𑁭. 𑀯𑀻𑀫𑀁𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁭. 𑀅𑀢𑁆𑀣𑀯𑀻𑀫𑀁𑀲𑀓𑁄𑀢𑀺 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀅𑀢𑁆𑀣𑀯𑀺𑀚𑀸𑀦𑀦𑀓𑁄. 𑀲𑀗𑁆𑀔𑀸𑀭𑀯𑀻𑀫𑀁𑀲𑀓𑁄𑀢𑀺 𑀲𑀗𑁆𑀔𑀢𑀥𑀫𑁆𑀫𑁂 𑀲𑀮𑀓𑁆𑀔𑀡𑀢𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄 𑀯𑀸 𑀆𑀬𑀢𑀦𑀸𑀤𑀺𑀯𑀺𑀪𑀸𑀕𑀢𑁄 𑀘 𑀯𑀻𑀫𑀁𑀲𑀓𑁄. 𑀲𑀢𑁆𑀣𑀼𑀯𑀻𑀫𑀁𑀲𑀓𑁄𑀢𑀺 ‘‘𑀲𑀢𑁆𑀣𑀸 𑀦𑀸𑀫 𑀕𑀼𑀡𑀢𑁄 𑀏𑀤𑀺𑀲𑁄 𑀏𑀤𑀺𑀲𑁄 𑀘𑀸’’𑀢𑀺 𑀲𑀢𑁆𑀣𑀼 𑀉𑀧𑀧𑀭𑀺𑀓𑁆𑀔𑀓𑁄. 𑀯𑀻𑀫𑀁𑀲𑀓𑁄𑀢𑀺 𑀯𑀺𑀘𑀸𑀭𑀓𑁄. 𑀬𑀁 𑀘𑁂𑀢𑀲𑁄 𑀲𑀭𑀸𑀕𑀸𑀤𑀺𑀯𑀺𑀪𑀸𑀕𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀦𑀁, 𑀢𑀁 𑀘𑁂𑀢𑁄𑀧𑀭𑀺𑀬𑀸𑀬𑁄. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤’’𑀦𑁆𑀢𑀺. 𑀬𑀲𑁆𑀫𑀸 𑀘𑁂𑀢𑁄𑀧𑀭𑀺𑀬𑀸𑀬𑀜𑀸𑀡𑀮𑀸𑀪𑀻 𑁋 ‘‘𑀇𑀤𑀁 𑀘𑀺𑀢𑁆𑀢𑀁 𑀇𑀢𑁄 𑀧𑀭𑀁 𑀧𑀯𑀢𑁆𑀢𑀁 𑀇𑀤𑀫𑀺𑀢𑁄 𑀧𑀭’’𑀦𑁆𑀢𑀺 𑀧𑀭𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑁂𑀢𑁄𑀧𑀭𑀺𑀬𑀸𑀬𑀦𑁆𑀢𑀺 𑀘𑀺𑀢𑁆𑀢𑀯𑀸𑀭’’𑀦𑁆𑀢𑀺. 𑀯𑀸𑀭𑀢𑁆𑀣𑁂𑀧𑀺 𑀳𑀺 𑀧𑀭𑀺𑀬𑀸𑀬-𑀲𑀤𑁆𑀤𑁄 𑀳𑁄𑀢𑀺 𑁋 ‘‘𑀓𑀲𑁆𑀲 𑀦𑀼 𑀔𑁄, 𑀆𑀦𑀦𑁆𑀤, 𑀧𑀭𑀺𑀬𑀸𑀬𑁄 𑀅𑀚𑁆𑀚 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁯𑁮). 𑀘𑀺𑀢𑁆𑀢𑀘𑀸𑀭𑀦𑁆𑀢𑀺𑀧𑀺 𑀧𑀸𑀞𑁄, 𑀘𑀺𑀢𑁆𑀢𑀧𑀯𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀺𑀚𑀸𑀦𑀦𑀢𑁆𑀣𑀸𑀬𑀸𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦 𑀯𑀻𑀫𑀁𑀲𑀦𑀢𑁆𑀣𑀸𑀬.

𑁪𑁮𑁮. 𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑀦𑁆𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀗𑁆𑀔𑀸𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀩𑀮𑀯𑀲𑀦𑁆𑀦𑀺𑀲𑁆𑀲𑀬𑀁. 𑀉𑀧𑀟𑁆𑀠𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦𑀸𑀢𑀺 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀲𑀫𑁆𑀧𑀸𑀤𑀺𑀬𑀫𑀸𑀦𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀉𑀧𑀟𑁆𑀠𑀪𑀸𑀕𑀫𑀢𑁆𑀢𑀁 𑀅𑀢𑁆𑀢𑀦𑁄 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑀥𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀺𑀚𑁆𑀛𑀢𑀺. 𑀉𑀧𑀟𑁆𑀠𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀼𑀪𑀸𑀯𑁂𑀦𑀸𑀢𑀺 𑀇𑀢𑀭𑁄 𑀧𑀦 𑀉𑀧𑀟𑁆𑀠𑀪𑀸𑀕𑁄 𑀬𑀁 𑀦𑀺𑀲𑁆𑀲𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀢𑀲𑁆𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀉𑀧𑀤𑁂𑀲𑀸𑀦𑀼𑀪𑀸𑀯𑁂𑀦 𑀳𑁄𑀢𑀺, 𑀲𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀮𑁄𑀓𑀲𑀺𑀤𑁆𑀥𑁄 𑀏𑀯 𑀅𑀬𑀫𑀢𑁆𑀣𑁄. 𑀮𑁄𑀓𑀺𑀬𑀸 𑀳𑀺 𑁋

‘‘𑀧𑀸𑀤𑁄 𑀲𑀺𑀤𑁆𑀥𑁄 𑀆𑀘𑀭𑀺𑀬𑀸, 𑀧𑀸𑀤𑁄 𑀳𑀺𑀲𑁆𑀲𑀸𑀦𑀼𑀪𑀸𑀯𑀢𑁄;

𑀢𑀁𑀯𑀺𑀚𑁆𑀚𑀸𑀲𑁂𑀯𑀓𑀸 𑀧𑀸𑀤𑁄, 𑀧𑀸𑀤𑁄 𑀓𑀸𑀮𑁂𑀦 𑀧𑀘𑁆𑀘𑀢𑀻’’𑀢𑀺. 𑁋

𑀯𑀤𑀦𑁆𑀢𑀺. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀸𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦, 𑀜𑀸𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀢𑀺 𑀓𑀮𑁆𑀬𑀸𑀡𑁄 𑀪𑀤𑁆𑀭𑁄 𑀲𑀼𑀦𑁆𑀤𑀭𑁄 𑀫𑀺𑀢𑁆𑀢𑁄 𑀏𑀢𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀯𑀦𑁆𑀢𑀢𑀸. 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂𑀳𑀺 𑀓𑀮𑁆𑀬𑀸𑀡𑀧𑀼𑀕𑁆𑀕𑀮𑁂𑀳𑁂𑀯 𑀅𑀬𑀦𑀁 𑀧𑀯𑀢𑁆𑀢𑀺 𑀓𑀮𑁆𑀬𑀸𑀡𑀲𑀳𑀸𑀬𑀢𑀸. 𑀢𑁂𑀲𑀼 𑀏𑀯 𑀘𑀺𑀢𑁆𑀢𑁂𑀦 𑀘𑁂𑀯 𑀓𑀸𑀬𑁂𑀦 𑀘 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 𑀧𑀯𑀢𑁆𑀢𑀺 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸. 𑀫𑀸𑀳𑁂𑀯𑀦𑁆𑀢𑀺 𑀏𑀯𑀁 𑀫𑀸 𑀆𑀳, ‘‘𑀉𑀧𑀟𑁆𑀠𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸’’𑀢𑀺 𑀫𑀸 𑀓𑀣𑁂𑀳𑀻𑀢𑀺 𑀅𑀢𑁆𑀣𑁄. 𑀢𑀤𑀫𑀺𑀦𑀸𑀢𑀺 𑀏𑀢𑁆𑀣 𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄 𑀇-𑀓𑀸𑀭𑀲𑁆𑀲 𑀅-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀇𑀫𑀺𑀦𑀸𑀧𑀻𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁂𑀦𑀧𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀇𑀤𑀸𑀦𑀺 𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀫𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑀣𑀸 𑀘𑁂𑀢𑁆𑀣, 𑀅𑀜𑁆𑀜𑁂𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑀼𑀧𑀦𑀺𑀲𑁆𑀲𑀬𑀫𑁂𑀯 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀽𑀦𑀁 𑀩𑀸𑀳𑀺𑀭𑀗𑁆𑀕𑀲𑀫𑁆𑀧𑀢𑁆𑀢𑀺𑀁 𑀓𑀣𑁂𑀦𑁆𑀢𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀥𑀫𑁆𑀫𑁂𑀢𑀺 𑀯𑀺𑀫𑀼𑀢𑁆𑀢𑀺𑀬𑀸 𑀅𑀭𑀳𑀢𑁆𑀢𑀲𑁆𑀲 𑀧𑀭𑀺𑀧𑀸𑀘𑀓𑀥𑀫𑁆𑀫𑁂. 𑀧𑀘𑁆𑀘𑀬𑁂𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑁂. 𑀫𑀳𑀸𑀚𑀘𑁆𑀘𑁄𑀢𑀺 𑀫𑀳𑀸𑀓𑀼𑀮𑀻𑀦𑁄.

𑀓𑀸𑀬𑀺𑀓𑁄 𑀲𑀫𑀸𑀘𑀸𑀭𑁄𑀢𑀺 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀸𑀤𑀺𑀓𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀧𑀭𑀺𑀓𑁆𑀔𑀢𑁄 𑀧𑀸𑀓𑀢𑀺𑀓𑁄 𑀘. 𑀯𑀻𑀫𑀁𑀲𑀓𑀲𑁆𑀲 𑀉𑀧𑀧𑀭𑀺𑀓𑁆𑀔𑀓𑀲𑁆𑀲. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁄 𑀦𑀸𑀫 𑀘𑀓𑁆𑀔𑀼𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀢𑁆𑀢𑀸. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀁𑀓𑀺𑀮𑀺𑀝𑁆𑀞𑀸𑀢𑀺 𑀭𑀸𑀕𑀸𑀤𑀺𑀲𑀁𑀓𑀺𑀮𑁂𑀲𑀥𑀫𑁆𑀫𑁂𑀳𑀺 𑀯𑀺𑀩𑀸𑀥𑀺𑀢𑀸, 𑀉𑀧𑀢𑀸𑀧𑀺𑀢𑀸 𑀯𑀺𑀤𑀽𑀲𑀺𑀢𑀸 𑀫𑀮𑀻𑀦𑀸 𑀘𑀸𑀢𑀺 𑀅𑀢𑁆𑀣𑁄. 𑀢𑁂 𑀧𑀦 𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺. 𑀬𑀤𑀺 𑀦 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀧𑀸𑀴𑀺𑀬𑀁 𑀓𑀣𑀁 𑀢𑀣𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺. 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀸𑀧𑀺𑀲𑀁𑀓𑀺𑀮𑀺𑀝𑁆𑀞𑀸𑀬𑁂𑀯 𑀦𑀸𑀫 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑁄. 𑀪𑀯𑀢𑀺 𑀳𑀺 𑀢𑀁𑀳𑁂𑀢𑀼𑀓𑁂𑀧𑀺 𑀢𑀤𑀼𑀧𑀘𑀸𑀭𑁄 𑀬𑀣𑀸 ‘‘𑀲𑁂𑀫𑁆𑀳𑁄 𑀕𑀼𑀴𑁄’’𑀢𑀺. ‘‘𑀫𑀸 𑀫𑁂 𑀇𑀤𑀁 𑀅𑀲𑀸𑀭𑀼𑀧𑁆𑀧𑀁 𑀧𑀭𑁄 𑀅𑀜𑁆𑀜𑀸𑀲𑀻’’𑀢𑀺 𑀧𑀦 𑀧𑀝𑀺𑀘𑁆𑀙𑀦𑁆𑀦𑀢𑀸𑀬 𑀦 𑀦 𑀉𑀧𑀮𑀩𑁆𑀪𑀦𑁆𑀢𑀺. ‘‘𑀦 𑀔𑁄 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀓𑀺𑀜𑁆𑀘𑀺 𑀕𑀭𑀳𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀭𑀳𑀺𑀢𑀩𑁆𑀩𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀪𑀸𑀯𑀺𑀢𑀫𑀕𑁆𑀕𑀲𑁆𑀲 𑀳𑀺 𑀕𑀭𑀳𑀺𑀢𑀩𑁆𑀩𑀢𑀸 𑀦𑀸𑀫 𑀲𑀺𑀬𑀸, 𑀦 𑀪𑀸𑀯𑀺𑀢𑀫𑀕𑁆𑀕𑀲𑁆𑀲. 𑀏𑀲 𑀉𑀢𑁆𑀢𑀭𑁄 𑀫𑀸𑀡𑀯𑁄 ‘‘𑀩𑀼𑀤𑁆𑀥𑀫𑁆𑀧𑀺 𑀕𑀭𑀳𑀺𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀓𑀢𑁆𑀯𑀸 𑀅𑀦𑀼𑀩𑀦𑁆𑀥𑀺. 𑀏𑀯𑀁 𑀘𑀺𑀦𑁆𑀢𑁂𑀲𑀺 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀅𑀢𑁆𑀢𑀦𑁄 𑀯𑀘𑀦𑁂 𑀅𑀝𑁆𑀞𑀺𑀢𑀢𑁆𑀢𑀸. 𑀓𑀺𑀜𑁆𑀘𑀺 𑀯𑀚𑁆𑀚𑀁 𑀅𑀧𑀲𑁆𑀲𑀦𑁆𑀢𑁄 𑀫𑀸𑀭𑁄 𑀏𑀯𑀫𑀸𑀳 𑁋

‘‘𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁, 𑀅𑀦𑀼𑀩𑀦𑁆𑀥𑀺𑀁 𑀧𑀤𑀸𑀧𑀤𑀁;

𑀑𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀺𑀲𑁆𑀲𑀁, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑀻𑀫𑀢𑁄’’𑀢𑀺. (𑀲𑀼. 𑀦𑀺. 𑁪𑁪𑁮);

𑀓𑀸𑀮𑁂 𑀓𑀡𑁆𑀳𑀸, 𑀓𑀸𑀮𑁂 𑀲𑀼𑀓𑁆𑀓𑀸𑀢𑀺 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀧𑀭𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀓𑀤𑀸𑀘𑀺 𑀓𑀡𑁆𑀳𑀸 𑀅𑀧𑀭𑀺𑀲𑀼𑀤𑁆𑀥𑀸 𑀓𑀸𑀬𑀲𑀫𑀸𑀘𑀸𑀭𑀸𑀤𑀬𑁄, 𑀓𑀤𑀸𑀘𑀺 𑀲𑀼𑀓𑁆𑀓𑀸 𑀧𑀭𑀺𑀲𑀼𑀤𑁆𑀥𑀸𑀢𑀺 𑀏𑀯𑀁 𑀅𑀦𑁆𑀢𑀭𑀦𑁆𑀢𑀭𑀸 𑀩𑁆𑀬𑀸𑀫𑀺𑀲𑁆𑀲𑀯𑀲𑁂𑀦 𑀯𑁄𑀫𑀺𑀲𑁆𑀲𑀓𑀸. 𑀦𑀺𑀓𑁆𑀓𑀺𑀮𑁂𑀲𑀸𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀸 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀸.

𑀅𑀦𑀯𑀚𑁆𑀚𑀁 𑀯𑀚𑁆𑀚𑀭𑀳𑀺𑀢𑀢𑁆𑀢𑀸. 𑀤𑀻𑀖𑀭𑀢𑁆𑀢𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀲𑀫𑀸𑀧𑀦𑁆𑀦𑁄𑀢𑀺 𑀲𑀫𑁆𑀫𑀸 𑀆𑀧𑀦𑁆𑀦𑁄 𑀲𑀫𑀗𑁆𑀕𑀻𑀪𑀽𑀢𑁄. 𑀢𑁂𑀦𑀸𑀳 ‘‘𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀅𑀢𑁆𑀢𑀦𑀸 𑀓𑀢𑀲𑁆𑀲 𑀅𑀲𑀸𑀭𑀼𑀧𑁆𑀧𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀆𑀭𑀜𑁆𑀜𑀓𑁄 𑀯𑀺𑀬 𑀳𑀼𑀢𑁆𑀯𑀸. 𑀢𑀲𑁆𑀲 𑀧𑀭𑀺𑀳𑀸𑀭𑀦𑁆𑀢𑀺 𑀉𑀴𑀸𑀭𑁂𑀳𑀺 𑀧𑀽𑀚𑀸𑀲𑀓𑁆𑀓𑀸𑀭𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀢𑀲𑁆𑀲 𑀧𑀭𑀺𑀳𑀭𑀺𑀬𑀫𑀸𑀦𑀢𑀁. 𑀅𑀢𑀺𑀤𑀧𑁆𑀧𑀺𑀢𑁄𑀢𑀺 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀲𑀫𑁆𑀪𑀸𑀯𑀦𑀸𑀬 𑀅𑀢𑀺𑀯𑀺𑀬 𑀤𑀢𑁆𑀢𑁄 𑀕𑀩𑁆𑀩𑀺𑀢𑁄.

𑀦 𑀇𑀢𑁆𑀢𑀭𑀲𑀫𑀸𑀧𑀦𑁆𑀦𑁄𑀢𑀺 𑀚𑀸𑀦𑀸𑀢𑀺. 𑀓𑀲𑁆𑀫𑀸? 𑀲𑀻𑀮𑀁 𑀦𑀸𑀫 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀚𑀸𑀦𑀺𑀢𑀩𑁆𑀩𑀁, 𑀦 𑀇𑀢𑁆𑀢𑀭𑁂𑀦. 𑀇𑀤𑀸𑀦𑀺 𑀅𑀦𑁂𑀓𑀚𑀸𑀢𑀺𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀢𑀣𑀸𑀕𑀢𑁄 𑀇𑀫𑀁 𑀓𑀼𑀲𑀮𑀁 𑀥𑀫𑁆𑀫𑀁 𑀤𑀻𑀖𑀭𑀢𑁆𑀢𑀁 𑀲𑀫𑀸𑀧𑀦𑁆𑀦𑁄, 𑀢𑀜𑁆𑀘𑀲𑁆𑀲 𑀅𑀢𑀺𑀯𑀺𑀬 𑀅𑀘𑁆𑀙𑀭𑀺𑀬𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀘𑁆𑀙𑀭𑀺𑀬𑀁 𑀘𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀭𑀜𑁆𑀜𑀕𑀸𑀫𑀓𑁂𑀢𑀺 𑀅𑀭𑀜𑁆𑀜𑀧𑀤𑁂𑀲𑁂 𑀏𑀓𑀲𑁆𑀫𑀺𑀁 𑀔𑀼𑀤𑁆𑀤𑀓𑀕𑀸𑀫𑁂. 𑀢𑀢𑁆𑀣 𑀦𑁂𑀲𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀺𑀡𑁆𑀟𑀸𑀬 𑀘𑀭𑀡𑀲𑁆𑀲 𑀅𑀯𑀺𑀘𑁆𑀙𑀺𑀦𑁆𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀺𑀯𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀤𑀼𑀮𑁆𑀮𑀪𑀮𑁄𑀡𑁄 𑀳𑁄𑀢𑀺 𑀲𑀫𑀼𑀤𑁆𑀤𑀲𑁆𑀲 𑀤𑀽𑀭𑀢𑀸𑀬.

𑀢𑀤𑀸 𑀓𑀺𑀭 𑀯𑀺𑀤𑁂𑀳𑀭𑀝𑁆𑀞𑁂 𑀲𑁄𑀴𑀲 𑀕𑀸𑀫𑀲𑀳𑀲𑁆𑀲𑀸𑀦𑀺 𑀫𑀳𑀦𑁆𑀢𑀸𑀦𑁂𑀯. 𑀢𑁂𑀦𑀸𑀳 𑁋 ‘‘𑀳𑀺𑀢𑁆𑀯𑀸 𑀕𑀸𑀫𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑁄𑀴𑀲𑀸’’𑀢𑀺. 𑀇𑀤𑀸𑀦𑀺 𑀓𑀲𑁆𑀫𑀸 ‘‘𑀲𑀦𑁆𑀦𑀺𑀥𑀺𑀁 𑀤𑀸𑀦𑀺 𑀓𑀼𑀩𑁆𑀩𑀲𑀻’’𑀢𑀺 𑀫𑀁 𑀖𑀝𑁆𑀝𑁂𑀣𑀸𑀢𑀺 𑀯𑀢𑁆𑀣𑀼𑀓𑀸𑀫𑁄 𑀢𑀁 𑀅𑀦𑀸𑀯𑀺𑀓𑀢𑁆𑀯𑀸 ‘‘𑀮𑁄𑀡…𑀧𑁂… 𑀦 𑀓𑀭𑁄𑀣𑀸’’𑀢𑀺 𑀆𑀳. 𑀕𑀦𑁆𑀥𑀸𑀭𑁄 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀢𑀼𑀓𑀸𑀫𑁄 ‘‘𑀓𑀺𑀁 𑀫𑀬𑀸 𑀓𑀢𑀁 𑀯𑁂𑀤𑁂𑀳𑀻𑀲𑀻’’𑀢𑀺 𑀆𑀳.

𑀇𑀢𑀭𑁄 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀳𑀺𑀢𑁆𑀯𑀸’’𑀢𑀺 𑀕𑀸𑀣𑀫𑀸𑀳. 𑀇𑀢𑀭𑁄 ‘‘𑀥𑀫𑁆𑀫𑀁 𑀪𑀡𑀸𑀫𑀻’’𑀢𑀺 𑀕𑀸𑀣𑀦𑁆𑀢𑀺 𑀏𑀯𑀁 𑀲𑀩𑁆𑀩𑀸𑀧𑀺 𑀦𑁂𑀲𑀁 𑀯𑀘𑀦𑀧𑀝𑀺𑀯𑀘𑀦𑀕𑀸𑀣𑀸. 𑀢𑀢𑁆𑀣 𑀧𑀲𑀸𑀲𑀲𑀻𑀢𑀺 𑀖𑀝𑁆𑀝𑁂𑀦𑁆𑀢𑁄 𑀯𑀺𑀬 𑀅𑀦𑀼𑀲𑀸𑀲𑀲𑀺. 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀺 𑀘𑀺𑀢𑁆𑀢𑀧𑁆𑀧𑀓𑁄𑀧𑀸𑀪𑀸𑀯𑀢𑁄. 𑀫𑀳𑀢𑁆𑀣𑀺𑀬𑀦𑁆𑀢𑀺 𑀫𑀳𑀸𑀅𑀢𑁆𑀣𑀲𑀁𑀳𑀺𑀢𑀁. 𑀦𑁄 𑀘𑁂 𑀅𑀲𑁆𑀲 𑀲𑀓𑀸 𑀩𑀼𑀤𑁆𑀥𑀻𑀢𑀺𑀆𑀤𑀺 𑀯𑁂𑀤𑁂𑀳𑀇𑀲𑀺𑀦𑁄 𑁋 ‘‘𑀆𑀘𑀭𑀺𑀬𑁄 𑀫𑀫 𑀳𑀺𑀢𑁂𑀲𑀺𑀢𑀸𑀬 𑀞𑀢𑁆𑀯𑀸 𑀥𑀫𑁆𑀫𑀁 𑀏𑀯 𑀪𑀡𑀢𑀻’’𑀢𑀺 𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸’’𑀢𑀺𑀆𑀤𑀺.

‘‘𑀜𑀢𑁆𑀢𑀸’’𑀢𑀺 𑀮𑁄𑀓𑁂 𑀜𑀸𑀬𑀢𑀺 𑀯𑀺𑀲𑁆𑀲𑀼𑀢𑁄𑀢𑀺 𑀜𑀸𑀢𑁄, 𑀜𑀸𑀢𑀲𑁆𑀲 𑀪𑀸𑀯𑁄 𑀜𑀢𑁆𑀢𑀁. 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀉𑀧𑀕𑀢𑁄. 𑀜𑀢𑁆𑀢-𑀕𑁆𑀕𑀳𑀡𑁂𑀦 𑀧𑀢𑁆𑀣𑀝𑀬𑀲𑀢𑀸 𑀯𑀺𑀪𑀸𑀯𑀺𑀢𑀸𑀢𑀺 𑀆𑀳 ‘‘𑀬𑀲𑀜𑁆𑀘 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺’’𑀦𑁆𑀢𑀺. 𑀓𑀺𑀦𑁆𑀢𑀺 𑀓𑀺𑀁𑀧𑀬𑁄𑀚𑀦𑀁, 𑀓𑁄 𑀏𑀢𑁆𑀣 𑀤𑁄𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁆𑀣 𑀢𑀢𑁆𑀣 𑀯𑀺𑀚𑁆𑀛𑀦𑁆𑀢𑁄𑀢𑀺 𑀬𑀲𑀫𑀤𑁂𑀦 𑀧𑀭𑀺𑀯𑀸𑀭𑀫𑀤𑁂𑀦 𑀘 𑀫𑀢𑁆𑀢𑁄 𑀳𑀼𑀢𑁆𑀯𑀸 𑀕𑀸𑀫𑁂𑀧𑀺 𑀯𑀺𑀳𑀸𑀭𑁂𑀧𑀺 𑀚𑀦𑀯𑀺𑀯𑀺𑀢𑁆𑀢𑁂𑀧𑀺 𑀲𑀗𑁆𑀖𑀫𑀚𑁆𑀛𑁂𑀧𑀺 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀖𑀝𑁆𑀝𑁂𑀦𑁆𑀢𑁄 ‘‘𑀫𑀬𑁆𑀳𑀁 𑀦𑀸𑀫 𑀧𑀸𑀤𑀸 𑀇𑀢𑀭𑁂𑀲𑀁 𑀧𑀸𑀤𑀨𑀼𑀲𑀦𑀝𑁆𑀞𑀸𑀦𑀁 𑀨𑀼𑀲𑀦𑁆𑀢𑀻’’𑀢𑀺 𑀅𑀨𑀼𑀲𑀺𑀢𑀼𑀓𑀸𑀫𑀢𑀸𑀬 𑀅𑀕𑁆𑀕𑀧𑀸𑀤𑁂𑀦 𑀪𑀽𑀫𑀺𑀁 𑀨𑀼𑀲𑀦𑁆𑀢𑁄 𑀯𑀺𑀬 𑀘𑀭𑀢𑀺. 𑀑𑀦𑀫𑀢𑀻𑀢𑀺 𑀦𑀺𑀯𑀸𑀢𑀯𑀼𑀢𑁆𑀢𑀺𑀢𑀸𑀬 𑀅𑀯𑀦𑀫𑀢𑀺 𑀅𑀦𑀼𑀤𑁆𑀥𑀢𑁄 𑀅𑀢𑁆𑀣𑀤𑁆𑀥𑁄 𑀳𑁄𑀢𑀺. 𑀅𑀓𑀺𑀜𑁆𑀘𑀦𑀪𑀸𑀯𑀦𑁆𑀢𑀺 ‘‘𑀧𑀩𑁆𑀩𑀚𑀺𑀢𑁂𑀦 𑀦𑀸𑀫 𑀅𑀓𑀺𑀜𑁆𑀘𑀦𑀜𑀸𑀡𑁂𑀦 𑀲𑀫𑀧𑀭𑀺𑀕𑁆𑀕𑀳𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀅𑀓𑀺𑀜𑁆𑀘𑀦𑀚𑁆𑀛𑀸𑀲𑀬𑀁 𑀧𑀝𑀺𑀅𑀯𑁂𑀓𑁆𑀔𑀺𑀢𑁆𑀯𑀸. 𑀮𑀸𑀪𑁂𑀧𑀺 𑀢𑀸𑀤𑀻, 𑀅𑀮𑀸𑀪𑁂𑀧𑀺 𑀢𑀸𑀤𑀻𑀢𑀺 𑀬𑀣𑀸 𑀅𑀮𑀸𑀪𑀓𑀸𑀮𑁂 𑀮𑀸𑀪𑀲𑁆𑀲 𑀮𑀤𑁆𑀥𑀓𑀸𑀮𑁂𑀧𑀺 𑀢𑀣𑁂𑀯𑀸𑀢𑀺 𑀢𑀸𑀤𑀻 𑀏𑀓𑀲𑀤𑀺𑀲𑁄. 𑀬𑀲𑁂 𑀲𑀢𑀺𑀧𑀺 𑀫𑀳𑀸𑀧𑀭𑀺𑀯𑀸𑀭𑀓𑀸𑀮𑁂𑀧𑀺.

𑀅𑀪𑀬𑁄 𑀳𑀼𑀢𑁆𑀯𑀸 𑀉𑀧𑀭𑀢𑁄𑀢𑀺 𑀦𑀺𑀩𑁆𑀪𑀬𑁄 𑀳𑀼𑀢𑁆𑀯𑀸 𑀪𑀬𑀲𑁆𑀲 𑀅𑀪𑀸𑀯𑁂𑀦𑁂𑀯 𑀑𑀭𑀫𑀺𑀢𑀩𑁆𑀩𑀢𑁄 𑀉𑀧𑀭𑀢𑁄 𑀪𑀬𑀳𑁂𑀢𑀽𑀦𑀁 𑀧𑀳𑀻𑀦𑀢𑁆𑀢𑀸. 𑀢𑀜𑁆𑀘 𑀔𑁄 𑀦 𑀓𑀢𑀺𑀧𑀬𑀓𑀸𑀮𑀁, 𑀅𑀣 𑀔𑁄 𑀅𑀘𑁆𑀘𑀦𑁆𑀢𑀫𑁂𑀯 𑀉𑀧𑀭𑀢𑁄𑀢𑀺 𑀅𑀘𑁆𑀘𑀦𑁆𑀢𑀽𑀧𑀭𑀢𑁄. 𑀅𑀣 𑀔𑁄 𑀪𑀸𑀬𑀺𑀢𑀩𑁆𑀩𑀯𑀢𑁆𑀣𑀼𑀁 𑀅𑀯𑁂𑀓𑁆𑀔𑀺𑀢𑁆𑀯𑀸 𑀢𑀢𑁄 𑀪𑀬𑁂𑀦 𑀉𑀧𑀭𑀢𑁄. 𑀓𑀺𑀮𑁂𑀲𑀸 𑀏𑀯 𑀪𑀸𑀬𑀺𑀢𑀩𑁆𑀩𑀢𑁄 𑀓𑀺𑀮𑁂𑀲𑀪𑀬𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀢𑁆𑀢 𑀲𑁂𑀓𑁆𑀔𑀸𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸𑀧𑀺 𑀪𑀬𑀽𑀧𑀭𑀢𑀸, 𑀧𑀕𑁂𑀯 𑀧𑀼𑀣𑀼𑀚𑁆𑀚𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀣𑀡𑁆𑀟𑀺𑀮𑀧𑀻𑀞𑀓𑀦𑁆𑀢𑀺 𑀣𑀡𑁆𑀟𑀺𑀮𑀫𑀜𑁆𑀘𑀲𑀤𑀺𑀲𑀁 𑀧𑀻𑀞𑀓𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀸𑀬𑀸𑀢𑀺 𑀅𑀧𑀲𑁆𑀲𑀸𑀬 𑀢𑀁 𑀅𑀧𑀲𑁆𑀲𑀸𑀬𑀁 𑀓𑀢𑁆𑀯𑀸. 𑀤𑁆𑀯𑀺𑀦𑁆𑀦𑀁 𑀫𑀚𑁆𑀛𑁂 𑀣𑀡𑁆𑀟𑀺𑀮𑀧𑀻𑀞𑀓𑀸 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀦𑁂𑀯𑀸𑀲𑀺𑀓𑀪𑀺𑀓𑁆𑀔𑀼𑀲𑁆𑀲 𑀦 𑀧𑀜𑁆𑀜𑀸𑀬𑀺. 𑀅𑀲𑀜𑁆𑀜𑀢𑀦𑀻𑀳𑀸𑀭𑁂𑀦𑀸𑀢𑀺 𑀦 𑀲𑀜𑁆𑀜𑀢𑀸𑀓𑀸𑀭𑁂𑀦. ‘‘𑀫𑀁 𑀪𑀸𑀬𑀦𑁆𑀢𑁄 𑀳𑁂𑀝𑁆𑀞𑀸𑀫𑀜𑁆𑀘𑀁 𑀧𑀯𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀳𑁂𑀝𑁆𑀞𑀸𑀫𑀜𑁆𑀘𑀁 𑀑𑀮𑁄𑀓𑁂𑀢𑁆𑀯𑀸. 𑀉𑀓𑁆𑀓𑀸𑀲𑀺 ‘‘𑀩𑀳𑀺 𑀕𑀘𑁆𑀙𑀦𑁆𑀢𑁄 𑀅𑀓𑁆𑀓𑁄𑀲𑀺𑀢𑁆𑀯𑀸 𑀫𑀸 𑀅𑀧𑀼𑀜𑁆𑀜𑀁 𑀧𑀲𑀯𑀻’’𑀢𑀺. 𑀅𑀥𑀺𑀯𑀸𑀲𑁂𑀢𑀼𑀦𑁆𑀢𑀺 𑀢𑀸𑀤𑀺𑀲𑀁 𑀇𑀤𑁆𑀥𑀸𑀦𑀪𑀸𑀯𑀁 𑀤𑀺𑀲𑁆𑀯𑀸𑀧𑀺 𑀧𑀝𑀧𑀝𑀸𑀬𑀦𑁆𑀢𑁄 𑀅𑀢𑁆𑀢𑀦𑁄 𑀓𑁄𑀥𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄.

𑀔𑀬𑁂𑀦𑁂𑀯𑀸𑀢𑀺 𑀭𑀸𑀕𑀲𑁆𑀲 𑀅𑀘𑁆𑀘𑀦𑁆𑀢𑀓𑁆𑀔𑀬𑁂𑀦𑁂𑀯 𑀯𑀻𑀢𑀭𑀸𑀕𑀢𑁆𑀢𑀸. 𑀦 𑀧𑀝𑀺𑀲𑀗𑁆𑀔𑀸𑀬 𑀯𑀸𑀭𑁂𑀢𑁆𑀯𑀸𑀢𑀺 𑀦 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀁 𑀦𑀺𑀯𑀸𑀭𑁂𑀢𑁆𑀯𑀸 𑀯𑀻𑀢𑀭𑀸𑀕𑀢𑁆𑀢𑀸. 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀓𑀸𑀬𑀲𑀫𑀸𑀘𑀸𑀭𑀸𑀤𑀻𑀦𑀁 𑀲𑀁𑀓𑀺𑀮𑀺𑀝𑁆𑀞𑀸𑀦𑀁 𑀯𑀻𑀢𑀺𑀓𑁆𑀓𑀫𑀺𑀬𑀸𑀦𑀜𑁆𑀘 𑀅𑀪𑀸𑀯𑀁 𑀆𑀘𑀸𑀭𑀲𑁆𑀲 𑀯𑁄𑀤𑀸𑀦𑀁 𑀘𑀺𑀭𑀓𑀸𑀮𑀲𑀫𑀸𑀘𑀺𑀡𑁆𑀡𑀢𑀸𑀬 𑀜𑀸𑀢𑀲𑁆𑀲 𑀲𑀳𑀺𑀢𑀪𑀸𑀯𑁂𑀧𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬 𑀅𑀪𑀬𑀽𑀧𑀭𑀢𑀪𑀸𑀯𑀲𑀫𑀦𑁆𑀦𑁂𑀲𑀦𑀸𑀬 𑀆𑀓𑀭𑀻𑀬𑀢𑀺 𑀜𑀸𑀧𑁂𑀢𑀼𑀁 𑀇𑀘𑁆𑀙𑀺𑀢𑁄 𑀅𑀢𑁆𑀣𑁄 𑀧𑀓𑀸𑀭𑀢𑁄 𑀜𑀸𑀧𑀻𑀬𑀢𑀺 𑀏𑀢𑁂𑀳𑀻𑀢𑀺 𑀆𑀓𑀸𑀭𑀸, 𑀉𑀧𑀧𑀢𑁆𑀢𑀺𑀲𑀸𑀥𑀦𑀓𑀸𑀭𑀡𑀸𑀦𑀺. 𑀢𑀸𑀦𑀺 𑀧𑀦 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀬𑀣𑀸𑀦𑀼𑀫𑀢𑀲𑁆𑀲 𑀅𑀢𑁆𑀣𑀲𑁆𑀲 𑀜𑀸𑀧𑀓𑀪𑀸𑀯𑁂𑀦 𑀯𑀯𑀢𑁆𑀣𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀢𑁂𑀲𑀁 𑀫𑀽𑀮𑀓𑀸𑀭𑀡𑀪𑀽𑀢𑀸𑀦𑀺 𑀅𑀦𑀼𑀫𑀸𑀦𑀜𑀸𑀡𑀸𑀦𑀺 𑀘 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑁋 ‘‘𑀓𑁂 𑀧𑀦𑀸𑀬𑀲𑁆𑀫𑀢𑁄 𑀆𑀓𑀸𑀭𑀸 𑀓𑁂 𑀅𑀦𑁆𑀯𑀬𑀸’’𑀢𑀺 𑀅𑀯𑁄𑀘𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀆𑀓𑀸𑀭𑀸𑀢𑀺 𑀓𑀸𑀭𑀡𑀸𑀦𑀺, 𑀅𑀦𑁆𑀯𑀬𑀸𑀢𑀺 𑀅𑀦𑀼𑀩𑀼𑀤𑁆𑀥𑀺𑀬𑁄’’𑀢𑀺 𑀆𑀳. 𑀬𑀣𑀸 𑀳𑀺 𑀮𑁄𑀓𑁂 𑀤𑀺𑀝𑁆𑀞𑁂𑀦 𑀥𑀽𑀫𑁂𑀦 𑀅𑀤𑀺𑀝𑁆𑀞𑀁 𑀅𑀕𑁆𑀕𑀺𑀁 𑀅𑀦𑁆𑀯𑁂𑀢𑀺 𑀅𑀦𑀼𑀫𑀸𑀦𑀢𑁄 𑀚𑀸𑀦𑀸𑀢𑀺, 𑀏𑀯𑀁 𑀯𑀻𑀫𑀁𑀲𑀓𑁄 𑀪𑀺𑀓𑁆𑀔𑀼 𑁋 ‘‘𑀪𑀕𑀯𑀸 𑀏𑀓𑁂𑀓𑀯𑀺𑀳𑀸𑀭𑁂𑀲𑀼 𑀲𑀼𑀧𑁆𑀧𑀝𑀺𑀧𑀦𑁆𑀦𑁂𑀲𑀼 𑀤𑀼𑀧𑁆𑀧𑀝𑀺𑀧𑀦𑁆𑀦𑁂𑀲𑀼 𑀘 𑀬𑀣𑀸 𑀏𑀓𑀲𑀤𑀺𑀲𑀢𑀸𑀤𑀲𑁆𑀲𑀦𑁂𑀦 𑀅𑀪𑀬𑀽𑀧𑀭𑀢𑀢𑀁 𑀅𑀦𑁆𑀯𑁂𑀢𑀺 𑀅𑀦𑀼𑀫𑀸𑀦𑀢𑁄 𑀚𑀸𑀦𑀸𑀢𑀺, 𑀲𑀼𑀧𑁆𑀧𑀝𑀺𑀧𑀦𑁆𑀦𑀤𑀼𑀧𑁆𑀧𑀝𑀺𑀧𑀦𑁆𑀦𑀧𑀼𑀕𑁆𑀕𑀮𑁂𑀲𑀼 𑀅𑀦𑀼𑀲𑁆𑀲𑀸𑀤𑀦𑀸𑀦𑀧𑀲𑀸𑀤𑀦𑀧𑁆𑀧𑀢𑁆𑀢𑀸𑀬 𑀲𑀢𑁆𑀣𑀼 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀜𑁆𑀘 𑀅𑀦𑁆𑀯𑁂𑀢𑀺 𑀅𑀦𑀼𑀫𑀸𑀦𑀢𑁄 𑀚𑀸𑀦𑀸𑀢𑀺, 𑀏𑀯𑀁 𑀚𑀸𑀦𑀦𑁆𑀢𑁄 𑀘 𑀅𑀪𑀬𑀽𑀧𑀭𑀢𑁄 𑀢𑀣𑀸𑀕𑀢𑁄 𑀲𑀩𑁆𑀩𑀥𑀺 𑀯𑀻𑀢𑀭𑀸𑀕𑀢𑁆𑀢𑀸, 𑀬𑁄 𑀬𑀢𑁆𑀣 𑀯𑀻𑀢𑀭𑀸𑀕𑁄, 𑀦 𑀲𑁄 𑀢𑀦𑁆𑀦𑀺𑀫𑀺𑀢𑁆𑀢𑀁 𑀓𑀺𑀜𑁆𑀘𑀺 𑀪𑀬𑀁 𑀧𑀲𑁆𑀲𑀢𑀺 𑀲𑁂𑀬𑁆𑀬𑀣𑀸𑀧𑀺 𑀩𑁆𑀭𑀳𑁆𑀫𑀸 𑀓𑀸𑀫𑀪𑀯𑀦𑀺𑀫𑀺𑀢𑁆𑀢𑀁, 𑀢𑀣𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀢𑁆𑀢𑀸, 𑀲𑁆𑀯𑀸𑀔𑀸𑀢𑁄 𑀥𑀫𑁆𑀫𑁄 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀢𑁆𑀢𑀸’’𑀢𑀺 𑀯𑀢𑁆𑀣𑀼𑀢𑁆𑀢𑀬𑀁 𑀕𑀼𑀡𑀢𑁄 𑀬𑀸𑀣𑀸𑀯𑀢𑁄 𑀚𑀸𑀦𑀸𑀢𑀺.

𑀕𑀡𑀩𑀦𑁆𑀥𑀦𑁂𑀦𑀸𑀢𑀺 ‘‘𑀫𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀫𑀫 𑀅𑀦𑁆𑀢𑁂𑀯𑀸𑀲𑀺𑀓𑀸’’𑀢𑀺 𑀏𑀯𑀁 𑀕𑀡𑁂 𑀅𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑁂𑀦 𑀩𑀦𑁆𑀥𑀦𑁂𑀦 𑀩𑀤𑁆𑀥𑀸 𑀧𑀬𑀼𑀢𑁆𑀢𑀸. 𑀢𑀸𑀬 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 ‘‘𑀲𑀼𑀕𑀢𑀸 𑀤𑀼𑀕𑁆𑀕𑀢𑀸’’𑀢𑀺 𑀯𑀼𑀢𑁆𑀢𑀸𑀬 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀤𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀘. 𑀉𑀲𑁆𑀲𑀸𑀤𑀦𑀸𑀢𑀺 𑀕𑀼𑀡𑀯𑀲𑁂𑀦 𑀉𑀓𑁆𑀓𑀁𑀲𑀦𑀸. 𑀅𑀧𑀲𑀸𑀤𑀦𑀸𑀢𑀺 𑀳𑀻𑀴𑀦𑀸. 𑀉𑀪𑀬𑀢𑁆𑀣 𑀕𑁂𑀳𑀲𑁆𑀲𑀺𑀢𑀯𑀲𑁂𑀦𑀸𑀢𑀺 𑀇𑀫𑀺𑀦𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑁂𑀲𑀁 𑀉𑀬𑁆𑀬𑁄𑀚𑀦𑀢𑁆𑀣𑀁 𑁋 ‘‘𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁦𑁫; 𑁩.𑁨𑁮𑁫, 𑁩𑁨𑁨) 𑀕𑀼𑀡𑀢𑁄 𑀉𑀓𑁆𑀓𑀁𑀲𑀦𑀫𑁆𑀧𑀺 𑀆𑀬𑀢𑀺𑀁 𑀲𑀁𑀯𑀭𑀸𑀬 𑀬𑀣𑀸𑀧𑀭𑀸𑀥𑀁 𑀕𑀭𑀳𑀡𑀫𑁆𑀧𑀺 𑀦 𑀦𑀺𑀯𑀸𑀭𑁂𑀢𑀺.

𑁪𑁮𑁯. 𑀯𑀻𑀫𑀁𑀲𑀓𑀲𑁆𑀲𑀧𑀺 𑀅𑀥𑀺𑀧𑁆𑀧𑀸𑀬𑁄 𑀯𑀻𑀫𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑁄. 𑀫𑀽𑀮𑀯𑀻𑀫𑀁𑀲𑀓𑁄 𑀳𑁂𑀢𑀼𑀯𑀸𑀤𑀺𑀢𑀸𑀬. 𑀕𑀡𑁆𑀞𑀺𑀯𑀻𑀫𑀁𑀲𑀓𑀲𑁆𑀲 𑀅𑀦𑀼𑀲𑁆𑀲𑀼𑀢𑀺𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀧𑀭𑀲𑁆𑀲𑁂𑀯 𑀓𑀣𑀸𑀬 𑀦𑀺𑀝𑁆𑀞𑀗𑁆𑀕𑀢𑁄’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀧𑀭𑀲𑁆𑀲 𑀘𑁂𑀢𑁄𑀧𑀭𑀺𑀬𑀸𑀬𑀁 𑀅𑀚𑀸𑀦𑀦𑁆𑀢𑁂𑀦𑀸’’𑀢𑀺. 𑀢𑀣𑀸𑀕𑀢𑁄𑀯 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀲𑀸𑀥𑀸𑀭𑀡𑀢𑁄 𑀯𑀼𑀢𑁆𑀢𑀁 𑀅𑀦𑀼𑀫𑀸𑀦𑀁 𑀉𑀓𑁆𑀓𑀁𑀲𑀁 𑀧𑀸𑀧𑁂𑀢𑁆𑀯𑀸 𑀯𑀤𑀢𑀺. 𑀉𑀓𑁆𑀓𑀁𑀲𑀕𑀢𑀜𑁆𑀳𑁂𑀢𑀁 𑀅𑀦𑀼𑀫𑀸𑀦𑀁, 𑀬𑀤𑀺𑀤𑀁 𑀲𑀩𑁆𑀩𑀜𑁆𑀜𑀼𑀯𑀘𑀦𑀁 𑀅𑀯𑀺𑀲𑀁𑀯𑀸𑀤𑀁 𑀲𑀸𑀫𑀜𑁆𑀜𑀢𑁄 𑀅𑀧𑀼𑀣𑀼𑀚𑁆𑀚𑀦𑀕𑁄𑀘𑀭𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑀼𑀫𑀸𑀦𑀢𑁄. 𑀢𑀺𑀯𑀺𑀥𑁄 𑀳𑀺 𑀅𑀢𑁆𑀣𑁄, 𑀓𑁄𑀘𑀺 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁄, 𑀬𑁄 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀧𑀘𑁆𑀘𑀢𑁆𑀢𑀯𑁂𑀤𑀦𑀺𑀬𑁄 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀓𑀸𑀭𑁄. 𑀓𑁄𑀘𑀺 𑀅𑀦𑀼𑀫𑀸𑀦𑀲𑀺𑀤𑁆𑀥𑁄, 𑀬𑁄 𑀖𑀝𑀸𑀤𑀻𑀲𑀼 𑀧𑀲𑀺𑀤𑁆𑀥𑁂𑀦 𑀧𑀘𑁆𑀘𑀬𑀸𑀬𑀢𑁆𑀢𑀪𑀸𑀯𑁂𑀦 𑀲𑀸𑀥𑀺𑀬𑀫𑀸𑀦𑁄 𑀲𑀤𑁆𑀤𑀸𑀤𑀻𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀆𑀓𑀸𑀭𑁄. 𑀓𑁄𑀘𑀺 𑀑𑀓𑀧𑁆𑀧𑀦𑀲𑀺𑀤𑁆𑀥𑁄, 𑀬𑁄 𑀧𑀘𑀼𑀭𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀫𑀤𑀺𑀝𑁆𑀞𑁄 𑀲𑀤𑁆𑀥𑀸𑀯𑀺𑀲𑀬𑁄 𑀧𑀭𑀮𑁄𑀓𑀦𑀺𑀩𑁆𑀩𑀸𑀦𑀸𑀤𑀺. 𑀢𑀢𑁆𑀣 𑀬𑀲𑁆𑀲 𑀲𑀢𑁆𑀣𑀼𑀦𑁄 𑀯𑀘𑀦𑀁 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁂 𑀅𑀦𑀼𑀫𑀸𑀦𑀲𑀺𑀤𑁆𑀥𑁂 𑀘 𑀅𑀢𑁆𑀣𑁂 𑀦 𑀯𑀺𑀲𑀁𑀯𑀸𑀤𑁂𑀢𑀺 𑀅𑀯𑀺𑀧𑀭𑀻𑀢𑀧𑁆𑀧𑀯𑀢𑁆𑀢𑀺𑀬𑀸, 𑀢𑀲𑁆𑀲 𑀯𑀘𑀦𑁂𑀦 𑀲𑀤𑁆𑀥𑁂𑀬𑁆𑀬𑀢𑁆𑀣𑀲𑀺𑀤𑁆𑀥𑀺, 𑀲𑀤𑁆𑀥𑁂𑀬𑁆𑀬𑀭𑀽𑀧𑀸 𑀏𑀯 𑀘 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀣𑀼𑀕𑀼𑀡𑀸 𑀅𑀘𑁆𑀘𑀦𑁆𑀢𑀲𑀫𑁆𑀪𑀯𑀢𑁄.

𑀏𑀲 𑀫𑀬𑁆𑀳𑀁 𑀧𑀣𑁄𑀢𑀺 𑀬𑁆𑀯𑀸𑀬𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀲𑀗𑁆𑀔𑀸𑀢𑁄 𑀫𑀬𑁆𑀳𑀁 𑀑𑀭𑀫𑀢𑁆𑀢𑀓𑁄 𑀕𑀼𑀡𑁄, 𑀏𑀲 𑀅𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑁄 𑀯𑀻𑀫𑀁𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀫 𑀚𑀸𑀦𑀦𑀧𑀣𑁄 𑀚𑀸𑀦𑀦𑀫𑀕𑁆𑀕𑁄. 𑀏𑀲 𑀕𑁄𑀘𑀭𑁄𑀢𑀺 𑀏𑀲𑁄 𑀏𑀢𑁆𑀢𑀓𑁄 𑀏𑀯 𑀢𑀲𑁆𑀲 𑀫𑀬𑀺 𑀕𑁄𑀘𑀭𑁄, 𑀦 𑀇𑀢𑁄 𑀧𑀭𑀁. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀚𑀸𑀮𑁂𑀧𑀺 (𑀤𑀻. 𑀦𑀺. 𑁧.𑁭) 𑀪𑀕𑀯𑀢𑀸 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀫𑁂𑀯 𑀦𑀺𑀤𑁆𑀤𑀺𑀝𑁆𑀞𑀁. 𑀏𑀢𑀸𑀧𑀸𑀣𑁄𑀢𑀺 𑀏𑀢𑁆𑀢𑀓𑀸𑀧𑀸𑀣𑁄. 𑀬𑁄 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁄 ‘‘𑀏𑀢𑀁 𑀫𑀫𑀸’’𑀢𑀺, ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 𑀢𑀡𑁆𑀳𑀸𑀬 𑀧𑀭𑀸𑀫𑀲𑀦𑁆𑀢𑁄, 𑀢𑀲𑁆𑀲 𑀯𑀺𑀲𑁂𑀲𑀪𑀸𑀕𑀺𑀬𑀢𑀸𑀬, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑀸𑀬 𑀯𑀸 𑀅𑀓𑀸𑀭𑀡𑁂𑀦 𑀢𑀡𑁆𑀳𑀁 𑀅𑀦𑀢𑀺𑀯𑀢𑁆𑀢𑀦𑀢𑁄 𑀲𑁄 𑀢𑀫𑁆𑀫𑀬𑁄 𑀦𑀸𑀫. 𑀢𑁂𑀦𑀸𑀳 ‘‘𑀦 𑀢𑀫𑁆𑀫𑀬𑁄 𑀦 𑀲𑀢𑀡𑁆𑀳𑁄’’𑀢𑀺𑀆𑀤𑀺.

𑀲𑀼𑀢𑀲𑁆𑀲 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀸𑀯𑀳𑀪𑀸𑀯𑁂𑀦 𑀉𑀢𑁆𑀢𑀭𑀼𑀢𑁆𑀢𑀭𑀜𑁆𑀘𑁂𑀯 𑀢𑀲𑁆𑀲 𑀘 𑀯𑀺𑀲𑁂𑀲𑀲𑁆𑀲 𑀅𑀦𑀼𑀓𑁆𑀓𑀫𑁂𑀦 𑀧𑀡𑀻𑀢𑀢𑀭𑀪𑀸𑀯𑀢𑁄 𑀧𑀡𑀻𑀢𑀢𑀭𑀜𑁆𑀘 𑀓𑀢𑁆𑀯𑀸 𑀤𑁂𑀲𑁂𑀢𑀺. 𑀲𑀯𑀺𑀧𑀓𑁆𑀔𑀦𑁆𑀢𑀺 𑀧𑀳𑀸𑀢𑀩𑁆𑀩𑀧𑀳𑀸𑀬𑀓𑀪𑀸𑀯𑁂𑀦 𑀲𑀧𑁆𑀧𑀝𑀺𑀧𑀓𑁆𑀔𑀁. 𑀓𑀡𑁆𑀳𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀼𑀓𑁆𑀓𑀦𑁆𑀢𑀺 𑀇𑀤𑀁 𑀥𑀫𑁆𑀫𑀚𑀸𑀢𑀁 𑀓𑀡𑁆𑀳𑀁 𑀦𑀸𑀫, 𑀇𑀫𑀲𑁆𑀲 𑀧𑀳𑀸𑀬𑀓𑀁 𑀇𑀤𑀁 𑀲𑀼𑀓𑁆𑀓𑀁 𑀦𑀸𑀫𑀸𑀢𑀺 𑀏𑀯𑀁 𑀓𑀡𑁆𑀳𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀼𑀓𑁆𑀓𑀁. 𑀲𑀼𑀓𑁆𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀓𑀡𑁆𑀳𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀇𑀥 𑀧𑀦 ‘‘𑀇𑀫𑀺𑀦𑀸 𑀧𑀳𑀸𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀉𑀲𑁆𑀲𑀸𑀳𑀦𑁆𑀢𑀺 𑀲𑀩𑁆𑀬𑀸𑀧𑀸𑀭𑀁. 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀸𑀦𑀜𑁆𑀳𑀺 𑀅𑀦𑀼𑀧𑀘𑁆𑀙𑀺𑀦𑁆𑀦𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀸𑀦𑀸𑀤𑀺𑀓𑁂 𑀲𑀦𑁆𑀢𑀸𑀦𑁂 𑀲𑀩𑁆𑀬𑀸𑀧𑀸𑀭𑀢𑀸 𑀲𑀉𑀲𑁆𑀲𑀸𑀳𑀢𑀸, 𑀲𑀯𑀺𑀧𑀸𑀓𑀥𑀫𑁆𑀫𑀢𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀤𑁂𑀲𑀺𑀢𑁂 𑀥𑀫𑁆𑀫𑁂𑀢𑀺 𑀢𑀲𑁆𑀫𑀺𑀁 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂. 𑀏𑀓𑀘𑁆𑀘𑀁 𑀏𑀓𑀤𑁂𑀲𑀪𑀽𑀢𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀧𑀝𑀺𑀯𑁂𑀥𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸. 𑀧𑀝𑀺𑀯𑁂𑀥𑀥𑀫𑁆𑀫𑁂𑀦 𑀫𑀕𑁆𑀕𑁂𑀦. 𑀤𑁂𑀲𑀦𑀸𑀥𑀫𑁆𑀫𑁂𑀢𑀺 𑀤𑁂𑀲𑀦𑀸𑀭𑀼𑀴𑁆𑀳𑁂 𑀧𑀼𑀩𑁆𑀩𑀪𑀸𑀕𑀺𑀬𑁂 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀦𑀺𑀝𑁆𑀞𑀁 𑀕𑀘𑁆𑀙𑀢𑀺 𑁋 ‘‘𑀅𑀤𑁆𑀥𑀸 𑀇𑀫𑀸𑀬 𑀧𑀝𑀺𑀧𑀤𑀸𑀬 𑀚𑀭𑀸𑀫𑀭𑀡𑀢𑁄 𑀫𑀼𑀘𑁆𑀘𑀺𑀲𑁆𑀲𑀸𑀫𑀻’’𑀢𑀺. 𑀧𑀼𑀩𑁆𑀩𑁂 𑀧𑁄𑀣𑀼𑀚𑁆𑀚𑀦𑀺𑀓𑀲𑀤𑁆𑀥𑀸𑀬𑀧𑀺 𑀧𑀲𑀦𑁆𑀦𑁄, 𑀢𑀢𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸𑀢𑀺 𑀲𑀢𑁆𑀣𑀭𑀺 𑀧𑀲𑀻𑀤𑀢𑀺. 𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀏𑀯 𑀢𑀢𑁄 𑀦𑀺𑀬𑁆𑀬𑀸𑀦𑀸𑀯𑀳𑀢𑁆𑀢𑀸. 𑀯𑀗𑁆𑀓𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀜𑁆𑀜𑀁 𑀅𑀲𑀸𑀫𑀻𑀘𑀺𑀧𑀭𑀺𑀬𑀸𑀬𑀁 𑀲𑀩𑁆𑀩𑀁 𑀤𑁄𑀲𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁪𑁯𑁦. 𑀇𑀫𑁂𑀳𑀺 𑀲𑀢𑁆𑀣𑀼𑀯𑀻𑀫𑀁𑀲𑀦𑀓𑀸𑀭𑀡𑁂𑀳𑀻𑀢𑀺 ‘‘𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀢𑀸𑀤𑀻𑀳𑀺 𑀘𑁂𑀯 𑀉𑀢𑁆𑀢𑀭𑀼𑀢𑁆𑀢𑀭𑀺𑀧𑀡𑀻𑀢𑀧𑀡𑀻𑀢𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀸𑀳𑀺 𑀘𑀸’’𑀢𑀺 𑀇𑀫𑁂𑀳𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑀢𑁆𑀣𑀼𑀉𑀧𑀧𑀭𑀺𑀓𑁆𑀔𑀦𑀓𑀸𑀭𑀡𑁂𑀳𑀺. 𑀅𑀓𑁆𑀔𑀭𑀲𑀫𑁆𑀧𑀺𑀡𑁆𑀟𑀦𑀧𑀤𑁂𑀳𑀻𑀢𑀺 𑀢𑁂𑀲𑀁𑀬𑁂𑀯 𑀓𑀸𑀭𑀡𑀸𑀦𑀁 𑀲𑀫𑁆𑀩𑁄𑀥𑀦𑁂𑀳𑀺 𑀅𑀓𑁆𑀔𑀭𑀲𑀫𑀼𑀤𑀸𑀬𑀮𑀓𑁆𑀔𑀡𑁂𑀳𑀺 𑀧𑀤𑁂𑀳𑀺. 𑀇𑀥 𑀯𑀼𑀢𑁆𑀢𑁂𑀳𑀺 𑀅𑀓𑁆𑀔𑀭𑁂𑀳𑀻𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀳𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀪𑀺𑀩𑁆𑀬𑀜𑁆𑀚𑀦𑀢𑁄 𑀩𑁆𑀬𑀜𑁆𑀚𑀦𑀲𑀜𑁆𑀜𑀺𑀢𑁂𑀳𑀺 𑀅𑀓𑁆𑀔𑀭𑁂𑀳𑀺. 𑀑𑀓𑀧𑁆𑀧𑀦𑀸𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀧𑀲𑀻𑀤𑀦𑀢𑁄 𑀑𑀓𑀧𑁆𑀧𑀦𑀮𑀓𑁆𑀔𑀡𑀸. 𑀲𑀤𑁆𑀥𑀸𑀬 𑀫𑀽𑀮𑀁 𑀦𑀸𑀫𑀸𑀢𑀺 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀪𑀽𑀢𑀸𑀬 𑀲𑀤𑁆𑀥𑀸𑀬 𑀫𑀽𑀮𑀁 𑀦𑀸𑀫 𑀓𑀸𑀭𑀡𑀦𑁆𑀢𑀺 𑀲𑀤𑁆𑀤𑀳𑀦𑀲𑁆𑀲 𑀓𑀸𑀭𑀡𑀁 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀓𑀁. 𑀣𑀺𑀭𑀸 𑀧𑀝𑀺𑀧𑀓𑁆𑀔𑀲𑀫𑀼𑀘𑁆𑀙𑁂𑀤𑁂𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸. 𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀧𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸. 𑀇𑀢𑀭𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑀤𑁂𑀯𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀫𑀺𑀢𑀧𑀸𑀧𑀲𑀫𑀡𑁂𑀦 𑀯𑀸’’𑀢𑀺𑀆𑀤𑀺.

‘‘𑀩𑀼𑀤𑁆𑀥𑀸𑀦𑀁 𑀓𑁂𑀲𑀜𑁆𑀘𑀺 𑀲𑀸𑀯𑀓𑀸𑀦𑀜𑁆𑀘 𑀯𑀺𑀩𑀸𑀥𑀦𑀢𑁆𑀣𑀁 𑀫𑀸𑀭𑁄 𑀉𑀧𑀕𑀘𑁆𑀙𑀢𑀻’’𑀢𑀺 𑀲𑀼𑀢𑀧𑀼𑀩𑁆𑀩𑀢𑁆𑀢𑀸 ‘‘𑀅𑀬𑀁 𑀫𑀸𑀭𑁄 𑀆𑀕𑀢𑁄’’𑀢𑀺 𑀘𑀺𑀦𑁆𑀢𑁂𑀲𑀺. 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁂𑀦 𑀅𑀭𑀺𑀬𑀲𑀸𑀯𑀓𑁂𑀦 𑀧𑀼𑀘𑁆𑀙𑀺𑀢𑀢𑁆𑀢𑀸 𑀫𑀼𑀲𑀸𑀯𑀸𑀤𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀏𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀲𑀫𑀺𑀢𑀧𑀸𑀧𑀲𑀫𑀡𑀸𑀤𑀬𑁄 𑀞𑀧𑁂𑀢𑁆𑀯𑀸. 𑀲𑀪𑀸𑀯𑀲𑀫𑀦𑁆𑀦𑁂𑀲𑀦𑀸𑀢𑀺 𑀬𑀸𑀣𑀸𑀯𑀲𑀫𑀦𑁆𑀦𑁂𑀲𑀦𑀸 𑀅𑀯𑀺𑀧𑀭𑀻𑀢𑀯𑀻𑀫𑀁𑀲𑀸. 𑀲𑀪𑀸𑀯𑁂𑀦𑁂𑀯𑀸𑀢𑀺 𑀲𑀩𑁆𑀪𑀸𑀯𑁂𑀦𑁂𑀯 𑀬𑀣𑀸𑀪𑀽𑀢𑀕𑀼𑀡𑀢𑁄 𑀏𑀯. 𑀲𑀼𑀝𑁆𑀞𑀼 𑀲𑀫𑁆𑀫𑀤𑁂𑀯. 𑀲𑀫𑀦𑁆𑀦𑁂𑀲𑀺𑀢𑁄𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀯𑀻𑀫𑀁𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.