𑁧𑁦. 𑀅𑀧𑀡𑁆𑀡𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀦𑀸𑀦𑀸𑀯𑀺𑀥𑀸𑀢𑀺 𑀦𑀸𑀦𑀸𑀯𑀺𑀥𑀤𑀺𑀝𑁆𑀞𑀺𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑁂𑀦 𑀲𑀫𑀡𑀸, 𑀚𑀸𑀢𑀺𑀫𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑀸 𑀘. 𑀤𑀲𑁆𑀲𑀦𑀦𑁆𑀢𑀺 𑀤𑀺𑀝𑁆𑀞𑀺. 𑀕𑀳𑀺𑀢𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑁆𑀲 𑀕𑀳𑀺𑀢𑀁. 𑀇𑀢𑀺 𑀢𑁂 𑀅𑀢𑁆𑀢𑀦𑁄 𑀤𑀲𑁆𑀲𑀦𑀁 𑀕𑀳𑁂𑀢𑀼𑀓𑀸𑀫𑀸 𑀧𑀼𑀘𑁆𑀙𑀦𑁆𑀢𑀺. 𑀯𑀺𑀦𑀸 𑀤𑀲𑁆𑀲𑀦𑁂𑀦 𑀮𑁄𑀓𑁄 𑀦 𑀦𑀺𑀬𑁆𑀬𑀸𑀢𑀻𑀢𑀺 𑀯𑀺𑀫𑁄𑀓𑁆𑀔𑀪𑀸𑀯𑀦𑀸𑀬 𑀏𑀓𑁂𑀦 𑀤𑀲𑁆𑀲𑀦𑁂𑀦 𑀯𑀺𑀦𑀸 𑀮𑁄𑀓𑁄 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀦 𑀦𑀺𑀕𑀘𑁆𑀙𑀢𑀺. 𑀏𑀓𑀤𑀺𑀝𑁆𑀞𑀺𑀬𑀫𑁆𑀧𑀺 𑀧𑀢𑀺𑀝𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼 𑀲𑀤𑁆𑀥𑀸𑀓𑀸𑀭𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑁂 𑀇𑀫𑀸𑀬 𑀤𑁂𑀲𑀦𑀸𑀬 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀬𑀲𑁆𑀫𑀸 𑀅𑀯𑀺𑀧𑀭𑀻𑀢𑁂 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀲𑀤𑁆𑀥𑀸 ‘‘𑀆𑀓𑀸𑀭𑀯𑀢𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀬𑁄 𑀮𑁄𑀓𑁂 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀸, 𑀅𑀬𑀫𑁂𑀯𑁂𑀲𑀸𑀢𑀺 𑀧𑀯𑀢𑁆𑀢𑀸 𑀫𑀕𑁆𑀕𑀲𑀸𑀥𑀦𑀕𑀢𑀸𑀬 𑀲𑀤𑁆𑀥𑀸𑀬 𑀓𑀸𑀭𑀡𑀪𑀸𑀯𑀢𑁄 𑀢𑀦𑁆𑀦𑀺𑀲𑁆𑀲𑀬𑀸 𑀲𑀤𑁆𑀥𑀸, 𑀲𑀸 𑀆𑀓𑀸𑀭𑀯𑀢𑀻𑀢𑀺 𑀯𑀼𑀢𑁆𑀢𑀸. 𑀅𑀯𑀢𑁆𑀣𑀼𑀲𑁆𑀫𑀺𑀜𑁆𑀳𑀺 𑀲𑀤𑁆𑀥𑀸 𑀅𑀬𑀼𑀢𑁆𑀢𑀓𑀸𑀭𑀡𑀢𑀸𑀬 𑀦 𑀆𑀓𑀸𑀭𑀯𑀢𑀻. 𑀆𑀓𑀸𑀭𑀯𑀢𑀻𑀢𑀺 𑀏𑀢𑁆𑀣 𑀯𑀢𑀻-𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀅𑀢𑁆𑀣𑀺𑀢𑀸𑀫𑀢𑁆𑀢𑀤𑀻𑀧𑀓𑁄, 𑀅𑀣 𑀔𑁄 𑀅𑀢𑀺𑀲𑀬𑀢𑁆𑀣𑀤𑀻𑀧𑀓𑁄 𑀧𑀸𑀲𑀁𑀲𑀢𑁆𑀣𑀤𑀻𑀧𑀓𑁄 𑀯𑀸 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀆𑀓𑀸𑀭𑀯𑀢𑀻𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀯𑀲𑁂𑀦 𑀅𑀢𑀺𑀲𑀬𑀓𑀸𑀭𑀡𑀯𑀢𑀻𑀢𑀺 𑀯𑀸 𑀧𑀸𑀲𑀁𑀲𑀓𑀸𑀭𑀡𑀯𑀢𑀻𑀢𑀺 𑀯𑀸 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀧𑀡𑁆𑀡𑀓𑁄𑀢𑀺 𑀏𑀢𑁆𑀣 𑀬𑀣𑀸 𑀓𑀜𑁆𑀘𑀺 𑀅𑀢𑁆𑀣𑀁 𑀲𑀸𑀥𑁂𑀢𑀼𑀁 𑀆𑀭𑀤𑁆𑀥𑀲𑁆𑀲 𑀧𑀬𑁄𑀕𑁄 𑀯𑀺𑀭𑀤𑁆𑀥𑁄, 𑀢𑀢𑁆𑀣 𑀅𑀓𑀸𑀭𑀓𑁄 𑀯𑀺𑀬 𑀳𑁄𑀢𑀺 𑀧𑀼𑀦𑀧𑀺 𑀆𑀭𑀪𑀺𑀢𑀩𑁆𑀩𑀢𑀸𑀬. 𑀅𑀯𑀺𑀭𑀤𑁆𑀥𑁄 𑀧𑀦 𑀅𑀢𑁆𑀣𑀲𑁆𑀲 𑀲𑀸𑀥𑀦𑀢𑁄 𑀅𑀧𑀡𑁆𑀡𑀓𑁄, 𑀏𑀯𑀁 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀏𑀓𑀁𑀲𑀢𑁄 ‘‘𑀅𑀧𑀡𑁆𑀡𑀓𑁄’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀯𑀺𑀭𑀤𑁆𑀥𑁄 𑀅𑀤𑁆𑀯𑁂𑀚𑁆𑀛𑀕𑀸𑀫𑀻 𑀏𑀓𑀁𑀲𑀕𑀸𑀳𑀺𑀓𑁄’’𑀢𑀺.

𑁯𑁪. 𑀢𑀩𑁆𑀩𑀺𑀧𑀘𑁆𑀘𑀦𑀻𑀓𑀪𑀽𑀢𑀸𑀢𑀺 𑀢𑀲𑁆𑀲𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀦𑀻𑀓𑀪𑀽𑀢𑀸.

𑁯𑁫. 𑀦𑁂𑀲𑀦𑁆𑀢𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁. 𑀅𑀓𑀼𑀲𑀮𑀢𑁄 𑀦𑀺𑀓𑁆𑀔𑀦𑁆𑀢𑀪𑀸𑀯𑁂𑀢𑀺 𑀅𑀲𑀁𑀓𑀺𑀮𑀺𑀝𑁆𑀞𑀪𑀸𑀯𑁂. 𑀆𑀦𑀺𑀲𑀁𑀲𑁄𑀢𑀺 𑀲𑀼𑀤𑁆𑀥𑀯𑀺𑀧𑀸𑀓𑀢𑀸. 𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑁄𑀢𑀺 𑀯𑀺𑀲𑀼𑀤𑁆𑀥𑀺𑀪𑀸𑀯𑁄 𑀧𑀭𑀺𑀬𑁄𑀤𑀸𑀢𑀢𑀸. 𑀅𑀪𑀽𑀢𑀥𑀫𑁆𑀫𑀲𑁆𑀲 𑀤𑀺𑀝𑁆𑀞𑀺𑀪𑀸𑀯𑀲𑁆𑀲 𑀲𑀜𑁆𑀜𑀸𑀧𑀦𑀸 𑀆𑀘𑀺𑀓𑁆𑀔𑀦𑀸 𑀅𑀪𑀽𑀢𑀥𑀫𑁆𑀫𑀲𑀜𑁆𑀜𑀸𑀧𑀦𑀸. 𑀲𑀸𑀯𑀚𑁆𑀚𑁂𑀲𑀼 𑀧𑀭𑀫𑀯𑀚𑁆𑀚𑁂 𑀫𑀺𑀘𑁆𑀙𑀸𑀤𑀲𑁆𑀲𑀦𑁂 𑀧𑀕𑁆𑀕𑀳𑀡𑀦𑁆𑀢𑀺 𑀓𑀼𑀢𑁄 𑀲𑀼𑀲𑀻𑀮𑁆𑀬𑀲𑁆𑀲 𑀧𑀕𑁆𑀕𑀳𑁄𑀢𑀺 𑀆𑀳 𑁋 ‘‘𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀕𑀡𑁆𑀳𑀦𑁆𑀢𑀲𑁆𑀲𑁂𑀯 𑀲𑀼𑀲𑀻𑀮𑁆𑀬𑀁 𑀧𑀳𑀻𑀦𑀁 𑀳𑁄𑀢𑀻’’𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄𑀢𑀺 𑀏𑀢𑁆𑀣 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀧𑀭𑀮𑁄𑀓𑀸𑀪𑀸𑀯𑀘𑀺𑀦𑁆𑀢𑀸, 𑀫𑀺𑀘𑁆𑀙𑀸𑀯𑀸𑀘𑀸 𑀧𑀭𑀮𑁄𑀓𑀸𑀪𑀸𑀯𑀯𑀸𑀤𑀪𑀽𑀢𑁄 𑀫𑀼𑀲𑀸𑀯𑀸𑀤𑁄, 𑀅𑀭𑀺𑀬𑀸𑀦𑀁 𑀧𑀘𑁆𑀘𑀦𑀻𑀓𑀢𑀸𑀤𑀬𑁄. 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀦𑀯𑀲𑁂𑀦𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀦𑀯𑀲𑁂𑀦. 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀲𑀜𑁆𑀜𑀸𑀧𑀦𑀸𑀤𑀺𑀓𑀸𑀮𑁂 𑀉𑀧𑁆𑀧𑀚𑁆𑀚𑀦𑀓𑀸 𑀢𑀣𑀸𑀧𑀯𑀢𑁆𑀢𑀸 𑀅𑀓𑀼𑀲𑀮𑀔𑀦𑁆𑀥𑀸.

𑀓𑀮𑀺𑀕𑁆𑀕𑀳𑁄𑀢𑀺 𑀅𑀦𑀢𑁆𑀣𑀧𑀭𑀺𑀕𑁆𑀕𑀳𑁄. 𑀲𑁄 𑀧𑀦 𑀬𑀲𑁆𑀫𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀧𑀭𑀸𑀚𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀧𑀭𑀸𑀚𑀬𑀕𑁆𑀕𑀸𑀳𑁄’’𑀢𑀺. 𑀤𑀼𑀲𑁆𑀲𑀫𑀢𑁆𑀢𑁄𑀢𑀺 𑀏𑀢𑁆𑀣 𑀤𑀼-𑀲𑀤𑁆𑀤𑁄 ‘‘𑀲𑀫𑀸𑀤𑀺𑀦𑁆𑀦𑁄’’𑀢𑀺 𑀏𑀢𑁆𑀣𑀸𑀧𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀤𑀼𑀧𑁆𑀧𑀭𑀸𑀫𑀝𑁆𑀞𑁄’’𑀢𑀺. 𑀬𑀣𑀸 𑀤𑀼𑀧𑁆𑀧𑀭𑀸𑀫𑀝𑁆𑀞𑁄 𑀳𑁄𑀢𑀺, 𑀏𑀯𑀁 𑀲𑀫𑀸𑀤𑀺𑀦𑁆𑀦𑁄 𑀤𑀼𑀲𑁆𑀲𑀫𑀢𑁆𑀢𑁄 𑀤𑀼𑀲𑀫𑀸𑀤𑀺𑀦𑁆𑀦𑁄 𑀯𑀼𑀢𑁆𑀢𑁄. 𑀲𑀓𑀯𑀸𑀤𑀫𑁂𑀯 𑀨𑀭𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀦𑀢𑁆𑀣𑀺𑀓𑀯𑀸𑀤𑀫𑁂𑀯 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁨.𑁧𑁮𑁭; 𑁩.𑁨𑁭-𑁨𑁮) 𑀅𑀯𑀥𑀸𑀭𑁂𑀦𑁆𑀢𑁄 𑀅𑀜𑁆𑀜𑀲𑁆𑀲 𑀑𑀓𑀸𑀲𑀅𑀤𑀸𑀦𑀯𑀲𑁂𑀦 𑀨𑀭𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸’’𑀢𑀺. ‘‘𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺 𑀅𑀥𑀺𑀫𑀼𑀘𑁆𑀘𑀦𑀸𑀓𑀸𑀭𑀤𑀲𑁆𑀲𑀦𑀁. 𑀭𑀺𑀜𑁆𑀘𑀢𑀻𑀢𑀺 𑀯𑀺𑀯𑁂𑀘𑁂𑀢𑀺 𑀅𑀧𑀦𑁂𑀢𑀺. 𑀢𑁂𑀦𑀸𑀳 ‘‘𑀯𑀚𑁆𑀚𑁂𑀢𑀻’’𑀢𑀺.

𑁯𑁬. 𑀓𑀝𑀕𑁆𑀕𑀳𑁄𑀢𑀺 𑀓𑀢𑀁 𑀲𑀩𑁆𑀩𑀲𑁄 𑀲𑀺𑀤𑁆𑀥𑀺𑀫𑁂𑀯 𑀓𑀢𑁆𑀯𑀸 𑀕𑀳𑀡𑀁. 𑀲𑁄 𑀧𑀦 𑀚𑀬𑀮𑀸𑀪𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀚𑀬𑀕𑁆𑀕𑀸𑀳𑁄’’𑀢𑀺. 𑀲𑀼𑀕𑁆𑀕𑀳𑀺𑀢𑁄𑀢𑀺 𑀲𑀼𑀝𑁆𑀞𑀼𑀓𑀭𑀡𑀯𑀲𑁂𑀦 𑀕𑀳𑀺𑀢𑁄. 𑀲𑀼𑀧𑀭𑀸𑀫𑀝𑁆𑀞𑁄𑀢𑀺 𑀲𑀼𑀝𑁆𑀞𑀼 𑀧𑀭𑀸𑀧𑀭𑀁 𑀆𑀲𑁂𑀯𑀦𑀯𑀲𑁂𑀦 𑀆𑀫𑀝𑁆𑀞𑁄. 𑀉𑀪𑀬𑁂𑀦𑀧𑀺 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀽𑀧𑀘𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀲𑁄𑀢𑁆𑀣𑀺𑀪𑀸𑀯𑀸𑀯𑀳𑀢𑁆𑀢𑀜𑁆𑀘 𑀲𑀕𑁆𑀕𑀼𑀧𑀧𑀢𑁆𑀢𑀺𑀲𑀁𑀯𑀢𑁆𑀢𑀦𑀢𑁄 𑀧𑀸𑀧𑀲𑀪𑀸𑀯𑀧𑀳𑀸𑀦𑀢𑁄 𑀘.

𑁯𑁭. 𑀲𑀳𑀢𑁆𑀣𑀸 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁬𑁬; 𑀲𑀁. 𑀦𑀺. 𑀝𑀻. 𑁨.𑁩.𑁨𑁧𑁧) 𑀲𑀳𑀢𑁆𑀣𑁂𑀦𑁂𑀯 𑀓𑀭𑁄𑀦𑁆𑀢𑀲𑁆𑀲. 𑀦𑀺𑀲𑁆𑀲𑀕𑁆𑀕𑀺𑀬𑀣𑀸𑀯𑀭𑀸𑀤𑀬𑁄𑀧𑀺 𑀇𑀥 𑀲𑀳𑀢𑁆𑀣𑀓𑀭𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀸. 𑀧𑀘𑀦𑀁 𑀤𑀳𑀦𑀁 𑀯𑀺𑀩𑀸𑀥𑀦𑀦𑁆𑀢𑀺 𑀆𑀳 ‘‘𑀤𑀡𑁆𑀟𑁂𑀦 𑀧𑀻𑀴𑁂𑀦𑁆𑀢𑀲𑁆𑀲𑀸’’𑀢𑀺. 𑀲𑁄𑀓𑀁 𑀲𑀬𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀧𑀭𑀲𑁆𑀲 𑀲𑁄𑀓𑀓𑀸𑀭𑀡𑀁 𑀲𑀬𑀁 𑀓𑀭𑁄𑀦𑁆𑀢𑀲𑁆𑀲, 𑀲𑁄𑀓𑀁 𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀧𑀭𑁂𑀳𑀺 𑀅𑀢𑁆𑀢𑀦𑁄 𑀯𑀘𑀦𑀓𑀭𑁂𑀳𑀺. 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄𑀢𑀺 𑀧𑀭𑀲𑁆𑀲 𑀯𑀺𑀩𑀸𑀥𑀦𑀧𑀬𑁄𑀕𑁂𑀦 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄. 𑀅𑀢𑀺𑀧𑀸𑀢𑀬𑀢𑁄𑀢𑀺 𑀧𑀤𑀁 𑀲𑀼𑀤𑁆𑀥𑀓𑀢𑁆𑀢𑀼𑀅𑀢𑁆𑀣𑁂 𑀳𑁂𑀢𑀼𑀓𑀢𑁆𑀢𑀼𑀅𑀢𑁆𑀣𑁂 𑀘 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀳𑀦𑀦𑁆𑀢𑀲𑁆𑀲𑀧𑀺 𑀳𑀦𑀸𑀧𑁂𑀦𑁆𑀢𑀲𑁆𑀲𑀸𑀧𑀻’’𑀢𑀺.

𑀖𑀭𑀲𑁆𑀲 𑀪𑀺𑀢𑁆𑀢𑀺 𑀅𑀦𑁆𑀢𑁄 𑀩𑀳𑀺 𑀘 𑀲𑀦𑁆𑀥𑀺𑀢𑀸 𑀳𑀼𑀢𑁆𑀯𑀸 𑀞𑀺𑀢𑀸 𑀖𑀭𑀲𑀦𑁆𑀥𑀺. 𑀓𑀺𑀜𑁆𑀘𑀺𑀧𑀺 𑀅𑀲𑁂𑀲𑁂𑀢𑁆𑀯𑀸 𑀦𑀺𑀭𑀯𑀲𑁂𑀲𑀫𑁂𑀯 𑀮𑁄𑀧𑁄𑀢𑀺 𑀦𑀺𑀮𑁆𑀮𑁄𑀧𑁄. 𑀏𑀓𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀯𑀺𑀮𑁄𑀧𑁄 𑀏𑀓𑀸𑀕𑀸𑀭𑀺𑀓𑁄. 𑀧𑀭𑀺𑀢𑁄 𑀲𑀩𑁆𑀩𑀲𑁄 𑀧𑀦𑁆𑀣𑁂 𑀳𑀦𑀦𑀁 𑀧𑀭𑀺𑀧𑀦𑁆𑀣𑁄. 𑀧𑀸𑀧𑀁 𑀦 𑀓𑀭𑀻𑀬𑀢𑀺 𑀧𑀼𑀩𑁆𑀩𑁂 𑀅𑀲𑀢𑁄 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀢𑀲𑁆𑀫𑀸 𑀦𑀢𑁆𑀣𑀺 𑀧𑀸𑀧𑀁. 𑀬𑀤𑀺 𑀏𑀯𑀁 𑀓𑀣𑀁 𑀲𑀢𑁆𑀢𑀸 𑀧𑀸𑀧𑀁 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀆𑀳 𑁋 ‘‘𑀲𑀢𑁆𑀢𑀸 𑀧𑀦 𑀓𑀭𑁄𑀫𑀸𑀢𑀺 𑀏𑀯𑀁𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀻’’𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀳𑁄𑀢𑀺 ‘‘𑀇𑀫𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑀳𑀺𑀁𑀲𑀸𑀤𑀺𑀓𑀺𑀭𑀺𑀬𑀸 𑀦 𑀅𑀢𑁆𑀢𑀸𑀦𑀁 𑀨𑀼𑀲𑀢𑀺 𑀢𑀲𑁆𑀲 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀢𑁆𑀢𑀸, 𑀲𑀭𑀻𑀭𑀁 𑀧𑀦 𑀅𑀘𑁂𑀢𑀦𑀁 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑀁, 𑀢𑀲𑁆𑀫𑀺𑀁 𑀯𑀺𑀓𑁄𑀧𑀺𑀢𑁂𑀧𑀺 𑀦 𑀓𑀺𑀜𑁆𑀘𑀺 𑀧𑀸𑀧’’𑀦𑁆𑀢𑀺. 𑀔𑀼𑀭𑀦𑁂𑀫𑀺𑀦𑀸𑀢𑀺 𑀦𑀺𑀲𑀺𑀢𑀔𑀼𑀭𑀫𑀬𑀦𑁂𑀫𑀺𑀦𑀸. 𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀤𑀺𑀲𑀸 𑀅𑀧𑁆𑀧𑀢𑀺𑀭𑀽𑀧𑀤𑁂𑀲𑁄, 𑀉𑀢𑁆𑀢𑀭𑀤𑀺𑀲𑀸 𑀧𑀢𑀺𑀭𑀽𑀧𑀤𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑀓𑁆𑀔𑀺𑀡𑀜𑁆𑀘𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀤𑀓𑁆𑀔𑀺𑀡𑀢𑀻𑀭𑁂 𑀫𑀦𑀼𑀲𑁆𑀲𑀸 𑀓𑀓𑁆𑀔𑀴𑀸’’𑀢𑀺𑀆𑀤𑀺𑀫𑀸𑀳.

𑀫𑀳𑀸𑀬𑀸𑀕𑀦𑁆𑀢𑀺 𑀫𑀳𑀸𑀯𑀺𑀚𑀺𑀢𑀬𑀜𑁆𑀜𑀲𑀤𑀺𑀲𑀁 𑀫𑀳𑀸𑀬𑀸𑀕𑀁. 𑀲𑀻𑀮𑀲𑀁𑀬𑀫𑁂𑀦𑀸𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑁂𑀦. 𑀲𑀘𑁆𑀘𑀯𑀘𑀦𑁂𑀦𑀸𑀢𑀺 𑀲𑀘𑁆𑀘𑀯𑀸𑀘𑀸𑀬. 𑀢𑀲𑁆𑀲 𑀯𑀺𑀲𑀼𑀁 𑀯𑀘𑀦𑀁 𑀮𑁄𑀓𑁂 𑀕𑀭𑀼𑀢𑀭𑀧𑀼𑀜𑁆𑀜𑀲𑀫𑁆𑀫𑀢𑀪𑀸𑀯𑀢𑁄. 𑀬𑀣𑀸 𑀳𑀺 𑀧𑀸𑀧𑀥𑀫𑁆𑀫𑁂𑀲𑀼 𑀫𑀼𑀲𑀸𑀯𑀸𑀤𑁄 𑀕𑀭𑀼, 𑀏𑀯𑀁 𑀧𑀼𑀜𑁆𑀜𑀥𑀫𑁆𑀫𑁂𑀲𑀼 𑀲𑀘𑁆𑀘𑀯𑀸𑀘𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀏𑀓𑀁 𑀥𑀫𑁆𑀫𑀫𑀢𑀻𑀢𑀲𑁆𑀲𑀸’’𑀢𑀺𑀆𑀤𑀺 (𑀥. 𑀧. 𑁧𑁭𑁬). 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀦𑀬𑁂𑀦. 𑀢𑀢𑁆𑀣 𑀳𑀺 𑁋 ‘‘𑀦𑀢𑁆𑀣𑀺 𑀧𑀸𑀧𑀁, 𑀦𑀢𑁆𑀣𑀺 𑀧𑀸𑀧𑀲𑁆𑀲 𑀆𑀕𑀫𑁄’’𑀢𑀺 𑀆𑀕𑀢𑀁, 𑀇𑀥 ‘‘𑀅𑀢𑁆𑀣𑀺 𑀧𑀼𑀜𑁆𑀜𑀁, 𑀅𑀢𑁆𑀣𑀺 𑀧𑀼𑀜𑁆𑀜𑀲𑁆𑀲 𑀆𑀕𑀫𑁄’’𑀢𑀺 𑀆𑀕𑀢𑀁, 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀲𑁂𑀲𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺 ‘‘𑀢𑁂𑀲𑀫𑁂𑀢𑀁 𑀧𑀸𑀝𑀺𑀓𑀗𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀢𑀁 𑀳𑁂𑀝𑁆𑀞𑀸 𑀧𑀼𑀭𑀺𑀫𑀯𑀸𑀭𑀲𑀤𑀺𑀲𑀁.

𑁧𑁦𑁦. 𑀉𑀪𑀬𑁂𑀦𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀧𑀝𑀺𑀲𑁂𑀥𑀯𑀘𑀦𑁂𑀦. 𑀲𑀁𑀓𑀺𑀮𑁂𑀲𑀧𑀘𑁆𑀘𑀬𑀦𑁆𑀢𑀺 𑀲𑀁𑀲𑀸𑀭𑁂 𑀧𑀭𑀺𑀩𑁆𑀪𑀫𑀦𑁂𑀦 𑀓𑀺𑀮𑀺𑀦𑁆𑀦𑀲𑁆𑀲 𑀫𑀮𑀺𑀦𑀪𑀸𑀯𑀲𑁆𑀲 𑀓𑀸𑀭𑀡𑀁. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀦𑁆𑀢𑀺 𑀲𑀤𑁆𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀮𑀦𑁆𑀢𑀺𑀆𑀤𑀻𑀲𑀼 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀯𑀳𑀁 𑀯𑁄𑀤𑀸𑀦𑀸𑀯𑀳𑀜𑁆𑀘 𑀉𑀲𑁆𑀲𑀸𑀳𑀲𑀗𑁆𑀔𑀸𑀢𑀁 𑀩𑀮𑀁 𑀯𑀸, 𑀲𑀽𑀭𑀯𑀻𑀭𑀪𑀸𑀯𑀲𑀗𑁆𑀔𑀸𑀢𑀁 𑀯𑀻𑀭𑀺𑀬𑀁 𑀯𑀸, 𑀧𑀼𑀭𑀺𑀲𑁂𑀦 𑀓𑀢𑁆𑀢𑀩𑁆𑀩𑁄 𑀧𑀼𑀭𑀺𑀲𑀣𑀸𑀫𑁄 𑀯𑀸, 𑀲𑁄 𑀏𑀯 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀧𑁆𑀧𑀢𑁆𑀢𑀺𑀬𑀸 𑀧𑀼𑀭𑀺𑀲𑀧𑀭𑀓𑁆𑀓𑀫𑁄 𑀯𑀸 𑀦𑀢𑁆𑀣𑀺 𑀦 𑀉𑀧𑀮𑀩𑁆𑀪𑀢𑀺.

𑀲𑀢𑁆𑀯𑀬𑁄𑀕𑀢𑁄, 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀘 𑀲𑀢𑁆𑀢𑀸. 𑀧𑀸𑀡𑀦𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀸𑀡𑀸. 𑀢𑁂 𑀧𑀦 𑀲𑁄 𑀏𑀓𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀯𑀤𑀢𑀻𑀢𑀺 𑀆𑀳 ‘‘𑀏𑀓𑀺𑀦𑁆𑀤𑁆𑀭𑀺𑀬𑁄’’𑀢𑀺𑀆𑀤𑀺. 𑀅𑀡𑁆𑀟𑀓𑁄𑀲𑀸𑀤𑀻𑀲𑀼 𑀪𑀯𑀦𑀢𑁄 𑀪𑀽𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀅𑀡𑁆𑀟𑀓𑁄𑀲…𑀧𑁂… 𑀯𑀤𑀦𑁆𑀢𑀻’’𑀢𑀺. 𑀚𑀻𑀯𑀦𑀢𑁄 𑀧𑀸𑀡𑀁 𑀥𑀸𑀭𑁂𑀦𑁆𑀢𑁄 𑀯𑀺𑀬 𑀯𑀟𑁆𑀠𑀦𑀢𑁄 𑀚𑀻𑀯𑀸𑀢𑀺 𑀏𑀯𑀁 𑀲𑀢𑁆𑀢𑀧𑀸𑀡𑀪𑀽𑀢𑀚𑀻𑀯𑁂𑀲𑀼 𑀲𑀤𑁆𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀢𑁆𑀣𑀺 𑀏𑀢𑁂𑀲𑀁 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀻𑀲𑀼 𑀯𑀲𑁄𑀢𑀺 𑀅𑀯𑀲𑀸. 𑀦𑀢𑁆𑀣𑀺 𑀦𑁂𑀲𑀁 𑀩𑀮𑀁 𑀯𑀻𑀭𑀺𑀬𑀜𑁆𑀘𑀸𑀢𑀺 𑀅𑀩𑀮𑀸 𑀅𑀯𑀻𑀭𑀺𑀬𑀸. 𑀦𑀺𑀬𑀢𑀢𑀸𑀢𑀺 𑀅𑀘𑁆𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀸𑀪𑁂𑀚𑁆𑀚𑀫𑀡𑀺 𑀯𑀺𑀬 𑀦𑀺𑀬𑀢𑀧𑀯𑀢𑁆𑀢𑀦𑀢𑀸𑀬 𑀕𑀢𑀺𑀚𑀸𑀢𑀺𑀩𑀦𑁆𑀥𑀧𑀚𑀳𑀯𑀲𑁂𑀦 𑀦𑀺𑀬𑀸𑀫𑁄. 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀦𑁆𑀢𑀺 𑀙𑀦𑁆𑀦𑀁 𑀅𑀪𑀺𑀚𑀸𑀢𑀻𑀦𑀁 𑀢𑀸𑀲𑀼 𑀢𑀸𑀲𑀼 𑀕𑀢𑀻𑀲𑀼 𑀉𑀧𑀕𑀫𑀦𑀁 𑀲𑀫𑀯𑀸𑀬𑁂𑀦 𑀲𑀫𑀸𑀕𑀫𑁄. 𑀲𑀪𑀸𑀯𑁄𑀬𑁂𑀯𑀸𑀢𑀺 𑀬𑀣𑀸 𑀓𑀡𑁆𑀝𑀓𑀲𑁆𑀲 𑀢𑀺𑀓𑁆𑀔𑀢𑀸, 𑀓𑀩𑀺𑀝𑁆𑀞𑀨𑀮𑀸𑀦𑀁 𑀧𑀭𑀺𑀫𑀡𑁆𑀟𑀮𑀢𑀸, 𑀫𑀺𑀕𑀧𑀓𑁆𑀔𑀻𑀦𑀁 𑀯𑀺𑀘𑀺𑀢𑁆𑀢𑀸𑀓𑀸𑀭𑀢𑀸, 𑀏𑀯𑀁 𑀲𑀩𑁆𑀩𑀲𑁆𑀲𑀧𑀺 𑀮𑁄𑀓𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀯𑀺𑀦𑀸 𑀢𑀣𑀸 𑀢𑀣𑀸 𑀧𑀭𑀺𑀡𑀸𑀫𑁄, 𑀅𑀬𑀁 𑀲𑀪𑀸𑀯𑁄𑀬𑁂𑀯 𑀅𑀓𑀺𑀢𑁆𑀢𑀺𑀫𑁄𑀬𑁂𑀯. 𑀢𑁂𑀦𑀸𑀳 ‘‘𑀬𑁂𑀦 𑀳𑀻’’𑀢𑀺𑀆𑀤𑀺.

𑀲𑀓𑀼𑀡𑁂 𑀳𑀦𑀢𑀻𑀢𑀺 𑀲𑀸𑀓𑀼𑀡𑀺𑀓𑁄, 𑀢𑀣𑀸 𑀲𑀽𑀓𑀭𑀺𑀓𑁄. 𑀮𑀼𑀤𑁆𑀤𑁄𑀢𑀺 𑀅𑀜𑁆𑀜𑁄𑀧𑀺 𑀬𑁄 𑀓𑁄𑀘𑀺 𑀫𑀸𑀕𑀯𑀺𑀓𑁄 𑀦𑁂𑀲𑀸𑀤𑁄. 𑀧𑀸𑀧𑀓𑀫𑁆𑀫𑀧𑀲𑀼𑀢𑀢𑀸𑀬 𑀓𑀡𑁆𑀳𑀸𑀪𑀺𑀚𑀸𑀢𑀺 𑀦𑀸𑀫. 𑀪𑀺𑀓𑁆𑀔𑀽𑀢𑀺 𑀲𑀸𑀓𑀺𑀬𑀸 𑀪𑀺𑀓𑁆𑀔𑀽, 𑀫𑀘𑁆𑀙𑀫𑀁𑀲𑀔𑀸𑀤𑀦𑀢𑁄 𑀦𑀻𑀮𑀸𑀪𑀺𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀜𑀸𑀬𑀮𑀤𑁆𑀥𑁂𑀧𑀺 𑀧𑀘𑁆𑀘𑀬𑁂 𑀪𑀼𑀜𑁆𑀚𑀫𑀸𑀦𑀸 𑀆𑀚𑀻𑀯𑀓𑀲𑀫𑀬𑀲𑁆𑀲 𑀯𑀺𑀮𑁄𑀫𑀕𑀸𑀳𑀺𑀢𑀸𑀬 ‘‘𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀏𑀓𑁂 𑀧𑀩𑁆𑀩𑀚𑀺𑀢𑀸, 𑀬𑁂 𑀲𑀯𑀺𑀲𑁂𑀲𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸. 𑀢𑀣𑀸 𑀳𑀺 𑀢𑁂 𑀓𑀡𑁆𑀝𑀓𑁂 𑀯𑀢𑁆𑀢𑁂𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸𑀢𑀺 𑀯𑀼𑀢𑁆𑀢𑀸. 𑀞𑀢𑁆𑀯𑀸 𑀪𑀼𑀜𑁆𑀚𑀦𑀤𑀸𑀦𑀧𑀝𑀺𑀓𑁆𑀔𑁂𑀧𑀸𑀤𑀺𑀯𑀢𑀲𑀫𑀸𑀬𑁄𑀕𑁂𑀦 𑀧𑀡𑁆𑀟𑀭𑀢𑀭𑀸. 𑀅𑀘𑁂𑀮𑀓𑀲𑀸𑀯𑀓𑀸𑀢𑀺 𑀆𑀚𑀻𑀯𑀓𑀲𑀸𑀯𑀓𑁂 𑀯𑀤𑀢𑀺. 𑀢𑁂 𑀓𑀺𑀭 𑀆𑀚𑀻𑀯𑀓𑀮𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀦𑀺𑀕𑀡𑁆𑀞𑁂𑀳𑀺𑀧𑀺 𑀧𑀡𑁆𑀟𑀭𑀢𑀭𑀸. 𑀦𑀦𑁆𑀤𑀸𑀤𑀬𑁄 𑀳𑀺 𑀢𑀣𑀸𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀢𑁆𑀢𑀩𑁆𑀩𑀸, 𑀢𑀲𑁆𑀫𑀸 𑀦𑀦𑁆𑀤𑀸𑀤𑀬𑁄 𑀦𑀺𑀕𑀡𑁆𑀞𑁂𑀳𑀺 𑀆𑀚𑀻𑀯𑀓𑀲𑀸𑀯𑀓𑁂𑀳𑀺 𑀘 𑀧𑀡𑁆𑀟𑀭𑀢𑀭𑀸𑀢𑀺 𑀯𑀼𑀢𑁆𑀢𑀸 ‘‘𑀲𑀼𑀓𑁆𑀓𑀸𑀪𑀺𑀚𑀸𑀢𑀻’’𑀢𑀺.

𑀅𑀬𑀫𑁂𑀢𑁂𑀲𑀁 𑀮𑀤𑁆𑀥𑀻𑀢𑀺 𑀲𑀸𑀓𑀼𑀡𑀺𑀓𑀸𑀤𑀺𑀪𑀸𑀯𑀽𑀧𑀕𑀫𑀦𑁂𑀦 𑀓𑀡𑁆𑀳𑀸𑀪𑀺𑀚𑀸𑀢𑀺𑀆𑀤𑀻𑀲𑀼 𑀤𑀼𑀓𑁆𑀔𑀁 𑀲𑀼𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀸 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀓𑀧𑁆𑀧𑀸𑀦𑀁 𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀔𑁂𑀧𑁂𑀢𑁆𑀯𑀸 𑀆𑀚𑀻𑀯𑀓𑀪𑀸𑀯𑀽𑀧𑀕𑀫𑀦𑁂𑀦 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀬𑀁 𑀞𑀢𑁆𑀯𑀸 𑀲𑀁𑀲𑀸𑀭𑀢𑁄 𑀲𑀼𑀚𑁆𑀛𑀦𑁆𑀢𑀻𑀢𑀺 𑀅𑀬𑀁 𑀢𑁂𑀲𑀁 𑀦𑀺𑀬𑀢𑀺 𑀆𑀚𑀻𑀯𑀓𑀸𑀦𑀁 𑀮𑀤𑁆𑀥𑀺.

‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 𑀯𑀤𑀦𑁆𑀢𑁄 𑀦𑀢𑁆𑀣𑀺𑀓𑁄 𑀤𑀸𑀦𑀲𑁆𑀲 𑀨𑀮𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀆𑀳 𑁋 ‘‘𑀦𑀢𑁆𑀣𑀺𑀓𑀤𑀺𑀝𑁆𑀞𑀺 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀢𑀻’’𑀢𑀺. 𑀢𑀣𑀸 𑀘𑁂𑀯 𑀳𑁂𑀝𑁆𑀞𑀸 𑀲𑀁𑀯𑀡𑁆𑀡𑀺𑀢𑀁 ‘‘𑀦𑀢𑁆𑀣𑀺𑀓𑀤𑀺𑀝𑁆𑀞𑀺 𑀳𑀺 𑀦𑀢𑁆𑀣𑀺𑀢𑀫𑀸𑀳𑀸’’𑀢𑀺. 𑀅𑀳𑁂𑀢𑀼𑀓𑀤𑀺𑀝𑁆𑀞𑀺 𑀉𑀪𑀬𑀦𑁆𑀢𑀺 𑀓𑀫𑁆𑀫𑀁 𑀯𑀺𑀧𑀸𑀓𑀜𑁆𑀘 𑀉𑀪𑀬𑀁. 𑀲𑁄 𑀳𑀺 ‘‘𑀅𑀳𑁂𑀢𑀽 𑀅𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 𑀯𑀤𑀦𑁆𑀢𑁄 𑀓𑀫𑁆𑀫𑀲𑁆𑀲 𑀯𑀺𑀬 𑀯𑀺𑀧𑀸𑀓𑀲𑁆𑀲𑀧𑀺 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀻𑀦𑀁 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀯𑀘𑀦𑀢𑁄 𑀢𑀤𑀼𑀪𑀬𑀁 𑀧𑀝𑀺𑀩𑀸𑀳𑀢𑀺 𑀦𑀸𑀫. 𑀯𑀺𑀧𑀸𑀓𑁄 𑀧𑀝𑀺𑀩𑀸𑀳𑀺𑀢𑁄 𑀳𑁄𑀢𑀺 𑀅𑀲𑀢𑀺 𑀓𑀫𑁆𑀫𑁂 𑀯𑀺𑀧𑀸𑀓𑀸𑀪𑀸𑀯𑀢𑁄. 𑀓𑀫𑁆𑀫𑀁 𑀧𑀝𑀺𑀩𑀸𑀳𑀺𑀢𑀁 𑀳𑁄𑀢𑀺 𑀅𑀲𑀢𑀺 𑀯𑀺𑀧𑀸𑀓𑁂 𑀓𑀫𑁆𑀫𑀲𑁆𑀲 𑀦𑀺𑀭𑀢𑁆𑀣𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀢𑁆𑀣𑀢𑁄𑀢𑀺 𑀲𑀭𑀽𑀧𑁂𑀦. 𑀉𑀪𑀬𑀧𑀝𑀺𑀩𑀸𑀳𑀓𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀢𑀁𑀢𑀁𑀤𑀺𑀝𑁆𑀞𑀺𑀢𑀸 𑀯𑀼𑀢𑁆𑀢𑀸𑀧𑀺 𑀲𑀩𑁆𑀩𑁂 𑀢𑁂 𑀦𑀢𑁆𑀣𑀺𑀓𑀸𑀤𑀬𑁄 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀆𑀤𑀺𑀯𑀲𑁂𑀦 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀤𑀺𑀝𑁆𑀞𑀺𑀓𑀸 𑀏𑀯 𑀉𑀪𑀬𑀧𑀝𑀺𑀩𑀸𑀳𑀓𑀢𑁆𑀢𑀸. ‘‘𑀉𑀪𑀬𑀧𑀝𑀺𑀩𑀸𑀳𑀓𑀸’’𑀢𑀺 𑀳𑀺 𑀳𑁂𑀢𑀼𑀯𑀘𑀦𑀁. 𑀅𑀳𑁂𑀢𑀼𑀓𑀯𑀸𑀤𑀸 𑀘𑀸𑀢𑀺𑀆𑀤𑀺 𑀧𑀝𑀺𑀜𑁆𑀜𑀸𑀯𑀘𑀦𑀁. 𑀬𑁄 𑀳𑀺 𑀯𑀺𑀧𑀸𑀓𑀧𑀝𑀺𑀩𑀸𑀳𑀦𑁂𑀦 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀓𑁄, 𑀲𑁄 𑀅𑀢𑁆𑀣𑀢𑁄 𑀓𑀫𑁆𑀫𑀧𑀝𑀺𑀩𑀸𑀳𑀦𑁂𑀦 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀓𑁄, 𑀉𑀪𑀬𑀧𑀝𑀺𑀩𑀸𑀳𑀦𑁂𑀦 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀓𑁄 𑀘 𑀳𑁄𑀢𑀺. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀚𑁆𑀛𑀸𑀬𑀦𑁆𑀢𑀻𑀢𑀺 𑀢𑀁 𑀤𑀺𑀝𑁆𑀞𑀺𑀤𑀻𑀧𑀓𑀁 𑀕𑀦𑁆𑀣𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀞𑀦𑁆𑀢𑀺. 𑀯𑀻𑀫𑀁𑀲𑀦𑁆𑀢𑀻𑀢𑀺 𑀢𑀲𑁆𑀲 𑀅𑀢𑁆𑀣𑀁 𑀯𑀺𑀘𑀸𑀭𑁂𑀦𑁆𑀢𑀺. 𑀢𑁂𑀲𑀦𑁆𑀢𑀺𑀆𑀤𑀺 𑀯𑀻𑀫𑀁𑀲𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀢𑀺 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑀓𑀫𑁆𑀫𑀨𑀮𑀸𑀪𑀸𑀯𑀤𑀻𑀧𑀓𑁂 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀮𑀤𑁆𑀥𑀺𑀬𑀸 𑀆𑀭𑀫𑁆𑀫𑀡𑁂. 𑀫𑀺𑀘𑁆𑀙𑀸𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀅𑀦𑀼𑀲𑁆𑀲𑀯𑀽𑀧𑀮𑀤𑁆𑀥𑁂 𑀅𑀢𑁆𑀣𑁂 𑀢𑀤𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑁂𑀳𑀺 𑀲𑀯𑀺𑀕𑁆𑀕𑀳𑁂 𑀯𑀺𑀬 𑀲𑀭𑀽𑀧𑀢𑁄 𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀘𑀺𑀭𑀓𑀸𑀮𑀧𑀭𑀺𑀘𑀬𑁂𑀦 ‘‘𑀏𑀯𑀫𑁂𑀢’’𑀦𑁆𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀫𑀪𑀸𑀯𑀽𑀧𑀕𑀫𑀦𑁂𑀦 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀢𑀣𑀸 𑀕𑀳𑀺𑀢𑁂 𑀧𑀼𑀦𑀧𑁆𑀧𑀼𑀦𑀁 𑀢𑀣𑁂𑀯 𑀆𑀲𑁂𑀯𑀦𑁆𑀢𑀲𑁆𑀲 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀦 𑀲𑀫𑀸𑀤𑀺𑀬𑀫𑀸𑀦𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑀼𑀧𑀢𑁆𑀣𑀫𑁆𑀪𑀺𑀢𑀸 𑀅𑀢𑀁𑀲𑀪𑀸𑀯𑀁 ‘‘𑀢𑀁𑀲𑀪𑀸𑀯’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀻 𑀫𑀺𑀘𑁆𑀙𑀸𑀲𑀢𑀻𑀢𑀺 𑀮𑀤𑁆𑀥𑀦𑀸𑀫𑀸 𑀢𑀁𑀮𑀤𑁆𑀥𑀺𑀲𑀳𑀕𑀢𑀸 𑀢𑀡𑁆𑀳𑀸 𑀲𑀦𑁆𑀢𑀺𑀝𑁆𑀞𑀢𑀺. 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀬𑀮𑀸𑀪𑁂𑀦 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀯𑀝𑁆𑀞𑀺𑀢𑀢𑀸𑀬 𑀅𑀦𑁂𑀓𑀕𑁆𑀕𑀁 𑀧𑀳𑀸𑀬 𑀏𑀓𑀕𑁆𑀕𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀳𑁄𑀢𑀺. 𑀫𑀺𑀘𑁆𑀙𑀸𑀲𑀫𑀸𑀥𑀺𑀧𑀺 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀮𑀤𑁆𑀥𑀪𑀸𑀯𑀦𑀸𑀩𑀮𑁂𑀳𑀺 𑀓𑀤𑀸𑀘𑀺 𑀲𑀫𑀸𑀥𑀸𑀦𑀧𑀢𑀺𑀭𑀽𑀧𑀓𑀺𑀘𑁆𑀘𑀓𑀭𑁄 𑀳𑁄𑀢𑀺𑀬𑁂𑀯 𑀯𑀸𑀮𑀯𑀺𑀚𑁆𑀛𑀦𑀸𑀤𑀻𑀲𑀼 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀚𑀯𑀦𑀸𑀦𑀺 𑀚𑀯𑀦𑁆𑀢𑀻𑀢𑀺 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀢𑁂𑀦𑀸𑀓𑀸𑀭𑁂𑀦 𑀧𑀼𑀩𑁆𑀩𑀪𑀸𑀕𑀺𑀬𑁂𑀲𑀼 𑀚𑀯𑀦𑀯𑀸𑀭𑁂𑀲𑀼 𑀧𑀯𑀢𑁆𑀢𑁂𑀲𑀼 𑀲𑀩𑁆𑀩𑀧𑀘𑁆𑀙𑀺𑀫𑁂 𑀚𑀯𑀦𑀯𑀸𑀭𑁂 𑀲𑀢𑁆𑀢 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. 𑀧𑀞𑀫𑀚𑀯𑀦𑁂 𑀧𑀦 𑀲𑀢𑁂𑀓𑀺𑀘𑁆𑀙𑀸 𑀳𑁄𑀦𑁆𑀢𑀺, 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀽𑀢𑀺 𑀥𑀫𑁆𑀫𑀲𑀪𑀸𑀯𑀤𑀲𑁆𑀲𑀦𑀫𑁂𑀢𑀁, 𑀦 𑀧𑀦 𑀢𑀲𑁆𑀫𑀺𑀁 𑀔𑀡𑁂 𑀢𑁂𑀲𑀁 𑀲𑀢𑁂𑀓𑀺𑀘𑁆𑀙𑀪𑀸𑀯𑀸𑀧𑀸𑀤𑀦𑀁 𑀓𑁂𑀦𑀘𑀺 𑀲𑀓𑁆𑀓𑀸 𑀓𑀸𑀢𑀼𑀁.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀲𑀼. 𑀓𑁄𑀘𑀺 𑀏𑀓𑀁 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀻𑀢𑀺 𑀬𑀲𑁆𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀪𑀺𑀦𑀺𑀯𑁂𑀲𑁄 𑀆𑀲𑁂𑀯𑀦𑀸 𑀘 𑀧𑀯𑀢𑁆𑀢𑀸, 𑀲𑁄 𑀏𑀓𑀁𑀬𑁂𑀯 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀺. 𑀬𑀲𑁆𑀲 𑀧𑀦 𑀤𑁆𑀯𑀻𑀲𑀼, 𑀢𑀻𑀲𑀼𑀧𑀺 𑀯𑀸 𑀅𑀪𑀺𑀦𑀺𑀯𑁂𑀲𑀦𑀸 𑀧𑀯𑀢𑁆𑀢𑀸, 𑀲𑁄 𑀤𑁆𑀯𑁂 𑀢𑀻𑀡𑀺 𑀑𑀓𑁆𑀓𑀫𑀢𑀺. 𑀏𑀢𑁂𑀦 𑀬𑀸 𑀧𑀼𑀩𑁆𑀩𑁂 𑀉𑀪𑀬𑀧𑀝𑀺𑀩𑀸𑀳𑀦𑀢𑀸𑀫𑀼𑀔𑁂𑀦 𑀯𑀼𑀢𑁆𑀢𑀸 𑀅𑀢𑁆𑀣𑀲𑀺𑀤𑁆𑀥𑀸 𑀲𑀩𑁆𑀩𑀤𑀺𑀝𑁆𑀞𑀺𑀓𑀢𑀸, 𑀲𑀸 𑀧𑀼𑀩𑁆𑀩𑀪𑀸𑀕𑀺𑀬𑀸. 𑀬𑀸 𑀧𑀦 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺 𑀪𑀽𑀢𑀸, 𑀲𑀸 𑀬𑀣𑀸𑀲𑀓𑀁 𑀧𑀘𑁆𑀘𑀬𑀲𑀫𑀼𑀤𑀸𑀕𑀫𑀲𑀺𑀤𑁆𑀥𑀺𑀢𑁄 𑀪𑀺𑀦𑁆𑀦𑀸𑀭𑀫𑁆𑀫𑀡𑀸𑀦𑀁 𑀯𑀺𑀬 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀏𑀓𑀚𑁆𑀛𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀲𑀁𑀓𑀺𑀡𑁆𑀡𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀲𑁆𑀫𑀺𑀁 𑀑𑀓𑁆𑀓𑀦𑁆𑀢𑁂𑀧𑀻𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀤𑀺𑀝𑁆𑀞𑀻𑀦𑀁 𑀲𑀫𑀸𑀦𑀩𑀮𑀢𑀁 𑀲𑀫𑀸𑀦𑀨𑀮𑀢𑀜𑁆𑀘 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀸 𑀏𑀓𑀲𑁆𑀲 𑀉𑀧𑁆𑀧𑀦𑁆𑀦𑀸 𑀅𑀜𑁆𑀜𑀫𑀜𑁆𑀜𑀁 𑀅𑀩𑁆𑀩𑁄𑀓𑀺𑀡𑁆𑀡𑀸 𑀏𑀯, 𑀏𑀓𑀸𑀬 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀇𑀢𑀭𑀸 𑀅𑀦𑀼𑀩𑀮𑀧𑁆𑀧𑀤𑀸𑀬𑀺𑀓𑀸 𑀳𑁄𑀦𑁆𑀢𑀺. 𑀯𑀝𑁆𑀝𑀔𑀸𑀡𑀼 𑀦𑀸𑀫𑀸𑀢𑀺 𑀇𑀤𑀁 𑀯𑀘𑀦𑀁 𑀦𑁂𑀬𑁆𑀬𑀢𑁆𑀣𑀁, 𑀦 𑀦𑀻𑀢𑀢𑁆𑀣𑀦𑁆𑀢𑀺 𑀢𑀁 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀓𑀺𑀁 𑀧𑀦𑁂𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀅𑀓𑀼𑀲𑀮𑀁 𑀦𑀸𑀫𑁂𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁, 𑀦 𑀓𑀼𑀲𑀮𑀁 𑀯𑀺𑀬 𑀫𑀳𑀸𑀩𑀮𑀦𑁆𑀢𑀺 𑀆𑀳 𑁋 ‘‘𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄’’𑀢𑀺. 𑀅𑀜𑁆𑀜𑀣𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄 𑀯𑀺𑀬 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀧𑀺 𑀅𑀘𑁆𑀘𑀦𑁆𑀢𑀺𑀓𑁄 𑀲𑀺𑀬𑀸. 𑀬𑀤𑀺 𑀏𑀯𑀁 𑀯𑀝𑁆𑀝𑀔𑀸𑀡𑀼𑀓𑀚𑁄𑀢𑀦𑀸 𑀓𑀣𑀦𑁆𑀢𑀺 𑀆𑀳 ‘‘𑀆𑀲𑁂𑀯𑀦𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺, 𑀢𑀲𑁆𑀫𑀸 𑀬𑀣𑀸 ‘‘𑀲𑀓𑀺𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀻’’𑀢𑀺 (𑀅. 𑀦𑀺. 𑁭.𑁧𑁫) 𑀯𑀼𑀢𑁆𑀢𑀁, 𑀏𑀯𑀁 𑀯𑀝𑁆𑀝𑀔𑀸𑀡𑀼𑀓𑀚𑁄𑀢𑀦𑀸. 𑀬𑀸𑀤𑀺𑀲𑁂 𑀳𑀺 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀅𑀬𑀁 𑀢𑀁𑀢𑀁𑀤𑀲𑁆𑀲𑀦𑀁 𑀑𑀓𑁆𑀓𑀦𑁆𑀢𑁄 𑀧𑀼𑀦 𑀓𑀤𑀸𑀘𑀺 𑀢𑀧𑁆𑀧𑀝𑀺𑀧𑀓𑁆𑀔𑁂 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀢𑀢𑁄 𑀲𑀻𑀲𑀼𑀓𑁆𑀔𑀺𑀧𑀦𑀫𑀲𑁆𑀲 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀲𑀁𑀲𑀸𑀭𑀔𑀸𑀡𑀼𑀪𑀸𑀯𑀲𑁆𑀲𑀧𑀺 𑀧𑀘𑁆𑀘𑀬𑁄 𑀅𑀓𑀮𑁆𑀬𑀸𑀡𑀚𑀦𑁄, 𑀢𑀲𑁆𑀫𑀸. 𑀪𑀽𑀢𑀺𑀓𑀸𑀫𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀸𑀦𑀁 𑀯𑀲𑁂𑀦 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀯𑀟𑁆𑀠𑀺𑀓𑀸𑀫𑁄. 𑀬𑀁 𑀧𑀦𑁂𑀢𑁆𑀣 𑀓𑁂𑀘𑀺 𑀯𑀤𑀦𑁆𑀢𑀺 ‘‘𑀬𑀣𑀸 𑀘𑀺𑀭𑀓𑀸𑀮𑀪𑀸𑀯𑀦𑀸𑀬 𑀧𑀭𑀺𑀧𑀸𑀓𑀽𑀧𑀕𑀫𑀮𑀤𑁆𑀥𑀩𑀮𑀢𑁆𑀢𑀸 𑀉𑀧𑀦𑀺𑀲𑁆𑀲𑀬𑀓𑀼𑀲𑀮𑀸 𑀅𑀓𑀼𑀲𑀮𑁂 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀏𑀯𑀁 𑀅𑀓𑀼𑀲𑀮𑀥𑀫𑁆𑀫𑀸 𑀢𑀢𑁄𑀧𑀺 𑀘𑀺𑀭𑀓𑀸𑀮𑀪𑀸𑀯𑀦𑀸𑀲𑀫𑁆𑀪𑀯𑀢𑁄 𑀮𑀤𑁆𑀥𑀩𑀮𑀸 𑀳𑀼𑀢𑁆𑀯𑀸 𑀓𑀤𑀸𑀘𑀺 𑀓𑀼𑀲𑀮𑀥𑀫𑁆𑀫𑁂𑀧𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀤𑀴𑁆𑀳𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀯𑀝𑁆𑀝𑀔𑀸𑀡𑀼𑀓𑀪𑀸𑀯𑀚𑁄𑀢𑀦𑀸𑀧𑀺 𑀲𑀫𑀢𑁆𑀣𑀺𑀢𑀸 𑀳𑁄𑀢𑀻’’𑀢𑀺 𑀬𑀣𑀸 𑀢𑀁 ‘‘𑀯𑀲𑁆𑀲𑀪𑀜𑁆𑀜𑀸𑀦𑀁 𑀤𑀺𑀝𑁆𑀞𑀻’’𑀢𑀺, 𑀢𑀁 𑀦, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀥𑀫𑁆𑀫𑀸𑀦𑀁 𑀘𑀺𑀭𑀓𑀸𑀮𑀪𑀸𑀯𑀦𑀸𑀫𑀢𑁆𑀢𑁂𑀦 𑀦 𑀧𑀝𑀺𑀧𑀓𑁆𑀔𑀲𑁆𑀲 𑀧𑀚𑀳𑀦𑀲𑀫𑀢𑁆𑀣𑀢𑀸, 𑀅𑀣 𑀔𑁄 𑀥𑀫𑁆𑀫𑀢𑀸𑀲𑀺𑀤𑁆𑀥𑁂𑀦 𑀧𑀘𑁆𑀘𑀬𑀯𑀺𑀲𑁂𑀲𑀸𑀳𑀺𑀢𑀲𑀸𑀫𑀢𑁆𑀣𑀺𑀬𑁂𑀦 𑀅𑀢𑁆𑀢𑀦𑁄 𑀧𑀳𑀸𑀬𑀓𑀲𑀪𑀸𑀯𑁂𑀦 𑀧𑀳𑀸𑀬𑀓𑀪𑀸𑀯𑁄 𑀪𑀸𑀯𑀦𑀸𑀓𑀼𑀲𑀮𑀸𑀦𑀁𑀬𑁂𑀯 𑀯𑀼𑀢𑁆𑀢𑁄, 𑀅𑀓𑀼𑀲𑀮𑀸𑀦𑀁𑀬𑁂𑀯 𑀘 𑀧𑀳𑀸𑀢𑀩𑁆𑀩𑀪𑀸𑀯𑁄 ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦, 𑀅𑀓𑀼𑀲𑀮𑀸𑀦𑀁𑀬𑁂𑀯 𑀤𑀼𑀩𑁆𑀩𑀮𑀪𑀸𑀯𑁄 ‘‘𑀅𑀩𑀮𑀸𑀦𑀁 𑀩𑀮𑀻𑀬𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁭𑁭𑁬; 𑀫𑀳𑀸𑀦𑀺. 𑁫) (𑀬𑀼𑀢𑁆𑀢𑀺𑀦𑀸𑀧𑀺 𑀦𑀸𑀫𑀢𑁄 𑀯𑀸 𑀅𑀥𑀺𑀕𑀫𑀦𑀺𑀬𑁄 𑀆𑀮𑁄𑀓𑁄 𑀆𑀮𑁄𑀓𑀪𑀸𑀯𑀢𑁄 𑀩𑀸𑀳𑀺𑀭𑀸𑀭𑀡𑁂𑀓𑀸 𑀯𑀺𑀬 𑀦 𑀘𑁂𑀢𑁆𑀣 𑀧𑀝𑀺𑀜𑁆𑀜𑀢𑁆𑀢𑁂 𑀪𑀸𑀯𑁂𑀲𑀢𑀸 𑀲𑁄𑀢𑀼𑀦𑁄 𑀆𑀲𑀁𑀓𑀺𑀢𑀩𑁆𑀩𑀸 𑀯𑀺𑀲𑁂𑀲𑀯𑀲𑁆𑀲 𑀲𑀸𑀥𑁂𑀢𑀩𑁆𑀩𑀢𑁄 𑀲𑀸𑀫𑀜𑁆𑀜𑀲𑁆𑀲 𑀘 𑀲𑁄𑀢𑀼𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑁂𑀤-𑀲𑀤𑁆𑀤𑀲𑁆𑀲 𑀮𑁄𑀧𑁄 𑀤𑀻𑀧𑁂 𑀲𑀪𑀸𑀯𑁂 𑀲𑀸𑀥𑀦𑁂 𑀬𑀣𑀸 𑀢𑀁 𑀲𑀤𑁆𑀤𑀬𑀪𑀸𑀯𑀲𑁆𑀲 𑀦𑀸𑀧𑀺 𑀯𑀺𑀲𑀼𑀤𑁆𑀥𑀓𑀅𑀦𑀼𑀫𑀸𑀦𑀸𑀤𑀺𑀯𑀺𑀭𑁄𑀥𑀲𑀫𑁆𑀪𑀸𑀯𑀢𑁄. 𑀦 𑀳𑀺 𑀲𑀓𑁆𑀓𑀸 𑀅𑀦𑁆𑀢𑀭𑀸𑀮𑁄𑀓𑀲𑁆𑀲 𑀩𑀸𑀳𑀺𑀭𑀸𑀮𑁄𑀓𑀲𑁆𑀲 𑀯𑀺𑀬 𑀭𑀽𑀧𑀓𑀸𑀬𑀁 𑀉𑀧𑀸𑀤𑀸𑀬 𑀭𑀽𑀧𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸𑀤𑀺𑀓𑁂 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀲𑀓𑁆𑀓𑀸𑀢𑀺 𑀯𑀼𑀢𑁆𑀢𑀁, 𑀦𑀦𑀼𑀧𑀺 𑀅𑀦𑁆𑀢𑀭𑀸𑀮𑁄𑀓𑁄 𑀅𑀯𑀺𑀕𑁆𑀕𑀳𑀢𑁆𑀢𑀸 𑀯𑁂𑀤𑀦𑀸 𑀯𑀺𑀬𑀸𑀢𑀺 𑀲𑀤𑁆𑀥𑁂𑀯 𑀜𑀸𑀡𑀸𑀮𑁄𑀓𑀲𑁆𑀲 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀸 𑀯𑀺𑀬 𑀯𑀺𑀥𑀫𑀦𑀺𑀬𑀪𑀸𑀯𑁂 𑀲𑀩𑁆𑀩𑁂𑀲𑀫𑁆𑀧𑀺 𑀓𑀼𑀲𑀮𑀥𑀫𑁆𑀫𑀸𑀦𑀁 𑀓𑁂𑀦𑀘𑀺𑀧𑀺 𑀅𑀓𑀼𑀲𑀮𑀥𑀫𑁆𑀫𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑀺𑀬𑀢𑀸 𑀲𑀺𑀤𑁆𑀥𑀸𑀯 𑀳𑁄𑀢𑀺). 𑀯𑀝𑁆𑀝𑀔𑀸𑀡𑀼𑀓𑀘𑁄𑀤𑀦𑀸𑀬 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯𑀸𑀢𑀺 𑀢𑀺𑀝𑁆𑀞𑀢𑁂𑀲𑀸 𑀩𑀸𑀮𑀚𑀦𑀯𑀺𑀓𑀢𑁆𑀣𑀦𑀸.

𑁧𑁦𑁩. 𑀛𑀸𑀦𑀘𑀺𑀢𑁆𑀢𑀫𑀬𑀸𑀢𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀘𑀺𑀢𑁆𑀢𑁂𑀦 𑀦𑀺𑀩𑁆𑀩𑀢𑁆𑀢𑀸. 𑀢𑀣𑀸 𑀳𑀺 𑀢𑁂𑀲𑀁 𑀯𑀺𑀲𑁂𑀲𑁂𑀦 𑀛𑀸𑀦𑀫𑀦𑀲𑀸 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀫𑀦𑁄𑀫𑀬𑀸’’𑀢𑀺 𑀯𑀼𑀢𑁆𑀢𑀸, 𑀅𑀯𑀺𑀲𑁂𑀲𑁂𑀦 𑀧𑀦 𑀅𑀪𑀺𑀲𑀗𑁆𑀔𑀸𑀭𑀫𑀦𑀲𑀸 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀫𑀦𑁄𑀫𑀬𑀸 𑀏𑀯. 𑀲𑀜𑁆𑀜𑀸𑀫𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑀸𑀳 ‘‘𑀅𑀭𑀽𑀧𑀚𑁆𑀛𑀸𑀦𑀲𑀜𑁆𑀜𑀸𑀬𑀸’’𑀢𑀺. 𑀅𑀬𑀦𑁆𑀢𑀺 𑀭𑀽𑀧𑀺𑀢𑀸𑀪𑀸𑀯𑀧𑀝𑀺𑀧𑀚𑁆𑀚𑀦𑀓𑀧𑀼𑀕𑁆𑀕𑀮𑁄. 𑀅𑀧𑁆𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑁄𑀢𑀺 𑀅𑀦𑀥𑀺𑀕𑀢𑀭𑀽𑀧𑀚𑁆𑀛𑀸𑀦𑁄. 𑀢𑀲𑁆𑀲𑀧𑀻𑀢𑀺 𑀢𑀓𑁆𑀓𑀺𑀦𑁄𑀧𑀺. 𑀭𑀽𑀧𑀚𑁆𑀛𑀸𑀦𑁂 𑀓𑀗𑁆𑀔𑀸 𑀦𑀢𑁆𑀣𑀺 𑀅𑀦𑀼𑀲𑁆𑀲𑀯𑀯𑀲𑁂𑀦 𑀮𑀤𑁆𑀥𑀯𑀺𑀦𑀺𑀘𑁆𑀙𑀬𑀢𑁆𑀢𑀸.

𑁧𑁦𑁪. 𑀲𑀸𑀭𑀸𑀕𑀸𑀬𑀸𑀢𑀺 𑀲𑀭𑀸𑀕𑀪𑀸𑀯𑀸𑀬. 𑀲𑀦𑁆𑀢𑀺𑀓𑁂𑀢𑀺 𑀲𑀫𑀻𑀧𑁂, 𑀦 𑀣𑀸𑀫𑀕𑀢𑀸 𑀤𑀺𑀝𑁆𑀞𑀺𑀦𑀸𑀢𑀺𑀤𑀽𑀭𑀢𑁆𑀢𑀸 𑀲𑀭𑀸𑀕𑀸, 𑀦 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸. 𑀲𑀸 𑀳𑀺 𑀦 𑀣𑀸𑀫𑀕𑀢𑀸 𑀯𑀝𑁆𑀝𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀭𑀚𑁆𑀚𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 𑁋 ‘‘𑀭𑀸𑀕𑀯𑀲𑁂𑀦 𑀯𑀝𑁆𑀝𑁂 𑀭𑀚𑁆𑀚𑀦𑀲𑁆𑀲𑀸’’𑀢𑀺. 𑀲𑀩𑁆𑀩𑁂𑀧𑀺 𑀲𑀁𑀬𑁄𑀚𑀦𑀸 𑀢𑀡𑁆𑀳𑀸𑀯𑀲𑁂𑀦𑁂𑀯 𑀲𑀫𑁆𑀪𑀯𑀦𑁆𑀢𑀻𑀢𑀺 𑀆𑀳 𑁋 ‘‘𑀢𑀡𑁆𑀳𑀸𑀯𑀲𑁂𑀦 𑀲𑀁𑀬𑁄𑀚𑀦𑀢𑁆𑀣𑀸𑀬𑀸’’𑀢𑀺. 𑀆𑀭𑀼𑀧𑁆𑀧𑁂 𑀧𑀦𑀲𑁆𑀲 𑀓𑀗𑁆𑀔𑀸 𑀦𑀢𑁆𑀣𑀻𑀢𑀺 𑀅𑀦𑀼𑀲𑁆𑀲𑀯𑀯𑀲𑁂𑀦 𑀮𑀤𑁆𑀥𑀦𑀺𑀘𑁆𑀙𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀸𑀫𑀁 𑀤𑀼𑀕𑁆𑀕𑀢𑀺𑀤𑀼𑀓𑁆𑀔𑀸𑀦𑀁 𑀏𑀓𑀦𑁆𑀢𑀲𑀁𑀯𑀢𑁆𑀢𑀦𑁂𑀦 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀆𑀤𑀻𑀦𑀁 𑀅𑀧𑀡𑁆𑀡𑀓𑀢𑀸 𑀧𑀸𑀓𑀝𑀸 𑀏𑀯, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀅𑀦𑀯𑀚𑁆𑀚𑀲𑁆𑀲 𑀅𑀢𑁆𑀣𑀲𑁆𑀲 𑀏𑀓𑀦𑁆𑀢𑀲𑀸𑀥𑀓𑀁 𑀅𑀧𑀡𑁆𑀡𑀓𑀦𑁆𑀢𑀺 𑀓𑀢𑁆𑀯𑀸 𑀘𑁄𑀤𑀦𑀸, 𑀲𑀸𑀯𑀚𑁆𑀚𑀲𑁆𑀲𑀧𑀺 𑀅𑀢𑁆𑀣𑀲𑁆𑀲 𑀲𑀸𑀥𑀦𑁂 𑀏𑀓𑀁𑀲𑀺𑀓𑀪𑀸𑀯𑀁 𑀕𑀳𑁂𑀢𑁆𑀯𑀸 𑀧𑀭𑀺𑀳𑀸𑀭𑁄. 𑀢𑁂𑀦𑀸𑀳 ‘‘𑀕𑀳𑀡𑀯𑀲𑁂𑀦𑀸’’𑀢𑀺𑀆𑀤𑀺. 𑀢𑁂𑀦 𑀭𑀼𑀴𑁆𑀳𑀻𑀯𑀲𑁂𑀦 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀻𑀦𑀺 𑀅𑀧𑀡𑁆𑀡𑀓𑀗𑁆𑀕𑀸𑀦𑀺 𑀚𑀸𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁦𑁫. 𑀳𑁂𑀝𑁆𑀞𑀸 𑀢𑀬𑁄 𑀧𑀼𑀕𑁆𑀕𑀮𑀸𑀯 𑀳𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁆𑀢𑀧𑁄 𑀧𑀭𑀦𑁆𑀢𑀧𑁄𑀢𑀺 𑀇𑀫𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀳𑁂𑀝𑁆𑀞𑀸 𑀢𑀬𑁄 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀬𑀣𑀸𑀯𑀼𑀢𑁆𑀢𑀸 𑀧𑀜𑁆𑀘𑀧𑀺 𑀧𑀼𑀕𑁆𑀕𑀮𑀸 𑀤𑀼𑀧𑁆𑀧𑀝𑀺𑀧𑀦𑁆𑀦𑀸𑀯, 𑀢𑀢𑁄 𑀅𑀢𑁆𑀣𑀺𑀓𑀯𑀸𑀤𑀸𑀤𑀬𑁄 𑀧𑀜𑁆𑀘𑀧𑀼𑀕𑁆𑀕𑀮𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀢𑀸𑀬 𑀇𑀫𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀏𑀓𑁄 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑁄𑀯 𑀳𑁄𑀢𑀺. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀇𑀥 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀼𑀕𑁆𑀕𑀮𑀧𑀜𑁆𑀘𑀓𑀤𑁆𑀯𑀬𑀁 𑀇𑀫𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀏𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀯𑀺𑀪𑀸𑀕𑁂𑀦 𑀤𑀼𑀧𑁆𑀧𑀝𑀺𑀧𑀢𑁆𑀢𑀺𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑀼𑀁 𑀪𑀕𑀯𑀸 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀻𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀧𑀡𑁆𑀡𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀕𑀳𑀧𑀢𑀺𑀯𑀕𑁆𑀕𑀯𑀡𑁆𑀡𑀦𑀸.