𑁬. 𑀉𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀧𑀸𑀯𑀸𑀭𑀁 𑀧𑀸𑀭𑀼𑀧𑀢𑀻𑀢𑀺 𑀧𑀸𑀯𑀸𑀭𑀺𑀓𑁄, 𑀇𑀤𑀁 𑀢𑀲𑁆𑀲 𑀓𑀼𑀮𑀲𑀫𑀼𑀤𑀸𑀕𑀢𑀁 𑀦𑀸𑀫𑀁, 𑀲𑁄 𑀧𑀦 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀦𑀕𑀭𑁂 𑀲𑁂𑀝𑁆𑀞𑀺𑀝𑁆𑀞𑀸𑀦𑁂 𑀞𑀺𑀢𑁄. 𑀢𑁂𑀦𑀸𑀳 ‘‘𑀤𑀼𑀲𑁆𑀲𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀺𑀦𑁄’’𑀢𑀺. 𑀤𑀻𑀖𑀢𑁆𑀢𑀸 𑀤𑀻𑀖𑀢𑀫𑀢𑁆𑀢𑀸. 𑀲𑁄 𑀓𑀺𑀭 𑀧𑀫𑀸𑀡𑀢𑁄 𑀉𑀧𑀯𑀘𑁆𑀙𑀬𑀢𑁄 𑀤𑀺𑀬𑀟𑁆𑀠𑀭𑀢𑀦𑀁 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑁄. 𑀏𑀯𑀁𑀮𑀤𑁆𑀥𑀦𑀸𑀫𑁄𑀢𑀺 ‘‘𑀤𑀻𑀖𑀢𑀧𑀲𑁆𑀲𑀻’’𑀢𑀺 𑀮𑀤𑁆𑀥𑀲𑀫𑀜𑁆𑀜𑁄. 𑀩𑀸𑀳𑀺𑀭𑀸𑀬𑀢𑀦𑁂𑀢𑀺 𑀢𑀺𑀢𑁆𑀣𑀺𑀬𑀲𑀫𑀬𑁂 𑀧𑀺𑀡𑁆𑀟𑀧𑀸𑀢𑁄𑀢𑀺 𑀯𑁄𑀳𑀸𑀭𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀸𑀲𑀦𑀯𑁄𑀳𑀸𑀭𑁂𑀦 ‘‘𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀲𑁆𑀲𑁂𑀢𑀻𑀢𑀺 𑀤𑁂𑀲𑁂𑀢𑀺. 𑀞𑀧𑁂𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀧𑁂𑀢𑀺. 𑀓𑀺𑀭𑀺𑀬𑀸𑀬𑀸𑀢𑀺 𑀓𑀭𑀡𑁂𑀦. 𑀧𑀯𑀢𑁆𑀢𑀺𑀬𑀸𑀢𑀺 𑀧𑀯𑀢𑁆𑀢𑀦𑁂𑀦. 𑀤𑀡𑁆𑀟𑀸𑀦𑀺 𑀧𑀜𑁆𑀜𑀧𑁂𑀢𑀻𑀢𑀺 𑀏𑀢𑁆𑀣 𑀓𑀲𑁆𑀫𑀸 𑀪𑀕𑀯𑀢𑀸 𑀆𑀤𑀺𑀢𑁄𑀯 𑀢𑀣𑀸 𑀦 𑀧𑀼𑀘𑁆𑀙𑀺𑀢𑀦𑁆𑀢𑀺? 𑀬𑀲𑁆𑀫𑀸 𑀲𑀸 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀦 𑀳𑁄𑀢𑀺, 𑀲𑀸𑀲𑀦𑁂 𑀮𑁄𑀓𑁂 𑀲𑀫𑀬𑀦𑁆𑀢𑀭𑁂𑀲𑀼 𑀘 𑀢𑀸𑀤𑀺𑀲𑁄 𑀲𑀫𑀼𑀤𑀸𑀘𑀸𑀭𑁄 𑀦𑀢𑁆𑀣𑀺, 𑀓𑁂𑀯𑀮𑀁 𑀧𑀦 𑀢𑀲𑁆𑀲𑁂𑀯 𑀦𑀺𑀕𑀡𑁆𑀞𑀲𑁆𑀲𑀸𑀬𑀁 𑀓𑁄𑀝𑁆𑀞𑀸𑀮𑀓𑀲𑀤𑀺𑀲𑁄 𑀲𑀫𑀼𑀤𑀸𑀘𑀸𑀭𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀫𑁆𑀫𑀸𑀦𑀺 𑀧𑀜𑁆𑀜𑀧𑁂𑀢𑀺’’ 𑀇𑀘𑁆𑀘𑁂𑀯𑀸𑀳. 𑀅𑀘𑀺𑀢𑁆𑀢𑀓𑀦𑁆𑀢𑀺 𑀘𑀺𑀢𑁆𑀢𑀭𑀳𑀺𑀢𑀁, 𑀘𑀺𑀢𑁆𑀢𑁂𑀦 𑀅𑀲𑀫𑀼𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦 𑀢𑀤𑀼𑀪𑀬𑀲𑁆𑀲 𑀘𑀺𑀢𑁆𑀢𑁂𑀦 𑀯𑀺𑀦𑀸 𑀲𑀫𑁆𑀪𑀯𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 𑀢𑀢𑁆𑀣 𑀦𑀺𑀤𑀲𑁆𑀲𑀦𑀫𑀸𑀳 ‘‘𑀬𑀣𑀸 𑀓𑀺𑀭𑀸’’𑀢𑀺𑀆𑀤𑀺. 𑀧𑀝𑀺𑀯𑀺𑀪𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑀢𑁄 𑀪𑀺𑀦𑁆𑀦𑀸𑀦𑀁. 𑀧𑀝𑀺𑀯𑀺𑀲𑀺𑀝𑁆𑀞𑀸𑀦𑀦𑁆𑀢𑀺 𑀯𑀺𑀲𑁂𑀲𑀦𑀧𑀤𑀯𑀲𑁂𑀦 𑀲𑀤𑁆𑀤𑀢𑁄𑀧𑀺 𑀪𑀺𑀦𑁆𑀦𑀸𑀦𑀁. 𑀯𑀘𑀦𑀁 𑀧𑀢𑀺𑀝𑁆𑀞𑀧𑁂𑀢𑀼𑀓𑀸𑀫𑁄𑀢𑀺 𑀤𑀻𑀖𑀢𑀧𑀲𑁆𑀲𑀺𑀦𑁄 𑀬𑀣𑀸𑀯𑀼𑀢𑁆𑀢𑀯𑀘𑀦𑀁 𑀧𑀢𑀺𑀝𑁆𑀞𑀧𑁂𑀢𑀼𑀓𑀸𑀫𑁄. 𑀢𑀲𑁆𑀫𑀺𑀜𑁆𑀳𑀺 𑀧𑀢𑀺𑀝𑁆𑀞𑀸𑀧𑀺𑀢𑁂 𑀢𑁂𑀦𑀧𑁆𑀧𑀲𑀗𑁆𑀕𑁂𑀦 𑀆𑀕𑀢𑁄, 𑀉𑀧𑀸𑀮𑀺 𑀕𑀳𑀧𑀢𑀺 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀥𑀫𑁆𑀫𑀁 𑀤𑀺𑀲𑁆𑀯𑀸 𑀲𑀸𑀲𑀦𑁂 𑀅𑀪𑀺𑀧𑁆𑀧𑀲𑀻𑀤𑀺𑀲𑁆𑀲𑀢𑀺.

𑀓𑀣𑀸 𑀏𑀯 𑀉𑀧𑀭𑀺 𑀯𑀸𑀤𑀸𑀭𑁄𑀧𑀦𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁄 𑀓𑀣𑀸𑀯𑀢𑁆𑀣𑀼. 𑀓𑀣𑀸𑀬𑀁 𑀧𑀢𑀺𑀝𑁆𑀞𑀧𑁂𑀲𑀻𑀢𑀺 𑀓𑀣𑀸𑀯𑀢𑁆𑀣𑀼𑀲𑁆𑀫𑀺𑀁, 𑀢𑀤𑀢𑁆𑀣𑁂 𑀯𑀸 𑀧𑀢𑀺𑀝𑁆𑀞𑀧𑁂𑀲𑀺. 𑀬𑀣𑀸 𑀢𑀁 𑀯𑀸𑀤𑀸𑀭𑁄𑀧𑀦𑀪𑀬𑁂𑀦 𑀦 𑀅𑀯𑀚𑀸𑀦𑀸𑀢𑀺, 𑀏𑀯𑀁 𑀢𑀲𑁆𑀲𑀁 𑀓𑀣𑀸𑀬𑀁, 𑀢𑀲𑁆𑀫𑀺𑀁 𑀯𑀸 𑀅𑀢𑁆𑀣𑁂 𑀤𑀻𑀖𑀢𑀧𑀲𑁆𑀲𑀺𑀁 𑀬𑀸𑀯𑀢𑀢𑀺𑀬𑀁 𑀯𑀸𑀤𑁂 𑀧𑀢𑀺𑀝𑁆𑀞𑀧𑁂𑀲𑀺. 𑀯𑀸𑀤𑀦𑁆𑀢𑀺 𑀤𑁄𑀲𑀁.

𑁫𑁭. 𑀇𑀤𑀸𑀦𑀺 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀫𑁆𑀧𑀺 𑀕𑀳𑁂𑀢𑁆𑀯𑀸 𑀓𑀸𑀬𑀓𑀫𑁆𑀫𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫𑀸𑀢𑀺𑀆𑀤𑀺 ‘‘𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸𑀬𑀸’’𑀢𑀺 𑀧𑀸𑀴𑀺𑀬𑀁 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀧𑀼𑀩𑁆𑀩𑁂 𑀧𑀦 𑀅𑀝𑁆𑀞𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸𑀢𑀺𑀆𑀤𑀺 𑀲𑀸𑀯𑀚𑁆𑀚𑀁 𑀅𑀦𑀯𑀚𑁆𑀚𑀜𑁆𑀘 𑀲𑀸𑀫𑀜𑁆𑀜𑀢𑁄 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀘𑁂𑀢𑀦𑀸 𑀦 𑀕𑀳𑀺𑀢𑀸𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀓𑀫𑁆𑀫𑀁 𑀥𑀼𑀭’’𑀦𑁆𑀢𑀺. 𑀓𑀸𑀬𑀓𑀫𑁆𑀫𑀸𑀤𑀺𑀪𑁂𑀤𑀁 𑀓𑀫𑁆𑀫𑀫𑁂𑀯 𑀥𑀼𑀭𑀁 𑀚𑁂𑀝𑁆𑀞𑀓𑀁 𑀧𑀼𑀩𑁆𑀩𑀗𑁆𑀕𑀫𑀁, 𑀦 𑀘𑁂𑀢𑀦𑀸𑀫𑀢𑁆𑀢𑀫𑁂𑀯. 𑀏𑀯𑀫𑀸𑀕𑀢𑁂𑀧𑀻𑀢𑀺 𑀓𑀫𑁆𑀫𑀸𑀦𑀻𑀢𑀺 𑀏𑀯𑀁 𑀦𑀸𑀫𑁂𑀦 𑀆𑀕𑀢𑁂𑀧𑀺 𑀘𑁂𑀢𑀦𑀸 𑀥𑀼𑀭𑀁, 𑀢𑀢𑁆𑀣 𑀘𑁂𑀢𑀦𑀁 𑀚𑁂𑀝𑁆𑀞𑀓𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀣𑀁 𑀧𑀦 𑀢𑀢𑁆𑀣 𑀓𑀫𑁆𑀫𑀦𑁆𑀢𑀺 𑀯𑀸 𑀓𑀫𑁆𑀫𑀸𑀦𑀻𑀢𑀺 𑀯𑀸 𑀆𑀕𑀢𑁂 𑀢𑁂𑀲𑀁 𑀘𑁂𑀢𑀦𑀸𑀬 𑀥𑀼𑀭𑀪𑀸𑀯𑁄𑀢𑀺 𑀆𑀳 ‘‘𑀬𑀢𑁆𑀣 𑀓𑀢𑁆𑀣𑀘𑀺…𑀧𑁂… 𑀮𑀪𑀢𑀻’’𑀢𑀺. 𑀢𑀢𑁆𑀣 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀤𑁆𑀯𑀸𑀭𑁂. 𑀲𑀸 𑀯𑀼𑀢𑁆𑀢𑀸𑀯𑀸𑀢𑀺 𑀲𑀸 𑀘𑁂𑀢𑀦𑀸 𑀯𑀼𑀢𑁆𑀢𑀸𑀯, 𑀬𑀸 𑀓𑀸𑀬𑀲𑀗𑁆𑀔𑀸𑀭𑀸𑀤𑀺𑀧𑀭𑀺𑀬𑀸𑀬𑁂𑀦 (𑀬𑀲𑁆𑀲 𑀓𑀲𑁆𑀲𑀘𑀺 𑀓𑀫𑁆𑀫𑀲𑁆𑀲 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀸𑀧𑀦𑀘𑁂𑀢𑀦𑀸) 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀢𑀤𑀕𑁆𑀕𑁂𑀦 𑀮𑁄𑀓𑀺𑀬𑀸𑀧𑀺 𑀮𑁄𑀓𑀼𑀢𑁆𑀢𑀭𑀸𑀧𑀺 𑀓𑀫𑁆𑀫𑀫𑁂𑀯, 𑀅𑀪𑀺𑀚𑁆𑀛𑀸𑀤𑀬𑁄 𑀧𑀦 𑀘𑁂𑀢𑀦𑀸𑀧𑀓𑁆𑀔𑀺𑀓𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀳𑀦𑁆𑀢𑀦𑁆𑀢𑀺 𑀓𑀝𑀼𑀓𑀨𑀮𑀁. 𑀦 𑀓𑀺𑀮𑀫𑀢𑀺 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀢𑁆𑀢𑀸 𑀧𑀝𑀺𑀜𑁆𑀜𑀸𑀬. 𑀇𑀤𑀸𑀦𑀺 𑀢𑁂𑀲𑀁 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺 𑀅𑀓𑀼𑀲𑀮𑀁 𑀧𑀢𑁆𑀯𑀸 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀳𑀦𑁆𑀢𑀦𑁆𑀢𑀺 𑀯𑀤𑀦𑁆𑀢𑁄 𑀦 𑀓𑀺𑀮𑀫𑀢𑀺, 𑀅𑀣 𑀓𑀲𑁆𑀫𑀸 𑀪𑀕𑀯𑀸 𑀇𑀥 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀫𑀳𑀸𑀲𑀸𑀯𑀚𑁆𑀚𑀁 𑀓𑀣𑁂𑀲𑀻𑀢𑀺 𑀆𑀳 ‘‘𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂’’𑀢𑀺𑀆𑀤𑀺. 𑀬𑀸𑀯𑀢𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑀦𑀫𑀢𑁆𑀢𑁂𑀦 𑀕𑀢𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀦𑁆𑀢𑁄. 𑀢𑁂𑀦𑀸𑀳 ‘‘𑀓𑀺𑀜𑁆𑀘𑀺 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀁 𑀅𑀧𑀲𑁆𑀲𑀦𑁆𑀢𑁄𑀧𑀻’’𑀢𑀺.

𑁫𑁮. 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑁄 𑀩𑀸𑀮𑀓𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀩𑀸𑀮𑀓𑀺𑀦𑀻. 𑀲𑀢𑁆𑀣𑀼𑀧𑀝𑀺𑀜𑁆𑀜𑀸𑀢𑀢𑀸𑀬 𑀦𑀺𑀕𑀡𑁆𑀞𑀸𑀦𑀁 𑀫𑀳𑀸𑀢𑀺 𑀲𑀫𑁆𑀪𑀸𑀯𑀺𑀢𑀢𑁆𑀢𑀸 𑀫𑀳𑀸𑀦𑀺𑀕𑀡𑁆𑀞𑁄.

𑁬𑁦. 𑀆𑀯𑀝𑁆𑀝𑁂𑀢𑀺 𑀧𑀼𑀭𑀺𑀫𑀸𑀓𑀸𑀭𑀢𑁄 𑀦𑀺𑀯𑀢𑁆𑀢𑁂𑀢𑀺 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀺 𑀏𑀢𑀸𑀬𑀸𑀢𑀺 𑀆𑀯𑀝𑁆𑀝𑀦𑀻, 𑀫𑀸𑀬𑀸. 𑀢𑁂𑀦𑀸𑀳 ‘‘𑀆𑀯𑀝𑁆𑀝𑁂𑀢𑁆𑀯𑀸 𑀕𑀳𑀡𑀫𑀸𑀬’’𑀦𑁆𑀢𑀺. 𑀲𑀢𑁆𑀣𑀼𑀧𑀝𑀺𑀜𑁆𑀜𑀸𑀦𑀁 𑀩𑀼𑀤𑁆𑀥𑀤𑀲𑁆𑀲𑀦𑁂 𑀘𑀺𑀢𑁆𑀢𑀫𑁂𑀯 𑀦 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸. 𑀲𑀘𑁂 𑀧𑀦 𑀲𑁄 𑀢𑀁 𑀧𑀝𑀺𑀜𑁆𑀜𑀁 𑀅𑀧𑁆𑀧𑀳𑀸𑀬 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀁 𑀉𑀧𑀕𑀘𑁆𑀙𑁂𑀬𑁆𑀬, 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑁂𑀬𑁆𑀬, 𑀢𑀲𑁆𑀫𑀸 𑀪𑀕𑀯𑀸 ‘‘𑀫𑀸 𑀅𑀬𑀁 𑀩𑀸𑀮𑁄 𑀯𑀺𑀦𑀲𑁆𑀲𑀻’’𑀢𑀺𑀆𑀤𑀺𑀢𑁄𑀯 𑀬𑀣𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀦 𑀮𑀪𑀢𑀺, 𑀢𑀣𑀸 𑀓𑀭𑁄𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀸𑀣𑀺𑀓𑀧𑀼𑀢𑁆𑀢𑀲𑀫𑀸𑀕𑀫𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺𑀦𑀺𑀬𑀸𑀫𑀫𑀸𑀳 ‘‘𑀢𑀣𑀸𑀕𑀢𑀁 𑀳𑀻’’𑀢𑀺𑀆𑀤𑀺. 𑀆𑀕𑀫𑀸 𑀦𑀼 𑀔𑁄 𑀇𑀥 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁.

𑁬𑁧. 𑀯𑀘𑀻𑀲𑀘𑁆𑀘𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀬𑀣𑀸𑀧𑀝𑀺𑀜𑁆𑀜𑀸𑀢𑀸𑀬 𑀧𑀝𑀺𑀜𑁆𑀜𑀸𑀬 𑀞𑀢𑁆𑀯𑀸.

𑁬𑁨. 𑀲𑀻𑀢𑁄𑀤𑀓𑁂 𑀅𑀫𑀢𑀸 𑀧𑀸𑀡𑀸 𑀧𑀸𑀦𑀓𑀸𑀮𑁂 𑀧𑀦 𑀫𑀭𑀦𑁆𑀢𑀺, 𑀢𑁂𑀧𑀺 𑀢𑁂𑀦 𑀲𑀻𑀢𑁄𑀤𑀓𑀧𑀭𑀺𑀪𑁄𑀕𑁂𑀦 𑀫𑀸𑀭𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀧𑀲𑁆𑀲𑀺𑀦𑀸 𑀦𑀸𑀫 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀻𑀢𑁄𑀤𑀓𑀁 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀢𑁂𑀲𑀁 𑀮𑀤𑁆𑀥𑀺. 𑀧𑀸𑀓𑀢𑀺𑀓𑀁 𑀯𑀸 𑀉𑀤𑀓𑀁 𑀲𑀢𑁆𑀢𑁄𑀢𑀺 𑀧𑀼𑀭𑀸𑀢𑀦𑀸𑀦𑀁 𑀦𑀺𑀕𑀡𑁆𑀞𑀸𑀦𑀁 𑀮𑀤𑁆𑀥𑀺. 𑀢𑁂𑀦𑀸𑀳 ‘‘𑀲𑀢𑁆𑀢𑀲𑀜𑁆𑀜𑀸𑀬 𑀲𑀻𑀢𑁄𑀤𑀓𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀻’’𑀢𑀺. 𑀢𑁂𑀲𑀁 𑀢𑀁 𑀅𑀥𑀼𑀦𑀸𑀢𑀦𑀦𑀺𑀕𑀡𑁆𑀞𑀸𑀦𑀁 𑀯𑀸𑀤𑁂𑀦 𑀯𑀺𑀭𑀼𑀚𑁆𑀛𑀢𑀺. 𑀢𑁂 𑀳𑀺 𑀧𑀣𑀯𑀻𑀆𑀤𑀺𑀦𑀯𑀧𑀤𑀢𑁆𑀣𑀢𑁄 𑀅𑀜𑁆𑀜𑀫𑁂𑀯 𑀚𑀻𑀯𑀺𑀢𑀁 𑀧𑀝𑀺𑀚𑀸𑀦𑀦𑁆𑀢𑀺. 𑀘𑀺𑀢𑁆𑀢𑁂𑀦 𑀲𑀻𑀢𑁄𑀤𑀓𑀁 𑀧𑀸𑀢𑀼𑀓𑀸𑀫𑁄 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺 𑀭𑁄𑀕𑁂 𑀞𑀢𑁆𑀯𑀸𑀧𑀺 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀲𑁆𑀲 𑀢𑀣𑀸 𑀦 𑀯𑀺𑀢𑀢𑀢𑀸. 𑀢𑁂𑀦𑀸𑀳 𑁋 ‘‘𑀢𑁂𑀦𑀲𑁆𑀲 𑀫𑀦𑁄𑀤𑀡𑁆𑀟𑁄 𑀢𑀢𑁆𑀣𑁂𑀯 𑀪𑀺𑀚𑁆𑀚𑀢𑀻’’𑀢𑀺. 𑀢𑁂𑀦𑀸𑀢𑀺 𑀲𑀻𑀢𑁄𑀤𑀓𑀁 𑀧𑀸𑀢𑀼𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀜𑁆𑀘 𑀇𑀘𑁆𑀙𑀦𑁂𑀦. 𑀅𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀦𑀺𑀕𑀡𑁆𑀞𑀲𑁆𑀲. 𑀢𑀢𑁆𑀣𑁂𑀯𑀸𑀢𑀺 𑀢𑀣𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑁂 𑀏𑀯. 𑀪𑀺𑀚𑁆𑀚𑀢𑀺 𑀲𑀁𑀯𑀭𑀲𑁆𑀲 𑀯𑀺𑀓𑁄𑀧𑀺𑀢𑀢𑁆𑀢𑀸. 𑀢𑀣𑀸𑀪𑀽𑀢𑁄 𑀲𑁄 𑀦𑀺𑀕𑀡𑁆𑀞𑁄 𑀲𑀻𑀢𑁄𑀤𑀓𑀁 𑀘𑁂 𑀮𑀪𑁂𑀬𑁆𑀬, 𑀓𑀢𑀺𑀧𑀬𑀁 𑀓𑀸𑀮𑀁 𑀚𑀻𑀯𑁂𑀬𑁆𑀬, 𑀅𑀮𑀸𑀪𑁂𑀦 𑀧𑀦 𑀧𑀭𑀺𑀲𑀼𑀲𑁆𑀲𑀫𑀸𑀦𑀓𑀡𑁆𑀞𑁄𑀝𑁆𑀞𑀢𑀸𑀮𑀼𑀚𑀺𑀯𑁆𑀳𑀸𑀆𑀤𑀺𑀓𑁄 𑀲𑀩𑁆𑀩𑀲𑁄 𑀧𑀭𑀺𑀤𑀸𑀳𑀸𑀪𑀺𑀪𑀽𑀢𑁄 𑀫𑀭𑁂𑀬𑁆𑀬. 𑀢𑁂𑀦𑀸𑀳 𑁋 ‘‘𑀲𑀻𑀢𑁄𑀤𑀓𑀁 𑀅𑀮𑀪𑀫𑀸𑀦𑁄 𑀓𑀸𑀮𑀁 𑀓𑀭𑁂𑀬𑁆𑀬𑀸’’𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀻𑀢𑁄𑀤𑀓𑀁 𑀧𑀺𑀯𑀸𑀬 𑀲𑀦𑁆𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀲𑁆𑀲 𑀫𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀦𑁄𑀤𑀡𑁆𑀟𑁄 𑀧𑀦 𑀪𑀺𑀦𑁆𑀦𑁄𑀧𑀺 𑀘𑀼𑀢𑀺𑀫𑁆𑀧𑀺 𑀆𑀓𑀟𑁆𑀠𑀢𑀻’’𑀢𑀺. 𑀬𑀲𑁆𑀫𑀸 𑀧𑀦 𑀢𑀣𑀸𑀪𑀽𑀢𑀘𑀺𑀢𑁆𑀢𑀲𑁆𑀲 𑀦𑀺𑀕𑀡𑁆𑀞𑀲𑁆𑀲 𑀫𑀦𑁄𑀲𑀢𑁆𑀢𑁂𑀲𑀼 𑀦𑀸𑀫 𑀤𑁂𑀯𑁂𑀲𑀼 𑀉𑀧𑀧𑀢𑁆𑀢𑀺 𑀳𑁄𑀢𑀻𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀮𑀤𑁆𑀥𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀦𑁄𑀤𑀡𑁆𑀟𑁄 𑀧𑀦 𑀪𑀺𑀦𑁆𑀦𑁄𑀧𑀺 𑀧𑀝𑀺𑀲𑀦𑁆𑀥𑀺𑀫𑁆𑀧𑀺 𑀆𑀓𑀟𑁆𑀠𑀢𑀻’’𑀢𑀺. 𑀇𑀢𑀻𑀢𑀺 𑀏𑀯𑀁 ‘‘𑀇𑀥𑀸𑀲𑁆𑀲 𑀦𑀺𑀕𑀡𑁆𑀞𑁄’’𑀢𑀺𑀆𑀤𑀺𑀆𑀓𑀸𑀭𑁂𑀦. 𑀦𑀦𑁆𑀢𑀺 𑀉𑀧𑀸𑀮𑀺𑀁 𑀕𑀳𑀧𑀢𑀺𑀁. 𑀫𑀳𑀦𑁆𑀢𑁄𑀢𑀺 𑀯𑀤𑀸𑀧𑁂𑀲𑀺 ‘‘𑀫𑀦𑁄𑀧𑀝𑀺𑀩𑀤𑁆𑀥𑁄 𑀓𑀸𑀮𑀗𑁆𑀓𑀭𑁄𑀢𑀻’’𑀢𑀺 𑀯𑀤𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀉𑀧𑀸𑀲𑀓𑀲𑁆𑀲𑀸𑀢𑀺 𑀉𑀧𑀸𑀮𑀺𑀲𑁆𑀲 𑀕𑀳𑀧𑀢𑀺𑀲𑁆𑀲. 𑀫𑀼𑀘𑁆𑀙𑀸𑀯𑀲𑁂𑀦𑀸𑀢𑀺𑀆𑀤𑀺𑀦𑀸 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀫𑀦𑁄𑀤𑀡𑁆𑀟𑀲𑁆𑀲 𑀫𑀳𑀦𑁆𑀢𑀢𑀁 𑀯𑀺𑀪𑀸𑀯𑁂𑀢𑀺. 𑀘𑀺𑀢𑁆𑀢𑀲𑀦𑁆𑀢𑀢𑀺𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑁂𑀦𑁂𑀯𑀸𑀢𑀺 𑀯𑀺𑀦𑀸 𑀓𑀸𑀬𑀤𑀡𑁆𑀟𑁂𑀦 𑀯𑀘𑀻𑀤𑀡𑁆𑀟𑁂𑀦 𑀘 𑀓𑁂𑀯𑀮𑀁 𑀘𑀺𑀢𑁆𑀢𑀲𑀦𑁆𑀢𑀢𑀺𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑁂𑀦. 𑀪𑀺𑀚𑁆𑀚𑀺𑀢𑁆𑀯𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀅𑀪𑀺𑀚𑁆𑀚𑀺𑀢𑁆𑀯𑀸𑀧𑀺. 𑀅𑀦𑀺𑀬𑁆𑀬𑀸𑀦𑀺𑀓𑀸𑀢𑀺 𑀅𑀧𑁆𑀧𑀸𑀝𑀺𑀳𑀻𑀭𑀸, 𑀅𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀮𑁆𑀮𑀓𑁆𑀔𑁂𑀲𑀺 𑀉𑀧𑀸𑀲𑀓𑁄𑀢𑀺 𑀯𑀺𑀪𑀢𑁆𑀢𑀺𑀁 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑀦𑀸. 𑀧𑀜𑁆𑀳𑀧𑀝𑀺𑀪𑀸𑀦𑀸𑀦𑀻𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁂 𑀅𑀢𑁆𑀣𑁂 𑀉𑀧𑁆𑀧𑀚𑁆𑀚𑀦𑀓𑀧𑀝𑀺𑀪𑀸𑀦𑀸𑀦𑀺.

‘‘𑀫𑀦𑁄𑀧𑀝𑀺𑀩𑀤𑁆𑀥𑁄 𑀓𑀸𑀮𑀁 𑀓𑀭𑁄𑀢𑀻’’𑀢𑀺 𑀯𑀤𑀦𑁆𑀢𑁂𑀦 𑀅𑀢𑁆𑀣𑀢𑁄 𑀫𑀦𑁄𑀤𑀡𑁆𑀟𑀲𑁆𑀲 𑀢𑀤𑀼𑀢𑁆𑀢𑀭𑀪𑀸𑀯𑁄 𑀧𑀝𑀺𑀜𑁆𑀜𑀸𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀇𑀤𑀸𑀦𑀺 𑀫𑀦𑁄𑀤𑀡𑁆𑀟𑁄 𑀫𑀳𑀦𑁆𑀢𑁄𑀢𑀺 𑀇𑀤𑀁 𑀯𑀘𑀦’’𑀦𑁆𑀢𑀺. 𑀢𑀣𑀸 𑀘𑁂𑀯 𑀯𑀼𑀢𑁆𑀢𑀁 𑁋 ‘‘𑀫𑀦𑁄𑀤𑀡𑁆𑀟𑁄𑀯 𑀩𑀮𑀯𑀸 𑀫𑀳𑀦𑁆𑀢𑁄𑀢𑀺 𑀯𑀤𑀸𑀧𑁂𑀲𑀻’’𑀢𑀺.

𑁬𑁩. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀢𑁄 𑀬𑀫𑀦𑀁 𑀬𑀸𑀫𑁄, 𑀘𑀢𑀼𑀩𑁆𑀩𑀺𑀥𑁄 𑀬𑀸𑀫𑁄 𑀘𑀢𑀼𑀬𑀸𑀫𑁄, 𑀘𑀢𑀼𑀬𑀸𑀫𑀲𑀗𑁆𑀔𑀸𑀢𑁂𑀦 𑀲𑀁𑀯𑀭𑁂𑀦 𑀲𑀁𑀯𑀼𑀢𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀸𑀫-𑀲𑀤𑁆𑀤𑁄 𑀓𑁄𑀝𑁆𑀞𑀸𑀲𑀧𑀭𑀺𑀬𑀸𑀬𑁄𑀢𑀺 ‘‘𑀇𑀫𑀺𑀦𑀸 𑀘𑀢𑀼𑀓𑁄𑀝𑁆𑀞𑀸𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀧𑀺𑀬𑀚𑀸𑀢𑀺𑀓𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀭𑀸𑀕𑀯𑀲𑁂𑀦 𑀩𑀸𑀮𑁂𑀳𑀺 𑀪𑀸𑀯𑀦𑀻𑀬𑀢𑁆𑀢𑀸 ‘‘𑀪𑀸𑀯𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀪𑀸𑀯𑀺𑀢𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺.

𑀬𑁄 𑀲𑀩𑁆𑀩𑀁 𑀧𑀸𑀧𑀁 𑀆𑀲𑀯𑀜𑁆𑀘 𑀯𑀸𑀭𑁂𑀢𑀻𑀢𑀺 𑀲𑀩𑁆𑀩𑀯𑀸𑀭𑀻, 𑀢𑀲𑁆𑀲 𑀦𑀯𑀲𑀼 𑀧𑀤𑀢𑁆𑀣𑁂𑀲𑀼 𑀲𑀢𑁆𑀢𑀫𑁄 𑀧𑀤𑀢𑁆𑀣𑁄, 𑀢𑁂𑀦 𑀲𑀩𑁆𑀩𑀯𑀸𑀭𑀺𑀦𑀸 𑀧𑀸𑀧𑀁 𑀯𑀸𑀭𑀺𑀢𑁆𑀯𑀸 𑀞𑀺𑀢𑁄𑀢𑀺 𑀲𑀩𑁆𑀩𑀯𑀸𑀭𑀺𑀯𑀸𑀭𑀺𑀢𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀯𑀸𑀭𑀺𑀢𑀧𑀸𑀧𑁄’’𑀢𑀺. 𑀢𑀢𑁄 𑀏𑀯 𑀲𑀩𑁆𑀩𑀲𑁆𑀲 𑀯𑀸𑀭𑀺𑀢𑀩𑁆𑀩𑀲𑁆𑀲 𑀆𑀲𑀯𑀲𑁆𑀲 𑀥𑀼𑀦𑀦𑀢𑁄 𑀲𑀩𑁆𑀩𑀯𑀸𑀭𑀺𑀥𑀼𑀢𑁄. 𑀯𑀸𑀭𑀺𑀢𑀩𑁆𑀩𑀲𑁆𑀲 𑀦𑀺𑀯𑀸𑀭𑀡𑀯𑀲𑁂𑀦 𑀲𑀩𑁆𑀩𑀯𑀸𑀭𑀺𑀦𑁄 𑀨𑀼𑀝𑁄 𑀨𑀼𑀲𑀺𑀢𑁄𑀢𑀺 𑀲𑀩𑁆𑀩𑀯𑀸𑀭𑀺𑀨𑀼𑀝𑁄. 𑀲𑀗𑁆𑀖𑀸𑀢𑀦𑁆𑀢𑀺 𑀲𑀳𑀲𑀸 𑀳𑀦𑀦𑀁, 𑀅𑀲𑀜𑁆𑀘𑁂𑀢𑀦𑀺𑀓𑀯𑀥𑀦𑁆𑀢𑀺 𑀅𑀢𑁆𑀣𑁄. 𑀓𑀢𑀭𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂𑀢𑀺 𑀢𑀻𑀲𑀼 𑀤𑀡𑁆𑀟𑀓𑁄𑀝𑁆𑀞𑀸𑀲𑁂𑀲𑀼 𑀓𑀢𑀭𑀓𑁄𑀝𑁆𑀞𑀸𑀲𑁂.

𑁬𑁪. 𑀔𑀮𑀺𑀬𑀢𑀺 𑀲𑀫𑀸𑀤𑀺𑀬𑀢𑀻𑀢𑀺 𑀔𑀮𑀁, 𑀭𑀸𑀲𑀻𑀢𑀺 𑀆𑀳 𑁋 ‘‘𑀏𑀓𑀁 𑀫𑀁𑀲𑀔𑀮𑀦𑁆𑀢𑀺 𑀏𑀓𑀁 𑀫𑀁𑀲𑀭𑀸𑀲𑀺’’𑀦𑁆𑀢𑀺. 𑀯𑀺𑀚𑁆𑀚𑀸𑀥𑀭𑀇𑀤𑁆𑀥𑀺𑀬𑀸 𑀇𑀤𑁆𑀥𑀺𑀫𑀸. 𑀲𑀸 𑀧𑀦 𑀇𑀤𑁆𑀥𑀺 𑀬𑀲𑁆𑀫𑀸 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀇𑀚𑁆𑀛𑀢𑀺, 𑀦 𑀬𑀲𑁆𑀲 𑀓𑀲𑁆𑀲𑀘𑀺. 𑀢𑀲𑁆𑀫𑀸 𑀆𑀳 ‘‘𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄’’𑀢𑀺. 𑀯𑀺𑀚𑁆𑀚𑀸𑀦𑀼𑀪𑀸𑀯𑀯𑀲𑁂𑀦𑁂𑀯 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄. 𑀘𑀺𑀢𑁆𑀢𑁂 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁄 𑀆𑀦𑀼𑀪𑀸𑀯𑀸𑀬 𑀏𑀯 𑀯𑀺𑀚𑁆𑀚𑀸𑀬 𑀧𑀕𑀼𑀡𑀪𑀸𑀯𑀸𑀧𑀸𑀤𑀦𑁂𑀦. 𑀏𑀢𑁂𑀦 𑀯𑀲𑀻𑀪𑀸𑀯𑀁 𑀮𑁄𑀓𑀺𑀬𑀲𑀫𑀜𑁆𑀜𑀸𑀯𑀲𑁂𑀦 𑀪𑀕𑀯𑀸 𑀉𑀧𑀸𑀮𑀺𑀁 𑀕𑀳𑀧𑀢𑀺𑀁 𑀧𑀜𑁆𑀜𑀧𑁂𑀢𑀼𑀓𑀸𑀫𑁄 𑀏𑀯𑀫𑀸𑀳. 𑀮𑁄𑀓𑀺𑀓𑀸 𑀳𑀺 ‘‘𑀪𑀸𑀯𑀦𑀸𑀫𑀬𑀇𑀤𑁆𑀥𑀺𑀬𑀸 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁄 𑀧𑀭𑀽𑀧𑀖𑀸𑀢𑀁 𑀓𑀭𑁄𑀢𑀻’’𑀢𑀺 𑀫𑀜𑁆𑀜𑀦𑁆𑀢𑀺. 𑀢𑀣𑀸 𑀳𑀺 𑀢𑁂 𑀇𑀲𑀬𑁄 𑀧𑀭𑁂𑀲𑀁 𑀲𑀁𑀯𑀡𑁆𑀡𑁂𑀦𑁆𑀢𑀺, 𑀇𑀲𑀻𑀦𑀁 𑀆𑀦𑀼𑀪𑀸𑀯𑀁 𑀓𑀺𑀢𑁆𑀢𑁂𑀦𑁆𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀻𑀢𑀺.

𑁬𑁫. 𑀅𑀭𑀜𑁆𑀜𑀫𑁂𑀯 𑀳𑀼𑀢𑁆𑀯𑀸𑀢𑀺 𑀲𑀩𑁆𑀩𑀲𑁄 𑀅𑀭𑀜𑁆𑀜𑀫𑁂𑀯 𑀳𑀼𑀢𑁆𑀯𑀸. 𑀅𑀭𑀜𑁆𑀜𑀪𑀸𑀯𑁂𑀦 𑀅𑀭𑀜𑁆𑀜𑀁 𑀚𑀸𑀢𑀁, 𑀦 𑀦𑀸𑀫𑀫𑀢𑁆𑀢𑁂𑀦. 𑀇𑀲𑀻𑀦𑀁 𑀅𑀢𑁆𑀣𑀸𑀬𑀸𑀢𑀺 𑀇𑀲𑀻𑀦𑀁 𑀆𑀲𑀸𑀤𑀦𑀢𑁆𑀣𑀸𑀬.

𑀕𑁄𑀥𑀸𑀯𑀭𑀻𑀢𑀻𑀭𑀢𑁄 𑀦𑀸𑀢𑀺𑀤𑀽𑀭𑁂. 𑀉𑀲𑀽𑀬𑀫𑀸𑀦𑁄𑀢𑀺 ‘‘𑀦 𑀫𑀁 𑀏𑀲 𑀚𑀦𑁄 𑀧𑀭𑀺𑀯𑀸𑀭𑁂𑀢𑀻’’𑀢𑀺 𑀉𑀲𑀽𑀬𑀁 𑀓𑀭𑁄𑀦𑁆𑀢𑁄. 𑀓𑀺𑀮𑀺𑀝𑁆𑀞𑁄 𑀯𑀢𑀸𑀢𑀺 𑀧𑀗𑁆𑀓𑀤𑀦𑁆𑀢𑀭𑀚𑀲𑀺𑀭𑀢𑀸𑀤𑀻𑀳𑀺 𑀓𑀺𑀮𑀺𑀝𑁆𑀞𑀲𑀭𑀻𑀭𑁄. 𑀅𑀦𑀜𑁆𑀚𑀺𑀢𑀫𑀡𑁆𑀟𑀺𑀢𑁄𑀢𑀺 𑀅𑀦𑀜𑁆𑀚𑀺𑀢𑀓𑁆𑀔𑀺𑀓𑁄 𑀲𑀩𑁆𑀩𑁂𑀦, 𑀲𑀩𑁆𑀩𑀁 𑀅𑀫𑀡𑁆𑀟𑀺𑀢𑁄 𑀘. 𑀢𑀲𑁆𑀫𑀺𑀁 𑀓𑀸𑀮𑁂 ‘‘𑀓𑀸𑀮𑀲𑁆𑀲𑁂𑀯 𑀅𑀓𑁆𑀔𑀻𑀦𑀁 𑀅𑀜𑁆𑀚𑀦𑀁 𑀫𑀗𑁆𑀕𑀮’’𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁 𑀮𑀤𑁆𑀥𑀺, 𑀢𑀲𑁆𑀫𑀸 𑀅𑀦𑀜𑁆𑀚𑀦𑀁 𑀯𑀺𑀲𑀼𑀁 𑀕𑀳𑀺𑀢𑀁.

𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀯𑁂𑀤𑁂𑀲𑀼 𑀈𑀤𑀺𑀲𑀁 𑀆𑀕𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁, 𑀪𑀦𑁆𑀢𑁂’’𑀢𑀺 𑀭𑀸𑀚𑀸 𑀢𑀲𑁆𑀲 𑀧𑀼𑀭𑁄𑀳𑀺𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸. 𑀉𑀲𑀼𑀫𑀚𑀸𑀢𑀳𑀤𑀬𑁄𑀢𑀺 𑀉𑀢𑁆𑀢𑀢𑁆𑀢𑀳𑀤𑀬𑁄. 𑀦𑀸𑀲𑀺𑀓𑀸𑀦𑀁 𑀅𑀧𑁆𑀧𑀳𑁄𑀦𑁆𑀢𑁂 𑀫𑀼𑀔𑁂𑀦 𑀅𑀲𑁆𑀲𑀲𑀦𑁆𑀢𑁄.

𑀯𑀺𑀚𑀺𑀢𑀚𑀬𑁂𑀳𑀺 𑀆𑀕𑀦𑁆𑀢𑁆𑀯𑀸 𑀦𑀓𑁆𑀔𑀢𑁆𑀢𑀬𑀼𑀢𑁆𑀢𑀁 𑀆𑀕𑀫𑁂𑀦𑁆𑀢𑁂𑀳𑀺 𑀦𑀺𑀲𑀻𑀤𑀺𑀢𑀩𑁆𑀩𑀝𑁆𑀞𑀸𑀦𑀁 𑀚𑀬𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀁. 𑀉𑀤𑀓𑀯𑀼𑀝𑁆𑀞𑀺𑀧𑀸𑀢𑀦𑀸𑀤𑀺 𑀢𑀲𑁆𑀫𑀺𑀁 𑀧𑀸𑀧𑀓𑀫𑁆𑀫𑁂 𑀅𑀲𑀫𑀗𑁆𑀕𑀺𑀪𑀽𑀢𑀸𑀦𑀫𑁆𑀧𑀺 𑀲𑀫𑀦𑀼𑀜𑁆𑀜𑀢𑀸𑀬 𑀅𑀦𑁆𑀢𑁄𑀓𑀭𑀡𑀢𑁆𑀣𑀁 𑀓𑀢𑀁. 𑀓𑀢𑀪𑀡𑁆𑀟𑀯𑀼𑀝𑁆𑀞𑀻𑀢𑀺 𑀆𑀪𑀭𑀡𑀯𑀲𑁆𑀲𑀁. 𑀫𑀳𑀸𑀚𑀦𑁄 𑀲𑀫𑀦𑀼𑀜𑁆𑀜𑁄 𑀚𑀸𑀢𑁄𑀢𑀺 𑀬𑁄𑀚𑀦𑀸. 𑀫𑀸𑀢𑀼𑀧𑁄𑀲𑀓𑀭𑀸𑀫𑁄𑀢𑀺 𑀫𑀸𑀢𑀭𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀭𑀸𑀫𑁄 𑀦𑀸𑀫 𑀏𑀓𑁄 𑀧𑀼𑀭𑀺𑀲𑁄. 𑀅𑀲𑀫𑀗𑁆𑀕𑀺𑀪𑀽𑀢𑀸𑀦𑀦𑁆𑀢𑀺 𑀅𑀲𑀫𑀦𑀼𑀜𑁆𑀜𑀸𑀦𑀁.

𑀅𑀯𑀓𑀺𑀭𑀺𑀬𑀸𑀢𑀺 𑀅𑀲𑀼𑀲𑁆𑀲𑀽𑀲𑀢𑀁 𑀧𑀝𑀺𑀘𑁆𑀘. 𑀨𑀼𑀮𑀺𑀗𑁆𑀕𑀸𑀦𑀻𑀢𑀺 𑀅𑀕𑁆𑀕𑀺𑀓𑀡𑀸𑀦𑀺. 𑀧𑀢𑀦𑁆𑀢𑀺 𑀓𑀸𑀬𑁂𑀢𑀺 𑀓𑀸𑀬𑁂 𑀇𑀢𑁄 𑀘𑀺𑀢𑁄 𑀦𑀺𑀧𑀢𑀦𑁆𑀢𑀺. 𑀏𑀢𑁂 𑀓𑀺𑀭 𑀦𑀺𑀭𑀬𑀁 𑀯𑀺𑀯𑀭𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀤𑀲𑁆𑀲𑁂𑀦𑁆𑀢𑀺.

𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑀦𑁆𑀢𑀺 𑀫𑀬𑀁 𑀓𑀜𑁆𑀘𑀺𑀧𑀺 𑀤𑁂𑀲𑀁 𑀉𑀤𑁆𑀤𑀺𑀲𑁆𑀲 𑀦 𑀕𑀘𑁆𑀙𑀸𑀫, 𑀬𑀢𑁆𑀣 𑀧𑀦 𑀯𑀲𑀦𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀲𑁆𑀲 𑀨𑀸𑀲𑀼 𑀳𑁄𑀢𑀺, 𑀢𑀁 𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑀁 𑀕𑀘𑁆𑀙𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀗𑁆𑀖𑀸𑀢𑀺 𑀲𑀁𑀳𑀢𑀸. 𑀕𑀡𑀸𑀢𑀺 𑀢𑀁𑀢𑀁𑀲𑁂𑀡𑀺𑀪𑀸𑀯𑁂𑀦 𑀕𑀡𑀺𑀢𑀩𑁆𑀩𑀢𑀸𑀬 𑀕𑀡𑀸. 𑀕𑀡𑀻𑀪𑀽𑀢𑀸𑀢𑀺 𑀏𑀓𑀚𑁆𑀛𑀸𑀲𑀬𑀸 𑀳𑀼𑀢𑁆𑀯𑀸 𑀭𑀸𑀲𑀺𑀪𑀽𑀢𑀸. 𑀅𑀤𑀺𑀦𑁆𑀦𑀸𑀤𑀸𑀦𑀦𑁆𑀢𑀺𑀆𑀤𑀻𑀲𑀼𑀧𑀺 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀢𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁.

𑀧𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀪𑀸𑀯𑀦𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺. 𑀦𑁂𑀲𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀘𑀺𑀦𑁆𑀢𑁂𑀲𑀻𑀢𑀺 𑀬𑁄𑀚𑀦𑀸. 𑀓𑀺𑀁 𑀘𑀺𑀦𑁆𑀢𑁂𑀲𑀺? 𑀆𑀖𑀸𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀦𑀢𑁆𑀣𑀓𑀭𑀡𑀽𑀧𑀸𑀬𑀁. 𑀢𑁂𑀦𑀸𑀳 ‘‘𑀲𑁄 𑀥𑀫𑁆𑀫𑀓𑀣𑀸𑀧𑀭𑀺𑀬𑁄𑀲𑀸𑀦𑁂’’𑀢𑀺𑀆𑀤𑀺. 𑀦𑀸𑀕𑀩𑀮𑀧𑀺𑀘𑁆𑀙𑀺𑀮𑁆𑀮𑀸𑀤𑀻𑀦𑀦𑁆𑀢𑀺 𑀦𑀸𑀕𑀩𑀮𑀲𑀸𑀲𑀧𑀅𑀗𑁆𑀓𑁄𑀮𑀢𑁂𑀮𑀓𑀡𑀺𑀓𑀸𑀭𑀦𑀺𑀬𑁆𑀬𑀸𑀲𑀸𑀤𑀻𑀦𑀁 𑀘𑀺𑀓𑁆𑀔𑀮𑁆𑀮𑀸𑀦𑀁. 𑀯𑀺𑀳𑁂𑀞𑀬𑀺𑀁𑀲𑀼 𑀦𑀺𑀭𑀬𑀸𑀤𑀺𑀓𑀣𑀸𑀳𑀺 𑀖𑀝𑁆𑀝𑁂𑀦𑁆𑀢𑀸. 𑀙𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀢𑀺 𑀘𑀓𑁆𑀔𑀸𑀤𑀻𑀦𑀁 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑁂 𑀭𑀽𑀧𑀸𑀤𑀺𑀯𑀺𑀲𑀬𑁂.

𑀦𑀯 𑀯𑀼𑀝𑁆𑀞𑀺𑀬𑁄𑀢𑀺 𑀉𑀤𑀓𑀯𑀼𑀝𑁆𑀞𑀺 𑀲𑀼𑀫𑀦𑀧𑀼𑀧𑁆𑀨𑀯𑀼𑀝𑁆𑀞𑀺 𑀫𑀸𑀲𑀓𑀯𑀼𑀝𑁆𑀞𑀺 𑀓𑀳𑀸𑀧𑀡𑀯𑀼𑀝𑁆𑀞𑀺 𑀆𑀪𑀭𑀡𑀯𑀼𑀝𑁆𑀞𑀺 𑀆𑀯𑀼𑀥𑀯𑀼𑀝𑁆𑀞𑀺 𑀅𑀗𑁆𑀕𑀸𑀭𑀯𑀼𑀝𑁆𑀞𑀺 𑀧𑀸𑀲𑀸𑀡𑀯𑀼𑀝𑁆𑀞𑀺 𑀯𑀸𑀮𑀺𑀓𑀸𑀯𑀼𑀝𑁆𑀞𑀻𑀢𑀺 𑀇𑀫𑀸 𑀦𑀯 𑀯𑀼𑀝𑁆𑀞𑀺𑀬𑁄. 𑀅𑀯𑀜𑁆𑀘𑀬𑀻𑀢𑀺 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀅𑀦𑀢𑁆𑀣𑀘𑀭𑀡𑁂𑀦 𑀯𑀜𑁆𑀘𑀬𑀺. 𑀅𑀤𑀽𑀲𑀓𑁂𑀢𑀺 𑀅𑀦𑀧𑀭𑀸𑀥𑁂.

‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸’’𑀢𑀺 𑀚𑀸𑀢𑀓𑀝𑁆𑀞𑀓𑀣𑀸𑀤𑀻𑀲𑀼 (𑀚𑀸. 𑀅𑀝𑁆𑀞. 𑁪.𑁧𑁫.𑀫𑀸𑀢𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸) 𑀆𑀕𑀢𑀁, 𑀇𑀥 𑀧𑀦 ‘‘𑀲𑁂𑀝𑁆𑀞𑀺𑀥𑀻𑀢𑀸’’𑀢𑀺. 𑀯𑀸𑀭𑁂𑀬𑁆𑀬𑀢𑁆𑀣𑀸𑀬𑀸𑀢𑀺 𑀆𑀯𑀸𑀳𑀢𑁆𑀣𑀸𑀬, 𑀅𑀲𑁆𑀲𑀸𑀢𑀺 𑀧𑁂𑀲𑀺𑀢𑀧𑀼𑀕𑁆𑀕𑀮𑀲𑁆𑀲. 𑀢𑀸𑀤𑀺𑀲𑁂𑀦 𑀦𑀻𑀘𑀓𑀼𑀮𑀲𑀁𑀯𑀢𑁆𑀢𑀦𑀺𑀬𑁂𑀦 𑀓𑀫𑁆𑀫𑀼𑀦𑀸 𑀮𑀤𑁆𑀥𑁄𑀓𑀸𑀲𑁂𑀦 𑀘𑀡𑁆𑀟𑀸𑀮𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄.

𑀘𑀫𑁆𑀫𑀕𑁂𑀳𑁂𑀢𑀺 𑀘𑀫𑁆𑀫𑁂𑀦 𑀙𑀸𑀤𑀺𑀢𑁂 𑀕𑁂𑀳𑁂. 𑀫𑀸𑀢𑀗𑁆𑀕𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺 𑀚𑀸𑀢𑀺𑀲𑀫𑀼𑀤𑀸𑀕𑀢𑀁. 𑀢𑀦𑁆𑀢𑀺 𑀖𑀡𑁆𑀝𑀁. 𑀯𑀸𑀤𑁂𑀦𑁆𑀢𑁄 𑀢𑀸𑀮𑀦𑁂𑀦 𑀲𑀤𑁆𑀤𑀁 𑀓𑀭𑁄𑀦𑁆𑀢𑁄. 𑀫𑀳𑀸𑀧𑀣𑀁 𑀧𑀝𑀺𑀧𑀚𑁆𑀚𑀺 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀕𑁂𑀳𑀤𑁆𑀯𑀸𑀭𑀲𑀫𑀻𑀧𑁂𑀦.

𑀢𑀲𑁆𑀲𑀸 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀘𑁂𑀯 𑀉𑀧𑀝𑁆𑀞𑀸𑀓𑀫𑀦𑀼𑀲𑁆𑀲𑀸 𑀧𑀝𑀺𑀩𑀤𑁆𑀥𑀸 𑀘 𑀲𑀼𑀭𑀸𑀲𑁄𑀡𑁆𑀟𑀸𑀤𑀬𑁄 𑀚𑀸𑀡𑀼𑀓𑀧𑁆𑀧𑀭𑀸𑀤𑀻𑀳𑀺 𑀲𑀼𑀓𑁄𑀝𑁆𑀝𑀺𑀢𑀁 𑀓𑁄𑀝𑁆𑀝𑀺𑀢𑀪𑀸𑀯𑁂𑀦 𑀫𑀼𑀘𑁆𑀙𑀁 𑀆𑀧𑀦𑁆𑀦𑀢𑁆𑀢𑀸 𑀫𑀢𑁄𑀢𑀺 𑀲𑀜𑁆𑀜𑀸𑀬 𑀙𑀟𑁆𑀟𑁂𑀲𑀼𑀁.

𑀅𑀣 𑀩𑁄𑀥𑀺𑀲𑀢𑁆𑀢𑁄 𑀆𑀬𑀼𑀅𑀯𑀲𑁂𑀲𑀲𑁆𑀲 𑀅𑀢𑁆𑀣𑀺𑀢𑀸𑀬 𑀫𑀦𑁆𑀤𑀫𑀦𑁆𑀤𑁂 𑀯𑀸𑀢𑁂 𑀯𑀸𑀬𑀦𑁆𑀢𑁂 𑀘𑀺𑀭𑁂𑀦 𑀲𑀜𑁆𑀜𑀁 𑀧𑀝𑀺𑀮𑀪𑀢𑀺. 𑀢𑁂𑀦𑀸𑀳 ‘‘𑀫𑀳𑀸𑀧𑀼𑀭𑀺𑀲𑁄’’𑀢𑀺𑀆𑀤𑀺. 𑀕𑁂𑀳𑀗𑁆𑀕𑀡𑁂𑀢𑀺 𑀕𑁂𑀳𑀲𑁆𑀲 𑀫𑀳𑀸𑀤𑁆𑀯𑀸𑀭𑀢𑁄 𑀩𑀳𑀺 𑀯𑀺𑀯𑀝𑀗𑁆𑀕𑀡𑁂. 𑀧𑀢𑀺𑀢𑁄𑀢𑀺 𑀧𑀸𑀢𑀁 𑀓𑀢𑁆𑀯𑀸 𑀇𑀘𑁆𑀙𑀺𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀅𑀦𑀼𑀧𑁆𑀧𑀯𑁂𑀲𑁂𑀦 𑀦𑀺𑀧𑀦𑁆𑀦𑁄. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬𑀸𑀢𑀺 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀓𑀸𑀭𑀡𑁂𑀦.

𑀬𑀲𑀦𑁆𑀢𑀺 𑀯𑀺𑀪𑀯𑀁 𑀓𑀺𑀢𑁆𑀢𑀺𑀲𑀤𑁆𑀤𑀜𑁆𑀘. 𑀘𑀦𑁆𑀤𑀦𑁆𑀢𑀺 𑀘𑀦𑁆𑀤𑀫𑀡𑁆𑀟𑀮𑀁, 𑀘𑀦𑁆𑀤𑀯𑀺𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀘𑁆𑀙𑀺𑀝𑁆𑀞𑀕𑁂𑀳𑁂𑀢𑀺 𑀧𑀭𑁂𑀳𑀺 𑀧𑀭𑀺𑀪𑀼𑀢𑁆𑀢𑀕𑁂𑀳𑁂. 𑀫𑀡𑁆𑀟𑀧𑁂𑀢𑀺 𑀦𑀕𑀭𑀫𑀚𑁆𑀛𑁂 𑀫𑀳𑀸𑀫𑀡𑁆𑀟𑀧𑁂.

𑀔𑀻𑀭𑀫𑀡𑀺𑀫𑀽𑀮𑀦𑁆𑀢𑀺 𑀔𑀻𑀭𑀫𑀽𑀮𑀁, 𑀧𑀸𑀤𑁂𑀲𑀼 𑀩𑀤𑁆𑀥𑀫𑀡𑀺𑀫𑀽𑀮𑀜𑁆𑀘. 𑀬𑀸𑀯𑀢𑀸 𑀯𑀸𑀘𑀼𑀕𑁆𑀕𑀢𑀸 𑀧𑀭𑀺𑀬𑀢𑁆𑀢𑀻𑀢𑀺 𑀬𑀢𑁆𑀢𑀓𑁄 𑀫𑀦𑀼𑀲𑁆𑀲𑀯𑀘𑀻𑀤𑁆𑀯𑀸𑀭𑀢𑁄 𑀉𑀕𑁆𑀕𑀢𑁄 𑀦𑀺𑀓𑁆𑀔𑀦𑁆𑀢𑁄 𑀧𑀯𑀢𑁆𑀢𑁄, 𑀬𑀁𑀓𑀺𑀜𑁆𑀘𑀺 𑀯𑀘𑀻𑀫𑀬𑀦𑁆𑀢𑀺 𑀅𑀢𑁆𑀣𑁄. 𑀆𑀓𑀸𑀲𑀗𑁆𑀕𑀡𑁂𑀢𑀺 𑀯𑀺𑀯𑀝𑀗𑁆𑀕𑀡𑁂.

𑀤𑀼𑀫𑁆𑀫𑀯𑀸𑀲𑀻𑀢𑀺 𑀥𑀽𑀫𑁄 𑀥𑀽𑀲𑀭𑁄, 𑀅𑀦𑀜𑁆𑀚𑀺𑀢𑀸𑀫𑀡𑁆𑀟𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀑𑀢𑀮𑁆𑀮𑀓𑁄𑀢𑀺 𑀦𑀺𑀳𑀻𑀦𑀚𑁆𑀛𑀸𑀲𑀬𑁄, 𑀅𑀧𑁆𑀧𑀸𑀦𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀧𑀝𑀺𑀫𑀼𑀜𑁆𑀘 𑀓𑀡𑁆𑀞𑁂𑀢𑀺 𑀬𑀸𑀯 𑀕𑀮𑀯𑀸𑀝𑀓𑀸 𑀧𑀸𑀭𑀼𑀧𑀺𑀢𑁆𑀯𑀸. 𑀓𑁄 𑀭𑁂 𑀢𑀼𑀯𑀦𑁆𑀢𑀺 𑀅𑀭𑁂 𑀓𑁄 𑀦𑀸𑀫 𑀢𑁆𑀯𑀁.

𑀧𑀓𑀢𑀦𑁆𑀢𑀺 𑀧𑀝𑀺𑀬𑀢𑁆𑀢𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀅𑀪𑀺𑀲𑀗𑁆𑀔𑀢𑀁. 𑀉𑀢𑁆𑀢𑀺𑀝𑁆𑀞𑀧𑀺𑀡𑁆𑀟𑀦𑁆𑀢𑀺 𑀅𑀦𑁆𑀢𑀭𑀖𑀭𑀁 𑀉𑀧𑀕𑀫𑁆𑀫 𑀞𑀢𑁆𑀯𑀸 𑀮𑀤𑁆𑀥𑀩𑁆𑀩𑀧𑀺𑀡𑁆𑀟𑀁, 𑀪𑀺𑀓𑁆𑀔𑀸𑀳𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀮𑀪𑀢𑀦𑁆𑀢𑀺 𑀮𑀘𑁆𑀙𑀢𑀼. 𑀲𑀧𑀸𑀓𑁄𑀢𑀺 𑀫𑀳𑀸𑀲𑀢𑁆𑀢𑁄 𑀚𑀸𑀢𑀺𑀯𑀲𑁂𑀦 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀆𑀯𑀺𑀓𑀭𑁄𑀢𑀺.

𑀅𑀢𑁆𑀣𑀢𑁆𑀣𑀺𑀢𑀁 𑀲𑀤𑁆𑀤𑀳𑀢𑁄𑀢𑀺 𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀅𑀢𑁆𑀣𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀲𑀤𑁆𑀤𑀳𑀦𑁆𑀢𑀲𑁆𑀲. 𑀅𑀧𑁂𑀳𑀻𑀢𑀺 𑀅𑀧𑀕𑀘𑁆𑀙. 𑀏𑀢𑁆𑀢𑁄𑀢𑀺 𑀇𑀫𑀲𑁆𑀫𑀸 𑀞𑀸𑀦𑀸. 𑀚𑀫𑁆𑀫𑀸𑀢𑀺 𑀮𑀸𑀫𑀓.

𑀅𑀦𑀽𑀧𑀔𑁂𑀢𑁆𑀢𑁂𑀢𑀺 𑀅𑀚𑀗𑁆𑀕𑀮𑁂 𑀉𑀤𑀓𑀲𑀫𑁆𑀧𑀦𑁆𑀦𑁂 𑀔𑁂𑀢𑁆𑀢𑁂 𑀨𑀮𑀯𑀺𑀲𑁂𑀲𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀸. 𑀏𑀢𑀸𑀬 𑀲𑀤𑁆𑀥𑀸𑀬 𑀤𑀤𑀸𑀳𑀺 𑀤𑀸𑀦𑀦𑁆𑀢𑀺 𑀦𑀺𑀦𑁆𑀦𑀁 𑀣𑀮𑀜𑁆𑀘 𑀧𑀽𑀭𑁂𑀦𑁆𑀢𑁄 𑀫𑁂𑀖𑁄 𑀯𑀺𑀬 𑀕𑀼𑀡𑀯𑀦𑁆𑀢𑁂 𑀦𑀺𑀕𑁆𑀕𑀼𑀡𑁂 𑀘 𑀤𑀸𑀦𑀁 𑀤𑁂𑀳𑀺, 𑀏𑀯𑀁 𑀤𑁂𑀦𑁆𑀢𑁄 𑀘 𑀅𑀧𑁆𑀧𑁂𑀯 𑀆𑀭𑀸𑀥𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑁂𑀢𑀺. 𑀤𑀓𑁆𑀔𑀺𑀡𑁂𑀬𑁆𑀬𑁂𑀢𑀺 𑀲𑀻𑀮𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁂.

𑀢𑀸𑀦𑀻𑀢𑀺 𑀢𑁂 𑀩𑁆𑀭𑀸𑀳𑁆𑀫𑀡𑀸. 𑀯𑁂𑀡𑀼𑀧𑀤𑀭𑁂𑀦𑀸𑀢𑀺 𑀯𑁂𑀴𑀼𑀯𑀺𑀮𑀻𑀯𑁂𑀦.

𑀕𑀺𑀭𑀺𑀁 𑀦𑀔𑁂𑀦 𑀔𑀡𑀲𑀻𑀢𑀺 𑀧𑀩𑁆𑀩𑀢𑀁 𑀅𑀢𑁆𑀢𑀦𑁄 𑀦𑀔𑁂𑀦 𑀔𑀡𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀅𑀬𑁄𑀢𑀺 𑀓𑀸𑀮𑀮𑁄𑀳𑀁. 𑀧𑀤𑀳𑀲𑀻𑀢𑀺 𑀅𑀪𑀺𑀪𑀯𑀲𑀺, 𑀅𑀢𑁆𑀢𑀦𑁄 𑀲𑀭𑀻𑀭𑁂𑀦 𑀅𑀪𑀺𑀪𑀯𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺.

𑀆𑀯𑁂𑀥𑀺𑀢𑀦𑁆𑀢𑀺 𑀘𑀮𑀺𑀢𑀁 𑀯𑀺𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀞𑀺𑀢𑀁. 𑀧𑀺𑀝𑁆𑀞𑀺𑀢𑁄𑀢𑀺 𑀧𑀺𑀝𑁆𑀞𑀺𑀧𑀲𑁆𑀲𑁂𑀦. 𑀩𑀸𑀳𑀼𑀁 𑀧𑀲𑀸𑀭𑁂𑀢𑀺 𑀅𑀓𑀫𑁆𑀫𑀦𑁂𑀬𑁆𑀬𑀦𑁆𑀢𑀺 𑀅𑀓𑀫𑁆𑀫𑀓𑁆𑀔𑀫𑀁 𑀩𑀸𑀳𑀼𑀤𑁆𑀯𑀬𑀁 𑀣𑀤𑁆𑀥𑀁 𑀲𑀼𑀓𑁆𑀔𑀤𑀡𑁆𑀟𑀓𑀁 𑀯𑀺𑀬 𑀓𑁂𑀯𑀮𑀁 𑀧𑀲𑀸𑀭𑁂𑀢𑀺, 𑀦 𑀲𑀫𑀺𑀜𑁆𑀚𑁂𑀢𑀺, 𑀲𑁂𑀢𑀸𑀦𑀺 𑀅𑀓𑁆𑀔𑀻𑀦𑀺 𑀧𑀭𑀺𑀯𑀢𑁆𑀢𑀦𑁂𑀦 𑀓𑀡𑁆𑀳𑀫𑀡𑁆𑀟𑀮𑀲𑁆𑀲 𑀅𑀤𑀺𑀲𑁆𑀲𑀦𑀢𑁄.

𑀚𑀻𑀯𑀺𑀢𑀦𑁆𑀢𑀺 𑀚𑀻𑀯𑀦𑀁.

𑀯𑁂𑀳𑀸𑀬𑀲𑀦𑁆𑀢𑀺 𑀆𑀓𑀸𑀲𑁂. 𑀧𑀣𑀤𑁆𑀥𑀼𑀦𑁄𑀢𑀺 𑀧𑀣𑀪𑀽𑀢𑀤𑁆𑀥𑀼𑀦𑁄 𑀯𑀺𑀬.

𑀲𑀜𑁆𑀜𑀫𑁆𑀧𑀺 𑀦 𑀓𑀭𑁄𑀢𑀻𑀢𑀺 ‘‘𑀇𑀫𑁂 𑀓𑀼𑀮𑀧𑁆𑀧𑀲𑀼𑀢𑀸’’𑀢𑀺 𑀲𑀜𑁆𑀜𑀸𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀺. 𑀤𑀦𑁆𑀢𑀓𑀝𑁆𑀞𑀓𑀼𑀘𑁆𑀙𑀺𑀝𑁆𑀞𑀓𑀦𑁆𑀢𑀺 𑀔𑀸𑀤𑀺𑀢𑀤𑀦𑁆𑀢𑀓𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀺𑀲𑁆𑀲𑀢𑀺 𑀅𑀧𑁆𑀧𑀤𑀼𑀝𑁆𑀞𑀧𑀤𑁄𑀲𑀪𑀸𑀯𑀢𑁄, 𑀫𑀳𑀸𑀲𑀢𑁆𑀢𑀲𑁆𑀲 𑀢𑀤𑀸 𑀉𑀓𑁆𑀓𑀁𑀲𑀕𑀢𑀔𑁂𑀢𑁆𑀢𑀪𑀸𑀯𑀢𑁄. 𑀇𑀤𑁆𑀥𑀺𑀯𑀺𑀲𑀬𑁄 𑀦𑀸𑀫 𑀅𑀘𑀺𑀦𑁆𑀢𑁂𑀬𑁆𑀬𑁄, 𑀢𑀲𑁆𑀫𑀸 𑀓𑀣𑀁 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀦𑁆𑀢𑀼𑀁 𑀦𑀸𑀤𑀸𑀲𑀻𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁. 𑀅𑀭𑀼𑀡𑀼𑀕𑁆𑀕𑀁 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀅𑀭𑀼𑀡𑀧𑀪𑀸 𑀦 𑀧𑀜𑁆𑀜𑀸𑀬𑀢𑀺, 𑀅𑀦𑁆𑀥𑀓𑀸𑀭𑁄 𑀏𑀯 𑀳𑁄𑀢𑀺.

𑀬𑀓𑁆𑀔𑀸𑀯𑀝𑁆𑀝𑁄 𑀦𑀼 𑀔𑁄 𑀅𑀬𑀁 𑀓𑀸𑀮𑀯𑀺𑀧𑀭𑀺𑀬𑀸𑀬𑁄. 𑀫𑀳𑀸𑀧𑀜𑁆𑀜𑀦𑁆𑀢𑀺 𑀫𑀳𑀦𑁆𑀢𑀸𑀦𑀁 𑀧𑀜𑁆𑀜𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀽𑀢𑀁. 𑀚𑀦𑀧𑀤𑀲𑁆𑀲 𑀫𑀼𑀔𑀁 𑀧𑀲𑁆𑀲𑀣𑀸𑀢𑀺 𑀇𑀫𑀲𑁆𑀲 𑀚𑀦𑀧𑀤𑀯𑀸𑀲𑀺𑀦𑁄 𑀚𑀦𑀲𑁆𑀲 𑀉𑀧𑀤𑁆𑀤𑀯𑁂𑀦 𑀫𑀗𑁆𑀓𑀼𑀪𑀽𑀢𑀁 𑀫𑀼𑀔𑀁 𑀧𑀲𑁆𑀲𑀣.

𑀏𑀢𑀲𑁆𑀲 𑀓𑀣𑀸 𑀏𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀺𑀲𑁆𑀲𑀢𑀻𑀢𑀺 𑀬𑀸𑀳𑀺 𑀢𑁂𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀦𑀲𑀫𑀺𑀤𑁆𑀥𑀸𑀳𑀺 𑀦𑀸𑀦𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀧𑀭𑀺𑀧𑀽𑀭𑀺𑀢𑀸𑀳𑀺 𑀲𑀻𑀮𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀳𑀺 𑀲𑀼𑀲𑀗𑁆𑀔𑀢𑀲𑀦𑁆𑀢𑀸𑀦𑁂 𑀫𑀳𑀸𑀓𑀭𑀼𑀡𑀸𑀥𑀺𑀯𑀸𑀲𑁂 𑀫𑀳𑀸𑀲𑀢𑁆𑀢𑁂 𑀅𑀭𑀺𑀬𑀽𑀧𑀯𑀸𑀤𑀓𑀫𑁆𑀫𑀅𑀪𑀺𑀲𑀧𑀲𑀗𑁆𑀔𑀸𑀢𑀸 𑀨𑀭𑀼𑀲𑀯𑀸𑀘𑀸 𑀧𑀯𑀢𑁆𑀢𑀺𑀢𑀸, 𑀲𑀸 𑀅𑀪𑀺𑀲𑀧𑀺 𑀢𑀲𑁆𑀲 𑀔𑁂𑀢𑁆𑀢𑀯𑀺𑀲𑁂𑀲𑀪𑀸𑀯𑀢𑁄 𑀢𑀲𑁆𑀲 𑀘 𑀅𑀚𑁆𑀛𑀸𑀲𑀬𑀨𑀭𑀼𑀲𑀢𑀸𑀬 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀺𑀬𑀓𑀫𑁆𑀫𑀁 𑀳𑀼𑀢𑁆𑀯𑀸 𑀲𑀘𑁂 𑀲𑁄 𑀫𑀳𑀸𑀲𑀢𑁆𑀢𑀁 𑀦 𑀔𑀫𑀸𑀧𑁂𑀢𑀺, 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀯𑀺𑀧𑀘𑁆𑀘𑀦𑀲𑀪𑀸𑀯𑀁 𑀚𑀸𑀢𑀁, 𑀔𑀫𑀸𑀧𑀺𑀢𑁂 𑀧𑀦 𑀫𑀳𑀸𑀲𑀢𑁆𑀢𑁂 𑀧𑀬𑁄𑀕𑀲𑀫𑁆𑀧𑀢𑁆𑀢𑀺 𑀧𑀝𑀺𑀩𑀸𑀳𑀺𑀢𑀢𑁆𑀢𑀸 𑀅𑀯𑀺𑀧𑀸𑀓𑀥𑀫𑁆𑀫𑀢𑀁 𑀆𑀧𑀚𑁆𑀚𑀢𑀺 𑀅𑀳𑁄𑀲𑀺𑀓𑀫𑁆𑀫𑀪𑀸𑀯𑀢𑁄. 𑀅𑀬𑀜𑁆𑀳𑀺 𑀅𑀭𑀺𑀬𑀽𑀧𑀯𑀸𑀤𑀧𑀸𑀧𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀺𑀬𑀲𑁆𑀲 𑀥𑀫𑁆𑀫𑀢𑀸, 𑀢𑁂𑀦 𑀯𑀼𑀢𑁆𑀢𑀁 ‘𑀏𑀢𑀲𑁆𑀲 𑀓𑀣𑀸 𑀏𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀺𑀲𑁆𑀲𑀢𑀻’𑀢𑀺𑀆𑀤𑀺. 𑀫𑀳𑀸𑀲𑀢𑁆𑀢𑁄 𑀧𑀦 𑀢𑀁 𑀢𑀲𑁆𑀲 𑀉𑀧𑀭𑀺 𑀧𑀢𑀺𑀢𑀼𑀁 𑀦 𑀅𑀤𑀸𑀲𑀺, 𑀉𑀧𑀸𑀬𑁂𑀦 𑀫𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀘𑀭𑀺𑀬𑀸𑀧𑀺𑀝𑀓𑁂 (𑀘𑀭𑀺𑀬𑀸. 𑁨.𑁬𑁪) 𑁋

‘‘𑀬𑀁 𑀲𑁄 𑀢𑀤𑀸 𑀫𑀁 𑀅𑀪𑀺𑀲𑀧𑀺, 𑀓𑀼𑀧𑀺𑀢𑁄 𑀤𑀼𑀝𑁆𑀞𑀫𑀸𑀦𑀲𑁄;

𑀢𑀲𑁆𑀲𑁂𑀯 𑀫𑀢𑁆𑀣𑀓𑁂 𑀦𑀺𑀧𑀢𑀺, 𑀬𑁄𑀕𑁂𑀦 𑀢𑀁 𑀧𑀫𑁄𑀘𑀬𑀺’’𑀦𑁆𑀢𑀺.

𑀬𑀜𑁆𑀳𑀺 𑀢𑀢𑁆𑀣 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑁄𑀥𑀺𑀲𑀢𑁆𑀢𑁂𑀦 𑀲𑀽𑀭𑀺𑀬𑀼𑀕𑁆𑀕𑀫𑀦𑀦𑀺𑀯𑀸𑀭𑀡𑀁 𑀓𑀢𑀁, 𑀅𑀬𑀫𑁂𑀢𑁆𑀣 𑀬𑁄𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑁄𑀕𑁂𑀦 𑀳𑀺 𑀉𑀩𑁆𑀩𑀴𑁆𑀳𑀸 𑀲𑀭𑀸𑀚𑀺𑀓𑀸 𑀧𑀭𑀺𑀲𑀸 𑀦𑀕𑀭𑀯𑀸𑀲𑀺𑀦𑁄 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀢𑀸𑀧𑀲𑀁 𑀆𑀦𑁂𑀢𑁆𑀯𑀸 𑀔𑀫𑀸𑀧𑁂𑀲𑀼𑀁. 𑀲𑁄 𑀘 𑀩𑁄𑀥𑀺𑀲𑀢𑁆𑀢𑀲𑁆𑀲 𑀕𑀼𑀡𑁂 𑀚𑀸𑀦𑀺𑀢𑁆𑀯𑀸 𑀢𑀲𑁆𑀫𑀺𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺. 𑀬𑀁 𑀧𑀦𑀲𑁆𑀲 𑀫𑀢𑁆𑀣𑀓𑁂 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀲𑁆𑀲 𑀞𑀧𑀦𑀁, 𑀢𑀲𑁆𑀲 𑀘 𑀲𑀢𑁆𑀢𑀥𑀸 𑀨𑀸𑀮𑀦𑀁 𑀓𑀢𑀁, 𑀢𑀁 𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀁. 𑀅𑀜𑁆𑀜𑀣𑀸 𑀳𑀺 𑁋 ‘‘𑀇𑀫𑁂 𑀧𑀩𑁆𑀩𑀚𑀺𑀢𑀸 𑀲𑀫𑀸𑀦𑀸 𑀘𑀺𑀢𑁆𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀺, 𑀦 𑀧𑀦 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑁂𑀦𑁆𑀢𑀻’’𑀢𑀺 𑀫𑀳𑀸𑀲𑀢𑁆𑀢𑀫𑁆𑀧𑀺 𑀢𑁂𑀦 𑀲𑀤𑀺𑀲𑀁 𑀓𑀢𑁆𑀯𑀸 𑀕𑀡𑁆𑀳𑁂𑀬𑁆𑀬𑀼𑀁, 𑀢𑀤𑀲𑁆𑀲 𑀢𑁂𑀲𑀁 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸𑀢𑀺. 𑀢𑁂𑀦𑀸𑀳 ‘‘𑀅𑀣𑀲𑁆𑀲𑀸’’𑀢𑀺𑀆𑀤𑀺.

𑀮𑁄𑀳𑀓𑀽𑀝𑀯𑀲𑁆𑀲𑀦𑁆𑀢𑀺 𑀅𑀬𑀕𑀼𑀴𑀯𑀲𑁆𑀲𑀁. 𑀢𑀤𑀸 𑀳𑀺 𑀭𑀢𑀦𑀫𑀢𑁆𑀢𑀸𑀦𑀺 𑀤𑀺𑀬𑀟𑁆𑀠𑀭𑀢𑀦𑀫𑀢𑁆𑀢𑀸𑀦𑀺𑀧𑀺 𑀢𑀺𑀔𑀺𑀡𑀁𑀲𑀸𑀦𑀺 𑀅𑀬𑀕𑀼𑀴𑀫𑀡𑁆𑀟𑀮𑀸𑀦𑀺 𑀇𑀢𑁄 𑀘𑀺𑀢𑁄 𑀘 𑀦𑀺𑀧𑀢𑀦𑁆𑀢𑀸 𑀫𑀦𑀼𑀲𑁆𑀲𑀸𑀦𑀁 𑀲𑀭𑀻𑀭𑀸𑀦𑀺 𑀔𑀡𑁆𑀟𑀔𑀡𑁆𑀟𑀓𑀸𑀦𑀺 𑀅𑀓𑀁𑀲𑀼. 𑀓𑀮𑀮𑀯𑀲𑁆𑀲𑀦𑁆𑀢𑀺 𑀢𑀦𑀼𑀓𑀓𑀤𑁆𑀤𑀫𑀧𑀝𑀮𑀓𑀤𑁆𑀤𑀫𑀁. 𑀉𑀧𑀳𑀘𑁆𑀘𑀸𑀢𑀺 𑀆𑀖𑀸𑀝𑁂𑀢𑁆𑀯𑀸. 𑀢𑀤𑁂𑀯 𑀫𑀚𑁆𑀛𑀸𑀭𑀜𑁆𑀜𑀁.

𑁬𑁭. 𑀅𑀦𑀼𑀯𑀺𑀘𑁆𑀘𑀓𑀸𑀭𑀦𑁆𑀢𑀺 𑀅𑀦𑀼𑀯𑀺𑀘𑁆𑀘𑀓𑀭𑀡𑀁. 𑀓𑀸𑀭𑀡𑁂𑀳𑀺 𑀤𑁆𑀯𑀻𑀳𑀺 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀞𑀺𑀢𑀸𑀦𑀁 𑀅𑀢𑁆𑀢𑀦𑁄 𑀲𑀸𑀯𑀓𑀢𑁆𑀢𑀁 𑀉𑀧𑀕𑀢𑁂 𑀧𑀕𑁆𑀕𑀳𑀦𑀺𑀕𑁆𑀕𑀳𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁬𑁯. 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁨.𑁭𑁫-𑁭𑁬; 𑀅. 𑀦𑀺. 𑀝𑀻. 𑁩.𑁮.𑁧𑁨) 𑀅𑀦𑀼𑀧𑀼𑀩𑁆𑀩𑀺𑀬𑀸 𑀅𑀦𑀼𑀧𑀼𑀩𑁆𑀩𑀁 𑀓𑀣𑁂𑀢𑀩𑁆𑀩𑀓𑀣𑀁, 𑀓𑀸 𑀧𑀦 𑀲𑀸? 𑀤𑀸𑀦𑀸𑀤𑀺𑀓𑀣𑀸. 𑀤𑀸𑀦𑀓𑀣𑀸 𑀢𑀸𑀯 𑀧𑀘𑀼𑀭𑀚𑀦𑁂𑀲𑀼𑀧𑀺 𑀧𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸 𑀲𑀼𑀓𑀭𑀢𑁆𑀢𑀸 𑀲𑀻𑀮𑁂 𑀧𑀢𑀺𑀝𑁆𑀞𑀸𑀦𑀲𑁆𑀲 𑀉𑀧𑀸𑀬𑀪𑀸𑀯𑀢𑁄 𑀘 𑀆𑀤𑀺𑀢𑁄𑀯 𑀓𑀣𑀺𑀢𑀸. 𑀧𑀭𑀺𑀘𑁆𑀘𑀸𑀕𑀲𑀻𑀮𑁄 𑀳𑀺 𑀧𑀼𑀕𑁆𑀕𑀮𑁄 𑀧𑀭𑀺𑀕𑁆𑀕𑀳𑀯𑀢𑁆𑀣𑀽𑀲𑀼 𑀦𑀺𑀲𑁆𑀲𑀗𑁆𑀕𑀪𑀸𑀯𑀢𑁄 𑀲𑀼𑀔𑁂𑀦𑁂𑀯 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀢𑀺, 𑀢𑀢𑁆𑀣 𑀘 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀲𑀻𑀮𑁂𑀦 𑀤𑀸𑀬𑀓𑀧𑀝𑀺𑀕𑁆𑀕𑀳𑀡𑀯𑀺𑀲𑀼𑀤𑁆𑀥𑀺𑀢𑁄 𑀧𑀭𑀸𑀦𑀼𑀕𑁆𑀕𑀳𑀁 𑀯𑀢𑁆𑀯𑀸 𑀧𑀭𑀧𑀻𑀴𑀸𑀦𑀺𑀯𑀢𑁆𑀢𑀺𑀯𑀘𑀦𑀢𑁄, 𑀓𑀺𑀭𑀺𑀬𑀥𑀫𑁆𑀫𑀁 𑀯𑀢𑁆𑀯𑀸 𑀅𑀓𑀺𑀭𑀺𑀬𑀥𑀫𑁆𑀫𑀯𑀘𑀦𑀢𑁄, 𑀪𑁄𑀕𑀬𑀲𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀁 𑀯𑀢𑁆𑀯𑀸 𑀪𑀯𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀯𑀘𑀦𑀢𑁄 𑀘 𑀤𑀸𑀦𑀓𑀣𑀸𑀦𑀦𑁆𑀢𑀭𑀁 𑀲𑀻𑀮𑀓𑀣𑀸 𑀓𑀣𑀺𑀢𑀸. 𑀢𑀜𑁆𑀘 𑀲𑀻𑀮𑀁 𑀯𑀝𑁆𑀝𑀦𑀺𑀲𑁆𑀲𑀺𑀢𑀁, 𑀅𑀬𑀁 𑀪𑀯𑀲𑀫𑁆𑀧𑀢𑁆𑀢𑀺 𑀢𑀲𑁆𑀲 𑀨𑀮𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀇𑀫𑁂𑀳𑀺 𑀘 𑀤𑀸𑀦𑀲𑀻𑀮𑀫𑀬𑁂𑀳𑀺 𑀧𑀡𑀻𑀢𑀘𑀭𑀺𑀬𑀪𑁂𑀤𑀪𑀺𑀦𑁆𑀦𑁂𑀳𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀳𑀺 𑀏𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀧𑀡𑀻𑀢𑀢𑀭𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀅𑀧𑀭𑀺𑀫𑁂𑀬𑁆𑀬𑀸 𑀪𑁄𑀕𑀪𑀯𑀲𑀫𑁆𑀧𑀢𑁆𑀢𑀺𑀬𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀕𑁆𑀕𑀓𑀣𑀸. 𑀲𑁆𑀯𑀸𑀬𑀁 𑀲𑀕𑁆𑀕𑁄 𑀭𑀸𑀕𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑁄 𑀲𑀩𑁆𑀩𑀤𑀸 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑁄 𑀅𑀭𑀺𑀬𑀫𑀕𑁆𑀕𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀲𑀕𑁆𑀕𑀸𑀦𑀦𑁆𑀢𑀭𑀁 𑀫𑀕𑁆𑀕𑁄, 𑀫𑀕𑁆𑀕𑀜𑁆𑀘 𑀓𑀣𑁂𑀦𑁆𑀢𑁂𑀦 𑀢𑀤𑀥𑀺𑀕𑀫𑀽𑀧𑀸𑀬𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀲𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀧𑀺 𑀧𑀕𑁂𑀯 𑀇𑀢𑀭𑁂 𑀲𑀩𑁆𑀩𑁂𑀧𑀺 𑀓𑀸𑀫𑀸 𑀦𑀸𑀫 𑀩𑀳𑁆𑀯𑀸𑀤𑀻𑀦𑀯𑀸 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄. 𑀳𑀻𑀦𑀸 𑀕𑀫𑁆𑀫𑀸 𑀧𑁄𑀣𑀼𑀚𑁆𑀚𑀦𑀺𑀓𑀸 𑀅𑀦𑀭𑀺𑀬𑀸 𑀅𑀦𑀢𑁆𑀣𑀲𑀜𑁆𑀳𑀺𑀢𑀸𑀢𑀺 𑀢𑁂𑀲𑀁 𑀑𑀓𑀸𑀭𑁄 𑀮𑀸𑀫𑀓𑀪𑀸𑀯𑁄, 𑀲𑀩𑁆𑀩𑁂𑀧𑀺 𑀪𑀯𑀸 𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀼𑀪𑀽𑀢𑀸𑀢𑀺 𑀢𑀢𑁆𑀣 𑀲𑀁𑀓𑀺𑀮𑁂𑀲𑁄. 𑀲𑀩𑁆𑀩𑀲𑁄 𑀓𑀺𑀮𑁂𑀲𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑁄 𑀘 𑀓𑀣𑁂𑀢𑀩𑁆𑀩𑁄𑀢𑀺 𑀅𑀬𑀫𑀢𑁆𑀣𑁄 𑀫𑀕𑁆𑀕𑀦𑁆𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁂𑀦 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀼𑀔𑀸𑀦𑀁 𑀦𑀺𑀤𑀸𑀦𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀦𑀺𑀩𑁆𑀩𑀸𑀦𑀲𑀜𑁆𑀳𑀺𑀢𑀸𑀦𑀜𑁆𑀘𑀸𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀲𑀼𑀔𑀸𑀦𑀁 𑀓𑀸𑀭𑀡𑀁. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀮𑁄𑀓𑁂 𑀪𑁄𑀕𑀲𑀼𑀔𑀁 𑀦𑀸𑀫, 𑀢𑀁 𑀲𑀩𑁆𑀩𑀁 𑀤𑀸𑀦𑀦𑀺𑀤𑀸𑀦𑀦𑁆𑀢𑀺 𑀧𑀸𑀓𑀝𑁄 𑀅𑀬𑀫𑀢𑁆𑀣𑁄. 𑀬𑀁 𑀧𑀦 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀼𑀔𑀁, 𑀢𑀲𑁆𑀲𑀧𑀺 𑀤𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. 𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀦𑁆𑀢𑀺 𑀬𑀸 𑀇𑀫𑀸 𑀮𑁄𑀓𑁂 𑀧𑀤𑁂𑀲𑀭𑀚𑁆𑀚𑀲𑀺𑀭𑀺𑀲𑁆𑀲𑀭𑀺𑀬𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀤𑀸𑀢𑀺 𑀏𑀯𑀁𑀧𑀪𑁂𑀤𑀸 𑀫𑀸𑀦𑀼𑀲𑀺𑀓𑀸 𑀲𑀫𑁆𑀧𑀢𑁆𑀢𑀺𑀬𑁄, 𑀬𑀸 𑀘 𑀘𑀸𑀢𑀼𑀫𑀳𑀸𑀭𑀸𑀚𑀸𑀤𑀺𑀕𑀢𑀸 𑀤𑀺𑀩𑁆𑀩𑀸 𑀲𑀫𑁆𑀧𑀢𑁆𑀢𑀺𑀬𑁄, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀲𑀫𑁆𑀧𑀢𑁆𑀢𑀺𑀬𑁄, 𑀢𑀸𑀲𑀁 𑀲𑀩𑁆𑀩𑀸𑀲𑀁 𑀇𑀤𑀁 𑀫𑀽𑀮𑀓𑀸𑀭𑀡𑀁. 𑀪𑁄𑀕𑀸𑀦𑀦𑁆𑀢𑀺 𑀪𑀼𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 ‘‘𑀪𑁄𑀕𑁄’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀫𑀦𑀸𑀧𑀺𑀬𑀭𑀽𑀧𑀸𑀤𑀻𑀦𑀁, 𑀢𑀦𑁆𑀦𑀺𑀲𑁆𑀲𑀬𑀸𑀦𑀁 𑀯𑀸 𑀉𑀧𑀪𑁄𑀕𑀲𑀼𑀔𑀸𑀦𑀁, 𑀧𑀢𑀺𑀝𑁆𑀞𑀸 𑀦𑀺𑀘𑁆𑀘𑀮𑀸𑀥𑀺𑀝𑁆𑀞𑀸𑀦𑀢𑀸𑀬. 𑀯𑀺𑀲𑀫𑀕𑀢𑀲𑁆𑀲𑀸𑀢𑀺 𑀩𑁆𑀬𑀲𑀦𑀧𑁆𑀧𑀢𑁆𑀢𑀲𑁆𑀲. 𑀢𑀸𑀡𑀦𑁆𑀢𑀺 𑀭𑀓𑁆𑀔𑀸 𑀢𑀢𑁄 𑀧𑀭𑀺𑀧𑀸𑀮𑀦𑀢𑁄. 𑀮𑁂𑀡𑀦𑁆𑀢𑀺 𑀩𑁆𑀬𑀲𑀦𑁂𑀳𑀺 𑀧𑀭𑀺𑀧𑀸𑀢𑀺𑀬𑀫𑀸𑀦𑀲𑁆𑀲 𑀑𑀮𑀻𑀬𑀦𑀧𑀤𑁂𑀲𑁄. 𑀕𑀢𑀻𑀢𑀺 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀁. 𑀧𑀭𑀸𑀬𑀡𑀦𑁆𑀢𑀺 𑀧𑀝𑀺𑀲𑀭𑀡𑀁. 𑀅𑀯𑀲𑁆𑀲𑀬𑁄𑀢𑀺 𑀯𑀺𑀦𑀺𑀧𑀢𑀺𑀢𑀼𑀁 𑀅𑀤𑁂𑀦𑁆𑀢𑁄 𑀦𑀺𑀲𑁆𑀲𑀬𑁄. 𑀆𑀭𑀫𑁆𑀫𑀡𑀦𑁆𑀢𑀺 𑀑𑀮𑀼𑀩𑁆𑀪𑀸𑀭𑀫𑁆𑀫𑀡𑀁.

𑀭𑀢𑀦𑀫𑀬𑀲𑀻𑀳𑀸𑀲𑀦𑀲𑀤𑀺𑀲𑀦𑁆𑀢𑀺 𑀲𑀩𑁆𑀩𑀭𑀢𑀦𑀫𑀬𑀲𑀢𑁆𑀢𑀗𑁆𑀕𑀫𑀳𑀸𑀲𑀻𑀳𑀸𑀲𑀦𑀲𑀤𑀺𑀲𑀁, 𑀫𑀳𑀕𑁆𑀖𑀁 𑀳𑀼𑀢𑁆𑀯𑀸 𑀲𑀩𑁆𑀩𑀲𑁄 𑀯𑀺𑀦𑀺𑀧𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀢𑁄. 𑀫𑀳𑀸𑀧𑀣𑀯𑀺𑀲𑀤𑀺𑀲𑀁 𑀕𑀢𑀕𑀢𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀸𑀲𑀫𑁆𑀪𑀯𑀢𑁄. 𑀬𑀣𑀸 𑀤𑀼𑀩𑁆𑀩𑀮𑀲𑁆𑀲 𑀧𑀼𑀭𑀺𑀲𑀲𑁆𑀲 𑀆𑀮𑀫𑁆𑀩𑀦𑀭𑀚𑁆𑀚𑀼 𑀉𑀢𑁆𑀢𑀺𑀝𑁆𑀞𑀢𑁄 𑀢𑀺𑀝𑁆𑀞𑀢𑁄 𑀘 𑀉𑀧𑀢𑁆𑀣𑀫𑁆𑀪𑁄, 𑀏𑀯𑀁 𑀤𑀸𑀦𑀁 𑀲𑀢𑁆𑀢𑀸𑀦𑀁 𑀲𑀫𑁆𑀧𑀢𑁆𑀢𑀺𑀪𑀯𑁂 𑀉𑀧𑀧𑀢𑁆𑀢𑀺𑀬𑀸 𑀞𑀺𑀢𑀺𑀬𑀸 𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀆𑀮𑀫𑁆𑀩𑀦𑀝𑁆𑀞𑁂𑀦 𑀆𑀮𑀫𑁆𑀩𑀦𑀭𑀚𑁆𑀚𑀼𑀲𑀤𑀺𑀲’’𑀦𑁆𑀢𑀺. 𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀝𑁆𑀞𑁂𑀦𑀸𑀢𑀺 𑀤𑀼𑀕𑁆𑀕𑀢𑀺𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀝𑁆𑀞𑁂𑀦. 𑀲𑀫𑀲𑁆𑀲𑀸𑀲𑀦𑀝𑁆𑀞𑁂𑀦𑀸𑀢𑀺 𑀮𑁄𑀪𑀫𑀘𑁆𑀙𑀭𑀺𑀬𑀸𑀤𑀺𑀧𑀝𑀺𑀲𑀢𑁆𑀢𑀼𑀧𑀤𑁆𑀤𑀯𑀢𑁄 𑀲𑀫𑁆𑀫𑀤𑁂𑀯 𑀅𑀲𑁆𑀲𑀸𑀲𑀦𑀝𑁆𑀞𑁂𑀦. 𑀪𑀬𑀧𑀭𑀺𑀢𑁆𑀢𑀸𑀡𑀝𑁆𑀞𑁂𑀦𑀸𑀢𑀺 𑀤𑀸𑀮𑀺𑀤𑁆𑀤𑀺𑀬𑀪𑀬𑀢𑁄 𑀧𑀭𑀺𑀧𑀸𑀮𑀦𑀝𑁆𑀞𑁂𑀦. 𑀫𑀘𑁆𑀙𑁂𑀭𑀫𑀮𑀸𑀤𑀻𑀳𑀻𑀢𑀺 𑀫𑀘𑁆𑀙𑁂𑀭𑀮𑁄𑀪𑀤𑁄𑀲𑀇𑀲𑁆𑀲𑀸𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀺 𑀘𑀺𑀢𑁆𑀢𑀫𑀮𑁂𑀳𑀺. 𑀅𑀦𑀼𑀧𑀮𑀺𑀢𑁆𑀢𑀝𑁆𑀞𑁂𑀦𑀸𑀢𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬. 𑀢𑁂𑀲𑀦𑁆𑀢𑀺 𑀫𑀘𑁆𑀙𑁂𑀭𑀫𑀮𑀸𑀤𑀻𑀦𑀁. 𑀏𑀢𑁂𑀲𑀁 𑀏𑀯 𑀤𑀼𑀭𑀸𑀲𑀤𑀝𑁆𑀞𑁂𑀦. 𑀅𑀲𑀦𑁆𑀢𑀸𑀲𑀦𑀝𑁆𑀞𑁂𑀦𑀸𑀢𑀺 𑀅𑀲𑀦𑁆𑀢𑀸𑀲𑀳𑁂𑀢𑀼𑀪𑀸𑀯𑁂𑀦. 𑀬𑁄 𑀳𑀺 𑀤𑀸𑀬𑀓𑁄 𑀤𑀸𑀦𑀧𑀢𑀺, 𑀲𑁄 𑀲𑀫𑁆𑀧𑀢𑀺𑀧𑀺 𑀦 𑀓𑀼𑀢𑁄𑀘𑀺 𑀲𑀦𑁆𑀢𑀲𑀢𑀺, 𑀧𑀕𑁂𑀯 𑀆𑀬𑀢𑀺𑀁. 𑀩𑀮𑀯𑀦𑁆𑀢𑀝𑁆𑀞𑁂𑀦𑀸𑀢𑀺 𑀫𑀳𑀸𑀩𑀮𑀯𑀢𑀸𑀬. 𑀤𑀸𑀬𑀓𑁄 𑀳𑀺 𑀤𑀸𑀦𑀧𑀢𑀺 𑀲𑀫𑁆𑀧𑀢𑀺 𑀧𑀓𑁆𑀔𑀩𑀮𑁂𑀦 𑀩𑀮𑀯𑀸 𑀳𑁄𑀢𑀺, 𑀆𑀬𑀢𑀺𑀁 𑀧𑀦 𑀓𑀸𑀬𑀩𑀮𑀸𑀤𑀻𑀳𑀺. 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀝𑁆𑀞𑁂𑀦𑀸𑀢𑀺 ‘‘𑀯𑀼𑀟𑁆𑀠𑀺𑀓𑀸𑀭𑀡’’𑀦𑁆𑀢𑀺 𑀅𑀪𑀺𑀲𑀫𑁆𑀫𑀢𑀪𑀸𑀯𑁂𑀦. 𑀯𑀺𑀧𑀢𑁆𑀢𑀺𑀢𑁄 𑀲𑀫𑁆𑀧𑀢𑁆𑀢𑀺𑀬𑀸 𑀦𑀬𑀦𑀁 𑀔𑁂𑀫𑀦𑁆𑀢𑀪𑀽𑀫𑀺𑀲𑀫𑁆𑀧𑀸𑀧𑀦𑀁.

𑀇𑀤𑀸𑀦𑀺 𑀫𑀳𑀸𑀩𑁄𑀥𑀺𑀘𑀭𑀺𑀬𑀪𑀸𑀯𑁂𑀦𑀧𑀺 𑀤𑀸𑀦𑀕𑀼𑀡𑀁 𑀤𑀲𑁆𑀲𑁂𑀢𑀼𑀁 𑀤𑀸𑀦𑀁 𑀦𑀸𑀫𑁂𑀢𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑁂𑀦𑀸𑀢𑀺 𑀏𑀢𑁂𑀦 𑀤𑀸𑀦𑀨𑀮𑀁 𑀲𑀫𑁆𑀫𑀤𑁂𑀯 𑀧𑀲𑁆𑀲𑀦𑁆𑀢𑀸 𑀫𑀳𑀸𑀧𑀼𑀭𑀺𑀲𑀸 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀢𑀲𑁆𑀫𑀸 𑀓𑁄 𑀦𑀸𑀫 𑀯𑀺𑀜𑁆𑀜𑀼𑀚𑀸𑀢𑀺𑀓𑁄 𑀩𑀸𑀳𑀺𑀭𑁂 𑀯𑀢𑁆𑀣𑀼𑀫𑁆𑀳𑀺 𑀲𑀗𑁆𑀕𑀁 𑀓𑀭𑁂𑀬𑁆𑀬𑀸𑀢𑀺 𑀑𑀯𑀸𑀤𑀁 𑀤𑁂𑀢𑀺. 𑀇𑀤𑀸𑀦𑀺 𑀬𑀸 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀘 𑀉𑀓𑁆𑀓𑀁𑀲𑀕𑀢𑀸 𑀲𑀫𑁆𑀧𑀢𑁆𑀢𑀺𑀬𑁄, 𑀢𑀸 𑀲𑀩𑁆𑀩𑀸 𑀤𑀸𑀦𑀢𑁄𑀬𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀸𑀦𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀓𑁆𑀓𑀫𑀸𑀭𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑀅𑀢𑁆𑀢𑀳𑀺𑀢𑀸𑀬 𑀏𑀯, 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀧𑀦 𑀅𑀢𑁆𑀢𑀳𑀺𑀢𑀸𑀬 𑀘 𑀧𑀭𑀳𑀺𑀢𑀸𑀬 𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 𑀲𑀸 𑀢𑀸𑀲𑀁 𑀧𑀭𑀢𑁄 𑀯𑀼𑀢𑁆𑀢𑀸. 𑀏𑀢𑀸 𑀮𑁄𑀓𑀺𑀬𑀸, 𑀇𑀫𑀸 𑀧𑀦 𑀮𑁄𑀓𑀼𑀢𑁆𑀢𑀭𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀯𑀓𑀧𑀸𑀭𑀫𑀻𑀜𑀸𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀸𑀲𑀼𑀧𑀺 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑀢𑀭𑀼𑀓𑁆𑀓𑀝𑁆𑀞𑀢𑀫𑀫𑁂𑀯 𑀤𑀲𑁆𑀲𑁂𑀢𑀼𑀁 𑀓𑀫𑁂𑀦 𑀜𑀸𑀡𑀢𑁆𑀢𑀬𑀁 𑀯𑀼𑀢𑁆𑀢𑀁. 𑀢𑁂𑀲𑀁 𑀧𑀦 𑀤𑀸𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀏𑀢𑁂𑀦𑁂𑀯 𑀢𑀲𑁆𑀲 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀧𑀘𑁆𑀘𑀬𑀪𑀸𑀯𑁄 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀸𑀦𑀜𑁆𑀘 𑀦𑀸𑀫 𑀳𑀺𑀢𑀚𑁆𑀛𑀸𑀲𑀬𑁂𑀦, 𑀧𑀽𑀚𑀸𑀯𑀲𑁂𑀦 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀧𑀭𑁂𑀲𑀁 𑀧𑀭𑀺𑀘𑁆𑀘𑀚𑀦𑀁, 𑀢𑀲𑁆𑀫𑀸 𑀤𑀸𑀬𑀓𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀧𑀭𑁂𑀲𑀁 𑀲𑀦𑁆𑀢𑀓𑀁 𑀳𑀭𑀺𑀲𑁆𑀲𑀢𑀻𑀢𑀺 𑀅𑀝𑁆𑀞𑀸𑀦𑀫𑁂𑀢𑀦𑁆𑀢𑀺 𑀆𑀳 𑁋 ‘‘𑀤𑀸𑀦𑀁 𑀤𑀤𑀦𑁆𑀢𑁄 𑀲𑀻𑀮𑀁 𑀲𑀫𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺. 𑀲𑀻𑀮𑀸𑀮𑀗𑁆𑀓𑀸𑀭𑀲𑀤𑀺𑀲𑁄 𑀅𑀮𑀗𑁆𑀓𑀸𑀭𑁄 𑀦𑀢𑁆𑀣𑀺 𑀲𑁄𑀪𑀸𑀯𑀺𑀲𑁂𑀲𑀸𑀯𑀳𑀢𑁆𑀢𑀸 𑀲𑀻𑀮𑀲𑁆𑀲. 𑀲𑀻𑀮𑀧𑀼𑀧𑁆𑀨𑀲𑀤𑀺𑀲𑀁 𑀧𑀼𑀧𑁆𑀨𑀁 𑀦𑀢𑁆𑀣𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀻𑀮𑀕𑀦𑁆𑀥𑀲𑀤𑀺𑀲𑁄 𑀕𑀦𑁆𑀥𑁄 𑀦𑀢𑁆𑀣𑀻𑀢𑀺 𑀏𑀢𑁆𑀣 ‘‘𑀘𑀦𑁆𑀤𑀦𑀁 𑀢𑀕𑀭𑀁 𑀯𑀸𑀧𑀻’’𑀢𑀺𑀆𑀤𑀺𑀓𑀸 (𑀥. 𑀧. 𑁫𑁫; 𑀫𑀺. 𑀧. 𑁪.𑁧.𑁧) 𑀕𑀸𑀣𑀸 𑁋 ‘‘𑀕𑀦𑁆𑀥𑁄 𑀇𑀲𑀻𑀦𑀁 𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀁, 𑀓𑀸𑀬𑀸 𑀘𑀼𑀢𑁄 𑀕𑀘𑁆𑀙𑀢𑀺 𑀫𑀸𑀮𑀼𑀢𑁂𑀦𑀸’’𑀢𑀺𑀆𑀤𑀺𑀓𑀸 (𑀚𑀸. 𑁨.𑁧𑁭.𑁫𑁫) 𑀚𑀸𑀢𑀓𑀕𑀸𑀣𑀸𑀬𑁄 𑀘 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸, 𑀲𑀻𑀮𑀜𑁆𑀳𑀺 𑀲𑀢𑁆𑀢𑀸𑀦𑀁 𑀆𑀪𑀭𑀡𑀜𑁆𑀘𑁂𑀯 𑀅𑀮𑀗𑁆𑀓𑀸𑀭𑁄 𑀘 𑀕𑀦𑁆𑀥𑀯𑀺𑀮𑁂𑀧𑀦𑀜𑁆𑀘 𑀤𑀲𑁆𑀲𑀦𑀻𑀬𑀪𑀸𑀯𑀸𑀯𑀳𑀜𑁆𑀘. 𑀢𑁂𑀦𑀸𑀳 ‘‘𑀲𑀻𑀮𑀸𑀮𑀗𑁆𑀓𑀸𑀭𑁂𑀦 𑀳𑀻’’𑀢𑀺𑀆𑀤𑀺.

𑀅𑀬𑀁 𑀲𑀕𑁆𑀕𑁄 𑀮𑀩𑁆𑀪𑀢𑀻𑀢𑀺 𑀇𑀤𑀁 𑀫𑀚𑁆𑀛𑀺𑀫𑁂𑀳𑀺 𑀙𑀦𑁆𑀤𑀸𑀤𑀻𑀳𑀺 𑀲𑀫𑀸𑀤𑀸𑀦𑀲𑀻𑀮𑀁 𑀲𑀦𑁆𑀥𑀸𑀬𑀸𑀳. 𑀢𑁂𑀦𑀸𑀳 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑁋

‘‘𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀺;

𑀫𑀚𑁆𑀛𑀺𑀫𑁂𑀦 𑀘 𑀤𑁂𑀯𑀢𑁆𑀢𑀁, 𑀉𑀢𑁆𑀢𑀫𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺. (𑀚𑀸. 𑁧.𑁮.𑁭𑁫; 𑁨.𑁨𑁨.𑁪𑁨𑁯; 𑀤𑀻. 𑀦𑀺. 𑀝𑀻. 𑁨.𑁭𑁫-𑁭𑁬);

𑀇𑀝𑁆𑀞𑁄𑀢𑀺 𑀲𑀼𑀔𑁄. 𑀓𑀦𑁆𑀢𑁄𑀢𑀺 𑀓𑀫𑀦𑀻𑀬𑁄. 𑀫𑀦𑀸𑀧𑁄𑀢𑀺 𑀫𑀦𑀯𑀟𑁆𑀠𑀦𑀓𑁄. 𑀢𑀁 𑀧𑀦 𑀢𑀲𑁆𑀲 𑀇𑀝𑁆𑀞𑀸𑀤𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀘𑁆𑀘𑀫𑁂𑀢𑁆𑀣 𑀓𑀻𑀴𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀤𑁄𑀲𑁄𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀦𑀸 𑀅𑀧𑁆𑀧𑀲𑁆𑀲𑀸𑀤𑀸𑀤𑀺𑀦𑀸 𑀘 𑀤𑀽𑀲𑀺𑀢𑀪𑀸𑀯𑁄, 𑀬𑀢𑁄 𑀢𑁂 𑀯𑀺𑀜𑁆𑀜𑀽𑀦𑀁 𑀘𑀺𑀢𑁆𑀢𑀁 𑀦𑀸𑀭𑀸𑀥𑁂𑀦𑁆𑀢𑀺. 𑀅𑀣 𑀯𑀸 𑀆𑀤𑀻𑀦𑀁 𑀯𑀸𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀆𑀤𑀻𑀦𑀯𑁄, 𑀧𑀭𑀫𑀓𑀧𑀡𑀢𑀸. 𑀢𑀣𑀸 𑀘 𑀓𑀸𑀫𑀸 𑀬𑀣𑀸𑀪𑀽𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀦𑀁 𑀧𑀘𑁆𑀘𑀼𑀧𑀢𑀺𑀝𑁆𑀞𑀦𑁆𑀢𑀺. 𑀮𑀸𑀫𑀓𑀪𑀸𑀯𑁄𑀢𑀺 𑀅𑀲𑁂𑀝𑁆𑀞𑁂𑀳𑀺 𑀲𑁂𑀯𑀺𑀢𑀩𑁆𑀩𑁄, 𑀲𑁂𑀝𑁆𑀞𑁂𑀳𑀺 𑀦 𑀲𑁂𑀯𑀺𑀢𑀩𑁆𑀩𑁄 𑀦𑀺𑀳𑀻𑀦𑀪𑀸𑀯𑁄. 𑀲𑀁𑀓𑀺𑀮𑀺𑀲𑁆𑀲𑀦𑀦𑁆𑀢𑀺 𑀯𑀺𑀩𑀸𑀥𑀓𑀢𑀸 𑀉𑀧𑀢𑀸𑀧𑀢𑀸 𑀘.

𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀦𑁆𑀢𑀺 𑀏𑀢𑁆𑀣 𑀬𑀢𑁆𑀢𑀓𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀢𑀢𑁆𑀢𑀓𑀸 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀸. 𑀅𑀧𑀺𑀘 𑁋 ‘‘𑀦𑁂𑀓𑁆𑀔𑀫𑁆𑀫𑀁 𑀦𑀸𑀫𑁂𑀢𑀁 𑀅𑀲𑀫𑁆𑀩𑀸𑀥𑀁 𑀅𑀲𑀁𑀓𑀺𑀮𑀺𑀝𑁆𑀞𑀁 𑀦𑀺𑀓𑁆𑀔𑀦𑁆𑀢𑀁 𑀓𑀸𑀫𑁂𑀳𑀺, 𑀦𑀺𑀓𑁆𑀔𑀦𑁆𑀢𑀁 𑀓𑀸𑀫𑀲𑀜𑁆𑀜𑀸𑀬, 𑀦𑀺𑀓𑁆𑀔𑀦𑁆𑀢𑀁 𑀓𑀸𑀫𑀯𑀺𑀢𑀓𑁆𑀓𑁂𑀳𑀺, 𑀦𑀺𑀓𑁆𑀔𑀦𑁆𑀢𑀁 𑀓𑀸𑀫𑀧𑀭𑀺𑀴𑀸𑀳𑁂𑀳𑀺, 𑀦𑀺𑀓𑁆𑀔𑀦𑁆𑀢𑀁 𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀬𑀸’’𑀢𑀺𑀆𑀤𑀺𑀦𑀸 (𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁨𑁬; 𑀤𑀻. 𑀦𑀺. 𑀝𑀻. 𑁨.𑁭𑁫-𑁭𑁬) 𑀦𑀬𑁂𑀦 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑁂 𑀧𑀓𑀸𑀲𑁂𑀲𑀺, 𑀧𑀩𑁆𑀩𑀚𑁆𑀚𑀸𑀬 𑀛𑀸𑀦𑀸𑀤𑀻𑀲𑀼 𑀘 𑀕𑀼𑀡𑁂 𑀯𑀺𑀪𑀸𑀯𑁂𑀲𑀺 𑀯𑀡𑁆𑀡𑁂𑀲𑀺. 𑀓𑀮𑁆𑀮𑀘𑀺𑀢𑁆𑀢𑀦𑁆𑀢𑀺 𑀳𑁂𑀝𑁆𑀞𑀸 𑀧𑀯𑀢𑁆𑀢𑀺𑀢𑀤𑁂𑀲𑀦𑀸𑀬 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀁 𑀘𑀺𑀢𑁆𑀢𑀤𑁄𑀲𑀸𑀦𑀁 𑀯𑀺𑀕𑀢𑀢𑁆𑀢𑀸 𑀉𑀧𑀭𑀺𑀤𑁂𑀲𑀦𑀸𑀬 𑀪𑀸𑀚𑀦𑀪𑀸𑀯𑀽𑀧𑀕𑀫𑀦𑁂𑀦 𑀓𑀫𑁆𑀫𑀓𑁆𑀔𑀫𑀘𑀺𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀲𑁆𑀫𑀸 𑀅𑀲𑁆𑀲𑀤𑁆𑀥𑀺𑀬𑀸𑀤𑀬𑁄 𑀘𑀺𑀢𑁆𑀢𑀲𑁆𑀲 𑀭𑁄𑀕𑀪𑀽𑀢𑀸, 𑀢𑀤𑀸 𑀢𑁂 𑀯𑀺𑀕𑀢𑀸, 𑀢𑀲𑁆𑀫𑀸 𑀆𑀳 ‘‘𑀅𑀭𑁄𑀕𑀘𑀺𑀢𑁆𑀢’’𑀦𑁆𑀢𑀺. 𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀓𑀺𑀮𑁂𑀲𑀯𑀺𑀕𑀫𑁂𑀦 𑀫𑀼𑀤𑀼𑀘𑀺𑀢𑁆𑀢𑀁. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀯𑀺𑀕𑀫𑁂𑀦 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀉𑀴𑀸𑀭𑀧𑀻𑀢𑀺𑀧𑀸𑀫𑁄𑀚𑁆𑀚𑀬𑁄𑀕𑁂𑀦 𑀉𑀤𑀕𑁆𑀕𑀘𑀺𑀢𑁆𑀢𑀁. 𑀢𑀢𑁆𑀣 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀦𑁆𑀦𑀘𑀺𑀢𑁆𑀢𑀁. 𑀬𑀤𑀸 𑀪𑀕𑀯𑀸 𑀅𑀜𑁆𑀜𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀓𑀮𑁆𑀮𑀘𑀺𑀢𑁆𑀢𑀦𑁆𑀢𑀺 𑀓𑀸𑀫𑀘𑁆𑀙𑀦𑁆𑀤𑀯𑀺𑀕𑀫𑁂𑀦 𑀅𑀭𑁄𑀕𑀘𑀺𑀢𑁆𑀢𑀁. 𑀫𑀼𑀤𑀼𑀘𑀺𑀢𑁆𑀢𑀦𑁆𑀢𑀺 𑀩𑁆𑀬𑀸𑀧𑀸𑀤𑀯𑀺𑀕𑀫𑁂𑀦 𑀫𑁂𑀢𑁆𑀢𑀸𑀯𑀲𑁂𑀦 𑀅𑀓𑀣𑀺𑀦𑀘𑀺𑀢𑁆𑀢𑀁. 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀦𑁆𑀢𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀯𑀺𑀕𑀫𑁂𑀦 𑀯𑀺𑀓𑁆𑀔𑁂𑀧𑀲𑁆𑀲 𑀯𑀺𑀕𑀢𑀢𑁆𑀢𑀸 𑀢𑁂𑀦 𑀅𑀧𑀺𑀳𑀺𑀢𑀘𑀺𑀢𑁆𑀢𑀁. 𑀉𑀤𑀕𑁆𑀕𑀘𑀺𑀢𑁆𑀢𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀯𑀺𑀕𑀫𑁂𑀦 𑀲𑀫𑁆𑀧𑀕𑁆𑀕𑀳𑀺𑀢𑀯𑀲𑁂𑀦 𑀅𑀮𑀻𑀦𑀘𑀺𑀢𑁆𑀢𑀁. 𑀧𑀲𑀦𑁆𑀦𑀘𑀺𑀢𑁆𑀢𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀕𑀫𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀲𑁂𑀲𑀧𑀤𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀦𑀸 𑀉𑀧𑀫𑀸𑀯𑀲𑁂𑀦 𑀉𑀧𑀸𑀮𑀺𑀲𑁆𑀲 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀅𑀭𑀺𑀬𑀫𑀕𑁆𑀕𑀦𑀺𑀧𑁆𑀨𑀸𑀤𑀦𑀜𑁆𑀘 𑀤𑀲𑁆𑀲𑁂𑀢𑀺. 𑀅𑀧𑀕𑀢𑀓𑀸𑀴𑀓𑀦𑁆𑀢𑀺 𑀯𑀺𑀕𑀢𑀓𑀸𑀴𑀓𑀁. 𑀲𑀫𑁆𑀫𑀤𑁂𑀯𑀸𑀢𑀺 𑀲𑀼𑀝𑁆𑀞𑀼 𑀏𑀯. 𑀭𑀚𑀦𑀦𑁆𑀢𑀺 𑀦𑀻𑀮𑀧𑀻𑀢𑀸𑀤𑀺𑀭𑀗𑁆𑀕𑀚𑀸𑀢𑀁. 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀕𑀡𑁆𑀳𑁂𑀬𑁆𑀬 𑀧𑀪𑀲𑁆𑀲𑀭𑀁 𑀪𑀯𑁂𑀬𑁆𑀬. 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂𑀢𑀺 𑀢𑀺𑀲𑁆𑀲𑀁 𑀏𑀯 𑀦𑀺𑀲𑀚𑁆𑀚𑀸𑀬𑀁. 𑀏𑀢𑁂𑀦𑀲𑁆𑀲 𑀮𑀳𑀼𑀯𑀺𑀧𑀲𑁆𑀲𑀓𑀢𑀸 𑀢𑀺𑀓𑁆𑀔𑀧𑀜𑁆𑀜𑀢𑀸 𑀲𑀼𑀔𑀧𑀝𑀺𑀧𑀤𑀸𑀔𑀺𑀧𑁆𑀧𑀸𑀪𑀺𑀜𑁆𑀜𑀢𑀸 𑀘 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀯𑀺𑀭𑀚𑀦𑁆𑀢𑀺 𑀅𑀧𑀸𑀬𑀕𑀫𑀦𑀻𑀬𑀭𑀸𑀕𑀭𑀚𑀸𑀤𑀻𑀦𑀁 𑀯𑀺𑀕𑀫𑁂𑀦 𑀯𑀺𑀭𑀚𑀁. 𑀅𑀦𑀯𑀲𑁂𑀲𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀫𑀮𑀸𑀧𑀕𑀫𑁂𑀦 𑀯𑀻𑀢𑀫𑀮𑀁. 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀦𑁆𑀢𑀺 𑀳𑁂𑀝𑁆𑀞𑀺𑀫𑀸𑀦𑀁 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁. 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀫𑀕𑁆𑀕𑀜𑀸𑀡𑀁 𑀅𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀁 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀝𑀺𑀯𑀺𑀚𑁆𑀛𑀦𑁆𑀢𑀦𑁆𑀢𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀦𑁆𑀢𑀁. 𑀢𑁂𑀦𑀸𑀳 ‘‘𑀓𑀺𑀘𑁆𑀘𑀯𑀲𑁂𑀦𑀸’’𑀢𑀺.

𑀢𑀢𑁆𑀭𑀺𑀤𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑁋 𑀯𑀢𑁆𑀣𑀁 𑀯𑀺𑀬 𑀘𑀺𑀢𑁆𑀢𑀁, 𑀯𑀢𑁆𑀣𑀲𑁆𑀲 𑀆𑀕𑀦𑁆𑀢𑀼𑀓𑀫𑀮𑁂𑀳𑀺 𑀓𑀺𑀮𑀺𑀝𑁆𑀞𑀪𑀸𑀯𑁄 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀭𑀸𑀕𑀸𑀤𑀺𑀫𑀮𑁂𑀳𑀺 𑀲𑀁𑀓𑀺𑀮𑀺𑀝𑁆𑀞𑀪𑀸𑀯𑁄, 𑀥𑁄𑀯𑀦𑀲𑀺𑀮𑀸 𑀯𑀺𑀬 𑀅𑀦𑀼𑀧𑀼𑀩𑁆𑀩𑀻𑀓𑀣𑀸, 𑀉𑀤𑀓𑀁 𑀯𑀺𑀬 𑀲𑀤𑁆𑀥𑀸, 𑀉𑀤𑀓𑁂 𑀢𑁂𑀫𑁂𑀢𑁆𑀯𑀸 𑀊𑀲𑀕𑁄𑀫𑀬𑀙𑀸𑀭𑀺𑀓𑀸𑀪𑀭𑁂𑀳𑀺 𑀓𑀸𑀴𑀓𑀧𑀤𑁂𑀲𑁂 𑀲𑀫𑁆𑀫𑀤𑁆𑀤𑀺𑀢𑁆𑀯𑀸 𑀯𑀢𑁆𑀣𑀲𑁆𑀲 𑀥𑁄𑀯𑀦𑀧𑀬𑁄𑀕𑁄 𑀯𑀺𑀬 𑀲𑀤𑁆𑀥𑀸𑀲𑀺𑀦𑁂𑀳𑁂𑀦 𑀢𑁂𑀫𑁂𑀢𑁆𑀯𑀸 𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀸𑀳𑀺 𑀤𑁄𑀲𑁂 𑀲𑀺𑀣𑀺𑀮𑁂 𑀓𑀢𑁆𑀯𑀸 𑀲𑀼𑀢𑀸𑀤𑀺𑀯𑀺𑀥𑀺𑀦𑀸 𑀘𑀺𑀢𑁆𑀢𑀲𑁆𑀲 𑀲𑁄𑀥𑀦𑁂 𑀯𑀻𑀭𑀺𑀬𑀸𑀭𑀫𑁆𑀪𑁄. 𑀢𑁂𑀦 𑀧𑀬𑁄𑀕𑁂𑀦 𑀯𑀢𑁆𑀣𑁂 𑀓𑀸𑀴𑀓𑀸𑀧𑀕𑀫𑁄 𑀯𑀺𑀬 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀁, 𑀭𑀗𑁆𑀕𑀚𑀸𑀢𑀁 𑀯𑀺𑀬 𑀅𑀭𑀺𑀬𑀫𑀕𑁆𑀕𑁄, 𑀢𑁂𑀦 𑀲𑀼𑀤𑁆𑀥𑀲𑁆𑀲 𑀯𑀢𑁆𑀣𑀲𑁆𑀲 𑀧𑀪𑀲𑁆𑀲𑀭𑀪𑀸𑀯𑁄 𑀯𑀺𑀬 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀲𑁆𑀲 𑀘𑀺𑀢𑁆𑀢𑀲𑁆𑀲 𑀫𑀕𑁆𑀕𑁂𑀦 𑀧𑀭𑀺𑀬𑁄𑀤𑀧𑀦𑀦𑁆𑀢𑀺.

𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀯𑀢𑁆𑀯𑀸 𑀤𑀲𑁆𑀲𑀦𑀁 𑀦𑀸𑀫 𑀜𑀸𑀡𑀤𑀲𑁆𑀲𑀦𑀢𑁄 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀻𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀧𑀢𑁆𑀢𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀧𑀢𑁆𑀢𑀺 𑀘 𑀜𑀸𑀡𑀲𑀫𑁆𑀧𑀢𑁆𑀢𑀺𑀢𑁄 𑀅𑀜𑁆𑀜𑀸𑀧𑀺 𑀯𑀺𑀚𑁆𑀚𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀯𑀺𑀤𑀺𑀢𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦𑁂𑀲𑀸 𑀯𑀺𑀤𑀺𑀢𑀥𑀫𑁆𑀫𑀢𑀸 𑀥𑀫𑁆𑀫𑁂𑀲𑀼 𑀏𑀓𑀤𑁂𑀲𑀦𑀸𑀧𑀺 𑀳𑁄𑀢𑀻𑀢𑀺 𑀦𑀺𑀧𑁆𑀧𑀤𑁂𑀲𑀢𑁄 𑀯𑀺𑀤𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀲𑁆𑀲 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀁𑀬𑁂𑀯 𑀤𑀻𑀧𑁂𑀢𑀺. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀏𑀓𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀁 𑀦𑀺𑀧𑁆𑀧𑀤𑁂𑀲𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀲𑀫𑀦𑁆𑀢𑀢𑁄 𑀑𑀕𑀸𑀳𑀦𑁆𑀢𑀁 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀤𑀺𑀝𑁆𑀞𑁄 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑁄 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁄’’𑀢𑀺. 𑀢𑀺𑀡𑁆𑀡𑀸 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀲𑀧𑁆𑀧𑀝𑀺𑀪𑀬𑀓𑀦𑁆𑀢𑀸𑀭𑀲𑀤𑀺𑀲𑀸 𑀲𑁄𑀴𑀲𑀯𑀢𑁆𑀣𑀼𑀓𑀸 𑀅𑀝𑁆𑀞𑀯𑀢𑁆𑀣𑀼𑀓𑀸 𑀘 𑀢𑀺𑀡𑁆𑀡𑀸 𑀯𑀺𑀘𑀺𑀓𑀺𑀘𑁆𑀙𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸. 𑀯𑀺𑀕𑀢𑀓𑀣𑀁𑀓𑀣𑁄𑀢𑀺 𑀧𑀯𑀢𑁆𑀢𑀺𑀆𑀤𑀻𑀲𑀼 ‘‘𑀏𑀯𑀁 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀺𑀓𑀸 𑀯𑀺𑀕𑀢𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀓𑀣𑀁𑀓𑀣𑀸. 𑀲𑀸𑀭𑀚𑁆𑀚𑀓𑀭𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀧𑀳𑀻𑀦𑀢𑁆𑀢𑀸 𑀢𑀧𑁆𑀧𑀝𑀺𑀧𑀓𑁆𑀔𑁂𑀲𑀼 𑀲𑀻𑀮𑀸𑀤𑀺𑀕𑀼𑀡𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀯𑁂𑀲𑀸𑀭𑀚𑁆𑀚𑀁 𑀯𑀺𑀲𑀸𑀭𑀤𑀪𑀸𑀯𑀁 𑀯𑁂𑀬𑁆𑀬𑀢𑁆𑀢𑀺𑀬𑀁 𑀧𑀢𑁆𑀢𑁄. 𑀅𑀢𑁆𑀢𑀦𑀸 𑀏𑀯 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀢𑁆𑀢𑀸 𑀦 𑀢𑀲𑁆𑀲 𑀧𑀭𑁄 𑀧𑀘𑁆𑀘𑁂𑀢𑀩𑁆𑀩𑁄 𑀅𑀢𑁆𑀣𑀻𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑁄.

𑁭𑁧. 𑀧𑀡𑁆𑀟𑀺𑀢𑁄𑀢𑀺 𑀧𑀜𑁆𑀜𑀯𑀸.

𑁭𑁨. 𑀢𑁂𑀦 𑀳𑀺 𑀲𑀫𑁆𑀫𑀸𑀢𑀺 𑀤𑁄𑀯𑀸𑀭𑀺𑀓𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀢𑀺𑀬𑁂𑀯, ‘‘𑀏𑀢𑁆𑀣𑁂𑀯𑀸’’𑀢𑀺 𑀢𑁂𑀦 𑀯𑀼𑀢𑁆𑀢𑀯𑀘𑀦𑀁 𑀲𑀼𑀢𑁆𑀯𑀸𑀧𑀺 𑀢𑀲𑁆𑀲 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄. 𑀓𑀲𑁆𑀫𑀸? 𑀧𑀭𑀺𑀤𑁂𑀯𑀢𑀸𑀬. 𑀢𑁂𑀦𑀸𑀳 ‘‘𑀩𑀮𑀯𑀲𑁄𑀓𑁂𑀦 𑀅𑀪𑀺𑀪𑀽𑀢𑁄’’𑀢𑀺.

𑁭𑁩. 𑀢𑁂𑀦𑁂𑀯𑀸𑀢𑀺 𑀬𑁂𑀦 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀆𑀲𑀦𑀁 𑀲𑀫𑁆𑀫𑀚𑁆𑀚𑀢𑀺, 𑀢𑁂𑀦𑁂𑀯 𑀉𑀤𑀭𑁂 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 ‘‘𑀫𑀸𑀳𑀁 𑀲𑀢𑁆𑀣𑀸𑀭𑀁 𑀫𑀫 𑀲𑀭𑀻𑀭𑁂𑀦 𑀨𑀼𑀲𑀺’’𑀦𑁆𑀢𑀺 𑀅𑀦𑁆𑀢𑀭𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀢𑀁 𑀉𑀤𑀭𑁂 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. ‘‘𑀤𑀢𑁆𑀢𑀧𑀜𑁆𑀜𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁭𑁧) 𑀯𑀺𑀬 𑀤𑀢𑁆𑀢-𑀲𑀤𑁆𑀤𑁄 𑀏𑀢𑁆𑀣 𑀩𑀸𑀮𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀚𑀴𑁄𑀲𑀺 𑀚𑀸𑀢𑁄’’𑀢𑀺. 𑀉𑀧𑀝𑁆𑀞𑀸𑀓𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁂𑀦𑀸𑀢𑀺 𑀧𑀼𑀩𑁆𑀩𑁂 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀲𑁆𑀲 𑀇𑀤𑀸𑀦𑀺 𑀅𑀦𑀼𑀧𑀝𑁆𑀞𑀸𑀓𑀪𑀸𑀯𑁂𑀦.

𑁭𑁫. 𑀅𑀯𑀺𑀜𑁆𑀜𑀸𑀡𑀓𑀁 𑀤𑀸𑀭𑀼𑀲𑀸𑀔𑀸𑀤𑀺𑀫𑀬𑀁. 𑀩𑀳𑀮𑀩𑀳𑀮𑀁 𑀧𑀻𑀢𑀸𑀯𑀮𑁂𑀧𑀦𑀁 𑀭𑀗𑁆𑀕𑀚𑀸𑀢𑀦𑁆𑀢𑀺 𑀅𑀢𑀺𑀯𑀺𑀬 𑀩𑀳𑀮𑀁 𑀧𑀻𑀢𑀯𑀡𑁆𑀡𑀫𑀜𑁆𑀚𑀺𑀝𑁆𑀞𑀆𑀤𑀺𑀅𑀯𑀮𑁂𑀧𑀦𑀭𑀚𑀦𑀁. 𑀖𑀝𑁆𑀝𑁂𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀘𑁆𑀙𑀯𑀺𑀁, 𑀬𑀸 𑀭𑀗𑁆𑀕𑀁 𑀧𑀺𑀯𑀢𑀺. 𑀦𑀺𑀮𑁆𑀮𑁄𑀫𑀢𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀅𑀦𑀼𑀮𑀺𑀫𑁆𑀧𑀦𑁂𑀦. 𑀔𑀡𑁆𑀟𑀔𑀡𑁆𑀟𑀺𑀢𑀦𑁆𑀢𑀺 𑀔𑀡𑁆𑀟𑀔𑀡𑁆𑀟𑀺𑀢𑀪𑀸𑀯𑀁. 𑀭𑀗𑁆𑀕𑀓𑁆𑀔𑀫𑁄 𑀭𑀚𑀦𑀺𑀬𑁄. 𑀢𑁂𑀦𑀸𑀳 ‘‘𑀭𑀸𑀕𑀫𑀢𑁆𑀢𑀁 𑀚𑀦𑁂𑀢𑀻’’𑀢𑀺. 𑀅𑀦𑀼𑀬𑁄𑀕𑀦𑁆𑀢𑀺 𑀘𑁄𑀤𑀦𑀁. 𑀯𑀻𑀫𑀁𑀲𑀦𑁆𑀢𑀺 𑀯𑀺𑀘𑀸𑀭𑀡𑀁. 𑀣𑀼𑀲𑁂 𑀓𑁄𑀝𑁆𑀝𑁂𑀢𑁆𑀯𑀸 𑀢𑀡𑁆𑀟𑀼𑀮𑀧𑀭𑀺𑀬𑁂𑀲𑀦𑀁 𑀯𑀺𑀬 𑀓𑀤𑀮𑀺𑀬𑀁 𑀲𑀸𑀭𑀧𑀭𑀺𑀬𑁂𑀲𑀦𑀁 𑀯𑀺𑀬 𑀘 𑀦𑀺𑀕𑀡𑁆𑀞𑀯𑀸𑀤𑁂 𑀲𑀸𑀭𑀯𑀻𑀫𑀁𑀲𑀦𑀁. 𑀢𑀢𑁄 𑀏𑀯 𑀘 𑀢𑀁 𑀯𑀻𑀫𑀁𑀲𑀦𑁆𑀢𑁄 𑀭𑀺𑀢𑁆𑀢𑀓𑁄 𑀢𑀼𑀘𑁆𑀙𑀓𑁄𑀯 𑀳𑁄𑀢𑀻𑀢𑀺. 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀘𑀢𑀼𑀲𑀘𑁆𑀘𑀯𑀺𑀦𑀺𑀫𑀼𑀢𑁆𑀢𑀁 𑀦𑀢𑁆𑀣𑀺, 𑀢𑀜𑁆𑀘 𑀯𑀻𑀫𑀁𑀲𑀺𑀬𑀫𑀸𑀦𑀁 𑀯𑀺𑀜𑁆𑀜𑀽𑀦𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀫𑁂𑀯 𑀚𑀦𑁂𑀢𑀺, 𑀅𑀢𑀧𑁆𑀧𑀓𑀜𑁆𑀘 𑀅𑀲𑁂𑀘𑀦𑀸𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀘𑀢𑀼𑀲𑀘𑁆𑀘𑀓𑀣𑀸 𑀳𑀻’’𑀢𑀺𑀆𑀤𑀺. 𑀬𑀣𑀸 𑀬𑀣𑀸𑀢𑀺 𑀬𑀤𑀺 𑀔𑀦𑁆𑀥𑀫𑀼𑀔𑁂𑀦 𑀬𑀤𑀺 𑀥𑀸𑀢𑀸𑀬𑀢𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀫𑀼𑀔𑁂𑀦 𑀩𑀼𑀤𑁆𑀥𑀯𑀘𑀦𑀁 𑀑𑀕𑀸𑀳𑀺𑀲𑁆𑀲𑀢𑀺, 𑀢𑀣𑀸 𑀢𑀣𑀸 𑀕𑀫𑁆𑀪𑀻𑀭𑀜𑀸𑀡𑀸𑀦𑀁𑀬𑁂𑀯 𑀕𑁄𑀘𑀭𑀪𑀸𑀯𑀢𑁄 𑀕𑀫𑁆𑀪𑀻𑀭𑀫𑁂𑀯 𑀳𑁄𑀢𑀺. 𑀬𑁄 𑀘𑁂𑀢𑁆𑀣 𑀧𑀡𑁆𑀟𑀺𑀢𑁄 𑀦𑀺𑀧𑀼𑀡𑁄 𑀓𑀢𑀧𑀭𑀧𑁆𑀧𑀯𑀸𑀤𑁄 𑀧𑀡𑀺𑀥𑀸𑀬 𑀲𑀩𑁆𑀩𑀣𑀸𑀫𑁂𑀦 𑀘𑁄𑀤𑀦𑀁 𑀆𑀭𑀫𑁆𑀪𑀢𑀺 𑀢𑀲𑁆𑀲 𑀘𑁄𑀤𑀦𑀸 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀼𑀦 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀯𑀺𑀘𑀸𑀭𑁂𑀦𑁆𑀢𑁂𑀲𑀼𑀧𑀺 𑀯𑀺𑀫𑀤𑁆𑀤𑀓𑁆𑀔𑀫𑀢𑁄, 𑀏𑀯𑀁 𑀢𑀣𑀸𑀕𑀢𑀯𑀸𑀤𑁄 𑀲𑁆𑀯𑀸𑀔𑁆𑀬𑀸𑀢𑀪𑀸𑀯𑀢𑁄𑀢𑀺 𑀆𑀳 ‘‘𑀅𑀦𑀼𑀬𑁄𑀕𑀓𑁆𑀔𑀫𑁄 𑀯𑀺𑀫𑀚𑁆𑀚𑀦𑀓𑁆𑀔𑀫𑁄 𑀘𑀸’’𑀢𑀺.

𑁭𑁬. 𑀯𑀺𑀲𑀬𑀧𑀭𑀺𑀜𑁆𑀜𑀸𑀡𑁂𑀦 𑀤𑀳𑀢𑀺 𑀧𑀝𑀺𑀧𑀓𑁆𑀔𑁂 𑀲𑁄𑀥𑁂𑀢𑀻𑀢𑀺 𑀥𑀻𑀭𑁄, 𑀲𑁆𑀯𑀸𑀬𑀫𑀲𑁆𑀲 𑀥𑀻𑀭𑀪𑀸𑀯𑁄 𑀲𑀩𑁆𑀩𑀲𑁄 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑀢𑀸𑀬𑀸𑀢𑀺 𑀆𑀳 𑁋 ‘‘𑀬𑀸 𑀧𑀜𑁆𑀜𑀸…𑀧𑁂… 𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲𑀸’’𑀢𑀺. 𑀧𑀪𑀺𑀦𑁆𑀦𑀔𑀻𑀮𑀲𑁆𑀲𑀸𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀲𑀩𑁆𑀩𑀘𑁂𑀢𑁄𑀔𑀻𑀮𑀲𑁆𑀲, 𑀓𑀺𑀮𑁂𑀲𑀫𑀘𑁆𑀘𑀼𑀫𑀸𑀭𑀯𑀺𑀚𑀬𑁂𑀦𑁂𑀯 𑀅𑀪𑀺𑀲𑀗𑁆𑀔𑀸𑀭𑀔𑀦𑁆𑀥𑀫𑀸𑀭𑀸 𑀚𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀇𑀥 𑀅𑀕𑁆𑀕𑀳𑀡𑀁. 𑀈𑀖-𑀲𑀤𑁆𑀤𑁄 𑀤𑀼𑀓𑁆𑀔𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀦𑀺𑀤𑁆𑀤𑀼𑀓𑁆𑀔𑀲𑁆𑀲𑀸’’𑀢𑀺. 𑀢𑀢𑁆𑀣 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀓𑀺𑀮𑁂𑀲𑁂𑀦 𑀦𑀺𑀤𑁆𑀤𑀼𑀓𑁆𑀔𑀢𑀸, 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀯𑀺𑀧𑀸𑀓𑀤𑀼𑀓𑁆𑀔𑁂𑀦 𑀦𑀺𑀤𑁆𑀤𑀼𑀓𑁆𑀔𑀢𑀸. 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑀁 𑀈𑀲𑀦𑀢𑁄 𑀯𑀻𑀲𑀁, 𑀯𑀻𑀲𑀫𑁂𑀯 𑀯𑁂𑀲𑀁, 𑀭𑀸𑀕𑀸𑀤𑀻𑀢𑀺 𑀆𑀳 𑁋 ‘‘𑀯𑁂𑀲𑀦𑁆𑀢𑀭𑀲𑁆𑀲𑀸𑀢𑀺 𑀭𑀸𑀕𑀸𑀤𑀺𑀯𑀻𑀲𑀁 𑀢𑀭𑀺𑀢𑁆𑀯𑀸 𑀯𑀺𑀢𑀭𑀺𑀢𑁆𑀯𑀸 𑀞𑀺𑀢𑀲𑁆𑀲𑀸’’𑀢𑀺.

𑀢𑀼𑀲𑀺𑀢𑀲𑁆𑀲𑀸𑀢𑀺 𑀓𑀭𑀼𑀡𑀸𑀬𑀦𑀯𑀲𑁂𑀦 𑀢𑀼𑀲𑀺𑀬𑀸 𑀇𑀢𑀲𑁆𑀲 𑀲𑀁𑀯𑀢𑁆𑀢𑀲𑁆𑀲. 𑀏𑀯𑀁 𑀲𑀢𑀺 ‘‘𑀫𑀼𑀤𑀺𑀢𑀲𑁆𑀲𑀸’’𑀢𑀺 𑀇𑀤𑀁 𑀧𑀼𑀦𑀭𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀫𑀦𑀼𑀚𑀲𑁆𑀲𑀸𑀢𑀺 𑀧𑀞𑀫𑀸𑀬 𑀚𑀸𑀢𑀺𑀬𑀸 𑀪𑀕𑀯𑀸 𑀫𑀦𑀼𑀲𑁆𑀲𑀚𑀸𑀢𑀺𑀬𑁄 𑀳𑀼𑀢𑁆𑀯𑀸 𑀯𑀼𑀢𑁆𑀢𑀸𑀦𑀁 𑀯𑀓𑁆𑀔𑀫𑀸𑀦𑀸𑀦𑀜𑁆𑀘 𑀯𑀲𑁂𑀦 𑀲𑀤𑁂𑀯𑀓𑀁 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄 𑀅𑀘𑁆𑀙𑀭𑀺𑀬𑁄 𑀪𑀕𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀁𑀲𑀸𑀭𑀢𑁄 𑀦𑀺𑀩𑁆𑀩𑀸𑀦𑀲𑀼𑀔𑀁 𑀦𑀭𑀢𑀺 𑀦𑁂𑀢𑀺 𑀧𑀸𑀧𑁂𑀢𑀻𑀢𑀺 𑀦𑀭𑁄, 𑀦𑀸𑀬𑀓𑁄𑀢𑀺 𑀅𑀢𑁆𑀣𑁄, 𑀢𑀲𑁆𑀲 𑀦𑀭𑀲𑁆𑀲, 𑀢𑁂𑀦𑀸𑀳 ‘‘𑀧𑀼𑀦𑀭𑀼𑀢𑁆𑀢’’𑀦𑁆𑀢𑀺. ‘‘𑀫𑀦𑀼𑀚𑀲𑁆𑀲𑀸’’𑀢𑀺 𑀯𑀢𑁆𑀯𑀸 ‘‘𑀦𑀭𑀲𑁆𑀲𑀸’’𑀢𑀺 𑀧𑀼𑀦𑀭𑀼𑀢𑁆𑀢𑀁 𑀧𑀤𑀁. 𑀅𑀢𑁆𑀣𑀯𑀲𑁂𑀦 𑀅𑀜𑁆𑀜𑀣𑀸 𑀯𑀼𑀘𑁆𑀘𑀫𑀸𑀦𑁂 𑀏𑀓𑁂𑀓𑀕𑀸𑀣𑀸𑀬 𑀤𑀲𑀕𑀼𑀡𑀸 𑀦𑀧𑁆𑀧𑀳𑁄𑀦𑁆𑀢𑀺, 𑀦 𑀧𑀽𑀭𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀦𑁂𑀢𑀻𑀢𑀺 𑀯𑀺𑀦𑀬𑁄, 𑀯𑀺𑀦𑀬𑁄 𑀏𑀯 𑀯𑁂𑀦𑁂𑀬𑀺𑀓𑁄𑀢𑀺 𑀆𑀳 ‘‘𑀲𑀢𑁆𑀢𑀸𑀦𑀁 𑀯𑀺𑀦𑀸𑀬𑀓𑀲𑁆𑀲𑀸’’𑀢𑀺. 𑀯𑀺𑀜𑁆𑀜𑀽𑀦𑀁 𑀭𑀼𑀘𑀺𑀁 𑀭𑀸𑀢𑀺, 𑀈𑀭𑁂𑀢𑀻𑀢𑀺 𑀯𑀸 𑀭𑀼𑀘𑀺𑀭𑁄, 𑀲𑁆𑀯𑀸𑀬𑀫𑀲𑁆𑀲 𑀭𑀼𑀘𑀺𑀭𑀪𑀸𑀯𑁄 𑀓𑀼𑀲𑀮𑀢𑀸𑀬𑀸𑀢𑀺 𑀆𑀳 ‘‘𑀲𑀼𑀘𑀺𑀥𑀫𑁆𑀫𑀲𑁆𑀲𑀸’’𑀢𑀺. 𑀧𑀪𑀸𑀲𑀓𑀲𑁆𑀲𑀸𑀢𑀺 𑀜𑀸𑀡𑀸𑀮𑁄𑀓𑁂𑀦 𑀧𑀪𑀲𑁆𑀲𑀭𑀪𑀸𑀯𑀓𑀭𑀲𑁆𑀲. 𑀦𑀺𑀲𑁆𑀲𑀗𑁆𑀕𑀲𑁆𑀲𑀸𑀢𑀺 𑀅𑀝𑁆𑀞𑀲𑀼𑀧𑀺 𑀧𑀭𑀺𑀲𑀸𑀲𑀼, 𑀲𑀤𑁂𑀯𑁂 𑀯𑀸 𑀲𑀩𑁆𑀩𑀲𑁆𑀫𑀺𑀁 𑀮𑁄𑀓𑁂 𑀅𑀕𑁆𑀕𑀡𑁆𑀳𑀸𑀧𑀦𑀧𑀭𑀺𑀘𑁆𑀘𑀸𑀕𑁂𑀦 𑀦𑀺𑀲𑁆𑀲𑀝𑀲𑁆𑀲. 𑀕𑀫𑁆𑀪𑀻𑀭𑀕𑀼𑀡𑀲𑁆𑀲𑀸𑀢𑀺 𑀧𑀭𑁂𑀲𑀁 𑀜𑀸𑀡𑁂𑀦 𑀅𑀧𑁆𑀧𑀢𑀺𑀝𑁆𑀞𑀪𑀸𑀯𑀸 𑀕𑀫𑁆𑀪𑀻𑀭𑀕𑀼𑀡𑀲𑁆𑀲. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁂𑀯 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁨𑁮). 𑀅𑀭𑀺𑀬𑀸𑀬 𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦 𑀫𑁄𑀦𑀧𑁆𑀧𑀢𑁆𑀢𑀲𑁆𑀲. 𑀥𑀫𑁆𑀫𑁂 𑀞𑀺𑀢𑀲𑁆𑀲𑀸𑀢𑀺 𑀥𑀫𑁆𑀫𑀓𑀸𑀬𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑁆𑀲. 𑀲𑀁𑀯𑀼𑀢𑀢𑁆𑀢𑀲𑁆𑀲𑀸𑀢𑀺 𑀅𑀭𑀓𑁆𑀔𑀺𑀬𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀢𑀸𑀬 𑀲𑀁𑀯𑀼𑀢𑀲𑀪𑀸𑀯𑀲𑁆𑀲.

𑀆𑀕𑀼𑀁 𑀦 𑀓𑀭𑁄𑀢𑀻𑀢𑀺𑀆𑀤𑀻𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺, 𑀧𑀦𑁆𑀢𑀲𑁂𑀦𑀸𑀲𑀦𑀲𑁆𑀲𑀸𑀢𑀺 𑀯𑀺𑀯𑀺𑀢𑁆𑀢𑀲𑁂𑀦𑀸𑀲𑀦𑀲𑁆𑀲. 𑀧𑀝𑀺𑀫𑀦𑁆𑀢𑀦𑀧𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀧𑀭𑀧𑁆𑀧𑀯𑀸𑀤𑀸𑀦𑀁 𑀯𑀺𑀧𑀭𑀸𑀯𑀢𑁆𑀢𑀫𑀦𑁆𑀢𑀦𑀧𑀜𑁆𑀜𑀸𑀬. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁 𑀲𑀩𑁆𑀩𑀢𑁄 𑀓𑀺𑀮𑁂𑀲𑀸𑀦𑀁 𑀦𑀺𑀥𑀼𑀦𑀦𑀢𑁄.

𑀇𑀲𑀺𑀲𑀢𑁆𑀢𑀫𑀲𑁆𑀲𑀸𑀢𑀺 𑀲𑀩𑁆𑀩𑀇𑀲𑀻𑀲𑀼 𑀚𑁂𑀝𑁆𑀞𑀲𑁆𑀲 𑀲𑀸𑀥𑀼𑀢𑀫𑀲𑁆𑀲. 𑀲𑁂𑀝𑁆𑀞𑀧𑁆𑀧𑀢𑁆𑀢𑀲𑁆𑀲𑀸𑀢𑀺 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑀲𑁆𑀲. 𑀅𑀓𑁆𑀔𑀭𑀸𑀤𑀻𑀦𑀻𑀢𑀺 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭-𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲-𑀲𑀁𑀓𑀸𑀲𑀦𑀧𑀓𑀸𑀲𑀦-𑀯𑀺𑀯𑀭𑀡-𑀯𑀺𑀪𑀚𑀦𑀼𑀢𑁆𑀢𑀸𑀦𑀻𑀓𑀭𑀡𑀸𑀦𑀻𑀢𑀺 𑀩𑁆𑀬𑀜𑁆𑀚𑀦𑀢𑁆𑀣𑀧𑀤𑀸𑀦𑀺. 𑀲𑀫𑁄𑀥𑀸𑀦𑁂𑀢𑁆𑀯𑀸 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀧𑀓𑀸𑀲𑀦𑀢𑁄 𑀓𑀣𑀦𑀢𑁄 𑀧𑀤𑀓𑀲𑁆𑀲. 𑀧𑀼𑀭𑀺-𑀲𑀤𑁆𑀤𑁄 ‘‘𑀧𑀼𑀩𑁆𑀩𑁂’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 𑁋 ‘‘𑀧𑀼𑀭𑀺𑀦𑁆𑀤𑀤𑀲𑁆𑀲𑀸𑀢𑀺 𑀲𑀩𑁆𑀩𑀧𑀞𑀫𑀁 𑀥𑀫𑁆𑀫𑀤𑀸𑀦𑀤𑀸𑀬𑀓𑀲𑁆𑀲𑀸’’𑀢𑀺. 𑀪𑀕𑀯𑀸 𑀅𑀲𑀬𑁆𑀳𑀁 𑀲𑀳𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀆𑀳 ‘‘𑀲𑀫𑀢𑁆𑀣𑀲𑁆𑀲𑀸’’𑀢𑀺. 𑀢𑁂𑀦𑀸𑀳 𑁋 ‘‘𑀢𑀣𑀸𑀕𑀢𑀁 𑀩𑀼𑀤𑁆𑀥𑀫𑀲𑀬𑁆𑀳𑀲𑀸𑀳𑀺𑀦’’𑀦𑁆𑀢𑀺 (𑀇𑀢𑀺𑀯𑀼. 𑁩𑁮). 𑀢𑁂 𑀧𑀢𑁆𑀢𑀲𑁆𑀲𑀸𑀢𑀺 𑀢𑁂 𑀕𑀼𑀡𑁂 𑀅𑀦𑀯𑀲𑁂𑀲𑀢𑁄 𑀧𑀢𑁆𑀢𑀲𑁆𑀲. 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀢𑀻𑀢𑀺 𑀩𑁆𑀬𑀸𑀓𑀭𑀡𑁄, 𑀩𑁆𑀬𑀸𑀓𑀭𑀡𑁄 𑀏𑀯 𑀯𑁂𑀬𑁆𑀬𑀸𑀓𑀭𑀡𑁄. 𑀢𑀦𑁆𑀢𑀺𑀧𑀤𑀦𑁆𑀢𑀺 𑀢𑀦𑁆𑀢𑀺𑀁 𑀆𑀭𑁄𑀧𑁂𑀢𑁆𑀯𑀸 𑀞𑀧𑀺𑀢𑀁 𑀧𑀤𑀁.

𑀢𑀡𑁆𑀳𑀸𑀩𑀦𑁆𑀥𑀦𑁂𑀦 𑀲𑀩𑁆𑀩𑁂𑀦 𑀯𑀸 𑀓𑀺𑀮𑁂𑀲𑀩𑀦𑁆𑀥𑀦𑁂𑀦 𑀅𑀩𑀤𑁆𑀥𑀲𑁆𑀲. 𑀫𑀳𑀸𑀧𑀜𑁆𑀜𑀸𑀬𑀸𑀢𑀺 𑀫𑀳𑀸𑀦𑀼𑀪𑀸𑀯𑀸𑀬 𑀧𑀜𑁆𑀜𑀸𑀬, 𑀫𑀳𑀸𑀯𑀺𑀲𑀬𑀸𑀬 𑀯𑀸 𑀧𑀜𑁆𑀜𑀸𑀬. 𑀲𑀩𑁆𑀩𑀸 𑀳𑀺 𑀪𑀕𑀯𑀢𑁄 𑀧𑀜𑁆𑀜𑀸 𑀫𑀳𑀸𑀦𑀼𑀪𑀸𑀯𑀸, 𑀬𑀣𑀸𑀲𑀓𑀁 𑀯𑀺𑀲𑀬𑁂 𑀫𑀳𑀸𑀯𑀺𑀲𑀬𑀸 𑀘 𑀏𑀓𑀸𑀤𑀺𑀯𑀲𑁂𑀦 𑀅𑀦𑀯𑀲𑁂𑀲𑀢𑁄 𑀫𑀳𑀸𑀯𑀺𑀲𑀬𑀸 𑀦𑀸𑀫 𑀲𑀩𑁆𑀩𑀜𑁆𑀜𑀼𑀢𑀸𑀯. 𑀆𑀦𑀼𑀪𑀸𑀯𑀤𑀲𑁆𑀲𑀦𑀝𑁆𑀞𑁂𑀦𑀸𑀢𑀺 𑀅𑀘𑁆𑀙𑀭𑀺𑀬𑀸𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀲𑁆𑀲 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀲𑁆𑀲 𑀮𑁄𑀓𑀲𑁆𑀲 𑀤𑀲𑁆𑀲𑀦𑀝𑁆𑀞𑁂𑀦. 𑀬𑀓𑁆𑀔𑀲𑁆𑀲𑀸𑀢𑀺 𑀯𑀸 𑀮𑁄𑀓𑁂𑀦 𑀧𑀽𑀚𑀦𑀻𑀬𑀲𑁆𑀲. 𑀅𑀬𑀁 𑀉𑀧𑀸𑀲𑀓𑁄 𑀔𑀼𑀚𑁆𑀚𑀼𑀢𑁆𑀢𑀭𑀸 𑀯𑀺𑀬 𑀉𑀧𑀸𑀲𑀺𑀓𑀸 𑀲𑁂𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄𑀢𑀺 𑀆𑀳 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑁂𑀯 𑀧𑀝𑀺𑀲𑀫𑁆𑀪𑀺𑀤𑀸 𑀆𑀕𑀢𑀸’’𑀢𑀺. 𑀓𑀺𑀮𑁂𑀲𑀧𑁆𑀧𑀳𑀸𑀦𑀯𑀡𑁆𑀡𑀁 𑀓𑀣𑁂𑀦𑁆𑀢𑁄𑀢𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀺𑀲𑀬𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄.

𑁭𑁭. 𑀲𑀫𑁆𑀧𑀺𑀡𑁆𑀟𑀺𑀢𑀸𑀢𑀺 𑀲𑀦𑁆𑀦𑀺𑀘𑀺𑀢𑀸, 𑀕𑀦𑁆𑀣𑀺𑀢𑀸𑀢𑀺 𑀅𑀢𑁆𑀣𑁄. 𑀇𑀫𑁂 𑀲𑀢𑁆𑀢𑀸𑀢𑀺 𑀬𑀁 𑀬𑀤𑁂𑀯 𑀧𑀭𑀺𑀩𑁆𑀪𑀫𑀦𑁆𑀢𑀸 𑀲𑀢𑁆𑀢𑀸. 𑀅𑀢𑁆𑀢𑀦𑁄𑀯 𑀘𑀺𑀦𑁆𑀢𑀬𑀦𑁆𑀢𑀻𑀢𑀺 𑀅𑀯𑀻𑀢𑀢𑀡𑁆𑀳𑀢𑀸𑀬 𑀲𑀓𑀁𑀬𑁂𑀯 𑀧𑀬𑁄𑀚𑀦𑀁 𑀘𑀺𑀦𑁆𑀢𑁂𑀦𑁆𑀢𑀺. 𑀢𑀣𑀸 𑀳𑀺 𑀫𑀢𑁂 𑀜𑀸𑀢𑀓𑁂 𑀅𑀦𑀼𑀲𑁄𑀘𑀦𑁆𑀢𑀸𑀧𑀺 𑀢𑁂𑀳𑀺 𑀲𑀸𑀥𑁂𑀢𑀩𑁆𑀩𑀲𑁆𑀲 𑀅𑀢𑁆𑀢𑀦𑁄 𑀧𑀬𑁄𑀚𑀦𑀲𑁆𑀲𑁂𑀯 𑀯𑀲𑁂𑀦 𑀅𑀦𑀼𑀲𑁄𑀘𑀦𑁆𑀢𑀺. 𑀉𑀡𑁆𑀳𑀁 𑀅𑀳𑁄𑀲𑀻𑀢𑀺 𑀩𑀮𑀯𑀢𑀸 𑀘𑀺𑀢𑁆𑀢𑀲𑁆𑀲 𑀲𑀦𑁆𑀢𑀸𑀧𑁂𑀦 𑀲𑀦𑁆𑀢𑀢𑁆𑀢𑀁 𑀅𑀩𑁆𑀪𑀦𑁆𑀢𑀭𑀁 𑀳𑀤𑀬𑀝𑁆𑀞𑀸𑀦𑀁 𑀔𑀤𑀺𑀭𑀗𑁆𑀕𑀸𑀭𑀲𑀦𑁆𑀢𑀸𑀧𑀺𑀢𑀁 𑀯𑀺𑀬 𑀉𑀡𑁆𑀳𑀁 𑀅𑀳𑁄𑀲𑀺. 𑀢𑁂𑀦𑀸𑀳 ‘‘𑀮𑁄𑀳𑀺𑀢𑀁 𑀯𑀺𑀮𑀻𑀬𑀺𑀢𑁆𑀣𑀸’’𑀢𑀺. 𑀧𑀢𑁆𑀢𑀫𑀢𑁆𑀢𑀦𑁆𑀢𑀺 𑀏𑀓𑀧𑀢𑁆𑀢𑀧𑀽𑀭𑀫𑀢𑁆𑀢𑀁. 𑀅𑀪𑀺𑀲𑀫𑀬𑀲𑀸𑀥𑀺𑀓𑀸𑀬 𑀘𑀢𑀼𑀲𑀘𑁆𑀘𑀤𑁂𑀲𑀦𑀸𑀬 𑀲𑀗𑁆𑀔𑁂𑀧𑁂𑀦𑁂𑀯 𑀤𑁂𑀲𑀺𑀢𑀢𑁆𑀢𑀸 𑀆𑀳 𑁋 ‘𑀉𑀕𑁆𑀖𑀝𑀺𑀢𑀜𑁆𑀜𑀼𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀦𑀺𑀝𑁆𑀞𑀺𑀢𑀸’’𑀢𑀺.

𑀉𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.