𑁫. 𑀘𑀽𑀴𑀬𑀫𑀓𑀯𑀕𑁆𑀕𑁄

𑁧. 𑀲𑀸𑀮𑁂𑀬𑁆𑀬𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩𑁯. 𑀫𑀳𑀸𑀚𑀦𑀓𑀸𑀬𑁂 𑀲𑀦𑁆𑀦𑀺𑀧𑀢𑀺𑀢𑁂𑀢𑀺 𑀓𑁂𑀘𑀺 ‘‘𑀧𑀳𑀁𑀲𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀭𑀸𑀚𑀓𑀼𑀫𑀸𑀭𑀁 𑀳𑀸𑀲𑁂𑀲𑁆𑀲𑀸𑀫𑀸’’𑀢𑀺, 𑀓𑁂𑀘𑀺 ‘‘𑀢𑀁 𑀓𑀻𑀴𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀫𑀳𑀸𑀚𑀦𑀲𑀫𑀽𑀳𑁂 𑀲𑀦𑁆𑀦𑀺𑀧𑀢𑀺𑀢𑁂. 𑀤𑁂𑀯𑀦𑀝𑀦𑁆𑀢𑀺 𑀤𑀺𑀩𑁆𑀩𑀕𑀦𑁆𑀥𑀩𑁆𑀩𑀁. 𑀓𑀼𑀲𑀮𑀁 𑀓𑀼𑀲𑀮𑀦𑁆𑀢𑀺 𑀯𑀘𑀦𑀁 𑀉𑀧𑀸𑀤𑀸𑀬𑀸𑀢𑀺 ‘‘𑀓𑀘𑁆𑀘𑀺 𑀓𑀼𑀲𑀮𑀁? 𑀆𑀫 𑀓𑀼𑀲𑀮’’𑀦𑁆𑀢𑀺 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦 𑀧𑀯𑀢𑁆𑀢𑀓𑀼𑀲𑀮𑀯𑀸𑀤𑀺𑀢𑀸𑀬 𑀢𑁂 𑀫𑀦𑀼𑀲𑁆𑀲𑀸 𑀆𑀤𑀺𑀢𑁄 𑀓𑀼𑀲𑀮𑀸𑀢𑀺 𑀲𑀫𑀜𑁆𑀜𑀁 𑀮𑀪𑀺𑀁𑀲𑀼. 𑀢𑁂𑀲𑀁 𑀓𑀼𑀲𑀮𑀸𑀦𑀁 𑀇𑀲𑁆𑀲𑀭𑀸𑀢𑀺 𑀭𑀸𑀚𑀓𑀼𑀫𑀸𑀭𑀸 𑀓𑁄𑀲𑀮𑀸. 𑀓𑁄𑀲𑀮𑁂 𑀚𑀸𑀢𑀸. 𑀢𑁂𑀲𑀁 𑀦𑀺𑀯𑀸𑀲𑁄𑀢𑀺 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀢𑁂𑀦𑀸𑀳 ‘‘𑀲𑁄 𑀧𑀤𑁂𑀲𑁄 𑀓𑁄𑀲𑀮𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀢𑀺 𑀲𑀸𑀫𑀜𑁆𑀜𑀯𑀘𑀦𑀫𑁆𑀧𑀺 ‘‘𑀫𑀳𑀢𑀸…𑀧𑁂… 𑀢𑀤𑀯𑀲𑀭𑀻’’𑀢𑀺 𑀯𑀘𑀦𑀢𑁄 𑀯𑀺𑀲𑁂𑀲𑀁 𑀦𑀺𑀯𑀺𑀝𑁆𑀞𑀫𑁂𑀯𑀸𑀢𑀺 𑀆𑀳 ‘‘𑀅𑀢𑀼𑀭𑀺𑀢𑀘𑀸𑀭𑀺𑀓𑀁 𑀘𑀭𑀫𑀸𑀦𑁄’’𑀢𑀺. 𑀫𑀳𑀢𑀸𑀢𑀺 𑀕𑀼𑀡𑀫𑀳𑀢𑁆𑀢𑁂𑀦𑀧𑀺 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦𑀧𑀺 𑀫𑀳𑀢𑀸. 𑀢𑀲𑁆𑀫𑀺𑀜𑁆𑀳𑀺 𑀪𑀺𑀓𑁆𑀔𑀼𑀲𑀫𑀽𑀳𑁂 𑀓𑁂𑀘𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯𑀲𑁂𑀦 𑀲𑀻𑀮𑀲𑀫𑁆𑀧𑀦𑁆𑀦𑀸, 𑀢𑀣𑀸 𑀓𑁂𑀘𑀺 𑀲𑀻𑀮𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀸, 𑀓𑁂𑀘𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀸𑀢𑀺 𑀕𑀼𑀡𑀫𑀳𑀢𑁆𑀢𑁂𑀦𑀧𑀺 𑀲𑁄 𑀪𑀺𑀓𑁆𑀔𑀼𑀲𑀫𑀽𑀳𑁄 𑀫𑀳𑀸𑀢𑀺. 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑀁 𑀯𑀸’’𑀢𑀺𑀆𑀤𑀺𑀫𑀸𑀳. 𑀅𑀜𑁆𑀜𑀕𑀸𑀫𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀸𑀯𑀲𑁂𑀦 𑀲𑀫𑁄𑀲𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑁄𑀲𑀭𑀡𑀁, 𑀕𑀸𑀫𑁄 𑀦𑀺𑀯𑀸𑀲𑀕𑀸𑀫𑁄. 𑀦𑁆𑀢𑀺 𑀲𑀸𑀮𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑀁. 𑀯𑀺𑀳𑀸𑀭𑁄𑀢𑀺 𑀪𑀕𑀯𑀢𑁄 𑀯𑀺𑀳𑀭𑀡𑀝𑁆𑀞𑀸𑀦𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀸𑀮𑁂𑀬𑁆𑀬𑀓𑀲𑀼𑀢𑁆𑀢𑁂. 𑀅𑀦𑀺𑀬𑀫𑀺𑀢𑁄𑀢𑀺 𑀅𑀲𑀼𑀓𑀲𑁆𑀫𑀺𑀁 𑀆𑀭𑀸𑀫𑁂 𑀧𑀩𑁆𑀩𑀢𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸𑀢𑀺 𑀦 𑀦𑀺𑀬𑀫𑀺𑀢𑁄, 𑀲𑀭𑀽𑀧𑀕𑁆𑀕𑀳𑀡𑀯𑀲𑁂𑀦 𑀦 𑀦𑀺𑀬𑀫𑀺𑀢𑁆𑀯𑀸 𑀯𑀼𑀢𑁆𑀢𑁄. 𑀢𑀲𑁆𑀫𑀸𑀢𑀺 𑀅𑀦𑀺𑀬𑀫𑀺𑀢𑀢𑁆𑀢𑀸. 𑀅𑀢𑁆𑀣𑀸𑀧𑀢𑁆𑀢𑀺𑀲𑀺𑀤𑁆𑀥𑀫𑀢𑁆𑀣𑀁 𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀦𑀲𑀡𑁆𑀟𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳, 𑀅𑀤𑁆𑀥𑀸 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀉𑀧𑀮𑀪𑀺𑀁𑀲𑀽𑀢𑀺 (𑀲𑀸𑀭𑀢𑁆𑀣. 𑀝𑀻. 𑁧.𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸; 𑀤𑀻. 𑀦𑀺. 𑀝𑀻. 𑁧.𑁨𑁫𑁫; 𑀅. 𑀦𑀺. 𑀝𑀻. 𑁨.𑁩.𑁬𑁪) 𑀲𑀯𑀦𑀯𑀲𑁂𑀦 𑀉𑀧𑀮𑀪𑀺𑀁𑀲𑀽𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀢𑀤𑁆𑀯𑀸𑀭…𑀧𑁂… 𑀚𑀸𑀦𑀺𑀁𑀲𑀽’’𑀢𑀺 𑀆𑀳. 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀲𑀩𑁆𑀩𑀫𑁆𑀧𑀺 𑀯𑀸𑀓𑁆𑀬𑀁 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀦𑁆𑀢𑀺 𑀆𑀳 ‘‘𑀧𑀤𑀧𑀽𑀭𑀡𑀫𑀢𑁆𑀢𑁂 𑀯𑀸 𑀦𑀺𑀧𑀸𑀢𑁄’’𑀢𑀺. 𑀅𑀯𑀥𑀸𑀭𑀡𑀢𑁆𑀣𑁂𑀢𑀺 𑀧𑀦 𑀇𑀫𑀺𑀦𑀸 𑀇𑀝𑁆𑀞𑀢𑁆𑀣𑀸𑀯𑀥𑀸𑀭𑀡𑀢𑁆𑀣𑀁 𑀔𑁄-𑀲𑀤𑁆𑀤𑀕𑁆𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀲𑁆𑀲𑁄𑀲𑀼’’𑀦𑁆𑀢𑀺 𑀧𑀤𑀁 𑀔𑁄-𑀲𑀤𑁆𑀤𑁂 𑀕𑀳𑀺𑀢𑁂 𑀢𑁂𑀦 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀯𑀺𑀪𑀽𑀲𑀺𑀢𑀁 𑀯𑀺𑀬 𑀳𑁄𑀦𑁆𑀢𑀁 𑀧𑀽𑀭𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑁂𑀦 𑀘 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑀸𑀦𑀺 𑀲𑀁𑀲𑀺𑀮𑀺𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀦 𑀢𑀲𑁆𑀫𑀺𑀁 𑀅𑀕𑁆𑀕𑀳𑀺𑀢𑁂𑀢𑀺 𑀆𑀳 ‘‘𑀧𑀤𑀧𑀽𑀭𑀡𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯𑀸’’𑀢𑀺. 𑀫𑀢𑁆𑀢-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄. 𑀢𑁂𑀦𑀲𑁆𑀲 𑀅𑀦𑀢𑁆𑀣𑀦𑁆𑀢𑀭𑀤𑀻𑀧𑀦𑀢𑀁 𑀤𑀲𑁆𑀲𑁂𑀢𑀺, 𑀏𑀯-𑀲𑀤𑁆𑀤𑁂𑀦 𑀧𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬 𑀏𑀓𑀦𑁆𑀢𑀺𑀓𑀢𑀁. 𑀲𑀸𑀮𑀸𑀬𑀁 𑀚𑀸𑀢𑀸 𑀲𑀁𑀯𑀟𑁆𑀠𑀓𑀸 𑀲𑀸𑀮𑁂𑀬𑁆𑀬𑀓𑀸 𑀬𑀣𑀸 ‘‘𑀓𑀢𑁆𑀢𑁂𑀬𑁆𑀬𑀓𑀸 𑀉𑀩𑁆𑀪𑁂𑀬𑁆𑀬𑀓𑀸’’𑀢𑀺.

𑀲𑀫𑀺𑀢𑀧𑀸𑀧𑀢𑁆𑀢𑀸𑀢𑀺 𑀅𑀘𑁆𑀘𑀦𑁆𑀢𑀁 𑀅𑀦𑀯𑀲𑁂𑀲𑀢𑁄 𑀲𑀯𑀸𑀲𑀦𑀁 𑀲𑀫𑀺𑀢𑀧𑀸𑀧𑀢𑁆𑀢𑀸. 𑀏𑀯𑀜𑁆𑀳𑀺 𑀩𑀸𑀳𑀺𑀭𑀓𑀯𑀻𑀢𑀭𑀸𑀕𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀸𑀧𑀲𑀫𑀦𑀢𑁄 𑀪𑀕𑀯𑀢𑁄 𑀧𑀸𑀧𑀲𑀫𑀦𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀦𑀺𑀧𑀸𑀢𑀸𑀦𑀁 𑀇𑀥 𑀅𑀦𑀼𑀲𑁆𑀲𑀯𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀔𑀮𑀽𑀢𑀺 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺. 𑀆𑀮𑀧𑀦𑀫𑀢𑁆𑀢𑀦𑁆𑀢𑀺 𑀧𑀺𑀬𑀸𑀮𑀸𑀧𑀯𑀘𑀦𑀁. 𑀧𑀺𑀬𑀲𑀫𑀼𑀤𑀸𑀳𑀸𑀭𑀸 𑀳𑁂𑀢𑁂 ‘‘𑀪𑁄’’𑀢𑀺 𑀯𑀸 ‘‘𑀆𑀯𑀼𑀲𑁄’’𑀢𑀺 𑀯𑀸 ‘‘𑀤𑁂𑀯𑀸𑀦𑀁𑀧𑀺𑀬𑀸’’𑀢𑀺 𑀯𑀸. 𑀕𑁄𑀢𑁆𑀢𑀯𑀲𑁂𑀦𑀸𑀢𑀺 𑀏𑀢𑁆𑀣 𑀢𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. 𑀕𑁄𑀢𑀫𑁄𑀢𑀺 𑀳𑀺 𑀧𑀯𑀢𑁆𑀢𑀫𑀸𑀦𑀁 𑀅𑀪𑀺𑀥𑀸𑀦𑀁 𑀩𑀼𑀤𑁆𑀥𑀺𑀜𑁆𑀘 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀕𑁄𑀢𑀫𑀕𑁄𑀢𑁆𑀢𑀁. 𑀬𑀣𑀸 𑀳𑀺 𑀩𑀼𑀤𑁆𑀥𑀺 𑀆𑀭𑀫𑁆𑀫𑀡𑀪𑀽𑀢𑁂𑀦 𑀅𑀢𑁆𑀣𑁂𑀦 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀏𑀯𑀁 𑀅𑀪𑀺𑀥𑀸𑀦𑀁 𑀅𑀪𑀺𑀥𑁂𑀬𑁆𑀬𑀪𑀽𑀢𑁂𑀦, 𑀢𑀲𑁆𑀫𑀸 𑀲𑁄 𑀢𑀸𑀦𑀺 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀧𑀦 𑀅𑀢𑁆𑀣𑀢𑁄 𑀅𑀜𑁆𑀜𑀓𑀼𑀮𑀧𑀭𑀫𑁆𑀧𑀭𑀸𑀲𑀸𑀥𑀸𑀭𑀡𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀆𑀤𑀺𑀧𑀼𑀭𑀺𑀲𑀲𑀫𑀼𑀤𑀸𑀕𑀢𑀁 𑀢𑀁𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀲𑀸𑀥𑀸𑀭𑀡𑀁 𑀲𑀸𑀫𑀜𑁆𑀜𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀁 𑀉𑀤𑀺𑀢𑁄𑀤𑀺𑀢𑀯𑀺𑀧𑀼𑀮𑀔𑀢𑁆𑀢𑀺𑀬𑀓𑀼𑀮𑀯𑀺𑀪𑀸𑀯𑀦𑀢𑁄. 𑀲𑀩𑁆𑀩𑀔𑀢𑁆𑀢𑀺𑀬𑀸𑀦𑀜𑁆𑀳𑀺 𑀆𑀤𑀺𑀪𑀽𑀢𑀫𑀳𑀸𑀲𑀫𑁆𑀫𑀢𑀫𑀳𑀸𑀭𑀸𑀚𑀢𑁄 𑀧𑀝𑁆𑀞𑀸𑀬 𑀅𑀲𑀫𑁆𑀪𑀺𑀦𑁆𑀦𑀁 𑀉𑀴𑀸𑀭𑀢𑀫𑀁 𑀲𑀓𑁆𑀬𑀭𑀸𑀚𑀓𑀼𑀮𑀁. 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦𑀸𑀢𑀺 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀸𑀤𑀺𑀦𑀸 𑀓𑁂𑀦𑀘𑀺𑀧𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀧𑀭𑀺𑀳𑀸𑀦𑀺𑀬𑀸 𑀅𑀦𑀪𑀺𑀪𑀽𑀢𑁄 𑀅𑀦𑀚𑁆𑀛𑁄𑀢𑁆𑀣𑀝𑁄. 𑀢𑀣𑀸 𑀳𑀺 𑀓𑀤𑀸𑀘𑀺𑀧𑀺 𑀢𑀲𑁆𑀲 𑀓𑀼𑀮𑀲𑁆𑀲 𑀢𑀸𑀤𑀺𑀲𑀧𑀸𑀭𑀺𑀚𑀼𑀜𑁆𑀜𑀸𑀪𑀸𑀯𑁄, 𑀅𑀪𑀺𑀦𑀺𑀓𑁆𑀔𑀫𑀦𑀓𑀸𑀮𑁂 𑀘 𑀢𑀢𑁄 𑀲𑀫𑀺𑀤𑁆𑀥𑀢𑀫𑀪𑀸𑀯𑁄 𑀮𑁄𑀓𑁂 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄𑀢𑀺. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀇𑀤𑀁 𑀯𑀘𑀦𑀁 𑀪𑀕𑀯𑀢𑁄 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀤𑀻𑀧𑀦𑀁 𑀯𑀼𑀢𑁆𑀢𑀁 𑀫𑀳𑀦𑁆𑀢𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀫𑀳𑀦𑁆𑀢𑀜𑁆𑀘 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀪𑀸𑀯𑀤𑀻𑀧𑀦𑀢𑁄. 𑀏𑀢𑁆𑀣 𑀘 𑀲𑀫𑀡𑁄𑀢𑀺 𑀇𑀫𑀺𑀦𑀸 𑀧𑀭𑀺𑀓𑁆𑀔𑀓𑀚𑀦𑁂𑀳𑀺 𑀪𑀕𑀯𑀢𑁄 𑀩𑀳𑀼𑀫𑀢𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀫𑀺𑀢𑀧𑀸𑀧𑀢𑀸𑀤𑀻𑀧𑀦𑀢𑁄, 𑀕𑁄𑀢𑀫𑁄𑀢𑀺 𑀇𑀫𑀺𑀦𑀸 𑀮𑁄𑀓𑀺𑀬𑀚𑀦𑁂𑀳𑀺 𑀉𑀴𑀸𑀭𑀢𑀫𑀓𑀼𑀮𑀻𑀦𑀢𑀸𑀤𑀻𑀧𑀦𑀢𑁄.

𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑁂, 𑀢𑀁𑀬𑁄𑀕𑀢𑁄 𑀧𑀦 ‘‘𑀪𑀯𑀦𑁆𑀢𑀁 𑀕𑁄𑀢𑀫’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁 𑀲𑀸𑀫𑀺𑀅𑀢𑁆𑀣𑁂𑀧𑀺 𑀲𑀫𑀸𑀦𑀁 𑀇𑀢𑁆𑀣𑀫𑁆𑀪𑀽𑀢𑀬𑁄𑀕𑀤𑀻𑀧𑀦𑀢𑁄 ‘‘𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀲𑁆𑀲 𑀔𑁄 𑀧𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺. 𑀓𑀮𑁆𑀬𑀸𑀡𑁄𑀢𑀺 𑀪𑀤𑁆𑀤𑀓𑁄. 𑀲𑀸 𑀘𑀲𑁆𑀲 𑀓𑀮𑁆𑀬𑀸𑀡𑀢𑀸 𑀉𑀴𑀸𑀭𑀯𑀺𑀲𑀬𑀢𑀸𑀬𑀸𑀢𑀺 𑀆𑀳 ‘‘𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀢𑀁𑀯𑀺𑀲𑀬𑀢𑀸 𑀳𑁂𑀢𑁆𑀣 𑀲𑀫𑀦𑁆𑀦𑀸𑀕𑀫𑁄. 𑀲𑁂𑀝𑁆𑀞𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄 𑀬𑀣𑀸 ‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞’’𑀦𑁆𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸; 𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁨; 𑀉𑀤𑀸. 𑀅𑀝𑁆𑀞. 𑁧; 𑀇𑀢𑀺𑀯𑀼. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦). ‘‘𑀪𑀕𑀯𑀸 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀕𑀼𑀡𑀸𑀦𑀁 𑀲𑀁𑀓𑀺𑀢𑁆𑀢𑀦𑀢𑁄 𑀲𑀁𑀲𑀤𑁆𑀤𑀦𑀢𑁄 𑀘 𑀓𑀺𑀢𑁆𑀢𑀺𑀲𑀤𑁆𑀤𑁄 𑀯𑀡𑁆𑀡𑁄𑀢𑀺 𑀆𑀳 ‘‘𑀓𑀺𑀢𑁆𑀢𑀺𑀬𑁂𑀯𑀸’’𑀢𑀺. 𑀓𑀺𑀢𑁆𑀢𑀺𑀧𑀭𑀺𑀬𑀸𑀬𑁄𑀧𑀺 𑀳𑀺 𑀲𑀤𑁆𑀤-𑀲𑀤𑁆𑀤𑁄 𑀬𑀣𑀸 𑀢𑀁 ‘‘𑀉𑀴𑀸𑀭𑀲𑀤𑁆𑀤𑀸 𑀇𑀲𑀬𑁄 𑀕𑀼𑀡𑀯𑀦𑁆𑀢𑁄 𑀢𑀧𑀲𑁆𑀲𑀺𑀦𑁄’’𑀢𑀺. 𑀣𑀼𑀢𑀺𑀖𑁄𑀲𑁄𑀢𑀺 𑀅𑀪𑀺𑀢𑁆𑀣𑀯𑀼𑀤𑀸𑀳𑀸𑀭𑁄. 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸𑀢𑀺 𑀧𑀝𑀺𑀧𑀓𑁆𑀔𑀸𑀪𑀸𑀯𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀘 𑀅𑀪𑀺𑀪𑀯𑀺𑀢𑁆𑀯𑀸.

𑀲𑁄 𑀪𑀕𑀯𑀸𑀢𑀺 𑀬𑁄 𑀲𑁄 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄 𑀲𑀓𑁆𑀓𑀸𑀦𑀁 𑀅𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸 𑀮𑁄𑀓𑀦𑀸𑀣𑁄 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸𑀢𑀺 𑀮𑀤𑁆𑀥𑀦𑀸𑀫𑁄, 𑀲𑁄 𑀪𑀕𑀯𑀸. ‘‘𑀪𑀕𑀯𑀸’’𑀢𑀺 𑀳𑀺 𑀇𑀤𑀁 𑀲𑀢𑁆𑀣𑀼 𑀦𑀸𑀫𑀓𑀺𑀢𑁆𑀢𑀦𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢’’𑀦𑁆𑀢𑀺𑀆𑀤𑀺 (𑀫𑀳𑀸𑀦𑀺. 𑁧𑁪𑁯, 𑁧𑁯𑁮, 𑁨𑁧𑁦; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨). 𑀧𑀭𑀢𑁄 𑀧𑀦 ‘‘𑀪𑀕𑀯𑀸’’𑀢𑀺 𑀕𑀼𑀡𑀓𑀺𑀢𑁆𑀢𑀦𑀫𑁂𑀯. 𑀏𑀯𑀁 ‘‘𑀅𑀭𑀳’’𑀦𑁆𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀬𑁂 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀢𑀺𑀯𑀺𑀬 𑀧𑀜𑁆𑀜𑀸𑀢𑀸 𑀩𑀼𑀤𑁆𑀥𑀕𑀼𑀡𑀸, 𑀢𑁂 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀪𑀸𑀯𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 𑀧𑀘𑁆𑀘𑁂𑀓𑀁 𑀇𑀢𑀺𑀧𑀺-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀇𑀢𑀺𑀧𑀺 𑀅𑀭𑀳𑀁, 𑀇𑀢𑀺𑀧𑀺 𑀲𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀇𑀢𑀺𑀧𑀺 𑀪𑀕𑀯𑀸’’𑀢𑀺. ‘‘𑀇𑀢𑀺𑀧𑁂𑀢𑀁 𑀪𑀽𑀢𑀁, 𑀇𑀢𑀺𑀧𑁂𑀢𑀁 𑀢𑀘𑁆𑀙’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁬) 𑀯𑀺𑀬 𑀳𑀺 𑀇𑀥 𑀇𑀢𑀺-𑀲𑀤𑁆𑀤𑁄 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀓𑀸𑀭𑀡𑀢𑁆𑀣𑁄, 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀢𑁂𑀦 𑀢𑁂𑀲𑀁 𑀕𑀼𑀡𑀸𑀦𑀁 𑀩𑀳𑀼𑀪𑀸𑀯𑀤𑀻𑀧𑀦𑀢𑁄. 𑀢𑀸𑀦𑀺 𑀕𑀼𑀡𑀲𑀮𑁆𑀮𑀓𑁆𑀔𑀡𑀓𑀸𑀭𑀡𑀸𑀦𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸𑀦𑀁 𑀯𑀺𑀜𑁆𑀜𑀼𑀚𑀸𑀢𑀺𑀓𑀸𑀦𑀁 𑀧𑀘𑁆𑀘𑀓𑁆𑀔𑀸𑀦𑀺 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺. 𑀢𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄. 𑀢𑁂𑀲𑀦𑁆𑀢𑀺 ‘‘𑀅𑀭𑀳’’𑀦𑁆𑀢𑀺𑀆𑀤𑀻𑀦𑀁. 𑀯𑀺𑀢𑁆𑀣𑀸𑀭𑁄 𑀅𑀢𑁆𑀣𑀦𑀺𑀤𑁆𑀤𑁂𑀲𑁄 𑀕𑀳𑁂𑀢𑀩𑁆𑀩𑁄. 𑀢𑀢𑁄 𑀏𑀯 𑀢𑀁𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁩𑁦) 𑀯𑀼𑀢𑁆𑀢𑁄 ‘‘𑀆𑀭𑀓𑀸𑀢𑀺 𑀅𑀭𑀳𑀁 𑀲𑀼𑀯𑀺𑀤𑀽𑀭𑀪𑀸𑀯𑀢𑁄, 𑀆𑀭𑀓𑀸𑀢𑀺 𑀅𑀭𑀳𑀁 𑀆𑀲𑀦𑁆𑀦𑀪𑀸𑀯𑀢𑁄, 𑀭𑀳𑀺𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄, 𑀲𑀬𑀜𑁆𑀘 𑀅𑀭𑀳𑀺𑀢𑀩𑁆𑀩𑀢𑁄, 𑀦𑀢𑁆𑀣𑀺 𑀏𑀢𑀲𑁆𑀲 𑀭𑀳𑁄𑀕𑀫𑀦𑀁 𑀕𑀢𑀻𑀲𑀼 𑀧𑀘𑁆𑀘𑀸𑀚𑀸𑀢𑀺, 𑀧𑀸𑀲𑀁𑀲𑀪𑀸𑀯𑀢𑁄 𑀯𑀸 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 ‘‘𑀅𑀭𑀳’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀪𑀯𑀦𑁆𑀢𑀺 𑀘𑁂𑀢𑁆𑀣 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁩𑁦; 𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸) 𑁋

‘‘𑀲𑀫𑁆𑀫𑀸 𑀦𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺, 𑀬𑁂 𑀦𑀺𑀳𑀻𑀦𑀸𑀲𑀬𑀸 𑀦𑀭𑀸;

𑀆𑀭𑀓𑀸 𑀢𑁂𑀳𑀺 𑀪𑀕𑀯𑀸, 𑀤𑀽𑀭𑁂 𑀢𑁂𑀦𑀸𑀭𑀳𑀁 𑀫𑀢𑁄.

𑀬𑁂 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀲𑀼𑀧𑁆𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀸;

𑀪𑀕𑀯𑀸 𑀢𑁂𑀳𑀺 𑀆𑀲𑀦𑁆𑀦𑁄, 𑀢𑁂𑀦𑀸𑀧𑀺 𑀅𑀭𑀳𑀁 𑀚𑀺𑀦𑁄.

𑀧𑀸𑀧𑀥𑀫𑁆𑀫𑀸 𑀭𑀳𑀸 𑀦𑀸𑀫, 𑀲𑀸𑀥𑀽𑀳𑀺 𑀭𑀳𑀺𑀢𑀩𑁆𑀩𑀢𑁄;

𑀢𑁂𑀲𑀁 𑀲𑀼𑀝𑁆𑀞𑀼 𑀧𑀳𑀻𑀦𑀢𑁆𑀢𑀸, 𑀪𑀕𑀯𑀸 𑀅𑀭𑀳𑀁 𑀫𑀢𑁄.

𑀬𑁂 𑀲𑀘𑁆𑀙𑀺𑀓𑀢𑀲𑀤𑁆𑀥𑀫𑁆𑀫𑀸, 𑀅𑀭𑀺𑀬𑀸 𑀲𑀼𑀤𑁆𑀥𑀕𑁄𑀘𑀭𑀸;

𑀦 𑀢𑁂𑀳𑀺 𑀭𑀳𑀺𑀢𑁄 𑀳𑁄𑀢𑀺, 𑀦𑀸𑀣𑁄 𑀢𑁂𑀦𑀸𑀭𑀳𑀁 𑀫𑀢𑁄.

𑀭𑀳𑁄 𑀯𑀸 𑀕𑀫𑀦𑀁 𑀬𑀲𑁆𑀲, 𑀲𑀁𑀲𑀸𑀭𑁂 𑀦𑀢𑁆𑀣𑀺 𑀲𑀩𑁆𑀩𑀲𑁄;

𑀧𑀳𑀻𑀦𑀚𑀸𑀢𑀺𑀫𑀭𑀡𑁄, 𑀅𑀭𑀳𑀁 𑀲𑀼𑀕𑀢𑁄 𑀫𑀢𑁄.

𑀕𑀼𑀡𑁂𑀳𑀺 𑀲𑀤𑀺𑀲𑁄 𑀦𑀢𑁆𑀣𑀺, 𑀬𑀲𑁆𑀫𑀸 𑀮𑁄𑀓𑁂 𑀲𑀤𑁂𑀯𑀓𑁂;

𑀢𑀲𑁆𑀫𑀸 𑀧𑀸𑀲𑀁𑀲𑀺𑀬𑀢𑁆𑀢𑀸𑀧𑀺, 𑀅𑀭𑀳𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

𑀆𑀭𑀓𑀸 𑀫𑀦𑁆𑀤𑀩𑀼𑀤𑁆𑀥𑀻𑀦𑀁, 𑀆𑀲𑀦𑁆𑀦𑀸 𑀘 𑀯𑀺𑀚𑀸𑀦𑀢𑀁;

𑀭𑀳𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑁆𑀢𑀸, 𑀯𑀺𑀤𑀽𑀦𑀫𑀭𑀳𑁂𑀬𑁆𑀬𑀢𑁄;

𑀪𑀯𑁂𑀲𑀼 𑀘 𑀭𑀳𑀸𑀪𑀸𑀯𑀸, 𑀧𑀸𑀲𑀁𑀲𑀸 𑀅𑀭𑀳𑀁 𑀚𑀺𑀦𑁄’’𑀢𑀺.

𑀲𑀼𑀦𑁆𑀤𑀭𑀦𑁆𑀢𑀺 𑀪𑀤𑁆𑀤𑀓𑀁. 𑀢𑀜𑁆𑀘 𑀧𑀲𑁆𑀲𑀦𑁆𑀢𑀲𑁆𑀲 𑀳𑀺𑀢𑀲𑀼𑀔𑀸𑀯𑀳𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳’’𑀦𑁆𑀢𑀺. 𑀢𑀢𑁆𑀣 𑀅𑀢𑁆𑀣𑀸𑀯𑀳𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀲𑀜𑁆𑀳𑀺𑀢𑀳𑀺𑀢𑀸𑀯𑀳𑀁. 𑀲𑀼𑀔𑀸𑀯𑀳𑀦𑁆𑀢𑀺 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀺𑀯𑀺𑀥𑀲𑀼𑀔𑀸𑀯𑀳𑀁. 𑀢𑀣𑀸𑀭𑀽𑀧𑀸𑀦𑀦𑁆𑀢𑀺 𑀢𑀸𑀤𑀺𑀲𑀸𑀦𑀁. 𑀬𑀸𑀤𑀺𑀲𑁂𑀳𑀺 𑀧𑀦 𑀕𑀼𑀡𑁂𑀳𑀺 𑀪𑀕𑀯𑀸 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀳𑀺 𑀘𑀢𑀼𑀧𑁆𑀧𑀫𑀸𑀡𑀺𑀓𑀲𑁆𑀲 𑀮𑁄𑀓𑀲𑁆𑀲 𑀲𑀩𑁆𑀩𑀣𑀸𑀧𑀺 𑀅𑀘𑁆𑀘𑀦𑁆𑀢𑀸𑀬 𑀧𑀲𑀸𑀤𑀦𑀻𑀬𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁂𑀓𑁂𑀳𑀺𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸𑀪𑀽𑀢…𑀧𑁂… 𑀅𑀭𑀳𑀢𑀦𑁆𑀢𑀺 𑀇𑀫𑀺𑀦𑀸 𑀥𑀫𑁆𑀫𑀧𑁆𑀧𑀫𑀸𑀡𑀸𑀦𑀁 𑀮𑀽𑀔𑀧𑁆𑀧𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀪𑀕𑀯𑀢𑁄 𑀧𑀲𑀸𑀤𑀸𑀯𑀳𑀢𑀫𑀸𑀳, 𑀇𑀢𑀭𑁂𑀦 𑀇𑀢𑀭𑁂𑀲𑀁. 𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺𑀲𑀸𑀥𑀼 𑀳𑁄𑀢𑀻𑀢𑀺 𑀏𑀢𑁆𑀣 𑀓𑁄𑀲𑀺𑀬𑀲𑀓𑀼𑀡𑀲𑁆𑀲 𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁. 𑀏𑀓𑀁 𑀧𑀤𑀫𑁆𑀧𑀺 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫, 𑀲𑀸𑀥𑀼𑀢𑀭𑀁𑀬𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 𑀫𑀡𑁆𑀟𑀽𑀓𑀤𑁂𑀯𑀧𑀼𑀢𑁆𑀢𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁.

𑀇𑀫𑀺𑀦𑀸 𑀦𑀬𑁂𑀦 𑀅𑀕𑀸𑀭𑀺𑀓𑀧𑀼𑀘𑁆𑀙𑀸 𑀆𑀕𑀢𑀸𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀅𑀕𑀸𑀭𑀺𑀓𑀸 𑀏𑀯𑀁 𑀧𑀼𑀘𑁆𑀙𑀦𑁆𑀢𑀺. 𑀅𑀦𑀕𑀸𑀭𑀺𑀓𑀧𑀼𑀘𑁆𑀙𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀦 𑀲𑀓𑁆𑀓𑁄𑀦𑁆𑀢𑀺…𑀧𑁂… 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄𑀢𑀺 𑀇𑀫𑀺𑀦𑀸 𑀲𑀢𑁆𑀣𑀼 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀦𑀺𑀕𑁆𑀕𑀡𑁆𑀳𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀺. 𑀢𑁂𑀲𑀜𑁆𑀳𑀺 𑀲𑀁𑀔𑀺𑀢𑁆𑀢𑀭𑀼𑀘𑀺𑀢𑀸𑀬 𑀲𑀗𑁆𑀔𑁂𑀧𑀤𑁂𑀲𑀦𑀸, 𑀢𑀸𑀬 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑀸 𑀯𑀺𑀢𑁆𑀣𑀸𑀭𑀤𑁂𑀲𑀦𑀁 𑀆𑀬𑀸𑀘𑀦𑁆𑀢𑀺, 𑀲𑀸 𑀘 𑀦𑁂𑀲𑀁 𑀲𑀁𑀔𑀺𑀢𑁆𑀢𑀭𑀼𑀘𑀺𑀢𑀸 𑀧𑀡𑁆𑀟𑀺𑀢𑀫𑀸𑀦𑀺𑀢𑀸𑀬, 𑀲𑁄 𑀘 𑀫𑀸𑀦𑁄 𑀬𑀣𑀸𑀤𑁂𑀲𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀚𑀸𑀦𑀦𑁆𑀢𑁂 𑀅𑀧𑁆𑀧𑀢𑀺𑀝𑁆𑀞𑁄 𑀳𑁄𑀢𑀺, 𑀇𑀢𑀺 𑀪𑀕𑀯𑀸 𑀢𑁂𑀲𑀁 𑀫𑀸𑀦𑀦𑀺𑀕𑁆𑀕𑀳𑀯𑀺𑀥𑀺𑀁 𑀘𑀺𑀦𑁆𑀢𑁂𑀢𑁆𑀯𑀸 𑀲𑀗𑁆𑀔𑁂𑀧𑁂𑀦𑁂𑀯 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀦 𑀲𑀩𑁆𑀩𑀲𑁄 𑀤𑁂𑀲𑀦𑀸𑀬 𑀅𑀲𑀮𑁆𑀮𑀓𑁆𑀔𑀡𑀢𑁆𑀣𑀁. 𑀢𑁂𑀦𑀸𑀳 ‘‘𑀧𑀡𑁆𑀟𑀺𑀢𑀫𑀸𑀦𑀺𑀓𑀸 𑀳𑀻’’𑀢𑀺𑀆𑀤𑀺. 𑀬𑀲𑁆𑀫𑀸 𑀫𑀁 𑀢𑀼𑀫𑁆𑀳𑁂 𑀬𑀸𑀘𑀣, 𑀲𑀁𑀔𑀺𑀢𑁆𑀢𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀦 𑀚𑀸𑀦𑀺𑀢𑁆𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁪𑁦. ‘‘𑀏𑀓𑀯𑀺𑀥𑁂𑀦 𑀜𑀸𑀡𑀯𑀢𑁆𑀣𑀼’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁫𑁧) 𑀯𑀺𑀬 𑀓𑁄𑀝𑁆𑀞𑀸𑀲𑀢𑁆𑀣𑁄 𑀯𑀺𑀥-𑀲𑀤𑁆𑀤𑁄, 𑀲𑁄 𑀘 𑀯𑀺𑀪𑀢𑁆𑀢𑀺𑀯𑀘𑀦𑀯𑀺𑀧𑀮𑁆𑀮𑀸𑀲𑀁 𑀓𑀢𑁆𑀯𑀸 𑀧𑀘𑁆𑀘𑀢𑁆𑀢𑁂 𑀓𑀭𑀡𑀯𑀘𑀦𑀯𑀲𑁂𑀦 ‘‘𑀢𑀺𑀯𑀺𑀥’’𑀦𑁆𑀢𑀺 𑀯𑀼𑀢𑁆𑀢𑁄. 𑀅𑀢𑁆𑀣𑁄 𑀧𑀦 𑀓𑀭𑀡𑀧𑀼𑀣𑀼𑀯𑀘𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑁄𑀢𑀺 𑀆𑀳 ‘‘𑀢𑀺𑀯𑀺𑀥𑀦𑁆𑀢𑀺 𑀢𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀻’’𑀢𑀺. 𑀧𑀓𑀸𑀭𑀢𑁆𑀣𑁄 𑀯𑀸 𑀯𑀺𑀥-𑀲𑀤𑁆𑀤𑁄, 𑀧𑀓𑀸𑀭𑀢𑁆𑀣𑀢𑁆𑀢𑀸𑀬𑁂𑀯 𑀮𑀩𑁆𑀪𑀫𑀸𑀦𑀁 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸𑀪𑀸𑀯𑀲𑀸𑀫𑀜𑁆𑀜𑀁, 𑀓𑀸𑀬𑀤𑁆𑀯𑀸𑀭𑀺𑀓𑀪𑀸𑀯𑀲𑀸𑀫𑀜𑁆𑀜𑀁 𑀯𑀸 𑀉𑀧𑀸𑀤𑀸𑀬 𑀏𑀓𑀢𑁆𑀢𑀁 𑀦𑁂𑀢𑁆𑀯𑀸 ‘‘𑀢𑀺𑀯𑀺𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀓𑀸𑀭𑀪𑁂𑀤𑁂 𑀧𑀦 𑀅𑀧𑁂𑀓𑁆𑀔𑀺𑀢𑁂 ‘‘𑀢𑀺𑀯𑀺𑀥𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀬𑁂𑀦𑀸𑀢𑀺 𑀏𑀢𑁆𑀣 𑀓𑀸𑀬𑁄𑀢𑀺 𑀘𑁄𑀧𑀦𑀓𑀸𑀬𑁄 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀅𑀥𑀫𑁆𑀫𑀘𑀭𑀺𑀬𑀸𑀬 𑀤𑁆𑀯𑀸𑀭𑀪𑀽𑀢𑁄 𑀢𑁂𑀦 𑀯𑀺𑀦𑀸 𑀢𑀲𑁆𑀲𑀸 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀓𑀸𑀬𑁂𑀦𑀸𑀢𑀺 𑀘 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁. 𑀓𑀺𑀜𑁆𑀘𑀸𑀧𑀺 𑀳𑀺 𑀅𑀥𑀫𑁆𑀫𑀘𑀭𑀺𑀬𑀸𑀲𑀗𑁆𑀔𑀸𑀢𑀘𑁂𑀢𑀦𑀸𑀲𑀫𑀼𑀝𑁆𑀞𑀸𑀦𑀸 𑀲𑀸 𑀯𑀺𑀜𑁆𑀜𑀢𑁆𑀢𑀺, 𑀦 𑀘 𑀲𑀸 𑀧𑀝𑁆𑀞𑀸𑀦𑁂 𑀆𑀕𑀢𑁂𑀲𑀼 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀏𑀓𑁂𑀦𑀧𑀺 𑀧𑀘𑁆𑀘𑀬𑁂𑀦 𑀘𑁂𑀢𑀦𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲𑀸 𑀧𑀦 𑀢𑀣𑀸𑀧𑀯𑀢𑁆𑀢𑀫𑀸𑀦𑀸𑀬 𑀓𑀸𑀬𑀓𑀫𑁆𑀫𑀲𑀜𑁆𑀜𑀺𑀢𑀸𑀬 𑀘𑁂𑀢𑀦𑀸𑀬 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀢𑁂𑀦 𑀤𑁆𑀯𑀸𑀭𑁂𑀦 𑀮𑀓𑁆𑀔𑀺𑀢𑀩𑁆𑀩𑀪𑀸𑀯𑀢𑁄 𑀢𑀲𑁆𑀲𑀸 𑀓𑀸𑀭𑀡𑀁 𑀯𑀺𑀬 𑀘 𑀲𑀩𑁆𑀩𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺. 𑀓𑀸𑀬𑀤𑁆𑀯𑀸𑀭𑁂𑀦𑀸𑀢𑀺 𑀯𑀸 𑀓𑀸𑀬𑁂𑀦 𑀤𑁆𑀯𑀸𑀭𑀪𑀽𑀢𑁂𑀦 𑀓𑀸𑀬𑀤𑁆𑀯𑀸𑀭𑀪𑀽𑀢𑁂𑀦𑀸𑀢𑀺 𑀢𑀁 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀅𑀥𑀫𑁆𑀫𑀁 𑀘𑀭𑀢𑀺 𑀏𑀢𑀸𑀬𑀸𑀢𑀺 𑀅𑀥𑀫𑁆𑀫𑀘𑀭𑀺𑀬𑀸, 𑀢𑀣𑀸𑀧𑀯𑀢𑁆𑀢𑀸 𑀘𑁂𑀢𑀦𑀸. 𑀅𑀥𑀫𑁆𑀫𑁄𑀢𑀺 𑀧𑀦 𑀢𑀁𑀲𑀫𑀼𑀝𑁆𑀞𑀸𑀦𑁄 𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑀢𑁄 𑀅𑀦𑀧𑁂𑀢𑀸𑀢𑀺 𑀥𑀫𑁆𑀫𑀸, 𑀦 𑀥𑀫𑁆𑀫𑀸𑀢𑀺 𑀅𑀥𑀫𑁆𑀫𑀸, 𑀅𑀥𑀫𑁆𑀫𑀸 𑀘 𑀲𑀸 𑀘𑀭𑀺𑀬𑀸 𑀘𑀸𑀢𑀺 𑀅𑀥𑀫𑁆𑀫𑀘𑀭𑀺𑀬𑀸. 𑀧𑀘𑁆𑀘𑀦𑀻𑀓𑀲𑀫𑀦𑀝𑁆𑀞𑁂𑀦 𑀲𑀫𑀁, 𑀲𑀫𑀸𑀦𑀁 𑀲𑀤𑀺𑀲𑀁 𑀬𑀼𑀢𑁆𑀢𑀦𑁆𑀢𑀺 𑀯𑀸 𑀲𑀫𑀁, 𑀲𑀼𑀘𑀭𑀺𑀢𑀁. 𑀲𑀫𑀢𑁄 𑀯𑀺𑀕𑀢𑀁, 𑀯𑀺𑀭𑀼𑀤𑁆𑀥𑀁 𑀯𑀸 𑀢𑀲𑁆𑀲𑀸𑀢𑀺 𑀯𑀺𑀲𑀫𑀁, 𑀤𑀼𑀘𑁆𑀘𑀭𑀺𑀢𑀁. 𑀲𑀸 𑀏𑀯 𑀯𑀺𑀲𑀫𑀸 𑀘𑀭𑀺𑀬𑀸𑀢𑀺 𑀯𑀺𑀲𑀫𑀘𑀭𑀺𑀬𑀸. 𑀲𑀩𑁆𑀩𑁂𑀲𑀼 𑀓𑀡𑁆𑀳𑀲𑀼𑀓𑁆𑀓𑀧𑀤𑁂𑀲𑀽𑀢𑀺 ‘‘𑀘𑀢𑀼𑀩𑁆𑀩𑀺𑀥𑀁 𑀯𑀸𑀘𑀸𑀬 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀯𑀲𑁂𑀦 𑀆𑀕𑀢𑁂𑀲𑀼 𑀲𑀩𑁆𑀩𑁂𑀲𑀼 𑀓𑀡𑁆𑀳𑀧𑀤𑁂𑀲𑀼 𑁋 ‘‘𑀢𑀺𑀯𑀺𑀥𑀁 𑀔𑁄 𑀕𑀳𑀧𑀢𑀬𑁄 𑀓𑀸𑀬𑁂𑀦 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀯𑀲𑁂𑀦 𑀆𑀕𑀢𑁂𑀲𑀼 𑀲𑀩𑁆𑀩𑁂𑀲𑀼 𑀲𑀼𑀓𑁆𑀓𑀧𑀤𑁂𑀲𑀼 𑀘.

𑀭𑁄𑀤𑁂𑀢𑀺 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀢𑀸𑀬 𑀧𑀭𑀧𑀝𑀺𑀩𑀤𑁆𑀥𑁂 𑀲𑀢𑁆𑀢𑁂 𑀅𑀲𑁆𑀲𑀽𑀦𑀺 𑀫𑁄𑀘𑁂𑀢𑀻𑀢𑀺 𑀭𑀼𑀤𑁆𑀤𑁄, 𑀲𑁄 𑀏𑀯 𑀮𑀼𑀤𑁆𑀤𑁄 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸. 𑀓𑀓𑁆𑀔𑀴𑁄𑀢𑀺 𑀮𑀼𑀤𑁆𑀤𑁄. 𑀤𑀸𑀭𑀼𑀡𑁄𑀢𑀺 𑀨𑀭𑀼𑀲𑁄. 𑀲𑀸𑀳𑀲𑀺𑀓𑁄𑀢𑀺 𑀲𑀸𑀳𑀲𑁆𑀲𑀓𑀸𑀭𑀻. 𑀲𑀘𑁂𑀧𑀺 𑀦 𑀮𑀺𑀧𑁆𑀧𑀦𑁆𑀢𑀺. 𑀢𑀣𑀸𑀯𑀺𑀥𑁄 𑀧𑀭𑁂𑀲𑀁 𑀖𑀸𑀢𑀦𑀲𑀻𑀮𑁄 𑀮𑁄𑀳𑀺𑀢𑀧𑀸𑀡𑀻𑀢𑁆𑀯𑁂𑀯 𑀯𑀼𑀘𑁆𑀘𑀢𑀺 𑀬𑀣𑀸 𑀤𑀸𑀦𑀲𑀻𑀮𑁄 𑀧𑀭𑁂𑀲𑀁 𑀤𑀸𑀦𑀢𑁆𑀣𑀁 𑀅𑀥𑁄𑀢𑀳𑀢𑁆𑀣𑁄𑀧𑀺 ‘‘𑀧𑀬𑀢𑀧𑀸𑀡𑀻’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀧𑀳𑀭𑀡𑀁 𑀧𑀳𑀸𑀭𑀤𑀸𑀦𑀫𑀢𑁆𑀢𑀁 𑀳𑀢𑀁, 𑀧𑀯𑀼𑀤𑁆𑀥𑀁 𑀧𑀳𑀭𑀡𑀁 𑀧𑀭𑀲𑁆𑀲 𑀫𑀸𑀭𑀡𑀁 𑀧𑀳𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀯𑀺𑀝𑁆𑀞𑁄𑀢𑀺 𑀅𑀪𑀺𑀦𑀺𑀯𑀺𑀝𑁆𑀞𑁄 𑀧𑀲𑀼𑀢𑁄.

𑀬𑀲𑁆𑀲 𑀯𑀲𑁂𑀦 ‘‘𑀧𑀭𑀲𑁆𑀲𑀸’’𑀢𑀺 𑀲𑀸𑀫𑀺𑀦𑀺𑀤𑁆𑀤𑁂𑀲𑁄, 𑀢𑀁 𑀲𑀸𑀧𑀢𑁂𑀬𑁆𑀬𑀁. 𑀬𑀜𑁆𑀳𑀺 𑀲𑀸𑀫𑀜𑁆𑀜𑀢𑁄 𑀕𑀳𑀺𑀢𑀁, 𑀢𑀁 𑀢𑁂𑀦𑁂𑀯 𑀲𑀸𑀫𑀺𑀦𑀺𑀤𑁆𑀤𑁂𑀲𑁂𑀦 𑀧𑀓𑀸𑀲𑀺𑀢𑀦𑁆𑀢𑀺 𑀆𑀳 ‘‘𑀧𑀭𑀲𑁆𑀲 𑀲𑀦𑁆𑀢𑀓’’𑀦𑁆𑀢𑀺. 𑀧𑀭𑀲𑁆𑀲𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀦𑁆𑀢𑀺 𑀯𑀸 𑀏𑀓𑀫𑁂𑀯𑁂𑀢𑀁 𑀲𑀫𑀸𑀲𑀧𑀤𑀁, 𑀬𑀁 𑀓𑀺𑀜𑁆𑀘𑀺 𑀧𑀭𑀲𑀦𑁆𑀢𑀓𑀁 𑀯𑀺𑀲𑁂𑀲𑀢𑁄 𑀧𑀭𑀲𑁆𑀲 𑀯𑀺𑀢𑁆𑀢𑀽𑀧𑀓𑀭𑀡𑀁 𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀳𑀺 𑀧𑀭𑁂𑀳𑀻𑀢𑀺 𑀬𑁂𑀲𑀁 𑀲𑀦𑁆𑀢𑀓𑀁, 𑀢𑁂𑀳𑀺. 𑀬𑀲𑁆𑀲 𑀯𑀲𑁂𑀦 𑀧𑀼𑀭𑀺𑀲𑁄 ‘‘𑀣𑁂𑀦𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀣𑁂𑀬𑁆𑀬𑀦𑁆𑀢𑀺 𑀆𑀳 ‘‘𑀅𑀯𑀳𑀭𑀡𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀣𑁂𑀬𑁆𑀬𑀲𑀗𑁆𑀔𑀸𑀢𑁂𑀦, 𑀦 𑀯𑀺𑀲𑁆𑀲𑀸𑀲𑀢𑀸𑀯𑀓𑀸𑀮𑀺𑀓𑀸𑀤𑀺𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀫𑀢𑁂 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁄. 𑀢𑁂𑀦 𑀧𑀩𑁆𑀩𑀚𑀺𑀢𑀸𑀤𑀺𑀪𑀸𑀯𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 𑀬𑀁 𑀫𑀸𑀢𑀭𑀺 𑀫𑀢𑀸𑀬, 𑀦𑀝𑁆𑀞𑀸𑀬 𑀯𑀸 𑀧𑀺𑀢𑀸 𑀭𑀓𑁆𑀔𑀢𑀺, 𑀲𑀸 𑀧𑀺𑀢𑀼𑀭𑀓𑁆𑀔𑀺𑀢𑀸. 𑀬𑀁 𑀉𑀪𑁄𑀲𑀼 𑀅𑀲𑀦𑁆𑀢𑁂𑀲𑀼 𑀪𑀸𑀢𑀸 𑀭𑀓𑁆𑀔𑀢𑀺, 𑀲𑀸 𑀪𑀸𑀢𑀼𑀭𑀓𑁆𑀔𑀺𑀢𑀸𑀢𑀺 𑀏𑀯𑀫𑀸𑀤𑀺𑀁 𑀲𑀦𑁆𑀥𑀸𑀬𑀸𑀳. 𑀲𑀪𑀸𑀕𑀓𑀼𑀮𑀸𑀦𑀻𑀢𑀺 𑀆𑀯𑀸𑀳𑀓𑀺𑀭𑀺𑀬𑀸𑀬 𑀲𑀪𑀸𑀕𑀸𑀦𑀺 𑀓𑀼𑀮𑀸𑀦𑀺. 𑀤𑀲𑁆𑀲𑀼𑀓𑀯𑀺𑀥𑀺𑀁 𑀯𑀸 𑀉𑀤𑁆𑀤𑀺𑀲𑁆𑀲 𑀞𑀧𑀺𑀢𑀤𑀡𑁆𑀟𑀸𑀭𑀸𑀚𑀸𑀤𑀻𑀳𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑁂 (𑀫. 𑀦𑀺. 𑀅𑀝𑁆𑀞. 𑁧.𑁮𑁯) ‘‘𑀅𑀲𑀤𑁆𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀫𑀺𑀘𑁆𑀙𑀸𑀘𑀸𑀭𑀮𑀓𑁆𑀔𑀡𑀯𑀲𑁂𑀦.

𑀳𑀢𑁆𑀣𑀧𑀸𑀤𑀸𑀤𑀺𑀳𑁂𑀢𑀽𑀢𑀺 𑀳𑀢𑁆𑀣𑀧𑀸𑀤𑀸𑀤𑀺𑀪𑁂𑀤𑀦𑀳𑁂𑀢𑀼. 𑀥𑀦𑀳𑁂𑀢𑀽𑀢𑀺 𑀥𑀦𑀲𑁆𑀲 𑀮𑀸𑀪𑀳𑁂𑀢𑀼 𑀚𑀸𑀦𑀺𑀳𑁂𑀢𑀼 𑀘. 𑀮𑀸𑀪𑁄𑀢𑀺 𑀖𑀸𑀲𑀘𑁆𑀙𑀸𑀤𑀦𑀸𑀦𑀺 𑀮𑀩𑁆𑀪𑀢𑀻𑀢𑀺 𑀮𑀸𑀪𑁄. 𑀓𑀺𑀜𑁆𑀘𑀺𑀓𑁆𑀔𑀦𑁆𑀢𑀺 𑀓𑀺𑀜𑁆𑀘𑀺𑀫𑀢𑁆𑀢𑀓𑀁 𑀆𑀫𑀺𑀲𑀚𑀸𑀢𑀁. 𑀢𑁂𑀦𑀸𑀳 ‘‘𑀬𑀁 𑀯𑀸’’𑀢𑀺𑀆𑀤𑀺. 𑀚𑀸𑀦𑀦𑁆𑀢𑁄𑀬𑁂𑀯𑀸𑀢𑀺 𑀫𑀼𑀲𑀸𑀪𑀸𑀯𑀁 𑀢𑀲𑁆𑀲 𑀯𑀢𑁆𑀣𑀼𑀦𑁄 𑀅𑀢𑁆𑀣𑀺, 𑀢𑀁 𑀚𑀸𑀦𑀦𑁆𑀢𑁄 𑀏𑀯.

𑀅𑀡𑁆𑀟𑀓𑀸𑀢𑀺 𑀯𑀼𑀘𑁆𑀘𑀢𑀺 𑀭𑀼𑀓𑁆𑀔𑁂 𑀅𑀡𑁆𑀟𑀲𑀤𑀺𑀲𑀸 𑀕𑀡𑁆𑀞𑀺𑀬𑁄. 𑀬𑀣𑀸 𑀣𑀤𑁆𑀥𑀸 𑀯𑀺𑀲𑀫𑀸 𑀤𑀼𑀩𑁆𑀩𑀺𑀦𑀻𑀢𑀸 𑀘 𑀳𑁄𑀦𑁆𑀢𑀺, 𑀏𑀯𑀫𑁂𑀯𑀁 𑀔𑀼𑀁𑀲𑀦𑀯𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀯𑀸𑀘𑀸𑀧𑀺 𑀳𑀺 ‘‘𑀅𑀡𑁆𑀟𑀓𑀸’’𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀬𑀣𑀸 𑀲𑀤𑁄𑀲𑁂 𑀭𑀼𑀓𑁆𑀔𑁂’’𑀢𑀺𑀆𑀤𑀺. 𑀓𑀓𑁆𑀓𑀲𑀸𑀢𑀺 𑀨𑀭𑀼𑀲𑀸 𑀏𑀯, 𑀲𑁄 𑀧𑀦𑀲𑁆𑀲𑀸 𑀓𑀓𑁆𑀓𑀲𑀪𑀸𑀯𑁄 𑀩𑁆𑀬𑀸𑀧𑀸𑀤𑀦𑀺𑀫𑀺𑀢𑁆𑀢𑀢𑀸𑀬 𑀢𑀢𑁄 𑀧𑀽𑀢𑀺𑀓𑀸𑀢𑀺. 𑀢𑁂𑀦𑀸𑀳 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺. 𑀓𑀝𑀼𑀓𑀸𑀢𑀺 𑀅𑀦𑀺𑀝𑁆𑀞𑀸. 𑀅𑀫𑀦𑀸𑀧𑀸𑀢𑀺 𑀦 𑀫𑀦𑀯𑀟𑁆𑀠𑀦𑀻, 𑀢𑀢𑁄 𑀏𑀯 𑀤𑁄𑀲𑀚𑀦𑀦𑀻, 𑀘𑀺𑀢𑁆𑀢𑀲𑀦𑁆𑀤𑁄𑀲𑀼𑀧𑁆𑀧𑀢𑁆𑀢𑀺𑀓𑀸𑀭𑀺𑀓𑀸. 𑀫𑀫𑁆𑀫𑁂𑀲𑀽𑀢𑀺 𑀖𑀝𑁆𑀝𑀦𑁂𑀦 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀢𑁄 𑀫𑀫𑁆𑀫𑀲𑀤𑀺𑀲𑁂𑀲𑀼 𑀚𑀸𑀢𑀺𑀆𑀤𑀻𑀲𑀼. 𑀮𑀕𑁆𑀕𑀦𑀓𑀸𑀭𑀻𑀢𑀺 𑀏𑀯𑀁 𑀯𑀤𑀦𑁆𑀢𑀲𑁆𑀲 𑀏𑀯𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑀸𑀥𑀺𑀧𑁆𑀧𑀸𑀬𑁂𑀦 𑀮𑀕𑁆𑀕𑀦𑀓𑀸𑀭𑀻, 𑀦 𑀩𑁆𑀬𑀜𑁆𑀚𑀦𑀯𑀲𑁂𑀦. 𑀓𑁄𑀥𑀲𑁆𑀲 𑀆𑀲𑀦𑁆𑀦𑀸 𑀢𑀲𑁆𑀲 𑀓𑀸𑀭𑀡𑀪𑀸𑀯𑀢𑁄. 𑀲𑀤𑁄𑀲𑀯𑀸𑀘𑀸𑀬𑀸𑀢𑀺 𑀅𑀢𑁆𑀢𑀦𑁄 𑀲𑀫𑀼𑀝𑁆𑀞𑀸𑀧𑀓𑀤𑁄𑀲𑀲𑁆𑀲 𑀯𑀲𑁂𑀦 𑀲𑀤𑁄𑀲𑀯𑀸𑀘𑀸𑀬 𑀯𑁂𑀯𑀘𑀦𑀸𑀦𑀺.

