𑁯. 𑀫𑀳𑀸𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁫. 𑀚𑀸𑀦𑀧𑀤𑀺𑀦𑁄𑀢𑀺 𑀚𑀦𑀧𑀤𑀯𑀦𑁆𑀢𑁄, 𑀚𑀦𑀧𑀤𑀲𑁆𑀲 𑀯𑀸 𑀇𑀲𑁆𑀲𑀭𑀸 𑀭𑀸𑀚𑀓𑀼𑀫𑀸𑀭𑀸 𑀕𑁄𑀢𑁆𑀢𑀯𑀲𑁂𑀦 𑀅𑀗𑁆𑀕𑀸 𑀦𑀸𑀫. 𑀢𑁂𑀲𑀁 𑀦𑀺𑀯𑀸𑀲𑁄 𑀬𑀤𑀺 𑀏𑀓𑁄 𑀚𑀦𑀧𑀤𑁄, 𑀓𑀣𑀁 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀭𑀼𑀴𑁆𑀳𑀻𑀲𑀤𑁆𑀤𑁂𑀦𑀸’’𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀬𑀼𑀢𑁆𑀢𑁂 𑀯𑀺𑀬 𑀲𑀮𑀺𑀗𑁆𑀕𑀯𑀘𑀦𑀸𑀦𑀺 (𑀧𑀸𑀡𑀺𑀦𑀺 𑁧.𑁨.𑁫𑁧) 𑀇𑀘𑁆𑀙𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀭𑀼𑀴𑁆𑀳𑀻 𑀬𑀣𑀸 ‘‘𑀓𑀼𑀭𑀽𑀲𑀼 𑀯𑀺𑀳𑀭𑀢𑀺, 𑀫𑀮𑁆𑀮𑁂𑀲𑀼 𑀯𑀺𑀳𑀭𑀢𑀻’’𑀢𑀺 𑀘. 𑀢𑀩𑁆𑀩𑀺𑀲𑁂𑀲𑀦𑁂 𑀧𑀦 𑀚𑀦𑀧𑀤𑀲𑀤𑁆𑀤𑁂 𑀚𑀸𑀢𑀺𑀲𑀤𑁆𑀤𑁂 𑀏𑀓𑀯𑀘𑀦𑀫𑁂𑀯. 𑀢𑁂𑀦𑀸𑀳 ‘‘𑀅𑀗𑁆𑀕𑁂𑀲𑀼 𑀚𑀦𑀧𑀤𑁂’’𑀢𑀺. 𑀅𑀲𑁆𑀲𑀸 𑀯𑀼𑀘𑁆𑀘𑀦𑁆𑀢𑀺 𑀧𑀸𑀲𑀸𑀡𑀸𑀦𑀺, 𑀢𑀸𑀦𑀺 𑀲𑀼𑀦𑁆𑀤𑀭𑀸𑀦𑀺 𑀢𑀢𑁆𑀣 𑀲𑀦𑁆𑀢𑀻𑀢𑀺 ‘‘𑀅𑀲𑁆𑀲𑀧𑀼𑀭’’𑀦𑁆𑀢𑀺 𑀲𑁄 𑀦𑀺𑀕𑀫𑁄 𑀯𑀼𑀢𑁆𑀢𑁄𑀢𑀺 𑀓𑁂𑀘𑀻. 𑀅𑀧𑀭𑁂 𑀧𑀦 𑀆𑀚𑀸𑀦𑀻𑀬𑁄 𑀅𑀲𑁆𑀲𑁄 𑀭𑀜𑁆𑀜𑁄 𑀢𑀢𑁆𑀣 𑀕𑀳𑀡𑀁 𑀉𑀧𑀕𑀢𑁄𑀢𑀺 ‘‘𑀅𑀲𑁆𑀲𑀧𑀼𑀭’’𑀦𑁆𑀢𑀺 𑀯𑀼𑀢𑁆𑀢𑁄𑀢𑀺 𑀯𑀤𑀦𑁆𑀢𑀺. 𑀓𑀺𑀁 𑀢𑁂𑀳𑀺, 𑀦𑀸𑀫𑀫𑁂𑀢𑀁 𑀢𑀲𑁆𑀲 𑀦𑀺𑀕𑀫𑀲𑁆𑀲. 𑀬𑀲𑁆𑀫𑀸 𑀧𑀦 𑀢𑀢𑁆𑀣 𑀪𑀕𑀯𑀢𑁄 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑀁 𑀓𑀺𑀜𑁆𑀘𑀺 𑀦𑀸𑀳𑁄𑀲𑀺, 𑀢𑀲𑁆𑀫𑀸 ‘‘𑀢𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸 𑀯𑀺𑀳𑀭𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀧𑀸𑀴𑀺𑀬𑀁 ‘‘𑀅𑀲𑁆𑀲𑀧𑀼𑀭𑀁 𑀦𑀸𑀫 𑀅𑀗𑁆𑀕𑀸𑀦𑀁 𑀦𑀺𑀕𑀫𑁄’’𑀢𑀺 𑀕𑁄𑀘𑀭𑀕𑀸𑀫𑀓𑀺𑀢𑁆𑀢𑀦𑀫𑁂𑀯 𑀓𑀢𑀁.

𑀏𑀯𑀭𑀽𑀧𑁂𑀦 𑀲𑀻𑀮𑁂𑀦𑀸𑀢𑀺𑀆𑀤𑀻𑀲𑀼 𑀲𑀻𑀮𑀕𑁆𑀕𑀳𑀡𑁂𑀦 𑀯𑀸𑀭𑀺𑀢𑁆𑀢𑀲𑀻𑀮𑀫𑀸𑀳. 𑀢𑁂𑀦 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑁂 𑀤𑀲𑁆𑀲𑁂𑀢𑀺. 𑀆𑀘𑀸𑀭𑀕𑁆𑀕𑀳𑀡𑁂𑀦 𑀘𑀸𑀭𑀺𑀢𑁆𑀢𑀲𑀻𑀮𑀁. 𑀢𑁂𑀦 𑀧𑀭𑀺𑀲𑀼𑀤𑁆𑀥𑀁 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀁. 𑀧𑀝𑀺𑀧𑀢𑁆𑀢𑀺𑀕𑁆𑀕𑀳𑀡𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀗𑁆𑀕𑀳𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁. 𑀮𑀚𑁆𑀚𑀺𑀦𑁄𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀲𑀻𑀮𑀸𑀘𑀸𑀭𑀫𑀽𑀮𑀓𑀸𑀭𑀡𑀁. 𑀧𑁂𑀲𑀮𑀸𑀢𑀺 𑀇𑀫𑀺𑀦𑀸 𑀧𑀸𑀭𑀺𑀲𑀼𑀤𑁆𑀥𑀺𑀁. 𑀉𑀴𑀸𑀭𑀕𑀼𑀡𑀸𑀢𑀺 𑀇𑀫𑀺𑀦𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀸𑀭𑀺𑀧𑀽𑀭𑀺𑀁. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯 𑀯𑀡𑁆𑀡𑀁 𑀓𑀣𑁂𑀦𑁆𑀢𑀻𑀢𑀺 𑀇𑀤𑀁 𑀢𑁂𑀲𑀁 𑀉𑀧𑀸𑀲𑀓𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀪𑀺𑀓𑁆𑀔𑀽𑀦𑀁 𑀕𑀼𑀡𑀓𑀺𑀢𑁆𑀢𑀦𑀧𑀲𑀼𑀢𑀢𑀸𑀬 𑀯𑀼𑀢𑁆𑀢𑀁. 𑀢𑁂 𑀧𑀦 𑀲𑀤𑁆𑀥𑀫𑁆𑀫𑁂𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀧𑀺 𑀅𑀪𑀺𑀧𑁆𑀧𑀲𑀦𑁆𑀦𑀸 𑀏𑀯. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀫𑀸𑀫𑀓𑀸 𑀥𑀫𑁆𑀫𑀫𑀸𑀫𑀓𑀸’’𑀢𑀺. 𑀯𑀢𑁆𑀣𑀼𑀢𑁆𑀢𑀬𑁂 𑀳𑀺 𑀏𑀓𑀲𑁆𑀫𑀺𑀁 𑀅𑀪𑀺𑀧𑁆𑀧𑀲𑀦𑁆𑀦𑀸 𑀇𑀢𑀭𑀤𑁆𑀯𑀬𑁂 𑀅𑀪𑀺𑀧𑁆𑀧𑀲𑀦𑁆𑀦𑀸 𑀏𑀯 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑁂𑀢𑀺 𑀮𑀓𑁆𑀔𑀡𑀯𑀘𑀦𑀫𑁂𑀢𑀁 𑀬𑀣𑀸 ‘‘𑀓𑀸𑀓𑁂𑀳𑀺 𑀲𑀧𑁆𑀧𑀺 𑀭𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀬𑀧𑀝𑀺𑀧𑀽𑀚𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀘𑀬𑀤𑀸𑀬𑀓𑀸𑀦𑀜𑁆𑀳𑀺 𑀓𑀸𑀭𑀲𑁆𑀲 𑀅𑀢𑁆𑀢𑀦𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀫𑀳𑀧𑁆𑀨𑀮𑀪𑀸𑀯𑀲𑁆𑀲 𑀓𑀭𑀡𑀁 𑀇𑀥 ‘‘𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁.

𑀲𑀫𑀡𑀓𑀭𑀡𑀸𑀢𑀺 𑀲𑀫𑀡𑀪𑀸𑀯𑀓𑀭𑀸, 𑀲𑀫𑀡𑀪𑀸𑀯𑀲𑁆𑀲 𑀓𑀸𑀭𑀓𑀸𑀢𑀺 𑀅𑀢𑁆𑀣𑁄. 𑀢𑁂 𑀧𑀦 𑀏𑀓𑀦𑁆𑀢𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀺𑀢𑀸 𑀯𑀟𑁆𑀠𑀺𑀢𑀸 𑀘 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀫𑀸𑀤𑀸𑀬 𑀧𑀭𑀺𑀧𑀽𑀭𑀺𑀢𑀸’’𑀢𑀺. 𑀲𑀫𑀡𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀲𑀫𑀡𑀯𑀲𑁂𑀦, 𑀦 𑀲𑀸𑀫𑀜𑁆𑀜𑀫𑀢𑁆𑀢𑁂𑀦𑀸𑀢𑀺 𑀆𑀳 ‘‘𑀲𑀫𑀺𑀢𑀧𑀸𑀧𑀲𑀫𑀡’’𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀓𑀭𑀡𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑁆𑀬𑀜𑁆𑀚𑀦𑀢𑁄 𑀏𑀯 𑀘𑀸𑀬𑀁 𑀪𑁂𑀤𑁄, 𑀬𑀤𑀺𑀤𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺, 𑀦 𑀅𑀢𑁆𑀣𑀢𑁄. 𑀲𑀫𑀡𑁂𑀦𑀓𑀢𑁆𑀢𑀩𑁆𑀩𑀥𑀫𑁆𑀫𑀸𑀢𑀺 𑀲𑀫𑀡𑀥𑀫𑁆𑀫𑁂 𑀞𑀺𑀢𑁂𑀦 𑀲𑀫𑁆𑀧𑀸𑀤𑁂𑀢𑀩𑁆𑀩𑀥𑀫𑁆𑀫𑀸. 𑀬𑁄 𑀳𑀺 𑀳𑁂𑀝𑁆𑀞𑀺𑀫𑀲𑀺𑀓𑁆𑀔𑀸𑀲𑀗𑁆𑀔𑀸𑀢𑀲𑀫𑀡𑀪𑀸𑀯𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄, 𑀢𑁂𑀦 𑀬𑁂 𑀉𑀧𑀭𑀺𑀲𑀺𑀓𑁆𑀔𑀸𑀲𑀗𑁆𑀔𑀸𑀢𑀲𑀫𑀡𑀪𑀸𑀯𑀸 𑀲𑀫𑁆𑀧𑀸𑀤𑁂𑀢𑀩𑁆𑀩𑀸, 𑀢𑁂𑀲𑀁 𑀯𑀲𑁂𑀦𑁂𑀯 𑀯𑀼𑀢𑁆𑀢𑀲𑀫𑀡𑁂𑀦 𑀓𑀢𑁆𑀢𑀩𑁆𑀩𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺. 𑀢𑀣𑀸 𑀳𑀺 𑀢𑁂𑀲𑀁 𑀲𑀫𑀡𑀪𑀸𑀯𑀸𑀯𑀳𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀢𑁂𑀧𑀺 𑀘 𑀲𑀫𑀡𑀓𑀭𑀡𑀸 𑀳𑁄𑀦𑁆𑀢𑀺𑀬𑁂𑀯𑀸’’𑀢𑀺. 𑀇𑀥 𑀧𑀦𑀸𑀢𑀺 𑀫𑀳𑀸𑀅𑀲𑁆𑀲𑀧𑀼𑀭𑁂. 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀺𑀯𑀲𑁂𑀦 𑀤𑁂𑀲𑀦𑀸 𑀯𑀺𑀢𑁆𑀣𑀸𑀭𑀺𑀢𑀸𑀢𑀺 𑀳𑀺𑀭𑁄𑀢𑁆𑀢𑀧𑁆𑀧-𑀧𑀭𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀫𑀦𑁄𑀲𑀫𑀸𑀘𑀸𑀭𑀸𑀚𑀻𑀯𑀇𑀦𑁆𑀤𑁆𑀭𑀺𑀬𑀲𑀁𑀯𑀭-𑀪𑁄𑀚𑀦𑁂𑀫𑀢𑁆𑀢𑀜𑁆𑀜𑀼𑀢- 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀲𑀢𑀺𑀲𑀫𑁆𑀧𑀚𑀜𑁆𑀜-𑀛𑀸𑀦𑀯𑀺𑀚𑁆𑀚𑀸𑀯𑀲𑁂𑀦 𑀲𑀫𑀡𑀓𑀭𑀡𑀥𑀫𑁆𑀫𑀤𑁂𑀲𑀦𑀸 𑀯𑀺𑀢𑁆𑀣𑀸𑀭𑀢𑁄 𑀤𑁂𑀲𑀺𑀢𑀸, 𑀦 𑀢𑀺𑀓𑀦𑀺𑀧𑀸𑀢𑁂 𑀯𑀺𑀬 𑀲𑀗𑁆𑀔𑁂𑀧𑀢𑁄. 𑀨𑀮𑀕𑁆𑀕𑀳𑀡𑁂𑀦𑁂𑀯 𑀯𑀺𑀧𑀸𑀓𑀨𑀮𑀁 𑀕𑀳𑀺𑀢𑀁, 𑀢𑀁 𑀧𑀦 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀲𑀸𑀫𑀜𑁆𑀜𑀨𑀮𑀁 𑀤𑀝𑁆𑀞𑀩𑁆𑀩𑀁. 𑀆𑀦𑀺𑀲𑀁𑀲𑀕𑁆𑀕𑀳𑀡𑁂𑀦 𑀧𑀺𑀬𑀫𑀦𑀸𑀧𑀢𑀸𑀤𑀺𑀉𑀤𑁆𑀭𑀬𑁄. 𑀢𑀲𑁆𑀲𑁂𑀯 𑀅𑀢𑁆𑀣𑁄𑀢𑀺 𑀢𑀲𑁆𑀲𑁂𑀯 𑀅𑀯𑀜𑁆𑀘𑀸𑀧𑀤𑀲𑁆𑀲𑁂𑀯 𑀅𑀢𑁆𑀣𑀦𑀺𑀤𑁆𑀤𑁂𑀲𑁄. ‘‘𑀬𑀲𑁆𑀲𑀸 𑀳𑀻’’𑀢𑀺𑀆𑀤𑀺𑀦𑀸 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀅𑀢𑁆𑀣𑀁 𑀯𑀤𑀢𑀺. 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦𑀸𑀢𑀺 𑀏𑀢𑁆𑀢𑀓𑁂𑀦 𑀧𑀸𑀴𑀺𑀧𑀤𑁂𑀲𑁂𑀦. 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀻𑀦𑀁 𑀉𑀧𑀭𑀺 𑀧𑀸𑀴𑀺𑀬𑀁 𑀯𑀼𑀘𑁆𑀘𑀫𑀸𑀦𑀸𑀦𑀁 𑀲𑀫𑀡𑀓𑀭𑀡𑀥𑀫𑁆𑀫𑀸𑀦𑀁. 𑀯𑀡𑁆𑀡𑀁 𑀓𑀣𑁂𑀲𑀻𑀢𑀺 𑀕𑀼𑀡𑀁 𑀆𑀦𑀺𑀲𑀁𑀲𑀁 𑀅𑀪𑀸𑀲𑀺. 𑀲𑀢𑀺𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀅𑀧𑀺𑀘 𑀯𑀡𑁆𑀡𑀪𑀡𑀦𑀫𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬) 𑀯𑀼𑀢𑁆𑀢𑀦𑀬𑁂𑀦.

𑁪𑁧𑁬. 𑀬𑀁 𑀳𑀺𑀭𑀻𑀬𑀢𑀻𑀢𑀺 𑀬𑁂𑀦 𑀥𑀫𑁆𑀫𑁂𑀦 𑀳𑁂𑀢𑀼𑀪𑀽𑀢𑁂𑀦 𑀯𑀸 𑀚𑀺𑀕𑀼𑀘𑁆𑀙𑀢𑀺. 𑀓𑀭𑀡𑁂 𑀳𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀬𑀦𑁆𑀢𑀺 𑀯𑀸 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑁄, 𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀳𑀺𑀭𑀻𑀬𑀺𑀢𑀩𑁆𑀩𑁂𑀦𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀳𑀺𑀭𑀻𑀬𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀦𑁆𑀢𑀺 𑀅𑀢𑁆𑀣𑁄. 𑀑𑀢𑁆𑀢𑀧𑁆𑀧𑀺𑀢𑀩𑁆𑀩𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀚𑁆𑀛𑀢𑁆𑀢𑀁 𑀦𑀺𑀬𑀓𑀚𑁆𑀛𑀢𑁆𑀢𑀁 𑀚𑀸𑀢𑀺𑀆𑀤𑀺 𑀲𑀫𑀼𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺𑀭𑀻, 𑀩𑀳𑀺𑀤𑁆𑀥𑀸 𑀅𑀢𑁆𑀢𑀢𑁄 𑀩𑀳𑀺𑀪𑀽𑀢𑁄 𑀧𑀭𑀲𑀢𑁆𑀢𑁄 𑀲𑀫𑀼𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁. 𑀅𑀢𑁆𑀢𑀸𑀥𑀺𑀧𑀢𑀺𑀢𑁄 𑀆𑀕𑀢𑀸 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸, 𑀅𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸. 𑀮𑀚𑁆𑀚𑀸𑀲𑀪𑀸𑀯𑀲𑀡𑁆𑀞𑀺𑀢𑀸𑀢𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀲𑀪𑀸𑀯𑀝𑁆𑀞𑀸𑀬𑀺𑀦𑀻. 𑀲𑀧𑁆𑀧𑀢𑀺𑀲𑁆𑀲𑀯𑀮𑀓𑁆𑀔𑀡𑀢𑁆𑀢𑀸 𑀕𑀭𑀼𑀦𑀸 𑀓𑀺𑀲𑁆𑀫𑀺𑀜𑁆𑀘𑀺 𑀯𑀼𑀢𑁆𑀢𑁂 𑀕𑀸𑀭𑀯𑀯𑀲𑁂𑀦 𑀧𑀢𑀺𑀲𑁆𑀲𑀯𑀦𑀁 𑀧𑀢𑀺𑀲𑁆𑀲𑀯𑁄, 𑀲𑀳 𑀧𑀢𑀺𑀲𑁆𑀲𑀯𑁂𑀦𑀸𑀢𑀺 𑀲𑀧𑁆𑀧𑀢𑀺𑀲𑁆𑀲𑀯𑀁, 𑀧𑀢𑀺𑀲𑁆𑀲𑀯𑀪𑀽𑀢𑀁 𑀢𑀁𑀲𑀪𑀸𑀯𑀜𑁆𑀘 𑀬𑀁 𑀓𑀺𑀜𑁆𑀘𑀺 𑀕𑀸𑀭𑀯𑀁. 𑀚𑀸𑀢𑀺𑀆𑀤𑀺𑀫𑀳𑀢𑁆𑀢𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘 𑀳𑀺𑀭𑀻 𑀢𑀢𑁆𑀣 𑀕𑀸𑀭𑀯𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀲𑀧𑁆𑀧𑀢𑀺𑀲𑁆𑀲𑀯𑀮𑀓𑁆𑀔𑀡𑀸𑀢𑀺 𑀯𑀼𑀘𑁆𑀘𑀢𑀺. 𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀦𑁆𑀢𑀺 𑀧𑀸𑀧𑀢𑁄 𑀪𑀸𑀬𑀦𑀲𑀪𑀸𑀯𑀝𑁆𑀞𑀸𑀬𑀻, 𑀯𑀚𑁆𑀚𑀪𑀻𑀭𑀼𑀓𑀪𑀬𑀤𑀲𑁆𑀲𑀸𑀯𑀺𑀮𑀓𑁆𑀔𑀡𑀢𑁆𑀢𑀸 𑀯𑀚𑁆𑀚𑀁 𑀪𑀸𑀬𑀢𑀺 𑀢𑀁 𑀪𑀬𑀢𑁄 𑀧𑀲𑁆𑀲𑀢𑀻𑀢𑀺 𑀯𑀚𑁆𑀚𑀪𑀻𑀭𑀼𑀓𑀪𑀬𑀤𑀲𑁆𑀲𑀸𑀯𑀻, 𑀏𑀯𑀁𑀲𑀪𑀸𑀯𑀁 𑀑𑀢𑁆𑀢𑀧𑁆𑀧𑀁. 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀢𑀸 𑀘 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀪𑀸𑀯𑁂𑀦𑁂𑀯 𑀯𑀼𑀘𑁆𑀘𑀢𑀺, 𑀦 𑀧𑀭𑁂𑀲𑀁 𑀓𑀤𑀸𑀘𑀺 𑀅𑀜𑁆𑀜𑀫𑀜𑁆𑀜𑀯𑀺𑀧𑁆𑀧𑀬𑁄𑀕𑀸. 𑀦 𑀳𑀺 𑀮𑀚𑁆𑀚𑀦𑀁 𑀦𑀺𑀩𑁆𑀪𑀬𑀁, 𑀧𑀸𑀧𑀪𑀬𑀁 𑀯𑀸 𑀅𑀮𑀚𑁆𑀚𑀦𑀁 𑀳𑁄𑀢𑀻𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁧.𑀩𑀮𑀭𑀸𑀲𑀺𑀯𑀡𑁆𑀡𑀦𑀸) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀓𑀫𑀭𑀺𑀬𑀸𑀤𑀲𑁆𑀲 𑀧𑀸𑀮𑀦𑀢𑁄 𑀮𑁄𑀓𑀧𑀸𑀮𑀥𑀫𑁆𑀫𑀸 𑀦𑀸𑀫. 𑀲𑀼𑀓𑁆𑀓𑀸𑀢𑀺 𑀑𑀤𑀸𑀢𑀸 𑀧𑀪𑀲𑁆𑀲𑀭𑀪𑀸𑀯𑀓𑀸𑀭𑀓𑀸, 𑀲𑀼𑀓𑁆𑀓𑀸𑀪𑀺𑀚𑀸𑀢𑀺𑀳𑁂𑀢𑀼𑀢𑀸𑀬 𑀯𑀸 𑀲𑀼𑀓𑁆𑀓𑀸. 𑀲𑀫𑁆𑀪𑁂𑀤𑀦𑁆𑀢𑀺 𑀆𑀘𑀸𑀭𑀫𑀭𑀺𑀬𑀸𑀤𑀸𑀲𑀗𑁆𑀓𑀭𑀁. 𑀤𑁂𑀯𑀪𑀸𑀯𑀸𑀯𑀳𑀸 𑀥𑀫𑁆𑀫𑀸𑀢𑀺 𑀤𑁂𑀯𑀥𑀫𑁆𑀫𑀸.

𑀲𑀼𑀓𑁆𑀓𑀥𑀫𑁆𑀫𑀲𑀫𑀸𑀳𑀺𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀼𑀓𑁆𑀓𑀥𑀫𑁆𑀫𑀲𑀫𑀗𑁆𑀕𑀺𑀦𑁄. 𑀲𑀦𑁆𑀢𑁄𑀢𑀺 𑀯𑀽𑀧𑀲𑀦𑁆𑀢𑀤𑁄𑀲𑀸. 𑀲𑀧𑁆𑀧𑀼𑀭𑀺𑀲𑀸𑀢𑀺 𑀲𑀦𑁆𑀢𑀚𑀦𑀸. 𑀲𑀧𑀭𑀳𑀺𑀢𑀲𑀸𑀥𑀓𑀸 𑀳𑀺 𑀲𑀸𑀥𑀯𑁄.

𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀅𑀪𑀸𑀯𑀢𑁄, 𑀅𑀯𑀬𑀯𑁂𑀦 𑀘 𑀲𑀫𑀼𑀤𑀸𑀬𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁄 𑀑𑀯𑀸𑀤𑀽𑀧𑀲𑀫𑁆𑀧𑀤𑀸𑀯𑀳𑀑𑀯𑀸𑀤𑁂𑀓𑀤𑁂𑀲𑁄 𑀑𑀯𑀸𑀤𑀽𑀧𑀲𑀫𑁆𑀧𑀤𑀸𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀅𑀲𑁆𑀲𑀧𑀼𑀭𑁂. 𑀏𑀢𑁂 𑀳𑀺𑀭𑁄𑀢𑁆𑀢𑀧𑁆𑀧𑀥𑀫𑁆𑀫𑀸. 𑀲𑀫𑀡𑀥𑀫𑁆𑀫𑀸 𑀦𑀸𑀫𑀸𑀢𑀺 𑀤𑀲𑁆𑀲𑀺𑀢𑀸 𑀫𑀽𑀮𑀪𑀽𑀢𑀲𑀫𑀡𑀪𑀸𑀯𑀓𑀭𑀸 𑀥𑀫𑁆𑀫𑀸𑀢𑀺 𑀓𑀢𑁆𑀯𑀸. 𑀢𑀣𑀸 𑀳𑀺 𑀢𑁂𑀲𑀁 𑀆𑀤𑀺𑀢𑁄 𑀕𑀳𑀡𑀁.

𑀬𑀲𑁆𑀲 𑀅𑀥𑀺𑀕𑀫𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀫𑀡𑀸 𑀦𑀸𑀫 𑀳𑁄𑀦𑁆𑀢𑀺, 𑀲𑁄 𑀅𑀭𑀺𑀬𑀫𑀕𑁆𑀕𑁄 ‘‘𑀲𑀫𑀡𑀲𑁆𑀲 𑀓𑀫𑁆𑀫𑀁 𑀧𑀝𑀺𑀧𑀤𑀸’’𑀢𑀺 𑀓𑀢𑁆𑀯𑀸 𑀲𑀸𑀫𑀜𑁆𑀜𑀁, 𑀢𑀲𑁆𑀲 𑀧𑀦 𑀨𑀮𑀪𑀸𑀯𑀢𑁄, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀭𑀡𑀻𑀬𑀢𑁄 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀲𑀸𑀫𑀜𑁆𑀜𑀢𑁆𑀣𑁄. 𑀭𑀸𑀕𑀁 𑀔𑁂𑀧𑁂𑀢𑀻𑀢𑀺 𑀭𑀸𑀕𑀓𑁆𑀔𑀬𑁄, 𑀅𑀭𑀺𑀬𑀫𑀕𑁆𑀕𑁄. 𑀭𑀸𑀕𑁄 𑀔𑀻𑀬𑀢𑀺 𑀏𑀢𑁆𑀣𑀸𑀢𑀺 𑀭𑀸𑀕𑀓𑁆𑀔𑀬𑁄, 𑀦𑀺𑀩𑁆𑀩𑀸𑀦𑀁. 𑀨𑀮𑀁 𑀧𑀦 𑀓𑀸𑀭𑀡𑀽𑀧𑀘𑀸𑀭𑁂𑀦 𑀭𑀸𑀕𑀓𑁆𑀔𑀬𑁄 𑀤𑀝𑁆𑀞𑀩𑁆𑀩𑁄. 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀸𑀫𑀜𑁆𑀜𑀪𑀽𑀢𑁄 𑀅𑀢𑁆𑀣𑁄 𑀲𑀸𑀫𑀜𑁆𑀜𑀢𑁆𑀣𑁄, 𑀫𑀕𑁆𑀕𑁄, 𑀲𑀸𑀫𑀜𑁆𑀜𑀲𑁆𑀲 𑀅𑀢𑁆𑀣𑁄𑀢𑀺 𑀲𑀸𑀫𑀜𑁆𑀜𑀢𑁆𑀣𑁄, 𑀨𑀮𑀦𑁆𑀢𑀺 𑀆𑀳 ‘‘𑀫𑀕𑁆𑀕𑀫𑁆𑀧𑀺 𑀨𑀮𑀫𑁆𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀲𑀸𑀫𑀜𑁆𑀜𑀢𑁆𑀣𑁄 𑀓𑀣𑀺𑀢𑁄’’𑀢𑀺. 𑀢𑀬𑀺𑀤𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀯𑀼𑀢𑁆𑀢𑀁. 𑀲𑀻𑀮𑀸𑀤𑀺𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀧𑀺 𑀳𑀺 𑀇𑀥 ‘‘𑀲𑀸𑀫𑀜𑁆𑀜𑀢𑁆𑀣𑁄’’𑀢𑀺 𑀕𑀳𑀺𑀢𑀸. 𑀢𑁂𑀦𑁂𑀯𑀸𑀳 ‘‘𑀲𑀢𑀺 𑀉𑀢𑁆𑀢𑀭𑀺𑀓𑀭𑀡𑀻𑀬𑁂’’𑀢𑀺. 𑀧𑀝𑀺𑀯𑁂𑀤𑀬𑀸𑀫𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀜𑀸𑀧𑁂𑀫𑀺.

𑁪𑁧𑁭. 𑀓𑀫𑁆𑀫𑀧𑀣𑀯𑀲𑁂𑀦𑁂𑀯𑀸𑀢𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑀪𑀸𑀯𑁂𑀦𑁂𑀯, 𑀢𑀢𑁄 𑀢𑀸𑀤𑀺𑀲𑀫𑁆𑀧𑀺 𑀅𑀓𑀼𑀲𑀮𑀓𑀫𑁆𑀫𑀁 𑀪𑀺𑀓𑁆𑀔𑀼𑀲𑁆𑀲 𑀓𑀸𑀢𑀼𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀤𑀼𑀝𑁆𑀞𑀼𑀮𑁆𑀮𑀪𑀸𑀯𑁂𑀦𑁂𑀯 𑀢𑀢𑁄 𑀑𑀭𑀫𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀺𑀓𑁆𑀔𑀸𑀧𑀤𑀩𑀤𑁆𑀥𑁂𑀦𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑁂𑀦. 𑀧𑀸𑀦𑀻𑀬𑀖𑀝𑁂 𑀯𑀸 𑀧𑀢𑁆𑀢𑁂 𑀯𑀸 𑀓𑀸𑀓𑀸𑀦𑀁 𑀳𑀢𑁆𑀣𑀁 𑀯𑀸 𑀤𑀡𑁆𑀟𑀁 𑀯𑀸 𑀮𑁂𑀟𑁆𑀟𑀼𑀁 𑀯𑀸𑀢𑀺 𑀲𑀩𑁆𑀩𑀫𑀺𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀬𑀢𑁆𑀣 𑀓𑀢𑁆𑀣𑀘𑀺 𑀳𑀺 𑀞𑀺𑀢𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀧𑀸𑀡𑀻𑀦𑀁 𑀉𑀝𑁆𑀞𑀸𑀧𑀦𑀸𑀤𑀺 𑀲𑀩𑁆𑀩𑀁 𑀅𑀦𑀺𑀝𑁆𑀞𑀓𑀭𑀡𑀁 𑀇𑀥 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑀪𑀸𑀯𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺. 𑀉𑀢𑁆𑀢𑀸𑀦𑁄𑀢𑀺 𑀉𑀤𑁆𑀥𑀫𑀼𑀤𑁆𑀥𑀁 𑀢𑀦𑁄𑀢𑀻𑀢𑀺 𑀉𑀢𑁆𑀢𑀸𑀦𑁄. 𑀏𑀯𑀁𑀪𑀽𑀢𑁄 𑀘 𑀓𑁂𑀦𑀘𑀺 𑀅𑀦𑀼𑀧𑁆𑀧𑀸𑀤𑀪𑀽𑀫𑀺𑀬𑀁 𑀲𑀜𑁆𑀚𑀸𑀢𑀲𑀸𑀮𑀓𑀮𑁆𑀬𑀸𑀡𑀻𑀔𑀦𑁆𑀥𑁄 𑀯𑀺𑀬 𑀉𑀧𑀭𑀽𑀧𑀭𑀺 𑀉𑀕𑁆𑀕𑀢𑀼𑀕𑁆𑀕𑀢𑁄 𑀧𑀸𑀓𑀝𑁄 𑀘 𑀳𑁄𑀢𑀻𑀢𑀺 𑀆𑀳 ‘‘𑀉𑀕𑁆𑀕𑀢𑁄 𑀧𑀸𑀓𑀝𑁄’’𑀢𑀺. 𑀅𑀦𑀸𑀯𑀝𑁄𑀢𑀺 𑀅𑀦𑀺𑀯𑀼𑀢𑁄. 𑀢𑁂𑀦𑀸𑀳 ‘‘𑀅𑀲𑀜𑁆𑀙𑀦𑁆𑀦𑁄’’𑀢𑀺, 𑀦𑀘𑁆𑀙𑀸𑀤𑁂𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀏𑀓𑀲𑀤𑀺𑀲𑁄 𑀯𑀺𑀲𑀼𑀤𑁆𑀥𑀪𑀸𑀯𑁂𑀦. 𑀅𑀦𑁆𑀢𑀭𑀦𑁆𑀢𑀭𑁂 𑀙𑀺𑀤𑁆𑀤𑀭𑀳𑀺𑀢𑁄 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀦𑁆𑀥𑀸𑀦𑁂𑀦. 𑀲𑀁𑀯𑀼𑀢𑁄 𑀓𑀸𑀬𑀺𑀓𑀲𑁆𑀲 𑀲𑀁𑀯𑀭𑀲𑁆𑀲 𑀅𑀦𑀼𑀧𑀓𑁆𑀓𑀺𑀮𑁂𑀲𑀢𑁄. 𑀢𑁂𑀦𑀸𑀳 ‘‘𑀓𑀺𑀮𑁂𑀲𑀸𑀦𑀁 𑀤𑁆𑀯𑀸𑀭𑀁 𑀧𑀺𑀤𑀳𑀦𑁂𑀦𑀸’’𑀢𑀺.

𑁪𑁧𑁮. 𑀏𑀢𑁆𑀣 𑀬𑀣𑀸 𑀮𑀳𑀼𑀓𑀢𑀭𑀁 𑀓𑀸𑀓𑀼𑀝𑁆𑀞𑀸𑀧𑀦𑀸𑀤𑀺𑀓𑀸𑀬𑀓𑀫𑁆𑀫𑀁 𑀓𑀸𑀬𑀲𑀫𑀸𑀘𑀸𑀭𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀯𑀳𑀁 𑀲𑀮𑁆𑀮𑁂𑀔𑀯𑀺𑀓𑁄𑀧𑀦𑀢𑁄, 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀦𑀫𑀢𑁆𑀢𑀜𑁆𑀘 𑀫𑀦𑁄𑀲𑀫𑀸𑀘𑀸𑀭𑀲𑁆𑀲, 𑀏𑀯𑀁 𑀬𑀁 𑀓𑀺𑀜𑁆𑀘𑀺 𑀅𑀦𑀺𑀬𑁆𑀬𑀸𑀦𑀓𑀣𑀸𑀓𑀣𑀦𑀫𑀢𑁆𑀢𑀁 𑀯𑀘𑀻𑀲𑀫𑀸𑀘𑀸𑀭𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀯𑀳𑀁 𑀲𑀮𑁆𑀮𑁂𑀔𑀯𑀺𑀓𑁄𑀧𑀦𑀢𑁄, 𑀦 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 𑀫𑀼𑀲𑀸𑀓𑀣𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 𑀳𑀺 𑀫𑀼𑀲𑀸𑀓𑀣𑀦𑀁 𑀲𑀺𑀓𑁆𑀔𑀸𑀧𑀤𑀩𑀤𑁆𑀥𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺.

𑁪𑁨𑁦. 𑀆𑀚𑀻𑀯𑁄𑀧𑀺 𑀏𑀓𑀘𑁆𑀘𑁄 𑀓𑀫𑁆𑀫𑀧𑀣𑀯𑀲𑁂𑀦 𑀯𑀸𑀭𑀺𑀢𑁄 𑀮𑀩𑁆𑀪𑀢𑀺. 𑀲𑁄 𑀧𑀦 𑀅𑀢𑀺𑀑𑀴𑀸𑀭𑀺𑀓𑁄 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀯𑀸𑀭𑁂𑀲𑀼 𑀯𑀼𑀢𑁆𑀢𑀦𑀬𑁄 𑀏𑀯𑀸𑀢𑀺 𑀦 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀬𑁂 𑀧𑀦 ‘‘𑀢𑀸𑀤𑀺𑀲𑁄 𑀪𑀺𑀓𑁆𑀔𑀽𑀦𑀁 𑀅𑀬𑁄𑀕𑁆𑀬𑀢𑁄 𑀦 𑀕𑀳𑀺𑀢𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀫𑀺𑀘𑁆𑀙𑀸 𑀢𑀣𑀸 𑀲𑀢𑀺 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀯𑀸𑀭𑁂𑀧𑀺 𑀢𑀲𑁆𑀲 𑀅𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑀸𑀧𑀢𑁆𑀢𑀺𑀢𑁄. ‘‘𑀔𑀸𑀤𑀣 𑀧𑀺𑀯𑀣𑀸’’𑀢𑀺 𑀧𑀼𑀘𑁆𑀙𑀸 𑀅𑀢𑁆𑀢𑀦𑁄 𑀔𑀸𑀤𑀺𑀢𑀼𑀓𑀸𑀫𑀢𑀸𑀤𑀻𑀧𑀦𑁂𑀦, 𑀧𑀭𑀺𑀬𑀸𑀬𑀓𑀣𑀸𑀪𑀸𑀯𑀢𑁄 𑀧𑀦𑁂𑀲𑀸 𑀲𑀮𑁆𑀮𑁂𑀔𑀯𑀺𑀓𑁄𑀧𑀦𑀸 𑀚𑀸𑀢𑀸.

𑁪𑁨𑁨. 𑀅𑀦𑁂𑀲𑀦𑀁 𑀧𑀳𑀸𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀘𑁆𑀘𑀬𑁂 𑀧𑀭𑀺𑀬𑁂𑀲𑀦𑁆𑀢𑁄 𑀧𑀭𑀺𑀬𑁂𑀲𑀦𑀫𑀢𑁆𑀢𑀜𑁆𑀜𑀽 𑀦𑀸𑀫. 𑀤𑀸𑀬𑀓𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀢𑁆𑀢𑀦𑁄 𑀘 𑀧𑀫𑀸𑀡𑀜𑁆𑀜𑀼𑀢𑀸𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑀜𑁆𑀜𑀽 𑀦𑀸𑀫. 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀭𑀺𑀪𑁄𑀕𑀫𑀢𑁆𑀢𑀜𑁆𑀜𑀽 𑀦𑀸𑀫.

𑁪𑁨𑁩. 𑀏𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂𑀢𑀺 𑀫𑀚𑁆𑀛𑀺𑀫𑀬𑀸𑀫𑀲𑀜𑁆𑀜𑀺𑀢𑁂 𑀏𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂. ‘‘𑀯𑀸𑀫𑁂𑀦 𑀧𑀲𑁆𑀲𑁂𑀦 𑀲𑁂𑀦𑁆𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸. 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀸𑀦𑁄 𑀦𑀸𑀫 𑀦𑀢𑁆𑀣𑀺 𑀤𑀓𑁆𑀔𑀺𑀡𑀳𑀢𑁆𑀣𑀲𑁆𑀲 𑀲𑀭𑀻𑀭𑀕𑁆𑀕𑀳𑀡𑀸𑀤𑀺𑀧𑀬𑁄𑀕𑀓𑁆𑀔𑀫𑀢𑁄. 𑀧𑀼𑀭𑀺𑀲𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁.

𑀢𑁂𑀚𑀼𑀲𑁆𑀲𑀤𑀢𑁆𑀢𑀸𑀢𑀺 𑀇𑀫𑀺𑀦𑀸 𑀲𑀻𑀳𑀲𑁆𑀲 𑀅𑀪𑀻𑀭𑀼𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀪𑀻𑀭𑀼𑀓𑀸 𑀳𑀺 𑀲𑁂𑀲𑀫𑀺𑀕𑀸 𑀅𑀢𑁆𑀢𑀦𑁄 𑀆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀲𑀦𑁆𑀢𑀸𑀲𑀧𑀼𑀩𑁆𑀩𑀓𑀁 𑀬𑀣𑀸 𑀢𑀣𑀸 𑀲𑀬𑀦𑁆𑀢𑀺, 𑀲𑀻𑀳𑁄 𑀧𑀦 𑀅𑀪𑀻𑀭𑀼𑀓𑀪𑀸𑀯𑀢𑁄 𑀲𑀢𑁄𑀓𑀸𑀭𑀻 𑀪𑀺𑀓𑁆𑀔𑀼 𑀯𑀺𑀬 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀯 𑀲𑀬𑀢𑀺. 𑀢𑁂𑀦𑀸𑀳 ‘‘𑀤𑁆𑀯𑁂 𑀧𑀼𑀭𑀺𑀫𑀧𑀸𑀤𑁂’’𑀢𑀺𑀆𑀤𑀺. 𑀲𑁂𑀢𑀺 𑀅𑀩𑁆𑀬𑀸𑀯𑀝𑀪𑀸𑀯𑁂𑀦 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀲𑁂𑀬𑁆𑀬𑀸, 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀲𑁂𑀬𑁆𑀬𑀸. 𑀓𑀺𑀁 𑀧𑀦 𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑁆𑀢𑀺? 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁. 𑀢𑀢𑁆𑀣 𑀳𑀺 𑀞𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀪𑀕𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀕𑁆𑀕𑀫𑀕𑁆𑀕𑀁 𑀅𑀥𑀺𑀕𑀢𑁄 𑀢𑀣𑀸𑀕𑀢𑁄 𑀚𑀸𑀢𑁄𑀢𑀺 𑀓𑁂𑀘𑀺, 𑀢𑀬𑀺𑀤𑀁 𑀧𑀤𑀝𑁆𑀞𑀸𑀦𑀁 𑀦𑀸𑀫 𑀦 𑀲𑁂𑀬𑁆𑀬𑀸. 𑀅𑀧𑀭𑁂 𑀧𑀦 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀦𑀦𑁆𑀢𑀭𑀸 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀯𑀼𑀢𑁆𑀢𑀧𑀤𑀁 𑀕𑀳𑁂𑀢𑁆𑀯𑀸 ‘‘𑀮𑁄𑀓𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀢𑀣𑀸𑀕𑀢𑀲𑁂𑀬𑁆𑀬𑀸’’𑀢𑀺 𑀯𑀤𑀦𑁆𑀢𑀺, 𑀢𑀣𑀸 𑀲𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀺𑀓𑀸 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀆𑀧𑀚𑁆𑀚𑀢𑀺, 𑀦 𑀘 𑀪𑀕𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀦𑀩𑀳𑀼𑀮𑁄 𑀯𑀺𑀳𑀸𑀲𑀺, 𑀅𑀕𑁆𑀕𑀨𑀮𑀛𑀸𑀦𑀁 𑀧𑀦𑁂𑀢𑁆𑀣 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀣 𑀬𑀣𑀸 𑀲𑀢𑁆𑀢𑀸𑀦𑀁 𑀦𑀺𑀤𑁆𑀤𑀼𑀧𑀕𑀫𑀦𑀮𑀓𑁆𑀔𑀡𑀸 𑀲𑁂𑀬𑁆𑀬𑀸 𑀪𑀯𑀗𑁆𑀕𑀘𑀺𑀢𑁆𑀢𑀯𑀸𑀭𑀯𑀲𑁂𑀦 𑀳𑁄𑀢𑀺, 𑀢𑀜𑁆𑀘 𑀢𑁂𑀲𑀁 𑀧𑀞𑀫𑀚𑀸𑀢𑀺𑀲𑀫𑀦𑁆𑀯𑀬𑀁 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀓𑀁, 𑀏𑀯𑀁 𑀪𑀕𑀯𑀢𑁄 𑀅𑀭𑀺𑀬𑀚𑀸𑀢𑀺𑀲𑀫𑀦𑁆𑀯𑀬𑀁 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀓𑀁 𑀅𑀕𑁆𑀕𑀨𑀮𑀪𑀽𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 ‘‘𑀢𑀣𑀸𑀕𑀢𑀲𑁂𑀬𑁆𑀬𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀻𑀳𑀲𑁂𑀬𑁆𑀬𑀸𑀢𑀺 𑀲𑁂𑀝𑁆𑀞𑀲𑁂𑀬𑁆𑀬𑀸𑀢𑀺 𑀆𑀳 ‘‘𑀉𑀢𑁆𑀢𑀫𑀲𑁂𑀬𑁆𑀬𑀸’’𑀢𑀺.

𑁪𑁨𑁬. 𑀯𑀺𑀕𑀢𑀦𑁆𑀢𑀸𑀦𑀻𑀢𑀺 𑀇𑀡𑀫𑀽𑀮𑀸𑀦𑀺. 𑀢𑁂𑀲𑀦𑁆𑀢𑀺 𑀇𑀡𑀫𑀽𑀮𑀸𑀦𑀁. 𑀧𑀭𑀺𑀬𑀦𑁆𑀢𑁄𑀢𑀺 𑀅𑀯𑀲𑁂𑀲𑁄.

𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀘𑀢𑀼𑀇𑀭𑀺𑀬𑀸𑀧𑀣𑀁 𑀙𑀺𑀦𑁆𑀤𑀦𑁆𑀢𑁄. 𑀆𑀩𑀸𑀥𑀢𑀻𑀢𑀺 𑀧𑀻𑀴𑁂𑀢𑀺. 𑀤𑀼𑀓𑁆𑀔𑀺𑀢𑁄𑀢𑀺 𑀲𑀜𑁆𑀚𑀸𑀢𑀤𑀼𑀓𑁆𑀔𑁄. 𑀅𑀧𑁆𑀧𑀁 𑀩𑀮𑀁 𑀩𑀮𑀫𑀢𑁆𑀢𑀸. 𑀅𑀧𑁆𑀧𑀢𑁆𑀣𑁄 𑀳𑀺 𑀅𑀬𑀁 𑀫𑀢𑁆𑀢𑀸-𑀲𑀤𑁆𑀤𑁄 ‘‘𑀫𑀢𑁆𑀢𑀸𑀲𑀼𑀔𑀧𑀭𑀺𑀘𑁆𑀘𑀸𑀕𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁯𑁦) 𑀯𑀺𑀬, 𑀩𑀮𑀯𑀢𑁆𑀣𑁄 𑀧𑀦 𑀫𑀢𑁆𑀢𑀸-𑀲𑀤𑁆𑀤𑁄 𑀅𑀦𑀢𑁆𑀣𑀦𑁆𑀢𑀭𑁄. 𑀲𑁂𑀲𑀦𑁆𑀢𑀺 ‘‘𑀢𑀲𑁆𑀲 𑀳𑀺 𑀩𑀦𑁆𑀥𑀦𑀸 𑀫𑀼𑀢𑁆𑀢𑁄𑀫𑁆𑀳𑀻𑀢𑀺 𑀆𑀯𑀚𑁆𑀚𑀬𑀢𑁄 𑀢𑀤𑀼𑀪𑀬𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁 𑀲𑀦𑁆𑀥𑀸𑀬𑀸𑀳. 𑀲𑀩𑁆𑀩𑀧𑀤𑁂𑀲𑀽𑀢𑀺 𑀯𑀼𑀢𑁆𑀢𑀸𑀯𑀲𑀺𑀝𑁆𑀞𑁂𑀲𑀼 𑀲𑀩𑁆𑀩𑀧𑀤𑁂𑀲𑀼. 𑀬𑁂𑀦𑀓𑀸𑀫𑀁 𑀬𑀣𑀸𑀭𑀼𑀘𑀺 𑀕𑀘𑁆𑀙𑀢𑀻𑀢𑀺 𑀬𑁂𑀦𑀓𑀸𑀫𑀁𑀕𑀫𑁄𑀢𑀺 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀅𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀪𑀼𑀚𑁄 𑀅𑀢𑁆𑀢𑀦𑁄 𑀬𑀣𑀸𑀲𑀼𑀔𑀯𑀺𑀦𑀺𑀬𑁄𑀕𑁄 𑀇𑀲𑁆𑀲𑁄 𑀇𑀘𑁆𑀙𑀺𑀢𑀩𑁆𑀩𑁄 𑀏𑀢𑁆𑀣𑀸𑀢𑀺 𑀪𑀼𑀚𑀺𑀲𑁆𑀲𑁄, 𑀲𑀸𑀫𑀺𑀓𑁄. 𑀲𑁄 𑀧𑀦 𑀅𑀧𑀭𑀲𑀦𑁆𑀢𑀓𑀢𑀸𑀬 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑁄’’𑀢𑀺 𑀯𑀼𑀢𑁆𑀢𑁄. 𑀤𑀼𑀮𑁆𑀮𑀪𑀆𑀧𑀢𑀸𑀬 𑀓𑀁 𑀢𑀸𑀭𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀦𑁆𑀢𑀸𑀭𑁄𑀢𑀺 𑀆𑀳 ‘‘𑀦𑀺𑀭𑀼𑀤𑀓𑀁 𑀤𑀻𑀖𑀫𑀕𑁆𑀕’’𑀦𑁆𑀢𑀺.

𑀯𑀺𑀦𑀸𑀲𑁂𑀢𑀻𑀢𑀺 𑀔𑀸𑀤𑀦𑀤𑀼𑀩𑁆𑀩𑀺𑀦𑀺𑀬𑁄𑀚𑀦𑀸𑀤𑀻𑀳𑀺 𑀬𑀣𑀸 𑀇𑀡𑀫𑀽𑀮𑀁 𑀓𑀺𑀜𑁆𑀘𑀺 𑀦 𑀳𑁄𑀢𑀺, 𑀢𑀣𑀸 𑀓𑀭𑁄𑀢𑀺. 𑀬𑀫𑁆𑀳𑀺 𑀭𑀸𑀕𑀯𑀢𑁆𑀣𑀼𑀫𑁆𑀳𑀺. 𑀲𑁄 𑀧𑀼𑀕𑁆𑀕𑀮𑁄. 𑀢𑁂𑀦 𑀭𑀸𑀕𑀯𑀢𑁆𑀣𑀼𑀦𑀸, 𑀧𑀼𑀭𑀺𑀲𑁄 𑀘𑁂 𑀇𑀢𑁆𑀣𑀺𑀬𑀸, 𑀇𑀢𑁆𑀣𑀻 𑀘𑁂 𑀧𑀼𑀭𑀺𑀲𑁂𑀦. 𑀇𑀡𑀁 𑀯𑀺𑀬 𑀓𑀸𑀫𑀘𑁆𑀙𑀦𑁆𑀤𑁄 𑀤𑀝𑁆𑀞𑀩𑁆𑀩𑁄 𑀧𑀻𑀴𑀸𑀲𑀫𑀸𑀦𑀢𑁄.

𑀦 𑀯𑀺𑀦𑁆𑀤𑀢𑀻𑀢𑀺 𑀦 𑀚𑀸𑀦𑀸𑀢𑀺. 𑀉𑀧𑀤𑁆𑀤𑀯𑁂𑀣𑀸𑀢𑀺 𑀲𑀼𑀔𑀯𑀺𑀳𑀸𑀭𑀲𑁆𑀲 𑀉𑀧𑀤𑁆𑀤𑀯𑀁 𑀓𑀭𑁄𑀣, 𑀯𑀺𑀩𑀸𑀥𑁂𑀣𑀸𑀢𑀺 𑀅𑀢𑁆𑀣𑁄. 𑀭𑁄𑀕𑁄 𑀯𑀺𑀬 𑀩𑁆𑀬𑀸𑀧𑀸𑀤𑁄 𑀤𑀝𑁆𑀞𑀩𑁆𑀩𑁄 𑀲𑀼𑀔𑀪𑀜𑁆𑀚𑀦𑀲𑀫𑀸𑀦𑀢𑁄.

𑀦𑀸𑀦𑀸𑀯𑀺𑀥𑀳𑁂𑀢𑀽𑀧𑀸𑀬𑀸𑀮𑀗𑁆𑀓𑀢𑀢𑀸𑀬 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀥𑀫𑁆𑀫𑀦𑀻𑀢𑀺𑀯𑀺𑀘𑀺𑀢𑁆𑀢𑀢𑀸𑀬 𑀘 𑀯𑀺𑀘𑀺𑀢𑁆𑀢𑀦𑀬𑁂. 𑀥𑀫𑁆𑀫𑀲𑁆𑀲𑀯𑀦𑁂𑀢𑀺 𑀥𑀫𑁆𑀫𑀓𑀣𑀸𑀬𑀁. 𑀓𑀣𑀸 𑀳𑀺 𑀲𑁄𑀢𑀩𑁆𑀩𑀝𑁆𑀞𑁂𑀦 ‘‘𑀲𑀯𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀏𑀯𑀫𑁂𑀢𑁆𑀣 𑀲𑀻𑀮𑀁 𑀯𑀺𑀪𑀢𑁆𑀢𑀁, 𑀏𑀯𑀁 𑀛𑀸𑀦𑀸𑀪𑀺𑀜𑁆𑀜𑀸, 𑀏𑀯𑀁 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀻𑀢𑀺 𑀦𑁂𑀯 𑀢𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀚𑀸𑀦𑀸𑀢𑀺. 𑀉𑀝𑁆𑀞𑀺𑀢𑁂𑀢𑀺 𑀦𑀺𑀝𑁆𑀞𑀺𑀢𑁂. 𑀅𑀳𑁄 𑀓𑀸𑀭𑀡𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑁂𑀦 𑀦𑀺𑀓𑁆𑀔𑀺𑀢𑁆𑀢𑀲𑀸𑀥𑀦𑀯𑀲𑁂𑀦 𑀕𑀳𑀺𑀢𑀓𑀸𑀭𑀡𑀁. 𑀅𑀳𑁄 𑀉𑀧𑀫𑀸𑀢𑀺 𑀢𑀲𑁆𑀲𑁂𑀯 𑀓𑀸𑀭𑀡𑀲𑁆𑀲 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀧𑀢𑀺𑀝𑁆𑀞𑀁 𑀉𑀤𑀸𑀳𑀭𑀡𑀸𑀤𑀺. 𑀩𑀦𑁆𑀥𑀦𑀸𑀕𑀸𑀭𑀁 𑀯𑀺𑀬 𑀣𑀺𑀦𑀫𑀺𑀤𑁆𑀥𑀁 𑀤𑀝𑁆𑀞𑀩𑁆𑀩𑀁 𑀤𑀼𑀓𑁆𑀔𑀢𑁄 𑀦𑀺𑀬𑁆𑀬𑀸𑀦𑀲𑁆𑀲 𑀯𑀺𑀩𑀦𑁆𑀥𑀦𑀢𑁄.

𑀬𑀲𑁆𑀫𑀸 𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀭𑀳𑀺𑀢𑀁 𑀦𑀢𑁆𑀣𑀺, 𑀬𑀲𑁆𑀫𑀸 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀲𑀫𑀸𑀦𑀓𑀺𑀘𑁆𑀘𑀸𑀳𑀸𑀭𑀧𑀝𑀺𑀧𑀓𑁆𑀔𑀁, 𑀢𑀲𑁆𑀫𑀸 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀳𑀺 𑀉𑀤𑁆𑀥𑀘𑁆𑀘𑀁 𑀲𑀢𑁆𑀢𑀲𑁆𑀲 𑀅𑀯𑀽𑀧𑀲𑀫𑀓𑀭𑀁, 𑀢𑀣𑀸 𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺. 𑀬𑀣𑀸𑀧𑀺 𑀉𑀤𑁆𑀥𑀘𑁆𑀘𑀲𑁆𑀲 𑀜𑀸𑀢𑀺𑀯𑀺𑀢𑀓𑁆𑀓𑀸𑀤𑀺 𑀆𑀳𑀸𑀭𑁄, 𑀢𑀣𑀸 𑀓𑀼𑀓𑁆𑀓𑀼𑀘𑁆𑀘𑀲𑁆𑀲𑀧𑀺. 𑀬𑀣𑀸 𑀘 𑀉𑀤𑁆𑀥𑀘𑁆𑀘𑀲𑁆𑀲 𑀲𑀫𑀣𑁄 𑀧𑀝𑀺𑀧𑀓𑁆𑀔𑁄, 𑀢𑀣𑀸 𑀓𑀼𑀓𑁆𑀓𑀼𑀘𑁆𑀘𑀲𑁆𑀲𑀧𑀻𑀢𑀺. 𑀤𑀸𑀲𑀩𑁆𑀬𑀁 𑀯𑀺𑀬 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀤𑀝𑁆𑀞𑀩𑁆𑀩𑀁 𑀅𑀲𑁂𑀭𑀺𑀪𑀸𑀯𑀸𑀧𑀸𑀤𑀦𑀢𑁄.

𑀲𑁄𑀴𑀲𑀯𑀢𑁆𑀣𑀼𑀓𑀸 𑀯𑀺𑀘𑀺𑀓𑀺𑀘𑁆𑀙𑀸 𑀅𑀝𑁆𑀞𑀯𑀢𑁆𑀣𑀼𑀓𑀁 𑀯𑀺𑀘𑀺𑀓𑀺𑀘𑁆𑀙𑀁 𑀅𑀦𑀼𑀧𑀯𑀺𑀝𑁆𑀞𑀸𑀢𑀺 𑀆𑀳 ‘‘𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸’’𑀢𑀺. 𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑁄𑀢𑀺 𑀲𑀁𑀲𑀬𑀦𑁆𑀢𑁄. 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸𑀢𑀺 𑀧𑀢𑁆𑀢𑀺𑀬𑀸𑀬𑁂𑀢𑁆𑀯𑀸. 𑀕𑀡𑁆𑀳𑀺𑀢𑀼𑀦𑁆𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 𑀧𑀭𑀺𑀕𑁆𑀕𑀳𑁂𑀢𑀼𑀁. 𑀅𑀪𑀺𑀫𑀼𑀔𑀁 𑀲𑀧𑁆𑀧𑀦𑀁 𑀆𑀲𑀧𑁆𑀧𑀦𑀁, 𑀧𑀭𑀺𑀢𑁄 𑀲𑀧𑁆𑀧𑀦𑀁 𑀧𑀭𑀺𑀲𑀧𑁆𑀧𑀦𑀁. 𑀧𑀤𑀤𑁆𑀯𑀬𑁂𑀦𑀧𑀺 𑀘𑀺𑀢𑁆𑀢𑀲𑁆𑀲 𑀅𑀦𑀺𑀘𑁆𑀙𑀦𑀸𑀓𑀸𑀭𑀫𑁂𑀯 𑀯𑀤𑀢𑀺. 𑀔𑁂𑀫𑀦𑁆𑀢𑀕𑀸𑀫𑀺𑀫𑀕𑁆𑀕𑀁 𑀦 𑀧𑀭𑀺𑀬𑁄𑀕𑀸𑀳𑀢𑀺 𑀏𑀢𑁂𑀦𑀸𑀢𑀺 𑀅𑀧𑀭𑀺𑀬𑁄𑀕𑀸𑀳𑀦𑀁, 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑀪𑀸𑀯𑁂𑀦 𑀙𑀫𑁆𑀪𑀺𑀢𑀁 𑀳𑁄𑀢𑀺 𑀘𑀺𑀢𑁆𑀢𑀁 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦, 𑀲𑁄 𑀥𑀫𑁆𑀫𑁄 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀦𑀸𑀓𑀸𑀭𑀫𑀸𑀳. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀬𑀫𑀸𑀦𑀸’’𑀢𑀺. 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑁄 𑀯𑀺𑀬𑀸𑀢𑀺 𑀲𑀸𑀲𑀗𑁆𑀓𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸 𑀅𑀧𑁆𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄.

𑀦𑀢𑁆𑀣𑀺 𑀏𑀢𑁆𑀣 𑀇𑀡𑀦𑁆𑀢𑀺 𑀅𑀡𑀡𑁄, 𑀢𑀲𑁆𑀲 𑀪𑀸𑀯𑁄 𑀆𑀡𑀡𑁆𑀬𑀁, 𑀓𑀲𑁆𑀲𑀘𑀺 𑀇𑀡𑀲𑁆𑀲 𑀅𑀥𑀸𑀭𑀡𑀁. 𑀲𑀫𑀺𑀤𑁆𑀥𑀓𑀫𑁆𑀫𑀦𑁆𑀢𑁄𑀢𑀺 𑀦𑀺𑀧𑁆𑀨𑀦𑁆𑀦𑀚𑀻𑀯𑀺𑀓𑀧𑁆𑀧𑀬𑁄𑀕𑁄. 𑀧𑀭𑀺𑀩𑀼𑀦𑁆𑀥𑀢𑀺 𑀉𑀧𑀭𑁄𑀥𑁂𑀢𑀻𑀢𑀺 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸 𑀧𑀮𑀺𑀩𑁄𑀥𑁄, 𑀅𑀲𑁂𑀭𑀺𑀯𑀺𑀳𑀸𑀭𑁄, 𑀢𑀲𑁆𑀲 𑀫𑀽𑀮𑀁 𑀓𑀸𑀭𑀡𑀦𑁆𑀢𑀺 𑀧𑀮𑀺𑀩𑁄𑀥𑀫𑀽𑀮𑀁. 𑀙 𑀥𑀫𑁆𑀫𑁂 𑀪𑀸𑀯𑁂𑀢𑁆𑀯𑀸𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀸𑀤𑀺𑀓𑁂 𑀙 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸. 𑀙 𑀥𑀫𑁆𑀫𑁂 𑀪𑀸𑀯𑁂𑀢𑁆𑀯𑀸𑀢𑀺 𑀘 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀸𑀤𑀬𑁄 𑀘 𑀢𑀢𑁆𑀣 𑀢𑀢𑁆𑀣 𑀙 𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀚𑀳𑀢𑀻𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀚𑀳𑀢𑀺. 𑀢𑁂𑀦𑀸𑀳 ‘‘𑀆𑀘𑀸𑀭𑀧𑀡𑁆𑀡𑀢𑁆𑀢𑀺𑀆𑀤𑀻𑀦𑀺 𑀲𑀺𑀓𑁆𑀔𑀸𑀧𑀺𑀬𑀫𑀸𑀦𑁄’’𑀢𑀺𑀆𑀤𑀺. 𑀧𑀭𑀯𑀢𑁆𑀣𑀼𑀫𑁆𑀳𑀻𑀢𑀺 𑀯𑀺𑀲𑀪𑀸𑀕𑀯𑀢𑁆𑀣𑀼𑀲𑁆𑀫𑀺𑀁, 𑀧𑀭𑀯𑀺𑀲𑀬𑁂 𑀯𑀸. 𑀧𑀭𑀯𑀺𑀲𑀬𑀸 𑀳𑁂𑀢𑁂 𑀪𑀺𑀓𑁆𑀔𑀼𑀦𑁄, 𑀬𑀤𑀺𑀤𑀁 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀆𑀡𑀡𑁆𑀬𑀫𑀺𑀯 𑀓𑀸𑀫𑀘𑁆𑀙𑀦𑁆𑀤𑀧𑁆𑀧𑀳𑀸𑀦𑀁 𑀆𑀳 𑀧𑀺𑀬𑀯𑀢𑁆𑀣𑀼𑀅𑀪𑀸𑀯𑀸𑀯𑀳𑀢𑁄.

𑀆𑀘𑀸𑀭𑀯𑀺𑀧𑀢𑁆𑀢𑀺𑀧𑀝𑀺𑀩𑀸𑀳𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀆𑀘𑀸𑀭𑀧𑀡𑁆𑀡𑀢𑁆𑀢𑀺𑀆𑀤𑀻𑀦𑀺. 𑀆𑀭𑁄𑀕𑁆𑀬𑀫𑀺𑀯 𑀩𑁆𑀬𑀸𑀧𑀸𑀤𑀧𑁆𑀧𑀳𑀸𑀦𑀁 𑀆𑀳 𑀓𑀸𑀬𑀘𑀺𑀢𑁆𑀢𑀸𑀦𑀁 𑀨𑀸𑀲𑀼𑀪𑀸𑀯𑀸𑀯𑀳𑀢𑁄.

𑀩𑀦𑁆𑀥𑀦𑀸 𑀫𑁄𑀓𑁆𑀔𑀫𑀺𑀯 𑀣𑀺𑀦𑀫𑀺𑀤𑁆𑀥𑀧𑁆𑀧𑀳𑀸𑀦𑀁 𑀆𑀳 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀳𑀺𑀢𑀪𑀸𑀯𑀸𑀯𑀳𑀢𑁄.

𑀪𑀼𑀚𑀺𑀲𑁆𑀲𑀁 𑀯𑀺𑀬 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀳𑀸𑀦𑀁 𑀆𑀳 𑀘𑀺𑀢𑁆𑀢𑀲𑁆𑀲 𑀲𑁂𑀭𑀺𑀪𑀸𑀯𑀸𑀯𑀳𑀢𑁄.

𑀢𑀺𑀡𑀁 𑀯𑀺𑀬𑀸𑀢𑀺 𑀢𑀺𑀡𑀫𑀺𑀯 𑀓𑀢𑁆𑀯𑀸. 𑀅𑀕𑀡𑁂𑀢𑁆𑀯𑀸𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸. 𑀔𑁂𑀫𑀦𑁆𑀢𑀪𑀽𑀫𑀺𑀁 𑀯𑀺𑀬 𑀯𑀺𑀘𑀺𑀓𑀺𑀘𑁆𑀙𑀸𑀧𑀳𑀸𑀦𑀁 𑀆𑀳 𑀅𑀦𑀼𑀲𑁆𑀲𑀗𑁆𑀓𑀺𑀢𑀸𑀧𑀭𑀺𑀲𑀗𑁆𑀓𑀺𑀢𑀪𑀸𑀯𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄.

𑁪𑁨𑁭. 𑀓𑀺𑀭𑀻𑀬𑀢𑀺 (𑀅. 𑀦𑀺. 𑀝𑀻. 𑁩.𑁫.𑁨𑁮-𑁨𑁯) 𑀕𑀩𑁆𑀪𑀸𑀲𑀬𑁂 𑀔𑀺𑀧𑀻𑀬𑀢𑀻𑀢𑀺 𑀓𑀭𑁄, 𑀲𑀫𑁆𑀪𑀯𑁄, 𑀓𑀭𑀢𑁄 𑀚𑀸𑀢𑁄𑀢𑀺 𑀓𑀭𑀚𑁄, 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄𑀢𑀺 𑀅𑀢𑁆𑀣𑁄. 𑀫𑀸𑀢𑀼𑀬𑀸 𑀳𑀺 𑀲𑀭𑀻𑀭𑀲𑀡𑁆𑀞𑀸𑀧𑀦𑀯𑀲𑁂𑀦 𑀓𑀭𑀢𑁄 𑀚𑀸𑀢𑁄𑀢𑀺 𑀓𑀭𑀚𑁄𑀢𑀺 𑀅𑀧𑀭𑁂. 𑀉𑀪𑀬𑀣𑀸𑀧𑀺 𑀓𑀭𑀚𑀓𑀸𑀬𑀦𑁆𑀢𑀺 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀫𑀸𑀳. 𑀢𑁂𑀫𑁂𑀢𑀻𑀢𑀺 𑀢𑀺𑀦𑁆𑀢𑀁 𑀓𑀭𑁄𑀢𑀺. 𑀓𑁄 𑀧𑀦𑁂𑀢𑁆𑀣 𑀢𑀺𑀦𑁆𑀢𑀪𑀸𑀯𑁄𑀢𑀺 𑀆𑀳 ‘‘𑀲𑁆𑀦𑁂𑀳𑁂𑀢𑀻’’𑀢𑀺, 𑀧𑀻𑀢𑀺𑀲𑁆𑀦𑁂𑀳𑁂𑀦 𑀧𑀻𑀡𑀦𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑀢𑁆𑀣 𑀧𑀯𑀢𑁆𑀢𑀧𑀻𑀢𑀺𑀲𑀼𑀔𑀁 𑀓𑀭𑁄𑀢𑀻’’𑀢𑀺. 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑁂𑀳𑀺 𑀲𑀓𑀮𑀲𑁆𑀲 𑀓𑀭𑀚𑀓𑀸𑀬𑀲𑁆𑀲 𑀧𑀭𑀺𑀨𑀼𑀝𑀢𑀸𑀬 𑀘𑁂𑀢𑁆𑀣 𑀢𑀁𑀲𑀫𑀼𑀝𑁆𑀞𑀸𑀧𑀓𑀧𑀻𑀢𑀺𑀲𑀼𑀔𑀸𑀦𑀁 𑀲𑀩𑁆𑀩𑀢𑁆𑀣 𑀧𑀯𑀢𑁆𑀢𑀺 𑀚𑁄𑀢𑀺𑀢𑀸. 𑀧𑀭𑀺𑀲𑀦𑁆𑀤𑁂𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣𑀸𑀧𑀺 𑀳𑀺 ‘‘𑀲𑀫𑀦𑁆𑀢𑀢𑁄 𑀲𑀦𑁆𑀤𑁂𑀢𑀺 𑀢𑁂𑀫𑁂𑀢𑀺 𑀲𑁆𑀦𑁂𑀳𑁂𑀢𑀺, 𑀲𑀩𑁆𑀩𑀢𑁆𑀣 𑀧𑀯𑀢𑁆𑀢𑀧𑀻𑀢𑀺𑀲𑀼𑀔𑀁 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 𑀬𑀣𑀸𑀭𑀳𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀧𑀽𑀭𑁂𑀢𑀻𑀢𑀺 𑀯𑀸𑀬𑀼𑀦𑀸 𑀪𑀲𑁆𑀢𑀁 𑀯𑀺𑀬 𑀇𑀫𑀁 𑀓𑀭𑀚𑀓𑀸𑀬𑀁 𑀧𑀻𑀢𑀺𑀲𑀼𑀔𑁂𑀦 𑀧𑀽𑀭𑁂𑀢𑀺. 𑀲𑀫𑀦𑁆𑀢𑀢𑁄 𑀨𑀼𑀲𑀢𑀻𑀢𑀺 𑀇𑀫𑀁 𑀓𑀭𑀚𑀓𑀸𑀬𑀁 𑀧𑀻𑀢𑀺𑀲𑀼𑀔𑁂𑀦 𑀨𑀼𑀲𑀢𑀺. 𑀲𑀩𑁆𑀩𑀸𑀯𑀢𑁄𑀢𑀺 𑀅-𑀓𑀸𑀭𑀲𑁆𑀲 𑀆-𑀓𑀸𑀭𑁄 𑀓𑀢𑁄, 𑀲𑀩𑁆𑀩𑀸𑀯𑀬𑀯𑀯𑀢𑁄𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀲𑀩𑁆𑀩𑀓𑁄𑀝𑁆𑀞𑀸𑀲𑀯𑀢𑁄’’𑀢𑀺, 𑀫𑀁𑀲𑀸𑀤𑀺𑀲𑀩𑁆𑀩𑀸𑀪𑀸𑀕𑀯𑀢𑁄𑀢𑀺 𑀅𑀢𑁆𑀣𑁄. 𑀅𑀨𑀼𑀝𑀁 𑀦𑀸𑀫 𑀦 𑀳𑁄𑀢𑀺 𑀧𑀻𑀢𑀺𑀲𑀼𑀔𑀲𑀫𑀼𑀝𑁆𑀞𑀸𑀦𑁂𑀳𑀺 𑀭𑀽𑀧𑁂𑀳𑀺 𑀲𑀩𑁆𑀩𑀢𑁆𑀣𑀓𑀫𑁂𑀯 𑀩𑁆𑀬𑀸𑀧𑀺𑀢𑀢𑁆𑀢𑀸. 𑀓𑀸𑀢𑀼𑀜𑁆𑀘𑁂𑀯 𑀬𑁄𑀚𑁂𑀢𑀼𑀜𑁆𑀘 𑀙𑁂𑀓𑁄 𑀲𑀦𑁆𑀦𑁂𑀢𑀼𑀁 𑀧𑀝𑀺𑀩𑀮𑁄𑀢𑀺 𑀬𑁄𑀚𑀦𑀸. 𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀸𑀦𑀁 𑀧𑀭𑀺𑀫𑀤𑁆𑀤𑀦𑀯𑀲𑁂𑀦 𑀧𑀺𑀡𑁆𑀟𑀁 𑀓𑀭𑁄𑀦𑁆𑀢𑁂𑀦 𑀳𑀢𑁆𑀣𑁂𑀦 𑀪𑀸𑀚𑀦𑀁 𑀦𑀺𑀧𑁆𑀧𑀻𑀴𑁂𑀢𑀩𑁆𑀩𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀦𑁆𑀦𑁂𑀦𑁆𑀢𑀲𑁆𑀲 𑀪𑀺𑀚𑁆𑀚𑀢𑀻’’𑀢𑀺. 𑀅𑀦𑀼𑀕𑀢𑀸𑀢𑀺 𑀅𑀦𑀼𑀧𑀯𑀺𑀝𑁆𑀞𑀸. 𑀧𑀭𑀺𑀕𑀢𑀸𑀢𑀺 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀢𑀺𑀦𑁆𑀢𑀸. 𑀢𑀺𑀦𑁆𑀢𑀪𑀸𑀯𑁂𑀦𑁂𑀯 𑀲𑀫𑀁 𑀅𑀦𑁆𑀢𑀭𑀁 𑀩𑀸𑀳𑀺𑀭𑀜𑁆𑀘 𑀏𑀢𑀺𑀲𑁆𑀲𑀸𑀢𑀺 𑀲𑀦𑁆𑀢𑀭𑀩𑀸𑀳𑀺𑀭𑀸. 𑀲𑀩𑁆𑀩𑀢𑁆𑀣𑀓𑀫𑁂𑀯𑀸𑀢𑀺 𑀲𑀩𑁆𑀩𑀢𑁆𑀣𑁂𑀯. 𑀦 𑀘 𑀧𑀕𑁆𑀖𑀭𑀺𑀡𑀻 𑀧𑀫𑀸𑀡𑀬𑀼𑀢𑁆𑀢𑀲𑁆𑀲𑁂𑀯 𑀉𑀤𑀓𑀲𑁆𑀲 𑀲𑀺𑀢𑁆𑀢𑀢𑁆𑀢𑀸. 𑀏𑀢𑁆𑀣 𑀘 𑀦𑁆𑀳𑀸𑀦𑀻𑀬𑀧𑀺𑀡𑁆𑀟𑀁 𑀯𑀺𑀬 𑀓𑀭𑀚𑀓𑀸𑀬𑁄, 𑀢𑀁 𑀢𑁂𑀫𑁂𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑀺𑀢𑀧𑀫𑀸𑀡𑀬𑀼𑀢𑁆𑀢𑀉𑀤𑀓𑀁 𑀯𑀺𑀬 𑀧𑀞𑀫𑀚𑁆𑀛𑀸𑀦𑀲𑀼𑀔𑀁 𑀤𑀝𑁆𑀞𑀩𑁆𑀩𑀁.

𑁪𑁨𑁮. 𑀳𑁂𑀝𑁆𑀞𑀸 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀉𑀕𑁆𑀕𑀘𑁆𑀙𑀦𑀉𑀤𑀓𑁄𑀢𑀺 𑀭𑀳𑀤𑀲𑁆𑀲 𑀅𑀥𑁄𑀣𑀽𑀮𑀥𑀸𑀭𑀸𑀯𑀲𑁂𑀦 𑀉𑀩𑁆𑀪𑀺𑀚𑁆𑀚 𑀉𑀝𑁆𑀞𑀳𑀦𑀉𑀤𑀓𑁄. 𑀅𑀦𑁆𑀢𑁄𑀬𑁂𑀯 𑀉𑀩𑁆𑀪𑀺𑀚𑁆𑀚𑀦𑀉𑀤𑀓𑁄𑀢𑀺 𑀭𑀳𑀤𑀲𑁆𑀲 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀣𑀽𑀮𑀥𑀸𑀭𑀸 𑀅𑀳𑀼𑀢𑁆𑀯𑀸 𑀉𑀝𑁆𑀞𑀺𑀢𑀉𑀤𑀓𑀲𑀺𑀭𑀸𑀫𑀼𑀔𑁂𑀳𑀺 𑀉𑀩𑁆𑀪𑀺𑀚𑁆𑀚𑀦𑀓𑁄. 𑀆𑀕𑀫𑀦𑀫𑀕𑁆𑀕𑁄𑀢𑀺 𑀦𑀤𑀻𑀢𑀴𑀸𑀓𑀓𑀦𑁆𑀤𑀭𑀲𑀭𑀆𑀤𑀺𑀢𑁄 𑀆𑀕𑀫𑀦𑀫𑀕𑁆𑀕𑁄.

𑁪𑁨𑁯. 𑀉𑀧𑁆𑀧𑀮𑀕𑀘𑁆𑀙𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀉𑀧𑁆𑀧𑀮𑀺𑀦𑀻 (𑀅. 𑀦𑀺. 𑀝𑀻. 𑁩.𑁫.𑁨𑁮-𑁨𑁯), 𑀯𑀸𑀭𑀺. 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄, 𑀢𑀣𑀸 𑀳𑀺 𑀮𑁄𑀓𑁂 𑀭𑀢𑁆𑀢𑀓𑁆𑀔𑀺𑀓𑁄 ‘‘𑀧𑀼𑀡𑁆𑀟𑀭𑀻𑀓𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀘𑀺 𑀧𑀦 ‘‘𑀭𑀢𑁆𑀢𑀁 𑀧𑀤𑀼𑀫𑀁, 𑀲𑁂𑀢𑀁 𑀧𑀼𑀡𑁆𑀟𑀭𑀻𑀓’’𑀦𑁆𑀢𑀺 𑀯𑀤𑀦𑁆𑀢𑀺. 𑀉𑀧𑁆𑀧𑀮𑀸𑀤𑀻𑀦𑀺 𑀯𑀺𑀬 𑀓𑀭𑀚𑀓𑀸𑀬𑁄, 𑀉𑀤𑀓𑀁 𑀯𑀺𑀬 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀦𑁆𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 ‘‘𑀧𑀼𑀭𑀺𑀫𑀦𑀬𑁂𑀦𑀸’’𑀢𑀺 𑀅𑀢𑀺𑀤𑁂𑀲𑁂𑀦𑁂𑀯 𑀯𑀺𑀪𑀸𑀯𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁩𑁦. 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀝𑁆𑀞𑁂𑀦𑀸𑀢𑀺 𑀭𑀚𑁄𑀚𑀮𑁆𑀮𑀸𑀤𑀺𑀦𑀸 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬 𑀅𑀫𑀮𑀻𑀦𑀪𑀸𑀯𑁂𑀦. 𑀅𑀫𑀮𑀻𑀦𑀫𑁆𑀧𑀺 𑀓𑀺𑀜𑁆𑀘𑀺 𑀯𑀢𑁆𑀣𑀼 𑀧𑀪𑀲𑁆𑀲𑀭𑀲𑀪𑀸𑀯𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀪𑀲𑁆𑀲𑀭𑀝𑁆𑀞𑁂𑀦𑀸’’𑀢𑀺. 𑀉𑀢𑀼𑀨𑀭𑀡𑀦𑁆𑀢𑀺 𑀉𑀡𑁆𑀳𑀉𑀢𑀼𑀨𑀭𑀡𑀁. 𑀲𑀩𑁆𑀩𑀢𑁆𑀣𑀓𑀫𑁂𑀯 𑀛𑀸𑀦𑀲𑀼𑀔𑁂𑀦 𑀨𑀼𑀝𑁆𑀞𑁄 𑀓𑀭𑀚𑀓𑀸𑀬𑁄 𑀬𑀣𑀸 𑀉𑀢𑀼𑀦𑀸 𑀨𑀼𑀝𑁆𑀞𑀯𑀢𑁆𑀣𑀲𑀤𑀺𑀲𑁄𑀢𑀺 𑀆𑀳 ‘‘𑀯𑀢𑁆𑀣𑀁 𑀯𑀺𑀬 𑀓𑀭𑀚𑀓𑀸𑀬𑁄’’𑀢𑀺. 𑀢𑀲𑁆𑀫𑀸𑀢𑀺 ‘‘𑀯𑀢𑁆𑀣𑀁 𑀯𑀺𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺, 𑀓𑀭𑀚𑀓𑀸𑀬𑀲𑁆𑀲 𑀯𑀢𑁆𑀣𑀲𑀤𑀺𑀲𑀢𑁆𑀢𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀲𑁆𑀲 𑀘 𑀉𑀢𑀼𑀨𑀭𑀡𑀲𑀤𑀺𑀲𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀲𑀪𑀸𑀯𑀢𑁆𑀢𑀸 𑀜𑀸𑀡𑀼𑀢𑁆𑀢𑀭𑀢𑁆𑀢𑀸 𑀘𑁂𑀢𑁆𑀣 𑀉𑀧𑁂𑀓𑁆𑀔𑀸𑀧𑀺 𑀲𑀼𑀔𑁂 𑀲𑀗𑁆𑀕𑀳𑀺𑀢𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀧𑀺 𑀲𑀼𑀔𑀕𑁆𑀕𑀳𑀡𑀁 𑀓𑀢𑀁. ‘‘𑀧𑀭𑀺𑀲𑀼𑀤𑁆𑀥𑁂𑀦 𑀧𑀭𑀺𑀬𑁄𑀤𑀸𑀢𑁂𑀦 𑀨𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻’’𑀢𑀺 𑀯𑀘𑀦𑀢𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀲𑁆𑀲 𑀯𑀢𑁆𑀣𑀲𑀤𑀺𑀲𑀢𑀸 𑀯𑀼𑀢𑁆𑀢𑀸. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀼𑀝𑁆𑀞𑀸𑀦𑀭𑀽𑀧𑁂𑀳𑀺 𑀪𑀺𑀓𑁆𑀔𑀼𑀦𑁄 𑀓𑀸𑀬𑀲𑁆𑀲 𑀨𑀼𑀝𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀉𑀢𑀼𑀨𑀭𑀡𑀁 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀲𑀲𑁆𑀲 𑀓𑀸𑀬𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀓𑀭𑀚𑀓𑀸𑀬𑁄𑀢𑀺 𑀅𑀬𑀁 𑀧𑀦𑀢𑁆𑀣𑁄 𑀧𑀸𑀓𑀝𑁄𑀢𑀺 𑀦 𑀕𑀳𑀺𑀢𑁄, 𑀕𑀳𑀺𑀢𑁄 𑀏𑀯 𑀯𑀸 ‘‘𑀬𑀣𑀸 𑀳𑀺 𑀓𑀢𑁆𑀣𑀘𑀺…𑀧𑁂… 𑀓𑀸𑀬𑁄 𑀨𑀼𑀝𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑁪𑁩𑁧. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀉𑀧𑀫𑀸𑀬𑀦𑁆𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲 𑀤𑀲𑁆𑀲𑀺𑀢𑀉𑀧𑀫𑀸𑀬𑀁. 𑀢𑀁𑀤𑀺𑀯𑀲𑀁𑀓𑀢𑀓𑀺𑀭𑀺𑀬𑀸𑀕𑀳𑀡𑀁 𑀧𑀸𑀓𑀢𑀺𑀓𑀲𑀢𑁆𑀢𑀲𑁆𑀲𑀧𑀺 𑀬𑁂𑀪𑀼𑀬𑁆𑀬𑁂𑀦 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀢𑀁𑀤𑀺𑀯𑀲𑀕𑀢𑀕𑀸𑀫𑀢𑁆𑀢𑀬𑀕𑁆𑀕𑀳𑀡𑁂𑀦𑁂𑀯 𑀫𑀳𑀸𑀪𑀺𑀦𑀻𑀳𑀸𑀭𑁂𑀳𑀺 𑀅𑀜𑁆𑀜𑁂𑀲𑀫𑁆𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀮𑀸𑀪𑀻𑀦𑀁 𑀢𑀻𑀲𑀼 𑀪𑀯𑁂𑀲𑀼 𑀓𑀢𑀸 𑀓𑀺𑀭𑀺𑀬𑀸 𑀬𑁂𑀪𑀼𑀬𑁆𑀬𑁂𑀦 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀤𑀻𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁪𑁩𑁨. 𑀲𑀫𑁆𑀫𑀼𑀔𑀤𑁆𑀯𑀸𑀭𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀪𑀺𑀫𑀼𑀔𑀤𑁆𑀯𑀸𑀭𑀸. 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀦𑁆𑀢𑁂𑀢𑀺 𑀢𑀁𑀢𑀁𑀓𑀺𑀘𑁆𑀘𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀦𑁆𑀢𑁂. 𑀇𑀢𑁄 𑀧𑀦 𑀕𑁂𑀳𑀸…𑀧𑁂… 𑀧𑀯𑀺𑀲𑀦𑀯𑀲𑁂𑀦𑀧𑀻𑀢𑀺 𑀇𑀤𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀲𑁆𑀲 𑀯𑀺𑀲𑀬𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀤𑁆𑀯𑀺𑀦𑁆𑀦𑀁 𑀕𑁂𑀳𑀸𑀦𑀁 𑀅𑀦𑁆𑀢𑀭𑁂 𑀞𑀢𑁆𑀯𑀸𑀢𑀺 𑀤𑁆𑀯𑀺𑀦𑁆𑀦𑀁 𑀕𑁂𑀳𑀤𑁆𑀯𑀸𑀭𑀸𑀦𑀁 𑀲𑀫𑁆𑀫𑀼𑀔𑀝𑁆𑀞𑀸𑀦𑀪𑀽𑀢𑁂 𑀅𑀦𑁆𑀢𑀭𑀯𑀻𑀣𑀺𑀬𑀁 𑀯𑁂𑀫𑀚𑁆𑀛𑁂 𑀞𑀢𑁆𑀯𑀸. 𑀢𑁂𑀲𑀼 𑀳𑀺 𑀏𑀓𑀲𑁆𑀲 𑀘𑁂 𑀧𑀸𑀘𑀻𑀦𑀫𑀼𑀔𑀤𑁆𑀯𑀸𑀭𑀁 𑀇𑀢𑀭𑀲𑁆𑀲 𑀧𑀘𑁆𑀙𑀺𑀫𑀫𑀼𑀔𑀁, 𑀢𑀲𑁆𑀲 𑀲𑀫𑁆𑀫𑀼𑀔𑀁 𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑀲𑁆𑀲 𑀤𑀓𑁆𑀔𑀺𑀡𑀸𑀫𑀼𑀔𑀲𑁆𑀲, 𑀉𑀢𑁆𑀢𑀭𑀸𑀫𑀼𑀔𑀲𑁆𑀲 𑀯𑀸 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀢𑀢𑁆𑀣 𑀧𑀯𑀺𑀲𑀦𑀓𑀦𑀺𑀓𑁆𑀔𑀫𑀦𑀓𑀧𑀼𑀭𑀺𑀲𑀸 𑀬𑀣𑀸 𑀲𑀼𑀔𑁂𑀦𑁂𑀯 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀏𑀯𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑀫𑀗𑁆𑀕𑀺𑀦𑁄 𑀘𑀯𑀦𑀓𑀉𑀧𑀧𑀚𑁆𑀚𑀦𑀓𑀧𑀼𑀭𑀺𑀲𑀸. 𑀬𑀣𑀸 𑀧𑀦 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀜𑁆𑀜𑁂𑀦𑁂𑀯 𑀔𑀡𑁂𑀦 𑀧𑀯𑀺𑀲𑀦𑁆𑀢𑀲𑁆𑀲 𑀤𑀲𑁆𑀲𑀦𑀁, 𑀅𑀜𑁆𑀜𑁂𑀦 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀤𑀲𑁆𑀲𑀦𑀁, 𑀏𑀯𑀁 𑀇𑀫𑀲𑁆𑀲𑀧𑀺 𑀅𑀜𑁆𑀜𑁂𑀦𑁂𑀯 𑀔𑀡𑁂𑀦 𑀘𑀯𑀫𑀸𑀦𑀲𑁆𑀲 𑀤𑀲𑁆𑀲𑀦𑀁, 𑀅𑀜𑁆𑀜𑁂𑀦 𑀉𑀧𑀧𑀚𑁆𑀚𑀫𑀸𑀦𑀲𑁆𑀲 𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀜𑀸𑀡𑀲𑁆𑀲 𑀧𑀸𑀓𑀝𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀜𑀸𑀡𑀲𑁆𑀲.

𑁪𑁩𑁩. 𑀧𑀩𑁆𑀩𑀢𑀲𑀺𑀔𑀭𑀁 𑀬𑁂𑀪𑀼𑀬𑁆𑀬𑁂𑀦 𑀲𑀁𑀔𑀺𑀢𑁆𑀢𑀁 𑀲𑀗𑁆𑀓𑀼𑀘𑀺𑀢𑀁 𑀳𑁄𑀢𑀻𑀢𑀺 𑀇𑀥 𑀧𑀩𑁆𑀩𑀢𑀫𑀢𑁆𑀣𑀓𑀁 ‘‘𑀧𑀩𑁆𑀩𑀢𑀲𑀗𑁆𑀔𑁂𑀧𑁄’’𑀢𑀺 𑀯𑀼𑀢𑁆𑀢𑀁, 𑀧𑀩𑁆𑀩𑀢𑀧𑀭𑀺𑀬𑀸𑀧𑀦𑁆𑀦𑁄 𑀯𑀸 𑀧𑀤𑁂𑀲𑁄 𑀧𑀩𑁆𑀩𑀢𑀲𑀗𑁆𑀔𑁂𑀧𑁄. 𑀅𑀦𑀸𑀯𑀺𑀮𑁄𑀢𑀺 𑀅𑀓𑀸𑀮𑀼𑀲𑁆𑀲𑁄. 𑀲𑀸 𑀘𑀲𑁆𑀲 𑀅𑀦𑀸𑀯𑀺𑀮𑀢𑀸 𑀓𑀤𑁆𑀤𑀫𑀸𑀪𑀸𑀯𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀓𑁆𑀓𑀤𑁆𑀤𑀫𑁄’’𑀢𑀺. 𑀞𑀺𑀢𑀸𑀲𑀼𑀧𑀺 𑀦𑀺𑀲𑀺𑀦𑁆𑀦𑀸𑀲𑀼𑀧𑀺 𑀕𑀸𑀯𑀻𑀲𑀼. 𑀯𑀺𑀚𑁆𑀚𑀫𑀸𑀦𑀸𑀲𑀽𑀢𑀺 𑀮𑀩𑁆𑀪𑀫𑀸𑀦𑀸𑀲𑀼. 𑀇𑀢𑀭𑀸 𑀞𑀺𑀢𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 𑀘𑀭𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺 𑀲𑀳𑀘𑀭𑀡𑀜𑀸𑀬𑁂𑀦. 𑀢𑀺𑀝𑁆𑀞𑀦𑁆𑀢𑀫𑁂𑀯, 𑀦 𑀓𑀤𑀸𑀘𑀺𑀧𑀺 𑀘𑀭𑀦𑁆𑀢𑀁. 𑀤𑁆𑀯𑀬𑀦𑁆𑀢𑀺 𑀲𑀺𑀧𑁆𑀧𑀺𑀲𑀫𑁆𑀫𑀼𑀓𑀁 𑀫𑀘𑁆𑀙𑀕𑀼𑀫𑁆𑀩𑀦𑁆𑀢𑀺 𑀇𑀫𑀁 𑀉𑀪𑀬𑀁 𑀢𑀺𑀝𑁆𑀞𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀘𑀭𑀦𑁆𑀢𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀯𑀸 𑀇𑀫𑀸𑀬 𑀲𑀳𑀘𑀭𑀺𑀬𑀸𑀬, 𑀬𑀣𑀸𑀮𑀸𑀪𑀕𑁆𑀕𑀳𑀡𑀁 𑀧𑀦𑁂𑀢𑁆𑀣 𑀤𑀝𑁆𑀞𑀩𑁆𑀩𑀁. 𑀲𑀓𑁆𑀔𑀭𑀓𑀣𑀮𑀲𑁆𑀲 𑀳𑀺 𑀯𑀲𑁂𑀦 ‘‘𑀢𑀺𑀝𑁆𑀞𑀦𑁆𑀢’’𑀦𑁆𑀢𑀺, 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀲𑁆𑀲 𑀫𑀘𑁆𑀙𑀕𑀼𑀫𑁆𑀩𑀲𑁆𑀲 𑀘 𑀯𑀲𑁂𑀦 ‘‘𑀢𑀺𑀝𑁆𑀞𑀦𑁆𑀢𑀫𑁆𑀧𑀺, 𑀘𑀭𑀦𑁆𑀢𑀫𑁆𑀧𑀻’’𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑁪𑁩𑁪. 𑀪𑀺𑀓𑁆𑀔𑀽𑀢𑀺 𑀪𑀺𑀦𑁆𑀦𑀓𑀺𑀮𑁂𑀲𑁄𑀢𑀺 𑀪𑀺𑀓𑁆𑀔𑀼. 𑀲𑁄 𑀳𑀺 𑀧𑀭𑀫𑀢𑁆𑀣𑀢𑁄 𑀲𑀫𑀡𑁄𑀢𑀺𑀦𑀸𑀫𑀓𑁄. 𑀢𑀢𑁆𑀣 𑀅𑀭𑀺𑀬𑀫𑀕𑁆𑀕𑁂𑀦 𑀲𑀩𑁆𑀩𑀲𑁄 𑀧𑀸𑀧𑀸𑀦𑀁 𑀲𑀫𑀺𑀢𑀸𑀯𑀻𑀢𑀺 𑀲𑀫𑀡𑁄. 𑀢𑁂𑀦𑀸𑀳 ‘‘𑀲𑀫𑀺𑀢𑀧𑀸𑀧𑀢𑁆𑀢𑀸’’𑀢𑀺. 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀸 𑀯𑀼𑀘𑁆𑀘𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀢𑁄 𑀆𑀕𑀢𑁄𑀢𑀺 𑀩𑁆𑀭𑀳𑁆𑀫𑀸, 𑀅𑀭𑀺𑀬𑀫𑀕𑁆𑀕𑁄, 𑀢𑀁 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀯𑀲𑁂𑀦 𑀅𑀜𑁆𑀜𑀸𑀲𑀻𑀢𑀺 𑀩𑁆𑀭𑀸𑀳𑁆𑀫𑀡𑁄. 𑀢𑀁𑀲𑀫𑀗𑁆𑀕𑀺𑀢𑀸𑀬 𑀳𑀺𑀲𑁆𑀲 𑀧𑀸𑀧𑀸𑀦𑀁 𑀩𑀸𑀳𑀺𑀢𑀪𑀸𑀯𑁄. 𑀢𑁂𑀦𑀸𑀳 ‘‘𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄’’𑀢𑀺. 𑀅𑀝𑁆𑀞𑀗𑁆𑀕𑀺𑀓𑁂𑀦 𑀅𑀭𑀺𑀬𑀫𑀕𑁆𑀕𑀚𑀮𑁂𑀦 𑀦𑁆𑀳𑀸𑀢𑀯𑀸 𑀦𑀺𑀤𑁆𑀥𑁄𑀢𑀓𑀺𑀮𑁂𑀲𑁄𑀢𑀺 𑀦𑁆𑀳𑀸𑀢𑀓𑁄. 𑀕𑀢𑀢𑁆𑀢𑀸𑀢𑀺 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑀺𑀤𑁆𑀥𑀢𑁆𑀢𑀸. 𑀢𑁂𑀦𑀸𑀳 ‘‘𑀯𑀺𑀤𑀺𑀢𑀢𑁆𑀢𑀸’’𑀢𑀺. 𑀦𑀺𑀲𑁆𑀲𑀼𑀢𑀢𑁆𑀢𑀸𑀢𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀲𑀦𑁆𑀢𑀸𑀦𑀢𑁄 𑀲𑀩𑁆𑀩𑀲𑁄 𑀦𑀺𑀳𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀧𑀳𑀢𑀢𑁆𑀢𑀸’’𑀢𑀺, 𑀫𑀭𑀺𑀬𑀸𑀤𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀳𑀺𑀁𑀲𑀺𑀢𑀢𑁆𑀢𑀸 𑀅𑀭𑀺𑀬𑀫𑀕𑁆𑀕𑁂𑀳𑀺 𑀑𑀥𑀺𑀲𑁄 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀳𑀢𑀢𑁆𑀢𑀸’’𑀢𑀺. 𑀆𑀭𑀓𑀢𑁆𑀢𑀸𑀢𑀺 𑀲𑀼𑀧𑁆𑀧𑀳𑀻𑀦𑀢𑀸𑀬 𑀯𑀺𑀧𑁆𑀧𑀓𑀝𑁆𑀞𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀤𑀽𑀭𑀻𑀪𑀽𑀢𑀢𑁆𑀢𑀸’’𑀢𑀺. 𑀉𑀪𑀬𑀫𑁆𑀧𑀺 𑀉𑀪𑀬𑀢𑁆𑀣 𑀬𑁄𑀚𑁂𑀢𑀩𑁆𑀩𑀁 𑁋 𑀓𑀺𑀮𑁂𑀲𑀸𑀦𑀁 𑀆𑀭𑀓𑀢𑁆𑀢𑀸 𑀳𑀢𑀢𑁆𑀢𑀸 𑀤𑀽𑀭𑀻𑀪𑀽𑀢𑀢𑁆𑀢𑀸 𑀘 𑀅𑀭𑀺𑀬𑁄, 𑀢𑀣𑀸 𑀅𑀭𑀳𑀦𑁆𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀉𑀢𑁆𑀢𑀸𑀦𑀢𑁆𑀣𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.