𑁧. 𑀕𑀳𑀧𑀢𑀺𑀯𑀕𑁆𑀕𑁄

𑁧. 𑀓𑀦𑁆𑀤𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀆𑀭𑀸𑀫𑀧𑁄𑀓𑁆𑀔𑀭𑀡𑀻𑀆𑀤𑀻𑀲𑀽𑀢𑀺 𑀆𑀭𑀸𑀫𑀧𑁄𑀓𑁆𑀔𑀭𑀡𑀻𑀉𑀬𑁆𑀬𑀸𑀦𑀘𑁂𑀢𑀺𑀬𑀝𑁆𑀞𑀸𑀦𑀸𑀤𑀻𑀲𑀼. 𑀉𑀲𑁆𑀲𑀦𑁆𑀦𑀸𑀢𑀺 𑀩𑀳𑀼𑀮𑀸. 𑀅𑀲𑁄𑀓𑀓𑀡𑀺𑀓𑀸𑀭𑀓𑁄𑀯𑀺𑀴𑀸𑀭𑀓𑀼𑀫𑁆𑀪𑀻𑀭𑀸𑀚𑀭𑀼𑀓𑁆𑀔𑁂𑀳𑀺 𑀲𑀫𑁆𑀫𑀺𑀲𑁆𑀲𑀢𑀸𑀬 𑀢𑀁 𑀘𑀫𑁆𑀧𑀓𑀯𑀦𑀁 𑀦𑀻𑀮𑀸𑀤𑀺𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀧𑀝𑀺𑀫𑀡𑁆𑀟𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀦 𑀘𑀫𑁆𑀧𑀓𑀭𑀼𑀓𑁆𑀔𑀸𑀦𑀁𑀬𑁂𑀯 𑀦𑀻𑀮𑀸𑀤𑀺𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀢𑀸𑀬𑀸𑀢𑀺 𑀯𑀤𑀦𑁆𑀢𑀺. 𑀪𑀕𑀯𑀸 𑀓𑀼𑀲𑀼𑀫𑀕𑀦𑁆𑀥𑀲𑀼𑀕𑀦𑁆𑀥𑁂 𑀘𑀫𑁆𑀧𑀓𑀯𑀦𑁂 𑀯𑀺𑀳𑀭𑀢𑀻𑀢𑀺 𑀇𑀫𑀺𑀦𑀸 𑀦 𑀫𑀸𑀧𑀦𑀓𑀸𑀮𑁂 𑀏𑀯 𑀢𑀲𑁆𑀫𑀺𑀁 𑀦𑀕𑀭𑁂 𑀘𑀫𑁆𑀧𑀓𑀭𑀼𑀓𑁆𑀔𑀸 𑀉𑀲𑁆𑀲𑀦𑁆𑀦𑀸, 𑀅𑀣 𑀔𑁄 𑀅𑀧𑀭𑀪𑀸𑀕𑁂𑀧𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀜𑁆𑀘𑀲𑀢𑀫𑀢𑁆𑀢𑁂𑀳𑀺 𑀅𑀟𑁆𑀠𑀢𑁂𑀴𑀲𑁂𑀳𑀻’’𑀢𑀺 𑀏𑀯𑀁 𑀅𑀤𑀲𑁆𑀲𑀺𑀢𑀧𑀭𑀺𑀘𑁆𑀙𑁂𑀤𑁂𑀦. 𑀳𑀢𑁆𑀣𑀺𑀦𑁄 𑀘𑀸𑀭𑁂𑀢𑀺 𑀲𑀺𑀓𑁆𑀔𑀸𑀧𑁂𑀢𑀻𑀢𑀺 𑀳𑀢𑁆𑀣𑀸𑀘𑀭𑀺𑀬𑁄 𑀳𑀢𑁆𑀣𑀻𑀦𑀁 𑀲𑀺𑀓𑁆𑀔𑀸𑀧𑀓𑁄, 𑀢𑀲𑁆𑀲 𑀧𑀼𑀢𑁆𑀢𑁄𑀢𑀺 𑀆𑀳 ‘‘𑀳𑀢𑁆𑀣𑀸𑀘𑀭𑀺𑀬𑀲𑁆𑀲 𑀧𑀼𑀢𑁆𑀢𑁄’’𑀢𑀺. 𑀢𑀤𑀸 𑀪𑀕𑀯𑀸 𑀢𑁂𑀲𑀁 𑀧𑀲𑀸𑀤𑀚𑀦𑀦𑀢𑁆𑀣𑀁 𑀅𑀢𑁆𑀢𑀦𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀅𑀦𑀺𑀕𑀼𑀳𑀺𑀢𑁆𑀯𑀸𑀯 𑀦𑀺𑀲𑀺𑀦𑁆𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀙𑀩𑁆𑀩𑀡𑁆𑀡𑀸𑀦𑀁 𑀖𑀦𑀩𑀼𑀤𑁆𑀥𑀭𑀲𑁆𑀫𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀪𑀕𑀯𑀢𑁄 𑀘𑁂𑀯 𑀕𑀸𑀭𑀯𑁂𑀦𑀸𑀢𑀺 𑀪𑀕𑀯𑀢𑁄 𑀕𑀭𑀼𑀪𑀸𑀯𑁂𑀦, 𑀪𑀕𑀯𑀢𑀺 𑀕𑀸𑀭𑀯𑁂𑀦𑀸𑀢𑀺 𑀯𑀸 𑀧𑀸𑀞𑁄.

𑀦𑀺𑀘𑁆𑀘𑀁 𑀦 𑀳𑁄𑀢𑀻𑀢𑀺 𑀅𑀪𑀺𑀡𑁆𑀳𑀁 𑀦 𑀳𑁄𑀢𑀺, 𑀓𑀤𑀸𑀘𑀺𑀤𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀡𑁆𑀳𑀦𑀺𑀘𑁆𑀘𑀢𑀸 𑀳𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸, 𑀦 𑀓𑀽𑀝𑀝𑁆𑀞𑀦𑀺𑀘𑁆𑀘𑀢𑀸. 𑀮𑁄𑀓𑁂 𑀓𑀺𑀜𑁆𑀘𑀺 𑀯𑀺𑀫𑁆𑀳𑀬𑀸𑀯𑀳𑀁 𑀤𑀺𑀲𑁆𑀯𑀸 𑀳𑀢𑁆𑀣𑀯𑀺𑀓𑀸𑀭𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀅𑀗𑁆𑀕𑀼𑀮𑀺𑀁 𑀯𑀸 𑀨𑁄𑀝𑀬𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺. 𑀅𑀪𑀽𑀢𑀧𑀼𑀩𑁆𑀩𑀁 𑀪𑀽𑀢𑀦𑁆𑀢𑀺 𑀅𑀬𑀁 𑀦𑀺𑀭𑀼𑀢𑁆𑀢𑀺𑀦𑀬𑁄 𑀬𑁂𑀪𑀼𑀬𑁆𑀬𑁂𑀦 𑀉𑀧𑀸𑀤𑀸𑀬 𑀭𑀼𑀴𑁆𑀳𑀻𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀧𑀸𑀴𑀺𑀬𑀁 ‘‘𑀬𑁂𑀧𑀺 𑀢𑁂, 𑀪𑁄 𑀕𑁄𑀢𑀫, 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀓𑀺𑀜𑁆𑀘𑀺 𑀅𑀓𑀢𑁆𑀢𑀩𑁆𑀩𑀫𑁆𑀧𑀺 𑀓𑀭𑀺𑀬𑀫𑀸𑀦𑀁 𑀤𑀼𑀓𑁆𑀓𑀭𑀪𑀸𑀯𑁂𑀦 𑀯𑀺𑀫𑁆𑀳𑀬𑀸𑀯𑀳𑀁 𑀳𑁄𑀢𑀺, 𑀢𑀣𑀸 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁, 𑀧𑀼𑀭𑀺𑀫𑀁 𑀕𑀭𑀳𑀘𑁆𑀙𑀭𑀺𑀬𑀁, 𑀧𑀘𑁆𑀙𑀺𑀫𑀁 𑀧𑀲𑀁𑀲𑀘𑁆𑀙𑀭𑀺𑀬𑀁, 𑀢𑀤𑀼𑀪𑀬𑀁 𑀲𑀼𑀢𑁆𑀢𑀧𑀤𑀲𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀫𑁆𑀫𑀸 𑀧𑀝𑀺𑀧𑀸𑀤𑀺𑀢𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀸𑀬𑀁 𑀞𑀧𑀺𑀢𑁄. 𑀏𑀲𑀸 𑀧𑀝𑀺𑀧𑀤𑀸 𑀧𑀭𑀫𑀸𑀢𑀺 𑀏𑀢𑀧𑀭𑀫𑀁, 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄𑀬𑀁 𑀬𑀣𑀸 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁭𑁦). 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀝𑀺𑀧𑀤𑀸𑀬 𑀢𑀼𑀫𑁆𑀳𑁂𑀳𑀺 𑀧𑀝𑀺𑀧𑀸𑀤𑀺𑀢𑁄, 𑀅𑀢𑀻𑀢𑁂𑀧𑀺 𑀓𑀸𑀮𑁂 𑀩𑀼𑀤𑁆𑀥𑀸 𑀏𑀢𑀧𑀭𑀫𑀁𑀬𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀫𑁆𑀫𑀸 𑀧𑀝𑀺𑀧𑀸𑀤𑁂𑀲𑀼𑀁, 𑀅𑀦𑀸𑀕𑀢𑁂𑀧𑀺 𑀓𑀸𑀮𑁂 𑀏𑀢𑀧𑀭𑀫𑀁𑀬𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀫𑁆𑀫𑀸 𑀧𑀝𑀺𑀧𑀸𑀤𑁂𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀩𑁆𑀩𑀸𑀚𑀓𑁄 𑀦𑀬𑀕𑁆𑀕𑀸𑀳𑁂𑀦 𑀤𑀺𑀝𑁆𑀞𑁂𑀦 𑀅𑀤𑀺𑀝𑁆𑀞𑀁 𑀅𑀦𑀼𑀫𑀺𑀦𑀦𑁆𑀢𑁄 𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀁 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀲𑀫𑀲𑀫𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀏𑀯𑀁 𑀤𑀲𑁆𑀲𑁂𑀦𑁆𑀢𑁄 𑀘 𑀢𑁂𑀲𑀁 𑀲𑀼𑀥𑀫𑁆𑀫𑀢𑀜𑁆𑀘 𑀢𑀣𑀸 𑀤𑀲𑁆𑀲𑁂𑀢𑀺 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸 𑀧𑀦 𑀦𑁂𑀲𑀁 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑀸𑀢𑀺. 𑀦 𑀇𑀢𑁄 𑀪𑀺𑀬𑁆𑀬𑁄𑀢𑀺 𑀇𑀫𑀺𑀦𑀸 𑀧𑀸𑀴𑀺𑀬𑀁 𑀏𑀢𑀧𑀭𑀫𑀁𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺 𑀲𑀻𑀮𑀧𑀤𑀝𑁆𑀞𑀸𑀦𑀢𑁆𑀢𑀸 𑀲𑀫𑀸𑀥𑀺𑀲𑁆𑀲, 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀢𑁆𑀢𑀸 𑀘 𑀧𑀜𑁆𑀜𑀸𑀬 𑀲𑀻𑀮𑁂𑀧𑀺 𑀘 𑀅𑀪𑀺𑀲𑀫𑀸𑀘𑀸𑀭𑀺𑀓𑀧𑀼𑀩𑁆𑀩𑀓𑀢𑁆𑀢𑀸 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀲𑁆𑀲 𑀯𑀼𑀢𑁆𑀢𑀁 ‘‘𑀆𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸’’𑀢𑀺.

𑁨. 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀆𑀤𑀻𑀲𑀼 𑀅𑀦𑀦𑁆𑀢𑁄𑀕𑀥𑀢𑁆𑀢𑀸 ‘‘𑀧𑀸𑀝𑀺𑀏𑀓𑁆𑀓𑁄 𑀅𑀦𑀼𑀲𑀦𑁆𑀥𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀪𑀕𑀯𑀸 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀲𑀦𑁆𑀢𑀓𑀸𑀭𑀡𑀦𑁆𑀢𑀺 𑀉𑀧𑀲𑀦𑁆𑀢𑀪𑀸𑀯𑀓𑀸𑀭𑀡𑀁. 𑀢𑀜𑁆𑀳𑀺 𑀅𑀭𑀺𑀬𑀸𑀦𑀁𑀬𑁂𑀯 𑀯𑀺𑀲𑀬𑁄, 𑀢𑀢𑁆𑀣𑀸𑀧𑀺 𑀘 𑀩𑀼𑀤𑁆𑀥𑀸𑀦𑀁 𑀏𑀯 𑀅𑀦𑀯𑀲𑁂𑀲𑀢𑁄 𑀯𑀺𑀲𑀬𑁄𑀢𑀺 𑀇𑀫𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀤𑀲𑁆𑀲𑁂𑀢𑀼𑀁 𑀦 𑀳𑀺 𑀢𑁆𑀯𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀜𑀸𑀢𑀢𑁆𑀣𑀘𑀭𑀺𑀬𑀸 𑀓𑀸𑀓𑀚𑀸𑀢𑀓𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀮𑁄𑀓𑀢𑁆𑀣𑀘𑀭𑀺𑀬𑀸 𑀢𑀁𑀢𑀁𑀧𑀸𑀭𑀫𑀺𑀧𑀽𑀭𑀡𑀯𑀲𑁂𑀦, 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀸 𑀫𑀳𑀸𑀩𑁄𑀥𑀺𑀚𑀸𑀢𑀓𑀸𑀤𑀺𑀯𑀲𑁂𑀦. 𑀅𑀘𑁆𑀙𑀭𑀺𑀬𑀁 𑀪𑁄 𑀕𑁄𑀢𑀫𑀸𑀢𑀺𑀆𑀤𑀺𑀦𑀸 𑀓𑀦𑁆𑀤𑀭𑀓𑁂𑀦 𑀓𑀢𑀁 𑀧𑀲𑀸𑀤𑀧𑀯𑁂𑀤𑀦𑀁 𑀤𑀲𑁆𑀲𑁂𑀢𑀺.

𑀬𑁂𑀧𑀺 𑀢𑁂𑀢𑀺𑀆𑀤𑀺𑀦𑀸 𑀢𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀧𑀘𑁆𑀘𑀦𑀼𑀪𑀸𑀲𑀦𑁆𑀢𑁂𑀦 𑀪𑀕𑀯𑀢𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀦𑁆𑀢𑀺 𑀘𑀭𑀺𑀢𑀢𑁆𑀢𑀸 𑀆𑀳 𑁋 ‘‘𑀲𑀦𑁆𑀢𑀺 𑀳𑀺 𑀓𑀦𑁆𑀤𑀭𑀓𑀸𑀢𑀺 𑀅𑀬𑀫𑁆𑀧𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀻’’𑀢𑀺. 𑀬𑁄 𑀳𑀺 𑀓𑀦𑁆𑀤𑀭𑀓𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑀲𑀦𑁆𑀢𑀪𑀸𑀯𑁄 𑀓𑀺𑀢𑁆𑀢𑀺𑀢𑁄, 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄𑀧𑀺 𑀢𑁂𑀦 𑀅𑀧𑀼𑀘𑁆𑀙𑀺𑀢𑁄𑀬𑁂𑀯 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦 𑀪𑀕𑀯𑀸 ‘‘𑀲𑀦𑁆𑀢𑀺 𑀳𑀻’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀁 𑀆𑀭𑀪𑀺. 𑀢𑁂𑀦𑀸𑀳 ‘‘𑀪𑀕𑀯𑀢𑁄 𑀓𑀺𑀭 𑀏𑀢𑀤𑀳𑁄𑀲𑀻’’ 𑀢𑀺𑀆𑀤𑀺. 𑀓𑀧𑁆𑀧𑁂𑀢𑁆𑀯𑀸𑀢𑀺 𑀅𑀜𑁆𑀜𑀣𑀸 𑀲𑀦𑁆𑀢𑀫𑁂𑀯 𑀅𑀢𑁆𑀢𑀸𑀦𑀁 𑀅𑀜𑁆𑀜𑀣𑀸 𑀯𑀺𑀥𑀸𑀬. 𑀧𑀓𑀧𑁆𑀧𑁂𑀢𑁆𑀯𑀸𑀢𑀺 𑀲𑀦𑀺𑀤𑀲𑁆𑀲𑀦𑀯𑀲𑁂𑀦 𑀕𑀳𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀓𑀼𑀳𑀓𑀪𑀸𑀯𑁂𑀦𑀸’’𑀢𑀺𑀆𑀤𑀺. 𑀧𑀝𑀺𑀧𑀤𑀁 𑀧𑀽𑀭𑀬𑀫𑀸𑀦𑀸𑀢𑀺 𑀓𑀸𑀫𑀁 𑀅𑀯𑀺𑀲𑁂𑀲𑁂𑀦 𑀲𑁂𑀓𑁆𑀔𑀸 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀧𑀦 𑀅𑀥𑀺𑀕𑀢𑀫𑀕𑁆𑀕𑀯𑀲𑁂𑀦 ‘‘𑀧𑀽𑀭𑀬𑀫𑀸𑀦𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀸 𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀺𑀢𑀢𑁆𑀢𑀸. 𑀫𑀕𑁆𑀕𑁄 𑀳𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄𑀢𑀺 𑀆𑀳 ‘‘𑀉𑀧𑀭𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸𑀬 𑀉𑀧𑀲𑀦𑁆𑀢𑀸’’𑀢𑀺. 𑀇𑀢𑁄 𑀫𑀼𑀢𑁆𑀢𑀸𑀢𑀺 𑀫𑀕𑁆𑀕𑁂𑀦𑀸𑀕𑀢𑀽𑀧𑀲𑀫𑀢𑁄 𑀫𑀼𑀢𑁆𑀢𑀸. 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑀸𑀳 ‘‘𑀘𑀢𑀽𑀳𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀉𑀧𑀲𑀦𑁆𑀢𑀸’’𑀢𑀺.

𑀲𑀢𑀢𑀲𑀻𑀮𑀸𑀢𑀺 𑀅𑀯𑀺𑀘𑁆𑀙𑀺𑀦𑁆𑀦𑀲𑀻𑀮𑀸. 𑀲𑀸𑀢𑀺𑀲𑀬𑁄 𑀳𑀺 𑀏𑀢𑁂𑀲𑀁 𑀲𑀻𑀮𑀲𑁆𑀲 𑀅𑀔𑀡𑁆𑀟𑀸𑀤𑀺𑀪𑀸𑀯𑁄. 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀢𑀸𑀯𑀲𑁂𑀦 𑀲𑀦𑁆𑀢𑀢𑀸 𑀯𑀼𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀲𑀦𑁆𑀢𑀢𑀯𑀼𑀢𑁆𑀢𑀺𑀦𑁄𑀢𑀺 𑀆𑀳 ‘‘𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀏𑀯𑀁 𑀲𑀻𑀮𑀯𑀼𑀢𑁆𑀢𑀺𑀯𑀲𑁂𑀦 ‘‘𑀲𑀦𑁆𑀢𑀢𑀯𑀼𑀢𑁆𑀢𑀺𑀦𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀚𑀻𑀯𑀺𑀢𑀯𑀼𑀢𑁆𑀢𑀺𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀦𑁆𑀢𑀢𑀚𑀻𑀯𑀺𑀓𑀸𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀲𑀸𑀲𑀦𑀲𑁆𑀲 𑀚𑀻𑀯𑀺𑀢𑀯𑀼𑀢𑁆𑀢𑀺 𑀲𑀻𑀮𑀲𑀦𑁆𑀦𑀺𑀲𑁆𑀲𑀺𑀢𑀸 𑀏𑀯𑀸𑀢𑀺 𑀆𑀳 ‘‘𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺.

𑀦𑀺𑀧𑀬𑀢𑀺 𑀯𑀺𑀲𑁄𑀲𑁂𑀢𑀺 𑀭𑀸𑀕𑀸𑀤𑀺𑀲𑀁𑀓𑀺𑀮𑁂𑀲𑀁, 𑀢𑀢𑁄 𑀯𑀸 𑀅𑀢𑁆𑀢𑀸𑀦𑀁 𑀦𑀺𑀧𑀸𑀢𑀻𑀢𑀺 𑀦𑀺𑀧𑀓𑁄, 𑀧𑀜𑁆𑀜𑀯𑀸. 𑀢𑁂𑀦𑀸𑀳 ‘‘𑀧𑀜𑁆𑀜𑀯𑀦𑁆𑀢𑁄’’𑀢𑀺. 𑀧𑀜𑁆𑀜𑀸𑀬 𑀞𑀢𑁆𑀯𑀸 𑀚𑀻𑀯𑀺𑀓𑀸𑀓𑀧𑁆𑀧𑀦𑀁 𑀦𑀸𑀫 𑀩𑀼𑀤𑁆𑀥𑀧𑀝𑀺𑀓𑀼𑀝𑁆𑀞𑀫𑀺𑀘𑁆𑀙𑀸𑀚𑀻𑀯𑀁 𑀧𑀳𑀸𑀬 𑀲𑀫𑁆𑀫𑀸𑀚𑀻𑀯𑁂𑀦 𑀚𑀻𑀯𑀦𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀏𑀓𑀘𑁆𑀘𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪) 𑀢𑀁𑀲𑀁𑀯𑀡𑁆𑀡𑀦𑀸𑀬𑀜𑁆𑀘 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁪) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀭𑀣𑀯𑀺𑀦𑀻𑀢𑀧𑀝𑀺𑀧𑀤𑀸𑀤𑀬𑁄 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀇𑀢𑁄 𑀅𑀜𑁆𑀜𑀢𑁆𑀣 𑀫𑀳𑀸𑀕𑁄𑀧𑀸𑀮𑀓𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁪𑁬 𑀆𑀤𑀬𑁄) 𑀮𑁄𑀓𑀼𑀢𑁆𑀢𑀭𑀲𑀢𑀺𑀧𑀝𑁆𑀞𑀸𑀦𑀸 𑀓𑀣𑀺𑀢𑀸𑀢𑀺 𑀆𑀳 𑁋 ‘‘𑀇𑀥 𑀧𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀲𑀢𑀺𑀧𑀝𑁆𑀞𑀸𑀦𑀸 𑀓𑀣𑀺𑀢𑀸’’𑀢𑀺, 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂𑀧𑀺 (𑀤𑀻. 𑀦𑀺. 𑁨.𑁩𑁭𑁩-𑁩𑁭𑁪; 𑀫. 𑀦𑀺. 𑁧.𑁧𑁦𑁬 𑀆𑀤𑀬𑁄) 𑀯𑁄𑀫𑀺𑀲𑁆𑀲𑀓𑀸𑀯 𑀓𑀣𑀺𑀢𑀸𑀢𑀺. 𑀏𑀢𑁆𑀢𑀓𑁂𑀦𑀸𑀢𑀺 𑀏𑀢𑁆𑀢𑀓𑀸𑀬 𑀤𑁂𑀲𑀦𑀸𑀬.

𑁩. 𑀓𑀸𑀭𑀓𑀪𑀸𑀯𑀦𑁆𑀢𑀺 𑀧𑀝𑀺𑀧𑀢𑁆𑀢𑀺𑀬𑀁 𑀧𑀝𑀺𑀧𑀚𑁆𑀚𑀦𑀓𑀪𑀸𑀯𑀁. 𑀫𑀬𑀫𑁆𑀧𑀺 𑀦𑀸𑀫 𑀕𑀺𑀳𑀻 𑀩𑀳𑀼𑀓𑀺𑀘𑁆𑀘𑀸 𑀲𑀫𑀸𑀦𑀸 𑀓𑀸𑀮𑁂𑀦 𑀓𑀸𑀮𑀁 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸 𑀯𑀺𑀳𑀭𑀸𑀫, 𑀓𑀺𑀫𑀗𑁆𑀕𑀁 𑀧𑀦 𑀯𑀺𑀯𑁂𑀓𑀯𑀸𑀲𑀺𑀦𑁄𑀢𑀺 𑀅𑀢𑁆𑀢𑀦𑁄 𑀓𑀸𑀭𑀓𑀪𑀸𑀯𑀁 𑀧𑀯𑁂𑀤𑁂𑀦𑁆𑀢𑁄 𑀏𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀉𑀓𑁆𑀔𑀺𑀧𑀢𑀺. 𑀢𑁂𑀦𑀸𑀳 ‘‘𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄’’𑀢𑀺𑀆𑀤𑀺. 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀁 𑀖𑀦𑀚𑀝𑀺𑀢𑀲𑀗𑁆𑀔𑀸𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 𑀓𑀺𑀮𑁂𑀲𑀕𑀳𑀦𑁂𑀦 𑀕𑀳𑀦𑀢𑀸, 𑀢𑁂𑀦𑀸𑀳 ‘‘𑀅𑀦𑁆𑀢𑁄 𑀚𑀝𑀸 𑀩𑀳𑀺 𑀚𑀝𑀸, 𑀚𑀝𑀸𑀬 𑀚𑀝𑀺𑀢𑀸 𑀧𑀚𑀸’’𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨). 𑀫𑀦𑀼𑀲𑁆𑀲𑀸𑀦𑀁 𑀅𑀚𑁆𑀛𑀸𑀲𑀬𑀕𑀳𑀡𑁂𑀦 𑀲𑀸𑀞𑁂𑀬𑁆𑀬𑀫𑁆𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀲𑀝𑀲𑀸𑀞𑁂𑀬𑁆𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀬𑀣𑀸 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀲𑀼 𑀓𑀘𑀯𑀭𑀪𑀸𑀯𑁄, 𑀲𑁄 𑀓𑀲𑀝𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀦𑁆𑀢𑀸𑀦𑁂 𑀅𑀧𑀭𑀺𑀲𑀼𑀤𑁆𑀥𑁄 𑀲𑀁𑀓𑀺𑀮𑁂𑀲𑀪𑀸𑀯𑁄 𑀓𑀲𑀝𑀦𑁆𑀢𑀺 𑀆𑀳 ‘‘𑀅𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀓𑀲𑀝𑀢𑀸’’𑀢𑀺. 𑀅𑀢𑁆𑀢𑀦𑀺 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀁 𑀓𑁂𑀭𑀸𑀝𑀺𑀬𑀝𑁆𑀞𑁄. 𑀚𑀸𑀦𑀸𑀢𑀻𑀢𑀺 ‘‘𑀇𑀤𑀁 𑀅𑀳𑀺𑀢𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀳𑀺𑀢𑀁 𑀲𑁂𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀺𑀘𑀸𑀭𑁂𑀢𑀺 𑀤𑁂𑀲𑁂𑀢𑀺. 𑀯𑀺𑀘𑀸𑀭𑀡𑀢𑁆𑀣𑁄𑀧𑀺 𑀳𑀺 𑀳𑁄𑀢𑀺 𑀚𑀸𑀦𑀸𑀢𑀺-𑀲𑀤𑁆𑀤𑁄 𑀬𑀣𑀸 ‘‘𑀆𑀬𑀲𑁆𑀫𑀸 𑀚𑀸𑀦𑀸𑀢𑀻’’𑀢𑀺. 𑀲𑀩𑁆𑀩𑀸𑀧𑀺…𑀧𑁂… 𑀅𑀥𑀺𑀧𑁆𑀧𑁂𑀢𑀸 ‘‘𑀧𑀲𑀼𑀧𑀸𑀮𑀓𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀇𑀥 𑀅𑀦𑁆𑀢𑀭-𑀲𑀤𑁆𑀤𑁄 ‘‘𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁪𑁯) 𑀯𑀺𑀬 𑀔𑀡𑀢𑁆𑀣𑁄𑀢𑀺 𑀆𑀳 ‘‘𑀬𑀢𑁆𑀢𑀓𑁂𑀦 𑀔𑀡𑁂𑀦𑀸’’𑀢𑀺. 𑀢𑁂𑀦𑀸𑀢𑀺 𑀳𑀢𑁆𑀣𑀺𑀦𑀸. 𑀢𑀸𑀦𑀻𑀢𑀺 𑀲𑀸𑀞𑁂𑀬𑁆𑀬𑀸𑀤𑀻𑀦𑀺.

𑀅𑀢𑁆𑀣𑀢𑁄 𑀓𑀸𑀬𑀘𑀺𑀢𑁆𑀢𑀼𑀚𑀼𑀓𑀢𑀸𑀧𑀝𑀺𑀧𑀓𑁆𑀔𑀪𑀽𑀢𑀸𑀯 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀸𑀢𑀺 𑀢𑀸𑀦𑀺 𑀧𑀯𑀢𑁆𑀢𑀺𑀆𑀓𑀸𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀲𑀸𑀢𑀺 𑀧𑀸𑀡𑀪𑀽𑀢𑀲𑁆𑀲 𑀅𑀲𑁆𑀲𑀲𑁆𑀲 𑀯𑀸 𑀳𑀢𑁆𑀣𑀺𑀦𑁄 𑀯𑀸. 𑀞𑀲𑁆𑀲𑀸𑀫𑀻𑀢𑀺 𑀢𑀢𑁆𑀣𑁂𑀯 𑀲𑀧𑁆𑀧𑀝𑀺𑀪𑀬𑁂 𑀞𑀸𑀦𑁂 𑀕𑀦𑁆𑀢𑁆𑀯𑀸 𑀞𑀲𑁆𑀲𑀸𑀫𑀻𑀢𑀺 𑀦 𑀳𑁄𑀢𑀺. 𑀇𑀫𑀲𑁆𑀲 𑀲𑀸𑀞𑁂𑀬𑁆𑀬𑀢𑀸𑀬 𑀧𑀸𑀓𑀝𑀓𑀭𑀡𑀁 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑀪𑀸𑀯𑀢𑁄. 𑀢𑀣𑀸 𑀳𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 ‘‘𑀯𑀜𑁆𑀘𑁂𑀢𑁆𑀯𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦𑀺𑀕𑀼𑀳𑀦𑁆𑀢𑁄 𑀧𑀦 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀝𑀺𑀫𑀕𑁆𑀕𑀁 𑀆𑀭𑁄𑀳𑀺𑀢𑀼𑀓𑀸𑀫𑀲𑁆𑀲𑀸𑀢𑀺 𑀆𑀕𑀢𑀫𑀕𑁆𑀕𑀫𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑀲𑁆𑀲. 𑀮𑁂𑀡𑁆𑀟𑀯𑀺𑀲𑁆𑀲𑀚𑁆𑀚𑀦𑀸𑀤𑀻𑀲𑀼 𑀓𑀸𑀮𑀦𑁆𑀢𑀭𑀸𑀧𑁂𑀓𑁆𑀔𑀸𑀪𑀸𑀯𑀁 ‘‘𑀢𑀣𑀸’’𑀢𑀺 𑀇𑀫𑀺𑀦𑀸 𑀉𑀧𑀲𑀁𑀳𑀭𑀢𑀺.

𑀅𑀦𑁆𑀢𑁄𑀚𑀸𑀢𑀓𑀸𑀢𑀺 𑀅𑀢𑁆𑀢𑀦𑁄 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀚𑀸𑀢𑀸. 𑀥𑀦𑀓𑁆𑀓𑀻𑀢𑀸𑀢𑀺 𑀥𑀦𑀁 𑀤𑀢𑁆𑀯𑀸 𑀤𑀸𑀲𑀪𑀸𑀯𑁂𑀦 𑀕𑀳𑀺𑀢𑀸. 𑀓𑀭𑀫𑀭𑀸𑀦𑀻𑀢𑀸𑀢𑀺 𑀤𑀸𑀲𑀪𑀸𑀯𑁂𑀦 𑀓𑀭𑀫𑀭𑀕𑁆𑀕𑀸𑀳𑀕𑀳𑀺𑀢𑀸. 𑀤𑀸𑀲𑀩𑁆𑀬𑀦𑁆𑀢𑀺 𑀤𑀸𑀲𑀪𑀸𑀯𑀁. 𑀧𑁂𑀲𑁆𑀲𑀸𑀢𑀺 𑀅𑀤𑀸𑀲𑀸 𑀏𑀯 𑀳𑀼𑀢𑁆𑀯𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸. 𑀇𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 𑀇𑀫𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸. 𑀇𑀫𑀁 𑀕𑀡𑁆𑀳𑀦𑁆𑀢𑀸𑀢𑀺 𑀇𑀫𑀁 𑀢𑀲𑁆𑀲 𑀳𑀢𑁆𑀣𑀕𑀢𑀁 𑀕𑀡𑁆𑀳𑀦𑁆𑀢𑀸. 𑀲𑀫𑁆𑀫𑀼𑀔𑀢𑁄 𑀅𑀜𑁆𑀜𑀣𑀸 𑀧𑀭𑀫𑁆𑀫𑀼𑀔𑀓𑀸𑀮𑁂 𑀓𑀸𑀬𑀯𑀸𑀘𑀸𑀲𑀫𑀼𑀤𑀸𑀘𑀸𑀭𑀤𑀲𑁆𑀲𑀦𑁂𑀦𑁂𑀯 𑀘𑀺𑀢𑁆𑀢𑀲𑁆𑀲 𑀦𑁂𑀲𑀁 𑀅𑀜𑁆𑀜𑀣𑀸 𑀞𑀺𑀢𑀪𑀸𑀯𑁄 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁪. 𑀅𑀬𑀫𑁆𑀧𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀻𑀢𑀺 𑀏𑀢𑁆𑀣𑀸𑀧𑀺 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀼𑀲𑀦𑁆𑀥𑀺𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺. 𑀘𑀢𑀼𑀢𑁆𑀣𑁄 𑀳𑀺𑀢𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄𑀢𑀺 𑀬𑁄𑀚𑀦𑀸. 𑀧𑀼𑀕𑁆𑀕𑀮𑀲𑀻𑀲𑁂𑀦 𑀧𑀼𑀕𑁆𑀕𑀮𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀕𑁆𑀕𑀮𑁂 𑀧𑀳𑀸𑀬𑀸’’𑀢𑀺 𑀆𑀳. 𑀧𑀝𑀺𑀧𑀢𑁆𑀢𑀺 𑀳𑀺 𑀇𑀥 𑀧𑀳𑀸𑀢𑀩𑁆𑀩𑀸, 𑀦 𑀧𑀼𑀕𑁆𑀕𑀮𑀸. 𑀬𑀣𑀸 𑀅𑀲𑁆𑀲𑀤𑁆𑀥𑀸𑀤𑀺𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀪𑀸𑀯𑀦𑀸 𑀇𑀚𑁆𑀛𑀦𑁆𑀢𑀺, 𑀏𑀯𑀁 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀤𑀸 𑀯𑀚𑁆𑀚𑀺𑀢𑀩𑁆𑀩𑀸𑀢𑀺 𑀆𑀳 𑁋 ‘‘𑀧𑀼𑀭𑀺𑀫𑁂 𑀢𑀬𑁄 𑀧𑀼𑀕𑁆𑀕𑀮𑁂 𑀧𑀳𑀸𑀬𑀸’’𑀢𑀺. 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀇𑀫𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀲𑁆𑀲 𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁𑀬𑁂𑀯 𑀧𑀝𑀺𑀧𑀸𑀤𑁂𑀫𑀺 𑀧𑀯𑀢𑁆𑀢𑁂𑀫𑀻𑀢𑀺 𑀤𑀲𑁆𑀲𑁂𑀦𑁆𑀢𑁄. 𑀲𑀦𑁆𑀢𑀸𑀢𑀺 𑀲𑀫𑀁 𑀯𑀺𑀦𑀸𑀲𑀁 𑀦𑀺𑀭𑁄𑀥𑀁 𑀧𑀢𑁆𑀢𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀦𑀺𑀭𑀼𑀤𑁆𑀥𑀸 𑀲𑀦𑁆𑀢𑀸𑀢𑀺 𑀯𑀼𑀢𑁆𑀢𑀸’’𑀢𑀺. 𑀧𑀼𑀦 𑀲𑀦𑁆𑀢𑀸𑀢𑀺 𑀪𑀸𑀯𑀦𑀸𑀯𑀲𑁂𑀦 𑀓𑀺𑀮𑁂𑀲𑀧𑀭𑀺𑀴𑀸𑀳𑀯𑀺𑀕𑀫𑀢𑁄 𑀲𑀦𑁆𑀢𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀦𑀺𑀩𑁆𑀩𑀼𑀢𑀸’’𑀢𑀺. 𑀲𑀦𑁆𑀢𑀸𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀲𑀦𑁆𑀢𑁄 𑀳𑀯𑁂𑀢𑀺 𑀏𑀢𑁆𑀣 𑀲𑀫𑀪𑀸𑀯𑀓𑀭𑁂𑀦 𑀲𑀸𑀥𑀼𑀪𑀸𑀯𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀪𑀽𑀢𑁂𑀦 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸 ‘‘𑀲𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 𑁋 ‘‘𑀲𑀦𑁆𑀢𑁄 𑀳𑀯𑁂…𑀧𑁂… 𑀧𑀡𑁆𑀟𑀺𑀢𑀸’’𑀢𑀺.

𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸 (𑀅. 𑀦𑀺. 𑀝𑀻. 𑁨.𑁪.𑁧𑁯𑁮) 𑀅𑀢𑁆𑀢𑀪𑀸𑀯𑁄, 𑀇𑀥 𑀧𑀦 𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸, 𑀢𑀁 𑀅𑀢𑁆𑀢𑀸𑀦𑀁. 𑀧𑀭𑀦𑁆𑀢𑀺 𑀅𑀢𑁆𑀢𑀢𑁄 𑀅𑀜𑁆𑀜𑀁. 𑀙𑀸𑀢𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸 𑀚𑀺𑀖𑀘𑁆𑀙𑀸𑀳𑁂𑀢𑀼𑀢𑀸𑀬. 𑀅𑀦𑁆𑀢𑁄 𑀢𑀸𑀧𑀦𑀓𑀺𑀮𑁂𑀲𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀢𑁆𑀢𑀧𑀭𑀺𑀴𑀸𑀳𑀚𑀦𑀦𑀲𑀦𑁆𑀢𑀧𑁆𑀧𑀦𑀓𑀺𑀮𑁂𑀲𑀸𑀦𑀁. 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀻𑀢𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀺, 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀢𑀣𑀸𑀪𑀽𑀢𑁄 𑀘𑀺𑀢𑁆𑀢𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀅𑀚𑁆𑀛𑀸𑀲𑀬𑀁 𑀕𑀡𑁆𑀳𑀦𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑀻’’𑀢𑀺𑀆𑀤𑀺.

𑁫. 𑀤𑀼𑀓𑁆𑀔𑀁 𑀧𑀝𑀺𑀓𑁆𑀓𑀽𑀮𑀁 𑀚𑁂𑀕𑀼𑀘𑁆𑀙𑀁 𑀏𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑁄 𑀢𑀁 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑀁. 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀢𑀸 𑀳𑀺 𑀓𑀸𑀫𑀘𑀸𑀭𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑀼𑀓𑁆𑀔𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀢𑀁 𑀲𑀦𑁆𑀥𑀸𑀬 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 ‘‘𑀤𑀼𑀓𑁆𑀔𑀲𑁆𑀲 𑀧𑀝𑀺𑀓𑁆𑀓𑀽𑀮’’𑀦𑁆𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀬𑁂𑀦 𑀳𑀺 𑀪𑀸𑀕𑁂𑀦 𑀧𑀼𑀭𑀺𑀲𑀲𑁆𑀲 𑀤𑀼𑀓𑁆𑀔𑀁 𑀧𑀝𑀺𑀓𑁆𑀓𑀽𑀮𑀁, 𑀢𑁂𑀦 𑀤𑀼𑀓𑁆𑀔𑀲𑁆𑀲 𑀧𑀼𑀭𑀺𑀲𑁄𑀧𑀻𑀢𑀺. 𑀢𑁂𑀦𑀸𑀳 𑁋 ‘‘𑀧𑀘𑁆𑀘𑀦𑀻𑀓𑀲𑀡𑁆𑀞𑀺𑀢’’𑀦𑁆𑀢𑀺.

𑁬. 𑀘𑀢𑀽𑀳𑀺 𑀓𑀸𑀭𑀡𑁂𑀳𑀻𑀢𑀺 𑀥𑀸𑀢𑀼𑀓𑀼𑀲𑀮𑀢𑀸𑀤𑀻𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺. 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀬𑁄𑀕𑀓𑀫𑁆𑀫𑀁 𑀓𑀭𑁄𑀢𑀺. 𑀬𑀲𑁆𑀫𑀸 𑀲𑀫𑁆𑀩𑀼𑀤𑁆𑀥𑀸 𑀧𑀭𑁂𑀲𑀁 𑀫𑀕𑁆𑀕𑀨𑀮𑀸𑀥𑀺𑀕𑀫𑀸𑀬 𑀉𑀲𑁆𑀲𑀸𑀳𑀚𑀸𑀢𑀸, 𑀢𑀢𑁆𑀣 𑀦𑀺𑀭𑀦𑁆𑀢𑀭𑀁 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀏𑀯 𑀳𑁄𑀦𑁆𑀢𑀺, 𑀢𑁂 𑀧𑀝𑀺𑀘𑁆𑀘 𑀢𑁂𑀲𑀁 𑀅𑀦𑁆𑀢𑀭𑀸𑀬𑁄 𑀦 𑀳𑁄𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀦 𑀧𑀦 𑀩𑀼𑀤𑁆𑀥𑁂 𑀧𑀝𑀺𑀘𑁆𑀘𑀸’’𑀢𑀺. 𑀓𑀺𑀭𑀺𑀬𑀧𑀭𑀺𑀳𑀸𑀦𑀺𑀬𑀸 𑀤𑁂𑀲𑀓𑀲𑁆𑀲 𑀢𑀲𑁆𑀲𑁂𑀯 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀢𑀚𑁆𑀚𑀧𑀬𑁄𑀕𑀸𑀪𑀸𑀯𑀢𑁄. ‘‘𑀤𑁂𑀲𑀓𑀲𑁆𑀲 𑀯𑀸’’𑀢𑀺 𑀇𑀤𑀁 𑀲𑀸𑀯𑀓𑀸𑀦𑀁 𑀯𑀲𑁂𑀦 𑀤𑀝𑁆𑀞𑀩𑁆𑀩𑀁. 𑀫𑀳𑀢𑀸 𑀅𑀢𑁆𑀣𑁂𑀦𑀸𑀢𑀺 𑀏𑀢𑁆𑀣 𑀅𑀢𑁆𑀣-𑀲𑀤𑁆𑀤𑁄 𑀆𑀦𑀺𑀲𑀁𑀲𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑁆𑀯𑀻𑀳𑀺 𑀆𑀦𑀺𑀲𑀁𑀲𑁂𑀳𑀻’’𑀢𑀺. 𑀧𑀲𑀸𑀤𑀁 𑀧𑀝𑀺𑀮𑀪𑀢𑀺 ‘‘𑀅𑀭𑀳𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀼𑀢𑀢𑁆𑀢𑀸. 𑀅𑀪𑀺𑀦𑀯𑁄 𑀦𑀬𑁄 𑀉𑀤𑀧𑀸𑀤𑀺 𑀲𑀦𑁆𑀢𑀢𑀲𑀻𑀮𑀢𑀸𑀤𑀺𑀯𑀲𑁂𑀦 𑀅𑀦𑀢𑁆𑀢𑀦𑁆𑀢𑀧𑀢𑀸𑀤𑀺𑀯𑀲𑁂𑀦, 𑀲𑁄𑀧𑀺 𑀢𑀁 𑀲𑀼𑀢𑁆𑀯𑀸 𑀤𑀸𑀲𑀸𑀤𑀻𑀲𑀼 𑀲𑀯𑀺𑀲𑁂𑀲𑀁 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄 𑀳𑀺𑀢𑀸𑀦𑀼𑀓𑀫𑁆𑀧𑀻 𑀳𑀼𑀢𑁆𑀯𑀸 𑀲𑁂𑀓𑁆𑀔𑀧𑀝𑀺𑀧𑀤𑀁 𑀲𑀻𑀮𑀁 𑀲𑀸𑀥𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁 𑀧𑀭𑀺𑀩𑁆𑀭𑀽𑀳𑁂𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀫𑀳𑀢𑀸 𑀅𑀢𑁆𑀣𑁂𑀦 𑀲𑀁𑀬𑀼𑀢𑁆𑀢𑁄’’𑀢𑀺.

