𑁪. 𑀫𑀳𑀸𑀬𑀫𑀓𑀯𑀕𑁆𑀕𑁄

𑁧. 𑀘𑀽𑀴𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁫. 𑀜𑀸𑀢𑀻𑀦𑀁 (𑀅. 𑀦𑀺. 𑀝𑀻. 𑁩.𑁬.𑁧𑁯) 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑁄 𑀕𑀸𑀫𑁄 𑀜𑀸𑀢𑀺𑀓𑁄, 𑀲𑁄 𑀏𑀯 𑀦𑀸𑀢𑀺𑀓𑁄. 𑀲𑁄 𑀓𑀺𑀭 𑀕𑀸𑀫𑁄 𑀬𑁂𑀲𑀁 𑀲𑀦𑁆𑀢𑀓𑁄, 𑀢𑁂𑀲𑀁 𑀧𑀼𑀩𑁆𑀩𑀧𑀼𑀭𑀺𑀲𑁂𑀦 𑀅𑀢𑁆𑀢𑀦𑁄 𑀜𑀸𑀢𑀻𑀦𑀁 𑀲𑀸𑀥𑀸𑀭𑀡𑀪𑀸𑀯𑁂𑀦 𑀦𑀺𑀯𑁂𑀲𑀺𑀢𑁄, 𑀢𑁂𑀦 ‘‘𑀦𑀸𑀢𑀺𑀓𑁄’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀣 𑀧𑀘𑁆𑀙𑀸 𑀢𑀢𑁆𑀣 𑀤𑁆𑀯𑀻𑀳𑀺 𑀤𑀸𑀬𑀸𑀤𑁂𑀳𑀺 𑀤𑁆𑀯𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀤𑁆𑀯𑀺𑀦𑁆𑀦𑀁 𑀘𑀽𑀴𑀧𑀺𑀢𑀺𑀫𑀳𑀸𑀧𑀺𑀢𑀺𑀧𑀼𑀢𑁆𑀢𑀸𑀦𑀁 𑀤𑁆𑀯𑁂 𑀕𑀸𑀫𑀸’’𑀢𑀺. 𑀕𑀺𑀜𑁆𑀚𑀓𑀸 𑀯𑀼𑀘𑁆𑀘𑀦𑁆𑀢𑀺 𑀇𑀝𑁆𑀞𑀓𑀸, 𑀕𑀺𑀜𑁆𑀚𑀓𑀸𑀳𑀺𑀬𑁂𑀯 𑀓𑀢𑁄 𑀆𑀯𑀲𑀣𑁄 𑀕𑀺𑀜𑁆𑀚𑀓𑀸𑀯𑀲𑀣𑁄. 𑀢𑀲𑁆𑀫𑀺𑀁 𑀓𑀺𑀭 𑀧𑀤𑁂𑀲𑁂 𑀫𑀢𑁆𑀢𑀺𑀓𑀸 𑀲𑀓𑁆𑀔𑀭𑀫𑀭𑀼𑀫𑁆𑀩𑀯𑀸𑀮𑀺𑀓𑀸𑀤𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀸 𑀅𑀓𑀞𑀺𑀦𑀸 𑀲𑀡𑁆𑀳𑀸 𑀲𑀼𑀔𑀼𑀫𑀸, 𑀢𑀸𑀬 𑀓𑀢𑀸𑀦𑀺 𑀓𑀼𑀮𑀸𑀮𑀪𑀸𑀚𑀦𑀸𑀦𑀺𑀧𑀺 𑀲𑀺𑀮𑀸𑀫𑀬𑀸𑀦𑀺 𑀯𑀺𑀬 𑀤𑀴𑁆𑀳𑀸𑀦𑀺, 𑀢𑀲𑁆𑀫𑀸 𑀢𑁂 𑀉𑀧𑀸𑀲𑀓𑀸 𑀢𑀸𑀬 𑀫𑀢𑁆𑀢𑀺𑀓𑀸𑀬 𑀤𑀻𑀖𑀧𑀼𑀣𑀼𑀮𑀇𑀝𑁆𑀞𑀓𑀸 𑀓𑀸𑀭𑁂𑀢𑁆𑀯𑀸 𑀢𑀸𑀳𑀺 𑀞𑀧𑁂𑀢𑁆𑀯𑀸 𑀤𑁆𑀯𑀸𑀭𑀩𑀸𑀳𑀯𑀸𑀢𑀧𑀸𑀦𑀓𑀯𑀸𑀝𑀢𑀼𑀮𑀸𑀬𑁄 𑀲𑁂𑀲𑀁 𑀲𑀩𑁆𑀩𑀁 𑀤𑀩𑁆𑀩𑀲𑀫𑁆𑀪𑀸𑀭𑁂𑀦 𑀯𑀺𑀦𑀸 𑀇𑀝𑁆𑀞𑀓𑀸𑀳𑀺 𑀏𑀯 𑀧𑀸𑀲𑀸𑀤𑀁 𑀓𑀸𑀭𑁂𑀲𑀼𑀁. 𑀢𑁂𑀦𑀸𑀳 ‘‘𑀇𑀝𑁆𑀞𑀓𑀸𑀳𑁂𑀯𑀸’’𑀢𑀺𑀆𑀤𑀺.

𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑀦𑁆𑀢𑀺 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀭𑀓𑁆𑀔𑀺𑀢𑀁 𑀅𑀭𑀜𑁆𑀜𑀁. 𑀚𑁂𑀝𑁆𑀞𑀓𑀭𑀼𑀓𑁆𑀔𑀲𑁆𑀲𑀸𑀢𑀺 𑀯𑀦𑀧𑁆𑀧𑀢𑀺𑀪𑀽𑀢𑀲𑁆𑀲 𑀲𑀸𑀮𑀭𑀼𑀓𑁆𑀔𑀲𑁆𑀲. 𑀲𑀸𑀫𑀕𑁆𑀕𑀺𑀭𑀲𑀦𑁆𑀢𑀺 𑀲𑀫𑀕𑁆𑀕𑀪𑀸𑀯𑀸𑀤𑀺𑀕𑀼𑀡𑀁 𑀯𑀺𑀯𑁂𑀓𑀲𑀼𑀔𑀁. 𑀉𑀧𑀭𑀺𑀧𑀡𑁆𑀡𑀸𑀲𑀓𑁂 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁨𑁩𑁭-𑁨𑁩𑁮) 𑀧𑀼𑀣𑀼𑀚𑁆𑀚𑀦𑀓𑀸𑀮𑁄 𑀓𑀣𑀺𑀢𑁄, 𑀇𑀥 𑀘𑀽𑀴𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑁂 𑀔𑀻𑀡𑀸𑀲𑀯𑀓𑀸𑀮𑁄 𑀓𑀣𑀺𑀢𑁄. 𑀓𑀢𑀓𑀺𑀘𑁆𑀘𑀸𑀧𑀺 𑀳𑀺 𑀢𑁂 𑀫𑀳𑀸𑀣𑁂𑀭𑀸 𑀅𑀢𑁆𑀢𑀦𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀧𑀭𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑀜𑁆𑀘 𑀲𑀫𑁆𑀧𑀲𑁆𑀲𑀦𑁆𑀢𑀸 𑀧𑀭𑀫𑀜𑁆𑀘 𑀯𑀺𑀯𑁂𑀓𑀁 𑀅𑀦𑀼𑀩𑁆𑀭𑀽𑀳𑀦𑁆𑀢𑀸 𑀲𑀸𑀫𑀕𑁆𑀕𑀺𑀭𑀲𑀁 𑀅𑀦𑀼𑀪𑀯𑀫𑀸𑀦𑀸 𑀢𑀢𑁆𑀣 𑀯𑀺𑀳𑀭𑀦𑁆𑀢𑀺. 𑀢𑀤𑀸𑀢𑀺 𑀢𑀲𑁆𑀫𑀺𑀁 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀤𑁂𑀲𑀦𑀸𑀓𑀸𑀮𑁂. 𑀢𑁂𑀢𑀺 𑀅𑀦𑀼𑀭𑀼𑀤𑁆𑀥𑀧𑁆𑀧𑀫𑀼𑀔𑀸 𑀓𑀼𑀮𑀧𑀼𑀢𑁆𑀢𑀸. 𑀮𑀤𑁆𑀥𑀲𑁆𑀲𑀸𑀤𑀸𑀢𑀺 𑀯𑀺𑀧𑀲𑁆𑀲𑀦𑀸𑀬 𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀕𑀢𑀲𑁆𑀲𑀸𑀤𑀸. 𑀯𑀺𑀧𑀲𑁆𑀲𑀦𑀸 𑀳𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀆𑀯𑀳𑀦𑁆𑀢𑀻 𑀧𑀯𑀢𑁆𑀢𑀫𑀸𑀦𑀸 𑀲𑀸𑀢𑀺𑀲𑀬𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀆𑀯𑀳𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪);

𑀮𑀤𑁆𑀥𑀧𑀢𑀺𑀝𑁆𑀞𑀸 𑀫𑀕𑁆𑀕𑀨𑀮𑀸𑀥𑀺𑀕𑀫𑀦𑁂𑀦. 𑀲𑀢𑀺 𑀳𑀺 𑀫𑀕𑁆𑀕𑀨𑀮𑀸𑀥𑀺𑀕𑀫𑁂 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸 𑀮𑀤𑁆𑀥𑀸 𑀦𑀸𑀫 𑀳𑁄𑀢𑀺, 𑀦𑁄 𑀅𑀜𑁆𑀜𑀣𑀸.

𑀓𑀸𑀫𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀧𑀺 𑀫𑀳𑀸𑀲𑀸𑀯𑀓𑀧𑀭𑀺𑀬𑀸𑀧𑀦𑁆𑀦𑀸𑀯, 𑀅𑀕𑁆𑀕𑀲𑀸𑀯𑀓𑀪𑀸𑀯𑁂𑀦 𑀧𑀦 𑀦𑁂𑀲𑀁 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀲𑀼 𑀯𑀸’’𑀢𑀺 𑀯𑀺𑀲𑀼𑀁 𑀕𑀳𑀡𑀁. 𑀲𑀢𑀺𑀧𑀺 𑀳𑀺 𑀲𑀸𑀫𑀜𑁆𑀜𑀬𑁄𑀕𑁂 𑀯𑀺𑀲𑁂𑀲𑀯𑀦𑁆𑀢𑁄 𑀯𑀺𑀲𑀼𑀁 𑀕𑀬𑁆𑀳𑀦𑁆𑀢𑀺 𑀬𑀣𑀸 ‘‘𑀩𑁆𑀭𑀸𑀳𑁆𑀫𑀡𑀸 𑀆𑀕𑀢𑀸, 𑀯𑀸𑀲𑀺𑀝𑁆𑀞𑁄𑀧𑀺 𑀆𑀕𑀢𑁄’’𑀢𑀺. 𑀢𑁂𑀲𑀼 𑀧𑀦 𑀯𑀺𑀲𑀼𑀁 𑀕𑀳𑀺𑀢𑁂𑀲𑀼𑀧𑀺 ‘‘𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂𑀲𑀽’’𑀢𑀺 𑀅𑀲𑀻𑀢𑀺𑀕𑁆𑀕𑀳𑀡𑀁 𑀅𑀧𑁆𑀧𑀓𑀁 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀼𑀧𑀕𑀁 𑀦 𑀳𑁄𑀢𑀻𑀢𑀺. 𑀅𑀦𑁆𑀢𑀫𑀲𑁄𑀢𑀺 𑀇𑀤𑀁 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀉𑀧𑀝𑁆𑀞𑀸𑀓𑀪𑀸𑀯𑁂𑀦 𑀆𑀲𑀦𑁆𑀦𑀘𑀸𑀭𑀺𑀢𑀸𑀬 𑀯𑀼𑀢𑁆𑀢𑀁. 𑀅𑀦𑀻𑀓𑀸𑀢𑀺 𑀳𑀢𑁆𑀣𑀸𑀦𑀻𑀓𑀸, 𑀳𑀢𑁆𑀣𑀸𑀦𑀻𑀓𑀢𑁄 𑀳𑀢𑁆𑀣𑀺𑀲𑀫𑀽𑀳𑀢𑁄𑀢𑀺 𑀅𑀢𑁆𑀣𑁄. 𑀓𑀸𑀴𑀲𑀻𑀳𑁄 𑀬𑁂𑀪𑀼𑀬𑁆𑀬𑁂𑀦 𑀬𑀽𑀣𑀘𑀭𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀬𑀽𑀣𑀸 𑀦𑀺𑀲𑁆𑀲𑀝𑁄 𑀓𑀸𑀴𑀲𑀻𑀳𑁄 𑀯𑀺𑀬𑀸’’𑀢𑀺. 𑀓𑁂𑀲𑀭𑀻 𑀧𑀦 𑀏𑀓𑀘𑀭𑁄𑀯. 𑀯𑀸𑀢𑀘𑁆𑀙𑀺𑀦𑁆𑀦𑁄 𑀯𑀮𑀸𑀳𑀓𑁄 𑀯𑀺𑀬𑀸𑀢𑀺 𑀯𑀸𑀢𑀘𑁆𑀙𑀺𑀦𑁆𑀦𑁄 𑀧𑀩𑁆𑀩𑀢𑀓𑀽𑀝𑀧𑁆𑀧𑀫𑀸𑀡𑁄 𑀯𑀮𑀸𑀳𑀓𑀘𑁆𑀙𑁂𑀤𑁄 𑀯𑀺𑀬. 𑀢𑁂𑀲𑀁 𑀧𑀕𑁆𑀕𑀡𑁆𑀳𑀦𑀢𑁄𑀢𑀺 𑀬𑀣𑀸 𑀦𑀸𑀫 𑀚𑀺𑀖𑀘𑁆𑀙𑀺𑀢𑀲𑁆𑀲 𑀪𑁄𑀚𑀦𑁂, 𑀧𑀺𑀧𑀸𑀲𑀺𑀢𑀲𑁆𑀲 𑀧𑀸𑀦𑀻𑀬𑁂, 𑀲𑀻𑀢𑁂𑀦 𑀨𑀼𑀝𑁆𑀞𑀲𑁆𑀲 𑀉𑀡𑁆𑀳𑁂, 𑀉𑀡𑁆𑀳𑁂𑀦 𑀨𑀼𑀝𑁆𑀞𑀲𑁆𑀲 𑀲𑀻𑀢𑁂, 𑀤𑀼𑀓𑁆𑀔𑀺𑀢𑀲𑁆𑀲 𑀲𑀼𑀔𑁂 𑀅𑀪𑀺𑀭𑀼𑀘𑀺 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀫𑁂𑀯𑀁 𑀪𑀕𑀯𑀢𑁄 𑀓𑁄𑀲𑀫𑁆𑀩𑀓𑁂 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀸𑀧𑀦𑁆𑀦𑁂 𑀤𑀺𑀲𑁆𑀯𑀸 𑀅𑀧𑀭𑁂 𑀲𑀫𑀕𑁆𑀕𑀸𑀯𑀸𑀲𑀁 𑀯𑀲𑀦𑁆𑀢𑁂 𑀆𑀯𑀚𑁆𑀚𑀺𑀢𑀲𑁆𑀲 𑀇𑀫𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀆𑀧𑀸𑀣𑀁 𑀆𑀕𑀫𑀺𑀁𑀲𑀼, 𑀅𑀣 𑀦𑁂 𑀧𑀕𑁆𑀕𑀡𑁆𑀳𑀺𑀢𑀼𑀓𑀸𑀫𑁄 𑀉𑀧𑀲𑀗𑁆𑀓𑀫𑀺, 𑀏𑀯𑀸𑀬𑀁 𑀧𑀝𑀺𑀧𑀢𑁆𑀢𑀺𑀅𑀦𑀼𑀓𑁆𑀓𑀫𑁂𑀦 𑀓𑁄𑀲𑀫𑁆𑀩𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀦𑀼𑀧𑀸𑀬𑁄 𑀳𑁄𑀢𑀻𑀢𑀺. 𑀢𑁂𑀦𑀸𑀳 ‘‘𑀢𑁂𑀲𑀁 𑀧𑀕𑁆𑀕𑀡𑁆𑀳𑀦𑀢𑁄’’𑀢𑀺. 𑀏𑀢𑁂𑀦𑁂𑀯 𑀧𑀘𑁆𑀙𑀺𑀫𑀚𑀦𑀢𑀁 𑀅𑀦𑀼𑀓𑀫𑁆𑀧𑀦𑀢𑁄𑀢𑀺 𑀇𑀤𑀫𑁆𑀧𑀺 𑀓𑀸𑀭𑀡𑀁 𑀏𑀓𑀤𑁂𑀲𑁂𑀦 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀓𑁆𑀓𑀁𑀲𑀺𑀢𑁆𑀯𑀸𑀢𑀺 𑀬𑀣𑀸𑀪𑀽𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑁆𑀧𑀳𑀁𑀲𑀦𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀺𑀲𑀺𑀝𑁆𑀞𑁂 𑀓𑀢𑁆𑀯𑀸 𑀧𑀲𑀁𑀲𑀸𑀯𑀲𑁂𑀦 𑀘𑁂𑀢𑀁 𑀆𑀫𑁂𑀟𑀺𑀢𑀯𑀘𑀦𑀁.

𑀢𑀁 𑀅𑀭𑀜𑁆𑀜𑀁 𑀭𑀓𑁆𑀔𑀢𑀺 𑀯𑀦𑀲𑀸𑀫𑀺𑀦𑀸 𑀆𑀡𑀢𑁆𑀢𑁄. 𑀭𑀓𑁆𑀔𑀺𑀢𑀕𑁄𑀧𑀺𑀢𑀁 𑀯𑀦𑀲𑀡𑁆𑀟𑀁, 𑀦 𑀫𑀳𑀸𑀯𑀦𑀸𑀤𑀺 𑀯𑀺𑀬 𑀅𑀧𑀭𑀺𑀕𑁆𑀕𑀳𑀺𑀢𑀁. 𑀲𑀻𑀮𑀸𑀤𑀺𑀧𑁆𑀧𑀪𑁂𑀤𑀸𑀬 𑀅𑀢𑁆𑀢𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀸 𑀅𑀢𑁆𑀢𑀓𑀸𑀫𑀸, 𑀦 𑀅𑀧𑀭𑀺𑀘𑁆𑀘𑀢𑁆𑀢𑀲𑀺𑀦𑁂𑀳𑀸𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀳𑀺𑀢𑀁 𑀓𑀸𑀫𑀬𑀫𑀸𑀦𑀸’’𑀢𑀺. 𑀢𑁂𑀦𑀸𑀳 ‘‘𑀬𑁄 𑀳𑀻’’𑀢𑀺𑀆𑀤𑀺. 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀯𑀺𑀦𑀸𑀲𑁂𑀬𑁆𑀬.

𑀤𑀼𑀩𑁆𑀩𑀮𑀫𑀦𑀼𑀲𑁆𑀲𑀸𑀢𑀺 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀸 𑀅𑀯𑀺𑀤𑁆𑀤𑀲𑀼𑀦𑁄 𑀫𑀦𑀼𑀲𑁆𑀲𑀸. 𑀢𑀸𑀦𑀻𑀢𑀺 𑀅𑀪𑀺𑀚𑀸𑀢𑀺𑀆𑀤𑀻𑀲𑀼 𑀉𑀧𑁆𑀧𑀦𑁆𑀦𑀧𑀸𑀝𑀺𑀳𑀸𑀭𑀺𑀬𑀸𑀦𑀺. 𑀘𑀻𑀯𑀭𑀕𑀩𑁆𑀪𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸𑀢𑀺 𑀘𑀻𑀯𑀭𑀲𑀗𑁆𑀔𑀸𑀢𑁂 𑀑𑀯𑀭𑀓𑁂 𑀦𑀺𑀕𑀽𑀳𑀺𑀢𑁆𑀯𑀸 𑀯𑀺𑀬. 𑀦 𑀳𑀺 𑀘𑀻𑀯𑀭𑀧𑀸𑀭𑀼𑀧𑀦𑀫𑀢𑁆𑀢𑁂𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑁄 𑀧𑀝𑀺𑀘𑁆𑀙𑀦𑁆𑀦𑁄 𑀳𑁄𑀢𑀺. ‘‘𑀫𑀸 𑀲𑀼𑀥 𑀓𑁄𑀘𑀺𑀫𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀅𑀜𑁆𑀜𑀸𑀲𑀻’’𑀢𑀺 𑀧𑀦 𑀢𑀣𑀸𑀭𑀽𑀧𑁂𑀦 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀦 𑀢𑀁 𑀙𑀸𑀤𑁂𑀢𑁆𑀯𑀸 𑀕𑀢𑁄 𑀪𑀕𑀯𑀸 𑀢𑀣𑀸 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀅𑀕𑀫𑀸𑀲𑀻’’𑀢𑀺.

𑀅𑀪𑀺𑀓𑁆𑀓𑀫𑀣𑀸𑀢𑀺 𑀧𑀤𑀁 𑀅𑀪𑀺𑀫𑀼𑀔𑀪𑀸𑀯𑁂𑀦 𑀯𑀺𑀥𑀺𑀫𑀼𑀔𑁂𑀦 𑀯𑀤𑀢𑀻𑀢𑀺 𑀆𑀳 ‘‘𑀇𑀢𑁄 𑀆𑀕𑀘𑁆𑀙𑀣𑀸’’𑀢𑀺. 𑀩𑀼𑀤𑁆𑀥𑀸𑀦𑀁 𑀓𑀸𑀬𑁄 𑀦𑀸𑀫 𑀲𑀼𑀯𑀺𑀲𑀼𑀤𑁆𑀥𑀚𑀸𑀢𑀺𑀫𑀡𑀺 𑀯𑀺𑀬 𑀲𑁄𑀪𑀦𑁄, 𑀓𑀺𑀜𑁆𑀘𑀺 𑀫𑀮𑀁 𑀅𑀧𑀦𑁂𑀢𑀩𑁆𑀩𑀁 𑀦𑀢𑁆𑀣𑀺, 𑀓𑀺𑀫𑀢𑁆𑀣𑀁 𑀪𑀕𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀻𑀢𑀺 𑀆𑀳 ‘‘𑀩𑀼𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺.

𑁩𑁨𑁬. 𑀅𑀦𑀼𑀭𑀼𑀤𑁆𑀥𑀸𑀢𑀺 𑀯𑀸 𑀏𑀓𑀲𑁂𑀲𑀦𑀬𑁂𑀦 𑀯𑀼𑀢𑁆𑀢𑀁 𑀯𑀺𑀭𑀽𑀧𑁂𑀓𑀲𑁂𑀲𑀲𑁆𑀲𑀧𑀺 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸, 𑀏𑀯𑀜𑁆𑀘 𑀓𑀢𑁆𑀯𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄𑀧𑀺 𑀲𑀫𑀢𑁆𑀣𑀺𑀢𑁄 𑀳𑁄𑀢𑀺. 𑀇𑀭𑀺𑀬𑀸𑀧𑀣𑁄 𑀔𑀫𑀢𑀻𑀢𑀺 𑀲𑀭𑀻𑀭𑀲𑁆𑀲 𑀮𑀳𑀼𑀝𑁆𑀞𑀸𑀦𑀢𑀸𑀬 𑀘𑀢𑀼𑀩𑁆𑀩𑀺𑀥𑁄𑀧𑀺 𑀇𑀭𑀺𑀬𑀸𑀧𑀣𑁄 𑀲𑀼𑀔𑀧𑁆𑀧𑀯𑀢𑁆𑀢𑀺𑀓𑁄. 𑀚𑀻𑀯𑀺𑀢𑀁 𑀬𑀸𑀧𑁂𑀢𑀻𑀢𑀺 𑀬𑀸𑀧𑀦𑀸𑀮𑀓𑁆𑀔𑀡𑀁 𑀚𑀻𑀯𑀺𑀢𑀁 𑀇𑀫𑀁 𑀲𑀭𑀻𑀭𑀬𑀦𑁆𑀢𑀁 𑀬𑀸𑀧𑁂𑀢𑀺 𑀲𑀼𑀔𑁂𑀦 𑀧𑀯𑀢𑁆𑀢𑁂𑀢𑀺. 𑀉𑀴𑀼𑀗𑁆𑀓𑀬𑀸𑀕𑀼𑀁 𑀯𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀯𑀸𑀢𑀺 𑀇𑀤𑀁 𑀫𑀓𑀭𑀯𑀼𑀢𑁆𑀢𑀺𑀬𑀸 𑀫𑀺𑀲𑁆𑀲𑀓𑀪𑀢𑁆𑀢𑁂𑀦 𑀬𑀸𑀧𑀦𑀁 𑀯𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀧𑀼𑀘𑁆𑀙𑀢𑀻’’𑀢𑀺.

𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀦𑁆𑀤𑀢𑀻𑀢𑀺 𑀲𑀢𑀺𑀧𑀺 𑀉𑀪𑀬𑁂𑀲𑀁 𑀓𑀮𑀸𑀧𑀸𑀦𑀁 𑀧𑀭𑀫𑀢𑁆𑀣𑀢𑁄 𑀪𑁂𑀤𑁂 𑀧𑀘𑀼𑀭𑀚𑀦𑁂𑀳𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀁 𑀔𑀻𑀭𑁄𑀤𑀓𑀲𑀫𑁆𑀫𑁄𑀤𑀺𑀢𑀁 𑀅𑀘𑁆𑀘𑀦𑁆𑀢𑀫𑁂𑀯 𑀲𑀁𑀲𑀝𑁆𑀞𑀁 𑀯𑀺𑀬 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 ‘‘𑀯𑀺𑀲𑀼𑀁 𑀦 𑀳𑁄𑀢𑀺, 𑀏𑀓𑀢𑁆𑀢𑀁 𑀯𑀺𑀬 𑀉𑀧𑁂𑀢𑀻’’𑀢𑀺. 𑀧𑀺𑀬𑀪𑀸𑀯𑀤𑀻𑀧𑀦𑀸𑀦𑀺 𑀘𑀓𑁆𑀔𑀽𑀦𑀺 𑀧𑀺𑀬𑀘𑀓𑁆𑀔𑀽𑀦𑀺. 𑀧𑀺𑀬𑀸𑀬𑀢𑀺, 𑀧𑀺𑀬𑀸𑀬𑀺𑀢𑀩𑁆𑀩𑁄𑀢𑀺 𑀯𑀸 𑀧𑀺𑀬𑁄𑀢𑀺. 𑀲𑀫𑀕𑁆𑀕𑀯𑀸𑀲𑀲𑁆𑀲 𑀬𑀁 𑀏𑀓𑀦𑁆𑀢𑀓𑀸𑀭𑀡𑀁, 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀪𑀕𑀯𑀸 ‘‘𑀬𑀣𑀸 𑀓𑀣𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳𑀸𑀢𑀺 ‘‘𑀓𑀣𑀦𑁆𑀢𑀺 𑀓𑀸𑀭𑀡𑀧𑀼𑀘𑁆𑀙𑀸’’𑀢𑀺 𑀯𑀼𑀢𑁆𑀢𑀁. 𑀬𑁄 𑀦𑁂𑀲𑀁 𑀫𑁂𑀢𑁆𑀢𑀸𑀲𑀳𑀺𑀢𑀸𑀦𑀁𑀬𑁂𑀯 𑀓𑀫𑁆𑀫𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀓𑀸𑀭𑁄, 𑀢𑀁 𑀲𑀦𑁆𑀥𑀸𑀬 ‘‘𑀓𑀣’’𑀦𑁆𑀢𑀺 𑀧𑀼𑀘𑁆𑀙𑀸. 𑀢𑀣𑀸 𑀳𑀺 𑀧𑀭𑀢𑁄 ‘‘𑀏𑀯𑀁 𑀔𑁄 𑀫𑀬𑀁, 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀣𑁂𑀭𑁂𑀳𑀺 𑀯𑀺𑀲𑁆𑀲𑀚𑁆𑀚𑀦𑀁 𑀓𑀣𑀺𑀢𑀁.

𑀫𑀺𑀢𑁆𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀓𑀸𑀬𑀓𑀫𑁆𑀫𑀁. 𑀆𑀯𑀻𑀢𑀺 𑀧𑀓𑀸𑀲𑀁. 𑀭𑀳𑁄𑀢𑀺 𑀅𑀧𑁆𑀧𑀓𑀸𑀲𑀁. 𑀬𑀜𑁆𑀳𑀺 𑀉𑀤𑁆𑀤𑀺𑀲𑁆𑀲 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀺, 𑀢𑀁 𑀢𑀲𑁆𑀲 𑀲𑀫𑁆𑀫𑀼𑀔𑀸 𑀘𑁂, 𑀧𑀓𑀸𑀲𑀁 𑀳𑁄𑀢𑀺, 𑀧𑀭𑀫𑁆𑀫𑀼𑀔𑀸 𑀘𑁂, 𑀅𑀧𑁆𑀧𑀓𑀸𑀲𑀁. 𑀢𑁂𑀦𑀸𑀳 ‘‘𑀆𑀯𑀺 𑀘𑁂𑀯 𑀭𑀳𑁄 𑀘𑀸𑀢𑀺 𑀲𑀫𑁆𑀫𑀼𑀔𑀸 𑀘𑁂𑀯 𑀧𑀭𑀫𑁆𑀫𑀼𑀔𑀸 𑀘𑀸’’𑀢𑀺. 𑀇𑀢𑀭𑀸𑀦𑀻𑀢𑀺 𑀧𑀭𑀫𑁆𑀫𑀼𑀔𑀸 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺. ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀬𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑁆𑀫𑀚𑁆𑀚𑀦𑀸𑀤𑀺𑀯𑀲𑁂𑀦 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀬𑀼𑀢𑁆𑀢𑀁 𑀞𑀸𑀦𑀁 𑀯𑀸. 𑀢𑀣𑁂𑀯𑀸𑀢𑀺 𑀬𑀣𑀸 𑀲𑀫𑁆𑀫𑀼𑀔𑀸 𑀓𑀢𑁂 𑀫𑁂𑀢𑁆𑀢𑀸𑀓𑀸𑀬𑀓𑀫𑁆𑀫𑁂 𑀯𑀼𑀢𑁆𑀢𑀁, 𑀢𑀣𑁂𑀯. ‘‘𑀓𑀘𑁆𑀘𑀺 𑀔𑀫𑀦𑀻𑀬’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀸 𑀓𑀣𑀸 𑀲𑀫𑁆𑀫𑁄𑀤𑀦𑀻𑀬𑀓𑀣𑀸. 𑀬𑀣𑀸 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀙𑀺𑀤𑁆𑀤𑀁 𑀦 𑀳𑁄𑀢𑀺, 𑀢𑀣𑀸 𑀧𑀝𑀺𑀲𑀦𑁆𑀣𑀸𑀭𑀯𑀲𑁂𑀦 𑀧𑀯𑀢𑁆𑀢𑀸 𑀓𑀣𑀸 𑀧𑀝𑀺𑀲𑀦𑁆𑀣𑀸𑀭𑀓𑀣𑀸. ‘‘𑀅𑀳𑁄 𑀢𑀤𑀸 𑀣𑁂𑀭𑁂𑀦 𑀫𑀬𑁆𑀳𑀁 𑀤𑀺𑀦𑁆𑀦𑁄 𑀑𑀯𑀸𑀤𑁄, 𑀤𑀺𑀦𑁆𑀦𑀸 𑀅𑀦𑀼𑀲𑀸𑀲𑀦𑀻’’𑀢𑀺 𑀏𑀯𑀁 𑀓𑀸𑀮𑀦𑁆𑀢𑀭𑁂 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀸, 𑀙𑀲𑀸𑀭𑀡𑀻𑀬𑀧𑀝𑀺𑀲𑀁𑀬𑀼𑀢𑁆𑀢𑀸 𑀯𑀸 𑀓𑀣𑀸 𑀲𑀸𑀭𑀡𑀻𑀬𑀓𑀣𑀸. 𑀲𑀼𑀢𑁆𑀢𑀧𑀤𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀦𑀺𑀤𑁆𑀤𑁂𑀲𑀯𑀲𑁂𑀦 𑀲𑀻𑀮𑀸𑀤𑀺𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀸 𑀓𑀣𑀸 𑀥𑀫𑁆𑀫𑀻𑀓𑀣𑀸. 𑀲𑀭𑁂𑀦 𑀲𑀼𑀢𑁆𑀢𑀲𑁆𑀲 𑀉𑀘𑁆𑀘𑀸𑀭𑀡𑀁 𑀲𑀭𑀪𑀜𑁆𑀜𑀁. 𑀧𑀜𑁆𑀳𑀲𑁆𑀲 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀼𑀘𑁆𑀙𑀦𑀁 𑀧𑀜𑁆𑀳𑀧𑀼𑀘𑁆𑀙𑀦𑀁. 𑀢𑀲𑁆𑀲 𑀬𑀣𑀸𑀧𑀼𑀘𑁆𑀙𑀺𑀢𑀲𑁆𑀲𑀆𑀤𑀺𑀲𑀦𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁. 𑀏𑀯𑀁 𑀲𑀫𑀦𑁆𑀦𑀸𑀳𑀭𑀢𑁄𑀢𑀺 𑀏𑀯𑀁 𑀫𑀦𑀲𑀺𑀓𑀭𑁄𑀢𑁄, 𑀏𑀯𑀁 𑀫𑁂𑀢𑁆𑀢𑀁 𑀉𑀧𑀲𑀁𑀳𑀭𑀢𑁄𑀢𑀺 𑀅𑀢𑁆𑀣𑁄.

𑀏𑀓𑀢𑁄 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀦𑀸𑀦𑀸. 𑀳𑀺𑀢𑀝𑁆𑀞𑁂𑀦𑀸𑀢𑀺 𑀅𑀢𑁆𑀢𑀦𑁄 𑀯𑀺𑀬 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺𑀢𑀪𑀸𑀯𑁂𑀦. 𑀦𑀺𑀭𑀦𑁆𑀢𑀭𑀝𑁆𑀞𑁂𑀦𑀸𑀢𑀺 𑀅𑀦𑁆𑀢𑀭𑀸𑀪𑀸𑀯𑁂𑀦 𑀪𑁂𑀤𑀸𑀪𑀸𑀯𑁂𑀦. 𑀅𑀯𑀺𑀕𑁆𑀕𑀳𑀝𑁆𑀞𑁂𑀦𑀸𑀢𑀺 𑀅𑀯𑀺𑀭𑁄𑀥𑀪𑀸𑀯𑁂𑀦. 𑀲𑀫𑀕𑁆𑀕𑀝𑁆𑀞𑁂𑀦𑀸𑀢𑀺 𑀲𑀳𑀺𑀢𑀪𑀸𑀯𑁂𑀦. 𑀧𑀭𑀺𑀪𑀡𑁆𑀟𑀁 𑀓𑀢𑁆𑀯𑀸𑀢𑀺 𑀩𑀳𑀮𑀢𑀦𑀼𑀫𑀢𑁆𑀢𑀺𑀓𑀸𑀮𑁂𑀧𑁂𑀳𑀺 𑀮𑀺𑀫𑁆𑀧𑁂𑀢𑁆𑀯𑀸. 𑀘𑀻𑀯𑀭𑀁 𑀯𑀸 𑀥𑁄𑀯𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀯𑀸 𑀥𑁄𑀯𑀦𑁆𑀢𑀺. 𑀧𑀭𑀺𑀪𑀡𑁆𑀟𑀁 𑀯𑀸𑀢𑀺 𑀅𑀢𑁆𑀢𑀦𑁄 𑀧𑀡𑁆𑀡𑀲𑀸𑀮𑀸𑀬 𑀧𑀭𑀺𑀪𑀡𑁆𑀟𑀁 𑀯𑀸 𑀓𑀭𑁄𑀦𑁆𑀢𑀺.

𑁩𑁨𑁭. 𑀧𑀝𑀺𑀯𑀺𑀭𑀼𑀤𑁆𑀥𑀸 𑀏𑀯𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑁂𑀲𑀁 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀦𑁆𑀢𑀺 𑀢𑁂𑀲𑀁 𑀅𑀧𑁆𑀧𑀫𑀚𑁆𑀚𑀦𑀲𑀪𑀸𑀯𑀁. 𑀓𑀘𑁆𑀘𑀺 𑀧𑀦 𑀯𑁄 𑀅𑀦𑀼𑀭𑀼𑀤𑁆𑀥𑀸 𑀲𑀫𑀕𑁆𑀕𑀸𑀢𑀺 𑀏𑀢𑁆𑀣𑀸𑀧𑀺 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀧𑀘𑁆𑀘𑀢𑁆𑀢𑀯𑀘𑀦𑀁 𑀯𑀸, 𑀓𑀘𑁆𑀘𑀺 𑀢𑀼𑀫𑁆𑀳𑁂𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀼𑀕𑁆𑀕𑀧𑀸𑀢𑀺𑀦𑁆𑀢𑀺 𑀲𑀫𑀼𑀕𑁆𑀕𑀧𑀼𑀝𑀲𑀤𑀺𑀲𑀁 𑀧𑀸𑀢𑀺𑀁.

𑀧𑀡𑁆𑀡𑀲𑀸𑀮𑀸𑀬𑀁 𑀅𑀦𑁆𑀢𑁄 𑀩𑀳𑀺 𑀘 𑀲𑀫𑁆𑀫𑀚𑁆𑀚𑀦𑁂𑀦 𑀲𑁄𑀥𑀺𑀢𑀗𑁆𑀕𑀡𑀢𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺. 𑀧𑀝𑀺𑀯𑀺𑀲𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀢𑀦𑁄 𑀬𑀸𑀧𑀦𑀧𑀝𑀺𑀯𑀺𑀲𑀫𑀢𑁆𑀢𑀫𑁂𑀯. 𑀑𑀲𑀸𑀧𑁂𑀢𑁆𑀯𑀸𑀢𑀺 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀧𑀫𑀸𑀡𑀫𑁂𑀯𑀸𑀢𑀺 𑀅𑀢𑁆𑀢𑀦𑁄 𑀬𑀸𑀧𑀦𑀧𑀫𑀸𑀡𑀫𑁂𑀯. 𑀯𑀼𑀢𑁆𑀢𑀦𑀬𑁂𑀦 𑀚𑀳𑀺𑀢𑁆𑀯𑀸𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀚𑀳𑀺𑀢𑁆𑀯𑀸.

𑀳𑀢𑁆𑀣𑁂𑀦 𑀳𑀢𑁆𑀣𑀁 𑀲𑀁𑀲𑀺𑀩𑁆𑀩𑀦𑁆𑀢𑀸𑀢𑀺 𑀅𑀢𑁆𑀢𑀦𑁄 𑀳𑀢𑁆𑀣𑁂𑀦 𑀇𑀢𑀭𑀲𑁆𑀲 𑀳𑀢𑁆𑀣𑀁 𑀤𑀴𑁆𑀳𑀕𑁆𑀕𑀳𑀡𑀯𑀲𑁂𑀦 𑀩𑀦𑁆𑀥𑀦𑁆𑀢𑀸. 𑀯𑀺𑀮𑀗𑁆𑀖𑁂𑀢𑀺 𑀤𑁂𑀲𑀦𑁆𑀢𑀭𑀁 𑀧𑀸𑀧𑁂𑀢𑀺 𑀏𑀢𑁂𑀦𑀸𑀢𑀺 𑀯𑀺𑀮𑀗𑁆𑀖𑀓𑁄, 𑀳𑀢𑁆𑀣𑁄. 𑀳𑀢𑁆𑀣𑁄 𑀏𑀯 𑀯𑀺𑀮𑀗𑁆𑀖𑀓𑁄 𑀳𑀢𑁆𑀣𑀯𑀺𑀮𑀗𑁆𑀖𑀓𑁄, 𑀢𑁂𑀦 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦.

𑀢𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸𑀢𑀺 𑀢𑀁 𑀢𑀻𑀲𑀼𑀧𑀺 𑀤𑀺𑀯𑀲𑁂𑀲𑀼 𑀥𑀫𑁆𑀫𑀲𑁆𑀲𑀯𑀦𑀁 𑀧𑀯𑀢𑁆𑀢𑀦𑀯𑀲𑁂𑀦 𑀅𑀔𑀡𑁆𑀟𑀺𑀓𑀁 𑀓𑀢𑁆𑀯𑀸. 𑀏𑀢𑀦𑁆𑀢𑀺 ‘‘𑀧𑀜𑁆𑀘𑀸𑀳𑀺𑀓𑀁 𑀔𑁄 𑀧𑀦𑀸’’𑀢𑀺𑀆𑀤𑀺𑀯𑀘𑀦𑀁. 𑀧𑀜𑁆𑀘𑀫𑁂 𑀧𑀜𑁆𑀘𑀫𑁂 𑀅𑀳𑀦𑀺 𑀪𑀯𑀢𑀻𑀢𑀺 𑀧𑀜𑁆𑀘𑀸𑀳𑀺𑀓𑀁. 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑁂𑀦 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁂𑀦. 𑀧𑀫𑀸𑀤𑀝𑁆𑀞𑀸𑀦𑁂𑀲𑀼𑀬𑁂𑀯𑀸𑀢𑀺 𑀅𑀜𑁆𑀜𑁂𑀲𑀁 𑀧𑀫𑀸𑀤𑀝𑁆𑀞𑀸𑀦𑁂𑀲𑀼𑀬𑁂𑀯. ‘‘𑀧𑀫𑀸𑀤𑀝𑁆𑀞𑀸𑀦𑁂𑀲𑀼𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀅𑀜𑁆𑀜𑁂𑀲𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀧𑀜𑁆𑀘𑀓𑀭𑀡𑀝𑁆𑀞𑀸𑀦𑀸𑀦𑀻𑀢𑀺 𑀓𑀣𑀸𑀧𑀧𑀜𑁆𑀘𑀲𑁆𑀲 𑀓𑀭𑀡𑀝𑁆𑀞𑀸𑀦𑀸𑀦𑀺 𑀯𑀺𑀲𑁆𑀲𑀝𑁆𑀞𑀓𑀣𑀸𑀧𑀯𑀢𑁆𑀢𑀦𑁂𑀦 𑀓𑀫𑁆𑀫𑀝𑁆𑀞𑀸𑀦𑁂 𑀧𑀫𑀚𑁆𑀚𑀦𑀝𑁆𑀞𑀸𑀦𑀸𑀦𑀺. 𑀢𑀢𑁆𑀣𑀸𑀧𑀺 ‘‘𑀫𑀬𑀁, 𑀪𑀦𑁆𑀢𑁂, 𑀓𑀫𑁆𑀫𑀝𑁆𑀞𑀸𑀦𑀯𑀺𑀭𑀼𑀤𑁆𑀥𑀁 𑀦 𑀧𑀝𑀺𑀧𑀚𑁆𑀚𑀸𑀫𑀸’’𑀢𑀺 𑀲𑀺𑀔𑀸𑀧𑁆𑀧𑀢𑁆𑀢𑀁 𑀅𑀢𑁆𑀢𑀦𑁄 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀣𑁂𑀭𑁄 𑀤𑀲𑁆𑀲𑁂𑀢𑀺. 𑀏𑀢𑁆𑀢𑀓𑀁 𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀧𑀦 𑀇𑀤𑀁 𑀢𑀤𑀸 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀯𑀴𑀜𑁆𑀚𑀸𑀪𑀸𑀯𑁂𑀦 𑀯𑀼𑀢𑁆𑀢𑀁.

𑁩𑁨𑁮. 𑀛𑀸𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀢𑀸𑀬 𑀲𑀢𑁆𑀣𑀼 𑀘𑀺𑀢𑁆𑀢𑀸𑀭𑀸𑀥𑀦𑀢𑁆𑀣𑀁 𑀢𑀲𑁆𑀲 𑀘 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀲𑀢𑁆𑀣𑀼 𑀧𑀘𑁆𑀘𑀓𑁆𑀔𑀪𑀸𑀯𑀢𑁄 𑀣𑁂𑀭𑁄 ‘‘𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑀦𑁆𑀢𑁂’’𑀢𑀺 𑀆𑀳. 𑀬𑀸𑀯𑀤𑁂𑀯𑀸𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁 𑀏𑀓𑀁 𑀤𑀺𑀯𑀲𑀪𑀸𑀕𑀁 𑀯𑀸 𑀲𑀓𑀮𑀭𑀢𑁆𑀢𑀺𑀁 𑀯𑀸 𑀬𑀸𑀯 𑀲𑀢𑁆𑀢 𑀯𑀸 𑀤𑀺𑀯𑀲𑁂.

𑁩𑁨𑁯. 𑀲𑀫𑀢𑀺𑀓𑁆𑀓𑀫𑀸𑀬𑀸𑀢𑀺 𑀲𑀫𑁆𑀫𑀤𑁂𑀯 𑀅𑀢𑀺𑀓𑁆𑀓𑀫𑀦𑀸𑀬. 𑀲𑀢𑀺 𑀳𑀺 𑀉𑀧𑀭𑀺 𑀯𑀺𑀲𑁂𑀲𑀸𑀥𑀺𑀕𑀫𑁂 𑀳𑁂𑀝𑁆𑀞𑀺𑀫𑀚𑁆𑀛𑀸𑀦𑀁 𑀲𑀫𑀢𑀺𑀓𑁆𑀓𑀦𑁆𑀢𑀁 𑀦𑀸𑀫 𑀳𑁄𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀘. 𑀢𑁂𑀦𑀸𑀳 ‘‘𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸’’𑀢𑀺. 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄𑀢𑀺 𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑁂𑀤𑀬𑀺𑀢𑀲𑀼𑀔𑀢𑁄𑀢𑀺 𑀯𑁂𑀤𑀦𑀸𑀲𑀳𑀺𑀢𑀚𑁆𑀛𑀸𑀦𑀲𑀼𑀔𑀢𑁄 𑀯𑀸 𑀨𑀮𑀲𑀼𑀔𑀢𑁄 𑀯𑀸. 𑀅𑀯𑁂𑀤𑀬𑀺𑀢𑀲𑀼𑀔𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑀼𑀔𑀁 𑀯𑀺𑀬 𑀯𑁂𑀤𑀦𑀸𑀭𑀳𑀺𑀢𑀁 𑀲𑀼𑀔𑀁. 𑀅𑀯𑁂𑀤𑀬𑀺𑀢𑀲𑀼𑀔𑀦𑁆𑀢𑀺 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀢𑀁 𑀧𑀦 𑀅𑀨𑀲𑁆𑀲𑀁 𑀅𑀲𑀜𑁆𑀜𑀁 𑀅𑀘𑁂𑀢𑀦𑀦𑁆𑀢𑀺 𑀲𑀩𑁆𑀩𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀳𑀺𑀢𑀫𑁂𑀯. 𑀢𑀢𑁄 𑀘 𑀲𑀢𑀺𑀧𑀺 𑀭𑀽𑀧𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀁 𑀢𑀲𑁆𑀲 𑀅𑀘𑁂𑀢𑀦𑀢𑁆𑀢𑀸 𑀲𑀩𑁆𑀩𑀲𑁄 𑀲𑀗𑁆𑀔𑀸𑀭𑀤𑀼𑀓𑁆𑀔𑀯𑀺𑀭𑀳𑀺𑀢𑀢𑀸𑀬 𑀲𑀦𑁆𑀢𑀢𑀭𑀸 𑀧𑀡𑀻𑀢𑀢𑀭𑀸 𑀘 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑁂. 𑀢𑁂𑀦𑀸𑀳 ‘‘𑀅𑀯𑁂𑀤𑀬𑀺𑀢𑀲𑀼𑀔𑀁 𑀲𑀦𑁆𑀢𑀢𑀭𑀁 𑀧𑀡𑀻𑀢𑀢𑀭𑀁 𑀳𑁄𑀢𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀫𑀫𑁆𑀳𑀸 𑀘𑀸’’𑀢𑀺𑀆𑀤𑀺.

𑁩𑁩𑁦. 𑀲𑀸𑀫𑀕𑁆𑀕𑀺𑀭𑀲𑀸𑀦𑀺𑀲𑀁𑀲𑀫𑁂𑀯 𑀦𑁂𑀲𑀁 𑀪𑀕𑀯𑀸 𑀓𑀣𑁂𑀲𑀺 𑀅𑀚𑁆𑀛𑀸𑀲𑀬𑀸𑀦𑀼𑀓𑀽𑀮𑀢𑁆𑀢𑀸 𑀢𑀲𑁆𑀲. 𑀅𑀦𑀼𑀲𑀸𑀯𑁂𑀢𑁆𑀯𑀸𑀢𑀺 𑀅𑀦𑀼𑀧𑀕𑀫𑀦𑀯𑀲𑁂𑀦 𑀲𑀫𑁆𑀫𑀤𑁂𑀯 𑀆𑀭𑁄𑀘𑁂𑀢𑁆𑀯𑀸. ‘‘𑀅𑀦𑀼𑀲𑀁𑀲𑀸𑀯𑁂𑀢𑁆𑀯𑀸’’𑀢𑀺 𑀯𑀸 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀏𑀢𑀭𑀳𑀺 𑀪𑀕𑀯𑀢𑁄 𑀏𑀓𑀯𑀺𑀳𑀸𑀭𑁂 𑀅𑀚𑁆𑀛𑀸𑀲𑀬𑁄𑀢𑀺 𑀲𑀢𑁆𑀣𑀼 𑀫𑀦𑀁 𑀕𑀡𑁆𑀳𑀦𑁆𑀢𑀸 ‘‘𑀇𑀥𑁂𑀯 𑀢𑀺𑀝𑁆𑀞𑀣𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀝𑁆𑀞𑀸𑀦𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸. 𑀧𑀩𑁆𑀩𑀚𑁆𑀚𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀉𑀧𑀲𑀫𑁆𑀧𑀤𑀸-𑀯𑀺𑀲𑀼𑀤𑁆𑀥𑀺-𑀥𑀼𑀢𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕-𑀛𑀸𑀦𑀯𑀺𑀫𑁄𑀓𑁆𑀔-𑀲𑀫𑀸𑀧𑀢𑁆𑀢𑀺-𑀜𑀸𑀡𑀤𑀲𑁆𑀲𑀦-𑀫𑀕𑁆𑀕𑀪𑀸𑀯𑀦𑀸-𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀥𑀺𑀕𑀦𑁆𑀢𑁆𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀬𑀣𑀸𑀥𑀺𑀕𑀢𑀸𑀦𑀫𑁆𑀧𑀺. 𑀅𑀢𑁆𑀢𑀦𑁄 𑀕𑀼𑀡𑀓𑀣𑀸𑀬 𑀅𑀝𑁆𑀝𑀺𑀬𑀫𑀸𑀦𑀸𑀢𑀺 𑀪𑀕𑀯𑀦𑁆𑀢𑀁 𑀦𑀺𑀲𑁆𑀲𑀸𑀬 𑀅𑀥𑀺𑀕𑀦𑁆𑀢𑁆𑀯𑀸𑀧𑀺 𑀥𑀫𑁆𑀫𑀸𑀥𑀺𑀓𑀭𑀡𑀁 𑀲𑀢𑁆𑀣𑀼𑀯𑀺𑀳𑁂𑀲𑀸𑀪𑀸𑀯𑀤𑀻𑀧𑀦𑁂 𑀪𑀕𑀯𑀢𑁄 𑀧𑀸𑀓𑀝𑀕𑀼𑀡𑀸𑀦𑀁 𑀓𑀣𑀸𑀬 𑀅𑀝𑁆𑀝𑀺𑀬𑀫𑀸𑀦𑀸𑀧𑀻𑀢𑀺 𑀬𑁄𑀚𑀦𑀸. 𑀤𑁂𑀯𑀢𑀸𑀢𑀺 𑀢𑀁𑀢𑀁𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑀺𑀬𑁄 𑀤𑁂𑀯𑀢𑀸. 𑀫𑀼𑀔𑀁 𑀫𑁂 𑀲𑀚𑁆𑀚𑀦𑁆𑀢𑀺 𑀫𑀼𑀔𑀁 𑀫𑁂 𑀓𑀣𑀦𑁂 𑀲𑀫𑀢𑁆𑀣𑀁, 𑀓𑀣𑀦𑁂 𑀬𑁄𑀕𑁆𑀬𑀦𑁆𑀢𑀺 𑀅𑀢𑁆𑀣𑁄.

𑁩𑁩𑁧. 𑀏𑀯𑀁 𑀆𑀕𑀢𑁄𑀢𑀺 𑀏𑀯𑀁 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑁂 𑀆𑀕𑀢𑁄. 𑀧𑀮𑀺𑀯𑁂𑀞𑁂𑀦𑁆𑀢𑁂𑀢𑀺 𑀘𑁄𑀤𑁂𑀦𑁆𑀢𑁂. 𑀫𑀘𑁆𑀙𑀭𑀸𑀬𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀕𑀼𑀡𑀸𑀦𑀁 𑀪𑀕𑀯𑀢𑁄𑀧𑀺 𑀆𑀭𑁄𑀘𑀦𑀁 𑀅𑀲𑀳𑀫𑀸𑀦𑀸 𑀫𑀘𑁆𑀙𑀭𑀸𑀬𑀦𑁆𑀢𑀻𑀢𑀺 𑀲𑁄 𑀘𑀺𑀦𑁆𑀢𑁂𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑁦𑁧. 𑀢𑁂𑀲𑀁 𑀮𑀸𑀪𑀸𑀢𑀺 𑀢𑁂𑀲𑀁 𑀯𑀚𑁆𑀚𑀺𑀭𑀸𑀚𑀽𑀦𑀁 𑀯𑀚𑁆𑀚𑀺𑀭𑀝𑁆𑀞𑀯𑀸𑀲𑀻𑀦𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁, 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀺𑀓𑁄, 𑀪𑀕𑀯𑀢𑁄 𑀢𑀺𑀡𑁆𑀡𑀜𑁆𑀘 𑀓𑀼𑀮𑀧𑀼𑀢𑁆𑀢𑀸𑀦𑀁 𑀤𑀲𑁆𑀲𑀦𑀯𑀦𑁆𑀤𑀦𑀤𑀸𑀦𑀥𑀫𑁆𑀫𑀲𑁆𑀲𑀯𑀦𑀸𑀤𑀬𑁄 𑀮𑀸𑀪𑀸. 𑀲𑀼𑀮𑀤𑁆𑀥𑀸 𑀮𑀸𑀪𑀸𑀢𑀺 𑀬𑁄𑀚𑀦𑀸. 𑀧𑀲𑀦𑁆𑀦𑀘𑀺𑀢𑁆𑀢𑀁 𑀅𑀦𑀼𑀲𑁆𑀲𑀭𑁂𑀬𑁆𑀬𑀸𑀢𑀺 𑀢𑀁 𑀓𑀼𑀮𑀜𑁆𑀳𑁂𑀢𑀁 𑀲𑀻𑀮𑀸𑀤𑀺𑀕𑀼𑀡𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀅𑀦𑀼𑀲𑁆𑀲𑀭𑁂𑀬𑁆𑀬. 𑀯𑀼𑀢𑁆𑀢𑀁 𑀢𑁂𑀲𑀁 ‘‘𑀅𑀦𑀼𑀲𑁆𑀲𑀭𑀡𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀩𑀳𑀽𑀧𑀓𑀸𑀭𑀁 𑀯𑀤𑀸𑀫𑀻’’𑀢𑀺 (𑀇𑀢𑀺𑀯𑀼. 𑁧𑁦𑁪; 𑀲𑀁. 𑀦𑀺. 𑁫.𑁧𑁮𑁪).

𑀘𑀽𑀴𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀫𑀳𑀸𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩𑁨. 𑀓𑁄𑀘𑀺𑀤𑁂𑀯𑀸𑀢𑀺 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀲𑀸𑀫𑀦𑁆𑀢𑀢𑁄 𑀦𑀺𑀯𑀺𑀝𑁆𑀞𑁂𑀲𑀼 𑀬𑁄 𑀓𑁄𑀘𑀺 𑀕𑀸𑀫𑁄 𑀕𑁄𑀘𑀭𑀕𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀦𑀺𑀩𑀤𑁆𑀥𑀪𑀸𑀯𑀢𑁄 𑀕𑁄𑀘𑀭𑀕𑀸𑀫𑁄 𑀦 𑀕𑀳𑀺𑀢𑁄, 𑀯𑀲𑀦𑀝𑁆𑀞𑀸𑀦𑀫𑁂𑀯 𑀧𑀭𑀺𑀤𑀻𑀧𑀺𑀢𑀁, 𑀢𑀢𑁄 𑀏𑀯 𑀅𑀭𑀜𑁆𑀜𑀦𑀺𑀤𑀸𑀦𑀓𑀁 𑀦𑀸𑀫𑁂𑀢𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀘. 𑀣𑀺𑀭𑀓𑀸𑀭𑀓𑁂𑀳𑀻𑀢𑀺 𑀲𑀸𑀲𑀦𑁂 𑀣𑀺𑀭𑀪𑀸𑀯𑀓𑀸𑀭𑀓𑁂𑀳𑀺. 𑀲𑀯𑀦𑀦𑁆𑀢𑁂 𑀚𑀸𑀢𑀢𑁆𑀢𑀸𑀢𑀺 𑀘𑀢𑀼𑀲𑀘𑁆𑀘𑀕𑀩𑁆𑀪𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸. 𑀬𑀣𑀸 𑀧𑀝𑀺𑀯𑁂𑀥𑀩𑀸𑀳𑀼𑀲𑀘𑁆𑀘𑀁 𑀇𑀚𑁆𑀛𑀢𑀺, 𑀢𑀣𑀸 𑀥𑀫𑁆𑀫𑀲𑁆𑀲 𑀲𑀯𑀦𑀢𑁄 𑀲𑀸𑀯𑀓𑀸. 𑀲𑀽𑀭𑀺𑀬𑁄 𑀯𑀺𑀬 𑀪𑀸𑀲𑀼𑀭𑀕𑀼𑀡𑀭𑀁𑀲𑀺𑀢𑀸𑀬 𑀫𑁄𑀳𑀦𑁆𑀥𑀓𑀸𑀭𑀯𑀺𑀥𑀫𑀦𑀢𑁄. 𑀘𑀦𑁆𑀤𑁄 𑀯𑀺𑀬 𑀭𑀫𑀡𑀻𑀬𑀫𑀦𑁄𑀳𑀭𑀲𑀻𑀢𑀮𑀕𑀼𑀡𑀢𑀸𑀬 𑀓𑀺𑀮𑁂𑀲𑀧𑀭𑀺𑀴𑀸𑀳𑀯𑀽𑀧𑀲𑀫𑀢𑁄. 𑀲𑀸𑀕𑀭𑁄 𑀯𑀺𑀬 𑀕𑀫𑁆𑀪𑀻𑀭𑀣𑀺𑀭𑀯𑀺𑀧𑀼𑀮𑀸𑀦𑁂𑀓𑀕𑀼𑀡𑀢𑀸𑀬 𑀞𑀺𑀢𑀥𑀫𑁆𑀫𑀲𑀪𑀸𑀯𑀢𑁄. 𑀕𑀼𑀡𑀫𑀳𑀦𑁆𑀢𑀢𑀸𑀬 𑀣𑁂𑀭𑀲𑁆𑀲 𑀅𑀪𑀺𑀜𑁆𑀜𑀸𑀢𑀢𑀸, 𑀕𑀼𑀡𑀫𑀳𑀦𑁆𑀢𑀢𑀸 𑀘 𑀲𑀼𑀢𑁆𑀢𑁂𑀲𑀼 𑀆𑀕𑀢𑀦𑀬𑁂𑀦𑁂𑀯 𑀜𑀸𑀢𑀩𑁆𑀩𑀸𑀢𑀺 𑀢𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀻𑀳𑀦𑀸𑀤𑀲𑀼𑀢𑁆𑀢𑀦𑁆𑀢𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀆𑀕𑀢𑀁 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀁 (𑀫. 𑀦𑀺. 𑁧.𑁧𑁪𑁬). 𑀣𑁂𑀭𑀧𑀜𑁆𑀳𑀲𑀼𑀢𑁆𑀢𑀦𑁆𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑁂 𑀅𑀝𑁆𑀞𑀓𑀯𑀕𑁆𑀕𑁂 𑀆𑀕𑀢𑀁 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀁 (𑀲𑀼. 𑀦𑀺. 𑁯𑁬𑁧-𑁯𑁮𑁧). 𑀣𑁂𑀭𑀲𑀻𑀳𑀦𑀸𑀤𑀲𑀼𑀢𑁆𑀢𑀦𑁆𑀢𑀺 𑀇𑀫𑀲𑁆𑀲 𑀘 𑀣𑁂𑀭𑀲𑁆𑀲 𑀚𑀦𑀧𑀤𑀘𑀸𑀭𑀺𑀓𑀸𑀬 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀲𑀻𑀳𑀦𑀸𑀤𑀲𑀼𑀢𑁆𑀢𑀁. 𑀅𑀪𑀺𑀦𑀺𑀓𑁆𑀔𑀫𑀦𑀦𑁆𑀢𑀺 𑀣𑁂𑀭𑀲𑁆𑀲𑁂𑀯 𑀫𑀳𑀢𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑁂𑀦 𑀫𑀳𑀢𑀸 𑀘 𑀪𑁄𑀕𑀧𑀭𑀺𑀯𑀝𑁆𑀝𑁂𑀦 𑀲𑀳 𑀖𑀭𑀸𑀯𑀸𑀲𑀧𑀭𑀺𑀘𑁆𑀘𑀸𑀕𑁄 𑀅𑀪𑀺𑀦𑀺𑀓𑁆𑀔𑀫𑀦𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀬𑁄 𑀅𑀬𑀦𑁆𑀢𑀺 𑀅𑀢𑁆𑀣𑁄.

𑀫𑀳𑀸𑀧𑀜𑁆𑀜𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸𑀢𑀺 𑀆𑀬𑀲𑁆𑀫𑀢𑁄 𑀓𑀺𑀭 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀭𑀺𑀯𑀸𑀭𑀪𑀺𑀓𑁆𑀔𑀽𑀧𑀺 𑀫𑀳𑀸𑀧𑀜𑁆𑀜𑀸 𑀏𑀯 𑀅𑀳𑁂𑀲𑀼𑀁. 𑀥𑀸𑀢𑀼𑀲𑁄 𑀳𑀺 𑀲𑀢𑁆𑀢𑀸 𑀲𑀁𑀲𑀦𑁆𑀤𑀦𑁆𑀢𑀺. 𑀲𑀬𑀁 𑀇𑀤𑁆𑀥𑀺𑀫𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦𑀢𑁆𑀣𑁄 𑀥𑀸𑀢𑀼𑀲𑀁𑀬𑀼𑀢𑁆𑀢𑁂𑀦 (𑀲𑀁. 𑀦𑀺. 𑁨.𑁯𑁯) 𑀤𑀻𑀧𑁂𑀢𑀩𑁆𑀩𑁄 𑁋 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑁂 𑀕𑀺𑀮𑀸𑀦𑀲𑁂𑀬𑁆𑀬𑀸𑀬 𑀦𑀺𑀲𑀺𑀦𑁆𑀦𑁄 𑀪𑀕𑀯𑀸 𑀆𑀭𑀓𑁆𑀔𑀢𑁆𑀣𑀸𑀬 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀲𑀦𑁆𑀢𑁂𑀲𑀼 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀻𑀲𑀼 𑀏𑀓𑀫𑁂𑀓𑀁 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀘𑀗𑁆𑀓𑀫𑀦𑁆𑀢𑀁 𑀯𑁄𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑀁 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀘𑀗𑁆𑀓𑀫𑀦𑁆𑀢𑀦𑁆𑀢𑀺. 𑀏𑀯𑀁, 𑀪𑀦𑁆𑀢𑁂. 𑀲𑀩𑁆𑀩𑁂 𑀔𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀳𑀸𑀧𑀜𑁆𑀜𑀸’’𑀢𑀺 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀯𑀦𑀦𑁆𑀢𑁂𑀢𑀺 𑀉𑀧𑀯𑀦𑀦𑁆𑀢𑁂. 𑀫𑁂𑀖𑀯𑀡𑁆𑀡𑀸𑀬𑀸𑀢𑀺 𑀦𑀻𑀮𑀸𑀪𑀸𑀬. 𑀲𑀫𑀼𑀤𑁆𑀤𑀓𑀼𑀘𑁆𑀙𑀺𑀢𑁄 𑀉𑀕𑁆𑀕𑀘𑁆𑀙𑀦𑁆𑀢𑀲𑁆𑀲 𑀯𑀺𑀬 𑀉𑀧𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑀢𑁆𑀣𑀓𑀲𑀫𑀻𑀧𑁂 𑀆𑀪𑀸𑀨𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 ‘‘𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑀢𑁆𑀣𑀓𑁂’’𑀢𑀺 𑀯𑀼𑀢𑁆𑀢𑀁, 𑀦 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑀢𑁆𑀣𑀓𑁂 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀯𑀺𑀘𑀭𑀡𑀢𑁄. 𑀢𑀣𑀸 𑀲𑀢𑀺 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁂𑀲𑀼𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀆𑀪𑀸 𑀨𑀭𑁂𑀬𑁆𑀬. 𑀉𑀩𑁆𑀩𑁂𑀥𑀯𑀲𑁂𑀦 𑀳𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑀢𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀯𑀺𑀘𑀭𑀦𑁆𑀢𑀺. 𑀲𑀸𑀮𑀓𑀼𑀲𑀼𑀫𑀧𑀪𑀸𑀦𑀁 𑀅𑀢𑀺𑀭𑀢𑁆𑀢𑀢𑀸𑀬 𑀯𑀼𑀢𑁆𑀢𑀁 ‘‘𑀮𑀸𑀔𑀸𑀭𑀲𑁂𑀦 𑀲𑀺𑀜𑁆𑀘𑀫𑀸𑀦𑀁 𑀯𑀺𑀬𑀸’’𑀢𑀺. 𑀉𑀧𑀕𑀸𑀬𑀫𑀸𑀦𑀸 𑀯𑀺𑀬𑀸𑀢𑀺 𑀧𑀬𑀺𑀭𑀼𑀧𑀸𑀲𑀦𑀯𑀲𑁂𑀦 𑀉𑀧𑁂𑀘𑁆𑀘 𑀕𑀸𑀬𑀫𑀸𑀦𑀸 𑀯𑀺𑀬. 𑀓𑀸𑀬 𑀦𑀼 𑀔𑁄 𑀅𑀚𑁆𑀚 𑀭𑀢𑀺𑀬𑀸𑀢𑀺 𑀅𑀚𑁆𑀚 𑀛𑀸𑀦𑀲𑀫𑀸𑀧𑀢𑁆𑀢𑀺𑀭𑀢𑀺𑀬𑀸 𑀏𑀯 𑀦𑀼 𑀔𑁄, 𑀉𑀤𑀸𑀳𑀼 𑀥𑀫𑁆𑀫𑀲𑀸𑀓𑀘𑁆𑀙𑀸𑀭𑀢𑀺𑀬𑀸 𑀥𑀫𑁆𑀫𑀤𑁂𑀲𑀦𑀸𑀭𑀢𑀺𑀬𑀸𑀢𑀺 𑀘𑀺𑀦𑁆𑀢𑁂𑀲𑀺.

𑀤𑁆𑀯𑁂 𑀘𑀦𑁆𑀤𑀫𑀡𑁆𑀟𑀮𑀸𑀦𑀺 𑀯𑀺𑀬 𑀧𑀭𑀫𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸𑀬 𑀓𑀦𑁆𑀢𑀺𑀬𑀸. 𑀤𑁆𑀯𑁂 𑀲𑀽𑀭𑀺𑀬𑀫𑀡𑁆𑀟𑀮𑀸𑀦𑀺 𑀯𑀺𑀬 𑀅𑀢𑀺𑀯𑀺𑀬 𑀲𑀼𑀯𑀺𑀲𑀼𑀤𑁆𑀥𑀲𑀫𑀼𑀚𑁆𑀚𑀮𑀸𑀬 𑀕𑀼𑀡𑀯𑀺𑀪𑀽𑀢𑀺𑀬𑀸. 𑀤𑁆𑀯𑁂 𑀙𑀤𑁆𑀤𑀦𑁆𑀢𑀦𑀸𑀕𑀭𑀸𑀚𑀸𑀦𑁄 𑀯𑀺𑀬 𑀫𑀳𑀸𑀦𑀼𑀪𑀸𑀯𑀢𑀸𑀬. 𑀤𑁆𑀯𑁂 𑀲𑀻𑀳𑀸 𑀯𑀺𑀬 𑀢𑁂𑀚𑀼𑀲𑁆𑀲𑀤𑀢𑀸𑀬. 𑀤𑁆𑀯𑁂 𑀩𑁆𑀬𑀕𑁆𑀖𑀸 𑀯𑀺𑀬 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀢𑀸𑀬. 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀫𑁂𑀯𑀸𑀢𑀺 𑀲𑀩𑁆𑀩𑀫𑁂𑀯 𑀲𑀫𑀦𑁆𑀢𑀢𑁄 𑀯𑀺𑀓𑀲𑀺𑀢𑀁.

𑁩𑁩𑁩. 𑀓𑀣𑀸 𑀉𑀧𑀘𑀭𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀓𑀣𑀸𑀉𑀧𑀘𑀸𑀭𑁄, 𑀲𑀯𑀦𑀽𑀧𑀘𑀸𑀭𑁄 𑀧𑀤𑁂𑀲𑁄, 𑀢𑀁 𑀓𑀣𑀸𑀉𑀧𑀘𑀸𑀭𑀁. 𑀭𑀫𑀡𑀻𑀬𑀫𑁂𑀯 𑀭𑀸𑀫𑀡𑁂𑀬𑁆𑀬𑀓𑀁. 𑀉𑀚𑁆𑀚𑀗𑁆𑀕𑀮𑁂𑀢𑀺 𑀮𑀽𑀔𑀧𑀤𑁂𑀲𑁂 𑀓𑀞𑀺𑀦𑀧𑀤𑁂𑀲𑁂. 𑀤𑁄𑀲𑁂𑀳𑀺 𑀇𑀢𑀸 𑀅𑀧𑀕𑀢𑀸𑀢𑀺 𑀤𑁄𑀲𑀺𑀦𑀸 𑀢-𑀓𑀸𑀭𑀲𑁆𑀲 𑀦-𑀓𑀸𑀭𑀁 𑀓𑀢𑁆𑀯𑀸. 𑀤𑀺𑀩𑁆𑀩𑀸 𑀫𑀜𑁆𑀜𑁂 𑀕𑀦𑁆𑀥𑀸𑀢𑀺 𑀤𑁂𑀯𑀮𑁄𑀓𑁂 𑀕𑀦𑁆𑀥𑀸 𑀯𑀺𑀬. 𑀤𑀺𑀯𑀺 𑀪𑀯𑀸𑀢𑀺 𑀤𑀺𑀩𑁆𑀩𑀸. 𑀤𑁆𑀯𑁂 𑀣𑁂𑀭𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀆𑀦𑀦𑁆𑀤𑀢𑁆𑀣𑁂𑀭𑀸. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀢𑀸𑀯 𑀫𑀫𑀸𑀬𑀢𑀼 𑀅𑀔𑀻𑀡𑀸𑀲𑀯𑀪𑀸𑀯𑀢𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀓𑀣𑀦𑁆𑀢𑀺? 𑀦 𑀇𑀤𑀁 𑀫𑀫𑀸𑀬𑀦𑀁 𑀕𑁂𑀳𑀲𑁆𑀲𑀺𑀢𑀧𑁂𑀫𑀯𑀲𑁂𑀦, 𑀅𑀣 𑀔𑁄 𑀕𑀼𑀡𑀪𑀢𑁆𑀢𑀺𑀯𑀲𑁂𑀦𑀸𑀢𑀺 𑀦𑀸𑀬𑀁 𑀤𑁄𑀲𑁄.

𑀅𑀦𑀼𑀫𑀢𑀺𑀬𑀸 𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸, 𑀅𑀦𑀼𑀫𑀢𑀺𑀕𑁆𑀕𑀳𑀡𑀢𑁆𑀣𑀁 𑀧𑀼𑀘𑁆𑀙𑀦𑀁. 𑀢𑀢𑁆𑀣 𑀬𑀲𑁆𑀫𑀸 𑀅𑀥𑀫𑁆𑀫𑀺𑀓𑀫𑁆𑀧𑀺 𑀯𑀼𑀤𑁆𑀥𑀲𑁆𑀲 𑀅𑀦𑀼𑀫𑀢𑀺𑀁 𑀇𑀢𑀭𑁄 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀦 𑀮𑀪𑀢𑀺, 𑀢𑁂𑀦 𑀲𑀸 𑀅𑀦𑀼𑀚𑀸𑀦𑀺𑀢𑀩𑁆𑀩𑀸𑀯 𑀳𑁄𑀢𑀺, 𑀢𑀲𑁆𑀫𑀸 𑀲𑀗𑁆𑀖𑀔𑀼𑀤𑁆𑀤𑀓𑀢𑁄 𑀧𑀝𑁆𑀞𑀸𑀬 𑀅𑀦𑀼𑀫𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀦𑀸𑀫𑁂𑀲𑀸’’𑀢𑀺𑀆𑀤𑀺. 𑀔𑀼𑀤𑁆𑀤𑀓𑀢𑁄 𑀧𑀝𑁆𑀞𑀸𑀬𑀸𑀢𑀺 𑀓𑀡𑀺𑀝𑁆𑀞𑀢𑁄 𑀧𑀝𑁆𑀞𑀸𑀬. 𑀧𑀝𑀺𑀪𑀸𑀢𑀺 𑀉𑀧𑀝𑁆𑀞𑀸𑀢𑀻𑀢𑀺 𑀧𑀝𑀺𑀪𑀸𑀦𑀁, 𑀬𑀣𑀸𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄, 𑀢𑀁 𑀧𑀝𑀺𑀪𑀸𑀦𑀁. 𑀲𑀺𑀔𑀸𑀧𑁆𑀧𑀢𑁆𑀢𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀦 𑀪𑀯𑀺𑀲𑁆𑀲𑀢𑀺 𑀧𑀤𑁂𑀲𑀜𑀸𑀡𑁂 𑀞𑀺𑀢𑁂𑀳𑀺 𑀪𑀸𑀲𑀺𑀢𑀢𑁆𑀢𑀸. 𑀲𑀺𑀔𑀸𑀧𑁆𑀧𑀢𑁆𑀢𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀪𑀯𑀺𑀲𑁆𑀲𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀁𑀲𑀦𑁆𑀤𑀺𑀢𑀢𑁆𑀢𑀸. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀘𑁆𑀘𑀢𑁆𑀣𑀺𑀓𑀸 𑀅𑀝𑁆𑀝𑀺𑀬𑀦𑁆𑀢𑀺 𑀤𑀼𑀓𑁆𑀔𑀸𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀝𑁆𑀝𑁄, 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀯𑁄𑀳𑀸𑀭𑁄. 𑀕𑀸𑀫𑀪𑁄𑀚𑀓𑀦𑁆𑀢𑀺 𑀬𑀲𑁆𑀫𑀺𑀁 𑀕𑀸𑀫𑁂 𑀲𑁄 𑀉𑀧𑁆𑀧𑀦𑁆𑀦𑁄, 𑀢𑀁 𑀕𑀸𑀫𑀪𑁄𑀚𑀓𑀁. 𑀚𑀦𑀧𑀤𑀪𑁄𑀚𑀓𑀦𑁆𑀢𑀺 𑀬𑀲𑁆𑀫𑀺𑀁 𑀚𑀦𑀧𑀤𑁂 𑀲𑁄 𑀉𑀧𑁆𑀧𑀦𑁆𑀦𑁄, 𑀢𑀁 𑀚𑀦𑀧𑀤𑀪𑁄𑀚𑀓𑀁. 𑀫𑀳𑀸𑀯𑀺𑀦𑀺𑀘𑁆𑀙𑀬𑀅𑀫𑀘𑁆𑀘𑀦𑁆𑀢𑀺 𑀬𑀲𑁆𑀫𑀺𑀁 𑀭𑀚𑁆𑀚𑁂 𑀲𑁄 𑀚𑀦𑀧𑀤𑁄, 𑀢𑀲𑁆𑀲 𑀭𑀸𑀚𑀥𑀸𑀦𑀺𑀬𑀁 𑀫𑀳𑀸𑀯𑀺𑀦𑀺𑀘𑁆𑀙𑀬𑀅𑀫𑀘𑁆𑀘𑀁. 𑀲𑁂𑀦𑀸𑀧𑀢𑀺𑀦𑁆𑀢𑀺 𑀬𑀲𑁆𑀲 𑀭𑀜𑁆𑀜𑁄 𑀲𑁄 𑀅𑀫𑀘𑁆𑀘𑁄, 𑀢𑀲𑁆𑀲 𑀲𑁂𑀦𑀸𑀧𑀢𑀺𑀁. 𑀢𑀣𑀸 𑀉𑀧𑀭𑀸𑀚𑀦𑁆𑀢𑀺. 𑀇𑀤𑀁 𑀧𑀦𑁂𑀢𑁆𑀣 𑀧𑀓𑀢𑀺𑀘𑀸𑀭𑀺𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁 𑀉𑀧𑀫𑁂𑀬𑁆𑀬𑀢𑁆𑀣𑀸𑀦𑀼𑀭𑀽𑀧𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑀭𑀸𑀧𑀭𑀁 𑀦 𑀲𑀜𑁆𑀘𑀭𑀢𑀺 𑀯𑀺𑀦𑀺𑀘𑁆𑀙𑀬𑀦𑀸𑀭𑀳𑁂𑀦 𑀯𑀺𑀦𑀺𑀘𑁆𑀙𑀺𑀢𑀪𑀸𑀯𑀢𑁄.

𑀧𑀓𑀝𑁆𑀞𑀸𑀦𑀁 (𑀅. 𑀦𑀺. 𑀝𑀻. 𑁨.𑁪.𑁨𑁨) 𑀉𑀓𑁆𑀓𑀝𑁆𑀞𑀸𑀦𑀁 𑀲𑀻𑀮𑀸𑀤𑀺𑀅𑀢𑁆𑀣𑀸𑀦𑀁 𑀩𑁄𑀥𑀦𑀢𑁄, 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀩𑀼𑀤𑁆𑀥𑀸𑀤𑀻𑀳𑀺 𑀪𑀸𑀲𑀺𑀢𑀢𑁆𑀢𑀸 𑀘 𑀧𑀓𑀝𑁆𑀞𑀸𑀦𑀁 𑀯𑀘𑀦𑀧𑁆𑀧𑀩𑀦𑁆𑀥𑀸𑀦𑀁 𑀆𑀴𑀻𑀢𑀺 𑀧𑀸𑀴𑀺, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. 𑀧𑀼𑀭𑀺𑀫𑀲𑁆𑀲 𑀅𑀢𑁆𑀣𑀲𑁆𑀲 𑀧𑀘𑁆𑀙𑀺𑀫𑁂𑀦 𑀅𑀢𑁆𑀣𑁂𑀦 𑀅𑀦𑀼𑀲𑀦𑁆𑀥𑀸𑀦𑀁 𑀅𑀦𑀼𑀲𑀦𑁆𑀥𑀺. 𑀅𑀢𑁆𑀣𑀫𑀼𑀔𑁂𑀦 𑀧𑀦 𑀧𑀸𑀴𑀺𑀧𑀤𑁂𑀲𑀸𑀦𑀫𑁆𑀧𑀺 𑀅𑀦𑀼𑀲𑀦𑁆𑀥𑀺 𑀳𑁄𑀢𑀺𑀬𑁂𑀯, 𑀲𑁄 𑀘 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺-𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺-𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺-𑀬𑀣𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑀁𑀢𑀁𑀤𑁂𑀲𑀦𑀸𑀦𑀁 𑀧𑀦 𑀧𑀼𑀩𑁆𑀩𑀸𑀧𑀭𑀲𑀁𑀲𑀦𑁆𑀤𑀦𑀁 𑀧𑀼𑀩𑁆𑀩𑀸𑀧𑀭𑀁. 𑀧𑀸𑀴𑀺𑀯𑀲𑁂𑀦 𑀅𑀦𑀼𑀲𑀦𑁆𑀥𑀺𑀯𑀲𑁂𑀦 𑀧𑀼𑀩𑁆𑀩𑀸𑀧𑀭𑀯𑀲𑁂𑀦𑀸𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀉𑀕𑁆𑀕𑀳𑀺𑀢𑀦𑁆𑀢𑀺 𑀩𑁆𑀬𑀜𑁆𑀚𑀦𑀲𑁄 𑀅𑀢𑁆𑀣𑀲𑁄 𑀘 𑀉𑀤𑁆𑀥𑀁 𑀉𑀤𑁆𑀥𑀁 𑀕𑀳𑀺𑀢𑀁, 𑀧𑀭𑀺𑀬𑀸𑀧𑀼𑀡𑀦𑀯𑀲𑁂𑀦 𑀘𑁂𑀯 𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀘 𑀳𑀤𑀬𑁂𑀦 𑀕𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀺𑀓𑁂𑀳𑀺 𑀲𑁄𑀢𑀩𑁆𑀩𑀢𑁄 𑀲𑀼𑀢𑀁, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄, 𑀢𑀁 𑀥𑀸𑀭𑁂𑀢𑀻𑀢𑀺 𑀲𑀼𑀢𑀥𑀭𑁄. 𑀬𑁄 𑀳𑀺 𑀲𑀼𑀢𑀥𑀭𑁄, 𑀲𑀼𑀢𑀁 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀼𑀢𑀲𑁆𑀲 𑀆𑀥𑀸𑀭𑀪𑀽𑀢𑁄’’𑀢𑀺. 𑀢𑁂𑀦𑀸𑀳 ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺. 𑀏𑀓𑀧𑀤𑀁 𑀏𑀓𑀓𑁆𑀔𑀭𑀫𑁆𑀧𑀺 𑀅𑀯𑀺𑀦𑀝𑁆𑀞𑀁 𑀳𑀼𑀢𑁆𑀯𑀸 𑀲𑀦𑁆𑀦𑀺𑀘𑀻𑀬𑀢𑀻𑀢𑀺 𑀲𑀦𑁆𑀦𑀺𑀘𑀬𑁄, 𑀲𑀼𑀢𑀁 𑀲𑀦𑁆𑀦𑀺𑀘𑀬𑁄 𑀏𑀢𑀲𑁆𑀫𑀺𑀦𑁆𑀢𑀺 𑀲𑀼𑀢𑀲𑀦𑁆𑀦𑀺𑀘𑀬𑁄. 𑀅𑀚𑁆𑀛𑁄𑀲𑀸𑀬𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀢𑀺𑀝𑁆𑀞𑀢𑀻𑀢𑀺 𑀦 𑀫𑀼𑀲𑁆𑀲𑀢𑀺.

𑀞𑀺𑀢𑀸 𑀧𑀕𑀼𑀡𑀸𑀢𑀺 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸. 𑀦𑀺𑀘𑁆𑀘𑀮𑀺𑀢𑀦𑁆𑀢𑀺 𑀅𑀧𑀭𑀺𑀯𑀢𑁆𑀢𑀺𑀢𑀁. 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀅𑀜𑁆𑀜𑁂𑀳𑀺 𑀲𑀁𑀲𑀦𑁆𑀤𑀺𑀢𑁆𑀯𑀸. 𑀲𑀫𑀦𑀼𑀕𑁆𑀕𑀸𑀳𑀺𑀢𑁆𑀯𑀸𑀢𑀺 𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀅𑀢𑁆𑀣𑀁 𑀑𑀕𑀸𑀳𑁂𑀢𑁆𑀯𑀸. 𑀧𑀩𑀦𑁆𑀥𑀲𑁆𑀲 𑀯𑀺𑀩𑀦𑁆𑀥𑀸𑀪𑀸𑀯𑀢𑁄 𑀕𑀗𑁆𑀕𑀸𑀲𑁄𑀢𑀲𑀤𑀺𑀲𑀁, ‘‘𑀪𑀯𑀗𑁆𑀕𑀲𑁄𑀢𑀲𑀤𑀺𑀲’’𑀦𑁆𑀢𑀺 𑀯𑀸 𑀧𑀸𑀞𑁄, 𑀅𑀓𑀺𑀢𑁆𑀢𑀺𑀫𑀁 𑀲𑀼𑀔𑀧𑁆𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑁂𑀓𑀤𑁂𑀲𑀲𑁆𑀲 𑀲𑀼𑀢𑁆𑀢𑀲𑁆𑀲 𑀘 𑀯𑀘𑀲𑀸 𑀧𑀭𑀺𑀘𑀬𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄, 𑀯𑀕𑁆𑀕𑀸𑀤𑀺𑀯𑀲𑁂𑀦 𑀧𑀦 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀲𑀼𑀢𑁆𑀢𑀤𑀲𑀓…𑀧𑁂… 𑀲𑀚𑁆𑀛𑀸𑀬𑀺𑀢𑀸’’𑀢𑀺, ‘‘𑀤𑀲 𑀲𑀼𑀢𑁆𑀢𑀸𑀦𑀺 𑀕𑀢𑀸𑀦𑀺, 𑀤𑀲 𑀯𑀕𑁆𑀕𑀸𑀕𑀢𑀸’’𑀢𑀺𑀆𑀤𑀺𑀦𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀸𑀘𑀸𑀬 𑀲𑀚𑁆𑀛𑀸𑀬𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀦𑀲𑀸 𑀅𑀦𑀼 𑀅𑀦𑀼 𑀧𑁂𑀓𑁆𑀔𑀺𑀢𑀸 𑀪𑀸𑀕𑀲𑁄 𑀦𑀺𑀚𑁆𑀛𑀸𑀬𑀺𑀢𑀸 𑀘𑀺𑀦𑁆𑀢𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸. 𑀭𑀽𑀧𑀕𑀢𑀁 𑀯𑀺𑀬 𑀧𑀜𑁆𑀜𑀸𑀬𑀢𑀻𑀢𑀺 𑀭𑀽𑀧𑀕𑀢𑀁 𑀯𑀺𑀬 𑀘𑀓𑁆𑀔𑀼𑀲𑁆𑀲 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺. 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀼𑀫𑁆𑀩𑀁 𑀓𑀢𑁆𑀯𑀸 𑀲𑀼𑀝𑁆𑀞𑀼 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀤𑁆𑀥𑀸.

𑀧𑀚𑁆𑀚𑀢𑀺 𑀅𑀢𑁆𑀣𑁄 𑀜𑀸𑀬𑀢𑀺 𑀏𑀢𑁂𑀦𑀸𑀢𑀺 𑀧𑀤𑀁, 𑀢𑀤𑁂𑀯 𑀅𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀦𑁆𑀢𑀺 𑀆𑀳 ‘‘𑀧𑀤𑀫𑁂𑀯 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀢𑁄 𑀧𑀤𑀩𑁆𑀬𑀜𑁆𑀚𑀦’’𑀦𑁆𑀢𑀺. 𑀅𑀓𑁆𑀔𑀭𑀧𑀸𑀭𑀺𑀧𑀽𑀭𑀺𑀬𑀸 𑀧𑀤𑀩𑁆𑀬𑀜𑁆𑀚𑀦𑀲𑁆𑀲 𑀧𑀭𑀺𑀫𑀡𑁆𑀟𑀮𑀢𑀸, 𑀲𑀸 𑀧𑀦 𑀧𑀸𑀭𑀺𑀧𑀽𑀭𑀻 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀤𑀲𑀯𑀺𑀥𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑁄 𑀅𑀧𑀭𑀺𑀳𑀸𑀧𑁂𑀢𑁆𑀯𑀸’’𑀢𑀺. 𑀅𑀜𑁆𑀜𑀁 𑀉𑀧𑀸𑀭𑀫𑁆𑀪𑀓𑀭𑀦𑁆𑀢𑀺 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀲𑀼𑀢𑁆𑀢𑀢𑁄 𑀅𑀜𑁆𑀜𑀁 𑀢𑀲𑁆𑀲 𑀅𑀦𑀦𑀼𑀮𑁄𑀫𑀓𑀁 𑀲𑀼𑀢𑁆𑀢𑀁 𑀆𑀳𑀭𑀢𑀺. 𑀢𑀤𑀢𑁆𑀣𑀁 𑀑𑀢𑀸𑀭𑁂𑀢𑀻𑀢𑀺 𑀢𑀲𑁆𑀲 𑀆𑀳𑀝𑀲𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀁 𑀯𑀺𑀘𑀸𑀭𑁂𑀢𑀺. 𑀢𑀲𑁆𑀲 𑀓𑀣𑀸 𑀅𑀧𑀭𑀺𑀫𑀡𑁆𑀟𑀮𑀸 𑀦𑀸𑀫 𑀳𑁄𑀢𑀺 𑀅𑀢𑁆𑀣𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀪𑀸𑀯𑀢𑁄. 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦𑁂𑀯 𑀲𑀼𑀢𑁆𑀢𑀦𑁆𑀢𑀭𑀫𑁆𑀧𑀺 𑀆𑀦𑁂𑀦𑁆𑀢𑁄 𑀩𑀳𑀺 𑀏𑀓𑀧𑀤𑀫𑁆𑀧𑀺 𑀦 𑀕𑀘𑁆𑀙𑀢𑀺 𑀦𑀸𑀫. 𑀅𑀫𑀓𑁆𑀔𑁂𑀦𑁆𑀢𑁄𑀢𑀺 𑀅𑀯𑀺𑀦𑀸𑀲𑁂𑀦𑁆𑀢𑁄. 𑀢𑀁 𑀢𑀁 𑀅𑀢𑁆𑀣𑀁 𑀲𑀼𑀝𑁆𑀞𑀼 𑀯𑀯𑀢𑁆𑀣𑀺𑀢𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀢𑀼𑀮𑀺𑀓𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀯𑀺𑀬. 𑀕𑀫𑁆𑀪𑀻𑀭𑀢𑀭𑀫𑀢𑁆𑀣𑀁 𑀕𑀫𑁂𑀦𑁆𑀢𑁄 𑀕𑀫𑁆𑀪𑀻𑀭𑀫𑀸𑀢𑀺𑀓𑀸𑀬 𑀉𑀤𑀓𑀁 𑀧𑁂𑀲𑁂𑀦𑁆𑀢𑁄 𑀯𑀺𑀬. 𑀉𑀢𑁆𑀢𑀸𑀦𑀫𑀸𑀢𑀺𑀓𑀸𑀬 𑀳𑀺 𑀫𑀭𑀺𑀬𑀸𑀤𑀁 𑀑𑀢𑁆𑀣𑀭𑀺𑀢𑁆𑀯𑀸 𑀉𑀤𑀓𑀁 𑀅𑀜𑁆𑀜𑀣𑀸 𑀕𑀘𑁆𑀙𑁂𑀬𑁆𑀬. 𑀏𑀓𑀁𑀬𑁂𑀯 𑀧𑀤𑀁 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀧𑀤𑀁 𑀓𑁄𑀝𑁆𑀝𑁂𑀦𑁆𑀢𑁄 𑀲𑀺𑀦𑁆𑀥𑀯𑀸𑀚𑀸𑀦𑀻𑀬𑁄 𑀯𑀺𑀬. 𑀲𑁄 𑀳𑀺 𑀯𑀕𑁆𑀕𑀺𑀢𑀸𑀬 𑀕𑀢𑀺𑀬𑀸 𑀧𑀤𑁂 𑀧𑀤𑀁 𑀓𑁄𑀝𑁆𑀝𑁂𑀦𑁆𑀢𑁄 𑀕𑀘𑁆𑀙𑀢𑀺. 𑀓𑀣𑀸𑀫𑀕𑁆𑀕𑁂𑀦 𑀢𑀲𑁆𑀲 𑀓𑀣𑀸 𑀧𑀭𑀺𑀫𑀡𑁆𑀟𑀮𑀸 𑀦𑀸𑀫 𑀳𑁄𑀢𑀺 𑀥𑀫𑁆𑀫𑀢𑁄 𑀅𑀢𑁆𑀣𑀢𑁄 𑀅𑀦𑀼𑀲𑀦𑁆𑀥𑀺𑀢𑁄 𑀧𑀼𑀩𑁆𑀩𑀸𑀧𑀭𑀢𑁄 𑀆𑀘𑀭𑀺𑀬𑀼𑀕𑁆𑀕𑀳𑀢𑁄𑀢𑀺 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀪𑀸𑀯𑀢𑁄.

𑀅𑀦𑀼𑀧𑁆𑀧𑀩𑀦𑁆𑀥𑁂𑀳𑀻𑀢𑀺 𑀯𑀺𑀲𑁆𑀲𑀝𑁆𑀞𑁂𑀳𑀺 𑀆𑀲𑀚𑁆𑀚𑀫𑀸𑀦𑁂𑀳𑀺. 𑀦𑀸𑀢𑀺𑀲𑀻𑀖𑀁 𑀦𑀸𑀢𑀺𑀲𑀡𑀺𑀓𑀁 𑀦𑀺𑀭𑀦𑁆𑀢𑀭𑀁 𑀏𑀓𑀭𑀲𑀜𑁆𑀘 𑀓𑀢𑁆𑀯𑀸 𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀓𑀣𑀸𑀬 𑀓𑀣𑁂𑀢𑀺 𑀦𑀸𑀫, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀫𑀸𑀳. 𑀅𑀭𑀡𑀺𑀁 𑀫𑀦𑁆𑀣𑁂𑀦𑁆𑀢𑁄 𑀯𑀺𑀬, 𑀉𑀡𑁆𑀳𑀔𑀸𑀤𑀦𑀻𑀬𑀁 𑀔𑀸𑀤𑀦𑁆𑀢𑁄 𑀯𑀺𑀬𑀸𑀢𑀺 𑀲𑀻𑀖𑀁 𑀲𑀻𑀖𑀁 𑀓𑀣𑀦𑀲𑁆𑀲 𑀉𑀤𑀸𑀳𑀭𑀡𑀁, 𑀕𑀳𑀺𑀢𑀁 𑀕𑀳𑀺𑀢𑀫𑁂𑀯𑀸𑀢𑀺𑀆𑀤𑀺 𑀮𑀗𑁆𑀖𑁂𑀢𑁆𑀯𑀸 𑀓𑀣𑀦𑀲𑁆𑀲. 𑀧𑀼𑀭𑀸𑀡𑀧𑀡𑁆𑀡𑀦𑁆𑀢𑀭𑁂𑀲𑀼 𑀳𑀺 𑀧𑀭𑀺𑀧𑀸𑀢𑀺𑀬𑀫𑀸𑀦𑀕𑁄𑀥𑀸 𑀓𑀤𑀸𑀘𑀺 𑀤𑀺𑀲𑁆𑀲𑀢𑀺, 𑀏𑀯𑀫𑁂𑀓𑀘𑁆𑀘𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀓𑀢𑁆𑀣𑀘𑀺 𑀦 𑀤𑀺𑀲𑁆𑀲𑀢𑀺. 𑀑𑀳𑀸𑀬𑀸𑀢𑀺 𑀞𑀧𑁂𑀢𑁆𑀯𑀸. 𑀬𑁄𑀧𑀻𑀢𑀺𑀆𑀤𑀺𑀦𑀸 𑀏𑀓𑀭𑀽𑀧𑁂𑀦 𑀓𑀣𑀸𑀬 𑀅𑀓𑀣𑀦𑀁 𑀤𑀲𑁆𑀲𑁂𑀢𑀺. 𑀧𑁂𑀢𑀕𑁆𑀕𑀺 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀧𑁂𑀢𑀲𑁆𑀲 𑀫𑀼𑀔𑀢𑁄 𑀦𑀺𑀘𑁆𑀙𑀭𑀡𑀓𑀅𑀕𑁆𑀕𑀺. 𑀯𑀺𑀢𑁆𑀣𑀸𑀬𑀢𑀻𑀢𑀺 𑀅𑀧𑁆𑀧𑀝𑀺𑀢𑀸𑀦𑀢𑀫𑀸𑀧𑀚𑁆𑀚𑀢𑀺. 𑀓𑁂𑀦𑀘𑀺 𑀭𑁄𑀕𑁂𑀦 𑀤𑀼𑀓𑁆𑀔𑀁 𑀧𑀢𑁆𑀢𑁄 𑀯𑀺𑀬 𑀦𑀺𑀢𑁆𑀣𑀼𑀦𑀦𑁆𑀢𑁄. 𑀓𑀦𑁆𑀤𑀦𑁆𑀢𑁄 𑀯𑀺𑀬𑀸𑀢𑀺 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑁄 𑀯𑀺𑀬. 𑀅𑀧𑁆𑀧𑀩𑀦𑁆𑀥𑀸 𑀦𑀸𑀫 𑀳𑁄𑀢𑀺 𑀲𑀼𑀔𑁂𑀦 𑀅𑀧𑁆𑀧𑀯𑀢𑁆𑀢𑀪𑀸𑀯𑀢𑁄. 𑀆𑀘𑀭𑀺𑀬𑁂𑀳𑀺 𑀤𑀺𑀦𑁆𑀦𑀦𑀬𑁂 𑀞𑀺𑀢𑁄𑀢𑀺 𑀆𑀘𑀭𑀺𑀬𑀼𑀕𑁆𑀕𑀳𑀁 𑀅𑀫𑀼𑀜𑁆𑀘𑀦𑁆𑀢𑁄, 𑀬𑀣𑀸 𑀘 𑀆𑀘𑀭𑀺𑀬𑀸 𑀢𑀁 𑀢𑀁 𑀲𑀼𑀢𑁆𑀢𑀁 𑀲𑀁𑀯𑀡𑁆𑀡𑁂𑀲𑀼𑀁, 𑀢𑁂𑀦𑁂𑀯 𑀦𑀬𑁂𑀦 𑀲𑀁𑀯𑀡𑁆𑀡𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀘𑁆𑀙𑀺𑀦𑁆𑀦𑀥𑀸𑀭𑀁 𑀓𑀢𑁆𑀯𑀸𑀢𑀺 ‘‘𑀦𑀸𑀢𑀺𑀲𑀻𑀖𑀁 𑀦𑀸𑀢𑀺𑀲𑀡𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀅𑀯𑀺𑀘𑁆𑀙𑀺𑀦𑁆𑀦𑀁 𑀓𑀣𑀸𑀧𑀩𑀦𑁆𑀥𑀁 𑀓𑀢𑁆𑀯𑀸. 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀸𑀬𑀸𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀓𑀣𑀸𑀬 𑀅𑀭𑀳𑀢𑁆𑀢𑀧𑀭𑀺𑀬𑁄𑀲𑀸𑀦𑀢𑀁 𑀤𑀲𑁆𑀲𑁂𑀢𑀺. 𑀏𑀯𑀭𑀽𑀧𑁂𑀦𑀸𑀢𑀺 𑀦𑀬𑀺𑀤𑀁 𑀏𑀓𑀯𑀘𑀦𑀁 𑀢𑀢𑁆𑀢𑀓𑀯𑀲𑁂𑀦 𑀕𑀳𑁂𑀢𑀩𑁆𑀩𑀁, 𑀅𑀣 𑀔𑁄 𑀮𑀓𑁆𑀔𑀡𑁂 𑀧𑀯𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸𑀭𑀽𑀧𑁂𑀦𑁂𑀯 𑀪𑀺𑀓𑁆𑀔𑀼𑀲𑀢𑁂𑀦 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦 𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀮𑁆𑀮𑀗𑁆𑀓𑁂𑀦𑀸𑀢𑀺 𑀧𑀮𑁆𑀮𑀗𑁆𑀓𑀧𑀤𑁂𑀲𑁂𑀦, 𑀧𑀮𑁆𑀮𑀗𑁆𑀓𑀸𑀲𑀦𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀯𑀸𑀭𑀦𑁆𑀢𑀭𑀲𑀸𑀥𑀸𑀭𑀡𑀁 𑀅𑀢𑁆𑀣𑀁 𑀅𑀢𑀺𑀤𑀺𑀲𑀢𑀺, 𑀅𑀲𑀸𑀥𑀸𑀭𑀡𑀁 𑀧𑀦 𑀯𑀓𑁆𑀔𑀢𑁂𑀯𑀸𑀢𑀺.

𑁩𑁩𑁪. 𑀆𑀭𑀫𑀢𑀺 𑀏𑀢𑁂𑀦𑀸𑀢𑀺 𑀆𑀭𑀸𑀫𑁄.

𑁩𑁩𑁫. 𑀥𑀼𑀯𑀲𑁂𑀯𑀦𑀦𑁆𑀢𑀺 𑀦𑀺𑀬𑀢𑀲𑁂𑀯𑀺𑀢𑀁. 𑀧𑀸𑀲𑀸𑀤𑀧𑀭𑀺𑀯𑁂𑀡𑁂𑀢𑀺 𑀧𑀸𑀲𑀸𑀤𑀗𑁆𑀕𑀡𑁂. 𑀦𑀸𑀪𑀺𑀬𑀸 𑀧𑀢𑀺𑀝𑁆𑀞𑀺𑀢𑀸𑀦𑀦𑁆𑀢𑀺 𑀦𑀸𑀪𑀺𑀬𑀸 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀸𑀦𑀁. 𑀅𑀭𑀦𑁆𑀢𑀭𑀸𑀦𑀻𑀢𑀺 𑀅𑀭𑀯𑀺𑀯𑀭𑀸𑀦𑀺 𑀢𑀁𑀢𑀁𑀅𑀭𑀸𑀦𑀁 𑀯𑁂𑀫𑀚𑁆𑀛𑀝𑁆𑀞𑀸𑀦𑀸𑀦𑀺.

𑁩𑁩𑁬. 𑀲𑀫𑀸𑀤𑀺𑀦𑁆𑀦𑀅𑀭𑀜𑁆𑀜𑀥𑀼𑀢𑀗𑁆𑀕𑁄 𑀆𑀭𑀜𑁆𑀜𑀺𑀓𑁄, 𑀦 𑀅𑀭𑀜𑁆𑀜𑀯𑀸𑀲𑀫𑀢𑁆𑀢𑁂𑀦.

𑁩𑁩𑁭. 𑀦 𑀑𑀲𑀸𑀤𑁂𑀦𑁆𑀢𑀻𑀢𑀺 𑀦 𑀅𑀯𑀲𑀸𑀤𑁂𑀦𑁆𑀢𑀺, 𑀦 𑀅𑀯𑀲𑀸𑀤𑀦𑀸𑀧𑁂𑀓𑁆𑀔𑀸 𑀅𑀜𑁆𑀜𑀫𑀜𑁆𑀜𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀯𑀢𑁆𑀢𑀺𑀦𑀻𑀢𑀺 𑀧𑀕𑀼𑀡𑀸.

𑁩𑁩𑁮. 𑀮𑁄𑀓𑀼𑀢𑁆𑀢𑀭𑀸 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺 𑀦𑀸𑀫 𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀬𑁄, 𑀧𑀭𑀺𑀬𑀸𑀬𑀢𑁄 𑀧𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀸.

𑁩𑁩𑁯. 𑀲𑀸𑀥𑀼𑀓𑀸𑀭𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑀣𑀸 𑀢𑀁 𑀆𑀦𑀦𑁆𑀤𑁄𑀯 𑀲𑀫𑁆𑀫𑀸 𑀩𑁆𑀬𑀸𑀓𑀭𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺𑀆𑀤𑀺. 𑀲𑀫𑁆𑀫𑀸𑀢𑀺 𑀲𑀼𑀝𑁆𑀞𑀼, 𑀬𑀣𑀸𑀅𑀚𑁆𑀛𑀸𑀲𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂𑀦 𑀳𑀺 𑀬𑀁 𑀬𑀣𑀸𑀘𑀺𑀢𑁆𑀢𑀁 𑀓𑀣𑀺𑀢𑀁, 𑀢𑀁 𑀲𑀫𑁆𑀫𑀸 𑀓𑀣𑀺𑀢𑀁 𑀦𑀸𑀫 𑀳𑁄𑀢𑀺. 𑀲𑀫𑁆𑀧𑀢𑁆𑀢𑀯𑀲𑁂𑀦 𑀳𑀺 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻 𑀲𑁄𑀪𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀅𑀦𑀼𑀘𑁆𑀙𑀯𑀺𑀓𑀫𑁂𑀯𑀸’’𑀢𑀺𑀆𑀤𑀺. 𑀩𑀳𑀼𑀲𑁆𑀲𑀼𑀢𑁄 𑀪𑀺𑀓𑁆𑀔𑀼 𑀢𑀢𑁆𑀣 𑀢𑀢𑁆𑀣 𑀲𑀼𑀢𑁆𑀢𑁂 𑀲𑀻𑀮𑀸𑀤𑀻𑀦𑀁 𑀆𑀕𑀢𑀝𑁆𑀞𑀸𑀦𑁂 𑀢𑁂𑀲𑀁 𑀲𑀼𑀯𑀺𑀤𑀺𑀢𑀢𑁆𑀢𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁄 𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑀆𑀳 ‘‘𑀲𑀻𑀮𑀲𑁆𑀲 𑀆𑀕𑀢𑀝𑁆𑀞𑀸𑀦𑁂’’𑀢𑀺𑀆𑀤𑀺. 𑀫𑀕𑁆𑀕𑀸𑀤𑀺𑀧𑀲𑀯𑀦𑀸𑀬 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀧𑀭𑀺𑀧𑀸𑀓𑀁 𑀕𑀫𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁩𑁪𑁦. ‘‘𑀏𑀲𑁂𑀯 𑀦𑀬𑁄’’𑀢𑀺 𑀅𑀢𑀺𑀤𑁂𑀲𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀆𑀬𑀲𑁆𑀫𑀸 𑀳𑀺 𑀭𑁂𑀯𑀢𑁄’’𑀢𑀺𑀆𑀤𑀺𑀫𑀸𑀳.

𑁩𑁪𑁨. 𑀅𑀧𑀭𑁂𑀧𑀺 𑀦𑀸𑀦𑀧𑁆𑀧𑀓𑀸𑀭𑁂 𑀓𑀺𑀮𑁂𑀲𑁂𑀢𑀺 𑀅𑀧𑀭𑁂𑀧𑀺 𑀦𑀸𑀦𑀧𑁆𑀧𑀓𑀸𑀭𑁂 𑀤𑁄𑀲𑀫𑁄𑀳𑀸𑀤𑀺𑀓𑀺𑀮𑁂𑀲𑁂. 𑀥𑀼𑀦𑀺𑀢𑁆𑀯𑀸𑀢𑀺 𑀯𑀺𑀥𑀫𑁂𑀢𑁆𑀯𑀸.

𑁩𑁪𑁩. 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀏𑀯𑀁 𑀩𑁆𑀬𑀸𑀓𑀸𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀓𑀮𑀫𑁆𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀕𑀢𑀁 𑀘𑀺𑀢𑁆𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀧𑀦 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀤𑀦𑀦𑁆𑀢𑀭𑀁 𑀲𑀫𑁆𑀧𑀝𑀺𑀘𑁆𑀙𑀦𑀁, 𑀢𑀤𑀦𑀦𑁆𑀢𑀭𑀁 𑀲𑀦𑁆𑀢𑀻𑀭𑀡𑀦𑁆𑀢𑀺𑀆𑀤𑀺𑀦𑀸 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀅𑀢𑀺𑀇𑀢𑁆𑀢𑀭𑀔𑀡𑀯𑀦𑁆𑀢𑀁 𑀘𑀺𑀢𑁆𑀢𑀦𑁆𑀢𑀭𑀁 𑀘𑀺𑀢𑁆𑀢𑀦𑀸𑀦𑀢𑁆𑀢𑀁. 𑀔𑀦𑁆𑀥𑀸𑀤𑀻𑀦𑀜𑁆𑀘 𑀦𑀸𑀦𑀢𑁆𑀢𑀲𑀗𑁆𑀔𑀸𑀢𑀁 𑀔𑀦𑁆𑀥𑀦𑁆𑀢𑀭𑀸𑀤𑀺. 𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀣𑁂𑀯 𑀢𑀢𑀺𑀬𑀁 𑀛𑀸𑀦𑀦𑁆𑀢𑀺𑀆𑀤𑀺𑀦𑀸 𑀆𑀭𑀫𑁆𑀫𑀡𑀁 𑀅𑀦𑀼𑀓𑁆𑀓𑀫𑀺𑀢𑁆𑀯𑀸 𑀛𑀸𑀦𑀲𑁆𑀲𑁂𑀯 𑀏𑀓𑀦𑁆𑀢𑀭𑀺𑀓𑀪𑀸𑀯𑁂𑀦 𑀉𑀓𑁆𑀓𑀫𑀦𑀁 𑀛𑀸𑀦𑁄𑀓𑁆𑀓𑀦𑁆𑀢𑀺𑀓𑀁 𑀦𑀸𑀫. 𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀢𑁂𑀚𑁄𑀓𑀲𑀺𑀡𑁂𑀢𑀺𑀆𑀤𑀺𑀦𑀸 𑀛𑀸𑀦𑀁 𑀅𑀦𑀼𑀓𑁆𑀓𑀫𑀺𑀢𑁆𑀯𑀸 𑀆𑀭𑀫𑁆𑀫𑀡𑀲𑁆𑀲𑁂𑀯 𑀏𑀓𑀦𑁆𑀢𑀭𑀺𑀓𑀪𑀸𑀯𑁂𑀦 𑀉𑀓𑁆𑀓𑀫𑀦𑀁 𑀆𑀭𑀫𑁆𑀫𑀡𑁄𑀓𑁆𑀓𑀦𑁆𑀢𑀺𑀓𑀁 𑀦𑀸𑀫. ‘‘𑀧𑀞𑀫𑀚𑁆𑀛𑀸𑀦𑀁 𑀧𑀜𑁆𑀘𑀗𑁆𑀕𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀤𑀼𑀯𑀗𑁆𑀕𑀺𑀓𑀦𑁆𑀢𑀺 𑀛𑀸𑀦𑀗𑁆𑀕𑀫𑀢𑁆𑀢𑀲𑁆𑀲𑁂𑀯 𑀯𑀯𑀢𑁆𑀣𑀸𑀧𑀦𑀁 𑀅𑀗𑁆𑀕𑀯𑀯𑀢𑁆𑀣𑀸𑀦𑀁. ‘‘𑀇𑀤𑀁 𑀧𑀣𑀯𑀻𑀓𑀲𑀺𑀡𑀁…𑀧𑁂… 𑀇𑀤𑀁 𑀑𑀤𑀸𑀢𑀓𑀲𑀺𑀡’’𑀦𑁆𑀢𑀺 𑀆𑀭𑀫𑁆𑀫𑀡𑀫𑀢𑁆𑀢𑀲𑁆𑀲𑁂𑀯 𑀯𑀯𑀢𑁆𑀣𑀸𑀧𑀦𑀁 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀁. 𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀇𑀢𑀭𑁂𑀲𑀫𑁆𑀧𑀺 𑀲𑀫𑀸𑀧𑀚𑁆𑀚𑀦𑀁 𑀅𑀗𑁆𑀕𑀲𑀗𑁆𑀓𑀦𑁆𑀢𑀺. 𑀧𑀣𑀯𑀻𑀓𑀲𑀺𑀡𑁂 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀤𑁂𑀯 𑀆𑀧𑁄𑀓𑀲𑀺𑀡𑁂𑀢𑀺 𑀏𑀯𑀁 𑀲𑀩𑁆𑀩𑀓𑀲𑀺𑀡𑁂𑀲𑀼 𑀏𑀓𑀲𑁆𑀲𑁂𑀯 𑀛𑀸𑀦𑀲𑁆𑀲 𑀲𑀫𑀸𑀧𑀚𑁆𑀚𑀦𑀁 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺. 𑀏𑀓𑀢𑁄𑀯𑀟𑁆𑀠𑀦𑀁 𑀉𑀪𑀢𑁄𑀯𑀟𑁆𑀠𑀦𑀦𑁆𑀢𑀺 𑀇𑀤𑀁 𑀔𑀦𑁆𑀥𑀸𑀤𑀺𑀤𑁂𑀲𑀦𑀸𑀬𑀁 𑀮𑀩𑁆𑀪𑀢𑀺. 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀳𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑀁 𑀪𑀸𑀚𑁂𑀦𑁆𑀢𑁄 𑀪𑀕𑀯𑀸 𑀢𑀺𑀓𑁂 𑀕𑀳𑁂𑀢𑁆𑀯𑀸 𑀤𑀼𑀓𑁂𑀲𑀼 𑀧𑀓𑁆𑀔𑀺𑀧𑀺, 𑀤𑀼𑀓𑁂 𑀕𑀳𑁂𑀢𑁆𑀯𑀸 𑀢𑀺𑀓𑁂𑀲𑀼 𑀧𑀓𑁆𑀔𑀺𑀧𑀺, 𑀇𑀤𑀁 𑀏𑀓𑀢𑁄𑀯𑀟𑁆𑀠𑀦𑀁. 𑀢𑀺𑀓𑁂 𑀘 𑀤𑀼𑀓𑁂 𑀘 𑀉𑀪𑀢𑁄𑀯𑀟𑁆𑀠𑀦𑀦𑀻𑀳𑀸𑀭𑁂𑀦 𑀓𑀣𑁂𑀲𑀺, 𑀇𑀤𑀁 𑀉𑀪𑀢𑁄𑀯𑀟𑁆𑀠𑀦𑀁. 𑀏𑀯𑀁 𑀲𑁂𑀲𑀔𑀦𑁆𑀥𑁂𑀲𑀼 𑀥𑀸𑀢𑀸𑀬𑀢𑀦𑀸𑀤𑀻𑀲𑀼 𑀘 𑀬𑀣𑀸𑀭𑀳𑀁 𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑁂 (𑀯𑀺𑀪. 𑁩𑁨-𑁩𑁩; 𑁧𑁫𑁫-𑁧𑁫𑁬, 𑁧𑁮𑁩-𑁧𑁮𑁪) 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑁂 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀆𑀪𑀺𑀥𑀫𑁆𑀫𑀺𑀓𑀥𑀫𑁆𑀫𑀓𑀣𑀺𑀓𑀲𑁆𑀲𑁂𑀯 𑀧𑀸𑀓𑀝’’𑀦𑁆𑀢𑀺. 𑀔𑀦𑁆𑀥𑀸𑀤𑀻𑀲𑀼 𑀲𑀪𑀸𑀯𑀥𑀫𑁆𑀫𑁂𑀲𑀼 𑀢𑀻𑀲𑀼 𑀮𑀓𑁆𑀔𑀡𑁂𑀲𑀼 𑀧𑀜𑁆𑀜𑀢𑁆𑀢𑀺𑀬𑀁 𑀲𑀫𑀬𑀦𑁆𑀢𑀭𑁂𑀲𑀼 𑀘 𑀓𑁄𑀲𑀮𑁆𑀮𑀸𑀪𑀸𑀯𑀢𑁄 𑀅𑀬𑀁 𑀲𑀓𑀯𑀸𑀤𑁄 𑀅𑀬𑀁 𑀧𑀭𑀯𑀸𑀤𑁄𑀢𑀺 𑀦 𑀚𑀸𑀦𑀸𑀢𑀺. 𑀢𑀢𑁄 𑀏𑀯 𑀲𑀓𑀯𑀸𑀤𑀁…𑀧𑁂… 𑀥𑀫𑁆𑀫𑀦𑁆𑀢𑀭𑀁 𑀯𑀺𑀲𑀁𑀯𑀸𑀤𑁂𑀢𑀺. 𑀔𑀦𑁆𑀥𑀸𑀤𑀻𑀲𑀼 𑀧𑀦 𑀓𑀼𑀲𑀮𑀢𑀸𑀬 𑀆𑀪𑀺𑀥𑀫𑁆𑀫𑀺𑀓𑁄 𑀲𑀓𑀯𑀸𑀤𑀁…𑀧𑁂… 𑀦 𑀯𑀺𑀲𑀁𑀯𑀸𑀤𑁂𑀢𑀺.

𑁩𑁪𑁪. 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺 𑀧𑀝𑀺𑀲𑀗𑁆𑀔𑀸𑀦𑀪𑀸𑀯𑀦𑀸𑀩𑀮𑁂𑀳𑀺 𑀧𑀭𑀺𑀕𑁆𑀕𑀡𑁆𑀳𑀦𑀲𑀫𑀢𑁆𑀣𑀢𑁆𑀢𑀸. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀯𑀺𑀪𑀸𑀯𑁂𑀢𑀼𑀁 ‘‘𑀤𑀼𑀧𑁆𑀧𑀜𑁆𑀜𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀸𑀦𑀲𑁆𑀲𑀸𑀢𑀺 𑀲𑀩𑁆𑀩𑀸𑀦𑀺 𑀅𑀲𑁆𑀲. 𑀯𑀺𑀲𑁂𑀯𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀻𑀢𑀺 𑀓𑀺𑀮𑁂𑀲𑀯𑀺𑀲𑀽𑀓𑀸𑀬𑀺𑀓𑀸𑀦𑀺 𑀘𑁂𑀯 𑀤𑀼𑀘𑁆𑀘𑀭𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀘. 𑀪𑀜𑁆𑀚𑀺𑀢𑁆𑀯𑀸𑀢𑀺 𑀫𑀤𑁆𑀤𑀺𑀢𑁆𑀯𑀸. 𑀩𑀳𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀢𑁄 𑀩𑀳𑀺 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂.

𑁩𑁪𑁫. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀏𑀢𑁆𑀣 𑀧𑀭𑀺𑀬𑀸𑀬-𑀲𑀤𑁆𑀤𑁄 ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁩-𑁯) 𑀯𑀺𑀬 𑀓𑀸𑀭𑀡𑀢𑁆𑀣𑁄𑀢𑀺 𑀆𑀳 ‘‘𑀲𑁄𑀪𑀦𑀓𑀸𑀭𑀡𑀁 𑀅𑀢𑁆𑀣𑀻’’𑀢𑀺. 𑀬𑀤𑀺 𑀪𑀕𑀯𑀸 𑁋 ‘‘𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀲𑀦𑁆𑀥𑀸𑀬𑀸𑀳, 𑀏𑀯𑀁 𑀲𑀦𑁆𑀢𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑁂𑀯 𑀲𑀗𑁆𑀖𑀸𑀭𑀸𑀫𑁄 𑀲𑁄𑀪𑁂𑀢𑀩𑁆𑀩𑁄, 𑀦 𑀅𑀜𑁆𑀜𑁂𑀳𑀻𑀢𑀺 𑀆𑀧𑀦𑁆𑀦𑀦𑁆𑀢𑀺 𑀆𑀳 ‘‘𑀅𑀧𑀺𑀘 𑀧𑀘𑁆𑀙𑀺𑀫𑀁 𑀚𑀦𑀢’’𑀦𑁆𑀢𑀺𑀆𑀤𑀺. 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀧𑀝𑀺𑀧𑀢𑁆𑀢𑀺𑀲𑀸𑀭𑀁 𑀏𑀢𑀲𑁆𑀲𑀸𑀢𑀺 𑀧𑀝𑀺𑀧𑀢𑁆𑀢𑀺𑀲𑀸𑀭𑁄, 𑀢𑀁 𑀧𑀝𑀺𑀧𑀢𑁆𑀢𑀺𑀲𑀸𑀭𑀁. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯𑀸𑀢𑀺 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀮𑁂𑀲𑁂𑀦 𑀯𑀺𑀦𑀸 𑀫𑀼𑀔𑁆𑀬𑁂𑀦 𑀦𑀬𑁂𑀦𑁂𑀯. 𑀬𑁄 ‘‘𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀤𑀴𑁆𑀳𑀲𑀫𑀸𑀤𑀸𑀦𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀢𑀁 𑀅𑀥𑀺𑀕𑀦𑁆𑀢𑁆𑀯𑀸𑀯 𑀉𑀝𑁆𑀞𑀳𑀢𑀺. 𑀏𑀯𑀭𑀽𑀧𑁂𑀦 𑀇𑀤𑀁 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑀢𑀺, 𑀲𑀸𑀲𑀦𑁂 𑀲𑀩𑁆𑀩𑀸𑀭𑀫𑁆𑀪𑀸𑀦𑀁 𑀢𑀤𑀢𑁆𑀣𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀆𑀲𑀯𑀓𑁆𑀔𑀬𑀸𑀯𑀳𑀁 𑀧𑀝𑀺𑀧𑀢𑁆𑀢𑀺𑀁 𑀆𑀭𑀪𑀺𑀢𑁆𑀯𑀸 𑀆𑀲𑀯𑀓𑁆𑀔𑀬𑁂𑀦𑁂𑀯 𑀤𑁂𑀲𑀦𑀸𑀬 𑀧𑀭𑀺𑀬𑁄𑀲𑀸𑀧𑀺𑀢𑀢𑁆𑀢𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺.

𑀫𑀳𑀸𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀫𑀳𑀸𑀕𑁄𑀧𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁬. 𑀢𑀢𑁆𑀣𑀸𑀢𑀺 𑀕𑁄𑀧𑀸𑀮𑀓𑀲𑀼𑀢𑁆𑀢𑁂. 𑀢𑀺𑀲𑁆𑀲𑁄 𑀓𑀣𑀸𑀢𑀺 (𑀅. 𑀦𑀺. 𑀝𑀻. 𑁩.𑁧𑁧.𑁧𑁭) 𑀢𑀺𑀲𑁆𑀲𑁄 𑀅𑀝𑁆𑀞𑀓𑀣𑀸, 𑀢𑀺𑀯𑀺𑀥𑀸 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸𑀢𑀺 𑀅𑀢𑁆𑀣𑁄. 𑀏𑀓𑁂𑀓𑀁 𑀧𑀤𑀁 𑀦𑀸𑀴𑀁 𑀫𑀽𑀮𑀁 𑀏𑀢𑀺𑀲𑁆𑀲𑀸𑀢𑀺 𑀏𑀯𑀁𑀲𑀜𑁆𑀜𑀺𑀢𑀸 𑀏𑀓𑀦𑀸𑀴𑀺𑀓𑀸, 𑀏𑀓𑁂𑀓𑀁 𑀯𑀸 𑀧𑀤𑀁 𑀦𑀸𑀴𑀁 𑀅𑀢𑁆𑀣𑀦𑀺𑀕𑁆𑀕𑀫𑀦𑀫𑀕𑁆𑀕𑁄 𑀏𑀢𑀺𑀲𑁆𑀲𑀸𑀢𑀺 𑀏𑀓𑀦𑀸𑀴𑀺𑀓𑀸. 𑀢𑁂𑀦𑀸𑀳 ‘‘𑀏𑀓𑁂𑀓𑀧𑀤𑀲𑁆𑀲 𑀅𑀢𑁆𑀣𑀓𑀣𑀦’’𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀅𑀁𑀲𑀸 𑀪𑀸𑀕𑀸 𑀅𑀢𑁆𑀣𑀲𑀮𑁆𑀮𑀓𑁆𑀔𑀡𑀽𑀧𑀸𑀬𑀸 𑀏𑀢𑀺𑀲𑁆𑀲𑀸𑀢𑀺 𑀘𑀢𑀼𑀭𑀲𑁆𑀲𑀸. 𑀢𑁂𑀦𑀸𑀳 ‘‘𑀘𑀢𑀼𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸 𑀓𑀣𑀦’’𑀦𑁆𑀢𑀺. 𑀦𑀺𑀬𑀫𑀢𑁄 𑀦𑀺𑀲𑀺𑀦𑁆𑀦𑀲𑁆𑀲 𑀆𑀭𑀤𑁆𑀥𑀲𑁆𑀲 𑀯𑀢𑁆𑀢𑁄 𑀲𑀁𑀯𑀢𑁆𑀢𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸, 𑀬𑀣𑀸𑀭𑀤𑁆𑀥𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀬𑁄𑀲𑀸𑀧𑀺𑀓𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀡𑁆𑀟𑀺𑀢𑀁 𑀕𑁄𑀧𑀸𑀮𑀓𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺𑀆𑀤𑀺. 𑀏𑀓𑁂𑀓𑀧𑀤𑀲𑁆𑀲𑀸𑀢𑀺 𑀧𑀺𑀡𑁆𑀟𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀩𑀳𑀼𑀦𑁆𑀦𑀁 𑀧𑀤𑀸𑀦𑀁 𑀏𑀓𑀚𑁆𑀛𑀁 𑀅𑀢𑁆𑀣𑀁 𑀅𑀓𑀣𑁂𑀢𑁆𑀯𑀸 𑀏𑀓𑀫𑁂𑀓𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸. 𑀅𑀬𑀁 𑀲𑀩𑁆𑀩𑀢𑁆𑀣𑁂𑀯 𑀮𑀩𑁆𑀪𑀢𑀺. 𑀘𑀢𑀼𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀓𑀡𑁆𑀳𑀧𑀓𑁆𑀔𑁂 𑀉𑀧𑀫𑀽𑀧𑀫𑁂𑀬𑁆𑀬𑀤𑁆𑀯𑀬𑀁, 𑀢𑀣𑀸 𑀲𑀼𑀓𑁆𑀓𑀧𑀓𑁆𑀔𑁂𑀢𑀺 𑀇𑀤𑀁 𑀘𑀢𑀼𑀓𑁆𑀓𑀁 𑀬𑁄𑀚𑁂𑀢𑁆𑀯𑀸. 𑀅𑀬𑀁 𑀈𑀤𑀺𑀲𑁂𑀲𑀼 𑀏𑀯 𑀲𑀼𑀢𑁆𑀢𑁂𑀲𑀼 𑀮𑀩𑁆𑀪𑀢𑀺. 𑀧𑀭𑀺𑀬𑁄𑀲𑀸𑀦𑀕𑀫𑀦𑀦𑁆𑀢𑀺 𑀓𑁂𑀘𑀺 𑀢𑀸𑀯 𑀆𑀳𑀼 𑁋 ‘‘𑀓𑀡𑁆𑀳𑀧𑀓𑁆𑀔𑁂 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀫𑀸 𑀘 𑀦𑀸𑀫 𑀬𑀸𑀯𑀤𑁂𑀯 𑀉𑀧𑀫𑁂𑀬𑁆𑀬𑀲𑀫𑁆𑀧𑀝𑀺𑀤𑀸𑀦𑀢𑁆𑀣𑀸𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑀁 𑀆𑀳𑀭𑀺𑀢𑁆𑀯𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑀦𑀺𑀤𑁆𑀤𑁂𑀲𑁄 𑀘 𑀯𑁄𑀤𑀸𑀦𑀧𑀓𑁆𑀔𑀯𑀺𑀪𑀸𑀯𑀦𑀢𑁆𑀣𑀸𑀬𑀸𑀢𑀺 𑀲𑀼𑀓𑁆𑀓𑀧𑀓𑁆𑀔𑀫𑁆𑀧𑀺 𑀉𑀧𑀫𑀽𑀧𑀫𑁂𑀬𑁆𑀬𑀯𑀺𑀪𑀸𑀕𑁂𑀦 𑀆𑀳𑀭𑀺𑀢𑁆𑀯𑀸 𑀲𑀼𑀢𑁆𑀢𑀢𑁆𑀣𑀲𑁆𑀲 𑀧𑀭𑀺𑀬𑁄𑀲𑀸𑀧𑀦’’𑀦𑁆𑀢𑀺. 𑀓𑀡𑁆𑀳𑀧𑀓𑁆𑀔𑁂 𑀉𑀧𑀫𑁂𑀬𑁆𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀕𑀫𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀭𑁂 𑀧𑀦 ‘‘𑀓𑀡𑁆𑀳𑀧𑀓𑁆𑀔𑁂 𑀲𑀼𑀓𑁆𑀓𑀧𑀓𑁆𑀔𑁂 𑀘 𑀢𑀁𑀢𑀁𑀉𑀧𑀫𑀽𑀧𑀫𑁂𑀬𑁆𑀬𑀢𑁆𑀣𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸𑀯 𑀓𑀣𑀦𑀁 𑀧𑀭𑀺𑀬𑁄𑀲𑀸𑀦𑀕𑀫𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀬𑀦𑁆𑀢𑀺 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀕𑁄𑀧𑀸𑀮𑀓𑀲𑀼𑀢𑁆𑀢𑁂. 𑀲𑀩𑁆𑀩𑀸𑀘𑀭𑀺𑀬𑀸𑀦𑀁 𑀆𑀘𑀺𑀡𑁆𑀡𑀸𑀢𑀺 𑀲𑀩𑁆𑀩𑁂𑀳𑀺𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀆𑀘𑀭𑀺𑀢𑀸 𑀲𑀁𑀯𑀡𑁆𑀡𑀺𑀢𑀸, 𑀢𑀣𑀸 𑀘𑁂𑀯 𑀧𑀸𑀴𑀺 𑀧𑀯𑀢𑁆𑀢𑀸𑀢𑀺.

𑀅𑀗𑁆𑀕𑀻𑀬𑀦𑁆𑀢𑀺 𑀅𑀯𑀬𑀯𑀪𑀸𑀯𑁂𑀦 𑀜𑀸𑀬𑀦𑁆𑀢𑀻𑀢𑀺 𑀅𑀗𑁆𑀕𑀸𑀦𑀺, 𑀪𑀸𑀕𑀸. 𑀢𑀸𑀦𑀺 𑀧𑀦𑁂𑀢𑁆𑀣 𑀬𑀲𑁆𑀫𑀸 𑀲𑀸𑀯𑀚𑁆𑀚𑀲𑀪𑀸𑀯𑀸𑀦𑀺, 𑀢𑀲𑁆𑀫𑀸 𑀆𑀳 ‘‘𑀅𑀗𑁆𑀕𑁂𑀳𑀻𑀢𑀺 𑀅𑀕𑀼𑀡𑀓𑁄𑀝𑁆𑀞𑀸𑀲𑁂𑀳𑀻’’𑀢𑀺. 𑀕𑁄𑀫𑀡𑁆𑀟𑀮𑀦𑁆𑀢𑀺 𑀕𑁄𑀲𑀫𑀽𑀳𑀁. 𑀧𑀭𑀺𑀳𑀭𑀺𑀢𑀼𑀦𑁆𑀢𑀺 𑀭𑀓𑁆𑀔𑀺𑀢𑀼𑀁. 𑀢𑀁 𑀧𑀦 𑀧𑀭𑀺𑀳𑀭𑀡𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀘𑀭𑀡𑀦𑁆𑀢𑀺 𑀆𑀳 ‘‘𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀢𑀼’’𑀦𑁆𑀢𑀺. 𑀯𑀟𑁆𑀠𑀺𑀦𑁆𑀢𑀺 𑀕𑀼𑀦𑁆𑀦𑀁 𑀩𑀳𑀼𑀪𑀸𑀯𑀁 𑀩𑀳𑀼𑀕𑁄𑀭𑀲𑀢𑀸𑀲𑀗𑁆𑀔𑀸𑀢𑀁 𑀧𑀭𑀺𑀯𑀼𑀤𑁆𑀥𑀺𑀁. ‘‘𑀏𑀢𑁆𑀢𑀓𑀫𑀺𑀤’’𑀦𑁆𑀢𑀺 𑀭𑀽𑀧𑀻𑀬𑀢𑀻𑀢𑀺 𑀭𑀽𑀧𑀁, 𑀧𑀭𑀺𑀫𑀸𑀦𑀧𑀭𑀺𑀘𑁆𑀙𑁂𑀤𑁄𑀧𑀺 𑀲𑀭𑀻𑀭𑀭𑀽𑀧𑀫𑁆𑀧𑀻𑀢𑀺 𑀆𑀳 ‘‘𑀕𑀡𑀦𑀢𑁄 𑀯𑀸 𑀯𑀡𑁆𑀡𑀢𑁄 𑀯𑀸’’𑀢𑀺. 𑀦 𑀧𑀭𑀺𑀬𑁂𑀲𑀢𑀺 𑀯𑀺𑀦𑀝𑁆𑀞𑀪𑀸𑀯𑀲𑁆𑀲𑁂𑀯 𑀅𑀚𑀸𑀦𑀦𑀢𑁄. 𑀦𑀻𑀮𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 𑀲𑁂𑀢𑀲𑀩𑀮𑀸𑀤𑀺𑀯𑀡𑁆𑀡𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀥𑀦𑀼𑀲𑀢𑁆𑀢𑀺𑀲𑀽𑀮𑀸𑀤𑀻𑀢𑀺 𑀏𑀢𑁆𑀣 𑀇𑀲𑁆𑀲𑀸𑀲𑀸𑀘𑀭𑀺𑀬𑀸𑀦𑀁 𑀕𑀸𑀯𑀻𑀲𑀼 𑀓𑀢𑀁 𑀥𑀦𑀼𑀮𑀓𑁆𑀔𑀡𑀁. 𑀓𑀼𑀫𑀸𑀭𑀪𑀢𑁆𑀢𑀺𑀕𑀡𑀸𑀦𑀁 𑀕𑀸𑀯𑀻𑀲𑀼 𑀓𑀢𑀁 𑀲𑀢𑁆𑀢𑀺𑀮𑀓𑁆𑀔𑀡𑀁. 𑀇𑀲𑁆𑀲𑀭𑀪𑀢𑁆𑀢𑀺𑀕𑀡𑀸𑀦𑀁 𑀕𑀸𑀯𑀻𑀲𑀼 𑀓𑀢𑀁 𑀲𑀽𑀮𑀮𑀓𑁆𑀔𑀡𑀦𑁆𑀢𑀺 𑀬𑁄𑀚𑀦𑀸. 𑀆𑀤𑀺-𑀲𑀤𑁆𑀤𑁂𑀦 𑀭𑀸𑀫𑀯𑀸𑀲𑀼𑀤𑁂𑀯𑀕𑀡𑀸𑀤𑀻𑀦𑀁 𑀕𑀸𑀯𑀻𑀲𑀼 𑀓𑀢𑀁 𑀨𑀭𑀲𑀼𑀘𑀓𑁆𑀓𑀸𑀤𑀺𑀮𑀓𑁆𑀔𑀡𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀦𑀻𑀮𑀫𑀓𑁆𑀔𑀺𑀓𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸, 𑀔𑀼𑀤𑁆𑀤𑀫𑀓𑁆𑀔𑀺𑀓𑀸 𑀏𑀯 𑀯𑀸. 𑀲𑀝𑀢𑀺 𑀭𑀼𑀚𑀢𑀺 𑀏𑀢𑀸𑀬𑀸𑀢𑀺 𑀲𑀸𑀝𑀺𑀓𑀸, 𑀲𑀁𑀯𑀤𑁆𑀥𑀸 𑀲𑀸𑀝𑀺𑀓𑀸𑀢𑀺 𑀆𑀲𑀸𑀝𑀺𑀓𑀸. 𑀢𑁂𑀦𑀸𑀳 ‘‘𑀯𑀟𑁆𑀠𑀦𑁆𑀢𑀻’’𑀢𑀺𑀆𑀤𑀺.

𑀯𑀸𑀓𑁂𑀦𑀸𑀢𑀺 𑀯𑀸𑀓𑀧𑀢𑁆𑀢𑁂𑀦. 𑀘𑀻𑀭𑀓𑁂𑀦𑀸𑀢𑀺 𑀧𑀺𑀮𑁄𑀢𑀺𑀓𑁂𑀦. 𑀅𑀦𑁆𑀢𑁄𑀯𑀲𑁆𑀲𑁂𑀢𑀺 𑀯𑀲𑁆𑀲𑀓𑀸𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑁂. 𑀦𑀺𑀕𑁆𑀕𑀸𑀳𑀦𑁆𑀢𑀺 𑀲𑀼𑀲𑀼𑀫𑀸𑀭𑀸𑀤𑀺𑀕𑁆𑀕𑀸𑀳𑀭𑀳𑀺𑀢𑀁. 𑀧𑀻𑀢𑀦𑁆𑀢𑀺 𑀧𑀸𑀦𑀻𑀬𑀲𑁆𑀲 𑀧𑀻𑀢𑀪𑀸𑀯𑀁. 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀧𑀭𑀺𑀲𑁆𑀲𑀬𑁂𑀦 𑀲𑀸𑀲𑀗𑁆𑀓𑁄 𑀲𑀧𑁆𑀧𑀝𑀺𑀪𑀬𑁄.

𑀧𑀜𑁆𑀘 𑀅𑀳𑀸𑀦𑀺 𑀪𑀽𑀢𑀸𑀦𑀺 𑀏𑀢𑀲𑁆𑀲𑀸𑀢𑀺 𑀧𑀜𑁆𑀘𑀸𑀳𑀺𑀢𑁄, 𑀲𑁄 𑀏𑀯 𑀯𑀸𑀭𑁄𑀢𑀺 𑀧𑀜𑁆𑀘𑀸𑀳𑀺𑀓𑀯𑀸𑀭𑁄. 𑀏𑀯𑀁 𑀲𑀢𑁆𑀢𑀸𑀳𑀺𑀓𑀯𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀺𑀡𑁆𑀡𑀝𑁆𑀞𑀸𑀦𑀦𑁆𑀢𑀺 𑀘𑀭𑀺𑀢𑀝𑁆𑀞𑀸𑀦𑀁 𑀕𑁄𑀘𑀭𑀕𑁆𑀕𑀳𑀺𑀢𑀝𑁆𑀞𑀸𑀦𑀁.

𑀧𑀺𑀢𑀼𑀝𑁆𑀞𑀸𑀦𑀦𑁆𑀢𑀺 𑀧𑀺𑀢𑀭𑀸 𑀓𑀸𑀢𑀩𑁆𑀩𑀝𑁆𑀞𑀸𑀦𑀁, 𑀧𑀺𑀢𑀭𑀸 𑀓𑀸𑀢𑀩𑁆𑀩𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀭𑀼𑀘𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀕𑀼𑀦𑁆𑀦𑀁 𑀭𑀼𑀘𑀺𑀅𑀦𑀼𑀭𑀽𑀧𑀁 𑀕𑁄𑀘𑀭𑀪𑀽𑀫𑀺𑀬𑀁 𑀯𑀸 𑀦𑀤𑀺𑀧𑀸𑀭𑀁 𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀕𑁄𑀪𑀢𑁆𑀢𑀦𑁆𑀢𑀺 𑀓𑀧𑁆𑀧𑀸𑀲𑀝𑁆𑀞𑀺𑀓𑀸𑀤𑀺𑀫𑀺𑀲𑁆𑀲𑀁 𑀕𑁄𑀪𑀼𑀜𑁆𑀚𑀺𑀢𑀩𑁆𑀩𑀁 𑀪𑀢𑁆𑀢𑀁, 𑀪𑀢𑁆𑀢𑀕𑁆𑀕𑀳𑀡𑁂𑀦𑁂𑀯 𑀬𑀸𑀕𑀼𑀧𑀺 𑀕𑀳𑀺𑀢𑀸.

𑁩𑁪𑁭. ‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑀁 𑀆𑀓𑀸𑀭𑀤𑁆𑀯𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀕𑀡𑀦𑀢𑁄 𑀯𑀸 𑀲𑀫𑀼𑀝𑁆𑀞𑀸𑀦𑀢𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀧𑀸𑀴𑀺𑀬𑀁 𑀆𑀕𑀢𑀸𑀢𑀺 ‘‘𑀉𑀧𑀘𑀬𑁄 𑀲𑀦𑁆𑀢𑀢𑀻’’𑀢𑀺 𑀚𑀸𑀢𑀺𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀳𑀤𑀬𑀯𑀢𑁆𑀣𑀼𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀤𑀲 𑀆𑀬𑀢𑀦𑀸𑀦𑀺 𑀧𑀜𑁆𑀘𑀤𑀲 𑀲𑀼𑀔𑀼𑀫𑀭𑀽𑀧𑀸𑀦𑀻’’𑀢𑀺 𑀏𑀯𑀁 𑀭𑀽𑀧𑀓𑀡𑁆𑀟𑀧𑀸𑀴𑀺𑀬𑀁 (𑀥. 𑀲. 𑁬𑁫𑁧-𑁬𑁫𑁫) 𑀆𑀕𑀢𑀸. 𑀧𑀜𑁆𑀘𑀯𑀻𑀲𑀢𑀺 𑀭𑀽𑀧𑀓𑁄𑀝𑁆𑀞𑀸𑀲𑀸𑀢𑀺 𑀲𑀮𑀓𑁆𑀔𑀡𑀢𑁄 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀸𑀪𑀸𑀯𑀢𑁄 𑀭𑀽𑀧𑀪𑀸𑀕𑀸. 𑀭𑀽𑀧𑀓𑁄𑀝𑁆𑀞𑀸𑀲𑀸𑀢𑀺 𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀧𑁆𑀧𑀯𑀢𑁆𑀢𑀺𑀢𑁆𑀯𑀸 𑀓𑀮𑀸𑀧𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑀢𑁄 𑀭𑀽𑀧𑀓𑀮𑀸𑀧𑀸. 𑀓𑁄𑀝𑁆𑀞𑀸𑀲𑀸𑀢𑀺 𑀘 𑀅𑀁𑀲𑀸, 𑀅𑀯𑀬𑀯𑀸𑀢𑀺 𑀅𑀢𑁆𑀣𑁄. 𑀓𑁄𑀝𑁆𑀞𑀦𑁆𑀢𑀺 𑀯𑀸 𑀲𑀭𑀻𑀭𑀁, 𑀢𑀲𑁆𑀲 𑀅𑀁𑀲𑀸 𑀓𑁂𑀲𑀸𑀤𑀬𑁄 𑀓𑁄𑀝𑁆𑀞𑀸𑀲𑀸𑀢𑀺 𑀅𑀜𑁆𑀜𑁂𑀧𑀺 𑀅𑀯𑀬𑀯𑀸 𑀓𑁄𑀝𑁆𑀞𑀸𑀲𑀸 𑀯𑀺𑀬 𑀓𑁄𑀝𑁆𑀞𑀸𑀲𑀸. 𑀲𑁂𑀬𑁆𑀬𑀣𑀸𑀧𑀻𑀢𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀢𑀢𑁆𑀣 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀁 𑀭𑀽𑀧𑀁 𑀲𑀮𑀓𑁆𑀔𑀡𑀢𑁄 𑀜𑀸𑀡𑁂𑀦 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸. 𑀅𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸𑀢𑀺 𑀢𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀆𑀭𑀫𑁆𑀫𑀡𑀜𑁆𑀘 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂 𑀯𑁂𑀤𑀦𑀸𑀤𑀺𑀓𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 ‘‘𑀅𑀭𑀽𑀧’’𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸. 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀧𑀼𑀦 𑀢𑀢𑁆𑀣 𑀬𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑀁, 𑀢𑀁 𑀭𑀽𑀧𑀁, 𑀢𑀤𑀜𑁆𑀜𑀁 𑀅𑀭𑀽𑀧𑀁, 𑀉𑀪𑀬𑀯𑀺𑀦𑀺𑀫𑀼𑀢𑁆𑀢𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸𑀢𑀺 𑀏𑀯𑀁 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸. 𑀢𑀤𑀼𑀪𑀬𑀜𑁆𑀘 𑀅𑀯𑀺𑀚𑁆𑀚𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀲𑀧𑁆𑀧𑀘𑁆𑀘𑀬𑀦𑁆𑀢𑀺 𑀧𑀘𑁆𑀘𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀬𑁄 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀓𑁆𑀓𑀫𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑁄 𑀦 𑀯𑀟𑁆𑀠𑀢𑀻𑀢𑀺 𑀬𑁄𑀚𑀦𑀸.

𑀏𑀢𑁆𑀢𑀓𑀁 𑀭𑀽𑀧𑀁 𑀏𑀓𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀘𑀓𑁆𑀔𑀸𑀬𑀢𑀦𑀁, 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀬𑀢𑀦𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀝𑁆𑀞𑀯𑀺𑀥𑀁 𑀓𑀫𑁆𑀫𑀯𑀲𑁂𑀦, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀢𑀺 𑀇𑀤𑀁 𑀤𑁆𑀯𑀬𑀁 𑀘𑀺𑀢𑁆𑀢𑀯𑀲𑁂𑀦𑀸𑀢𑀺 𑀏𑀢𑁆𑀢𑀓𑀁 𑀭𑀽𑀧𑀁 𑀏𑀓𑀲𑀫𑀼𑀝𑁆𑀞𑀸𑀦𑀁. 𑀲𑀤𑁆𑀤𑀸𑀬𑀢𑀦𑀫𑁂𑀓𑀁 𑀉𑀢𑀼𑀘𑀺𑀢𑁆𑀢𑀯𑀲𑁂𑀦 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀁. 𑀭𑀽𑀧𑀲𑁆𑀲 𑀮𑀳𑀼𑀢𑀸 𑀫𑀼𑀤𑀼𑀢𑀸 𑀓𑀫𑁆𑀫𑀜𑁆𑀜𑀢𑀸𑀢𑀺 𑀏𑀢𑁆𑀢𑀓𑀁 𑀭𑀽𑀧𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀯𑀲𑁂𑀦 𑀢𑀺𑀲𑀫𑀼𑀝𑁆𑀞𑀸𑀦𑀁. 𑀭𑀽𑀧𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀆𑀓𑀸𑀲𑀥𑀸𑀢𑀼 𑀆𑀧𑁄𑀥𑀸𑀢𑀼 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺 𑀏𑀢𑁆𑀢𑀓𑀁 𑀭𑀽𑀧𑀁 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑀓𑀫𑁆𑀫𑀯𑀲𑁂𑀦 𑀘𑀢𑀼𑀲𑀫𑀼𑀝𑁆𑀞𑀸𑀦𑀁. 𑀉𑀧𑀘𑀬𑁄 𑀲𑀦𑁆𑀢𑀢𑀺 𑀚𑀭𑀢𑀸 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸𑀢𑀺 𑀏𑀢𑁆𑀢𑀓𑀁 𑀭𑀽𑀧𑀁 𑀦 𑀓𑀼𑀢𑁄𑀘𑀺 𑀲𑀫𑀼𑀝𑁆𑀞𑀸𑀢𑀻𑀢𑀺 𑀦 𑀚𑀸𑀦𑀸𑀢𑀺. 𑀲𑀫𑀼𑀝𑁆𑀞𑀸𑀦𑀢𑁄 𑀭𑀽𑀧𑀁 𑀅𑀚𑀸𑀦𑀦𑁆𑀢𑁄𑀢𑀺𑀆𑀤𑀻𑀲𑀼 𑀯𑀢𑁆𑀢𑀩𑁆𑀩𑀁 ‘‘𑀕𑀡𑀦𑀢𑁄 𑀭𑀽𑀧𑀁 𑀅𑀚𑀸𑀦𑀦𑁆𑀢𑁄’’𑀢𑀺𑀆𑀤𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀓𑀫𑁆𑀫𑀮𑀓𑁆𑀔𑀡𑁄𑀢𑀺 𑀅𑀢𑁆𑀢𑀦𑀸 𑀓𑀢𑀁 𑀤𑀼𑀘𑁆𑀘𑀭𑀺𑀢𑀓𑀫𑁆𑀫𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀓𑀫𑁆𑀫𑀮𑀓𑁆𑀔𑀡𑁄, 𑀩𑀸𑀮𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲 𑀩𑀸𑀮𑀮𑀓𑁆𑀔𑀡𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀳𑁄𑀢𑀺, 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻, 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻. 𑀇𑀫𑀸𑀦𑀺 𑀔𑁄…𑀧𑁂… 𑀮𑀓𑁆𑀔𑀡𑀸𑀦𑀻’’𑀢𑀺 (𑀅. 𑀦𑀺. 𑁩.𑁨; 𑀦𑁂𑀢𑁆𑀢𑀺. 𑁧𑁧𑁬). 𑀅𑀢𑁆𑀢𑀦𑀸 𑀓𑀢𑀁 𑀲𑀼𑀘𑀭𑀺𑀢𑀓𑀫𑁆𑀫𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀓𑀫𑁆𑀫𑀮𑀓𑁆𑀔𑀡𑁄, 𑀧𑀡𑁆𑀟𑀺𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀲𑁆𑀲 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀳𑁄𑀢𑀺, 𑀲𑀼𑀪𑀸𑀲𑀺𑀢𑀪𑀸𑀲𑀻, 𑀲𑀼𑀓𑀢𑀓𑀫𑁆𑀫𑀓𑀸𑀭𑀻. 𑀇𑀫𑀸𑀦𑀺 𑀔𑁄…𑀧𑁂… 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀻’’𑀢𑀺 (𑀫. 𑀦𑀺. 𑁩.𑁨𑁫𑁩; 𑀅. 𑀦𑀺. 𑁩.𑁩; 𑀦𑁂𑀢𑁆𑀢𑀺. 𑁧𑁧𑁬). 𑀢𑁂𑀦𑀸𑀳 ‘‘𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀧𑀡𑁆𑀟𑀺𑀢𑀫𑀸𑀮𑀮𑀓𑁆𑀔𑀡’’𑀦𑁆𑀢𑀺. 𑀩𑀸𑀮𑁂 𑀯𑀚𑁆𑀚𑁂𑀢𑁆𑀯𑀸 𑀧𑀡𑁆𑀟𑀺𑀢𑁂 𑀦 𑀲𑁂𑀯𑀢𑀻𑀢𑀺 𑀬𑀁 𑀩𑀸𑀮𑀧𑀼𑀕𑁆𑀕𑀮𑁂 𑀯𑀚𑁆𑀚𑁂𑀢𑁆𑀯𑀸 𑀧𑀡𑁆𑀟𑀺𑀢𑀲𑁂𑀯𑀦𑀁 𑀅𑀢𑁆𑀣𑀓𑀸𑀫𑁂𑀦 𑀓𑀸𑀢𑀩𑁆𑀩𑀁, 𑀢𑀁 𑀦 𑀓𑀭𑁄𑀢𑀺. 𑀢𑀣𑀸𑀪𑀽𑀢𑀲𑁆𑀲 𑀅𑀬𑀫𑀸𑀤𑀻𑀦𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀩𑀸𑀮𑁂 𑀯𑀚𑁆𑀚𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀪𑀕𑀯𑀢𑀸 ‘‘𑀇𑀤𑀁 𑀯𑁄 𑀓𑀧𑁆𑀧𑀢𑀻’’𑀢𑀺 𑀅𑀦𑀼𑀜𑁆𑀜𑀸𑀢𑀁, 𑀢𑀤𑀦𑀼𑀮𑁄𑀫𑀜𑁆𑀘𑁂, 𑀢𑀁 𑀓𑀧𑁆𑀧𑀺𑀬𑀁. 𑀬𑀁 ‘‘𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀤𑀦𑀼𑀮𑁄𑀫𑀜𑁆𑀘𑁂, 𑀢𑀁 𑀅𑀓𑀧𑁆𑀧𑀺𑀬𑀁. 𑀬𑀁 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀁, 𑀢𑀁 𑀓𑀼𑀲𑀮𑀁, 𑀢𑀧𑁆𑀧𑀝𑀺𑀧𑀓𑁆𑀔𑀁 𑀅𑀓𑀼𑀲𑀮𑀁. 𑀢𑀤𑁂𑀯 𑀲𑀸𑀯𑀚𑁆𑀚𑀁, 𑀓𑀼𑀲𑀮𑀁 𑀅𑀦𑀯𑀚𑁆𑀚𑀁. 𑀆𑀧𑀢𑁆𑀢𑀺𑀢𑁄 𑀆𑀤𑀺𑀢𑁄 𑀤𑁆𑀯𑁂 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀕𑀭𑀼𑀓𑀁, 𑀢𑀤𑀜𑁆𑀜𑀁 𑀮𑀳𑀼𑀓𑀁. 𑀥𑀫𑁆𑀫𑀢𑁄 𑀫𑀳𑀸𑀲𑀸𑀯𑀚𑁆𑀚𑀁 𑀕𑀭𑀼𑀓𑀁, 𑀅𑀧𑁆𑀧𑀲𑀸𑀯𑀚𑁆𑀚𑀁 𑀮𑀳𑀼𑀓𑀁. 𑀲𑀧𑁆𑀧𑀝𑀺𑀓𑀸𑀭𑀁 𑀲𑀢𑁂𑀓𑀺𑀘𑁆𑀘𑀁, 𑀅𑀧𑁆𑀧𑀝𑀺𑀓𑀸𑀭𑀁 𑀅𑀢𑁂𑀓𑀺𑀘𑁆𑀙𑀁. 𑀥𑀫𑁆𑀫𑀢𑀸𑀦𑀼𑀕𑀢𑀁 𑀓𑀸𑀭𑀡𑀁, 𑀇𑀢𑀭𑀁 𑀅𑀓𑀸𑀭𑀡𑀁. 𑀢𑀁 𑀅𑀚𑀸𑀦𑀦𑁆𑀢𑁄𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀕𑀭𑀼𑀓𑀮𑀳𑀼𑀓𑀁 𑀲𑀢𑁂𑀓𑀺𑀘𑁆𑀙𑀸𑀢𑁂𑀓𑀺𑀘𑁆𑀙𑀁 𑀅𑀚𑀸𑀦𑀦𑁆𑀢𑁄 𑀲𑀼𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀼𑀲𑀮𑀸𑀓𑀼𑀲𑀮𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀓𑀸𑀭𑀡𑀸𑀓𑀸𑀭𑀡𑀁 𑀅𑀚𑀸𑀦𑀦𑁆𑀢𑁄 𑀔𑀦𑁆𑀥𑀸𑀤𑀻𑀲𑀼 𑀅𑀓𑀼𑀲𑀮𑀢𑀸𑀬 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀼𑀢𑁄 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑀦𑀸. 𑀢𑁂𑀦𑀸𑀳 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺.

𑀕𑁄𑀯𑀡𑀲𑀤𑀺𑀲𑁂 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁄 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀆𑀲𑀸𑀝𑀺𑀓𑀸 𑀯𑀺𑀬𑀸𑀢𑀺 𑀆𑀲𑀸𑀝𑀺𑀓𑀸𑀢𑀺 𑀆𑀳 ‘‘𑀅𑀓𑀼𑀲𑀮𑀯𑀺𑀢𑀓𑁆𑀓𑀁 𑀆𑀲𑀸𑀝𑀺𑀓𑀁 𑀅𑀳𑀸𑀭𑁂𑀢𑁆𑀯𑀸’’𑀢𑀺.

‘‘𑀕𑀡𑁆𑀟𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀘𑀦𑀢𑁄 (𑀅. 𑀦𑀺. 𑁮.𑁫𑁬) 𑀙𑀳𑀺 𑀯𑀡𑀫𑀼𑀔𑁂𑀳𑀺 𑀯𑀺𑀲𑁆𑀲𑀦𑁆𑀤𑀫𑀸𑀦𑀬𑀽𑀲𑁄 𑀕𑀡𑁆𑀟𑁄 𑀯𑀺𑀬 𑀧𑀺𑀮𑁄𑀢𑀺𑀓𑀔𑀡𑁆𑀟𑁂𑀦 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀯𑀺𑀲𑁆𑀲𑀦𑁆𑀤𑀫𑀸𑀦𑀓𑀺𑀮𑁂𑀲𑀸𑀲𑀼𑀘𑀺 𑀅𑀢𑁆𑀢𑀪𑀸𑀯𑀯𑀡𑁄 𑀲𑀢𑀺𑀲𑀁𑀯𑀭𑁂𑀦 𑀧𑀺𑀤𑀳𑀺𑀢𑀩𑁆𑀩𑁄, 𑀅𑀬𑀁 𑀧𑀦 𑀏𑀯𑀁 𑀦 𑀓𑀭𑁄𑀢𑀻𑀢𑀺 𑀆𑀳 ‘‘𑀬𑀣𑀸 𑀲𑁄 𑀕𑁄𑀧𑀸𑀮𑀓𑁄 𑀯𑀡𑀁 𑀦 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀏𑀯𑀁 𑀲𑀁𑀯𑀭𑀁 𑀦 𑀲𑀫𑁆𑀧𑀸𑀤𑁂𑀢𑀻’’𑀢𑀺.

𑀬𑀣𑀸 𑀥𑀽𑀫𑁄 𑀇𑀦𑁆𑀥𑀦𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀡𑁆𑀳𑁄 𑀲𑀼𑀔𑀼𑀫𑁄 𑀢𑀁 𑀢𑀁 𑀯𑀺𑀯𑀭𑀁 𑀅𑀦𑀼𑀧𑀯𑀺𑀲𑁆𑀲 𑀩𑁆𑀬𑀸𑀧𑁂𑀦𑁆𑀢𑁄 𑀲𑀢𑁆𑀢𑀸𑀦𑀁 𑀟𑀁𑀲𑀫𑀓𑀲𑀸𑀤𑀺𑀧𑀭𑀺𑀲𑁆𑀲𑀬𑀁 𑀯𑀺𑀦𑁄𑀤𑁂𑀢𑀺, 𑀅𑀕𑁆𑀕𑀺𑀚𑀸𑀮𑀲𑀫𑀼𑀝𑁆𑀞𑀸𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺, 𑀏𑀯𑀁 𑀥𑀫𑁆𑀫𑀤𑁂𑀲𑀦𑀸𑀜𑀸𑀡𑀲𑁆𑀲 𑀇𑀦𑁆𑀥𑀦𑀪𑀽𑀢𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀚𑀸𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀡𑁆𑀳𑀸 𑀲𑀼𑀔𑀼𑀫𑀸 𑀢𑀁 𑀢𑀁 𑀔𑀦𑁆𑀥𑀦𑁆𑀢𑀭𑀁 𑀆𑀬𑀢𑀦𑀦𑁆𑀢𑀭𑀜𑁆𑀘 𑀅𑀦𑀼𑀧𑀯𑀺𑀲𑁆𑀲 𑀩𑁆𑀬𑀸𑀧𑁂𑀢𑀺, 𑀲𑀢𑁆𑀢𑀸𑀦𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀤𑀺𑀧𑀭𑀺𑀲𑁆𑀲𑀬𑀁 𑀯𑀺𑀦𑁄𑀤𑁂𑀢𑀺, 𑀜𑀸𑀡𑀕𑁆𑀕𑀺𑀚𑀸𑀮𑀲𑀫𑀼𑀝𑁆𑀞𑀸𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑁄𑀢𑀺 𑀥𑀽𑀫𑁄 𑀯𑀺𑀬𑀸𑀢𑀺 𑀥𑀽𑀫𑁄𑀢𑀺 𑀆𑀳 ‘‘𑀕𑁄𑀧𑀸𑀮𑀓𑁄 𑀥𑀽𑀫𑀁 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀥𑀽𑀫𑀁 𑀦 𑀓𑀭𑁄𑀢𑀻’’𑀢𑀺. 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀢𑀩𑁆𑀩𑀸 𑀢𑀤𑀦𑀼𑀘𑁆𑀙𑀯𑀺𑀓𑀸 𑀥𑀫𑁆𑀫𑀓𑀣𑀸 𑀉𑀧𑀦𑀺𑀲𑀺𑀦𑁆𑀦𑀓𑀣𑀸. 𑀓𑀢𑀲𑁆𑀲 𑀤𑀸𑀦𑀸𑀤𑀺𑀧𑀼𑀜𑁆𑀜𑀲𑁆𑀲 𑀅𑀦𑀼𑀫𑁄𑀤𑀦𑀓𑀣𑀸 𑀅𑀦𑀼𑀫𑁄𑀤𑀦𑀸. 𑀢𑀢𑁄𑀢𑀺 𑀥𑀫𑁆𑀫𑀓𑀣𑀸𑀤𑀻𑀦𑀁 𑀅𑀓𑀭𑀡𑀢𑁄. ‘‘𑀩𑀳𑀼𑀲𑁆𑀲𑀼𑀢𑁄 𑀕𑀼𑀡𑀯𑀸’’𑀢𑀺 𑀦 𑀚𑀸𑀦𑀦𑁆𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀅𑀢𑁆𑀢𑀦𑁄 𑀚𑀸𑀦𑀸𑀧𑀦𑀢𑁆𑀣𑀁 𑀥𑀫𑁆𑀫𑀓𑀣𑀸𑀤𑀺 𑀦 𑀓𑀸𑀢𑀩𑁆𑀩𑀫𑁂𑀯𑀸𑀢𑀺? 𑀲𑀘𑁆𑀘𑀁, 𑀦 𑀓𑀸𑀢𑀩𑁆𑀩𑀫𑁂𑀯, 𑀲𑀼𑀤𑁆𑀥𑀸𑀲𑀬𑁂𑀦 𑀧𑀦 𑀥𑀫𑁆𑀫𑁂 𑀓𑀣𑀺𑀢𑁂 𑀢𑀲𑁆𑀲 𑀕𑀼𑀡𑀚𑀸𑀦𑀦𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀸𑀪𑀸𑀲𑀫𑀸𑀦𑀁 𑀚𑀸𑀦𑀦𑁆𑀢𑀺, 𑀫𑀺𑀲𑁆𑀲𑀁 𑀩𑀸𑀮𑁂𑀳𑀺 𑀧𑀡𑁆𑀟𑀺𑀢𑀁;

𑀪𑀸𑀲𑀬𑁂 𑀚𑁄𑀢𑀬𑁂 𑀥𑀫𑁆𑀫𑀁, 𑀧𑀕𑁆𑀕𑀡𑁆𑀳𑁂 𑀇𑀲𑀺𑀦𑀁 𑀥𑀚’’𑀦𑁆𑀢𑀺. (𑀲𑀁. 𑀦𑀺. 𑁨.𑁨𑁪𑁧);

𑀢𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀢𑀺𑀢𑁆𑀣𑀁, 𑀦𑀤𑀻𑀢𑀴𑀸𑀓𑀸𑀤𑀻𑀦𑀁 𑀦𑀳𑀸𑀦𑀸𑀤𑀺𑀅𑀢𑁆𑀣𑀁 𑀑𑀢𑀭𑀡𑀝𑁆𑀞𑀸𑀦𑀁. 𑀬𑀣𑀸 𑀧𑀦 𑀢𑀁 𑀉𑀤𑀓𑁂𑀦 𑀑𑀢𑀺𑀡𑁆𑀡𑀲𑀢𑁆𑀢𑀸𑀦𑀁 𑀲𑀭𑀻𑀭𑀫𑀮𑀁 𑀧𑀯𑀸𑀳𑁂𑀢𑀺, 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑀺, 𑀯𑀺𑀲𑀼𑀤𑁆𑀥𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀩𑀳𑀼𑀲𑁆𑀲𑀼𑀢𑀸 𑀅𑀢𑁆𑀢𑀦𑁄 𑀲𑀫𑀻𑀧𑀁 𑀑𑀢𑀺𑀡𑁆𑀡𑀲𑀢𑁆𑀢𑀸𑀦𑀁 𑀥𑀫𑁆𑀫𑀽𑀤𑀓𑁂𑀦 𑀘𑀺𑀢𑁆𑀢𑀫𑀮𑀁 𑀧𑀯𑀸𑀳𑁂𑀦𑁆𑀢𑀺, 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀯𑀺𑀲𑀼𑀤𑁆𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀢𑀺𑀢𑁆𑀣𑀁 𑀯𑀺𑀬𑀸𑀢𑀺 𑀢𑀺𑀢𑁆𑀣𑀁. 𑀢𑁂𑀦𑀸𑀳 ‘‘𑀢𑀺𑀢𑁆𑀣𑀪𑀽𑀢𑁂 𑀩𑀳𑀼𑀲𑁆𑀲𑀼𑀢𑀪𑀺𑀓𑁆𑀔𑀽’’𑀢𑀺. 𑀩𑁆𑀬𑀜𑁆𑀚𑀦𑀁 𑀓𑀣𑀁 𑀭𑁄𑀧𑁂𑀢𑀩𑁆𑀩𑀦𑁆𑀢𑀺, 𑀪𑀦𑁆𑀢𑁂, 𑀇𑀤𑀁 𑀩𑁆𑀬𑀜𑁆𑀚𑀦𑀁 𑀅𑀬𑀁 𑀲𑀤𑁆𑀤𑁄 𑀓𑀣𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀭𑁄𑀧𑁂𑀢𑀩𑁆𑀩𑁄, 𑀓𑁂𑀦 𑀧𑀓𑀸𑀭𑁂𑀦 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑁄 𑀚𑀸𑀢𑁄. ‘‘𑀦𑀺𑀭𑀽𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀸 𑀧𑀸𑀞𑁄, 𑀦𑀺𑀭𑀽𑀧𑁂𑀢𑀩𑁆𑀩𑀁 𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺 𑀓𑀣𑀫𑁂𑀢𑁆𑀣 𑀦𑀺𑀭𑀼𑀴𑁆𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀓𑁄 𑀅𑀢𑁆𑀣𑁄𑀢𑀺 𑀲𑀤𑁆𑀤𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀇𑀫𑀲𑁆𑀫𑀺𑀁 𑀞𑀸𑀦𑁂𑀢𑀺 𑀇𑀫𑀲𑁆𑀫𑀺𑀁 𑀧𑀸𑀴𑀺𑀧𑀤𑁂𑀲𑁂. 𑀧𑀸𑀴𑀺 𑀓𑀺𑀁 𑀯𑀤𑁂𑀢𑀻𑀢𑀺 𑀪𑀸𑀯𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀅𑀢𑁆𑀣𑁄 𑀓𑀺𑀁 𑀤𑀻𑀧𑁂𑀢𑀻𑀢𑀺 𑀪𑀸𑀯𑀢𑁆𑀣𑀁 𑀯𑀸 𑀲𑀗𑁆𑀓𑁂𑀢𑀢𑁆𑀣𑀁 𑀯𑀸. 𑀦 𑀧𑀭𑀺𑀧𑀼𑀘𑁆𑀙𑀢𑀻𑀢𑀺 𑀯𑀺𑀫𑀢𑀺𑀘𑁆𑀙𑁂𑀤𑀦𑀧𑀼𑀘𑁆𑀙𑀸𑀯𑀲𑁂𑀦 𑀲𑀩𑁆𑀩𑀲𑁄 𑀧𑀼𑀘𑁆𑀙𑀁 𑀦 𑀓𑀭𑁄𑀢𑀺. 𑀦 𑀧𑀭𑀺𑀧𑀜𑁆𑀳𑀢𑀻𑀢𑀺 𑀧𑀭𑀺 𑀧𑀭𑀺 𑀅𑀢𑁆𑀢𑀦𑁄 𑀜𑀸𑀢𑀼𑀁 𑀇𑀘𑁆𑀙𑀁 𑀦 𑀆𑀘𑀺𑀓𑁆𑀔𑀢𑀺 𑀦 𑀯𑀺𑀪𑀸𑀯𑁂𑀢𑀺. 𑀢𑁂𑀦𑀸𑀳 ‘‘𑀦 𑀚𑀸𑀦𑀸𑀧𑁂𑀢𑀻’’𑀢𑀺. 𑀢𑁂𑀢𑀺 𑀩𑀳𑀼𑀲𑁆𑀲𑀼𑀢𑀪𑀺𑀓𑁆𑀔𑀽. 𑀯𑀺𑀯𑀭𑀡𑀁 𑀦𑀸𑀫 𑀅𑀢𑁆𑀣𑀲𑁆𑀲 𑀯𑀺𑀪𑀚𑀺𑀢𑁆𑀯𑀸 𑀓𑀣𑀦𑀦𑁆𑀢𑀺 𑀆𑀳 ‘‘𑀪𑀸𑀚𑁂𑀢𑁆𑀯𑀸 𑀦 𑀤𑀲𑁆𑀲𑁂𑀦𑁆𑀢𑀻’’𑀢𑀺. 𑀅𑀦𑀼𑀢𑁆𑀢𑀸𑀦𑀻𑀓𑀢𑀦𑁆𑀢𑀺 𑀜𑀸𑀡𑁂𑀦 𑀅𑀧𑀸𑀓𑀝𑀻𑀓𑀢𑀁 𑀕𑀼𑀬𑁆𑀳𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀦 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀻𑀢𑀺 𑀲𑀺𑀦𑁂𑀭𑀼𑀫𑀽𑀮𑀓𑀁 𑀯𑀸𑀮𑀺𑀓𑀁 𑀉𑀤𑁆𑀥𑀭𑀦𑁆𑀢𑁄 𑀯𑀺𑀬 𑀧𑀣𑀯𑀻𑀲𑀦𑁆𑀥𑀸𑀭𑁄𑀤𑀓𑀁 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀘 𑀉𑀢𑁆𑀢𑀸𑀦𑀁 𑀦 𑀓𑀭𑁄𑀦𑁆𑀢𑀺. 𑀏𑀯𑀁 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀩𑀳𑀼𑀲𑁆𑀲𑀼𑀢𑀸 ‘‘𑀢𑀺𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀸 𑀧𑀭𑀺𑀬𑀸𑀬𑀢𑁄, 𑀇𑀤𑀸𑀦𑀺 𑀢𑀫𑁂𑀯 𑀥𑀫𑁆𑀫𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀢𑀺𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀫𑁆𑀫𑁄 𑀳𑀺 𑀢𑀭𑀦𑁆𑀢𑀺 𑀏𑀢𑁂𑀦 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀢𑀴𑀸𑀓𑀦𑁆𑀢𑀺 ‘‘𑀢𑀺𑀢𑁆𑀣’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑀲𑀼𑀫𑁂𑀥𑀪𑀽𑀢𑁄 𑁋

‘‘𑀏𑀯𑀁 𑀓𑀺𑀮𑁂𑀲𑀫𑀮𑀥𑁄𑀯𑀁, 𑀯𑀺𑀚𑁆𑀚𑀦𑁆𑀢𑁂 𑀅𑀫𑀢𑀦𑁆𑀢𑀴𑁂;

𑀦 𑀕𑀯𑁂𑀲𑀢𑀺 𑀢𑀁 𑀢𑀴𑀸𑀓𑀁, 𑀦 𑀤𑁄𑀲𑁄 𑀅𑀫𑀢𑀦𑁆𑀢𑀴𑁂’’𑀢𑀺. (𑀩𑀼. 𑀯𑀁. 𑁨.𑁧𑁪);

𑀥𑀫𑁆𑀫𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀲𑁆𑀲𑁄𑀢𑀭𑀡𑀢𑀺𑀢𑁆𑀣𑀪𑀽𑀢𑀲𑁆𑀲 𑀑𑀢𑀭𑀡𑀧𑀓𑀸𑀭𑀁 𑀅𑀚𑀸𑀦𑀦𑁆𑀢𑁄 ‘‘𑀥𑀫𑁆𑀫𑀢𑀺𑀢𑁆𑀣𑀁 𑀦 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑁄.

𑀧𑀻𑀢𑀸𑀧𑀻𑀢𑀦𑁆𑀢𑀺 𑀕𑁄𑀕𑀡𑁂 𑀧𑀻𑀢𑀁 𑀅𑀧𑀻𑀢𑀜𑁆𑀘 𑀕𑁄𑀭𑀽𑀧𑀁 𑀦 𑀚𑀸𑀦𑀸𑀢𑀺 𑀦 𑀯𑀺𑀦𑁆𑀤𑀢𑀺. 𑀅𑀯𑀺𑀦𑁆𑀤𑀦𑁆𑀢𑁄 𑀳𑀺 𑀦 𑀮𑀪𑀢𑀻𑀢𑀺 𑀯𑀼𑀢𑁆𑀢𑁄. ‘‘𑀆𑀦𑀺𑀲𑀁𑀲𑀁 𑀦 𑀯𑀺𑀦𑁆𑀤𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀯𑀺𑀦𑁆𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁 𑀕𑀦𑁆𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀅𑀬𑀁 𑀮𑁄𑀓𑀼𑀢𑁆𑀢𑀭𑁄𑀢𑀺 𑀧𑀤𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀭𑀺𑀬’’𑀦𑁆𑀢𑀺. 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦 𑀅𑀦𑀦𑁆𑀢𑀭𑀯𑀺𑀥𑀺𑀧𑁆𑀧𑀝𑀺𑀲𑁂𑀥𑁄 𑀯𑀸, 𑀅𑀭𑀺𑀬-𑀲𑀤𑁆𑀤𑁄 𑀯𑀸 𑀦𑀺𑀤𑁆𑀤𑁄𑀲𑀧𑀭𑀺𑀬𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀅𑀝𑁆𑀞𑀗𑁆𑀕𑀺𑀓𑀦𑁆𑀢𑀺 𑀘 𑀯𑀺𑀲𑀼𑀁 𑀏𑀓𑀚𑁆𑀛𑀜𑁆𑀘 𑀅𑀝𑁆𑀞𑀗𑁆𑀕𑀺𑀓𑀁 𑀉𑀧𑀸𑀤𑀸𑀬 𑀕𑀳𑁂𑀢𑀩𑁆𑀩𑀁, 𑀅𑀝𑁆𑀞𑀗𑁆𑀕𑀢𑀸 𑀩𑀸𑀳𑀼𑀮𑁆𑀮𑀢𑁄 𑀘. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀢𑁆𑀢𑀗𑁆𑀕𑀲𑁆𑀲𑀧𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺.

𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂𑀢𑀺𑀆𑀤𑀻𑀲𑀼 𑀅𑀯𑀺𑀲𑁂𑀲𑁂𑀦 𑀲𑀢𑀺𑀧𑀝𑁆𑀞𑀸𑀦𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑀸𑀭𑀫𑁆𑀫𑀡𑀸 𑀲𑀢𑀺𑀧𑀝𑁆𑀞𑀸𑀦𑀸 𑀮𑁄𑀓𑀺𑀬𑀸, 𑀢𑀢𑁆𑀣 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀏𑀯𑀁 𑀇𑀫𑁂 𑀮𑁄𑀓𑀺𑀬𑀸, 𑀇𑀫𑁂 𑀮𑁄𑀓𑀼𑀢𑁆𑀢𑀭𑀸𑀢𑀺 𑀬𑀣𑀸𑀪𑀽𑀢𑀁 𑀦 𑀧𑀚𑀸𑀦𑀸𑀢𑀺.

𑀅𑀦𑀯𑀲𑁂𑀲𑀁 𑀤𑀼𑀳𑀢𑀻𑀢𑀺 𑀧𑀝𑀺𑀕𑁆𑀕𑀳𑀡𑁂 𑀫𑀢𑁆𑀢𑀁 𑀅𑀚𑀸𑀦𑀦𑁆𑀢𑁄 𑀓𑀺𑀲𑁆𑀫𑀺𑀜𑁆𑀘𑀺 𑀤𑀸𑀬𑀓𑁂 𑀲𑀤𑁆𑀥𑀸𑀳𑀸𑀦𑀺𑀬𑀸 𑀓𑀺𑀲𑁆𑀫𑀺𑀜𑁆𑀘𑀺 𑀧𑀘𑁆𑀘𑀬𑀳𑀸𑀦𑀺𑀬𑀸 𑀅𑀦𑀯𑀲𑁂𑀲𑀁 𑀤𑀼𑀳𑀢𑀺. 𑀯𑀸𑀘𑀸𑀬 𑀅𑀪𑀺𑀳𑀸𑀭𑁄 𑀯𑀸𑀘𑀸𑀪𑀺𑀳𑀸𑀭𑁄. 𑀧𑀘𑁆𑀘𑀬𑀸𑀦𑀁 𑀅𑀪𑀺𑀳𑀸𑀭𑁄 𑀧𑀘𑁆𑀘𑀬𑀸𑀪𑀺𑀳𑀸𑀭𑁄.

𑀇𑀫𑁂 𑀅𑀫𑁆𑀳𑁂𑀲𑀼 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀦𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀲𑀫𑁆𑀧𑀝𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀧𑀺𑀢𑀼𑀧𑁂𑀫𑀲𑁆𑀲 𑀅𑀦𑀼𑀧𑀝𑁆𑀞𑀸𑀧𑀦𑀢𑁄. 𑀢𑁂𑀦 𑀘 𑀲𑀺𑀓𑁆𑀔𑀸𑀕𑀸𑀭𑀯𑀢𑀸𑀪𑀸𑀯𑀤𑀻𑀧𑀦𑁂𑀦 𑀲𑀗𑁆𑀕𑀳𑀲𑁆𑀲 𑀅𑀪𑀸𑀚𑀦𑀪𑀸𑀯𑀁, 𑀢𑁂𑀦 𑀣𑁂𑀭𑀸𑀦𑀁 𑀢𑁂𑀲𑀼 𑀅𑀦𑀼𑀕𑁆𑀕𑀳𑀸𑀪𑀸𑀯𑀁. 𑀦 𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀸𑀲𑀦𑁂 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸 𑀅𑀦𑀦𑀼𑀕𑁆𑀕𑀳𑁂𑀢𑀩𑁆𑀩𑁂 𑀲𑀩𑁆𑀭𑀳𑁆𑀫𑀘𑀸𑀭𑀻 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺, 𑀦𑀺𑀭𑀢𑁆𑀣𑀓𑀁 𑀯𑀸 𑀅𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀯𑀓𑁂 𑀪𑀺𑀓𑁆𑀔𑀽’’𑀢𑀺. 𑀥𑀫𑁆𑀫𑀓𑀣𑀸𑀩𑀦𑁆𑀥𑀦𑁆𑀢𑀺 𑀧𑀯𑁂𑀡𑀺𑀆𑀕𑀢𑀁 𑀧𑀓𑀺𑀡𑁆𑀡𑀓𑀥𑀫𑁆𑀫𑀓𑀣𑀸𑀫𑀕𑁆𑀕𑀁. 𑀲𑀘𑁆𑀘𑀲𑀢𑁆𑀢𑀧𑀝𑀺𑀲𑀦𑁆𑀥𑀺𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀼𑀜𑁆𑀜𑀢𑀸𑀤𑀻𑀧𑀦𑀁 𑀕𑀼𑀬𑁆𑀳𑀕𑀦𑁆𑀣𑀁. 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀯𑀲𑁂𑀦𑀸𑀢𑀺 ‘‘𑀦 𑀭𑀽𑀧𑀜𑁆𑀜𑀽’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀲𑁆𑀲 𑀧𑀝𑀺𑀲𑁂𑀥𑀲𑁆𑀲 𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀅𑀕𑁆𑀕𑀳𑀡𑀯𑀲𑁂𑀦. 𑀬𑁄𑀚𑁂𑀢𑁆𑀯𑀸𑀢𑀺 ‘‘𑀭𑀽𑀧𑀜𑁆𑀜𑀽 𑀳𑁄𑀢𑀻𑀢𑀺 𑀕𑀡𑀦𑀸𑀢𑁄 𑀯𑀸 𑀯𑀡𑁆𑀡𑀢𑁄 𑀯𑀸 𑀭𑀽𑀧𑀁 𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸, ‘‘𑀢𑀲𑁆𑀲 𑀕𑁄𑀕𑀡𑁄𑀧𑀺 𑀦 𑀧𑀭𑀺𑀳𑀸𑀬𑀢𑀺, 𑀧𑀜𑁆𑀘𑀕𑁄𑀭𑀲𑀧𑀭𑀺𑀪𑁄𑀕𑀢𑁄𑀧𑀺 𑀦 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀘 𑀅𑀢𑁆𑀣𑀁 𑀬𑁄𑀚𑁂𑀢𑁆𑀯𑀸. 𑀯𑁂𑀤𑀺𑀢𑀩𑁆𑀩𑁄𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀬𑀣𑀸𑀭𑀳𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀳𑀸𑀕𑁄𑀧𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀘𑀽𑀴𑀕𑁄𑀧𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁦. 𑀘𑁂𑀮𑀼𑀓𑁆𑀓𑀸𑀳𑀻𑀢𑀺 𑀘𑁂𑀮𑀫𑀬𑀸𑀳𑀺 𑀉𑀓𑁆𑀓𑀸𑀳𑀺. 𑀉𑀓𑁆𑀓𑀪𑀽𑀢𑀸𑀦𑀺 𑀘𑁂𑀮𑀸𑀦𑀺 𑀏𑀢𑁆𑀣𑀸𑀢𑀺 𑀉𑀓𑁆𑀓𑀘𑁂𑀮𑀸, 𑀦𑀕𑀭𑀁. 𑀲𑀩𑁆𑀩𑀸 𑀕𑀗𑁆𑀕𑀸 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀻𑀢𑀺 𑀧𑀓𑀢𑀺𑀘𑀓𑁆𑀔𑀼𑀲𑁆𑀲 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀧𑀦 𑀲𑀫𑀦𑁆𑀢𑀘𑀓𑁆𑀔𑀼𑀲𑁆𑀲 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀲𑀺𑀦𑁆𑀦𑀲𑁆𑀲𑀧𑀺 𑀪𑀕𑀯𑀢𑁄 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑁂𑀯. 𑀲𑁄𑀢𑁆𑀣𑀻𑀢𑀺 𑀅𑀦𑀼𑀧𑀤𑁆𑀤𑀯𑁄. 𑀯𑀟𑁆𑀠𑀻𑀢𑀺 𑀅𑀧𑀭𑀺𑀳𑀸𑀦𑀺. 𑀆𑀭𑁄𑀕𑁆𑀬𑀦𑁆𑀢𑀺 𑀅𑀭𑁄𑀕𑀢𑀸 𑀆𑀩𑀸𑀥𑀸𑀪𑀸𑀯𑁄.

𑀫𑀕𑀥𑁄 𑀚𑀦𑀧𑀤𑁄 𑀦𑀺𑀯𑀸𑀲𑁄 𑀏𑀢𑀲𑁆𑀲𑀸𑀢𑀺 𑀫𑀸𑀕𑀥𑁄, 𑀫𑀸𑀕𑀥𑁄𑀯 𑀫𑀸𑀕𑀥𑀺𑀓𑁄. 𑀧𑀜𑁆𑀜𑀸𑀬 𑀦𑀸𑀫 𑀤𑀼𑀝𑁆𑀞𑀼𑀪𑀸𑀯𑁄 𑀦𑀢𑁆𑀣𑀺 𑀏𑀓𑀦𑁆𑀢𑀸𑀦𑀯𑀚𑁆𑀚𑀢𑀸𑀬, 𑀢𑀲𑁆𑀫𑀸 𑀤𑀼-𑀲𑀤𑁆𑀤𑁄 𑀅𑀪𑀸𑀯𑀯𑀸𑀘𑀻 ‘‘𑀤𑀼𑀲𑁆𑀲𑀻𑀮𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀚𑀸𑀢𑀺-𑀲𑀤𑁆𑀤𑁄 𑀘 𑀲𑀪𑀸𑀯𑀢𑁆𑀣𑁄𑀢𑀺 𑀆𑀳 ‘‘𑀦𑀺𑀧𑁆𑀧𑀜𑁆𑀜𑀲𑀪𑀸𑀯𑁄’’𑀢𑀺. -𑀲𑀤𑁆𑀤𑁄 𑀆𑀭𑀫𑁆𑀪𑀢𑁆𑀣𑁄𑀢𑀺 𑀆𑀳 ‘‘𑀧𑀢𑀸𑀭𑁂𑀲𑀻𑀢𑀺 𑀢𑀸𑀭𑁂𑀢𑀼𑀁 𑀆𑀭𑀪𑀻’’𑀢𑀺 𑀧𑀭𑀢𑀻𑀭𑀁 𑀕𑀸𑀯𑀻𑀦𑀁 𑀅𑀧𑁆𑀧𑀢𑁆𑀢𑀢𑁆𑀢𑀸. 𑀲𑀼𑀯𑀺𑀤𑁂𑀳𑀸𑀦𑀦𑁆𑀢𑀺 𑀲𑀼𑀦𑁆𑀤𑀭𑀯𑀺𑀤𑁂𑀳𑀸𑀦𑀁. 𑀯𑀺𑀤𑁂𑀳𑀭𑀝𑁆𑀞𑀁 𑀓𑀺𑀭 𑀪𑀽𑀫𑀺𑀪𑀸𑀕𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀯𑀦𑀭𑀸𑀫𑀡𑁂𑀬𑁆𑀬𑀓𑀸𑀤𑀺𑀦𑀸 𑀘 𑀲𑀼𑀦𑁆𑀤𑀭𑀁. 𑀆𑀫𑀡𑁆𑀟𑀮𑀺𑀓𑀁 𑀓𑀭𑀺𑀢𑁆𑀯𑀸𑀢𑀺 𑀆𑀯𑀢𑁆𑀢𑁂 𑀧𑀢𑀺𑀢𑀸 𑀢𑁂𑀫𑀡𑁆𑀟𑀮𑀸𑀓𑀸𑀭𑁂𑀦 𑀧𑀭𑀺𑀩𑁆𑀪𑀫𑀺𑀢𑁆𑀯𑀸. 𑀓𑀢𑀺𑀧𑀬𑀸𑀧𑀺 𑀕𑀸𑀯𑀺𑀬𑁄 𑀅𑀲𑁂𑀲𑁂𑀢𑁆𑀯𑀸 𑀦𑀤𑀻𑀲𑁄𑀢𑁂𑀦 𑀯𑀽𑀴𑁆𑀳𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀯𑀟𑁆𑀠𑀺𑀁 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀁𑀲𑀽’’𑀢𑀺. 𑀓𑀢𑀺𑀧𑀬𑀸𑀲𑀼𑀧𑀺 𑀳𑀺 𑀅𑀯𑀲𑀺𑀝𑁆𑀞𑀸𑀲𑀼 𑀕𑀸𑀯𑀻𑀲𑀼 𑀅𑀦𑀼𑀓𑁆𑀓𑀫𑁂𑀦𑀧𑀺 𑀲𑀺𑀬𑀸 𑀕𑁄𑀕𑀡𑀲𑁆𑀲 𑀯𑀟𑁆𑀠𑀻𑀢𑀺. 𑀯𑀺𑀲𑁆𑀲𑀫𑀝𑁆𑀞𑀸𑀦𑀦𑁆𑀢𑀺 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀝𑁆𑀞𑀸𑀦𑀁. 𑀢𑀺𑀢𑁆𑀣𑀸 𑀪𑀝𑁆𑀞𑀸𑀢𑀺 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀢𑀺𑀢𑁆𑀣𑀁 𑀅𑀧𑁆𑀧𑀢𑁆𑀢𑀸. 𑀅𑀭𑁄𑀕𑁄 𑀦𑀸𑀫 𑀦𑀸𑀳𑁄𑀲𑀻𑀢𑀺 𑀮𑁄𑀫𑀫𑀢𑁆𑀢𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀸 𑀕𑀸𑀯𑀺𑀬𑁄 𑀦𑀤𑀻𑀲𑁄𑀢𑁂 𑀯𑀺𑀦𑀝𑁆𑀞𑀸𑀢𑀺 𑀅𑀢𑁆𑀣𑁄.

𑀬𑁂𑀲𑀼 𑀔𑀦𑁆𑀥𑀸𑀬𑀢𑀦𑀥𑀸𑀢𑀽𑀲𑀼 𑀇𑀥 𑀮𑁄𑀓𑀲𑀫𑀜𑁆𑀜𑀸, 𑀢𑁂 𑀅𑀚𑀸𑀦𑀦𑁆𑀢𑀸 ‘‘𑀅𑀓𑀼𑀲𑀮𑀸 𑀇𑀫𑀲𑁆𑀲 𑀮𑁄𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀇𑀥𑀮𑁄𑀓𑁂 𑀔𑀦𑁆𑀥𑀥𑀸𑀢𑀸𑀬𑀢𑀦𑁂𑀲𑀼 𑀅𑀓𑀼𑀲𑀮𑀸 𑀅𑀙𑁂𑀓𑀸’’𑀢𑀺. 𑀅𑀬𑀫𑁂𑀯 𑀦𑀬𑁄 ‘‘𑀅𑀓𑀼𑀲𑀮𑀸 𑀧𑀭𑀲𑁆𑀲 𑀮𑁄𑀓𑀲𑁆𑀲𑀸’’𑀢𑀺 𑀏𑀢𑁆𑀣𑀸𑀧𑀻𑀢𑀺 𑀆𑀳 ‘‘𑀧𑀭𑀮𑁄𑀓𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀫𑀸𑀭𑁄 𑀏𑀢𑁆𑀣 𑀥𑀻𑀬𑀢𑀻𑀢𑀺 𑀫𑀸𑀭𑀥𑁂𑀬𑁆𑀬𑀁. 𑀫𑀸𑀭𑁄𑀢𑀺 𑀘𑁂𑀢𑁆𑀣 𑀓𑀺𑀮𑁂𑀲𑀫𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑀸 𑀳𑀺 𑀢𑀲𑁆𑀲 𑀧𑀯𑀢𑁆𑀢𑀦𑀪𑀸𑀯𑁂𑀦 𑀕𑀳𑀺𑀢𑀸, 𑀫𑀘𑁆𑀘𑀼𑀫𑀸𑀭𑁄 𑀯𑀺𑀲𑀼𑀁 𑀕𑀳𑀺𑀢𑁄 𑀏𑀯, 𑀓𑀺𑀮𑁂𑀲𑀫𑀸𑀭𑀯𑀲𑁂𑀦𑁂𑀯 𑀘 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲 𑀓𑀸𑀫𑀪𑀯𑁂 𑀆𑀥𑀺𑀧𑀘𑁆𑀘𑀦𑁆𑀢𑀺. 𑀢𑁂𑀲𑀦𑁆𑀢𑀺 𑀬𑁂 𑀇𑀥𑀮𑁄𑀓𑀸𑀤𑀻𑀲𑀼 𑀅𑀙𑁂𑀓𑀸, 𑀢𑁂𑀲𑀁. 𑀢𑁂 𑀧𑀦 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀫𑀺𑀦𑀸 𑀙 𑀲𑀢𑁆𑀣𑀸𑀭𑁄 𑀤𑀲𑁆𑀲𑀺𑀢𑀸’’𑀢𑀺.

𑁩𑁫𑁧. 𑀩𑀮𑀯𑀕𑀸𑀯𑁄𑀢𑀺 𑀩𑀮𑀯𑀦𑁆𑀢𑁂 𑀕𑁄𑀭𑀽𑀧𑁂. 𑀢𑁂 𑀧𑀦 𑀤𑀫𑁆𑀫𑀢𑀁 𑀉𑀧𑀕𑀢𑀕𑁄𑀡𑀸 𑀘𑁂𑀯 𑀥𑁂𑀦𑀼𑀬𑁄 𑀘𑀸𑀢𑀺 𑀆𑀳 ‘‘𑀤𑀦𑁆𑀢𑀕𑁄𑀡𑁂 𑀘𑁂𑀯 𑀥𑁂𑀦𑀼𑀬𑁄 𑀘𑀸’’𑀢𑀺. 𑀅𑀯𑀺𑀚𑀸𑀢𑀕𑀸𑀯𑁄𑀢𑀺 𑀦 𑀯𑀺𑀚𑀸𑀢𑀕𑀸𑀯𑀺𑀬𑁄. 𑀯𑀘𑁆𑀙𑀓𑁂𑀢𑀺 𑀔𑀼𑀤𑁆𑀤𑀓𑀯𑀘𑁆𑀙𑁂. 𑀅𑀧𑁆𑀧𑀢𑁆𑀣𑁄 𑀳𑀺 𑀅𑀬𑀁 𑀓-𑀲𑀤𑁆𑀤𑁄. 𑀢𑁂𑀦𑀸𑀳 ‘‘𑀢𑀭𑀼𑀡𑀯𑀘𑁆𑀙𑀓𑁂’’𑀢𑀺. 𑀓𑀺𑀲𑀸𑀩𑀮𑀓𑁂𑀢𑀺 𑀤𑀼𑀩𑁆𑀩𑀮𑁂.

𑁩𑁫𑁨. 𑀫𑀸𑀭𑀲𑁆𑀲 𑀢𑀡𑁆𑀳𑀸𑀲𑁄𑀢𑀁 𑀙𑁂𑀢𑁆𑀯𑀸𑀢𑀺 𑀔𑀦𑁆𑀥𑀫𑀸𑀭𑀲𑀫𑁆𑀩𑀦𑁆𑀥𑀻𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀲𑁄𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀔𑁂𑀧𑁂𑀢𑁆𑀯𑀸 𑀞𑀺𑀢𑀸𑀢𑀺 𑀅𑀦𑀸𑀕𑀸𑀫𑀺𑀦𑁄 𑀲𑀦𑁆𑀥𑀸𑀬𑀸𑀳. 𑀲𑀩𑁆𑀩𑀯𑀸𑀭𑁂𑀲𑀽𑀢𑀺 𑀲𑀓𑀤𑀸𑀕𑀸𑀫𑀺𑀲𑁄𑀢𑀸𑀧𑀦𑁆𑀦𑀅𑀝𑁆𑀞𑀫𑀓𑀯𑀸𑀭𑁂𑀲𑀼. 𑀢𑀢𑁆𑀣 𑀧𑀦 𑀬𑀣𑀸𑀓𑁆𑀓𑀫𑀁 𑀘𑀢𑀼𑀫𑀕𑁆𑀕𑀯𑀚𑁆𑀛𑀸𑀦𑀁 𑀓𑀺𑀮𑁂𑀲𑀸𑀦𑀁 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀔𑁂𑀧𑁂𑀢𑁆𑀯𑀸 𑀞𑀺𑀢𑀸, 𑀏𑀓𑀓𑁄𑀝𑁆𑀞𑀸𑀲𑀁 𑀔𑁂𑀧𑁂𑀢𑁆𑀯𑀸 𑀞𑀺𑀢𑀸, 𑀧𑀞𑀫𑀁 𑀓𑁄𑀝𑁆𑀞𑀸𑀲𑀁 𑀔𑁂𑀧𑁂𑀦𑁆𑀢𑁄𑀢𑀺 𑀯𑀢𑁆𑀢𑀩𑁆𑀩𑀁. 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀯𑀸 𑀅𑀦𑀼𑀲𑁆𑀲𑀭𑀡𑀲𑀻𑀮𑀸𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑁄. 𑀥𑀫𑁆𑀫𑁄𑀢𑀺 𑀘𑁂𑀢𑁆𑀣 𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸. 𑀲𑀤𑁆𑀥𑀁 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀲𑀤𑁆𑀥𑀸𑀬 𑀯𑀸 𑀅𑀦𑀼𑀲𑁆𑀲𑀭𑀡𑀲𑀻𑀮𑀸𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄.

𑀚𑀸𑀦𑀢𑀸𑀢𑀺 𑀏𑀢𑁆𑀣 𑀚𑀸𑀦𑀦𑀓𑀺𑀭𑀺𑀬𑀸𑀯𑀺𑀲𑀬𑀲𑁆𑀲 𑀅𑀯𑀺𑀲𑁂𑀲𑀺𑀢𑀢𑁆𑀢𑀸 𑀅𑀥𑀺𑀓𑀸𑀭𑀯𑀲𑁂𑀦 𑀅𑀦𑀯𑀲𑁂𑀲𑀜𑁂𑀬𑁆𑀬𑀯𑀺𑀲𑁂𑀲𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀲𑀩𑁆𑀩𑀥𑀫𑁆𑀫𑁂 𑀚𑀸𑀦𑀦𑁆𑀢𑁂𑀦𑀸’’𑀢𑀺. 𑀅𑀦𑁆𑀢𑁄𑀲𑀸𑀭𑀯𑀺𑀭𑀳𑀢𑁄 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀘 𑀦𑀴𑁄 𑀯𑀺𑀬𑀸𑀢𑀺 𑀦𑀴𑁄, 𑀫𑀸𑀦𑁄𑀢𑀺 𑀆𑀳 ‘‘𑀯𑀺𑀕𑀢𑀫𑀸𑀦𑀦𑀴𑀁 𑀓𑀢’’𑀦𑁆𑀢𑀺. 𑀔𑁂𑀫𑀁 𑀧𑀢𑁆𑀣𑁂𑀣𑀸𑀢𑀺 𑀏𑀢𑁆𑀣 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀅𑀦𑀼𑀧𑀤𑁆𑀤𑀯𑀢𑁆𑀢𑀸 ‘‘𑀔𑁂𑀫’’𑀦𑁆𑀢𑀺 𑀅𑀭𑀳𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀧𑀢𑁆𑀣𑀦𑀸 𑀘 𑀙𑀦𑁆𑀤𑀧𑀢𑁆𑀣𑀦𑀸, 𑀦 𑀢𑀡𑁆𑀳𑀸𑀧𑀢𑁆𑀣𑀦𑀸𑀢𑀺 𑀆𑀳 ‘‘𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀣𑁂𑀣𑀸’’𑀢𑀺. 𑀧𑀢𑁆𑀢𑀸𑀬𑁂𑀯 𑀦𑀸𑀫 𑀢𑀲𑁆𑀲 𑀧𑀢𑁆𑀢𑀺𑀬𑀸 𑀦 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄. 𑀲𑁄𑀢𑁆𑀣𑀺𑀦𑀸 𑀧𑀸𑀭𑀕𑀫𑀦𑀁 𑀉𑀤𑁆𑀤𑀺𑀲𑁆𑀲 𑀤𑁂𑀲𑀦𑀁 𑀆𑀭𑀪𑀺𑀢𑁆𑀯𑀸 𑀔𑁂𑀫𑀧𑁆𑀧𑀢𑁆𑀢𑀺𑀬𑀸 𑀤𑁂𑀲𑀦𑀸𑀬 𑀧𑀭𑀺𑀬𑁄𑀲𑀸𑀧𑀺𑀢𑀢𑁆𑀢𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀘𑀽𑀴𑀕𑁄𑀧𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀘𑀽𑀴𑀲𑀘𑁆𑀘𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁩. 𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦𑀸𑀢𑀺 𑀳𑀁𑀲𑀯𑀝𑁆𑀝𑀓𑀧𑀝𑀺𑀘𑁆𑀙𑀦𑁆𑀦𑁂𑀦, 𑀳𑀁𑀲𑀫𑀡𑁆𑀟𑀮𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄.

𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀫𑀕𑁆𑀕𑁄. 𑀓𑀺𑀁 𑀯𑀤𑀦𑁆𑀢𑀺? 𑀉𑀢𑁆𑀢𑀭𑀁. 𑀯𑀸𑀤𑀸𑀦𑀁 𑀲𑀢𑀸𑀦𑀺 𑀯𑀸𑀤𑀲𑀢𑀸𑀦𑀺. ‘‘𑀦𑀺𑀕𑀡𑁆𑀞𑁄 𑀧𑀜𑁆𑀘𑀯𑀸𑀤𑀲𑀢𑀸𑀦𑀺, 𑀦𑀺𑀕𑀡𑁆𑀞𑀻 𑀧𑀜𑁆𑀘𑀯𑀸𑀤𑀲𑀢𑀸𑀦𑀻’’𑀢𑀺 𑀏𑀯𑀁 𑀦𑀺𑀕𑀡𑁆𑀞𑁄 𑀘 𑀦𑀺𑀕𑀡𑁆𑀞𑀻 𑀘 𑀧𑀜𑁆𑀘 𑀧𑀜𑁆𑀘 𑀯𑀸𑀤𑀲𑀢𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸. 𑀓𑀺𑀭𑀺𑀬𑀢𑁄 𑀢𑁂 𑀧𑀼𑀘𑁆𑀙𑀺𑀁𑀲𑀼, 𑀮𑀺𑀗𑁆𑀕𑀢𑁄 𑀧𑀦 𑀦𑀺𑀕𑀡𑁆𑀞𑀪𑀸𑀯𑁄 𑀜𑀸𑀢𑁄. 𑀢𑁂𑀦𑀸𑀳 ‘‘𑀅𑀳𑀁 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺.

𑀚𑀕𑁆𑀕𑀦𑁆𑀢𑁄 𑀲𑀫𑁆𑀫𑀚𑁆𑀚𑀦𑀸𑀤𑀺𑀯𑀲𑁂𑀦. 𑀤𑀺𑀯𑀸𑀢𑀭𑀦𑁆𑀢𑀺 𑀅𑀢𑀺𑀤𑀺𑀯𑀁. ‘‘𑀓𑀲𑁆𑀲 𑀧𑀼𑀘𑁆𑀙𑀸, 𑀓𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁 𑀳𑁄𑀢𑀽’’𑀢𑀺 𑀧𑀭𑀺𑀩𑁆𑀩𑀸𑀚𑀺𑀓𑀸𑀳𑀺 𑀯𑀼𑀢𑁆𑀢𑁂 𑀣𑁂𑀭𑁄 𑀆𑀳 ‘‘𑀧𑀼𑀘𑁆𑀙𑀸 𑀦𑀸𑀫 𑀅𑀫𑁆𑀳𑀸𑀓𑀁 𑀧𑀢𑁆𑀢𑀸’’𑀢𑀺. 𑀧𑀼𑀘𑁆𑀙𑀸 𑀯𑀸𑀤𑀸𑀦𑀁 𑀧𑀼𑀩𑁆𑀩𑀧𑀓𑁆𑀔𑁄, 𑀬𑀲𑁆𑀫𑀸 𑀢𑀼𑀫𑁆𑀳𑁂 𑀯𑀸𑀤𑀧𑀲𑀼𑀢𑀸 𑀯𑀸𑀤𑀸𑀪𑀺𑀭𑀢𑀸 𑀥𑀚𑀁 𑀧𑀕𑁆𑀕𑀬𑁆𑀳 𑀯𑀺𑀘𑀭𑀣, 𑀢𑀲𑁆𑀫𑀸 𑀯𑀸𑀤𑀸𑀦𑀁 𑀧𑀼𑀩𑁆𑀩𑀧𑀓𑁆𑀔𑁄 𑀅𑀫𑁆𑀳𑀸𑀓𑀁 𑀧𑀢𑁆𑀢𑁄, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀼𑀫𑁆𑀳𑀸𑀓𑀁 𑀫𑀸𑀢𑀼𑀕𑀸𑀫𑀪𑀸𑀯𑀢𑁄 𑀧𑀼𑀩𑁆𑀩𑀧𑀓𑁆𑀔𑀁 𑀤𑁂𑀫𑀸𑀢𑀺 𑀆𑀳 ‘‘𑀢𑀼𑀫𑁆𑀳𑁂 𑀧𑀦 𑀫𑀸𑀢𑀼𑀕𑀸𑀫𑀸 𑀦𑀸𑀫 𑀧𑀞𑀫𑀁 𑀧𑀼𑀘𑁆𑀙𑀣𑀸’’𑀢𑀺. 𑀢𑀸 𑀧𑀭𑀺𑀩𑁆𑀩𑀸𑀚𑀺𑀓𑀸 𑀏𑀓𑁂𑀓𑀸 𑀅𑀟𑁆𑀠𑀢𑁂𑀬𑁆𑀬𑀲𑀢𑀯𑀸𑀤𑀫𑀕𑁆𑀕𑀁 𑀧𑀼𑀘𑁆𑀙𑀦𑁆𑀢𑀺𑀬𑁄 𑀯𑀸𑀤𑀲𑀳𑀲𑁆𑀲𑀁 𑀧𑀼𑀘𑁆𑀙𑀺𑀁𑀲𑀼. 𑀬𑀣𑀸 𑀦𑀺𑀲𑀺𑀢𑀲𑁆𑀲 𑀔𑀕𑁆𑀕𑀲𑁆𑀲 𑀓𑀼𑀫𑀼𑀤𑀦𑀸𑀴𑀘𑁆𑀙𑁂𑀤𑀦𑁂 𑀓𑀺𑀫𑀢𑁆𑀣𑀺 𑀪𑀸𑀭𑀺𑀬𑀁, 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀲𑁆𑀲 𑀲𑀸𑀯𑀓𑁂𑀲𑀼 𑀧𑀜𑁆𑀜𑀯𑀦𑁆𑀢𑀸𑀦𑀁 𑀅𑀕𑁆𑀕𑀪𑀸𑀯𑁂 𑀞𑀺𑀢𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀧𑀼𑀣𑀼𑀚𑁆𑀚𑀦𑀧𑀭𑀺𑀓𑀧𑁆𑀧𑀺𑀢𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 𑀓𑀺𑀫𑀢𑁆𑀣𑀺 𑀪𑀸𑀭𑀺𑀬𑀁. 𑀢𑁂𑀦𑀸𑀳 ‘‘𑀣𑁂𑀭𑁄 𑀔𑀕𑁆𑀕𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀡𑁆𑀞𑀺𑀁 𑀓𑀢𑁆𑀯𑀸𑀢𑀺 𑀬𑀣𑀸 𑀢𑀸 𑀧𑀼𑀦 𑀢𑀢𑁆𑀣 𑀚𑀝𑀁 𑀕𑀡𑁆𑀞𑀺𑀁 𑀓𑀸𑀢𑀼𑀁 𑀦 𑀯𑀺𑀲𑀳𑀦𑁆𑀢𑀺, 𑀢𑀣𑀸 𑀯𑀺𑀚𑀝𑁂𑀢𑁆𑀯𑀸 𑀓𑀣𑁂𑀲𑀺. 𑀅𑀬𑀁 𑀣𑁂𑀭𑁄 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀦𑁆𑀥𑀓𑀸𑀭𑁂 𑀲𑀳𑀲𑁆𑀲𑀯𑀝𑁆𑀝𑀺𑀓𑀁 𑀤𑀻𑀧𑁂𑀦𑁆𑀢𑁄 𑀯𑀺𑀬 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑁂 𑀅𑀦𑁆𑀥𑀓𑀸𑀭𑀪𑀽𑀢𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑀫𑀢𑁆𑀢𑁂𑀬𑁂𑀯 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺 𑀣𑁂𑀭𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀤𑀺𑀲𑁆𑀯𑀸 𑀲𑀬𑀜𑁆𑀘 𑀅𑀦𑁆𑀢𑀺𑀫𑀪𑀯𑀺𑀓𑀢𑀸𑀬 𑀓𑁄𑀳𑀜𑁆𑀜𑁂 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺𑀬𑁄 ‘‘𑀏𑀢𑁆𑀢𑀓𑀫𑁂𑀯, 𑀪𑀦𑁆𑀢𑁂, 𑀫𑀬𑀁 𑀚𑀸𑀦𑀸𑀫𑀸’’𑀢𑀺 𑀆𑀳𑀁𑀲𑀼. 𑀣𑁂𑀭𑀲𑁆𑀲 𑀯𑀺𑀲𑀬𑀦𑁆𑀢𑀺 𑀣𑁂𑀭𑀲𑁆𑀲 𑀧𑀜𑁆𑀜𑀸𑀯𑀺𑀲𑀬𑀁.

𑀦𑁂𑀯 𑀅𑀦𑁆𑀢𑀁 𑀦 𑀓𑁄𑀝𑀺𑀁 𑀅𑀤𑁆𑀤𑀲𑀁𑀲𑀽𑀢𑀺 𑀏𑀓𑀦𑁆𑀢𑀺 𑀯𑀢𑁆𑀢𑀩𑁆𑀩𑀲𑁆𑀲 𑀩𑀳𑀼𑀪𑀸𑀯𑀢𑁄 𑀢𑀲𑁆𑀲𑀸 𑀧𑀼𑀘𑁆𑀙𑀸𑀬 𑀅𑀢𑁆𑀣𑁄 𑀏𑀯𑀫𑀦𑁆𑀢𑁄 𑀏𑀯𑀫𑀯𑀲𑀸𑀦𑀓𑁄𑀝𑀻𑀢𑀺 𑀦 𑀧𑀲𑁆𑀲𑀺𑀁𑀲𑀼 𑀦 𑀚𑀸𑀦𑀺𑀁𑀲𑀼. 𑀣𑁂𑀭𑁄 𑀢𑀸𑀲𑀁 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀦𑁆𑀢𑁄 𑀧𑀩𑁆𑀩𑀚𑁆𑀚𑀸𑀭𑀼𑀘𑀺𑀁 𑀤𑀺𑀲𑁆𑀯𑀸 𑀆𑀳 ‘‘𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? 𑀉𑀢𑁆𑀢𑀭𑀺𑀢𑀭𑀧𑀜𑁆𑀜𑁄𑀢𑀺 𑀯𑀸𑀤𑀫𑀕𑁆𑀕𑀧𑀭𑀺𑀘𑀬𑁂𑀦 𑀫𑁂𑀥𑀸𑀯𑀺𑀢𑀸𑀬 𑀘 𑀬𑀸𑀤𑀺𑀲𑀸 𑀢𑀸𑀲𑀁 𑀧𑀜𑁆𑀜𑀸, 𑀢𑀢𑁄 𑀉𑀢𑁆𑀢𑀭𑀺𑀢𑀭𑀧𑀜𑁆𑀜𑁄.

𑀓𑀣𑀸𑀫𑀕𑁆𑀕𑁄𑀢𑀺 𑀯𑀸𑀤𑀫𑀕𑁆𑀕𑁄. 𑀢𑀲𑁆𑀫𑀸 𑀢𑁂𑀳𑀺 𑀢𑁂𑀳𑀺 𑀧𑀭𑀧𑁆𑀧𑀯𑀸𑀤𑀸𑀤𑀻𑀳𑀺 𑀪𑀲𑁆𑀲𑀁 𑀯𑀸𑀤𑀫𑀕𑁆𑀕𑀁 𑀧𑀓𑀸𑀭𑁂𑀳𑀺 𑀯𑀤𑁂𑀢𑀻𑀢𑀺 𑀪𑀲𑁆𑀲𑀧𑁆𑀧𑀯𑀸𑀤𑀓𑁄. 𑀧𑀡𑁆𑀟𑀺𑀢𑀯𑀸𑀤𑁄𑀢𑀺 𑀅𑀳𑀁 𑀧𑀡𑁆𑀟𑀺𑀢𑁄 𑀦𑀺𑀧𑀼𑀡𑁄 𑀩𑀳𑀼𑀲𑁆𑀲𑀼𑀢𑁄𑀢𑀺 𑀏𑀯𑀁𑀯𑀸𑀤𑀻. 𑀬𑀁 𑀬𑀁 𑀦𑀓𑁆𑀔𑀢𑁆𑀢𑀸𑀘𑀸𑀭𑁂𑀦 𑀆𑀤𑀺𑀲𑀢𑀻𑀢𑀺 𑀦𑀓𑁆𑀔𑀢𑁆𑀢𑀕𑀢𑀺𑀬𑀸 𑀓𑀸𑀮𑀜𑀸𑀡𑁂𑀦 ‘‘𑀅𑀲𑀼𑀓𑀤𑀺𑀯𑀲𑁂 𑀘𑀦𑁆𑀤𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀲𑀽𑀭𑀺𑀬𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀬𑀁 𑀬𑀁 𑀆𑀤𑁂𑀲𑀁 𑀪𑀡𑀢𑀺. 𑀲𑀸𑀥𑀼𑀮𑀤𑁆𑀥𑀺𑀓𑁄 𑀜𑀸𑀡𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀦𑁆𑀤𑀭𑁄. 𑀆𑀭𑁄𑀧𑀺𑀢𑁄𑀢𑀺 𑀧𑀝𑀺𑀜𑁆𑀜𑀸𑀳𑁂𑀢𑀼𑀦𑀺𑀤𑀲𑁆𑀲𑀦𑀸𑀤𑀺𑀤𑁄𑀲𑀁 𑀉𑀧𑀭𑀺 𑀆𑀭𑁄𑀧𑀺𑀢𑁄 𑀯𑀸𑀤𑁄 𑀲𑁆𑀯𑀸𑀭𑁄𑀧𑀺𑀢𑁄. 𑀤𑁄𑀲𑀧𑀤𑀁 𑀆𑀭𑁄𑀧𑁂𑀦𑁆𑀢𑁂𑀦 𑀯𑀸𑀤𑀺𑀦𑀸 𑀧𑀭𑀯𑀸𑀤𑀺𑀫𑁆𑀳𑀺 𑀅𑀪𑀺𑀪𑀼𑀬𑁆𑀬 𑀢𑀲𑁆𑀲 𑀥𑀸𑀢𑀼𑀓𑁆𑀔𑁄𑀪𑁄𑀧𑀺 𑀲𑀺𑀬𑀸, 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁂𑀦 𑀬𑁂𑀦 𑀤𑁄𑀲𑁄 𑀢𑁂𑀦 𑀲𑀗𑁆𑀓𑀧𑁆𑀧𑀺𑀢𑁄 𑀲𑀫𑁆𑀧𑀯𑁂𑀥𑀺𑀢𑁄𑀢𑀺. 𑀣𑀽𑀡𑀦𑁆𑀢𑀺 𑀲𑀭𑀻𑀭𑀁 𑀔𑁄𑀪𑀺𑀢𑀦𑁆𑀢𑀺 𑀓𑀢𑁆𑀯𑀸. 𑀣𑀽𑀡𑀦𑁆𑀢𑀺 𑀳𑀺 𑀮𑁄𑀳𑀺𑀢𑀧𑀺𑀢𑁆𑀢𑀲𑁂𑀫𑁆𑀳𑀸𑀦𑀁 𑀅𑀥𑀺𑀯𑀘𑀦𑀁 𑀲𑀩𑁆𑀩𑀗𑁆𑀕𑀲𑀭𑀻𑀭𑀥𑀸𑀭𑀡𑀢𑁄. 𑀅𑀧𑀺𑀘 𑀣𑀽𑀡𑀧𑀤𑁄 𑀦𑀸𑀫 𑀅𑀢𑁆𑀣𑀺 𑀓𑀣𑀸𑀫𑀕𑁆𑀕𑁄 𑀯𑀸𑀤𑀫𑀕𑁆𑀕𑀁 𑀕𑀡𑁆𑀳𑀦𑁆𑀢𑀸𑀦𑀁. 𑀲𑀘𑁆𑀘𑀓𑁄 𑀧𑀦 𑀓𑁄𑀳𑀜𑁆𑀜𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀧𑁆𑀧𑀪𑁂𑀤𑀯𑀲𑁂𑀦 𑀧𑀭𑁂 𑀯𑀺𑀫𑁆𑀳𑀸𑀧𑁂𑀦𑁆𑀢𑁄 ‘‘𑀣𑀽𑀡𑀁 𑀘𑁂𑀧𑀸𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀸𑀯𑀓𑀸𑀦𑀁 𑀯𑀺𑀦𑀬𑀁 𑀦𑀸𑀫 𑀲𑀺𑀓𑁆𑀔𑀸𑀧𑀤𑀁, 𑀢𑀜𑁆𑀘 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀻𑀢𑀺 𑀏𑀲𑀸 𑀏𑀯 𑀘𑀲𑁆𑀲 𑀅𑀦𑀼𑀲𑀸𑀲𑀦𑀻𑀢𑀺 𑀯𑀺𑀦𑀬𑀦𑀸𑀤𑀺𑀫𑀼𑀔𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀢𑀁 𑀲𑀸𑀲𑀦𑀁 𑀧𑀼𑀘𑁆𑀙𑀦𑁆𑀢𑁄 𑀲𑀘𑁆𑀘𑀓𑁄 ‘‘𑀓𑀣𑀁 𑀧𑀦, 𑀪𑁄, 𑀅𑀲𑁆𑀲𑀚𑀻’’𑀢𑀺𑀆𑀤𑀺𑀫𑀸𑀳. 𑀅𑀣𑀲𑁆𑀲 𑀣𑁂𑀭𑁄 ‘‘𑀮𑀓𑁆𑀔𑀡𑀢𑁆𑀢𑀬𑀓𑀣𑀸 𑀦𑀸𑀫 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀩𑀼𑀤𑁆𑀥𑀸𑀯𑁂𑀡𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀢𑁆𑀭 𑀘 𑀫𑀬𑀸 𑀅𑀦𑀺𑀘𑁆𑀘𑀓𑀣𑀸𑀬 𑀲𑀫𑀼𑀝𑁆𑀞𑀸𑀧𑀺𑀢𑀸𑀬 𑀢𑀁 𑀅𑀲𑀳𑀦𑁆𑀢𑁄 𑀲𑀘𑁆𑀘𑀓𑁄 𑀢𑀼𑀘𑁆𑀙𑀫𑀸𑀦𑁂𑀦 𑀧𑀝𑀧𑀝𑀸𑀬𑀦𑁆𑀢𑁄 𑀓𑀼𑀭𑀼𑀫𑀸𑀦𑁄 𑀮𑀺𑀘𑁆𑀙𑀯𑀻 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀢𑀺, 𑀅𑀣𑀲𑁆𑀲 𑀪𑀕𑀯𑀸 𑀯𑀸𑀤𑀁 𑀫𑀤𑁆𑀤𑀺𑀢𑁆𑀯𑀸 𑀅𑀦𑀺𑀘𑁆𑀘𑀦𑁆𑀢𑀺 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀥𑀫𑁆𑀫𑀁 𑀓𑀣𑁂𑀲𑁆𑀲𑀢𑀺, 𑀢𑀤𑀸 𑀪𑀯𑀺𑀲𑁆𑀲𑀢𑀺 𑀯𑀺𑀚𑀳𑀺𑀢𑀯𑀸𑀤𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀧𑀢𑀺𑀝𑁆𑀞𑀺𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀺𑀘𑁆𑀘𑀸𑀦𑀢𑁆𑀢𑀮𑀓𑁆𑀔𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀪𑀕𑀯𑀢𑁄 𑀅𑀦𑀼𑀲𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁, 𑀪𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸’’𑀢𑀺𑀆𑀤𑀺𑀫𑀸𑀳.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀤𑀼𑀓𑁆𑀔𑀮𑀓𑁆𑀔𑀡𑀁 𑀅𑀕𑁆𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀣𑁂𑀭𑁄 𑀧𑀦𑀸’’𑀢𑀺𑀆𑀤𑀺. ‘‘𑀉𑀧𑀸𑀭𑀫𑁆𑀪𑀲𑁆𑀲 𑀑𑀓𑀸𑀲𑁄 𑀳𑁄𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀫𑀕𑁆𑀕𑀨𑀮𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀧𑀭𑀺𑀬𑀸𑀬𑁂𑀦. 𑀅𑀬𑀦𑁆𑀢𑀺 𑀲𑀘𑁆𑀘𑀓𑁄. 𑀦𑀬𑀺𑀤𑀁 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑀁 𑀦𑀸𑀫𑀸𑀢𑀺 𑀬𑀢𑁆𑀣 𑀢𑀼𑀫𑁆𑀳𑁂 𑀅𑀯𑀝𑁆𑀞𑀺𑀢𑀸, 𑀇𑀤𑀁 𑀢𑀼𑀫𑁆𑀳𑀸𑀓𑀁 𑀲𑀩𑁆𑀩𑀜𑁆𑀜𑀼𑀲𑀸𑀲𑀦𑀁 𑀦𑀸𑀫 𑀦 𑀳𑁄𑀢𑀺 𑀤𑀼𑀓𑁆𑀔𑀢𑁄 𑀅𑀦𑀺𑀲𑁆𑀲𑀭𑀡𑀢𑁆𑀢𑀸, 𑀅𑀣 𑀔𑁄 𑀫𑀳𑀸𑀆𑀖𑀸𑀢𑀦𑀁 𑀦𑀸𑀫𑁂𑀢𑀁, 𑀫𑀳𑀸𑀤𑀼𑀓𑁆𑀔𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀧𑀦 𑀦𑀺𑀭𑀬𑀼𑀲𑁆𑀲𑀤𑁄 𑀦𑀸𑀫 𑀉𑀲𑁆𑀲𑀤𑀦𑀺𑀭𑀬𑁄 𑀦𑀸𑀫, 𑀢𑀲𑁆𑀫𑀸 𑀦𑀢𑁆𑀢𑀺 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀲𑀼𑀔𑀸𑀲𑀸. 𑀉𑀝𑁆𑀞𑀸𑀬𑀼𑀝𑁆𑀞𑀸𑀬𑀸𑀢𑀺 𑀉𑀲𑁆𑀲𑀼𑀓𑁆𑀓𑀁 𑀓𑀢𑁆𑀯𑀸, 𑀤𑀼𑀓𑁆𑀔𑀫𑁂𑀯 𑀚𑀻𑀭𑀸𑀧𑁂𑀦𑁆𑀢𑀸 𑀲𑀩𑁆𑀩𑀲𑁄 𑀤𑀼𑀓𑁆𑀔𑀫𑁂𑀯 𑀅𑀦𑀼𑀪𑀯𑀦𑁆𑀢𑀸, 𑀆𑀳𑀺𑀡𑁆𑀟𑀣 𑀯𑀺𑀘𑀭𑀣𑀸𑀢𑀺. 𑀲𑀩𑁆𑀩𑀫𑀺𑀤𑀁 𑀢𑀲𑁆𑀲 𑀫𑀺𑀘𑁆𑀙𑀸𑀧𑀭𑀺𑀓𑀧𑁆𑀧𑀺𑀢𑀫𑁂𑀯. 𑀓𑀲𑁆𑀫𑀸? 𑀤𑀼𑀓𑁆𑀔𑀲𑀘𑁆𑀘𑀽𑀧𑀲𑀜𑁆𑀳𑀺𑀢𑀸𑀬𑁂𑀯 𑀳𑁂𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸 𑀦𑀸𑀫. 𑀢𑀲𑁆𑀲 𑀳𑀺 𑀧𑀭𑀺𑀜𑁆𑀜𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺. 𑀫𑀕𑁆𑀕𑀨𑀮𑀸𑀦𑀺 𑀲𑀗𑁆𑀔𑀸𑀭𑀪𑀸𑀯𑁂𑀦 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀧𑀭𑀺𑀬𑀸𑀬𑀢𑁄 𑀤𑀼𑀓𑁆𑀔𑀁, 𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀲𑁄𑀢𑀼𑀁 𑀅𑀬𑀼𑀢𑁆𑀢𑀁 𑀫𑀺𑀘𑁆𑀙𑀸𑀯𑀸𑀤𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁫𑁪. 𑀲𑀳 𑀅𑀢𑁆𑀣𑀸𑀦𑀼𑀲𑀸𑀲𑀦𑀁 𑀅𑀕𑀸𑀭𑀦𑁆𑀢𑀺 𑀲𑀦𑁆𑀥𑀸𑀕𑀸𑀭𑀁, 𑀭𑀸𑀚𑀓𑀼𑀮𑀸𑀦𑀁 𑀲𑀦𑁆𑀣𑀸𑀧𑀦𑀅𑀕𑀸𑀭𑀦𑁆𑀢𑀺𑀧𑀺 𑀲𑀦𑁆𑀥𑀸𑀕𑀸𑀭𑀁, 𑀢𑀲𑁆𑀫𑀺𑀁 𑀲𑀦𑁆𑀣𑀸𑀕𑀸𑀭𑁂𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀢𑀸𑀤𑀺𑀲𑁂 𑀓𑀸𑀮𑁂 𑀭𑀸𑀚𑀓𑀺𑀘𑁆𑀘𑀸𑀦𑀁 𑀲𑀦𑁆𑀣𑀸𑀦𑀫𑁂𑀢𑁆𑀣 𑀯𑀺𑀘𑀸𑀭𑁂𑀦𑁆𑀢𑀻𑀢𑀺 𑀲𑀦𑁆𑀥𑀸𑀕𑀸𑀭𑀁, 𑀢𑀲𑁆𑀫𑀺𑀁 𑀲𑀦𑁆𑀣𑀸𑀕𑀸𑀭𑁂𑀢𑀺𑀧𑀺 𑀅𑀢𑁆𑀣𑁄. 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 ‘‘𑀅𑀦𑀺𑀘𑁆𑀘𑀁 𑀅𑀦𑀢𑁆𑀢𑀸’’𑀢𑀺 𑀘 𑀧𑀝𑀺𑀜𑁆𑀜𑀸𑀢𑀁. 𑀇𑀤𑀸𑀦𑁂𑀯 𑀧𑀺𑀝𑁆𑀞𑀺𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄𑀢𑀺 𑀪𑀕𑀯𑀢𑁄 𑀦𑀮𑀸𑀝𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀯𑀺𑀫𑀼𑀔𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑁄. 𑀲𑀼𑀭𑀸𑀖𑀭𑁂𑀢𑀺 𑀲𑀼𑀭𑀸𑀲𑀫𑁆𑀧𑀸𑀤𑀓𑀕𑁂𑀳𑁂. 𑀧𑀺𑀝𑁆𑀞𑀓𑀺𑀮𑀜𑁆𑀚𑀦𑁆𑀢𑀺 𑀧𑀺𑀝𑁆𑀞𑀞𑀧𑀦𑀓𑀺𑀴𑀜𑁆𑀚𑀁. 𑀯𑀸𑀮𑀦𑁆𑀢𑀺 𑀘𑀗𑁆𑀕𑀯𑀸𑀭𑀁. 𑀲𑀸𑀡𑀲𑀸𑀝𑀓𑀓𑀭𑀡𑀢𑁆𑀣𑀦𑁆𑀢𑀺 𑀲𑀸𑀡𑀲𑀸𑀝𑀓𑀁 𑀓𑀭𑁄𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀸𑀡𑀲𑀸𑀝𑀓𑀓𑀭𑀡𑀁, 𑀲𑀼𑀢𑁆𑀢𑀁, 𑀢𑀤𑀢𑁆𑀣𑀁. 𑀲𑀸𑀡𑀯𑀸𑀓𑀸 𑀏𑀢𑁂𑀲𑀼 𑀲𑀦𑁆𑀢𑀻𑀢𑀺 𑀲𑀸𑀡𑀯𑀸𑀓𑀸, 𑀲𑀸𑀡𑀤𑀡𑁆𑀟𑀸. 𑀢𑁂 𑀕𑀳𑁂𑀢𑁆𑀯𑀸 𑀲𑀸𑀡𑀸𑀦𑀁 𑀥𑁄𑀯𑀦𑀲𑀤𑀺𑀲𑀁 𑀓𑀻𑀴𑀺𑀢𑀚𑀸𑀢𑀁 𑀬𑀣𑀸 ‘‘𑀉𑀤𑁆𑀤𑀸𑀮𑀧𑀼𑀧𑁆𑀨𑀪𑀜𑁆𑀚𑀺𑀓𑀸, 𑀲𑀸𑀡𑀪𑀜𑁆𑀚𑀺𑀓𑀸’’𑀢𑀺 𑀘. 𑀓𑀺𑀁 𑀲𑁄 𑀪𑀯𑀫𑀸𑀦𑁄𑀢𑀺 𑀓𑀻𑀤𑀺𑀲𑁄 𑀳𑀼𑀢𑁆𑀯𑀸 𑀲𑁄 𑀪𑀯𑀫𑀸𑀦𑁄, 𑀓𑀺𑀁 𑀳𑁄𑀦𑁆𑀢𑁄 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀸𑀤𑀸𑀭𑁄𑀧𑀦𑀁 𑀦𑀸𑀫 𑀢𑀢𑁄 𑀉𑀢𑁆𑀢𑀭𑀺𑀢𑀭𑀲𑀽𑀭𑀕𑀼𑀡𑁄 𑀏𑀯 𑀬𑀓𑁆𑀔𑀸𑀤𑀺𑀪𑀸𑀯𑁂𑀦 𑀲𑁄 𑀪𑀯𑀫𑀸𑀦𑁄 𑀅𑀪𑀺𑀲𑀫𑁆𑀪𑀼𑀡𑁂𑀬𑁆𑀬. 𑀅𑀬𑀁 𑀧𑀦 𑀅𑀧𑁆𑀧𑀸𑀦𑀼𑀪𑀸𑀯𑀢𑀸𑀬 𑀧𑀺𑀲𑀸𑀘𑀭𑀽𑀧𑁄 𑀓𑀺𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀦𑀺𑀤𑁆𑀤𑀸𑀬𑀦𑁆𑀢𑁄 𑀅𑀚𑁆𑀚 𑀧𑀩𑀼𑀚𑁆𑀛𑀺𑀢𑁆𑀯𑀸 𑀏𑀯𑀁 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀓𑀺𑀁 𑀬𑀓𑁆𑀔𑁄’’𑀢𑀺𑀆𑀤𑀺.

𑁩𑁫𑁫. 𑀫𑀳𑀸𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂𑀢𑀺 𑀫𑀳𑀢𑀺 𑀫𑀚𑁆𑀛𑀦𑁆𑀳𑀺𑀓𑀓𑀸𑀮𑁂, 𑀕𑀕𑀦𑀫𑀚𑁆𑀛𑁂 𑀲𑀽𑀭𑀺𑀬𑀕𑀢𑀯𑁂𑀮𑀸𑀬. 𑀤𑀺𑀯𑀸𑀧𑀥𑀸𑀦𑀺𑀓𑀸 𑀧𑀥𑀸𑀦𑀸𑀦𑀼𑀬𑀼𑀜𑁆𑀚𑀓𑀸. 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀤𑀺𑀯𑀸𑀯𑀺𑀳𑀸𑀭𑀽𑀧𑀕𑀫𑀦𑀢𑁄 𑀧𑀼𑀩𑁆𑀩𑁂 𑀓𑀸𑀢𑀩𑁆𑀩𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀧𑀚𑁆𑀚𑀺𑀢𑁆𑀯𑀸. 𑀪𑀕𑀯𑀦𑁆𑀢𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀪𑀕𑀯𑀢𑀺 𑀕𑀸𑀭𑀯𑀩𑀳𑀼𑀫𑀸𑀦𑀁 𑀯𑀺𑀪𑀸𑀯𑁂𑀦𑁆𑀢𑁄 𑀉𑀪𑁄 𑀳𑀢𑁆𑀣𑁂 𑀓𑀫𑀮𑀫𑀓𑀼𑀮𑀸𑀓𑀸𑀭𑁂 𑀓𑀢𑁆𑀯𑀸 𑀉𑀓𑁆𑀔𑀺𑀧𑁆𑀧 𑀪𑀕𑀯𑀦𑁆𑀢𑀁 𑀤𑀲𑁆𑀲𑁂𑀦𑁆𑀢𑁄.

𑀢𑀁 𑀲𑀦𑁆𑀥𑀸𑀬𑀸𑀢𑀺 𑀢𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀁 𑀲𑀦𑁆𑀥𑀸𑀬 𑀏𑀯𑀁 ‘‘𑀫𑀳𑀢𑀺𑀬𑀸 𑀮𑀺𑀘𑁆𑀙𑀯𑀺𑀧𑀭𑀺𑀲𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀓𑀺𑀁 𑀲𑀻𑀲𑁂𑀦 𑀪𑀽𑀫𑀺𑀁 𑀧𑀳𑀭𑀦𑁆𑀢𑁂𑀦𑁂𑀯 𑀯𑀦𑁆𑀤𑀦𑀸 𑀓𑀢𑀸 𑀳𑁄𑀢𑀺? 𑀓𑁂𑀭𑀸𑀝𑀺𑀓𑀸𑀢𑀺 𑀲𑀞𑀸. 𑀫𑁄𑀘𑁂𑀦𑁆𑀢𑀸𑀢𑀺 𑀪𑀺𑀓𑁆𑀔𑀸𑀤𑀸𑀦𑀢𑁄 𑀫𑁄𑀘𑁂𑀦𑁆𑀢𑀸. 𑀅𑀯𑀓𑁆𑀔𑀺𑀢𑁆𑀢𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀯𑀺𑀬𑀸𑀢𑀺 𑀳𑁂𑀝𑁆𑀞𑀸𑀔𑀺𑀢𑁆𑀢𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀯𑀺𑀬. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀯𑀘𑀦𑀁 𑀅𑀲𑀮𑁆𑀮𑀧𑁂𑀦𑁆𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺.

𑁩𑁫𑁬. 𑀤𑀺𑀲𑁆𑀲𑀢𑀺 ‘‘𑀇𑀤𑀁 𑀇𑀫𑀲𑁆𑀲 𑀨𑀮’’𑀦𑁆𑀢𑀺 𑀅𑀧𑀤𑀺𑀲𑁆𑀲𑀢𑀺 𑀏𑀢𑁂𑀦𑀸𑀢𑀺 𑀤𑁂𑀲𑁄, 𑀓𑀸𑀭𑀡𑀁, 𑀢𑀤𑁂𑀯 𑀢𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀑𑀓𑀸𑀲𑁄𑀢𑀺 𑀆𑀳 ‘‘𑀓𑀜𑁆𑀘𑀺𑀤𑁂𑀯 𑀤𑁂𑀲𑀦𑁆𑀢𑀺 𑀓𑀜𑁆𑀘𑀺 𑀑𑀓𑀸𑀲𑀁 𑀓𑀺𑀜𑁆𑀘𑀺 𑀓𑀸𑀭𑀡’’𑀦𑁆𑀢𑀺. 𑀑𑀓𑀸𑀲𑁄 𑀞𑀸𑀦𑀦𑁆𑀢𑀺 𑀘 𑀓𑀸𑀭𑀡𑀁 𑀯𑀼𑀘𑁆𑀘𑀢𑀺 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁬𑁧; 𑀫. 𑀦𑀺. 𑁩.𑁧𑁨𑁮-𑁧𑁩𑁧; 𑀅. 𑀦𑀺. 𑁧.𑁨𑁬𑁮-𑁨𑁯𑁫; 𑀯𑀺𑀪. 𑁮𑁦𑁯). 𑀬𑀤𑀸𑀓𑀗𑁆𑀔𑀲𑀻𑀢𑀺 𑀦 𑀯𑀤𑀦𑁆𑀢𑀺 𑀅𑀦𑀯𑀲𑁂𑀲𑀥𑀫𑁆𑀫𑀯𑀺𑀲𑀬𑀢𑁆𑀢𑀸 𑀧𑀝𑀺𑀜𑁆𑀜𑀸𑀬. 𑀢𑀼𑀫𑁆𑀳𑀦𑁆𑀢𑀺 𑀢𑀼𑀫𑁆𑀳𑀸𑀓𑀁. 𑀬𑀓𑁆𑀔…𑀧𑁂… 𑀧𑀭𑀺𑀩𑁆𑀩𑀸𑀚𑀓𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀧𑀼𑀘𑁆𑀙𑀸𑀯𑀼𑀲𑁄, 𑀬𑀤𑀸𑀓𑀗𑁆𑀔𑀲𑀻’’𑀢𑀺𑀆𑀤𑀻𑀦𑀺 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑀆𑀴𑀯𑀓𑀲𑀼𑀢𑁆𑀢) 𑀧𑀼𑀘𑁆𑀙𑀸𑀯𑀘𑀦𑀸𑀦𑀺 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀜𑀢𑁆𑀯𑀸 𑀲𑀬𑀁 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸𑀢𑀺 𑀇𑀤𑀁 𑀫𑀳𑀸𑀲𑀢𑁆𑀢𑁄 𑀦𑀺𑀭𑀬𑀁 𑀲𑀕𑁆𑀕𑀜𑁆𑀘 𑀢𑁂𑀲𑀁 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀢𑁆𑀯𑀸 𑀆𑀳.

𑀢𑀕𑁆𑀖 𑀢𑁂 𑀅𑀳𑀫𑀓𑁆𑀔𑀺𑀲𑁆𑀲𑀁, 𑀬𑀣𑀸𑀧𑀺 𑀓𑀼𑀲𑀮𑁄 𑀢𑀣𑀸𑀢𑀺 𑀬𑀣𑀸 𑀧𑀓𑀸𑀭𑁂𑀦 𑀲𑀼𑀓𑀼𑀲𑀮𑁄 𑀲𑀩𑁆𑀩𑀜𑁆𑀜𑀽 𑀚𑀸𑀦𑀸𑀢𑀺 𑀓𑀣𑁂𑀢𑀺, 𑀢𑀣𑀸 𑀅𑀳𑀁 𑀓𑀣𑁂𑀲𑁆𑀲𑀸𑀫𑀺. 𑀢𑀲𑁆𑀲 𑀧𑀦 𑀓𑀸𑀭𑀡𑀁 𑀅𑀓𑀸𑀭𑀡𑀜𑁆𑀘 𑀅𑀯𑀺𑀚𑀸𑀦𑀦𑁆𑀢𑁄 𑀭𑀸𑀚𑀸𑀦𑀁 𑀓𑀭𑁄𑀢𑀼 𑀯𑀸 𑀫𑀸 𑀯𑀸, 𑀅𑀳𑀁 𑀧𑀦 𑀢𑁂 𑀅𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀆𑀳 ‘‘𑀭𑀸𑀚𑀸 𑀘 𑀔𑁄…𑀧𑁂… 𑀦 𑀯𑀸’’𑀢𑀺.

𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀓𑀣𑁂𑀦𑁆𑀢𑁄𑀢𑀺 𑀢𑁂𑀧𑀭𑀺𑀯𑀝𑁆𑀝𑀓𑀣𑀸𑀬 𑀤𑀼𑀓𑁆𑀔𑀮𑀓𑁆𑀔𑀡𑀫𑁆𑀧𑁂𑀲 𑀓𑀣𑁂𑀲𑁆𑀲𑀢𑀺, 𑀇𑀥 𑀧𑀦 𑀅𑀜𑁆𑀜𑀣𑀸 𑀲𑀸𑀯𑀓𑁂𑀦 𑀅𑀲𑁆𑀲𑀚𑀺𑀦𑀸 𑀓𑀣𑀺𑀢𑀁, 𑀅𑀜𑁆𑀜𑀣𑀸 𑀲𑀫𑀡𑁂𑀦 𑀕𑁄𑀢𑀫𑁂𑀦𑀸𑀢𑀺 𑀯𑀘𑀦𑁄𑀓𑀸𑀲𑀧𑀭𑀺𑀳𑀭𑀡𑀢𑁆𑀣𑀁 𑀤𑀼𑀓𑁆𑀔𑀮𑀓𑁆𑀔𑀡𑀁 𑀅𑀦𑀸𑀫𑀲𑀺𑀢𑁆𑀯𑀸 𑀣𑁂𑀭𑁂𑀦 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀅𑀦𑀺𑀘𑁆𑀘𑀸𑀦𑀢𑁆𑀢𑀮𑀓𑁆𑀔𑀡𑀫𑁂𑀯 𑀓𑀣𑁂𑀦𑁆𑀢𑁂𑀦 𑀪𑀕𑀯𑀢𑀸 𑁋 ‘‘𑀭𑀽𑀧𑀁 𑀅𑀦𑀢𑁆𑀢𑀸 𑀬𑀸𑀯 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸’’𑀢𑀺 𑀯𑀼𑀢𑁆𑀢𑁂 𑀲𑀘𑁆𑀘𑀓𑁄 𑀢𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀉𑀧𑀫𑀸𑀬 𑀅𑀢𑁆𑀣𑀜𑀸𑀧𑀦𑁂 𑀉𑀧𑀫𑀸𑀧𑀫𑀸𑀡𑀁 𑀬𑀣𑀸 ‘‘𑀕𑁄 𑀯𑀺𑀬 𑀕𑀯𑀬𑁄’’𑀢𑀺 𑀅𑀢𑁆𑀢𑀸𑀦𑀁 𑀉𑀧𑀫𑁂𑀬𑁆𑀬𑀁 𑀓𑀢𑁆𑀯𑀸 𑀉𑀧𑀫𑀸𑀧𑀫𑀸𑀡𑁂𑀦 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄 𑀆𑀳 ‘‘𑀉𑀧𑀫𑀸 𑀫𑀁, 𑀪𑁄 𑀕𑁄𑀢𑀫, 𑀧𑀝𑀺𑀪𑀸𑀢𑀻’’𑀢𑀺, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀉𑀧𑀫𑀸𑀬𑀧𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀕𑀯𑀸 𑀉𑀧𑀫𑀸𑀲𑀢𑁂𑀦, 𑀅𑀜𑁆𑀜𑁂𑀦 𑀯𑀸𑀧𑀺 𑀧𑀫𑀸𑀡𑁂𑀦 𑀢𑀯 𑀅𑀢𑁆𑀢𑀸 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀦 𑀮𑀩𑁆𑀪𑀸 𑀅𑀢𑁆𑀢𑀦𑁄 𑀯𑀺𑀬 𑀧𑀫𑀸𑀡𑀲𑁆𑀲𑀧𑀺 𑀅𑀦𑀼𑀧𑀮𑀩𑁆𑀪𑀦𑀢𑁄𑀢𑀺 𑀆𑀳 ‘‘𑀧𑀝𑀺𑀪𑀸𑀢𑀼 𑀢𑀁 𑀅𑀕𑁆𑀕𑀺𑀯𑁂𑀲𑁆𑀲𑀦𑀸’’𑀢𑀺. 𑀬𑀣𑀸 𑀳𑀺 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀧𑀭𑀫𑀢𑁆𑀣𑀢𑁄 𑀦 𑀉𑀧𑀮𑀩𑁆𑀪𑀢𑀺 𑀏𑀓𑀁𑀲𑁂𑀦 𑀅𑀦𑀼𑀧𑀮𑀤𑁆𑀥𑀺𑀢𑁄, 𑀏𑀯𑀲𑁆𑀲 𑀜𑀸𑀧𑀓𑀧𑀼𑀕𑁆𑀕𑀮𑀁 𑀧𑀫𑀸𑀡𑀫𑁆𑀧𑀺 𑀦 𑀉𑀧𑀮𑀩𑁆𑀪𑀢𑀺. 𑀢𑁂𑀦𑀸𑀳 ‘‘𑀆𑀳𑀭 𑀢𑀁 𑀉𑀧𑀫𑀁 𑀯𑀺𑀲𑁆𑀲𑀢𑁆𑀣𑁄’’𑀢𑀺, 𑀦 𑀢𑁂𑀦 𑀢𑀯 𑀅𑀢𑁆𑀢𑀯𑀸𑀤𑁄 𑀧𑀢𑀺𑀝𑁆𑀞𑀁 𑀮𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀁 𑀤𑀺𑀝𑁆𑀞𑀁 𑀓𑀸𑀬𑀺𑀓𑀁 𑀯𑀸 𑀧𑀼𑀜𑁆𑀜𑀸𑀧𑀼𑀜𑁆𑀜𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁂 𑀉𑀧𑀮𑀩𑁆𑀪𑀢𑀺, 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 𑀭𑀽𑀧𑀢𑁆𑀢𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄, 𑀢𑀣𑀸 𑀬𑀁 𑀤𑀺𑀝𑁆𑀞𑀁 𑀲𑀼𑀔𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀦𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁂 𑀉𑀧𑀮𑀩𑁆𑀪𑀢𑀺, 𑀬𑀁 𑀤𑀺𑀝𑁆𑀞𑀁 𑀦𑀻𑀮𑀸𑀤𑀺𑀲𑀜𑁆𑀚𑀸𑀦𑀦𑀁, 𑀬𑀁 𑀤𑀺𑀝𑁆𑀞𑀁 𑀭𑀚𑁆𑀚𑀦𑀤𑀼𑀲𑁆𑀲𑀦𑀸𑀤𑀺, 𑀬𑀁 𑀤𑀺𑀝𑁆𑀞𑀁 𑀆𑀭𑀫𑁆𑀫𑀡𑀧𑀝𑀺𑀯𑀺𑀚𑀸𑀦𑀦𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁂 𑀉𑀧𑀮𑀩𑁆𑀪𑀢𑀺, 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 𑀯𑀺𑀜𑁆𑀜𑀸𑀡𑀢𑁆𑀢𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄𑀢𑀺. 𑀏𑀯𑀁 𑀭𑀽𑀧𑀸𑀤𑀺𑀮𑀓𑁆𑀔𑀡𑁄 𑀅𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀓𑀸𑀬𑁂 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀲𑀼𑀔𑀤𑀼𑀓𑁆𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀏𑀯𑀜𑁆𑀘𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑁄 𑀦 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀓𑀺𑀁 𑀤𑀻𑀧𑁂𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀢𑀺 𑀲𑀢𑁆𑀢𑀸. 𑀧𑀢𑀺𑀝𑁆𑀞𑀸𑀬𑀸𑀢𑀺 𑀦𑀺𑀲𑁆𑀲𑀸𑀬. ‘‘𑀭𑀽𑀧𑀢𑁆𑀢𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀦𑀸 𑀭𑀽𑀧𑀸𑀤𑀺𑀥𑀫𑁆𑀫𑁂 ‘‘𑀅𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀭𑀽𑀧𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺𑀆𑀤𑀺𑀁 𑀯𑀤𑀦𑁆𑀢𑁄 𑀅𑀬𑀁 𑀦𑀺𑀕𑀡𑁆𑀞𑁄 𑀅𑀢𑁆𑀢𑀦𑁄 𑀯𑀸𑀤𑀁 𑀪𑀺𑀦𑁆𑀤𑀢𑀺 𑀧𑀢𑀺𑀝𑁆𑀞𑀸𑀦𑀲𑁆𑀲, 𑀧𑀢𑀺𑀝𑁆𑀞𑀸𑀬𑀓𑀲𑁆𑀲 𑀘 𑀅𑀪𑁂𑀤𑀤𑀻𑀧𑀦𑀢𑁄. 𑀭𑀽𑀧𑀸𑀤𑀬𑁄 𑀯𑁂𑀤𑀦𑀸𑀤𑀺𑀲𑀪𑀸𑀯𑀸 𑀅𑀢𑁆𑀢𑀸 𑀢𑀦𑁆𑀦𑀺𑀲𑁆𑀲𑀬𑁂𑀦 𑀧𑀼𑀜𑁆𑀜𑀸𑀤𑀺𑀓𑀺𑀭𑀺𑀬𑀸𑀲𑀫𑀼𑀧𑀮𑀤𑁆𑀥𑀺𑀢𑁄 𑀇𑀥 𑀬𑀁 𑀦𑀺𑀲𑁆𑀲𑀸𑀬 𑀧𑀼𑀜𑁆𑀜𑀸𑀤𑀺𑀓𑀺𑀭𑀺𑀬𑀸 𑀲𑀫𑀼𑀧𑀮𑀩𑁆𑀪𑀢𑀺, 𑀢𑁂 𑀭𑀽𑀧𑀸𑀤𑀬𑁄 𑀲𑀢𑁆𑀢𑀲𑀜𑁆𑀜𑀺𑀢𑀸 𑀅𑀢𑁆𑀢𑀲𑀪𑀸𑀯𑀸 𑀤𑀺𑀝𑁆𑀞𑀸 𑀬𑀣𑀸 𑀢𑀁 𑀤𑁂𑀯𑀢𑀸𑀤𑀻𑀲𑀼, 𑀬𑁂 𑀧𑀦 𑀲𑀢𑁆𑀢𑀲𑀜𑁆𑀜𑀺𑀢𑀸 𑀢𑀢𑁄 𑀅𑀜𑁆𑀜𑁂 𑀅𑀲𑀢𑁆𑀢𑀲𑀪𑀸𑀯𑀸 𑀤𑀺𑀝𑁆𑀞𑀸 𑀬𑀣𑀸 𑀢𑀁 𑀓𑀝𑁆𑀞𑀓𑀮𑀺𑀗𑁆𑀕𑀭𑀸𑀤𑀻𑀲𑀽𑀢𑀺 𑀏𑀯𑀁 𑀲𑀸𑀥𑁂𑀢𑀩𑁆𑀩𑀁 𑀅𑀢𑁆𑀣𑀁 𑀲𑀳𑁂𑀢𑀼𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀦𑀺𑀕𑀡𑁆𑀞𑁄 𑀦𑀺𑀤𑀲𑁆𑀲𑀦𑀁 𑀆𑀦𑁂𑀲𑀻𑀢𑀺 𑀆𑀳 ‘‘𑀅𑀢𑀺𑀯𑀺𑀬 𑀲𑀓𑀸𑀭𑀡𑀁 𑀓𑀢𑁆𑀯𑀸 𑀉𑀧𑀫𑀁 𑀆𑀳𑀭𑀻’’𑀢𑀺. 𑀢𑀲𑁆𑀲 𑀧𑀦 ‘‘𑀩𑀮𑀓𑀭𑀡𑀻𑀬𑀸’’𑀢𑀺 𑀯𑀼𑀢𑁆𑀢𑀧𑀼𑀭𑀺𑀲𑀧𑁆𑀧𑀬𑁄𑀕𑀸 𑀯𑀺𑀬 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸𑀧𑀺 𑀲𑀚𑀻𑀯𑀸 𑀏𑀯𑀸𑀢𑀺 𑀮𑀤𑁆𑀥𑀻𑀢𑀺 𑀢𑁂 𑀲𑀤𑀺𑀲𑀽𑀤𑀸𑀳𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀘𑁂 𑀧𑀦 𑀬𑁂 𑀚𑀻𑀯𑀲𑁆𑀲 𑀆𑀥𑀸𑀭𑀡𑀪𑀸𑀯𑁂𑀦 𑀲𑀳𑀺𑀢𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀪𑀸𑀯𑁂𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸, 𑀢𑁂 𑀲𑀚𑀻𑀯𑀸𑀢𑀺 𑀇𑀘𑁆𑀙𑀺𑀢𑀸, 𑀦 𑀓𑁂𑀯𑀮𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀪𑀸𑀯𑁂𑀦. 𑀏𑀯𑀁 𑀲𑀢𑀺 ‘‘𑀩𑀮𑀓𑀭𑀡𑀻𑀬𑀸 𑀓𑀫𑁆𑀫𑀦𑁆𑀢𑀸’’𑀢𑀺 𑀯𑀤𑀦𑁆𑀢𑁂𑀦 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑀪𑀸𑀯𑁂𑀦 𑀉𑀧𑀦𑀻𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺 𑀅𑀢𑁆𑀢𑀯𑀸𑀤𑀪𑀜𑁆𑀚𑀦𑀲𑁆𑀲 𑀅𑀦𑀢𑁆𑀢𑀢𑀸𑀧𑀢𑀺𑀝𑁆𑀞𑀸𑀧𑀦𑀲𑁆𑀲 𑀘 𑀲𑀼𑀕𑀢𑀸𑀯𑁂𑀡𑀺𑀓𑀢𑁆𑀢𑀸. 𑀬𑀁 𑀧𑀦𑁂𑀢𑀭𑀳𑀺 𑀲𑀸𑀲𑀦𑀺𑀓𑀸 𑀬𑀣𑀸𑀲𑀢𑁆𑀢𑀺 𑀢𑀤𑀼𑀪𑀬𑀁 𑀓𑀭𑁄𑀦𑁆𑀢𑀺, 𑀢𑀁 𑀩𑀼𑀤𑁆𑀥𑁂𑀳𑀺 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀢𑁂𑀲𑀁 𑀤𑁂𑀲𑀦𑀸𑀦𑀼𑀲𑀸𑀭𑀢𑁄. 𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸, 𑀯𑀺𑀲𑀼𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀓𑀮𑀁 𑀯𑁂𑀲𑀸𑀮𑀺𑀦𑁆𑀢𑀺 𑀲𑀩𑁆𑀩𑀯𑁂𑀲𑀸𑀮𑀺𑀯𑀸𑀲𑀺𑀦𑀁 𑀚𑀦𑀁 𑀦𑀺𑀲𑁆𑀲𑀬𑀽𑀧𑀘𑀸𑀭𑁂𑀦 𑀦𑀺𑀲𑁆𑀲𑀺𑀢𑀁 𑀯𑀤𑀢𑀺 𑀬𑀣𑀸 ‘‘𑀕𑀸𑀫𑁄 𑀆𑀕𑀢𑁄’’𑀢𑀺. 𑀲𑀁𑀯𑀝𑁆𑀝𑀺𑀢𑁆𑀯𑀸𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸, 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁩𑁫𑁭. 𑀧𑀢𑀺𑀝𑁆𑀞𑀧𑁂𑀢𑁆𑀯𑀸𑀢𑀺 𑀬𑀣𑀸 𑀢𑀁 𑀯𑀸𑀤𑀁 𑀦 𑀅𑀯𑀚𑀸𑀦𑀸𑀢𑀺, 𑀏𑀯𑀁 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀖𑀸𑀢𑀺-𑀲𑀤𑁆𑀤𑁄 𑀳𑀺𑀁𑀲𑀦𑀢𑁆𑀣𑁄, 𑀢𑀢𑁄 𑀘 𑀲𑀤𑁆𑀤𑀯𑀺𑀤𑀽 𑀅𑀭𑀳𑀢𑁆𑀣𑀁 𑀢𑀸𑀬-𑀲𑀤𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀖𑀸𑀢𑁂𑀢𑀸𑀬𑀦𑁆𑀢𑀺 𑀭𑀽𑀧𑀲𑀺𑀤𑁆𑀥𑀺𑀁 𑀇𑀘𑁆𑀙𑀦𑁆𑀢𑀻𑀢𑀺 𑀆𑀳 ‘‘𑀖𑀸𑀢𑀸𑀭𑀳’’𑀦𑁆𑀢𑀺. 𑀚𑀸𑀧𑁂𑀢𑀸𑀬𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀢𑁆𑀢𑀺𑀢𑀼𑀜𑁆𑀘 𑀫𑀭𑀳𑀢𑀻𑀢𑀺 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀯𑀺𑀲𑁂𑀲𑁂𑀢𑁆𑀯𑀸 𑀤𑀻𑀧𑁂𑀢𑀻𑀢𑀺 ‘‘𑀯𑀢𑁆𑀢𑀢𑀺’’𑀇𑀘𑁆𑀘𑁂𑀯 𑀅𑀯𑀢𑁆𑀯𑀸 ‘‘𑀯𑀢𑁆𑀢𑀺𑀢𑀼𑀜𑁆𑀘 𑀫𑀭𑀳𑀢𑀻’’𑀢𑀺 𑀤𑀼𑀢𑀺𑀬𑁂𑀦 𑀧𑀤𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀯𑀺𑀲𑁂𑀲𑁂𑀢𑁆𑀯𑀸 𑀤𑀻𑀧𑁂𑀢𑀺.

𑀧𑀸𑀲𑀸𑀤𑀺𑀓𑀁 𑀅𑀪𑀺𑀭𑀽𑀧𑀦𑁆𑀢𑀺 𑀅𑀪𑀺𑀫𑀢𑀭𑀽𑀧𑀲𑀫𑁆𑀧𑀦𑁆𑀦𑀁 𑀲𑀩𑁆𑀩𑀸𑀯𑀬𑀯𑀁. 𑀢𑀢𑁄 𑀏𑀯 𑀲𑀼𑀲𑀚𑁆𑀚𑀺𑀢𑀁 𑀲𑀩𑁆𑀩𑀓𑀸𑀮𑀁 𑀲𑀼𑀝𑁆𑀞𑀼 𑀲𑀚𑁆𑀚𑀺𑀢𑀸𑀓𑀸𑀭𑀫𑁂𑀯. 𑀏𑀯𑀁𑀯𑀺𑀥𑀦𑁆𑀢𑀺 𑀬𑀸𑀤𑀺𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀺 ‘‘𑀤𑀼𑀩𑁆𑀩𑀡𑁆𑀡’’𑀦𑁆𑀢𑀺𑀆𑀤𑀺𑀦𑀸. 𑀇𑀫𑀲𑁆𑀫𑀺𑀁 𑀞𑀸𑀦𑁂𑀢𑀺 ‘‘𑀯𑀢𑁆𑀢𑀢𑀺 𑀢𑁂 𑀢𑀲𑁆𑀫𑀺𑀁 𑀭𑀽𑀧𑁂 𑀯𑀲𑁄’’𑀢𑀺 𑀏𑀢𑀲𑁆𑀫𑀺𑀁 𑀓𑀸𑀭𑀡𑀕𑁆𑀕𑀳𑀡𑁂. 𑀓𑀸𑀭𑀡𑀜𑁆𑀳𑁂𑀢𑀁 𑀪𑀕𑀯𑀢𑀸 𑀕𑀳𑀺𑀢𑀁 ‘‘𑀯𑀢𑁆𑀢𑀢𑀺…𑀧𑁂… 𑀫𑀸 𑀅𑀳𑁄𑀲𑀻’’𑀢𑀺. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 𑀭𑀽𑀧𑀁 𑀅𑀦𑀢𑁆𑀢𑀸 𑀅𑀯𑀲𑀯𑀢𑁆𑀢𑀦𑀢𑁄, 𑀬𑀜𑁆𑀳𑀺 𑀯𑀲𑁂 𑀦 𑀯𑀢𑁆𑀢𑀢𑀺, 𑀢𑀁 𑀅𑀦𑀢𑁆𑀢𑀓𑀫𑁂𑀯 𑀤𑀺𑀝𑁆𑀞𑀁 𑀬𑀣𑀸 𑀢𑀁 𑀲𑀫𑁆𑀧𑀢𑁆𑀢𑀺. 𑀯𑀸𑀤𑀦𑁆𑀢𑀺 𑀤𑁄𑀲𑀁 𑀦𑀺𑀕𑁆𑀕𑀳𑀁 𑀆𑀭𑁄𑀧𑁂𑀲𑁆𑀲𑀢𑀺. 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀢𑀻𑀢𑀺 𑀲𑀳𑀥𑀫𑁆𑀫𑀺𑀓𑀲𑀸𑀓𑀘𑁆𑀙𑀸𑀳𑀺 𑀢𑀣𑀸𑀕𑀢𑁂, 𑀧𑀼𑀘𑁆𑀙𑀦𑁆𑀢𑁂 𑀅𑀩𑁆𑀬𑀸𑀓𑀭𑀡𑁂𑀦 𑀯𑀺𑀳𑁂𑀲𑀸𑀬 𑀓𑀬𑀺𑀭𑀫𑀸𑀦𑀢𑁆𑀢𑀸 𑀢𑀢𑀺𑀬𑁂 𑀯𑀸𑀭𑁂 𑀥𑀫𑁆𑀫𑀢𑀸𑀯𑀲𑁂𑀦 𑀯𑀺𑀳𑁂𑀲𑀓𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀢𑀺 𑀬𑀣𑀸 𑀢𑀁 𑀲𑀩𑁆𑀩𑀜𑁆𑀜𑀼𑀧𑀝𑀺𑀜𑁆𑀜𑀸𑀬 𑀪𑀕𑀯𑀢𑁄 𑀲𑀫𑁆𑀫𑀼𑀔𑀪𑀸𑀯𑀽𑀧𑀕𑀫𑀦𑁂. 𑀯𑀚𑀺𑀭𑀧𑀸𑀡𑀺 𑀧𑀦 𑀓𑀲𑁆𑀫𑀸 𑀞𑀺𑀢𑁄 𑀳𑁄𑀢𑀻𑀢𑀺? 𑀪𑀕𑀯𑀸 𑀯𑀺𑀬 𑀅𑀦𑀼𑀓𑀫𑁆𑀧𑀫𑀸𑀦𑁄 𑀫𑀳𑀦𑁆𑀢𑀁 𑀪𑀬𑀸𑀦𑀓𑀁 𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀢𑀸𑀲𑁂𑀢𑁆𑀯𑀸 𑀇𑀫𑀁 𑀤𑀺𑀝𑁆𑀞𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀫𑀻𑀢𑀺 𑀢𑀲𑁆𑀲 𑀧𑀼𑀭𑀢𑁄 𑀆𑀓𑀸𑀲𑁂 𑀯𑀚𑀺𑀭𑀁 𑀆𑀳𑀭𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀦 𑀫𑀼𑀤𑁆𑀥𑀁 𑀨𑀸𑀮𑁂𑀢𑀼𑀓𑀸𑀫𑁄. 𑀦 𑀳𑀺 𑀪𑀕𑀯𑀢𑁄 𑀧𑀼𑀭𑀢𑁄 𑀓𑀲𑁆𑀲𑀘𑀺 𑀅𑀦𑀢𑁆𑀣𑁄 𑀦𑀸𑀫 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀓𑀁𑀲𑀢𑁄 𑀲𑀳𑀥𑀫𑁆𑀫𑀺𑀓𑀫𑁂𑀯 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀘𑁆𑀙𑀺𑀢𑁂’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀆𑀤𑀺𑀢𑁆𑀢𑀦𑁆𑀢𑀺 𑀤𑀺𑀧𑁆𑀧𑀫𑀸𑀦𑀁. 𑀅𑀓𑁆𑀔𑀺𑀦𑀸𑀲𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀏𑀴𑀓𑀲𑀻𑀲𑀲𑀤𑀺𑀲𑀓𑁂𑀲𑀫𑀲𑁆𑀲𑀼𑀆𑀤𑀻𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀤𑀺𑀝𑁆𑀞𑀺𑀯𑀺𑀲𑁆𑀲𑀚𑁆𑀚𑀸𑀧𑀦𑀢𑁆𑀣’’𑀦𑁆𑀢𑀺 𑀯𑀢𑁆𑀯𑀸 𑀦𑀬𑀺𑀤𑀁 𑀬𑀤𑀺𑀘𑁆𑀙𑀸𑀯𑀲𑁂𑀦 𑀆𑀕𑀫𑀦𑀁, 𑀅𑀣 𑀔𑁄 𑀆𑀤𑀺𑀢𑁄 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀅𑀢𑁆𑀢𑀦𑀸 𑀓𑀢𑀧𑀝𑀺𑀜𑁆𑀜𑀸𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀦𑁆𑀢𑀺 𑀯𑀚𑀺𑀭𑀧𑀸𑀡𑀺𑀁. 𑀢𑀁 𑀲𑀘𑁆𑀘𑀓𑀲𑁆𑀲 𑀧𑀝𑀺𑀜𑁆𑀜𑀸𑀬 𑀧𑀭𑀺𑀯𑀢𑁆𑀢𑀦𑀓𑀸𑀭𑀡𑀁. 𑀅𑀜𑁆𑀜𑁂𑀧𑀺 𑀦𑀼 𑀔𑁄𑀢𑀺𑀆𑀤𑀺 𑀲𑀘𑁆𑀘𑀓𑀲𑁆𑀲 𑀯𑀻𑀫𑀁𑀲𑀓𑀪𑀸𑀯𑀤𑀲𑁆𑀲𑀦𑀁. 𑀅𑀯𑀻𑀫𑀁𑀲𑀓𑁂𑀦 𑀳𑀺 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀬𑀓𑁆𑀔𑁄𑀢𑀺 𑀯𑀤𑁂𑀬𑁆𑀬, 𑀢𑁂𑀦𑀲𑁆𑀲 𑀅𑀲𑀸𑀭𑀼𑀧𑁆𑀧𑀁 𑀲𑀺𑀬𑀸, 𑀅𑀬𑀁 𑀧𑀦 𑀅𑀜𑁆𑀜𑁂𑀲𑀁 𑀅𑀪𑀻𑀢𑀪𑀸𑀯𑀁 𑀉𑀧𑀥𑀸𑀭𑁂𑀢𑁆𑀯𑀸 ‘‘𑀅𑀤𑁆𑀥𑀸𑀫𑁂 𑀬𑀓𑁆𑀔𑀁 𑀦 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀫𑀬𑁆𑀳𑀫𑁂𑀯 𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀢𑀻𑀭𑁂𑀢𑁆𑀯𑀸 𑀬𑀼𑀢𑁆𑀢𑀧𑁆𑀧𑀢𑁆𑀢𑀯𑀲𑁂𑀦 𑀧𑀝𑀺𑀧𑀚𑁆𑀚𑀺.

𑁩𑁫𑁮. 𑀉𑀧𑀥𑀸𑀭𑁂𑀢𑁆𑀯𑀸𑀢𑀺 𑀩𑁆𑀬𑀸𑀓𑀸𑀢𑀩𑁆𑀩𑀫𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸. 𑀏𑀲𑁂𑀯 𑀦𑀬𑁄𑀢𑀺 𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑁂𑀲𑀼𑀧𑀺 𑀲𑀜𑁆𑀜𑀸𑀬 𑀯𑀺𑀬 𑀦𑀬𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦𑀸𑀢𑀺 ‘‘𑀅𑀓𑀼𑀲𑀮𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀫𑀸 𑀅𑀳𑁄𑀲𑀺, 𑀅𑀓𑀼𑀲𑀮𑀸 𑀤𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸 𑀫𑀸 𑀅𑀳𑁄𑀲𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀧𑁆𑀧𑀤𑀝𑁆𑀞𑀯𑀺𑀲𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀧𑁆𑀧𑀤𑀝𑁆𑀞𑀝𑁆𑀞𑀸𑀦𑁂 𑀲𑀭𑀻𑀭𑀧𑀤𑁂𑀲𑁂 𑀧𑀢𑀺𑀢𑀁 𑀯𑀺𑀲𑀁. 𑀅𑀮𑁆𑀮𑀻𑀦𑁄𑀢𑀺 𑀲𑀁𑀲𑀺𑀮𑀺𑀝𑁆𑀞𑁄. 𑀉𑀧𑀕𑀢𑁄𑀢𑀺 𑀦 𑀅𑀧𑀕𑀢𑁄. 𑀅𑀚𑁆𑀛𑁄𑀲𑀺𑀢𑁄𑀢𑀺 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀞𑀺𑀢𑁄. 𑀧𑀭𑀺𑀢𑁄 𑀚𑀸𑀦𑁂𑀬𑁆𑀬𑀸𑀢𑀺 𑀲𑀫𑀦𑁆𑀢𑀢𑁄 𑀲𑀩𑁆𑀩𑀲𑁄 𑀓𑀺𑀜𑁆𑀘𑀺𑀧𑀺 𑀅𑀲𑁂𑀲𑁂𑀢𑁆𑀯𑀸 𑀚𑀸𑀦𑁂𑀬𑁆𑀬. 𑀧𑀭𑀺𑀓𑁆𑀔𑁂𑀧𑁂𑀢𑁆𑀯𑀸𑀢𑀺 𑀆𑀬𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑀯𑀲𑁂𑀦 𑀲𑀩𑁆𑀩𑀲𑁄 𑀔𑁂𑀧𑁂𑀢𑁆𑀯𑀸. 𑀢𑀣𑀸𑀪𑀽𑀢𑁄 𑀘𑀲𑁆𑀲 𑀔𑀬𑀯𑀬𑀁 𑀉𑀧𑀦𑁂𑀢𑀺 𑀦𑀸𑀫𑀸𑀢𑀺 𑀆𑀳 ‘‘𑀔𑀬𑀁 𑀯𑀬𑀁 𑀅𑀦𑀼𑀧𑁆𑀧𑀸𑀤𑀁 𑀉𑀧𑀦𑁂𑀢𑁆𑀯𑀸’’𑀢𑀺.

𑁩𑁫𑁯. 𑀅𑀢𑁆𑀢𑀦𑁄 𑀯𑀸𑀤𑀲𑁆𑀲 𑀅𑀲𑀸𑀭𑀪𑀸𑀯𑀢𑁄, 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀯𑀸 𑀲𑀸𑀭𑀲𑁆𑀲 𑀅𑀪𑀸𑀯𑀢𑁄 𑀅𑀦𑁆𑀢𑁄𑀲𑀸𑀭𑀯𑀺𑀭𑀳𑀺𑀢𑁄 𑀭𑀺𑀢𑁆𑀢𑁄. 𑀯𑀺𑀧𑁆𑀧𑀓𑀸𑀭𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀲𑀻𑀮𑀸𑀘𑀸𑀭𑀲𑁆𑀲 𑀘 𑀯𑀲𑁂𑀦 𑀯𑀺𑀭𑀽𑀧𑀢𑀁 𑀲𑀸𑀧𑀭𑀸𑀥𑀢𑀁 𑀲𑀸𑀯𑀚𑁆𑀚𑀢𑀁 𑀢𑁂𑀲𑀁 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸. 𑀲𑀺𑀦𑁆𑀦𑀧𑀢𑁆𑀢𑁄𑀢𑀺 𑀢𑀦𑀼𑀓𑀧𑀢𑁆𑀢𑁄. 𑀯𑀺𑀨𑀸𑀭𑀺𑀢𑀦𑁆𑀢𑀺 𑀯𑀺𑀨𑀸𑀴𑀺𑀢𑀁.

𑀅𑀲𑀸𑀭𑀓𑀭𑀼𑀓𑁆𑀔𑀧𑀭𑀺𑀘𑀺𑀢𑁄𑀢𑀺 𑀧𑀮𑀸𑀲𑀸𑀤𑀺𑀅𑀲𑀸𑀭𑀭𑀼𑀓𑁆𑀔𑀓𑁄𑀝𑁆𑀝𑀦𑁂 𑀓𑀢𑀧𑀭𑀺𑀘𑀬𑁄. 𑀣𑀤𑁆𑀥𑀪𑀸𑀯𑀦𑁆𑀢𑀺 𑀯𑀺𑀧𑀓𑁆𑀓𑀪𑀸𑀯𑀁, 𑀢𑀺𑀓𑁆𑀔𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀻𑀢𑀺 𑀲𑀤𑀸 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀧𑀭𑀺𑀲𑀢𑀻𑀢𑀺 𑀘𑀢𑀼𑀧𑀭𑀺𑀲𑀫𑀚𑁆𑀛𑁂. 𑀢𑀣𑀸 𑀳𑀺 ‘‘𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀲𑀭𑀻𑀭𑀸’’𑀢𑀺 𑀯𑀼𑀢𑁆𑀢𑀁. 𑀬𑀦𑁆𑀢𑀸𑀭𑀼𑀴𑁆𑀳𑀲𑁆𑀲 𑀯𑀺𑀬𑀸𑀢𑀺 𑀩𑁆𑀬𑀸𑀓𑀭𑀡𑀢𑁆𑀣𑀁 𑀯𑀸𑀬𑀫𑀬𑀦𑁆𑀢𑀁 𑀆𑀭𑀼𑀴𑁆𑀳𑀲𑁆𑀲 𑀯𑀺𑀬.

𑁩𑁬𑁦. 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀻𑀢𑀺 𑀤𑀺𑀝𑁆𑀞𑀺𑀓𑀺𑀜𑁆𑀘𑀓𑀸𑀦𑀺. 𑀤𑀺𑀝𑁆𑀞𑀺𑀲𑀜𑁆𑀘𑀭𑀺𑀢𑀸𑀦𑀻𑀢𑀺 𑀤𑀺𑀝𑁆𑀞𑀺𑀢𑀸𑀴𑀦𑀸𑀦𑀺. 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀻𑀢𑀺 𑀤𑀺𑀝𑁆𑀞𑀺𑀇𑀜𑁆𑀚𑀺𑀢𑀸𑀦𑀺. 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸𑀢𑀺 𑀢𑁂𑀲𑀁 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀸𑀦𑀁 𑀇𑀜𑁆𑀚𑀺𑀢𑁂𑀦𑁂𑀯 𑀅𑀚𑁆𑀛𑀸𑀲𑀬𑀁 𑀚𑀸𑀦𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀇𑀫𑁂’’𑀢𑀺𑀆𑀤𑀺.

𑁩𑁬𑁧. 𑀬𑀲𑁆𑀫𑀺𑀁 𑀅𑀥𑀺𑀕𑀢𑁂 𑀧𑀼𑀕𑁆𑀕𑀮𑁄 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀲𑀸𑀭𑀤𑁄 𑀳𑁄𑀢𑀺 𑀧𑀭𑁂𑀳𑀺 𑀅𑀲𑀁𑀳𑀸𑀭𑀺𑀬𑁄, 𑀢𑀁 𑀜𑀸𑀡𑀁 𑀯𑀺𑀲𑀸𑀭𑀤𑀲𑁆𑀲 𑀪𑀸𑀯𑁄𑀢𑀺 𑀓𑀢𑁆𑀯𑀸 𑀯𑁂𑀲𑀸𑀭𑀚𑁆𑀚𑀦𑁆𑀢𑀺 𑀆𑀳 ‘‘𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄𑀢𑀺 𑀜𑀸𑀡𑀧𑁆𑀧𑀢𑁆𑀢𑁄’’𑀢𑀺. 𑀢𑀢𑁄 𑀏𑀯𑀫𑀲𑁆𑀲 𑀦 𑀧𑀭𑁄 𑀧𑀘𑁆𑀘𑁂𑀢𑀩𑁆𑀩𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑁄. 𑀦 𑀧𑀭𑁄 𑀧𑀢𑁆𑀢𑀺𑀬𑁄 𑀲𑀤𑁆𑀤𑀳𑀸𑀢𑀩𑁆𑀩𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀧𑀭𑀧𑁆𑀧𑀢𑁆𑀢𑀺𑀬𑁄. 𑀓𑀸𑀫𑀁 𑀲𑀘𑁆𑀘𑀓𑁄 𑀲𑁂𑀓𑁆𑀔𑀪𑀽𑀫𑀺 𑀅𑀲𑁂𑀓𑁆𑀔𑀪𑀽𑀫𑀻𑀢𑀺 𑀇𑀤𑀁 𑀲𑀸𑀲𑀦𑀯𑁄𑀳𑀸𑀭𑀁 𑀦 𑀚𑀸𑀦𑀸𑀢𑀺. 𑀧𑀲𑁆𑀲𑀢𑀻𑀢𑀺 𑀧𑀦 𑀤𑀲𑁆𑀲𑀦𑀓𑀺𑀭𑀺𑀬𑀸𑀬 𑀯𑀺𑀧𑁆𑀧𑀓𑀢𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀦 𑀏𑀢𑁆𑀢𑀸𑀯𑀢𑀸 𑀪𑀺𑀓𑁆𑀔𑀼𑀓𑀺𑀘𑁆𑀘𑀁 𑀧𑀭𑀺𑀬𑁄𑀲𑀺𑀢’’𑀦𑁆𑀢𑀺 𑀅𑀜𑁆𑀜𑀸𑀲𑀺, 𑀢𑀲𑁆𑀫𑀸 𑀧𑀼𑀦 ‘‘𑀓𑀺𑀢𑁆𑀢𑀸𑀯𑀢𑀸 𑀧𑀦𑀸’’𑀢𑀺 𑀧𑀼𑀘𑁆𑀙𑀁 𑀆𑀭𑀪𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸’’𑀢𑀺𑀆𑀤𑀺.

𑀬𑀣𑀸𑀪𑀽𑀢𑀁 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀁, 𑀯𑀺𑀲𑀺𑀝𑁆𑀞𑀝𑁆𑀞𑁂𑀦 𑀅𑀦𑀼𑀢𑁆𑀢𑀭𑀺𑀬𑀁, 𑀤𑀲𑁆𑀲𑀦𑀫𑁂𑀯 𑀅𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁, 𑀤𑀲𑁆𑀲𑀦𑁂𑀲𑀼 𑀯𑀸 𑀅𑀦𑀼𑀢𑁆𑀢𑀭𑀺𑀬𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁. 𑀮𑁄𑀓𑀺𑀬𑀧𑀜𑁆𑀜𑀸𑀢𑀺 𑀘𑁂𑀢𑁆𑀣 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀳𑀺 𑀲𑀩𑁆𑀩𑀮𑁄𑀓𑀺𑀬𑀧𑀜𑁆𑀜𑀸𑀳𑀺 𑀯𑀺𑀲𑀺𑀝𑁆𑀞𑀝𑁆𑀞𑁂𑀦 ‘‘𑀅𑀦𑀼𑀢𑁆𑀢𑀭𑀸’’𑀢𑀺 𑀯𑀼𑀢𑁆𑀢𑀸. 𑀮𑁄𑀓𑀺𑀬𑀧𑀝𑀺𑀧𑀤𑀸𑀦𑀼𑀢𑁆𑀢𑀭𑀺𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀸𑀦𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀯 𑀢𑀺𑀯𑀺𑀥𑀫𑁆𑀧𑀺 𑀅𑀦𑀼𑀢𑁆𑀢𑀭𑀺𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀤𑁆𑀥𑀮𑁄𑀓𑀼𑀢𑁆𑀢𑀭𑀫𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀲𑀩𑁆𑀩𑁂𑀲𑀫𑁆𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀅𑀦𑀼𑀢𑁆𑀢𑀭𑀪𑀸𑀯𑁂 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀅𑀕𑁆𑀕𑀫𑀕𑁆𑀕𑀧𑀜𑁆𑀜𑀸 𑀢𑀢𑁄 𑀉𑀢𑁆𑀢𑀭𑀺𑀢𑀭𑀲𑁆𑀲 𑀅𑀪𑀸𑀯𑀢𑁄 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁. 𑀢𑁂𑀦𑀸𑀳 ‘‘𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺. 𑀲𑁂𑀲𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀻𑀢𑀺 𑀲𑁂𑀲𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑀗𑁆𑀕𑀸𑀦𑀺. 𑀢𑀸𑀦𑀺 𑀳𑀺 𑀫𑀢𑁆𑀣𑀓𑀧𑁆𑀧𑀢𑁆𑀢𑀸𑀦𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺. 𑀅𑀕𑁆𑀕𑀨𑀮𑀯𑀺𑀫𑀼𑀢𑁆𑀢𑀻𑀢𑀺 𑀅𑀕𑁆𑀕𑀫𑀕𑁆𑀕𑀲𑁆𑀲 𑀨𑀮𑀯𑀺𑀫𑀼𑀢𑁆𑀢𑀺 𑀅𑀭𑀳𑀢𑁆𑀢𑀨𑀮𑀁. 𑀔𑀻𑀡𑀸𑀲𑀯𑀲𑁆𑀲𑀸𑀢𑀺 𑀲𑀩𑁆𑀩𑀲𑁄 𑀔𑀻𑀬𑀫𑀸𑀦𑀸𑀲𑀯𑀲𑁆𑀲. 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀦𑁆𑀢𑀺 𑀅𑀕𑁆𑀕𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀫𑀸𑀳. 𑀢𑀢𑁆𑀣 𑀫𑀕𑁆𑀕𑀗𑁆𑀕𑀸𑀦𑀻𑀢𑀺 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀺. 𑀘𑀢𑀼𑀲𑀘𑁆𑀘𑀦𑁆𑀢𑁄𑀕𑀥𑀢𑁆𑀢𑀸 𑀲𑀩𑁆𑀩𑀲𑁆𑀲 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀲𑀘𑁆𑀘𑀸𑀦𑀼𑀕𑀢𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑁂𑀦𑁂𑀯 𑀳𑀺 𑀪𑀕𑀯𑀢𑁄 𑀲𑀩𑁆𑀩𑀲𑁄 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀁. 𑀦𑀺𑀩𑁆𑀩𑀺𑀲𑁂𑀯𑀦𑁄𑀢𑀺 𑀦𑀺𑀭𑀼𑀤𑁆𑀥𑀓𑀺𑀮𑁂𑀲𑀯𑀺𑀲𑁂𑀯𑀦𑁄.

𑁩𑁬𑁨. 𑀥𑀁𑀲𑀻𑀢𑀺 𑀅𑀦𑀼𑀤𑁆𑀥𑀁𑀲𑀦𑀲𑀻𑀮𑀸. 𑀅𑀦𑀼𑀧𑀳𑀢𑀦𑁆𑀢𑀺 𑀅𑀯𑀺𑀓𑁆𑀔𑀺𑀢𑁆𑀢𑀁. 𑀲𑀓𑀮𑀦𑁆𑀢𑀺 𑀅𑀦𑀽𑀦𑀁. 𑀓𑀸𑀬𑀗𑁆𑀕𑀦𑁆𑀢𑀺 𑀓𑀸𑀬𑀫𑁂𑀯 𑀅𑀗𑁆𑀕𑀦𑁆𑀢𑀺 𑀯𑀤𑀦𑁆𑀢𑀺, 𑀓𑀸𑀬𑀲𑀗𑁆𑀔𑀸𑀢𑀁 𑀅𑀗𑁆𑀕𑀁 𑀲𑀻𑀲𑀸𑀤𑀺𑀅𑀯𑀬𑀯𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 ‘‘𑀳𑁄𑀢𑀼, 𑀲𑀸𑀥𑀽’’𑀢𑀺 𑀏𑀯𑀫𑀺𑀤𑀁 𑀯𑀸𑀘𑀸𑀬 𑀅𑀯𑀬𑀯𑁄 𑀯𑀸𑀘𑀗𑁆𑀕𑀦𑁆𑀢𑀺.

𑁩𑁬𑁩. 𑀆𑀳𑀭𑀦𑁆𑀢𑀻𑀢𑀺 𑀅𑀪𑀺𑀳𑀭𑀦𑁆𑀢𑀺. 𑀧𑀼𑀜𑁆𑀜𑀦𑁆𑀢𑀺 𑀧𑀼𑀜𑁆𑀜𑀨𑀮𑀲𑀗𑁆𑀔𑀸𑀢𑁄 𑀆𑀦𑀼𑀪𑀸𑀯𑁄. 𑀧𑀼𑀜𑁆𑀜𑀨𑀮𑀫𑁆𑀧𑀺 𑀳𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀧𑀼𑀜𑁆𑀜’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑁋 ‘‘𑀓𑀼𑀲𑀮𑀸𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀲𑀫𑀸𑀤𑀸𑀦𑀳𑁂𑀢𑀼 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁮𑁦). 𑀢𑁂𑀦𑀸𑀳 ‘‘𑀆𑀬𑀢𑀺𑀁 𑀯𑀺𑀧𑀸𑀓𑀓𑁆𑀔𑀦𑁆𑀥𑀸’’𑀢𑀺. 𑀧𑀼𑀜𑁆𑀜𑀫𑀳𑀻𑀢𑀺 𑀫𑀳𑀢𑀺 𑀧𑀼𑀜𑁆𑀜𑀨𑀮𑀯𑀺𑀪𑀽𑀢𑀺 𑀲𑁂𑀢𑀘𑁆𑀙𑀢𑁆𑀢𑀫𑀓𑀼𑀝𑀘𑀸𑀫𑀭𑀸𑀤𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁𑀬𑁂𑀯 𑀧𑀭𑀺𑀯𑀸𑀭𑁄’’𑀢𑀺. 𑀮𑀺𑀘𑁆𑀙𑀯𑀻𑀳𑀺 𑀧𑁂𑀲𑀺𑀢𑁂𑀦 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀲𑀲𑀸𑀯𑀓𑀲𑀗𑁆𑀖𑁄 𑀫𑀬𑀸 𑀧𑀭𑀺𑀯𑀺𑀲𑀺𑀢𑁄, 𑀢𑀲𑁆𑀫𑀸 𑀮𑀺𑀘𑁆𑀙𑀯𑀻𑀦𑀫𑁂𑀯 𑀢𑀁 𑀧𑀼𑀜𑁆𑀜𑀁 𑀳𑁄𑀢𑀻𑀢𑀺. 𑀢𑁂𑀦𑀸𑀳 ‘‘𑀢𑀁 𑀤𑀸𑀬𑀓𑀸𑀦𑀁 𑀲𑀼𑀔𑀸𑀬 𑀳𑁄𑀢𑀽’’𑀢𑀺. 𑀬𑀲𑁆𑀫𑀸 𑀧𑀦 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀲𑀘𑁆𑀘𑀓𑁂𑀦 𑀤𑀸𑀦𑀁 𑀤𑀺𑀦𑁆𑀦𑀁, 𑀦 𑀮𑀺𑀘𑁆𑀙𑀯𑀻𑀳𑀺, 𑀢𑀲𑁆𑀫𑀸 𑀪𑀕𑀯𑀸 𑀲𑀘𑁆𑀘𑀓𑀲𑁆𑀲 𑀲𑀢𑀺𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 ‘‘𑀬𑀁 𑀔𑁄’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀢𑀺 𑀪𑀕𑀯𑀸’’𑀢𑀺𑀆𑀤𑀺. 𑀦𑀺𑀕𑀡𑁆𑀞𑀲𑁆𑀲 𑀫𑀢𑁂𑀦 𑀯𑀺𑀦𑀸𑀬𑁂𑀯𑀸𑀢𑀺 𑀲𑀘𑁆𑀘𑀓𑀲𑁆𑀲 𑀘𑀺𑀢𑁆𑀢𑁂𑀦 𑀯𑀺𑀦𑀸 𑀏𑀯 𑀢𑀲𑁆𑀲 𑀤𑀓𑁆𑀔𑀺𑀡𑀁 𑀔𑁂𑀢𑁆𑀢𑀕𑀢𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀤𑀺𑀦𑁆𑀦𑀁 𑀤𑀓𑁆𑀔𑀺𑀡𑀁…𑀧𑁂… 𑀦𑀺𑀬𑁆𑀬𑀸𑀢𑁂𑀲𑀻’’𑀢𑀺.

𑀘𑀽𑀴𑀲𑀘𑁆𑀘𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀫𑀳𑀸𑀲𑀘𑁆𑀘𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀻𑀢𑀺 𑀇𑀫𑀺𑀦𑀸 𑀢𑀤𑀸 𑀪𑀕𑀯𑀢𑁄 𑀯𑁂𑀲𑀸𑀮𑀺𑀬𑀁 𑀦𑀺𑀯𑀸𑀲𑀧𑀭𑀺𑀘𑁆𑀙𑀺𑀦𑁆𑀦𑁄 𑀧𑀼𑀩𑁆𑀩𑀡𑁆𑀳𑀸𑀤𑀺𑀪𑁂𑀤𑁄 𑀲𑀩𑁆𑀩𑁄 𑀲𑀫𑀬𑁄 𑀲𑀸𑀥𑀸𑀭𑀡𑀢𑁄 𑀕𑀳𑀺𑀢𑁄, 𑀢𑀣𑀸 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀘 𑀇𑀫𑀺𑀦𑀸. 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀧𑀦 𑀇𑀫𑀺𑀦𑀸 𑀢𑀩𑁆𑀩𑀺𑀲𑁂𑀲𑁄, 𑀬𑁄 𑀪𑀺𑀓𑁆𑀔𑀸𑀘𑀸𑀭𑀢𑁆𑀣𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀢𑀻𑀳𑀺 𑀧𑀤𑁂𑀳𑀺 𑀏𑀓𑁄𑀯 𑀲𑀫𑀬𑁄 𑀯𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁 𑀯𑀺𑀲𑁂𑀲𑀲𑁆𑀲 𑀲𑀸𑀫𑀜𑁆𑀜𑀦𑁆𑀢𑁄𑀕𑀥𑀢𑁆𑀢𑀸. 𑀫𑀼𑀔𑀥𑁄𑀯𑀦𑀲𑁆𑀲 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀪𑀸𑀯𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁 ‘‘𑀫𑀼𑀔𑀁 𑀥𑁄𑀯𑀺𑀢𑁆𑀯𑀸’’𑀢𑀺. 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀏𑀯 𑀳𑀺 𑀯𑀸𑀲𑀥𑀼𑀭𑁄 𑀘𑁂, 𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀣𑀸𑀘𑀺𑀡𑁆𑀡𑀁 𑀪𑀸𑀯𑀦𑀸𑀦𑀼𑀬𑁄𑀕𑀁, 𑀕𑀦𑁆𑀣𑀥𑀼𑀭𑁄 𑀘𑁂, 𑀕𑀦𑁆𑀣𑀧𑀭𑀺𑀘𑀬𑁂 𑀓𑀢𑀺𑀧𑀬𑁂 𑀦𑀺𑀲𑀚𑁆𑀚𑀯𑀸𑀭𑁂 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀯𑀺𑀢𑀓𑁆𑀓𑀫𑀸𑀴𑀁 𑀉𑀧𑀕𑀘𑁆𑀙𑀢𑀺.

𑀓𑀸𑀭𑀡𑀁 𑀬𑀼𑀢𑁆𑀢𑀁, 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀬𑀣𑀸𑀘𑀺𑀦𑁆𑀢𑀺𑀢𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀅𑀜𑁆𑀜𑀁 𑀧𑀼𑀘𑁆𑀙𑀦𑁆𑀢𑁄 𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 𑀉𑀫𑁆𑀫𑀕𑁆𑀕𑀢𑁄 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀧𑀲𑁆𑀲𑁂𑀦 𑀢𑀸𑀯 𑀧𑀭𑀺𑀳𑀭𑀦𑁆𑀢𑁄’’𑀢𑀺.

𑁩𑁬𑁫. 𑀊𑀭𑀼𑀓𑁆𑀔𑀫𑁆𑀪𑁄𑀧𑀺 𑀦𑀸𑀫 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 𑀦𑀸𑀫-𑀲𑀤𑁆𑀤𑁄 𑀯𑀺𑀫𑁆𑀳𑀬𑀢𑁆𑀣𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀯𑀺𑀫𑁆𑀳𑀬𑀢𑁆𑀣𑀯𑀲𑁂𑀦𑀸’’𑀢𑀺𑀆𑀤𑀺. ‘‘𑀅𑀦𑁆𑀥𑁄 𑀦𑀸𑀫 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀯𑀺𑀫𑁆𑀳𑀬𑀯𑀸𑀘𑀻𑀲𑀤𑁆𑀤𑀬𑁄𑀕𑁂𑀦 𑀳𑀺 ‘‘𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀦𑀸𑀕𑀢𑀯𑀘𑀦𑀁. 𑀓𑀸𑀬𑀦𑁆𑀯𑀬𑀦𑁆𑀢𑀺 𑀓𑀸𑀬𑀸𑀦𑀼𑀕𑀢𑀁. ‘‘𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁩𑁭𑁯; 𑀫. 𑀦𑀺. 𑁧.𑁧𑁧𑁨; 𑀫. 𑀦𑀺. 𑁩.𑁧𑁫𑁪) 𑀓𑀸𑀬𑀲𑁆𑀲 𑀅𑀲𑀼𑀪𑀸𑀦𑀺𑀘𑁆𑀘𑀸𑀤𑀺𑀢𑀸𑀬 𑀅𑀦𑀼𑀧𑀲𑁆𑀲𑀦𑀸 𑀓𑀸𑀬𑀪𑀸𑀯𑀦𑀸𑀢𑀺 𑀆𑀳 ‘‘𑀓𑀸𑀬𑀪𑀸𑀯𑀦𑀸𑀢𑀺 𑀧𑀦 𑀯𑀺𑀧𑀲𑁆𑀲𑀦𑀸 𑀯𑀼𑀘𑁆𑀘𑀢𑀻’’𑀢𑀺. 𑀅𑀦𑀸𑀕𑀢𑀭𑀽𑀧𑀦𑁆𑀢𑀺 𑀅𑀪𑀻𑀢𑁂 𑀅𑀢𑁆𑀣𑁂 𑀅𑀦𑀸𑀕𑀢𑀲𑀤𑁆𑀤𑀸𑀭𑁄𑀧𑀦𑀁 𑀅𑀦𑀸𑀕𑀢𑀧𑁆𑀧𑀬𑁄𑀕𑁄 𑀦 𑀲𑀫𑁂𑀢𑀺. 𑀅𑀢𑁆𑀣𑁄𑀧𑀻𑀢𑀺 ‘‘𑀊𑀭𑀼𑀓𑁆𑀔𑀫𑁆𑀪𑁄𑀧𑀺 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀅𑀢𑁆𑀣𑁄𑀧𑀺 𑀦 𑀲𑀫𑁂𑀢𑀺. 𑀅𑀬𑀦𑁆𑀢𑀺 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄. 𑀢𑁂𑀲𑀦𑁆𑀢𑀺 𑀦𑀺𑀕𑀡𑁆𑀞𑀸𑀦𑀁.

𑁩𑁬𑁬. 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑁂𑀢𑀓𑀸𑀬𑀪𑀸𑀯𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 𑀬𑁂 𑀢𑀁 𑀅𑀦𑀼𑀬𑀼𑀢𑁆𑀢𑀸, 𑀢𑁂 𑀦𑀸𑀫𑀕𑁄𑀢𑁆𑀢𑀢𑁄 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀦𑀦𑁆𑀤𑁄 𑀯𑀘𑁆𑀙𑁄’’𑀢𑀺𑀆𑀤𑀺𑀫𑀸𑀳. 𑀓𑀺𑀮𑀺𑀝𑁆𑀞𑀢𑀧𑀸𑀦𑀦𑁆𑀢𑀺 𑀓𑀸𑀬𑀲𑁆𑀲 𑀓𑀺𑀮𑁂𑀲𑀦𑀢𑀧𑀸𑀦𑀁 𑀧𑀼𑀕𑁆𑀕𑀮𑀸𑀦𑀁. 𑀚𑀸𑀢𑀫𑁂𑀤𑀦𑁆𑀢𑀺 𑀫𑁂𑀤𑀪𑀸𑀯𑀸𑀧𑀢𑁆𑀢𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀫𑁂𑀤𑀁. 𑀧𑀼𑀭𑀺𑀫𑀁 𑀧𑀳𑀸𑀬𑀸𑀢𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑁂𑀦 𑀅𑀦𑀸𑀳𑀸𑀭𑀅𑀧𑁆𑀧𑀸𑀳𑀸𑀭𑀢𑀸𑀤𑀺𑀯𑀲𑁂𑀦 𑀓𑀸𑀬𑀲𑁆𑀲 𑀅𑀧𑀘𑀺𑀦𑀦𑀁 𑀔𑁂𑀤𑀦𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸. 𑀓𑀸𑀬𑀪𑀸𑀯𑀦𑀸 𑀧𑀦 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀦𑀺𑀬𑀫𑀁 𑀧𑀭𑀫𑀢𑁆𑀣𑀢𑁄 𑀓𑀸𑀬𑀪𑀸𑀯𑀦𑀸𑀧𑀺 𑀢𑀯 𑀜𑀸𑀡𑁂𑀦 𑀦 𑀜𑀸𑀬𑀢𑀺, 𑀲𑁂𑀲𑀢𑁄𑀧𑀺 𑀦 𑀤𑀺𑀲𑁆𑀲𑀢𑀺.

𑁩𑁬𑁭. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂𑀢𑀺 ‘‘𑀓𑀸𑀬𑀪𑀸𑀯𑀦𑀫𑁆𑀧𑀺 𑀔𑁄 𑀢𑁆𑀯𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀦 𑀅𑀜𑁆𑀜𑀸𑀲𑀺, 𑀓𑀼𑀢𑁄 𑀧𑀦 𑀢𑁆𑀯𑀁 𑀘𑀺𑀢𑁆𑀢𑀪𑀸𑀯𑀦𑀁 𑀚𑀸𑀦𑀺𑀲𑁆𑀲𑀲𑀻’’𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂. 𑀢𑀣𑀸 ‘‘𑀬𑁄 𑀢𑁆𑀯𑀁 𑀏𑀯𑀁 𑀑𑀴𑀸𑀭𑀺𑀓𑀁 𑀤𑀼𑀩𑁆𑀩𑀮𑀁 𑀓𑀸𑀬𑀪𑀸𑀯𑀦𑀁 𑀦 𑀚𑀸𑀦𑀸𑀲𑀺, 𑀲𑁄 𑀢𑁆𑀯𑀁 𑀓𑀼𑀢𑁄 𑀲𑀦𑁆𑀢𑀲𑀼𑀔𑀼𑀫𑀁 𑀘𑀺𑀢𑁆𑀢𑀪𑀸𑀯𑀦𑀁 𑀚𑀸𑀦𑀺𑀲𑁆𑀲𑀲𑀻’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑀯𑀡𑁆𑀡𑀦𑀸𑀞𑀸𑀦𑁂. 𑀅𑀩𑀼𑀤𑁆𑀥𑀯𑀘𑀦𑀁 𑀦𑀸𑀫𑁂𑀢𑀁 𑀧𑀤𑀦𑁆𑀢𑀺 𑀓𑀸𑀬𑀪𑀸𑀯𑀦𑀸𑀲𑀜𑁆𑀜𑀺𑀢𑀯𑀺𑀧𑀲𑁆𑀲𑀦𑀸𑀢𑁄 𑀘𑀺𑀢𑁆𑀢𑀪𑀸𑀯𑀦𑀸 𑀲𑀦𑁆𑀢𑀸, 𑀯𑀺𑀧𑀲𑁆𑀲𑀦𑀸 𑀧𑀦 𑀧𑀸𑀤𑀓𑀚𑁆𑀛𑀸𑀦𑀢𑁄 𑀑𑀴𑀸𑀭𑀺𑀓𑀸 𑀘𑁂𑀯 𑀤𑀼𑀩𑁆𑀩𑀮𑀸 𑀘𑀸𑀢𑀺 𑀅𑀬𑀜𑁆𑀘 𑀏𑀢𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑁄. ‘‘𑀅𑀩𑀼𑀤𑁆𑀥𑀯𑀘𑀦𑀁 𑀦𑀸𑀫𑁂𑀢𑀁 𑀯𑀘𑀦𑀁 𑀲𑀺𑀬𑀸’’𑀢𑀺 𑀯𑀢𑁆𑀯𑀸 𑀣𑁂𑀭𑁄 𑀧𑀓𑁆𑀓𑀫𑀺𑀢𑀼𑀁 𑀆𑀭𑀪𑀢𑀺. 𑀅𑀣 𑀦𑀁 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 ‘‘𑀯𑀺𑀧𑀲𑁆𑀲𑀦𑀸 𑀦𑀸𑀫𑁂𑀲𑀸 𑀦 𑀆𑀤𑀺𑀢𑁄 𑀲𑀼𑀩𑁆𑀭𑀽𑀳𑀺𑀢𑀸 𑀩𑀮𑀯𑀢𑀻 𑀢𑀺𑀓𑁆𑀔𑀸 𑀯𑀺𑀲𑀤𑀸 𑀳𑁄𑀢𑀺, 𑀢𑀲𑁆𑀫𑀸 𑀢𑀭𑀼𑀡𑀯𑀲𑁂𑀦𑀸𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂’’𑀢𑀺 𑀲𑀼𑀢𑁆𑀢𑀧𑀤𑀁 (𑀲𑀁. 𑀦𑀺. 𑁨.𑁬𑁨) 𑀆𑀳𑀭𑀺. 𑀢𑀢𑁆𑀣 𑀆𑀤𑀸𑀦𑀦𑁆𑀢𑀺 𑀧𑀝𑀺𑀲𑀦𑁆𑀥𑀺. 𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀘𑀼𑀢𑀺. 𑀑𑀴𑀸𑀭𑀺𑀓𑀦𑁆𑀢𑀺 𑀅𑀭𑀽𑀧𑀥𑀫𑁆𑀫𑁂𑀳𑀺 𑀤𑀼𑀝𑁆𑀞𑀼𑀮𑁆𑀮𑀪𑀸𑀯𑀢𑁆𑀢𑀸 𑀑𑀴𑀸𑀭𑀺𑀓𑀁. 𑀓𑀸𑀬𑀦𑁆𑀢𑀺 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀲𑀫𑀽𑀳𑀪𑀽𑀢𑀁 𑀓𑀸𑀬𑀁. 𑀑𑀴𑀸𑀭𑀺𑀓𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀑𑀴𑀸𑀭𑀺𑀓𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀆𑀤𑀸𑀦𑀫𑁆𑀧𑀺 𑀦𑀺𑀓𑁆𑀔𑁂𑀧𑀦𑀫𑁆𑀧𑀻’’𑀢𑀺.

𑁩𑁬𑁮. 𑀲𑀼𑀔𑀲𑀸𑀭𑀸𑀕𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀼𑀔𑀯𑁂𑀤𑀦𑀸𑀬 𑀩𑀮𑀯𑀢𑀭𑀭𑀸𑀕𑁂𑀦 𑀲𑀫𑀗𑁆𑀕𑀻𑀪𑀽𑀢𑁄. 𑀧𑀝𑁆𑀞𑀸𑀦𑁂 𑀧𑀝𑀺𑀲𑀺𑀤𑁆𑀥𑀸 𑀅𑀯𑀘𑀦𑁂𑀦𑁂𑀯. 𑀢𑀲𑁆𑀫𑀸𑀢𑀺 𑀲𑀼𑀔𑁂 𑀞𑀺𑀢𑁂 𑀏𑀯 𑀤𑀼𑀓𑁆𑀔𑀲𑁆𑀲𑀸𑀦𑀼𑀧𑁆𑀧𑀚𑁆𑀚𑀦𑀢𑁄. 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑁄𑀥𑀸 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁, 𑀦 𑀅𑀦𑀦𑁆𑀢𑀭𑀸𑀯 𑀉𑀧𑁆𑀧𑀚𑁆𑀚𑀦𑀢𑁄. 𑀔𑁂𑀧𑁂𑀢𑁆𑀯𑀸𑀢𑀺 𑀓𑀼𑀲𑀮𑀸𑀦𑀺 𑀔𑁂𑀧𑁂𑀢𑁆𑀯𑀸. 𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀏𑀯 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸. 𑀉𑀪𑀢𑁄𑀧𑀓𑁆𑀔𑀁 𑀳𑀼𑀢𑁆𑀯𑀸𑀢𑀺 ‘‘𑀓𑀤𑀸𑀘𑀺 𑀲𑀼𑀔𑀯𑁂𑀤𑀦𑀸, 𑀓𑀤𑀸𑀘𑀺 𑀤𑀼𑀓𑁆𑀔𑀯𑁂𑀤𑀦𑀸’’𑀢𑀺 𑀧𑀓𑁆𑀔𑀤𑁆𑀯𑀬𑀯𑀲𑁂𑀦𑀧𑀺 𑀯𑁂𑀤𑀦𑀸 𑀘𑀺𑀢𑁆𑀢𑀲𑁆𑀲 𑀧𑀭𑀺𑀬𑀸𑀤𑀸𑀬 𑀳𑁄𑀢𑀺 𑀬𑀣𑀸𑀓𑁆𑀓𑀫𑀁 𑀅𑀪𑀸𑀯𑀺𑀢𑀓𑀸𑀬𑀲𑁆𑀲 𑀅𑀪𑀸𑀯𑀺𑀢𑀘𑀺𑀢𑁆𑀢𑀲𑁆𑀲.

𑁩𑁬𑁯. 𑀯𑀺𑀧𑀲𑁆𑀲𑀦𑀸 𑀘 𑀲𑀼𑀔𑀲𑁆𑀲 𑀧𑀘𑁆𑀘𑀦𑀻𑀓𑀸𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀫𑀳𑀸𑀪𑀽𑀢𑀧𑀭𑀺𑀕𑁆𑀕𑀳𑀸𑀤𑀺𑀓𑀸𑀮𑁂 𑀩𑀳𑀺 𑀘𑀺𑀢𑁆𑀢𑀘𑀸𑀭𑀁 𑀦𑀺𑀲𑁂𑀥𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀏𑀯 𑀲𑀢𑀺𑀁 𑀲𑀁𑀳𑀭𑀦𑁆𑀢𑀲𑁆𑀲 𑀅𑀮𑀤𑁆𑀥𑀲𑁆𑀲𑀸𑀤𑀁 𑀓𑀸𑀬𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺, 𑀲𑀫𑁆𑀩𑀸𑀥𑁂 𑀯𑀚𑁂 𑀲𑀦𑁆𑀦𑀺𑀭𑀼𑀤𑁆𑀥𑁄 𑀕𑁄𑀕𑀡𑁄 𑀯𑀺𑀬 𑀯𑀺𑀳𑀜𑁆𑀜𑀢𑀺 𑀯𑀺𑀧𑁆𑀨𑀦𑁆𑀤𑀢𑀺, 𑀅𑀘𑁆𑀘𑀸𑀲𑀦𑁆𑀦𑀳𑁂𑀢𑀼𑀓𑀜𑁆𑀘 𑀲𑀭𑀻𑀭𑁂 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀔𑀲𑁆𑀲 𑀆𑀲𑀦𑁆𑀦𑀸’’𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺. 𑀅𑀤𑁆𑀥𑀸𑀦𑁂 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂𑀢𑀺 𑀫𑀳𑀸𑀪𑀽𑀢𑀧𑀭𑀺𑀕𑁆𑀕𑀳𑀸𑀤𑀺𑀯𑀲𑁂𑀦 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀭𑀻𑀭𑀧𑀤𑁂𑀲𑁂. 𑀤𑀼𑀓𑁆𑀔𑀁 𑀤𑀽𑀭𑀸𑀧𑀕𑀢𑀁 𑀳𑁄𑀢𑀺 𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀅𑀧𑁆𑀧𑀦𑀸𑀪𑀸𑀯𑀢𑁄. 𑀅𑀦𑀧𑁆𑀧𑀓𑀁 𑀯𑀺𑀧𑀼𑀮𑀁. 𑀲𑀼𑀔𑀦𑁆𑀢𑀺 𑀛𑀸𑀦𑀲𑀼𑀔𑀁. 𑀑𑀓𑁆𑀓𑀫𑀢𑀻𑀢𑀺 𑀛𑀸𑀦𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀯𑀲𑁂𑀦 𑀭𑀽𑀧𑀓𑀸𑀬𑀁 𑀅𑀦𑀼𑀧𑀯𑀺𑀲𑀢𑀺, 𑀦𑀸𑀫𑀓𑀸𑀬𑁄𑀓𑁆𑀓𑀫𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀓𑀸𑀬𑀧𑀲𑁆𑀲𑀤𑁆𑀥𑀺𑀓𑀫𑁆𑀫𑀺𑀓𑀲𑁆𑀲𑀧𑀺 𑀲𑀫𑁆𑀫𑀲𑀦𑀪𑀸𑀯𑀦𑀸 𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀓𑀲𑁆𑀲𑀘𑀺 𑀆𑀤𑀺𑀢𑁄𑀯 𑀓𑀸𑀬𑀓𑀺𑀮𑀫𑀣𑀘𑀺𑀢𑁆𑀢𑀼𑀧𑀖𑀸𑀢𑀸𑀧𑀺 𑀲𑀫𑁆𑀪𑀯𑀦𑁆𑀢𑀺, 𑀲𑀫𑀸𑀥𑀺𑀲𑁆𑀲 𑀧𑀦 𑀅𑀧𑀘𑁆𑀘𑀦𑀻𑀓𑀢𑁆𑀢𑀸 𑀲𑀺𑀦𑀺𑀤𑁆𑀥𑀪𑀸𑀯𑀢𑁄 𑀘 𑀦 𑀲𑀼𑀓𑁆𑀔𑀯𑀺𑀧𑀲𑁆𑀲𑀦𑀸 𑀯𑀺𑀬 𑀲𑀼𑀔𑀲𑁆𑀲 𑀯𑀺𑀧𑀘𑁆𑀘𑀦𑀻𑀓𑁄, 𑀅𑀦𑀼𑀓𑁆𑀓𑀫𑁂𑀦 𑀘 𑀤𑀼𑀓𑁆𑀔𑀁 𑀯𑀺𑀓𑁆𑀔𑀫𑁆𑀪𑁂𑀢𑀻𑀢𑀺 𑀆𑀳 ‘‘𑀬𑀣𑀸 𑀲𑀫𑀸𑀥𑀻’’𑀢𑀺. 𑀬𑀣𑀸 𑀲𑀫𑀸𑀥𑀺, 𑀯𑀺𑀧𑀲𑁆𑀲𑀦𑀸𑀬 𑀧𑀦𑁂𑀢𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀦 𑀘 𑀢𑀣𑀸 𑀯𑀺𑀧𑀲𑁆𑀲𑀦𑀸’’𑀢𑀺. 𑀢𑁂𑀦 𑀯𑀼𑀢𑁆𑀢𑀦𑁆𑀢𑀺 𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸 𑀲𑀼𑀔𑀲𑁆𑀲 𑀧𑀘𑁆𑀘𑀦𑀻𑀓𑀸, 𑀲𑀸 𑀘 𑀓𑀸𑀬𑀪𑀸𑀯𑀦𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀦𑁆𑀦𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀪𑀸𑀯𑀺𑀢𑀢𑁆𑀢𑀸 𑀓𑀸𑀬𑀲𑁆𑀲𑀸’’𑀢𑀺. 𑀢𑀣𑀸 𑀬𑀲𑁆𑀫𑀸 𑀲𑀫𑀸𑀥𑀺 𑀤𑀼𑀓𑁆𑀔𑀲𑁆𑀲 𑀧𑀘𑁆𑀘𑀦𑀻𑀓𑁄, 𑀲𑁄 𑀘 𑀘𑀺𑀢𑁆𑀢𑀪𑀸𑀯𑀦𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀦𑁆𑀦𑀸𑀧𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀪𑀸𑀯𑀺𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀬𑁄𑀚𑀦𑀸.

𑁩𑁭𑁦. 𑀕𑀼𑀡𑁂 𑀖𑀝𑁆𑀝𑁂𑀢𑁆𑀯𑀸𑀢𑀺 𑀅𑀧𑀤𑁂𑀲𑁂𑀦 𑀯𑀺𑀦𑀸 𑀲𑀫𑀻𑀧𑀫𑁂𑀯 𑀦𑁂𑀢𑁆𑀯𑀸. 𑀢𑀁 𑀯𑀢 𑀫𑀫 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀸 𑀲𑀼𑀔𑀸 𑀯𑁂𑀤𑀦𑀸 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀬𑁄𑀚𑀦𑀸.

𑁩𑁭𑁧. 𑀓𑀺𑀁 𑀦 𑀪𑀯𑀺𑀲𑁆𑀲𑀢𑀺, 𑀲𑀼𑀔𑀸𑀧𑀺 𑀤𑀼𑀓𑁆𑀔𑀸𑀧𑀺 𑀯𑁂𑀤𑀦𑀸 𑀬𑀣𑀸𑀧𑀘𑁆𑀘𑀬𑀁 𑀉𑀧𑁆𑀧𑀚𑁆𑀚𑀢𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀫𑀢𑁆𑀣𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀅𑀦𑀪𑀺𑀪𑀯𑀦𑀻𑀬𑀢𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀁. 𑀢𑀢𑁆𑀣 𑀢𑀸𑀯 𑀧𑀸𑀲𑀭𑀸𑀲𑀺𑀲𑀼𑀢𑁆𑀢𑁂 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀚𑁆𑀚𑀸 ‘‘𑀢𑀢𑁆𑀣𑁂𑀯 𑀦𑀺𑀲𑀻𑀤𑀺’’𑀦𑁆𑀢𑀺 𑀯𑀼𑀢𑁆𑀢𑀸. 𑀇𑀥 𑀫𑀳𑀸𑀲𑀘𑁆𑀘𑀓𑀲𑀼𑀢𑁆𑀢𑁂 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀤𑀼𑀓𑁆𑀓𑀭𑀘𑀭𑀡𑁂 𑀦𑀺𑀲𑀚𑁆𑀚𑀸 ‘‘𑀢𑀢𑁆𑀣𑁂𑀯 𑀦𑀺𑀲𑀻𑀤𑀺’’𑀦𑁆𑀢𑀺 𑀯𑀼𑀢𑁆𑀢𑀸.

𑁩𑁭𑁪. 𑀙𑀦𑁆𑀤𑀓𑀭𑀡𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀬𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀺𑀦𑁂𑀳𑀓𑀭𑀡𑀯𑀲𑁂𑀦𑀸𑀢𑀺 𑀲𑀺𑀦𑁂𑀳𑀦𑀯𑀲𑁂𑀦. 𑀫𑀼𑀘𑁆𑀙𑀸𑀓𑀭𑀡𑀯𑀲𑁂𑀦𑀸𑀢𑀺 𑀫𑁄𑀳𑀦𑀯𑀲𑁂𑀦 𑀧𑀫𑀸𑀤𑀸𑀧𑀸𑀤𑀦𑁂𑀦. 𑀯𑀺𑀧𑀸𑀲𑀸𑀓𑀭𑀡𑀯𑀲𑁂𑀦𑀸𑀢𑀺 𑀧𑀸𑀢𑀼𑀓𑀫𑁆𑀬𑀢𑀸𑀯𑀲𑁂𑀦. 𑀅𑀦𑀼𑀤𑀳𑀦𑀯𑀲𑁂𑀦𑀸𑀢𑀺 𑀭𑀸𑀕𑀕𑁆𑀕𑀺𑀦𑀸 𑀅𑀦𑀼𑀤𑀳𑀦𑀯𑀲𑁂𑀦. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀯𑁂𑀯𑀘𑀦𑀫𑁂𑀯 𑀯𑀝𑁆𑀝𑀦𑀺𑀲𑁆𑀲𑀭𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀅𑀮𑁆𑀮𑀕𑁆𑀕𑀳𑀡𑁂𑀦 𑀓𑀺𑀮𑁂𑀲𑀸𑀦𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀲𑀲𑁆𑀦𑁂𑀳𑀕𑁆𑀕𑀳𑀡𑁂𑀦 𑀅𑀯𑀺𑀓𑁆𑀔𑀫𑁆𑀪𑀺𑀢𑀪𑀸𑀯𑀁, 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑀪𑀸𑀯𑀕𑁆𑀕𑀳𑀡𑁂𑀦 𑀲𑀫𑀼𑀤𑀸𑀘𑀸𑀭𑀸𑀯𑀢𑁆𑀣𑀁, 𑀉𑀤𑀼𑀫𑁆𑀩𑀭𑀓𑀝𑁆𑀞𑀕𑁆𑀕𑀳𑀡𑁂𑀦 𑀅𑀢𑁆𑀢𑀪𑀸𑀯𑀲𑁆𑀲 𑀅𑀲𑀸𑀭𑀓𑀢𑁆𑀢𑀁. 𑀇𑀫𑀺𑀦𑀸𑀯 𑀦𑀬𑁂𑀦𑀸𑀢𑀺 ‘‘𑀅𑀮𑁆𑀮𑀁 𑀉𑀤𑀼𑀫𑁆𑀩𑀭𑀓𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀲𑀧𑀼𑀢𑁆𑀢𑀪𑀭𑀺𑀬𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀧𑀼𑀢𑁆𑀢𑀪𑀭𑀺𑀬𑁂𑀳𑀺 𑀲𑀤𑁆𑀥𑀺𑀁 𑀓𑀢𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀓𑀼𑀝𑀻𑀘𑀓𑀩𑀳𑀽𑀤𑀓𑀳𑀁𑀲-𑀧𑀭𑀫𑀳𑀁𑀲𑀸𑀤𑀺𑀪𑁂𑀤𑀸 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑁆𑀚𑀸.

𑁩𑁭𑁬. 𑀓𑀼𑀢𑁄𑀧𑀺 𑀇𑀫𑀲𑁆𑀲 𑀆𑀧𑁄𑀲𑀺𑀦𑁂𑀳𑁄 𑀦𑀢𑁆𑀣𑀻𑀢𑀺 𑀓𑁄𑀴𑀸𑀧𑀁. 𑀢𑁂𑀦𑀸𑀳 ‘‘𑀙𑀺𑀦𑁆𑀦𑀲𑀺𑀦𑁂𑀳𑀁 𑀦𑀺𑀭𑀸𑀧’’𑀦𑁆𑀢𑀺. 𑀓𑁄𑀴𑀦𑁆𑀢𑀺 𑀯𑀸 𑀲𑀼𑀓𑁆𑀔𑀓𑀮𑀺𑀗𑁆𑀕𑀭𑀁 𑀯𑀼𑀘𑁆𑀘𑀢𑀺, 𑀓𑁄𑀴𑀁 𑀓𑁄𑀴𑀪𑀸𑀯𑀁 𑀆𑀧𑀦𑁆𑀦𑀦𑁆𑀢𑀺 𑀓𑁄𑀴𑀸𑀧𑀁. 𑀧𑀝𑀺𑀧𑀦𑁆𑀦𑀲𑁆𑀲 𑀉𑀧𑀓𑁆𑀓𑀫𑀫𑀳𑀢𑁆𑀢𑀦𑀺𑀲𑁆𑀲𑀺𑀢𑀢𑀸 𑀧𑀓𑀢𑀺𑀬𑀸 𑀓𑀺𑀮𑁂𑀲𑁂𑀳𑀺 𑀅𑀦𑀪𑀺𑀪𑀽𑀢𑀢𑀸𑀬. 𑀅𑀢𑀺𑀦𑁆𑀢𑀢𑀸 𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀬. 𑀢𑀣𑀸 𑀳𑀺 𑀲𑀼𑀓𑁆𑀔𑀓𑁄𑀴𑀸𑀧𑀪𑀸𑀯𑁄, 𑀆𑀭𑀓𑀸 𑀉𑀤𑀓𑀸 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀪𑀸𑀯𑁄 𑀘 𑀦𑀺𑀤𑀲𑁆𑀲𑀺𑀢𑁄. 𑀑𑀧𑀓𑁆𑀓𑀫𑀺𑀓𑀸𑀳𑀻𑀢𑀺 𑀓𑀺𑀮𑁂𑀲𑀅𑀢𑀺𑀦𑀺𑀕𑁆𑀕𑀡𑁆𑀳𑀦𑀼𑀧𑀓𑁆𑀓𑀫𑀧𑁆𑀧𑀪𑀯𑀸𑀳𑀺. 𑀯𑁂𑀤𑀦𑀸𑀳𑀻𑀢𑀺 𑀧𑀝𑀺𑀧𑀢𑁆𑀢𑀺𑀯𑁂𑀤𑀦𑀸𑀳𑀺. 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀸.

𑁩𑁭𑁭. 𑀓𑀺𑀁 𑀧𑀦 𑀦 𑀲𑀫𑀢𑁆𑀣𑁄, 𑀬𑀢𑁄 𑀏𑀯𑀁 𑀧𑀭𑁂𑀳𑀺 𑀘𑀺𑀦𑁆𑀢𑀺𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀤𑀼𑀓𑁆𑀓𑀭𑀘𑀭𑀺𑀬𑀁 𑀙𑀩𑁆𑀩𑀲𑁆𑀲𑀸𑀦𑀺 𑀅𑀓𑀸𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀢𑁆𑀯𑀸𑀧𑀺 𑀅𑀓𑀢𑁆𑀯𑀸𑀧𑀺 𑀲𑀫𑀢𑁆𑀣𑁄𑀯 𑀓𑀸𑀭𑀡𑀲𑁆𑀲 𑀦𑀺𑀧𑁆𑀨𑀦𑁆𑀦𑀢𑁆𑀢𑀸. ‘‘𑀬𑀣𑀸𑀧𑀺 𑀲𑀩𑁆𑀩𑁂𑀲𑀫𑁆𑀧𑀺 𑀔𑁄 𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀭𑀺𑀫𑀪𑀯𑁂 𑀅𑀦𑁆𑀢𑀫𑀲𑁄 𑀲𑀢𑁆𑀢𑀸𑀳𑀫𑀢𑁆𑀢𑀫𑁆𑀧𑀺 𑀥𑀫𑁆𑀫𑀢𑀸𑀯𑀲𑁂𑀦 𑀤𑀼𑀓𑁆𑀓𑀭𑀘𑀭𑀺𑀬𑀸 𑀳𑁄𑀢𑀺𑀬𑁂𑀯, 𑀏𑀯𑀁 𑀪𑀕𑀯𑀸 𑀲𑀫𑀢𑁆𑀣𑁄 𑀤𑀼𑀓𑁆𑀓𑀭𑀘𑀭𑀺𑀬𑀁 𑀓𑀸𑀢𑀼𑀁, 𑀏𑀯𑀜𑁆𑀘 𑀦𑀁 𑀅𑀓𑀸𑀲𑀺, 𑀦 𑀧𑀦 𑀢𑀸𑀬 𑀩𑀼𑀤𑁆𑀥𑁄 𑀚𑀸𑀢𑁄, 𑀅𑀣 𑀔𑁄 𑀫𑀚𑁆𑀛𑀺𑀫𑀸𑀬 𑀏𑀯 𑀧𑀝𑀺𑀧𑀢𑁆𑀢𑀺𑀬𑀸’’𑀢𑀺 𑀢𑀲𑁆𑀲𑀸 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀩𑁄𑀥𑀸𑀬 𑀅𑀫𑀕𑁆𑀕𑀪𑀸𑀯𑀤𑀻𑀧𑀦𑀢𑁆𑀣𑀁, 𑀇𑀫𑀲𑁆𑀲 𑀧𑀦 𑀪𑀕𑀯𑀢𑁄 𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀘𑀭𑀺𑀬𑀸 𑀅𑀳𑁄𑀲𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀯𑀘𑀸𑀳𑀁 𑀚𑁄𑀢𑀺𑀧𑀸𑀮𑁄, 𑀓𑀲𑁆𑀲𑀧𑀁 𑀲𑀼𑀕𑀢𑀁 𑀢𑀤𑀸;

𑀓𑀼𑀢𑁄 𑀦𑀼 𑀩𑁄𑀥𑀺 𑀫𑀼𑀡𑁆𑀟𑀲𑁆𑀲, 𑀩𑁄𑀥𑀺 𑀧𑀭𑀫𑀤𑀼𑀮𑁆𑀮𑀪𑀸.

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀅𑀘𑀭𑀺𑀁 𑀤𑀼𑀓𑁆𑀓𑀭𑀁 𑀩𑀳𑀼𑀁;

𑀙𑀩𑁆𑀩𑀲𑁆𑀲𑀸𑀦𑀼𑀭𑀼𑀯𑁂𑀮𑀸𑀬𑀁, 𑀢𑀢𑁄 𑀩𑁄𑀥𑀺𑀫𑀧𑀸𑀧𑀼𑀡𑀺𑀁.

𑀦𑀸𑀳𑀁 𑀏𑀢𑁂𑀦 𑀫𑀕𑁆𑀕𑁂𑀦, 𑀧𑀸𑀧𑀼𑀡𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀓𑀼𑀫𑀕𑁆𑀕𑁂𑀦 𑀕𑀯𑁂𑀲𑀺𑀲𑁆𑀲𑀁, 𑀧𑀼𑀩𑁆𑀩𑀓𑀫𑁆𑀫𑁂𑀦 𑀯𑀸𑀭𑀺𑀢𑁄’’𑀢𑀺.

𑀤𑀼𑀓𑁆𑀓𑀭𑀘𑀭𑀺𑀬𑀸𑀬 𑀩𑁄𑀥𑀸𑀬 𑀅𑀫𑀕𑁆𑀕𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀤𑀼𑀓𑁆𑀓𑀭𑀘𑀭𑀺𑀬𑀁 𑀅𑀓𑀸𑀲𑀻𑀢𑀺 𑀓𑁂𑀘𑀺. 𑀅𑀣 𑀯𑀸 𑀮𑁄𑀓𑀦𑀸𑀣𑀲𑁆𑀲 𑀅𑀢𑁆𑀢𑀦𑁄 𑀧𑀭𑀓𑁆𑀓𑀫𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀸𑀬 𑀤𑀼𑀓𑁆𑀓𑀭𑀘𑀭𑀺𑀬𑀸. 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀬𑀸 𑀳𑀺 𑀧𑀭𑀫𑀼𑀓𑁆𑀓𑀁𑀲𑀕𑀢𑀪𑀸𑀯𑀢𑁄 𑀅𑀪𑀺𑀦𑀻𑀳𑀸𑀭𑀸𑀦𑀼𑀭𑀽𑀧𑀁 𑀲𑀫𑁆𑀩𑁄𑀥𑀺𑀬𑀁 𑀢𑀺𑀩𑁆𑀩𑀙𑀦𑁆𑀤𑀢𑀸𑀬 𑀲𑀺𑀔𑀸𑀧𑁆𑀧𑀢𑁆𑀢𑀺𑀬𑀸 𑀢𑀤𑀢𑁆𑀣𑀁 𑀈𑀤𑀺𑀲𑀫𑁆𑀧𑀺 𑀦𑀸𑀫 𑀤𑀼𑀓𑁆𑀓𑀭𑀘𑀭𑀺𑀬𑀁 𑀅𑀓𑀸𑀲𑀻𑀢𑀺 𑀮𑁄𑀓𑁂 𑀅𑀢𑁆𑀢𑀦𑁄 𑀯𑀻𑀭𑀺𑀬𑀸𑀦𑀼𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 𑁋 ‘‘𑀲𑁄 𑀘 𑀫𑁂 𑀧𑀘𑁆𑀙𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀸𑀯𑀳𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀮𑁄𑀓𑀦𑀸𑀣𑁄 𑀤𑀼𑀓𑁆𑀓𑀭𑀘𑀭𑀺𑀬𑀁 𑀅𑀓𑀸𑀲𑀺. 𑀢𑁂𑀦𑀸𑀳 ‘‘𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀻𑀭𑀺𑀬𑀦𑀺𑀫𑁆𑀫𑀣𑀦𑀕𑀼𑀡𑁄𑀢𑀺 𑀯𑀻𑀭𑀺𑀬𑀲𑁆𑀲 𑀲𑀁𑀯𑀟𑁆𑀠𑀦𑀲𑀫𑁆𑀧𑀸𑀤𑀦𑀕𑀼𑀡𑁄. 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀧𑀸𑀲𑀸𑀤𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀗𑁆𑀕𑀸𑀫𑁂 𑀤𑁆𑀯𑁂 𑀢𑀬𑁄 𑀲𑀫𑁆𑀧𑀳𑀸𑀭𑁂𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀧𑀭𑀲𑁂𑀦𑀸𑀬 𑀧𑀳𑀸𑀭𑀧𑀬𑁄𑀕𑁂. 𑀧𑀥𑀸𑀦𑀯𑀻𑀭𑀺𑀬𑀦𑁆𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀆𑀲𑁂𑀯𑀦𑀯𑀻𑀭𑀺𑀬𑀁, 𑀲𑀩𑁆𑀩𑀁 𑀯𑀸 𑀧𑀼𑀩𑁆𑀩𑀪𑀸𑀕𑀯𑀻𑀭𑀺𑀬𑀁.

𑀅𑀪𑀺𑀤𑀦𑁆𑀢𑀦𑁆𑀢𑀺 𑀅𑀪𑀺𑀪𑀯𑀦𑀤𑀦𑁆𑀢𑀁, 𑀉𑀧𑀭𑀺𑀤𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀉𑀧𑀭𑀺𑀤𑀦𑁆𑀢’’𑀦𑁆𑀢𑀺. 𑀲𑁄 𑀳𑀺 𑀇𑀢𑀭𑀁 𑀫𑀼𑀲𑀮𑀁 𑀯𑀺𑀬 𑀉𑀤𑀼𑀓𑁆𑀔𑀮𑀁 𑀯𑀺𑀲𑁂𑀲𑀢𑁄 𑀓𑀲𑁆𑀲𑀘𑀺 𑀔𑀸𑀤𑀦𑀓𑀸𑀮𑁂 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑀢𑀺. 𑀓𑀼𑀲𑀮𑀘𑀺𑀢𑁆𑀢𑁂𑀦𑀸𑀢𑀺 𑀩𑀮𑀯𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀬𑀼𑀢𑁆𑀢𑁂𑀦 𑀓𑀼𑀲𑀮𑀘𑀺𑀢𑁆𑀢𑁂𑀦. 𑀅𑀓𑀼𑀲𑀮𑀘𑀺𑀢𑁆𑀢𑀦𑁆𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀲𑀳𑀺𑀢𑀁 𑀅𑀓𑀼𑀲𑀮𑀘𑀺𑀢𑁆𑀢𑀁. 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀁 𑀦𑀺𑀕𑁆𑀕𑀳𑁄. 𑀢𑀁𑀢𑀁𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀺𑀦𑁄𑀤𑀦𑀁 𑀅𑀪𑀺𑀦𑀺𑀧𑁆𑀧𑀻𑀴𑀦𑀁. 𑀯𑀻𑀭𑀺𑀬𑀢𑀸𑀧𑁂𑀦 𑀯𑀺𑀓𑁆𑀔𑀫𑁆𑀪𑀦𑀁 𑀅𑀪𑀺𑀲𑀦𑁆𑀢𑀸𑀧𑀦𑀁. 𑀲𑀤𑀭𑀣𑁄𑀢𑀺 𑀲𑀧𑀭𑀺𑀴𑀸𑀳𑁄. 𑀧𑀥𑀸𑀦𑁂𑀦𑀸𑀢𑀺 𑀧𑀤𑀳𑀦𑁂𑀦, 𑀓𑀸𑀬𑀲𑁆𑀲 𑀓𑀺𑀮𑀫𑀣𑀼𑀧𑁆𑀧𑀸𑀤𑀓𑁂𑀦 𑀯𑀻𑀭𑀺𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀤𑁆𑀥𑀲𑁆𑀲𑀸𑀢𑀺 𑀢𑀼𑀤𑀲𑁆𑀲. 𑀲𑀢𑁄𑀢𑀺 𑀲𑀫𑀸𑀦𑀲𑁆𑀲.

𑁩𑁭𑁮. 𑀲𑀻𑀲𑀯𑁂𑀞𑀦𑀦𑁆𑀢𑀺 𑀲𑀻𑀲𑀁 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑁆𑀯𑀸 𑀤𑀡𑁆𑀟𑀓𑁂𑀦 𑀧𑀭𑀺𑀯𑀢𑁆𑀢𑀓𑀯𑁂𑀞𑀦𑀁. 𑀅𑀭𑀳𑀦𑁆𑀢𑁄 𑀦𑀸𑀫 𑀏𑀯𑀭𑀽𑀧𑀸 𑀳𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀬𑀣𑀸𑀬𑀁, 𑀏𑀯𑀁 𑀯𑀺𑀲𑀜𑁆𑀜𑀻𑀪𑀽𑀢𑀸𑀧𑀺 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀫𑀢𑀓𑀲𑀤𑀺𑀲𑀸’’𑀢𑀺, 𑀯𑁂𑀤𑀦𑀸𑀧𑁆𑀧𑀢𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀧𑀺𑀦𑀧𑁆𑀧𑀝𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀲𑁂𑀢𑀯𑀸𑀭𑀡𑀲𑀼𑀧𑀺𑀦𑀁 𑀧𑀲𑁆𑀲𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂𑀳𑀺 𑀩𑁆𑀬𑀸𑀓𑀢𑀓𑀸𑀮𑀢𑁄 𑀧𑀝𑁆𑀞𑀸𑀬.

