𑁮. 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁬. 𑀮𑀤𑁆𑀥𑀺𑀫𑀢𑁆𑀢𑀦𑁆𑀢𑀺 𑀫𑀺𑀘𑁆𑀙𑀸𑀕𑀸𑀳𑀫𑀢𑁆𑀢𑀁, 𑀦 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁄. 𑀲𑀲𑁆𑀲𑀢𑀤𑀺𑀝𑁆𑀞𑀻𑀢𑀺 𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑁄. 𑀲𑁄𑀢𑀺 𑀅𑀭𑀺𑀝𑁆𑀞𑁄 𑀪𑀺𑀓𑁆𑀔𑀼. 𑀓𑀣𑁂𑀢𑁆𑀯𑀸 𑀲𑀫𑁄𑀥𑀸𑀦𑁂𑀦𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀲𑀫𑁄𑀥𑀸𑀦𑁂𑀦𑁆𑀢𑀦𑁆𑀢𑀺 𑀘 𑀦𑀺𑀕𑀫𑁂𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀏𑀯 𑀪𑀯𑁂𑀲𑀼 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀦 𑀪𑀯𑀦𑁆𑀢𑀭𑀁 𑀲𑀗𑁆𑀓𑀫𑀦𑁆𑀢𑀺. 𑀯𑀺𑀜𑁆𑀜𑀸𑀡𑀁 𑀧𑀦 𑀅𑀪𑀺𑀦𑁆𑀦𑀲𑀪𑀸𑀯𑀁 𑀅𑀦𑀜𑁆𑀜𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀥𑀮𑁄𑀓𑀢𑁄𑀢𑀺 𑀇𑀫𑀲𑁆𑀫𑀸 𑀅𑀢𑁆𑀢𑀪𑀸𑀯𑀸. 𑀧𑀭𑀮𑁄𑀓𑀦𑁆𑀢𑀺 𑀧𑀭𑀪𑀯𑀲𑀜𑁆𑀜𑀺𑀢𑀁 𑀅𑀢𑁆𑀢𑀪𑀸𑀯𑀁. 𑀲𑀦𑁆𑀥𑀸𑀯𑀢𑀻𑀢𑀺 𑀦𑀺𑀘𑁆𑀘𑀢𑀸𑀬 𑀓𑁂𑀦𑀘𑀺 𑀅𑀲𑀫𑁆𑀩𑀤𑁆𑀥𑀁 𑀯𑀺𑀬 𑀕𑀘𑁆𑀙𑀢𑀺. 𑀢𑁂𑀦 𑀇𑀥𑀮𑁄𑀓𑀢𑁄 𑀧𑀭𑀮𑁄𑀓𑀕𑀫𑀦𑀫𑀸𑀳. 𑀲𑀁𑀲𑀭𑀢𑀻𑀢𑀺 𑀇𑀫𑀺𑀦𑀸 𑀧𑀭𑀮𑁄𑀓𑀢𑁄 𑀇𑀥𑀸𑀕𑀫𑀦𑀁. 𑀲𑀦𑁆𑀥𑀸𑀯𑀢𑀻𑀢𑀺 𑀯𑀸 𑀪𑀯𑀦𑁆𑀢𑀭𑀲𑀗𑁆𑀓𑀫𑀦𑀫𑀸𑀳. 𑀲𑀁𑀲𑀭𑀢𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀅𑀧𑀭𑀸𑀧𑀭𑀲𑀜𑁆𑀘𑀭𑀡𑀁.

‘‘𑀧𑀘𑁆𑀘𑀬𑁂 𑀲𑀢𑀺 𑀪𑀯𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀲𑀲𑁆𑀲𑀢𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀩𑀼𑀤𑁆𑀥𑁂𑀦 𑀅𑀓𑀣𑀺𑀢𑀁 𑀓𑀣𑁂𑀲𑀻𑀢𑀺 𑀇𑀫𑀺𑀦𑀸 ‘‘𑀬𑀁 𑀅𑀪𑀸𑀲𑀺𑀢𑀁 𑀅𑀮𑀧𑀺𑀢𑀁 𑀢𑀣𑀸𑀕𑀢𑁂𑀦, 𑀢𑀁 𑀪𑀸𑀲𑀺𑀢𑀁 𑀮𑀧𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺 𑀤𑀻𑀧𑁂𑀢𑀻’’𑀢𑀺 (𑀘𑀽𑀴𑀯. 𑁩𑁫𑁨, 𑁩𑁫𑁩) 𑀇𑀫𑀲𑁆𑀫𑀺𑀁 𑀪𑁂𑀤𑀓𑀭𑀯𑀢𑁆𑀣𑀼𑀲𑁆𑀫𑀺𑀁 𑀲𑀦𑁆𑀤𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀚𑀺𑀦𑀘𑀓𑁆𑀓𑁂 𑀧𑀳𑀸𑀭𑀁 𑀤𑁂𑀢𑀻𑀢𑀺 ‘‘𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁…𑀧𑁂… 𑀅𑀦𑀜𑁆𑀜’’𑀦𑁆𑀢𑀺 𑀦𑀺𑀘𑁆𑀘𑀢𑀁 𑀧𑀝𑀺𑀚𑀸𑀦𑀦𑁆𑀢𑁄 𑁋 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 (𑀥. 𑀧. 𑁨𑁭𑁭), 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘’’𑀦𑁆𑀢𑀺 (𑀲𑀁. 𑀦𑀺. 𑁩.𑁯𑁩-𑁯𑁪) 𑀘 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂 𑀲𑀢𑁆𑀣𑀼 𑀥𑀫𑁆𑀫𑀘𑀓𑁆𑀓𑁂 𑀔𑀻𑀮𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀧𑀳𑀸𑀭𑀁 𑀤𑁂𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀅𑀦𑀺𑀘𑁆𑀘𑀦𑁆𑀢𑀺 𑀤𑀺𑀝𑁆𑀞𑀁 𑀧𑀯𑁂𑀤𑀺𑀢𑀜𑁆𑀘 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀦𑁆𑀢𑀺 𑀧𑀝𑀺𑀚𑀸𑀦𑀦𑁆𑀢𑁄 𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀧𑀝𑀺𑀩𑀸𑀳𑀢𑀺. 𑀲𑁄𑀢𑀼𑀓𑀸𑀫𑀁 𑀚𑀦𑀦𑁆𑀢𑀺 𑀅𑀭𑀺𑀬𑀥𑀫𑁆𑀫𑀸𑀥𑀺𑀕𑀫𑀲𑁆𑀲 𑀏𑀓𑀦𑁆𑀢𑀉𑀧𑀸𑀬𑀪𑀽𑀢𑀁 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀲𑁄𑀢𑀼𑀓𑀸𑀫𑀁 𑀚𑀦𑀁 𑀦𑀺𑀘𑁆𑀘𑀕𑁆𑀕𑀸𑀳𑀧𑀕𑁆𑀕𑀡𑁆𑀳𑀦𑁂𑀦 𑀯𑀺𑀲𑀁𑀯𑀸𑀤𑁂𑀢𑀺. 𑀢𑀢𑁄 𑀏𑀯 𑀅𑀭𑀺𑀬𑀧𑀣𑁂 𑀅𑀭𑀺𑀬𑀥𑀫𑁆𑀫𑀯𑀻𑀣𑀺𑀬𑀁 𑀢𑀲𑁆𑀲𑀸 𑀧𑀝𑀺𑀓𑁆𑀔𑀺𑀧𑀦𑁂𑀦 𑀢𑀺𑀭𑀺𑀬𑀁 𑀦𑀺𑀧𑀢𑀺𑀢𑁆𑀯𑀸.

𑁩𑁯𑁮. 𑀯𑀺𑀜𑁆𑀜𑀸𑀡𑀲𑀻𑀲𑁂𑀦 𑀅𑀢𑁆𑀢𑀦𑀸 𑀕𑀳𑀺𑀢𑀁 𑀅𑀢𑁆𑀢𑀸𑀦𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑁆𑀯𑀸𑀬𑀁, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀤𑁄 𑀯𑁂𑀤𑁂𑀬𑁆𑀬𑁄𑀢𑀺𑀆𑀤𑀬𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀏𑀯 𑀅𑀪𑀺𑀦𑀺𑀯𑁂𑀲𑀸𑀓𑀸𑀭𑀸. 𑀯𑀤𑀢𑀻𑀢𑀺 𑀯𑀤𑁄, 𑀯𑀘𑀻𑀓𑀫𑁆𑀫𑀲𑁆𑀲 𑀓𑀸𑀭𑀓𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀳𑀺 𑀓𑀸𑀭𑀓𑀪𑀸𑀯𑀼𑀧𑀸𑀬𑀺𑀓𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀩𑁄𑀥𑀦𑀲𑀫𑀢𑁆𑀣𑀢𑀁 𑀅𑀢𑁆𑀢𑀦𑁄 𑀤𑀲𑁆𑀲𑁂𑀢𑀺. 𑀯𑁂𑀤𑀺𑀬𑁄𑀯 𑀯𑁂𑀤𑁂𑀬𑁆𑀬𑁄, 𑀚𑀸𑀦𑀸𑀢𑀺 𑀅𑀦𑀼𑀪𑀯𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀈𑀤𑀺𑀲𑀸𑀦𑀜𑁆𑀳𑀺 𑀧𑀤𑀸𑀦𑀁 𑀩𑀳𑀼𑀮𑀸 𑀓𑀢𑁆𑀢𑀼𑀲𑀸𑀥𑀦𑀢𑀁 𑀲𑀤𑁆𑀤𑀯𑀺𑀤𑀽 𑀫𑀜𑁆𑀜𑀦𑁆𑀢𑀺. 𑀯𑁂𑀤𑀬𑀢𑀻𑀢𑀺 𑀢𑀁 𑀢𑀁 𑀅𑀦𑀼𑀪𑀯𑀺𑀢𑀩𑁆𑀩𑀁 𑀅𑀦𑀼𑀪𑀯𑀢𑀺. 𑀢𑀳𑀺𑀁 𑀢𑀳𑀺𑀦𑁆𑀢𑀺 𑀢𑁂𑀲𑀼 𑀢𑁂𑀲𑀼 𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀲𑀢𑁆𑀢𑀦𑀺𑀓𑀸𑀬𑁂𑀲𑀼.

𑁩𑁯𑁯. 𑀢𑀁 𑀯𑀸𑀤𑀁 𑀧𑀕𑁆𑀕𑀬𑁆𑀳 𑀞𑀺𑀢𑀢𑁆𑀢𑀸 𑀲𑀸𑀢𑀺𑀲𑁆𑀲 𑀙𑀺𑀦𑁆𑀦𑀧𑀘𑁆𑀘𑀬𑀢𑀸 𑀅𑀯𑀺𑀭𑀼𑀴𑁆𑀳𑀥𑀫𑁆𑀫𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀳𑁂𑀝𑁆𑀞𑀸𑀢𑀺 𑀅𑀮𑀕𑀤𑁆𑀤𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀁 (𑀫. 𑀦𑀺. 𑀅𑀝𑁆𑀞. 𑁨.𑁨𑁩𑁬-𑁨𑁩𑁭) 𑀲𑀦𑁆𑀥𑀸𑀬𑀸𑀳. 𑀧𑀭𑀢𑁄 𑀳𑁂𑀝𑁆𑀞𑀸𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀻𑀢𑀺 𑀢𑀻𑀳𑀺𑀧𑀺 𑀅𑀦𑀼𑀲𑀦𑁆𑀥𑀻𑀳𑀺 𑀅𑀯𑁄𑀫𑀺𑀲𑁆𑀲𑁄 𑀯𑀺𑀲𑀼𑀁𑀬𑁂𑀯𑁂𑀓𑁄 𑀅𑀦𑀼𑀲𑀦𑁆𑀥𑀺. 𑀦𑀦𑀼 𑀘𑀸𑀬𑀫𑁆𑀧𑀺 𑀲𑀸𑀢𑀺𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀧𑀯𑀢𑁆𑀢𑀺𑀢𑀢𑁆𑀢𑀸 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀬𑁂𑀯𑀸𑀢𑀺? 𑀦, 𑀦𑀺𑀬𑁆𑀬𑀸𑀦𑀫𑀼𑀔𑁂𑀦 𑀅𑀧𑁆𑀧𑀯𑀢𑁆𑀢𑀢𑁆𑀢𑀸. 𑀦𑀺𑀬𑁆𑀬𑀸𑀦𑀜𑁆𑀳𑀺 𑀧𑀼𑀭𑀓𑁆𑀔𑀢𑁆𑀯𑀸 𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀇𑀢𑀭𑀸 𑀤𑁂𑀲𑀦𑀸𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀆𑀤𑀬𑁄. 𑀇𑀥 𑀢𑀤𑀪𑀸𑀯𑀢𑁄 𑀯𑀼𑀢𑁆𑀢𑀁 ‘‘𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀻’’𑀢𑀺. 𑀧𑀭𑀺𑀲𑀸𑀬 𑀮𑀤𑁆𑀥𑀺𑀁 𑀲𑁄𑀥𑁂𑀦𑁆𑀢𑁄𑀢𑀺 𑀬𑀸𑀤𑀺𑀲𑀻 𑀲𑀸𑀢𑀺𑀲𑁆𑀲 𑀮𑀤𑁆𑀥𑀺, 𑀢𑀤𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀧𑀭𑀺𑀲𑀸𑀬 𑀮𑀤𑁆𑀥𑀺𑀁 𑀲𑁄𑀥𑁂𑀦𑁆𑀢𑁄, 𑀧𑀭𑀺𑀲𑀸𑀬 𑀮𑀤𑁆𑀥𑀺𑀲𑁄𑀥𑀦𑁂𑀦𑁂𑀯 𑀲𑀸𑀢𑀺 𑀕𑀡𑀢𑁄 𑀦𑀺𑀲𑁆𑀲𑀸𑀭𑀺𑀢𑁄 𑀦𑀸𑀫 𑀚𑀸𑀢𑁄.

𑁪𑁦𑁦. 𑀬𑀁 𑀬𑀤𑁂𑀯𑀸𑀢𑀺 𑀇𑀤𑀁 𑀬𑀤𑀺𑀧𑀺 𑀅𑀯𑀺𑀲𑁂𑀲𑀢𑁄 𑀧𑀘𑁆𑀘𑀬𑀥𑀫𑁆𑀫𑀕𑁆𑀕𑀳𑀡𑀁, ‘‘𑀯𑀺𑀜𑁆𑀜𑀸𑀡𑀦𑁆𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻’’𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀢𑀁𑀢𑀁𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀜𑁆𑀜𑀸𑀦𑀺𑀫𑀺𑀢𑁆𑀢𑀧𑀘𑁆𑀘𑀬𑀚𑀸𑀢𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 𑁋 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀺. 𑀅𑀣 𑀯𑀸 𑀢𑀁𑀢𑀁𑀤𑁆𑀯𑀸𑀭𑀦𑀺𑀬𑀢𑀁 𑀇𑀢𑀭𑀫𑁆𑀧𑀺 𑀲𑀩𑁆𑀩𑀁 𑀢𑀲𑁆𑀲 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀚𑀸𑀢𑀁 𑀇𑀥 ‘‘𑀬𑀁 𑀬𑀤𑁂𑀯𑀸’’𑀢𑀺 𑀕𑀳𑀺𑀢𑀁, 𑀢𑀢𑁆𑀣 𑀧𑀦 𑀬𑀁 𑀅𑀲𑀸𑀥𑀸𑀭𑀡𑀁, 𑀢𑁂𑀦 𑀲𑀫𑀜𑁆𑀜𑀸𑀢𑀺 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑁆𑀯𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁆𑀯𑀸𑀭𑀲𑀗𑁆𑀓𑀦𑁆𑀢𑀺𑀬𑀸 𑀅𑀪𑀸𑀯𑀦𑁆𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀤𑁆𑀯𑀸𑀭𑀦𑁆𑀢𑀭𑀲𑀗𑁆𑀓𑀫𑀦𑀲𑁆𑀲 𑀅𑀪𑀸𑀯𑀁. 𑀲𑁆𑀯𑀸𑀬𑀁 𑀑𑀴𑀸𑀭𑀺𑀓𑀦𑀬𑁂𑀦 𑀫𑀦𑁆𑀤𑀩𑀼𑀤𑁆𑀥𑀻𑀦𑀁 𑀲𑀼𑀔𑀸𑀯𑀩𑁄𑀥𑀦𑀢𑁆𑀣𑀁 𑀦𑀬𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀦 𑀳𑀺 𑀓𑀤𑀸𑀘𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀁 𑀯𑀺𑀕𑀘𑁆𑀙𑀦𑁆𑀢𑀁 𑀅𑀦𑀦𑁆𑀢𑀭𑀯𑀺𑀜𑁆𑀜𑀸𑀡𑀁 𑀲𑀗𑁆𑀓𑀫𑀢𑀺 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀸𑀮𑀸𑀪𑁂 𑀢𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄.

𑀏𑀯𑀫𑁂𑀯𑀸𑀢𑀺 𑀬𑀣𑀸 𑀅𑀕𑁆𑀕𑀺 𑀉𑀧𑀸𑀤𑀸𑀦𑀁 𑀧𑀝𑀺𑀘𑁆𑀘 𑀚𑀮𑀦𑁆𑀢𑁄 𑀅𑀦𑀼𑀧𑀸𑀤𑀸𑀦𑁄 𑀢𑀢𑁆𑀣𑁂𑀯 𑀦𑀺𑀩𑁆𑀩𑀸𑀬𑀢𑀺, 𑀦 𑀓𑀢𑁆𑀣𑀘𑀺 𑀲𑀗𑁆𑀓𑀫𑀢𑀺, 𑀏𑀯𑀫𑁂𑀯. ‘‘𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦 𑀳𑁂𑀢𑁆𑀣 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀇𑀘𑁆𑀙𑀺𑀢𑁄 𑀢𑀸𑀤𑀺𑀲𑀲𑁆𑀲 𑀦𑀺𑀭𑁄𑀥𑀲𑁆𑀲 𑀇𑀥 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸, 𑀅𑀣 𑀔𑁄 𑀔𑀡𑀦𑀺𑀭𑁄𑀥𑁄, 𑀲𑁄 𑀘 𑀲𑀸𑀪𑀸𑀯𑀺𑀓𑀢𑁆𑀢𑀸 𑀦 𑀧𑀘𑁆𑀘𑀬𑀯𑁂𑀓𑀮𑁆𑀮𑀳𑁂𑀢𑀼𑀓𑁄? 𑀲𑀘𑁆𑀘𑀫𑁂𑀢𑀁, 𑀢𑀁𑀢𑀁𑀤𑁆𑀯𑀸𑀭𑀺𑀓𑀲𑁆𑀲 𑀧𑀦 𑀯𑀺𑀜𑁆𑀜𑀸𑀡𑀲𑁆𑀲 𑀤𑁆𑀯𑀸𑀭𑀦𑁆𑀢𑀭𑀁 𑀅𑀲𑀗𑁆𑀓𑀫𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀬𑁂𑀲𑀜𑁆𑀘 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀤𑁆𑀯𑀸𑀭𑀦𑁆𑀢𑀭𑀺𑀓𑀯𑀺𑀜𑁆𑀜𑀸𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀢𑁂𑀲𑀁 𑀢𑀤𑀪𑀸𑀯𑀢𑁄 𑀧𑀘𑁆𑀘𑀬𑀯𑁂𑀓𑀮𑁆𑀮𑀕𑁆𑀕𑀳𑀡𑀁, 𑀢𑀲𑁆𑀫𑀸 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀦 𑀲𑁄𑀢𑀸𑀤𑀻𑀦𑀺 𑀲𑀗𑁆𑀓𑀫𑀺𑀢𑁆𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. 𑀏𑀢𑁂𑀦 𑀬𑀁 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀭𑀽𑀧𑀸𑀤𑀺𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀯𑀲𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺 𑀢𑀸𑀯𑀓𑀸𑀮𑀺𑀓𑀪𑀸𑀯𑀢𑁄, 𑀢𑀲𑁆𑀲 𑀧𑀦 𑀲𑁄𑀢𑀲𑀤𑁆𑀤𑀸𑀤𑀺𑀧𑀘𑁆𑀘𑀬𑀸𑀪𑀸𑀯𑀢𑁄 𑀓𑀼𑀢𑁄 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀲𑀫𑀜𑁆𑀜𑀸, 𑀏𑀯𑀫𑀧𑁆𑀧𑀯𑀢𑁆𑀢𑀺𑀢𑁄 𑀢𑀲𑁆𑀲 𑀓𑀼𑀢𑁄 𑀲𑀗𑁆𑀓𑀫𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑁂𑀢𑀺 𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀁. 𑀤𑁆𑀯𑀸𑀭𑀲𑀗𑁆𑀓𑀦𑁆𑀢𑀺𑀫𑀢𑁆𑀢𑀦𑁆𑀢𑀺 𑀤𑁆𑀯𑀸𑀭𑀦𑁆𑀢𑀭𑀲𑀗𑁆𑀓𑀫𑀦𑀫𑀢𑁆𑀢𑀫𑁆𑀧𑀺 𑀦 𑀯𑀤𑀸𑀫𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑀢𑁄 𑀧𑀘𑁆𑀘𑀬𑀲𑁆𑀲 𑀉𑀧𑁆𑀧𑀸𑀤𑀯𑀦𑁆𑀢𑀢𑁄 𑀲𑀢𑀺 𑀘 𑀉𑀧𑁆𑀧𑀸𑀤𑁂 𑀅𑀯𑀲𑁆𑀲𑀁𑀪𑀸𑀯𑀻 𑀦𑀺𑀭𑁄𑀥𑁄𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀢𑀸 𑀤𑀻𑀧𑀺𑀢𑀸 𑀳𑁄𑀢𑀻𑀢𑀺.

𑁪𑁦𑁧. ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀁 𑀯𑀼𑀢𑁆𑀢𑀁 𑀫𑀬𑀸, 𑀅𑀜𑁆𑀜𑀢𑁆𑀭 𑀧𑀘𑁆𑀘𑀬𑀸 𑀦𑀢𑁆𑀣𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀪𑀯𑁄’’𑀢𑀺 𑀧𑀸𑀴𑀺𑀬𑀸 𑀅𑀦𑁆𑀯𑀬𑀢𑁄 𑀘 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀯𑀺𑀜𑁆𑀜𑀸𑀡𑀲𑁆𑀲 𑀲𑀗𑁆𑀔𑀢𑀢𑀸𑀯 𑀤𑀲𑁆𑀲𑀺𑀢𑀸𑀢𑀺 𑀆𑀳 ‘‘𑀲𑀧𑁆𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺. 𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁 ‘‘𑀪𑀽𑀢’’𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀢𑀁 𑀅𑀢𑁆𑀣𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀧𑁆𑀧𑀘𑁆𑀘𑀬𑀲𑁆𑀲 𑀅𑀪𑀸𑀯𑀢𑁄, 𑀬𑀜𑁆𑀘 𑀔𑀦𑁆𑀥𑀧𑀜𑁆𑀘𑀓𑀁 𑀅𑀢𑁆𑀢𑀦𑁄 𑀢𑁂𑀲𑀜𑁆𑀘 𑀪𑀺𑀓𑁆𑀔𑀽𑀦𑀁, 𑀢𑀁 ‘‘𑀪𑀽𑀢𑀫𑀺𑀤’’𑀦𑁆𑀢𑀺 𑀪𑀕𑀯𑀸 𑀅𑀯𑁄𑀘𑀸𑀢𑀺 𑀆𑀳 ‘‘𑀇𑀤𑀁 𑀔𑀦𑁆𑀥𑀧𑀜𑁆𑀘𑀓’’𑀦𑁆𑀢𑀺. 𑀅𑀢𑁆𑀢𑀦𑁄 𑀨𑀮𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄, 𑀧𑀘𑁆𑀘𑀬𑁄. 𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄, 𑀆𑀳𑀸𑀭𑁄 𑀲𑀫𑁆𑀪𑀯𑁄 𑀏𑀢𑀲𑁆𑀲𑀸𑀢𑀺 𑀆𑀳𑀸𑀭𑀲𑀫𑁆𑀪𑀯𑀁. 𑀢𑁂𑀦𑀸𑀳 ‘‘𑀧𑀘𑁆𑀘𑀬𑀲𑀫𑁆𑀪𑀯’’𑀦𑁆𑀢𑀺. 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀦𑀺𑀭𑁄𑀥𑀸𑀢𑀺 𑀬𑁂𑀦 𑀅𑀯𑀺𑀚𑁆𑀚𑀸𑀤𑀺𑀦𑀸 𑀧𑀘𑁆𑀘𑀬𑁂𑀦 𑀔𑀦𑁆𑀥𑀧𑀜𑁆𑀘𑀓𑀁 𑀲𑀫𑁆𑀪𑀯𑀢𑀺, 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀸. 𑀔𑀡𑀦𑀺𑀭𑁄𑀥𑁄 𑀧𑀦 𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑁄.

𑀦𑁄𑀲𑁆𑀲𑀽𑀢𑀺 𑀲𑀁𑀲𑀬𑀚𑁄𑀢𑀦𑁄 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀪𑀽𑀢𑀁 𑀦𑀼 𑀔𑁄 𑀇𑀤𑀁, 𑀦 𑀦𑀼 𑀔𑁄 𑀪𑀽𑀢’’𑀦𑁆𑀢𑀺. 𑀪𑀽𑀢𑀫𑀺𑀤𑀁 𑀦𑁄𑀲𑁆𑀲𑀽𑀢𑀺 𑀘 𑀇𑀫𑀺𑀦𑀸 𑀔𑀦𑁆𑀥𑀧𑀜𑁆𑀘𑀓𑀫𑁂𑀯 𑀦𑀼 𑀔𑁄 𑀇𑀤𑀁, 𑀉𑀤𑀸𑀳𑀼 𑀅𑀢𑁆𑀢𑀢𑁆𑀢𑀦𑀺𑀬𑀦𑁆𑀢𑀺 𑀏𑀯𑀁𑀚𑀸𑀢𑀺𑀓𑁄 𑀲𑀁𑀲𑀬𑀦𑀸𑀓𑀸𑀭𑁄 𑀕𑀳𑀺𑀢𑁄. 𑀢𑀤𑀸𑀳𑀸𑀭𑀲𑀫𑁆𑀪𑀯𑀁 𑀦𑁄𑀲𑁆𑀲𑀽𑀢𑀺 𑀧𑀦 𑀇𑀫𑀺𑀦𑀸 𑀲𑀳𑁂𑀢𑀼𑀓𑀁 𑀦𑀼 𑀔𑁄 𑀇𑀤𑀁 𑀪𑀽𑀢𑀁, 𑀉𑀤𑀸𑀳𑀼 𑀅𑀳𑁂𑀢𑀼𑀓𑀦𑁆𑀢𑀺 𑀬𑀣𑀸 𑀅𑀳𑁂𑀢𑀼𑀓𑀪𑀸𑀯𑀸𑀧𑀦𑁆𑀦𑁄 𑀲𑀁𑀲𑀬𑀦𑀸𑀓𑀸𑀭𑁄 𑀕𑀳𑀺𑀢𑁄, 𑀏𑀯𑀁 𑀯𑀺𑀲𑀫𑀳𑁂𑀢𑀼𑀓𑀪𑀸𑀯𑀸𑀧𑀦𑁆𑀦𑁄𑀧𑀺 𑀲𑀁𑀲𑀬𑀦𑀸𑀓𑀸𑀭𑁄 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀲𑀫𑀳𑁂𑀢𑀼𑀦𑁄𑀧𑀺 𑀧𑀭𑀫𑀢𑁆𑀣𑀢𑁄 𑀪𑀽𑀢𑀲𑁆𑀲 𑀅𑀳𑁂𑀢𑀼𑀓𑀪𑀸𑀯𑀢𑁄. 𑀯𑀺𑀲𑀫𑀳𑁂𑀢𑀼𑀯𑀸𑀤𑁄𑀧𑀺 𑀧𑀭𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑀫𑀢𑁆𑀢𑀢𑀸𑀬 𑀲𑀪𑀸𑀯𑀦𑀺𑀬𑀢𑀺𑀬𑀤𑀺𑀘𑁆𑀙𑀸𑀤𑀺𑀯𑀸𑀤𑁂𑀳𑀺 𑀲𑀫𑀸𑀦𑀬𑁄𑀕𑀓𑁆𑀔𑀫𑁄𑀢𑀺. 𑀦𑀺𑀭𑁄𑀥𑀥𑀫𑁆𑀫𑀁 𑀦𑁄𑀲𑁆𑀲𑀽𑀢𑀺 𑀇𑀫𑀺𑀦𑀸 𑀬𑀣𑀸 𑀅𑀦𑀺𑀘𑁆𑀘𑀁 𑀦𑀼 𑀔𑁄 𑀇𑀤𑀁 𑀪𑀽𑀢𑀁, 𑀉𑀤𑀸𑀳𑀼 𑀦𑀺𑀘𑁆𑀘𑀦𑁆𑀢𑀺 𑀅𑀦𑀺𑀘𑁆𑀘𑀢𑀁 𑀧𑀝𑀺𑀘𑁆𑀘 𑀲𑀁𑀲𑀬𑀦𑀸𑀓𑀸𑀭𑁄 𑀕𑀳𑀺𑀢𑁄, 𑀏𑀯𑀁 𑀤𑀼𑀓𑁆𑀔𑀁 𑀦𑀼 𑀔𑁄, 𑀉𑀤𑀸𑀳𑀼 𑀦 𑀤𑀼𑀓𑁆𑀔𑀁, 𑀅𑀦𑀢𑁆𑀢𑀸 𑀦𑀼 𑀔𑁄, 𑀉𑀤𑀸𑀳𑀼 𑀦 𑀅𑀦𑀢𑁆𑀢𑀸𑀢𑀺𑀧𑀺 𑀲𑀁𑀲𑀬𑀦𑀸𑀓𑀸𑀭𑁄 𑀕𑀳𑀺𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁 𑀅𑀦𑀺𑀘𑁆𑀘𑀲𑁆𑀲 𑀤𑀼𑀓𑁆𑀔𑀪𑀸𑀯𑀸𑀤𑀺𑀅𑀯𑀲𑁆𑀲𑀁𑀪𑀸𑀯𑀢𑁄, 𑀦𑀺𑀘𑁆𑀘𑁂 𑀘 𑀢𑀤𑀼𑀪𑀬𑀸𑀪𑀸𑀯𑀢𑁄. 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄𑀢𑀺 𑀅𑀯𑀺𑀧𑀭𑀻𑀢𑀲𑀭𑀲𑀢𑁄 𑀲𑀮𑀓𑁆𑀔𑀡𑀢𑁄 𑀘, 𑀓𑀺𑀘𑁆𑀘𑀢𑁄 𑀘𑁂𑀯 𑀲𑀪𑀸𑀯𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀯𑀺𑀧𑀲𑁆𑀲𑀦𑀸𑀬 𑀅𑀥𑀺𑀝𑁆𑀞𑀸𑀦𑀪𑀽𑀢𑀸𑀧𑀺 𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬𑀸’’𑀢𑀺. 𑀲𑀭𑀲𑀢𑁄𑀢𑀺 𑀘 𑀲𑀪𑀸𑀯𑀢𑁄. 𑀲𑀮𑀓𑁆𑀔𑀡𑀢𑁄𑀢𑀺 𑀲𑀸𑀫𑀜𑁆𑀜𑀮𑀓𑁆𑀔𑀡𑀢𑁄. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑀲𑁆𑀲𑀸’’𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀬𑁂 𑀬𑁂𑀢𑀺 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀬𑁂 𑀬𑁂 𑀪𑀺𑀓𑁆𑀔𑀽. 𑀲𑀮𑁆𑀮𑀓𑁆𑀔𑁂𑀲𑀼𑀦𑁆𑀢𑀺 𑀲𑀫𑁆𑀫𑀤𑁂𑀯 𑀉𑀧𑀥𑀸𑀭𑁂𑀲𑀼𑀁.

𑀢𑁂𑀳𑀻𑀢𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺. 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬𑀁. 𑀦𑀺𑀢𑁆𑀢𑀡𑁆𑀳𑀪𑀸𑀯𑀦𑁆𑀢𑀺 𑀢𑀡𑁆𑀳𑀸𑀪𑀸𑀯𑀁 ‘‘𑀏𑀢𑀁 𑀫𑀫’’𑀦𑁆𑀢𑀺 𑀢𑀡𑁆𑀳𑀸𑀕𑁆𑀕𑀸𑀳𑀲𑁆𑀲 𑀧𑀳𑀻𑀦𑀢𑀁. 𑀏𑀢𑁂𑀦𑀧𑀺 𑀪𑀕𑀯𑀸 ‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼𑀧𑀺 𑀢𑀡𑁆𑀳𑀸𑀧𑀳𑀸𑀦𑀫𑁂𑀯 𑀯𑀡𑁆𑀡𑁂𑀫𑀺, 𑀲𑀸𑀢𑀺 𑀧𑀦 𑀫𑁄𑀖𑀧𑀼𑀭𑀺𑀲𑁄 𑀅𑀢𑁆𑀢𑀪𑀸𑀯𑁂𑀧𑀺 𑀢𑀡𑁆𑀳𑀸𑀲𑀁𑀯𑀤𑁆𑀥𑀦𑀺𑀁 𑀯𑀺𑀧𑀭𑀻𑀢𑀤𑀺𑀝𑁆𑀞𑀺𑀁 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀻’’𑀢𑀺 𑀲𑀸𑀢𑀺𑀁 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀲𑀪𑀸𑀯𑀤𑀲𑁆𑀲𑀦𑁂𑀦𑀸𑀢𑀺 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀤𑀲𑁆𑀲𑀦𑁂𑀦. 𑀧𑀘𑁆𑀘𑀬𑀤𑀲𑁆𑀲𑀦𑁂𑀦𑀸𑀢𑀺 𑀓𑀸𑀭𑀡𑀤𑀲𑁆𑀲𑀦𑁂𑀦 𑀅𑀦𑀯𑀲𑁂𑀲𑀢𑁄 𑀳𑁂𑀢𑀼𑀦𑁄 𑀧𑀘𑁆𑀘𑀬𑀲𑁆𑀲 𑀘 𑀤𑀲𑁆𑀲𑀦𑁂𑀦. 𑀅𑀮𑁆𑀮𑀻𑀬𑁂𑀣𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀦𑀺𑀲𑁆𑀲𑀬𑁂𑀣. 𑀢𑁂𑀦𑀸𑀳 ‘‘𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀻’’𑀢𑀺. 𑀓𑁂𑀮𑀸𑀬𑁂𑀣𑀸𑀢𑀺 𑀧𑀭𑀺𑀳𑀭𑀡𑀓𑁂𑀴𑀺𑀬𑀸 𑀧𑀭𑀺𑀳𑀭𑁂𑀬𑁆𑀬𑀸𑀣. 𑀢𑁂𑀦𑀸𑀳 ‘‘𑀓𑀻𑀴𑀫𑀸𑀦𑀸 𑀯𑀺𑀳𑀭𑁂𑀬𑁆𑀬𑀸𑀣𑀸’’𑀢𑀺. 𑀥𑀦𑀁 𑀯𑀺𑀬 𑀇𑀘𑁆𑀙𑀦𑁆𑀢𑀸𑀢𑀺 𑀥𑀦𑀁 𑀯𑀺𑀬 𑀤𑁆𑀭𑀩𑁆𑀬𑀁 𑀯𑀺𑀬 𑀇𑀘𑁆𑀙𑀁 𑀢𑀡𑁆𑀳𑀁 𑀚𑀦𑁂𑀦𑁆𑀢𑀸. 𑀢𑁂𑀦𑀸𑀳 ‘‘𑀕𑁂𑀥𑀁 𑀆𑀧𑀚𑁆𑀚𑁂𑀬𑁆𑀬𑀸𑀣𑀸’’𑀢𑀺. 𑀫𑀫𑀢𑁆𑀢𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀣𑀸𑀢𑀺 ‘‘𑀫𑀫𑀫𑀺𑀤’’𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀁 𑀚𑀦𑁂𑀬𑁆𑀬𑀸𑀣. 𑀦𑀺𑀓𑀦𑁆𑀢𑀺𑀯𑀲𑁂𑀦𑀧𑀺 𑀕𑀳𑀡𑀢𑁆𑀣𑀸𑀬 𑀦𑁄 𑀤𑁂𑀲𑀺𑀢𑁄, 𑀢𑀲𑁆𑀲 𑀯𑀸 𑀲𑀡𑁆𑀳𑀲𑀼𑀔𑀼𑀫𑀲𑁆𑀲 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀲𑁆𑀲 𑀕𑀳𑀡𑀁 𑀦𑀸𑀫 𑀦𑀺𑀓𑀦𑁆𑀢𑀺𑀬𑀸 𑀏𑀯 𑀲𑀺𑀬𑀸, 𑀦 𑀑𑀴𑀸𑀭𑀺𑀓𑀢𑀡𑁆𑀳𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀓𑀦𑁆𑀢𑀺𑀯𑀲𑁂𑀦𑀸’’𑀢𑀺.

𑁪𑁦𑁨. 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀨𑀮𑀁 𑀏𑀢𑀻𑀢𑀺 𑀧𑀘𑁆𑀘𑀬𑁄, 𑀲𑀩𑁆𑀩𑁄 𑀓𑀸𑀭𑀡𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀔𑀦𑁆𑀥𑀸𑀦𑀁 𑀧𑀘𑁆𑀘𑀬𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺. 𑀬𑀸𑀯 𑀅𑀯𑀺𑀚𑁆𑀚𑀸 𑀳𑀺 𑀲𑀩𑁆𑀩𑁄 𑀦𑁂𑀲𑀁 𑀓𑀸𑀭𑀡𑀯𑀺𑀲𑁂𑀲𑁄 𑀇𑀥 𑀤𑀲𑁆𑀲𑀺𑀢𑁄. 𑀧𑀼𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸, 𑀅𑀦𑁆𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀻𑀢𑀺 𑀅𑀦𑀼𑀮𑁄𑀫𑀢𑁄 𑀧𑀝𑀺𑀮𑁄𑀫𑀢𑁄 𑀘 𑀯𑀝𑁆𑀝𑀯𑀺𑀯𑀝𑁆𑀝𑀤𑀲𑁆𑀲𑀦𑀯𑀲𑁂𑀦 𑀦𑀸𑀦𑀸𑀦𑀬𑁂𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑀲𑁆𑀲𑀺𑀢𑁄, 𑀦𑀺𑀘𑁆𑀘𑀕𑁆𑀕𑀸𑀳𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑁄 𑀓𑀺𑀮𑁂𑀲𑁄𑀧𑀺 𑀇𑀥 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀢𑀫𑁆𑀧𑀺 𑀯𑀼𑀢𑁆𑀢𑀢𑁆𑀣𑀫𑁂𑀯𑀸𑀢𑀺 𑀢𑀫𑁆𑀧𑀺 ‘‘𑀇𑀫𑁂 𑀘, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸’’𑀢𑀺𑀆𑀤𑀺 𑀬𑀸𑀯 ‘‘𑀢𑀡𑁆𑀳𑀸𑀧𑀪𑀯𑀸’’𑀢𑀺 𑀧𑀸𑀴𑀺𑀧𑀤𑀁, 𑀢𑀸𑀯 𑀯𑀼𑀢𑁆𑀢𑀢𑁆𑀣𑀫𑁂𑀯 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁮𑁯). 𑀲𑁂𑀲𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀪𑀸𑀯𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁫𑁭𑁦) 𑀯𑀺𑀢𑁆𑀣𑀸𑀭𑀺𑀢𑀸𑀯𑀸𑀢𑀺 𑀇𑀫𑀺𑀦𑀸𑀯 𑀲𑀗𑁆𑀕𑀳𑀺𑀢𑀁.

𑁪𑁦𑁪. 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 (𑀉𑀤𑀸. 𑀅𑀝𑁆𑀞. 𑁧) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁪𑁦𑁭. 𑀧𑀝𑀺𑀥𑀸𑀯𑀦𑀸𑀢𑀺 𑀧𑀝𑀺𑀲𑀭𑀡𑀁, 𑀧𑀼𑀩𑁆𑀩𑁂 𑀅𑀢𑁆𑀢𑀦𑁄 𑀆𑀕𑀢𑀁 𑀅𑀢𑀻𑀢𑀁 𑀅𑀤𑁆𑀥𑀸𑀦𑀁 𑀉𑀤𑁆𑀤𑀺𑀲𑁆𑀲 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀝𑀺𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀦𑀼 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀧𑀸𑀴𑀺𑀬𑀁 𑀧𑀝𑀺𑀥𑀸𑀯𑀦𑀸 𑀆𑀕𑀢𑀸𑀢𑀺? 𑀲𑀘𑁆𑀘𑀁 𑀆𑀕𑀢𑀸, 𑀲𑀸 𑀧𑀦 𑀢𑀡𑁆𑀳𑀸𑀤𑀺𑀝𑁆𑀞𑀺𑀳𑁂𑀢𑀼𑀓𑀸𑀢𑀺 ‘‘𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀬𑀣𑀸𑀥𑀺𑀕𑀢𑁂 𑀜𑀸𑀡𑀤𑀲𑁆𑀲𑀦𑁂.

𑀦𑀺𑀘𑁆𑀘𑀮𑀪𑀸𑀯𑀦𑁆𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀁, 𑀢𑀺𑀢𑁆𑀣𑀺𑀬𑀯𑀸𑀤𑀯𑀸𑀢𑁂𑀳𑀺 𑀅𑀓𑀫𑁆𑀧𑀺𑀬𑀪𑀸𑀯𑀜𑁆𑀘. 𑀕𑀭𑀽𑀢𑀺 𑀕𑀭𑀼𑀕𑀼𑀡𑀬𑀼𑀢𑁆𑀢𑁄. 𑀪𑀸𑀭𑀺𑀓𑁄 𑀧𑀸𑀲𑀸𑀡𑀘𑁆𑀙𑀢𑁆𑀢𑀲𑀤𑀺𑀲𑁄. 𑀅𑀓𑀸𑀫𑀸 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑁄𑀢𑀺 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯 𑀅𑀦𑀼𑀯𑀢𑁆𑀢𑀦𑀫𑀸𑀳, 𑀦 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦. 𑀓𑀺𑀘𑁆𑀘𑀦𑁆𑀢𑀺 𑀲𑀢𑁆𑀣𑀼𑀓𑀺𑀘𑁆𑀘𑀁. 𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀚𑀸𑀢𑀺𑀫𑀦𑁆𑀢𑀩𑁆𑀭𑀸𑀳𑁆𑀫𑀡𑀸𑀦𑀁. 𑀯𑀢𑀲𑀫𑀸𑀤𑀸𑀦𑀸𑀦𑀻𑀢𑀺 𑀫𑀕𑀯𑀢𑀸𑀤𑀺𑀯𑀢𑀲𑀫𑀸𑀤𑀸𑀦𑀸𑀦𑀺. 𑀤𑀺𑀝𑁆𑀞𑀺𑀓𑀼𑀢𑀽𑀳𑀮𑀸𑀦𑀻𑀢𑀺 𑀢𑀁𑀢𑀁𑀤𑀺𑀝𑁆𑀞𑀺𑀕𑁆𑀕𑀸𑀳𑀯𑀲𑁂𑀦 ‘‘𑀇𑀤𑀁 𑀲𑀘𑁆𑀘𑀁, 𑀇𑀤𑀁 𑀲𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀕𑀳𑁂𑀢𑀩𑁆𑀩𑀓𑀼𑀢𑀽𑀳𑀮𑀸𑀦𑀺. 𑀏𑀯𑀁 𑀦𑀺𑀲𑁆𑀲𑀝𑁆𑀞𑀸𑀦𑀻𑀢𑀺 𑀬𑀣𑀸 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀑𑀯𑀸𑀤𑁄 𑀤𑀺𑀦𑁆𑀦𑁄, 𑀏𑀯𑀁 𑀦𑀺𑀲𑁆𑀲𑀝𑁆𑀞𑀸𑀦𑀺 𑀯𑀢𑀸𑀤𑀻𑀦𑀺 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀺𑀁 𑀕𑀡𑁆𑀳𑁂𑀬𑁆𑀬𑀸𑀣. 𑀲𑀬𑀁 𑀜𑀸𑀡𑁂𑀦 𑀜𑀸𑀢𑀦𑁆𑀢𑀺 𑀧𑀭𑀦𑁂𑀬𑁆𑀬𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀢𑀦𑁄 𑀏𑀯 𑀜𑀸𑀡𑁂𑀦 𑀬𑀸𑀣𑀸𑀯𑀢𑁄 𑀜𑀸𑀢𑀁. 𑀏𑀯𑀁𑀪𑀽𑀢𑀜𑁆𑀘 𑀲𑀬𑀁 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀬𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀤𑀺𑀝𑁆𑀞’’𑀦𑁆𑀢𑀺. 𑀲𑀬𑀁 𑀯𑀺𑀪𑀸𑀯𑀺𑀢𑀦𑁆𑀢𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀘𑁆𑀘𑀢𑁆𑀢𑀁 𑀯𑀺𑀪𑀽𑀢𑀪𑀸𑀯𑀁 𑀆𑀧𑀸𑀤𑀺𑀢𑀁. 𑀉𑀧𑀦𑀻𑀢𑀸𑀢𑀺 𑀉𑀧𑀓𑁆𑀓𑀫𑁂𑀦 𑀥𑀫𑁆𑀫𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀦𑀻𑀢𑀸. 𑀫𑀬𑀸𑀢𑀺 𑀓𑀢𑁆𑀢𑀭𑀺 𑀓𑀭𑀡𑀯𑀘𑀦𑀁. 𑀥𑀫𑁆𑀫𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀏𑀢𑀁 𑀯𑀘𑀦𑀦𑁆𑀢𑀺 𑀏𑀢𑀁 ‘‘𑀲𑀦𑁆𑀤𑀺𑀝𑁆𑀞𑀺𑀓𑁄’’𑀢𑀺𑀆𑀤𑀺𑀯𑀘𑀦𑀁.

𑁪𑁦𑁮. 𑀢𑀁 𑀲𑀫𑁆𑀫𑁄𑀳𑀝𑁆𑀞𑀸𑀦𑀁 𑀅𑀲𑁆𑀲 𑀮𑁄𑀓𑀲𑁆𑀲. 𑀲𑀫𑁄𑀥𑀸𑀦𑁂𑀦𑀸𑀢𑀺 𑀲𑀫𑀸𑀕𑀫𑁂𑀦. 𑀕𑀩𑁆𑀪𑀢𑀺 𑀅𑀢𑁆𑀢𑀪𑀸𑀯𑀪𑀸𑀯𑁂𑀦 𑀯𑀢𑁆𑀢𑀢𑀻𑀢𑀺 𑀕𑀩𑁆𑀪𑁄, 𑀓𑀮𑀮𑀸𑀤𑀺𑀅𑀯𑀢𑁆𑀣𑁄 𑀥𑀫𑁆𑀫𑀧𑀩𑀦𑁆𑀥𑁄, 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀧𑀦 𑀲𑀢𑁆𑀢𑀲𑀦𑁆𑀢𑀸𑀦𑁄 ‘‘𑀕𑀩𑁆𑀪𑁄’’𑀢𑀺 𑀯𑀼𑀢𑁆𑀢𑁄 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺. 𑀢𑀦𑁆𑀦𑀺𑀲𑁆𑀲𑀬𑀪𑀸𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺 ‘‘𑀕𑀩𑁆𑀪𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀕𑀩𑁆𑀪𑁄 𑀯𑀺𑀬𑀸𑀢𑀺 𑀯𑀸. 𑀬𑀣𑀸 𑀳𑀺 𑀦𑀺𑀯𑀸𑀲𑀝𑁆𑀞𑀸𑀦𑀢𑀸𑀬 𑀲𑀢𑁆𑀢𑀸𑀦𑀁 𑀑𑀯𑀭𑀓𑁄 ‘‘𑀕𑀩𑁆𑀪𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀬𑀸𑀯 𑀅𑀪𑀺𑀚𑀸𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀢𑀸𑀬 𑀫𑀸𑀢𑀼𑀓𑀼𑀘𑁆𑀙𑀺 ‘‘𑀕𑀩𑁆𑀪𑁄’’𑀢𑀺 𑀯𑀼𑀢𑁆𑀢𑁄𑀢𑀺.

𑀬𑀫𑁂𑀓𑀭𑀢𑁆𑀢𑀺𑀦𑁆𑀢𑀺 𑀬𑀲𑁆𑀲𑀁 𑀏𑀓𑀭𑀢𑁆𑀢𑀺𑀬𑀁. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀯𑀸. 𑀧𑀞𑀫𑀦𑁆𑀢𑀺 𑀲𑀩𑁆𑀩𑀧𑀞𑀫𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂. 𑀕𑀩𑁆𑀪𑁂𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀬𑀁. 𑀫𑀸𑀡𑀯𑁄𑀢𑀺 𑀲𑀢𑁆𑀢𑁄. 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀭𑀢𑁆𑀢𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀻𑀢𑀺 𑀭𑀢𑁆𑀢𑀺𑀕𑁆𑀕𑀳𑀡𑀁. 𑀅𑀩𑁆𑀪𑀼𑀝𑁆𑀞𑀺𑀢𑁄𑀯𑀸𑀢𑀺 𑀉𑀝𑁆𑀞𑀺𑀢𑀅𑀩𑁆𑀪𑁄 𑀯𑀺𑀬, 𑀅𑀪𑀺𑀫𑀼𑀔𑀪𑀸𑀯𑁂𑀦 𑀯𑀸 𑀉𑀝𑁆𑀞𑀺𑀢𑁄 𑀏𑀯 𑀫𑀭𑀡𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄 𑀬𑀸𑀢𑀻𑀢𑀺 𑀲𑁄 𑀫𑀸𑀡𑀯𑁄 𑀬𑀸𑀢𑀺 𑀧𑀞𑀫𑀓𑁆𑀔𑀡𑀢𑁄 𑀧𑀝𑁆𑀞𑀸𑀬 𑀕𑀘𑁆𑀙𑀢𑁂𑀯. 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀻𑀢𑀺 𑀲𑁄 𑀏𑀯𑀁 𑀕𑀘𑁆𑀙𑀦𑁆𑀢𑁄 𑀔𑀡𑀫𑀢𑁆𑀢𑀫𑁆𑀧𑀺 𑀦 𑀦𑀺𑀯𑀢𑁆𑀢𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀫𑀭𑀡𑀫𑁂𑀯 𑀉𑀧𑀕𑀘𑁆𑀙𑀢𑀻𑀢𑀺 𑀕𑀸𑀣𑀸𑀬 𑀅𑀢𑁆𑀣𑁄.

𑀉𑀢𑀼𑀲𑀫𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀮𑁄𑀓𑀲𑀫𑀜𑁆𑀜𑀸𑀢𑀭𑀚𑀲𑁆𑀲 𑀮𑀕𑁆𑀕𑀦𑀤𑀺𑀯𑀲𑀫𑀢𑁆𑀢𑀁. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀫𑀸𑀢𑀼𑀕𑀸𑀫𑀲𑁆𑀲 𑀓𑀺𑀭 𑀬𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀕𑀩𑁆𑀪𑀸𑀲𑀬𑁂. 𑀲𑀡𑁆𑀞𑀳𑀺𑀢𑁆𑀯𑀸𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸. 𑀪𑀺𑀚𑁆𑀚𑀺𑀢𑁆𑀯𑀸𑀢𑀺 𑀅𑀕𑁆𑀕𑀳𑀺𑀢𑀕𑀩𑁆𑀪𑀸 𑀏𑀯 𑀪𑀺𑀦𑁆𑀦𑀸 𑀳𑀼𑀢𑁆𑀯𑀸. 𑀅𑀬𑀜𑁆𑀳𑀺 𑀢𑀲𑁆𑀲𑀸 𑀲𑀪𑀸𑀯𑁄. 𑀯𑀢𑁆𑀣𑀼 𑀲𑀼𑀤𑁆𑀥𑀁 𑀳𑁄𑀢𑀻𑀢𑀺 𑀧𑀕𑁆𑀖𑀭𑀺𑀢𑀮𑁄𑀳𑀺𑀢𑀢𑁆𑀢𑀸 𑀅𑀦𑀸𑀫𑀬𑀢𑁆𑀢𑀸 𑀘 𑀕𑀩𑁆𑀪𑀸𑀲𑀬𑁄 𑀲𑀼𑀤𑁆𑀥𑁄 𑀳𑁄𑀢𑀺. 𑀲𑀼𑀤𑁆𑀥𑀯𑀢𑁆𑀣𑀼𑀢𑁆𑀢𑀸 𑀢𑀢𑁄 𑀧𑀭𑀁 𑀓𑀢𑀺𑀧𑀬𑀤𑀺𑀯𑀲𑀸𑀦𑀺 𑀔𑁂𑀢𑁆𑀢𑀫𑁂𑀯 𑀳𑁄𑀢𑀺 𑀕𑀩𑁆𑀪𑀲𑀡𑁆𑀞𑀳𑀦𑀲𑁆𑀲 𑀧𑀭𑀺𑀢𑁆𑀢𑀲𑁆𑀲 𑀮𑁄𑀳𑀺𑀢𑀮𑁂𑀲𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀲𑀫𑁆𑀪𑀯𑀲𑁆𑀲 𑀧𑀦 𑀓𑀣𑀁 𑀲𑀩𑁆𑀪𑀸𑀯𑁄𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺𑀆𑀤𑀺. 𑀇𑀢𑁆𑀣𑀺𑀲𑀦𑁆𑀢𑀸𑀦𑁂𑀧𑀺 𑀲𑀼𑀓𑁆𑀓𑀥𑀸𑀢𑀼 𑀮𑀩𑁆𑀪𑀢𑁂𑀯. 𑀢𑁂𑀦𑀸𑀳 ‘‘𑀅𑀗𑁆𑀕𑀧𑀭𑀸𑀫𑀲𑀦𑁂𑀦𑀧𑀺 𑀤𑀸𑀭𑀓𑁄 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯𑀸’’𑀢𑀺. 𑀬𑀣𑀸 𑀧𑀸𑀭𑀺𑀓𑀸𑀬 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀲𑀸𑀫𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲, 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀫𑀡𑁆𑀟𑀩𑁆𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀺. 𑀕𑀦𑁆𑀥𑀩𑁆𑀩𑁄𑀢𑀺 𑀕𑀦𑁆𑀥𑀦𑀢𑁄 𑀉𑀧𑁆𑀧𑀚𑁆𑀚𑀦𑀕𑀢𑀺𑀬𑀸 𑀦𑀺𑀫𑀺𑀢𑁆𑀢𑀼𑀧𑀝𑁆𑀞𑀸𑀧𑀦𑁂𑀦 𑀲𑀽𑀘𑀦𑀢𑁄 𑀕𑀦𑁆𑀥𑁄𑀢𑀺 𑀮𑀤𑁆𑀥𑀦𑀸𑀫𑁂𑀦 𑀪𑀯𑀕𑀸𑀫𑀺𑀓𑀫𑁆𑀫𑀼𑀦𑀸 𑀅𑀩𑁆𑀩𑀢𑀺 𑀧𑀯𑀢𑁆𑀢𑀢𑀻𑀢𑀺 𑀕𑀦𑁆𑀥𑀩𑁆𑀩𑁄, 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑁄. 𑀢𑁂𑀦𑀸𑀳 ‘‘𑀢𑀢𑁆𑀭𑀽𑀧𑀕𑀲𑀢𑁆𑀢𑁄’’𑀢𑀺. 𑀓𑀫𑁆𑀫𑀬𑀦𑁆𑀢𑀬𑀦𑁆𑀢𑀺𑀢𑁄𑀢𑀺 𑀢𑀢𑁆𑀭𑀽𑀧𑀧𑀢𑁆𑀢𑀺𑀆𑀯𑀳𑁂𑀦 𑀓𑀫𑁆𑀫𑀲𑀗𑁆𑀔𑀸𑀢𑁂𑀦 𑀧𑁂𑀮𑁆𑀮𑀦𑀓𑀬𑀦𑁆𑀢𑁂𑀦 𑀢𑀣𑀢𑁆𑀢𑀸𑀬 𑀧𑁂𑀮𑁆𑀮𑀺𑀢𑁄 𑀉𑀧𑀦𑀻𑀢𑁄. 𑀫𑀳𑀦𑁆𑀢𑁂𑀦 𑀚𑀻𑀯𑀺𑀢𑀲𑀁𑀲𑀬𑁂𑀦𑀸𑀢𑀺 𑀯𑀺𑀚𑀸𑀬𑀦𑀧𑀭𑀺𑀓𑁆𑀓𑀺𑀮𑁂𑀲𑁂𑀦 ‘‘𑀚𑀻𑀯𑀺𑀲𑁆𑀲𑀸𑀫𑀺 𑀔𑁄, 𑀦 𑀦𑀼 𑀔𑁄 𑀚𑀻𑀯𑀺𑀲𑁆𑀲𑀸𑀫𑀺 𑀅𑀳𑀁 𑀯𑀸, 𑀧𑀼𑀢𑁆𑀢𑁄 𑀯𑀸 𑀫𑁂’’𑀢𑀺 𑀏𑀯𑀁 𑀧𑀯𑀢𑁆𑀢𑁂𑀦 𑀚𑀻𑀯𑀺𑀢𑀲𑀁𑀲𑀬𑁂𑀦 𑀯𑀺𑀧𑀼𑀮𑁂𑀦 𑀕𑀭𑀼𑀢𑀭𑁂𑀦 𑀲𑀁𑀲𑀬𑁂𑀦. 𑀢𑀁 𑀞𑀸𑀦𑀦𑁆𑀢𑀺 𑀣𑀦𑀧𑁆𑀧𑀤𑁂𑀲𑀫𑀸𑀳. 𑀓𑀻𑀴𑀦𑁆𑀢𑀺 𑀢𑁂𑀦𑀸𑀢𑀺 𑀓𑀻𑀴𑀦𑀁, 𑀓𑀻𑀴𑀦𑀫𑁂𑀯 𑀓𑀻𑀴𑀦𑀓𑀁.

𑁪𑁦𑁯. 𑀲𑀸𑀭𑀚𑁆𑀚𑀢𑀻𑀢𑀺 𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺. 𑀓𑀸𑀬𑁂 𑀓𑁂𑀲𑀸𑀤𑀺𑀤𑁆𑀯𑀢𑁆𑀢𑀺𑀁𑀲𑀸𑀲𑀼𑀘𑀺𑀲𑀫𑀼𑀤𑀸𑀬𑁂 𑀢𑀁𑀲𑀪𑀸𑀯𑀸𑀭𑀫𑁆𑀫𑀡𑀸 𑀲𑀢𑀺 𑀓𑀸𑀬𑀲𑀢𑀺. 𑀅𑀦𑀼𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸, 𑀬𑀣𑀸𑀲𑀪𑀸𑀯𑀢𑁄 𑀓𑀸𑀬𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀢𑁆𑀢𑀘𑁂𑀢𑀲𑁄𑀢𑀺 𑀓𑀺𑀮𑁂𑀲𑁂𑀳𑀺 𑀧𑀭𑀺𑀢𑁄 𑀔𑀡𑁆𑀟𑀺𑀢𑀘𑀺𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀓𑀼𑀲𑀮𑀘𑀺𑀢𑁆𑀢𑁄’’𑀢𑀺. 𑀏𑀢𑁂 𑀅𑀓𑀼𑀲𑀮𑀥𑀫𑁆𑀫𑀸. 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀦𑀺𑀭𑁄𑀥𑀁 𑀧𑀢𑁆𑀢𑀸 𑀳𑁄𑀦𑁆𑀢𑀺. 𑀢𑀡𑁆𑀳𑀸𑀯𑀲𑁂𑀦 𑀅𑀪𑀺𑀦𑀦𑁆𑀤𑀢𑀻𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀸𑀯𑀲𑁂𑀦 𑀅𑀪𑀺𑀫𑀼𑀔𑀁 𑀳𑀼𑀢𑁆𑀯𑀸 𑀦𑀦𑁆𑀤𑀢𑀺. 𑀅𑀪𑀺𑀯𑀤𑀢𑀻𑀢𑀺 𑀢𑀡𑁆𑀳𑀸𑀯𑀲𑁂𑀦 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀅𑀪𑀺𑀦𑀺𑀯𑀺𑀲𑁆𑀲 𑀯𑀤𑀢𑀺. 𑀅𑀚𑁆𑀛𑁄𑀲𑀸𑀬𑀸𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀺𑀬 𑀆𑀭𑀫𑁆𑀫𑀡𑀁 𑀢𑀡𑁆𑀳𑀸𑀯𑀲𑁂𑀦 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸’’𑀢𑀺. 𑀤𑀼𑀓𑁆𑀔𑀁 𑀓𑀣𑀁 𑀅𑀪𑀺𑀦𑀦𑁆𑀤𑀢𑀻𑀢𑀺 𑀏𑀢𑁆𑀣 𑀤𑀼𑀓𑁆𑀔𑀳𑁂𑀢𑀼𑀓𑀁 𑀅𑀪𑀺𑀦𑀦𑁆𑀤𑀦𑁆𑀢𑁄 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺 𑀦𑀸𑀫𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀸𑀯𑀢𑀸 𑀬𑀲𑁆𑀲 𑀤𑀼𑀓𑁆𑀔𑁂 𑀤𑀺𑀝𑁆𑀞𑀺𑀢𑀡𑁆𑀳𑀸 𑀅𑀪𑀺𑀦𑀦𑁆𑀤𑀦𑀸 𑀅𑀧𑁆𑀧𑀳𑀻𑀦𑀸, 𑀢𑀸𑀯𑀢𑀸𑀬𑀁 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀳𑀁 𑀤𑀼𑀓𑁆𑀔𑀺𑀢𑁄 𑀫𑀫 𑀤𑀼𑀓𑁆𑀔𑀦𑁆𑀢𑀺 𑀕𑀡𑁆𑀳𑀦𑁆𑀢𑁄 𑀅𑀪𑀺𑀦𑀦𑁆𑀤𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀕𑀸𑀳𑀤𑁆𑀯𑀬𑀳𑁂𑀢𑀼𑀓𑀸 𑀢𑀢𑁆𑀣 𑀅𑀪𑀺𑀦𑀦𑁆𑀤𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀦 𑀏𑀓𑀯𑀸𑀭𑀦𑁆𑀢𑀺 𑀧𑀼𑀦𑀧𑀺 𑀏𑀓𑀯𑀸𑀭𑀁. 𑀨𑀮𑀳𑁂𑀢𑀼𑀲𑀦𑁆𑀥𑀺𑀳𑁂𑀢𑀼𑀨𑀮𑀲𑀦𑁆𑀥𑀺𑀯𑀲𑁂𑀦 𑀤𑁆𑀯𑀺𑀲𑀦𑁆𑀥𑀻. ‘‘𑀕𑀩𑁆𑀪𑀲𑁆𑀲𑀸𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀢𑁄 𑀲𑀭𑀽𑀧𑀢𑁄 𑀘 𑀏𑀢𑀭𑀳𑀺 𑀨𑀮𑀲𑀗𑁆𑀔𑁂𑀧𑀲𑁆𑀲. 𑀲𑀭𑀽𑀧𑁂𑀦𑁂𑀯 𑀘 𑀇𑀢𑀭𑀤𑁆𑀯𑀬𑀲𑁆𑀲 𑀤𑁂𑀲𑀺𑀢𑀢𑁆𑀢𑀸 𑀆𑀳 ‘‘𑀢𑀺𑀲𑀗𑁆𑀔𑁂𑀧’’𑀦𑁆𑀢𑀺.

𑁪𑁧𑁦-𑁪𑁧𑁪. 𑀲𑀫𑀣𑀬𑀸𑀦𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑁂𑀤𑀦𑀸𑀫𑀼𑀔𑁂𑀦 𑀲𑀗𑁆𑀔𑁂𑀧𑁂𑀦𑁂𑀯 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀇𑀥 𑀓𑀣𑀺𑀢𑀦𑁆𑀢𑀺 𑀆𑀳 ‘‘𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀥𑀸𑀭𑁂𑀣𑀸’’𑀢𑀺. ‘‘𑀇𑀫𑀁 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺’’𑀦𑁆𑀢𑀺 𑀘 𑀪𑀕𑀯𑀸 𑀬𑀣𑀸𑀤𑁂𑀲𑀺𑀢𑀁 𑀤𑁂𑀲𑀦𑀁 𑀅𑀯𑁄𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀫𑀁…𑀧𑁂… 𑀯𑀺𑀫𑀼𑀢𑁆𑀢𑀺𑀤𑁂𑀲𑀦’’𑀦𑁆𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀤𑁂𑀲𑀦𑀸 𑀯𑀺𑀫𑀼𑀢𑁆𑀢𑀻𑀢𑀺 𑀆𑀳 ‘‘𑀤𑁂𑀲𑀦𑀸 𑀳𑀺…𑀧𑁂… 𑀯𑀺𑀫𑀼𑀢𑁆𑀢𑀻𑀢𑀺 𑀯𑀼𑀢𑁆𑀢𑀸’’𑀢𑀺. 𑀬𑀲𑁆𑀲𑀸 𑀢𑀡𑁆𑀳𑀸𑀬 𑀯𑀲𑁂𑀦 𑀲𑀸𑀢𑀺 𑀪𑀺𑀓𑁆𑀔𑀼 𑀲𑀲𑁆𑀲𑀢𑀕𑁆𑀕𑀸𑀳𑀫𑀳𑀸𑀲𑀗𑁆𑀖𑀸𑀝𑀧𑀝𑀺𑀫𑀼𑀓𑁆𑀓𑁄, 𑀲𑀸 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸 𑀳𑀢𑁆𑀣𑀸𑀯𑀮𑀫𑁆𑀩𑀫𑀸𑀦𑁂𑀧𑀺 𑀤𑀼𑀭𑀼𑀕𑁆𑀖𑀸𑀝𑀺𑀬𑀸 𑀚𑀸𑀢𑀸𑀢𑀺 𑀆𑀳 ‘‘𑀫𑀳𑀸𑀢𑀡𑁆𑀳𑀸𑀚𑀸𑀮𑀢𑀡𑁆𑀳𑀸𑀲𑀗𑁆𑀖𑀸𑀝𑀧𑀝𑀺𑀫𑀼𑀓𑁆𑀓’’𑀦𑁆𑀢𑀺. 𑀫𑀳𑀸𑀢𑀡𑁆𑀳𑀸𑀚𑀸𑀮𑁂𑀢𑀺 𑀫𑀳𑀦𑁆𑀢𑁂 𑀢𑀡𑁆𑀳𑀸𑀚𑀝𑁂. 𑀢𑀡𑁆𑀳𑀸𑀲𑀗𑁆𑀖𑀸𑀝𑁂𑀢𑀺 𑀢𑀡𑁆𑀳𑀸𑀬 𑀲𑀗𑁆𑀖𑀸𑀝𑁂. 𑀢𑀣𑀸𑀪𑀽𑀢𑁄 𑀘 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀓𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀼𑀧𑀯𑀺𑀝𑁆𑀞𑁄 𑀅𑀦𑁆𑀢𑁄𑀕𑀥𑁄’’𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.