𑁮. 𑀧𑀭𑁂𑀲𑀁 𑀳𑀦𑀦𑀖𑀸𑀢𑀦𑀸𑀤𑀺𑀦𑀸 𑀭𑁄𑀤𑀸𑀧𑀦𑀢𑁄 𑀮𑀼𑀤𑁆𑀤𑁄, 𑀢𑀣𑀸 𑀯𑀺𑀖𑀸𑀢𑀓𑀪𑀸𑀯𑁂𑀦 𑀓𑀸𑀬𑀘𑀺𑀢𑁆𑀢𑀸𑀦𑀁 𑀯𑀺𑀤𑀸𑀭𑀡𑀢𑁄 𑀤𑀸𑀭𑀼𑀡𑁄, 𑀯𑀺𑀭𑀼𑀤𑁆𑀥𑀯𑀸𑀤𑀢𑀸𑀬 𑀓𑀓𑁆𑀔𑀴𑁄, 𑀩𑀦𑁆𑀥𑀦𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀩𑀦𑁆𑀥𑀦𑀸𑀕𑀸𑀭𑀺𑀓𑁄.

𑁯. 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦𑀸𑀢𑀺 𑀔𑀢𑁆𑀢𑀺𑀬𑀸𑀦𑀁 𑀓𑀢𑁆𑀢𑀩𑁆𑀩𑀅𑀪𑀺𑀲𑁂𑀓𑁂𑀦. 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀲𑀦𑁆𑀣𑀸𑀭𑀯𑀲𑁂𑀦 𑀓𑀢𑀁 𑀅𑀕𑀸𑀭𑀁 𑀬𑀜𑁆𑀜𑀸𑀯𑀸𑀝𑀁. 𑀲𑀧𑁆𑀧𑀺𑀢𑁂𑀮𑁂𑀦𑀸𑀢𑀺 𑀲𑀧𑁆𑀧𑀺𑀫𑀬𑁂𑀦 𑀢𑁂𑀮𑁂𑀦, 𑀬𑀫𑀓𑀲𑁆𑀦𑁂𑀳𑁂𑀦 𑀳𑀺 𑀢𑀤𑀸 𑀓𑀸𑀬𑀁 𑀅𑀩𑁆𑀪𑀜𑁆𑀚𑀢𑀺. 𑀯𑀘𑁆𑀙𑀪𑀸𑀯𑀁 𑀢𑀭𑀺𑀢𑁆𑀯𑀸 𑀞𑀺𑀢𑁄 𑀯𑀘𑁆𑀙𑀢𑀭𑁄. 𑀧𑀭𑀺𑀓𑁆𑀔𑁂𑀧𑀓𑀭𑀡𑀢𑁆𑀣𑀸𑀬𑀸𑀢𑀺 𑀯𑀦𑀫𑀸𑀮𑀸𑀳𑀺 𑀲𑀤𑁆𑀥𑀺𑀁 𑀤𑀩𑁆𑀪𑁂𑀳𑀺 𑀯𑁂𑀤𑀺𑀬𑀸 𑀧𑀭𑀺𑀓𑁆𑀔𑁂𑀧𑀦𑀢𑁆𑀣𑀸𑀬. 𑀬𑀜𑁆𑀜𑀪𑀽𑀫𑀺𑀬𑀦𑁆𑀢𑀺 𑀅𑀯𑀲𑁂𑀲𑀬𑀜𑁆𑀜𑀝𑁆𑀞𑀸𑀦𑁂. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑀦𑁆𑀤𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀅𑀯𑀺𑀤𑀽𑀭𑁂𑀢𑀺 𑀇𑀫𑀺𑀦𑀸 𑀧𑀸𑀴𑀺𑀬𑀁 ‘‘𑀯𑁂𑀲𑀸𑀮𑀺𑀬’’𑀦𑁆𑀢𑀺 𑀇𑀤𑀁 𑀲𑀫𑀻𑀧𑁂 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀭𑀧𑁆𑀧𑀢𑁆𑀢𑀓𑀼𑀮𑀕𑀡𑀦𑀸𑀬𑀸𑀢𑀺 (𑀅. 𑀦𑀺. 𑀝𑀻. 𑁩.𑁧𑁧.𑁧𑁬) 𑀫𑀳𑀸𑀲𑀸𑀭𑀫𑀳𑀧𑁆𑀧𑀢𑁆𑀢𑀓𑀼𑀮𑀕𑀡𑀦𑀸𑀬. 𑀤𑀲𑀫𑁂 𑀞𑀸𑀦𑁂𑀢𑀺 𑀅𑀜𑁆𑀜𑁂 𑀅𑀜𑁆𑀜𑁂𑀢𑀺 𑀤𑀲𑀕𑀡𑀦𑀝𑁆𑀞𑀸𑀦𑁂. 𑀅𑀝𑁆𑀞𑀓𑀦𑀕𑀭𑁂 𑀚𑀸𑀢𑁄 𑀪𑀯𑁄 𑀅𑀝𑁆𑀞𑀓𑀦𑀸𑀕𑀭𑁄. 𑀓𑀼𑀓𑁆𑀓𑀼𑀝𑀸𑀭𑀸𑀫𑁄𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑁂 𑀓𑀼𑀓𑁆𑀓𑀼𑀝𑀸𑀭𑀸𑀫𑁄, 𑀦 𑀓𑁄𑀲𑀫𑁆𑀩𑀺𑀬𑀁.

𑁧𑁮. 𑀧𑀓𑀢𑀢𑁆𑀣𑀦𑀺𑀤𑁆𑀤𑁂𑀲𑁄 𑀢-𑀲𑀤𑁆𑀤𑁄𑀢𑀺 𑀢𑀲𑁆𑀲 ‘‘𑀪𑀕𑀯𑀢𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀬𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑁂𑀦 𑀪𑀕𑀯𑀸 𑀧𑀓𑀢𑁄 𑀅𑀥𑀺𑀕𑀢𑁄 𑀲𑀼𑀧𑀸𑀓𑀝𑁄 𑀘, 𑀢𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑀁 𑀲𑀤𑁆𑀥𑀺𑀁 𑀆𑀕𑀫𑀦𑀻𑀬𑀧𑀝𑀺𑀧𑀤𑀸𑀬 𑀅𑀢𑁆𑀣𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀲𑁄…𑀧𑁂… 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀆𑀳. 𑀲𑀢𑀺𑀧𑀺 𑀜𑀸𑀡𑀤𑀲𑁆𑀲𑀦-𑀲𑀤𑁆𑀤𑀸𑀦𑀁 𑀇𑀥 𑀧𑀜𑁆𑀜𑀸𑀯𑁂𑀯𑀘𑀦𑀪𑀸𑀯𑁂 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀢𑁂𑀲𑀁 𑀯𑀺𑀲𑀬𑀯𑀺𑀲𑁂𑀲𑁂 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀅𑀲𑀸𑀥𑀸𑀭𑀡𑀜𑀸𑀡𑀯𑀺𑀲𑁂𑀲𑀯𑀲𑁂𑀦 𑀯𑀺𑀚𑁆𑀚𑀸𑀢𑁆𑀢𑀬𑀯𑀲𑁂𑀦 𑀯𑀺𑀚𑁆𑀚𑀸𑀅𑀪𑀺𑀜𑁆𑀜𑀸𑀦𑀸𑀯𑀭𑀡𑀜𑀸𑀡𑀯𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀫𑀁𑀲𑀘𑀓𑁆𑀔𑀼𑀯𑀲𑁂𑀦 𑀧𑀝𑀺𑀯𑁂𑀥𑀤𑁂𑀲𑀦𑀸𑀜𑀸𑀡𑀯𑀲𑁂𑀦 𑀘 𑀢𑀤𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀁 𑀢𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀲𑀬𑀸𑀦𑀼𑀲𑀬𑀁 𑀚𑀸𑀦𑀢𑀸 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦 𑀲𑀩𑁆𑀩𑀁 𑀜𑁂𑀬𑁆𑀬𑀥𑀫𑁆𑀫𑀁 𑀧𑀲𑁆𑀲𑀢𑀸 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑁂𑀳𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀲𑀯𑀓𑁆𑀔𑀬𑀜𑀸𑀡𑁂𑀳𑀺. 𑀧𑀝𑀺𑀯𑁂𑀥𑀧𑀜𑁆𑀜𑀸𑀬𑀸𑀢𑀺 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬. 𑀤𑁂𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀸𑀢𑀺 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀁 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀸𑀦𑀜𑁆𑀘 𑀆𑀲𑀬𑀸𑀦𑀼𑀲𑀬𑀘𑀭𑀺𑀢𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀪𑁂𑀤𑀁 𑀥𑀫𑁆𑀫𑀤𑁂𑀲𑀦𑀸𑀧𑀜𑁆𑀜𑀸𑀬 𑀬𑀸𑀣𑀸𑀯𑀢𑁄 𑀧𑀲𑁆𑀲𑀢𑀸. 𑀅𑀭𑀻𑀦𑀦𑁆𑀢𑀺 𑀓𑀺𑀮𑁂𑀲𑀸𑀭𑀻𑀦𑀁, 𑀧𑀜𑁆𑀘𑀯𑀺𑀥𑀫𑀸𑀭𑀸𑀦𑀁 𑀯𑀸, 𑀲𑀸𑀲𑀦𑀲𑁆𑀲 𑀯𑀸 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀢𑁂𑀲𑀁 𑀧𑀦 𑀳𑀦𑀦𑀁 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀅𑀪𑀺𑀪𑀯𑀦𑀁 𑀅𑀧𑁆𑀧𑀝𑀺𑀪𑀸𑀦𑀢𑀸𑀓𑀭𑀡𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀫𑁂𑀯 𑀯𑀸, 𑀓𑁂𑀲𑀺𑀯𑀺𑀦𑀬𑀲𑀼𑀢𑁆𑀢𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀢𑀣𑀸 𑀞𑀸𑀦𑀸𑀝𑁆𑀞𑀸𑀦𑀸𑀤𑀺𑀯𑀺𑀪𑀸𑀕𑀁 𑀚𑀸𑀦𑀢𑀸 𑀬𑀣𑀸𑀓𑀫𑁆𑀫𑀽𑀧𑀕𑀲𑀢𑁆𑀢𑁂 𑀧𑀲𑁆𑀲𑀢𑀸, 𑀲𑀯𑀸𑀲𑀦𑀸𑀦𑀁 𑀆𑀲𑀯𑀸𑀦𑀁 𑀔𑀻𑀡𑀢𑁆𑀢𑀸 𑀅𑀭𑀳𑀢𑀸, 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀢𑁄 𑀅𑀯𑀺𑀧𑀭𑀻𑀢𑀸𑀯𑀩𑁄𑀥𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀅𑀣 𑀯𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑀸𑀬 𑀚𑀸𑀦𑀢𑀸, 𑀓𑀸𑀬𑀓𑀫𑁆𑀫𑀸𑀤𑀺𑀯𑀲𑁂𑀦 𑀢𑀺𑀡𑁆𑀡𑀁 𑀓𑀫𑁆𑀫𑀸𑀦𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑁄 𑀦𑀺𑀲𑀫𑁆𑀫𑀓𑀸𑀭𑀺𑀢𑀸𑀬 𑀧𑀲𑁆𑀲𑀢𑀸, 𑀤𑀯𑀸𑀤𑀻𑀦𑀁 𑀅𑀪𑀸𑀯𑀲𑀸𑀥𑀺𑀓𑀸𑀬 𑀧𑀳𑀸𑀦𑀲𑀫𑁆𑀧𑀤𑀸𑀬 𑀅𑀭𑀳𑀢𑀸, 𑀙𑀦𑁆𑀤𑀸𑀤𑀻𑀦𑀁 𑀅𑀳𑀸𑀦𑀺𑀳𑁂𑀢𑀼𑀪𑀽𑀢𑀸𑀬 𑀅𑀓𑁆𑀔𑀬𑀧𑀝𑀺𑀪𑀸𑀦𑀲𑀸𑀥𑀺𑀓𑀸𑀬 𑀲𑀩𑁆𑀩𑀜𑁆𑀜𑀼𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀏𑀯𑀁 𑀤𑀲𑀩𑀮𑀅𑀝𑁆𑀞𑀸𑀭𑀲𑀆𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑀯𑀲𑁂𑀦𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑁧𑁯. 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀫𑁆𑀫𑀼𑀔𑀪𑀸𑀯𑁂𑀦 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬𑁆𑀬 𑀓𑀢𑀁, 𑀲𑁆𑀯𑀲𑁆𑀲 𑀓𑀢𑀪𑀸𑀯𑁄 𑀉𑀧𑁆𑀧𑀸𑀤𑀦𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀦 𑀉𑀧𑁆𑀧𑀦𑁆𑀦𑀲𑁆𑀲 𑀧𑀝𑀺𑀲𑀗𑁆𑀔𑀭𑀡𑁂𑀦𑀸𑀢𑀺 𑀆𑀳 ‘‘𑀉𑀧𑁆𑀧𑀸𑀤𑀺𑀢’’𑀦𑁆𑀢𑀺. 𑀢𑁂 𑀘𑀲𑁆𑀲 𑀧𑀘𑁆𑀘𑀬𑀸 𑀘𑁂𑀢𑀦𑀸𑀧𑀥𑀸𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀅𑀪𑀺𑀲𑀗𑁆𑀔𑀢𑀁 𑀅𑀪𑀺𑀲𑀜𑁆𑀘𑁂𑀢𑀬𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀘𑁂𑀢𑀬𑀺𑀢𑀁 𑀧𑀓𑀧𑁆𑀧𑀺𑀢’’𑀦𑁆𑀢𑀺 𑀅𑀢𑁆𑀣𑀫𑀸𑀳. 𑀅𑀪𑀺𑀲𑀗𑁆𑀔𑀢𑀁 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀦𑁆𑀢𑀺 𑀘 𑀛𑀸𑀦𑀲𑁆𑀲 𑀧𑀸𑀢𑀼𑀪𑀸𑀯𑀤𑀲𑁆𑀲𑀦𑀫𑀼𑀔𑁂𑀦 𑀯𑀺𑀤𑁆𑀥𑀁𑀲𑀦𑀪𑀸𑀯𑀁 𑀉𑀮𑁆𑀮𑀺𑀗𑁆𑀕𑁂𑀢𑀺 𑀬𑀜𑁆𑀳𑀺 𑀅𑀳𑀼𑀢𑁆𑀯𑀸 𑀲𑀫𑁆𑀪𑀯𑀢𑀺, 𑀢𑀁 𑀳𑀼𑀢𑁆𑀯𑀸 𑀧𑀝𑀺𑀯𑁂𑀢𑀺. 𑀢𑁂𑀦𑀸𑀳 𑀧𑀸𑀴𑀺𑀬𑀁 ‘𑀅𑀪𑀺𑀲𑀗𑁆𑀔𑀢’𑀦𑁆𑀢𑀺𑀆𑀤𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀞𑀺𑀢𑁄𑀢𑀺 𑀲𑀫𑀣𑀥𑀫𑁆𑀫𑁂 𑀞𑀺𑀢𑀢𑁆𑀢𑀸 𑀲𑀫𑀸𑀳𑀺𑀢𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀬𑁄 𑀧𑀚𑀳𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀅𑀦𑀼𑀮𑁄𑀫𑀜𑀸𑀡𑀁 𑀧𑀸𑀧𑁂𑀢𑀸 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀞𑀺𑀢𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁂𑀲𑀼 𑀥𑀫𑁆𑀫𑁂𑀲𑀼 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄, 𑀦𑀦𑁆𑀤𑀦𑀝𑁆𑀞𑁂𑀦 𑀦𑀦𑁆𑀤𑀻𑀢𑀺. 𑀢𑀢𑁆𑀣 𑀲𑀼𑀔𑀼𑀫𑀸 𑀅𑀧𑁂𑀓𑁆𑀔𑀸 𑀯𑀼𑀢𑁆𑀢𑀸, 𑀬𑀸 ‘‘𑀦𑀺𑀓𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀬𑀣𑀸𑀭𑀼𑀢𑀯𑀲𑁂𑀦 𑀘 𑀇𑀫𑀲𑁆𑀲 𑀲𑀼𑀢𑁆𑀢𑀧𑀤𑀲𑁆𑀲 𑀅𑀢𑁆𑀣𑁂 𑀕𑀳𑁂𑀢𑀩𑁆𑀩𑁂 𑀲𑀢𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀙𑀦𑁆𑀤𑀭𑀸𑀕𑁄 𑀓𑀢𑁆𑀢𑀩𑁆𑀩𑁄𑀢𑀺 𑀅𑀦𑀸𑀕𑀸𑀫𑀺𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑀢𑁆𑀣𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀺 𑀅𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀓𑁂𑀯𑀮𑀁 𑀢𑀢𑁆𑀣 𑀙𑀦𑁆𑀤𑀭𑀸𑀕𑁄 𑀓𑀢𑁆𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺. 𑀓𑀲𑁆𑀫𑀸? 𑀢𑁂𑀲𑀼 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁂𑀲𑀼 𑀥𑀫𑁆𑀫𑁂𑀲𑀼 𑀙𑀦𑁆𑀤𑀭𑀸𑀕𑀫𑀢𑁆𑀢𑁂𑀦 𑀅𑀦𑀸𑀕𑀸𑀫𑀺𑀦𑀸 𑀮𑀤𑁆𑀥𑀩𑁆𑀩𑀲𑁆𑀲 𑀅𑀮𑀤𑁆𑀥𑀸𑀦𑀸𑀕𑀸𑀫𑀺𑀨𑀮𑁂𑀦 𑀮𑀤𑁆𑀥𑀩𑁆𑀩𑀢𑁆𑀢𑀸 𑀢𑀣𑀸 𑀲𑀢𑀺 𑀢𑁂𑀦 𑀅𑀦𑀸𑀕𑀸𑀫𑀺𑀨𑀮𑀫𑁆𑀧𑀺 𑀮𑀤𑁆𑀥𑀩𑁆𑀩𑀫𑁂𑀯 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀅𑀦𑀸𑀕𑀸𑀫𑀺𑀨𑀮𑀁 𑀧𑀝𑀺𑀯𑀺𑀤𑁆𑀥𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀪𑀸𑀯𑀢𑁄 𑀭𑀲𑀺𑀢𑀩𑁆𑀩𑀢𑁆𑀢𑀸 𑀅𑀯𑀺𑀧𑀭𑀻𑀢𑁄 𑀅𑀢𑁆𑀣𑁄 𑀏𑀯 𑀅𑀢𑁆𑀣𑀭𑀲𑁄. 𑀅𑀜𑁆𑀜𑀸𑀧𑀺 𑀓𑀸𑀘𑀺 𑀲𑀼𑀕𑀢𑀺𑀬𑁄𑀢𑀺 𑀯𑀺𑀦𑀺𑀧𑀸𑀢𑀺𑀓𑁂 𑀲𑀦𑁆𑀥𑀸𑀬𑀸𑀳. 𑀅𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄𑀢𑀺 𑀅𑀲𑀼𑀭𑀓𑀸𑀬𑀫𑀸𑀳.

𑀲𑀫𑀣𑀥𑀼𑀭𑀫𑁂𑀯 𑀥𑀼𑀭𑀁 𑀲𑀫𑀣𑀬𑀸𑀦𑀺𑀓𑀲𑁆𑀲 𑀯𑀲𑁂𑀦 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸. 𑀫𑀳𑀸𑀫𑀸𑀮𑀼𑀓𑁆𑀬𑁄𑀯𑀸𑀤𑁂 ‘‘𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭’’𑀦𑁆𑀢𑀺 𑀧𑀸𑀤𑀓𑀚𑁆𑀛𑀸𑀦𑀁 𑀓𑀢𑁆𑀯𑀸 ‘‘𑀲𑁄 𑀬𑀤𑁂𑀯 𑀢𑀢𑁆𑀣 𑀳𑁄𑀢𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀧𑀲𑁆𑀲𑀦𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 ‘‘𑀲𑁄 𑀢𑀢𑁆𑀣 𑀞𑀺𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀧𑀸𑀧𑀼𑀡𑀸𑀢𑀻’’𑀢𑀺 (𑀫. 𑀦𑀺. 𑁨.𑁧𑁩𑁩) 𑀆𑀕𑀢𑀢𑁆𑀢𑀸 ‘‘𑀫𑀳𑀸𑀫𑀸𑀮𑀼𑀓𑁆𑀬𑁄𑀯𑀸𑀤𑁂 𑀯𑀺𑀧𑀲𑁆𑀲𑀦𑀸𑀯 𑀥𑀼𑀭’’𑀦𑁆𑀢𑀺 𑀆𑀳. 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁩𑁭𑁩 𑀆𑀤𑀬𑁄; 𑀫. 𑀦𑀺. 𑁧.𑁧𑁦𑁬 𑀆𑀤𑀬𑁄) 𑀲𑀩𑁆𑀩𑀢𑁆𑀣𑀓𑀫𑁂𑀯 𑀢𑀺𑀓𑁆𑀔𑀢𑀭𑀸𑀬 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑀺𑀧𑀲𑁆𑀲𑀦𑀼𑀢𑁆𑀢𑀭𑀁 𑀓𑀣𑀺𑀢’’𑀦𑁆𑀢𑀺. 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁧𑁫𑁩-𑁧𑁫𑁪) 𑀆𑀦𑀸𑀧𑀸𑀦𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀲𑀯𑀺𑀲𑁂𑀲𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀫𑀣𑀼𑀢𑁆𑀢𑀭𑀁 𑀓𑀣𑀺𑀢’’𑀦𑁆𑀢𑀺.

𑀅𑀧𑁆𑀧𑀁 𑀬𑀸𑀘𑀺𑀢𑁂𑀦 𑀩𑀳𑀼𑀁 𑀤𑁂𑀦𑁆𑀢𑁂𑀦 𑀉𑀴𑀸𑀭𑀧𑀼𑀭𑀺𑀲𑁂𑀦 𑀯𑀺𑀬 𑀏𑀓𑀁 𑀥𑀫𑁆𑀫𑀁 𑀧𑀼𑀘𑁆𑀙𑀺𑀢𑁂𑀦 ‘‘𑀅𑀬𑀫𑁆𑀧𑀺 𑀏𑀓𑀥𑀫𑁆𑀫𑁄’’𑀢𑀺 𑀓𑀣𑀺𑀢𑀢𑁆𑀢𑀸 𑀏𑀓𑀸𑀤𑀲𑀧𑀺 𑀥𑀫𑁆𑀫𑀸 𑀧𑀼𑀘𑁆𑀙𑀸𑀯𑀲𑁂𑀦 𑀏𑀓𑀥𑀫𑁆𑀫𑁄 𑀦𑀸𑀫 𑀚𑀸𑀢𑁄 𑀧𑀘𑁆𑀘𑁂𑀓𑀁 𑀯𑀸𑀓𑁆𑀬𑀧𑀭𑀺𑀲𑀫𑀸𑀧𑀦𑀜𑀸𑀬𑁂𑀦. 𑀏𑀓𑀯𑀻𑀲𑀢𑀺 𑀧𑀩𑁆𑀩𑀸𑀦𑀺 𑀢𑁂𑀳𑀺 𑀩𑁄𑀥𑀺𑀬𑀫𑀸𑀦𑀸𑀬 𑀧𑀝𑀺𑀧𑀤𑀸𑀬 𑀏𑀓𑀭𑀽𑀧𑀢𑁆𑀢𑀸 𑀧𑀝𑀺𑀧𑀤𑀸𑀯𑀲𑁂𑀦 𑀏𑀓𑀥𑀫𑁆𑀫𑁄 𑀦𑀸𑀫 𑀚𑀸𑀢𑁄𑀢𑀺. 𑀇𑀥 𑀇𑀫𑀲𑁆𑀫𑀺𑀁 𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑁂. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀥𑀫𑁆𑀫𑀸𑀦𑀁 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀢𑀸𑀬 𑀢𑀢𑁆𑀣 𑀲𑀸𑀯𑀓𑀸𑀦𑀁 𑀤𑀼𑀓𑁆𑀓𑀭𑀦𑁆𑀢𑀺 𑀦 𑀘𑀢𑀼𑀢𑁆𑀣𑀸𑀭𑀼𑀧𑁆𑀧𑀯𑀲𑁂𑀦𑁂𑀢𑁆𑀣 𑀤𑁂𑀲𑀦𑀸 𑀆𑀕𑀢𑀸𑀢𑀺 𑀘𑀢𑀼𑀦𑁆𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁, 𑀳𑁂𑀝𑁆𑀞𑀺𑀫𑀸𑀦𑀁 𑀢𑀺𑀡𑁆𑀡𑀁 𑀆𑀭𑀼𑀧𑁆𑀧𑀸𑀦𑀜𑁆𑀘 𑀯𑀲𑁂𑀦 𑀏𑀓𑀸𑀤𑀲. 𑀧𑀼𑀘𑁆𑀙𑀸𑀯𑀲𑁂𑀦𑀸𑀢𑀺 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂 𑀆𑀦𑀦𑁆𑀤, 𑀢𑁂𑀦…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀏𑀓𑀥𑀫𑁆𑀫𑁄 𑀅𑀓𑁆𑀔𑀸𑀢𑁄’’𑀢𑀺 (𑀫. 𑀦𑀺. 𑁨.𑁧𑁮) 𑀏𑀯𑀁 𑀧𑀯𑀢𑁆𑀢𑀧𑀼𑀘𑁆𑀙𑀸𑀯𑀲𑁂𑀦. 𑀅𑀫𑀢𑀼𑀧𑁆𑀧𑀢𑁆𑀢𑀺𑀬𑀢𑁆𑀣𑁂𑀦𑀸𑀢𑀺 𑀅𑀫𑀢𑀪𑀸𑀯𑀲𑁆𑀲 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬, 𑀲𑀩𑁆𑀩𑀸𑀦𑀺𑀧𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀏𑀓𑀭𑀲𑀫𑁆𑀧𑀺 𑀅𑀫𑀢𑀸𑀥𑀺𑀕𑀫𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄, 𑀏𑀯𑀫𑁂𑀢𑁆𑀣 𑀅𑀕𑁆𑀕𑀨𑀮𑀪𑀽𑀫𑀺 𑀅𑀦𑀸𑀕𑀸𑀫𑀺𑀨𑀮𑀪𑀽𑀫𑀻𑀢𑀺 𑀤𑁆𑀯𑁂𑀯 𑀪𑀽𑀫𑀺𑀬𑁄 𑀲𑀭𑀽𑀧𑀢𑁄 𑀆𑀕𑀢𑀸, 𑀦𑀸𑀦𑀦𑁆𑀢𑀭𑀺𑀬𑀢𑀸𑀬 𑀧𑀦 𑀳𑁂𑀝𑁆𑀞𑀺𑀫𑀸𑀧𑀺 𑀤𑁆𑀯𑁂 𑀪𑀽𑀫𑀺𑀬𑁄 𑀅𑀢𑁆𑀣𑀢𑁄 𑀆𑀕𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁨𑁧. 𑀧𑀜𑁆𑀘 𑀲𑀢𑀸𑀦𑀺 𑀅𑀕𑁆𑀖𑁄 𑀏𑀢𑀲𑁆𑀲𑀸𑀢𑀺 𑀧𑀜𑁆𑀘𑀲𑀢𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀅𑀢𑁆𑀣𑀸𑀦𑀼𑀲𑀸𑀲𑀦𑀸𑀕𑀸𑀭𑀁. 𑀢𑁂𑀦𑀸𑀳 𑁋 ‘‘𑀉𑀬𑁆𑀬𑁄𑀕𑀓𑀸𑀮𑀸𑀤𑀻𑀲𑀽’’𑀢𑀺𑀆𑀤𑀺. 𑀆𑀤𑀺-𑀲𑀤𑁆𑀤𑁂𑀦 𑀫𑀗𑁆𑀕𑀮𑀫𑀳𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀦𑁆𑀣𑀫𑁆𑀪𑀦𑁆𑀢𑀻𑀢𑀺 𑀯𑀺𑀲𑁆𑀲𑀫𑀦𑁆𑀢𑀺, 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀳𑀸𑀢𑀺 𑀲𑀦𑁆𑀦𑀺𑀯𑁂𑀲𑀯𑀲𑁂𑀦 𑀏𑀓𑀚𑁆𑀛𑀁. 𑀲𑀳 𑀅𑀢𑁆𑀣𑀸𑀦𑀼𑀲𑀸𑀲𑀦𑀁 𑀅𑀕𑀸𑀭𑀦𑁆𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀢𑁆𑀣-𑀓𑀸𑀭𑀲𑁆𑀲 𑀦𑁆𑀣-𑀓𑀸𑀭𑀁 𑀓𑀢𑁆𑀯𑀸 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀦𑁆𑀣𑀭𑀦𑁆𑀢𑀻𑀢𑀺 𑀲𑀫𑁆𑀫𑀦𑁆𑀢𑀦𑀯𑀲𑁂𑀦 𑀢𑀺𑀝𑁆𑀞𑀦𑁆𑀢𑀺.

𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀆𑀕𑀢𑀫𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀆𑀕𑀫𑀦𑀲𑀻𑀲𑁂𑀦 𑀅𑀭𑀺𑀬𑀨𑀮𑀥𑀫𑁆𑀫𑀸𑀦𑀫𑁆𑀧𑀺 𑀆𑀕𑀫𑀦𑀁 𑀯𑀼𑀢𑁆𑀢𑀫𑁂𑀯, 𑀢𑀺𑀬𑀸𑀫𑀭𑀢𑁆𑀢𑀺𑀁 𑀢𑀢𑁆𑀣 𑀯𑀲𑀦𑁆𑀢𑀸𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀯𑀴𑀜𑁆𑀚𑀦𑀁 𑀳𑁄𑀢𑀻𑀢𑀺. 𑀢𑀲𑁆𑀫𑀺𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑁂 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑀸 𑀳𑁄𑀦𑁆𑀢𑀻𑀢𑀺 𑀘𑁂? 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸𑀦𑀁 𑀢𑀢𑁆𑀣 𑀆𑀕𑀫𑀦𑀁 𑀳𑁄𑀢𑀺𑀬𑁂𑀯.

𑀅𑀮𑁆𑀮𑀕𑁄𑀫𑀬𑁂𑀦𑀸𑀢𑀺 𑀅𑀘𑁆𑀙𑁂𑀦 𑀅𑀮𑁆𑀮𑀕𑁄𑀫𑀬𑀭𑀲𑁂𑀦. 𑀑𑀧𑀼𑀜𑁆𑀙𑀸𑀧𑁂𑀢𑁆𑀯𑀸𑀢𑀺 𑀯𑀺𑀮𑀺𑀫𑁆𑀧𑀺𑀢𑁆𑀯𑀸. 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀳𑀻𑀢𑀺 𑀢𑀕𑀭𑀓𑀼𑀗𑁆𑀓𑀼𑀫𑀬𑀯𑀦𑀧𑀼𑀧𑁆𑀨𑀢𑀫𑀸𑀮𑀧𑀢𑁆𑀢𑀸𑀦𑀺 𑀧𑀺𑀲𑀺𑀢𑁆𑀯𑀸 𑀓𑀢𑀕𑀦𑁆𑀥𑁂𑀳𑀺 𑀦𑀸𑀦𑀸𑀯𑀡𑁆𑀡𑁂𑀢𑀺 𑀦𑀻𑀮𑀸𑀤𑀺𑀯𑀲𑁂𑀦 𑀦𑀸𑀦𑀸𑀯𑀡𑁆𑀡𑁂, 𑀦 𑀪𑀺𑀢𑁆𑀢𑀺𑀯𑀺𑀲𑁂𑀲𑀯𑀲𑁂𑀦. 𑀪𑀺𑀢𑁆𑀢𑀺𑀯𑀺𑀲𑁂𑀲𑀯𑀲𑁂𑀦 𑀧𑀦 𑀦𑀸𑀦𑀸𑀲𑀡𑁆𑀞𑀸𑀦𑀭𑀽𑀧𑀫𑁂𑀯. 𑀫𑀳𑀸𑀧𑀺𑀝𑁆𑀞𑀺𑀓𑀓𑁄𑀚𑀯𑀓𑁂𑀢𑀺 𑀳𑀢𑁆𑀣𑀺𑀧𑀺𑀝𑁆𑀞𑀻𑀲𑀼 𑀅𑀢𑁆𑀣𑀭𑀺𑀢𑀩𑁆𑀩𑀢𑀸𑀬 𑀫𑀳𑀸𑀧𑀺𑀝𑁆𑀞𑀺𑀓𑀸𑀢𑀺 𑀮𑀤𑁆𑀥𑀲𑀫𑀜𑁆𑀜𑁂 𑀓𑁄𑀚𑀯𑁂𑀢𑀺 𑀯𑀤𑀦𑁆𑀢𑀺. 𑀓𑀼𑀢𑁆𑀢𑀓𑁂 𑀧𑀦 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑀳𑀢𑁆𑀣𑀢𑁆𑀣𑀭𑀡𑀸 𑀳𑀢𑁆𑀣𑀺𑀭𑀽𑀧𑀯𑀺𑀘𑀺𑀢𑁆𑀢𑀸. 𑀅𑀲𑁆𑀲𑀢𑁆𑀣𑀭𑀓𑀲𑀻𑀳𑀢𑁆𑀣𑀭𑀓𑀸𑀤𑀬𑁄𑀧𑀺 𑀅𑀲𑁆𑀲𑀲𑀻𑀳𑀭𑀽𑀧𑀸𑀤𑀺𑀯𑀺𑀘𑀺𑀢𑁆𑀢𑀸 𑀏𑀯 𑀅𑀢𑁆𑀣𑀭𑀓𑀸, 𑀘𑀺𑀢𑁆𑀢𑀢𑁆𑀣𑀭𑀓𑀁 𑀦𑀸𑀦𑀸𑀭𑀽𑀧𑁂𑀳𑀺 𑀘𑁂𑀯 𑀦𑀸𑀦𑀸𑀯𑀺𑀥𑀫𑀸𑀮𑀸𑀓𑀫𑁆𑀫𑀸𑀤𑀻𑀳𑀺 𑀘 𑀯𑀺𑀘𑀺𑀢𑁆𑀢𑀁 𑀅𑀢𑁆𑀣𑀭𑀓𑀁.

𑀉𑀧𑀥𑀸𑀦𑀦𑁆𑀢𑀺 𑀅𑀧𑀲𑁆𑀲𑀬𑀦𑀁 𑀉𑀧𑀤𑀳𑀺𑀢𑁆𑀯𑀸𑀢𑀺 𑀅𑀧𑀲𑁆𑀲𑀬𑀬𑁄𑀕𑁆𑀕𑀪𑀸𑀯𑁂𑀦 𑀞𑀧𑁂𑀢𑁆𑀯𑀸 𑀕𑀦𑁆𑀥𑁂𑀳𑀺 𑀓𑀢𑀫𑀸𑀮𑀸 𑀕𑀦𑁆𑀥𑀤𑀸𑀫𑀁, 𑀢𑀫𑀸𑀮𑀧𑀢𑁆𑀢𑀸𑀤𑀻𑀳𑀺 𑀓𑀢𑀁 𑀧𑀢𑁆𑀢𑀤𑀸𑀫𑀁. 𑀆𑀤𑀺-𑀲𑀤𑁆𑀤𑁂𑀦 𑀳𑀺𑀗𑁆𑀕𑀼𑀮𑀢𑀓𑁆𑀓𑁄𑀮𑀚𑀸𑀢𑀺𑀨𑀮𑀚𑀸𑀢𑀺𑀧𑀼𑀧𑁆𑀨𑀸𑀤𑀻𑀳𑀺 𑀓𑀢𑀤𑀸𑀫𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀮𑁆𑀮𑀗𑁆𑀓𑀸𑀓𑀸𑀭𑁂𑀦 𑀓𑀢𑀧𑀻𑀞𑀁 𑀧𑀮𑁆𑀮𑀗𑁆𑀓𑀧𑀻𑀞𑀁, 𑀢𑀻𑀲𑀼 𑀧𑀲𑁆𑀲𑁂𑀲𑀼, 𑀏𑀓𑀧𑀲𑁆𑀲𑁂 𑀏𑀯 𑀯𑀸 𑀲𑀉𑀧𑀲𑁆𑀲𑀬𑀁 𑀅𑀧𑀲𑁆𑀲𑀬𑀧𑀻𑀞𑀁, 𑀅𑀦𑀧𑀲𑁆𑀲𑀬𑀁 𑀫𑀼𑀡𑁆𑀟𑀧𑀻𑀞𑀁 𑀬𑁄𑀚𑀦𑀸𑀯𑀝𑁆𑀝𑁂𑀢𑀺 𑀬𑁄𑀚𑀦𑀧𑀭𑀺𑀓𑁆𑀔𑁂𑀧𑁂.

𑀲𑀁𑀯𑀺𑀥𑀸𑀬𑀸𑀢𑀺 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀓𑁄𑀡𑀧𑀤𑁂𑀲𑀜𑁆𑀘 𑀇𑀢𑀭𑀧𑀤𑁂𑀲𑀜𑁆𑀘 𑀲𑀫𑀁 𑀓𑀢𑁆𑀯𑀸 𑀯𑀺𑀥𑀸𑀬. 𑀢𑁂𑀦𑀸𑀳 𑁋 ‘‘𑀓𑀢𑁆𑀢𑀭𑀺𑀬𑀸 𑀧𑀤𑀼𑀫𑀁 𑀓𑀦𑁆𑀢𑀦𑁆𑀢𑁄 𑀯𑀺𑀬𑀸’’𑀢𑀺 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄𑀢𑀺 𑀏𑀢𑁆𑀣 𑀘 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀭𑀽𑀧𑀲𑀫𑁆𑀧𑀤𑀸 𑀯𑀺𑀬 𑀆𑀓𑀧𑁆𑀧𑀲𑀫𑁆𑀧𑀤𑀸𑀧𑀺 𑀧𑀭𑀫𑀼𑀓𑁆𑀓𑀁𑀲𑀕𑀢𑀸, 𑀢𑀲𑁆𑀫𑀸 𑀢𑀤𑀸 𑀪𑀕𑀯𑀸 𑀏𑀯𑀁 𑀲𑁄𑀪𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀯𑀡𑁆𑀡𑀧𑀸𑀫𑀗𑁆𑀕𑁂𑀦𑀸’’𑀢𑀺𑀆𑀤𑀺𑀫𑀸𑀳, 𑀢𑀢𑁆𑀣 𑀅𑀲𑀫𑁂𑀦 𑀩𑀼𑀤𑁆𑀥𑀯𑁂𑀲𑁂𑀦𑀸𑀢𑀺𑀆𑀤𑀺𑀦𑀸 𑀢𑀤𑀸 𑀪𑀕𑀯𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑀲𑁆𑀲 𑀦𑀺𑀕𑀼𑀳𑀡𑁂 𑀓𑀸𑀭𑀡𑀸𑀪𑀸𑀯𑀢𑁄 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀤𑁂𑀯𑀫𑀦𑀼𑀲𑁆𑀲𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀻𑀦𑀁 𑀧𑀲𑀸𑀤𑀚𑀦𑀦𑀢𑁆𑀣𑀁 𑀅𑀢𑁆𑀢𑀦𑁄 𑀲𑀪𑀸𑀯𑀧𑀓𑀢𑀺𑀓𑀺𑀭𑀺𑀬𑀸𑀬𑁂𑀯 𑀓𑀧𑀺𑀮𑀯𑀢𑁆𑀣𑀼𑀁 𑀧𑀸𑀯𑀺𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀩𑀼𑀤𑁆𑀥𑀸𑀦𑀁 𑀓𑀸𑀬𑀧𑁆𑀧𑀪𑀸 𑀦𑀸𑀫 𑀧𑀓𑀢𑀺𑀬𑀸 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑀫𑁂𑀯 𑀧𑀤𑁂𑀲𑀁 𑀨𑀭𑀢𑀻𑀢𑀺 𑀆𑀳 𑁋 ‘‘𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀻’’𑀢𑀺 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀸𑀦𑀁 𑀯𑀲𑁂𑀦 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄.

𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄𑀢𑀺 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀸 𑀨𑀼𑀮𑁆𑀮𑁄 𑀯𑀺𑀓𑀲𑀺𑀢𑁄. 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀸𑀦𑀦𑁆𑀢𑀺𑀆𑀤𑀺 𑀧𑀭𑀺𑀓𑀧𑁆𑀧𑀽𑀧𑀫𑀸. 𑀬𑀣𑀸 𑀢𑀁…𑀧𑁂… 𑀅𑀮𑀗𑁆𑀓𑀢𑀁 𑀅𑀜𑁆𑀜𑁄 𑀯𑀺𑀭𑁄𑀘𑀢𑀺, 𑀏𑀯𑀁 𑀯𑀺𑀭𑁄𑀘𑀺𑀢𑁆𑀣, 𑀲𑀫𑀢𑀺𑀁𑀲𑀸𑀬 𑀧𑀸𑀭𑀫𑀺𑀢𑀸𑀳𑀺 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀏𑀯𑀁 𑀯𑀺𑀭𑁄𑀘𑀺𑀢𑁆𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀜𑁆𑀘𑀯𑀻𑀲𑀢𑀺𑀬𑀸 𑀦𑀤𑀻𑀦𑀦𑁆𑀢𑀺 𑀕𑀗𑁆𑀕𑀸𑀤𑀻𑀦𑀁 𑀘𑀦𑁆𑀤𑀪𑀸𑀕𑀸𑀧𑀭𑀺𑀬𑁄𑀲𑀸𑀦𑀸𑀦𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀫𑀳𑀸𑀦𑀤𑀻𑀦𑀁. 𑀲𑀫𑁆𑀪𑀺𑀚𑁆𑀚𑀸𑀢𑀺 𑀲𑀫𑁆𑀪𑁂𑀤𑀁 𑀫𑀺𑀲𑁆𑀲𑀻𑀪𑀸𑀯𑀁 𑀧𑀢𑁆𑀯𑀸 𑀫𑀼𑀔𑀤𑁆𑀯𑀸𑀭𑁂𑀢𑀺 𑀲𑀫𑀼𑀤𑁆𑀤𑀁 𑀧𑀯𑀺𑀝𑁆𑀞𑀝𑁆𑀞𑀸𑀦𑁂.

𑀤𑁂𑀯𑀫𑀦𑀼𑀲𑁆𑀲𑀦𑀸𑀕𑀲𑀼𑀧𑀡𑁆𑀡𑀕𑀦𑁆𑀥𑀩𑁆𑀩𑀬𑀓𑁆𑀔𑀸𑀤𑀻𑀦𑀁 𑀅𑀓𑁆𑀔𑀻𑀦𑀻𑀢𑀺 𑀘𑁂𑀢𑀁 𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀳𑀲𑁆𑀲𑁂𑀦𑀸𑀢𑀺 𑀧𑀤𑀲𑀳𑀲𑁆𑀲𑁂𑀦, 𑀪𑀸𑀡𑀯𑀸𑀭𑀧𑁆𑀧𑀫𑀸𑀡𑁂𑀦 𑀕𑀦𑁆𑀣𑁂𑀦𑀸𑀢𑀺 𑀅𑀢𑁆𑀣𑁄.

𑀓𑀫𑁆𑀧𑀬𑀦𑁆𑀢𑁄 𑀯𑀲𑀼𑀦𑁆𑀥𑀭𑀦𑁆𑀢𑀺 𑀅𑀢𑁆𑀢𑀦𑁄 𑀕𑀼𑀡𑀯𑀺𑀲𑁂𑀲𑁂𑀳𑀺 𑀧𑀣𑀯𑀻𑀓𑀫𑁆𑀧𑀁 𑀉𑀧𑁆𑀧𑀸𑀤𑁂𑀦𑁆𑀢𑁄, 𑀏𑀯𑀁𑀪𑀽𑀢𑁄𑀧𑀺 𑀅𑀳𑁂𑀞𑀬𑀦𑁆𑀢𑁄 𑀧𑀸𑀡𑀸𑀦𑀺. 𑀲𑀩𑁆𑀩𑀤𑀓𑁆𑀔𑀺𑀡𑀢𑁆𑀢𑀸 𑀩𑀼𑀤𑁆𑀥𑀸𑀦𑀁 𑀤𑀓𑁆𑀔𑀺𑀡𑀁 𑀧𑀞𑀫𑀁 𑀧𑀸𑀤𑀁 𑀉𑀤𑁆𑀥𑀭𑀦𑁆𑀢𑁄. 𑀲𑀫𑀁 𑀲𑀫𑁆𑀨𑀼𑀲𑀢𑁂 𑀪𑀽𑀫𑀺𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀬. 𑀬𑀤𑀺𑀧𑀺 𑀪𑀽𑀫𑀺𑀁 𑀲𑀫𑀁 𑀨𑀼𑀲𑀢𑀺, 𑀭𑀚𑀲𑀸𑀦𑀼𑀧𑀮𑀺𑀧𑁆𑀧𑀢𑀺 𑀲𑀼𑀔𑀼𑀫𑀢𑁆𑀢𑀸 𑀙𑀯𑀺𑀬𑀸. 𑀦𑀺𑀦𑁆𑀦𑀝𑁆𑀞𑀸𑀦𑀁 𑀉𑀦𑁆𑀦𑀫𑀢𑀻𑀢𑀺𑀆𑀤𑀺 𑀩𑀼𑀤𑁆𑀥𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀲𑀗𑁆𑀔𑀸𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀮𑀸𑀪𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀁. 𑀦𑀸𑀢𑀺𑀤𑀽𑀭𑁂 𑀉𑀤𑁆𑀥𑀭𑀢𑀻𑀢𑀺 𑀅𑀢𑀺𑀤𑀽𑀭𑁂 𑀞𑀧𑁂𑀢𑀼𑀁 𑀦 𑀉𑀤𑁆𑀥𑀭𑀢𑀺. 𑀦𑀘𑁆𑀘𑀸𑀲𑀦𑁆𑀦𑁂 𑀘 𑀦𑀺𑀓𑁆𑀔𑀺𑀧𑀦𑁆𑀢𑀺 𑀅𑀘𑁆𑀘𑀸𑀲𑀦𑁆𑀦𑁂 𑀘 𑀞𑀸𑀦𑁂 𑀅𑀦𑀺𑀓𑁆𑀔𑀺𑀧𑀦𑁆𑀢𑁄 𑀦𑀺𑀬𑁆𑀬𑀸𑀢𑀺. 𑀳𑀸𑀲𑀬𑀦𑁆𑀢𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀢𑁄𑀲𑀬𑀦𑁆𑀢𑁄. 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀘𑀭𑀢𑀻𑀢𑀺 𑀘𑀢𑀼𑀘𑀸𑀭𑀻.

𑀩𑀼𑀤𑁆𑀥𑀸𑀦𑀼𑀪𑀸𑀯𑀲𑁆𑀲 𑀧𑀓𑀸𑀲𑀦𑀯𑀲𑁂𑀦 𑀕𑀢𑀢𑁆𑀢𑀸 𑀯𑀡𑁆𑀡𑀓𑀸𑀮𑁄 𑀦𑀸𑀫 𑀓𑀺𑀭𑁂𑀲. 𑀲𑀭𑀻𑀭𑀯𑀡𑁆𑀡𑁂 𑀯𑀸 𑀕𑀼𑀡𑀯𑀡𑁆𑀡𑁂 𑀯𑀸 𑀓𑀣𑀺𑀬𑀫𑀸𑀦𑁂 𑀤𑀼𑀓𑁆𑀓𑀣𑀺𑀢𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀅𑀧𑀭𑀺𑀫𑀸𑀡𑀯𑀡𑁆𑀡𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀩𑀼𑀤𑁆𑀥𑀕𑀼𑀡𑀲𑀁𑀯𑀡𑁆𑀡𑀦𑀸 𑀚𑀸𑀦𑀦𑁆𑀢𑀲𑁆𑀲 𑀬𑀣𑀸𑀥𑀫𑁆𑀫𑀲𑀁𑀯𑀡𑁆𑀡𑀦𑀁𑀬𑁂𑀯 𑀅𑀦𑀼𑀧𑀯𑀺𑀲𑀢𑀻𑀢𑀺.

𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦𑀸𑀢𑀺 𑀕𑀦𑁆𑀣𑀺𑀢𑁆𑀯𑀸 𑀕𑀳𑀺𑀢𑀤𑀼𑀓𑀽𑀮𑀯𑀢𑁆𑀣𑁂𑀦, 𑀦𑀸𑀕𑀯𑀺𑀓𑁆𑀓𑀦𑁆𑀢𑀘𑀭𑀡𑁄𑀢𑀺 𑀳𑀢𑁆𑀣𑀺𑀦𑀸𑀕𑀲𑀤𑀺𑀲𑀧𑀤𑀦𑀺𑀓𑁆𑀔𑁂𑀧𑁄. 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄𑀢𑀺 𑀅𑀦𑁂𑀓𑀲𑀢𑀧𑀼𑀜𑁆𑀜𑀦𑀺𑀫𑁆𑀫𑀺𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁄 𑀫𑀡𑀺𑀯𑁂𑀭𑁄𑀘𑀦𑁄 𑀬𑀣𑀸𑀢𑀺 𑀅𑀢𑀺𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀫𑀡𑀺 𑀯𑀺𑀬 𑀯𑁂𑀭𑁄𑀘𑀦𑁄 𑀦𑀸𑀫 𑀏𑀓𑁄 𑀫𑀡𑀺𑀯𑀺𑀲𑁂𑀲𑁄𑀢𑀺 𑀓𑁂𑀘𑀺 𑀫𑀳𑀸𑀲𑀸𑀮𑁄𑀯𑀸𑀢𑀺 𑀫𑀳𑀦𑁆𑀢𑁄 𑀲𑀸𑀮𑀭𑀼𑀓𑁆𑀔𑁄 𑀯𑀺𑀬, 𑀓𑁄𑀯𑀺𑀴𑀸𑀭𑀸𑀤𑀺𑀫𑀳𑀸𑀭𑀼𑀓𑁆𑀔𑁄 𑀯𑀺𑀬 𑀯𑀸 𑀧𑀤𑀼𑀫𑁄 𑀓𑁄𑀓𑀦𑀤𑁄 𑀬𑀣𑀸𑀢𑀺 𑀓𑁄𑀓𑀦𑀤𑀲𑀗𑁆𑀔𑀸𑀢𑀁 𑀫𑀳𑀸𑀧𑀤𑀼𑀫𑀁 𑀯𑀺𑀬, 𑀯𑀺𑀓𑀲𑀫𑀸𑀦𑀧𑀤𑀼𑀫𑀁 𑀯𑀺𑀬 𑀯𑀸.

𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬𑀸𑀢𑀺𑀆𑀤𑀺 𑀢𑀲𑁆𑀲𑀸 𑀧𑀓𑀺𑀡𑁆𑀡𑀓𑀓𑀣𑀸𑀬 𑀅𑀜𑁆𑀜𑁂𑀲𑀁 𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀜𑁆𑀘𑁂𑀯 𑀲𑀼𑀡𑀦𑁆𑀢𑀸𑀦𑀁 𑀅𑀘𑁆𑀘𑀦𑁆𑀢𑀲𑀼𑀔𑀸𑀯𑀳𑀪𑀸𑀯𑀤𑀲𑁆𑀲𑀦𑀜𑁆𑀘 𑀧𑀣𑀯𑀻𑀚𑀁 𑀆𑀓𑀟𑁆𑀠𑁂𑀦𑁆𑀢𑁄 𑀯𑀺𑀬𑀸𑀢𑀺 𑀦𑀸𑀴𑀺𑀬𑀦𑁆𑀢𑀁 𑀬𑁄𑀚𑁂𑀢𑁆𑀯𑀸 𑀫𑀳𑀸𑀧𑀣𑀯𑀺𑀬𑀸 𑀳𑁂𑀝𑁆𑀞𑀺𑀫𑀢𑀮𑁂 𑀧𑀧𑁆𑀧𑀝𑀓𑁄𑀚𑀁 𑀉𑀤𑁆𑀥𑀁𑀫𑀼𑀔𑀁 𑀓𑀢𑁆𑀯𑀸 𑀆𑀓𑀟𑁆𑀠𑁂𑀦𑁆𑀢𑁄 𑀯𑀺𑀬 𑀬𑁄𑀚𑀦𑀺𑀓𑀦𑁆𑀢𑀺 𑀬𑁄𑀚𑀦𑀧𑁆𑀧𑀫𑀸𑀡𑀁 𑀫𑀥𑀼𑀪𑀡𑁆𑀟𑀦𑁆𑀢𑀺 𑀫𑀥𑀼𑀧𑀝𑀮𑀁.

𑀫𑀳𑀦𑁆𑀢𑀦𑁆𑀢𑀺 𑀉𑀴𑀸𑀭𑀁. 𑀲𑀩𑁆𑀩𑀤𑀸𑀦𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀻𑀢𑀺 𑀲𑀩𑁆𑀩𑀫𑁂𑀯 𑀧𑀘𑁆𑀘𑀬𑀚𑀸𑀢𑀁 𑀆𑀯𑀸𑀲𑀤𑀸𑀬𑀓𑁂𑀦 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀢𑀣𑀸𑀳𑀺 𑀤𑁆𑀯𑁂 𑀢𑀬𑁄 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀆𑀕𑀢𑀲𑁆𑀲𑀧𑀺 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀁 𑀆𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀧𑀝𑀺𑀲𑁆𑀲𑀬𑁂 𑀫𑀼𑀳𑀼𑀢𑁆𑀢𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀬𑁂 𑀩𑀮𑀁 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀯𑀡𑁆𑀡𑀥𑀸𑀢𑀼 𑀯𑀸𑀢𑀸𑀢𑀧𑁂𑀳𑀺 𑀓𑀺𑀮𑀫𑀢𑀺, 𑀧𑀝𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀫𑀼𑀳𑀼𑀢𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀯𑀺𑀲𑀪𑀸𑀕𑀲𑀦𑁆𑀢𑀢𑀺 𑀯𑀽𑀧𑀲𑀫𑁆𑀫𑀢𑀺, 𑀲𑀪𑀸𑀕𑀲𑀦𑁆𑀢𑀢𑀺 𑀧𑀢𑀺𑀝𑁆𑀞𑀸𑀢𑀺, 𑀯𑀡𑁆𑀡𑀥𑀸𑀢𑀼 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀸 𑀯𑀺𑀬 𑀳𑁄𑀢𑀺, 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀧𑀸𑀤𑁂 𑀓𑀡𑁆𑀝𑀓𑁄 𑀯𑀺𑀚𑁆𑀛𑀢𑀺, 𑀔𑀸𑀡𑀼 𑀧𑀳𑀭𑀢𑀺, 𑀲𑀭𑀻𑀲𑀧𑀸𑀤𑀺𑀧𑀭𑀺𑀲𑁆𑀲𑀬𑁄 𑀘𑁂𑀯 𑀘𑁄𑀭𑀪𑀬𑀜𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀧𑀝𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀧𑀦𑁆𑀦𑀲𑁆𑀲 𑀧𑀦 𑀲𑀩𑁆𑀩𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺, 𑀅𑀚𑁆𑀛𑀬𑀦𑁆𑀢𑀲𑁆𑀲 𑀥𑀫𑁆𑀫𑀧𑀻𑀢𑀺𑀲𑀼𑀔𑀁, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀉𑀧𑀲𑀫𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄, 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀅𑀓𑁆𑀔𑀻𑀦𑀺 𑀨𑀦𑁆𑀤𑀦𑁆𑀢𑀺, 𑀲𑁂𑀦𑀸𑀲𑀦𑀁 𑀧𑀯𑀺𑀲𑀦𑀓𑁆𑀔𑀡𑁂 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀼𑀳𑀼𑀢𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀧𑀦 𑀅𑀓𑁆𑀔𑀺𑀧𑀲𑀸𑀤𑁄 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑁄 𑀯𑀺𑀬 𑀳𑁄𑀢𑀺, 𑀤𑁆𑀯𑀸𑀭𑀯𑀸𑀢𑀧𑀸𑀦𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀢𑀲𑁆𑀫𑀺𑀫𑁆𑀧𑀺 𑀘 𑀆𑀯𑀸𑀲𑁂 𑀯𑀲𑀦𑁆𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀆𑀯𑀸𑀲𑀤𑀸𑀦𑀲𑁆𑀫𑀺𑀁 𑀤𑀺𑀦𑁆𑀦𑁂 𑀲𑀩𑁆𑀩𑀁 𑀤𑀸𑀦𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀻’’𑀢𑀺. 𑀪𑀽𑀫𑀝𑁆𑀞𑀓…𑀧𑁂… 𑀦 𑀲𑀓𑁆𑀓𑀸𑀢𑀺 𑀅𑀬𑀫𑀢𑁆𑀣𑁄 𑀫𑀳𑀸𑀲𑀼𑀤𑀲𑁆𑀲𑀦𑀯𑀢𑁆𑀣𑀼𑀦𑀸 (𑀤𑀻. 𑀦𑀺. 𑁨.𑁨𑁪𑁧 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄.

𑀲𑀻𑀢𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁯𑁫; 𑀲𑀁. 𑀦𑀺. 𑀝𑀻. 𑁨.𑁪.𑁨𑁪𑁩) 𑀅𑀚𑁆𑀛𑀢𑁆𑀢𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸 𑀩𑀳𑀺𑀤𑁆𑀥𑀉𑀢𑀼𑀯𑀺𑀧𑀭𑀺𑀡𑀸𑀫𑀯𑀲𑁂𑀦 𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀻𑀢𑀁. 𑀉𑀡𑁆𑀳𑀦𑁆𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀁. 𑀢𑀲𑁆𑀲 𑀧𑀦 𑀤𑀯𑀤𑀸𑀳𑀸𑀤𑀻𑀲𑀼 𑀲𑀫𑁆𑀪𑀯𑁄 𑀤𑀝𑁆𑀞𑀩𑁆𑀩𑁄. 𑀧𑀝𑀺𑀳𑀦𑁆𑀢𑀻𑀢𑀺 𑀧𑀝𑀺𑀩𑀸𑀳𑀢𑀺. 𑀬𑀣𑀸 𑀢𑀤𑀼𑀪𑀬𑀯𑀲𑁂𑀦 𑀓𑀸𑀬𑀘𑀺𑀢𑁆𑀢𑀸𑀦𑀁 𑀩𑀸𑀥𑀦𑀸𑀦𑀺 𑀦 𑀳𑁄𑀦𑁆𑀢𑀺, 𑀏𑀯𑀁 𑀓𑀭𑁄𑀢𑀺. 𑀲𑀻𑀢𑀼𑀡𑁆𑀳𑀩𑁆𑀪𑀸𑀳𑀢𑁂 𑀳𑀺 𑀲𑀭𑀻𑀭𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄 𑀧𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀸𑀴𑀫𑀺𑀕𑀸𑀦𑀻𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀸𑀴𑀫𑀺𑀕𑁂. 𑀕𑀼𑀢𑁆𑀢𑀲𑁂𑀦𑀸𑀲𑀦𑀜𑁆𑀳𑀺 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀢𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺. 𑀲𑀭𑀻𑀲𑀧𑁂𑀢𑀺 𑀬𑁂 𑀓𑁂𑀘𑀺 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑁂 𑀤𑀻𑀖𑀚𑀸𑀢𑀺𑀓𑁂. 𑀫𑀓𑀲𑁂𑀢𑀺 𑀦𑀺𑀤𑀲𑁆𑀲𑀦𑀫𑁂𑀢𑀁, 𑀟𑀁𑀲𑀸𑀤𑀻𑀦𑀁 𑀏𑀢𑁂𑀦𑁂𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀺𑀲𑀺𑀭𑁂𑀢𑀺 𑀲𑀻𑀢𑀓𑀸𑀮𑀯𑀲𑁂𑀦 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀤𑀺𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑁂 𑀲𑀺𑀲𑀺𑀭𑀲𑀫𑁆𑀨𑀲𑁆𑀲𑁂. 𑀯𑀼𑀝𑁆𑀞𑀺𑀬𑁄𑀢𑀺 𑀬𑀤𑀸 𑀢𑀤𑀸 𑀉𑀧𑁆𑀧𑀦𑁆𑀦𑀸 𑀯𑀲𑁆𑀲𑀯𑀼𑀝𑁆𑀞𑀺𑀬𑁄 𑀧𑀝𑀺𑀳𑀦𑀢𑀻𑀢𑀺 𑀬𑁄𑀚𑀦𑀸.

𑀯𑀸𑀢𑀸𑀢𑀧𑁄 𑀖𑁄𑀭𑁄𑀢𑀺 𑀭𑀼𑀓𑁆𑀔𑀕𑀘𑁆𑀙𑀸𑀤𑀻𑀦𑀁 𑀉𑀫𑁆𑀫𑀽𑀮𑀪𑀜𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀖𑁄𑀭𑁄 𑀲𑀭𑀚𑀅𑀭𑀚𑀸𑀤𑀺𑀪𑁂𑀤𑁄 𑀯𑀸𑀢𑁄 𑀘𑁂𑀯 𑀕𑀺𑀫𑁆𑀳𑀧𑀭𑀺𑀴𑀸𑀳𑀲𑀫𑀬𑁂𑀲𑀼 𑀉𑀧𑁆𑀧𑀢𑁆𑀢𑀺𑀬𑀸 𑀖𑁄𑀭𑁄 𑀲𑀽𑀭𑀺𑀬𑀸𑀢𑀧𑁄 𑀘. 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀝𑀺𑀩𑀸𑀳𑀻𑀬𑀢𑀺. 𑀮𑁂𑀡𑀢𑁆𑀣𑀦𑁆𑀢𑀺 𑀦𑀸𑀦𑀸𑀭𑀫𑁆𑀫𑀡𑀢𑁄 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀁. 𑀲𑀼𑀔𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀧𑀭𑀺𑀲𑁆𑀲𑀬𑀸𑀪𑀸𑀯𑁂𑀦 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀁. 𑀛𑀸𑀬𑀺𑀢𑀼𑀦𑁆𑀢𑀺 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀺𑀢𑁆𑀢𑀁 𑀉𑀧𑀦𑀺𑀚𑁆𑀛𑀸𑀬𑀺𑀢𑀼𑀁. 𑀯𑀺𑀧𑀲𑁆𑀲𑀺𑀢𑀼𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀢𑁄 𑀲𑀩𑁆𑀩𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑀼𑀁.

𑀯𑀺𑀳𑀸𑀭𑁂𑀢𑀺 𑀧𑀝𑀺𑀲𑁆𑀲𑀬𑁂. 𑀓𑀸𑀭𑀬𑁂𑀢𑀺 𑀓𑀸𑀭𑀸𑀧𑁂𑀬𑁆𑀬. 𑀭𑀫𑁆𑀫𑁂𑀢𑀺 𑀫𑀦𑁄𑀭𑀫𑁂 𑀦𑀺𑀯𑀸𑀲𑀲𑀼𑀔𑁂. 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂𑀢𑀺 𑀓𑀸𑀭𑁂𑀢𑁆𑀯𑀸 𑀧𑀦 𑀏𑀢𑁆𑀣 𑀯𑀺𑀳𑀸𑀭𑁂𑀲𑀼 𑀩𑀳𑀼𑀲𑁆𑀲𑀼𑀢𑁂 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀦𑀺𑀯𑀸𑀲𑁂𑀬𑁆𑀬. 𑀢𑁂 𑀦𑀺𑀯𑀸𑀲𑁂𑀦𑁆𑀢𑁄 𑀧𑀦 𑀢𑁂𑀲𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀣𑀸 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀣𑁄 𑀦 𑀳𑁄𑀢𑀺, 𑀏𑀯𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘 𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑁂𑀲𑀼 𑀓𑀫𑁆𑀫𑀨𑀮𑀸𑀦𑀁 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀜𑁆𑀘 𑀲𑀤𑁆𑀤𑀳𑀦𑁂𑀦 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑀇𑀤𑀸𑀦𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀢𑁂𑀢𑀺 𑀩𑀳𑀼𑀲𑁆𑀲𑀼𑀢𑀸 𑀢𑀲𑁆𑀲𑀸𑀢𑀺 𑀉𑀧𑀸𑀲𑀓𑀲𑁆𑀲. 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀧𑀦𑀼𑀤𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬𑀸𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀬𑀁 𑀲𑀤𑁆𑀥𑀫𑁆𑀫𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁂𑀦 𑀚𑀸𑀦𑀺𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺.

𑀧𑀽𑀚𑀸𑀲𑀓𑁆𑀓𑀸𑀭𑀯𑀲𑁂𑀦𑁂𑀯 𑀧𑀞𑀫𑀬𑀸𑀫𑁄 𑀔𑁂𑀧𑀺𑀢𑁄, 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀅𑀧𑁆𑀧𑀸𑀯𑀲𑁂𑀲𑁄 𑀫𑀚𑁆𑀛𑀺𑀫𑀬𑀸𑀫𑁄 𑀕𑀢𑁄𑀢𑀺 𑀧𑀸𑀴𑀺𑀬𑀁 ‘‘𑀩𑀳𑀼𑀤𑁂𑀯 𑀭𑀢𑁆𑀢𑀺’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀢𑀺𑀭𑁂𑀓𑀢𑀭𑀁 𑀤𑀺𑀬𑀟𑁆𑀠𑀬𑀸𑀫’’𑀦𑁆𑀢𑀺. 𑀲𑀦𑁆𑀤𑀲𑁆𑀲𑁂𑀲𑀻𑀢𑀺 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀲𑀺, 𑀆𑀯𑀸𑀲𑀤𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀢𑁄 𑀧𑀭𑀁, ‘‘𑀫𑀳𑀸𑀭𑀸𑀚, 𑀇𑀢𑀺𑀧𑀺 𑀲𑀻𑀮𑀁, 𑀇𑀢𑀺𑀧𑀺 𑀲𑀫𑀸𑀥𑀺, 𑀇𑀢𑀺𑀧𑀺 𑀧𑀜𑁆𑀜𑀸’’𑀢𑀺 𑀲𑀻𑀮𑀸𑀤𑀺𑀕𑀼𑀡𑁂 𑀢𑁂𑀲𑀁 𑀲𑀫𑁆𑀫𑀸 𑀤𑀲𑁆𑀲𑁂𑀲𑀺, 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀧𑀓𑀸𑀲𑁂𑀲𑀺. 𑀲𑀫𑀸𑀤𑀧𑁂𑀲𑀻𑀢𑀺 ‘‘𑀏𑀯𑀁 𑀲𑀻𑀮𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦 𑀏𑀯𑀁 𑀲𑀫𑀸𑀥𑀺, 𑀏𑀯𑀁 𑀧𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀬𑀣𑀸 𑀢𑁂 𑀲𑀻𑀮𑀸𑀤𑀺𑀕𑀼𑀡𑁂 𑀆𑀤𑀺𑀬𑀦𑁆𑀢𑀺, 𑀢𑀣𑀸 𑀕𑀡𑁆𑀳𑀸𑀧𑁂𑀲𑀺. 𑀲𑀫𑀼𑀢𑁆𑀢𑁂𑀚𑁂𑀲𑀻𑀢𑀺 𑀬𑀣𑀸 𑀲𑀫𑀸𑀤𑀺𑀦𑁆𑀦𑀁 𑀲𑀻𑀮𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀘 𑀪𑀸𑀯𑀺𑀬𑀫𑀸𑀦𑀸 𑀬𑀣𑀸 𑀲𑀼𑀝𑁆𑀞𑀼 𑀯𑀺𑀲𑁄𑀥𑀺𑀢𑀸 𑀉𑀧𑀭𑀺𑀯𑀺𑀲𑁂𑀲𑀸𑀯𑀳𑀸 𑀳𑁄𑀦𑁆𑀢𑀺, 𑀏𑀯𑀁 𑀘𑀺𑀢𑁆𑀢𑀁 𑀲𑀫𑀼𑀢𑁆𑀢𑁂𑀚𑁂𑀲𑀺 𑀦𑀺𑀲𑀸𑀫𑀦𑀯𑀲𑁂𑀦 𑀯𑁄𑀤𑀸𑀧𑁂𑀲𑀺. 𑀲𑀫𑁆𑀧𑀳𑀁𑀲𑁂𑀲𑀻𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀞𑀺𑀢𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑁆𑀧𑀢𑀺 𑀮𑀤𑁆𑀥𑀕𑀼𑀡𑀸𑀦𑀺𑀲𑀁𑀲𑁂𑀳𑀺 𑀘𑁂𑀯 𑀉𑀧𑀭𑀺 𑀮𑀤𑁆𑀥𑀩𑁆𑀩𑀨𑀮𑀯𑀺𑀲𑁂𑀲𑁂𑀳𑀺 𑀘 𑀉𑀧𑀭𑀺𑀘𑀺𑀢𑁆𑀢𑀁 𑀲𑀫𑁆𑀫𑀸 𑀧𑀳𑀁𑀲𑁂𑀲𑀺, 𑀮𑀤𑁆𑀥𑀲𑁆𑀲𑀸𑀲𑀯𑀲𑁂𑀦 𑀲𑀼𑀝𑁆𑀞𑀼 𑀢𑁄𑀲𑁂𑀲𑀺. 𑀏𑀯𑀫𑁂𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀫𑀼𑀤𑀸𑀬𑀯𑀘𑀦𑁄𑀧𑀺 𑀅𑀲𑀻𑀢𑀺𑀫𑀳𑀸𑀣𑁂𑀭-𑀲𑀤𑁆𑀤𑁄 𑀢𑀤𑁂𑀓𑀤𑁂𑀲𑁂𑀧𑀺 𑀦𑀺𑀭𑀼𑀴𑁆𑀳𑁄𑀢𑀺 𑀆𑀳 ‘‘𑀅𑀲𑀻𑀢𑀺𑀫𑀳𑀸𑀣𑁂𑀭𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀽’’𑀢𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀳𑀺 𑀅𑀦𑁆𑀢𑁄𑀕𑀥𑁄 𑀏𑀯𑀸𑀢𑀺. 𑀲𑀸𑀓𑀺𑀬𑀫𑀡𑁆𑀟𑀮𑁂𑀢𑀺 𑀲𑀸𑀓𑀺𑀬𑀭𑀸𑀚𑀲𑀫𑀽𑀳𑁂.

𑀧𑀝𑀺𑀧𑀤𑀸𑀬 𑀦𑀺𑀬𑀼𑀢𑁆𑀢𑀢𑁆𑀢𑀸 𑀧𑀸𑀝𑀺𑀧𑀤𑁄. 𑀢𑁂𑀦𑀸𑀳 𑁋 ‘‘𑀧𑀝𑀺𑀧𑀦𑁆𑀦𑀓𑁄’’𑀢𑀺. 𑀲𑀺𑀓𑁆𑀔𑀦𑀲𑀻𑀮𑀢𑀸𑀤𑀺𑀦𑀸 𑀲𑁂𑀔𑁄, 𑀑𑀥𑀺𑀲𑁄 𑀲𑀫𑀺𑀢𑀧𑀸𑀧𑀢𑀸𑀬 𑀲𑀫𑀡𑁄. 𑀲𑁂𑀔𑁄 𑀧𑀸𑀝𑀺𑀧𑀤𑁄 𑀧𑀝𑀺𑀧𑀚𑁆𑀚𑀦𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀧𑀝𑀺𑀧𑀤𑀸𑀤𑁂𑀲𑀦𑀁 𑀦𑀺𑀬𑀫𑁂𑀦𑁆𑀢𑁄 𑀧𑀝𑀺𑀧𑀤𑀸𑀬 𑀧𑀼𑀕𑁆𑀕𑀮𑀁 𑀦𑀺𑀬𑀫𑁂𑀢𑀺 𑀦𑀸𑀫𑀸𑀢𑀺 ‘‘𑀧𑀝𑀺𑀧𑀤𑀸𑀬 𑀧𑀼𑀕𑁆𑀕𑀮𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀻’’𑀢𑀺. 𑀲𑁂𑀔𑀧𑁆𑀧𑀝𑀺𑀧𑀤𑀸 𑀲𑀸𑀲𑀦𑁂 𑀫𑀗𑁆𑀕𑀮𑀧𑀝𑀺𑀧𑀤𑀸 𑀲𑀫𑁆𑀫𑀤𑁂𑀯 𑀅𑀲𑁂𑀯𑀺𑀢𑀩𑁆𑀩𑀧𑀭𑀺𑀯𑀚𑁆𑀚𑀦𑁂𑀦 𑀲𑁂𑀯𑀺𑀢𑀩𑁆𑀩𑀲𑀫𑀸𑀤𑀸𑀦𑁂𑀦 𑀉𑀓𑁆𑀓𑀁𑀲𑀯𑀢𑁆𑀣𑀽𑀲𑀼 𑀘 𑀪𑀸𑀯𑀢𑁄 𑀅𑀲𑁂𑀔𑀥𑀫𑁆𑀫𑀧𑀸𑀭𑀺𑀧𑀽𑀭𑀺𑀬𑀸 𑀆𑀯𑀳𑀢𑁆𑀢𑀸 𑀘 𑀯𑀟𑁆𑀠𑀫𑀸𑀦𑀓𑀧𑀝𑀺𑀧𑀤𑀸. 𑀅𑀓𑀺𑀮𑀫𑀦𑁆𑀢𑀸𑀯 𑀲𑀮𑁆𑀮𑀓𑁆𑀔𑁂𑀲𑁆𑀲𑀦𑁆𑀢𑀻𑀢𑀺 𑀇𑀤𑀁 𑀢𑀤𑀸 𑀢𑁂𑀲𑀁 𑀅𑀲𑁂𑀔𑀪𑀽𑀫𑀺𑀅𑀥𑀺𑀕𑀫𑀸𑀬 𑀅𑀬𑁄𑀕𑁆𑀬𑀢𑀸𑀬 𑀯𑀼𑀢𑁆𑀢𑀁. 𑀅𑀓𑀺𑀮𑀫𑀦𑁆𑀢𑀸𑀯𑀸𑀢𑀺 𑀇𑀫𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀲𑁆𑀲𑀧𑀺 𑀅𑀦𑀥𑀺𑀕𑀢𑀫𑀕𑁆𑀕𑀲𑀜𑁆𑀜𑀸𑀧𑀦𑀸 𑀪𑀸𑀭𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀑𑀲𑀝𑀸𑀢𑀺 𑀅𑀦𑀼𑀧𑁆𑀧𑀯𑀺𑀝𑁆𑀞𑀸. 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀓𑀣𑀺𑀢𑀫𑁂𑀯 𑀳𑁄𑀢𑀺 𑀢𑀲𑁆𑀲 𑀲𑀻𑀮𑀓𑀣𑀸𑀩𑀸𑀳𑀼𑀮𑁆𑀮𑀢𑁄 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀻𑀳𑀺 𑀧𑀺𑀝𑀓𑁂𑀳𑀻𑀢𑀺 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀢𑁂𑀦 𑀢𑀁𑀢𑀁𑀧𑀺𑀝𑀓𑀸𑀦𑀁 𑀢𑀲𑁆𑀲𑀸 𑀢𑀲𑁆𑀲𑀸 𑀲𑀺𑀓𑁆𑀔𑀸𑀬 𑀲𑀸𑀥𑀓𑀢𑀫𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀧𑀺𑀝𑁆𑀞𑀺𑀯𑀸𑀢𑁄 𑀉𑀧𑁆𑀧𑀚𑁆𑀚𑀢𑀺 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀲𑁆𑀲 𑀢𑀣𑀸𑀭𑀽𑀧𑀢𑁆𑀢𑀸 𑀲𑀗𑁆𑀔𑀸𑀭𑀸𑀦𑀜𑁆𑀘 𑀅𑀦𑀺𑀘𑁆𑀘𑀢𑀸𑀬 𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀢𑁆𑀢𑀸. 𑀅𑀓𑀸𑀭𑀡𑀁 𑀯𑀸 𑀏𑀢𑀦𑁆𑀢𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁, 𑀢𑀫𑁂𑀯 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀺𑀢𑀼𑀁 ‘‘𑀧𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀅𑀳𑁄𑀲𑀺 𑀲𑀓𑁆𑀬𑀭𑀸𑀚𑀽𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀢𑁆𑀣𑀸𑀧𑀺 𑀢𑀤𑁂𑀯 𑀲𑀦𑁆𑀥𑀸𑀬 𑀢𑀢𑁆𑀣 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀻𑀢𑀻’’𑀢𑀺. 𑀬𑀤𑀺 𑀏𑀯𑀁 ‘‘𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀻’’𑀢𑀺 𑀇𑀤𑀁 𑀓𑀣𑀦𑁆𑀢𑀺 𑀆𑀳 ‘‘𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀜𑁆𑀘 𑀦𑀸𑀫𑀸’’𑀢𑀺𑀆𑀤𑀺.

𑁨𑁩. ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦…𑀧𑁂… 𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 (𑀯𑀺𑀪. 𑁫𑁧𑁧) 𑀲𑀫𑀦𑁆𑀦𑀸𑀕𑀢𑀢𑁆𑀣𑁄 𑀲𑀫𑁆𑀧𑀦𑁆𑀦-𑀲𑀤𑁆𑀤𑁄, 𑀇𑀥 𑀧𑀦 𑀧𑀸𑀭𑀺𑀧𑀽𑀭𑀺𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀧𑀼𑀡𑁆𑀡𑀲𑀻𑀮𑁄𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀬𑁄 𑀧𑀦 𑀲𑀫𑁆𑀧𑀦𑁆𑀦𑀲𑀻𑀮𑁄𑀬𑁂𑀯, 𑀲𑁄 𑀧𑀭𑀺𑀧𑀼𑀡𑁆𑀡𑀲𑀻𑀮𑁄. 𑀧𑀭𑀺𑀲𑀼𑀤𑁆𑀥𑀜𑁆𑀳𑀺 𑀲𑀻𑀮𑀁 ‘‘𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀦 𑀲𑀩𑀮𑀁 𑀓𑀫𑁆𑀫𑀸𑀲𑀁 𑀯𑀸. 𑀲𑀼𑀦𑁆𑀤𑀭𑀥𑀫𑁆𑀫𑁂𑀳𑀻𑀢𑀺 𑀲𑁄𑀪𑀦𑀥𑀫𑁆𑀫𑁂𑀳𑀺. 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀸 𑀢𑀲𑁆𑀲 𑀲𑁄𑀪𑀦𑀪𑀸𑀯𑀢𑁄. 𑀢𑁂𑀳𑀺 𑀲𑀧𑁆𑀧𑀼𑀭𑀺𑀲𑀪𑀸𑀯𑀲𑀸𑀥𑀦𑀢𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑁂𑀳𑀺.

𑁨𑁪. 𑀇𑀫𑀺𑀦𑀸 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦𑀸𑀢𑀺 ‘‘𑀇𑀥, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 ‘‘𑀅𑀓𑀲𑀺𑀭𑀮𑀸𑀪𑀻’’𑀢𑀺 𑀧𑀤𑀁 𑀇𑀫𑀺𑀦𑀸 𑀏𑀢𑁆𑀢𑀓𑁂𑀦 𑀉𑀤𑁆𑀤𑁂𑀲𑀧𑀤𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸. 𑀧𑀝𑀺𑀧𑀸𑀝𑀺𑀬𑀸𑀢𑀺 𑀉𑀤𑁆𑀤𑁂𑀲𑀧𑀝𑀺𑀧𑀸𑀝𑀺𑀬𑀸. 𑀏𑀯𑀫𑀸𑀳𑀸𑀢𑀺 ‘‘𑀏𑀯𑀁 𑀓𑀣𑀜𑁆𑀘, 𑀫𑀳𑀸𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁂𑀦 𑀤𑀲𑁆𑀲𑀺𑀢𑀸𑀓𑀸𑀭𑁂𑀦 𑀆𑀳.

𑁨𑁫. 𑀳𑀺𑀭𑀻𑀬𑀢𑀻𑀢𑀺 𑀮𑀚𑁆𑀚𑀻𑀬𑀢𑀺 𑀧𑀻𑀴𑀻𑀬𑀢𑀺. 𑀬𑀲𑁆𑀫𑀸 𑀳𑀺𑀭𑀻 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸, 𑀢𑀲𑁆𑀫𑀸 ‘‘𑀚𑀺𑀕𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀑𑀢𑁆𑀢𑀧𑁆𑀧𑀢𑀻𑀢𑀺 𑀉𑀢𑁆𑀢𑀧𑁆𑀧𑀢𑀺. 𑀧𑀸𑀧𑀼𑀢𑁆𑀭𑀸𑀲𑀮𑀓𑁆𑀔𑀡𑀜𑁆𑀳𑀺 𑀑𑀢𑁆𑀢𑀧𑁆𑀧𑀁. 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄𑀢𑀺 𑀲𑀗𑁆𑀓𑁄𑀘𑀁 𑀅𑀦𑀸𑀧𑀦𑁆𑀦𑀯𑀻𑀭𑀺𑀬𑁄. 𑀢𑁂𑀦𑀸𑀳 ‘‘𑀅𑀦𑁄𑀲𑀓𑁆𑀓𑀺𑀢𑀫𑀸𑀦𑀲𑁄’’𑀢𑀺. 𑀧𑀳𑀸𑀦𑀢𑁆𑀣𑀸𑀬𑀸𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁆𑀣𑀸𑀬. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸 𑀦𑀸𑀫 𑀅𑀥𑀺𑀕𑀫𑁄 𑀏𑀯𑀸𑀢𑀺 𑀆𑀳 ‘‘𑀧𑀝𑀺𑀮𑀸𑀪𑀢𑁆𑀣𑀸𑀬𑀸’’𑀢𑀺. 𑀲𑀢𑀺𑀦𑁂𑀧𑀓𑁆𑀓𑁂𑀦𑀸𑀢𑀺 𑀲𑀢𑀺𑀬𑀸 𑀦𑁂𑀧𑀓𑁆𑀓𑁂𑀦 𑀢𑀺𑀓𑁆𑀔𑀯𑀺𑀲𑀤𑀲𑀽𑀭𑀪𑀸𑀯𑁂𑀦. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀦𑁂𑀧𑀓𑁆𑀓𑀁 𑀦𑀸𑀫 𑀧𑀜𑁆𑀜𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀢𑀺𑀬𑀸 𑀘 𑀦𑀺𑀧𑀓𑀪𑀸𑀯𑁂𑀦 𑀘𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀏𑀯𑀁 𑀲𑀢𑀺 𑀅𑀜𑁆𑀜𑁄 𑀦𑀺𑀤𑁆𑀤𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺. 𑀲𑀢𑀺𑀫𑀸𑀢𑀺 𑀘 𑀇𑀫𑀺𑀦𑀸𑀯 𑀯𑀺𑀲𑁂𑀲𑀸 𑀲𑀢𑀺 𑀕𑀳𑀺𑀢𑀸, 𑀧𑀭𑀢𑁄 ‘‘𑀘𑀺𑀭𑀓𑀢𑀫𑁆𑀧𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸’’𑀢𑀺 𑀲𑀢𑀺𑀓𑀺𑀘𑁆𑀘𑀫𑁂𑀯 𑀦𑀺𑀤𑁆𑀤𑀺𑀝𑁆𑀞𑀁, 𑀦 𑀧𑀜𑁆𑀜𑀸𑀓𑀺𑀘𑁆𑀘𑀁, 𑀢𑀲𑁆𑀫𑀸 𑀲𑀢𑀺𑀦𑁂𑀧𑀓𑁆𑀓𑁂𑀦𑀸𑀢𑀺 𑀲𑀢𑀺𑀬𑀸 𑀦𑁂𑀧𑀓𑁆𑀓𑀪𑀸𑀯𑁂𑀦𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀢𑁂𑀦𑁂𑀯 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑀯𑀲𑁂𑀦 𑀅𑀜𑁆𑀜𑀥𑀫𑁆𑀫𑀦𑀺𑀭𑀧𑁂𑀓𑁆𑀔𑁄 𑀲𑀢𑀺𑀬𑀸 𑀩𑀮𑀯𑀪𑀸𑀯𑁄. 𑀢𑀣𑀸 𑀳𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑀧𑀺 𑀅𑀚𑁆𑀛𑀬𑀦𑀲𑀫𑁆𑀫𑀲𑀦𑀸𑀦𑀺 𑀲𑀫𑁆𑀪𑀯𑀦𑁆𑀢𑀺.

𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀲𑀻𑀢𑀺𑀫𑀳𑀸𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀦𑁆𑀢𑀺 𑀏𑀢𑁆𑀣 𑀅𑀲𑀻𑀢𑀺𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀁 𑀫𑀳𑀸𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀦𑁆𑀢𑀺 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀧𑀽𑀭𑀡-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀫𑀳𑀸𑀯𑀢𑁆𑀢𑀸𑀦𑀺 (𑀯𑀺𑀪. 𑀫𑀽𑀮𑀝𑀻. 𑁪𑁦𑁬) 𑀦𑀸𑀫 𑀯𑀢𑁆𑀢𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁫𑁬 𑀆𑀤𑀬𑁄) 𑀯𑀼𑀢𑁆𑀢𑀸𑀦𑀺 𑀆𑀕𑀦𑁆𑀢𑀼𑀓𑀯𑀢𑁆𑀢𑀁 𑀆𑀯𑀸𑀲𑀺𑀓𑀁 𑀕𑀫𑀺𑀓𑀁 𑀅𑀦𑀼𑀫𑁄𑀤𑀦𑀁 𑀪𑀢𑁆𑀢𑀕𑁆𑀕𑀁 𑀧𑀺𑀡𑁆𑀟𑀘𑀸𑀭𑀺𑀓𑀁 𑀆𑀭𑀜𑁆𑀜𑀺𑀓𑀁 𑀲𑁂𑀦𑀸𑀲𑀦𑀁 𑀚𑀦𑁆𑀢𑀸𑀖𑀭𑀁 𑀯𑀘𑁆𑀘𑀓𑀼𑀝𑀺 𑀉𑀧𑀚𑁆𑀛𑀸𑀬𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀆𑀘𑀭𑀺𑀬𑀁 𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀦𑁆𑀢𑀺 𑀘𑀼𑀤𑁆𑀤𑀲. 𑀢𑀢𑁄 𑀅𑀜𑁆𑀜𑀸𑀦𑀺 𑀧𑀦 𑀓𑀤𑀸𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸𑀤𑀺𑀓𑀸𑀮𑁂 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀓𑀸𑀮𑁂 𑀘 𑀘𑀭𑀺𑀢𑀩𑁆𑀩𑀸𑀦𑀺 𑀅𑀲𑀻𑀢𑀺 𑀔𑀼𑀤𑁆𑀤𑀓𑀯𑀢𑁆𑀢𑀸𑀦𑀺 𑀲𑀩𑁆𑀩𑀸𑀲𑀼 𑀅𑀯𑀢𑁆𑀣𑀸𑀲𑀼 𑀦 𑀘𑀭𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀫𑀳𑀸𑀯𑀢𑁆𑀢𑁂𑀲𑀼, 𑀅𑀕𑁆𑀕𑀳𑀺𑀢𑀸𑀦𑀺. 𑀢𑀢𑁆𑀣 ‘‘𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀭𑀪𑀺𑀢𑁆𑀯𑀸 ‘‘𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁…𑀧𑁂… 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁮𑁧) 𑀯𑀼𑀢𑁆𑀢𑀸𑀦𑀺 𑀧𑀓𑀪𑀢𑁆𑀢𑁂 𑀘𑀭𑀺𑀢𑀩𑁆𑀩𑀯𑀢𑁆𑀢𑀸𑀯𑀲𑀸𑀦𑀸𑀦𑀺 𑀙𑀲𑀝𑁆𑀞𑀺, 𑀢𑀢𑁄 𑀧𑀭𑀁 ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦 𑀫𑀸𑀦𑀢𑁆𑀢𑀸𑀭𑀳𑁂𑀦 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀢𑀩𑁆𑀩’’𑀦𑁆𑀢𑀺𑀆𑀤𑀻𑀦𑀺 (𑀘𑀽𑀴𑀯. 𑁮𑁨) 𑀧𑀓𑀢𑀢𑁆𑀢𑁂 𑀘𑀭𑀺𑀢𑀩𑁆𑀩𑁂𑀳𑀺 𑀅𑀦𑀜𑁆𑀜𑀢𑁆𑀢𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀕𑀡𑁂𑀢𑁆𑀯𑀸 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑀸𑀤𑀻𑀲𑀼 𑀧𑀼𑀕𑁆𑀕𑀮𑀦𑁆𑀢𑀭𑁂𑀲𑀼 𑀘𑀭𑀺𑀢𑀩𑁆𑀩𑀢𑁆𑀢𑀸 𑀢𑁂𑀲𑀁 𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀏𑀓𑁂𑀓𑀁 𑀓𑀢𑁆𑀯𑀸 𑀕𑀡𑀺𑀢𑀩𑁆𑀩𑀸𑀦𑀺 𑀧𑀜𑁆𑀘𑀸𑀢𑀺 𑀏𑀓𑀲𑀢𑁆𑀢𑀢𑀺𑀯𑀢𑁆𑀢𑀸𑀦𑀺, 𑀉𑀓𑁆𑀔𑁂𑀧𑀦𑀺𑀬𑀓𑀫𑁆𑀫𑀓𑀢𑀯𑀢𑁆𑀢𑁂𑀲𑀼 𑀯𑀢𑁆𑀢𑀧𑀜𑁆𑀜𑀸𑀧𑀦𑀯𑀲𑁂𑀦 𑀯𑀼𑀢𑁆𑀢𑀁 𑁋 ‘‘𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀦𑁆𑀳𑀸𑀦𑁂 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁫𑁧) 𑀇𑀤𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀁 𑀅𑀲𑀸𑀤𑀺𑀬𑀦𑀁 𑀏𑀓𑀁, ‘‘𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑀺𑀢𑀩𑁆𑀩𑁄’’𑀢𑀺𑀆𑀤𑀻𑀦𑀺 𑀘 𑀤𑀲𑀸𑀢𑀺 𑀏𑀯𑀫𑁂𑀢𑀸𑀦𑀺 𑀤𑁆𑀯𑀸𑀲𑀻𑀢𑀺. 𑀏𑀢𑁂𑀲𑁆𑀯𑁂𑀯 𑀧𑀦 𑀓𑀸𑀦𑀺𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀺𑀯𑀢𑁆𑀢𑀸𑀦𑀺 𑀓𑀸𑀦𑀺𑀘𑀺 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀯𑀢𑁆𑀢𑀸𑀦𑀻𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑁆𑀯𑀸𑀲𑀻𑀢𑀺, 𑀏𑀯𑀁 𑀅𑀧𑁆𑀧𑀓𑀁 𑀧𑀦 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀼𑀧𑀕𑀁 𑀦 𑀳𑁄𑀢𑀻𑀢𑀺 𑀇𑀥 ‘‘𑀅𑀲𑀻𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀣 𑀧𑀦 𑀅𑀝𑁆𑀞𑀓𑀣𑀸𑀧𑀤𑁂𑀲𑁂 ‘‘𑀤𑁆𑀯𑀸𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀓𑁆𑀓𑀘𑁆𑀘𑀁 𑀉𑀤𑁆𑀤𑀺𑀲𑀦𑀁 𑀲𑀓𑁆𑀓𑀘𑁆𑀘𑀁 𑀉𑀤𑁆𑀤𑀺𑀲𑀸𑀧𑀦𑀦𑁆𑀢𑀺 𑀧𑀘𑁆𑀘𑁂𑀓𑀁 𑀲𑀓𑁆𑀓𑀘𑁆𑀘𑀁-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀉𑀤𑁆𑀤𑀺𑀲𑀦𑀁 𑀉𑀤𑁆𑀤𑁂𑀲𑀕𑁆𑀕𑀳𑀡𑀁. 𑀥𑀫𑁆𑀫𑁄𑀲𑀸𑀭𑀡𑀁 𑀥𑀫𑁆𑀫𑀲𑁆𑀲 𑀉𑀘𑁆𑀘𑀸𑀭𑀡𑀁. 𑀥𑀫𑁆𑀫𑀤𑁂𑀲𑀦𑀸 𑁋

‘‘𑀆𑀤𑀺𑀫𑁆𑀳𑀺 𑀲𑀻𑀮𑀁 𑀤𑁂𑀲𑁂𑀬𑁆𑀬, 𑀫𑀚𑁆𑀛𑁂 𑀛𑀸𑀦𑀁 𑀯𑀺𑀧𑀲𑁆𑀲𑀦𑀁;

𑀧𑀭𑀺𑀬𑁄𑀲𑀸𑀦𑁂 𑀘 𑀦𑀺𑀩𑁆𑀩𑀸𑀦𑀁, 𑀏𑀲𑀸 𑀓𑀣𑀺𑀓𑀲𑀡𑁆𑀞𑀺𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦; 𑀲𑀁. 𑀦𑀺. 𑀅𑀝𑁆𑀞. 𑁩.𑁪.𑁨𑁪𑁬) 𑁋

𑀏𑀯𑀁 𑀓𑀣𑀺𑀢𑀮𑀓𑁆𑀔𑀡𑀸 𑀥𑀫𑁆𑀫𑀓𑀣𑀸. 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀕𑀳𑀝𑁆𑀞𑀲𑁆𑀲 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀢𑀗𑁆𑀔𑀡𑀸𑀦𑀼𑀭𑀽𑀧𑀸 𑀥𑀫𑁆𑀫𑀻 𑀓𑀣𑀸 𑀉𑀧𑀦𑀺𑀲𑀺𑀦𑁆𑀦𑀓𑀣𑀸. 𑀪𑀢𑁆𑀢𑀸𑀦𑀼𑀫𑁄𑀤𑀦𑀓𑀣𑀸 𑀅𑀦𑀼𑀫𑁄𑀤𑀦𑀺𑀬𑀸. 𑀲𑀭𑀺𑀢𑀸𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀘𑀺𑀭𑀓𑀢𑀘𑀺𑀭𑀪𑀸𑀲𑀺𑀢𑀸𑀦𑀁 𑀲𑀭𑀡𑀫𑀦𑀼𑀲𑁆𑀲𑀭𑀡𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀢𑀣𑀸𑀧𑀯𑀢𑁆𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀧𑀭𑀺𑀕𑁆𑀕𑀳𑀫𑀼𑀔𑁂𑀦 𑀧𑀯𑀢𑁆𑀢𑀯𑀺𑀧𑀲𑁆𑀲𑀦𑀸𑀘𑀸𑀭𑁂 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀺𑀁 𑀓𑀸𑀬𑁂𑀦 𑀘𑀺𑀭𑀓𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀓𑀺𑀫𑁆𑀧𑀺 𑀲𑀭𑀡𑁂𑀦𑀸𑀢𑀺 𑀏𑀓𑀯𑀸𑀭𑀁 𑀲𑀭𑀡𑁂𑀦. 𑀧𑀼𑀦𑀧𑁆𑀧𑀼𑀦𑀁 𑀲𑀭𑀡𑁂𑀦𑀸𑀢𑀺 𑀅𑀦𑀼 𑀅𑀦𑀼 𑀲𑀭𑀡𑁂𑀦. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀫𑁆𑀧𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀁 𑀦𑀺𑀭𑁄𑀥𑀦𑀺𑀲𑁆𑀲𑀺𑀢𑀁 𑀯𑁄𑀲𑀕𑁆𑀕𑀧𑀭𑀺𑀡𑀸𑀫𑀺𑀜𑁆𑀘 𑀓𑀢𑁆𑀯𑀸 𑀲𑀭𑀦𑁆𑀢𑁄 𑀢𑀢𑁆𑀣 𑀢𑀢𑁆𑀣 𑀚𑀯𑀦𑀯𑀸𑀭𑁂 𑀲𑀭𑀡𑀚𑀯𑀦𑀯𑀸𑀭𑁂 𑀧𑀭𑀺𑀢𑁆𑀢𑀚𑀯𑀦𑀯𑀲𑁂𑀦 𑀅𑀦𑀼𑀲𑁆𑀲𑀭𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀕𑀢𑀺𑀅𑀢𑁆𑀣𑀸 𑀥𑀸𑀢𑀼𑀲𑀤𑁆𑀤𑀸 𑀩𑀼𑀤𑁆𑀥𑀺𑀅𑀢𑁆𑀣𑀸 𑀳𑁄𑀦𑁆𑀢𑀻𑀢𑀺 𑀆𑀳 𑁋 ‘‘𑀉𑀤𑀬𑀜𑁆𑀘 𑀯𑀬𑀜𑁆𑀘 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸𑀬𑀸’’𑀢𑀺. 𑀫𑀺𑀲𑁆𑀲𑀓𑀦𑀬𑁂𑀦𑀸𑀬𑀁 𑀤𑁂𑀲𑀦𑀸 𑀆𑀕𑀢𑀸𑀢𑀺 𑀆𑀳 𑁋 ‘‘𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀘 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘𑀸’’𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘𑁂𑀯𑀸’’𑀢𑀺𑀆𑀤𑀺. 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀦𑀺𑀩𑁆𑀩𑁂𑀥𑀺𑀓𑀧𑀭𑀺𑀬𑀸𑀬𑀢𑁄. 𑀲𑀸 𑀘 𑀔𑁄 𑀧𑀤𑁂𑀲𑀺𑀓𑀸𑀢𑀺 𑀦𑀺𑀧𑁆𑀧𑀤𑁂𑀲𑀺𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀢𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀪𑀸𑀯𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁆𑀫𑀸𑀢𑀺 𑀬𑀸𑀣𑀸𑀯𑀢𑁄. 𑀅𑀓𑀼𑀧𑁆𑀧𑀥𑀫𑁆𑀫𑀢𑀸𑀬 𑀳𑀺 𑀫𑀕𑁆𑀕𑀧𑀜𑁆𑀜𑀸 𑀔𑁂𑀧𑀺𑀢𑀔𑁂𑀧𑀦𑀸𑀬 𑀦 𑀧𑀼𑀦 𑀓𑀺𑀘𑁆𑀘𑀁 𑀅𑀢𑁆𑀣𑀻𑀢𑀺 𑀉𑀧𑀸𑀬𑁂𑀦 𑀜𑀸𑀬𑁂𑀦 𑀬𑀸 𑀧𑀯𑀢𑁆𑀢𑀺 𑀲𑀸 𑀏𑀯𑀸𑀢𑀺 𑀆𑀳 𑁋 ‘‘𑀳𑁂𑀢𑀼𑀦𑀸 𑀦𑀬𑁂𑀦𑀸’’𑀢𑀺.

𑁨𑁬. 𑀅𑀥𑀺𑀓𑀁 𑀘𑁂𑀢𑁄 𑀅𑀪𑀺𑀘𑁂𑀢𑁄, 𑀫𑀳𑀕𑁆𑀕𑀢𑀘𑀺𑀢𑁆𑀢𑀁, 𑀢𑀲𑁆𑀲 𑀧𑀦 𑀅𑀥𑀺𑀓𑀢𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑀝𑀺𑀧𑀓𑁆𑀔𑀯𑀺𑀕𑀫𑁂𑀦 𑀯𑀺𑀲𑀺𑀝𑁆𑀞𑀪𑀸𑀯𑀧𑁆𑀧𑀢𑁆𑀢𑀺, 𑀢𑀦𑁆𑀦𑀺𑀲𑁆𑀲𑀺𑀢𑀸𑀦𑀺 𑀆𑀪𑀺𑀘𑁂𑀢𑀲𑀺𑀓𑀸𑀦𑀺. 𑀢𑁂𑀦𑀸𑀳 ‘‘𑀅𑀪𑀺𑀘𑀺𑀢𑁆𑀢𑀁 𑀲𑁂𑀝𑁆𑀞𑀘𑀺𑀢𑁆𑀢𑀁 𑀲𑀺𑀢𑀸𑀦’’𑀦𑁆𑀢𑀺. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀦𑁆𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀨𑀸𑀲𑀼𑀯𑀺𑀳𑀸𑀭𑀪𑀽𑀢𑀸𑀦𑀁. 𑀢𑁂𑀳𑀺 𑀧𑀦 𑀲𑀫𑀗𑁆𑀕𑀺𑀢𑀓𑁆𑀔𑀡𑁂 𑀬𑀲𑁆𑀫𑀸 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀅𑀧𑀻𑀢𑀺𑀚𑀁 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀜𑀸𑀡𑀲𑀼𑀔𑀜𑁆𑀘 𑀧𑀝𑀺𑀮𑀪𑀢𑀺 𑀯𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀆𑀳 𑁋 ‘‘𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀲𑀼𑀔𑀧𑀝𑀺𑀮𑀸𑀪𑀳𑁂𑀢𑀽𑀦’’𑀦𑁆𑀢𑀺. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀸𑀢𑀺 𑀇𑀫𑀺𑀦𑀸 𑀢𑁂𑀲𑀼 𑀛𑀸𑀦𑁂𑀲𑀼 𑀲𑀫𑀸𑀧𑀚𑁆𑀚𑀦𑀯𑀲𑀻𑀪𑀸𑀯𑀫𑀸𑀳, ‘‘𑀦𑀺𑀓𑀸𑀫𑀮𑀸𑀪𑀻’’𑀢𑀺 𑀧𑀦 𑀯𑀘𑀦𑀢𑁄 𑀆𑀯𑀚𑁆𑀚𑀦𑀸𑀥𑀺𑀝𑁆𑀞𑀸𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀺𑀬𑁄 𑀘 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀤𑀼𑀓𑁆𑀔𑀮𑀸𑀪𑀻𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀛𑀸𑀦𑀸𑀦𑀁 𑀲𑀼𑀔𑀧𑀝𑀺𑀧𑀤𑀸𑀔𑀺𑀧𑁆𑀧𑀸𑀪𑀺𑀜𑁆𑀜𑀢𑀁 𑀤𑀲𑁆𑀲𑁂𑀢𑀺, 𑀯𑀺𑀧𑀼𑀮𑀮𑀸𑀪𑀻𑀢𑀺 𑀇𑀫𑀺𑀦𑀸 𑀧𑀕𑀼𑀡𑀢𑀁 𑀢𑀧𑁆𑀧𑀫𑀸𑀡𑀤𑀲𑁆𑀲𑀺𑀢𑀪𑀸𑀯𑀤𑀻𑀧𑀦𑀢𑁄. 𑀢𑁂𑀦𑀸𑀳 ‘‘𑀧𑀕𑀼𑀡𑀪𑀸𑀯𑁂𑀦𑀸’’𑀢𑀺𑀆𑀤𑀺. 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺 𑀲𑀫𑀸𑀧𑀚𑁆𑀚𑀦𑀯𑀲𑀻𑀪𑀸𑀯𑀢𑀸𑀬 𑀲𑀸𑀥𑀺𑀢𑀢𑁆𑀢𑀸. 𑀲𑀫𑀸𑀥𑀺𑀧𑀸𑀭𑀺𑀧𑀦𑁆𑀣𑀺𑀓𑀥𑀫𑁆𑀫𑁂𑀢𑀺 𑀯𑀲𑀻𑀪𑀸𑀯𑀲𑁆𑀲 𑀧𑀘𑁆𑀘𑀦𑀻𑀓𑀥𑀫𑁆𑀫𑁂. 𑀛𑀸𑀦𑀸𑀥𑀺𑀕𑀫𑀲𑁆𑀲 𑀧𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑀸 𑀧𑀕𑁂𑀯 𑀯𑀺𑀓𑁆𑀔𑀫𑁆𑀪𑀺𑀢𑀸, 𑀅𑀜𑁆𑀜𑀣𑀸 𑀛𑀸𑀦𑀸𑀥𑀺𑀕𑀫𑁄 𑀏𑀯 𑀦 𑀲𑀺𑀬𑀸. 𑀅𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀓𑀺𑀘𑁆𑀙𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑀺 𑀯𑀺𑀲𑁄𑀥𑁂𑀢𑀺, 𑀓𑀸𑀫𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀳𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀅𑀜𑁆𑀜𑁂𑀲𑀁 𑀲𑀫𑀸𑀥𑀺𑀧𑀸𑀭𑀺𑀧𑀦𑁆𑀣𑀺𑀓𑀸𑀦𑀁 𑀤𑀽𑀭𑀲𑀫𑀼𑀲𑁆𑀲𑀸𑀭𑀡𑀁 𑀇𑀥 𑀯𑀺𑀓𑁆𑀔𑀫𑁆𑀪𑀦𑀁 𑀯𑀺𑀲𑁄𑀥𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁭. 𑀯𑀺𑀧𑀲𑁆𑀲𑀦𑀸𑀳𑀺𑀢𑀸𑀬 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀸𑀯𑀳𑀢𑁆𑀢𑀸 𑀯𑀟𑁆𑀠𑀫𑀸𑀦𑀸𑀬 𑀧𑀼𑀩𑁆𑀩𑀪𑀸𑀕𑀲𑀻𑀮𑀸𑀤𑀺𑀧𑀝𑀺𑀧𑀤𑀸𑀬. 𑀲𑀸 𑀏𑀯 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀬𑀣𑀸𑀪𑀸𑀯𑀺𑀢𑀢𑀸𑀬 𑀅𑀯𑀲𑁆𑀲𑀁 𑀪𑀸𑀯𑀺𑀦𑀁 𑀯𑀺𑀲𑁂𑀲𑀁 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀅𑀡𑁆𑀟𑀁 𑀯𑀺𑀬𑀸𑀢𑀺 𑀅𑀡𑁆𑀟𑀁, 𑀓𑀺𑀮𑁂𑀲𑁂𑀳𑀺 𑀅𑀤𑀽𑀲𑀺𑀢𑀢𑀸𑀬 𑀅𑀧𑀽𑀢𑀺 𑀅𑀡𑁆𑀟𑀁 𑀏𑀢𑀲𑁆𑀲𑀸𑀢𑀺 𑀅𑀧𑀼𑀘𑁆𑀘𑀡𑁆𑀟𑁄, 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀞𑀺𑀢𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀪𑀸𑀯𑁄 𑀅𑀧𑀼𑀘𑁆𑀘𑀡𑁆𑀟𑀢𑀸. 𑀯𑀺𑀧𑀲𑁆𑀲𑀦𑀸𑀤𑀺𑀜𑀸𑀡𑀧𑁆𑀧𑀪𑁂𑀤𑀸𑀬𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀸𑀤𑀺𑀜𑀸𑀡𑀧𑀪𑁂𑀤𑀸𑀬. 𑀢𑀢𑁆𑀣𑀸𑀢𑀺 𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁧𑁮𑁫) ‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀏𑀯𑀁 𑀉𑀲𑁆𑀲𑁄𑀴𑁆𑀳𑀺𑀧𑀦𑁆𑀦𑀭𑀲𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀩𑁆𑀩𑁄 𑀅𑀪𑀺𑀦𑀺𑀩𑁆𑀩𑀺𑀤𑀸𑀬𑀸’’𑀢𑀺 𑀆𑀕𑀢𑀢𑁆𑀢𑀸 𑀉𑀲𑁆𑀲𑁄𑀴𑁆𑀳𑀺𑀧𑀦𑁆𑀦𑀭𑀲𑁂𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀪𑀸𑀯𑁄𑀢𑀺 𑀏𑀯𑀁 𑀬𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀆𑀕𑀢𑀁, 𑀢𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀇𑀥 𑀇𑀫𑀲𑁆𑀫𑀺𑀁 𑀲𑁂𑀔𑀲𑀼𑀢𑁆𑀢𑁂 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑁨𑁮. 𑀫𑀳𑀕𑁆𑀕𑀢𑀸𑀤𑀺𑀪𑀸𑀯𑁂𑀦 𑀳𑁂𑀝𑁆𑀞𑀺𑀫𑀸𑀦𑀁 𑀛𑀸𑀦𑀸𑀦𑀁 𑀅𑀦𑀼𑀭𑀽𑀧𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑁂𑀲𑁂𑀦 𑀢𑁂 𑀉𑀢𑁆𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀦 𑀞𑀺𑀢𑀦𑁆𑀢𑀺 𑀅𑀦𑀼𑀢𑁆𑀢𑀭𑀁, 𑀢𑁂𑀦𑀸𑀳 𑁋 ‘‘𑀧𑀞𑀫𑀸𑀤𑀺𑀚𑁆𑀛𑀸𑀦𑁂𑀳𑀺 𑀅𑀲𑀤𑀺𑀲𑀁 𑀉𑀢𑁆𑀢𑀫’’𑀦𑁆𑀢𑀺. 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀅𑀪𑀺𑀦𑀺𑀩𑁆𑀪𑀺𑀤𑀸𑀲𑀼. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀬𑀣𑀸 𑀅𑀢𑁆𑀢𑀦𑁄 𑀯𑀺𑀲𑀬𑀧𑀝𑀺𑀘𑁆𑀙𑀸𑀤𑀓𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑀁 𑀯𑀺𑀥𑀫𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀓𑀜𑁆𑀘𑀺 𑀯𑀺𑀲𑁂𑀲𑀁 𑀓𑀭𑁄𑀦𑁆𑀢𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 𑁋 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀧𑀞𑀫𑀁 𑀚𑀸𑀬𑀢𑀻’’𑀢𑀺, 𑀲𑁂𑀲𑀜𑀸𑀡𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁨𑁯. 𑀘𑀭𑀡𑀲𑁆𑀫𑀺𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀆𑀳 ‘‘𑀘𑀭𑀡𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀢𑁂𑀦𑀸𑀢𑀺 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁 𑀅𑀕𑀢𑀧𑀼𑀩𑁆𑀩𑀤𑀺𑀲𑀸𑀕𑀫𑀦𑁂 𑀢𑁂𑀲𑀁 𑀲𑀸𑀥𑀓𑀢𑀫𑀪𑀸𑀯𑀢𑁄.

𑀅𑀝𑁆𑀞 𑀜𑀸𑀡𑀸𑀦𑀻𑀢𑀺 𑀇𑀥 𑀆𑀕𑀢𑀸𑀦𑀺 𑀘 𑀅𑀦𑀸𑀕𑀢𑀸𑀦𑀺 𑀘 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁪 𑀆𑀤𑀬𑁄) 𑀆𑀕𑀢𑀸𑀦𑀺 𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀘𑁆𑀙𑀸𑀤𑀓𑀸𑀤𑀺𑀓𑀺𑀮𑁂𑀲𑀢𑀫𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀤𑀸𑀮𑁂𑀢𑁆𑀯𑀸.

𑁩𑁦. 𑀲𑀦𑀗𑁆𑀓𑀼𑀫𑀸𑀭𑁂𑀦𑀸𑀢𑀺 𑀲𑀦𑀦𑁆𑀢𑀦𑀓𑀼𑀫𑀸𑀭𑁂𑀦. 𑀢𑀤𑁂𑀯 𑀳𑀺 𑀢𑀲𑁆𑀲 𑀲𑀦𑀦𑁆𑀢𑀦𑀓𑀼𑀫𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑁄 𑀅𑀢𑁆𑀢𑀪𑀸𑀯𑁄𑀢𑀺 𑀬𑁂𑀦 𑀅𑀢𑁆𑀢𑀪𑀸𑀯𑁂𑀦 𑀫𑀦𑀼𑀲𑁆𑀲𑀧𑀣𑁂 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑀺, 𑀲𑁄 𑀓𑀼𑀫𑀸𑀭𑀢𑁆𑀢𑀪𑀸𑀯𑁄, 𑀢𑀲𑁆𑀫𑀸 𑀩𑁆𑀭𑀳𑁆𑀫𑀪𑀽𑀢𑁄𑀧𑀺 𑀢𑀸𑀤𑀺𑀲𑁂𑀦 𑀓𑀼𑀫𑀸𑀭𑀢𑁆𑀢𑀪𑀸𑀯𑁂𑀦 𑀘𑀭𑀢𑀺.

𑀚𑀦𑀺𑀢𑀲𑁆𑀫𑀺𑀁-𑀲𑀤𑁆𑀤𑁄 𑀏𑀯 𑀇-𑀓𑀸𑀭𑀲𑁆𑀲 𑀏-𑀓𑀸𑀭𑀁 𑀓𑀢𑁆𑀯𑀸 ‘‘𑀚𑀦𑁂𑀢𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑁄, 𑀚𑀦𑀺𑀢𑀲𑁆𑀫𑀺𑀦𑁆𑀢𑀺 𑀘 𑀚𑀦𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀚𑀦𑀺𑀢𑀲𑁆𑀫𑀺𑀦𑁆𑀢𑀺 𑀲𑀸𑀫𑀜𑁆𑀜𑀕𑁆𑀕𑀳𑀡𑁂𑀧𑀺 𑀬𑀢𑁆𑀣 𑀘𑀢𑀼𑀯𑀡𑁆𑀡𑀲𑀫𑀜𑁆𑀜𑀸, 𑀢𑀢𑁆𑀣𑁂𑀯 𑀫𑀦𑀼𑀲𑁆𑀲𑀮𑁄𑀓𑁂. 𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄𑀢𑀺 𑀮𑁄𑀓𑀲𑀫𑀜𑁆𑀜𑀸𑀧𑀺 𑀫𑀦𑀼𑀲𑁆𑀲𑀮𑁄𑀓𑁂𑀬𑁂𑀯, 𑀦 𑀤𑁂𑀯𑀓𑀸𑀬𑁂 𑀩𑁆𑀭𑀳𑁆𑀫𑀓𑀸𑀬𑁂 𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀲𑀭𑀦𑁆𑀢𑀻𑀢𑀺 ‘‘𑀅𑀳𑀁 𑀕𑁄𑀢𑀫𑁄, 𑀅𑀳𑀁 𑀓𑀲𑁆𑀲𑀧𑁄’’𑀢𑀺 𑀧𑀢𑀺 𑀧𑀢𑀺 𑀅𑀢𑁆𑀢𑀦𑁄 𑀕𑁄𑀢𑁆𑀢𑀁 𑀅𑀦𑀼𑀲𑀭𑀦𑁆𑀢𑀺 𑀧𑀝𑀺𑀚𑀸𑀦𑀦𑁆𑀢𑀺 𑀯𑀸𑀢𑀺 𑀅𑀢𑁆𑀣𑁄.

𑀏𑀢𑁆𑀢𑀸𑀯𑀢𑀸𑀢𑀺 ‘‘𑀲𑀸𑀥𑀼 𑀲𑀸𑀥𑀼 𑀆𑀦𑀦𑁆𑀤𑀸’’𑀢𑀺 𑀏𑀢𑁆𑀢𑀓𑁂𑀦 𑀲𑀸𑀥𑀼𑀓𑀸𑀭𑀤𑀸𑀦𑁂𑀦. 𑀚𑀺𑀦𑀪𑀸𑀲𑀺𑀢𑀁 𑀦𑀸𑀫 𑀚𑀸𑀢𑀦𑁆𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀣𑁂𑀭𑀪𑀸𑀲𑀺𑀢𑀁 𑀩𑀼𑀤𑁆𑀥𑀪𑀸𑀲𑀺𑀢𑀫𑁂𑀯 𑀦𑀸𑀫 𑀚𑀸𑀢𑀁. ‘‘𑀓𑀺𑀫𑁆𑀧𑀦𑀺𑀤𑀁 𑀲𑀼𑀢𑁆𑀢𑀁 𑀲𑀢𑁆𑀣𑀼𑀤𑁂𑀲𑀦𑀸𑀦𑀼𑀯𑀺𑀥𑀸𑀦𑀢𑁄 𑀚𑀺𑀦𑀪𑀸𑀲𑀺𑀢𑀁, 𑀉𑀤𑀸𑀳𑀼 𑀲𑀸𑀥𑀼𑀓𑀸𑀭𑀤𑀸𑀦𑀫𑀢𑁆𑀢𑁂𑀦𑀸’’𑀢𑀺 𑀏𑀯𑀭𑀽𑀧𑀸 𑀘𑁄𑀤𑀦𑀸 𑀇𑀥 𑀅𑀦𑁄𑀓𑀸𑀲𑀸 𑀣𑁂𑀭𑀲𑁆𑀲 𑀤𑁂𑀲𑀦𑀸𑀬 𑀪𑀕𑀯𑀢𑁄 𑀤𑁂𑀲𑀦𑀸𑀦𑀼𑀯𑀺𑀥𑀸𑀦𑀳𑁂𑀢𑀼𑀓𑀢𑁆𑀢𑀸 𑀲𑀸𑀥𑀼𑀓𑀸𑀭𑀤𑀸𑀦𑀲𑁆𑀲𑀸𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀧𑁄𑀢𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀅𑀗𑁆𑀕𑀸 𑀦𑀸𑀫 𑀚𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀺𑀯𑀲𑁂𑀦 𑀅𑀗𑁆𑀕𑀸𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀅𑀗𑁆𑀕𑀸𑀬𑁂𑀯 𑀲𑁄 𑀚𑀦𑀧𑀤𑁄’’𑀢𑀺. 𑀫𑀳𑀺𑀬𑀸 𑀧𑀦𑀲𑁆𑀲 𑀉𑀢𑁆𑀢𑀭𑁂𑀦 𑀬𑀸 𑀆𑀧𑁄𑀢𑀺 𑀫𑀳𑀺𑀬𑀸 𑀦𑀤𑀺𑀬𑀸 𑀬𑀸 𑀆𑀧𑁄 𑀢𑀲𑁆𑀲 𑀚𑀦𑀧𑀤𑀲𑁆𑀲 𑀉𑀢𑁆𑀢𑀭𑁂𑀦 𑀳𑁄𑀦𑁆𑀢𑀺. 𑀢𑀸𑀲𑀁 𑀅𑀯𑀺𑀤𑀽𑀭𑀢𑁆𑀢𑀸 𑀲𑁄 𑀚𑀦𑀧𑀤𑁄 𑀉𑀢𑁆𑀢𑀭𑀸𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀧𑀦 𑀫𑀳𑀻 𑀓𑀢𑁆𑀣𑀘𑀺 𑀓𑀢𑁆𑀣𑀘𑀺 𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀸𑀢𑀺 𑀆𑀳 ‘‘𑀓𑀢𑀭𑀫𑀳𑀺𑀬𑀸 𑀉𑀢𑁆𑀢𑀭𑁂𑀦 𑀬𑀸 𑀆𑀧𑁄’’𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀸 𑀫𑀳𑀺𑀬𑀸 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀅𑀬𑀁 𑀆𑀯𑀺𑀪𑀸𑀯𑀓𑀣𑀸. 𑀬𑀲𑁆𑀫𑀸 (𑀅. 𑀦𑀺. 𑀝𑀻. 𑁩.𑁮.𑁧𑁯) 𑀮𑁄𑀓𑀺𑀬𑀸 𑀚𑀫𑁆𑀩𑀼𑀤𑀻𑀧𑁄 𑀳𑀺𑀫𑀯𑀸 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀲𑀫𑀼𑀤𑁆𑀤𑀤𑀳𑀧𑀩𑁆𑀩𑀢𑀦𑀤𑀺𑀬𑁄𑀢𑀺 𑀏𑀢𑁂𑀲𑀼 𑀬𑀁 𑀬𑀁 𑀦 𑀫𑀦𑀼𑀲𑁆𑀲𑀕𑁄𑀘𑀭𑀁, 𑀢𑀢𑁆𑀣 𑀲𑀬𑀁 𑀲𑀫𑁆𑀫𑀽𑀴𑁆𑀳𑀸 𑀅𑀜𑁆𑀜𑁂𑀧𑀺 𑀲𑀫𑁆𑀫𑁄𑀳𑀬𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑁄𑀳𑀯𑀺𑀥𑀫𑀦𑀢𑁆𑀣𑀁 ‘‘𑀅𑀬𑀁 𑀓𑀺𑀭 𑀚𑀫𑁆𑀩𑀼𑀤𑀻𑀧𑁄’’𑀢𑀺𑀆𑀤𑀺𑀫𑀸𑀭𑀤𑁆𑀥𑀁. 𑀤𑀲𑀲𑀳𑀲𑁆𑀲𑀬𑁄𑀚𑀦𑀧𑀭𑀺𑀫𑀸𑀡𑁄 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀝𑁄 𑀢𑀤𑀼𑀧𑀪𑁄𑀕𑀺𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀓𑁆𑀔𑀬𑁂𑀦.

𑀲𑀼𑀦𑁆𑀤𑀭𑀤𑀲𑁆𑀲𑀦𑀁 𑀓𑀽𑀝𑀦𑁆𑀢𑀺 𑀲𑀼𑀤𑀲𑁆𑀲𑀦𑀓𑀽𑀝𑀁, 𑀬𑀁 𑀮𑁄𑀓𑁂 ‘‘𑀳𑁂𑀫𑀓𑀽𑀝’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀽𑀮𑀕𑀦𑁆𑀥𑁄 𑀓𑀸𑀴𑀸𑀦𑀼𑀲𑀸𑀭𑀺𑀬𑀸𑀤𑀺. 𑀲𑀸𑀭𑀕𑀦𑁆𑀥𑁄 𑀘𑀦𑁆𑀤𑀦𑀸𑀤𑀺. 𑀨𑁂𑀕𑁆𑀕𑀼𑀕𑀦𑁆𑀥𑁄 𑀲𑀮𑀮𑀸𑀤𑀺. 𑀢𑀘𑀕𑀦𑁆𑀥𑁄 𑀮𑀯𑀗𑁆𑀕𑀸𑀤𑀺. 𑀧𑀧𑀝𑀺𑀓𑀕𑀦𑁆𑀥𑁄 𑀓𑀩𑀺𑀢𑁆𑀣𑀸𑀤𑀺. 𑀭𑀲𑀕𑀦𑁆𑀥𑁄 𑀲𑀚𑁆𑀚𑀸𑀤𑀺, 𑀧𑀢𑁆𑀢𑀕𑀦𑁆𑀥𑁄 𑀢𑀫𑀸𑀮𑀳𑀺𑀭𑀺𑀯𑁂𑀭𑀸𑀤𑀺. 𑀧𑀼𑀧𑁆𑀨𑀕𑀦𑁆𑀥𑁄 𑀦𑀸𑀕𑀓𑀼𑀗𑁆𑀓𑀼𑀫𑀸𑀤𑀺. 𑀨𑀮𑀕𑀦𑁆𑀥𑁄 𑀚𑀸𑀢𑀺𑀨𑀮𑀸𑀤𑀺. 𑀕𑀦𑁆𑀥𑀕𑀦𑁆𑀥𑁄 𑀲𑀩𑁆𑀩𑁂𑀲𑀁 𑀕𑀦𑁆𑀥𑀸𑀦𑀁 𑀕𑀦𑁆𑀥𑁄. 𑀬𑀲𑁆𑀲 𑀳𑀺 𑀭𑀼𑀓𑁆𑀔𑀲𑁆𑀲 𑀲𑀩𑁆𑀩𑁂𑀲𑀫𑁆𑀧𑀺 𑀫𑀽𑀮𑀸𑀤𑀻𑀦𑀁 𑀕𑀦𑁆𑀥𑁄 𑀅𑀢𑁆𑀣𑀺, 𑀲𑁄 𑀇𑀥 𑀕𑀦𑁆𑀥𑁄 𑀦𑀸𑀫. 𑀢𑀲𑁆𑀲 𑀕𑀦𑁆𑀥𑀲𑁆𑀲 𑀕𑀦𑁆𑀥𑁄 𑀕𑀦𑁆𑀥𑀕𑀦𑁆𑀥𑁄. 𑀲𑀩𑁆𑀩𑀸𑀦𑀺 𑀧𑀼𑀣𑀼𑀮𑀢𑁄 𑀧𑀜𑁆𑀜𑀸𑀲𑀬𑁄𑀚𑀦𑀸𑀦𑀺, 𑀆𑀬𑀸𑀫𑀢𑁄 𑀧𑀦 𑀉𑀩𑁆𑀩𑁂𑀥𑀢𑁄 𑀯𑀺𑀬 𑀤𑁆𑀯𑀺𑀬𑁄𑀚𑀦𑀲𑀢𑀸𑀦𑁂𑀯𑀸𑀢𑀺 𑀯𑀤𑀦𑁆𑀢𑀺.

𑀫𑀦𑁄𑀳𑀭𑀲𑀺𑀮𑀸𑀢𑀮𑀸𑀦𑀻𑀢𑀺 𑀑𑀢𑀭𑀡𑀢𑁆𑀣𑀸𑀬 𑀫𑀦𑀼𑀜𑁆𑀜𑀲𑁄𑀧𑀸𑀦𑀲𑀺𑀮𑀸𑀢𑀮𑀸𑀦𑀺. 𑀲𑀼𑀧𑀝𑀺𑀬𑀢𑁆𑀢𑀸𑀦𑀻𑀢𑀺 𑀢𑀤𑀼𑀧𑀪𑁄𑀕𑀺𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀼𑀝𑁆𑀞𑀼 𑀧𑀝𑀺𑀬𑀢𑁆𑀢𑀸𑀦𑀺 𑀲𑀼𑀧𑁆𑀧𑀯𑀢𑁆𑀢𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀫𑀘𑁆𑀙𑀓𑀘𑁆𑀙𑀧𑀸𑀤𑀬𑁄 𑀉𑀤𑀓𑀁 𑀫𑀮𑀺𑀦𑀁 𑀓𑀭𑁄𑀦𑁆𑀢𑀺, 𑀢𑀤𑀪𑀸𑀯𑀢𑁄 𑀨𑀮𑀺𑀓𑀲𑀤𑀺𑀲𑀦𑀺𑀫𑁆𑀫𑀮𑀼𑀤𑀓𑀸𑀦𑀺. 𑀢𑀺𑀭𑀺𑀬𑀢𑁄 𑀤𑀻𑀖𑀁 𑀉𑀕𑁆𑀕𑀢𑀓𑀽𑀝𑀦𑁆𑀢𑀺 ‘‘𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢’’𑀦𑁆𑀢𑀺 𑀆𑀳.

𑀆𑀧𑀡𑀸𑀦𑀺 𑀏𑀯 𑀯𑁄𑀳𑀸𑀭𑀲𑁆𑀲 𑀫𑀼𑀔𑀪𑀽𑀢𑀸𑀦𑀻𑀢𑀺 𑀆𑀳 ‘‘𑀆𑀧𑀡𑀫𑀼𑀔𑀲𑀳𑀲𑁆𑀲𑀸𑀦𑀻’’𑀢𑀺. 𑀯𑀺𑀪𑀢𑁆𑀢𑀸𑀦𑀻𑀢𑀺 𑀯𑀯𑀢𑁆𑀣𑀺𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀸𑀲𑀫𑁆𑀪𑀺𑀦𑁆𑀦𑀸𑀦𑀺. 𑀯𑀲𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀬𑀣𑀸𑀨𑀸𑀲𑀼𑀓𑀁 𑀯𑀲𑀺𑀢𑀩𑁆𑀩𑀝𑁆𑀞𑀸𑀦𑀁. 𑀆𑀲𑀢𑀺 𑀏𑀢𑁆𑀣𑀸𑀢𑀺 𑀆𑀲𑀦𑀁, 𑀦𑀺𑀲𑀻𑀤𑀺𑀢𑀩𑁆𑀩𑀝𑁆𑀞𑀸𑀦𑀸𑀦𑀺.

𑀅𑀲𑀸𑀭𑀼𑀧𑁆𑀧𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀙𑀸𑀤𑀦𑀢𑁄 𑀙𑀦𑁆𑀦𑀁 𑀅𑀦𑀼𑀘𑁆𑀙𑀯𑀺𑀓𑀁, 𑀢𑀤𑁂𑀯 𑀅𑀚𑁆𑀛𑀸𑀲𑀬𑀲𑀫𑁆𑀧𑀢𑁆𑀢𑀺𑀁 𑀧𑀢𑀺𑀭𑀽𑀧𑁂𑀢𑀺 𑀧𑀓𑀸𑀲𑁂𑀢𑀻𑀢𑀺 𑀧𑀢𑀺𑀭𑀽𑀧𑀁. 𑀢𑁂𑀦𑀸𑀳 ‘‘𑀦𑀧𑁆𑀧𑀢𑀺𑀭𑀽𑀧’’𑀦𑁆𑀢𑀺. 𑀓𑀸𑀭𑀡𑀯𑁂𑀯𑀘𑀦𑀸𑀦𑀻𑀢𑀺 𑀜𑀸𑀧𑀓𑀓𑀸𑀭𑀡𑀯𑁂𑀯𑀘𑀦𑀸𑀦𑀺. 𑀜𑀸𑀧𑀓𑀜𑁆𑀳𑀺 𑀓𑀸𑀭𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀢𑁆𑀣𑀁 𑀆𑀓𑀭𑁄𑀢𑀺 𑀧𑀓𑀸𑀲𑁂𑀢𑀻𑀢𑀺 𑀆𑀓𑀸𑀭𑁄, 𑀢𑀫𑁂𑀯 𑀮𑀻𑀦𑀁 𑀕𑀼𑀴𑁆𑀳𑀁 𑀅𑀢𑁆𑀣𑀁 𑀕𑀫𑁂𑀢𑀻𑀢𑀺 𑀮𑀺𑀗𑁆𑀕𑀁, 𑀲𑁄 𑀢𑁂𑀦 𑀦𑀺𑀫𑀻𑀬𑀢𑀻𑀢𑀺 𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀤𑀻𑀖𑀤𑀲𑀯𑀢𑁆𑀣…𑀧𑁂… 𑀦𑀺𑀫𑀺𑀢𑁆𑀢𑀸𑀢𑀺 𑀯𑀼𑀢𑁆𑀢𑀸’’𑀢𑀺 𑀆𑀳. 𑀢𑁂𑀢𑀺 𑀆𑀓𑀸𑀭𑀸𑀤𑀬𑁄. 𑀢𑀣𑀸 𑀳𑀺 𑀧𑀦 𑀫𑁂𑀢𑀺𑀆𑀤𑀺𑀦𑀸 𑀧𑁄𑀢𑀮𑀺𑀬𑁄 𑀕𑀳𑀧𑀢𑀺 ‘‘𑀧𑀭𑀺𑀩𑁆𑀩𑀸𑀚𑀓𑀦𑀺𑀬𑀸𑀫𑁂𑀦 𑀅𑀳𑀁 𑀚𑀻𑀯𑀸𑀫𑀺, 𑀢𑀲𑁆𑀫𑀸 𑀕𑀳𑀧𑀢𑀺 𑀦 𑀳𑁄𑀫𑀻𑀢𑀺 𑀯𑀤𑀢𑀺. 𑀑𑀯𑀤𑀦𑁆𑀢𑁄𑀢𑀺 𑀅𑀦𑀼𑀲𑀸𑀲𑀦𑁆𑀢𑁄. 𑀉𑀧𑀯𑀤𑀦𑁆𑀢𑁄𑀢𑀺 𑀧𑀭𑀺𑀪𑀸𑀲𑀦𑁆𑀢𑁄.

𑁩𑁨. 𑀕𑁂𑀥𑀪𑀽𑀢𑁄 𑀮𑁄𑀪𑁄𑀢𑀺 𑀕𑀺𑀚𑁆𑀛𑀦𑀲𑀪𑀸𑀯𑁄 𑀮𑁄𑀪𑁄. 𑀅𑀕𑀺𑀚𑁆𑀛𑀦𑀮𑀓𑁆𑀔𑀡𑁄 𑀦 𑀮𑁄𑀪𑁄, 𑀅𑀦𑀺𑀦𑁆𑀤𑀸𑀪𑀽𑀢𑀁 𑀅𑀖𑀝𑁆𑀝𑀦𑀦𑁆𑀢𑀺 𑀦𑀺𑀦𑁆𑀤𑀸𑀬 𑀧𑀝𑀺𑀧𑀓𑁆𑀔𑀪𑀽𑀢𑀁 𑀧𑀭𑁂𑀲𑀁 𑀅𑀖𑀝𑁆𑀝𑀦𑀁. 𑀦𑀺𑀦𑁆𑀤𑀸𑀖𑀝𑁆𑀝𑀦𑀸𑀢𑀺 𑀦𑀺𑀦𑁆𑀤𑀸𑀯𑀲𑁂𑀦 𑀧𑀭𑁂𑀲𑀁 𑀖𑀝𑁆𑀝𑀦𑀸 𑀅𑀓𑁆𑀓𑁄𑀲𑀦𑀸. 𑀩𑁆𑀬𑀯𑀳𑀸𑀭𑀯𑁄𑀳𑀸𑀭𑁄𑀧𑀻𑀢𑀺 𑀓𑀬𑀯𑀺𑀓𑁆𑀓𑀬𑀮𑀓𑁆𑀔𑀡𑁄 𑀲𑀩𑁆𑀬𑁄𑀳𑀸𑀭𑁄𑀧𑀺 𑀤𑀸𑀦𑀕𑁆𑀕𑀳𑀡𑀁 𑀯𑁄𑀳𑀸𑀭𑁄. ‘‘𑀤𑀢𑁆𑀢𑁄 𑀢𑀺𑀲𑁆𑀲𑁄’’ 𑀢𑀺𑀆𑀤𑀺𑀦𑀸 𑀯𑁄𑀳𑀭𑀡𑀁 𑀧𑀜𑁆𑀜𑀸𑀧𑀦𑀦𑁆𑀢𑀺 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄. 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑁄𑀳𑀭𑀡𑀁 𑀓𑀣𑀦𑀁 𑀩𑁄𑀥𑀦𑀦𑁆𑀢𑀺 𑀯𑀘𑀦𑀁 𑀯𑁄𑀳𑀸𑀭𑁄. 𑀬𑀸𑀣𑀸𑀯𑀢𑁄 𑀅𑀬𑀸𑀣𑀸𑀯𑀢𑁄 𑀘 𑀯𑁄𑀳𑀭𑀢𑀺 𑀏𑀢𑁂𑀦𑀸𑀢𑀺 𑀯𑁄𑀳𑀸𑀭𑁄, 𑀘𑁂𑀢𑀦𑀸. 𑀅𑀬𑀫𑀺𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀅𑀬𑀁 𑀘𑁂𑀢𑀦𑀸𑀮𑀓𑁆𑀔𑀡𑁄 𑀯𑁄𑀳𑀸𑀭𑁄 𑀇𑀥 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀔𑁄 𑀲𑀸𑀯𑀚𑁆𑀚𑁄𑀯 𑀲𑀫𑀼𑀘𑁆𑀙𑁂𑀤𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀇𑀤𑀸𑀦𑀺 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀯𑁄𑀳𑀸𑀭𑀲𑁆𑀲 𑀇𑀥 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀺𑀳𑀻𑀢𑀺 𑀘𑁂𑀢𑀦𑀸 𑀦𑀢𑁆𑀣𑀻𑀢𑀺 𑀅𑀳𑀁 𑀕𑀺𑀳𑀻𑀢𑀺 𑀘𑁂𑀢𑀦𑀸𑀧𑀯𑀢𑁆𑀢𑀺 𑀦𑀢𑁆𑀣𑀺. 𑀕𑀺𑀳𑀻𑀢𑀺 𑀯𑀘𑀦𑀁 𑀦𑀢𑁆𑀣𑀻𑀢𑀺 𑀕𑀺𑀳𑀻𑀢𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀯𑀘𑀦𑀧𑁆𑀧𑀯𑀢𑁆𑀢𑀺 𑀦𑀢𑁆𑀣𑀺. 𑀕𑀺𑀳𑀻𑀢𑀺 𑀧𑀡𑁆𑀡𑀢𑁆𑀢𑀺 𑀦𑀢𑁆𑀣𑀻𑀢𑀺 𑀕𑀺𑀳𑀻𑀢𑀺 𑀲𑀫𑀜𑁆𑀜𑀸 𑀦𑀢𑁆𑀣𑀺. 𑀕𑀺𑀳𑀻𑀢𑀺 𑀩𑁆𑀬𑀯𑀳𑀸𑀭𑁄 𑀦𑀢𑁆𑀣𑀻𑀢𑀺 𑀲𑀫𑀼𑀤𑀸𑀘𑀸𑀭𑁄 𑀦𑀢𑁆𑀣𑀺.

𑁩𑁩. 𑀧𑀸𑀡𑀸𑀢𑀺𑀧𑀸𑀢𑁄𑀯 𑀲𑀁𑀬𑁄𑀚𑀦𑀁. 𑀓𑀲𑁆𑀫𑀸? 𑀩𑀦𑁆𑀥𑀦𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀦𑀺𑀲𑁆𑀲𑀭𑀺𑀢𑀼𑀁 𑀅𑀧𑁆𑀧𑀤𑀸𑀦𑀢𑁄. 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀅𑀢𑁆𑀣𑀺𑀢𑀸𑀬 𑀲𑁄 𑀧𑀼𑀕𑁆𑀕𑀮𑁄 ‘‘𑀧𑀸𑀡𑀸𑀢𑀺𑀧𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 𑁋 ‘‘𑀧𑀸𑀡𑀸𑀢𑀺𑀧𑀸𑀢𑀲𑁆𑀲…𑀧𑁂… 𑀳𑁄𑀢𑀻’’𑀢𑀺. 𑀬𑀜𑁆𑀳𑀺 𑀬𑀲𑁆𑀲 𑀅𑀢𑁆𑀣𑀺, 𑀢𑁂𑀦 𑀲𑁄 𑀅𑀧𑀤𑀺𑀲𑁆𑀲𑀢𑀻𑀢𑀺. 𑀩𑀳𑀼𑀢𑀸𑀬𑀸𑀢𑀺 𑀅𑀘𑀓𑁆𑀔𑀼𑀓𑀸𑀤𑀺𑀪𑁂𑀤𑁂𑀦 𑀩𑀳𑀼𑀪𑀸𑀯𑀢𑁄. 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀝𑀺𑀧𑀓𑁆𑀔𑁄 𑀅𑀧𑀸𑀡𑀸𑀢𑀺𑀧𑀸𑀢𑁄. 𑀲𑁄 𑀧𑀦 𑀅𑀢𑁆𑀣𑀢𑁄 𑀓𑀸𑀬𑀤𑁆𑀯𑀸𑀭𑀺𑀓𑁄 𑀲𑀻𑀮𑀲𑀁𑀯𑀭𑁄𑀢𑀺 𑀆𑀳 ‘‘𑀓𑀸𑀬𑀺𑀓𑀲𑀻𑀮𑀲𑀁𑀯𑀭𑁂𑀦𑀸’’𑀢𑀺. 𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬𑀸𑀢𑀺𑀆𑀤𑀺 𑀧𑀸𑀡𑀸𑀢𑀺𑀧𑀸𑀢𑁂 𑀆𑀤𑀻𑀦𑀯𑀤𑀲𑁆𑀲𑀦𑀁. 𑀆𑀤𑀻𑀦𑀯𑀤𑀲𑁆𑀲𑀺𑀦𑁄 𑀳𑀺 𑀢𑀢𑁄 𑀑𑀭𑀫𑀡𑀁. 𑀤𑁂𑀲𑀦𑀸𑀯𑀲𑁂𑀦𑀸𑀢𑀺 𑀅𑀜𑁆𑀜𑀢𑁆𑀣 𑀲𑀼𑀢𑁆𑀢𑁂 𑀅𑀪𑀺𑀥𑀫𑁆𑀫𑁂 𑀘 𑀤𑀲𑀲𑀼 𑀲𑀁𑀬𑁄𑀚𑀦𑁂𑀲𑀼 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼 𑀤𑁂𑀲𑀦𑀸𑀯𑀲𑁂𑀦 𑀅𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀲𑀁𑀬𑁄𑀚𑀦𑀦𑁆𑀢𑀺𑀧𑀺 𑀦𑀻𑀯𑀭𑀡𑀦𑁆𑀢𑀺𑀧𑀺 𑀇𑀥 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀢𑀤𑀢𑁆𑀣𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 𑁋 ‘‘𑀯𑀝𑁆𑀝𑀩𑀦𑁆𑀥𑀦𑀝𑁆𑀞𑁂𑀦 𑀳𑀺𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀝𑁆𑀞𑁂𑀦 𑀘𑀸’’𑀢𑀺, 𑀧𑀸𑀡𑀸𑀢𑀺𑀧𑀸𑀢𑁄 𑀳𑀺 𑀅𑀧𑀸𑀡𑀸𑀢𑀺𑀧𑀸𑀢𑀧𑀘𑁆𑀘𑀬𑀁 𑀳𑀺𑀢𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄𑀯 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀏𑀓𑁄 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 𑀇𑀤𑀁 𑀲𑀳𑀚𑀸𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀦 𑀇𑀢𑀭𑁂𑀲𑀫𑁆𑀧𑀺 𑀆𑀲𑀯𑀸𑀦𑀁 𑀬𑀣𑀸𑀭𑀳𑀁 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀡𑀸𑀢𑀺𑀧𑀸𑀢𑀻 𑀳𑀺 𑀧𑀼𑀕𑁆𑀕𑀮𑁄 ‘‘𑀢𑀧𑁆𑀧𑀘𑁆𑀘𑀬𑀁 𑀅𑀢𑁆𑀣𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀫𑁂 𑀧𑀢𑁆𑀣𑁂𑀢𑀺. 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺, 𑀪𑀯𑀯𑀺𑀲𑁂𑀲𑀁 𑀧𑀘𑁆𑀘𑀸𑀲𑀻𑀲𑀢𑀺. 𑀢𑀢𑁆𑀣 𑀉𑀧𑁆𑀧𑀦𑁆𑀦𑀁 𑀯𑀺𑀳𑀦𑀢𑀺 𑀩𑀸𑀥𑀢𑀻𑀢𑀺 𑀯𑀺𑀖𑀸𑀢𑁄, 𑀤𑀼𑀓𑁆𑀔𑀁, 𑀧𑀭𑀺𑀴𑀸𑀳𑀦𑀁 𑀅𑀦𑀢𑁆𑀣𑀼𑀧𑁆𑀧𑀸𑀤𑀯𑀲𑁂𑀦 𑀉𑀧𑀢𑀸𑀧𑀦𑀁 𑀧𑀭𑀺𑀴𑀸𑀳𑁄, 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀯𑀸𑀭𑁂𑀲𑀼. 𑀇𑀫𑀺𑀦𑀸 𑀉𑀧𑀸𑀬𑁂𑀦𑀸𑀢𑀺 𑀅𑀢𑀺𑀤𑁂𑀲𑁂𑀦 𑀧𑀦 𑀧𑀭𑀺𑀕𑁆𑀕𑀳𑀺𑀢𑁄 𑀅𑀢𑁆𑀣𑁄 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀻𑀢𑀺.

𑁩𑁪-𑁪𑁦. 𑀇𑀫𑀲𑁆𑀫𑀺𑀁 𑀧𑀤𑁂𑀢𑀺 𑀏𑀢𑁂𑀦 𑀲𑀢𑁆𑀢𑀲𑀼𑀧𑀺 𑀯𑀸𑀭𑁂𑀲𑀼 𑀢𑀣𑀸 𑀆𑀕𑀢𑀁 𑀧𑀤𑀁 𑀲𑀸𑀫𑀜𑁆𑀜𑀢𑁄 𑀕𑀳𑀺𑀢𑀁. 𑀢𑁂𑀦𑀸𑀳 ‘‘𑀇𑀫𑀺𑀦𑀸’’𑀢𑀺𑀆𑀤𑀺. 𑀭𑁄𑀲𑀦𑀁 𑀓𑀸𑀬𑀺𑀓𑀁 𑀯𑀸𑀘𑀲𑀺𑀓𑀜𑁆𑀘𑀸𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑁄 𑀅𑀭𑁄𑀲𑁄𑀧𑀺 𑀢𑀣𑀸 𑀤𑀼𑀯𑀺𑀥𑁄𑀢𑀺 𑀆𑀳 ‘‘𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑁂𑀦𑀸’’𑀢𑀺. 𑀬𑀣𑀸 𑀅𑀪𑀺𑀚𑁆𑀛𑀸 𑀮𑁄𑀪𑁄, 𑀅𑀦𑀪𑀺𑀚𑁆𑀛𑀸 𑀅𑀮𑁄𑀪𑁄, 𑀏𑀯𑀁 𑀅𑀓𑁄𑀥𑀽𑀧𑀸𑀬𑀸𑀲𑁄 𑀅𑀩𑁆𑀬𑀸𑀧𑀸𑀤𑁄, 𑀲𑀁𑀯𑀭𑁂 𑀲𑀼𑀔𑀦𑁆𑀢𑀺 𑀲𑀁𑀯𑀭𑁄𑀢𑀺 𑀤𑀝𑁆𑀞𑀩𑁆𑀩𑁄, 𑀅𑀦𑀢𑀺𑀮𑁄𑀪𑁄 𑀧𑀦 𑀲𑀢𑀺𑀲𑀁𑀯𑀭𑁂, 𑀅𑀦𑀢𑀺𑀫𑀸𑀦𑁄 𑀜𑀸𑀡𑀲𑀁𑀯𑀭𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀫𑁂𑀲𑀼 𑀧𑀦 𑀧𑀤𑁂𑀲𑀼 𑀏𑀯𑀁 𑀲𑀩𑁆𑀩𑀯𑀸𑀭𑁂𑀲𑀼 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀯𑀁 𑀆𑀲𑀯𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀲𑁆𑀲𑀧𑀺 𑀏𑀓𑀚𑁆𑀛𑀁 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 ‘‘𑀧𑀼𑀦 𑀅𑀬𑀁 𑀲𑀗𑁆𑀔𑁂𑀧𑀯𑀺𑀦𑀺𑀘𑁆𑀙𑀬𑁄’’𑀢𑀺 𑀯𑀼𑀢𑁆𑀢𑀁. 𑀅𑀲𑀫𑁆𑀫𑁄𑀳𑀢𑁆𑀣𑀁 𑀆𑀭𑀫𑁆𑀫𑀡𑀲𑁆𑀲. 𑀧𑀼𑀭𑀺𑀫𑁂𑀲𑀼 𑀢𑀸𑀯 𑀘𑀢𑀽𑀲𑀼 𑀯𑀸𑀭𑁂𑀲𑀼 𑀯𑀺𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺 𑀯𑀢𑁆𑀢𑀩𑁆𑀩𑀁. ‘‘𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬𑀸’’𑀢𑀺 𑀏𑀢𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 ‘‘𑀦 𑀲𑀓𑁆𑀓𑁄𑀫𑀻’’𑀢𑀺, ‘‘𑀅𑀦𑀼𑀯𑀺𑀚𑁆𑀚𑀸𑀧𑀺 𑀫𑀁 𑀯𑀺𑀜𑁆𑀜𑀽 𑀕𑀭𑀳𑁂𑀬𑁆𑀬𑀼’’𑀦𑁆𑀢𑀺 𑀏𑀢𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 ‘‘𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀇𑀫𑀺𑀦𑀸 𑀦𑀬𑁂𑀦 𑀧𑀘𑁆𑀙𑀺𑀫𑁂𑀲𑀼𑀧𑀺 𑀘𑀢𑀽𑀲𑀼 𑀬𑀣𑀸𑀭𑀳𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀢𑀺𑀫𑀸𑀦𑁂 𑀪𑀯𑀸𑀲𑀯𑀅𑀯𑀺𑀚𑁆𑀚𑀸𑀲𑀯𑀸𑀢𑀺 𑀯𑀼𑀢𑁆𑀢𑀁 𑀫𑀸𑀦𑁂𑀦 𑀲𑀳 𑀤𑀺𑀝𑁆𑀞𑀺𑀬𑀸 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀅𑀢𑀺𑀫𑀸𑀦𑁄 𑀧𑀦 𑀓𑀸𑀫𑀭𑀸𑀕𑁂𑀦𑀧𑀺 𑀉𑀧𑁆𑀧𑀚𑁆𑀚𑀢𑁂𑀯𑀸𑀢𑀺 ‘‘𑀅𑀢𑀺𑀫𑀸𑀦𑁂 𑀓𑀸𑀫𑀸𑀲𑀯𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀲𑁆𑀯𑀸𑀬𑀁 𑀦𑀬𑁄 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀦 𑀤𑀲𑁆𑀲𑀺𑀢𑁄. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀓𑀣𑀺𑀢𑀁 𑀆𑀤𑀺𑀢𑁄 𑀘𑀢𑀽𑀳𑀺 𑀙𑀝𑁆𑀞𑁂𑀦 𑀯𑀸𑀢𑀺 𑀧𑀜𑁆𑀘𑀳𑀺 𑀯𑀸𑀭𑁂𑀳𑀺, 𑀲𑁂𑀲𑁂𑀳𑀺 𑀢𑀻𑀳𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀗𑁆𑀔𑀸𑀧𑀳𑀸𑀦𑀁, 𑀲𑀩𑁆𑀩𑁂𑀳𑀺𑀧𑀺 𑀧𑀦 𑀪𑀺𑀓𑁆𑀔𑀼𑀪𑀸𑀯𑁂 𑀞𑀺𑀢𑀲𑁆𑀲 𑀕𑀺𑀳𑀺𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑁄 𑀓𑀣𑀺𑀢𑁄. 𑀢𑀢𑁆𑀣 𑀲𑀩𑁆𑀩𑀢𑁆𑀣 𑀯𑀢𑁆𑀢𑀁 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀫𑀬𑁆𑀳𑀁 𑀓𑀸𑀢𑀼𑀁 𑀦𑀧𑁆𑀧𑀢𑀺𑀭𑀽𑀧’’𑀦𑁆𑀢𑀺 𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦 𑀅𑀓𑀭𑀡𑀁 𑀧𑀚𑀳𑀦𑀜𑁆𑀘 𑀧𑀝𑀺𑀲𑀗𑁆𑀔𑀸𑀧𑀳𑀸𑀦𑀁.

𑀓𑀸𑀫𑀸𑀤𑀻𑀦𑀯𑀓𑀣𑀸𑀯𑀡𑁆𑀡𑀦𑀸

𑁪𑁨. 𑀉𑀧𑀲𑀼𑀫𑁆𑀪𑁂𑀬𑁆𑀬𑀸𑀢𑀺 𑀏𑀢𑁆𑀣 𑀉𑀧-𑀲𑀤𑁆𑀤𑁄 𑀲𑀫𑀻𑀧𑀢𑁆𑀣𑁄, 𑀲𑀼𑀫𑁆𑀪𑀦𑀁 𑀯𑀺𑀓𑁆𑀔𑁂𑀧𑀦𑀁. 𑀢𑁂𑀦𑁂𑀯 𑀢𑀫𑁂𑀦𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 𑁋 ‘‘𑀢𑀲𑁆𑀲 𑀲𑀫𑀻𑀧𑁂 𑀔𑀺𑀧𑁂𑀬𑁆𑀬𑀸’’𑀢𑀺, 𑀢𑀲𑁆𑀲 𑀓𑀼𑀓𑁆𑀓𑀼𑀭𑀲𑁆𑀲 𑀲𑀫𑀻𑀧𑁂 𑀅𑀝𑁆𑀞𑀺𑀓𑀗𑁆𑀓𑀮𑀁 𑀔𑀺𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦𑀺𑀫𑁆𑀫𑀁𑀲𑀢𑁆𑀢𑀸 𑀓𑀗𑁆𑀓𑀮𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀫𑀺𑀦𑀸 𑀯𑀺𑀕𑀢𑀫𑀁𑀲𑀸𑀬 𑀅𑀝𑁆𑀞𑀺𑀓𑀗𑁆𑀓𑀮𑀺𑀓𑀸𑀬 𑀉𑀭𑀝𑁆𑀞𑀺𑀫𑁆𑀳𑀺 𑀯𑀸 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀯𑀸 𑀲𑀻𑀲𑀝𑁆𑀞𑀺𑀫𑁆𑀳𑀺 𑀯𑀸 𑀓𑀗𑁆𑀓𑀮-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀦𑀺𑀓𑁆𑀓𑀦𑁆𑀢𑀦𑁆𑀢𑀺 𑀦𑀺𑀮𑁆𑀮𑀺𑀔𑀺𑀢𑀁 𑀓𑀢𑁆𑀯𑀸𑀯 𑀦𑀺𑀩𑁆𑀩𑀺𑀲𑁂𑀲𑀁 𑀮𑀺𑀔𑀺𑀢𑀁.

𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀏𑀓𑀢𑁆𑀢𑀸. 𑀢𑁂𑀦𑀸𑀳 ‘‘𑀘𑀢𑀼𑀢𑁆𑀣𑀛𑀸𑀦𑀼𑀧𑁂𑀓𑁆𑀔𑀸’’𑀢𑀺. 𑀬𑀲𑁆𑀫𑀸 𑀧𑀦𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 𑀏𑀓𑀲𑀪𑀸𑀯𑀫𑁂𑀯, 𑀢𑀲𑁆𑀫𑀸 𑀆𑀳 ‘‘𑀲𑀸 𑀳𑀻’’𑀢𑀺𑀆𑀤𑀺. 𑀮𑁄𑀓𑀸𑀫𑀺𑀲𑀲𑀗𑁆𑀔𑀸𑀢𑀸𑀢𑀺 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀦𑀸 𑀮𑁄𑀓𑁂𑀦 𑀆𑀫𑀲𑀺𑀢𑀩𑁆𑀩𑀢𑁄, 𑀮𑁄𑀓𑁂 𑀯𑀸 𑀆𑀫𑀺𑀲𑁄𑀢𑀺 𑀲𑀗𑁆𑀔𑀁 𑀕𑀢𑀸𑀬 𑀯𑀲𑁂𑀦 𑀓𑀸𑀫𑀕𑀼𑀡𑀸𑀦𑀁 𑀓𑀸𑀫𑀪𑀸𑀯𑁄 𑀘 𑀆𑀫𑀺𑀲𑀪𑀸𑀯𑁄 𑀘, 𑀲𑁄 𑀏𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀆𑀫𑀺𑀲𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀓𑀸𑀫𑀕𑀼𑀡𑀸𑀫𑀺𑀲𑀸𑀢𑀺 𑀓𑀸𑀫𑀕𑀼𑀡𑁂 𑀙𑀦𑁆𑀤𑀭𑀸𑀕𑀸. 𑀕𑀳𑀡𑀝𑁆𑀞𑁂𑀦 𑀪𑀼𑀲𑀁 𑀆𑀤𑀸𑀦𑀝𑁆𑀞𑁂𑀦.

𑁪𑁩. 𑀟𑀬𑀦𑀁 𑀆𑀓𑀸𑀲𑁂𑀦 𑀕𑀫𑀦𑀦𑁆𑀢𑀺 𑀆𑀳 ‘‘𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀕𑀺𑀚𑁆𑀛𑀸𑀤𑀻𑀦𑀁 𑀯𑀸𑀲𑀺𑀨𑀭𑀲𑀼 𑀦 𑀳𑁄𑀢𑀻𑀢𑀺 𑀆𑀳 𑁋 ‘‘𑀫𑀼𑀔𑀢𑀼𑀡𑁆𑀟𑀓𑁂𑀦 𑀟𑀲𑀦𑁆𑀢𑀸 𑀢𑀘𑁆𑀙𑁂𑀬𑁆𑀬𑀼’’𑀦𑁆𑀢𑀺. 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀏𑀢𑁆𑀣 ‘‘𑀯𑀺𑀲𑁆𑀲𑀚𑁆𑀚𑀦’’𑀦𑁆𑀢𑀺 𑀆𑀓𑀟𑁆𑀠𑀦𑀁 𑀅𑀥𑀺𑀧𑁆𑀧𑁂𑀢𑀁 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁, 𑀆𑀓𑀟𑁆𑀠𑀦𑀜𑁆𑀘 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀧𑀸𑀢𑀦𑀦𑁆𑀢𑀺 𑀆𑀳 ‘‘𑀫𑀁𑀲𑀧𑁂𑀲𑀺𑀁 𑀦𑀔𑁂𑀳𑀺 𑀓𑀟𑁆𑀠𑀺𑀢𑁆𑀯𑀸 𑀧𑀸𑀢𑁂𑀬𑁆𑀬𑀼’’𑀦𑁆𑀢𑀺.

𑁪𑁭. 𑀧𑀼𑀭𑀺𑀲𑀲𑁆𑀲 𑀆𑀭𑁄𑀳𑀦𑀬𑁄𑀕𑁆𑀬𑀁 𑀧𑁄𑀭𑀺𑀲𑁂𑀬𑁆𑀬𑀁.

𑁪𑁮. 𑀲𑀫𑁆𑀧𑀦𑁆𑀦𑀁 𑀲𑀼𑀦𑁆𑀤𑀭𑀁 𑀨𑀮𑀫𑀲𑁆𑀲𑀸𑀢𑀺 𑀲𑀫𑁆𑀧𑀦𑁆𑀦𑀨𑀮𑀁. 𑀨𑀮𑀽𑀧𑀧𑀦𑁆𑀦𑀦𑁆𑀢𑀺 𑀨𑀮𑁂𑀳𑀺 𑀉𑀧𑁂𑀢𑀦𑁆𑀢𑀺 𑀆𑀳 ‘‘𑀩𑀳𑀼𑀨𑀮’’𑀦𑁆𑀢𑀺.

𑁫𑁦. 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂𑀢𑀺 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑀢𑁄 𑀲𑀼𑀝𑁆𑀞𑀼 𑀯𑀺𑀤𑀽𑀭𑀪𑀽𑀢𑁂 𑀏𑀯 𑀯𑀺𑀤𑀽𑀭𑁂 𑀅𑀳𑀁 𑀞𑀺𑀢𑁄. 𑀓𑀲𑁆𑀲𑀘𑀺 𑀦𑀸𑀫 𑀅𑀢𑁆𑀣𑀲𑁆𑀲𑀧𑀺 𑀅𑀚𑀸𑀦𑀦𑀢𑁄 𑀦 𑀆𑀚𑀸𑀦𑀦𑁆𑀢𑀻𑀢𑀺 𑀅𑀦𑀸𑀚𑀸𑀦𑀻𑀬𑀸𑀢𑀺 𑀓𑀢𑁆𑀢𑀼𑀲𑀸𑀥𑀦𑀫𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 𑀅𑀚𑀸𑀦𑀦𑀓𑁂𑀢𑀺 𑀅𑀚𑀸𑀦𑀦𑁆𑀢𑀪𑁄𑀚𑀦𑀲𑀻𑀲𑁂𑀦 𑀢𑁂𑀲𑀁 𑀤𑀸𑀢𑀩𑁆𑀩𑀧𑀘𑁆𑀘𑀬𑁂 𑀯𑀤𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑁄𑀢𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀚𑀻𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀓𑀼𑀫𑀸𑀭𑁂𑀦 𑀪𑀢𑁄 𑀧𑁄𑀲𑀸𑀧𑀺𑀢𑁄𑀢𑀺 𑀓𑀼𑀫𑀸𑀭𑀪𑀢𑁄, 𑀓𑀼𑀫𑀸𑀭𑀪𑀢𑁄 𑀏𑀯 𑀓𑁄𑀫𑀸𑀭𑀪𑀘𑁆𑀘𑁄 𑀬𑀣𑀸 ‘‘𑀪𑀺𑀲𑀓𑁆𑀓𑀫𑁂𑀯 𑀪𑁂𑀲𑀚𑁆𑀚’’𑀦𑁆𑀢𑀺.

𑀆𑀭𑀪𑀦𑁆𑀢𑀻𑀢𑀺 𑀏𑀢𑁆𑀣 𑀆𑀭𑀪-𑀲𑀤𑁆𑀤𑁄 𑀓𑀸𑀫𑀁 𑀓𑀸𑀫𑀸𑀬𑀽𑀳𑀦𑀬𑀜𑁆𑀜𑀼𑀝𑁆𑀞𑀸𑀧𑀦𑀆𑀧𑀢𑁆𑀢𑀺𑀆𑀧𑀚𑁆𑀚𑀦𑀯𑀺𑀜𑁆𑀜𑀸𑀧𑀦𑀸𑀤𑀻𑀲𑀼𑀧𑀺 𑀆𑀕𑀢𑁄, 𑀇𑀥 𑀧𑀦 𑀳𑀺𑀁𑀲𑀦𑁂 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀆𑀳 𑁋 ‘‘𑀆𑀭𑀪𑀦𑁆𑀢𑀻𑀢𑀺 𑀖𑀸𑀢𑁂𑀦𑁆𑀢𑀻’’𑀢𑀺. 𑀉𑀤𑁆𑀤𑀺𑀲𑀺𑀢𑁆𑀯𑀸 𑀓𑀢𑀦𑁆𑀢𑀺 (𑀅. 𑀦𑀺. 𑀝𑀻. 𑁩.𑁮.𑁧𑁨; 𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁨𑁯𑁪) 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀫𑀸𑀭𑀡𑀯𑀲𑁂𑀦 𑀓𑀢𑀁 𑀦𑀺𑀩𑁆𑀩𑀢𑁆𑀢𑀺𑀢𑀁. 𑀧𑀝𑀺𑀘𑁆𑀘𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫-𑀲𑀤𑁆𑀤𑁄 𑀓𑀫𑁆𑀫𑀲𑀸𑀥𑀦𑁄 𑀅𑀢𑀻𑀢𑀓𑀸𑀮𑀺𑀓𑁄𑀢𑀺 𑀆𑀳 𑁋 ‘‘𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀓𑀢’’𑀦𑁆𑀢𑀺. 𑀦𑀺𑀫𑀺𑀢𑁆𑀢𑀓𑀫𑁆𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 ‘‘𑀧𑀝𑀺𑀘𑁆𑀘 𑀓𑀫𑁆𑀫𑀁 𑀨𑀼𑀲𑀢𑀻’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁪.𑁭𑁫) 𑀯𑀺𑀬. 𑀦𑀺𑀫𑀺𑀢𑁆𑀢𑀓𑀫𑁆𑀫𑀲𑁆𑀲𑀸𑀢𑀺 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀮𑀤𑁆𑀥𑀩𑁆𑀩𑀓𑀫𑁆𑀫𑀲𑁆𑀲, 𑀦 𑀓𑀭𑀡𑀓𑀸𑀭𑀸𑀧𑀦𑀯𑀲𑁂𑀦. 𑀧𑀝𑀺𑀘𑁆𑀘𑀓𑀫𑁆𑀫𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀫𑀁𑀲𑀁 𑀧𑀝𑀺𑀘𑁆𑀘𑀓𑀫𑁆𑀫𑀁 𑀬𑀣𑀸 ‘‘𑀩𑀼𑀤𑁆𑀥𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀩𑀼𑀤𑁆𑀥𑁄’’𑀢𑀺. 𑀢𑁂𑀲𑀦𑁆𑀢𑀺 𑀦𑀺𑀕𑀡𑁆𑀞𑀸𑀦𑀁. 𑀅𑀜𑁆𑀜𑁂𑀧𑀺 𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀢𑀁𑀮𑀤𑁆𑀥𑀺𑀓𑀸 𑀅𑀢𑁆𑀣𑁂𑀯.

𑀓𑀸𑀭𑀡𑀦𑁆𑀢𑀺 𑀏𑀢𑁆𑀣 𑀬𑀼𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀲𑀸 𑀏𑀯 𑀘 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 ‘‘𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 𑁋 ‘‘𑀓𑀸𑀭𑀡𑀁 𑀦𑀸𑀫 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀫𑀘𑁆𑀙𑀫𑀁𑀲𑀧𑀭𑀺𑀪𑁄𑀕𑁄’’𑀢𑀺. 𑀅𑀦𑀼𑀓𑀸𑀭𑀡𑀁 𑀦𑀸𑀫 𑀫𑀳𑀸𑀚𑀦𑀲𑁆𑀲 𑀢𑀣𑀸 𑀩𑁆𑀬𑀸𑀓𑀭𑀡𑀁 𑀬𑀼𑀢𑁆𑀢𑀺𑀬𑀸 𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀪𑀸𑀯𑀢𑁄 𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀁 𑀢𑀣𑁂𑀯 𑀓𑀣𑀦𑀦𑁆𑀢𑀺 𑀓𑀢𑁆𑀯𑀸. 𑀢𑀦𑁆𑀢𑀺 ‘‘𑀚𑀸𑀦𑀁 𑀉𑀤𑁆𑀤𑀺𑀲𑁆𑀲𑀓𑀢𑀁 𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀦𑀁 𑀦𑁂𑀯 𑀓𑀸𑀭𑀡𑀁 𑀳𑁄𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀢𑁄 𑀲𑀢𑀺 𑀘 𑀅𑀬𑀼𑀢𑁆𑀢𑀺𑀬𑀁 𑀅𑀥𑀫𑁆𑀫𑁄𑀢𑀺 𑀓𑀢𑁆𑀯𑀸. 𑀢𑀣𑀸 𑀩𑁆𑀬𑀸𑀓𑀭𑀡𑀦𑁆𑀢𑀺 ‘‘𑀚𑀸𑀦𑀁 𑀉𑀤𑁆𑀤𑀺𑀲𑁆𑀲𑀓𑀢𑀁 𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 𑀓𑀣𑀦𑀁 𑀬𑀼𑀢𑁆𑀢𑀺𑀬𑀸 𑀥𑀫𑁆𑀫𑀲𑁆𑀲 𑀅𑀦𑀦𑀼𑀭𑀽𑀧𑀪𑀸𑀯𑀢𑁄 𑀦 𑀅𑀦𑀼𑀓𑀸𑀭𑀡𑀁 𑀳𑁄𑀢𑀺. 𑀧𑀭𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀓𑀸𑀭𑀡𑁄 𑀳𑀼𑀢𑁆𑀯𑀸𑀢𑀺 𑀧𑀭𑁂 𑀢𑀺𑀢𑁆𑀣𑀺𑀬𑀸 ‘𑀚𑀸𑀦’𑀦𑁆𑀢𑀺𑀆𑀤𑀺𑀦𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀦 𑀓𑀸𑀭𑀡𑀪𑀽𑀢𑁂𑀦 𑀲𑀓𑀸𑀭𑀡𑁄 𑀳𑀼𑀢𑁆𑀯𑀸. 𑀢𑁂𑀳𑀺 𑀢𑀣𑀸 𑀯𑀢𑁆𑀢𑀩𑁆𑀩𑁄 𑀏𑀯 𑀳𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀯𑀸𑀤𑁄 𑀯𑀸 𑀅𑀦𑀼𑀯𑀸𑀤𑁄 𑀯𑀸 ‘‘𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀧𑀯𑀢𑁆𑀢𑀸 𑀢𑀼𑀫𑁆𑀳𑀸𑀓𑀁 𑀓𑀣𑀸 𑀯𑀸 𑀧𑀭𑀢𑁄 𑀧𑀭𑁂𑀳𑀺 𑀢𑀣𑀸 𑀧𑀯𑀢𑁆𑀢𑀺𑀢𑀸 𑀢𑀲𑁆𑀲𑀸 𑀅𑀦𑀼𑀓𑀣𑀸 𑀯𑀸. 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀓𑀸𑀭𑀡𑀦𑁆𑀢𑀺 𑀢𑀺𑀢𑁆𑀣𑀺𑀬𑀸 𑀢𑀸𑀯 𑀢𑀺𑀝𑁆𑀞𑀦𑁆𑀢𑀼, 𑀢𑀢𑁄 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀕𑀭𑀳𑀺𑀢𑀩𑁆𑀩𑀓𑀸𑀭𑀡𑀁. 𑀓𑁄𑀘𑀺 𑀦 𑀆𑀕𑀘𑁆𑀙𑀢𑀻𑀢𑀺 𑀕𑀭𑀳𑀺𑀢𑀩𑁆𑀩𑀢𑀁 𑀦 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀪𑀯𑀺𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀻𑀢𑀺 𑀅𑀪𑀺𑀪𑀼𑀬𑁆𑀬 𑀫𑀤𑁆𑀤𑀺𑀢𑁆𑀯𑀸 𑀓𑀣𑁂𑀦𑁆𑀢𑀺, 𑀅𑀪𑀺𑀪𑀽𑀢𑁂𑀦 𑀅𑀓𑁆𑀓𑁄𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁫𑁨. 𑀓𑀸𑀭𑀡𑁂𑀳𑀻𑀢𑀺 𑀧𑀭𑀺𑀪𑁄𑀕𑀘𑀺𑀢𑁆𑀢𑀲𑁆𑀲 𑀅𑀯𑀺𑀲𑀼𑀤𑁆𑀥𑀢𑀸𑀳𑁂𑀢𑀽𑀳𑀺. 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑁆𑀲𑀓𑀢𑀁 𑀤𑀺𑀝𑁆𑀞𑀁. 𑀢𑀸𑀤𑀺𑀲𑀫𑀁𑀲𑀜𑁆𑀳𑀺 𑀧𑀭𑀺𑀪𑁄𑀕𑀸𑀦𑀸𑀭𑀳𑀢𑁆𑀢𑀸 𑀘𑀺𑀢𑁆𑀢𑀅𑀯𑀺𑀲𑀼𑀤𑁆𑀥𑀺𑀬𑀸 𑀓𑀸𑀭𑀡𑀁 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀸𑀯𑀳𑀢𑁄. 𑀇𑀤𑀸𑀦𑀺 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑀸𑀤𑀻𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀤𑀼𑀪𑀬𑀯𑀺𑀫𑀼𑀢𑁆𑀢𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺 ‘‘𑀤𑀺𑀝𑁆𑀞𑀁 𑀲𑀼𑀢’’𑀦𑁆𑀢𑀺 𑀇𑀫𑀁 𑀉𑀪𑀬𑀁 𑀅𑀦𑀺𑀲𑁆𑀲𑀸𑀬 𑁋 ‘‘𑀓𑀺𑀁 𑀦𑀼 𑀔𑁄 𑀇𑀫𑀁 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲 𑀯𑀥𑀺𑀢𑁆𑀯𑀸 𑀲𑀫𑁆𑀧𑀸𑀤𑀺𑀢’’𑀦𑁆𑀢𑀺 𑀓𑁂𑀯𑀮𑀫𑁂𑀯 𑀧𑀭𑀺𑀲𑀗𑁆𑀓𑀺𑀢𑀁. 𑀲𑀩𑁆𑀩𑀲𑀗𑁆𑀕𑀸𑀳𑀓𑁄𑀢𑀺 𑀲𑀩𑁆𑀩𑁂𑀲𑀁 𑀢𑀺𑀡𑁆𑀡𑀁 𑀧𑀭𑀺𑀲𑀗𑁆𑀓𑀺𑀢𑀸𑀦𑀁 𑀲𑀗𑁆𑀕𑀡𑁆𑀳𑀦𑀓𑁄.

𑀫𑀗𑁆𑀕𑀮𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀳𑀼𑀦𑀧𑀸𑀳𑀼𑀦𑀸𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀺𑀩𑁆𑀩𑁂𑀫𑀢𑀺𑀓𑀸 𑀳𑁄𑀦𑁆𑀢𑀻𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀭𑀺𑀲𑀗𑁆𑀓𑀺𑀢𑀸𑀪𑀸𑀯𑀫𑀸𑀳. 𑀇𑀢𑀭𑁂𑀲𑀦𑁆𑀢𑀺 𑀅𑀚𑀸𑀦𑀦𑁆𑀢𑀸𑀦𑀁 𑀯𑀝𑁆𑀝𑀢𑀺, 𑀚𑀸𑀦𑀢𑁄 𑀏𑀯𑁂𑀢𑁆𑀣 𑀆𑀧𑀢𑁆𑀢𑀺 𑀳𑁄𑀢𑀺. 𑀢𑁂𑀬𑁂𑀯𑀸𑀢𑀺 𑀬𑁂 𑀉𑀤𑁆𑀤𑀺𑀲𑁆𑀲 𑀓𑀢𑀁, 𑀢𑁂𑀬𑁂𑀯.

𑀉𑀤𑁆𑀤𑀺𑀲𑁆𑀲𑀓𑀢𑀫𑀁𑀲𑀧𑀭𑀺𑀪𑁄𑀕𑀢𑁄 𑀅𑀓𑀧𑁆𑀧𑀺𑀬𑀫𑀁𑀲𑀧𑀭𑀺𑀪𑁄𑀕𑀲𑁆𑀲 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀓𑀧𑁆𑀧𑀺𑀬𑀫𑀁𑀲𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀲𑁆𑀫𑀺𑀁 𑀲𑀘𑀺𑀢𑁆𑀢𑀓𑀸 𑀆𑀧𑀢𑁆𑀢𑀺, 𑀇𑀢𑀭𑀲𑁆𑀫𑀺𑀁 𑀅𑀘𑀺𑀢𑁆𑀢𑀓𑀸. 𑀢𑁂𑀦𑀸𑀳 𑁋 ‘‘𑀅𑀓𑀧𑁆𑀧𑀺𑀬𑀫𑀁𑀲𑀁 𑀅𑀚𑀸𑀦𑀺𑀢𑁆𑀯𑀸 𑀪𑀼𑀢𑁆𑀢𑀲𑁆𑀲𑀧𑀺 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺. 𑀧𑀭𑀺𑀪𑁄𑀕𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁫𑁩. 𑀢𑀸𑀤𑀺𑀲𑀲𑁆𑀲𑀸𑀢𑀺 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀲𑁆𑀲 𑀫𑀘𑁆𑀙𑀫𑀁𑀲𑀲𑁆𑀲 𑀧𑀭𑀺𑀪𑁄𑀕𑁂. 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀅𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄𑀧𑀺. 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄 𑀧𑀭𑀺𑀪𑁄𑀕𑁂 𑀲𑀺𑀔𑀸𑀧𑁆𑀧𑀢𑁆𑀢𑀸 𑀅𑀦𑀯𑀚𑁆𑀚𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀥, 𑀚𑀻𑀯𑀓, 𑀪𑀺𑀓𑁆𑀔𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀺𑀬𑀫𑁂𑀢𑁆𑀯𑀸𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 𑀲𑀸𑀫𑀜𑁆𑀜𑀢𑁄. 𑀬𑀲𑁆𑀫𑀸 𑀪𑀕𑀯𑀢𑀸 𑁋 ‘‘𑀬𑀢𑁄 𑀔𑁄, 𑀯𑀘𑁆𑀙, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀧𑀳𑀻𑀦𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀫𑀳𑀸𑀯𑀘𑁆𑀙𑀕𑁄𑀢𑁆𑀢𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁧𑁯𑁪) 𑀅𑀢𑁆𑀢𑀸 𑀅𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀯𑀘𑁆𑀙𑀕𑁄𑀢𑁆𑀢𑁄 𑁋 ‘‘𑀢𑀺𑀝𑁆𑀞𑀢𑀼 𑀪𑀯𑀁 𑀕𑁄𑀢𑀫𑁄, 𑀅𑀢𑁆𑀣𑀺 𑀧𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀏𑀓𑀪𑀺𑀓𑁆𑀔𑀼𑀧𑀺 𑀲𑀸𑀯𑀓𑁄 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 𑀆𑀳, ‘‘𑀇𑀥, 𑀪𑀸𑀭𑀤𑁆𑀯𑀸𑀚, 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 𑀘𑀗𑁆𑀓𑀻𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁪𑁩𑁦) 𑀅𑀢𑁆𑀢𑀸 𑀅𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀢𑀢𑁆𑀣 𑀧𑀭𑀢𑁄 𑁋 ‘‘𑀬𑀁 𑀔𑁄 𑀧𑀦 𑀅𑀬𑀫𑀸𑀬𑀲𑁆𑀫𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀕𑀫𑁆𑀪𑀻𑀭𑁄 𑀲𑁄 𑀥𑀫𑁆𑀫𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄, 𑀦 𑀲𑁄 𑀥𑀫𑁆𑀫𑁄 𑀲𑀼𑀤𑁂𑀲𑀦𑀻𑀬𑁄 𑀮𑀼𑀤𑁆𑀤𑁂𑀦𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸 𑀆𑀕𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀕𑀯𑀢𑀸 𑀳𑀺 𑀫𑀳𑀸𑀯𑀘𑁆𑀙𑀕𑁄𑀢𑁆𑀢𑀲𑀼𑀢𑁆𑀢𑁂, 𑀘𑀗𑁆𑀓𑀻𑀲𑀼𑀢𑁆𑀢𑁂 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀅𑀢𑁆𑀢𑀸𑀦𑀁𑀬𑁂𑀯 𑀲𑀦𑁆𑀥𑀸𑀬 𑀤𑁂𑀲𑀦𑀸 𑀓𑀢𑀸’’𑀢𑀺. 𑀫𑀁𑀲𑀽𑀧𑀲𑁂𑀘𑀦𑁄𑀯 𑀅𑀥𑀺𑀧𑁆𑀧𑁂𑀢𑁄 𑀫𑀘𑁆𑀙𑀫𑀁𑀲𑀲𑀳𑀺𑀢𑀲𑁆𑀲 𑀆𑀳𑀸𑀭𑀲𑁆𑀲 𑀧𑀭𑀺𑀪𑁄𑀕𑀪𑀸𑀯𑀢𑁄 𑀫𑀘𑁆𑀙𑀫𑀁𑀲𑀲𑁆𑀲 𑀘 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀅𑀕𑀣𑀺𑀢𑁄 𑀅𑀧𑁆𑀧𑀝𑀺𑀩𑀤𑁆𑀥𑁄. 𑀢𑀡𑁆𑀳𑀸𑀫𑀼𑀘𑁆𑀙𑀦𑀸𑀬𑀸𑀢𑀺 𑀢𑀡𑁆𑀳𑀸𑀬𑀦𑀯𑀲𑁂𑀦 𑀫𑀼𑀘𑁆𑀙𑀸𑀧𑀢𑁆𑀢𑀺𑀬𑀸. 𑀅𑀦𑀚𑁆𑀛𑁄𑀧𑀦𑁆𑀦𑁄 𑀢𑀡𑁆𑀳𑀸𑀬 𑀅𑀪𑀺𑀪𑀯𑀺𑀢𑁆𑀯𑀸 𑀦 𑀅𑀚𑁆𑀛𑁄𑀢𑁆𑀣𑀝𑁄, 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀦 𑀲𑀡𑁆𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀲𑀩𑁆𑀩𑀁 𑀆𑀮𑀼𑀫𑁆𑀧𑀺𑀢𑁆𑀯𑀸’’𑀢𑀺𑀆𑀤𑀺. 𑀇𑀥 𑀆𑀤𑀻𑀦𑀯𑁄 𑀆𑀳𑀸𑀭𑀲𑁆𑀲 𑀧𑀝𑀺𑀓𑀽𑀮𑀪𑀸𑀯𑁄𑀢𑀺 𑀆𑀳 ‘‘𑀏𑀓𑀭𑀢𑁆𑀢𑀺𑀯𑀸𑀲𑁂𑀦𑀸’’𑀢𑀺𑀆𑀤𑀺. 𑀅𑀬𑀫𑀢𑁆𑀣𑁄 𑀆𑀳𑀸𑀭𑀧𑀭𑀺𑀪𑁄𑀕𑁄𑀢𑀺 𑀅𑀢𑁆𑀣𑀲𑀁𑀬𑁄𑀚𑀦𑀧𑀭𑀺𑀘𑁆𑀙𑁂𑀤𑀺𑀓𑀸 ‘‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁧𑁮𑁨; 𑀫. 𑀦𑀺. 𑁧.𑁨𑁩; 𑁨.𑁨𑁪; 𑁩.𑁭𑁫; 𑀲𑀁. 𑀦𑀺. 𑁪.𑁧𑁨𑁦) 𑀧𑀯𑀢𑁆𑀢𑀸 𑀆𑀳𑀸𑀭𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀦𑀺𑀲𑁆𑀲𑀭𑀡𑀪𑀽𑀢𑀸 𑀧𑀜𑁆𑀜𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀦𑀺𑀲𑁆𑀲𑀭𑀡𑀧𑀜𑁆𑀜𑁄. 𑀇𑀤𑀫𑀢𑁆𑀣𑀦𑁆𑀢𑀺 𑀏𑀢𑀫𑀢𑁆𑀣𑀸𑀬. 𑀏𑀯𑀁 𑀲𑀦𑁆𑀢𑁂𑀢𑀺 ‘‘𑀩𑁆𑀭𑀳𑁆𑀫𑀸𑀢𑀺 𑀘 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄 𑀲𑀫𑀜𑁆𑀜𑀸’’𑀢𑀺 𑀅𑀯𑀢𑁆𑀯𑀸 𑀬𑁂 𑀥𑀫𑁆𑀫𑀸 𑀫𑁂𑀢𑁆𑀢𑀸𑀯𑀺𑀳𑀸𑀭𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀸, 𑀢𑀢𑁆𑀣 𑀲𑀸𑀯𑀲𑁂𑀲𑀁 𑀧𑀳𑀸𑀲𑀺 𑀩𑁆𑀭𑀳𑁆𑀫𑀸, 𑀅𑀦𑀯𑀲𑁂𑀲𑀁 𑀧𑀳𑀸𑀲𑀺 𑀪𑀕𑀯𑀸𑀢𑀺 𑀲𑀘𑁂 𑀢𑁂 𑀇𑀤𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁, 𑀏𑀯𑀁 𑀲𑀦𑁆𑀢𑁂 𑀢𑀯 𑀇𑀤𑀁 𑀬𑀣𑀸𑀯𑀼𑀢𑁆𑀢𑀯𑀘𑀦𑀁 𑀅𑀦𑀼𑀚𑀸𑀦𑀸𑀫𑀺, 𑀦 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀢𑀸𑀲𑀸𑀫𑀜𑁆𑀜𑀫𑀢𑁆𑀢𑀢𑁄𑀢𑀺 𑀅𑀢𑁆𑀣𑁄.

𑁫𑁫. ‘‘𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀻’’𑀢𑀺 𑀯𑀢𑁆𑀯𑀸 𑀯𑀺𑀲𑀼𑀁 𑀅𑀦𑀼𑀲𑀦𑁆𑀥𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁆𑀯𑀸𑀭𑀁 𑀣𑀓𑁂𑀢𑀻𑀢𑀺 𑀫𑀘𑁆𑀙𑀫𑀁𑀲𑀧𑀭𑀺𑀪𑁄𑀕𑀸𑀦𑀼𑀜𑁆𑀜𑀸𑀬 𑀅𑀜𑁆𑀜𑁂𑀲𑀁 𑀯𑀘𑀦𑀤𑁆𑀯𑀸𑀭𑀁 𑀧𑀺𑀤𑀳𑀢𑀺, 𑀘𑁄𑀤𑀦𑀸𑀧𑀣𑀁 𑀦𑀺𑀭𑀼𑀦𑁆𑀥𑀢𑀺. 𑀓𑀣𑀁 𑀲𑀢𑁆𑀢𑀸𑀦𑀼𑀤𑁆𑀤𑀬𑀁 𑀤𑀲𑁆𑀲𑁂𑀢𑀺? 𑀲𑀢𑁆𑀢𑀸𑀦𑀼𑀤𑁆𑀤𑀬𑀫𑀼𑀔𑁂𑀦 𑀩𑀸𑀳𑀺𑀭𑀓𑀸𑀦𑀁 𑀫𑀘𑁆𑀙𑀫𑀁𑀲𑀧𑀭𑀺𑀪𑁄𑀕𑀧𑀝𑀺𑀓𑁆𑀔𑁂𑀧𑁄 𑀢𑀬𑀺𑀤𑀁 𑀫𑀺𑀘𑁆𑀙𑀸, 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀲𑁆𑀲𑁂𑀯 𑀫𑀘𑁆𑀙𑀫𑀁𑀲𑀲𑁆𑀲 𑀧𑀭𑀺𑀪𑁄𑀕𑁄 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘𑀢𑀻𑀳𑀺 𑀔𑁄 𑀅𑀳𑀁, 𑀚𑀻𑀯𑀓, 𑀞𑀸𑀦𑁂𑀳𑀺 𑀫𑀁𑀲𑀁 𑀧𑀭𑀺𑀪𑁄𑀕𑀦𑁆𑀢𑀺 𑀯𑀤𑀸𑀫𑀻’𑀢𑀺𑀆𑀤𑀺 (𑀫. 𑀦𑀺. 𑁨.𑁫𑁨). 𑀯𑀺𑀦𑀬𑁂𑀧𑀺 (𑀧𑀸𑀭𑀸. 𑁪𑁦𑁯; 𑀘𑀽𑀴𑀯. 𑁩𑁪𑁩) 𑀯𑀼𑀢𑁆𑀢𑀁 𑁋 ‘‘𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀁, 𑀤𑁂𑀯𑀤𑀢𑁆𑀢, 𑀫𑀘𑁆𑀙𑀫𑀁𑀲𑀁 𑀫𑀬𑀸 𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺. 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀜𑁆𑀘 𑀪𑀼𑀜𑁆𑀚𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀅𑀦𑀼𑀤𑁆𑀤𑀬𑀸 𑀦𑀺𑀘𑁆𑀘𑀮𑀸. ‘‘𑀲𑀢𑁆𑀢𑀸𑀦𑀼𑀤𑁆𑀤𑀬𑀁 𑀤𑀲𑁆𑀲𑁂𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀘𑁂 𑀳𑀻’’𑀢𑀺𑀆𑀤𑀺𑀫𑀸𑀳.

𑀧𑀞𑀫𑁂𑀦 𑀓𑀸𑀭𑀡𑁂𑀦𑀸𑀢𑀺 𑀤𑁂𑀲𑀦𑀸𑀯𑀲𑁂𑀦𑀧𑀺 𑀧𑀬𑁄𑀕𑀯𑀲𑁂𑀦𑀧𑀺 𑀧𑀞𑀫𑁂𑀦 𑀧𑀭𑀽𑀧𑀖𑀸𑀢𑀳𑁂𑀢𑀼𑀦𑀸. 𑀓𑀟𑁆𑀠𑀺𑀢𑁄 𑀲𑁄 𑀧𑀸𑀡𑁄. 𑀕𑀮𑁂𑀦 𑀧𑀯𑁂𑀥𑁂𑀦𑁆𑀢𑁂𑀦𑀸𑀢𑀺 𑀬𑁄𑀢𑁆𑀢𑀕𑀮𑁂𑀦 𑀓𑀭𑀡𑁂𑀦 𑀅𑀲𑀬𑁆𑀳𑀫𑀸𑀦𑁂𑀦. 𑀩𑀳𑀼𑀧𑀼𑀜𑁆𑀜𑀫𑁂𑀯 𑀳𑁄𑀢𑀺 𑀆𑀲𑀸𑀤𑀦𑀸𑀧𑁂𑀓𑁆𑀔𑀸𑀬 𑀅𑀪𑀸𑀯𑀢𑁄, 𑀳𑀺𑀢𑀚𑁆𑀛𑀸𑀲𑀬𑀢𑁆𑀢𑀸 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀲𑀸𑀳𑀁, 𑀪𑀦𑁆𑀢𑁂𑀢𑀺𑀆𑀤𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀲𑀭𑀡𑀕𑀫𑀦𑀯𑀲𑁂𑀦𑁂𑀯 𑀕𑀳𑀺𑀢𑀲𑀭𑀡𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀬’’𑀦𑁆𑀢𑀺𑀆𑀤𑀺. 𑀑𑀕𑀸𑀳𑀦𑁆𑀢𑁄𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀲𑀼𑀢𑁆𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀅𑀢𑁆𑀣𑀁 𑀉𑀧𑀥𑀸𑀭𑁂𑀦𑁆𑀢𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀚𑀻𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀉𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀧𑀸𑀯𑀸𑀭𑀁 𑀧𑀸𑀭𑀼𑀧𑀢𑀻𑀢𑀺 𑀧𑀸𑀯𑀸𑀭𑀺𑀓𑁄, 𑀇𑀤𑀁 𑀢𑀲𑁆𑀲 𑀓𑀼𑀮𑀲𑀫𑀼𑀤𑀸𑀕𑀢𑀁 𑀦𑀸𑀫𑀁, 𑀲𑁄 𑀧𑀦 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀦𑀕𑀭𑁂 𑀲𑁂𑀝𑁆𑀞𑀺𑀝𑁆𑀞𑀸𑀦𑁂 𑀞𑀺𑀢𑁄. 𑀢𑁂𑀦𑀸𑀳 ‘‘𑀤𑀼𑀲𑁆𑀲𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀺𑀦𑁄’’𑀢𑀺. 𑀤𑀻𑀖𑀢𑁆𑀢𑀸 𑀤𑀻𑀖𑀢𑀫𑀢𑁆𑀢𑀸. 𑀲𑁄 𑀓𑀺𑀭 𑀧𑀫𑀸𑀡𑀢𑁄 𑀉𑀧𑀯𑀘𑁆𑀙𑀬𑀢𑁄 𑀤𑀺𑀬𑀟𑁆𑀠𑀭𑀢𑀦𑀁 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑁄. 𑀏𑀯𑀁𑀮𑀤𑁆𑀥𑀦𑀸𑀫𑁄𑀢𑀺 ‘‘𑀤𑀻𑀖𑀢𑀧𑀲𑁆𑀲𑀻’’𑀢𑀺 𑀮𑀤𑁆𑀥𑀲𑀫𑀜𑁆𑀜𑁄. 𑀩𑀸𑀳𑀺𑀭𑀸𑀬𑀢𑀦𑁂𑀢𑀺 𑀢𑀺𑀢𑁆𑀣𑀺𑀬𑀲𑀫𑀬𑁂 𑀧𑀺𑀡𑁆𑀟𑀧𑀸𑀢𑁄𑀢𑀺 𑀯𑁄𑀳𑀸𑀭𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀸𑀲𑀦𑀯𑁄𑀳𑀸𑀭𑁂𑀦 ‘‘𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀲𑁆𑀲𑁂𑀢𑀻𑀢𑀺 𑀤𑁂𑀲𑁂𑀢𑀺. 𑀞𑀧𑁂𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀧𑁂𑀢𑀺. 𑀓𑀺𑀭𑀺𑀬𑀸𑀬𑀸𑀢𑀺 𑀓𑀭𑀡𑁂𑀦. 𑀧𑀯𑀢𑁆𑀢𑀺𑀬𑀸𑀢𑀺 𑀧𑀯𑀢𑁆𑀢𑀦𑁂𑀦. 𑀤𑀡𑁆𑀟𑀸𑀦𑀺 𑀧𑀜𑁆𑀜𑀧𑁂𑀢𑀻𑀢𑀺 𑀏𑀢𑁆𑀣 𑀓𑀲𑁆𑀫𑀸 𑀪𑀕𑀯𑀢𑀸 𑀆𑀤𑀺𑀢𑁄𑀯 𑀢𑀣𑀸 𑀦 𑀧𑀼𑀘𑁆𑀙𑀺𑀢𑀦𑁆𑀢𑀺? 𑀬𑀲𑁆𑀫𑀸 𑀲𑀸 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀦 𑀳𑁄𑀢𑀺, 𑀲𑀸𑀲𑀦𑁂 𑀮𑁄𑀓𑁂 𑀲𑀫𑀬𑀦𑁆𑀢𑀭𑁂𑀲𑀼 𑀘 𑀢𑀸𑀤𑀺𑀲𑁄 𑀲𑀫𑀼𑀤𑀸𑀘𑀸𑀭𑁄 𑀦𑀢𑁆𑀣𑀺, 𑀓𑁂𑀯𑀮𑀁 𑀧𑀦 𑀢𑀲𑁆𑀲𑁂𑀯 𑀦𑀺𑀕𑀡𑁆𑀞𑀲𑁆𑀲𑀸𑀬𑀁 𑀓𑁄𑀝𑁆𑀞𑀸𑀮𑀓𑀲𑀤𑀺𑀲𑁄 𑀲𑀫𑀼𑀤𑀸𑀘𑀸𑀭𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀸𑀦𑀺 𑀧𑀜𑁆𑀜𑀧𑁂𑀢𑀺’’ 𑀇𑀘𑁆𑀘𑁂𑀯𑀸𑀳. 𑀅𑀘𑀺𑀢𑁆𑀢𑀓𑀦𑁆𑀢𑀺 𑀘𑀺𑀢𑁆𑀢𑀭𑀳𑀺𑀢𑀁, 𑀘𑀺𑀢𑁆𑀢𑁂𑀦 𑀅𑀲𑀫𑀼𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦 𑀢𑀤𑀼𑀪𑀬𑀲𑁆𑀲 𑀘𑀺𑀢𑁆𑀢𑁂𑀦 𑀯𑀺𑀦𑀸 𑀲𑀫𑁆𑀪𑀯𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 𑀢𑀢𑁆𑀣 𑀦𑀺𑀤𑀲𑁆𑀲𑀦𑀫𑀸𑀳 ‘‘𑀬𑀣𑀸 𑀓𑀺𑀭𑀸’’𑀢𑀺𑀆𑀤𑀺. 𑀧𑀝𑀺𑀯𑀺𑀪𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑀢𑁄 𑀪𑀺𑀦𑁆𑀦𑀸𑀦𑀁. 𑀧𑀝𑀺𑀯𑀺𑀲𑀺𑀝𑁆𑀞𑀸𑀦𑀦𑁆𑀢𑀺 𑀯𑀺𑀲𑁂𑀲𑀦𑀧𑀤𑀯𑀲𑁂𑀦 𑀲𑀤𑁆𑀤𑀢𑁄𑀧𑀺 𑀪𑀺𑀦𑁆𑀦𑀸𑀦𑀁. 𑀯𑀘𑀦𑀁 𑀧𑀢𑀺𑀝𑁆𑀞𑀧𑁂𑀢𑀼𑀓𑀸𑀫𑁄𑀢𑀺 𑀤𑀻𑀖𑀢𑀧𑀲𑁆𑀲𑀺𑀦𑁄 𑀬𑀣𑀸𑀯𑀼𑀢𑁆𑀢𑀯𑀘𑀦𑀁 𑀧𑀢𑀺𑀝𑁆𑀞𑀧𑁂𑀢𑀼𑀓𑀸𑀫𑁄. 𑀢𑀲𑁆𑀫𑀺𑀜𑁆𑀳𑀺 𑀧𑀢𑀺𑀝𑁆𑀞𑀸𑀧𑀺𑀢𑁂 𑀢𑁂𑀦𑀧𑁆𑀧𑀲𑀗𑁆𑀕𑁂𑀦 𑀆𑀕𑀢𑁄, 𑀉𑀧𑀸𑀮𑀺 𑀕𑀳𑀧𑀢𑀺 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀥𑀫𑁆𑀫𑀁 𑀤𑀺𑀲𑁆𑀯𑀸 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀻𑀤𑀺𑀲𑁆𑀲𑀢𑀺.

𑀓𑀣𑀸 𑀏𑀯 𑀉𑀧𑀭𑀺 𑀯𑀸𑀤𑀸𑀭𑁄𑀧𑀦𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁄 𑀓𑀣𑀸𑀯𑀢𑁆𑀣𑀼. 𑀓𑀣𑀸𑀬𑀁 𑀧𑀢𑀺𑀝𑁆𑀞𑀧𑁂𑀲𑀻𑀢𑀺 𑀓𑀣𑀸𑀯𑀢𑁆𑀣𑀼𑀲𑁆𑀫𑀺𑀁, 𑀢𑀤𑀢𑁆𑀣𑁂 𑀯𑀸 𑀧𑀢𑀺𑀝𑁆𑀞𑀧𑁂𑀲𑀺. 𑀬𑀣𑀸 𑀢𑀁 𑀯𑀸𑀤𑀸𑀭𑁄𑀧𑀦𑀪𑀬𑁂𑀦 𑀦 𑀅𑀯𑀚𑀸𑀦𑀸𑀢𑀺, 𑀏𑀯𑀁 𑀢𑀲𑁆𑀲𑀁 𑀓𑀣𑀸𑀬𑀁, 𑀢𑀲𑁆𑀫𑀺𑀁 𑀯𑀸 𑀅𑀢𑁆𑀣𑁂 𑀤𑀻𑀖𑀢𑀧𑀲𑁆𑀲𑀺𑀁 𑀬𑀸𑀯𑀢𑀢𑀺𑀬𑀁 𑀯𑀸𑀤𑁂 𑀧𑀢𑀺𑀝𑁆𑀞𑀧𑁂𑀲𑀺. 𑀯𑀸𑀤𑀦𑁆𑀢𑀺 𑀤𑁄𑀲𑀁.

𑁫𑁭. 𑀇𑀤𑀸𑀦𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀫𑁆𑀧𑀺 𑀕𑀳𑁂𑀢𑁆𑀯𑀸 𑀓𑀸𑀬𑀓𑀫𑁆𑀫𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫𑀸𑀢𑀺𑀆𑀤𑀺 ‘‘𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸𑀬𑀸’’𑀢𑀺 𑀧𑀸𑀴𑀺𑀬𑀁 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀧𑀼𑀩𑁆𑀩𑁂 𑀧𑀦 𑀅𑀝𑁆𑀞𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸𑀢𑀺𑀆𑀤𑀺 𑀲𑀸𑀯𑀚𑁆𑀚𑀁 𑀅𑀦𑀯𑀚𑁆𑀚𑀜𑁆𑀘 𑀲𑀸𑀫𑀜𑁆𑀜𑀢𑁄 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀘𑁂𑀢𑀦𑀸 𑀦 𑀕𑀳𑀺𑀢𑀸𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀓𑀫𑁆𑀫𑀁 𑀥𑀼𑀭’’𑀦𑁆𑀢𑀺. 𑀓𑀸𑀬𑀓𑀫𑁆𑀫𑀸𑀤𑀺𑀪𑁂𑀤𑀁 𑀓𑀫𑁆𑀫𑀫𑁂𑀯 𑀥𑀼𑀭𑀁 𑀚𑁂𑀝𑁆𑀞𑀓𑀁 𑀧𑀼𑀩𑁆𑀩𑀗𑁆𑀕𑀫𑀁, 𑀦 𑀘𑁂𑀢𑀦𑀸𑀫𑀢𑁆𑀢𑀫𑁂𑀯. 𑀏𑀯𑀫𑀸𑀕𑀢𑁂𑀧𑀻𑀢𑀺 𑀓𑀫𑁆𑀫𑀸𑀦𑀻𑀢𑀺 𑀏𑀯𑀁 𑀦𑀸𑀫𑁂𑀦 𑀆𑀕𑀢𑁂𑀧𑀺 𑀘𑁂𑀢𑀦𑀸 𑀥𑀼𑀭𑀁, 𑀢𑀢𑁆𑀣 𑀘𑁂𑀢𑀦𑀁 𑀚𑁂𑀝𑁆𑀞𑀓𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀣𑀁 𑀧𑀦 𑀢𑀢𑁆𑀣 𑀓𑀫𑁆𑀫𑀦𑁆𑀢𑀺 𑀯𑀸 𑀓𑀫𑁆𑀫𑀸𑀦𑀻𑀢𑀺 𑀯𑀸 𑀆𑀕𑀢𑁂 𑀢𑁂𑀲𑀁 𑀘𑁂𑀢𑀦𑀸𑀬 𑀥𑀼𑀭𑀪𑀸𑀯𑁄𑀢𑀺 𑀆𑀳 ‘‘𑀬𑀢𑁆𑀣 𑀓𑀢𑁆𑀣𑀘𑀺…𑀧𑁂… 𑀮𑀪𑀢𑀻’’𑀢𑀺. 𑀢𑀢𑁆𑀣 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀤𑁆𑀯𑀸𑀭𑁂. 𑀲𑀸 𑀯𑀼𑀢𑁆𑀢𑀸𑀯𑀸𑀢𑀺 𑀲𑀸 𑀘𑁂𑀢𑀦𑀸 𑀯𑀼𑀢𑁆𑀢𑀸𑀯, 𑀬𑀸 𑀓𑀸𑀬𑀲𑀗𑁆𑀔𑀸𑀭𑀸𑀤𑀺𑀧𑀭𑀺𑀬𑀸𑀬𑁂𑀦 (𑀬𑀲𑁆𑀲 𑀓𑀲𑁆𑀲𑀘𑀺 𑀓𑀫𑁆𑀫𑀲𑁆𑀲 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀸𑀧𑀦𑀘𑁂𑀢𑀦𑀸) 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀢𑀤𑀕𑁆𑀕𑁂𑀦 𑀮𑁄𑀓𑀺𑀬𑀸𑀧𑀺 𑀮𑁄𑀓𑀼𑀢𑁆𑀢𑀭𑀸𑀧𑀺 𑀓𑀫𑁆𑀫𑀫𑁂𑀯, 𑀅𑀪𑀺𑀚𑁆𑀛𑀸𑀤𑀬𑁄 𑀧𑀦 𑀘𑁂𑀢𑀦𑀸𑀧𑀓𑁆𑀔𑀺𑀓𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀳𑀦𑁆𑀢𑀦𑁆𑀢𑀺 𑀓𑀝𑀼𑀓𑀨𑀮𑀁. 𑀦 𑀓𑀺𑀮𑀫𑀢𑀺 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀢𑁆𑀢𑀸 𑀧𑀝𑀺𑀜𑁆𑀜𑀸𑀬. 𑀇𑀤𑀸𑀦𑀺 𑀢𑁂𑀲𑀁 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺 𑀅𑀓𑀼𑀲𑀮𑀁 𑀧𑀢𑁆𑀯𑀸 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀳𑀦𑁆𑀢𑀦𑁆𑀢𑀺 𑀯𑀤𑀦𑁆𑀢𑁄 𑀦 𑀓𑀺𑀮𑀫𑀢𑀺, 𑀅𑀣 𑀓𑀲𑁆𑀫𑀸 𑀪𑀕𑀯𑀸 𑀇𑀥 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀫𑀳𑀸𑀲𑀸𑀯𑀚𑁆𑀚𑀁 𑀓𑀣𑁂𑀲𑀻𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂’’𑀢𑀺𑀆𑀤𑀺. 𑀬𑀸𑀯𑀢𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑀦𑀫𑀢𑁆𑀢𑁂𑀦 𑀕𑀢𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀦𑁆𑀢𑁄. 𑀢𑁂𑀦𑀸𑀳 ‘‘𑀓𑀺𑀜𑁆𑀘𑀺 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀁 𑀅𑀧𑀲𑁆𑀲𑀦𑁆𑀢𑁄𑀧𑀻’’𑀢𑀺.

𑁫𑁮. 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑁄 𑀩𑀸𑀮𑀓𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀩𑀸𑀮𑀓𑀺𑀦𑀻. 𑀲𑀢𑁆𑀣𑀼𑀧𑀝𑀺𑀜𑁆𑀜𑀸𑀢𑀢𑀸𑀬 𑀦𑀺𑀕𑀡𑁆𑀞𑀸𑀦𑀁 𑀫𑀳𑀸𑀢𑀺 𑀲𑀫𑁆𑀪𑀸𑀯𑀺𑀢𑀢𑁆𑀢𑀸 𑀫𑀳𑀸𑀦𑀺𑀕𑀡𑁆𑀞𑁄.

𑁬𑁦. 𑀆𑀯𑀝𑁆𑀝𑁂𑀢𑀺 𑀧𑀼𑀭𑀺𑀫𑀸𑀓𑀸𑀭𑀢𑁄 𑀦𑀺𑀯𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀺 𑀏𑀢𑀸𑀬𑀸𑀢𑀺 𑀆𑀯𑀝𑁆𑀝𑀦𑀻, 𑀫𑀸𑀬𑀸. 𑀢𑁂𑀦𑀸𑀳 ‘‘𑀆𑀯𑀝𑁆𑀝𑁂𑀢𑁆𑀯𑀸 𑀕𑀳𑀡𑀫𑀸𑀬’’𑀦𑁆𑀢𑀺. 𑀲𑀢𑁆𑀣𑀼𑀧𑀝𑀺𑀜𑁆𑀜𑀸𑀦𑀁 𑀩𑀼𑀤𑁆𑀥𑀤𑀲𑁆𑀲𑀦𑁂 𑀘𑀺𑀢𑁆𑀢𑀫𑁂𑀯 𑀦 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸. 𑀲𑀘𑁂 𑀧𑀦 𑀲𑁄 𑀢𑀁 𑀧𑀝𑀺𑀜𑁆𑀜𑀁 𑀅𑀧𑁆𑀧𑀳𑀸𑀬 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀁 𑀉𑀧𑀕𑀘𑁆𑀙𑁂𑀬𑁆𑀬, 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑁂𑀬𑁆𑀬, 𑀢𑀲𑁆𑀫𑀸 𑀪𑀕𑀯𑀸 ‘‘𑀫𑀸 𑀅𑀬𑀁 𑀩𑀸𑀮𑁄 𑀯𑀺𑀦𑀲𑁆𑀲𑀻’’𑀢𑀺𑀆𑀤𑀺𑀢𑁄𑀯 𑀬𑀣𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀦 𑀮𑀪𑀢𑀺, 𑀢𑀣𑀸 𑀓𑀭𑁄𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀸𑀣𑀺𑀓𑀧𑀼𑀢𑁆𑀢𑀲𑀫𑀸𑀕𑀫𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺𑀦𑀺𑀬𑀸𑀫𑀫𑀸𑀳 ‘‘𑀢𑀣𑀸𑀕𑀢𑀁 𑀳𑀻’’𑀢𑀺𑀆𑀤𑀺. 𑀆𑀕𑀫𑀸 𑀦𑀼 𑀔𑁄 𑀇𑀥 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁.

𑁬𑁧. 𑀯𑀘𑀻𑀲𑀘𑁆𑀘𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀬𑀣𑀸𑀧𑀝𑀺𑀜𑁆𑀜𑀸𑀢𑀸𑀬 𑀧𑀝𑀺𑀜𑁆𑀜𑀸𑀬 𑀞𑀢𑁆𑀯𑀸.

𑁬𑁨. 𑀲𑀻𑀢𑁄𑀤𑀓𑁂 𑀅𑀫𑀢𑀸 𑀧𑀸𑀡𑀸 𑀧𑀸𑀦𑀓𑀸𑀮𑁂 𑀧𑀦 𑀫𑀭𑀦𑁆𑀢𑀺, 𑀢𑁂𑀧𑀺 𑀢𑁂𑀦 𑀲𑀻𑀢𑁄𑀤𑀓𑀧𑀭𑀺𑀪𑁄𑀕𑁂𑀦 𑀫𑀸𑀭𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀧𑀲𑁆𑀲𑀺𑀦𑀸 𑀦𑀸𑀫 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀻𑀢𑁄𑀤𑀓𑀁 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀢𑁂𑀲𑀁 𑀮𑀤𑁆𑀥𑀺. 𑀧𑀸𑀓𑀢𑀺𑀓𑀁 𑀯𑀸 𑀉𑀤𑀓𑀁 𑀲𑀢𑁆𑀢𑁄𑀢𑀺 𑀧𑀼𑀭𑀸𑀢𑀦𑀸𑀦𑀁 𑀦𑀺𑀕𑀡𑁆𑀞𑀸𑀦𑀁 𑀮𑀤𑁆𑀥𑀺. 𑀢𑁂𑀦𑀸𑀳 ‘‘𑀲𑀢𑁆𑀢𑀲𑀜𑁆𑀜𑀸𑀬 𑀲𑀻𑀢𑁄𑀤𑀓𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀻’’𑀢𑀺. 𑀢𑁂𑀲𑀁 𑀢𑀁 𑀅𑀥𑀼𑀦𑀸𑀢𑀦𑀦𑀺𑀕𑀡𑁆𑀞𑀸𑀦𑀁 𑀯𑀸𑀤𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀢𑁂 𑀳𑀺 𑀧𑀣𑀯𑀻𑀆𑀤𑀺𑀦𑀯𑀧𑀤𑀢𑁆𑀣𑀢𑁄 𑀅𑀜𑁆𑀜𑀫𑁂𑀯 𑀚𑀻𑀯𑀺𑀢𑀁 𑀧𑀝𑀺𑀚𑀸𑀦𑀦𑁆𑀢𑀺. 𑀘𑀺𑀢𑁆𑀢𑁂𑀦 𑀲𑀻𑀢𑁄𑀤𑀓𑀁 𑀧𑀸𑀢𑀼𑀓𑀸𑀫𑁄 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺 𑀭𑁄𑀕𑁂 𑀞𑀢𑁆𑀯𑀸𑀧𑀺 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀢𑀣𑀸 𑀦 𑀯𑀺𑀢𑀢𑀢𑀸. 𑀢𑁂𑀦𑀸𑀳 𑁋 ‘‘𑀢𑁂𑀦𑀲𑁆𑀲 𑀫𑀦𑁄𑀤𑀡𑁆𑀟𑁄 𑀢𑀢𑁆𑀣𑁂𑀯 𑀪𑀺𑀚𑁆𑀚𑀢𑀻’’𑀢𑀺. 𑀢𑁂𑀦𑀸𑀢𑀺 𑀲𑀻𑀢𑁄𑀤𑀓𑀁 𑀧𑀸𑀢𑀼𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀜𑁆𑀘 𑀇𑀘𑁆𑀙𑀦𑁂𑀦. 𑀅𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀦𑀺𑀕𑀡𑁆𑀞𑀲𑁆𑀲. 𑀢𑀢𑁆𑀣𑁂𑀯𑀸𑀢𑀺 𑀢𑀣𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑁂 𑀏𑀯. 𑀪𑀺𑀚𑁆𑀚𑀢𑀺 𑀲𑀁𑀯𑀭𑀲𑁆𑀲 𑀯𑀺𑀓𑁄𑀧𑀺𑀢𑀢𑁆𑀢𑀸. 𑀢𑀣𑀸𑀪𑀽𑀢𑁄 𑀲𑁄 𑀦𑀺𑀕𑀡𑁆𑀞𑁄 𑀲𑀻𑀢𑁄𑀤𑀓𑀁 𑀘𑁂 𑀮𑀪𑁂𑀬𑁆𑀬, 𑀓𑀢𑀺𑀧𑀬𑀁 𑀓𑀸𑀮𑀁 𑀚𑀻𑀯𑁂𑀬𑁆𑀬, 𑀅𑀮𑀸𑀪𑁂𑀦 𑀧𑀦 𑀧𑀭𑀺𑀲𑀼𑀲𑁆𑀲𑀫𑀸𑀦𑀓𑀡𑁆𑀞𑁄𑀝𑁆𑀞𑀢𑀸𑀮𑀼𑀚𑀺𑀯𑁆𑀳𑀸𑀆𑀤𑀺𑀓𑁄 𑀲𑀩𑁆𑀩𑀲𑁄 𑀧𑀭𑀺𑀤𑀸𑀳𑀸𑀪𑀺𑀪𑀽𑀢𑁄 𑀫𑀭𑁂𑀬𑁆𑀬. 𑀢𑁂𑀦𑀸𑀳 𑁋 ‘‘𑀲𑀻𑀢𑁄𑀤𑀓𑀁 𑀅𑀮𑀪𑀫𑀸𑀦𑁄 𑀓𑀸𑀮𑀁 𑀓𑀭𑁂𑀬𑁆𑀬𑀸’’𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀻𑀢𑁄𑀤𑀓𑀁 𑀧𑀺𑀯𑀸𑀬 𑀲𑀦𑁆𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀲𑁆𑀲 𑀫𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀦𑁄𑀤𑀡𑁆𑀟𑁄 𑀧𑀦 𑀪𑀺𑀦𑁆𑀦𑁄𑀧𑀺 𑀘𑀼𑀢𑀺𑀫𑁆𑀧𑀺 𑀆𑀓𑀟𑁆𑀠𑀢𑀻’’𑀢𑀺. 𑀬𑀲𑁆𑀫𑀸 𑀧𑀦 𑀢𑀣𑀸𑀪𑀽𑀢𑀘𑀺𑀢𑁆𑀢𑀲𑁆𑀲 𑀦𑀺𑀕𑀡𑁆𑀞𑀲𑁆𑀲 𑀫𑀦𑁄𑀲𑀢𑁆𑀢𑁂𑀲𑀼 𑀦𑀸𑀫 𑀤𑁂𑀯𑁂𑀲𑀼 𑀉𑀧𑀧𑀢𑁆𑀢𑀺 𑀳𑁄𑀢𑀻𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀮𑀤𑁆𑀥𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀦𑁄𑀤𑀡𑁆𑀟𑁄 𑀧𑀦 𑀪𑀺𑀦𑁆𑀦𑁄𑀧𑀺 𑀧𑀝𑀺𑀲𑀦𑁆𑀥𑀺𑀫𑁆𑀧𑀺 𑀆𑀓𑀟𑁆𑀠𑀢𑀻’’𑀢𑀺. 𑀇𑀢𑀻𑀢𑀺 𑀏𑀯𑀁 ‘‘𑀇𑀥𑀸𑀲𑁆𑀲 𑀦𑀺𑀕𑀡𑁆𑀞𑁄’’𑀢𑀺𑀆𑀤𑀺𑀆𑀓𑀸𑀭𑁂𑀦. 𑀦𑀦𑁆𑀢𑀺 𑀉𑀧𑀸𑀮𑀺𑀁 𑀕𑀳𑀧𑀢𑀺𑀁. 𑀫𑀳𑀦𑁆𑀢𑁄𑀢𑀺 𑀯𑀤𑀸𑀧𑁂𑀲𑀺 ‘‘𑀫𑀦𑁄𑀧𑀝𑀺𑀩𑀤𑁆𑀥𑁄 𑀓𑀸𑀮𑀗𑁆𑀓𑀭𑁄𑀢𑀻’’𑀢𑀺 𑀯𑀤𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀉𑀧𑀸𑀲𑀓𑀲𑁆𑀲𑀸𑀢𑀺 𑀉𑀧𑀸𑀮𑀺𑀲𑁆𑀲 𑀕𑀳𑀧𑀢𑀺𑀲𑁆𑀲. 𑀫𑀼𑀘𑁆𑀙𑀸𑀯𑀲𑁂𑀦𑀸𑀢𑀺𑀆𑀤𑀺𑀦𑀸 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀫𑀦𑁄𑀤𑀡𑁆𑀟𑀲𑁆𑀲 𑀫𑀳𑀦𑁆𑀢𑀢𑀁 𑀯𑀺𑀪𑀸𑀯𑁂𑀢𑀺. 𑀘𑀺𑀢𑁆𑀢𑀲𑀦𑁆𑀢𑀢𑀺𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑁂𑀦𑁂𑀯𑀸𑀢𑀺 𑀯𑀺𑀦𑀸 𑀓𑀸𑀬𑀤𑀡𑁆𑀟𑁂𑀦 𑀯𑀘𑀻𑀤𑀡𑁆𑀟𑁂𑀦 𑀘 𑀓𑁂𑀯𑀮𑀁 𑀘𑀺𑀢𑁆𑀢𑀲𑀦𑁆𑀢𑀢𑀺𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑁂𑀦. 𑀪𑀺𑀚𑁆𑀚𑀺𑀢𑁆𑀯𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀅𑀪𑀺𑀚𑁆𑀚𑀺𑀢𑁆𑀯𑀸𑀧𑀺. 𑀅𑀦𑀺𑀬𑁆𑀬𑀸𑀦𑀺𑀓𑀸𑀢𑀺 𑀅𑀧𑁆𑀧𑀸𑀝𑀺𑀳𑀻𑀭𑀸, 𑀅𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀮𑁆𑀮𑀓𑁆𑀔𑁂𑀲𑀺 𑀉𑀧𑀸𑀲𑀓𑁄𑀢𑀺 𑀯𑀺𑀪𑀢𑁆𑀢𑀺𑀁 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑀦𑀸. 𑀧𑀜𑁆𑀳𑀧𑀝𑀺𑀪𑀸𑀦𑀸𑀦𑀻𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁂 𑀅𑀢𑁆𑀣𑁂 𑀉𑀧𑁆𑀧𑀚𑁆𑀚𑀦𑀓𑀧𑀝𑀺𑀪𑀸𑀦𑀸𑀦𑀺.

‘‘𑀫𑀦𑁄𑀧𑀝𑀺𑀩𑀤𑁆𑀥𑁄 𑀓𑀸𑀮𑀁 𑀓𑀭𑁄𑀢𑀻’’𑀢𑀺 𑀯𑀤𑀦𑁆𑀢𑁂𑀦 𑀅𑀢𑁆𑀣𑀢𑁄 𑀫𑀦𑁄𑀤𑀡𑁆𑀟𑀲𑁆𑀲 𑀢𑀤𑀼𑀢𑁆𑀢𑀭𑀪𑀸𑀯𑁄 𑀧𑀝𑀺𑀜𑁆𑀜𑀸𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀇𑀤𑀸𑀦𑀺 𑀫𑀦𑁄𑀤𑀡𑁆𑀟𑁄 𑀫𑀳𑀦𑁆𑀢𑁄𑀢𑀺 𑀇𑀤𑀁 𑀯𑀘𑀦’’𑀦𑁆𑀢𑀺. 𑀢𑀣𑀸 𑀘𑁂𑀯 𑀯𑀼𑀢𑁆𑀢𑀁 𑁋 ‘‘𑀫𑀦𑁄𑀤𑀡𑁆𑀟𑁄𑀯 𑀩𑀮𑀯𑀸 𑀫𑀳𑀦𑁆𑀢𑁄𑀢𑀺 𑀯𑀤𑀸𑀧𑁂𑀲𑀻’’𑀢𑀺.

𑁬𑁩. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀢𑁄 𑀬𑀫𑀦𑀁 𑀬𑀸𑀫𑁄, 𑀘𑀢𑀼𑀩𑁆𑀩𑀺𑀥𑁄 𑀬𑀸𑀫𑁄 𑀘𑀢𑀼𑀬𑀸𑀫𑁄, 𑀘𑀢𑀼𑀬𑀸𑀫𑀲𑀗𑁆𑀔𑀸𑀢𑁂𑀦 𑀲𑀁𑀯𑀭𑁂𑀦 𑀲𑀁𑀯𑀼𑀢𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀸𑀫-𑀲𑀤𑁆𑀤𑁄 𑀓𑁄𑀝𑁆𑀞𑀸𑀲𑀧𑀭𑀺𑀬𑀸𑀬𑁄𑀢𑀺 ‘‘𑀇𑀫𑀺𑀦𑀸 𑀘𑀢𑀼𑀓𑁄𑀝𑁆𑀞𑀸𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀧𑀺𑀬𑀚𑀸𑀢𑀺𑀓𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀭𑀸𑀕𑀯𑀲𑁂𑀦 𑀩𑀸𑀮𑁂𑀳𑀺 𑀪𑀸𑀯𑀦𑀻𑀬𑀢𑁆𑀢𑀸 ‘‘𑀪𑀸𑀯𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀪𑀸𑀯𑀺𑀢𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺.

𑀬𑁄 𑀲𑀩𑁆𑀩𑀁 𑀧𑀸𑀧𑀁 𑀆𑀲𑀯𑀜𑁆𑀘 𑀯𑀸𑀭𑁂𑀢𑀻𑀢𑀺 𑀲𑀩𑁆𑀩𑀯𑀸𑀭𑀻, 𑀢𑀲𑁆𑀲 𑀦𑀯𑀲𑀼 𑀧𑀤𑀢𑁆𑀣𑁂𑀲𑀼 𑀲𑀢𑁆𑀢𑀫𑁄 𑀧𑀤𑀢𑁆𑀣𑁄, 𑀢𑁂𑀦 𑀲𑀩𑁆𑀩𑀯𑀸𑀭𑀺𑀦𑀸 𑀧𑀸𑀧𑀁 𑀯𑀸𑀭𑀺𑀢𑁆𑀯𑀸 𑀞𑀺𑀢𑁄𑀢𑀺 𑀲𑀩𑁆𑀩𑀯𑀸𑀭𑀺𑀯𑀸𑀭𑀺𑀢𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀯𑀸𑀭𑀺𑀢𑀧𑀸𑀧𑁄’’𑀢𑀺. 𑀢𑀢𑁄 𑀏𑀯 𑀲𑀩𑁆𑀩𑀲𑁆𑀲 𑀯𑀸𑀭𑀺𑀢𑀩𑁆𑀩𑀲𑁆𑀲 𑀆𑀲𑀯𑀲𑁆𑀲 𑀥𑀼𑀦𑀦𑀢𑁄 𑀲𑀩𑁆𑀩𑀯𑀸𑀭𑀺𑀥𑀼𑀢𑁄. 𑀯𑀸𑀭𑀺𑀢𑀩𑁆𑀩𑀲𑁆𑀲 𑀦𑀺𑀯𑀸𑀭𑀡𑀯𑀲𑁂𑀦 𑀲𑀩𑁆𑀩𑀯𑀸𑀭𑀺𑀦𑁄 𑀨𑀼𑀝𑁄 𑀨𑀼𑀲𑀺𑀢𑁄𑀢𑀺 𑀲𑀩𑁆𑀩𑀯𑀸𑀭𑀺𑀨𑀼𑀝𑁄. 𑀲𑀗𑁆𑀖𑀸𑀢𑀦𑁆𑀢𑀺 𑀲𑀳𑀲𑀸 𑀳𑀦𑀦𑀁, 𑀅𑀲𑀜𑁆𑀘𑁂𑀢𑀦𑀺𑀓𑀯𑀥𑀦𑁆𑀢𑀺 𑀅𑀢𑁆𑀣𑁄. 𑀓𑀢𑀭𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂𑀢𑀺 𑀢𑀻𑀲𑀼 𑀤𑀡𑁆𑀟𑀓𑁄𑀝𑁆𑀞𑀸𑀲𑁂𑀲𑀼 𑀓𑀢𑀭𑀓𑁄𑀝𑁆𑀞𑀸𑀲𑁂.

𑁬𑁪. 𑀔𑀮𑀺𑀬𑀢𑀺 𑀲𑀫𑀸𑀤𑀺𑀬𑀢𑀻𑀢𑀺 𑀔𑀮𑀁, 𑀭𑀸𑀲𑀻𑀢𑀺 𑀆𑀳 𑁋 ‘‘𑀏𑀓𑀁 𑀫𑀁𑀲𑀔𑀮𑀦𑁆𑀢𑀺 𑀏𑀓𑀁 𑀫𑀁𑀲𑀭𑀸𑀲𑀺’’𑀦𑁆𑀢𑀺. 𑀯𑀺𑀚𑁆𑀚𑀸𑀥𑀭𑀇𑀤𑁆𑀥𑀺𑀬𑀸 𑀇𑀤𑁆𑀥𑀺𑀫𑀸. 𑀲𑀸 𑀧𑀦 𑀇𑀤𑁆𑀥𑀺 𑀬𑀲𑁆𑀫𑀸 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀇𑀚𑁆𑀛𑀢𑀺, 𑀦 𑀬𑀲𑁆𑀲 𑀓𑀲𑁆𑀲𑀘𑀺. 𑀢𑀲𑁆𑀫𑀸 𑀆𑀳 ‘‘𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄’’𑀢𑀺. 𑀯𑀺𑀚𑁆𑀚𑀸𑀦𑀼𑀪𑀸𑀯𑀯𑀲𑁂𑀦𑁂𑀯 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄. 𑀘𑀺𑀢𑁆𑀢𑁂 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁄 𑀆𑀦𑀼𑀪𑀸𑀯𑀸𑀬 𑀏𑀯 𑀯𑀺𑀚𑁆𑀚𑀸𑀬 𑀧𑀕𑀼𑀡𑀪𑀸𑀯𑀸𑀧𑀸𑀤𑀦𑁂𑀦. 𑀏𑀢𑁂𑀦 𑀯𑀲𑀻𑀪𑀸𑀯𑀁 𑀮𑁄𑀓𑀺𑀬𑀲𑀫𑀜𑁆𑀜𑀸𑀯𑀲𑁂𑀦 𑀪𑀕𑀯𑀸 𑀉𑀧𑀸𑀮𑀺𑀁 𑀕𑀳𑀧𑀢𑀺𑀁 𑀧𑀜𑁆𑀜𑀧𑁂𑀢𑀼𑀓𑀸𑀫𑁄 𑀏𑀯𑀫𑀸𑀳. 𑀮𑁄𑀓𑀺𑀓𑀸 𑀳𑀺 ‘‘𑀪𑀸𑀯𑀦𑀸𑀫𑀬𑀇𑀤𑁆𑀥𑀺𑀬𑀸 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁄 𑀧𑀭𑀽𑀧𑀖𑀸𑀢𑀁 𑀓𑀭𑁄𑀢𑀻’’𑀢𑀺 𑀫𑀜𑁆𑀜𑀦𑁆𑀢𑀺. 𑀢𑀣𑀸 𑀳𑀺 𑀢𑁂 𑀇𑀲𑀬𑁄 𑀧𑀭𑁂𑀲𑀁 𑀲𑀁𑀯𑀡𑁆𑀡𑁂𑀦𑁆𑀢𑀺, 𑀇𑀲𑀻𑀦𑀁 𑀆𑀦𑀼𑀪𑀸𑀯𑀁 𑀓𑀺𑀢𑁆𑀢𑁂𑀦𑁆𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀻𑀢𑀺.

𑁬𑁫. 𑀅𑀭𑀜𑁆𑀜𑀫𑁂𑀯 𑀳𑀼𑀢𑁆𑀯𑀸𑀢𑀺 𑀲𑀩𑁆𑀩𑀲𑁄 𑀅𑀭𑀜𑁆𑀜𑀫𑁂𑀯 𑀳𑀼𑀢𑁆𑀯𑀸. 𑀅𑀭𑀜𑁆𑀜𑀪𑀸𑀯𑁂𑀦 𑀅𑀭𑀜𑁆𑀜𑀁 𑀚𑀸𑀢𑀁, 𑀦 𑀦𑀸𑀫𑀫𑀢𑁆𑀢𑁂𑀦. 𑀇𑀲𑀻𑀦𑀁 𑀅𑀢𑁆𑀣𑀸𑀬𑀸𑀢𑀺 𑀇𑀲𑀻𑀦𑀁 𑀆𑀲𑀸𑀤𑀦𑀢𑁆𑀣𑀸𑀬.

𑀕𑁄𑀥𑀸𑀯𑀭𑀻𑀢𑀻𑀭𑀢𑁄 𑀦𑀸𑀢𑀺𑀤𑀽𑀭𑁂. 𑀉𑀲𑀽𑀬𑀫𑀸𑀦𑁄𑀢𑀺 ‘‘𑀦 𑀫𑀁 𑀏𑀲 𑀚𑀦𑁄 𑀧𑀭𑀺𑀯𑀸𑀭𑁂𑀢𑀻’’𑀢𑀺 𑀉𑀲𑀽𑀬𑀁 𑀓𑀭𑁄𑀦𑁆𑀢𑁄. 𑀓𑀺𑀮𑀺𑀝𑁆𑀞𑁄 𑀯𑀢𑀸𑀢𑀺 𑀧𑀗𑁆𑀓𑀤𑀦𑁆𑀢𑀭𑀚𑀲𑀺𑀭𑀢𑀸𑀤𑀻𑀳𑀺 𑀓𑀺𑀮𑀺𑀝𑁆𑀞𑀲𑀭𑀻𑀭𑁄. 𑀅𑀦𑀜𑁆𑀚𑀺𑀢𑀫𑀡𑁆𑀟𑀺𑀢𑁄𑀢𑀺 𑀅𑀦𑀜𑁆𑀚𑀺𑀢𑀓𑁆𑀔𑀺𑀓𑁄 𑀲𑀩𑁆𑀩𑁂𑀦, 𑀲𑀩𑁆𑀩𑀁 𑀅𑀫𑀡𑁆𑀟𑀺𑀢𑁄 𑀘. 𑀢𑀲𑁆𑀫𑀺𑀁 𑀓𑀸𑀮𑁂 ‘‘𑀓𑀸𑀮𑀲𑁆𑀲𑁂𑀯 𑀅𑀓𑁆𑀔𑀻𑀦𑀁 𑀅𑀜𑁆𑀚𑀦𑀁 𑀫𑀗𑁆𑀕𑀮’’𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀮𑀤𑁆𑀥𑀺, 𑀢𑀲𑁆𑀫𑀸 𑀅𑀦𑀜𑁆𑀚𑀦𑀁 𑀯𑀺𑀲𑀼𑀁 𑀕𑀳𑀺𑀢𑀁.

𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀯𑁂𑀤𑁂𑀲𑀼 𑀈𑀤𑀺𑀲𑀁 𑀆𑀕𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀢𑀲𑁆𑀲 𑀧𑀼𑀭𑁄𑀳𑀺𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸. 𑀉𑀲𑀼𑀫𑀚𑀸𑀢𑀳𑀤𑀬𑁄𑀢𑀺 𑀉𑀢𑁆𑀢𑀢𑁆𑀢𑀳𑀤𑀬𑁄. 𑀦𑀸𑀲𑀺𑀓𑀸𑀦𑀁 𑀅𑀧𑁆𑀧𑀳𑁄𑀦𑁆𑀢𑁂 𑀫𑀼𑀔𑁂𑀦 𑀅𑀲𑁆𑀲𑀲𑀦𑁆𑀢𑁄.

𑀯𑀺𑀚𑀺𑀢𑀚𑀬𑁂𑀳𑀺 𑀆𑀕𑀦𑁆𑀢𑁆𑀯𑀸 𑀦𑀓𑁆𑀔𑀢𑁆𑀢𑀬𑀼𑀢𑁆𑀢𑀁 𑀆𑀕𑀫𑁂𑀦𑁆𑀢𑁂𑀳𑀺 𑀦𑀺𑀲𑀻𑀤𑀺𑀢𑀩𑁆𑀩𑀝𑁆𑀞𑀸𑀦𑀁 𑀚𑀬𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀁. 𑀉𑀤𑀓𑀯𑀼𑀝𑁆𑀞𑀺𑀧𑀸𑀢𑀦𑀸𑀤𑀺 𑀢𑀲𑁆𑀫𑀺𑀁 𑀧𑀸𑀧𑀓𑀫𑁆𑀫𑁂 𑀅𑀲𑀫𑀗𑁆𑀕𑀺𑀪𑀽𑀢𑀸𑀦𑀫𑁆𑀧𑀺 𑀲𑀫𑀦𑀼𑀜𑁆𑀜𑀢𑀸𑀬 𑀅𑀦𑁆𑀢𑁄𑀓𑀭𑀡𑀢𑁆𑀣𑀁 𑀓𑀢𑀁. 𑀓𑀢𑀪𑀡𑁆𑀟𑀯𑀼𑀝𑁆𑀞𑀻𑀢𑀺 𑀆𑀪𑀭𑀡𑀯𑀲𑁆𑀲𑀁. 𑀫𑀳𑀸𑀚𑀦𑁄 𑀲𑀫𑀦𑀼𑀜𑁆𑀜𑁄 𑀚𑀸𑀢𑁄𑀢𑀺 𑀬𑁄𑀚𑀦𑀸. 𑀫𑀸𑀢𑀼𑀧𑁄𑀲𑀓𑀭𑀸𑀫𑁄𑀢𑀺 𑀫𑀸𑀢𑀭𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀭𑀸𑀫𑁄 𑀦𑀸𑀫 𑀏𑀓𑁄 𑀧𑀼𑀭𑀺𑀲𑁄. 𑀅𑀲𑀫𑀗𑁆𑀕𑀺𑀪𑀽𑀢𑀸𑀦𑀦𑁆𑀢𑀺 𑀅𑀲𑀫𑀦𑀼𑀜𑁆𑀜𑀸𑀦𑀁.

𑀅𑀯𑀓𑀺𑀭𑀺𑀬𑀸𑀢𑀺 𑀅𑀲𑀼𑀲𑁆𑀲𑀽𑀲𑀢𑀁 𑀧𑀝𑀺𑀘𑁆𑀘. 𑀨𑀼𑀮𑀺𑀗𑁆𑀕𑀸𑀦𑀻𑀢𑀺 𑀅𑀕𑁆𑀕𑀺𑀓𑀡𑀸𑀦𑀺. 𑀧𑀢𑀦𑁆𑀢𑀺 𑀓𑀸𑀬𑁂𑀢𑀺 𑀓𑀸𑀬𑁂 𑀇𑀢𑁄 𑀘𑀺𑀢𑁄 𑀦𑀺𑀧𑀢𑀦𑁆𑀢𑀺. 𑀏𑀢𑁂 𑀓𑀺𑀭 𑀦𑀺𑀭𑀬𑀁 𑀯𑀺𑀯𑀭𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀤𑀲𑁆𑀲𑁂𑀦𑁆𑀢𑀺.

𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑀦𑁆𑀢𑀺 𑀫𑀬𑀁 𑀓𑀜𑁆𑀘𑀺𑀧𑀺 𑀤𑁂𑀲𑀁 𑀉𑀤𑁆𑀤𑀺𑀲𑁆𑀲 𑀦 𑀕𑀘𑁆𑀙𑀸𑀫, 𑀬𑀢𑁆𑀣 𑀧𑀦 𑀯𑀲𑀦𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀲𑁆𑀲 𑀨𑀸𑀲𑀼 𑀳𑁄𑀢𑀺, 𑀢𑀁 𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑀁 𑀕𑀘𑁆𑀙𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀗𑁆𑀖𑀸𑀢𑀺 𑀲𑀁𑀳𑀢𑀸. 𑀕𑀡𑀸𑀢𑀺 𑀢𑀁𑀢𑀁𑀲𑁂𑀡𑀺𑀪𑀸𑀯𑁂𑀦 𑀕𑀡𑀺𑀢𑀩𑁆𑀩𑀢𑀸𑀬 𑀕𑀡𑀸. 𑀕𑀡𑀻𑀪𑀽𑀢𑀸𑀢𑀺 𑀏𑀓𑀚𑁆𑀛𑀸𑀲𑀬𑀸 𑀳𑀼𑀢𑁆𑀯𑀸 𑀭𑀸𑀲𑀺𑀪𑀽𑀢𑀸. 𑀅𑀤𑀺𑀦𑁆𑀦𑀸𑀤𑀸𑀦𑀦𑁆𑀢𑀺𑀆𑀤𑀻𑀲𑀼𑀧𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀢𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑀧𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀪𑀸𑀯𑀦𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺. 𑀦𑁂𑀲𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀘𑀺𑀦𑁆𑀢𑁂𑀲𑀻𑀢𑀺 𑀬𑁄𑀚𑀦𑀸. 𑀓𑀺𑀁 𑀘𑀺𑀦𑁆𑀢𑁂𑀲𑀺? 𑀆𑀖𑀸𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀦𑀢𑁆𑀣𑀓𑀭𑀡𑀽𑀧𑀸𑀬𑀁. 𑀢𑁂𑀦𑀸𑀳 ‘‘𑀲𑁄 𑀥𑀫𑁆𑀫𑀓𑀣𑀸𑀧𑀭𑀺𑀬𑁄𑀲𑀸𑀦𑁂’’𑀢𑀺𑀆𑀤𑀺. 𑀦𑀸𑀕𑀩𑀮𑀧𑀺𑀘𑁆𑀙𑀺𑀮𑁆𑀮𑀸𑀤𑀻𑀦𑀦𑁆𑀢𑀺 𑀦𑀸𑀕𑀩𑀮𑀲𑀸𑀲𑀧𑀅𑀗𑁆𑀓𑁄𑀮𑀢𑁂𑀮𑀓𑀡𑀺𑀓𑀸𑀭𑀦𑀺𑀬𑁆𑀬𑀸𑀲𑀸𑀤𑀻𑀦𑀁 𑀘𑀺𑀓𑁆𑀔𑀮𑁆𑀮𑀸𑀦𑀁. 𑀯𑀺𑀳𑁂𑀞𑀬𑀺𑀁𑀲𑀼 𑀦𑀺𑀭𑀬𑀸𑀤𑀺𑀓𑀣𑀸𑀳𑀺 𑀖𑀝𑁆𑀝𑁂𑀦𑁆𑀢𑀸. 𑀙𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀢𑀺 𑀘𑀓𑁆𑀔𑀸𑀤𑀻𑀦𑀁 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑁂 𑀭𑀽𑀧𑀸𑀤𑀺𑀯𑀺𑀲𑀬𑁂.

𑀦𑀯 𑀯𑀼𑀝𑁆𑀞𑀺𑀬𑁄𑀢𑀺 𑀉𑀤𑀓𑀯𑀼𑀝𑁆𑀞𑀺 𑀲𑀼𑀫𑀦𑀧𑀼𑀧𑁆𑀨𑀯𑀼𑀝𑁆𑀞𑀺 𑀫𑀸𑀲𑀓𑀯𑀼𑀝𑁆𑀞𑀺 𑀓𑀳𑀸𑀧𑀡𑀯𑀼𑀝𑁆𑀞𑀺 𑀆𑀪𑀭𑀡𑀯𑀼𑀝𑁆𑀞𑀺 𑀆𑀯𑀼𑀥𑀯𑀼𑀝𑁆𑀞𑀺 𑀅𑀗𑁆𑀕𑀸𑀭𑀯𑀼𑀝𑁆𑀞𑀺 𑀧𑀸𑀲𑀸𑀡𑀯𑀼𑀝𑁆𑀞𑀺 𑀯𑀸𑀮𑀺𑀓𑀸𑀯𑀼𑀝𑁆𑀞𑀻𑀢𑀺 𑀇𑀫𑀸 𑀦𑀯 𑀯𑀼𑀝𑁆𑀞𑀺𑀬𑁄. 𑀅𑀯𑀜𑁆𑀘𑀬𑀻𑀢𑀺 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀅𑀦𑀢𑁆𑀣𑀘𑀭𑀡𑁂𑀦 𑀯𑀜𑁆𑀘𑀬𑀺. 𑀅𑀤𑀽𑀲𑀓𑁂𑀢𑀺 𑀅𑀦𑀧𑀭𑀸𑀥𑁂.

‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸’’𑀢𑀺 𑀚𑀸𑀢𑀓𑀝𑁆𑀞𑀓𑀣𑀸𑀤𑀻𑀲𑀼 (𑀚𑀸. 𑀅𑀝𑁆𑀞. 𑁪.𑁧𑁫.𑀫𑀸𑀢𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸) 𑀆𑀕𑀢𑀁, 𑀇𑀥 𑀧𑀦 ‘‘𑀲𑁂𑀝𑁆𑀞𑀺𑀥𑀻𑀢𑀸’’𑀢𑀺. 𑀯𑀸𑀭𑁂𑀬𑁆𑀬𑀢𑁆𑀣𑀸𑀬𑀸𑀢𑀺 𑀆𑀯𑀸𑀳𑀢𑁆𑀣𑀸𑀬, 𑀅𑀲𑁆𑀲𑀸𑀢𑀺 𑀧𑁂𑀲𑀺𑀢𑀧𑀼𑀕𑁆𑀕𑀮𑀲𑁆𑀲. 𑀢𑀸𑀤𑀺𑀲𑁂𑀦 𑀦𑀻𑀘𑀓𑀼𑀮𑀲𑀁𑀯𑀢𑁆𑀢𑀦𑀺𑀬𑁂𑀦 𑀓𑀫𑁆𑀫𑀼𑀦𑀸 𑀮𑀤𑁆𑀥𑁄𑀓𑀸𑀲𑁂𑀦 𑀘𑀡𑁆𑀟𑀸𑀮𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄.

𑀘𑀫𑁆𑀫𑀕𑁂𑀳𑁂𑀢𑀺 𑀘𑀫𑁆𑀫𑁂𑀦 𑀙𑀸𑀤𑀺𑀢𑁂 𑀕𑁂𑀳𑁂. 𑀫𑀸𑀢𑀗𑁆𑀕𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺 𑀚𑀸𑀢𑀺𑀲𑀫𑀼𑀤𑀸𑀕𑀢𑀁. 𑀢𑀦𑁆𑀢𑀺 𑀖𑀡𑁆𑀝𑀁. 𑀯𑀸𑀤𑁂𑀦𑁆𑀢𑁄 𑀢𑀸𑀮𑀦𑁂𑀦 𑀲𑀤𑁆𑀤𑀁 𑀓𑀭𑁄𑀦𑁆𑀢𑁄. 𑀫𑀳𑀸𑀧𑀣𑀁 𑀧𑀝𑀺𑀧𑀚𑁆𑀚𑀺 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀕𑁂𑀳𑀤𑁆𑀯𑀸𑀭𑀲𑀫𑀻𑀧𑁂𑀦.

𑀢𑀲𑁆𑀲𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀘𑁂𑀯 𑀉𑀧𑀝𑁆𑀞𑀸𑀓𑀫𑀦𑀼𑀲𑁆𑀲𑀸 𑀧𑀝𑀺𑀩𑀤𑁆𑀥𑀸 𑀘 𑀲𑀼𑀭𑀸𑀲𑁄𑀡𑁆𑀟𑀸𑀤𑀬𑁄 𑀚𑀸𑀡𑀼𑀓𑀧𑁆𑀧𑀭𑀸𑀤𑀻𑀳𑀺 𑀲𑀼𑀓𑁄𑀝𑁆𑀝𑀺𑀢𑀁 𑀓𑁄𑀝𑁆𑀝𑀺𑀢𑀪𑀸𑀯𑁂𑀦 𑀫𑀼𑀘𑁆𑀙𑀁 𑀆𑀧𑀦𑁆𑀦𑀢𑁆𑀢𑀸 𑀫𑀢𑁄𑀢𑀺 𑀲𑀜𑁆𑀜𑀸𑀬 𑀙𑀟𑁆𑀟𑁂𑀲𑀼𑀁.

𑀅𑀣 𑀩𑁄𑀥𑀺𑀲𑀢𑁆𑀢𑁄 𑀆𑀬𑀼𑀅𑀯𑀲𑁂𑀲𑀲𑁆𑀲 𑀅𑀢𑁆𑀣𑀺𑀢𑀸𑀬 𑀫𑀦𑁆𑀤𑀫𑀦𑁆𑀤𑁂 𑀯𑀸𑀢𑁂 𑀯𑀸𑀬𑀦𑁆𑀢𑁂 𑀘𑀺𑀭𑁂𑀦 𑀲𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀢𑁂𑀦𑀸𑀳 ‘‘𑀫𑀳𑀸𑀧𑀼𑀭𑀺𑀲𑁄’’𑀢𑀺𑀆𑀤𑀺. 𑀕𑁂𑀳𑀗𑁆𑀕𑀡𑁂𑀢𑀺 𑀕𑁂𑀳𑀲𑁆𑀲 𑀫𑀳𑀸𑀤𑁆𑀯𑀸𑀭𑀢𑁄 𑀩𑀳𑀺 𑀯𑀺𑀯𑀝𑀗𑁆𑀕𑀡𑁂. 𑀧𑀢𑀺𑀢𑁄𑀢𑀺 𑀧𑀸𑀢𑀁 𑀓𑀢𑁆𑀯𑀸 𑀇𑀘𑁆𑀙𑀺𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀅𑀦𑀼𑀧𑁆𑀧𑀯𑁂𑀲𑁂𑀦 𑀦𑀺𑀧𑀦𑁆𑀦𑁄. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬𑀸𑀢𑀺 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀓𑀸𑀭𑀡𑁂𑀦.

𑀬𑀲𑀦𑁆𑀢𑀺 𑀯𑀺𑀪𑀯𑀁 𑀓𑀺𑀢𑁆𑀢𑀺𑀲𑀤𑁆𑀤𑀜𑁆𑀘. 𑀘𑀦𑁆𑀤𑀦𑁆𑀢𑀺 𑀘𑀦𑁆𑀤𑀫𑀡𑁆𑀟𑀮𑀁, 𑀘𑀦𑁆𑀤𑀯𑀺𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀘𑁆𑀙𑀺𑀝𑁆𑀞𑀕𑁂𑀳𑁂𑀢𑀺 𑀧𑀭𑁂𑀳𑀺 𑀧𑀭𑀺𑀪𑀼𑀢𑁆𑀢𑀕𑁂𑀳𑁂. 𑀫𑀡𑁆𑀟𑀧𑁂𑀢𑀺 𑀦𑀕𑀭𑀫𑀚𑁆𑀛𑁂 𑀫𑀳𑀸𑀫𑀡𑁆𑀟𑀧𑁂.

𑀔𑀻𑀭𑀫𑀡𑀺𑀫𑀽𑀮𑀦𑁆𑀢𑀺 𑀔𑀻𑀭𑀫𑀽𑀮𑀁, 𑀧𑀸𑀤𑁂𑀲𑀼 𑀩𑀤𑁆𑀥𑀫𑀡𑀺𑀫𑀽𑀮𑀜𑁆𑀘. 𑀬𑀸𑀯𑀢𑀸 𑀯𑀸𑀘𑀼𑀕𑁆𑀕𑀢𑀸 𑀧𑀭𑀺𑀬𑀢𑁆𑀢𑀻𑀢𑀺 𑀬𑀢𑁆𑀢𑀓𑁄 𑀫𑀦𑀼𑀲𑁆𑀲𑀯𑀘𑀻𑀤𑁆𑀯𑀸𑀭𑀢𑁄 𑀉𑀕𑁆𑀕𑀢𑁄 𑀦𑀺𑀓𑁆𑀔𑀦𑁆𑀢𑁄 𑀧𑀯𑀢𑁆𑀢𑁄, 𑀬𑀁𑀓𑀺𑀜𑁆𑀘𑀺 𑀯𑀘𑀻𑀫𑀬𑀦𑁆𑀢𑀺 𑀅𑀢𑁆𑀣𑁄. 𑀆𑀓𑀸𑀲𑀗𑁆𑀕𑀡𑁂𑀢𑀺 𑀯𑀺𑀯𑀝𑀗𑁆𑀕𑀡𑁂.

𑀤𑀼𑀫𑁆𑀫𑀯𑀸𑀲𑀻𑀢𑀺 𑀥𑀽𑀫𑁄 𑀥𑀽𑀲𑀭𑁄, 𑀅𑀦𑀜𑁆𑀚𑀺𑀢𑀸𑀫𑀡𑁆𑀟𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀑𑀢𑀮𑁆𑀮𑀓𑁄𑀢𑀺 𑀦𑀺𑀳𑀻𑀦𑀚𑁆𑀛𑀸𑀲𑀬𑁄, 𑀅𑀧𑁆𑀧𑀸𑀦𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀧𑀝𑀺𑀫𑀼𑀜𑁆𑀘 𑀓𑀡𑁆𑀞𑁂𑀢𑀺 𑀬𑀸𑀯 𑀕𑀮𑀯𑀸𑀝𑀓𑀸 𑀧𑀸𑀭𑀼𑀧𑀺𑀢𑁆𑀯𑀸. 𑀓𑁄 𑀭𑁂 𑀢𑀼𑀯𑀦𑁆𑀢𑀺 𑀅𑀭𑁂 𑀓𑁄 𑀦𑀸𑀫 𑀢𑁆𑀯𑀁.

𑀧𑀓𑀢𑀦𑁆𑀢𑀺 𑀧𑀝𑀺𑀬𑀢𑁆𑀢𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀅𑀪𑀺𑀲𑀗𑁆𑀔𑀢𑀁. 𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑀦𑁆𑀢𑀺 𑀅𑀦𑁆𑀢𑀭𑀖𑀭𑀁 𑀉𑀧𑀕𑀫𑁆𑀫 𑀞𑀢𑁆𑀯𑀸 𑀮𑀤𑁆𑀥𑀩𑁆𑀩𑀧𑀺𑀡𑁆𑀟𑀁, 𑀪𑀺𑀓𑁆𑀔𑀸𑀳𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀮𑀪𑀢𑀦𑁆𑀢𑀺 𑀮𑀘𑁆𑀙𑀢𑀼. 𑀲𑀧𑀸𑀓𑁄𑀢𑀺 𑀫𑀳𑀸𑀲𑀢𑁆𑀢𑁄 𑀚𑀸𑀢𑀺𑀯𑀲𑁂𑀦 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀢𑀺.

𑀅𑀢𑁆𑀣𑀢𑁆𑀣𑀺𑀢𑀁 𑀲𑀤𑁆𑀤𑀳𑀢𑁄𑀢𑀺 𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀅𑀢𑁆𑀣𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀲𑀤𑁆𑀤𑀳𑀦𑁆𑀢𑀲𑁆𑀲. 𑀅𑀧𑁂𑀳𑀻𑀢𑀺 𑀅𑀧𑀕𑀘𑁆𑀙. 𑀏𑀢𑁆𑀢𑁄𑀢𑀺 𑀇𑀫𑀲𑁆𑀫𑀸 𑀞𑀸𑀦𑀸. 𑀚𑀫𑁆𑀫𑀸𑀢𑀺 𑀮𑀸𑀫𑀓.

𑀅𑀦𑀽𑀧𑀔𑁂𑀢𑁆𑀢𑁂𑀢𑀺 𑀅𑀚𑀗𑁆𑀕𑀮𑁂 𑀉𑀤𑀓𑀲𑀫𑁆𑀧𑀦𑁆𑀦𑁂 𑀔𑁂𑀢𑁆𑀢𑁂 𑀨𑀮𑀯𑀺𑀲𑁂𑀲𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀸. 𑀏𑀢𑀸𑀬 𑀲𑀤𑁆𑀥𑀸𑀬 𑀤𑀤𑀸𑀳𑀺 𑀤𑀸𑀦𑀦𑁆𑀢𑀺 𑀦𑀺𑀦𑁆𑀦𑀁 𑀣𑀮𑀜𑁆𑀘 𑀧𑀽𑀭𑁂𑀦𑁆𑀢𑁄 𑀫𑁂𑀖𑁄 𑀯𑀺𑀬 𑀕𑀼𑀡𑀯𑀦𑁆𑀢𑁂 𑀦𑀺𑀕𑁆𑀕𑀼𑀡𑁂 𑀘 𑀤𑀸𑀦𑀁 𑀤𑁂𑀳𑀺, 𑀏𑀯𑀁 𑀤𑁂𑀦𑁆𑀢𑁄 𑀘 𑀅𑀧𑁆𑀧𑁂𑀯 𑀆𑀭𑀸𑀥𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑁂𑀢𑀺. 𑀤𑀓𑁆𑀔𑀺𑀡𑁂𑀬𑁆𑀬𑁂𑀢𑀺 𑀲𑀻𑀮𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁂.

𑀢𑀸𑀦𑀻𑀢𑀺 𑀢𑁂 𑀩𑁆𑀭𑀸𑀳𑁆𑀫𑀡𑀸. 𑀯𑁂𑀡𑀼𑀧𑀤𑀭𑁂𑀦𑀸𑀢𑀺 𑀯𑁂𑀴𑀼𑀯𑀺𑀮𑀻𑀯𑁂𑀦.

𑀕𑀺𑀭𑀺𑀁 𑀦𑀔𑁂𑀦 𑀔𑀡𑀲𑀻𑀢𑀺 𑀧𑀩𑁆𑀩𑀢𑀁 𑀅𑀢𑁆𑀢𑀦𑁄 𑀦𑀔𑁂𑀦 𑀔𑀡𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀅𑀬𑁄𑀢𑀺 𑀓𑀸𑀮𑀮𑁄𑀳𑀁. 𑀧𑀤𑀳𑀲𑀻𑀢𑀺 𑀅𑀪𑀺𑀪𑀯𑀲𑀺, 𑀅𑀢𑁆𑀢𑀦𑁄 𑀲𑀭𑀻𑀭𑁂𑀦 𑀅𑀪𑀺𑀪𑀯𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺.

𑀆𑀯𑁂𑀥𑀺𑀢𑀦𑁆𑀢𑀺 𑀘𑀮𑀺𑀢𑀁 𑀯𑀺𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀞𑀺𑀢𑀁. 𑀧𑀺𑀝𑁆𑀞𑀺𑀢𑁄𑀢𑀺 𑀧𑀺𑀝𑁆𑀞𑀺𑀧𑀲𑁆𑀲𑁂𑀦. 𑀩𑀸𑀳𑀼𑀁 𑀧𑀲𑀸𑀭𑁂𑀢𑀺 𑀅𑀓𑀫𑁆𑀫𑀦𑁂𑀬𑁆𑀬𑀦𑁆𑀢𑀺 𑀅𑀓𑀫𑁆𑀫𑀓𑁆𑀔𑀫𑀁 𑀩𑀸𑀳𑀼𑀤𑁆𑀯𑀬𑀁 𑀣𑀤𑁆𑀥𑀁 𑀲𑀼𑀓𑁆𑀔𑀤𑀡𑁆𑀟𑀓𑀁 𑀯𑀺𑀬 𑀓𑁂𑀯𑀮𑀁 𑀧𑀲𑀸𑀭𑁂𑀢𑀺, 𑀦 𑀲𑀫𑀺𑀜𑁆𑀚𑁂𑀢𑀺, 𑀲𑁂𑀢𑀸𑀦𑀺 𑀅𑀓𑁆𑀔𑀻𑀦𑀺 𑀧𑀭𑀺𑀯𑀢𑁆𑀢𑀦𑁂𑀦 𑀓𑀡𑁆𑀳𑀫𑀡𑁆𑀟𑀮𑀲𑁆𑀲 𑀅𑀤𑀺𑀲𑁆𑀲𑀦𑀢𑁄.

𑀚𑀻𑀯𑀺𑀢𑀦𑁆𑀢𑀺 𑀚𑀻𑀯𑀦𑀁.

𑀯𑁂𑀳𑀸𑀬𑀲𑀦𑁆𑀢𑀺 𑀆𑀓𑀸𑀲𑁂. 𑀧𑀣𑀤𑁆𑀥𑀼𑀦𑁄𑀢𑀺 𑀧𑀣𑀪𑀽𑀢𑀤𑁆𑀥𑀼𑀦𑁄 𑀯𑀺𑀬.

𑀲𑀜𑁆𑀜𑀫𑁆𑀧𑀺 𑀦 𑀓𑀭𑁄𑀢𑀻𑀢𑀺 ‘‘𑀇𑀫𑁂 𑀓𑀼𑀮𑀧𑁆𑀧𑀲𑀼𑀢𑀸’’𑀢𑀺 𑀲𑀜𑁆𑀜𑀸𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀺. 𑀤𑀦𑁆𑀢𑀓𑀝𑁆𑀞𑀓𑀼𑀘𑁆𑀙𑀺𑀝𑁆𑀞𑀓𑀦𑁆𑀢𑀺 𑀔𑀸𑀤𑀺𑀢𑀤𑀦𑁆𑀢𑀓𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀺𑀲𑁆𑀲𑀢𑀺 𑀅𑀧𑁆𑀧𑀤𑀼𑀝𑁆𑀞𑀧𑀤𑁄𑀲𑀪𑀸𑀯𑀢𑁄, 𑀫𑀳𑀸𑀲𑀢𑁆𑀢𑀲𑁆𑀲 𑀢𑀤𑀸 𑀉𑀓𑁆𑀓𑀁𑀲𑀕𑀢𑀔𑁂𑀢𑁆𑀢𑀪𑀸𑀯𑀢𑁄. 𑀇𑀤𑁆𑀥𑀺𑀯𑀺𑀲𑀬𑁄 𑀦𑀸𑀫 𑀅𑀘𑀺𑀦𑁆𑀢𑁂𑀬𑁆𑀬𑁄, 𑀢𑀲𑁆𑀫𑀸 𑀓𑀣𑀁 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀦𑁆𑀢𑀼𑀁 𑀦𑀸𑀤𑀸𑀲𑀻𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀅𑀭𑀼𑀡𑀼𑀕𑁆𑀕𑀁 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀅𑀭𑀼𑀡𑀧𑀪𑀸 𑀦 𑀧𑀜𑁆𑀜𑀸𑀬𑀢𑀺, 𑀅𑀦𑁆𑀥𑀓𑀸𑀭𑁄 𑀏𑀯 𑀳𑁄𑀢𑀺.

𑀬𑀓𑁆𑀔𑀸𑀯𑀝𑁆𑀝𑁄 𑀦𑀼 𑀔𑁄 𑀅𑀬𑀁 𑀓𑀸𑀮𑀯𑀺𑀧𑀭𑀺𑀬𑀸𑀬𑁄. 𑀫𑀳𑀸𑀧𑀜𑁆𑀜𑀦𑁆𑀢𑀺 𑀫𑀳𑀦𑁆𑀢𑀸𑀦𑀁 𑀧𑀜𑁆𑀜𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀽𑀢𑀁. 𑀚𑀦𑀧𑀤𑀲𑁆𑀲 𑀫𑀼𑀔𑀁 𑀧𑀲𑁆𑀲𑀣𑀸𑀢𑀺 𑀇𑀫𑀲𑁆𑀲 𑀚𑀦𑀧𑀤𑀯𑀸𑀲𑀺𑀦𑁄 𑀚𑀦𑀲𑁆𑀲 𑀉𑀧𑀤𑁆𑀤𑀯𑁂𑀦 𑀫𑀗𑁆𑀓𑀼𑀪𑀽𑀢𑀁 𑀫𑀼𑀔𑀁 𑀧𑀲𑁆𑀲𑀣.

𑀏𑀢𑀲𑁆𑀲 𑀓𑀣𑀸 𑀏𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀺𑀲𑁆𑀲𑀢𑀻𑀢𑀺 𑀬𑀸𑀳𑀺 𑀢𑁂𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀦𑀲𑀫𑀺𑀤𑁆𑀥𑀸𑀳𑀺 𑀦𑀸𑀦𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀧𑀭𑀺𑀧𑀽𑀭𑀺𑀢𑀸𑀳𑀺 𑀲𑀻𑀮𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀳𑀺 𑀲𑀼𑀲𑀗𑁆𑀔𑀢𑀲𑀦𑁆𑀢𑀸𑀦𑁂 𑀫𑀳𑀸𑀓𑀭𑀼𑀡𑀸𑀥𑀺𑀯𑀸𑀲𑁂 𑀫𑀳𑀸𑀲𑀢𑁆𑀢𑁂 𑀅𑀭𑀺𑀬𑀽𑀧𑀯𑀸𑀤𑀓𑀫𑁆𑀫𑀅𑀪𑀺𑀲𑀧𑀲𑀗𑁆𑀔𑀸𑀢𑀸 𑀨𑀭𑀼𑀲𑀯𑀸𑀘𑀸 𑀧𑀯𑀢𑁆𑀢𑀺𑀢𑀸, 𑀲𑀸 𑀅𑀪𑀺𑀲𑀧𑀺 𑀢𑀲𑁆𑀲 𑀔𑁂𑀢𑁆𑀢𑀯𑀺𑀲𑁂𑀲𑀪𑀸𑀯𑀢𑁄 𑀢𑀲𑁆𑀲 𑀘 𑀅𑀚𑁆𑀛𑀸𑀲𑀬𑀨𑀭𑀼𑀲𑀢𑀸𑀬 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀺𑀬𑀓𑀫𑁆𑀫𑀁 𑀳𑀼𑀢𑁆𑀯𑀸 𑀲𑀘𑁂 𑀲𑁄 𑀫𑀳𑀸𑀲𑀢𑁆𑀢𑀁 𑀦 𑀔𑀫𑀸𑀧𑁂𑀢𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀯𑀺𑀧𑀘𑁆𑀘𑀦𑀲𑀪𑀸𑀯𑀁 𑀚𑀸𑀢𑀁, 𑀔𑀫𑀸𑀧𑀺𑀢𑁂 𑀧𑀦 𑀫𑀳𑀸𑀲𑀢𑁆𑀢𑁂 𑀧𑀬𑁄𑀕𑀲𑀫𑁆𑀧𑀢𑁆𑀢𑀺 𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀅𑀯𑀺𑀧𑀸𑀓𑀥𑀫𑁆𑀫𑀢𑀁 𑀆𑀧𑀚𑁆𑀚𑀢𑀺 𑀅𑀳𑁄𑀲𑀺𑀓𑀫𑁆𑀫𑀪𑀸𑀯𑀢𑁄. 𑀅𑀬𑀜𑁆𑀳𑀺 𑀅𑀭𑀺𑀬𑀽𑀧𑀯𑀸𑀤𑀧𑀸𑀧𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀺𑀬𑀲𑁆𑀲 𑀥𑀫𑁆𑀫𑀢𑀸, 𑀢𑁂𑀦 𑀯𑀼𑀢𑁆𑀢𑀁 ‘𑀏𑀢𑀲𑁆𑀲 𑀓𑀣𑀸 𑀏𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀺𑀲𑁆𑀲𑀢𑀻’𑀢𑀺𑀆𑀤𑀺. 𑀫𑀳𑀸𑀲𑀢𑁆𑀢𑁄 𑀧𑀦 𑀢𑀁 𑀢𑀲𑁆𑀲 𑀉𑀧𑀭𑀺 𑀧𑀢𑀺𑀢𑀼𑀁 𑀦 𑀅𑀤𑀸𑀲𑀺, 𑀉𑀧𑀸𑀬𑁂𑀦 𑀫𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀘𑀭𑀺𑀬𑀸𑀧𑀺𑀝𑀓𑁂 (𑀘𑀭𑀺𑀬𑀸. 𑁨.𑁬𑁪) 𑁋

‘‘𑀬𑀁 𑀲𑁄 𑀢𑀤𑀸 𑀫𑀁 𑀅𑀪𑀺𑀲𑀧𑀺, 𑀓𑀼𑀧𑀺𑀢𑁄 𑀤𑀼𑀝𑁆𑀞𑀫𑀸𑀦𑀲𑁄;

𑀢𑀲𑁆𑀲𑁂𑀯 𑀫𑀢𑁆𑀣𑀓𑁂 𑀦𑀺𑀧𑀢𑀺, 𑀬𑁄𑀕𑁂𑀦 𑀢𑀁 𑀧𑀫𑁄𑀘𑀬𑀺’’𑀦𑁆𑀢𑀺.

𑀬𑀜𑁆𑀳𑀺 𑀢𑀢𑁆𑀣 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑁂𑀦 𑀲𑀽𑀭𑀺𑀬𑀼𑀕𑁆𑀕𑀫𑀦𑀦𑀺𑀯𑀸𑀭𑀡𑀁 𑀓𑀢𑀁, 𑀅𑀬𑀫𑁂𑀢𑁆𑀣 𑀬𑁄𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑁄𑀕𑁂𑀦 𑀳𑀺 𑀉𑀩𑁆𑀩𑀴𑁆𑀳𑀸 𑀲𑀭𑀸𑀚𑀺𑀓𑀸 𑀧𑀭𑀺𑀲𑀸 𑀦𑀕𑀭𑀯𑀸𑀲𑀺𑀦𑁄 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀢𑀸𑀧𑀲𑀁 𑀆𑀦𑁂𑀢𑁆𑀯𑀸 𑀔𑀫𑀸𑀧𑁂𑀲𑀼𑀁. 𑀲𑁄 𑀘 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑁂 𑀚𑀸𑀦𑀺𑀢𑁆𑀯𑀸 𑀢𑀲𑁆𑀫𑀺𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺. 𑀬𑀁 𑀧𑀦𑀲𑁆𑀲 𑀫𑀢𑁆𑀣𑀓𑁂 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀲𑁆𑀲 𑀞𑀧𑀦𑀁, 𑀢𑀲𑁆𑀲 𑀘 𑀲𑀢𑁆𑀢𑀥𑀸 𑀨𑀸𑀮𑀦𑀁 𑀓𑀢𑀁, 𑀢𑀁 𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀁. 𑀅𑀜𑁆𑀜𑀣𑀸 𑀳𑀺 𑁋 ‘‘𑀇𑀫𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀘𑀺𑀢𑁆𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀺, 𑀦 𑀧𑀦 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑁂𑀦𑁆𑀢𑀻’’𑀢𑀺 𑀫𑀳𑀸𑀲𑀢𑁆𑀢𑀫𑁆𑀧𑀺 𑀢𑁂𑀦 𑀲𑀤𑀺𑀲𑀁 𑀓𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀼𑀁, 𑀢𑀤𑀲𑁆𑀲 𑀢𑁂𑀲𑀁 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸𑀢𑀺. 𑀢𑁂𑀦𑀸𑀳 ‘‘𑀅𑀣𑀲𑁆𑀲𑀸’’𑀢𑀺𑀆𑀤𑀺.

𑀮𑁄𑀳𑀓𑀽𑀝𑀯𑀲𑁆𑀲𑀦𑁆𑀢𑀺 𑀅𑀬𑀕𑀼𑀴𑀯𑀲𑁆𑀲𑀁. 𑀢𑀤𑀸 𑀳𑀺 𑀭𑀢𑀦𑀫𑀢𑁆𑀢𑀸𑀦𑀺 𑀤𑀺𑀬𑀟𑁆𑀠𑀭𑀢𑀦𑀫𑀢𑁆𑀢𑀸𑀦𑀺𑀧𑀺 𑀢𑀺𑀔𑀺𑀡𑀁𑀲𑀸𑀦𑀺 𑀅𑀬𑀕𑀼𑀴𑀫𑀡𑁆𑀟𑀮𑀸𑀦𑀺 𑀇𑀢𑁄 𑀘𑀺𑀢𑁄 𑀘 𑀦𑀺𑀧𑀢𑀦𑁆𑀢𑀸 𑀫𑀦𑀼𑀲𑁆𑀲𑀸𑀦𑀁 𑀲𑀭𑀻𑀭𑀸𑀦𑀺 𑀔𑀡𑁆𑀟𑀔𑀡𑁆𑀟𑀓𑀸𑀦𑀺 𑀅𑀓𑀁𑀲𑀼. 𑀓𑀮𑀮𑀯𑀲𑁆𑀲𑀦𑁆𑀢𑀺 𑀢𑀦𑀼𑀓𑀓𑀤𑁆𑀤𑀫𑀧𑀝𑀮𑀓𑀤𑁆𑀤𑀫𑀁. 𑀉𑀧𑀳𑀘𑁆𑀘𑀸𑀢𑀺 𑀆𑀖𑀸𑀝𑁂𑀢𑁆𑀯𑀸. 𑀢𑀤𑁂𑀯 𑀫𑀚𑁆𑀛𑀸𑀭𑀜𑁆𑀜𑀁.

𑁬𑁭. 𑀅𑀦𑀼𑀯𑀺𑀘𑁆𑀘𑀓𑀸𑀭𑀦𑁆𑀢𑀺 𑀅𑀦𑀼𑀯𑀺𑀘𑁆𑀘𑀓𑀭𑀡𑀁. 𑀓𑀸𑀭𑀡𑁂𑀳𑀺 𑀤𑁆𑀯𑀻𑀳𑀺 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀞𑀺𑀢𑀸𑀦𑀁 𑀅𑀢𑁆𑀢𑀦𑁄 𑀲𑀸𑀯𑀓𑀢𑁆𑀢𑀁 𑀉𑀧𑀕𑀢𑁂 𑀧𑀕𑁆𑀕𑀳𑀦𑀺𑀕𑁆𑀕𑀳𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁬𑁯. 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁨.𑁭𑁫-𑁭𑁬; 𑀅. 𑀦𑀺. 𑀝𑀻. 𑁩.𑁮.𑁧𑁨) 𑀅𑀦𑀼𑀧𑀼𑀩𑁆𑀩𑀺𑀬𑀸 𑀅𑀦𑀼𑀧𑀼𑀩𑁆𑀩𑀁 𑀓𑀣𑁂𑀢𑀩𑁆𑀩𑀓𑀣𑀁, 𑀓𑀸 𑀧𑀦 𑀲𑀸? 𑀤𑀸𑀦𑀸𑀤𑀺𑀓𑀣𑀸. 𑀤𑀸𑀦𑀓𑀣𑀸 𑀢𑀸𑀯 𑀧𑀘𑀼𑀭𑀚𑀦𑁂𑀲𑀼𑀧𑀺 𑀧𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀲𑀼𑀓𑀭𑀢𑁆𑀢𑀸 𑀲𑀻𑀮𑁂 𑀧𑀢𑀺𑀝𑁆𑀞𑀸𑀦𑀲𑁆𑀲 𑀉𑀧𑀸𑀬𑀪𑀸𑀯𑀢𑁄 𑀘 𑀆𑀤𑀺𑀢𑁄𑀯 𑀓𑀣𑀺𑀢𑀸. 𑀧𑀭𑀺𑀘𑁆𑀘𑀸𑀕𑀲𑀻𑀮𑁄 𑀳𑀺 𑀧𑀼𑀕𑁆𑀕𑀮𑁄 𑀧𑀭𑀺𑀕𑁆𑀕𑀳𑀯𑀢𑁆𑀣𑀽𑀲𑀼 𑀦𑀺𑀲𑁆𑀲𑀗𑁆𑀕𑀪𑀸𑀯𑀢𑁄 𑀲𑀼𑀔𑁂𑀦𑁂𑀯 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀢𑀺, 𑀢𑀢𑁆𑀣 𑀘 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀲𑀻𑀮𑁂𑀦 𑀤𑀸𑀬𑀓𑀧𑀝𑀺𑀕𑁆𑀕𑀳𑀡𑀯𑀺𑀲𑀼𑀤𑁆𑀥𑀺𑀢𑁄 𑀧𑀭𑀸𑀦𑀼𑀕𑁆𑀕𑀳𑀁 𑀯𑀢𑁆𑀯𑀸 𑀧𑀭𑀧𑀻𑀴𑀸𑀦𑀺𑀯𑀢𑁆𑀢𑀺𑀯𑀘𑀦𑀢𑁄, 𑀓𑀺𑀭𑀺𑀬𑀥𑀫𑁆𑀫𑀁 𑀯𑀢𑁆𑀯𑀸 𑀅𑀓𑀺𑀭𑀺𑀬𑀥𑀫𑁆𑀫𑀯𑀘𑀦𑀢𑁄, 𑀪𑁄𑀕𑀬𑀲𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀁 𑀯𑀢𑁆𑀯𑀸 𑀪𑀯𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀯𑀘𑀦𑀢𑁄 𑀘 𑀤𑀸𑀦𑀓𑀣𑀸𑀦𑀦𑁆𑀢𑀭𑀁 𑀲𑀻𑀮𑀓𑀣𑀸 𑀓𑀣𑀺𑀢𑀸. 𑀢𑀜𑁆𑀘 𑀲𑀻𑀮𑀁 𑀯𑀝𑁆𑀝𑀦𑀺𑀲𑁆𑀲𑀺𑀢𑀁, 𑀅𑀬𑀁 𑀪𑀯𑀲𑀫𑁆𑀧𑀢𑁆𑀢𑀺 𑀢𑀲𑁆𑀲 𑀨𑀮𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀇𑀫𑁂𑀳𑀺 𑀘 𑀤𑀸𑀦𑀲𑀻𑀮𑀫𑀬𑁂𑀳𑀺 𑀧𑀡𑀻𑀢𑀘𑀭𑀺𑀬𑀪𑁂𑀤𑀪𑀺𑀦𑁆𑀦𑁂𑀳𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀳𑀺 𑀏𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀧𑀡𑀻𑀢𑀢𑀭𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀅𑀧𑀭𑀺𑀫𑁂𑀬𑁆𑀬𑀸 𑀪𑁄𑀕𑀪𑀯𑀲𑀫𑁆𑀧𑀢𑁆𑀢𑀺𑀬𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀕𑁆𑀕𑀓𑀣𑀸. 𑀲𑁆𑀯𑀸𑀬𑀁 𑀲𑀕𑁆𑀕𑁄 𑀭𑀸𑀕𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑁄 𑀲𑀩𑁆𑀩𑀤𑀸 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑁄 𑀅𑀭𑀺𑀬𑀫𑀕𑁆𑀕𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀲𑀕𑁆𑀕𑀸𑀦𑀦𑁆𑀢𑀭𑀁 𑀫𑀕𑁆𑀕𑁄, 𑀫𑀕𑁆𑀕𑀜𑁆𑀘 𑀓𑀣𑁂𑀦𑁆𑀢𑁂𑀦 𑀢𑀤𑀥𑀺𑀕𑀫𑀽𑀧𑀸𑀬𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀲𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀧𑀺 𑀧𑀕𑁂𑀯 𑀇𑀢𑀭𑁂 𑀲𑀩𑁆𑀩𑁂𑀧𑀺 𑀓𑀸𑀫𑀸 𑀦𑀸𑀫 𑀩𑀳𑁆𑀯𑀸𑀤𑀻𑀦𑀯𑀸 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄. 𑀳𑀻𑀦𑀸 𑀕𑀫𑁆𑀫𑀸 𑀧𑁄𑀣𑀼𑀚𑁆𑀚𑀦𑀺𑀓𑀸 𑀅𑀦𑀭𑀺𑀬𑀸 𑀅𑀦𑀢𑁆𑀣𑀲𑀜𑁆𑀳𑀺𑀢𑀸𑀢𑀺 𑀢𑁂𑀲𑀁 𑀑𑀓𑀸𑀭𑁄 𑀮𑀸𑀫𑀓𑀪𑀸𑀯𑁄, 𑀲𑀩𑁆𑀩𑁂𑀧𑀺 𑀪𑀯𑀸 𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀼𑀪𑀽𑀢𑀸𑀢𑀺 𑀢𑀢𑁆𑀣 𑀲𑀁𑀓𑀺𑀮𑁂𑀲𑁄. 𑀲𑀩𑁆𑀩𑀲𑁄 𑀓𑀺𑀮𑁂𑀲𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑁄 𑀘 𑀓𑀣𑁂𑀢𑀩𑁆𑀩𑁄𑀢𑀺 𑀅𑀬𑀫𑀢𑁆𑀣𑁄 𑀫𑀕𑁆𑀕𑀦𑁆𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁂𑀦 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀼𑀔𑀸𑀦𑀁 𑀦𑀺𑀤𑀸𑀦𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀦𑀺𑀩𑁆𑀩𑀸𑀦𑀲𑀜𑁆𑀳𑀺𑀢𑀸𑀦𑀜𑁆𑀘𑀸𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀲𑀼𑀔𑀸𑀦𑀁 𑀓𑀸𑀭𑀡𑀁. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀮𑁄𑀓𑁂 𑀪𑁄𑀕𑀲𑀼𑀔𑀁 𑀦𑀸𑀫, 𑀢𑀁 𑀲𑀩𑁆𑀩𑀁 𑀤𑀸𑀦𑀦𑀺𑀤𑀸𑀦𑀦𑁆𑀢𑀺 𑀧𑀸𑀓𑀝𑁄 𑀅𑀬𑀫𑀢𑁆𑀣𑁄. 𑀬𑀁 𑀧𑀦 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀼𑀔𑀁, 𑀢𑀲𑁆𑀲𑀧𑀺 𑀤𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. 𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀦𑁆𑀢𑀺 𑀬𑀸 𑀇𑀫𑀸 𑀮𑁄𑀓𑁂 𑀧𑀤𑁂𑀲𑀭𑀚𑁆𑀚𑀲𑀺𑀭𑀺𑀲𑁆𑀲𑀭𑀺𑀬𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀤𑀸𑀢𑀺 𑀏𑀯𑀁𑀧𑀪𑁂𑀤𑀸 𑀫𑀸𑀦𑀼𑀲𑀺𑀓𑀸 𑀲𑀫𑁆𑀧𑀢𑁆𑀢𑀺𑀬𑁄, 𑀬𑀸 𑀘 𑀘𑀸𑀢𑀼𑀫𑀳𑀸𑀭𑀸𑀚𑀸𑀤𑀺𑀕𑀢𑀸 𑀤𑀺𑀩𑁆𑀩𑀸 𑀲𑀫𑁆𑀧𑀢𑁆𑀢𑀺𑀬𑁄, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀲𑀫𑁆𑀧𑀢𑁆𑀢𑀺𑀬𑁄, 𑀢𑀸𑀲𑀁 𑀲𑀩𑁆𑀩𑀸𑀲𑀁 𑀇𑀤𑀁 𑀫𑀽𑀮𑀓𑀸𑀭𑀡𑀁. 𑀪𑁄𑀕𑀸𑀦𑀦𑁆𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 ‘‘𑀪𑁄𑀕𑁄’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀫𑀦𑀸𑀧𑀺𑀬𑀭𑀽𑀧𑀸𑀤𑀻𑀦𑀁, 𑀢𑀦𑁆𑀦𑀺𑀲𑁆𑀲𑀬𑀸𑀦𑀁 𑀯𑀸 𑀉𑀧𑀪𑁄𑀕𑀲𑀼𑀔𑀸𑀦𑀁, 𑀧𑀢𑀺𑀝𑁆𑀞𑀸 𑀦𑀺𑀘𑁆𑀘𑀮𑀸𑀥𑀺𑀝𑁆𑀞𑀸𑀦𑀢𑀸𑀬. 𑀯𑀺𑀲𑀫𑀕𑀢𑀲𑁆𑀲𑀸𑀢𑀺 𑀩𑁆𑀬𑀲𑀦𑀧𑁆𑀧𑀢𑁆𑀢𑀲𑁆𑀲. 𑀢𑀸𑀡𑀦𑁆𑀢𑀺 𑀭𑀓𑁆𑀔𑀸 𑀢𑀢𑁄 𑀧𑀭𑀺𑀧𑀸𑀮𑀦𑀢𑁄. 𑀮𑁂𑀡𑀦𑁆𑀢𑀺 𑀩𑁆𑀬𑀲𑀦𑁂𑀳𑀺 𑀧𑀭𑀺𑀧𑀸𑀢𑀺𑀬𑀫𑀸𑀦𑀲𑁆𑀲 𑀑𑀮𑀻𑀬𑀦𑀧𑀤𑁂𑀲𑁄. 𑀕𑀢𑀻𑀢𑀺 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁. 𑀧𑀭𑀸𑀬𑀡𑀦𑁆𑀢𑀺 𑀧𑀝𑀺𑀲𑀭𑀡𑀁. 𑀅𑀯𑀲𑁆𑀲𑀬𑁄𑀢𑀺 𑀯𑀺𑀦𑀺𑀧𑀢𑀺𑀢𑀼𑀁 𑀅𑀤𑁂𑀦𑁆𑀢𑁄 𑀦𑀺𑀲𑁆𑀲𑀬𑁄. 𑀆𑀭𑀫𑁆𑀫𑀡𑀦𑁆𑀢𑀺 𑀑𑀮𑀼𑀩𑁆𑀪𑀸𑀭𑀫𑁆𑀫𑀡𑀁.

𑀭𑀢𑀦𑀫𑀬𑀲𑀻𑀳𑀸𑀲𑀦𑀲𑀤𑀺𑀲𑀦𑁆𑀢𑀺 𑀲𑀩𑁆𑀩𑀭𑀢𑀦𑀫𑀬𑀲𑀢𑁆𑀢𑀗𑁆𑀕𑀫𑀳𑀸𑀲𑀻𑀳𑀸𑀲𑀦𑀲𑀤𑀺𑀲𑀁, 𑀫𑀳𑀕𑁆𑀖𑀁 𑀳𑀼𑀢𑁆𑀯𑀸 𑀲𑀩𑁆𑀩𑀲𑁄 𑀯𑀺𑀦𑀺𑀧𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀢𑁄. 𑀫𑀳𑀸𑀧𑀣𑀯𑀺𑀲𑀤𑀺𑀲𑀁 𑀕𑀢𑀕𑀢𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀸𑀲𑀫𑁆𑀪𑀯𑀢𑁄. 𑀬𑀣𑀸 𑀤𑀼𑀩𑁆𑀩𑀮𑀲𑁆𑀲 𑀧𑀼𑀭𑀺𑀲𑀲𑁆𑀲 𑀆𑀮𑀫𑁆𑀩𑀦𑀭𑀚𑁆𑀚𑀼 𑀉𑀢𑁆𑀢𑀺𑀝𑁆𑀞𑀢𑁄 𑀢𑀺𑀝𑁆𑀞𑀢𑁄 𑀘 𑀉𑀧𑀢𑁆𑀣𑀫𑁆𑀪𑁄, 𑀏𑀯𑀁 𑀤𑀸𑀦𑀁 𑀲𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀪𑀯𑁂 𑀉𑀧𑀧𑀢𑁆𑀢𑀺𑀬𑀸 𑀞𑀺𑀢𑀺𑀬𑀸 𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀆𑀮𑀫𑁆𑀩𑀦𑀝𑁆𑀞𑁂𑀦 𑀆𑀮𑀫𑁆𑀩𑀦𑀭𑀚𑁆𑀚𑀼𑀲𑀤𑀺𑀲’’𑀦𑁆𑀢𑀺. 𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀝𑁆𑀞𑁂𑀦𑀸𑀢𑀺 𑀤𑀼𑀕𑁆𑀕𑀢𑀺𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀝𑁆𑀞𑁂𑀦. 𑀲𑀫𑀲𑁆𑀲𑀸𑀲𑀦𑀝𑁆𑀞𑁂𑀦𑀸𑀢𑀺 𑀮𑁄𑀪𑀫𑀘𑁆𑀙𑀭𑀺𑀬𑀸𑀤𑀺𑀧𑀝𑀺𑀲𑀢𑁆𑀢𑀼𑀧𑀤𑁆𑀤𑀯𑀢𑁄 𑀲𑀫𑁆𑀫𑀤𑁂𑀯 𑀅𑀲𑁆𑀲𑀸𑀲𑀦𑀝𑁆𑀞𑁂𑀦. 𑀪𑀬𑀧𑀭𑀺𑀢𑁆𑀢𑀸𑀡𑀝𑁆𑀞𑁂𑀦𑀸𑀢𑀺 𑀤𑀸𑀮𑀺𑀤𑁆𑀤𑀺𑀬𑀪𑀬𑀢𑁄 𑀧𑀭𑀺𑀧𑀸𑀮𑀦𑀝𑁆𑀞𑁂𑀦. 𑀫𑀘𑁆𑀙𑁂𑀭𑀫𑀮𑀸𑀤𑀻𑀳𑀻𑀢𑀺 𑀫𑀘𑁆𑀙𑁂𑀭𑀮𑁄𑀪𑀤𑁄𑀲𑀇𑀲𑁆𑀲𑀸𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀺 𑀘𑀺𑀢𑁆𑀢𑀫𑀮𑁂𑀳𑀺. 𑀅𑀦𑀼𑀧𑀮𑀺𑀢𑁆𑀢𑀝𑁆𑀞𑁂𑀦𑀸𑀢𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬. 𑀢𑁂𑀲𑀦𑁆𑀢𑀺 𑀫𑀘𑁆𑀙𑁂𑀭𑀫𑀮𑀸𑀤𑀻𑀦𑀁. 𑀏𑀢𑁂𑀲𑀁 𑀏𑀯 𑀤𑀼𑀭𑀸𑀲𑀤𑀝𑁆𑀞𑁂𑀦. 𑀅𑀲𑀦𑁆𑀢𑀸𑀲𑀦𑀝𑁆𑀞𑁂𑀦𑀸𑀢𑀺 𑀅𑀲𑀦𑁆𑀢𑀸𑀲𑀳𑁂𑀢𑀼𑀪𑀸𑀯𑁂𑀦. 𑀬𑁄 𑀳𑀺 𑀤𑀸𑀬𑀓𑁄 𑀤𑀸𑀦𑀧𑀢𑀺, 𑀲𑁄 𑀲𑀫𑁆𑀧𑀢𑀺𑀧𑀺 𑀦 𑀓𑀼𑀢𑁄𑀘𑀺 𑀲𑀦𑁆𑀢𑀲𑀢𑀺, 𑀧𑀕𑁂𑀯 𑀆𑀬𑀢𑀺𑀁. 𑀩𑀮𑀯𑀦𑁆𑀢𑀝𑁆𑀞𑁂𑀦𑀸𑀢𑀺 𑀫𑀳𑀸𑀩𑀮𑀯𑀢𑀸𑀬. 𑀤𑀸𑀬𑀓𑁄 𑀳𑀺 𑀤𑀸𑀦𑀧𑀢𑀺 𑀲𑀫𑁆𑀧𑀢𑀺 𑀧𑀓𑁆𑀔𑀩𑀮𑁂𑀦 𑀩𑀮𑀯𑀸 𑀳𑁄𑀢𑀺, 𑀆𑀬𑀢𑀺𑀁 𑀧𑀦 𑀓𑀸𑀬𑀩𑀮𑀸𑀤𑀻𑀳𑀺. 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀝𑁆𑀞𑁂𑀦𑀸𑀢𑀺 ‘‘𑀯𑀼𑀟𑁆𑀠𑀺𑀓𑀸𑀭𑀡’’𑀦𑁆𑀢𑀺 𑀅𑀪𑀺𑀲𑀫𑁆𑀫𑀢𑀪𑀸𑀯𑁂𑀦. 𑀯𑀺𑀧𑀢𑁆𑀢𑀺𑀢𑁄 𑀲𑀫𑁆𑀧𑀢𑁆𑀢𑀺𑀬𑀸 𑀦𑀬𑀦𑀁 𑀔𑁂𑀫𑀦𑁆𑀢𑀪𑀽𑀫𑀺𑀲𑀫𑁆𑀧𑀸𑀧𑀦𑀁.

𑀇𑀤𑀸𑀦𑀺 𑀫𑀳𑀸𑀩𑁄𑀥𑀺𑀘𑀭𑀺𑀬𑀪𑀸𑀯𑁂𑀦𑀧𑀺 𑀤𑀸𑀦𑀕𑀼𑀡𑀁 𑀤𑀲𑁆𑀲𑁂𑀢𑀼𑀁 𑀤𑀸𑀦𑀁 𑀦𑀸𑀫𑁂𑀢𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑁂𑀦𑀸𑀢𑀺 𑀏𑀢𑁂𑀦 𑀤𑀸𑀦𑀨𑀮𑀁 𑀲𑀫𑁆𑀫𑀤𑁂𑀯 𑀧𑀲𑁆𑀲𑀦𑁆𑀢𑀸 𑀫𑀳𑀸𑀧𑀼𑀭𑀺𑀲𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀢𑀲𑁆𑀫𑀸 𑀓𑁄 𑀦𑀸𑀫 𑀯𑀺𑀜𑁆𑀜𑀼𑀚𑀸𑀢𑀺𑀓𑁄 𑀩𑀸𑀳𑀺𑀭𑁂 𑀯𑀢𑁆𑀣𑀼𑀫𑁆𑀳𑀺 𑀲𑀗𑁆𑀕𑀁 𑀓𑀭𑁂𑀬𑁆𑀬𑀸𑀢𑀺 𑀑𑀯𑀸𑀤𑀁 𑀤𑁂𑀢𑀺. 𑀇𑀤𑀸𑀦𑀺 𑀬𑀸 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀘 𑀉𑀓𑁆𑀓𑀁𑀲𑀕𑀢𑀸 𑀲𑀫𑁆𑀧𑀢𑁆𑀢𑀺𑀬𑁄, 𑀢𑀸 𑀲𑀩𑁆𑀩𑀸 𑀤𑀸𑀦𑀢𑁄𑀬𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀸𑀦𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀓𑁆𑀓𑀫𑀸𑀭𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑀅𑀢𑁆𑀢𑀳𑀺𑀢𑀸𑀬 𑀏𑀯, 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀧𑀦 𑀅𑀢𑁆𑀢𑀳𑀺𑀢𑀸𑀬 𑀘 𑀧𑀭𑀳𑀺𑀢𑀸𑀬 𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 𑀲𑀸 𑀢𑀸𑀲𑀁 𑀧𑀭𑀢𑁄 𑀯𑀼𑀢𑁆𑀢𑀸. 𑀏𑀢𑀸 𑀮𑁄𑀓𑀺𑀬𑀸, 𑀇𑀫𑀸 𑀧𑀦 𑀮𑁄𑀓𑀼𑀢𑁆𑀢𑀭𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀯𑀓𑀧𑀸𑀭𑀫𑀻𑀜𑀸𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀸𑀲𑀼𑀧𑀺 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑀢𑀭𑀼𑀓𑁆𑀓𑀝𑁆𑀞𑀢𑀫𑀫𑁂𑀯 𑀤𑀲𑁆𑀲𑁂𑀢𑀼𑀁 𑀓𑀫𑁂𑀦 𑀜𑀸𑀡𑀢𑁆𑀢𑀬𑀁 𑀯𑀼𑀢𑁆𑀢𑀁. 𑀢𑁂𑀲𑀁 𑀧𑀦 𑀤𑀸𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀏𑀢𑁂𑀦𑁂𑀯 𑀢𑀲𑁆𑀲 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀧𑀘𑁆𑀘𑀬𑀪𑀸𑀯𑁄 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀸𑀦𑀜𑁆𑀘 𑀦𑀸𑀫 𑀳𑀺𑀢𑀚𑁆𑀛𑀸𑀲𑀬𑁂𑀦, 𑀧𑀽𑀚𑀸𑀯𑀲𑁂𑀦 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀧𑀭𑁂𑀲𑀁 𑀧𑀭𑀺𑀘𑁆𑀘𑀚𑀦𑀁, 𑀢𑀲𑁆𑀫𑀸 𑀤𑀸𑀬𑀓𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀳𑀭𑀺𑀲𑁆𑀲𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀢𑀦𑁆𑀢𑀺 𑀆𑀳 𑁋 ‘‘𑀤𑀸𑀦𑀁 𑀤𑀤𑀦𑁆𑀢𑁄 𑀲𑀻𑀮𑀁 𑀲𑀫𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺. 𑀲𑀻𑀮𑀸𑀮𑀗𑁆𑀓𑀸𑀭𑀲𑀤𑀺𑀲𑁄 𑀅𑀮𑀗𑁆𑀓𑀸𑀭𑁄 𑀦𑀢𑁆𑀣𑀺 𑀲𑁄𑀪𑀸𑀯𑀺𑀲𑁂𑀲𑀸𑀯𑀳𑀢𑁆𑀢𑀸 𑀲𑀻𑀮𑀲𑁆𑀲. 𑀲𑀻𑀮𑀧𑀼𑀧𑁆𑀨𑀲𑀤𑀺𑀲𑀁 𑀧𑀼𑀧𑁆𑀨𑀁 𑀦𑀢𑁆𑀣𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀻𑀮𑀕𑀦𑁆𑀥𑀲𑀤𑀺𑀲𑁄 𑀕𑀦𑁆𑀥𑁄 𑀦𑀢𑁆𑀣𑀻𑀢𑀺 𑀏𑀢𑁆𑀣 ‘‘𑀘𑀦𑁆𑀤𑀦𑀁 𑀢𑀕𑀭𑀁 𑀯𑀸𑀧𑀻’’𑀢𑀺𑀆𑀤𑀺𑀓𑀸 (𑀥. 𑀧. 𑁫𑁫; 𑀫𑀺. 𑀧. 𑁪.𑁧.𑁧) 𑀕𑀸𑀣𑀸 𑁋 ‘‘𑀕𑀦𑁆𑀥𑁄 𑀇𑀲𑀻𑀦𑀁 𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀁, 𑀓𑀸𑀬𑀸 𑀘𑀼𑀢𑁄 𑀕𑀘𑁆𑀙𑀢𑀺 𑀫𑀸𑀮𑀼𑀢𑁂𑀦𑀸’’𑀢𑀺𑀆𑀤𑀺𑀓𑀸 (𑀚𑀸. 𑁨.𑁧𑁭.𑁫𑁫) 𑀚𑀸𑀢𑀓𑀕𑀸𑀣𑀸𑀬𑁄 𑀘 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸, 𑀲𑀻𑀮𑀜𑁆𑀳𑀺 𑀲𑀢𑁆𑀢𑀸𑀦𑀁 𑀆𑀪𑀭𑀡𑀜𑁆𑀘𑁂𑀯 𑀅𑀮𑀗𑁆𑀓𑀸𑀭𑁄 𑀘 𑀕𑀦𑁆𑀥𑀯𑀺𑀮𑁂𑀧𑀦𑀜𑁆𑀘 𑀤𑀲𑁆𑀲𑀦𑀻𑀬𑀪𑀸𑀯𑀸𑀯𑀳𑀜𑁆𑀘. 𑀢𑁂𑀦𑀸𑀳 ‘‘𑀲𑀻𑀮𑀸𑀮𑀗𑁆𑀓𑀸𑀭𑁂𑀦 𑀳𑀻’’𑀢𑀺𑀆𑀤𑀺.

𑀅𑀬𑀁 𑀲𑀕𑁆𑀕𑁄 𑀮𑀩𑁆𑀪𑀢𑀻𑀢𑀺 𑀇𑀤𑀁 𑀫𑀚𑁆𑀛𑀺𑀫𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀲𑀫𑀸𑀤𑀸𑀦𑀲𑀻𑀮𑀁 𑀲𑀦𑁆𑀥𑀸𑀬𑀸𑀳. 𑀢𑁂𑀦𑀸𑀳 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑁋