𑁮. 𑀓𑁄𑀲𑀫𑁆𑀩𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯𑁧. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀓𑁄𑀲𑀫𑁆𑀩𑀭𑀼𑀓𑁆𑀔𑀯𑀢𑀻, 𑀢𑀲𑁆𑀫𑀸 𑀦𑀕𑀭𑀁 𑀓𑁄𑀲𑀫𑁆𑀩𑀻𑀢𑀺𑀲𑀗𑁆𑀔𑀫𑀕𑀫𑀸𑀲𑀺. 𑀓𑀼𑀲𑀫𑁆𑀩𑀲𑁆𑀲 𑀯𑀸 𑀇𑀲𑀺𑀦𑁄 𑀦𑀺𑀯𑀸𑀲𑀪𑀽𑀫𑀺 𑀓𑁄𑀲𑀫𑁆𑀩𑀻, 𑀢𑀲𑁆𑀲𑀸𑀯𑀺𑀤𑀽𑀭𑁂 𑀪𑀯𑀢𑁆𑀢𑀸 𑀦𑀕𑀭𑀁 𑀓𑁄𑀲𑀫𑁆𑀩𑀻.

𑀖𑁄𑀲𑀺𑀢𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑁂 𑀆𑀭𑀸𑀫𑁂𑀢𑀺 𑀏𑀢𑁆𑀣 𑀓𑁄 𑀖𑁄𑀲𑀺𑀢𑀲𑁂𑀝𑁆𑀞𑀺, 𑀓𑀣𑀜𑁆𑀘𑀸𑀦𑁂𑀦 𑀆𑀭𑀸𑀫𑁄 𑀓𑀸𑀭𑀺𑀢𑁄𑀢𑀺 𑀅𑀦𑁆𑀢𑁄𑀮𑀻𑀦𑀸𑀬 𑀘𑁄𑀤𑀦𑀸𑀬 𑀯𑀺𑀲𑁆𑀲𑀚𑁆𑀚𑀦𑁂 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀖𑁄𑀲𑀺𑀢𑀲𑁂𑀝𑁆𑀞𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀤𑁆𑀤𑀺𑀮𑀭𑀝𑁆𑀞𑀁 𑀦𑀸𑀫 𑀅𑀳𑁄𑀲𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑁂𑀤𑀸𑀭𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀓𑁂𑀤𑀸𑀭𑀪𑀽𑀫𑀺𑀬𑀸 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀕𑀘𑁆𑀙𑀦𑁆𑀢𑁄𑀢𑀺 𑀓𑁂𑀤𑀸𑀭𑀧𑀸𑀴𑀺𑀬𑀸 𑀕𑀘𑁆𑀙𑀦𑁆𑀢𑁄. 𑀧𑀳𑀽𑀢𑀧𑀸𑀬𑀲𑀦𑁆𑀢𑀺 𑀧𑀳𑀽𑀢𑀢𑀭𑀁 𑀧𑀸𑀬𑀲𑀁, 𑀢𑀁 𑀧𑀦 𑀕𑀭𑀼 𑀲𑀺𑀦𑀺𑀤𑁆𑀥𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀧𑁆𑀧𑀸𑀳𑀸𑀭𑀢𑀸𑀬 𑀫𑀦𑁆𑀤𑀕𑀳𑀡𑀺𑀓𑁄 𑀲𑀫𑀸𑀦𑁄 𑀚𑀻𑀭𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑁂𑀦𑀸𑀳 ‘‘𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄’’𑀢𑀺𑀆𑀤𑀺. 𑀬𑀲𑀯𑀢𑀺 𑀭𑀽𑀧𑀯𑀢𑀺 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀖𑁄𑀲𑀺𑀢𑀲𑁂𑀝𑁆𑀞𑀺 𑀦𑀸𑀫 𑀚𑀸𑀢𑁄𑀢𑀺 𑀏𑀯𑀫𑁂𑀢𑁆𑀣 𑀲𑀗𑁆𑀔𑁂𑀧𑁂𑀦𑁂𑀯 𑀖𑁄𑀲𑀺𑀢𑀲𑁂𑀝𑁆𑀞𑀺𑀯𑀢𑁆𑀣𑀼𑀁 𑀓𑀣𑁂𑀢𑀺, 𑀯𑀺𑀢𑁆𑀣𑀸𑀭𑁄 𑀧𑀦 𑀥𑀫𑁆𑀫𑀧𑀤𑀯𑀢𑁆𑀣𑀼𑀫𑁆𑀳𑀺 (𑀥. 𑀧. 𑀅𑀝𑁆𑀞. 𑁧.𑀲𑀸𑀫𑀸𑀯𑀢𑀻𑀯𑀢𑁆𑀣𑀼) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀲𑀁𑀓𑀧𑁆𑀧𑀦𑀯𑀲𑁂𑀦𑀸𑀢𑀺 𑀉𑀧𑀲𑀗𑁆𑀓𑀧𑁆𑀧𑀦𑀦𑀺𑀬𑀸𑀫𑁂𑀦. 𑀆𑀳𑀸𑀭𑀧𑀭𑀺𑀓𑁆𑀔𑀻𑀡𑀓𑀸𑀬𑀲𑁆𑀲𑀸𑀢𑀺 𑀆𑀳𑀸𑀭𑀦𑀺𑀫𑀺𑀢𑁆𑀢𑀧𑀭𑀺𑀓𑁆𑀔𑀻𑀡𑀓𑀸𑀬𑀲𑁆𑀲, 𑀆𑀳𑀸𑀭𑀓𑁆𑀔𑀬𑁂𑀦 𑀧𑀭𑀺𑀓𑁆𑀔𑀻𑀡𑀓𑀸𑀬𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀼𑀜𑁆𑀜𑀸𑀕𑀸𑀭𑁂𑀢𑀺 𑀚𑀦𑀯𑀺𑀯𑀺𑀢𑁆𑀢𑁂 𑀨𑀸𑀲𑀼𑀓𑀝𑁆𑀞𑀸𑀦𑁂.

𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀪𑀡𑁆𑀟𑀦𑀁 𑀦𑀸𑀫𑀸𑀢𑀺 𑀓𑀮𑀳𑀲𑁆𑀲 𑀳𑁂𑀢𑀼𑀪𑀽𑀢𑀸 𑀧𑀭𑀺𑀪𑀸𑀲𑀸 𑀢𑀁𑀲𑀤𑀺𑀲𑀻 𑀘 𑀅𑀦𑀺𑀝𑁆𑀞𑀓𑀺𑀭𑀺𑀬𑀸 𑀪𑀡𑁆𑀟𑀦𑀁 𑀦𑀸𑀫. 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺𑀯𑀲𑁂𑀦𑀸𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀧𑀭𑀸𑀫𑀲𑀦𑀅𑀘𑁆𑀘𑀦𑁆𑀢𑀩𑀦𑁆𑀥𑀦𑀸𑀤𑀺𑀯𑀲𑁂𑀦. ‘‘𑀅𑀬𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀯𑀺𑀭𑀼𑀤𑁆𑀥𑀯𑀸𑀤𑀪𑀽𑀢𑀁 𑀆𑀧𑀦𑁆𑀦𑀸𑀢𑀺 𑀯𑀺𑀯𑀸𑀤𑀸𑀧𑀦𑁆𑀦𑀸. 𑀢𑁂𑀦𑀸𑀳 ‘‘𑀯𑀺𑀭𑀼𑀤𑁆𑀥𑀪𑀽𑀢’’𑀦𑁆𑀢𑀺𑀆𑀤𑀺. 𑀫𑀼𑀔𑀲𑀦𑁆𑀦𑀺𑀲𑁆𑀲𑀺𑀢𑀢𑀸𑀬 𑀯𑀸𑀘𑀸 𑀇𑀥 ‘‘𑀫𑀼𑀔’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀫𑀼𑀔𑀲𑀢𑁆𑀢𑀻𑀳𑀻𑀢𑀺 𑀯𑀸𑀘𑀸𑀲𑀢𑁆𑀢𑀻𑀳𑀻’’𑀢𑀺. 𑀲𑀜𑁆𑀜𑀢𑁆𑀢𑀺𑀦𑁆𑀢𑀺 𑀲𑀜𑁆𑀜𑀸𑀧𑀦𑀁 ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄’’𑀢𑀺 𑀲𑀜𑁆𑀜𑀸𑀧𑁂𑀢𑀩𑁆𑀩𑀢𑀁. 𑀦𑀺𑀚𑁆𑀛𑀢𑁆𑀢𑀺𑀦𑁆𑀢𑀺 𑀬𑀸𑀣𑀸𑀯𑀢𑁄 𑀢𑀲𑁆𑀲 𑀦𑀺𑀚𑁆𑀛𑀸𑀦𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀜𑁆𑀜𑀢𑁆𑀢𑀺𑀯𑁂𑀯𑀘𑀦𑀫𑁂𑀯𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀘𑁂 𑀳𑁄𑀢𑀺 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀲𑀼𑀩𑁆𑀩𑀘𑀢𑀸𑀬 𑀲𑀺𑀓𑁆𑀔𑀸𑀓𑀸𑀫𑀢𑀸𑀬 𑀘 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺. 𑀦𑀢𑁆𑀣𑀺 𑀢𑁂 𑀆𑀧𑀢𑁆𑀢𑀻𑀢𑀺 𑀅𑀦𑀸𑀧𑀢𑁆𑀢𑀺𑀧𑀓𑁆𑀔𑁄𑀧𑀺 𑀏𑀢𑁆𑀣 𑀲𑀫𑁆𑀪𑀯𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳. 𑀲𑀸 𑀧𑀦𑀸𑀧𑀢𑁆𑀢𑀺 𑀏𑀯. 𑀢𑁂𑀦𑀸𑀳 𑁋 ‘‘𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀻’’𑀢𑀺.

