𑁬. 𑀫𑀳𑀸𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁩. 𑀏𑀯𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁄 𑀓𑀸𑀫𑁄 𑀓𑀸𑀫𑀦𑀁 𑀇𑀘𑁆𑀙𑀸 𑀏𑀢𑁂𑀲𑀦𑁆𑀢𑀺 𑀏𑀯𑀁𑀓𑀸𑀫𑀸. 𑀏𑀯𑀁 𑀙𑀦𑁆𑀤𑁄 𑀙𑀦𑁆𑀤𑀦𑀁 𑀭𑁄𑀘𑀦𑀁 𑀅𑀚𑁆𑀛𑀸𑀲𑀬𑁄 𑀏𑀢𑁂𑀲𑀦𑁆𑀢𑀺 𑀏𑀯𑀁𑀙𑀦𑁆𑀤𑀸. 𑀅𑀪𑀺𑀫𑀼𑀔𑀁, 𑀅𑀪𑀺𑀦𑀺𑀯𑀺𑀲𑁆𑀲 𑀯𑀸 𑀧𑀓𑀸𑀭𑁂𑀳𑀺 𑀏𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀮𑀤𑁆𑀥𑀺. 𑀲𑀸 𑀳𑀺 𑀮𑀤𑁆𑀥𑀩𑁆𑀩𑀯𑀢𑁆𑀣𑀼𑀁 𑀅𑀪𑀺𑀫𑀼𑀔𑀁 ‘‘𑀏𑀯𑀫𑁂𑀢’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀻 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀉𑀧𑀕𑀘𑁆𑀙𑀢𑀺, 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸 𑀢𑀺𑀝𑁆𑀞𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀏𑀯𑀁 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁄 𑀅𑀥𑀺𑀧𑁆𑀧𑀸𑀬𑁄 𑀏𑀢𑁂𑀲𑀦𑁆𑀢𑀺 𑀏𑀯𑀁𑀅𑀥𑀺𑀧𑁆𑀧𑀸𑀬𑀸. 𑀪𑀕𑀯𑀸 𑀫𑀽𑀮𑀁 𑀓𑀸𑀭𑀡𑀁 𑀏𑀢𑁂𑀲𑀁 𑀬𑀸𑀣𑀸𑀯𑀢𑁄 𑀅𑀥𑀺𑀕𑀫𑀸𑀬𑀸𑀢𑀺 𑀪𑀕𑀯𑀁𑀫𑀽𑀮𑀓𑀸. 𑀢𑁂𑀦𑀸𑀳 ‘‘𑀪𑀕𑀯𑀦𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀫𑀬𑀁 𑀇𑀫𑁂 𑀥𑀫𑁆𑀫𑁂 𑀆𑀚𑀸𑀦𑀸𑀫 𑀧𑀝𑀺𑀯𑀺𑀚𑁆𑀛𑀸𑀫𑀸’’𑀢𑀺. 𑀅𑀫𑁆𑀳𑀸𑀓𑀁𑀥𑀫𑁆𑀫𑀸𑀢𑀺 𑀢𑁂𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀦𑁆𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀁. 𑀲𑁂𑀯𑀺𑀢𑀩𑁆𑀩𑀸𑀦𑀜𑁆𑀳𑀺 𑀬𑀸𑀣𑀸𑀯𑀢𑁄 𑀅𑀥𑀺𑀕𑀫𑀜𑀸𑀡𑀸𑀦𑀺 𑀅𑀥𑀺𑀕𑀘𑁆𑀙𑀦𑀓𑀲𑀫𑁆𑀩𑀦𑁆𑀥𑀻𑀦𑀺, 𑀢𑀸𑀦𑀺 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀫𑀽𑀮𑀓𑀸𑀦𑀺 𑀅𑀦𑀜𑁆𑀜𑀯𑀺𑀲𑀬𑀢𑁆𑀢𑀸. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂 𑀓𑀲𑁆𑀲𑀧𑀲𑀫𑁆𑀩𑀼𑀤𑁆𑀥𑁂𑀦𑀸’’𑀢𑀺𑀆𑀤𑀺. 𑀪𑀕𑀯𑀸 𑀦𑁂𑀢𑀸 𑀢𑁂𑀲𑀦𑁆𑀢𑀺 𑀪𑀕𑀯𑀁𑀦𑁂𑀢𑁆𑀢𑀺𑀓𑀸. 𑀦𑁂𑀢𑀸𑀢𑀺 𑀲𑁂𑀯𑀺𑀢𑀩𑁆𑀩𑀥𑀫𑁆𑀫𑁂 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑀁 𑀧𑀸𑀧𑁂𑀢𑀸. 𑀯𑀺𑀦𑁂𑀢𑀸𑀢𑀺 𑀅𑀲𑁂𑀯𑀺𑀢𑀩𑁆𑀩𑀥𑀫𑁆𑀫𑁂 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑀢𑁄 𑀅𑀧𑀦𑁂𑀢𑀸. 𑀢𑀤𑀗𑁆𑀕𑀯𑀺𑀦𑀬𑀸𑀤𑀺𑀯𑀲𑁂𑀦 𑀯𑀸 𑀯𑀺𑀦𑁂𑀢𑀸. 𑀅𑀦𑀼𑀦𑁂𑀢𑀸𑀢𑀺 𑀇𑀫𑁂 𑀥𑀫𑁆𑀫𑀸 𑀲𑁂𑀯𑀺𑀢𑀩𑁆𑀩𑀸, 𑀇𑀫𑁂 𑀦 𑀲𑁂𑀯𑀺𑀢𑀩𑁆𑀩𑀸𑀢𑀺 𑀉𑀪𑀬𑀲𑀫𑁆𑀧𑀸𑀧𑀦𑀸𑀧𑀦𑀬𑀦𑀢𑁆𑀣𑀁 𑀧𑀜𑁆𑀜𑀧𑁂𑀢𑀸. 𑀢𑁂𑀦𑀸𑀳 ‘‘𑀬𑀣𑀸𑀲𑀪𑀸𑀯𑀢𑁄’’𑀢𑀺𑀆𑀤𑀺.

𑀧𑀝𑀺𑀲𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀝𑀺𑀲𑀭𑀡𑀁, 𑀪𑀕𑀯𑀸 𑀧𑀝𑀺𑀲𑀭𑀡𑀁 𑀏𑀢𑁂𑀲𑀦𑁆𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀧𑀝𑀺𑀲𑀭𑀢𑀺 𑀲𑀪𑀸𑀯𑀲𑀫𑁆𑀧𑀝𑀺𑀯𑁂𑀥𑀯𑀲𑁂𑀦 𑀧𑀘𑁆𑀘𑁂𑀓𑀫𑀼𑀧𑀕𑀘𑁆𑀙𑀢𑀻𑀢𑀺 𑀯𑀸 𑀧𑀝𑀺𑀲𑀭𑀡𑀁, 𑀪𑀕𑀯𑀸 𑀧𑀝𑀺𑀲𑀭𑀡𑀁 𑀏𑀢𑁂𑀲𑀦𑁆𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑀸𑀯𑀲𑁂𑀦. 𑀅𑀲𑀢𑀺𑀧𑀺 𑀫𑀼𑀔𑁂 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀨𑀲𑁆𑀲𑁄 𑀆𑀕𑀘𑁆𑀙𑀢𑀺, 𑀅𑀳𑀁 𑀪𑀕𑀯𑀸 𑀓𑀺𑀁 𑀦𑀸𑀫𑁄’’𑀢𑀺. 𑀧𑀝𑀺𑀪𑀸𑀢𑀽𑀢𑀺 𑀏𑀢𑁆𑀣 𑀧𑀝𑀺-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 ‘‘𑀪𑀕𑀯𑀦𑁆𑀢’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁, 𑀅𑀢𑁆𑀣𑁄 𑀧𑀦 𑀲𑀸𑀫𑀺𑀯𑀘𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀢𑁄’’𑀢𑀺 𑀧𑀝𑀺𑀪𑀸𑀢𑀽𑀢𑀺 𑀘 𑀪𑀕𑀯𑀢𑁄 𑀪𑀸𑀕𑁄 𑀳𑁄𑀢𑀼. 𑀪𑀕𑀯𑀢𑁄 𑀳𑀺 𑀏𑀲 𑀪𑀸𑀕𑁄, 𑀬𑀤𑀺𑀤𑀁 𑀥𑀫𑁆𑀫𑀲𑁆𑀲 𑀤𑁂𑀲𑀦𑀸, 𑀅𑀫𑁆𑀳𑀸𑀓𑀁 𑀧𑀦 𑀪𑀸𑀕𑁄 𑀲𑀯𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 𑀧𑀝𑀺𑀪𑀸𑀢𑀽𑀢𑀺 𑀧𑀤𑀺𑀲𑁆𑀲𑀢𑀽𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀜𑀸𑀡𑁂𑀦 𑀤𑀺𑀲𑁆𑀲𑀢𑀼, 𑀤𑁂𑀲𑀻𑀬𑀢𑀽𑀢𑀺 𑀯𑀸 𑀅𑀢𑁆𑀣𑁄. 𑀉𑀧𑀝𑁆𑀞𑀸𑀢𑀽𑀢𑀺 𑀘 𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀢𑀼.

𑁪𑁭𑁪. 𑀦𑀺𑀲𑁆𑀲𑀬𑀺𑀢𑀩𑁆𑀩𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀯𑀲𑁂𑀦 𑀅𑀧𑀲𑁆𑀲𑀬𑀺𑀢𑀩𑁆𑀩𑁂. 𑀢𑀢𑀺𑀬𑀘𑀢𑀼𑀢𑁆𑀣𑀥𑀫𑁆𑀫𑀲𑀫𑀸𑀤𑀸𑀦𑀸𑀦𑀺 𑀳𑀺 𑀅𑀧𑀲𑁆𑀲𑀸𑀬 𑀲𑀢𑁆𑀢𑀸𑀦𑀁 𑀏𑀢𑀭𑀳𑀺 𑀆𑀬𑀢𑀺𑀜𑁆𑀘 𑀲𑀫𑁆𑀧𑀢𑁆𑀢𑀺𑀬𑁄 𑀅𑀪𑀺𑀯𑀟𑁆𑀠𑀦𑁆𑀢𑀺. 𑀪𑀚𑀺𑀢𑀩𑁆𑀩𑁂𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑁂𑀯𑀺𑀢𑀩𑁆𑀩𑁂𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑀼𑀧𑀲𑁆𑀲𑀬𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀲𑀦𑁆𑀥𑀸𑀬𑀸𑀳. 𑀪𑀚𑀺𑀢𑀩𑁆𑀩𑁂𑀢𑀺 𑀢𑀧𑁆𑀧𑀘𑁆𑀘𑀬𑁂 𑀤𑀸𑀦𑀸𑀤𑀺𑀧𑀼𑀜𑁆𑀜𑀥𑀫𑁆𑀫𑁂.

𑁪𑁭𑁫. 𑀉𑀧𑁆𑀧𑀝𑀺𑀧𑀸𑀝𑀺𑀆𑀓𑀸𑀭𑁂𑀦𑀸𑀢𑀺 𑀧𑀞𑀫𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀯𑁄𑀤𑀸𑀦𑀥𑀫𑁆𑀫𑀤𑀲𑁆𑀲𑀦𑀁 𑀲𑀢𑁆𑀣𑀼 𑀤𑁂𑀲𑀦𑀸𑀧𑀝𑀺𑀧𑀸𑀝𑀺, 𑀬𑀣𑀸 𑁋 ‘‘𑀯𑀸𑀫𑀁 𑀫𑀼𑀜𑁆𑀘, 𑀤𑀓𑁆𑀔𑀺𑀡𑀁 𑀕𑀡𑁆𑀳𑀸’’𑀢𑀺 (𑀥. 𑀲. 𑀅𑀝𑁆𑀞. 𑁪𑁯𑁮; 𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁪), 𑀢𑀣𑀸 𑀉𑀧𑁆𑀧𑀝𑀺𑀧𑀸𑀝𑀺𑀧𑀓𑀸𑀭𑁂𑀦, 𑀲𑀸 𑀘 𑀔𑁄 𑀧𑀼𑀭𑀺𑀫𑁂𑀲𑀼 𑀤𑁆𑀯𑀻𑀲𑀼 𑀥𑀫𑁆𑀫𑀲𑀫𑀸𑀤𑀸𑀦𑁂𑀲𑀼, 𑀧𑀘𑁆𑀙𑀺𑀫𑁂𑀲𑀼 𑀧𑀦 𑀧𑀝𑀺𑀧𑀸𑀝𑀺𑀬𑀸𑀯 𑀫𑀸𑀢𑀺𑀓𑀸 𑀧𑀝𑁆𑀞𑀧𑀺𑀢𑀸. 𑀬𑀣𑀸𑀥𑀫𑁆𑀫𑀭𑀲𑁂𑀦𑁂𑀯𑀸𑀢𑀺 𑀧𑀳𑀸𑀢𑀩𑁆𑀩𑀧𑀳𑀸𑀬𑀓𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑁂𑀦𑁂𑀯. 𑀲𑀪𑀸𑀯𑁄 𑀳𑀺 𑀬𑀸𑀣𑀸𑀯𑀢𑁄 𑀭𑀲𑀺𑀢𑀩𑁆𑀩𑀢𑁄 𑀚𑀸𑀦𑀺𑀢𑀩𑁆𑀩𑀢𑁄 ‘‘𑀭𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀞𑀫𑀁 𑀧𑀳𑀸𑀢𑀩𑁆𑀩𑀥𑀫𑁆𑀫𑁂 𑀤𑀲𑁆𑀲𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 ‘‘𑀇𑀫𑁂 𑀥𑀫𑁆𑀫𑀸 𑀏𑀢𑁂𑀳𑀺 𑀧𑀳𑀻𑀬𑀦𑁆𑀢𑀻’’𑀢𑀺 𑀧𑀳𑀸𑀬𑀓𑀥𑀫𑁆𑀫𑀤𑀲𑁆𑀲𑀦𑀁 𑀤𑁂𑀲𑀦𑀸𑀦𑀼𑀧𑀼𑀩𑁆𑀩𑀻. 𑀕𑀳𑀡𑀁 𑀆𑀤𑀺𑀬𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀁.

𑁪𑁭𑁮. 𑀯𑀥𑀤𑀡𑁆𑀟𑀸𑀤𑀻𑀳𑀺 𑀪𑀻𑀢𑀲𑁆𑀲 𑀉𑀧𑀲𑀗𑁆𑀓𑀫𑀦𑁂, 𑀫𑀺𑀘𑁆𑀙𑀸 𑀘𑀭𑀺𑀢𑁆𑀯𑀸 𑀢𑀣𑀸 𑀅𑀧𑀕𑀫𑀦𑁂 𑀘 𑀧𑀼𑀩𑁆𑀩𑀸𑀧𑀭𑀘𑁂𑀢𑀦𑀸𑀦𑀁 𑀯𑀲𑁂𑀦 𑀫𑀺𑀘𑁆𑀙𑀸𑀘𑀸𑀭𑁄 𑀤𑀼𑀓𑁆𑀔𑀯𑁂𑀤𑀦𑁄 𑀳𑁄𑀢𑀺, 𑀢𑀣𑀸 𑀇𑀲𑁆𑀲𑀸𑀦𑀺𑀦𑁆𑀤𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀲𑁆𑀲 𑀅𑀧𑀭𑀘𑁂𑀢𑀦𑀸𑀯𑀲𑁂𑀦, 𑀏𑀯𑀁 𑀅𑀪𑀺𑀚𑁆𑀛𑀸𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀲𑀼𑀧𑀺 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀘𑁂𑀢𑀦𑀸𑀦𑀦𑁆𑀢𑀺 𑀧𑀼𑀩𑁆𑀩𑀸𑀧𑀭𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀦𑀁. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀫𑀼𑀲𑀸𑀯𑀸𑀤𑁄 𑀧𑀺𑀲𑀼𑀡𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑁄𑀢𑀺 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀦𑀁 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑀸𑀢𑀺 𑀅𑀬𑀁 𑀦𑀬𑁄 𑀇𑀥 𑀅𑀥𑀺𑀓𑀢𑀢𑁆𑀢𑀸 𑀦 𑀉𑀤𑁆𑀥𑀝𑁄. 𑀤𑁄𑀫𑀦𑀲𑁆𑀲𑀫𑁂𑀯 𑀘𑁂𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀇𑀤𑀁 𑀧𑀼𑀩𑁆𑀩𑀪𑀸𑀕𑀸𑀧𑀭𑀪𑀸𑀕𑀘𑁂𑀢𑀦𑀸𑀧𑀺 𑀘𑁂𑀢𑁆𑀣 𑀆𑀲𑀦𑁆𑀦𑀸 𑀤𑁄𑀫𑀦𑀲𑁆𑀲𑀲𑀳𑀕𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀦𑀸𑀲𑀦𑁆𑀦𑀸 𑀧𑀦 𑀲𑀦𑁆𑀥𑀸𑀬 ‘‘𑀧𑀭𑀺𑀬𑁂𑀝𑁆𑀞𑀺𑀁 𑀯𑀸 𑀆𑀧𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀫𑀺𑀘𑁆𑀙𑀸𑀘𑀸𑀭𑀸𑀪𑀺𑀚𑁆𑀛𑀸𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀦𑀁 𑀧𑀼𑀩𑁆𑀩𑀪𑀸𑀕𑀸𑀧𑀭𑀪𑀸𑀕𑀘𑁂𑀢𑀦𑀸 𑀆𑀲𑀦𑁆𑀦𑀸 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀕𑀢𑀺𑀓𑀸𑀯𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀬𑁂𑀝𑁆𑀞𑀺𑀦𑁆𑀢𑀺 𑀫𑀺𑀘𑁆𑀙𑀸𑀘𑀸𑀭𑀸𑀤𑀻𑀲𑀼 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀫𑀸𑀮𑀸𑀕𑀦𑁆𑀥𑀸𑀤𑀺𑀧𑀭𑀺𑀬𑁂𑀲𑀦𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀫𑀸𑀭𑁂𑀢𑀩𑁆𑀩𑀯𑀢𑁆𑀣𑀼𑀆𑀯𑀼𑀥𑀸𑀤𑀺𑀧𑀭𑀺𑀬𑁂𑀲𑀦𑀁 𑀆𑀧𑀚𑁆𑀚𑀦𑁆𑀢𑀲𑁆𑀲. 𑀅𑀓𑀺𑀘𑁆𑀙𑁂𑀦𑀧𑀺 𑀢𑁂𑀲𑀁 𑀧𑀭𑀺𑀬𑁂𑀲𑀦𑀁 𑀲𑀫𑁆𑀪𑀯𑀢𑀻𑀢𑀺 ‘‘𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺.

𑁪𑁭𑁯. 𑀲𑀼𑀔𑀯𑁂𑀤𑀦𑀸 𑀳𑁄𑀦𑁆𑀢𑀻𑀢𑀺 𑀲𑀼𑀔𑀯𑁂𑀤𑀦𑀸𑀧𑀺 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀸𑀲𑀁 𑀘𑁂𑀢𑀦𑀸𑀦𑀁 𑀅𑀲𑀼𑀔𑀯𑁂𑀤𑀦𑀢𑀸𑀧𑀺 𑀮𑀩𑁆𑀪𑀢𑀻𑀢𑀺 ‘‘𑀲𑀼𑀔𑀯𑁂𑀤𑀦𑀸𑀧𑀺 𑀳𑁄𑀦𑁆𑀢𑀺𑀬𑁂𑀯𑀸’’𑀢𑀺 𑀲𑀸𑀲𑀗𑁆𑀓𑀯𑀘𑀦𑀁. 𑀲𑁄𑀫𑀦𑀲𑁆𑀲𑀫𑁂𑀯 𑀘𑁂𑀢𑁆𑀣 𑀲𑀼𑀔𑀦𑁆𑀢𑀺 𑀇𑀤𑀁 𑀧𑀼𑀩𑁆𑀩𑀪𑀸𑀕𑀸𑀧𑀭𑀪𑀸𑀕𑀘𑁂𑀢𑀦𑀸𑀧𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀜𑁆𑀘 𑀔𑁄 𑀫𑀺𑀘𑁆𑀙𑀸𑀘𑀸𑀭𑀯𑀚𑁆𑀚𑀸𑀦𑀁 𑀙𑀦𑁆𑀦𑀁 𑀯𑀲𑁂𑀦. 𑀫𑀺𑀘𑁆𑀙𑀸𑀘𑀸𑀭𑀲𑁆𑀲 𑀧𑀦 𑀧𑀼𑀩𑁆𑀩𑀸𑀧𑀭𑀪𑀸𑀕𑀲𑁆𑀲 𑀯𑀲𑁂𑀦 ‘‘𑀓𑀸𑀬𑀺𑀓𑀁 𑀲𑀼𑀔𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀲𑀸𑀲𑀗𑁆𑀓𑀯𑀘𑀦𑀁.

𑁪𑁮𑁦. 𑀤𑁄𑀲𑀚𑀧𑀭𑀺𑀴𑀸𑀳𑀯𑀲𑁂𑀦𑀲𑁆𑀲 𑀲𑀺𑀬𑀸 𑀓𑀸𑀬𑀺𑀓𑀫𑁆𑀧𑀺 𑀤𑀼𑀓𑁆𑀔𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑁄 𑀕𑀡𑁆𑀳𑀦𑁆𑀢𑁄𑀧𑀺 𑀤𑀼𑀓𑁆𑀔𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀘𑁂𑀢𑁄𑀤𑀼𑀓𑁆𑀔𑀫𑁂𑀯 𑀯𑀸 𑀲𑀦𑁆𑀥𑀸𑀬 𑀢𑀲𑁆𑀲 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 ‘‘𑀤𑀼𑀓𑁆𑀔𑀺𑀢𑁄 𑀤𑁄𑀫𑀦𑀲𑁆𑀲𑀺𑀢𑁄’’𑀢𑀺 𑀯𑀼𑀢𑁆𑀢𑀁.

𑁪𑁮𑁧. 𑀤𑀲𑀲𑀼𑀧𑀺 𑀧𑀤𑁂𑀲𑀽𑀢𑀺 𑀤𑀲𑀲𑀼𑀧𑀺 𑀓𑁄𑀝𑁆𑀞𑀸𑀲𑁂𑀲𑀼, 𑀯𑀸𑀓𑁆𑀬𑁂𑀲𑀼 𑀯𑀸. 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀢𑀸𑀧𑀺 𑀲𑀫𑁆𑀪𑀯𑀢𑀻𑀢𑀺 ‘‘𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀺𑀬𑁂𑀯𑀸’’𑀢𑀺 𑀇𑀥 𑀲𑀸𑀲𑀗𑁆𑀓𑀯𑀘𑀦𑀁. 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀲𑁆𑀲 𑀓𑀸𑀬𑁄𑀧𑀺 𑀲𑀺𑀬𑀸 𑀯𑀺𑀕𑀢𑀤𑀭𑀣𑀧𑀭𑀺𑀴𑀸𑀳𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀺𑀧𑀘𑁆𑀘𑀬𑀸 𑀓𑀸𑀬𑀺𑀓𑀧𑀝𑀺𑀲𑀁𑀯𑁂𑀤𑀦𑀸𑀧𑀺 𑀲𑀫𑁆𑀪𑀯𑀢𑀻𑀢𑀺 𑀲𑀳𑀸𑀧𑀺 𑀲𑀼𑀔𑁂𑀦𑀸𑀢𑀺 𑀏𑀢𑁆𑀣 𑀓𑀸𑀬𑀺𑀬𑀲𑀼𑀔𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯.

𑁪𑁮𑁨. 𑀢𑀺𑀢𑁆𑀢𑀓𑀸𑀮𑀸𑀩𑀽𑀢𑀺 𑀉𑀧𑀪𑀼𑀢𑁆𑀢𑀲𑁆𑀲 𑀉𑀫𑁆𑀫𑀸𑀤𑀸𑀤𑀺𑀧𑀸𑀧𑀦𑁂𑀦 𑀓𑀼𑀘𑁆𑀙𑀺𑀢𑀢𑀺𑀢𑁆𑀢𑀓𑀭𑀲𑁄 𑀅𑀮𑀸𑀩𑀼. 𑀦 𑀭𑀼𑀘𑁆𑀘𑀺𑀲𑁆𑀲𑀢𑀺 𑀅𑀦𑀺𑀝𑁆𑀞𑀭𑀲𑀢𑀸𑀬 𑀅𑀦𑀺𑀝𑁆𑀞𑀨𑀮𑀢𑀸𑀬 𑀘.

𑁪𑁮𑁩. 𑀭𑀲𑀁 𑀤𑁂𑀢𑀻𑀢𑀺 𑀭𑀲𑀁 𑀤𑀲𑁆𑀲𑁂𑀢𑀺 𑀯𑀺𑀪𑀸𑀯𑁂𑀢𑀺.

𑁪𑁮𑁪. 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀧𑀽𑀢𑀺𑀲𑀪𑀸𑀯𑀫𑀼𑀢𑁆𑀢𑀁. 𑀢𑀭𑀼𑀡𑀦𑁆𑀢𑀺 𑀥𑀸𑀭𑀸𑀯𑀲𑁂𑀦 𑀦𑀺𑀧𑀢𑀦𑁆𑀢𑀁 𑀳𑀼𑀢𑁆𑀯𑀸 𑀉𑀡𑁆𑀳𑀁. 𑀢𑁂𑀦𑀲𑁆𑀲 𑀉𑀧𑀭𑀺𑀫𑀼𑀢𑁆𑀢𑀢𑀫𑀸𑀳. 𑀫𑀼𑀢𑁆𑀢𑀜𑁆𑀳𑀺 𑀧𑀲𑁆𑀲𑀸𑀯𑀫𑀕𑁆𑀕𑀢𑁄 𑀫𑀼𑀘𑁆𑀘𑀫𑀸𑀦𑀁 𑀓𑀸𑀬𑀼𑀲𑁆𑀫𑀸𑀯𑀲𑁂𑀦 𑀉𑀡𑁆𑀳𑀁 𑀳𑁄𑀢𑀺.

𑁪𑁮𑁫. 𑀬𑀁 𑀪𑀕𑀦𑁆𑀤𑀭𑀲𑀁𑀲𑀝𑁆𑀞𑀁 𑀮𑁄𑀳𑀺𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀪𑀕𑀦𑁆𑀤𑀭𑀩𑁆𑀬𑀸𑀥𑀺𑀲𑀳𑀺𑀢𑀸𑀬 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀢𑀸𑀬 𑀯𑀲𑁂𑀦 𑀬𑀁 𑀮𑁄𑀳𑀺𑀢𑀁 𑀯𑀺𑀲𑁆𑀲𑀯𑀢𑀺. 𑀧𑀺𑀢𑁆𑀢𑀲𑀁𑀲𑀝𑁆𑀞𑀁 𑀮𑁄𑀳𑀺𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄.

𑁪𑁮𑁬. 𑀉𑀩𑁆𑀩𑀺𑀤𑁆𑀥𑁂𑀢𑀺 𑀤𑀽𑀭𑁂. 𑀅𑀩𑁆𑀪𑀫𑀳𑀺𑀓𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀕𑀫𑁂𑀦 𑀳𑀺 𑀆𑀓𑀸𑀲𑀁 𑀉𑀢𑁆𑀢𑀼𑀗𑁆𑀕𑀁 𑀯𑀺𑀬 𑀤𑀽𑀭𑀁 𑀯𑀺𑀬 𑀘 𑀔𑀸𑀬𑀢𑀺. 𑀢𑁂𑀦𑀸𑀳 ‘‘𑀤𑀽𑀭𑀻𑀪𑀽𑀢𑁂’’𑀢𑀺. 𑀢𑀫𑀁𑀬𑁂𑀯 𑀢𑀫𑀕𑀢𑀁 ‘‘𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢’’𑀦𑁆𑀢𑀺 (𑀫. 𑀦𑀺. 𑁨.𑁧𑁧𑁯; 𑀅. 𑀦𑀺. 𑁯.𑁧𑁧) 𑀬𑀣𑀸. 𑀪𑀸𑀲𑀢𑁂 𑀘 𑀢𑀧𑀢𑁂 𑀘 𑀯𑀺𑀭𑁄𑀘𑀢𑁂 𑀘 𑀇𑀤𑀁 𑀘𑀢𑀼𑀢𑁆𑀣𑀁 𑀥𑀫𑁆𑀫𑀲𑀫𑀸𑀤𑀸𑀦𑀁 𑀯𑀺𑀪𑀚𑀦𑁆𑀢𑁂𑀦 𑀓𑀼𑀲𑀮𑀓𑀫𑁆𑀫𑀧𑀣𑀲𑁆𑀲 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀢𑁆𑀢𑀸.

𑀲𑀗𑁆𑀕𑀭𑀭𑀼𑀓𑁆𑀔𑁄 𑀓𑀦𑁆𑀤𑀫𑀸𑀤𑀲𑀧𑁄𑀯. 𑀲𑀭𑀪𑀜𑁆𑀜𑀯𑀲𑁂𑀦𑀸𑀢𑀺 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸 𑀧𑀤𑀲𑁄 𑀲𑀭𑀪𑀜𑁆𑀜𑀯𑀲𑁂𑀦. 𑀑𑀲𑀸𑀭𑁂𑀦𑁆𑀢𑀲𑁆𑀲𑀸𑀢𑀺 𑀉𑀘𑁆𑀘𑀸𑀭𑁂𑀦𑁆𑀢𑀲𑁆𑀲. 𑀲𑀤𑁆𑀤𑁂𑀢𑀺 𑀑𑀲𑀸𑀭𑀡𑀲𑀤𑁆𑀤𑁂. 𑀅𑀥𑀺𑀕𑀢𑀯𑀺𑀲𑁂𑀲𑀁 𑀅𑀦𑀸𑀭𑁄𑀘𑁂𑀢𑀼𑀓𑀸𑀫𑀸 𑀤𑁂𑀯𑀢𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺. 𑀢𑀁 𑀤𑀺𑀯𑀲𑀦𑁆𑀢𑀺 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀤𑀺𑀯𑀲𑁂. 𑀇𑀢𑀺 𑀅𑀢𑁆𑀢𑀦𑁄 𑀯𑀺𑀲𑁂𑀲𑀸𑀥𑀺𑀕𑀫𑀦𑀺𑀫𑀺𑀢𑁆𑀢𑀢𑀸𑀬 𑀅𑀬𑀁 𑀤𑁂𑀯𑀢𑀸 𑀇𑀫𑀁 𑀲𑀼𑀢𑁆𑀢𑀁 𑀧𑀺𑀬𑀸𑀬𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀫𑀳𑀸𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.