𑀅𑀓𑀸𑀮𑁂𑀦𑀸𑀢𑀺 𑀅𑀬𑀼𑀢𑁆𑀢𑀓𑀸𑀮𑁂𑀦. 𑀅𑀓𑀸𑀭𑀡𑀦𑀺𑀲𑁆𑀲𑀺𑀢𑀦𑁆𑀢𑀺 𑀦𑀺𑀧𑁆𑀨𑀮𑀁. 𑀨𑀮𑀜𑁆𑀳𑀺 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀦𑀸𑀫 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀅𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀦𑀺𑀧𑁆𑀨𑀮𑀁, 𑀲𑀫𑁆𑀨𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀪𑀸𑀯𑀯𑀢𑁆𑀢𑀸𑀢𑀺 𑀅𑀬𑀸𑀣𑀸𑀯𑀯𑀸𑀤𑀻. 𑀅𑀲𑀁𑀯𑀭𑀯𑀺𑀦𑀬𑀧𑀝𑀺𑀲𑀁𑀬𑀼𑀢𑁆𑀢𑀲𑁆𑀲𑀸𑀢𑀺 𑀲𑀁𑀯𑀭𑀯𑀺𑀦𑀬𑀭𑀳𑀺𑀢𑀲𑁆𑀲, 𑀅𑀢𑁆𑀢𑀦𑁄 𑀲𑀼𑀡𑀦𑁆𑀢𑀲𑁆𑀲 𑀘 𑀦 𑀲𑀁𑀯𑀭𑀯𑀺𑀦𑀬𑀸𑀯𑀳𑀲𑁆𑀲 𑀯𑀢𑁆𑀢𑀸. 𑀳𑀤𑀬𑀫𑀜𑁆𑀚𑀽𑀲𑀸𑀬𑀁 𑀦𑀺𑀥𑁂𑀢𑀼𑀦𑁆𑀢𑀺 𑀅𑀳𑀺𑀢𑀲𑀁𑀳𑀺𑀢𑀢𑁆𑀢𑀸 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀯𑀺𑀲𑁂𑀢𑁆𑀯𑀸 𑀦𑀺𑀥𑁂𑀢𑀼𑀁. 𑀅𑀬𑀼𑀢𑁆𑀢𑀓𑀸𑀮𑁂𑀢𑀺 𑀥𑀫𑁆𑀫𑀁 𑀓𑀣𑁂𑀦𑁆𑀢𑁂𑀦 𑀬𑁄 𑀅𑀢𑁆𑀣𑁄 𑀬𑀲𑁆𑀫𑀺𑀁 𑀓𑀸𑀮𑁂 𑀯𑀢𑁆𑀢𑀩𑁆𑀩𑁄, 𑀢𑀢𑁄 𑀧𑀼𑀩𑁆𑀩𑁂 𑀧𑀘𑁆𑀙𑀸 𑀢𑀲𑁆𑀲 𑀅𑀓𑀸𑀮𑁄, 𑀢𑀲𑁆𑀫𑀺𑀁 𑀅𑀬𑀼𑀢𑁆𑀢𑀓𑀸𑀮𑁂 𑀯𑀢𑁆𑀢𑀸 𑀳𑁄𑀢𑀺. 𑀅𑀦𑀧𑀤𑁂𑀲𑀦𑁆𑀢𑀺 𑀪𑀕𑀯𑀢𑀸 𑀅𑀲𑀼𑀓𑀲𑀼𑀢𑁆𑀢𑁂 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀲𑀼𑀢𑁆𑀢𑀸𑀧𑀤𑁂𑀲𑀯𑀺𑀭𑀳𑀺𑀢𑀁. 𑀅𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀭𑀳𑀺𑀢𑀁. 𑀬𑀣𑀸 𑀧𑀦 𑀯𑀸𑀘𑀸 𑀧𑀭𑀺𑀘𑁆𑀙𑁂𑀤𑀭𑀳𑀺𑀢𑀸 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀢𑁆𑀢𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀮𑀩𑁆𑀪𑀦𑁆𑀢𑀺 𑀅𑀦𑀼𑀬𑁄𑀕𑀁. 𑀩𑀸𑀳𑀺𑀭𑀓𑀣𑀁𑀬𑁂𑀯𑀸𑀢𑀺 𑀬𑀁 𑀲𑀼𑀢𑁆𑀢𑀁, 𑀚𑀸𑀢𑀓𑀁 𑀯𑀸 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲 𑀲𑀭𑀻𑀭𑀪𑀽𑀢𑀁 𑀓𑀣𑀁 𑀅𑀦𑀸𑀫𑀲𑀺𑀢𑁆𑀯𑀸 𑀢𑀢𑁄 𑀩𑀳𑀺𑀪𑀽𑀢𑀁𑀬𑁂𑀯 𑀓𑀣𑀁. 𑀲𑀫𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀯𑀺𑀭𑀼𑀴𑁆𑀳𑀁 𑀆𑀧𑀚𑁆𑀚𑀺𑀢𑁆𑀯𑀸. 𑀧𑀯𑁂𑀡𑀺𑀚𑀸𑀢𑀓𑀸𑀯𑀸𑀢𑀺 𑀅𑀦𑀼𑀚𑀸𑀢𑀧𑀸𑀭𑁄𑀳𑀫𑀽𑀮𑀸𑀦𑀺𑀬𑁂𑀯 𑀢𑀺𑀝𑁆𑀞𑀦𑁆𑀢𑀺. 𑀆𑀳𑀭𑀺𑀢𑁆𑀯𑀸𑀢𑀺 𑀦𑀺𑀓𑁆𑀔𑀺𑀢𑁆𑀢𑀲𑀼𑀢𑁆𑀢𑀢𑁄 𑀅𑀜𑁆𑀜𑀫𑁆𑀧𑀺 𑀅𑀦𑀼𑀬𑁄𑀕𑀉𑀧𑀫𑀸𑀯𑀢𑁆𑀣𑀼𑀯𑀲𑁂𑀦 𑀢𑀤𑀦𑀼𑀧𑀬𑁄𑀕𑀺𑀦𑀁 𑀆𑀳𑀭𑀺𑀢𑁆𑀯𑀸. 𑀚𑀸𑀦𑀸𑀧𑁂𑀢𑀼𑀦𑁆𑀢𑀺 𑀏𑀢𑀤𑀢𑁆𑀣𑀫𑀺𑀤𑀁 𑀯𑀼𑀢𑁆𑀢𑀦𑁆𑀢𑀺 𑀚𑀸𑀦𑀸𑀧𑁂𑀢𑀼𑀁 𑀬𑁄 𑀲𑀓𑁆𑀓𑁄𑀢𑀺. 𑀢𑀲𑁆𑀲 𑀓𑀣𑁂𑀢𑀼𑀦𑁆𑀢𑀺 𑀢𑀲𑁆𑀲 𑀢𑀣𑀸𑀭𑀽𑀧𑀲𑁆𑀲 𑀥𑀫𑁆𑀫𑀓𑀣𑀺𑀓𑀲𑁆𑀲 𑀩𑀳𑀼𑀫𑁆𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀦 𑀅𑀢𑁆𑀣𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀦 𑀳𑀺𑀢𑀸𑀯𑀳𑀁.

𑀅𑀪𑀺𑀚𑁆𑀛𑀸𑀬𑀦𑀁 𑀬𑁂𑀪𑀼𑀬𑁆𑀬𑁂𑀦 𑀧𑀭𑀲𑀦𑁆𑀢𑀓𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀳𑁄𑀢𑀻𑀢𑀺 ‘‘𑀅𑀪𑀺𑀚𑁆𑀛𑀸𑀬 𑀑𑀮𑁄𑀓𑁂𑀢𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀚𑁆𑀛𑀸𑀬𑀦𑁆𑀢𑁄 𑀯𑀸 𑀅𑀪𑀺𑀚𑁆𑀛𑀸𑀬𑀺𑀢𑀁 𑀯𑀢𑁆𑀣𑀼𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀫𑁆𑀧𑀺 𑀧𑀘𑁆𑀘𑀓𑁆𑀔𑀢𑁄 𑀧𑀲𑁆𑀲𑀦𑁆𑀢𑁄 𑀯𑀺𑀬 𑀅𑀪𑀺𑀚𑁆𑀛𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀪𑀺𑀚𑁆𑀛𑀸𑀬 𑀑𑀮𑁄𑀓𑁂𑀢𑀸 𑀳𑁄𑀢𑀻’’𑀢𑀺. 𑀓𑀫𑁆𑀫𑀧𑀣𑀪𑁂𑀤𑁄 𑀦 𑀳𑁄𑀢𑀺, 𑀓𑁂𑀯𑀮𑀁 𑀮𑁄𑀪𑀫𑀢𑁆𑀢𑁄𑀯 𑀳𑁄𑀢𑀺 𑀧𑀭𑀺𑀡𑀸𑀫𑀦𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀢𑁆𑀢𑀸. 𑀬𑀣𑀸 𑀧𑀦 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀡𑀸𑀫𑁂𑀢𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑁂𑀦 𑀧𑀭𑀺𑀕𑁆𑀕𑀬𑁆𑀳 𑀦𑀸𑀫𑁂𑀢𑀺.

𑀯𑀺𑀧𑀦𑁆𑀦𑀘𑀺𑀢𑁆𑀢𑁄𑀢𑀺 𑀩𑁆𑀬𑀸𑀧𑀸𑀤𑁂𑀦 𑀯𑀺𑀧𑀢𑁆𑀢𑀺𑀁 𑀆𑀧𑀸𑀤𑀺𑀢𑀘𑀺𑀢𑁆𑀢𑁄. 𑀢𑁂𑀦𑀸𑀳 ‘‘𑀧𑀽𑀢𑀺𑀪𑀽𑀢𑀘𑀺𑀢𑁆𑀢𑁄’’𑀢𑀺. 𑀩𑁆𑀬𑀸𑀧𑀸𑀤𑁄 𑀳𑀺 𑀯𑀺𑀲𑀁 𑀯𑀺𑀬 𑀮𑁄𑀳𑀺𑀢𑀲𑁆𑀲 𑀘𑀺𑀢𑁆𑀢𑀁 𑀧𑀽𑀢𑀺𑀪𑀸𑀯𑀁 𑀚𑀦𑁂𑀢𑀺. 𑀤𑁄𑀲𑁂𑀦 𑀤𑀼𑀝𑁆𑀞𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄𑀢𑀺 𑀯𑀺𑀲𑁂𑀦 𑀯𑀺𑀬 𑀲𑀧𑁆𑀧𑀺𑀆𑀤𑀺𑀓𑁄𑀧𑁂𑀦 𑀤𑀽𑀲𑀺𑀢𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄. 𑀖𑀸𑀢𑀻𑀬𑀦𑁆𑀢𑀽𑀢𑀺 𑀳𑀦𑀻𑀬𑀦𑁆𑀢𑀼. 𑀯𑀥𑀁 𑀧𑀸𑀧𑀼𑀡𑀦𑁆𑀢𑀽𑀢𑀺 𑀫𑀭𑀡𑀁 𑀧𑀸𑀧𑀼𑀡𑀦𑁆𑀢𑀼. 𑀫𑀸 𑀯𑀸 𑀅𑀳𑁂𑀲𑀼𑀦𑁆𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀳𑁄𑀦𑁆𑀢𑀼. 𑀢𑁂𑀦𑀸𑀳 ‘‘𑀓𑀺𑀜𑁆𑀘𑀺𑀧𑀺 𑀫𑀸 𑀅𑀳𑁂𑀲𑀼’’𑀦𑁆𑀢𑀺, 𑀅𑀦𑀯𑀲𑁂𑀲𑀯𑀺𑀦𑀸𑀲𑀁 𑀧𑀸𑀧𑀼𑀡𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀳𑀜𑁆𑀜𑀦𑁆𑀢𑀽𑀢𑀺 𑀆𑀤𑀺𑀘𑀺𑀦𑁆𑀢𑀦𑁂𑀦𑁂𑀯𑀸𑀢𑀺 𑀏𑀓𑀦𑁆𑀢𑀢𑁄 𑀯𑀺𑀦𑀸𑀲𑀘𑀺𑀦𑁆𑀢𑀸𑀬 𑀏𑀯.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀢𑀺 𑀅𑀬𑁄𑀦𑀺𑀲𑁄 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺𑀓𑁄. 𑀲𑁄 𑀘 𑀏𑀓𑀦𑁆𑀢𑀢𑁄 𑀓𑀼𑀲𑀮𑀧𑀝𑀺𑀧𑀓𑁆𑀔𑀤𑀺𑀝𑁆𑀞𑀺𑀓𑁄𑀢𑀺 𑀆𑀳 ‘‘𑀅𑀓𑀼𑀲𑀮𑀤𑀲𑁆𑀲𑀦𑁄’’𑀢𑀺. 𑀯𑀺𑀧𑀮𑁆𑀮𑀢𑁆𑀣𑀤𑀲𑁆𑀲𑀦𑁄𑀢𑀺 𑀥𑀫𑁆𑀫𑀢𑀸𑀬 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑀻. 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑀻𑀲𑁂𑀦 𑀤𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀺𑀦𑁆𑀦𑀲𑁆𑀲 𑀨𑀮𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀻’’𑀢𑀺. 𑀤𑀺𑀦𑁆𑀦𑀁 𑀧𑀦 𑀅𑀦𑁆𑀦𑀸𑀤𑀺𑀯𑀢𑁆𑀣𑀼𑀁 𑀓𑀣𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀏𑀲 𑀦𑀬𑁄 ‘‘𑀬𑀺𑀝𑁆𑀞𑀁 𑀳𑀼𑀢’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀫𑀳𑀸𑀬𑀸𑀕𑁄𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀁 𑀫𑀳𑀸𑀤𑀸𑀦𑀁. 𑀧𑀳𑁂𑀡𑀓𑀲𑀓𑁆𑀓𑀸𑀭𑁄𑀢𑀺 𑀧𑀸𑀳𑀼𑀦𑀓𑀸𑀦𑀁 𑀓𑀢𑁆𑀢𑀩𑁆𑀩𑀲𑀓𑁆𑀓𑀸𑀭𑁄. 𑀨𑀮𑀦𑁆𑀢𑀺 𑀆𑀦𑀺𑀲𑀁𑀲𑀨𑀮𑀜𑁆𑀘 𑀦𑀺𑀲𑁆𑀲𑀦𑁆𑀤𑀨𑀮𑀜𑁆𑀘. 𑀯𑀺𑀧𑀸𑀓𑁄𑀢𑀺 𑀲𑀤𑀺𑀲𑀁 𑀨𑀮𑀁. 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲 𑀅𑀬𑀁 𑀮𑁄𑀓𑁄 𑀦𑀢𑁆𑀣𑀻𑀢𑀺 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲 𑀓𑀫𑁆𑀫𑀼𑀦𑀸 𑀮𑀤𑁆𑀥𑀩𑁆𑀩𑁄 𑀅𑀬𑀁 𑀮𑁄𑀓𑁄 𑀦 𑀳𑁄𑀢𑀺. 𑀇𑀥𑀮𑁄𑀓𑁂 𑀞𑀺𑀢𑀲𑁆𑀲𑀧𑀺 𑀧𑀭𑀮𑁄𑀓𑁄 𑀦𑀢𑁆𑀣𑀻𑀢𑀺 𑀇𑀥𑀮𑁄𑀓𑁂 𑀞𑀺𑀢𑀲𑁆𑀲 𑀓𑀫𑁆𑀫𑀼𑀦𑀸 𑀮𑀤𑁆𑀥𑀩𑁆𑀩𑁄 𑀧𑀭𑀮𑁄𑀓𑁄 𑀦 𑀳𑁄𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀲𑀩𑁆𑀩𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀻’’𑀢𑀺. 𑀇𑀫𑁂 𑀲𑀢𑁆𑀢𑀸 𑀬𑀢𑁆𑀣 𑀬𑀢𑁆𑀣 𑀪𑀯𑀬𑁄𑀦𑀺𑀕𑀢𑀺𑀆𑀤𑀻𑀲𑀼 𑀞𑀺𑀢𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀺 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀯𑀺𑀦𑀲𑁆𑀲𑀦𑁆𑀢𑀺. 𑀨𑀮𑀸𑀪𑀸𑀯𑀯𑀲𑁂𑀦𑀸𑀢𑀺 𑀫𑀸𑀢𑀸𑀧𑀺𑀢𑀽𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀻𑀦𑀁 𑀨𑀮𑀲𑁆𑀲 𑀅𑀪𑀸𑀯𑀯𑀲𑁂𑀦 ‘‘𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸’’𑀢𑀺 𑀯𑀤𑀢𑀺, 𑀦 𑀫𑀸𑀢𑀸𑀧𑀺𑀢𑀽𑀦𑀁, 𑀦𑀸𑀧𑀺 𑀢𑁂𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀻𑀦𑀁 𑀅𑀪𑀸𑀯𑀯𑀲𑁂𑀦 𑀢𑁂𑀲𑀁 𑀮𑁄𑀓𑀧𑀘𑁆𑀘𑀓𑁆𑀔𑀢𑁆𑀢𑀸. 𑀩𑀼𑀩𑁆𑀩𑀼𑀴𑀓𑀲𑁆𑀲 𑀯𑀺𑀬 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀸𑀤𑁄 𑀦𑀸𑀫 𑀓𑁂𑀯𑀮𑁄𑀯, 𑀦 𑀘𑀯𑀺𑀢𑁆𑀯𑀸 𑀆𑀕𑀫𑀦𑀧𑀼𑀩𑁆𑀩𑀓𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀘𑀯𑀺𑀢𑁆𑀯𑀸 𑀉𑀧𑀧𑀚𑁆𑀚𑀦𑀓𑀲𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀤𑀢𑀻’’𑀢𑀺. 𑀲𑀫𑀡𑁂𑀦 𑀦𑀸𑀫 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁂𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀓𑀣𑁂𑀢𑁆𑀯𑀸 𑀲𑀜𑁆𑀜𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀅𑀳𑁄𑀧𑀼𑀭𑀺𑀲𑀺𑀓𑀸 𑀦𑀸𑀫 𑀲𑀺𑀬𑀸, 𑀓𑀺𑀁 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀺, 𑀢𑀣𑀸 𑀅𑀢𑁆𑀢𑀦𑁄 𑀲𑀫𑁆𑀧𑀸𑀤𑀦𑀲𑁆𑀲 𑀓𑀲𑁆𑀲𑀘𑀺 𑀅𑀯𑀲𑀭𑁄 𑀏𑀯 𑀦𑀢𑁆𑀣𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑀢𑁄𑀢𑀺 𑀆𑀳 ‘‘𑀬𑁂 𑀇𑀫𑀜𑁆𑀘…𑀧𑁂… 𑀧𑀯𑁂𑀤𑁂𑀦𑁆𑀢𑀻’’𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀩𑁆𑀬𑀧𑀤𑁂𑀲𑁂𑀦. 𑀤𑀲𑀯𑀢𑁆𑀣𑀼𑀓𑀸𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸𑀦𑀺 𑀤𑀲 𑀯𑀢𑁆𑀣𑀽𑀦𑀺 𑀏𑀢𑀺𑀲𑁆𑀲𑀸𑀢𑀺 𑀤𑀲𑀯𑀢𑁆𑀣𑀼𑀓𑀸.

𑁪𑁪𑁧. 𑀅𑀦𑀪𑀺𑀚𑁆𑀛𑀸𑀤𑀬𑁄 𑀳𑁂𑀝𑁆𑀞𑀸 𑀅𑀢𑁆𑀣𑀢𑁄 𑀧𑀓𑀸𑀲𑀺𑀢𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯.

𑁪𑁪𑁨. 𑀲𑀳 𑀩𑁆𑀬𑀬𑀢𑀺 𑀕𑀘𑁆𑀙𑀢𑀻𑀢𑀺 𑀲𑀳𑀩𑁆𑀬𑁄, 𑀲𑀳𑀯𑀢𑁆𑀢𑀦𑀓𑁄, 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀢𑀸, 𑀲𑀳𑀧𑀯𑀢𑁆𑀢𑀻𑀢𑀺 𑀆𑀳 ‘‘𑀲𑀳𑀪𑀸𑀯𑀁 𑀉𑀧𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀩𑁆𑀭𑀳𑁆𑀫𑀸𑀦𑀁 𑀓𑀸𑀬𑁄 𑀲𑀫𑀽𑀳𑁄𑀢𑀺 𑀩𑁆𑀭𑀳𑁆𑀫𑀓𑀸𑀬𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀢𑀢𑁆𑀣 𑀕𑀢𑀸𑀢𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸. 𑀓𑀸𑀫𑀁 𑀘𑁂𑀢𑀸𑀬 𑀲𑀩𑁆𑀩𑀲𑁆𑀲𑀧𑀺 𑀩𑁆𑀭𑀳𑁆𑀫𑀦𑀺𑀓𑀸𑀬𑀲𑁆𑀲 𑀲𑀫𑀜𑁆𑀜𑀸𑀬 𑀪𑀯𑀺𑀢𑀩𑁆𑀩𑀁, ‘‘𑀆𑀪𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀓𑀸𑀤𑀻𑀦𑀁 𑀉𑀧𑀭𑀺 𑀕𑀳𑀺𑀢𑀢𑁆𑀢𑀸 𑀕𑁄𑀩𑀮𑀻𑀩𑀤𑁆𑀤𑀜𑀸𑀬𑁂𑀦 𑀢𑀤𑀯𑀲𑁂𑀲𑀸𑀦𑀁 𑀅𑀬𑀁 𑀲𑀫𑀜𑁆𑀜𑀸𑀢𑀺 𑀆𑀳 ‘‘𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀤𑁂𑀯𑀸𑀦’’𑀦𑁆𑀢𑀺. 𑀆𑀪𑀸 𑀦𑀸𑀫 𑀯𑀺𑀲𑀼𑀁 𑀤𑁂𑀯𑀸 𑀦𑀢𑁆𑀣𑀺, 𑀧𑀭𑀺𑀢𑁆𑀢𑀸𑀪𑀸𑀤𑀻𑀦𑀁𑀬𑁂𑀯 𑀧𑀦 𑀆𑀪𑀸𑀯𑀦𑁆𑀢𑀢𑀸𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀁 𑀏𑀢𑀁 𑀅𑀥𑀺𑀯𑀘𑀦𑀁, 𑀬𑀤𑀺𑀤𑀁 ‘‘𑀆𑀪𑀸’’𑀢𑀺 𑀬𑀣𑀸 ‘‘𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀩𑁆𑀭𑀳𑁆𑀫𑀓𑀸𑀬𑀺𑀓𑀸’’𑀢𑀺. 𑀧𑀭𑀺𑀢𑁆𑀢𑀸𑀪𑀸𑀦𑀦𑁆𑀢𑀺𑀆𑀤𑀺 𑀧𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀧𑁆𑀧𑀫𑀸𑀡𑀸𑀪𑀸𑀦𑀁 𑀤𑁂𑀯𑀸𑀦𑀁 𑀆𑀪𑀲𑁆𑀲𑀭𑀸𑀦𑀁 𑀤𑁂𑀯𑀸𑀦𑀦𑁆𑀢𑀺 𑀇𑀫𑀁 𑀧𑀸𑀴𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀓𑀢𑁄 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀆𑀪𑀸𑀢𑀺 𑀯𑀸, 𑀏𑀓𑀢𑁆𑀢𑀓𑀸𑀬𑀦𑀸𑀦𑀢𑁆𑀢𑀲𑀜𑁆𑀜𑀸𑀢𑀺 𑀯𑀸 𑀏𑀓𑀢𑁄 𑀅𑀕𑁆𑀕𑀳𑁂𑀢𑁆𑀯𑀸. 𑀢𑁂𑀲𑀁𑀬𑁂𑀯𑀸𑀢𑀺 𑀆𑀪𑀸𑀢𑀺 𑀯𑀼𑀢𑁆𑀢𑀤𑁂𑀯𑀸𑀦𑀁𑀬𑁂𑀯. 𑀪𑁂𑀤𑀢𑁄 𑀕𑀳𑀡𑀦𑁆𑀢𑀺 𑀓𑀸𑀭𑀡𑀲𑁆𑀲 𑀳𑀻𑀦𑀸𑀤𑀺𑀪𑁂𑀤𑀪𑀺𑀦𑁆𑀦𑀢𑀸𑀤𑀲𑁆𑀲𑀦𑀯𑀲𑁂𑀦 𑀧𑀭𑀺𑀢𑁆𑀢𑀸𑀪𑀸𑀤𑀺𑀕𑁆𑀕𑀳𑀡𑀁. 𑀇𑀢𑀺 𑀪𑀕𑀯𑀸 𑀆𑀲𑀯𑀓𑁆𑀔𑀬𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀏𑀯𑀁 𑀪𑀕𑀯𑀸 𑀥𑀫𑁆𑀫𑀘𑀭𑀺𑀬𑀁, 𑀲𑀫𑀘𑀭𑀺𑀬𑀁, 𑀯𑀝𑁆𑀝𑀦𑀺𑀲𑁆𑀲𑀺𑀢𑀁 𑀲𑀼𑀕𑀢𑀺𑀕𑀸𑀫𑀺𑀧𑀝𑀺𑀧𑀤𑀁, 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀁 𑀆𑀲𑀯𑀓𑁆𑀔𑀬𑀕𑀸𑀫𑀺𑀧𑀝𑀺𑀧𑀤𑀁 𑀓𑀢𑁆𑀯𑀸 𑀢𑀺𑀪𑀯𑀪𑀜𑁆𑀚𑀦𑀢𑁄 𑀆𑀲𑀯𑀓𑁆𑀔𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺.

𑀇𑀥 𑀞𑀢𑁆𑀯𑀸𑀢𑀺 𑀇𑀫𑀲𑁆𑀫𑀺𑀁 𑀥𑀫𑁆𑀫𑀘𑀭𑀺𑀬𑀸𑀲𑀫𑀘𑀭𑀺𑀬𑀸𑀬 𑀦𑀺𑀤𑁆𑀤𑁂𑀲𑁂 𑀞𑀢𑁆𑀯𑀸. 𑀤𑁂𑀯𑀮𑁄𑀓𑀸 𑀲𑀫𑀸𑀦𑁂𑀢𑀩𑁆𑀩𑀸𑀢𑀺 𑀙𑀩𑁆𑀩𑀻𑀲𑀢𑀺𑀧𑀺 𑀤𑁂𑀯𑀮𑁄𑀓𑀸 𑀲𑀫𑁄𑀥𑀸𑀦𑁂𑀢𑀩𑁆𑀩𑀸. 𑀯𑀻𑀲𑀢𑀺 𑀩𑁆𑀭𑀳𑁆𑀫𑀮𑁄𑀓𑀸𑀢𑀺 𑀢𑀁𑀢𑀁𑀪𑀯𑀧𑀭𑀺𑀬𑀸𑀧𑀦𑁆𑀦𑀦𑀺𑀓𑀸𑀬𑀯𑀲𑁂𑀦 𑀯𑀻𑀲𑀢𑀺 𑀩𑁆𑀭𑀳𑁆𑀫𑀮𑁄𑀓𑀸, 𑀯𑀻𑀲𑀢𑀺 𑀩𑁆𑀭𑀳𑁆𑀫𑀦𑀺𑀓𑀸𑀬𑀸𑀢𑀺 𑀅𑀢𑁆𑀣𑁄. 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀻𑀢𑀺 𑀬𑀣𑀸𑀭𑀳𑀁 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑁂𑀳𑀺 𑀓𑁂𑀯𑀮𑀁 𑀉𑀧𑀦𑀺𑀲𑁆𑀲𑀬𑀪𑀽𑀢𑁂𑀳𑀺 𑀘 𑀦𑀺𑀩𑁆𑀩𑀢𑁆𑀢𑀺 𑀤𑀲𑁆𑀲𑀺𑀢𑀸.

𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀦𑁆𑀢𑀺 𑀢𑀺𑀡𑁆𑀡𑀁 𑀓𑀸𑀫𑀸𑀯𑀘𑀭𑀲𑀼𑀘𑀭𑀺𑀢𑀸𑀦𑀁. 𑀓𑀸𑀫𑀸𑀯𑀘𑀭𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀫𑀦𑁄𑀲𑀼𑀘𑀭𑀺𑀢𑀸𑀧𑁂𑀓𑁆𑀔𑀸𑀬. 𑀯𑀺𑀧𑀸𑀓𑁂𑀦𑁂𑀯𑀸𑀢𑀺 𑀇𑀫𑀺𑀦𑀸 𑀯𑀺𑀧𑀸𑀓𑀼𑀧𑁆𑀧𑀸𑀤𑁂𑀦𑁂𑀯 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺, 𑀦 𑀉𑀧𑀦𑀺𑀲𑁆𑀲𑀬𑀢𑀸𑀫𑀢𑁆𑀢𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀸𑀤𑀻𑀦𑀺 𑀪𑀸𑀯𑁂𑀢𑁆𑀯𑀸𑀢𑀺𑀆𑀤𑀻𑀲𑀼𑀧𑀺 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀦𑀦𑀼 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁪𑁧) 𑁋 ‘‘𑀧𑀞𑀫𑁂𑀦 𑀛𑀸𑀦𑁂𑀦 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀁 𑀲𑀻𑀮𑀁, 𑀯𑁂𑀭𑀫𑀡𑀺 𑀲𑀻𑀮𑀁, 𑀘𑁂𑀢𑀦𑀸 𑀲𑀻𑀮𑀁, 𑀲𑀁𑀯𑀭𑁄 𑀲𑀻𑀮𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀲𑀻𑀮’’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀲𑀼𑀧𑀺 𑀛𑀸𑀦𑁂𑀲𑀼 𑀲𑀻𑀮𑀁 𑀉𑀤𑁆𑀥𑀝𑀦𑁆𑀢𑀺 𑀢𑀲𑁆𑀲 𑀯𑀲𑁂𑀦 𑀉𑀧𑀭𑀺𑀤𑁂𑀯𑀮𑁄𑀓𑀸𑀦𑀫𑁆𑀧𑀺 𑀯𑀺𑀧𑀸𑀓𑁂𑀦 𑀦𑀺𑀩𑁆𑀩𑀢𑁆𑀢𑀺 𑀯𑀢𑁆𑀢𑀩𑁆𑀩𑀸𑀢𑀺? 𑀦, 𑀢𑀲𑁆𑀲 𑀧𑀭𑀺𑀜𑁆𑀜𑀸𑀬 𑀤𑁂𑀲𑀦𑀢𑁆𑀢𑀸, 𑀧𑀭𑀺𑀜𑁆𑀜𑀸𑀬 𑀤𑁂𑀲𑀦𑀢𑀸 𑀘𑀲𑁆𑀲 ‘‘𑀬𑀢𑁆𑀣 𑀘 𑀧𑀳𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀜𑁆𑀘 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁮𑁩𑁭, 𑁮𑁩𑁯) 𑀧𑀓𑀸𑀲𑀺𑀢𑀸 𑀏𑀯. 𑀢𑀣𑀸 𑀳𑀺 𑀇𑀥𑀸𑀧𑀺 ‘‘𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀳𑀺 𑀲𑀻𑀮’’𑀦𑁆𑀢𑀺𑀆𑀤𑀺𑀦𑀸 𑀲𑀻𑀮𑀲𑁆𑀲 𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀉𑀧𑀦𑀺𑀲𑁆𑀲𑀬𑀢𑀸 𑀯𑀺𑀪𑀸𑀯𑀺𑀢𑀸, 𑀦 𑀦𑀺𑀩𑁆𑀩𑀢𑁆𑀢𑀓𑀢𑀸𑀬. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀪𑀸𑀯𑀦𑀸𑀮𑀓𑁆𑀔𑀡𑀸𑀬 𑀥𑀫𑁆𑀫𑀘𑀭𑀺𑀬𑀸𑀬 𑀪𑀯𑀯𑀺𑀲𑁂𑀲𑁂 𑀯𑀺𑀪𑀚𑀺𑀬𑀫𑀸𑀦𑁂 𑀅𑀲𑀜𑁆𑀜𑀪𑀯𑁄 𑀦 𑀕𑀳𑀺𑀢𑁄𑀢𑀺 𑀆𑀳 ‘‘𑀅𑀲𑀜𑁆𑀜𑀪𑀯𑁄 𑀧𑀦…𑀧𑁂… 𑀦 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺. 𑀩𑀸𑀳𑀺𑀭𑀓𑀸 𑀳𑀺 𑀅𑀬𑀣𑀸𑀪𑀽𑀢𑀤𑀲𑁆𑀲𑀺𑀢𑀸𑀬 𑀅𑀲𑀜𑁆𑀜𑀪𑀯𑀁 𑀪𑀯𑀯𑀺𑀧𑁆𑀧𑀫𑁄𑀓𑁆𑀔𑀁 𑀫𑀜𑁆𑀜𑀫𑀸𑀦𑀸 𑀢𑀤𑀼𑀧𑀕𑀚𑁆𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀅𑀲𑀜𑁆𑀜𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀩𑁆𑀭𑀳𑁆𑀫𑀚𑀸𑀮𑀝𑁆𑀞𑀓𑀣𑀸𑀬𑀁 𑀢𑀁𑀲𑀁𑀯𑀡𑁆𑀡𑀦𑀸𑀬𑀜𑁆𑀘 (𑀤𑀻. 𑀦𑀺. 𑀅𑀝𑁆𑀞. 𑁧.𑁬𑁮-𑁭𑁩; 𑀤𑀻. 𑀦𑀺. 𑀝𑀻. 𑁧.𑁬𑁮-𑁭𑁩) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀲𑀸𑀮𑁂𑀬𑁆𑀬𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀯𑁂𑀭𑀜𑁆𑀚𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪𑁪. 𑀯𑁂𑀭𑀜𑁆𑀚𑀯𑀸𑀲𑀺𑀦𑁄𑀢𑀺 𑀯𑁂𑀭𑀜𑁆𑀚𑀕𑀸𑀫𑀯𑀸𑀲𑀺𑀦𑁄. 𑀓𑁂𑀘𑀺 𑀧𑀦 ‘‘𑀯𑀺𑀯𑀺𑀥𑀭𑀝𑁆𑀞𑀯𑀸𑀲𑀺𑀦𑁄 𑀯𑁂𑀭𑀜𑁆𑀚𑀓𑀸’’𑀢𑀺 𑀏𑀢𑀫𑀢𑁆𑀣𑀁 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 ‘‘𑀯𑁂𑀭𑀚𑁆𑀚𑀓𑀸’’𑀢𑀺 𑀧𑀸𑀴𑀺𑀬𑀸 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀅𑀦𑀺𑀬𑀫𑀺𑀢𑀓𑀺𑀘𑁆𑀘𑁂𑀦𑀸𑀢𑀺 ‘‘𑀇𑀫𑀺𑀦𑀸 𑀦𑀸𑀫𑀸’’𑀢𑀺 𑀏𑀯𑀁 𑀦 𑀦𑀺𑀬𑀫𑀺𑀢𑁂𑀦 𑀓𑀺𑀘𑁆𑀘𑁂𑀦. 𑀅𑀬𑀁 𑀯𑀺𑀲𑁂𑀲𑁄𑀢𑀺 𑀅𑀬𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀓𑀢𑁄 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀤𑁂𑀲𑀦𑀸𑀬 𑀯𑀺𑀲𑁂𑀲𑁄, 𑀅𑀢𑁆𑀣𑁄 𑀧𑀦 𑀤𑁂𑀲𑀦𑀸𑀦𑀬𑁄 𑀘 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀅𑀯𑀺𑀲𑀺𑀝𑁆𑀞𑁄𑀢𑀺 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀓𑀢𑁆𑀣𑀘𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀤𑁂𑀲𑀦𑀁 𑀤𑁂𑀲𑁂𑀢𑀺, 𑀓𑀢𑁆𑀣𑀘𑀺 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀦𑁆𑀢𑀺? 𑀤𑁂𑀲𑀦𑀸𑀯𑀺𑀮𑀸𑀲𑀢𑁄 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄 𑀘. 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀢𑁂 𑀬𑀣𑀸𑀭𑀼𑀘𑀺 𑀓𑀢𑁆𑀣𑀘𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸, 𑀓𑀢𑁆𑀣𑀘𑀺 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀬𑁂 𑀧𑀦 𑀯𑁂𑀦𑁂𑀬𑁆𑀬𑀸 𑀲𑀸𑀲𑀦𑀓𑁆𑀓𑀫𑀁 𑀅𑀦𑁄𑀢𑀺𑀡𑁆𑀡𑀸, 𑀢𑁂𑀲𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀤𑁂𑀲𑀦𑀁 𑀤𑁂𑀲𑁂𑀦𑁆𑀢𑀺. 𑀬𑁂 𑀑𑀢𑀺𑀡𑁆𑀡𑀸, 𑀢𑁂𑀲𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁. 𑀲𑀫𑁆𑀫𑀼𑀢𑀺𑀲𑀘𑁆𑀘𑀯𑀺𑀲𑀬𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸, 𑀇𑀢𑀭𑀸 𑀧𑀭𑀫𑀢𑁆𑀣𑀲𑀘𑁆𑀘𑀯𑀺𑀲𑀬𑀸. 𑀧𑀼𑀭𑀺𑀫𑀸 𑀓𑀭𑀼𑀡𑀸𑀦𑀼𑀓𑀽𑀮𑀸, 𑀇𑀢𑀭𑀸 𑀧𑀜𑁆𑀜𑀸𑀦𑀼𑀓𑀽𑀮𑀸. 𑀲𑀤𑁆𑀥𑀸𑀦𑀼𑀲𑀸𑀭𑀺𑀕𑁄𑀢𑁆𑀢𑀸𑀦𑀁 𑀯𑀸 𑀧𑀼𑀭𑀺𑀫𑀸. 𑀢𑁂 𑀳𑀺 𑀧𑀼𑀕𑁆𑀕𑀮𑀧𑁆𑀧𑀫𑀸𑀡𑀸, 𑀧𑀘𑁆𑀙𑀺𑀫𑀸 𑀥𑀫𑁆𑀫𑀸𑀦𑀼𑀲𑀸𑀭𑀻𑀦𑀁. 𑀲𑀤𑁆𑀥𑀸𑀘𑀭𑀺𑀢𑀢𑀸𑀬 𑀯𑀸 𑀮𑁄𑀓𑀸𑀥𑀺𑀧𑀢𑀻𑀦𑀁 𑀯𑀲𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸, 𑀧𑀜𑁆𑀜𑀸𑀘𑀭𑀺𑀢𑀢𑀸𑀬 𑀥𑀫𑁆𑀫𑀸𑀥𑀺𑀧𑀢𑀻𑀦𑀁 𑀯𑀲𑁂𑀦 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸. 𑀧𑀼𑀭𑀺𑀫𑀸 𑀘 𑀦𑁂𑀬𑁆𑀬𑀢𑁆𑀣𑀸, 𑀧𑀘𑁆𑀙𑀺𑀫𑀸 𑀦𑀻𑀢𑀢𑁆𑀣𑀸. 𑀇𑀢𑀺 𑀪𑀕𑀯𑀸 𑀢𑀁 𑀢𑀁 𑀯𑀺𑀲𑁂𑀲𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀤𑀼𑀯𑀺𑀥𑀁 𑀤𑁂𑀲𑀦𑀁 𑀤𑁂𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑁂𑀭𑀜𑁆𑀚𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪𑁯. 𑀕𑀭𑀼𑀪𑀸𑀯𑁄 𑀕𑀸𑀭𑀯𑀁, 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀓𑀭𑀡𑀻𑀬𑀢𑀸. 𑀲𑀳 𑀕𑀸𑀭𑀯𑁂𑀦𑀸𑀢𑀺 𑀲𑀕𑀸𑀭𑀯𑁄, 𑀕𑀭𑀼𑀦𑀸 𑀓𑀺𑀲𑁆𑀫𑀺𑀜𑁆𑀘𑀺 𑀯𑀼𑀢𑁆𑀢𑁂 𑀕𑀸𑀭𑀯𑀯𑀲𑁂𑀦 𑀧𑀢𑀺𑀲𑁆𑀲𑀯𑀦𑀁 𑀧𑀢𑀺𑀲𑁆𑀲𑀯𑁄, 𑀲𑀳 𑀧𑀢𑀺𑀲𑁆𑀲𑀯𑁂𑀦 𑀲𑀧𑁆𑀧𑀢𑀺𑀲𑁆𑀲𑀯𑁄, 𑀧𑀢𑀺𑀲𑁆𑀲𑀯𑀪𑀽𑀢𑀁 𑀢𑀁𑀲𑀪𑀸𑀕𑀜𑁆𑀘 𑀬𑀁 𑀓𑀺𑀜𑁆𑀘𑀺 𑀕𑀭𑀼𑀓𑀭𑀡𑀁. 𑀲𑀕𑀸𑀭𑀯𑁂 𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀁. 𑀕𑀭𑀼𑀓𑀭𑀡𑀁 𑀯𑀸 𑀕𑀸𑀭𑀯𑁄, 𑀲𑀕𑀸𑀭𑀯𑀲𑁆𑀲 𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀁. 𑀏𑀢𑁂𑀦 𑀲𑀪𑀸𑀯𑁂𑀦𑁂𑀯 𑀲𑀕𑀸𑀭𑀯𑀲𑁆𑀲 𑀢𑀣𑀸𑀧𑀯𑀢𑁆𑀢𑀁 𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀢𑁆𑀣 𑀤𑀼-𑀲𑀤𑁆𑀤𑁄 𑀕𑀭𑀳𑀢𑁆𑀣𑁄𑀧𑀺 𑀳𑁄𑀢𑀺 ‘‘𑀤𑀼𑀓𑁆𑀔𑀁 𑀤𑀼𑀧𑁆𑀧𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀇𑀥 𑀧𑀦 𑀲𑁄 𑀦 𑀲𑀫𑁆𑀪𑀯𑀢𑀺 𑀓𑀼𑀘𑁆𑀙𑀺𑀢𑀸𑀬 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄𑀢𑀺 𑀆𑀳 ‘‘𑀧𑀜𑁆𑀜𑀸𑀬 𑀤𑀼𑀝𑁆𑀞𑀁 𑀦𑀸𑀫 𑀦𑀢𑁆𑀣𑀻’’𑀢𑀺. ‘‘𑀤𑀼𑀲𑁆𑀲𑀻𑀮𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀪𑀸𑀯𑀢𑁆𑀣𑁄 𑀤𑀼-𑀲𑀤𑁆𑀤𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀜𑁆𑀜𑁄 𑀦𑀺𑀧𑁆𑀧𑀜𑁆𑀜𑁄𑀢𑀺 𑀅𑀢𑁆𑀣𑁄’’𑀢𑀺. 𑀓𑀺𑀢𑁆𑀢𑀓𑁂𑀦𑀸𑀢𑀺 𑀓𑁂𑀦 𑀧𑀭𑀺𑀫𑀸𑀡𑁂𑀦. 𑀢𑀁 𑀧𑀦 𑀧𑀭𑀺𑀫𑀸𑀡𑀁 𑀬𑀲𑁆𑀫𑀸 𑀧𑀭𑀺𑀫𑁂𑀬𑁆𑀬𑀲𑁆𑀲 𑀅𑀢𑁆𑀣𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀁 𑀳𑁄𑀢𑀺, 𑀦𑀼-𑀲𑀤𑁆𑀤𑁄 𑀘 𑀧𑀼𑀘𑁆𑀙𑀸𑀬 𑀚𑁄𑀢𑀓𑁄, 𑀢𑀲𑁆𑀫𑀸 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄𑀢𑀺 𑀓𑀸𑀭𑀡𑀧𑀭𑀺𑀘𑁆𑀙𑁂𑀤𑀧𑀼𑀘𑁆𑀙𑀸’’𑀢𑀺 𑀯𑀢𑁆𑀯𑀸 ‘‘𑀓𑀺𑀢𑁆𑀢𑀓𑁂𑀦 𑀦𑀼 𑀔𑁄 𑀏𑀯𑀁 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀆𑀳. ‘‘𑀓𑀸𑀭𑀡𑀧𑀭𑀺𑀘𑁆𑀙𑁂𑀤𑀧𑀼𑀘𑁆𑀙𑀸’’𑀢𑀺 𑀇𑀫𑀺𑀦𑀸 ‘‘𑀓𑀺𑀢𑁆𑀢𑀸𑀯𑀢𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀧𑀼𑀘𑁆𑀙𑀸𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀦 𑀯𑀺𑀲𑁂𑀲𑀢𑁄, 𑀢𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑁂𑀲𑀪𑀸𑀯𑀜𑀸𑀧𑀦𑀢𑁆𑀣𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 𑀆𑀕𑀢𑀸 𑀲𑀩𑁆𑀩𑀸𑀯 𑀧𑀼𑀘𑁆𑀙𑀸 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦 𑀤𑀲𑁆𑀲𑁂𑀢𑀺 ‘‘𑀧𑀼𑀘𑁆𑀙𑀸 𑀘 𑀦𑀸𑀫𑀸’’𑀢𑀺𑀆𑀤𑀺𑀦𑀸. 𑀅𑀤𑀺𑀝𑁆𑀞𑀁 𑀚𑁄𑀢𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀤𑀺𑀝𑁆𑀞𑀚𑁄𑀢𑀦𑀸, 𑀧𑀼𑀘𑁆𑀙𑀸. 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸 𑀲𑀸𑀓𑀘𑁆𑀙𑀸𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑀓𑀭𑀡𑀁. 𑀯𑀺𑀫𑀢𑀺 𑀙𑀺𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀯𑀺𑀫𑀢𑀺𑀘𑁆𑀙𑁂𑀤𑀦𑀸. 𑀅𑀦𑀼𑀫𑀢𑀺𑀬𑀸 𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀼𑀘𑁆𑀙𑀸𑀬 𑀳𑀺 ‘‘𑀓𑀺𑀁 𑀢𑀼𑀫𑁆𑀳𑀸𑀓𑀁 𑀅𑀦𑀼𑀫𑀢𑀻’’𑀢𑀺 𑀅𑀦𑀼𑀫𑀢𑀺 𑀧𑀼𑀘𑁆𑀙𑀺𑀢𑀸 𑀳𑁄𑀢𑀺. 𑀓𑀣𑁂𑀢𑀼𑀁 𑀓𑀫𑁆𑀬𑀢𑀸𑀬 𑀧𑀼𑀘𑁆𑀙𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸.

𑀮𑀓𑁆𑀔𑀡𑀦𑁆𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀬𑁄 𑀓𑁄𑀘𑀺 𑀲𑀪𑀸𑀯𑁄. 𑀅𑀜𑁆𑀜𑀸𑀢𑀦𑁆𑀢𑀺 𑀬𑁂𑀦 𑀓𑁂𑀦𑀘𑀺 𑀜𑀸𑀡𑁂𑀦 𑀅𑀜𑁆𑀜𑀸𑀢𑀪𑀸𑀯𑀁 𑀆𑀳. 𑀅𑀤𑀺𑀝𑁆𑀞𑀦𑁆𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀅𑀤𑀺𑀝𑁆𑀞𑀢𑀁. 𑀅𑀢𑀼𑀮𑀺𑀢𑀦𑁆𑀢𑀺 ‘‘𑀏𑀢𑁆𑀢𑀓𑀁 𑀇𑀤’’𑀦𑁆𑀢𑀺 𑀢𑀼𑀮𑀦𑀪𑀽𑀢𑁂𑀦 𑀅𑀢𑀼𑀮𑀺𑀢𑀢𑀁. 𑀅𑀢𑀻𑀭𑀺𑀢𑀦𑁆𑀢𑀺 𑀢𑀻𑀭𑀡𑀪𑀽𑀢𑁂𑀦 𑀅𑀓𑀢𑀜𑀸𑀡𑀓𑀺𑀭𑀺𑀬𑀸𑀲𑀫𑀸𑀧𑀦𑀢𑀁. 𑀅𑀯𑀺𑀪𑀽𑀢𑀦𑁆𑀢𑀺 𑀜𑀸𑀡𑀲𑁆𑀲 𑀅𑀧𑀸𑀓𑀝𑀪𑀸𑀯𑀁. 𑀅𑀯𑀺𑀪𑀸𑀯𑀺𑀢𑀦𑁆𑀢𑀺 𑀜𑀸𑀡𑁂𑀦 𑀅𑀧𑀸𑀓𑀝𑀻𑀓𑀢𑀪𑀸𑀯𑀁. 𑀇𑀥 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 𑀅𑀥𑀺𑀧𑁆𑀧𑁂𑀢𑀸, 𑀦 𑀅𑀤𑀺𑀝𑁆𑀞𑀚𑁄𑀢𑀦𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸 𑀘𑀸𑀢𑀺.

𑀓𑀣𑀫𑀬𑀁 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀣𑁂𑀭𑁄 𑀳𑀻’’𑀢𑀺𑀆𑀤𑀺. 𑀲𑀬𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁄𑀢𑀺 𑀲𑀬𑀫𑁂𑀯 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀅𑀢𑁆𑀣𑀁 𑀯𑀺𑀲𑁂𑀲𑁂𑀦 𑀦𑀺𑀘𑁆𑀙𑀺𑀦𑀦𑁆𑀢𑁄. 𑀇𑀤𑀁 𑀲𑀼𑀢𑁆𑀢𑀦𑁆𑀢𑀺 𑀇𑀤𑀁 𑀧𑀜𑁆𑀘𑀯𑀻𑀲𑀢𑀺𑀧𑀜𑁆𑀳𑀧𑀝𑀺𑀫𑀡𑁆𑀟𑀺𑀢𑀲𑀼𑀢𑁆𑀢𑀁, 𑀦 𑀬𑀁 𑀓𑀺𑀜𑁆𑀘𑀺 𑀅𑀦𑀯𑀲𑁂𑀲𑁂𑀦𑁂𑀯 𑀫𑀢𑁆𑀣𑀓𑀁 𑀧𑀸𑀧𑁂𑀲𑀻𑀢𑀺. ‘‘𑀲𑀬𑀫𑁂𑀯 𑀧𑀜𑁆𑀳𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀬𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁄’’𑀢𑀺 𑀏𑀢𑁆𑀣 𑀘𑀢𑀼𑀓𑁆𑀓𑁄𑀝𑀺𑀓𑀁 𑀪𑀯𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀘𑁆𑀘𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀧𑀜𑁆𑀳𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀁𑀬𑁂𑀯 𑀲𑀓𑁆𑀓𑁄𑀢𑀻𑀢𑀺 𑀧𑀼𑀘𑁆𑀙𑀦𑀯𑀺𑀥𑀺𑀁𑀬𑁂𑀯 𑀚𑀸𑀦𑀸𑀢𑀺. 𑀦 𑀦𑀺𑀘𑁆𑀙𑁂𑀢𑀼𑀦𑁆𑀢𑀺 𑀦𑀺𑀘𑁆𑀙𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀺𑀲𑁆𑀲𑀚𑁆𑀚𑀦𑀯𑀺𑀥𑀺𑀁 𑀦 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀲𑁂𑀲𑀝𑁆𑀞𑀸𑀦𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀲𑀤𑀺𑀲𑀝𑁆𑀞𑀸𑀦𑀁. 𑀣𑁂𑀭𑁂𑀦 𑀲𑀤𑀺𑀲𑁄𑀢𑀺 𑀣𑁂𑀭𑁂𑀦 𑀲𑀤𑀺𑀲𑁄 𑀲𑀸𑀯𑀓𑁄 𑀦𑀢𑁆𑀣𑀺.

𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀲𑀁𑀬𑁄𑀚𑁂𑀢𑁆𑀯𑀸 𑀲𑀫𑀸𑀦𑀁 𑀓𑀢𑁆𑀯𑀸, 𑀬𑀣𑀸 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀯𑀢𑁆𑀢𑀁, 𑀢𑀣𑀸 𑀢𑀁 𑀅𑀯𑀺𑀮𑁄𑀫𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀮𑀻𑀴𑀸𑀬𑀦𑁆𑀢𑁄𑀢𑀺 𑀮𑀻𑀴𑀁 𑀓𑀭𑁄𑀦𑁆𑀢𑁄. 𑀥𑀫𑁆𑀫𑀓𑀣𑀺𑀓𑀢𑀸𑀬 𑀅𑀕𑁆𑀕𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀢𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑀸𑀬 𑀩𑀼𑀤𑁆𑀥𑀮𑀻𑀴𑀸𑀬 𑀯𑀺𑀬 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀕𑀫𑀦𑀁 𑀕𑀡𑁆𑀳𑀦𑁆𑀢𑁄 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺.

𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀅𑀦𑀼𑀓𑁆𑀓𑀫𑀺𑀢𑁆𑀯𑀸𑀢𑀺 𑀉𑀕𑁆𑀕𑀳𑀺𑀢𑀓𑀣𑀸𑀫𑀕𑁆𑀕𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀈𑀲𑀓𑀫𑁆𑀧𑀺 𑀅𑀦𑀼𑀓𑁆𑀓𑀫𑀺𑀢𑁆𑀯𑀸 𑀉𑀕𑁆𑀕𑀳𑀺𑀢𑀦𑀺𑀬𑀸𑀫𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀝𑁆𑀞𑀺𑀓𑁄𑀝𑀺’’𑀦𑁆𑀢𑀺𑀆𑀤𑀺. 𑀏𑀓𑀧𑀤𑀺𑀓𑀦𑁆𑀢𑀺 𑀏𑀓𑀧𑀤𑀦𑀺𑀓𑁆𑀔𑁂𑀧𑀫𑀢𑁆𑀢𑀁. 𑀤𑀡𑁆𑀟𑀓𑀲𑁂𑀢𑀼𑀦𑁆𑀢𑀺 𑀏𑀓𑀤𑀡𑁆𑀟𑀓𑀫𑀬𑀁 𑀲𑁂𑀢𑀼𑀁. 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀲𑀼𑀢𑁆𑀢𑀧𑀤𑀸𑀦𑀁 𑀆𑀳𑀭𑀡𑁂𑀦 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀁 𑀓𑀭𑁄𑀦𑁆𑀢𑁄. 𑀚𑀸𑀢𑀲𑁆𑀲𑀭𑀲𑀤𑀺𑀲𑀜𑁆𑀘 𑀕𑀸𑀣𑀁, 𑀲𑀼𑀢𑁆𑀢𑀧𑀤𑀁 𑀯𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑁆𑀣 𑀦𑀸𑀦𑀸𑀉𑀧𑀫𑀸𑀓𑀸𑀭𑀡𑀸𑀦𑀺 𑀆𑀳𑀭𑀦𑁆𑀢𑁄 𑀢𑀸𑀦𑀺 𑀘 𑀢𑁂𑀳𑀺 𑀲𑀼𑀢𑁆𑀢𑀧𑀤𑁂𑀳𑀺 𑀩𑁄𑀥𑁂𑀦𑁆𑀢𑁄 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 ‘‘𑀚𑀸𑀢𑀲𑁆𑀲𑀭𑁂 𑀧𑀜𑁆𑀘𑀯𑀡𑁆𑀡𑀸𑀦𑀺 𑀓𑀼𑀲𑀼𑀫𑀸𑀦𑀺 𑀨𑀼𑀮𑁆𑀮𑀸𑀧𑁂𑀦𑁆𑀢𑁄 𑀯𑀺𑀬 𑀲𑀺𑀦𑁂𑀭𑀼𑀫𑀢𑁆𑀣𑀓𑁂 𑀯𑀝𑁆𑀝𑀺𑀲𑀳𑀲𑁆𑀲𑀁 𑀚𑀸𑀮𑁂𑀦𑁆𑀢𑁄 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑁄.

𑀏𑀓𑀧𑀤𑀼𑀤𑁆𑀥𑀸𑀭𑁂𑀢𑀺 𑀏𑀓𑀲𑁆𑀫𑀺𑀁 𑀧𑀤𑀼𑀤𑁆𑀥𑀸𑀭𑀡𑀓𑁆𑀔𑀡𑁂. 𑀧𑀤𑀯𑀲𑁂𑀦 𑀲𑀝𑁆𑀞𑀺 𑀧𑀤𑀲𑀢𑀲𑀳𑀲𑁆𑀲𑀸𑀦𑀺 𑀕𑀸𑀣𑀸𑀯𑀲𑁂𑀦 𑀧𑀦𑁆𑀦𑀭𑀲 𑀕𑀸𑀣𑀸𑀲𑀳𑀲𑁆𑀲𑀸𑀦𑀺. 𑀆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀯𑀺𑀬𑀸𑀢𑀺 𑀧𑀘𑁆𑀘𑁂𑀓𑀁 𑀧𑀼𑀧𑁆𑀨𑀸𑀦𑀺 𑀅𑀦𑁄𑀘𑀺𑀦𑀺𑀢𑁆𑀯𑀸 𑀯𑀮𑁆𑀮𑀺𑀫𑁂𑀯 𑀆𑀓𑀟𑁆𑀠𑀺𑀢𑁆𑀯𑀸 𑀏𑀓𑀚𑁆𑀛𑀁 𑀧𑀼𑀧𑁆𑀨𑀸𑀦𑀺 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀯𑀺𑀬. 𑀢𑁂𑀦𑀸𑀳 ‘‘𑀏𑀓𑀧𑁆𑀧𑀳𑀸𑀭𑁂𑀦𑁂𑀯𑀸’’𑀢𑀺. 𑀕𑀢𑀺𑀫𑀦𑁆𑀢𑀸𑀦𑀦𑁆𑀢𑀺 𑀅𑀢𑀺𑀲𑀬𑀸𑀬 𑀜𑀸𑀡𑀕𑀢𑀺𑀬𑀸 𑀬𑀼𑀢𑁆𑀢𑀸𑀦𑀁. 𑀥𑀺𑀢𑀺𑀫𑀦𑁆𑀢𑀸𑀦𑀦𑁆𑀢𑀺 𑀥𑀸𑀭𑀡𑀩𑀮𑁂𑀦 𑀬𑀼𑀢𑁆𑀢𑀸𑀦𑀁.

𑀅𑀦𑀦𑁆𑀢𑀦𑀬𑀼𑀲𑁆𑀲𑀤𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀲𑀺𑀢𑀢𑁆𑀣𑀦𑀺𑀩𑁆𑀩𑀸𑀦𑀯𑀺𑀧𑀸𑀓𑀓𑀺𑀭𑀺𑀬𑀸𑀤𑀺𑀯𑀲𑁂𑀦 𑀅𑀦𑀦𑁆𑀢𑀧𑀪𑁂𑀤𑁂 𑀯𑀺𑀲𑀬𑁂 𑀧𑀯𑀢𑁆𑀢𑀺𑀬𑀸 𑀅𑀦𑀦𑁆𑀢𑀦𑀬𑁂𑀳𑀺 𑀉𑀲𑁆𑀲𑀦𑁆𑀦𑀁 𑀉𑀧𑀘𑀺𑀢𑀁. 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑀸𑀦𑀁 𑀢𑀺𑀢𑁆𑀣𑁂 𑀞𑀧𑀺𑀢𑀦𑀸𑀯𑀸 𑀯𑀺𑀬𑀸𑀢𑀺 𑀬𑁄𑀚𑀦𑀸. 𑀲𑀳𑀲𑁆𑀲𑀬𑀼𑀢𑁆𑀢𑀆𑀚𑀜𑁆𑀜𑀭𑀣𑁄𑀢𑀺 𑀯𑁂𑀚𑀬𑀦𑁆𑀢𑀭𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀬𑀲𑁆𑀫𑀸 𑀧𑀼𑀘𑁆𑀙𑀸𑀬𑀁 𑀩𑁆𑀬𑀸𑀧𑀦𑀺𑀘𑁆𑀙𑀸𑀦𑀬𑁂𑀦 ‘‘𑀤𑀼𑀧𑁆𑀧𑀜𑁆𑀜𑁄 𑀤𑀼𑀧𑁆𑀧𑀜𑁆𑀜𑁄’’𑀢𑀺 𑀆𑀫𑁂𑀟𑀺𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀧𑀼𑀘𑁆𑀙𑀸𑀲𑀪𑀸𑀕𑁂𑀦 ‘‘𑀦𑀧𑁆𑀧𑀚𑀸𑀦𑀸𑀢𑀺 𑀦𑀧𑁆𑀧𑀚𑀸𑀦𑀸𑀢𑀻’’𑀢𑀺 𑀆𑀫𑁂𑀟𑀺𑀢𑀯𑀲𑁂𑀦𑁂𑀯𑀸𑀳. 𑀢𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀸 𑀦𑀧𑁆𑀧𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀤𑀼𑀧𑁆𑀧𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀆𑀳. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀇𑀤𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁. 𑀢𑀜𑁆𑀘 𑀔𑁄 𑀭𑀼𑀧𑁆𑀧𑀦𑀁 𑀯𑁂𑀤𑀺𑀬𑀦𑀁 𑀲𑀜𑁆𑀚𑀸𑀦𑀦𑀁 𑀅𑀪𑀺𑀲𑀗𑁆𑀔𑀭𑀡𑀁 𑀯𑀺𑀚𑀸𑀦𑀦𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀏𑀢𑁆𑀢𑀓𑀁. 𑀇𑀢𑁄 𑀉𑀤𑁆𑀥𑀁 𑀓𑀺𑀜𑁆𑀘𑀺 𑀥𑀫𑁆𑀫𑀚𑀸𑀢𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀧𑀯𑀢𑁆𑀢𑀺𑀓𑁆𑀓𑀫𑀢𑁄 𑀘𑁂𑀯 𑀧𑀻𑀴𑀦𑀲𑀗𑁆𑀔𑀢𑀲𑀦𑁆𑀢𑀸𑀧𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀢𑁄 𑀘 𑀬𑀣𑀸𑀪𑀽𑀢𑀁 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀯𑀲𑁂𑀲𑀧𑀘𑁆𑀘𑀬𑀲𑀫𑀸𑀕𑀫𑁂 𑀉𑀤𑀬𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀲𑁆𑀯𑀸𑀬𑀁 𑀲𑀫𑀼𑀤𑀬𑁄 𑀲𑀁𑀲𑀸𑀭𑀧𑀯𑀢𑁆𑀢𑀺𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀧𑀯𑀢𑁆𑀢𑀺𑀤𑀼𑀓𑁆𑀔𑀧𑀪𑀸𑀯𑀺𑀓𑀸’’𑀢𑀺, 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀺𑀓𑀸𑀢𑀺 𑀅𑀢𑁆𑀣𑁄. 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄𑀢𑀺 𑀬𑀣𑀸𑀪𑀽𑀢𑀁 𑀅𑀦𑀼𑀧𑀘𑁆𑀙𑁂𑀤𑀓𑀭𑀡𑀭𑀲𑀢𑁄 𑀘𑁂𑀯 𑀲𑀫𑁆𑀧𑀺𑀡𑁆𑀟𑀦𑀦𑀺𑀤𑀸𑀦𑀲𑀁𑀬𑁄𑀕𑀧𑀮𑀺𑀩𑁄𑀥𑀮𑀓𑁆𑀔𑀡𑀢𑁄 𑀘.

𑀇𑀤𑀁 𑀦𑀸𑀫 𑀞𑀸𑀦𑀁 𑀧𑀢𑁆𑀯𑀸𑀢𑀺 𑀇𑀤𑀁 𑀦𑀸𑀫 𑀅𑀧𑁆𑀧𑀯𑀢𑁆𑀢𑀺𑀓𑀸𑀭𑀡𑀁 𑀆𑀕𑀫𑁆𑀫. 𑀦𑀺𑀭𑀼𑀚𑁆𑀛𑀢𑀻𑀢𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀯𑀲𑁂𑀦 𑀦𑀺𑀭𑀼𑀚𑁆𑀛𑀢𑀺, 𑀢𑁂𑀦𑀸𑀳 ‘‘𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀻’’𑀢𑀺. 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄𑀢𑀺 𑀬𑀣𑀸𑀪𑀽𑀢𑀁 𑀅𑀘𑁆𑀘𑀼𑀢𑀺𑀭𑀲𑀢𑁄 𑀘𑁂𑀯 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀸𑀲𑀗𑁆𑀔𑀢𑀸𑀫𑀢𑀮𑀓𑁆𑀔𑀡𑀢𑁄 𑀘. 𑀅𑀬𑀁 𑀧𑀝𑀺𑀧𑀤𑀸𑀢𑀺 𑀅𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀓𑀸 𑀲𑀫𑁄𑀥𑀸𑀦𑀮𑀓𑁆𑀔𑀡𑀸 𑀧𑀝𑀺𑀧𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀧𑀝𑀺𑀧𑀤𑀸. 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀻𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀕𑀘𑁆𑀙𑀢𑀺 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺. 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄𑀢𑀺 𑀬𑀣𑀸𑀪𑀽𑀢𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀓𑀭𑀡𑀲𑀭𑀲𑀢𑁄 𑀘𑁂𑀯 𑀦𑀺𑀬𑁆𑀬𑀸𑀦𑀳𑁂𑀢𑀼𑀤𑀲𑁆𑀲𑀦𑀸𑀥𑀺𑀧𑀢𑁂𑀬𑁆𑀬𑀮𑀓𑁆𑀔𑀡𑀢𑁄 𑀘 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀦𑀦𑁆𑀢𑀭𑀯𑀸𑀭𑁂𑀢𑀺 𑀤𑀼𑀢𑀺𑀬𑀯𑀸𑀭𑁂. 𑀇𑀫𑀺𑀦𑀸𑀯 𑀦𑀬𑁂𑀦𑀸𑀢𑀺 ‘‘𑀇𑀤𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀧𑀞𑀫𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦. 𑀢𑀢𑁆𑀣 𑀳𑀺 𑀤𑀼𑀧𑁆𑀧𑀜𑁆𑀜𑀦𑀺𑀤𑁆𑀤𑁂𑀲𑀢𑁆𑀢𑀸 𑀧𑀚𑀸𑀦𑀦𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀤𑁂𑀲𑀦𑀸 𑀆𑀕𑀢𑀸, 𑀇𑀥 𑀧𑀜𑁆𑀜𑀯𑀦𑁆𑀢𑀦𑀺𑀤𑁆𑀤𑁂𑀲𑀢𑁆𑀢𑀸 𑀧𑀚𑀸𑀦𑀦𑀯𑀲𑁂𑀦𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀏𑀢𑁆𑀣𑀸𑀢𑀺 𑀤𑀼𑀢𑀺𑀬𑀯𑀸𑀭𑁂.

𑀲𑀯𑀦𑀢𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀲𑀯𑀦𑀢𑁄 𑀉𑀕𑁆𑀕𑀡𑁆𑀳𑀸𑀢𑀺. 𑀕𑀦𑁆𑀣𑀲𑀯𑀦𑀫𑀼𑀔𑁂𑀦 𑀳𑀺 𑀢𑀤𑀢𑁆𑀣𑀲𑁆𑀲 𑀉𑀕𑁆𑀕𑀳𑀡𑀁. 𑀞𑀧𑁂𑀢𑁆𑀯𑀸 𑀢𑀡𑁆𑀳𑀦𑁆𑀢𑀺𑀆𑀤𑀺 𑀢𑀲𑁆𑀲 𑀉𑀕𑁆𑀕𑀳𑀡𑀸𑀓𑀸𑀭𑀦𑀺𑀤𑀲𑁆𑀲𑀦𑀁. 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀧𑀝𑁆𑀞𑀧𑁂𑀢𑀺. 𑀦𑁄 𑀯𑀺𑀯𑀝𑁆𑀝𑁂𑀢𑀺 𑀯𑀺𑀯𑀝𑁆𑀝𑁂 𑀅𑀪𑀺𑀦𑀺𑀯𑁂𑀲𑁄 𑀦 𑀳𑁄𑀢𑀺 𑀅𑀯𑀺𑀲𑀬𑀢𑁆𑀢𑀸. 𑀅𑀬𑀦𑁆𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀺𑀓𑁄.

𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀔𑀦𑁆𑀥𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀲𑁆𑀲 𑀘𑀓𑁆𑀔𑀸𑀤𑀺𑀯𑀲𑁂𑀦 𑀯𑁂𑀤𑀦𑀸𑀤𑀺𑀯𑀲𑁂𑀦 𑀘 𑀲𑀢𑀺𑀧𑀺 𑀅𑀦𑁂𑀓𑀯𑀺𑀥𑀢𑁆𑀢𑁂 𑀲𑀼𑀓𑀭𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀘𑀢𑀼𑀥𑀸𑀢𑀼𑀫𑀼𑀔𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀑𑀢𑀭𑀺𑀢𑁆𑀯𑀸’’𑀢𑀺 𑀆𑀳. 𑀭𑀽𑀧𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀻𑀢𑀺 𑀭𑀼𑀧𑁆𑀧𑀦𑀝𑁆𑀞𑁂𑀦 𑀭𑀽𑀧𑀦𑁆𑀢𑀺 𑀅𑀲𑀗𑁆𑀓𑀭𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀢𑀺. 𑀢𑀤𑀸𑀭𑀫𑁆𑀫𑀡𑀸𑀢𑀺 𑀢𑀁 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑀓𑀸. 𑀦𑀸𑀫𑀦𑁆𑀢𑀺 𑀯𑁂𑀤𑀦𑀸𑀤𑀺𑀘𑀢𑀼𑀓𑁆𑀓𑀁 𑀦𑀫𑀦𑀝𑁆𑀞𑁂𑀦 𑀦𑀸𑀫𑀦𑁆𑀢𑀺 𑀯𑀯𑀢𑁆𑀣𑀸𑀧𑁂𑀢𑀺. 𑀬𑀫𑀓𑀢𑀸𑀮𑀓𑁆𑀔𑀦𑁆𑀥𑀁 𑀪𑀺𑀦𑁆𑀤𑀦𑁆𑀢𑁄 𑀯𑀺𑀬 𑀬𑀫𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 ‘‘𑀅𑀭𑀽𑀧𑀁, 𑀭𑀽𑀧𑀜𑁆𑀘𑀸’’𑀢𑀺 𑀤𑁆𑀯𑁂𑀯 𑀇𑀫𑁂 𑀥𑀫𑁆𑀫𑀸, 𑀦 𑀏𑀢𑁆𑀣 𑀓𑁄𑀘𑀺 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸𑀢𑀺 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀏𑀢𑁆𑀢𑀸𑀯𑀢𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀤𑀲𑁆𑀲𑀺𑀢𑀸. 𑀢𑀁 𑀧𑀦𑁂𑀢𑀁 𑀦𑀸𑀫𑀭𑀽𑀧𑀁 𑀦 𑀅𑀳𑁂𑀢𑀼𑀓𑀁. 𑀬𑀲𑁆𑀫𑀸 𑀲𑀩𑁆𑀩𑀁 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀘 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀳𑁂𑀢𑀼𑀓𑀁. 𑀓𑀻𑀤𑀺𑀲𑁂𑀦 𑀳𑁂𑀢𑀼𑀦𑀸? 𑀦 𑀇𑀲𑁆𑀲𑀭𑀸𑀤𑀺𑀯𑀺𑀲𑀫𑀳𑁂𑀢𑀼𑀦𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁪𑁪𑁭) 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁. 𑀲𑀳𑁂𑀢𑀼𑀓𑀢𑁆𑀢𑀸 𑀏𑀯 𑀲𑀧𑀘𑁆𑀘𑀬𑀁. 𑀅𑀯𑀺𑀚𑁆𑀚𑀸𑀤𑀬𑁄𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀼𑀧𑀸𑀤𑀸𑀦𑀓𑀫𑁆𑀫𑀸𑀳𑀸𑀭𑀸𑀤𑀬𑁄. 𑀏𑀯𑀦𑁆𑀢𑀺 ‘‘𑀢𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀯𑀺𑀚𑁆𑀚𑀸𑀤𑀺𑀓𑁂 𑀧𑀘𑁆𑀘𑀬𑁂 𑀘𑁂𑀯 𑀭𑀽𑀧𑀯𑁂𑀤𑀦𑀸𑀤𑀺𑀓𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂 𑀘 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀢𑀡𑁆𑀳𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺 (𑀧𑀝𑀺. 𑀫. 𑁧.𑁫𑁦). 𑀏𑀢𑁆𑀢𑀸𑀯𑀢𑀸 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺.

𑀳𑀼𑀢𑁆𑀯𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸. 𑀅𑀪𑀸𑀯𑀝𑁆𑀞𑁂𑀦𑀸𑀢𑀺 𑀢𑀤𑀦𑀦𑁆𑀢𑀭𑀫𑁂𑀯 𑀯𑀺𑀦𑀲𑁆𑀲𑀦𑀝𑁆𑀞𑁂𑀦. 𑀅𑀦𑀺𑀘𑁆𑀘𑀸𑀢𑀺 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸. 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀻𑀢𑀺 𑀢𑁂𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀦𑀺𑀘𑁆𑀘𑀢𑀸𑀲𑀗𑁆𑀔𑀸𑀢𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀦𑀺𑀭𑁄𑀧𑁂𑀢𑀺. 𑀢𑀢𑁄𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀭𑁄𑀧𑀦𑀢𑁄 𑀧𑀭𑀁, 𑀢𑀢𑁄 𑀯𑀸 𑀅𑀦𑀺𑀘𑁆𑀘𑀪𑀸𑀯𑀢𑁄. 𑀉𑀤𑀬𑀩𑁆𑀩𑀬𑀧𑁆𑀧𑀝𑀺𑀧𑀻𑀴𑀦𑀸𑀓𑀸𑀭𑁂𑀦𑀸𑀢𑀺 𑀉𑀧𑁆𑀧𑀸𑀤𑀦𑀺𑀭𑁄𑀥𑁂𑀳𑀺 𑀧𑀢𑀺 𑀧𑀢𑀺 𑀅𑀪𑀺𑀓𑁆𑀔𑀡𑀁 𑀧𑀻𑀴𑀦𑀸𑀓𑀸𑀭𑁂𑀦 𑀳𑁂𑀢𑀼𑀦𑀸 𑀤𑀼𑀓𑁆𑀔𑀸 𑀅𑀦𑀺𑀝𑁆𑀞𑀸, 𑀤𑀼𑀓𑁆𑀔𑀫𑀸 𑀯𑀸. 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦𑀸𑀢𑀺 𑀓𑀲𑁆𑀲𑀘𑀺 𑀯𑀲𑁂𑀦 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦. 𑀅𑀦𑀢𑁆𑀢𑀸𑀢𑀺 𑀦 𑀲𑀬𑀁 𑀅𑀢𑁆𑀢𑀸, 𑀦𑀸𑀧𑀺 𑀦𑁂𑀲𑀁 𑀓𑁄𑀘𑀺 𑀅𑀢𑁆𑀢𑀸 𑀅𑀢𑁆𑀣𑀻𑀢𑀺 𑀅𑀦𑀢𑁆𑀢𑀸𑀢𑀺. 𑀢𑀺𑀮𑀓𑁆𑀔𑀡𑀁𑀆𑀭𑁄𑀧𑁂𑀢𑁆𑀯𑀸𑀢𑀺 𑀏𑀯𑀁 𑀅𑀦𑀺𑀘𑁆𑀘𑀲𑁆𑀲 𑀤𑀼𑀓𑁆𑀔𑀪𑀸𑀯𑀢𑁄, 𑀤𑀼𑀓𑁆𑀔𑀲𑁆𑀲 𑀘 𑀅𑀦𑀢𑁆𑀢𑀪𑀸𑀯𑀢𑁄 𑀔𑀦𑁆𑀥𑀧𑀜𑁆𑀘𑀓𑁂 𑀢𑀺𑀯𑀺𑀥𑀫𑁆𑀧𑀺 𑀲𑀸𑀫𑀜𑁆𑀜𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸. 𑀲𑀫𑁆𑀫𑀲𑀦𑁆𑀢𑁄𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑁆𑀧𑀦𑁆𑀦𑁂 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑁂 𑀧𑀳𑀸𑀬 𑀫𑀕𑁆𑀕𑀸𑀫𑀕𑁆𑀕𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀺𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀕𑁄𑀢𑁆𑀭𑀪𑀼𑀜𑀸𑀡𑀸𑀦𑀦𑁆𑀢𑀭𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺.

𑀏𑀓𑀧𑀝𑀺𑀯𑁂𑀥𑁂𑀦𑀸𑀢𑀺 𑀏𑀓𑁂𑀦𑁂𑀯 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀧𑀝𑀺𑀯𑁂𑀥𑁄 𑀧𑀝𑀺𑀖𑀸𑀢𑀸𑀪𑀸𑀯𑁂𑀦 𑀯𑀺𑀲𑀬𑁂 𑀦𑀺𑀲𑁆𑀲𑀗𑁆𑀕𑀘𑀸𑀭𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀺𑀚𑁆𑀛𑀦𑀁. 𑀅𑀪𑀺𑀲𑀫𑀬𑁄 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀅𑀥𑀺𑀕𑀫𑀦𑀲𑀗𑁆𑀔𑀸𑀢𑁄 𑀅𑀯𑀩𑁄𑀥𑁄. ‘‘𑀇𑀤𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀬𑀸𑀣𑀸𑀯𑀢𑁄 𑀚𑀸𑀦𑀦𑀫𑁂𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁄, 𑀇𑀤𑀜𑁆𑀘 𑀬𑀣𑀸 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀤𑀼𑀓𑁆𑀔𑀲𑁆𑀲 𑀲𑀭𑀽𑀧𑀸𑀤𑀺𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀧𑀦 𑀫𑀕𑁆𑀕𑀜𑀸𑀡𑀲𑁆𑀲 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀦𑀢𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀺𑀜𑁆𑀘𑀲𑁆𑀲 𑀔𑀡𑁂’’𑀢𑀺𑀆𑀤𑀺. 𑀧𑀳𑀻𑀦𑀲𑁆𑀲 𑀧𑀼𑀦 𑀅𑀧𑀳𑀸𑀢𑀩𑁆𑀩𑀢𑀸𑀬 𑀧𑀓𑀝𑁆𑀞𑀁 𑀳𑀸𑀦𑀁 𑀘𑀚𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀁 𑀧𑀳𑀸𑀦𑀁, 𑀧𑀳𑀸𑀦𑀫𑁂𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀧𑀳𑀸𑀦𑀧𑀝𑀺𑀯𑁂𑀥𑁄. 𑀅𑀬𑀫𑁆𑀧𑀺 𑀬𑁂𑀦 𑀓𑀺𑀮𑁂𑀲𑁂𑀦 𑀅𑀧𑁆𑀧𑀳𑀻𑀬𑀫𑀸𑀦𑁂𑀦 𑀫𑀕𑁆𑀕𑀪𑀸𑀯𑀦𑀸𑀬 𑀦 𑀪𑀯𑀺𑀢𑀩𑁆𑀩𑀁, 𑀅𑀲𑀢𑀺 𑀘 𑀫𑀕𑁆𑀕𑀪𑀸𑀯𑀦𑀸𑀬 𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀧𑀤𑀖𑀸𑀢𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑀲𑁆𑀲 𑀜𑀸𑀡𑀲𑁆𑀲 𑀢𑀣𑀸𑀧𑀯𑀢𑁆𑀢𑀺𑀬𑀸 𑀧𑀝𑀺𑀖𑀸𑀢𑀸𑀪𑀸𑀯𑁂𑀦 𑀦𑀺𑀲𑁆𑀲𑀗𑁆𑀕𑀘𑀸𑀭𑀁 𑀉𑀧𑀸𑀤𑀸𑀬 𑀏𑀯𑀁 𑀯𑀼𑀢𑁆𑀢𑁄. 𑀲𑀘𑁆𑀙𑀺𑀓𑀺𑀭𑀺𑀬𑀸 𑀧𑀘𑁆𑀘𑀓𑁆𑀔𑀓𑀭𑀡𑀁 𑀅𑀦𑀼𑀲𑁆𑀲𑀯𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸𑀤𑀺𑀓𑁂 𑀫𑀼𑀜𑁆𑀘𑀺𑀢𑁆𑀯𑀸𑀯 𑀲𑀭𑀽𑀧𑀢𑁄 𑀆𑀭𑀫𑁆𑀫𑀡𑀓𑀭𑀡𑀁 ‘‘𑀇𑀤𑀁 𑀢’’𑀦𑁆𑀢𑀺 𑀬𑀸𑀣𑀸𑀯𑀲𑀪𑀸𑀯𑀢𑁄 𑀕𑀳𑀡𑀁, 𑀲𑀸 𑀏𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁄. 𑀅𑀬𑀫𑁆𑀧𑀺 𑀬𑀲𑁆𑀲 𑀆𑀯𑀭𑀡𑀲𑁆𑀲 𑀅𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀜𑀸𑀡𑀁 𑀦𑀺𑀭𑁄𑀥𑀁 𑀆𑀮𑀫𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀢𑀁 𑀲𑀭𑀽𑀧𑀢𑁄 𑀯𑀺𑀪𑀸𑀯𑀺𑀢𑀫𑁂𑀯 𑀧𑀯𑀢𑁆𑀢𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑁄.

𑀪𑀸𑀯𑀦𑀸 𑀉𑀧𑁆𑀧𑀸𑀤𑀦𑀸 𑀯𑀟𑁆𑀠𑀦𑀸 𑀘. 𑀢𑀢𑁆𑀣 𑀧𑀞𑀫𑀫𑀕𑁆𑀕𑁂 𑀉𑀧𑁆𑀧𑀸𑀤𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀤𑀼𑀢𑀺𑀬𑀸𑀤𑀻𑀲𑀼 𑀯𑀟𑁆𑀠𑀦𑀝𑁆𑀞𑁂𑀦, 𑀉𑀪𑀬𑀢𑁆𑀣𑀸𑀧𑀺 𑀯𑀸 𑀉𑀪𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀞𑀫𑀫𑀕𑁆𑀕𑁄𑀧𑀺 𑀳𑀺 𑀬𑀣𑀸𑀭𑀳𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀁 𑀧𑀯𑀢𑁆𑀢𑀁 𑀧𑀭𑀺𑀚𑀸𑀦𑀦𑀸𑀤𑀺𑀁 𑀯𑀟𑁆𑀠𑁂𑀦𑁆𑀢𑁄 𑀧𑀯𑀢𑁆𑀢𑁄𑀢𑀺 𑀢𑀢𑁆𑀣𑀸𑀧𑀺 𑀯𑀟𑁆𑀠𑀦𑀝𑁆𑀞𑁂𑀦 𑀪𑀸𑀯𑀦𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀧𑁆𑀧𑀳𑀸𑀦𑀢𑁄 𑀧𑀼𑀕𑁆𑀕𑀮𑀦𑁆𑀢𑀭𑀲𑀸𑀥𑀦𑀢𑁄 𑀘 𑀉𑀧𑁆𑀧𑀸𑀤𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀲𑀸 𑀏𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀪𑀸𑀯𑀦𑀸𑀧𑀝𑀺𑀯𑁂𑀥𑁄. 𑀅𑀬𑀫𑁆𑀧𑀺 𑀬𑀣𑀸 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀫𑀕𑁆𑀕𑀥𑀫𑁆𑀫𑀸𑀦𑀁 𑀲𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀢𑀺𑀝𑁆𑀞𑀦𑁆𑀢𑀼 𑀢𑀸𑀯 𑀬𑀣𑀸𑀥𑀺𑀕𑀢𑀸 𑀫𑀕𑁆𑀕𑀥𑀫𑁆𑀫𑀸, 𑀬𑀣𑀸𑀧𑀯𑀢𑁆𑀢𑁂𑀲𑀼 𑀨𑀮𑁂𑀲𑀼𑀧𑀺 𑀅𑀬𑀁 𑀬𑀣𑀸𑀥𑀺𑀕𑀢𑀲𑀘𑁆𑀘𑀥𑀫𑁆𑀫𑁂𑀲𑀼 𑀯𑀺𑀬 𑀯𑀺𑀕𑀢𑀲𑀫𑁆𑀫𑁄𑀳𑁄𑀯 𑀳𑁄𑀢𑀺 𑀲𑁂𑀓𑁆𑀔𑁄𑀧𑀺 𑀲𑀫𑀸𑀦𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄’’𑀢𑀺 (𑀫𑀳𑀸𑀯. 𑁨𑁭). 𑀬𑀣𑀸 𑀘𑀲𑁆𑀲 𑀥𑀫𑁆𑀫𑀸 𑀢𑀸𑀲𑀁 𑀚𑁄𑀢𑀺𑀢𑀸 𑀬𑀣𑀸𑀥𑀺𑀕𑀢𑀲𑀘𑁆𑀘𑀥𑀫𑁆𑀫𑀸𑀯𑀮𑀫𑁆𑀩𑀺𑀦𑀺𑀬𑁄 𑀫𑀕𑁆𑀕𑀯𑀻𑀣𑀺𑀢𑁄 𑀧𑀭𑀢𑁄 𑀫𑀕𑁆𑀕𑀨𑀮𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀯𑀢𑁆𑀢𑀦𑁆𑀢𑀺. 𑀤𑀼𑀓𑁆𑀔𑀲𑀘𑁆𑀘𑀥𑀫𑁆𑀫𑀸 𑀳𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀬𑁄. 𑀅𑀬𑀜𑁆𑀘 𑀅𑀢𑁆𑀣𑀯𑀡𑁆𑀡𑀦𑀸 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦𑀸𑀢𑀺𑀆𑀤𑀻𑀲𑀼𑀧𑀺 𑀯𑀺𑀪𑀸𑀯𑁂𑀢𑀩𑁆𑀩𑀸. 𑀓𑀺𑀘𑁆𑀘𑀢𑁄𑀢𑀺 𑀅𑀲𑀫𑁆𑀫𑁄𑀳𑀢𑁄. 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀢𑁄𑀢𑀺 𑀏𑀢𑁆𑀣 ‘‘𑀆𑀭𑀫𑁆𑀫𑀡𑀢𑁄𑀧𑀻’’𑀢𑀺 𑀧𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀤𑀝𑁆𑀞𑀩𑁆𑀩𑁄 𑀦𑀺𑀭𑁄𑀥𑁂𑀧𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀲𑁆𑀲 𑀮𑀩𑁆𑀪𑀦𑀢𑁄. 𑀏𑀢𑀲𑁆𑀲𑀸𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲.

𑀧𑀜𑁆𑀜𑀯𑀸𑀢𑀺 𑀦𑀺𑀤𑁆𑀤𑀺𑀝𑁆𑀞𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀜𑁆𑀜𑀯𑀦𑁆𑀢𑀢𑀸𑀬 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀧𑀸𑀴𑀺𑀢𑁄𑀢𑀺 𑀥𑀫𑁆𑀫𑀢𑁄. 𑀅𑀢𑁆𑀣𑀢𑁄𑀢𑀺 𑀅𑀝𑁆𑀞𑀓𑀣𑀸𑀢𑁄. 𑀅𑀦𑀼𑀲𑀦𑁆𑀥𑀺𑀢𑁄𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀁𑀢𑀁𑀅𑀦𑀼𑀲𑀦𑁆𑀥𑀺𑀢𑁄. 𑀧𑀼𑀩𑁆𑀩𑀸𑀧𑀭𑀢𑁄𑀢𑀺 𑀧𑀼𑀩𑁆𑀩𑁂𑀦𑀸𑀧𑀭𑀲𑁆𑀲 𑀲𑀁𑀲𑀦𑁆𑀤𑀦𑀢𑁄. 𑀲𑀗𑁆𑀕𑀻𑀢𑀺𑀓𑁆𑀓𑀫𑁂𑀦 𑀘𑁂𑀢𑁆𑀣 𑀧𑀼𑀩𑁆𑀩𑀸𑀧𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀁𑀢𑀁𑀤𑁂𑀲𑀦𑀸𑀬𑀫𑁂𑀯 𑀯𑀸 𑀧𑀼𑀩𑁆𑀩𑀪𑀸𑀕𑁂𑀦 𑀅𑀧𑀭𑀪𑀸𑀕𑀲𑁆𑀲 𑀲𑀁𑀲𑀦𑁆𑀤𑀦𑀢𑁄. 𑀯𑀺𑀜𑁆𑀜𑀸𑀡𑀘𑀭𑀺𑀢𑁄𑀢𑀺 𑀯𑀺𑀚𑀸𑀦𑀦𑀘𑀭𑀺𑀢𑁄 𑀯𑀻𑀫𑀁𑀲𑀦𑀘𑀭𑀺𑀢𑁄 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀯𑀺𑀘𑀸𑀭𑀡𑀸𑀘𑀸𑀭𑀯𑁂𑀧𑀼𑀮𑁆𑀮𑀢𑁄. 𑀧𑀜𑁆𑀜𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑁄 𑀫𑀕𑁆𑀕𑁂𑀦𑀸𑀕𑀢𑀸𑀬 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄. 𑀅𑀚𑁆𑀚 𑀅𑀚𑁆𑀚𑁂𑀯 𑀅𑀭𑀳𑀢𑁆𑀢𑀦𑁆𑀢𑀺 𑀇𑀢𑁆𑀢𑀭𑀁 𑀅𑀢𑀺𑀔𑀺𑀧𑁆𑀧𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀜𑀯𑀸𑀧𑀓𑁆𑀔𑀁 𑀪𑀚𑀢𑀺 𑀲𑁂𑀓𑁆𑀔𑀧𑀭𑀺𑀬𑀸𑀬𑀲𑀩𑁆𑀪𑀸𑀯𑀢𑁄. 𑀲𑀼𑀢𑁆𑀢𑁂 𑀧𑀦 𑀧𑀝𑀺𑀯𑁂𑀥𑁄𑀯 𑀓𑀣𑀺𑀢𑁄 𑀲𑀘𑁆𑀘𑀸𑀪𑀺𑀲𑀫𑀬𑀯𑀲𑁂𑀦 𑀆𑀕𑀢𑀢𑁆𑀢𑀸.

𑀏𑀲𑀸𑀢𑀺 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑁄 𑀅𑀭𑀺𑀬𑀧𑀼𑀕𑁆𑀕𑀮𑁄. 𑀓𑀫𑁆𑀫𑀓𑀸𑀭𑀓𑀘𑀺𑀢𑁆𑀢𑀦𑁆𑀢𑀺 𑀪𑀸𑀯𑀦𑀸𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀦𑀓𑀘𑀺𑀢𑁆𑀢𑀁. 𑀲𑀼𑀔𑀯𑁂𑀤𑀦𑀫𑁆𑀧𑀺 𑀯𑀺𑀚𑀸𑀦𑀸𑀢𑀻𑀢𑀺 𑀓𑁄 𑀯𑁂𑀤𑀺𑀬𑀢𑀺, 𑀓𑀲𑁆𑀲 𑀯𑁂𑀤𑀦𑀸, 𑀓𑀺𑀁𑀓𑀸𑀭𑀡𑀸 𑀯𑁂𑀤𑀦𑀸, 𑀲𑁄𑀧𑀺 𑀓𑀲𑁆𑀲𑀘𑀺 𑀅𑀪𑀸𑀯𑀕𑁆𑀕𑀳𑀡𑀫𑀼𑀔𑁂𑀦 𑀲𑀼𑀔𑀁 𑀯𑁂𑀤𑀦𑀁 𑀲𑀪𑀸𑀯𑀢𑁄 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀢𑁄 𑀘 𑀬𑀣𑀸𑀪𑀽𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀲𑀼𑀔𑀁 𑀯𑁂𑀤𑀦𑀁 𑀯𑀺𑀚𑀸𑀦𑀸𑀢𑀺 𑀦𑀸𑀫. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀸 ‘‘𑀲𑀢𑀺𑀧𑀝𑁆𑀞𑀸𑀦𑁂’’𑀢𑀺 𑀇𑀫𑀺𑀦𑀸 𑀲𑀢𑀺𑀧𑀝𑁆𑀞𑀸𑀦𑀓𑀣𑀁 𑀉𑀧𑀮𑀓𑁆𑀔𑁂𑀢𑀺. 𑀢𑀸𑀬 𑀳𑀺 𑀢𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀲𑁆𑀫𑀸 𑀢𑀁𑀲𑀁𑀯𑀡𑁆𑀡𑀦𑀸𑀬𑀫𑁆𑀧𑀺 (𑀤𑀻. 𑀦𑀺. 𑀝𑀻. 𑁨.𑁩𑁮𑁦) 𑀯𑀼𑀢𑁆𑀢𑀦𑀬𑁂𑀦 𑀢𑀲𑁆𑀲𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀫𑀜𑁆𑀘𑁂𑀢𑀁 𑀯𑀺𑀜𑁆𑀜𑀸𑀡𑀁 𑀯𑁂𑀤𑀦𑀸𑀢𑁄 𑀅𑀜𑁆𑀜𑀫𑁆𑀧𑀺 𑀆𑀭𑀫𑁆𑀫𑀡𑀁 𑀯𑀺𑀚𑀸𑀦𑀸𑀢𑀺, 𑀅𑀦𑀦𑁆𑀢𑀭𑀯𑀸𑀭𑁂 𑀧𑀦 𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀇𑀥 𑀅𑀭𑀽𑀧𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀔𑀦𑁆𑀢𑀺𑀧𑀺 𑀯𑀺𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀁, 𑀧𑀼𑀘𑁆𑀙𑀦𑁆𑀢𑀲𑁆𑀲 𑀯𑀸 𑀅𑀚𑁆𑀛𑀸𑀲𑀬𑀯𑀲𑁂𑀦.

𑀲𑀁𑀲𑀝𑁆𑀞𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀏𑀓𑀼𑀧𑁆𑀧𑀸𑀤𑀸𑀤𑀺𑀮𑀓𑁆𑀔𑀡𑁂𑀦 𑀲𑀁𑀬𑁄𑀕𑀝𑁆𑀞𑁂𑀦𑀸’’𑀢𑀺. 𑀯𑀺𑀲𑀁𑀲𑀝𑁆𑀞𑀸𑀢𑀺 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀜𑁆𑀜𑀪𑀽𑀫𑀺𑀓𑀲𑁆𑀲 𑀅𑀜𑁆𑀜𑀪𑀽𑀫𑀺𑀤𑀲𑁆𑀲𑀦𑁂𑀦𑁂𑀯 𑀯𑀺𑀦𑀸𑀲𑁂𑀢𑁆𑀯𑀸, 𑀲𑀁𑀪𑀺𑀦𑁆𑀤𑀺𑀢𑁆𑀯𑀸 𑀯𑀸. 𑀲𑀁𑀲𑀝𑁆𑀞𑀪𑀸𑀯𑀁 𑀧𑀼𑀘𑁆𑀙𑀢𑀻𑀢𑀺 𑀢𑀁𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀁 𑀲𑀁𑀲𑀝𑁆𑀞𑀪𑀸𑀯𑀁 𑀧𑀼𑀘𑁆𑀙𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀧𑀼𑀘𑁆𑀙𑀸𑀬 𑀅𑀯𑀲𑀭𑁄 𑀯𑀺𑀲𑀁𑀲𑀝𑁆𑀞𑀪𑀸𑀯𑀸𑀲𑀗𑁆𑀓𑀸𑀬 𑀏𑀯 𑀅𑀪𑀸𑀯𑀢𑁄? 𑀦, 𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑁆𑀢𑀭𑀕𑀢𑀸𑀦𑀁 𑀫𑀕𑁆𑀕𑀧𑀜𑁆𑀜𑀸𑀫𑀕𑁆𑀕𑀯𑀺𑀜𑁆𑀜𑀸𑀡𑀸𑀦𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀸𑀦𑀜𑁆𑀘 𑀯𑁄𑀫𑀺𑀲𑁆𑀲𑀓𑀲𑀁𑀲𑀝𑁆𑀞𑀪𑀸𑀯𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸𑀢𑀺 𑀅𑀜𑁆𑀜𑀫𑀜𑁆𑀜𑀢𑁄 𑀯𑀺𑀯𑁂𑀘𑁂𑀢𑁆𑀯𑀸. 𑀦𑀸𑀦𑀸𑀓𑀭𑀡𑀁 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀇𑀤𑀁 𑀓𑁂𑀯𑀮𑀁 𑀲𑀁𑀲𑀝𑁆𑀞𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀪𑀸𑀯𑀪𑁂𑀤𑀁, 𑀲𑀪𑀸𑀯𑀪𑁂𑀤𑀢𑁄 𑀧𑀦 𑀦𑀸𑀦𑀸𑀓𑀭𑀡𑀁 𑀦𑁂𑀲𑀁 𑀧𑀸𑀓𑀝𑀫𑁂𑀯. 𑀢𑁂𑀦𑀸𑀳 ‘‘𑀆𑀭𑀫𑁆𑀫𑀡𑀢𑁄 𑀯𑀸 𑀯𑀢𑁆𑀣𑀼𑀢𑁄 𑀯𑀸 𑀉𑀧𑁆𑀧𑀸𑀤𑀢𑁄 𑀯𑀸 𑀦𑀺𑀭𑁄𑀥𑀢𑁄 𑀯𑀸’’𑀢𑀺. 𑀇𑀤𑀸𑀦𑀺 𑀢𑀫𑁂𑀯 𑀲𑀪𑀸𑀯𑀪𑁂𑀤𑀁 𑀯𑀺𑀲𑀬𑀪𑁂𑀤𑁂𑀦 𑀲𑀼𑀝𑁆𑀞𑀼 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀁 𑀢𑁂𑀲𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀲𑀬𑁄𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀇𑀲𑁆𑀲𑀭𑀺𑀬𑀪𑀽𑀫𑀺, 𑀬𑁂𑀦 𑀘𑀺𑀢𑁆𑀢𑀧𑀜𑁆𑀜𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀧𑀼𑀩𑁆𑀩𑀗𑁆𑀕𑀫𑀢𑀸 𑀯𑀼𑀘𑁆𑀘𑀢𑀺.

𑀓𑀸𑀫𑀜𑁆𑀘 𑀯𑀺𑀧𑀲𑁆𑀲𑀦𑀸𑀧𑀺 𑀧𑀜𑁆𑀜𑀸𑀯𑀲𑁂𑀦𑁂𑀯 𑀓𑀺𑀘𑁆𑀘𑀓𑀸𑀭𑀻, 𑀫𑀕𑁆𑀕𑁄𑀧𑀺 𑀯𑀺𑀜𑁆𑀜𑀸𑀡𑀲𑀳𑀺𑀢𑁄𑀯, 𑀦 𑀓𑁂𑀯𑀮𑁄, 𑀬𑀣𑀸 𑀧𑀦 𑀮𑁄𑀓𑀺𑀬𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀧𑀥𑀸𑀦𑀁 𑀢𑀢𑁆𑀣𑀲𑁆𑀲 𑀥𑁄𑀭𑀬𑁆𑀳𑀪𑀸𑀯𑁂𑀦 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑀁 ‘‘𑀙𑀤𑁆𑀯𑀸𑀭𑀸𑀥𑀺𑀧𑀢𑀺 𑀭𑀸𑀚𑀸’’𑀢𑀺 (𑀥. 𑀧. 𑀅𑀝𑁆𑀞. 𑁨.𑁧𑁮𑁧) 𑀯𑀼𑀘𑁆𑀘𑀢𑀺, 𑀏𑀯𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀧𑀜𑁆𑀜𑀸 𑀧𑀥𑀸𑀦𑀸 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀲𑁆𑀲 𑀯𑀺𑀲𑁂𑀲𑀢𑁄 𑀢𑀤𑀥𑀻𑀦𑀢𑁆𑀢𑀸. 𑀢𑀣𑀸 𑀳𑀺 𑀫𑀕𑁆𑀕𑀥𑀫𑁆𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀺 𑀏𑀯 𑀧𑀞𑀫𑀁 𑀕𑀳𑀺𑀢𑀸. 𑀅𑀬𑀜𑁆𑀘 𑀦𑁂𑀲𑀁 𑀯𑀺𑀲𑀬𑀯𑀲𑁂𑀦 𑀧𑀯𑀢𑁆𑀢𑀺𑀪𑁂𑀤𑁄, 𑀢𑀣𑀸 𑀘 𑀧𑀜𑁆𑀜𑀸𑀧𑀦𑀯𑀺𑀥𑀺 𑀦 𑀓𑁂𑀯𑀮𑀁 𑀣𑁂𑀭𑁂𑀳𑁂𑀯 𑀤𑀲𑁆𑀲𑀺𑀢𑁄, 𑀅𑀧𑀺𑀘 𑀔𑁄 𑀪𑀕𑀯𑀢𑀸𑀧𑀺 𑀤𑀲𑁆𑀲𑀺𑀢𑁄𑀢𑀺 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀬𑀢𑁆𑀣 𑀧𑀜𑁆𑀜𑀸 𑀦 𑀮𑀩𑁆𑀪𑀢𑀺, 𑀢𑀢𑁆𑀣 𑀘𑀺𑀢𑁆𑀢𑀯𑀲𑁂𑀦 𑀧𑀼𑀘𑁆𑀙𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺 𑀬𑀣𑀸 ‘‘𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁩𑁨-𑁧𑁩𑁫). 𑀬𑀢𑁆𑀣 𑀧𑀦 𑀧𑀜𑁆𑀜𑀸 𑀮𑀩𑁆𑀪𑀢𑀺, 𑀢𑀢𑁆𑀣𑀸𑀧𑀺 𑀘𑀺𑀢𑁆𑀢𑀯𑀲𑁂𑀦 𑀚𑁄𑀢𑀦𑀸 𑀳𑁄𑀢𑀺 𑀬𑀣𑀸 𑁋 ‘‘𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀺 𑀲𑀦𑁆𑀦𑀺𑀲𑀸𑀤𑁂𑀢𑀺 𑀏𑀓𑁄𑀤𑀺𑀁 𑀓𑀭𑁄𑀢𑀺 𑀲𑀫𑀸𑀤𑀳𑀢𑀺 (𑀲𑀁. 𑀦𑀺. 𑁪.𑁩𑁩𑁨), 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁧). 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀮𑁄𑀓𑀺𑀬𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀯𑀲𑁂𑀦, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀧𑀜𑁆𑀜𑀸𑀯𑀲𑁂𑀦 𑀘𑁄𑀤𑀦𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑀸 𑀢𑁂 𑀪𑀺𑀓𑁆𑀔𑀼 𑀧𑀜𑁆𑀜𑀸 𑀅𑀥𑀺𑀕𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁂𑀪𑀼𑀬𑁆𑀬𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀓𑀢𑁆𑀣𑀘𑀺 𑀮𑁄𑀓𑀺𑀬𑀥𑀫𑁆𑀫𑀸 𑀧𑀜𑁆𑀜𑀸𑀲𑀻𑀲𑁂𑀦𑀧𑀺 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺 𑁋 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀺𑀦𑁄 𑀓𑀸𑀫𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀲𑀫𑀼𑀤𑀸𑀘𑀭𑀦𑁆𑀢𑀺 𑀳𑀸𑀦𑀪𑀸𑀕𑀺𑀦𑀻 𑀧𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁧). 𑀲𑀜𑁆𑀜𑀸𑀲𑀻𑀲𑁂𑀦𑀧𑀺 𑁋 ‘‘𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀢𑀺 𑀯𑀸 𑀲𑁂𑀲𑀭𑀽𑀧𑀸𑀭𑀽𑀧𑀲𑀜𑁆𑀜𑀸𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸, 𑀉𑀤𑀸𑀳𑀼 𑀦𑀸𑀦𑀢𑁆𑀣𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑀅𑀝𑁆𑀞. 𑁪𑁫.𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸). 𑀢𑀣𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀧𑀺 𑀓𑀢𑁆𑀣𑀘𑀺 𑀘𑀺𑀢𑁆𑀢𑀲𑀻𑀲𑁂𑀦 𑀦𑀺𑀤𑁆𑀤𑀺𑀲𑀻𑀬𑀦𑁆𑀢𑀺 𑁋 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀘𑀺𑀢𑁆𑀢𑀁 𑀪𑀸𑀯𑁂𑀢𑀻’’𑀢𑀺 (𑀥. 𑀲. 𑁨𑁭𑁭), 𑀢𑀣𑀸 𑀨𑀲𑁆𑀲𑀸𑀤𑀺𑀲𑀻𑀲𑁂𑀦𑀧𑀺 𑁋 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀨𑀲𑁆𑀲𑀁 𑀪𑀸𑀯𑁂𑀢𑀺, 𑀯𑁂𑀤𑀦𑀁 𑀲𑀜𑁆𑀜𑀁 𑀘𑁂𑀢𑀦𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁨𑁭𑁭).

𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀽𑀢𑀺 𑀲𑀧𑁆𑀧𑀼𑀭𑀺𑀲𑀲𑁂𑀯𑀦𑀸, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀻𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀓𑀸𑀭𑀡𑁂𑀲𑀼. 𑀓𑀸𑀫𑀁 𑀘𑁂𑀢𑁂𑀲𑀼 𑀲𑀢𑀺𑀆𑀤𑀬𑁄𑀧𑀺 𑀥𑀫𑁆𑀫𑀸 𑀇𑀘𑁆𑀙𑀺𑀢𑀩𑁆𑀩𑀸𑀯 𑀢𑁂𑀳𑀺 𑀯𑀺𑀦𑀸 𑀢𑁂𑀲𑀁 𑀅𑀲𑀫𑁆𑀪𑀯𑀢𑁄, 𑀢𑀣𑀸𑀧𑀺 𑀘𑁂𑀢𑁆𑀣 𑀲𑀤𑁆𑀥𑀸 𑀯𑀺𑀲𑁂𑀲𑀢𑁄 𑀓𑀺𑀘𑁆𑀘𑀓𑀸𑀭𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀤𑁆𑀤𑁄 𑀏𑀯 𑀳𑀺 𑀲𑀧𑁆𑀧𑀼𑀭𑀺𑀲𑁂 𑀧𑀬𑀺𑀭𑀼𑀧𑀸𑀲𑀢𑀺, 𑀲𑀤𑁆𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀬𑁄𑀦𑀺𑀲𑁄 𑀘 𑀫𑀦𑀲𑀺 𑀓𑀭𑁄𑀢𑀺, 𑀅𑀭𑀺𑀬𑀫𑀕𑁆𑀕𑀲𑁆𑀲 𑀘 𑀅𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀏𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀺𑀦𑁆𑀤𑁆𑀭𑀺𑀬𑁂𑀲𑀼𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀽𑀢𑀺 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀪𑀸𑀯𑀦𑀸𑀬. 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀽𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼 𑀲𑀤𑁆𑀥𑀸 𑀯𑀺𑀬 𑀲𑀫𑁆𑀫𑀧𑁆𑀧𑀥𑀸𑀦𑀪𑀸𑀯𑀦𑀸𑀬 𑀯𑀻𑀭𑀺𑀬𑀁 𑀯𑀺𑀬 𑀘 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑁋 ‘‘𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’’𑀦𑁆𑀢𑀺 (𑀤𑀻. 𑀦𑀺. 𑁨.𑁩𑁭𑁩; 𑀫. 𑀦𑀺. 𑁧.𑁧𑁦𑁬; 𑀲𑀁. 𑀦𑀺. 𑁫.𑁩𑁮𑁪, 𑁪𑁦𑁭) 𑀯𑀘𑀦𑀢𑁄 𑀧𑀼𑀩𑁆𑀩𑀪𑀸𑀕𑁂 𑀓𑀺𑀘𑁆𑀘𑀢𑁄 𑀲𑀢𑀺 𑀅𑀥𑀺𑀓𑀸 𑀇𑀘𑁆𑀙𑀺𑀢𑀩𑁆𑀩𑀸. 𑀏𑀯𑀁 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀲𑀫𑀸𑀥𑀺, ‘‘𑀅𑀭𑀺𑀬𑀲𑀘𑁆𑀘𑀪𑀸𑀯𑀦𑀸 𑀧𑀜𑁆𑀜𑀸𑀪𑀸𑀯𑀦𑀸’’𑀢𑀺 𑀓𑀢𑁆𑀯𑀸 𑀢𑀢𑁆𑀣 𑀧𑀜𑁆𑀜𑀸 𑀧𑀼𑀩𑁆𑀩𑀪𑀸𑀕𑁂 𑀅𑀥𑀺𑀓𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄, 𑀅𑀥𑀺𑀕𑀫𑀓𑁆𑀔𑀡𑁂 𑀧𑀦 𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀯𑀺𑀬 𑀲𑀩𑁆𑀩𑁂𑀲𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀤𑁆𑀥𑀸𑀤𑀻𑀦𑀁 𑀲𑀫𑀭𑀲𑀢𑀸𑀯 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀣𑀸 𑀳𑀺 ‘‘𑀏𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀏𑀢𑁆𑀣𑀕𑁆𑀕𑀳𑀡𑀁 𑀓𑀢𑀁. 𑀏𑀯𑀦𑁆𑀢𑀺 𑀬𑀁 𑀞𑀸𑀦𑀁, 𑀢𑀁 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀸𑀤𑀺𑀁 𑀧𑀘𑁆𑀘𑀸𑀫𑀲𑀢𑀺. 𑀲𑀯𑀺𑀲𑀬𑀲𑁆𑀫𑀺𑀁𑀬𑁂𑀯𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀯. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸 𑀓𑀣𑀺𑀢𑀸𑀢𑀺 𑀮𑁄𑀓𑀺𑀬𑀥𑀫𑁆𑀫𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀘 𑀢𑁂𑀦 𑀢𑁂𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦 𑀓𑀣𑀺𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀤𑁆𑀥𑀸𑀧𑀜𑁆𑀘𑀫𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀳 𑀧𑀯𑀢𑁆𑀢𑀫𑀸𑀦𑁂𑀲𑀼 𑀢𑀢𑁆𑀣 𑀢𑀢𑁆𑀣 𑀯𑀺𑀲𑀬𑁂 𑀲𑀤𑁆𑀥𑀸𑀤𑀻𑀦𑀁 𑀓𑀺𑀘𑁆𑀘𑀸𑀥𑀺𑀓𑀢𑀸𑀬 𑀢𑀲𑁆𑀲 𑀢𑀲𑁆𑀲𑁂𑀯 𑀤𑀝𑁆𑀞𑀩𑁆𑀩𑀢𑀸 𑀯𑀼𑀢𑁆𑀢𑀸, 𑀦 𑀲𑀩𑁆𑀩𑁂𑀲𑀁. 𑀏𑀯𑀁 𑀅𑀜𑁆𑀜𑁂𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸 𑀬𑀣𑀸𑀲𑀓𑀁 𑀯𑀺𑀲𑀬𑁂 𑀧𑀯𑀢𑁆𑀢𑀺𑀯𑀺𑀲𑁂𑀲𑀯𑀲𑁂𑀦 𑀩𑁄𑀥𑀺𑀢𑀸𑀢𑀺.

𑀇𑀤𑀸𑀦𑀺 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀅𑀢𑀺𑀭𑁂𑀓𑀓𑀺𑀘𑁆𑀘𑀢𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀺𑀤𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀭𑀸𑀚𑀧𑀜𑁆𑀘𑀫𑀸 𑀲𑀳𑀸𑀬𑀸 𑀯𑀺𑀬 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺. 𑀦𑁂𑀲𑀁 𑀓𑀻𑀴𑀦𑀢𑁆𑀣𑀁 𑀏𑀓𑀚𑁆𑀛𑀁 𑀯𑀻𑀣𑀺𑀑𑀢𑀭𑀡𑀁 𑀯𑀺𑀬 𑀇𑀦𑁆𑀤𑁆𑀭𑀺𑀬𑀸𑀦𑀁 𑀏𑀓𑀚𑁆𑀛𑀁 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀑𑀢𑀭𑀡𑀁. 𑀲𑀳𑀸𑀬𑁂𑀲𑀼 𑀧𑀞𑀫𑀸𑀤𑀻𑀦𑀁 𑀬𑀣𑀸𑀲𑀓𑀕𑁂𑀳𑁂𑀯 𑀯𑀺𑀘𑀸𑀭𑀡𑀸 𑀯𑀺𑀬 𑀲𑀤𑁆𑀥𑀸𑀤𑀻𑀦𑀁 𑀲𑁄𑀢𑀸𑀧𑀢𑁆𑀢𑀺𑀅𑀗𑁆𑀕𑀸𑀤𑀻𑀦𑀺 𑀧𑀢𑁆𑀯𑀸 𑀧𑀼𑀩𑁆𑀩𑀗𑁆𑀕𑀫𑀢𑀸. 𑀲𑀳𑀸𑀬𑁂𑀲𑀼 𑀇𑀢𑀭𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀢𑀼𑀡𑁆𑀳𑀻𑀪𑀸𑀯𑁄 𑀯𑀺𑀬 𑀲𑁂𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀢𑀤𑀦𑁆𑀯𑀬𑀢𑀸. 𑀢𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀪𑀽𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀲𑁆𑀲 𑀓𑀺𑀘𑁆𑀘𑀸𑀦𑀼𑀕𑀢𑀢𑀸. 𑀦 𑀳𑀺 𑀢𑀤𑀸 𑀢𑁂𑀲𑀁 𑀲𑀲𑀫𑁆𑀪𑀸𑀭𑀧𑀣𑀯𑀻𑀆𑀤𑀻𑀲𑀼 𑀆𑀧𑀸𑀤𑀻𑀦𑀁 𑀯𑀺𑀬 𑀓𑀺𑀘𑁆𑀘𑀁 𑀧𑀸𑀓𑀝𑀁 𑀳𑁄𑀢𑀺, 𑀲𑀤𑁆𑀥𑀸𑀤𑀻𑀦𑀁𑀬𑁂𑀯 𑀧𑀦 𑀓𑀺𑀘𑁆𑀘𑀁 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺 𑀧𑀼𑀭𑁂𑀢𑀭𑀁 𑀢𑀣𑀸𑀧𑀘𑁆𑀘𑀬𑁂𑀳𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀪𑀺𑀲𑀗𑁆𑀔𑀢𑀢𑁆𑀢𑀸. 𑀏𑀢𑁆𑀣 𑀘 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑀲𑁆𑀲 𑀪𑀸𑀯𑀦𑀸 𑀯𑀺𑀲𑁂𑀲𑀢𑁄 𑀧𑀜𑁆𑀜𑀼𑀢𑁆𑀢𑀭𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀭𑀸𑀚𑀸𑀦𑀁 𑀦𑀺𑀤𑀲𑁆𑀲𑀦𑀁 𑀓𑀢𑁆𑀯𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀯𑀼𑀢𑁆𑀢𑀁. 𑀇𑀢𑀻𑀢𑀺𑀆𑀤𑀺 𑀬𑀣𑀸𑀥𑀺𑀕𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀁.

𑀫𑀕𑁆𑀕𑀯𑀺𑀜𑁆𑀜𑀸𑀡𑀫𑁆𑀧𑀻𑀢𑀺 𑀅𑀭𑀺𑀬𑀫𑀕𑁆𑀕𑀲𑀳𑀕𑀢𑀁 𑀅𑀧𑀘𑀬𑀕𑀸𑀫𑀺𑀯𑀺𑀜𑁆𑀜𑀸𑀡𑀫𑁆𑀧𑀺. 𑀢𑀣𑁂𑀯 𑀢𑀁 𑀯𑀺𑀚𑀸𑀦𑀸𑀢𑀻𑀢𑀺 𑀲𑀘𑁆𑀘𑀥𑀫𑁆𑀫𑀁 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦𑁂𑀯 𑀯𑀺𑀚𑀸𑀦𑀸𑀢𑀺 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀫𑀕𑁆𑀕𑀸𑀦𑀼𑀓𑀽𑀮𑀢𑁆𑀢𑀸 𑀘. 𑀬𑀁 𑀯𑀺𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀯𑀺𑀚𑀸𑀦𑀦𑀧𑀚𑀸𑀦𑀦𑀸𑀦𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺, 𑀦 ‘‘𑀬𑀁 𑀧𑀚𑀸𑀦𑀸𑀢𑀻’’𑀢𑀺 𑀏𑀢𑁆𑀣 𑀯𑀺𑀬 𑀫𑀕𑁆𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀆𑀳 ‘‘𑀬𑀁 𑀲𑀗𑁆𑀔𑀸𑀭𑀕𑀢’’𑀦𑁆𑀢𑀺𑀆𑀤𑀺. 𑀢𑀣𑁂𑀯𑀸𑀢𑀺 ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦. 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀪𑀸𑀯𑀢𑁄 𑀘 𑀲𑀫𑀸𑀦𑀧𑀘𑁆𑀘𑀬𑁂𑀳𑀺 𑀲𑀳 𑀧𑀯𑀢𑁆𑀢𑀺𑀓𑀢𑀸 𑀏𑀓𑀼𑀧𑁆𑀧𑀸𑀤𑀢𑀸, 𑀢𑀢𑁄 𑀏𑀯 𑀏𑀓𑀚𑁆𑀛𑀁 𑀲𑀳𑁂𑀯 𑀦𑀺𑀭𑀼𑀚𑁆𑀛𑀦𑀁 𑀏𑀓𑀦𑀺𑀭𑁄𑀥𑀢𑀸, 𑀏𑀓𑀁𑀬𑁂𑀯 𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺 𑀏𑀓𑀯𑀢𑁆𑀣𑀼𑀓𑀢𑀸, 𑀏𑀓𑀁𑀬𑁂𑀯 𑀆𑀭𑀫𑁆𑀫𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺 𑀏𑀓𑀸𑀭𑀫𑁆𑀫𑀡𑀢𑀸. 𑀳𑁂𑀢𑀼𑀫𑁆𑀳𑀺 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀢𑁂𑀦 𑀏𑀓𑀼𑀧𑁆𑀧𑀸𑀤𑀸𑀤𑀺𑀢𑀸𑀬 𑀲𑀁𑀲𑀝𑁆𑀞𑀪𑀸𑀯𑀁 𑀲𑀸𑀥𑁂𑀢𑀺. 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀜𑁆𑀘𑁂𑀢𑀁, 𑀇𑀢𑁄 𑀢𑀻𑀳𑀺𑀧𑀺 𑀲𑀫𑁆𑀧𑀬𑀼𑀢𑁆𑀢𑀮𑀓𑁆𑀔𑀡𑀁 𑀳𑁄𑀢𑀺𑀬𑁂𑀯.

𑀫𑀕𑁆𑀕𑀧𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑀸 𑀳𑀺 𑀏𑀓𑀦𑁆𑀢𑀢𑁄 𑀪𑀸𑀯𑁂𑀢𑀩𑁆𑀩𑀸, 𑀦 𑀧𑀭𑀺𑀜𑁆𑀜𑁂𑀬𑁆𑀬𑀸, 𑀧𑀜𑁆𑀜𑀸𑀬 𑀧𑀦 𑀪𑀸𑀯𑁂𑀢𑀩𑁆𑀩𑀢𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀢𑀕𑁆𑀕𑀢𑀺𑀓𑀸𑀯 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀧𑀦𑀸’’𑀢𑀺𑀆𑀤𑀺. 𑀓𑀺𑀜𑁆𑀘𑀸𑀧𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑀯𑀺𑀜𑁆𑀜𑀸𑀡𑀫𑁆𑀧𑀺 𑀢𑀣𑁂𑀯 𑀧𑀯𑀢𑁆𑀢𑀢𑀺, 𑀢𑀲𑁆𑀲 𑀧𑀦 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀧𑀭𑀺𑀜𑁆𑀜𑁂𑀬𑁆𑀬𑀢𑀸 𑀯𑀼𑀢𑁆𑀢𑀸. 𑀢𑁂𑀦𑁂𑀯𑀸𑀳 𑁋 ‘‘𑀬𑀫𑁆𑀧𑀺 𑀢𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀢𑀫𑁆𑀧𑀺 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺.

𑁪𑁫𑁦. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀯𑁂𑀤𑀦𑀸𑀢𑀺 𑀏𑀯𑀁 𑀲𑀸𑀫𑀜𑁆𑀜𑀕𑁆𑀕𑀳𑀡𑁂 𑀲𑀢𑀺𑀧𑀺. 𑀢𑁂𑀪𑀽𑀫𑀺𑀓𑀲𑀫𑁆𑀫𑀲𑀦𑀘𑀸𑀭𑀯𑁂𑀤𑀦𑀸𑀯𑀸𑀢𑀺 𑀪𑀽𑀫𑀺𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀸, 𑀢𑀢𑁄 𑀏𑀯 𑀲𑀫𑁆𑀫𑀲𑀦𑀜𑀸𑀡𑀲𑁆𑀲 𑀕𑁄𑀘𑀭𑀪𑀽𑀢𑀸 𑀯𑁂𑀤𑀦𑀸 𑀏𑀯 𑀅𑀥𑀺𑀧𑁆𑀧𑁂𑀢𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀧𑀓𑀸𑀭𑀸𑀯𑀳𑀪𑀸𑀯𑁂𑀦 𑀤𑁂𑀲𑀦𑀸𑀬 𑀆𑀭𑀤𑁆𑀥𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑀸𑀦’’𑀦𑁆𑀢𑀺𑀆𑀤𑀺. 𑀏𑀲 𑀦𑀬𑁄 𑀧𑀜𑁆𑀜𑀸𑀬𑀧𑀺. 𑀇𑀥 𑀲𑀼𑀔𑀸𑀤𑀺𑀲𑀤𑁆𑀤𑀸 𑀢𑀤𑀸𑀭𑀫𑁆𑀫𑀡𑀯𑀺𑀲𑀬𑀸𑀢𑀺 𑀇𑀫𑀫𑀢𑁆𑀣𑀁 𑀲𑀼𑀢𑁆𑀢𑁂𑀦 𑀲𑀸𑀥𑁂𑀢𑀼𑀁 ‘‘𑀭𑀽𑀧𑀜𑁆𑀘 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀦𑁆𑀢𑀤𑀼𑀓𑁆𑀔𑀦𑁆𑀢𑀺 𑀏𑀓𑀦𑁆𑀢𑁂𑀦𑁂𑀯 𑀅𑀦𑀺𑀝𑁆𑀞𑀁, 𑀢𑀢𑁄 𑀏𑀯 𑀤𑀼𑀓𑁆𑀔𑀫𑀢𑀸𑀬 𑀤𑀼𑀓𑁆𑀔𑀁. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀤𑀼𑀓𑁆𑀔𑀯𑁂𑀤𑀦𑀸𑀬 𑀅𑀦𑀼𑀧𑀢𑀺𑀢𑀁, 𑀑𑀢𑀺𑀡𑁆𑀡𑀜𑁆𑀘𑀸𑀢𑀺 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀁, 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢𑀁. 𑀲𑀼𑀔𑁂𑀦 𑀅𑀦𑀯𑀓𑁆𑀓𑀦𑁆𑀢𑀁 𑀅𑀪𑀯𑀺𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀦𑀬𑀺𑀤𑀦𑁆𑀢𑀺 𑀏𑀢𑁆𑀣 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀸𑀭𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀲𑀸𑀭𑀸𑀕𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁. 𑀲𑀼𑀔𑀦𑁆𑀢𑀺 𑀲𑀪𑀸𑀯𑀢𑁄 𑀘 𑀇𑀝𑁆𑀞𑀁. 𑀲𑀸𑀭𑀸𑀕𑀸 𑀲𑀁𑀬𑀼𑀚𑁆𑀚𑀦𑁆𑀢𑀻𑀢𑀺 𑀩𑀳𑀮𑀭𑀸𑀕𑀳𑁂𑀢𑀼 𑀬𑀣𑀸𑀭𑀳𑀁 𑀤𑀲𑀳𑀺𑀧𑀺 𑀲𑀁𑀬𑁄𑀚𑀦𑁂𑀳𑀺 𑀲𑀁𑀬𑀼𑀚𑁆𑀚𑀦𑁆𑀢𑀺. 𑀲𑀁𑀬𑁄𑀕𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀻𑀢𑀺 𑀢𑀣𑀸 𑀲𑀁𑀬𑀼𑀢𑁆𑀢𑀢𑀸𑀬 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀯𑀲𑁂𑀦 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀯𑀺𑀩𑀸𑀥𑀻𑀬𑀦𑁆𑀢𑀺 𑀉𑀧𑀢𑀸𑀧𑀻𑀬𑀦𑁆𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀦𑁆𑀢𑀺 𑀇𑀝𑁆𑀞𑀁, 𑀅𑀦𑀺𑀝𑁆𑀞𑀁, 𑀫𑀚𑁆𑀛𑀢𑁆𑀢𑀜𑁆𑀘 𑀆𑀭𑀫𑁆𑀫𑀡𑀁 𑀬𑀣𑀸𑀓𑁆𑀓𑀫𑀁 𑀲𑀼𑀔𑀁, 𑀤𑀼𑀓𑁆𑀔𑀁, 𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀓𑀣𑀺𑀢𑀁. 𑀏𑀯𑀁 𑀅𑀯𑀺𑀲𑁂𑀲𑁂𑀦 𑀧𑀜𑁆𑀘𑀧𑀺 𑀔𑀦𑁆𑀥𑁂 𑀲𑀼𑀔𑀸𑀤𑀺𑀆𑀭𑀫𑁆𑀫𑀡𑀪𑀸𑀯𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑁂𑀤𑀦𑀸 𑀏𑀯 𑀲𑀼𑀔𑀸𑀤𑀺𑀆𑀭𑀫𑁆𑀫𑀡𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀸𑀓𑀢𑀺𑀓𑀧𑀘𑀼𑀭𑀚𑀦𑀯𑀲𑁂𑀦𑀸𑀬𑀁 𑀓𑀣𑀺𑀢𑀸𑀢𑀺 𑀓𑀢𑁆𑀯𑀸 ‘‘𑀧𑀼𑀭𑀺𑀫𑀁 𑀲𑀼𑀔𑀁 𑀯𑁂𑀤𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀮𑀸𑀪𑀻 𑀧𑀦 𑀅𑀦𑀸𑀕𑀢𑀫𑁆𑀧𑀺 𑀲𑀼𑀔𑀁 𑀯𑁂𑀤𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑁂𑀯. 𑀯𑀼𑀢𑁆𑀢𑀫𑁂𑀢𑀁 𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁮𑁦; 𑀫. 𑀦𑀺. 𑀅𑀝𑁆𑀞. 𑁧.𑁭𑁯). 𑀯𑁂𑀤𑀦𑀸𑀬 𑀳𑀺 𑀆𑀭𑀫𑁆𑀫𑀡𑀁 𑀯𑁂𑀤𑀺𑀬𑀦𑁆𑀢𑀺𑀬𑀸 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀯𑁂𑀤𑁂𑀢𑀻𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺.

𑀲𑀩𑁆𑀩𑀲𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀸𑀬𑀧𑀺 𑀘𑀢𑀼𑀪𑀽𑀫𑀺𑀓𑀲𑀜𑁆𑀜𑀸𑀬. 𑀲𑀩𑁆𑀩𑀢𑁆𑀣𑀓𑀲𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀧𑀯𑀢𑁆𑀢𑀦𑀓𑀲𑀜𑁆𑀜𑀸𑀬. 𑀯𑀢𑁆𑀣𑁂 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 𑀯𑀡𑁆𑀡𑀥𑀸𑀢𑀼𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀸𑀧𑁂𑀦𑁆𑀢𑁄𑀢𑀺 𑀪𑀸𑀯𑀦𑀁 𑀉𑀧𑀘𑀸𑀭𑀁 𑀯𑀸 𑀅𑀧𑁆𑀧𑀦𑀁 𑀯𑀸 𑀉𑀧𑀦𑁂𑀦𑁆𑀢𑁄. 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀸𑀧𑀻𑀢𑀺 ‘‘𑀦𑀻𑀮𑀁 𑀭𑀽𑀧𑀁, 𑀭𑀽𑀧𑀸𑀭𑀫𑁆𑀫𑀡𑀁 𑀦𑀻𑀮’’𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀸𑀧𑀺.

𑀅𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀢𑁆𑀢𑀸𑀢𑀺 𑀲𑀩𑁆𑀩𑁂𑀲𑀁 𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀸𑀦𑀁 𑀅𑀲𑀗𑁆𑀕𑀳𑀺𑀢𑀢𑁆𑀢𑀸. 𑀢𑀓𑁆𑀓𑀕𑀢𑀦𑁆𑀢𑀺 𑀲𑀼𑀢𑁆𑀢𑀓𑀦𑁆𑀢𑀦𑀓𑀢𑀓𑁆𑀓𑀫𑁆𑀳𑀺, 𑀲𑀼𑀢𑁆𑀢𑀯𑀢𑁆𑀢𑀦𑀓𑀢𑀓𑁆𑀓𑀫𑁆𑀳𑀺 𑀯𑀸 𑀯𑁂𑀞𑀦𑀯𑀲𑁂𑀦 𑀞𑀺𑀢𑀁. 𑀧𑀭𑀺𑀯𑀝𑁆𑀝𑀓𑀸𑀤𑀺𑀕𑀢𑀦𑁆𑀢𑀺 𑀲𑀼𑀢𑁆𑀢𑀯𑁂𑀞𑀦𑀧𑀭𑀺𑀯𑀝𑁆𑀝𑀓𑀸𑀤𑀺𑀕𑀢𑀁. 𑀯𑀺𑀲𑁆𑀲𑀝𑁆𑀞𑀢𑁆𑀢𑀸𑀯 𑀦 𑀕𑀳𑀺𑀢𑀸, 𑀬𑀤𑀕𑁆𑀕𑁂𑀦 𑀧𑀜𑁆𑀜𑀸 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀕𑀁 𑀮𑀪𑀸𑀧𑀺𑀢𑀸, 𑀢𑀤𑀕𑁆𑀕𑁂𑀦 𑀯𑁂𑀤𑀦𑀸𑀲𑀜𑁆𑀜𑀸𑀳𑀺𑀧𑀺 𑀲𑀫𑁆𑀧𑀬𑁄𑀕𑀁 𑀮𑀪𑀸𑀧𑀺𑀢𑀸 𑀏𑀯𑀸𑀢𑀺. 𑀢𑀤𑁂𑀯 𑀲𑀜𑁆𑀚𑀸𑀦𑀸𑀢𑀺 𑀲𑀁𑀲𑀝𑁆𑀞𑀪𑀸𑀯𑀢𑁄.

𑀲𑀜𑁆𑀚𑀸𑀦𑀸𑀢𑀺 𑀯𑀺𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 ‘‘𑀧𑀚𑀸𑀦𑀸𑀢𑀻’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀧𑀚𑀸𑀦𑀦𑀯𑀲𑁂𑀦𑀧𑀺 𑀯𑀺𑀲𑁂𑀲𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀚𑀸𑀦𑀸𑀢𑀻𑀢𑀺 𑀅𑀬𑀁 𑀲𑀤𑁆𑀤𑁄 𑀘 𑀮𑀤𑁆𑀤𑀢𑁄𑀬𑁂𑀯𑁂𑀢𑁆𑀣 𑀅𑀯𑀺𑀲𑁂𑀲𑁄, 𑀅𑀢𑁆𑀣𑀢𑁄 𑀧𑀦 𑀯𑀺𑀲𑁂𑀲𑀢𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀳𑀺 𑀥𑀸𑀢𑀽𑀦𑀁 𑀢𑁂𑀦 𑀆𑀔𑁆𑀬𑀸𑀢𑀧𑀤𑁂𑀦 𑀦𑀸𑀫𑀧𑀤𑁂𑀦 𑀘 𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀲𑀕𑁆𑀕𑀧𑀤𑀁 𑀚𑁄𑀢𑀓𑀪𑀸𑀯𑁂𑀦 𑀯𑀺𑀲𑁂𑀲𑁂𑀢𑀺, 𑀦 𑀯𑀸𑀘𑀓𑀪𑀸𑀯𑁂𑀦. 𑀢𑁂𑀦𑀸𑀳 ‘‘𑀢𑀲𑁆𑀲𑀧𑀺 𑀚𑀸𑀦𑀦𑀢𑁆𑀣𑁂 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀏𑀢𑁂𑀦 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀧𑀤𑀸𑀦𑀺 𑀅𑀦𑁆𑀢𑁄𑀕𑀥𑀚𑀸𑀦𑀦𑀢𑁆𑀣𑁂 𑀬𑀣𑀸𑀲𑀓𑀁 𑀯𑀺𑀲𑀺𑀝𑁆𑀞𑀯𑀺𑀲𑀬𑁂 𑀘 𑀦𑀺𑀝𑁆𑀞𑀸𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀜𑁆𑀜𑀸 𑀳𑀻’’𑀢𑀺𑀆𑀤𑀺. 𑀲𑀜𑁆𑀚𑀸𑀦𑀦𑀫𑀢𑁆𑀢𑀫𑁂𑀯𑀸𑀢𑀺 𑀏𑀢𑁆𑀣 𑀫𑀢𑁆𑀢-𑀲𑀤𑁆𑀤𑁂𑀦 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁂𑀦 𑀯𑀺𑀚𑀸𑀦𑀦𑀧𑀚𑀸𑀦𑀦𑀸𑀓𑀸𑀭𑁂 𑀦𑀺𑀯𑀢𑁆𑀢𑁂𑀢𑀺, 𑀏𑀯-𑀲𑀤𑁆𑀤𑁂𑀦 𑀓𑀤𑀸𑀘𑀺𑀧𑀺 𑀇𑀫𑀺𑀲𑁆𑀲𑀸 𑀢𑁂 𑀯𑀺𑀲𑁂𑀲𑀸 𑀦𑀢𑁆𑀣𑁂𑀯𑀸𑀢𑀺 𑀅𑀯𑀥𑀸𑀭𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀫𑁆𑀧𑀺 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀲𑀜𑁆𑀜𑀸 𑀓𑀼𑀢𑁄 𑀧𑀜𑁆𑀜𑀸𑀓𑀺𑀘𑁆𑀘𑀁 𑀓𑀭𑁂𑀬𑁆𑀬𑀸𑀢𑀺 ‘‘𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀧𑀸𑀢𑀼𑀪𑀸𑀯’’𑀦𑁆𑀢𑀺.

𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀁 𑀯𑀺𑀜𑁆𑀜𑀸𑀡𑀁 𑀦 𑀲𑀜𑁆𑀜𑀸 𑀯𑀺𑀬 𑀦𑀻𑀮𑀧𑀻𑀢𑀸𑀤𑀺𑀫𑀢𑁆𑀢𑀲𑀜𑁆𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀅𑀣 𑀔𑁄 𑀢𑀢𑁆𑀣 𑀅𑀜𑁆𑀜𑀫𑁆𑀧𑀺 𑀢𑀸𑀤𑀺𑀲𑀁 𑀯𑀺𑀲𑁂𑀲𑀁 𑀚𑀸𑀦𑀦𑁆𑀢𑀫𑁂𑀯 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺. 𑀓𑀣𑀁 𑀧𑀦 𑀯𑀺𑀜𑁆𑀜𑀸𑀡𑀁 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑁂𑀢𑀻𑀢𑀺? 𑀧𑀜𑁆𑀜𑀸𑀬 𑀤𑀲𑁆𑀲𑀺𑀢𑀫𑀕𑁆𑀕𑁂𑀦. 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀬 𑀳𑀺 𑀅𑀦𑁂𑀓𑀯𑀸𑀭𑀁 𑀮𑀓𑁆𑀔𑀡𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸𑀬 𑀧𑀕𑀼𑀡𑀪𑀸𑀯𑀢𑁄 𑀧𑀭𑀺𑀘𑀬𑀯𑀲𑁂𑀦 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑀧𑀺 𑀯𑀺𑀧𑀲𑁆𑀲𑀦𑀸 𑀲𑀫𑁆𑀪𑀯𑀢𑀺, 𑀬𑀣𑀸 𑀢𑀁 𑀧𑀕𑀼𑀡𑀲𑁆𑀲 𑀕𑀦𑁆𑀣𑀲𑁆𑀲 𑀅𑀚𑁆𑀛𑀬𑀦𑁂 𑀢𑀢𑁆𑀣 𑀢𑀢𑁆𑀣 𑀕𑀢𑀸𑀧𑀺 𑀯𑀸𑀭𑀸 𑀦 𑀉𑀧𑀥𑀸𑀭𑀻𑀬𑀦𑁆𑀢𑀺. ‘‘𑀮𑀓𑁆𑀔𑀡𑀧𑀝𑀺𑀯𑁂𑀥’’𑀦𑁆𑀢𑀺 𑀘 𑀮𑀓𑁆𑀔𑀡𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀝𑀺𑀯𑀺𑀚𑁆𑀛𑀦𑀁. 𑀉𑀲𑁆𑀲𑀓𑁆𑀓𑀺𑀢𑁆𑀯𑀸𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀺𑀜𑀸𑀡𑀧𑀝𑀺𑀧𑀸𑀝𑀺𑀬𑀸 𑀆𑀭𑀪𑀺𑀢𑁆𑀯𑀸. 𑀫𑀕𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀅𑀲𑀫𑁆𑀩𑁄𑀥𑀲𑀪𑀸𑀯𑀢𑁆𑀢𑀸. 𑀆𑀭𑀫𑁆𑀫𑀡𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺 𑀅𑀯𑀩𑀼𑀚𑁆𑀛𑀦𑀯𑀲𑁂𑀦𑁂𑀯, 𑀦 𑀲𑀜𑁆𑀚𑀸𑀦𑀦𑀫𑀢𑁆𑀢𑁂𑀦. 𑀢𑀣𑀸 𑀮𑀓𑁆𑀔𑀡𑀧𑀝𑀺𑀯𑁂𑀥𑀫𑁆𑀧𑀺 𑀧𑀸𑀧𑁂𑀢𑀺, 𑀦 𑀯𑀺𑀚𑀸𑀦𑀦𑀫𑀢𑁆𑀢𑁂𑀦, 𑀅𑀢𑁆𑀢𑀦𑁄 𑀧𑀦 𑀅𑀜𑁆𑀜𑀸𑀲𑀸𑀥𑀸𑀭𑀡𑁂𑀦 𑀆𑀦𑀼𑀪𑀸𑀯𑁂𑀦 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀫𑀕𑁆𑀕𑀧𑀸𑀢𑀼𑀪𑀸𑀯𑀫𑁆𑀧𑀺 𑀧𑀸𑀧𑁂𑀢𑀺.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀚𑀸𑀢𑀩𑀼𑀤𑁆𑀥𑀻𑀢𑀺 𑀅𑀲𑀜𑁆𑀚𑀸𑀢𑀩𑁆𑀬𑀯𑀳𑀸𑀭𑀩𑀼𑀤𑁆𑀥𑀺. 𑀉𑀧𑀪𑁄𑀕𑀧𑀭𑀺𑀪𑁄𑀕𑀦𑁆𑀢𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀭𑀳𑀁, 𑀉𑀧𑀪𑁄𑀕𑀧𑀭𑀺𑀪𑁄𑀕𑀯𑀢𑁆𑀣𑀽𑀦𑀁 𑀧𑀝𑀺𑀮𑀸𑀪𑀬𑁄𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀓𑀽𑀝𑁄𑀢𑀺 𑀓𑀳𑀸𑀧𑀡𑀧𑀢𑀺𑀭𑀽𑀧𑀓𑁄 𑀢𑀫𑁆𑀩𑀓𑀁𑀲𑀸𑀤𑀺𑀫𑀬𑁄. 𑀙𑁂𑀓𑁄𑀢𑀺 𑀫𑀳𑀸𑀲𑀸𑀭𑁄. 𑀓𑀭𑀢𑁄𑀢𑀺 𑀅𑀟𑁆𑀠𑀲𑀸𑀭𑁄. 𑀲𑀡𑁆𑀳𑁄𑀢𑀺 𑀫𑀼𑀤𑀼𑀚𑀸𑀢𑀺𑀓𑁄 𑀲𑀫𑀲𑀸𑀭𑁄. 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 𑀧𑀸𑀤𑀲𑀸𑀭𑀧𑀭𑁄𑀧𑀸𑀤𑀲𑀸𑀭𑀅𑀟𑁆𑀠𑀲𑀸𑀭𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀚𑀸𑀦𑀦𑁆𑀢𑁄 𑀘 𑀧𑀦 𑀦𑀁 𑀭𑀽𑀧𑀁 𑀤𑀺𑀲𑁆𑀯𑀸𑀧𑀺…𑀧𑁂… 𑀅𑀲𑀼𑀓𑀸𑀘𑀭𑀺𑀬𑁂𑀦 𑀓𑀢𑁄𑀢𑀺𑀧𑀺 𑀚𑀸𑀦𑀸𑀢𑀺 𑀢𑀣𑀸 𑀳𑁂𑀭𑀜𑁆𑀜𑀺𑀓𑀕𑀦𑁆𑀣𑀲𑁆𑀲 𑀲𑀼𑀕𑁆𑀕𑀳𑀺𑀢𑀢𑁆𑀢𑀸. 𑀏𑀯𑀫𑁂𑀯𑀦𑁆𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀲𑀜𑁆𑀜𑀸𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀧𑀺𑀡𑁆𑀟𑀯𑀲𑁂𑀦𑁂𑀯 𑀆𑀭𑀫𑁆𑀫𑀡𑀲𑁆𑀲 𑀕𑀳𑀡𑀢𑁄 𑀤𑀸𑀭𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀲𑀤𑀺𑀲𑀸 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀲𑀸 𑀬𑀣𑀸𑀉𑀧𑀝𑁆𑀞𑀺𑀢𑀯𑀺𑀲𑀬𑀧𑀤𑀝𑁆𑀞𑀸𑀦𑀸 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀜𑀸𑀡𑀁 𑀆𑀭𑀫𑁆𑀫𑀡𑁂 𑀏𑀓𑀘𑁆𑀘𑀯𑀺𑀲𑁂𑀲𑀕𑁆𑀕𑀳𑀡𑀲𑀫𑀢𑁆𑀣𑀪𑀸𑀯𑀢𑁄 𑀕𑀸𑀫𑀺𑀓𑀧𑀼𑀭𑀺𑀲𑀓𑀳𑀸𑀧𑀡𑀤𑀲𑁆𑀲𑀦𑀲𑀤𑀺𑀲𑀁 𑀯𑀼𑀢𑁆𑀢𑀁. 𑀧𑀜𑁆𑀜𑀸 𑀧𑀦 𑀆𑀭𑀫𑁆𑀫𑀡𑁂 𑀅𑀦𑀯𑀲𑁂𑀲𑀸𑀯𑀩𑁄𑀥𑀢𑁄 𑀳𑁂𑀭𑀜𑁆𑀜𑀺𑀓𑀓𑀳𑀸𑀧𑀡𑀤𑀲𑁆𑀲𑀦𑀲𑀤𑀺𑀲𑀸 𑀯𑀼𑀢𑁆𑀢𑀸. 𑀦𑁂𑀲𑀦𑁆𑀢𑀺 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦𑀁. 𑀯𑀺𑀲𑁂𑀲𑁄𑀢𑀺 𑀲𑀪𑀸𑀯𑀯𑀺𑀲𑁂𑀲𑁄. 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑁄 𑀧𑀓𑀢𑀺𑀧𑀜𑁆𑀜𑀸𑀬. 𑀇𑀫𑀺𑀦𑀸𑀯 𑀦𑁂𑀲𑀁 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀢𑀁 𑀤𑀲𑁆𑀲𑁂𑀢𑀺.

𑀏𑀓𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸𑀦𑀦𑁆𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸𑀦𑀁. 𑀢𑁂𑀦 𑀅𑀪𑀺𑀦𑁆𑀦𑀯𑀺𑀲𑀬𑀸𑀪𑀺𑀦𑁆𑀦𑀓𑀸𑀮𑀢𑀸𑀤𑀲𑁆𑀲𑀦𑁂𑀦 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀁𑀬𑁂𑀯 𑀉𑀮𑁆𑀮𑀺𑀗𑁆𑀕𑁂𑀢𑀺. 𑀯𑀯𑀢𑁆𑀣𑀸𑀦𑀦𑁆𑀢𑀺 𑀅𑀲𑀗𑁆𑀓𑀭𑀢𑁄 𑀞𑀧𑀦𑀁. 𑀅𑀬𑀁 𑀨𑀲𑁆𑀲𑁄…𑀧𑁂… 𑀇𑀤𑀁 𑀘𑀺𑀢𑁆𑀢𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀇𑀢𑀺-𑀲𑀤𑁆𑀤𑁄 𑀯𑀸 𑀆𑀤𑀺𑀅𑀢𑁆𑀣𑁄. 𑀢𑁂𑀦 𑀲𑁂𑀲𑀥𑀫𑁆𑀫𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀇𑀤𑀦𑁆𑀢𑀺 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀯𑀯𑀢𑁆𑀣𑀸𑀦𑀓𑀭𑀡𑀁. 𑀢𑀢𑁄𑀢𑀺 𑀬𑀁 𑀯𑀼𑀢𑁆𑀢𑀁 𑀢𑀺𑀮𑀢𑁂𑀮𑀸𑀤𑀺𑀉𑀤𑁆𑀥𑀭𑀡𑀁, 𑀢𑀢𑁄. 𑀬𑀤𑀺 𑀤𑀼𑀓𑁆𑀓𑀭𑀢𑀭𑀁, 𑀓𑀣𑀁 𑀢𑀦𑁆𑀢𑀺 𑀆𑀳 ‘‘𑀪𑀕𑀯𑀸 𑀧𑀦𑀸’’𑀢𑀺𑀆𑀤𑀺.

𑁪𑁫𑁧. 𑀦𑀺𑀲𑁆𑀲𑀝𑁂𑀦𑀸𑀢𑀺 𑀦𑀺𑀓𑁆𑀔𑀦𑁆𑀢𑁂𑀦 𑀅𑀢𑀁𑀲𑀫𑁆𑀩𑀦𑁆𑀥𑁂𑀦. 𑀧𑀭𑀺𑀘𑁆𑀘𑀢𑁆𑀢𑁂𑀦𑀸𑀢𑀺 𑀧𑀭𑀺𑀘𑁆𑀘𑀢𑁆𑀢𑀲𑀤𑀺𑀲𑁂𑀦 𑀧𑀘𑁆𑀘𑀬𑀪𑀸𑀯𑀸𑀦𑀼𑀧𑀕𑀫𑀦𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑀫𑁆𑀩𑀦𑁆𑀥𑀸𑀪𑀸𑀯𑀢𑁄. 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀅𑀧𑀸𑀤𑀸𑀦𑀤𑀻𑀧𑀦𑀢𑁄. 𑀓𑀭𑀡𑀯𑀘𑀦𑀁 𑀓𑀢𑁆𑀢𑀼𑀅𑀢𑁆𑀣𑀤𑀻𑀧𑀦𑀢𑁄. 𑀓𑀸𑀫𑀸𑀯𑀘𑀭𑀫𑀦𑁄𑀯𑀺𑀜𑁆𑀜𑀸𑀡𑀁 𑀦 𑀦𑀺𑀬𑀫𑀢𑁄 ‘‘𑀇𑀤𑀁 𑀦𑀸𑀫 𑀧𑀜𑁆𑀘𑀤𑁆𑀯𑀸𑀭𑀺𑀓𑀸𑀲𑀫𑁆𑀩𑀦𑁆𑀥𑀸’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀭𑀽𑀧𑀸𑀯𑀘𑀭𑀯𑀺𑀜𑁆𑀜𑀸𑀡𑀁 𑀧𑀦 𑀦 𑀢𑀣𑀸𑀢𑀺, 𑀢𑀲𑁆𑀲𑁂𑀯 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀦𑀺𑀲𑁆𑀲𑀝𑀢𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑁂𑀦𑀸’’𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀕𑁆𑀕𑀳𑀡𑀁 𑀢𑀲𑁆𑀲𑁂𑀯 𑀅𑀭𑀽𑀧𑀸𑀯𑀘𑀭𑀲𑁆𑀲 𑀧𑀤𑀝𑁆𑀞𑀸𑀦𑀪𑀸𑀯𑀢𑁄. 𑀧𑀭𑀺𑀲𑀼𑀤𑁆𑀥𑁂𑀦𑀸𑀢𑀺 𑀯𑀺𑀲𑁂𑀲𑀢𑁄 𑀅𑀲𑀁𑀓𑀺𑀮𑁂𑀲𑀺𑀓𑀢𑁆𑀢𑀸𑀯. 𑀢𑀜𑁆𑀳𑀺 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀢𑀸𑀬 𑀯𑀺𑀲𑁂𑀲𑀢𑁄 𑀧𑀭𑀺𑀲𑀼𑀤𑁆𑀥𑀁. 𑀢𑁂𑀦𑀸𑀳 ‘‘𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑁂𑀦𑀸’’𑀢𑀺. 𑀚𑀸𑀦𑀺𑀢𑀩𑁆𑀩𑀁 𑀦𑁂𑀬𑁆𑀬𑀁, 𑀲𑀧𑀭𑀲𑀦𑁆𑀢𑀸𑀦𑁂𑀲𑀼 𑀇𑀤𑀁 𑀅𑀢𑀺𑀲𑀬𑀁 𑀚𑀸𑀦𑀺𑀢𑀩𑁆𑀩𑀢𑁄 𑀩𑀼𑀚𑁆𑀛𑀺𑀢𑀩𑁆𑀩𑀁 𑀩𑁄𑀥𑁂𑀢𑀩𑁆𑀩𑀁 𑀯𑀸𑀢𑀺 𑀅𑀢𑁆𑀣𑁄. 𑀦𑁂𑀬𑁆𑀬𑀦𑁆𑀢𑀺 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀦𑁂𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺. 𑀏𑀢𑁆𑀣 𑀞𑀺𑀢𑀲𑁆𑀲 𑀳𑀺 𑀲𑀸 𑀇𑀚𑁆𑀛𑀢𑀻’’𑀢𑀺. 𑀧𑀸𑀝𑀺𑀬𑁂𑀓𑁆𑀓𑀦𑁆𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁, 𑀅𑀦𑀼𑀧𑀤𑀥𑀫𑁆𑀫𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀦𑀺𑀯𑁂𑀲𑀸𑀪𑀸𑀯𑀢𑁄𑀢𑀺 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀓𑀮𑀸𑀧𑀢𑁄 𑀦𑀬𑀢𑁄𑀢𑀺 𑀓𑀮𑀸𑀧𑀲𑀫𑁆𑀫𑀲𑀦𑀲𑀗𑁆𑀔𑀸𑀢𑀢𑁄 𑀦𑀬𑀯𑀺𑀧𑀲𑁆𑀲𑀦𑀢𑁄. 𑀪𑀺𑀓𑁆𑀔𑀼𑀦𑁄𑀢𑀺 𑀲𑀸𑀯𑀓𑀲𑁆𑀲. 𑀲𑀸𑀯𑀓𑀲𑁆𑀲𑁂𑀯 𑀳𑀺 𑀢𑀢𑁆𑀭 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸 𑀦 𑀲𑀫𑁆𑀪𑀯𑀢𑀺, 𑀦 𑀲𑀢𑁆𑀣𑀼. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀢𑀺.

𑀳𑀢𑁆𑀣𑀕𑀢𑀢𑁆𑀢𑀸𑀢𑀺 𑀳𑀢𑁆𑀣𑀕𑀢𑀲𑀤𑀺𑀲𑀢𑁆𑀢𑀸, 𑀆𑀲𑀦𑁆𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑀤𑀸 𑀳𑀺 𑀮𑁄𑀓𑀦𑀸𑀣𑁄 𑀩𑁄𑀥𑀺𑀫𑀽𑀮𑁂 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑁋 ‘‘𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁫𑁭; 𑀲𑀁. 𑀦𑀺. 𑁨.𑁪, 𑁧𑁦) 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁 𑀓𑀢𑁆𑀯𑀸 𑀅𑀥𑀺𑀕𑀦𑁆𑀢𑀩𑁆𑀩𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀼𑀭𑀽𑀧𑀁 𑀙𑀢𑁆𑀢𑀺𑀁𑀲𑀓𑁄𑀝𑀺𑀲𑀳𑀲𑁆𑀲𑀫𑀼𑀔𑁂𑀦 𑀫𑀳𑀸𑀯𑀚𑀺𑀭𑀜𑀸𑀡𑀁 𑀦𑀸𑀫 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑀫𑁆𑀫𑀲𑀦𑀁 𑀧𑀯𑀢𑁆𑀢𑁂𑀦𑁆𑀢𑁄 𑀅𑀦𑁂𑀓𑀸𑀓𑀸𑀭𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀲𑀫𑁆𑀫𑀲𑀦𑁂 𑀅𑀦𑀼𑀧𑀤𑀫𑁂𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀥𑀫𑁆𑀫𑁂𑀧𑀺 𑀅𑀧𑀭𑀸𑀧𑀭𑀁 𑀲𑀫𑁆𑀫𑀲𑀺. 𑀢𑁂𑀦𑀸𑀳 ‘‘𑀪𑀕𑀯𑀸 𑀧𑀦𑀸’’𑀢𑀺𑀆𑀤𑀺. 𑀧𑀭𑁄𑀧𑀜𑁆𑀜𑀸𑀲𑀸𑀢𑀺 𑀤𑁆𑀯𑁂𑀧𑀜𑁆𑀜𑀸𑀲𑀁. 𑀓𑀸𑀫𑀜𑁆𑀘𑁂𑀢𑁆𑀣 𑀓𑁂𑀘𑀺 𑀥𑀫𑁆𑀫𑀸 𑀯𑁂𑀤𑀦𑀸𑀤𑀬𑁄 𑀨𑀲𑁆𑀲𑀧𑀜𑁆𑀘𑀫𑀓𑀸𑀤𑀻𑀲𑀼 𑀯𑀼𑀢𑁆𑀢𑀸𑀧𑀺 𑀛𑀸𑀦𑀓𑁄𑀝𑁆𑀞𑀸𑀲𑀸𑀤𑀻𑀲𑀼𑀧𑀺 𑀲𑀗𑁆𑀕𑀳𑀺𑀢𑀸, 𑀢𑀁𑀢𑀁𑀧𑀘𑁆𑀘𑀬𑀪𑀸𑀯𑀯𑀺𑀲𑀺𑀝𑁆𑀞𑁂𑀦 𑀧𑀦 𑀅𑀢𑁆𑀣𑀯𑀺𑀲𑁂𑀲𑁂𑀦 𑀥𑀫𑁆𑀫𑀦𑁆𑀢𑀭𑀸𑀦𑀺 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀦𑀯𑀺𑀦𑁆𑀤𑁆𑀭𑀺𑀬𑀢𑀸 𑀯𑀼𑀘𑁆𑀘𑀢𑀺. 𑀅𑀗𑁆𑀕𑀼𑀤𑁆𑀥𑀸𑀭𑁂𑀦𑀸𑀢𑀺 𑀢𑀢𑁆𑀣 𑀮𑀩𑁆𑀪𑀫𑀸𑀦𑀛𑀸𑀦𑀗𑁆𑀕𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀸𑀦𑀁 𑀉𑀤𑁆𑀥𑀭𑀡𑁂𑀦. 𑀅𑀗𑁆𑀕-𑀲𑀤𑁆𑀤𑁄 𑀯𑀸 𑀓𑁄𑀝𑁆𑀞𑀸𑀲𑀧𑀭𑀺𑀬𑀸𑀬𑁄, 𑀢𑀲𑁆𑀫𑀸 𑀅𑀗𑁆𑀕𑀼𑀤𑁆𑀥𑀸𑀭𑁂𑀦𑀸𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑀸𑀤𑀺𑀓𑁄𑀝𑁆𑀞𑀸𑀲𑀸𑀦𑀁 𑀲𑀫𑀼𑀤𑁆𑀥𑀭𑀡𑁂𑀦. 𑀬𑀸𑀯𑀢𑀸 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄𑀢𑀺 𑀬𑀢𑁆𑀢𑀓𑀸 𑀲𑀜𑁆𑀜𑀸𑀲𑀳𑀕𑀢𑀸 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑁄, 𑀢𑀸𑀳𑀺 𑀯𑀼𑀝𑁆𑀞𑀸𑀬 𑀅𑀥𑀺𑀕𑀦𑁆𑀥𑀩𑁆𑀩𑀢𑁆𑀢𑀸 𑀢𑀸𑀯𑀢𑀺𑀓𑀸 𑀯𑁂𑀦𑁂𑀬𑁆𑀬𑀸𑀦𑀁 𑀅𑀜𑁆𑀜𑀸𑀧𑀝𑀺𑀯𑁂𑀥𑁄 𑀅𑀭𑀳𑀢𑁆𑀢𑀲𑀫𑀥𑀺𑀕𑀫𑁄.

𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦𑀸𑀢𑀺 𑀅𑀦𑁆𑀥𑀲𑁆𑀲 𑀬𑀝𑁆𑀞𑀺𑀓𑁄𑀝𑀺𑀁 𑀕𑀳𑁂𑀢𑁆𑀯𑀸 𑀫𑀕𑁆𑀕𑀤𑁂𑀲𑀓𑁄 𑀯𑀺𑀬 𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀤𑀲𑁆𑀲𑀦𑀲𑀗𑁆𑀔𑀸𑀢𑁂𑀦 𑀧𑀭𑀺𑀡𑀸𑀬𑀓𑀪𑀸𑀯𑁂𑀦. 𑀬𑀣𑀸 𑀯𑀸 𑀲𑁄 𑀢𑀲𑁆𑀲 𑀘𑀓𑁆𑀔𑀼𑀪𑀽𑀢𑁄, 𑀏𑀯𑀁 𑀲𑀢𑁆𑀢𑀸𑀦𑀁 𑀧𑀜𑁆𑀜𑀸. 𑀢𑁂𑀦𑀸𑀳 ‘‘𑀘𑀓𑁆𑀔𑀼𑀪𑀽𑀢𑀸𑀬 𑀧𑀜𑁆𑀜𑀸𑀬𑀸’’𑀢𑀺. 𑀲𑀫𑀸𑀥𑀺𑀲𑀫𑁆𑀧𑀬𑀼𑀢𑁆𑀢𑀸 𑀧𑀜𑁆𑀜𑀸 𑀲𑀫𑀸𑀥𑀺𑀧𑀜𑁆𑀜𑀸. 𑀲𑀫𑀸𑀥𑀺 𑀘𑁂𑀢𑁆𑀣 𑀆𑀭𑀼𑀧𑁆𑀧𑀲𑀫𑀸𑀥𑀻𑀢𑀺 𑀯𑀤𑀦𑁆𑀢𑀺, 𑀲𑀫𑁆𑀫𑀲𑀦𑀧𑀬𑁄𑀕𑁄 𑀧𑀦 𑀓𑁄𑀘𑀺 𑀛𑀸𑀦𑀲𑀫𑀸𑀥𑀻𑀢𑀺 𑀬𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀪𑀽𑀢𑀸 𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸. 𑀲𑀫𑀸𑀥𑀺𑀧𑀜𑁆𑀜𑀸𑀬 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀓𑀺𑀘𑁆𑀘𑀢𑁄 𑀧𑀚𑀸𑀦𑀸𑀢𑀺, ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 𑀧𑀦 𑀯𑀘𑀦𑀢𑁄 (𑀲𑀁. 𑀦𑀺. 𑁩.𑁫; 𑁪.𑁯𑁯-𑁧𑁦𑁦; 𑁩.𑁫.𑁧𑁦𑁭𑁧-𑁧𑁦𑁭𑁨; 𑀦𑁂𑀢𑁆𑀢𑀺. 𑁪𑁦; 𑀫𑀺. 𑀧. 𑁨.𑁧.𑁧𑁪) 𑀅𑀲𑀫𑁆𑀫𑁄𑀳𑀢𑁄 𑀧𑀚𑀸𑀦𑀸𑀢𑀺. 𑀢𑀢𑁆𑀣 𑀓𑀺𑀘𑁆𑀘𑀢𑁄𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑁂 𑀆𑀭𑀫𑁆𑀫𑀡𑀓𑀭𑀡𑀓𑀺𑀘𑁆𑀘𑀢𑁄. 𑀅𑀲𑀫𑁆𑀫𑁄𑀳𑀢𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀲𑀫𑁆𑀫𑁄𑀳𑀯𑀺𑀥𑀫𑀦𑀢𑁄 𑀬𑀣𑀸 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀦𑀸𑀤𑀻𑀲𑀼. 𑀓𑀺𑀫𑀢𑁆𑀣𑀺𑀬𑀸𑀢𑀺 𑀓𑀺𑀁𑀧𑀬𑁄𑀚𑀦𑀸𑀢𑀺 𑀆𑀳 ‘‘𑀓𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑁄’’𑀢𑀺. 𑀅𑀪𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂𑀢𑀺 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀸𑀯𑀩𑁄𑀥𑀯𑀲𑁂𑀦 𑀅𑀪𑀺𑀫𑀼𑀔𑀁 𑀜𑁂𑀬𑁆𑀬𑁂 𑀚𑀸𑀦𑀺𑀢𑀩𑁆𑀩𑁂 𑀔𑀦𑁆𑀥𑀸𑀬𑀢𑀦𑀸𑀤𑀺𑀥𑀫𑁆𑀫𑁂. 𑀅𑀪𑀺𑀚𑀸𑀦𑀸𑀢𑀻𑀢𑀺 𑀲𑀮𑀓𑁆𑀔𑀡𑀢𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄 𑀘 𑀅𑀪𑀺𑀫𑀼𑀔𑀁 𑀅𑀯𑀺𑀭𑀚𑁆𑀛𑀦𑀯𑀲𑁂𑀦 𑀚𑀸𑀦𑀸𑀢𑀺. 𑀏𑀢𑁂𑀦 𑀜𑀸𑀢𑀧𑀭𑀺𑀜𑁆𑀜𑀸𑀩𑁆𑀬𑀸𑀧𑀸𑀭𑀫𑀸𑀳. 𑀧𑀭𑀺𑀜𑁆𑀜𑁂𑀬𑁆𑀬𑁂𑀢𑀺 𑀅𑀦𑀺𑀘𑁆𑀘𑀸𑀢𑀺𑀧𑀺 𑀤𑀼𑀓𑁆𑀔𑀸𑀢𑀺𑀧𑀺 𑀅𑀦𑀢𑁆𑀢𑀸𑀢𑀺𑀧𑀺 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀺𑀢𑀩𑁆𑀩𑁂. 𑀧𑀭𑀺𑀚𑀸𑀦𑀸𑀢𑀻𑀢𑀺 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁…𑀧𑁂… 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦𑀸’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁪𑁮) 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀸𑀦𑀸𑀢𑀺. 𑀇𑀫𑀺𑀦𑀸 𑀢𑀻𑀭𑀡𑀧𑀭𑀺𑀜𑁆𑀜𑀸𑀩𑁆𑀬𑀸𑀧𑀸𑀭𑀫𑀸𑀳. 𑀧𑀳𑀸𑀢𑀩𑁆𑀩𑁂 𑀥𑀫𑁆𑀫𑁂𑀢𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀓𑁂 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀸 𑀲𑀩𑁆𑀩𑁂 𑀧𑀸𑀧𑀥𑀫𑁆𑀫𑁂. 𑀧𑀚𑀳𑀢𑀺 𑀧𑀓𑀝𑁆𑀞𑀢𑁄 𑀚𑀳𑀢𑀺, 𑀯𑀺𑀓𑁆𑀔𑀫𑁆𑀪𑁂𑀢𑀺 𑀘𑁂𑀯 𑀲𑀫𑀼𑀘𑁆𑀙𑀺𑀦𑁆𑀤𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀧𑀳𑀸𑀦𑀧𑀭𑀺𑀜𑁆𑀜𑀸𑀩𑁆𑀬𑀸𑀧𑀸𑀭𑀫𑀸𑀳. 𑀲𑀸 𑀧𑀦𑁂𑀲𑀸 𑀧𑀜𑁆𑀜𑀸 𑀮𑁄𑀓𑀺𑀬𑀸𑀧𑀺 𑀢𑀺𑀧𑁆𑀧𑀓𑀸𑀭𑀸 𑀮𑁄𑀓𑀼𑀢𑁆𑀢𑀭𑀸𑀧𑀺, 𑀢𑀸𑀲𑀁 𑀯𑀺𑀲𑁂𑀲𑀁 𑀲𑀬𑀫𑁂𑀯𑀸𑀳. 𑀓𑀺𑀘𑁆𑀘𑀢𑁄𑀢𑀺 𑀅𑀪𑀺𑀚𑀸𑀦𑀦𑀯𑀲𑁂𑀦 𑀆𑀭𑀫𑁆𑀫𑀡𑀓𑀺𑀘𑁆𑀘𑀢𑁄. 𑀅𑀲𑀫𑁆𑀫𑁄𑀳𑀢𑁄𑀢𑀺 𑀬𑀣𑀸𑀩𑀮𑀁 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀻𑀲𑀼 𑀲𑀫𑁆𑀫𑁄𑀳𑀯𑀺𑀥𑀫𑀦𑀢𑁄. 𑀦𑀺𑀩𑁆𑀩𑀸𑀦𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀻𑀲𑀼 𑀯𑀺𑀕𑀢𑀲𑀫𑁆𑀫𑁄𑀳𑀢𑁄 𑀏𑀯𑀸𑀢𑀺 𑀆𑀳 ‘‘𑀮𑁄𑀓𑀼𑀢𑁆𑀢𑀭𑀸 𑀅𑀲𑀫𑁆𑀫𑁄𑀳𑀢𑁄’’𑀢𑀺.

𑁪𑁫𑁨. 𑀓𑀫𑁆𑀫𑀲𑁆𑀲𑀓𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘 𑀯𑀝𑁆𑀝𑀦𑀺𑀲𑁆𑀲𑀺𑀢𑀢𑁆𑀢𑀸 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸, 𑀯𑀺𑀯𑀝𑁆𑀝𑀓𑀣𑀸 𑀳𑁂𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘𑀸’’𑀢𑀺. 𑀧𑀭𑀢𑁄 𑀖𑁄𑀲𑁄𑀢𑀺 𑀧𑀭𑀢𑁄 𑀲𑀢𑁆𑀣𑀼𑀢𑁄, 𑀲𑀸𑀯𑀓𑀢𑁄 𑀯𑀸 𑀮𑀩𑁆𑀪𑀫𑀸𑀦𑁄 𑀥𑀫𑁆𑀫𑀖𑁄𑀲𑁄. 𑀢𑁂𑀦𑀸𑀳 ‘‘𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦’’𑀦𑁆𑀢𑀺. 𑀢𑀜𑁆𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀬𑁄 𑀓𑁄𑀘𑀺 𑀧𑀭𑀢𑁄𑀖𑁄𑀲𑁄. 𑀉𑀧𑀸𑀬𑀫𑀦𑀲𑀺𑀓𑀸𑀭𑁄𑀢𑀺 𑀬𑁂𑀦 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀸𑀤𑀺 𑀲𑀺𑀚𑁆𑀛𑀢𑀺, 𑀢𑀸𑀤𑀺𑀲𑁄 𑀧𑀣𑀫𑀦𑀲𑀺𑀓𑀸𑀭𑁄. 𑀅𑀬𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑁄𑀢𑀺 𑀦𑀺𑀬𑀫𑀧𑀓𑁆𑀔𑀺𑀓𑁄, 𑀦 𑀲𑀩𑁆𑀩𑀲𑀁𑀕𑀸𑀳𑀓𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀫𑀺𑀁𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀧𑀭𑀢𑁄𑀖𑁄𑀲𑀫𑁂𑀯 𑀦𑀺𑀯𑀢𑁆𑀢𑁂𑀢𑀺, 𑀦 𑀧𑀤𑀝𑁆𑀞𑀸𑀦𑀯𑀺𑀲𑁂𑀲𑀁 𑀧𑀝𑀺𑀬𑁄𑀕𑀻𑀦𑀺𑀯𑀢𑁆𑀢𑀦𑀢𑁆𑀣𑀢𑁆𑀢𑀸 𑀏𑀯-𑀲𑀤𑁆𑀤𑀲𑁆𑀲.

𑀮𑀤𑁆𑀥𑀼𑀧𑀓𑀸𑀭𑀸𑀢𑀺 (𑀅. 𑀦𑀺. 𑀝𑀻. 𑁩.𑁫.𑁨𑁫) 𑀬𑀣𑀸𑀭𑀳𑀁 𑀦𑀺𑀲𑁆𑀲𑀬𑀸𑀤𑀺𑀯𑀲𑁂𑀦 𑀮𑀤𑁆𑀥𑀧𑀘𑁆𑀘𑀬𑀸. 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀦𑀼𑀕𑁆𑀕𑀳𑀺𑀢𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀻𑀲𑀼 𑀘 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀦𑀦𑁆𑀢𑀭𑀲𑁆𑀲 𑀳𑀺 𑀯𑀺𑀥𑀺, 𑀧𑀝𑀺𑀲𑁂𑀥𑁄 𑀯𑀸. 𑀅𑀕𑁆𑀕𑀨𑀮𑀲𑀫𑀸𑀥𑀺𑀫𑁆𑀳𑀺 𑀢𑀧𑁆𑀧𑀭𑀺𑀓𑁆𑀔𑀸𑀭𑀥𑀫𑁆𑀫𑁂𑀲𑀼𑀬𑁂𑀯 𑀘 𑀓𑁂𑀯𑀮𑁄 𑀘𑁂𑀢𑁄𑀧𑀭𑀺𑀬𑀸𑀬𑁄 𑀦𑀺𑀭𑀼𑀴𑁆𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺. 𑀨𑀮𑀓𑁆𑀔𑀡𑁂𑀢𑀺 𑀅𑀦𑀦𑁆𑀢𑀭𑁂 𑀓𑀸𑀮𑀦𑁆𑀢𑀭𑁂 𑀘𑀸𑀢𑀺 𑀤𑀼𑀯𑀺𑀥𑁂 𑀨𑀮𑀓𑁆𑀔𑀡𑁂. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀲𑀩𑁆𑀩𑀲𑀁𑀓𑀺𑀮𑁂𑀲𑁂𑀳𑀺 𑀘𑁂𑀢𑁄 𑀯𑀺𑀫𑀼𑀘𑁆𑀘𑀢𑀺 𑀏𑀢𑀸𑀬𑀸𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀕𑁆𑀕𑀨𑀮𑀧𑀜𑁆𑀜𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀨𑀮𑀥𑀫𑁆𑀫𑀸. 𑀢𑁂𑀦𑀸𑀳 ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀨𑀮𑀁 𑀅𑀲𑁆𑀲𑀸𑀢𑀺. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀁 𑀨𑀮𑀁 𑀆𑀦𑀺𑀲𑀁𑀲𑁄’’𑀢𑀺, 𑀲𑀩𑁆𑀩𑀲𑀁𑀓𑀺𑀮𑁂𑀲𑁂𑀳𑀺 𑀘𑁂𑀢𑀲𑁄 𑀯𑀺𑀫𑀼𑀘𑁆𑀘𑀦𑀲𑀗𑁆𑀔𑀸𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀲𑀜𑁆𑀜𑀺𑀢𑀁 𑀧𑀳𑀸𑀦𑀁 𑀨𑀮𑀁 𑀆𑀦𑀺𑀲𑀁𑀲𑁄 𑀘𑀸𑀢𑀺 𑀬𑁄𑀚𑀦𑀸. 𑀇𑀥 𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺-𑀲𑀤𑁆𑀤𑁂𑀦 𑀧𑀳𑀸𑀦𑀫𑀢𑁆𑀢𑀁 𑀕𑀳𑀺𑀢𑀁, 𑀧𑀼𑀩𑁆𑀩𑁂 𑀧𑀳𑀸𑀬𑀓𑀥𑀫𑁆𑀫𑀸, 𑀅𑀜𑁆𑀜𑀣𑀸 𑀨𑀮𑀥𑀫𑁆𑀫𑀸 𑀏𑀯 𑀆𑀦𑀺𑀲𑀁𑀲𑁄𑀢𑀺 𑀕𑀬𑁆𑀳𑀫𑀸𑀦𑁂 𑀧𑀼𑀦𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸.

𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸𑀢𑀺 𑀏𑀢𑁆𑀣𑀸𑀧𑀺 𑀏𑀯𑀫𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀲𑀻𑀮𑀲𑀪𑀸𑀯𑀢𑁆𑀢𑀸 𑀯𑀺𑀲𑁂𑀲𑀢𑁄 𑀲𑀫𑀸𑀥𑀺𑀲𑁆𑀲 𑀉𑀧𑀓𑀸𑀭𑀸, 𑀢𑀣𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀛𑀸𑀦𑀲𑀪𑀸𑀯𑀢𑁆𑀢𑀸. 𑀢𑀣𑀸 𑀳𑀺 𑀲𑁄 ‘‘𑀅𑀧𑁆𑀧𑀦𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀲𑀫𑁆𑀫𑀸𑀲𑀢𑀺𑀲𑀫𑁆𑀫𑀸𑀯𑀸𑀬𑀸𑀫𑀸 𑀧𑀦 𑀲𑀫𑀸𑀥𑀺𑀧𑀓𑁆𑀔𑀺𑀬𑀸 𑀏𑀯𑀸𑀢𑀺 𑀆𑀳 ‘‘𑀅𑀯𑀲𑁂𑀲𑀸 𑀥𑀫𑁆𑀫𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀼𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀢𑀦𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀆𑀭𑁄𑀘𑀦𑀯𑀲𑁂𑀦 𑀲𑀳 𑀓𑀣𑀦𑀁 𑀲𑀁𑀓𑀣𑀸, 𑀲𑀁𑀓𑀣𑀸𑀯 𑀲𑀸𑀓𑀘𑁆𑀙𑀸. 𑀇𑀥 𑀧𑀦 𑀓𑀫𑁆𑀫𑀝𑁆𑀞𑀸𑀦𑀧𑀝𑀺𑀩𑀤𑁆𑀥𑀸𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑁂…𑀧𑁂… 𑀓𑀣𑀸’’𑀢𑀺. 𑀢𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀏𑀓𑀯𑀸𑀭𑀁 𑀯𑀻𑀣𑀺𑀬𑀸 𑀅𑀧𑁆𑀧𑀝𑀺𑀧𑀚𑁆𑀚𑀦𑀁 𑀔𑀮𑀦𑀁, 𑀅𑀦𑁂𑀓𑀯𑀸𑀭𑀁 𑀧𑀓𑁆𑀔𑀮𑀦𑀁, 𑀢𑀤𑀼𑀪𑀬𑀲𑁆𑀲 𑀯𑀺𑀘𑁆𑀙𑁂𑀤𑀦𑀻𑀓𑀣𑀸 𑀔𑀮𑀦𑀧𑀓𑁆𑀔𑀮𑀦𑀙𑁂𑀤𑀦𑀓𑀣𑀸. 𑀧𑀽𑀭𑁂𑀦𑁆𑀢𑀲𑁆𑀲𑀸𑀢𑀺 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀧𑀸𑀮𑁂𑀦𑁆𑀢𑀲𑁆𑀲 𑀩𑁆𑀭𑀽𑀳𑁂𑀦𑁆𑀢𑀲𑁆𑀲 𑀘. 𑀲𑀼𑀡𑀦𑁆𑀢𑀲𑁆𑀲𑀸𑀢𑀺 ‘‘𑀬𑀣𑀸𑀉𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀁 𑀨𑀸𑀢𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀲𑀼𑀡𑀦𑁆𑀢𑀲𑁆𑀲. 𑀢𑁂𑀦𑁂𑀯 𑀳𑀺 ‘‘𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲.

𑀧𑀜𑁆𑀘𑀲𑀼𑀧𑀺 𑀞𑀸𑀦𑁂𑀲𑀼 𑀅𑀦𑁆𑀢-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑀚𑁄𑀢𑀦𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑀫𑀸𑀦𑀸 𑀅𑀫𑁆𑀩𑀼𑀧𑀫𑀸 𑀘 𑀬𑀼𑀚𑁆𑀚𑁂𑀬𑁆𑀬. 𑀉𑀤𑀓𑀓𑁄𑀝𑁆𑀞𑀓𑀦𑁆𑀢𑀺 𑀆𑀮𑀯𑀸𑀮𑀁. 𑀣𑀺𑀭𑀁 𑀓𑀢𑁆𑀯𑀸 𑀩𑀦𑁆𑀥𑀢𑀻𑀢𑀺 𑀅𑀲𑀺𑀣𑀺𑀮𑀁 𑀤𑀴𑁆𑀳𑀁 𑀦𑀸𑀢𑀺𑀫𑀳𑀦𑁆𑀢𑀁 𑀦𑀸𑀢𑀺𑀔𑀼𑀤𑁆𑀤𑀓𑀁 𑀓𑀢𑁆𑀯𑀸 𑀬𑁄𑀚𑁂𑀢𑀺. 𑀣𑀺𑀭𑀁 𑀓𑀭𑁄𑀢𑀻𑀢𑀺 𑀉𑀤𑀓𑀲𑀺𑀜𑁆𑀘𑀦𑀓𑀸𑀮𑁂 𑀢𑀢𑁄 𑀢𑀢𑁄 𑀯𑀺𑀲𑁆𑀲𑀭𑀺𑀢𑁆𑀯𑀸 𑀉𑀤𑀓𑀲𑁆𑀲 𑀅𑀦𑀺𑀓𑁆𑀔𑀫𑀦𑀢𑁆𑀣𑀁 𑀆𑀮𑀯𑀸𑀮𑀁 𑀣𑀺𑀭𑀢𑀭𑀁 𑀓𑀭𑁄𑀢𑀺. 𑀲𑀼𑀓𑁆𑀔𑀤𑀡𑁆𑀟𑀓𑁄𑀢𑀺 𑀢𑀲𑁆𑀲𑁂𑀯 𑀅𑀫𑁆𑀩𑀕𑀘𑁆𑀙𑀓𑀲𑁆𑀲 𑀲𑀼𑀓𑁆𑀔𑁄 𑀲𑀸𑀔𑀸𑀲𑀻𑀲𑀓𑁄. 𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑁄𑀢𑀺 𑀢𑀫𑁆𑀩𑀓𑀺𑀧𑀺𑀮𑁆𑀮𑀺𑀓𑀓𑀼𑀝𑀚𑀁. 𑀔𑀡𑀺𑀢𑁆𑀢𑀺𑀦𑁆𑀢𑀺 𑀓𑀼𑀤𑀸𑀮𑀁. 𑀓𑁄𑀝𑁆𑀞𑀓𑀩𑀦𑁆𑀥𑀦𑀁 𑀯𑀺𑀬 𑀲𑀻𑀮𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀟𑁆𑀠𑀦𑀼𑀧𑀸𑀬𑀲𑁆𑀲 𑀫𑀽𑀮𑀪𑀸𑀯𑀢𑁄. 𑀉𑀤𑀓𑀲𑀺𑀜𑁆𑀘𑀦𑀁 𑀯𑀺𑀬 𑀥𑀫𑁆𑀫𑀲𑁆𑀲𑀯𑀦𑀁 𑀪𑀸𑀯𑀦𑀸𑀬 𑀧𑀭𑀺𑀩𑁆𑀭𑀽𑀳𑀦𑀢𑁄. 𑀫𑀭𑀺𑀬𑀸𑀤𑀸𑀬 𑀣𑀺𑀭𑀪𑀸𑀯𑀓𑀭𑀡𑀁 𑀯𑀺𑀬 𑀲𑀫𑀣𑁄 𑀬𑀣𑀸𑀯𑀼𑀢𑁆𑀢𑀪𑀸𑀯𑀦𑀸𑀥𑀺𑀝𑁆𑀞𑀸𑀦𑀸𑀬 𑀲𑀻𑀮𑀫𑀭𑀺𑀬𑀸𑀤𑀸𑀬 𑀤𑀴𑁆𑀳𑀪𑀸𑀯𑀸𑀧𑀸𑀤𑀦𑀢𑁄. 𑀲𑀫𑀸𑀳𑀺𑀢𑀲𑁆𑀲 𑀳𑀺 𑀲𑀻𑀮𑀁 𑀣𑀺𑀭𑀢𑀭𑀁 𑀳𑁄𑀢𑀺. 𑀲𑀫𑀻𑀧𑁂 𑀯𑀮𑁆𑀮𑀺𑀆𑀤𑀻𑀦𑀁 𑀳𑀭𑀡𑀁 𑀯𑀺𑀬 𑀓𑀫𑁆𑀫𑀝𑁆𑀞𑀸𑀦𑁂 𑀔𑀮𑀦𑀧𑀓𑁆𑀔𑀮𑀦𑀘𑁆𑀙𑁂𑀤𑀦𑀁 𑀇𑀚𑁆𑀛𑀺𑀢𑀩𑁆𑀩𑀪𑀸𑀯𑀦𑀸𑀬 𑀯𑀺𑀩𑀦𑁆𑀥𑀸𑀧𑀦𑀬𑀦𑀢𑁄. 𑀫𑀽𑀮𑀔𑀡𑀦𑀁 𑀯𑀺𑀬 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀪𑀸𑀯𑀦𑀸 𑀢𑀲𑁆𑀲𑀸 𑀯𑀺𑀩𑀦𑁆𑀥𑀲𑁆𑀲 𑀫𑀽𑀮𑀓𑀸𑀦𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀦𑀁 𑀧𑀮𑀺𑀔𑀡𑀦𑀢𑁄. 𑀏𑀢𑁆𑀣 𑀘 𑀬𑀲𑁆𑀫𑀸 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀢𑁄 𑀬𑀣𑀸𑀲𑀼𑀢𑁂 𑀅𑀢𑁆𑀣𑁂 𑀲𑀸𑀓𑀘𑁆𑀙𑀸𑀲𑀫𑀸𑀧𑀚𑁆𑀚𑀦𑀁, 𑀢𑀢𑁄 𑀓𑀫𑁆𑀫𑀝𑁆𑀞𑀸𑀦𑀯𑀺𑀲𑁄𑀥𑀦𑁂𑀦 𑀲𑀫𑀣𑀦𑀺𑀧𑁆𑀨𑀢𑁆𑀢𑀺, 𑀢𑀢𑁄 𑀲𑀫𑀸𑀳𑀺𑀢𑀲𑁆𑀲 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀸𑀭𑀺𑀧𑀽𑀭𑀺. 𑀧𑀭𑀺𑀧𑀼𑀡𑁆𑀡𑀯𑀺𑀧𑀲𑁆𑀲𑀦𑁄 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀭𑀺𑀩𑁆𑀭𑀽𑀳𑁂𑀢𑀻𑀢𑀺 𑀏𑀯𑀫𑁂𑀢𑁂𑀲𑀁 𑀅𑀗𑁆𑀕𑀸𑀦𑀁 𑀧𑀭𑀫𑁆𑀧𑀭𑀸𑀬 𑀲𑀫𑁆𑀫𑀼𑀔𑀸 𑀘 𑀅𑀦𑀼𑀕𑁆𑀕𑀡𑁆𑀳𑀦𑀢𑁄 𑀅𑀬𑀫𑀸𑀦𑀼𑀧𑀼𑀩𑁆𑀩𑀻 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁫𑁩. 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀻𑀢𑀺 𑀇𑀥 𑀏𑀯𑀁 𑀅𑀭𑀳𑀢𑁆𑀢𑀨𑀮𑀁 𑀧𑀸𑀧𑀺𑀢𑀸𑀬 𑀤𑁂𑀲𑀦𑀸𑀬 ‘‘𑀓𑀢𑀺 𑀧𑀦𑀸𑀯𑀼𑀲𑁄, 𑀪𑀯𑀸’’𑀢𑀺 𑀪𑀯𑀁 𑀧𑀼𑀘𑁆𑀙𑀦𑁆𑀢𑁄 𑀓𑀻𑀤𑀺𑀲𑀁 𑀅𑀦𑀼𑀲𑀦𑁆𑀥𑀺𑀁 𑀉𑀧𑀸𑀤𑀸𑀬 𑀧𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀳𑀺 ‘‘𑀫𑀽𑀮𑀫𑁂𑀯 𑀕𑀢𑁄 𑀅𑀦𑀼𑀲𑀦𑁆𑀥𑀻’’𑀢𑀺 𑀯𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀤𑀼𑀧𑁆𑀧𑀜𑁆𑀜𑁄’’𑀢𑀺𑀆𑀤𑀺𑀫𑀸𑀳. 𑀤𑀼𑀧𑁆𑀧𑀜𑁆𑀜𑁄𑀢𑀺 𑀳𑀺 𑀇𑀥 𑀅𑀧𑁆𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀚𑀴𑁄 𑀏𑀯. 𑀓𑀸𑀫𑀪𑀯𑁄𑀢𑀺𑀆𑀤𑀻𑀲𑀼 𑀓𑀫𑁆𑀫𑁄𑀧𑀧𑀢𑁆𑀢𑀺𑀪𑁂𑀤𑀢𑁄 𑀤𑀼𑀯𑀺𑀥𑁄𑀧𑀺 𑀪𑀯𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀪𑀯𑀽𑀧𑀕𑀁 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂𑀢𑀁𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁬𑁪𑁭; 𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁬𑁪𑁬-𑁬𑁪𑁭) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀦𑀩𑁆𑀪𑀯𑀲𑁆𑀲𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀅𑀧𑀭𑀸𑀧𑀭𑀁 𑀪𑀯𑀦𑀢𑁄 𑀚𑀸𑀬𑀦𑀢𑁄 𑀧𑀼𑀦𑀩𑁆𑀪𑀯𑁄𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀯𑀝𑁆𑀝𑀧𑀩𑀦𑁆𑀥𑀲𑁆𑀲. 𑀢𑁂𑀦𑀸𑀳 ‘‘𑀇𑀥 𑀯𑀝𑁆𑀝𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺. 𑀅𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀪𑀯𑀬𑁄𑀦𑀺𑀕𑀢𑀺𑀆𑀤𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺. 𑀢𑀳𑀺𑀁 𑀢𑀳𑀺𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑀸𑀤𑀺𑀓𑁂. 𑀅𑀪𑀺𑀦𑀦𑁆𑀤𑀦𑀸𑀢𑀺 𑀢𑀡𑁆𑀳𑀸𑀅𑀪𑀺𑀦𑀦𑁆𑀤𑀦𑀳𑁂𑀢𑀼. 𑀕𑀫𑀦𑀸𑀕𑀫𑀦𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 𑀪𑀯𑀸𑀤𑀻𑀲𑀼 𑀲𑀢𑁆𑀢𑀸𑀦𑀁 𑀅𑀧𑀭𑀸𑀧𑀭𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀤𑀲𑁆𑀲𑁂𑀢𑀺. 𑀔𑀬𑀦𑀺𑀭𑁄𑀥𑁂𑀦𑀸𑀢𑀺 𑀅𑀘𑁆𑀘𑀦𑁆𑀢𑀔𑀬𑀲𑀗𑁆𑀔𑀸𑀢𑁂𑀦 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦. 𑀉𑀪𑀬𑀫𑁂𑀢𑀁 𑀦 𑀯𑀢𑁆𑀢𑀩𑁆𑀩𑀁 𑀧𑀳𑀸𑀦𑀸𑀪𑀺𑀲𑀫𑀬𑀪𑀸𑀯𑀦𑀸𑀪𑀺𑀲𑀫𑀬𑀸𑀦𑀁 𑀅𑀘𑁆𑀘𑀸𑀲𑀦𑁆𑀦𑀓𑀸𑀮𑀢𑁆𑀢𑀸. 𑀯𑀢𑁆𑀢𑀩𑁆𑀩𑀁 𑀢𑀁 𑀳𑁂𑀢𑀼𑀨𑀮𑀥𑀫𑁆𑀫𑀽𑀧𑀘𑀸𑀭𑀯𑀲𑁂𑀦. 𑀬𑀣𑀸 𑀳𑀺 𑀧𑀤𑀻𑀧𑀼𑀚𑁆𑀚𑀮𑀦𑀳𑁂𑀢𑀼𑀓𑁄 𑀅𑀦𑁆𑀥𑀓𑀸𑀭𑀯𑀺𑀕𑀫𑁄, 𑀏𑀯𑀁 𑀯𑀺𑀚𑁆𑀚𑀼𑀧𑁆𑀧𑀸𑀤𑀳𑁂𑀢𑀼𑀓𑁄 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑁄, 𑀳𑁂𑀢𑀼𑀨𑀮𑀥𑀫𑁆𑀫𑀸 𑀘 𑀲𑀫𑀸𑀦𑀓𑀸𑀮𑀸𑀧𑀺 𑀧𑀼𑀩𑁆𑀩𑀸𑀧𑀭𑀓𑀸𑀮𑀸 𑀯𑀺𑀬 𑀯𑁄𑀳𑀭𑀻𑀬𑀦𑁆𑀢𑀺 𑀬𑀣𑀸 𑁋 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀫. 𑀦𑀺. 𑁧.𑁨𑁦𑁪, 𑁪𑁦𑁦; 𑀫. 𑀦𑀺. 𑁩.𑁪𑁨𑁦, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁩-𑁪𑁫; 𑁨.𑁪.𑁬𑁦; 𑀓𑀣𑀸. 𑁪𑁬𑁫, 𑁪𑁬𑁭) 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀓𑀺𑀭𑀺𑀬𑀸. 𑀕𑀫𑀦𑀁 𑀉𑀧𑀘𑁆𑀙𑀺𑀚𑁆𑀚𑀢𑀺 𑀇𑀥 𑀓𑀸𑀫𑀪𑀯𑁂 𑀧𑀭𑀺𑀦𑀺𑀩𑁆𑀩𑀸𑀦𑁂𑀦. 𑀆𑀕𑀫𑀦𑀁 𑀉𑀧𑀘𑁆𑀙𑀺𑀚𑁆𑀚𑀢𑀺 𑀢𑀢𑁆𑀣 𑀭𑀽𑀧𑀸𑀭𑀽𑀧𑁂𑀲𑀼 𑀧𑀭𑀺𑀦𑀺𑀩𑁆𑀩𑀸𑀦𑁂𑀦. 𑀕𑀫𑀦𑀸𑀕𑀫𑀦𑀁 𑀉𑀧𑀘𑁆𑀙𑀺𑀚𑁆𑀚𑀢𑀺 𑀲𑀩𑁆𑀩𑀲𑁄 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄.

𑁪𑁫𑁪. 𑀯𑀺𑀯𑀝𑁆𑀝𑀓𑀣𑀸𑀬 𑀧𑀭𑀢𑁄 𑀚𑁄𑀢𑀺𑀢𑀁 𑀧𑀞𑀫𑀁 𑀛𑀸𑀦𑀁 𑀯𑀺𑀯𑀝𑁆𑀝𑀁 𑀧𑀢𑁆𑀯𑀸 𑀞𑀺𑀢𑀲𑁆𑀲 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀲𑁆𑀲 𑀦𑀺𑀭𑁄𑀥𑀲𑀸𑀥𑀓𑀁 𑀯𑀺𑀪𑀸𑀯𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀢𑀫𑀁 𑀧𑀦𑀸𑀯𑀼𑀲𑁄𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀻’’𑀢𑀺𑀆𑀤𑀺. 𑀢𑀣𑀸 𑀳𑀺 𑀅𑀦𑀦𑁆𑀢𑀭𑀁 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀓𑁂𑀦 𑀪𑀺𑀓𑁆𑀔𑀼𑀦𑀸 𑀚𑀸𑀦𑀺𑀢𑀩𑁆𑀩𑀸𑀦𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀲𑀫𑁆𑀧𑀬𑁄𑀕𑀧𑀳𑀸𑀦𑀗𑁆𑀕𑀸𑀦𑀺 𑀧𑀼𑀘𑁆𑀙𑀺𑀢𑀸𑀦𑀺. 𑀅𑀗𑁆𑀕𑀯𑀯𑀢𑁆𑀣𑀸𑀦𑀦𑁆𑀢𑀺 𑀛𑀸𑀦𑀗𑁆𑀕𑀯𑀯𑀢𑁆𑀣𑀸𑀦𑀁. 𑀓𑁄𑀝𑁆𑀞𑀸𑀲𑀧𑀭𑀺𑀘𑁆𑀙𑁂𑀤𑁄𑀢𑀺 𑀢𑀢𑁆𑀣 𑀮𑀩𑁆𑀪𑀫𑀸𑀦𑀨𑀲𑁆𑀲𑀧𑀜𑁆𑀘𑀫𑀓𑀸𑀤𑀺𑀥𑀫𑁆𑀫𑀓𑁄𑀝𑁆𑀞𑀸𑀲𑀧𑀭𑀺𑀘𑁆𑀙𑁂𑀤𑁄 𑀚𑀸𑀦𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀛𑀸𑀦𑁂 𑀏𑀢𑁆𑀢𑀓𑀸 𑀥𑀫𑁆𑀫𑀸 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀏𑀢𑁆𑀢𑀓𑀸 𑀦𑀺𑀭𑁄𑀥𑀺𑀢𑀸𑀢𑀺 𑀚𑀸𑀦𑀺𑀢𑀩𑁆𑀩𑀁. 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀸𑀦𑀺 𑀅𑀗𑁆𑀕𑀸𑀦𑀻𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀉𑀧𑀓𑀸𑀭𑀸𑀦𑀺 𑀘 𑀅𑀦𑀼𑀧𑀓𑀸𑀭𑀸𑀦𑀺 𑀘 𑀅𑀗𑁆𑀕𑀸𑀦𑀺. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀳𑀺 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺 𑀘 𑀧𑀢𑁆𑀢𑀩𑁆𑀩𑀢𑁆𑀢𑀸 𑀢𑀁𑀢𑀁𑀜𑀸𑀡𑀲𑁆𑀲 𑀲𑀫𑀸𑀥𑀺𑀘𑀭𑀺𑀬𑀸𑀳𑀺 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀸 𑀥𑀫𑁆𑀫𑀸 𑀅𑀦𑀼𑀧𑀓𑀸𑀭𑀓𑀗𑁆𑀕𑀸𑀦𑀺, 𑀲𑀫𑀢𑀺𑀓𑁆𑀓𑀫𑀓𑀸 𑀉𑀧𑀓𑀸𑀭𑀓𑀗𑁆𑀕𑀸𑀦𑀺. 𑀢𑁂𑀲𑀜𑁆𑀳𑀺 𑀯𑀲𑁂𑀦 𑀬𑀣𑀸𑀦𑀼𑀧𑀼𑀩𑁆𑀩𑀁 𑀉𑀧𑀲𑀦𑁆𑀢𑀼𑀧𑀲𑀦𑁆𑀢𑀑𑀴𑀸𑀭𑀺𑀓𑀪𑀸𑀯𑀸𑀬 𑀪𑀯𑀕𑁆𑀕𑀲𑀫𑀸𑀧𑀢𑁆𑀢𑀺𑀬𑀸 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀢𑀁 𑀧𑀢𑁆𑀢𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀁 𑀓𑀸𑀮𑀁 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀧𑁆𑀧𑀯𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀦𑀺𑀭𑁄𑀥𑀲𑁆𑀲. 𑀅𑀦𑀦𑁆𑀢𑀭𑀧𑀘𑁆𑀘𑀬𑀦𑁆𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀲𑀤𑀺𑀲𑀁. 𑀦 𑀳𑀺 𑀦𑀺𑀭𑁄𑀥𑀲𑁆𑀲 𑀓𑁄𑀘𑀺 𑀥𑀫𑁆𑀫𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀦𑀸𑀫 𑀅𑀢𑁆𑀣𑀺. 𑀬𑀜𑁆𑀳𑀺 𑀢𑀤𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀢𑀣𑀸 𑀦𑀺𑀭𑀼𑀚𑁆𑀛𑀦𑀁, 𑀢𑀁 𑀬𑀣𑀸𑀯𑀼𑀢𑁆𑀢𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀳𑁂𑀢𑀼𑀓𑀸𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀅𑀳𑁄𑀲𑀻𑀢𑀺 𑀲𑀸 𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀯𑀺𑀬 𑀳𑁄𑀢𑀻𑀢𑀺 𑀢𑀁 𑀯𑀼𑀢𑁆𑀢𑀁. 𑀙 𑀲𑀫𑀸𑀧𑀢𑁆𑀢𑀺𑀬𑁄𑀢𑀺 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀯𑀼𑀢𑁆𑀢𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀲𑀁𑀯𑀡𑁆𑀡𑀦𑀸𑀢𑀺 𑀓𑀢𑁆𑀯𑀸. ‘‘𑀲𑀢𑁆𑀢 𑀲𑀫𑀸𑀧𑀢𑁆𑀢𑀺𑀬𑁄’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀇𑀤𑀁 ‘‘𑀘𑀢𑀼𑀭𑀗𑁆𑀕𑀺𑀓’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀦𑀬𑀁 𑀯𑀸 𑀤𑀲𑁆𑀲𑁂𑀢𑁆𑀯𑀸𑀢𑀺 𑀆𑀤𑀺𑀅𑀦𑁆𑀢𑀤𑀲𑁆𑀲𑀦𑀯𑀲𑁂𑀦 𑀦𑀬𑀤𑀲𑁆𑀲𑀦𑀁 𑀓𑀢𑁆𑀯𑀸.

𑁪𑁫𑁫. 𑀏𑀯𑀁 𑀦𑀺𑀭𑁄𑀥𑀲𑁆𑀲 𑀧𑀸𑀤𑀓𑀁 𑀯𑀺𑀪𑀸𑀯𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑁆𑀢𑁄𑀦𑀺𑀭𑁄𑀥𑁂 𑀅𑀦𑀼𑀧𑀩𑀦𑁆𑀥𑀪𑀸𑀯𑀢𑁄 𑀧𑀜𑁆𑀘𑀦𑁆𑀦𑀁 𑀧𑀲𑀸𑀤𑀸𑀦𑀁 𑀧𑀘𑁆𑀘𑀬𑀧𑀼𑀘𑁆𑀙𑀦𑁂 𑀧𑀞𑀫𑀁 𑀢𑀸𑀯 𑀢𑁂 𑀲𑀭𑀽𑀧𑀢𑁄 𑀆𑀯𑁂𑀡𑀺𑀓𑀢𑁄 𑀆𑀯𑁂𑀡𑀺𑀓𑀯𑀺𑀲𑀬𑀢𑁄 𑀧𑀝𑀺𑀲𑁆𑀲𑀭𑀡𑀢𑁄 𑀘 𑀧𑀼𑀘𑁆𑀙𑀦𑀯𑀲𑁂𑀦 𑀧𑀸𑀴𑀺 𑀧𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀜𑁆𑀜𑀸𑀡𑀦𑀺𑀲𑁆𑀲𑀬𑁂 𑀧𑀜𑁆𑀘 𑀧𑀲𑀸𑀤𑁂 𑀧𑀼𑀘𑁆𑀙𑀦𑁆𑀢𑁄’’𑀢𑀺 𑀆𑀳. 𑀕𑁄𑀘𑀭𑀯𑀺𑀲𑀬𑀦𑁆𑀢𑀺 𑀏𑀢𑁆𑀣 𑀓𑀸𑀫𑀁 𑀢𑀩𑁆𑀩𑀳𑀼𑀮𑀘𑀸𑀭𑀺𑀢𑀸𑀧𑁂𑀓𑁆𑀔𑀁 𑀕𑁄𑀘𑀭𑀕𑁆𑀕𑀳𑀡𑀁, 𑀅𑀦𑀜𑁆𑀜𑀢𑁆𑀣𑀪𑀸𑀯𑀸𑀧𑁂𑀓𑁆𑀔𑀁 𑀯𑀺𑀲𑀬𑀕𑁆𑀕𑀳𑀡𑀦𑁆𑀢𑀺 𑀅𑀢𑁆𑀣𑁂𑀯 𑀕𑁄𑀘𑀭𑀯𑀺𑀲𑀬𑀪𑀸𑀯𑀸𑀦𑀁 𑀯𑀺𑀲𑁂𑀲𑁄, 𑀯𑀺𑀯𑀭𑀺𑀬𑀫𑀸𑀦𑀁 𑀧𑀦 𑀉𑀪𑀬𑀫𑁆𑀧𑀺 𑀆𑀭𑀫𑁆𑀫𑀡𑀲𑀪𑀸𑀯𑀫𑁂𑀯𑀸𑀢𑀺 𑀆𑀳 ‘‘𑀕𑁄𑀘𑀭𑀪𑀽𑀢𑀁 𑀯𑀺𑀲𑀬’’𑀦𑁆𑀢𑀺. 𑀏𑀓𑁂𑀓𑀲𑁆𑀲𑀸𑀢𑀺 𑀏𑀓𑁄 𑀏𑀓𑀲𑁆𑀲, 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀣𑁄 𑀳𑀺 𑀅𑀬𑀁 𑀏𑀓-𑀲𑀤𑁆𑀤𑁄 ‘‘𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁭) 𑀯𑀺𑀬. 𑀲𑀘𑁂 𑀳𑀻𑀢𑀺𑀆𑀤𑀺 𑀅𑀪𑀽𑀢𑀧𑀭𑀺𑀓𑀧𑁆𑀧𑀦𑀯𑀘𑀦𑀫𑁂𑀢𑀁. 𑀢𑀢𑁆𑀣 𑀲𑀫𑁄𑀥𑀸𑀦𑁂𑀢𑁆𑀯𑀸𑀢𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸. 𑀯𑀺𑀦𑀸𑀧𑀺 𑀫𑀼𑀔𑁂𑀦𑀸𑀢𑀺𑀆𑀤𑀺𑀦𑀸 𑀅𑀢𑁆𑀣𑀲𑀮𑁆𑀮𑀸𑀧𑀺𑀓𑀦𑀺𑀤𑀲𑁆𑀲𑀦𑀁 𑀦𑀸𑀫 𑀤𑀲𑁆𑀲𑁂𑀢𑀺. 𑀬𑀣𑀸 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀫𑁂𑀯 𑀘𑀓𑁆𑀔𑀼 𑀭𑀽𑀧𑀁 𑀧𑀲𑁆𑀲𑀢𑀺, 𑀦 𑀓𑁂𑀯𑀮𑀁, 𑀏𑀯𑀁 𑀘𑀓𑁆𑀔𑀼𑀦𑀺𑀲𑁆𑀲𑀬𑀫𑁂𑀯 𑀯𑀺𑀜𑁆𑀜𑀸𑀡𑀁 𑀢𑀁 𑀧𑀲𑁆𑀲𑀢𑀺, 𑀦 𑀇𑀢𑀭𑀦𑁆𑀢𑀺 𑀆𑀳 ‘‘𑀘𑀓𑁆𑀔𑀼𑀧𑀲𑀸𑀤𑁂 𑀉𑀧𑀦𑁂𑀳𑀻’’𑀢𑀺. 𑀢𑁂𑀦 𑀢𑁂𑀲𑀁 𑀢𑀢𑁆𑀣 𑀲𑀁𑀳𑀘𑁆𑀘𑀓𑀸𑀭𑀺𑀢𑀁 𑀤𑀲𑁆𑀲𑁂𑀢𑀺. 𑀬𑀤𑀺 𑀯𑀸 𑀦𑀻𑀮𑀁 𑀬𑀤𑀺 𑀯𑀸 𑀧𑀻𑀢𑀓𑀦𑁆𑀢𑀺 𑀇𑀤𑀁 𑀦𑀻𑀮𑀧𑀻𑀢𑀸𑀤𑀺𑀲𑀪𑀸𑀯𑀚𑀸𑀦𑀦𑀫𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀦𑀻𑀮𑀁 𑀧𑀻𑀢𑀓𑀦𑁆𑀢𑀺 𑀧𑀚𑀸𑀦𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀢𑁆𑀣𑁂𑀯 𑀅𑀯𑀺𑀓𑀧𑁆𑀧𑀓𑀪𑀸𑀯𑀢𑁄. 𑀏𑀢𑁂𑀲𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁. 𑀦𑀺𑀲𑁆𑀲𑀬𑀲𑀻𑀲𑁂𑀦 𑀦𑀺𑀲𑁆𑀲𑀺𑀢𑀧𑀼𑀘𑁆𑀙𑀸 𑀳𑁂𑀲𑀸, 𑀏𑀯𑀜𑁆𑀳𑀺 𑀯𑀺𑀲𑀬𑀸𑀦𑀼𑀪𑀯𑀦𑀘𑁄𑀤𑀦𑀸 𑀲𑀫𑀢𑁆𑀣𑀺𑀢𑀸 𑀳𑁄𑀢𑀺. 𑀢𑁂𑀦𑀸𑀳 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀳𑀻’’𑀢𑀺𑀆𑀤𑀺. 𑀬𑀣𑀸𑀲𑀓𑀁 𑀯𑀺𑀲𑀬𑀁 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀅𑀦𑀼𑀪𑀯𑀺𑀢𑀼𑀁 𑀅𑀲𑀫𑀢𑁆𑀣𑀸𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺, 𑀢𑀢𑁆𑀣 𑀲𑀫𑀢𑁆𑀣𑀢𑀸𑀬𑁂𑀯 𑀘 𑀦𑀢𑁆𑀣𑀺, 𑀦 𑀓𑀺𑀜𑁆𑀘𑀺 𑀅𑀢𑁆𑀣𑀢𑁄 𑀧𑀝𑀺𑀲𑀭𑀦𑁆𑀢𑀸𑀦𑀺 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀺𑀁 𑀏𑀢𑀸𑀦𑀺 𑀧𑀝𑀺𑀲𑀭𑀦𑁆𑀢𑀻’’𑀢𑀺. 𑀚𑀯𑀦𑀫𑀦𑁄 𑀧𑀝𑀺𑀲𑀭𑀡𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀁 𑀇𑀢𑀭𑀜𑁆𑀘 𑀲𑀸𑀥𑀸𑀭𑀡𑀢𑁄 𑀯𑀢𑁆𑀯𑀸 𑀧𑀼𑀦 𑀬𑀸𑀬’𑀲𑁆𑀲 𑀭𑀚𑁆𑀚𑀦𑀸𑀤𑀺𑀧𑀯𑀢𑁆𑀢𑀺𑀬𑀸 𑀧𑀝𑀺𑀲𑀭𑀡𑀢𑀸, 𑀲𑀸 𑀲𑀯𑀺𑀲𑁂𑀲𑀸 𑀬𑀢𑁆𑀣 𑀮𑀩𑁆𑀪𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀫𑀦𑁄 𑀯𑀸’’𑀢𑀺 𑀆𑀳. 𑀏𑀢𑀲𑁆𑀫𑀺𑀁 𑀧𑀦 𑀤𑁆𑀯𑀸𑀭𑁂𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀚𑀯𑀦𑀁 𑀭𑀚𑁆𑀚𑀢𑀺 𑀯𑀸 𑀤𑀼𑀲𑁆𑀲𑀢𑀺 𑀯𑀸 𑀫𑀼𑀬𑁆𑀳𑀢𑀺 𑀯𑀸, 𑀬𑀢𑁄 𑀢𑀢𑁆𑀣 𑀅𑀜𑁆𑀜𑀸𑀡𑀸𑀤𑀺𑀅𑀲𑀁𑀯𑀭𑁄 𑀧𑀯𑀢𑁆𑀢𑀢𑀺.

𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀚𑀯𑀦𑀫𑀦𑀲𑁆𑀲𑁂𑀯 𑀧𑀝𑀺𑀲𑀭𑀡𑀪𑀸𑀯𑁂. 𑀤𑀼𑀩𑁆𑀩𑀮𑀪𑁄𑀚𑀓𑀸𑀢𑀺 𑀳𑀻𑀦𑀲𑀸𑀫𑀢𑁆𑀣𑀺𑀬𑀸 𑀭𑀸𑀚𑀪𑁄𑀕𑁆𑀕𑀸. 𑀲𑁂𑀯𑀓𑀸𑀦𑀁 𑀕𑀡𑀦𑀸𑀬 𑀬𑁄𑀚𑀺𑀢𑀤𑀺𑀯𑀲𑁂 𑀮𑀩𑁆𑀪𑀫𑀸𑀦𑀓𑀳𑀸𑀧𑀡𑁄 𑀬𑀼𑀢𑁆𑀢𑀺𑀓𑀳𑀸𑀧𑀡𑁄. 𑀅𑀦𑁆𑀤𑀼𑀩𑀦𑁆𑀥𑀦𑁂𑀦 𑀩𑀤𑁆𑀥𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂𑀦 𑀮𑀩𑁆𑀪𑀫𑀸𑀦𑀓𑀳𑀸𑀧𑀡𑁄 𑀩𑀦𑁆𑀥𑀓𑀳𑀸𑀧𑀡𑁄. 𑀓𑀺𑀜𑁆𑀘𑀺 𑀧𑀳𑀭𑀦𑁆𑀢𑁂 𑀫𑀸 𑀧𑀳𑀭𑀦𑁆𑀢𑀽𑀢𑀺 𑀧𑀝𑀺𑀓𑁆𑀔𑀺𑀧𑀢𑁄 𑀤𑀸𑀢𑀩𑁆𑀩𑀤𑀡𑁆𑀟𑁄 𑀫𑀸𑀧𑀳𑀸𑀭𑀓𑀳𑀸𑀧𑀡𑁄. 𑀲𑁄 𑀲𑀩𑁆𑀩𑁄𑀧𑀺 𑀧𑀭𑀺𑀢𑁆𑀢𑀓𑁂𑀲𑀼 𑀕𑀸𑀫𑀺𑀓𑀫𑀦𑀼𑀲𑁆𑀲𑁂𑀲𑀼 𑀢𑀣𑀸 𑀮𑀩𑁆𑀪𑀫𑀸𑀦𑁄 𑀏𑀢𑁆𑀢𑀓𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀝𑁆𑀞𑀓𑀳𑀸𑀧𑀡𑁄 𑀯𑀸’’𑀢𑀺𑀆𑀤𑀺. 𑀲𑀢𑀯𑀢𑁆𑀣𑀼𑀓𑀦𑁆𑀢𑀺 𑀲𑀢𑀓𑀭𑀻𑀲𑀯𑀢𑁆𑀣𑀼𑀓𑀁. 𑀏𑀲 𑀦𑀬𑁄 𑀲𑁂𑀲𑀧𑀤𑀤𑁆𑀯𑀬𑁂𑀧𑀺. 𑀢𑀢𑁆𑀣𑀸𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀥𑀦𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁪𑁫𑁬. 𑀅𑀦𑁆𑀢𑁄𑀦𑀺𑀭𑁄𑀥𑀲𑁆𑀫𑀺𑀁 𑀧𑀜𑁆𑀘 𑀧𑀲𑀸𑀤𑁂𑀢𑀺 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀲𑁆𑀲 𑀧𑀯𑀢𑁆𑀢𑀫𑀸𑀦𑁂 𑀧𑀜𑁆𑀘 𑀧𑀲𑀸𑀤𑁂. 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀲𑁆𑀫𑀺𑀦𑁆𑀢𑀺 𑀚𑀯𑀦𑀸𑀤𑀺𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀓𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀁. 𑀩𑀮𑀯𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀧𑀘𑁆𑀙𑀸𑀚𑀸𑀢𑀯𑀺𑀧𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀉𑀧𑀢𑁆𑀣𑀫𑁆𑀪𑀓𑀪𑀸𑀯𑁂𑀦 𑀩𑀮𑀯𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘𑀸𑀢𑀺 𑀇𑀦𑁆𑀤𑁆𑀭𑀺𑀬𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑀯𑀲𑁂𑀦 𑀧𑀘𑁆𑀘𑀬𑀪𑀽𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀧𑀜𑁆𑀘𑀯𑀺𑀥𑁄𑀧𑀺 𑀧𑀲𑀸𑀤𑁄 𑀢𑀺𑀝𑁆𑀞𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀯𑀺𑀦𑀸 𑀦 𑀢𑀺𑀝𑁆𑀞𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀭𑀳𑀺𑀢𑀲𑁆𑀲 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀭𑀽𑀧𑀓𑀮𑀸𑀧𑀲𑁆𑀲 𑀅𑀪𑀸𑀯𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀦𑀼𑀧𑀸𑀮𑀦𑀮𑀓𑁆𑀔𑀡𑁂𑀦 𑀚𑀻𑀯𑀺𑀢𑁂𑀦 𑀅𑀦𑀼𑀧𑀸𑀮𑀺𑀢𑀸 𑀏𑀯 𑀉𑀲𑁆𑀫𑀸 𑀧𑀯𑀢𑁆𑀢𑀢𑀺, 𑀦 𑀢𑁂𑀦 𑀅𑀦𑀦𑀼𑀧𑀸𑀮𑀺𑀢𑀸, 𑀢𑀲𑁆𑀫𑀸 𑀉𑀲𑁆𑀫𑀸 𑀆𑀬𑀼𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺. 𑀚𑀸𑀮𑀲𑀺𑀔𑀁 𑀧𑀝𑀺𑀘𑁆𑀘 𑀆𑀪𑀸 𑀧𑀜𑁆𑀜𑀸𑀬𑀢𑀻𑀢𑀺 𑀚𑀸𑀮𑀲𑀺𑀔𑀸𑀲𑀗𑁆𑀔𑀸𑀢𑀪𑀽𑀢𑀲𑀗𑁆𑀖𑀸𑀢𑀁 𑀲𑀳𑁂𑀯 𑀧𑀯𑀢𑁆𑀢𑀫𑀸𑀦𑀁 𑀦𑀺𑀲𑁆𑀲𑀸𑀬 ‘‘𑀆𑀪𑀸’’𑀢𑀺 𑀮𑀤𑁆𑀥𑀦𑀸𑀫𑀸 𑀯𑀡𑁆𑀡𑀥𑀸𑀢𑀼 ‘‘𑀉𑀚𑁆𑀚𑀮𑀢𑀺, 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀭𑀽𑀧𑀕𑀢𑀸𑀦𑀺 𑀘 𑀯𑀺𑀤𑀁𑀲𑁂𑀢𑀻’’𑀢𑀺𑀆𑀤𑀻𑀳𑀺 𑀧𑀓𑀸𑀭𑁂𑀳𑀺 𑀜𑀸𑀬𑀢𑀺. 𑀢𑀁 𑀆𑀮𑁄𑀓𑀁 𑀧𑀝𑀺𑀘𑁆𑀘𑀸𑀢𑀺 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀆𑀮𑁄𑀓𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸. 𑀚𑀸𑀮𑀲𑀺𑀔𑀸 𑀧𑀜𑁆𑀜𑀸𑀬𑀢𑀻𑀢𑀺 ‘‘𑀅𑀧𑁆𑀧𑀺𑀓𑀸, 𑀫𑀳𑀢𑀻, 𑀉𑀚𑀼, 𑀓𑀼𑀝𑀺𑀮𑀸’’𑀢𑀺𑀆𑀤𑀺𑀦𑀸 𑀧𑀸𑀓𑀝𑀸 𑀳𑁄𑀢𑀺.

𑀚𑀸𑀮𑀲𑀺𑀔𑀸 𑀯𑀺𑀬 𑀓𑀫𑁆𑀫𑀚𑀢𑁂𑀚𑁄 𑀦𑀺𑀲𑁆𑀲𑀬𑀪𑀸𑀯𑀢𑁄. 𑀆𑀮𑁄𑀓𑁄 𑀯𑀺𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀢𑀦𑁆𑀦𑀺𑀲𑁆𑀲𑀺𑀢𑀪𑀸𑀯𑀢𑁄. 𑀇𑀤𑀸𑀦𑀺 𑀉𑀧𑀫𑁄𑀧𑀫𑀺𑀢𑀩𑁆𑀩𑀸𑀦𑀁 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀮𑀲𑀺𑀔𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀮𑁄𑀓𑀁 𑀕𑀳𑁂𑀢𑁆𑀯𑀸𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀺𑀦𑀸 𑀬𑀣𑀸 𑀚𑀸𑀮𑀲𑀺𑀔𑀸𑀬 𑀲𑀳𑁂𑀯 𑀆𑀮𑁄𑀓𑁄 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀓𑀫𑁆𑀫𑀚𑀼𑀲𑁆𑀫𑀦𑀸 𑀲𑀳𑁂𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀚𑀸𑀮𑀲𑀺𑀔𑀸𑀲𑀦𑁆𑀦𑀺𑀲𑁆𑀲𑀬𑁄 𑀢𑀲𑁆𑀲𑀸 𑀲𑀢𑀺𑀬𑁂𑀯 𑀳𑁄𑀦𑁆𑀢𑁄 𑀆𑀮𑁄𑀓𑁄 𑀢𑀸𑀬 𑀉𑀧𑁆𑀧𑀸𑀤𑀺𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑁆𑀢𑀦𑀸 𑀚𑀦𑀺𑀢𑀆𑀮𑁄𑀓𑁂𑀦𑁂𑀯𑀸’’𑀢𑀺. 𑀉𑀲𑁆𑀫𑀸 𑀦𑀸𑀫𑁂𑀢𑁆𑀣 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀢𑁂𑀚𑁄𑀥𑀸𑀢𑀼 𑀢𑀦𑁆𑀦𑀺𑀲𑁆𑀲𑀺𑀢𑀜𑁆𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀢𑀤𑀦𑀼𑀧𑀸𑀮𑀓𑀜𑁆𑀘𑀸𑀢𑀺 𑀆𑀳 ‘‘𑀓𑀫𑁆𑀫𑀚𑀫𑀳𑀸𑀪𑀽𑀢𑀲𑀫𑁆𑀪𑀯𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀉𑀲𑁆𑀫𑀸𑀬 𑀅𑀦𑀼𑀧𑀸𑀮𑀦’’𑀦𑁆𑀢𑀺. 𑀦 𑀓𑁂𑀯𑀮𑀁 𑀔𑀡𑀝𑁆𑀞𑀺𑀢𑀺𑀬𑀸 𑀏𑀯, 𑀅𑀣 𑀔𑁄 𑀧𑀩𑀦𑁆𑀥𑀸𑀦𑀼𑀧𑀘𑁆𑀙𑁂𑀤𑀲𑁆𑀲𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀯𑀲𑁆𑀲𑀲𑀢𑀫𑁆𑀧𑀺 𑀓𑀫𑁆𑀫𑀚𑀢𑁂𑀚𑀧𑀯𑀢𑁆𑀢𑀁 𑀧𑀸𑀮𑁂𑀢𑀻’’𑀢𑀺. 𑀉𑀲𑁆𑀫𑀸 𑀆𑀬𑀼𑀦𑁄 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄 𑀲𑁂𑀲𑀪𑀽𑀢𑀲𑀳𑀺𑀢𑁄 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀫𑀳𑀸𑀪𑀽𑀢𑀸𑀦𑀻’’𑀢𑀺. 𑀢𑀣𑀸 𑀆𑀬𑀼𑀧𑀺 𑀲𑀳𑀚𑀸𑀢𑀭𑀽𑀧𑀁 𑀧𑀸𑀮𑁂𑀦𑁆𑀢𑀫𑁂𑀯 𑀉𑀲𑁆𑀫𑀸𑀬 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀫𑀳𑀸𑀪𑀽𑀢𑀸𑀦𑀺 𑀧𑀸𑀮𑁂𑀢𑀻’’𑀢𑀺.

𑁪𑁫𑁭. 𑀆𑀬𑀼 𑀏𑀯 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀅𑀦𑀼𑀧𑀸𑀮𑀦𑀯𑀲𑁂𑀦 𑀲𑀗𑁆𑀔𑀭𑀡𑀢𑁄 𑀆𑀬𑀼𑀲𑀗𑁆𑀔𑀸𑀭𑁄. 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀧𑀦 𑀅𑀦𑁂𑀓𑀲𑀢𑀲𑀳𑀲𑁆𑀲𑀪𑁂𑀤𑁂𑀲𑀼 𑀭𑀽𑀧𑀓𑀮𑀸𑀧𑁂𑀲𑀼 𑀧𑀯𑀢𑁆𑀢𑀺𑀬𑀸 𑀅𑀦𑁂𑀓𑀪𑁂𑀤𑀦𑁆𑀢𑀺 𑀓𑀢𑁆𑀯𑀸. 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀦𑁆𑀢𑀻𑀢𑀺 𑀯𑁂𑀤𑀦𑀺𑀬𑀸 𑀬𑀣𑀸 ‘‘𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺. 𑀢𑁂𑀦𑀸𑀳 ‘‘𑀯𑁂𑀤𑀦𑀸 𑀥𑀫𑁆𑀫𑀸𑀯𑀸’’𑀢𑀺. 𑀲𑀼𑀔𑀸𑀤𑀺𑀪𑁂𑀤𑀪𑀺𑀦𑁆𑀦𑀢𑁆𑀢𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄. 𑀇𑀫𑁂𑀲𑀁 𑀆𑀬𑀼𑀲𑀗𑁆𑀔𑀸𑀭𑀯𑁂𑀤𑀦𑀸𑀦𑀁 𑀏𑀓𑀦𑁆𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀫𑀭𑀡𑁂𑀦 𑀪𑀯𑀺𑀢𑀩𑁆𑀩𑀁 𑀯𑁂𑀤𑀦𑀸𑀬 𑀦𑀺𑀭𑀼𑀤𑁆𑀥𑀢𑁆𑀢𑀸. 𑀆𑀬𑀼𑀲𑀗𑁆𑀔𑀸𑀭𑀸𑀦𑀁 𑀢𑀣𑀸 𑀅𑀦𑀺𑀭𑀼𑀤𑁆𑀥𑀢𑁆𑀢𑀸 𑀦𑀺𑀭𑁄𑀥𑀲𑁆𑀲 𑀲𑀫𑀸𑀧𑀚𑁆𑀚𑀦𑀫𑁂𑀯 𑀦 𑀲𑀺𑀬𑀸, 𑀓𑀼𑀢𑁄 𑀯𑀼𑀝𑁆𑀞𑀸𑀦𑀁. 𑀢𑁂𑀦 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀢𑁂 𑀘 𑀳𑀸𑀯𑀼𑀲𑁄’’𑀢𑀺𑀆𑀤𑀺. 𑀯𑀼𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺 𑀲𑀜𑁆𑀜𑀸𑀯𑁂𑀤𑀦𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀬𑀸. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀓𑁆𑀓𑀡𑁆𑀞𑀺𑀢𑁆𑀯𑀸𑀢𑀺 𑀦𑀸𑀦𑀸𑀭𑀫𑁆𑀫𑀡𑀸𑀧𑀸𑀢𑀢𑁄 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦𑀸𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂 𑀓𑀸𑀮𑁂 𑀲𑀫𑁆𑀧𑀢𑁆𑀢𑁂. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀢𑀺 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀽𑀢𑀸. 𑀚𑀸𑀮𑀸𑀧𑀯𑀢𑁆𑀢𑀁 𑀯𑀺𑀬 𑀅𑀭𑀽𑀧𑀥𑀫𑁆𑀫𑀸 𑀢𑁂𑀚𑀼𑀲𑁆𑀲𑀤𑀪𑀸𑀯𑀢𑁄 𑀯𑀺𑀲𑀬𑁄𑀪𑀸𑀲𑀦𑀢𑁄 𑀘. 𑀉𑀤𑀓𑀧𑁆𑀧𑀳𑀸𑀭𑁄 𑀯𑀺𑀬 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄. 𑀧𑀺𑀳𑀺𑀢𑀅𑀗𑁆𑀕𑀸𑀭𑀸 𑀯𑀺𑀬 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀲𑁆𑀫𑀸𑀫𑀢𑁆𑀢𑀢𑀸𑀬 𑀅𑀦𑁄𑀪𑀸𑀲𑀦𑀢𑁄. 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀸𑀕𑀫𑀦𑀦𑁆𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀲𑁆𑀲 𑀉𑀧𑀕𑀫𑀦𑀁. 𑀅𑀦𑀼𑀭𑀽𑀧𑀧𑀢𑁆𑀢𑀺𑀯𑀲𑁂𑀦𑁂𑀯 𑀭𑀽𑀧𑀧𑀯𑀢𑁆𑀢𑀺𑀕𑁆𑀕𑀳𑀡𑀁. 𑀇𑀫𑀁 𑀭𑀽𑀧𑀓𑀸𑀬𑀁 𑀚𑀳𑀦𑁆𑀢𑀻𑀢𑀺 𑀇𑀫𑀲𑁆𑀫𑀸 𑀭𑀽𑀧𑀓𑀸𑀬𑀸 𑀓𑀴𑁂𑀯𑀭𑀸 𑀯𑀺𑀕𑀘𑁆𑀙𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺.

𑀓𑀸𑀬𑁂𑀦 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀓𑀸𑀬𑀲𑀗𑁆𑀔𑀸𑀭𑀸 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬. 𑀯𑀸𑀘𑀁 𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀯𑀘𑀻𑀲𑀗𑁆𑀔𑀸𑀭𑀸. 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀳𑀺 𑀯𑀸𑀘𑀁 𑀪𑀺𑀦𑁆𑀤𑀢𑀺 𑀓𑀣𑁂𑀢𑀺. 𑀘𑀺𑀢𑁆𑀢𑁂𑀦 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁄. 𑀘𑀺𑀢𑁆𑀢𑀲𑀗𑁆𑀔𑀸𑀭𑀦𑀺𑀭𑁄𑀥𑀘𑁄𑀤𑀦𑀸𑀬 𑀭𑀽𑀧𑀦𑀺𑀭𑁄𑀥𑁄 𑀯𑀺𑀬 𑀘𑀺𑀢𑁆𑀢𑀦𑀺𑀭𑁄𑀥𑁄 𑀅𑀘𑁄𑀤𑀺𑀢𑁄 𑀢𑁂𑀲𑀁 𑀢𑀢𑁄 𑀅𑀜𑁆𑀜𑀢𑁆𑀢𑀸𑀢𑀺 𑀦 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀦𑀺𑀭𑁄𑀥𑁄 𑀏𑀓𑀦𑁆𑀢𑀺𑀓𑁄 𑀯𑀺𑀢𑀓𑁆𑀓𑀸𑀤𑀺𑀦𑀺𑀭𑁄𑀥𑁂 𑀢𑀤𑀪𑀸𑀯𑀢𑁄. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀯𑀸𑀘𑀸 𑀅𑀦𑀺𑀭𑀼𑀤𑁆𑀥𑀸 𑀳𑁄𑀢𑀻’’𑀢𑀺, 𑀢𑀫𑁆𑀧𑀺 𑀦. 𑀯𑀸𑀘𑀁 𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀳𑀺 𑀯𑀘𑀻𑀲𑀗𑁆𑀔𑀸𑀭𑀸, 𑀢𑁂𑀲𑀼 𑀦𑀺𑀭𑀼𑀤𑁆𑀥𑁂𑀲𑀼 𑀓𑀣𑀁 𑀯𑀸𑀘𑀸𑀬 𑀅𑀦𑀺𑀭𑁄𑀥𑁄. 𑀘𑀺𑀢𑁆𑀢𑀁 𑀧𑀦 𑀦𑀺𑀭𑀼𑀤𑁆𑀥𑁂𑀲𑀼𑀧𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀢𑁂𑀳𑀺 𑀅𑀦𑀪𑀺𑀲𑀗𑁆𑀔𑀢𑀢𑁆𑀢𑀸 𑀯𑀺𑀢𑀓𑁆𑀓𑀸𑀤𑀺𑀦𑀺𑀭𑁄𑀥𑁄 𑀯𑀺𑀬 𑀧𑀯𑀢𑁆𑀢𑀢𑀺𑀬𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀧𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀓𑀢𑀁 𑀪𑀯𑁂𑀬𑁆𑀬, 𑀘𑀺𑀢𑁆𑀢𑀲𑁆𑀲 𑀅𑀦𑀺𑀭𑀼𑀤𑁆𑀥𑀢𑁆𑀢𑀸 𑀢𑀁 𑀦𑀺𑀲𑁆𑀲𑀸𑀬 𑀘 𑀭𑀽𑀧𑀥𑀫𑁆𑀫𑀸𑀦𑀁 𑀅𑀦𑀧𑀕𑀢𑀢𑁆𑀢𑀸 𑀢𑁂 𑀚𑀻𑀯𑀦𑁆𑀢𑀺 𑀏𑀯 𑀦𑀸𑀫𑀸𑀢𑀺. 𑀩𑁆𑀬𑀜𑁆𑀚𑀦𑁂 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸𑀢𑀺 ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸’’𑀢𑀺 𑀯𑀘𑀦𑀢𑁄 𑀢𑁂𑀯 𑀦𑀺𑀭𑀼𑀤𑁆𑀥𑀸, 𑀦 𑀘𑀺𑀢𑁆𑀢𑀦𑁆𑀢𑀺 𑀏𑀯𑀁 𑀦𑁂𑀬𑁆𑀬𑀢𑁆𑀣𑀁 𑀲𑀼𑀢𑁆𑀢𑀁 ‘‘𑀦𑀻𑀢𑀢𑁆𑀣’’𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸. 𑀆𑀘𑀭𑀺𑀬𑀸𑀦𑀁 𑀦𑀬𑁂 𑀞𑀢𑁆𑀯𑀸𑀢𑀺 𑀧𑀭𑀫𑁆𑀧𑀭𑀸𑀕𑀢𑀸𑀦𑀁 𑀆𑀘𑀭𑀺𑀬𑀸𑀦𑀁 𑀅𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄𑀢𑀺 𑀲𑀼𑀢𑁆𑀢𑀦𑁆𑀢𑀭𑀸𑀕𑀫𑀢𑁄 𑀲𑀼𑀢𑁆𑀢𑀦𑁆𑀢𑀭𑀧𑀤𑀲𑁆𑀲 𑀅𑀯𑀺𑀧𑀭𑀻𑀢𑁄 𑀅𑀢𑁆𑀣𑁄 𑀯𑀻𑀫𑀁𑀲𑀺𑀢𑀩𑁆𑀩𑁄. 𑀬𑀣𑀸 𑀳𑀺 ‘‘𑀅𑀲𑀜𑁆𑀜𑀪𑀯𑁄’’𑀢𑀺 𑀯𑀘𑀦𑀢𑁄 ‘‘𑀲𑀜𑁆𑀜𑀸𑀯 𑀢𑀢𑁆𑀣 𑀦𑀢𑁆𑀣𑀺, 𑀇𑀢𑀭𑁂 𑀧𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀲𑀦𑁆𑀢𑀻’’𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀦 𑀕𑀬𑁆𑀳𑀢𑀺. 𑀬𑀣𑀸 𑀘 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦’’𑀦𑁆𑀢𑀺 𑀯𑀘𑀦𑀢𑁄 ‘‘𑀲𑀜𑁆𑀜𑀸𑀯 𑀢𑀢𑁆𑀣 𑀢𑀸𑀤𑀺𑀲𑀻, 𑀦 𑀨𑀲𑁆𑀲𑀸𑀤𑀬𑁄’’𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀦 𑀕𑀬𑁆𑀳𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀤𑁂𑀲𑀦𑀸𑀢𑀺 𑀓𑀢𑁆𑀯𑀸, 𑀏𑀯𑀫𑀺𑀥𑀸𑀧𑀺 ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸’’𑀢𑀺, ‘‘𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑁄’’𑀢𑀺 𑀘 𑀤𑁂𑀲𑀦𑀸𑀲𑀻𑀲𑀫𑁂𑀯. 𑀲𑀩𑁆𑀩𑁂𑀧𑀺 𑀧𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀢𑀢𑁆𑀣 𑀦𑀺𑀭𑀼𑀚𑁆𑀛𑀦𑁆𑀢𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀯𑀺𑀧𑀭𑀻𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀣𑀸𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁂𑀦 𑀲𑀩𑁆𑀩𑁂𑀲𑀁𑀬𑁂𑀯 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀢𑀢𑁆𑀣 𑀦𑀺𑀭𑀼𑀚𑁆𑀛𑀦𑀢𑁄. 𑀏𑀢𑁂𑀦 𑀬𑀁 𑀧𑀼𑀩𑁆𑀩𑁂 ‘‘𑀅𑀜𑁆𑀜𑀢𑁆𑀢𑀸, 𑀢𑀤𑀪𑀸𑀯𑀢𑁄’’𑀢𑀺 𑀘 𑀬𑀼𑀢𑁆𑀢𑀺𑀯𑀘𑀦𑀁, 𑀢𑀤𑀬𑀼𑀢𑁆𑀢𑀁 𑀅𑀥𑀺𑀧𑁆𑀧𑀸𑀬𑀸𑀦𑀯𑀩𑁄𑀥𑀢𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀣𑁄 𑀳𑀺 𑀧𑀝𑀺𑀲𑀭𑀡𑀁, 𑀦 𑀩𑁆𑀬𑀜𑁆𑀚𑀦’’𑀦𑁆𑀢𑀺.

𑀉𑀧𑀳𑀢𑀸𑀦𑀻𑀢𑀺 𑀩𑀸𑀥𑀺𑀢𑀸𑀦𑀺. 𑀫𑀓𑁆𑀔𑀺𑀢𑀸𑀦𑀻𑀢𑀺 𑀥𑀁𑀲𑀺𑀢𑀸𑀦𑀺. 𑀆𑀭𑀫𑁆𑀫𑀡𑀖𑀝𑁆𑀝𑀦𑀸𑀬 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀺𑀮𑀫𑀣𑁄 𑀘𑀓𑁆𑀔𑀼𑀦𑀸 𑀪𑀸𑀲𑀼𑀭𑀭𑀽𑀧𑀲𑀼𑀔𑀼𑀫𑀭𑀚𑀤𑀲𑁆𑀲𑀦𑁂𑀦 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀢𑀣𑀸 𑀳𑀺 𑀉𑀡𑁆𑀳𑀓𑀸𑀮𑁂 𑀧𑀼𑀭𑀢𑁄 𑀅𑀕𑁆𑀕𑀺𑀫𑁆𑀳𑀺 𑀚𑀮𑀦𑁆𑀢𑁂 𑀔𑀭𑀲𑁆𑀲𑀭𑁂 𑀘 𑀧𑀡𑀯𑁂 𑀆𑀓𑁄𑀝𑀺𑀢𑁂 𑀅𑀓𑁆𑀔𑀻𑀦𑀺 𑀪𑁂𑀤𑀸𑀦𑀺 𑀯𑀺𑀬 𑀦 𑀲𑀳𑀦𑁆𑀢𑀺 𑀲𑁄𑀢𑀸𑀦𑀺 ‘‘𑀲𑀺𑀔𑀭𑁂𑀦 𑀯𑀺𑀬 𑀅𑀪𑀺𑀳𑀜𑁆𑀜𑀦𑁆𑀢𑀻’’𑀢𑀺 𑀯𑀢𑁆𑀢𑀸𑀭𑁄 𑀳𑁄𑀦𑁆𑀢𑀺.

𑁪𑁫𑁮. 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀁 𑀅𑀭𑀽𑀧𑀚𑁆𑀛𑀸𑀦𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸’’𑀢𑀺𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀅𑀧𑀕𑀫𑀦𑁂𑀦 𑀯𑀺𑀕𑀫𑁂𑀦 𑀧𑀘𑁆𑀘𑀬𑀸 𑀅𑀧𑀕𑀫𑀦𑀧𑀘𑁆𑀘𑀬𑀸 𑀲𑀼𑀔𑀸𑀤𑀺𑀧𑁆𑀧𑀳𑀸𑀦𑀸𑀦𑀺. 𑀅𑀥𑀺𑀕𑀫𑀧𑀘𑁆𑀘𑀬𑀸 𑀧𑀦 𑀓𑀲𑀺𑀡𑁂𑀲𑀼 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀳𑁂𑀝𑁆𑀞𑀺𑀫𑀸 𑀢𑀬𑁄 𑀘 𑀆𑀭𑀼𑀧𑁆𑀧𑀸. 𑀦 𑀳𑀺 𑀲𑀓𑁆𑀓𑀸 𑀢𑀸𑀦𑀺 𑀅𑀦𑀥𑀺𑀕𑀦𑁆𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀫𑀥𑀺𑀕𑀦𑁆𑀢𑀼𑀁. 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀓𑀨𑀮𑀲𑀫𑀸𑀧𑀢𑁆𑀢𑀺𑀦𑁆𑀢𑀺 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀪𑀽𑀢𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀲𑀫𑀼𑀤𑀸𑀕𑀢𑀨𑀮𑀲𑀫𑀸𑀧𑀢𑁆𑀢𑀺𑀁. 𑀲𑀸 𑀳𑀺 ‘‘𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀲𑀫𑀣𑀦𑀺𑀲𑁆𑀲𑀦𑁆𑀤𑁄 𑀅𑀪𑀺𑀜𑁆𑀜𑀸, 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑀦𑀺𑀲𑁆𑀲𑀦𑁆𑀤𑁄 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁄, 𑀓𑀲𑀺𑀡𑀦𑀺𑀲𑁆𑀲𑀦𑁆𑀤𑁄 𑀆𑀭𑀼𑀧𑁆𑀧𑀸, 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀦𑁆𑀤𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺, 𑀏𑀯𑀁 𑀯𑀺𑀧𑀲𑁆𑀲𑀦𑀸𑀬 𑀦𑀺𑀲𑁆𑀲𑀦𑁆𑀤𑀨𑀮𑀪𑀽𑀢𑀁 𑀲𑀸𑀫𑀜𑁆𑀜𑀨𑀮𑀦𑁆𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀦𑁆𑀤𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺. 𑀆𑀭𑀫𑁆𑀫𑀡𑀸 𑀦𑀸𑀫 𑀲𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀢𑁄 𑀉𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀲𑀩𑁆𑀩𑀸𑀭𑀫𑁆𑀫𑀡𑀸𑀦’’𑀦𑁆𑀢𑀺. 𑀦𑀢𑁆𑀣𑀺 𑀏𑀢𑁆𑀣 𑀓𑀺𑀜𑁆𑀘𑀺 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀦𑀺𑀫𑀺𑀢𑁆𑀢𑀸, 𑀅𑀲𑀗𑁆𑀔𑀢𑀸 𑀥𑀸𑀢𑀽𑀢𑀺 𑀆𑀳 ‘‘𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀧𑀕𑀢𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸’’𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀲𑀳𑀚𑀸𑀢𑀁 𑀫𑀦𑀲𑀺𑀓𑀸𑀭𑀁 𑀲𑀦𑁆𑀥𑀸𑀬𑀸𑀳, 𑀦 𑀆𑀯𑀚𑁆𑀚𑀦𑀫𑀦𑀲𑀺𑀓𑀸𑀭𑀁. 𑀦 𑀳𑁂𑀢𑁆𑀣 𑀢𑀲𑁆𑀲 𑀲𑀫𑁆𑀪𑀯𑁄 𑀅𑀦𑀼𑀮𑁄𑀫𑀸𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀦𑀢𑁄.

