𑁧𑁦. 𑀘𑀽𑀴𑀲𑀸𑀭𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧𑁨. 𑀧𑀺𑀗𑁆𑀕𑀮𑀥𑀸𑀢𑀼𑀓𑁄𑀢𑀺 𑀧𑀺𑀗𑁆𑀕𑀮𑀲𑀪𑀸𑀯𑁄 𑀧𑀺𑀗𑁆𑀕𑀮𑀘𑁆𑀙𑀯𑀺𑀓𑁄, 𑀧𑀺𑀗𑁆𑀕𑀮𑀓𑁆𑀔𑁄𑀢𑀺 𑀯𑀸 𑀅𑀢𑁆𑀣𑁄. 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄 𑀲𑀗𑁆𑀖𑁄, 𑀦 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀗𑁆𑀕𑀳𑀺𑀢𑀩𑁆𑀩𑀪𑀸𑀯𑁂𑀦. 𑀲𑀗𑁆𑀖𑁄 𑀏𑀢𑁂𑀲𑀁 𑀅𑀢𑁆𑀣𑀺 𑀧𑀭𑀺𑀯𑀸𑀭𑀪𑀽𑀢𑁄𑀢𑀺 𑀲𑀗𑁆𑀖𑀺𑀦𑁄. 𑀲𑁆𑀯𑁂𑀯𑀸𑀢𑀺 𑀲𑁄 𑀏𑀯 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄. 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑀸 𑀧𑀭𑀺𑀓𑀧𑁆𑀧𑀺𑀢𑀅𑀘𑁂𑀮𑀯𑀢𑀸𑀤𑀺𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦. 𑀧𑀜𑁆𑀜𑀸𑀢𑀸𑀢𑀺 𑀬𑀣𑀸𑀲𑀓𑀁 𑀲𑀫𑀸𑀤𑀺𑀦𑁆𑀦𑀯𑀢𑀯𑀲𑁂𑀦 𑀘𑁂𑀯 𑀯𑀺𑀜𑁆𑀜𑀸𑀢𑀮𑀤𑁆𑀥𑀺𑀯𑀲𑁂𑀦 𑀘 𑀧𑀜𑁆𑀜𑀸𑀢𑀸. 𑀮𑀤𑁆𑀥𑀺𑀓𑀭𑀸𑀢𑀺 𑀢𑀲𑁆𑀲𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀓𑀸. 𑀩𑀳𑀼𑀚𑀦𑀲𑁆𑀲𑀸𑀢𑀺 𑀧𑀼𑀣𑀼𑀚𑀦𑀲𑁆𑀲. 𑀢𑀲𑁆𑀲 𑀧𑀦 𑀆𑀕𑀫𑀲𑀫𑁆𑀧𑀤𑀸𑀧𑀺 𑀦𑀸𑀫 𑀦𑀢𑁆𑀣𑀺, 𑀓𑀼𑀢𑁄 𑀅𑀥𑀺𑀕𑀫𑁄𑀢𑀺 𑀏𑀓𑀁𑀲𑀢𑁄 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀏𑀯𑀸𑀢𑀺 𑀆𑀳 ‘‘𑀅𑀲𑁆𑀲𑀼𑀢𑀯𑀢𑁄 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺. 𑀦 𑀳𑀺 𑀯𑀺𑀜𑁆𑀜𑀽 𑀅𑀧𑁆𑀧𑀲𑀸𑀤𑀦𑀻𑀬𑁂 𑀧𑀲𑀻𑀤𑀦𑁆𑀢𑀺. 𑀫𑀗𑁆𑀕𑀮𑁂𑀲𑀼 𑀓𑀸𑀢𑀩𑁆𑀩𑀤𑀸𑀲𑀓𑀺𑀘𑁆𑀘𑀓𑀭𑁄 𑀤𑀸𑀲𑁄 𑀫𑀗𑁆𑀕𑀮𑀤𑀸𑀲𑁄.

𑀢𑀦𑁆𑀢𑀸𑀯𑀼𑀢𑀸𑀦𑀦𑁆𑀢𑀺 𑀢𑀦𑁆𑀢𑁂 𑀧𑀲𑀸𑀭𑁂𑀢𑁆𑀯𑀸 𑀯𑀻𑀢𑀸𑀦𑀁. 𑀕𑀡𑁆𑀞𑀦𑀓𑀺𑀮𑁂𑀲𑁄𑀢𑀺 𑀲𑀁𑀲𑀸𑀭𑁂 𑀩𑀦𑁆𑀥𑀦𑀓𑀺𑀮𑁂𑀲𑁄. 𑀏𑀯𑀁 𑀯𑀸𑀤𑀺𑀢𑀸𑀬𑀸𑀢𑀺 𑀏𑀯𑀁 𑀧𑀝𑀺𑀜𑁆𑀜𑀢𑀸𑀬, 𑀏𑀯𑀁 𑀤𑀺𑀝𑁆𑀞𑀺𑀢𑀸𑀬 𑀯𑀸. 𑀦𑀺𑀬𑁆𑀬𑀸𑀦𑀺𑀓𑀸𑀢𑀺 𑀦𑀺𑀬𑁆𑀬𑀸𑀦𑀕𑀢𑀺𑀲𑀧𑁆𑀧𑀸𑀝𑀺𑀳𑀻𑀭𑀓𑀸 𑀅𑀦𑀼𑀧𑀸𑀭𑀫𑁆𑀪𑀪𑀽𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑁄 𑀘𑁂 𑀦𑀺𑀬𑁆𑀬𑀸𑀦𑀺𑀓𑀸𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀢𑁂𑀲𑀁 𑀲𑀩𑁆𑀩𑀜𑁆𑀜𑀼𑀧𑀝𑀺𑀜𑁆𑀜𑀸𑀬 𑀅𑀪𑀽𑀢𑀢𑁆𑀢𑀸 𑀢𑀲𑁆𑀲𑀸 𑀅𑀪𑀽𑀢𑀪𑀸𑀯𑀓𑀣𑀦𑁂𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦 𑀓𑀸𑀘𑀺 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀆𑀳 ‘‘𑀦𑁂𑀲𑀁 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀓𑀣𑀦𑁂𑀦 𑀅𑀢𑁆𑀣𑀸𑀪𑀸𑀯𑀢𑁄’’𑀢𑀺.

𑁩𑁧𑁮. 𑀦𑀺𑀳𑀻𑀦𑀮𑁄𑀓𑀸𑀫𑀺𑀲𑁂 𑀮𑀻𑀦𑁄 𑀅𑀚𑁆𑀛𑀸𑀲𑀬𑁄 𑀏𑀢𑀲𑁆𑀲, 𑀦 𑀧𑀦 𑀦𑀺𑀩𑁆𑀩𑀸𑀦𑁂𑀢𑀺. 𑀮𑀻𑀦𑀚𑁆𑀛𑀸𑀲𑀬𑁄. 𑀲𑀸𑀲𑀦𑀁 𑀲𑀺𑀣𑀺𑀮𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺 𑀲𑀺𑀓𑁆𑀔𑀸𑀬 𑀦 𑀢𑀺𑀩𑁆𑀩𑀕𑀸𑀭𑀯𑀢𑁆𑀢𑀸.

𑁩𑁨𑁩. 𑀳𑁂𑀝𑁆𑀞𑀸𑀢𑀺 𑀅𑀦𑀦𑁆𑀢𑀭𑀸𑀢𑀻𑀢𑀲𑀼𑀢𑁆𑀢𑁂 𑀫𑀳𑀸𑀲𑀸𑀭𑁄𑀧𑀫𑁂. 𑀧𑀞𑀫𑀚𑁆𑀛𑀸𑀦𑀸𑀤𑀺𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀢𑀺 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀘𑀽𑀴𑀲𑀸𑀭𑁄𑀧𑀫𑁂 𑀆𑀕𑀢𑀸. 𑀦𑀺𑀭𑁄𑀥𑀧𑀸𑀤𑀓𑀸𑀢𑀺 𑀅𑀦𑀸𑀕𑀸𑀫𑀺𑀦𑁄, 𑀅𑀭𑀳𑀦𑁆𑀢𑁄 𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑀸. 𑀢𑀲𑁆𑀫𑀸𑀢𑀺 𑀦𑀺𑀭𑁄𑀥𑀧𑀸𑀤𑀓𑀢𑁆𑀢𑀸. 𑀧𑀞𑀫𑀚𑁆𑀛𑀸𑀦𑀸𑀤𑀺𑀥𑀫𑁆𑀫𑀸 𑀜𑀸𑀡𑀤𑀲𑁆𑀲𑀦𑀢𑁄 𑀉𑀢𑁆𑀢𑀭𑀺𑀢𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀘𑀽𑀴𑀲𑀸𑀭𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀑𑀧𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸.