𑁮. 𑀅𑀪𑀬𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀚𑀸𑀢𑀺𑀬𑀸 𑀅𑀲𑀫𑀸𑀦𑁄 𑀦𑀺𑀳𑀻𑀦𑀸𑀘𑀭𑀺𑀬𑁄 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀓𑀸𑀬 𑀫𑀸𑀢𑀼𑀬𑀸 𑀓𑀼𑀘𑁆𑀙𑀺𑀬𑀁 𑀚𑀸𑀢𑁄 𑀧𑀸𑀤𑀲𑀺𑀓𑀧𑀼𑀢𑁆𑀢𑁄. 𑀦𑀺𑀦𑁆𑀤𑀸𑀯𑀲𑁂𑀦 𑀯𑀤𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄 𑀅𑀕𑀼𑀡𑁄𑀢𑀺 𑀆𑀳 𑁋 ‘‘𑀯𑀸𑀤𑀁 𑀆𑀭𑁄𑀧𑁂𑀳𑀻𑀢𑀺 𑀤𑁄𑀲𑀁 𑀆𑀭𑁄𑀧𑁂𑀳𑀻’’𑀢𑀺. 𑀦𑀺𑀩𑁆𑀩𑀢𑁆𑀢𑀯𑀲𑁂𑀦 𑀦𑀺𑀭𑀬𑀁 𑀅𑀭𑀳𑀢𑀺, 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀬𑁂𑀦 𑀯𑀸 𑀓𑀫𑁆𑀫𑁂𑀦 𑀦𑀺𑀭𑀬𑁂 𑀦𑀺𑀬𑀼𑀢𑁆𑀢𑁄 𑀦𑁂𑀭𑀬𑀺𑀓𑁄. 𑀆𑀧𑀸𑀬𑀺𑀓𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀯𑀻𑀘𑀺𑀫𑁆𑀳𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀆𑀬𑀼𑀓𑀧𑁆𑀧𑀲𑀜𑁆𑀜𑀺𑀢𑀁 𑀅𑀦𑁆𑀢𑀭𑀓𑀧𑁆𑀧𑀁 𑀢𑀺𑀝𑁆𑀞𑀢𑀻𑀢𑀺 𑀓𑀧𑁆𑀧𑀝𑁆𑀞𑁄. 𑀦𑀺𑀭𑀬𑀽𑀧𑀧𑀢𑁆𑀢𑀺𑀧𑀭𑀺𑀳𑀭𑀡𑀯𑀲𑁂𑀦 𑀢𑀺𑀓𑀺𑀘𑁆𑀙𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀢𑁂𑀓𑀺𑀘𑁆𑀙𑁄, 𑀦 𑀢𑁂𑀓𑀺𑀘𑁆𑀙𑁄 𑀅𑀢𑁂𑀓𑀺𑀘𑁆𑀙𑁄. 𑀤𑁆𑀯𑁂 𑀅𑀦𑁆𑀢𑁂 𑀫𑁄𑀘𑁂𑀢𑁆𑀯𑀸𑀢𑀺 𑀨𑀭𑀼𑀲𑀁 𑀯𑀸 𑀅𑀧𑁆𑀧𑀺𑀬𑀁 𑀯𑀸 𑀓𑀧𑁆𑀧𑁂𑀬𑁆𑀬𑀸𑀢𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀫𑀼𑀜𑁆𑀘𑀺𑀢𑁆𑀯𑀸 𑀢𑁂 𑀅𑀦𑀸𑀫𑀲𑀺𑀢𑁆𑀯𑀸 𑀧𑀼𑀘𑁆𑀙𑀺𑀢𑀁 𑀅𑀢𑁆𑀣𑀁 𑀢𑀢𑁄 𑀩𑀳𑀺 𑀓𑀭𑁄𑀦𑁆𑀢𑁄 𑀉𑀕𑁆𑀕𑀺𑀮𑀢𑀺 𑀦𑀸𑀫. 