𑁭. 𑀓𑀼𑀓𑁆𑀓𑀼𑀭𑀯𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀓𑁄𑀮𑀺𑀬𑁂𑀲𑀽𑀢𑀺 𑀩𑀳𑀼𑀯𑀘𑀦𑀯𑀲𑁂𑀦𑀸𑀬𑀁 𑀧𑀸𑀴𑀺 𑀆𑀕𑀢𑀸. 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂𑀢𑀺 𑀅𑀢𑁆𑀣𑀯𑀘𑀦𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑁄 𑀳𑀻’’𑀢𑀺𑀆𑀤𑀺. 𑀦 𑀦𑀺𑀬𑀫𑀺𑀢𑁄𑀢𑀺 ‘‘𑀅𑀲𑀼𑀓𑀫𑁆𑀳𑀺 𑀦𑀸𑀫 𑀯𑀺𑀳𑀸𑀭𑁂’’𑀢𑀺 𑀦 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀲𑁂𑀦𑀸𑀲𑀦𑁂𑀬𑁂𑀯𑀸𑀢𑀺 𑀆𑀯𑀸𑀲𑁂𑀬𑁂𑀯, 𑀦 𑀭𑀼𑀓𑁆𑀔𑀫𑀽𑀮𑀸𑀤𑀺𑀓𑁂. 𑀯𑁂𑀲𑀓𑀺𑀭𑀺𑀬𑀸 𑀖𑀸𑀲𑀕𑁆𑀕𑀳𑀡𑀸𑀤𑀺𑀦𑀸 𑀲𑀫𑀸𑀤𑀸𑀢𑀩𑁆𑀩𑀝𑁆𑀞𑁂𑀦 𑀕𑁄𑀯𑀢𑀁, 𑀢𑀲𑁆𑀫𑀺𑀁 𑀦𑀺𑀬𑀼𑀢𑁆𑀢𑁄 𑀕𑁄𑀯𑀢𑀺𑀓𑁄. 𑀢𑁂𑀦𑀸𑀳 ‘‘𑀲𑀫𑀸𑀤𑀺𑀦𑁆𑀦𑀕𑁄𑀯𑀢𑁄’’𑀢𑀺. 𑀬𑀁 𑀲𑀦𑁆𑀥𑀸𑀬𑀸𑀳𑀼 𑀯𑁂𑀤𑀯𑁂𑀤𑀺𑀦𑁄 𑁋 ‘‘𑀕𑀘𑁆𑀙𑀁 𑀪𑀓𑁆𑀔𑁂𑀢𑀺, 𑀢𑀺𑀝𑁆𑀞𑀁 𑀫𑀼𑀢𑁆𑀢𑁂𑀢𑀺, 𑀉𑀧𑀸𑀳𑀸 𑀉𑀤𑀓𑀁 𑀥𑀽𑀧𑁂𑀢𑀺, 𑀢𑀺𑀡𑀸𑀦𑀺 𑀙𑀺𑀦𑁆𑀤𑀢𑀻’’𑀢𑀺𑀆𑀤𑀺. 𑀅𑀬𑀁 𑀅𑀘𑁂𑀮𑁄𑀢𑀺 𑀅𑀘𑁂𑀮𑀓𑀧𑀩𑁆𑀩𑀚𑁆𑀚𑀸𑀯𑀲𑁂𑀦 𑀅𑀘𑁂𑀮𑁄, 𑀧𑀼𑀭𑀺𑀫𑁄 𑀧𑀦 𑀕𑁄𑀯𑀢𑀺𑀓𑁄 𑀓𑀼𑀓𑁆𑀓𑀼𑀭𑀯𑀢𑀺𑀓𑁄𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀧𑀮𑀺𑀓𑀼𑀡𑁆𑀞𑀺𑀢𑁆𑀯𑀸𑀢𑀺 𑀉𑀪𑁄 𑀳𑀢𑁆𑀣𑁂 𑀉𑀪𑁄 𑀧𑀸𑀤𑁂 𑀘 𑀲𑀫𑀺𑀜𑁆𑀚𑀺𑀢𑁆𑀯𑀸. ‘‘𑀉𑀓𑁆𑀓𑀼𑀝𑀺𑀓𑁄 𑀳𑀼𑀢𑁆𑀯𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀕𑀫𑀦𑀁 𑀦𑀺𑀧𑁆𑀨𑀚𑁆𑀚𑀦𑀁 𑀕𑀢𑀻𑀢𑀺 𑀆𑀳 𑁋 ‘‘𑀓𑀸 𑀕𑀢𑀻𑀢𑀺 𑀓𑀸 𑀦𑀺𑀧𑁆𑀨𑀢𑁆𑀢𑀻’’𑀢𑀺. 𑀦𑀺𑀧𑁆𑀨𑀢𑁆𑀢𑀺𑀧𑀭𑀺𑀬𑁄𑀲𑀸𑀦𑀸 𑀳𑀺 𑀯𑀺𑀧𑀸𑀓𑀥𑀫𑁆𑀫𑀧𑁆𑀧𑀯𑀢𑁆𑀢𑀺. 𑀓𑀢𑀽𑀧𑀘𑀺𑀢𑀓𑀫𑁆𑀫𑀯𑀲𑁂𑀦 𑀅𑀪𑀺𑀲𑀫𑁆𑀧𑀭𑁂𑀢𑀺 𑀏𑀢𑁆𑀣𑀸𑀢𑀺 𑀅𑀪𑀺𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄. 𑀢𑀢𑁆𑀣𑀲𑁆𑀲 𑀘 𑀦𑀺𑀧𑁆𑀨𑀢𑁆𑀢𑀺𑀁 𑀧𑀼𑀘𑁆𑀙𑀢𑀻𑀢𑀺 𑀆𑀳 𑁋 ‘‘𑀅𑀪𑀺𑀲𑀫𑁆𑀧𑀭𑀸𑀬𑀫𑁆𑀳𑀺 𑀓𑀢𑁆𑀣 𑀦𑀺𑀩𑁆𑀩𑀢𑁆𑀢𑀻’’𑀢𑀺. 𑀓𑀼𑀓𑁆𑀓𑀼𑀭𑀯𑀢𑀲𑀫𑀸𑀤𑀸𑀦𑀦𑁆𑀢𑀺 𑀓𑀼𑀓𑁆𑀓𑀼𑀭𑀪𑀸𑀯𑀲𑀫𑀸𑀤𑀸𑀦𑀁, ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀅𑀳𑀁 𑀓𑀼𑀓𑁆𑀓𑀼𑀭𑁄’’𑀢𑀺 𑀓𑀼𑀓𑁆𑀓𑀼𑀭𑀪𑀸𑀯𑀸𑀥𑀺𑀝𑁆𑀞𑀸𑀦𑀁.

𑁭𑁯. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀬𑀢𑁆𑀢𑀓𑀸 𑀓𑀼𑀓𑁆𑀓𑀼𑀭𑀯𑀺𑀓𑀸𑀭𑀸, 𑀢𑁂𑀳𑀺 𑀧𑀭𑀺𑀧𑀼𑀡𑁆𑀡𑀁. 𑀢𑁂𑀦𑀸𑀳 ‘‘𑀅𑀦𑀽𑀦’’𑀦𑁆𑀢𑀺. 𑀅𑀩𑁆𑀩𑁄𑀓𑀺𑀡𑁆𑀡𑀦𑁆𑀢𑀺 𑀢𑁂𑀳𑀺 𑀅𑀯𑁄𑀫𑀺𑀲𑁆𑀲𑀁. 𑀓𑀼𑀓𑁆𑀓𑀼𑀭𑀸𑀘𑀸𑀭𑀦𑁆𑀢𑀺 𑀓𑀼𑀓𑁆𑀓𑀼𑀭𑀸𑀦𑀁 𑀕𑀫𑀦𑀸𑀓𑀸𑀭𑁄𑀢𑀺𑀆𑀤𑀺𑀆𑀘𑀸𑀭𑁂𑀦 𑀓𑀼𑀓𑁆𑀓𑀼𑀭𑀪𑀸𑀯𑀸𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀫𑀸𑀳. 𑀢𑀣𑀸 𑀢𑀣𑀸 𑀆𑀓𑀧𑁆𑀧𑁂𑀢𑀩𑁆𑀩𑀢𑁄 𑀆𑀓𑀧𑁆𑀧𑁄, 𑀧𑀯𑀢𑁆𑀢𑀺𑀆𑀓𑀸𑀭𑁄. 𑀲𑁄 𑀧𑀦𑁂𑀢𑁆𑀣 𑀕𑀫𑀦𑀸𑀤𑀺𑀓𑁄𑀢𑀺 𑀆𑀳 ‘‘𑀓𑀼𑀓𑁆𑀓𑀼𑀭𑀸𑀦𑀁 𑀕𑀫𑀦𑀸𑀓𑀸𑀭𑁄’’𑀢𑀺𑀆𑀤𑀺. 𑀆𑀘𑀸𑀭𑁂𑀦𑀸𑀢𑀺 𑀓𑀼𑀓𑁆𑀓𑀼𑀭𑀲𑀻𑀮𑀸𑀘𑀸𑀭𑁂𑀦. 𑀯𑀢𑀲𑀫𑀸𑀤𑀸𑀦𑁂𑀦𑀸𑀢𑀺 𑀓𑀼𑀓𑁆𑀓𑀼𑀭𑀯𑀢𑀸𑀥𑀺𑀝𑁆𑀞𑀸𑀦𑁂𑀦. 𑀓𑀼𑀓𑁆𑀓𑀼𑀭𑀘𑀭𑀺𑀬𑀸𑀤𑀺𑀬𑁂𑀯 𑀤𑀼𑀓𑁆𑀓𑀭𑀢𑀧𑀘𑀭𑀡𑀁. 𑀢𑁂𑀦 𑀕𑀢𑀺𑀯𑀺𑀧𑀭𑀺𑀬𑁂𑀲𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀮𑀤𑁆𑀥𑀺. 𑀅𑀲𑁆𑀲 𑀓𑀼𑀓𑁆𑀓𑀼𑀭𑀯𑀢𑀺𑀓𑀲𑁆𑀲 𑀅𑀜𑁆𑀜𑀸 𑀕𑀢𑀺 𑀦𑀢𑁆𑀣𑀻𑀢𑀺 𑀇𑀢𑀭𑀕𑀢𑀺𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀇𑀢𑀭𑀸𑀲𑀁 𑀧𑀦 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀻𑀢𑀺. 𑀦𑀺𑀧𑀚𑁆𑀚𑀫𑀸𑀦𑀦𑁆𑀢𑀺 𑀯𑀢𑀲𑀻𑀮𑀸𑀤𑀻𑀦𑀁 𑀲𑀁𑀕𑁄𑀧𑀦𑀯𑀲𑁂𑀦 𑀲𑀺𑀚𑁆𑀛𑀫𑀸𑀦𑀁. 𑀬𑀣𑀸 𑀲𑀓𑀫𑁆𑀫𑀓𑀥𑀸𑀢𑀼𑀲𑀤𑁆𑀤𑀸 𑀅𑀢𑁆𑀣𑀯𑀺𑀲𑁂𑀲𑀯𑀲𑁂𑀦 𑀅𑀓𑀫𑁆𑀫𑀓𑀸 𑀳𑁄𑀦𑁆𑀢𑀺 ‘‘𑀯𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀯𑀺𑀩𑀼𑀤𑁆𑀥𑁄 𑀓𑀫𑀮𑀲𑀡𑁆𑀟𑁄’’𑀢𑀺, 𑀏𑀯𑀁 𑀅𑀢𑁆𑀣𑀯𑀺𑀲𑁂𑀲𑀯𑀲𑁂𑀦 𑀅𑀓𑀫𑁆𑀫𑀓𑀸𑀧𑀺 𑀲𑀓𑀫𑁆𑀫𑀓𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀧𑀭𑀺𑀤𑁂𑀯𑀸𑀫𑀺 𑀦 𑀅𑀦𑀼𑀢𑁆𑀣𑀼𑀦𑀸𑀫𑀻’’𑀢𑀺𑀆𑀤𑀺𑀫𑀸𑀳. 𑀅𑀦𑀼𑀢𑁆𑀣𑀼𑀦𑀲𑀤𑁆𑀤𑁄 𑀘 𑀲𑀓𑀫𑁆𑀫𑀓𑀯𑀲𑁂𑀦 𑀧𑀬𑀼𑀚𑁆𑀚𑀢𑀺 ‘‘𑀧𑀼𑀭𑀸𑀡𑀸𑀦𑀺 𑀅𑀦𑀼𑀢𑁆𑀣𑀼𑀦’’𑀦𑁆𑀢𑀺𑀆𑀤𑀻𑀲𑀼. 𑀅𑀬𑀜𑁆𑀘𑁂𑀢𑁆𑀣 𑀧𑀬𑁄𑀕𑁄𑀢𑀺 𑀇𑀫𑀺𑀦𑀸 𑀕𑀸𑀣𑀸𑀬𑀜𑁆𑀘 𑀅𑀦𑀼𑀢𑁆𑀣𑀼𑀦𑀦𑀭𑁄𑀤𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁮𑁦. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀇𑀫𑀺𑀦𑀸 𑀕𑁄𑀯𑀢𑀦𑁆𑀢𑀺 𑀕𑁄𑀯𑀢𑀲𑀫𑀸𑀤𑀸𑀦𑀁. 𑀕𑁄𑀲𑀻𑀮𑀦𑁆𑀢𑀺 𑀕𑀯𑀸𑀘𑀸𑀭𑀁. 𑀕𑁄𑀘𑀺𑀢𑁆𑀢𑀦𑁆𑀢𑀺 ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀕𑁄𑀳𑀺 𑀓𑀸𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀕𑁆𑀯𑀸𑀓𑀧𑁆𑀧𑁂 𑀧𑀦 𑀯𑀢𑁆𑀢𑀩𑁆𑀩𑀁 𑀅𑀯𑀲𑀺𑀝𑁆𑀞𑀁 ‘‘𑀓𑀼𑀓𑁆𑀓𑀼𑀭𑀸𑀓𑀧𑁆𑀧𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸’’𑀢𑀺 𑀇𑀫𑀺𑀦𑀸𑀯 𑀅𑀢𑀺𑀤𑀺𑀝𑁆𑀞𑀁, 𑀯𑀺𑀲𑀺𑀝𑁆𑀞𑀜𑁆𑀘 𑀬𑀣𑀸 𑀧𑀦 𑀢𑀢𑁆𑀣𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀓𑀼𑀓𑁆𑀓𑀼𑀭𑀯𑀢𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀫𑁂𑀯.

𑁮𑁧. 𑀏𑀓𑀘𑁆𑀘𑀓𑀫𑁆𑀫𑀓𑀺𑀭𑀺𑀬𑀸𑀯𑀲𑁂𑀦𑀸𑀢𑀺 𑀏𑀓𑀘𑁆𑀘𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀓𑀼𑀲𑀮𑀓𑀫𑁆𑀫𑀲𑁆𑀲 𑀓𑀭𑀡𑀧𑁆𑀧𑀲𑀗𑁆𑀕𑁂𑀦. 𑀇𑀫𑁂𑀲𑀦𑁆𑀢𑀺 𑀕𑁄𑀯𑀢𑀺𑀓𑀓𑀼𑀓𑁆𑀓𑀼𑀭𑀯𑀢𑀺𑀓𑀸𑀦𑀁. 𑀓𑀺𑀭𑀺𑀬𑀸𑀢𑀺 𑀕𑁄𑀯𑀢𑀪𑀸𑀯𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀓𑀺𑀭𑀺𑀬𑀸. 𑀧𑀸𑀓𑀝𑀸 𑀪𑀯𑀺𑀲𑁆𑀲𑀢𑀻𑀢𑀺 ‘‘𑀇𑀫𑀲𑁆𑀫𑀺𑀁 𑀓𑀫𑁆𑀫𑀘𑀢𑀼𑀓𑁆𑀓𑁂 𑀇𑀤𑀁 𑀦𑀸𑀫 𑀓𑀫𑁆𑀫𑀁 𑀪𑀚𑀢𑀻’’𑀢𑀺 𑀧𑀸𑀓𑀝𑀸 𑀪𑀯𑀺𑀲𑁆𑀲𑀢𑀺.

𑀓𑀸𑀴𑀓𑀦𑁆𑀢𑀺 (𑀅. 𑀦𑀺. 𑀝𑀻. 𑁨.𑁪.𑁨𑁩𑁨) 𑀫𑀮𑀻𑀦𑀁, 𑀘𑀺𑀢𑁆𑀢𑀲𑁆𑀲 𑀅𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀧𑀦𑁂𑀢𑁆𑀣 𑀓𑀫𑁆𑀫𑀧𑀣𑀲𑀫𑁆𑀧𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣’’𑀦𑁆𑀢𑀺. 𑀓𑀡𑁆𑀳𑀦𑁆𑀢𑀺 𑀓𑀡𑁆𑀳𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀯𑀸 𑀓𑀡𑁆𑀳𑀁. 𑀢𑁂𑀦𑀸𑀳 ‘‘𑀓𑀡𑁆𑀳𑀯𑀺𑀧𑀸𑀓’’𑀦𑁆𑀢𑀺. 𑀅𑀧𑀸𑀬𑀽𑀧𑀧𑀢𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀘 𑀤𑁄𑀪𑀕𑁆𑀕𑀺𑀬𑀁 𑀓𑀡𑁆𑀳𑀯𑀺𑀧𑀸𑀓𑁄, 𑀬𑀣𑀸 𑀢𑀫𑀪𑀸𑀯𑁄 𑀯𑀼𑀢𑁆𑀢𑁄, 𑀏𑀓𑀢𑁆𑀢𑀦𑀺𑀤𑁆𑀤𑁂𑀲𑁂𑀦 𑀧𑀦 ‘‘𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀦𑀢𑁄’’𑀢𑀺 𑀯𑀼𑀢𑁆𑀢𑀁, 𑀦𑀺𑀩𑁆𑀩𑀢𑁆𑀢𑀸𑀧𑀦𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀓𑀦𑁆𑀢𑀺 𑀑𑀤𑀸𑀢𑀁, 𑀘𑀺𑀢𑁆𑀢𑀲𑁆𑀲 𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀦𑁆𑀢𑀺 𑀅𑀢𑁆𑀣𑁄, 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑁄 𑀯𑀸 𑀲𑀼𑀓𑁆𑀓𑀁. 𑀢𑁂𑀦𑀸𑀳 ‘‘𑀲𑀼𑀓𑁆𑀓𑀯𑀺𑀧𑀸𑀓’’𑀦𑁆𑀢𑀺. 𑀲𑀕𑁆𑀕𑀽𑀧𑀧𑀢𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀲𑁄𑀪𑀕𑁆𑀕𑀺𑀬𑀜𑁆𑀘 𑀲𑀼𑀓𑁆𑀓𑀯𑀺𑀧𑀸𑀓𑁄, 𑀬𑀣𑀸 𑀘 𑀚𑁄𑀢𑀺𑀪𑀸𑀯𑁄 𑀯𑀼𑀢𑁆𑀢𑁄, 𑀏𑀓𑀢𑁆𑀢𑀦𑀺𑀤𑁆𑀤𑁂𑀲𑁂𑀦 𑀧𑀦 ‘‘𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑀢𑁄’’𑀢𑀺 𑀯𑀼𑀢𑁆𑀢𑀁, 𑀦𑀺𑀩𑁆𑀩𑀢𑁆𑀢𑀸𑀧𑀦𑀢𑁄𑀢𑀺 𑀅𑀢𑁆𑀣𑁄, 𑀯𑁄𑀫𑀺𑀲𑁆𑀲𑀓𑀓𑀫𑁆𑀫𑀦𑁆𑀢𑀺 𑀓𑀸𑀮𑁂𑀦 𑀓𑀡𑁆𑀳𑀁, 𑀓𑀸𑀮𑁂𑀦 𑀲𑀼𑀓𑁆𑀓𑀦𑁆𑀢𑀺 𑀏𑀯𑀁 𑀫𑀺𑀲𑁆𑀲𑀓𑀯𑀲𑁂𑀦 𑀓𑀢𑀓𑀫𑁆𑀫𑀁. ‘‘𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓’’𑀦𑁆𑀢𑀺 𑀯𑀢𑁆𑀯𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀺𑀲𑁆𑀲𑀓𑀓𑀫𑁆𑀫𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀲𑁆𑀲 𑀓𑀡𑁆𑀳𑀲𑀼𑀓𑁆𑀓𑀲𑀫𑀜𑁆𑀜𑀸 𑀓𑀡𑁆𑀳𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑀸𑀬𑀸𑀢𑀺, 𑀅𑀧𑀘𑁆𑀘𑀬𑀕𑀸𑀫𑀺𑀢𑀸𑀬 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀫𑁆𑀫𑀓𑁆𑀔𑀬𑀓𑀭𑀓𑀫𑁆𑀫𑀲𑁆𑀲 𑀇𑀥 𑀲𑀼𑀓𑁆𑀓𑀧𑀭𑀺𑀬𑀸𑀬𑁄𑀧𑀺 𑀦 𑀇𑀘𑁆𑀙𑀺𑀢𑁄𑀢𑀺 𑀆𑀳 𑁋 ‘‘𑀉𑀪𑀬…𑀧𑁂… 𑀅𑀲𑀼𑀓𑁆𑀓𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀉𑀪𑀬𑀯𑀺𑀧𑀸𑀓𑀲𑁆𑀲𑀸𑀢𑀺 𑀬𑀣𑀸𑀥𑀺𑀕𑀢𑀲𑁆𑀲 𑀯𑀺𑀧𑀸𑀓𑀲𑁆𑀲. 𑀲𑀫𑁆𑀧𑀢𑁆𑀢𑀺𑀪𑀯𑀧𑀭𑀺𑀬𑀸𑀧𑀦𑁆𑀦𑁄 𑀳𑀺 𑀯𑀺𑀧𑀸𑀓𑁄 𑀇𑀥 ‘‘𑀲𑀼𑀓𑁆𑀓𑀯𑀺𑀧𑀸𑀓𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀅𑀘𑁆𑀘𑀦𑁆𑀢𑀧𑀭𑀺𑀲𑀼𑀤𑁆𑀥𑁄.

𑀲𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑁂𑀦 𑀤𑀼𑀓𑁆𑀔𑁂𑀦 𑀲𑀤𑀼𑀓𑁆𑀔𑀁, 𑀤𑀼𑀓𑁆𑀔𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀅𑀢𑁆𑀣𑁄. ‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑁂𑀢𑀦𑀸 𑀥𑀼𑀭𑀁, 𑀉𑀧𑀸𑀮𑀺𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁫𑁬) 𑀓𑀫𑁆𑀫’’𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁆𑀧𑀺 𑀅𑀢𑁆𑀣𑀁 𑀇𑀥 𑀲𑀸𑀥𑀬𑀢𑀺 𑀯𑀺𑀚𑀸𑀦𑀦𑀢𑁆𑀣𑀁. 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 𑀆𑀬𑀽𑀳𑀺𑀢𑁆𑀯𑀸. 𑀢𑀁 𑀧𑀦 𑀧𑀘𑁆𑀘𑀬𑀲𑀫𑀯𑀸𑀬𑀲𑀺𑀤𑁆𑀥𑀺𑀢𑁄 𑀲𑀁𑀓𑀟𑁆𑀠𑀦𑀁 𑀧𑀺𑀡𑁆𑀟𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀆𑀳 𑁋 ‘‘𑀲𑀗𑁆𑀓𑀟𑁆𑀠𑀺𑀢𑁆𑀯𑀸, 𑀧𑀺𑀡𑁆𑀟𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺, 𑀲𑀤𑀼𑀓𑁆𑀔𑀁 𑀮𑁄𑀓𑀦𑁆𑀢𑀺 𑀅𑀧𑀸𑀬𑀮𑁄𑀓𑀫𑀸𑀳. 𑀯𑀺𑀧𑀸𑀓𑀨𑀲𑁆𑀲𑀸𑀢𑀺 𑀨𑀲𑁆𑀲𑀲𑀻𑀲𑁂𑀦 𑀢𑀢𑁆𑀣 𑀯𑀺𑀧𑀸𑀓𑀧𑀯𑀢𑁆𑀢𑀫𑀸𑀳. 𑀪𑀽𑀢𑀓𑀫𑁆𑀫𑀢𑁄𑀢𑀺 𑀦𑀺𑀩𑁆𑀩𑀢𑁆𑀢𑀓𑀫𑁆𑀫𑀢𑁄 𑀅𑀢𑁆𑀢𑀦𑀸 𑀓𑀢𑀽𑀧𑀘𑀺𑀢𑀓𑀫𑁆𑀫𑀢𑁄. 𑀬𑀣𑀸𑀪𑀽𑀢𑀦𑁆𑀢𑀺 𑀬𑀸𑀤𑀺𑀲𑀁. 𑀓𑀫𑁆𑀫𑀲𑀪𑀸𑀕𑀯𑀲𑁂𑀦𑀸𑀢𑀺 𑀓𑀫𑁆𑀫𑀲𑀭𑀺𑀓𑁆𑀔𑀓𑀯𑀲𑁂𑀦. 𑀉𑀧𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀧𑀤𑀸𑀤𑀺𑀪𑁂𑀤𑀸 𑀉𑀧𑀧𑀢𑁆𑀢𑀺. 𑀓𑀫𑁆𑀫𑁂𑀦 𑀯𑀺𑀬 𑀯𑀼𑀢𑁆𑀢𑀸𑀢𑀺 𑀬𑀁 𑀓𑀭𑁄𑀢𑀺, 𑀢𑁂𑀦 𑀉𑀧𑀧𑀚𑁆𑀚𑀢𑀻𑀢𑀺 𑀏𑀓𑀓𑀫𑁆𑀫𑁂𑀦𑁂𑀯 𑀚𑀸𑀬𑀫𑀸𑀦𑀸 𑀯𑀺𑀬 𑀯𑀼𑀢𑁆𑀢𑀸 𑀅𑀧𑀤𑀸𑀤𑀺𑀪𑁂𑀤𑀸. 𑀉𑀧𑀧𑀢𑁆𑀢𑀺 𑀘 𑀦𑀸𑀫 𑀯𑀺𑀧𑀸𑀓𑁂𑀦 𑀳𑁄𑀢𑀺 𑀯𑀺𑀧𑀸𑀓𑁂 𑀲𑀫𑁆𑀪𑀯𑀦𑁆𑀢𑁂 𑀏𑀓𑀁𑀲𑁂𑀦 𑀢𑁂 𑀉𑀧𑀧𑀢𑁆𑀢𑀺𑀯𑀺𑀲𑁂𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀢𑁂𑀦 𑀉𑀧𑀧𑀚𑁆𑀚𑀢𑀻’’𑀢𑀺 𑀉𑀧𑀧𑀢𑁆𑀢𑀺𑀓𑀫𑁆𑀫𑀳𑁂𑀢𑀼𑀓𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀬𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦 𑀦𑀺𑀩𑁆𑀩𑀢𑁆𑀢𑁄𑀢𑀺 𑀬𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦 𑀯𑀺𑀧𑀘𑁆𑀘𑀫𑀸𑀦𑁂𑀦 𑀅𑀬𑀁 𑀲𑀢𑁆𑀢𑁄 𑀦𑀺𑀩𑁆𑀩𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀁𑀓𑀫𑁆𑀫𑀯𑀺𑀧𑀸𑀓𑀨𑀲𑁆𑀲𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀪𑀽𑀢𑀸 𑀨𑀲𑁆𑀲𑀸. 𑀓𑀫𑁆𑀫𑁂𑀦 𑀤𑀸𑀢𑀩𑁆𑀩𑀁 𑀤𑀸𑀬𑀁 𑀢𑀩𑁆𑀩𑀺𑀧𑀸𑀓𑀁 𑀆𑀤𑀺𑀬𑀦𑁆𑀢𑀻𑀢𑀺 𑀓𑀫𑁆𑀫𑀤𑀸𑀬𑀸𑀤𑀸, 𑀨𑀲𑁆𑀲𑀸. 𑀓𑀫𑁆𑀫𑀲𑁆𑀲 𑀤𑀸𑀬𑀚𑁆𑀚𑀢𑀸 𑀓𑀫𑁆𑀫𑀨𑀮𑀲𑁆𑀲 𑀤𑀸𑀬𑀚𑁆𑀚𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀫𑁆𑀫𑀤𑀸𑀬𑀚𑁆𑀚𑀸’’𑀢𑀺. 𑀢𑁂𑀦𑀸𑀳 ‘‘𑀓𑀫𑁆𑀫𑀫𑁂𑀯 𑀦𑁂𑀲𑀁 𑀤𑀸𑀬𑀚𑁆𑀚𑀁 𑀲𑀦𑁆𑀢𑀓’’𑀦𑁆𑀢𑀺.

𑀢𑀺𑀲𑁆𑀲𑁄 𑀘 𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑀘𑁂𑀢𑀦𑀸𑀢𑀺 𑀇𑀤𑀁 𑀅𑀩𑁆𑀬𑀸𑀩𑀚𑁆𑀛𑀯𑁂𑀤𑀦𑀁 𑀯𑁂𑀤𑀺𑀬𑀦𑀏𑀓𑀦𑁆𑀢𑀲𑀼𑀔𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑀲𑀸𑀥𑀦𑀁. 𑀬𑀤𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀸 𑀛𑀸𑀦𑀘𑁂𑀢𑀦𑀸 𑀢𑀸𑀯 𑀳𑁄𑀢𑀼 𑀏𑀓𑀦𑁆𑀢𑀲𑀼𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄. 𑀓𑀸𑀫𑀸𑀯𑀘𑀭𑀸 𑀓𑀺𑀦𑁆𑀢𑀻𑀢𑀺 𑀓𑀸𑀫𑀸𑀯𑀘𑀭𑀸 𑀧𑀦 𑀓𑀼𑀲𑀮𑀘𑁂𑀢𑀦𑀸 𑀢𑀁𑀲𑀪𑀸𑀯𑀸𑀪𑀸𑀯𑀢𑁄 𑀓𑀺𑀦𑁆𑀢𑀺 𑀓𑁂𑀦 𑀧𑀓𑀸𑀭𑁂𑀦 𑀅𑀩𑁆𑀬𑀸𑀩𑀚𑁆𑀛𑀫𑀦𑁄𑀲𑀗𑁆𑀔𑀸𑀭𑁄 𑀦𑀸𑀫 𑀚𑀸𑀢𑁄𑀢𑀺 𑀘𑁄𑀤𑁂𑀢𑀺, 𑀇𑀢𑀭𑁄 𑀧𑀦 𑀦 𑀲𑀩𑁆𑀩𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀢𑀣𑀸 𑀕𑀳𑀺𑀢𑀸, 𑀅𑀣 𑀔𑁄 𑀏𑀓𑀘𑁆𑀘𑀸 𑀛𑀸𑀦𑀘𑁂𑀢𑀦𑀸𑀦𑀼𑀓𑀽𑀮𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀲𑀺𑀡𑀲𑀚𑁆𑀚𑀦𑀓𑀸𑀮𑁂 𑀓𑀲𑀺𑀡𑀸𑀲𑁂𑀯𑀦𑀓𑀸𑀮𑁂 𑀮𑀩𑁆𑀪𑀦𑁆𑀢𑀻’’𑀢𑀺 𑀆𑀳. 𑀢𑀢𑁆𑀣 𑀓𑀲𑀺𑀡𑀸𑀲𑁂𑀯𑀦𑀘𑁂𑀢𑀦𑀸 𑀕𑀳𑁂𑀢𑀩𑁆𑀩𑀸, 𑀲𑀸 𑀉𑀧𑀘𑀸𑀭𑀚𑁆𑀛𑀸𑀦𑀲𑁆𑀲 𑀲𑀸𑀥𑀺𑀓𑀸. 𑀢𑁂𑀦 𑀓𑀸𑀫𑀸𑀯𑀘𑀭𑀘𑁂𑀢𑀦𑀸 𑀧𑀞𑀫𑀚𑁆𑀛𑀸𑀦𑀘𑁂𑀢𑀦𑀸𑀬 𑀖𑀝𑀺𑀢𑀸𑀢𑀺 𑀓𑀲𑀺𑀡𑀲𑀚𑁆𑀚𑀦𑀘𑁂𑀢𑀦𑀸𑀧𑀺 𑀓𑀤𑀸𑀘𑀺 𑀢𑀸𑀤𑀺𑀲𑀸 𑀳𑁄𑀢𑀻𑀢𑀺 𑀕𑀳𑀺𑀢𑀸. 𑀧𑀭𑀺𑀓𑀫𑁆𑀫𑀸𑀤𑀺𑀯𑀲𑁂𑀦 𑀳𑀺 𑀧𑀯𑀢𑁆𑀢𑀸 𑀪𑀸𑀯𑀦𑀸𑀫𑀬𑀸 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀧𑀞𑀫𑀚𑁆𑀛𑀸𑀦𑀲𑁆𑀲 𑀆𑀲𑀦𑁆𑀦𑀢𑀸𑀬 𑀯𑀼𑀢𑁆𑀢𑀸. 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑁂𑀢𑀦𑀸 𑀢𑀢𑀺𑀬𑀚𑁆𑀛𑀸𑀦𑀘𑁂𑀢𑀦𑀸𑀬 𑀖𑀝𑀺𑀢𑀸𑀢𑀺 𑀇𑀤𑀁 𑀏𑀓𑀢𑁆𑀢𑀓𑀸𑀬𑀏𑀓𑀢𑁆𑀢𑀲𑀜𑁆𑀜𑀻𑀲𑀢𑁆𑀢𑀸𑀯𑀸𑀲𑀯𑀢𑀸𑀬 𑀢𑀁𑀲𑀭𑀺𑀓𑁆𑀔𑀓𑀸 𑀉𑀧𑁂𑀓𑁆𑀔𑀸𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀼𑀔𑀲𑀭𑀺𑀓𑁆𑀔𑀢𑀸, 𑀏𑀯𑀁 𑀲𑀦𑁆𑀢𑀲𑀪𑀸𑀯𑀢𑀸 𑀜𑀸𑀡𑀲𑀳𑀺𑀢𑀢𑀸 𑀘. 𑀓𑁂𑀘𑀺 𑀧𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑁂𑀢𑀦𑀸𑀦𑀼𑀕𑀼𑀡𑀸𑀢𑀺 𑀦𑀺𑀤𑀲𑁆𑀲𑁂𑀦𑁆𑀢𑀸 𑀓𑀲𑀺𑀡𑀲𑀚𑁆𑀚𑀦𑀓𑀸𑀮𑁂 𑀓𑀲𑀺𑀡𑀚𑁆𑀛𑀸𑀦𑀓𑀸𑀮𑁂 𑀓𑀲𑀺𑀡𑀸𑀲𑁂𑀯𑀦𑀓𑀸𑀮𑁂 𑀮𑀩𑁆𑀪𑀢𑀻𑀢𑀺 𑀢𑀢𑀺𑀬𑀚𑁆𑀛𑀸𑀦𑀘𑁂𑀢𑀦𑀸𑀬 𑀆𑀲𑀦𑁆𑀦𑀖𑀝𑀺𑀢𑀢𑀸 𑀯𑀼𑀢𑁆𑀢𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀸𑀲𑀁 𑀖𑀝𑀺𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀪𑀬𑀫𑀺𑀲𑁆𑀲𑀓𑀯𑀲𑁂𑀦𑀸𑀢𑀺 𑀉𑀪𑀬𑁂𑀲𑀁 𑀓𑀼𑀲𑀮𑀸𑀓𑀼𑀲𑀮𑀲𑀗𑁆𑀔𑀸𑀭𑀸𑀦𑀁 𑀲𑀼𑀔𑀤𑀼𑀓𑁆𑀔𑀸𑀦𑀜𑁆𑀘 𑀫𑀺𑀲𑁆𑀲𑀓𑀪𑀸𑀯𑀯𑀲𑁂𑀦. 𑀯𑁂𑀫𑀸𑀦𑀺𑀓𑀧𑁂𑀢𑀸𑀦𑀦𑁆𑀢𑀺 𑀇𑀤𑀁 𑀩𑀸𑀳𑀼𑀮𑁆𑀮𑀢𑁄 𑀯𑀼𑀢𑁆𑀢𑀁, 𑀇𑀢𑀭𑁂𑀲𑀫𑁆𑀧𑀺 𑀯𑀺𑀦𑀺𑀧𑀸𑀢𑀺𑀓𑀸𑀦𑀁 𑀓𑀸𑀮𑁂𑀦 𑀤𑀼𑀓𑁆𑀔𑀁 𑀳𑁄𑀢𑀺𑀬𑁂𑀯.

𑀢𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀓𑀫𑁆𑀫𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀸𑀬. 𑀬𑀸 𑀘𑁂𑀢𑀦𑀸𑀢𑀺 𑀬𑀸 𑀅𑀧𑀘𑀬𑀕𑀸𑀫𑀺𑀦𑀺𑀘𑁂𑀢𑀦𑀸. 𑀓𑀫𑁆𑀫𑀁 𑀧𑀢𑁆𑀯𑀸𑀢𑀺 𑀲𑀼𑀔𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂 𑀫𑀕𑁆𑀕𑀘𑁂𑀢𑀦𑀸𑀬 𑀅𑀜𑁆𑀜𑁄 𑀧𑀡𑁆𑀟𑀭𑀢𑀭𑁄 𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺 𑀅𑀘𑁆𑀘𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑀢𑁄. 𑀅𑀓𑀡𑁆𑀳𑀸 𑀅𑀲𑀼𑀓𑁆𑀓𑀸𑀢𑀺 𑀆𑀕𑀢𑀸𑀢𑀺 𑀏𑀢𑁆𑀣 𑀲𑀼𑀓𑁆𑀓𑀪𑀸𑀯𑀧𑀝𑀺𑀓𑁆𑀔𑁂𑀧𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀢𑁂𑀦𑀸𑀳 ‘‘𑀇𑀤𑀁 𑀧𑀦 𑀓𑀫𑁆𑀫𑀘𑀢𑀼𑀓𑁆𑀓𑀁 𑀧𑀢𑁆𑀯𑀸’’𑀢𑀺𑀆𑀤𑀺.

𑁮𑁨. 𑀅𑀦𑀺𑀬𑁆𑀬𑀸𑀦𑀺𑀓𑀧𑀓𑁆𑀔𑁂𑀢𑀺 𑀅𑀘𑁂𑀴𑀓𑀧𑀩𑁆𑀩𑀚𑁆𑀚𑀸𑀬 𑀓𑀼𑀓𑁆𑀓𑀼𑀭𑀯𑀢𑁂 𑀘. 𑀬𑁄𑀕𑁂𑀢𑀺 𑀜𑀸𑀬𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀬𑁄𑀦𑁂𑀦𑀸𑀢𑀺 𑀬𑁄 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁄 𑀢𑁂𑀦 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑁄. 𑀬𑀁 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀁 𑀲𑀫𑀸𑀤𑀺𑀬𑀺𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀬𑁄𑀚𑀦𑀸. 𑀖𑀁𑀲𑀺𑀢𑁆𑀯𑀸 𑀲𑀼𑀯𑀡𑁆𑀡𑀁 𑀯𑀺𑀬 𑀦𑀺𑀖𑀁𑀲𑁄𑀧𑁆𑀧𑀮𑁂. 𑀓𑁄𑀝𑁆𑀝𑁂𑀢𑁆𑀯𑀸 𑀳𑀢𑁆𑀣𑁂𑀦 𑀯𑀺𑀬 𑀓𑀼𑀮𑀸𑀮𑀪𑀸𑀚𑀦𑀁.

𑀯𑀽𑀧𑀓𑀝𑁆𑀞𑁄𑀢𑀺 𑀯𑀺𑀯𑀺𑀢𑁆𑀢𑁄 𑀏𑀓𑀻𑀪𑀽𑀢𑁄. 𑀧𑁂𑀲𑀺𑀢𑀢𑁆𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺 𑀧𑁂𑀲𑀺𑀢𑀢𑁆𑀢𑁄. 𑀓𑀸𑀫𑀁 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁…𑀧𑁂… 𑀯𑀺𑀳𑀸𑀲𑀻𑀢𑀺 𑀇𑀫𑀺𑀦𑀸𑀯 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀸 𑀦𑀺𑀝𑁆𑀞𑀸𑀧𑀺𑀢𑀸 𑀳𑁄𑀢𑀺, 𑀆𑀬𑀲𑁆𑀫𑀢𑁄 𑀧𑀦 𑀲𑁂𑀦𑀺𑀬𑀲𑁆𑀲 𑀧𑀝𑀺𑀧𑀢𑁆𑀢𑀺𑀓𑀺𑀢𑁆𑀢𑀦𑀧𑀭𑀫𑁂𑀢𑀁 𑀉𑀚𑀼𑀓𑀁 𑀆𑀧𑀦𑁆𑀦𑀅𑀭𑀳𑀢𑁆𑀢𑀪𑀸𑀯𑀤𑀻𑀧𑀦𑀁, 𑀬𑀤𑀺𑀤𑀁 ‘‘𑀅𑀜𑁆𑀜𑀢𑀭𑁄 𑀔𑁄 𑀧𑀦𑀸’’𑀢𑀺𑀆𑀤𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯𑀸’’𑀢𑀺. 𑀅𑀭𑀳𑀢𑁆𑀢𑀸𑀥𑀺𑀕𑀫𑁄𑀬𑁂𑀯 𑀢𑀲𑁆𑀲 𑀢𑁂𑀲𑀁 𑀅𑀩𑁆𑀪𑀦𑁆𑀢𑀭𑀢𑀸. 𑀲𑁂𑀲𑀁 𑀲𑀩𑁆𑀩𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑀼𑀓𑁆𑀓𑀼𑀭𑀯𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.