𑁭. 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁦. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀼𑀩𑁆𑀩𑀸𑀭𑀸𑀫𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑀸𑀦𑀁 𑀅𑀢𑁆𑀣𑀯𑀺𑀪𑀸𑀯𑀦𑁂 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑀻 𑀓𑀣𑀸. 𑀫𑀡𑀻𑀦𑀦𑁆𑀢𑀺 𑀏𑀢𑁆𑀣 𑀧𑀤𑀼𑀫𑀭𑀸𑀕𑀫𑀡𑀻𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀆𑀳 ‘‘𑀅𑀜𑁆𑀜𑁂𑀳𑀺 𑀘𑀸’’𑀢𑀺. 𑀢𑁂𑀦 𑀇𑀦𑁆𑀤𑀦𑀻𑀮𑀸𑀤𑀺𑀫𑀡𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀓𑀩𑀭𑀯𑀡𑁆𑀡𑀯𑀲𑁂𑀦 𑀲𑀢𑁆𑀢𑀯𑀡𑁆𑀡𑁂𑀳𑀺.

𑀢𑀡𑁆𑀳𑀸 𑀲𑀩𑁆𑀩𑀲𑁄 𑀔𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀬𑁄 (𑀅. 𑀦𑀺. 𑀝𑀻. 𑁩.𑁭.𑁬𑁧), 𑀢𑀲𑁆𑀫𑀺𑀁. 𑀢𑀡𑁆𑀳𑀸𑀲𑀗𑁆𑀔𑀬𑁂𑀢𑀺 𑀘 𑀯𑀺𑀲𑀬𑁂 𑀇𑀤𑀁 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺. 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑀸𑀬𑀸𑀢𑀺 𑀲𑀩𑁆𑀩𑀲𑀁𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑀸𑀬. 𑀅𑀧𑀭𑀪𑀸𑀕𑀧𑀝𑀺𑀧𑀤𑀸 𑀦𑀸𑀫 𑀅𑀭𑀺𑀬𑀲𑀘𑁆𑀘𑀸𑀪𑀺𑀲𑀫𑀬𑁄, 𑀲𑀸 𑀲𑀸𑀲𑀦𑀘𑀸𑀭𑀺𑀕𑁄𑀘𑀭𑀸 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀢𑁄𑀢𑀺 𑀆𑀳 ‘‘𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀲𑀁𑀔𑀺𑀢𑁆𑀢𑁂𑀦 𑀤𑁂𑀲𑁂𑀣𑀸𑀢𑀺 𑀧𑀼𑀘𑁆𑀙𑀢𑀻’’𑀢𑀺. 𑀅𑀓𑀼𑀧𑁆𑀧𑀥𑀫𑁆𑀫𑀢𑀸𑀬 𑀔𑀬𑀯𑀬𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀅𑀢𑀻𑀢𑀸𑀢𑀺 𑀅𑀘𑁆𑀘𑀦𑁆𑀢𑀸, 𑀲𑁄 𑀏𑀯 𑀅𑀧𑀭𑀺𑀳𑀸𑀦𑀲𑀪𑀸𑀯𑀢𑁆𑀢𑀸 𑀅𑀘𑁆𑀘𑀦𑁆𑀢𑀸 𑀦𑀺𑀝𑁆𑀞𑀸 𑀏𑀢𑀲𑁆𑀲𑀸𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄. 𑀢𑁂𑀦𑀸𑀳 ‘‘𑀏𑀓𑀦𑁆𑀢𑀦𑀺𑀝𑁆𑀞𑁄 𑀲𑀢𑀢𑀦𑀺𑀝𑁆𑀞𑁄𑀢𑀺 𑀅𑀢𑁆𑀣𑁄’’𑀢𑀺. 𑀦 𑀳𑀺 𑀧𑀝𑀺𑀯𑀺𑀤𑁆𑀥𑀲𑁆𑀲 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀤𑀲𑁆𑀲𑀦𑀁 𑀓𑀼𑀧𑁆𑀧𑀦𑀁 𑀦𑀸𑀫 𑀅𑀢𑁆𑀣𑀺. 𑀅𑀘𑁆𑀘𑀦𑁆𑀢𑀫𑁂𑀯 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀼𑀲𑀺𑀢𑀢𑁆𑀢𑀸, 𑀢𑀲𑁆𑀲 𑀘 𑀅𑀧𑀭𑀺𑀳𑀸𑀦𑀲𑀪𑀸𑀯𑀢𑁆𑀢𑀸 𑀅𑀘𑁆𑀘𑀦𑁆𑀢𑀁 𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻. 𑀢𑁂𑀦𑀸𑀳 ‘‘𑀦𑀺𑀘𑁆𑀘𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀅𑀢𑁆𑀣𑁄’’𑀢𑀺. 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀁.

𑀯𑁂𑀕𑀸𑀬𑀢𑀻𑀢𑀺 𑀢𑀼𑀭𑀺𑀢𑀸𑀬𑀢𑀺. 𑀲𑀮𑁆𑀮𑀓𑁆𑀔𑁂𑀲𑀻𑀢𑀺 𑀘𑀺𑀦𑁆𑀢𑁂𑀲𑀺, 𑀅𑀢𑁆𑀢𑀦𑀸 𑀬𑀣𑀸 𑀲𑀼𑀢𑀸𑀬 𑀲𑀢𑁆𑀣𑀼 𑀤𑁂𑀲𑀦𑀸𑀬 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀉𑀧𑀥𑀸𑀭𑁂𑀲𑀺. 𑀅𑀦𑀼𑀕𑁆𑀕𑀡𑁆𑀳𑀺𑀢𑁆𑀯𑀸𑀯𑀸𑀢𑀺 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀯𑀲𑁂𑀦 𑀅𑀦𑀼𑀕𑁆𑀕𑀳𑁂𑀢𑁆𑀯𑀸 𑀏𑀯. 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀦𑀺𑀬𑀼𑀢𑁆𑀢𑀸𑀢𑀺 𑀙𑀤𑁆𑀯𑀸𑀭𑀺𑀓𑀸, 𑀢𑁂𑀳𑀺.

𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀲𑀓𑁆𑀓𑀸𑀬𑀲𑀩𑁆𑀩𑀜𑁆𑀳𑀺 𑀲𑀦𑁆𑀥𑀸𑀬 𑀇𑀥 ‘‘𑀲𑀩𑁆𑀩𑁂 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀯𑀺𑀲𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀢𑀲𑁆𑀫𑀸 𑀆𑀬𑀢𑀦𑀥𑀸𑀢𑀼𑀬𑁄𑀧𑀺 𑀢𑀕𑁆𑀕𑀢𑀺𑀓𑀸 𑀏𑀯 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’’𑀢𑀺. 𑀦 𑀬𑀼𑀢𑁆𑀢𑀸 𑀅𑀪𑀺𑀦𑀺𑀯𑁂𑀲𑀸𑀬 ‘‘𑀏𑀢𑀁 𑀫𑀫, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀅𑀚𑁆𑀛𑁄𑀲𑀸𑀦𑀸𑀬. ‘‘𑀅𑀮𑀫𑁂𑀯 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁭𑁨; 𑀲𑀁. 𑀦𑀺. 𑁨.𑁧𑁨𑁪-𑁧𑁨𑁫, 𑁧𑁨𑁮, 𑁧𑁩𑁪, 𑁧𑁪𑁩) 𑀯𑀺𑀬 𑀅𑀮𑀁-𑀲𑀤𑁆𑀤𑁄 𑀬𑀼𑀢𑁆𑀢𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀦 𑀬𑀼𑀢𑁆𑀢𑀸’’𑀢𑀺. 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀪𑀯𑀦𑁆𑀢𑀺. 𑀬𑀤𑀺𑀧𑀺 ‘‘𑀢𑀢𑀺𑀬𑀸, 𑀘𑀢𑀼𑀢𑁆𑀣𑀻’’𑀢𑀺 𑀇𑀤𑀁 𑀯𑀺𑀲𑀼𑀤𑁆𑀥𑀺𑀤𑁆𑀯𑀬𑀁 𑀅𑀪𑀺𑀜𑁆𑀜𑀸𑀧𑀜𑁆𑀜𑀸, 𑀢𑀲𑁆𑀲𑀸 𑀧𑀦 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀪𑀸𑀯𑀢𑁄, 𑀲𑀢𑀺 𑀘 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀲𑀧𑁆𑀧𑀘𑁆𑀘𑀬𑀢𑁆𑀢𑀸 (𑀦𑀸𑀫𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀜𑁆𑀘 𑀅𑀦𑀢𑁆𑀢𑀸𑀢𑀺 𑀅𑀢𑁆𑀣𑀢𑁄) 𑀮𑀓𑁆𑀔𑀡𑀢𑁆𑀢𑀬𑀁 𑀲𑀼𑀧𑀸𑀓𑀝𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀬 𑀅𑀪𑀺𑀚𑀸𑀦𑀸𑀢𑀻’’𑀢𑀺. 𑀢𑀣𑁂𑀯 𑀢𑀻𑀭𑀡𑀧𑀭𑀺𑀜𑁆𑀜𑀸𑀬𑀸𑀢𑀺 𑀇𑀫𑀺𑀦𑀸 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸𑀢𑀺 𑀦𑀸𑀫𑀭𑀽𑀧𑀲𑁆𑀲 𑀉𑀧𑀲𑀁𑀳𑀭𑀢𑀺, 𑀦 𑀅𑀪𑀺𑀜𑁆𑀜𑀸𑀧𑀜𑁆𑀜𑀸𑀦𑀁 𑀲𑀫𑁆𑀪𑀸𑀭𑀥𑀫𑁆𑀫𑀸𑀦𑀁. 𑀧𑀼𑀭𑀺𑀫𑀸𑀬 𑀳𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀮𑀓𑁆𑀔𑀡𑀢𑁆𑀢𑀬𑀁 𑀕𑀡𑁆𑀳𑀸𑀢𑀺 𑀲𑀮𑀓𑁆𑀔𑀡𑀲𑀮𑁆𑀮𑀓𑁆𑀔𑀡𑀧𑀭𑀢𑁆𑀢𑀸 𑀢𑀲𑁆𑀲𑀸, 𑀤𑀼𑀢𑀺𑀬𑀸𑀬 𑀲𑀭𑀽𑀧𑀢𑁄 𑀢𑀲𑁆𑀲𑀸 𑀮𑀓𑁆𑀔𑀡𑀢𑁆𑀢𑀬𑀸𑀭𑁄𑀧𑀦𑀯𑀲𑁂𑀦 𑀲𑀫𑁆𑀫𑀲𑀦𑀪𑀸𑀯𑀢𑁄. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑀸𑀬 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀢𑀸𑀬 𑀘 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺. 𑀭𑀽𑀧𑀧𑀭𑀺𑀕𑁆𑀕𑀳𑀲𑁆𑀲 𑀑𑀴𑀸𑀭𑀺𑀓𑀪𑀸𑀯𑀢𑁄 𑀅𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀺. 𑀤𑀲𑁆𑀲𑁂𑀦𑁆𑀢𑁄 𑀘 𑀯𑁂𑀤𑀦𑀸𑀬 𑀆𑀲𑀦𑁆𑀦𑀪𑀸𑀯𑀢𑁄, 𑀯𑀺𑀲𑁂𑀲𑀢𑁄 𑀲𑀼𑀔𑀲𑀸𑀭𑀸𑀕𑀺𑀢𑀸𑀬, 𑀪𑀯𑀲𑁆𑀲𑀸𑀤𑀕𑀥𑀺𑀢𑀫𑀸𑀦𑀲𑀢𑀸𑀬 𑀘 𑀲𑀓𑁆𑀓𑀲𑁆𑀲 𑀯𑁂𑀤𑀦𑀸𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀉𑀧𑁆𑀧𑀸𑀤𑀯𑀬𑀝𑁆𑀞𑁂𑀦𑀸𑀢𑀺 𑀉𑀤𑀬𑀩𑁆𑀩𑀬𑀲𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁂𑀦. 𑀅𑀦𑀺𑀘𑁆𑀘𑀸𑀢𑀺 𑀅𑀤𑁆𑀥𑀼 𑀯𑀸. 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀅𑀦𑀺𑀘𑁆𑀘𑀢𑀸 𑀉𑀤𑀬𑀯𑀬𑀢𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀔𑀬𑀢𑁄 𑀯𑀬𑀢𑁄 𑀤𑀲𑁆𑀲𑀦𑀜𑀸𑀡𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀢𑀁𑀲𑀫𑀗𑁆𑀕𑀻 𑀘 𑀧𑀼𑀕𑁆𑀕𑀮𑁄 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻, 𑀢𑀲𑁆𑀫𑀸. 𑀔𑀬𑀯𑀺𑀭𑀸𑀕𑁄𑀢𑀺 𑀔𑀬𑀲𑀗𑁆𑀔𑀸𑀢𑁄 𑀯𑀺𑀭𑀸𑀕𑁄 𑀲𑀗𑁆𑀔𑀸𑀭𑀸𑀦𑀁 𑀧𑀮𑀼𑀚𑁆𑀚𑀦𑀸. 𑀬𑀁 𑀆𑀕𑀫𑁆𑀫 𑀲𑀩𑁆𑀩𑀲𑁄 𑀲𑀗𑁆𑀔𑀸𑀭𑁂𑀳𑀺 𑀯𑀺𑀭𑀚𑁆𑀚𑀦𑀸 𑀳𑁄𑀢𑀺, 𑀢𑀁 𑀦𑀺𑀩𑁆𑀩𑀸𑀦𑀁 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀺𑀫𑁆𑀳𑀺𑀧𑀻𑀢𑀺 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀺𑀧𑀤𑁂𑀧𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀅𑀪𑀺𑀤𑀺𑀲𑀺𑀢𑁆𑀯𑀸 𑀢𑀁 𑀏𑀓𑀤𑁂𑀲𑁂𑀦 𑀯𑀺𑀯𑀭𑀦𑁆𑀢𑁄 ‘‘𑀦𑀺𑀭𑁄𑀥𑁄𑀧𑀺 𑀳𑀺…𑀧𑁂… 𑀤𑀼𑀯𑀺𑀥𑁄𑀬𑁂𑀯𑀸’’𑀢𑀺 𑀆𑀳. 𑀲𑀩𑁆𑀩𑀸𑀲𑀯𑀲𑀁𑀯𑀭𑁂 𑀯𑀼𑀢𑁆𑀢𑀯𑁄𑀲𑁆𑀲𑀕𑁆𑀕𑁄𑀯 𑀇𑀥 ‘‘𑀧𑀝𑀺𑀦𑀺𑀲𑁆𑀲𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀯𑀼𑀘𑁆𑀘𑀢𑀺 𑀯𑁄𑀲𑁆𑀲𑀕𑁆𑀕𑁄’’𑀢𑀺𑀆𑀤𑀺𑀫𑀸𑀳. 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄 𑀯𑀺𑀧𑀲𑁆𑀲𑀦𑀸. 𑀧𑀓𑁆𑀔𑀦𑁆𑀤𑀦𑀯𑀲𑁂𑀦 𑀅𑀧𑁆𑀧𑀦𑀢𑁄 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄 𑀫𑀕𑁆𑀕𑁄 𑀅𑀜𑁆𑀜𑀲𑁆𑀲 𑀢𑀤𑀪𑀸𑀯𑀢𑁄. 𑀲𑁄𑀢𑀺 𑀫𑀕𑁆𑀕𑁄. 𑀆𑀭𑀫𑁆𑀫𑀡𑀢𑁄𑀢𑀺 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀆𑀭𑀫𑁆𑀫𑀡𑀓𑀭𑀡𑀢𑁄. 𑀏𑀯𑀜𑁆𑀳𑀺 𑀫𑀕𑁆𑀕𑀢𑁄 𑀅𑀜𑁆𑀜𑁂𑀲𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸𑀦𑀁 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑀸𑀪𑀸𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀧𑀭𑀺𑀘𑁆𑀘𑀚𑀦𑁂𑀦 𑀧𑀓𑁆𑀔𑀦𑁆𑀤𑀦𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺𑀧𑀺 𑀯𑀸 𑀓𑀸𑀭𑀡𑁂𑀳𑀺. 𑀲𑀩𑁆𑀩𑁂𑀲𑀁 𑀔𑀦𑁆𑀥𑀸𑀦𑀁 𑀯𑁄𑀲𑁆𑀲𑀚𑁆𑀚𑀦𑀁 𑀢𑀧𑁆𑀧𑀝𑀺𑀩𑀤𑁆𑀥𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀤𑀝𑁆𑀞𑀩𑁆𑀩𑀁. 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀉𑀪𑀬𑀫𑁆𑀧𑁂𑀢𑀁 𑀯𑁄𑀲𑁆𑀲𑀚𑁆𑀚𑀦𑀁. 𑀢𑀤𑀼𑀪𑀬𑀲𑀫𑀗𑁆𑀕𑀻𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑀗𑁆𑀕𑀻 𑀫𑀕𑁆𑀕𑀲𑀫𑀗𑁆𑀕𑀻 𑀘. ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑀺. 𑀫. 𑁧.𑁫𑁨) 𑀬𑀣𑀸 𑀯𑀺𑀧𑀲𑁆𑀲𑀦𑀸𑀬 𑀓𑀺𑀮𑁂𑀲𑀸𑀦𑀁 𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀮𑀩𑁆𑀪𑀢𑀺, 𑀏𑀯𑀁 𑀆𑀬𑀢𑀺𑀁 𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀉𑀧𑁆𑀧𑀸𑀤𑁂𑀢𑀩𑁆𑀩𑀔𑀦𑁆𑀥𑀸𑀦𑀫𑁆𑀧𑀺 𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀯𑀢𑁆𑀢𑀩𑁆𑀩𑁄, 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀧𑀦 𑀫𑀕𑁆𑀕𑁂 𑀮𑀩𑁆𑀪𑀫𑀸𑀦𑀸𑀬 𑀏𑀓𑀦𑁆𑀢𑀓𑀸𑀭𑀡𑀪𑀽𑀢𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀫𑀕𑁆𑀕𑁂 𑀧𑀦 𑀢𑀤𑀼𑀪𑀬𑀫𑁆𑀧𑀺 𑀜𑀸𑀬𑀸𑀕𑀢𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄𑀯 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑀤𑀼𑀪𑀬𑀲𑀫𑀗𑁆𑀕𑀻 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺.

𑀧𑀼𑀘𑁆𑀙𑀦𑁆𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 ‘‘𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀻’’𑀢𑀺 𑀏𑀢𑁆𑀣 𑀓𑀸𑀫𑀼𑀧𑀸𑀤𑀸𑀦𑀯𑀲𑁂𑀦 𑀉𑀧𑀸𑀤𑀺𑀬𑀦𑀁 𑀧𑀝𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀆𑀳 ‘‘𑀢𑀡𑁆𑀳𑀸𑀯𑀲𑁂𑀦 𑀦 𑀉𑀧𑀸𑀤𑀺𑀬𑀢𑀻’’𑀢𑀺. 𑀢𑀡𑁆𑀳𑀸𑀯𑀲𑁂𑀦 𑀯𑀸 𑀅𑀲𑀢𑀺 𑀉𑀧𑀸𑀤𑀺𑀬𑀦𑁂 𑀤𑀺𑀝𑁆𑀞𑀺𑀯𑀲𑁂𑀦 𑀉𑀧𑀸𑀤𑀺𑀬𑀦𑀁 𑀅𑀦𑀯𑀓𑀸𑀲𑀫𑁂𑀯𑀸𑀢𑀺 ‘‘𑀢𑀡𑁆𑀳𑀸𑀯𑀲𑁂𑀦’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀦 𑀧𑀭𑀸𑀫𑀲𑀢𑀻𑀢𑀺 𑀦𑀸𑀤𑀺𑀬𑀢𑀺, 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀯𑀲𑁂𑀦 𑀯𑀸 ‘‘𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀦 𑀧𑀭𑀸𑀫𑀲𑀢𑀺. 𑀲𑀁𑀔𑀺𑀢𑁆𑀢𑁂𑀦𑁂𑀯 𑀔𑀺𑀧𑁆𑀧𑀁 𑀓𑀣𑁂𑀲𑀻𑀢𑀺 𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀓𑀣𑁂𑀲𑀺.

𑁩𑁯𑁧. 𑀅𑀪𑀺𑀲𑀫𑀸𑀕𑀦𑁆𑀢𑁆𑀯𑀸𑀢𑀺 𑀅𑀪𑀺𑀫𑀼𑀔𑀜𑀸𑀡𑁂𑀦 𑀜𑁂𑀬𑁆𑀬𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀸𑀣𑀸𑀯𑀢𑁄 𑀯𑀺𑀤𑀺𑀢𑁆𑀯𑀸. 𑀢𑁂𑀦𑀸𑀳 ‘‘𑀚𑀸𑀦𑀺𑀢𑁆𑀯𑀸’’𑀢𑀺. 𑀬𑀣𑀸𑀧𑀭𑀺𑀲𑀯𑀺𑀜𑁆𑀜𑀸𑀧𑀓𑀢𑁆𑀢𑀸𑀢𑀺 𑀬𑀣𑀸𑀧𑀭𑀺𑀲𑀁 𑀥𑀫𑁆𑀫𑀲𑀫𑁆𑀧𑀝𑀺𑀕𑁆𑀕𑀸𑀳𑀺𑀓𑀸𑀬 𑀫𑀳𑀢𑀺𑀬𑀸, 𑀅𑀧𑁆𑀧𑀓𑀸𑀬 𑀯𑀸 𑀧𑀭𑀺𑀲𑀸𑀬 𑀅𑀦𑀼𑀭𑀽𑀧𑀫𑁂𑀯 𑀯𑀺𑀜𑁆𑀜𑀸𑀧𑀦𑀢𑁄. 𑀧𑀭𑀺𑀬𑀦𑁆𑀢𑀁 𑀦 𑀦𑀺𑀘𑁆𑀙𑀭𑀢𑀻𑀢𑀺 𑀦 𑀧𑀯𑀢𑁆𑀢𑀢𑀺. 𑀫𑀸 𑀦𑀺𑀭𑀢𑁆𑀣𑀓𑀸 𑀅𑀕𑀫𑀸𑀲𑀻𑀢𑀺 𑀇𑀤𑀁 𑀥𑀫𑁆𑀫𑀢𑀸𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀯𑀲𑁂𑀦. 𑀏𑀓𑀜𑁆𑀳𑁂𑀢𑀁 𑀲𑀢𑁆𑀣𑀼 𑀯𑀘𑀻𑀖𑁄𑀲𑀲𑁆𑀲 𑀅𑀝𑁆𑀞𑀲𑀼 𑀅𑀗𑁆𑀕𑁂𑀲𑀼, 𑀬𑀤𑀺𑀤𑀁 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑀸. 𑀙𑀺𑀤𑁆𑀤𑀯𑀺𑀯𑀭𑁄𑀓𑀸𑀲𑁄𑀢𑀺 𑀙𑀺𑀤𑁆𑀤𑀪𑀽𑀢𑁄, 𑀯𑀺𑀯𑀭𑀪𑀽𑀢𑁄 𑀯𑀸 𑀑𑀓𑀸𑀲𑁄𑀧𑀺 𑀦𑀢𑁆𑀣𑀺, 𑀪𑀕𑀯𑀢𑁄 𑀲𑀤𑁆𑀤𑀸𑀲𑀯𑀦𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀢𑀲𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄.

𑀧𑀜𑁆𑀘 𑀅𑀗𑁆𑀕𑀸𑀦𑀺 𑀏𑀢𑀲𑁆𑀲𑀸𑀢𑀺 𑀧𑀜𑁆𑀘𑀗𑁆𑀕𑀁, 𑀧𑀜𑁆𑀘𑀗𑁆𑀕𑀁 𑀏𑀯 𑀧𑀜𑁆𑀘𑀗𑁆𑀕𑀺𑀓𑀁. 𑀫𑀳𑀢𑀻𑀆𑀤𑀺 𑀯𑀻𑀡𑀸𑀯𑀺𑀲𑁂𑀲𑁄𑀧𑀺 𑀆𑀢𑀢𑀫𑁂𑀯𑀸𑀢𑀺 ‘‘𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁂𑀲𑀽’’𑀢𑀺 𑀯𑀺𑀲𑁂𑀲𑀺𑀢𑀁. 𑀏𑀓𑀢𑀮𑀁 𑀓𑀼𑀫𑁆𑀪𑀣𑀽𑀡𑀤𑀤𑁆𑀤𑀭𑀸𑀤𑀺. 𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑀁 𑀳𑀼𑀢𑁆𑀯𑀸 𑀢𑀦𑁆𑀢𑀺𑀩𑀤𑁆𑀥𑀁 𑀆𑀢𑀢𑀯𑀺𑀢𑀢𑀁. 𑀢𑁂𑀦𑀸𑀳 ‘‘𑀢𑀦𑁆𑀢𑀺𑀩𑀤𑁆𑀥𑀧𑀡𑀯𑀸𑀤𑀻’’𑀢𑀺. 𑀕𑁄𑀫𑀼𑀔𑀻𑀆𑀤𑀻𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀯𑀁𑀲𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀔𑀲𑀺𑀗𑁆𑀕𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀲𑀫𑁆𑀫𑀸𑀤𑀻𑀢𑀺 𑀲𑀫𑁆𑀫𑀢𑀸𑀴𑀓𑀁𑀲𑀢𑀸𑀴𑀲𑀺𑀮𑀸𑀲𑀮𑀸𑀓𑀢𑀸𑀴𑀸𑀤𑀺. 𑀢𑀢𑁆𑀣 𑀲𑀫𑁆𑀫𑀢𑀸𑀴𑀁 𑀦𑀸𑀫 𑀤𑀡𑁆𑀟𑀫𑀬𑀢𑀸𑀴𑀁. 𑀓𑀁𑀲𑀢𑀸𑀴𑀁 𑀮𑁄𑀳𑀫𑀬𑀁. 𑀲𑀺𑀮𑀸𑀬 𑀅𑀬𑁄𑀧𑀢𑁆𑀢𑁂𑀦 𑀘 𑀯𑀸𑀤𑀦𑀢𑀸𑀴𑀁 𑀲𑀺𑀮𑀸𑀲𑀮𑀸𑀓𑀢𑀸𑀴𑀁. 𑀲𑀫𑀧𑁆𑀧𑀺𑀢𑁄𑀢𑀺 𑀲𑀫𑁆𑀫𑀸 𑀅𑀧𑁆𑀧𑀺𑀢𑁄 𑀉𑀧𑁂𑀢𑁄. 𑀢𑁂𑀦𑀸𑀳 ‘‘𑀉𑀧𑀕𑀢𑁄’’𑀢𑀺. 𑀉𑀧𑀝𑁆𑀞𑀸𑀦𑀯𑀲𑁂𑀦 𑀧𑀜𑁆𑀘𑀳𑀺 𑀢𑀽𑀭𑀺𑀬𑀲𑀢𑁂𑀳𑀺 𑀉𑀧𑁂𑀢𑁄. 𑀏𑀯𑀁𑀪𑀽𑀢𑁄 𑀘 𑀬𑀲𑁆𑀫𑀸 𑀢𑁂𑀳𑀺 𑀉𑀧𑀝𑁆𑀞𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑀗𑁆𑀕𑀻𑀪𑀽𑀢𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀧𑀭𑀺𑀘𑀸𑀭𑁂𑀢𑀻𑀢𑀺 𑀧𑀭𑀺𑀢𑁄 𑀘𑀸𑀭𑁂𑀢𑀺. 𑀓𑀸𑀦𑀺 𑀧𑀦 𑀘𑀸𑀭𑁂𑀢𑀺, 𑀓𑀣𑀁 𑀯𑀸 𑀘𑀸𑀭𑁂𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀢𑁆𑀢𑀺𑀁…𑀧𑁂… 𑀘𑀸𑀭𑁂𑀢𑀻’’𑀢𑀺. 𑀢𑀢𑁆𑀣 𑀢𑀢𑁄 𑀢𑀢𑁄𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀸𑀤𑀺𑀢𑁂 𑀢𑀢𑁆𑀣 𑀢𑀢𑁆𑀣 𑀘 𑀯𑀸𑀤𑀓𑀚𑀦𑁂. 𑀅𑀧𑀦𑁂𑀢𑁆𑀯𑀸𑀢𑀺 𑀯𑀸𑀤𑀓𑀚𑀦𑁂 𑀦𑀺𑀲𑁂𑀥𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀦𑀺𑀲𑁆𑀲𑀤𑁆𑀤𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸’’𑀢𑀺. 𑀤𑁂𑀯𑀘𑀸𑀭𑀺𑀓𑀁 𑀕𑀘𑁆𑀙𑀢𑀺𑀬𑁂𑀯 𑀤𑁂𑀯𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀜𑁆𑀘 𑀅𑀦𑀼𑀓𑀫𑁆𑀧𑀸𑀬. 𑀲𑁆𑀯𑀸𑀬𑀫𑀢𑁆𑀣𑁄 𑀯𑀺𑀫𑀸𑀦𑀯𑀢𑁆𑀣𑀽𑀳𑀺 (𑀯𑀺. 𑀯. 𑁧) 𑀤𑀻𑀧𑁂𑀢𑀩𑁆𑀩𑁄.

𑁩𑁯𑁨. 𑀅𑀧𑁆𑀧𑁂𑀯 𑀲𑀓𑁂𑀦 𑀓𑀭𑀡𑀻𑀬𑁂𑀦𑀸𑀢𑀺 𑀫𑀸𑀭𑀺𑀲, 𑀫𑁄𑀕𑁆𑀕𑀮𑁆𑀮𑀸𑀦, 𑀫𑀬𑀁 𑀲𑀓𑁂𑀦 𑀓𑀭𑀡𑀻𑀬𑁂𑀦 𑀅𑀧𑁆𑀧𑁂𑀯 𑀩𑀳𑀼𑀓𑀺𑀘𑁆𑀘𑀸𑀧𑀺 𑀦 𑀳𑁄𑀫. 𑀅𑀧𑀺𑀘 𑀤𑁂𑀯𑀸𑀦𑀁𑀬𑁂𑀯𑀸𑀢𑀺 𑀅𑀧𑀺𑀘 𑀔𑁄 𑀧𑀦 𑀤𑁂𑀯𑀸𑀦𑀁𑀬𑁂𑀯 𑀢𑀸𑀯𑀢𑀺𑀁𑀲𑀸𑀦𑀁 𑀓𑀭𑀡𑀻𑀬𑁂𑀦 𑀯𑀺𑀲𑁂𑀲𑀢𑁄 𑀩𑀳𑀼𑀓𑀺𑀘𑁆𑀘𑀸𑀢𑀺 𑀅𑀢𑁆𑀣𑀬𑁄𑀚𑀦𑀸. 𑀪𑀼𑀫𑁆𑀫𑀝𑁆𑀞𑀓𑀤𑁂𑀯𑀢𑀸𑀦𑀫𑁆𑀧𑀺 𑀓𑁂𑀘𑀺 𑀅𑀝𑁆𑀝𑀸 𑀲𑀓𑁆𑀓𑁂𑀦 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀣𑀯𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺. 𑀦𑀺𑀬𑀫𑁂𑀦𑁆𑀢𑁄𑀢𑀺 𑀅𑀯𑀥𑀸𑀭𑁂𑀦𑁆𑀢𑁄. 𑀢𑀁 𑀧𑀦 𑀓𑀭𑀡𑀻𑀬𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑁂𑀯𑀸𑀦𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀸𑀲𑀦𑁆𑀢𑀺 𑀤𑁂𑀯𑀥𑀻𑀢𑀼𑀤𑁂𑀯𑀧𑀼𑀢𑁆𑀢𑀧𑀸𑀤𑀧𑀭𑀺𑀘𑀸𑀭𑀺𑀓𑀸𑀦𑀁. 𑀫𑀡𑁆𑀟𑀦𑀧𑀲𑀸𑀥𑀦𑀓𑀸𑀭𑀺𑀓𑀸𑀢𑀺 𑀫𑀡𑁆𑀟𑀦𑀧𑀲𑀸𑀥𑀦𑀲𑀁𑀯𑀺𑀥𑀸𑀬𑀺𑀓𑀸. 𑀅𑀝𑁆𑀝𑀓𑀭𑀡𑀁 𑀦𑀢𑁆𑀣𑀺 𑀲𑀁𑀲𑀬𑀲𑁆𑀲𑁂𑀯 𑀅𑀪𑀸𑀯𑀢𑁄.

𑀬𑀦𑁆𑀢𑀺 𑀲𑀯𑀦𑀼𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀲𑀼𑀧𑀭𑀺𑀘𑀺𑀢𑀫𑁆𑀧𑀺 𑀬𑀁 𑀅𑀢𑁆𑀣𑀚𑀸𑀢𑀁. 𑀦 𑀤𑀺𑀲𑁆𑀲𑀢𑀺, 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀲𑀩𑁆𑀩𑀲𑁄 𑀦 𑀧𑀝𑀺𑀪𑀸𑀢𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀻𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸. 𑀲𑁄𑀫𑀦𑀲𑁆𑀲𑀲𑀁𑀯𑁂𑀕𑀦𑁆𑀢𑀺 𑀲𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀸𑀦𑀁 𑀲𑀁𑀯𑁂𑀕𑀁, 𑀦 𑀘𑀺𑀢𑁆𑀢𑀲𑀦𑁆𑀢𑀸𑀲𑀁.