𑀢𑀁 𑀧𑀦 𑀏𑀯𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀆𑀳 𑁋 ‘‘𑀉𑀕𑁆𑀕𑀺𑀮𑀺𑀢𑀼𑀁 𑀩𑀳𑀺 𑀦𑀻𑀳𑀭𑀺𑀢𑀼𑀁 𑀦 𑀲𑀓𑁆𑀔𑀺𑀢𑀻’’𑀢𑀺. 𑀏𑀯𑀫𑁂𑀯𑀸𑀬𑀁 𑀧𑀼𑀘𑁆𑀙𑀸 𑀦 𑀕𑀳𑁂𑀢𑀩𑁆𑀩𑀸, 𑀅𑀬𑀫𑁂𑀢𑁆𑀣 𑀤𑁄𑀲𑁄𑀢𑀺 𑀢𑀁 𑀅𑀧𑀼𑀘𑁆𑀙𑀁 𑀓𑀭𑁄𑀦𑁆𑀢𑁄 𑀅𑀧𑀦𑀬𑀦𑁆𑀢𑁄 𑀑𑀕𑀺𑀮𑀢𑀺 𑀦𑀸𑀫, 𑀢𑀣𑀸 𑀧𑀦 𑀅𑀲𑀓𑁆𑀓𑁄𑀦𑁆𑀢𑁄 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 𑀦 𑀑𑀕𑀺𑀮𑀢𑀺 𑀦𑀸𑀫, 𑀪𑀕𑀯𑀸 𑀧𑀦 𑀢𑀫𑀢𑁆𑀣𑀁 𑀑𑀓𑀸𑀲𑀫𑁆𑀧𑀺 𑀅𑀓𑀭𑁄𑀦𑁆𑀢𑁄 𑀉𑀪𑀬𑀣𑀸𑀧𑀺 𑀅𑀲𑀓𑁆𑀔𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀪𑀕𑀯𑀸 𑀳𑀺 ‘‘𑀦 𑀔𑁆𑀯𑁂𑀢𑁆𑀣 𑀭𑀸𑀚𑀓𑀼𑀫𑀸𑀭 𑀏𑀓𑀁𑀲𑁂𑀦𑀸’’𑀢𑀺 𑀯𑀤𑀦𑁆𑀢𑁄 𑀦𑀺𑀕𑀡𑁆𑀞𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀯𑀺𑀧𑀭𑀺𑀯𑀢𑁆𑀢𑁂𑀢𑀺, 𑀉𑀪𑁄 𑀅𑀦𑁆𑀢𑁂 𑀫𑁄𑀘𑁂𑀢𑁆𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀏𑀯𑀁 𑀢𑀸𑀯 𑀉𑀕𑁆𑀕𑀺𑀮𑀺𑀢𑀼𑀁 𑀅𑀲𑀓𑁆𑀔𑀺. ‘‘𑀦 𑀢𑀢𑁆𑀭 𑀭𑀸𑀚𑀓𑀼𑀫𑀸𑀭 𑀏𑀓𑀁𑀲𑁂𑀦𑀸’’𑀢𑀺 𑀯𑀤𑀦𑁆𑀢𑁄 𑀏𑀯 𑀘 ‘‘𑀦𑀸𑀬𑀁 𑀧𑀼𑀘𑁆𑀙𑀸 𑀏𑀯𑀁 𑀅𑀯𑀺𑀪𑀸𑀕𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀸, 𑀯𑀺𑀪𑀚𑀺𑀢𑁆𑀯𑀸 𑀧𑀦 𑀧𑀼𑀘𑁆𑀙𑀺𑀢𑀩𑁆𑀩𑀸’’𑀢𑀺 𑀧𑀼𑀘𑁆𑀙𑀸𑀬 𑀤𑁄𑀲𑀁 𑀤𑀻𑀧𑁂𑀦𑁆𑀢𑁄 𑀢𑀁 𑀳𑀸𑀭𑁂𑀦𑁆𑀢𑁄 𑀑𑀕𑀺𑀮𑀺𑀢𑀼𑀫𑁆𑀧𑀺 𑀲𑀓𑁆𑀔𑀢𑀻𑀢𑀺.

