𑁧𑁦. 𑀘𑀽𑀴𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩𑁫. 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺 ‘‘𑀅𑀲𑁆𑀲𑀧𑀼𑀭𑀯𑀸𑀲𑀻𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀕𑀸𑀭𑀯𑀩𑀳𑀼𑀫𑀸𑀦𑀁 𑀦𑀺𑀧𑀘𑁆𑀘𑀓𑀸𑀭𑀜𑁆𑀘 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑁂 𑀦𑀺𑀬𑁄𑀚𑁂𑀦𑁆𑀢𑁄 𑀇𑀤𑀁 𑀲𑀼𑀢𑁆𑀢𑀁 𑀅𑀪𑀸𑀲𑀻’’𑀢𑀺 𑀧𑀼𑀭𑀺𑀫𑀲𑀼𑀢𑁆𑀢𑁂 𑀫𑀳𑀸𑀅𑀲𑁆𑀲𑀧𑀼𑀭𑁂 (𑀫. 𑀦𑀺. 𑀅𑀝𑁆𑀞. 𑁨.𑁪𑁧𑁫) 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀲𑀫𑀡𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀢𑀺 𑀲𑀫𑀡𑀸𑀦𑀁 𑀲𑀫𑀡𑀪𑀸𑀯𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸 𑀧𑀢𑀺𑀭𑀽𑀧𑀸. 𑀲𑀫𑀡𑀸𑀦𑀁 𑀅𑀦𑀼𑀮𑁄𑀫𑀧𑁆𑀧𑀝𑀺𑀧𑀤𑀸𑀢𑀺 𑀲𑀫𑀡𑀸𑀦𑀁 𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑀼𑀓𑀽𑀮𑀧𑁆𑀧𑀝𑀺𑀧𑀤𑀸.

𑁪𑁩𑁬. 𑀏𑀢𑁂 𑀥𑀫𑁆𑀫𑀸𑀢𑀺 𑀏𑀢𑁂 𑀧𑀸𑀴𑀺𑀬𑀁 𑀆𑀕𑀢𑀸 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸𑀤𑀬𑁄 𑀧𑀸𑀧𑀥𑀫𑁆𑀫𑀸. 𑀉𑀧𑁆𑀧𑀚𑁆𑀚𑀫𑀸𑀦𑀸𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀏𑀯, 𑀧𑀕𑁂𑀯 𑀲𑀦𑁆𑀢𑀸𑀦𑁂 𑀪𑀸𑀯𑀺𑀢𑀸. 𑀫𑀮𑀺𑀦𑁂𑀢𑀺 𑀫𑀮𑀯𑀦𑁆𑀢𑁂 𑀓𑀺𑀮𑀺𑀝𑁆𑀞𑁂. 𑀫𑀮𑀕𑁆𑀕𑀳𑀺𑀢𑁂𑀢𑀺 𑀕𑀳𑀺𑀢𑀫𑀮𑁂 𑀲𑀜𑁆𑀚𑀸𑀢𑀫𑀮𑁂. 𑀲𑀫𑀡𑀫𑀮𑀸𑀢𑀺 𑀲𑀫𑀡𑀸𑀦𑀁 𑀲𑀫𑀡𑀪𑀸𑀯𑀲𑁆𑀲 𑀫𑀮𑀸. 𑀤𑀼𑀲𑁆𑀲𑀦𑁆𑀢𑀻𑀢𑀺 𑀯𑀺𑀧𑀚𑁆𑀚𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺. 𑀲𑀫𑀡𑀤𑁄𑀲𑀸𑀢𑀺 𑀲𑀫𑀡𑀸𑀦𑀁 𑀲𑀫𑀡𑀪𑀸𑀯𑀤𑀽𑀲𑀦𑀸. 𑀓𑀲𑀝𑁂𑀢𑀺 𑀅𑀲𑀸𑀭𑁂. 𑀦𑀺𑀭𑁄𑀚𑁂𑀢𑀺 𑀦𑀺𑀢𑁆𑀢𑁂𑀚𑁂. 𑀅𑀬𑀢𑁄 𑀲𑀼𑀔𑀢𑁄 𑀅𑀧𑁂𑀢𑀸𑀢𑀺 𑀅𑀧𑀸𑀬𑀸, 𑀦𑀺𑀭𑀬𑀸𑀤𑀬𑁄, 𑀢𑀁 𑀨𑀮𑀁 𑀅𑀭𑀳𑀦𑁆𑀢𑀺, 𑀢𑀁 𑀧𑀬𑁄𑀚𑀦𑀁 𑀯𑀸 𑀏𑀢𑁂𑀲𑀦𑁆𑀢𑀺 𑀆𑀧𑀸𑀬𑀺𑀓𑀸. 𑀞𑀸𑀦𑀸𑀦𑀺 𑀅𑀪𑀺𑀚𑁆𑀛𑀸𑀤𑀬𑁄. 𑀢𑁂𑀦𑀸𑀳 ‘‘𑀅𑀧𑀸𑀬𑁂’’𑀢𑀺𑀆𑀤𑀺. 𑀓𑀸𑀭𑀡𑀪𑀸𑀯𑁂𑀦 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀬 𑀯𑁂𑀤𑀦𑀸𑀬 𑀳𑀺𑀢𑀸𑀦𑀻𑀢𑀺 𑀤𑀼𑀕𑁆𑀕𑀢𑀺𑀯𑁂𑀤𑀦𑀺𑀬𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀕𑁆𑀕𑀢𑀺𑀬𑀁 𑀯𑀺𑀧𑀸𑀓𑀯𑁂𑀤𑀦𑀸𑀬 𑀧𑀘𑁆𑀘𑀬𑀸𑀦’’𑀦𑁆𑀢𑀺. 𑀢𑀺𑀔𑀺𑀡𑀁 𑀅𑀬𑀦𑁆𑀢𑀺 𑀯𑁂𑀓𑀦𑁆𑀢𑀓𑀲𑀤𑀺𑀲𑀁 𑀲𑀸𑀭𑀅𑀬𑀁. 𑀅𑀬𑁂𑀦𑀸𑀢𑀺 𑀅𑀬𑁄𑀖𑀁𑀲𑀓𑁂𑀦. 𑀓𑁄𑀜𑁆𑀘𑀲𑀓𑀼𑀡𑀸𑀦𑀁 𑀓𑀺𑀭 𑀓𑀼𑀘𑁆𑀙𑀺𑀬𑀁 𑀦𑀺𑀯𑀼𑀢𑁆𑀣𑀁 𑀬𑀁 𑀓𑀺𑀜𑁆𑀘𑀺 𑀔𑀭𑀁 𑀢𑀺𑀔𑀺𑀡𑀜𑁆𑀘 𑀳𑁄𑀢𑀺. 𑀢𑀣𑀸 𑀳𑀺 𑀢𑁂𑀲𑀁 𑀯𑀘𑁆𑀘𑀁 𑀅𑀝𑁆𑀞𑀺𑀫𑁆𑀧𑀺 𑀧𑀸𑀲𑀸𑀡𑀫𑁆𑀧𑀺 𑀯𑀺𑀮𑀻𑀬𑀸𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑁄𑀜𑁆𑀘𑀲𑀓𑀼𑀡𑁂 𑀔𑀸𑀤𑀸𑀧𑁂𑀦𑁆𑀢𑀻’’𑀢𑀺. 𑀢𑀁 𑀓𑀺𑀭 𑀅𑀬𑀘𑀼𑀡𑁆𑀡𑀁 𑀅𑀕𑁆𑀕𑀺𑀦𑀸𑀧𑀺 𑀓𑀺𑀘𑁆𑀙𑁂𑀦 𑀤𑀬𑁆𑀳𑀢𑀺, 𑀪𑁂𑀲𑀚𑁆𑀚𑀩𑀮𑁂𑀦 𑀧𑀦 𑀲𑀼𑀔𑁂𑀦 𑀤𑀬𑁆𑀳𑁂𑀬𑁆𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀲𑀺𑀓𑁆𑀔𑀺𑀢𑀸 𑀘 𑀦𑀁 𑀅𑀬𑀓𑀸𑀭𑀸 𑀩𑀳𑀼𑀳𑀢𑁆𑀣𑀓𑀫𑁆𑀫𑀫𑀽𑀮𑀁 𑀮𑀪𑀺𑀢𑁆𑀯𑀸 𑀓𑀭𑁄𑀦𑁆𑀢𑀻’’𑀢𑀺𑀆𑀤𑀺. 𑀅𑀢𑀺𑀢𑀺𑀔𑀺𑀡𑀁 𑀳𑁄𑀢𑀺, 𑀅𑀜𑁆𑀜𑀢𑀭𑀁 𑀅𑀬𑁄𑀩𑀦𑁆𑀥𑀦𑀁 𑀨𑁂𑀕𑁆𑀕𑀼𑀤𑀡𑁆𑀟𑀁 𑀯𑀺𑀬 𑀲𑀼𑀔𑁂𑀦𑁂𑀯 𑀙𑀺𑀦𑁆𑀤𑀦𑁆𑀢𑀺. 𑀲𑀲𑀩𑀺𑀴𑀸𑀭𑀘𑀫𑁆𑀫𑁂𑀳𑀺 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 𑀲𑀗𑁆𑀖𑀸𑀝𑀻𑀢𑀺 𑀯𑀼𑀘𑁆𑀘𑀢𑀺 𑀆𑀯𑀼𑀥𑀧𑀭𑀺𑀘𑁆𑀙𑀤𑁄𑀢𑀺 𑀆𑀳 ‘‘𑀲𑀗𑁆𑀖𑀸𑀝𑀺𑀬𑀸𑀢𑀺 𑀓𑁄𑀲𑀺𑀬𑀸’’𑀢𑀺. 𑀧𑀭𑀺𑀬𑁄𑀦𑀤𑁆𑀥𑀦𑁆𑀢𑀺 𑀧𑀭𑀺𑀢𑁄 𑀑𑀦𑀤𑁆𑀥𑀁 𑀙𑀸𑀤𑀺𑀢𑀁. 𑀲𑀫𑀦𑁆𑀢𑀢𑁄 𑀯𑁂𑀞𑀺𑀢𑀦𑁆𑀢𑀺 𑀲𑀩𑁆𑀩𑀲𑁄 𑀧𑀺𑀳𑀺𑀢𑀁.

𑁪𑁩𑁭. 𑀭𑀚𑁄𑀢𑀺 𑀆𑀕𑀦𑁆𑀢𑀼𑀓𑀭𑀚𑁄. 𑀚𑀮𑁆𑀮𑀦𑁆𑀢𑀺 𑀲𑀭𑀻𑀭𑁂 𑀉𑀝𑁆𑀞𑀸𑀦𑀓𑀮𑁄𑀡𑀸𑀤𑀺𑀫𑀮𑀁. 𑀭𑀚𑁄𑀚𑀮𑁆𑀮𑀜𑁆𑀘 𑀯𑀢𑀲𑀫𑀸𑀤𑀸𑀦𑀯𑀲𑁂𑀦 𑀅𑀦𑀧𑀦𑀻𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀭𑀚𑁄𑀚𑀮𑁆𑀮𑀺𑀓𑁄, 𑀢𑀲𑁆𑀲. 𑀢𑁂𑀦𑀸𑀳 ‘‘𑀭𑀚𑁄𑀚𑀮𑁆𑀮𑀥𑀸𑀭𑀺𑀦𑁄’’𑀢𑀺. 𑀉𑀤𑀓𑀁 𑀑𑀭𑁄𑀳𑀦𑁆𑀢𑀲𑁆𑀲𑀸𑀢𑀺𑀆𑀤𑀻𑀦𑀫𑀢𑁆𑀣𑁄 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄𑀬𑁂𑀯. 𑀲𑀩𑁆𑀩𑀫𑁂𑀢𑀦𑁆𑀢𑀺𑀆𑀤𑀻𑀲𑀼 𑀲𑀩𑁆𑀩𑀲𑁄𑀧𑀺 𑀯𑀢𑀲𑀫𑀸𑀤𑀸𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀲𑀩𑁆𑀩𑀫𑁂𑀢𑀁 𑀩𑀸𑀳𑀺𑀭𑀲𑀫𑀬𑀯𑀲𑁂𑀦𑁂𑀯 𑀓𑀣𑀺𑀢𑀁, 𑀢𑀲𑁆𑀫𑀸 𑀲𑀗𑁆𑀖𑀸𑀝𑀺𑀓𑀲𑁆𑀲𑀸𑀢𑀺 𑀧𑀺𑀮𑁄𑀢𑀺𑀓𑀔𑀡𑁆𑀟𑁂𑀳𑀺 𑀲𑀗𑁆𑀖𑀝𑀺𑀢𑀢𑁆𑀢𑀸 ‘‘𑀲𑀗𑁆𑀖𑀸𑀝𑀻’’𑀢𑀺 𑀮𑀤𑁆𑀥𑀦𑀸𑀫𑀯𑀢𑁆𑀣𑀥𑀸𑀭𑀺𑀦𑁄𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀧𑀸𑀴𑀺𑀬𑀁 ‘‘𑀲𑀗𑁆𑀖𑀸𑀝𑀺𑀓𑀲𑁆𑀲’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 ‘‘𑀪𑀺𑀓𑁆𑀔𑀼𑀦𑁄’’𑀢𑀺. 𑀢𑁂𑀦𑀸𑀳 ‘‘𑀇𑀫𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀪𑀕𑀯𑀢𑀸 𑀲𑀗𑁆𑀖𑀸𑀝𑀺𑀓𑀢𑁆𑀢𑀸𑀤𑀻𑀦𑀺𑀬𑁂𑀯 𑀯𑀢𑀲𑀫𑀸𑀤𑀸𑀦𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺? 𑀦𑀬𑀤𑀲𑁆𑀲𑀦𑀫𑁂𑀢𑀁 𑀅𑀜𑁆𑀜𑁂𑀲𑀫𑁆𑀧𑀺 𑀧𑀜𑁆𑀘𑀸𑀢𑀧𑀫𑀽𑀕𑀯𑀢𑀸𑀤𑀻𑀦𑀁 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦𑁂𑀯 𑀧𑀲𑀺𑀤𑁆𑀥𑀺𑀢𑁄. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀸𑀝𑀺𑀓𑀲𑁆𑀲 𑀲𑀗𑁆𑀖𑀸𑀝𑀺𑀥𑀸𑀭𑀡𑀫𑀢𑁆𑀢𑁂𑀦 𑀲𑀸𑀫𑀜𑁆𑀜𑀁 𑀯𑀤𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄 𑀓𑁄𑀘𑀺 𑀢𑀺𑀢𑁆𑀣𑀦𑁆𑀢𑀭𑀮𑀤𑁆𑀥𑀺𑀓𑁄 𑀅𑀘𑁂𑀮𑀓𑀢𑁆𑀢𑀁 𑀦𑀼 𑀔𑁄 𑀓𑀣𑀦𑁆𑀢𑀺 𑀘𑀺𑀦𑁆𑀢𑁂𑀲𑀺, 𑀅𑀧𑀭𑁂 𑀭𑀚𑁄𑀚𑀮𑁆𑀮𑀓𑀢𑁆𑀢𑀁 𑀦𑀼 𑀔𑁄 𑀓𑀣𑀦𑁆𑀢𑀺, 𑀏𑀯𑀁 𑀢𑀁 𑀢𑀁 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀪𑀕𑀯𑀸 𑀇𑀫𑀸𑀦𑁂𑀯 𑀯𑀢𑀲𑀫𑀸𑀤𑀸𑀦𑀸𑀦𑀺 𑀇𑀥 𑀧𑀝𑀺𑀓𑁆𑀔𑀺𑀧𑀻𑀢𑀺. 𑀲𑀗𑁆𑀖𑀸𑀝𑀺𑀓𑀦𑁆𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀲𑁂𑀦 𑀲𑀗𑁆𑀖𑀸𑀝𑀺𑀯𑀦𑁆𑀢𑀁. 𑀢𑁂𑀦𑀸𑀳 ‘‘𑀲𑀗𑁆𑀖𑀸𑀝𑀺𑀓𑀁 𑀯𑀢𑁆𑀣’’𑀦𑁆𑀢𑀺𑀆𑀤𑀺. 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀫𑀺𑀢𑁆𑀢𑀸𑀤𑀬𑁄 𑀲𑀗𑁆𑀖𑀸𑀝𑀺𑀓𑀁 𑀓𑀭𑁂𑀬𑁆𑀬𑀼𑀁, 𑀧𑀘𑁆𑀙𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀓𑀸𑀮𑁂 𑀲𑀗𑁆𑀖𑀸𑀝𑀺𑀓𑀢𑁆𑀢𑁂 𑀲𑀫𑀸𑀤𑀧𑁂𑀬𑁆𑀬𑀼𑀁.

𑁪𑁩𑁮. 𑀅𑀢𑁆𑀢𑀸𑀦𑀁 𑀯𑀺𑀲𑀼𑀚𑁆𑀛𑀦𑁆𑀢𑀁 𑀧𑀲𑁆𑀲𑀢𑀺 𑀅𑀪𑀺𑀚𑁆𑀛𑀸𑀤𑀻𑀦𑀁 𑀲𑀫𑀼𑀤𑀸𑀘𑀸𑀭𑀸𑀪𑀸𑀯𑀢𑁄. 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀺𑀲𑀼𑀤𑁆𑀥𑁄𑀢𑀺 𑀧𑀦 𑀦 𑀯𑀢𑁆𑀢𑀩𑁆𑀩𑁄. 𑀧𑀸𑀫𑁄𑀚𑁆𑀚𑀦𑁆𑀢𑀺 𑀢𑀭𑀼𑀡𑀧𑀻𑀢𑀺𑀫𑀸𑀳. 𑀢𑀲𑁆𑀲 𑀳𑀺 𑀅𑀢𑁆𑀢𑀦𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀤𑁆𑀥𑀢𑀁 𑀧𑀲𑁆𑀲𑀦𑁆𑀢𑀲𑁆𑀲 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀢𑀁 𑀢𑀼𑀝𑁆𑀞𑀸𑀓𑀸𑀭𑀁. 𑀢𑁂𑀦𑀸𑀳 ‘‘𑀢𑀼𑀝𑁆𑀞𑀸𑀓𑀸𑀭𑁄’’𑀢𑀺. 𑀧𑀻𑀢𑀻𑀢𑀺 𑀧𑀲𑁆𑀲𑀤𑁆𑀥𑀺𑀆𑀯𑀳𑀸 𑀩𑀮𑀯𑀧𑀻𑀢𑀺. 𑀦𑀸𑀫𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀻𑀢𑀺 𑀇𑀫𑀺𑀦𑀸 𑀉𑀪𑀬𑀫𑁆𑀧𑀺 𑀧𑀲𑁆𑀲𑀤𑁆𑀥𑀺𑀁 𑀯𑀤𑀢𑀺. 𑀯𑁂𑀤𑀺𑀬𑀢𑀻𑀢𑀺 𑀅𑀦𑀼𑀪𑀯𑀢𑀺 𑀯𑀺𑀦𑁆𑀤𑀢𑀺. 𑀇𑀤𑀸𑀦𑀺 𑀢𑁂𑀦 𑀦𑀻𑀯𑀭𑀡𑁂𑀳𑀺 𑀘𑀺𑀢𑁆𑀢𑀲𑁆𑀲 𑀯𑀺𑀲𑁄𑀥𑀦𑀢𑁆𑀢𑀁 𑀮𑀤𑁆𑀥𑀦𑁆𑀢𑀺 𑀆𑀳 ‘‘𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀁 𑀯𑀺𑀬 𑀳𑁄𑀢𑀻’’𑀢𑀺. 𑀅𑀜𑁆𑀜𑀢𑁆𑀣 𑀉𑀝𑁆𑀞𑀺𑀢𑀸 𑀅𑀜𑁆𑀜𑀁 𑀞𑀸𑀦𑀁 𑀉𑀧𑀕𑀢𑀸𑀢𑀺 𑀏𑀢𑁆𑀢𑀓𑁂𑀦 𑀉𑀧𑀫𑀸𑀪𑀸𑀯𑁂𑀦 𑀉𑀘𑁆𑀘𑀦𑀻𑀘𑀢𑀸𑀲𑀸𑀫𑀜𑁆𑀜𑁂𑀦 𑀳𑁂𑀝𑁆𑀞𑀸 𑀅𑀲𑀤𑁆𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀤𑁂𑀲𑀦𑀸𑀬 𑀧𑀭𑀺𑀬𑁄𑀲𑀸𑀧𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀬𑀣𑀸𑀦𑀼𑀲𑀦𑁆𑀥𑀺𑀦𑀸’’𑀢𑀺. 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂 𑀫𑀕𑁆𑀕𑁄 𑀧𑁄𑀓𑁆𑀔𑀭𑀡𑀺𑀬𑀸 𑀉𑀧𑀫𑀺𑀢𑁄 ‘‘𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑁄𑀓𑁆𑀔𑀭𑀡𑀻’’𑀢𑀺𑀆𑀤𑀺𑀁 (𑀫. 𑀦𑀺. 𑁧.𑁧𑁫𑁪) 𑀆𑀭𑀪𑀺𑀢𑁆𑀯𑀸 𑀉𑀧𑀫𑀸𑀲𑀁𑀲𑀦𑁆𑀤𑀦𑁂 ‘‘𑀢𑀣𑀸𑀬𑀁 𑀧𑀼𑀕𑁆𑀕𑀮𑁄 𑀧𑀝𑀺𑀧𑀦𑁆𑀦𑁄, 𑀢𑀣𑀸 𑀘 𑀇𑀭𑀺𑀬𑀢𑀺, 𑀢𑀜𑁆𑀘 𑀫𑀕𑁆𑀕𑀁 𑀲𑀫𑀸𑀭𑀼𑀴𑁆𑀳𑁄, 𑀬𑀣𑀸 𑀆𑀲𑀯𑀸𑀦𑀁 𑀔𑀬𑀸’’𑀢𑀺 (𑀫. 𑀦𑀺. 𑁧.𑁧𑁫𑁪) 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸 𑀳𑀺 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀳𑀺 𑀆𑀕𑀢𑀸 𑀧𑀼𑀭𑀺𑀲𑀸 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀆𑀕𑀫𑁆𑀫 𑀯𑀺𑀲𑀼𑀤𑁆𑀥𑀭𑀽𑀧𑀓𑀸𑀬𑀸 𑀯𑀺𑀕𑀢𑀧𑀭𑀺𑀴𑀸𑀳𑀸 𑀘 𑀳𑁄𑀦𑁆𑀢𑀺, 𑀏𑀯𑀁 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑀢𑁄 𑀆𑀕𑀢𑀸 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀲𑀸𑀲𑀦𑀁 𑀆𑀕𑀫𑁆𑀫 𑀯𑀺𑀲𑀼𑀤𑁆𑀥𑀦𑀸𑀫𑀓𑀸𑀬𑀸 𑀯𑀺𑀕𑀢𑀓𑀺𑀮𑁂𑀲𑀧𑀭𑀺𑀴𑀸𑀳𑀸 𑀘 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀲𑀫𑀺𑀢𑀢𑁆𑀢𑀸 𑀧𑀭𑀫𑀢𑁆𑀣𑀲𑀫𑀡𑁄 𑀳𑁄𑀢𑀻𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀽𑀴𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀫𑀳𑀸𑀬𑀫𑀓𑀯𑀕𑁆𑀕𑀯𑀡𑁆𑀡𑀦𑀸.