𑁧𑁦. 𑀫𑀸𑀭𑀢𑀚𑁆𑀚𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦𑁬. 𑀓𑁄𑀝𑁆𑀞𑀫𑀦𑀼𑀧𑀯𑀺𑀝𑁆𑀞𑁄𑀢𑀺 𑀆𑀲𑀬𑁄 𑀯𑀘𑁆𑀘𑀕𑀼𑀢𑁆𑀢𑀝𑁆𑀞𑀸𑀦𑀢𑀸𑀬 𑀓𑁄𑀝𑁆𑀞𑀁, 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀜𑁆𑀳𑁂𑀢𑁆𑀣 𑀓𑁄𑀝𑁆𑀞𑀁. 𑀅𑀦𑀼𑀭𑀽𑀧𑁄 𑀳𑀼𑀢𑁆𑀯𑀸 𑀧𑀯𑀺𑀝𑁆𑀞𑁄 𑀅𑀦𑀼𑀧𑀯𑀺𑀝𑁆𑀞𑁄. 𑀲𑀼𑀔𑀼𑀫𑀜𑁆𑀳𑀺 𑀢𑀤𑀦𑀼𑀘𑁆𑀙𑀯𑀺𑀓𑀁 𑀅𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀅𑀬𑀁 𑀢𑀢𑁆𑀣 𑀧𑀯𑀺𑀝𑁆𑀞𑁄. 𑀕𑀭𑀼𑀕𑀭𑁄 𑀯𑀺𑀬𑀸𑀢𑀺 𑀕𑀭𑀼𑀓𑀕𑀭𑀼𑀓𑁄 𑀯𑀺𑀬. 𑀉-𑀓𑀸𑀭𑀲𑁆𑀲 𑀳𑀺 𑀑-𑀓𑀸𑀭𑀁 𑀓𑀢𑁆𑀯𑀸 𑀅𑀬𑀁 𑀦𑀺𑀤𑁆𑀤𑁂𑀲𑁄, 𑀅𑀢𑀺𑀯𑀺𑀬 𑀕𑀭𑀼𑀓𑁄 𑀫𑀜𑁆𑀜𑁂𑀢𑀺 𑀅𑀢𑁆𑀣𑁄. 𑀕𑀭𑀼𑀕𑀭𑀼 𑀯𑀺𑀬 𑀇𑀘𑁆𑀘𑁂𑀯 𑀯𑀸 𑀧𑀸𑀞𑁄. 𑀫𑀸𑀲𑀪𑀢𑁆𑀢𑀁 𑀫𑀸𑀲𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀫𑀸𑀲𑀪𑀢𑁆𑀢𑁂𑀦 𑀆𑀘𑀺𑀢𑀁 𑀧𑀽𑀭𑀺𑀢𑀁 𑀫𑀸𑀲𑀸𑀘𑀺𑀢𑀁 𑀫𑀜𑁆𑀜𑁂. 𑀢𑁂𑀦𑀸𑀳 ‘‘𑀫𑀸𑀲𑀪𑀢𑁆𑀢𑀁 𑀪𑀼𑀢𑁆𑀢𑀲𑁆𑀲 𑀓𑀼𑀘𑁆𑀙𑀺 𑀯𑀺𑀬𑀸’’𑀢𑀺. 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀯𑀺𑀦𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀸𑀲𑀧𑀽𑀭𑀺𑀢𑀧𑀲𑀺𑀩𑁆𑀩𑀓𑁄 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀺𑀦𑁆𑀢𑀫𑀸𑀲𑁄 𑀯𑀺𑀬𑀸𑀢𑀺 𑀢𑀺𑀦𑁆𑀢𑀫𑀸𑀲𑁄 𑀧𑀲𑀺𑀩𑁆𑀩𑀓𑁄 𑀯𑀺𑀬. 𑀓𑀺𑀁 𑀦𑀼 𑀔𑁄 𑀏𑀢𑀁 𑀫𑀫 𑀓𑀼𑀘𑁆𑀙𑀺𑀬𑀁 𑀧𑀼𑀩𑁆𑀩𑀁 𑀪𑀸𑀭𑀺𑀓𑀢𑁆𑀢𑀁, 𑀓𑀺𑀁 𑀦𑀼 𑀔𑁄 𑀓𑀣𑀁 𑀦𑀼 𑀔𑁄 𑀚𑀸𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄? 𑀉𑀧𑀸𑀬𑁂𑀦𑀸𑀢𑀺 𑀧𑀣𑁂𑀦 𑀜𑀸𑀬𑁂𑀦. 𑀩𑁆𑀬𑀢𑀺𑀭𑁂𑀓𑀢𑁄 𑀧𑀦𑀲𑁆𑀲 𑀅𑀦𑀼𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀸𑀦𑀫𑁂𑀯 𑀯𑀸 𑀲𑀦𑁆𑀥𑀸𑀬 ‘‘𑀫𑀸 𑀢𑀣𑀸𑀕𑀢𑀁 𑀯𑀺𑀳𑁂𑀲𑁂𑀲𑀻’’𑀢𑀺 𑀆𑀳. 𑀬𑀣𑀸 𑀳𑀺 𑀅𑀭𑀺𑀬𑀲𑀗𑁆𑀖𑁄 ‘‘𑀢𑀣𑀸𑀕𑀢𑀁 𑀤𑁂𑀯𑀫𑀦𑀼𑀲𑁆𑀲𑀧𑀽𑀚𑀺𑀢𑀁, 𑀲𑀗𑁆𑀖𑀁 𑀦𑀫𑀲𑁆𑀲𑀸𑀫 𑀲𑀼𑀯𑀢𑁆𑀣𑀺 𑀳𑁄𑀢𑀽’’𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁬.𑁧𑁮; 𑀲𑀼. 𑀦𑀺. 𑁨𑁪𑁧) 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀅𑀭𑀺𑀬𑀧𑀼𑀕𑁆𑀕𑀮𑀸, 𑀬𑀣𑀸 𑀘 𑀧𑀼𑀭𑀺𑀫𑀓𑀸 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑀸 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀆𑀕𑀢𑀸, 𑀅𑀬𑀫𑁆𑀧𑀺 𑀫𑀳𑀸𑀣𑁂𑀭𑁄 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄𑀢𑀺. 𑀧𑀢𑀺𑀅𑀕𑁆𑀕𑀴𑁂𑀯 𑀅𑀝𑁆𑀞𑀸𑀲𑀻𑀢𑀺 𑀅𑀕𑁆𑀕𑀴𑀲𑁆𑀲 𑀩𑀳𑀺𑀪𑀸𑀕𑁂 𑀅𑀝𑁆𑀞𑀸𑀲𑀺.

𑁫𑁦𑁭. 𑀭𑀼𑀓𑁆𑀔𑀤𑁂𑀯𑀢𑀸 𑀦𑀸𑀫 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼 𑀦𑀺𑀳𑀻𑀦𑁄 𑀓𑀸𑀬𑁄, 𑀢𑀲𑁆𑀫𑀸 𑀦𑁂𑀲𑀁 𑀫𑀦𑀼𑀲𑁆𑀲𑀕𑀦𑁆𑀥𑁄 𑀧𑀭𑀺𑀘𑀺𑀢𑀢𑁆𑀢𑀸 𑀦𑀸𑀢𑀺𑀚𑁂𑀕𑀼𑀘𑁆𑀙𑁄𑀢𑀺 𑀆𑀳 ‘‘𑀆𑀓𑀸𑀲𑀝𑁆𑀞𑀤𑁂𑀯𑀢𑀸𑀦’’𑀦𑁆𑀢𑀺. 𑀆𑀩𑀸𑀥𑀁 𑀓𑀭𑁄𑀢𑀻𑀢𑀺 𑀤𑀼𑀓𑁆𑀔𑀁 𑀚𑀦𑁂𑀢𑀺. 𑀦𑀸𑀕𑀭𑀺𑀓𑁄𑀢𑀺 𑀲𑀼𑀓𑀼𑀫𑀸𑀭𑁄. 𑀧𑀭𑀺𑀘𑁄𑀓𑁆𑀔𑁄𑀢𑀺 𑀲𑀩𑁆𑀩𑀲𑁄 𑀲𑀼𑀘𑀺𑀭𑀽𑀧𑁄. 𑀜𑀸𑀢𑀺𑀓𑁄𑀝𑀺𑀦𑁆𑀢𑀺 𑀜𑀸𑀢𑀺𑀪𑀸𑀕𑀁. 𑀅𑀦𑀸𑀤𑀺𑀫𑀢𑀺 𑀳𑀺 𑀲𑀁𑀲𑀸𑀭𑁂 𑀜𑀸𑀢𑀺𑀪𑀸𑀕𑀭𑀳𑀺𑀢𑁄 𑀦𑀸𑀫 𑀲𑀢𑁆𑀢𑁄 𑀓𑀲𑁆𑀲𑀘𑀺𑀧𑀺 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀦𑁆𑀢𑀺 ‘‘𑀲𑁄 𑀫𑁂 𑀢𑁆𑀯𑀁 𑀪𑀸𑀕𑀺𑀦𑁂𑀬𑁆𑀬𑁄 𑀳𑁄𑀲𑀻’’𑀢𑀺 𑀇𑀤𑀁 𑀯𑀘𑀦𑀁. 𑀧𑀯𑁂𑀡𑀺𑀯𑀲𑁂𑀦𑀸𑀢𑀺 𑀢𑀤𑀸 𑀫𑀬𑁆𑀳𑀁 𑀪𑀸𑀕𑀺𑀦𑁂𑀬𑁆𑀬𑁄 𑀳𑀼𑀢𑁆𑀯𑀸 𑀇𑀤𑀸𑀦𑀺 𑀫𑀸𑀭𑀝𑁆𑀞𑀸𑀦𑁂 𑀞𑀺𑀢𑁄𑀢𑀺 𑀇𑀫𑀺𑀲𑁆𑀲𑀸 𑀧𑀯𑁂𑀡𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀜𑁆𑀜𑀲𑁆𑀲 𑀯𑀸 𑀯𑁂𑀲𑀫𑀁 𑀥𑀼𑀭𑁄 𑀯𑀺𑀥𑀼𑀭𑁄. 𑀢𑁂𑀦𑀸𑀳 ‘‘𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀅𑀲𑀤𑀺𑀲𑁄’’𑀢𑀺. 𑀅𑀧𑁆𑀧𑀤𑀼𑀓𑁆𑀔𑁂𑀦𑀸𑀢𑀺 𑀲𑀼𑀔𑁂𑀦𑁂𑀯. 𑀧𑀦𑁆𑀣𑀸𑀦𑀁 𑀅𑀯𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀧𑀣𑀸𑀯𑀺𑀦𑁄. 𑀏𑀢𑁆𑀢𑀓𑁂𑀦𑀸𑀢𑀺 𑀏𑀢𑁆𑀢𑀸𑀯𑀢𑀸 𑀘𑀺𑀢𑀓𑀲𑀦𑁆𑀦𑀺𑀲𑀬𑁂𑀦. 𑀉𑀤𑀓𑀮𑁂𑀡𑀦𑁆𑀢𑀺 𑀉𑀤𑀓𑀦𑀺𑀲𑁆𑀲𑀦𑁆𑀤𑀦𑀮𑁂𑀡𑀁. 𑀲𑀫𑀸𑀧𑀢𑁆𑀢𑀺𑀢𑁄𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄. 𑀲𑀫𑀸𑀧𑀢𑁆𑀢𑀺𑀨𑀮𑀦𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀨𑀮𑀁.

𑁫𑁦𑁮. 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀻𑀢𑀺 𑀤𑀲𑀳𑀺𑀧𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺, 𑀢𑀢𑁄 𑀓𑀺𑀜𑁆𑀘𑀺 𑀅𑀳𑀸𑀧𑁂𑀦𑁆𑀢𑀸. 𑀧𑀭𑀺𑀪𑀸𑀲𑀣𑀸𑀢𑀺 𑀕𑀭𑀳𑀣. 𑀖𑀝𑁆𑀝𑁂𑀣𑀸𑀢𑀺 𑀅𑀦𑀽𑀦𑀸𑀳𑀺 𑀓𑀣𑀸𑀳𑀺 𑀇𑀫𑁂𑀲𑀼 𑀑𑀯𑀺𑀚𑁆𑀛𑀣. 𑀤𑀼𑀓𑁆𑀔𑀸𑀧𑁂𑀣𑀸𑀢𑀺 𑀘𑀺𑀢𑁆𑀢𑁂 𑀤𑀼𑀓𑁆𑀔𑀁 𑀚𑀦𑁂𑀣. 𑀏𑀢𑁂𑀲𑀦𑁆𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀼𑀫𑁆𑀳𑀸𑀓𑀁 𑀅𑀓𑁆𑀓𑁄𑀲𑀦𑀸𑀤𑀻𑀳𑀺 𑀪𑀺𑀓𑁆𑀔𑀽𑀦𑀁 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸. 𑀢𑁂𑀦𑁂𑀢𑁆𑀣 𑀤𑀽𑀲𑀻 𑀫𑀸𑀭𑁄 𑀑𑀢𑀸𑀭𑀁 𑀮𑀪𑀢𑀺 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀝𑁆𑀞𑀸𑀢𑀩𑁆𑀩𑀁 𑀇𑀪𑀁 𑀅𑀭𑀳𑀦𑁆𑀢𑀻𑀢𑀺 𑀇𑀩𑁆𑀪𑀸, 𑀳𑀢𑁆𑀣𑀺𑀪𑀡𑁆𑀟𑀓𑀸, 𑀳𑀻𑀦𑀚𑀻𑀯𑀺𑀓𑀢𑀸𑀬 𑀳𑁂𑀢𑁂 𑀇𑀩𑁆𑀪𑀸 𑀯𑀺𑀬𑀸𑀢𑀺 𑀇𑀩𑁆𑀪𑀸, 𑀢𑁂 𑀧𑀦 𑀲𑀤𑀼𑀢𑀺𑀬𑀓𑀯𑀲𑁂𑀦 ‘‘𑀕𑀳𑀧𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀓𑀡𑁆𑀳𑀸𑀢𑀺 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑀸. 𑀧𑀸𑀤𑀢𑁄 𑀚𑀸𑀢𑀢𑁆𑀢𑀸 𑀧𑀸𑀤𑀸𑀦𑀁 𑀅𑀧𑀘𑁆𑀘𑀸. 𑀆𑀮𑀲𑀺𑀬𑀚𑀸𑀢𑀸𑀢𑀺 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀲𑁆𑀲 𑀅𑀓𑀭𑀡𑁂𑀦 𑀲𑀜𑁆𑀚𑀸𑀢𑀸𑀮𑀲𑀺𑀬𑀸. 𑀕𑀽𑀣𑀦𑀺𑀤𑁆𑀥𑀫𑀦𑀧𑀦𑀸𑀴𑀻𑀢𑀺 𑀯𑀘𑁆𑀘𑀓𑀽𑀧𑀢𑁄 𑀕𑀽𑀣𑀲𑁆𑀲 𑀦𑀺𑀓𑁆𑀔𑀫𑀧𑀤𑁂𑀲𑁄.

𑀫𑀦𑀼𑀲𑁆𑀲𑀸𑀦𑀁 𑀅𑀓𑀼𑀲𑀮𑀁 𑀦 𑀪𑀯𑁂𑀬𑁆𑀬 𑀢𑁂𑀲𑀁 𑀢𑀸𑀤𑀺𑀲𑀸𑀬 𑀅𑀪𑀺𑀲𑀦𑁆𑀥𑀺𑀬𑀸 𑀅𑀪𑀸𑀯𑀢𑁄. 𑀆𑀯𑁂𑀲𑀓𑀲𑁆𑀲 𑀆𑀦𑀼𑀪𑀸𑀯𑁂𑀦 𑀆𑀯𑀺𑀝𑁆𑀞𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀢𑀺 𑀯𑀺𑀧𑀭𑀺𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀯𑀺𑀲𑀪𑀸𑀕𑀯𑀢𑁆𑀣𑀼𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀇𑀢𑁆𑀣𑀺𑀭𑀽𑀧𑀁, 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀧𑀼𑀭𑀺𑀲𑀭𑀽𑀧𑀦𑁆𑀢𑀺 𑀈𑀤𑀺𑀲𑀁, 𑀅𑀜𑁆𑀜𑀁 𑀯𑀸 𑀧𑀩𑁆𑀩𑀚𑀺𑀢𑀸𑀦𑀁 𑀅𑀲𑀸𑀭𑀼𑀧𑁆𑀧𑀁 𑀯𑀺𑀲𑀪𑀸𑀕𑀯𑀢𑁆𑀣𑀼𑀁. 𑀯𑀺𑀧𑁆𑀧𑀝𑀺𑀲𑀸𑀭𑀸𑀭𑀫𑁆𑀫𑀡𑀦𑁆𑀢𑀺 𑀧𑀲𑁆𑀲𑀦𑁆𑀢𑀸𑀦𑀁 𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀧𑀘𑁆𑀘𑀬𑀁. 𑀮𑁂𑀧𑀬𑀝𑁆𑀞𑀺𑀦𑁆𑀢𑀺 𑀮𑁂𑀧𑀮𑀺𑀢𑁆𑀢𑀁 𑀯𑀸𑀓𑀼𑀭𑀬𑀝𑁆𑀞𑀺𑀁.

𑁫𑁧𑁦. 𑀲𑁄𑀫𑀦𑀲𑁆𑀲𑀯𑀲𑁂𑀦𑀸𑀢𑀺 𑀕𑁂𑀳𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀯𑀲𑁂𑀦. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 ‘‘𑀲𑀘𑁂 𑀫𑀸𑀭𑁄 𑀫𑀦𑀼𑀲𑁆𑀲𑀸𑀦𑀁 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦. 𑀬𑀤𑀺 𑀫𑀸𑀭𑁄𑀯 𑀢𑀣𑀸 𑀓𑀭𑁂𑀬𑁆𑀬, 𑀫𑀦𑀼𑀲𑁆𑀲𑀸𑀦𑀁 𑀓𑀼𑀲𑀮𑀁 𑀦 𑀪𑀯𑁂𑀬𑁆𑀬, 𑀫𑀸𑀭𑀲𑁆𑀲𑁂𑀯 𑀪𑀯𑁂𑀬𑁆𑀬, 𑀲𑀭𑀻𑀭𑁂 𑀧𑀦 𑀅𑀦𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀢𑀸𑀤𑀺𑀲𑀁 𑀧𑀲𑀸𑀤𑀦𑀻𑀬𑀁 𑀧𑀲𑀸𑀤𑀯𑀢𑁆𑀣𑀼𑀁 𑀤𑀲𑁆𑀲𑁂𑀲𑀺. 𑀢𑁂𑀦𑀸𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺.

𑁫𑁧𑁧. 𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦𑀸𑀢𑀺 𑀲𑀓𑀮𑀁 𑀓𑀸𑀬𑀁 𑀅𑀲𑀼𑀪𑀦𑁆𑀢𑀺 𑀧𑀯𑀢𑁆𑀢𑀸𑀬 𑀲𑀜𑁆𑀜𑀸𑀬 𑀲𑀳𑀕𑀢𑀚𑁆𑀛𑀸𑀦𑀁 𑀅𑀲𑀼𑀪𑀲𑀜𑁆𑀜𑀸, 𑀢𑁂𑀦 𑀧𑀭𑀺𑀘𑀺𑀢𑁂𑀦 𑀧𑀭𑀺𑀪𑀸𑀯𑀺𑀢𑁂𑀦. 𑀘𑁂𑀢𑀲𑀸 𑀘𑀺𑀢𑁆𑀢𑁂𑀦. 𑀩𑀳𑀼𑀮𑀦𑁆𑀢𑀺 𑀅𑀪𑀺𑀡𑁆𑀳𑀁. 𑀯𑀺𑀳𑀭𑀢𑁄𑀢𑀺 𑀯𑀺𑀳𑀭𑀦𑁆𑀢𑀲𑁆𑀲, 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀢𑀺𑀮𑀻𑀬𑀢𑀻𑀢𑀺 𑀲𑀗𑁆𑀓𑀼𑀘𑀢𑀺 𑀢𑀢𑁆𑀣 𑀧𑀝𑀺𑀓𑀽𑀮𑀢𑀸𑀬 𑀲𑀡𑁆𑀞𑀺𑀢𑀢𑁆𑀢𑀸. 𑀧𑀢𑀺𑀓𑀼𑀝𑀢𑀻𑀢𑀺 𑀅𑀧𑀲𑀓𑁆𑀓𑀢𑀺. 𑀧𑀢𑀺𑀯𑀢𑁆𑀢𑀢𑀻𑀢𑀺 𑀦𑀺𑀯𑀢𑁆𑀢𑀢𑀺. 𑀢𑀢𑁄 𑀏𑀯 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺. 𑀭𑀲𑀢𑀡𑁆𑀳𑀸𑀬𑀸𑀢𑀺 𑀫𑀥𑀼𑀭𑀸𑀤𑀺𑀭𑀲𑀯𑀺𑀲𑀬𑀸𑀬 𑀢𑀡𑁆𑀳𑀸𑀬.

𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀸𑀢𑀺 𑀢𑀻𑀲𑀼𑀧𑀺 𑀪𑀯𑁂𑀲𑀼 𑀅𑀭𑀼𑀘𑁆𑀘𑀦𑀯𑀲𑁂𑀦 𑀧𑀯𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀳𑁂𑀲𑀸. 𑀮𑁄𑀓𑀘𑀺𑀢𑁆𑀭𑁂𑀲𑀽𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀺𑀪𑁂𑀤𑁂𑀲𑀼 𑀘𑁂𑀯 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀸𑀤𑀺𑀪𑁂𑀤𑁂𑀲𑀼 𑀘 𑀮𑁄𑀓𑁂 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑁂𑀲𑀼. 𑀭𑀸𑀕𑀲𑀦𑁆𑀢𑀸𑀦𑀺 𑀯𑀽𑀧𑀲𑀦𑁆𑀢𑀭𑀸𑀕𑀸𑀦𑀺. 𑀤𑁄𑀲𑀫𑁄𑀳𑀲𑀦𑁆𑀢𑀸𑀦𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂𑀲𑀁 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀁 𑀲𑀩𑁆𑀩𑁂𑀲𑀁 𑀲𑀧𑁆𑀧𑀸𑀬𑀪𑀸𑀯𑀢𑁄.

𑁫𑁧𑁨. 𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸𑀢𑀺 𑀲𑀓𑁆𑀔𑀭𑀸𑀲𑀻𑀲𑁂𑀦 𑀢𑀢𑁆𑀢𑀓𑀁 𑀪𑀺𑀦𑁆𑀦𑀧𑀸𑀲𑀸𑀡𑀫𑀼𑀝𑁆𑀞𑀺𑀦𑁆𑀢𑀺 𑀆𑀳 ‘‘𑀅𑀦𑁆𑀢𑁄𑀫𑀼𑀝𑁆𑀞𑀺𑀬𑀁 𑀢𑀺𑀝𑁆𑀞𑀦𑀧𑀫𑀸𑀡𑀁 𑀧𑀸𑀲𑀸𑀡’’𑀦𑁆𑀢𑀺. 𑀫𑀼𑀝𑁆𑀞𑀺𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀧𑀸𑀲𑀸𑀡𑀲𑁆𑀲 𑀳𑁂𑀝𑁆𑀞𑀺𑀫𑀓𑁄𑀝𑀺. 𑀳𑀢𑁆𑀣𑀺𑀦𑀸𑀕𑁄𑀢𑀺 𑀫𑀳𑀸𑀳𑀢𑁆𑀣𑀻. 𑀫𑀳𑀦𑁆𑀢𑀧𑀭𑀺𑀬𑀸𑀬𑁄 𑀦𑀸𑀕-𑀲𑀤𑁆𑀤𑁄𑀢𑀺 𑀓𑁂𑀘𑀺. 𑀅𑀳𑀺𑀦𑀸𑀕𑀸𑀤𑀺𑀢𑁄 𑀯𑀸 𑀯𑀺𑀲𑁂𑀲𑀦𑀢𑁆𑀣𑀁 𑀳𑀢𑁆𑀣𑀺𑀦𑀸𑀕𑁄𑀢𑀺 𑀯𑀼𑀢𑁆𑀢𑀁. 𑀲𑀓𑀮𑀲𑀭𑀻𑀭𑁂𑀦𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀧𑀮𑁄𑀓𑁂𑀲𑀻𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀯𑀸𑀬𑀦𑁆𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄𑀢𑀺 𑀆𑀳 ‘‘𑀦𑁂𑀯 𑀧𑀫𑀸𑀡𑀁 𑀅𑀜𑁆𑀜𑀸𑀲𑀻’’𑀢𑀺. 𑀲𑀳𑀸𑀧𑀮𑁄𑀓𑀦𑀸𑀬𑀸𑀢𑀺 𑀘 𑀯𑀘𑀦𑀢𑁄𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀇𑀫𑀁 𑀯𑀘𑀦𑀫𑀢𑁆𑀢𑀁 𑀕𑀳𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀴𑀸𑀭𑁂𑀢𑀺 𑀉𑀴𑀸𑀭𑀕𑀼𑀡𑁂. 𑀪𑀕𑀯𑀦𑁆𑀢𑀜𑁆𑀳𑀺 𑀞𑀧𑁂𑀢𑁆𑀯𑀸 𑀦𑀢𑁆𑀣𑀺 𑀢𑀤𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀢𑀸𑀤𑀺𑀲𑁄 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄𑀢𑀺.

𑀯𑀺𑀲𑀼𑀁 𑀯𑀺𑀲𑀼𑀁 𑀧𑀘𑁆𑀘𑀢𑁆𑀢𑀯𑁂𑀤𑀦𑀺𑀬𑁄 𑀅𑀬𑀲𑀽𑀮𑁂𑀦 𑀲𑀤𑁆𑀥𑀺𑀁 𑀪𑀽𑀢𑀸𑀦𑀺 𑀙 𑀨𑀲𑁆𑀲𑀸𑀬𑀢𑀦𑀸𑀦𑀺 𑀏𑀢𑀲𑁆𑀲𑀸𑀢𑀺 𑀙 𑀨𑀲𑁆𑀲𑀸𑀬𑀢𑀦𑀁, 𑀤𑀼𑀓𑁆𑀔𑀁. 𑀢𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀙 𑀨𑀲𑁆𑀲𑀸𑀬𑀢𑀦𑀺𑀓𑁄, 𑀦𑀺𑀭𑀬𑁄. 𑀢𑁂𑀦𑀸𑀳 ‘‘𑀙𑀲𑀼 𑀨𑀲𑁆𑀲𑀸…𑀧𑁂… 𑀧𑀘𑁆𑀘𑀬𑁄’’𑀢𑀺. 𑀲𑀫𑀸𑀳𑀦𑀢𑀻𑀢𑀺 𑀲𑀫𑀸𑀳𑀢𑁄, 𑀅𑀦𑁂𑀓𑀲𑀢𑀪𑁂𑀤𑁄 𑀲𑀗𑁆𑀓𑀼𑀲𑀫𑀸𑀳𑀢𑁄 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀲𑀗𑁆𑀓𑀼𑀲𑀫𑀸𑀳𑀢𑁄, 𑀦𑀺𑀭𑀬𑁄. 𑀯𑀺𑀲𑁂𑀲𑀧𑀘𑁆𑀘𑀬𑀢𑀸𑀬 𑀯𑁂𑀤𑀦𑀸𑀬 𑀞𑀺𑀢𑁄𑀢𑀺 𑀯𑁂𑀤𑀦𑀺𑀬𑁄, 𑀓𑀸𑀭𑀡𑀸𑀓𑀸𑀭𑀓𑁂𑀦 𑀯𑀺𑀦𑀸 𑀧𑀘𑁆𑀘𑀢𑁆𑀢𑀁 𑀲𑀬𑀫𑁂𑀯 𑀯𑁂𑀤𑀦𑀺𑀬𑁄𑀢𑀺 𑀧𑀘𑁆𑀘𑀢𑁆𑀢𑀯𑁂𑀤𑀦𑀺𑀬𑁄. 𑀅𑀬𑀲𑀽𑀮𑁂𑀦 𑀲𑀤𑁆𑀥𑀺𑀁 𑀅𑀬𑀲𑀽𑀮𑀦𑁆𑀢𑀺 𑀧𑀸𑀤𑀧𑀤𑁂𑀲𑀢𑁄 𑀧𑀝𑁆𑀞𑀸𑀬 𑀦𑀺𑀭𑀦𑁆𑀢𑀭𑀁 𑀅𑀪𑀺𑀳𑀦𑀦𑀯𑀲𑁂𑀦 𑀆𑀕𑀢𑁂𑀦 𑀧𑀡𑁆𑀡𑀸𑀲𑀸𑀬 𑀚𑀦𑁂𑀳𑀺 𑀕𑀳𑀺𑀢𑁂𑀦 𑀅𑀬𑀲𑀽𑀮𑁂𑀦 𑀲𑀳 𑀲𑀻𑀲𑀧𑀤𑁂𑀲𑀢𑁄 𑀧𑀝𑁆𑀞𑀸𑀬 𑀆𑀕𑀢𑀁. 𑀅𑀬𑀲𑀽𑀮𑀪𑀸𑀯𑀲𑀸𑀫𑀜𑁆𑀜𑁂𑀦 𑀘𑁂𑀢𑀁 𑀏𑀓𑀯𑀘𑀦𑀁, 𑀲𑀢𑀫𑀢𑁆𑀢𑀸𑀦𑀺 𑀧𑀢𑀺𑀢𑀸𑀦𑀺 𑀲𑀽𑀮𑀸𑀦𑀺. 𑀇𑀫𑀺𑀦𑀸 𑀢𑁂 𑀞𑀸𑀦𑁂𑀦 𑀘𑀺𑀦𑁆𑀢𑁂𑀢𑁆𑀯𑀸𑀢𑀺 𑀦𑀺𑀲𑁆𑀲𑀺𑀢𑀯𑁄𑀳𑀸𑀭𑁂𑀦 𑀦𑀺𑀲𑁆𑀲𑀬𑀁 𑀯𑀤𑀢𑀺. 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀢𑀤𑀸 𑀚𑀸𑀦𑁂𑀬𑁆𑀬𑀸𑀲𑀺 𑀯𑀲𑁆𑀲𑀲𑀳𑀲𑁆𑀲𑀁 𑀫𑁂 𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀲𑁆𑀲𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀯𑀼𑀝𑁆𑀞𑀸𑀦𑀺𑀫𑀦𑁆𑀢𑀺 𑀯𑀼𑀝𑁆𑀞𑀸𑀦𑁂 𑀪𑀯𑀁, 𑀅𑀦𑁆𑀢𑀺𑀫𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀧𑀸𑀓𑀯𑀼𑀝𑁆𑀞𑀸𑀦𑀯𑁂𑀤𑀦’’𑀦𑁆𑀢𑀺, 𑀯𑀺𑀧𑀸𑀓𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀯𑁂𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀢𑀭𑀸 𑀳𑁄𑀢𑀺 𑀧𑀤𑀻𑀧𑀲𑁆𑀲 𑀯𑀺𑀚𑁆𑀛𑀸𑀬𑀦𑀓𑁆𑀔𑀡𑁂 𑀫𑀳𑀦𑁆𑀢𑀪𑀸𑀯𑁄 𑀯𑀺𑀬.

𑁫𑁧𑁩. 𑀖𑀝𑁆𑀝𑀬𑀺𑀢𑁆𑀯𑀸 𑀧𑁄𑀣𑁂𑀢𑁆𑀯𑀸. 𑀧𑀸𑀝𑀺𑀬𑁂𑀓𑁆𑀓𑀯𑁂𑀤𑀦𑀸𑀚𑀦𑀓𑀸𑀢𑀺 𑀧𑀘𑁆𑀘𑁂𑀓𑀁 𑀫𑀳𑀸𑀤𑀼𑀓𑁆𑀔𑀲𑀫𑀼𑀧𑁆𑀧𑀸𑀤𑀓𑀸. 𑀅𑀬𑀢𑁄 𑀅𑀧𑀕𑀢𑁄 𑀦𑀺𑀭𑀬𑁄, 𑀲𑁄 𑀤𑁂𑀯𑀤𑀽𑀢𑀲𑀼𑀢𑁆𑀢𑁂𑀦 (𑀫. 𑀦𑀺. 𑁩.𑁨𑁬𑁧) 𑀤𑀻𑀧𑁂𑀢𑀩𑁆𑀩𑁄. 𑀅𑀢𑁆𑀣𑀯𑀡𑁆𑀡𑀦𑀸 𑀧𑀦𑀲𑁆𑀲 𑀧𑀭𑀢𑁄 𑀲𑀬𑀫𑁂𑀯 𑀆𑀕𑀫𑀺𑀲𑁆𑀲𑀢𑀺. 𑀇𑀫𑀁 𑀧𑀦 𑀅𑀢𑀻𑀢𑀯𑀢𑁆𑀣𑀼𑀁 𑀆𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀜𑀸𑀡𑀸𑀦𑀼𑀪𑀸𑀯𑀤𑀻𑀧𑀦𑀫𑀼𑀔𑁂𑀦 𑀫𑀸𑀭𑀁 𑀲𑀦𑁆𑀢𑀚𑁆𑀚𑁂𑀦𑁆𑀢𑁄 𑀫𑀳𑀸𑀣𑁂𑀭𑁄 ‘‘𑀬𑁄𑀏𑀢𑀫𑀪𑀺𑀚𑀸𑀦𑀸𑀢𑀻’’𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀫𑀳𑀸𑀪𑀺𑀜𑁆𑀜𑁄 𑀏𑀢𑀁 𑀓𑀫𑁆𑀫𑀁 𑀓𑀫𑁆𑀫𑀨𑀮𑀜𑁆𑀘 𑀳𑀢𑁆𑀣𑀢𑀮𑁂 𑀞𑀧𑀺𑀢𑀁 𑀆𑀫𑀮𑀓𑀁 𑀯𑀺𑀬 𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 𑀧𑀘𑁆𑀘𑀓𑁆𑀔𑀢𑁄 𑀚𑀸𑀦𑀸𑀢𑀺. 𑀲𑀩𑁆𑀩𑀲𑁄 𑀪𑀺𑀦𑁆𑀦𑀓𑀺𑀮𑁂𑀲𑀢𑀸𑀬 𑀪𑀺𑀓𑁆𑀔𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀲𑀸𑀯𑀓𑁄, 𑀢𑀸𑀤𑀺𑀲𑀁 𑀉𑀴𑀸𑀭𑀕𑀼𑀡𑀁 𑀆𑀲𑀚𑁆𑀚 𑀖𑀝𑁆𑀝𑀬𑀺𑀢𑁆𑀯𑀸 𑀏𑀓𑀦𑁆𑀢𑀓𑀸𑀴𑀓𑁂𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀓𑀡𑁆𑀳 𑀫𑀸𑀭 𑀆𑀬𑀢𑀺𑀁 𑀫𑀳𑀸𑀤𑀼𑀓𑁆𑀔𑀁 𑀯𑀺𑀦𑁆𑀤𑀺𑀲𑁆𑀲𑀲𑀺.

𑀉𑀤𑀓𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸𑀢𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀓𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀓𑀫𑁆𑀫𑀨𑀮𑁂𑀦 𑀫𑀳𑀸𑀲𑀫𑀼𑀤𑁆𑀤𑀉𑀤𑀓𑀫𑁂𑀯 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸. 𑀢𑀣𑀸 𑀳𑀺 𑀢𑀸𑀦𑀺 𑀓𑀧𑁆𑀧𑀝𑁆𑀞𑀺𑀢𑀺𑀓𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀓𑀧𑁆𑀧𑀝𑁆𑀞𑀸𑀬𑀺𑀦𑁄’’𑀢𑀺. 𑀢𑁂𑀲𑀦𑁆𑀢𑀺 𑀯𑀺𑀫𑀸𑀦𑀸𑀦𑀁. 𑀏𑀢𑀁 𑀬𑀣𑀸𑀯𑀼𑀢𑁆𑀢𑀯𑀺𑀫𑀸𑀦𑀯𑀢𑁆𑀣𑀼𑀁 𑀢𑀸𑀲𑀁 𑀅𑀘𑁆𑀙𑀭𑀸𑀦𑀁 𑀲𑀫𑁆𑀧𑀢𑁆𑀢𑀺𑀁, 𑀢𑀲𑁆𑀲 𑀘 𑀓𑀸𑀭𑀡𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀚𑀸𑀦𑀸𑀢𑀺. 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑀬𑀻𑀢𑀺 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀲𑀸𑀔𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀓𑀸𑀭𑀺𑀢𑀁 𑀲𑀳𑀲𑁆𑀲𑀕𑀩𑁆𑀪𑀧𑀝𑀺𑀫𑀡𑁆𑀟𑀺𑀢𑀫𑀳𑀸𑀧𑀸𑀲𑀸𑀤𑀁 𑀅𑀢𑁆𑀢𑀦𑁄 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑁂𑀲𑀺. 𑀢𑁂𑀦𑀸𑀳 ‘‘𑀇𑀤𑀁 𑀧𑀸𑀲𑀸𑀤𑀓𑀫𑁆𑀧𑀦𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩’’𑀦𑁆𑀢𑀺. 𑀇𑀤𑀦𑁆𑀢𑀺 ‘‘𑀬𑁄 𑀯𑁂𑀚𑀬𑀦𑁆𑀢’’𑀦𑁆𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀚𑀸𑀢𑀁 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀲𑀼𑀢𑁆𑀢𑁂𑀦𑁂𑀯 (𑀫. 𑀦𑀺. 𑁧.𑁩𑁯𑁩) 𑀤𑀻𑀧𑁂𑀢𑀩𑁆𑀩𑀁.

𑀢𑀲𑁆𑀲 𑀩𑁆𑀭𑀳𑁆𑀫𑀕𑀡𑀲𑁆𑀲 𑀢𑀣𑀸𑀘𑀺𑀦𑁆𑀢𑀦𑀲𑀫𑀦𑀦𑁆𑀢𑀭𑀫𑁂𑀯 𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀲𑀼𑀥𑀫𑁆𑀫𑀁 𑀩𑁆𑀭𑀳𑁆𑀫𑀲𑀪𑀁 𑀕𑀦𑁆𑀢𑁆𑀯𑀸. 𑀢𑁂𑀧𑀻𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄. 𑀧𑀘𑁆𑀘𑁂𑀓𑀁 𑀤𑀺𑀲𑀸𑀲𑀽𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬𑀁, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀤𑀓𑁆𑀔𑀺𑀡𑀤𑀺𑀲𑀸𑀬𑀁, 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑁄 𑀧𑀘𑁆𑀙𑀺𑀫𑀤𑀺𑀲𑀸𑀬𑀁, 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀉𑀢𑁆𑀢𑀭𑀤𑀺𑀲𑀸𑀬𑀦𑁆𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄 𑀣𑁂𑀭𑀸 𑀩𑁆𑀭𑀳𑁆𑀫𑀧𑀭𑀺𑀲𑀫𑀢𑁆𑀣𑀓𑁂 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄 𑀲𑀫𑀦𑁆𑀢𑀢𑁄 𑀘𑀢𑀼𑀤𑁆𑀤𑀺𑀲𑀸 𑀦𑀺𑀲𑀻𑀤𑀺𑀁𑀲𑀼. 𑀕𑀸𑀣𑀸 𑀯𑀼𑀢𑁆𑀢𑀸𑀢𑀺 ‘‘𑀬𑁄 𑀩𑁆𑀭𑀳𑁆𑀫𑀁 𑀧𑀭𑀺𑀧𑀼𑀘𑁆𑀙𑀢𑀻’’𑀢𑀺 𑀕𑀸𑀣𑀸 𑀯𑀼𑀢𑁆𑀢𑀸. 𑀅𑀜𑁆𑀜𑀢𑀭𑀩𑁆𑀭𑀳𑁆𑀫𑀲𑀼𑀢𑁆𑀢𑁂𑀦𑀸𑀢𑀺 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁧.𑁧𑁭𑁬) 𑀫𑀳𑀸𑀯𑀕𑁆𑀕𑁂 𑀆𑀕𑀢𑁂𑀦 𑀅𑀜𑁆𑀜𑀢𑀭𑀩𑁆𑀭𑀳𑁆𑀫𑀲𑀼𑀢𑁆𑀢𑁂𑀦.

𑀛𑀸𑀦𑀯𑀺𑀫𑁄𑀓𑁆𑀔𑁂𑀦 𑀨𑀼𑀲𑀻𑀢𑀺 𑀛𑀸𑀦𑀯𑀺𑀫𑁄𑀓𑁆𑀔𑀲𑀦𑁆𑀦𑀺𑀲𑁆𑀲𑀬𑁂𑀦 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀨𑀲𑁆𑀲𑀬𑀺. 𑀯𑀦𑀦𑁆𑀢𑀺 𑀚𑀫𑁆𑀩𑀼𑀤𑀻𑀧𑀁 𑀅𑀨𑀲𑁆𑀲𑀬𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀫𑁆𑀩𑀼𑀤𑀻𑀧𑁄 𑀳𑀺 𑀯𑀦𑀩𑀳𑀼𑀮𑀢𑀸𑀬 𑀇𑀥 ‘‘𑀯𑀦’’𑀦𑁆𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀚𑀫𑁆𑀩𑀼𑀲𑀡𑁆𑀟𑀲𑁆𑀲 𑀇𑀲𑁆𑀲𑀭𑁄’’𑀢𑀺. 𑀧𑀼𑀩𑁆𑀩𑀯𑀺𑀤𑁂𑀳𑀸𑀦𑀁 𑀤𑀻𑀧𑀦𑁆𑀢𑀺 𑀧𑀼𑀩𑁆𑀩𑀯𑀺𑀤𑁂𑀳𑀯𑀸𑀲𑀻𑀦𑀁 𑀤𑀻𑀧𑀁, 𑀧𑀼𑀩𑁆𑀩𑀯𑀺𑀤𑁂𑀳𑀤𑀻𑀧𑀦𑁆𑀢𑀺 𑀅𑀢𑁆𑀣𑁄. 𑀪𑀽𑀫𑀺𑀲𑀬𑀸 𑀦𑀭𑀸 𑀦𑀸𑀫 𑀅𑀧𑀭𑀕𑁄𑀬𑀸𑀦𑀓𑀸 𑀉𑀢𑁆𑀢𑀭𑀓𑀼𑀭𑀼𑀓𑀸 𑀘. 𑀬𑀲𑁆𑀫𑀸 𑀢𑁂 𑀕𑁂𑀳𑀧𑀭𑀺𑀕𑁆𑀕𑀳𑀸𑀪𑀸𑀯𑀢𑁄 𑀪𑀽𑀫𑀺𑀬𑀁𑀬𑁂𑀯 𑀲𑀬𑀦𑁆𑀢𑀺, 𑀦 𑀧𑀸𑀲𑀸𑀤𑀸𑀤𑀻𑀲𑀼. 𑀧𑀝𑀺𑀮𑀪𑀻𑀢𑀺 𑀉𑀧𑁆𑀧𑀸𑀤𑁂𑀲𑀺. 𑀏𑀢𑀁 𑀆𑀲𑀁 𑀫𑀸 𑀅𑀓𑀸𑀲𑀻𑀢𑀺 𑀏𑀲𑀸 𑀬𑀣𑀸 𑀧𑀼𑀩𑁆𑀩𑁂 𑀤𑀽𑀲𑀺𑀫𑀸𑀭𑀲𑁆𑀲, 𑀏𑀯𑀁 𑀢𑀼𑀬𑁆𑀳𑀁 𑀆𑀲𑀸 𑀤𑀻𑀖𑀭𑀢𑁆𑀢𑀁 𑀅𑀦𑀢𑁆𑀣𑀸𑀯𑀳𑀸, 𑀢𑀲𑁆𑀫𑀸 𑀏𑀤𑀺𑀲𑀁 𑀆𑀲𑀁 𑀫𑀸 𑀅𑀓𑀸𑀲𑀻𑀢𑀺 𑀫𑀸𑀭𑀲𑁆𑀲 𑀑𑀯𑀸𑀤𑀁 𑀅𑀤𑀸𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀸𑀭𑀢𑀚𑁆𑀚𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀘𑀽𑀴𑀬𑀫𑀓𑀯𑀕𑁆𑀕𑀯𑀡𑁆𑀡𑀦𑀸.

𑀫𑀽𑀮𑀧𑀡𑁆𑀡𑀸𑀲𑀝𑀻𑀓𑀸 𑀲𑀫𑀢𑁆𑀢𑀸.

𑀤𑀼𑀢𑀺𑀬𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.