𑀲𑀫𑀼𑀧𑀩𑁆𑀬𑀽𑀴𑁆𑀳𑁄𑀢𑀺 𑀬𑀼𑀚𑁆𑀛𑀦𑀯𑀲𑁂𑀦 𑀲𑀳𑀧𑀢𑀺𑀢𑁄 𑀲𑀫𑁄𑀕𑀸𑀴𑁆𑀳𑁄. 𑀏𑀯𑀁𑀪𑀽𑀢𑁄 𑀘 𑀬𑀲𑁆𑀫𑀸 𑀲𑀫𑀽𑀳𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀦𑁆𑀦𑀺𑀧𑀢𑀺𑀢𑁄 𑀭𑀸𑀲𑀺𑀪𑀽𑀢𑁄’’𑀢𑀺. 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂𑀢𑀺 𑀇𑀤𑀁 𑀤𑀼𑀢𑀺𑀬𑀁 𑀲𑀓𑁆𑀓𑀢𑁆𑀢𑀪𑀸𑀯𑀁 𑀢𑀢𑁄 𑀅𑀦𑀦𑁆𑀢𑀭𑀸𑀢𑀻𑀢𑁂𑀦 𑀲𑀓𑁆𑀓𑀢𑁆𑀢𑀪𑀸𑀯𑁂𑀦 𑀲𑀓𑁆𑀓𑀢𑁆𑀢𑀪𑀸𑀯𑀲𑀸𑀫𑀜𑁆𑀜𑀢𑁄 𑀏𑀓𑀫𑀺𑀯 𑀓𑀢𑁆𑀯𑀸 𑀕𑀳𑀡𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 ‘‘𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀫𑀖𑀢𑁆𑀢𑀪𑀸𑀯𑁄 𑀳𑀺 𑀇𑀢𑁄 𑀢𑀢𑀺𑀬𑁄𑀢𑀺. 𑀅𑀣 𑀯𑀸 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀲𑁄 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄 𑀅𑀳𑁄𑀲𑀺, 𑀢𑀲𑁆𑀲 𑀅𑀦𑀦𑁆𑀢𑀭𑀢𑁆𑀢𑀸 𑀫𑀖𑀢𑁆𑀢𑀪𑀸𑀯𑀲𑁆𑀲 𑀯𑀼𑀢𑁆𑀢𑀁 ‘‘𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂’’𑀢𑀺. 𑀲𑀢𑁆𑀢𑀸𑀦𑀁 𑀳𑀺𑀢𑁂𑀲𑀺𑀢𑀸𑀬 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀸𑀤𑀺𑀦𑀸 𑀘𑀭𑀺𑀬𑀸𑀳𑀺 𑀩𑁄𑀥𑀺𑀲𑀢𑁆𑀢𑀘𑀭𑀺𑀬𑀸 𑀯𑀺𑀬𑀲𑁆𑀲 𑀘𑀭𑀺𑀬𑀸 𑀅𑀳𑁄𑀲𑀺. 𑀲𑀢𑁆𑀢 𑀯𑀢𑀧𑀤𑀸𑀦𑀻𑀢𑀺 𑀲𑀢𑁆𑀢 𑀯𑀢𑀓𑁄𑀝𑁆𑀞𑀸𑀲𑁂.

𑀫𑀳𑀸𑀧𑀸𑀦𑀦𑁆𑀢𑀺 𑀫𑀳𑀦𑁆𑀢𑀁 𑀲𑀼𑀭𑀸𑀧𑀸𑀦𑀁. 𑀕𑀡𑁆𑀟𑀧𑀸𑀦𑀦𑁆𑀢𑀺 𑀕𑀡𑁆𑀟𑀲𑀼𑀭𑀸𑀧𑀸𑀦𑀁, 𑀅𑀥𑀺𑀫𑀢𑁆𑀢𑀧𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀳𑀭𑀫𑀸𑀦𑀸𑀢𑀺 𑀧𑀭𑀺𑀯𑀸𑀭𑁂𑀦𑁆𑀢𑀸. 𑀯𑁂𑀤𑀺𑀓𑀸𑀧𑀸𑀤𑀸𑀢𑀺 𑀲𑀺𑀦𑁂𑀭𑀼𑀲𑁆𑀲 𑀧𑀭𑀺𑀬𑀦𑁆𑀢𑁂 𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑁂𑀧𑀸. 𑀧𑀜𑁆𑀘𑀲𑀼 𑀞𑀸𑀦𑁂𑀲𑀽𑀢𑀺 𑀧𑀜𑁆𑀘𑀲𑀼 𑀧𑀭𑀺𑀪𑀡𑁆𑀟𑀝𑁆𑀞𑀸𑀦𑁂𑀲𑀼 𑀦𑀸𑀕𑀲𑁂𑀦𑀸𑀤𑀻𑀳𑀺 𑀆𑀭𑀓𑁆𑀔𑀁 𑀞𑀧𑁂𑀲𑀺.

𑁩𑁯𑁩. 𑀭𑀸𑀫𑀡𑁂𑀬𑁆𑀬𑀓𑀦𑁆𑀢𑀺 𑀭𑀫𑀡𑀻𑀬𑀪𑀸𑀯𑀁. 𑀫𑀲𑀸𑀭𑀕𑀮𑁆𑀮𑀢𑁆𑀣𑀫𑁆𑀪𑁂𑀢𑀺 𑀓𑀩𑀭𑀫𑀡𑀺𑀫𑀬𑁂 𑀣𑀫𑁆𑀪𑁂. 𑀲𑀼𑀯𑀡𑁆𑀡𑀸𑀤𑀺𑀫𑀬𑁂 𑀖𑀝𑀓𑁂𑀢𑀺 ‘‘𑀭𑀚𑀢𑀢𑁆𑀣𑀫𑁆𑀪𑁂𑀲𑀼 𑀲𑀼𑀯𑀡𑁆𑀡𑀫𑀬𑁂, 𑀲𑀼𑀯𑀡𑁆𑀡𑀢𑁆𑀣𑀫𑁆𑀪𑁂𑀲𑀼 𑀭𑀚𑀢𑀫𑀬𑁂’’𑀢𑀺𑀆𑀤𑀺𑀦𑀸 𑀲𑀼𑀯𑀡𑁆𑀡𑀸𑀤𑀺𑀫𑀬𑁂 𑀖𑀝𑀓𑁂 𑀯𑀸𑀴𑀭𑀽𑀧𑀓𑀸𑀦𑀺 𑀘. 𑀧𑀩𑀸𑀴𑁆𑀳𑀁 𑀫𑀢𑁆𑀢𑁄𑀢𑀺 𑀧𑀫𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀢𑀺𑀯𑀺𑀬 𑀫𑀢𑁆𑀢𑁄’’𑀢𑀺. 𑀦𑀸𑀝𑀓𑀧𑀭𑀺𑀯𑀸𑀭𑁂𑀦𑀸𑀢𑀺 𑀅𑀘𑁆𑀙𑀭𑀸𑀧𑀭𑀺𑀯𑀸𑀭𑁂𑀦.

𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀦𑁆𑀢𑀺 𑀧𑀤𑀤𑁆𑀯𑀬𑁂𑀦𑀧𑀺 𑀯𑀺𑀫𑁆𑀳𑀬𑀦𑀸𑀓𑀸𑀭𑁄𑀯 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀲𑀜𑁆𑀚𑀸𑀢𑀁 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀁 𑀯𑀺𑀫𑁆𑀳𑀬𑀦𑀸𑀓𑀸𑀭𑁄 𑀏𑀢𑁂𑀲𑀦𑁆𑀢𑀺 𑀲𑀜𑁆𑀚𑀸𑀢𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀸, 𑀢𑀣𑀸 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸. 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀳𑁂𑀢𑀼𑀓𑀸 𑀲𑀜𑁆𑀚𑀸𑀢𑀸 𑀢𑀼𑀝𑁆𑀞𑀺 𑀏𑀢𑁂𑀲𑀦𑁆𑀢𑀺 𑀲𑀜𑁆𑀚𑀸𑀢𑀢𑀼𑀝𑁆𑀞𑀺𑀦𑁄. 𑀲𑀁𑀯𑀺𑀕𑁆𑀕𑀦𑁆𑀢𑀺 𑀲𑀜𑁆𑀚𑀸𑀢𑀲𑀁𑀯𑁂𑀕𑀁. 𑀲𑁆𑀯𑀸𑀬𑀁 𑀲𑀁𑀯𑁂𑀕𑁄 𑀬𑀲𑁆𑀫𑀸 𑀧𑀼𑀭𑀺𑀫𑀸𑀯𑀢𑁆𑀣𑀸𑀬 𑀘𑀺𑀢𑁆𑀢𑀲𑁆𑀲 𑀘𑀮𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀮𑀺𑀢’’𑀦𑁆𑀢𑀺.

𑁩𑁯𑁪. 𑀢𑀫𑀁 𑀯𑀺𑀦𑁄𑀤𑀺𑀢𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀤𑀲𑁆𑀲𑀦𑁂𑀦 ‘‘𑀅𑀳𑁄 𑀣𑁂𑀭𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑁄’’𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀲𑀜𑁆𑀚𑀸𑀢𑀩𑀳𑀼𑀫𑀸𑀦𑁄, 𑀈𑀤𑀺𑀲𑀁 𑀦𑀸𑀫 𑀲𑀸𑀲𑀦𑀁 𑀮𑀪𑀺𑀢𑁆𑀯𑀸𑀧𑀺 𑀫𑀬𑀁 𑀦𑀺𑀭𑀢𑁆𑀣𑀓𑁂𑀦 𑀪𑁄𑀕𑀫𑀤𑁂𑀦 𑀲𑀫𑁆𑀫𑀢𑁆𑀢𑀸 𑀪𑀯𑀸𑀫𑀸𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀼𑀧𑁆𑀧𑀸𑀤𑀦𑁂𑀦 𑀲𑀫𑁆𑀫𑁄𑀳𑀢𑀫𑀁 𑀯𑀺𑀦𑁄𑀤𑀺𑀢𑀁 𑀯𑀺𑀥𑀫𑀺𑀢𑀁. 𑀏𑀢𑁂𑀢𑀺 𑀫𑀳𑀸𑀣𑁂𑀭𑁄 𑀲𑀓𑁆𑀓𑁄 𑀘𑀸𑀢𑀺 𑀢𑁂 𑀤𑁆𑀯𑁂𑀧𑀺 𑀲𑀫𑀸𑀦𑀩𑁆𑀭𑀳𑁆𑀫𑀘𑀭𑀺𑀬𑀢𑀸𑀬 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄.

𑁩𑁯𑁫. 𑀧𑀜𑁆𑀜𑀸𑀢𑀸𑀦𑀦𑁆𑀢𑀺 𑀧𑀸𑀓𑀝𑀸𑀦𑀁 𑀘𑀸𑀢𑀼𑀫𑀳𑀸𑀭𑀸𑀚-𑀲𑀼𑀬𑀸𑀫-𑀲𑀦𑁆𑀢𑀼𑀲𑀺𑀢-𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀅𑀜𑁆𑀜𑀢𑀭𑁄, 𑀦 𑀬𑁂𑀲𑀁 𑀓𑁂𑀲𑀜𑁆𑀘𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀭𑀤𑁆𑀥𑀥𑀫𑁆𑀫𑀯𑀲𑁂𑀦𑁂𑀯 𑀧𑀭𑀺𑀬𑁄𑀲𑀸𑀧𑀺𑀢𑀢𑁆𑀢𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀦𑀺𑀝𑁆𑀞𑀧𑁂𑀲𑀺.

𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.