𑁯. 𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦𑁧. ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 (𑀤𑀻. 𑀦𑀺. 𑁧.𑁩𑁦) 𑀏𑀯𑀁 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀲𑀲𑁆𑀲𑀢𑀤𑀺𑀝𑁆𑀞𑀺 (𑀲𑀁. 𑀦𑀺. 𑀝𑀻. 𑁧.𑁧.𑁧𑁭𑁫). 𑀲𑀳 𑀓𑀸𑀬𑁂𑀦𑀸𑀢𑀺 𑀲𑀳 𑀢𑁂𑀦 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂𑀦. 𑀩𑁆𑀭𑀳𑁆𑀫𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀯𑀢𑁆𑀣𑀼𑀁. ‘‘𑀅𑀦𑀺𑀘𑁆𑀘𑀁 𑀦𑀺𑀘𑁆𑀘’’𑀦𑁆𑀢𑀺 𑀯𑀤𑀢𑀺 𑀅𑀦𑀺𑀘𑁆𑀘𑀢𑀸𑀬 𑀅𑀢𑁆𑀢𑀦𑁄 𑀅𑀧𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀣𑀺𑀭𑀦𑁆𑀢𑀺 𑀤𑀴𑁆𑀳𑀁, 𑀯𑀺𑀦𑀸𑀲𑀸𑀪𑀸𑀯𑀢𑁄 𑀲𑀸𑀭𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀸𑀤𑀯𑀺𑀧𑀭𑀺𑀡𑀸𑀫𑀸𑀪𑀸𑀯𑀢𑁄 𑀲𑀤𑀸 𑀯𑀺𑀚𑁆𑀚𑀫𑀸𑀦𑀁. 𑀓𑁂𑀯𑀮𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁. 𑀢𑁂𑀦𑀸𑀳 ‘‘𑀅𑀔𑀡𑁆𑀟’’𑀦𑁆𑀢𑀺. 𑀓𑁂𑀯𑀮𑀦𑁆𑀢𑀺 𑀯𑀸 𑀚𑀸𑀢𑀺𑀆𑀤𑀻𑀳𑀺 𑀅𑀫𑀺𑀲𑁆𑀲𑀁, 𑀯𑀺𑀭𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑁆𑀧𑀸𑀤𑀸𑀤𑀻𑀦𑀁 𑀅𑀪𑀸𑀯𑀢𑁄 𑀏𑀯 𑀅𑀘𑀯𑀦𑀥𑀫𑁆𑀫𑀁. 𑀓𑁄𑀘𑀺 𑀚𑀸𑀬𑀦𑀓𑁄 𑀯𑀸…𑀧𑁂… 𑀉𑀧𑀧𑀚𑁆𑀚𑀦𑀓𑁄 𑀯𑀸 𑀦𑀢𑁆𑀣𑀺 𑀦𑀺𑀘𑁆𑀘𑀪𑀸𑀯𑀢𑁄. 𑀞𑀸𑀦𑁂𑀦 𑀲𑀤𑁆𑀥𑀺𑀁 𑀢𑀦𑁆𑀦𑀺𑀯𑀸𑀲𑀻𑀦𑀁 𑀦𑀺𑀘𑁆𑀘𑀪𑀸𑀯𑀜𑁆𑀳𑀺 𑀲𑁄 𑀧𑀝𑀺𑀚𑀸𑀦𑀸𑀢𑀺. 𑀢𑀺𑀲𑁆𑀲𑁄 𑀛𑀸𑀦𑀪𑀽𑀫𑀺𑀬𑁄𑀢𑀺 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀬𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀯𑀺𑀲𑁂𑀲𑀸 𑀳𑀺 𑀅𑀲𑀜𑁆𑀜𑀲𑀼𑀤𑁆𑀥𑀸𑀯𑀸𑀲𑀸𑀭𑀼𑀧𑁆𑀧𑀪𑀯𑀸. 𑀧𑀝𑀺𑀩𑀸𑀳𑀢𑀻𑀢𑀺 𑀲𑀦𑁆𑀢𑀁𑀬𑁂𑀯 𑀲𑀫𑀸𑀦𑀁 𑀅𑀚𑀸𑀦𑀦𑁆𑀢𑁄𑀯 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀯𑀺𑀚𑁆𑀚𑀸𑀬 𑀕𑀢𑁄𑀢𑀺 𑀅𑀯𑀺𑀚𑁆𑀚𑀸𑀬 𑀲𑀳 𑀕𑀢𑁄 𑀧𑀯𑀢𑁆𑀢𑁄. 𑀲𑀳𑀬𑁄𑀕𑁂 𑀳𑀺 𑀇𑀤𑀁 𑀓𑀭𑀡𑀯𑀘𑀦𑀁. 𑀢𑁂𑀦𑀸𑀳 ‘‘𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀅𑀜𑁆𑀜𑀸𑀡𑀻𑀢𑀺 𑀅𑀯𑀺𑀤𑁆𑀯𑀸. 𑀧𑀜𑁆𑀜𑀸𑀘𑀓𑁆𑀔𑀼𑀯𑀺𑀭𑀳𑀢𑁄 𑀅𑀦𑁆𑀥𑁄 𑀪𑀽𑀢𑁄, 𑀅𑀦𑁆𑀥𑀪𑀸𑀯𑀁 𑀯𑀸 𑀧𑀢𑁆𑀢𑁄𑀢𑀺 𑀅𑀦𑁆𑀥𑀻𑀪𑀽𑀢𑁄.

𑁫𑁦𑁨. 𑀢𑀤𑀸 𑀪𑀕𑀯𑀢𑁄 𑀲𑀼𑀪𑀕𑀯𑀦𑁂 𑀯𑀺𑀳𑀭𑀡𑀲𑁆𑀲 𑀅𑀯𑀺𑀘𑁆𑀙𑀺𑀦𑁆𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀼𑀪𑀕𑀯𑀦𑁂 𑀯𑀺𑀳𑀭𑀢𑀻𑀢𑀺 𑀜𑀢𑁆𑀯𑀸’’𑀢𑀺. 𑀢𑀢𑁆𑀣 𑀧𑀦 𑀢𑀤𑀸𑀲𑁆𑀲 𑀪𑀕𑀯𑀢𑁄 𑀅𑀤𑀲𑁆𑀲𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀢𑁆𑀣 𑀦𑀼 𑀔𑁄 𑀕𑀢𑁄𑀢𑀺 𑀑𑀮𑁄𑀓𑁂𑀦𑁆𑀢𑁄’’𑀢𑀺. 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸𑀢𑀺 𑀇𑀫𑀺𑀦𑀸 𑀓𑀢𑀺𑀧𑀬𑀘𑀺𑀢𑁆𑀢𑀯𑀸𑀭𑀯𑀲𑁂𑀦 𑀢𑀤𑀸 𑀪𑀕𑀯𑀢𑁄 𑀩𑁆𑀭𑀳𑁆𑀫𑀮𑁄𑀓𑀕𑀫𑀦𑀁 𑀚𑀸𑀢𑀁, 𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀦 𑀘𑁂𑀢𑁆𑀣 𑀓𑀸𑀬𑀕𑀢𑀺𑀬𑀸 𑀘𑀺𑀢𑁆𑀢𑀧𑀭𑀺𑀡𑀸𑀫𑀦𑀁 𑀅𑀥𑀺𑀧𑁆𑀧𑁂𑀢𑀁 𑁋 ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀫. 𑀦𑀺. 𑁧.𑁫𑁦𑁧). 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀯𑀺𑀙𑀦𑁆𑀤𑀦𑁆𑀢𑀺 𑀙𑀦𑁆𑀤𑀯𑀺𑀕𑀫𑀁. 𑀅𑀧𑀲𑀸𑀤𑀺𑀢𑁄𑀢𑀺 𑀤𑀺𑀝𑁆𑀞𑀺𑀬𑀸 𑀕𑀸𑀳𑀲𑁆𑀲 𑀯𑀺𑀧𑀭𑀺𑀯𑀢𑁆𑀢𑀦𑁂𑀦 𑀲𑀦𑁆𑀢𑀚𑁆𑀚𑀺𑀢𑁄. ‘‘𑀫𑁂𑀢𑀫𑀸𑀲𑀤𑁄’’𑀢𑀺 𑀯𑀘𑀦𑁂𑀦 𑀉𑀧𑀢𑁆𑀣𑀫𑁆𑀪𑁄 𑀳𑀼𑀢𑁆𑀯𑀸.

𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸𑀢𑀺 𑀆𑀯𑀺𑀲𑀦𑀯𑀲𑁂𑀦 𑀢𑀲𑁆𑀲 𑀅𑀢𑁆𑀢𑀪𑀸𑀯𑀁 𑀅𑀥𑀺𑀪𑀯𑀺𑀢𑁆𑀯𑀸. 𑀢𑀣𑀸 𑀅𑀪𑀺𑀪𑀯𑀢𑁄 𑀳𑀺 𑀢𑀲𑁆𑀲 𑀲𑀭𑀻𑀭𑀁 𑀧𑀯𑀺𑀝𑁆𑀞𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀭𑀻𑀭𑀁 𑀧𑀯𑀺𑀲𑀺𑀢𑁆𑀯𑀸’’𑀢𑀺. 𑀬𑀜𑁆𑀳𑀺 𑀲𑀢𑁆𑀢𑀁 𑀤𑁂𑀯𑀬𑀓𑁆𑀔𑀦𑀸𑀕𑀸𑀤𑀬𑁄 𑀆𑀯𑀺𑀲𑀦𑁆𑀢𑀺, 𑀢𑀲𑁆𑀲 𑀧𑀸𑀓𑀢𑀺𑀓𑀓𑀺𑀭𑀺𑀬𑀫𑀬𑀁 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀦𑀺𑀯𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀬𑀁 𑀇𑀘𑁆𑀙𑀺𑀢𑀁 𑀳𑀲𑀺𑀢𑀮𑀧𑀺𑀢𑀸𑀤𑀺, 𑀢𑀁 𑀢𑁂𑀦 𑀓𑀸𑀭𑀸𑀧𑁂𑀦𑁆𑀢𑀺, 𑀓𑀸𑀭𑁂𑀦𑁆𑀢𑀸 𑀘 𑀆𑀯𑀺𑀝𑁆𑀞𑀧𑀼𑀕𑁆𑀕𑀮𑀲𑁆𑀲 𑀘𑀺𑀢𑁆𑀢𑀯𑀲𑁂𑀦 𑀓𑀸𑀭𑁂𑀦𑁆𑀢𑀺. ‘‘𑀅𑀢𑁆𑀢𑀦𑁄𑀯𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀫𑁂𑀢𑀁 𑀅𑀘𑀺𑀦𑁆𑀢𑁂𑀬𑁆𑀬𑀢𑁆𑀢𑀸 𑀓𑀫𑁆𑀫𑀚𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑀲𑁆𑀲𑀸𑀢𑀺 𑀓𑁂𑀘𑀺. 𑀅𑀧𑀭𑁂 𑀧𑀦 𑀬𑀣𑀸 𑀢𑀤𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀧𑀯𑀢𑁆𑀢𑀺 𑀆𑀯𑀺𑀝𑁆𑀞𑀧𑀼𑀕𑁆𑀕𑀮𑀲𑁆𑀲𑁂𑀯, 𑀏𑀯𑀁 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀧𑀯𑀢𑁆𑀢𑀺𑀧𑀺 𑀢𑀲𑁆𑀲𑁂𑀯, 𑀆𑀯𑁂𑀲𑀓𑀸𑀦𑀼𑀪𑀸𑀯𑁂𑀦 𑀧𑀦 𑀲𑀸𑀫𑀜𑁆𑀜𑀢𑀸 𑀧𑀭𑀺𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀫𑀳𑀸𑀦𑀼𑀪𑀸𑀯𑀁 𑀧𑀼𑀕𑁆𑀕𑀮𑀁 𑀢𑁂 𑀆𑀯𑀺𑀲𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀺𑀓𑀺𑀘𑁆𑀙𑀸𑀯𑀼𑀝𑁆𑀞𑀸𑀧𑀦𑁂 𑀧𑀦 𑀙𑀯𑀲𑀭𑀻𑀭𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀲𑀢𑀦𑁆𑀢𑀁 𑀓𑀭𑁄𑀢𑀺 𑀯𑀺𑀚𑁆𑀚𑀸𑀦𑀼𑀪𑀸𑀯𑁂𑀦. 𑀓𑁄𑀭𑀔𑀢𑁆𑀢𑀺𑀬𑀸𑀤𑀻𑀦𑀁 𑀧𑀦 𑀙𑀯𑀲𑀭𑀻𑀭𑀲𑁆𑀲 𑀉𑀝𑁆𑀞𑀸𑀦𑀁 𑀯𑀘𑀻𑀦𑀺𑀘𑁆𑀙𑀸𑀭𑀡𑀜𑁆𑀘 𑀓𑁂𑀯𑀮𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦. 𑀅𑀘𑀺𑀦𑁆𑀢𑁂𑀬𑁆𑀬𑀸 𑀳𑀺 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀸𑀢𑀺. 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄𑀢𑀺 𑀲𑀓𑀮𑀮𑁄𑀓𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄. 𑀚𑁂𑀝𑁆𑀞𑀓𑁄𑀢𑀺 𑀧𑀥𑀸𑀦𑁄, 𑀢𑀸𑀤𑀺𑀲𑀁 𑀯𑀸 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀢𑁆𑀢𑀸 𑀉𑀢𑁆𑀢𑀫𑁄. 𑀧𑀲𑁆𑀲𑀢𑀻𑀢𑀺 𑀤𑀲𑁄. 𑀯𑀺𑀲𑁂𑀲𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑀢𑁄 𑀅𑀦𑀯𑀲𑁂𑀲𑀯𑀺𑀲𑀬𑁄 𑀤𑀲𑁄-𑀲𑀤𑁆𑀤𑁄𑀢𑀺 𑀆𑀳 ‘‘𑀲𑀩𑁆𑀩𑀁 𑀧𑀲𑁆𑀲𑀢𑀻’’𑀢𑀺. 𑀲𑀩𑁆𑀩𑀚𑀦𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀩𑁆𑀩𑀲𑀢𑁆𑀢𑀓𑀸𑀬𑀁. 𑀯𑀲𑁂 𑀯𑀢𑁆𑀢𑁂𑀢𑀺, 𑀲𑁂𑀝𑁆𑀞𑀢𑁆𑀢𑀸 𑀦𑀺𑀫𑁆𑀫𑀸𑀧𑀓𑀢𑁆𑀢𑀸 𑀘 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀺. 𑀮𑁄𑀓𑀲𑁆𑀲 𑀈𑀲𑀦𑀲𑀻𑀮𑀢𑀸𑀬 𑀇𑀲𑁆𑀲𑀭𑁄. 𑀲𑀢𑁆𑀢𑀸𑀦𑀁 𑀓𑀫𑁆𑀫𑀲𑁆𑀲 𑀓𑀸𑀭𑀓𑀪𑀸𑀯𑁂𑀦 𑀓𑀢𑁆𑀢𑀸. 𑀣𑀸𑀯𑀭𑀚𑀗𑁆𑀕𑀫𑀯𑀺𑀪𑀸𑀕𑀁 𑀲𑀓𑀮𑀁 𑀮𑁄𑀓𑀁 𑀦𑀺𑀫𑁆𑀫𑀸𑀦𑁂𑀢𑀻𑀢𑀺 𑀦𑀺𑀫𑁆𑀫𑀸𑀢𑀸.

𑀕𑀼𑀡𑀯𑀺𑀲𑁂𑀲𑁂𑀦 𑀮𑁄𑀓𑁂 𑀧𑀸𑀲𑀁𑀲𑀢𑁆𑀢𑀸 𑀲𑁂𑀝𑁆𑀞𑁄. 𑀢𑀸𑀤𑀺𑀲𑁄 𑀘 𑀉𑀓𑁆𑀓𑀝𑁆𑀞𑀢𑀫𑁄 𑀳𑁄𑀢𑀻𑀢𑀺 𑀆𑀳 ‘‘𑀉𑀢𑁆𑀢𑀫𑁄’’𑀢𑀺. 𑀲𑀢𑁆𑀢𑀸𑀦𑀁 𑀦𑀺𑀫𑁆𑀫𑀸𑀦𑀁 𑀢𑀣𑀸 𑀢𑀣𑀸 𑀲𑀚𑀦𑀁 𑀯𑀺𑀲𑀚𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀢𑁆𑀯𑀁 𑀔𑀢𑁆𑀢𑀺𑀬𑁄’’𑀢𑀺𑀆𑀤𑀺. 𑀛𑀸𑀦𑀸𑀤𑀻𑀲𑀼 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀘 𑀘𑀺𑀡𑁆𑀡𑀯𑀲𑀺𑀢𑁆𑀢𑀸 𑀯𑀲𑀻. 𑀪𑀽𑀢𑀸𑀦𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀸𑀦𑀁. 𑀪𑀯𑀁 𑀅𑀪𑀺𑀚𑀸𑀢𑀁 𑀅𑀭𑀳𑀦𑁆𑀢𑀻𑀢𑀺 𑀪𑀩𑁆𑀬𑀸, 𑀲𑀫𑁆𑀪𑀯𑁂𑀲𑀺𑀦𑁄, 𑀢𑁂𑀲𑀁 𑀪𑀩𑁆𑀬𑀸𑀦𑀁. 𑀢𑁂𑀦𑀸𑀳 ‘‘𑀅𑀡𑁆𑀟𑀚𑀚𑀮𑀸𑀩𑀼𑀚𑀸 𑀲𑀢𑁆𑀢𑀸’’𑀢𑀺𑀆𑀤𑀺.

𑀧𑀣𑀯𑀻𑀆𑀤𑀬𑁄 𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸. 𑀬𑁂 𑀢𑁂𑀲𑀁 ‘‘𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀕𑀭𑀳𑀓𑀸 𑀚𑀺𑀕𑀼𑀘𑁆𑀙𑀸 𑀲𑀢𑁆𑀢𑀸, 𑀢𑁂 𑀅𑀬𑀣𑀸𑀪𑀽𑀢𑀯𑀸𑀤𑀺𑀢𑀸𑀬 𑀫𑀢𑀓𑀸𑀮𑁂 𑀅𑀧𑀸𑀬𑀦𑀺𑀝𑁆𑀞𑀸 𑀅𑀳𑁂𑀲𑀼𑀁. 𑀬𑁂 𑀧𑀦 𑀧𑀣𑀯𑀻𑀆𑀤𑀻𑀦𑀁 ‘‘𑀦𑀺𑀘𑁆𑀘𑀸 𑀥𑀼𑀯𑀸’’𑀢𑀺𑀆𑀤𑀺𑀦𑀸 𑀧𑀲𑀁𑀲𑀓𑀸, 𑀢𑁂 𑀬𑀣𑀸𑀪𑀽𑀢𑀯𑀸𑀤𑀺𑀢𑀸𑀬 𑀩𑁆𑀭𑀳𑁆𑀫𑀓𑀸𑀬𑀽𑀧𑀕𑀸 𑀅𑀳𑁂𑀲𑀼𑀦𑁆𑀢𑀺 𑀫𑀸𑀭𑁄 𑀧𑀸𑀧𑀺𑀫𑀸 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀧𑀣𑀯𑀻𑀆𑀤𑀺𑀫𑀼𑀔𑁂𑀦 𑀲𑀗𑁆𑀔𑀸𑀭𑀸𑀦𑀁 𑀧𑀭𑀺𑀜𑁆𑀜𑀸𑀧𑀜𑁆𑀜𑀸𑀧𑀦𑁂 𑀆𑀤𑀻𑀦𑀯𑀁 𑀯𑀺𑀪𑀸𑀯𑁂𑀢𑀺 𑀢𑀢𑁄 𑀯𑀺𑀯𑁂𑀘𑁂𑀢𑀼𑀓𑀸𑀫𑁄. 𑀢𑁂𑀦𑀸𑀳 ‘‘𑀧𑀣𑀯𑀻𑀕𑀭𑀳𑀓𑀸’’𑀢𑀺𑀆𑀤𑀺. 𑀏𑀢𑁆𑀣 𑀘 𑀫𑀸𑀭𑁄 𑀧𑀣𑀯𑀻𑀆𑀤𑀺𑀥𑀸𑀢𑀼𑀫𑀳𑀸𑀪𑀽𑀢𑀕𑁆𑀕𑀳𑀡𑁂𑀦 𑀫𑀦𑀼𑀲𑁆𑀲𑀮𑁄𑀓𑀁, 𑀪𑀽𑀢𑀕𑁆𑀕𑀳𑀡𑁂𑀦 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂, 𑀤𑁂𑀯𑀕𑁆𑀕𑀳𑀡𑁂𑀦 𑀅𑀯𑀲𑁂𑀲𑀓𑀸𑀫𑀤𑁂𑀯𑀮𑁄𑀓𑀁, 𑀧𑀚𑀸𑀧𑀢𑀺𑀕𑁆𑀕𑀳𑀡𑁂𑀦 𑀅𑀢𑁆𑀢𑀦𑁄 𑀞𑀸𑀦𑀁, 𑀩𑁆𑀭𑀳𑁆𑀫𑀕𑁆𑀕𑀳𑀡𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑁂 𑀕𑀡𑁆𑀳𑀺. 𑀆𑀪𑀲𑁆𑀲𑀭𑀸𑀤𑀬𑁄 𑀧𑀦 𑀅𑀯𑀺𑀲𑀬𑀢𑀸𑀬 𑀏𑀯 𑀅𑀦𑁂𑀦 𑀅𑀕𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸𑀬 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀬 𑀘 𑀯𑀲𑁂𑀦. ‘‘𑀏𑀢𑀁 𑀫𑀫, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀦𑁆𑀤𑀺𑀦𑁄 𑀅𑀪𑀺𑀦𑀦𑁆𑀤𑀓𑀸, 𑀅𑀪𑀺𑀦𑀦𑁆𑀤𑀦𑀲𑀻𑀮𑀸 𑀯𑀸. 𑀩𑁆𑀭𑀳𑁆𑀫𑀼𑀦𑁄 𑀑𑀯𑀸𑀤𑁂 𑀞𑀺𑀢𑀸𑀦𑀁 𑀇𑀤𑁆𑀥𑀸𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺 𑀢𑁂𑀲𑀁 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀩𑁆𑀭𑀳𑁆𑀫𑀸𑀦𑀁 𑀇𑀤𑁆𑀥𑀸𑀦𑀼𑀪𑀸𑀯𑀁 𑀢𑀲𑁆𑀲 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀑𑀯𑀸𑀤𑁂 𑀞𑀺𑀢𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀬𑀲𑁂𑀦𑀸𑀢𑀺 𑀆𑀦𑀼𑀪𑀸𑀯𑁂𑀦. 𑀲𑀺𑀭𑀺𑀬𑀸𑀢𑀺 𑀲𑁄𑀪𑀸𑀬. 𑀫𑀁 𑀩𑁆𑀭𑀳𑁆𑀫𑀧𑀭𑀺𑀲𑀁 𑀉𑀧𑀦𑁂𑀲𑀻𑀢𑀺 𑀬𑀸𑀤𑀺𑀲𑀸 𑀩𑁆𑀭𑀳𑁆𑀫𑀧𑀭𑀺𑀲𑀸 𑀇𑀲𑁆𑀲𑀭𑀺𑀬𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸, 𑀢𑀢𑁆𑀣 𑀫𑀁 𑀉𑀬𑁆𑀬𑁄𑀚𑁂𑀲𑀺. 𑀫𑀳𑀸𑀚𑀦𑀲𑁆𑀲 𑀫𑀸𑀭𑀡𑀢𑁄𑀢𑀺 𑀫𑀳𑀸𑀚𑀦𑀲𑁆𑀲 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀕𑀼𑀡𑀯𑀺𑀦𑀸𑀲𑀦𑁂𑀦 𑀆𑀦𑀼𑀪𑀸𑀯𑁂𑀦 𑀫𑀸𑀭𑀡𑀢𑁄. 𑀅𑀬𑀲𑀦𑁆𑀢𑀺 𑀬𑀲𑀧𑀝𑀺𑀧𑀓𑁆𑀔𑀁 𑀅𑀓𑀺𑀢𑁆𑀢𑀺𑀓𑀫𑁆𑀫𑀸𑀦𑀼𑀪𑀸𑀯𑀜𑁆𑀘𑀸𑀢𑀺 𑀅𑀢𑁆𑀣𑁄.

