𑁨. 𑀪𑀺𑀓𑁆𑀔𑀼𑀯𑀕𑁆𑀕𑁄

𑁧. 𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭. 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀦𑁆𑀢𑀺 𑀏𑀢𑁆𑀣 𑀅𑀫𑁆𑀩𑀮𑀝𑁆𑀞𑀺𑀓𑀸 𑀯𑀼𑀘𑁆𑀘𑀢𑀺 𑀲𑀼𑀚𑀸𑀢𑁄 𑀢𑀭𑀼𑀡𑀫𑁆𑀩𑀭𑀼𑀓𑁆𑀔𑁄, 𑀢𑀲𑁆𑀲 𑀧𑀦 𑀅𑀯𑀺𑀤𑀽𑀭𑁂 𑀓𑀢𑁄 𑀧𑀸𑀲𑀸𑀤𑁄 𑀇𑀥 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀯𑁂𑀴𑀼𑀯𑀦𑀯𑀺𑀳𑀸𑀭𑀲𑁆𑀲𑀸’’𑀢𑀺𑀆𑀤𑀺. 𑀧𑀥𑀸𑀦𑀖𑀭𑀲𑀗𑁆𑀔𑁂𑀧𑁂𑀢𑀺 𑀪𑀸𑀯𑀦𑀸𑀕𑁂𑀳𑀧𑁆𑀧𑀓𑀸𑀭𑁂 𑀬𑁄𑀕𑀻𑀦𑀁 𑀕𑁂𑀳𑁂𑀢𑀺 𑀅𑀢𑁆𑀣𑁄. 𑀢𑀺𑀔𑀺𑀡𑁄𑀯 𑀳𑁄𑀢𑀺, 𑀦 𑀢𑀲𑁆𑀲 𑀢𑀺𑀔𑀺𑀡𑀪𑀸𑀯𑁄 𑀓𑁂𑀦𑀘𑀺 𑀓𑀸𑀢𑀩𑁆𑀩𑁄 𑀲𑀪𑀸𑀯𑀲𑀺𑀤𑁆𑀥𑀢𑁆𑀢𑀸. 𑀏𑀯𑀫𑁂𑀯 𑀅𑀢𑁆𑀢𑀦𑁄 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀓𑀫𑁆𑀫𑀼𑀦𑀸 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀅𑀬𑀫𑁆𑀧𑀺 𑀆𑀬𑀲𑁆𑀫𑀸…𑀧𑁂… 𑀢𑀢𑁆𑀣 𑀯𑀺𑀳𑀸𑀲𑀺. 𑀧𑀓𑀢𑀺𑀧𑀜𑁆𑀜𑀢𑁆𑀢𑀫𑁂𑀯𑀸𑀢𑀺 𑀧𑀓𑀢𑀺𑀬𑀸 𑀧𑀜𑁆𑀜𑀢𑁆𑀢𑀁 𑀩𑀼𑀤𑁆𑀥𑀸𑀦𑀁 𑀉𑀧𑀕𑀫𑀦𑀢𑁄 𑀧𑀼𑀭𑁂𑀢𑀭𑀫𑁂𑀯 𑀘𑀸𑀭𑀺𑀢𑁆𑀢𑀯𑀲𑁂𑀦 𑀧𑀜𑁆𑀜𑀢𑁆𑀢𑀁.

𑁧𑁦𑁮. 𑀉𑀤𑀓𑀁 𑀅𑀦𑁂𑀦 𑀥𑀻𑀬𑀢𑀺, 𑀞𑀧𑀻𑀬𑀢𑀺 𑀯𑀸 𑀏𑀢𑁆𑀣𑀸𑀢𑀺 𑀉𑀤𑀓𑀸𑀥𑀸𑀦𑀁. 𑀉𑀤𑀓𑀝𑁆𑀞𑀸𑀦𑀦𑁆𑀢𑀺 𑀘 𑀔𑀼𑀤𑁆𑀤𑀓𑀪𑀸𑀚𑀦𑀁. ‘‘𑀑𑀯𑀸𑀤𑀤𑀸𑀦𑀢𑁆𑀣𑀁 𑀆𑀫𑀦𑁆𑀢𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑀁 𑀧𑀦𑀲𑁆𑀲 𑀑𑀯𑀸𑀤𑀤𑀸𑀦𑀁 𑀦 𑀇𑀥𑁂𑀯, 𑀅𑀣 𑀔𑁄 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀩𑀳𑀼𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀢𑀦𑁆𑀢𑀺 𑀢𑀸𑀦𑀺 𑀢𑀸𑀦𑀺 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀥 𑀲𑀁𑀯𑀡𑁆𑀡𑀦𑀢𑁆𑀣𑀁 ‘‘𑀪𑀕𑀯𑀢𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀅𑀯𑀺𑀚𑀳𑀺𑀢𑀦𑁆𑀢𑀺 𑀇𑀫𑀺𑀦𑀸 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀓𑀼𑀫𑀸𑀭𑀧𑀜𑁆𑀳𑀸 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀓𑁂𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲𑀓𑀸 𑀧𑀯𑀢𑁆𑀢𑀸 𑀤𑀲 𑀧𑀼𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀤𑀲𑀧𑀼𑀘𑁆𑀙𑀁, 𑀏𑀓𑁂𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑀲𑀓𑀸 𑀏𑀓𑀼𑀢𑁆𑀢𑀭𑀯𑀲𑁂𑀦 𑀧𑀯𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀸𑀬 𑀧𑀜𑁆𑀘𑀧𑀡𑁆𑀡𑀲𑀯𑀺𑀲𑁆𑀲𑀚𑁆𑀚𑀦𑀁 𑀲𑀸𑀫𑀡𑁂𑀭𑀧𑀜𑁆𑀳𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬𑀁 𑀔𑀼𑀤𑁆𑀤𑀓𑀝𑁆𑀞𑀓𑀣𑀸𑀬𑀁 (𑀔𑀼. 𑀧𑀸. 𑀅𑀝𑁆𑀞. 𑁪.𑀓𑀼𑀫𑀸𑀭𑀧𑀜𑁆𑀳𑀯𑀡𑁆𑀡𑀦𑀸) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀢𑀸𑀬 𑀅𑀪𑀺𑀡𑁆𑀳𑀁 𑀫𑀼𑀲𑀸 𑀲𑀫𑀼𑀤𑀸𑀘𑀭𑀡𑀢𑁄 ‘‘𑀧𑀺𑀬𑀫𑀼𑀲𑀸𑀯𑀸𑀤𑀸’’𑀢𑀺 𑀯𑀼𑀢𑁆𑀢𑀁, 𑀉𑀤𑀓𑀸𑀯𑀲𑁂𑀲𑀙𑀟𑁆𑀟𑀦𑀉𑀤𑀓𑀸𑀥𑀸𑀦𑀦𑀺𑀓𑀼𑀚𑁆𑀚𑀦𑀉𑀓𑁆𑀓𑀼𑀚𑁆𑀚𑀦𑀤𑀲𑁆𑀲𑀦𑀲𑀜𑁆𑀜𑀺𑀢𑀸 𑀘𑀢𑀲𑁆𑀲𑁄 𑀉𑀤𑀓𑀸𑀥𑀸𑀦𑀽𑀧𑀫𑀸𑀬𑁄 𑀲𑀩𑁆𑀩𑀲𑁆𑀲 𑀬𑀼𑀤𑁆𑀥𑀓𑀫𑁆𑀫𑀲𑁆𑀲 𑀅𑀓𑀭𑀡𑀓𑀭𑀡𑀯𑀲𑁂𑀦 𑀤𑀲𑁆𑀲𑀺𑀢𑀸 𑀤𑁆𑀯𑁂 𑀳𑀢𑁆𑀣𑀺𑀉𑀧𑀫𑀸𑀬𑁄.

𑀢𑀢𑁆𑀣 𑀭𑀸𑀳𑀼𑀮𑀲𑀼𑀢𑁆𑀢𑀦𑁆𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑁂 𑀆𑀕𑀢𑀁 𑀭𑀸𑀳𑀼𑀮𑀲𑀼𑀢𑁆𑀢𑀁 (𑀲𑀼. 𑀦𑀺. 𑁩𑁩𑁭 𑀆𑀤𑀬𑁄). 𑀅𑀪𑀺𑀡𑁆𑀳𑁄𑀯𑀸𑀤𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀅𑀦𑁆𑀢𑀭𑀦𑁆𑀢𑀭𑀸 𑀢𑀁 𑀲𑀼𑀢𑁆𑀢𑀁 𑀓𑀣𑁂𑀢𑁆𑀯𑀸 𑀪𑀕𑀯𑀸 𑀣𑁂𑀭𑀁 𑀑𑀯𑀤𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀜𑁆𑀘 𑀧𑀦𑀸𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀁 𑀪𑀕𑀯𑀢𑁄 𑀢𑀁𑀢𑀁𑀓𑀸𑀮𑀸𑀦𑀼𑀭𑀽𑀧𑀁 𑀅𑀢𑁆𑀢𑀦𑁄 𑀑𑀯𑀸𑀤𑀤𑀸𑀦𑀁 𑀲𑀦𑁆𑀥𑀸𑀬. 𑀩𑀻𑀚𑀦𑁆𑀢𑀺 𑀅𑀡𑁆𑀟𑀁. 𑀧𑀲𑁆𑀲𑀲𑀺 𑀦𑀽𑀢𑀺 𑀦𑀼-𑀲𑀤𑁆𑀤𑁄 𑀅𑀦𑀼𑀚𑀸𑀦𑀦𑁂, 𑀦𑀦𑀼 𑀧𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀲𑀘𑁆𑀘𑀥𑀫𑁆𑀫𑀁 𑀮𑀗𑁆𑀖𑀺𑀢𑁆𑀯𑀸 𑀞𑀺𑀢𑀲𑁆𑀲 𑀓𑀺𑀜𑁆𑀘𑀺𑀧𑀺 𑀅𑀓𑀢𑁆𑀢𑀩𑁆𑀩𑀁 𑀦𑀸𑀫 𑀧𑀸𑀧𑀁 𑀦𑀢𑁆𑀣𑀻𑀢𑀺 𑀆𑀳 𑁋 ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀲𑀁𑀯𑀭𑀭𑀳𑀺𑀢𑀲𑁆𑀲 𑀑𑀧𑀫𑁆𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸’’𑀢𑀺. 𑀢𑀣𑀸 𑀳𑀺 𑁋

‘‘𑀏𑀓𑀁 𑀥𑀫𑁆𑀫𑀫𑀢𑀻𑀢𑀲𑁆𑀲, 𑀫𑀼𑀲𑀸𑀯𑀸𑀤𑀺𑀲𑁆𑀲 𑀚𑀦𑁆𑀢𑀼𑀦𑁄;

𑀯𑀺𑀢𑀺𑀡𑁆𑀡𑀧𑀭𑀮𑁄𑀓𑀲𑁆𑀲, 𑀦𑀢𑁆𑀣𑀺 𑀧𑀸𑀧𑀫𑀓𑀸𑀭𑀺𑀬’’𑀦𑁆𑀢𑀺. (𑀥. 𑀧. 𑁧𑁭𑁬);

𑀉𑀭𑀼𑀴𑁆𑀳𑀯𑀸𑀢𑀺 𑀉𑀭𑀼𑀴𑁆𑀳𑁄 𑀳𑀼𑀢𑁆𑀯𑀸 𑀉𑀲𑁆𑀲𑀺𑀢𑁄. 𑀲𑁄 𑀧𑀦 𑀤𑀫𑀯𑀲𑁂𑀦 𑀅𑀪𑀺𑀭𑀼𑀬𑁆𑀳 𑀯𑀟𑁆𑀠𑀺𑀢𑁄 𑀆𑀭𑁄𑀳𑀦𑀬𑁄𑀕𑁆𑀬𑁄 𑀘 𑀳𑁄𑀢𑀻𑀢𑀺 𑀆𑀳 ‘‘𑀅𑀪𑀺𑀯𑀟𑁆𑀠𑀺𑀢𑁄 𑀆𑀭𑁄𑀳𑀲𑀫𑁆𑀧𑀦𑁆𑀦𑁄’’𑀢𑀺. 𑀆𑀕𑀢𑀸𑀕𑀢𑁂𑀢𑀺 𑀅𑀢𑁆𑀢𑀦𑁄 𑀬𑁄𑀕𑁆𑀬𑀧𑀤𑁂𑀲𑀁 𑀆𑀕𑀢𑀸𑀕𑀢𑁂. 𑀧𑀝𑀺𑀲𑁂𑀦𑀸𑀬 𑀨𑀮𑀓𑀓𑁄𑀝𑁆𑀞𑀓𑀫𑀼𑀡𑁆𑀟𑀧𑀸𑀓𑀸𑀭𑀸𑀤𑀬𑁄𑀢𑀺 𑀧𑀝𑀺𑀲𑁂𑀦𑀸𑀬 𑀅𑀢𑁆𑀢𑀦𑁄 𑀆𑀭𑀓𑁆𑀔𑀢𑁆𑀣𑀸𑀬 𑀞𑀧𑀺𑀢𑁂 𑀨𑀮𑀓𑀓𑁄𑀝𑁆𑀞𑀓𑁂 𑀘𑁂𑀯 𑀉𑀤𑁆𑀥𑀘𑁆𑀙𑀤𑀧𑀸𑀓𑀸𑀭𑀸𑀤𑀺𑀓𑁂 𑀘. 𑀏𑀢𑀁 𑀧𑀤𑁂𑀲𑀦𑁆𑀢𑀺 𑀏𑀢𑀁 𑀧𑀭𑀲𑁂𑀦𑀸𑀧𑀤𑁂𑀲𑀁. 𑀏𑀢𑁆𑀢𑀓𑁂𑀦𑀸𑀢𑀺 𑀑𑀮𑁄𑀓𑀦𑀫𑀢𑁆𑀢𑁂𑀦. 𑀢𑀲𑁆𑀲 𑀑𑀮𑁄𑀓𑀦𑀸𑀓𑀸𑀭𑀤𑀲𑁆𑀲𑀦𑁂𑀦𑁂𑀯. 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀲𑁂𑀦𑀸𑀦𑀻𑀓𑀁 𑀤𑁆𑀯𑁂𑀥𑀸 𑀪𑀺𑀚𑁆𑀚𑀢𑀺, 𑀢𑀻𑀭𑀧𑀸𑀢𑀺𑀓𑀁 𑀫𑀤𑁆𑀤𑀺𑀢𑀁 𑀳𑀼𑀢𑁆𑀯𑀸 𑀧𑀤𑀸𑀢𑀸 𑀳𑀼𑀢𑁆𑀯𑀸 𑀤𑁆𑀯𑁂𑀥𑀸 𑀳𑀼𑀢𑁆𑀯𑀸 𑀧𑀮𑀸𑀬𑀦𑁆𑀢𑀺. 𑀓𑀡𑁆𑀡𑁂𑀳𑀺 𑀧𑀳𑀭𑀺𑀢𑁆𑀯𑀸𑀢𑀺 𑀧𑀕𑁂𑀯 𑀲𑀭𑀸𑀦𑀁 𑀆𑀕𑀫𑀦𑀲𑀤𑁆𑀤𑀁 𑀉𑀧𑀥𑀸𑀭𑁂𑀢𑁆𑀯𑀸 𑀬𑀣𑀸 𑀯𑁂𑀕𑁄 𑀦 𑀳𑁄𑀢𑀺, 𑀏𑀯𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀳𑀺 𑀧𑀳𑀭𑀺𑀢𑁆𑀯𑀸 𑀧𑀸𑀢𑀦𑀁. 𑀧𑀝𑀺𑀳𑀢𑁆𑀣𑀺𑀧𑀝𑀺𑀅𑀲𑁆𑀲𑀸𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀧𑀢𑀺-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄𑀢𑀺. 𑀤𑀻𑀖𑀸𑀲𑀺𑀮𑀝𑁆𑀞𑀺𑀬𑀸𑀢𑀺 𑀤𑀻𑀖𑀮𑀢𑀸𑀬 𑀅𑀲𑀺𑀮𑀝𑁆𑀞𑀺𑀬𑀸.

𑀓𑀭𑀡𑁂𑀢𑀺 𑀓𑀫𑁆𑀫𑀓𑀭𑀡𑁂. 𑀫𑀜𑁆𑀜𑀢𑀺 𑀳𑀢𑁆𑀣𑀸𑀭𑁄𑀳𑁄. 𑀅𑀬𑀫𑀼𑀕𑁆𑀕𑀭𑀦𑁆𑀢𑀺 𑀢𑀸𑀤𑀺𑀲𑁂 𑀓𑀸𑀮𑁂 𑀕𑀳𑀺𑀢𑀫𑀼𑀕𑁆𑀕𑀭𑀁. 𑀑𑀮𑁄𑀓𑁂𑀢𑁆𑀯𑀸𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸, 𑀅𑀪𑀺𑀡𑁆𑀳𑀁 𑀲𑀫𑁆𑀧𑀚𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁧𑁦𑁯. 𑀲𑀲𑀓𑁆𑀓𑀦𑁆𑀢𑀺 𑀧𑀲𑁆𑀲𑀺𑀢𑀼𑀁 𑀬𑀼𑀢𑁆𑀢𑀁 𑀓𑀢𑁆𑀯𑀸 𑀉𑀲𑁆𑀲𑀸𑀳𑀁 𑀚𑀦𑁂𑀢𑁆𑀯𑀸 𑀦 𑀓𑀭𑀡𑀻𑀬𑀁, 𑀢𑀸𑀤𑀺𑀲𑀁 𑀦𑀺𑀬𑀫𑀢𑁄 𑀅𑀓𑀢𑁆𑀢𑀩𑁆𑀩𑀁 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑀁𑀲𑁂𑀦𑁂𑀯 𑀦 𑀓𑀸𑀢𑀩𑁆𑀩’’𑀦𑁆𑀢𑀺. 𑀧𑀝𑀺𑀲𑀁𑀳𑀭𑁂𑀬𑁆𑀬𑀸𑀲𑀻𑀢𑀺 𑀓𑀭𑀡𑀢𑁄 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑁂𑀬𑁆𑀬𑀸𑀲𑀺. 𑀬𑀣𑀸𑀪𑀽𑀢𑁄 𑀅𑀲𑀦𑁆𑀢𑁄 𑀦𑀺𑀯𑀢𑁆𑀢𑁄 𑀅𑀓𑀭𑁄𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀯𑀢𑁆𑀢𑁂𑀬𑁆𑀬𑀸𑀲𑀺 𑀫𑀸 𑀓𑀭𑁂𑀬𑁆𑀬𑀸𑀲𑀻’’𑀢𑀺. 𑀅𑀦𑀼𑀧𑀤𑁂𑀬𑁆𑀬𑀸𑀲𑀻𑀢𑀺 𑀅𑀦𑀼𑀩𑀮𑀧𑁆𑀧𑀤𑀸𑀬𑀻 𑀪𑀯𑁂𑀬𑁆𑀬𑀸𑀲𑀺. 𑀢𑁂𑀦𑀸𑀳 ‘‘𑀉𑀧𑀢𑁆𑀣𑀫𑁆𑀪𑁂𑀬𑁆𑀬𑀸𑀲𑀻’’𑀢𑀺. 𑀢𑀁 𑀧𑀦 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑀉𑀧𑀢𑁆𑀣𑀫𑁆𑀪𑀦𑀁 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀫𑁂𑀯𑀸𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺. 𑀲𑀺𑀓𑁆𑀔𑀫𑀸𑀦𑁄𑀢𑀺 𑀢𑀁𑀬𑁂𑀯 𑀅𑀥𑀺𑀲𑀻𑀮𑀲𑀺𑀓𑁆𑀔𑀁 𑀢𑀦𑁆𑀦𑀺𑀲𑁆𑀲𑀬𑀜𑁆𑀘 𑀲𑀺𑀓𑁆𑀔𑀸𑀤𑁆𑀯𑀬𑀁 𑀲𑀺𑀓𑁆𑀔𑀦𑁆𑀢𑁄 𑀲𑀫𑁆𑀧𑀸𑀤𑁂𑀦𑁆𑀢𑁄.

𑁧𑁧𑁧. 𑀓𑀺𑀢𑁆𑀢𑀓𑁂 𑀧𑀦 𑀞𑀸𑀦𑁂𑀢𑀺 𑀓𑀺𑀢𑁆𑀢𑀓𑁂 𑀞𑀸𑀦𑁂 𑀧𑀯𑀢𑁆𑀢𑀸𑀦𑀺. 𑀅𑀯𑀺𑀤𑀽𑀭𑁂 𑀏𑀯 𑀧𑀯𑀢𑁆𑀢𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀲𑁆𑀫𑀺𑀁 𑀧𑀼𑀭𑁂𑀪𑀢𑁆𑀢𑁂𑀬𑁂𑀯 𑀲𑁄𑀥𑁂𑀢𑀩𑁆𑀩𑀸𑀦𑀻’’𑀢𑀺 𑀆𑀳. 𑀏𑀯𑀜𑁆𑀳𑀺 𑀢𑀸𑀦𑀺 𑀲𑀼𑀲𑁄𑀥𑀺𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀸𑀦𑀺. 𑀧𑀭𑁂𑀲𑀁 𑀅𑀧𑁆𑀧𑀺𑀬𑀁 𑀕𑀭𑀼𑀁 𑀕𑀸𑀭𑀬𑁆𑀳𑀁, 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑀢𑁄 𑀧𑀦 𑀅𑀜𑁆𑀜𑀁 𑀯𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦𑁂𑀯 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀧𑀭𑀺𑀲𑁄𑀥𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀦 𑀕𑀳𑀺𑀢𑀁. 𑀧𑀝𑀺𑀖𑀁 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁂𑀦 𑀅𑀲𑀫𑀧𑁂𑀓𑁆𑀔𑀡𑁂 𑀫𑁄𑀳𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑁧𑁧𑁨. 𑀯𑀼𑀢𑁆𑀢𑀦𑀬𑁂𑀦 𑀓𑀸𑀬𑀓𑀫𑁆𑀫𑀸𑀤𑀺𑀧𑀭𑀺𑀲𑁄𑀥𑀦𑀁 𑀦𑀸𑀫 𑀇𑀥𑁂𑀯, 𑀦 𑀇𑀢𑁄 𑀩𑀳𑀺𑀤𑁆𑀥𑀸𑀢𑀺 𑀆𑀳 ‘‘𑀩𑀼𑀤𑁆𑀥𑀸…𑀧𑁂… 𑀲𑀸𑀯𑀓𑀸 𑀯𑀸’’𑀢𑀺. 𑀢𑁂 𑀳𑀺 𑀅𑀢𑁆𑀣𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑀸𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀩𑁆𑀩𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀆𑀭𑀼𑀴𑁆𑀳𑀫𑀕𑁆𑀕𑁄, 𑀭𑀸𑀳𑀼𑀮, 𑀫𑀬𑀸 𑀢𑀼𑀬𑁆𑀳𑀁 𑀆𑀘𑀺𑀓𑁆𑀔𑀺𑀢𑁄, 𑀢𑀲𑁆𑀫𑀸. 𑀢𑁂𑀦 𑀅𑀦𑀼𑀲𑀺𑀓𑁆𑀔𑀦𑁆𑀢𑁂𑀦 𑀢𑀬𑀸 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀑𑀯𑀸𑀤𑀁 𑀅𑀤𑀸𑀲𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸

𑀲𑀫𑀢𑁆𑀢𑀸.

𑁨. 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩. 𑀇𑀭𑀺𑀬𑀸𑀧𑀣𑀸𑀦𑀼𑀩𑀦𑁆𑀥𑀦𑁂𑀦𑀸𑀢𑀺 𑀇𑀭𑀺𑀬𑀸𑀧𑀣𑀕𑀫𑀦𑀸𑀦𑀼𑀩𑀦𑁆𑀥𑀦𑁂𑀦, 𑀦 𑀧𑀝𑀺𑀧𑀢𑁆𑀢𑀺𑀕𑀫𑀦𑀸𑀦𑀼𑀩𑀦𑁆𑀥𑀦𑁂𑀦. 𑀅𑀜𑁆𑀜𑀫𑁂𑀯 𑀳𑀺 𑀩𑀼𑀤𑁆𑀥𑀸𑀦𑀁 𑀧𑀝𑀺𑀧𑀢𑁆𑀢𑀺𑀕𑀫𑀦𑀁 𑀅𑀜𑁆𑀜𑀁 𑀲𑀸𑀯𑀓𑀸𑀦𑀁. 𑀯𑀺𑀮𑀸𑀲𑀺𑀢𑀕𑀫𑀦𑁂𑀦𑀸𑀢𑀺 𑁋 ‘‘𑀤𑀽𑀭𑁂 𑀧𑀸𑀤𑀁 𑀦 𑀉𑀤𑁆𑀥𑀭𑀢𑀺, 𑀦 𑀅𑀘𑁆𑀘𑀸𑀲𑀦𑁆𑀦𑁂 𑀧𑀸𑀤𑀁 𑀦𑀺𑀓𑁆𑀔𑀺𑀧𑀢𑀺, 𑀦𑀸𑀢𑀺𑀲𑀻𑀖𑀁 𑀕𑀘𑁆𑀙𑀢𑀺 𑀦𑀸𑀢𑀺𑀲𑀡𑀺𑀓’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑀅𑀝𑁆𑀞. 𑁩.𑁪.𑁨𑁪𑁩; 𑀉𑀤𑀸. 𑀅𑀝𑁆𑀞. 𑁭𑁬; 𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁨𑁮𑁫) 𑀯𑀼𑀢𑁆𑀢𑁂𑀦 𑀲𑀪𑀸𑀯𑀲𑀻𑀮𑁂𑀦 𑀩𑀼𑀤𑁆𑀥𑀸𑀦𑀁 𑀘𑀸𑀢𑀼𑀭𑀺𑀬𑀕𑀫𑀦𑁂𑀦. 𑀢𑀤𑁂𑀯 𑀳𑀺 𑀲𑀦𑁆𑀥𑀸𑀬 ‘‘𑀧𑀤𑁂 𑀧𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀧𑀤𑀸𑀦𑀼𑀧𑀤𑀺𑀓𑁄𑀢𑀺 𑀭𑀸𑀳𑀼𑀮𑀢𑁆𑀣𑁂𑀭𑀲𑁆𑀲𑀧𑀺 𑀮𑀓𑁆𑀔𑀡𑀧𑀸𑀭𑀺𑀧𑀽𑀭𑀺𑀬𑀸 𑀢𑀸𑀤𑀺𑀲𑀫𑁂𑀯 𑀕𑀫𑀦𑀦𑁆𑀢𑀺 𑀬𑀢𑁆𑀢𑀓𑀁 𑀧𑀤𑁂𑀲𑀁 𑀅𑀦𑁆𑀢𑀭𑀁 𑀅𑀤𑀢𑁆𑀯𑀸 𑀪𑀕𑀯𑀢𑁄 𑀧𑀺𑀝𑁆𑀞𑀺𑀢𑁄 𑀕𑀦𑁆𑀢𑀼𑀁 𑀆𑀭𑀤𑁆𑀥𑁄, 𑀲𑀩𑁆𑀩𑀢𑁆𑀣 𑀢𑀫𑁂𑀯 𑀕𑀫𑀦𑀧𑀤𑀸𑀦𑀼𑀧𑀤𑀁 𑀕𑀘𑁆𑀙𑀢𑀻𑀢𑀺 𑀧𑀤𑀸𑀦𑀼𑀧𑀤𑀺𑀓𑁄.

𑀯𑀡𑁆𑀡𑀦𑀸𑀪𑀽𑀫𑀺 𑀘𑀸𑀬𑀁 𑀢𑀢𑁆𑀣 𑀪𑀕𑀯𑀦𑁆𑀢𑀁 𑀣𑁂𑀭𑀜𑁆𑀘 𑀅𑀦𑁂𑀓𑀭𑀽𑀧𑀸𑀳𑀺 𑀉𑀧𑀫𑀸𑀳𑀺 𑀯𑀡𑁆𑀡𑁂𑀦𑁆𑀢𑁄 ‘‘𑀢𑀢𑁆𑀣 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳. 𑀦𑀺𑀓𑁆𑀔𑀦𑁆𑀢𑀕𑀚𑀧𑁄𑀢𑀓𑁄 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣𑀸𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀏𑀯𑀁 𑀢𑀁 𑀓𑁂𑀲𑀭𑀲𑀻𑀳𑁄 𑀯𑀺𑀬𑀸𑀢𑀺𑀆𑀤𑀻𑀲𑀼𑀧𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀸𑀭𑀓𑀭𑀸𑀚𑀸 𑀦𑀸𑀫 𑀘𑀦𑁆𑀤𑁄. 𑀤𑁆𑀯𑀺𑀦𑁆𑀦𑀁 𑀘𑀦𑁆𑀤𑀫𑀡𑁆𑀟𑀮𑀸𑀦𑀦𑁆𑀢𑀺𑀆𑀤𑀺 𑀧𑀭𑀺𑀓𑀧𑁆𑀧𑀯𑀘𑀦𑀁, 𑀩𑀼𑀤𑁆𑀥𑀸𑀯𑁂𑀡𑀺𑀓𑀲𑀦𑁆𑀢𑀓𑀁 𑀯𑀺𑀬 𑀩𑀼𑀤𑁆𑀥𑀸𑀦𑀁 𑀆𑀓𑀧𑁆𑀧𑀲𑁄𑀪𑀸 𑀅𑀳𑁄𑀲𑀺, 𑀅𑀳𑁄 𑀲𑀺𑀭𑀻𑀲𑀫𑁆𑀧𑀢𑁆𑀢𑀻𑀢𑀺 𑀬𑁄𑀚𑀦𑀸.

𑀆𑀤𑀺𑀬𑀫𑀸𑀦𑀸𑀢𑀺 𑀕𑀡𑁆𑀳𑀦𑁆𑀢𑀺. ‘‘𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀦 𑀅𑀚𑁆𑀚𑀼𑀧𑁂𑀓𑁆𑀔𑀺𑀢𑀩𑁆𑀩𑁄. 𑀇𑀤𑀁 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑁂𑀢𑀺 𑀇𑀤𑀁 𑀧𑀸𑀡𑀅𑀢𑀺𑀧𑀸𑀢𑀦𑀁 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑁂 𑀇𑀤𑀁 𑀤𑀡𑁆𑀟𑁂𑀦 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀯𑀺𑀳𑁂𑀞𑀦𑀁 𑀦 𑀓𑀢𑁆𑀢𑀩𑁆𑀩𑀁, 𑀇𑀤𑀁 𑀧𑀸𑀡𑀺𑀦𑀸 𑀤𑀡𑁆𑀟𑀓𑀤𑀸𑀦𑀜𑁆𑀘 𑀅𑀦𑁆𑀢𑀫𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀦𑀫𑀢𑁆𑀢𑀫𑁆𑀧𑀺 𑀦 𑀓𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀦𑀬𑀲𑀢𑁂𑀦𑀧𑀺 𑀦𑀬𑀲𑀳𑀲𑁆𑀲𑁂𑀦𑀧𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀢𑀣𑀸 𑀇𑀥 𑀢𑀸𑀯 𑀲𑀫𑁆𑀫𑀚𑁆𑀚𑀦𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀢𑀢𑁆𑀣 𑀧𑀭𑀺𑀪𑀡𑁆𑀟𑀓𑀭𑀡𑀁 𑀯𑀺𑀳𑀸𑀭𑀗𑁆𑀕𑀡𑀲𑀫𑁆𑀫𑀚𑁆𑀚𑀦𑀁 𑀓𑀘𑀯𑀭𑀙𑀟𑁆𑀟𑀦𑀁 𑀯𑀸𑀮𑀺𑀓𑀸𑀲𑀫𑀓𑀺𑀭𑀡𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀧𑀝𑀺𑀯𑀺𑀚𑁆𑀛𑀢𑀺. 𑀢𑁂𑀦𑀸𑀳 𑁋 ‘‘𑀇𑀤𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀧𑀭𑀺𑀪𑀸𑀲𑀦𑁆𑀢𑀺 𑀢𑀚𑁆𑀚𑀦𑀁. 𑀮𑀪𑀸𑀫𑀻𑀢𑀺 𑀧𑀘𑁆𑀘𑀸𑀲𑀻𑀲𑀢𑀺.

𑀲𑀩𑁆𑀩𑀫𑁂𑀢𑀦𑁆𑀢𑀺 𑀲𑀩𑁆𑀩𑀁 𑀏𑀢𑀁 𑀫𑀬𑀺 𑀮𑀩𑁆𑀪𑀫𑀸𑀦𑀁 𑀲𑀺𑀓𑁆𑀔𑀸𑀓𑀸𑀫𑀢𑀁. 𑀅𑀪𑀺𑀜𑁆𑀜𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸. 𑀲𑀳𑀸𑀬𑁄𑀢𑀺 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 𑀪𑀕𑀯𑀢𑀸 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑁂 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀥𑀫𑁆𑀫𑀸𑀭𑀓𑁆𑀔𑁄𑀢𑀺 𑀲𑀢𑁆𑀣𑀼 𑀲𑀤𑁆𑀥𑀫𑁆𑀫𑀭𑀢𑀦𑀸𑀦𑀼𑀧𑀸𑀮𑀓𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄. 𑀧𑁂𑀢𑁆𑀢𑀺𑀬𑁄𑀢𑀺 𑀘𑀽𑀴𑀧𑀺𑀢𑀸. 𑀲𑀩𑁆𑀩𑀁 𑀫𑁂 𑀚𑀺𑀦𑀲𑀸𑀲𑀦𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀲𑀸𑀲𑀦𑀁 𑀫𑀬𑁆𑀳𑀫𑁂𑀯.

𑀙𑀦𑁆𑀤𑀭𑀸𑀕𑀁 𑀜𑀢𑁆𑀯𑀸𑀢𑀺 𑀙𑀦𑁆𑀤𑀭𑀸𑀕𑀁 𑀫𑀫 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀁 𑀜𑀢𑁆𑀯𑀸. 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂𑀢𑀺 𑀯𑀺𑀳𑀸𑀭𑀧𑀭𑀺𑀬𑀦𑁆𑀢𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑀝𑁆𑀞𑀸𑀦𑁂 𑀅𑀦𑀼𑀘𑁆𑀙𑀯𑀺𑀓𑁂.

𑀢𑀤𑀸𑀢𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀧𑀲𑀸𑀤𑀸𑀧𑀦𑀓𑀸𑀮𑁂. 𑀅𑀜𑁆𑀜𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀘𑀗𑁆𑀓𑀫𑀦𑀇𑀭𑀺𑀬𑀸𑀧𑀣𑁂𑀧𑀺 𑀧𑀺𑀝𑁆𑀞𑀺𑀧𑀲𑀸𑀭𑀡𑀓𑀸𑀮𑁂𑀧𑀺 𑀲𑀫𑀺𑀚𑁆𑀛𑀦𑁆𑀢𑀺, 𑀦 𑀏𑀯𑀫𑀺𑀤𑀦𑁆𑀢𑀺 𑀆𑀳 𑁋 ‘‘𑀇𑀤𑀫𑀲𑁆𑀲 𑀏𑀢𑀺𑀲𑁆𑀲𑀸 𑀦𑀺𑀲𑀚𑁆𑀚𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺. 𑀆𑀦𑀸𑀧𑀸𑀦𑀲𑁆𑀲𑀢𑀺𑀦𑁆𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁.

𑀲𑀫𑀲𑀻𑀲𑀻 𑀳𑁄𑀢𑀻𑀢𑀺 𑀲𑀘𑁂 𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀭𑁄𑀢𑀺 𑀦𑁄 𑀘𑁂 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀔𑀺𑀧𑁆𑀧𑀸𑀪𑀺𑀜𑁆𑀜𑁄𑀢𑀺 𑀔𑀺𑀧𑁆𑀧𑀁 𑀮𑀳𑀼𑀁𑀬𑁂𑀯 𑀧𑀢𑁆𑀢𑀩𑁆𑀩𑀙𑀴𑀪𑀺𑀜𑁆𑀜𑁄.

𑀧𑀭𑀺𑀧𑀼𑀡𑁆𑀡𑀸𑀢𑀺 𑀲𑁄𑀴𑀲𑀲𑀼 𑀆𑀓𑀸𑀭𑁂𑀲𑀼 𑀓𑀲𑁆𑀲𑀘𑀺𑀧𑀺 𑀅𑀢𑀸𑀧𑀦𑁂𑀦 𑀲𑀩𑁆𑀩𑀲𑁄 𑀧𑀼𑀡𑁆𑀡𑀸. 𑀲𑀼𑀪𑀸𑀯𑀺𑀢𑀸𑀢𑀺 𑀲𑀫𑀣𑀪𑀸𑀯𑀦𑀸𑀬 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀘 𑀅𑀦𑀼𑀧𑀼𑀩𑁆𑀩𑀲𑀫𑁆𑀧𑀸𑀤𑀦𑁂𑀦 𑀲𑀼𑀪𑀸𑀯𑀺𑀢𑀸. 𑀕𑀡𑀦𑀸𑀯𑀺𑀥𑀸𑀦𑀸𑀦𑀼𑀧𑀼𑀩𑁆𑀩𑀺𑀬𑀸 𑀆𑀲𑁂𑀯𑀺𑀢𑀢𑁆𑀢𑀸 𑀅𑀦𑀼𑀧𑀼𑀩𑁆𑀩𑀁 𑀧𑀭𑀺𑀘𑀺𑀢𑀸.

𑀑𑀫𑀸𑀦𑀁 𑀯𑀸𑀢𑀺 𑀅𑀯𑀚𑀸𑀦𑀦𑀁 𑀉𑀜𑁆𑀜𑀸𑀢𑀦𑁆𑀢𑀺 𑀏𑀯𑀁𑀯𑀺𑀥𑀁 𑀫𑀸𑀦𑀁 𑀯𑀸. 𑀅𑀢𑀺𑀫𑀸𑀦𑀁 𑀯𑀸𑀢𑀺 ‘‘𑀓𑀺𑀁 𑀇𑀫𑁂𑀳𑀺, 𑀫𑀫𑁂𑀯 𑀆𑀦𑀼𑀪𑀸𑀯𑁂𑀦 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀢𑀺𑀫𑀸𑀦𑀁 𑀯𑀸 𑀓𑀼𑀢𑁄 𑀚𑀦𑁂𑀲𑁆𑀲𑀢𑀻𑀢𑀺.

𑁧𑁧𑁪. 𑀯𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 𑀯𑀺𑀲𑀁𑀬𑀼𑀢𑁆𑀢𑁂 𑀓𑀢𑁆𑀯𑀸, 𑀬𑀣𑀸 𑀲𑀗𑁆𑀕𑀸𑀓𑀸𑀭𑁂𑀦 𑀕𑀳𑀡𑀁 𑀦 𑀕𑀘𑁆𑀙𑀢𑀺, 𑀏𑀯𑀁 𑀯𑀺𑀦𑀺𑀪𑀼𑀜𑁆𑀚𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀪𑀽𑀢𑀸𑀦𑀺 𑀢𑀸𑀯 𑀯𑀺𑀢𑁆𑀣𑀸𑀭𑁂𑀢𑀼, 𑀲𑀫𑁆𑀫𑀲𑀦𑀽𑀧𑀕𑀢𑁆𑀢𑀸, 𑀅𑀲𑀫𑁆𑀫𑀲𑀦𑀽𑀧𑀕𑀁 𑀆𑀓𑀸𑀲𑀥𑀸𑀢𑀼𑀁 𑀅𑀣 𑀓𑀲𑁆𑀫𑀸 𑀯𑀺𑀢𑁆𑀣𑀸𑀭𑁂𑀲𑀻𑀢𑀺 𑀆𑀳 ‘‘𑀉𑀧𑀸𑀤𑀸𑀭𑀽𑀧𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺. 𑀆𑀧𑁄𑀥𑀸𑀢𑀼 𑀲𑀼𑀔𑀼𑀫𑀭𑀽𑀧𑀁. 𑀇𑀢𑀭𑀸𑀲𑀼 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸𑀧𑀺 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀉𑀧𑀸𑀤𑀸𑀭𑀽𑀧𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺. 𑀳𑁂𑀝𑁆𑀞𑀸 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑁂𑀯 𑀓𑀣𑀺𑀢𑀸𑀦𑀺, 𑀦 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀢𑀲𑁆𑀲 𑀧𑀦𑁂𑀢𑁆𑀣 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀆𑀓𑀸𑀲𑀤𑀲𑁆𑀲𑀦𑁂𑀦 𑀤𑀲𑁆𑀲𑀺𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀫𑀼𑀔𑁂𑀦 𑀢𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺. 𑀦 𑀓𑁂𑀯𑀮𑀁 𑀉𑀧𑀸𑀤𑀸𑀭𑀽𑀧𑀕𑁆𑀕𑀳𑀡𑀤𑀲𑁆𑀲𑀦𑀢𑁆𑀣𑀫𑁂𑀯 𑀆𑀓𑀸𑀲𑀥𑀸𑀢𑀼 𑀯𑀺𑀢𑁆𑀣𑀸𑀭𑀺𑀢𑀸, 𑀅𑀣 𑀔𑁄 𑀧𑀭𑀺𑀕𑁆𑀕𑀳𑀲𑀼𑀔𑀢𑀸𑀬𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀲𑁆𑀲 𑀭𑀽𑀧𑀲𑁆𑀲 𑀦𑀺𑀭𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁆𑀣𑀁 ‘‘𑀅𑀚𑁆𑀛𑀢𑁆𑀢𑀺𑀓𑁂𑀦𑀸’’𑀢𑀺 𑀯𑀺𑀲𑁂𑀲𑀦𑀫𑀸𑀳. 𑀆𑀓𑀸𑀲𑁂𑀦𑀸𑀢𑀺 𑀆𑀓𑀸𑀲𑀥𑀸𑀢𑀼𑀬𑀸 𑀕𑀳𑀺𑀢𑀸𑀬. 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀦𑁆𑀢𑀺 𑀢𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀓𑀮𑀸𑀧𑀕𑀢𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀺 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺.

𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀕𑀸𑀣𑀸𑀬 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸𑀢𑀺 𑀉𑀧𑀸𑀤𑀸𑀬𑀭𑀽𑀧𑀲𑁆𑀲. 𑀏𑀯𑀁 𑀆𑀯𑀺𑀪𑀸𑀯𑀢𑁆𑀣𑀦𑁆𑀢𑀺 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑀢𑀸𑀬 𑀆𑀓𑀸𑀲𑀲𑁆𑀲 𑀯𑀲𑁂𑀦 𑀯𑀺𑀪𑀽𑀢𑀪𑀸𑀯𑀢𑁆𑀣𑀁. 𑀢𑀦𑁆𑀢𑀺 𑀆𑀓𑀸𑀲𑀥𑀸𑀢𑀼𑀁.

𑁧𑁧𑁮. 𑀆𑀓𑀸𑀲𑀪𑀸𑀯𑀁 𑀕𑀢𑀦𑁆𑀢𑀺 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀸𑀦𑀁 𑀢𑁂𑀲𑀁 𑀧𑀭𑀺𑀘𑁆𑀙𑁂𑀤𑀓𑀪𑀸𑀯𑁂𑀦 𑀆𑀓𑀸𑀲𑀦𑁆𑀢𑀺 𑀕𑀳𑁂𑀢𑀩𑁆𑀩𑀢𑀁 𑀕𑀢𑀁, 𑀆𑀓𑀸𑀲𑀫𑁂𑀯 𑀯𑀸 𑀆𑀓𑀸𑀲𑀕𑀢𑀁 𑀬𑀣𑀸 ‘‘𑀤𑀺𑀝𑁆𑀞𑀺𑀕𑀢𑀁 (𑀥. 𑀲. 𑁩𑁮𑁧; 𑀫𑀳𑀸𑀦𑀺. 𑁧𑁨), 𑀅𑀢𑁆𑀣𑀗𑁆𑀕𑀢’’𑀦𑁆𑀢𑀺 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁩𑁦) 𑀘. 𑀆𑀤𑀺𑀦𑁆𑀦𑀦𑁆𑀢𑀺 𑀇𑀫𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀆𑀤𑀺𑀦𑁆𑀦𑀁. 𑀢𑁂𑀦𑀸𑀳 ‘‘𑀕𑀳𑀺𑀢𑀁 𑀧𑀭𑀸𑀫𑀝𑁆𑀞’’𑀦𑁆𑀢𑀺. 𑀅𑀜𑁆𑀜𑀢𑁆𑀣 𑀓𑀫𑁆𑀫𑀚𑀁 ‘‘𑀉𑀧𑀸𑀤𑀺𑀦𑁆𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀣𑀸 𑀇𑀥𑀸𑀢𑀺 𑀆𑀳 ‘‘𑀲𑀭𑀻𑀭𑀝𑁆𑀞𑀓𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀧𑀣𑀯𑀻𑀥𑀸𑀢𑀼𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑁂 (𑀫. 𑀦𑀺. 𑁧.𑁩𑁦𑁦 𑀆𑀤𑀬𑁄) 𑀯𑀼𑀢𑁆𑀢𑀦𑀬𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁧𑁧𑁯. 𑀢𑀸𑀤𑀺𑀪𑀸𑀯𑁄 𑀦𑀸𑀫 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀲𑁆𑀲 𑀳𑁄𑀢𑀺, 𑀅𑀬𑀜𑁆𑀘 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀢𑀺, 𑀅𑀣 𑀓𑀺𑀫𑀢𑁆𑀣𑀁 𑀢𑀸𑀤𑀺𑀪𑀸𑀯𑀢𑀸 𑀯𑀼𑀢𑁆𑀢𑀸𑀢𑀺? 𑀧𑀣𑀯𑀻𑀲𑀫𑀢𑀸𑀤𑀺𑀮𑀓𑁆𑀔𑀡𑀸𑀘𑀺𑀓𑁆𑀔𑀡𑀸𑀳𑀺 𑀯𑀺𑀧𑀲𑁆𑀲𑀦𑀸𑀬 𑀲𑀼𑀔𑀧𑁆𑀧𑀯𑀢𑁆𑀢𑀺𑀅𑀢𑁆𑀣𑀁. 𑀢𑁂𑀦𑀸𑀳 ‘‘𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀽’’𑀢𑀺𑀆𑀤𑀺. 𑀕𑀳𑁂𑀢𑁆𑀯𑀸𑀢𑀺 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀸 𑀑𑀓𑀸𑀲𑀤𑀸𑀦𑀯𑀲𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀦 𑀧𑀢𑀺𑀝𑁆𑀞𑀺𑀢𑁄𑀢𑀺 𑀦 𑀦𑀺𑀲𑁆𑀲𑀺𑀢𑁄 𑀦 𑀮𑀕𑁆𑀕𑁄.

𑁧𑁨𑁦. 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸 𑀅𑀲𑀼𑀪𑀪𑀸𑀯𑀦𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀪𑀸𑀯𑀦𑀸 𑀘 𑀉𑀧𑀘𑀸𑀭𑀁 𑀯𑀸 𑀅𑀧𑁆𑀧𑀦𑀁 𑀯𑀸 𑀧𑀸𑀧𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀪𑀸𑀯𑀸𑀬 𑀅𑀦𑀺𑀘𑁆𑀘𑀸𑀤𑀺𑀲𑀜𑁆𑀜𑀸𑀬 𑀯𑀺𑀧𑀲𑁆𑀲𑀦𑀸𑀪𑀸𑀯𑁂𑀦 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀸𑀥𑀺𑀕𑀫𑀸𑀬 𑀳𑁄𑀢𑀻𑀢𑀺 ‘‘𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀸𑀬 𑀧𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀢𑁆𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀘 𑀧𑀝𑀺𑀳𑀜𑁆𑀜𑀦𑀓𑀺𑀮𑁂𑀲𑁄𑀢𑀺 𑀆𑀖𑀸𑀢𑀪𑀸𑀯𑀫𑁂𑀯 𑀯𑀤𑀢𑀺 𑀜𑀸𑀬𑀪𑀸𑀯𑀢𑁄 𑀅𑀜𑁆𑀜𑁂𑀲𑀫𑁆𑀧𑀺. 𑀅𑀲𑁆𑀫𑀺𑀫𑀸𑀦𑁄𑀢𑀺 𑀭𑀽𑀧𑀸𑀤𑀺𑀓𑁂 𑀧𑀘𑁆𑀘𑁂𑀓𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀫𑀸𑀦𑁄.

𑁧𑁨𑁧. 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀕𑀡𑀦𑀸𑀤𑀺𑀯𑀲𑁂𑀦 𑀆𑀲𑁂𑀯𑀺𑀬𑀫𑀸𑀦𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀬𑁄𑀕𑀓𑀫𑁆𑀫𑀲𑁆𑀲 𑀧𑀢𑀺𑀝𑁆𑀞𑀸𑀦𑀢𑀸𑀬 𑀓𑀫𑁆𑀫𑀝𑁆𑀞𑀸𑀦𑀁. 𑀢𑀢𑁆𑀣 𑀧𑀦 𑀢𑀣𑀸𑀧𑀯𑀢𑁆𑀢𑁄 𑀫𑀦𑀲𑀺𑀓𑀸𑀭𑁄 𑀪𑀸𑀯𑀦𑀸. 𑀏𑀢𑁆𑀣 𑀘 𑀢𑀲𑁆𑀲𑁂𑀯 𑀣𑁂𑀭𑀲𑁆𑀲 𑀪𑀕𑀯𑀢𑀸 𑀩𑀳𑀽𑀦𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀁 𑀤𑁂𑀲𑀺𑀢𑀢𑁆𑀢𑀸 𑀘𑀭𑀺𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀲𑀧𑁆𑀧𑀸𑀬𑀸𑀦𑀻𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄, 𑀅𑀢𑀺𑀲𑀧𑁆𑀧𑀸𑀬𑀯𑀲𑁂𑀦 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀯𑀺𑀪𑀸𑀕𑀓𑀣𑀸 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀘𑀽𑀴𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁨. 𑀏𑀯𑀁 𑀞𑀧𑀺𑀢𑀸𑀦𑀻𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀅𑀦𑀺𑀬𑁆𑀬𑀸𑀦𑀺𑀓𑀢𑀸𑀬 𑀦 𑀩𑁆𑀬𑀸𑀓𑀸𑀢𑀩𑁆𑀩𑀸𑀦𑀺 𑀦 𑀓𑀣𑁂𑀢𑀩𑁆𑀩𑀸𑀦𑀺, 𑀏𑀯𑀁 𑀞𑀧𑀦𑀻𑀬𑀧𑀓𑁆𑀔𑁂 𑀞𑀧𑀺𑀢𑀸𑀦𑀺 𑀘𑁂𑀯 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀙𑀟𑁆𑀟𑀦𑀻𑀬𑀢𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺 𑀘, 𑀅𑀧𑀺𑀘𑁂𑀢𑁆𑀣 𑀅𑀢𑁆𑀣𑀢𑁄 𑀧𑀝𑀺𑀓𑁆𑀔𑁂𑀧𑁄 𑀏𑀯 𑀩𑁆𑀬𑀸𑀓𑀸𑀢𑀩𑁆𑀩𑀢𑁄. 𑀬𑀣𑀸 𑀏𑀓𑁄 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄, 𑀢𑀣𑀸 𑀅𑀧𑀭𑁄𑀧𑀺 𑀅𑀧𑀭𑁄𑀧𑀻𑀢𑀺 𑀲𑀢𑁆𑀢𑁄 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀻𑀢𑀺 𑀆𑀳 𑁋 ‘‘𑀢𑀣𑀸𑀕𑀢𑁄𑀢𑀺 𑀲𑀢𑁆𑀢𑁄’’𑀢𑀺. 𑀢𑀁 𑀅𑀩𑁆𑀬𑀸𑀓𑀭𑀡𑀁 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀻𑀢𑀺 𑀬𑀤𑀺 𑀲𑀲𑁆𑀲𑀢𑁄 𑀮𑁄𑀓𑁄, 𑀲𑀲𑁆𑀲𑀢𑁄 𑀮𑁄𑀓𑁄𑀢𑀺, 𑀅𑀲𑀲𑁆𑀲𑀢𑁄 𑀮𑁄𑀓𑁄, 𑀅𑀲𑀲𑁆𑀲𑀢𑁄 𑀮𑁄𑀓𑁄𑀢𑀺 𑀚𑀸𑀦𑀸𑀫𑀸𑀢𑀺 𑀩𑁆𑀬𑀸𑀓𑀸𑀢𑀩𑁆𑀩𑀫𑁂𑀯, 𑀬𑀁 𑀧𑀦 𑀉𑀪𑀬𑀣𑀸 𑀅𑀩𑁆𑀬𑀸𑀓𑀭𑀡𑀁, 𑀢𑀁 𑀫𑁂 𑀘𑀺𑀢𑁆𑀢𑀁 𑀦 𑀆𑀭𑀸𑀥𑁂𑀢𑀺 𑀅𑀚𑀸𑀦𑀦𑀳𑁂𑀢𑀼𑀓𑀢𑁆𑀢𑀸 𑀅𑀩𑁆𑀬𑀸𑀓𑀭𑀡𑀲𑁆𑀲. 𑀢𑁂𑀦𑀸𑀳 𑁋 ‘‘𑀅𑀚𑀸𑀦𑀢𑁄 𑀔𑁄 𑀧𑀦 𑀅𑀧𑀲𑁆𑀲𑀢𑁄 𑀏𑀢𑀤𑁂𑀯 𑀉𑀚𑀼𑀓𑀁, 𑀬𑀤𑀺𑀤𑀁 𑀦 𑀚𑀸𑀦𑀸𑀫𑀺 𑀦 𑀧𑀲𑁆𑀲𑀸𑀫𑀻’’𑀢𑀺. 𑀲𑀲𑁆𑀲𑀢𑁄𑀢𑀺𑀆𑀤𑀻𑀲𑀼 𑀲𑀲𑁆𑀲𑀢𑁄𑀢𑀺 𑀲𑀩𑁆𑀩𑀓𑀸𑀮𑀺𑀓𑁄, 𑀦𑀺𑀘𑁆𑀘𑁄 𑀥𑀼𑀯𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀢𑀩𑁆𑀩𑀺𑀧𑀸𑀓𑀸, 𑀲𑀬𑀁 𑀯𑀸 𑀢𑀩𑁆𑀩𑀺𑀧𑀸𑀓𑀸𑀓𑀭𑀸𑀤𑀺𑀪𑀸𑀯𑁂𑀦 𑀅𑀯𑀺𑀬𑀼𑀢𑁆𑀢𑁂𑀳𑀺 𑀮𑁄𑀓𑀻𑀬𑀢𑀻𑀢𑀺 𑀮𑁄𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀏𑀢𑁂𑀦 𑀘𑀢𑁆𑀢𑀸𑀭𑁄𑀧𑀺 𑀲𑀲𑁆𑀲𑀢𑀯𑀸𑀤𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀅𑀲𑀲𑁆𑀲𑀢𑁄𑀢𑀺 𑀦 𑀲𑀲𑁆𑀲𑀢𑁄, 𑀅𑀦𑀺𑀘𑁆𑀘𑁄 𑀅𑀤𑁆𑀥𑀼𑀯𑁄 𑀪𑁂𑀤𑀦𑀥𑀫𑁆𑀫𑁄𑀢𑀺 𑀅𑀢𑁆𑀣𑁄, 𑀅𑀲𑀲𑁆𑀲𑀢𑁄𑀢𑀺 𑀘 𑀲𑀲𑁆𑀲𑀢𑀪𑀸𑀯𑀧𑀝𑀺𑀓𑁆𑀔𑁂𑀧𑁂𑀦 𑀉𑀘𑁆𑀙𑁂𑀤𑁄 𑀤𑀻𑀧𑀺𑀢𑁄𑀢𑀺 𑀲𑀢𑁆𑀢𑀧𑀺 𑀉𑀘𑁆𑀙𑁂𑀤𑀯𑀸𑀤𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀅𑀦𑁆𑀢𑀯𑀸𑀢𑀺 𑀧𑀭𑀺𑀯𑀝𑀼𑀫𑁄 𑀧𑀭𑀺𑀘𑁆𑀙𑀺𑀦𑁆𑀦𑀧𑀭𑀺𑀫𑀸𑀡𑁄, 𑀅𑀲𑀩𑁆𑀩𑀕𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀲𑀭𑀻𑀭𑀧𑀭𑀺𑀫𑀸𑀡𑁄, 𑀅𑀗𑁆𑀕𑀼𑀝𑁆𑀞𑀧𑀭𑀺𑀫𑀸𑀡𑁄, 𑀬𑀯𑀧𑀭𑀺𑀫𑀸𑀡𑁄 𑀧𑀭𑀫𑀸𑀡𑀼𑀧𑀭𑀺𑀫𑀸𑀡𑁄 𑀅𑀢𑁆𑀢𑀸’’𑀢𑀺 (𑀉𑀤𑀸. 𑀅𑀝𑁆𑀞. 𑁫𑁪; 𑀤𑀻. 𑀦𑀺. 𑀝𑀻. 𑁧.𑁭𑁬-𑁭𑁭) 𑀏𑀯𑀫𑀸𑀤𑀺𑀯𑀸𑀤𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺.

𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀢𑀣𑀸𑀕𑀢𑁄 𑀚𑀻𑀯𑁄 𑀅𑀢𑁆𑀢𑀸 𑀫𑀭𑀡𑀢𑁄 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀪𑁂𑀤𑀢𑁄 𑀧𑀭𑀁 𑀉𑀤𑁆𑀥𑀁 𑀳𑁄𑀢𑀺 𑀅𑀢𑁆𑀣𑀺 𑀲𑀁𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀲𑀲𑁆𑀲𑀢𑀪𑀸𑀯𑀫𑀼𑀔𑁂𑀦 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀘 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀦 𑀳𑁄𑀢𑀻𑀢𑀺 𑀦𑀢𑁆𑀣𑀺 𑀦 𑀉𑀧𑀮𑀩𑁆𑀪𑀢𑀺. 𑀏𑀢𑁂𑀦 𑀉𑀘𑁆𑀙𑁂𑀤𑀯𑀸𑀤𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀅𑀧𑀺𑀘 𑀳𑁄𑀢𑀺 𑀘 𑀦 𑀘 𑀳𑁄𑀢𑀻𑀢𑀺 𑀅𑀢𑁆𑀣𑀺 𑀦𑀢𑁆𑀣𑀺 𑀘𑀸𑀢𑀺. 𑀏𑀢𑁂𑀦 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄 𑀤𑀲𑁆𑀲𑀺𑀢𑁄. 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀻𑀢𑀺 𑀧𑀦 𑀇𑀫𑀺𑀦𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀕𑀯𑀢𑀸 𑀧𑀦 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀅𑀦𑀢𑁆𑀣𑀲𑀁𑀳𑀺𑀢𑀸𑀦𑀺 𑀇𑀫𑀸𑀦𑀺 𑀤𑀲𑁆𑀲𑀦𑀸𑀦𑀻𑀢𑀺 𑀢𑀸𑀦𑀺 𑀦 𑀩𑁆𑀬𑀸𑀓𑀢𑀸𑀦𑀺, 𑀢𑀁 𑀅𑀩𑁆𑀬𑀸𑀓𑀭𑀡𑀁 𑀲𑀦𑁆𑀥𑀸𑀬𑀸𑀳 𑀅𑀬𑀁 𑀣𑁂𑀭𑁄 ‘‘𑀢𑀁 𑀫𑁂 𑀦 𑀭𑀼𑀘𑁆𑀘𑀢𑀻’’𑀢𑀺. 𑀲𑀺𑀓𑁆𑀔𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸𑀲𑀫𑀸𑀤𑀺𑀦𑁆𑀦𑀲𑀺𑀓𑁆𑀔𑀁 𑀧𑀳𑀸𑀬.

𑁧𑁨𑁫. 𑀢𑁆𑀯𑀁 𑀦𑁂𑀯 𑀬𑀸𑀘𑀓𑁄𑀢𑀺 𑀅𑀳𑀁 𑀪𑀦𑁆𑀢𑁂 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀦𑀸. 𑀦 𑀬𑀸𑀘𑀺𑀢𑀓𑁄𑀢𑀺 𑀢𑁆𑀯𑀁 𑀫𑀸𑀮𑀼𑀓𑁆𑀬𑀧𑀼𑀢𑁆𑀢 𑀫𑀬𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀢𑀺𑀆𑀤𑀺𑀦𑀸.

𑁧𑁨𑁬. 𑀧𑀭𑀲𑁂𑀦𑀸𑀬 𑀞𑀺𑀢𑁂𑀦 𑀧𑀼𑀭𑀺𑀲𑁂𑀦. 𑀩𑀳𑀮𑀮𑁂𑀧𑀦𑁂𑀦𑀸𑀢𑀺 𑀩𑀳𑀮𑀯𑀺𑀮𑁂𑀧𑀦𑁂𑀦. 𑀫𑀳𑀸𑀲𑀼𑀧𑀺𑀬𑀸𑀤𑀺 𑀲𑀩𑁆𑀩𑁄 𑀫𑀼𑀤𑀼𑀳𑀺𑀤𑀓𑁄 𑀯𑁂𑀡𑀼𑀯𑀺𑀲𑁂𑀲𑁄 𑀲𑀡𑁆𑀳𑁄. 𑀫𑀭𑀼𑀯𑀸𑀢𑀺 𑀫𑀓𑀘𑀺. 𑀔𑀻𑀭𑀧𑀡𑁆𑀡𑀺𑀦𑁄𑀢𑀺 𑀔𑀻𑀭𑀧𑀡𑁆𑀡𑀺𑀬𑀸, 𑀬𑀲𑁆𑀲𑀸 𑀙𑀺𑀦𑁆𑀤𑀦𑀫𑀢𑁆𑀢𑁂 𑀧𑀡𑁆𑀡𑁂 𑀔𑀻𑀭𑀁 𑀧𑀕𑁆𑀖𑀭𑀢𑀺. 𑀕𑀘𑁆𑀙𑀦𑁆𑀢𑀺 𑀕𑀘𑁆𑀙𑀢𑁄 𑀚𑀸𑀢𑀁 𑀲𑀬𑀁𑀚𑀸𑀢𑀕𑀼𑀫𑁆𑀩𑀢𑁄 𑀕𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀺𑀣𑀺𑀮𑀳𑀦𑀼 𑀦𑀸𑀫 𑀤𑀢𑁆𑀢𑀸 𑀓𑀡𑁆𑀡𑁄 𑀧𑀢𑀗𑁆𑀕𑁄. 𑀏𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀦 𑀳𑁄𑀢𑀻𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀏𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀺, 𑀢𑀁 𑀧𑀳𑀸𑀬 𑀏𑀯 𑀧𑀢𑁆𑀢𑀩𑁆𑀩𑀢𑁄.

𑁧𑁨𑁭. 𑀅𑀢𑁆𑀣𑁂𑀯 𑀚𑀸𑀢𑀻𑀢𑀺𑀆𑀤𑀺𑀦𑀸 𑀏𑀢𑀸 𑀤𑀺𑀝𑁆𑀞𑀺𑀬𑁄 𑀧𑀘𑁆𑀘𑁂𑀓𑀫𑁆𑀧𑀺 𑀲𑀁𑀲𑀸𑀭𑀧𑀭𑀺𑀩𑁆𑀭𑀽𑀳𑀦𑀸 𑀓𑀝𑀲𑀺𑀯𑀟𑁆𑀠𑀦𑀸 𑀦𑀺𑀩𑁆𑀩𑀸𑀦𑀯𑀺𑀩𑀦𑁆𑀥𑀦𑀸𑀢𑀺 𑀤𑀲𑁆𑀲𑁂𑀢𑀺.

𑁧𑁨𑁮. 𑀢𑀲𑁆𑀫𑀸𑀢𑀺𑀳𑀸𑀢𑀺 𑀇𑀤𑀁 𑀅𑀝𑁆𑀞𑀸𑀦𑁂 𑀉𑀤𑁆𑀥𑀝𑀁, 𑀞𑀸𑀦𑁂𑀬𑁂𑀯 𑀧𑀦 ‘‘𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀇𑀫𑀲𑁆𑀲 𑀧𑀭𑀢𑁄 𑀓𑀢𑁆𑀯𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀨𑀮𑁂𑀦 𑀅𑀭𑀡𑀻𑀬𑀢𑁄 𑀅𑀦𑀼𑀕𑀦𑁆𑀢𑀩𑁆𑀩𑀢𑁄 𑀓𑀸𑀭𑀡𑀫𑁆𑀧𑀺 ‘‘𑀅𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀸𑀭𑀡𑀦𑀺𑀲𑁆𑀲𑀺𑀢’’𑀦𑁆𑀢𑀺. 𑀢𑁂𑀦𑀸𑀳 ‘‘𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀫𑀢𑁆𑀢𑀫𑁆𑀧𑀻’’𑀢𑀺. 𑀧𑀼𑀩𑁆𑀩𑀧𑀤𑀝𑁆𑀞𑀸𑀦𑀦𑁆𑀢𑀺 𑀧𑀞𑀫𑀸𑀭𑀫𑁆𑀪𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀽𑀴𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀫𑀳𑀸𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁯. 𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼, 𑀢𑀢𑁆𑀣 𑀧𑀯𑀢𑁆𑀢𑀺𑀬𑀸 𑀲𑀁𑀯𑀢𑁆𑀢𑀦𑀢𑁄 𑀑𑀭𑀁 𑀪𑀚𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺, 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑀢𑀸𑀬 𑀑𑀭𑀫𑁆𑀪𑀸𑀕𑁂 𑀳𑁂𑀝𑁆𑀞𑀸𑀓𑁄𑀝𑁆𑀞𑀸𑀲𑁂 𑀪𑀚𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀳𑁂𑀝𑁆𑀞𑀸𑀓𑁄𑀝𑁆𑀞𑀸𑀲𑀺𑀓𑀸𑀦𑀻’’𑀢𑀺𑀆𑀤𑀺. 𑀓𑀫𑁆𑀫𑀼𑀦𑀸 𑀳𑀺 𑀯𑀝𑁆𑀝𑁂𑀦 𑀘 𑀤𑀼𑀓𑁆𑀔𑀁 𑀲𑀁𑀬𑁄𑀚𑁂𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸𑀦𑀺, 𑀑𑀭𑀫𑁆𑀪𑀸𑀕𑀺𑀬𑀲𑀜𑁆𑀜𑀺𑀢𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀬𑀲𑁆𑀲 𑀅𑀧𑁆𑀧𑀳𑀻𑀦𑀸𑀦𑀺, 𑀢𑀲𑁆𑀲𑁂𑀯 𑀯𑀝𑁆𑀝𑀤𑀼𑀓𑁆𑀔𑀁. 𑀬𑀲𑁆𑀲 𑀧𑀦 𑀢𑀸𑀦𑀺 𑀧𑀳𑀻𑀦𑀸𑀦𑀺, 𑀢𑀲𑁆𑀲 𑀢𑀁 𑀦𑀢𑁆𑀣𑀻𑀢𑀺. 𑀅𑀧𑁆𑀧𑀳𑀻𑀦𑀢𑀸𑀬 𑀅𑀦𑀼𑀲𑁂𑀢𑀻𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑀸𑀬 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀅𑀦𑀼𑀲𑁂𑀢𑀺. 𑀅𑀦𑀼𑀲𑀬𑀫𑀸𑀦𑁄 𑀲𑀁𑀬𑁄𑀚𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀦𑀼𑀲𑀬𑀢𑁆𑀢𑀁 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀧𑀸𑀧𑀥𑀫𑁆𑀫𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀲𑀁𑀬𑁄𑀚𑀦𑀁 𑀦𑀸𑀫 𑀳𑁄𑀢𑀺. 𑀏𑀢𑁂𑀦 𑀬𑀤𑀺 𑀧𑀦 𑀅𑀦𑀼𑀲𑀬𑀢𑁄 𑀲𑀁𑀬𑁄𑀚𑀦𑀁 𑀧𑀯𑀢𑁆𑀢𑀁, 𑀢𑀣𑀸𑀧𑀺 𑀬𑁂 𑀢𑁂 𑀓𑀸𑀫𑀭𑀸𑀕𑀸𑀤𑀬𑁄 ‘‘𑀅𑀦𑀼𑀲𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀬𑁂𑀯 𑀩𑀦𑁆𑀥𑀦𑀝𑁆𑀞𑁂𑀦 𑀲𑀁𑀬𑁄𑀚𑀦𑀸𑀦𑀻𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀬𑀤𑁂𑀯 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀁 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑀁, 𑀢𑀤𑁂𑀯 𑀣𑁂𑀭𑁂𑀦𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑀁, 𑀢𑀣𑀸𑀧𑀺 𑀅𑀬𑀁 𑀮𑀤𑁆𑀥𑀺 𑀲𑀦𑁆𑀦𑀺𑀲𑁆𑀲𑀬𑀸. 𑀢𑀢𑁆𑀣 𑀤𑁄𑀲𑀸𑀭𑁄𑀧𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲 𑀯𑀸𑀤𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀼𑀤𑀸𑀘𑀸𑀭𑀓𑁆𑀔𑀡𑁂𑀬𑁂𑀯𑀸𑀢𑀺 𑀧𑀯𑀢𑁆𑀢𑀺𑀓𑁆𑀔𑀡𑁂 𑀏𑀯. 𑀦 𑀳𑀺 𑀲𑀩𑁆𑀩𑁂 𑀯𑀢𑁆𑀢𑀫𑀸𑀦𑀸 𑀓𑀺𑀮𑁂𑀲𑀸 𑀲𑀁𑀬𑁄𑀚𑀦𑀢𑁆𑀣𑀁 𑀨𑀭𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦, 𑀢𑀣𑀸𑀮𑀤𑁆𑀥𑀺𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀘𑀺𑀦𑁆𑀢𑁂𑀲𑀺 ‘‘𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀬𑁄𑀚𑀦𑀸. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑁂𑀯𑀸𑀢𑀺 𑀅𑀚𑁆𑀛𑀢𑁆𑀢𑀸𑀲𑀬𑁂𑀦𑁂𑀯. 𑀯𑀺𑀲𑀁𑀯𑀸𑀤𑀺𑀢𑀸𑀢𑀺 𑀲𑀢𑁆𑀣𑀼 𑀘𑀺𑀢𑁆𑀢𑀲𑁆𑀲 𑀅𑀦𑀸𑀭𑀸𑀥𑀦𑁂𑀦 𑀯𑀺𑀯𑁂𑀘𑀺𑀢𑀸. 𑀏𑀯𑀫𑀓𑀸𑀲𑀺 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀸𑀧𑁂𑀲𑀺.

𑁧𑁩𑁦. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀺𑀢𑁂𑀦𑀸𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀲𑀫𑀢𑁆𑀣𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑁂𑀦. 𑀢𑀣𑀸𑀪𑀽𑀢𑀜𑁆𑀘 𑀘𑀺𑀢𑁆𑀢𑀁 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀯𑀺𑀕𑀬𑁆𑀳𑀺𑀢𑀁 𑀅𑀚𑁆𑀛𑁄𑀢𑁆𑀣𑀝𑀜𑁆𑀘 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀕𑀳𑀺𑀢𑁂𑀦 𑀅𑀪𑀺𑀪𑀽𑀢𑁂𑀦𑀸’’𑀢𑀺. 𑀤𑀺𑀝𑁆𑀞𑀺𑀦𑀺𑀲𑁆𑀲𑀭𑀡𑀁 𑀦𑀸𑀫 𑀤𑀲𑁆𑀲𑀦𑀫𑀕𑁆𑀕𑁄 𑀢𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀢𑁄, 𑀲𑁄 𑀧𑀦 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀺𑀦𑀺𑀲𑁆𑀲𑀭𑀡𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀅𑀯𑀺𑀦𑁄𑀤𑀺𑀢𑀸 𑀅𑀦𑀻𑀳𑀝𑀸𑀢𑀺 𑀧𑀤𑀤𑁆𑀯𑀬𑁂𑀦𑀧𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀅𑀧𑁆𑀧𑀳𑀻𑀦𑀢𑁆𑀢𑀁𑀬𑁂𑀯 𑀯𑀤𑀢𑀺. 𑀅𑀜𑁆𑀜𑀁 𑀲𑀁𑀬𑁄𑀚𑀦𑀁 𑀅𑀜𑁆𑀜𑁄 𑀅𑀦𑀼𑀲𑀬𑁄𑀢𑀺 𑀯𑀤𑀦𑁆𑀢𑀺, 𑀲𑀳𑀪𑀸𑀯𑁄 𑀦𑀸𑀫 𑀅𑀜𑁆𑀜𑁂𑀦 𑀳𑁄𑀢𑀺. 𑀦 𑀳𑀺 𑀢𑀤𑁂𑀯 𑀢𑁂𑀦 𑀲𑀳𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑀢𑁄 𑀅𑀜𑁆𑀜𑁂𑀦. 𑀅𑀯𑀢𑁆𑀣𑀸𑀫𑀢𑁆𑀢𑀢𑁄 𑀬𑀤𑀺𑀧𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀢𑁆𑀣𑀺, 𑀅𑀯𑀬𑀯𑁄 𑀧𑀦 𑀲𑀫𑀼𑀤𑀸𑀬𑁄 𑀦 𑀳𑁄𑀢𑀻𑀢𑀺 𑀲𑁄 𑀲𑀫𑀼𑀤𑀸𑀬𑀢𑁄 𑀅𑀜𑁆𑀜𑁄 𑀏𑀯𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀭𑀺𑀳𑀸𑀭𑀲𑁆𑀲 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀆𑀲𑀗𑁆𑀓𑀺𑀢𑁆𑀯𑀸 𑀧𑀓𑁆𑀔𑀦𑁆𑀢𑀭𑀁 𑀆𑀲𑀮𑁆𑀮𑀺𑀢𑀁 ‘‘𑀅𑀣𑀸𑀧𑀺 𑀲𑀺𑀬𑀸’’𑀢𑀺𑀆𑀤𑀺𑀦𑀸. 𑀧𑀓𑁆𑀔𑀦𑁆𑀢𑀭𑁂𑀳𑀺 𑀧𑀭𑀺𑀳𑀸𑀭𑀸 𑀳𑁄𑀦𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀜𑀸𑀬𑁂𑀦𑀧𑀺 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀅𑀣𑀸𑀧𑀺 𑀲𑀺𑀬𑀸, 𑀅𑀬𑀁 𑀧𑀦𑁂𑀢𑁆𑀣 𑀅𑀜𑁆𑀜𑁄 𑀤𑁄𑀲𑁄𑀢𑀺 𑀆𑀳 ‘‘𑀬𑀤𑀺 𑀢𑀤𑁂𑀯𑀸’’𑀢𑀺𑀆𑀤𑀺. 𑀅𑀣𑀸𑀧𑀺 𑀲𑀺𑀬𑀸 𑀢𑀼𑀬𑁆𑀳𑀁 𑀬𑀤𑀺 𑀧𑀭𑀺𑀯𑀺𑀢𑀓𑁆𑀓𑁄 𑀈𑀤𑀺𑀲𑁄 𑀬𑀤𑀺 𑀢𑀤𑁂𑀯 𑀲𑀁𑀬𑁄𑀚𑀦𑀦𑁆𑀢𑀺𑀆𑀤𑀺. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀢𑀺 𑀧𑀭𑀫𑀢𑁆𑀣𑀢𑁄 𑀲𑁄 𑀏𑀯 𑀓𑀺𑀮𑁂𑀲𑁄 𑀲𑀁𑀬𑁄𑀚𑀦𑀫𑀦𑀼𑀲𑀬𑁄 𑀘, 𑀩𑀦𑁆𑀥𑀦𑀢𑁆𑀣𑀅𑀧𑁆𑀧𑀳𑀻𑀦𑀢𑁆𑀣𑀸𑀦𑀁 𑀧𑀦 𑀅𑀢𑁆𑀣𑁂𑀯 𑀪𑁂𑀤𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬.

𑁧𑁩𑁨. 𑀢𑀘𑀘𑁆𑀙𑁂𑀤𑁄 𑀯𑀺𑀬 𑀲𑀫𑀸𑀧𑀢𑁆𑀢𑀺 𑀓𑀺𑀮𑁂𑀲𑀸𑀦𑀁 𑀲𑀫𑀸𑀧𑀢𑁆𑀢𑀺𑀯𑀺𑀓𑁆𑀔𑀫𑁆𑀪𑀦𑀲𑁆𑀲 𑀲𑀸𑀭𑀘𑁆𑀙𑁂𑀤𑀲𑁆𑀲 𑀅𑀦𑀼𑀲𑀬𑀲𑁆𑀲 𑀤𑀽𑀭𑀪𑀸𑀯𑀢𑁄. 𑀨𑁂𑀕𑁆𑀕𑀼𑀘𑁆𑀙𑁂𑀤𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸 𑀢𑀲𑁆𑀲 𑀆𑀲𑀦𑁆𑀦𑀪𑀸𑀯𑀢𑁄. 𑀏𑀯𑀭𑀽𑀧𑀸 𑀧𑀼𑀕𑁆𑀕𑀮𑀸𑀢𑀺 𑀅𑀪𑀸𑀯𑀺𑀢𑀲𑀤𑁆𑀥𑀸𑀤𑀺𑀩𑀮𑀢𑀸𑀬 𑀤𑀼𑀩𑁆𑀩𑀮𑀦𑀸𑀫𑀓𑀸𑀬𑀸 𑀧𑀼𑀕𑁆𑀕𑀮𑀸, 𑀬𑁂𑀲𑀁 𑀲𑀓𑁆𑀓𑀸𑀬𑀦𑀺𑀭𑁄𑀥𑀸𑀬…𑀧𑁂… 𑀦𑀸𑀥𑀺𑀫𑀼𑀘𑁆𑀘𑀢𑀺. 𑀏𑀯𑀁 𑀤𑀝𑁆𑀞𑀩𑁆𑀩𑀸𑀢𑀺 𑀬𑀣𑀸 𑀲𑁄 𑀤𑀼𑀩𑁆𑀩𑀮𑀓𑁄 𑀧𑀼𑀭𑀺𑀲𑁄, 𑀏𑀯𑀁 𑀤𑀝𑁆𑀞𑀩𑁆𑀩𑁄 𑀲𑁄 𑀧𑀼𑀭𑀺𑀲𑁄 𑀕𑀗𑁆𑀕𑀸𑀧𑀸𑀭𑀁 𑀯𑀺𑀬 𑀲𑀓𑁆𑀓𑀸𑀬𑀧𑀸𑀭𑀁 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁩𑁩. 𑀉𑀧𑀥𑀺𑀯𑀺𑀯𑁂𑀓𑁂𑀦𑀸𑀢𑀺 𑀇𑀫𑀺𑀦𑀸 𑀉𑀧𑀥𑀺𑀯𑀺𑀯𑁂𑀓𑀸𑀢𑀺 𑀓𑀭𑀡𑁂 𑀦𑀺𑀲𑁆𑀲𑀓𑁆𑀓𑀦𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀉𑀧𑀥𑀺𑀯𑀺𑀯𑁂𑀓𑀸𑀢𑀺 𑀯𑀸 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀲𑁆𑀲 𑀉𑀧𑀥𑀺𑀯𑀺𑀯𑁂𑀓𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀯𑀺𑀯𑁂𑀓𑁄 𑀓𑀣𑀺𑀢𑁄. 𑀓𑀸𑀫𑀕𑀼𑀡𑀸𑀧𑀺 𑀳𑀺 𑀉𑀧𑀥𑀻𑀬𑀢𑀺 𑀏𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀉𑀧𑀥𑀻𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀣𑀺𑀦𑀫𑀺𑀤𑁆𑀥𑀧𑀘𑁆𑀘𑀬𑀸 𑀓𑀸𑀬𑀯𑀺𑀚𑀫𑁆𑀪𑀺𑀢𑀸𑀤𑀺𑀪𑁂𑀤𑀁 𑀓𑀸𑀬𑀸𑀮𑀲𑀺𑀬𑀁. 𑀢𑀢𑁆𑀣𑀸𑀢𑀺 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀲𑀫𑀸𑀧𑀢𑁆𑀢𑀺𑀅𑀩𑁆𑀪𑀦𑁆𑀢𑀭𑁂 𑀚𑀸𑀢𑀁. 𑀢𑀁 𑀧𑀦 𑀲𑀫𑀸𑀧𑀢𑁆𑀢𑀺𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀅𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀻𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂𑀬𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀽𑀧𑀸𑀤𑀬𑁄 𑀥𑀫𑁆𑀫𑁂𑀢𑀺 𑀭𑀽𑀧𑀯𑁂𑀤𑀦𑀸𑀤𑀺𑀓𑁂 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑁂. 𑀦 𑀦𑀺𑀘𑁆𑀘𑀢𑁄𑀢𑀺 𑀇𑀫𑀺𑀦𑀸 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄 𑀢𑁂𑀲𑀁 𑀅𑀦𑀺𑀘𑁆𑀘𑀢𑀫𑀸𑀳. 𑀢𑀢𑁄 𑀏𑀯 𑀉𑀤𑀬𑀯𑀬𑀦𑁆𑀢𑀢𑁄 𑀯𑀺𑀧𑀭𑀺𑀡𑀸𑀫𑀢𑁄 𑀢𑀸𑀯𑀓𑀸𑀮𑀺𑀓𑀢𑁄 𑀘 𑀢𑁂 𑀅𑀦𑀺𑀘𑁆𑀘𑀸𑀢𑀺 𑀚𑁄𑀢𑀺𑀢𑀁 𑀳𑁄𑀢𑀺. 𑀬𑀜𑁆𑀳𑀺 𑀦𑀺𑀘𑁆𑀘𑀁 𑀦 𑀳𑁄𑀢𑀺, 𑀢𑀁 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑀁 𑀚𑀭𑀸𑀬 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑁂𑀥𑀸 𑀯𑀺𑀧𑀭𑀺𑀡𑀢𑀁 𑀇𑀢𑁆𑀢𑀭𑀔𑀡𑀫𑁂𑀯 𑀘 𑀳𑁄𑀢𑀺. 𑀦 𑀲𑀼𑀔𑀢𑁄𑀢𑀺 𑀇𑀫𑀺𑀦𑀸 𑀲𑀼𑀔𑀧𑀝𑀺𑀓𑁆𑀔𑁂𑀧𑀢𑁄 𑀢𑁂𑀲𑀁 𑀤𑀼𑀓𑁆𑀔𑀢𑀫𑀸𑀳, 𑀅𑀢𑁄 𑀏𑀯 𑀅𑀪𑀺𑀡𑁆𑀳𑀁 𑀧𑀝𑀺𑀧𑀻𑀴𑀦𑀢𑁄 𑀤𑀼𑀓𑁆𑀔𑀯𑀢𑁆𑀣𑀼𑀢𑁄 𑀘 𑀢𑁂 𑀤𑀼𑀓𑁆𑀔𑀸𑀢𑀺 𑀚𑁄𑀢𑀺𑀢𑀁 𑀳𑁄𑀢𑀺. 𑀉𑀤𑀬𑀩𑁆𑀩𑀬𑀯𑀦𑁆𑀢𑀢𑀸𑀬 𑀳𑀺 𑀢𑁂 𑀅𑀪𑀺𑀡𑁆𑀳𑀁 𑀧𑀝𑀺𑀧𑀻𑀴𑀦𑀢𑁄 𑀦𑀺𑀭𑀦𑁆𑀢𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀲𑁆𑀲𑁂𑀯 𑀘 𑀅𑀥𑀺𑀝𑁆𑀞𑀸𑀦𑀪𑀽𑀢𑀸𑀢𑀺. 𑀧𑀘𑁆𑀘𑀬𑀬𑀸𑀧𑀦𑀻𑀬𑀢𑀸𑀬 𑀭𑁄𑀕𑀫𑀽𑀮𑀢𑀸𑀬 𑀘 𑀭𑁄𑀕𑀢𑁄. 𑀤𑀼𑀓𑁆𑀔𑀢𑀸𑀲𑀽𑀮𑀬𑁄𑀕𑀺𑀢𑀸𑀬 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑁄 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑁂𑀳𑀺 𑀉𑀤𑁆𑀥𑀼𑀫𑀸𑀢𑀧𑀓𑁆𑀓𑀪𑀺𑀚𑁆𑀚𑀦𑀢𑁄 𑀘 𑀕𑀡𑁆𑀟𑀢𑁄. 𑀧𑀻𑀴𑀸𑀚𑀦𑀦𑀢𑁄 𑀅𑀦𑁆𑀢𑁄𑀢𑀼𑀤𑀦𑀢𑁄 𑀤𑀼𑀦𑁆𑀦𑀻𑀳𑀭𑀡𑀢𑁄 𑀘 𑀅𑀯𑀤𑁆𑀥𑀺𑀆𑀯𑀳𑀢𑁄 𑀅𑀖𑀯𑀢𑁆𑀣𑀼𑀢𑁄 𑀘 𑀅𑀲𑁂𑀭𑀻𑀪𑀸𑀯𑀢𑁄 𑀆𑀩𑀸𑀥𑀧𑀤𑀝𑁆𑀞𑀸𑀦𑀢𑀸𑀬 𑀘 𑀆𑀩𑀸𑀥𑀢𑁄. 𑀅𑀯𑀲𑀯𑀢𑁆𑀢𑀦𑀢𑁄 𑀅𑀯𑀺𑀥𑁂𑀬𑁆𑀬𑀢𑀸𑀬 𑀧𑀭𑀢𑁄. 𑀩𑁆𑀬𑀸𑀥𑀺𑀚𑀭𑀸𑀫𑀭𑀡𑁂𑀳𑀺 𑀧𑀮𑀼𑀚𑁆𑀚𑀦𑀻𑀬𑀢𑀸𑀬 𑀧𑀮𑁄𑀓𑀢𑁄. 𑀲𑀸𑀫𑀻𑀦𑀺𑀯𑀸𑀲𑀻𑀓𑀸𑀭𑀓𑀯𑁂𑀤𑀓𑀅𑀥𑀺𑀝𑁆𑀞𑀸𑀬𑀓𑀯𑀺𑀭𑀳𑀢𑁄 𑀲𑀼𑀜𑁆𑀜𑀢𑁄. 𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀝𑁆𑀞𑁂𑀦 𑀅𑀦𑀢𑁆𑀢𑀢𑁄, 𑀭𑀽𑀧𑀸𑀤𑀺𑀥𑀫𑁆𑀫𑀸𑀧𑀺 𑀦 𑀏𑀢𑁆𑀣 𑀅𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀦𑀢𑁆𑀢𑀸, 𑀏𑀯𑀁 𑀅𑀬𑀫𑁆𑀧𑀺 𑀦 𑀅𑀢𑁆𑀢𑀸 𑀳𑁄𑀢𑀻𑀢𑀺 𑀅𑀦𑀢𑁆𑀢𑀸. 𑀢𑁂𑀦 𑀅𑀩𑁆𑀬𑀸𑀧𑀸𑀭𑀢𑁄 𑀦𑀺𑀭𑀻𑀳𑀢𑁄 𑀢𑀼𑀘𑁆𑀙𑀢𑁄 𑀅𑀦𑀢𑁆𑀢𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀮𑀓𑁆𑀔𑀡𑀢𑁆𑀢𑀬𑀫𑁂𑀯 𑀅𑀯𑀩𑁄𑀥𑀢𑁆𑀣𑀁 𑀏𑀓𑀸𑀤𑀲𑀳𑀺 𑀧𑀤𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀕𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀦𑁆𑀢𑀺 𑀲𑀫𑀸𑀧𑀢𑁆𑀢𑀻𑀦𑀁 𑀲𑀳𑀚𑀸𑀢𑀢𑀸𑀬 𑀲𑀫𑀸𑀧𑀢𑁆𑀢𑀻𑀦𑀁 𑀅𑀩𑁆𑀪𑀦𑁆𑀢𑀭𑁂. 𑀘𑀺𑀢𑁆𑀢𑀁 𑀧𑀝𑀺𑀲𑀁𑀳𑀭𑀢𑀻𑀢𑀺 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑁂𑀦 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀧𑀝𑀺𑀲𑀁𑀳𑀭𑀢𑀺. 𑀢𑁂𑀦𑀸𑀳 ‘‘𑀫𑁄𑀘𑁂𑀢𑀻’’𑀢𑀺. 𑀲𑀯𑀦𑀯𑀲𑁂𑀦𑀸𑀢𑀺 ‘‘𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄’’𑀢𑀺𑀆𑀤𑀺𑀦𑀸 𑀲𑀯𑀦𑀯𑀲𑁂𑀦. 𑀣𑀼𑀢𑀺𑀯𑀲𑁂𑀦𑀸𑀢𑀺 𑀢𑀣𑁂𑀯 𑀣𑁄𑀫𑀦𑀸𑀯𑀲𑁂𑀦 𑀕𑀼𑀡𑀢𑁄 𑀲𑀁𑀓𑀺𑀢𑁆𑀢𑀦𑀯𑀲𑁂𑀦. 𑀧𑀭𑀺𑀬𑀢𑁆𑀢𑀺𑀯𑀲𑁂𑀦𑀸𑀢𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀭𑀺𑀬𑀸𑀧𑀼𑀡𑀦𑀯𑀲𑁂𑀦. 𑀧𑀜𑁆𑀜𑀢𑁆𑀢𑀺𑀯𑀲𑁂𑀦𑀸𑀢𑀺 𑀢𑀤𑀢𑁆𑀣𑀲𑁆𑀲 𑀧𑀜𑁆𑀜𑀸𑀧𑀦𑀯𑀲𑁂𑀦. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑁂𑀯 𑀉𑀧𑀲𑀁𑀳𑀭𑀢𑀺 𑀫𑀕𑁆𑀕𑀘𑀺𑀢𑁆𑀢𑀁. 𑀏𑀢𑀁 𑀲𑀦𑁆𑀢𑀦𑁆𑀢𑀺𑀆𑀤𑀺 𑀧𑀦 𑀅𑀯𑀥𑀸𑀭𑀡𑀦𑀺𑀯𑀢𑁆𑀢𑀺𑀢𑀢𑁆𑀣𑀤𑀲𑁆𑀲𑀦𑀁. 𑀬𑀣𑀸 𑀯𑀺𑀧𑀲𑁆𑀲𑀦𑀸 ‘‘𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺, 𑀏𑀯𑀁 𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀅𑀪𑀺𑀲𑀫𑁂𑀦𑁆𑀢𑁄 𑀢𑀢𑁆𑀣 𑀮𑀩𑁆𑀪𑀫𑀸𑀦𑁂 𑀲𑀩𑁆𑀩𑁂 𑀯𑀺𑀲𑁂𑀲𑁂 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺. 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀧𑀦 𑀆𑀓𑀸𑀭𑁂𑀦𑀸’’𑀢𑀺𑀆𑀤𑀺. 𑀲𑁄 𑀢𑀢𑁆𑀣 𑀞𑀺𑀢𑁄𑀢𑀺 𑀲𑁄 𑀅𑀤𑀦𑁆𑀥𑀯𑀺𑀧𑀲𑁆𑀲𑀦𑁄 𑀬𑁄𑀕𑀻 𑀢𑀢𑁆𑀣 𑀢𑀸𑀬 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀸𑀭𑀫𑁆𑀫𑀡𑀸𑀬 𑀯𑀺𑀧𑀲𑁆𑀲𑀦𑀸𑀬 𑀞𑀺𑀢𑁄. 𑀲𑀩𑁆𑀩𑀲𑁄𑀢𑀺 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀢𑁆𑀢𑀺𑀢𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼. 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑀸𑀕𑀸𑀫𑀻 𑀳𑁄𑀢𑀻𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀳𑀸𑀲𑀼 𑀏𑀯 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀙𑀦𑁆𑀤𑀭𑀸𑀕𑀁 𑀧𑀳𑀸𑀬 𑀅𑀕𑁆𑀕𑀫𑀕𑁆𑀕𑀯𑀳𑀸𑀲𑀼 𑀢𑀸𑀲𑀼 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑀸𑀕𑀸𑀫𑀺𑀢𑀸𑀬𑀫𑁂𑀯 𑀲𑀡𑁆𑀞𑀸𑀢𑀺.

𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸𑀢𑀺 𑀲𑀫𑀣𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘𑀸𑀢𑀺 𑀲𑀩𑁆𑀩𑀣𑀸𑀧𑀺 𑀭𑀽𑀧𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺. 𑀅𑀦𑁂𑀦𑀸𑀢𑀺 𑀬𑁄𑀕𑀺𑀦𑀸. 𑀢𑀁 𑀅𑀢𑀺𑀓𑁆𑀓𑀫𑁆𑀫𑀸𑀢𑀺 𑀇𑀤𑀁 𑀬𑁄 𑀯𑀸 𑀧𑀞𑀫𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑀧𑀭𑀺𑀬𑀸𑀧𑀦𑁆𑀦𑁂 𑀥𑀫𑁆𑀫𑁂 𑀲𑀫𑁆𑀫𑀤𑁂𑀯 𑀲𑀫𑁆𑀫𑀲𑀺𑀢𑁆𑀯𑀸 𑀢𑁂 𑀯𑀺𑀯𑀚𑁆𑀚𑁂𑀢𑁆𑀯𑀸 𑀢𑀢𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀭𑀽𑀧𑀥𑀫𑁆𑀫𑁂 𑀲𑀫𑁆𑀫𑀲𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀤𑀸𑀦𑀺 𑀅𑀭𑀽𑀧𑀁 𑀲𑀫𑁆𑀫𑀲𑀢𑀻’’𑀢𑀺.

𑀲𑀫𑀣𑀯𑀲𑁂𑀦 𑀕𑀘𑁆𑀙𑀢𑁄𑀢𑀺 𑀲𑀫𑀣𑀧𑁆𑀧𑀥𑀸𑀦𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀥𑀼𑀭𑀁 𑀳𑁄𑀢𑀻𑀢𑀺 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀢𑀣𑀸 𑀧𑀼𑀩𑁆𑀩𑁂 𑀧𑀯𑀢𑁆𑀢𑀢𑁆𑀢𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀲𑀫𑀸𑀥𑀺𑀧𑁆𑀧𑀥𑀸𑀦𑀸 𑀳𑁄𑀢𑀺, 𑀫𑀕𑁆𑀕𑁂𑀧𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀥𑀼𑀭𑀁 𑀳𑁄𑀢𑀺, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀼𑀩𑁆𑀩𑀗𑁆𑀕𑀫𑀁 𑀩𑀮𑀯𑀁 𑀳𑁄𑀢𑀺. 𑀲𑁄 𑀘𑁂𑀢𑁄𑀯𑀺𑀫𑀼𑀢𑁆𑀢𑁄 𑀦𑀸𑀫𑀸𑀢𑀺 𑀲𑁄 𑀅𑀭𑀺𑀬𑁄 𑀘𑁂𑀢𑁄𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀕𑀘𑁆𑀙𑀢𑁄𑀢𑀺 ‘‘𑀲𑀫𑀣𑀯𑀲𑁂𑀦 𑀕𑀘𑁆𑀙𑀢𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀘 𑀧𑀼𑀕𑁆𑀕𑀮𑀯𑀺𑀪𑀸𑀕𑁄 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀇𑀥𑀸𑀪𑀺𑀳𑀺𑀢𑁄 𑀧𑀭𑀺𑀬𑀸𑀬𑁄 𑀦𑀸𑀫, 𑀅𑀪𑀺𑀥𑀫𑁆𑀫𑀦𑀬𑁂𑀦 𑀧𑀭𑀢𑁄 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀤𑀲𑁆𑀲𑀬𑀺𑀲𑁆𑀲𑀸𑀫. 𑀅𑀬𑀁 𑀲𑀪𑀸𑀯𑀥𑀫𑁆𑀫𑁄𑀬𑁂𑀯𑀸𑀢𑀺 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀲𑀫𑀣𑀧𑁆𑀧𑀥𑀸𑀦𑀸 𑀘𑁂 𑀲𑀫𑀸𑀥𑀺 𑀥𑀼𑀭𑀁, 𑀯𑀺𑀧𑀲𑁆𑀲𑀦𑀸𑀧𑀥𑀸𑀦𑀸 𑀘𑁂 𑀧𑀜𑁆𑀜𑀸 𑀥𑀼𑀭𑀦𑁆𑀢𑀺 𑀅𑀬𑀁 𑀥𑀫𑁆𑀫𑀲𑀪𑀸𑀯𑁄𑀬𑁂𑀯, 𑀏𑀢𑁆𑀣 𑀓𑀺𑀜𑁆𑀘𑀺 𑀦 𑀆𑀲𑀗𑁆𑀓𑀺𑀢𑀩𑁆𑀩𑀁.

𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀁 𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀢𑀸. 𑀢𑁂𑀦𑀸𑀳 ‘‘𑀇𑀦𑁆𑀤𑁆𑀭𑀺𑀬𑀦𑀸𑀦𑀢𑁆𑀢𑀁 𑀯𑀤𑀸𑀫𑀻’’𑀢𑀺. 𑀇𑀦𑁆𑀤𑁆𑀭𑀺𑀬𑀦𑀸𑀦𑀢𑁆𑀢𑀢𑀸 𑀓𑀸𑀭𑀡𑀦𑁆𑀢𑀺 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀯𑀺𑀬 𑀲𑀫𑀣𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘 𑀬𑀁 𑀧𑀼𑀩𑁆𑀩𑀪𑀸𑀕𑀕𑀫𑀦𑀁, 𑀢𑀁 𑀅𑀧𑁆𑀧𑀫𑀸𑀡𑀁 𑀢𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀁, 𑀬𑀲𑁆𑀲 𑀲𑀫𑀸𑀥𑀺 𑀥𑀼𑀭𑀁 𑀧𑀼𑀩𑁆𑀩𑀗𑁆𑀕𑀫𑀁 𑀩𑀮𑀯𑀁 𑀳𑁄𑀢𑀺, 𑀲𑁄 𑀅𑀭𑀺𑀬𑁄 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀜𑁆𑀜𑀸 𑀥𑀼𑀭𑀁 𑀧𑀼𑀩𑁆𑀩𑀗𑁆𑀕𑀫𑀁 𑀩𑀮𑀯𑀁 𑀳𑁄𑀢𑀺 𑀲𑁄 𑀅𑀭𑀺𑀬𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀩𑀼𑀤𑁆𑀥𑀺𑀯𑀺𑀲𑀺𑀝𑁆𑀞𑁂𑀦 𑀦𑀺𑀤𑀲𑁆𑀲𑀦𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸’’𑀢𑀺𑀆𑀤𑀺𑀫𑀸𑀳, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁪. 𑀅𑀲𑀺𑀬𑀢𑀻𑀢𑀺 𑀅𑀲𑀦𑀁, 𑀪𑀼𑀜𑁆𑀚𑀦𑀁 𑀪𑁄𑀚𑀦𑀁, 𑀅𑀲𑀦𑀲𑁆𑀲 𑀪𑁄𑀚𑀦𑀁 𑀅𑀲𑀦𑀪𑁄𑀚𑀦𑀁, 𑀆𑀳𑀸𑀭𑀧𑀭𑀺𑀪𑁄𑀕𑁄, 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀅𑀲𑀦𑀪𑁄𑀚𑀦𑀁 𑀏𑀓𑀸𑀲𑀦𑀪𑁄𑀚𑀦𑀁. 𑀲𑁄 𑀧𑀦 𑀓𑀸𑀮𑁄 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑀯𑀲𑁂𑀦 𑀧𑀼𑀩𑁆𑀩𑀡𑁆𑀳𑁄 𑀏𑀯 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀏𑀓𑀲𑁆𑀫𑀺𑀁 𑀧𑀼𑀭𑁂𑀪𑀢𑁆𑀢𑁂 𑀅𑀲𑀦𑀪𑁄𑀚𑀦’’𑀦𑁆𑀢𑀺. 𑀯𑀺𑀧𑁆𑀧𑀝𑀺𑀲𑀸𑀭𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 ‘‘𑀅𑀬𑀼𑀢𑁆𑀢𑀁 𑀯𑀢 𑀫𑀬𑀸 𑀓𑀢𑀁, 𑀬𑁄 𑀅𑀢𑁆𑀢𑀦𑁄 𑀲𑀭𑀻𑀭𑀧𑀓𑀢𑀺𑀁 𑀅𑀚𑀸𑀦𑀦𑁆𑀢𑁄 𑀏𑀓𑀸𑀲𑀦𑀪𑁄𑀚𑀦𑀁 𑀪𑀼𑀜𑁆𑀚𑀺, 𑀬𑁂𑀦 𑀫𑁂 𑀇𑀤𑀁 𑀲𑀭𑀻𑀭𑀁 𑀓𑀺𑀲𑀁 𑀚𑀸𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑁄 𑀦𑀸𑀳𑁄𑀲𑀻’’𑀢𑀺 𑀏𑀯𑀁 𑀯𑀺𑀧𑁆𑀧𑀝𑀺𑀲𑀸𑀭𑀓𑀼𑀓𑁆𑀓𑀼𑀘𑁆𑀘𑀁 𑀪𑀯𑁂𑀬𑁆𑀬. 𑀏𑀢𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 𑀆𑀳, 𑀦 𑀪𑀤𑁆𑀤𑀸𑀮𑀺𑀫𑁂𑀯 𑀢𑀸𑀤𑀺𑀲𑀁 𑀓𑀺𑀭𑀺𑀬𑀁 𑀅𑀦𑀼𑀚𑀸𑀦𑀦𑁆𑀢𑁄. 𑀇𑀢𑀭𑀣𑀸𑀢𑀺 𑀬𑀤𑀺 𑀏𑀓𑀁𑀬𑁂𑀯 𑀪𑀢𑁆𑀢𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀢𑀢𑁄 𑀏𑀓𑀲𑁆𑀲 𑀪𑀸𑀕𑀲𑁆𑀲 𑀪𑀼𑀜𑁆𑀚𑀦𑀁 𑀏𑀓𑀤𑁂𑀲𑀪𑀼𑀜𑁆𑀚𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀓𑁄 𑀲𑀓𑁆𑀓𑁄𑀢𑀻𑀢𑀺 𑀓𑁄 𑀏𑀯𑀁 𑀬𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀢𑀻𑀢𑀚𑀸𑀢𑀺𑀧𑀭𑀺𑀘𑀬𑁄𑀧𑀺 𑀦𑀸𑀫 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁𑀬𑁂𑀯 𑀅𑀦𑀼𑀩𑀦𑁆𑀥𑀢𑀻𑀢𑀺 𑀆𑀳 ‘‘𑀅𑀢𑀻𑀢𑁂’’𑀢𑀺𑀆𑀤𑀺. 𑀯𑀺𑀭𑀯𑀦𑁆𑀢𑀲𑁆𑀲𑁂𑀯𑀸𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀢𑀁 𑀫𑀤𑁆𑀤𑀺𑀢𑁆𑀯𑀸𑀢𑀺 ‘‘𑀅𑀬𑀁 𑀲𑀺𑀓𑁆𑀔𑀸 𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀆𑀘𑀺𑀡𑁆𑀡𑀁, 𑀅𑀬𑀜𑁆𑀘 𑀪𑀺𑀓𑁆𑀔𑀼 𑀇𑀫𑀁 𑀲𑀺𑀓𑁆𑀔𑀢𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀁 𑀪𑀤𑁆𑀤𑀸𑀮𑀺𑀁 𑀢𑀲𑁆𑀲 𑀯𑀸 𑀅𑀦𑀼𑀲𑁆𑀲𑀸𑀳𑀧𑀯𑁂𑀤𑀦𑀁 𑀅𑀪𑀺𑀪𑀯𑀺𑀢𑁆𑀯𑀸. 𑀪𑀺𑀓𑁆𑀔𑀸𑀘𑀸𑀭𑀕𑀫𑀦𑀢𑁆𑀣𑀁 𑀦 𑀯𑀺𑀢𑀓𑁆𑀓𑀫𑀸𑀴𑀓𑀁 𑀅𑀕𑀫𑀸𑀲𑀺, 𑀯𑀺𑀳𑀸𑀭𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀪𑀕𑀯𑀸 𑀕𑀘𑁆𑀙𑀢𑀺.

𑁧𑁩𑁫. 𑀤𑀽𑀲𑀬𑀦𑁆𑀢𑀺 𑀕𑀭𑀳𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑁄𑀲𑁄, 𑀅𑀧𑀭𑀸𑀥𑁄, 𑀲𑁄 𑀏𑀯 𑀓𑀼𑀘𑁆𑀙𑀺𑀢𑀪𑀸𑀯𑁂𑀦 𑀤𑁄𑀲𑀓𑁄. 𑀕𑀭𑀳𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑁄 𑀑𑀓𑀸𑀲𑁄. 𑀢𑁂𑀦𑀸𑀳 𑁋 ‘‘𑀏𑀢𑀁 𑀑𑀓𑀸𑀲𑀁 𑀏𑀢𑀁 𑀅𑀧𑀭𑀸𑀥’’𑀦𑁆𑀢𑀺. 𑀤𑀼𑀓𑁆𑀓𑀭𑀢𑀭𑀦𑁆𑀢𑀺 𑀧𑀢𑀺𑀓𑀸𑀭𑀯𑀲𑁂𑀦 𑀅𑀢𑀺𑀲𑀬𑁂𑀦 𑀤𑀼𑀓𑁆𑀓𑀭𑀁. 𑀅𑀧𑀭𑀸𑀥𑁄 𑀳𑀺 𑀦 𑀔𑀫𑀸𑀧𑁂𑀦𑁆𑀢𑀁 𑀬𑀣𑀸𑀧𑀘𑁆𑀘𑀬𑀁 𑀯𑀺𑀢𑁆𑀣𑀸𑀭𑀺𑀢𑁄 𑀳𑀼𑀢𑁆𑀯𑀸 𑀤𑀼𑀧𑁆𑀧𑀢𑀺𑀓𑀸𑀭𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀯𑀲𑁆𑀲𑀜𑁆𑀳𑀻’’𑀢𑀺𑀆𑀤𑀺.

𑀅𑀮𑀕𑁆𑀕𑀺𑀢𑁆𑀯𑀸𑀢𑀺 𑀇𑀫𑀫𑁆𑀧𑀺 𑀦𑀸𑀫 𑀅𑀧𑀦𑀻𑀢𑀁 𑀅𑀓𑀸𑀲𑀻𑀢𑀺 𑀏𑀯𑀁 𑀅𑀯𑀺𑀦𑁂𑀢𑁆𑀯𑀸, 𑀢𑀁 𑀢𑀁 𑀢𑀲𑁆𑀲 𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀦𑀺𑀯𑀸𑀭𑀡𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀜𑀸𑀬𑀧𑀝𑀺𑀧𑀢𑁆𑀢𑀺𑀁 𑀅𑀢𑀺𑀘𑁆𑀘 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀘𑁆𑀘𑀬𑁄, 𑀅𑀧𑀭𑀸𑀥𑁄, 𑀧𑀼𑀭𑀺𑀲𑁂𑀦 𑀫𑀤𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑁄 𑀅𑀧𑀭𑀸𑀥𑁄 𑀅𑀢𑁆𑀣𑀢𑁄 𑀧𑀼𑀭𑀺𑀲𑀁 𑀅𑀢𑀺𑀘𑁆𑀘 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀘𑁆𑀘𑀬𑁄 𑀫𑀁, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸’’𑀢𑀺. 𑀅𑀯𑀲𑁂𑀲𑀧𑀘𑁆𑀘𑀬𑀸𑀦𑀁 𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀏𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀲𑀫𑀬𑁄, 𑀳𑁂𑀢𑀼 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺 𑀆𑀳 ‘‘𑀏𑀓𑀁 𑀓𑀸𑀭𑀡’’𑀦𑁆𑀢𑀺. 𑀬𑀁 𑀧𑀦𑁂𑀢𑁆𑀣 𑀪𑀤𑁆𑀤𑀸𑀮𑀺𑀢𑁆𑀣𑁂𑀭𑀲𑁆𑀲 𑀅𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀪𑀺𑀓𑁆𑀔𑀼𑀆𑀤𑀻𑀦𑀁 𑀚𑀸𑀦𑀦𑀁, 𑀢𑀫𑁆𑀧𑀺 𑀓𑀸𑀭𑀡𑀁 𑀓𑀢𑁆𑀯𑀸 ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀦 𑀉𑀲𑁆𑀲𑀳𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁧𑁩𑁬. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀢𑀺 𑀧𑀞𑀫𑀫𑀕𑁆𑀕𑀘𑀺𑀢𑁆𑀢𑀓𑁆𑀔𑀡𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸. 𑀏𑀯𑀁 𑀆𑀡𑀸𑀧𑁂𑀢𑀼𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀲𑀗𑁆𑀓𑀫𑀢𑁆𑀣𑀸𑀬 𑀆𑀡𑀸𑀧𑁂𑀢𑀼𑀁 𑀦 𑀬𑀼𑀢𑁆𑀢𑀁 𑀧𑀬𑁄𑀚𑀦𑀸𑀪𑀸𑀯𑀢𑁄. 𑀅𑀦𑀸𑀘𑀺𑀡𑁆𑀡𑀜𑁆𑀘𑁂𑀢𑀁 𑀩𑀼𑀤𑁆𑀥𑀸𑀦𑀁, 𑀬𑀤𑀺𑀤𑀁 𑀧𑀤𑀲𑀸 𑀅𑀓𑁆𑀓𑀫𑀦𑀁. 𑀢𑀣𑀸 𑀳𑀺 𑁋

‘‘𑀅𑀓𑁆𑀓𑀫𑀺𑀢𑁆𑀯𑀸𑀦 𑀫𑀁 𑀩𑀼𑀤𑁆𑀥𑁄, 𑀲𑀳 𑀲𑀺𑀲𑁆𑀲𑁂𑀳𑀺 𑀕𑀘𑁆𑀙𑀢𑀼;

𑀫𑀸 𑀦𑀁 𑀓𑀮𑀮𑀁 𑀅𑀓𑁆𑀓𑀫𑀺𑀢𑁆𑀣, 𑀳𑀺𑀢𑀸𑀬 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺. (𑀩𑀼. 𑀯𑀁. 𑁨.𑁫𑁩);

𑀲𑀼𑀫𑁂𑀥𑀧𑀡𑁆𑀟𑀺𑀢𑁂𑀦 𑀧𑀘𑁆𑀘𑀸𑀲𑀻𑀲𑀺𑀢𑀁 𑀦 𑀓𑀢𑀁. 𑀬𑀣𑀸𑀳 𑁋

‘‘𑀤𑀻𑀧𑀗𑁆𑀓𑀭𑁄 𑀮𑁄𑀓𑀯𑀺𑀤𑀽, 𑀆𑀳𑀼𑀢𑀻𑀦𑀁 𑀧𑀝𑀺𑀕𑁆𑀕𑀳𑁄;

𑀉𑀲𑁆𑀲𑀻𑀲𑀓𑁂 𑀫𑀁 𑀞𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀻’’𑀢𑀺. (𑀩𑀼. 𑀯𑀁. 𑁨.𑁬𑁦);

𑀪𑀕𑀯𑀢𑀸 𑀆𑀡𑀢𑁆𑀢𑁂 𑀲𑀢𑀺 𑀢𑁂𑀲𑀫𑁆𑀧𑀺 𑀏𑀯𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁂𑀲𑀁 𑀧𑀝𑀺𑀩𑀸𑀳𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀇𑀤𑀁 𑀅𑀝𑁆𑀞𑀸𑀦𑀧𑀭𑀺𑀓𑀧𑁆𑀧𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀓𑀸𑀢𑀼𑀁 𑀆𑀭𑀤𑁆𑀥𑀁 𑀦𑀸𑀫 𑀓𑀺𑀘𑁆𑀘𑀁 𑀓𑁂𑀳𑀺𑀘𑀺 𑀧𑀝𑀺𑀩𑀸𑀳𑀺𑀢𑀼𑀁 𑀬𑀼𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺 𑀧𑀝𑀺𑀩𑀸𑀳𑀺𑀢𑀼𑀁𑀬𑁂𑀯 𑀅𑀓𑀭𑀡𑀢𑁄. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑁆𑀲 𑀅𑀦𑁄𑀓𑁆𑀓𑀦𑁆𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀩𑀸𑀳𑀺𑀭𑀓𑁄’’𑀢𑀺.

𑁧𑁩𑁭. 𑀦 𑀓𑀫𑁆𑀫𑀝𑁆𑀞𑀸𑀦𑀁 𑀅𑀮𑁆𑀮𑀻𑀬𑀢𑀻𑀢𑀺 𑀘𑀺𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀑𑀢𑀭𑀢𑀺.

𑁧𑁪𑁦. 𑀧𑀼𑀦𑀧𑁆𑀧𑀼𑀦𑀁 𑀓𑀸𑀭𑁂𑀦𑁆𑀢𑀻𑀢𑀺 𑀤𑀡𑁆𑀟𑀓𑀫𑁆𑀫𑀧𑀡𑀸𑀫𑀦𑀸𑀤𑀺𑀓𑀸𑀭𑀡𑀁 𑀧𑀼𑀦𑀧𑁆𑀧𑀼𑀦𑀁 𑀓𑀸𑀭𑁂𑀦𑁆𑀢𑀺. 𑀲𑀫𑁆𑀫𑀸𑀯𑀢𑁆𑀢𑀫𑁆𑀳𑀺 𑀦 𑀯𑀢𑁆𑀢𑀢𑀻𑀢𑀺 𑀢𑀲𑁆𑀲𑀸 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀢𑁆𑀣𑀁 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀲𑀫𑁆𑀫𑀸𑀯𑀢𑁆𑀢𑀫𑁆𑀳𑀺 𑀦 𑀯𑀢𑁆𑀢𑀢𑀺. 𑀅𑀦𑀼𑀮𑁄𑀫𑀯𑀢𑁆𑀢𑁂 𑀦 𑀯𑀢𑁆𑀢𑀢𑀻𑀢𑀺 𑀬𑁂𑀦 𑀬𑁂𑀦 𑀯𑀢𑁆𑀢𑁂𑀦 𑀲𑀗𑁆𑀖𑁄 𑀅𑀦𑀼𑀮𑁄𑀫𑀺𑀓𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀦𑀼𑀮𑁄𑀫𑀯𑀢𑁆𑀢𑁂 𑀦 𑀯𑀢𑁆𑀢𑀢𑀺 𑀯𑀺𑀮𑁄𑀫𑀫𑁂𑀯 𑀕𑀡𑁆𑀳𑀸𑀢𑀺, 𑀧𑀝𑀺𑀮𑁄𑀫𑁂𑀦 𑀳𑁄𑀢𑀺. 𑀦𑀺𑀢𑁆𑀣𑀸𑀭𑀡𑀓𑀯𑀢𑁆𑀢𑀫𑁆𑀳𑀻𑀢𑀺 𑀬𑁂𑀦 𑀯𑀢𑁆𑀢𑁂𑀦 𑀲𑀗𑁆𑀖𑁄 𑀅𑀦𑀼𑀮𑁄𑀫𑀺𑀓𑁄 𑀳𑁄𑀢𑀺, 𑀲𑀸𑀧𑀢𑁆𑀢𑀺𑀓𑀪𑀸𑀯𑀢𑁄 𑀦𑀺𑀢𑁆𑀣𑀺𑀡𑁆𑀡𑁄 𑀳𑁄𑀢𑀺, 𑀢𑀫𑁆𑀳𑀺 𑀦𑀺𑀢𑁆𑀣𑀸𑀭𑀡𑀯𑀢𑁆𑀢𑀲𑁆𑀫𑀺𑀁 𑀦 𑀯𑀢𑁆𑀢𑀢𑀺. 𑀢𑁂𑀦𑀸𑀳 ‘‘𑀆𑀧𑀢𑁆𑀢𑀻’’𑀢𑀺𑀆𑀤𑀺. 𑀤𑀼𑀩𑁆𑀩𑀘𑀓𑀭𑀡𑁂𑀢𑀺 𑀤𑀼𑀩𑁆𑀩𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀭𑀡𑁂.

𑁧𑁪𑁪. 𑀬𑀸𑀧𑁂𑀢𑀻𑀢𑀺 𑀯𑀢𑁆𑀢𑀢𑀺, 𑀲𑀸𑀲𑀦𑁂 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀜𑁆𑀜𑀸𑀧𑀢𑁆𑀢𑀸𑀢𑀺 ‘‘𑀅𑀲𑀼𑀓𑁄 𑀅𑀲𑀼𑀓𑁄 𑀘 𑀣𑁂𑀭𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀩𑀳𑀼𑀲𑁆𑀲𑀼𑀢𑁄’’𑀢𑀺𑀆𑀤𑀺𑀦𑀸 𑀅𑀪𑀺𑀜𑁆𑀜𑀸𑀢𑀪𑀸𑀯𑀁 𑀧𑀢𑁆𑀢𑀸 𑀅𑀥𑀺𑀕𑀢𑀅𑀪𑀺𑀜𑁆𑀜𑀸𑀢𑀸.

𑁧𑁪𑁫. 𑀲𑀢𑁆𑀢𑁂𑀲𑀼 𑀳𑀸𑀬𑀫𑀸𑀦𑁂𑀲𑀽𑀢𑀺 𑀓𑀺𑀮𑁂𑀲𑀩𑀳𑀼𑀮𑀢𑀸𑀬 𑀧𑀝𑀺𑀧𑀚𑁆𑀚𑀦𑀓𑀲𑀢𑁆𑀢𑁂𑀲𑀼 𑀧𑀭𑀺𑀳𑀸𑀬𑀦𑁆𑀢𑁂𑀲𑀼 𑀧𑀝𑀺𑀧𑀣𑁂𑀲𑀼 𑀚𑀸𑀬𑀫𑀸𑀦𑁂𑀲𑀼. 𑀅𑀦𑁆𑀢𑀭𑀥𑀸𑀬𑀢𑀺 𑀦𑀸𑀫 𑀢𑀤𑀸𑀥𑀸𑀭𑀢𑀸𑀬. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀧𑀭𑀽𑀧𑀯𑀸𑀤𑀸𑀤𑀬𑁄. 𑀲𑀫𑁆𑀧𑀭𑀸𑀬𑀺𑀓𑀸 𑀅𑀧𑀸𑀬𑀤𑀼𑀓𑁆𑀔𑀯𑀺𑀲𑁂𑀲𑀸. 𑀆𑀲𑀯𑀦𑁆𑀢𑀺 𑀢𑁂𑀦 𑀢𑁂𑀦 𑀧𑀘𑁆𑀘𑀬𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀲𑀯𑀸. 𑀦𑁂𑀲𑀦𑁆𑀢𑀺 𑀧𑀭𑀽𑀧𑀯𑀸𑀤𑀸𑀤𑀺𑀆𑀲𑀯𑀸𑀦𑀁. 𑀢𑁂𑀢𑀺 𑀯𑀻𑀢𑀺𑀓𑁆𑀓𑀫𑀥𑀫𑁆𑀫𑀸.

𑀅𑀓𑀸𑀮𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀓𑀸𑀮𑀁 𑀤𑀲𑁆𑀲𑁂𑀢𑁆𑀯𑀸. 𑀉𑀧𑁆𑀧𑀢𑁆𑀢𑀺𑀦𑁆𑀢𑀺 𑀆𑀲𑀯𑀝𑁆𑀞𑀸𑀦𑀺𑀬𑀸𑀦𑀁 𑀥𑀫𑁆𑀫𑀸𑀦𑀫𑀼𑀧𑁆𑀧𑀢𑁆𑀢𑀺𑀁. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀓𑀸𑀮𑀁, 𑀢𑀸𑀯 𑀲𑁂𑀦𑀸𑀲𑀦𑀸𑀦𑀺 𑀧𑀳𑁄𑀦𑁆𑀢𑀺, 𑀢𑁂𑀦 𑀆𑀯𑀸𑀲𑀫𑀘𑁆𑀙𑀭𑀺𑀬𑀸𑀤𑀺𑀳𑁂𑀢𑀼𑀦𑀸 𑀲𑀸𑀲𑀦𑁂 𑀏𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀺𑀬𑀸 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀇𑀫𑀺𑀦𑀸 𑀧𑀦 𑀳𑁂𑀢𑀼𑀦𑀸 𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀬𑀲𑀦𑁆𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑀁 𑀧𑀭𑀺𑀯𑀸𑀭𑀜𑁆𑀘. 𑀲𑀸𑀕𑀢𑀢𑁆𑀣𑁂𑀭𑀲𑁆𑀲 𑀦𑀸𑀕𑀤𑀫𑀦𑀓𑀺𑀢𑁆𑀢𑀺𑀬𑀲𑀸𑀤𑀺𑀯𑀲𑁂𑀦 𑀲𑀼𑀭𑀸𑀧𑀸𑀦𑀲𑀗𑁆𑀔𑀸𑀢𑁄 𑀆𑀲𑀯𑀝𑁆𑀞𑀸𑀦𑀺𑀬𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀺.

𑀭𑀲𑁂𑀦 𑀭𑀲𑀁 𑀲𑀁𑀲𑀦𑁆𑀤𑁂𑀢𑁆𑀯𑀸𑀢𑀺 𑀉𑀧𑀸𑀤𑀺𑀦𑁆𑀦𑀓𑀨𑀲𑁆𑀲𑀭𑀲𑁂𑀦 𑀅𑀦𑀼𑀧𑀸𑀤𑀺𑀦𑁆𑀦𑀓𑀨𑀲𑁆𑀲𑀭𑀲𑀁 𑀲𑀁𑀲𑀦𑁆𑀤𑁂𑀢𑁆𑀯𑀸.

𑁧𑁪𑁬. 𑀦 𑀔𑁄, 𑀪𑀤𑁆𑀤𑀸𑀮𑀺, 𑀏𑀲𑁂𑀯 𑀳𑁂𑀢𑀼, 𑀅𑀣 𑀔𑁄 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀥𑀫𑁆𑀫𑀲𑁆𑀲 𑀲𑀓𑁆𑀓𑀘𑁆𑀘𑀲𑀯𑀦𑁂 𑀣𑁂𑀭𑀁 𑀦𑀺𑀬𑁄𑀚𑁂𑀢𑀺.

𑁧𑁪𑁭. 𑀯𑀺𑀲𑁂𑀯𑀦𑀸𑀘𑀸𑀭𑀦𑁆𑀢𑀺 𑀅𑀤𑀦𑁆𑀢𑀓𑀺𑀭𑀺𑀬𑀁. 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀯𑀽𑀧𑀲𑀫𑁆𑀫𑀢𑀺. 𑀢𑀢𑁆𑀣 𑀅𑀤𑀦𑁆𑀢𑀓𑀺𑀭𑀺𑀬𑀁 𑀧𑀳𑀸𑀬 𑀤𑀦𑁆𑀢𑁄 𑀳𑁄𑀢𑀺. 𑀬𑀼𑀕𑀲𑁆𑀲𑀸𑀢𑀺 𑀭𑀣𑀥𑀼𑀭𑀲𑁆𑀲.

𑀅𑀦𑀼𑀓𑁆𑀓𑀫𑁂𑀢𑀺 𑀅𑀦𑀼𑀭𑀽𑀧𑀧𑀭𑀺𑀕𑀫𑁂. 𑀢𑀤𑀯𑀢𑁆𑀣𑀸𑀦𑀼𑀭𑀽𑀧𑀁 𑀧𑀸𑀤𑀸𑀦𑀁 𑀉𑀓𑁆𑀔𑀺𑀧𑀦𑁂 𑀦𑀺𑀓𑁆𑀔𑀺𑀧𑀦𑁂 𑀘. 𑀢𑁂𑀦𑀸𑀳 ‘‘𑀘𑀢𑁆𑀢𑀸𑀭𑁄 𑀧𑀸𑀤𑁂’’𑀢𑀺𑀆𑀤𑀺. 𑀭𑀚𑁆𑀚𑀼𑀩𑀦𑁆𑀥𑀦𑀯𑀺𑀥𑀸𑀦𑁂𑀦𑀸𑀢𑀺 𑀧𑀸𑀤𑀢𑁄 𑀪𑀽𑀫𑀺𑀬𑀸 𑀫𑁄𑀘𑀦𑀯𑀺𑀥𑀸𑀦𑁂𑀦. 𑀏𑀯𑀁 𑀓𑀭𑀡𑀢𑁆𑀣𑀦𑁆𑀢𑀺 𑀬𑀣𑀸 𑀅𑀲𑁆𑀲𑁂 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀪𑀽𑀫𑀺𑀁 𑀕𑀳𑁂𑀢𑀼𑀁 𑀲𑀓𑁆𑀓𑀸, 𑀏𑀯𑀁 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀢𑀣𑀸 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀘𑁆𑀘𑀮𑀪𑀸𑀯𑀓𑀭𑀡𑀢𑁆𑀣𑀁. 𑀫𑀡𑁆𑀟𑀮𑁂𑀢𑀺 𑀫𑀡𑁆𑀟𑀮𑀥𑀸𑀯𑀺𑀓𑀸𑀬𑀁. 𑀧𑀣𑀯𑀻𑀓𑀫𑀦𑁂𑀢𑀺 𑀧𑀣𑀯𑀺𑀁 𑀨𑀼𑀝𑁆𑀞𑀫𑀢𑁆𑀢𑁂𑀦 𑀕𑀫𑀦𑁂. 𑀢𑁂𑀦𑀸𑀳 ‘‘𑀅𑀕𑁆𑀕𑀕𑁆𑀕𑀔𑀼𑀭𑁂𑀳𑀻’’𑀢𑀺. 𑀑𑀓𑁆𑀓𑀦𑁆𑀢𑀓𑀭𑀡𑀲𑁆𑀫𑀺𑀦𑁆𑀢𑀺 𑀑𑀓𑁆𑀓𑀦𑁆𑀢𑁂𑀢𑁆𑀯𑀸 𑀧𑀭𑀲𑁂𑀦𑀸𑀲𑀫𑁆𑀫𑀤𑁆𑀤𑀦 𑀑𑀓𑁆𑀓𑀦𑁆𑀢𑀓𑀭𑀡𑁂. 𑀏𑀓𑀲𑁆𑀫𑀺𑀁 𑀞𑀸𑀦𑁂𑀢𑀺 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀕𑀫𑀦𑀁 𑀘𑁄𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀲𑁄 𑀧𑀦𑁂𑀢𑁆𑀣 𑀲𑀻𑀖𑀢𑀭𑁄 𑀅𑀥𑀺𑀧𑁆𑀧𑁂𑀢𑁄. 𑀤𑀯𑀢𑁆𑀢𑁂𑀢𑀺 𑀫𑀭𑀺𑀬𑀸𑀤𑀸𑀓𑁄𑀧𑀦𑁂𑀳𑀺 𑀦𑀸𑀦𑀧𑁆𑀧𑀬𑁄𑀚𑀦𑁂, 𑀧𑀭𑀲𑁂𑀦𑀸𑀬 𑀧𑀯𑀢𑁆𑀢𑀫𑀳𑀸𑀦𑀸𑀤𑀧𑀳𑀭𑀡𑁂𑀳𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀼𑀤𑁆𑀥𑀓𑀸𑀮𑀲𑁆𑀫𑀺’’𑀦𑁆𑀢𑀺𑀆𑀤𑀺.

𑀭𑀜𑁆𑀜𑀸 𑀚𑀸𑀦𑀺𑀢𑀩𑁆𑀩𑀕𑀼𑀡𑁂𑀢𑀺 𑀬𑀣𑀸 𑀭𑀸𑀚𑀸 𑀅𑀲𑁆𑀲𑀲𑁆𑀲 𑀕𑀼𑀡𑁂 𑀚𑀸𑀦𑀸𑀢𑀺, 𑀏𑀯𑀁 𑀢𑁂𑀦 𑀚𑀸𑀦𑀺𑀢𑀩𑁆𑀩𑀕𑀼𑀡𑀓𑀸𑀭𑀡𑀁 𑀓𑀸𑀭𑁂𑀢𑀺. 𑀅𑀲𑁆𑀲𑀭𑀸𑀚𑀯𑀁𑀲𑁂𑀢𑀺 𑀤𑀼𑀲𑁆𑀲𑀳𑀁 𑀤𑀼𑀓𑁆𑀔𑀁 𑀧𑀢𑁆𑀯𑀸𑀧𑀺 𑀬𑀣𑀸 𑀅𑀬𑀁 𑀭𑀸𑀚𑀯𑀁𑀲𑀸𑀦𑀼𑀭𑀽𑀧𑀓𑀺𑀭𑀺𑀬𑀁 𑀦 𑀚𑀳𑀺𑀲𑁆𑀲𑀢𑀺, 𑀏𑀯𑀁 𑀲𑀺𑀓𑁆𑀔𑀸𑀧𑀦𑁂. 𑀲𑀺𑀓𑁆𑀔𑀸𑀧𑀦𑀫𑁂𑀯 𑀳𑀺 𑀲𑀦𑁆𑀥𑀸𑀬 𑀲𑀩𑁆𑀩𑀢𑁆𑀣 ‘‘𑀓𑀸𑀭𑀡𑀁 𑀓𑀸𑀭𑁂𑀢𑀻’’𑀢𑀺 𑀯𑀼𑀢𑁆𑀢𑀁 𑀢𑀲𑁆𑀲 𑀓𑀭𑀡𑀓𑀸𑀭𑀸𑀧𑀦𑀧𑀭𑀺𑀬𑀸𑀬𑀢𑁆𑀢𑀸.

𑀬𑀣𑀸 𑀉𑀢𑁆𑀢𑀫𑀚𑀯𑁄 𑀳𑁄𑀢𑀻𑀢𑀺 𑀚𑀯𑀤𑀲𑁆𑀲𑀦𑀝𑁆𑀞𑀸𑀦𑁂 𑀬𑀣𑀸 𑀳𑀬𑁄 𑀉𑀢𑁆𑀢𑀫𑀚𑀯𑀁 𑀦 𑀳𑀸𑀧𑁂𑀲𑀺, 𑀏𑀯𑀁 𑀲𑀺𑀓𑁆𑀔𑀸𑀧𑁂𑀢𑀺. 𑀉𑀢𑁆𑀢𑀫𑀳𑀬𑀪𑀸𑀯𑁂, 𑀬𑀣𑀸 𑀉𑀢𑁆𑀢𑀫𑀳𑀬𑁄 𑀳𑁄𑀢𑀻𑀢𑀺 𑀓𑀫𑁆𑀫𑀓𑀭𑀡𑀓𑀸𑀮𑁂 𑀅𑀢𑁆𑀢𑀦𑁄 𑀉𑀢𑁆𑀢𑀫𑀲𑀪𑀸𑀯𑀁 𑀅𑀦𑀺𑀕𑀼𑀳𑀺𑀢𑁆𑀯𑀸 𑀅𑀯𑀚𑁆𑀚𑁂𑀢𑁆𑀯𑀸 𑀬𑀣𑀸 𑀅𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀺, 𑀏𑀯𑀁 𑀧𑀭𑀫𑀚𑀯𑁂𑀦 𑀲𑀺𑀓𑁆𑀔𑀸𑀧𑁂𑀢𑀺. 𑀬𑀣𑀸 𑀓𑀺𑀭𑀺𑀬𑀸 𑀯𑀺𑀦𑀸 𑀤𑀩𑁆𑀩𑀫𑁆𑀧𑀺 𑀯𑀺𑀦𑀸 𑀓𑀺𑀭𑀺𑀬𑀁 𑀦 𑀪𑀯𑀢𑀺, 𑀏𑀯𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀧𑀓𑀢𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀓𑀢𑀺𑀬𑀸 𑀉𑀢𑁆𑀢𑀫𑀳𑀬𑀲𑁆𑀲𑁂𑀯 𑀉𑀢𑁆𑀢𑀫𑀳𑀬𑀓𑀸𑀭𑀡𑀸𑀭𑀳𑀢𑁆𑀢𑀸 𑀉𑀢𑁆𑀢𑀫𑀚𑀯𑀧𑀝𑀺𑀧𑀚𑁆𑀚𑀦𑁂. 𑀫𑀸𑀲𑀔𑀸𑀤𑀓𑀖𑁄𑀝𑀓𑀸𑀦𑀦𑁆𑀢𑀺 𑀫𑀸𑀲𑀁 𑀔𑀸𑀤𑀺𑀢𑁆𑀯𑀸 𑀬𑀣𑀸 𑀢𑀣𑀸 𑀯𑀺𑀕𑀼𑀡𑀔𑀮𑀼𑀗𑁆𑀕𑀓𑀸𑀦𑀁. 𑀯𑀮𑀜𑁆𑀚𑀓𑀤𑀡𑁆𑀟𑀦𑁆𑀢𑀺 𑀭𑀜𑁆𑀜𑀸 𑀕𑀳𑁂𑀢𑀩𑁆𑀩𑀲𑀼𑀯𑀡𑁆𑀡𑀤𑀡𑁆𑀟𑀁. 𑀥𑀸𑀢𑀼𑀧𑀢𑁆𑀣𑀤𑁆𑀥𑁄𑀢𑀺 𑀅𑀢𑁆𑀢𑀦𑀸𑀯 𑀲𑀫𑀼𑀧𑁆𑀧𑀸𑀤𑀺𑀢𑀥𑀸𑀢𑀼𑀬𑀸 𑀉𑀧𑀢𑁆𑀣𑀫𑁆𑀪𑀺𑀢𑁄 𑀳𑀼𑀢𑁆𑀯𑀸.

𑀉𑀢𑁆𑀢𑀫𑁂 𑀲𑀸𑀔𑀮𑁆𑀬𑁂𑀢𑀺 𑀧𑀭𑀫𑀲𑀔𑀺𑀮𑀪𑀸𑀯𑁂 𑀲𑀔𑀺𑀮𑀯𑀸𑀘𑀸𑀬 𑀏𑀯 𑀤𑀫𑁂𑀢𑀩𑁆𑀩𑀢𑀸𑀬. 𑀢𑁂𑀦𑀸𑀳 ‘‘𑀫𑀼𑀤𑀼𑀯𑀸𑀘𑀸𑀬 𑀳𑀻’’𑀢𑀺𑀆𑀤𑀺.

𑀅𑀭𑀳𑀢𑁆𑀢𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁂 𑀧𑀯𑀢𑁆𑀢𑀲𑀫𑁆𑀫𑀸𑀜𑀸𑀡𑀁. 𑀲𑀫𑁆𑀫𑀸𑀜𑀸𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁂𑀯𑀸𑀢𑀺 𑀧𑀦 𑀇𑀤𑀁 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀪𑀸𑀯𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺 ‘‘𑀅𑀲𑁂𑀓𑁆𑀔𑁂𑀦𑀸’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀢𑀫𑁆𑀧𑀺 𑀅𑀲𑁂𑀓𑁆𑀔𑀜𑀸𑀡𑀦𑁆𑀢𑀺 𑀘𑁂? 𑀏𑀯𑀫𑁆𑀧𑀺 𑀦𑀺𑀧𑁆𑀧𑀭𑀺𑀬𑀸𑀬 𑀲𑁂𑀓𑁆𑀔𑀕𑁆𑀕𑀳𑀡𑁂 𑀧𑀭𑀺𑀬𑀸𑀬𑀲𑁂𑀓𑁆𑀔𑀕𑁆𑀕𑀳𑀡𑀁 𑀦 𑀬𑀼𑀢𑁆𑀢𑀫𑁂𑀯, 𑀓𑀺𑀘𑁆𑀘𑀪𑁂𑀤𑁂𑀦 𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀸 𑀏𑀯 𑀳𑀺 𑀲𑀸 𑀧𑀜𑁆𑀜𑀸 𑀦𑀺𑀩𑁆𑀩𑀸𑀦𑀲𑁆𑀲 𑀧𑀘𑁆𑀘𑀓𑁆𑀔𑀓𑀺𑀭𑀺𑀬𑀸𑀬 𑀲𑀫𑁆𑀫𑀸𑀤𑀲𑁆𑀲𑀦𑀓𑀺𑀘𑁆𑀘𑀁 𑀉𑀧𑀸𑀤𑀸𑀬 ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀯𑀼𑀢𑁆𑀢𑀸, 𑀲𑀫𑁆𑀫𑀸𑀚𑀸𑀦𑀦𑀓𑀺𑀘𑁆𑀘𑀁 𑀉𑀧𑀸𑀤𑀸𑀬 ‘‘𑀲𑀫𑁆𑀫𑀸𑀜𑀸𑀡’’𑀦𑁆𑀢𑀺. 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀫𑁆𑀫𑀸𑀜𑀸𑀡𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑀕𑁆𑀕𑀨𑀮𑀸𑀯𑀳𑀸𑀬 𑀤𑁂𑀲𑀦𑀸𑀬 𑀲𑀗𑁆𑀔𑁂𑀧𑀢𑁄𑀯 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀉𑀕𑁆𑀖𑀝𑀺𑀢𑀜𑁆𑀜𑀼𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦𑀸’’𑀢𑀺.

𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀮𑀝𑀼𑀓𑀺𑀓𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁮. 𑀫𑀳𑀸𑀉𑀤𑀸𑀬𑀺𑀢𑁆𑀣𑁂𑀭𑁄𑀢𑀺 𑀓𑀸𑀴𑀼𑀤𑀸𑀬𑀺𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁂𑀳𑀺 𑀅𑀜𑁆𑀜𑁄 𑀫𑀳𑀸𑀤𑁂𑀳𑀢𑀸𑀬 𑀫𑀳𑀸𑀉𑀤𑀸𑀬𑀻𑀢𑀺 𑀲𑀸𑀲𑀦𑁂 𑀧𑀜𑁆𑀜𑀸𑀢𑁄 𑀣𑁂𑀭𑁄. 𑀅𑀧𑀳𑀭𑀺 𑀅𑀧𑀳𑀭𑀢𑀺 𑀅𑀧𑀳𑀭𑀺𑀲𑁆𑀲𑀢𑀻𑀢𑀺 𑀅𑀧𑀳𑀢𑁆𑀢𑀸. 𑀢𑁂𑀓𑀸𑀮𑀺𑀓𑁄 𑀳𑀺 𑀅𑀬𑀁 𑀲𑀤𑁆𑀤𑁄. 𑀉𑀧𑀳𑀢𑁆𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀳𑀸𑀭𑀓𑁄𑀢𑀺 𑀅𑀧𑀦𑁂𑀢𑀸. 𑀉𑀧𑀳𑀸𑀭𑀓𑁄𑀢𑀺 𑀉𑀧𑀦𑁂𑀢𑀸.

𑁧𑁪𑁯. 𑀬𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑁂𑀦 𑀘 𑀅𑀦𑀦𑁆𑀢𑀭𑀦𑀺𑀤𑁆𑀤𑀺𑀝𑁆𑀞𑀲𑀫𑀬𑁄 𑀧𑀘𑁆𑀘𑀸𑀫𑀝𑁆𑀞𑁄𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺. 𑀦 𑀪𑀕𑀯𑀦𑁆𑀢𑀁 𑀧𑀝𑀺𑀘𑁆𑀘𑀸𑀢𑀺 𑀦 𑀪𑀕𑀯𑀦𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸.

𑀓𑀫𑁆𑀫𑀦𑀺𑀧𑁆𑀨𑀦𑁆𑀦𑀢𑁆𑀣𑀦𑁆𑀢𑀺 𑀅𑀢𑁆𑀢𑀦𑀸 𑀆𑀬𑀸𑀘𑀺𑀬𑀫𑀸𑀦𑀓𑀫𑁆𑀫𑀲𑀺𑀤𑁆𑀥𑀺𑀅𑀢𑁆𑀣𑀁. 𑀪𑀯𑀢𑀻𑀢𑀺 𑀪𑀽, 𑀦 𑀪𑀽𑀢𑀺 𑀅𑀪𑀽, 𑀪𑀬𑀯𑀲𑁂𑀦 𑀧𑀦 𑀲𑀸 𑀇𑀢𑁆𑀣𑀻 ‘‘𑀅𑀪𑀼’’𑀦𑁆𑀢𑀺 𑀆𑀳. 𑀆𑀢𑀼 𑀫𑀸𑀢𑀽𑀢𑀺 𑀏𑀢𑁆𑀣 𑀬𑀣𑀸 𑁋

‘‘𑀅𑀗𑁆𑀕𑀸 𑀅𑀗𑁆𑀕𑀸 𑀲𑀫𑁆𑀪𑀯𑀲𑀺, 𑀳𑀤𑀬𑀸 𑀅𑀥𑀺𑀚𑀸𑀬𑀲𑁂;

𑀅𑀢𑁆𑀢𑀸 𑀏𑀯 𑀧𑀼𑀢𑁆𑀢 𑀦𑀸𑀫𑀸𑀲𑀺, 𑀲 𑀚𑀻𑀯 𑀲𑀭𑀤𑁄𑀲𑀢’’𑀦𑁆𑀢𑀺. 𑁋

𑀆𑀤𑀻𑀲𑀼 𑀧𑀼𑀢𑁆𑀢𑁄 ‘‘𑀅𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀢𑀺 𑀓𑀼𑀮𑀯𑀲𑁂𑀦 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀦𑀢𑁄. 𑀏𑀯𑀁 𑀧𑀺𑀢𑀸𑀧𑀺 ‘‘𑀧𑀼𑀢𑁆𑀢𑀲𑁆𑀲 𑀅𑀢𑁆𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 ‘‘𑀪𑀺𑀓𑁆𑀔𑀼𑀲𑁆𑀲 𑀅𑀢𑁆𑀢𑀸 𑀫𑀸𑀢𑀸’’𑀢𑀺 𑀯𑀢𑁆𑀣𑀼𑀓𑀸𑀫𑀸 𑀪𑀬𑀯𑀲𑁂𑀦 ‘‘𑀆𑀢𑀼 𑀫𑀸𑀢𑀽’’𑀢𑀺 𑀆𑀳. 𑀢𑁂𑀦𑀸𑀳 ‘‘𑀆𑀢𑀽𑀢𑀺 𑀧𑀺𑀢𑀸’’𑀢𑀺𑀆𑀤𑀺.

𑁧𑁫𑁦. 𑀏𑀯𑀫𑁂𑀯𑀦𑁆𑀢𑀺 𑀇𑀤𑀁 𑀕𑀭𑀳𑀢𑁆𑀣𑀚𑁄𑀢𑀦𑀦𑀺𑀧𑀸𑀢𑀧𑀤𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀕𑀭𑀳𑀦𑁆𑀢𑁄 𑀆𑀳𑀸’’𑀢𑀺. 𑀢𑀣𑀸 𑀳𑀺 𑀦𑀁 𑀯𑀸𑀘𑀓𑀲𑀤𑁆𑀤𑁂𑀦𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥𑁂𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀆𑀳. 𑀆𑀳𑀁𑀲𑀽𑀢𑀺 𑀢𑁂𑀲𑀁 𑀢𑀣𑀸 𑀯𑀘𑀦𑀲𑁆𑀲 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀺𑀤𑀻𑀧𑀦𑀦𑁆𑀢𑀺 𑀆𑀳 ‘‘𑀯𑀤𑀦𑁆𑀢𑀻’’𑀢𑀺. 𑀓𑀺𑀁 𑀧𑀦𑀺𑀫𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀲𑁆𑀲𑀸𑀢𑀺 𑀧𑀳𑀸𑀢𑀩𑁆𑀩𑀯𑀢𑁆𑀣𑀼𑀁 𑀅𑀯𑀫𑀜𑁆𑀜𑀫𑀸𑀦𑁂𑀳𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀓𑀺𑀁 𑀧𑀦𑀸’’𑀢𑀺. 𑀳𑁂𑀢𑀼𑀫𑁆𑀳𑀺 𑀚𑁄𑀢𑁂𑀢𑀩𑁆𑀩𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁 𑀬𑀣𑀸 ‘‘𑀅𑀦𑀼𑀲𑁆𑀲𑀯𑀲𑁆𑀲 𑀳𑁂𑀢𑀼, 𑀅𑀚𑁆𑀛𑁂𑀦𑀲𑁆𑀲 𑀳𑁂𑀢𑀽’’𑀢𑀺. 𑀢𑁂𑀦𑀸𑀳 ‘‘𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀳𑁂𑀢𑀽’’𑀢𑀺. 𑀦𑀦𑀼 𑀅𑀧𑀲𑁆𑀲𑀦𑁆𑀢𑁂𑀦 𑀯𑀺𑀬 𑀅𑀲𑀼𑀡𑀦𑁆𑀢𑁂𑀦 𑀯𑀺𑀬 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀲𑀢𑁆𑀣𑀸𑀭𑀸 𑀦𑀸𑀫 𑀅𑀧𑁆𑀧𑀫𑀢𑁆𑀢𑀓𑁂𑀲𑀼 𑀤𑁄𑀲𑁂𑀲𑀼 𑀅𑀧𑀲𑁆𑀲𑀦𑁆𑀢𑁂𑀦 𑀯𑀺𑀬 𑀘 𑀅𑀲𑀼𑀡𑀦𑁆𑀢𑁂𑀦 𑀯𑀺𑀬 𑀘 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁂𑀦 𑀯𑀺𑀯𑀭𑀡𑀁. 𑀢𑁂𑀲𑀼 𑀘𑀸𑀢𑀺 𑀲𑀺𑀓𑁆𑀔𑀸𑀓𑀸𑀫𑁂𑀲𑀼 𑀘. 𑀅𑀧𑁆𑀧𑀘𑁆𑀘𑀬𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀲𑀦𑁆𑀢𑀺 𑀬𑁂 ‘‘𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀯𑀼𑀢𑁆𑀢𑀸 𑀧𑀼𑀕𑁆𑀕𑀮𑀸, 𑀢𑁂𑀲𑀁. 𑀕𑀮𑁂 𑀩𑀤𑁆𑀥𑀁 𑀫𑀳𑀸𑀓𑀝𑁆𑀞𑀦𑁆𑀢𑀺 𑀕𑀮𑁂 𑀑𑀮𑀫𑁆𑀩𑁂𑀢𑁆𑀯𑀸 𑀩𑀤𑁆𑀥𑀁 𑀭𑀼𑀓𑁆𑀔𑀤𑀡𑁆𑀟𑀫𑀸𑀳. 𑀧𑀽𑀢𑀺𑀮𑀢𑀸𑀬𑀸𑀢𑀺 𑀕𑀮𑁄𑀘𑀺𑀬𑀸. 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀯𑀺𑀬 𑀤𑀼𑀧𑁆𑀧𑀚𑀳𑀁 𑀳𑁄𑀢𑀻𑀢𑀺 𑀙𑀦𑁆𑀤𑀓𑀧𑁆𑀧𑀳𑀸𑀦𑀯𑀲𑁂𑀦 𑀢𑀁 𑀧𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑁧𑁫𑁧. 𑀅𑀦𑀼𑀲𑁆𑀲𑀼𑀓𑁆𑀓𑀸𑀢𑀺 𑀢𑀲𑁆𑀲 𑀧𑀳𑀸𑀢𑀩𑁆𑀩𑀲𑁆𑀲 𑀧𑀳𑀸𑀦𑁂 𑀉𑀲𑁆𑀲𑀼𑀓𑁆𑀓𑀭𑀳𑀺𑀢𑀸. 𑀅𑀧𑀘𑁆𑀘𑀸𑀲𑀻𑀲𑀦𑀧𑀓𑁆𑀔𑁂𑀢𑀺 𑀢𑀸𑀬 𑀧𑀭𑀤𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀓𑀲𑁆𑀲𑀘𑀺 𑀧𑀘𑁆𑀘𑀬𑀲𑁆𑀲 𑀓𑀼𑀢𑁄𑀘𑀺 𑀅𑀧𑀘𑁆𑀘𑀸𑀲𑀻𑀲𑀓𑀧𑀓𑁆𑀔𑁂 𑀞𑀺𑀢𑀸 𑀳𑀼𑀢𑁆𑀯𑀸 𑀲𑀼𑀧𑁆𑀧𑀚𑀳𑀁 𑀳𑁄𑀢𑀺, 𑀦 𑀢𑀲𑁆𑀲 𑀧𑀳𑀸𑀦𑁂 𑀪𑀸𑀭𑀺𑀬𑀁 𑀅𑀢𑁆𑀣𑀺.

𑁧𑁫𑁨. 𑀤𑀮𑀺𑀤𑁆𑀤𑁄 𑀤𑀼𑀕𑁆𑀕𑀢𑁄. 𑀅𑀲𑁆𑀲𑀓𑁄𑀢𑀺 𑀅𑀲𑀸𑀧𑀢𑁂𑀬𑁆𑀬𑁄. 𑀕𑁂𑀳𑀬𑀝𑁆𑀞𑀺𑀬𑁄𑀢𑀺 𑀕𑁂𑀳𑀙𑀤𑀦𑀲𑁆𑀲 𑀆𑀥𑀸𑀭𑀸, 𑀢𑀸 𑀉𑀚𑀼𑀓𑀁 𑀢𑀺𑀭𑀺𑀬𑀁 𑀞𑀧𑁂𑀢𑀩𑁆𑀩𑀤𑀡𑁆𑀟𑀸. 𑀲𑀫𑀦𑁆𑀢𑀢𑁄 𑀪𑀺𑀢𑁆𑀢𑀺𑀧𑀸𑀤𑁂𑀲𑀼 𑀞𑀧𑁂𑀢𑀩𑁆𑀩𑀤𑀡𑁆𑀟𑀸 𑀫𑀡𑁆𑀟𑀮𑀸. 𑀓𑀸𑀓𑀸𑀢𑀺𑀤𑀸𑀬𑀺𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀓𑀸𑀓𑁂𑀳𑀺 𑀅𑀢𑀺𑀧𑀸𑀢𑀯𑀲𑁂𑀦 𑀉𑀟𑁆𑀟𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀬𑀢𑁆𑀣 𑀓𑀺𑀜𑁆𑀘𑀺𑀤𑁂𑀯𑀸’’𑀢𑀺𑀆𑀤𑀺. 𑀲𑀽𑀭𑀓𑀸𑀓𑀸𑀢𑀺 𑀓𑀸𑀓𑀸𑀦𑀁 𑀉𑀟𑁆𑀟𑁂𑀧𑀦𑀸𑀓𑀸𑀭𑀫𑀸𑀳. 𑀦𑀧𑀭𑀫𑀭𑀽𑀧𑀦𑁆𑀢𑀺 𑀳𑀻𑀦𑀭𑀽𑀧𑀁. 𑀯𑀺𑀮𑀻𑀯𑀫𑀜𑁆𑀘𑀓𑁄𑀢𑀺 𑀢𑀸𑀮𑀯𑁂𑀢𑁆𑀢𑀓𑀸𑀤𑀻𑀳𑀺 𑀯𑀻𑀢𑀫𑀜𑁆𑀘𑀓𑁄. 𑀲𑀸 𑀧𑀦𑀲𑁆𑀲 𑀲𑀦𑁆𑀢𑀸𑀦𑀸𑀦𑀁 𑀙𑀺𑀦𑁆𑀦𑀪𑀺𑀦𑁆𑀦𑀢𑀸𑀬 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀢𑀸, 𑀢𑀣𑀸 𑀲𑀢𑀺 𑀲𑀸 𑀯𑀺𑀲𑀫𑀭𑀽𑀧𑀸 𑀳𑁄𑀢𑀻𑀢𑀺 𑀆𑀳 ‘‘𑀑𑀡𑀢𑀸’’𑀢𑀺𑀆𑀤𑀺. 𑀲𑁄 𑀧𑀼𑀕𑁆𑀕𑀮𑁄 𑀮𑀽𑀔𑀪𑁄𑀚𑀻 𑀳𑁄𑀢𑀻𑀢𑀺 𑀆𑀳 ‘‘𑀥𑀜𑁆𑀜𑀁 𑀦𑀸𑀫 𑀓𑀼𑀤𑁆𑀭𑀽𑀲𑀓𑁄’’𑀢𑀺. 𑀲𑀫𑀓𑀸𑀮𑀁 𑀯𑀧𑀺𑀢𑀩𑁆𑀩𑀢𑀸𑀬 𑀲𑀫𑀯𑀸𑀧𑀓𑀁, 𑀬𑀣𑀸𑀉𑀢𑀼 𑀯𑀧𑀺𑀢𑀩𑁆𑀩𑀩𑀻𑀚𑀁. 𑀚𑀸𑀬𑀺𑀓𑀸𑀢𑀺 𑀓𑀼𑀘𑁆𑀙𑀺𑀢𑀸 𑀪𑀭𑀺𑀬𑀸, 𑀲𑀩𑁆𑀩𑀢𑁆𑀣 𑀕𑀭𑀳𑀸𑀬𑀁 𑀓-𑀲𑀤𑁆𑀤𑁄. 𑀲𑁄 𑀯𑀢𑀸𑀳𑀁 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀲𑁄𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀧𑀩𑁆𑀩𑀚𑁂𑀬𑁆𑀬𑀁, 𑀬𑁄𑀳𑀁 𑀧𑀼𑀭𑀺𑀲𑁄 𑀦𑀸𑀫 𑀅𑀲𑁆𑀲𑀁 𑀯𑀢𑀸𑀢𑀺 𑀧𑀩𑁆𑀩𑀚𑁆𑀚𑀸𑀯𑀲𑁂𑀦 𑀅𑀢𑁆𑀢𑀦𑁄 𑀧𑀼𑀭𑀺𑀲𑀁 𑀩𑁄𑀥𑁂𑀬𑁆𑀬. 𑀢𑀁𑀲𑀪𑀸𑀯𑁂 𑀞𑀺𑀢𑀲𑁆𑀲 𑀩𑁄𑀥𑀸 𑀦 𑀢𑀼 𑀤𑀼𑀓𑁆𑀓𑀭𑀸, 𑀲𑀸 𑀔𑀝𑁄𑀧𑀺𑀓𑀸. 𑀲𑀸 𑀓𑀼𑀫𑁆𑀪𑀻. 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀦𑁄 𑀅𑀟𑁆𑀠𑀢𑁂𑀴𑀲𑀸𑀦𑀺 𑀓𑁄𑀝𑁆𑀞𑀸𑀕𑀸𑀭𑀲𑀢𑀸𑀦𑀺 𑀯𑀺𑀬.

𑁧𑁫𑁩. 𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑀢𑀸𑀦𑀦𑁆𑀢𑀺 𑀅𑀦𑁂𑀓𑁂𑀲𑀁 𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑀢𑀸𑀦𑀁. 𑀘𑀬𑁄𑀢𑀺 𑀲𑀦𑁆𑀢𑀸𑀦𑁂𑀳𑀺 𑀦𑀺𑀘𑀬𑁄 𑀅𑀯𑀻𑀘𑀺 𑀦𑀺𑀘𑁆𑀘𑀧𑁆𑀧𑀩𑀦𑁆𑀥𑀦𑀺𑀘𑀬𑁄. 𑀢𑁂𑀦𑀸𑀳 ‘‘𑀲𑀦𑁆𑀢𑀸𑀦𑀢𑁄 𑀓𑀢𑀲𑀦𑁆𑀦𑀺𑀘𑀬𑁄’’𑀢𑀺.

𑁧𑁫𑁪. 𑀳𑁂𑀝𑁆𑀞𑀸 𑀓𑀺𑀜𑁆𑀘𑀸𑀧𑀺 𑀅𑀧𑁆𑀧𑀚𑀳𑀦𑀓𑀸 𑀧𑀞𑀫𑀁 𑀤𑀲𑁆𑀲𑀺𑀢𑀸, 𑀧𑀚𑀳𑀦𑀓𑀸 𑀧𑀥𑀸𑀦𑀸, 𑀢𑁂𑀲𑀜𑁆𑀘 𑀯𑀲𑁂𑀦𑁂𑀢𑁆𑀣 𑀧𑀼𑀕𑁆𑀕𑀮𑀘𑀢𑀼𑀓𑁆𑀓𑀁 𑀤𑀲𑁆𑀲𑀺𑀢𑀁. 𑀢𑁂 𑀢𑀜𑁆𑀘𑁂𑀯 𑀧𑀚𑀳𑀦𑁆𑀢𑀻𑀢𑀺 𑀧𑀚𑀳𑀦𑀓𑀸 𑀧𑀞𑀫𑀁 𑀕𑀳𑀺𑀢𑀸. 𑀭𑀸𑀲𑀺𑀯𑀲𑁂𑀦𑀸𑀢𑀺 ‘‘𑀇𑀥𑀼𑀤𑀸𑀬𑀺 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀦𑀸 𑀘𑀢𑀼𑀓𑁆𑀓𑁂 𑀆𑀕𑀢𑀯𑀺𑀪𑀸𑀕𑀁 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀢𑁂 𑀢𑁂’’𑀢𑀺 𑀧𑀘𑀼𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀦 𑀧𑀸𑀝𑀺𑀬𑁂𑀓𑁆𑀓𑀁 𑀯𑀺𑀪𑀢𑁆𑀢𑀸’’𑀢𑀺. 𑀅𑀯𑀺𑀪𑀸𑀕𑁂𑀦 𑀕𑀳𑀺𑀢𑀯𑀢𑁆𑀣𑀽𑀲𑀼 𑀯𑀺𑀪𑀸𑀕𑀢𑁄 𑀕𑀳𑀡𑀁 𑀮𑁄𑀓𑀲𑀺𑀤𑁆𑀥𑀫𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀚𑀳𑀦𑀓𑀧𑀼𑀕𑁆𑀕𑀮𑀸𑀢𑀺 ‘‘𑀢𑁂 𑀢𑀜𑁆𑀘𑁂𑀯 𑀧𑀚𑀳𑀦𑁆𑀢𑀻’’𑀢𑀺 𑀏𑀯𑀁 𑀧𑀚𑀳𑀦𑀓𑀧𑀼𑀕𑁆𑀕𑀮𑀸 𑀏𑀯.

𑀉𑀧𑀥𑀺𑀅𑀦𑀼𑀥𑀸𑀯𑀦𑀓𑀸𑀢𑀺 𑀉𑀧𑀥𑀻𑀲𑀼 𑀅𑀦𑀼𑀅𑀦𑀼𑀥𑀸𑀯𑀦𑀓𑀸 𑀉𑀧𑀥𑀺𑀬𑁄 𑀆𑀭𑀩𑁆𑀪 𑀧𑀯𑀢𑁆𑀢𑀦𑀓𑀸. 𑀯𑀺𑀢𑀓𑁆𑀓𑀸𑀬𑁂𑀯𑀸𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀯𑀺𑀢𑀓𑁆𑀓𑀸𑀬𑁂𑀯. 𑀇𑀦𑁆𑀤𑁆𑀭𑀺𑀬𑀦𑀸𑀦𑀢𑁆𑀢𑀢𑀸𑀢𑀺 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑁄𑀧𑀭𑀺𑀬𑀢𑁆𑀢𑀁. 𑀢𑀲𑁆𑀲 𑀳𑀺 𑀯𑀲𑁂𑀦𑁂𑀯 𑀢𑁂 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀚𑀸𑀢𑀸. 𑀅𑀕𑁆𑀕𑀫𑀕𑁆𑀕𑀢𑁆𑀣𑀸𑀬 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀬𑀸𑀯 𑀦 𑀢𑀁 𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑁂𑀦𑁆𑀢𑀺, 𑀢𑀸𑀯 𑀦𑀧𑁆𑀧𑀚𑀳𑀦𑁆𑀢𑀺 𑀦𑀸𑀫. 𑀇𑀢𑀺 𑀳𑁂𑀝𑁆𑀞𑀺𑀫𑀸 𑀢𑀬𑁄𑀧𑀺 𑀅𑀭𑀺𑀬𑀸 𑀅𑀧𑁆𑀧𑀳𑀻𑀦𑀲𑁆𑀲 𑀓𑀺𑀮𑁂𑀲𑀲𑁆𑀲 𑀯𑀲𑁂𑀦 ‘‘𑀦𑀧𑁆𑀧𑀚𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸, 𑀧𑀕𑁂𑀯 𑀧𑀼𑀣𑀼𑀚𑁆𑀚𑀦𑀸. 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀯𑀺𑀧𑀲𑁆𑀲𑀦𑀁 𑀫𑀕𑁆𑀕𑁂𑀦 𑀖𑀝𑁂𑀦𑁆𑀢𑀸 𑀢𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀅𑀕𑁆𑀕𑀫𑀕𑁆𑀕𑀓𑁆𑀔𑀡𑁂 𑀧𑀚𑀳𑀦𑁆𑀢𑀺 𑀦𑀸𑀫. 𑀢𑁂 𑀏𑀯 𑀢𑀢𑁆𑀣 𑀲𑀻𑀖𑀓𑀸𑀭𑀺𑀦𑁄 𑀔𑀺𑀧𑁆𑀧𑀁 𑀧𑀚𑀳𑀦𑁆𑀢𑀺 𑀦𑀸𑀫, 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺.

𑀲𑀁𑀯𑁂𑀕𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀅𑀓𑁆𑀓𑀦𑁆𑀢𑀧𑀼𑀭𑀺𑀲𑁄 𑀯𑀺𑀬. 𑀫𑀕𑁆𑀕𑁂𑀦𑀸𑀢𑀺 𑀅𑀦𑀼𑀓𑁆𑀓𑀫𑀸𑀕𑀢𑁂𑀦 𑀅𑀕𑁆𑀕𑀫𑀕𑁆𑀕𑁂𑀦. 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑁂𑀢𑀺 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁩𑁦𑁦 𑀆𑀤𑀬𑁄). 𑀢𑀢𑁆𑀣 𑀳𑀺 ‘‘𑀢𑀲𑁆𑀲 𑀥𑀸𑀢𑀸𑀭𑀫𑁆𑀫𑀡𑀫𑁂𑀯 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺 𑀧𑀲𑀻𑀤𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 𑀅𑀥𑀺𑀫𑀼𑀘𑁆𑀘𑀢𑀻’’𑀢𑀺 (𑀫. 𑀦𑀺. 𑁧.𑁩𑁦𑁨) 𑀏𑀢𑁆𑀣 𑀅𑀢𑀺𑀢𑀺𑀓𑁆𑀔𑀦𑀸𑀢𑀺𑀢𑀺𑀓𑁆𑀔-𑀦𑀸𑀢𑀺𑀫𑀦𑁆𑀤𑀅𑀢𑀺𑀫𑀦𑁆𑀤-𑀧𑀼𑀕𑁆𑀕𑀮𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁨.𑁩𑁦𑁨) 𑀢𑀬𑁄 𑀯𑀸𑀭𑀸 𑀉𑀤𑁆𑀥𑀝𑀸, 𑀢𑀢𑁆𑀣 𑀫𑀚𑁆𑀛𑀺𑀫𑀯𑀲𑁂𑀦𑁂𑀯 𑀧𑀜𑁆𑀳𑁄 𑀓𑀣𑀺𑀢𑁄. 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑁂𑀢𑀺 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀲𑀼𑀢𑁆𑀢𑁂, 𑀢𑀢𑁆𑀣𑀸𑀧𑀺 𑀫𑀚𑁆𑀛𑀺𑀫𑀦𑀬𑁂𑀦𑁂𑀯 𑀧𑀜𑁆𑀳𑁄 𑀓𑀣𑀺𑀢𑁄. 𑀢𑁂𑀦𑀸𑀳 ‘‘𑀇𑀫𑁂𑀲𑀽’’𑀢𑀺𑀆𑀤𑀺.

𑀢𑀦𑁆𑀢𑀺 ‘‘𑀉𑀧𑀥𑀻’’𑀢𑀺 𑀯𑀼𑀢𑁆𑀢𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀤𑀼𑀓𑁆𑀔𑀲𑁆𑀲 𑀫𑀽𑀮𑀦𑁆𑀢𑀺 𑀲𑀩𑁆𑀩𑀲𑁆𑀲𑀧𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀓𑀸𑀭𑀡𑀁. 𑀦𑀺𑀕𑁆𑀕𑀳𑀡𑁄𑀢𑀺 𑀦𑀺𑀭𑀼𑀧𑀸𑀤𑀸𑀦𑁄. 𑀢𑁂𑀦𑀸𑀳 ‘‘𑀦𑀺𑀢𑁆𑀢𑀡𑁆𑀳𑁄’’𑀢𑀺.

𑁧𑁫𑁫. 𑀬𑁂 𑀧𑀚𑀳𑀦𑁆𑀢𑀻𑀢𑀺 ‘‘𑀢𑁂 𑀢𑀜𑁆𑀘𑁂𑀯 𑀧𑀚𑀳𑀦𑁆𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀧𑀼𑀕𑁆𑀕𑀮𑀸. 𑀢𑁂 𑀇𑀫𑁂 𑀦𑀸𑀫 𑀏𑀢𑁆𑀢𑀓𑁂 𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑀻𑀢𑀺 𑀬𑁂 𑀢𑁂 𑀧𑀼𑀣𑀼𑀚𑁆𑀚𑀦𑀸 𑀮𑀸𑀪𑀺𑀦𑁄 𑀘 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀏𑀢𑁆𑀢𑀓𑁂 𑀢𑀁𑀢𑀁𑀛𑀸𑀦𑀸𑀤𑀺𑀯𑀢𑁆𑀣𑀼𑀓𑁂 𑀘 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀢𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀏𑀢𑁆𑀢𑀓𑁂 𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑀺. 𑀬𑁂 𑀦𑀧𑁆𑀧𑀚𑀳𑀦𑁆𑀢𑀻𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀼𑀘𑀺𑀲𑀼𑀔𑀁 𑀓𑀸𑀬𑀸𑀲𑀼𑀘𑀺𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸. 𑀅𑀦𑀭𑀺𑀬𑁂𑀳𑀻𑀢𑀺 𑀅𑀧𑀭𑀺𑀲𑀼𑀤𑁆𑀥𑁂𑀳𑀺. 𑀧𑀝𑀺𑀮𑀸𑀪𑀢𑁄 𑀪𑀸𑀬𑀺𑀢𑀩𑁆𑀩𑀁 𑀓𑀺𑀮𑁂𑀲𑀤𑀼𑀓𑁆𑀔𑀕𑀢𑀺𑀓𑀢𑁆𑀢𑀸. 𑀯𑀺𑀧𑀸𑀓𑀢𑁄 𑀪𑀸𑀬𑀺𑀢𑀩𑁆𑀩𑀁 𑀅𑀧𑀸𑀬𑀤𑀼𑀓𑁆𑀔𑀕𑀢𑀺𑀓𑀢𑁆𑀢𑀸. 𑀕𑀡𑀢𑁄𑀧𑀺 𑀓𑀺𑀮𑁂𑀲𑀢𑁄𑀧𑀺 𑀯𑀺𑀯𑀺𑀢𑁆𑀢𑀲𑀼𑀔𑀦𑁆𑀢𑀺 𑀕𑀡𑀲𑀗𑁆𑀕𑀡𑀺𑀓𑀢𑁄 𑀘 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀢𑁄 𑀘 𑀯𑀺𑀯𑀺𑀢𑁆𑀢𑀲𑀼𑀔𑀁. 𑀭𑀸𑀕𑀸𑀤𑀺𑀯𑀽𑀧𑀲𑀫𑀢𑁆𑀣𑀸𑀬𑀸𑀢𑀺 𑀭𑀸𑀕𑀸𑀤𑀺𑀯𑀽𑀧𑀲𑀫𑀸𑀯𑀳𑀁 𑀲𑀼𑀔𑀁. 𑀦 𑀪𑀸𑀬𑀺𑀢𑀩𑁆𑀩𑀁 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀏𑀓𑀦𑁆𑀢𑀳𑀺𑀢𑀪𑀸𑀯𑀢𑁄.

𑁧𑁫𑁬. 𑀇𑀜𑁆𑀚𑀺𑀢𑀲𑁆𑀫𑀺𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀆𑀳 ‘‘𑀇𑀜𑁆𑀚𑀦’’𑀦𑁆𑀢𑀺𑀆𑀤𑀺. 𑀇𑀜𑁆𑀚𑀢𑀺 𑀢𑁂𑀦𑀸𑀢𑀺 𑀇𑀜𑁆𑀚𑀺𑀢𑀁, 𑀢𑀲𑁆𑀲 𑀢𑀲𑁆𑀲 𑀛𑀸𑀦𑀲𑁆𑀲 𑀔𑁄𑀪𑀓𑀭𑀁 𑀑𑀴𑀸𑀭𑀺𑀓𑀁 𑀛𑀸𑀦𑀗𑁆𑀕𑀁. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀅𑀦𑀺𑀜𑁆𑀚𑀦𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂’’𑀢𑀺 (𑀤𑀻. 𑀦𑀺. 𑁧.𑁨𑁪𑁪-𑁨𑁪𑁫; 𑀫. 𑀦𑀺. 𑁧.𑁩𑁮𑁪-𑁩𑁮𑁬; 𑀧𑀸𑀭𑀸. 𑁧𑁨-𑁧𑁩).

𑀅𑀮𑀁-𑀲𑀤𑁆𑀤𑁄 𑀬𑀼𑀢𑁆𑀢𑀢𑁆𑀣𑁄𑀧𑀺 𑀳𑁄𑀢𑀺 𑁋 ‘‘𑀅𑀮𑀫𑁂𑀯 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁭𑁨; 𑀲𑀁. 𑀦𑀺. 𑁨.𑁧𑁨𑁪, 𑁧𑁨𑁮, 𑁧𑁩𑁪, 𑁧𑁪𑁩), 𑀢𑀲𑁆𑀫𑀸 𑀅𑀦𑀮𑀁 𑀅𑀦𑀼𑀲𑀗𑁆𑀕𑀁 𑀓𑀸𑀢𑀼𑀁 𑀅𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀓𑀢𑁆𑀢𑀩𑁆𑀩𑀆𑀮𑀬𑀦𑁆𑀢𑀺 𑀯𑀤𑀸𑀫𑀻’’𑀢𑀺. 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀅𑀮𑀁 𑀏𑀢𑁆𑀢𑀸𑀯𑀢𑀸𑀢𑀺 𑀉𑀲𑁆𑀲𑀸𑀳𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀁 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀜𑁆𑀜𑀺𑀢𑀁 𑀅𑀡𑀼𑀁 𑀯𑀸 𑀑𑀭𑀫𑁆𑀪𑀸𑀕𑀺𑀬𑀲𑀜𑁆𑀜𑀺𑀢𑀁 𑀣𑀽𑀮𑀁 𑀯𑀸, 𑀭𑀽𑀧𑀭𑀸𑀕𑁄𑀢𑀺 𑀏𑀯𑀭𑀽𑀧𑀁 𑀅𑀡𑀼𑀁 𑀯𑀸 𑀓𑀸𑀫𑀸𑀲𑀯𑁄 𑀧𑀝𑀺𑀖𑀦𑁆𑀢𑀺 𑀏𑀯𑀭𑀽𑀧𑀁 𑀣𑀽𑀮𑀁 𑀯𑀸, 𑀫𑀼𑀤𑀼𑀦𑀸 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁂𑀦 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀓𑀫𑁆𑀫𑀩𑀦𑁆𑀥𑀦𑀝𑁆𑀞𑁂𑀦 𑀯𑀸 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀫𑀳𑀸𑀲𑀸𑀯𑀚𑁆𑀚𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀸𑀢𑀺𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀯𑀲𑁂𑀦 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸 ‘‘𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀲𑁄 𑀳𑀺 𑀧𑀭𑀺𑀬𑀸𑀤𑀺𑀦𑁆𑀦𑀦𑀺𑀓𑀦𑁆𑀢𑀺𑀓𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑁆𑀲 𑀆𑀕𑀢𑀢𑁆𑀢𑀸 ‘‘𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀦𑀺𑀝𑁆𑀞𑀸𑀧𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀮𑀝𑀼𑀓𑀺𑀓𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁭. 𑀘𑀸𑀢𑀼𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁭. 𑀬𑀣𑀸𑀉𑀧𑀦𑀺𑀲𑁆𑀲𑀬𑁂𑀦𑀸𑀢𑀺 𑀬𑁄 𑀬𑁄 𑀉𑀧𑀦𑀺𑀲𑁆𑀲𑀬𑁄 𑀬𑀣𑀸𑀉𑀧𑀦𑀺𑀲𑁆𑀲𑀬𑁄, 𑀢𑁂𑀦 𑀬𑀣𑀸𑀉𑀧𑀦𑀺𑀲𑁆𑀲𑀬𑁂𑀦 𑀲𑀫𑁆𑀫𑀸𑀧𑀬𑁄𑀕𑁂𑀦. 𑀧𑀢𑀺𑀝𑁆𑀞𑀳𑀺𑀲𑁆𑀲𑀦𑁆𑀢𑀺 𑀲𑀸𑀲𑀦𑁂 𑀧𑀢𑀺𑀝𑁆𑀞𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺. 𑀯𑀲𑀦𑀝𑁆𑀞𑀸𑀦𑀸𑀦𑀻𑀢𑀺 𑀯𑀲𑁆𑀲𑀕𑁆𑀕𑀸𑀤𑀺𑀯𑀲𑁂𑀦 𑀯𑀲𑀦𑀝𑁆𑀞𑀸𑀦𑀸𑀦𑀺. 𑀲𑀡𑁆𑀞𑀸𑀧𑀬𑀫𑀸𑀦𑀸𑀢𑀺 𑀲𑀼𑀯𑀺𑀪𑀢𑁆𑀢𑀪𑀸𑀯𑁂𑀦 𑀞𑀧𑁂𑀦𑁆𑀢𑀸.

𑀅𑀯𑀺𑀦𑀺𑀩𑁆𑀪𑁄𑀕𑀲𑀤𑁆𑀤𑀦𑁆𑀢𑀺 𑀯𑀺𑀦𑀺𑀪𑀼𑀜𑁆𑀚𑀺𑀢𑁆𑀯𑀸 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑀤𑁆𑀤𑀁. 𑀯𑀘𑀻𑀖𑁄𑀲𑁄𑀧𑀺 𑀳𑀺 𑀩𑀳𑀽𑀳𑀺 𑀏𑀓𑀘𑁆𑀘𑀁 𑀧𑀯𑀢𑁆𑀢𑀺𑀢𑁄 𑀞𑀸𑀦𑀢𑁄 𑀘 𑀤𑀽𑀭𑀢𑀭𑁄 𑀓𑁂𑀯𑀮𑀁 𑀫𑀳𑀸𑀦𑀺𑀕𑁆𑀖𑁄𑀲𑁄 𑀏𑀯 𑀳𑀼𑀢𑁆𑀯𑀸 𑀲𑁄𑀢𑀧𑀣𑀫𑀸𑀕𑀘𑁆𑀙𑀢𑀺. 𑀫𑀘𑁆𑀙𑀯𑀺𑀮𑁄𑀧𑁂𑀢𑀺 𑀫𑀘𑁆𑀙𑁂 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀯𑀺𑀬 𑀕𑀳𑀡𑁂, 𑀫𑀘𑁆𑀙𑀸𑀦𑀁 𑀯𑀸 𑀦𑀬𑀦𑁂.

𑁧𑁫𑁮. 𑀯𑀯𑀲𑁆𑀲𑀕𑁆𑀕𑀢𑁆𑀣𑁂𑀢𑀺 𑀦𑀺𑀘𑁆𑀙𑀬𑀢𑁆𑀣𑁂, 𑀇𑀤𑀁 𑀢𑀸𑀯 𑀅𑀫𑁆𑀳𑁂𑀳𑀺 𑀯𑀼𑀘𑁆𑀘𑀫𑀸𑀦𑀯𑀘𑀦𑀁 𑀏𑀓𑀦𑁆𑀢𑀲𑁄𑀢𑀩𑁆𑀩𑀁, 𑀧𑀘𑁆𑀙𑀸 𑀢𑀼𑀫𑁆𑀳𑁂𑀳𑀺 𑀓𑀸𑀢𑀩𑁆𑀩𑀁 𑀓𑀭𑁄𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀘𑀦𑀧𑀭𑀺𑀳𑀸𑀭𑁄𑀢𑀺 𑀢𑁂𑀳𑀺 𑀲𑀓𑁆𑀬𑀭𑀸𑀚𑀽𑀳𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀧𑀭𑀺𑀳𑀸𑀭𑁄. 𑀮𑁂𑀲𑀓𑀧𑁆𑀧𑀦𑁆𑀢𑀺 𑀓𑀧𑁆𑀧𑀺𑀬𑀮𑁂𑀲𑀁. 𑀥𑀼𑀭𑀯𑀳𑀸𑀢𑀺 𑀥𑀼𑀭𑀯𑀸𑀳𑀺𑀦𑁄, 𑀥𑁄𑀭𑀬𑁆𑀳𑀸𑀢𑀺 𑀅𑀢𑁆𑀣𑁄. 𑀧𑀸𑀤𑀫𑀽𑀮𑀦𑁆𑀢𑀺 𑀉𑀧𑀘𑀸𑀭𑀁 𑀯𑀤𑀢𑀺. 𑀯𑀺𑀕𑀘𑁆𑀙𑀺𑀲𑁆𑀲𑀢𑀻𑀢𑀺 𑀳𑀸𑀬𑀺𑀲𑁆𑀲𑀢𑀺. 𑀧𑀝𑀺𑀧𑁆𑀨𑀭𑀺𑀢𑁄𑀢𑀺 𑀦 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸𑀯, 𑀲𑀓𑁆𑀬𑀭𑀸𑀚𑀽𑀦𑀁 𑀧𑀼𑀭𑀢𑁄𑀧𑀺 𑀯𑀺𑀧𑁆𑀨𑀭𑀺𑀢𑁄𑀯 𑀳𑁄𑀢𑀺.

𑁧𑁫𑁯. 𑀅𑀪𑀺𑀦𑀦𑁆𑀤𑀢𑀽𑀢𑀺 𑀅𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀧𑀫𑁄𑀤𑀢𑀼. 𑀅𑀪𑀺𑀯𑀤𑀢𑀽𑀢𑀺 𑀅𑀪𑀺𑀭𑀽𑀧𑀯𑀲𑁂𑀦 𑀯𑀤𑀢𑀼. 𑀧𑀲𑀸𑀤𑀜𑁆𑀜𑀣𑀢𑁆𑀢𑀦𑁆𑀢𑀺 𑀅𑀧𑁆𑀧𑀲𑀸𑀤𑀲𑁆𑀲 𑀯𑀺𑀧𑀭𑀺𑀡𑀸𑀫𑁄 𑀳𑀻𑀦𑀸𑀬𑀸𑀯𑀢𑁆𑀢𑀦𑀲𑀗𑁆𑀔𑀸𑀢𑀁 𑀧𑀭𑀺𑀯𑀢𑁆𑀢𑀦𑀁, 𑀢𑁂𑀦𑀸𑀳 ‘‘𑀯𑀺𑀩𑁆𑀪𑀫𑀦𑁆𑀢𑀸𑀦𑀁. 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀢𑁆𑀢’’𑀦𑁆𑀢𑀺. 𑀓𑀸𑀭𑀡𑀽𑀧𑀘𑀸𑀭𑁂𑀦 𑀲𑀲𑁆𑀲𑁂𑀲𑀼 𑀩𑀻𑀚𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀩𑀻𑀚𑀸𑀦𑀁 𑀢𑀭𑀼𑀡𑀸𑀦𑀦𑁆𑀢𑀺 𑀢𑀭𑀼𑀡𑀲𑀲𑁆𑀲𑀸𑀦’’𑀦𑁆𑀢𑀺. 𑀢𑀭𑀼𑀡𑀪𑀸𑀯𑁂𑀦𑁂𑀯 𑀢𑀲𑁆𑀲 𑀪𑀸𑀯𑀺𑀦𑁄 𑀨𑀮𑀲𑁆𑀲 𑀅𑀪𑀸𑀯𑁂𑀦 𑀯𑀺𑀧𑀭𑀺𑀡𑀸𑀫𑁄.

𑁧𑁬𑁦. 𑀓𑀢𑁆𑀢𑀩𑁆𑀩𑀲𑁆𑀲 𑀲𑀭𑀲𑁂𑀦𑁂𑀯 𑀓𑀭𑀡𑀁 𑀘𑀺𑀢𑁆𑀢𑀭𑀼𑀘𑀺𑀬𑀁, 𑀦 𑀢𑀣𑀸 𑀧𑀭𑀲𑁆𑀲 𑀉𑀲𑁆𑀲𑀸𑀤𑀦𑁂𑀦𑀸𑀢𑀺 𑀆𑀳 𑁋 ‘‘𑀧𑀓𑁆𑀓𑁄𑀲𑀺𑀬𑀫𑀸𑀦𑀸𑀦𑀁 𑀕𑀫𑀦𑀁 𑀦𑀸𑀫 𑀦 𑀨𑀸𑀲𑀼𑀓’’𑀦𑁆𑀢𑀺. 𑀫𑀬𑀫𑁆𑀧𑀺 𑀪𑀕𑀯𑀸 𑀯𑀺𑀬 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁂𑀦𑁂𑀯 𑀯𑀺𑀳𑀭𑀺𑀲𑁆𑀲𑀸𑀫𑀸𑀢𑀺 𑀤𑀻𑀧𑁂𑀢𑀺 𑀧𑀓𑀢𑀺𑀬𑀸 𑀯𑀺𑀯𑁂𑀓𑀚𑁆𑀛𑀸𑀲𑀬𑀪𑀸𑀯𑀢𑁄 𑀯𑀺𑀭𑀤𑁆𑀥𑁄 𑀆𑀕𑀢𑀲𑁆𑀲 𑀪𑀸𑀭𑀲𑁆𑀲 𑀅𑀯𑀳𑀦𑀢𑁄𑀬𑁂𑀯. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀪𑀸𑀭𑀪𑀸𑀯𑀁 𑀦 𑀅𑀜𑁆𑀜𑀸𑀲𑀻’’𑀢𑀺.

𑁧𑁬𑁧. 𑀓𑀲𑁆𑀫𑀸 𑀆𑀭𑀪𑀻𑀢𑀺? 𑀲𑀧𑁆𑀧𑀸𑀬𑀢𑁄. 𑀧𑀜𑁆𑀘𑀲𑀢𑀸 𑀳𑀺 𑀪𑀺𑀓𑁆𑀔𑀽 𑀅𑀪𑀺𑀦𑀯𑀸, 𑀢𑀲𑁆𑀫𑀸 𑀢𑁂𑀲𑀁 𑀑𑀯𑀸𑀤𑀤𑀸𑀦𑀢𑁆𑀣𑀁 𑀪𑀕𑀯𑀸 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀻𑀢𑀺.

𑁧𑁬𑁨. 𑀓𑁄𑀥𑀼𑀧𑀸𑀬𑀸𑀲𑀲𑁆𑀲𑀸𑀢𑀺 𑀏𑀢𑁆𑀣 𑀓𑀼𑀚𑁆𑀛𑀦𑀝𑁆𑀞𑁂𑀦 𑀓𑁄𑀥𑁄, 𑀲𑁆𑀯𑁂𑀯 𑀘𑀺𑀢𑁆𑀢𑀲𑁆𑀲 𑀓𑀸𑀬𑀲𑁆𑀲 𑀘 𑀅𑀢𑀺𑀧𑁆𑀧𑀫𑀤𑁆𑀤𑀦𑀫𑀣𑀦𑀼𑀧𑁆𑀧𑀸𑀤𑀦𑁂𑀳𑀺 𑀤𑀴𑁆𑀳𑀁 𑀆𑀬𑀸𑀲𑀝𑁆𑀞𑁂𑀦 𑀉𑀧𑀸𑀬𑀸𑀲𑁄. 𑀅𑀦𑁂𑀓𑀯𑀸𑀭𑀁 𑀧𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑀸 𑀲𑀫𑀯𑁂𑀢𑀁 𑀲𑀢𑁆𑀢𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀤𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀧𑀸𑀧𑀦𑁂𑀦 𑀓𑁄𑀥𑀼𑀧𑀸𑀬𑀸𑀲𑀲𑁆𑀲 𑀊𑀫𑀺𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 ‘‘𑀓𑁄𑀥𑀼𑀧𑀸𑀬𑀸𑀲𑁂’’𑀢𑀺𑀆𑀤𑀺.

𑁧𑁬𑁩. 𑀑𑀤𑀭𑀺𑀓𑀢𑁆𑀢𑁂𑀦 𑀔𑀸𑀤𑀺𑀢𑁄𑀢𑀺 𑀑𑀤𑀭𑀺𑀓𑀪𑀸𑀯𑁂𑀦 𑀆𑀫𑀺𑀲𑀕𑁂𑀥𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀸𑀓𑀧𑁆𑀧𑀦𑁂𑀦 𑀦𑀸𑀲𑀺𑀢𑀲𑀻𑀮𑀸𑀤𑀺𑀕𑀼𑀡𑀢𑀸𑀬 𑀔𑀸𑀤𑀺𑀢𑀥𑀫𑁆𑀫𑀲𑀭𑀻𑀭𑁄.

𑁧𑁬𑁪. 𑀧𑀜𑁆𑀘𑀓𑀸𑀫𑀕𑀼𑀡𑀸𑀯𑀝𑁆𑀝𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸𑀢𑀺 𑀏𑀢𑁆𑀣 𑀓𑀸𑀫𑀭𑀸𑀕𑀸𑀪𑀺𑀪𑀽𑀢𑁂 𑀲𑀢𑁆𑀢𑁂 𑀇𑀢𑁄 𑀘 𑀏𑀢𑁆𑀢𑁄, 𑀏𑀢𑁆𑀢𑁄 𑀘 𑀇𑀢𑁄𑀢𑀺 𑀏𑀯𑀁 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀯𑀺𑀲𑀬𑀲𑀗𑁆𑀔𑀸𑀢𑁂 𑀆𑀯𑀝𑁆𑀝𑁂 𑀅𑀢𑁆𑀢𑀸𑀦𑀁 𑀲𑀁𑀲𑀸𑀭𑁂𑀢𑁆𑀯𑀸 𑀬𑀣𑀸 𑀢𑀢𑁄 𑀩𑀳𑀺𑀪𑀽𑀢𑁂 𑀦𑁂𑀓𑁆𑀔𑀫𑁆𑀫𑁂 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀆𑀯𑀝𑁆𑀝𑁂𑀢𑁆𑀯𑀸 𑀩𑁆𑀬𑀲𑀦𑀸𑀧𑀸𑀤𑀦𑁂𑀦 𑀓𑀸𑀫𑀕𑀼𑀡𑀸𑀦𑀁 𑀆𑀯𑀝𑁆𑀝𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺.

𑁧𑁬𑁫. 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦𑀸𑀢𑀺 𑀭𑀸𑀕𑁂𑀦 𑀅𑀦𑀼𑀤𑁆𑀥𑀁𑀲𑀺𑀢𑁂𑀦. 𑀘𑀡𑁆𑀟𑀫𑀘𑁆𑀙𑀁 𑀆𑀕𑀫𑁆𑀫𑀸𑀢𑀺 𑀲𑀼𑀲𑀼𑀓𑀸𑀤𑀺𑀘𑀡𑁆𑀟𑀫𑀘𑁆𑀙𑀁 𑀆𑀕𑀫𑁆𑀫. 𑀫𑀸𑀢𑀼𑀕𑀸𑀫𑀁 𑀆𑀕𑀫𑁆𑀫𑀸𑀢𑀺 𑀫𑀸𑀢𑀼𑀕𑀸𑀫𑁄 𑀳𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀭𑀳𑀺𑀢𑀁 𑀅𑀥𑀻𑀭𑀧𑀼𑀭𑀺𑀲𑀁 𑀇𑀢𑁆𑀣𑀺𑀓𑀼𑀢𑁆𑀢𑀪𑀽𑀢𑁂𑀳𑀺 𑀅𑀢𑁆𑀢𑀦𑁄 𑀳𑀸𑀯𑀪𑀸𑀯𑀯𑀺𑀮𑀸𑀲𑁂𑀳𑀺 𑀅𑀪𑀺𑀪𑀼𑀬𑁆𑀬 𑀕𑀳𑁂𑀢𑁆𑀯𑀸 𑀥𑀻𑀭𑀚𑀸𑀢𑀺𑀬𑀫𑁆𑀧𑀺 𑀅𑀢𑁆𑀢𑀦𑁄 𑀭𑀽𑀧𑀸𑀤𑀻𑀳𑀺 𑀧𑀮𑁄𑀪𑀦𑀯𑀲𑁂𑀦 𑀅𑀦𑀯𑀲𑁂𑀲𑀁 𑀅𑀢𑁆𑀢𑀦𑁄 𑀉𑀧𑀓𑀸𑀭𑀥𑀫𑁆𑀫𑁂 𑀲𑀻𑀮𑀸𑀤𑀺𑀓𑁂 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑀁 𑀓𑀭𑁄𑀦𑁆𑀢𑁄 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀢𑀺. 𑀢𑁂𑀦𑀸𑀳 𑁋 ‘‘𑀫𑀸𑀢𑀼𑀕𑀸𑀫𑀁 𑀆𑀕𑀫𑁆𑀫 𑀉𑀧𑁆𑀧𑀦𑁆𑀦𑀓𑀸𑀫𑀭𑀸𑀕𑁄 𑀯𑀺𑀩𑁆𑀪𑀫𑀢𑀻’’𑀢𑀺.

𑀪𑀬𑀁 𑀦𑀸𑀫 𑀬𑀢𑁆𑀣 𑀪𑀸𑀬𑀺𑀢𑀩𑁆𑀩𑀯𑀢𑁆𑀣𑀼, 𑀢𑀢𑁆𑀣 𑀑𑀢𑀭𑀦𑁆𑀢𑀲𑁆𑀲𑁂𑀯 𑀳𑁄𑀢𑀺, 𑀦 𑀅𑀦𑁄𑀢𑀭𑀦𑁆𑀢𑀲𑁆𑀲, 𑀢𑀁 𑀑𑀢𑀭𑀺𑀢𑁆𑀯𑀸 𑀪𑀬𑀁 𑀯𑀺𑀦𑁄𑀤𑁂𑀢𑁆𑀯𑀸 𑀢𑀢𑁆𑀣 𑀓𑀺𑀘𑁆𑀘𑀁 𑀲𑀸𑀥𑁂𑀢𑀩𑁆𑀩𑀁, 𑀇𑀢𑀭𑀣𑀸 𑀘𑀢𑁆𑀣𑀲𑀺𑀤𑁆𑀥𑀺 𑀦 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀉𑀧𑀫𑁄𑀧𑀫𑀺𑀢𑀩𑁆𑀩𑀲𑀭𑀽𑀧𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀤𑀓𑀁 𑀦𑀺𑀲𑁆𑀲𑀸𑀬 𑀆𑀦𑀺𑀲𑀁𑀲𑁄 𑀧𑀺𑀧𑀸𑀲𑀯𑀺𑀦𑀬𑀦𑀁 𑀲𑀭𑀻𑀭𑀲𑀼𑀤𑁆𑀥𑀺 𑀧𑀭𑀺𑀴𑀸𑀳𑀽𑀧𑀲𑀫𑁄 𑀓𑀸𑀬𑀉𑀢𑀼𑀕𑁆𑀕𑀸𑀳𑀸𑀧𑀦𑀦𑁆𑀢𑀺 𑀏𑀯𑀫𑀸𑀤𑀺. 𑀲𑀸𑀲𑀦𑀁 𑀦𑀺𑀲𑁆𑀲𑀸𑀬 𑀆𑀦𑀺𑀲𑀁𑀲𑁄 𑀧𑀦 𑀲𑀗𑁆𑀔𑁂𑀧𑀢𑁄 𑀯𑀝𑁆𑀝𑀤𑀼𑀓𑁆𑀔𑀽𑀧𑀲𑀫𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀻𑀮𑀸𑀦𑀺𑀲𑀁𑀲𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑁄, 𑀲𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁯) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀆𑀦𑀺𑀲𑀁𑀲𑁄 𑀳𑁄𑀢𑀺 𑀢𑀸𑀦𑀺 𑀪𑀬𑀸𑀦𑀺 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀸𑀦𑀺 𑀅𑀪𑀸𑀬𑀺𑀢𑁆𑀯𑀸𑀢𑀺 𑀇𑀫𑀸𑀦𑀺 𑀓𑁄𑀥𑀽𑀧𑀸𑀬𑀸𑀲𑀸𑀤𑀺𑀪𑀬𑀸𑀦𑀺 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀺𑀢𑁆𑀯𑀸 𑀅𑀪𑀸𑀬𑀺𑀢𑁆𑀯𑀸. 𑀓𑁄𑀥𑀽𑀧𑀸𑀬𑀸𑀲𑀸𑀤𑀬𑁄 𑀳𑀺 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀦𑁆𑀢𑀺 𑀯𑀼𑀢𑁆𑀢𑀸. 𑀣𑁂𑀭𑁄𑀢𑀺 𑀫𑀳𑀸𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑁄. 𑀓𑀸𑀫𑀁 𑀧𑀳𑀸𑀦𑀸𑀪𑀺𑀲𑀫𑀬𑀓𑀸𑀮𑁄 𑀏𑀯 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁄, 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀦 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀥𑀫𑁆𑀫𑁂𑀲𑀼 𑀓𑀺𑀘𑁆𑀘𑀁 𑀅𑀲𑀁𑀓𑀺𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀲𑀫𑀸𑀦𑀓𑀸𑀮𑀺𑀓𑀫𑁆𑀧𑀺 𑀅𑀲𑀫𑀸𑀦𑀓𑀸𑀮𑀺𑀓𑀁 𑀯𑀺𑀬 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀸𑀢𑀼𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁮. 𑀦𑀴𑀓𑀧𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁬. 𑀬𑀢𑁆𑀣 𑀩𑁄𑀥𑀺𑀲𑀢𑁆𑀢𑀧𑀫𑀼𑀔𑁄 𑀯𑀸𑀦𑀭𑁄 𑀦𑀴𑀓𑁂𑀦 𑀧𑀸𑀦𑀻𑀬𑀁 𑀧𑀺𑀯𑀺, 𑀲𑀸 𑀧𑁄𑀓𑁆𑀔𑀭𑀡𑀻, 𑀢𑀲𑁆𑀲𑀸𑀫𑀦𑁆𑀢𑁄 𑀪𑀽𑀫𑀺𑀧𑁆𑀧𑀤𑁂𑀲𑁄, 𑀢𑀢𑁆𑀣 𑀦𑀺𑀯𑀺𑀝𑁆𑀞𑀕𑀸𑀫𑁄 𑀘 ‘‘𑀦𑀴𑀓𑀧𑀸𑀦’’𑀦𑁆𑀢𑁂𑀯 𑀧𑀜𑁆𑀜𑀸𑀬𑀺𑀢𑁆𑀣, 𑀇𑀥 𑀧𑀦 𑀕𑀸𑀫𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀦𑀴𑀓𑀧𑀸𑀦𑁂𑀢𑀺 𑀏𑀯𑀁𑀦𑀸𑀫𑀓𑁂 𑀕𑀸𑀫𑁂’’𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑁂 𑀓𑀺𑀭𑀸’’𑀢𑀺 𑀆𑀭𑀤𑁆𑀥𑀁. 𑀧𑀜𑁆𑀜𑀯𑀸𑀢𑀺 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀬 𑀧𑀜𑁆𑀜𑀸𑀬 𑀧𑀜𑁆𑀜𑀯𑀸.

𑀣𑀽𑀮𑀤𑀻𑀖𑀩𑀳𑀼𑀮𑀪𑀸𑀯𑁂𑀦 𑀫𑀳𑀢𑀻𑀳𑀺 𑀤𑀸𑀞𑀺𑀓𑀸𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀸𑀤𑀸𑀞𑀺𑀓𑁄. ‘‘𑀉𑀤𑀓𑀭𑀓𑁆𑀔𑀲𑁄 𑀅𑀳’’𑀦𑁆𑀢𑀺 𑀯𑀢𑁆𑀯𑀸 𑀯𑀸𑀦𑀭𑀸𑀦𑀁 𑀓𑀜𑁆𑀘𑀺 𑀅𑀫𑀼𑀜𑁆𑀘𑀺𑀢𑁆𑀯𑀸 ‘‘𑀲𑀩𑁆𑀩𑁂 𑀢𑀼𑀫𑁆𑀳𑁂 𑀫𑀫 𑀳𑀢𑁆𑀣𑀕𑀢𑀸’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀼𑀫𑁆𑀳𑁂 𑀧𑀦 𑀲𑀩𑁆𑀩𑁂 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀥𑀫𑀺…𑀧𑁂… 𑀧𑀺𑀯𑀺𑀁𑀲𑀽𑀢𑀺 𑀩𑁄𑀥𑀺𑀲𑀢𑁆𑀢𑁂𑀦 𑀕𑀳𑀺𑀢𑀦𑀴𑁄 𑀅𑀦𑀯𑀲𑁂𑀲𑁄 𑀅𑀩𑁆𑀪𑀦𑁆𑀢𑀭𑁂 𑀲𑀩𑁆𑀩𑀲𑀦𑁆𑀥𑀻𑀦𑀁 𑀦𑀺𑀩𑁆𑀩𑀸𑀥𑁂𑀦 𑀏𑀓𑀘𑁆𑀙𑀺𑀤𑁆𑀤𑁄 𑀅𑀳𑁄𑀲𑀺. 𑀦𑁂𑀯 𑀫𑀁 𑀢𑁆𑀯𑀁 𑀯𑀥𑀺𑀲𑁆𑀲𑀲𑀻𑀢𑀺 𑀉𑀤𑀓𑀭𑀓𑁆𑀔𑀲 𑀢𑁆𑀯𑀁 𑀯𑀥𑀺𑀢𑀼𑀓𑀸𑀫𑁄𑀧𑀺 𑀫𑀫 𑀧𑀼𑀭𑀺𑀲𑀣𑀸𑀫𑁂𑀦 𑀦 𑀯𑀥𑀺𑀲𑁆𑀲𑀲𑀺.

𑀏𑀯𑀁 𑀧𑀦 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 ‘‘𑀅𑀬𑀁 𑀧𑀸𑀧𑁄 𑀏𑀢𑁆𑀣 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑁂 𑀅𑀜𑁆𑀜𑁂𑀧𑀺 𑀲𑀢𑁆𑀢𑁂 𑀫𑀸 𑀩𑀸𑀥𑀬𑀺𑀢𑁆𑀣𑀸’’𑀢𑀺 𑀓𑀭𑀼𑀡𑀸𑀬𑀫𑀸𑀦𑁄 ‘‘𑀏𑀢𑁆𑀣 𑀚𑀸𑀬𑀦𑁆𑀢𑀸 𑀦𑀴𑀸 𑀲𑀩𑁆𑀩𑁂 𑀅𑀧𑀩𑁆𑀩𑀩𑀦𑁆𑀥𑀸 𑀏𑀓𑀘𑁆𑀙𑀺𑀤𑁆𑀤𑀸𑀯 𑀳𑁄𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀬 𑀕𑀢𑁄. 𑀢𑁂𑀦𑀸𑀳 ‘‘𑀢𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺.

