𑁯. 𑀫𑀳𑀸𑀲𑀸𑀭𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁭. 𑀦𑀘𑀺𑀭𑀧𑀓𑁆𑀓𑀦𑁆𑀢𑁂𑀢𑀺 𑀦 𑀘𑀺𑀭𑀁 𑀧𑀓𑁆𑀓𑀦𑁆𑀢𑁂, 𑀧𑀓𑁆𑀓𑀦𑁆𑀢𑀲𑁆𑀲 𑀲𑀢𑁄 𑀦 𑀘𑀺𑀭𑀲𑁆𑀲𑁂𑀯. 𑀲𑀮𑀺𑀗𑁆𑀕𑁂𑀦𑁂𑀯𑀸𑀢𑀺 𑀫𑀼𑀡𑁆𑀟𑀺𑀬𑀓𑀸𑀲𑀸𑀬𑀕𑁆𑀕𑀳𑀡𑀸𑀤𑀺𑀦𑀸 𑀅𑀢𑁆𑀢𑀦𑁄 𑀧𑀼𑀭𑀺𑀫𑀮𑀺𑀗𑁆𑀕𑁂𑀦𑁂𑀯. 𑀧𑀸𑀝𑀺𑀬𑁂𑀓𑁆𑀓𑁂 𑀚𑀸𑀢𑁂𑀢𑀺 𑀯𑀺𑀧𑀦𑁆𑀦𑀸𑀘𑀸𑀭𑀤𑀺𑀝𑁆𑀞𑀺𑀢𑀸𑀬 𑀧𑀓𑀸𑀲𑀦𑀻𑀬𑀓𑀫𑁆𑀫𑀓𑀭𑀡𑀢𑁄 𑀧𑀭𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀤𑀺𑀲𑁂 𑀯𑀺𑀲𑀼𑀁 𑀪𑀽𑀢𑁂. 𑀓𑀼𑀮𑀧𑀼𑀢𑁆𑀢𑁄𑀢𑀺 𑀚𑀸𑀢𑀺𑀫𑀢𑁆𑀢𑁂𑀦 𑀓𑀼𑀮𑀧𑀼𑀢𑁆𑀢𑁄. 𑀅𑀲𑀫𑁆𑀪𑀺𑀦𑁆𑀦𑀸𑀬𑀸𑀢𑀺 𑀲𑀫𑁆𑀪𑁂𑀤𑀭𑀳𑀺𑀢𑀸𑀬, 𑀚𑀸𑀢𑀺𑀲𑀗𑁆𑀓𑀭𑀯𑀺𑀭𑀳𑀺𑀢𑀸𑀬𑀸𑀢𑀺 𑀅𑀢𑁆𑀢𑁄. 𑀚𑀸𑀢𑀺𑀲𑀻𑀲𑁂𑀦 𑀇𑀥 𑀚𑀸𑀢𑀺𑀯𑀢𑁆𑀣𑀼𑀓𑀁 𑀤𑀼𑀓𑁆𑀔𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀑𑀢𑀺𑀡𑁆𑀡𑁄𑀢𑀺 𑀬𑀲𑁆𑀲 𑀚𑀸𑀢𑀺 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑀸’’𑀢𑀺. 𑀚𑀸𑀢𑁄 𑀳𑀺 𑀲𑀢𑁆𑀢𑁄 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀸𑀢𑀺𑀦𑀺𑀫𑀺𑀢𑁆𑀢𑁂𑀦 𑀤𑀼𑀓𑁆𑀔𑁂𑀦 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑁄 𑀯𑀺𑀬 𑀯𑀺𑀩𑀸𑀥𑀻𑀬𑀢𑀺. 𑀚𑀭𑀸𑀬𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀻𑀢𑀺 𑀮𑀸𑀪𑀸, 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀮𑀩𑁆𑀪𑀫𑀸𑀦𑀸𑀦𑀁 𑀲𑀼𑀓𑀢𑀪𑀸𑀯𑁄 𑀲𑀼𑀝𑁆𑀞𑀼 𑀅𑀪𑀺𑀲𑀗𑁆𑀔𑀢𑀪𑀸𑀯𑁄. 𑀯𑀡𑁆𑀡𑀪𑀡𑀦𑀦𑁆𑀢𑀺 𑀕𑀼𑀡𑀓𑀺𑀢𑁆𑀢𑀦𑀁. 𑀅𑀧𑀜𑁆𑀜𑀸𑀢𑀸𑀢𑀺 𑀲𑀫𑁆𑀪𑀸𑀯𑀦𑀸𑀯𑀲𑁂𑀦 𑀦 𑀧𑀜𑁆𑀜𑀸𑀢𑀸. 𑀮𑀸𑀪𑀸𑀤𑀺𑀦𑀺𑀩𑁆𑀩𑀢𑁆𑀢𑀺𑀬𑀸𑀪𑀸𑀯𑀤𑀲𑁆𑀲𑀦𑀜𑁆𑀳𑁂𑀢𑀁. 𑀢𑁂𑀦𑀸𑀳 ‘‘𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀦 𑀮𑀪𑀦𑁆𑀢𑀻’’𑀢𑀺. 𑀅𑀧𑁆𑀧𑁂𑀲𑀓𑁆𑀔𑀸𑀢𑀺 𑀅𑀧𑁆𑀧𑀸𑀦𑀼𑀪𑀸𑀯𑀸. 𑀲𑀸 𑀧𑀦 𑀅𑀧𑁆𑀧𑁂𑀲𑀓𑁆𑀔𑀢𑀸 𑀅𑀥𑀺𑀧𑀢𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀪𑀸𑀯𑁂𑀦 𑀧𑀸𑀓𑀝𑀸 𑀳𑁄𑀢𑀺. 𑀢𑀢𑁆𑀣 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀧𑀭𑀺𑀯𑀸𑀭𑀸’’𑀢𑀺 𑀆𑀳.

𑀲𑀸𑀭𑁂𑀦𑀧𑀺 𑀓𑁂𑀘𑀺 𑀅𑀚𑀸𑀦𑀦𑁂𑀦 𑀅𑀜𑁆𑀜𑀸𑀮𑀸𑀪𑁂𑀦 𑀯𑀸 𑀅𑀲𑀸𑀭𑀪𑀽𑀢𑀫𑁆𑀧𑀺 𑀓𑀢𑁆𑀢𑀩𑁆𑀩𑀁 𑀓𑀭𑁄𑀦𑁆𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀲𑀸𑀭𑁂𑀦 𑀲𑀸𑀭𑀓𑀭𑀡𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀓𑁆𑀔𑀘𑀓𑁆𑀓𑀬𑀼𑀕𑀦𑀗𑁆𑀕𑀮𑀸𑀤𑀺𑀓’’𑀦𑁆𑀢𑀺 𑀆𑀳. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸𑀢𑀺 𑀲𑀺𑀓𑁆𑀔𑀸𑀢𑁆𑀢𑀬𑀲𑀗𑁆𑀕𑀳𑀲𑁆𑀲 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲. 𑀫𑀳𑀸𑀭𑀼𑀓𑁆𑀔𑀲𑁆𑀲 𑀫𑀕𑁆𑀕𑀨𑀮𑀲𑀸𑀭𑀲𑁆𑀲 𑀜𑀸𑀡𑀤𑀲𑁆𑀲𑀦𑀨𑁂𑀕𑁆𑀕𑀼𑀓𑀲𑁆𑀲 𑀲𑀫𑀸𑀥𑀺𑀢𑀘𑀲𑁆𑀲 𑀲𑀻𑀮𑀧𑀧𑀝𑀺𑀓𑀲𑁆𑀲 𑀘𑀜𑁆𑀘𑀮𑀲𑀪𑀸𑀯𑀸 𑀲𑀁𑀲𑀧𑁆𑀧𑀘𑀸𑀭𑀻𑀢𑀺 𑀘 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀲𑀸𑀔𑀸𑀧𑀮𑀸𑀲𑀁 𑀦𑀸𑀫. 𑀢𑁂𑀦𑁂𑀯𑀸𑀢𑀺 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑀺𑀩𑁆𑀩𑀢𑁆𑀢𑀦𑁂𑀦𑁂𑀯. 𑀲𑀸𑀭𑁄 𑀫𑁂 𑀧𑀢𑁆𑀢𑁄𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀅𑀥𑀺𑀕𑀦𑁆𑀢𑀩𑁆𑀩𑀲𑀸𑀭𑁄 𑀦𑀸𑀫 𑀇𑀫𑀺𑀦𑀸 𑀮𑀸𑀪𑀸𑀤𑀺𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀯𑁄𑀲𑀸𑀦𑀁 𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀁 𑀆𑀧𑀦𑁆𑀦𑁄.

𑁩𑁧𑁦. 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀜𑀸𑀡𑀪𑀽𑀢𑀁 𑀤𑀲𑁆𑀲𑀦𑀁 𑀯𑀺𑀲𑀬𑀲𑁆𑀲 𑀲𑀘𑁆𑀙𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀁 𑀅𑀪𑀺𑀜𑁆𑀜𑀸𑀜𑀸𑀡𑀁. 𑀲𑀼𑀔𑀼𑀫𑀁 𑀭𑀽𑀧𑀦𑁆𑀢𑀺 𑀤𑁂𑀯𑀸𑀤𑀻𑀦𑀁, 𑀅𑀜𑁆𑀜𑀫𑁆𑀧𑀺 𑀯𑀸 𑀲𑀼𑀔𑀼𑀫𑀲𑀪𑀸𑀯𑀁 𑀭𑀽𑀧𑀁. 𑀢𑁂𑀦𑀸𑀳 ‘‘𑀅𑀦𑁆𑀢𑀫𑀲𑁄…𑀧𑁂… 𑀯𑀺𑀳𑀭𑀦𑁆𑀢𑀻’’𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼 𑀳𑀺 𑀇𑀥 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 ‘‘𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺 𑀕𑀳𑀺𑀢𑀁.

𑁩𑁧𑁧. 𑀅𑀲𑀫𑀬𑀯𑀺𑀫𑁄𑀓𑁆𑀔𑀁 𑀆𑀭𑀸𑀥𑁂𑀢𑀻𑀢𑀺 𑀏𑀢𑁆𑀣 𑀅𑀥𑀺𑀧𑁆𑀧𑁂𑀢𑀁 𑀅𑀲𑀫𑀬𑀯𑀺𑀫𑁄𑀓𑁆𑀔𑀁 𑀧𑀸𑀴𑀺𑀬𑀸 𑀏𑀯 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑁄 𑀅𑀲𑀫𑀬𑀯𑀺𑀫𑁄𑀓𑁆𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀦𑁆𑀦𑀜𑁆𑀳𑀺 𑀲𑀫𑀸𑀧𑀚𑁆𑀚𑀦𑀲𑀫𑀬𑁄𑀧𑀺 𑀅𑀢𑁆𑀣𑀺 𑀅𑀲𑀫𑀬𑁄𑀧𑀺, 𑀫𑀕𑁆𑀕𑀯𑀺𑀫𑁄𑀓𑁆𑀔𑁂𑀦 𑀧𑀦 𑀯𑀺𑀫𑀼𑀘𑁆𑀘𑀦𑀲𑁆𑀲 𑀲𑀫𑀬𑁄 𑀯𑀸 𑀅𑀲𑀫𑀬𑁄 𑀯𑀸 𑀦𑀢𑁆𑀣𑀺. 𑀬𑀲𑁆𑀲 𑀲𑀤𑁆𑀥𑀸 𑀩𑀮𑀯𑀢𑀻, 𑀯𑀺𑀧𑀲𑁆𑀲𑀦𑀸 𑀘 𑀆𑀭𑀤𑁆𑀥𑀸, 𑀢𑀲𑁆𑀲 𑀕𑀘𑁆𑀙𑀦𑁆𑀢𑀲𑁆𑀲 𑀢𑀺𑀝𑁆𑀞𑀦𑁆𑀢𑀲𑁆𑀲 𑀦𑀺𑀲𑀻𑀤𑀦𑁆𑀢𑀲𑁆𑀲 𑀪𑀼𑀜𑁆𑀚𑀦𑁆𑀢𑀲𑁆𑀲 𑀘 𑀫𑀕𑁆𑀕𑀨𑀮𑀧𑀝𑀺𑀯𑁂𑀥𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀇𑀢𑀺 𑀫𑀕𑁆𑀕𑀯𑀺𑀫𑁄𑀓𑁆𑀔𑁂𑀦 𑀯𑀺𑀫𑀼𑀘𑁆𑀘𑀦𑁆𑀢𑀲𑁆𑀲 𑀲𑀫𑀬𑁄 𑀯𑀸 𑀅𑀲𑀫𑀬𑁄 𑀯𑀸 𑀦𑀢𑁆𑀣𑀻𑀢𑀺 𑀲𑁄 𑀅𑀲𑀫𑀬𑀯𑀺𑀫𑁄𑀓𑁆𑀔𑁄. 𑀢𑁂𑀦𑀸𑀳 ‘‘𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀬𑁄 𑀳𑀻’’𑀢𑀺𑀆𑀤𑀺.

𑀦 𑀓𑀼𑀧𑁆𑀧𑀢𑀺, 𑀦 𑀦𑀲𑁆𑀲𑀢𑀻𑀢𑀺 𑀅𑀓𑀼𑀧𑁆𑀧𑀸, 𑀓𑀤𑀸𑀘𑀺𑀧𑀺 𑀅𑀧𑀭𑀺𑀳𑀸𑀦𑀲𑀪𑀸𑀯𑀸. 𑀲𑀩𑁆𑀩𑀲𑀁𑀓𑀺𑀮𑁂𑀲𑁂𑀳𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀘𑁂𑀢𑀲𑁄 𑀯𑀺𑀫𑀼𑀢𑁆𑀢𑀻𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀢𑁂𑀦𑀸𑀳 ‘‘𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀻’’𑀢𑀺. 𑀅𑀬𑀫𑀢𑁆𑀣𑁄 𑀧𑀬𑁄𑀚𑀦𑀁 𑀏𑀢𑀲𑁆𑀲𑀸𑀢𑀺 𑀏𑀢𑀤𑀢𑁆𑀣𑀁, 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀲𑁆𑀲 𑀏𑀲𑀸 𑀧𑀭𑀫𑀓𑁄𑀝𑀺. 𑀬𑀣𑀸𑀭𑀤𑁆𑀥𑀲𑁆𑀲 𑀲𑀸𑀭𑁄𑀧𑀫𑁂𑀦 𑀨𑀮𑁂𑀦 𑀤𑁂𑀲𑀦𑀸 𑀦𑀺𑀝𑁆𑀞𑀸𑀧𑀺𑀢𑀸𑀢𑀺 𑀆𑀳 ‘‘𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻’’𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀲𑀸𑀭𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.