𑁯. 𑀩𑀳𑀼𑀯𑁂𑀤𑀦𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀧𑀜𑁆𑀘𑀓𑀗𑁆𑀕𑁄𑀢𑀺 𑀯𑀟𑁆𑀠𑀓𑀻𑀓𑀺𑀘𑁆𑀘𑀲𑀸𑀥𑀦𑁂 𑀯𑀸𑀲𑀺𑀆𑀤𑀺𑀧𑀜𑁆𑀘𑀓𑀁 𑀅𑀗𑁆𑀕𑀁 𑀲𑀁𑀥𑀦𑀁 𑀏𑀢𑀲𑁆𑀫𑀺𑀦𑁆𑀢𑀺 𑀧𑀜𑁆𑀘𑀓𑀗𑁆𑀕𑁄. 𑀣𑀫𑁆𑀪𑀸𑀤𑀺𑀯𑀢𑁆𑀣𑀽𑀦𑀁 𑀣𑀧𑀦𑀝𑁆𑀞𑁂𑀦 𑀣𑀧𑀢𑀺. 𑀧𑀡𑁆𑀟𑀺𑀢𑀉𑀤𑀸𑀬𑀺𑀢𑁆𑀣𑁂𑀭𑁄, 𑀦 𑀓𑀸𑀴𑀼𑀤𑀸𑀬𑀻 𑀣𑁂𑀭𑁄.

𑁮𑁯. 𑀧𑀭𑀺𑀬𑀸𑀬𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀯𑀢𑁆𑀢𑁂𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀓𑀸𑀭𑀡𑀁. 𑀯𑁂𑀤𑀦𑀸𑀲𑀦𑁆𑀦𑀺𑀲𑁆𑀲𑀺𑀢𑁄 𑀘 𑀓𑀸𑀬𑀺𑀓𑀘𑁂𑀢𑀲𑀺𑀓𑀪𑀸𑀯𑁄 𑀓𑀸𑀭𑀡𑀁. 𑀢𑁂𑀦𑀸𑀳 𑁋 ‘‘𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀲𑁂𑀦 𑀤𑁆𑀯𑁂 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀢𑀢𑁆𑀣 𑀧𑀲𑀸𑀤𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀸 𑀓𑀸𑀬𑀺𑀓𑀸, 𑀘𑁂𑀢𑁄𑀲𑀦𑁆𑀦𑀺𑀲𑁆𑀲𑀺𑀢𑀸 𑀘𑁂𑀢𑀲𑀺𑀓𑀸. 𑀲𑀼𑀔𑀸𑀤𑀺𑀯𑀲𑁂𑀦 𑀢𑀺𑀲𑁆𑀲𑁄𑀢𑀺 𑀏𑀢𑁆𑀣 𑀲𑀼𑀔𑀦𑀤𑀼𑀓𑁆𑀔𑀦𑀼𑀧𑁂𑀓𑁆𑀔𑀦𑀸𑀦𑀺 𑀲𑀼𑀔𑀸𑀤𑀺𑀯𑁂𑀤𑀦𑀸𑀬 𑀓𑀸𑀭𑀡𑀁. 𑀢𑀸𑀦𑀺 𑀳𑀺 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀓𑀢𑁆𑀯𑀸 𑀢𑀢𑁆𑀣 𑀲𑀼𑀔𑀸𑀤𑀺𑀲𑀤𑁆𑀤𑀧𑁆𑀧𑀯𑀢𑁆𑀢𑀺, 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁 𑀓𑀸𑀭𑀡𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀉𑀧𑀯𑀺𑀘𑀸𑀭𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀁 𑀉𑀧𑁂𑀘𑁆𑀘 𑀲𑀯𑀺𑀲𑁂𑀲𑀧𑀯𑀢𑁆𑀢𑀺𑀯𑀲𑁂𑀦. 𑀬𑀲𑁆𑀫𑀺𑀜𑁆𑀳𑀺 𑀆𑀭𑀫𑁆𑀫𑀡𑁂 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀧𑀯𑀢𑁆𑀢𑀢𑀺, 𑀆𑀭𑀫𑁆𑀫𑀡𑀢𑀸𑀬 𑀢𑀁 𑀉𑀧𑀕𑀦𑁆𑀢𑁆𑀯𑀸 𑀇𑀢𑀭𑀯𑁂𑀤𑀦𑀸𑀳𑀺 𑀯𑀺𑀲𑀺𑀝𑁆𑀞𑀢𑀸𑀬 𑀲𑀯𑀺𑀲𑁂𑀲𑀁 𑀢𑀢𑁆𑀣 𑀧𑀯𑀢𑁆𑀢𑀺. 𑀢𑁂𑀦𑀸𑀳 ‘‘𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀻’’𑀢𑀺. 𑀏𑀲 𑀦𑀬𑁄 𑀲𑁂𑀲𑀯𑁂𑀤𑀦𑀸𑀲𑀼 𑀕𑁂𑀳𑀲𑁆𑀲𑀺𑀢𑀸𑀦𑀻𑀢𑀺 𑀕𑁂𑀳𑀦𑀺𑀲𑁆𑀲𑀺𑀢𑀸𑀦𑀺.

𑁯𑁦. 𑀧𑀭𑀺𑀬𑀸𑀬𑁂𑀦𑀸𑀢𑀺 ‘‘𑀇𑀤𑀫𑁂𑀢𑁆𑀣 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀯𑀤𑀸𑀫𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀓𑀸𑀫𑀜𑁆𑀘𑁂𑀢𑁆𑀣 𑀲𑀼𑀢𑁆𑀢𑁂 𑁋 ‘‘𑀤𑁆𑀯𑁂𑀧𑀸𑀦𑀦𑁆𑀤, 𑀯𑁂𑀤𑀦𑀸 𑀯𑀼𑀢𑁆𑀢𑀸’’𑀢𑀺 𑀤𑁆𑀯𑁂 𑀆𑀤𑀺𑀁 𑀓𑀢𑁆𑀯𑀸 𑀯𑁂𑀤𑀦𑀸 𑀤𑀲𑁆𑀲𑀺𑀢𑀸, 𑀏𑀓𑀸𑀧𑀺 𑀧𑀦 𑀤𑀲𑁆𑀲𑀺𑀢𑀸 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄. 𑀉𑀧𑀢𑁆𑀣𑀫𑁆𑀪𑁂𑀢𑀼𑀦𑁆𑀢𑀺 𑀏𑀓𑀸𑀧𑀺 𑀯𑁂𑀤𑀦𑀸 𑀯𑀼𑀢𑁆𑀢𑀸 𑀫𑀬𑀸 𑀧𑀭𑀺𑀬𑀸𑀬𑁂𑀦, 𑀏𑀯𑀁 𑀲𑀢𑀺 𑀤𑁆𑀯𑁂𑀧𑀺 𑀯𑀢𑁆𑀢𑀩𑁆𑀩𑀸𑀢𑀺 𑀏𑀯𑀁 𑀢𑀲𑁆𑀲 𑀯𑀸𑀤𑀁 𑀉𑀧𑀢𑁆𑀣𑀫𑁆𑀪𑁂𑀢𑀼𑀁. 𑀓𑀣𑀁 𑀧𑀦 𑀏𑀓𑀸 𑀯𑁂𑀤𑀦𑀸 𑀯𑀼𑀢𑁆𑀢𑀸𑀢𑀺? 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀇𑀤𑀫𑁂𑀢𑁆𑀣 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀯𑀤𑀸𑀫𑀻𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀇𑀢𑀺𑀯𑀼𑀢𑁆𑀢𑀓𑀯𑀡𑁆𑀡𑀦𑀸𑀬𑀁 (𑀇𑀢𑀺𑀯𑀼. 𑀅𑀝𑁆𑀞. 𑁫𑁨 𑀆𑀤𑀬𑁄) 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀁 𑀧𑀦𑁂𑀢𑁆𑀣 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑁂 𑀅𑀭𑀽𑀧𑁂𑀲𑀼 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑁂 𑀲𑀼𑀔𑀁 𑀉𑀤𑁆𑀥𑀢𑀦𑁆𑀢𑀺 𑀆𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀲𑀦𑁆𑀢𑀝𑁆𑀞𑁂𑀦𑀸𑀢𑀺 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀯𑀽𑀧𑀲𑀦𑁆𑀢𑀪𑀸𑀯𑁂𑀦. 𑀧𑀡𑀻𑀢𑀝𑁆𑀞𑁂𑀦𑀸𑀢𑀺 𑀪𑀸𑀯𑀦𑀸𑀯𑀺𑀲𑁂𑀲𑀯𑀺𑀲𑀺𑀝𑁆𑀞𑁂𑀦 𑀅𑀢𑀧𑁆𑀧𑀓𑀪𑀸𑀯𑁂𑀦𑁂𑀯 𑀲𑁂𑀝𑁆𑀞𑀪𑀸𑀯𑁂𑀦 𑀘, 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀥𑀸𑀦𑀪𑀸𑀯𑀁 𑀦𑀻𑀢𑀦𑁆𑀢𑀺𑀧𑀺 𑀧𑀡𑀻𑀢𑀁. 𑀯𑁂𑀤𑀬𑀺𑀢𑀲𑀼𑀔𑀁 𑀦𑀸𑀫 𑀯𑁂𑀤𑀦𑀸𑀪𑀽𑀢𑀁 𑀲𑀼𑀔𑀦𑁆𑀢𑀺 𑀓𑀢𑁆𑀯𑀸. 𑀅𑀯𑁂𑀤𑀬𑀺𑀢𑀲𑀼𑀔𑀁 𑀦𑀸𑀫 𑀬𑀸𑀯𑀢𑀸 𑀦𑀺𑀤𑁆𑀤𑀼𑀓𑁆𑀔𑀢𑀸, 𑀢𑀸𑀯𑀢𑀸 𑀲𑀼𑀔𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.𑀅𑀣 𑀯𑀸 𑀦𑀺𑀭𑁄𑀥𑁄 𑀲𑀼𑀝𑁆𑀞𑀼 𑀔𑀸𑀤𑀢𑀺 𑀔𑀦𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀸𑀩𑀸𑀥𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺 𑀲𑀢𑁆𑀢𑀸𑀳𑀫𑁆𑀧𑀺 𑀢𑀢𑁆𑀣 𑀤𑀼𑀓𑁆𑀔𑀲𑁆𑀲 𑀦𑀺𑀭𑀼𑀚𑁆𑀛𑀦𑀢𑁄. 𑀢𑁂𑀦𑀸𑀳 ‘‘𑀦𑀺𑀤𑁆𑀤𑀼𑀓𑁆𑀔𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀼𑀔𑀝𑁆𑀞𑁂𑀦𑀸’’𑀢𑀺.

𑁯𑁧. 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀪𑀯𑁂, 𑀘𑀺𑀢𑁆𑀢𑀼𑀧𑁆𑀧𑀸𑀤𑁂, 𑀅𑀯𑀢𑁆𑀣𑀸𑀬 𑀯𑀸 𑀦𑀺𑀤𑁆𑀤𑀼𑀓𑁆𑀔𑀪𑀸𑀯𑁄, 𑀤𑀼𑀓𑁆𑀔𑀲𑁆𑀲 𑀧𑀝𑀺𑀧𑀓𑁆𑀔𑀢𑀸 𑀅𑀦𑀼𑀧𑀮𑀩𑁆𑀪𑀦𑁂𑀦 𑀤𑀼𑀓𑁆𑀔𑀯𑀺𑀯𑀺𑀢𑁆𑀢𑀁, 𑀢𑀁 𑀲𑀼𑀔𑀲𑁆𑀫𑀺𑀁𑀬𑁂𑀯 𑀧𑀜𑁆𑀜𑀧𑁂𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀩𑀳𑀼𑀯𑁂𑀤𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.