𑁪𑁯𑁨. 𑀓𑀮𑀳𑀪𑀡𑁆𑀟𑀦𑀯𑀲𑁂𑀦𑀸𑀢𑀺 𑀓𑀮𑀳𑀪𑀡𑁆𑀟𑀦𑀲𑁆𑀲 𑀦𑀺𑀫𑀺𑀢𑁆𑀢𑀯𑀲𑁂𑀦. 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀕𑀢𑀦𑁆𑀢𑀺 𑀓𑀮𑀳𑀪𑀡𑁆𑀟𑀦𑀸𑀦𑀁 𑀲𑀸𑀭𑀡𑀻𑀬𑀥𑀫𑁆𑀫𑀧𑀝𑀺𑀧𑀓𑁆𑀔𑀢𑁆𑀢𑀸 𑀢𑀤𑀼𑀧𑀲𑀫𑀸𑀯𑀳𑀸 𑀳𑁂𑀝𑁆𑀞𑀸𑀤𑁂𑀲𑀦𑀸𑀬 𑀅𑀦𑀼𑀭𑀽𑀧𑀸𑀯 𑀉𑀧𑀭𑀺𑀤𑁂𑀲𑀦𑀸𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀉𑀧𑀭𑀺𑀲𑀼𑀢𑁆𑀢𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀸𑀢𑀺 𑀅𑀦𑀼𑀲𑁆𑀲𑀭𑀡𑀸𑀭𑀳𑀸. 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀦𑁆𑀢𑀺 𑀲𑀳𑀥𑀫𑁆𑀫𑀺𑀓𑀸𑀦𑀁. 𑀧𑀺𑀬𑀁 𑀧𑀺𑀬𑀸𑀬𑀺𑀢𑀩𑁆𑀩𑀁 𑀓𑀭𑁄𑀦𑁆𑀢𑀻𑀢𑀺 𑀧𑀺𑀬𑀓𑀭𑀡𑀸. 𑀕𑀭𑀼𑀁 𑀕𑀭𑀼𑀝𑁆𑀞𑀸𑀦𑀺𑀬𑀁 𑀓𑀭𑁄𑀦𑁆𑀢𑀻𑀢𑀺 𑀕𑀭𑀼𑀓𑀭𑀡𑀸. 𑀲𑀗𑁆𑀕𑀳𑀡𑀢𑁆𑀣𑀸𑀬𑀸𑀢𑀺 𑀲𑀗𑁆𑀕𑀳𑀯𑀢𑁆𑀣𑀼𑀯𑀺𑀲𑁂𑀲𑀪𑀸𑀯𑀢𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀗𑁆𑀕𑀡𑁆𑀳𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀯𑀺𑀯𑀸𑀤𑀦𑀢𑁆𑀣𑀸𑀬𑀸𑀢𑀺 𑀲𑀗𑁆𑀕𑀳𑀯𑀢𑁆𑀣𑀼𑀪𑀸𑀯𑀢𑁄 𑀏𑀯 𑀦 𑀯𑀺𑀯𑀸𑀤𑀦𑀸𑀬. 𑀲𑀢𑀺 𑀘 𑀅𑀯𑀺𑀯𑀸𑀤𑀦𑀳𑁂𑀢𑀼𑀪𑀽𑀢𑀲𑀗𑁆𑀕𑀸𑀳𑀡𑀢𑁆𑀢𑁂 𑀢𑁂𑀲𑀁 𑀯𑀲𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀲𑀫𑀕𑁆𑀕𑀪𑀸𑀯𑁄 𑀪𑁂𑀤𑀸𑀪𑀸𑀯𑁄 𑀲𑀺𑀤𑁆𑀥𑁄𑀬𑁂𑀯𑀸𑀢𑀺 𑀆𑀳 ‘‘𑀲𑀸𑀫𑀕𑁆𑀕𑀺𑀬𑀸’’𑀢𑀺𑀆𑀤𑀺. 𑀫𑀺𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀺 𑀏𑀢𑀸𑀬𑀸𑀢𑀺 𑀫𑁂𑀢𑁆𑀢𑀸, 𑀫𑀺𑀢𑁆𑀢𑀪𑀸𑀯𑁄, 𑀫𑁂𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀓𑀸𑀬𑀓𑀫𑁆𑀫𑀁. 𑀢𑀁 𑀧𑀦 𑀬𑀲𑁆𑀫𑀸 𑀫𑁂𑀢𑁆𑀢𑀸𑀲𑀳𑀕𑀢𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺. 𑀇𑀫𑀸𑀦𑀺 𑀫𑁂𑀢𑁆𑀢𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺 𑀧𑀸𑀞𑁂 𑀪𑀺𑀓𑁆𑀔𑀽𑀳𑀺 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀩𑁆𑀩𑀢𑀸𑀯𑀘𑀦𑀢𑁄. 𑀪𑀺𑀓𑁆𑀔𑀼𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀲𑁂𑀲𑀲𑀳𑀥𑀫𑁆𑀫𑀺𑀓𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀪𑀺𑀓𑁆𑀔𑀼𑀦𑁄 𑀲𑀩𑁆𑀩𑀫𑁆𑀧𑀺 𑀅𑀦𑀯𑀚𑁆𑀚𑀓𑀸𑀬𑀓𑀫𑁆𑀫𑀁 𑀆𑀪𑀺𑀲𑀫𑀸𑀘𑀸𑀭𑀺𑀓𑀓𑀫𑁆𑀫𑀦𑁆𑀢𑁄𑀕𑀥𑀫𑁂𑀯𑀸𑀢𑀺 𑀆𑀳 𑁋 ‘‘𑀫𑁂𑀢𑁆𑀢𑀘𑀺𑀢𑁆𑀢𑁂𑀦…𑀧𑁂… 𑀓𑀸𑀬𑀓𑀫𑁆𑀫𑀁 𑀦𑀸𑀫𑀸’’𑀢𑀺. 𑀯𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀸 𑀘𑁂𑀢𑀺𑀬𑀩𑁄𑀥𑀻𑀦𑀁 𑀯𑀦𑁆𑀤𑀦𑀸 𑀫𑁂𑀢𑁆𑀢𑀸𑀲𑀤𑀺𑀲𑀻𑀢𑀺 𑀓𑀢𑁆𑀯𑀸 𑀢𑀤𑀢𑁆𑀣𑀸𑀬 𑀕𑀫𑀦𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑀺𑀬𑀩𑁄𑀥𑀺𑀪𑀺𑀓𑁆𑀔𑀽𑀲𑀼 𑀯𑀼𑀢𑁆𑀢𑀸𑀯𑀲𑁂𑀲𑀅𑀧𑀘𑀸𑀬𑀦𑀸𑀤𑀺𑀁 𑀫𑁂𑀢𑁆𑀢𑀸𑀯𑀲𑁂𑀦 𑀧𑀯𑀢𑁆𑀢𑀁 𑀓𑀸𑀬𑀺𑀓𑀁 𑀓𑀺𑀭𑀺𑀬𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀢𑁂𑀧𑀺𑀝𑀓𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀓𑀣𑀺𑀬𑀫𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀓𑀸𑀬𑀯𑀘𑀻𑀫𑀦𑁄𑀲𑀼𑀘𑀭𑀺𑀢𑀸𑀦𑀺. 𑀘𑀺𑀦𑁆𑀢𑀦𑀦𑁆𑀢𑀺 𑀇𑀫𑀺𑀦𑀸 𑀏𑀯𑀁 𑀘𑀺𑀦𑁆𑀢𑀦𑀫𑀢𑁆𑀢𑀫𑁆𑀧𑀺 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁, 𑀧𑀕𑁂𑀯 𑀯𑀺𑀥𑀺𑀧𑀝𑀺𑀧𑀦𑁆𑀦𑀸 𑀪𑀸𑀯𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀁 𑀢𑁂𑀲𑀁 𑀧𑀼𑀭𑀢𑁄. 𑀢𑁂𑀲𑀼 𑀓𑀭𑁄𑀦𑁆𑀢𑁂𑀲𑀼𑀬𑁂𑀯 𑀳𑀺 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀁 𑀲𑀫𑁆𑀫𑀼𑀔𑀸 𑀓𑀸𑀬𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀓𑁂𑀯𑀮𑀁 ‘‘𑀤𑁂𑀯𑁄’’𑀢𑀺 𑀅𑀯𑀢𑁆𑀯𑀸 𑀕𑀼𑀡𑁂𑀳𑀺 𑀣𑀺𑀭𑀪𑀸𑀯𑀚𑁄𑀢𑀦𑀁 𑀤𑁂𑀯𑀢𑁆𑀣𑁂𑀭𑁄𑀢𑀺 𑀯𑀘𑀦𑀁 𑀧𑀕𑁆𑀕𑀬𑁆𑀳 𑀯𑀘𑀦𑀁. 𑀫𑀫𑀢𑁆𑀢𑀩𑁄𑀥𑀦𑀁 𑀯𑀘𑀦𑀁 𑀫𑀫𑀸𑀬𑀦𑀯𑀘𑀦𑀁. 𑀏𑀓𑀦𑁆𑀢𑀢𑀺𑀭𑁄𑀓𑁆𑀔𑀓𑀲𑁆𑀲 𑀫𑀦𑁄𑀓𑀫𑁆𑀫𑀲𑁆𑀲 𑀲𑀫𑁆𑀫𑀼𑀔𑀢𑀸 𑀦𑀸𑀫 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦𑁂𑀯 𑀳𑁄𑀢𑀺, 𑀢𑀜𑁆𑀘 𑀔𑁄 𑀮𑁄𑀓𑁂 𑀓𑀸𑀬𑀓𑀫𑁆𑀫𑀦𑁆𑀢𑀺 𑀧𑀸𑀓𑀝𑀁 𑀧𑀜𑁆𑀜𑀸𑀢𑀁 𑀳𑀢𑁆𑀣𑀯𑀺𑀓𑀸𑀭𑀸𑀤𑀺𑀁 𑀅𑀦𑀸𑀫𑀲𑀺𑀢𑁆𑀯𑀸 𑀏𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀬𑀦𑀸𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸’’𑀢𑀺 𑀆𑀳. 𑀢𑀣𑀸 𑀳𑀺 𑀯𑀘𑀻𑀪𑁂𑀤𑀯𑀲𑁂𑀦 𑀧𑀯𑀢𑁆𑀢𑀺 𑀦 𑀕𑀳𑀺𑀢𑀸.

𑀮𑀤𑁆𑀥𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀻𑀢𑀺 𑀮𑀸𑀪𑀸, 𑀧𑀭𑀺𑀲𑀼𑀤𑁆𑀥𑀸𑀕𑀫𑀦𑀸 𑀧𑀘𑁆𑀘𑀬𑀸. 𑀦 𑀲𑀫𑁆𑀫𑀸 𑀕𑀬𑁆𑀳𑀫𑀸𑀦𑀸𑀧𑀺 𑀦 𑀥𑀫𑁆𑀫𑀮𑀤𑁆𑀥𑀸 𑀦𑀸𑀫 𑀦 𑀳𑁄𑀦𑁆𑀢𑀻𑀢𑀺 𑀢𑀧𑁆𑀧𑀝𑀺𑀲𑁂𑀥𑀦𑀢𑁆𑀣𑀁 𑀧𑀸𑀴𑀺𑀬𑀁 ‘‘𑀥𑀫𑁆𑀫𑀮𑀤𑁆𑀥𑀸’’𑀢𑀺 𑀯𑀼𑀢𑁆𑀢𑀁. 𑀤𑁂𑀬𑁆𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑀜𑁆𑀘 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀓𑀢𑁆𑀯𑀸 𑀪𑀼𑀜𑁆𑀚𑀢𑀻𑀢𑀺 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻. 𑀢𑁂𑀦𑀸𑀳 ‘‘𑀤𑁆𑀯𑁂 𑀧𑀝𑀺𑀯𑀺𑀪𑀢𑁆𑀢𑀸𑀦𑀺 𑀦𑀸𑀫𑀸’’𑀢𑀺𑀆𑀤𑀺. 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦𑀦𑁆𑀢𑀺 𑀏𑀢𑁂𑀦 𑁋 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑀧𑀺 𑀯𑀺𑀪𑀚𑀦𑀁 𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫, 𑀧𑀕𑁂𑀯 𑀧𑀬𑁄𑀕𑀢𑁄’’𑀢𑀺 𑀤𑀲𑁆𑀲𑁂𑀢𑀺.

𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄𑀯…𑀧𑁂… 𑀧𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀲𑀸𑀥𑀸𑀭𑀡𑀩𑀼𑀤𑁆𑀥𑀺𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀏𑀯𑀁 𑀳𑀺𑀲𑁆𑀲 𑀲𑀸𑀥𑀸𑀭𑀡𑀪𑁄𑀕𑀺𑀢𑀸 𑀲𑀼𑀓𑀭𑀸, 𑀲𑀸𑀭𑀡𑀻𑀬𑀥𑀫𑁆𑀫𑁄 𑀘𑀲𑁆𑀲 𑀲𑀼𑀧𑀽𑀭𑁄 𑀳𑁄𑀢𑀺. 𑀯𑀢𑁆𑀢𑀦𑁆𑀢𑀺 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀡𑀯𑀢𑁆𑀢𑀁.

𑀤𑀸𑀢𑀩𑁆𑀩𑀦𑁆𑀢𑀺 𑀅𑀯𑀲𑁆𑀲𑀁 𑀤𑀸𑀢𑀩𑁆𑀩𑀁. 𑀅𑀢𑁆𑀢𑀦𑁄 𑀧𑀮𑀺𑀩𑁄𑀥𑀯𑀲𑁂𑀦 𑀲𑀧𑀮𑀺𑀩𑁄𑀥𑀲𑁆𑀲𑁂𑀯 𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀑𑀤𑀺𑀲𑁆𑀲𑀓𑀤𑀸𑀦𑀫𑁆𑀧𑀺𑀲𑁆𑀲 𑀦 𑀲𑀩𑁆𑀩𑀢𑁆𑀣 𑀯𑀸𑀭𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀤𑀸𑀢𑀼𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀤𑀼𑀲𑁆𑀲𑀻𑀮𑀲𑁆𑀲𑀧𑀺 𑀅𑀢𑁆𑀣𑀺𑀓𑀲𑁆𑀲 𑀲𑀢𑀺 𑀲𑀫𑁆𑀪𑀯𑁂 𑀤𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀤𑀸𑀦𑀜𑁆𑀳𑀺 𑀦𑀸𑀫 𑀓𑀲𑁆𑀲𑀘𑀺 𑀦 𑀦𑀺𑀯𑀸𑀭𑀺𑀢𑀁.

𑀫𑀳𑀸𑀕𑀺𑀭𑀺𑀕𑀸𑀫𑁄 𑀦𑀸𑀫 𑀦𑀸𑀕𑀤𑀻𑀧𑀧𑀲𑁆𑀲𑁂 𑀏𑀓𑁄 𑀕𑀸𑀫𑁄. 𑀲𑀸𑀭𑀡𑀻𑀬𑀥𑀫𑁆𑀫𑁄 𑀫𑁂, 𑀪𑀦𑁆𑀢𑁂, 𑀧𑀽𑀭𑀺𑀢𑁄…𑀧𑁂… 𑀧𑀢𑁆𑀢𑀕𑀢𑀁 𑀦 𑀔𑀻𑀬𑀢𑀻𑀢𑀺 𑀆𑀳 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀦𑀢𑁆𑀣𑀁. 𑀢𑀁 𑀲𑀼𑀢𑁆𑀯𑀸 𑀢𑁂𑀧𑀺 𑀣𑁂𑀭𑀸 ‘‘𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀅𑀬’’𑀦𑁆𑀢𑀺 𑀅𑀩𑁆𑀪𑀜𑁆𑀜𑀁𑀲𑀼. 𑀤𑀳𑀭𑀓𑀸𑀮𑁂 𑀏𑀯 𑀓𑀺𑀭𑁂𑀲 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀅𑀳𑁄𑀲𑀺, 𑀢𑀲𑁆𑀲𑀸 𑀘 𑀧𑀝𑀺𑀧𑀢𑁆𑀢𑀺𑀬𑀸 𑀅𑀯𑀜𑁆𑀛𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀁 ‘‘𑀏𑀢𑁂 𑀫𑀬𑁆𑀳𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳.

𑀅𑀳𑀁 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀺𑀓𑀸, 𑀫𑀫 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁂𑀦𑀧𑀺 𑀲𑀩𑁆𑀩𑀸𑀧𑀺𑀫𑀸 𑀪𑀺𑀓𑁆𑀔𑀼𑀦𑀺𑀬𑁄 𑀬𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀆𑀳 ‘‘𑀫𑀸 𑀢𑀼𑀫𑁆𑀳𑁂 𑀢𑁂𑀲𑀁 𑀕𑀢𑀪𑀸𑀯𑀁 𑀘𑀺𑀦𑁆𑀢𑀬𑀺𑀢𑁆𑀣𑀸’’𑀢𑀺.

𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀆𑀤𑀺𑀫𑁆𑀳𑀺 𑀯𑀸 𑀅𑀦𑁆𑀢𑁂 𑀯𑀸, 𑀯𑁂𑀫𑀚𑁆𑀛𑁂𑀢𑀺 𑀘 𑀇𑀤𑀁 𑀉𑀤𑁆𑀤𑁂𑀲𑀸𑀕𑀢𑀧𑀸𑀴𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀅𑀜𑁆𑀜𑁄 𑀓𑁄𑀘𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀦𑀼𑀓𑁆𑀓𑀫𑁄 𑀅𑀢𑁆𑀣𑀺. 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬𑀸𑀢𑀺 𑀯𑀢𑁆𑀣𑀦𑁆𑀢𑁂, 𑀤𑀲𑀦𑁆𑀢𑁂 𑀯𑀸 𑀙𑀺𑀦𑁆𑀦𑀯𑀢𑁆𑀣𑀁 𑀯𑀺𑀬. 𑀔𑀡𑁆𑀟𑀦𑁆𑀢𑀺 𑀔𑀡𑁆𑀟𑀯𑀦𑁆𑀢𑀁, 𑀔𑀡𑁆𑀟𑀺𑀢𑀁 𑀯𑀸. 𑀙𑀺𑀤𑁆𑀤𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀉𑀧𑀟𑁆𑀠𑀁, 𑀢𑀢𑀺𑀬𑀪𑀸𑀕𑀁 𑀯𑀸 𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀁 𑀲𑀩𑀮𑀁, 𑀯𑀺𑀲𑀪𑀸𑀕𑀯𑀡𑁆𑀡𑁂𑀳𑁂𑀯 𑀧𑀦 𑀩𑀺𑀦𑁆𑀤𑀽𑀳𑀺 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀫𑀺𑀲𑁆𑀲𑀁 𑀓𑀫𑁆𑀫𑀸𑀲𑀁, 𑀅𑀬𑀁 𑀇𑀫𑁂𑀲𑀁 𑀯𑀺𑀲𑁂𑀲𑁄. 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑀦𑀯𑀘𑀦𑁂𑀦𑁂𑀯 𑀢𑁂𑀲𑀁 𑀲𑀻𑀮𑀸𑀦𑀁 𑀯𑀺𑀯𑀝𑁆𑀝𑀼𑀧𑀦𑀺𑀲𑁆𑀲𑀬𑀢𑀫𑀸𑀳. 𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄𑀢𑀺 𑀇𑀫𑀺𑀦𑀸 𑀪𑀼𑀚𑀺𑀲𑁆𑀲𑀓𑀭𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀻𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀯𑀺𑀜𑁆𑀜𑀽𑀦𑀁 𑀅𑀧𑁆𑀧𑀫𑀸𑀡𑀢𑀸𑀬 ‘‘𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀧𑀭𑀸𑀫𑀝𑁆𑀞𑀢𑁆𑀢𑀸𑀢𑀺 𑁋 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 𑀢𑀡𑁆𑀳𑀸𑀧𑀭𑀸𑀫𑀸𑀲𑁂𑀦 𑁋 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀤𑁂𑀯𑁄 𑀳𑀼𑀢𑁆𑀯𑀸 𑀢𑀢𑁆𑀣 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁂𑀦 𑀘 𑀅𑀧𑀭𑀸𑀫𑀝𑁆𑀞𑀢𑁆𑀢𑀸. 𑀧𑀭𑀸𑀫𑀝𑁆𑀞𑀼𑀦𑁆𑀢𑀺 𑀘𑁄𑀤𑁂𑀢𑀼𑀁. 𑀲𑀻𑀮𑀁 𑀦𑀸𑀫 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀧𑀸𑀭𑀫𑁆𑀧𑀭𑀺𑀬𑁂𑀦 𑀬𑀸𑀯𑀤𑁂𑀯 𑀲𑀫𑀸𑀥𑀺𑀲𑀫𑁆𑀧𑀸𑀤𑀦𑀢𑁆𑀣𑀦𑁆𑀢𑀺 𑀆𑀳 ‘‘𑀲𑀫𑀸𑀥𑀺𑀲𑀁𑀯𑀢𑁆𑀢𑀓𑀸𑀦𑀻’’𑀢𑀺. 𑀲𑀫𑀸𑀦𑀪𑀸𑀯𑁄 𑀲𑀸𑀫𑀜𑁆𑀜𑀁, 𑀧𑀭𑀺𑀧𑀼𑀡𑁆𑀡𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀲𑁆𑀲 𑀯𑀺𑀬 𑀪𑁂𑀤𑀸𑀪𑀸𑀯𑀢𑁄 𑀲𑀻𑀮𑁂𑀦 𑀲𑀸𑀫𑀜𑁆𑀜𑀁 𑀲𑀻𑀮𑀲𑀸𑀫𑀜𑁆𑀜𑀁, 𑀢𑀁 𑀕𑀢𑁄 𑀉𑀧𑀕𑀢𑁄𑀢𑀺 𑀲𑀻𑀮𑀲𑀸𑀫𑀜𑁆𑀜𑀕𑀢𑁄. 𑀢𑁂𑀦𑀸𑀳 ‘‘𑀲𑀫𑀸𑀦𑀪𑀸𑀯𑀽𑀧𑀕𑀢𑀲𑀻𑀮𑁄’’𑀢𑀺.

𑀬𑀸𑀬𑀁 𑀤𑀺𑀝𑁆𑀞𑀻𑀢𑀺 𑀬𑀸 𑀅𑀬𑀁 𑀤𑀺𑀝𑁆𑀞𑀺 𑀫𑀬𑁆𑀳𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘 𑀧𑀘𑁆𑀘𑀓𑁆𑀔𑀪𑀽𑀢𑀸. 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀝𑁆𑀞𑀺, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺, ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀘 𑀤𑀺𑀝𑁆𑀞𑀺𑀬𑀸 𑀲𑀸𑀫𑀜𑁆𑀜𑀁 𑀲𑀫𑀸𑀦𑀤𑀺𑀝𑁆𑀞𑀺𑀪𑀸𑀯𑀁. 𑀅𑀕𑁆𑀕𑀁 𑀇𑀢𑀭𑁂𑀲𑀁 𑀲𑀸𑀭𑀡𑀻𑀬𑀥𑀫𑁆𑀫𑀸𑀦𑀁 𑀧𑀥𑀸𑀦𑀪𑀸𑀯𑀢𑁄. 𑀏𑀢𑀲𑁆𑀫𑀺𑀁 𑀲𑀢𑀺 𑀲𑀼𑀔𑀲𑀺𑀤𑁆𑀥𑀺𑀢𑁄 𑀢𑁂𑀲𑀁 𑀲𑀗𑁆𑀕𑀸𑀳𑀺𑀓𑀁, 𑀢𑀢𑁄 𑀏𑀯 𑀢𑁂𑀲𑀁 𑀲𑀗𑁆𑀖𑀸𑀝𑀦𑀺𑀓𑀁 𑀕𑁄𑀧𑀸𑀦𑀲𑀺𑀬𑁄 𑀅𑀧𑀭𑀺𑀧𑀢𑀦𑁆𑀢𑁂 𑀓𑀢𑁆𑀯𑀸 𑀲𑀗𑁆𑀕𑀡𑁆𑀳𑀸𑀢𑀺 𑀥𑀸𑀭𑁂𑀢𑀻𑀢𑀺 𑀲𑀗𑁆𑀕𑀸𑀳𑀺𑀓𑀁. 𑀲𑀗𑁆𑀖𑀸𑀝𑀦𑁆𑀢𑀺 𑀅𑀕𑁆𑀕𑀪𑀸𑀯𑁂𑀦 𑀲𑀗𑁆𑀖𑀸𑀝𑀪𑀸𑀯𑀁. 𑀲𑀗𑁆𑀖𑀸𑀝𑀦𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀗𑁆𑀖𑀸𑀝𑀦𑀺𑀓𑀁, 𑀲𑀗𑁆𑀖𑀸𑀝𑀦𑀺𑀬𑀦𑁆𑀢𑀺 𑀯𑀸 𑀧𑀸𑀞𑁄, 𑀲𑀗𑁆𑀖𑀸𑀝𑀦𑁂 𑀦𑀺𑀬𑀼𑀢𑁆𑀢𑀦𑁆𑀢𑀺 𑀯𑀸 𑀲𑀗𑁆𑀖𑀸𑀝𑀦𑀺𑀓𑀁, 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀦𑀺𑀬𑀁. 𑀲𑀸𑀫𑀜𑁆𑀜𑀢𑁄 𑀏𑀯 𑀕𑀳𑀺𑀢𑀢𑁆𑀢𑀸 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄.

𑁪𑁯𑁩. 𑀧𑀞𑀫𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀺 𑀏𑀯𑀁𑀲𑀪𑀸𑀯𑀸, 𑀅𑀜𑁆𑀜𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀻𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀬𑀸𑀬𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀤𑀺𑀝𑁆𑀞𑀻’’𑀢𑀺. 𑀏𑀢𑁆𑀢𑀸𑀯𑀢𑀸𑀧𑀻𑀢𑀺 𑀏𑀢𑁆𑀢𑀓𑁂𑀦𑀧𑀺 𑀭𑀸𑀕𑀸𑀤𑀻𑀲𑀼 𑀏𑀓𑁂𑀓𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀢𑀸𑀬𑀧𑀺 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀬𑁂𑀯 𑀦𑀸𑀫 𑀳𑁄𑀢𑀺, 𑀧𑀕𑁂𑀯 𑀤𑁆𑀯𑀻𑀳𑀺, 𑀩𑀳𑀽𑀳𑀺 𑀯𑀸 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀢𑀸𑀬. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀅𑀝𑁆𑀞𑀲𑀼𑀧𑀺 𑀯𑀸𑀭𑁂𑀲𑀼. 𑀲𑀼𑀝𑁆𑀞𑀼 𑀞𑀧𑀺𑀢𑀦𑁆𑀢𑀺 𑀬𑀣𑀸 𑀫𑀕𑁆𑀕𑀪𑀸𑀯𑀦𑀸 𑀉𑀧𑀭𑀺 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑁄 𑀳𑁄𑀢𑀺, 𑀏𑀯𑀁 𑀲𑀫𑁆𑀫𑀸 𑀞𑀧𑀺𑀢𑀁. 𑀢𑁂𑀦𑀸𑀳 ‘‘𑀲𑀘𑁆𑀘𑀸𑀦𑀁 𑀩𑁄𑀥𑀸𑀬𑀸’’𑀢𑀺. 𑀢𑀁 𑀜𑀸𑀡𑀦𑁆𑀢𑀺 ‘‘𑀦𑀢𑁆𑀣𑀺 𑀔𑁄 𑀫𑁂 𑀢𑀁 𑀧𑀭𑀺𑀬𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀅𑀭𑀺𑀬𑀸𑀦𑀁 𑀳𑁄𑀢𑀻𑀢𑀺 𑀅𑀭𑀺𑀬𑀸𑀦𑀫𑁂𑀯 𑀳𑁄𑀢𑀺. 𑀢𑁂𑀲𑀜𑁆𑀳𑀺 𑀏𑀓𑀤𑁂𑀲𑀢𑁄𑀧𑀺 𑀧𑀳𑀻𑀦𑀁 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀢𑁂𑀦𑀸𑀳 ‘‘𑀦 𑀧𑀼𑀣𑀼𑀚𑁆𑀚𑀦𑀸𑀦’’𑀦𑁆𑀢𑀺. 𑀅𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀭𑀺𑀬𑁂𑀲𑀼 𑀚𑀸𑀢’’𑀦𑁆𑀢𑀺 𑀓𑀢𑁆𑀯𑀸. 𑀮𑁄𑀓𑀼𑀢𑁆𑀢𑀭𑀳𑁂𑀢𑀼𑀓𑀢𑀸𑀬 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀬𑁂𑀲𑀁 𑀧𑀦𑀸’’𑀢𑀺𑀆𑀤𑀺. 𑀢𑀣𑀸 𑀳𑀺𑀲𑁆𑀲 𑀧𑀼𑀣𑀼𑀚𑁆𑀚𑀦𑁂𑀳𑀺 𑀅𑀲𑀸𑀥𑀸𑀭𑀡𑀢𑀸. 𑀢𑁂𑀦𑀸𑀳 ‘‘𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀅𑀪𑀸𑀯𑀢𑁄’’𑀢𑀺. 𑀲𑀩𑁆𑀩𑀯𑀸𑀭𑁂𑀲𑀽𑀢𑀺 𑀲𑀩𑁆𑀩𑁂𑀲𑀼 𑀇𑀢𑀭𑁂𑀲𑀼 𑀙𑀲𑀼 𑀯𑀸𑀭𑁂𑀲𑀼.

𑁪𑁯𑁪. 𑀧𑀘𑁆𑀘𑀢𑁆𑀢𑀦𑁆𑀢𑀺 𑀧𑀸𑀝𑀺𑀬𑁂𑀓𑁆𑀓𑀁 𑀅𑀢𑁆𑀢𑀦𑀺 𑀫𑀫 𑀘𑀺𑀢𑁆𑀢𑁂𑀬𑁂𑀯. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀘𑀺𑀢𑁆𑀢𑁂’’𑀢𑀺. ‘‘𑀧𑀘𑁆𑀘𑀢𑁆𑀢𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀦𑀺𑀩𑁆𑀩𑀼𑀢𑀺𑀁 𑀓𑀺𑀮𑁂𑀲𑀯𑀽𑀧𑀲𑀫𑀁 𑀮𑀪𑀸𑀫𑀻’’𑀢𑀺 𑀇𑀫𑀫𑀢𑁆𑀣𑀁 ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀅𑀢𑀺𑀤𑀺𑀲𑀢𑀺.

𑁪𑁯𑁫. 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸𑀢𑀺 𑀇𑀤𑀁 ‘‘𑀬𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀧𑀘𑁆𑀘𑀸𑀫𑀲𑀦𑀦𑁆𑀢𑀺 𑀆𑀳 ‘‘𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸𑀢𑀺 𑀏𑀯𑀭𑀽𑀧𑀸𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀤𑀺𑀝𑁆𑀞𑀺𑀬𑀸’’𑀢𑀺.

𑁪𑁯𑁬. 𑀲𑀪𑀸𑀯𑁂𑀦𑀸𑀢𑀺 𑀦𑀺𑀬𑀢𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀢𑀸𑀤𑀺𑀲𑀪𑀸𑀯𑁂𑀦. 𑀲𑀗𑁆𑀖𑀓𑀫𑁆𑀫𑀯𑀲𑁂𑀦𑀸𑀢𑀺 𑀫𑀸𑀦𑀢𑁆𑀢𑀘𑀭𑀺𑀬𑀸𑀤𑀺𑀲𑀗𑁆𑀖𑀓𑀫𑁆𑀫𑀯𑀲𑁂𑀦. 𑀤𑀳𑀭𑁄𑀢𑀺 𑀩𑀸𑀮𑁄. 𑀓𑀼𑀫𑀸𑀭𑁄𑀢𑀺 𑀤𑀸𑀭𑀓𑁄. 𑀬𑀲𑁆𑀫𑀸 𑀤𑀳𑀭𑁄 ‘‘𑀓𑀼𑀫𑀸𑀭𑁄’’𑀢𑀺 𑀘 ‘‘𑀬𑀼𑀯𑀸’’𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀫𑀦𑁆𑀤𑁄𑀢𑀺 𑀯𑀼𑀢𑁆𑀢𑀁. 𑀫𑀦𑁆𑀤𑀺𑀦𑁆𑀤𑁆𑀭𑀺𑀬𑀢𑀸𑀬 𑀳𑀺 𑀫𑀦𑁆𑀤𑁄. 𑀢𑁂𑀦𑀸𑀳 ‘‘𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀁 𑀫𑀦𑁆𑀤𑀢𑀸𑀬𑀸’’𑀢𑀺. 𑀏𑀯𑀫𑁆𑀧𑀺 𑀬𑀼𑀯𑀸𑀯𑀢𑁆𑀣𑀸𑀧𑀺 𑀓𑁂𑀘𑀺 𑀫𑀦𑁆𑀤𑀺𑀦𑁆𑀤𑁆𑀭𑀺𑀬𑀸 𑀳𑁄𑀦𑁆𑀢𑀻𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄, 𑀓𑀣𑀫𑀲𑁆𑀲 𑀅𑀗𑁆𑀕𑀸𑀭𑀓𑁆𑀓𑀫𑀦𑀦𑁆𑀢𑀺? 𑀬𑀣𑀸 𑀢𑀣𑀸 𑀅𑀗𑁆𑀕𑀸𑀭𑀲𑁆𑀲 𑀨𑀼𑀲𑀦𑀁 𑀇𑀥 ‘‘𑀅𑀓𑁆𑀓𑀫𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀇𑀢𑁄 𑀘𑀺𑀢𑁄 𑀘𑀸’’𑀢𑀺𑀆𑀤𑀺. 𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀫𑀳𑀮𑁆𑀮𑀓𑀫𑀦𑀼𑀲𑁆𑀲𑀸𑀦𑀁. 𑀦 𑀲𑀻𑀖𑀁 𑀳𑀢𑁆𑀣𑁄 𑀛𑀸𑀬𑀢𑀺 𑀓𑀣𑀺𑀦𑀳𑀢𑁆𑀣𑀢𑀸𑀬. 𑀔𑀺𑀧𑁆𑀧𑀁 𑀧𑀝𑀺𑀲𑀁𑀳𑀭𑀢𑀺 𑀫𑀼𑀤𑀼𑀢𑀮𑀼𑀡𑀲𑀭𑀻𑀭𑀢𑀸𑀬. 𑀅𑀥𑀺𑀯𑀸𑀲𑁂𑀢𑀺 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸.

𑁪𑁯𑁭. 𑀉𑀘𑁆𑀘𑀸𑀯𑀘𑀸𑀦𑀻𑀢𑀺 𑀫𑀳𑀦𑁆𑀢𑀸𑀦𑀺 𑀘𑁂𑀯 𑀔𑀼𑀤𑁆𑀤𑀓𑀸𑀦𑀺 𑀘. 𑀢𑀢𑁆𑀣𑁂𑀯𑀸𑀢𑀺 𑀲𑀼𑀥𑀸𑀓𑀫𑁆𑀫𑀸𑀤𑀺𑀫𑁆𑀳𑀺𑀬𑁂𑀯. 𑀓𑀲𑀸𑀯𑀧𑀘𑀦𑀁 𑀲𑀼𑀥𑀸𑀤𑀺𑀲𑀗𑁆𑀔𑀭𑀡𑀢𑁆𑀣𑀁, 𑀉𑀤𑀓𑀸𑀦𑀬𑀦𑀁 𑀥𑁄𑀯𑀦𑀸𑀤𑀺𑀅𑀢𑁆𑀣𑀁, 𑀳𑀮𑀺𑀤𑁆𑀤𑀺𑀯𑀡𑁆𑀡𑀥𑀸𑀢𑀼𑀮𑁂𑀧𑀦𑀢𑁆𑀣𑀁 𑀓𑀼𑀘𑁆𑀙𑀓𑀭𑀡𑀁. 𑀩𑀳𑀮𑀧𑀢𑁆𑀣𑀦𑁄𑀢𑀺 𑀤𑀴𑁆𑀳𑀙𑀦𑁆𑀤𑁄. 𑀯𑀘𑁆𑀙𑀓𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀥𑁂𑀦𑀼𑀧𑀕𑀯𑀘𑁆𑀙𑀁. 𑀅𑀧𑀘𑀺𑀦𑀸𑀢𑀻𑀢𑀺 𑀅𑀧𑀯𑀺𑀦𑁆𑀤𑀢𑀺, 𑀆𑀮𑁄𑀓𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀧𑀮𑁄𑀓𑁂𑀢𑀻’’𑀢𑀺. 𑀢𑀦𑁆𑀦𑀺𑀦𑁆𑀦𑁄 𑀳𑁄𑀢𑀻𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀦𑀺𑀦𑁆𑀦𑁄𑀯 𑀳𑁄𑀢𑀺 𑀉𑀘𑁆𑀘𑀸𑀯𑀘𑀸𑀦𑀫𑁆𑀧𑀺 𑀓𑀺𑀁𑀓𑀭𑀡𑀻𑀬𑀸𑀦𑀁 𑀘𑀸𑀭𑀺𑀢𑁆𑀢𑀲𑀻𑀮𑀲𑁆𑀲 𑀧𑀽𑀭𑀡𑀯𑀲𑁂𑀦𑁂𑀯 𑀓𑀭𑀡𑀢𑁄, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀲𑁂𑀦𑁂𑀯 𑀘 𑀢𑁂𑀲𑀁 𑀧𑀝𑀺𑀧𑀚𑁆𑀚𑀦𑀢𑁄. 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀪𑀸𑀯𑀢𑁄 ‘‘𑀢𑀁 𑀢𑀁 𑀲𑀫𑀼𑀮𑁆𑀮𑀧𑀺𑀲𑁆𑀲𑀸𑀫𑀻’’𑀢𑀺.

𑁪𑁯𑁮. 𑀩𑀮𑀁 𑀏𑀯 𑀩𑀮𑀢𑀸𑀢𑀺 𑀆𑀳 ‘‘𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀅𑀢𑁆𑀣𑀺𑀓𑀪𑀸𑀯𑀁 𑀓𑀢𑁆𑀯𑀸𑀢𑀺 𑀢𑁂𑀦 𑀥𑀫𑁆𑀫𑁂𑀦 𑀲𑀯𑀺𑀲𑁂𑀲𑀁 𑀅𑀢𑁆𑀣𑀺𑀓𑀪𑀸𑀯𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀲𑀓𑀮𑀘𑀺𑀢𑁆𑀢𑁂𑀦𑀸𑀢𑀺 𑀤𑁂𑀲𑀦𑀸𑀬𑀆𑀤𑀺𑀫𑁆𑀳𑀺 𑀫𑀚𑁆𑀛𑁂 𑀧𑀭𑀺𑀬𑁄𑀲𑀸𑀦𑁂𑀢𑀺 𑀲𑀩𑁆𑀩𑀢𑁆𑀣𑁂𑀯 𑀧𑀯𑀢𑁆𑀢𑀢𑀸𑀬 𑀲𑀓𑀮𑁂𑀦 𑀅𑀦𑀯𑀲𑁂𑀲𑁂𑀦 𑀘𑀺𑀢𑁆𑀢𑁂𑀦.

𑁫𑁦𑁦. 𑀲𑀪𑀸𑀯𑁄𑀢𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀼𑀣𑀼𑀚𑁆𑀚𑀦𑁂𑀳𑀺 𑀅𑀲𑀸𑀥𑀸𑀭𑀡𑀢𑀸𑀬 𑀆𑀯𑁂𑀡𑀺𑀓𑁄 𑀲𑀪𑀸𑀯𑁄. 𑀲𑀼𑀝𑁆𑀞𑀼 𑀲𑀫𑀦𑁆𑀦𑁂𑀲𑀺𑀢𑁄𑀢𑀺 𑀲𑀫𑁆𑀫𑀤𑁂𑀯 𑀉𑀧𑀧𑀭𑀺𑀓𑁆𑀔𑀺𑀢𑁄. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀲𑀘𑁆𑀙𑀺𑀓𑀭𑀡𑁂𑀦, 𑀲𑀘𑁆𑀙𑀺𑀓𑀢𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀢𑀜𑀸𑀡𑁂𑀦𑀸’’𑀢𑀺. 𑀧𑀞𑀫𑀫𑀕𑁆𑀕𑀨𑀮𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀯𑀺𑀲𑁂𑀲𑀸 𑀳𑁂𑀢𑁂 𑀧𑀯𑀢𑁆𑀢𑀺𑀆𑀓𑀸𑀭𑀪𑀺𑀦𑁆𑀦𑀸. 𑀢𑁂𑀦𑁂𑀯𑀸𑀳 ‘‘𑀲𑀢𑁆𑀢𑀳𑀺 𑀫𑀳𑀸𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀳𑀻’’𑀢𑀺. 𑀅𑀬𑀁 𑀢𑀸𑀯 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀓𑀣𑀸𑀢𑀺 ‘‘𑀇𑀤𑀫𑀲𑁆𑀲 𑀧𑀞𑀫𑀁 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺, 𑀦 𑀫𑀕𑁆𑀕𑀜𑀸𑀡𑀸𑀦𑀻𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀭𑀫𑁆𑀧𑀭𑀸𑀕𑀢𑀸 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀁 𑀲𑀫𑀸𑀦𑀸 𑀲𑀸𑀥𑀸𑀭𑀡𑀸 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸 𑀅𑀢𑁆𑀣𑀯𑀡𑁆𑀡𑀦𑀸. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀳𑀺 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀬𑀤𑀺 𑀲𑁄 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀲𑀺𑀬𑀸 𑀦𑀸𑀦𑀸𑀪𑀺𑀲𑀫𑀬𑁄, 𑀢𑀣𑀸 𑀲𑀢𑀺 𑀲𑀁𑀬𑁄𑀚𑀦𑀢𑁆𑀢𑀬𑀸𑀤𑀻𑀦𑀁 𑀏𑀓𑀤𑁂𑀲𑀧𑁆𑀧𑀳𑀸𑀦𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑀦𑁆𑀢𑀭𑀨𑀮𑀢𑁆𑀢𑀸 𑀏𑀓𑀤𑁂𑀲𑀲𑁄𑀢𑀸𑀧𑀦𑁆𑀦𑀢𑀸𑀤𑀺𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀨𑀮𑀸𑀦𑀁 𑀯𑀸 𑀅𑀦𑁂𑀓𑀪𑀸𑀯𑁄, 𑀲𑀩𑁆𑀩𑀫𑁂𑀢𑀁 𑀅𑀬𑀼𑀢𑁆𑀢𑀦𑁆𑀢𑀺 𑀢𑀲𑁆𑀫𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄𑀯 𑀅𑀭𑀺𑀬𑀫𑀕𑁆𑀕𑁄.

𑀬𑀁 𑀧𑀦 𑀲𑀼𑀢𑁆𑀢𑀧𑀤𑀁 𑀦𑀺𑀲𑁆𑀲𑀸𑀬 𑀯𑀺𑀢𑀡𑁆𑀟𑀯𑀸𑀤𑀻 𑀅𑀭𑀺𑀬𑀫𑀕𑁆𑀕𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑁆𑀢 𑀯𑀲𑁆𑀲𑀸𑀦𑀻𑀢𑀺 𑀳𑀺 𑀯𑀘𑀦𑀢𑁄’’𑀢𑀺 𑀆𑀳. 𑀓𑀺𑀮𑁂𑀲𑀸 𑀧𑀦 𑀮𑀳𑀼…𑀧𑁂… 𑀙𑀺𑀚𑁆𑀚𑀦𑁆𑀢𑀻𑀢𑀺 𑀯𑀤𑀦𑁆𑀢𑁂𑀦 𑀳𑀺 𑀔𑀺𑀧𑁆𑀧𑀁 𑀢𑀸𑀯 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀤𑀦𑁆𑀥𑀧𑀯𑀢𑁆𑀢𑀺𑀓𑀸 𑀫𑀕𑁆𑀕𑀪𑀸𑀯𑀦𑀸𑀢𑀺 𑀧𑀝𑀺𑀜𑁆𑀜𑀸𑀢𑀁 𑀳𑁄𑀢𑀺. 𑀢𑀢𑁆𑀣 𑀲𑀘𑁂 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀬 𑀆𑀭𑀤𑁆𑀥𑀫𑀢𑁆𑀢𑀸𑀬 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀲𑁂𑀲𑀸 𑀫𑀕𑁆𑀕𑀪𑀸𑀯𑀦𑀸 𑀦𑀺𑀭𑀢𑁆𑀣𑀓𑀸 𑀲𑀺𑀬𑀸, 𑀅𑀣 𑀧𑀘𑁆𑀙𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀓𑀺𑀮𑁂𑀲𑀸 𑀧𑀦 𑀮𑀳𑀼 𑀙𑀺𑀚𑁆𑀚𑀦𑁆𑀢𑀻𑀢𑀺 𑀇𑀤𑀁 𑀫𑀺𑀘𑁆𑀙𑀸, ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺 𑀯𑀓𑁆𑀔𑀢𑀻𑀢𑀺. 𑀢𑀢𑁄 𑀲𑀼𑀢𑁆𑀢𑀧𑀝𑀺𑀚𑀸𑀦𑀦𑀢𑁄. 𑀫𑀕𑁆𑀕𑀁 𑀅𑀪𑀸𑀯𑁂𑀢𑁆𑀯𑀸𑀢𑀺 𑀅𑀭𑀺𑀬𑀫𑀕𑁆𑀕𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀅𑀪𑀸𑀯𑁂𑀢𑁆𑀯𑀸. 𑀅𑀢𑁆𑀣𑀭𑀲𑀁 𑀯𑀺𑀤𑀺𑀢𑁆𑀯𑀸𑀢𑀺 𑀲𑀼𑀢𑁆𑀢𑀲𑁆𑀲 𑀅𑀯𑀺𑀧𑀭𑀻𑀢𑁄 𑀅𑀢𑁆𑀣𑁄 𑀏𑀯 𑀅𑀢𑁆𑀣𑀭𑀲𑁄, 𑀢𑀁 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸. 𑀏𑀯𑀁 𑀯𑀺𑀢𑀡𑁆𑀟𑀯𑀸𑀤𑀺𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀕𑀫𑁂𑀢𑀼𑀁 ‘‘𑀇𑀫𑀸𑀦𑀺 𑀲𑀢𑁆𑀢 𑀜𑀸𑀡𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑁄𑀲𑀫𑁆𑀩𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.