𑀉𑀝𑁆𑀞𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀸 𑀧𑀯𑀢𑁆𑀢𑀺𑀬𑀸. 𑀅𑀪𑀬𑁄 𑀤𑁆𑀯𑁂 𑀫𑀕𑁆𑀕𑁂 𑀓𑀢𑀧𑀭𑀺𑀘𑀬𑁄 𑀙𑁂𑀓𑁄 𑀦𑀺𑀧𑀼𑀡𑁄 𑀯𑀸𑀤𑀲𑀻𑀮𑁄 𑀘 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀢𑁂𑀦𑀸𑀳 𑁋 ‘‘𑀲𑁄 𑀯𑀸𑀤𑀚𑁆𑀛𑀸𑀲𑀬𑀢𑀸𑀬 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 ‘𑀏𑀯𑀁, 𑀪𑀦𑁆𑀢𑁂’𑀢𑀺 𑀆𑀳𑀸’’𑀢𑀺.

𑁮𑁫. 𑀏𑀯𑀭𑀽𑀧𑀦𑁆𑀢𑀺 𑀬𑀸 𑀧𑀭𑁂𑀲𑀁 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸 𑀤𑀼𑀭𑀼𑀢𑁆𑀢𑀯𑀸𑀘𑀸, 𑀏𑀯𑀭𑀽𑀧𑀸 𑀯𑀸𑀘𑀸, 𑀦 𑀧𑀦 𑀨𑀭𑀼𑀲𑀯𑀸𑀘𑀸. 𑀨𑀭𑀼𑀲𑀯𑀸𑀘𑀸𑀬 𑀳𑀺 𑀲𑁂𑀢𑀼𑀖𑀸𑀢𑁄 𑀢𑀣𑀸𑀕𑀢𑀸𑀦𑀁. 𑀘𑁂𑀢𑀦𑀸𑀨𑀭𑀼𑀲𑀢𑀸𑀬 𑀳𑀺 𑀨𑀭𑀼𑀲𑀯𑀸𑀘𑀸 𑀇𑀘𑁆𑀙𑀺𑀢𑀸, 𑀦 𑀧𑀭𑁂𑀲𑀁 𑀅𑀧𑁆𑀧𑀺𑀬𑀢𑀸𑀫𑀢𑁆𑀢𑁂𑀦. 𑀦𑀝𑁆𑀞𑀸 𑀦𑀺𑀕𑀡𑁆𑀞𑀸 𑀑𑀕𑀺𑀮𑀺𑀓𑀸𑀤𑀺𑀲𑀫𑁆𑀫𑀢𑀲𑁆𑀲 𑀧𑀜𑁆𑀳𑀲𑁆𑀲 𑀏𑀓𑀯𑀘𑀦𑁂𑀦 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸.

𑁮𑁬. 𑀤𑀸𑀭𑀓𑀲𑁆𑀲 𑀅𑀗𑁆𑀓𑁂 𑀦𑀺𑀲𑀻𑀤𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀮𑁂𑀲𑀯𑀸𑀤𑀺𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀮𑁂𑀲𑀯𑀸𑀤𑀺𑀦𑁄𑀢𑀺 𑀙𑀮𑀯𑀸𑀤𑀺𑀦𑁄, 𑀯𑀸𑀤𑀫𑀕𑁆𑀕𑁂 𑀯𑀸 𑀅𑀧𑀭𑀺𑀧𑀼𑀡𑁆𑀡𑀢𑀸𑀬 𑀮𑁂𑀲𑀫𑀢𑁆𑀢𑁂𑀦𑁂𑀯 𑀯𑀸𑀤𑀲𑀻𑀮𑀸. 𑀑𑀲𑀝𑀲𑀗𑁆𑀕𑀸𑀫𑁄𑀢𑀺 𑀅𑀦𑁂𑀓𑀯𑀸𑀭𑀁 𑀧𑀭𑀯𑀸𑀤𑀫𑀤𑁆𑀤𑀦𑀯𑀲𑁂𑀦 𑀑𑀢𑀺𑀡𑁆𑀡𑀯𑀸𑀤𑀲𑀗𑁆𑀕𑀸𑀫𑁄. 𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀦𑀔𑁂𑀦 𑀯𑀺𑀚𑁆𑀛𑀺𑀢𑁆𑀯𑀸. 𑀇𑀫𑀫𑁂𑀯𑀸𑀢𑀺 𑀬𑁆𑀯𑀸𑀬𑀁 𑀤𑀸𑀭𑀓𑁄 𑀅𑀢𑁆𑀢𑀦𑁄 𑀯𑀸𑀤𑀪𑀗𑁆𑀕𑀧𑀭𑀺𑀳𑀭𑀡𑀢𑁆𑀣𑀁 𑀇𑀫𑀺𑀦𑀸 𑀅𑀗𑁆𑀓𑁂 𑀦𑀺𑀲𑀻𑀤𑀸𑀧𑀺𑀢𑁄, 𑀇𑀫𑀫𑁂𑀯 𑀅𑀲𑁆𑀲 𑀤𑀸𑀭𑀓𑀁 𑀉𑀧𑀫𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀯𑀸𑀤𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺. ‘‘𑀅𑀲𑁆𑀲 𑀯𑀸𑀤𑀁 𑀅𑀧𑁆𑀧𑀝𑀺𑀢𑀢𑀸𑀬 𑀉𑀧𑀫𑀸𑀬 𑀪𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸.

𑀅𑀧𑀦𑁂𑀬𑁆𑀬𑀁 𑀅𑀲𑁆𑀲 𑀅𑀳𑀦𑁆𑀢𑀺 𑀅𑀲𑁆𑀲 𑀤𑀸𑀭𑀓𑀲𑁆𑀲 𑀫𑀼𑀔𑀢𑁄 𑀅𑀳𑀁 𑀢𑀁 𑀅𑀧𑀦𑁂𑀬𑁆𑀬𑀁. 𑀅𑀪𑀽𑀢𑀢𑁆𑀣𑁄𑀯 𑀅𑀪𑀽𑀢𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀢𑀺 𑀆𑀳 ‘‘𑀅𑀪𑀽𑀢𑀦𑁆𑀢𑀺 𑀅𑀪𑀽𑀢𑀢𑁆𑀣’’𑀦𑁆𑀢𑀺. 𑀅𑀢𑀘𑁆𑀙𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀢𑀘𑁆𑀙𑀦𑁆𑀢𑀺 𑀦 𑀢𑀘𑁆𑀙’’𑀦𑁆𑀢𑀺. 𑀅𑀪𑀽𑀢𑀦𑁆𑀢𑀺 𑀯𑀸 𑀅𑀲𑀦𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀁. 𑀅𑀢𑀘𑁆𑀙𑀦𑁆𑀢𑀺 𑀅𑀢𑀣𑀸𑀓𑀸𑀭𑀁. 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑁂𑀦, 𑀲𑀫𑁆𑀧𑀭𑀸𑀬𑀺𑀓𑁂𑀦 𑀯𑀸 𑀅𑀦𑀢𑁆𑀣𑁂𑀦 𑀲𑀁𑀳𑀺𑀢𑀁, 𑀅𑀦𑀢𑁆𑀣𑁂 𑀯𑀸 𑀲𑀁𑀳𑀺𑀢𑀁, 𑀦 𑀅𑀢𑁆𑀣𑁄𑀢𑀺 𑀯𑀸 𑀅𑀦𑀢𑁆𑀣𑁄, 𑀅𑀢𑁆𑀣𑀲𑁆𑀲 𑀧𑀝𑀺𑀧𑀓𑁆𑀔𑁄 𑀲𑀪𑀸𑀯𑁄, 𑀢𑁂𑀦 𑀲𑀁𑀳𑀺𑀢𑀦𑁆𑀢𑀺 𑀅𑀦𑀢𑁆𑀣𑀲𑀁𑀳𑀺𑀢𑀁, 𑀧𑀺𑀲𑀼𑀡𑀯𑀸𑀘𑀁 𑀲𑀫𑁆𑀨𑀧𑁆𑀧𑀮𑀸𑀧𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀢𑁆𑀣 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑁆𑀲 𑀕𑀳𑀺𑀢𑀢𑀸 𑀤𑀝𑁆𑀞𑀩𑁆𑀩𑀸.

𑀤𑀼𑀧𑁆𑀧𑀬𑀼𑀢𑁆𑀢𑁄𑀢𑀺 𑀤𑀼𑀧𑁆𑀧𑀝𑀺𑀧𑀦𑁆𑀦𑁄. 𑀦 𑀢𑀁 𑀢𑀣𑀸𑀕𑀢𑁄 𑀪𑀸𑀲𑀢𑀺 𑀅𑀪𑀽𑀢𑀢𑀸𑀤𑀺𑀤𑁄𑀲𑀤𑀼𑀝𑁆𑀞𑀢𑁆𑀢𑀸. 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀦 𑀪𑀸𑀲𑀢𑀺 𑀪𑀽𑀢𑀢𑁆𑀣𑁂𑀧𑀺 𑀅𑀦𑀢𑁆𑀣𑀲𑀁𑀳𑀺𑀢𑀢𑀸𑀤𑀺𑀤𑁄𑀲𑀤𑀼𑀝𑁆𑀞𑀢𑁆𑀢𑀸.

𑀞𑀸𑀦𑀁 𑀓𑀸𑀭𑀡𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀞𑀸𑀦𑀺𑀬𑀸 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸, 𑀦 𑀞𑀸𑀦𑀺𑀬𑀸𑀢𑀺 𑀅𑀝𑁆𑀞𑀸𑀦𑀺𑀬𑀸, 𑀦𑀺𑀓𑁆𑀓𑀸𑀭𑀡𑀸 𑀅𑀬𑀼𑀢𑁆𑀢𑀺𑀬𑀼𑀢𑁆𑀢𑀸, 𑀲𑀸 𑀏𑀯 𑀓𑀣𑀸𑀢𑀺 𑀅𑀝𑁆𑀞𑀸𑀦𑀺𑀬𑀓𑀣𑀸. 𑀅𑀢𑁆𑀢𑀧𑀘𑁆𑀘𑀓𑁆𑀔𑀓𑀣𑀁 𑀓𑀣𑁂𑀫𑀸𑀢𑀺 𑀅𑀢𑁆𑀢𑀦𑀸 𑀏𑀯 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀫𑀸𑀦𑀁 𑀙𑀮𑀓𑀣𑀁 𑀓𑀣𑁂𑀫.

𑀕𑀸𑀫𑀺𑀓𑀫𑀳𑀮𑁆𑀮𑀓𑁄 ‘‘𑀇𑀫𑁂 𑀫𑀁 𑀯𑀜𑁆𑀘𑁂𑀢𑀼𑀓𑀸𑀫𑀸, 𑀅𑀳𑀫𑁂𑀯 𑀤𑀸𑀦𑀺 𑀇𑀫𑁂 𑀯𑀜𑁆𑀘𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀫𑀸𑀳. ‘‘𑀦 𑀫𑀬𑀁 𑀤𑀸𑀲𑀸’’𑀢𑀺𑀧𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼 𑀧𑀼𑀩𑁆𑀩𑁂 𑀢𑀣𑀸𑀓𑀢𑀺𑀓𑀸𑀬 𑀓𑀢𑀢𑁆𑀢𑀸.

𑀢𑀢𑀺𑀬𑀁 𑀢𑀢𑀺𑀬𑀫𑁂𑀯𑀸𑀢𑀺 𑀤𑁆𑀯𑀻𑀲𑀼𑀧𑀺 𑀧𑀓𑁆𑀔𑁂𑀲𑀼 𑀢𑀢𑀺𑀬𑀁 𑀢𑀢𑀺𑀬𑀫𑁂𑀯 𑀯𑀸𑀘𑀁. 𑀪𑀸𑀲𑀺𑀢𑀩𑁆𑀩𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀬𑀲𑁆𑀲 𑀬𑀤𑀸 𑀬𑀣𑀸 𑀪𑀸𑀲𑀺𑀢𑀩𑁆𑀩𑀁, 𑀢𑀲𑁆𑀲 𑀢𑀤𑀸 𑀢𑀣𑁂𑀯 𑀘 𑀪𑀸𑀲𑀦𑀢𑁄 𑀪𑀸𑀲𑀺𑀢𑀩𑁆𑀩𑀁 𑀓𑀸𑀭𑀡𑀁 𑀪𑀸𑀲𑀺𑀢𑀩𑁆𑀩𑀓𑀸𑀮𑀜𑁆𑀘 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀪𑀸𑀲𑀢𑀺.

𑁮𑁭. 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀜𑀸𑀡𑁂𑀦𑀸𑀢𑀺 𑀞𑀸𑀦𑁂 𑀏𑀯 𑀉𑀧𑁆𑀧𑀚𑁆𑀚𑀦𑀓𑀜𑀸𑀡𑁂𑀦. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀭𑀡𑁂 𑀢𑀲𑁆𑀲 𑀢𑀁 𑀢𑀁 𑀅𑀯𑀢𑁆𑀣𑀸𑀬 𑀉𑀧𑁆𑀧𑀚𑁆𑀚𑀦𑀓𑀜𑀸𑀡𑁂𑀦, 𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀢𑁄 𑀅𑀯𑀩𑀼𑀚𑁆𑀛𑀦𑀲𑀪𑀸𑀯𑁄𑀢𑀺 𑀥𑀫𑁆𑀫𑀲𑀪𑀸𑀯𑁄. 𑀥𑀫𑁆𑀫𑁂 𑀲𑀪𑀸𑀯𑀥𑀫𑁆𑀫𑁂 𑀅𑀦𑀯𑀲𑁂𑀲𑁂 𑀯𑀸 𑀬𑀸𑀣𑀸𑀯𑀢𑁄 𑀉𑀧𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑀥𑀸𑀢𑀼, 𑀲𑀩𑁆𑀩𑀜𑁆𑀜𑀼𑀢𑀸. 𑀢𑁂𑀦𑀸𑀳 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀦𑁆𑀢𑀺 𑀲𑀩𑁆𑀩𑀁 𑀜𑁂𑀬𑁆𑀬𑀥𑀫𑁆𑀫𑀁 𑀲𑀼𑀝𑁆𑀞𑀼 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦, 𑀲𑀼𑀝𑁆𑀞𑀼 𑀧𑀝𑀺𑀯𑀺𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀳𑀢𑁆𑀣𑀕𑀢𑀁 𑀪𑀕𑀯𑀢𑁄’’𑀢𑀺. 𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦 𑀧𑀭𑀺𑀦𑀺𑀝𑁆𑀞𑀺𑀢𑀸𑀢𑀺 𑀓𑀣𑀸𑀧𑀭𑀺𑀯𑀺𑀪𑀸𑀕𑁂𑀦 𑀅𑀬𑀫𑁂𑀯 𑀤𑁂𑀲𑀦𑀸 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀘𑁆𑀘𑀓𑁆𑀔𑀸𑀲𑀻𑀢𑀺.

𑀅𑀪𑀬𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.