑀦𑀸𑀧𑀢𑀸𑀢𑀺 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀥𑀫𑁆𑀫𑁂𑀳𑀺. 𑀤𑀸𑀦𑀁 𑀧𑀺𑀬𑀯𑀘𑀦𑀁 𑀅𑀢𑁆𑀣𑀘𑀭𑀺𑀬𑀸 𑀲𑀫𑀸𑀦𑀢𑁆𑀢𑀢𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺. 𑀭𑀜𑁆𑀚𑀦𑀢𑁄𑀢𑀺 𑀧𑀻𑀢𑀺𑀚𑀦𑀦𑀢𑁄. 𑀘𑀓𑁆𑀓𑀁 𑀘𑀓𑁆𑀓𑀭𑀢𑀦𑀁 𑀯𑀢𑁆𑀢𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀺 𑀲𑀬𑀁 𑀯𑀢𑁆𑀢𑁂𑀢𑀺, 𑀢𑁂𑀳𑀺 𑀘 𑀧𑀭𑀁 𑀲𑀢𑁆𑀢𑀦𑀺𑀓𑀸𑀬𑀁 𑀯𑀢𑁆𑀢𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀧𑀭𑀳𑀺𑀢𑀸𑀯𑀳𑁄 𑀇𑀭𑀺𑀬𑀸𑀧𑀣𑀘𑀓𑁆𑀓𑀸𑀦𑀁 𑀯𑀢𑁆𑀢𑁄 𑀯𑀢𑁆𑀢𑀦𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀅𑀧𑁆𑀧𑀝𑀺𑀳𑀢𑀁 𑀯𑀸 𑀆𑀡𑀸𑀲𑀗𑁆𑀔𑀸𑀢𑀁 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑀻, 𑀅𑀧𑁆𑀧𑀝𑀺𑀳𑀢𑀁 𑀯𑀸 𑀆𑀡𑀸𑀲𑀗𑁆𑀔𑀸𑀢𑀁 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀔𑀢𑁆𑀢𑀺𑀬𑀫𑀡𑁆𑀟𑀮𑀸𑀤𑀺𑀲𑀜𑁆𑀜𑀺𑀢𑀁 𑀘𑀓𑁆𑀓𑀁 𑀲𑀫𑀽𑀳𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀥𑀫𑁆𑀫𑀁 𑀘𑀭𑀢𑀻𑀢𑀺 𑀥𑀫𑁆𑀫𑀺𑀓𑁄. 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑁄 𑀭𑀜𑁆𑀚𑀦𑀢𑁆𑀣𑁂𑀦 𑀭𑀸𑀚𑀸𑀢𑀺 𑀥𑀫𑁆𑀫𑀭𑀸𑀚𑀸. 𑀓𑁄𑀧𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀸𑀫𑀮𑁄𑀪𑀫𑀸𑀦𑀫𑀤𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀚𑀺𑀢𑀸𑀯𑀻𑀢𑀺 𑀯𑀺𑀚𑀺𑀢𑀯𑀸. 𑀓𑁂𑀦𑀘𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄. 𑀤𑀴𑁆𑀳𑀪𑀢𑁆𑀢𑀺𑀪𑀸𑀯𑀢𑁄 𑀯𑀸 𑀚𑀦𑀧𑀤𑁄 𑀣𑀸𑀯𑀭𑀺𑀬𑀁 𑀧𑀢𑁆𑀢𑁄 𑀏𑀢𑁆𑀣𑀸𑀢𑀺 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄. 𑀘𑀺𑀢𑁆𑀢𑀻𑀓𑀢𑀪𑀸𑀯𑀸𑀤𑀺𑀦𑀸𑀧𑀺 (𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁨𑁨𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦) 𑀘𑀓𑁆𑀓𑀲𑁆𑀲 𑀭𑀢𑀦𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀭𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀯𑀸 𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑀲𑁆𑀲 𑀭𑀢𑀺𑀚𑀦𑀦𑀝𑁆𑀞𑁂𑀦 𑀏𑀓𑀲𑀗𑁆𑀕𑀳𑀢𑀸𑀬 𑀯𑀺𑀲𑀼𑀁 𑀅𑀕𑁆𑀕𑀳𑀡𑀁.

𑀇𑀫𑁂𑀳𑀺 𑀧𑀦 𑀭𑀢𑀦𑁂𑀳𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀬𑀁 𑀬𑀫𑀢𑁆𑀣𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀢𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂𑀲𑀼 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀚𑀺𑀢𑀁 𑀚𑀺𑀦𑀸𑀢𑀺 𑀫𑀳𑁂𑀲𑀓𑁆𑀔𑀢𑀸𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑀪𑀸𑀯𑀢𑁄. 𑀯𑀺𑀚𑀺𑀢𑁂 𑀬𑀣𑀸𑀲𑀼𑀔𑀁 𑀅𑀦𑀼𑀯𑀺𑀘𑀭𑀢𑀺 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀜𑁆𑀘 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑁂𑀲𑀁 𑀆𑀦𑀼𑀪𑀸𑀯𑁂𑀦 𑀅𑀦𑁆𑀢𑁄𑀧𑀸𑀢𑀭𑀸𑀲𑁂𑀬𑁂𑀯 𑀲𑀓𑀮𑀁 𑀧𑀣𑀯𑀺𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀭𑀸𑀚𑀥𑀸𑀦𑀺𑀬𑀁 𑀧𑀘𑁆𑀘𑀸𑀕𑀫𑀦𑀢𑁄. 𑀧𑀭𑀺𑀡𑀸𑀬𑀓𑀭𑀢𑀦𑁂𑀦 𑀯𑀺𑀚𑀺𑀢𑀫𑀦𑀼𑀭𑀓𑁆𑀔𑀢𑀺 𑀢𑁂𑀦 𑀢𑀢𑁆𑀣 𑀢𑀢𑁆𑀣 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀲𑀁𑀯𑀺𑀥𑀸𑀦𑀢𑁄. 𑀲𑁂𑀲𑁂𑀳𑀻𑀢𑀺 𑀫𑀡𑀺𑀭𑀢𑀦𑀇𑀢𑁆𑀣𑀺𑀭𑀢𑀦𑀕𑀳𑀧𑀢𑀺𑀭𑀢𑀦𑁂𑀳𑀺. 𑀢𑀢𑁆𑀣 𑀫𑀡𑀺𑀭𑀢𑀦𑁂𑀦 𑀬𑁄𑀚𑀦𑀧𑁆𑀧𑀫𑀸𑀡𑁂 𑀤𑁂𑀲𑁂 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀤𑀲𑁆𑀲𑀦𑀸𑀤𑀺𑀦𑀸 𑀲𑀼𑀔𑀫𑀦𑀼𑀪𑀯𑀢𑀺, 𑀇𑀢𑁆𑀣𑀺𑀭𑀢𑀦𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀭𑀽𑀧𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀸𑀤𑀺𑀯𑀲𑁂𑀦, 𑀕𑀳𑀧𑀢𑀺𑀭𑀢𑀦𑁂𑀦 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀫𑀡𑀺𑀓𑀦𑀓𑀭𑀚𑀢𑀸𑀤𑀺𑀥𑀦𑀧𑁆𑀧𑀝𑀺𑀮𑀸𑀪𑀯𑀲𑁂𑀦. 𑀉𑀲𑁆𑀲𑀸𑀳𑀲𑀢𑁆𑀢𑀺𑀬𑁄𑀕𑁄 𑀬𑁂𑀦 𑀓𑁂𑀦𑀘𑀺 𑀅𑀧𑁆𑀧𑀝𑀺𑀳𑀢𑀸𑀡𑀸𑀘𑀓𑁆𑀓𑀪𑀸𑀯𑀲𑀺𑀤𑁆𑀥𑀺𑀢𑁄. 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑀸𑀤𑀻𑀦𑀁 𑀫𑀳𑀸𑀦𑀼𑀪𑀸𑀯𑀢𑁆𑀢𑀸 𑀓𑁄𑀲𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀧𑀪𑀸𑀯𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀢𑁄 ‘‘𑀳𑀢𑁆𑀣𑀺…𑀧𑁂… 𑀬𑁄𑀕𑁄’’𑀢𑀺 𑀯𑀼𑀢𑁆𑀢𑀁. 𑀓𑁄𑀲𑁄 𑀳𑀺 𑀦𑀸𑀫 𑀲𑀢𑀺 𑀉𑀲𑁆𑀲𑀸𑀳𑀲𑀫𑁆𑀧𑀢𑁆𑀢𑀺𑀬𑀁 (𑀉𑀕𑁆𑀕𑀢𑁂𑀚𑀲𑁆𑀲 𑀲𑀼𑀓𑀼𑀫𑀸𑀭𑀧𑀭𑀓𑁆𑀓𑀫𑀲𑁆𑀲 𑀧𑀲𑀦𑁆𑀦𑀫𑀼𑀔𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀧𑀼𑀡𑀸𑀢𑀺). 𑀧𑀘𑁆𑀙𑀺𑀫𑁂𑀦𑀸𑀢𑀺 𑀧𑀭𑀺𑀡𑀸𑀬𑀓𑀭𑀢𑀦𑁂𑀦. 𑀢𑀜𑁆𑀳𑀺 𑀲𑀩𑁆𑀩𑀭𑀸𑀚𑀓𑀺𑀘𑁆𑀘𑁂𑀲𑀼 𑀓𑀼𑀲𑀮𑀁 𑀅𑀯𑀺𑀭𑀚𑁆𑀛𑀦𑀧𑀬𑁄𑀕𑀁. 𑀢𑁂𑀦𑀸𑀳 ‘‘𑀫𑀦𑁆𑀢𑀲𑀢𑁆𑀢𑀺𑀬𑁄𑀕𑁄’’𑀢𑀺. 𑀢𑀺𑀯𑀺𑀥𑀲𑀢𑁆𑀢𑀺𑀬𑁄𑀕𑀨𑀮𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑁂𑀳𑀻𑀢𑀺 𑀲𑁂𑀲𑁂𑀳𑀺 𑀧𑀜𑁆𑀘𑀳𑀺 𑀭𑀢𑀦𑁂𑀳𑀺. 𑀅𑀤𑁄𑀲𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦𑀸𑀢𑀺 𑀅𑀤𑁄𑀲𑀲𑀗𑁆𑀔𑀸𑀢𑁂𑀦 𑀓𑀼𑀲𑀮𑀫𑀽𑀮𑁂𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀓𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺 𑀲𑁄𑀫𑁆𑀫𑀢𑀭𑀭𑀢𑀦𑀚𑀸𑀢𑀺𑀓𑀢𑁆𑀢𑀸. 𑀫𑀚𑁆𑀛𑀺𑀫𑀸𑀦𑀺 𑀫𑀡𑀺𑀇𑀢𑁆𑀣𑀺𑀕𑀳𑀧𑀢𑀺𑀭𑀢𑀦𑀸𑀦𑀺. 𑀅𑀮𑁄𑀪…𑀧𑁂… 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺 𑀉𑀴𑀸𑀭𑀥𑀦𑀲𑁆𑀲 𑀉𑀴𑀸𑀭𑀥𑀦𑀧𑀝𑀺𑀮𑀸𑀪𑀓𑀸𑀭𑀡𑀲𑁆𑀲 𑀘 𑀧𑀭𑀺𑀘𑁆𑀘𑀸𑀕𑀲𑀫𑁆𑀧𑀤𑀸𑀳𑁂𑀢𑀼𑀓𑀢𑁆𑀢𑀸. 𑀧𑀘𑁆𑀙𑀺𑀫𑀦𑁆𑀢𑀺 𑀧𑀭𑀺𑀡𑀸𑀬𑀓𑀭𑀢𑀦𑀁. 𑀢𑀜𑁆𑀳𑀺 𑀅𑀫𑁄𑀳…𑀧𑁂… 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀢𑀺 𑀫𑀳𑀸𑀧𑀜𑁆𑀜𑁂𑀦𑁂𑀯 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀓𑀺𑀘𑁆𑀘𑀲𑁆𑀲 𑀧𑀭𑀺𑀡𑁂𑀢𑀩𑁆𑀩𑀢𑁆𑀢𑀸.

𑀲𑀭𑀡𑀢𑁄 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀢𑁄 𑀲𑀽𑀭𑀸. 𑀢𑁂𑀦𑀸𑀳 ‘‘𑀅𑀪𑀻𑀭𑀼𑀓𑀚𑀸𑀢𑀺𑀓𑀸’’𑀢𑀺. 𑀅𑀲𑀼𑀭𑁂 𑀯𑀺𑀚𑀺𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀯𑀻𑀭𑁄, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄, 𑀢𑀲𑁆𑀲 𑀅𑀗𑁆𑀕𑀁 𑀤𑁂𑀯𑀧𑀼𑀢𑁆𑀢𑁄 𑀲𑁂𑀦𑀗𑁆𑀕𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀻𑀭𑀗𑁆𑀕𑀭𑀽𑀧𑀸𑀢𑀺 𑀤𑁂𑀯𑀧𑀼𑀢𑁆𑀢𑀲𑀤𑀺𑀲𑀓𑀸𑀬𑀸’’𑀢𑀺. 𑀲𑀪𑀸𑀯𑁄𑀢𑀺 𑀲𑀪𑀸𑀯𑀪𑀽𑀢𑁄 𑀅𑀢𑁆𑀣𑁄. 𑀯𑀻𑀭𑀓𑀸𑀭𑀡𑀦𑁆𑀢𑀺 𑀯𑀻𑀭𑀪𑀸𑀯𑀓𑀸𑀭𑀡𑀁. 𑀯𑀻𑀭𑀺𑀬𑀫𑀬𑀲𑀭𑀻𑀭𑀸 𑀯𑀺𑀬𑀸𑀢𑀺 𑀲𑀯𑀺𑀕𑁆𑀕𑀳𑀯𑀻𑀭𑀺𑀬𑀲𑀤𑀺𑀲𑀸 𑀲𑀯𑀺𑀕𑁆𑀕𑀳𑀜𑁆𑀘𑁂 𑀯𑀻𑀭𑀺𑀬𑀁 𑀲𑀺𑀬𑀸, 𑀢𑀁𑀲𑀤𑀺𑀲𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀝𑀺𑀲𑁂𑀦𑀸 𑀦𑀸𑀫 𑀦𑀢𑁆𑀣𑀺, 𑀬𑀫𑀲𑁆𑀲 𑀧𑀼𑀢𑁆𑀢𑀸 𑀧𑀫𑀤𑁆𑀤𑁂𑀬𑁆𑀬𑀼𑀁, 𑀅𑀣 𑀓𑀲𑁆𑀫𑀸 ‘‘𑀧𑀭𑀲𑁂𑀦𑀧𑀫𑀤𑁆𑀤𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀘𑁂’’𑀢𑀺𑀆𑀤𑀺. 𑀢𑁂𑀦 𑀧𑀭𑀲𑁂𑀦𑀸 𑀳𑁄𑀢𑀼 𑀯𑀸 𑀫𑀸 𑀯𑀸, 𑀢𑁂 𑀧𑀦 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀥𑀫𑁆𑀫𑁂𑀦𑀸𑀢𑀺 𑀓𑀢𑀽𑀧𑀘𑀺𑀢𑁂𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀥𑀫𑁆𑀫𑁂𑀦. 𑀢𑁂𑀦 𑀳𑀺 𑀲𑀜𑁆𑀘𑁄𑀤𑀺𑀢𑀸 𑀧𑀣𑀯𑀺𑀬𑀁 𑀲𑀩𑁆𑀩𑀭𑀸𑀚𑀸𑀦𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 ‘‘𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀭𑀚𑁆𑀚𑀁 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀦𑀺𑀬𑁆𑀬𑀸𑀤𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄 𑀇𑀫𑀁…𑀧𑁂… 𑀅𑀚𑁆𑀛𑀸𑀯𑀲𑀢𑀻’’𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑁆𑀲 𑀘𑀺𑀭𑀢𑀭𑀁 𑀯𑀺𑀧𑀘𑁆𑀘𑀺𑀢𑀼𑀁 𑀧𑀘𑁆𑀘𑀬𑀪𑀽𑀢𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑀫𑀼𑀤𑀸𑀕𑀢𑀁 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄𑀢𑀺𑀆𑀤𑀺𑀦𑀸 𑀧𑀜𑁆𑀘𑀲𑀻𑀮𑀥𑀫𑁆𑀫𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 ‘‘𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦𑀸’’𑀢𑀺 𑀇𑀤𑀁 𑀯𑀘𑀦𑀁 𑀲𑀼𑀝𑁆𑀞𑀼𑀢𑀭𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺, 𑀬𑀲𑁆𑀫𑀸 𑀭𑀸𑀕𑀸𑀤𑀬𑁄 𑀧𑀸𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀢𑁆𑀢𑀲𑀦𑁆𑀢𑀸𑀦𑀁 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀓𑀼𑀲𑀮𑀧𑀯𑀢𑁆𑀢𑀺𑀁 𑀦𑀺𑀯𑀸𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂 ‘‘𑀙𑀤𑀦𑀸, 𑀙𑀤𑀸’’𑀢𑀺 𑀘 𑀯𑀼𑀢𑁆𑀢𑀸.

𑀯𑀺𑀯𑀝𑁆𑀝𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀧𑀽𑀚𑀸𑀭𑀳𑀢𑀸 𑀯𑀼𑀢𑁆𑀢𑀸 ‘‘𑀅𑀭𑀳𑀢𑀻𑀢𑀺 𑀅𑀭𑀳’’𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀧𑀽𑀚𑀸𑀭𑀳𑀢𑀸𑀬. 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀅𑀭𑀳𑀦𑁆𑀢𑀺. 𑀩𑀼𑀤𑁆𑀥𑀢𑁆𑀢𑀳𑁂𑀢𑀼𑀪𑀽𑀢𑀸 𑀯𑀺𑀯𑀝𑁆𑀝𑀘𑁆𑀙𑀤𑀢𑀸 𑀯𑀼𑀢𑁆𑀢𑀸 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀧𑀼𑀩𑁆𑀩𑀓𑀢𑁆𑀢𑀸 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺𑀬𑀸. 𑀅𑀭𑀳𑀁 𑀯𑀝𑁆𑀝𑀸𑀪𑀸𑀯𑁂𑀦𑀸𑀢𑀺 𑀨𑀮𑁂𑀦 𑀳𑁂𑀢𑀼𑀅𑀦𑀼𑀫𑀸𑀦𑀤𑀲𑁆𑀲𑀦𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀙𑀤𑀦𑀸𑀪𑀸𑀯𑁂𑀦𑀸𑀢𑀺 𑀳𑁂𑀢𑀼𑀦𑀸 𑀨𑀮𑀸𑀦𑀼𑀫𑀸𑀦𑀤𑀲𑁆𑀲𑀦𑀁. 𑀳𑁂𑀢𑀼𑀤𑁆𑀯𑀬𑀁 𑀯𑀼𑀢𑁆𑀢𑀁 ‘‘𑀯𑀺𑀯𑀝𑁆𑀝𑁄 𑀯𑀺𑀘𑁆𑀙𑀤𑁄 𑀘𑀸’’𑀢𑀺. 𑀤𑀼𑀢𑀺𑀬𑀯𑁂𑀲𑀸𑀭𑀚𑁆𑀚𑁂𑀦𑀸𑀢𑀺 ‘‘𑀔𑀻𑀡𑀸𑀲𑀯𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁫𑁦) 𑀆𑀕𑀢𑁂𑀦 𑀯𑁂𑀲𑀸𑀭𑀚𑁆𑀚𑁂𑀦. 𑀧𑀼𑀭𑀺𑀫𑀲𑀺𑀤𑁆𑀥𑀻𑀢𑀺 𑀧𑀼𑀭𑀺𑀫𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺. 𑀧𑀞𑀫𑁂𑀦𑀸𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁫𑁦) 𑀆𑀕𑀢𑁂𑀦 𑀯𑁂𑀲𑀸𑀭𑀚𑁆𑀚𑁂𑀦. 𑀤𑀼𑀢𑀺𑀬𑀲𑀺𑀤𑁆𑀥𑀻𑀢𑀺 𑀩𑀼𑀤𑁆𑀥𑀢𑁆𑀢𑀲𑀺𑀤𑁆𑀥𑀺. 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀻𑀢𑀺 ‘‘𑀬𑁂 𑀔𑁄 𑀧𑀦 𑀢𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁫𑁦), ‘‘𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁫𑁦) 𑀘 𑀆𑀕𑀢𑁂𑀳𑀺 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺. 𑀢𑀢𑀺𑀬𑀲𑀺𑀤𑁆𑀥𑀻𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑀦𑀢𑀸 𑀲𑀺𑀤𑁆𑀥𑀺. 𑀬𑀸𑀣𑀸𑀯𑀢𑁄 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀸𑀧𑀤𑁂𑀲𑁂𑀦 𑀳𑀺 𑀲𑀢𑁆𑀣𑀼 𑀯𑀺𑀯𑀝𑁆𑀝𑀘𑁆𑀙𑀤𑀪𑀸𑀯𑁄 𑀮𑁄𑀓𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀧𑀼𑀭𑀺𑀫𑀁 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀧𑀼𑀭𑀺𑀫𑀧𑀤𑀁 𑀪𑀕𑀯𑀢𑁄 𑀥𑀫𑁆𑀫𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀓𑀺𑀮𑁂𑀲𑀸𑀭𑀻𑀦𑀁 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀘 𑀅𑀭𑀸𑀦𑀁 𑀳𑀢𑀪𑀸𑀯𑀤𑀻𑀧𑀦𑀢𑁄. 𑀤𑀼𑀢𑀺𑀬𑀁 𑀧𑀤𑀁 𑀩𑀼𑀤𑁆𑀥𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑁂𑀯 𑀢𑀁 𑀲𑀫𑁆𑀪𑀯𑀢𑁄. 𑀢𑀢𑀺𑀬𑀁 𑀧𑀤𑀁 𑀲𑀫𑀦𑁆𑀢𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀻𑀧𑀦𑀢𑁄. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀳𑀺 𑀯𑀢𑁆𑀯𑀸 ‘‘𑀯𑀺𑀯𑀝𑁆𑀝𑀘𑁆𑀙𑀤𑁄’’𑀢𑀺 𑀯𑀘𑀦𑀁 𑀩𑀼𑀤𑁆𑀥𑀪𑀸𑀯𑀸𑀯𑀳𑀫𑁂𑀯 𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀺𑀪𑀸𑀯𑁂𑀢𑀻𑀢𑀺. 𑀲𑀽𑀭𑀪𑀸𑀯𑀦𑁆𑀢𑀺 𑀮𑀓𑁆𑀔𑀡𑀯𑀺𑀪𑀸𑀯𑀦𑁂𑀦 𑀯𑀺𑀲𑀤𑀜𑀸𑀡𑀢𑀁.

𑁩𑁮𑁫. 𑀕𑀯𑁂𑀲𑀻𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁮𑁭) 𑀜𑀸𑀡𑁂𑀦 𑀧𑀭𑀺𑀬𑁂𑀲𑀦𑀁 𑀅𑀓𑀸𑀲𑀺. 𑀲𑀫𑀸𑀦𑀬𑀻𑀢𑀺 𑀜𑀸𑀡𑁂𑀦 𑀲𑀗𑁆𑀓𑀮𑁂𑀦𑁆𑀢𑁄 𑀲𑀫𑀸𑀦𑀁 𑀆𑀦𑀬𑀺 𑀲𑀫𑀸𑀳𑀭𑀺. 𑀦 𑀲𑀓𑁆𑀓𑁄𑀢𑀺 𑀲𑀁𑀓𑀼𑀘𑀺𑀢𑁂 𑀇𑀭𑀺𑀬𑀸𑀧𑀣𑁂 𑀬𑁂𑀪𑀼𑀬𑁆𑀬𑁂𑀦 𑀢𑁂𑀲𑀁 𑀤𑀼𑀩𑁆𑀩𑀺𑀪𑀸𑀯𑀦𑀢𑁄. 𑀓𑀗𑁆𑀔𑀢𑀻𑀢𑀺 𑀧𑀤𑀲𑁆𑀲 𑀆𑀓𑀗𑁆𑀔𑀢𑀻𑀢𑀺 𑀅𑀬𑀫𑀢𑁆𑀣𑁄𑀢𑀺 𑀆𑀳 𑁋 ‘‘𑀅𑀳𑁄 𑀯𑀢 𑀧𑀲𑁆𑀲𑁂𑀬𑁆𑀬𑀦𑁆𑀢𑀺 𑀧𑀢𑁆𑀣𑀦𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺. 𑀓𑀺𑀘𑁆𑀙𑀢𑀻𑀢𑀺 𑀓𑀺𑀮𑀫𑀢𑀺. ‘‘𑀓𑀗𑁆𑀔𑀢𑀻’’𑀢𑀺 𑀧𑀤𑀲𑁆𑀲 𑀧𑀼𑀩𑁆𑀩𑁂 𑀆𑀲𑀻𑀲𑀦𑀢𑁆𑀣𑀢𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀲𑀁𑀲𑀬𑀢𑁆𑀣𑀢𑁆𑀢𑀫𑁂𑀯 𑀯𑀺𑀓𑀧𑁆𑀧𑀦𑁆𑀢𑀭𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀗𑁆𑀔𑀸𑀬 𑀯𑀸 𑀤𑀼𑀩𑁆𑀩𑀮𑀸 𑀯𑀺𑀫𑀢𑀺 𑀯𑀼𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀢𑀺𑀧𑁆𑀧𑀓𑀸𑀭𑁂𑀳𑀺 𑀲𑀁𑀲𑀬𑀥𑀫𑁆𑀫𑁂𑀳𑀺. 𑀓𑀸𑀮𑀼𑀲𑁆𑀲𑀺𑀬𑀪𑀸𑀯𑁄𑀢𑀺 𑀅𑀧𑁆𑀧𑀲𑀦𑁆𑀦𑀢𑀸𑀬 𑀳𑁂𑀢𑀼𑀪𑀽𑀢𑁄 𑀆𑀯𑀺𑀮𑀪𑀸𑀯𑁄. 𑀬𑀲𑁆𑀫𑀸 𑀪𑀕𑀯𑀢𑁄 𑀓𑁄𑀲𑁄𑀳𑀺𑀢𑀁 𑀲𑀩𑁆𑀩𑀩𑀼𑀤𑁆𑀥𑀸𑀯𑁂𑀡𑀺𑀓𑀁 𑀯𑀢𑁆𑀣𑀕𑀼𑀬𑁆𑀳𑀁 𑀲𑀼𑀯𑀺𑀲𑀼𑀤𑁆𑀥𑀓𑀜𑁆𑀘𑀦𑀫𑀡𑁆𑀟𑀮𑀲𑀦𑁆𑀦𑀺𑀓𑀸𑀲𑀁 𑀅𑀢𑁆𑀢𑀦𑁄 𑀲𑀡𑁆𑀞𑀸𑀦𑀲𑀦𑁆𑀦𑀺𑀯𑁂𑀲𑀲𑀼𑀦𑁆𑀤𑀭𑀢𑀸𑀬 𑀆𑀚𑀸𑀦𑁂𑀬𑁆𑀬𑀕𑀦𑁆𑀥𑀳𑀢𑁆𑀣𑀺𑀦𑁄 𑀯𑀭𑀗𑁆𑀕𑀘𑀸𑀭𑀼𑀪𑀸𑀯𑀁 𑀯𑀺𑀓𑀲𑀫𑀸𑀦𑀢𑀧𑀦𑀺𑀬𑀸𑀭𑀯𑀺𑀦𑁆𑀤𑀲𑀫𑀼𑀚𑁆𑀚𑀮𑀓𑁂𑀲𑀭𑀸𑀯𑀢𑁆𑀢𑀯𑀺𑀮𑀸𑀲𑀁 𑀲𑀜𑁆𑀛𑀸𑀧𑀪𑀸𑀦𑀼𑀭𑀜𑁆𑀚𑀺𑀢𑀚𑀮𑀯𑀦𑀦𑁆𑀢𑀭𑀸𑀪𑀺𑀮𑀓𑁆𑀔𑀺𑀢-𑀲𑀫𑁆𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀲𑁄𑀪𑀜𑁆𑀘 𑀅𑀢𑁆𑀢𑀦𑁄 𑀲𑀺𑀭𑀺𑀬𑀸 𑀅𑀪𑀺𑀪𑀼𑀬𑁆𑀬 𑀯𑀺𑀭𑀸𑀚𑀢𑀺, 𑀬𑀁 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀫𑀮𑁂𑀳𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬 𑀘𑀺𑀭𑀓𑀸𑀮𑀁 𑀲𑀼𑀧𑀭𑀺𑀘𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀸𑀥𑀺𑀓𑀸𑀭𑀢𑀸𑀬 𑀲𑀼𑀲𑀡𑁆𑀞𑀺𑀢𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀓𑁄𑀧𑀻𑀦𑀫𑁆𑀧𑀺 𑀲𑀦𑁆𑀢𑀁 𑀅𑀓𑁄𑀧𑀻𑀦𑀫𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺. 𑀧𑀳𑀽𑀢𑀪𑀸𑀯𑀦𑁆𑀢𑀺 𑀧𑀼𑀣𑀼𑀮𑀪𑀸𑀯𑀁. 𑀏𑀢𑁆𑀣𑁂𑀯 𑀳𑀺 𑀢𑀲𑁆𑀲 𑀲𑀁𑀲𑀬𑁄, 𑀢𑀦𑀼𑀫𑀼𑀤𑀼𑀲𑀼𑀓𑀼𑀫𑀸𑀭𑀢𑀸𑀤𑀻𑀲𑀼 𑀧𑀦𑀲𑁆𑀲 𑀕𑀼𑀡𑁂𑀲𑀼 𑀢𑀲𑁆𑀲 𑀯𑀺𑀘𑀸𑀭𑀡𑀸 𑀏𑀯 𑀦𑀸𑀳𑁄𑀲𑀺.

𑀳𑀺𑀭𑀺𑀓𑀭𑀡𑁄𑀓𑀸𑀲𑀦𑁆𑀢𑀺 𑀳𑀺𑀭𑀺𑀬𑀺𑀢𑀩𑁆𑀩𑀝𑁆𑀞𑀸𑀦𑀁. 𑀙𑀸𑀬𑀦𑁆𑀢𑀺 𑀧𑀝𑀺𑀩𑀺𑀫𑁆𑀩𑀁. 𑀓𑀻𑀤𑀺𑀲𑀦𑁆𑀢𑀺 𑀆𑀳 ‘‘𑀇𑀤𑁆𑀥𑀺𑀬𑀸’’𑀢𑀺𑀆𑀤𑀺. 𑀙𑀸𑀬𑀸𑀭𑀽𑀧𑀦𑁆𑀢𑀺 𑀪𑀕𑀯𑀢𑁄 𑀧𑀝𑀺𑀩𑀺𑀫𑁆𑀩𑀭𑀽𑀧𑀁. 𑀢𑀜𑁆𑀘 𑀔𑁄 𑀩𑀼𑀤𑁆𑀥𑀲𑀦𑁆𑀢𑀸𑀦𑀢𑁄 𑀯𑀺𑀦𑀺𑀫𑀼𑀢𑁆𑀢𑀁 𑀭𑀽𑀧𑀓𑀫𑀢𑁆𑀢𑀁 𑀪𑀕𑀯𑀢𑁄 𑀲𑀭𑀻𑀭𑀯𑀡𑁆𑀡𑀲𑀡𑁆𑀞𑀸𑀦𑀸𑀯𑀬𑀯𑀁 𑀇𑀤𑁆𑀥𑀺𑀫𑀬𑀁 𑀩𑀺𑀫𑁆𑀩𑀓𑀫𑀢𑁆𑀢𑀁, 𑀢𑀁 𑀧𑀦 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀬𑀣𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀭𑀽𑀧𑀁 𑀦 𑀤𑀺𑀲𑁆𑀲𑀢𑀺, 𑀢𑀣𑀸 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀨𑀭𑀺𑀢𑁆𑀯𑀸.

𑀓𑀡𑁆𑀡𑀲𑁄𑀢𑀸𑀦𑀁 𑀉𑀧𑀘𑀺𑀢𑀢𑀦𑀼𑀢𑀫𑁆𑀩𑀮𑁄𑀫𑀢𑀸𑀬 𑀥𑁄𑀢𑀭𑀚𑀢𑀧𑀦𑀸𑀴𑀺𑀓𑀸𑀲𑀤𑀺𑀲𑀢𑀸 𑀯𑀼𑀢𑁆𑀢𑀸. 𑀫𑀼𑀔𑀧𑀭𑀺𑀬𑀦𑁆𑀢𑁂𑀢𑀺 𑀓𑁂𑀲𑀦𑁆𑀢𑁂.

𑀓𑀺𑀭𑀺𑀬𑀸𑀓𑀭𑀡𑀦𑁆𑀢𑀺 𑀓𑀺𑀭𑀺𑀬𑀸𑀬 𑀓𑀸𑀬𑀺𑀓𑀲𑁆𑀲 𑀯𑀸𑀘𑀲𑀺𑀓𑀲𑁆𑀲 𑀧𑀝𑀺𑀧𑀢𑁆𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼. 𑀥𑀫𑁆𑀫𑀓𑀣𑀺𑀓𑀸𑀦𑀁 𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀩𑀻𑀚𑀦𑀺𑀕𑁆𑀕𑀳𑀡𑀁 𑀓𑀢𑀁. 𑀦 𑀳𑀺 𑀅𑀜𑁆𑀜𑀣𑀸 𑀲𑀩𑁆𑀩𑀲𑁆𑀲𑀧𑀺 𑀮𑁄𑀓𑀲𑁆𑀲 𑀅𑀮𑀗𑁆𑀓𑀸𑀭𑀪𑀽𑀢𑀁 𑀧𑀭𑀫𑀼𑀓𑁆𑀓𑀁𑀲𑀕𑀢𑀁 𑀲𑀺𑀓𑁆𑀔𑀸𑀲𑀁𑀬𑀫𑀸𑀦𑀁 𑀩𑀼𑀤𑁆𑀥𑀸𑀦𑀁 𑀫𑀼𑀔𑀘𑀦𑁆𑀤𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁 𑀳𑁄𑀢𑀺.

𑀧𑀢𑁆𑀣𑀭𑀺𑀢𑀯𑀺𑀢𑀸𑀦𑀑𑀮𑀫𑁆𑀩𑀺𑀢𑀕𑀦𑁆𑀥𑀤𑀸𑀫𑀓𑀼𑀲𑀼𑀫𑀤𑀸𑀫𑀓𑁂 𑀕𑀦𑁆𑀥𑀫𑀡𑁆𑀟𑀮𑀫𑀸𑀴𑁂. 𑀧𑀼𑀩𑁆𑀩𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀏𑀢𑁆𑀢𑀓𑀁 𑀯𑁂𑀮𑀁 𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑁂𑀦 𑀧𑀼𑀩𑁆𑀩𑀪𑀸𑀕𑁂𑀦 𑀓𑀸𑀮𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀧𑀘𑁆𑀘𑀬𑀤𑀸𑀬𑀓𑁂𑀲𑀼 𑀅𑀦𑀼𑀭𑁄𑀥𑀯𑀲𑁂𑀦 𑀧𑀭𑀺𑀲𑀁 𑀉𑀲𑁆𑀲𑀸𑀤𑁂𑀦𑁆𑀢𑁄 𑀯𑀸 𑀧𑀕𑁆𑀕𑀡𑁆𑀳𑀦𑁆𑀢𑁄, 𑀅𑀤𑀸𑀬𑀓𑁂𑀲𑀼 𑀯𑀺𑀭𑁄𑀥𑀯𑀲𑁂𑀦 𑀧𑀭𑀺𑀲𑀁 𑀅𑀧𑀲𑀸𑀤𑁂𑀦𑁆𑀢𑁄 𑀯𑀸.

𑀬𑁄𑀕𑀓𑁆𑀔𑁂𑀫𑀁 𑀅𑀦𑁆𑀢𑀭𑀸𑀬𑀸𑀪𑀸𑀯𑀁. 𑀲𑀪𑀸𑀯𑀕𑀼𑀡𑁂𑀦𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀕𑀼𑀡𑁂𑀦𑁂𑀯. 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀕𑀼𑀡𑀁 𑀲𑀯𑀺𑀕𑁆𑀕𑀳𑀁 𑀘𑀓𑁆𑀓𑀯𑀸𑀴𑀁 𑀅𑀢𑀺𑀲𑀫𑁆𑀩𑀸𑀥𑀁 𑀯𑀺𑀢𑁆𑀣𑀸𑀭𑁂𑀦 𑀲𑀦𑁆𑀥𑀸𑀭𑁂𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀢𑁄. 𑀪𑀯𑀕𑁆𑀕𑀁 𑀅𑀢𑀺𑀦𑀻𑀘𑀁 𑀉𑀧𑀭𑀽𑀧𑀭𑀺 𑀲𑀦𑁆𑀥𑀸𑀭𑁂𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑀢𑁄.

𑁩𑁮𑁬. 𑀞𑀸𑀦𑀕𑀫𑀦𑀸𑀤𑀻𑀲𑀼 (𑀤𑀻. 𑀦𑀺. 𑀝𑀻. 𑁨.𑁩𑁫) 𑀪𑀽𑀫𑀺𑀬𑀁 𑀲𑀼𑀝𑁆𑀞𑀼 𑀲𑀫𑀁𑀧𑀢𑀺𑀝𑁆𑀞𑀺𑀢𑀸 𑀧𑀸𑀤𑀸 𑀏𑀢𑀲𑁆𑀲𑀸𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄. 𑀢𑀁 𑀧𑀦 𑀪𑀕𑀯𑀢𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀕𑁆𑀕𑀢𑀮𑀦𑁆𑀢𑀺 𑀅𑀕𑁆𑀕𑀧𑀸𑀤𑀢𑀮𑀁. 𑀧𑀡𑁆𑀳𑀻𑀢𑀺 𑀧𑀡𑁆𑀳𑀺𑀢𑀮𑀁. 𑀧𑀲𑁆𑀲𑀦𑁆𑀢𑀺 𑀧𑀸𑀤𑀢𑀮𑀲𑁆𑀲 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀏𑀓𑁂𑀓𑀁, 𑀉𑀪𑀬𑀫𑁂𑀯 𑀯𑀸 𑀧𑀭𑀺𑀬𑀦𑁆𑀢𑀁 𑀧𑀲𑁆𑀲𑀁. 𑀲𑀼𑀯𑀡𑁆𑀡𑀧𑀸𑀤𑀼𑀓𑀢𑀮𑀁 𑀯𑀺𑀬 𑀉𑀚𑀼𑀓𑀁 𑀦𑀺𑀓𑁆𑀔𑀺𑀧𑀺𑀬𑀫𑀸𑀦𑀁. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯𑀸𑀢𑀺 𑀏𑀓𑀓𑁆𑀔𑀡𑁂𑀬𑁂𑀯. 𑀲𑀓𑀮𑀁 𑀧𑀸𑀤𑀢𑀮𑀁 𑀪𑀽𑀫𑀺𑀁 𑀨𑀼𑀲𑀢𑀺 𑀦𑀺𑀓𑁆𑀔𑀺𑀧𑀦𑁂. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀓𑀮𑀁 𑀧𑀸𑀤𑀢𑀮𑀁 𑀪𑀽𑀫𑀺𑀢𑁄 𑀉𑀝𑁆𑀞𑀳𑀢𑀻𑀢𑀺 𑀬𑁄𑀚𑀦𑀸.

𑀢𑀢𑁆𑀭𑀸𑀢𑀺 𑀢𑀸𑀬 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀬 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑀸𑀯 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀁 𑀇𑀤𑀁 𑀯𑀼𑀘𑁆𑀘𑀫𑀸𑀦𑀁 𑀦𑀺𑀲𑁆𑀲𑀦𑁆𑀤𑀨𑀮𑀁. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀢𑁆𑀣𑀼 𑀢𑀺𑀤𑀺𑀯𑀕𑀫𑀦𑁂𑀦 𑀲𑀼𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀢𑀣𑀸 𑀳𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀢𑀁 𑀲𑀫𑀢𑁆𑀣𑁂𑀢𑀺. 𑀢𑁂𑀦 𑀧𑀞𑀫𑀮𑀓𑁆𑀔𑀡𑀢𑁄𑀧𑀺 𑀤𑀼𑀢𑀺𑀬𑀮𑀓𑁆𑀔𑀡𑀁 𑀫𑀳𑀸𑀦𑀼𑀪𑀸𑀯𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀦𑁆𑀢𑀫𑀲𑁄 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀧𑀭𑀺𑀲𑀁 𑀉𑀧𑀸𑀤𑀸𑀬 𑀲𑀩𑁆𑀩𑁄𑀧𑀺 𑀘𑀓𑁆𑀓𑀮𑀓𑁆𑀔𑀡𑀲𑁆𑀲𑁂𑀯 𑀧𑀭𑀺𑀯𑀸𑀭𑁄’’𑀢𑀺. 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀲𑁆𑀲 𑀢𑀸𑀯𑀢𑀺𑀁𑀲𑀪𑀯𑀦𑀲𑁆𑀲 𑀘 𑀧𑀓𑀢𑀺𑀧𑀤𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑀼𑀧𑀲𑀗𑁆𑀓𑀫𑀦𑁂 𑀦𑁂𑀯 𑀩𑀼𑀤𑁆𑀥𑀸𑀦𑀁, 𑀦 𑀤𑁂𑀯𑀢𑀸𑀦𑀁 𑀆𑀦𑀼𑀪𑀸𑀯𑁄, 𑀅𑀣 𑀔𑁄 𑀩𑀼𑀤𑁆𑀥𑀸𑀦𑀁 𑀮𑀓𑁆𑀔𑀡𑀸𑀦𑀼𑀪𑀸𑀯𑁄𑀢𑀺 𑀇𑀫𑀫𑀢𑁆𑀣𑀁 𑀦𑀺𑀤𑀲𑁆𑀲𑀺𑀢𑀁. 𑀲𑀻𑀮𑀢𑁂𑀚𑁂𑀦…𑀧𑁂… 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀆𑀦𑀼𑀪𑀸𑀯𑁂𑀦𑀸𑀢𑀺 𑀇𑀤𑀫𑁆𑀧𑀺 𑀮𑀓𑁆𑀔𑀡𑀦𑀺𑀩𑁆𑀩𑀢𑁆𑀢𑀓𑀫𑁆𑀫𑀯𑀺𑀲𑁂𑀲𑀓𑀺𑀢𑁆𑀢𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀸𑀯𑀦𑁆𑀢𑁂𑀳𑀻𑀢𑀺 𑀲𑀩𑁆𑀩𑀧𑀤𑁂𑀲𑀯𑀦𑁆𑀢𑁂𑀳𑀺.

𑀦𑀸𑀪𑀺𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀦𑀸𑀪𑀺𑀬𑀁 𑀧𑀭𑀺𑀘𑁆𑀙𑀺𑀦𑁆𑀦𑀸 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀞𑀺𑀢𑀸. 𑀦𑀸𑀪𑀺𑀫𑀼𑀔𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁄𑀢𑀺 𑀧𑀓𑀢𑀺𑀘𑀓𑁆𑀓𑀲𑁆𑀲 𑀅𑀓𑁆𑀔𑀩𑁆𑀪𑀸𑀳𑀢𑀧𑀭𑀺𑀳𑀭𑀡𑀢𑁆𑀣𑀁 𑀦𑀸𑀪𑀺𑀫𑀼𑀔𑁂 𑀞𑀧𑁂𑀢𑀩𑁆𑀩𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁄. 𑀦𑁂𑀫𑀺𑀫𑀡𑀺𑀓𑀸𑀢𑀺 𑀦𑁂𑀫𑀺𑀬𑀁 𑀆𑀯𑀴𑀺𑀪𑀸𑀯𑁂𑀦 𑀞𑀺𑀢𑀫𑀡𑀺𑀓𑀸𑀮𑁂𑀔𑀸.

𑀲𑀫𑁆𑀩𑀳𑀼𑀮𑀯𑀸𑀭𑁄𑀢𑀺 𑀩𑀳𑀼𑀯𑀺𑀥𑀮𑁂𑀔𑀗𑁆𑀕𑀯𑀺𑀪𑀸𑀯𑀦𑀯𑀸𑀭𑁄. 𑀲𑀢𑁆𑀢𑀻𑀢𑀺 𑀆𑀯𑀼𑀥𑀲𑀢𑁆𑀢𑀺. 𑀲𑀺𑀭𑀺𑀯𑀘𑁆𑀙𑁄𑀢𑀺 𑀲𑀺𑀭𑀺𑀫𑀼𑀔𑀁. 𑀦𑀦𑁆𑀤𑀻𑀢𑀺 𑀤𑀓𑁆𑀔𑀺𑀡𑀸𑀯𑀝𑁆𑀝𑀁. 𑀲𑁄𑀯𑀢𑁆𑀢𑀺𑀓𑁄𑀢𑀺 𑀲𑁄𑀯𑀢𑁆𑀢𑀺𑀅𑀗𑁆𑀓𑁄. 𑀯𑀝𑀁𑀲𑀓𑁄𑀢𑀺 𑀆𑀯𑁂𑀴𑀁. 𑀯𑀟𑁆𑀠𑀫𑀸𑀦𑀓𑀦𑁆𑀢𑀺 𑀧𑀼𑀭𑀺𑀲𑀳𑀸𑀭𑀺 𑀧𑀼𑀭𑀺𑀲𑀗𑁆𑀕𑀁. 𑀫𑁄𑀭𑀳𑀢𑁆𑀣𑀓𑁄𑀢𑀺 𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑁄, 𑀫𑁄𑀭𑀧𑀺𑀜𑁆𑀙 𑀧𑀭𑀺𑀲𑀺𑀩𑁆𑀩𑀺𑀢𑁄 𑀯𑀸 𑀩𑀻𑀚𑀦𑀺𑀯𑀺𑀲𑁂𑀲𑁄. 𑀯𑀸𑀮𑀩𑀻𑀚𑀦𑀻𑀢𑀺 𑀘𑀸𑀫𑀭𑀺𑀯𑀸𑀮𑀁. 𑀲𑀺𑀤𑁆𑀥𑀢𑁆𑀣𑀸𑀤𑀺 𑀧𑀼𑀡𑁆𑀡𑀖𑀝𑀧𑀼𑀡𑁆𑀡𑀧𑀸𑀢𑀺𑀬𑁄. ‘‘𑀘𑀓𑁆𑀓𑀯𑀸𑀴𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀥𑀸𑀦𑀸𑀯𑀬𑀯𑁂 𑀤𑀲𑁆𑀲𑁂𑀢𑀼𑀁 ‘‘𑀳𑀺𑀫𑀯𑀸 𑀲𑀺𑀦𑁂𑀭𑀼…𑀧𑁂… 𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑀆𑀬𑀢𑀧𑀡𑁆𑀳𑀻𑀢𑀺 𑀇𑀤𑀁 𑀅𑀜𑁆𑀜𑁂𑀲𑀁 𑀧𑀡𑁆𑀳𑀺𑀢𑁄 𑀤𑀻𑀖𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀅𑀢𑀺𑀤𑀻𑀖𑀢𑀦𑁆𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑀧𑀡𑁆𑀳𑀻’’𑀢𑀺. 𑀬𑀣𑀸 𑀧𑀦 𑀧𑀡𑁆𑀳𑀺𑀮𑀓𑁆𑀔𑀡𑀁 𑀧𑀭𑀺𑀧𑀼𑀡𑁆𑀡𑀁 𑀦𑀸𑀫 𑀳𑁄𑀢𑀺, 𑀢𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀭𑀕𑁆𑀕𑁂𑀦𑀸𑀢𑀺 𑀫𑀡𑁆𑀟𑀮𑀸𑀬 𑀲𑀺𑀔𑀸𑀬. 𑀯𑀝𑁆𑀝𑁂𑀢𑁆𑀯𑀸𑀢𑀺 𑀬𑀣𑀸 𑀲𑀼𑀯𑀝𑁆𑀝𑀁 𑀳𑁄𑀢𑀺, 𑀏𑀯𑀁 𑀯𑀝𑁆𑀝𑁂𑀢𑁆𑀯𑀸. 𑀭𑀢𑁆𑀢𑀓𑀫𑁆𑀩𑀮𑀕𑁂𑀡𑁆𑀟𑀼𑀓𑀲𑀤𑀺𑀲𑀸𑀢𑀺 𑀭𑀢𑁆𑀢𑀓𑀫𑁆𑀩𑀮𑀫𑀬𑀕𑁂𑀡𑁆𑀟𑀼𑀓𑀲𑀤𑀺𑀲𑀸.

𑀫𑀓𑁆𑀓𑀝𑀲𑁆𑀲𑁂𑀯𑀸𑀢𑀺 𑀯𑀸𑀦𑀭𑀲𑁆𑀲 𑀯𑀺𑀬. 𑀤𑀻𑀖𑀪𑀸𑀯𑁂𑀦 𑀲𑀫𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀦𑀺𑀬𑁆𑀬𑀸𑀲𑀢𑁂𑀮𑁂𑀦𑀸𑀢𑀺 𑀙𑀤𑀺𑀓𑀦𑀺𑀬𑁆𑀬𑀸𑀲𑀸𑀤𑀺𑀦𑀺𑀬𑁆𑀬𑀸𑀲𑀲𑀫𑁆𑀫𑀺𑀲𑁆𑀲𑁂𑀦 𑀢𑁂𑀮𑁂𑀦.

𑀢𑀮𑀼𑀦𑀸𑀢𑀺 𑀲𑀼𑀓𑀼𑀫𑀸𑀭𑀸.

𑀘𑀫𑁆𑀫𑁂𑀦𑀸𑀢𑀺 𑀅𑀗𑁆𑀕𑀼𑀮𑀦𑁆𑀢𑀭𑀯𑁂𑀞𑀺𑀢𑀘𑀫𑁆𑀫𑁂𑀦. 𑀧𑀝𑀺𑀩𑀤𑁆𑀥𑀅𑀗𑁆𑀕𑀼𑀮𑀦𑁆𑀢𑀭𑁄𑀢𑀺 𑀏𑀓𑀢𑁄 𑀲𑀫𑁆𑀩𑀤𑁆𑀥𑀅𑀗𑁆𑀕𑀼𑀮𑀦𑁆𑀢𑀭𑁄. 𑀏𑀓𑀧𑁆𑀧𑀫𑀸𑀡𑀸𑀢𑀺 𑀤𑀻𑀖𑀢𑁄 𑀲𑀫𑀸𑀦𑀧𑁆𑀧𑀫𑀸𑀡𑀸. 𑀬𑀯𑀮𑀓𑁆𑀔𑀡𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀢𑁄 𑀅𑀗𑁆𑀕𑀼𑀮𑀺𑀧𑀩𑁆𑀩𑁂𑀞𑀺𑀢𑀁 𑀬𑀯𑀮𑀓𑁆𑀔𑀡𑀁. 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀢𑀁𑀢𑀁𑀧𑀩𑁆𑀩𑀸𑀦𑀁 𑀲𑀫𑀸𑀦𑀤𑁂𑀲𑀢𑀸𑀬 𑀅𑀗𑁆𑀕𑀼𑀮𑀻𑀦𑀁 𑀧𑀲𑀸𑀭𑀺𑀢𑀓𑀸𑀮𑁂 𑀅𑀜𑁆𑀜𑀫𑀜𑁆𑀜𑀁 𑀯𑀺𑀚𑁆𑀛𑀺𑀢𑀸𑀦𑀺 𑀯𑀺𑀬 𑀨𑀼𑀲𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺.

𑀲𑀗𑁆𑀔𑀸 𑀯𑀼𑀘𑁆𑀘𑀦𑁆𑀢𑀺 𑀕𑁄𑀧𑁆𑀨𑀓𑀸, 𑀉𑀤𑁆𑀥𑀁 𑀲𑀗𑁆𑀔𑀸 𑀏𑀢𑁂𑀲𑀦𑁆𑀢𑀺 𑀉𑀲𑁆𑀲𑀗𑁆𑀔𑀸, 𑀧𑀸𑀤𑀸. 𑀧𑀺𑀝𑁆𑀞𑀺𑀧𑀸𑀤𑁂𑀢𑀺 𑀧𑀺𑀝𑁆𑀞𑀺𑀧𑀸𑀤𑀲𑀫𑀻𑀧𑁂. 𑀲𑀼𑀔𑁂𑀦 𑀧𑀸𑀤𑀸 𑀧𑀭𑀺𑀯𑀢𑁆𑀢𑀦𑁆𑀢𑀺 𑀧𑀸𑀤𑀦𑀸𑀫𑀦𑀸𑀤𑀻𑀲𑀼, 𑀢𑁂𑀦𑁂𑀯 𑀕𑀘𑁆𑀙𑀦𑁆𑀢𑀸𑀦𑀁 𑀢𑁂𑀲𑀁 𑀳𑁂𑀝𑁆𑀞𑀸 𑀧𑀸𑀤𑀢𑀮𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀢𑁂𑀦𑀸𑀢𑀺 𑀕𑁄𑀧𑁆𑀨𑀓𑀸𑀦𑀁 𑀧𑀺𑀝𑁆𑀞𑀺𑀧𑀸𑀤𑀢𑁄 𑀉𑀤𑁆𑀥𑀁 𑀧𑀢𑀺𑀝𑁆𑀞𑀺𑀢𑀢𑁆𑀢𑀸. 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀜𑁆𑀳𑀺 𑀢𑀸𑀦𑀺 𑀉𑀤𑁆𑀥𑀁 𑀆𑀭𑁄𑀳𑀺𑀢𑁆𑀯𑀸 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀦𑀺𑀕𑀼𑀴𑁆𑀳𑀸𑀦𑀺 𑀘 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑁂𑀲𑀁 𑀯𑀺𑀬 𑀧𑀜𑁆𑀜𑀸𑀬𑀫𑀸𑀦𑀸𑀦𑀺. 𑀲𑀢𑀺𑀧𑀺 𑀤𑁂𑀲𑀦𑁆𑀢𑀭𑀧𑁆𑀧𑀯𑀢𑁆𑀢𑀺𑀬𑀁 𑀦𑀺𑀘𑁆𑀘𑀮𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀦𑀸𑀪𑀺𑀕𑁆𑀕𑀳𑀡𑀁.

𑀬𑀲𑁆𑀫𑀸 𑀏𑀡𑀻𑀫𑀺𑀕𑀲𑁆𑀲 𑀲𑀫𑀦𑁆𑀢𑀢𑁄 𑀏𑀓𑀲𑀤𑀺𑀲𑀫𑀁𑀲𑀸 𑀅𑀦𑀼𑀓𑁆𑀓𑀫𑁂𑀦 𑀉𑀤𑁆𑀥𑀁 𑀣𑀽𑀮𑀸 𑀚𑀗𑁆𑀖𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀏𑀡𑀻𑀫𑀺𑀕𑀲𑀤𑀺𑀲𑀚𑀗𑁆𑀖𑀸’’𑀢𑀺. 𑀧𑀭𑀺𑀧𑀼𑀡𑁆𑀡𑀚𑀗𑁆𑀖𑁄𑀢𑀺 𑀲𑀫𑀦𑁆𑀢𑀢𑁄 𑀫𑀁𑀲𑀽𑀧𑀘𑀬𑁂𑀦 𑀧𑀭𑀺𑀧𑀼𑀡𑁆𑀡𑀚𑀗𑁆𑀖𑁄. 𑀢𑁂𑀦𑀸𑀳 ‘‘𑀦 𑀏𑀓𑀢𑁄’’𑀢𑀺𑀆𑀤𑀺.

𑀏𑀢𑁂𑀦𑀸𑀢𑀺 ‘‘𑀅𑀦𑁄𑀦𑀫𑀦𑁆𑀢𑁄’’𑀢𑀺𑀆𑀤𑀺𑀯𑀘𑀦𑁂𑀦, 𑀚𑀸𑀡𑀼𑀨𑀸𑀲𑀼𑀪𑀸𑀯𑀤𑀻𑀧𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀯𑀲𑁂𑀲𑀚𑀦𑀸𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀭𑀳𑀺𑀢𑀸 𑀚𑀦𑀸. 𑀔𑀼𑀚𑁆𑀚𑀸 𑀯𑀸 𑀳𑁄𑀦𑁆𑀢𑀺 𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀉𑀧𑀭𑀺𑀫𑀓𑀸𑀬𑀲𑁆𑀲 𑀭𑀲𑁆𑀲𑀢𑀸𑀬. 𑀯𑀸𑀫𑀦𑀸 𑀯𑀸 𑀉𑀧𑀭𑀺𑀫𑀓𑀸𑀬𑀢𑁄 𑀳𑁂𑀝𑁆𑀞𑀺𑀫𑀓𑀸𑀬𑀲𑁆𑀲 𑀭𑀲𑁆𑀲𑀢𑀸𑀬. 𑀏𑀢𑁂𑀦 𑀞𑀧𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀘𑀓𑁆𑀓𑀯𑀢𑁆𑀢𑀺𑀦𑀜𑁆𑀘 𑀇𑀢𑀭𑁂 𑀲𑀢𑁆𑀢𑀸 𑀔𑀼𑀚𑁆𑀚𑀸 𑀯𑀸𑀫𑀦𑀸 𑀘𑀸𑀢𑀺 𑀤𑀲𑁆𑀲𑁂𑀢𑀺.

𑀑𑀳𑀺𑀢𑀦𑁆𑀢𑀺 𑀲𑀫𑁄𑀳𑀺𑀢𑀁 𑀅𑀦𑁆𑀢𑁄𑀕𑀥𑀁. 𑀢𑀣𑀸𑀪𑀽𑀢𑀁 𑀧𑀦 𑀢𑀁 𑀢𑁂𑀦 𑀙𑀦𑁆𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺.

𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀯𑀡𑁆𑀡𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦𑀸’’𑀢𑀺𑀆𑀤𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀆𑀯𑀼𑀢𑁆𑀢𑀺𑀜𑀸𑀬𑁂𑀦 𑀘 𑀯𑁂𑀤𑀺𑀢𑀩𑁆𑀩𑁄. 𑀲𑀭𑀻𑀭𑀧𑀭𑀺𑀬𑀸𑀬𑁄 𑀇𑀥 𑀯𑀡𑁆𑀡𑀲𑀤𑁆𑀤𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀞𑀫𑀯𑀺𑀓𑀧𑁆𑀧𑀁 𑀯𑀢𑁆𑀯𑀸 𑀢𑀣𑀸𑀭𑀽𑀧𑀸𑀬 𑀧𑀦 𑀭𑀼𑀴𑁆𑀳𑀺𑀬𑀸 𑀅𑀪𑀸𑀯𑀁 𑀫𑀦𑀲𑀺 𑀓𑀢𑁆𑀯𑀸 𑀯𑀡𑁆𑀡𑀥𑀸𑀢𑀼𑀧𑀭𑀺𑀬𑀸𑀬𑀫𑁂𑀯 𑀯𑀡𑁆𑀡𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄.

𑀭𑀚𑁄𑀢𑀺 𑀲𑀼𑀔𑀼𑀫𑀭𑀚𑁄. 𑀚𑀮𑁆𑀮𑀦𑁆𑀢𑀺 𑀫𑀮𑀻𑀦𑀪𑀸𑀯𑀸𑀯𑀳𑁄 𑀭𑁂𑀡𑀼𑀲𑀜𑁆𑀘𑀬𑁄. 𑀢𑁂𑀦𑀸𑀳 ‘‘𑀫𑀮𑀁 𑀯𑀸’’𑀢𑀺. 𑀬𑀤𑀺 𑀯𑀺𑀯𑀝𑁆𑀝𑀢𑀺, 𑀓𑀣𑀁 𑀦𑁆𑀳𑀸𑀦𑀸𑀤𑀻𑀢𑀺 𑀆𑀳 ‘‘𑀳𑀢𑁆𑀣𑀥𑁄𑀯𑀦𑀸’’𑀢𑀺𑀆𑀤𑀺.

𑀆𑀯𑀝𑁆𑀝𑀧𑀭𑀺𑀬𑁄𑀲𑀸𑀦𑁂𑀢𑀺 𑀧𑀤𑀓𑁆𑀔𑀺𑀡𑀸𑀯𑀝𑁆𑀝𑀸𑀬 𑀅𑀦𑁆𑀢𑁂.

𑀩𑁆𑀭𑀳𑁆𑀫𑀼𑀦𑁄 𑀲𑀭𑀻𑀭𑀁 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀅𑀦𑁄𑀦𑀫𑀺𑀢𑁆𑀯𑀸 𑀉𑀚𑀼𑀓𑀫𑁂𑀯 𑀉𑀕𑁆𑀕𑀢𑀦𑁆𑀢𑀺 𑀆𑀳 ‘‘𑀩𑁆𑀭𑀳𑁆𑀫𑀸 𑀯𑀺𑀬 𑀉𑀚𑀼𑀕𑀢𑁆𑀢𑁄’’𑀢𑀺. 𑀧𑀲𑁆𑀲𑀯𑀗𑁆𑀓𑀸𑀢𑀺 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀯𑀸 𑀯𑀸𑀫𑀧𑀲𑁆𑀲𑁂𑀦 𑀯𑀸 𑀯𑀗𑁆𑀓𑀸.

𑀳𑀢𑁆𑀣𑀧𑀺𑀝𑁆𑀞𑀺𑀆𑀤𑀺𑀯𑀲𑁂𑀦 𑀲𑀢𑁆𑀢 𑀉𑀲𑁆𑀲𑀤𑀸 𑀏𑀢𑀲𑁆𑀲𑀸𑀢𑀺 𑀲𑀢𑁆𑀢𑀼𑀲𑁆𑀲𑀤𑁄.

𑀲𑀻𑀳𑀲𑁆𑀲 𑀧𑀼𑀩𑁆𑀩𑀤𑁆𑀥𑀁 𑀲𑀻𑀳𑀧𑀼𑀩𑁆𑀩𑀤𑁆𑀥𑀁, 𑀧𑀭𑀺𑀧𑀼𑀡𑁆𑀡𑀸𑀯𑀬𑀯𑀢𑀸𑀬 𑀲𑀻𑀳𑀧𑀼𑀩𑁆𑀩𑀤𑁆𑀥𑀁 𑀯𑀺𑀬 𑀲𑀓𑀮𑁄 𑀓𑀸𑀬𑁄 𑀅𑀲𑁆𑀲𑀸𑀢𑀺 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄. 𑀲𑀻𑀳𑀲𑁆𑀲𑁂𑀯𑀸𑀢𑀺 𑀲𑀻𑀳𑀲𑁆𑀲 𑀯𑀺𑀬. 𑀲𑀡𑁆𑀞𑀦𑁆𑀢𑀻𑀢𑀺 𑀲𑀡𑁆𑀞𑀳𑀦𑁆𑀢𑀺. 𑀦𑀸𑀦𑀸𑀘𑀺𑀢𑁆𑀢𑁂𑀦𑀸𑀢𑀺 𑀯𑀺𑀯𑀺𑀥𑀘𑀺𑀢𑁆𑀢𑁂𑀦. 𑀧𑀼𑀜𑁆𑀜𑀘𑀺𑀢𑁆𑀢𑁂𑀦𑀸𑀢𑀺 𑀧𑀸𑀭𑀫𑀺𑀢𑀸𑀧𑀼𑀜𑁆𑀜𑀘𑀺𑀢𑁆𑀢𑀭𑀽𑀧𑁂𑀦. 𑀘𑀺𑀢𑁆𑀢𑀺𑀢𑁄𑀢𑀺 𑀲𑀜𑁆𑀚𑀸𑀢𑀘𑀺𑀢𑁆𑀢𑀪𑀸𑀯𑁄.

𑀤𑁆𑀯𑀺𑀦𑁆𑀦𑀁 𑀓𑁄𑀝𑁆𑀝𑀸𑀦𑀫𑀦𑁆𑀢𑀭𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀺𑀝𑁆𑀞𑀺𑀩𑀸𑀳𑀸𑀦𑀁 𑀯𑁂𑀫𑀚𑁆𑀛𑀁, 𑀧𑀺𑀝𑁆𑀞𑀺𑀫𑀚𑁆𑀛𑀲𑁆𑀲 𑀉𑀧𑀭𑀺𑀪𑀸𑀕𑁄. 𑀘𑀺𑀢𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀦𑀺𑀦𑁆𑀦𑀪𑀸𑀯𑁂𑀦 𑀘𑀺𑀢𑀁, 𑀤𑁆𑀯𑀻𑀳𑀺 𑀓𑁄𑀝𑁆𑀝𑁂𑀳𑀺 𑀲𑀫𑀢𑀮𑀢𑀸𑀬 𑀧𑀭𑀺𑀧𑀼𑀡𑁆𑀡𑀁. 𑀉𑀕𑁆𑀕𑀫𑁆𑀫𑀸𑀢𑀺 𑀉𑀕𑁆𑀕𑀦𑁆𑀢𑁆𑀯𑀸.

𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑁄 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑀏𑀓𑀲𑁆𑀲 𑀧𑀭𑀺𑀫𑀡𑁆𑀟𑀮𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸. 𑀦 𑀳𑀺 𑀲𑀩𑁆𑀩𑁄 𑀦𑀺𑀕𑁆𑀭𑁄𑀥𑁄 𑀫𑀡𑁆𑀟𑀮𑁄. 𑀢𑁂𑀦𑀸𑀳 ‘‘𑀲𑀫𑀓𑁆𑀔𑀦𑁆𑀥𑀲𑀸𑀔𑁄 𑀦𑀺𑀕𑁆𑀭𑁄𑀥𑁄’’𑀢𑀺. 𑀧𑀭𑀺𑀫𑀡𑁆𑀟𑀮𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀯𑀸 𑀧𑀭𑀺𑀫𑀡𑁆𑀟𑀮𑁄𑀯 𑀦𑀺𑀕𑁆𑀭𑁄𑀥𑁄 𑀕𑀬𑁆𑀳𑀢𑀻𑀢𑀺 𑀧𑀭𑀺𑀫𑀡𑁆𑀟𑀮𑀲𑀤𑁆𑀤𑀲𑁆𑀲 𑀮𑁄𑀧𑁂𑀦 𑀯𑀺𑀦𑀸𑀧𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀦𑀺𑀕𑁆𑀭𑁄𑀥𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑁄’’𑀢𑀺. 𑀬𑀸𑀯𑀢𑀓𑁆𑀯𑀲𑁆𑀲𑀸𑀢𑀺 𑀑-𑀓𑀸𑀭𑀲𑁆𑀲 𑀯-𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀲𑀫𑀯𑀝𑁆𑀝𑀺𑀢𑀓𑁆𑀔𑀦𑁆𑀥𑁄𑀢𑀺 𑀲𑀫𑀁 𑀲𑀼𑀯𑀝𑁆𑀝𑀺𑀢𑀓𑁆𑀔𑀦𑁆𑀥𑁄. 𑀓𑁄𑀜𑁆𑀘𑀸 𑀯𑀺𑀬 𑀤𑀻𑀖𑀕𑀮𑀸, 𑀩𑀓𑀸 𑀯𑀺𑀬 𑀯𑀗𑁆𑀓𑀕𑀮𑀸, 𑀯𑀭𑀸𑀳𑀸 𑀯𑀺𑀬 𑀧𑀼𑀣𑀼𑀮𑀕𑀮𑀸𑀢𑀺 𑀬𑁄𑀚𑀦𑀸. 𑀲𑀼𑀯𑀡𑁆𑀡𑀸𑀮𑀺𑀗𑁆𑀕𑀲𑀤𑀺𑀲𑁄𑀢𑀺 𑀲𑀼𑀯𑀡𑁆𑀡𑀫𑀬𑀔𑀼𑀤𑁆𑀤𑀓𑀫𑀼𑀤𑀺𑀗𑁆𑀕𑀲𑀤𑀺𑀲𑁄.

𑀭𑀲𑀕𑁆𑀕𑀲𑀕𑁆𑀕𑀻𑀢𑀺 𑀫𑀥𑀼𑀭𑀸𑀤𑀺𑀪𑁂𑀤𑀁 𑀭𑀲𑀁 𑀕𑀲𑀦𑁆𑀢𑀺 𑀅𑀦𑁆𑀢𑁄 𑀧𑀯𑁂𑀲𑀦𑁆𑀢𑀻𑀢𑀺 𑀭𑀲𑀕𑁆𑀕𑀲𑀸, 𑀭𑀲𑀕𑁆𑀕𑀲𑀸𑀦𑀁 𑀅𑀕𑁆𑀕𑀸 𑀭𑀲𑀕𑁆𑀕𑀲𑀕𑁆𑀕𑀸, 𑀢𑀸 𑀏𑀢𑀲𑁆𑀲 𑀲𑀦𑁆𑀢𑀻𑀢𑀺 𑀭𑀲𑀕𑁆𑀕𑀲𑀕𑁆𑀕𑀻. 𑀢𑁂𑀦𑀸𑀢𑀺 𑀑𑀚𑀸𑀬 𑀅𑀨𑀭𑀡𑁂𑀦, 𑀳𑀻𑀦𑀥𑀸𑀢𑀼𑀓𑀢𑁆𑀢𑀸 𑀢𑁂 𑀩𑀳𑁆𑀯𑀸𑀩𑀸𑀥𑀸 𑀳𑁄𑀦𑁆𑀢𑀺.

‘‘𑀳𑀦𑀽’’𑀢𑀺 𑀲𑀦𑁆𑀦𑀺𑀲𑁆𑀲𑀬𑀤𑀦𑁆𑀢𑀸𑀥𑀸𑀭𑀲𑁆𑀲 𑀲𑀫𑀜𑁆𑀜𑀸, 𑀢𑀁 𑀪𑀕𑀯𑀢𑁄 𑀲𑀻𑀳𑀳𑀦𑀼𑀲𑀤𑀺𑀲𑀁, 𑀢𑀲𑁆𑀫𑀸 𑀪𑀕𑀯𑀸 𑀲𑀻𑀳𑀳𑀦𑀼. 𑀢𑀢𑁆𑀣 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀭𑀽𑀧𑀓𑀸𑀬𑀲𑁆𑀲 𑀥𑀫𑁆𑀫𑀓𑀸𑀬𑀲𑁆𑀲 𑀘 𑀉𑀧𑀫𑀸 𑀦𑀸𑀫 𑀦𑀺𑀳𑀻𑀦𑀼𑀧𑀫𑀸𑀯, 𑀦𑀢𑁆𑀣𑀺 𑀲𑀫𑀸𑀦𑀼𑀧𑀫𑀸, 𑀓𑀼𑀢𑁄 𑀅𑀥𑀺𑀓𑀽𑀧𑀫𑀸, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀦𑀺𑀳𑀻𑀦𑀼𑀧𑀫𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀺𑀪𑀸𑀕𑀯𑀲𑁂𑀦 𑀫𑀡𑁆𑀟𑀮𑀢𑀸𑀬 𑀤𑁆𑀯𑀸𑀤𑀲𑀺𑀬𑀁 𑀧𑀓𑁆𑀔𑀲𑁆𑀲 𑀘𑀦𑁆𑀤𑀲𑀤𑀺𑀲𑀸𑀦𑀺.

𑀤𑀦𑁆𑀢𑀸𑀦𑀁 𑀉𑀘𑁆𑀘𑀦𑀻𑀘𑀢𑀸 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀧𑀲𑁆𑀲𑀯𑀲𑁂𑀦𑀧𑀺 𑀯𑁂𑀤𑀺𑀢𑀩𑁆𑀩𑀸, 𑀦 𑀅𑀕𑁆𑀕𑀯𑀲𑁂𑀦𑁂𑀯. 𑀢𑁂𑀦𑀸𑀳 ‘‘𑀅𑀬𑀧𑀝𑁆𑀝𑀙𑀺𑀦𑁆𑀦𑀲𑀗𑁆𑀔𑀧𑀝𑀮𑀁 𑀯𑀺𑀬𑀸’’𑀢𑀺. 𑀅𑀬𑀧𑀝𑁆𑀝𑀦𑁆𑀢𑀺 𑀘 𑀓𑀓𑀘𑀁 𑀅𑀥𑀺𑀧𑁆𑀧𑁂𑀢𑀁. 𑀯𑀺𑀲𑀫𑀸𑀢𑀺 𑀯𑀺𑀲𑀫𑀲𑀡𑁆𑀞𑀸𑀦𑀸.

𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀲𑀭𑀢𑀸𑀬 𑀙𑀺𑀦𑁆𑀦𑀲𑁆𑀲𑀭𑀸𑀧𑀺. 𑀅𑀦𑁂𑀓𑀸𑀓𑀸𑀭𑀢𑀸𑀬 𑀪𑀺𑀦𑁆𑀦𑀲𑁆𑀲𑀭𑀸𑀧𑀺. 𑀓𑀸𑀓𑀲𑁆𑀲 𑀯𑀺𑀬 𑀅𑀫𑀦𑀼𑀜𑁆𑀜𑀲𑀭𑀢𑀸𑀬 𑀓𑀸𑀓𑀲𑁆𑀲𑀭𑀸𑀧𑀺. 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸𑀢𑀺 𑀅𑀦𑀼𑀧𑀤𑁆𑀤𑀼𑀢𑀯𑀢𑁆𑀣𑀼𑀓𑀢𑁆𑀢𑀸. 𑀯𑀢𑁆𑀣𑀼𑀦𑁆𑀢𑀺 𑀘 𑀅𑀓𑁆𑀔𑀭𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀫𑀸𑀳. 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀢𑁆𑀣 𑀅𑀝𑁆𑀞𑀗𑁆𑀕𑀸𑀦𑀺 𑀧𑀭𑀢𑁄 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀫𑀜𑁆𑀚𑀼𑀖𑁄𑀲𑁄𑀢𑀺 𑀫𑀥𑀼𑀭𑀲𑁆𑀲𑀭𑁄.

𑀓𑀭𑀯𑀻𑀓𑀲𑀤𑁆𑀤𑁄 𑀬𑁂𑀲𑀁 𑀲𑀢𑁆𑀢𑀸𑀦𑀁 𑀲𑁄𑀢𑀧𑀣𑀁 𑀉𑀧𑀕𑀘𑁆𑀙𑀢𑀺, 𑀢𑁂 𑀅𑀢𑁆𑀢𑀦𑁄 𑀲𑀭𑀲𑀫𑁆𑀧𑀢𑁆𑀢𑀺𑀬𑀸 𑀧𑀓𑀢𑀺𑀁 𑀚𑀳𑀸𑀧𑁂𑀢𑁆𑀯𑀸 𑀅𑀯𑀲𑁂 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀺, 𑀏𑀯𑀁 𑀫𑀥𑀼𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭𑀺𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀧𑀻𑀢𑀺𑀦𑁆𑀢𑀺 𑀢𑀁 𑀩𑀼𑀤𑁆𑀥𑀕𑀢𑀁 𑀧𑀻𑀢𑀺𑀁. 𑀢𑁂𑀦𑁂𑀯 𑀦𑀻𑀳𑀸𑀭𑁂𑀦 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀦𑁆𑀢𑀁 𑀅𑀯𑀺𑀚𑀳𑀺𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀸 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑁂 𑀮𑀤𑁆𑀥𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀧𑀓𑁆𑀓𑀜𑀸𑀡𑀢𑀸𑀬 ‘‘𑀲𑀢𑁆𑀢𑀳𑀺…𑀧𑁂… 𑀧𑀢𑀺𑀝𑁆𑀞𑀸𑀲𑀻’’𑀢𑀺. 𑀲𑀢𑁆𑀢𑀲𑀢𑀫𑀢𑁆𑀢𑁂𑀦 𑀑𑀭𑁄𑀥𑀚𑀦𑁂𑀦 𑀲𑀤𑁆𑀥𑀺𑀁 𑀧𑀤𑀲𑀸𑀯 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀉𑀧𑀕𑀢𑀢𑁆𑀢𑀸 ‘‘𑀲𑀢𑁆𑀢𑀳𑀺 𑀚𑀗𑁆𑀖𑀸𑀲𑀢𑁂𑀳𑀺 𑀲𑀤𑁆𑀥𑀺’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀪𑀺𑀦𑀻𑀮𑀦𑁂𑀢𑁆𑀢𑁄𑀢𑀺 𑀅𑀥𑀺𑀓𑀦𑀻𑀮𑀦𑁂𑀢𑁆𑀢𑁄. 𑀅𑀥𑀺𑀓𑀦𑀻𑀮𑀢𑀸 𑀘 𑀲𑀸𑀢𑀺𑀲𑀬𑀁 𑀦𑀻𑀮𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀦 𑀦𑁂𑀢𑁆𑀢𑁂 𑀦𑀻𑀮𑀯𑀡𑁆𑀡𑀲𑁆𑀲𑁂𑀯 𑀅𑀥𑀺𑀓𑀪𑀸𑀯𑀢𑁄𑀢𑀺 𑀆𑀳 ‘‘𑀦 𑀲𑀓𑀮𑀦𑀻𑀮𑀦𑁂𑀢𑁆𑀢𑁄𑀯𑀸’’𑀢𑀺𑀆𑀤𑀺. 𑀧𑀻𑀢𑀮𑁄𑀳𑀺𑀢𑀯𑀡𑁆𑀡𑀸 𑀲𑁂𑀢𑀫𑀡𑁆𑀟𑀮𑀕𑀢𑀭𑀸𑀚𑀺𑀯𑀲𑁂𑀦, 𑀦𑀻𑀮𑀲𑁂𑀢𑀓𑀸𑀴𑀯𑀡𑁆𑀡𑀸 𑀧𑀦 𑀢𑀁𑀢𑀁𑀫𑀡𑁆𑀟𑀮𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀘𑀓𑁆𑀔𑀼𑀪𑀡𑁆𑀟𑀦𑁆𑀢𑀺 𑀅𑀓𑁆𑀔𑀺𑀤𑀮𑀦𑁆𑀢𑀺 𑀓𑁂𑀘𑀺, 𑀅𑀓𑁆𑀔𑀺𑀤𑀮𑀧𑀢𑁆𑀢𑀦𑁆𑀢𑀺 𑀅𑀜𑁆𑀜𑁂. 𑀅𑀓𑁆𑀔𑀺𑀤𑀮𑁂𑀳𑀺 𑀧𑀦 𑀲𑀤𑁆𑀥𑀺𑀁 𑀅𑀓𑁆𑀔𑀺𑀩𑀺𑀫𑁆𑀩𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀯𑀺𑀦𑀺𑀕𑁆𑀕𑀢𑀕𑀫𑁆𑀪𑀻𑀭𑀚𑁄𑀢𑀦𑀸𑀧𑀺 𑀬𑀼𑀢𑁆𑀢𑀸 𑀳𑁄𑀢𑀺.

𑀉𑀡𑁆𑀡𑀸𑀲𑀤𑁆𑀤𑁄 𑀮𑁄𑀓𑁂 𑀅𑀯𑀺𑀲𑁂𑀲𑀢𑁄 𑀮𑁄𑀫𑀧𑀭𑀺𑀬𑀸𑀬𑁄, 𑀇𑀥 𑀧𑀦 𑀮𑁄𑀫𑀯𑀺𑀲𑁂𑀲𑀯𑀸𑀘𑀓𑁄𑀢𑀺 𑀆𑀳 ‘‘𑀉𑀡𑁆𑀡𑀮𑁄𑀫’’𑀦𑁆𑀢𑀺. 𑀦𑀮𑀸𑀝𑀫𑀚𑁆𑀛𑀚𑀸𑀢𑀸𑀢𑀺 𑀦𑀮𑀸𑀝𑀫𑀚𑁆𑀛𑀕𑀢𑀸. 𑀑𑀤𑀸𑀢𑀢𑀸𑀬 𑀉𑀧𑀫𑀸, 𑀦 𑀫𑀼𑀤𑀼𑀢𑀸𑀬. 𑀭𑀚𑀢𑀧𑀼𑀩𑁆𑀩𑀼𑀴𑀓𑀸𑀢𑀺 𑀭𑀚𑀢𑀫𑀬𑀢𑀸𑀭𑀓𑀸.

𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀯𑀼𑀢𑁆𑀢𑀦𑁆𑀢𑀺 𑀬𑀲𑁆𑀫𑀸 𑀩𑀼𑀤𑁆𑀥𑀸 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀧𑀭𑀺𑀧𑀼𑀡𑁆𑀡𑀦𑀮𑀸𑀝𑀢𑀸𑀬 𑀧𑀭𑀺𑀧𑀼𑀡𑁆𑀡𑀲𑀻𑀲𑀩𑀺𑀫𑁆𑀩𑀢𑀸𑀬 𑀘 ‘‘𑀉𑀡𑁆𑀳𑀻𑀲𑀲𑀻𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 ‘‘𑀉𑀡𑁆𑀳𑀻𑀲𑀲𑀻𑀲𑁄’’𑀢𑀺 𑀇𑀤𑀁 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀁 𑀅𑀢𑁆𑀣𑀤𑁆𑀯𑀬𑀁 𑀪𑀕𑀯𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸𑀕𑀢𑀲𑁆𑀲𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀡𑁆𑀳𑀢𑀫𑀢𑀸𑀬 𑀲𑀼𑀯𑀡𑁆𑀡𑀯𑀡𑁆𑀡𑀢𑀸𑀬 𑀘 𑀭𑀜𑁆𑀜𑁄 𑀩𑀤𑁆𑀥𑀉𑀡𑁆𑀳𑀻𑀲𑀧𑀝𑁆𑀝𑁄 𑀯𑀺𑀬 𑀯𑀺𑀭𑁄𑀘𑀢𑀺. 𑀓𑀧𑁆𑀧𑀲𑀻𑀲𑀸𑀢𑀺 𑀤𑁆𑀯𑀺𑀥𑀸𑀪𑀽𑀢𑀲𑀻𑀲𑀸. 𑀨𑀮𑀲𑀻𑀲𑀸𑀢𑀺 𑀨𑀮𑀲𑀤𑀺𑀲𑀲𑀻𑀲𑀸. 𑀅𑀝𑁆𑀞𑀺𑀲𑀻𑀲𑀸𑀢𑀺 𑀫𑀁𑀲𑀲𑁆𑀲 𑀅𑀪𑀸𑀯𑀢𑁄 𑀢𑀘𑁄𑀧𑀭𑀺𑀬𑁄𑀦𑀤𑁆𑀥𑀅𑀝𑁆𑀞𑀺𑀫𑀢𑁆𑀢𑀲𑀻𑀲𑀸. 𑀢𑀼𑀫𑁆𑀩𑀲𑀻𑀲𑀸𑀢𑀺 𑀮𑀸𑀩𑀼𑀲𑀤𑀺𑀲𑀲𑀻𑀲𑀸. 𑀧𑀩𑁆𑀪𑀸𑀭𑀲𑀻𑀲𑀸𑀢𑀺 𑀧𑀺𑀝𑁆𑀞𑀺𑀪𑀸𑀕𑁂𑀦 𑀑𑀮𑀫𑁆𑀩𑀫𑀸𑀦𑀲𑀻𑀲𑀸. 𑀧𑀼𑀭𑀺𑀫𑀦𑀬𑁂𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑀦𑀮𑀸𑀝𑀢𑀸𑀧𑀓𑁆𑀔𑁂𑀦. 𑀉𑀡𑁆𑀳𑀻𑀲𑀯𑁂𑀞𑀺𑀢𑀲𑀻𑀲𑁄 𑀯𑀺𑀬𑀸𑀢𑀺 𑀉𑀡𑁆𑀳𑀻𑀲𑀧𑀝𑁆𑀝𑁂𑀦 𑀯𑁂𑀞𑀺𑀢𑀲𑀻𑀲𑀧𑀤𑁂𑀲𑁄 𑀯𑀺𑀬. 𑀉𑀡𑁆𑀳𑀻𑀲𑀁 𑀯𑀺𑀬𑀸𑀢𑀺 𑀙𑁂𑀓𑁂𑀦 𑀲𑀺𑀧𑁆𑀧𑀺𑀦𑀸 𑀯𑀺𑀭𑀘𑀺𑀢𑀉𑀡𑁆𑀳𑀻𑀲𑀫𑀡𑁆𑀟𑀮𑀁 𑀯𑀺𑀬.

𑀓𑀫𑁆𑀫𑀦𑁆𑀢𑀺 𑀬𑁂𑀦 𑀬𑁂𑀦 𑀓𑀫𑁆𑀫𑁂𑀦 𑀬𑀁 𑀬𑀁 𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀁 𑀢𑀁 𑀓𑀫𑁆𑀫𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀮𑀓𑁆𑀔𑀡𑀲𑁆𑀲 𑀢𑀁𑀓𑀫𑁆𑀫𑀸𑀦𑀼𑀭𑀽𑀧𑀢𑀸. 𑀮𑀓𑁆𑀔𑀡𑀦𑁆𑀢𑀺 𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑁆𑀲 𑀅𑀯𑀺𑀧𑀭𑀻𑀢𑀲𑀪𑀸𑀯𑁄. 𑀮𑀓𑁆𑀔𑀡𑀸𑀦𑀺𑀲𑀁𑀲𑀦𑁆𑀢𑀺 𑀢𑀁 𑀮𑀓𑁆𑀔𑀡𑀧𑀝𑀺𑀮𑀸𑀪𑁂𑀦 𑀮𑀤𑁆𑀥𑀩𑁆𑀩𑀕𑀼𑀡𑁄. 𑀇𑀫𑀸𑀦𑀺 𑀓𑀫𑁆𑀫𑀸𑀤𑀻𑀦𑀻𑀢𑀺 𑀇𑀫𑀸𑀦𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀸𑀦𑀺 𑀓𑀫𑁆𑀫𑀓𑀫𑁆𑀫𑀲𑀭𑀺𑀓𑁆𑀔𑀓𑀸𑀤𑀻𑀦𑀺 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀲𑀭𑀽𑀧𑀢𑁄 𑀯𑀺𑀪𑀸𑀯𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸𑀦𑀺 𑀲𑀁𑀯𑀡𑁆𑀡𑀓𑁂𑀦.

𑀭𑀢𑀦𑀯𑀺𑀘𑀺𑀢𑁆𑀢𑀲𑀼𑀯𑀡𑁆𑀡𑀢𑁄𑀭𑀡𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀦𑀼𑀲𑁆𑀲𑀮𑁄𑀓𑁂 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀤𑁂𑀯𑀦𑀕𑀭𑁂’’𑀢𑀺. 𑀲𑀩𑁆𑀩𑀲𑁄 𑀲𑀼𑀧𑀼𑀧𑁆𑀨𑀺𑀢𑀲𑀸𑀮𑀭𑀼𑀓𑁆𑀔𑁄 𑀅𑀲𑀸𑀥𑀸𑀭𑀡𑀲𑁄𑀪𑁄 𑀫𑀦𑀼𑀲𑁆𑀲𑀽𑀧𑀘𑀸𑀭𑁂 𑀦 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀲𑁂𑀮𑀦𑁆𑀢𑀭𑀫𑁆𑀳𑀻’’𑀢𑀺. 𑀓𑀺𑀭𑀺𑀬𑀸𑀘𑀸𑀭𑀦𑁆𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑀺𑀭𑀺𑀬𑀸𑀧𑀯𑀢𑁆𑀢𑀺𑀁.

𑁩𑁮𑁭. 𑀲𑀢𑀢𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀲𑀢𑀢𑀁 𑀘𑀭𑀺𑀫𑀪𑀯𑁂 𑀲𑀩𑁆𑀩𑀓𑀸𑀮𑀁 𑀮𑀓𑁆𑀔𑀡𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀸𑀦𑀼𑀪𑀸𑀯𑀳𑁂𑀢𑀼𑀓𑀁 𑀩𑀼𑀤𑁆𑀥𑀸𑀯𑁂𑀡𑀺𑀓𑀁 𑀧𑀸𑀝𑀺𑀳𑀸𑀭𑀺𑀬𑀁. 𑀩𑀼𑀤𑁆𑀥𑀸𑀦𑀁 𑀅𑀢𑀺𑀤𑀽𑀭𑁂 𑀧𑀸𑀤𑀁 𑀦𑀺𑀓𑁆𑀔𑀺𑀧𑀺𑀢𑀼𑀓𑀸𑀫𑀸𑀦𑀫𑁆𑀧𑀺 𑀦𑀸𑀢𑀺𑀤𑀽𑀭𑁂 𑀏𑀯 𑀦𑀺𑀓𑁆𑀔𑀺𑀧𑀦𑀁 𑀳𑁄𑀢𑀻𑀢𑀺 ‘‘𑀦 𑀅𑀢𑀺𑀤𑀽𑀭𑁂 𑀞𑀧𑁂𑀲𑁆𑀲𑀸𑀫𑀻𑀢𑀺 𑀉𑀤𑁆𑀥𑀭𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀓𑀢𑀺𑀲𑀜𑁆𑀘𑀭𑀡𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀸𑀤𑀺𑀲𑁂𑀦 𑀧𑀸𑀤𑁂𑀦 𑀅𑀦𑁂𑀓𑀬𑁄𑀚𑀦𑁂 𑀞𑀧𑁂𑀲𑁆𑀲𑀸𑀫𑀻𑀢𑀺 𑀉𑀤𑁆𑀥𑀭𑀡𑀫𑁆𑀧𑀺 𑀳𑁄𑀢𑀺𑀬𑁂𑀯. 𑀅𑀢𑀺𑀤𑀽𑀭𑀁 𑀳𑀻𑀢𑀺𑀆𑀤𑀺 𑀧𑀫𑀸𑀡𑀸𑀢𑀺𑀓𑁆𑀓𑀫𑁂 𑀤𑁄𑀲𑀤𑀲𑁆𑀲𑀦𑀁. 𑀏𑀯𑀁 𑀲𑀢𑀻𑀢𑀺 𑀏𑀯𑀁 𑀤𑀓𑁆𑀔𑀺𑀡𑀧𑀸𑀤𑀯𑀸𑀫𑀧𑀸𑀤𑀸𑀦𑀁 𑀬𑀣𑀸𑀥𑀺𑀧𑁆𑀧𑁂𑀢𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂 𑀲𑀢𑀺. 𑀧𑀤𑀯𑀺𑀘𑁆𑀙𑁂𑀤𑁄𑀢𑀺 𑀧𑀤𑀯𑀸𑀭𑀯𑀺𑀘𑁆𑀙𑁂𑀤𑁄. 𑀬𑀸𑀤𑀺𑀲𑀁 𑀧𑀲𑀸𑀭𑁂𑀦𑁆𑀢𑁄 𑀯𑀸𑀫𑀧𑀸𑀤𑀲𑁆𑀲 𑀉𑀤𑁆𑀥𑀭𑀡𑀁 𑀧𑀢𑀺𑀝𑁆𑀞𑀸𑀦𑀜𑁆𑀘, 𑀤𑀓𑁆𑀔𑀺𑀡𑀧𑀸𑀤𑀲𑁆𑀲 𑀢𑀸𑀤𑀺𑀲𑀫𑁂𑀯, 𑀇𑀢𑀺 𑀦𑁂𑀲𑀁 𑀉𑀤𑁆𑀥𑀭𑀡𑀧𑀢𑀺𑀝𑁆𑀞𑀸𑀦𑀸𑀦𑀁 𑀲𑀫𑀸𑀦𑀢𑁄 𑀅𑀜𑁆𑀜𑀫𑀜𑁆𑀜𑀪𑀸𑀯𑁂𑀦 𑀅𑀦𑀽𑀦𑀸𑀦𑀥𑀺𑀓𑀢𑀸𑀬 𑀯𑀼𑀢𑁆𑀢𑀁 ‘‘𑀤𑀓𑁆𑀔𑀺𑀡𑀧𑀸𑀤𑀓𑀺𑀘𑁆𑀘𑀁 𑀯𑀸𑀫𑀧𑀸𑀤𑁂𑀦 𑀦𑀺𑀬𑀫𑀺𑀢𑀁, 𑀯𑀸𑀫𑀧𑀸𑀤𑀓𑀺𑀘𑁆𑀘𑀁 𑀤𑀓𑁆𑀔𑀺𑀡𑀧𑀸𑀤𑁂𑀦 𑀦𑀺𑀬𑀫𑀺𑀢’’𑀦𑁆𑀢𑀺.

𑀤𑀺𑀯𑀸𑀢𑀺 𑀉𑀧𑀓𑀝𑁆𑀞𑀸𑀬 𑀯𑁂𑀮𑀸𑀬. 𑀯𑀺𑀳𑀸𑀭𑀪𑀢𑁆𑀢𑀢𑁆𑀣𑀸𑀬𑀸𑀢𑀺 𑀯𑀺𑀳𑀸𑀭𑁂 𑀬𑀣𑀸𑀯𑀼𑀤𑁆𑀥𑀁 𑀕𑀳𑁂𑀢𑀩𑁆𑀩𑀪𑀢𑁆𑀢𑀢𑁆𑀣𑀸𑀬. 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄𑀢𑀺 𑀧𑀓𑀢𑀺𑀕𑀫𑀦𑁂𑀦 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄. 𑀑𑀓𑀸𑀲𑀁 𑀦 𑀮𑀪𑀢𑀻𑀢𑀺 𑀧𑀤𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑀁 𑀦 𑀮𑀪𑀢𑀺. 𑀊𑀭𑀼𑀧𑀭𑀺𑀬𑀸𑀬𑁄 𑀇𑀥 𑀲𑀢𑁆𑀣𑀺-𑀲𑀤𑁆𑀤𑁄𑀢𑀺 𑀆𑀳 ‘‘𑀦 𑀊𑀭𑀼𑀁 𑀉𑀦𑁆𑀦𑀸𑀫𑁂𑀢𑀻’’𑀢𑀺. 𑀤𑀡𑁆𑀟𑀗𑁆𑀓𑀼𑀲𑀁 𑀯𑀼𑀘𑁆𑀘𑀢𑀺 𑀤𑀻𑀖𑀤𑀡𑁆𑀟𑁄 𑀅𑀗𑁆𑀓𑀼𑀲𑁄, 𑀢𑁂𑀦 𑀭𑀼𑀓𑁆𑀔𑀲𑀸𑀔𑀁 𑀙𑀺𑀦𑁆𑀤𑀢𑁄 𑀧𑀼𑀭𑀺𑀲𑀲𑁆𑀲 𑀬𑀣𑀸 𑀧𑀘𑁆𑀙𑀸𑀪𑀸𑀕𑁂𑀦 𑀧𑀸𑀤𑀸𑀦𑀁 𑀑𑀲𑀓𑁆𑀓𑀦𑀁 𑀳𑁄𑀢𑀺, 𑀏𑀯𑀁 𑀪𑀕𑀯𑀢𑁄 𑀧𑀸𑀤𑀸 𑀦 𑀑𑀲𑀓𑁆𑀓𑀦𑁆𑀢𑀻𑀢𑀺 𑀆𑀳 ‘‘𑀭𑀼𑀓𑁆𑀔𑀲𑀸𑀔𑀸𑀙𑁂𑀤𑀦…𑀧𑁂… 𑀑𑀲𑀓𑁆𑀓𑀸𑀧𑁂𑀢𑀻’’𑀢𑀺. 𑀑𑀩𑀤𑁆𑀥𑀸𑀦𑀸𑀩𑀤𑁆𑀥𑀝𑁆𑀞𑀸𑀦𑁂𑀳𑀺 𑀧𑀸𑀤𑀁 𑀓𑁄𑀝𑁆𑀝𑁂𑀦𑁆𑀢𑁄 𑀯𑀺𑀬𑀸𑀢𑀺 𑀆𑀩𑀤𑁆𑀥𑀝𑁆𑀞𑀸𑀦𑁂𑀦 𑀅𑀦𑀸𑀩𑀤𑁆𑀥𑀝𑁆𑀞𑀸𑀦𑁂𑀦 𑀘 𑀧𑀸𑀤𑀔𑀡𑁆𑀟𑀁 𑀓𑁄𑀝𑁆𑀝𑁂𑀢𑁆𑀯𑀸 𑀣𑀤𑁆𑀥𑀁 𑀓𑀭𑁄𑀦𑁆𑀢𑁄 𑀯𑀺𑀬. 𑀦 𑀇𑀢𑁄 𑀘𑀺𑀢𑁄 𑀘 𑀘𑀸𑀮𑁂𑀢𑀻𑀢𑀺 𑀅𑀧𑀭𑀸𑀧𑀭𑀁 𑀦 𑀘𑀸𑀮𑁂𑀢𑀺. 𑀉𑀲𑁆𑀲𑀗𑁆𑀔𑀧𑀸𑀤𑀢𑀸𑀬 𑀲𑀼𑀔𑁂𑀦𑁂𑀯 𑀧𑀸𑀤𑀸𑀦𑀁 𑀧𑀭𑀺𑀯𑀢𑁆𑀢𑀦𑀢𑁄 𑀦𑀸𑀪𑀺𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺𑀫𑀓𑀸𑀬𑁄 𑀦 𑀇𑀜𑁆𑀚𑀢𑀻𑀢𑀺 𑀳𑁂𑀝𑁆𑀞𑀺𑀫𑀓𑀸𑀬𑁄𑀯 𑀇𑀜𑁆𑀚𑀢𑀺. 𑀢𑁂𑀦𑀸𑀳 ‘‘𑀉𑀧𑀭𑀺𑀫…𑀧𑁂… 𑀦𑀺𑀘𑁆𑀘𑀮𑁄 𑀳𑁄𑀢𑀻’’𑀢𑀺. 𑀦 𑀚𑀸𑀦𑀸𑀢𑀺 𑀅𑀦𑀺𑀜𑁆𑀚𑀦𑀢𑁄. 𑀓𑀸𑀬𑀩𑀮𑁂𑀦𑀸𑀢𑀺 𑀕𑀫𑀦𑀧𑀬𑁄𑀕𑀲𑀗𑁆𑀔𑀸𑀢𑁂𑀦 𑀓𑀸𑀬𑀕𑀢𑁂𑀦 𑀯𑀺𑀲𑁂𑀲𑀩𑀮𑁂𑀦. 𑀚𑀯𑀕𑀫𑀦𑀳𑁂𑀢𑀼𑀪𑀽𑀢𑁂𑀦 𑀯𑀸 𑀓𑀸𑀬𑀩𑀮𑁂𑀦. 𑀢𑁂𑀦𑀸𑀳 ‘‘𑀩𑀸𑀳𑀸 𑀔𑀺𑀧𑀦𑁆𑀢𑁄’’𑀢𑀺𑀆𑀤𑀺. 𑀚𑀯𑁂𑀦 𑀕𑀘𑁆𑀙𑀦𑁆𑀢𑁄 𑀳𑀺 𑀩𑀸𑀳𑀸 𑀔𑀺𑀧𑀢𑀺, 𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀦𑀸𑀕𑀸𑀧𑀮𑁄𑀓𑀺𑀢𑀯𑀲𑁂𑀦𑀸𑀢𑀺 𑀦𑀸𑀕𑀲𑁆𑀲 𑀅𑀧𑀮𑁄𑀓𑀦𑀫𑀺𑀯 𑀲𑀓𑀮𑀓𑀸𑀬𑁂𑀦𑁂𑀯 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀧𑀮𑁄𑀓𑀦𑀯𑀲𑁂𑀦.

𑀅𑀦𑀸𑀯𑀭𑀡𑀜𑀸𑀡𑀲𑁆𑀲𑀸𑀢𑀺 𑀅𑀦𑀸𑀯𑀭𑀡𑀜𑀸𑀡𑀩𑀮𑁂𑀦 𑀤𑀲𑁆𑀲𑀦𑀲𑁆𑀲. 𑀅𑀦𑀸𑀯𑀭𑀡𑀯𑀸𑀭𑁄 𑀧𑀦 𑀓𑀸𑀬𑁂 𑀧𑀢𑀺𑀝𑁆𑀞𑀺𑀢𑀭𑀽𑀧𑀤𑀲𑁆𑀲𑀦𑀫𑁆𑀧𑀺 𑀅𑀦𑀸𑀯𑀭𑀡𑀫𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄. 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀦𑀕𑀭𑀤𑁆𑀯𑀸𑀭𑁂 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬. 𑀧𑀓𑀢𑀺𑀇𑀭𑀺𑀬𑀸𑀧𑀣𑁂𑀦𑁂𑀯𑀸𑀢𑀺 𑀑𑀦𑀫𑀦𑀸𑀤𑀺𑀁 𑀅𑀓𑀢𑁆𑀯𑀸 𑀉𑀚𑀼𑀓𑀕𑀫𑀦𑀸𑀤𑀺𑀦𑀸 𑀏𑀯. 𑀬𑀤𑀺 𑀏𑀯𑀁 𑀓𑁄𑀝𑁆𑀞𑀓𑀤𑁆𑀯𑀸𑀭𑀕𑁂𑀳𑀧𑁆𑀧𑀯𑁂𑀲𑁂 𑀓𑀣𑀦𑁆𑀢𑀺 𑀆𑀳 ‘‘𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀺. 𑀧𑀭𑀺𑀯𑀢𑁆𑀢𑁂𑀦𑁆𑀢𑁂𑀦𑀸𑀢𑀺 𑀦𑀺𑀧𑀚𑁆𑀚𑀦𑀢𑁆𑀣𑀁 𑀓𑀸𑀬𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁂𑀦.

𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸𑀢𑀺 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀉𑀪𑁄𑀲𑀼 𑀓𑀝𑀺𑀧𑁆𑀧𑀤𑁂𑀲𑁂𑀲𑀼 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀧𑀢𑀢𑀺 𑀦𑀺𑀲𑀻𑀤𑀦𑀝𑁆𑀞𑀸𑀦𑁂 𑀦𑀺𑀧𑀚𑁆𑀚𑀦𑀯𑀲𑁂𑀦 𑀧𑀢𑀢𑀺. 𑀑𑀭𑀺𑀫𑀁 𑀅𑀗𑁆𑀕𑀁 𑀦𑀺𑀲𑁆𑀲𑀸𑀬 𑀦𑀺𑀲𑀺𑀦𑁆𑀦𑁄𑀢𑀺 𑀧𑀮𑁆𑀮𑀗𑁆𑀓𑀫𑀸𑀪𑀼𑀚𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀦𑀺𑀲𑀚𑁆𑀚𑀸𑀬 𑀉𑀧𑀭𑀺𑀫𑀓𑀸𑀬𑀁 𑀳𑁂𑀝𑁆𑀞𑀺𑀫𑀓𑀸𑀬𑁂 𑀧𑀢𑀺𑀝𑁆𑀞𑀧𑁂𑀦𑁆𑀢𑁄𑀬𑁂𑀯 𑀪𑀸𑀭𑀻𑀓𑀭𑀡𑀯𑀲𑁂𑀦 𑀑𑀭𑀺𑀫𑀗𑁆𑀕𑀁 𑀦𑀺𑀲𑁆𑀲𑀸𑀬 𑀦𑀺𑀲𑀺𑀦𑁆𑀦𑁄. 𑀖𑀁𑀲𑀦𑁆𑀢𑁄𑀢𑀺 𑀆𑀦𑀺𑀲𑀤𑀤𑁂𑀲𑁂𑀦 𑀆𑀲𑀦𑀝𑁆𑀞𑀸𑀦𑀁 𑀖𑀁𑀲𑀦𑁆𑀢𑁄. 𑀧𑀸𑀭𑀺𑀫𑀗𑁆𑀕𑀦𑁆𑀢𑀺 𑀲𑀢𑁆𑀣𑀺𑀪𑀸𑀕𑀲𑀫𑁆𑀫𑀤𑁆𑀤𑀁 𑀆𑀦𑀺𑀲𑀤𑀧𑀤𑁂𑀲𑀁. 𑀢𑀣𑁂𑀯𑀸𑀢𑀺 𑀖𑀁𑀲𑀦𑁆𑀢𑁄 𑀏𑀯. 𑀑𑀮𑀫𑁆𑀩𑀓𑀁 𑀥𑀸𑀭𑁂𑀦𑁆𑀢𑁄 𑀯𑀺𑀬𑀸𑀢𑀺 𑀑𑀮𑀫𑁆𑀩𑀓𑀲𑀼𑀢𑁆𑀢𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬. 𑀢𑁂𑀦 𑀉𑀚𑀼𑀓𑀫𑁂𑀯 𑀦𑀺𑀲𑀻𑀤𑀦𑀫𑀸𑀳. 𑀲𑀭𑀻𑀭𑀲𑁆𑀲 𑀕𑀭𑀼𑀓𑀪𑀸𑀯𑀳𑁂𑀢𑀽𑀦𑀁 𑀤𑀽𑀭𑀢𑁄 𑀲𑀫𑀼𑀧𑀸𑀬𑀺𑀢𑀪𑀸𑀯𑁂𑀦 𑀲𑀮𑁆𑀮𑀳𑀼𑀓𑀪𑀸𑀯𑀢𑁄 𑀢𑀽𑀮𑀧𑀺𑀘𑀼𑀁 𑀞𑀧𑁂𑀦𑁆𑀢𑁄 𑀯𑀺𑀬.

𑀅𑀧𑁆𑀧𑁂𑀲𑀓𑁆𑀔𑀸𑀦𑀁 𑀫𑀳𑀸𑀦𑀼𑀪𑀸𑀯𑀕𑁂𑀳𑀧𑁆𑀧𑀯𑁂𑀲𑁂 𑀲𑀺𑀬𑀸 𑀙𑀫𑁆𑀪𑀺𑀢𑀢𑁆𑀢𑀁, 𑀘𑀺𑀢𑁆𑀢𑀓𑁆𑀔𑁄𑀪𑁄, 𑀤𑀭𑀣𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀓𑀧𑁆𑀧𑀦𑀁, 𑀪𑀬𑀯𑀲𑁂𑀦 𑀢𑀡𑁆𑀳𑀸𑀯𑀲𑁂𑀦 𑀧𑀭𑀺𑀢𑀲𑁆𑀲𑀦𑀁, 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀦 𑀙𑀫𑁆𑀪𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁨.𑁩𑁮𑁭) 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦 𑀙𑀫𑁆𑀪𑀢𑀻’’𑀢𑀺𑀆𑀤𑀺.

𑀉𑀤𑀓𑀁 𑀤𑀻𑀬𑀢𑀺 𑀏𑀢𑁂𑀦𑀸𑀢𑀺 𑀉𑀤𑀓𑀤𑀸𑀦𑀁, 𑀪𑀺𑀗𑁆𑀓𑀸𑀭𑀸𑀤𑀺 𑀉𑀤𑀓𑀪𑀸𑀚𑀦𑀁. 𑀩𑀤𑁆𑀥𑀁 𑀓𑀢𑁆𑀯𑀸𑀢𑀺 𑀳𑀢𑁆𑀣𑀕𑀢𑀫𑀢𑁆𑀢𑀺𑀓𑀁 𑀯𑀺𑀬 𑀅𑀢𑁆𑀢𑀦𑁄 𑀯𑀲𑁂 𑀅𑀯𑀢𑁆𑀢𑀦𑁆𑀢𑀁 𑀓𑀢𑁆𑀯𑀸. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀓𑀼𑀚𑁆𑀚𑀺𑀢𑁆𑀯𑀸. 𑀯𑀺𑀙𑀟𑁆𑀟𑀬𑀫𑀸𑀦𑁄 𑀉𑀤𑀓𑀲𑁆𑀲 𑀯𑀺𑀓𑁆𑀔𑀺𑀧𑀦𑀯𑀲𑁂𑀦 𑀙𑀟𑁆𑀟𑀬𑀫𑀸𑀦𑁄.

𑀢𑀣𑀸 𑀦 𑀕𑀡𑁆𑀳𑀸𑀢𑀺, 𑀩𑁆𑀬𑀜𑁆𑀚𑀦𑀫𑀢𑁆𑀢𑀸𑀬 𑀏𑀯 𑀕𑀡𑁆𑀳𑀦𑁆𑀢𑁄. 𑀪𑀢𑁆𑀢𑀁 𑀯𑀸 𑀅𑀫𑀦𑀸𑀧𑀦𑁆𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀩𑁆𑀬𑀜𑁆𑀚𑀦𑁂𑀦 𑀆𑀮𑁄𑀧𑀅𑀢𑀺𑀦𑀸𑀫𑀦𑀁, 𑀆𑀮𑁄𑀧𑁂𑀦 𑀩𑁆𑀬𑀜𑁆𑀚𑀦𑀅𑀢𑀺𑀦𑀸𑀫𑀦𑀦𑁆𑀢𑀺 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀧𑀞𑀫𑀫𑁂𑀯 𑀅𑀲𑀸𑀭𑀼𑀧𑁆𑀧𑀢𑀸𑀬 𑀅𑀦𑀺𑀝𑁆𑀞𑀁 𑀯𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀧𑀸𑀴𑀺𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀆𑀳𑀭𑀺𑀢𑀩𑁆𑀩𑀯𑀢𑁆𑀣𑀼𑀲𑁆𑀫𑀺𑀁 𑀲𑀼𑀧𑀡𑀻𑀢𑀪𑀸𑀯𑁂𑀦 𑀭𑀲𑁄 𑀧𑀸𑀓𑀝𑁄 𑀳𑁄𑀢𑀺 𑀜𑀸𑀡𑁂𑀦 𑀧𑀭𑀺𑀜𑁆𑀜𑀸𑀢𑀢𑁆𑀢𑀸. 𑀭𑀲𑀕𑁂𑀥𑁄 𑀧𑀦 𑀦𑀢𑁆𑀣𑀺 𑀲𑁂𑀢𑀼𑀖𑀸𑀢𑀢𑁆𑀢𑀸.

𑀅𑀲𑁆𑀲𑀸𑀢𑀺 ‘‘𑀦𑁂𑀯 𑀤𑀯𑀸𑀬𑀸’’𑀢𑀺𑀆𑀤𑀺𑀧𑀤𑀲𑁆𑀲. 𑀯𑀼𑀢𑁆𑀢𑀫𑁂𑀢𑀦𑁆𑀢𑀺 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀦𑀺𑀘𑁆𑀙𑀬𑁄 𑀆𑀕𑀢𑁄’’𑀢𑀺 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁨𑁩) 𑀲𑀁𑀯𑀡𑁆𑀡𑀬𑀦𑁆𑀢𑁂𑀦 𑀯𑀼𑀢𑁆𑀢𑀫𑁂𑀢𑀁, 𑀢𑀲𑁆𑀫𑀸 𑀦 𑀏𑀢𑁆𑀣 𑀢𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀲𑁆𑀫𑀸 𑀬𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀦𑀺𑀘𑁆𑀙𑀬𑁂 𑀯𑀺𑀲𑁂𑀲𑀯𑀸𑀤𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀲𑁄 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸𑀬 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀧𑀢𑁆𑀢𑀲𑁆𑀲 𑀕𑀳𑀡𑀝𑁆𑀞𑀸𑀦𑀦𑁆𑀢𑀺 𑀳𑀢𑁆𑀣𑁂𑀦 𑀧𑀢𑁆𑀢𑀲𑁆𑀲 𑀕𑀳𑀡𑀧𑀤𑁂𑀲𑀁. 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀧𑀢𑁆𑀢𑁂 𑀲𑀩𑁆𑀩𑀁 𑀆𑀫𑀺𑀲𑀕𑀢𑀁 𑀲𑀤𑁆𑀥𑀺𑀁 𑀪𑀢𑁆𑀢𑁂𑀦 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀓𑁂𑀮𑀸𑀬𑀦𑀯𑀲𑁂𑀦 𑀅𑀢𑀺𑀓𑁆𑀓𑀦𑁆𑀢𑀧𑀫𑀸𑀡𑀁 𑀆𑀭𑀓𑁆𑀔𑀁 𑀞𑀧𑁂𑀢𑀺. 𑀘𑀻𑀯𑀭𑀪𑁄𑀕𑀦𑁆𑀢𑀭𑀦𑁆𑀢𑀺 𑀘𑀻𑀯𑀭𑀧𑀝𑀮𑀦𑁆𑀢𑀭𑀁. 𑀉𑀤𑀭𑁂𑀦 𑀅𑀓𑁆𑀓𑀫𑀺𑀢𑁆𑀯𑀸𑀢𑀺 𑀉𑀤𑀭𑁂𑀦𑁂𑀯 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸.

𑀅𑀧𑁆𑀧𑀢𑁆𑀢𑀓𑀸𑀮𑀁 𑀅𑀪𑀺𑀫𑀼𑀔𑀁 𑀦𑀸𑀫𑁂𑀢𑀺 𑀉𑀧𑀦𑀸𑀫𑁂𑀢𑀻𑀢𑀺 𑀅𑀢𑀺𑀦𑀸𑀫𑁂𑀢𑀺, 𑀧𑀢𑁆𑀢𑀓𑀸𑀮𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑁄 𑀦𑀸𑀫𑁂𑀢𑀺 𑀅𑀧𑀦𑁂𑀢𑀻𑀢𑀺 𑀅𑀢𑀺𑀦𑀸𑀫𑁂𑀢𑀺. 𑀉𑀪𑀬𑀫𑁆𑀧𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀧𑀸𑀴𑀺𑀬𑀁 ‘‘𑀦 𑀘 𑀅𑀦𑀼𑀫𑁄𑀤𑀦𑀲𑁆𑀲 𑀓𑀸𑀮𑀫𑀢𑀺𑀦𑀸𑀫𑁂𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀳𑀻’’𑀢𑀺𑀆𑀤𑀺𑀫𑀸𑀳.

𑀯𑁂𑀕𑀕𑀫𑀦𑁂𑀦 𑀧𑀝𑀺𑀲𑀁𑀫𑀼𑀜𑁆𑀘𑀺𑀢𑁆𑀯𑀸 𑀥𑀸𑀯𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀘𑁆𑀘𑀼𑀓𑁆𑀓𑀝𑁆𑀞𑀦𑁆𑀢𑀺 𑀅𑀢𑀺𑀯𑀺𑀬 𑀉𑀤𑁆𑀥𑀁 𑀓𑀢𑁆𑀯𑀸 𑀓𑀟𑁆𑀠𑀺𑀢𑀧𑀸𑀭𑀼𑀢𑀁. 𑀢𑁂𑀦𑀸𑀳 ‘‘𑀬𑁄 𑀳𑀺 𑀬𑀸𑀯 𑀳𑀦𑀼𑀓𑀝𑁆𑀞𑀺𑀢𑁄…𑀧𑁂… 𑀳𑁄𑀢𑀻’’𑀢𑀺. 𑀅𑀘𑁆𑀘𑁄𑀓𑁆𑀓𑀝𑁆𑀞𑀦𑁆𑀢𑀺 𑀅𑀢𑀺𑀯𑀺𑀬 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀓𑀟𑁆𑀠𑀺𑀢𑀧𑀸𑀭𑀼𑀢𑀁. 𑀢𑁂𑀦𑀸𑀳 ‘‘𑀬𑀸𑀯 𑀕𑁄𑀧𑁆𑀨𑀓𑀸 𑀑𑀢𑀸𑀭𑁂𑀢𑁆𑀯𑀸’’𑀢𑀺. 𑀉𑀪𑀢𑁄 𑀉𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀤𑀓𑁆𑀔𑀺𑀡𑀢𑁄 𑀯𑀸𑀫𑀢𑁄𑀢𑀺 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀉𑀢𑁆𑀢𑀭𑀸𑀲𑀗𑁆𑀕𑀁 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀣𑀦𑀦𑁆𑀢𑀺 𑀤𑀓𑁆𑀔𑀺𑀡𑀣𑀦𑀁.

𑀯𑀺𑀲𑁆𑀲𑀝𑁆𑀞𑁄𑀢𑀺 𑀯𑀺𑀫𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀯𑀺𑀲𑁆𑀲𑀝𑁆𑀞𑀢𑁆𑀢𑀸𑀬𑁂𑀯 𑀘𑁂𑀲 𑀯𑀺𑀜𑁆𑀜𑁂𑀬𑁆𑀬𑁄’’𑀢𑀺. 𑀬𑀲𑁆𑀫𑀸 𑀅𑀫𑀼𑀢𑁆𑀢𑀯𑀸𑀤𑀺𑀦𑁄 𑀯𑀘𑀦𑀁 𑀅𑀯𑀺𑀲𑁆𑀲𑀝𑁆𑀞𑀢𑀸𑀬 𑀦 𑀲𑀺𑀦𑀺𑀬𑁆𑀳𑀢𑀺, 𑀦 𑀏𑀯𑀁 𑀫𑀼𑀢𑁆𑀢𑀯𑀸𑀤𑀺𑀦𑁄𑀢𑀺 𑀆𑀳 ‘‘𑀲𑀺𑀦𑀺𑀤𑁆𑀥𑁄’’𑀢𑀺. 𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀲𑀼𑀧𑀭𑀺𑀩𑁆𑀬𑀢𑁆𑀢𑀢𑀸𑀬 𑀅𑀓𑁆𑀔𑀭𑀢𑁄 𑀘 𑀩𑁆𑀬𑀜𑁆𑀚𑀦𑀢𑁄 𑀘 𑀯𑀺𑀜𑁆𑀜𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑁄. 𑀢𑁂𑀦𑀸𑀳 ‘‘𑀧𑀸𑀓𑀝𑁄’’𑀢𑀺. 𑀯𑀺𑀜𑁆𑀜𑀸𑀧𑀦𑀺𑀬𑁄𑀢𑀺 𑀯𑀺𑀚𑀸𑀦𑀺𑀢𑀩𑁆𑀩𑁄. 𑀩𑁆𑀬𑀜𑁆𑀚𑀦𑀯𑀲𑁂𑀦𑁂𑀯 𑀘𑁂𑀢𑁆𑀣 𑀯𑀺𑀜𑁆𑀜𑁂𑀬𑁆𑀬𑀢𑀸 𑀯𑁂𑀤𑀺𑀢𑀩𑁆𑀩𑀸 𑀖𑁄𑀲𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀫𑀥𑀼𑀭𑁄𑀢𑀺 𑀧𑀺𑀬𑁄 𑀧𑁂𑀫𑀦𑀻𑀬𑁄 𑀅𑀧𑀮𑀺𑀩𑀼𑀤𑁆𑀥𑁄. 𑀲𑀯𑀦𑀫𑀭𑀳𑀢𑀺, 𑀲𑀯𑀦𑀲𑁆𑀲 𑀲𑁄𑀢𑀲𑁆𑀲 𑀳𑀺𑀢𑁄𑀢𑀺 𑀯𑀸 𑀲𑀯𑀦𑀻𑀬𑁄. 𑀲𑀫𑁆𑀧𑀺𑀡𑁆𑀟𑀺𑀢𑁄𑀢𑀺 𑀲𑀳𑀺𑀢𑁄. 𑀪𑀕𑀯𑀢𑁄 𑀳𑀺 𑀲𑀤𑁆𑀤𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀓𑀢𑀸𑀲𑀜𑁆𑀘𑀺𑀢𑀢𑁆𑀢𑀸 𑀲𑀳𑀺𑀢𑀸𑀓𑀸𑀭𑁂𑀦𑁂𑀯 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀦 𑀅𑀬𑁄𑀲𑀮𑀸𑀓𑀸𑀬 𑀧𑀳𑀝𑀓𑀁𑀲𑀣𑀸𑀮𑀁 𑀯𑀺𑀬 𑀯𑀺𑀧𑁆𑀧𑀓𑀺𑀡𑁆𑀡𑁄. 𑀢𑁂𑀦𑀸𑀳 ‘‘𑀅𑀯𑀺𑀲𑀸𑀭𑀻’’𑀢𑀺. 𑀕𑀫𑁆𑀪𑀻𑀭𑁄𑀢𑀺 𑀬𑀣𑀸 𑀕𑀫𑁆𑀪𑀻𑀭𑀯𑀢𑁆𑀣𑀼𑀧𑀭𑀺𑀘𑁆𑀙𑀺𑀦𑁆𑀤𑀦𑁂𑀦 𑀜𑀸𑀡𑀲𑁆𑀲 𑀕𑀫𑁆𑀪𑀻𑀭𑀲𑀫𑀜𑁆𑀜𑀸, 𑀏𑀯𑀁 𑀕𑀫𑁆𑀪𑀻𑀭𑀝𑁆𑀞𑀸𑀦𑀲𑀫𑁆𑀪𑀯𑀢𑁄 𑀲𑀤𑁆𑀤𑀲𑁆𑀲 𑀕𑀫𑁆𑀪𑀻𑀭𑀲𑀫𑀜𑁆𑀜𑀸𑀢𑀺 𑀆𑀳 ‘‘𑀕𑀫𑁆𑀪𑀻𑀭𑁄𑀢𑀺 𑀕𑀫𑁆𑀪𑀻𑀭𑀲𑀫𑀼𑀝𑁆𑀞𑀺𑀢𑁄’’𑀢𑀺. 𑀦𑀺𑀦𑁆𑀦𑀸𑀤𑀯𑀸𑀢𑀺 𑀲𑀯𑀺𑀲𑁂𑀲𑀁 𑀦𑀺𑀦𑁆𑀦𑀸𑀤𑀯𑀸. 𑀲𑁆𑀯𑀸𑀬𑀁 𑀯𑀺𑀲𑁂𑀲𑁄 𑀕𑀫𑁆𑀪𑀻𑀭𑀪𑀸𑀯𑀲𑀺𑀤𑁆𑀥𑁄𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀢𑁆𑀢𑀸𑀬𑁂𑀯 𑀘𑁂𑀲 𑀦𑀺𑀦𑁆𑀦𑀸𑀤𑀻’’𑀢𑀺. 𑀏𑀯𑀫𑁂𑀢𑁆𑀣 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀘𑀢𑀼𑀭𑀗𑁆𑀕𑀦𑀺𑀧𑁆𑀨𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀓𑀸𑀭𑀡𑀸 𑀫𑀸 𑀦𑀲𑁆𑀲𑀻𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀯𑀺𑀬 𑀲𑀭𑀲𑁆𑀲 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑀸 𑀯𑀼𑀢𑁆𑀢𑀸, 𑀥𑀫𑁆𑀫𑀢𑀸𑀯𑀲𑁂𑀦𑁂𑀯 𑀧𑀦 𑀲𑀸 𑀯𑁂𑀤𑀺𑀢𑀩𑁆𑀩𑀸 𑀢𑀲𑁆𑀲 𑀫𑀽𑀮𑀓𑀸𑀭𑀡𑀲𑁆𑀲 𑀢𑀣𑀸 𑀅𑀯𑀝𑁆𑀞𑀺𑀢𑀢𑁆𑀢𑀸.

𑀧𑀘𑁆𑀘𑁄𑀲𑀓𑁆𑀓𑀺𑀢𑁆𑀯𑀸𑀢𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸. 𑀲𑀫𑀼𑀲𑁆𑀲𑀺𑀢𑀓𑀜𑁆𑀘𑀦𑀧𑀩𑁆𑀩𑀢𑀁 𑀯𑀺𑀬 𑀉𑀧𑀭𑀺 𑀇𑀦𑁆𑀤𑀦𑀻𑀮𑀭𑀢𑀦𑀯𑀺𑀢𑀢𑀲𑀺𑀔𑀁 𑀯𑀺𑀚𑁆𑀚𑀼𑀮𑁆𑀮𑀢𑀸𑀪𑀽𑀲𑀺𑀢𑀁. 𑀫𑀳𑀸𑀧𑀣𑀯𑀻𑀆𑀤𑀬𑁄 𑀲𑀢𑁆𑀣𑀼𑀕𑀼𑀡𑀧𑀝𑀺𑀪𑀸𑀕𑀢𑀸𑀬 𑀦𑀺𑀤𑀲𑁆𑀲𑀦𑀁, 𑀓𑁂𑀯𑀮𑀁 𑀫𑀳𑀦𑁆𑀢𑀢𑀸𑀫𑀢𑁆𑀢𑀁 𑀉𑀧𑀸𑀤𑀸𑀬 𑀦𑀺𑀤𑀲𑁆𑀲𑀺𑀢𑀸.

𑁩𑁯𑁦. 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑁄𑀢𑀺 𑀅𑀦𑀸𑀭𑁄𑀘𑀺𑀢𑁄. 𑀆𑀕𑀫𑀦𑀯𑀲𑁂𑀦 𑀘𑁂𑀢𑁆𑀣 𑀧𑀝𑀺𑀲𑀁𑀯𑁂𑀤𑀺𑀢𑀦𑁆𑀢𑀺 𑀆𑀳 ‘‘𑀅𑀯𑀺𑀜𑁆𑀜𑀸𑀢𑀆𑀕𑀫𑀦𑁄’’𑀢𑀺. 𑀉𑀕𑁆𑀕𑀢𑀪𑀸𑀯𑀦𑁆𑀢𑀺 𑀓𑀼𑀮𑀪𑁄𑀕𑀯𑀺𑀚𑁆𑀚𑀸𑀤𑀻𑀳𑀺 𑀉𑀴𑀸𑀭𑀪𑀸𑀯𑀁. 𑀅𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑀸𑀢𑀺 𑀓𑀸𑀭𑀼𑀡𑀺𑀓𑀸.

𑁩𑁯𑁧. 𑀲𑀳𑀲𑀸𑀯 𑀑𑀓𑀸𑀲𑀓𑀭𑀡𑁂𑀦 𑀉𑀘𑁆𑀘𑀓𑀼𑀮𑀻𑀦𑀢𑀸 𑀤𑀻𑀧𑀺𑀢𑀸 𑀳𑁄𑀢𑀻𑀢𑀺 𑀆𑀳 ‘‘𑀯𑁂𑀕𑁂𑀦 𑀉𑀝𑁆𑀞𑀸𑀬 𑀤𑁆𑀯𑀺𑀥𑀸 𑀪𑀺𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀺.

𑀦𑀸𑀭𑀺𑀲𑀫𑀸𑀦𑀦𑀸𑀫𑀦𑁆𑀢𑀺 𑀇𑀢𑁆𑀣𑀺𑀅𑀢𑁆𑀣𑀚𑁄𑀢𑀓𑀦𑀸𑀫𑀁. 𑀢𑁂𑀦𑀸𑀳 ‘‘𑀇𑀢𑁆𑀣𑀺𑀮𑀺𑀗𑁆𑀕’’𑀦𑁆𑀢𑀺. 𑀅𑀯𑁆𑀳𑀸𑀢𑀩𑁆𑀩𑀸𑀢𑀺 𑀓𑀣𑁂𑀢𑀩𑁆𑀩𑀸.

𑁩𑁯𑁪. 𑀏𑀓𑀦𑀻𑀳𑀸𑀭𑁂𑀦𑁂𑀯 𑀅𑀝𑁆𑀞 𑀧𑀜𑁆𑀳𑁂 𑀩𑁆𑀬𑀸𑀓𑀭𑁄𑀦𑁆𑀢𑁄. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁…𑀧𑁂… 𑀧𑀯𑀼𑀘𑁆𑀘𑀢𑀻’’𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑁆𑀲 𑀯𑀺𑀤𑀺𑀢𑀓𑀸𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑁄 𑀧𑀸𑀓𑀝𑁄’’𑀢𑀺. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀓𑀣𑀺𑀢𑀁 𑀢𑀲𑁆𑀲 𑀧𑀭𑀺𑀪𑀡𑁆𑀟𑀜𑀸𑀡𑀪𑀸𑀯𑀢𑁄 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲. ‘‘𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑀸 𑀯𑁄𑀲𑀺𑀢𑁄’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀫𑀼𑀦𑀻𑀢𑀺 𑀅𑀲𑁂𑀓𑁆𑀔𑀫𑀼𑀦𑀺 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀜𑀸𑀡𑀫𑁄𑀦𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺.

𑀓𑀺𑀮𑁂𑀲𑀭𑀸𑀕𑁂𑀳𑀺 𑀓𑀺𑀮𑁂𑀲𑀯𑀺𑀯𑀡𑁆𑀡𑀢𑀸𑀳𑀺. 𑀚𑀸𑀢𑀺𑀓𑁆𑀔𑀬𑀧𑁆𑀧𑀢𑁆𑀢𑀢𑁆𑀢𑀸 ‘‘𑀅𑀣𑁄 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀅𑀪𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑀢𑀸𑀬 𑀅𑀕𑁆𑀕𑀫𑀕𑁆𑀕𑀧𑀜𑁆𑀜𑀸𑀬 𑀜𑀢𑁆𑀯𑀸. 𑀇𑀤𑀸𑀦𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀆𑀕𑀢𑀦𑀬𑁂𑀦 𑀧𑀭𑀺𑀜𑁆𑀜𑀸𑀧𑀳𑀸𑀦𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀫𑀸𑀧𑀢𑁆𑀢𑀻𑀦𑀁 𑀧𑀸𑀭𑀕𑀫𑀦𑁂𑀦 𑀧𑀸𑀭𑀕𑀽𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀭𑀕𑀽𑀢𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀸𑀦𑀁 𑀚𑀸𑀦𑀦𑀯𑀲𑁂𑀦 𑀅𑀪𑀺𑀜𑁆𑀜𑀸𑀧𑀸𑀭𑀕𑀽. 𑀢𑀸𑀤𑀺𑀲𑁄𑀢𑀺 𑀬𑀸𑀤𑀺𑀲𑁄 ‘‘𑀧𑀸𑀭𑀕𑀽 𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺 𑀧𑀤𑀤𑁆𑀯𑀬𑁂𑀦 𑀯𑀼𑀢𑁆𑀢𑁄, 𑀢𑀸𑀤𑀺𑀲𑁄. 𑀙𑀳𑀺 𑀆𑀓𑀸𑀭𑁂𑀳𑀻𑀢𑀺 𑀧𑀚𑀸𑀦𑀦𑀸𑀤𑀻𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀙𑀳𑀺 𑀆𑀓𑀸𑀭𑁂𑀳𑀺.

𑀓𑀸𑀫𑀜𑁆𑀘𑁂𑀢𑁆𑀣 𑀤𑁆𑀯𑁂 𑀏𑀯 𑀧𑀼𑀘𑁆𑀙𑀸𑀕𑀸𑀣𑀸 𑀤𑁆𑀯𑁂 𑀘 𑀯𑀺𑀲𑁆𑀲𑀚𑁆𑀚𑀦𑀸𑀕𑀸𑀣𑀸, 𑀧𑀼𑀘𑁆𑀙𑀸𑀧𑀝𑀺𑀧𑀸𑀝𑀺𑀬𑀸 𑀧𑀦 𑀅𑀲𑀗𑁆𑀓𑀭𑀢𑁄 𑀘 𑀯𑀺𑀲𑁆𑀲𑀚𑁆𑀚𑀦𑀁 𑀧𑀯𑀢𑁆𑀢𑀢𑀺, 𑀢𑀁 𑀦𑀺𑀤𑁆𑀥𑀸𑀭𑁂𑀢𑀼𑀁 𑀓𑀺𑀁 𑀧𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑁂𑀤𑁂𑀳𑀺 𑀕𑀢𑀢𑁆𑀢𑀸𑀢𑀺 𑀯𑁂𑀤𑁂𑀳𑀺 𑀫𑀕𑁆𑀕𑀜𑀸𑀡𑁂𑀳𑀺 𑀧𑀸𑀭𑀗𑁆𑀕𑀢𑀢𑁆𑀢𑀸. 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺𑀆𑀤𑀻𑀳𑀺 𑀯𑀺𑀚𑁆𑀚𑀸𑀦𑀁 𑀅𑀢𑁆𑀣𑀺𑀢𑀸𑀬 𑀩𑁄𑀥𑀺𑀢𑀢𑁆𑀢𑀸. 𑀧𑀸𑀧𑀥𑀫𑁆𑀫𑀸𑀦𑀦𑁆𑀢𑀺 𑀙𑀢𑁆𑀢𑀺𑀁𑀲𑀧𑀸𑀧𑀥𑀫𑁆𑀫𑀸𑀦𑀁 𑀲𑁄𑀢𑁆𑀣𑀸𑀦𑀁 𑀫𑀕𑁆𑀕𑀁 𑀧𑀸𑀧𑀦𑁂𑀦 𑀦𑀺𑀲𑁆𑀲𑁂𑀲𑀢𑁄 𑀲𑁄𑀥𑀺𑀢𑀢𑁆𑀢𑀸.

𑁩𑁯𑁫. 𑀥𑀫𑁆𑀫𑁄 𑀦𑀸𑀫 𑀅𑀭𑀳𑀢𑁆𑀢𑀫𑀕𑁆𑀕𑁄 𑀓𑀼𑀲𑀮𑀥𑀫𑁆𑀫𑁂𑀲𑀼 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀺𑀬𑀸 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦. 𑀢𑀲𑁆𑀲 𑀅𑀦𑀼𑀭𑀽𑀧𑀥𑀫𑁆𑀫𑀪𑀸𑀯𑀢𑁄 𑀅𑀦𑀼𑀥𑀫𑁆𑀫𑁄 𑀦𑀸𑀫 𑀳𑁂𑀝𑁆𑀞𑀺𑀫𑀫𑀕𑁆𑀕𑀨𑀮𑀥𑀫𑁆𑀫𑀸. 𑀬𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀦 𑀧𑀝𑀺𑀧𑀚𑁆𑀚𑀢𑀺, 𑀲𑁄 𑀢𑀣𑀸𑀕𑀢𑀁 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀳𑁂𑀞𑁂𑀢𑀺 𑀦𑀸𑀫. 𑀬𑁄 𑀧𑀦 𑀧𑀝𑀺𑀧𑀚𑁆𑀚𑀦𑁆𑀢𑁄 𑀘 𑀤𑀦𑁆𑀥𑀸𑀪𑀺𑀜𑁆𑀜𑀢𑀸𑀬 𑀓𑀫𑁆𑀫𑀝𑁆𑀞𑀸𑀦𑀲𑁄𑀥𑀦𑀢𑁆𑀣𑀁 𑀅𑀦𑁆𑀢𑀭𑀦𑁆𑀢𑀭𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀦𑁂𑀓𑀯𑀸𑀭𑀁 𑀓𑀣𑀸𑀧𑁂𑀢𑀺, 𑀲𑁄 𑀏𑀢𑁆𑀢𑀸𑀯𑀢𑀸 𑀥𑀫𑁆𑀫𑀸𑀥𑀺𑀓𑀭𑀡𑀁 𑀢𑀣𑀸𑀕𑀢𑀁 𑀯𑀺𑀳𑁂𑀞𑁂𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀦 𑀳𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀧𑀭𑀺𑀲𑁆𑀲𑀫𑁄 𑀅𑀢𑁆𑀣𑀺, 𑀅𑀬𑀜𑁆𑀘 𑀅𑀢𑁆𑀣𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀸𑀤𑀻𑀳𑀺 (𑀤𑀻. 𑀦𑀺. 𑁨.𑁨𑁪𑁧 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄, 𑀢𑀲𑁆𑀫𑀸 𑁋 ‘‘𑀲𑀘𑁆𑀘𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀯𑀼𑀢𑁆𑀢𑀫𑁂𑀯 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀦 𑀘 𑀫𑀁 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀳𑁂𑀲𑁂𑀲𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀧𑀭𑀓𑀸𑀮𑁂 𑀘𑁂𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀦𑀫𑁆𑀧𑀺 𑀲𑀗𑁆𑀕𑀬𑁆𑀳𑀢𑀺, 𑀢𑀁 𑀧𑀦 𑀇𑀫𑀲𑁆𑀫𑀺𑀁 𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑁂𑀦𑁂𑀯 𑀓𑀽𑀝𑀁 𑀕𑀳𑀺𑀢’’𑀦𑁆𑀢𑀺.

𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀲𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁬. 𑀓𑁂𑀡𑀺𑀬𑁄𑀢𑀺 𑀢𑀲𑁆𑀲 𑀦𑀸𑀫𑀁, 𑀧𑀼𑀩𑁆𑀩𑁂 𑀓𑁂𑀡𑀺𑀬𑀸 𑀚𑀻𑀯𑀺𑀓𑀸𑀓𑀧𑁆𑀧𑀦𑀢𑁄𑀢𑀺 𑀯𑀤𑀦𑁆𑀢𑀺. 𑀚𑀝𑀺𑀮𑁄𑀢𑀺 𑀚𑀝𑀸𑀥𑀭𑁄. 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀢𑁆𑀢𑀸 𑀓𑁄𑀝𑀺𑀲𑀸𑀭𑀢𑀸𑀬 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄. 𑀧𑀬𑁄𑀚𑁂𑀢𑁆𑀯𑀸 𑀦𑀺𑀲𑁆𑀲𑀬𑁄 𑀳𑀼𑀢𑁆𑀯𑀸 𑀯𑀲𑀢𑀺, 𑀭𑀢𑁆𑀢𑀺𑀁 𑀓𑀸𑀫𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀻𑀢𑀺 𑀯𑀸 𑀬𑁄𑀚𑀦𑀸. 𑀲𑀼𑀲𑀗𑁆𑀔𑀢𑀦𑁆𑀢𑀺 𑀲𑀧𑁆𑀧𑀺𑀫𑀥𑀼𑀲𑀓𑁆𑀓𑀭𑀸𑀤𑀻𑀳𑀺 𑀘𑁂𑀯 𑀫𑀭𑀺𑀘𑀲𑀺𑀗𑁆𑀕𑀻𑀯𑁂𑀭𑀸𑀤𑀻𑀳𑀺 𑀘 𑀲𑀼𑀝𑁆𑀞𑀼 𑀅𑀪𑀺𑀲𑀗𑁆𑀔𑀢𑀁.

𑀧𑀝𑀺𑀓𑁆𑀔𑁂𑀧𑀧𑀲𑀦𑁆𑀦𑀢𑀸𑀬𑀸𑀢𑀺 𑀅𑀳𑁄𑀯𑀢𑀸𑀬𑀁 𑀅𑀧𑁆𑀧𑀺𑀘𑁆𑀙𑁄, 𑀬𑁄 𑀦𑀺𑀫𑀦𑁆𑀢𑀺𑀬𑀫𑀸𑀦𑁄𑀧𑀺 𑀦 𑀲𑀸𑀤𑀺𑀬𑀢𑀻𑀢𑀺 𑀉𑀧𑀦𑀺𑀫𑀦𑁆𑀢𑀺𑀬𑀫𑀸𑀦𑀲𑁆𑀲 𑀧𑀝𑀺𑀓𑁆𑀔𑁂𑀧𑁂 𑀢𑀺𑀢𑁆𑀣𑀺𑀬𑀸𑀦𑀁 𑀧𑀲𑀦𑁆𑀦𑀪𑀸𑀯𑀢𑁄𑀢𑀺. 𑀢𑀁 𑀓𑀣𑀁? 𑀯𑀺𑀭𑀼𑀤𑁆𑀥𑀫𑁂𑀢𑀦𑁆𑀢𑀺 ‘‘𑀅𑀓𑀸𑀭𑀡𑀫𑁂𑀢’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑁩𑁯𑁮. 𑀓𑀧𑁆𑀧𑀲𑀳𑀲𑁆𑀲𑁂𑀳𑀺𑀧𑀺…𑀧𑁂… 𑀅𑀳𑁄𑀲𑀻𑀢𑀺 𑀇𑀤𑀁 𑀦𑀸𑀦𑀼𑀲𑁆𑀲𑀯𑀲𑀺𑀤𑁆𑀥𑀁 𑀅𑀦𑀼𑀫𑀸𑀦𑀕𑁆𑀕𑀳𑀡𑀁 𑀲𑀦𑁆𑀥𑀸𑀬𑀸𑀳. 𑀧𑀤𑁂𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀧𑀤𑀧𑁆𑀧𑀫𑀸𑀡𑁂’’𑀢𑀺. 𑀧𑀚𑁆𑀚𑀢𑀺 𑀦𑀺𑀓𑁆𑀔𑀺𑀧𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀧𑀤𑀁 𑀧𑀓𑀢𑀺𑀬𑀸 𑀧𑀸𑀤𑀦𑀺𑀓𑁆𑀔𑀺𑀧𑀝𑁆𑀞𑀸𑀦𑀁, 𑀢𑀲𑁆𑀫𑀺𑀁 𑀧𑀤𑁂. 𑀓𑀻𑀴𑀸𑀧𑀲𑀼𑀢𑀢𑀸𑀤𑀺𑀦𑀸 𑀧𑀫𑀸𑀤𑀁 𑀆𑀧𑀚𑁆𑀚𑀢𑀺. 𑀩𑁄𑀥𑀺𑀲𑀢𑁆𑀢𑀘𑀸𑀭𑀺𑀓𑀦𑁆𑀢𑀺 𑀤𑀼𑀓𑁆𑀓𑀭𑀘𑀭𑀺𑀬𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁩𑁯𑁯. 𑀧𑀭𑀺𑀧𑀼𑀡𑁆𑀡𑀢𑀸𑀬𑀸𑀢𑀺 𑀅𑀦𑀽𑀦𑀢𑀸𑀬. 𑀅𑀳𑀻𑀦𑀗𑁆𑀕𑀢𑀸𑀬𑀸𑀢𑀺 𑀅𑀯𑁂𑀓𑀮𑁆𑀮𑀪𑀸𑀯𑀢𑁄. 𑀭𑁄𑀘𑀢𑀻𑀢𑀺 𑀭𑀼𑀘𑀺, 𑀤𑁂𑀳𑀧𑁆𑀧𑀪𑀸, 𑀲𑁄𑀪𑀡𑀸 𑀭𑀼𑀘𑀺 𑀏𑀢𑀲𑁆𑀲𑀸𑀢𑀺 𑀲𑀼𑀭𑀼𑀘𑀺. 𑀆𑀭𑁄𑀳𑀲𑀫𑁆𑀧𑀢𑁆𑀢𑀺 𑀓𑀸𑀬𑀲𑁆𑀲 𑀧𑀫𑀸𑀡𑀬𑀼𑀢𑁆𑀢𑀉𑀘𑁆𑀘𑀢𑀸. 𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺 𑀓𑀺𑀲𑀣𑀽𑀮𑀪𑀸𑀯𑀯𑀚𑁆𑀚𑀺𑀢𑀧𑀭𑀺𑀡𑀸𑀳𑀢𑀸. 𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺 𑀅𑀯𑀬𑀯𑀸𑀦𑀁 𑀲𑀼𑀲𑀡𑁆𑀞𑀺𑀢𑀢𑀸. 𑀘𑀸𑀭𑀼𑀤𑀲𑁆𑀲𑀦𑁄𑀢𑀺 𑀧𑀺𑀬𑀤𑀲𑁆𑀲𑀦𑁄 𑀢𑁂𑀦𑀸𑀳 ‘‘𑀲𑀼𑀘𑀺𑀭𑀫𑁆𑀧𑀻’’𑀢𑀺𑀆𑀤𑀺. 𑀲𑀼𑀯𑀡𑁆𑀡𑀲𑀤𑀺𑀲𑀯𑀡𑁆𑀡𑁄𑀢𑀺 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀫𑀤𑁆𑀤𑀺𑀢𑁆𑀯𑀸 𑀲𑀺𑀮𑀸𑀦𑀺𑀖𑀁𑀲𑁂𑀦𑁂𑀯 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀞𑀧𑀺𑀢𑀖𑀦𑀲𑀼𑀯𑀡𑁆𑀡𑀭𑀽𑀧𑀯𑀡𑁆𑀡𑁄. 𑀫𑀳𑀸𑀧𑀼𑀭𑀺𑀲𑀪𑀸𑀯𑀁 𑀩𑁆𑀬𑀜𑁆𑀚𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀻𑀢𑀺 𑀩𑁆𑀬𑀜𑁆𑀚𑀦𑀸𑀦𑀺, 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀻𑀢𑀺 𑀆𑀳 ‘‘𑀧𑀞𑀫𑀁 𑀯𑀼𑀢𑁆𑀢𑀩𑁆𑀬𑀜𑁆𑀚𑀦𑀸𑀦𑁂𑀯𑀸’’𑀢𑀺.

𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑁆𑀢𑀺 ‘‘𑀲𑀼𑀭𑀼𑀘𑀻’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, ‘‘𑀆𑀤𑀺𑀘𑁆𑀘𑁄𑀯 𑀯𑀺𑀭𑁄𑀘𑀲𑀻’’𑀢𑀺 𑀧𑀼𑀦 𑀯𑀼𑀢𑁆𑀢𑀁. ‘‘𑀘𑀸𑀭𑀼𑀤𑀲𑁆𑀲𑀦𑁄 𑀲𑀼𑀯𑀡𑁆𑀡𑀯𑀡𑁆𑀡𑁄𑀲𑀻’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, ‘‘𑀓𑀮𑁆𑀬𑀸𑀡𑀤𑀲𑁆𑀲𑀦𑁄 𑀪𑀺𑀓𑁆𑀔𑀼 𑀓𑀜𑁆𑀘𑀦𑀸𑀪𑀢𑁆𑀢𑀘𑁄’’𑀢𑀺 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀉𑀢𑁆𑀢𑀭𑀕𑀸𑀣𑀸𑀬𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀲𑀸𑀢𑀺𑀲𑀬𑀁 𑀉𑀢𑁆𑀢𑀫𑀯𑀡𑁆𑀡𑁂 𑀯𑀡𑁆𑀡𑁂𑀢𑁆𑀯𑀸 𑀉𑀢𑁆𑀢𑀫𑀯𑀡𑁆𑀡𑀺𑀦𑁄𑀢𑀺 𑀧𑀤𑁂𑀦 𑀲𑀦𑁆𑀢𑀁 𑀧𑀓𑀸𑀲𑁂𑀢𑀻𑀢𑀺 𑀆𑀳 ‘‘𑀉𑀢𑁆𑀢𑀫𑀯𑀡𑁆𑀡𑀲𑀫𑁆𑀧𑀦𑁆𑀦𑀲𑁆𑀲𑀸’’𑀢𑀺. 𑀉𑀢𑁆𑀢𑀫𑀲𑀸𑀭𑀣𑀻𑀢𑀺 𑀲𑁂𑀝𑁆𑀞𑀧𑀼𑀭𑀺𑀲𑀲𑀸𑀭𑀣𑀺. 𑀢𑀢𑁆𑀣 𑀢𑀢𑁆𑀣 𑀚𑀫𑁆𑀩𑀼𑀯𑀦𑀲𑀡𑁆𑀟𑀫𑀡𑁆𑀟𑀺𑀢𑀢𑀸𑀬 𑀚𑀫𑁆𑀩𑀼𑀤𑀻𑀧𑁄 ‘‘𑀚𑀫𑁆𑀩𑀼𑀲𑀡𑁆𑀟𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀲𑁆𑀲𑀭𑀺𑀬𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀲𑁆𑀲𑀭𑀺𑀬𑀁.

𑀚𑀸𑀢𑀺𑀔𑀢𑁆𑀢𑀺𑀬𑀸𑀢𑀺 𑀚𑀸𑀢𑀺𑀫𑀦𑁆𑀢𑁄 𑀔𑀢𑁆𑀢𑀺𑀬𑀸. 𑀭𑀸𑀚𑀸𑀪𑀺𑀭𑀸𑀚𑀸𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀧𑀽𑀚𑀢𑁆𑀣𑁄𑀢𑀺 𑀆𑀳 ‘‘𑀭𑀸𑀚𑀽𑀦𑀁 𑀧𑀽𑀚𑀦𑀻𑀬𑁄’’𑀢𑀺.

𑀅𑀧𑁆𑀧𑀫𑀸𑀡𑀸𑀢𑀺 𑀅𑀧𑀭𑀺𑀫𑀸𑀡𑀸 𑀮𑁄𑀓𑀥𑀸𑀢𑀼𑀬𑁄. ‘‘𑀬𑀸𑀯𑀢𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁩.𑁮𑁧) 𑀳𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄𑀢𑀺 𑀏𑀢𑁆𑀣 𑀯𑀼𑀢𑁆𑀢𑀅𑀦𑀼𑀢𑁆𑀢𑀭𑀪𑀸𑀯𑀁 ‘‘𑀬𑀸𑀯𑀢𑀸 𑀳𑀻’’𑀢𑀺𑀆𑀤𑀺𑀦𑀸 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀥𑀫𑁆𑀫𑀭𑀸𑀚𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀲𑁆𑀯𑀸𑀳’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀫𑁆𑀫𑁂𑀦𑀸𑀢𑀺 𑀧𑀝𑀺𑀯𑁂𑀥𑀥𑀫𑁆𑀫𑁂𑀦. 𑀢𑁂𑀦𑀸𑀳 ‘‘𑀅𑀦𑀼𑀢𑁆𑀢𑀭𑁂𑀦𑁂𑀯𑀸’’𑀢𑀺. 𑀅𑀦𑀼𑀢𑁆𑀢𑀭𑁂𑀦𑀸𑀢𑀺 𑀯𑀺𑀲𑀺𑀝𑁆𑀞𑁂𑀦 𑀉𑀢𑁆𑀢𑀫𑁂𑀦. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀥𑀫𑁆𑀫𑁂𑀦𑀸𑀢𑀺 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂𑀦𑀸𑀢𑀺𑀧𑀺 𑀲𑀗𑁆𑀕𑀬𑁆𑀳𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀦𑀸𑀢𑀺 𑀤𑁂𑀲𑀦𑀸𑀥𑀫𑁆𑀫𑁂𑀦 𑀆𑀡𑀸𑀘𑀓𑁆𑀓𑀁 𑀧𑀯𑀢𑁆𑀢𑁂𑀫𑀻𑀢𑀺 𑀬𑁄𑀚𑀦𑀸. 𑀤𑁂𑀲𑀦𑀸𑀜𑀸𑀡𑀧𑀝𑀺𑀯𑁂𑀥𑀜𑀸𑀡𑀯𑀺𑀪𑀸𑀕𑀁 𑀥𑀫𑁆𑀫𑀘𑀓𑁆𑀓𑀫𑁂𑀯 𑀯𑀸. 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀧𑀝𑀺𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁.

𑀢𑀣𑀸𑀕𑀢𑁂𑀦 𑀚𑀸𑀢𑁄𑀢𑀺 𑀢𑀣𑀸𑀕𑀢𑁂𑀦 𑀳𑁂𑀢𑀼𑀦𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄. 𑀳𑁂𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀅𑀦𑀼𑀚𑀸𑀢𑁄𑀢𑀺 𑀘 𑀯𑀼𑀢𑁆𑀢𑁂 𑀅𑀦𑀼-𑀲𑀤𑁆𑀤𑀲𑁆𑀲 𑀯𑀲𑁂𑀦 𑀢𑀣𑀸𑀕𑀢𑀦𑁆𑀢𑀺 𑀘 𑀉𑀧𑀬𑁄𑀕𑀯𑀘𑀦𑀫𑁂𑀯 𑀳𑁄𑀢𑀺, 𑀲𑁄 𑀘 𑀅𑀦𑀼-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑀚𑁄𑀢𑀓𑁄𑀢𑀺 𑀆𑀳 ‘‘𑀢𑀣𑀸𑀕𑀢𑀁 𑀳𑁂𑀢𑀼𑀁 𑀅𑀦𑀼𑀚𑀸𑀢𑁄’’𑀢𑀺. 𑀅𑀯𑀜𑁆𑀜𑀸𑀢𑀩𑁆𑀩𑀪𑀸𑀯𑁂𑀦 𑀚𑀸𑀢𑁄𑀢𑀺 𑀅𑀯𑀚𑀸𑀢𑁄 𑀤𑀼𑀧𑁆𑀧𑀝𑀺𑀧𑀦𑁆𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀤𑀼𑀲𑁆𑀲𑀻𑀮𑁄’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀓𑁄𑀓𑀸𑀮𑀺𑀓𑀁 𑀆𑀭𑀩𑁆𑀪 ‘‘𑀧𑀼𑀭𑀺𑀲𑀦𑁆𑀢𑀓𑀮𑀺 𑀅𑀯𑀚𑀸𑀢𑁄’’𑀢𑀺. 𑀧𑀼𑀢𑁆𑀢𑁄 𑀦𑀸𑀫 𑀦 𑀳𑁄𑀢𑀺 𑀢𑀲𑁆𑀲 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀁 𑀅𑀝𑁆𑀞𑀺𑀢𑀢𑁆𑀢𑀸. 𑀏𑀯𑀫𑀸𑀳𑀸𑀢𑀺 ‘‘𑀅𑀦𑀼𑀚𑀸𑀢𑁄 𑀢𑀣𑀸𑀕𑀢’’𑀦𑁆𑀢𑀺 𑀏𑀯𑀫𑀸𑀳.

𑀯𑀺𑀚𑁆𑀚𑀸𑀢𑀺 𑀫𑀕𑁆𑀕𑀯𑀺𑀚𑁆𑀚𑀸. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀯𑀺𑀫𑀼𑀢𑁆𑀢𑀺. 𑀦𑀦𑀼 𑀘 𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁂𑀦 𑀕𑀳𑀺𑀢𑁄𑀢𑀺? 𑀲𑀘𑁆𑀘𑀁 𑀕𑀳𑀺𑀢𑁄, 𑀲𑀩𑁆𑀩𑁂 𑀘 𑀧𑀦 𑀲𑀢𑁆𑀢 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸𑀢𑀺 𑀯𑀺𑀚𑁆𑀚𑀸𑀬 𑀅𑀪𑀺𑀜𑁆𑀜𑁂𑀬𑁆𑀬𑀪𑀸𑀯𑁄 𑀯𑀼𑀢𑁆𑀢𑁄. 𑀇𑀫𑀺𑀦𑀸 𑀯𑀸 𑀦𑀬𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀪𑀺𑀜𑁆𑀜𑁂𑀬𑁆𑀬𑀪𑀸𑀯𑁄 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀨𑀮𑁂𑀦 𑀯𑀺𑀦𑀸 𑀳𑁂𑀢𑀼𑀪𑀸𑀯𑀲𑁆𑀲𑁂𑀯 𑀅𑀪𑀸𑀯𑀢𑁄 𑀳𑁂𑀢𑀼𑀯𑀘𑀦𑁂𑀦 𑀨𑀮𑀲𑀺𑀤𑁆𑀥𑀺, 𑀦𑀺𑀭𑁄𑀥𑀲𑁆𑀲 𑀘 𑀲𑀫𑁆𑀧𑀸𑀧𑀦𑁂𑀦 𑀫𑀕𑁆𑀕𑀲𑁆𑀲 𑀳𑁂𑀢𑀼𑀪𑀸𑀯𑁄. 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑁂𑀦 𑀢𑀡𑁆𑀳𑀸𑀬 𑀲𑀫𑀼𑀤𑀬𑀪𑀸𑀯𑁄𑀢𑀺 𑀇𑀫𑀫𑀢𑁆𑀣𑀁 𑀲𑀗𑁆𑀕𑀳𑀺𑀢𑀫𑁂𑀯 𑀅𑀢𑁆𑀣𑀢𑁄 𑀆𑀧𑀦𑁆𑀦𑀢𑁆𑀢𑀸. 𑀬𑀼𑀢𑁆𑀢𑀳𑁂𑀢𑀼𑀦𑀸𑀢𑀺 𑀬𑀼𑀢𑁆𑀢𑀺𑀬𑀼𑀢𑁆𑀢𑁂𑀦 𑀳𑁂𑀢𑀼𑀦𑀸 𑀩𑀼𑀤𑁆𑀥𑀪𑀸𑀯𑀁 𑀲𑀸𑀥𑁂𑀢𑀺 𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀩𑀼𑀚𑁆𑀛𑀺𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀲𑀘𑁆𑀘𑀲𑀫𑁆𑀩𑁄𑀥𑀦𑁂𑀦𑁂𑀯 𑀘 𑀢𑀲𑁆𑀲 𑀅𑀦𑀯𑀲𑁂𑀲𑀢𑁄 𑀩𑀼𑀤𑁆𑀥𑀢𑁆𑀢𑀸. 𑀅𑀢𑁆𑀣𑀯𑀘𑀦𑀜𑁆𑀘𑁂𑀢𑀁, 𑀧𑀬𑁄𑀕𑀯𑀘𑀦𑀸𑀦𑀺 𑀧𑀦 𑁋 𑀩𑁆𑀭𑀸𑀳𑁆𑀫𑀡, 𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀩𑁆𑀩𑀣𑀸 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀲𑀩𑁆𑀩𑀢𑁆𑀣 𑀅𑀯𑀺𑀧𑀭𑀻𑀢𑀫𑀸𑀘𑀺𑀓𑁆𑀔𑀢𑀺 𑀬𑀣𑀸𑀳𑀁 𑀲𑀩𑁆𑀩𑀫𑀕𑁆𑀕𑀤𑁂𑀲𑀓𑁄𑀢𑀺. 𑀓𑀺𑀁 𑀧𑀦 𑀪𑀕𑀯𑀸 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀁 𑀆𑀭𑁄𑀘𑁂𑀢𑀻𑀢𑀺? 𑀫𑀳𑀸𑀓𑀭𑀼𑀡𑀸𑀬 𑀅𑀜𑁆𑀜𑁂𑀲𑀁 𑀫𑀳𑀸𑀯𑀺𑀲𑀬𑀢𑁄. 𑀢𑀢𑁆𑀣 ‘‘𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑀸𑀪𑀺𑀪𑀽 𑀲𑀩𑁆𑀩𑀯𑀺𑀤𑀽𑀳𑀫𑀲𑁆𑀫𑀻’’𑀢𑀺𑀆𑀤𑀻𑀦𑀺 (𑀫𑀳𑀸𑀯. 𑁧𑁧; 𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧; 𑀓𑀣𑀸. 𑁪𑁦𑁫) 𑀲𑀼𑀢𑁆𑀢𑀧𑀤𑀸𑀦𑀺 𑀇𑀤𑀫𑁂𑀯 𑀘 𑀲𑀼𑀢𑁆𑀢𑀧𑀤𑀁 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁.

𑀲𑀮𑁆𑀮𑀓𑀦𑁆𑀢𑀦𑁄𑀢𑀺 𑀲𑀮𑁆𑀮𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀭𑁄𑀕𑀲𑁆𑀲𑀸𑀢𑀺 𑀓𑀺𑀮𑁂𑀲𑀭𑁄𑀕𑀲𑁆𑀲. 𑀢𑀲𑁆𑀫𑀸𑀢𑀺 𑀅𑀧𑀼𑀦𑀧𑀯𑀢𑁆𑀢𑀺𑀧𑀸𑀤𑀦𑁂𑀦 𑀢𑀺𑀓𑀺𑀘𑁆𑀙𑀦𑀢𑁄. 𑀩𑁆𑀭𑀳𑁆𑀫𑀁 𑀯𑀸 𑀲𑁂𑀝𑁆𑀞𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄𑀢𑀺 𑀩𑁆𑀭𑀳𑁆𑀫𑀪𑀽𑀢𑁄. 𑀏𑀯𑀁 𑀆𑀕𑀢𑀸𑀬𑀸𑀢𑀺 𑀇𑀫𑀺𑀦𑀸 𑁋

‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸, 𑀤𑀼𑀢𑀺𑀬𑀸 𑀅𑀭𑀢𑀺 𑀯𑀼𑀘𑁆𑀘𑀢𑀺;

𑀢𑀢𑀺𑀬𑀸 𑀔𑀼𑀧𑁆𑀧𑀺𑀧𑀸𑀲𑀸 𑀢𑁂, 𑀘𑀢𑀼𑀢𑁆𑀣𑀻 𑀢𑀡𑁆𑀳𑀸 𑀧𑀯𑀼𑀘𑁆𑀘𑀢𑀺.

𑀣𑀺𑀦𑀫𑀺𑀤𑁆𑀥𑀁 𑀢𑁂𑀧𑀜𑁆𑀘𑀫𑀁 𑀣𑀺𑀦𑀫𑀺𑀤𑁆𑀥𑀁 𑀢𑁂, 𑀙𑀝𑁆𑀞𑀸 𑀪𑀻𑀭𑀽 𑀧𑀯𑀼𑀘𑁆𑀘𑀢𑀺;

𑀲𑀢𑁆𑀢𑀫𑀻 𑀯𑀺𑀘𑀺𑀓𑀺𑀘𑁆𑀙𑀸 𑀢𑁂, 𑀫𑀓𑁆𑀔𑁄 𑀣𑀫𑁆𑀪𑁄 𑀢𑁂 𑀅𑀝𑁆𑀞𑀫𑁄.

𑀮𑀸𑀪𑁄 𑀲𑀺𑀮𑁄𑀓𑁄 𑀲𑀓𑁆𑀓𑀸𑀭𑁄, 𑀫𑀺𑀘𑁆𑀙𑀸𑀮𑀤𑁆𑀥𑁄 𑀘 𑀬𑁄 𑀬𑀲𑁄;

𑀬𑁄 𑀘𑀢𑁆𑀢𑀸𑀦𑀁 𑀲𑀫𑀼𑀓𑁆𑀓𑀁𑀲𑁂, 𑀧𑀭𑁂 𑀘 𑀅𑀯𑀚𑀸𑀦𑀢𑀺;

𑀏𑀲𑀸 𑀦𑀫𑀼𑀘𑀺 𑀢𑁂 𑀲𑁂𑀦𑀸, 𑀓𑀡𑁆𑀳𑀲𑁆𑀲𑀸𑀪𑀺𑀧𑁆𑀧𑀳𑀸𑀭𑀺𑀦𑀻’’𑀢𑀺. (𑀲𑀼. 𑀦𑀺. 𑁪𑁩𑁮-𑁪𑁪𑁧);

𑀏𑀯𑀁 𑀯𑀼𑀢𑁆𑀢𑀁 𑀦𑀯𑀯𑀺𑀥𑀁 𑀲𑁂𑀦𑀁 𑀲𑀗𑁆𑀕𑀬𑁆𑀳𑀢𑀺. 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀅𑀦𑀼𑀧𑁆𑀧𑀸𑀤𑀢𑀸𑀧𑀸𑀤𑀦𑁂𑀦 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸. 𑀓𑀼𑀢𑁄𑀘𑀺 𑀅𑀪𑀬𑁄 𑀦𑀺𑀩𑁆𑀪𑀬𑁄.

𑀲𑀬𑀫𑁂𑀯 𑀤𑀝𑁆𑀞𑀩𑁆𑀩𑀦𑁆𑀢𑀺 𑀬𑁂𑀦 𑀬𑁂𑀦 𑀅𑀥𑀺𑀕𑀢𑁄, 𑀢𑁂𑀦 𑀢𑁂𑀦 𑀧𑀭𑀲𑀤𑁆𑀥𑀸𑀬 𑀕𑀦𑁆𑀢𑀩𑁆𑀩𑀁 𑀳𑀺𑀢𑁆𑀯𑀸 𑀅𑀲𑀫𑁆𑀫𑁄𑀳𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑁂𑀦𑁂𑀯 𑀲𑀸𑀫𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀧𑀘𑁆𑀘𑀓𑁆𑀔’’𑀦𑁆𑀢𑀺. 𑀧𑀲𑀝𑁆𑀞𑀸 𑀤𑀺𑀝𑁆𑀞𑀺 𑀲𑀦𑁆𑀤𑀺𑀝𑁆𑀞𑀺. 𑀬𑀣𑀸 𑀭𑀣𑁂𑀦 𑀚𑀬𑀢𑀻𑀢𑀺 𑀭𑀣𑀺𑀓𑁄, 𑀏𑀯𑀁 𑀇𑀤𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀤𑀺𑀝𑁆𑀞𑀺𑀬𑀸 𑀚𑀬𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑀁. 𑀅𑀣 𑀯𑀸 𑀤𑀺𑀝𑁆𑀞𑀦𑁆𑀢𑀺 𑀤𑀲𑁆𑀲𑀦𑀁 𑀯𑀼𑀘𑁆𑀘𑀢𑀺, 𑀤𑀺𑀝𑁆𑀞𑀫𑁂𑀯 𑀲𑀦𑁆𑀤𑀺𑀝𑁆𑀞𑀁, 𑀲𑀦𑁆𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀺𑀝𑁆𑀞𑀁 𑀅𑀭𑀳𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄 𑀬𑀣𑀸 𑀯𑀢𑁆𑀣𑀬𑀼𑀕𑀁 𑀅𑀭𑀳𑀢𑀻𑀢𑀺 𑀯𑀢𑁆𑀣𑀬𑀼𑀕𑀺𑀓𑁄. 𑀲𑀦𑁆𑀤𑀺𑀝𑁆𑀞𑀺𑀓𑀁 𑀨𑀮𑀤𑀸𑀦𑀁 𑀲𑀦𑁆𑀥𑀸𑀬 𑀦𑀸𑀲𑁆𑀲 𑀓𑀸𑀮𑁄𑀢𑀺 𑀅𑀓𑀸𑀮𑀁, 𑀅𑀓𑀸𑀮𑀫𑁂𑀯 𑀅𑀓𑀸𑀮𑀺𑀓𑀁, 𑀦 𑀓𑀸𑀮𑀦𑁆𑀢𑀭𑀁 𑀔𑁂𑀧𑁂𑀢𑁆𑀯𑀸 𑀨𑀮𑀁 𑀤𑁂𑀢𑀺, 𑀅𑀢𑁆𑀢𑀦𑁄 𑀧𑀦 𑀧𑀯𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀨𑀮𑀁 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀢𑁆𑀢𑀦𑁄 𑀨𑀮𑀧𑁆𑀧𑀤𑀸𑀦𑁂 𑀧𑀓𑀝𑁆𑀞𑁄 𑀓𑀸𑀮𑁄 𑀧𑀢𑁆𑀢𑁄 𑀅𑀲𑁆𑀲𑀸𑀢𑀺 𑀓𑀸𑀮𑀺𑀓𑁄, 𑀮𑁄𑀓𑀺𑀬𑁄 𑀓𑀼𑀲𑀮𑀥𑀫𑁆𑀫𑁄, 𑀇𑀤𑀁 𑀧𑀦 𑀲𑀫𑀦𑀦𑁆𑀢𑀭𑀨𑀮𑀢𑁆𑀢𑀸 𑀦 𑀓𑀸𑀮𑀺𑀓𑀁.

𑁪𑁦𑁦. ‘‘𑀫𑀳𑀸𑀬𑀜𑁆𑀜𑀁 𑀧𑀯𑀢𑁆𑀢𑀬𑀻’’𑀢𑀺𑀆𑀤𑀻𑀲𑀼 𑀓𑁂𑀯𑀮𑀁 𑀤𑀸𑀦𑀥𑀫𑁆𑀫𑀸𑀤𑀻𑀲𑀼 𑀬𑀜𑁆𑀜𑀧𑀭𑀺𑀬𑀸𑀬𑀲𑀫𑁆𑀪𑀯𑀢𑁄 ‘‘𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀜𑁆𑀜𑀸𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁. 𑀩𑁆𑀭𑀸𑀳𑁆𑀫𑀡𑀸 𑀳𑀺 ‘‘𑀅𑀕𑁆𑀕𑀺𑀫𑀼𑀔𑀸 𑀤𑁂𑀯𑀸’’𑀢𑀺 𑀅𑀕𑁆𑀕𑀺𑀚𑀼𑀳𑀦𑀧𑀼𑀩𑁆𑀩𑀓𑀁 𑀬𑀜𑁆𑀜𑀁 𑀯𑀺𑀤𑀳𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀕𑁆𑀕𑀺𑀚𑀼𑀳𑀦𑀧𑁆𑀧𑀥𑀸𑀦𑀸𑀢𑀺 𑀅𑀢𑁆𑀣𑁄’’𑀢𑀺 ‘‘𑀪𑀽𑀭𑁆𑀪𑀼𑀯? 𑀲𑁆𑀯?’’ 𑀇𑀢𑀺 𑀲𑀸𑀯𑀺𑀢𑁆𑀢𑀻 𑀧𑀼𑀩𑁆𑀩𑀓𑀢𑁆𑀢𑀸 𑀫𑀼𑀔𑀁 𑀧𑀼𑀩𑁆𑀩𑀗𑁆𑀕𑀫𑀁. ‘‘𑀫𑀼𑀔𑀫𑀺𑀯 𑀫𑀼𑀔’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀇𑀥𑀸𑀧𑀺 𑀧𑀥𑀸𑀦𑀧𑀭𑀺𑀬𑀸𑀬𑁄 𑀫𑀼𑀔𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀦𑀼𑀲𑁆𑀲𑀸𑀦𑀁 𑀲𑁂𑀝𑁆𑀞𑀢𑁄 𑀭𑀸𑀚𑀸 ‘𑀫𑀼𑀔’𑀦𑁆𑀢𑀺 𑀯𑀼𑀢𑁆𑀢𑁄’’𑀢𑀺 𑀆𑀳. 𑀆𑀥𑀸𑀭𑀢𑁄𑀢𑀺 𑀑𑀕𑀸𑀳𑀦𑁆𑀢𑀻𑀦𑀁 𑀦𑀤𑀻𑀦𑀁 𑀆𑀥𑀸𑀭𑀪𑀸𑀯𑀢𑁄 𑀧𑀝𑀺𑀲𑀭𑀡𑀢𑁄 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀪𑀸𑀯𑀢𑁄. 𑀲𑀜𑁆𑀜𑀸𑀡𑀢𑁄𑀢𑀺 𑀘𑀦𑁆𑀤𑀬𑁄𑀕𑀯𑀲𑁂𑀦 𑀅𑀚𑁆𑀚 𑀅𑀲𑀼𑀓𑀦𑀓𑁆𑀔𑀢𑁆𑀢𑀦𑁆𑀢𑀺 𑀧𑀜𑁆𑀜𑀸𑀬𑀦𑀢𑁄. 𑀆𑀮𑁄𑀓𑀓𑀭𑀡𑀢𑁄𑀢𑀺 𑀦𑀓𑁆𑀔𑀢𑁆𑀢𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀆𑀮𑁄𑀓𑀓𑀭𑀡𑀢𑁄. 𑀲𑁄𑀫𑁆𑀫𑀪𑀸𑀯𑀢𑁄𑀢𑀺 𑀲𑀻𑀢𑀳𑀺𑀫𑀯𑀸𑀲𑀻𑀢𑀯𑀸𑀢𑀽𑀧𑀓𑁆𑀔𑀭𑀪𑀸𑀯𑀢𑁄. 𑀢𑀧𑀦𑁆𑀢𑀸𑀦𑀦𑁆𑀢𑀺 𑀤𑀻𑀧𑀲𑀺𑀔𑀸 𑀅𑀕𑁆𑀕𑀺𑀚𑀸𑀮𑀸 𑀅𑀲𑀦𑀺𑀯𑀺𑀘𑀓𑁆𑀓𑀦𑁆𑀢𑀺 𑀏𑀯𑀫𑀸𑀤𑀻𑀦𑀁 𑀯𑀺𑀚𑁆𑀚𑀮𑀦𑁆𑀢𑀸𑀦𑀁. 𑀆𑀬𑀫𑀼𑀔𑀁 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑁂𑀦.

𑀤𑀺𑀩𑁆𑀩𑀘𑀓𑁆𑀔𑀼 𑀥𑀫𑁆𑀫𑀘𑀓𑁆𑀔𑀼 𑀧𑀜𑁆𑀜𑀸𑀘𑀓𑁆𑀔𑀼 𑀩𑀼𑀤𑁆𑀥𑀘𑀓𑁆𑀔𑀼 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺. 𑀢𑁂 𑀲𑀭𑀡𑀲𑁆𑀲𑀸𑀢𑀺 𑀢𑁂 𑀲𑀭𑀡𑀲𑁆𑀲 𑀘, 𑀢𑁂 𑀲𑀭𑀡𑀪𑀸𑀯𑀫𑀽𑀮𑀓𑀢𑁆𑀢𑀸 𑀇𑀢𑀭𑀤𑁆𑀯𑀬𑀲𑁆𑀲 𑀘, 𑀬𑀣𑀸𑀯𑀼𑀢𑁆𑀢 𑀢𑁂-𑀧𑀤𑁂𑀦 𑀯𑀼𑀢𑁆𑀢𑀢𑁆𑀣𑀢𑁄 𑀧𑀭𑀲𑁆𑀲 𑀘𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀢𑁂 𑀢𑀼𑀬𑁆𑀳𑀁, 𑀇𑀢𑀭𑀲𑁆𑀲 𑀘 𑀲𑀭𑀡𑀲𑁆𑀲 𑀅𑀳𑁄 𑀆𑀦𑀼𑀪𑀸𑀯𑁄’’𑀢𑀺. 𑀆𑀯𑀼𑀢𑁆𑀢𑀺𑀯𑀲𑁂𑀦 𑀯𑀸 𑀢𑁂 𑀲𑀭𑀡𑀲𑁆𑀲𑀸𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄 𑁋 𑀢𑀼𑀬𑁆𑀳𑀁 𑀲𑀭𑀡𑀪𑀽𑀢𑀲𑁆𑀲 𑀘 𑀇𑀢𑀭𑀲𑀭𑀡𑀲𑁆𑀲 𑀘 𑀆𑀦𑀼𑀪𑀸𑀯𑁄𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑁂𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀅𑀲𑁆𑀲𑀮𑀸𑀬𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦𑁧. 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑀢𑁆𑀢𑀸 𑀯𑀺𑀲𑀤𑀺𑀲𑀁 𑀭𑀚𑁆𑀚𑀁 𑀯𑀺𑀭𑀚𑁆𑀚𑀁, 𑀯𑀺𑀭𑀚𑁆𑀚𑀢𑁄 𑀆𑀕𑀢𑀸, 𑀢𑀢𑁆𑀣 𑀚𑀸𑀢𑀸𑀢𑀺 𑀯𑀸 𑀯𑁂𑀭𑀚𑁆𑀚𑀓𑀸, 𑀏𑀯𑀁 𑀚𑀸𑀢𑀸 𑀔𑁄 𑀧𑀦 𑀢𑁂, 𑀬𑀲𑁆𑀫𑀸 𑀯𑀢𑁆𑀣𑀸𑀪𑀭𑀡𑀸𑀤𑀺𑀯𑀺𑀪𑀸𑀕𑁂𑀦 𑀦𑀸𑀦𑀧𑁆𑀧𑀓𑀸𑀭𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀸𑀦𑀸𑀯𑁂𑀭𑀚𑁆𑀚𑀓𑀸𑀦’’𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑁂𑀭𑀚𑁆𑀚𑀲𑁆𑀲𑁂𑀯 𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑀸 𑀯𑀼𑀢𑁆𑀢𑀸. 𑀬𑀜𑁆𑀜𑀼𑀧𑀸𑀲𑀦𑀸𑀤𑀺𑀦𑀸𑀢𑀺 𑀬𑀜𑁆𑀜𑀸𑀦𑀼𑀪𑀯𑀦𑀫𑀦𑁆𑀢𑀚𑁆𑀛𑁂𑀦𑀤𑀓𑁆𑀔𑀺𑀡𑀧𑀭𑀺𑀬𑁂𑀲𑀦𑀸𑀤𑀺𑀦𑀸. 𑀘𑀢𑀼𑀯𑀡𑁆𑀡𑀲𑀸𑀥𑀸𑀭𑀡𑀦𑁆𑀢𑀺 𑀔𑀢𑁆𑀢𑀺𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀲𑀸𑀥𑀸𑀭𑀡𑀁 𑀲𑀁𑀲𑀸𑀭𑀲𑀼𑀤𑁆𑀥𑀺𑀧𑀸𑀧𑀢𑀲𑁆𑀲𑀦𑀁. 𑀦𑁆𑀳𑀸𑀦𑀲𑀼𑀤𑁆𑀥𑀺𑀬𑀸𑀢𑀺 𑀢𑀺𑀢𑁆𑀣𑀲𑀫𑀼𑀤𑁆𑀤𑀔𑀸𑀢𑁂𑀲𑀼 𑀫𑀦𑁆𑀢𑀚𑀧𑁆𑀧𑀦𑀧𑀼𑀩𑁆𑀩𑀓𑀁 𑀲𑀸𑀬𑀁𑀢𑀢𑀺𑀬𑀉𑀤𑀓𑁄𑀭𑁄𑀳𑀦𑀸𑀤𑀺𑀦𑁆𑀳𑀸𑀦𑀲𑀼𑀤𑁆𑀥𑀺𑀬𑀸. 𑀪𑀸𑀯𑀦𑀸𑀲𑀼𑀤𑁆𑀥𑀺𑀬𑀸𑀢𑀺 𑀧𑀭𑀫𑀚𑁄𑀢𑀺𑀪𑀽𑀢𑀸𑀬 𑀧𑀼𑀭𑀺𑀲𑀪𑀸𑀯𑀦𑀸𑀲𑀗𑁆𑀔𑀸𑀢𑀸𑀬 𑀲𑀼𑀤𑁆𑀥𑀺𑀬𑀸. 𑀯𑀸𑀧𑀺𑀢𑀲𑀺𑀭𑁄𑀢𑀺 𑀑𑀭𑁄𑀧𑀺𑀢𑀓𑁂𑀲𑁄. 𑀢𑀫𑁂𑀯 𑀳𑀺 𑀲𑀺𑀭𑁄 𑀯𑀸𑀧𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀲𑀪𑀸𑀯𑀯𑀸𑀤𑀻𑀢𑀺 𑀬𑀣𑀸𑀪𑀽𑀢𑀯𑀸𑀤𑀻. 𑀧𑀩𑁆𑀩𑀚𑀦𑁆𑀢𑀸𑀢𑀺 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑁆𑀚𑀁 𑀉𑀧𑀕𑀘𑁆𑀙𑀦𑁆𑀢𑀸, 𑀢𑀲𑁆𑀫𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀩𑁆𑀩𑀚𑁆𑀚𑀸𑀯𑀺𑀥𑀸𑀦𑀁 𑀲𑀺𑀓𑁆𑀔𑀦𑁆𑀢𑁂𑀦 𑀪𑁄𑀢𑀸 ‘‘𑀩𑁆𑀭𑀸𑀳𑁆𑀫𑀡𑀸𑀯 𑀲𑀼𑀚𑁆𑀛𑀦𑁆𑀢𑀺, 𑀦𑁄 𑀅𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀅𑀬𑀁 𑀯𑀺𑀥𑀺 𑀲𑀳𑁂𑀢𑀼𑀓𑁄 𑀲𑀉𑀧𑀸𑀤𑀸𑀦𑁄 𑀲𑀓𑁆𑀓𑀘𑁆𑀘𑀁 𑀉𑀕𑁆𑀕𑀳𑀺𑀢𑁄, 𑀢𑀲𑁆𑀫𑀸 𑀢𑀼𑀬𑁆𑀳𑀁 𑀧𑀭𑀸𑀚𑀬𑁄 𑀦𑀢𑁆𑀣𑀺…𑀧𑁂… 𑀏𑀯𑀫𑀸𑀳𑀁𑀲𑀼.

𑁪𑁦𑁨. 𑀮𑀤𑁆𑀥𑀺𑀪𑀺𑀦𑁆𑀤𑀦𑀢𑁆𑀣𑀦𑁆𑀢𑀺 ‘‘𑀩𑁆𑀭𑀸𑀳𑁆𑀫𑀡𑀸𑀯 𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸 𑀩𑁆𑀭𑀳𑁆𑀫𑀚𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀮𑀤𑁆𑀥𑀺𑀬𑀸 𑀯𑀺𑀦𑀺𑀯𑁂𑀞𑀦𑀢𑁆𑀣𑀁. 𑀧𑀼𑀢𑁆𑀢𑀧𑀝𑀺𑀮𑀸𑀪𑀢𑁆𑀣𑀸𑀬𑀸𑀢𑀺 ‘‘𑀏𑀯𑀁 𑀫𑀬𑀁 𑀧𑁂𑀢𑁆𑀢𑀺𑀓𑀁 𑀇𑀡𑀥𑀸𑀭𑀁 𑀲𑁄𑀥𑁂𑀬𑁆𑀬𑀸𑀫𑀸’’𑀢𑀺 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀼𑀢𑁆𑀢𑀧𑀝𑀺𑀮𑀸𑀪𑀢𑁆𑀣𑀸𑀬. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀫𑁆𑀫𑀺𑀓𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑁆𑀛𑀸𑀲𑀬𑁄. 𑀦𑁂𑀲𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁. 𑀲𑀘𑁆𑀘𑀯𑀘𑀦𑀁 𑀲𑀺𑀬𑀸𑀢𑀺 ‘‘𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑀁 𑀲𑀘𑁆𑀘𑀁 𑀬𑀤𑀺 𑀲𑀺𑀬𑀸 𑀩𑁆𑀭𑀸𑀳𑁆𑀫𑀡𑀻𑀦𑀁…𑀧𑁂… 𑀪𑀯𑁂𑀬𑁆𑀬, 𑀦 𑀘𑁂𑀢𑀁 𑀅𑀢𑁆𑀣𑀺. 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀚𑀸𑀢𑁄𑀢𑀺 𑀯𑀸𑀤𑀘𑁆𑀙𑁂𑀤𑀓𑀯𑀸𑀤𑁄 𑀫𑀼𑀔𑀢𑁄𑀚𑀸𑀢𑀘𑁆𑀙𑁂𑀓𑀯𑀸𑀤𑁄. 𑀅𑀲𑁆𑀲𑀮𑀸𑀬𑀦𑁄𑀯𑀺𑀜𑁆𑀜𑀽 𑀚𑀸𑀢𑀺𑀓𑁄 ‘‘𑀦𑀺𑀭𑀓𑁆𑀔𑁂𑀧𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀚𑀸𑀦𑀦𑁆𑀢𑁄𑀧𑀺 𑀲𑀳𑀕𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀁 ‘‘𑀓𑀺𑀜𑁆𑀘𑀸𑀧𑀺 𑀪𑀯𑀁 𑀕𑁄𑀢𑀫𑁄’’𑀢𑀺𑀆𑀤𑀺𑀫𑀸𑀳.

𑁪𑁦𑁩. 𑀇𑀤𑀸𑀦𑀺 𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄𑀢𑀺 𑀯𑀸𑀤𑀁 𑀪𑀺𑀦𑁆𑀤𑀺𑀢𑀼𑀁 ‘‘𑀲𑀼𑀢𑀁 𑀢𑁂 𑀬𑁄𑀦𑀓𑀓𑀫𑁆𑀩𑁄𑀚𑁂𑀲𑀽’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀬𑀤𑀺 𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄, 𑀲𑀩𑁆𑀩𑀢𑁆𑀣 𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀪𑀯𑁂𑀬𑁆𑀬, 𑀅𑀣 𑀓𑀲𑁆𑀫𑀸 𑀬𑁄𑀦𑀓𑀓𑀫𑁆𑀩𑁄𑀚𑀸𑀤𑀺𑀚𑀦𑀧𑀤𑁂𑀲𑀼 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑁂𑀝𑁆𑀞𑀪𑀸𑀯𑁄 𑀦𑀢𑁆𑀣𑀺? 𑀏𑀯𑀜𑁆𑀳𑀺 𑀢𑀢𑁆𑀣 𑀯𑀡𑁆𑀡𑀸, 𑀢𑀲𑁆𑀫𑀸 ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄’’𑀢𑀺 𑀮𑀤𑁆𑀥𑀺𑀫𑀢𑁆𑀢𑀫𑁂𑀢𑀁. 𑀢𑁂𑀲𑀼 𑀳𑀺 𑀚𑀦𑀧𑀤𑁂𑀲𑀼 𑀚𑀦𑀸 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀓𑀢𑀺𑀓𑀁 𑀅𑀓𑀁𑀲𑀼, 𑀤𑀸𑀲𑀁 𑀲𑀸𑀫𑀺𑀓𑀁 𑀓𑀢𑁆𑀯𑀸 𑀇𑀢𑀭𑁂 𑀲𑀩𑁆𑀩𑁂 𑀢𑀁 𑀧𑀽𑀚𑁂𑀢𑁆𑀯𑀸 𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀺, 𑀬𑁄 𑀢𑁂𑀲𑀁 𑀅𑀬𑁆𑀬𑁄 𑀳𑁄𑀢𑀺 𑀇𑀢𑀭𑁂 𑀲𑀩𑁆𑀩𑁂 𑀢𑀲𑁆𑀲 𑀤𑀸𑀲𑀸 𑀳𑁄𑀦𑁆𑀢𑀺, 𑀢𑁂 𑀓𑀢𑀺𑀧𑀬𑀲𑀁𑀯𑀘𑁆𑀙𑀭𑀸𑀢𑀺𑀓𑁆𑀓𑀫𑁂𑀦 𑀢𑀲𑁆𑀲 𑀓𑀺𑀜𑁆𑀘𑀺 𑀤𑁄𑀲𑀁 𑀤𑀺𑀲𑁆𑀯𑀸 𑀢𑀁 𑀢𑀢𑁄 𑀞𑀸𑀦𑀢𑁄 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀞𑀧𑁂𑀦𑁆𑀢𑀺, 𑀇𑀢𑀺 𑀲𑁄 𑀅𑀬𑁆𑀬𑁄 𑀳𑀼𑀢𑁆𑀯𑀸 𑀤𑀸𑀲𑁄 𑀳𑁄𑀢𑀺, 𑀇𑀢𑀭𑁄 𑀤𑀸𑀲𑁄 𑀳𑀼𑀢𑁆𑀯𑀸 𑀅𑀬𑁆𑀬𑁄 𑀳𑁄𑀢𑀺, 𑀏𑀯𑀁 𑀢𑀸𑀯 𑀓𑁂𑀘𑀺 ‘‘𑀅𑀬𑁆𑀬𑁄 𑀳𑀼𑀢𑁆𑀯𑀸 𑀤𑀸𑀲𑁄 𑀳𑁄𑀢𑀺, 𑀤𑀸𑀲𑁄 𑀳𑀼𑀢𑁆𑀯𑀸 𑀅𑀬𑁆𑀬𑁄 𑀳𑁄𑀢𑀻’’𑀢𑀺 𑀏𑀢𑁆𑀣 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀧𑀼𑀭𑀺𑀫𑀯𑀲𑁂𑀦𑁂𑀯 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀩𑁆𑀭𑀸𑀳𑁆𑀫𑀡𑁄 𑀲𑀪𑀭𑀺𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀬𑀧𑁆𑀧𑀢𑁆𑀢𑁂 𑀧𑀼𑀢𑁆𑀢𑁂 𑀅𑀲𑀢𑀻𑀢𑀺 𑀇𑀤𑀁 𑀯𑀓𑁆𑀔𑀫𑀸𑀦𑀲𑁆𑀲 𑀤𑀸𑀭𑀓𑀲𑁆𑀲 𑀤𑀸𑀬𑀚𑁆𑀚𑀲𑀸𑀫𑀺𑀓𑀪𑀸𑀯𑀲𑁆𑀲 𑀢𑀸𑀯 𑀤𑀲𑁆𑀲𑀦𑀁. 𑀫𑀸𑀢𑀺𑀢𑁄 𑀲𑀼𑀤𑁆𑀥𑁄𑀢𑀺 𑀏𑀢𑁆𑀣 𑀬𑁄 𑀫𑀸𑀢𑀺𑀢𑁄 𑀲𑀼𑀤𑁆𑀥𑀢𑁆𑀢𑀸 𑀅𑀬𑁆𑀬𑁄, 𑀧𑀺𑀢𑀺𑀢𑁄 𑀅𑀲𑀼𑀤𑁆𑀥𑀢𑁆𑀢𑀸 𑀤𑀸𑀲𑁄 𑀳𑁄𑀢𑀺, 𑀲𑁄 𑀏𑀯 𑀧𑀺𑀢𑀺𑀢𑁄 𑀅𑀲𑀼𑀤𑁆𑀥𑀢𑁆𑀢𑀸 𑀤𑀸𑀲𑁄 𑀳𑀼𑀢𑁆𑀯𑀸 𑀫𑀸𑀢𑀺𑀢𑁄 𑀅𑀬𑁆𑀬𑁄 𑀳𑁄𑀢𑀻𑀢𑀺 𑀚𑀸𑀢𑀺𑀁 𑀲𑀫𑁆𑀪𑁂𑀤𑁂𑀢𑀺. 𑀲𑁄𑀯 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀳𑁄𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀅𑀧𑀭𑁂. 𑀓𑁄 𑀣𑀸𑀫𑁄𑀢𑀺 𑀫𑀳𑀦𑁆𑀢𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀦𑀫𑀢𑀕𑁆𑀕𑁂 𑀅𑀢𑀻𑀢𑁂 𑀓𑀸𑀮𑁂 𑀇𑀢𑁆𑀣𑀻𑀦𑀁 𑀯𑀸 𑀘𑀺𑀢𑁆𑀢𑁂 𑀅𑀦𑀯𑀝𑁆𑀞𑀺𑀢𑁂 𑀤𑀸𑀲𑀸 𑀤𑀸𑀲𑀸 𑀏𑀯 𑀳𑁄𑀦𑁆𑀢𑀺, 𑀅𑀬𑁆𑀬𑀸 𑀅𑀬𑁆𑀬𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣 𑀓𑁄 𑀏𑀓𑀦𑁆𑀢𑀺𑀓𑁄 𑀲𑀳𑁂𑀢𑀼𑀓𑁄 𑀅𑀯𑀲𑁆𑀲𑀬𑁄, 𑀢𑀲𑁆𑀲 𑀲𑀸𑀥𑀓𑁄 𑀲𑀺𑀤𑁆𑀥𑀦𑁆𑀢𑁄, 𑀓𑀺𑀁 𑀦𑀺𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄.

𑁪𑁦𑁪. 𑀲𑀼𑀓𑁆𑀓𑀘𑁆𑀙𑁂𑀤𑀓𑀯𑀸𑀤𑁄 𑀦𑀸𑀫𑀸𑀢𑀺 ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑀼𑀓𑁆𑀓𑁄 𑀯𑀡𑁆𑀡𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀲𑀼𑀓𑁆𑀓𑀘𑁆𑀙𑁂𑀤𑀓𑀯𑀸𑀭𑁄 𑀦𑀸𑀫.

𑁪𑁦𑁮. 𑀲𑀩𑁆𑀩𑀲𑁆𑀫𑀺𑀁 𑀅𑀕𑁆𑀕𑀺𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁂𑀢𑀺 𑀏𑀢𑁂𑀦 𑀬𑀣𑀸 𑀬𑀢𑁄 𑀓𑀼𑀢𑁄𑀘𑀺 𑀦𑀺𑀲𑁆𑀲𑀬𑀢𑁄 𑀉𑀧𑁆𑀧𑀦𑁆𑀦𑁄 𑀅𑀕𑁆𑀕𑀺𑀉𑀧𑀸𑀤𑀸𑀦𑀲𑀫𑁆𑀧𑀦𑁆𑀦𑁄 𑀅𑀕𑁆𑀕𑀺𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀏𑀯𑀁 𑀬𑀲𑁆𑀫𑀺𑀁 𑀓𑀲𑁆𑀫𑀺𑀜𑁆𑀘𑀺 𑀤𑀸𑀲𑀓𑀼𑀮𑁂 𑀚𑀸𑀢𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑁄 𑀲𑀁𑀲𑀸𑀭𑀢𑁄 𑀲𑀼𑀚𑁆𑀛𑀢𑀺 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺.

𑁪𑁦𑁯. 𑀧𑀸𑀤𑀲𑀺𑀓𑀯𑀡𑁆𑀡𑁄𑀢𑀺 𑀅𑀦𑁆𑀢𑀭𑀸𑀴𑀯𑀡𑁆𑀡𑁄. 𑀏𑀢𑁂𑀲𑀦𑁆𑀢𑀺 𑀔𑀢𑁆𑀢𑀺𑀬𑀓𑀼𑀫𑀸𑀭𑁂𑀦 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸𑀬 𑀉𑀧𑁆𑀧𑀦𑁆𑀦𑀧𑀼𑀢𑁆𑀢𑁄, 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁂𑀦 𑀔𑀢𑁆𑀢𑀺𑀬𑀓𑀜𑁆𑀜𑀸𑀬 𑀉𑀧𑁆𑀧𑀦𑁆𑀦𑀧𑀼𑀢𑁆𑀢𑁄𑀢𑀺 𑀏𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀫𑀸𑀡𑀯𑀓𑀸𑀦𑀁. 𑀫𑀢𑀓𑀪𑀢𑁆𑀢𑁂𑀢𑀺 𑀫𑀢𑁂 𑀉𑀤𑁆𑀤𑀺𑀲𑁆𑀲 𑀓𑀢𑀪𑀢𑁆𑀢𑁂. 𑀣𑀸𑀮𑀺𑀧𑀸𑀓𑁂𑀢𑀺 𑀓𑀢𑀫𑀗𑁆𑀕𑀮𑀪𑀢𑁆𑀢𑁂.

𑁪𑁧𑁦. 𑀢𑀼𑀫𑁆𑀳𑁂𑀢𑀺 𑀚𑀸𑀢𑀺𑀲𑀸𑀫𑀜𑁆𑀜𑀢𑁄 𑀫𑀸𑀡𑀯𑀁 𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀏𑀓𑀚𑁆𑀛𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 𑀆𑀳. 𑀓𑁄 𑀦𑀼 𑀔𑁄𑀢𑀺 𑀅𑀯𑀁𑀲𑀺𑀭𑁄 𑀇𑀲𑀺𑀯𑀸𑀤𑁄, 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀻𑀲𑀻𑀦𑀁 𑀅𑀲𑀸𑀫𑀢𑁆𑀣𑀺𑀬𑀤𑀲𑁆𑀲𑀦𑁂𑀦 𑀚𑀸𑀢𑀺𑀬𑀸 𑀅𑀧𑁆𑀧𑀫𑀸𑀡𑀢𑀁 𑀯𑀺𑀪𑀸𑀯𑁂𑀢𑀼𑀁 𑀕𑀸𑀫𑀤𑀸𑀭𑀓𑀯𑁂𑀲𑁂𑀦 𑀉𑀧𑀕𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀕𑀸𑀫𑀡𑁆𑀟𑀮𑀭𑀽𑀧𑁄 𑀯𑀺𑀬𑀸’’𑀢𑀺. 𑀓𑁄𑀡𑁆𑀟𑀤𑀫𑀓𑁄𑀢𑀺 𑀅𑀤𑀦𑁆𑀢𑀤𑀫𑀓𑁄.

𑁪𑁧𑁧. 𑀚𑀦𑁂𑀢𑀻𑀢𑀺 𑀚𑀦𑀺𑀓𑀸 𑀚𑀦𑁂𑀢𑁆𑀢𑀺. 𑀚𑀦𑀓𑁄 𑀧𑀺𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀕𑀦𑁆𑀥𑀩𑁆𑀩𑀧𑀜𑁆𑀳𑀦𑁆𑀢𑀺 𑀕𑀦𑁆𑀥𑀩𑁆𑀩𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑀲𑁆𑀲 𑀔𑀢𑁆𑀢𑀺𑀬𑀪𑀸𑀯𑀸𑀤𑀺𑀧𑀼𑀘𑁆𑀙𑀁. 𑀤𑀩𑁆𑀩𑀺𑀕𑀳𑀡𑀲𑀺𑀧𑁆𑀧𑀫𑁆𑀧𑀺 𑀏𑀓𑀸 𑀯𑀺𑀚𑁆𑀚𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀓𑀺𑀭 𑀓𑀼𑀲𑀮𑁄 𑀬𑀁 𑀓𑀺𑀜𑁆𑀘𑀺 𑀆𑀳𑀸𑀭𑀽𑀧𑀕𑀧𑀡𑁆𑀡𑀧𑀼𑀧𑁆𑀨𑀨𑀮𑀩𑀻𑀚𑀁 𑀅𑀦𑁆𑀢𑀫𑀲𑁄 𑀏𑀮𑀸𑀮𑀼𑀓𑀫𑁆𑀧𑀺 𑀕𑀳𑁂𑀢𑁆𑀯𑀸 𑀪𑁂𑀲𑀚𑁆𑀚𑁂𑀳𑀺 𑀬𑁄𑀚𑁂𑀢𑁆𑀯𑀸 𑀧𑀘𑀦𑁆𑀢𑁄 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑁂𑀳𑀺 𑀲𑀫𑀸𑀦𑀭𑀲𑀁 𑀓𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀧𑀼𑀡𑁆𑀡𑁄𑀧𑀺 𑀢𑀸𑀤𑀺𑀲𑁄, 𑀢𑁂𑀦 𑀜𑀸𑀢𑀁 𑀢𑁆𑀯𑀁 𑀤𑀩𑁆𑀩𑀺𑀕𑀳𑀡𑀲𑀺𑀧𑁆𑀧𑀫𑀢𑁆𑀢𑀫𑁆𑀧𑀺 𑀦 𑀚𑀸𑀦𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀤𑁆𑀥𑁄𑀢𑀺 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀲𑀤𑁆𑀥𑁄, 𑀧𑁄𑀣𑀼𑀚𑁆𑀚𑀦𑀺𑀓𑁂𑀦𑁂𑀯 𑀭𑀢𑀦𑀢𑁆𑀢𑀬𑀧𑀲𑀸𑀤𑁂𑀦 𑀧𑀲𑀦𑁆𑀦𑁄. 𑀢𑁂𑀦𑁂𑀯𑀸𑀳 𑁋 ‘‘𑀉𑀧𑀸𑀲𑀓𑀁 𑀫𑀁 𑀪𑀯𑀁…𑀧𑁂… 𑀲𑀭𑀡𑀁 𑀕𑀢’’𑀦𑁆𑀢𑀺.

𑀅𑀲𑁆𑀲𑀮𑀸𑀬𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀖𑁄𑀝𑀫𑀼𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁨. 𑀔𑁂𑀫𑀺𑀬𑀸 𑀦𑀸𑀫 𑀭𑀜𑁆𑀜𑁄 𑀤𑁂𑀯𑀺𑀬𑀸 𑀭𑁄𑀧𑀺𑀢𑀢𑁆𑀢𑀸 𑀢𑀁 𑀅𑀫𑁆𑀩𑀯𑀦𑀁 𑀔𑁂𑀫𑀺𑀬𑀫𑁆𑀩𑀯𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀯𑀤𑀦𑁆𑀢𑀺. 𑀥𑀫𑁆𑀫𑀺𑀓𑁄𑀢𑀺 𑀥𑀫𑁆𑀫𑀬𑀼𑀢𑁆𑀢𑁄 𑀲𑀩𑁆𑀩𑀲𑁄𑀯 𑀅𑀥𑀫𑁆𑀫𑀁 𑀧𑀳𑀸𑀬 𑀥𑀫𑁆𑀫𑁂 𑀞𑀺𑀢𑁄. 𑀧𑀭𑀺𑀩𑁆𑀩𑀚𑀢𑀺 𑀧𑀩𑁆𑀩𑀚𑀢𑀺 𑀏𑀢𑁂𑀦𑀸𑀢𑀺 𑀧𑀭𑀺𑀩𑁆𑀩𑀚𑁄, 𑀖𑀭𑀸𑀯𑀸𑀲𑀢𑁄 𑀦𑀺𑀓𑁆𑀔𑀫𑀦𑀧𑀼𑀩𑁆𑀩𑀓𑀁 𑀮𑀺𑀗𑁆𑀕𑀕𑁆𑀕𑀳𑀡𑀯𑀲𑁂𑀦 𑀲𑀻𑀮𑀲𑀫𑀸𑀤𑀸𑀦𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀭𑀺𑀩𑁆𑀩𑀚𑁂. 𑀲𑀪𑀸𑀯𑁄𑀢𑀺 𑀢𑀁 𑀧𑀭𑀺𑀩𑁆𑀩𑀸𑀚𑀦𑀺𑀬𑀁, 𑀢𑁂𑀳𑀺 𑀢𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀅𑀦𑀼𑀝𑁆𑀞𑀸𑀢𑀩𑁆𑀩𑁄 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀲𑀗𑁆𑀔𑀸𑀢𑁄 𑀲𑀪𑀸𑀯𑁄. 𑀥𑀫𑁆𑀫𑁄𑀯 𑀧𑀫𑀸𑀡𑀦𑁆𑀢𑀺 𑀏𑀢𑁂𑀦 𑀫𑀬𑀁 𑀅𑀳𑀺𑀭𑀺𑀫𑀦𑀸 𑀘𑀺𑀢𑁆𑀢𑀲𑁆𑀲 𑀬𑀣𑀸𑀉𑀧𑀝𑁆𑀞𑀺𑀢𑀁 𑀓𑀣𑁂𑀫, 𑀢𑀲𑁆𑀫𑀸 𑀢𑀁 𑀅𑀧𑁆𑀧𑀫𑀸𑀡𑀁, 𑀬𑁄 𑀧𑀦𑁂𑀢𑁆𑀣 𑀅𑀯𑀺𑀢𑀣𑁄 𑀥𑀫𑁆𑀫𑁄, 𑀢𑀤𑁂𑀯 𑀧𑀫𑀸𑀡𑀁. 𑀅𑀥𑀺𑀕𑀢𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀲𑀪𑀸𑀯𑁄 𑀅𑀢𑁆𑀣𑀺, 𑀢𑀲𑁆𑀲 𑀢𑀼𑀫𑁆𑀳𑁂𑀳𑀺 𑀢𑀼𑀫𑁆𑀳𑁂𑀳𑀺 𑀩𑀳𑀼𑀦𑀸 𑀦𑀸𑀦𑀸𑀲𑀦𑁆𑀤𑀲𑁆𑀲𑀦𑀸𑀤𑀺 𑀓𑀫𑁆𑀫𑁂𑀦 𑀇𑀥 𑀪𑀯𑀺𑀢𑀩𑁆𑀩𑀁, 𑀩𑀳𑀼𑀤𑁂𑀯𑁂𑀢𑁆𑀣 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁧𑁪. 𑀲𑀸𑀭𑀢𑁆𑀢𑀭𑀢𑁆𑀢𑀸𑀢𑀺 𑀲𑀸𑀭𑀚𑁆𑀚𑀦𑀯𑀲𑁂𑀦 𑀭𑀢𑁆𑀢𑀸, 𑀩𑀳𑀼𑀮𑀭𑀸𑀕𑀯𑀲𑁂𑀦 𑀅𑀪𑀺𑀭𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑀸 𑀜𑀸𑀧𑁂𑀢𑀩𑁆𑀩𑀫𑀢𑁆𑀣𑀁 𑀅𑀦𑀼𑀕𑁆𑀕𑀳𑀸𑀧𑁂𑀢𑀺 𑀩𑁄𑀥𑁂𑀢𑀻𑀢𑀺 𑀅𑀦𑀼𑀕𑁆𑀕𑀳𑁄, 𑀜𑀸𑀧𑀺𑀢𑀓𑀸𑀭𑀡𑀁, 𑀲𑀳 𑀅𑀦𑀼𑀕𑁆𑀕𑀳𑁂𑀦𑀸𑀢𑀺 𑀲𑀸𑀦𑀼𑀕𑁆𑀕𑀳𑀸. 𑀢𑁂𑀦𑀸𑀳 ‘‘𑀲𑀓𑀸𑀭𑀡𑀸’’𑀢𑀺. 𑀓𑀺𑀁 𑀧𑀦 𑀢𑀁 𑀓𑀸𑀭𑀡𑀁? 𑀇𑀫𑀲𑁆𑀲𑀸𑀥𑀺𑀧𑁆𑀧𑀸𑀬𑁄 ‘‘𑀦𑀢𑁆𑀣𑀺 𑀥𑀫𑁆𑀫𑀺𑀓𑁄 𑀧𑀭𑀺𑀩𑁆𑀩𑀚𑁄’’𑀢𑀺 𑀫𑀬𑀸 𑀯𑀼𑀢𑁆𑀢𑁄, 𑀅𑀤𑁆𑀥𑀸 𑀧𑀦𑀸𑀬𑀲𑁆𑀫𑀸 𑀉𑀤𑁂𑀦𑁄 𑀬𑀸𑀣𑀸𑀯𑀢𑁄 𑀥𑀫𑁆𑀫𑀺𑀓𑀁 𑀧𑀭𑀺𑀩𑁆𑀩𑀚𑀁 𑀫𑁂 𑀆𑀘𑀺𑀓𑁆𑀔𑀢𑀻𑀢𑀺. 𑀢𑁂𑀦𑀸𑀳 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺.

𑁪𑁨𑁧. 𑀲𑀩𑁆𑀩𑀫𑀺𑀤𑀁 𑀣𑀸𑀯𑀭𑀚𑀗𑁆𑀕𑀫𑀁 𑀧𑀼𑀭𑀺𑀲𑀓𑀢𑀁, 𑀢𑀲𑁆𑀫𑀸 𑀬𑀁 𑀓𑀺𑀜𑁆𑀘𑀺 𑀓𑀢𑁆𑀯𑀸 𑀅𑀢𑁆𑀢𑀸 𑀧𑁄𑀲𑁂𑀢𑀩𑁆𑀩𑁄 𑀭𑀓𑁆𑀔𑀺𑀢𑀩𑁆𑀩𑁄𑀢𑀺 𑀮𑁄𑀓𑀸𑀬𑀢𑀦𑀺𑀲𑁆𑀲𑀺𑀢𑁄 𑀦𑀻𑀢𑀺𑀫𑀕𑁆𑀕𑁄 𑀖𑁄𑀝𑀫𑀼𑀔𑀓𑀦𑁆𑀢𑁄, 𑀢𑀲𑁆𑀫𑀸 𑀆𑀳 ‘‘𑀏𑀢𑀲𑁆𑀲 𑀓𑀺𑀭 𑀚𑀸𑀦𑀦𑀲𑀺𑀧𑁆𑀧𑁂’’𑀢𑀺𑀆𑀤𑀺. 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺 𑀅𑀓𑀢𑁆𑀢𑀩𑁆𑀩𑀫𑁂𑀯 𑀓𑀭𑀡𑀢𑁄. 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀥𑀦𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀧𑁆𑀧𑀧𑀼𑀜𑁆𑀜𑀸𑀪𑀸𑀯𑀢𑁄 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀦𑀺𑀳𑀺𑀢𑀥𑀦𑀁 ‘‘𑀅𑀲𑀼𑀓𑁂 𑀘𑀸’’𑀢𑀺 𑀆𑀘𑀺𑀓𑁆𑀔𑀺𑀢𑁆𑀯𑀸 𑀕𑀢𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀖𑁄𑀝𑀫𑀼𑀔𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀘𑀗𑁆𑀓𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨𑁨. 𑀢𑀲𑁆𑀫𑀺𑀦𑁆𑀢𑀺 𑀲𑀸𑀮𑀯𑀦𑁂. 𑀉𑀢𑁆𑀢𑀭𑁂𑀦 𑀑𑀧𑀸𑀲𑀸𑀤𑀦𑁆𑀢𑀺 𑀑𑀧𑀸𑀲𑀸𑀤𑀕𑀸𑀫𑀲𑁆𑀲 𑀉𑀢𑁆𑀢𑀭𑀤𑀺𑀲𑀸𑀬𑀁. 𑀉𑀢𑁆𑀢𑀭𑁂𑀦𑀸𑀢𑀺 𑀏𑀦-𑀲𑀤𑁆𑀤𑀬𑁄𑀕𑁂𑀦 𑀳𑀺 𑀑𑀧𑀸𑀲𑀸𑀤𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁. 𑀅𑀚𑁆𑀛𑀸𑀯𑀲𑀢𑀻𑀢𑀺 𑀏𑀢𑁆𑀣 𑀅𑀥𑀺-𑀆-𑀲𑀤𑁆𑀤𑀸𑀦𑀁 𑀅𑀦𑀢𑁆𑀣𑀦𑁆𑀢𑀭𑀢𑀁 𑀳𑀤𑀬𑁂 𑀓𑀢𑁆𑀯𑀸 𑀆𑀳 ‘‘𑀯𑀲𑀢𑀻’’𑀢𑀺. 𑀇𑀤𑀸𑀦𑀺 𑀢𑁂𑀲𑀁 𑀅𑀢𑁆𑀣𑀯𑀺𑀲𑁂𑀲𑀪𑀸𑀯𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀪𑀯𑀺𑀢𑁆𑀯𑀸 𑀯𑀸 𑀆𑀯𑀲𑀢𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀑𑀧𑀸𑀲𑀸𑀤𑀧𑀤𑁂. 𑀲𑀢𑁆𑀢𑀼𑀲𑁆𑀲𑀤𑀦𑁆𑀢𑀺𑀆𑀤𑀻𑀲𑀼 𑀧𑀦 𑀓𑀣𑀦𑁆𑀢𑀺 𑀆𑀳 𑁋 ‘‘𑀢𑀲𑁆𑀲 𑀅𑀦𑀼𑀧𑁆𑀧𑀬𑁄𑀕𑀢𑁆𑀢𑀸𑀯 𑀲𑁂𑀲𑀧𑀤𑁂𑀲𑀽’’𑀢𑀺. 𑀉𑀧-𑀅𑀦𑀼-𑀅𑀥𑀺-𑀇𑀢𑀺-𑀏𑀯𑀁-𑀧𑀼𑀩𑁆𑀩𑀓𑁂 𑀯𑀲𑀦𑀓𑀺𑀭𑀺𑀬𑀬𑀸𑀝𑁆𑀞𑀸𑀦𑁂 𑀉𑀧𑀬𑁄𑀕𑀯𑀘𑀦𑀫𑁂𑀯 𑀧𑀸𑀧𑀼𑀡𑀸𑀢𑀻𑀢𑀺 𑀲𑀤𑁆𑀤𑀯𑀺𑀤𑀽 𑀇𑀘𑁆𑀙𑀦𑁆𑀢𑀻𑀢𑀺 𑀆𑀳 ‘‘𑀮𑀓𑁆𑀔𑀡𑀁 𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀉𑀧𑀲𑀕𑁆𑀕𑀯𑀲𑁂𑀦 𑀧𑀦𑁂𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀉𑀲𑁆𑀲𑀤𑀢𑀸 𑀦𑀸𑀫𑁂𑀢𑁆𑀣 𑀩𑀳𑀼𑀮𑀢𑀸𑀢𑀺 𑀢𑀁 𑀩𑀳𑀼𑀮𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀳𑀼𑀚𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀯𑀚𑁆𑀚𑀺𑀢𑁆𑀯𑀸𑀢𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸.

𑀭𑀜𑁆𑀜𑀸 𑀯𑀺𑀬 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀸 𑀭𑀸𑀚𑀪𑁄𑀕𑁆𑀕𑀁. 𑀭𑀜𑁆𑀜𑁄 𑀤𑀸𑀬𑀪𑀽𑀢𑀦𑁆𑀢𑀺 𑀓𑀼𑀮𑀧𑀭𑀫𑁆𑀧𑀭𑀸𑀬 𑀪𑁄𑀕𑁆𑀕𑀪𑀸𑀯𑁂𑀦 𑀭𑀜𑁆𑀜𑀸 𑀮𑀤𑁆𑀥𑀤𑀸𑀬𑀪𑀽𑀢𑀁. 𑀢𑁂𑀦𑀸𑀳 ‘‘𑀤𑀸𑀬𑀚𑁆𑀚𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀭𑀸𑀚𑀦𑀻𑀳𑀸𑀭𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀉𑀤𑁆𑀥𑀁 𑀧𑀭𑀺𑀪𑁄𑀕𑀮𑀸𑀪𑀲𑁆𑀲 𑀲𑁂𑀝𑁆𑀞𑀤𑁂𑀬𑁆𑀬𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀳 𑁋 ‘‘𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀸𑀚𑀲𑀗𑁆𑀔𑁂𑀧𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺. 𑀢𑀺𑀢𑁆𑀣𑀧𑀩𑁆𑀩𑀢𑀸𑀤𑀻𑀲𑀽𑀢𑀺 𑀦𑀤𑀻𑀢𑀺𑀢𑁆𑀣𑀧𑀩𑁆𑀩𑀢𑀧𑀸𑀤𑀕𑀸𑀫𑀤𑁆𑀯𑀸𑀭𑀅𑀝𑀯𑀻𑀫𑀼𑀔𑀸𑀤𑀻𑀲𑀼. 𑀦𑀺𑀲𑁆𑀲𑀝𑁆𑀞𑀧𑀭𑀺𑀘𑁆𑀘𑀢𑁆𑀢𑀦𑁆𑀢𑀺 𑀫𑀼𑀢𑁆𑀢𑀘𑀸𑀕𑀯𑀲𑁂𑀦 𑀧𑀭𑀺𑀘𑁆𑀘𑀢𑁆𑀢𑀁 𑀓𑀢𑁆𑀯𑀸. 𑀏𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁.

𑁪𑁨𑁩. 𑀢𑀺 𑀲𑀦𑁆𑀦𑀺𑀧𑀢𑀺𑀢𑀸. 𑀬𑁄 𑀓𑁄𑀘𑀺 𑀯𑀺𑀜𑁆𑀜𑀽𑀦𑀁 𑀇𑀘𑁆𑀙𑀺𑀢𑁄 𑀧𑀜𑁆𑀳𑁄, 𑀢𑀲𑁆𑀲 𑀧𑀼𑀘𑁆𑀙𑀺𑀢𑀲𑁆𑀲 𑀬𑀸𑀣𑀸𑀯𑀢𑁄 𑀓𑀣𑀦𑀲𑀫𑀢𑁆𑀣𑁄 𑀧𑀼𑀘𑁆𑀙𑀺𑀢𑀧𑀜𑁆𑀳𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑁄.𑀓𑀼𑀮𑀸𑀧𑀤𑁂𑀲𑀸𑀤𑀺𑀦𑀸 𑀫𑀳𑀢𑀻 𑀫𑀢𑁆𑀢𑀸 𑀏𑀢𑀲𑁆𑀲𑀸𑀢𑀺 𑀫𑀳𑀸𑀫𑀢𑁆𑀢𑁄.

𑁪𑁨𑁪. 𑀢𑁂𑀢𑀺 ‘‘𑀦𑀸𑀦𑀸𑀯𑁂𑀭𑀚𑁆𑀚𑀓𑀸’’𑀢𑀺 𑀯𑀼𑀢𑁆𑀢𑀩𑁆𑀭𑀸𑀳𑁆𑀫𑀡𑀸. ‘‘𑀉𑀪𑀢𑁄 𑀲𑀼𑀚𑀸𑀢𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁩𑁦𑁩; 𑀅. 𑀦𑀺. 𑀝𑀻. 𑁩.𑁫.𑁧𑁩𑁪) 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀬𑁂𑀳𑀺 𑀓𑁂𑀳𑀺𑀘𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀲𑀼𑀚𑀸𑀢𑀢𑀸 𑀯𑀺𑀜𑁆𑀜𑀸𑀬𑁂𑀬𑁆𑀬, 𑀲𑀼𑀚𑀸𑀢𑀲𑀤𑁆𑀤𑁄 𑀘 ‘‘𑀲𑀼𑀚𑀸𑀢𑁄 𑀘𑀸𑀭𑀼𑀤𑀲𑁆𑀲𑀦𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁯𑁯; 𑀲𑀼. 𑀦𑀺. 𑁫𑁫𑁩; 𑀣𑁂𑀭𑀕𑀸. 𑁮𑁧𑁮) 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑁄𑀢𑀺 𑀚𑀸𑀢𑀺𑀯𑀲𑁂𑀦𑁂𑀯 𑀲𑀼𑀚𑀸𑀢𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑁄𑀭𑀲𑀧𑀼𑀢𑁆𑀢𑀯𑀲𑁂𑀦𑀧𑀺 𑀮𑁄𑀓𑁂 𑀫𑀸𑀢𑀼𑀧𑀺𑀢𑀼𑀲𑀫𑀜𑁆𑀜𑀸 𑀤𑀺𑀲𑁆𑀲𑀢𑀺, 𑀇𑀥 𑀧𑀦𑀲𑁆𑀲 𑀑𑀭𑀲𑀧𑀼𑀢𑁆𑀢𑀯𑀲𑁂𑀦𑁂𑀯 𑀇𑀘𑁆𑀙𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀲𑀼𑀤𑁆𑀥𑀕𑀳𑀡𑀻𑀓𑁄’’𑀢𑀺 𑀯𑀼𑀢𑁆𑀢𑀁. 𑀧𑀺𑀢𑀸 𑀘 𑀫𑀸𑀢𑀸 𑀘 𑀧𑀺𑀢𑀭𑁄, 𑀧𑀺𑀢𑀽𑀦𑀁 𑀧𑀺𑀢𑀭𑁄 𑀧𑀺𑀢𑀸𑀫𑀳𑀸, 𑀢𑁂𑀲𑀁 𑀬𑀼𑀕𑁄 𑀧𑀺𑀢𑀸𑀫𑀳𑀬𑀼𑀕𑁄, 𑀢𑀲𑁆𑀫𑀸 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀼𑀕𑀲𑀤𑁆𑀤𑁄 𑀘𑁂𑀢𑁆𑀣 𑀏𑀓𑀲𑁂𑀲𑀦𑀬𑁂𑀦 𑀤𑀝𑁆𑀞𑀩𑁆𑀩𑁄 ‘‘𑀬𑀼𑀕𑁄 𑀘 𑀬𑀼𑀕𑁄 𑀘 𑀬𑀼𑀕𑀸’’𑀢𑀺. 𑀏𑀯𑀜𑁆𑀳𑀺 𑀢𑀢𑁆𑀣 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀢𑀢𑁄 𑀉𑀤𑁆𑀥𑀁 𑀲𑀩𑁆𑀩𑁂𑀧𑀺 𑀧𑀼𑀩𑁆𑀩𑀧𑀼𑀭𑀺𑀲𑀸 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸’’𑀢𑀺. 𑀧𑀼𑀭𑀺𑀲𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 ‘‘𑀫𑀸𑀢𑀺𑀢𑁄’’𑀢𑀺 𑀧𑀸𑀴𑀺𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀅𑀓𑁆𑀔𑀺𑀢𑁆𑀢𑁄𑀢𑀺 𑀅𑀧𑁆𑀧𑀢𑁆𑀢𑀔𑁂𑀧𑁄. 𑀅𑀦𑀯𑀓𑁆𑀔𑀺𑀢𑁆𑀢𑁄𑀢𑀺 𑀲𑀤𑁆𑀥𑀣𑀸𑀮𑀺𑀧𑀸𑀓𑀸𑀤𑀻𑀲𑀼 𑀦 𑀅𑀯𑀓𑁆𑀔𑀺𑀢𑁆𑀢𑁄. 𑀚𑀸𑀢𑀺𑀯𑀸𑀤𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀉𑀪𑀢𑁄…𑀧𑁂… 𑀧𑀺𑀢𑀸𑀫𑀳𑀬𑀼𑀕𑀸𑀢𑀺 𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑁄𑀦𑀺𑀤𑁄𑀲𑀸𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑀪𑀸𑀯𑀓𑀺𑀢𑁆𑀢𑀦𑀢𑁄. 𑀅𑀓𑁆𑀔𑀺𑀢𑁆𑀢𑁄𑀢𑀺 𑀇𑀫𑀺𑀦𑀸 𑀓𑀺𑀭𑀺𑀬𑀸𑀧𑀭𑀸𑀥𑀸𑀪𑀸𑀯𑁄. 𑀓𑀺𑀭𑀺𑀬𑀸𑀧𑀭𑀸𑀥𑁂𑀦 𑀳𑀺 𑀲𑀢𑁆𑀢𑀸 𑀔𑁂𑀧𑀁 𑀧𑀸𑀧𑀼𑀡𑀦𑁆𑀢𑀺. 𑀅𑀦𑀼𑀧𑀓𑀼𑀝𑁆𑀞𑁄𑀢𑀺 𑀇𑀫𑀺𑀦𑀸 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀸𑀪𑀸𑀯𑁄. 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀫𑁆𑀧𑀺 𑀳𑀺 𑀧𑀝𑀺𑀘𑁆𑀘 𑀲𑀢𑁆𑀢𑀸 𑀅𑀓𑁆𑀓𑁄𑀲𑀁 𑀮𑀪𑀦𑁆𑀢𑀺.

𑀇𑀲𑁆𑀲𑀭𑁄𑀢𑀺 𑀅𑀥𑀺𑀧𑀢𑁂𑀬𑁆𑀬𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀨𑀮𑁂𑀦 𑀈𑀲𑀦𑀲𑀻𑀮𑁄. 𑀲𑀸 𑀧𑀦𑀲𑁆𑀲 𑀇𑀲𑁆𑀲𑀭𑀢𑀸 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀬𑀸 𑀧𑀸𑀓𑀝𑀸 𑀚𑀸𑀢𑀸𑀢𑀺 𑀅𑀟𑁆𑀠𑀢𑀸𑀧𑀭𑀺𑀬𑀸𑀬𑀪𑀸𑀯𑁂𑀦 𑀯𑀤𑀦𑁆𑀢𑁄 ‘‘𑀅𑀟𑁆𑀠𑁄𑀢𑀺 𑀇𑀲𑁆𑀲𑀭𑁄’’𑀢𑀺 𑀆𑀳. 𑀫𑀳𑀦𑁆𑀢𑀁 𑀥𑀦𑀫𑀲𑁆𑀲 𑀪𑀽𑀫𑀺𑀕𑀢𑀜𑁆𑀘𑁂𑀯 𑀯𑁂𑀳𑀸𑀲𑀝𑁆𑀞𑀜𑁆𑀘𑀸𑀢𑀺 𑀫𑀳𑀤𑁆𑀥𑀦𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀢𑀲𑁆𑀲. 𑀯𑀤𑀦𑁆𑀢𑀺 ‘‘𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀅𑀦𑀼𑀧𑀲𑀗𑁆𑀓𑀫𑀦𑀓𑀸𑀭𑀡𑀁 𑀓𑀺𑀢𑁆𑀢𑁂𑀫𑀸’’𑀢𑀺.

𑀅𑀥𑀺𑀓𑀭𑀽𑀧𑁄𑀢𑀺 𑀯𑀺𑀲𑀺𑀝𑁆𑀞𑀭𑀽𑀧𑁄 𑀉𑀢𑁆𑀢𑀫𑀲𑀭𑀻𑀭𑁄. 𑀤𑀲𑁆𑀲𑀦𑀁 𑀅𑀭𑀳𑀢𑀻𑀢𑀺 𑀤𑀲𑁆𑀲𑀦𑀻𑀬𑁄. 𑀢𑁂𑀦𑀸𑀳 ‘‘𑀤𑀲𑁆𑀲𑀦𑀬𑁄𑀕𑁆𑀕𑁄’’𑀢𑀺. 𑀧𑀲𑀸𑀤𑀁 𑀆𑀯𑀳𑀢𑀻𑀢𑀺 𑀧𑀸𑀲𑀸𑀤𑀺𑀓𑁄. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀧𑀲𑀸𑀤𑀚𑀦𑀦𑀢𑁄’’𑀢𑀺. 𑀯𑀡𑁆𑀡𑀲𑁆𑀲𑀸𑀢𑀺 𑀯𑀡𑁆𑀡𑀥𑀸𑀢𑀼𑀬𑀸. 𑀲𑀭𑀻𑀭𑀦𑁆𑀢𑀺 𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑁄 𑀓𑀭𑀘𑀭𑀡𑀕𑀻𑀯𑀸𑀲𑀻𑀲𑀸𑀤𑀺 𑀅𑀯𑀬𑀯𑀲𑀫𑀼𑀤𑀸𑀬𑁄, 𑀲𑁄 𑀘 𑀲𑀡𑁆𑀞𑀸𑀦𑀫𑀼𑀔𑁂𑀦 𑀕𑀬𑁆𑀳𑀢𑀻𑀢𑀺 ‘‘𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀧𑀭𑀫𑀸𑀬…𑀧𑁂… 𑀲𑀫𑁆𑀧𑀢𑁆𑀢𑀺𑀬𑀸 𑀘𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀯𑀡𑁆𑀡𑁂𑀲𑀼 𑀲𑀼𑀯𑀡𑁆𑀡𑀯𑀡𑁆𑀡𑁄𑀯 𑀉𑀢𑁆𑀢𑀫𑁄𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀝𑁆𑀞𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀢𑀣𑀸 𑀳𑀺 𑀩𑀼𑀤𑁆𑀥𑀸 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀲𑀼𑀯𑀡𑁆𑀡𑀯𑀡𑁆𑀡𑀸𑀯 𑀳𑁄𑀦𑁆𑀢𑀺. 𑀩𑁆𑀭𑀳𑁆𑀫𑀯𑀘𑁆𑀙𑀲𑀻𑀢𑀺 𑀉𑀢𑁆𑀢𑀫𑀲𑀭𑀻𑀭𑀸𑀪𑁄 𑀲𑀼𑀯𑀡𑁆𑀡𑀸𑀪𑁄𑀢𑀺 𑀅𑀢𑁆𑀣𑁄. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀲𑀭𑀻𑀭𑀲𑀤𑀺𑀲𑁂𑀦 𑀲𑀭𑀻𑀭𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀦 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑀢𑀁. 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬𑀸𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸 𑀅𑀯𑀬𑀯𑀧𑀸𑀭𑀺𑀧𑀽𑀭𑀺𑀬𑀸 𑀘 𑀤𑀲𑁆𑀲𑀦𑀸𑀬 𑀑𑀓𑀸𑀲𑁄 𑀦 𑀔𑀼𑀤𑁆𑀤𑀓𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑀸𑀦𑁂𑀯𑀸’’𑀢𑀺𑀆𑀤𑀺.

𑀬𑀫𑀦𑀺𑀬𑀫𑀮𑀓𑁆𑀔𑀡𑀁 𑀲𑀻𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀯𑀸, 𑀢𑀁 𑀧𑀦𑀲𑁆𑀲 𑀭𑀢𑁆𑀢𑀜𑁆𑀜𑀼𑀢𑀸𑀬 𑀯𑀼𑀤𑁆𑀥𑀁 𑀯𑀟𑁆𑀠𑀺𑀢𑀁 𑀲𑀻𑀮𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀼𑀤𑁆𑀥𑀲𑀻𑀮𑀻, 𑀢𑁂𑀦 𑀘 𑀲𑀩𑁆𑀩𑀤𑀸 𑀲𑀫𑀸𑀬𑁄𑀕𑀢𑁄 𑀯𑀼𑀟𑁆𑀠𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀜𑁆𑀘𑀲𑀻𑀮𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺 𑀢𑀢𑁄 𑀧𑀭𑀁 𑀲𑀻𑀮𑀲𑁆𑀲 𑀢𑀢𑁆𑀣 𑀅𑀪𑀸𑀯𑀢𑁄 𑀢𑁂𑀲𑀜𑁆𑀘 𑀅𑀚𑀸𑀦𑀦𑀢𑁄.

𑀞𑀸𑀦𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸 𑀲𑀺𑀓𑁆𑀔𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀓𑀢𑁆𑀣𑀘𑀺𑀧𑀺 𑀅𑀦𑀽𑀦𑀢𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀅𑀓𑁆𑀔𑀭𑀸𑀦𑀺 𑀏𑀢𑀺𑀲𑁆𑀲𑀸𑀢𑀺 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸. 𑀅𑀣 𑀯𑀸 𑀧𑀚𑁆𑀚𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀧𑀤𑀁, 𑀦𑀸𑀫𑀸𑀤𑀺, 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀁 𑀯𑀸𑀓𑁆𑀬𑀁, 𑀢𑁂𑀲𑀁 𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸. 𑀅𑀢𑁆𑀣𑀜𑀸𑀧𑀦𑀲𑀸𑀥𑀦𑀢𑀸𑀬 𑀯𑀸𑀘𑀸𑀯 𑀓𑀭𑀡𑀦𑁆𑀢𑀺 𑀯𑀸𑀓𑁆𑀓𑀭𑀡𑀁, 𑀉𑀤𑀸𑀳𑀭𑀡𑀖𑁄𑀲𑁄. 𑀕𑀼𑀡𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀢𑁂𑀦 𑀯𑀸 𑀪𑀸𑀲𑀺𑀢𑀩𑁆𑀩𑀅𑀢𑁆𑀣𑀲𑁆𑀲. 𑀧𑀽𑀭𑁂 𑀧𑀼𑀡𑁆𑀡𑀪𑀸𑀯𑁂. 𑀧𑀽𑀭𑁂𑀢𑀺 𑀘 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑁂 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀤𑀼𑀢𑀺𑀬𑀲𑁆𑀫𑀺𑀁 𑀯𑀺𑀲𑀬𑁂. 𑀲𑀼𑀔𑀼𑀫𑀸𑀮𑀢𑁆𑀢𑀦𑁂𑀦𑀸𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀯𑀸𑀘𑀸𑀬 𑀫𑀼𑀤𑀼𑀲𑀡𑁆𑀳𑀪𑀸𑀯𑀫𑀸𑀳. 𑀅𑀧𑀮𑀺𑀩𑀼𑀤𑁆𑀥𑀸𑀬 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺. 𑀲𑀦𑁆𑀤𑀺𑀝𑁆𑀞𑀁 𑀲𑀩𑁆𑀩𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀬 𑀏𑀓𑀤𑁂𑀲𑀓𑀣𑀦𑀁. 𑀯𑀺𑀮𑀫𑁆𑀩𑀺𑀢𑀁 𑀲𑀡𑀺𑀓𑀁 𑀘𑀺𑀭𑀸𑀬𑀺𑀢𑁆𑀯𑀸 𑀓𑀣𑀦𑀁. ‘‘𑀲𑀦𑁆𑀤𑀺𑀤𑁆𑀥𑀯𑀺𑀮𑀫𑁆𑀩𑀺𑀢𑀸𑀤𑀻’’𑀢𑀺 𑀯𑀸 𑀧𑀸𑀞𑁄. 𑀢𑀢𑁆𑀣 𑀲𑀦𑁆𑀤𑀺𑀤𑁆𑀥𑀁 𑀲𑀦𑁆𑀤𑁂𑀳𑀚𑀦𑀓𑀁. 𑀆𑀤𑀺-𑀲𑀤𑁆𑀤𑁂𑀦 𑀔𑀮𑀺𑀢𑀸𑀦𑀼𑀓𑀟𑁆𑀠𑀺𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀧𑀸𑀓𑀝𑀁 𑀓𑀢𑁆𑀯𑀸𑀢𑀺 𑀇𑀫𑀺𑀦𑀸 𑀘𑀲𑁆𑀲 𑀯𑀸𑀘𑀸𑀬 𑀅𑀢𑁆𑀣𑀧𑀸𑀭𑀺𑀧𑀽𑀭𑀺𑀁 𑀯𑀤𑀦𑁆𑀢𑀺.

𑁪𑁨𑁫. 𑀲𑀤𑀺𑀲𑀸𑀢𑀺 𑀏𑀓𑀤𑁂𑀲𑁂𑀦 𑀲𑀤𑀺𑀲𑀸. 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀕𑀼𑀡𑁂𑀳𑀺 𑀲𑀩𑁆𑀩𑀣𑀸 𑀲𑀤𑀺𑀲𑀸 𑀓𑁂𑀘𑀺𑀧𑀺 𑀕𑀼𑀡𑀸 𑀅𑀜𑁆𑀜𑁂𑀲𑀼 𑀮𑀩𑁆𑀪𑀦𑁆𑀢𑀺. 𑀇𑀢𑀭𑁂𑀢𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀅𑀲𑀤𑀺𑀲𑀕𑀼𑀡𑁂. 𑀇𑀤𑀦𑁆𑀢𑀺 𑀇𑀤𑀁 𑀅𑀢𑁆𑀣𑀚𑀸𑀢𑀁. 𑀕𑁄𑀧𑀤𑀓𑀦𑁆𑀢𑀺 𑀕𑀸𑀯𑀺𑀬𑀸 𑀧𑀤𑁂 𑀞𑀺𑀢𑀉𑀤𑀓𑀁. 𑀓𑀼𑀮𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀼𑀮𑀸𑀦𑀼𑀓𑁆𑀓𑀫𑁂𑀦.

𑀢𑀢𑁆𑀣𑀸𑀢𑀺 𑀫𑀜𑁆𑀘𑀓𑁂. 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀻𑀢𑀺 𑀬𑀣𑀸 𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄 𑀆𑀬𑀸𑀫𑀢𑁄 𑀯𑀺𑀢𑁆𑀣𑀸𑀭𑀢𑁄 𑀉𑀩𑁆𑀩𑁂𑀥𑀢𑁄 𑀘 𑀪𑀕𑀯𑀢𑁄 𑀭𑀽𑀧𑀓𑀸𑀬𑀲𑁆𑀲 𑀧𑀭𑀺𑀘𑁆𑀙𑁂𑀤𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺.

𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀅𑀭𑀺𑀬𑀦𑁆𑀢𑀺 𑀆𑀳 ‘‘𑀅𑀭𑀺𑀬𑀁 𑀉𑀢𑁆𑀢𑀫𑀁 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺. 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁, 𑀦 𑀲𑀼𑀔𑀯𑀺𑀧𑀸𑀓𑀝𑁆𑀞𑁂𑀦. 𑀓𑀢𑁆𑀣𑀘𑀺 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀓𑀢𑁆𑀣𑀘𑀺 𑀅𑀧𑀭𑀺𑀫𑀸𑀡𑀸𑀧𑀺 𑀤𑁂𑀯𑀫𑀦𑀼𑀲𑁆𑀲𑀸 𑀬𑀲𑁆𑀫𑀸 𑀘𑀢𑀼𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀅𑀧𑀭𑀺𑀫𑁂𑀬𑁆𑀬𑀸 𑀫𑀕𑁆𑀕𑀨𑀮𑀸𑀫𑀢𑀁 𑀧𑀺𑀯𑀦𑁆𑀢𑀺. 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀤𑀺𑀧𑀭𑀺𑀫𑀸𑀡𑁂𑀦𑀧𑀺 𑀩𑀳𑀽 𑀏𑀯. 𑀢𑀲𑁆𑀫𑀸 𑀅𑀦𑀼𑀢𑁆𑀢𑀭𑀸𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦𑁂𑀯 𑀪𑀕𑀯𑀸 𑀩𑀳𑀽𑀦𑀁 𑀆𑀘𑀭𑀺𑀬𑁄. 𑀢𑁂𑀢𑀺 𑀓𑀸𑀫𑀭𑀸𑀕𑀢𑁄 𑀅𑀜𑁆𑀜𑁂 𑀪𑀕𑀯𑀢𑀸 𑀧𑀳𑀻𑀦𑀓𑀺𑀮𑁂𑀲𑁂.

𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀅𑀧𑀸𑀧𑁂𑀳𑀺 𑀧𑀼𑀭𑀓𑁆𑀔𑀭𑀻𑀬𑀢𑀺, 𑀦 𑀯𑀸 𑀧𑀸𑀧𑀁 𑀧𑀼𑀭𑀢𑁄 𑀓𑀭𑁄𑀢𑀻𑀢𑀺𑀧𑀺 𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀸𑀧𑁂 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀧𑀸𑀧𑁂𑀢𑀺 𑀧𑀸𑀧𑀧𑀧𑀝𑀺𑀧𑀓𑁆𑀔𑁂 𑀧𑀸𑀧𑀭𑀳𑀺𑀢𑁂 𑀘. 𑀩𑁆𑀭𑀳𑁆𑀫𑀦𑀺 𑀪𑀯𑀸, 𑀩𑁆𑀭𑀳𑁆𑀫𑀼𑀦𑁄 𑀯𑀸 𑀳𑀺𑀢𑀸 𑀕𑀭𑀼𑀓𑀭𑀡𑀸𑀤𑀺𑀦𑀸, 𑀩𑁆𑀭𑀳𑁆𑀫𑀸𑀦𑀁 𑀯𑀸 𑀫𑀕𑁆𑀕𑀁 𑀚𑀸𑀦𑀸𑀢𑀻𑀢𑀺 𑀩𑁆𑀭𑀳𑁆𑀫𑀜𑁆𑀜𑀸, 𑀢𑀲𑁆𑀲𑀸 𑀩𑁆𑀭𑀳𑁆𑀫𑀜𑁆𑀜𑀸𑀬 𑀧𑀚𑀸𑀬.

𑀢𑀺𑀭𑁄𑀭𑀝𑁆𑀞𑀸 𑀢𑀺𑀭𑁄𑀚𑀦𑀧𑀤𑀸𑀢𑀺 𑀏𑀢𑁆𑀣 𑀭𑀚𑁆𑀚𑀁 𑀭𑀝𑁆𑀞𑀁 𑀭𑀸𑀚𑀦𑁆𑀢𑀺 𑀭𑀸𑀚𑀸𑀦𑁄 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸. 𑀢𑀤𑁂𑀓𑀤𑁂𑀲𑀪𑀽𑀢𑀸 𑀧𑀤𑁂𑀲𑀸 𑀧𑀦 𑀚𑀦𑀧𑀤𑁄 𑀚𑀦𑀸 𑀧𑀚𑁆𑀚𑀦𑁆𑀢𑀺 𑀏𑀢𑁆𑀣 𑀲𑀼𑀔𑀚𑀻𑀯𑀺𑀓𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀓𑀢𑁆𑀯𑀸. 𑀧𑀼𑀘𑁆𑀙𑀸𑀬 𑀤𑁄𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀺 𑀢𑁂𑀲𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀘𑀺𑀦𑁆𑀢𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀯𑀓𑀸𑀢𑀺 𑀆𑀕𑀦𑁆𑀢𑀼𑀓𑀪𑀸𑀯𑁂𑀦 𑀅𑀫𑁆𑀳𑀸𑀓𑀁 𑀅𑀪𑀺𑀦𑀯𑀸.

𑁪𑁨𑁬. 𑀑𑀧𑀸𑀢𑁂𑀢𑀺 𑀦𑀺𑀧𑁆𑀧𑀸𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀪𑀽𑀢𑁄 𑀘 𑀢𑀢𑁆𑀣 𑀧𑁂𑀲𑀺𑀢𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀯𑁂𑀲𑁂𑀢𑀻’’𑀢𑀺. 𑀲𑀁𑀧𑀼𑀭𑀓𑁆𑀔𑀭𑁄𑀦𑁆𑀢𑀻𑀢𑀺 𑀲𑀓𑁆𑀓𑀘𑁆𑀘𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀭𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀼𑀭𑀢𑁄 𑀓𑀢𑁆𑀯𑀸 𑀯𑀺𑀘𑀭𑀦𑁆𑀢𑀻’’𑀢𑀺.

𑁪𑁨𑁭. 𑀲𑀼𑀤𑁆𑀤𑁂 𑀩𑀳𑀺 𑀓𑀢𑁆𑀯𑀸 𑀭𑀳𑁄 𑀲𑀸𑀲𑀺𑀢𑀩𑁆𑀩𑀝𑁆𑀞𑁂𑀦 𑀫𑀦𑁆𑀢𑀸 𑀏𑀯 𑀢𑀁𑀢𑀁𑀅𑀢𑁆𑀣𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀧𑀤𑀦𑁆𑀢𑀺 𑀫𑀦𑁆𑀢𑀧𑀤𑀁 𑀯𑁂𑀤𑀁. 𑀢𑁂𑀦𑀸𑀳 ‘‘𑀯𑁂𑀤𑁄’’𑀢𑀺. 𑀏𑀯𑀁 𑀓𑀺𑀭𑀸𑀢𑀺 𑀧𑀭𑀫𑁆𑀧𑀭𑀪𑀸𑀯𑁂𑀦 𑀆𑀪𑀢𑀦𑁆𑀢𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀆𑀪𑀢𑀁. 𑀧𑀸𑀯𑀘𑀦𑀲𑀗𑁆𑀔𑀸𑀢𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀧𑀫𑀼𑀔𑀯𑀘𑀦𑀫𑁆𑀳𑀺 𑀉𑀤𑀢𑁆𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸. 𑀲𑀸𑀯𑀺𑀢𑁆𑀢𑀺𑀆𑀤𑀻𑀳𑀺 𑀙𑀦𑁆𑀤𑀩𑀦𑁆𑀥𑁂𑀳𑀺 𑀯𑀕𑁆𑀕𑀩𑀦𑁆𑀥𑁂𑀳𑀺 𑀘𑀸𑀢𑀺 𑀕𑀸𑀬𑀢𑁆𑀢𑀻𑀆𑀤𑀻𑀳𑀺 𑀅𑀚𑁆𑀛𑀸𑀬𑀸𑀦𑀼𑀯𑀸𑀓𑀸𑀤𑀻𑀳𑀺 𑀙𑀦𑁆𑀤𑀩𑀦𑁆𑀥𑁂𑀳𑀺 𑀘 𑀯𑀕𑁆𑀕𑀩𑀦𑁆𑀥𑁂𑀳𑀺 𑀘. 𑀲𑀫𑁆𑀧𑀸𑀤𑁂𑀢𑁆𑀯𑀸𑀢𑀺 𑀧𑀤𑀲𑀫𑁆𑀧𑀢𑁆𑀢𑀺𑀁 𑀅𑀳𑀸𑀧𑁂𑀢𑁆𑀯𑀸. 𑀧𑀯𑀢𑁆𑀢𑀸𑀭𑁄𑀢𑀺 𑀯𑀸 𑀧𑀸𑀯𑀘𑀦𑀯𑀲𑁂𑀦 𑀯𑀢𑁆𑀢𑀸𑀭𑁄. 𑀲𑀚𑁆𑀛𑀸𑀬𑀺𑀢𑀦𑁆𑀢𑀺 𑀕𑀸𑀬𑀦𑀯𑀲𑁂𑀦 𑀲𑀚𑁆𑀛𑀸𑀬𑀺𑀢𑀁, 𑀢𑀁 𑀧𑀦 𑀧𑀤𑁂𑀦𑁂𑀯 𑀇𑀘𑁆𑀙𑀺𑀢𑀦𑁆𑀢𑀺 𑀆𑀳 ‘‘𑀧𑀤𑀲𑀫𑁆𑀧𑀢𑁆𑀢𑀺𑀯𑀲𑁂𑀦𑀸’’𑀢𑀺. 𑀅𑀜𑁆𑀜𑁂𑀲𑀁 𑀯𑀼𑀢𑁆𑀢𑀦𑁆𑀢𑀺 𑀧𑀸𑀯𑀘𑀦𑀯𑀲𑁂𑀦 𑀅𑀜𑁆𑀜𑁂𑀲𑀁 𑀯𑀼𑀢𑁆𑀢𑀁. 𑀭𑀸𑀲𑀺𑀓𑀢𑀦𑁆𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀸𑀤𑀺𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀧𑀘𑁆𑀘𑁂𑀓𑀁 𑀫𑀦𑁆𑀢𑀩𑁆𑀭𑀳𑁆𑀫𑀸𑀤𑀺𑀯𑀲𑁂𑀦 𑀅𑀚𑁆𑀛𑀸𑀬𑀸𑀦𑀼𑀯𑀸𑀓𑀸𑀤𑀺𑀯𑀲𑁂𑀦 𑀭𑀸𑀲𑀺𑀓𑀢𑀁. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀪𑀡𑁆𑀟𑁂𑀦 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 𑀲𑀢𑁆𑀢𑀸𑀦𑀁 𑀓𑀫𑁆𑀫𑀲𑁆𑀲𑀓𑀢𑀁, 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀲𑀤𑀺𑀲𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀓𑀧𑁆𑀧𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀦𑁆𑀢𑀚𑁆𑀛𑁂𑀦𑀯𑀺𑀥𑀺𑀜𑁆𑀘 𑀑𑀮𑁄𑀓𑁂𑀢𑁆𑀯𑀸. 𑀧𑀸𑀯𑀘𑀦𑁂𑀦 𑀲𑀳 𑀲𑀁𑀲𑀦𑁆𑀤𑁂𑀢𑁆𑀯𑀸𑀢𑀺 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀬𑀁 𑀯𑀘𑀦𑀁 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀁, 𑀢𑁂𑀦 𑀲𑀳 𑀅𑀯𑀺𑀭𑀼𑀤𑁆𑀥𑀁 𑀓𑀢𑁆𑀯𑀸. 𑀦 𑀳𑀺 𑀢𑁂𑀲𑀁 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑁄 𑀅𑀢𑁆𑀣𑁄 𑀧𑀘𑁆𑀘𑀓𑁆𑀔𑁄 𑀳𑁄𑀢𑀺. 𑀅𑀧𑀭𑀸𑀧𑀭𑁂𑀢𑀺 𑀅𑀝𑁆𑀞𑀓𑀸𑀤𑀻𑀳𑀺 𑀅𑀧𑀭𑀸𑀧𑀭𑁂, 𑀧𑀘𑁆𑀙𑀺𑀫𑀸 𑀑𑀓𑁆𑀓𑀸𑀓𑀭𑀸𑀚𑀓𑀸𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀸. 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀝𑁆𑀞𑀓𑀸𑀤𑀻𑀳𑀺 𑀕𑀦𑁆𑀣𑀺𑀢𑀫𑀦𑁆𑀢𑀧𑀤𑁂𑀲𑀼 𑀓𑀺𑀮𑁂𑀲𑀲𑀦𑁆𑀦𑀺𑀲𑁆𑀲𑀺𑀢𑀧𑀤𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀧𑀤𑁂 𑀧𑀓𑁆𑀔𑀺𑀧𑀦𑀁 𑀓𑀢𑁆𑀯𑀸. 𑀯𑀺𑀭𑀼𑀤𑁆𑀥𑁂 𑀅𑀓𑀁𑀲𑀽𑀢𑀺 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀲𑀼𑀢𑁆𑀢𑀸𑀤𑀻𑀲𑀼 (𑀔𑀼. 𑀦𑀺. 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀲𑀼𑀢𑁆𑀢𑀁) 𑀆𑀕𑀢𑀦𑀬𑁂𑀦𑁂𑀯 𑀲𑀁𑀓𑀺𑀮𑁂𑀲𑀺𑀓𑀢𑁆𑀣𑀤𑀻𑀧𑀦𑀢𑁄 𑀧𑀘𑁆𑀘𑀦𑀻𑀓𑀪𑀽𑀢𑁂 𑀅𑀓𑀁𑀲𑀼.

𑁪𑁨𑁮. 𑀧𑀝𑀺𑀧𑀸𑀝𑀺𑀬𑀸 𑀖𑀝𑀺𑀢𑀸𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀫𑁆𑀩𑀤𑁆𑀥𑀸. 𑀧𑀭𑀫𑁆𑀧𑀭𑀲𑀁𑀲𑀢𑁆𑀢𑀸𑀢𑀺 𑀆𑀤𑀸𑀦𑀺𑀬𑀸𑀬 𑀬𑀝𑁆𑀞𑀺𑀬𑀸 𑀲𑀁𑀲𑀢𑁆𑀢𑀸. 𑀢𑁂𑀦𑀸𑀳 ‘‘𑀬𑀝𑁆𑀞𑀺𑀕𑁆𑀕𑀸𑀳𑀓𑁂𑀦 𑀘𑀓𑁆𑀔𑀼𑀫𑀢𑀸’’𑀢𑀺. 𑀧𑀼𑀭𑀺𑀫𑀲𑁆𑀲𑀸𑀢𑀺 𑀫𑀡𑁆𑀟𑀮𑀸𑀓𑀸𑀭𑁂𑀦 𑀞𑀺𑀢𑀸𑀬 𑀅𑀦𑁆𑀥𑀯𑁂𑀡𑀺𑀬𑀸 𑀲𑀩𑁆𑀩𑀧𑀼𑀭𑀺𑀫𑀲𑁆𑀲 𑀳𑀢𑁆𑀣𑁂𑀦 𑀲𑀩𑁆𑀩𑀧𑀘𑁆𑀙𑀺𑀫𑀲𑁆𑀲 𑀓𑀘𑁆𑀙𑀁 𑀕𑀡𑁆𑀳𑀸𑀧𑁂𑀢𑁆𑀯𑀸. 𑀤𑀺𑀯𑀲𑀫𑁆𑀧𑀻𑀢𑀺 𑀅𑀦𑁂𑀓𑀤𑀺𑀯𑀲𑀫𑁆𑀧𑀺. 𑀘𑀓𑁆𑀔𑀼𑀲𑁆𑀲 𑀅𑀦𑀸𑀕𑀢𑀪𑀯𑀁 𑀜𑀢𑁆𑀯𑀸 𑀬𑀣𑀸𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂𑀬𑁂𑀯 𑀅𑀦𑀼𑀧𑀢𑀺𑀢𑁆𑀯𑀸 𑀅𑀓𑁆𑀓𑀫𑀦𑀁𑀯 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀓𑀳𑀁 𑀘𑀓𑁆𑀔𑀼𑀫𑀸 𑀓𑀳𑀁 𑀫𑀕𑁆𑀕𑁄’’𑀢𑀺 𑀧𑀭𑀺𑀯𑁂𑀤𑀺𑀢𑁆𑀯𑀸.

𑀧𑀸𑀴𑀺𑀆𑀕𑀢𑁂𑀲𑀼 𑀤𑁆𑀯𑀻𑀲𑀽𑀢𑀺 𑀲𑀤𑁆𑀥𑀸 𑀅𑀦𑀼𑀲𑁆𑀲𑀯𑁄𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼. 𑀏𑀯𑀭𑀽𑀧𑁂𑀢𑀺 𑀬𑀣𑀸 𑀲𑀤𑁆𑀥𑀸𑀦𑀼𑀲𑁆𑀲𑀯𑀸, 𑀏𑀯𑀭𑀽𑀧𑁂 𑀏𑀯 𑀧𑀘𑁆𑀘𑀓𑁆𑀔𑀕𑀸𑀳𑀺𑀦𑁄𑀢𑀺 𑀅𑀢𑁆𑀣𑁄. 𑀢𑀬𑁄𑀢𑀺 𑀭𑀼𑀘𑀺𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑁄. 𑀪𑀽𑀢𑀯𑀺𑀧𑀸𑀓𑀸𑀢𑀺 𑀪𑀽𑀢𑀢𑁆𑀣𑀦𑀺𑀝𑁆𑀞𑀸𑀬𑀓𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀓𑀸, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀪𑀽𑀢𑀢𑁆𑀣𑀯𑀺𑀧𑀸𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀲𑀤𑁆𑀥𑀸𑀬𑀺𑀢𑀸𑀤𑀺𑀯𑀢𑁆𑀣𑀽𑀲𑀼. 𑀏𑀓𑀁𑀲𑁂𑀦𑁂𑀯 𑀦𑀺𑀝𑁆𑀞𑀁 𑀕𑀦𑁆𑀢𑀼𑀁 𑀦𑀸𑀮𑀁 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀲𑀤𑁆𑀥𑀸𑀤𑀺𑀕𑁆𑀕𑀸𑀳𑀲𑁆𑀲. 𑀉𑀧𑀭𑀺 𑀧𑀼𑀘𑁆𑀙𑀸𑀬 𑀫𑀕𑁆𑀕𑀁 𑀯𑀺𑀯𑀭𑀺𑀢𑁆𑀯𑀸 𑀞𑀧𑁂𑀲𑀺 𑀲𑀘𑁆𑀘𑀸𑀦𑀼𑀭𑀓𑁆𑀔𑀸𑀬 𑀜𑀸𑀢𑀼𑀓𑀸𑀫𑀢𑀸𑀬 𑀉𑀧𑁆𑀧𑀸𑀤𑀺𑀢𑀢𑁆𑀢𑀸. 𑀧𑀲𑁆𑀲𑀢𑀺 𑀳𑀺 𑀪𑀕𑀯𑀸 𑁋 𑀫𑀬𑀸 ‘‘𑀲𑀘𑁆𑀘𑀫𑀦𑀼𑀭𑀓𑁆𑀔𑀢𑀸…𑀧𑁂… 𑀦𑀺𑀝𑁆𑀞𑀁 𑀕𑀦𑁆𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀘𑁆𑀘𑀸𑀦𑀼𑀭𑀓𑁆𑀔𑀡𑀁 𑀜𑀸𑀢𑀼𑀓𑀸𑀫𑁄 𑀫𑀸𑀡𑀯𑁄 ‘‘𑀓𑀺𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀢𑀲𑁆𑀲 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀘𑁆𑀘𑀸𑀦𑀼𑀩𑁄𑀥𑁂 𑀧𑀼𑀘𑁆𑀙𑀸𑀬 𑀅𑀯𑀲𑀭𑀁 𑀤𑀢𑁆𑀯𑀸 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁂 𑀉𑀧𑀓𑀸𑀭𑀥𑀫𑁆𑀫𑁂 𑀓𑀣𑁂𑀲𑁆𑀲𑀸𑀫𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀧𑀭𑀺 𑀧𑀼𑀘𑁆𑀙𑀸𑀬 𑀫𑀕𑁆𑀕𑀁 𑀯𑀺𑀯𑀭𑀺𑀢𑁆𑀯𑀸 𑀞𑀧𑁂𑀲𑀻’’𑀢𑀺.

𑁪𑁩𑁦. 𑀅𑀢𑁆𑀢𑀸𑀦𑀜𑁆𑀜𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺, 𑀬𑀢𑁄 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 𑁋 ‘‘𑀬𑀁 𑀔𑁄 𑀧𑀦𑀸𑀬𑀫𑀸𑀬𑀲𑁆𑀫𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀕𑀫𑁆𑀪𑀻𑀭𑁄 𑀲𑁄 𑀥𑀫𑁆𑀫𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄’’𑀢𑀺𑀆𑀤𑀺. 𑀮𑀼𑀩𑁆𑀪𑀦𑁆𑀢𑀻𑀢𑀺 𑀮𑁄𑀪𑀦𑀻𑀬𑀸 𑀬𑀣𑀸 ‘‘𑀅𑀧𑀸𑀬𑀕𑀫𑀦𑀻𑀬𑀸’’𑀢𑀺 𑀆𑀳 ‘‘𑀮𑁄𑀪𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀮𑁄𑀪𑀥𑀫𑁆𑀫𑁂𑀲𑀽’’𑀢𑀺. 𑀬𑀣𑀸 𑀯𑀸 𑀭𑀽𑀧𑀸𑀤𑀺𑀥𑀫𑁆𑀫𑀸 𑀮𑁄𑀪𑀦𑀻𑀬𑀸, 𑀏𑀯𑀁 𑀮𑁄𑀪𑁄𑀢𑀺 𑀆𑀳 ‘‘𑀮𑁄𑀪𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀮𑁄𑀪𑀥𑀫𑁆𑀫𑁂𑀲𑀽’’𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀻’’𑀢𑀺 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩; 𑀯𑀺𑀪. 𑁨𑁦𑁩). 𑀏𑀲𑁂 𑀦𑀬𑁄 𑀲𑁂𑀲𑀧𑀤𑀤𑁆𑀯𑀬𑁂𑀧𑀺.

𑁪𑁩𑁨. 𑀦𑀺𑀯𑁂𑀲𑁂𑀢𑀻𑀢𑀺 𑀞𑀧𑁂𑀢𑀺 𑀧𑀝𑁆𑀞𑀧𑁂𑀢𑀺. 𑀧𑀬𑀺𑀭𑀼𑀧𑀸𑀲𑀢𑀻𑀢𑀺 𑀉𑀧𑀝𑁆𑀞𑀸𑀦𑀯𑀲𑁂𑀦 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀢𑀺. 𑀲𑀼𑀬𑁆𑀬𑀢𑀺 𑀏𑀢𑁂𑀦𑀸𑀢𑀺 𑀲𑁄𑀢𑀦𑁆𑀢𑀺 𑀆𑀳 ‘‘𑀧𑀲𑀸𑀤𑀲𑁄𑀢’’𑀦𑁆𑀢𑀺. 𑀢𑀜𑁆𑀳𑀺 𑀲𑀯𑀦𑀸𑀬 𑀑𑀤𑀳𑀺𑀢𑀩𑁆𑀩𑀦𑁆𑀢𑀺. 𑀥𑀸𑀭𑁂𑀢𑀺 𑀲𑀦𑁆𑀥𑀸𑀭𑁂𑀢𑀺 𑀢𑀢𑁆𑀣𑁂𑀯 𑀫𑀦𑀁 𑀞𑀧𑁂𑀢𑀺. 𑀅𑀢𑁆𑀣𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀢𑁄. 𑀓𑀸𑀭𑀡𑀢𑁄𑀢𑀺 𑀬𑀼𑀢𑁆𑀢𑀺𑀢𑁄 𑀳𑁂𑀢𑀼𑀤𑀸𑀳𑀭𑀡𑁂𑀳𑀺 𑀉𑀧𑀧𑀢𑁆𑀢𑀺𑀢𑁄. 𑀑𑀮𑁄𑀓𑀦𑀦𑁆𑀢𑀺 𑀏𑀯𑀫𑁂𑀢𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀤𑀝𑁆𑀞𑀩𑁆𑀩𑀢𑀁 𑀔𑀫𑀦𑁆𑀢𑀺, 𑀢𑀜𑁆𑀘 𑀫𑀳𑀦𑁆𑀢𑀲𑁆𑀲 𑀫𑀡𑀺𑀦𑁄 𑀧𑀚𑁆𑀚𑀮𑀦𑁆𑀢𑀲𑁆𑀲 𑀯𑀺𑀬 𑀆𑀯𑀺𑀓𑀢𑁆𑀯𑀸 𑀅𑀢𑁆𑀣𑀲𑁆𑀲 𑀘𑀺𑀢𑁆𑀢𑁂 𑀉𑀧𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀇𑀥𑀸’’𑀢𑀺𑀆𑀤𑀺. 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄𑀢𑀺 𑀓𑀢𑁆𑀢𑀼𑀓𑀸𑀫𑀢𑀸𑀲𑀗𑁆𑀔𑀸𑀢𑁄 𑀓𑀼𑀲𑀮𑀘𑁆𑀙𑀦𑁆𑀤𑁄. 𑀯𑀸𑀬𑀫𑀢𑀻𑀢𑀺𑀆𑀤𑀺𑀢𑁄 𑀘𑀢𑀼𑀦𑁆𑀦𑀫𑁆𑀧𑀺 𑀯𑀻𑀭𑀺𑀬𑀸𑀦𑀁 𑀯𑀲𑁂𑀦 𑀯𑀸𑀬𑀸𑀫𑀁 𑀧𑀭𑀓𑁆𑀓𑀫𑀁 𑀓𑀭𑁄𑀢𑀺. 𑀫𑀕𑁆𑀕𑀧𑀥𑀸𑀦𑀁 𑀧𑀤𑀳𑀢𑀻𑀢𑀺 𑀫𑀕𑁆𑀕𑀸𑀯𑀳𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀜𑁆𑀘 𑀲𑀫𑁆𑀫𑀧𑁆𑀧𑀥𑀸𑀦𑀁 𑀧𑀤𑀳𑀢𑀺, 𑀧𑀤𑀳𑀦𑀯𑀲𑁂𑀦 𑀢𑀁 𑀧𑀭𑀺𑀧𑀽𑀭𑁂𑀢𑀺. 𑀧𑀭𑀫𑀲𑀘𑁆𑀘𑀦𑁆𑀢𑀺 𑀅𑀫𑁄𑀖𑀥𑀫𑁆𑀫𑀢𑁆𑀢𑀸 𑀧𑀭𑀫𑀢𑁆𑀣𑀲𑀘𑁆𑀘𑀁. 𑀲𑀳𑀚𑀸𑀢𑀦𑀸𑀫𑀓𑀸𑀬𑁂𑀦𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀲𑀳𑀚𑀸𑀢𑀦𑀸𑀫𑀓𑀸𑀬𑁂𑀦. 𑀢𑀤𑁂𑀯𑀸𑀢𑀺 𑀢𑀤𑁂𑀯 𑀧𑀭𑀫𑀲𑀘𑁆𑀘𑀁 𑀦𑀺𑀩𑁆𑀩𑀸𑀦𑀁. 𑀢𑁂𑀦𑁂𑀯𑀸𑀳 𑁋 ‘‘𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦 𑀯𑀺𑀪𑀽𑀢𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀧𑀲𑁆𑀲𑀢𑀻’’𑀢𑀺.

𑁪𑁩𑁩-𑁪. 𑀫𑀕𑁆𑀕𑀸𑀦𑀼𑀩𑁄𑀥𑁄𑀢𑀺 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀩𑁄𑀥𑁄 𑀩𑀼𑀚𑁆𑀛𑀦𑀁, 𑀬𑁂𑀲𑀁 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀫𑀕𑁆𑀕𑀧𑁆𑀧𑀝𑀺𑀯𑁂𑀥𑁄, 𑀢𑁂𑀲𑀁 𑀧𑀝𑀺𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀸𑀫𑀜𑁆𑀜𑀨𑀮𑀁, 𑀫𑀕𑁆𑀕𑁂𑀦 𑀧𑀝𑀺𑀯𑀺𑀤𑁆𑀥𑀸𑀦𑀺 𑀲𑀘𑁆𑀘𑀸𑀦𑀺, 𑀧𑀭𑀫𑀢𑁆𑀣𑀲𑀘𑁆𑀘𑀫𑁂𑀯 𑀯𑀸 𑀅𑀦𑀼𑀭𑀽𑀧𑀩𑀼𑀚𑁆𑀛𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀘𑁆𑀘𑀸𑀦𑀼𑀧𑁆𑀧𑀢𑁆𑀢𑀻𑀢𑀺 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀲𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀲𑀤𑁆𑀥𑀸𑀧𑀝𑀺𑀮𑀸𑀪𑀸𑀤𑀬𑁄 𑀤𑁆𑀯𑀸𑀤𑀲 𑀥𑀫𑁆𑀫𑀸 𑀲𑀘𑁆𑀘𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀓𑀸𑀭𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑁂𑀲𑀁𑀬𑁂𑀯𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀁 𑀤𑁆𑀯𑀸𑀤𑀲𑀦𑁆𑀦’’𑀦𑁆𑀢𑀺. 𑀦𑀸𑀬𑀁 ‘‘𑀢𑁂𑀲𑀁𑀬𑁂𑀯𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄. 𑀲𑀢𑀺𑀧𑀺 𑀓𑀼𑀲𑀮𑀯𑀺𑀧𑀸𑀓𑀸𑀤𑀺𑀪𑀸𑀯𑁂𑀦 𑀦𑀸𑀦𑀢𑁆𑀢𑁂 𑀯𑀢𑁆𑀣𑀸𑀭𑀫𑁆𑀫𑀡𑀪𑀽𑀫𑀺𑀓𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀦 𑀲𑀤𑀺𑀲𑀸𑀢𑀺 𑀉𑀧𑀸𑀬𑀢𑁄𑀯 𑀫𑀕𑁆𑀕𑀥𑀫𑁆𑀫𑀸 𑀆𑀲𑁂𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀨𑀮𑀪𑀽𑀢𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀢𑀁𑀲𑀤𑀺𑀲𑁂 𑀢𑀩𑁆𑀩𑁄𑀳𑀸𑀭𑀁 𑀓𑀢𑁆𑀯𑀸 ‘‘𑀢𑁂𑀲𑀁 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀆𑀲𑁂𑀯𑀦𑀸𑀕𑀳𑀡𑀁 𑀲𑀫𑀢𑁆𑀣𑀺𑀢𑀁, 𑀦 𑀅𑀜𑁆𑀜𑀣𑀸. 𑀦 𑀳𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀦𑀁 𑀫𑀕𑁆𑀕𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀸, 𑀩𑀳𑀼𑀮𑀻𑀓𑀫𑁆𑀫𑀁 𑀯𑀸 𑀅𑀢𑁆𑀣𑀻𑀢𑀺. 𑀢𑀼𑀮𑀦𑀸𑀢𑀺 𑀯𑀺𑀧𑀲𑁆𑀲𑀦𑀸. 𑀲𑀸 𑀳𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀪𑀽𑀢𑀸 𑀫𑀕𑁆𑀕𑀧𑁆𑀧𑀥𑀸𑀦𑀲𑁆𑀲 𑀩𑀳𑀼𑀓𑀸𑀭𑀸 𑀢𑀲𑁆𑀲 𑀅𑀪𑀸𑀯𑁂 𑀫𑀕𑁆𑀕𑀧𑁆𑀧𑀥𑀸𑀦𑀲𑁆𑀲𑁂𑀯 𑀅𑀪𑀸𑀯𑀢𑁄, 𑀏𑀯𑀁 𑀉𑀲𑁆𑀲𑀸𑀳𑁄 𑀢𑀼𑀮𑀦𑀸𑀬 𑀙𑀦𑁆𑀤𑁄 𑀉𑀲𑁆𑀲𑀸𑀳𑀲𑁆𑀲 𑀩𑀳𑀼𑀓𑀸𑀭𑁄𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀺𑀫𑀲𑁆𑀲 𑀉𑀧𑀭𑀺𑀫𑀽𑀧𑀓𑀸𑀭𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀆𑀳 𑁋 ‘‘𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀗𑁆𑀓𑀻𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀏𑀲𑀼𑀓𑀸𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩𑁭. 𑀓𑁄𑀝𑁆𑀞𑀸𑀲𑀦𑁆𑀢𑀺 𑀫𑀁𑀲𑀪𑀸𑀕𑀁. 𑀮𑀕𑁆𑀕𑀸𑀧𑁂𑀬𑁆𑀬𑀼𑀦𑁆𑀢𑀺 𑀦𑁆𑀳𑀸𑀭𑀼𑀦𑀸 𑀯𑀸 𑀯𑀸𑀓𑁂𑀦 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀯𑀸 𑀯𑀲𑀦𑀕𑁂𑀳𑁂 𑀯𑀸 𑀑𑀮𑀫𑁆𑀩𑀦𑀯𑀲𑁂𑀦 𑀩𑀦𑁆𑀥𑁂𑀬𑁆𑀬𑀼𑀁. 𑀲𑀢𑁆𑀣𑀥𑀫𑁆𑀫𑀦𑁆𑀢𑀺 𑀲𑀢𑁆𑀣𑀺𑀓𑁂𑀲𑀼 𑀲𑀢𑁆𑀣𑀯𑀸𑀳𑁂𑀦 𑀧𑀡𑁂𑀢𑀩𑁆𑀩𑀁 𑀆𑀡𑀸𑀥𑀫𑁆𑀫𑀁. 𑀢𑀲𑁆𑀲 𑀦𑀺𑀓𑁆𑀔𑀫𑀦𑀢𑁆𑀣𑀦𑁆𑀢𑀺 𑀢𑀁 𑀫𑀽𑀮𑀁 𑀲𑀢𑁆𑀣𑀺𑀓𑁂𑀳𑀺 𑀦𑀺𑀢𑁆𑀣𑀭𑀡𑀢𑁆𑀣𑀁. 𑀧𑀸𑀧𑀁 𑀅𑀲𑁆𑀲𑀸𑀢𑀺 𑀧𑀭𑀺𑀘𑀭𑀦𑁆𑀢𑀲𑁆𑀲 𑀧𑀸𑀭𑀺𑀘𑀭𑀺𑀬𑀸𑀬 𑀅𑀳𑀺𑀢𑀁𑀯 𑀅𑀲𑁆𑀲. 𑀢𑁂𑀦𑀸𑀳 ‘‘𑀦 𑀲𑁂𑀬𑁆𑀬𑁄’’𑀢𑀺. 𑀉𑀘𑁆𑀘𑀓𑀼𑀮𑀻𑀦𑀸𑀤𑀬𑁄 𑀤𑀼𑀢𑀺𑀬𑀯𑀸𑀭𑀸𑀤𑀻𑀳𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀥 𑀉𑀧𑀥𑀺𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀺𑀬𑀸𑀤𑀺𑀧𑀤𑁂𑀳𑀺 𑀯𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 𑁋 ‘‘𑀧𑀸𑀧𑀺𑀬𑁄𑀢𑀺 𑀧𑀸𑀧𑀓𑁄 𑀮𑀸𑀫𑀓𑁄 𑀅𑀢𑁆𑀢𑀪𑀸𑀯𑁄 𑀅𑀲𑁆𑀲𑀸’’𑀢𑀺. 𑀲𑁂𑀬𑁆𑀬𑀁𑀲𑁄𑀢𑀺 𑀳𑀺𑀢𑀓𑁄𑀝𑁆𑀞𑀸𑀲𑁄, 𑀳𑀺𑀢𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀉𑀘𑁆𑀘𑀓𑀼𑀮𑀻𑀦𑀢𑀸𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀉𑀘𑁆𑀘𑀸𑀓𑀼𑀮𑀻𑀦𑀢𑁆𑀢𑁂𑀦𑀸’’𑀢𑀺. ‘‘𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁫; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫; 𑀉𑀤𑀸. 𑁫𑁩; 𑀅𑀧. 𑀅𑀝𑁆𑀞. 𑁨.𑁭.𑁨𑁦; 𑀩𑀼. 𑀯𑀁. 𑀅𑀝𑁆𑀞. 𑁪.𑁪; 𑀘𑀭𑀺𑀬𑀸. 𑀅𑀝𑁆𑀞. 𑁧.𑀦𑀺𑀤𑀸𑀦𑀓𑀣𑀸; 𑁨.𑀧𑀓𑀺𑀡𑁆𑀡𑀓𑀓𑀣𑀸; 𑀤𑀻. 𑀦𑀺. 𑀝𑀻. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀲𑀁. 𑀦𑀺. 𑀝𑀻. 𑁧.𑁨.𑁧; 𑀅. 𑀦𑀺. 𑀝𑀻. 𑁧.𑁧.𑁧; 𑀯𑀚𑀺𑀭. 𑀝𑀻. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀲𑀸𑀭𑀢𑁆𑀣. 𑀝𑀻. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀦𑁂𑀢𑁆𑀢𑀺. 𑀝𑀻. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸; 𑀫. 𑀦𑀺. 𑀝𑀻. 𑁧.𑁧) 𑀯𑀺𑀬 𑀯𑀡𑁆𑀡𑀲𑀤𑁆𑀤𑁄 𑀇𑀥 𑀧𑀲𑀁𑀲𑀸𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀯𑁂𑀲𑁆𑀲𑁄𑀧𑀺 𑀳𑀺 𑀉𑀴𑀸𑀭𑀯𑀡𑁆𑀡𑁄 𑀳𑁄𑀢𑀻’’𑀢𑀺.

𑁪𑁪𑁦. ‘‘𑀦𑀺𑀭𑀯𑁄 𑀧𑀤𑀲𑀤𑁆𑀤𑁄 𑀲𑁄𑀴𑀸𑀭𑀕𑁄𑀢𑁆𑀢𑀲𑁆𑀲 𑀅𑀓𑀺𑀡𑁆𑀡𑀫𑀢𑁆𑀢𑀺𑀓𑀸𑀧𑀢𑁆𑀢𑁄 𑀢𑀺𑀝𑁆𑀞𑁂𑀬𑁆𑀬 𑀅𑀲𑀗𑁆𑀕𑀘𑀸𑀭𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀪𑀺𑀓𑁆𑀔𑀸 𑀘𑀭𑀺𑀢𑀩𑁆𑀩𑀸𑀯, 𑀅𑀬𑀁 𑀢𑁂𑀲𑀁 𑀓𑀼𑀮𑀥𑀫𑁆𑀫𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑀭𑀺𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸. 𑀲𑀢𑁆𑀢𑀚𑀻𑀯𑁄 𑀲𑀢𑁆𑀢𑀯𑀸𑀡𑀺𑀚𑀓𑁄. 𑀕𑁄𑀧𑁂𑀢𑀺 𑀭𑀓𑁆𑀔𑀢𑀻𑀢𑀺 𑀕𑁄𑀧𑁄, 𑀆𑀭𑀓𑁆𑀔𑀸𑀥𑀺𑀓𑀸𑀭𑁂 𑀦𑀺𑀬𑀼𑀢𑁆𑀢𑁄. 𑀅𑀲𑀦𑁆𑀢𑀺 𑀮𑀽𑀦𑀦𑁆𑀢𑀺 𑀢𑁂𑀦𑀸𑀢𑀺 𑀅𑀲𑀺𑀢𑀁, 𑀮𑀯𑀺𑀢𑁆𑀢𑀁. 𑀯𑀺𑀯𑀺𑀥𑀁 𑀪𑀸𑀭𑀁 𑀆𑀪𑀜𑁆𑀚𑀦𑁆𑀢𑀺 𑀑𑀮𑀫𑁆𑀩𑀦𑁆𑀢𑀺 𑀏𑀢𑁆𑀣𑀸𑀢𑀺 𑀩𑁆𑀬𑀸𑀪𑀗𑁆𑀕𑀻, 𑀓𑀸𑀚𑀁.

𑁪𑁪𑁧. 𑀅𑀦𑀼𑀲𑁆𑀲𑀭𑀢𑁄𑀢𑀺 𑀅𑀦𑀼𑀲𑁆𑀲𑀭𑀡𑀳𑁂𑀢𑀼 𑀓𑀼𑀮𑀯𑀁𑀲𑀸𑀦𑀼𑀲𑁆𑀲𑀭𑀡𑀓𑁆𑀔𑀡𑁂 𑀔𑀢𑁆𑀢𑀺𑀬𑁄𑀢𑀺𑀆𑀤𑀺𑀦𑀸 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀧𑁄𑀭𑀸𑀡𑁂…𑀧𑁂… 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑁂’’𑀢𑀺. 𑀉𑀘𑁆𑀘𑀦𑀻𑀘𑀢𑁆𑀢𑀚𑀸𑀦𑀦𑀢𑁆𑀣𑀜𑁆𑀘 𑀓𑀼𑀮𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀻𑀢𑀺 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑀓𑀫𑁆𑀫𑀼𑀦𑀸 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀲𑀦𑁆𑀥𑀦𑀁 𑀚𑀻𑀯𑀺𑀓𑀁 𑀧𑀜𑁆𑀜𑀧𑁂𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸, 𑀢𑀣𑀸𑀕𑀢𑁄 𑀧𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯 𑀧𑀼𑀭𑀺𑀲𑀲𑁆𑀲 𑀲𑀦𑁆𑀥𑀦𑀁 𑀧𑀜𑁆𑀜𑀧𑁂𑀢𑀺 𑀢𑁂𑀦 𑀲𑀢𑁆𑀢𑀲𑁆𑀲 𑀮𑁄𑀓𑀕𑁆𑀕𑀪𑀸𑀯𑀲𑀺𑀤𑁆𑀥𑀺𑀢𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀲𑀼𑀓𑀸𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁭. 𑀥𑀦𑀜𑁆𑀚𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪𑁫. 𑀭𑀸𑀚𑀕𑀳𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀧𑀩𑁆𑀩𑀢𑀲𑁆𑀲𑀸𑀢𑀺 𑀧𑀡𑁆𑀟𑀯𑀧𑀩𑁆𑀩𑀢𑀁 𑀲𑀦𑁆𑀥𑀸𑀬𑀸𑀳. 𑀭𑀸𑀚𑀕𑀳𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀧𑀩𑁆𑀩𑀢𑀲𑁆𑀲 𑀲𑀫𑀻𑀧𑁂 𑀞𑀺𑀢𑁄 𑀚𑀦𑀧𑀤𑁄 𑀤𑀓𑁆𑀔𑀺𑀡𑀸𑀕𑀺𑀭𑀺. 𑀢𑀡𑁆𑀟𑀼𑀮𑀧𑀼𑀝𑀓𑀸𑀦𑀁 𑀧𑀸𑀮𑀺 𑀏𑀢𑁆𑀣𑀸𑀢𑀺 𑀢𑀡𑁆𑀟𑀼𑀮𑀧𑀸𑀮𑀺. 𑀢𑀲𑁆𑀲 𑀓𑀺𑀭 𑀤𑁆𑀯𑀸𑀭𑀲𑀫𑀻𑀧𑁂 𑀢𑀡𑁆𑀟𑀼𑀮𑀯𑀸𑀡𑀺𑀚𑀸 𑀢𑀡𑁆𑀟𑀼𑀮𑀧𑀲𑀺𑀩𑁆𑀩𑀓𑁂 𑀯𑀺𑀯𑀭𑀺𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀞𑀧𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺, 𑀢𑁂𑀦𑀲𑁆𑀲 ‘‘𑀢𑀡𑁆𑀟𑀼𑀮𑀧𑀸𑀮𑀺𑀤𑁆𑀯𑀸𑀭’’𑀦𑁆𑀢𑀺 𑀲𑀫𑀜𑁆𑀜𑀸 𑀅𑀳𑁄𑀲𑀺. 𑀲𑀩𑁆𑀩𑀫𑁂𑀯 𑀲𑀲𑁆𑀲𑀁 𑀕𑀡𑁆𑀳𑀸𑀢𑀻𑀢𑀺 𑀤𑀮𑀺𑀤𑁆𑀤𑀓𑀲𑁆𑀲𑀓𑀸𑀦𑀁 𑀤𑀺𑀯𑀲𑀧𑀭𑀺𑀩𑁆𑀩𑀬𑀫𑀢𑁆𑀢𑀫𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑀫𑁂𑀯 𑀆𑀬𑀢𑁄 𑀦𑀺𑀧𑁆𑀨𑀦𑁆𑀦𑀁 𑀥𑀜𑁆𑀜𑀁 𑀕𑀡𑁆𑀳𑀸𑀢𑀺. 𑀫𑀦𑁆𑀤𑀲𑀲𑁆𑀲𑀸𑀦𑀻𑀢𑀺 𑀫𑀦𑁆𑀤𑀦𑀺𑀧𑁆𑀨𑀢𑁆𑀢𑀺𑀓𑀸𑀦𑀺 𑀲𑀲𑁆𑀲𑀸𑀦𑀺.

𑁪𑁪𑁬. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀤𑀸𑀲𑀓𑀫𑁆𑀫𑀓𑀭𑀲𑁆𑀲 𑀦𑀺𑀯𑀸𑀲𑀦𑀪𑀢𑁆𑀢𑀯𑁂𑀢𑁆𑀢𑀦𑀸𑀦𑀼𑀧𑁆𑀧𑀤𑀸𑀦𑁂𑀦 𑀫𑀗𑁆𑀕𑀮𑀤𑀺𑀯𑀲𑁂𑀲𑀼 𑀥𑀦𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀦𑀼𑀧𑁆𑀧𑀤𑀸𑀦𑀸𑀤𑀺𑀦𑀸 𑀘 𑀧𑁄𑀲𑁂𑀢𑀩𑁆𑀩𑁄. 𑀫𑀺𑀢𑁆𑀢𑀸𑀫𑀘𑁆𑀘𑀸𑀦𑀁 𑀧𑀺𑀬𑀯𑀘𑀦𑀅𑀢𑁆𑀣𑀘𑀭𑀺𑀬𑀸𑀲𑀫𑀸𑀦𑀢𑁆𑀢𑀢𑀸𑀤𑀺 𑀫𑀺𑀢𑁆𑀢𑀸𑀫𑀘𑁆𑀘𑀓𑀭𑀡𑀻𑀬𑀁 𑀓𑀢𑁆𑀢𑀩𑁆𑀩𑀁, 𑀢𑀣𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀦𑀁. 𑀢𑀢𑁆𑀣 𑀆𑀯𑀸𑀳𑀯𑀺𑀯𑀸𑀳𑀲𑀫𑁆𑀩𑀤𑁆𑀥𑁂𑀦 ‘‘𑀅𑀫𑁆𑀳𑀸𑀓𑀁 𑀇𑀫𑁂’’𑀢𑀺 𑀜𑀸𑀬𑀦𑁆𑀢𑀻𑀢𑀺 𑀜𑀸𑀢𑀻, 𑀫𑀸𑀢𑀸𑀧𑀺𑀢𑀸𑀤𑀺𑀲𑀫𑁆𑀩𑀤𑁆𑀥𑀢𑀸𑀬 𑀲𑀫𑀸𑀦𑀮𑁄𑀳𑀺𑀢𑀸𑀢𑀺 𑀲𑀸𑀮𑁄𑀳𑀺𑀢𑀸. 𑀲𑀫𑁆𑀫𑀸 𑀤𑀤𑀦𑁆𑀢𑁂𑀲𑀼𑀧𑀺 𑀅𑀲𑀚𑁆𑀚𑀦𑀢𑁄 𑀦𑀢𑁆𑀣𑀺 𑀏𑀢𑁂𑀲𑀁 𑀢𑀺𑀣𑀻𑀢𑀺 𑀅𑀢𑀺𑀣𑀺, 𑀢𑁂𑀲𑀁 𑀅𑀢𑁆𑀢𑀦𑀸 𑀲𑀫𑀸𑀦𑀧𑀭𑀺𑀪𑁄𑀕𑀯𑀲𑁂𑀦 𑀅𑀢𑀺𑀣𑀺𑀓𑀭𑀡𑀻𑀬𑀁 𑀓𑀸𑀢𑀩𑁆𑀩𑀁, 𑀅𑀢𑀺𑀣𑀺𑀩𑀮𑀻𑀢𑀺 𑀅𑀢𑁆𑀣𑁄. 𑀜𑀸𑀢𑀓𑀪𑀽𑀢𑀧𑀼𑀩𑁆𑀩𑀸 𑀧𑁂𑀢𑁆𑀢𑀺𑀯𑀺𑀲𑀬𑀁 𑀉𑀧𑀕𑀢𑀸 𑀧𑀼𑀩𑁆𑀩𑀧𑁂𑀢𑀸, 𑀤𑀓𑁆𑀔𑀺𑀡𑁂𑀬𑁆𑀬𑁂𑀲𑀼 𑀓𑀸𑀮𑁂𑀦 𑀓𑀸𑀮𑀁 𑀤𑀸𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀉𑀤𑁆𑀤𑀺𑀲𑀦𑀁 𑀧𑀼𑀩𑁆𑀩𑀧𑁂𑀢𑀓𑀭𑀡𑀻𑀬𑀁, 𑀧𑁂𑀢𑀩𑀮𑀻𑀢𑀺 𑀅𑀢𑁆𑀣𑁄. 𑀕𑀦𑁆𑀥𑀧𑀼𑀧𑁆𑀨𑀯𑀺𑀮𑁂𑀧𑀦𑀚𑀸𑀮𑀸𑀪𑀢𑁆𑀢𑁂𑀳𑀺 𑀓𑀸𑀮𑁂𑀦 𑀓𑀸𑀮𑀁 𑀤𑁂𑀯𑀢𑀸𑀦𑀁 𑀧𑀽𑀚𑀸 𑀤𑁂𑀯𑀢𑀸𑀓𑀭𑀡𑀻𑀬𑀁, 𑀤𑁂𑀯𑀢𑀸𑀩𑀮𑀻𑀢𑀺 𑀅𑀢𑁆𑀣𑁄, 𑀭𑀸𑀚𑀓𑀺𑀘𑁆𑀘𑀓𑀭𑀡𑀁 𑀉𑀧𑀝𑁆𑀞𑀸𑀦𑀁 𑀭𑀸𑀚𑀓𑀭𑀡𑀻𑀬𑀁. 𑀅𑀬𑀫𑁆𑀧𑀺 𑀓𑀸𑀬𑁄𑀢𑀺 𑀅𑀢𑁆𑀢𑀦𑁄 𑀓𑀸𑀬𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑁪𑁪𑁭. 𑀧𑀜𑁆𑀘 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀸𑀦𑀻𑀢𑀺 𑀦𑀺𑀘𑁆𑀘𑀲𑀻𑀮𑀧𑀝𑀺𑀧𑀓𑁆𑀔𑀥𑀫𑁆𑀫𑀸. 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀸 𑀤𑀲 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀸𑀦𑀺. 𑀅𑀥𑀫𑁆𑀫𑀘𑀸𑀭𑀻 𑀏𑀯 𑀯𑀺𑀲𑀫𑀘𑀸𑀭𑀻 𑀓𑀸𑀬𑀯𑀺𑀲𑀫𑀸𑀤𑀺𑀘𑀭𑀡𑀢𑁄𑀢𑀺 𑀯𑀺𑀲𑀫𑀘𑀸𑀭𑀻𑀧𑀤𑀲𑁆𑀲 𑀅𑀢𑁆𑀣𑁄 𑀯𑀺𑀲𑀼𑀁 𑀦 𑀯𑀼𑀢𑁆𑀢𑁄.

𑁪𑁪𑁮-𑁪𑁫𑁩. 𑀑𑀲𑀭𑀦𑁆𑀢𑀺 𑀅𑀧𑀲𑀓𑁆𑀓𑀦𑁆𑀢𑀺, 𑀔𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀭𑀺𑀳𑀸𑀬𑀦𑁆𑀢𑀻’’𑀢𑀺. 𑀅𑀪𑀺𑀲𑀭𑀦𑁆𑀢𑀻𑀢𑀺 𑀅𑀪𑀺𑀯𑀟𑁆𑀠𑀦𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀦𑀸𑀳 ‘‘𑀯𑀟𑁆𑀠𑀦𑁆𑀢𑀻’’𑀢𑀺. 𑀢𑀢𑁆𑀭𑀸𑀢𑀺 𑀩𑁆𑀭𑀳𑁆𑀫𑀮𑁄𑀓𑁂. 𑀅𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀦𑁆𑀦𑀲𑁆𑀲 𑀥𑀦𑀜𑁆𑀚𑀸𑀦𑀺𑀲𑁆𑀲. 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀤𑀸 𑀪𑀕𑀯𑀢𑀸 ‘‘𑀏𑀲𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀢𑁄 𑀧𑀝𑁆𑀞𑀸𑀬. 𑀘𑀢𑀼𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀦𑁆𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂𑀳𑀺 𑀲𑀘𑁆𑀘𑁂𑀳𑀺 𑀯𑀺𑀫𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀧𑀦 𑀢𑀢𑁄 𑀧𑀼𑀩𑁆𑀩𑁂𑀧𑀺 𑀲𑀘𑁆𑀘𑀯𑀺𑀫𑀼𑀢𑁆𑀢𑀁 𑀓𑀣𑀁 𑀦 𑀓𑀣𑁂𑀲𑀺𑀬𑁂𑀯 𑀲𑀘𑁆𑀘𑀯𑀺𑀫𑀼𑀢𑁆𑀢𑀲𑁆𑀲 𑀦𑀺𑀬𑁆𑀬𑀸𑀦𑀲𑁆𑀲 𑀅𑀪𑀸𑀯𑀢𑁄.

𑀥𑀦𑀜𑁆𑀚𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁮. 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫𑁪. 𑀚𑀸𑀢𑀺𑀁 𑀲𑁄𑀥𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀻𑀢𑀺 𑀲𑀳𑀯𑀸𑀲𑀻𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀺𑀭𑀺𑀬𑀸 𑀧𑀭𑀸𑀥𑁂𑀦 𑀯𑀸 𑀅𑀲𑀸𑀭𑀼𑀧𑁆𑀧𑀢𑁆𑀢𑁂𑀦 𑀯𑀸 𑀚𑀸𑀢𑀺𑀬𑀸 𑀉𑀧𑀓𑁆𑀓𑀺𑀮𑁂𑀲𑀁 𑀆𑀲𑀗𑁆𑀓𑀸𑀬 𑀢𑀁 𑀲𑁄𑀥𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀫𑀦𑁆𑀢𑁂 𑀲𑁄𑀥𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀻𑀢𑀺 𑀫𑀦𑁆𑀢𑀯𑀘𑀦𑁂 𑀆𑀘𑀭𑀺𑀬𑀫𑀢𑀺𑀘𑁄𑀤𑀦𑀸𑀬 𑀅𑀜𑁆𑀜𑁂𑀦 𑀯𑀸𑀓𑁆𑀬𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀲𑀁𑀲𑀬𑁂 𑀉𑀧𑁆𑀧𑀦𑁆𑀦𑁂 𑀢𑀁 𑀲𑁄𑀥𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀅𑀦𑁆𑀢𑀭𑀸𑀢𑀺 𑀯𑁂𑀫𑀚𑁆𑀛𑁂, 𑀅𑀜𑁆𑀜𑀢𑁆𑀣𑁂𑀯𑀸 𑀅𑀦𑁆𑀢𑀭𑀸𑀲𑀤𑁆𑀤𑁄𑀢𑀺 𑀢𑀲𑁆𑀲 𑀅𑀜𑁆𑀜𑀸 𑀓𑀣𑀸𑀢𑀺 𑀯𑀘𑀦𑀁 𑀅𑀯𑀕𑀦𑁆𑀢𑀩𑁆𑀩𑀁. 𑀔𑀦𑁆𑀢𑀻𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄 𑀏𑀯 ‘‘𑀲𑀻𑀮𑀯𑀸𑀢𑀺 𑀕𑀼𑀡𑀯𑀸’’𑀢𑀺𑀆𑀳. 𑀢𑁂𑀳𑀺 𑀲𑀻𑀮𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀓𑀸𑀮𑁂𑀧𑀺 ‘‘𑀲𑀻𑀮𑀯𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀧𑀦𑁆𑀦𑀲𑀻𑀮𑀢𑁆𑀢𑀸 𑀯𑀸 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀻𑀮𑀯𑀸𑀢𑀺 𑀕𑀼𑀡𑀯𑀸’’𑀢𑀺. 𑀆𑀘𑀸𑀭𑀲𑀫𑁆𑀧𑀦𑁆𑀦𑁄𑀢𑀺 𑀲𑀸𑀥𑀼 𑀆𑀘𑀸𑀭𑀯𑀢𑁆𑀢𑁄.

𑁪𑁫𑁫. 𑀲𑀺𑀓𑁆𑀔𑀺𑀢𑀸𑀢𑀺 𑀢𑁂𑀯𑀺𑀚𑁆𑀚𑀸𑀦𑀁 𑀲𑀺𑀓𑁆𑀔𑀺𑀢𑀸 𑀢𑀼𑀫𑁆𑀳𑁂, 𑀦 𑀤𑀸𑀦𑀺 𑀢𑀼𑀫𑁆𑀳𑁂𑀳𑀺 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀜𑁆𑀜𑀸𑀢𑀸𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀞𑀺𑀢𑀸.

𑀯𑁂𑀤𑀢𑁆𑀢𑀬𑀲𑀗𑁆𑀔𑀸𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀚𑁆𑀛𑀬𑀦𑁆𑀢𑀻𑀢𑀺 𑀢𑁂𑀯𑀺𑀚𑁆𑀚𑀸. 𑀢𑁂𑀦𑀸𑀳 ‘‘𑀢𑀺𑀯𑁂𑀤𑀸𑀦’’𑀦𑁆𑀢𑀺. 𑀢𑀬𑁄 𑀯𑁂𑀤𑁂 𑀅𑀡𑀦𑁆𑀢𑀺 𑀅𑀚𑁆𑀛𑀬𑀦𑁆𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑀸, 𑀢𑁂𑀲𑀁. 𑀬𑀁 𑀏𑀓𑀁 𑀧𑀤𑀫𑁆𑀧𑀺 𑀅𑀓𑁆𑀔𑀸𑀢𑀁, 𑀢𑀁 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀓𑁂𑀯𑀮𑀺𑀦𑁄 𑀅𑀥𑀺𑀬𑀺𑀦𑁄 𑀅𑀧𑁆𑀧𑀧𑀬𑁄𑀕𑁂𑀦. 𑀦𑀺𑀝𑁆𑀞𑀸𑀕𑀢𑀫𑁆𑀳𑀸𑀢𑀺 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑀸 𑀅𑀫𑁆𑀳𑀸 𑀢𑁂𑀯𑀺𑀚𑁆𑀚𑀸𑀬 𑀲𑀓𑀲𑀫𑀬𑀲𑁆𑀲 𑀓𑀣𑀦𑁂.

𑀫𑀦𑁄𑀓𑀫𑁆𑀫𑀢𑁄 𑀳𑀺 𑀯𑀢𑁆𑀢𑀲𑀫𑁆𑀧𑀤𑀸𑀢𑀺𑀓𑀸𑀭𑀡𑀽𑀧𑀘𑀸𑀭𑁂𑀦𑀸𑀬𑀫𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀆𑀳 𑁋 ‘‘𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺.

𑀔𑀬𑀸𑀢𑀻𑀢𑀦𑁆𑀢𑀺 𑀯𑀟𑁆𑀠𑀺𑀧𑀓𑁆𑀔𑁂 𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀓𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀳𑀺 𑀘𑀦𑁆𑀤𑁄 𑀯𑀟𑁆𑀠𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀔𑀻𑀬𑀢𑀻𑀢𑀺. 𑀯𑀦𑁆𑀤𑀫𑀸𑀦𑀸 𑀚𑀦𑀸 𑀦𑀫𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺.

𑀅𑀢𑁆𑀣𑀤𑀲𑁆𑀲𑀦𑁂𑀦𑀸𑀢𑀺 𑀯𑀺𑀯𑀭𑀡𑁂𑀦 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀮𑁄𑀓𑀲𑁆𑀲 𑀘𑀓𑁆𑀔𑀼 𑀳𑀼𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀁.

𑁪𑁫𑁬. 𑀢𑀺𑀝𑁆𑀞𑀢𑀼 𑀢𑀸𑀯 𑀩𑁆𑀭𑀸𑀳𑁆𑀫𑀡𑀘𑀺𑀦𑁆𑀢𑀸𑀢𑀺 𑁋 ‘‘𑀓𑀺𑀁 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺 𑀉𑀤𑀸𑀳𑀼 𑀪𑀯𑀢𑀺 𑀓𑀫𑁆𑀫𑀼𑀦𑀸’’𑀢𑀺 𑀅𑀬𑀁 𑀩𑁆𑀭𑀸𑀳𑁆𑀫𑀡𑀯𑀺𑀘𑀸𑀭𑁄 𑀢𑀸𑀯 𑀢𑀺𑀝𑁆𑀞𑀢𑀼. 𑀚𑀸𑀢𑀺𑀤𑀲𑁆𑀲𑀦𑀢𑁆𑀣𑀁 𑀢𑀺𑀡𑀭𑀼𑀓𑁆𑀔𑀓𑀻𑀝𑀧𑀝𑀗𑁆𑀕𑀢𑁄 𑀧𑀝𑁆𑀞𑀸𑀬 𑀮𑁄𑀓𑁂 𑀚𑀸𑀢𑀺𑀯𑀺𑀪𑀗𑁆𑀕𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀲𑁆𑀲𑀸𑀫𑀻𑀢𑀺 𑀢𑁂𑀲𑀁 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀁 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀝𑀺𑀚𑀸𑀦𑀸𑀢𑀺. 𑀢𑀢𑁆𑀣 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄𑀢𑀺 𑀇𑀤𑀁 𑀓𑀸𑀭𑀡𑀯𑀘𑀦𑀁, 𑀬𑀲𑁆𑀫𑀸 𑀇𑀫𑀸 𑀚𑀸𑀢𑀺𑀬𑁄 𑀦𑀸𑀫 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀺𑀝𑁆𑀞𑀸, 𑀢𑀲𑁆𑀫𑀸 𑀚𑀸𑀢𑀺𑀯𑀺𑀪𑀗𑁆𑀕𑀁 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻𑀢𑀺.

𑀬𑀲𑁆𑀫𑀸 𑀇𑀥 𑀉𑀧𑀸𑀤𑀺𑀦𑁆𑀦𑀓𑀚𑀸𑀢𑀺 𑀩𑁆𑀬𑀸𑀓𑀸𑀢𑀩𑁆𑀩𑀪𑀸𑀯𑁂𑀦 𑀆𑀕𑀢𑀸, 𑀢𑀲𑁆𑀲𑀸 𑀧𑀦 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀇𑀢𑀭𑀸, 𑀢𑀲𑁆𑀫𑀸 ‘‘𑀚𑀸𑀢𑀺𑀯𑀺𑀪𑀗𑁆𑀕𑀁 𑀧𑀸𑀡𑀸𑀦’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀢𑁂𑀲𑀁 𑀢𑁂𑀲𑀁 𑀧𑀸𑀡𑀸𑀦𑀁 𑀚𑀸𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀦𑀺𑀤𑀲𑁆𑀲𑀦𑀁 𑀓𑀣𑁂𑀢𑁆𑀯𑀸 𑀦𑀺𑀤𑀲𑁆𑀲𑀺𑀢𑀩𑁆𑀩𑁂 𑀓𑀣𑀺𑀬𑀫𑀸𑀦𑁂. 𑀢𑀲𑁆𑀲𑀸𑀢𑀺 𑀯𑀸𑀲𑁂𑀝𑁆𑀞𑀲𑁆𑀲. 𑀓𑀸𑀫𑀁 ‘‘𑀢𑁂𑀲𑀁 𑀯𑁄𑀳𑀁 𑀩𑁆𑀬𑀓𑁆𑀔𑀺𑀲𑁆𑀲’’𑀦𑁆𑀢𑀺 𑀉𑀪𑁄𑀧𑀺 𑀫𑀸𑀡𑀯𑁂 𑀦𑀺𑀲𑁆𑀲𑀸𑀬 𑀤𑁂𑀲𑀦𑀸 𑀆𑀕𑀢𑀸, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 ‘‘𑀏𑀯𑀁, 𑀯𑀸𑀲𑁂𑀝𑁆𑀞, 𑀚𑀸𑀦𑀸𑀳𑀻’’𑀢𑀺𑀆𑀤𑀺𑀦𑀸 𑀯𑀸𑀲𑁂𑀝𑁆𑀞𑀫𑁂𑀯 𑀆𑀮𑀧𑀦𑁆𑀢𑁄 𑀪𑀕𑀯𑀸 𑀢𑀫𑁂𑀯 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀧𑀫𑀼𑀔𑀁 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀲𑀸𑀢𑀺 𑀯𑀸𑀲𑁂𑀝𑁆𑀞𑀲𑁆𑀲𑀸’’𑀢𑀺. 𑀚𑀸𑀢𑀺𑀪𑁂𑀤𑁄 𑀚𑀸𑀢𑀺𑀯𑀺𑀲𑁂𑀲𑁄, 𑀚𑀸𑀢𑀺𑀬𑀸 𑀪𑁂𑀤𑁄 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺 𑀦𑀺𑀤𑀲𑁆𑀲𑀦𑁂𑀦 𑀯𑀺𑀪𑀽𑀢𑀪𑀸𑀯𑀁 𑀆𑀧𑀸𑀤𑀺𑀢𑁂𑀦 𑀧𑀝𑀺𑀜𑁆𑀜𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀪𑀽𑀢𑀪𑀸𑀯𑀸𑀧𑀢𑁆𑀢𑀺𑀢𑁄. 𑀆𑀫 𑀦 𑀯𑀝𑁆𑀝𑀢𑀻𑀢𑀺 𑀓𑀫𑁆𑀫𑀦𑀸𑀦𑀢𑀸𑀬 𑀏𑀯 𑀉𑀧𑀸𑀤𑀺𑀦𑁆𑀦𑀦𑀸𑀦𑀢𑀸𑀬 𑀧𑀝𑀺𑀓𑁆𑀔𑁂𑀧𑀧𑀤𑀫𑁂𑀢𑀁, 𑀦 𑀩𑀻𑀚𑀦𑀸𑀦𑀢𑀸𑀬 𑀅𑀦𑀼𑀧𑀸𑀤𑀺𑀦𑁆𑀦𑀦𑀸𑀦𑀢𑀸𑀬 𑀧𑀝𑀺𑀓𑁆𑀔𑁂𑀧𑀧𑀤𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀢𑀁𑀢𑀁𑀬𑁄𑀦𑀺𑀔𑀺𑀧𑀦𑀫𑀢𑁆𑀢𑀁 𑀓𑀫𑁆𑀫𑀲𑁆𑀲 𑀲𑀸𑀫𑀢𑁆𑀣𑀺𑀬𑀁, 𑀢𑀁𑀢𑀁𑀬𑁄𑀦𑀺𑀦𑀺𑀬𑀢𑀸 𑀧𑀦 𑀬𑁂 𑀯𑀡𑁆𑀡𑀯𑀺𑀲𑁂𑀲𑀸, 𑀢𑁂 𑀢𑀁𑀢𑀁𑀬𑁄𑀦𑀺𑀲𑀺𑀤𑁆𑀥𑀺𑀬𑀸𑀯 𑀲𑀺𑀤𑁆𑀥𑀸 𑀳𑁄𑀦𑁆𑀢𑀻𑀢𑀺 𑀢𑀁 𑀧𑀦 𑀬𑁄𑀦𑀺𑀔𑀺𑀧𑀦𑀓𑀫𑁆𑀫𑀁 𑀢𑀁𑀢𑀁𑀬𑁄𑀦𑀺𑀯𑀺𑀲𑀺𑀝𑁆𑀞-𑀯𑀺𑀲𑁂𑀲𑀸𑀪𑀺𑀪𑀽𑀢𑀸𑀬 𑀧𑀬𑁄𑀕𑀦𑀺𑀧𑁆𑀨𑀢𑁆𑀢𑀺𑀬𑀸, 𑀅𑀲𑀁𑀫𑀼𑀘𑁆𑀙𑀺𑀢𑀸𑀬 𑀏𑀯 𑀯𑀸 𑀧𑀘𑁆𑀘𑀬𑀪𑀽𑀢𑀸𑀬 𑀪𑀯𑀧𑀢𑁆𑀣𑀦𑀸𑀬 𑀅𑀪𑀺𑀲𑀗𑁆𑀔𑀢𑀫𑁂𑀯𑀸𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀯𑀺𑀦𑀸 𑀨𑀮𑀯𑀺𑀲𑁂𑀲𑀸𑀪𑀸𑀯𑀢𑁄 𑀏𑀢𑀁 𑀲𑀫𑀻𑀳𑀺𑀢𑀓𑀫𑁆𑀫𑀁 𑀧𑀢𑁆𑀣𑀦𑀸𑀤𑀻𑀳𑀺 𑀘 𑀪𑀺𑀦𑁆𑀦𑀲𑀢𑁆𑀢𑀺𑀢𑀁 𑀯𑀺𑀲𑀺𑀝𑁆𑀞𑀲𑀸𑀫𑀢𑁆𑀣𑀺𑀬𑀁 𑀯𑀸 𑀆𑀧𑀚𑁆𑀚𑀺𑀢𑁆𑀯𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀯𑀺𑀲𑀺𑀝𑁆𑀞𑀨𑀮𑀦𑀺𑀩𑁆𑀩𑀢𑁆𑀢𑀓𑀁 𑀚𑀸𑀬𑀢𑀺, 𑀏𑀯𑀁 𑀬𑁄𑀦𑀺𑀔𑀺𑀧𑀦𑀢𑀁𑀬𑁄𑀦𑀺𑀦𑀺𑀬𑀢𑀯𑀺𑀲𑁂𑀲𑀸𑀯𑀳𑀢𑀸 𑀳𑁄𑀢𑀻𑀢𑀺. 𑀣𑁂𑀭𑁂𑀦 𑀳𑀺 𑀩𑀻𑀚𑀦𑀸𑀦𑀢𑀸 𑀯𑀺𑀬 𑀓𑀫𑁆𑀫𑀦𑀸𑀦𑀢𑀸𑀧𑀺 𑀉𑀧𑀸𑀤𑀺𑀦𑁆𑀦𑀓𑀦𑀸𑀦𑀢𑀸𑀬 𑀲𑀺𑀬𑀸 𑀦𑀼 𑀔𑁄 𑀧𑀘𑁆𑀘𑀬𑁄𑀢𑀺 𑀘𑁄𑀤𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀬𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀸 𑀓𑀫𑁆𑀫𑀦𑀸𑀦𑀢𑀸 𑀧𑀦 𑀧𑀘𑁆𑀘𑀬𑁄𑀢𑀺 𑀦𑀺𑀘𑁆𑀙𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀸𑀦𑀸𑀯𑀡𑁆𑀡𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀯𑀡𑁆𑀡𑀸. 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀦𑀁 𑀮𑁄𑀓𑁂 𑀅𑀪𑀺𑀜𑁆𑀜𑀸𑀢𑀢𑀺𑀡𑀚𑀸𑀢𑀺𑀪𑀸𑀯𑀢𑁄 𑀯𑀺𑀲𑁂𑀲𑁂𑀦 𑀕𑀬𑁆𑀳𑀢𑀺 𑀅𑀪𑀺𑀜𑁆𑀜𑀸𑀢𑀲𑁄𑀢𑀦𑀬𑁂𑀦. 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄𑀯𑀸𑀢𑀺 𑀅𑀝𑁆𑀞𑀸𑀦𑀧𑀬𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄, 𑀚𑀸𑀢𑀺𑀬𑀸𑀯 𑀩𑁆𑀭𑀸𑀳𑁆𑀫𑀡𑁄 𑀪𑀯𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀦 𑀘 𑀕𑀬𑁆𑀳𑀢𑀻𑀢𑀺 𑀢𑀺𑀡𑀭𑀼𑀓𑁆𑀔𑀸𑀤𑀻𑀲𑀼 𑀯𑀺𑀬 𑀩𑁆𑀭𑀸𑀳𑁆𑀫𑀡𑁂𑀲𑀼 𑀚𑀸𑀢𑀺𑀦𑀺𑀬𑀢𑀲𑁆𑀲 𑀮𑀺𑀗𑁆𑀕𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄, 𑀧𑀺𑀯𑀦𑀪𑀼𑀜𑁆𑀚𑀦𑀓𑀣𑀦𑀳𑀲𑀦𑀸𑀤𑀺𑀓𑀺𑀭𑀺𑀬𑀸𑀬 𑀩𑁆𑀭𑀸𑀳𑁆𑀫𑀡𑀪𑀸𑀯𑁂𑀦 𑀏𑀓𑀦𑁆𑀢𑀺𑀓𑀮𑀺𑀗𑁆𑀕𑀦𑀺𑀬𑀢𑀸𑀬 𑀫𑀦𑁆𑀢𑀚𑁆𑀛𑁂𑀦𑀸𑀤𑀺𑀁 𑀯𑀺𑀦𑀸 𑀅𑀦𑀼𑀧𑀮𑀩𑁆𑀪𑀦𑀢𑁄 𑀘. 𑀯𑀘𑀻𑀪𑁂𑀤𑁂𑀦𑁂𑀯𑀸𑀢𑀺 𑀆𑀳𑀘𑁆𑀘𑀯𑀘𑀦𑁂𑀦𑁂𑀯.