𑀇𑀫𑀲𑁆𑀫𑀺𑀁 𑀞𑀸𑀦𑁂𑀢𑀺 𑀇𑀥 𑀯𑀼𑀢𑁆𑀢𑀦𑀺𑀭𑁄𑀥𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀁 𑀕𑀳𑀺𑀢𑀸𑀦𑀁 𑀇𑀫𑀲𑁆𑀫𑀺𑀁 𑀧𑀭𑀺𑀬𑁄𑀲𑀸𑀦𑀲𑁆𑀲 𑀕𑀳𑀺𑀢𑀝𑁆𑀞𑀸𑀦𑁂. 𑀤𑁆𑀯𑀻𑀳𑀺 𑀩𑀮𑁂𑀳𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀳𑀺. 𑀢𑀬𑁄 𑀘 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀓𑀸𑀬𑀲𑀗𑁆𑀔𑀸𑀭𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀗𑁆𑀔𑀸𑀭𑀸𑀦𑀁. 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀻𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀤𑀼𑀓𑁆𑀔𑀸, 𑀅𑀦𑀢𑁆𑀢𑀸, 𑀦𑀺𑀩𑁆𑀩𑀺𑀤𑀸, 𑀯𑀺𑀭𑀸𑀕𑀸, 𑀦𑀺𑀭𑁄𑀥𑀸, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸, 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄…𑀧𑁂… 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀻𑀢𑀺 𑀇𑀫𑀸𑀳𑀺 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺. 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀻𑀢𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀆𑀤𑀻𑀳𑀺 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺. 𑀬𑁄 𑀬𑀣𑀸𑀯𑀼𑀢𑁆𑀢𑀸𑀲𑀼 𑀘𑀭𑀺𑀬𑀸𑀲𑀼 𑀧𑀼𑀕𑁆𑀕𑀮𑀲𑁆𑀲 𑀯𑀲𑀻𑀪𑀸𑀯𑁄, 𑀲𑀸 𑀯𑀲𑀻𑀪𑀸𑀯𑀢𑀸𑀧𑀜𑁆𑀜𑀸. 𑀅𑀲𑁆𑀲𑀸 𑀲𑀸 𑀓𑀣𑀺𑀢𑀸𑀢𑀺 𑀬𑁄𑀚𑀦𑀸. 𑀯𑀺𑀦𑀺𑀘𑁆𑀙𑀬𑀓𑀣𑀸𑀢𑀺 𑀯𑀺𑀦𑀺𑀘𑁆𑀙𑀬𑀯𑀲𑁂𑀦 𑀧𑀯𑀢𑁆𑀢𑀸 𑀅𑀝𑁆𑀞𑀓𑀣𑀸 𑀓𑀣𑀺𑀢𑀸. 𑀢𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁮𑁬𑁮-𑁮𑁬𑁯) 𑀢𑀁𑀲𑀁𑀯𑀡𑁆𑀡𑀦𑀸𑀬𑀜𑁆𑀘 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁮𑁬𑁮) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀯𑀮𑀜𑁆𑀚𑀦𑀲𑀫𑀸𑀧𑀢𑁆𑀢𑀺 𑀅𑀭𑀺𑀬𑀯𑀺𑀳𑀸𑀭𑀯𑀲𑁂𑀦 𑀯𑀺𑀳𑀭𑀡𑀲𑀫𑀸𑀧𑀢𑁆𑀢𑀺. 𑀞𑀺𑀢𑀺𑀬𑀸𑀢𑀺 𑀏𑀢𑁆𑀣 𑀧𑀩𑀦𑁆𑀥𑀝𑁆𑀞𑀺𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀔𑀡𑀝𑁆𑀞𑀺𑀢𑀺. 𑀓𑀲𑁆𑀫𑀸? 𑀲𑀫𑀸𑀧𑀚𑁆𑀚𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀞𑀺𑀢𑀺𑀬𑀸𑀢𑀺 𑀘𑀺𑀭𑀝𑁆𑀞𑀺𑀢𑀢𑁆𑀣’’𑀦𑁆𑀢𑀺. 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀻𑀢𑀺 𑀧𑀕𑁂𑀯 𑀓𑀸𑀮𑀧𑀭𑀺𑀘𑁆𑀙𑁂𑀤𑁄. 𑀭𑀽𑀧𑀸𑀤𑀺𑀦𑀺𑀫𑀺𑀢𑁆𑀢𑀯𑀲𑁂𑀦𑀸𑀢𑀺 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑁂𑀲𑀼 𑀬𑀣𑀸𑀭𑀳𑀁 𑀮𑀩𑁆𑀪𑀫𑀸𑀦𑀭𑀽𑀧𑀸𑀤𑀺𑀦𑀺𑀫𑀺𑀢𑁆𑀢𑀯𑀲𑁂𑀦. 𑀢𑀢𑁆𑀣 𑀬𑀲𑁆𑀫𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑁂 𑀙𑀩𑁆𑀩𑀺𑀥𑀫𑁆𑀧𑀺 𑀆𑀭𑀫𑁆𑀫𑀡𑀁 𑀮𑀩𑁆𑀪𑀢𑀺, 𑀢𑀲𑁆𑀫𑀸 ‘‘𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑁂𑀲𑀁 𑀆𑀭𑀫𑁆𑀫𑀡𑀸𑀦𑀁 𑀏𑀓𑀚𑁆𑀛𑀁, 𑀏𑀓𑀦𑁆𑀢𑀢𑁄 𑀯𑀸 𑀫𑀦𑀲𑀺𑀓𑀸𑀢𑀩𑁆𑀩𑀢𑁄. 𑀮𑀓𑁆𑀔𑀡𑀯𑀘𑀦𑀜𑁆𑀳𑁂𑀢𑀁 𑀬𑀣𑀸 ‘‘𑀤𑀸𑀢𑀩𑁆𑀩𑀫𑁂𑀢𑀁 𑀪𑁂𑀲𑀚𑁆𑀚𑀁, 𑀬𑀤𑀺 𑀫𑁂 𑀩𑁆𑀬𑀸𑀥𑀺𑀢𑀸 𑀲𑀺𑀬𑀼’’𑀦𑁆𑀢𑀺.

𑁪𑁫𑁯. 𑀦𑀻𑀮𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀻𑀢𑀺𑀆𑀤𑀺𑀦𑀸 𑀦𑀻𑀮𑀸𑀤𑀺𑀕𑁆𑀕𑀳𑀡𑀫𑀼𑀔𑁂𑀦 𑀢𑀁𑀯𑀡𑁆𑀡𑀸𑀦𑀁 𑀲𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀦𑀁 𑀅𑀯𑁂𑀭𑀸𑀤𑀺𑀪𑀸𑀯𑀫𑀦𑀲𑀺𑀓𑀭𑀡𑀁 𑀚𑁄𑀢𑀺𑀢𑀦𑁆𑀢𑀺 𑀆𑀳 ‘‘𑀏𑀢𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀓𑀣𑀺𑀢𑀸’’𑀢𑀺. 𑀏𑀢𑁆𑀣 𑀆𑀓𑀺𑀜𑁆𑀘𑀜𑁆𑀜𑀁 𑀓𑀣𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀏𑀢𑁆𑀣 𑀲𑀼𑀜𑁆𑀜𑀢𑀸’’𑀢𑀺, ‘‘𑀏𑀢𑁆𑀣 𑀅𑀦𑀺𑀫𑀺𑀢𑁆𑀢𑀸’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦𑁆𑀢𑀺 ‘‘𑀇𑀥 𑀅𑀜𑁆𑀜𑀁 𑀅𑀪𑀺𑀦𑀯𑀁 𑀦𑀸𑀫 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀅𑀢𑁆𑀣𑀯𑀘𑀦𑀁. 𑀏𑀢𑀸𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀆𑀤𑀬𑁄. 𑀏𑀓𑀦𑀸𑀫𑀓𑀸𑀢𑀺 𑀏𑀓𑁂𑀓𑀦𑀸𑀫𑀓𑀸, 𑀬𑁂 𑀦𑀸𑀦𑀸𑀩𑁆𑀬𑀜𑁆𑀚𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀏𑀓𑁄 𑀥𑀫𑁆𑀫𑁄𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺. 𑀘𑀢𑀼𑀦𑀸𑀫𑀓𑁄𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀆𑀤𑀺𑀦𑀸𑀫𑀓𑁄. 𑀏𑀢𑀦𑁆𑀢𑀺 𑀏𑀢𑀫𑀢𑁆𑀣𑀁. 𑀅𑀧𑁆𑀧𑀫𑀸𑀡𑀸𑀢𑀺 𑀅𑀦𑁄𑀥𑀺𑀲𑁄, 𑀑𑀥𑀺𑀲𑁄𑀧𑀺 𑀯𑀸 ‘‘𑀏𑀢𑁆𑀢𑀓𑀸’’𑀢𑀺 𑀅𑀧𑀭𑀺𑀫𑀺𑀢𑀸. 𑀅𑀲𑁂𑀲𑁂𑀢𑁆𑀯𑀸𑀢𑀺 𑀅𑀲𑀼𑀪𑀲𑀫𑀸𑀧𑀢𑁆𑀢𑀺 𑀯𑀺𑀬 𑀏𑀓𑀲𑁆𑀲𑁂𑀯 𑀅𑀕𑁆𑀕𑀳𑀡𑀢𑁄.

𑀓𑀺𑀜𑁆𑀘𑀸𑀧𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀫𑁆𑀧𑀺 𑀓𑀺𑀜𑁆𑀘𑀦𑀁 𑀳𑁄𑀢𑀺, 𑀆𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑀦𑀲𑁆𑀲 𑀓𑀺𑀜𑁆𑀘𑀦𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀻𑀦𑀫𑁆𑀧𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑀁 𑀆𑀭𑀫𑁆𑀫𑀡𑀁 𑀲𑀩𑀺𑀫𑁆𑀩𑀁 𑀯𑀺𑀬 𑀯𑀺𑀕𑁆𑀕𑀳𑀁 𑀓𑀺𑀜𑁆𑀘𑀦𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀦 𑀢𑀣𑀸 𑀇𑀫𑀲𑁆𑀲𑀸𑀢𑀺. 𑀦𑀦𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀞𑀫𑀸𑀭𑀼𑀧𑁆𑀧𑀸𑀦𑀫𑁆𑀧𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀪𑀽𑀢𑀁 𑀓𑀺𑀜𑁆𑀘𑀺 𑀆𑀭𑀫𑁆𑀫𑀡𑀁 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺, 𑀅𑀬𑀁 𑀧𑀦 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀁 𑀯𑀺𑀬 𑀦 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀪𑀽𑀢𑀆𑀭𑀫𑁆𑀫𑀡𑀢𑀸𑀬 𑀏𑀯𑀁 𑀯𑀼𑀢𑁆𑀢𑀸. 𑀅𑀢𑁆𑀢𑁂𑀦𑀸𑀢𑀺 𑀅𑀢𑁆𑀢𑀦𑀸. 𑀪𑀯𑀢𑀺 𑀏𑀢𑁂𑀦 𑀅𑀢𑁆𑀢𑀸𑀢𑀺 𑀅𑀪𑀺𑀥𑀸𑀦𑀁 𑀩𑀼𑀤𑁆𑀥𑀺 𑀘𑀸𑀢𑀺 𑀪𑀸𑀯𑁄, 𑀅𑀢𑁆𑀢𑀸. 𑀪𑀸𑀯-𑀲𑀤𑁆𑀤𑁄𑀧𑀺 𑀅𑀢𑁆𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀪𑀸𑀯𑀧𑁄𑀲𑀧𑀼𑀕𑁆𑀕𑀮𑀸𑀤𑀺𑀲𑀗𑁆𑀔𑀸𑀢𑁂𑀦𑀸’’𑀢𑀺. 𑀦𑁂𑀲𑀁 𑀅𑀧𑁆𑀧𑀫𑀸𑀡𑀲𑀫𑀸𑀥𑀺𑀆𑀤𑀻𑀦𑀁 𑀘𑀢𑀼𑀦𑁆𑀦𑀁. ‘‘𑀦𑀸𑀦𑀢𑀸 𑀧𑀸𑀓𑀝𑀸𑀯𑀸’’𑀢𑀺 𑀯𑀼𑀢𑁆𑀢𑀁 𑀦𑀸𑀦𑀢𑁆𑀢𑀁 𑀪𑀽𑀫𑀺𑀢𑁄 𑀆𑀭𑀫𑁆𑀫𑀡𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀢𑁆𑀢𑀸𑀤𑀺𑀪𑀸𑀯𑁂𑀦 𑀅𑀢𑀻𑀢𑀸𑀤𑀺𑀪𑀸𑀯𑁂𑀦 𑀅𑀚𑁆𑀛𑀢𑁆𑀢𑀸𑀤𑀺𑀪𑀸𑀯𑁂𑀦 𑀘 𑀦 𑀯𑀢𑁆𑀢𑀩𑁆𑀩𑀁 𑀆𑀭𑀫𑁆𑀫𑀡𑀁 𑀏𑀢𑀺𑀲𑁆𑀲𑀸𑀢𑀺 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀨𑀮𑀲𑀫𑀸𑀧𑀢𑁆𑀢𑀺𑀪𑀸𑀯𑀢𑁄.

𑀏𑀢𑁆𑀢𑀓𑁄𑀢𑀺 𑀭𑀸𑀕𑀸𑀤𑀻𑀳𑀺 𑀲𑀁𑀓𑀺𑀮𑀺𑀝𑁆𑀞𑀢𑀸𑀬 𑀏𑀢𑁆𑀢𑀓𑀧𑁆𑀧𑀫𑀸𑀡𑁄, 𑀉𑀢𑁆𑀢𑀸𑀦𑁄 𑀧𑀭𑀺𑀢𑁆𑀢𑀘𑁂𑀢𑀲𑁄𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀅𑀧𑁆𑀧𑀫𑀸𑀡𑀫𑁂𑀯 𑀧𑀫𑀸𑀡𑀓𑀭𑀡𑀸𑀦𑀁 𑀅𑀪𑀸𑀯𑁂𑀦𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀅𑀓𑀼𑀧𑁆𑀧𑀸𑀢𑀺 𑀅𑀭𑀳𑀢𑁆𑀢𑀨𑀮𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑁄𑀧𑀦𑀻𑀬𑀢𑀸𑀬. 𑀓𑀺𑀜𑁆𑀘𑀢𑀻𑀢𑀺 𑀓𑀢𑁆𑀢𑀭𑀺 𑀧𑀞𑀺𑀢𑁄 𑀥𑀸𑀢𑀼 𑀫𑀤𑁆𑀤𑀦𑀢𑁆𑀣𑁄𑀢𑀺 𑀆𑀳 ‘‘𑀓𑀺𑀜𑁆𑀘𑀢𑀺 𑀫𑀤𑁆𑀤𑀢𑀻’’𑀢𑀺. 𑀢𑀲𑁆𑀲 𑀧𑀬𑁄𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀼𑀲𑁆𑀲𑀸 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀫𑀽𑀳𑀸𑀤𑀺𑀖𑀦𑀯𑀲𑁂𑀦 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑁂𑀤𑀢𑀸𑀬 𑀘 𑀲𑀯𑀺𑀕𑁆𑀕𑀳𑀸 𑀯𑀺𑀬 𑀉𑀧𑀝𑁆𑀞𑀺𑀢𑀸 𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀸𑀤𑀺𑀕𑁆𑀕𑀸𑀳𑀲𑁆𑀲 𑀯𑀢𑁆𑀣𑀼𑀢𑀸𑀬 ‘‘𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀁 𑀲𑀼𑀔𑀸𑀤𑀺𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀯𑀺𑀧𑀲𑁆𑀲𑀦𑀸 𑀧𑀦 𑀢𑀢𑁆𑀣 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀭𑁄𑀦𑁆𑀢𑀻 𑀦𑀺𑀘𑁆𑀘𑀸𑀤𑀺𑀕𑁆𑀕𑀸𑀳𑀁 𑀯𑀺𑀥𑀫𑁂𑀦𑁆𑀢𑀻 ‘‘𑀦𑀺𑀫𑀺𑀢𑁆𑀢𑀁 𑀲𑀫𑀼𑀕𑁆𑀖𑀸𑀢𑁂𑀢𑀻’’𑀢𑀺 𑀯𑀼𑀢𑁆𑀢𑀸 𑀖𑀦𑀦𑀺𑀫𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀲𑁆𑀲 𑀅𑀪𑀸𑀯𑀸. 𑀦 𑀕𑀳𑀺𑀢𑀸𑀢𑀺 𑀏𑀓𑀢𑁆𑀣𑀧𑀤𑀦𑀺𑀤𑁆𑀤𑁂𑀲𑁂 𑀧𑀸𑀴𑀺𑀬𑀁 𑀓𑀲𑁆𑀫𑀸 𑀦 𑀕𑀳𑀺𑀢𑀸? 𑀲𑀸𑀢𑀺 𑀲𑀼𑀜𑁆𑀜𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀅𑀧𑁆𑀧𑀫𑀸𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑁂𑀲𑀼. 𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀯𑀲𑁂𑀦𑀧𑀺 𑀏𑀓𑀢𑁆𑀣𑀸, 𑀦 𑀓𑁂𑀯𑀮𑀁 𑀲𑀪𑀸𑀯𑀲𑀭𑀲𑀢𑁄𑀯. 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀧𑁆𑀧𑀫𑀸𑀡𑀢𑁄𑀢𑀺𑀆𑀤𑀺𑀦𑀸 𑀆𑀭𑀫𑁆𑀫𑀡𑀢𑁄 𑀮𑀤𑁆𑀥𑀧𑀭𑀺𑀬𑀸𑀬𑁂𑀦. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀞𑀸𑀦𑁂𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀤𑀺𑀲𑀤𑁆𑀤𑀧𑀯𑀢𑁆𑀢𑀺𑀳𑁂𑀢𑀼𑀢𑁄 𑀅𑀜𑁆𑀜𑁂𑀦 𑀳𑁂𑀢𑀼𑀦𑀸 𑀅𑀧𑁆𑀧𑀫𑀸𑀡𑀸𑀢𑀺𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀁 𑀏𑀢𑀲𑁆𑀲 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀫𑀺𑀦𑀸 𑀢𑀸𑀬 𑀢𑀸𑀬 𑀲𑀫𑀜𑁆𑀜𑀸𑀬 𑀯𑁄𑀳𑀭𑀺𑀢𑀩𑁆𑀩𑀢𑀸𑀧𑀭𑀺𑀬𑀸𑀬𑁂𑀦. 𑀲𑀘𑁆𑀘𑀸𑀦𑀁 𑀤𑀲𑁆𑀲𑀦𑀫𑀼𑀔𑁂𑀦 𑀯𑀝𑁆𑀝𑀯𑀲𑁂𑀦 𑀉𑀝𑁆𑀞𑀺𑀢𑀤𑁂𑀲𑀦𑀁 𑀅𑀭𑀳𑀢𑁆𑀢𑁂𑀦 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬𑁦. 𑀅𑀬𑀁 𑀤𑁂𑀲𑀦𑀸 𑀬𑀲𑁆𑀫𑀸 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸, 𑀢𑀲𑁆𑀫𑀸 𑀧𑀼𑀘𑁆𑀙𑀓𑀯𑀺𑀲𑁆𑀲𑀚𑁆𑀚𑀓𑁂 𑀧𑀼𑀘𑁆𑀙𑀸𑀦𑀺𑀫𑀺𑀢𑁆𑀢𑀜𑁆𑀘 𑀲𑀫𑀼𑀤𑀸𑀬𑀢𑁄 𑀯𑀺𑀪𑀸𑀯𑁂𑀢𑀼𑀁 ‘‘𑀓𑁄 𑀧𑀦𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀸𑀲𑀓𑀢𑁆𑀢𑀦𑁆𑀢𑀺 𑀅𑀫𑀕𑁆𑀕𑀸𑀕𑀢𑀁 𑀉𑀧𑀸𑀲𑀓𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀏𑀓𑀸𑀤𑀲𑀦𑀳𑀼𑀢𑀸𑀦𑀁. 𑀫𑀕𑁆𑀕𑀸𑀕𑀢𑁂𑀦 𑀉𑀧𑀲𑀫𑁂𑀦 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄.

‘‘𑀓𑀺𑀁 𑀦𑀼 𑀔𑁄 𑀅𑀚𑁆𑀚 𑀪𑀯𑀺𑀲𑁆𑀲𑀢𑀺 𑀅𑀬𑁆𑀬𑀧𑀼𑀢𑁆𑀢𑁄’’𑀢𑀺 𑀯𑀻𑀣𑀺𑀁 𑀑𑀮𑁄𑀓𑀬𑀫𑀸𑀦𑀸. 𑀑𑀮𑀫𑁆𑀩𑀦𑀢𑁆𑀣𑀦𑁆𑀢𑀺 𑀢𑀲𑁆𑀲 𑀳𑀢𑁆𑀣𑀸𑀯𑀮𑀫𑁆𑀩𑀦𑀢𑁆𑀣𑀁 𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦 𑀅𑀢𑁆𑀢𑀦𑁄 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀩𑀳𑀺𑀤𑁆𑀥𑀸𑀢𑀺 𑀅𑀢𑁆𑀢𑀦𑀸 𑀅𑀜𑁆𑀜𑀁 𑀯𑀺𑀲𑀪𑀸𑀕𑀯𑀢𑁆𑀣𑀼𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀭𑀺𑀪𑁂𑀤𑀓𑁂𑀦𑀸𑀢𑀺 𑀧𑁂𑀲𑀼𑀜𑁆𑀜𑀯𑀸𑀤𑀺𑀦𑀸.

𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑀢𑀸𑀬 ‘‘𑀦 𑀧𑀓𑀸𑀲𑁂𑀢𑀩𑁆𑀩𑁄’’𑀢𑀺 𑀘𑀺𑀦𑁆𑀢𑁂𑀲𑀺. 𑀧𑀼𑀦 𑀢𑀁 𑀅𑀦𑀼𑀓𑀫𑁆𑀧𑀦𑁆𑀢𑁄 ‘‘𑀲𑀘𑁂 𑀔𑁄 𑀧𑀦𑀸𑀳’’𑀦𑁆𑀢𑀺𑀆𑀤𑀺𑀁 𑀘𑀺𑀦𑁆𑀢𑁂𑀲𑀺. 𑀏𑀲𑁄 𑀥𑀫𑁆𑀫𑁄𑀢𑀺 𑀏𑀲𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄. 𑀯𑀺𑀯𑀝𑁆𑀝𑀁 𑀉𑀤𑁆𑀤𑀺𑀲𑁆𑀲 𑀉𑀧𑀘𑀺𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀓𑀼𑀲𑀮𑀁 𑀉𑀧𑀦𑀺𑀲𑁆𑀲𑀬𑁄. ‘‘𑀬𑀤𑀺 𑀫𑁂 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀲𑀓𑁆𑀓𑀸 𑀏𑀢𑀁 𑀧𑀝𑀺𑀮𑀤𑁆𑀥𑀼𑀁. 𑀲𑀘𑁂𑀧𑀺 𑀦𑀢𑁆𑀣𑀺, 𑀆𑀬𑀢𑀺𑀁 𑀉𑀧𑀦𑀺𑀲𑁆𑀲𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀭𑀓𑀸𑀮𑀧𑀭𑀺𑀪𑀸𑀯𑀺𑀢𑀸𑀬 𑀖𑀝𑁂 𑀧𑀤𑀻𑀧𑀚𑀸𑀮𑀸 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀤𑀺𑀧𑁆𑀧𑀫𑀸𑀦𑀸𑀬 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑀸 𑀆𑀳 ‘‘𑀏𑀯𑀁 𑀲𑀦𑁆𑀢𑁂 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀣𑀸’’𑀢𑀺.

𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺 𑀲𑀼𑀘𑀺𑀭𑀓𑀸𑀮𑀁 𑀓𑀢𑀽𑀧𑀘𑀺𑀢𑀧𑀼𑀜𑁆𑀜𑀢𑀸𑀬. 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀢𑁆𑀢𑀸𑀢𑀺 𑀲𑀼𑀚𑀸𑀢𑀢𑁆𑀣𑁂𑀭𑀲𑁆𑀲 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀅𑀕𑁆𑀕𑀲𑀸𑀯𑀓𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀁 𑀓𑀢𑁆𑀯𑀸 𑁋 ‘‘𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑁆𑀲 𑀪𑀸𑀕𑀻 𑀅𑀲𑁆𑀲’’𑀦𑁆𑀢𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀢𑀧𑀢𑁆𑀣𑀦𑀸𑀲𑀗𑁆𑀔𑀸𑀢𑀲𑀫𑁆𑀧𑀦𑁆𑀦𑀸𑀪𑀺𑀦𑀻𑀳𑀸𑀭𑀢𑁆𑀢𑀸. 𑀦𑀸𑀢𑀺𑀘𑀺𑀭𑀁 𑀓𑀺𑀮𑀫𑀺𑀢𑁆𑀣𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑀻 𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀧𑀸𑀓𑀯𑀲𑁂𑀦 𑀘𑀺𑀭𑀁 𑀦 𑀓𑀺𑀮𑀫𑀺𑀢𑁆𑀣. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀕𑀫𑀦𑁂𑀦𑀸𑀢𑀺 𑀧𑀩𑁆𑀩𑀸𑀚𑀦𑀢𑁆𑀣𑀁 𑀕𑀫𑀦𑀢𑁄 𑀤𑀼𑀢𑀺𑀬𑀕𑀫𑀦𑁂𑀦.

𑀉𑀧𑀦𑁂𑀢𑁆𑀯𑀸𑀢𑀺 𑀧𑀜𑁆𑀳𑀲𑁆𑀲 𑀅𑀢𑁆𑀣𑀪𑀸𑀯𑁂𑀦 𑀉𑀧𑀦𑁂𑀢𑁆𑀯𑀸. 𑀲𑀓𑁆𑀓𑀸𑀬𑀦𑁆𑀢𑀺 𑀲𑀓𑀸𑀬𑀁. 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀓𑀺𑀜𑁆𑀘𑀺 𑀯𑀢𑁆𑀣𑀼𑀁 𑀲𑀫𑁆𑀧𑀝𑀺𑀘𑁆𑀙𑀫𑀸𑀦𑀸, 𑀯𑀺𑀬 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀻 𑀯𑀺𑀬. 𑀏𑀓𑁄 𑀏𑀯 𑀧𑀸𑀲𑁄 𑀏𑀢𑀺𑀲𑁆𑀲𑀸𑀢𑀺 𑀏𑀓𑀧𑀸𑀲𑀓𑀸, 𑀕𑀡𑁆𑀞𑀺. 𑀲𑀸 𑀳𑀺 𑀲𑀼𑀫𑁄𑀘𑀺𑀬𑀸, 𑀅𑀦𑁂𑀓𑀧𑀸𑀲𑀸 𑀧𑀦 𑀤𑀼𑀫𑁆𑀫𑁄𑀘𑀺𑀬𑀸, 𑀏𑀓𑀧𑀸𑀲𑀕𑁆𑀕𑀳𑀡𑀁 𑀯𑀺𑀲𑁆𑀲𑀚𑁆𑀚𑀦𑀲𑁆𑀲 𑀲𑀼𑀓𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂 𑀞𑀢𑁆𑀯𑀸𑀢𑀺 𑀏𑀢𑁂𑀦 𑀣𑁂𑀭𑀺𑀬𑀸 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀢𑀁 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀬𑀪𑀽𑀢𑀸𑀢𑀺 𑀆𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀪𑀽𑀢𑀸.

𑀣𑁂𑀭𑀺𑀬𑀸 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀅𑀢𑁆𑀢𑀦𑁄 𑀅𑀯𑀺𑀲𑀬𑀢𑀸𑀬 𑀯𑀺𑀲𑀸𑀔𑁄 ‘‘𑀦 𑀲𑀓𑁆𑀓𑀸’’𑀢𑀺𑀆𑀤𑀺𑀦𑀸 𑀘𑀺𑀦𑁆𑀢𑁂𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀘𑁆𑀘𑀯𑀺𑀦𑀺𑀩𑁆𑀪𑁄𑀕𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦𑀸𑀢𑀺 𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀥𑀫𑁆𑀫𑀲𑁆𑀲 𑀤𑀲𑁆𑀲𑀦𑀢𑁄 𑀅𑀜𑁆𑀜𑀸𑀦𑀜𑁆𑀜𑀢𑁆𑀣𑀦𑀺𑀤𑁆𑀥𑀸𑀭𑀡𑀪𑁂𑀤𑀦𑀸𑀲𑀗𑁆𑀔𑀸𑀢𑀲𑁆𑀲 𑀯𑀺𑀦𑀺𑀩𑁆𑀪𑁄𑀕𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂𑀦. 𑀤𑁆𑀯𑁂 𑀲𑀘𑁆𑀘𑀸𑀦𑀻𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑀲𑀘𑁆𑀘𑀸𑀦𑀺. 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀕𑀡𑁆𑀞𑀺𑀧𑀜𑁆𑀳𑀦𑁆𑀢𑀺 𑀤𑀼𑀩𑁆𑀩𑀺𑀦𑀺𑀩𑁆𑀩𑁂𑀥𑀢𑀸𑀬 𑀕𑀡𑁆𑀞𑀺𑀪𑀽𑀢𑀁 𑀧𑀜𑁆𑀳𑀁.

𑀦 𑀢𑀁𑀬𑁂𑀯 𑀉𑀧𑀸𑀤𑀸𑀦𑀁 𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀏𑀓𑀤𑁂𑀲𑀲𑁆𑀲 𑀲𑀫𑀼𑀤𑀸𑀬𑀢𑀸𑀪𑀸𑀯𑀢𑁄, 𑀲𑀫𑀼𑀤𑀸𑀬𑀲𑁆𑀲 𑀘 𑀏𑀓𑀤𑁂𑀲𑀢𑀸𑀪𑀸𑀯𑀢𑁄. 𑀦𑀸𑀧𑀺 𑀅𑀜𑁆𑀜𑀢𑁆𑀭 𑀧𑀜𑁆𑀘𑀳𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀳𑀺 𑀉𑀧𑀸𑀤𑀸𑀦𑀁 𑀢𑀲𑁆𑀲 𑀢𑀤𑁂𑀓𑀤𑁂𑀲𑀪𑀸𑀯𑀢𑁄. 𑀦 𑀳𑀺 𑀏𑀓𑀤𑁂𑀲𑁄 𑀲𑀫𑀼𑀤𑀸𑀬𑀯𑀺𑀦𑀺𑀫𑀼𑀢𑁆𑀢𑁄 𑀳𑁄𑀢𑀺. 𑀬𑀤𑀺 𑀳𑀺 𑀢𑀜𑁆𑀜𑁂𑀯𑀸𑀢𑀺𑀆𑀤𑀺𑀦𑀸 𑀉𑀪𑀬𑀧𑀓𑁆𑀔𑁂𑀧𑀺 𑀤𑁄𑀲𑀁 𑀤𑀲𑁆𑀲𑁂𑀢𑀺. 𑀭𑀽𑀧𑀸𑀤𑀺𑀲𑀪𑀸𑀯𑀫𑁆𑀧𑀻𑀢𑀺 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀲𑀪𑀸𑀯𑀫𑁆𑀧𑀺, 𑀨𑀲𑁆𑀲𑀘𑁂𑀢𑀦𑀸𑀤𑀺𑀲𑀪𑀸𑀯𑀫𑁆𑀧𑀺 𑀉𑀧𑀸𑀤𑀸𑀦𑀁 𑀲𑀺𑀬𑀸. 𑀅𑀜𑁆𑀜𑀢𑁆𑀭 𑀲𑀺𑀬𑀸𑀢𑀺 𑀧𑀜𑁆𑀘𑀳𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀳𑀺 𑀯𑀺𑀲𑀼𑀁𑀬𑁂𑀯 𑀉𑀧𑀸𑀤𑀸𑀦𑀁 𑀬𑀤𑀺 𑀲𑀺𑀬𑀸. 𑀧𑀭𑀲𑀫𑀬𑁂𑀢𑀺 𑀦𑀺𑀓𑀸𑀬𑀯𑀸𑀤𑁂. 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀅𑀦𑀼𑀲𑀬𑁄𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀦𑀺𑀓𑀸𑀬𑀯𑀸𑀤𑁂 𑀘𑀺𑀢𑁆𑀢𑀲𑀪𑀸𑀯𑀸𑀪𑀸𑀯𑀯𑀺𑀜𑁆𑀜𑀸𑀡𑀸𑀤𑀻𑀦𑀫𑁆𑀧𑀺 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑀧𑀝𑀺𑀚𑀸𑀦𑀦𑀢𑁄. 𑀏𑀯𑀁 𑀩𑁆𑀬𑀸𑀓𑀸𑀲𑀻𑀢𑀺 ‘‘𑀦 𑀔𑁄, 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀕𑀢𑀙𑀦𑁆𑀤𑀭𑀸𑀕𑀪𑀸𑀯𑁂𑀦 𑀩𑁆𑀬𑀸𑀓𑀸𑀲𑀺. 𑀅𑀢𑁆𑀣𑀥𑀫𑁆𑀫𑀦𑀺𑀘𑁆𑀙𑀬𑀲𑀫𑁆𑀪𑀯𑀢𑁄 𑀅𑀲𑀫𑁆𑀩𑀦𑁆𑀥𑁂𑀦. 𑀢𑁂𑀲𑀼 𑀓𑀢𑁆𑀣𑀘𑀺𑀧𑀺 𑀅𑀲𑀫𑁆𑀫𑀼𑀬𑁆𑀳𑀦𑀢𑁄 𑀅𑀯𑀺𑀢𑁆𑀣𑀸𑀬𑀦𑁆𑀢𑁂𑀦. 𑀧𑀼𑀘𑁆𑀙𑀸𑀯𑀺𑀲𑀬𑁂 𑀫𑁄𑀳𑀦𑁆𑀥𑀓𑀸𑀭𑀯𑀺𑀕𑀫𑀦𑁂𑀦 𑀧𑀤𑀻𑀧𑀲𑀳𑀲𑁆𑀲𑀁 𑀚𑀸𑀮𑁂𑀦𑁆𑀢𑁂𑀦 𑀯𑀺𑀬. 𑀲𑀉𑀧𑀸𑀤𑀸𑀦𑀼𑀧𑀸𑀤𑀸𑀦𑀝𑁆𑀞𑀸𑀦𑀁 𑀅𑀦𑀼𑀢𑁆𑀢𑀸𑀦𑀢𑀸𑀬 𑀧𑀘𑀼𑀭𑀚𑀦𑀲𑁆𑀲 𑀕𑀽𑀴𑁆𑀳𑁄. 𑀅𑀕𑁆𑀕𑀳𑀺𑀢𑀲𑀗𑁆𑀓𑁂𑀢𑀸𑀦𑀁 𑀓𑁂𑀲𑀜𑁆𑀘𑀺 𑀧𑀝𑀺𑀘𑁆𑀙𑀸𑀤𑀺𑀢𑀲𑀤𑀺𑀲𑀢𑁆𑀢𑀸 𑀧𑀝𑀺𑀘𑁆𑀙𑀦𑁆𑀦𑁄. 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀥𑀫𑁆𑀫𑀯𑀺𑀲𑀬𑀢𑀸𑀬 𑀢𑀺𑀮𑀓𑁆𑀔𑀡𑀸𑀳𑀢𑁄. 𑀕𑀫𑁆𑀪𑀻𑀭𑀜𑀸𑀡𑀕𑁄𑀘𑀭𑀢𑀸𑀬 𑀕𑀫𑁆𑀪𑀻𑀭𑁄. 𑀮𑀤𑁆𑀥𑀧𑀢𑀺𑀝𑁆𑀞𑀸 𑀅𑀭𑀺𑀬𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑀦𑀢𑁄. 𑀏𑀯𑀁 𑀤𑀺𑀝𑁆𑀞𑀥𑀫𑁆𑀫𑀸𑀤𑀺𑀪𑀸𑀯𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸. 𑀲𑀩𑁆𑀩𑀲𑁄 𑀦𑀺𑀯𑀼𑀢𑁆𑀣𑀩𑁆𑀭𑀳𑁆𑀫𑀘𑀭𑀺𑀬𑀢𑀸𑀬 𑀢𑀺𑀡𑁆𑀡𑀁 𑀪𑀯𑀸𑀦𑀫𑁆𑀧𑀺 𑀅𑀧𑀭𑀪𑀸𑀕𑁂 𑀦𑀺𑀩𑁆𑀩𑀸𑀦𑁂 𑀦𑀺𑀯𑀼𑀢𑁆𑀣𑀯𑀢𑀻𑀢𑀺 𑀪𑀯𑀫𑀢𑁆𑀣𑀓𑁂 𑀞𑀺𑀢𑀸.

𑁪𑁬𑁧. ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀧𑀤𑀼𑀤𑁆𑀥𑀸𑀭𑀁 𑀓𑀢𑁆𑀯𑀸 ‘‘𑀇𑀥𑁂𑀓𑀘𑁆𑀘𑁄’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁧𑁩𑁦) 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀞𑁂𑀦 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺. 𑀢𑀢𑁆𑀣 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀢𑁆𑀢𑀪𑀸𑀯𑁂𑀦 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀅𑀳𑀁𑀩𑀼𑀤𑁆𑀥𑀺𑀦𑀺𑀩𑀦𑁆𑀥𑀦𑀜𑁆𑀳𑀺 𑀅𑀢𑁆𑀢𑀸𑀦𑀁 𑀅𑀢𑁆𑀢𑀯𑀸𑀤𑀻 𑀧𑀜𑁆𑀜𑀧𑁂𑀢𑀺, 𑀢𑀲𑁆𑀫𑀸 𑀬𑀁 𑀭𑀽𑀧𑀁 𑀲𑁄 𑀅𑀳𑀦𑁆𑀢𑀺 𑀬𑀤𑁂𑀢𑀁 𑀫𑀫 𑀭𑀽𑀧𑀁 𑀦𑀸𑀫, 𑀲𑁄 𑀅𑀳𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 𑀫𑀫 𑀅𑀢𑁆𑀢𑀸 𑀢𑀁 𑀫𑀫 𑀭𑀽𑀧𑀦𑁆𑀢𑀺 𑀭𑀽𑀧𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀅𑀦𑀜𑁆𑀜𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀢𑀣𑀸 𑀧𑀲𑁆𑀲𑀢𑁄 𑀘 𑀅𑀢𑁆𑀢𑀸 𑀯𑀺𑀬 𑀭𑀽𑀧𑀁, 𑀭𑀽𑀧𑀁 𑀯𑀺𑀬 𑀯𑀸 𑀅𑀢𑁆𑀢𑀸 𑀅𑀦𑀺𑀘𑁆𑀘𑁄𑀢𑀺 𑀆𑀧𑀦𑁆𑀦𑀫𑁂𑀯. 𑀅𑀘𑁆𑀘𑀻𑀢𑀺 𑀚𑀸𑀮𑀲𑀺𑀔𑀸. 𑀲𑀸 𑀘𑁂 𑀯𑀡𑁆𑀡𑁄, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀯 𑀲𑀺𑀬𑀸, 𑀦 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸, 𑀯𑀡𑁆𑀡𑁄𑀧𑀺 𑀯𑀸 𑀓𑀸𑀬𑀸𑀤𑀺𑀯𑀺𑀜𑁆𑀜𑁂𑀬𑁆𑀬𑁄 𑀅𑀘𑁆𑀘𑀺𑀬𑀸 𑀅𑀦𑀜𑁆𑀜𑀢𑁆𑀢𑀸𑀢𑀺 𑀉𑀧𑀫𑁂𑀬𑁆𑀬𑀁 𑀯𑀺𑀬 𑀉𑀧𑀫𑀸𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀅𑀬𑀼𑀢𑁆𑀢𑀸𑀯. 𑀤𑀺𑀝𑁆𑀞𑀺𑀧𑀲𑁆𑀲𑀦𑀸𑀬𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸𑀬 𑀧𑀲𑁆𑀲𑀦𑀸𑀬 𑀧𑀲𑁆𑀲𑀢𑀺, 𑀦 𑀢𑀡𑁆𑀳𑀸𑀫𑀸𑀦𑀧𑀜𑁆𑀜𑀸𑀦𑀼𑀧𑀲𑁆𑀲𑀦𑀸𑀬. 𑀅𑀭𑀽𑀧𑀁 𑀯𑁂𑀤𑀦𑀸𑀤𑀺𑀁 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀙𑀸𑀬𑀸𑀬 𑀭𑀼𑀓𑁆𑀔𑀸𑀥𑀻𑀦𑀢𑀸𑀬 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀯𑀺𑀬, 𑀭𑀽𑀧𑀲𑁆𑀲 𑀲𑀦𑁆𑀢𑀓𑀪𑀸𑀯𑁂𑀦 𑀅𑀢𑁆𑀢𑀸𑀥𑀻𑀦𑀢𑀸𑀬 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀧𑀼𑀧𑁆𑀨𑀸𑀥𑀻𑀦𑀢𑀸𑀬 𑀧𑀼𑀧𑁆𑀨𑀲𑁆𑀫𑀺𑀁 𑀕𑀦𑁆𑀥𑀁 𑀯𑀺𑀬 𑀆𑀥𑁂𑀬𑁆𑀬𑀪𑀸𑀯𑁂𑀦 𑀅𑀢𑁆𑀢𑀸𑀥𑀻𑀦𑀢𑀸𑀬 𑀭𑀽𑀧𑀲𑁆𑀲 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀣𑀸 𑀓𑀭𑀡𑁆𑀟𑁄 𑀫𑀡𑀺𑀦𑁄 𑀆𑀥𑀸𑀭𑁄, 𑀏𑀯𑀁 𑀭𑀽𑀧𑀫𑁆𑀧𑀺 𑀅𑀢𑁆𑀢𑀦𑁄 𑀆𑀥𑀸𑀭𑁄𑀢𑀺 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀭𑀽𑀧𑀲𑁆𑀫𑀺𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀯𑁂𑀤𑀦𑀸𑀤𑀻𑀳𑀺 𑀅𑀦𑀜𑁆𑀜𑀢𑁆𑀢𑀁 𑀢𑁂𑀲𑀜𑁆𑀘𑀸𑀥𑀸𑀭𑀡𑀢𑀁 𑀦𑀺𑀲𑁆𑀲𑀺𑀢𑀢𑀜𑁆𑀘 𑀬𑀣𑀸𑀯𑀼𑀢𑁆𑀢𑀁 𑀅𑀢𑀺𑀤𑀺𑀲𑀢𑀺.

𑀅𑀭𑀽𑀧𑀁 𑀅𑀢𑁆𑀢𑀸𑀢𑀺 𑀓𑀣𑀺𑀢𑀁 ‘‘𑀯𑁂𑀤𑀦𑀸𑀯𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀭𑀽𑀧𑁂𑀦 𑀯𑁄𑀫𑀺𑀲𑁆𑀲𑀓𑀢𑀸𑀬 𑀅𑀪𑀸𑀯𑀢𑁄. 𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑁄 𑀅𑀢𑁆𑀢𑀸 𑀓𑀣𑀺𑀢𑁄 𑀭𑀽𑀧𑁂𑀦 𑀲𑀤𑁆𑀥𑀺𑀁 𑀲𑁂𑀲𑀸𑀭𑀽𑀧𑀥𑀫𑁆𑀫𑀸𑀦𑀁 𑀅𑀢𑁆𑀢𑀸𑀢𑀺 𑀕𑀳𑀺𑀢𑀢𑁆𑀢𑀸. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀓𑀣𑀺𑀢𑀸 𑀭𑀽𑀧𑀸𑀤𑀻𑀦𑀁 𑀯𑀺𑀦𑀸𑀲𑀤𑀲𑁆𑀲𑀦𑀢𑁄. 𑀢𑁂𑀦𑁂𑀯𑀸𑀳 ‘‘𑀭𑀽𑀧𑀁 𑀅𑀢𑁆𑀢𑀸𑀢𑀺 𑀬𑁄 𑀯𑀤𑁂𑀬𑁆𑀬, 𑀢𑀁 𑀦 𑀉𑀧𑀧𑀚𑁆𑀚𑀢𑀺, 𑀅𑀢𑁆𑀢𑀸 𑀫𑁂 𑀉𑀧𑁆𑀧𑀚𑁆𑀚𑀢𑀺 𑀘 𑀯𑁂𑀢𑀺 𑀘𑀸𑀢𑀺 𑀇𑀘𑁆𑀘𑀲𑁆𑀲 𑀏𑀯𑀫𑀸𑀕𑀢𑀁 𑀳𑁄𑀢𑀻’’𑀢𑀺𑀆𑀤𑀺. 𑀅𑀯𑀲𑁂𑀲𑁂𑀲𑀽𑀢𑀺 𑀧𑀦𑁆𑀦𑀭𑀲𑀲𑀼 𑀞𑀸𑀦𑁂𑀲𑀼. 𑀲𑀲𑁆𑀲𑀢𑀤𑀺𑀝𑁆𑀞𑀺 𑀓𑀣𑀺𑀢𑀸 𑀭𑀽𑀧𑀯𑀦𑁆𑀢𑀸𑀤𑀺𑀪𑀸𑀯𑁂𑀦 𑀕𑀳𑀺𑀢𑀲𑁆𑀲 𑀅𑀦𑀺𑀤𑁆𑀥𑀸𑀭𑀺𑀢𑀭𑀽𑀧𑀢𑁆𑀢𑀸.

𑀤𑀺𑀝𑁆𑀞𑀺𑀕𑀢𑀺𑀓𑁄 𑀬𑀁 𑀯𑀢𑁆𑀣𑀼𑀁 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀢𑀁 𑀦𑀺𑀘𑁆𑀘𑀁 𑀲𑀼𑀔𑀦𑁆𑀢𑀺 𑀘 𑀲𑀫𑀦𑀼𑀧𑀲𑁆𑀲𑀢𑁂𑀯. 𑀲𑀸𑀯𑀓𑁄 𑀧𑀦 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺 𑀲𑀼𑀤𑀺𑀝𑁆𑀞𑀢𑁆𑀢𑀸 𑀭𑀽𑀧𑀁 𑀅𑀢𑁆𑀢𑀸𑀢𑀺 𑀦 𑀲𑀫𑀦𑀼𑀧𑀲𑁆𑀲𑀢𑀺, 𑀢𑀣𑀸𑀪𑀽𑀢𑁄 𑀘 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀢𑀣𑀸 𑀯𑁂𑀤𑀦𑀸𑀤𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀭𑀽𑀧𑀁 𑀅𑀢𑁆𑀢𑀢𑁄’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀪𑀯𑀤𑀺𑀝𑁆𑀞𑀺𑀧𑀺 𑀅𑀯𑀺𑀚𑁆𑀚𑀸𑀪𑀯𑀢𑀡𑁆𑀳𑀸 𑀯𑀺𑀬 𑀯𑀝𑁆𑀝𑀲𑁆𑀲 𑀲𑀫𑀼𑀤𑀬𑁄𑀬𑁂𑀯𑀸𑀢𑀺 𑀤𑀺𑀝𑁆𑀞𑀺𑀓𑀣𑀸𑀬𑀁 ‘‘𑀏𑀢𑁆𑀢𑀓𑁂𑀦 𑀕𑀫𑀦𑀁 𑀳𑁄𑀢𑀻’’𑀢𑀺𑀆𑀤𑀺. 𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀓𑀣𑀸𑀬𑀜𑁆𑀘 ‘‘𑀏𑀢𑁆𑀢𑀓𑁂𑀦 𑀕𑀫𑀦𑀁 𑀦 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁬𑁨. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑀢𑁆𑀣𑀫𑁂𑀯 𑀧𑀼𑀘𑁆𑀙𑀺𑀢𑀢𑁆𑀢𑀸 ‘‘𑀣𑁂𑀭𑀺𑀬𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀸𑀲𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀲𑀓𑁆𑀓𑀸𑀬𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀪𑀸𑀯𑁂𑀦. 𑀲𑀗𑁆𑀔𑀢𑀸𑀲𑀗𑁆𑀔𑀢𑀯𑀲𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀯𑀲𑁂𑀦𑀸𑀢𑀺 ‘‘𑀯𑀲𑁂𑀦𑀸’’𑀢𑀺 𑀧𑀤𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀓𑀸𑀫𑀁 𑀅𑀲𑀗𑁆𑀔𑀢𑁄 𑀦𑀸𑀫 𑀫𑀕𑁆𑀕𑁄 𑀦𑀢𑁆𑀣𑀺, 𑀓𑀺𑀁 𑀲𑀗𑁆𑀔𑀢𑁄, 𑀉𑀤𑀸𑀳𑀼 𑀅𑀲𑀗𑁆𑀔𑀢𑁄𑀢𑀺 𑀧𑀦 𑀧𑀼𑀘𑁆𑀙𑀸𑀯𑀲𑁂𑀦 𑀢𑀣𑀸 𑀯𑀼𑀢𑁆𑀢𑀁? ‘‘𑀅𑀭𑀺𑀬𑁄’’𑀢𑀺 𑀯𑀘𑀦𑁂𑀦𑁂𑀯 𑀫𑀕𑁆𑀕𑀲𑁆𑀲 𑀮𑁄𑀓𑀼𑀢𑁆𑀢𑀭𑀢𑁄 𑀲𑀺𑀤𑁆𑀥𑀸, 𑀲𑀗𑁆𑀕𑀸𑀳𑀓𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀧𑀦 𑀫𑀕𑁆𑀕𑀥𑀫𑁆𑀫𑀸𑀦𑀫𑁆𑀧𑀺 𑀲𑀺𑀬𑀸 𑀮𑁄𑀓𑀺𑀬𑀢𑀸𑀢𑀺 𑀇𑀥 𑀮𑁄𑀓𑀺𑀬𑀕𑁆𑀕𑀳𑀡𑀁. 𑀓𑀺𑀜𑁆𑀘𑀸𑀧𑀺 𑀲𑀗𑁆𑀕𑀳𑀺𑀢𑀧𑀤𑀫𑁂𑀯 𑀧𑀸𑀴𑀺𑀬𑀁 𑀆𑀕𑀢𑀁, 𑀦 𑀅𑀲𑀗𑁆𑀕𑀳𑀺𑀢𑀧𑀤𑀁, 𑀬𑁂 𑀧𑀦 𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑁂 𑀲𑀗𑁆𑀕𑀳𑀺𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀅𑀲𑀗𑁆𑀕𑀳𑀺𑀢𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀗𑁆𑀔𑀢𑁄𑀢𑀺𑀆𑀤𑀻𑀲𑀼 𑀲𑀫𑁂𑀘𑁆𑀘 𑀲𑀫𑁆𑀪𑀼𑀬𑁆𑀬 𑀧𑀘𑁆𑀘𑀬𑁂𑀳𑀺 𑀓𑀢𑁄𑀢𑀺 𑀲𑀗𑁆𑀔𑀢𑁄. 𑀢𑀣𑀸𑀪𑀽𑀢𑁄 𑀘 𑀢𑀁𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸𑀢𑀺 𑀫𑀬𑁆𑀳𑀁 𑀫𑀕𑁆𑀕𑁄 𑀅𑀝𑁆𑀞𑀗𑁆𑀕𑀺𑀓𑁄 𑀳𑁄𑀢𑀼 𑀲𑀢𑁆𑀢𑀗𑁆𑀕𑀺𑀓𑁄 𑀯𑀸𑀢𑀺 𑀘𑁂𑀢𑀺𑀢𑀪𑀸𑀯𑁂𑀦 𑀘𑁂𑀢𑀺𑀢𑁄. 𑀲𑀳𑀚𑀸𑀢𑀘𑁂𑀢𑀦𑀸𑀬𑀧𑀺 𑀘𑁂𑀢𑀺𑀢𑁄𑀯 𑀢𑀲𑁆𑀲𑀸 𑀲𑀳𑀓𑀸𑀭𑀻𑀓𑀸𑀭𑀡𑀪𑀸𑀯𑀢𑁄, 𑀢𑀢𑁄 𑀏𑀯 𑀧𑀓𑀧𑁆𑀧𑀺𑀢𑁄 𑀆𑀬𑀽𑀳𑀺𑀢𑁄. 𑀧𑀘𑁆𑀘𑀬𑁂𑀳𑀺 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 𑀓𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑁄 𑀘. 𑀲𑀫𑀸𑀧𑀚𑁆𑀚𑀦𑁆𑀢𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀲𑀫𑁆𑀫𑀤𑁂𑀯 𑀆𑀧𑀚𑁆𑀚𑀦𑁆𑀢𑁂𑀦 𑀉𑀧𑁆𑀧𑀸𑀤𑁂𑀦𑁆𑀢𑁂𑀦. 𑀇𑀢𑀺 𑀲𑀢𑁆𑀢𑀳𑀺𑀧𑀺 𑀧𑀤𑁂𑀳𑀺 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀺𑀢𑀁𑀬𑁂𑀯 𑀅𑀭𑀺𑀬𑀫𑀕𑁆𑀕𑀲𑁆𑀲 𑀤𑀲𑁆𑀲𑁂𑀢𑀺.

𑀅𑀲𑀗𑁆𑀕𑀳𑀺𑀢𑁄 𑀔𑀦𑁆𑀥𑀸𑀦𑀁 𑀧𑀤𑁂𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀕𑁆𑀕𑁄 𑀲𑀧𑁆𑀧𑀤𑁂𑀲𑁄. 𑀦𑀢𑁆𑀣𑀺 𑀏𑀢𑁂𑀲𑀁 𑀧𑀤𑁂𑀲𑀸𑀢𑀺 𑀔𑀦𑁆𑀥𑀸 𑀦𑀺𑀧𑁆𑀧𑀤𑁂𑀲𑀸. 𑀧𑀤𑀺𑀲𑁆𑀲𑀢𑀺 𑀏𑀢𑁂𑀦 𑀲𑀫𑀼𑀤𑀸𑀬𑁄𑀢𑀺 𑀳𑀺 𑀧𑀤𑁂𑀲𑁄, 𑀅𑀯𑀬𑀯𑁄. 𑀅𑀬𑀦𑁆𑀢𑀺 𑀫𑀕𑁆𑀕𑁄. 𑀲𑀧𑁆𑀧𑀤𑁂𑀲𑀢𑁆𑀢𑀸 𑀏𑀓𑀤𑁂𑀲𑀢𑁆𑀢𑀸. 𑀦𑀺𑀧𑁆𑀧𑀤𑁂𑀲𑁂𑀳𑀺 𑀲𑀫𑀼𑀤𑀸𑀬𑀪𑀸𑀯𑀢𑁄 𑀦𑀺𑀭𑀯𑀲𑁂𑀲𑀧𑀤𑁂𑀲𑁂𑀳𑀺. 𑀬𑀣𑀸 𑀦𑀕𑀭𑀁 𑀭𑀚𑁆𑀚𑁂𑀓𑀤𑁂𑀲𑀪𑀽𑀢𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀭𑀚𑁆𑀚𑁂𑀦 𑀲𑀗𑁆𑀕𑀳𑀺𑀢𑀁, 𑀏𑀯𑀁 𑀅𑀭𑀺𑀬𑀫𑀕𑁆𑀕𑁄 𑀔𑀦𑁆𑀥𑀢𑁆𑀢𑀬𑁂𑀓𑀤𑁂𑀲𑀪𑀽𑀢𑁄 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀦𑀕𑀭𑀁 𑀯𑀺𑀬 𑀭𑀚𑁆𑀚𑁂𑀦𑀸’’𑀢𑀺 𑀇𑀫𑀺𑀦𑀸. 𑀲𑀚𑀸𑀢𑀺𑀢𑁄𑀢𑀺 𑀲𑀫𑀸𑀦𑀚𑀸𑀢𑀺𑀢𑀸𑀬, 𑀲𑀫𑀸𑀦𑀲𑀪𑀸𑀯𑀢𑁆𑀢𑀸 𑀏𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀲𑀻𑀮𑀓𑁆𑀔𑀦𑁆𑀥𑁄 ‘‘𑀦𑀯 𑀓𑁄𑀝𑀺𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁨𑁦; 𑀅𑀧. 𑀅𑀝𑁆𑀞. 𑁨.𑁫𑁫.𑁫𑁫; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁩𑁭) 𑀯𑀼𑀢𑁆𑀢𑀧𑀪𑁂𑀤𑀯𑀲𑁂𑀦 𑀘𑁂𑀯 𑀲𑀫𑁆𑀧𑀢𑁆𑀢𑀲𑀫𑀸𑀤𑀸𑀦𑀯𑀺𑀭𑀢𑀺𑀆𑀤𑀺𑀯𑀲𑁂𑀦 𑀘 𑀕𑀬𑁆𑀳𑀫𑀸𑀦𑁄 𑀦𑀺𑀧𑁆𑀧𑀤𑁂𑀲𑁄, 𑀫𑀕𑁆𑀕𑀲𑀻𑀮𑀁 𑀧𑀦 𑀆𑀚𑀻𑀯𑀝𑁆𑀞𑀫𑀓𑀫𑁂𑀯 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀲𑀧𑁆𑀧𑀤𑁂𑀲𑀁. 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀸𑀤𑀺𑀯𑀲𑁂𑀦 𑀘𑁂𑀯 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀯𑀲𑁂𑀦 𑀘 𑀅𑀦𑁂𑀓𑀪𑁂𑀤𑀢𑀸𑀬 𑀦𑀺𑀧𑁆𑀧𑀤𑁂𑀲𑁄, 𑀫𑀕𑁆𑀕𑀲𑀫𑀸𑀥𑀺 𑀧𑀦 𑀮𑁄𑀓𑀼𑀢𑁆𑀢𑀭𑁄𑀯, 𑀅𑀧𑁆𑀧𑀦𑀸𑀲𑀫𑀸𑀥𑀺 𑀏𑀯𑀸𑀢𑀺 𑀲𑀧𑁆𑀧𑀤𑁂𑀲𑁄. 𑀢𑀣𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀸𑀤𑀺𑀯𑀲𑁂𑀦 𑀘𑁂𑀯 𑀲𑀼𑀢𑀫𑀬𑀜𑀸𑀡𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀪𑁂𑀤𑀢𑀸𑀬 𑀦𑀺𑀧𑁆𑀧𑀤𑁂𑀲𑁄, 𑀫𑀕𑁆𑀕𑀧𑀜𑁆𑀜𑀸 𑀧𑀦 𑀮𑁄𑀓𑀼𑀢𑁆𑀢𑀭𑀸𑀯, 𑀪𑀸𑀯𑀦𑀸𑀫𑀬𑀸 𑀏𑀯𑀸𑀢𑀺 𑀲𑀧𑁆𑀧𑀤𑁂𑀲𑀸. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀸𑀢𑀺 𑀲𑀳𑀓𑀸𑀭𑀻𑀓𑀸𑀭𑀡𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀅𑀢𑁆𑀢𑀦𑁄 𑀩𑀮𑁂𑀦 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀯𑀻𑀭𑀺𑀬𑁂𑀦 𑀅𑀦𑀼𑀧𑀢𑁆𑀣𑀫𑁆𑀪𑀺𑀢𑀁, 𑀲𑀢𑀺𑀬𑀸 𑀘 𑀅𑀦𑀼𑀧𑀝𑁆𑀞𑀺𑀢𑀁. 𑀧𑀕𑁆𑀕𑀳𑀓𑀺𑀘𑁆𑀘𑀦𑁆𑀢𑀺 𑀬𑀣𑀸 𑀓𑁄𑀲𑀚𑁆𑀚𑀧𑀓𑁆𑀔𑁂 𑀦 𑀧𑀢𑀺𑀢𑀸 𑀘𑀺𑀢𑁆𑀢𑀝𑁆𑀞𑀺𑀢𑀺, 𑀢𑀣𑀸 𑀧𑀕𑁆𑀕𑀡𑁆𑀳𑀦𑀓𑀺𑀘𑁆𑀘𑀁. 𑀅𑀧𑀺𑀮𑀸𑀧𑀦𑀓𑀺𑀘𑁆𑀘𑀦𑁆𑀢𑀺 𑀬𑀣𑀸 𑀆𑀭𑀫𑁆𑀫𑀡𑁂 𑀦 𑀧𑀺𑀮𑀯𑀢𑀺, 𑀏𑀯𑀁 𑀅𑀧𑀺𑀮𑀸𑀧𑀦𑀓𑀺𑀘𑁆𑀘𑀁.

𑀏𑀓𑀢𑁄 𑀚𑀸𑀢𑀸𑀢𑀺 𑀲𑀳𑀚𑀸𑀢𑀸. 𑀧𑀺𑀝𑁆𑀞𑀺𑀁 𑀤𑀢𑁆𑀯𑀸 𑀑𑀦𑀢𑀲𑀳𑀸𑀬𑁄 𑀯𑀺𑀬 𑀯𑀸𑀬𑀸𑀫𑁄 𑀲𑀫𑀸𑀥𑀺𑀲𑁆𑀲 𑀆𑀭𑀫𑁆𑀫𑀡𑁂 𑀅𑀧𑁆𑀧𑀦𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀢𑁄. 𑀅𑀁𑀲𑀓𑀽𑀝𑀁 𑀤𑀢𑁆𑀯𑀸 𑀞𑀺𑀢𑀲𑀳𑀸𑀬𑁄 𑀯𑀺𑀬 𑀲𑀢𑀺 𑀲𑀫𑀸𑀥𑀺𑀲𑁆𑀲 𑀆𑀭𑀫𑁆𑀫𑀡𑁂 𑀤𑀴𑁆𑀳𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑀢𑁄. 𑀓𑀺𑀭𑀺𑀬𑀢𑁄𑀢𑀺 𑀉𑀧𑀓𑀸𑀭𑀓𑀺𑀭𑀺𑀬𑀢𑁄.

𑀆𑀓𑁄𑀝𑁂𑀢𑁆𑀯𑀸𑀢𑀺 𑀆𑀭𑀫𑁆𑀫𑀡𑀁 𑀆𑀳𑀦𑀺𑀢𑁆𑀯𑀸. 𑀢𑀣𑀸 𑀳𑀺 𑀯𑀺𑀢𑀓𑁆𑀓𑁄 ‘‘𑀆𑀳𑀦𑀦𑀭𑀲𑁄’’𑀢𑀺, 𑀬𑁄𑀕𑀸𑀯𑀘𑀭𑁄 𑀘 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀢𑀓𑁆𑀓𑀸𑀳𑀢𑀁 𑀯𑀺𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀓𑀭𑁄𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀥𑀸𑀧𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑁂𑀲𑀼. 𑀓𑀺𑀭𑀺𑀬𑀢𑁄𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀉𑀧𑀓𑀸𑀭𑀓𑀺𑀭𑀺𑀬𑀢𑁄.

𑀲𑀼𑀪𑀲𑀼𑀔𑀸𑀤𑀺𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀺𑀥𑀫𑀦𑀁 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀁. 𑀧𑀘𑁆𑀘𑀬𑀢𑁆𑀢𑁂𑀦𑀸𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦. 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦𑁂𑀯𑀸𑀢𑀺 𑀇𑀤𑀁 𑀫𑀕𑁆𑀕𑀯𑀻𑀭𑀺𑀬𑀲𑁆𑀲𑁂𑀯 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀢𑀜𑁆𑀳𑀺 𑀏𑀓𑀁𑀬𑁂𑀯 𑀳𑀼𑀢𑁆𑀯𑀸 𑀘𑀢𑀼𑀓𑀺𑀘𑁆𑀘𑀁 𑀬𑀣𑀸𑀯𑀼𑀢𑁆𑀢𑀉𑀧𑀓𑀸𑀭𑀓𑀲𑀪𑀸𑀯𑁂𑀦 𑀘 𑀧𑀭𑀺𑀯𑀸𑀭𑀝𑁆𑀞𑁂𑀦 𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺. 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺 𑀇𑀫𑀺𑀦𑀸 𑀫𑀕𑁆𑀕𑀥𑀫𑁆𑀫𑀸𑀦𑀫𑁆𑀧𑀺 𑀕𑀳𑀡𑀁, 𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀸𑀤𑀻𑀦𑀁𑀬𑁂𑀯. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀢𑀺 𑀫𑀕𑁆𑀕𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸.

𑀲𑀢𑁆𑀢𑀳𑀺 𑀜𑀸𑀡𑁂𑀳𑀻𑀢𑀺 𑀧𑀭𑀫𑀼𑀓𑁆𑀓𑀁𑀲𑀕𑀢𑁂𑀳𑀺 𑀲𑀢𑁆𑀢𑀳𑀺 𑀚𑀯𑀦𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑁂𑀳𑀺, 𑀲𑀢𑁆𑀢𑀳𑀺 𑀯𑀸 𑀅𑀦𑀼𑀧𑀲𑁆𑀲𑀦𑀸𑀜𑀸𑀡𑁂𑀳𑀺. 𑀆𑀤𑀺𑀢𑁄 𑀲𑁂𑀯𑀦𑀸 𑀆𑀲𑁂𑀯𑀦𑀸, 𑀢𑀢𑁄 𑀧𑀭𑀁 𑀯𑀟𑁆𑀠𑀦𑀸 𑀪𑀸𑀯𑀦𑀸, 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁 𑀩𑀳𑀼𑀮𑀻𑀓𑀫𑁆𑀫𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀜𑁆𑀜𑁂𑀦 𑀘𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺. 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁆𑀣𑀁 𑀲𑀼𑀢𑁆𑀢𑀁 𑀦𑁂𑀬𑁆𑀬𑀢𑁆𑀣𑀁. 𑀬𑀣𑀸𑀭𑀼𑀢𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀣𑀁 𑀦𑀻𑀢𑀢𑁆𑀣𑀁. 𑀏𑀯𑀁 𑀲𑀦𑁆𑀢𑁂𑀢𑀺 𑀬𑀤𑀺 𑀇𑀤𑀁 𑀲𑀼𑀢𑁆𑀢𑀁 𑀦𑀻𑀢𑀢𑁆𑀣𑀁, 𑀆𑀲𑁂𑀯𑀦𑀸𑀤𑀺 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀘𑀺𑀢𑁆𑀢𑁂𑀳𑀺 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂. 𑀆𑀲𑁂𑀯𑀦𑀸𑀤𑀺 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀅𑀦𑁂𑀓𑀯𑀸𑀭𑀁 𑀉𑀧𑁆𑀧𑀢𑁆𑀢𑀺𑀬𑀸 𑀳𑁄𑀢𑀺, 𑀦 𑀏𑀓𑀯𑀸𑀭𑀫𑁂𑀯𑀸𑀢𑀺 𑀆𑀳 ‘‘𑀏𑀓𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀆𑀲𑁂𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀘𑀺𑀢𑁆𑀢𑀁 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀆𑀲𑁂𑀯𑀦𑀸𑀯𑀲𑁂𑀦𑁂𑀯 𑀧𑀯𑀢𑁆𑀢𑁂𑀬𑁆𑀬, 𑀢𑀣𑀸 𑀪𑀸𑀯𑀦𑀸𑀩𑀳𑀼𑀮𑀻𑀓𑀫𑁆𑀫𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀺𑀧𑀺, 𑀦 𑀘𑁂𑀢𑁆𑀣 𑀏𑀢𑁆𑀢𑀓𑀸𑀦𑁂𑀯 𑀘𑀺𑀢𑁆𑀢𑀸𑀦𑀺 𑀆𑀲𑁂𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺, 𑀏𑀢𑁆𑀢𑀓𑀸𑀦𑀺 𑀪𑀸𑀯𑀦𑀸𑀯𑀲𑁂𑀦, 𑀩𑀳𑀼𑀮𑀻𑀓𑀫𑁆𑀫𑀯𑀲𑁂𑀦𑀸𑀢𑀺 𑀦𑀺𑀬𑀫𑁄 𑀮𑀩𑁆𑀪𑀢𑀺. 𑀇𑀢𑀺 𑀅𑀦𑁂𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀅𑀭𑀺𑀬𑀫𑀕𑁆𑀕𑀁 𑀯𑀤𑀦𑁆𑀢𑀲𑁆𑀲 𑀤𑀼𑀦𑁆𑀦𑀺𑀯𑀸𑀭𑀺𑀬𑁄𑀯𑀸𑀬𑀁 𑀤𑁄𑀲𑁄. 𑀬𑀣𑀸 𑀧𑀦 𑀧𑀼𑀩𑁆𑀩𑀪𑀸𑀕𑁂𑀧𑀺 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀧𑀯𑀢𑁆𑀢𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀧𑀝𑀺𑀯𑁂𑀥𑀓𑀸𑀮𑁂 𑀬𑀣𑀸𑀭𑀳𑀁 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀁, 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀘 𑀧𑀯𑀢𑁆𑀢𑀺, 𑀏𑀯𑀁 𑀯𑀺𑀧𑀲𑁆𑀲𑀦𑀸𑀬 𑀧𑀯𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀲𑁂𑀯𑀦𑀸𑀪𑀸𑀯𑀦𑀸𑀩𑀳𑀼𑀮𑀻𑀓𑀫𑁆𑀫𑀸𑀦𑀺 𑀧𑀝𑀺𑀯𑁂𑀥𑀓𑀸𑀮𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑀤𑀦𑁆𑀢𑀸𑀦𑀁 𑀆𑀘𑀭𑀺𑀬𑀸𑀦𑀁 𑀦 𑀓𑁄𑀘𑀺 𑀤𑁄𑀲𑁄 𑀆𑀲𑁂𑀯𑀦𑀸𑀤𑀻𑀳𑀺 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀢𑀤𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀬𑁂𑀯 𑀲𑀺𑀚𑁆𑀛𑀦𑀢𑁄. 𑀢𑁂𑀦𑀸𑀳 ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀯𑀸’’𑀢𑀺𑀆𑀤𑀺. 𑀲𑀘𑁂 𑀲𑀜𑁆𑀚𑀸𑀦𑀸𑀢𑀻𑀢𑀺 𑀲𑀘𑁂 𑀲𑀜𑁆𑀜𑀢𑁆𑀢𑀺𑀁 𑀕𑀘𑁆𑀙𑀢𑀺. 𑀬𑀸𑀕𑀼𑀁 𑀧𑀺𑀯𑀸𑀳𑀻𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄 𑀥𑀫𑁆𑀫𑀲𑀸𑀓𑀘𑁆𑀙𑀸𑀬 𑀅𑀪𑀩𑁆𑀩𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁬𑁩. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀸𑀬𑀲𑀜𑁆𑀘𑁂𑀢𑀦𑀸𑀤𑀺 𑀮𑀓𑁆𑀔𑀡𑁂 𑀓𑀸𑀬𑀲𑀗𑁆𑀔𑀸𑀭𑀸𑀤𑀺𑀓𑁂𑀧𑀺 𑀲𑀗𑁆𑀕𑀡𑁆𑀳𑀸𑀢𑀺, 𑀦 𑀅𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁂 𑀏𑀯. 𑀓𑀸𑀬𑀧𑀝𑀺𑀩𑀤𑁆𑀥𑀢𑁆𑀢𑀸 𑀓𑀸𑀬𑁂𑀦 𑀲𑀗𑁆𑀔𑀭𑀻𑀬𑀢𑀺, 𑀦 𑀓𑀸𑀬𑀲𑀫𑀼𑀝𑁆𑀞𑀸𑀦𑀢𑁆𑀢𑀸. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺 𑀢𑁂 𑀥𑀫𑁆𑀫𑀸𑀢𑀺. 𑀦𑀺𑀩𑁆𑀩𑀢𑁆𑀢𑀻𑀬𑀢𑀻𑀢𑀺 𑀘 𑀇𑀤𑀁 𑀓𑀸𑀬𑁂 𑀲𑀢𑀺 𑀲𑀩𑁆𑀪𑀸𑀯𑀁, 𑀅𑀲𑀢𑀺 𑀘 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀸𑀘𑀦𑁆𑀢𑀺 𑀯𑀘𑀻𑀖𑁄𑀲𑀁. 𑀲𑀗𑁆𑀔𑀭𑁄𑀢𑀻𑀢𑀺 𑀚𑀦𑁂𑀢𑀺. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀢𑁆𑀢𑁂𑀢𑀻’’𑀢𑀺. 𑀦 𑀳𑀺 𑀢𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀭𑀳𑀺𑀢𑀘𑀺𑀢𑁆𑀢𑀁 𑀯𑀘𑀻𑀖𑁄𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀢𑁆𑀢𑀸𑀢𑀺 𑀏𑀢𑁂𑀦 𑀘𑀺𑀢𑁆𑀢𑀲𑁆𑀲 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑀲𑀗𑁆𑀔𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀫𑀜𑁆𑀜𑀫𑀺𑀲𑁆𑀲𑀸𑀢𑀺 𑀅𑀢𑁆𑀣𑀢𑁄 𑀪𑀺𑀦𑁆𑀦𑀸𑀧𑀺 𑀓𑀸𑀬𑀲𑀗𑁆𑀔𑀸𑀭𑀸𑀤𑀺𑀯𑀘𑀦𑀯𑀘𑀦𑀻𑀬𑀪𑀸𑀯𑁂𑀦 𑀅𑀜𑁆𑀜𑀫𑀜𑁆𑀜𑀫𑀺𑀲𑁆𑀲𑀺𑀢𑀸 𑀅𑀪𑀺𑀦𑁆𑀦𑀸 𑀯𑀺𑀬, 𑀢𑀢𑁄 𑀏𑀯 𑀆𑀮𑀼𑀴𑀺𑀢𑀸 𑀲𑀁𑀓𑀺𑀡𑁆𑀡𑀸 𑀅𑀯𑀺𑀪𑀽𑀢𑀸 𑀅𑀧𑀸𑀓𑀝𑀸 𑀤𑀼𑀤𑁆𑀤𑀻𑀧𑀦𑀸 𑀤𑀼𑀯𑀺𑀜𑁆𑀜𑀸𑀧𑀬𑀸. 𑀆𑀤𑀸𑀦𑀕𑁆𑀕𑀳𑀡𑀫𑀼𑀜𑁆𑀘𑀦𑀘𑁄𑀧𑀦𑀸𑀦𑀻𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀓𑀸𑀬𑁂𑀦 𑀆𑀤𑀸𑀢𑀩𑁆𑀩𑀲𑁆𑀲 𑀆𑀤𑀸𑀦𑀲𑀗𑁆𑀔𑀸𑀢𑀁 𑀕𑀳𑀡𑀁, 𑀯𑀺𑀲𑁆𑀲𑀚𑁆𑀚𑀦𑀲𑀗𑁆𑀔𑀸𑀢𑀁 𑀫𑀼𑀜𑁆𑀘𑀦𑀁, 𑀬𑀣𑀸𑀢𑀣𑀸𑀘𑀮𑀦𑀲𑀗𑁆𑀔𑀸𑀢𑀁 𑀘𑁄𑀧𑀦𑀦𑁆𑀢𑀺 𑀇𑀫𑀸𑀦𑀺 𑀧𑀸𑀧𑁂𑀢𑁆𑀯𑀸 𑀲𑀸𑀥𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸. 𑀓𑀸𑀬𑀢𑁄 𑀧𑀯𑀢𑁆𑀢𑀸 𑀲𑀗𑁆𑀔𑀸𑀭𑀸, 𑀓𑀸𑀬𑁂𑀦 𑀲𑀗𑁆𑀔𑀭𑀻𑀬𑀦𑁆𑀢𑀻𑀢𑀺 𑀘 𑀓𑀸𑀬𑀲𑀗𑁆𑀔𑀸𑀭𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀳𑀦𑀼𑀲𑀁𑀘𑁄𑀧𑀦𑀦𑁆𑀢𑀺 𑀳𑀦𑀼𑀲𑀜𑁆𑀘𑀮𑀦𑀁. 𑀯𑀘𑀻𑀪𑁂𑀤𑀦𑁆𑀢𑀺 𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀁. 𑀯𑀸𑀘𑀁 𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀇𑀥 𑀯𑀘𑀻𑀲𑀗𑁆𑀔𑀸𑀭𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺.

𑁪𑁬𑁪. 𑀲𑀫𑀸𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀧𑀤𑀁 𑀦𑀺𑀭𑁄𑀥𑀲𑁆𑀲 𑀆𑀲𑀦𑁆𑀦𑀸𑀦𑀸𑀕𑀢𑀪𑀸𑀯𑀯𑀺𑀲𑀬𑀁 𑀆𑀲𑀦𑁆𑀦𑀁 𑀯𑀚𑁆𑀚𑁂𑀢𑁆𑀯𑀸 𑀤𑀽𑀭𑀲𑁆𑀲 𑀕𑀳𑀡𑁂 𑀧𑀬𑁄𑀚𑀦𑀸𑀪𑀸𑀯𑀢𑁄. 𑀦𑀺𑀭𑁄𑀥𑀧𑀸𑀤𑀓𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀘𑀺𑀢𑁆𑀢𑀲𑁆𑀲 𑀘 𑀕𑀳𑀡𑀢𑁄 𑀧𑀝𑁆𑀞𑀸𑀬 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀢𑀺 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀧𑀤𑀤𑁆𑀯𑀬𑁂𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀓𑀸𑀮𑁄 𑀓𑀣𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀘𑀺𑀢𑁆𑀢𑀕𑁆𑀕𑀳𑀡𑀁 𑀇𑀢𑀭𑁂𑀲𑀁 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑀢𑁄. 𑀦 𑀳𑀺 𑀩𑀮𑀤𑁆𑀯𑀬𑀜𑀸𑀡𑀲𑀫𑀸𑀥𑀺𑀘𑀭𑀺𑀬𑀸𑀦𑀁 𑀯𑀲𑀻𑀪𑀸𑀯𑀸𑀧𑀸𑀤𑀦𑀘𑀺𑀢𑁆𑀢𑁂𑀳𑀺 𑀯𑀺𑀦𑀸 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀘𑀺𑀢𑁆𑀢𑀁 𑀅𑀘𑀺𑀢𑁆𑀢𑀓𑀪𑀸𑀯𑀸𑀬 𑀳𑁄𑀢𑀺.

𑀲𑁂𑀲𑀲𑀗𑁆𑀔𑀸𑀭𑁂𑀳𑀻𑀢𑀺 𑀓𑀸𑀬𑀲𑀗𑁆𑀔𑀸𑀭𑀘𑀺𑀢𑁆𑀢𑀲𑀗𑁆𑀔𑀸𑀭𑁂𑀳𑀺. 𑀤𑀼𑀢𑀺𑀬𑀚𑁆𑀛𑀸𑀦𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀺 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑁂𑀦. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺 𑀧𑀤𑀁 𑀯𑀼𑀝𑁆𑀞𑀳𑀦𑀲𑁆𑀲 𑀆𑀲𑀦𑁆𑀦𑀸𑀦𑀸𑀕𑀢𑀪𑀸𑀯𑀯𑀺𑀲𑀬𑀁 𑀆𑀲𑀦𑁆𑀦𑀁 𑀯𑀚𑁆𑀚𑁂𑀢𑁆𑀯𑀸 𑀤𑀽𑀭𑀲𑁆𑀲 𑀕𑀳𑀡𑁂 𑀧𑀬𑁄𑀚𑀦𑀸𑀪𑀸𑀯𑀢𑁄. 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀲𑁆𑀲 𑀘 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀢𑀢𑁄 𑀑𑀭𑀫𑁂𑀯𑀸𑀢𑀺 𑀆𑀳 ‘‘𑀧𑀤𑀤𑁆𑀯𑀬𑁂𑀦 𑀅𑀦𑁆𑀢𑁄𑀦𑀺𑀭𑁄𑀥𑀓𑀸𑀮𑁄 𑀓𑀣𑀺𑀢𑁄’’𑀢𑀺. 𑀢𑀣𑀸 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀬𑀣𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀫𑁂𑀯 𑀅𑀘𑀺𑀢𑁆𑀢𑀓𑀪𑀸𑀯𑁄, 𑀢𑀢𑁄 𑀧𑀭𑀁 𑀲𑀘𑀺𑀢𑁆𑀢𑀓𑀪𑀸𑀯𑁄 𑀳𑁄𑀢𑀺, 𑀢𑀣𑀸 𑀦𑀺𑀭𑁄𑀥𑀲𑁆𑀲 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑀺𑀢𑀁 𑀳𑁄𑀢𑀺.

𑀧𑀝𑀺𑀲𑀗𑁆𑀔𑀸𑀢𑀺 𑀧𑀝𑀺𑀲𑀗𑁆𑀔𑀸𑀬 𑀇𑀤𑀫𑁂𑀯 𑀓𑀸𑀢𑀩𑁆𑀩𑀁 𑀚𑀸𑀦𑀺𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀁. 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀅𑀘𑀺𑀢𑁆𑀢𑀓𑀪𑀸𑀯𑀁 𑀲𑀫𑁆𑀧𑀤𑁂𑀯 𑀆𑀧𑀚𑁆𑀚𑀦𑁆𑀢𑀺. 𑀅𑀣 𑀓𑀲𑁆𑀫𑀸 𑀲𑀢𑁆𑀢𑀸𑀳𑀫𑁂𑀯 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺? 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀓𑀭𑀡𑀢𑁄, 𑀢𑀜𑁆𑀘 𑀬𑁂𑀪𑀼𑀬𑁆𑀬𑁂𑀦 𑀆𑀳𑀸𑀭𑀽𑀧𑀚𑀻𑀯𑀻𑀦𑀁 𑀲𑀢𑁆𑀢𑀸𑀦𑀁 𑀉𑀧𑀸𑀤𑀺𑀦𑁆𑀦𑀓𑀧𑀯𑀢𑁆𑀢𑀲𑁆𑀲 𑀏𑀓𑀤𑀺𑀯𑀲𑀁 𑀪𑀼𑀢𑁆𑀢𑀸𑀳𑀸𑀭𑀲𑁆𑀲 𑀲𑀢𑁆𑀢𑀸𑀳𑀫𑁂𑀯 𑀬𑀸𑀧𑀦𑀢𑁄.

𑀲𑀩𑁆𑀩𑀸 𑀨𑀮𑀲𑀫𑀸𑀧𑀢𑁆𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀇𑀤𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺. 𑀬𑀸 𑀧𑀦 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀲𑁆𑀲 𑀧𑀦…𑀧𑁂… 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺 𑀆𑀳. 𑀢𑀢𑁆𑀣 𑀇𑀫𑀲𑁆𑀲𑀸𑀢𑀺 𑀇𑀥 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀪𑀺𑀓𑁆𑀔𑀼𑀦𑁄. 𑀢𑀲𑁆𑀲 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸𑀯𑀸𑀢𑀺 𑀦𑀺𑀬𑀫𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀓𑀺𑀁 𑀯𑀸 𑀏𑀢𑁂𑀦𑀸’’𑀢𑀺𑀆𑀤𑀺. 𑀅𑀩𑁆𑀩𑁄𑀳𑀸𑀭𑀺𑀓𑀸𑀢𑀺 𑀲𑀼𑀔𑀼𑀫𑀢𑁆𑀢𑀪𑀸𑀯𑀧𑁆𑀧𑀢𑁆𑀢𑀺𑀬𑀸 ‘‘𑀅𑀢𑁆𑀣𑀻’’𑀢𑀺 𑀯𑁄𑀳𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀓𑁂𑀘𑀺. 𑀦𑀺𑀭𑁄𑀥𑀲𑁆𑀲 𑀧𑀦 𑀧𑀸𑀤𑀓𑀪𑀽𑀢𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀘𑀭𑀺𑀬𑀸𑀬 𑀯𑀲𑁂𑀦 𑀅𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸𑀧𑀺 𑀦𑀺𑀭𑁄𑀥𑀸𑀦𑀦𑁆𑀢𑀭𑀨𑀮𑀲𑀫𑀸𑀧𑀢𑁆𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀅𑀪𑀸𑀯𑀢𑁄 𑀏𑀯 𑀢𑁂 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀼𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀜𑁆𑀚𑀻𑀯𑀢𑁆𑀣𑁂𑀭𑀯𑀢𑁆𑀣𑀼𑀫𑁆𑀳𑀺 𑀆𑀦𑀻𑀢𑀲𑀫𑀸𑀧𑀢𑁆𑀢𑀺𑀨𑀮𑀦𑀺𑀤𑀲𑁆𑀲𑀦𑀫𑁆𑀧𑀺 𑀲𑀼𑀝𑁆𑀞𑀼 𑀉𑀧𑀧𑀚𑁆𑀚𑀢𑀺. 𑀢𑁂𑀦𑀸𑀳 ‘‘𑀪𑀯𑀗𑁆𑀕𑀲𑀫𑀬𑁂𑀦𑁂𑀯𑁂𑀢𑀁 𑀓𑀣𑀺𑀢’’𑀦𑁆𑀢𑀺. 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀯𑀴𑀜𑁆𑀚𑀦𑀓𑀸𑀮𑁂𑀢𑀺 𑀏𑀢𑁆𑀣 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀁 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀺𑀧𑁆𑀨𑀸𑀭𑁄, 𑀢𑀲𑁆𑀲 𑀯𑀴𑀜𑁆𑀚𑀦𑀓𑀸𑀮𑁂 𑀧𑀯𑀢𑁆𑀢𑀦𑀲𑀫𑀬𑁂. 𑀯𑀸𑀘𑀁 𑀅𑀪𑀺𑀲𑀗𑁆𑀔𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑁆𑀢𑀸 𑀢𑁂𑀲𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁.

𑀲𑀕𑀼𑀡𑁂𑀦𑀸𑀢𑀺 𑀲𑀭𑀲𑁂𑀦, 𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀼𑀜𑁆𑀜𑀢𑀸 𑀦𑀸𑀫 𑀨𑀮𑀲𑀫𑀸𑀧𑀢𑁆𑀢𑀺 𑀭𑀸𑀕𑀸𑀤𑀻𑀳𑀺 𑀲𑀼𑀜𑁆𑀜𑀢𑁆𑀢𑀸. 𑀢𑀣𑀸 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀅𑀪𑀸𑀯𑀸 𑀅𑀦𑀺𑀫𑀺𑀢𑁆𑀢𑀸, 𑀭𑀸𑀕𑀧𑀡𑀺𑀥𑀺𑀆𑀤𑀻𑀦𑀁 𑀅𑀪𑀸𑀯𑀸 𑀅𑀧𑁆𑀧𑀡𑀺𑀳𑀺𑀢𑀸𑀢𑀺 𑀆𑀳 ‘‘𑀅𑀦𑀺𑀫𑀺𑀢𑁆𑀢𑀅𑀧𑁆𑀧𑀡𑀺𑀳𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀨𑀲𑁆𑀲𑁄 𑀅𑀦𑀺𑀫𑀺𑀢𑁆𑀢𑁄 𑀨𑀲𑁆𑀲𑁄 𑀅𑀧𑁆𑀧𑀡𑀺𑀳𑀺𑀢𑁄 𑀨𑀲𑁆𑀲𑁄 𑀦𑀸𑀫𑀸𑀢𑀺 𑀇𑀫𑀫𑀢𑁆𑀣𑀁 ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀅𑀢𑀺𑀤𑀺𑀲𑀢𑀺.

𑀅𑀢𑁆𑀢𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑀢𑁄 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀲𑀼𑀜𑁆𑀜𑀢𑀸, 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀼𑀕𑁆𑀖𑀸𑀝𑀦𑀢𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀅𑀦𑀺𑀫𑀺𑀢𑁆𑀢𑀸, 𑀲𑀼𑀔𑀧𑁆𑀧𑀡𑀺𑀥𑀺𑀧𑀝𑀺𑀓𑁆𑀔𑁂𑀧𑀢𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀅𑀧𑁆𑀧𑀡𑀺𑀳𑀺𑀢𑀸𑀢𑀺 𑀆𑀳 𑁋 ‘‘𑀲𑀼𑀜𑁆𑀜𑀢𑀸…𑀧𑁂… 𑀯𑀺𑀧𑀲𑁆𑀲𑀦𑀸𑀧𑀺 𑀯𑀼𑀘𑁆𑀘𑀢𑀻’’𑀢𑀺. 𑀅𑀦𑀺𑀘𑁆𑀘𑀢𑁄 𑀯𑀼𑀝𑁆𑀞𑀸𑀢𑀻𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀸𑀓𑀸𑀭𑀕𑁆𑀕𑀸𑀳𑀺𑀦𑀺𑀬𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀸 𑀧𑀭𑀢𑁄 𑀏𑀓𑀢𑁄𑀯𑀼𑀝𑁆𑀞𑀸𑀦𑀉𑀪𑀢𑁄𑀯𑀼𑀝𑁆𑀞𑀸𑀦𑁂𑀳𑀺 𑀦𑀺𑀫𑀺𑀢𑁆𑀢𑀧𑀯𑀢𑁆𑀢𑀢𑁄 𑀯𑀼𑀝𑁆𑀞𑀸𑀢𑀺. 𑀅𑀦𑀺𑀘𑁆𑀘𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀘 𑀇𑀤𑀁 ‘‘𑀦 𑀏𑀓𑀦𑁆𑀢𑀺𑀓𑀁 𑀏𑀯𑀫𑁆𑀧𑀺 𑀳𑁄𑀢𑀻’’𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀧𑁆𑀧𑀡𑀺𑀳𑀺𑀢𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄𑀢𑀺𑀆𑀤𑀺𑀦𑀸, 𑀲𑀼𑀜𑁆𑀜𑀢𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄𑀢𑀺𑀆𑀤𑀺𑀦𑀸 𑀘 𑀬𑁄𑀚𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀲𑁂𑀯 𑀦𑀬𑁄’’𑀢𑀺. 𑀯𑀺𑀓𑀧𑁆𑀧𑁄 𑀆𑀧𑀚𑁆𑀚𑁂𑀬𑁆𑀬 𑀆𑀕𑀫𑀦𑀲𑁆𑀲 𑀯𑀯𑀢𑁆𑀣𑀸𑀦𑀲𑁆𑀲 𑀅𑀪𑀸𑀯𑁂𑀦 𑀅𑀯𑀯𑀢𑁆𑀣𑀸𑀦𑀓𑀭𑀢𑁆𑀢𑀸. 𑀏𑀯𑀜𑁆𑀳𑀺 𑀢𑀬𑁄 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻𑀢𑀺 𑀏𑀯𑀁 𑀲𑀕𑀼𑀡𑀢𑁄 𑀆𑀭𑀫𑁆𑀫𑀡𑀢𑁄 𑀘 𑀦𑀸𑀫𑀮𑀸𑀪𑁂 𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀓𑀸 𑀢𑀬𑁄 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻𑀢𑀺 𑀅𑀦𑀺𑀬𑀫𑀯𑀘𑀦𑀁. 𑀲𑀫𑁂𑀢𑀺 𑀬𑀼𑀚𑁆𑀚𑀢𑀺 𑀏𑀓𑀲𑁆𑀲𑁂𑀯 𑀨𑀲𑁆𑀲𑀲𑁆𑀲 𑀦𑀸𑀫𑀢𑁆𑀢𑀬𑀬𑁄𑀕𑀢𑁄.

𑀲𑀩𑁆𑀩𑀲𑀗𑁆𑀔𑀢𑀯𑀺𑀯𑀺𑀢𑁆𑀢𑀢𑀸𑀬 𑀦𑀺𑀩𑁆𑀩𑀸𑀦𑀁 𑀯𑀺𑀯𑁂𑀓𑁄 𑀦𑀸𑀫 𑀉𑀧𑀥𑀺𑀯𑀺𑀯𑁂𑀓𑁄𑀢𑀺 𑀓𑀢𑁆𑀯𑀸. 𑀦𑀺𑀦𑁆𑀦𑀢𑀸 𑀢𑀧𑁆𑀧𑀝𑀺𑀧𑀓𑁆𑀔𑀯𑀺𑀫𑀼𑀔𑀲𑁆𑀲 𑀢𑀤𑀪𑀺𑀫𑀼𑀔𑀢𑀸. 𑀧𑁄𑀡𑀢𑀸 𑀑𑀦𑀫𑀦𑀁, 𑀧𑀩𑁆𑀪𑀸𑀭𑀢𑀸 𑀢𑀢𑁄 𑀯𑀺𑀲𑁆𑀲𑀝𑁆𑀞𑀪𑀸𑀯𑁄.

𑁪𑁬𑁫. 𑀘𑀓𑁆𑀔𑀸𑀤𑀺𑀢𑁄 𑀭𑀽𑀧𑀸𑀤𑀻𑀲𑀼 𑀧𑀯𑀢𑁆𑀢𑀭𑀽𑀧𑀓𑀸𑀬𑀢𑁄 𑀉𑀧𑁆𑀧𑀚𑁆𑀚𑀦𑀢𑁄 𑀧𑀜𑁆𑀘𑀤𑁆𑀯𑀸𑀭𑀺𑀓𑀁 𑀲𑀼𑀔𑀁 𑀓𑀸𑀬𑀺𑀓𑀁 𑀦𑀸𑀫, 𑀫𑀦𑁄𑀤𑁆𑀯𑀸𑀭𑀺𑀓𑀁 𑀘𑁂𑀢𑁄𑀨𑀲𑁆𑀲𑀚𑀸𑀢𑀸𑀬 𑀘𑁂𑀢𑀲𑀺𑀓𑀁 𑀦𑀸𑀫. 𑀲𑀪𑀸𑀯𑀦𑀺𑀤𑁆𑀤𑁂𑀲𑁄 𑀲𑀼𑀔𑀬𑀢𑀻𑀢𑀺 𑀓𑀢𑁆𑀯𑀸. 𑀫𑀥𑀼𑀭𑀪𑀸𑀯𑀤𑀻𑀧𑀓𑀦𑁆𑀢𑀺 𑀇𑀝𑁆𑀞𑀪𑀸𑀯𑀚𑁄𑀢𑀦𑀁. 𑀯𑁂𑀤𑀬𑀺𑀢𑀪𑀸𑀯𑀤𑀻𑀧𑀓𑀦𑁆𑀢𑀺 𑀯𑁂𑀤𑀓𑀪𑀸𑀯𑀯𑀺𑀪𑀸𑀯𑀓𑀁. 𑀯𑁂𑀤𑀦𑀸 𑀏𑀯 𑀳𑀺 𑀧𑀭𑀫𑀢𑁆𑀣𑀢𑁄 𑀆𑀭𑀫𑁆𑀫𑀡𑀁 𑀯𑁂𑀤𑁂𑀢𑀺, 𑀆𑀭𑀫𑁆𑀫𑀡𑀁 𑀧𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀤𑀼𑀓𑁆𑀔𑀦𑁆𑀢𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑁄𑀢𑀺𑀏𑀯𑀫𑀸𑀤𑀺𑀅𑀢𑁆𑀣𑀯𑀘𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀲𑁂𑀯 𑀦𑀬𑁄’’𑀢𑀺. 𑀞𑀺𑀢𑀺𑀲𑀼𑀔𑀸𑀢𑀺 𑀞𑀺𑀢𑀺𑀬𑀸 𑀥𑀭𑀫𑀸𑀦𑀢𑀸𑀬 𑀲𑀼𑀔𑀸, 𑀦 𑀞𑀺𑀢𑀺𑀓𑁆𑀔𑀡𑀫𑀢𑁆𑀢𑁂𑀦. 𑀢𑁂𑀦𑀸𑀳 ‘‘𑀅𑀢𑁆𑀣𑀺𑀪𑀸𑀯𑁄 𑀲𑀼𑀔’’𑀦𑁆𑀢𑀺. 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸𑀢𑀺 𑀯𑀺𑀧𑀭𑀺𑀡𑀫𑀦𑁂𑀦 𑀯𑀺𑀕𑀫𑀦𑁂𑀦 𑀤𑀼𑀓𑁆𑀔𑀸, 𑀦 𑀦𑀺𑀭𑁄𑀥𑀓𑁆𑀔𑀡𑁂𑀦. 𑀢𑁂𑀦𑀸𑀳 ‘‘𑀦𑀢𑁆𑀣𑀺𑀪𑀸𑀯𑁄 𑀤𑀼𑀓𑁆𑀔’’𑀦𑁆𑀢𑀺. 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀜𑁆𑀳𑀺 𑀲𑀼𑀔𑀯𑁂𑀤𑀦𑀼𑀧𑀭𑀫𑁄 𑀤𑀼𑀓𑁆𑀔𑀢𑁄 𑀉𑀧𑀝𑁆𑀞𑀸𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀺𑀬𑀯𑀺𑀧𑁆𑀧𑀬𑁄𑀕𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀞𑀺𑀢𑀺𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀲𑀼𑀔𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑀸𑀳 ‘‘𑀅𑀢𑁆𑀣𑀺𑀪𑀸𑀯𑁄 𑀤𑀼𑀓𑁆𑀔𑀁, 𑀦𑀢𑁆𑀣𑀺𑀪𑀸𑀯𑁄 𑀲𑀼𑀔’’𑀦𑁆𑀢𑀺. 𑀤𑀼𑀓𑁆𑀔𑀯𑁂𑀤𑀦𑀼𑀧𑀭𑀫𑁄 𑀳𑀺 𑀲𑀢𑁆𑀢𑀸𑀦𑀁 𑀲𑀼𑀔𑀢𑁄 𑀉𑀧𑀝𑁆𑀞𑀸𑀢𑀺. 𑀏𑀯𑀜𑁆𑀳𑀺 𑀯𑀤𑀦𑁆𑀢𑀺 𑁋 ‘‘𑀢𑀲𑁆𑀲 𑀭𑁄𑀕𑀲𑁆𑀲 𑀯𑀽𑀧𑀲𑀫𑁂𑀦 𑀅𑀳𑁄 𑀲𑀼𑀔𑀁 𑀚𑀸𑀢’’𑀦𑁆𑀢𑀺. 𑀚𑀸𑀦𑀦𑀪𑀸𑀯𑁄𑀢𑀺 𑀬𑀸𑀣𑀸𑀯𑀲𑀪𑀸𑀯𑀢𑁄 𑀅𑀯𑀩𑀼𑀚𑁆𑀛𑀦𑀁. 𑀅𑀤𑀼𑀓𑁆𑀔𑀫𑀲𑀼𑀔𑀜𑁆𑀳𑀺 𑀯𑁂𑀤𑀦𑀁 𑀚𑀸𑀦𑀦𑁆𑀢𑀲𑁆𑀲 𑀲𑀼𑀔𑀁 𑀳𑁄𑀢𑀺 𑀢𑀲𑁆𑀲 𑀲𑀼𑀔𑀼𑀫𑀪𑀸𑀯𑀢𑁄, 𑀬𑀣𑀸 𑀢𑀤𑀜𑁆𑀜𑁂 𑀥𑀫𑁆𑀫𑁂 𑀲𑀮𑀓𑁆𑀔𑀡𑀢𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄 𑀘 𑀲𑀫𑁆𑀫𑀤𑁂𑀯 𑀅𑀯𑀩𑁄𑀥𑁄 𑀧𑀭𑀫𑀁 𑀲𑀼𑀔𑀁. 𑀢𑁂𑀦𑁂𑀯𑀸𑀳 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪);

𑀅𑀚𑀸𑀦𑀦𑀪𑀸𑀯𑁄𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀓𑁆𑀔𑀜𑁆𑀳𑀺 𑀲𑀫𑁆𑀫𑁄𑀳𑀯𑀺𑀳𑀸𑀭𑁄𑀢𑀺. 𑀅𑀧𑀭𑁄 𑀦𑀬𑁄 𑀚𑀸𑀦𑀦𑀪𑀸𑀯𑁄𑀢𑀺 𑀚𑀸𑀦𑀦𑀲𑁆𑀲 𑀜𑀸𑀡𑀲𑁆𑀲 𑀲𑀩𑁆𑀪𑀸𑀯𑁄. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀳𑀺 𑀜𑀸𑀡𑁄𑀧𑀦𑀺𑀲𑁆𑀲𑀬𑀸 𑀘 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀲𑀼𑀔𑀸 𑀇𑀝𑁆𑀞𑀸𑀓𑀸𑀭𑀸. 𑀬𑀣𑀸𑀳 ‘‘𑀇𑀝𑁆𑀞𑀸 𑀘𑁂𑀯 𑀇𑀝𑁆𑀞𑀨𑀮𑀸 𑀘𑀸’’𑀢𑀺. 𑀅𑀚𑀸𑀦𑀦𑀪𑀸𑀯𑁄 𑀤𑀼𑀓𑁆𑀔𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀢𑀫𑁄 𑀅𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀓𑀸𑀫𑀭𑀸𑀕𑀸𑀦𑀼𑀲𑀬𑀸𑀤𑀻𑀲𑀼 𑀲𑀢𑁆𑀢𑀲𑀼 𑀅𑀦𑀼𑀲𑀬𑁂𑀲𑀼 𑀓𑀢𑀫𑁄 𑀅𑀦𑀼𑀲𑀬𑁄 𑀅𑀦𑀼𑀲𑀬𑀯𑀲𑁂𑀦 𑀧𑀯𑀢𑁆𑀢𑀢𑀺? 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀳𑀺 𑀲𑀦𑁆𑀢𑀸𑀦𑁂 𑀅𑀦𑀼𑀲𑀬𑀦𑁆𑀢𑀻𑀢𑀺 𑀅𑀦𑀼𑀲𑀬𑀸, 𑀅𑀦𑀼𑀭𑀽𑀧𑀁 𑀓𑀸𑀭𑀡𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀸 𑀦𑁂𑀲𑀁 𑀤𑀲𑁆𑀲𑀺𑀢𑀸. 𑀅𑀧𑁆𑀧𑀳𑀻𑀦𑀸 𑀳𑀺 𑀓𑀺𑀮𑁂𑀲𑀸 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀲𑀬𑀺𑀢𑁄 𑀯𑀺𑀬 𑀳𑁄𑀢𑀻’’𑀢𑀺. 𑀢𑁂 𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀦𑀸𑀕𑀢𑀸 𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸, 𑀅𑀢𑀻𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀘 𑀢𑀁𑀲𑀪𑀸𑀯𑀢𑁆𑀢𑀸 𑀢𑀣𑀸 𑀯𑀼𑀘𑁆𑀘𑀦𑁆𑀢𑀺. 𑀦 𑀳𑀺 𑀥𑀫𑁆𑀫𑀸𑀦𑀁 𑀓𑀸𑀮𑀪𑁂𑀤𑁂𑀦 𑀲𑀪𑀸𑀯𑀪𑁂𑀤𑁄 𑀅𑀢𑁆𑀣𑀺. 𑀬𑀤𑀺 𑀅𑀧𑁆𑀧𑀳𑀻𑀦𑀝𑁆𑀞𑁄 𑀅𑀦𑀼𑀲𑀬𑀝𑁆𑀞𑁄, 𑀦𑀦𑀼 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀅𑀧𑁆𑀧𑀳𑀻𑀦𑀸 𑀅𑀦𑀼𑀲𑀬𑀸 𑀪𑀯𑁂𑀬𑁆𑀬𑀼𑀦𑁆𑀢𑀺? 𑀦 𑀫𑀬𑀁 𑀅𑀧𑁆𑀧𑀳𑀻𑀦𑀢𑀸𑀫𑀢𑁆𑀢𑁂𑀦 𑀅𑀦𑀼𑀲𑀬𑀝𑁆𑀞𑀁 𑀯𑀤𑀸𑀫, 𑀅𑀣 𑀔𑁄 𑀧𑀦 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀣𑀸𑀫𑀕𑀢𑀸 𑀓𑀺𑀮𑁂𑀲𑀸 𑀅𑀦𑀼𑀲𑀬𑀸. 𑀇𑀤𑀁 𑀣𑀸𑀫𑀕𑀫𑀦𑀜𑁆𑀘 𑀭𑀸𑀕𑀸𑀤𑀻𑀦𑀫𑁂𑀯 𑀆𑀯𑁂𑀡𑀺𑀓𑁄 𑀲𑀪𑀸𑀯𑁄 𑀤𑀝𑁆𑀞𑀩𑁆𑀩𑁄, 𑀬𑀢𑁄 𑀅𑀪𑀺𑀥𑀫𑁆𑀫𑁂 𑁋 ‘‘𑀣𑀸𑀫𑀕𑀢𑀁 𑀅𑀦𑀼𑀲𑀬𑀁 𑀧𑀚𑀳𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁄𑀢𑀺 𑀭𑀸𑀕𑀸𑀦𑀼𑀲𑀬𑁄. 𑀅𑀧𑁆𑀧𑀳𑀻𑀦𑁄𑀢𑀺 𑀅𑀧𑁆𑀧𑀳𑀻𑀦𑀪𑀸𑀯𑀫𑀼𑀔𑁂𑀦 𑀅𑀦𑀼𑀲𑀬𑀦𑀝𑁆𑀞𑀫𑀸𑀳. 𑀲𑁄 𑀘 𑀅𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑀯𑀢𑁆𑀣𑀼𑀢𑁄, 𑀧𑀭𑀺𑀜𑁆𑀜𑀸𑀢𑁂𑀲𑀼 𑀧𑀢𑀺𑀝𑁆𑀞𑀁 𑀦 𑀮𑀪𑀢𑀺. 𑀢𑁂𑀦𑀸𑀳 ‘‘𑀦 𑀲𑀩𑁆𑀩𑀸𑀬 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑁄 𑀅𑀧𑁆𑀧𑀳𑀻𑀦𑁄’’𑀢𑀺. 𑀆𑀭𑀫𑁆𑀫𑀡𑀯𑀲𑁂𑀦 𑀘𑀸𑀬𑀁 𑀅𑀦𑀼𑀲𑀬𑀝𑁆𑀞𑁄 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀦 𑀲𑀩𑁆𑀩𑀁 𑀲𑀼𑀔𑀁 𑀯𑁂𑀤𑀦𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄’’𑀢𑀺.

𑀯𑀢𑁆𑀣𑀼𑀯𑀲𑁂𑀦𑀧𑀺 𑀧𑀦 𑀅𑀦𑀼𑀲𑀬𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄, 𑀬𑁄 ‘‘𑀪𑀽𑀫𑀺𑀮𑀤𑁆𑀥’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀳𑀺 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁮𑁩𑁪) 𑀯𑀼𑀢𑁆𑀢𑀁 𑁋

‘‘𑀪𑀽𑀫𑀻𑀢𑀺 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀢𑁂𑀪𑀽𑀫𑀓𑀸 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀪𑀽𑀫𑀺𑀮𑀤𑁆𑀥𑀁 𑀦𑀸𑀫 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀉𑀧𑁆𑀧𑀢𑁆𑀢𑀺𑀭𑀳𑀁 𑀓𑀺𑀮𑁂𑀲𑀚𑀸𑀢𑀁. 𑀢𑁂𑀦 𑀳𑀺 𑀲𑀸 𑀪𑀽𑀫𑀺𑀮𑀤𑁆𑀥𑀸 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀪𑀽𑀫𑀺𑀮𑀤𑁆𑀥𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀸 𑀘 𑀔𑁄 𑀦 𑀆𑀭𑀫𑁆𑀫𑀡𑀯𑀲𑁂𑀦. 𑀆𑀭𑀫𑁆𑀫𑀡𑀯𑀲𑁂𑀦 𑀳𑀺 𑀲𑀩𑁆𑀩𑁂𑀧𑀺 𑀅𑀢𑀻𑀢𑀸𑀦𑀸𑀕𑀢𑁂 𑀧𑀭𑀺𑀜𑁆𑀜𑀸𑀢𑁂𑀧𑀺 𑀘 𑀔𑀻𑀡𑀸𑀲𑀯𑀸𑀦𑀁 𑀔𑀦𑁆𑀥𑁂 𑀆𑀭𑀩𑁆𑀪 𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀫𑀳𑀸𑀓𑀘𑁆𑀘𑀸𑀦𑀉𑀧𑁆𑀧𑀮𑀯𑀡𑁆𑀡𑀸𑀤𑀻𑀦𑀁 𑀔𑀦𑁆𑀥𑁂 𑀆𑀭𑀩𑁆𑀪 𑀲𑁄𑀭𑁂𑀬𑁆𑀬𑀲𑁂𑀝𑁆𑀞𑀺𑀦𑀦𑁆𑀤𑀫𑀸𑀡𑀯𑀓𑀸𑀤𑀻𑀦𑀁 𑀯𑀺𑀬. 𑀬𑀤𑀺 𑀘 𑀢𑀁 𑀪𑀽𑀫𑀺𑀮𑀤𑁆𑀥𑀁 𑀦𑀸𑀫 𑀲𑀺𑀬𑀸, 𑀢𑀲𑁆𑀲 𑀅𑀧𑁆𑀧𑀳𑁂𑀬𑁆𑀬𑀢𑁄 𑀦 𑀓𑁄𑀘𑀺 𑀪𑀯𑀫𑀽𑀮𑀁 𑀧𑀚𑀳𑁂𑀬𑁆𑀬, 𑀯𑀢𑁆𑀣𑀼𑀯𑀲𑁂𑀦 𑀧𑀦 𑀪𑀽𑀫𑀺𑀮𑀤𑁆𑀥𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀢𑁆𑀣 𑀬𑀢𑁆𑀣 𑀳𑀺 𑀯𑀺𑀧𑀲𑁆𑀲𑀦𑀸𑀬 𑀅𑀧𑀭𑀺𑀜𑁆𑀜𑀸𑀢𑀸 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀉𑀧𑁆𑀧𑀸𑀤𑀢𑁄 𑀧𑀪𑀼𑀢𑀺 𑀢𑁂𑀲𑀼 𑀯𑀝𑁆𑀝𑀫𑀽𑀮𑀁 𑀓𑀺𑀮𑁂𑀲𑀚𑀸𑀢𑀁 𑀅𑀦𑀼𑀲𑁂𑀢𑀺. 𑀢𑀁 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀪𑀽𑀫𑀺𑀮𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺.

𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸𑀢𑀺 𑀇𑀫𑀺𑀦𑀸 ‘‘𑀦 𑀲𑀩𑁆𑀩𑀸𑀬 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑁄 𑀅𑀧𑁆𑀧𑀳𑀻𑀦𑁄, 𑀦 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀁 𑀅𑀢𑀺𑀤𑀺𑀲𑀢𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. ‘‘𑀬𑁄 𑀅𑀦𑀼𑀲𑀬𑁄 𑀬𑀢𑁆𑀣 𑀅𑀦𑀼𑀲𑁂𑀢𑀺, 𑀲𑁄 𑀧𑀳𑀻𑀬𑀫𑀸𑀦𑁄 𑀢𑀢𑁆𑀣 𑀧𑀳𑀻𑀦𑁄 𑀦𑀸𑀫 𑀳𑁄𑀢𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀳𑀸𑀦𑀧𑀼𑀘𑁆𑀙𑀸, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀺𑀁 𑀧𑀳𑀸𑀢𑀩𑁆𑀩𑀦𑁆𑀢𑀺 𑀅𑀬𑀁 𑀧𑀳𑀸𑀦𑀧𑀼𑀘𑁆𑀙𑀸 𑀦𑀸𑀫𑀸’’𑀢𑀺.

𑀏𑀓𑁂𑀦𑁂𑀯 𑀩𑁆𑀬𑀸𑀓𑀭𑀡𑁂𑀦𑀸𑀢𑀺 ‘‘𑀇𑀥𑀸𑀯𑀼𑀲𑁄, 𑀯𑀺𑀲𑀸𑀔, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁭𑁪) 𑀏𑀓𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑀦𑁂𑀦. 𑀤𑁆𑀯𑁂 𑀧𑀼𑀘𑁆𑀙𑀸𑀢𑀺 𑀅𑀦𑀼𑀲𑀬𑀧𑀼𑀘𑁆𑀙𑀸 𑀧𑀳𑀸𑀦𑀧𑀼𑀘𑁆𑀙𑀸𑀢𑀺 𑀤𑁆𑀯𑁂𑀧𑀺 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. ‘‘𑀭𑀸𑀕𑀁 𑀢𑁂𑀦 𑀧𑀚𑀳𑀢𑀻’’𑀢𑀺 𑀇𑀤𑀫𑁂𑀓𑀁 𑀯𑀺𑀲𑁆𑀲𑀚𑁆𑀚𑀦𑀁, ‘‘𑀦 𑀢𑀢𑁆𑀣 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀇𑀤𑀫𑁂𑀓𑀁 𑀯𑀺𑀲𑁆𑀲𑀚𑁆𑀚𑀦𑀁, 𑀧𑀼𑀘𑁆𑀙𑀸𑀦𑀼𑀓𑁆𑀓𑀫𑀜𑁆𑀘𑁂𑀢𑁆𑀣 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀳𑀸𑀦𑀓𑁆𑀓𑀫𑁂𑀦 𑀯𑀺𑀲𑁆𑀲𑀚𑁆𑀚𑀦𑀸 𑀧𑀯𑀢𑁆𑀢𑀸. ‘‘𑀤𑁆𑀯𑁂 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀥𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀣𑀸𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸𑀢𑀺 𑀇𑀫𑀺𑀦𑀸 𑀬𑁄 𑀭𑀸𑀕𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀧𑀼𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑀢𑁄 𑀢𑀣𑀸𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀢𑀲𑁆𑀲 𑀯𑀲𑁂𑀦 ‘‘𑀭𑀸𑀕𑀁 𑀢𑁂𑀦 𑀧𑀚𑀳𑀢𑀺, 𑀦 𑀢𑀢𑁆𑀣 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀫𑁄𑀖𑀸𑀤𑀻𑀳𑀺 𑀘𑀢𑀽𑀳𑀺 𑀑𑀖𑁂𑀳𑀺 𑀲𑀁𑀲𑀸𑀭𑀪𑀯𑁄𑀖𑁂𑀦𑁂𑀯 𑀯𑀸 𑀯𑁂𑀕𑀲𑀸 𑀯𑀼𑀬𑁆𑀳𑀫𑀸𑀦𑁂𑀲𑀼 𑀲𑀢𑁆𑀢𑁂𑀲𑀼 𑀢𑀁 𑀉𑀢𑁆𑀢𑀭𑀺𑀢𑁆𑀯𑀸 𑀧𑀢𑁆𑀢𑀩𑁆𑀩𑀁, 𑀢𑀲𑁆𑀲 𑀧𑀦 𑀕𑀸𑀥𑀪𑀸𑀯𑀢𑁄 𑀧𑀢𑀺𑀝𑁆𑀞𑀸𑀦𑀪𑀽𑀢𑀁. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺 (𑀲𑀁. 𑀦𑀺. 𑁪.𑁨𑁩𑁮; 𑀇𑀢𑀺𑀯𑀼. 𑁬𑁯; 𑀧𑀼. 𑀧. 𑁧𑁮𑁭).

𑀲𑀼𑀜𑁆𑀜𑀢𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀪𑁂𑀤𑀢𑁆𑀢𑀸 𑀧𑀸𑀴𑀺𑀬𑀁 ‘‘𑀅𑀦𑀼𑀢𑁆𑀢𑀭𑁂𑀲𑀽’’𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄𑀢𑀺 ‘‘𑀅𑀦𑀼𑀢𑁆𑀢𑀭𑀸 𑀯𑀺𑀫𑁄𑀓𑁆𑀔𑀸’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀭𑀳𑀢𑁆𑀢𑀪𑀸𑀯𑀲𑀸𑀫𑀜𑁆𑀜𑁂𑀦 ‘‘𑀅𑀭𑀳𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀁. 𑀯𑀺𑀲𑀬𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲𑀸𑀢𑀺 ‘‘𑀅𑀳𑁄 𑀯𑀢𑀸𑀳𑀁 𑀅𑀭𑀳𑀢𑁆𑀢𑀁 𑀮𑀪𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀉𑀧𑀝𑁆𑀞𑀧𑁂𑀦𑁆𑀢𑀲𑁆𑀲, 𑀧𑀢𑁆𑀣𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀝𑁆𑀞𑀧𑁂𑀦𑁆𑀢𑀲𑁆𑀲𑀸𑀢𑀺 𑀘𑁂𑀢𑁆𑀣 𑀳𑁂𑀢𑀼𑀫𑁆𑀳𑀺 𑀅𑀦𑁆𑀢𑀲𑀤𑁆𑀤𑁄. 𑀓𑀣𑀁 𑀧𑀦 𑀅𑀭𑀳𑀢𑁆𑀢𑀯𑀺𑀲𑀬𑀸 𑀧𑀢𑁆𑀣𑀦𑀸 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀦 𑀓𑀸𑀘𑀺 𑀅𑀭𑀳𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀢𑁆𑀣𑀦𑀸 𑀉𑀧𑁆𑀧𑀚𑁆𑀚𑀢𑀺 𑀅𑀦𑀥𑀺𑀕𑀢𑀢𑁆𑀢𑀸 𑀅𑀯𑀺𑀲𑀬𑀪𑀸𑀯𑀢𑁄. 𑀧𑀭𑀺𑀓𑀧𑁆𑀧𑀺𑀢𑀭𑀽𑀧𑀁 𑀧𑀦 𑀢𑀁 𑀉𑀤𑁆𑀤𑀺𑀲𑁆𑀲 𑀧𑀢𑁆𑀣𑀦𑀸 𑀉𑀧𑁆𑀧𑀚𑁆𑀚𑀢𑀺. ‘‘𑀉𑀧𑁆𑀧𑀚𑁆𑀚𑀢𑀺 𑀧𑀺𑀳𑀸𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀁 𑀧𑀭𑀫𑁆𑀧𑀭𑀧𑀘𑁆𑀘𑀬𑀢𑀁 𑀲𑀦𑁆𑀥𑀸𑀬, 𑀉𑀚𑀼𑀓𑀁 𑀧𑀦 𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀦 𑀧𑀢𑁆𑀣𑀦𑀸𑀬 𑀧𑀝𑁆𑀞𑀧𑀦𑀫𑀽𑀮𑀓𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀇𑀤𑀁 𑀧𑀦 𑀲𑁂𑀯𑀺𑀢𑀩𑁆𑀩𑀁 𑀤𑁄𑀫𑀦𑀲𑁆𑀲𑀁 𑀅𑀓𑀼𑀲𑀮𑀧𑁆𑀧𑀳𑀸𑀦𑀲𑁆𑀲 𑀓𑀼𑀲𑀮𑀸𑀪𑀺𑀯𑀼𑀟𑁆𑀠𑀺𑀬𑀸 𑀘 𑀦𑀺𑀫𑀺𑀢𑁆𑀢𑀪𑀸𑀯𑀢𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀤𑁄𑀫𑀦𑀲𑁆𑀲𑀫𑁆𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’’𑀢𑀺 (𑀤𑀻. 𑀦𑀺. 𑁨.𑁩𑁫𑁯-𑁩𑁬𑁨). 𑀢𑀻𑀳𑀺 𑀫𑀸𑀲𑁂𑀳𑀺 𑀲𑀫𑁆𑀧𑀚𑁆𑀚𑀦𑀓𑀸 𑀢𑁂𑀫𑀸𑀲𑀺𑀓𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀲𑁆𑀫𑀺𑀁 𑀯𑀸𑀭𑁂𑀢𑀺 𑀇𑀫𑀲𑁆𑀫𑀺𑀁 𑀧𑀯𑀸𑀭𑀡𑀯𑀸𑀭𑁂. 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀦𑁆𑀢𑀺 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁. 𑀅𑀭𑀳𑀦𑁆𑀢𑀸𑀦𑀫𑁂𑀯 𑀳𑁂𑀲 𑀧𑀯𑀸𑀭𑀡𑀸.

𑀦 𑀓𑀤𑀸𑀘𑀺 𑀧𑀳𑀸𑀢𑀩𑁆𑀩𑀲𑁆𑀲 𑀧𑀳𑀸𑀬𑀓𑀢𑀸 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀤𑁄𑀫𑀦𑀲𑁆𑀲𑁂𑀦 𑀯𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀧𑀭𑀺𑀬𑀸𑀬𑁂𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀯𑀺𑀢𑁆𑀣𑀸𑀭𑁂𑀦 𑀆𑀕𑀫𑀺𑀲𑁆𑀲𑀢𑀺. 𑀧𑀝𑀺𑀧𑀤𑀁 𑀕𑀳𑁂𑀢𑁆𑀯𑀸 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀧𑀢𑁆𑀣𑀦𑀁 𑀞𑀧𑁂𑀢𑁆𑀯𑀸. 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀑𑀯𑀸𑀤𑀯𑀲𑁂𑀦 𑀅𑀢𑁆𑀢𑀸𑀦𑀁 𑀲𑀫𑀼𑀢𑁆𑀢𑁂𑀚𑁂𑀦𑁆𑀢𑁄 𑀓𑀣𑁂𑀢𑀺. 𑀲𑀻𑀮𑁂𑀦 𑀳𑀻𑀦𑀝𑁆𑀞𑀸𑀦𑀦𑁆𑀢𑀺 𑀅𑀜𑁆𑀜𑁂𑀳𑀺 𑀅𑀭𑀳𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑁂𑀳𑀺 𑀲𑀻𑀮𑁂𑀦 𑀳𑀻𑀦𑀝𑁆𑀞𑀸𑀦𑀁 𑀓𑀺𑀁 𑀢𑀼𑀬𑁆𑀳𑀁 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀅𑀔𑀡𑁆𑀟𑀸𑀤𑀺𑀪𑀸𑀯𑀢𑁄 𑀲𑀼𑀥𑁄𑀢𑀚𑀸𑀢𑀺𑀫𑀡𑀺 𑀯𑀺𑀬 𑀲𑀼𑀝𑁆𑀞𑀼 𑀧𑀭𑀺𑀲𑀼𑀤𑁆𑀥𑀁. 𑀲𑀼𑀧𑀕𑁆𑀕𑀳𑀺𑀢𑀦𑁆𑀢𑀺 𑀓𑀤𑀸𑀘𑀺𑀧𑀺 𑀲𑀗𑁆𑀓𑁄𑀘𑀸𑀪𑀸𑀯𑀢𑁄 𑀯𑀻𑀭𑀺𑀬𑀁 𑀲𑀼𑀝𑁆𑀞𑀼 𑀧𑀕𑁆𑀕𑀳𑀺𑀢𑀁. 𑀧𑀜𑁆𑀜𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀥𑀺𑀪𑀽𑀢𑀢𑀸𑀬 𑀅𑀓𑀼𑀡𑁆𑀞𑀸 𑀢𑀺𑀓𑁆𑀔𑀯𑀺𑀲𑀤𑀸 𑀲𑀗𑁆𑀔𑀸𑀭𑀸𑀦𑀁 𑀲𑀫𑁆𑀫𑀲𑀦𑁂 𑀲𑀽𑀭𑀸 𑀳𑀼𑀢𑁆𑀯𑀸 𑀯𑀳𑀢𑀺 𑀧𑀯𑀢𑁆𑀢𑀢𑀺. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀢𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲 𑀅𑀭𑀳𑀢𑁆𑀢𑀼𑀧𑀦𑀺𑀲𑁆𑀲𑀬𑀢𑀸𑀧𑀭𑀺𑀬𑀸𑀬𑁂𑀦. 𑀆𑀭𑀫𑁆𑀫𑀡𑀯𑀲𑁂𑀦 𑀅𑀦𑀼𑀲𑀬𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀦 𑀢𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀅𑀦𑀼𑀧𑁆𑀧𑀚𑁆𑀚𑀦𑀫𑁂𑀢𑁆𑀣 𑀧𑀳𑀸𑀦𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀳𑀻𑀦𑁄𑀯 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀅𑀢𑁆𑀣𑁄’’𑀢𑀺. 𑀢𑀢𑀺𑀬𑀚𑁆𑀛𑀸𑀦𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑀩𑁆𑀩𑀸 𑀅𑀯𑀺𑀚𑁆𑀚𑀸, 𑀲𑀸 𑀏𑀯 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀻𑀬𑀢𑀻𑀢𑀺 ‘‘𑀅𑀯𑀺𑀚𑁆𑀚𑀸𑀦𑀼𑀲𑀬𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀅𑀦𑀼𑀲𑀬𑀲𑀤𑀺𑀲𑀢𑀸𑀬 𑀯𑀸. ‘‘𑀭𑀸𑀕𑀸𑀦𑀼𑀲𑀬𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀸𑀦𑀼𑀲𑁂𑀢𑀺 𑀦𑀸𑀫 𑀢𑀢𑁆𑀣 𑀓𑀸𑀢𑀩𑁆𑀩𑀓𑀺𑀘𑁆𑀘𑀸𑀓𑀭𑀡𑀢𑁄.

𑁪𑁬𑁬. 𑀢𑀲𑁆𑀫𑀸𑀢𑀺 𑀧𑀘𑁆𑀘𑀦𑀻𑀓𑀢𑁆𑀢𑀸 𑀲𑀪𑀸𑀯𑀢𑁄 𑀓𑀺𑀘𑁆𑀘𑀢𑁄 𑀧𑀘𑁆𑀘𑀬𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀲𑀪𑀸𑀕𑀧𑀝𑀺𑀪𑀸𑀕𑁄 𑀓𑀣𑀺𑀢𑁄 ‘‘𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀦𑁆𑀥𑀓𑀸𑀭𑀸𑀢𑀺 𑀅𑀦𑁆𑀥𑀓𑀸𑀭𑀲𑀤𑀺𑀲𑀸 𑀅𑀧𑁆𑀧𑀓𑀸 𑀲𑀪𑀸𑀯𑀢𑁄. 𑀅𑀯𑀺𑀪𑀽𑀢𑀸 𑀅𑀧𑀸𑀓𑀝𑀸 𑀅𑀦𑁄𑀴𑀸𑀭𑀺𑀓𑀪𑀸𑀯𑀢𑁄. 𑀢𑀢𑁄 𑀏𑀯 𑀤𑀼𑀤𑁆𑀤𑀻𑀧𑀦𑀸 𑀤𑀼𑀯𑀺𑀜𑁆𑀜𑀸𑀧𑀦𑀸. 𑀢𑀸𑀤𑀺𑀲𑀸𑀯𑀸𑀢𑀺 𑀉𑀧𑁂𑀓𑁆𑀔𑀸𑀲𑀤𑀺𑀲𑀸𑀯. 𑀬𑀣𑀸 𑀉𑀧𑁂𑀓𑁆𑀔𑀸 𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀺𑀬 𑀦 𑀑𑀴𑀸𑀭𑀺𑀓𑀸, 𑀏𑀯𑀁 𑀅𑀯𑀺𑀚𑁆𑀚𑀸 𑀭𑀸𑀕𑀤𑁄𑀲𑀸 𑀯𑀺𑀬 𑀦 𑀑𑀴𑀸𑀭𑀺𑀓𑀸. 𑀅𑀣 𑀔𑁄 𑀅𑀦𑁆𑀥𑀓𑀸𑀭𑀸 𑀅𑀯𑀺𑀪𑀽𑀢𑀸 𑀤𑀼𑀤𑁆𑀤𑀻𑀧𑀦𑀸 𑀤𑀼𑀯𑀺𑀜𑁆𑀜𑀸𑀧𑀦𑀸𑀢𑀺 𑀅𑀢𑁆𑀣𑁄. 𑀲𑀪𑀸𑀕𑀧𑀝𑀺𑀪𑀸𑀕𑁄 𑀓𑀣𑀺𑀢𑁄 ‘‘𑀧𑀡𑀺𑀥𑀺 𑀧𑀝𑀺𑀖𑁄𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀬𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀽𑀢𑀺 𑀤𑀼𑀓𑁆𑀔𑀸𑀤𑀻𑀲𑀼 𑀬𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀼, 𑀬𑀢𑁆𑀣 𑀯𑀸 𑀜𑁂𑀬𑁆𑀬𑀝𑁆𑀞𑀸𑀦𑁂𑀲𑀼. 𑀯𑀺𑀲𑀪𑀸𑀕𑀧𑀝𑀺𑀪𑀸𑀕𑁄𑀢𑀺 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀬 𑀆𑀮𑁄𑀓𑁄 𑀯𑀺𑀖𑀸𑀢𑀓𑀧𑀝𑀺𑀪𑀸𑀕𑁄. 𑀯𑀺𑀚𑁆𑀚𑀸𑀢𑀺 𑀫𑀕𑁆𑀕𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀦𑁆𑀢𑀺 𑀆𑀳 ‘‘𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀅𑀦𑀸𑀲𑀯𑀸’’𑀢𑀺. 𑀅𑀦𑀸𑀲𑀯𑀝𑁆𑀞𑁂𑀦𑀸𑀢𑀺𑀆𑀤𑀻𑀲𑀼 𑀧𑀡𑀻𑀢𑀝𑁆𑀞𑁂𑀦𑀸𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀲𑁄𑀧𑀺 𑀳𑀺 𑀯𑀺𑀫𑀼𑀢𑁆𑀢𑀺𑀦𑀺𑀩𑁆𑀩𑀸𑀦𑀸𑀦𑀁 𑀲𑀸𑀥𑀸𑀭𑀡𑁄, 𑀯𑀺𑀫𑀼𑀢𑁆𑀢𑀺𑀬𑀸 𑀅𑀲𑀗𑁆𑀔𑀢𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀯𑀺𑀲𑀪𑀸𑀕𑀢𑀸𑀧𑀺 𑀮𑀩𑁆𑀪𑀢𑁂𑀯. 𑀧𑀜𑁆𑀳𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀢𑁄𑀲𑀺, 𑀅𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀼𑀘𑁆𑀙𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀳𑀸𑀦𑀁 𑀧𑀭𑀺𑀘𑁆𑀙𑁂𑀤𑀧𑀫𑀸𑀡𑀁 𑀕𑀳𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀅𑀝𑁆𑀞𑀢𑁆𑀯𑀸 𑀢𑀢𑁄 𑀧𑀭𑀁 𑀧𑀼𑀘𑁆𑀙𑀦𑁆𑀢𑁄 𑀦𑀸𑀲𑀓𑁆𑀔𑀺 𑀧𑀜𑁆𑀳𑀸𑀦𑀁 𑀧𑀭𑀺𑀬𑀦𑁆𑀢𑀁 𑀕𑀳𑁂𑀢𑀼𑀁. 𑀅𑀧𑁆𑀧𑀝𑀺𑀪𑀸𑀕𑀥𑀫𑁆𑀫𑀲𑁆𑀲𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀪𑀸𑀕𑀧𑀝𑀺𑀪𑀸𑀕𑁂𑀦 𑀅𑀧𑁆𑀧𑀝𑀺𑀪𑀸𑀕𑀥𑀫𑁆𑀫𑀲𑁆𑀲. 𑀅𑀦𑀸𑀕𑀢𑀸𑀤𑀺𑀧𑀭𑀺𑀬𑀸𑀬𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀲𑀪𑀸𑀕𑀧𑀝𑀺𑀪𑀸𑀕𑁄 𑀯𑀼𑀢𑁆𑀢𑁄, 𑀯𑀺𑀲𑀪𑀸𑀕𑁂 𑀘 𑀅𑀢𑁆𑀣𑁂𑀯 𑀲𑀗𑁆𑀔𑀢𑀥𑀫𑁆𑀫𑀸, 𑀢𑀲𑁆𑀫𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀓𑀺𑀜𑁆𑀘𑀺 𑀲𑀪𑀸𑀕𑀧𑀝𑀺𑀪𑀸𑀕𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀘𑁆𑀘𑀬𑀸𑀲𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑀗𑁆𑀔𑀢𑀲𑁆𑀲 𑀳𑀺 𑀅𑀧𑁆𑀧𑀢𑀺𑀝𑁆𑀞𑀲𑁆𑀲 𑀏𑀓𑀦𑁆𑀢𑀦𑀺𑀘𑁆𑀘𑀲𑁆𑀲 𑀲𑀢𑁄 𑀦𑀺𑀩𑁆𑀩𑀸𑀦𑀲𑁆𑀲 𑀓𑀼𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀪𑀸𑀕𑀲𑁆𑀲 𑀲𑀫𑁆𑀪𑀯𑁄. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀁 𑀦𑀸𑀫𑁂𑀢’’𑀦𑁆𑀢𑀺𑀆𑀤𑀺.

𑀯𑀺𑀭𑀤𑁆𑀥𑁄𑀢𑀺 𑀏𑀢𑁆𑀣 𑀲𑀪𑀸𑀕𑀧𑀝𑀺𑀪𑀸𑀕𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀦𑀺𑀘𑁆𑀙𑀬𑀸𑀪𑀸𑀯𑀢𑁄 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀯𑀺𑀭𑀚𑁆𑀛𑀺𑀢𑁆𑀯𑀸𑀯 𑀧𑀼𑀘𑁆𑀙𑀺, 𑀦 𑀅𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀳𑁂𑀝𑁆𑀞𑀸 𑀲𑀩𑁆𑀩𑀧𑀼𑀘𑁆𑀙𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀦𑀬𑁂𑀦 𑀚𑀸𑀦𑀺𑀢𑁆𑀯𑀸𑀯 𑀧𑀯𑀢𑁆𑀢𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀣𑁂𑀭𑀻 𑀧𑀦 𑀢𑀁 𑀢𑀁 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀲𑀪𑀸𑀯𑀢𑁄 𑀯𑀺𑀪𑀸𑀯𑁂𑀦𑁆𑀢𑀻 𑀲𑀢𑁆𑀣𑀼 𑀤𑁂𑀲𑀦𑀸𑀜𑀸𑀡𑀁 𑀅𑀦𑀼𑀕𑀦𑁆𑀢𑁆𑀯𑀸𑀯 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀦𑀺𑀩𑁆𑀩𑀸𑀦𑁄𑀕𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀑𑀕𑀸𑀳𑀺𑀢𑁆𑀯𑀸 𑀞𑀺𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑁄𑀕𑀥𑀁. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀩𑁆𑀪𑀦𑁆𑀢𑀭𑀁 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞’’𑀦𑁆𑀢𑀺. 𑀅𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲.

𑁪𑁬𑁭. 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀧𑀡𑁆𑀟𑀺𑀘𑁆𑀘𑀁 𑀤𑀲𑁆𑀲𑁂𑀢𑀼𑀁 ‘‘𑀥𑀸𑀢𑀼𑀓𑀼𑀲𑀮𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀧𑀡𑁆𑀟𑀺𑀢𑁄 𑀳𑁄𑀢𑀺? 𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀥𑀸𑀢𑀼𑀓𑀼𑀲𑀮𑁄 𑀘 𑀳𑁄𑀢𑀺, 𑀆𑀬𑀢𑀦𑀓𑀼𑀲𑀮𑁄 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑁄 𑀘 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑁄 𑀘. 𑀏𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀧𑀡𑁆𑀟𑀺𑀢𑁄 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁧𑁨𑁪). 𑀧𑀜𑁆𑀜𑀸𑀫𑀳𑀢𑁆𑀢𑀁 𑀦𑀸𑀫 𑀣𑁂𑀭𑀺𑀬𑀸 𑀅𑀲𑁂𑀓𑁆𑀔𑀧𑁆𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸𑀬 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀧𑀽𑀭𑁂𑀢𑁆𑀯𑀸 𑀞𑀺𑀢𑀢𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀦𑁆𑀢𑁂 𑀅𑀢𑁆𑀣𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀸𑀚𑀬𑀼𑀢𑁆𑀢𑁂𑀳𑀻𑀢𑀺 𑀭𑀜𑁆𑀜𑁄 𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑀧𑀼𑀭𑀺𑀲𑁂𑀳𑀺. 𑀆𑀳𑀘𑁆𑀘𑀯𑀘𑀦𑁂𑀦𑀸𑀢𑀺 𑀲𑀢𑁆𑀣𑀸𑀭𑀸 𑀓𑀭𑀡𑀸𑀤𑀻𑀦𑀺 𑀆𑀳𑀦𑀺𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀘𑀦𑁂𑀦. 𑀬𑀤𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀘𑀽𑀴𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬𑁮. 𑀥𑀫𑁆𑀫𑁄𑀢𑀺 𑀕𑀳𑀺𑀢𑀕𑀳𑀡𑀸𑀦𑀻𑀢𑀺 𑀥𑀫𑁆𑀫𑁄 𑀯𑀸 𑀳𑁄𑀢𑀼 𑀇𑀢𑀭𑁄 𑀯𑀸, 𑀥𑀫𑁆𑀫𑁄𑀢𑀺 𑀧𑀕𑁆𑀕𑀳𑀺𑀢𑀕𑁆𑀕𑀸𑀳𑀧𑁆𑀧𑀯𑀢𑁆𑀢𑀸 𑀘𑀭𑀺𑀬𑀸𑀯. 𑀆𑀬𑀽𑀳𑀦𑀓𑁆𑀔𑀡𑁂𑀢𑀺 𑀢𑀲𑁆𑀲 𑀥𑀫𑁆𑀫𑁄𑀢𑀺 𑀕𑀳𑀺𑀢𑀲𑁆𑀲 𑀧𑀯𑀢𑁆𑀢𑀦𑀓𑁆𑀔𑀡𑁂. 𑀲𑀼𑀔𑀦𑁆𑀢𑀺 𑀅𑀓𑀺𑀘𑁆𑀙𑀁. 𑀢𑁂𑀦𑀸𑀳 ‘‘𑀲𑀼𑀓𑀭’’𑀦𑁆𑀢𑀺. 𑀤𑀼𑀓𑁆𑀔𑀯𑀺𑀧𑀸𑀓𑀦𑁆𑀢𑀺 𑀅𑀦𑀺𑀝𑁆𑀞𑀨𑀮𑀯𑀺𑀧𑀘𑁆𑀘𑀦𑀁.

𑁪𑁬𑁯. 𑀬𑀣𑀸 𑀘𑀓𑁆𑀔𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀬𑀣𑀸𑀲𑀓𑀁 𑀯𑀺𑀲𑀬𑀕𑁆𑀕𑀳𑀡𑀁 𑀲𑀪𑀸𑀯𑀲𑀺𑀤𑁆𑀥𑀁, 𑀏𑀯𑀁 𑀫𑀦𑀲𑁄𑀧𑀺. 𑀢𑁂 𑀘 𑀯𑀺𑀲𑀬𑀸 𑀇𑀝𑁆𑀞𑀸𑀓𑀸𑀭𑀢𑁄 𑀕𑀳𑀡𑁂 𑀦 𑀓𑁄𑀘𑀺 𑀤𑁄𑀲𑁄, 𑀧𑀼𑀭𑀺𑀲𑀢𑁆𑀢𑀪𑀸𑀯𑁂 𑀦 𑀘 𑀢𑁂 𑀤𑁄𑀲𑀁 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀅𑀬𑀁 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀻𑀢𑀺 𑀆𑀳 ‘‘𑀯𑀢𑁆𑀣𑀼𑀓𑀸𑀫𑁂𑀲𑀼𑀧𑀺 𑀓𑀺𑀮𑁂𑀲𑀓𑀸𑀫𑁂𑀲𑀼𑀧𑀺 𑀤𑁄𑀲𑁄 𑀦𑀢𑁆𑀣𑀻’’𑀢𑀺, 𑀅𑀲𑁆𑀲𑀸𑀤𑁂𑀢𑁆𑀯𑀸 𑀯𑀺𑀲𑀬𑀧𑀭𑀺𑀪𑁄𑀕𑁂 𑀦𑀢𑁆𑀣𑀺 𑀆𑀤𑀻𑀦𑀯𑁄, 𑀢𑀧𑁆𑀧𑀘𑁆𑀘𑀬𑀸 𑀦 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀧𑀭𑀺𑀪𑀼𑀜𑁆𑀚𑀦𑀓𑀢𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀧𑀭𑀺𑀪𑁄𑀕𑀢𑁆𑀣𑁄 𑀳𑀺 𑀅𑀬𑀁 𑀧𑀸-𑀲𑀤𑁆𑀤𑁄 𑀓𑀢𑁆𑀢𑀼𑀲𑀸𑀥𑀦𑁄 𑀘 𑀢𑀩𑁆𑀬-𑀲𑀤𑁆𑀤𑁄, 𑀬𑀣𑀸𑀭𑀼𑀘𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑀓𑀸𑀫𑁄𑀧𑀺 𑀅𑀲𑁆𑀲𑀸𑀤𑀺𑀬𑀫𑀸𑀦𑁄 𑀯𑀢𑁆𑀣𑀼𑀓𑀸𑀫𑀦𑁆𑀢𑁄𑀕𑀥𑁄𑀬𑁂𑀯, 𑀓𑀺𑀮𑁂𑀲𑀓𑀸𑀫𑀯𑀲𑁂𑀦 𑀧𑀦 𑀦𑁂𑀲𑀁 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑀸𑀢𑀺 𑀆𑀳 ‘‘𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀦 𑀧𑀸𑀢𑀩𑁆𑀬𑀢’’𑀦𑁆𑀢𑀺. 𑀓𑀺𑀮𑁂𑀲𑀓𑀸𑀫𑁂𑀦𑀸𑀢𑀺 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀧𑀸𑀢𑀩𑁆𑀬𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀓𑀢𑁆𑀢𑀼𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑁄𑀴𑀺𑀁 𑀓𑀢𑁆𑀯𑀸𑀢𑀺 𑀯𑁂𑀡𑀺𑀩𑀦𑁆𑀥𑀯𑀲𑁂𑀦 𑀫𑁄𑀴𑀺𑀁 𑀓𑀢𑁆𑀯𑀸. 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀺𑀓𑀸𑀳𑀻𑀢𑀺 𑀢𑀸𑀧𑀲𑀧𑀩𑁆𑀩𑀚𑁆𑀚𑀽𑀧𑀕𑀢𑀸𑀳𑀺. 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀇𑀤𑀁 ‘‘𑀧𑀳𑀸𑀦𑀫𑀸𑀳𑀁𑀲𑀽’’𑀢𑀺 𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀦𑁆𑀢𑀺 ‘‘𑀧𑀳𑀸𑀦𑀁 𑀲𑀫𑀢𑀺𑀓𑁆𑀓𑀫𑀁 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀓𑀸𑀫𑀸 𑀦𑀸𑀫𑁂𑀢𑁂 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀬𑀸𑀣𑀸𑀯𑀢𑁄 𑀧𑀭𑀺𑀚𑀸𑀦𑀦𑀁 𑀇𑀥 ‘‘𑀧𑀳𑀸𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀦 𑀯𑀺𑀦𑀸𑀪𑀸𑀯𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀫𑀸𑀮𑀼𑀯𑀸𑀲𑀺𑀧𑀸𑀝𑀺𑀓𑀸𑀢𑀺 𑀫𑀸𑀮𑀼𑀯𑀸𑀯𑀺𑀤𑀮𑀁 𑀫𑀸𑀮𑀼𑀯𑀸𑀨𑀮𑁂 𑀧𑁄𑀝𑁆𑀝𑀮𑀺𑀓𑀸. 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀲𑀸𑀮𑁂 𑀅𑀥𑀺𑀯𑀢𑁆𑀣𑀤𑁂𑀯𑀢𑀸𑀬 𑀧𑀯𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀤𑀸 𑀳𑀺 𑀢𑀲𑁆𑀲𑀸 𑀏𑀯𑀁 𑀳𑁄𑀢𑀺. 𑀓𑁄𑀯𑀺𑀴𑀸𑀭𑀧𑀢𑁆𑀢𑀲𑀤𑀺𑀲𑁂𑀳𑀻𑀢𑀺 𑀫𑀳𑀸𑀓𑁄𑀯𑀺𑀴𑀸𑀭𑀧𑀢𑁆𑀢𑀲𑀡𑁆𑀞𑀸𑀦𑁂𑀳𑀺. 𑀲𑀡𑁆𑀞𑀸𑀦𑀯𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁, 𑀫𑀸𑀮𑀼𑀯𑀸𑀧𑀢𑁆𑀢𑀸 𑀧𑀦 𑀓𑁄𑀯𑀺𑀴𑀸𑀭𑀧𑀢𑁆𑀢𑁂𑀳𑀺 𑀫𑀳𑀦𑁆𑀢𑀢𑀭𑀸𑀦𑀺 𑀘𑁂𑀯 𑀖𑀦𑀢𑀭𑀸𑀦𑀺 𑀘 𑀳𑁄𑀦𑁆𑀢𑀺. 𑀯𑀺𑀧𑀼𑀮𑀩𑀳𑀼𑀖𑀦𑀕𑀭𑀼𑀧𑀢𑁆𑀢𑀢𑀸𑀬 𑀫𑀳𑀦𑁆𑀢𑀁 𑀪𑀸𑀭𑀁 𑀚𑀦𑁂𑀢𑁆𑀯𑀸. 𑀲𑀸𑀢𑀺 𑀫𑀸𑀮𑀼𑀯𑀸𑀮𑀢𑀸. 𑀑𑀖𑀦𑀦𑁆𑀢𑀺 𑀳𑁂𑀝𑁆𑀞𑀢𑁄 𑀑𑀮𑀫𑁆𑀩𑀦𑀳𑁂𑀢𑀼𑀪𑀽𑀢𑀁 𑀖𑀦𑀪𑀸𑀯𑀁.

𑀅𑀦𑁆𑀥𑀯𑀦𑀲𑀼𑀪𑀕𑀯𑀦𑀕𑁆𑀕𑀳𑀡𑀁 𑀢𑁂𑀲𑀁 𑀅𑀪𑀺𑀮𑀓𑁆𑀔𑀺𑀢𑀪𑀸𑀯𑀢𑁄. 𑀦𑀸𑀴𑀺𑀓𑁂𑀭𑀸𑀤𑀻𑀲𑀼 𑀢𑀺𑀡𑀚𑀸𑀢𑀻𑀲𑀼. 𑀔𑀸𑀤𑀦𑀼𑀧𑀮𑀓𑁆𑀔𑀡𑀁 𑀉𑀧𑀘𑀺𑀓𑀸𑀦𑀁 𑀉𑀝𑁆𑀞𑀳𑀦𑀕𑁆𑀕𑀳𑀡𑀦𑁆𑀢𑀺 𑀆𑀳 ‘‘𑀉𑀝𑁆𑀞𑀳𑁂𑀬𑁆𑀬𑀼’’𑀦𑁆𑀢𑀺. 𑀓𑁂𑀴𑀺𑀁 𑀓𑀭𑁄𑀦𑁆𑀢𑀻 𑀯𑀺𑀬𑀸𑀢𑀺 𑀯𑀺𑀮𑀫𑁆𑀩𑀦𑀦𑀤𑀻 𑀯𑀺𑀬 𑀓𑁂𑀴𑀺𑀁 𑀓𑀭𑁄𑀦𑁆𑀢𑀻. 𑀇𑀤𑀸𑀦𑀺 𑀅𑀳𑀁 𑀢𑀁 𑀅𑀚𑁆𑀛𑁄𑀢𑁆𑀣𑀭𑀺𑀦𑁆𑀢𑀺 𑀧𑀫𑁄𑀤𑀫𑀸𑀦𑀸 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀯𑀺𑀮𑀫𑁆𑀩𑀦𑁆𑀢𑀻. 𑀲𑀫𑁆𑀨𑀲𑁆𑀲𑁄𑀧𑀺 𑀲𑀼𑀔𑁄 𑀫𑀼𑀤𑀼𑀢𑀮𑀼𑀡𑀓𑁄𑀫𑀮𑀪𑀸𑀯𑀢𑁄. 𑀤𑀲𑁆𑀲𑀦𑀫𑁆𑀧𑀺 𑀲𑀼𑀔𑀁 𑀖𑀦𑀩𑀳𑀮𑀧𑀢𑁆𑀢𑀲𑀁𑀳𑀢𑀢𑀸𑀬. 𑀲𑁄𑀫𑀦𑀲𑁆𑀲𑀚𑀸𑀢𑀸𑀢𑀺 𑀧𑀼𑀩𑁆𑀩𑁂 𑀅𑀦𑀼𑀲𑁆𑀲𑀯𑀯𑀲𑁂𑀦 𑀪𑀯𑀦𑀯𑀺𑀦𑀸𑀲𑀪𑀬𑀸 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀺, 𑀇𑀤𑀸𑀦𑀺 𑀢𑀲𑁆𑀲𑀸 𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀧𑀮𑁄𑀪𑀺𑀢𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁄𑀲𑀺.

𑀯𑀺𑀝𑀪𑀺𑀁 𑀓𑀭𑁂𑀬𑁆𑀬𑀸𑀢𑀺 𑀆𑀢𑀸𑀦𑀯𑀺𑀢𑀸𑀦𑀯𑀲𑁂𑀦 𑀚𑀝𑁂𑀦𑁆𑀢𑀻 𑀚𑀸𑀮𑀁 𑀓𑀭𑁂𑀬𑁆𑀬. 𑀢𑀣𑀸𑀪𑀽𑀢𑀸 𑀘 𑀖𑀦𑀧𑀢𑁆𑀢𑀲𑀜𑁆𑀙𑀦𑁆𑀦𑀢𑀸𑀬 𑀙𑀢𑁆𑀢𑀲𑀤𑀺𑀲𑀻 𑀳𑁄𑀢𑀻𑀢𑀺 𑀆𑀳 ‘‘𑀙𑀢𑁆𑀢𑀸𑀓𑀸𑀭𑁂𑀦 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺. 𑀲𑀓𑀮𑀁 𑀭𑀼𑀓𑁆𑀔𑀦𑁆𑀢𑀺 𑀉𑀧𑀭𑀺 𑀲𑀩𑁆𑀩𑀲𑀸𑀔𑀸𑀧𑀲𑀸𑀔𑀁 𑀲𑀩𑁆𑀩𑀭𑀼𑀓𑁆𑀔𑀁. 𑀪𑀲𑁆𑀲𑀫𑀸𑀦𑀸𑀢𑀺 𑀧𑀮𑀺𑀯𑁂𑀞𑀦𑀯𑀲𑁂𑀦𑁂𑀯 𑀑𑀢𑀭𑀫𑀸𑀦𑀸. 𑀬𑀸𑀯 𑀫𑀽𑀮𑀸 𑀑𑀢𑀺𑀡𑁆𑀡𑀲𑀸𑀔𑀸𑀳𑀻𑀢𑀺 𑀫𑀸𑀮𑀼𑀯𑀸 𑀪𑀸𑀭𑁂𑀦 𑀑𑀦𑀫𑀺𑀢𑁆𑀯𑀸 𑀭𑀼𑀓𑁆𑀔𑀲𑁆𑀲 𑀬𑀸𑀯 𑀫𑀽𑀮𑀸 𑀑𑀢𑀺𑀡𑁆𑀡𑀲𑀸𑀔𑀸𑀳𑀺 𑀧𑀼𑀦 𑀅𑀪𑀺𑀭𑀼𑀳𑀫𑀸𑀦𑀸. 𑀲𑀩𑁆𑀩𑀲𑀸𑀔𑀸𑀢𑀺 𑀳𑁂𑀝𑁆𑀞𑀸 𑀫𑀚𑁆𑀛𑁂 𑀉𑀧𑀭𑀺 𑀘𑀸𑀢𑀺 𑀲𑀩𑁆𑀩𑀸𑀧𑀺 𑀲𑀸𑀔𑀸𑀬𑁄 𑀧𑀮𑀺𑀯𑁂𑀞𑁂𑀦𑁆𑀢𑀻. 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀚𑀸𑀮𑀲𑀦𑁆𑀢𑀸𑀦𑀓𑀦𑀺𑀬𑀸𑀫𑁂𑀦 𑀚𑀝𑁂𑀢𑁆𑀯𑀸. 𑀏𑀯𑀁 𑀅𑀧𑀭𑀸𑀧𑀭𑀁 𑀲𑀁𑀲𑀺𑀩𑁆𑀩𑀦𑁂𑀦 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀻. 𑀲𑀩𑁆𑀩𑀲𑀸𑀔𑀸 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀲𑀬𑀁 𑀉𑀧𑀭𑀺 𑀞𑀢𑁆𑀯𑀸 𑀫𑀳𑀸𑀪𑀸𑀭𑀪𑀸𑀯𑁂𑀦 𑀯𑀸𑀢𑁂 𑀯𑀸 𑀯𑀸𑀬𑀦𑁆𑀢𑁂 𑀤𑁂𑀯𑁂 𑀯𑀸 𑀯𑀲𑁆𑀲𑀦𑁆𑀢𑁂 𑀧𑀤𑀸𑀮𑁂𑀬𑁆𑀬. 𑀲𑀸𑀔𑀝𑁆𑀞𑀓𑀯𑀺𑀫𑀸𑀦𑀦𑁆𑀢𑀺 𑀲𑀸𑀔𑀸𑀧𑀝𑀺𑀩𑀤𑁆𑀥𑀁 𑀯𑀺𑀫𑀸𑀦𑀁. 𑀬𑀲𑁆𑀫𑀸 𑀇𑀥 𑀲𑀢𑁆𑀣𑀸𑀭𑀸 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀪𑀽𑀢𑀧𑀼𑀩𑁆𑀩𑀫𑁂𑀯 𑀯𑀢𑁆𑀣𑀼 𑀉𑀧𑀫𑀸𑀪𑀸𑀯𑁂𑀦 𑀆𑀳𑀝𑀁, 𑀢𑀲𑁆𑀫𑀸 ‘‘𑀇𑀤𑀁 𑀧𑀦 𑀯𑀺𑀫𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁭𑁧. 𑀩𑀳𑀮𑀭𑀸𑀕𑀲𑀪𑀸𑀯𑁄𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀳𑀺 𑀦𑀻𑀳𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀩𑀮𑀯𑀸 𑀳𑀼𑀢𑁆𑀯𑀸 𑀅𑀪𑀺𑀪𑀯𑀦𑀭𑀸𑀕𑀥𑀸𑀢𑀼𑀓𑁄. 𑀭𑀸𑀕𑀚𑀦𑁆𑀢𑀺 𑀭𑀸𑀕𑀦𑀺𑀫𑀺𑀢𑁆𑀢𑀚𑀸𑀢𑀁. 𑀤𑀺𑀝𑁆𑀞𑁂 𑀤𑀺𑀝𑁆𑀞𑁂 𑀆𑀭𑀫𑁆𑀫𑀡𑁂𑀢𑀺 𑀤𑀺𑀝𑁆𑀞𑁂 𑀤𑀺𑀝𑁆𑀞𑁂 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑁂. 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀻𑀢𑀺 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀁 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀲𑀺𑀓𑁆𑀔𑀸𑀕𑀸𑀭𑀯𑁂𑀦 𑀧𑀦 𑀓𑀺𑀮𑁂𑀲𑁂𑀳𑀺 𑀦𑀺𑀲𑁆𑀲𑀺𑀢𑀁 𑀫𑀕𑁆𑀕𑀁 𑀦 𑀧𑀝𑀺𑀧𑀚𑁆𑀚𑀢𑀺, 𑀢𑀢𑁄 𑀏𑀯 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀆𑀡𑀢𑁆𑀢𑀁 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀢𑁂𑀯. 𑀢𑁂𑀦𑀸𑀳 ‘‘𑀦 𑀢𑁆𑀯𑁂𑀯 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀻’’𑀢𑀺. 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀻𑀦𑀻𑀢𑀺 𑁋 ‘‘𑀏𑀳𑀺 𑀢𑀸𑀯 𑀢𑀬𑀸 𑀯𑀼𑀢𑁆𑀢𑀁 𑀫𑀬𑀸 𑀯𑀼𑀢𑁆𑀢𑀜𑁆𑀘 𑀅𑀫𑀼𑀢𑁆𑀭 𑀕𑀦𑁆𑀢𑁆𑀯𑀸 𑀯𑀻𑀫𑀁𑀲𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀦𑀸 𑀳𑀢𑁆𑀣𑀕𑁆𑀕𑀳𑀡𑀸𑀤𑀻𑀦𑀺 𑀓𑀭𑁄𑀦𑁆𑀢𑁄, 𑀦 𑀓𑀭𑀼𑀡𑀸𑀫𑁂𑀢𑁆𑀢𑀸𑀦𑀺𑀤𑀸𑀦𑀯𑀲𑁂𑀦. 𑀫𑁄𑀳𑀚𑀸𑀢𑀺𑀓𑁄𑀢𑀺 𑀩𑀳𑀮𑀫𑁄𑀳𑀲𑀪𑀸𑀯𑁄.

𑁪𑁭𑁨. 𑀓𑀫𑁆𑀫𑀦𑀺𑀬𑀸𑀫𑁂𑀦𑀸𑀢𑀺 𑀧𑀼𑀭𑀺𑀫𑀚𑀸𑀢𑀺𑀲𑀺𑀤𑁆𑀥𑁂𑀦 𑀮𑁄𑀪𑀼𑀲𑁆𑀲𑀤𑀢𑀸𑀤𑀺𑀦𑀺𑀬𑀫𑀺𑀢𑁂𑀦 𑀓𑀫𑁆𑀫𑀦𑀺𑀬𑀸𑀫𑁂𑀦. 𑀇𑀤𑀸𑀦𑀺 𑀢𑀁 𑀮𑁄𑀪𑀼𑀲𑁆𑀲𑀤𑀢𑀸𑀤𑀺𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂𑀢𑀺 𑀓𑀫𑁆𑀫𑀓𑀭𑀡𑀯𑁂𑀮𑀸𑀬. 𑀮𑁄𑀪𑁄 𑀩𑀮𑀯𑀸𑀢𑀺 𑀢𑀚𑁆𑀚𑀸𑀬 𑀲𑀸𑀫𑀕𑁆𑀕𑀺𑀬𑀸 𑀲𑀸𑀫𑀢𑁆𑀣𑀺𑀬𑀢𑁄 𑀮𑁄𑀪𑁄 𑀅𑀥𑀺𑀓𑁄 𑀳𑁄𑀢𑀺. 𑀅𑀮𑁄𑀪𑁄 𑀫𑀦𑁆𑀤𑁄𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑁄 𑀅𑀮𑁄𑀪𑁄 𑀤𑀼𑀩𑁆𑀩𑀮𑁄 𑀳𑁄𑀢𑀺. 𑀓𑀣𑀁 𑀧𑀦𑁂𑀢𑁂 𑀮𑁄𑀪𑀸𑀮𑁄𑀪𑀸 𑀅𑀜𑁆𑀜𑀫𑀜𑁆𑀜𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀸 𑀏𑀓𑀓𑁆𑀔𑀡𑁂 𑀧𑀯𑀢𑁆𑀢𑀦𑁆𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁 ‘‘𑀏𑀓𑀓𑁆𑀔𑀡𑁂 𑀧𑀯𑀢𑁆𑀢𑀦𑁆𑀢𑀻’’𑀢𑀺, 𑀦𑀺𑀓𑀦𑁆𑀢𑀺𑀓𑁆𑀔𑀡𑀁 𑀧𑀦 𑀆𑀬𑀽𑀳𑀦𑀓𑁆𑀔𑀡𑀫𑁂𑀯 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼. 𑀧𑀭𑀺𑀬𑀸𑀤𑀸𑀢𑀼𑀦𑁆𑀢𑀺 𑀅𑀪𑀺𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑁄 𑀳𑀺 ‘‘𑀏𑀯𑀁𑀲𑀼𑀦𑁆𑀤𑀭𑀁 𑀏𑀯𑀁𑀯𑀺𑀧𑀼𑀮𑀁 𑀏𑀯𑀁𑀫𑀳𑀕𑁆𑀖𑀜𑁆𑀘 𑀦 𑀲𑀓𑁆𑀓𑀸 𑀧𑀭𑀲𑁆𑀲 𑀤𑀸𑀢𑀼’’𑀦𑁆𑀢𑀺𑀆𑀤𑀺𑀦𑀸 𑀅𑀫𑀼𑀢𑁆𑀢𑀘𑀸𑀕𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀬 𑀘𑁂𑀢𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀅𑀮𑁄𑀪𑁄 𑀲𑀫𑁆𑀫𑀤𑁂𑀯 𑀮𑁄𑀪𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀤𑁄𑀲𑀫𑁄𑀳𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀁 𑀢𑀸𑀤𑀺𑀲𑀧𑀘𑁆𑀘𑀬𑀮𑀸𑀪𑁂𑀦𑁂𑀯 𑀅𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄. 𑀢𑀲𑁆𑀫𑀸𑀢𑀺 𑀮𑁄𑀪𑀸𑀤𑁄𑀲𑀸𑀫𑁄𑀳𑀸𑀦𑀁 𑀩𑀮𑀯𑀪𑀸𑀯𑀢𑁄 𑀅𑀮𑁄𑀪𑀤𑁄𑀲𑀫𑁄𑀳𑀸𑀦𑀜𑁆𑀘 𑀤𑀼𑀩𑁆𑀩𑀮𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀫𑁂𑀯 𑀓𑀸𑀭𑀡𑀁 𑀧𑀘𑁆𑀘𑀸𑀫𑀲𑀢𑀺. 𑀲𑁄𑀢𑀺 𑀢𑀁𑀲𑀫𑀗𑁆𑀕𑀻. 𑀢𑁂𑀦 𑀓𑀫𑁆𑀫𑁂𑀦𑀸𑀢𑀺 𑀢𑁂𑀦 𑀮𑁄𑀪𑀸𑀤𑀺𑀉𑀧𑀦𑀺𑀲𑁆𑀲𑀬𑀯𑀢𑀸 𑀓𑀼𑀲𑀮𑀓𑀫𑁆𑀫𑀼𑀦𑀸. 𑀲𑀼𑀔𑀲𑀻𑀮𑁄𑀢𑀺 𑀲𑀔𑀺𑀮𑁄. 𑀢𑀫𑁂𑀯𑀢𑁆𑀣𑀁 𑀅𑀓𑁆𑀓𑁄𑀥𑀦𑁄𑀢𑀺 𑀧𑀭𑀺𑀬𑀸𑀬𑁂𑀦 𑀯𑀤𑀢𑀺.

𑀫𑀦𑁆𑀤𑀸 𑀅𑀮𑁄𑀪𑀸𑀤𑁄𑀲𑀸 𑀮𑁄𑀪𑀤𑁄𑀲𑁂 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀫𑁄𑀳𑁄 𑀧𑀦 𑀩𑀮𑀯𑀸 𑀫𑁄𑀳𑀁 𑀧𑀭𑀺𑀬𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀏𑀯𑀁 𑀬𑀣𑀸𑀭𑀳𑀁 𑀧𑀞𑀫𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑀺𑀤𑁂𑀲𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦. 𑀤𑀼𑀝𑁆𑀞𑁄𑀢𑀺 𑀓𑁄𑀥𑀦𑁄. 𑀤𑀦𑁆𑀥𑁄𑀢𑀺 𑀫𑀦𑁆𑀤𑀫𑀜𑁆𑀜𑁄. 𑀲𑀼𑀔𑀲𑀻𑀮𑀓𑁄𑀢𑀺 𑀲𑀼𑀔𑀲𑀻𑀮𑁄.

𑀏𑀢𑁆𑀣 𑀘 𑀮𑁄𑀪𑀯𑀲𑁂𑀦, 𑀤𑁄𑀲𑀫𑁄𑀳-𑀮𑁄𑀪𑀤𑁄𑀲-𑀮𑁄𑀪𑀫𑁄𑀳-𑀤𑁄𑀲𑀫𑁄𑀳-𑀮𑁄𑀪𑀤𑁄𑀲𑀫𑁄𑀳𑀯𑀲𑁂𑀦𑀸𑀢𑀺 𑀢𑀬𑁄 𑀏𑀓𑀓𑀸, 𑀢𑀬𑁄 𑀤𑀼𑀓𑀸, 𑀏𑀓𑁄 𑀢𑀺𑀓𑁄𑀢𑀺 𑀮𑁄𑀪𑀸𑀤𑀺𑀉𑀲𑁆𑀲𑀤𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁂 𑀏𑀯 𑀲𑀢𑁆𑀢 𑀯𑀸𑀭𑀸, 𑀢𑀣𑀸 𑀓𑀼𑀲𑀮𑀧𑀓𑁆𑀔𑁂 𑀅𑀮𑁄𑀪𑀸𑀤𑀺𑀉𑀲𑁆𑀲𑀤𑀯𑀲𑁂𑀦𑀸𑀢𑀺 𑀘𑀼𑀤𑁆𑀤𑀲 𑀯𑀸𑀭𑀸 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀣 𑀅𑀮𑁄𑀪𑀤𑁄𑀲𑀫𑁄𑀳𑀸, 𑀅𑀮𑁄𑀪𑀸𑀤𑁄𑀲𑀫𑁄𑀳𑀸, 𑀅𑀮𑁄𑀪𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄𑀢𑀺 𑀆𑀕𑀢𑁂𑀳𑀺 𑀓𑀼𑀲𑀮𑀧𑀓𑁆𑀔𑁂 𑀢𑀢𑀺𑀬𑀤𑀼𑀢𑀺𑀬𑀧𑀞𑀫𑀯𑀸𑀭𑁂𑀳𑀺 𑀤𑁄𑀲𑀼𑀲𑁆𑀲𑀤𑀫𑁄𑀳𑀼𑀲𑁆𑀲𑀤𑀤𑁄𑀲𑀫𑁄𑀳𑀼𑀲𑁆𑀲𑀤𑀯𑀸𑀭𑀸 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀢𑀣𑀸 𑀅𑀓𑀼𑀲𑀮𑀧𑀓𑁆𑀔𑁂 𑀮𑁄𑀪𑀸𑀤𑁄𑀲𑀸𑀫𑁄𑀳𑀸, 𑀮𑁄𑀪𑀤𑁄𑀲𑀸𑀫𑁄𑀳𑀸, 𑀮𑁄𑀪𑀸𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄𑀢𑀺 𑀆𑀕𑀢𑁂𑀳𑀺 𑀢𑀢𑀺𑀬𑀤𑀼𑀢𑀺𑀬𑀧𑀞𑀫𑀯𑀸𑀭𑁂𑀳𑀺 𑀅𑀤𑁄𑀲𑀼𑀲𑁆𑀲𑀤𑀅𑀫𑁄𑀳𑀼𑀲𑁆𑀲𑀤𑀅𑀤𑁄𑀲𑀸𑀫𑁄𑀳𑀼𑀲𑁆𑀲𑀤𑀯𑀸𑀭𑀸 𑀕𑀳𑀺𑀢𑀸 𑀏𑀯𑀸𑀢𑀺 𑀅𑀓𑀼𑀲𑀮𑀓𑀼𑀲𑀮𑀧𑀓𑁆𑀔𑁂𑀲𑀼 𑀢𑀬𑁄 𑀢𑀬𑁄 𑀯𑀸𑀭𑁂 𑀅𑀦𑁆𑀢𑁄𑀕𑀥𑁂 𑀓𑀢𑁆𑀯𑀸 𑀅𑀝𑁆𑀞𑁂𑀯 𑀯𑀸𑀭𑀸 𑀤𑀲𑁆𑀲𑀺𑀢𑀸. 𑀬𑁂 𑀧𑀦 𑀉𑀪𑀬𑀲𑀫𑁆𑀫𑀺𑀲𑁆𑀲𑀢𑀸𑀯𑀲𑁂𑀦 𑀮𑁄𑀪𑀸𑀮𑁄𑀪𑀼𑀲𑁆𑀲𑀤𑀯𑀸𑀭𑀸𑀤𑀬𑁄 𑀅𑀧𑀭𑁂 𑀏𑀓𑀽𑀦𑀧𑀜𑁆𑀜𑀸𑀲 𑀯𑀸𑀭𑀸 𑀓𑀸𑀫𑀁 𑀤𑀲𑁆𑀲𑁂𑀢𑀩𑁆𑀩𑀸, 𑀢𑁂𑀲𑀁 𑀅𑀲𑀫𑁆𑀪𑀯𑀢𑁄 𑀏𑀯 𑀦 𑀤𑀲𑁆𑀲𑀺𑀢𑀸. 𑀦 𑀳𑀺 ‘‘𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀦𑁆𑀢𑀭𑁂𑀦 𑀅𑀯𑀢𑁆𑀣𑀦𑁆𑀢𑀭𑀁 𑀮𑁄𑀪𑁄 𑀘 𑀩𑀮𑀯𑀸 𑀅𑀮𑁄𑀪𑁄 𑀘𑀸’’𑀢𑀺𑀆𑀤𑀺 𑀬𑀼𑀚𑁆𑀚𑀢𑀺. 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀸𑀧𑀺 𑀏𑀢𑁂𑀲𑀁 𑀩𑀮𑀯𑀤𑀼𑀩𑁆𑀩𑀮𑀪𑀸𑀯𑁄 𑀲𑀳𑀚𑀸𑀢𑀥𑀫𑁆𑀫𑀯𑀲𑁂𑀦 𑀯𑀸. 𑀢𑀢𑁆𑀣 𑀮𑁄𑀪𑀲𑁆𑀲 𑀢𑀸𑀯 𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀦𑀪𑀺𑀪𑀽𑀢𑀢𑀸𑀬 𑀩𑀮𑀯𑀪𑀸𑀯𑁄, 𑀢𑀣𑀸 𑀤𑁄𑀲𑀫𑁄𑀳𑀸𑀦𑀁 𑀅𑀤𑁄𑀲𑀸𑀫𑁄𑀳𑁂𑀳𑀺. 𑀅𑀮𑁄𑀪𑀸𑀤𑀻𑀦𑀁 𑀧𑀦 𑀮𑁄𑀪𑀸𑀤𑀺𑀅𑀦𑀪𑀺𑀪𑀯𑀦𑀢𑁄. 𑀲𑀩𑁆𑀩𑁂𑀲𑀜𑁆𑀘 𑀲𑀫𑀸𑀦𑀚𑀸𑀢𑀺𑀬𑀲𑀫𑀥𑀺𑀪𑀼𑀬𑁆𑀬 𑀧𑀯𑀢𑁆𑀢𑀺𑀯𑀲𑁂𑀦 𑀲𑀳𑀚𑀸𑀢𑀥𑀫𑁆𑀫𑀢𑁄 𑀩𑀮𑀯𑀪𑀸𑀯𑁄. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁨.𑁪𑁭𑁨) 𑁋 ‘‘𑀮𑁄𑀪𑁄 𑀩𑀮𑀯𑀸, 𑀅𑀮𑁄𑀪𑁄 𑀫𑀦𑁆𑀤𑁄. 𑀅𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄, 𑀤𑁄𑀲𑀫𑁄𑀳𑀸 𑀫𑀦𑁆𑀤𑀸’’𑀢𑀺𑀆𑀤𑀺, 𑀲𑁄 𑀘 𑀦𑁂𑀲𑀁 𑀫𑀦𑁆𑀤𑀩𑀮𑀯𑀪𑀸𑀯𑁄 𑀧𑀼𑀭𑀺𑀫𑀽𑀧𑀦𑀺𑀲𑁆𑀲𑀬𑀢𑁄 𑀢𑀣𑀸 𑀆𑀲𑀬𑀲𑁆𑀲 𑀧𑀭𑀺𑀪𑀸𑀯𑀺𑀢𑀢𑀸𑀬 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀓𑀫𑁆𑀫𑀦𑀺𑀬𑀸𑀫𑁂𑀦𑀸’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀘𑀽𑀴𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀫𑀳𑀸𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁩. 𑀏𑀯𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁄 𑀓𑀸𑀫𑁄 𑀓𑀸𑀫𑀦𑀁 𑀇𑀘𑁆𑀙𑀸 𑀏𑀢𑁂𑀲𑀦𑁆𑀢𑀺 𑀏𑀯𑀁𑀓𑀸𑀫𑀸. 𑀏𑀯𑀁 𑀙𑀦𑁆𑀤𑁄 𑀙𑀦𑁆𑀤𑀦𑀁 𑀭𑁄𑀘𑀦𑀁 𑀅𑀚𑁆𑀛𑀸𑀲𑀬𑁄 𑀏𑀢𑁂𑀲𑀦𑁆𑀢𑀺 𑀏𑀯𑀁𑀙𑀦𑁆𑀤𑀸. 𑀅𑀪𑀺𑀫𑀼𑀔𑀁, 𑀅𑀪𑀺𑀦𑀺𑀯𑀺𑀲𑁆𑀲 𑀯𑀸 𑀧𑀓𑀸𑀭𑁂𑀳𑀺 𑀏𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀮𑀤𑁆𑀥𑀺. 𑀲𑀸 𑀳𑀺 𑀮𑀤𑁆𑀥𑀩𑁆𑀩𑀯𑀢𑁆𑀣𑀼𑀁 𑀅𑀪𑀺𑀫𑀼𑀔𑀁 ‘‘𑀏𑀯𑀫𑁂𑀢’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀻 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀉𑀧𑀕𑀘𑁆𑀙𑀢𑀺, 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸 𑀢𑀺𑀝𑁆𑀞𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀏𑀯𑀁 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁄 𑀅𑀥𑀺𑀧𑁆𑀧𑀸𑀬𑁄 𑀏𑀢𑁂𑀲𑀦𑁆𑀢𑀺 𑀏𑀯𑀁𑀅𑀥𑀺𑀧𑁆𑀧𑀸𑀬𑀸. 𑀪𑀕𑀯𑀸 𑀫𑀽𑀮𑀁 𑀓𑀸𑀭𑀡𑀁 𑀏𑀢𑁂𑀲𑀁 𑀬𑀸𑀣𑀸𑀯𑀢𑁄 𑀅𑀥𑀺𑀕𑀫𑀸𑀬𑀸𑀢𑀺 𑀪𑀕𑀯𑀁𑀫𑀽𑀮𑀓𑀸. 𑀢𑁂𑀦𑀸𑀳 ‘‘𑀪𑀕𑀯𑀦𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀫𑀬𑀁 𑀇𑀫𑁂 𑀥𑀫𑁆𑀫𑁂 𑀆𑀚𑀸𑀦𑀸𑀫 𑀧𑀝𑀺𑀯𑀺𑀚𑁆𑀛𑀸𑀫𑀸’’𑀢𑀺. 𑀅𑀫𑁆𑀳𑀸𑀓𑀁𑀥𑀫𑁆𑀫𑀸𑀢𑀺 𑀢𑁂𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀦𑁆𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀁. 𑀲𑁂𑀯𑀺𑀢𑀩𑁆𑀩𑀸𑀦𑀜𑁆𑀳𑀺 𑀬𑀸𑀣𑀸𑀯𑀢𑁄 𑀅𑀥𑀺𑀕𑀫𑀜𑀸𑀡𑀸𑀦𑀺 𑀅𑀥𑀺𑀕𑀘𑁆𑀙𑀦𑀓𑀲𑀫𑁆𑀩𑀦𑁆𑀥𑀻𑀦𑀺, 𑀢𑀸𑀦𑀺 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀫𑀽𑀮𑀓𑀸𑀦𑀺 𑀅𑀦𑀜𑁆𑀜𑀯𑀺𑀲𑀬𑀢𑁆𑀢𑀸. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂 𑀓𑀲𑁆𑀲𑀧𑀲𑀫𑁆𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺. 𑀪𑀕𑀯𑀸 𑀦𑁂𑀢𑀸 𑀢𑁂𑀲𑀦𑁆𑀢𑀺 𑀪𑀕𑀯𑀁𑀦𑁂𑀢𑁆𑀢𑀺𑀓𑀸. 𑀦𑁂𑀢𑀸𑀢𑀺 𑀲𑁂𑀯𑀺𑀢𑀩𑁆𑀩𑀥𑀫𑁆𑀫𑁂 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑀁 𑀧𑀸𑀧𑁂𑀢𑀸. 𑀯𑀺𑀦𑁂𑀢𑀸𑀢𑀺 𑀅𑀲𑁂𑀯𑀺𑀢𑀩𑁆𑀩𑀥𑀫𑁆𑀫𑁂 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑀢𑁄 𑀅𑀧𑀦𑁂𑀢𑀸. 𑀢𑀤𑀗𑁆𑀕𑀯𑀺𑀦𑀬𑀸𑀤𑀺𑀯𑀲𑁂𑀦 𑀯𑀸 𑀯𑀺𑀦𑁂𑀢𑀸. 𑀅𑀦𑀼𑀦𑁂𑀢𑀸𑀢𑀺 𑀇𑀫𑁂 𑀥𑀫𑁆𑀫𑀸 𑀲𑁂𑀯𑀺𑀢𑀩𑁆𑀩𑀸, 𑀇𑀫𑁂 𑀦 𑀲𑁂𑀯𑀺𑀢𑀩𑁆𑀩𑀸𑀢𑀺 𑀉𑀪𑀬𑀲𑀫𑁆𑀧𑀸𑀧𑀦𑀸𑀧𑀦𑀬𑀦𑀢𑁆𑀣𑀁 𑀧𑀜𑁆𑀜𑀧𑁂𑀢𑀸. 𑀢𑁂𑀦𑀸𑀳 ‘‘𑀬𑀣𑀸𑀲𑀪𑀸𑀯𑀢𑁄’’𑀢𑀺𑀆𑀤𑀺.