𑁧𑁬𑁭. 𑀅𑀦𑀼𑀭𑀼𑀤𑁆𑀥𑀧𑁆𑀧𑀫𑀼𑀔𑀸 𑀪𑀺𑀓𑁆𑀔𑀽 𑀪𑀕𑀯𑀢𑀸 ‘‘𑀓𑀘𑁆𑀘𑀺 𑀢𑀼𑀫𑁆𑀳𑁂 𑀅𑀦𑀼𑀭𑀼𑀤𑁆𑀥𑀸’’𑀢𑀺 𑀧𑀼𑀘𑁆𑀙𑀺𑀢𑀸𑀢𑀺 𑀣𑁂𑀭𑁄 ‘‘𑀢𑀕𑁆𑀖 𑀫𑀬𑀁, 𑀪𑀦𑁆𑀢𑁂’’𑀢𑀺 𑀆𑀳.

𑀲𑀘𑁂 𑀧𑀩𑁆𑀩𑀚𑀢𑀺, 𑀚𑀻𑀯𑀺𑀢𑀁 𑀮𑀪𑀺𑀲𑁆𑀲𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺 𑀭𑀜𑁆𑀜𑀸 𑀧𑀩𑁆𑀩𑀚𑁆𑀚𑀸𑀬 𑀅𑀪𑀺𑀦𑀻𑀢𑀸𑀢𑀺 𑀭𑀸𑀚𑀸𑀪𑀺𑀦𑀻𑀢𑀸. 𑀘𑁄𑀭𑀸𑀪𑀺𑀦𑀻𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀘𑁄𑀭𑀸𑀦𑀁 𑀫𑀽𑀮𑀁 𑀙𑀺𑀦𑁆𑀤𑀦𑁆𑀢𑁄 ‘‘𑀓𑀡𑁆𑀝𑀓𑀲𑁄𑀥𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀆𑀚𑀻𑀯𑀺𑀓𑀸𑀬𑀸𑀢𑀺 𑀆𑀚𑀻𑀯𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸. 𑀇𑀫𑁂𑀲𑀼 𑀧𑀦 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀸𑀤𑀻𑀲𑀼.

𑀯𑀺𑀯𑁂𑀓𑀦𑁆𑀢𑀺 𑀧𑀼𑀩𑁆𑀩𑀓𑀸𑀮𑀺𑀓𑀓𑀺𑀭𑀺𑀬𑀧𑁆𑀧𑀥𑀸𑀦𑀁 ‘‘𑀅𑀩𑁆𑀬𑀸𑀧𑀚𑁆𑀚𑀁 𑀉𑀧𑁂𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀆𑀳 𑁋 ‘‘𑀯𑀺𑀯𑀺𑀘𑁆𑀘𑀸’’𑀢𑀺, 𑀯𑀺𑀯𑀺𑀘𑁆𑀘𑀺𑀢𑁆𑀯𑀸 𑀯𑀺𑀯𑀺𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀦𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀦𑁆𑀢𑀺 𑀧𑀩𑁆𑀩𑀚𑀺𑀢𑀲𑁆𑀲 𑀲𑀸𑀭𑀼𑀧𑁆𑀧𑀓𑀺𑀘𑁆𑀘𑀁. 𑀲𑀫𑀡𑀓𑀺𑀘𑁆𑀘𑀦𑁆𑀢𑀺 𑀲𑀫𑀡𑀪𑀸𑀯𑀓𑀭𑀡𑀓𑀺𑀘𑁆𑀘𑀁. 𑀬𑀤𑀕𑁆𑀕𑁂𑀦 𑀳𑀺 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀢𑀤𑀕𑁆𑀕𑁂𑀦 𑀲𑀫𑀡𑀪𑀸𑀯𑀓𑀭𑀫𑁆𑀧𑀺 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦𑀸𑀳 ‘‘𑀲𑁄 𑀬𑁂𑀯𑀸’’𑀢𑀺𑀆𑀤𑀺.

𑁧𑁬𑁮. 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁂 𑀢𑀸𑀯 𑀩𑁆𑀬𑀸𑀓𑀭𑁄𑀦𑁆𑀢𑁄 𑀧𑀯𑀢𑁆𑀢𑀻𑀲𑀼 𑀞𑀸𑀦𑀁 𑀅𑀢𑀻𑀢𑁄𑀢𑀺 𑀓𑀢𑁆𑀯𑀸 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑀦𑀸𑀫 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀸 𑀅𑀪𑀸𑀯𑀓𑀺𑀢𑁆𑀢𑀦𑀢𑁄. 𑀫𑀳𑀦𑁆𑀢𑀢𑀼𑀝𑁆𑀞𑀺𑀦𑁄𑀢𑀺 𑀯𑀺𑀧𑀼𑀮𑀧𑀫𑁄𑀤𑀸.

𑁧𑁬𑁯. 𑀇𑀫𑀲𑁆𑀲𑀸𑀢𑀺 ‘‘𑀅𑀲𑁆𑀲𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀘𑀦𑀁. 𑀇𑀫𑀲𑁆𑀲 𑀞𑀺𑀢𑀲𑁆𑀲 𑀆𑀬𑀲𑁆𑀫𑀢𑁄 𑀲𑀸𑀫𑀁 𑀤𑀺𑀝𑁆𑀞𑁄 𑀯𑀸 𑀳𑁄𑀢𑀺 𑀅𑀦𑀼𑀲𑁆𑀲𑀯𑀲𑀼𑀢𑁄 𑀯𑀸𑀢𑀺 𑀬𑁄𑀚𑀦𑀸. 𑀲𑀫𑀸𑀥𑀺𑀧𑀓𑁆𑀔𑀺𑀓𑀸 𑀥𑀫𑁆𑀫𑀸 𑀥𑀫𑁆𑀫𑀸𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀲𑀫𑀸𑀥𑀺 𑀧𑀦 𑀏𑀯𑀁𑀯𑀺𑀳𑀸𑀭𑀻𑀢𑀺 𑀏𑀢𑁆𑀣 𑀯𑀺𑀳𑀸𑀭𑀲𑀤𑁆𑀤𑁂𑀦 𑀕𑀳𑀺𑀢𑁄. 𑀏𑀯𑀁𑀯𑀺𑀫𑀼𑀢𑁆𑀢𑀸𑀢𑀺 𑀏𑀢𑁆𑀣 𑀧𑀦 𑀯𑀺𑀫𑀼𑀢𑁆𑀢𑀺𑀲𑀤𑁆𑀤𑁂𑀦 𑀨𑀮𑀯𑀺𑀫𑀼𑀢𑁆𑀢𑀺 𑀕𑀳𑀺𑀢𑀸. 𑀘𑀭𑀢𑁄𑀧𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀸𑀭𑁂𑀦 𑀘𑀭𑀢𑁄𑀧𑀺 𑀯𑀺𑀳𑀭𑀦𑁆𑀢𑀲𑁆𑀲𑀧𑀺. 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀞𑀸𑀦𑁂𑀲𑀼 𑀮𑀩𑁆𑀪𑀫𑀸𑀦𑀫𑁆𑀧𑀺 𑀅𑀭𑀳𑀢𑁆𑀢𑀁 𑀅𑀧𑁆𑀧𑀓𑀪𑀸𑀯𑀢𑁄 𑀧𑀸𑀴𑀺𑀬𑀁 𑀅𑀦𑀼𑀤𑁆𑀥𑀝𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀴𑀓𑀧𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁯. 𑀕𑁄𑀮𑀺𑀬𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁩. 𑀧𑀤𑀲𑀫𑀸𑀘𑀸𑀭𑁄𑀢𑀺 𑀢𑀁𑀢𑀁𑀧𑀘𑁆𑀘𑀬𑀪𑁂𑀤𑀤𑀲𑁆𑀲𑀦𑀸𑀬 𑀯𑀺𑀕𑀢𑀢𑁆𑀢𑀸 𑀧𑀓𑀸𑀭𑁂𑀳𑀺 𑀤𑀮𑀺𑀤𑁆𑀤𑀲𑀫𑀸𑀘𑀸𑀭𑁄 𑀲𑀺𑀣𑀺𑀮𑀲𑀫𑀸𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀢𑀸𑀤𑀺𑀲𑁄 𑀲𑀫𑀸𑀘𑀸𑀭𑁄 𑀣𑀺𑀭𑁄 𑀤𑀴𑁆𑀳𑁄 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀼𑀩𑁆𑀩𑀮𑀲𑀫𑀸𑀘𑀸𑀭𑁄’’𑀢𑀺. ‘‘𑀲𑀸𑀔𑀲𑀫𑀸𑀘𑀸𑀭𑁄’’𑀢𑀺 𑀯𑀸 𑀧𑀸𑀞𑁄, 𑀢𑀢𑁆𑀣 𑀢𑀢𑁆𑀣 𑀮𑀕𑁆𑀕𑀦𑀝𑁆𑀞𑁂𑀦 𑀲𑀸𑀔𑀸𑀲𑀤𑀺𑀲𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀑𑀴𑀸𑀭𑀺𑀓𑀸𑀘𑀸𑀭𑁄’’𑀢𑀺. 𑀧𑀘𑁆𑀘𑀬𑁂𑀲𑀼 𑀲𑀸𑀧𑁂𑀓𑁆𑀔𑁄𑀢𑀺 𑀧𑀘𑁆𑀘𑀬𑁂𑀲𑀼 𑀲𑀸𑀧𑁂𑀓𑁆𑀔𑀢𑀸𑀬 𑀏𑀯 𑀳𑀺𑀲𑁆𑀲 𑀑𑀴𑀸𑀭𑀺𑀓𑀸𑀘𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀕𑀭𑀼𑀦𑀸 𑀓𑀺𑀲𑁆𑀫𑀺𑀜𑁆𑀘𑀺 𑀯𑀼𑀢𑁆𑀢𑁂 𑀕𑀸𑀭𑀯𑀯𑀲𑁂𑀦 𑀧𑀢𑀺𑀲𑁆𑀲𑀯𑀦𑀁 𑀧𑀢𑀺𑀲𑁆𑀲𑁄, 𑀧𑀢𑀺𑀲𑁆𑀲𑀯𑀘𑀦𑀪𑀽𑀢𑀁 𑀢𑀁𑀲𑀪𑀸𑀕𑀜𑁆𑀘 𑀬𑀁 𑀓𑀺𑀜𑁆𑀘𑀺 𑀕𑀸𑀭𑀯𑀦𑁆𑀢𑀺 𑀅𑀢𑁆𑀣𑁄. 𑀲𑀳 𑀧𑀢𑀺𑀲𑁆𑀲𑁂𑀦𑀸𑀢𑀺 𑀲𑀧𑁆𑀧𑀢𑀺𑀲𑁆𑀲𑁂𑀦, 𑀲𑀧𑁆𑀧𑀢𑀺𑀲𑁆𑀲𑀯𑁂𑀦 𑀑𑀯𑀸𑀤𑀲𑀫𑁆𑀧𑀝𑀺𑀘𑁆𑀙𑀦𑁂𑀦. 𑀧𑀢𑀺𑀲𑁆𑀲𑀻𑀬𑀢𑀻𑀢𑀺 𑀯𑀸 𑀧𑀢𑀺𑀲𑁆𑀲𑁄, 𑀕𑀭𑀼𑀓𑀸𑀢𑀩𑁆𑀩𑁄, 𑀢𑁂𑀦 𑀲𑀳 𑀧𑀢𑀺𑀲𑁆𑀲𑁂𑀦𑀸𑀢𑀺 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀺𑀬. 𑀢𑁂𑀦𑀸𑀳 ‘‘𑀲𑀚𑁂𑀝𑁆𑀞𑀓𑁂𑀦𑀸’’𑀢𑀺. 𑀲𑁂𑀭𑀺𑀯𑀺𑀳𑀸𑀭𑁄 𑀦𑀸𑀫 𑀅𑀢𑁆𑀢𑀧𑁆𑀧𑀥𑀸𑀦𑀯𑀸𑀲𑁄. 𑀢𑁂𑀦𑀸𑀳 ‘‘𑀦𑀺𑀭𑀗𑁆𑀓𑀼𑀲𑀯𑀺𑀳𑀸𑀭𑁂𑀦𑀸’’𑀢𑀺.

𑀅𑀦𑀼𑀧𑀔𑀚𑁆𑀚𑀸𑀢𑀺 𑀅𑀦𑀼𑀧𑀓𑀟𑁆𑀠𑀺𑀢𑁆𑀯𑀸. 𑀕𑀭𑀼𑀝𑁆𑀞𑀸𑀦𑀺𑀬𑀸𑀦𑀁 𑀅𑀦𑁆𑀢𑀭𑀁 𑀅𑀦𑀸𑀧𑀼𑀘𑁆𑀙𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀆𑀪𑀺𑀲𑀫𑀸𑀘𑀸𑀭𑀺𑀓𑀦𑁆𑀢𑀺 𑀅𑀪𑀺𑀲𑀫𑀸𑀘𑀸𑀭𑁂 𑀪𑀯𑀁. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀫𑀢𑁆𑀢𑀫𑁆𑀧𑀻’’𑀢𑀺. 𑀦𑀸𑀢𑀺𑀓𑀸𑀮𑀲𑁆𑀲𑁂𑀯 𑀲𑀗𑁆𑀖𑀲𑁆𑀲 𑀧𑀼𑀭𑀢𑁄 𑀧𑀯𑀺𑀲𑀺𑀢𑀩𑁆𑀩𑀁, 𑀦 𑀧𑀘𑁆𑀙𑀸 𑀧𑀝𑀺𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀢𑀺𑀓𑀸𑀮𑁂 𑀘 𑀕𑀸𑀫𑀧𑁆𑀧𑀯𑁂𑀲𑁄 𑀅𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀦𑀜𑁆𑀘 𑀦𑀺𑀯𑀸𑀭𑀺𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀅𑀢𑀺𑀧𑀸𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀤𑁆𑀥𑀘𑁆𑀘𑀧𑀓𑀢𑀺𑀓𑁄𑀢𑀺 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄. 𑀅𑀯𑀘𑀸𑀧𑀮𑁆𑀬𑁂𑀦𑀸𑀢𑀺 𑀤𑀴𑁆𑀳𑀯𑀸𑀢𑀸𑀧𑀳𑀢𑀧𑀮𑁆𑀮𑀯𑀲𑀤𑀺𑀲𑁂𑀦 𑀮𑁄𑀮𑀪𑀸𑀯𑁂𑀦.

𑀧𑀜𑁆𑀜𑀯𑀢𑀸𑀢𑀺 𑀇𑀫𑀺𑀦𑀸 𑀪𑀺𑀓𑁆𑀔𑀼𑀲𑀸𑀭𑀼𑀧𑁆𑀧𑁂𑀲𑀼 𑀇𑀢𑀺𑀓𑀢𑁆𑀢𑀩𑁆𑀩𑁂𑀲𑀼 𑀉𑀧𑀸𑀬𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸, 𑀦 𑀲𑀼𑀢𑀫𑀬𑀧𑀜𑁆𑀜𑀸. 𑀅𑀪𑀺𑀥𑀫𑁆𑀫𑁂 𑀅𑀪𑀺𑀯𑀺𑀦𑀬𑁂 𑀬𑁄𑀕𑁄𑀢𑀺 𑀇𑀫𑀺𑀦𑀸 𑀪𑀸𑀯𑀦𑀸𑀧𑀜𑁆𑀜𑀸𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀬𑁄𑀕𑁄 𑀧𑀓𑀸𑀲𑀺𑀢𑁄. 𑀬𑁄𑀕𑁄𑀢𑀺 𑀘 𑀧𑀭𑀺𑀘𑀬𑁄 𑀉𑀕𑁆𑀕𑀡𑁆𑀳𑀯𑀲𑁂𑀦.

𑀆𑀭𑀼𑀧𑁆𑀧𑀸𑀢𑀺 𑀇𑀫𑀺𑀦𑀸 𑀘𑀢𑀲𑁆𑀲𑁄𑀧𑀺 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀕𑀳𑀺𑀢𑀸, 𑀢𑀸 𑀧𑀦 𑀘𑀢𑀽𑀳𑀺 𑀭𑀽𑀧𑀲𑀫𑀸𑀧𑀢𑁆𑀢𑀻𑀳𑀺 𑀯𑀺𑀦𑀸 𑀦 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀆𑀳 𑁋 ‘‘𑀆𑀭𑀼𑀧𑁆𑀧𑀸𑀢𑀺 𑀏𑀢𑁆𑀢𑀸𑀯𑀢𑀸 𑀅𑀝𑁆𑀞𑀧𑀺 𑀲𑀫𑀸𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸 𑀳𑁄𑀦𑁆𑀢𑀻’’𑀢𑀺. 𑀓𑀲𑀺𑀡𑁂𑀢𑀺 𑀤𑀲𑀯𑀺𑀥𑁂 𑀓𑀲𑀺𑀡𑁂. 𑀏𑀓𑀁 𑀧𑀭𑀺𑀓𑀫𑁆𑀫𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀏𑀓𑀪𑀸𑀯𑀦𑀸 𑀧𑀭𑀺𑀓𑀫𑁆𑀫𑀤𑀻𑀧𑀦𑀁 𑀔𑀦𑁆𑀥𑀓𑀫𑁆𑀫𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀧𑀕𑀼𑀡𑀁 𑀓𑀢𑁆𑀯𑀸’’𑀢𑀺. 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀧𑀦 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀁 𑀳𑁄𑀢𑀺, 𑀮𑁄𑀓𑀺𑀬𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀳𑁂𑀝𑁆𑀞𑀸 𑀕𑀳𑀺𑀢𑀸𑀢𑀺 𑀆𑀳 ‘‘𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂𑀢𑀺 𑀇𑀫𑀺𑀦𑀸 𑀲𑀩𑁆𑀩𑁂𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀤𑀲𑁆𑀲𑁂𑀢𑀻’’𑀢𑀺. 𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦𑀸𑀢𑀺 𑀚𑀸𑀦𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀜𑀸𑀢𑀩𑁆𑀩𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦𑀸𑀢𑀺.

𑀕𑁄𑀮𑀺𑀬𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁧𑁦. 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁪. 𑀧𑀜𑁆𑀘 𑀆𑀦𑀺𑀲𑀁𑀲𑁂𑀢𑀺 𑀅𑀧𑁆𑀧𑀸𑀩𑀸𑀥𑀢𑀸𑀤𑀺𑀓𑁂 𑀧𑀜𑁆𑀘 𑀕𑀼𑀡𑁂. 𑀢𑀢𑁆𑀣 𑀅𑀓𑁆𑀔𑀺𑀭𑁄𑀕𑀓𑀼𑀘𑁆𑀙𑀺𑀭𑁄𑀕𑀸𑀤𑀻𑀦𑀁 𑀅𑀪𑀸𑀯𑁄 𑀅𑀧𑁆𑀧𑀸𑀩𑀸𑀥𑀢𑀸. 𑀲𑀭𑀻𑀭𑁂 𑀢𑁂𑀲𑀁 𑀓𑀼𑀧𑁆𑀧𑀦𑀤𑀼𑀓𑁆𑀔𑀲𑁆𑀲 𑀅𑀪𑀸𑀯𑁄 𑀅𑀧𑁆𑀧𑀸𑀢𑀗𑁆𑀓𑀁. 𑀲𑀭𑀻𑀭𑀲𑁆𑀲 𑀉𑀝𑁆𑀞𑀸𑀦𑀲𑀼𑀔𑀢𑀸 𑀮𑀳𑀼𑀝𑁆𑀞𑀸𑀦𑀁. 𑀩𑀮𑀁 𑀦𑀸𑀫 𑀓𑀸𑀬𑀩𑀮𑀁. 𑀨𑀸𑀲𑀼𑀯𑀺𑀳𑀸𑀭𑁄 𑀇𑀭𑀺𑀬𑀸𑀧𑀣𑀲𑀼𑀔𑀢𑀸. 𑀅𑀦𑀼𑀧𑀓𑁆𑀔𑀦𑁆𑀤𑀸𑀦𑀻𑀢𑀺 𑀤𑀼𑀘𑁆𑀘𑀚𑀦𑀯𑀲𑁂𑀦 𑀲𑀢𑁆𑀢𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸𑀦𑀺. 𑀲𑀜𑁆𑀚𑀸𑀦𑀺𑀲𑁆𑀲𑀣𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑀲𑁆𑀫𑀸 𑀇𑀢𑀺 𑀏𑀯𑀁 𑀆𑀦𑀺𑀲𑀁𑀲𑀦𑁆𑀢𑀺 𑀅𑀢𑁆𑀣𑁄.

𑁧𑁭𑁫. 𑀆𑀯𑀸𑀲𑁂 𑀦𑀺𑀬𑀼𑀢𑁆𑀢𑀸𑀢𑀺 𑀆𑀯𑀸𑀲𑀺𑀓𑀸 𑀢𑀲𑁆𑀲 𑀅𑀦𑀢𑀺𑀯𑀢𑁆𑀢𑀦𑀢𑁄. 𑀢𑁂𑀦𑀸𑀳 ‘‘𑀦𑀺𑀩𑀤𑁆𑀥𑀯𑀸𑀲𑀺𑀦𑁄’’𑀢𑀺, 𑀦𑀺𑀬𑀢𑀯𑀸𑀲𑀺𑀦𑁄𑀢𑀺 𑀅𑀢𑁆𑀣𑁄. 𑀢𑀦𑁆𑀦𑀺𑀩𑀦𑁆𑀥𑀸𑀢𑀺 𑀦𑀺𑀩𑀦𑁆𑀥𑀁 𑀯𑀼𑀘𑁆𑀘𑀢𑀺 𑀩𑁆𑀬𑀸𑀧𑀸𑀭𑁄, 𑀢𑀢𑁆𑀣 𑀩𑀦𑁆𑀥𑀸 𑀧𑀲𑀼𑀢𑀸 𑀉𑀲𑁆𑀲𑀼𑀓𑀸𑀢𑀺 𑀢𑀦𑁆𑀦𑀺𑀩𑀦𑁆𑀥𑀸. 𑀓𑀣𑀁 𑀢𑁂 𑀢𑀢𑁆𑀣 𑀦𑀺𑀩𑀦𑁆𑀥𑀸𑀢𑀺 𑀆𑀳 ‘‘𑀅𑀓𑀢𑀁 𑀲𑁂𑀦𑀸𑀲𑀦’’𑀦𑁆𑀢𑀺𑀆𑀤𑀺. 𑀉𑀧𑁆𑀧𑀚𑁆𑀚𑀦𑀓𑁂𑀦 𑀓𑀸𑀮𑁂𑀦 𑀧𑀢𑁆𑀢𑀩𑁆𑀩𑀁 𑀓𑀸𑀮𑀺𑀓𑀁 𑀲𑁄 𑀧𑀦 𑀓𑀸𑀮𑁄 𑀅𑀦𑀸𑀕𑀢𑁄 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀸𑀕𑀢𑁂 𑀓𑀸𑀮𑁂 𑀧𑀢𑁆𑀢𑀩𑁆𑀩’’𑀦𑁆𑀢𑀺.

𑁧𑁭𑁮. 𑀏𑀢𑁆𑀢𑀓𑀸 𑀯𑁂𑀤𑀦𑀸 𑀲𑁂𑀯𑀺𑀢𑀩𑁆𑀩𑀸𑀢𑀺 𑀅𑀝𑁆𑀞𑀸𑀭𑀲𑀧𑀺 𑀦𑁂𑀓𑁆𑀔𑀫𑁆𑀫𑀦𑀺𑀲𑁆𑀲𑀺𑀢𑀸 𑀯𑁂𑀤𑀦𑀸 𑀲𑁂𑀯𑀺𑀢𑀩𑁆𑀩𑀸, 𑀕𑁂𑀳𑀲𑁆𑀲𑀺𑀢𑀸 𑀦 𑀲𑁂𑀯𑀺𑀢𑁆𑀩𑁆𑀩𑀸.

𑁧𑁮𑁧. 𑀢𑀁 𑀓𑀢𑀁 𑀲𑁄𑀴𑀲𑀯𑀺𑀥𑀲𑁆𑀲𑀧𑀺 𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸. 𑀅𑀦𑀼𑀮𑁄𑀫𑀺𑀓𑀸𑀦𑀻𑀢𑀺 𑀉𑀢𑀼𑀲𑀼𑀔𑀪𑀸𑀯𑁂𑀦 𑀅𑀦𑀼𑀭𑀽𑀧𑀸𑀦𑀺. 𑀢𑁂𑀦𑀸𑀳 ‘‘𑀓𑀫𑁆𑀫𑀝𑁆𑀞𑀸𑀦𑀲𑀧𑁆𑀧𑀸𑀬𑀸𑀦𑀻’’𑀢𑀺. 𑀲𑀫𑀸𑀦𑀁 𑀓𑀼𑀭𑀼𑀫𑀸𑀦𑀸𑀢𑀺 𑀑𑀫𑀢𑁆𑀢𑀢𑀁 𑀅𑀥𑀺𑀫𑀢𑁆𑀢𑀢𑀜𑁆𑀘 𑀧𑀳𑀸𑀬 𑀲𑀫𑀓𑀺𑀘𑁆𑀘𑀢𑀁 𑀲𑀫𑁆𑀧𑀸𑀤𑁂𑀦𑁆𑀢𑀸.

𑁧𑁮𑁨. 𑀢𑁂 𑀤𑁆𑀯𑁂 𑀳𑁄𑀦𑁆𑀢𑀻𑀢𑀺 𑀢𑁂 𑀆𑀤𑀺𑀢𑁄 𑀯𑀼𑀢𑁆𑀢𑀸 𑀤𑁆𑀯𑁂.

𑀉𑀪𑀢𑁄 (𑀅. 𑀦𑀺. 𑀝𑀻. 𑁩.𑁭.𑁧𑁪) 𑀉𑀪𑀬𑀣𑀸 𑀉𑀪𑁄𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 (𑀧𑀼. 𑀧. 𑀅𑀝𑁆𑀞. 𑁨𑁪) ‘‘𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺. 𑀢𑀢𑁆𑀣 𑀓𑁂𑀘𑀺 𑀢𑀸𑀯 𑀣𑁂𑀭𑀸 𑁋 ‘‘𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦, 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺. 𑀅𑀜𑁆𑀜𑁂 𑀣𑁂𑀭𑀸 𑁋 ‘‘𑀅𑀬𑀁 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀭𑀽𑀧𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀦𑀸𑀫𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀧𑀼𑀦 𑀢𑀢𑁄 𑀫𑀼𑀘𑁆𑀘𑀦𑀢𑁄 𑀦𑀸𑀫𑀦𑀺𑀲𑁆𑀲𑀺𑀢𑀓𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀘 𑀲𑀸𑀥𑀓𑀁 𑁋

‘‘𑀅𑀘𑁆𑀘𑀺 𑀬𑀣𑀸 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸, (𑀉𑀧𑀲𑀺𑀯𑀸𑀢𑀺 𑀪𑀕𑀯𑀸,)

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁;

𑀏𑀯𑀁 𑀫𑀼𑀦𑀺 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄,

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔’’𑀦𑁆𑀢𑀺. (𑀲𑀼. 𑀦𑀺. 𑁧𑁦𑁮𑁦; 𑀘𑀽𑀴𑀦𑀺. 𑀉𑀧𑀲𑀻𑀯𑀫𑀸𑀡𑀯𑀧𑀼𑀘𑁆𑀙𑀸 𑁧𑁧; 𑀉𑀧𑀲𑀻𑀯𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁪𑁩) 𑁋

𑀇𑀫𑀁 𑀲𑀼𑀢𑁆𑀢𑀧𑀤𑀁 𑀯𑀢𑁆𑀯𑀸 ‘‘𑀦𑀸𑀫𑀓𑀸𑀬𑀢𑁄 𑀘 𑀭𑀽𑀧𑀓𑀸𑀬𑀢𑁄 𑀘 𑀲𑀼𑀯𑀺𑀫𑀼𑀢𑁆𑀢𑀢𑁆𑀢𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺. 𑀲𑀼𑀢𑁆𑀢𑁂 𑀳𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀮𑀸𑀪𑀺𑀦𑁄 𑀉𑀧𑀲𑀺𑀯𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀕𑀯𑀢𑀸 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀅𑀓𑁆𑀔𑀸𑀢𑁄𑀢𑀺. 𑀅𑀧𑀭𑁂 𑀧𑀦 ‘‘𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦 𑀏𑀓𑀯𑀸𑀭𑀁 𑀯𑀺𑀫𑀼𑀢𑁆𑀢𑁄, 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀺𑀫𑁄𑀓𑁆𑀔𑁂𑀦 𑀏𑀓𑀯𑀸𑀭𑀁 𑀯𑀺𑀫𑀼𑀢𑁆𑀢𑁄𑀢𑀺 𑀏𑀯𑀁 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀣 𑀧𑀞𑀫𑀯𑀸𑀤𑁂 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀤𑀼𑀢𑀺𑀬𑀯𑀸𑀤𑁂 𑀉𑀪𑀢𑁄𑀪𑀸𑀕𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀢𑀢𑀺𑀬𑀯𑀸𑀤𑁂 𑀧𑀦 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀤𑁆𑀯𑁂 𑀯𑀸𑀭𑁂 𑀯𑀺𑀫𑀼𑀢𑁆𑀢𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑁄 𑀓𑀺𑀮𑁂𑀲𑀸 𑀯𑀸 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑁂𑀳𑀺 𑀓𑀸𑀬𑀤𑁆𑀯𑀬𑀢𑁄 𑀯𑀺𑀫𑀼𑀢𑁆𑀢𑀸 𑀅𑀲𑁆𑀲𑀸𑀢𑀺 𑀅𑀬𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 ‘‘𑀤𑁆𑀯𑀻𑀳𑀺 𑀪𑀸𑀕𑁂𑀳𑀻’’𑀢𑀺𑀆𑀤𑀺.

𑀲𑁄𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀓𑀸𑀫𑀜𑁆𑀘𑁂𑀢𑁆𑀣 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁆𑀧𑀺 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀯𑀺𑀬 𑀤𑀼𑀯𑀗𑁆𑀕𑀺𑀓𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫 𑀦 𑀳𑁄𑀢𑀺 𑀭𑀽𑀧𑀓𑀸𑀬𑀢𑁄 𑀅𑀯𑀺𑀫𑀼𑀢𑁆𑀢𑀢𑁆𑀢𑀸. 𑀢𑀜𑁆𑀳𑀺 𑀓𑀺𑀮𑁂𑀲𑀓𑀸𑀬𑀢𑁄𑀯 𑀯𑀺𑀫𑀼𑀢𑁆𑀢𑀁, 𑀦 𑀭𑀽𑀧𑀓𑀸𑀬𑀢𑁄, 𑀢𑀲𑁆𑀫𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦 𑀳𑁄𑀢𑀻𑀢𑀺 𑀆𑀳 𑁋 ‘‘𑀘𑀢𑀼𑀦𑁆𑀦𑀁 𑀅𑀭𑀽𑀧…𑀧𑁂… 𑀧𑀜𑁆𑀘𑀯𑀺𑀥𑁄 𑀳𑁄𑀢𑀻’’𑀢𑀺. ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀓𑁂 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀅𑀦𑁆𑀢𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀯𑀢𑁆𑀯𑀸 𑁋 ‘‘𑀬𑀢𑁄 𑀘 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀇𑀫𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀬𑀤𑀺𑀧𑀺 𑀫𑀳𑀸𑀦𑀺𑀤𑀸𑀦𑁂 (𑀤𑀻. 𑀦𑀺. 𑁨.𑁧𑁨𑁯-𑁧𑁩𑁦) 𑀯𑀼𑀢𑁆𑀢𑀁, 𑀢𑀁 𑀧𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁂𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀇𑀥 𑀲𑀩𑁆𑀩𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑀗𑁆𑀕𑀳𑀡𑀢𑁆𑀣𑀁 ‘‘𑀧𑀜𑁆𑀘𑀯𑀺𑀥𑁄 𑀳𑁄𑀢𑀻’’𑀢𑀺 𑀯𑀢𑁆𑀯𑀸 ‘‘𑀧𑀸𑀴𑀺 𑀧𑀦𑁂𑀢𑁆𑀣…𑀧𑁂… 𑀅𑀪𑀺𑀥𑀫𑁆𑀫𑁂 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀺𑀦𑁄 𑀯𑀲𑁂𑀦 𑀆𑀕𑀢𑀸’’𑀢𑀺 𑀆𑀳. 𑀇𑀥𑀸𑀧𑀺 𑀳𑀺 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑁂 ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘𑀢𑁆𑀢𑀸𑀭𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸, 𑀲𑁂𑀝𑁆𑀞𑁄 𑀘 𑀯𑀼𑀢𑁆𑀢𑁄 𑀯𑀼𑀢𑁆𑀢𑀮𑀓𑁆𑀔𑀡𑀽𑀧𑀧𑀢𑁆𑀢𑀺𑀢𑁄. 𑀬𑀣𑀸𑀯𑀼𑀢𑁆𑀢𑁂𑀲𑀼 𑀳𑀺 𑀧𑀜𑁆𑀘𑀲𑀼 𑀧𑀼𑀭𑀺𑀫𑀸 𑀘𑀢𑁆𑀢𑀸𑀭𑁄 𑀦𑀺𑀭𑁄𑀥𑀁 𑀦 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀧𑀭𑀺𑀬𑀸𑀬𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸 𑀦𑀸𑀫. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀅𑀦𑀸𑀕𑀸𑀫𑀻 𑀢𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁂𑀝𑁆𑀞𑁄 𑀦𑀸𑀫.

𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄𑀢𑀺𑀆𑀤𑀻𑀲𑀼 𑀓𑀢𑀫𑁄𑀢𑀺 𑀧𑀼𑀘𑁆𑀙𑀸𑀯𑀘𑀦𑀁, 𑀧𑀼𑀕𑁆𑀕𑀮𑁄𑀢𑀺 𑀅𑀲𑀸𑀥𑀸𑀭𑀡𑀢𑁄 𑀧𑀼𑀘𑁆𑀙𑀺𑀢𑀩𑁆𑀩𑀯𑀘𑀦𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀏𑀓𑀘𑁆𑀘𑁄𑀢𑀺 𑀏𑀓𑁄. 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀳𑀚𑀸𑀢𑀦𑀸𑀫𑀓𑀸𑀬𑁂𑀦 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀗𑁆𑀔𑀸𑀭𑀕𑀢𑀁, 𑀫𑀕𑁆𑀕𑀧𑀜𑁆𑀜𑀸𑀬 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀲𑁆𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑁄𑀧𑀺 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀺𑀲𑁂𑀲𑀢𑁄 𑀧𑀜𑁆𑀜𑀸𑀬 𑀏𑀯 𑀯𑀺𑀫𑀼𑀢𑁆𑀢𑁄, 𑀦 𑀢𑀲𑁆𑀲𑀸 𑀧𑀢𑀺𑀝𑁆𑀞𑀸𑀦𑀪𑀽𑀢𑁂𑀦 𑀅𑀝𑁆𑀞𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑁂𑀦 𑀲𑀸𑀢𑀺𑀲𑀬𑁂𑀦 𑀲𑀫𑀸𑀥𑀺𑀦𑀸𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀬𑁄 𑀅𑀭𑀺𑀬𑁄 𑀅𑀦𑀥𑀺𑀕𑀢𑀅𑀝𑁆𑀞𑀯𑀺𑀫𑁄𑀓𑁆𑀔𑁂𑀦 𑀲𑀩𑁆𑀩𑀲𑁄 𑀆𑀲𑀯𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀥𑀺𑀕𑀢𑁂𑀧𑀺 𑀳𑀺 𑀭𑀽𑀧𑀚𑁆𑀛𑀸𑀦𑀯𑀺𑀫𑁄𑀓𑁆𑀔𑁂 𑀦 𑀲𑁄 𑀲𑀸𑀢𑀺𑀲𑀬𑀲𑀫𑀸𑀥𑀺𑀦𑀺𑀲𑁆𑀲𑀺𑀢𑁄𑀢𑀺 𑀦 𑀢𑀲𑁆𑀲 𑀯𑀲𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀅𑀭𑀽𑀧𑀚𑁆𑀛𑀸𑀦𑁂𑀲𑀼 𑀧𑀦 𑀏𑀓𑀲𑁆𑀫𑀺𑀫𑁆𑀧𑀺 𑀲𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀬𑁂𑀯 𑀦𑀸𑀫 𑀳𑁄𑀢𑀺. 𑀢𑁂𑀦 𑀳𑀺 𑀅𑀝𑁆𑀞𑀯𑀺𑀫𑁄𑀓𑁆𑀔𑁂𑀓𑀤𑁂𑀲𑁂𑀦 𑀢𑀁𑀦𑀸𑀫𑀤𑀸𑀦𑀲𑀫𑀢𑁆𑀣𑁂𑀦 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀻𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀲𑀫𑀼𑀤𑀸𑀬𑁂 𑀳𑀺 𑀧𑀯𑀢𑁆𑀢𑁄 𑀯𑁄𑀳𑀸𑀭𑁄 𑀅𑀯𑀬𑀯𑁂𑀧𑀺 𑀤𑀺𑀲𑁆𑀲𑀢𑀺 𑀬𑀣𑀸 ‘‘𑀲𑀢𑁆𑀢𑀺𑀲𑀬𑁄’’𑀢𑀺. 𑀧𑀸𑀴𑀻𑀢𑀺 𑀅𑀪𑀺𑀥𑀫𑁆𑀫𑀧𑀸𑀴𑀺. 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀓𑀣𑀸𑀬𑀁. 𑀅𑀝𑁆𑀞𑀯𑀺𑀫𑁄𑀓𑁆𑀔𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀇𑀥𑀸𑀧𑀺 𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺.

𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀨𑀼𑀝𑁆𑀞𑀸𑀦𑀁 𑀅𑀦𑁆𑀢𑁄 𑀨𑀼𑀝𑁆𑀞𑀦𑁆𑀢𑁄, 𑀨𑀼𑀝𑁆𑀞𑀸𑀦𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀁 𑀅𑀦𑀦𑁆𑀢𑀭𑁄 𑀓𑀸𑀮𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁, 𑀨𑀼𑀝𑁆𑀞𑀸𑀦𑀦𑁆𑀢𑀭𑀓𑀸𑀮𑀫𑁂𑀯 𑀲𑀘𑁆𑀙𑀺𑀓𑀭𑁄𑀢𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑁄𑀧𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀯𑀦𑀧𑀼𑀁𑀲𑀓𑀁 𑀯𑀸 𑀏𑀢𑀁 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨) 𑀯𑀺𑀬. 𑀬𑁄 𑀳𑀺 𑀅𑀭𑀽𑀧𑀚𑁆𑀛𑀸𑀦𑁂𑀦 𑀭𑀽𑀧𑀓𑀸𑀬𑀢𑁄 𑀦𑀸𑀫𑀓𑀸𑀬𑁂𑀓𑀤𑁂𑀲𑀢𑁄 𑀘 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑁄, 𑀢𑁂𑀦 𑀦𑀺𑀭𑁄𑀥𑀲𑀗𑁆𑀔𑀸𑀢𑁄 𑀯𑀺𑀫𑁄𑀓𑁆𑀔𑁄 𑀆𑀮𑁄𑀘𑀺𑀢𑁄 𑀧𑀓𑀸𑀲𑀺𑀢𑁄 𑀯𑀺𑀬 𑀳𑁄𑀢𑀺, 𑀦 𑀧𑀦 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑁄, 𑀦𑀺𑀭𑁄𑀥𑀁 𑀧𑀦 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀏𑀓𑀘𑁆𑀘𑁂𑀲𑀼 𑀆𑀲𑀯𑁂𑀲𑀼 𑀔𑁂𑀧𑀺𑀢𑁂𑀲𑀼 𑀢𑁂𑀦 𑀲𑁄 𑀲𑀘𑁆𑀙𑀺𑀓𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀦𑀺𑀭𑁄𑀥𑀁 𑀬𑀣𑀸𑀆𑀮𑁄𑀘𑀺𑀢𑀁 𑀦𑀸𑀫𑀓𑀸𑀬𑁂𑀦 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 ‘‘𑀓𑀸𑀬𑀲𑀓𑁆𑀔𑀻’’𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀼 ‘‘𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀓𑀘𑁆𑀘𑀸𑀦𑀁 𑀆𑀲𑀯𑀸𑀦𑀁 𑀅𑀧𑀭𑀺𑀓𑁆𑀔𑀻𑀡𑀢𑁆𑀢𑀸. 𑀢𑁂𑀦𑀸𑀳 𑁋 ‘‘𑀛𑀸𑀦𑀨𑀲𑁆𑀲𑀁 𑀧𑀞𑀫𑀁 𑀨𑀼𑀲𑀢𑀺, 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺. 𑀅𑀬𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀏𑀓𑁂𑀓𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀓𑀸𑀬𑀲𑀓𑁆𑀔𑀺𑀪𑀸𑀯𑀁 𑀧𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀅𑀕𑁆𑀕𑀫𑀕𑁆𑀕𑀧𑁆𑀧𑀢𑁆𑀢𑀅𑀦𑀸𑀕𑀸𑀫𑀺𑀦𑁄 𑀘 𑀯𑀲𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀯𑀺𑀬 𑀧𑀜𑁆𑀘𑀯𑀺𑀥𑁄 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 ‘‘𑀓𑀸𑀬𑀲𑀓𑁆𑀔𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄’’𑀢𑀺.

𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄𑀢𑀺 𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀧𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀤𑀺𑀝𑁆𑀞𑀢𑁆𑀢𑀸 𑀧𑀢𑁆𑀢𑁄’’𑀢𑀺𑀧𑀺 𑀧𑀸𑀞𑁄. 𑀏𑀢𑁂𑀦 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀲𑀗𑁆𑀔𑀸𑀢𑀸𑀬 𑀤𑀺𑀝𑁆𑀞𑀺𑀬𑀸 𑀦𑀺𑀭𑁄𑀥𑀲𑁆𑀲 𑀧𑀢𑁆𑀢𑀢𑀁 𑀤𑀻𑀧𑁂𑀢𑀺. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸, 𑀲𑀼𑀔𑁄 𑀦𑀺𑀭𑁄𑀥𑁄𑀢𑀺 𑀜𑀸𑀢𑀁 𑀳𑁄𑀢𑀻’’𑀢𑀺. 𑀢𑀢𑁆𑀣 𑀧𑀜𑁆𑀜𑀸𑀬𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀬. 𑀧𑀞𑀫𑀨𑀮𑀝𑁆𑀞𑀢𑁄 𑀬𑀸𑀯 𑀅𑀕𑁆𑀕𑀫𑀕𑁆𑀕𑀝𑁆𑀞𑀸, 𑀢𑀸𑀯 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀢𑁂𑀦𑀸𑀳 ‘‘𑀲𑁄𑀧𑀺 𑀓𑀸𑀬𑀲𑀓𑁆𑀔𑀺 𑀯𑀺𑀬 𑀙𑀩𑁆𑀩𑀺𑀥𑁄 𑀳𑁄𑀢𑀻’’𑀢𑀺. 𑀬𑀣𑀸 𑀧𑀦 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀧𑀜𑁆𑀘𑀯𑀺𑀥𑁄 𑀯𑀼𑀢𑁆𑀢𑁄, 𑀏𑀯𑀁 𑀅𑀬𑀫𑁆𑀧𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀘𑀢𑀽𑀳𑀺 𑀭𑀽𑀧𑀚𑁆𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀬 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀪𑀸𑀯𑀧𑁆𑀧𑀢𑁆𑀢𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀧𑀜𑁆𑀘𑀯𑀺𑀥𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀉𑀤𑁆𑀥𑀁 𑀤𑀼𑀓𑁆𑀔𑀦𑁆𑀢𑀺. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀬𑀸𑀣𑀸𑀯𑀢𑁄 𑀧𑀚𑀸𑀦𑀸𑀢𑀺. 𑀬𑀲𑁆𑀫𑀸 𑀧𑀦 𑀢𑀡𑁆𑀳𑀸 𑀤𑀼𑀓𑁆𑀔𑀁 𑀚𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀢𑀢𑁄 𑀢𑀁 𑀤𑀼𑀓𑁆𑀔𑀁 𑀲𑀫𑀼𑀤𑁂𑀢𑀺, 𑀢𑀲𑁆𑀫𑀸 𑀦𑀁 ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑀬𑀲𑁆𑀫𑀸 𑀧𑀦 𑀇𑀤𑀁 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄 𑀘 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺 𑀅𑀧𑁆𑀧𑀯𑀢𑁆𑀢𑀺𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀅𑀭𑀺𑀬𑁄 𑀧𑀦 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀢𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀺, 𑀢𑁂𑀦 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀦𑀸𑀦𑀓𑁆𑀔𑀡𑁂 𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁. 𑀇𑀤𑀸𑀦𑀺 𑀢𑀁 𑀏𑀓𑀓𑁆𑀔𑀡𑁂 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀲𑀢𑁆𑀣𑁄 𑀆𑀕𑀫𑀺𑀲𑁆𑀲𑀢𑀺.

𑀲𑀤𑁆𑀥𑀸𑀬 𑀯𑀺𑀫𑀼𑀢𑁆𑀢𑁄𑀢𑀺 𑀏𑀢𑁂𑀦 𑀲𑀩𑁆𑀩𑀣𑀸 𑀅𑀯𑀺𑀫𑀼𑀢𑁆𑀢𑀲𑁆𑀲𑀧𑀺 𑀲𑀤𑁆𑀥𑀸𑀫𑀢𑁆𑀢𑁂𑀦 𑀯𑀺𑀫𑀼𑀢𑁆𑀢𑀪𑀸𑀯𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀯𑀸 𑀲𑀤𑁆𑀥𑀸𑀬 𑀅𑀥𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀲𑁄𑀢𑀸𑀧𑀢𑁆𑀢𑀺𑀨𑀮’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀲𑀤𑁆𑀤𑀳𑀦𑁆𑀢𑀲𑁆𑀲𑀸𑀢𑀺 ‘‘𑀏𑀓𑀁𑀲𑀢𑁄 𑀅𑀬𑀁 𑀧𑀝𑀺𑀧𑀤𑀸 𑀓𑀺𑀮𑁂𑀲𑀓𑁆𑀔𑀬𑀁 𑀆𑀯𑀳𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀪𑀸𑀲𑀺𑀢𑀢𑁆𑀢𑀸’’𑀢𑀺 𑀏𑀯𑀁 𑀲𑀤𑁆𑀤𑀳𑀦𑁆𑀢𑀲𑁆𑀲. 𑀬𑀲𑁆𑀫𑀸 𑀧𑀦𑀲𑁆𑀲 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀧𑀳𑀸𑀦𑀯𑀲𑁂𑀦 𑀪𑀸𑀯𑀦𑀸𑀬 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀧𑀲𑁆𑀲𑀢𑁄 𑀢𑀢𑁆𑀣 𑀢𑀢𑁆𑀣 𑀧𑀘𑁆𑀘𑀓𑁆𑀔𑀢𑀸𑀧𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀤𑁆𑀤𑀳𑀦𑁆𑀢𑀲𑁆𑀲 𑀯𑀺𑀬𑀸’’𑀢𑀺. 𑀲𑁂𑀲𑀧𑀤𑀤𑁆𑀯𑀬𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀏𑀢𑁆𑀣 𑀘 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀪𑀸𑀯𑀦𑀸𑀢𑀺 𑀯𑀘𑀦𑁂𑀦 𑀆𑀕𑀫𑀦𑀻𑀬𑀧𑀝𑀺𑀧𑀤𑀸𑀦𑀸𑀦𑀢𑁆𑀢𑁂𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀦𑀁 𑀧𑀜𑁆𑀜𑀸𑀦𑀸𑀦𑀢𑁆𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑀺𑀢𑀁. 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀫𑁆𑀧𑀺 (𑀧𑀼. 𑀧. 𑀅𑀝𑁆𑀞. 𑁨𑁮) ‘‘𑀦𑁂𑀲𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺, 𑀧𑀜𑁆𑀜𑀸𑀬 𑀦𑀸𑀦𑀢𑁆𑀢𑀁 𑀅𑀢𑁆𑀣𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑁋 ‘‘𑀆𑀕𑀫𑀦𑀻𑀬𑀦𑀸𑀦𑀢𑁆𑀢𑁂𑀦𑁂𑀯 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀅𑀥𑀺𑀫𑀢𑁆𑀢𑀢𑀸𑀬 𑀧𑀼𑀩𑁆𑀩𑀗𑁆𑀕𑀫𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀢𑁂𑀦𑀸𑀳 ‘‘𑀥𑀫𑁆𑀫𑁄’’𑀢𑀺𑀆𑀤𑀺. 𑀲𑀤𑁆𑀥𑀁 𑀅𑀦𑀼𑀲𑁆𑀲𑀭𑀢𑀺 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀁 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀇𑀫𑀫𑀢𑁆𑀣𑀁 ‘‘𑀏𑀲𑁂𑀯 𑀦𑀬𑁄’’𑀢𑀺 𑀅𑀢𑀺𑀤𑀺𑀲𑀢𑀺. 𑀧𑀜𑁆𑀜𑀁 𑀯𑀸𑀳𑁂𑀢𑀻𑀢𑀺 𑀧𑀜𑁆𑀜𑀸𑀯𑀸𑀳𑀻, 𑀧𑀜𑁆𑀜𑀁 𑀲𑀸𑀢𑀺𑀲𑀬𑀁 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺. 𑀲𑀤𑁆𑀥𑀸𑀯𑀸𑀳𑀺𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀤𑀺𑀓𑀣𑀸𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀤𑀻𑀲𑀼 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀯𑀢𑁆𑀢𑀩𑁆𑀩𑀓𑀣𑀸. 𑀏𑀢𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀤𑀻𑀦𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑁂. 𑀦𑀦𑀼 𑀘 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀯𑀲𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀓𑀸𑀬𑀲𑀓𑁆𑀔𑀻𑀆𑀤𑀬𑁄 𑀘 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸, 𑀓𑀣𑀫𑀺𑀥 𑀅𑀭𑀽𑀧𑀚𑁆𑀛𑀸𑀦𑀮𑀸𑀪𑀻𑀯𑀲𑁂𑀦𑁂𑀯 𑀉𑀤𑁆𑀥𑀝𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺.

𑀨𑀼𑀲𑀺𑀢𑁆𑀯𑀸 𑀧𑀢𑁆𑀯𑀸. 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀦 𑀆𑀲𑀯𑀸 𑀧𑀜𑁆𑀜𑀸𑀬 𑀧𑀲𑁆𑀲𑀻𑀬𑀦𑁆𑀢𑀺, 𑀤𑀲𑁆𑀲𑀦𑀓𑀸𑀭𑀡𑀸 𑀧𑀜𑁆𑀜𑀸𑀬 𑀧𑀭𑀺𑀓𑁆𑀔𑀻𑀡𑀸 ‘‘𑀤𑀺𑀲𑁆𑀯𑀸 𑀧𑀜𑁆𑀜𑀸𑀬 𑀧𑀭𑀺𑀓𑁆𑀔𑀻𑀡𑀸’’𑀢𑀺 𑀯𑀼𑀢𑁆𑀢𑀸. 𑀤𑀲𑁆𑀲𑀦𑀸𑀬𑀢𑁆𑀢𑀧𑀭𑀺𑀓𑁆𑀔𑀬𑀢𑁆𑀢𑀸 𑀏𑀯 𑀳𑀺 𑀤𑀲𑁆𑀲𑀦𑀁 𑀆𑀲𑀯𑀸𑀦𑀁 𑀔𑀬𑀲𑁆𑀲 𑀧𑀼𑀭𑀺𑀫𑀓𑀺𑀭𑀺𑀬𑀸 𑀳𑁄𑀢𑀻𑀢𑀺. 𑀢𑀣𑀸𑀕𑀢𑁂𑀦 𑀧𑀯𑁂𑀤𑀺𑀢𑀸𑀢𑀺 𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀣𑀸𑀕𑀢𑁂𑀦 𑀧𑀝𑀺𑀯𑀺𑀤𑁆𑀥𑀸 𑀯𑀺𑀤𑀺𑀢𑀸 𑀧𑀘𑁆𑀙𑀸 𑀧𑀭𑁂𑀲𑀁 𑀧𑀸𑀓𑀝𑀻𑀓𑀢𑀸. ‘‘𑀘𑀢𑀼𑀲𑀘𑁆𑀘𑀥𑀫𑁆𑀫𑀸’’𑀢𑀺 𑀯𑀢𑁆𑀯𑀸 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀲𑀻𑀮𑀸𑀤𑀻𑀦𑀁 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀁 𑀓𑀣𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀣𑁂𑀦𑀸𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀧𑀬𑁄𑀚𑀦𑁂𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀻𑀢𑀺𑀆𑀤𑀺𑀓𑁂𑀦 𑀅𑀢𑁆𑀣𑁂𑀦. 𑀓𑀸𑀭𑀡𑁂𑀦𑀸𑀢𑀺 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀦𑀸 𑀓𑀸𑀭𑀡𑁂𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀸𑀥𑀺𑀆𑀤𑀺𑀧𑀤𑀝𑁆𑀞𑀸𑀦𑀢𑀸𑀬 𑀲𑀻𑀮𑀸𑀤𑀺 𑀓𑀸𑀭𑀡𑁂. 𑀘𑀺𑀡𑁆𑀡𑀘𑀭𑀺𑀢𑀢𑁆𑀢𑀸𑀢𑀺 𑀲𑀤𑁆𑀥𑀸𑀘𑀺𑀡𑁆𑀡𑀪𑀸𑀯𑁂𑀦 𑀲𑀫𑁆𑀩𑁄𑀥𑀸𑀯𑀳𑀪𑀸𑀯𑁂. 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀺𑀢𑀸 𑀯𑀺𑀲𑁂𑀲𑁂𑀦 𑀘𑀭𑀺𑀢𑀸, 𑀢𑁂𑀲𑀼 𑀢𑁂𑀦 𑀧𑀜𑁆𑀜𑀸 𑀲𑀼𑀝𑁆𑀞𑀼 𑀘𑀭𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀧𑀢𑀺𑀝𑁆𑀞𑀺𑀢𑀸 𑀳𑁄𑀢𑀺 𑀫𑀕𑁆𑀕𑁂𑀦 𑀆𑀕𑀢𑀢𑁆𑀢𑀸. 𑀫𑀢𑁆𑀢𑀸𑀬 𑀧𑀭𑀺𑀢𑁆𑀢𑀧𑁆𑀧𑀫𑀸𑀡𑁂𑀦. 𑀑𑀮𑁄𑀓𑀦𑀁 𑀔𑀫𑀦𑁆𑀢𑀺, 𑀧𑀜𑁆𑀜𑀸𑀬 𑀕𑀳𑁂𑀢𑀩𑁆𑀩𑀢𑀁 𑀉𑀧𑁂𑀦𑁆𑀢𑀺.

𑀢𑀬𑁄𑀢𑀺 𑀓𑀸𑀬𑀲𑀓𑁆𑀔𑀺𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀸. 𑀬𑀣𑀸𑀞𑀺𑀢𑁄𑀯 𑀧𑀸𑀴𑀺𑀅𑀢𑁆𑀣𑁄, 𑀦 𑀢𑀢𑁆𑀣 𑀓𑀺𑀜𑁆𑀘𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀅𑀯𑀼𑀢𑁆𑀢𑀁 𑀯𑀤𑀢𑀺. 𑀢𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀬𑀁 𑀓𑀸𑀢𑀩𑁆𑀩𑀁, 𑀢𑀲𑁆𑀲 𑀅𑀥𑀺𑀕𑀢𑀢𑁆𑀢𑀸. 𑀉𑀧𑀭𑀺 𑀧𑀦 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀅𑀢𑁆𑀣𑀸𑀬 𑀲𑁂𑀯𑀫𑀸𑀦𑀸 𑀅𑀦𑀼𑀮𑁄𑀫𑀲𑁂𑀦𑀸𑀲𑀦𑀁, 𑀪𑀚𑀫𑀸𑀦𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑁂, 𑀲𑀫𑀦𑁆𑀦𑀸𑀦𑀬𑀫𑀸𑀦𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀼𑀧𑀼𑀩𑁆𑀩𑁂𑀦 𑀪𑀸𑀯𑀦𑀸𑀫𑀕𑁆𑀕𑀧𑁆𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺 𑀫𑀕𑁆𑀕𑀲𑁆𑀲 𑀅𑀦𑁂𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑀸𑀬𑀸𑀢𑀺 𑀅𑀬𑀫𑁂𑀢𑁆𑀣 𑀲𑀼𑀢𑁆𑀢𑀧𑀤𑁂𑀲𑁂 𑀧𑀸𑀴𑀺𑀬𑀸 𑀅𑀢𑁆𑀣𑁄.

𑀇𑀫𑀫𑁂𑀯 𑀧𑀸𑀴𑀺𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀦𑀼𑀲𑀸𑀭𑀻’’𑀢𑀺 𑀫𑀕𑁆𑀕𑀝𑁆𑀞𑁂 𑀧𑀼𑀕𑁆𑀕𑀮𑁂 𑀯𑀢𑁆𑀯𑀸 ‘‘𑀇𑀫𑀲𑁆𑀲 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀢𑁂𑀲𑀁 𑀯𑀲𑁂𑀦 𑀅𑀦𑀼𑀮𑁄𑀫𑀲𑁂𑀦𑀸𑀲𑀦𑀲𑁂𑀯𑀦𑀸𑀤𑀻𑀦𑀁 𑀯𑀼𑀢𑁆𑀢𑀢𑁆𑀢𑀸 𑀇𑀫𑀫𑁂𑀯 𑀬𑀣𑀸𑀯𑀼𑀢𑁆𑀢𑀁 𑀧𑀸𑀴𑀺𑀧𑀤𑁂𑀲𑀁 𑀕𑀳𑁂𑀢𑁆𑀯𑀸 ‘‘𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑁄’’𑀢𑀺 𑀯𑀤𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄𑀢𑀺 𑀲𑁄 𑀯𑀺𑀢𑀡𑁆𑀟𑀯𑀸𑀤𑀻 𑀏𑀯𑀁 𑀯𑀢𑁆𑀢𑀩𑁆𑀩𑁄. 𑀬𑀤𑀺 𑀫𑀕𑁆𑀕𑀝𑁆𑀞𑀧𑀼𑀕𑁆𑀕𑀮𑁂 𑀯𑀢𑁆𑀯𑀸 𑀅𑀦𑀼𑀮𑁄𑀫𑀺𑀓𑀲𑁂𑀦𑀸𑀲𑀦𑀲𑁂𑀯𑀦𑀸𑀤𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀏𑀯 𑀳𑀼𑀢𑁆𑀯𑀸 𑀢𑁂 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀲𑁂𑀦𑀸𑀲𑀦𑀧𑀝𑀺𑀲𑀁𑀬𑀼𑀢𑁆𑀢𑀭𑀽𑀧𑀸𑀤𑀺𑀯𑀺𑀧𑀲𑁆𑀲𑀦𑀕𑁆𑀕𑀳𑀡𑀲𑁆𑀫𑀺𑀁 𑀢𑀯 𑀫𑀢𑁂𑀦 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀏𑀯 𑀆𑀧𑀚𑁆𑀚𑁂𑀬𑁆𑀬𑀼𑀁, 𑀦 𑀘𑁂𑀢𑀁 𑀏𑀯𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀢𑁆𑀢𑀁 𑀫𑁂 𑀮𑀤𑁆𑀥𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀫𑀸 𑀓𑀣𑁂𑀳𑀻𑀢𑀺 𑀯𑀸𑀭𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀬𑀤𑀺 𑀅𑀜𑁆𑀜𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀯𑀁 𑀲𑀦𑁆𑀢𑁂𑀢𑀺 𑀦𑀸𑀦𑀸𑀘𑀺𑀢𑁆𑀢𑁂𑀦𑁂𑀯 𑀲𑁂𑀦𑀸𑀲𑀦𑀧𑀝𑀺𑀲𑁂𑀯𑀦𑀸𑀤𑀺𑀓𑁂 𑀲𑀢𑀺. 𑀢𑀢𑁆𑀣 𑀧𑀸𑀴𑀺𑀬𑀁 𑀬𑀤𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀫𑀗𑁆𑀕𑀺𑀦𑁄 𑀏𑀯 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀓𑀸𑀮𑁂𑀧𑀺 𑀮𑁄𑀓𑀼𑀢𑁆𑀢𑀭𑀲𑀫𑀗𑁆𑀕𑀺𑀢𑀁 𑀲𑀘𑁂 𑀲𑀫𑁆𑀧𑀝𑀺𑀘𑁆𑀙𑀲𑀺, 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀲𑀺 𑀲𑀼𑀢𑁆𑀢𑀯𑀺𑀭𑁄𑀥𑀤𑀻𑀧𑀦𑀢𑁄. 𑀢𑁂𑀦𑀸𑀳 ‘‘𑀲𑀢𑁆𑀣𑀸𑀭𑀸 𑀳𑀻’’𑀢𑀺𑀆𑀤𑀺. 𑀥𑀫𑁆𑀫𑀯𑀺𑀘𑀸𑀭𑀡𑀸 𑀦𑀸𑀫 𑀢𑀼𑀬𑁆𑀳𑀁 𑀅𑀯𑀺𑀲𑀬𑁄, 𑀢𑀲𑁆𑀫𑀸 𑀬𑀸𑀕𑀼𑀁 𑀧𑀺𑀯𑀸𑀳𑀻𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄.

𑁧𑁮𑁩. 𑀆𑀤𑀺𑀓𑁂𑀦𑁂𑀯𑀸𑀢𑀺 𑀧𑀞𑀫𑁂𑀦𑁂𑀯. 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀢𑀺 𑀅𑀦𑀼𑀧𑀼𑀩𑁆𑀩𑁂𑀦𑁂𑀯 𑀧𑀯𑀢𑁆𑀢𑀲𑀺𑀓𑁆𑀔𑀸𑀬. 𑀢𑁂𑀦𑀸𑀳 ‘‘𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦’’𑀦𑁆𑀢𑀺. 𑀲𑀤𑁆𑀥𑀸 𑀚𑀸𑀢𑀸 𑀏𑀢𑀲𑁆𑀲𑀸𑀢𑀺 𑀲𑀤𑁆𑀥𑀸𑀚𑀸𑀢𑁄, 𑀅𑀕𑁆𑀬𑀸𑀳𑀺𑀢𑀸𑀢𑀺𑀧𑀓𑁆𑀔𑁂𑀧𑁂𑀦 𑀚𑀸𑀢-𑀲𑀤𑁆𑀤𑀲𑁆𑀲 𑀧𑀘𑁆𑀙𑀸𑀯𑀘𑀦𑀁. 𑀏𑀯𑀫𑁂𑀢𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀦𑀁 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀸. 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀢𑀺 𑀉𑀧𑀝𑁆𑀞𑀸𑀦𑀯𑀲𑁂𑀦. 𑀲𑀸𑀥𑀼𑀓𑀁 𑀓𑀢𑁆𑀯𑀸 𑀥𑀸𑀭𑁂𑀢𑀻𑀢𑀺 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀯𑀸𑀘𑀼𑀕𑁆𑀕𑀢𑀓𑀭𑀡𑀯𑀲𑁂𑀦 𑀢𑀁 𑀧𑀕𑀼𑀡𑀁 𑀓𑀢𑁆𑀯𑀸 𑀲𑀸𑀭𑀯𑀲𑁂𑀦 𑀥𑀸𑀭𑁂𑀢𑀺. 𑀙𑀦𑁆𑀤𑁄 𑀚𑀸𑀬𑀢𑀻𑀢𑀺 𑀥𑀫𑁆𑀫𑁂𑀲𑀼 𑀦𑀺𑀚𑁆𑀛𑀸𑀦𑀓𑁆𑀔𑀫𑁂𑀲𑀼 𑀇𑀫𑁂 𑀥𑀫𑁆𑀫𑁂 𑀪𑀸𑀯𑀦𑀸𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀢𑁄 𑀉𑀲𑁆𑀲𑀸𑀫𑀻𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑁄 𑀚𑀸𑀬𑀢𑀺. 𑀉𑀲𑁆𑀲𑀳𑀢𑀻𑀢𑀺 𑀙𑀦𑁆𑀤𑁄 𑀉𑀧𑁆𑀧𑀸𑀤𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀢𑀢𑁄 𑀪𑀸𑀯𑀦𑀸𑀭𑀫𑁆𑀪𑀯𑀲𑁂𑀦 𑀉𑀲𑁆𑀲𑀳𑀢𑀺. 𑀢𑀼𑀮𑀬𑀢𑀺𑀢𑀺 𑀲𑀫𑁆𑀫𑀲𑀦𑀯𑀲𑁂𑀦 𑀲𑀗𑁆𑀔𑀸𑀭𑁂. 𑀢𑀻𑀭𑀡𑀯𑀺𑀧𑀲𑁆𑀲𑀦𑀸𑀬 𑀢𑀼𑀮𑀬𑀦𑁆𑀢𑁄𑀢𑀺 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀉𑀧𑀭𑀺 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀯𑀲𑁂𑀦 𑀧𑀭𑀺𑀢𑀼𑀮𑀬𑀦𑁆𑀢𑁄 𑀧𑀝𑀺𑀚𑀸𑀦𑀦𑁆𑀢𑁄. 𑀫𑀕𑁆𑀕𑀧𑀥𑀸𑀦𑀁 𑀧𑀤𑀳𑀢𑀻𑀢𑀺 𑀫𑀕𑁆𑀕𑀮𑀓𑁆𑀔𑀡𑀁 𑀧𑀥𑀸𑀦𑀺𑀓𑀁 𑀫𑀕𑁆𑀕𑀁 𑀧𑀤𑀳𑀢𑀺. 𑀧𑁂𑀲𑀺𑀢𑀘𑀺𑀢𑁆𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺 𑀧𑁂𑀲𑀺𑀢𑀘𑀺𑀢𑁆𑀢𑁄. 𑀦𑀸𑀫𑀓𑀸𑀬𑁂𑀦𑀸𑀢𑀺 𑀫𑀕𑁆𑀕𑀧𑁆𑀧𑀝𑀺𑀧𑀸𑀝𑀺𑀬𑀸 𑀢𑀁𑀢𑀁𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀦𑀸𑀫𑀓𑀸𑀬𑁂𑀦. 𑀦 𑀧𑀦 𑀓𑀺𑀜𑁆𑀘𑀺 𑀆𑀳𑀸𑀢𑀺 𑀤𑀽𑀭𑀢𑀸𑀬 𑀲𑀫𑀸𑀦𑀁 𑀦 𑀓𑀺𑀜𑁆𑀘𑀺 𑀯𑀘𑀦𑀁 𑀪𑀕𑀯𑀸 𑀆𑀳 𑀢𑁂 𑀤𑀴𑁆𑀳𑀢𑀭𑀁 𑀦𑀺𑀕𑁆𑀕𑀡𑁆𑀳𑀺𑀢𑀼𑀁.