𑁫𑁦𑁩. 𑀓𑀲𑀺𑀡𑀁 𑀆𑀬𑀼𑀦𑁆𑀢𑀺 𑀯𑀲𑁆𑀲𑀲𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀉𑀧𑀦𑀺𑀲𑁆𑀲𑀸𑀬 𑀲𑁂𑀢𑀻𑀢𑀺 𑀉𑀧𑀲𑀬𑁄, 𑀉𑀧𑀲𑀬𑁄𑀯 𑀑𑀧𑀲𑀸𑀬𑀺𑀓𑁄 𑀬𑀣𑀸 ‘‘𑀯𑁂𑀦𑀬𑀺𑀓𑁄’’𑀢𑀺 (𑀫. 𑀦𑀺. 𑁧.𑁨𑁪𑁬; 𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁮) 𑀆𑀳 ‘‘𑀲𑀫𑀻𑀧𑀲𑀬𑁄’’𑀢𑀺. 𑀲𑀬𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀁 𑀕𑀘𑁆𑀙𑀦𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀯𑀢𑁆𑀢𑀦𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑀫 𑀯𑀢𑁆𑀣𑀼𑀲𑁆𑀫𑀺𑀁 𑀲𑀬𑀦𑀓𑁄𑀢𑀺 𑀫𑀬𑁆𑀳𑀁 𑀞𑀸𑀦𑁂 𑀯𑀺𑀲𑀬𑁂 𑀯𑀢𑁆𑀢𑀦𑀓𑁄. 𑀩𑀸𑀳𑀺𑀢𑁆𑀯𑀸𑀢𑀺 𑀦𑀻𑀘𑀁 𑀓𑀢𑁆𑀯𑀸, 𑀅𑀪𑀺𑀪𑀯𑀺𑀢𑁆𑀯𑀸 𑀯𑀸. 𑀚𑀚𑁆𑀛𑀭𑀺𑀓𑀸𑀕𑀼𑀫𑁆𑀩𑀢𑁄𑀢𑀺 𑀏𑀢𑁆𑀣 𑀚𑀚𑁆𑀛𑀭𑀺𑀓𑀸 𑀦𑀸𑀫 𑀧𑀣𑀯𑀺𑀁 𑀧𑀢𑁆𑀣𑀭𑀺𑀢𑁆𑀯𑀸 𑀚𑀸𑀢𑀸 𑀏𑀓𑀸 𑀕𑀘𑁆𑀙𑀚𑀸𑀢𑀺.

𑀇𑀫𑀺𑀦𑀸𑀢𑀺 ‘‘𑀲𑀘𑁂 𑀔𑁄 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀯𑀘𑀦𑁂𑀦. 𑀏𑀲 𑀩𑁆𑀭𑀳𑁆𑀫𑀸. 𑀉𑀧𑀮𑀸𑀧𑁂𑀢𑀻𑀢𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀧𑀲𑀸𑀤𑁂𑀢𑀻𑀢𑀺 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀲𑁂𑀲𑀧𑀤𑁂𑀳𑀻𑀢𑀺 𑀯𑀢𑁆𑀣𑀼𑀲𑀸𑀬𑀺𑀓𑁄 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀩𑀸𑀳𑀺𑀢𑁂𑀬𑁆𑀬𑁄𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺. 𑀫𑀬𑁆𑀳𑀁 𑀆𑀭𑀓𑁆𑀔𑀁 𑀕𑀡𑁆𑀳𑀺𑀲𑁆𑀲𑀲𑀻𑀢𑀺 𑀫𑀫 𑀆𑀭𑀓𑁆𑀔𑀓𑁄 𑀪𑀯𑀺𑀲𑁆𑀲𑀲𑀺. 𑀮𑀓𑀼𑀡𑁆𑀟𑀓𑀢𑀭𑀦𑁆𑀢𑀺 𑀦𑀻𑀘𑀢𑀭𑀁 𑀦𑀺𑀳𑀻𑀦𑀯𑀼𑀢𑁆𑀢𑀺𑀲𑀭𑀻𑀭𑀁.

𑀨𑀼𑀲𑀺𑀢𑀼𑀫𑁆𑀧𑀺 𑀲𑀫𑀢𑁆𑀣𑀁 𑀓𑀺𑀜𑁆𑀘𑀺 𑀦 𑀧𑀲𑁆𑀲𑀢𑀺, 𑀧𑀕𑁂𑀯 𑀜𑀸𑀡𑀯𑀺𑀪𑀯𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀧𑁆𑀨𑀢𑁆𑀢𑀺𑀦𑁆𑀢𑀺 𑀦𑀺𑀧𑁆𑀨𑀚𑁆𑀚𑀦𑀁, 𑀨𑀮𑀦𑁆𑀢𑀺 𑀅𑀢𑁆𑀣𑁄. 𑀢𑀜𑁆𑀳𑀺 𑀓𑀸𑀭𑀡𑀯𑀲𑁂𑀦 𑀕𑀦𑁆𑀢𑀩𑁆𑀩𑀢𑁄 𑀅𑀥𑀺𑀕𑀦𑁆𑀢𑀩𑁆𑀩𑀢𑁄 𑀕𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀆𑀦𑀼𑀪𑀸𑀯𑀦𑁆𑀢𑀺 𑀧𑀪𑀸𑀯𑀁. 𑀲𑁄 𑀳𑀺 𑀚𑁄𑀢𑀦𑀝𑁆𑀞𑁂𑀦 𑀯𑀺𑀭𑁄𑀘𑀦𑀝𑁆𑀞𑁂𑀦 𑀚𑀼𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀫𑀳𑀢𑀸 𑀆𑀦𑀼𑀪𑀸𑀯𑁂𑀦 𑀧𑀭𑁂𑀲𑀁 𑀅𑀪𑀺𑀪𑀯𑀦𑀢𑁄 𑀫𑀳𑁂𑀲𑁄𑀢𑀺 𑀅𑀓𑁆𑀔𑀸𑀬𑀢𑀻𑀢𑀺 𑀫𑀳𑁂𑀲𑀓𑁆𑀔𑁄. 𑀢𑀬𑀺𑀤𑀁 𑀅𑀪𑀺𑀪𑀯𑀦𑀁 𑀓𑀺𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘𑀸𑀢𑀺 𑀆𑀳 ‘‘𑀫𑀳𑀸𑀬𑀲𑁄 𑀫𑀳𑀸𑀧𑀭𑀺𑀯𑀸𑀭𑁄’’𑀢𑀺.

𑀧𑀭𑀺𑀳𑀭𑀦𑁆𑀢𑀻𑀢𑀺 𑀲𑀺𑀦𑁂𑀭𑀼𑀁 𑀤𑀓𑁆𑀔𑀺𑀡𑀢𑁄 𑀓𑀢𑁆𑀯𑀸 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀤𑀺𑀲𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀤𑀺𑀲𑀸𑀲𑀼 𑀯𑀺𑀭𑁄𑀘𑀫𑀸𑀦𑀸’’𑀢𑀺. 𑀅𑀢𑁆𑀢𑀦𑁄 𑀚𑀼𑀢𑀺𑀬𑀸 𑀤𑀺𑀩𑁆𑀩𑀫𑀸𑀦𑀸𑀬 𑀯𑀸. 𑀢𑁂𑀳𑀻𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀳𑀺. 𑀢𑀢𑁆𑀢𑀓𑁂𑀦 𑀧𑀫𑀸𑀡𑁂𑀦𑀸𑀢𑀺 𑀬𑀢𑁆𑀢𑀓𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀳𑀺 𑀑𑀪𑀸𑀲𑀺𑀬𑀫𑀸𑀦𑁄 𑀮𑁄𑀓𑀥𑀸𑀢𑀼𑀲𑀗𑁆𑀔𑀸𑀢𑁄 𑀏𑀓𑁄 𑀮𑁄𑀓𑁄, 𑀢𑀢𑁆𑀢𑀓𑁂𑀦 𑀧𑀫𑀸𑀡𑁂𑀦. 𑀇𑀤𑀁 𑀘𑀓𑁆𑀓𑀯𑀸𑀴𑀁 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀧𑀥𑀸𑀦𑀁, 𑀢𑀲𑁆𑀫𑀸 𑀬𑁂𑀪𑀼𑀬𑁆𑀬𑁂𑀦 𑀏𑀢𑁆𑀣𑀼𑀧𑀧𑀦𑁆𑀦𑀸 𑀤𑁂𑀯𑀢𑀸 𑀅𑀜𑁆𑀜𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑀦𑁆𑀢𑀺. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀤𑀲𑀲𑀳𑀲𑁆𑀲𑀩𑁆𑀭𑀳𑁆𑀫𑀧𑀭𑀺𑀯𑀸𑀭𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀉𑀧𑀕𑀜𑁆𑀙𑀺. 𑀢𑁂𑀦𑀸𑀳 ‘‘𑀏𑀢𑁆𑀣 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 𑀢𑀼𑀬𑁆𑀳𑀁 𑀯𑀲𑁄 𑀯𑀢𑁆𑀢𑀢𑀻’’𑀢𑀺. 𑀇𑀤𑀸𑀦𑀺 ‘‘𑀏𑀢𑁆𑀣 𑀢𑁂 𑀯𑀢𑁆𑀢𑀢𑁂 𑀯𑀲𑁄’’𑀢𑀺 𑀯𑀼𑀢𑁆𑀢𑀁 𑀯𑀲𑁂 𑀯𑀢𑁆𑀢𑀦𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀭𑁄𑀧𑀭𑀜𑁆𑀘 𑀚𑀸𑀦𑀸𑀲𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀞𑀫𑀕𑀸𑀣𑀸𑀬𑀁 𑀯𑀼𑀢𑁆𑀢𑀁 𑀏𑀢𑁆𑀣-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀣 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂’’𑀢𑀺 𑀆𑀳. 𑀉𑀘𑁆𑀘𑀦𑀻𑀘𑁂𑀢𑀺 𑀚𑀸𑀢𑀺𑀓𑀼𑀮𑀭𑀽𑀧𑀪𑁄𑀕𑀧𑀭𑀺𑀯𑀸𑀭𑀸𑀤𑀺𑀯𑀲𑁂𑀦 𑀉𑀴𑀸𑀭𑁂 𑀘 𑀅𑀦𑀼𑀴𑀸𑀭𑁂 𑀘. 𑀅𑀬𑀁 𑀇𑀤𑁆𑀥𑁄𑀅𑀬𑀁 𑀧𑀓𑀢𑀺𑀫𑀦𑀼𑀲𑁆𑀲𑁄𑀢𑀺 𑀇𑀫𑀺𑀦𑀸 ‘‘𑀲𑀭𑀽𑀧𑀢𑁄 𑀏𑀯𑀲𑁆𑀲 𑀲𑀢𑁆𑀢𑀸𑀦𑀁 𑀧𑀭𑁄𑀧𑀭𑀚𑀸𑀦𑀦𑀁, 𑀦 𑀲𑀫𑀼𑀤𑀸𑀕𑀫𑀢𑁄’’𑀢𑀺 𑀤𑀲𑁆𑀲𑁂𑀢𑀺. 𑀬𑀁 𑀧𑀦 𑀯𑀓𑁆𑀔𑀢𑀺 ‘‘𑀲𑀢𑁆𑀢𑀸𑀦𑀁 𑀆𑀕𑀢𑀺𑀁 𑀕𑀢𑀺𑀦𑁆𑀢𑀺, 𑀢𑀁 𑀓𑀸𑀫𑀮𑁄𑀓𑁂 𑀲𑀢𑁆𑀢𑀸𑀦𑀁 𑀆𑀤𑀸𑀦𑀦𑀺𑀓𑁆𑀔𑁂𑀧𑀚𑀸𑀦𑀦𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀦𑀁. 𑀬𑀤𑀺 𑀳𑀺 𑀲𑀫𑀼𑀤𑀸𑀕𑀫𑀢𑁄 𑀚𑀸𑀦𑁂𑀬𑁆𑀬, 𑀅𑀢𑁆𑀢𑀦𑁄𑀧𑀺 𑀚𑀸𑀦𑁂𑀬𑁆𑀬, 𑀦 𑀘𑀲𑁆𑀲 𑀢𑀁 𑀅𑀢𑁆𑀣𑀻𑀢𑀺, 𑀢𑀣𑀸 𑀆𑀳 ‘‘𑀇𑀢𑁆𑀣𑀫𑁆𑀪𑀸𑀯𑁄𑀢𑀺 𑀇𑀤𑀁 𑀘𑀓𑁆𑀓𑀯𑀸𑀴’’𑀦𑁆𑀢𑀺𑀆𑀤𑀺. 𑀭𑀸𑀕𑀬𑁄𑀕𑀢𑁄 𑀭𑀸𑀕𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀯𑀸 𑀭𑀸𑀕𑁄, 𑀯𑀺𑀭𑀚𑁆𑀚𑀦𑀲𑀻𑀮𑁄 𑀯𑀺𑀭𑀸𑀕𑀻, 𑀢𑀁 𑀭𑀸𑀕𑀯𑀺𑀭𑀸𑀕𑀺𑀦𑀁. 𑀲𑀳𑀲𑁆𑀲𑀺𑀩𑁆𑀭𑀳𑁆𑀫𑀸 𑀦𑀸𑀫 𑀢𑁆𑀯𑀁 𑀘𑀽𑀴𑀦𑀺𑀬𑀸 𑀏𑀯 𑀮𑁄𑀓𑀥𑀸𑀢𑀼𑀬𑀸 𑀚𑀸𑀦𑀦𑀢𑁄. 𑀢𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁. 𑀘𑀢𑀼𑀳𑀢𑁆𑀣𑀸𑀬𑀸𑀢𑀺 𑀅𑀦𑁂𑀓𑀳𑀢𑁆𑀣𑁂𑀦 𑀲𑀸𑀡𑀺𑀧𑀸𑀓𑀸𑀭𑁂𑀦 𑀓𑀸𑀢𑀩𑁆𑀩𑀧𑀝𑀧𑁆𑀧𑀫𑀸𑀡𑀁 𑀤𑀻𑀖𑀢𑁄 𑀘𑀢𑀼𑀳𑀢𑁆𑀣𑀸𑀬, 𑀯𑀺𑀢𑁆𑀣𑀸𑀭𑀢𑁄 𑀤𑁆𑀯𑀺𑀳𑀢𑁆𑀣𑀸𑀬 𑀧𑀺𑀮𑁄𑀢𑀺𑀓𑀸𑀬 𑀓𑀸𑀢𑀼𑀁 𑀯𑀸𑀬𑀫𑀦𑁆𑀢𑁄 𑀯𑀺𑀬 𑀕𑁄𑀧𑁆𑀨𑀓𑁂 𑀉𑀤𑀓𑁂 𑀦𑀺𑀫𑀼𑀚𑁆𑀚𑀺𑀢𑀼𑀓𑀸𑀫𑁄 𑀯𑀺𑀬 𑀘 𑀧𑀫𑀸𑀡𑀁 𑀅𑀚𑀸𑀦𑀦𑁆𑀢𑁄 𑀯𑀺𑀳𑀜𑁆𑀜𑀢𑀻𑀢𑀺 𑀦𑀺𑀕𑁆𑀕𑀡𑁆𑀳𑀸𑀢𑀺.

𑁫𑁦𑁪. 𑀢𑀁 𑀓𑀸𑀬𑀦𑁆𑀢𑀺 𑀢𑀤𑁂𑀯 𑀦𑀺𑀓𑀸𑀬𑀁. 𑀚𑀸𑀦𑀺𑀢𑀩𑁆𑀩𑀝𑁆𑀞𑀸𑀦𑀁 𑀧𑀢𑁆𑀯𑀸𑀧𑀻𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀫𑀬𑁆𑀳𑀁 𑀲𑀻𑀮𑀸𑀤𑀬𑁄 𑀕𑀼𑀡𑀯𑀺𑀲𑁂𑀲𑀸 𑀢𑀸𑀯 𑀢𑀺𑀝𑁆𑀞𑀦𑁆𑀢𑀼, 𑀈𑀤𑀺𑀲𑀁 𑀮𑁄𑀓𑀺𑀬𑀁 𑀧𑀭𑀺𑀢𑁆𑀢𑀓𑀁 𑀚𑀸𑀦𑀺𑀢𑀩𑁆𑀩𑀝𑁆𑀞𑀸𑀦𑀫𑁆𑀧𑀺 𑀧𑀢𑁆𑀯𑀸. 𑀅𑀬𑀁 𑀇𑀫𑁂𑀲𑀁 𑀅𑀢𑀺𑀲𑀬𑁂𑀦 𑀦𑀻𑀘𑁄𑀢𑀺 𑀦𑀻𑀘𑁂𑀬𑁆𑀬𑁄, 𑀢𑀲𑁆𑀲 𑀪𑀸𑀯𑁄 𑀦𑀻𑀘𑁂𑀬𑁆𑀬𑀦𑁆𑀢𑀺 𑀆𑀳 ‘‘𑀢𑀬𑀸 𑀦𑀻𑀘𑀢𑀭𑀪𑀸𑀯𑁄 𑀧𑀦 𑀫𑀬𑁆𑀳𑀁 𑀓𑀼𑀢𑁄’’𑀢𑀺.

𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀓𑁄𑀢𑀺 𑀉𑀧𑀭𑀽𑀧𑀭𑀺𑀢𑁄 𑀘𑀯𑀺𑀢𑁆𑀯𑀸 𑀳𑁂𑀝𑁆𑀞𑀸 𑀮𑀤𑁆𑀥𑀽𑀧𑀧𑀢𑁆𑀢𑀺𑀓𑁄. 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑁂’’𑀢𑀺 𑀆𑀳. 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀓𑀁 𑀓𑀢𑁆𑀯𑀸𑀢𑀺 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀓𑀁 𑀧𑀢𑁆𑀣𑀦𑀁 𑀓𑀢𑁆𑀯𑀸. 𑀬𑀣𑀸 𑀓𑁂𑀦𑀘𑀺 𑀩𑀳𑀽𑀲𑀼 𑀆𑀦𑀦𑁆𑀢𑀭𑀺𑀬𑁂𑀲𑀼 𑀓𑀢𑁂𑀲𑀼 𑀬𑀁 𑀢𑀢𑁆𑀣 𑀕𑀭𑀼𑀢𑀭𑀁 𑀩𑀮𑀯𑀁, 𑀢𑀤𑁂𑀯 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀇𑀢𑀭𑀸𑀦𑀺 𑀧𑀦 𑀢𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀬𑀓𑀸𑀦𑀺 𑀳𑁄𑀦𑁆𑀢𑀺, 𑀦 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀸𑀦𑀺, 𑀏𑀯𑀁 𑀘𑀢𑀽𑀲𑀼 𑀭𑀽𑀧𑀚𑁆𑀛𑀸𑀦𑁂𑀲𑀼 𑀪𑀸𑀯𑀺𑀢𑁂𑀲𑀼 𑀬𑀁 𑀢𑀢𑁆𑀣 𑀕𑀭𑀼𑀢𑀭𑀁 𑀙𑀦𑁆𑀤𑀧𑀡𑀺𑀥𑀺𑀅𑀥𑀺𑀫𑁄𑀓𑁆𑀔𑀸𑀤𑀺𑀯𑀲𑁂𑀦 𑀲𑀸𑀪𑀺𑀲𑀗𑁆𑀔𑀸𑀭𑀜𑁆𑀘, 𑀢𑀤𑁂𑀯 𑀘 𑀧𑀝𑀺𑀲𑀦𑁆𑀥𑀺𑀁 𑀤𑁂𑀢𑀺, 𑀇𑀢𑀭𑀸𑀦𑀺 𑀧𑀦 𑀅𑀮𑀤𑁆𑀥𑁄𑀓𑀸𑀲𑀢𑀸𑀬 𑀢𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀬𑀓𑀸𑀦𑀺 𑀳𑁄𑀦𑁆𑀢𑀺, 𑀦 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀸𑀦𑀺, 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀢𑀚𑁆𑀛𑀸𑀦𑁂𑀦𑁂𑀯 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀢𑀢𑀺𑀬𑀚𑁆𑀛𑀸𑀦𑀁 𑀧𑀡𑀻𑀢𑀁 𑀪𑀸𑀯𑁂𑀢𑁆𑀯𑀸’’𑀢𑀺. 𑀢𑀢𑁆𑀣𑀸𑀢𑀺 𑀲𑀼𑀪𑀓𑀺𑀡𑁆𑀳𑀩𑁆𑀭𑀳𑁆𑀫𑀮𑁄𑀓𑁂. 𑀧𑀼𑀦 𑀢𑀢𑁆𑀣𑀸𑀢𑀺 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑁂. 𑀧𑀞𑀫𑀓𑀸𑀮𑁂𑀢𑀺 𑀢𑀲𑁆𑀫𑀺𑀁 𑀪𑀯𑁂 𑀧𑀞𑀫𑀲𑁆𑀫𑀺𑀁 𑀓𑀸𑀮𑁂. 𑀉𑀪𑀬𑀦𑁆𑀢𑀺 𑀅𑀢𑀻𑀢𑀁 𑀅𑀢𑁆𑀢𑀦𑁄 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑀁 𑀅𑀢𑁆𑀢𑀦𑁄 𑀓𑀢𑀓𑀫𑁆𑀫𑀦𑁆𑀢𑀺 𑀉𑀪𑀬𑀁. 𑀧𑀫𑀼𑀲𑁆𑀲𑀺𑀢𑁆𑀯𑀸 𑀓𑀸𑀮𑀲𑁆𑀲 𑀘𑀺𑀭𑀢𑀭𑀪𑀸𑀯𑀢𑁄. 𑀯𑀻𑀢𑀺𑀦𑀸𑀫𑁂𑀢𑀺 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀘 𑀢𑀤𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀺𑀓𑁆𑀔𑀡𑀁 𑀉𑀧𑀸𑀤𑀸𑀬 𑀧𑀯𑀢𑁆𑀢𑀫𑀸𑀦𑀧𑀬𑁄𑀕𑁄.

𑀅𑀧𑀸𑀬𑁂𑀲𑀻𑀢𑀺 𑀧𑀸𑀬𑁂𑀲𑀺. 𑀧𑀺𑀧𑀸𑀲𑀺𑀢𑁂𑀢𑀺 𑀢𑀲𑀺𑀢𑁂. 𑀖𑀫𑁆𑀫𑀦𑀻𑀢𑀺 𑀖𑀫𑁆𑀫𑀓𑀸𑀮𑁂. 𑀲𑀫𑁆𑀧𑀭𑁂𑀢𑁂𑀢𑀺 𑀖𑀫𑁆𑀫𑀧𑀭𑀺𑀴𑀸𑀳𑁂𑀦 𑀧𑀺𑀧𑀸𑀲𑀸𑀬 𑀅𑀪𑀺𑀪𑀽𑀢𑁂. 𑀦𑁆𑀢𑀺 𑀧𑀸𑀦𑀻𑀬𑀤𑀸𑀦𑀁. 𑀯𑀢𑀲𑀻𑀮𑀯𑀢𑁆𑀢𑀦𑁆𑀢𑀺 𑀲𑀫𑀸𑀤𑀸𑀦𑀯𑀲𑁂𑀦 𑀯𑀢𑀪𑀽𑀢𑀁 𑀘𑀸𑀭𑀺𑀢𑁆𑀢𑀲𑀻𑀮𑀪𑀸𑀯𑁂𑀦 𑀲𑀫𑀸𑀘𑀺𑀡𑁆𑀡𑀢𑁆𑀢𑀸 𑀲𑀻𑀮𑀯𑀢𑁆𑀢𑀁. 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀻𑀢𑀺 𑀲𑀼𑀧𑀺𑀢𑁆𑀯𑀸 𑀧𑀩𑀼𑀤𑁆𑀥𑀫𑀢𑁆𑀢𑁄 𑀯𑀺𑀬 𑀲𑀼𑀧𑀺𑀦𑀁 𑀢𑀯 𑀧𑀼𑀩𑁆𑀩𑀦𑀺𑀯𑀼𑀢𑁆𑀣𑀁 𑀫𑀫 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀅𑀦𑀼𑀲𑁆𑀲𑀭𑀸𑀫𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀓𑀭𑀫𑀭𑁂𑀢𑀺 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀆𑀦𑀻𑀢𑁂. 𑀓𑀫𑁆𑀫𑀲𑀚𑁆𑀚𑀦𑁆𑀢𑀺 𑀬𑀼𑀤𑁆𑀥𑀲𑀚𑁆𑀚𑀁, 𑀆𑀯𑀼𑀥𑀸𑀤𑀸𑀬𑀺𑀦𑀺𑀦𑁆𑀢𑀺 𑀅𑀢𑁆𑀣𑁄.

𑀏𑀡𑀻𑀓𑀽𑀮𑀲𑁆𑀫𑀺𑀦𑁆𑀢𑀺 𑀏𑀡𑀻𑀫𑀺𑀕𑀩𑀸𑀳𑀼𑀮𑁆𑀮𑁂𑀦 ‘‘𑀏𑀡𑀻𑀓𑀽𑀮’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑁂 𑀕𑀗𑁆𑀕𑀸𑀬 𑀢𑀻𑀭𑀧𑁆𑀧𑀤𑁂𑀲𑁂. 𑀕𑀬𑁆𑀳𑀓 𑀦𑀻𑀬𑀫𑀸𑀦𑀦𑁆𑀢𑀺 𑀕𑀬𑁆𑀳𑀯𑀲𑁂𑀦 𑀓𑀭𑀫𑀭𑀪𑀸𑀯𑁂𑀦 𑀘𑁄𑀭𑁂𑀳𑀺 𑀅𑀢𑁆𑀢𑀦𑁄 𑀞𑀸𑀦𑀁 𑀦𑀻𑀬𑀫𑀸𑀦𑀁.

𑀆𑀯𑀸𑀳𑀯𑀺𑀯𑀸𑀳𑀯𑀲𑁂𑀦 𑀫𑀺𑀢𑁆𑀢𑀲𑀦𑁆𑀣𑀯𑀁 𑀓𑀢𑁆𑀯𑀸. ‘‘𑀏𑀯𑀁 𑀅𑀫𑁆𑀳𑁂𑀲𑀼 𑀓𑀻𑀴𑀦𑁆𑀢𑁂𑀲𑀼 𑀕𑀗𑁆𑀕𑁂𑀬𑁆𑀬𑀓𑁄 𑀦𑀸𑀕𑁄 𑀓𑀼𑀧𑀺𑀢𑁄’’𑀢𑀺 𑀫𑀬𑀺 𑀲𑀜𑁆𑀜𑀫𑁆𑀧𑀺 𑀦 𑀓𑀭𑁄𑀦𑁆𑀢𑀻𑀢𑀺. 𑀲𑀼𑀲𑀼𑀓𑀸𑀭𑀦𑁆𑀢𑀺 𑀲𑀼𑀲𑀽𑀢𑀺 𑀧𑀯𑀢𑁆𑀢𑀁 𑀪𑁂𑀭𑀯𑀦𑀸𑀕𑀦𑀺𑀲𑁆𑀲𑀸𑀲𑀁.

𑀕𑀳𑀻𑀢𑀦𑀸𑀯𑀦𑁆𑀢𑀺 𑀯𑀺𑀳𑁂𑀞𑁂𑀢𑀼𑀓𑀸𑀫𑀢𑀸𑀬 𑀕𑀢𑀺𑀦𑀺𑀯𑀸𑀭𑀡𑀯𑀲𑁂𑀦 𑀕𑀳𑀺𑀢𑀁 𑀦𑀺𑀕𑁆𑀕𑀳𑀺𑀢𑀁 𑀦𑀸𑀯𑀁. 𑀮𑀼𑀤𑁆𑀤𑁂𑀦𑀸𑀢𑀺 𑀓𑀼𑀭𑀽𑀭𑁂𑀦. 𑀫𑀦𑀼𑀲𑁆𑀲𑀓𑀧𑁆𑀧𑀸𑀢𑀺 𑀦𑀸𑀯𑀸𑀕𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀺𑀳𑁂𑀞𑁂𑀢𑀼𑀓𑀸𑀫𑀢𑀸𑀬.

𑀩𑀤𑁆𑀥𑀘𑀭𑁄𑀢𑀺 𑀧𑀝𑀺𑀩𑀤𑁆𑀥𑀘𑀭𑀺𑀬𑁄. 𑀢𑁂𑀦𑀸𑀳 ‘‘𑀅𑀦𑁆𑀢𑁂𑀯𑀸𑀲𑀺𑀓𑁄’’𑀢𑀺. 𑀢𑀁 𑀦𑀺𑀲𑁆𑀲𑀸𑀬𑁂𑀯𑀸𑀢𑀺 𑀭𑀜𑁆𑀜𑀸 𑀉𑀧𑀝𑁆𑀞𑀺𑀬𑀫𑀸𑀦𑁄𑀧𑀺 𑀭𑀸𑀚𑀸𑀦𑀁 𑀧𑀳𑀸𑀬 𑀢𑀁 𑀓𑀧𑁆𑀧𑀁 𑀅𑀦𑁆𑀢𑁂𑀯𑀸𑀲𑀺𑀁 𑀦𑀺𑀲𑁆𑀲𑀸𑀬𑁂𑀯.

𑀲𑀫𑁆𑀩𑀼𑀤𑁆𑀥𑀺𑀫𑀦𑁆𑀢𑀁 𑀯𑀢𑀺𑀦𑀁 𑀅𑀫𑀜𑁆𑀜𑀻𑀢𑀺 𑀅𑀬𑀁 𑀲𑀫𑁆𑀫𑀤𑁂𑀯 𑀩𑀼𑀤𑁆𑀥𑀺𑀫𑀸 𑀯𑀢𑀲𑀫𑁆𑀧𑀦𑁆𑀦𑁄𑀢𑀺 𑀅𑀫𑀜𑁆𑀜𑀺 𑀲𑀫𑁆𑀪𑀸𑀯𑁂𑀲𑀺 𑀘.

𑀦𑀸𑀦𑀢𑁆𑀢𑀪𑀸𑀯𑁂𑀲𑀽𑀢𑀺 𑀦𑀸𑀦𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀢𑀪𑀸𑀯𑁂𑀲𑀼.

𑀅𑀤𑁆𑀥𑀸𑀢𑀺 𑀏𑀓𑀁𑀲𑁂𑀦. 𑀫𑀫𑁂𑀢𑀫𑀸𑀬𑀼𑀦𑁆𑀢𑀺 𑀫𑀬𑁆𑀳𑀁 𑀏𑀢𑀁 𑀬𑀣𑀸𑀯𑀼𑀢𑁆𑀢𑀁 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀯𑀢𑁆𑀢𑀁 𑀆𑀬𑀼𑀁. 𑀦 𑀓𑁂𑀯𑀮𑀁 𑀫𑀫 𑀆𑀬𑀼𑀫𑁂𑀯, 𑀅𑀣 𑀔𑁄 𑀅𑀜𑁆𑀜𑀫𑁆𑀧𑀺 𑀲𑀩𑁆𑀩𑀜𑁆𑀜𑁂𑀬𑁆𑀬𑀁 𑀚𑀸𑀦𑀸𑀲𑀺, 𑀦 𑀢𑀼𑀬𑁆𑀳𑀁 𑀅𑀯𑀺𑀤𑀺𑀢𑀁 𑀦𑀸𑀫 𑀅𑀢𑁆𑀣𑀺. 𑀢𑀣𑀸 𑀳𑀺 𑀩𑀼𑀤𑁆𑀥𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀼𑀯𑀁. 𑀦𑁄 𑀘𑁂 𑀓𑀣𑀫𑀬𑀫𑀢𑁆𑀣𑁄 𑀜𑀸𑀢𑁄? 𑀢𑀣𑀸 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀏𑀯 𑀢𑁂 𑀅𑀬𑀁 𑀚𑀮𑀺𑀢𑁄 𑀚𑁄𑀢𑀫𑀸𑀦𑁄 𑀆𑀦𑀼𑀪𑀸𑀯𑁄 𑀑𑀪𑀸𑀲𑀬𑀁 𑀲𑀩𑁆𑀩𑀫𑁆𑀧𑀺 𑀩𑁆𑀭𑀳𑁆𑀫𑀮𑁄𑀓𑀁 𑀑𑀪𑀸𑀲𑁂𑀦𑁆𑀢𑁄 𑀤𑀺𑀩𑁆𑀩𑀫𑀸𑀦𑁄 𑀢𑀺𑀝𑁆𑀞𑀢𑀻𑀢𑀺 𑀲𑀢𑁆𑀣𑀼 𑀅𑀲𑀫𑀲𑀫𑀢𑀁 𑀧𑀯𑁂𑀤𑁂𑀲𑀺.

𑀧𑀣𑀯𑀢𑁆𑀢𑁂𑀦𑀸𑀢𑀺 𑀧𑀣𑀯𑀻𑀅𑀢𑁆𑀢𑁂𑀦. 𑀢𑁂𑀦𑀸𑀳 ‘‘𑀧𑀣𑀯𑀻𑀲𑀪𑀸𑀯𑁂𑀦𑀸’’𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑁋 ‘‘𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺’’𑀆𑀤𑀺𑀦𑀸 (𑀫𑀳𑀸𑀯. 𑁭; 𑀤𑀻. 𑀦𑀺. 𑁨.𑁬𑁪, 𑁬𑁭; 𑀫. 𑀦𑀺. 𑁧.𑁨𑁮𑁧; 𑀲𑀁. 𑀦𑀺. 𑁧.𑁧𑁭𑁨) 𑀲𑀸𑀥𑀸𑀭𑀡𑀢𑁄, ‘‘𑀬𑀢𑁆𑀣 𑀦𑁂𑀯 𑀧𑀣𑀯𑀻’’𑀢𑀺 𑀅𑀲𑀸𑀥𑀸𑀭𑀡𑀢𑁄 𑀘 𑀧𑀣𑀯𑀺𑀬𑀸 𑀅𑀲𑀪𑀸𑀯𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀕𑀳𑁂𑀢𑀩𑁆𑀩𑀢𑀸 𑀅𑀢𑁆𑀣𑀺, 𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀣𑀯𑀺𑀬𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀲𑀪𑀸𑀯𑀁 𑀕𑀳𑁂𑀢𑀼𑀁 ‘‘𑀧𑀣𑀯𑀺𑀬𑀸 𑀧𑀣𑀯𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀦𑀸𑀧𑀳𑁄𑀲𑀺𑀦𑁆𑀢𑀺 𑀦 𑀧𑀸𑀧𑀼𑀡𑀺𑀁. 𑀇𑀥 𑀧𑀣𑀯𑀺𑀬𑀸 𑀧𑀸𑀧𑀼𑀡𑀦𑀁 𑀦𑀸𑀫 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀕𑀳𑀡𑀦𑁆𑀢𑀺 𑀆𑀳 ‘‘𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀕𑁆𑀕𑀸𑀳𑁂𑀳𑀺 𑀦 𑀕𑀡𑁆𑀳𑀺’’𑀦𑁆𑀢𑀺.

𑀯𑀸𑀤𑀺𑀢𑀸𑀬𑀸𑀢𑀺 𑀯𑀸𑀤𑀲𑀻𑀮𑀢𑀸𑀬. 𑀲𑀩𑁆𑀩𑀦𑁆𑀢𑀺 𑀅𑀓𑁆𑀔𑀭𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸𑀢𑀺 ‘‘𑀲𑀩𑁆𑀩𑀁 𑀔𑁄 𑀅𑀳𑀁 𑀩𑁆𑀭𑀳𑁆𑀫𑁂’’𑀢𑀺𑀆𑀤𑀺𑀦𑀸 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀲𑀩𑁆𑀩-𑀲𑀤𑁆𑀤𑀁 𑁋 ‘‘𑀲𑀘𑁂 𑀔𑁄 𑀢𑁂 𑀫𑀸𑀭𑀺𑀲 𑀲𑀩𑁆𑀩𑀲𑁆𑀲 𑀲𑀩𑁆𑀩𑀢𑁆𑀢𑁂𑀦 𑀅𑀦𑀦𑀼𑀪𑀽𑀢’’𑀦𑁆𑀢𑀺 𑀧𑀘𑁆𑀘𑀦𑀼𑀪𑀸𑀲𑀦𑀯𑀲𑁂𑀦 𑀦𑀺𑀤𑁆𑀤𑀺𑀲𑀺𑀢𑁆𑀯𑀸. 𑀅𑀓𑁆𑀔𑀭𑁂 𑀤𑁄𑀲𑀁 𑀕𑀡𑁆𑀳𑀦𑁆𑀢𑁄𑀢𑀺 𑀪𑀕𑀯𑀢𑀸 𑀲𑀓𑁆𑀓𑀸𑀬𑀲𑀩𑁆𑀩𑀁 𑀲𑀦𑁆𑀥𑀸𑀬 𑀲𑀩𑁆𑀩-𑀲𑀤𑁆𑀤𑁂 𑀕𑀳𑀺𑀢𑁂 𑀲𑀩𑁆𑀩𑀲𑀩𑁆𑀩𑀯𑀲𑁂𑀦 𑀢𑀤𑀢𑁆𑀣𑀧𑀭𑀺𑀯𑀢𑁆𑀢𑀦𑁂𑀦 𑀲𑀩𑁆𑀩-𑀲𑀤𑁆𑀤𑀯𑀘𑀦𑀻𑀬𑀢𑀸𑀲𑀸𑀫𑀜𑁆𑀜𑁂𑀦 𑀘 𑀤𑁄𑀲𑀁 𑀕𑀡𑁆𑀳𑀦𑁆𑀢𑁄. 𑀢𑁂𑀦𑀸𑀳 ‘‘𑀲𑀢𑁆𑀣𑀸 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀤𑀺 𑀲𑀩𑁆𑀩𑀁 𑀅𑀦𑀦𑀼𑀪𑀽𑀢𑀁 ‘‘𑀦𑀢𑁆𑀣𑀺 𑀲𑀩𑁆𑀩’’𑀦𑁆𑀢𑀺 𑀮𑁄𑀓𑁂 𑀅𑀦𑀯𑀲𑁂𑀲𑀁 𑀧𑀼𑀘𑁆𑀙𑀢𑀺. 𑀲𑀘𑁂 𑀲𑀩𑁆𑀩𑀲𑁆𑀲 𑀲𑀩𑁆𑀩𑀢𑁆𑀢𑁂𑀦 𑀅𑀦𑀯𑀲𑁂𑀲𑀲𑀪𑀸𑀯𑁂𑀦 𑀅𑀦𑀦𑀼𑀪𑀽𑀢𑀁 𑀅𑀧𑁆𑀧𑀢𑁆𑀢𑀁, 𑀢𑀁 𑀕𑀕𑀦𑀓𑀼𑀲𑀼𑀫𑀁 𑀯𑀺𑀬 𑀓𑀺𑀜𑁆𑀘𑀺 𑀦 𑀲𑀺𑀬𑀸. 𑀅𑀣𑀲𑁆𑀲 𑀅𑀦𑀦𑀼𑀪𑀽𑀢𑀁 𑀅𑀢𑁆𑀣𑀻𑀢𑀺 𑀅𑀲𑁆𑀲 𑀲𑀩𑁆𑀩𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀁 𑀬𑀤𑀺 𑀅𑀢𑁆𑀣𑀺, ‘‘𑀲𑀩𑁆𑀩’’𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀫𑀺𑀘𑁆𑀙𑀸, 𑀲𑀩𑁆𑀩𑀁 𑀦𑀸𑀫 𑀢𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀫𑀸 𑀳𑁂𑀯 𑀢𑁂 𑀭𑀺𑀢𑁆𑀢𑀓𑀫𑁂𑀯𑀸’’𑀢𑀺𑀆𑀤𑀺.

𑀅𑀳𑀁 𑀲𑀩𑁆𑀩𑀜𑁆𑀘 𑀯𑀓𑁆𑀔𑀸𑀫𑀺, 𑀅𑀦𑀦𑀼𑀪𑀽𑀢𑀜𑁆𑀘 𑀯𑀓𑁆𑀔𑀸𑀫𑀻𑀢𑀺 𑀅𑀳𑀁 ‘‘𑀲𑀩𑁆𑀩’’𑀦𑁆𑀢𑀺 𑀘 𑀯𑀓𑁆𑀔𑀸𑀫𑀺, ‘‘𑀅𑀦𑀦𑀼𑀪𑀽𑀢’’𑀦𑁆𑀢𑀺 𑀘 𑀯𑀓𑁆𑀔𑀸𑀫𑀺, 𑀏𑀢𑁆𑀣 𑀓𑁄 𑀤𑁄𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀭𑀡𑀁 𑀆𑀳𑀭𑀦𑁆𑀢𑁄𑀢𑀺 𑀲𑀩𑁆𑀩𑀲𑁆𑀲 𑀲𑀩𑁆𑀩𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀲𑁆𑀲 𑀅𑀢𑁆𑀣𑀺𑀪𑀸𑀯𑁂 𑀓𑀸𑀭𑀡𑀁 𑀦𑀺𑀤𑁆𑀤𑀺𑀲𑀦𑁆𑀢𑁄. 𑀯𑀺𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀳𑀺 𑀯𑀺𑀲𑁂𑀲𑀢𑁄 𑀲𑀩𑁆𑀩𑀲𑀗𑁆𑀔𑀢𑀯𑀺𑀲𑀺𑀝𑁆𑀞𑀢𑀸𑀬 𑀚𑀸𑀦𑀺𑀢𑀩𑁆𑀩𑀁. 𑀅𑀦𑀺𑀤𑀲𑁆𑀲𑀦𑀦𑁆𑀢𑀺 𑀇𑀤𑀁 𑀦𑀺𑀩𑁆𑀩𑀸𑀦𑀲𑁆𑀲 𑀲𑀦𑀺𑀤𑀲𑁆𑀲𑀦𑀤𑀼𑀓𑁂 𑀤𑀼𑀢𑀺𑀬𑀧𑀤𑀲𑀳𑀺𑀢𑀢𑀸𑀤𑀲𑁆𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀧𑀸𑀣𑀁 𑀅𑀦𑀼𑀧𑀕𑀫𑀦𑀢𑁄 𑀅𑀦𑀺𑀤𑀲𑁆𑀲𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀲𑀗𑁆𑀔𑀢𑀯𑀺𑀥𑀼𑀭𑀢𑀸𑀬 𑀯𑀸 𑀦𑀢𑁆𑀣𑀺 𑀏𑀢𑀲𑁆𑀲 𑀦𑀺𑀤𑀲𑁆𑀲𑀦𑀦𑁆𑀢𑀺 𑀅𑀦𑀺𑀤𑀲𑁆𑀲𑀦𑀁. 𑀦𑀢𑁆𑀣𑀺 𑀏𑀢𑀲𑁆𑀲 𑀅𑀦𑁆𑀢𑁄𑀢𑀺 𑀅𑀦𑀦𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀬𑀺𑀤’’𑀦𑁆𑀢𑀺𑀆𑀤𑀺.

𑀪𑀽𑀢𑀸𑀦𑀻𑀢𑀺 𑀧𑀘𑁆𑀘𑀬𑀲𑀫𑁆𑀪𑀽𑀢𑀸𑀦𑀺. 𑀅𑀲𑀫𑁆𑀪𑀽𑀢𑀦𑁆𑀢𑀺 𑀧𑀘𑁆𑀘𑀬𑁂𑀳𑀺 𑀅𑀲𑀫𑁆𑀪𑀽𑀢𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀪𑀲𑁆𑀲𑀭𑀪𑀸𑀯𑀳𑁂𑀢𑀽𑀦𑀁 𑀲𑀩𑁆𑀩𑀲𑁄 𑀅𑀪𑀸𑀯𑀸 𑀲𑀩𑁆𑀩𑀢𑁄 𑀧𑀪𑀸𑀢𑀺 𑀲𑀩𑁆𑀩𑀢𑁄𑀧𑀪𑀁. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀢𑁄 𑀳𑀻’’𑀢𑀺𑀆𑀤𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀢𑀫𑁄 𑀢𑀢𑁆𑀣 𑀦 𑀯𑀺𑀚𑁆𑀚𑀢𑀻’’𑀢𑀺. (𑀦𑁂𑀢𑁆𑀢𑀺. 𑁧𑁦𑁪) 𑀧𑀪𑀽𑀢𑀫𑁂𑀯𑀸𑀢𑀺 𑀧𑀓𑀝𑁆𑀞𑀪𑀸𑀯𑁂𑀦 𑀉𑀓𑁆𑀓𑀝𑁆𑀞𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀫𑁂𑀯. 𑀅𑀭𑀽𑀧𑀻𑀪𑀸𑀯𑁂𑀦 𑀅𑀤𑁂𑀲𑀺𑀓𑀢𑁆𑀢𑀸 𑀲𑀩𑁆𑀩𑀢𑁄 𑀧𑀪𑀯𑀢𑀺 𑀯𑀺𑀚𑁆𑀚𑀢𑀻𑀢𑀺 𑀲𑀩𑁆𑀩𑀢𑁄𑀧𑀪𑀁. 𑀢𑁂𑀦𑀸𑀳 ‘‘𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀤𑀻𑀲𑀽’’𑀢𑀺𑀆𑀤𑀺. 𑀧𑀯𑀺𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀯𑀺𑀲𑀁, 𑀢𑀤𑁂𑀯 𑀲-𑀓𑀸𑀭𑀲𑁆𑀲 𑀪-𑀓𑀸𑀭𑀁, 𑀯𑀺-𑀓𑀸𑀭𑀲𑁆𑀲 𑀘 𑀮𑁄𑀧𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀪’’𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀺𑀢𑁆𑀣𑀲𑁆𑀲 𑀦𑀸𑀫’’𑀦𑁆𑀢𑀺. 𑀯𑀸𑀤𑀁 𑀧𑀢𑀺𑀝𑁆𑀞𑀧𑁂𑀲𑀻𑀢𑀺 𑀏𑀯𑀁 𑀫𑀬𑀸 𑀲𑀩𑁆𑀩𑀜𑁆𑀘 𑀯𑀼𑀢𑁆𑀢𑀁, 𑀅𑀦𑀦𑀼𑀪𑀽𑀢𑀜𑁆𑀘 𑀯𑀼𑀢𑁆𑀢𑀁, 𑀢𑀢𑁆𑀣 𑀬𑀁 𑀢𑀬𑀸 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁂𑀦 𑀲𑀳𑀲𑀸 𑀅𑀧𑁆𑀧𑀝𑀺𑀲𑀗𑁆𑀔𑀸𑀬 𑀤𑁄𑀲𑀕𑁆𑀕𑀳𑀡𑀁, 𑀢𑀁 𑀫𑀺𑀘𑁆𑀙𑀸𑀢𑀺 𑀩𑁆𑀭𑀳𑁆𑀫𑀸𑀦𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀪𑀕𑀯𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑀺𑀝𑁆𑀞𑀧𑁂𑀲𑀺.

𑀕𑀳𑀺𑀢𑀕𑀳𑀺𑀢𑀦𑁆𑀢𑀺 ‘‘𑀇𑀤𑀁 𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀕𑀳𑀺𑀢𑀕𑀳𑀺𑀢𑀁 𑀕𑀸𑀳𑀁. 𑀢𑀢𑁆𑀣 𑀢𑀢𑁆𑀣 𑀤𑁄𑀲𑀤𑀲𑁆𑀲𑀦𑀫𑀼𑀔𑁂𑀦 𑀦𑀺𑀕𑁆𑀕𑀡𑁆𑀳𑀦𑁆𑀢𑁂𑀦 𑀲𑀢𑁆𑀣𑀸𑀭𑀸 𑀯𑀺𑀲𑁆𑀲𑀚𑁆𑀚𑀸𑀧𑀺𑀢𑁄 𑀓𑀺𑀜𑁆𑀘𑀺 𑀕𑀳𑁂𑀢𑀩𑁆𑀩𑀁 𑀅𑀢𑁆𑀢𑀦𑁄 𑀧𑀝𑀺𑀲𑀭𑀡𑀁 𑀅𑀤𑀺𑀲𑁆𑀯𑀸 𑀧𑀭𑀸𑀚𑀬𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀮𑀴𑀺𑀢𑀓𑀁𑀓𑀸𑀢𑀼𑀓𑀸𑀫𑁄 𑀯𑀸𑀤𑀁 𑀧𑀳𑀸𑀬 𑀇𑀤𑁆𑀥𑀺𑀬𑀸 𑀧𑀸𑀝𑀺𑀳𑀸𑀭𑀺𑀬𑀮𑀻𑀴𑀁 𑀤𑀲𑁆𑀲𑁂𑀢𑀼𑀓𑀸𑀫𑁄. 𑀬𑀤𑀺 𑀲𑀓𑁆𑀓𑁄𑀲𑀺 𑀫𑀬𑁆𑀳𑀁 𑀅𑀦𑁆𑀢𑀭𑀥𑀸𑀬𑀺𑀢𑀼𑀁, 𑀦 𑀧𑀦 𑀲𑀓𑁆𑀔𑀺𑀲𑁆𑀲𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀽𑀮𑀧𑀝𑀺𑀲𑀦𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑁄𑀢𑀺 𑀅𑀢𑁆𑀢𑀦𑁄 𑀧𑀸𑀓𑀢𑀺𑀓𑁂𑀦 𑀅𑀢𑁆𑀢𑀪𑀸𑀯𑁂𑀦 𑀞𑀸𑀢𑀼𑀓𑀸𑀫𑁄. 𑀲𑁄 𑀳𑀺 𑀧𑀝𑀺𑀲𑀦𑁆𑀥𑀺𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑀲𑀤𑀺𑀲𑀢𑀸𑀬 𑀫𑀽𑀮𑀧𑀝𑀺𑀲𑀦𑁆𑀥𑀻𑀢𑀺 𑀯𑀼𑀢𑁆𑀢𑁄. 𑀅𑀜𑁆𑀜𑁂𑀲𑀦𑁆𑀢𑀺 𑀳𑁂𑀝𑁆𑀞𑀸 𑀅𑀜𑁆𑀜𑀓𑀸𑀬𑀺𑀓𑀸𑀦𑀁 𑀩𑁆𑀭𑀳𑁆𑀫𑀽𑀦𑀁. 𑀦 𑀅𑀤𑀸𑀲𑀺 𑀅𑀪𑀺𑀲𑀗𑁆𑀔𑀢𑀓𑀸𑀬𑁂𑀦𑁂𑀯𑀸𑀬𑀁 𑀢𑀺𑀝𑁆𑀞𑀢𑀼, 𑀦 𑀧𑀸𑀓𑀢𑀺𑀓𑀭𑀽𑀧𑁂𑀦𑀸𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑁂𑀦 𑀲𑁄 𑀅𑀪𑀺𑀲𑀗𑁆𑀔𑀢𑀓𑀸𑀬𑀁 𑀅𑀧𑀦𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀅𑀢𑁆𑀢𑀪𑀸𑀯𑀧𑀝𑀺𑀘𑁆𑀙𑀸𑀤𑀓𑀁 𑀅𑀦𑁆𑀥𑀓𑀸𑀭𑀁 𑀦𑀺𑀫𑁆𑀫𑀺𑀦𑀺𑀢𑀼𑀁 𑀆𑀭𑀪𑀺. 𑀲𑀢𑁆𑀣𑀸 𑀢𑀁 𑀢𑀫𑀁 𑀯𑀺𑀤𑁆𑀥𑀁𑀲𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀽𑀮𑀧𑀝𑀺𑀲𑀦𑁆𑀥𑀺𑀁 𑀯𑀸’’𑀢𑀺𑀆𑀤𑀺.

𑀪𑀯𑁂𑀯𑀸𑀳𑀦𑁆𑀢𑀺 𑀪𑀯𑁂 𑀏𑀯 𑀅𑀳𑀁. 𑀅𑀬𑀜𑁆𑀘 𑀏𑀯-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀳𑀁 𑀪𑀯𑁂 𑀪𑀬𑀁 𑀤𑀺𑀲𑁆𑀯𑀸𑀬𑁂𑀯𑀸’’𑀢𑀺, 𑀲𑀩𑁆𑀩𑀲𑁆𑀫𑀺𑀁 𑀪𑀯𑁂 𑀚𑀸𑀢𑀺𑀆𑀤𑀺𑀪𑀬𑀁 𑀜𑀸𑀡𑀘𑀓𑁆𑀔𑀼𑀦𑀸 𑀬𑀸𑀣𑀸𑀯𑀢𑁄 𑀤𑀺𑀲𑁆𑀯𑀸. 𑀲𑀢𑁆𑀢𑀪𑀯𑀦𑁆𑀢𑀺 𑀲𑀢𑁆𑀢𑀲𑀗𑁆𑀔𑀸𑀢𑀁 𑀪𑀯𑀁. 𑀓𑀫𑁆𑀫𑀪𑀯𑀧𑀘𑁆𑀘𑀬𑁂 𑀳𑀺 𑀉𑀧𑀧𑀢𑁆𑀢𑀺𑀪𑀯𑁂 𑀲𑀢𑁆𑀢𑀲𑀫𑀜𑁆𑀜𑀸. 𑀯𑀺𑀪𑀯𑀦𑁆𑀢𑀺 𑀯𑀺𑀫𑀼𑀢𑁆𑀢𑀺𑀁. 𑀧𑀭𑀺𑀬𑁂𑀲𑀫𑀸𑀦𑀫𑁆𑀧𑀺 𑀉𑀧𑀸𑀬𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀪𑀯𑁂𑀬𑁂𑀯 𑀤𑀺𑀲𑁆𑀯𑀸. 𑀪𑀯𑀜𑁆𑀘 𑀯𑀺𑀪𑀯𑁂𑀲𑀺𑀦𑀁 𑀯𑀺𑀪𑀯𑀁 𑀦𑀺𑀩𑁆𑀩𑀼𑀢𑀺𑀁 𑀏𑀲𑀫𑀸𑀦𑀸𑀦𑀁 𑀲𑀢𑁆𑀢𑀸𑀦𑀁 𑀪𑀯𑀁, 𑀪𑀯𑁂𑀲𑀼 𑀉𑀧𑁆𑀧𑀢𑁆𑀢𑀺𑀜𑁆𑀘 𑀤𑀺𑀲𑁆𑀯𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀦 𑀅𑀪𑀺𑀯𑀤𑀺𑀦𑁆𑀢𑀺 ‘‘𑀅𑀳𑁄 𑀯𑀢 𑀲𑀼𑀔’’𑀦𑁆𑀢𑀺 𑀏𑀯𑀁 𑀅𑀪𑀺𑀯𑀤𑀸𑀧𑀦𑀸𑀓𑀸𑀭𑀸𑀪𑀸𑀯𑀢𑁄 𑀦 𑀅𑀪𑀺𑀦𑀺𑀯𑀺𑀲𑀺𑀁, 𑀮𑀓𑁆𑀔𑀡𑀯𑀘𑀦𑀫𑁂𑀢𑀁. 𑀕𑀸𑀳𑀢𑁆𑀣𑁄 𑀏𑀯 𑀯𑀸 𑀅𑀪𑀺𑀯𑀸𑀤-𑀲𑀤𑁆𑀤𑁄𑀢𑀺 𑀆𑀳 ‘‘𑀦𑀸𑀪𑀺𑀯𑀤𑀺’’𑀦𑁆𑀢𑀺, ‘‘𑀦 𑀕𑀯𑁂𑀲𑀺’’𑀦𑁆𑀢𑀺. 𑀪𑀯𑀕𑁆𑀕𑀳𑀡𑁂𑀦𑁂𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁, 𑀦𑀦𑁆𑀤𑀻𑀕𑀳𑀡𑁂𑀦 𑀲𑀫𑀼𑀤𑀬𑀲𑀘𑁆𑀘𑀁, 𑀯𑀺𑀪𑀯𑀕𑁆𑀕𑀳𑀡𑁂𑀦 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀦𑁆𑀤𑀺𑀜𑁆𑀘 𑀦 𑀉𑀧𑀸𑀤𑀺𑀬𑀺𑀦𑁆𑀢𑀺 𑀇𑀫𑀺𑀦𑀸 𑀫𑀕𑁆𑀕𑀲𑀘𑁆𑀘𑀁 𑀧𑀓𑀸𑀲𑀺𑀢𑀦𑁆𑀢𑀺 𑀆𑀳 ‘‘𑀇𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀦𑁆𑀢𑁄’’𑀢𑀺. 𑀢𑀤𑀺𑀤𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀕𑀸𑀣𑀸𑀬 𑀯𑀺𑀪𑀸𑀯𑀦𑀤𑀲𑁆𑀲𑀦𑀁. 𑀲𑀢𑁆𑀣𑀸 𑀧𑀦 𑀢𑁂𑀲𑀁 𑀩𑁆𑀭𑀳𑁆𑀫𑀽𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀲𑀘𑁆𑀘𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀧𑀓𑀸𑀲𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀧𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀺. 𑀢𑁂 𑀘 𑀩𑁆𑀭𑀳𑁆𑀫𑀸𑀦𑁄 𑀓𑁂𑀘𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀨𑀮𑁂, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀨𑀮𑁂, 𑀓𑁂𑀘𑀺 𑀅𑀭𑀳𑀢𑁆𑀢𑁂 𑀘 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀻’’𑀢𑀺𑀆𑀤𑀺. 𑀅𑀘𑁆𑀙𑀭𑀺𑀬𑀚𑀸𑀢𑀸𑀢𑀺 𑀲𑀜𑁆𑀚𑀸𑀢𑀘𑁆𑀙𑀭𑀺𑀬𑀸. 𑀲𑀫𑀽𑀮𑀁 𑀪𑀯𑀦𑁆𑀢𑀺 𑀢𑀡𑁆𑀳𑀸𑀯𑀺𑀚𑁆𑀚𑀸𑀳𑀺 𑀲𑀫𑀽𑀮𑀁 𑀪𑀯𑀁.

𑁫𑁦𑁫. 𑀫𑀫 𑀯𑀲𑀁 𑀅𑀢𑀺𑀯𑀢𑁆𑀢𑀺𑀢𑀸𑀦𑀻𑀢𑀺 𑀲𑀩𑁆𑀩𑀲𑁄 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀧𑀝𑀺𑀧𑀤𑀸𑀬 𑀫𑀬𑁆𑀳𑀁 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑀸𑀦𑀺. 𑀓𑀣𑀁 𑀧𑀦𑀸𑀬𑀁 𑀢𑁂𑀲𑀁 𑀅𑀭𑀺𑀬𑀪𑀽𑀫𑀺𑀲𑀫𑁄𑀓𑁆𑀓𑀫𑀦𑀁 𑀚𑀸𑀦𑀸𑀢𑀻𑀢𑀺? 𑀦𑀬𑀕𑁆𑀕𑀸𑀳𑀢𑁄 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀁𑀲𑀸𑀭𑁂 𑀆𑀤𑀻𑀦𑀯𑀁, 𑀦𑀺𑀩𑁆𑀩𑀸𑀦𑁂 𑀘 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀦𑁆𑀢𑁄 𑀯𑁂𑀦𑁂𑀬𑁆𑀬𑀚𑀦𑀁 𑀦𑀺𑀩𑁆𑀩𑀸𑀦𑀁 𑀤𑀺𑀝𑁆𑀞𑀫𑁂𑀯 𑀓𑀭𑁄𑀢𑀺, 𑀢𑀲𑁆𑀲 𑀤𑁂𑀲𑀦𑀸 𑀅𑀯𑀜𑁆𑀛𑀸 𑀅𑀫𑁄𑀖𑀸 𑀇𑀦𑁆𑀤𑁂𑀦 𑀯𑀺𑀲𑁆𑀲𑀝𑁆𑀞𑀯𑀚𑀺𑀭𑀲𑀤𑀺𑀲𑀸, 𑀢𑀲𑁆𑀲 𑀘 𑀆𑀡𑀸𑀬 𑀞𑀺𑀢𑀸 𑀲𑀁𑀲𑀸𑀭𑁂 𑀦 𑀤𑀺𑀲𑁆𑀲𑀦𑁆𑀢𑁂𑀯𑀸’’𑀢𑀺 𑀦𑀬𑀕𑁆𑀕𑀸𑀳𑁂𑀦 𑀅𑀦𑀼𑀫𑀸𑀦𑁂𑀦 𑀚𑀸𑀦𑀸𑀢𑀺. 𑀲𑀘𑁂 𑀢𑁆𑀯𑀁 𑀏𑀯𑀁 𑀅𑀦𑀼𑀩𑀼𑀤𑁆𑀥𑁄𑀢𑀺 𑀬𑀣𑀸 𑀢𑁆𑀯𑀁 𑀧𑀭𑁂𑀲𑀁 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀁 𑀯𑀤𑀢𑀺, 𑀏𑀯𑀁 𑀢𑁆𑀯𑀁 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀢𑁄 𑀲𑀬𑀫𑁆𑀪𑀼𑀜𑀸𑀡𑁂𑀦 𑀩𑀼𑀤𑁆𑀥𑁄 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑁄. 𑀢𑀁 𑀥𑀫𑁆𑀫𑀁 𑀫𑀸 𑀉𑀧𑀦𑀬𑀲𑀻𑀢𑀺 𑀢𑀬𑀸 𑀧𑀝𑀺𑀯𑀺𑀤𑁆𑀥𑀥𑀫𑁆𑀫𑀁 𑀫𑀸 𑀲𑀸𑀯𑀓𑀧𑀝𑀺𑀯𑁂𑀥𑀁 𑀧𑀸𑀧𑁂𑀲𑀺. 𑀇𑀤𑀦𑁆𑀢𑀺 𑀇𑀤𑀁 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀁 𑀩𑁆𑀭𑀳𑁆𑀫𑀮𑁄𑀓𑁂 𑀧𑀢𑀺𑀝𑁆𑀞𑀸𑀦𑀁𑀬𑁂𑀯 𑀲𑀦𑁆𑀥𑀸𑀬 𑀫𑀸𑀭𑁄 𑀯𑀤𑀢𑀺, 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀼𑀧𑁆𑀧𑀦𑁆𑀦𑁂 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀧𑀸𑀬𑀧𑀢𑀺𑀝𑁆𑀞𑀸𑀦𑀁 𑀧𑀦 𑀆𑀚𑀻𑀯𑀓𑀦𑀺𑀕𑀡𑁆𑀞𑀸𑀤𑀺𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑁂 𑀢𑀺𑀢𑁆𑀣𑀓𑀭𑁂, 𑀬𑁂 𑀓𑁂𑀘𑀺 𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁂 𑀚𑀦𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀦𑀼𑀧𑁆𑀧𑀦𑁆𑀦𑁂𑀢𑀺 𑀅𑀲𑀜𑁆𑀚𑀸𑀢𑁂, 𑀅𑀧𑁆𑀧𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀦𑀼𑀮𑁆𑀮𑀧𑀦𑀢𑀸𑀬𑀸𑀢𑀺 𑀬𑀣𑀸 𑀫𑀸𑀭𑁄 𑀉𑀧𑀭𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀁 𑀮𑀧𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀢𑀣𑀸 𑀉𑀢𑁆𑀢𑀭𑀪𑀸𑀲𑀦𑁂𑀦. 𑀦𑀺𑀫𑀦𑁆𑀢𑀦𑀯𑀘𑀦𑁂𑀦𑀸𑀢𑀺 𑀯𑀺𑀜𑁆𑀜𑀸𑀧𑀦𑀯𑀘𑀦𑁂𑀦. 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀦𑀺𑀫𑀦𑁆𑀢𑀦𑀁, 𑀩𑁆𑀭𑀳𑁆𑀫𑀼𑀦𑁄 𑀯𑀸 𑀦𑀺𑀫𑀦𑁆𑀢𑀦𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀺𑀓𑀁, 𑀲𑀼𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.