𑁩𑁭𑁯. 𑀥𑀫𑁆𑀫𑀲𑀭𑀻𑀭𑀲𑁆𑀲 𑀅𑀭𑁄𑀕𑀪𑀸𑀯𑁂𑀦 𑀲𑀸𑀥𑀽𑀢𑀺 𑀫𑀭𑀺𑀲𑀦𑀺𑀬𑁄𑀢𑀺 𑀫𑀸𑀭𑀺𑀲𑁄, 𑀧𑀺𑀬𑀸𑀬𑀦𑀯𑀘𑀦𑀫𑁂𑀢𑀁. 𑀢𑁂𑀦𑀸𑀳 ‘‘𑀲𑀫𑁆𑀧𑀺𑀬𑀸𑀬𑀫𑀸𑀦𑀸’’𑀢𑀺𑀆𑀤𑀺. 𑀅𑀚𑀚𑁆𑀚𑀺𑀢𑀦𑁆𑀢𑀺 𑀏𑀯𑀁 𑀅𑀪𑀼𑀜𑁆𑀚𑀺𑀢𑀁 𑀪𑀓𑀸𑀭𑀲𑁆𑀲 𑀚𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀪𑁄𑀚𑀦’’𑀦𑁆𑀢𑀺. 𑀏𑀯𑀁 𑀫𑀸 𑀓𑀭𑀺𑀢𑁆𑀣𑀸𑀢𑀺 ‘‘𑀮𑁄𑀫𑀓𑀽𑀧𑁂𑀳𑀺 𑀅𑀚𑁆𑀛𑁄𑀳𑀸𑀭𑁂𑀲𑁆𑀲𑀸𑀫 𑀅𑀦𑀼𑀧𑁆𑀧𑀯𑁂𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀣𑀸 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀏𑀯𑀁 𑀫𑀸 𑀓𑀭𑀺𑀢𑁆𑀣. 𑀓𑀲𑁆𑀫𑀸? 𑀬𑀸𑀧𑁂𑀲𑁆𑀲𑀸𑀫𑀳𑀦𑁆𑀢𑀺 𑀅𑀳𑀜𑁆𑀘 𑀬𑀸𑀯𑀤𑀢𑁆𑀣𑀁 𑀆𑀳𑀸𑀭𑀫𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑁄 𑀬𑀣𑀸 𑀬𑀸𑀧𑁂𑀲𑁆𑀲𑀸𑀫𑀺, 𑀏𑀯𑀁 𑀆𑀳𑀸𑀭𑀁 𑀧𑀝𑀺𑀲𑁂𑀯𑀺𑀲𑁆𑀲𑀸𑀫𑀺.

𑁩𑁮𑁦-𑁮𑁧. 𑀏𑀢𑀸𑀯 𑀧𑀭𑀫𑀦𑁆𑀢𑀺 𑀏𑀢𑁆𑀢𑀓𑀁 𑀧𑀭𑀫𑀁, 𑀦 𑀇𑀢𑁄 𑀧𑀭𑀁 𑀑𑀧𑀓𑁆𑀓𑀫𑀺𑀓𑀤𑀼𑀓𑁆𑀔𑀯𑁂𑀤𑀦𑀸𑀯𑁂𑀤𑀺𑀬𑀦𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀭𑀜𑁆𑀜𑁄 𑀕𑀳𑁂𑀢𑀩𑁆𑀩𑀦𑀗𑁆𑀕𑀮𑀢𑁄 𑀅𑀜𑁆𑀜𑀸𑀦𑀺 𑀲𑀦𑁆𑀥𑀸𑀬 ‘‘𑀏𑀓𑁂𑀦 𑀊𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀢𑀁, 𑀇𑀢𑀭𑀸𑀦𑀺 𑀭𑀚𑀢𑀧𑀭𑀺𑀓𑁆𑀔𑀢𑀸𑀦𑀺. 𑀢𑁂𑀦𑀸𑀳 ‘‘𑀅𑀫𑀘𑁆𑀘𑀸 𑀏𑀓𑁂𑀦𑀽𑀦𑀅𑀝𑁆𑀞𑀲𑀢𑀭𑀚𑀢𑀦𑀗𑁆𑀕𑀮𑀸𑀦𑀻’’𑀢𑀺. 𑀆𑀴𑀸𑀭𑀼𑀤𑀓𑀲𑀫𑀸𑀕𑀫𑁂 𑀮𑀤𑁆𑀥𑀚𑁆𑀛𑀸𑀦𑀸𑀦𑀺 𑀯𑀝𑁆𑀝𑀧𑀸𑀤𑀓𑀸𑀦𑀺, 𑀆𑀦𑀸𑀧𑀸𑀦𑀲𑀫𑀸𑀥𑀺 𑀧𑀦 𑀓𑀸𑀬𑀕𑀢𑀸𑀲𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀲𑀩𑁆𑀩𑁂𑀲𑀜𑁆𑀘 𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀢𑀸 ‘‘𑀩𑁄𑀥𑀸𑀬 𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄. 𑀩𑀼𑀚𑁆𑀛𑀦𑀢𑁆𑀣𑀸𑀬𑀸𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁, 𑀲𑀩𑁆𑀩𑀲𑁆𑀲𑁂𑀯 𑀯𑀸 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀸𑀬. 𑀲𑀢𑀺𑀬𑀸 𑀅𑀦𑀼𑀲𑁆𑀲𑀭𑀡𑀓𑀯𑀺𑀜𑁆𑀜𑀸𑀡𑀁 𑀲𑀢𑀸𑀦𑀼𑀲𑀸𑀭𑀺𑀯𑀺𑀜𑁆𑀜𑀸𑀡𑀁. 𑀓𑀲𑁆𑀲𑀸 𑀧𑀦 𑀲𑀢𑀺𑀬𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀬𑀺𑀤’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩𑁮𑁨. 𑀧𑀘𑁆𑀘𑀼𑀧𑀝𑁆𑀞𑀺𑀢𑀸𑀢𑀺 𑀢𑀁𑀢𑀁𑀯𑀢𑁆𑀢𑀓𑀭𑀡𑀯𑀲𑁂𑀦 𑀧𑀢𑀺𑀉𑀧𑀝𑁆𑀞𑀺𑀢𑀸 𑀉𑀧𑀝𑁆𑀞𑀸𑀬𑀓𑀸. 𑀢𑁂𑀦𑀸𑀳 ‘‘𑀧𑀡𑁆𑀡𑀲𑀸𑀮𑀸’’𑀢𑀺𑀆𑀤𑀺. 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀺𑀓𑁄𑀢𑀺 𑀧𑀘𑁆𑀘𑀬𑀸𑀦𑀁 𑀩𑀸𑀳𑀼𑀮𑁆𑀮𑀸𑀬 𑀧𑀝𑀺𑀧𑀦𑁆𑀦𑁄. 𑀆𑀯𑀢𑁆𑀢𑁄𑀢𑀺 𑀧𑀼𑀩𑁆𑀩𑁂 𑀧𑀘𑁆𑀘𑀬𑀕𑁂𑀥𑀧𑁆𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑁄, 𑀇𑀤𑀸𑀦𑀺 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑁄. 𑀢𑁂𑀦𑀸𑀳 ‘‘𑀭𑀲𑀕𑀺𑀤𑁆𑀥𑁄…𑀧𑁂… 𑀆𑀯𑀢𑁆𑀢𑁄’’𑀢𑀺. 𑀥𑀫𑁆𑀫𑀦𑀺𑀬𑀸𑀫𑁂𑀦𑀸𑀢𑀺 𑀥𑀫𑁆𑀫𑀢𑀸𑀬. 𑀢𑀫𑁂𑀯 𑀥𑀫𑁆𑀫𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀩𑁄𑀥𑀺𑀲𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀩𑀸𑀭𑀸𑀡𑀲𑀺𑀫𑁂𑀯 𑀢𑀢𑁆𑀣𑀸𑀧𑀺 𑀘 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀅𑀯𑀺𑀚𑀳𑀺𑀢𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀁𑀲𑀼. 𑀧𑀜𑁆𑀘𑀯𑀕𑁆𑀕𑀺𑀬𑀸 𑀓𑀺𑀭 𑀯𑀺𑀲𑀸𑀔𑀫𑀸𑀲𑀲𑁆𑀲 𑀅𑀤𑁆𑀥𑀫𑀸𑀲𑀺𑀬𑀁 𑀕𑀢𑀸. 𑀢𑁂𑀦𑀸𑀳 ‘‘𑀢𑁂𑀲𑀼 𑀕𑀢𑁂𑀲𑀼 𑀅𑀟𑁆𑀠𑀫𑀸𑀲𑀁 𑀓𑀸𑀬𑀯𑀺𑀯𑁂𑀓𑀁 𑀮𑀪𑀺𑀢𑁆𑀯𑀸’’𑀢𑀺.

𑁩𑁮𑁭. ‘‘𑀅𑀤𑁆𑀥𑀸𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸𑀘𑀺𑀢𑁆𑀢𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀦𑁄 𑀓𑀸𑀬𑀪𑀸𑀯𑀦’’𑀦𑁆𑀢𑀺 𑀇𑀫𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺’’𑀦𑁆𑀢𑀺. 𑀇𑀫𑀁 𑀥𑀫𑁆𑀫𑀤𑁂𑀲𑀦𑀦𑁆𑀢𑀺 ‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳’’𑀦𑁆𑀢𑀺𑀆𑀤𑀺𑀓𑀁 𑀥𑀫𑁆𑀫𑀤𑁂𑀲𑀦𑀁. 𑀅𑀲𑀮𑁆𑀮𑀻𑀦𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀢𑁂𑀳𑀺 𑀲𑀩𑁆𑀩𑀲𑁄 𑀦 𑀮𑀺𑀢𑁆𑀢𑁄. 𑀅𑀦𑀼𑀧𑀮𑀺𑀢𑁆𑀢𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁 𑀢𑀡𑁆𑀳𑀸𑀦𑀦𑁆𑀤𑀺𑀬𑀸 𑀅𑀪𑀸𑀯𑁂𑀦. 𑀕𑁄𑀘𑀭𑀚𑁆𑀛𑀢𑁆𑀢𑀫𑁂𑀯𑀸𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀲𑀜𑁆𑀜𑀺𑀢𑁂 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀆𑀭𑀫𑁆𑀫𑀡𑁂, 𑀦𑀺𑀩𑁆𑀩𑀸𑀦𑁂𑀢𑀺 𑀅𑀢𑁆𑀣𑁄. 𑀬𑀁 𑀲𑀦𑁆𑀥𑀸𑀬 𑀧𑀸𑀴𑀺𑀬𑀁 ‘‘𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀁 𑀲𑀦𑁆𑀦𑀺𑀲𑀻𑀤𑀸𑀧𑁂𑀫𑀻𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀥𑀺𑀦𑀸 𑀅𑀘𑁆𑀘𑀦𑁆𑀢𑀲𑀫𑀸𑀤𑀸𑀦𑀯𑀲𑁂𑀦 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀦𑀺𑀲𑀻𑀤𑀸𑀧𑁂𑀫𑀺. 𑀧𑀼𑀩𑁆𑀩𑀸𑀪𑁄𑀕𑁂𑀦𑀸𑀢𑀺 𑀲𑀫𑀸𑀧𑀚𑁆𑀚𑀦𑀢𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀆𑀪𑁄𑀕𑁂𑀦. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀫𑀸𑀧𑀚𑁆𑀚𑀦𑀓𑁆𑀔𑀡𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀲𑀸𑀥𑀼𑀓𑀸𑀭…𑀧𑁂… 𑀅𑀯𑀺𑀘𑁆𑀙𑀺𑀦𑁆𑀦𑁂𑀬𑁂𑀯𑀸’’𑀢𑀺. 𑀏𑀯𑀫𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀲𑀫𑀸𑀧𑀚𑁆𑀚𑀦𑀁 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀁 𑀯𑀼𑀝𑁆𑀞𑀸𑀦𑀜𑁆𑀘 𑀩𑀼𑀤𑁆𑀥𑀸𑀦𑀁 𑀦 𑀪𑀸𑀭𑀺𑀬𑀁 𑀯𑀲𑀻𑀪𑀸𑀯𑀲𑁆𑀲 𑀢𑀣𑀸𑀲𑀼𑀧𑁆𑀧𑀕𑀼𑀡𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀼𑀤𑁆𑀥𑀸𑀦𑀁 𑀳𑀻’’𑀢𑀺𑀆𑀤𑀺. 𑀥𑀫𑁆𑀫𑀲𑀫𑁆𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀅𑀲𑁆𑀲𑀸𑀲𑀯𑀸𑀭𑁂 𑀯𑀸. 𑀢𑀤𑀸 𑀳𑀺 𑀤𑁂𑀲𑀺𑀬𑀫𑀸𑀦𑀁 𑀥𑀫𑁆𑀫𑀁 𑀉𑀧𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀔𑀡𑁂 𑀤𑁂𑀲𑀺𑀢𑀤𑁂𑀲𑀦𑀸 𑀦𑀺𑀭𑀢𑁆𑀣𑀓𑀸 𑀲𑀺𑀬𑀸. 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀦𑀺𑀭𑀢𑁆𑀣𑀓𑀸 𑀓𑀺𑀭𑀺𑀬𑀸 𑀅𑀢𑁆𑀣𑀺.

𑀑𑀓𑀧𑁆𑀧𑀦𑀻𑀬𑀫𑁂𑀢𑀦𑁆𑀢𑀺 ‘‘𑀢𑀲𑁆𑀲𑀸 𑀏𑀯 𑀓𑀣𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀅𑀢𑀺𑀯𑀺𑀬 𑀅𑀘𑁆𑀙𑀭𑀺𑀬𑀕𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀲𑀼𑀢𑁆𑀯𑀸 𑀈𑀤𑀺𑀲𑀻 𑀧𑀝𑀺𑀧𑀢𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑁂𑀯 𑀳𑁄𑀢𑀻𑀢𑀺 𑀉𑀧𑀯𑀸𑀤𑀯𑀲𑁂𑀦 𑀯𑀤𑀢𑀺, 𑀦 𑀲𑀪𑀸𑀯𑁂𑀦. 𑀢𑁂𑀦𑀸𑀳 ‘‘𑀲𑀢𑁆𑀣𑀭𑀺 𑀧𑀲𑀸𑀤𑀫𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀓𑀸𑀬𑀤𑀭𑀣𑁄𑀢𑀺 𑀧𑀘𑁆𑀘𑀬𑀯𑀺𑀲𑁂𑀲𑀯𑀲𑁂𑀦 𑀭𑀽𑀧𑀓𑀸𑀬𑀲𑁆𑀲 𑀧𑀭𑀺𑀲𑁆𑀲𑀫𑀸𑀓𑀸𑀭𑁄. 𑀉𑀧𑀸𑀤𑀺𑀦𑁆𑀦𑀓𑁂𑀢𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑁂. 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀢𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁂. 𑀯𑀺𑀓𑀲𑀦𑁆𑀢𑀺 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑁂𑀦. 𑀢𑀤𑀪𑀸𑀯𑁂𑀦 𑀫𑀓𑀼𑀮𑀸𑀦𑀺 𑀳𑁄𑀦𑁆𑀢𑀺. 𑀓𑁂𑀲𑀜𑁆𑀘𑀺 𑀢𑀺𑀦𑁆𑀢𑀺𑀦𑀺𑀓𑀸𑀤𑀺𑀭𑀼𑀓𑁆𑀔𑀸𑀦𑀁. 𑀧𑀢𑀺𑀮𑀻𑀬𑀦𑁆𑀢𑀺 𑀦𑀺𑀲𑁆𑀲𑀬𑀭𑀽𑀧𑀥𑀫𑁆𑀫𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬. 𑀅𑀭𑀽𑀧𑀥𑀫𑁆𑀫𑀢𑀸𑀬 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀜𑁆𑀘𑁂𑀯 𑀓𑀺𑀭𑀺𑀬𑀸𑀫𑀬𑀯𑀺𑀜𑁆𑀜𑀸𑀡𑀸𑀦𑀜𑁆𑀘 𑀅𑀧𑁆𑀧𑀯𑀢𑁆𑀢𑀺𑀲𑀜𑁆𑀜𑀺𑀢𑀸 𑀅𑀯𑀺𑀧𑁆𑀨𑀸𑀭𑀺𑀓𑀢𑀸 𑀳𑁄𑀢𑀺, 𑀬𑀢𑁆𑀣 𑀦𑀺𑀤𑁆𑀤𑀸𑀲𑀫𑀜𑁆𑀜𑀸. 𑀢𑁂𑀦𑀸𑀳 ‘‘𑀤𑀭𑀣𑀯𑀲𑁂𑀦 𑀪𑀯𑀗𑁆𑀕𑀲𑁄𑀢𑀜𑁆𑀘 𑀇𑀥 𑀦𑀺𑀤𑁆𑀤𑀸𑀢𑀺 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀢𑀢𑁆𑀣 𑀤𑀭𑀣𑀯𑀲𑁂𑀦𑀸𑀢𑀺 𑀤𑀭𑀣𑀯𑀲𑁂𑀦𑁂𑀯, 𑀦 𑀣𑀺𑀦𑀫𑀺𑀤𑁆𑀥𑀯𑀲𑁂𑀦𑀸𑀢𑀺 𑀅𑀯𑀥𑀸𑀭𑀡𑀁 𑀅𑀯𑀥𑀸𑀭𑀡𑀨𑀮𑀜𑁆𑀘 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀓𑀸𑀬𑀲𑁆𑀲 𑀤𑀭𑀣𑀲𑀗𑁆𑀔𑀸𑀢𑀲𑀭𑀻𑀭𑀕𑀺𑀮𑀸𑀦𑀳𑁂𑀢𑀼𑀓𑀁 𑀦𑀺𑀤𑁆𑀤𑀁 𑀲𑀦𑁆𑀥𑀸𑀬. 𑀲𑀭𑀻𑀭𑀕𑀺𑀮𑀸𑀦𑀜𑁆𑀘 𑀪𑀕𑀯𑀢𑁄 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁦𑁦; 𑀫. 𑀦𑀺. 𑁨.𑁨𑁨; 𑀘𑀽𑀴𑀯. 𑁩𑁪𑁫) 𑀯𑀘𑀦𑀢𑁄. 𑀲𑀫𑁆𑀫𑁄𑀳𑀯𑀺𑀳𑀸𑀭𑀲𑁆𑀫𑀺𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀏𑀢𑀁 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀫𑁆𑀫𑁄𑀳𑀯𑀺𑀳𑀸𑀭𑁄𑀢𑀺 𑀯𑀤𑀦𑁆𑀢𑀻’’𑀢𑀺, 𑀲𑀫𑁆𑀫𑁄𑀳𑀯𑀺𑀳𑀸𑀭𑀲𑁆𑀫𑀺𑀁 𑀯𑀸 𑀧𑀭𑀺𑀬𑀸𑀧𑀦𑁆𑀦𑀁 𑀏𑀢𑀁 𑀯𑀤𑀦𑁆𑀢𑀺, 𑀬𑀤𑀺𑀤𑀁 𑀤𑀺𑀯𑀸 𑀦𑀺𑀤𑁆𑀤𑁄𑀓𑁆𑀓𑀫𑀦𑀦𑁆𑀢𑀺 𑀬𑁄𑀚𑀦𑀸.

𑁩𑁮𑁯. 𑀉𑀧𑀦𑀻𑀢𑁂𑀳𑀻𑀢𑀺 𑀤𑁄𑀲𑀫𑀕𑁆𑀕𑀁 𑀦𑀺𑀦𑁆𑀤𑀸𑀧𑀣𑀁 𑀉𑀧𑀦𑀻𑀢𑁂𑀳𑀺. 𑀅𑀪𑀺𑀦𑀦𑁆𑀤𑀺𑀢𑁆𑀯𑀸𑀢𑀺 𑀲𑀫𑁆𑀧𑀺𑀬𑀸𑀬𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄’’𑀢𑀺. 𑀅𑀦𑀼𑀫𑁄𑀤𑀺𑀢𑁆𑀯𑀸𑀢𑀺 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀤𑁂𑀲𑀦𑀸𑀬 𑀣𑁄𑀫𑀦𑀯𑀲𑁂𑀦 𑀅𑀦𑀼𑀫𑁄𑀤𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀯𑀸𑀘𑀸𑀬𑀧𑀺 𑀧𑀲𑀁𑀲𑀦𑁆𑀢𑁄’’𑀢𑀺. 𑀲𑀫𑁆𑀧𑀢𑁆𑀢𑁂 𑀓𑀸𑀮𑁂𑀢𑀺 𑀧𑀩𑁆𑀩𑀚𑁆𑀚𑀸𑀬𑁄𑀕𑁆𑀕𑁂 𑀓𑀸𑀮𑁂 𑀅𑀦𑀼𑀧𑁆𑀧𑀢𑁆𑀢𑁂.

𑀕𑀡𑀁 𑀯𑀺𑀦𑁄𑀤𑁂𑀢𑁆𑀯𑀸𑀢𑀺 𑀕𑀡𑀁 𑀅𑀧𑀦𑁂𑀢𑁆𑀯𑀸 𑀕𑀡𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀧𑀧𑀜𑁆𑀘𑀦𑁆𑀢𑀺 𑀅𑀯𑀲𑁂𑀲𑀓𑀺𑀮𑁂𑀲𑀁. ‘‘𑀧𑀼𑀜𑁆𑀜𑀯𑀸 𑀭𑀸𑀚𑀧𑀽𑀚𑀺𑀢𑁄’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀙𑀦𑁆𑀤𑀯𑀸𑀲𑀳𑀭𑀡𑁂𑀦 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑁄.

𑀲𑀓𑀮𑀁 𑀭𑀢𑁆𑀢𑀺𑀁 𑀩𑀼𑀤𑁆𑀥𑀕𑀼𑀡𑀸𑀦𑀁𑀬𑁂𑀯 𑀓𑀣𑀺𑀢𑀢𑁆𑀢𑀸 𑀣𑁂𑀭𑀲𑁆𑀲 𑀜𑀸𑀡𑀁 𑀤𑁂𑀲𑀦𑀸𑀯𑀺𑀪𑀯𑀜𑁆𑀘 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀏𑀢𑁆𑀢𑀓𑀸𑀯, 𑀪𑀦𑁆𑀢𑁂, 𑀩𑀼𑀤𑁆𑀥𑀕𑀼𑀡𑀸’’𑀢𑀺. 𑀇𑀫𑀸𑀬, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀓𑀣𑀸𑀬 𑀅𑀦𑀯𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀸 𑀓𑀣𑀺𑀢𑀸 𑀯𑀺𑀬 𑀚𑀸𑀬𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀦𑀦𑁆𑀢𑀸𑀧𑀭𑀺𑀫𑁂𑀬𑁆𑀬𑀸𑀯 𑀢𑁂, 𑀓𑀺𑀁 𑀇𑀢𑁄 𑀧𑀭𑁂𑀧𑀺 𑀯𑀺𑀚𑁆𑀚𑀦𑁆𑀢𑁂𑀯𑀸𑀢𑀺 𑀣𑁂𑀭𑀁 𑀢𑀢𑁆𑀣 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑀼𑀓𑀸𑀫𑁄 𑀆𑀳 ‘‘𑀉𑀤𑀸𑀳𑀼 𑀅𑀜𑁆𑀜𑁂𑀧𑀺 𑀅𑀢𑁆𑀣𑀻’’𑀢𑀺𑀆𑀤𑀺. 𑀭𑀚𑁆𑀚𑀲𑁆𑀲 𑀧𑀤𑁂𑀲𑀺𑀓𑀢𑁆𑀢𑀸, 𑀬𑀣𑀸𑀯𑀼𑀢𑁆𑀢𑀲𑀼𑀪𑀸𑀲𑀺𑀢𑀲𑁆𑀲 𑀘 𑀅𑀦𑀕𑁆𑀖𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀬𑀁 𑀫𑁂 𑀤𑀼𑀕𑁆𑀕𑀢𑀧𑀡𑁆𑀡𑀸𑀓𑀸𑀭𑁄’’𑀢𑀺. 𑀢𑀺𑀬𑁄𑀚𑀦𑀲𑀢𑀺𑀓𑀦𑁆𑀢𑀺 𑀇𑀤𑀁 𑀧𑀭𑀺𑀓𑁆𑀔𑁂𑀧𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀜𑁆𑀘 𑀔𑁄 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀪𑁄𑀕𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀳𑀸𑀲𑀘𑁆𑀘𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁭. 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁦. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀼𑀩𑁆𑀩𑀸𑀭𑀸𑀫𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑀸𑀦𑀁 𑀅𑀢𑁆𑀣𑀯𑀺𑀪𑀸𑀯𑀦𑁂 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑀻 𑀓𑀣𑀸. 𑀫𑀡𑀻𑀦𑀦𑁆𑀢𑀺 𑀏𑀢𑁆𑀣 𑀧𑀤𑀼𑀫𑀭𑀸𑀕𑀫𑀡𑀻𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀆𑀳 ‘‘𑀅𑀜𑁆𑀜𑁂𑀳𑀺 𑀘𑀸’’𑀢𑀺. 𑀢𑁂𑀦 𑀇𑀦𑁆𑀤𑀦𑀻𑀮𑀸𑀤𑀺𑀫𑀡𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀓𑀩𑀭𑀯𑀡𑁆𑀡𑀯𑀲𑁂𑀦 𑀲𑀢𑁆𑀢𑀯𑀡𑁆𑀡𑁂𑀳𑀺.

𑀢𑀡𑁆𑀳𑀸 𑀲𑀩𑁆𑀩𑀲𑁄 𑀔𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀬𑁄 (𑀅. 𑀦𑀺. 𑀝𑀻. 𑁩.𑁭.𑁬𑁧), 𑀢𑀲𑁆𑀫𑀺𑀁. 𑀢𑀡𑁆𑀳𑀸𑀲𑀗𑁆𑀔𑀬𑁂𑀢𑀺 𑀘 𑀯𑀺𑀲𑀬𑁂 𑀇𑀤𑀁 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺. 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑀸𑀬𑀸𑀢𑀺 𑀲𑀩𑁆𑀩𑀲𑀁𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑀸𑀬. 𑀅𑀧𑀭𑀪𑀸𑀕𑀧𑀝𑀺𑀧𑀤𑀸 𑀦𑀸𑀫 𑀅𑀭𑀺𑀬𑀲𑀘𑁆𑀘𑀸𑀪𑀺𑀲𑀫𑀬𑁄, 𑀲𑀸 𑀲𑀸𑀲𑀦𑀘𑀸𑀭𑀺𑀕𑁄𑀘𑀭𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀢𑁄𑀢𑀺 𑀆𑀳 ‘‘𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀲𑀁𑀔𑀺𑀢𑁆𑀢𑁂𑀦 𑀤𑁂𑀲𑁂𑀣𑀸𑀢𑀺 𑀧𑀼𑀘𑁆𑀙𑀢𑀻’’𑀢𑀺. 𑀅𑀓𑀼𑀧𑁆𑀧𑀥𑀫𑁆𑀫𑀢𑀸𑀬 𑀔𑀬𑀯𑀬𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀅𑀢𑀻𑀢𑀸𑀢𑀺 𑀅𑀘𑁆𑀘𑀦𑁆𑀢𑀸, 𑀲𑁄 𑀏𑀯 𑀅𑀧𑀭𑀺𑀳𑀸𑀦𑀲𑀪𑀸𑀯𑀢𑁆𑀢𑀸 𑀅𑀘𑁆𑀘𑀦𑁆𑀢𑀸 𑀦𑀺𑀝𑁆𑀞𑀸 𑀏𑀢𑀲𑁆𑀲𑀸𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄. 𑀢𑁂𑀦𑀸𑀳 ‘‘𑀏𑀓𑀦𑁆𑀢𑀦𑀺𑀝𑁆𑀞𑁄 𑀲𑀢𑀢𑀦𑀺𑀝𑁆𑀞𑁄𑀢𑀺 𑀅𑀢𑁆𑀣𑁄’’𑀢𑀺. 𑀦 𑀳𑀺 𑀧𑀝𑀺𑀯𑀺𑀤𑁆𑀥𑀲𑁆𑀲 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀤𑀲𑁆𑀲𑀦𑀁 𑀓𑀼𑀧𑁆𑀧𑀦𑀁 𑀦𑀸𑀫 𑀅𑀢𑁆𑀣𑀺. 𑀅𑀘𑁆𑀘𑀦𑁆𑀢𑀫𑁂𑀯 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀼𑀲𑀺𑀢𑀢𑁆𑀢𑀸, 𑀢𑀲𑁆𑀲 𑀘 𑀅𑀧𑀭𑀺𑀳𑀸𑀦𑀲𑀪𑀸𑀯𑀢𑁆𑀢𑀸 𑀅𑀘𑁆𑀘𑀦𑁆𑀢𑀁 𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻. 𑀢𑁂𑀦𑀸𑀳 ‘‘𑀦𑀺𑀘𑁆𑀘𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀅𑀢𑁆𑀣𑁄’’𑀢𑀺. 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀁.

𑀯𑁂𑀕𑀸𑀬𑀢𑀻𑀢𑀺 𑀢𑀼𑀭𑀺𑀢𑀸𑀬𑀢𑀺. 𑀲𑀮𑁆𑀮𑀓𑁆𑀔𑁂𑀲𑀻𑀢𑀺 𑀘𑀺𑀦𑁆𑀢𑁂𑀲𑀺, 𑀅𑀢𑁆𑀢𑀦𑀸 𑀬𑀣𑀸 𑀲𑀼𑀢𑀸𑀬 𑀲𑀢𑁆𑀣𑀼 𑀤𑁂𑀲𑀦𑀸𑀬 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀉𑀧𑀥𑀸𑀭𑁂𑀲𑀺. 𑀅𑀦𑀼𑀕𑁆𑀕𑀡𑁆𑀳𑀺𑀢𑁆𑀯𑀸𑀯𑀸𑀢𑀺 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀯𑀲𑁂𑀦 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀏𑀯. 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀦𑀺𑀬𑀼𑀢𑁆𑀢𑀸𑀢𑀺 𑀙𑀤𑁆𑀯𑀸𑀭𑀺𑀓𑀸, 𑀢𑁂𑀳𑀺.

𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀲𑀓𑁆𑀓𑀸𑀬𑀲𑀩𑁆𑀩𑀜𑁆𑀳𑀺 𑀲𑀦𑁆𑀥𑀸𑀬 𑀇𑀥 ‘‘𑀲𑀩𑁆𑀩𑁂 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀯𑀺𑀲𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀢𑀲𑁆𑀫𑀸 𑀆𑀬𑀢𑀦𑀥𑀸𑀢𑀼𑀬𑁄𑀧𑀺 𑀢𑀕𑁆𑀕𑀢𑀺𑀓𑀸 𑀏𑀯 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’’𑀢𑀺. 𑀦 𑀬𑀼𑀢𑁆𑀢𑀸 𑀅𑀪𑀺𑀦𑀺𑀯𑁂𑀲𑀸𑀬 ‘‘𑀏𑀢𑀁 𑀫𑀫, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀅𑀚𑁆𑀛𑁄𑀲𑀸𑀦𑀸𑀬. ‘‘𑀅𑀮𑀫𑁂𑀯 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁭𑁨; 𑀲𑀁. 𑀦𑀺. 𑁨.𑁧𑁨𑁪-𑁧𑁨𑁫, 𑁧𑁨𑁮, 𑁧𑁩𑁪, 𑁧𑁪𑁩) 𑀯𑀺𑀬 𑀅𑀮𑀁-𑀲𑀤𑁆𑀤𑁄 𑀬𑀼𑀢𑁆𑀢𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀦 𑀬𑀼𑀢𑁆𑀢𑀸’’𑀢𑀺. 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀪𑀯𑀦𑁆𑀢𑀺. 𑀬𑀤𑀺𑀧𑀺 ‘‘𑀢𑀢𑀺𑀬𑀸, 𑀘𑀢𑀼𑀢𑁆𑀣𑀻’’𑀢𑀺 𑀇𑀤𑀁 𑀯𑀺𑀲𑀼𑀤𑁆𑀥𑀺𑀤𑁆𑀯𑀬𑀁 𑀅𑀪𑀺𑀜𑁆𑀜𑀸𑀧𑀜𑁆𑀜𑀸, 𑀢𑀲𑁆𑀲𑀸 𑀧𑀦 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀪𑀸𑀯𑀢𑁄, 𑀲𑀢𑀺 𑀘 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀲𑀧𑁆𑀧𑀘𑁆𑀘𑀬𑀢𑁆𑀢𑀸 (𑀦𑀸𑀫𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀜𑁆𑀘 𑀅𑀦𑀢𑁆𑀢𑀸𑀢𑀺 𑀅𑀢𑁆𑀣𑀢𑁄) 𑀮𑀓𑁆𑀔𑀡𑀢𑁆𑀢𑀬𑀁 𑀲𑀼𑀧𑀸𑀓𑀝𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀬 𑀅𑀪𑀺𑀚𑀸𑀦𑀸𑀢𑀻’’𑀢𑀺. 𑀢𑀣𑁂𑀯 𑀢𑀻𑀭𑀡𑀧𑀭𑀺𑀜𑁆𑀜𑀸𑀬𑀸𑀢𑀺 𑀇𑀫𑀺𑀦𑀸 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸𑀢𑀺 𑀦𑀸𑀫𑀭𑀽𑀧𑀲𑁆𑀲 𑀉𑀧𑀲𑀁𑀳𑀭𑀢𑀺, 𑀦 𑀅𑀪𑀺𑀜𑁆𑀜𑀸𑀧𑀜𑁆𑀜𑀸𑀦𑀁 𑀲𑀫𑁆𑀪𑀸𑀭𑀥𑀫𑁆𑀫𑀸𑀦𑀁. 𑀧𑀼𑀭𑀺𑀫𑀸𑀬 𑀳𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀮𑀓𑁆𑀔𑀡𑀢𑁆𑀢𑀬𑀁 𑀕𑀡𑁆𑀳𑀸𑀢𑀺 𑀲𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀧𑀭𑀢𑁆𑀢𑀸 𑀢𑀲𑁆𑀲𑀸, 𑀤𑀼𑀢𑀺𑀬𑀸𑀬 𑀲𑀭𑀽𑀧𑀢𑁄 𑀢𑀲𑁆𑀲𑀸 𑀮𑀓𑁆𑀔𑀡𑀢𑁆𑀢𑀬𑀸𑀭𑁄𑀧𑀦𑀯𑀲𑁂𑀦 𑀲𑀫𑁆𑀫𑀲𑀦𑀪𑀸𑀯𑀢𑁄. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑀸𑀬 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀢𑀸𑀬 𑀘 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺. 𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀑𑀴𑀸𑀭𑀺𑀓𑀪𑀸𑀯𑀢𑁄 𑀅𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀺. 𑀤𑀲𑁆𑀲𑁂𑀦𑁆𑀢𑁄 𑀘 𑀯𑁂𑀤𑀦𑀸𑀬 𑀆𑀲𑀦𑁆𑀦𑀪𑀸𑀯𑀢𑁄, 𑀯𑀺𑀲𑁂𑀲𑀢𑁄 𑀲𑀼𑀔𑀲𑀸𑀭𑀸𑀕𑀺𑀢𑀸𑀬, 𑀪𑀯𑀲𑁆𑀲𑀸𑀤𑀕𑀥𑀺𑀢𑀫𑀸𑀦𑀲𑀢𑀸𑀬 𑀘 𑀲𑀓𑁆𑀓𑀲𑁆𑀲 𑀯𑁂𑀤𑀦𑀸𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀉𑀧𑁆𑀧𑀸𑀤𑀯𑀬𑀝𑁆𑀞𑁂𑀦𑀸𑀢𑀺 𑀉𑀤𑀬𑀩𑁆𑀩𑀬𑀲𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁂𑀦. 𑀅𑀦𑀺𑀘𑁆𑀘𑀸𑀢𑀺 𑀅𑀤𑁆𑀥𑀼 𑀯𑀸. 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀅𑀦𑀺𑀘𑁆𑀘𑀢𑀸 𑀉𑀤𑀬𑀯𑀬𑀢𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀔𑀬𑀢𑁄 𑀯𑀬𑀢𑁄 𑀤𑀲𑁆𑀲𑀦𑀜𑀸𑀡𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀢𑀁𑀲𑀫𑀗𑁆𑀕𑀻 𑀘 𑀧𑀼𑀕𑁆𑀕𑀮𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻, 𑀢𑀲𑁆𑀫𑀸. 𑀔𑀬𑀯𑀺𑀭𑀸𑀕𑁄𑀢𑀺 𑀔𑀬𑀲𑀗𑁆𑀔𑀸𑀢𑁄 𑀯𑀺𑀭𑀸𑀕𑁄 𑀲𑀗𑁆𑀔𑀸𑀭𑀸𑀦𑀁 𑀧𑀮𑀼𑀚𑁆𑀚𑀦𑀸. 𑀬𑀁 𑀆𑀕𑀫𑁆𑀫 𑀲𑀩𑁆𑀩𑀲𑁄 𑀲𑀗𑁆𑀔𑀸𑀭𑁂𑀳𑀺 𑀯𑀺𑀭𑀚𑁆𑀚𑀦𑀸 𑀳𑁄𑀢𑀺, 𑀢𑀁 𑀦𑀺𑀩𑁆𑀩𑀸𑀦𑀁 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀺𑀫𑁆𑀳𑀺𑀧𑀻𑀢𑀺 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀺𑀧𑀤𑁂𑀧𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀅𑀪𑀺𑀤𑀺𑀲𑀺𑀢𑁆𑀯𑀸 𑀢𑀁 𑀏𑀓𑀤𑁂𑀲𑁂𑀦 𑀯𑀺𑀯𑀭𑀦𑁆𑀢𑁄 ‘‘𑀦𑀺𑀭𑁄𑀥𑁄𑀧𑀺 𑀳𑀺…𑀧𑁂… 𑀤𑀼𑀯𑀺𑀥𑁄𑀬𑁂𑀯𑀸’’𑀢𑀺 𑀆𑀳. 𑀲𑀩𑁆𑀩𑀸𑀲𑀯𑀲𑀁𑀯𑀭𑁂 𑀯𑀼𑀢𑁆𑀢𑀯𑁄𑀲𑁆𑀲𑀕𑁆𑀕𑁄𑀯 𑀇𑀥 ‘‘𑀧𑀝𑀺𑀦𑀺𑀲𑁆𑀲𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀯𑀼𑀘𑁆𑀘𑀢𑀺 𑀯𑁄𑀲𑁆𑀲𑀕𑁆𑀕𑁄’’𑀢𑀺𑀆𑀤𑀺𑀫𑀸𑀳. 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄 𑀯𑀺𑀧𑀲𑁆𑀲𑀦𑀸. 𑀧𑀓𑁆𑀔𑀦𑁆𑀤𑀦𑀯𑀲𑁂𑀦 𑀅𑀧𑁆𑀧𑀦𑀢𑁄 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄 𑀫𑀕𑁆𑀕𑁄 𑀅𑀜𑁆𑀜𑀲𑁆𑀲 𑀢𑀤𑀪𑀸𑀯𑀢𑁄. 𑀲𑁄𑀢𑀺 𑀫𑀕𑁆𑀕𑁄. 𑀆𑀭𑀫𑁆𑀫𑀡𑀢𑁄𑀢𑀺 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀆𑀭𑀫𑁆𑀫𑀡𑀓𑀭𑀡𑀢𑁄. 𑀏𑀯𑀜𑁆𑀳𑀺 𑀫𑀕𑁆𑀕𑀢𑁄 𑀅𑀜𑁆𑀜𑁂𑀲𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀁 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑀸𑀪𑀸𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀧𑀭𑀺𑀘𑁆𑀘𑀚𑀦𑁂𑀦 𑀧𑀓𑁆𑀔𑀦𑁆𑀤𑀦𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺𑀧𑀺 𑀯𑀸 𑀓𑀸𑀭𑀡𑁂𑀳𑀺. 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀦𑀁 𑀯𑁄𑀲𑁆𑀲𑀚𑁆𑀚𑀦𑀁 𑀢𑀧𑁆𑀧𑀝𑀺𑀩𑀤𑁆𑀥𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀤𑀝𑁆𑀞𑀩𑁆𑀩𑀁. 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀉𑀪𑀬𑀫𑁆𑀧𑁂𑀢𑀁 𑀯𑁄𑀲𑁆𑀲𑀚𑁆𑀚𑀦𑀁. 𑀢𑀤𑀼𑀪𑀬𑀲𑀫𑀗𑁆𑀕𑀻𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑀗𑁆𑀕𑀻 𑀫𑀕𑁆𑀕𑀲𑀫𑀗𑁆𑀕𑀻 𑀘. ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑀺. 𑀫. 𑁧.𑁫𑁨) 𑀬𑀣𑀸 𑀯𑀺𑀧𑀲𑁆𑀲𑀦𑀸𑀬 𑀓𑀺𑀮𑁂𑀲𑀸𑀦𑀁 𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀮𑀩𑁆𑀪𑀢𑀺, 𑀏𑀯𑀁 𑀆𑀬𑀢𑀺𑀁 𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀉𑀧𑁆𑀧𑀸𑀤𑁂𑀢𑀩𑁆𑀩𑀔𑀦𑁆𑀥𑀸𑀦𑀫𑁆𑀧𑀺 𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀯𑀢𑁆𑀢𑀩𑁆𑀩𑁄, 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀧𑀦 𑀫𑀕𑁆𑀕𑁂 𑀮𑀩𑁆𑀪𑀫𑀸𑀦𑀸𑀬 𑀏𑀓𑀦𑁆𑀢𑀓𑀸𑀭𑀡𑀪𑀽𑀢𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀫𑀕𑁆𑀕𑁂 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀜𑀸𑀬𑀸𑀕𑀢𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀯 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑀤𑀼𑀪𑀬𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺.

𑀧𑀼𑀘𑁆𑀙𑀦𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 ‘‘𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀻’’𑀢𑀺 𑀏𑀢𑁆𑀣 𑀓𑀸𑀫𑀼𑀧𑀸𑀤𑀸𑀦𑀯𑀲𑁂𑀦 𑀉𑀧𑀸𑀤𑀺𑀬𑀦𑀁 𑀧𑀝𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀆𑀳 ‘‘𑀢𑀡𑁆𑀳𑀸𑀯𑀲𑁂𑀦 𑀦 𑀉𑀧𑀸𑀤𑀺𑀬𑀢𑀻’’𑀢𑀺. 𑀢𑀡𑁆𑀳𑀸𑀯𑀲𑁂𑀦 𑀯𑀸 𑀅𑀲𑀢𑀺 𑀉𑀧𑀸𑀤𑀺𑀬𑀦𑁂 𑀤𑀺𑀝𑁆𑀞𑀺𑀯𑀲𑁂𑀦 𑀉𑀧𑀸𑀤𑀺𑀬𑀦𑀁 𑀅𑀦𑀯𑀓𑀸𑀲𑀫𑁂𑀯𑀸𑀢𑀺 ‘‘𑀢𑀡𑁆𑀳𑀸𑀯𑀲𑁂𑀦’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀦 𑀧𑀭𑀸𑀫𑀲𑀢𑀻𑀢𑀺 𑀦𑀸𑀤𑀺𑀬𑀢𑀺, 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀯𑀲𑁂𑀦 𑀯𑀸 ‘‘𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀦 𑀧𑀭𑀸𑀫𑀲𑀢𑀺. 𑀲𑀁𑀔𑀺𑀢𑁆𑀢𑁂𑀦𑁂𑀯 𑀔𑀺𑀧𑁆𑀧𑀁 𑀓𑀣𑁂𑀲𑀻𑀢𑀺 𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀓𑀣𑁂𑀲𑀺.

𑁩𑁯𑁧. 𑀅𑀪𑀺𑀲𑀫𑀸𑀕𑀦𑁆𑀢𑁆𑀯𑀸𑀢𑀺 𑀅𑀪𑀺𑀫𑀼𑀔𑀜𑀸𑀡𑁂𑀦 𑀜𑁂𑀬𑁆𑀬𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀸𑀣𑀸𑀯𑀢𑁄 𑀯𑀺𑀤𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀚𑀸𑀦𑀺𑀢𑁆𑀯𑀸’’𑀢𑀺. 𑀬𑀣𑀸𑀧𑀭𑀺𑀲𑀯𑀺𑀜𑁆𑀜𑀸𑀧𑀓𑀢𑁆𑀢𑀸𑀢𑀺 𑀬𑀣𑀸𑀧𑀭𑀺𑀲𑀁 𑀥𑀫𑁆𑀫𑀲𑀫𑁆𑀧𑀝𑀺𑀕𑁆𑀕𑀸𑀳𑀺𑀓𑀸𑀬 𑀫𑀳𑀢𑀺𑀬𑀸, 𑀅𑀧𑁆𑀧𑀓𑀸𑀬 𑀯𑀸 𑀧𑀭𑀺𑀲𑀸𑀬 𑀅𑀦𑀼𑀭𑀽𑀧𑀫𑁂𑀯 𑀯𑀺𑀜𑁆𑀜𑀸𑀧𑀦𑀢𑁄. 𑀧𑀭𑀺𑀬𑀦𑁆𑀢𑀁 𑀦 𑀦𑀺𑀘𑁆𑀙𑀭𑀢𑀻𑀢𑀺 𑀦 𑀧𑀯𑀢𑁆𑀢𑀢𑀺. 𑀫𑀸 𑀦𑀺𑀭𑀢𑁆𑀣𑀓𑀸 𑀅𑀕𑀫𑀸𑀲𑀻𑀢𑀺 𑀇𑀤𑀁 𑀥𑀫𑁆𑀫𑀢𑀸𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀯𑀲𑁂𑀦. 𑀏𑀓𑀜𑁆𑀳𑁂𑀢𑀁 𑀲𑀢𑁆𑀣𑀼 𑀯𑀘𑀻𑀖𑁄𑀲𑀲𑁆𑀲 𑀅𑀝𑁆𑀞𑀲𑀼 𑀅𑀗𑁆𑀕𑁂𑀲𑀼, 𑀬𑀤𑀺𑀤𑀁 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑀸. 𑀙𑀺𑀤𑁆𑀤𑀯𑀺𑀯𑀭𑁄𑀓𑀸𑀲𑁄𑀢𑀺 𑀙𑀺𑀤𑁆𑀤𑀪𑀽𑀢𑁄, 𑀯𑀺𑀯𑀭𑀪𑀽𑀢𑁄 𑀯𑀸 𑀑𑀓𑀸𑀲𑁄𑀧𑀺 𑀦𑀢𑁆𑀣𑀺, 𑀪𑀕𑀯𑀢𑁄 𑀲𑀤𑁆𑀤𑀸𑀲𑀯𑀦𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀢𑀲𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄.