𑁮. 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫𑁪. 𑀚𑀸𑀢𑀺𑀁 𑀲𑁄𑀥𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀻𑀢𑀺 𑀲𑀳𑀯𑀸𑀲𑀻𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀺𑀭𑀺𑀬𑀸 𑀧𑀭𑀸𑀥𑁂𑀦 𑀯𑀸 𑀅𑀲𑀸𑀭𑀼𑀧𑁆𑀧𑀢𑁆𑀢𑁂𑀦 𑀯𑀸 𑀚𑀸𑀢𑀺𑀬𑀸 𑀉𑀧𑀓𑁆𑀓𑀺𑀮𑁂𑀲𑀁 𑀆𑀲𑀗𑁆𑀓𑀸𑀬 𑀢𑀁 𑀲𑁄𑀥𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀫𑀦𑁆𑀢𑁂 𑀲𑁄𑀥𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀻𑀢𑀺 𑀫𑀦𑁆𑀢𑀯𑀘𑀦𑁂 𑀆𑀘𑀭𑀺𑀬𑀫𑀢𑀺𑀘𑁄𑀤𑀦𑀸𑀬 𑀅𑀜𑁆𑀜𑁂𑀦 𑀯𑀸𑀓𑁆𑀬𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀲𑀁𑀲𑀬𑁂 𑀉𑀧𑁆𑀧𑀦𑁆𑀦𑁂 𑀢𑀁 𑀲𑁄𑀥𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀅𑀦𑁆𑀢𑀭𑀸𑀢𑀺 𑀯𑁂𑀫𑀚𑁆𑀛𑁂, 𑀅𑀜𑁆𑀜𑀢𑁆𑀣𑁂𑀯𑀸 𑀅𑀦𑁆𑀢𑀭𑀸𑀲𑀤𑁆𑀤𑁄𑀢𑀺 𑀢𑀲𑁆𑀲 𑀅𑀜𑁆𑀜𑀸 𑀓𑀣𑀸𑀢𑀺 𑀯𑀘𑀦𑀁 𑀅𑀯𑀕𑀦𑁆𑀢𑀩𑁆𑀩𑀁. 𑀔𑀦𑁆𑀢𑀻𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄 𑀏𑀯 ‘‘𑀲𑀻𑀮𑀯𑀸𑀢𑀺 𑀕𑀼𑀡𑀯𑀸’’𑀢𑀺𑀆𑀳. 𑀢𑁂𑀳𑀺 𑀲𑀻𑀮𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀓𑀸𑀮𑁂𑀧𑀺 ‘‘𑀲𑀻𑀮𑀯𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀧𑀦𑁆𑀦𑀲𑀻𑀮𑀢𑁆𑀢𑀸 𑀯𑀸 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀻𑀮𑀯𑀸𑀢𑀺 𑀕𑀼𑀡𑀯𑀸’’𑀢𑀺. 𑀆𑀘𑀸𑀭𑀲𑀫𑁆𑀧𑀦𑁆𑀦𑁄𑀢𑀺 𑀲𑀸𑀥𑀼 𑀆𑀘𑀸𑀭𑀯𑀢𑁆𑀢𑁄.

𑁪𑁫𑁫. 𑀲𑀺𑀓𑁆𑀔𑀺𑀢𑀸𑀢𑀺 𑀢𑁂𑀯𑀺𑀚𑁆𑀚𑀸𑀦𑀁 𑀲𑀺𑀓𑁆𑀔𑀺𑀢𑀸 𑀢𑀼𑀫𑁆𑀳𑁂, 𑀦 𑀤𑀸𑀦𑀺 𑀢𑀼𑀫𑁆𑀳𑁂𑀳𑀺 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀜𑁆𑀜𑀸𑀢𑀸𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀞𑀺𑀢𑀸.

𑀯𑁂𑀤𑀢𑁆𑀢𑀬𑀲𑀗𑁆𑀔𑀸𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀚𑁆𑀛𑀬𑀦𑁆𑀢𑀻𑀢𑀺 𑀢𑁂𑀯𑀺𑀚𑁆𑀚𑀸. 𑀢𑁂𑀦𑀸𑀳 ‘‘𑀢𑀺𑀯𑁂𑀤𑀸𑀦’’𑀦𑁆𑀢𑀺. 𑀢𑀬𑁄 𑀯𑁂𑀤𑁂 𑀅𑀡𑀦𑁆𑀢𑀺 𑀅𑀚𑁆𑀛𑀬𑀦𑁆𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑀸, 𑀢𑁂𑀲𑀁. 𑀬𑀁 𑀏𑀓𑀁 𑀧𑀤𑀫𑁆𑀧𑀺 𑀅𑀓𑁆𑀔𑀸𑀢𑀁, 𑀢𑀁 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀓𑁂𑀯𑀮𑀺𑀦𑁄 𑀅𑀥𑀺𑀬𑀺𑀦𑁄 𑀅𑀧𑁆𑀧𑀧𑀬𑁄𑀕𑁂𑀦. 𑀦𑀺𑀝𑁆𑀞𑀸𑀕𑀢𑀫𑁆𑀳𑀸𑀢𑀺 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑀸 𑀅𑀫𑁆𑀳𑀸 𑀢𑁂𑀯𑀺𑀚𑁆𑀚𑀸𑀬 𑀲𑀓𑀲𑀫𑀬𑀲𑁆𑀲 𑀓𑀣𑀦𑁂.

𑀫𑀦𑁄𑀓𑀫𑁆𑀫𑀢𑁄 𑀳𑀺 𑀯𑀢𑁆𑀢𑀲𑀫𑁆𑀧𑀤𑀸𑀢𑀺𑀓𑀸𑀭𑀡𑀽𑀧𑀘𑀸𑀭𑁂𑀦𑀸𑀬𑀫𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀆𑀳 𑁋 ‘‘𑀢𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀺 𑀆𑀘𑀸𑀭𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺.

𑀔𑀬𑀸𑀢𑀻𑀢𑀦𑁆𑀢𑀺 𑀯𑀟𑁆𑀠𑀺𑀧𑀓𑁆𑀔𑁂 𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀓𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀳𑀺 𑀘𑀦𑁆𑀤𑁄 𑀯𑀟𑁆𑀠𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀔𑀻𑀬𑀢𑀻𑀢𑀺. 𑀯𑀦𑁆𑀤𑀫𑀸𑀦𑀸 𑀚𑀦𑀸 𑀦𑀫𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺.

𑀅𑀢𑁆𑀣𑀤𑀲𑁆𑀲𑀦𑁂𑀦𑀸𑀢𑀺 𑀯𑀺𑀯𑀭𑀡𑁂𑀦 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀮𑁄𑀓𑀲𑁆𑀲 𑀘𑀓𑁆𑀔𑀼 𑀳𑀼𑀢𑁆𑀯𑀸 𑀲𑀫𑀼𑀧𑁆𑀧𑀦𑁆𑀦𑀁.

𑁪𑁫𑁬. 𑀢𑀺𑀝𑁆𑀞𑀢𑀼 𑀢𑀸𑀯 𑀩𑁆𑀭𑀸𑀳𑁆𑀫𑀡𑀘𑀺𑀦𑁆𑀢𑀸𑀢𑀺 𑁋 ‘‘𑀓𑀺𑀁 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺 𑀉𑀤𑀸𑀳𑀼 𑀪𑀯𑀢𑀺 𑀓𑀫𑁆𑀫𑀼𑀦𑀸’’𑀢𑀺 𑀅𑀬𑀁 𑀩𑁆𑀭𑀸𑀳𑁆𑀫𑀡𑀯𑀺𑀘𑀸𑀭𑁄 𑀢𑀸𑀯 𑀢𑀺𑀝𑁆𑀞𑀢𑀼. 𑀚𑀸𑀢𑀺𑀤𑀲𑁆𑀲𑀦𑀢𑁆𑀣𑀁 𑀢𑀺𑀡𑀭𑀼𑀓𑁆𑀔𑀓𑀻𑀝𑀧𑀝𑀗𑁆𑀕𑀢𑁄 𑀧𑀝𑁆𑀞𑀸𑀬 𑀮𑁄𑀓𑁂 𑀚𑀸𑀢𑀺𑀯𑀺𑀪𑀗𑁆𑀕𑀁 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀲𑁆𑀲𑀸𑀫𑀻𑀢𑀺 𑀢𑁂𑀲𑀁 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀁 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀝𑀺𑀚𑀸𑀦𑀸𑀢𑀺. 𑀢𑀢𑁆𑀣 𑀅𑀜𑁆𑀜𑀫𑀜𑁆𑀜𑀸 𑀳𑀺 𑀚𑀸𑀢𑀺𑀬𑁄𑀢𑀺 𑀇𑀤𑀁 𑀓𑀸𑀭𑀡𑀯𑀘𑀦𑀁, 𑀬𑀲𑁆𑀫𑀸 𑀇𑀫𑀸 𑀚𑀸𑀢𑀺𑀬𑁄 𑀦𑀸𑀫 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀺𑀝𑁆𑀞𑀸, 𑀢𑀲𑁆𑀫𑀸 𑀚𑀸𑀢𑀺𑀯𑀺𑀪𑀗𑁆𑀕𑀁 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻𑀢𑀺.

𑀬𑀲𑁆𑀫𑀸 𑀇𑀥 𑀉𑀧𑀸𑀤𑀺𑀦𑁆𑀦𑀓𑀚𑀸𑀢𑀺 𑀩𑁆𑀬𑀸𑀓𑀸𑀢𑀩𑁆𑀩𑀪𑀸𑀯𑁂𑀦 𑀆𑀕𑀢𑀸, 𑀢𑀲𑁆𑀲𑀸 𑀧𑀦 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀇𑀢𑀭𑀸, 𑀢𑀲𑁆𑀫𑀸 ‘‘𑀚𑀸𑀢𑀺𑀯𑀺𑀪𑀗𑁆𑀕𑀁 𑀧𑀸𑀡𑀸𑀦’’𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀢𑁂𑀲𑀁 𑀢𑁂𑀲𑀁 𑀧𑀸𑀡𑀸𑀦𑀁 𑀚𑀸𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀏𑀯𑀦𑁆𑀢𑀺 𑀦𑀺𑀤𑀲𑁆𑀲𑀦𑀁 𑀓𑀣𑁂𑀢𑁆𑀯𑀸 𑀦𑀺𑀤𑀲𑁆𑀲𑀺𑀢𑀩𑁆𑀩𑁂 𑀓𑀣𑀺𑀬𑀫𑀸𑀦𑁂. 𑀢𑀲𑁆𑀲𑀸𑀢𑀺 𑀯𑀸𑀲𑁂𑀝𑁆𑀞𑀲𑁆𑀲. 𑀓𑀸𑀫𑀁 ‘‘𑀢𑁂𑀲𑀁 𑀯𑁄𑀳𑀁 𑀩𑁆𑀬𑀓𑁆𑀔𑀺𑀲𑁆𑀲’’𑀦𑁆𑀢𑀺 𑀉𑀪𑁄𑀧𑀺 𑀫𑀸𑀡𑀯𑁂 𑀦𑀺𑀲𑁆𑀲𑀸𑀬 𑀤𑁂𑀲𑀦𑀸 𑀆𑀕𑀢𑀸, 𑀢𑀣𑀸𑀧𑀺 𑀢𑀢𑁆𑀣 𑀢𑀢𑁆𑀣 ‘‘𑀏𑀯𑀁, 𑀯𑀸𑀲𑁂𑀝𑁆𑀞, 𑀚𑀸𑀦𑀸𑀳𑀻’’𑀢𑀺𑀆𑀤𑀺𑀦𑀸 𑀯𑀸𑀲𑁂𑀝𑁆𑀞𑀫𑁂𑀯 𑀆𑀮𑀧𑀦𑁆𑀢𑁄 𑀪𑀕𑀯𑀸 𑀢𑀫𑁂𑀯 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀧𑀫𑀼𑀔𑀁 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀲𑀸𑀢𑀺 𑀯𑀸𑀲𑁂𑀝𑁆𑀞𑀲𑁆𑀲𑀸’’𑀢𑀺. 𑀚𑀸𑀢𑀺𑀪𑁂𑀤𑁄 𑀚𑀸𑀢𑀺𑀯𑀺𑀲𑁂𑀲𑁄, 𑀚𑀸𑀢𑀺𑀬𑀸 𑀪𑁂𑀤𑁄 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺 𑀦𑀺𑀤𑀲𑁆𑀲𑀦𑁂𑀦 𑀯𑀺𑀪𑀽𑀢𑀪𑀸𑀯𑀁 𑀆𑀧𑀸𑀤𑀺𑀢𑁂𑀦 𑀧𑀝𑀺𑀜𑁆𑀜𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀪𑀽𑀢𑀪𑀸𑀯𑀸𑀧𑀢𑁆𑀢𑀺𑀢𑁄. 𑀆𑀫 𑀦 𑀯𑀝𑁆𑀝𑀢𑀻𑀢𑀺 𑀓𑀫𑁆𑀫𑀦𑀸𑀦𑀢𑀸𑀬 𑀏𑀯 𑀉𑀧𑀸𑀤𑀺𑀦𑁆𑀦𑀦𑀸𑀦𑀢𑀸𑀬 𑀧𑀝𑀺𑀓𑁆𑀔𑁂𑀧𑀧𑀤𑀫𑁂𑀢𑀁, 𑀦 𑀩𑀻𑀚𑀦𑀸𑀦𑀢𑀸𑀬 𑀅𑀦𑀼𑀧𑀸𑀤𑀺𑀦𑁆𑀦𑀦𑀸𑀦𑀢𑀸𑀬 𑀧𑀝𑀺𑀓𑁆𑀔𑁂𑀧𑀧𑀤𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀢𑀁𑀢𑀁𑀬𑁄𑀦𑀺𑀔𑀺𑀧𑀦𑀫𑀢𑁆𑀢𑀁 𑀓𑀫𑁆𑀫𑀲𑁆𑀲 𑀲𑀸𑀫𑀢𑁆𑀣𑀺𑀬𑀁, 𑀢𑀁𑀢𑀁𑀬𑁄𑀦𑀺𑀦𑀺𑀬𑀢𑀸 𑀧𑀦 𑀬𑁂 𑀯𑀡𑁆𑀡𑀯𑀺𑀲𑁂𑀲𑀸, 𑀢𑁂 𑀢𑀁𑀢𑀁𑀬𑁄𑀦𑀺𑀲𑀺𑀤𑁆𑀥𑀺𑀬𑀸𑀯 𑀲𑀺𑀤𑁆𑀥𑀸 𑀳𑁄𑀦𑁆𑀢𑀻𑀢𑀺 𑀢𑀁 𑀧𑀦 𑀬𑁄𑀦𑀺𑀔𑀺𑀧𑀦𑀓𑀫𑁆𑀫𑀁 𑀢𑀁𑀢𑀁𑀬𑁄𑀦𑀺𑀯𑀺𑀲𑀺𑀝𑁆𑀞-𑀯𑀺𑀲𑁂𑀲𑀸𑀪𑀺𑀪𑀽𑀢𑀸𑀬 𑀧𑀬𑁄𑀕𑀦𑀺𑀧𑁆𑀨𑀢𑁆𑀢𑀺𑀬𑀸, 𑀅𑀲𑀁𑀫𑀼𑀘𑁆𑀙𑀺𑀢𑀸𑀬 𑀏𑀯 𑀯𑀸 𑀧𑀘𑁆𑀘𑀬𑀪𑀽𑀢𑀸𑀬 𑀪𑀯𑀧𑀢𑁆𑀣𑀦𑀸𑀬 𑀅𑀪𑀺𑀲𑀗𑁆𑀔𑀢𑀫𑁂𑀯𑀸𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀯𑀺𑀦𑀸 𑀨𑀮𑀯𑀺𑀲𑁂𑀲𑀸𑀪𑀸𑀯𑀢𑁄 𑀏𑀢𑀁 𑀲𑀫𑀻𑀳𑀺𑀢𑀓𑀫𑁆𑀫𑀁 𑀧𑀢𑁆𑀣𑀦𑀸𑀤𑀻𑀳𑀺 𑀘 𑀪𑀺𑀦𑁆𑀦𑀲𑀢𑁆𑀢𑀺𑀢𑀁 𑀯𑀺𑀲𑀺𑀝𑁆𑀞𑀲𑀸𑀫𑀢𑁆𑀣𑀺𑀬𑀁 𑀯𑀸 𑀆𑀧𑀚𑁆𑀚𑀺𑀢𑁆𑀯𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀯𑀺𑀲𑀺𑀝𑁆𑀞𑀨𑀮𑀦𑀺𑀩𑁆𑀩𑀢𑁆𑀢𑀓𑀁 𑀚𑀸𑀬𑀢𑀺, 𑀏𑀯𑀁 𑀬𑁄𑀦𑀺𑀔𑀺𑀧𑀦𑀢𑀁𑀬𑁄𑀦𑀺𑀦𑀺𑀬𑀢𑀯𑀺𑀲𑁂𑀲𑀸𑀯𑀳𑀢𑀸 𑀳𑁄𑀢𑀻𑀢𑀺. 𑀣𑁂𑀭𑁂𑀦 𑀳𑀺 𑀩𑀻𑀚𑀦𑀸𑀦𑀢𑀸 𑀯𑀺𑀬 𑀓𑀫𑁆𑀫𑀦𑀸𑀦𑀢𑀸𑀧𑀺 𑀉𑀧𑀸𑀤𑀺𑀦𑁆𑀦𑀓𑀦𑀸𑀦𑀢𑀸𑀬 𑀲𑀺𑀬𑀸 𑀦𑀼 𑀔𑁄 𑀧𑀘𑁆𑀘𑀬𑁄𑀢𑀺 𑀘𑁄𑀤𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀬𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑀸 𑀓𑀫𑁆𑀫𑀦𑀸𑀦𑀢𑀸 𑀧𑀦 𑀧𑀘𑁆𑀘𑀬𑁄𑀢𑀺 𑀦𑀺𑀘𑁆𑀙𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀸𑀦𑀸𑀯𑀡𑁆𑀡𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀯𑀡𑁆𑀡𑀸. 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀦𑀁 𑀮𑁄𑀓𑁂 𑀅𑀪𑀺𑀜𑁆𑀜𑀸𑀢𑀢𑀺𑀡𑀚𑀸𑀢𑀺𑀪𑀸𑀯𑀢𑁄 𑀯𑀺𑀲𑁂𑀲𑁂𑀦 𑀕𑀬𑁆𑀳𑀢𑀺 𑀅𑀪𑀺𑀜𑁆𑀜𑀸𑀢𑀲𑁄𑀢𑀦𑀬𑁂𑀦. 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄𑀯𑀸𑀢𑀺 𑀅𑀝𑁆𑀞𑀸𑀦𑀧𑀬𑀼𑀢𑁆𑀢𑁄 𑀏𑀯-𑀲𑀤𑁆𑀤𑁄, 𑀚𑀸𑀢𑀺𑀬𑀸𑀯 𑀩𑁆𑀭𑀸𑀳𑁆𑀫𑀡𑁄 𑀪𑀯𑁂𑀬𑁆𑀬𑀸𑀢𑀺 𑀬𑁄𑀚𑀦𑀸. 𑀦 𑀘 𑀕𑀬𑁆𑀳𑀢𑀻𑀢𑀺 𑀢𑀺𑀡𑀭𑀼𑀓𑁆𑀔𑀸𑀤𑀻𑀲𑀼 𑀯𑀺𑀬 𑀩𑁆𑀭𑀸𑀳𑁆𑀫𑀡𑁂𑀲𑀼 𑀚𑀸𑀢𑀺𑀦𑀺𑀬𑀢𑀲𑁆𑀲 𑀮𑀺𑀗𑁆𑀕𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄, 𑀧𑀺𑀯𑀦𑀪𑀼𑀜𑁆𑀚𑀦𑀓𑀣𑀦𑀳𑀲𑀦𑀸𑀤𑀺𑀓𑀺𑀭𑀺𑀬𑀸𑀬 𑀩𑁆𑀭𑀸𑀳𑁆𑀫𑀡𑀪𑀸𑀯𑁂𑀦 𑀏𑀓𑀦𑁆𑀢𑀺𑀓𑀮𑀺𑀗𑁆𑀕𑀦𑀺𑀬𑀢𑀸𑀬 𑀫𑀦𑁆𑀢𑀚𑁆𑀛𑁂𑀦𑀸𑀤𑀺𑀁 𑀯𑀺𑀦𑀸 𑀅𑀦𑀼𑀧𑀮𑀩𑁆𑀪𑀦𑀢𑁄 𑀘. 𑀯𑀘𑀻𑀪𑁂𑀤𑁂𑀦𑁂𑀯𑀸𑀢𑀺 𑀆𑀳𑀘𑁆𑀘𑀯𑀘𑀦𑁂𑀦𑁂𑀯.

𑀓𑀻𑀝𑁂 𑀧𑀝𑀗𑁆𑀕𑁂𑀢𑀺𑀆𑀤𑀻𑀲𑀼 𑀚𑀸𑀢𑀺𑀦𑀸𑀦𑀢𑀸 𑀮𑀩𑁆𑀪𑀢𑀺 𑀅𑀜𑁆𑀜𑀫𑀜𑁆𑀜𑀮𑀺𑀗𑁆𑀕𑀯𑀺𑀲𑀺𑀝𑁆𑀞𑀢𑀸𑀤𑀲𑁆𑀲𑀦𑀸. 𑀓𑀼𑀦𑁆𑀣𑀸 𑀓𑀻𑀝𑀓𑀸, 𑀔𑀚𑁆𑀚𑀔𑀸𑀤𑀓𑀸 𑀓𑀺𑀧𑀺𑀮𑁆𑀮𑀺𑀓𑀸. 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀉𑀟𑁆𑀟𑁂𑀢𑁆𑀯𑀸 𑀉𑀟𑁆𑀟𑁂𑀢𑁆𑀯𑀸. 𑀧𑀝𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀸 𑀧𑀝𑀗𑁆𑀕𑀸, 𑀦 𑀔𑀼𑀤𑁆𑀤𑀓𑀧𑀸𑀡𑀓𑀸 𑀓𑀻𑀝𑀸 𑀦𑀸𑀫. 𑀢𑁂𑀲𑀫𑁆𑀧𑀺 𑀓𑀻𑀝𑀓𑀸𑀦𑀁.

𑀓𑀸𑀴𑀓𑀸𑀤𑀬𑁄𑀢𑀺 𑀓𑀮𑀦𑁆𑀤𑀓𑀸𑀤𑀬𑁄.

𑀉𑀤𑀭𑀁𑀬𑁂𑀯 𑀦𑁂𑀲𑀁 𑀧𑀸𑀤𑀸 𑀉𑀤𑀭𑁂𑀦𑁂𑀯 𑀲𑀫𑁆𑀧𑀚𑁆𑀚𑀦𑀢𑁄.

𑀲𑀜𑁆𑀜𑀸𑀧𑀼𑀩𑁆𑀩𑀓𑁄 𑀯𑀺𑀥𑀺 𑀅𑀦𑀺𑀘𑁆𑀘𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀤𑀓𑁂’’𑀢𑀺 𑀆𑀳 𑀬𑀣𑀸 ‘‘𑀯𑀻𑀭𑀲𑁆𑀲 𑀪𑀸𑀯𑁄 𑀯𑀻𑀭𑀺𑀬’’𑀦𑁆𑀢𑀺.

𑀧𑀢𑁆𑀢𑀲𑀫𑀼𑀤𑀸𑀬𑁂 𑀧𑀓𑁆𑀔𑀲𑀤𑁆𑀤𑁄𑀢𑀺 ‘‘𑀧𑀢𑁆𑀢𑁂𑀳𑀺 𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀅𑀯𑀬𑀯𑀩𑁆𑀬𑀢𑀺𑀭𑁂𑀓𑁂𑀦 𑀲𑀫𑀼𑀤𑀸𑀬𑁄 𑀅𑀢𑁆𑀣𑀺.

𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑁄 ‘‘𑀚𑀸𑀢𑀺𑀯𑀲𑁂𑀦 𑀦𑀸𑀦𑀸’’𑀢𑀺𑀆𑀤𑀺𑀦𑀸. 𑀏𑀢𑁆𑀣 𑀧𑀤𑀢𑁆𑀣𑁂 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀁 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀭𑀸𑀬𑀁 𑀬𑁄𑀚𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀦 𑀳𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀤𑀺𑀲𑀁 𑀲𑀻𑀲𑀁 𑀳𑁄𑀢𑀺, 𑀔𑀢𑁆𑀢𑀺𑀬𑀸𑀦𑀁 𑀏𑀤𑀺𑀲𑀦𑁆𑀢𑀺 𑀦𑀺𑀬𑀫𑁄 𑀅𑀢𑁆𑀣𑀺 𑀬𑀣𑀸 𑀳𑀢𑁆𑀣𑀺𑀅𑀲𑁆𑀲𑀫𑀺𑀕𑀸𑀤𑀻𑀦’’𑀦𑁆𑀢𑀺 𑀇𑀤𑀫𑁂𑀯 𑀯𑀸𑀓𑁆𑀬𑀁 𑀲𑀩𑁆𑀩𑀢𑁆𑀣 𑀦𑁂𑀢𑀩𑁆𑀩𑀁. 𑀢𑀁 𑀲𑀁𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀆𑀳.

𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑀺𑀕𑀫𑀦𑀯𑀘𑀦𑀲𑁆𑀲 𑀅𑀬𑀁 𑀬𑁄𑀚𑀦𑀸 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁪𑁫𑁭. 𑀯𑁄𑀓𑀸𑀭𑀦𑁆𑀢𑀺 𑀯𑁄𑀓𑀭𑀡𑀁, 𑀬𑁂𑀦 𑀯𑀺𑀲𑀺𑀝𑁆𑀞𑀢𑀸𑀬 𑀦 𑀯𑁄𑀓𑀭𑀻𑀬𑀢𑀺 𑀚𑀸𑀢𑀺𑀪𑁂𑀤𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀸𑀦𑀢𑁆𑀢’’𑀦𑁆𑀢𑀺.

𑀕𑁄𑀭𑀓𑁆𑀔𑀸𑀤𑀺𑀉𑀧𑀚𑀻𑀯𑀦𑁂𑀦 𑀆𑀚𑀻𑀯𑀯𑀺𑀧𑀦𑁆𑀦𑁄, 𑀳𑀺𑀁𑀲𑀸𑀤𑀺𑀦𑀸 𑀲𑀻𑀮𑀯𑀺𑀧𑀦𑁆𑀦𑁄, 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀢𑀸𑀤𑀺𑀦𑀸 𑀆𑀘𑀸𑀭𑀯𑀺𑀧𑀦𑁆𑀦𑁄𑀢𑀺. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀯𑀺𑀲𑁂𑀲𑁂 𑀦𑀺𑀯𑀺𑀝𑁆𑀞𑀸 𑀳𑁄𑀢𑀻𑀢𑀺 𑀆𑀳 ‘‘𑀕𑁄𑀭𑀓𑁆𑀔𑀦𑁆𑀢𑀺 𑀔𑁂𑀢𑁆𑀢𑀭𑀓𑁆𑀔’’𑀦𑁆𑀢𑀺. ‘‘𑀕𑁄𑀢𑀺 𑀳𑀺 𑀧𑀣𑀯𑀺𑀬𑀸 𑀦𑀸𑀫’’𑀦𑁆𑀢𑀺. 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 𑀲𑀺𑀧𑁆𑀧𑀁, 𑀢𑀢𑁆𑀣 𑀓𑁄𑀲𑀮𑁆𑀮𑀁. 𑀧𑀭𑁂𑀲𑀁 𑀈𑀲𑀦𑀝𑁆𑀞𑁂𑀦 𑀳𑀺𑀁𑀲𑀦𑀝𑁆𑀞𑁂𑀦 𑀇𑀲𑁆𑀲𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀇𑀲𑁆𑀲𑁄 𑀬𑁄𑀥𑀸𑀚𑀻𑀯𑀺𑀓𑁄, 𑀇𑀲𑁆𑀲𑀲𑁆𑀲 𑀓𑀫𑁆𑀫𑀁 𑀧𑀳𑀭𑀡𑀁, 𑀉𑀲𑀼𑀁 𑀲𑀢𑁆𑀢𑀺𑀜𑁆𑀘 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀸 𑀚𑀻𑀯𑀺𑀓𑀸 𑀇𑀲𑁆𑀲𑀢𑁆𑀢𑀁. 𑀢𑁂𑀦𑀸𑀳 ‘‘𑀆𑀯𑀼𑀥𑀚𑀻𑀯𑀺𑀓’’𑀦𑁆𑀢𑀺. 𑀬𑀁 𑀦𑀺𑀲𑁆𑀲𑀸𑀬 𑀅𑀲𑁆𑀲 𑀚𑀻𑀯𑀺𑀓𑀸, 𑀢𑀤𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀉𑀲𑀼𑀜𑁆𑀘 𑀲𑀢𑁆𑀢𑀺𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁.

𑀩𑁆𑀭𑀳𑁆𑀫𑀁 𑀯𑀼𑀘𑁆𑀘𑀢𑀺 𑀯𑁂𑀤𑁄, 𑀢𑀁 𑀅𑀡𑀢𑀺 𑀚𑀸𑀦𑀸𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀚𑀸𑀦𑀦𑀜𑁆𑀘 𑀧𑁄𑀭𑀸𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀳𑀺𑀢𑀦𑀺𑀬𑀸𑀫𑁂𑀦 𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑁄𑀧𑀲𑀫𑁂𑀦 𑀅𑀦𑀼𑀝𑁆𑀞𑀸𑀦𑀢𑀧𑁂𑀦 𑀬𑀣𑀸 ‘‘𑀆𑀚𑀻𑀯𑀲𑀻𑀮𑀸𑀘𑀸𑀭𑀯𑀺𑀧𑀦𑁆𑀦𑁄 𑀦𑀢𑁆𑀣𑀻’’𑀢𑀺 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑁂𑀳𑀺 𑀮𑁄𑀓𑀺𑀬𑀧𑀡𑁆𑀟𑀺𑀢𑁂𑀳𑀺 𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑁄, 𑀢𑀣𑀸 𑀧𑀝𑀺𑀧𑀚𑁆𑀚𑀦𑀫𑁂𑀯𑀸𑀢𑀺 𑀆𑀳 ‘‘𑀏𑀯𑀁 𑀩𑁆𑀭𑀸𑀳𑁆𑀫𑀡𑀲𑀫𑀬𑁂𑀦…𑀧𑁂… 𑀲𑀸𑀥𑁂𑀢𑁆𑀯𑀸’’𑀢𑀺. 𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀆𑀚𑀻𑀯𑀲𑀻𑀮𑀸𑀘𑀸𑀭𑀯𑀺𑀧𑀦𑁆𑀦𑀲𑁆𑀲 𑀅𑀩𑁆𑀭𑀸𑀳𑁆𑀫𑀡𑀪𑀸𑀯𑁂 𑀲𑀢𑀺 𑀦 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀕𑀼𑀡𑁂𑀳𑀺 𑀧𑀦 𑀆𑀚𑀻𑀯𑀲𑀻𑀮𑀸𑀘𑀸𑀭𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀳𑀺 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀢𑀲𑁆𑀫𑀸 𑀕𑀼𑀡𑀸𑀦𑀁𑀬𑁂𑀯 𑀩𑁆𑀭𑀸𑀳𑁆𑀫𑀡𑀪𑀸𑀯𑀓𑀭𑀡𑀢𑁄 𑀘𑀢𑀼𑀯𑀡𑁆𑀡𑀯𑀺𑀪𑀸𑀕𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀼𑀮𑁂 𑀚𑀸𑀢𑁄 𑀬𑁄 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀢𑀸𑀬 𑀕𑀼𑀡𑀯𑀸, 𑀲𑁄 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀩𑀸𑀳𑀺𑀢𑀧𑀸𑀧𑀢𑀸𑀬 𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀬𑀫𑁂𑀢𑁆𑀣 𑀩𑁆𑀭𑀸𑀳𑁆𑀫𑀡𑀪𑀸𑀯𑁂 𑀜𑀸𑀬𑁄𑀢𑀺, 𑀏𑀯𑀁 𑀜𑀸𑀬𑀁 𑀅𑀢𑁆𑀣𑀢𑁄 𑀆𑀧𑀦𑁆𑀦𑀁 𑀓𑀢𑁆𑀯𑀸. 𑀦𑀦𑁆𑀢𑀺 𑀢𑀫𑁂𑀯 𑀬𑀣𑀸𑀯𑀼𑀢𑁆𑀢𑀁 𑀜𑀸𑀬𑀁. 𑀬𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀁𑀯𑀡𑁆𑀡𑀺𑀢𑀸𑀬𑀸𑀢𑀺 𑀫𑀸𑀢𑀼𑀬𑀸 𑀉𑀪𑀢𑁄𑀲𑀼𑀚𑀸𑀢𑀢𑀸𑀤𑀺𑀓𑀼𑀮𑀯𑀡𑁆𑀡𑁂𑀦 𑀲𑀁𑀯𑀡𑁆𑀡𑀺𑀢𑀸𑀬 𑀧𑀲𑀢𑁆𑀣𑀸𑀬 𑀬𑀣𑀸𑀭𑀽𑀧𑀸𑀬 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀸𑀢𑀸 𑀪𑀯𑀺𑀢𑀼𑀁 𑀬𑀼𑀢𑁆𑀢𑀸, 𑀢𑀣𑀸𑀭𑀽𑀧𑀸𑀬 𑀫𑀸𑀢𑀭𑀺𑀲𑀫𑁆𑀪𑀽𑀢𑁄. 𑀏𑀢𑁂𑀦 𑀘𑀢𑀼𑀦𑁆𑀦𑀁 𑀬𑁄𑀦𑀻𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀺𑀲𑁂𑀲𑀦𑀺𑀝𑁆𑀞𑀸 𑀓𑀢𑀸. 𑀢𑁂𑀦𑀸𑀳 ‘‘𑀢𑀢𑁆𑀭𑀸𑀧𑀺 𑀯𑀺𑀲𑁂𑀲𑁂𑀦𑀸’’𑀢𑀺. 𑀏𑀯𑀁 𑀲𑀸𑀫𑀜𑁆𑀜𑀢𑁄 𑀯𑀺𑀲𑁂𑀲𑀦𑀺𑀝𑁆𑀞𑀸𑀯𑀲𑁂𑀦 ‘‘𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯’’𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀲𑀸𑀫𑀜𑁆𑀜𑀚𑁄𑀢𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀯𑀺𑀲𑁂𑀲𑀚𑁄𑀢𑀦𑀸𑀯𑀲𑁂𑀦𑁂𑀯 𑀅𑀢𑁆𑀣𑀁 𑀯𑀢𑁆𑀢𑀼𑀁 ‘‘𑀬𑀸𑀘𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀲𑀼𑀤𑁆𑀥𑀉𑀧𑁆𑀧𑀢𑁆𑀢𑀺𑀫𑀕𑁆𑀕𑀲𑀗𑁆𑀔𑀸𑀢𑀸 𑀬𑁄𑀦𑀺 𑀯𑀼𑀢𑁆𑀢𑀸𑀢𑀺 𑀅𑀦𑀼𑀧𑀓𑁆𑀓𑀼𑀝𑁆𑀞𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀉𑀧𑁆𑀧𑀢𑁆𑀢𑀺𑀫𑀕𑁆𑀕𑀲𑀗𑁆𑀔𑀸𑀢𑀸 𑀬𑀸 𑀘𑀸𑀬𑀁 𑀬𑁄𑀦𑀺 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁄𑀧𑀺 𑀚𑀸𑀢𑀲𑀫𑁆𑀪𑀽𑀢𑀢𑁆𑀢𑀸𑀢𑀺 𑀢𑀢𑁄 𑀬𑁄𑀦𑀺𑀢𑁄 𑀚𑀸𑀢𑀢𑁆𑀢𑀸 𑀫𑀸𑀢𑀸𑀧𑁂𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀢𑁄 𑀲𑀫𑁆𑀪𑀽𑀢𑀢𑁆𑀢𑀸.

𑀯𑀺𑀲𑀺𑀝𑁆𑀞𑀢𑁆𑀢𑀸𑀢𑀺 𑀲𑀫𑀼𑀤𑀸𑀬𑀪𑀽𑀢𑀸 𑀫𑀦𑀼𑀲𑁆𑀲𑀸 𑀭𑀸𑀕𑀸𑀤𑀺𑀦𑀸 𑀯𑀺𑀲𑀺𑀝𑁆𑀞𑀢𑁆𑀢𑀸. 𑀭𑀸𑀕𑀸𑀤𑀺𑀦𑀸 𑀲𑀳 𑀓𑀺𑀜𑁆𑀘𑀦𑁂𑀦𑀸𑀢𑀺 𑀲𑀓𑀺𑀜𑁆𑀘𑀦𑁄. 𑀢𑀣𑁂𑀯 𑀭𑀸𑀕𑀸𑀤𑀺𑀲𑀗𑁆𑀔𑀸𑀢𑁂𑀦 𑀧𑀮𑀺𑀩𑁄𑀥𑀦𑀝𑁆𑀞𑁂𑀦 𑀲𑀳 𑀧𑀮𑀺𑀩𑁄𑀥𑁂𑀦𑀸𑀢𑀺 𑀲𑀧𑀮𑀺𑀩𑁄𑀥𑁄. 𑀲𑀩𑁆𑀩𑀕𑀳𑀡𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀦𑀸𑀢𑀺 𑀉𑀧𑀸𑀤𑀸𑀦𑀲𑀗𑁆𑀔𑀸𑀢𑀲𑁆𑀲 𑀲𑀩𑁆𑀩𑀲𑁆𑀲 𑀕𑀳𑀡𑀲𑁆𑀲 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁂𑀦. 𑀬𑀲𑁆𑀫𑀸 𑀩𑀸𑀳𑀺𑀢𑀧𑀸𑀧𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀢𑁄 𑀩𑀳𑀺𑀓𑀢𑀧𑀸𑀧𑁄, 𑀢𑀲𑁆𑀫𑀸 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀦𑁆𑀢𑀺 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀏𑀯𑀭𑀽𑀧𑁄 𑀏𑀢𑀺𑀲𑁆𑀲𑀸 𑀓𑀣𑀸𑀬 𑀉𑀧𑀤𑁂𑀲𑁄 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀪𑀢𑁆𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁪𑁫𑁮. 𑀕𑀳𑀺𑀢𑀤𑀡𑁆𑀟𑁂𑀲𑀽𑀢𑀺 𑀧𑀭𑁂𑀲𑀁 𑀤𑀡𑁆𑀟𑁂𑀦 𑀯𑀺𑀳𑁂𑀞𑀦𑀁 𑀅𑀦𑀺𑀥𑀸𑀬 𑀆𑀤𑀺𑀦𑁆𑀦𑀤𑀡𑁆𑀟𑁂𑀲𑀼.

𑁪𑁫𑁯. 𑀓𑀺𑀜𑁆𑀘𑀺 𑀕𑀳𑀡𑀦𑁆𑀢𑀺 𑀢𑀡𑁆𑀳𑀸𑀕𑀸𑀳𑀸𑀤𑀻𑀲𑀼 𑀓𑀺𑀜𑁆𑀘𑀺 𑀕𑀸𑀳𑀁.

𑀬𑁂𑀦 𑀓𑀸𑀫𑀪𑀯𑁂𑀦 𑀫𑀸𑀦𑀼𑀲𑀓𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀬𑀼𑀜𑁆𑀚𑀢𑀺, 𑀢𑀁 𑀫𑀸𑀦𑀼𑀲𑀓𑀁 𑀬𑁄𑀕𑀁. ‘‘𑀫𑀸𑀦𑀼𑀲𑀓𑀁 𑀬𑁄𑀕’’𑀦𑁆𑀢𑀺 𑀏𑀢𑁆𑀣 𑀘 𑀏𑀓𑀤𑁂𑀲𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀏𑀲 𑀦𑀬𑁄 ‘‘𑀤𑀺𑀩𑁆𑀩𑀬𑁄𑀕’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀲𑀩𑁆𑀩𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀧𑀤𑀤𑁆𑀯𑀬𑁂𑀦 𑀯𑀼𑀢𑁆𑀢𑁂𑀳𑀺 𑀲𑀩𑁆𑀩𑀓𑀺𑀮𑁂𑀲𑀬𑁄𑀕𑁂𑀳𑀺 𑀯𑀺𑀧𑁆𑀧𑀬𑀼𑀢𑁆𑀢𑀁.

𑀭𑀢𑀺𑀦𑁆𑀢𑀺 𑀅𑀪𑀺𑀭𑀢𑀺𑀁 𑀆𑀲𑀢𑁆𑀢𑀺𑀁. 𑀓𑀼𑀲𑀮𑀪𑀸𑀯𑀦𑀸𑀬𑀸𑀢𑀺 𑀓𑀸𑀬𑀪𑀸𑀯𑀦𑀸𑀤𑀺 𑀓𑀼𑀲𑀮𑀥𑀫𑁆𑀫𑀪𑀸𑀯𑀦𑀸𑀬 𑀉𑀓𑁆𑀓𑀡𑁆𑀞𑀺𑀢𑀁. 𑀯𑀻𑀭𑀺𑀬𑀯𑀦𑁆𑀢𑀦𑁆𑀢𑀺 𑀯𑀻𑀭𑀺𑀬𑀲𑀩𑁆𑀪𑀸𑀯𑁂𑀦 𑀯𑀻𑀭𑀁 𑀦𑀺𑀤𑁆𑀤𑀺𑀲𑀢𑀺, 𑀯𑀻𑀭𑀪𑀸𑀯𑁄 𑀳𑀺 𑀯𑀻𑀭𑀺𑀬𑀦𑁆𑀢𑀺.

𑀲𑀼𑀦𑁆𑀤𑀭𑀁 𑀞𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀲𑀼𑀦𑁆𑀤𑀭𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀭𑀺𑀬𑀧𑀝𑀺𑀧𑀢𑁆𑀢𑀺𑀬𑀸.

𑀦𑀺𑀩𑁆𑀩𑀢𑁆𑀢𑀺𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀁. 𑀅𑀢𑀻𑀢𑁂𑀢𑀺 𑀅𑀢𑀻𑀢𑀓𑁄𑀝𑁆𑀞𑀸𑀲𑁂. 𑀓𑀺𑀜𑁆𑀘𑀦𑀓𑀸𑀭𑀓𑁄𑀢𑀺 𑀧𑀮𑀺𑀩𑁄𑀥𑀳𑁂𑀢𑀼𑀪𑀽𑀢𑁄.

𑀅𑀲𑁂𑀓𑁆𑀔𑁂 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀓𑁂 𑀫𑀳𑀦𑁆𑀢𑁂 𑀕𑀼𑀡𑁂. 𑀧𑀜𑁆𑀘𑀦𑁆𑀦𑀁 𑀫𑀸𑀭𑀸𑀦𑀁 𑀯𑀺𑀚𑀺𑀢𑀢𑁆𑀢𑀸 𑀯𑀺𑀚𑀺𑀢𑀯𑀺𑀚𑀬𑀁.

𑁪𑁬𑁦. 𑀇𑀤𑀁 𑀅𑀚𑀸𑀦𑀦𑁆𑀢𑀸𑀢𑀺 ‘‘𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀇𑀤𑀁 𑀮𑁄𑀓𑀲𑀫𑀜𑁆𑀜𑀸𑀫𑀢𑁆𑀢𑀦𑁆𑀢𑀺 𑀅𑀚𑀸𑀦𑀦𑁆𑀢𑀸. 𑀬𑁂 𑀩𑁆𑀭𑀸𑀳𑁆𑀫𑀡𑁂𑀲𑀼 𑀦𑀸𑀫𑀕𑁄𑀢𑁆𑀢𑀁 𑀦𑀸𑀫 𑀢𑀢𑀺𑀬𑀁 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀁 𑀚𑀦𑁂𑀦𑁆𑀢𑀺, 𑀲𑀸𑀯 𑀦𑁂𑀲𑀁 𑀤𑀺𑀝𑁆𑀞𑀺. 𑀓𑀢𑀁 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀧𑀭𑀺𑀓𑀧𑁆𑀧𑀦𑀯𑀲𑁂𑀦𑁂𑀯 𑀓𑀢𑀁 𑀞𑀧𑀺𑀢𑀁 𑀢𑀤𑀼𑀧𑀘𑀺𑀢𑀁, 𑀦 𑀳𑁂𑀢𑀼𑀧𑀘𑁆𑀘𑀬𑀲𑀫𑀸𑀬𑁄𑀕𑁂𑀦. 𑀲𑀫𑀼𑀘𑁆𑀘𑀸𑀢𑀺 𑀲𑀫𑁆𑀫𑀼𑀢𑀺𑀬𑀸. 𑀓𑀸 𑀧𑀦 𑀲𑀸 𑀲𑀫𑁆𑀫𑀼𑀢𑀻𑀢𑀺 𑀆𑀳 ‘‘𑀲𑀫𑀜𑁆𑀜𑀸𑀬𑀸’’𑀢𑀺, 𑀮𑁄𑀓𑀲𑀫𑀜𑁆𑀜𑀸𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸 𑀧𑀦 𑀧𑀭𑀫𑀢𑁆𑀣𑀢𑁄 𑀅𑀚𑀸𑀦𑀦𑁆𑀢𑀸𑀦𑀁 𑀦𑀸𑀫𑀕𑁄𑀢𑁆𑀢𑀁 𑀏𑀯𑀁 𑀓𑀧𑁆𑀧𑁂𑀢𑀻𑀢𑀺 𑀆𑀳 ‘‘𑀦𑁄 𑀘𑁂’’𑀢𑀺𑀆𑀤𑀺. 𑀢𑀁 𑀧𑀦 𑀅𑀲𑀦𑁆𑀢𑀫𑁆𑀧𑀺 𑀧𑀭𑀫𑀢𑁆𑀣𑀢𑁄 𑀲𑀦𑁆𑀢𑀢𑀸𑀬𑁂𑀯 𑀅𑀪𑀺𑀦𑀺𑀯𑀺𑀲𑀦𑁆𑀢𑀺, 𑀢𑁂𑀲𑀫𑀬𑀁 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀧𑀓𑀧𑁆𑀧𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀁 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁩𑁩𑁧). 𑀅𑀚𑀸𑀦𑀦𑁆𑀢𑀸 𑀦𑁄𑀢𑀺 𑀏𑀢𑁆𑀣 𑀦𑁄-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄 𑁋 ‘‘𑀦 𑀦𑁄 𑀲𑀫𑀁 𑀅𑀢𑁆𑀣𑀺 𑀢𑀣𑀸𑀕𑀢𑁂𑀦𑀸’’𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁬.𑁩) 𑀯𑀺𑀬𑀸𑀢𑀺 𑀆𑀳 ‘‘𑀅𑀚𑀸𑀦𑀦𑁆𑀢𑀸𑀯 𑀏𑀯𑀁 𑀯𑀤𑀦𑁆𑀢𑀻’’𑀢𑀺.

𑀦𑀺𑀧𑁆𑀧𑀭𑀺𑀬𑀸𑀬𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀉𑀚𑀼𑀓𑀫𑁂𑀯𑀸𑀢𑀺 𑀅𑀢𑁆𑀣𑁄, 𑀦 𑀧𑀼𑀩𑁆𑀩𑁂 𑀯𑀺𑀬 ‘‘𑀬𑁄 𑀳𑀺 𑀓𑁄𑀘𑀻’’𑀢𑀺 𑀧𑀭𑀺𑀬𑀸𑀬𑀯𑀲𑁂𑀦. ‘‘𑀦 𑀚𑀘𑁆𑀘𑀸’’𑀢𑀺 𑀕𑀸𑀣𑀸𑀬 𑀧𑀼𑀩𑁆𑀩𑀤𑁆𑀥𑁂𑀦 𑀚𑀸𑀢𑀺𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀧𑀘𑁆𑀙𑀺𑀫𑀤𑁆𑀥𑁂𑀦 𑀓𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑁄. 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀕𑀸𑀣𑀸𑀬𑀁. 𑀉𑀧𑀟𑁆𑀠𑀕𑀸𑀣𑀸𑀬 𑀯𑀺𑀢𑁆𑀣𑀸𑀭𑀡𑀢𑁆𑀣𑀦𑁆𑀢𑀺 𑀉𑀧𑀟𑁆𑀠𑀕𑀸𑀣𑀸𑀬 𑀅𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑀼𑀁 ‘‘𑀓𑀲𑁆𑀲𑀓𑁄 𑀓𑀫𑁆𑀫𑀼𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀸𑀬 𑀘𑀢𑀽𑀳𑀺 𑀧𑀸𑀤𑁂𑀳𑀺, 𑀧𑀘𑁆𑀙𑀺𑀫𑁂 𑀤𑁆𑀯𑀻𑀳𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀢𑁄 𑀅𑀢𑁆𑀣𑁄 𑀯𑀺𑀢𑁆𑀣𑀸𑀭𑀺𑀢𑁄. 𑀢𑀢𑁆𑀣 𑀓𑀲𑀺𑀓𑀫𑁆𑀫𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀺𑀧𑁆𑀧𑀓𑀫𑁆𑀫𑀯𑀸𑀡𑀺𑀚𑀸𑀤𑀺 𑀲𑀗𑁆𑀕𑀳𑁄.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀥𑀸𑀦𑀯𑀘𑀦𑀯𑀺𑀜𑁆𑀜𑁂𑀬𑁆𑀬𑁄 𑀧𑀘𑁆𑀘𑀬𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀧𑁂𑀓𑁆𑀔𑀸𑀬 𑀳𑁄𑀢𑀻𑀢𑀺 𑀆𑀳 𑁋 ‘‘𑀇𑀫𑀺𑀦𑀸 𑀧𑀘𑁆𑀘𑀬𑁂𑀦 𑀏𑀢𑀁 𑀳𑁄𑀢𑀻’’𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁫𑁭𑁦) 𑀢𑀁𑀲𑀁𑀯𑀡𑁆𑀡𑀦𑀸𑀬𑀜𑁆𑀘 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁫𑁭𑁦) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀲𑀫𑁆𑀫𑀸𑀦𑀸𑀯𑀫𑀸𑀦𑀸𑀭𑀳𑀓𑀼𑀮𑁂𑀢𑀺 𑀲𑀫𑁆𑀫𑀸𑀦𑀸𑀭𑀳𑁂 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑁂, 𑀅𑀯𑀫𑀸𑀦𑀸𑀭𑀳𑁂 𑀘𑀡𑁆𑀟𑀸𑀮𑀸𑀤𑀺𑀓𑀼𑀮𑁂 𑀓𑀫𑁆𑀫𑀯𑀲𑁂𑀦 𑀉𑀧𑀧𑀢𑁆𑀢𑀺 𑀳𑁄𑀢𑀺 𑀓𑀫𑁆𑀫𑀲𑁆𑀲 𑀯𑀺𑀧𑀘𑁆𑀘𑀫𑀸𑀦𑁄𑀓𑀸𑀲𑀓𑀭𑀢𑀸𑀬 𑀯𑀺𑀦𑀸 𑀢𑀸𑀤𑀺𑀲𑀸𑀬 𑀉𑀘𑁆𑀘𑀦𑀻𑀘𑀓𑀼𑀮𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀅𑀟𑁆𑀠𑀤𑀮𑀺𑀤𑁆𑀤𑀢𑀸𑀤𑀺 𑀅𑀜𑁆𑀜𑀸𑀧𑀺 𑀳𑀻𑀦𑀧𑀡𑀻𑀢𑀢𑀸.

𑀓𑀫𑁆𑀫𑀼𑀦𑀸𑀢𑀺 𑀘𑁂𑀢𑁆𑀣 𑀬𑀣𑀸 𑀮𑁄𑀓𑀧𑀚𑀸𑀲𑀢𑁆𑀢𑀲𑀤𑁆𑀤𑁂𑀳𑀺 𑀏𑀓𑁄 𑀏𑀯𑀢𑁆𑀣𑁄 𑀯𑀼𑀢𑁆𑀢𑁄, 𑀏𑀯𑀁 𑀲𑁂𑀲𑀲𑀤𑁆𑀤𑁂𑀳𑀺𑀧𑀺, 𑀅𑀥𑀺𑀧𑁆𑀧𑀸𑀬𑀯𑀺𑀲𑁂𑀲𑁄 𑀧𑀦 𑀢𑀢𑁆𑀣 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑀺𑀫𑀧𑀤𑁂𑀦 𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀸𑀬𑀁 𑀮𑁄𑀓𑁄 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑁄 𑀓𑀫𑁆𑀫𑁂𑀦 𑀉𑀧𑁆𑀧𑀚𑁆𑀚𑀦𑀢𑁄. 𑀦 𑀳𑀺 𑀲𑀦𑁆𑀦𑀺𑀳𑀺𑀢𑀓𑀸𑀭𑀡𑀸𑀦𑀁 𑀨𑀮𑀸𑀦𑀁 𑀅𑀜𑁆𑀜𑁂𑀦 𑀉𑀧𑁆𑀧𑀢𑁆𑀢𑀺𑀤𑀺𑀝𑁆𑀞𑀺 𑀬𑀼𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀺𑀬𑀸 𑀧𑀝𑀺𑀲𑁂𑀥𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀤𑀻𑀲𑀼𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀮𑁄𑀓𑀲𑁆𑀲 𑀧𑀞𑀫𑀼𑀧𑁆𑀧𑀢𑁆𑀢𑀺 𑀦 𑀩𑁆𑀭𑀳𑁆𑀫𑀼𑀦𑀸𑀢𑀺 ‘‘𑀓𑀫𑁆𑀫𑀼𑀦𑀸 𑀳𑀺 𑀢𑀸𑀲𑀼 𑀢𑀸𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑀺𑀬𑁂𑀦 ‘‘𑀅𑀬𑀁 𑀮𑁄𑀓𑁄 𑀆𑀤𑀺𑀢𑁄 𑀧𑀪𑀼𑀢𑀺 𑀧𑀪𑀯𑀓𑀫𑁆𑀫𑀼𑀦𑀸 𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀕𑀫𑁂𑀢𑀺.𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀽𑀘𑀦𑀜𑁆𑀳𑀺 𑀦𑀺𑀕𑀫𑀦𑀁. 𑀢𑀁 𑀧𑀦 𑀦𑀺𑀬𑀫𑀢𑁆𑀣𑀁 𑀳𑁄𑀢𑀻𑀢𑀺 𑀆𑀳 ‘‘𑀓𑀫𑁆𑀫𑁂𑀦𑁂𑀯 𑀩𑀤𑁆𑀥𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀦 𑀅𑀜𑁆𑀜𑀣𑀸’’𑀢𑀺. 𑀘𑀢𑀼𑀢𑁆𑀣𑁂𑀦 𑀧𑀤𑁂𑀦. 𑀬𑀸𑀬𑀢𑁄𑀢𑀺 𑀕𑀘𑁆𑀙𑀢𑁄. 𑀦𑀺𑀩𑁆𑀩𑀢𑁆𑀢𑀢𑁄𑀢𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀲𑁆𑀲. 𑀧𑀯𑀢𑁆𑀢𑀢𑁄𑀢𑀺 𑀧𑀯𑀢𑁆𑀢𑀦𑁆𑀢𑀲𑁆𑀲.

𑀥𑀼𑀢𑀥𑀫𑁆𑀫𑀸 𑀯𑀺𑀲𑁂𑀲𑀢𑁄 𑀢𑀡𑁆𑀳𑀸𑀬 𑀲𑀦𑁆𑀢𑀢𑁆𑀢𑀯𑀲𑁂𑀦 𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀢𑀧𑁂𑀦𑀸𑀢𑀺 𑀥𑀼𑀢𑀗𑁆𑀕𑀢𑀧𑁂𑀦𑀸’’𑀢𑀺. 𑀫𑁂𑀣𑀼𑀦𑀯𑀺𑀭𑀢𑀺 𑀯𑀺𑀲𑁂𑀲𑀢𑁄 𑀩𑁆𑀭𑀸𑀳𑁆𑀫𑀡𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀸 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀩𑁆𑀭𑀳𑁆𑀫𑀘𑀭𑀺𑀬𑁂𑀦𑀸𑀢𑀺 𑀫𑁂𑀣𑀼𑀦𑀯𑀺𑀭𑀢𑀺𑀬𑀸’’𑀢𑀺. 𑀏𑀢𑁂𑀦𑀸𑀢𑀺 𑀇𑀫𑀺𑀦𑀸 ‘‘𑀢𑀧𑁂𑀦𑀸’’𑀢𑀺𑀆𑀤𑀻𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀯𑀼𑀢𑁆𑀢𑁂𑀦. 𑀲𑁂𑀝𑁆𑀞𑁂𑀦𑀸𑀢𑀺 𑀉𑀢𑁆𑀢𑀫𑁂𑀦. 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀺𑀬𑀸 𑀧𑀭𑀺𑀲𑀼𑀤𑁆𑀥𑁂𑀦. 𑀩𑁆𑀭𑀳𑁆𑀫𑀦𑁆𑀢𑀺 𑀩𑁆𑀭𑀳𑁆𑀫𑀪𑀸𑀯𑀁 𑀲𑁂𑀝𑁆𑀞𑀪𑀸𑀯𑀁. 𑀲𑁄 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀩𑁆𑀭𑀸𑀳𑁆𑀫𑀡𑀪𑀸𑀯𑁄𑀢𑀺 𑀆𑀳 ‘‘𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀆𑀯𑀳𑀢𑀻’’𑀢𑀺.

𑀩𑁆𑀭𑀳𑁆𑀫𑀸 𑀘 𑀲𑀓𑁆𑀓𑁄 𑀘𑀸𑀢𑀺 𑀲𑀓𑁆𑀓𑀕𑀭𑀼𑀓𑀸𑀦𑀁 𑀲𑀓𑁆𑀓𑁄 𑀲𑀓𑁆𑀓𑁂𑀦𑀧𑀺 𑀕𑀭𑀼𑀓𑀸𑀢𑀩𑁆𑀩𑀢𑁄, 𑀩𑁆𑀭𑀳𑁆𑀫𑀕𑀭𑀼𑀓𑀸𑀦𑀁 𑀩𑁆𑀭𑀳𑁆𑀫𑀸 𑀩𑁆𑀭𑀳𑁆𑀫𑀼𑀦𑀸𑀧𑀺 𑀕𑀭𑀼𑀓𑀸𑀢𑀩𑁆𑀩𑀢𑁄. 𑀯𑀺𑀚𑀸𑀦𑀢𑀦𑁆𑀢𑀺 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀺𑀲𑁂𑀲𑀁 𑀚𑀸𑀦𑀦𑁆𑀢𑀸𑀦𑀁 𑀯𑀺𑀜𑁆𑀜𑀽𑀦𑀁. 𑀅𑀯𑀺𑀜𑁆𑀜𑀼𑀦𑁄 𑀳𑀺 𑀅𑀧𑁆𑀧𑀫𑀸𑀡𑀁. 𑀢𑁂𑀦𑀸𑀳 𑁋 ‘‘𑀧𑀡𑁆𑀟𑀺𑀢𑀸𑀦’’𑀦𑁆𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.