𑁩. 𑀑𑀧𑀫𑁆𑀫𑀯𑀕𑁆𑀕𑁄

𑁧. 𑀓𑀓𑀘𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁨. 𑀫𑁄𑀴𑀺𑀦𑁆𑀢𑀺 𑀓𑁂𑀲𑀭𑀘𑀦𑀁. 𑀯𑁂𑀳𑀸𑀬𑀲𑀦𑁆𑀢𑀺 𑀆𑀓𑀸𑀲𑁂. 𑀭𑀢𑀦𑀘𑀗𑁆𑀓𑁄𑀝𑀯𑀭𑁂𑀦𑀸𑀢𑀺 𑀭𑀢𑀦𑀲𑀺𑀮𑀸𑀫𑀬𑀯𑀭𑀘𑀗𑁆𑀓𑁄𑀝𑀓𑁂𑀦 𑀲𑀳𑀲𑁆𑀲𑀦𑁂𑀢𑁆𑀢𑁄 𑀲𑀺𑀭𑀲𑀸 𑀧𑀝𑀺𑀕𑁆𑀕𑀳𑀺. ‘‘𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑀯𑀭𑁂𑀦𑀸’’𑀢𑀺𑀧𑀺 (𑀩𑀼. 𑀯𑀁. 𑀅𑀝𑁆𑀞. 𑁨𑁩 𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑁨 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑀧𑀸𑀞𑁄.

𑀲𑀸𑀢𑀺 𑀫𑁄𑀴𑀺. 𑀫𑁄𑀴𑀺 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁄𑀴𑀺𑀓𑁄, 𑀫𑁄𑀴𑀺𑀓𑁄 𑀏𑀯 𑀫𑁄𑀴𑀺𑀬𑁄. 𑀨𑀕𑁆𑀕𑀼𑀦𑁄𑀢𑀺 𑀧𑀦 𑀦𑀸𑀫𑀁. 𑀲𑀗𑁆𑀔𑀸𑀢𑀺 𑀲𑀫𑀜𑁆𑀜𑀸. 𑀯𑁂𑀮𑀻𑀬𑀢𑀺 𑀔𑀡𑀫𑀼𑀳𑀼𑀢𑁆𑀢𑀸𑀤𑀺𑀯𑀲𑁂𑀦 𑀉𑀧𑀤𑀺𑀲𑀻𑀬𑀢𑀻𑀢𑀺 𑀯𑁂𑀮𑀸, 𑀓𑀸𑀮𑁄𑀢𑀺 𑀆𑀳 ‘‘𑀢𑀸𑀬𑀁 𑀯𑁂𑀮𑀸𑀬𑀁…𑀧𑁂… 𑀅𑀬𑀁 𑀓𑀸𑀮𑀯𑁂𑀮𑀸 𑀦𑀸𑀫𑀸’’𑀢𑀺. 𑀯𑁂𑀮𑀬𑀢𑀺 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀢𑀺𑀝𑁆𑀞𑀢𑀻𑀢𑀺 𑀯𑁂𑀮𑀸, 𑀲𑀻𑀫𑀸. 𑀯𑁂𑀮𑀬𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀘𑀸𑀮𑀬𑀢𑀻𑀢𑀺 𑀯𑁂𑀮𑀸, 𑀲𑀻𑀮𑀁. 𑀅𑀦𑀢𑀺𑀓𑁆𑀓𑀫𑀦𑀝𑁆𑀞𑁄𑀧𑀺 𑀘𑀲𑁆𑀲 𑀲𑀁𑀓𑀺𑀮𑁂𑀲𑀥𑀫𑁆𑀫𑀦𑀺𑀫𑀺𑀢𑁆𑀢𑀁 𑀅𑀘𑀮𑀦𑀫𑁂𑀯. 𑀯𑀺𑀜𑁆𑀜𑀼𑀧𑀼𑀭𑀺𑀲𑀸𑀪𑀸𑀯𑁂 𑀙𑀧𑀜𑁆𑀘𑀯𑀸𑀘𑀸𑀫𑀢𑁆𑀢𑀁 𑀑𑀯𑀸𑀤𑁂 𑀧𑀫𑀸𑀡𑀁 𑀦𑀸𑀫.𑀤𑀯𑀲𑀳𑀕𑀢𑀁 𑀓𑀢𑁆𑀯𑀸𑀢𑀺 𑀓𑀻𑀴𑀸𑀲𑀳𑀺𑀢𑀁 𑀓𑀢𑁆𑀯𑀸.

𑀫𑀺𑀲𑁆𑀲𑀻𑀪𑀽𑀢𑁄𑀢𑀺 𑀅𑀦𑀦𑀼𑀮𑁄𑀫𑀺𑀓𑀲𑀁𑀲𑀕𑁆𑀕𑀯𑀲𑁂𑀦 𑀫𑀺𑀲𑁆𑀲𑀻𑀪𑀽𑀢𑁄. ‘‘𑀅𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀢𑀸𑀧𑀦𑀧𑀘𑀦𑀓𑁄𑀝𑁆𑀝𑀦𑀸𑀤𑀻𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀥𑀺𑀓𑀭𑀡𑀫𑁆𑀧𑀺 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀬𑀣𑀸 𑀲𑁄 𑀅𑀥𑀺𑀓𑀭𑀡𑀸𑀬 𑀧𑀭𑀺𑀲𑀓𑁆𑀓𑀢𑀺, 𑀢𑀁𑀤𑀲𑁆𑀲𑀦𑀁 ‘‘𑀇𑀫𑁂𑀲𑀁 𑀪𑀺𑀓𑁆𑀔𑀽𑀦’’𑀦𑁆𑀢𑀺𑀆𑀤𑀺. 𑀅𑀥𑀺𑀓𑀭𑀡𑀁 𑀆𑀓𑀟𑁆𑀠𑀢𑀻𑀢𑀺 𑀅𑀥𑀺𑀓𑀭𑀡𑀁 𑀉𑀤𑁆𑀤𑀺𑀲𑁆𑀲 𑀢𑁂 𑀪𑀺𑀓𑁆𑀔𑀽 𑀆𑀓𑀟𑁆𑀠𑀢𑀺, 𑀅𑀥𑀺𑀓𑀭𑀡𑀁 𑀯𑀸 𑀢𑁂𑀲𑀼 𑀉𑀧𑁆𑀧𑀸𑀤𑁂𑀦𑁆𑀢𑁄 𑀆𑀓𑀟𑁆𑀠𑀢𑀺. 𑀉𑀤𑁆𑀤𑁂𑀲𑀧𑀤𑀁 𑀯𑀸𑀢𑀺 𑀧𑀤𑀲𑁄 𑀉𑀤𑁆𑀤𑁂𑀲𑀫𑀢𑁆𑀢𑀁 𑀯𑀸. 𑀦𑁂𑀯 𑀧𑀺𑀬𑀓𑀫𑁆𑀬𑀢𑀸𑀬𑀸𑀢𑀺 𑀦𑁂𑀯 𑀅𑀢𑁆𑀢𑀦𑀺 𑀲𑀢𑁆𑀣𑀼𑀦𑁄 𑀧𑀺𑀬𑀪𑀸𑀯𑀓𑀸𑀫𑀢𑀸𑀬. 𑀦 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀦 𑀲𑀢𑁆𑀣𑀼𑀦𑁄 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦. 𑀅𑀢𑁆𑀣𑀓𑀸𑀫𑀢𑀸𑀬𑀸𑀢𑀺 𑀫𑁄𑀴𑀺𑀬𑀨𑀕𑁆𑀕𑀼𑀦𑀲𑁆𑀲 𑀳𑀺𑀢𑀓𑀸𑀫𑀢𑀸𑀬.

𑁨𑁨𑁪. 𑀅𑀯𑀡𑁆𑀡𑀪𑀸𑀲𑀦𑁂𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀅𑀕𑀼𑀡𑀓𑀣𑀦𑁂. 𑀙𑀦𑁆𑀤𑀸𑀤𑀻𑀦𑀁 𑀯𑀢𑁆𑀣𑀼𑀪𑀸𑀯𑀢𑁄 𑀓𑀸𑀫𑀕𑀼𑀡𑀸 𑀕𑁂𑀳𑀁 𑀯𑀺𑀬 𑀕𑁂𑀳𑀁, 𑀢𑁂 𑀘 𑀢𑁂 𑀲𑀺𑀢𑀸 𑀦𑀺𑀲𑁆𑀲𑀺𑀢𑀸𑀢𑀺 𑀕𑁂𑀳𑀲𑁆𑀲𑀺𑀢𑀸𑀢𑀺 𑀯𑀼𑀢𑁆𑀢𑀸. 𑀢𑀡𑁆𑀳𑀸𑀙𑀦𑁆𑀤𑀸𑀧𑀺 𑀢𑀸𑀲𑀁 𑀓𑀢𑁆𑀢𑀼𑀓𑀸𑀫𑀢𑀸𑀧𑀻𑀢𑀺 𑀉𑀪𑀬𑁂𑀧𑀺 𑀢𑀡𑁆𑀳𑀸𑀙𑀦𑁆𑀤𑀸, 𑀧𑀝𑀺𑀖𑀙𑀦𑁆𑀤𑀸 𑀧𑀦 𑀢𑁂𑀲𑀁 𑀓𑀢𑁆𑀢𑀼𑀓𑀸𑀫𑀢𑀸 𑀏𑀯. 𑀨𑀮𑀺𑀓𑀫𑀡𑀺 𑀯𑀺𑀬 𑀧𑀓𑀢𑀺𑀧𑀪𑀲𑁆𑀲𑀭𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀉𑀧𑀲𑀗𑁆𑀕𑁄 𑀯𑀺𑀬 𑀯𑀺𑀧𑀭𑀺𑀡𑀸𑀫𑀓𑀸𑀭𑀡𑀁 𑀭𑀸𑀕𑀸𑀤𑀬𑁄𑀢𑀺 𑀆𑀳 ‘‘𑀭𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢’’𑀦𑁆𑀢𑀺𑀆𑀤𑀺. 𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀓𑀭𑀼𑀡𑀸𑀬 𑀧𑀘𑁆𑀘𑀼𑀧𑀝𑁆𑀞𑀸𑀧𑀦𑀫𑀸𑀳. ‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦) 𑀯𑀺𑀬 𑀅𑀦𑁆𑀢𑀭-𑀲𑀤𑁆𑀤𑁄 𑀘𑀺𑀢𑁆𑀢𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑁄𑀲𑀦𑁆𑀢𑀭𑁄𑀢𑀺 𑀤𑁄𑀲𑀘𑀺𑀢𑁆𑀢𑁄’’𑀢𑀺.

𑁨𑁨𑁫. 𑀤𑀼𑀩𑁆𑀩𑀘𑀢𑀸𑀬 𑀑𑀯𑀸𑀤𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀘𑀺𑀢𑁆𑀢𑁂𑀦𑁂𑀯 𑀧𑀝𑀺𑀯𑀺𑀭𑀼𑀤𑁆𑀥𑁄 𑀅𑀝𑁆𑀞𑀸𑀲𑀺. 𑀕𑀡𑁆𑀳𑀺𑀁𑀲𑀼 𑀘𑀺𑀢𑁆𑀢𑀁, 𑀳𑀤𑀬𑀕𑀸𑀳𑀺𑀦𑀺𑀁 𑀧𑀝𑀺𑀧𑀚𑁆𑀚𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀧𑀽𑀭𑀬𑀺𑀁𑀲𑀼 𑀅𑀚𑁆𑀛𑀸𑀲𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀧𑀞𑀫𑀩𑁄𑀥𑀺𑀬𑀁. 𑀏𑀓𑀸𑀲𑀦𑀁 𑀪𑁄𑀚𑀦𑀲𑁆𑀲 𑀏𑀓𑀸𑀲𑀦𑀪𑁄𑀚𑀦𑀁, 𑀏𑀓𑀯𑁂𑀮𑀸𑀬𑀫𑁂𑀯 𑀪𑁄𑀚𑀦𑀁. 𑀢𑀜𑁆𑀘 𑀔𑁄 𑀧𑀼𑀩𑁆𑀩𑀡𑁆𑀳𑁂 𑀏𑀯𑀸𑀢𑀺 𑀆𑀳 ‘‘𑀏𑀓𑀁 𑀧𑀼𑀭𑁂𑀪𑀢𑁆𑀢𑀪𑁄𑀚𑀦’’𑀦𑁆𑀢𑀺𑀆𑀤𑀺. 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑀼𑀢𑁆𑀢𑀪𑁄𑀚𑀦𑀫𑁆𑀧𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀏𑀓𑀸𑀲𑀦𑀪𑁄𑀚𑀦𑀦𑁆𑀢𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀦 𑀏𑀓𑀸𑀲𑀦𑀺𑀓𑀢𑀸𑀬 𑀏𑀓𑀸𑀬 𑀏𑀯 𑀦𑀺𑀲𑀚𑁆𑀚𑀸𑀬 𑀪𑁄𑀚𑀦𑀁. ‘‘𑀅𑀧𑁆𑀧𑀟𑀁𑀲…𑀧𑁂… 𑀲𑀫𑁆𑀨𑀲𑁆𑀲’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀧𑁆𑀧-𑀲𑀤𑁆𑀤𑁄 𑀅𑀪𑀸𑀯𑀢𑁆𑀣𑁄𑀢𑀺 𑀆𑀳 ‘‘𑀦𑀺𑀭𑀸𑀩𑀸𑀥𑀢𑀁, 𑀦𑀺𑀤𑁆𑀤𑀼𑀓𑁆𑀔𑀢’’𑀦𑁆𑀢𑀺. 𑀧𑀥𑀸𑀦𑀸𑀤𑀺𑀯𑀲𑁂𑀦 𑀲𑀮𑁆𑀮𑀳𑀼𑀓𑀁 𑀅𑀓𑀺𑀘𑁆𑀙𑀁 𑀉𑀝𑁆𑀞𑀸𑀦𑀁 𑀲𑀮𑁆𑀮𑀳𑀼𑀓𑀉𑀝𑁆𑀞𑀸𑀦𑀁. 𑀦 𑀏𑀓𑀧𑁆𑀧𑀳𑀸𑀭𑁂𑀦𑀸𑀢𑀺 𑀦 𑀏𑀓𑀯𑀸𑀭𑁂𑀦, 𑀦 𑀏𑀓𑀲𑁆𑀫𑀺𑀁𑀬𑁂𑀯 𑀓𑀸𑀮𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁆𑀯𑁂 𑀪𑁄𑀚𑀦𑀸𑀦𑀻𑀢𑀺 ‘‘𑀅𑀧𑀭𑀡𑁆𑀳𑁂 𑀭𑀢𑁆𑀢𑀺𑀬’’𑀦𑁆𑀢𑀺 𑀓𑀸𑀮𑀯𑀲𑁂𑀦 𑀤𑁆𑀯𑁂 𑀪𑁄𑀚𑀦𑀸𑀦𑀺. 𑀧𑀜𑁆𑀘 𑀕𑀼𑀡𑁂𑀢𑀺 𑀅𑀧𑁆𑀧𑀸𑀩𑀸𑀥𑀸𑀤𑀺𑀓𑁂 𑀧𑀜𑁆𑀘 𑀆𑀦𑀺𑀲𑀁𑀲𑁂. 𑀲𑀢𑀼𑀧𑁆𑀧𑀸𑀤𑀓𑀭𑀡𑀻𑀬𑀫𑀢𑁆𑀢𑀫𑁂𑀯𑀸𑀢𑀺 𑀲𑀢𑀼𑀧𑁆𑀧𑀸𑀤𑀫𑀢𑁆𑀢𑀓𑀭𑀡𑀻𑀬𑀫𑁂𑀯, 𑀦𑀺𑀯𑀸𑀭𑁂𑀢𑀩𑁆𑀩𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀤𑀧𑀦𑀜𑁆𑀘 𑀦𑀸𑀳𑁄𑀲𑀺.

𑀫𑀡𑁆𑀟𑀪𑀽𑀫𑀻𑀢𑀺 𑀑𑀚𑀯𑀦𑁆𑀢𑀪𑀽𑀫𑀺, 𑀬𑀢𑁆𑀣 𑀧𑀭𑀺𑀲𑀺𑀜𑁆𑀘𑀦𑁂𑀦 𑀯𑀺𑀦𑀸 𑀲𑀲𑁆𑀲𑀸𑀦𑀺 𑀓𑀺𑀝𑁆𑀞𑀸𑀦𑀺 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀬𑀼𑀕𑁂 𑀬𑁄𑀚𑁂𑀢𑀩𑁆𑀩𑀸𑀦𑀺 𑀬𑁄𑀕𑁆𑀕𑀸𑀦𑀺, 𑀢𑁂𑀲𑀁 𑀆𑀘𑀭𑀺𑀬𑁄 𑀬𑁄𑀕𑁆𑀕𑀸𑀘𑀭𑀺𑀬𑁄, 𑀢𑁂𑀲𑀁 𑀲𑀺𑀓𑁆𑀔𑀸𑀧𑀦𑀓𑁄. 𑀕𑀸𑀫𑀡𑀺𑀳𑀢𑁆𑀣𑀺𑀆𑀤𑀬𑁄𑀧𑀺 ‘‘𑀬𑁄𑀕𑁆𑀕𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 𑀧𑀸𑀴𑀺𑀬𑀁 ‘‘𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀻’’𑀢𑀺. 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀬𑁂𑀦 𑀬𑁂𑀦 𑀫𑀕𑁆𑀕𑁂𑀦 𑀇𑀘𑁆𑀙𑀢𑀺. 𑀚𑀯𑀲𑀫𑀕𑀸𑀤𑀺𑀪𑁂𑀤𑀸𑀲𑀼 𑀕𑀢𑀻𑀲𑀼 𑀬𑀁 𑀬𑀁 𑀕𑀢𑀺𑀁. 𑀢𑀁 𑀢𑀁 𑀫𑀕𑁆𑀕𑀁 𑀆𑀭𑀼𑀴𑁆𑀳𑀸𑀯 𑀑𑀢𑀺𑀡𑁆𑀡𑀸𑀬𑁂𑀯. 𑀦𑁂𑀯 𑀯𑀸𑀭𑁂𑀢𑀩𑁆𑀩𑀸 𑀭𑀲𑁆𑀫𑀺𑀯𑀺𑀦𑀺𑀕𑁆𑀕𑀡𑁆𑀳𑀦𑁂𑀦. 𑀦 𑀯𑀺𑀚𑁆𑀛𑀺𑀢𑀩𑁆𑀩𑀸 𑀧𑀢𑁄𑀤𑀮𑀝𑁆𑀞𑀺𑀬𑀸. 𑀕𑀫𑀦𑀫𑁂𑀯𑀸𑀢𑀺 𑀇𑀫𑁂 𑀬𑀼𑀢𑁆𑀢𑀸 𑀫𑀫 𑀇𑀘𑁆𑀙𑀸𑀦𑀼𑀭𑀽𑀧𑀁 𑀫𑀦𑁆𑀤𑀁 𑀕𑀘𑁆𑀙𑀦𑁆𑀢𑀺, 𑀲𑀫𑀁 𑀕𑀘𑁆𑀙𑀦𑁆𑀢𑀺, 𑀲𑀻𑀖𑀁 𑀕𑀘𑁆𑀙𑀦𑁆𑀢𑀻𑀢𑀺 𑀔𑀼𑀭𑁂𑀲𑀼 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀸𑀭𑀣𑀺𑀦𑀸 𑀢𑁂𑀲𑀁 𑀕𑀫𑀦𑀫𑁂𑀯 𑀧𑀲𑁆𑀲𑀺𑀢𑀩𑁆𑀩𑀁 𑀳𑁄𑀢𑀺, 𑀦 𑀢𑀢𑁆𑀣 𑀦𑀺𑀬𑁄𑀚𑀦𑀁. 𑀢𑁂𑀳𑀺𑀧𑀺 𑀪𑀺𑀓𑁆𑀔𑀽𑀳𑀺. 𑀧𑀚𑀳𑀺𑀁𑀲𑀼 𑀧𑀚𑀳𑀺𑀢𑀩𑁆𑀩𑀁. 𑀲𑀸𑀮𑀤𑀽𑀲𑀦𑀸𑀢𑀺 𑀲𑀸𑀮𑀭𑀼𑀓𑁆𑀔𑀯𑀺𑀲𑀦𑀸𑀲𑀓𑀸. 𑀅𑀜𑁆𑀜𑀸 𑀘 𑀯𑀮𑁆𑀮𑀺𑀬𑁄 𑀲𑀸𑀮𑀭𑀼𑀓𑁆𑀔𑁂 𑀯𑀺𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀸. 𑀩𑀳𑀺 𑀦𑀻𑀳𑀭𑀡𑁂𑀦𑀸𑀢𑀺 𑀲𑀸𑀮𑀯𑀦𑀢𑁄 𑀩𑀳𑀺 𑀙𑀟𑁆𑀟𑀦𑁂𑀦. 𑀲𑀼𑀲𑀡𑁆𑀞𑀺𑀢𑀸𑀢𑀺 𑀲𑀡𑁆𑀞𑀸𑀦𑀲𑀫𑁆𑀧𑀦𑁆𑀦𑀸, 𑀫𑀭𑀺𑀬𑀸𑀤𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀆𑀮𑀯𑀸𑀮𑀲𑀫𑁆𑀧𑀸𑀤𑀦𑀯𑀲𑁂𑀦 𑀫𑀭𑀺𑀬𑀸𑀤𑀁 𑀩𑀦𑁆𑀥𑀺𑀢𑁆𑀯𑀸. 𑀓𑀺𑀧𑀺𑀮𑁆𑀮𑀧𑀼𑀝𑀓𑀁 𑀢𑀫𑁆𑀩𑀓𑀺𑀧𑀺𑀮𑁆𑀮𑀓𑀧𑀼𑀝𑀓𑀁. 𑀲𑀼𑀓𑁆𑀔𑀤𑀡𑁆𑀟𑀓𑀳𑀭𑀡𑀁 𑀆𑀮𑀯𑀸𑀮𑀩𑁆𑀪𑀦𑁆𑀢𑀭𑀸.

𑁨𑁨𑁬. 𑀯𑀺𑀤𑁂𑀳𑀭𑀝𑁆𑀞𑁂 𑀚𑀸𑀢𑀲𑀁𑀯𑀟𑁆𑀠𑀢𑀸𑀬 𑀯𑁂𑀤𑁂𑀳𑀺𑀓𑀸. 𑀧𑀡𑁆𑀟𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀇𑀢𑀸 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀧𑀡𑁆𑀟𑀺𑀢𑀸. 𑀕𑀳𑀧𑀢𑀸𑀦𑀻𑀢𑀺 𑀕𑁂𑀳𑀲𑀸𑀫𑀺𑀦𑀻. 𑀲𑁄𑀭𑀘𑁆𑀘𑁂𑀦𑀸𑀢𑀺 𑀲𑀁𑀬𑀫𑁂𑀦. 𑀦𑀺𑀯𑀸𑀢𑀯𑀼𑀢𑁆𑀢𑀻𑀢𑀺 𑀧𑀡𑀺𑀧𑀸𑀢𑀓𑀸𑀭𑀻. 𑀦𑀺𑀩𑁆𑀩𑀼𑀢𑀸𑀢𑀺 𑀦𑀺𑀩𑁆𑀩𑀼𑀢𑀤𑀼𑀘𑁆𑀘𑀭𑀺𑀢𑀧𑀭𑀺𑀴𑀸𑀳𑀸. 𑀉𑀝𑁆𑀞𑀸𑀳𑀺𑀓𑀸𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀯𑀢𑀻. 𑀓𑀺𑀩𑁆𑀩𑀺𑀲𑀸𑀢𑀺 𑀓𑀼𑀭𑀽𑀭𑀸.

𑁨𑁨𑁭. 𑀏𑀯𑀁 𑀅𑀓𑁆𑀔𑀦𑁆𑀢𑀺𑀬𑀸 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 ‘‘𑀕𑀼𑀡𑀯𑀦𑁆𑀢𑁄’’𑀢𑀺 𑀮𑁄𑀓𑁂 𑀧𑀢𑁆𑀣𑀝𑀓𑀺𑀢𑁆𑀢𑀺𑀲𑀤𑁆𑀤𑀸𑀦𑀫𑁆𑀧𑀺 𑀅𑀓𑁆𑀔𑀦𑁆𑀢𑀺𑀦𑀺𑀫𑀺𑀢𑁆𑀢𑀁 𑀅𑀬𑀲𑀼𑀧𑁆𑀧𑀢𑁆𑀢𑀺𑀕𑀼𑀡𑀧𑀭𑀺𑀳𑀸𑀦𑀺𑀆𑀤𑀺𑀁 𑀅𑀓𑁆𑀔𑀫𑀢𑀸𑀬𑀆𑀤𑀻𑀦𑀯𑀁 𑀧𑀓𑀸𑀲𑁂𑀢𑁆𑀯𑀸. 𑀯𑀘𑀦𑀧𑀣𑁂𑀢𑀺 𑀯𑀘𑀦𑀫𑀕𑁆𑀕𑁂 𑀬𑀼𑀢𑁆𑀢𑀓𑀸𑀮𑀸𑀤𑀺𑀓𑁂. 𑀲𑀡𑁆𑀳𑀸𑀪𑀸𑀯𑁄𑀧𑀺 𑀳𑀺 𑀯𑀘𑀦𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑁄𑀢𑀺 𑀓𑀢𑁆𑀯𑀸 ‘‘𑀯𑀘𑀦𑀧𑀣𑁄’’ 𑀢𑁆𑀯𑁂𑀯 𑀯𑀼𑀢𑁆𑀢𑁄. 𑀢𑁂𑀲𑀁𑀬𑁂𑀯 𑀓𑀸𑀮𑀸𑀤𑀻𑀦𑀁. 𑀫𑁂𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀉𑀧𑁆𑀧𑀦𑁆𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀏𑀢𑁂𑀲𑀦𑁆𑀢𑀺 𑀉𑀧𑁆𑀧𑀦𑁆𑀦𑀫𑁂𑀢𑁆𑀢𑀘𑀺𑀢𑁆𑀢𑀸. 𑀧𑀼𑀦 ‘‘𑀓𑀸𑀮𑁂𑀦 𑀯𑀸, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 (𑀧𑀭𑀺. 𑁩𑁬𑁨, 𑁩𑁬𑁩) 𑀧𑀸𑀴𑀺 𑀥𑀫𑁆𑀫𑀲𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸 ‘‘𑀧𑀭𑀁 𑀘𑁄𑀤𑀦𑀸𑀯𑀲𑁂𑀦 𑀯𑀤𑀦𑁆𑀢𑀸 𑀦𑀸𑀫 𑀇𑀫𑁂𑀳𑀺 𑀆𑀓𑀸𑀭𑁂𑀳𑀺 𑀯𑀤𑀦𑁆𑀢𑀻’’𑀢𑀺. 𑀅𑀥𑀺𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀅𑀪𑀺𑀭𑀢𑀺𑀯𑀲𑁂𑀦 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀪𑀸𑀯𑀦𑀸𑀘𑀺𑀢𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸. 𑀲𑁄 𑀧𑀼𑀕𑁆𑀕𑀮𑁄 𑀆𑀭𑀫𑁆𑀫𑀡𑀁 𑀏𑀢𑀲𑁆𑀲𑀸𑀢𑀺 𑀢𑀤𑀸𑀭𑀫𑁆𑀫𑀡𑀁, 𑀫𑁂𑀢𑁆𑀢𑀘𑀺𑀢𑁆𑀢𑀁. 𑀬𑀤𑀺 𑀏𑀯𑀁 𑀧𑀤𑁂𑀲𑀯𑀺𑀲𑀬𑀁 𑀢𑀁 𑀓𑀣𑀁 𑀦𑀺𑀧𑁆𑀧𑀤𑁂𑀲𑀯𑀺𑀲𑀬𑀁 𑀯𑀺𑀬 𑀳𑁄𑀢𑀻𑀢𑀺 𑀘𑁄𑀤𑁂𑀦𑁆𑀢𑁄 ‘‘𑀓𑀣𑀁 𑀢𑀤𑀸𑀭𑀫𑁆𑀫𑀡𑀁 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀓𑀭𑁄𑀢𑀻’’𑀢𑀺 𑀆𑀳, 𑀇𑀢𑀭𑁄 ‘‘𑀧𑀜𑁆𑀘 𑀯𑀘𑀦𑀧𑀣𑁂’’𑀢𑀺𑀆𑀤𑀺𑀦𑀸 𑀧𑀭𑀺𑀳𑀭𑀢𑀺. 𑀇𑀥 𑀢𑀤𑀸𑀭𑀫𑁆𑀫𑀡𑀜𑁆𑀘𑀸𑀢𑀺 𑀢𑀲𑁆𑀲𑁂𑀯 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀧𑀸𑀴𑀺𑀬𑀁 𑀯𑀘𑀦𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 ‘‘𑀧𑀼𑀦 𑀢𑀲𑁆𑀲𑁂𑀯𑀸’’𑀢𑀺𑀆𑀤𑀺. 𑀲𑀩𑁆𑀩𑀸 𑀲𑀢𑁆𑀢𑀓𑀸𑀬𑀲𑀗𑁆𑀔𑀸𑀢𑀸 𑀧𑀚𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀩𑁆𑀩𑀸𑀯𑀦𑁆𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀸𑀯𑀦𑁆𑀢’’𑀦𑁆𑀢𑀺 𑀆𑀳. 𑀯𑀺𑀧𑀼𑀮𑁂𑀦𑀸𑀢𑀺 𑀫𑀳𑀸𑀚𑀦𑀸𑀭𑀫𑁆𑀫𑀡𑁂𑀦. 𑀫𑀳𑀦𑁆𑀢𑀧𑀭𑀺𑀬𑀸𑀬𑁄 𑀳𑀺 𑀯𑀺𑀧𑀼𑀮-𑀲𑀤𑁆𑀤𑁄, 𑀫𑀳𑀢𑁆𑀢𑀜𑁆𑀘𑁂𑀢𑁆𑀣 𑀩𑀳𑀼𑀓𑀪𑀸𑀯𑁄. 𑀢𑁂𑀦𑀸𑀳 ‘‘𑀅𑀦𑁂𑀓𑀲𑀢𑁆𑀢𑀸𑀭𑀫𑁆𑀫𑀡𑁂𑀦𑀸’’𑀢𑀺. 𑀢𑀜𑁆𑀘 𑀧𑀼𑀕𑁆𑀕𑀮𑀦𑁆𑀢𑀺 𑀧𑀜𑁆𑀘 𑀯𑀘𑀦𑀧𑀣𑁂 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀕𑁆𑀕𑀮𑀁. 𑀘𑀺𑀢𑁆𑀢𑀲𑁆𑀲𑀸𑀢𑀺 𑀫𑁂𑀢𑁆𑀢𑀸𑀲𑀳𑀕𑀢𑀘𑀺𑀢𑁆𑀢𑀲𑁆𑀲. 𑀏𑀢𑁆𑀣 𑀘 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀺𑀲𑁆𑀲𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀣𑀦𑁆𑀢𑀺 𑀆𑀳 ‘‘𑀢𑀜𑁆𑀘 𑀧𑀼𑀕𑁆𑀕𑀮𑀁 𑀲𑀩𑁆𑀩𑀜𑁆𑀘 𑀮𑁄𑀓𑀁 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸’’𑀢𑀺.

𑁨𑁨𑁮. 𑀢𑀤𑀢𑁆𑀣𑀤𑀻𑀧𑀺𑀓𑀦𑁆𑀢𑀺 𑀬𑀸 𑀫𑁂𑀢𑁆𑀢𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀲𑀫𑁆𑀫𑀤𑁂𑀯 𑀪𑀸𑀯𑁂𑀢𑁆𑀯𑀸 𑀞𑀺𑀢𑀲𑁆𑀲 𑀦𑀺𑀩𑁆𑀩𑀺𑀓𑀸𑀭𑀢𑁄 𑀓𑁂𑀦𑀘𑀺 𑀯𑀺𑀓𑀸𑀭𑀁 𑀦 𑀆𑀧𑀸𑀤𑁂𑀢𑀩𑁆𑀩𑀢𑀸, 𑀢𑀤𑀢𑁆𑀣𑀚𑁄𑀢𑀺𑀓𑀁. 𑀅𑀧𑀣𑀯𑀺𑀦𑁆𑀢𑀺 𑀧𑀣𑀯𑀻 𑀦 𑀳𑁄𑀢𑀻𑀢𑀺 𑀅𑀧𑀣𑀯𑀻. 𑀦𑀺𑀧𑁆𑀧𑀣𑀯𑀺𑀦𑁆𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀣𑀯𑀻𑀪𑀸𑀯𑀸𑀪𑀸𑀯𑀁. 𑀢𑀺𑀭𑀺𑀬𑀁 𑀧𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂𑀳𑀺 𑀢𑀁 𑀢𑀁 𑀘𑀓𑁆𑀓𑀯𑀸𑀴𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺? 𑀦, 𑀢𑀤𑀜𑁆𑀜𑀘𑀓𑁆𑀓𑀯𑀸𑀴𑀧𑀣𑀯𑀺𑀬𑀸 𑀏𑀓𑀸𑀩𑀤𑁆𑀥𑀪𑀸𑀯𑀢𑁄. 𑀢𑀺𑀡𑁆𑀡𑀜𑁆𑀳𑀺 𑀘𑀓𑁆𑀓𑀸𑀦𑀁 𑀅𑀦𑁆𑀢𑀭𑀲𑀤𑀺𑀲𑁂 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀮𑁄𑀓𑀥𑀸𑀢𑀽𑀦𑀁 𑀅𑀦𑁆𑀢𑀭𑁂𑀬𑁂𑀯 𑀧𑀣𑀯𑀻 𑀦𑀢𑁆𑀣𑀺 𑀮𑁄𑀓𑀦𑁆𑀢𑀭𑀦𑀺𑀭𑀬𑀪𑀸𑀯𑀢𑁄. 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀦𑁆𑀢𑀭𑁂𑀳𑀺 𑀲𑀫𑁆𑀩𑀤𑁆𑀥𑀝𑁆𑀞𑀸𑀦𑁂 𑀧𑀣𑀯𑀻 𑀏𑀓𑀸𑀩𑀤𑁆𑀥𑀸𑀯. 𑀯𑀺𑀯𑀝𑁆𑀝𑀓𑀸𑀮𑁂 𑀳𑀺 𑀲𑀡𑁆𑀞𑀳𑀫𑀸𑀦𑀸𑀧𑀺 𑀧𑀣𑀯𑀻 𑀬𑀣𑀸𑀲𑀡𑁆𑀞𑀺𑀢𑀧𑀣𑀯𑀺𑀬𑀸 𑀏𑀓𑀸𑀩𑀤𑁆𑀥𑀸𑀯 𑀲𑀡𑁆𑀞𑀳𑀢𑀺. 𑀢𑁂𑀦𑀸𑀳 ‘‘𑀢𑀺𑀭𑀺𑀬𑀁 𑀧𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀸’’𑀢𑀺. 𑀇𑀫𑀺𑀦𑀸𑀯 𑀕𑀫𑁆𑀪𑀻𑀭𑀪𑀸𑀯𑁂𑀦 𑀯𑀼𑀢𑁆𑀢𑀧𑀭𑀺𑀫𑀸𑀡𑀢𑁄 𑀧𑀭𑀁 𑀦𑀢𑁆𑀣𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑁨𑁨𑁯. 𑀳𑀮𑀺𑀤𑁆𑀤𑀻𑀢𑀺 𑀳𑀮𑀺𑀤𑁆𑀤𑀺𑀯𑀡𑁆𑀡𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀬𑀁 𑀓𑀺𑀜𑁆𑀘𑀺 𑀧𑀻𑀢𑀓𑀯𑀡𑁆𑀡’’𑀦𑁆𑀢𑀺. 𑀯𑀡𑁆𑀡𑀲𑀗𑁆𑀔𑀸𑀢𑀁 𑀭𑀽𑀧𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻, 𑀦 𑀭𑀽𑀧𑀻𑀢𑀺 𑀅𑀭𑀽𑀧𑀻𑀢𑀺 𑀆𑀳 ‘‘𑀅𑀭𑀽𑀧𑁄’’𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀦𑀺𑀤𑀲𑁆𑀲𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺.

𑁨𑁩𑁦. 𑀧𑀜𑁆𑀘 𑀬𑁄𑀚𑀦𑀲𑀢𑀸𑀦𑀻𑀢𑀺 𑀳𑀺𑀫𑀯𑀦𑁆𑀢𑀢𑁄 𑀲𑀫𑀼𑀤𑁆𑀤𑀁 𑀧𑀯𑀺𑀝𑁆𑀞𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀅𑀦𑁄𑀢𑀢𑁆𑀢𑀤𑀳𑀫𑀼𑀔𑀢𑁄. 𑀅𑀜𑁆𑀜𑀸 𑀦𑀤𑀺𑀬𑁄 𑀉𑀧𑀸𑀤𑀸𑀬 𑀮𑀩𑁆𑀪𑀫𑀸𑀦𑀁 𑀕𑀫𑁆𑀪𑀻𑀭𑀢𑀁 𑀅𑀧𑁆𑀧𑀫𑁂𑀬𑁆𑀬𑀉𑀤𑀓𑀢𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀕𑀫𑁆𑀪𑀻𑀭𑀸 𑀅𑀧𑁆𑀧𑀫𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀺𑀡𑀼𑀓𑁆𑀓𑀸𑀬 𑀢𑀸𑀧𑁂𑀢𑀩𑁆𑀩𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑀧𑀭𑀫𑁂𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀢𑁂𑀦 𑀧𑀬𑁄𑀕𑁂𑀦𑀸’’𑀢𑀺𑀆𑀤𑀺.

𑁨𑁩𑁧. 𑀢𑀽𑀮𑀺𑀦𑀻 𑀯𑀺𑀬 𑀢𑀽𑀮𑀺𑀦𑀻𑀢𑀺 𑀆𑀳 ‘‘𑀲𑀺𑀫𑁆𑀩𑀮𑀺𑀢𑀽𑀮𑀮𑀢𑀸𑀢𑀽𑀮𑀲𑀫𑀸𑀦𑀸’’𑀢𑀺. 𑀲𑀲𑁆𑀲𑀭𑀦𑁆𑀢𑀺 𑀏𑀯𑀁𑀧𑀯𑀢𑁆𑀢𑁄 𑀲𑀤𑁆𑀤𑁄 𑀲𑀲𑁆𑀲𑀭𑀲𑀤𑁆𑀤𑁄. 𑀅𑀦𑀼𑀭𑀯𑀤𑀲𑁆𑀲𑀦𑀜𑁆𑀳𑁂𑀢𑀁. 𑀢𑀣𑀸 𑀪𑀩𑁆𑀪𑀭𑀲𑀤𑁆𑀤𑁄. 𑀲𑀩𑁆𑀩𑀫𑁂𑀢𑀁 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄 𑀘𑀺𑀢𑁆𑀢𑀲𑁆𑀲 𑀤𑀽𑀲𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀤𑀲𑁆𑀲𑀦𑀧𑀭𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀫𑀳𑀸𑀧𑀣𑀯𑀻 𑀓𑁂𑀦𑀘𑀺 𑀧𑀼𑀭𑀺𑀲𑁂𑀦 𑀅𑀧𑀣𑀯𑀺𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀬𑀣𑀸 𑀆𑀓𑀸𑀲𑁂 𑀓𑀺𑀜𑁆𑀘𑀺 𑀭𑀽𑀧𑀁 𑀧𑀝𑁆𑀞𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀬𑀣𑀸 𑀕𑀗𑁆𑀕𑀸𑀬 𑀉𑀤𑀓𑀁 𑀢𑀺𑀡𑀼𑀓𑁆𑀓𑀸𑀬 𑀢𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀬𑀣𑀸 𑀘 𑀩𑀺𑀴𑀸𑀭𑀪𑀲𑁆𑀢𑀁 𑀣𑀤𑁆𑀥𑀁 𑀨𑀭𑀼𑀲𑀜𑁆𑀘 𑀲𑀫𑁆𑀨𑀲𑁆𑀲𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀏𑀯𑀫𑁂𑀯𑀁 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀺𑀢𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀧𑀜𑁆𑀘 𑀯𑀘𑀦𑀧𑀣𑁂 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀭𑀺𑀲𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺.

𑁨𑁩𑁨. 𑀑𑀘𑀭𑀓𑀸𑀢𑀺 𑀧𑀭𑀽𑀧𑀖𑀸𑀢𑀯𑀲𑁂𑀦 𑀳𑀻𑀦𑀓𑀫𑁆𑀫𑀓𑀸𑀭𑀺𑀦𑁄. 𑀢𑁂𑀦𑀸𑀳 ‘‘𑀦𑀻𑀘𑀓𑀫𑁆𑀫𑀓𑀸𑀭𑀓𑀸’’𑀢𑀺. 𑀅𑀦𑀥𑀺𑀯𑀸𑀲𑀦𑁂𑀦𑀸𑀢𑀺 𑀅𑀓𑁆𑀔𑀫𑀦𑁂𑀦. 𑀫𑀬𑁆𑀳𑀁 𑀑𑀯𑀸𑀤𑀓𑀭𑁄 𑀦 𑀳𑁄𑀢𑀻𑀢𑀺 𑀧𑀭𑀫𑁆𑀳𑀺 𑀅𑀦𑀢𑁆𑀣𑀓𑀸𑀭𑀺𑀫𑁆𑀳𑀺 𑀘𑀺𑀢𑁆𑀢𑀧𑀤𑁄𑀲𑀦𑁂𑀦 𑀆𑀖𑀸𑀢𑀼𑀧𑁆𑀧𑀸𑀤𑀦𑁂𑀦 𑀫𑀫 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑁄 𑀦𑀸𑀫 𑀦 𑀳𑁄𑀢𑀺.

𑁨𑁩𑁩. 𑀅𑀡𑀼𑀦𑁆𑀢𑀺 𑀅𑀧𑁆𑀧𑀓𑀁 𑀢𑀦𑀼 𑀧𑀭𑀺𑀢𑁆𑀢𑀓𑀁. 𑀣𑀽𑀮𑀦𑁆𑀢𑀺 𑀫𑀳𑀦𑁆𑀢𑀁 𑀑𑀴𑀸𑀭𑀺𑀓𑀁. 𑀯𑀘𑀦𑀧𑀣𑀲𑁆𑀲 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀁 𑀲𑀸𑀯𑀚𑁆𑀚𑀯𑀺𑀪𑀸𑀕𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀅𑀧𑁆𑀧𑀲𑀸𑀯𑀚𑁆𑀚𑀁 𑀯𑀸 𑀫𑀳𑀸𑀲𑀸𑀯𑀚𑁆𑀚𑀁 𑀯𑀸’’𑀢𑀺. 𑀔𑀦𑁆𑀢𑀺𑀬𑀸 𑀇𑀤𑀁 𑀪𑀸𑀭𑀺𑀬𑀁 𑀦 𑀳𑁄𑀢𑀻𑀢𑀺 𑀅𑀯𑁄𑀘𑀼𑀁 ‘‘𑀅𑀦𑀥𑀺…𑀧𑁂… 𑀧𑀲𑁆𑀲𑀸𑀫𑀸’’𑀢𑀺. 𑀤𑀻𑀖𑀭𑀢𑁆𑀢𑀦𑁆𑀢𑀺 𑀘𑀺𑀭𑀓𑀸𑀮𑀁, 𑀅𑀘𑁆𑀘𑀦𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀜𑁆𑀘 𑀳𑀺𑀢𑀲𑀼𑀔𑀁 𑀦𑀸𑀫 𑀅𑀜𑁆𑀜𑀸𑀥𑀺𑀕𑀫𑁂𑀦𑁂𑀯𑀸𑀢𑀺 𑀆𑀳 ‘‘𑀅𑀭𑀳𑀢𑁆𑀢𑁂𑀦 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄’’𑀢𑀺.

𑀓𑀓𑀘𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀅𑀮𑀕𑀤𑁆𑀤𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁪. 𑀩𑀸𑀥𑀬𑀺𑀁𑀲𑀽𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀸𑀘𑀺𑀢𑁆𑀢𑀺𑀬 𑁩.𑁪𑁧𑁭) 𑀳𑀦𑀺𑀁𑀲𑀼. 𑀢𑀁𑀢𑀁𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑀦𑀯𑀲𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂 𑀏𑀢𑀺 𑀆𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑀭𑀸𑀬𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀦𑀢𑁆𑀣𑁄, 𑀅𑀦𑀢𑀺𑀓𑁆𑀓𑀫𑀦𑀝𑁆𑀞𑁂𑀦 𑀢𑀲𑁆𑀫𑀺𑀁 𑀅𑀦𑁆𑀢𑀭𑀸𑀬𑁂 𑀦𑀺𑀬𑀼𑀢𑁆𑀢𑀸, 𑀅𑀦𑁆𑀢𑀭𑀸𑀬𑀁 𑀯𑀸 𑀨𑀮𑀁 𑀅𑀭𑀳𑀦𑁆𑀢𑀺, 𑀅𑀦𑁆𑀢𑀭𑀸𑀬𑀲𑁆𑀲 𑀯𑀸 𑀓𑀭𑀡𑀲𑀻𑀮𑀸𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀢𑁂𑀦𑀸𑀳 ‘‘𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸’’𑀢𑀺. 𑀆𑀦𑀦𑁆𑀢𑀭𑀺𑀬𑀥𑀫𑁆𑀫𑀸𑀢𑀺 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀘𑁂𑀢𑀦𑀸𑀥𑀫𑁆𑀫𑀸. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀘𑀼𑀢𑀺𑀅𑀦𑀦𑁆𑀢𑀭𑀨𑀮𑀁 𑀅𑀦𑀦𑁆𑀢𑀭𑀁 𑀦𑀸𑀫, 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀸, 𑀢𑀦𑁆𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀦𑁆𑀢𑀭𑀓𑀭𑀡𑀲𑀻𑀮𑀸, 𑀅𑀦𑀦𑁆𑀢𑀭𑀧𑀬𑁄𑀚𑀦𑀸𑀢𑀺 𑀯𑀸 𑀆𑀦𑀦𑁆𑀢𑀭𑀺𑀓𑀸, 𑀢𑁂 𑀏𑀯 𑀆𑀦𑀦𑁆𑀢𑀭𑀺𑀬𑀸𑀢𑀺 𑀯𑀼𑀢𑁆𑀢𑀸. 𑀓𑀫𑁆𑀫𑀸𑀦𑀺 𑀏𑀯 𑀅𑀦𑁆𑀢𑀭𑀸𑀬𑀺𑀓𑀸𑀢𑀺 𑀓𑀫𑁆𑀫𑀦𑁆𑀢𑀭𑀸𑀬𑀺𑀓𑀸. 𑀫𑁄𑀓𑁆𑀔𑀲𑁆𑀲𑁂𑀯 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀦 𑀲𑀕𑁆𑀕𑀲𑁆𑀲 𑀫𑀺𑀘𑁆𑀙𑀸𑀘𑀸𑀭𑀮𑀓𑁆𑀔𑀡𑀸𑀪𑀸𑀯𑀢𑁄. 𑀦 𑀳𑀺 𑀪𑀺𑀓𑁆𑀔𑀼𑀦𑀺𑀬𑀸 𑀥𑀫𑁆𑀫𑀭𑀓𑁆𑀔𑀺𑀢𑀪𑀸𑀯𑁄 𑀅𑀢𑁆𑀣𑀺. 𑀧𑀸𑀓𑀢𑀺𑀓𑀪𑀺𑀓𑁆𑀔𑀼𑀦𑀻𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁, 𑀅𑀭𑀺𑀬𑀸𑀬 𑀧𑀦 𑀧𑀯𑀢𑁆𑀢𑀁 𑀅𑀧𑀸𑀬𑀲𑀁𑀯𑀢𑁆𑀢𑀦𑀺𑀬𑀫𑁂𑀯. 𑀦𑀦𑁆𑀤𑀫𑀸𑀡𑀯𑀓𑁄 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀉𑀪𑀺𑀦𑁆𑀦𑀁 𑀲𑀫𑀸𑀦𑀘𑁆𑀙𑀦𑁆𑀤𑀢𑀸𑀯𑀲𑁂𑀦 𑀯𑀸 𑀅𑀲𑀕𑁆𑀕𑀦𑁆𑀢𑀭𑀸𑀬𑀺𑀓𑀢𑀸, 𑀫𑁄𑀓𑁆𑀔𑀦𑁆𑀢𑀭𑀸𑀬𑀺𑀓𑀢𑀸 𑀧𑀦 𑀫𑁄𑀓𑁆𑀔𑀢𑁆𑀣𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀤𑀽𑀲𑀦𑀢𑁄, 𑀅𑀪𑀺𑀪𑀯𑀺𑀢𑁆𑀯𑀸 𑀧𑀦 𑀧𑀯𑀢𑁆𑀢𑀺𑀬𑀁 𑀲𑀕𑁆𑀕𑀦𑁆𑀢𑀭𑀸𑀬𑀺𑀓𑀢𑀸𑀧𑀺 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀦𑁆𑀢𑀺. 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀬𑁄𑀯 𑀦𑀺𑀬𑀢𑀪𑀸𑀯𑀁 𑀧𑀢𑁆𑀢𑀸 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑀸. 𑀧𑀝𑀺𑀲𑀦𑁆𑀥𑀺𑀥𑀫𑁆𑀫𑀸𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀸𑀳. 𑀧𑀡𑁆𑀟𑀓𑀸𑀤𑀺𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀲𑀩𑁆𑀩𑀸𑀬𑀧𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀧𑀸𑀓𑀦𑁆𑀢𑀭𑀸𑀬𑀺𑀓𑀪𑀸𑀯𑀢𑁄. 𑀬𑀸 𑀳𑀺 𑀅𑀭𑀺𑀬𑁂 𑀉𑀧𑀯𑀤𑀢𑀺, 𑀲𑀸 𑀘𑁂𑀢𑀦𑀸 𑀅𑀭𑀺𑀬𑀽𑀧𑀯𑀸𑀤𑀥𑀫𑁆𑀫𑀸. 𑀢𑀢𑁄 𑀧𑀭𑀦𑁆𑀢𑀺 𑀔𑀫𑀸𑀧𑀦𑀢𑁄 𑀉𑀧𑀭𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀳𑀸𑀲𑀻𑀳𑀦𑀸𑀤𑀲𑁆𑀲 𑀮𑀻𑀦𑀢𑁆𑀣𑀧𑀓𑀸𑀲𑀦𑁂 𑀯𑀼𑀢𑁆𑀢𑀫𑁂𑀯. 𑀬𑀸𑀯 𑀪𑀺𑀓𑁆𑀔𑀼𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀺 𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑁄. 𑀦 𑀯𑀼𑀝𑁆𑀞𑀸𑀢𑀺 𑀲𑁂𑀲𑀁 𑀕𑀭𑀼𑀓𑀸𑀧𑀢𑁆𑀢𑀺𑀁. 𑀦 𑀤𑁂𑀲𑁂𑀢𑀺 𑀮𑀳𑀼𑀓𑀸𑀧𑀢𑁆𑀢𑀺𑀁.

𑀅𑀬𑀁 𑀪𑀺𑀓𑁆𑀔𑀼 𑀅𑀭𑀺𑀝𑁆𑀞𑁄. 𑀭𑀲𑁂𑀦 𑀭𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀅𑀦𑀯𑀚𑁆𑀚𑁂𑀦 𑀧𑀘𑁆𑀘𑀬𑀧𑀭𑀺𑀪𑀼𑀜𑁆𑀚𑀦𑀭𑀲𑁂𑀦 𑀲𑀸𑀯𑀚𑁆𑀚𑀁 𑀓𑀸𑀫𑀕𑀼𑀡𑀧𑀭𑀺𑀪𑁄𑀕𑀭𑀲𑀁 𑀲𑀫𑀸𑀦𑁂𑀢𑁆𑀯𑀸. 𑀉𑀧𑀦𑁂𑀦𑁆𑀢𑁄 𑀯𑀺𑀬𑀸𑀢𑀺 𑀩𑀦𑁆𑀥𑀦𑀁 𑀉𑀧𑀦𑁂𑀦𑁆𑀢𑁄 𑀯𑀺𑀬. ‘‘𑀖𑀝𑁂𑀦𑁆𑀢𑁄 𑀯𑀺𑀬𑀸’’𑀢𑀺𑀧𑀺 𑀧𑀸𑀞𑁄. 𑀉𑀧𑀲𑀁𑀳𑀭𑀦𑁆𑀢𑁄 𑀯𑀺𑀬𑀸𑀢𑀺 𑀲𑀤𑀺𑀲𑀢𑀁 𑀉𑀧𑀲𑀁𑀳𑀭𑀦𑁆𑀢𑁄 𑀯𑀺𑀬 𑀏𑀓𑀦𑁆𑀢𑀲𑀸𑀯𑀚𑁆𑀚𑁂 𑀅𑀦𑀯𑀚𑁆𑀚𑀪𑀸𑀯𑀧𑀓𑁆𑀔𑁂𑀧𑁂𑀦. 𑀧𑀸𑀧𑀓𑀦𑁆𑀢𑀺 𑀮𑀸𑀫𑀓𑀝𑁆𑀞𑁂𑀦 𑀤𑀼𑀕𑁆𑀕𑀢𑀺𑀲𑀫𑁆𑀧𑀸𑀧𑀦𑀝𑁆𑀞𑁂𑀦 𑀘 𑀧𑀸𑀧𑀓𑀁. 𑀲𑁂𑀢𑀼𑀓𑀭𑀡𑀯𑀲𑁂𑀦 𑀫𑀳𑀸𑀲𑀫𑀼𑀤𑁆𑀤𑀁 𑀩𑀦𑁆𑀥𑀦𑁆𑀢𑁂𑀦 𑀯𑀺𑀬. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 ‘‘𑀲𑀸𑀯𑀚𑁆𑀚’’𑀦𑁆𑀢𑀺 𑀤𑀺𑀝𑁆𑀞𑀁 ‘‘𑀅𑀦𑀯𑀚𑁆𑀚’’𑀦𑁆𑀢𑀺 𑀕𑀳𑀡𑁂𑀦 𑀢𑁂𑀦 𑀧𑀝𑀺𑀯𑀺𑀭𑀼𑀚𑁆𑀛𑀦𑁆𑀢𑁄. 𑀏𑀓𑀦𑁆𑀢𑀢𑁄 𑀅𑀦𑀦𑁆𑀢𑀭𑀸𑀬𑀺𑀓𑀦𑁆𑀢𑀺 𑀕𑀳𑀡𑁂𑀦 𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀧𑀝𑀺𑀩𑀸𑀳𑀦𑁆𑀢𑁄. 𑀓𑀸𑀫𑀓𑀡𑁆𑀝𑀓𑁂𑀳𑀺 𑀅𑀭𑀺𑀬𑀫𑀕𑁆𑀕𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀦 𑀉𑀧𑀓𑁆𑀓𑀺𑀮𑀺𑀲𑁆𑀲𑀢𑀻𑀢𑀺 𑀯𑀤𑀦𑁆𑀢𑁄 ‘‘𑀅𑀭𑀺𑀬𑀫𑀕𑁆𑀕𑁂 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀦𑀺 𑀧𑀓𑁆𑀔𑀺𑀧𑀦𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑁂, ‘‘𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀳𑀸𑀬𑀸’’𑀢𑀺 (𑀤𑀻. 𑀦𑀺. 𑁧.𑁮, 𑁧𑁯𑁪) 𑀆𑀤𑀺𑀤𑁂𑀲𑀦𑀸𑀲𑀗𑁆𑀔𑀸𑀢𑁂 𑀘 𑀆𑀡𑀸𑀘𑀓𑁆𑀓𑁂.

𑀧𑀼𑀘𑁆𑀙𑀫𑀸𑀦𑀸 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀺 𑀦𑀸𑀫. 𑀧𑀼𑀘𑁆𑀙𑀸 𑀳𑀺 𑀅𑀦𑀼𑀬𑁄𑀕𑁄𑀢𑀺. 𑀢𑁂𑀦𑀸𑀥𑀺𑀕𑀢𑀸𑀬 𑀮𑀤𑁆𑀥𑀺𑀬𑀸 𑀅𑀦𑀼𑀯𑀚𑁆𑀚𑀦𑀢𑁆𑀣𑀁 𑀧𑀘𑁆𑀘𑀦𑀼𑀪𑀸𑀲𑀦𑁂𑀦 𑀧𑀼𑀦 𑀧𑀝𑀺𑀚𑀸𑀦𑀸𑀧𑀦𑀁 𑀧𑀢𑀺𑀝𑁆𑀞𑀸𑀧𑀦𑀁, 𑀢𑀁 𑀧𑀦𑀲𑁆𑀲 𑀆𑀤𑀸𑀬 𑀲𑀫𑀸𑀤𑀸𑀧𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑀦𑀼𑀕𑀸𑀳𑀦𑁆𑀢𑀺 𑀦𑀸𑀫𑀸’’𑀢𑀺. 𑀢𑀲𑁆𑀲𑀸 𑀧𑀦 𑀮𑀤𑁆𑀥𑀺𑀬𑀸 𑀅𑀦𑀼𑀬𑀼𑀜𑁆𑀚𑀺𑀢𑀸𑀬 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀓𑀸𑀭𑀡𑀁 𑀓𑀸𑀭𑀡𑀧𑀢𑀺𑀭𑀽𑀧𑀓𑀫𑁂𑀯𑀸𑀢𑀺 𑀢𑀲𑁆𑀲 𑀧𑀼𑀘𑁆𑀙𑀦𑀁 𑀲𑀫𑀦𑀼𑀪𑀸𑀲𑀦𑀁. 𑀅𑀦𑀼𑀤𑀳𑀦𑀝𑁆𑀞𑁂𑀦 𑀅𑀦𑀼𑀧𑀸𑀬𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀅𑀦𑀼𑀤𑀳𑀦𑀝𑁆𑀞𑁂𑀦. 𑀫𑀳𑀸𑀪𑀺𑀢𑀸𑀧𑀦𑀝𑁆𑀞𑁂𑀦 𑀅𑀦𑀯𑀝𑁆𑀞𑀺𑀢𑀲𑀪𑀸𑀯𑀢𑀸𑀬. 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦 𑀫𑀼𑀳𑀼𑀢𑁆𑀢𑀭𑀫𑀡𑀻𑀬𑀢𑀸𑀬. 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦 𑀧𑀭𑁂𑀳𑀺 𑀅𑀪𑀺𑀪𑀯𑀦𑀻𑀬𑀢𑀸𑀬. 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀧𑀮𑀺𑀪𑀜𑁆𑀚𑀦𑀝𑁆𑀞𑁂𑀦 𑀙𑁂𑀤𑀦𑀪𑁂𑀤𑀦𑀸𑀤𑀺𑀅𑀥𑀺𑀓𑀭𑀡𑀪𑀸𑀯𑁂𑀦. 𑀉𑀕𑁆𑀖𑀸𑀝𑀲𑀤𑀺𑀲𑀢𑀸𑀬 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦. 𑀅𑀯𑀡𑁂 𑀯𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀦𑁆𑀢𑁄 𑀅𑀦𑀼𑀧𑀯𑀺𑀲𑀦𑀲𑀪𑀸𑀯𑀢𑀸𑀬 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀅𑀦𑀢𑁆𑀣𑀦𑀺𑀫𑀺𑀢𑁆𑀢𑀢𑀸𑀬 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦.𑀤𑀺𑀝𑁆𑀞𑀺𑀣𑀸𑀫𑁂𑀦𑀸𑀢𑀺 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀣𑀸𑀫𑀕𑀢𑀪𑀸𑀯𑁂𑀦. 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁂𑀦𑀸𑀢𑀺 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀧𑀭𑀸𑀫𑀲𑀦𑁂𑀦. 𑀤𑀺𑀝𑁆𑀞𑀺𑀬𑁂𑀯 𑀳𑀺 𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀢𑁄 𑀆𑀫𑀲𑀦𑁂𑀦 𑀧𑀭𑀸𑀫𑀸𑀲𑁄. 𑀅𑀪𑀺𑀦𑀺𑀯𑀺𑀲𑁆𑀲𑀸𑀢𑀺 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑀧𑀼𑀩𑁆𑀩𑀗𑁆𑀕𑀫𑁂𑀦 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁂𑀦 ‘‘𑀇𑀤𑀫𑁂𑀯𑁂𑀢𑁆𑀣 𑀢𑀣’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸. 𑀬𑀲𑁆𑀫𑀸 𑀳𑀺 𑀅𑀪𑀺𑀦𑀺𑀯𑁂𑀲𑀦𑀁 𑀢𑀢𑁆𑀣 𑀅𑀪𑀺𑀦𑀺𑀯𑀺𑀝𑁆𑀞𑀁 𑀦𑀸𑀫 𑀳𑁄𑀢𑀺.𑀢𑀲𑁆𑀫𑀸 𑀆𑀳 ‘‘𑀅𑀥𑀺𑀝𑁆𑀞𑀳𑀺𑀢𑁆𑀯𑀸’’𑀢𑀺.

𑁨𑁩𑁫. 𑀦𑀢𑁆𑀣𑀻𑀢𑀺 𑀯𑀢𑁆𑀢𑀼𑀓𑀸𑀫𑁄𑀧𑀻𑀢𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀕𑀼𑀳𑁂𑀢𑀼𑀓𑀸𑀫𑀢𑀸𑀬 𑀅𑀯𑀚𑀸𑀦𑀺𑀢𑀼𑀓𑀸𑀫𑁄𑀧𑀺. 𑀲𑀫𑁆𑀧𑀝𑀺𑀘𑁆𑀙𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀤𑁆𑀯𑁂 𑀓𑀣𑀸𑀢𑀺 𑀯𑀺𑀲𑀁𑀯𑀸𑀤𑀦𑀓𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀪𑀽𑀢𑀓𑀣𑀸 𑀳𑀺 𑀧𑀼𑀩𑁆𑀩𑁂 𑀧𑀯𑀢𑁆𑀢𑀸 𑀪𑀽𑀢𑀓𑀣𑀸𑀬 𑀯𑀲𑁂𑀦 𑀤𑁆𑀯𑁂 𑀓𑀣𑀸𑀢𑀺 𑀯𑀼𑀘𑁆𑀘𑀢𑀺.

𑁨𑁩𑁬. 𑀓𑀲𑁆𑀲 𑀔𑁄 𑀦𑀸𑀫𑀸𑀢𑀺 𑀇𑀫𑀺𑀦𑀸 𑀲𑀢𑁆𑀣𑀸 ‘‘𑀦 𑀫𑀫 𑀢𑀼𑀬𑁆𑀳𑀁 𑀢𑀸𑀤𑀺𑀲𑀲𑁆𑀲 𑀅𑀢𑁆𑀣𑀸𑀬 𑀥𑀫𑁆𑀫𑀤𑁂𑀲𑀦𑀸 𑀦𑀸𑀫 𑀪𑀽𑀢𑀧𑀼𑀩𑁆𑀩𑀸’’𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀔𑀢𑁆𑀢𑀺𑀬𑀲𑁆𑀲 𑀯𑀸’’𑀢𑀺𑀆𑀤𑀺.

𑀜𑀸𑀡𑀫𑀬𑀸 𑀉𑀲𑁆𑀫𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀉𑀲𑁆𑀫𑀻, 𑀢𑀣𑀸𑀭𑀽𑀧𑁂𑀳𑀺 𑀧𑀘𑁆𑀘𑀬𑁂𑀳𑀺 𑀅𑀦𑀼𑀲𑁆𑀫𑀻𑀓𑀢𑁄 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀝𑀺𑀯𑁂𑀥𑀕𑀩𑁆𑀪𑁄𑀅𑀧𑀺 𑀉𑀲𑁆𑀫𑀻𑀓𑀢𑁄𑀢𑀺 𑀯𑀺𑀓𑀢𑀪𑀸𑀯𑀢𑁄 𑀧𑀜𑁆𑀜𑀸𑀩𑀻𑀚𑀫𑀲𑁆𑀲 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀧𑀺 𑀦𑀼 𑀅𑀢𑁆𑀣𑀻𑀢𑀺 𑀪𑀕𑀯𑀸 𑀪𑀺𑀓𑁆𑀔𑀽 𑀧𑀼𑀘𑁆𑀙𑀢𑀺. 𑀢𑁂 𑀧𑀝𑀺𑀓𑁆𑀔𑀺𑀧𑀦𑁆𑀢𑀸 𑀯𑀤𑀦𑁆𑀢𑀺 𑀞𑀸𑀦𑀕𑀢𑁂𑀦 𑀤𑀼𑀘𑁆𑀘𑀭𑀺𑀢𑁂𑀦 𑀜𑀸𑀡𑀼𑀧𑀳𑀢𑀪𑀸𑀯𑀁 𑀲𑀫𑁆𑀧𑀲𑁆𑀲𑀦𑁆𑀢𑀸. 𑀦𑀺𑀢𑁆𑀢𑁂𑀚𑀪𑀽𑀢𑁄𑀢𑀺 𑀦𑀺𑀢𑁆𑀢𑁂𑀚𑀁 𑀪𑀽𑀢𑁄 𑀢𑁂𑀚𑁄𑀳𑀸𑀦𑀺𑀧𑁆𑀧𑀢𑁆𑀢𑁄. 𑀢𑀢𑁄 𑀏𑀯 𑀪𑀺𑀓𑁆𑀔𑀽𑀦𑀫𑁆𑀧𑀺 𑀲𑀫𑁆𑀫𑀼𑀔𑀸 𑀑𑀮𑁄𑀓𑁂𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄. 𑀲𑀳𑀥𑀫𑁆𑀫𑀺𑀓𑀁 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑀢𑁄 𑀅𑀧𑁆𑀧𑀝𑀺𑀪𑀸𑀦𑁄. 𑀲𑀫𑁆𑀧𑀢𑁆𑀢𑀽𑀧𑀕𑀦𑁆𑀢𑀺 𑀲𑀫𑁆𑀧𑀢𑁆𑀢𑀺𑀆𑀯𑀳𑀁. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑁄𑀢𑀺 𑀧𑀝𑀺𑀲𑁂𑀥𑁂𑀦𑁆𑀢𑁄.

𑁨𑁩𑁭. 𑀅𑀦𑁆𑀢𑀭𑀸𑀬𑀓𑀭𑀮𑀤𑁆𑀥𑀺𑀬𑀸 𑀲𑀪𑀸𑀯𑀯𑀺𑀪𑀸𑀯𑀦𑁂𑀦 𑀧𑀭𑀺𑀲𑀁 𑀲𑁄𑀥𑁂𑀢𑀺. 𑀦𑀺𑀲𑁆𑀲𑀸𑀭𑁂𑀢𑀺 𑀦𑀻𑀳𑀭𑀢𑀺 𑀅𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺𑀢𑀸𑀬. 𑀓𑀲𑁆𑀲𑀘𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀅𑀚𑀸𑀦𑀦𑁆𑀢𑀲𑁆𑀲. 𑀢𑀲𑁆𑀲 𑀳𑀺 𑀏𑀯𑀁 𑀪𑀯𑁂𑀬𑁆𑀬 ‘‘𑀲𑀳𑀲𑀸 𑀓𑀣𑀺𑀢’’𑀦𑁆𑀢𑀺. 𑀦 𑀳𑀺 𑀓𑀤𑀸𑀘𑀺 𑀩𑀼𑀤𑁆𑀥𑀸𑀦𑀁 𑀲𑀳𑀲𑀸 𑀓𑀺𑀭𑀺𑀬𑀸 𑀦𑀸𑀫 𑀅𑀢𑁆𑀣𑀺. 𑀅𑀲𑁆𑀲𑀸𑀢𑀺 ‘‘𑀓𑀲𑁆𑀲𑀘𑀻’’𑀢𑀺 𑀯𑀼𑀢𑁆𑀢𑀪𑀺𑀓𑁆𑀔𑀼𑀲𑁆𑀲. 𑀲𑀼𑀢𑁆𑀯𑀸𑀧𑀺 𑀢𑀼𑀡𑁆𑀳𑀻𑀪𑀸𑀯𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀣𑀸𑀧𑀺 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀁 𑀲𑀩𑁆𑀩𑀦𑁆𑀢𑀺 ‘‘𑀲𑀘𑁂 𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀧𑀭𑀺𑀓𑀧𑁆𑀧𑀦𑀁. 𑀦 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀲𑀸𑀬 𑀮𑀤𑁆𑀥𑀺𑀁 𑀲𑁄𑀥𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀮𑀤𑁆𑀥𑀺𑀁 𑀧𑀓𑀸𑀲𑁂𑀦𑁆𑀢𑁄𑀢𑀺 𑀫𑀳𑀸𑀲𑀸𑀯𑀚𑁆𑀚𑀢𑀸𑀯𑀲𑁂𑀦 𑀧𑀓𑀸𑀲𑁂𑀦𑁆𑀢𑁄. 𑀲𑀜𑁆𑀜𑀸𑀯𑀺𑀢𑀓𑁆𑀓𑁂𑀳𑀻𑀢𑀺 𑀲𑀼𑀪𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁂𑀳𑀺 𑀲𑀜𑁆𑀜𑀸𑀯𑀺𑀢𑀓𑁆𑀓𑁂𑀳𑀺. 𑀢𑁂𑀦𑀸𑀳 ‘‘𑀓𑀺𑀮𑁂𑀲𑀓𑀸𑀫𑀲𑀫𑁆𑀧𑀬𑀼𑀢𑁆𑀢𑁂𑀳𑀻’’𑀢𑀺. 𑀫𑁂𑀣𑀼𑀦𑀲𑀫𑀸𑀘𑀸𑀭𑀦𑁆𑀢𑀺 𑀇𑀤𑀁 𑀅𑀥𑀺𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀤𑀜𑁆𑀜𑀫𑁆𑀧𑀺 𑀧𑀦 𑁋 ‘‘𑀅𑀧𑀺𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀁 𑀧𑀭𑀺𑀫𑀤𑁆𑀤𑀦𑀁 𑀦𑀳𑀸𑀧𑀦𑀁 𑀲𑀫𑁆𑀩𑀸𑀳𑀦𑀁 𑀲𑀸𑀤𑀺𑀬𑀢𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁫𑁦) 𑀆𑀕𑀢𑀁 𑀯𑀺𑀲𑀪𑀸𑀕𑀯𑀢𑁆𑀣𑀼𑀯𑀺𑀲𑀬𑀁 𑀆𑀫𑀺𑀲𑀧𑀭𑀺𑀪𑁄𑀕𑀁. ‘‘𑀅𑀜𑁆𑀜𑀢𑁆𑀭𑁂𑀯 𑀓𑀸𑀫𑁂𑀳𑀺 𑀅𑀜𑁆𑀜𑀢𑁆𑀭 𑀓𑀸𑀫𑀲𑀜𑁆𑀜𑀸𑀳𑀺 𑀅𑀜𑁆𑀜𑀢𑁆𑀭 𑀓𑀸𑀫𑀯𑀺𑀢𑀓𑁆𑀓𑁂𑀳𑀺 𑀲𑀫𑀸𑀘𑀭𑀺𑀲𑁆𑀲𑀢𑀻’’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁨𑁩𑁮. 𑀬𑁄𑀦𑀺𑀲𑁄 𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀦𑀢𑁆𑀣𑀺 𑀏𑀢𑁆𑀣 𑀙𑀦𑁆𑀤𑀭𑀸𑀕𑁄𑀢𑀺 𑀦𑀺𑀘𑁆𑀙𑀦𑁆𑀤𑀭𑀸𑀕𑁄, 𑀢𑀁 𑀦𑀺𑀘𑁆𑀙𑀦𑁆𑀤𑀭𑀸𑀕𑀁. 𑀓𑀤𑀸𑀘𑀺 𑀉𑀧𑁄𑀲𑀣𑀺𑀓𑀪𑀸𑀯𑁂𑀦 𑀲𑀫𑀸𑀤𑀺𑀦𑁆𑀦𑀲𑀻𑀮𑀸𑀧𑀺 𑀳𑁄𑀦𑁆𑀢𑀺 𑀓𑀤𑀸𑀘𑀺 𑀦𑁄𑀢𑀺 𑀅𑀦𑀺𑀩𑀤𑁆𑀥𑀲𑀻𑀮𑀸𑀦𑀁 𑀕𑀳𑀝𑁆𑀞𑀸𑀦𑀁. 𑀲𑀻𑀮𑀲𑀫𑀸𑀤𑀸𑀦𑀪𑀸𑀯𑀢𑁄 𑀅𑀦𑁆𑀢𑀭𑀸𑀬𑀓𑀭𑀁. 𑀯𑀢𑁆𑀣𑀼𑀓𑀸𑀫𑀸𑀦𑀁 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘. 𑀅𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀪𑀺𑀓𑁆𑀔𑀽𑀦𑀁 𑀆𑀯𑀭𑀡𑀓𑀭𑀁. 𑀧𑀘𑁆𑀘𑀬𑀸𑀦𑀁 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘. 𑀅𑀬𑀁 𑀅𑀭𑀺𑀝𑁆𑀞𑁄 𑀤𑀼𑀕𑁆𑀕𑀳𑀺𑀢𑀸𑀬 𑀧𑀭𑀺𑀬𑀢𑁆𑀢𑀺𑀬𑀸 𑀯𑀲𑁂𑀦 𑀅𑀫𑁆𑀳𑁂 𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀢𑀺, 𑀅𑀢𑁆𑀢𑀸𑀦𑀜𑁆𑀘 𑀔𑀦𑀢𑀺, 𑀩𑀳𑀼𑀜𑁆𑀘 𑀅𑀧𑀼𑀜𑁆𑀜𑀁 𑀧𑀲𑀯𑀢𑀻𑀢𑀺 𑀏𑀯𑀁 𑀲𑀜𑁆𑀜𑀸 𑀫𑀸 𑀳𑁄𑀦𑁆𑀢𑀽𑀢𑀺 𑀤𑀼𑀕𑁆𑀕𑀳𑀺𑀢𑀸𑀬 𑀧𑀭𑀺𑀬𑀢𑁆𑀢𑀺𑀬𑀸 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀉𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀲𑀚𑁆𑀛𑀸𑀬𑀦𑁆𑀢𑀺 𑀘𑁂𑀯 𑀯𑀸𑀘𑀼𑀕𑁆𑀕𑀢𑀁 𑀓𑀭𑁄𑀦𑁆𑀢𑀸 𑀥𑀸𑀭𑁂𑀦𑁆𑀢𑀺 𑀘𑀸𑀢𑀺 𑀅𑀢𑁆𑀣𑁄.

𑀲𑀼𑀢𑁆𑀢𑀦𑁆𑀢𑀺𑀆𑀤𑀺𑀦𑀸 𑀦𑀯𑀧𑁆𑀧𑀪𑁂𑀤𑀫𑁆𑀧𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀓𑀣𑀁 𑀲𑀼𑀢𑁆𑀢𑀁 𑀦𑀯𑀧𑁆𑀧𑀪𑁂𑀤𑀁? 𑀲𑀕𑀸𑀣𑀓𑀜𑁆𑀳𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀁, 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀜𑁆𑀘 𑀲𑀼𑀢𑁆𑀢𑀁 𑀉𑀤𑀸𑀦𑀸𑀤𑀺𑀯𑀺𑀲𑁂𑀲𑀲𑀜𑁆𑀜𑀸𑀯𑀺𑀭𑀳𑀺𑀢𑀁 𑀦𑀢𑁆𑀣𑀺, 𑀬𑀁 𑀲𑀼𑀢𑁆𑀢𑀗𑁆𑀕𑀁 𑀲𑀺𑀬𑀸, 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀜𑁆𑀘 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸 𑀕𑀸𑀣𑀸𑀪𑀸𑀯𑀢𑁄 𑀥𑀫𑁆𑀫𑀧𑀤𑀸𑀤𑀻𑀦𑀁 𑀯𑀺𑀬, 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀯𑀸 𑀲𑀺𑀬𑀸 𑀲𑀕𑀸𑀣𑀓𑀢𑁆𑀢𑀸 𑀲𑀕𑀸𑀣𑀸𑀯𑀕𑁆𑀕𑀲𑁆𑀲 𑀯𑀺𑀬, 𑀢𑀣𑀸 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋

𑀲𑀼𑀢𑁆𑀢𑀦𑁆𑀢𑀺 𑀲𑀸𑀫𑀜𑁆𑀜𑀯𑀺𑀥𑀺, 𑀯𑀺𑀲𑁂𑀲𑀯𑀺𑀥𑀬𑁄 𑀧𑀭𑁂;

𑀲𑀦𑀺𑀫𑀺𑀢𑁆𑀢𑀸 𑀦𑀺𑀭𑀽𑀴𑁆𑀳𑀢𑁆𑀢𑀸, 𑀲𑀳𑀢𑀸𑀜𑁆𑀜𑁂𑀦 𑀦𑀜𑁆𑀜𑀢𑁄. (𑀤𑀻. 𑀦𑀺. 𑀝𑀻. 𑁧.𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸; 𑀅. 𑀦𑀺. 𑀝𑀻. 𑁨.𑁪.𑁬; 𑀲𑀸𑀭𑀢𑁆𑀣. 𑀝𑀻. 𑁧.𑀩𑀸𑀳𑀺𑀭𑀦𑀺𑀤𑀸𑀦𑀓𑀣𑀸);

𑀲𑀩𑁆𑀩𑀲𑁆𑀲𑀧𑀺 𑀳𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀲𑀼𑀢𑁆𑀢𑀦𑁆𑀢𑀺 𑀅𑀬𑀁 𑀲𑀸𑀫𑀜𑁆𑀜𑀯𑀺𑀥𑀺. 𑀢𑁂𑀦𑁂𑀯𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀦𑁂𑀢𑁆𑀢𑀺𑀬𑀁 (𑀦𑁂𑀢𑁆𑀢𑀺. 𑁧.𑀲𑀗𑁆𑀕𑀳𑀯𑀸𑀭) ‘‘𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻’’𑀢𑀺. ‘‘𑀏𑀢𑁆𑀢𑀓𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀼𑀢𑁆𑀢𑀸𑀕𑀢𑀁 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 (𑀧𑀸𑀘𑀺. 𑁬𑁫𑁫, 𑁧𑁨𑁪𑁨), 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀻’’𑀢𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀓𑀣𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀏𑀯𑀫𑀸𑀤𑀺 𑀘 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁. 𑀢𑀤𑁂𑀓𑀤𑁂𑀲𑁂𑀲𑀼 𑀧𑀦 𑀕𑁂𑀬𑁆𑀬𑀸𑀤𑀬𑁄 𑀯𑀺𑀲𑁂𑀲𑀯𑀺𑀥𑀬𑁄 𑀢𑁂𑀦 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀧𑀢𑀺𑀝𑁆𑀞𑀺𑀢𑀸. 𑀢𑀣𑀸 𑀳𑀺 𑀕𑁂𑀬𑁆𑀬𑀲𑁆𑀲 𑀲𑀕𑀸𑀣𑀓𑀢𑁆𑀢𑀁 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀮𑁄𑀓𑁂𑀧𑀺 𑀳𑀺 𑀲𑀲𑀺𑀮𑁄𑀓𑀁 𑀲𑀕𑀸𑀣𑀓𑀁 𑀯𑀸 𑀘𑀼𑀡𑁆𑀡𑀺𑀬𑀕𑀦𑁆𑀣𑀁 ‘‘𑀕𑁂𑀬𑁆𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀕𑀸𑀣𑀸𑀯𑀺𑀭𑀳𑁂 𑀧𑀦 𑀲𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀜𑁆𑀳𑀺 ‘‘𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀩𑁆𑀬𑀸𑀓𑀭𑀡𑀫𑁂𑀯 𑀯𑁂𑀬𑁆𑀬𑀸𑀓𑀭𑀡𑀁.

𑀏𑀯𑀁 𑀲𑀦𑁆𑀢𑁂 𑀲𑀕𑀸𑀣𑀓𑀸𑀤𑀻𑀦𑀫𑁆𑀧𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸𑀦𑀁 𑀅𑀦𑁄𑀓𑀸𑀲𑀪𑀸𑀯𑀢𑁄, ‘‘𑀕𑀸𑀣𑀸𑀯𑀺𑀭𑀳𑁂 𑀲𑀢𑀻’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸 𑀘. 𑀢𑀣𑀸 𑀳𑀺 𑀥𑀫𑁆𑀫𑀧𑀤𑀸𑀤𑀻𑀲𑀼 𑀓𑁂𑀯𑀮𑀁 𑀕𑀸𑀣𑀸𑀩𑀦𑁆𑀥𑁂𑀲𑀼, 𑀲𑀕𑀸𑀣𑀓𑀢𑁆𑀢𑁂𑀧𑀺 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀬𑀼𑀢𑁆𑀢𑁂𑀲𑀼, ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺 (𑀇𑀢𑀺𑀯𑀼. 𑁧) 𑀆𑀤𑀺𑀯𑀘𑀦𑀲𑀫𑁆𑀩𑀦𑁆𑀥𑁂𑀲𑀼, 𑀅𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀘 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀬𑀣𑀸𑀓𑁆𑀓𑀫𑀁 𑀕𑀸𑀣𑀸-𑀉𑀤𑀸𑀦-𑀇𑀢𑀺𑀯𑀼𑀢𑁆𑀢𑀓-𑀅𑀩𑁆𑀪𑀼𑀢𑀥𑀫𑁆𑀫-𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀢𑀣𑀸 𑀲𑀢𑀺𑀧𑀺 𑀕𑀸𑀣𑀸𑀩𑀦𑁆𑀥𑀪𑀸𑀯𑁂 𑀪𑀕𑀯𑀢𑁄 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀘𑀭𑀺𑀬𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀓𑁂𑀲𑀼 𑀚𑀸𑀢𑀓𑀲𑀜𑁆𑀜𑀸, 𑀲𑀢𑀺𑀧𑀺 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁂 𑀲𑀕𑀸𑀣𑀓𑀢𑁆𑀢𑁂 𑀘 𑀓𑁂𑀲𑀼𑀘𑀺 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑁂𑀤𑀲𑁆𑀲 𑀮𑀪𑀸𑀧𑀦𑀢𑁄 𑀯𑁂𑀤𑀮𑁆𑀮𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀏𑀯𑀁 𑀢𑁂𑀦 𑀢𑁂𑀦 𑀲𑀕𑀸𑀣𑀓𑀢𑁆𑀢𑀸𑀤𑀺𑀦𑀸 𑀦𑀺𑀫𑀺𑀢𑁆𑀢𑁂𑀦 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀯𑀺𑀲𑁂𑀲𑀯𑀺𑀥𑀬𑁄 𑀲𑀼𑀢𑁆𑀢𑀗𑁆𑀕𑀢𑁄 𑀧𑀭𑁂 𑀕𑁂𑀬𑁆𑀬𑀸𑀤𑀬𑁄. 𑀬𑀁 𑀧𑀦𑁂𑀢𑁆𑀣 𑀕𑁂𑀬𑁆𑀬𑀗𑁆𑀕𑀸𑀤𑀺𑀦𑀺𑀫𑀺𑀢𑁆𑀢𑀭𑀳𑀺𑀢𑀁, 𑀢𑀁 𑀲𑀼𑀢𑁆𑀢𑀗𑁆𑀕𑀁 𑀯𑀺𑀲𑁂𑀲𑀲𑀜𑁆𑀜𑀸𑀧𑀭𑀺𑀳𑀸𑀭𑁂𑀦 𑀲𑀸𑀫𑀜𑁆𑀜𑀲𑀜𑁆𑀜𑀸𑀬 𑀧𑀯𑀢𑁆𑀢𑀦𑀢𑁄𑀢𑀺. 𑀦𑀦𑀼 𑀘 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀲𑀼𑀢𑁆𑀢𑀗𑁆𑀕𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀘𑁄𑀤𑀦𑀸 𑀢𑀤𑀯𑀢𑁆𑀣𑀸 𑀏𑀯𑀸𑀢𑀺? 𑀦 𑀢𑀤𑀯𑀢𑁆𑀣𑀸 𑀲𑁄𑀥𑀺𑀢𑀢𑁆𑀢𑀸. 𑀲𑁄𑀥𑀺𑀢𑀜𑁆𑀳𑀺 𑀧𑀼𑀩𑁆𑀩𑁂 ‘‘𑀕𑀸𑀣𑀸𑀯𑀺𑀭𑀳𑁂 𑀲𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢’’𑀦𑁆𑀢𑀺.

𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀕𑀸𑀣𑀸𑀪𑀸𑀯𑀢𑁄 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸’’𑀢𑀺 (𑀔𑀼. 𑀧𑀸. 𑁫.𑁧; 𑀲𑀼. 𑀦𑀺. 𑁨𑁬𑁧), 𑀢𑀁 𑀦, 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀦𑀺𑀭𑀼𑀴𑁆𑀳𑁄 𑀳𑀺 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀪𑀸𑀯𑁄. 𑀦 𑀳𑀺 𑀢𑀸𑀦𑀺 𑀥𑀫𑁆𑀫𑀧𑀤𑀩𑀼𑀤𑁆𑀥𑀯𑀁𑀲𑀸𑀤𑀬𑁄 𑀯𑀺𑀬 𑀕𑀸𑀣𑀸𑀪𑀸𑀯𑁂𑀦 𑀧𑀜𑁆𑀜𑀸𑀢𑀸𑀦𑀺, 𑀓𑀺𑀦𑁆𑀢𑀼 𑀲𑀼𑀢𑁆𑀢𑀪𑀸𑀯𑁂𑀦𑁂𑀯. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀢𑁆𑀢𑀦𑀸𑀫𑀓’’𑀦𑁆𑀢𑀺 𑀦𑀸𑀫𑀕𑁆𑀕𑀳𑀡𑀁 𑀓𑀢𑀁. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀕𑀸𑀣𑀓𑀢𑁆𑀢𑀸 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀲𑀺𑀬𑀸’’𑀢𑀺, 𑀢𑀤𑀧𑀺 𑀦𑀢𑁆𑀣𑀺, 𑀬𑀲𑁆𑀫𑀸 𑀲𑀳𑀢𑀸𑀜𑁆𑀜𑁂𑀦. 𑀲𑀳 𑀕𑀸𑀣𑀸𑀳𑀻𑀢𑀺 𑀳𑀺 𑀲𑀕𑀸𑀣𑀓𑀁, 𑀲𑀳𑀪𑀸𑀯𑁄 𑀘 𑀦𑀸𑀫 𑀅𑀢𑁆𑀣𑀢𑁄 𑀅𑀜𑁆𑀜𑁂𑀦 𑀳𑁄𑀢𑀺, 𑀦 𑀘 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀲𑀼 𑀕𑀸𑀣𑀸𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀲𑀼𑀢𑁆𑀢𑀧𑀤𑁂𑀲𑁄 𑀅𑀢𑁆𑀣𑀺, 𑀬𑁄 ‘‘𑀲𑀳 𑀕𑀸𑀣𑀸𑀳𑀻’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀦 𑀘 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺. 𑀬𑀤𑀧𑀺 𑀯𑀼𑀢𑁆𑀢𑀁 ‘‘𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀁 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀲𑀺𑀬𑀸’’𑀢𑀺, 𑀢𑀤𑀧𑀺 𑀦 𑀅𑀜𑁆𑀜𑀢𑁄. 𑀅𑀜𑁆𑀜𑀸 𑀏𑀯 𑀳𑀺 𑀢𑀸 𑀕𑀸𑀣𑀸 𑀚𑀸𑀢𑀓𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀅𑀢𑁄 𑀦 𑀢𑀸𑀳𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀦𑀁 𑀕𑁂𑀬𑁆𑀬𑀗𑁆𑀕𑀪𑀸𑀯𑁄𑀢𑀺. 𑀏𑀯𑀁 𑀲𑀼𑀢𑁆𑀢𑀸𑀤𑀻𑀦𑀁 𑀅𑀗𑁆𑀕𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀣𑀢𑁆𑀣𑀦𑁆𑀢𑀺 𑀅𑀢𑁆𑀣𑀪𑀽𑀢𑀁 𑀬𑀣𑀸𑀪𑀽𑀢𑀁 𑀅𑀢𑁆𑀣𑀁. 𑀅𑀦𑀢𑁆𑀣𑀫𑁆𑀧𑀺 𑀓𑁂𑀘𑀺 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 ‘‘𑀅𑀢𑁆𑀣𑁄’’𑀢𑀺 𑀕𑀡𑁆𑀳𑀦𑁆𑀢𑀻𑀢𑀺 ‘‘𑀅𑀢𑁆𑀣𑀢𑁆𑀣’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀸𑀭𑀡𑀢𑁆𑀣𑀦𑁆𑀢𑀺 𑀓𑀸𑀭𑀡𑀪𑀽𑀢𑀁 𑀅𑀢𑁆𑀣𑀁, 𑀲𑀻𑀮𑀁 𑀲𑀫𑀸𑀥𑀺𑀲𑁆𑀲 𑀓𑀸𑀭𑀡𑀁, 𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀓𑀸𑀭𑀡𑀪𑀽𑀢𑀁 𑀅𑀢𑁆𑀣𑀁. 𑀢𑁂𑀦𑀸𑀳 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮’’𑀦𑁆𑀢𑀺𑀆𑀤𑀺. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 𑁋 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀁 𑀓𑀣𑀺𑀢𑀁, 𑀢𑀜𑁆𑀘 𑀬𑀸𑀯𑀤𑁂𑀯 𑀲𑀫𑀸𑀥𑀢𑁆𑀣𑀁, 𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀢𑁆𑀣𑁄, 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀢𑁆𑀣𑀸, 𑀫𑀕𑁆𑀕𑁄 𑀨𑀮𑀢𑁆𑀣𑁄, 𑀯𑀝𑁆𑀝𑀁 𑀓𑀣𑀺𑀢𑀁 𑀬𑀸𑀯𑀤𑁂𑀯 𑀯𑀺𑀯𑀝𑁆𑀝𑀸𑀥𑀺𑀕𑀫𑀢𑁆𑀣𑀦𑁆𑀢𑀺 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺. 𑀏𑀯𑀁 𑀧𑀸𑀴𑀺𑀬𑀁 ‘‘𑀅𑀢𑁆𑀣’’𑀦𑁆𑀢𑀺 𑀇𑀫𑀺𑀦𑀸 𑀪𑀸𑀲𑀺𑀢𑀢𑁆𑀣𑀧𑀬𑁄𑀚𑀦𑀢𑁆𑀣𑀸𑀦𑀁 𑀕𑀳𑀺𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀦 𑀯𑀺𑀘𑀸𑀭𑁂𑀦𑁆𑀢𑀺, 𑀦𑀺𑀚𑁆𑀛𑀸𑀦𑀧𑀜𑁆𑀜𑀸𑀓𑁆𑀔𑀫𑀸 𑀦 𑀳𑁄𑀦𑁆𑀢𑀺, 𑀦𑀺𑀚𑁆𑀛𑀸𑀬𑀺𑀢𑁆𑀯𑀸 𑀧𑀜𑁆𑀜𑀸𑀬 𑀭𑁄𑀘𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀺 𑀏𑀯𑀁 𑀏𑀢𑀸𑀬 𑀧𑀭𑀺𑀬𑀢𑁆𑀢𑀺𑀬𑀸 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀭𑁂𑀳𑀺 𑀆𑀭𑁄𑀧𑀺𑀢𑀯𑀸𑀤𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀫𑁄𑀓𑁆𑀔𑀧𑀬𑁄𑀚𑀦𑀸 𑀳𑀼𑀢𑁆𑀯𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺. 𑀯𑀸𑀤𑀧𑁆𑀧𑀫𑁄𑀓𑁆𑀔𑁄 𑀯𑀸 𑀦𑀺𑀦𑁆𑀤𑀸𑀧𑀫𑁄𑀓𑁆𑀔𑁄. 𑀬𑀲𑁆𑀲 𑀘𑀸𑀢𑀺 𑀬𑀲𑁆𑀲 𑀘 𑀲𑀻𑀮𑀸𑀤𑀺𑀧𑀽𑀭𑀡𑁂𑀦 𑀧𑀢𑁆𑀢𑀩𑁆𑀩𑀲𑁆𑀲, 𑀫𑀕𑁆𑀕𑀲𑁆𑀲 𑀯𑀸 𑀢𑀤𑀥𑀺𑀕𑀫𑁂𑀦 𑀧𑀢𑁆𑀢𑀩𑁆𑀩𑀲𑁆𑀲, 𑀨𑀮𑀲𑁆𑀲 𑀯𑀸 𑀢𑀤𑀥𑀺𑀕𑀫𑁂𑀦 𑀧𑀢𑁆𑀢𑀩𑁆𑀩𑀲𑁆𑀲, 𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑀲𑁆𑀲 𑀯𑀸 𑀅𑀢𑁆𑀣𑀸𑀬. 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀜𑀸𑀬𑁂𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀸𑀦𑀼𑀪𑁄𑀦𑁆𑀢𑀺 𑀦 𑀯𑀺𑀦𑁆𑀤𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀤𑀼𑀕𑁆𑀕𑀳𑀺𑀢𑀸 𑀉𑀧𑀸𑀭𑀫𑁆𑀪𑀫𑀸𑀦𑀤𑀧𑁆𑀧𑀫𑀓𑁆𑀔𑀧𑀴𑀸𑀲𑀸𑀤𑀺𑀳𑁂𑀢𑀼𑀪𑀸𑀯𑁂𑀦 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

𑁨𑁩𑁯. 𑀅𑀮𑀁 𑀧𑀭𑀺𑀬𑀢𑁆𑀢𑁄 𑀕𑀤𑁄 𑀅𑀲𑁆𑀲𑀸𑀢𑀺 𑀅𑀮𑀕𑀤𑁆𑀤𑁄 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀤-𑀓𑀸𑀭𑀸𑀕𑀫𑀜𑁆𑀘 𑀓𑀢𑁆𑀯𑀸. 𑀯𑀝𑁆𑀝𑀤𑀼𑀓𑁆𑀔𑀓𑀦𑁆𑀢𑀸𑀭𑀢𑁄 𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀧𑀭𑀺𑀬𑀢𑁆𑀢𑀺 𑀦𑀺𑀢𑁆𑀣𑀭𑀡𑀧𑀭𑀺𑀬𑀢𑁆𑀢𑀺. 𑀪𑀡𑁆𑀟𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀯𑀺𑀬 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀥𑀫𑁆𑀫𑀭𑀢𑀦𑀸𑀦𑀼𑀧𑀸𑀮𑀓𑁄. 𑀅𑀜𑁆𑀜𑀁 𑀅𑀢𑁆𑀣𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲𑁂𑀯 𑀲𑀢𑁄 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺. ‘‘𑀯𑀁𑀲𑀸𑀦𑀼𑀭𑀓𑁆𑀔𑀓𑁄𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀲𑀻𑀳𑀸𑀯𑀮𑁄𑀓𑀦𑀜𑀸𑀬𑁂𑀦 𑀢𑀦𑁆𑀢𑀺𑀥𑀸𑀭𑀓𑁄𑀯 𑀧𑀯𑁂𑀡𑀺𑀧𑀸𑀮𑀓𑁄𑀯𑀸𑀢𑀺 𑀧𑀼𑀭𑀺𑀫𑀧𑀤𑀤𑁆𑀯𑀬𑁂𑀧𑀺 𑀬𑁄𑀚𑁂𑀢𑀩𑁆𑀩𑀁.

𑀬𑀤𑀺 𑀢𑀦𑁆𑀢𑀺𑀥𑀸𑀭𑀡𑀸𑀤𑀺𑀅𑀢𑁆𑀣𑀁 𑀩𑀼𑀤𑁆𑀥𑀯𑀘𑀦𑀲𑁆𑀲 𑀧𑀭𑀺𑀬𑀸𑀧𑀼𑀡𑀦𑀁 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺, 𑀓𑀲𑁆𑀫𑀸 ‘‘𑀔𑀻𑀡𑀸𑀲𑀯𑀲𑁆𑀲𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦𑀦𑀼 𑀏𑀓𑀘𑁆𑀘𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑀧𑀺 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀻𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀬𑁄 𑀧𑀦𑀸’’𑀢𑀺𑀆𑀤𑀺. 𑀅𑀢𑁆𑀢𑀦𑁄 𑀞𑀸𑀦𑁂𑀢𑀺 𑀦𑀺𑀢𑁆𑀣𑀭𑀡𑀝𑁆𑀞𑀸𑀦𑁂. 𑀓𑀸𑀫𑀁 𑀧𑀼𑀣𑀼𑀚𑁆𑀚𑀦𑁄 ‘‘𑀧𑀯𑁂𑀡𑀺𑀁 𑀧𑀸𑀮𑁂𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀛𑀸𑀲𑀬𑁂𑀦 𑀧𑀭𑀺𑀬𑀸𑀧𑀼𑀡𑀸𑀢𑀺. 𑀅𑀢𑁆𑀢𑀦𑁄 𑀧𑀦 𑀪𑀯𑀓𑀦𑁆𑀢𑀸𑀭𑀢𑁄 𑀅𑀦𑀺𑀢𑁆𑀢𑀺𑀡𑁆𑀡𑀢𑁆𑀢𑀸 𑀢𑀲𑁆𑀲 𑀲𑀸 𑀧𑀭𑀺𑀬𑀢𑁆𑀢𑀺 𑀦𑀺𑀢𑁆𑀣𑀭𑀡𑀧𑀭𑀺𑀬𑀢𑁆𑀢𑀺 𑀏𑀯 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺𑀆𑀤𑀺.

𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀦𑀺𑀚𑁆𑀛𑀸𑀦𑀧𑀜𑁆𑀜𑀁 𑀔𑀫𑀦𑁆𑀢𑀺. 𑀢𑀢𑁆𑀣 𑀢𑀢𑁆𑀣 𑀆𑀕𑀢𑁂 𑀲𑀻𑀮𑀸𑀤𑀺𑀥𑀫𑁆𑀫𑁂 𑀦𑀺𑀚𑁆𑀛𑀸𑀬𑀺𑀢𑁆𑀯𑀸 𑀧𑀜𑁆𑀜𑀸𑀬 𑀭𑁄𑀘𑁂𑀢𑁆𑀯𑀸 𑀬𑀸𑀣𑀸𑀯𑀢𑁄 𑀕𑀳𑁂𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀇𑀥 𑀲𑀻𑀮’’𑀦𑁆𑀢𑀺𑀆𑀤𑀺. 𑀦 𑀓𑁂𑀯𑀮𑀁 𑀲𑀼𑀕𑁆𑀕𑀳𑀺𑀢𑀁 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀫𑀕𑁆𑀕𑀪𑀸𑀯𑀦𑀸𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸, 𑀧𑀭𑀯𑀸𑀤𑀦𑀺𑀕𑁆𑀕𑀳𑀲𑀓𑀯𑀸𑀤𑀧𑀢𑀺𑀝𑁆𑀞𑀸𑀧𑀦𑀸𑀤𑀻𑀦𑀺𑀧𑀺 𑀇𑀚𑁆𑀛𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀯𑀸𑀤𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀁 𑀦𑀺𑀕𑁆𑀕𑀳𑀺𑀢𑁆𑀯𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁨𑁬𑁮). 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀦𑁆𑀢𑀺 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀸𑀤𑀺𑀯𑀲𑁂𑀦 𑀇𑀘𑁆𑀙𑀺𑀢𑀁 𑀇𑀘𑁆𑀙𑀺𑀢𑀁 𑀧𑀸𑀴𑀺𑀧𑀤𑁂𑀲𑀁. 𑀫𑁄𑀘𑁂𑀢𑀼𑀦𑁆𑀢𑀺 𑀅𑀧𑀦𑁂𑀢𑀼𑀁. 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀲𑀁𑀯𑀢𑁆𑀢𑀦𑀫𑁆𑀧𑀺 𑀢𑀤𑀪𑀸𑀯𑁂 𑀉𑀧𑁆𑀧𑀚𑁆𑀚𑀦𑀓𑀳𑀺𑀢𑀲𑀼𑀔𑀲𑁆𑀲 𑀓𑀸𑀭𑀡𑀫𑁂𑀯 𑀢𑀲𑁆𑀫𑀺𑀁 𑀲𑀢𑀺 𑀪𑀸𑀯𑀢𑁄𑀢𑀺. 𑀲𑀼𑀕𑁆𑀕𑀳𑀺𑀢𑀅𑀮𑀕𑀤𑁆𑀤𑀲𑁆𑀲𑀧𑀺 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑀢𑀸 𑀤𑀝𑁆𑀞𑀩𑁆𑀩𑀸.

𑁨𑁪𑁦. 𑀉𑀢𑁆𑀢𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀢𑁆𑀢𑀭𑁄, 𑀲𑀺𑀦𑀦𑁆𑀢𑀺 𑀩𑀦𑁆𑀥𑀦𑁆𑀢𑀻𑀢𑀺 𑀲𑁂𑀢𑀼, 𑀉𑀢𑁆𑀢𑀭𑁄 𑀘 𑀲𑁄 𑀲𑁂𑀢𑀼 𑀘𑀸𑀢𑀺 𑀉𑀢𑁆𑀢𑀭𑀲𑁂𑀢𑀼. 𑀓𑀽𑀮𑀁 𑀧𑀭𑀢𑀻𑀭𑀁 𑀯𑀳𑀢𑀺 𑀧𑀸𑀧𑁂𑀢𑀻𑀢𑀺 𑀓𑀼𑀮𑁆𑀮𑀁. 𑀓𑀮𑀸𑀧𑀁 𑀓𑀢𑁆𑀯𑀸 𑀩𑀤𑁆𑀥𑁄𑀢𑀺 𑀯𑁂𑀴𑀼𑀦𑀴𑀸𑀤𑀻𑀳𑀺 𑀓𑀮𑀸𑀧𑀯𑀲𑁂𑀦 𑀩𑀤𑁆𑀥𑁄. 𑀅𑀡𑀼𑀦𑁆𑀢𑀺 𑀇𑀤𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀆𑀭𑀫𑁆𑀫𑀡𑀁 𑀲𑀜𑁆𑀜𑁄𑀚𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀣𑀽𑀮𑀦𑁆𑀢𑀺 𑀇𑀢𑀭𑀁. 𑀤𑀺𑀝𑁆𑀞𑀺𑀦𑁆𑀢𑀺 𑀬𑀣𑀸𑀪𑀽𑀢𑀤𑀲𑁆𑀲𑀦𑀁, 𑀯𑀺𑀧𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀏𑀯𑀁 𑀧𑀭𑀺𑀬𑁄𑀤𑀸𑀢𑀦𑁆𑀢𑀺 𑀢𑁂𑀪𑀽𑀫𑀓𑁂𑀲𑀼 𑀥𑀫𑁆𑀫𑁂𑀲𑀼 𑀜𑀸𑀢𑀁 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺, 𑀏𑀯𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀸𑀪𑀸𑀯𑁂𑀦 𑀲𑀩𑁆𑀩𑀲𑁄 𑀯𑀺𑀲𑀼𑀤𑁆𑀥𑀁, 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀏𑀯 𑀧𑀭𑀺𑀬𑁄𑀤𑀸𑀢𑀁. 𑀦 𑀅𑀮𑁆𑀮𑀻𑀬𑁂𑀣𑀸𑀢𑀺 𑀦𑀺𑀓𑀦𑁆𑀢𑀺𑀯𑀲𑁂𑀦 𑀦 𑀦𑀺𑀲𑁆𑀲𑀬𑁂𑀣. 𑀦 𑀓𑁂𑀮𑀸𑀬𑁂𑀣𑀸𑀢𑀺 𑀦 𑀫𑀫𑀸𑀬𑁂𑀣. 𑀦 𑀥𑀦𑀸𑀬𑁂𑀣𑀸𑀢𑀺 𑀥𑀦𑀁 𑀤𑁆𑀭𑀩𑁆𑀬𑀁 𑀦 𑀓𑀬𑀺𑀭𑀸𑀣. 𑀉𑀪𑀬𑀢𑁆𑀣𑀸𑀢𑀺 𑀲𑀫𑀣𑁂 𑀯𑀺𑀧𑀲𑁆𑀲𑀦𑀸𑀬 𑀘.

𑀅𑀲𑀤𑁆𑀥𑀫𑁆𑀫𑁂𑀢𑀺𑀆𑀤𑀻𑀲𑀼 𑀅𑀲𑀢𑀁 𑀳𑀻𑀦𑀚𑁆𑀛𑀸𑀲𑀬𑀸𑀦𑀁 𑀥𑀫𑁆𑀫𑁄𑀢𑀺 𑀅𑀲𑀤𑁆𑀥𑀫𑁆𑀫𑁄. 𑀕𑀸𑀫𑀯𑀸𑀲𑀻𑀦𑀁 𑀥𑀫𑁆𑀫𑁄𑀢𑀺 𑀕𑀸𑀫𑀥𑀫𑁆𑀫𑁄. 𑀓𑀺𑀮𑁂𑀲𑀸𑀦𑀁 𑀯𑀲𑁆𑀲𑀦𑀲𑀪𑀸𑀯𑀢𑀸𑀬 𑀯𑀲𑀮𑀥𑀫𑁆𑀫𑁄. 𑀓𑀺𑀮𑁂𑀲𑁂𑀳𑀺 𑀤𑀽𑀲𑀺𑀢𑀢𑁆𑀢𑀸 𑀣𑀽𑀮𑀢𑁆𑀢𑀸 𑀘 𑀤𑀼𑀝𑁆𑀞𑀼𑀮𑁆𑀮𑁄. 𑀉𑀤𑀓𑀲𑀼𑀤𑁆𑀥𑀺𑀧𑀭𑀺𑀬𑁄𑀲𑀸𑀦𑀢𑀸𑀬 𑀑𑀤𑀓𑀦𑁆𑀢𑀺𑀓𑁄. ‘‘𑀥𑀫𑁆𑀫𑀸𑀧𑀺 𑀯𑁄 𑀧𑀳𑀸𑀢𑀩𑁆𑀩𑀸’’𑀢𑀺 𑀇𑀫𑀺𑀦𑀸𑀧𑀺 𑀑𑀯𑀸𑀤𑁂𑀦 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑁆𑀲 𑀓𑀣𑁂𑀦𑁆𑀢𑁄𑀧𑀺 𑀅𑀭𑀺𑀝𑁆𑀞𑀁𑀬𑁂𑀯 𑀦𑀺𑀕𑁆𑀕𑀡𑁆𑀳𑀸𑀢𑀺.

𑁨𑁪𑁧. 𑀢𑀺𑀯𑀺𑀥𑀕𑁆𑀕𑀸𑀳𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑀯𑀲𑁂𑀦. 𑀬𑀤𑀺 𑀏𑀯𑀁 ‘‘𑀅𑀳𑀁 𑀫𑀫𑀸𑀢𑀺 𑀕𑀡𑁆𑀳𑀸𑀢𑀻’’𑀢𑀺 𑀕𑀸𑀳𑀤𑁆𑀯𑀬𑀫𑁂𑀯 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁 𑀢𑀢𑁆𑀣𑀸𑀧𑀺 𑀕𑀸𑀳𑀢𑁆𑀢𑀬𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸. ‘‘𑀅𑀳’’𑀦𑁆𑀢𑀺 𑀳𑀺 𑀇𑀫𑀺𑀦𑀸 𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑀸 𑀯𑀼𑀢𑁆𑀢𑀸 ‘‘𑀅𑀳𑀫𑀲𑁆𑀫𑀻’’𑀢𑀺 𑀕𑀸𑀳𑀲𑀸𑀫𑀜𑁆𑀜𑀢𑁄. 𑀤𑀺𑀝𑁆𑀞𑀺𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸𑀬 𑀤𑀺𑀝𑁆𑀞𑀺𑀬𑀸 𑀉𑀢𑁆𑀢𑀭𑀤𑀺𑀝𑁆𑀞𑀺𑀬𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀘 𑀓𑀸𑀭𑀡𑀪𑀸𑀯𑀢𑁄. 𑀆𑀭𑀫𑁆𑀫𑀡𑀁 𑀧𑀜𑁆𑀘 𑀔𑀦𑁆𑀥𑀸, 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀘. 𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑁄 𑀅𑀯𑀺𑀚𑁆𑀚𑀸-𑀨𑀲𑁆𑀲-𑀲𑀜𑁆𑀜𑀸-𑀯𑀺𑀢𑀓𑁆𑀓-𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭-𑀧𑀸𑀧𑀫𑀺𑀢𑁆𑀢𑀧𑀭𑀢𑁄𑀖𑁄𑀲𑀸𑀤𑀺𑀓𑁄 𑀤𑀺𑀝𑁆𑀞𑀺𑀬𑀸 𑀉𑀧𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁨𑁪)‘‘𑀓𑀢𑀫𑀸𑀦𑀺 𑀅𑀝𑁆𑀞 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀺 𑀅𑀯𑀺𑀚𑁆𑀚𑀸𑀧𑀺 𑀨𑀲𑁆𑀲𑁄𑀧𑀺 𑀲𑀜𑁆𑀜𑀸𑀧𑀺 𑀯𑀺𑀢𑀓𑁆𑀓𑁄𑀧𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀧𑀺 𑀧𑀸𑀧𑀫𑀺𑀢𑁆𑀢𑁄𑀧𑀺 𑀧𑀭𑀢𑁄𑀖𑁄𑀲𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺. 𑀭𑀽𑀧𑀸𑀭𑀫𑁆𑀫𑀡𑀸𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑀥𑀫𑁆𑀫𑀸𑀭𑀫𑁆𑀫𑀡𑀸. 𑀭𑀽𑀧𑀁 𑀧𑀦 𑀅𑀢𑁆𑀢𑀸𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀇𑀥 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁧, 𑁩𑁪𑁫) 𑀇𑀫𑀲𑁆𑀲 𑀕𑀸𑀳𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑁄 𑀳𑀺 ‘‘𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀢𑁄 𑀯𑀼𑀘𑁆𑀘𑀢𑀺. 𑀇𑀥 𑀧𑀦 ‘‘𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀅𑀢𑁆𑀢𑀦𑀺 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦’’𑀦𑁆𑀢𑀺 𑀇𑀫𑁂 𑀢𑀬𑁄 𑀕𑀸𑀳𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀓𑁂𑀘𑀺, 𑀢𑀤𑀬𑀼𑀢𑁆𑀢𑀁. 𑀬𑀲𑁆𑀫𑀸 𑀭𑀽𑀧𑀁 𑀅𑀢𑁆𑀢𑀸 𑀦 𑀳𑁄𑀢𑀺, 𑀅𑀢𑁆𑀢𑀕𑁆𑀕𑀸𑀳𑀲𑁆𑀲 𑀧𑀦 𑀆𑀮𑀫𑁆𑀩𑀦𑀁 𑀳𑁄𑀢𑀺, 𑀅𑀢𑁆𑀢𑀲𑀪𑀸𑀯𑁂𑀬𑁂𑀯 𑀯𑀸 𑀭𑀽𑀧𑀸𑀤𑀺𑀥𑀫𑁆𑀫𑁂 𑀆𑀭𑀩𑁆𑀪 𑀅𑀢𑁆𑀢𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀢𑁆𑀢𑀸𑀦𑀁 𑀢𑀲𑁆𑀲 𑀧𑀭𑀫𑀢𑁆𑀣𑀢𑁄 𑀅𑀦𑀼𑀧𑀮𑀩𑁆𑀪𑀦𑀢𑁄, 𑀢𑀲𑁆𑀫𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀯 𑀅𑀢𑁆𑀢𑀤𑀺𑀝𑁆𑀞𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀭𑀽𑀧𑀁 𑀧𑀦 ‘‘𑀅𑀢𑁆𑀢𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. ‘‘𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀯𑀺𑀧𑀲𑁆𑀲𑀦𑀸𑀧𑀝𑀺𑀯𑀺𑀧𑀲𑁆𑀲𑀦𑀸 𑀯𑀺𑀬 𑀤𑀺𑀝𑁆𑀞𑀺𑀅𑀦𑀼𑀧𑀲𑁆𑀲𑀦𑀸 𑀦𑀸𑀫 𑀤𑀲𑁆𑀲𑀺𑀢𑀸.

𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀸𑀦𑀁 𑀲𑀫𑁆𑀧𑀢𑁆𑀢𑀕𑀸𑀳𑀺𑀦𑁆𑀤𑁆𑀭𑀺𑀬𑀯𑀺𑀲𑀬𑀢𑀸𑀬 𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑀸. 𑀢𑀜𑁆𑀳𑀺 𑀢𑀲𑁆𑀲 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀧𑀭𑀺𑀪𑀼𑀢𑁆𑀯𑀸 𑀲𑀫𑁆𑀩𑀦𑁆𑀥𑀁 𑀳𑀼𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀅𑀯𑀲𑁂𑀲𑀸𑀦𑀺 𑀲𑀢𑁆𑀢𑀸𑀬𑀢𑀦𑀸𑀦𑀺 𑀯𑀺𑀜𑁆𑀜𑀸𑀢𑀁 𑀦𑀸𑀫 𑀫𑀦𑀲𑀸 𑀯𑀺𑀜𑁆𑀜𑀸𑀢𑀩𑁆𑀩𑀢𑁄. 𑀅𑀜𑁆𑀜𑀣𑀸 𑀇𑀢𑀭𑁂𑀲𑀫𑁆𑀧𑀺 𑀯𑀺𑀜𑁆𑀜𑀸𑀢𑀢𑀸 𑀲𑀺𑀬𑀸. 𑀧𑀢𑁆𑀢𑀦𑁆𑀢𑀺 𑀅𑀥𑀺𑀕𑀢𑀁. 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 𑀕𑀯𑁂𑀲𑀺𑀢𑀁. 𑀅𑀦𑀼𑀯𑀺𑀘𑀭𑀺𑀢𑀦𑁆𑀢𑀺 𑀘𑀺𑀦𑁆𑀢𑀺𑀢𑀁. 𑀢𑁂𑀦𑀸𑀳 ‘‘𑀫𑀦𑀲𑀸’’𑀢𑀺. 𑀏𑀢𑁆𑀣 𑀘 𑀧𑀢𑁆𑀢𑀧𑀭𑀺𑀬𑁂𑀲𑀦𑀸𑀦𑀁 𑀅𑀧𑀝𑀺𑀓𑁆𑀔𑁂𑀧𑀲𑁆𑀲, 𑀯𑀺𑀲𑀼𑀁, 𑀏𑀓𑀚𑁆𑀛𑀁 𑀧𑀝𑀺𑀓𑁆𑀔𑁂𑀧𑀲𑁆𑀲 𑀘 𑀯𑀲𑁂𑀦 𑀘𑀢𑀼𑀓𑁆𑀓𑁄𑀝𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀢𑁆𑀢𑀧𑀭𑀺𑀬𑁂𑀲𑀺𑀢𑁂𑀳𑀺 𑀅𑀦𑀼𑀯𑀺𑀘𑀭𑀺𑀢𑀲𑁆𑀲 𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀁 𑀧𑀞𑀫𑀁 𑀘𑁂𑀢𑀲𑀸 𑀧𑀘𑁆𑀙𑀸 𑀓𑀸𑀬𑁂𑀦 𑀧𑀢𑁆𑀢𑀢𑁆𑀢𑀸 𑀧𑀢𑁆𑀢𑀁 𑀦𑀸𑀫. 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀦𑀸𑀫 𑀓𑁂𑀯𑀮𑀁 𑀧𑀭𑀺𑀬𑁂𑀲𑀺𑀢𑀪𑀸𑀯𑀢𑁄. 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀜𑁆𑀘 𑀦𑁄𑀧𑀢𑁆𑀢𑀜𑁆𑀘 𑀫𑀦𑀲𑀸 𑀅𑀦𑀼𑀯𑀺𑀘𑀭𑀺𑀢𑀩𑁆𑀩𑀢𑁄 𑀫𑀦𑀲𑀸𑀦𑀼𑀯𑀺𑀘𑀭𑀺𑀢𑀁 𑀦𑀸𑀫.

𑀅𑀬𑀜𑁆𑀘 𑀯𑀺𑀓𑀧𑁆𑀧𑁄 𑀆𑀓𑀼𑀮𑁄 𑀯𑀺𑀬𑀸𑀢𑀺 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀢𑁆𑀢𑀝𑁆𑀞𑁂𑀦𑀸𑀢𑀺 𑀧𑀢𑁆𑀢𑀪𑀸𑀯𑁂𑀦 𑀧𑀢𑁆𑀢𑀢𑀸𑀲𑀸𑀫𑀜𑁆𑀜𑁂𑀦. 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀁 𑀫𑀦𑀲𑀸𑀦𑀼𑀯𑀺𑀘𑀭𑀺𑀢𑀁 𑀦𑀸𑀫 𑀧𑀢𑁆𑀢𑀺𑀬𑀸 𑀧𑀭𑀺𑀬𑁂𑀲𑀦𑀸𑀬 𑀘 𑀅𑀪𑀸𑀯𑀢𑁄. 𑀲𑀩𑁆𑀩𑀁 𑀯𑀸 𑀏𑀢𑀦𑁆𑀢𑀺 ‘‘𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺. 𑀇𑀫𑀺𑀦𑀸𑀢𑀺 ‘‘𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀁’’𑀢𑀺𑀆𑀤𑀺𑀯𑀘𑀦𑁂𑀦. 𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀓𑀣𑀺𑀢𑀸 𑀧𑀸𑀭𑀺𑀲𑁂𑀲𑀜𑀸𑀬𑁂𑀦. 𑀏𑀯𑀁 𑀧𑀸𑀭𑀺𑀲𑁂𑀲𑀜𑀸𑀬𑀧𑀭𑀺𑀕𑁆𑀕𑀳𑁂 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀆𑀳 ‘‘𑀤𑁂𑀲𑀦𑀸𑀯𑀺𑀮𑀸𑀲𑁂𑀦𑀸’’𑀢𑀺𑀆𑀤𑀺. 𑀬𑁂𑀲𑀁 𑀯𑀺𑀦𑁂𑀬𑁆𑀬𑀸𑀦𑀁 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀲𑀭𑀽𑀧𑀁 𑀅𑀦𑀸𑀫𑀲𑀺𑀢𑁆𑀯𑀸 𑀆𑀭𑀫𑁆𑀫𑀡𑀓𑀺𑀘𑁆𑀘-𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫-𑀨𑀮𑀯𑀺𑀲𑁂𑀲𑀸𑀤𑀺-𑀧𑀓𑀸𑀭𑀦𑁆𑀢𑀭𑀯𑀺𑀪𑀸𑀯𑀦𑁂𑀦 𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀢𑁂𑀲𑀁 𑀢𑀧𑁆𑀧𑀓𑀸𑀭𑀪𑁂𑀤𑁂𑀳𑀺 𑀥𑀫𑁆𑀫𑁂𑀳𑀺, 𑀬𑁂𑀲𑀁 𑀧𑀦 𑀬𑁂𑀦 𑀏𑀓𑁂𑀦𑁂𑀯 𑀧𑀓𑀸𑀭𑁂𑀦 𑀲𑀭𑀽𑀧𑁂𑀦𑁂𑀯 𑀯𑀸 𑀯𑀺𑀪𑀸𑀯𑀦𑁂 𑀓𑀢𑁂 𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀢𑁂𑀲𑀁 𑀢𑀁 𑀯𑀢𑁆𑀯𑀸 𑀥𑀫𑁆𑀫𑀺𑀲𑁆𑀲𑀭𑀢𑁆𑀢𑀸 𑀢𑀤𑀜𑁆𑀜𑀁 𑀦𑀺𑀭𑀯𑀲𑁂𑀲𑀸𑀓𑀸𑀭𑀯𑀺𑀪𑀸𑀯𑀦𑀜𑁆𑀘 𑀤𑁂𑀲𑀦𑀸𑀯𑀺𑀮𑀸𑀲𑁄. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑀯𑀲𑁂𑀦 𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀺𑀢’’𑀦𑁆𑀢𑀺.

𑀤𑀺𑀝𑁆𑀞𑀺𑀝𑁆𑀞𑀸𑀦𑀦𑁆𑀢𑀺 𑀤𑀺𑀝𑁆𑀞𑀺 𑀏𑀯 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀬𑀁 𑀭𑀽𑀧𑀁 𑀏𑀲𑀸 𑀤𑀺𑀝𑁆𑀞𑀺 ‘‘𑀮𑁄𑀓𑁄 𑀘 𑀅𑀢𑁆𑀢𑀸 𑀘𑀸’’𑀢𑀺 𑀕𑀡𑁆𑀳𑀸𑀢𑀺. 𑀢𑀁 𑀭𑀽𑀧𑀁 𑀲𑀦𑁆𑀥𑀸𑀬 ‘‘𑀲𑁄 𑀮𑁄𑀓𑁄 𑀲𑁄 𑀅𑀢𑁆𑀢𑀸’’𑀢𑀺 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸. 𑀲𑁄 𑀧𑁂𑀘𑁆𑀘𑀪𑀯𑀺𑀲𑁆𑀲𑀸𑀫𑀻𑀢𑀺 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀯𑀸𑀤𑀯𑀲𑁂𑀦𑀸𑀬𑀁 𑀤𑀺𑀝𑁆𑀞𑀻𑀢𑀺 𑀆𑀳 ‘‘𑀲𑁄 𑀅𑀳𑀁 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀘𑁆𑀘𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀥𑀼𑀯𑁄𑀢𑀺 𑀣𑀺𑀭𑁄. 𑀲𑀲𑁆𑀲𑀢𑁄𑀢𑀺 𑀲𑀩𑁆𑀩𑀤𑀸𑀪𑀸𑀯𑀻. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺 𑀚𑀭𑀸𑀬 𑀫𑀭𑀡𑁂𑀦 𑀘 𑀅𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀲𑀪𑀸𑀯𑁄, 𑀦𑀺𑀩𑁆𑀩𑀺𑀓𑀸𑀭𑁄𑀢𑀺 𑀅𑀢𑁆𑀣𑁄. 𑀢𑀫𑁆𑀧𑀺 𑀤𑀲𑁆𑀲𑀦𑀦𑁆𑀢𑀺 𑀢𑀫𑁆𑀧𑀺 𑀢𑀣𑀸𑀯𑀼𑀢𑁆𑀢𑀁 𑀤𑀺𑀝𑁆𑀞𑀺𑀤𑀲𑁆𑀲𑀦𑀁 𑀅𑀢𑁆𑀢𑀸𑀦𑀁 𑀯𑀺𑀬 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑁆𑀕𑀸𑀳𑀯𑀺𑀲𑁂𑀲𑁂𑀦 𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺. 𑀤𑀺𑀝𑁆𑀞𑀸𑀭𑀫𑁆𑀫𑀡𑀸𑀢𑀺 𑀤𑀺𑀝𑁆𑀞𑀺𑀯𑀺𑀲𑀬𑀸. 𑀓𑀣𑀁 𑀧𑀦 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀺𑀲𑀬𑀸 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸𑀬𑀸’’𑀢𑀺𑀆𑀤𑀺. 𑀧𑀝𑀺𑀯𑀺𑀧𑀲𑁆𑀲𑀦𑀸𑀓𑀸𑀮𑁂𑀢𑀺 𑀬𑀫𑀓𑀢𑁄 𑀲𑀫𑁆𑀫𑀲𑀦𑀸𑀤𑀺𑀓𑀸𑀮𑀁 𑀲𑀦𑁆𑀥𑀸𑀬𑀸𑀳. 𑀢𑀢𑁆𑀣 𑀅𑀓𑁆𑀔𑀭𑀘𑀺𑀦𑁆𑀢𑀓𑀸𑀦𑀁 𑀲𑀤𑁆𑀤𑁂 𑀯𑀺𑀬, 𑀯𑁂𑀤𑀚𑁆𑀛𑀸𑀬𑀻𑀦𑀁 𑀯𑁂𑀤𑀲𑀢𑁆𑀣𑁂 𑀯𑀺𑀬 𑀘 𑀤𑀺𑀝𑁆𑀞𑀺𑀬𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀤𑀺𑀝𑁆𑀞𑀺𑀕𑁆𑀕𑀸𑀳𑀧𑁆𑀧𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸.

𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀧𑀤𑀲𑁆𑀲 𑀘 𑀢𑀲𑁆𑀲𑁄 𑀲𑀫𑀦𑀼𑀧𑀲𑁆𑀲𑀦𑀸 𑀅𑀢𑁆𑀣𑁄𑀢𑀺 𑀬𑁄𑀚𑀦𑀸. 𑀢𑁂𑀦 𑀲𑀫𑀦𑀼𑀧𑀲𑁆𑀲𑀦𑀸 𑀦𑀸𑀫 𑀘𑀢𑀼𑀩𑁆𑀩𑀺𑀥𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀜𑀸𑀡𑀁 𑀢𑀸𑀯 𑀲𑀫𑀯𑀺𑀲𑀫𑀁 𑀲𑀫𑁆𑀫𑀸 𑀬𑀸𑀣𑀸𑀯𑀢𑁄 𑀅𑀦𑀼𑀧𑀲𑁆𑀲𑀢𑀻𑀢𑀺 𑀲𑀫𑀦𑀼𑀧𑀲𑁆𑀲𑀦𑀸. 𑀇𑀢𑀭𑀸 𑀧𑀦 𑀲𑀁𑀓𑀺𑀮𑁂𑀲𑀯𑀲𑁂𑀦 𑀅𑀦𑀼 𑀅𑀦𑀼 𑀧𑀲𑁆𑀲𑀦𑁆𑀢𑀻𑀢𑀺 𑀲𑀫𑀦𑀼𑀧𑀲𑁆𑀲𑀦𑀸. 𑀬𑀤𑀺 𑀏𑀯𑀁 𑀳𑁄𑀢𑀼 𑀢𑀸𑀯 𑀤𑀺𑀝𑁆𑀞𑀺𑀲𑀫𑀦𑀼𑀧𑀲𑁆𑀲𑀦𑀸 𑀫𑀺𑀘𑁆𑀙𑀸𑀤𑀲𑁆𑀲𑀦𑀪𑀸𑀯𑀢𑁄, 𑀓𑀣𑀁 𑀢𑀡𑁆𑀳𑀸𑀫𑀸𑀦𑀸𑀢𑀺? 𑀢𑀡𑁆𑀳𑀸𑀬𑀧𑀺 𑀲𑀢𑁆𑀢𑀸𑀦𑀁 𑀧𑀸𑀧𑀓𑀭𑀡𑁂 𑀉𑀧𑀸𑀬𑀤𑀲𑁆𑀲𑀦𑀯𑀲𑁂𑀦 𑀧𑀜𑁆𑀜𑀸𑀧𑀢𑀺𑀭𑀽𑀧𑀺𑀓𑀸 𑀧𑀯𑀢𑁆𑀢𑀺 𑀮𑀩𑁆𑀪𑀢𑁂𑀯, 𑀬𑀸𑀬 𑀯𑀜𑁆𑀘𑀦𑀦𑀺𑀓𑀢𑀺𑀲𑀸𑀘𑀺𑀬𑁄𑀕𑀸 𑀲𑀫𑁆𑀪𑀯𑀦𑁆𑀢𑀺. 𑀫𑀸𑀦𑁄𑀧𑀺 𑀲𑁂𑀬𑁆𑀬𑀸𑀤𑀺𑀦𑀸 𑀤𑀲𑁆𑀲𑀦𑀯𑀲𑁂𑀦𑁂𑀯 𑀢𑀣𑀸 𑀅𑀢𑁆𑀢𑀸𑀦𑀁 𑀊𑀳𑀢𑀻𑀢𑀺 𑀢𑀡𑁆𑀳𑀸𑀫𑀸𑀦𑀸𑀦𑀁 𑀲𑀫𑀦𑀼𑀧𑀲𑁆𑀲𑀦𑀸𑀧𑀢𑀺𑀭𑀽𑀧𑀺𑀓𑀸 𑀧𑀯𑀢𑁆𑀢𑀺 𑀮𑀩𑁆𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀺𑀚𑁆𑀚𑀫𑀸𑀦𑁂𑀢𑀺 ‘‘𑀏𑀢𑀁 𑀫𑀫𑀸’’𑀢𑀺 𑀏𑀯𑀁 𑀕𑀳𑁂𑀢𑀩𑁆𑀩𑁂 𑀢𑀡𑁆𑀳𑀸𑀯𑀢𑁆𑀣𑀼𑀲𑁆𑀫𑀺𑀁 𑀅𑀚𑁆𑀛𑀢𑁆𑀢𑀔𑀦𑁆𑀥𑀧𑀜𑁆𑀘𑀓𑁂 𑀅𑀦𑀼𑀧𑀮𑀩𑁆𑀪𑀫𑀸𑀦𑁂 𑀯𑀺𑀦𑀝𑁆𑀞𑁂. 𑀦 𑀧𑀭𑀺𑀢𑀲𑁆𑀲𑀢𑀺 𑀪𑀬𑀧𑀭𑀺𑀢𑁆𑀢𑀸𑀲𑀢𑀡𑁆𑀳𑀸𑀧𑀭𑀺𑀢𑁆𑀢𑀸𑀲𑀸𑀦𑀁 𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀺𑀢𑀢𑁆𑀢𑀸.

𑁨𑁪𑁨. 𑀘𑀢𑀽𑀳𑀺 𑀓𑀸𑀭𑀡𑁂𑀳𑀻𑀢𑀺 ‘‘𑀅𑀲𑀢𑀺 𑀦 𑀧𑀭𑀺𑀢𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀫𑁆𑀧𑀺 𑀇𑀢𑀭𑁂𑀳𑀺 𑀢𑀻𑀳𑀺 𑀲𑀳 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀘𑀢𑀽𑀳𑀺 𑀓𑀸𑀭𑀡𑁂𑀳𑀻𑀢𑀺 𑀘𑀢𑀼𑀓𑁆𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀓𑀣𑀦𑀲𑁆𑀲 𑀓𑀸𑀭𑀡𑁂𑀳𑀺. 𑀩𑀳𑀺𑀤𑁆𑀥𑀸 𑀅𑀲𑀢𑀻𑀢𑀺 𑀩𑀸𑀳𑀺𑀭𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀯𑀺𑀚𑁆𑀚𑀫𑀸𑀦𑁂. 𑀲𑀸 𑀧𑀦𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑀸 𑀮𑀤𑁆𑀥𑀯𑀺𑀦𑀸𑀲𑁂𑀦 𑀯𑀸 𑀅𑀮𑀤𑁆𑀥𑀸𑀮𑀸𑀪𑁂𑀦 𑀯𑀸𑀢𑀺 𑀧𑀸𑀴𑀺𑀬𑀁 𑁋 ‘‘𑀅𑀳𑀼 𑀯𑀢 𑀫𑁂, 𑀢𑀁 𑀯𑀢 𑀫𑁂 𑀦𑀢𑁆𑀣𑀺, 𑀲𑀺𑀬𑀸 𑀯𑀢 𑀫𑁂, 𑀢𑀁 𑀯𑀢𑀸𑀳𑀁 𑀦 𑀮𑀪𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀤𑀼𑀪𑀬𑀁 𑀧𑀭𑀺𑀓𑁆𑀔𑀸𑀭𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀢𑀢𑁆𑀣 𑀧𑀭𑀺𑀢𑀲𑁆𑀲𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀳𑀺𑀤𑁆𑀥𑀸 𑀧𑀭𑀺𑀓𑁆𑀔𑀸𑀭𑀯𑀺𑀦𑀸𑀲𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀸𑀦𑀁 ‘‘𑀭𑀣𑁄 𑀯𑀬𑁆𑀳’’𑀦𑁆𑀢𑀺 𑀏𑀯𑀫𑀸𑀤𑀺. 𑀯𑀸𑀳𑀦𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀺.

𑀬𑁂𑀳𑀺 𑀓𑀺𑀮𑁂𑀲𑁂𑀳𑀻𑀢𑀺 𑀬𑁂𑀳𑀺 𑀅𑀲𑀦𑁆𑀢𑀧𑀢𑁆𑀣𑀦𑀸𑀤𑀻𑀳𑀺 𑀓𑀺𑀮𑁂𑀲𑁂𑀳𑀺. 𑀏𑀯𑀁 𑀪𑀯𑁂𑀬𑁆𑀬𑀸𑀢𑀺 𑀏𑀯𑀁 ‘‘𑀅𑀳𑀼 𑀯𑀢 𑀫𑁂’’𑀢𑀺𑀆𑀤𑀺𑀦𑀸 𑀘𑁄𑀤𑀦𑀸𑀤𑀺 𑀪𑀯𑁂𑀬𑁆𑀬. 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀥𑀺𑀝𑁆𑀞𑀸𑀦𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸𑀦𑀦𑁆𑀢𑀺 𑀏𑀢𑁆𑀣 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀸𑀲𑀼 𑀤𑀺𑀝𑁆𑀞𑀻𑀲𑀼 𑀬𑀸 𑀧𑀭𑀢𑁄 𑀉𑀧𑁆𑀧𑀦𑁆𑀦𑀸 𑀤𑀺𑀝𑁆𑀞𑀺𑀬𑁄, 𑀢𑀸𑀲𑀁 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸 𑀤𑀺𑀝𑁆𑀞𑀺𑀬𑁄 𑀓𑀸𑀭𑀡𑀝𑁆𑀞𑁂𑀦 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀺. 𑀅𑀥𑀺𑀓𑀭𑀡𑀝𑁆𑀞𑁂𑀦 𑀤𑀺𑀝𑁆𑀞𑀸𑀥𑀺𑀝𑁆𑀞𑀸𑀦𑀸𑀦𑀺, 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀺. ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁨.𑁨𑁦𑁨, 𑁪𑁨𑁭; 𑁩.𑁨𑁭-𑁨𑁯; 𑀉𑀤𑀸. 𑁫𑁫; 𑀫𑀳𑀸𑀦𑀺. 𑁨𑁦; 𑀦𑁂𑀢𑁆𑀢𑀺. 𑁫𑁯) 𑀧𑀯𑀢𑁆𑀢𑀺𑀬𑀸 𑀅𑀪𑀺𑀦𑀺𑀯𑁂𑀲𑀸. 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀲𑀬𑀦𑁆𑀢𑀻𑀢𑀺 𑀅𑀦𑀼𑀲𑀬𑀸𑀢𑀺 𑀏𑀯𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀤𑀻𑀦𑀁 𑀧𑀤𑀸𑀦𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀡𑁆𑀳𑀸𑀤𑀻𑀳𑀺 𑀓𑀫𑁆𑀧𑀦𑀺𑀬𑀢𑀸𑀬 𑀲𑀩𑁆𑀩𑀲𑀗𑁆𑀔𑀸𑀭𑀸𑀯 𑀇𑀜𑁆𑀚𑀺𑀢𑀸𑀦𑀻𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀇𑀜𑁆𑀚𑀺𑀢𑀸𑀦𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑀥𑀻𑀬𑀢𑀺 𑀏𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀉𑀧𑀥𑀺, 𑀔𑀦𑁆𑀥𑀸𑀯 𑀉𑀧𑀥𑀺 𑀔𑀦𑁆𑀥𑀽𑀧𑀥𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀤𑁂𑀯 𑀘 𑀆𑀕𑀫𑁆𑀫 𑀢𑀡𑁆𑀳𑀸 𑀔𑀻𑀬𑀢𑀺 𑀯𑀺𑀭𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀻𑀢𑀺 𑀬𑁄𑀚𑀦𑀸. 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀺 𑀦𑀸𑀫𑀲𑁆𑀲𑀽𑀢𑀺𑀆𑀤𑀻𑀲𑀼 𑀦𑀺𑀧𑀸𑀢𑀫𑀢𑁆𑀢𑀁, 𑀲𑀁𑀲𑀬𑁂 𑀯𑀸. 𑀢𑀸𑀲𑁄𑀢𑀺 𑀅𑀢𑁆𑀢𑀦𑀺𑀬𑀸𑀪𑀸𑀯𑀁 𑀧𑀝𑀺𑀘𑁆𑀘 𑀢𑀡𑁆𑀳𑀸𑀧𑀭𑀺𑀢𑁆𑀢𑀸𑀲𑁄 𑀘𑁂𑀯 𑀪𑀬𑀧𑀭𑀺𑀢𑁆𑀢𑀸𑀲𑁄 𑀘. 𑀢𑁂𑀦𑀸𑀳 ‘‘𑀢𑀸𑀲𑁄 𑀳𑁂𑀲𑁄’’𑀢𑀺𑀆𑀤𑀺. 𑀦𑁄 𑀘𑀲𑁆𑀲𑀁,𑀦𑁄 𑀘 𑀫𑁂 𑀲𑀺𑀬𑀸𑀢𑀺 ‘‘𑀅𑀳’’𑀦𑁆𑀢𑀺 𑀓𑀺𑀭 𑀓𑁄𑀘𑀺 𑀦𑁄 𑀘𑀲𑁆𑀲𑀁, ‘‘𑀫𑁂’’𑀢𑀺 𑀘 𑀓𑀺𑀜𑁆𑀘𑀺 𑀦𑁄 𑀲𑀺𑀬𑀸𑀢𑀺. 𑀢𑀸𑀲𑀧𑁆𑀧𑀢𑀻𑀓𑀸𑀭𑀤𑀲𑁆𑀲𑀦𑀜𑁆𑀳𑁂𑀢𑀁.

𑁨𑁪𑁩. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀏𑀯𑀁 𑀯𑀼𑀢𑁆𑀢𑁂’’𑀢𑀺𑀆𑀤𑀺𑀦𑀸, 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀧𑀯𑀢𑁆𑀢𑀸𑀬 ‘‘𑀙𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁪𑁧) 𑀯𑀸. 𑀲𑀸𑀧𑀺 𑀳𑀺 𑀅𑀚𑁆𑀛𑀢𑁆𑀢𑀔𑀦𑁆𑀥𑀯𑀺𑀦𑀸𑀲𑁂 𑀧𑀭𑀺𑀢𑀲𑁆𑀲𑀦𑀓𑀁 𑀤𑀲𑁆𑀲𑁂𑀢𑁆𑀯𑀸 𑀅𑀧𑀭𑀺𑀢𑀲𑁆𑀲𑀦𑀓𑀁 𑀤𑀲𑁆𑀲𑁂𑀦𑁆𑀢𑀻 𑀧𑀯𑀢𑁆𑀢𑀸𑀢𑀺 𑀢𑀲𑁆𑀲𑀦𑀓𑀲𑁆𑀲 𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑀁 𑀅𑀓𑀺𑀘𑁆𑀘𑀲𑀸𑀥𑀓𑀫𑁆𑀧𑀺 𑀲𑀼𑀜𑁆𑀜𑀢𑀸𑀤𑀲𑁆𑀲𑀦𑀫𑁂𑀯𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 ‘‘𑀘𑀢𑀼𑀓𑁆𑀓𑁄𑀝𑀺𑀓𑀸 𑀲𑀼𑀜𑁆𑀜𑀢𑀸 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀩𑀳𑀺𑀤𑁆𑀥𑀸 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀩𑀸𑀳𑀺𑀭𑀁 𑀲𑀯𑀺𑀜𑁆𑀜𑀸𑀡𑀓𑀁 𑀅𑀯𑀺𑀜𑁆𑀜𑀸𑀡𑀓𑀜𑁆𑀘 𑀲𑀢𑁆𑀢𑁄𑀧𑀓𑀭𑀡𑀁. 𑀢𑀜𑁆𑀳𑀺 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸 𑀧𑀭𑀺𑀓𑁆𑀔𑀸𑀭𑀓𑀝𑁆𑀞𑁂𑀦 ‘‘𑀧𑀭𑀺𑀓𑁆𑀔𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀕𑁆𑀕𑀳𑀁 𑀦𑀸𑀫 𑀓𑀢𑁆𑀯𑀸𑀢𑀺 ‘‘𑀫𑀫 𑀇𑀤’’𑀦𑁆𑀢𑀺 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀢𑀸𑀬 𑀧𑀭𑀺𑀕𑁆𑀕𑀳𑀺𑀢𑀁 𑀦𑀸𑀫 𑀓𑀢𑁆𑀯𑀸. 𑀲𑀩𑁆𑀩𑁄𑀧𑀺 𑀤𑀺𑀝𑁆𑀞𑀺𑀕𑁆𑀕𑀸𑀳𑁄 ‘‘𑀅𑀢𑁆𑀢𑀸 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄, 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀤𑀺𑀝𑁆𑀞𑀺𑀲𑀦𑁆𑀦𑀺𑀲𑁆𑀲𑀬𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀫𑀼𑀔𑀸 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀬𑁄’’𑀢𑀺. 𑀅𑀬𑀸𑀣𑀸𑀯𑀕𑁆𑀕𑀸𑀳𑀺𑀦𑀸 𑀅𑀪𑀺𑀦𑀺𑀯𑁂𑀲𑀦𑀧𑀜𑁆𑀜𑀸𑀧𑀦𑀸𑀦𑀁 𑀉𑀧𑀢𑁆𑀣𑀫𑁆𑀪𑀪𑀸𑀯𑀢𑁄 𑀤𑀺𑀝𑁆𑀞𑀺 𑀏𑀯 𑀦𑀺𑀲𑁆𑀲𑀬𑁄𑀢𑀺 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄. 𑀧𑀭𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀦𑀺𑀘𑁆𑀘𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑀁 𑀓𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑁂𑀬𑁆𑀬. 𑀓𑀺𑀫𑁂𑀯𑀁 𑀧𑀭𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬? 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀢𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀉𑀧𑀸𑀤𑀺𑀬𑁂𑀣, 𑀢𑀁, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀦𑀺𑀲𑁆𑀲𑀬𑁂𑀣𑀸’’𑀢𑀺 𑀏𑀢𑁂𑀲𑀼𑀧𑀺.

𑁨𑁪𑁪. 𑀅𑀢𑁆𑀢𑀦𑀺 𑀯𑀸 𑀲𑀢𑀻𑀢𑀺 𑀬𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑁂𑀦 𑀓𑀺𑀜𑁆𑀘𑀺 𑀅𑀢𑁆𑀢𑀦𑀺𑀬𑀦𑁆𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀢𑀲𑁆𑀫𑀺𑀁 𑀅𑀢𑁆𑀢𑀦𑀺 𑀲𑀢𑀺, 𑀲𑁄 𑀏𑀯 𑀧𑀦 𑀅𑀢𑁆𑀢𑀸 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀓𑁆𑀓𑀸 𑀳𑀺 𑀯𑀢𑁆𑀢𑀼𑀁 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑁄 𑀅𑀢𑁆𑀢𑀸 ‘‘𑀧𑀭𑀫𑀢𑁆𑀣𑁄’’𑀢𑀺? 𑀲𑀺𑀬𑀸 𑀔𑀦𑁆𑀥𑀧𑀜𑁆𑀘𑀓𑀁 𑀜𑁂𑀬𑁆𑀬𑀲𑀪𑀸𑀯𑀢𑁆𑀢𑀸 𑀬𑀣𑀸 𑀢𑀁 𑀖𑀝𑁄, 𑀬𑀤𑀺 𑀧𑀦 𑀢𑀤𑀜𑁆𑀜𑀁 𑀦𑀸𑀫 𑀓𑀺𑀜𑁆𑀘𑀺 𑀅𑀪𑀯𑀺𑀲𑁆𑀲, 𑀦 𑀢𑀁 𑀦𑀺𑀬𑀫𑀢𑁄 𑀯𑀺𑀧𑀭𑀻𑀢𑀁 𑀲𑀺𑀬𑀸𑀢𑀺? 𑀦 𑀘 𑀲𑁄 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺 𑀧𑀫𑀸𑀡𑁂𑀳𑀺 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸 𑀢𑀼𑀭𑀗𑁆𑀕𑀫𑀯𑀺𑀲𑀸𑀡𑀁 𑀯𑀺𑀬𑀸𑀢𑀺. 𑀅𑀢𑁆𑀢𑀦𑀺𑀬𑁂 𑀯𑀸 𑀧𑀭𑀺𑀓𑁆𑀔𑀸𑀭𑁂 𑀲𑀢𑀻𑀢𑀺 ‘‘𑀇𑀤𑀁 𑀦𑀸𑀫 𑀅𑀢𑁆𑀢𑀦𑁄 𑀲𑀦𑁆𑀢𑀓’’𑀦𑁆𑀢𑀺 𑀢𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂𑀦 𑀦𑀺𑀘𑁆𑀙𑀺𑀢𑁂 𑀓𑀺𑀲𑁆𑀫𑀺𑀜𑁆𑀘𑀺 𑀯𑀢𑁆𑀣𑀼𑀲𑁆𑀫𑀺𑀁 𑀲𑀢𑀺. 𑀅𑀢𑁆𑀢𑀦𑁄 𑀇𑀤𑀦𑁆𑀢𑀺 𑀳𑀺 𑀅𑀢𑁆𑀢𑀦𑀺𑀬𑀦𑁆𑀢𑀺. 𑀅𑀳𑀦𑁆𑀢𑀺 𑀲𑀢𑀻𑀢𑀺 ‘‘𑀅𑀳𑀁 𑀦𑀸𑀫𑀸𑀬’’𑀦𑁆𑀢𑀺 𑀅𑀳𑀁𑀓𑀸𑀭𑀯𑀢𑁆𑀣𑀼𑀪𑀽𑀢𑁂 𑀧𑀭𑀫𑀢𑁆𑀣𑀢𑁄 𑀦𑀺𑀤𑁆𑀥𑀸𑀭𑀺𑀢𑀲𑀭𑀽𑀧𑁂 𑀓𑀺𑀲𑁆𑀫𑀺𑀜𑁆𑀘𑀺 𑀲𑀢𑀺 𑀢𑀲𑁆𑀲 𑀲𑀦𑁆𑀢𑀓𑀪𑀸𑀯𑁂𑀦 𑀫𑀫𑀸𑀢𑀺 𑀓𑀺𑀜𑁆𑀘𑀺 𑀕𑀳𑁂𑀢𑀼𑀁 𑀬𑀼𑀢𑁆𑀢𑀁 𑀪𑀯𑁂𑀬𑁆𑀬. 𑀫𑀫𑀸𑀢𑀺 𑀲𑀢𑀺 ‘‘𑀅𑀳’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀧𑀭𑀫𑀢𑁆𑀣𑀢𑁄 𑀅𑀢𑁆𑀢𑀦𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸 𑀅𑀢𑁆𑀢𑀦𑀺𑀬𑀁 𑀓𑀺𑀜𑁆𑀘𑀺 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑁂𑀯𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀅𑀦𑀢𑁆𑀢𑀢𑀸𑀬 𑀅𑀦𑀢𑁆𑀢𑀦𑀺𑀬𑀢𑀁, 𑀅𑀦𑀢𑁆𑀢𑀦𑀺𑀬𑀢𑀸𑀬 𑀘 𑀅𑀦𑀢𑁆𑀢𑀓𑀢𑀁 𑀤𑀲𑁆𑀲𑁂𑀢𑀺. 𑀪𑀽𑀢𑀢𑁄𑀢𑀺 𑀪𑀽𑀢𑀢𑁆𑀣𑀢𑁄. 𑀢𑀣𑀢𑁄𑀢𑀺 𑀢𑀣𑀲𑀪𑀸𑀯𑀢𑁄. 𑀣𑀺𑀭𑀢𑁄𑀢𑀺 𑀞𑀺𑀢𑀲𑀪𑀸𑀯𑀢𑁄 𑀦𑀺𑀩𑁆𑀩𑀺𑀓𑀸𑀭𑀢𑁄.

𑀬𑀲𑁆𑀫𑀸 𑀳𑀼𑀢𑁆𑀯𑀸 𑀦 𑀳𑁄𑀢𑀻𑀢𑀺 𑀬𑀲𑁆𑀫𑀸 𑀧𑀼𑀩𑁆𑀩𑁂 𑀅𑀲𑀦𑁆𑀢𑀁 𑀧𑀘𑁆𑀘𑀬𑀲𑀫𑀯𑀸𑀬𑁂𑀦 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀪𑀗𑁆𑀕𑀼𑀧𑀕𑀫𑁂𑀦 𑀦 𑀳𑁄𑀢𑀺, 𑀢𑀲𑁆𑀫𑀸 𑀦 𑀦𑀺𑀘𑁆𑀘𑀦𑁆𑀢𑀺 𑀅𑀦𑀺𑀘𑁆𑀘𑀁, 𑀅𑀥𑀼𑀯𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄 𑀏𑀯 𑀉𑀧𑁆𑀧𑀸𑀤𑀯𑀬𑀯𑀢𑁆𑀢𑀺𑀢𑁄𑀢𑀺 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀦𑀺𑀭𑀼𑀚𑁆𑀛𑀦𑀯𑀲𑁂𑀦 𑀘 𑀧𑀯𑀢𑁆𑀢𑀦𑀢𑁄. 𑀲𑀪𑀸𑀯𑀯𑀺𑀕𑀫𑁄 𑀇𑀥 𑀯𑀺𑀧𑀭𑀺𑀡𑀸𑀫𑁄, 𑀔𑀡𑀺𑀓𑀢𑀸 𑀢𑀸𑀯𑀓𑀸𑀮𑀺𑀓𑀢𑀸, 𑀦𑀺𑀘𑁆𑀘𑀲𑀪𑀸𑀯𑀸𑀪𑀸𑀯𑁄 𑀏𑀯 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑁄. 𑀅𑀦𑀺𑀘𑁆𑀘𑀥𑀫𑁆𑀫𑀸 𑀳𑀺 𑀢𑁂𑀦𑁂𑀯 𑀅𑀢𑁆𑀢𑀦𑁄 𑀅𑀦𑀺𑀘𑁆𑀘𑀪𑀸𑀯𑁂𑀦 𑀅𑀢𑁆𑀣𑀢𑁄 𑀦𑀺𑀘𑁆𑀘𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺 𑀦𑀸𑀫. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀦 𑀦𑀺𑀘𑁆𑀘𑀦𑁆𑀢𑀺 𑀅𑀦𑀺𑀘𑁆𑀘’’𑀦𑁆𑀢𑀺. 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑀯𑀲𑁂𑀦 𑀭𑀽𑀧𑀲𑁆𑀲 𑀦𑀺𑀭𑀦𑁆𑀢𑀭𑀩𑀸𑀥𑀢𑀸𑀢𑀺 𑀧𑀝𑀺𑀧𑀻𑀴𑀦𑀸𑀓𑀸𑀭𑁂𑀦𑀲𑁆𑀲 𑀤𑀼𑀓𑁆𑀔𑀢𑀸. 𑀲𑀦𑁆𑀢𑀸𑀧𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀲𑀦𑁆𑀢𑀸𑀧𑀦𑀁 𑀧𑀭𑀺𑀤𑀳𑀦𑀁, 𑀢𑀢𑁄 𑀏𑀯𑀲𑁆𑀲 𑀤𑀼𑀲𑁆𑀲𑀳𑀢𑀸𑀬 𑀤𑀼𑀓𑁆𑀔𑀫𑀢𑀸. 𑀢𑀺𑀲𑁆𑀲𑀦𑁆𑀦𑀁 𑀤𑀼𑀓𑁆𑀔𑀢𑀸𑀦𑀁 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀘 𑀅𑀥𑀺𑀝𑁆𑀞𑀸𑀦𑀢𑀸𑀬 𑀤𑀼𑀓𑁆𑀔𑀯𑀢𑁆𑀣𑀼𑀓𑀢𑀸. 𑀲𑀼𑀔𑀲𑀪𑀸𑀯𑀸𑀪𑀸𑀯𑁄 𑀏𑀯 𑀲𑀼𑀔𑀧𑀝𑀺𑀓𑁆𑀔𑁂𑀧𑁄. 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺 𑀚𑀭𑀸𑀬 𑀫𑀭𑀡𑁂𑀦 𑀘 𑀯𑀺𑀧𑀭𑀺𑀡𑀫𑀦𑀲𑀪𑀸𑀯𑀁. 𑀬𑀲𑁆𑀫𑀸 𑀇𑀤𑀁 𑀭𑀽𑀧𑀁 𑀧𑀘𑁆𑀘𑀬𑀲𑀫𑀯𑀸𑀬𑁂𑀦 𑀉𑀧𑁆𑀧𑀸𑀤𑀁, 𑀉𑀧𑁆𑀧𑀸𑀤𑀸𑀦𑀦𑁆𑀢𑀭𑀁 𑀚𑀭𑀁 𑀧𑀢𑁆𑀯𑀸 𑀅𑀯𑀲𑁆𑀲𑀫𑁂𑀯 𑀪𑀺𑀚𑁆𑀚𑀢𑀺, 𑀪𑀺𑀦𑁆𑀦𑀜𑁆𑀘 𑀪𑀺𑀦𑁆𑀦𑀫𑁂𑀯, 𑀦𑀸𑀲𑁆𑀲 𑀓𑀲𑁆𑀲𑀘𑀺 𑀲𑀗𑁆𑀓𑀫𑁄𑀢𑀺 𑀪𑀯𑀦𑁆𑀢𑀭𑀸𑀦𑀼𑀧𑀕𑀫𑀦𑀲𑀗𑁆𑀔𑀸𑀢𑁂𑀦 𑀲𑀗𑁆𑀓𑀫𑀸𑀪𑀸𑀯𑁂𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀪𑀯𑀲𑀗𑁆𑀓𑀦𑁆𑀢𑀺 𑀉𑀧𑀕𑀫𑀦𑀲𑀪𑀸𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑀁 𑀲𑀪𑀸𑀯𑀯𑀺𑀕𑀫𑁄 𑀦𑀺𑀭𑀼𑀚𑁆𑀛𑀦𑀫𑁂𑀯. 𑀦𑁆𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑀭𑀽𑀧𑀁. 𑀇𑀫𑀺𑀦𑀸𑀢𑀺 ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺 𑀭𑀽𑀧𑀲𑁆𑀲 𑀢𑀡𑁆𑀳𑀸𑀤𑀺𑀕𑁆𑀕𑀸𑀳𑀸𑀦𑀁 𑀯𑀢𑁆𑀣𑀼𑀪𑀸𑀯𑀧𑀝𑀺𑀓𑁆𑀔𑁂𑀧𑁂𑀦. 𑀭𑀽𑀧𑀜𑁆𑀳𑀺 𑀉𑀧𑁆𑀧𑀦𑁆𑀦𑀁 𑀞𑀺𑀢𑀺𑀁 𑀫𑀸 𑀧𑀸𑀧𑀼𑀡𑀸𑀢𑀼, 𑀞𑀺𑀢𑀺𑀧𑁆𑀧𑀢𑁆𑀢𑀁 𑀫𑀸 𑀚𑀻𑀭𑀢𑀼, 𑀚𑀭𑀧𑁆𑀧𑀢𑁆𑀢𑀁 𑀫𑀸 𑀪𑀺𑀚𑁆𑀚𑀢𑀼, 𑀉𑀤𑀬𑀩𑁆𑀩𑀬𑁂𑀳𑀺 𑀫𑀸 𑀓𑀺𑀮𑀫𑀺𑀬𑀢𑀽𑀢𑀺 𑀦 𑀏𑀢𑁆𑀣 𑀓𑀲𑁆𑀲𑀘𑀺 𑀯𑀲𑀻𑀪𑀸𑀯𑁄 𑀅𑀢𑁆𑀣𑀺, 𑀲𑁆𑀯𑀸𑀬𑀫𑀲𑁆𑀲 𑀅𑀯𑀲𑀯𑀢𑁆𑀢𑀦𑀝𑁆𑀞𑁄 𑀅𑀦𑀢𑁆𑀢𑀢𑀸𑀲𑀮𑁆𑀮𑀓𑁆𑀔𑀡𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦 𑀭𑀽𑀧𑀁, 𑀪𑀦𑁆𑀢𑁂, 𑀅𑀦𑀢𑁆𑀢𑀸𑀢𑀺 𑀧𑀝𑀺𑀚𑀸𑀦𑀦𑁆𑀢𑀻’’𑀢𑀺. 𑀦𑀺𑀯𑀸𑀲𑀺𑀓𑀸𑀭𑀓𑀯𑁂𑀤𑀓𑀅𑀥𑀺𑀝𑁆𑀞𑀸𑀬𑀓𑀯𑀺𑀭𑀳𑁂𑀦 𑀢𑀢𑁄 𑀲𑀼𑀜𑁆𑀜𑀢𑀸 𑀲𑀼𑀜𑁆𑀜𑀝𑁆𑀞𑁄, 𑀲𑀸𑀫𑀺𑀪𑀽𑀢𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑁄 𑀅𑀲𑁆𑀲𑀸𑀫𑀺𑀓𑀝𑁆𑀞𑁄, 𑀬𑀣𑀸𑀯𑀼𑀢𑁆𑀢𑀯𑀲𑀯𑀢𑁆𑀢𑀺𑀪𑀸𑀯𑀸𑀪𑀸𑀯𑁄 𑀅𑀦𑀺𑀲𑁆𑀲𑀭𑀝𑁆𑀞𑁄, 𑀧𑀭𑀧𑀭𑀺𑀓𑀧𑁆𑀧𑀺𑀢𑀅𑀢𑁆𑀢𑀲𑀪𑀸𑀯𑀸𑀪𑀸𑀯𑁄 𑀏𑀯 𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀝𑁆𑀞𑁄.

𑀬𑀲𑁆𑀫𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑁂𑀦 𑀯𑀺𑀬 𑀤𑀼𑀓𑁆𑀔𑀮𑀓𑁆𑀔𑀡𑀁, 𑀢𑀤𑀼𑀪𑀬𑁂𑀦 𑀅𑀦𑀢𑁆𑀢𑀮𑀓𑁆𑀔𑀡𑀁 𑀲𑀼𑀯𑀺𑀜𑁆𑀜𑀸𑀧𑀬𑀁, 𑀦 𑀓𑁂𑀯𑀮𑀁, 𑀢𑀲𑁆𑀫𑀸 𑀢𑀤𑀼𑀪𑀬𑁂𑀦𑁂𑀢𑁆𑀣 𑀅𑀦𑀢𑁆𑀢𑀮𑀓𑁆𑀔𑀡𑀯𑀺𑀪𑀸𑀯𑀦𑀁 𑀓𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀺𑀘𑁆𑀘𑀯𑀲𑁂𑀦𑀸𑀢𑀺 𑀅𑀦𑀺𑀘𑁆𑀘𑀢𑀸𑀯𑀲𑁂𑀦. 𑀤𑀼𑀓𑁆𑀔𑀯𑀲𑁂𑀦𑀸𑀢𑀺 𑀤𑀼𑀓𑁆𑀔𑀢𑀸𑀯𑀲𑁂𑀦. 𑀦 𑀉𑀧𑀧𑀚𑁆𑀚𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺. 𑀢𑀫𑁂𑀯 𑀅𑀬𑀼𑀚𑁆𑀚𑀫𑀸𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑁄𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀅𑀢𑁆𑀢𑀯𑀸𑀤𑀻 𑀅𑀢𑁆𑀢𑀸𑀦𑀁 𑀦𑀺𑀘𑁆𑀘𑀁 𑀧𑀜𑁆𑀜𑀧𑁂𑀢𑀺, 𑀘𑀓𑁆𑀔𑀼𑀁 𑀧𑀦 𑀅𑀦𑀺𑀘𑁆𑀘𑀁, 𑀢𑀲𑁆𑀫𑀸 𑀘𑀓𑁆𑀔𑀼 𑀯𑀺𑀬 𑀅𑀢𑁆𑀢𑀸𑀧𑀺 𑀅𑀦𑀺𑀘𑁆𑀘𑁄 𑀆𑀧𑀦𑁆𑀦𑁄. 𑀢𑁂𑀦𑀸𑀳 ‘‘𑀬𑀲𑁆𑀲 𑀔𑁄 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑁂𑀢𑀻𑀢𑀺 𑀯𑀺𑀕𑀘𑁆𑀙𑀢𑀺 𑀦𑀺𑀭𑀼𑀚𑁆𑀛𑀢𑀺. 𑀇𑀢𑀺 𑀘𑀓𑁆𑀔𑀼 𑀅𑀦𑀢𑁆𑀢𑀸𑀢𑀺 𑀘𑀓𑁆𑀔𑀼𑀲𑁆𑀲 𑀉𑀤𑀬𑀩𑁆𑀩𑀬𑀯𑀦𑁆𑀢𑀢𑀸𑀬 𑀅𑀦𑀺𑀘𑁆𑀘𑀢𑀸, 𑀅𑀢𑁆𑀢𑀦𑁄 𑀘 𑀅𑀢𑁆𑀢𑀯𑀸𑀤𑀺𑀦𑀸 𑀅𑀦𑀺𑀘𑁆𑀘𑀢𑀸𑀬 𑀅𑀦𑀺𑀘𑁆𑀙𑀺𑀢𑀢𑁆𑀢𑀸 𑀘𑀓𑁆𑀔𑀼 𑀅𑀦𑀢𑁆𑀢𑀸.

𑀓𑀸𑀫𑀁 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑁂 (𑀲𑀁. 𑀦𑀺. 𑁩.𑁫𑁯; 𑀫𑀳𑀸𑀯. 𑁨𑁦) 𑁋 ‘‘𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 𑀭𑀽𑀧𑀲𑁆𑀲 𑀅𑀦𑀢𑁆𑀢𑀢𑀸𑀬 𑀤𑀼𑀓𑁆𑀔𑀢𑀸 𑀯𑀺𑀪𑀸𑀯𑀺𑀢𑀸 𑀯𑀺𑀬 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 ‘‘𑀬𑀲𑁆𑀫𑀸 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀧𑀸𑀓𑀝𑀢𑀸𑀬 𑀲𑀸𑀩𑀸𑀥𑀢𑀸𑀬 𑀭𑀽𑀧𑀲𑁆𑀲 𑀅𑀢𑁆𑀢𑀲𑀸𑀭𑀸𑀪𑀸𑀯𑁄 𑀯𑀺𑀪𑀸𑀯𑀺𑀢𑁄, 𑀢𑀢𑁄 𑀏𑀯 𑀘 ‘‘𑀦 𑀮𑀩𑁆𑀪𑀢𑀺 𑀭𑀽𑀧𑁂 𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’’𑀢𑀺 𑀭𑀽𑀧𑁂 𑀓𑀲𑁆𑀲𑀘𑀺 𑀅𑀦𑀺𑀲𑁆𑀲𑀭𑀢𑀸, 𑀢𑀲𑁆𑀲 𑀘 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁄 𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀤𑀼𑀓𑁆𑀔𑀯𑀲𑁂𑀦 𑀅𑀦𑀢𑁆𑀢𑀢𑀁 𑀤𑀲𑁆𑀲𑁂𑀢𑀻’’𑀢𑀺. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀬𑀁 𑀯𑀢𑁆𑀣𑀼 𑀅𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀺𑀢𑀢𑁆𑀢𑀸, 𑀬𑀁 𑀧𑀦 𑀦𑀺𑀘𑁆𑀘𑀁 𑀢𑀤𑀪𑀸𑀯𑀢𑁄, 𑀢𑀁 𑀲𑀼𑀔𑀁 𑀬𑀣𑀸 𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀁 𑀢𑀦𑁆𑀢𑀺 𑀓𑀸𑀭𑀡𑀦𑀺𑀤𑁆𑀤𑁂𑀲𑁄𑀯𑀸𑀬𑀁, 𑀬𑀲𑁆𑀫𑀸 𑀭𑀽𑀧𑀁 𑀅𑀦𑀺𑀘𑁆𑀘𑀁, 𑀢𑀁 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀺𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀖𑀝𑀸𑀤𑀺 𑀯𑀺𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸 𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸𑀯 𑀦𑀬𑁂𑀦 ‘‘𑀅𑀦𑀢𑁆𑀢𑀸’’𑀢𑀺 𑀯𑀢𑁆𑀢𑀼𑀁 𑀮𑀩𑁆𑀪𑀫𑀸𑀦𑁂𑀧𑀺 ‘‘𑀅𑀦𑀢𑁆𑀢𑀸’’𑀢𑀺 𑀯𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀏𑀯𑀁 𑀤𑀼𑀓𑁆𑀔𑀦𑁆𑀢𑀺 𑀯𑀤𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁 ‘‘𑀅𑀓𑁆𑀔𑀺𑀲𑀽𑀮𑀸𑀤𑀺𑀯𑀺𑀓𑀸𑀭𑀧𑁆𑀧𑀢𑁆𑀢𑀓𑀸𑀮𑁂 𑀯𑀺𑀬 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸 𑀤𑀼𑀓𑁆𑀔𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸. 𑀤𑀼𑀤𑁆𑀤𑀲𑀁 𑀤𑀼𑀧𑁆𑀧𑀜𑁆𑀜𑀸𑀧𑀦𑀁. 𑀢𑀣𑀸 𑀳𑀺 𑀲𑀭𑀪𑀗𑁆𑀕𑀸𑀤𑀬𑁄𑀧𑀺 𑀲𑀢𑁆𑀣𑀸𑀭𑁄 𑀦𑀸𑀤𑁆𑀤𑀲𑀁𑀲𑀼, 𑀓𑀼𑀢𑁄 𑀧𑀜𑁆𑀜𑀸𑀧𑀦𑀸. 𑀢𑀬𑀺𑀤𑀁 𑀅𑀦𑀢𑁆𑀢𑀮𑀓𑁆𑀔𑀡𑀁.

𑀢𑀲𑁆𑀫𑀸𑀢𑀺𑀳𑀸𑀢𑀺𑀆𑀤𑀺𑀦𑀸 𑀢𑀺𑀬𑀤𑁆𑀥𑀕𑀢𑀭𑀽𑀧𑀁 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀢𑀭𑀳𑀺 𑀅𑀜𑁆𑀜𑀤𑀸𑀧𑀻’’𑀢𑀺. 𑀢𑀁 𑀧𑀦 𑀬𑀸𑀤𑀺𑀲𑀁 𑀢𑀸𑀤𑀺𑀲𑀫𑁆𑀧𑀺 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀅𑀚𑁆𑀛𑀢𑁆𑀢𑀸𑀤𑀺𑀯𑀺𑀲𑁂𑀲𑁄𑀧𑀺 𑀯𑀢𑁆𑀢𑀩𑁆𑀩𑁄. 𑀧𑀺-𑀲𑀤𑁆𑀤𑁂𑀦 𑀯𑀸 𑀢𑀲𑁆𑀲𑀸𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑁨𑁪𑁫. 𑀉𑀓𑁆𑀓𑀡𑁆𑀞𑀢𑀻𑀢𑀺 𑀦𑀸𑀪𑀺𑀭𑀫𑀢𑀺. 𑀅𑀜𑁆𑀜𑀢𑁆𑀣 ‘‘𑀦𑀺𑀩𑁆𑀩𑀺𑀤𑀸’’𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸 𑀯𑀼𑀘𑁆𑀘𑀢𑀺, 𑀲𑀸𑀦𑀼𑀮𑁄𑀫𑀸 𑀧𑀦 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻’’𑀢𑀺, 𑀲𑀸 𑀇𑀥 𑀓𑀣𑀁 𑀦𑀺𑀩𑁆𑀩𑀺𑀤𑀸 𑀦𑀸𑀫 𑀚𑀸𑀢𑀸𑀢𑀺 𑀆𑀳 ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀳𑀻’’𑀢𑀺𑀆𑀤𑀺. 𑀇𑀫𑀺𑀦𑀸 𑀲𑀺𑀔𑀸𑀧𑀢𑁆𑀢𑀦𑀺𑀩𑁆𑀩𑁂𑀤𑀢𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀇𑀥 𑀦𑀺𑀩𑁆𑀩𑀺𑀤𑀸𑀦𑀸𑀫𑁂𑀦 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺.

‘‘𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀜𑁆𑀜𑀕𑁆𑀕𑀁 𑀨𑀼𑀲𑀢𑀻’’𑀢𑀺 (𑀤𑀻. 𑀦𑀺. 𑁧.𑁪𑁧𑁪, 𑁪𑁧𑁫) 𑀯𑀢𑁆𑀯𑀸 ‘‘𑀲𑀜𑁆𑀜𑀸 𑀔𑁄 𑀧𑁄𑀝𑁆𑀞𑀧𑀸𑀤 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀜𑀸𑀡’’𑀦𑁆𑀢𑀺 (𑀤𑀻. 𑀦𑀺. 𑁧.𑁪𑁧𑁬) 𑀯𑀼𑀢𑁆𑀢𑀢𑁆𑀢𑀸 𑀲𑀜𑁆𑀜𑀕𑁆𑀕𑀦𑁆𑀢𑀺 𑀯𑀼𑀢𑁆𑀢𑀸 𑀮𑁄𑀓𑀺𑀬𑀸𑀲𑀼 𑀧𑀳𑀸𑀦𑀲𑀜𑁆𑀜𑀸𑀲𑀼 𑀲𑀺𑀔𑀸𑀧𑀢𑁆𑀢𑀪𑀸𑀯𑀢𑁄. 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸𑀤𑀲𑁆𑀲𑀦𑀲𑁆𑀲 𑀫𑀢𑁆𑀣𑀓𑀧𑁆𑀧𑀢𑁆𑀢𑀻𑀢𑀺 𑀓𑀢𑁆𑀯𑀸. 𑀢𑀢𑁄 𑀧𑀭𑀜𑁆𑀳𑀺 𑀅𑀲𑀗𑁆𑀔𑀢𑀸𑀭𑀫𑁆𑀫𑀡𑀁 𑀜𑀸𑀡𑀁 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀧𑀼𑀩𑁆𑀩𑁂 𑀔𑁄 𑀲𑀼𑀲𑀺𑀫 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀧𑀘𑁆𑀙𑀸 𑀦𑀺𑀩𑁆𑀩𑀸𑀦𑁂 𑀜𑀸𑀡’’𑀦𑁆𑀢𑀺 (𑀲𑀁. 𑀦𑀺. 𑁨.𑁭𑁦). 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀦𑁆𑀢𑀺 𑀯𑀼𑀢𑁆𑀢𑀸 𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀧𑀭𑀺𑀧𑀦𑁆𑀣𑀪𑀽𑀢𑀲𑀩𑁆𑀩𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀺 𑀧𑀥𑀸𑀦𑀺𑀓𑀲𑁆𑀲 𑀬𑁄𑀕𑀺𑀦𑁄, 𑀧𑀥𑀸𑀦𑀪𑀸𑀯𑀦𑀸𑀬 𑀯𑀸 𑀚𑀸𑀢𑀁 𑀅𑀗𑁆𑀕𑀦𑁆𑀢𑀺 𑀓𑀢𑁆𑀯𑀸. 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀯𑀼𑀢𑁆𑀢𑀸 𑀧𑀭𑀫𑀼𑀓𑁆𑀓𑀁𑀲𑀕𑀢𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀪𑀸𑀯𑀢𑁄. 𑀅𑀢𑀫𑁆𑀫𑀬𑀢𑀦𑁆𑀢𑀺 𑀏𑀢𑁆𑀣 𑀢𑀫𑁆𑀫𑀬𑀢𑀸 𑀦𑀸𑀫 𑀢𑀡𑁆𑀳𑀸, 𑀓𑀸𑀫𑀢𑀡𑁆𑀳𑀸𑀤𑀻𑀲𑀼 𑀢𑀸𑀬 𑀢𑀸𑀬 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀢𑀫𑁆𑀫𑀬𑀁 𑀦𑀸𑀫 𑀢𑁂𑀪𑀽𑀫𑀺𑀓𑀧𑁆𑀧𑀯𑀢𑁆𑀢𑀁, 𑀢𑀲𑁆𑀲 𑀪𑀸𑀯𑁄𑀢𑀺 𑀓𑀢𑁆𑀯𑀸. 𑀢𑀲𑁆𑀲𑀸 𑀢𑀡𑁆𑀳𑀸𑀬 𑀧𑀭𑀺𑀬𑀸𑀤𑀸𑀦𑀢𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀅𑀢𑀫𑁆𑀫𑀬𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀲𑁆𑀲𑀸𑀬𑀸𑀢𑀺 𑀢𑀁 𑀅𑀢𑀫𑁆𑀫𑀬𑀢𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸. 𑀆𑀕𑀫𑁆𑀫𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀦𑀸𑀦𑀢𑁆𑀢𑀸𑀢𑀺 𑀦𑀸𑀦𑀸𑀲𑀪𑀸𑀯𑀸 𑀩𑀳𑀽 𑀅𑀦𑁂𑀓𑀧𑁆𑀧𑀓𑀸𑀭𑀸. 𑀦𑀸𑀦𑀢𑁆𑀢𑀲𑀺𑀢𑀸𑀢𑀺 𑀦𑀸𑀦𑀸𑀭𑀫𑁆𑀫𑀡𑀦𑀺𑀲𑁆𑀲𑀺𑀢𑀸 𑀭𑀽𑀧𑀸𑀤𑀺𑀯𑀺𑀲𑀬𑀸. 𑀏𑀓𑀢𑁆𑀢𑀸𑀢𑀺 𑀏𑀓𑀲𑀪𑀸𑀯𑀸. 𑀏𑀓𑀢𑁆𑀢𑀲𑀺𑀢𑀸𑀢𑀺 𑀏𑀓𑀁𑀬𑁂𑀯 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀺𑀢𑀸. 𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀢𑀁 𑀏𑀓𑀢𑁆𑀢𑀲𑀺𑀢𑀁 𑀉𑀧𑁂𑀓𑁆𑀔𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸. 𑀏𑀢𑀺𑀲𑁆𑀲𑀸𑀢𑀺 𑀏𑀢𑀺𑀲𑁆𑀲𑀸 𑀉𑀧𑁂𑀓𑁆𑀔𑀸𑀬. 𑀧𑀳𑀸𑀦𑀁 𑀳𑁄𑀢𑀻𑀢𑀺 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀢𑁄 𑀧𑀪𑀼𑀢𑀺 𑀲𑀩𑁆𑀩𑀁 𑀉𑀧𑁂𑀓𑁆𑀔𑀁 𑀧𑀚𑀳𑀺𑀢𑁆𑀯𑀸 𑀞𑀺𑀢𑀲𑁆𑀲 ‘‘𑀅𑀢𑀫𑁆𑀫𑀬𑀢𑀸’’𑀢𑀺 𑀯𑀼𑀢𑁆𑀢𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀉𑀧𑁂𑀓𑁆𑀔𑀸𑀬 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀬 𑀘 𑀧𑀳𑀸𑀦𑀁 𑀳𑁄𑀢𑀻𑀢𑀺 𑀧𑀭𑀺𑀬𑀸𑀤𑀸𑀦𑀦𑁆𑀢𑀺 𑀯𑀼𑀢𑁆𑀢𑀸𑀢𑀺. 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀲𑁆𑀲 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀧𑀝𑀺𑀲𑀗𑁆𑀔𑀸𑀦𑀲𑁆𑀲 𑀲𑀺𑀔𑀸𑀧𑀢𑁆𑀢𑀪𑀸𑀯𑀢𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸 𑀧𑀝𑀺𑀲𑀗𑁆𑀔𑀸𑀦𑀦𑁆𑀢𑀺 𑀘 𑀯𑀼𑀢𑁆𑀢𑀸. 𑀫𑀼𑀤𑀼𑀫𑀚𑁆𑀛𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀫𑀢𑁆𑀢𑀁, 𑀅𑀢𑁆𑀣𑀢𑁄 𑀏𑀓𑀢𑁆𑀣𑀸 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀤𑀬𑁄, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀤𑁆𑀯𑀻𑀳𑀺 𑀦𑀸𑀫𑁂𑀳𑀻𑀢𑀺 𑀕𑁄𑀢𑁆𑀭𑀪𑀼, 𑀯𑁄𑀤𑀸𑀦𑀦𑁆𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺.

𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄, 𑀅𑀘𑁆𑀘𑀦𑁆𑀢𑀫𑁂𑀯 𑀯𑀺𑀭𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀯𑀺𑀭𑀸𑀕𑁄, 𑀢𑁂𑀦. 𑀫𑀕𑁆𑀕𑁂𑀦 𑀳𑁂𑀢𑀼𑀪𑀽𑀢𑁂𑀦. 𑀯𑀺𑀫𑀼𑀘𑁆𑀘𑀢𑀻𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀯𑀺𑀫𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀨𑀮𑀁 𑀓𑀣𑀺𑀢’’𑀦𑁆𑀢𑀺.

𑀫𑀳𑀸𑀔𑀻𑀡𑀸𑀲𑀯𑁄𑀢𑀺 𑀧𑀲𑀁𑀲𑀸𑀯𑀘𑀦𑀁 𑀬𑀣𑀸 ‘‘𑀫𑀳𑀸𑀭𑀸𑀚𑀸’’𑀢𑀺. 𑀢𑀣𑀸 𑀳𑀺 𑀢𑀁 𑀧𑀲𑀁𑀲𑀦𑁆𑀢𑁄 𑀲𑀢𑁆𑀣𑀸 ‘‘𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 𑀇𑀢𑀺𑀧𑀻’’𑀢𑀺𑀆𑀤𑀺𑀫𑀸𑀳𑀸𑀢𑀺. 𑀢𑀤𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀤𑀸𑀦𑀺 𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸𑀪𑀽𑀢𑁂𑀳𑀻𑀢𑀺 𑀬𑀸𑀣𑀸𑀯𑀢𑁄 𑀪𑀽𑀢𑁂𑀳𑀺. 𑀤𑀼𑀭𑀼𑀓𑁆𑀔𑀺𑀧𑀦𑀝𑁆𑀞𑁂𑀦𑀸𑀢𑀺 𑀧𑀘𑀼𑀭𑀚𑀦𑁂𑀳𑀺 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦. 𑀦𑀺𑀩𑁆𑀩𑀸𑀦𑀦𑀕𑀭𑀧𑁆𑀧𑀯𑁂𑀲𑁂 𑀯𑀺𑀩𑀦𑁆𑀥𑀦𑁂𑀦 𑀧𑀮𑀺𑀖𑁄 𑀯𑀺𑀬𑀸𑀢𑀺 𑀧𑀮𑀺𑀖𑁄𑀢𑀺 𑀯𑀼𑀘𑁆𑀘𑀢𑀺. 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑁄 𑀢𑀸𑀮𑁄 𑀧𑀢𑁆𑀢𑀨𑀮𑀸𑀤𑀻𑀦𑀁 𑀅𑀦𑀗𑁆𑀕𑀢𑁄 𑀢𑀸𑀮𑀸𑀯𑀢𑁆𑀣𑀼 𑀅𑀲𑀺𑀯𑁂 ‘‘𑀲𑀺𑀯𑀸’’𑀢𑀺 𑀲𑀫𑀜𑁆𑀜𑀸 𑀯𑀺𑀬. 𑀢𑁂𑀦𑀸𑀳 ‘‘𑀲𑀻𑀲𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀓𑀢𑀸’’𑀢𑀺. 𑀧𑀼𑀦𑀩𑁆𑀪𑀯𑀲𑁆𑀲 𑀓𑀭𑀡𑀲𑀻𑀮𑁄, 𑀧𑀼𑀦𑀩𑁆𑀪𑀯𑀁 𑀯𑀸 𑀨𑀮𑀁 𑀅𑀭𑀳𑀢𑀻𑀢𑀺 𑀧𑁄𑀦𑁄𑀪𑀯𑀺𑀓𑁄. 𑀏𑀯𑀁𑀪𑀽𑀢𑁄 𑀧𑀦 𑀧𑀼𑀦𑀩𑁆𑀪𑀯𑀁 𑀤𑁂𑀢𑀺 𑀦𑀸𑀫𑀸𑀢𑀺 𑀆𑀳 ‘‘𑀧𑀼𑀦𑀩𑁆𑀪𑀯𑀤𑀸𑀬𑀓𑁄’’𑀢𑀺. 𑀧𑀼𑀦𑀩𑁆𑀪𑀯𑀔𑀦𑁆𑀥𑀸𑀦𑀁 𑀧𑀘𑁆𑀘𑀬𑁄𑀢𑀺 𑀇𑀫𑀺𑀦𑀸 𑀚𑀸𑀢𑀺𑀲𑀁𑀲𑀸𑀭𑁄𑀢𑀺 𑀨𑀮𑀽𑀧𑀘𑀸𑀭𑁂𑀦 𑀓𑀸𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀓𑁆𑀔𑀸𑀢𑀺 𑀯𑀼𑀘𑁆𑀘𑀢𑀺 𑀲𑀦𑁆𑀢𑀸𑀦𑀲𑁆𑀲 𑀧𑀭𑀺𑀓𑁆𑀔𑀺𑀧𑀦𑀢𑁄. 𑀲𑀁𑀓𑀺𑀡𑁆𑀡𑀢𑁆𑀢𑀸𑀢𑀺 𑀲𑀩𑁆𑀩𑀲𑁄 𑀓𑀺𑀡𑁆𑀡𑀢𑁆𑀢𑀸 𑀯𑀺𑀦𑀸𑀲𑀺𑀢𑀢𑁆𑀢𑀸. 𑀕𑀩𑁆𑀪𑀻𑀭𑀸𑀦𑀼𑀕𑀢𑀝𑁆𑀞𑁂𑀦𑀸𑀢𑀺 𑀕𑀫𑁆𑀪𑀻𑀭𑀁 𑀅𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦. 𑀮𑀼𑀜𑁆𑀘𑀺𑀢𑁆𑀯𑀸𑀢𑀺 𑀉𑀤𑁆𑀥𑀭𑀺𑀢𑁆𑀯𑀸. 𑀏𑀢𑀸𑀦𑀻𑀢𑀺 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸𑀤𑀻𑀦𑀺. 𑀅𑀕𑁆𑀕𑀴𑀸𑀢𑀺 𑀯𑀼𑀘𑁆𑀘𑀦𑁆𑀢𑀺 𑀅𑀯𑀥𑀸𑀭𑀡𑀝𑁆𑀞𑁂𑀦. 𑀅𑀕𑁆𑀕𑀫𑀕𑁆𑀕𑁂𑀦 𑀧𑀢𑀺𑀢𑁄 𑀫𑀸𑀦𑀤𑁆𑀥𑀚𑁄 𑀏𑀢𑀲𑁆𑀲𑀸𑀢𑀺 𑀧𑀢𑀺𑀢𑀫𑀸𑀦𑀤𑁆𑀥𑀚𑁄. 𑀇𑀢𑀭𑀪𑀸𑀭𑁄𑀭𑁄𑀧𑀦𑀲𑁆𑀲 𑀧𑀼𑀭𑀺𑀫𑀧𑀤𑁂𑀳𑀺 𑀧𑀓𑀸𑀲𑀺𑀢𑀢𑁆𑀢𑀸 ‘‘𑀫𑀸𑀦𑀪𑀸𑀭𑀲𑁆𑀲𑁂𑀯 𑀑𑀭𑁄𑀧𑀺𑀢𑀢𑁆𑀢𑀸 𑀧𑀦𑁆𑀦𑀪𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀯𑀼𑀢𑁆𑀢𑀁. 𑀫𑀸𑀦𑀲𑀁𑀬𑁄𑀕𑁂𑀦𑁂𑀯 𑀯𑀺𑀲𑀁𑀬𑀼𑀢𑁆𑀢𑀢𑁆𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀧𑀺 𑀔𑀦𑁆𑀥𑁂 𑀅𑀯𑀺𑀲𑁂𑀲𑀢𑁄 𑀅𑀲𑁆𑀫𑀻𑀢𑀺 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 ‘‘𑀅𑀲𑁆𑀫𑀺𑀫𑀸𑀦𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑁂 𑀅𑀲𑁆𑀫𑀻𑀢𑀺 𑀫𑀸𑀦𑁄’’𑀢𑀺𑀆𑀤𑀺.

𑀦𑀕𑀭𑀤𑁆𑀯𑀸𑀭𑀲𑁆𑀲 𑀧𑀭𑀺𑀲𑁆𑀲𑀬𑀧𑀝𑀺𑀩𑀸𑀳𑀦𑀢𑁆𑀣𑀜𑁆𑀘𑁂𑀯 𑀲𑁄𑀪𑀦𑀢𑁆𑀣𑀜𑁆𑀘 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀏𑀲𑀺𑀓𑀢𑁆𑀣𑀫𑁆𑀪𑁂 𑀦𑀺𑀔𑀡𑀺𑀢𑁆𑀯𑀸 𑀞𑀧𑁂𑀦𑁆𑀢𑀻𑀢𑀺 𑀆𑀳 ‘‘𑀦𑀕𑀭𑀤𑁆𑀯𑀸𑀭𑁂 𑀉𑀲𑁆𑀲𑀸𑀧𑀺𑀢𑁂 𑀏𑀲𑀺𑀓𑀢𑁆𑀣𑀫𑁆𑀪𑁂’’𑀢𑀺. 𑀧𑀸𑀓𑀸𑀭𑀯𑀺𑀤𑁆𑀥𑀁𑀲𑀦𑁂𑀦𑁂𑀯 𑀧𑀭𑀺𑀓𑁆𑀔𑀸𑀬 𑀪𑀽𑀫𑀺𑀲𑀫𑀓𑀭𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀸𑀓𑀸𑀭𑀁 𑀪𑀺𑀦𑁆𑀤𑀦𑁆𑀢𑁄 𑀧𑀭𑀺𑀓𑁆𑀔𑀁 𑀲𑀁𑀓𑀺𑀭𑀺𑀢𑁆𑀯𑀸’’𑀢𑀺. 𑀏𑀯𑀦𑁆𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁. 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀓𑀸𑀬𑁄 𑀥𑀫𑁆𑀫𑀲𑀫𑀽𑀳𑁄𑀢𑀺 𑀲𑀓𑁆𑀓𑀸𑀬𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁. 𑀤𑁆𑀯𑀢𑁆𑀢𑀺𑀁𑀲 𑀓𑀫𑁆𑀫𑀓𑀸𑀭𑀡𑀸 𑀤𑀼𑀓𑁆𑀔𑀓𑁆𑀔𑀦𑁆𑀥𑁂 𑀆𑀕𑀢𑀸. 𑀅𑀓𑁆𑀔𑀺𑀭𑁄𑀕𑀲𑀻𑀲𑀭𑁄𑀕𑀸𑀤𑀬𑁄 𑀅𑀝𑁆𑀞𑀦𑀯𑀼𑀢𑀺 𑀭𑁄𑀕𑀸. 𑀭𑀸𑀚𑀪𑀬𑀸𑀤𑀻𑀦𑀺 𑀧𑀜𑁆𑀘𑀯𑀻𑀲𑀢𑀺 𑀫𑀳𑀸𑀪𑀬𑀸𑀦𑀺.

𑁨𑁪𑁬. 𑀅𑀦𑀥𑀺𑀕𑀫𑀦𑀻𑀬𑀯𑀺𑀜𑁆𑀜𑀸𑀡𑀢𑀦𑁆𑀢𑀺 ‘‘𑀇𑀤𑀁 𑀦𑀸𑀫 𑀦𑀺𑀲𑁆𑀲𑀸𑀬 𑀇𑀫𑀺𑀦𑀸 𑀦𑀸𑀫 𑀆𑀓𑀸𑀭𑁂𑀦 𑀧𑀯𑀢𑁆𑀢𑀢𑀻’’𑀢𑀺 𑀏𑀯𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀘𑀺𑀢𑁆𑀢𑀢𑀁. 𑀅𑀦𑁆𑀯𑁂𑀲𑀦𑁆𑀢𑀺 𑀧𑀘𑁆𑀘𑀢𑁆𑀢𑁂 𑀏𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀦𑁆𑀯𑁂𑀲𑀦𑁆𑀢𑁄’’𑀢𑀺. 𑀲𑀢𑁆𑀢𑁄𑀧𑀺 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀺 ‘‘𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁬𑁫) 𑀯𑀺𑀬. 𑀲𑀢𑁆𑀢𑁄 𑀳𑀺 𑀬𑀣𑁂𑀓𑁄 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄, 𑀢𑀣𑀸 𑀅𑀧𑀭𑁄𑀧𑀺 𑀆𑀕𑀢𑁄𑀢𑀺 ‘‘𑀢𑀣𑀸𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀉𑀢𑁆𑀢𑀫𑀧𑀼𑀕𑁆𑀕𑀮𑁄𑀢𑀺 𑀪𑀕𑀯𑀦𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀔𑀻𑀡𑀸𑀲𑀯𑁄𑀧𑀻𑀢𑀺 𑀬𑁄 𑀓𑁄𑀘𑀺 𑀔𑀻𑀡𑀸𑀲𑀯𑁄𑀧𑀺 ‘‘𑀢𑀣𑀸𑀕𑀢𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄𑀧𑀺 𑀳𑀺 𑀬𑀣𑁂𑀓𑁄 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀽𑀧𑀝𑁆𑀞𑀺𑀢𑀘𑀺𑀢𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀅𑀭𑀳𑀢𑁆𑀢𑀁 𑀆𑀕𑀢𑁄 𑀅𑀥𑀺𑀕𑀢𑁄, 𑀢𑀣𑀸 𑀅𑀧𑀭𑁄𑀧𑀺 𑀆𑀕𑀢𑁄𑀢𑀺 ‘‘𑀢𑀣𑀸𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀲𑀁𑀯𑀺𑀚𑁆𑀚𑀫𑀸𑀦𑁄𑀢𑀺 𑀧𑀭𑀫𑀢𑁆𑀣𑀢𑁄 𑀅𑀦𑀼𑀧𑀮𑀩𑁆𑀪𑀦𑀻𑀬𑁄. 𑀅𑀯𑀺𑀦𑁆𑀤𑁂𑀬𑁆𑀬𑁄𑀢𑀺 𑀦 𑀯𑀺𑀦𑁆𑀤𑀺𑀢𑀩𑁆𑀩𑁄, 𑀤𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀅𑀢𑁆𑀣𑁄.

𑀢𑀣𑀸𑀕𑀢𑁄 𑀲𑀢𑁆𑀢𑁄 𑀧𑀼𑀕𑁆𑀕𑀮𑁄𑀢𑀺 𑀦 𑀧𑀜𑁆𑀜𑀧𑁂𑀫𑀺 𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑀲𑁆𑀲𑁂𑀯 𑀅𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 𑀧𑀜𑁆𑀜𑀢𑁆𑀢𑀺𑀉𑀧𑀸𑀤𑀸𑀦𑀲𑁆𑀲𑀧𑀺 𑀥𑀭𑀫𑀸𑀦𑀓𑀲𑁆𑀲 𑀅𑀪𑀸𑀯𑀢𑁄. ‘‘𑀅𑀦𑀼𑀧𑁆𑀧𑀸𑀤𑁄 𑀔𑁂𑀫𑀁, 𑀅𑀦𑀼𑀧𑁆𑀧𑀢𑁆𑀢𑀺 𑀔𑁂𑀫’’𑀦𑁆𑀢𑀺𑀆𑀤𑀺𑀦𑀸 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀧𑀓𑁆𑀔𑀦𑁆𑀥𑀦𑀯𑀲𑁂𑀦 𑀧𑀯𑀢𑁆𑀢𑀁 𑀅𑀕𑁆𑀕𑀨𑀮𑀲𑀫𑀸𑀧𑀢𑁆𑀢𑀺𑀅𑀢𑁆𑀣𑀁 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀯𑀸.

𑀢𑀼𑀘𑁆𑀙𑀸𑀢𑀺 𑀓𑀭𑀡𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀼𑀘𑁆𑀙𑀓𑁂𑀦𑀸’’𑀢𑀺. 𑀯𑀺𑀦𑀬𑀢𑀻𑀢𑀺 𑀯𑀺𑀦𑀬𑁄, 𑀲𑁄 𑀏𑀯 𑀯𑁂𑀦𑀬𑀺𑀓𑁄. 𑀢𑀣𑀸 𑀫𑀦𑁆𑀢𑀺 𑀢𑀣𑀸𑀪𑀽𑀢𑀁 𑀫𑀁. 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀲𑁆𑀲 𑀳𑀺 𑀲𑀢𑁆𑀢𑀲𑁆𑀲 𑀅𑀪𑀸𑀯𑀁 𑀯𑀤𑀦𑁆𑀢𑁄 𑀲𑀢𑁆𑀢𑀯𑀺𑀦𑀸𑀲𑀧𑀜𑁆𑀜𑀸𑀧𑀓𑁄 𑀘 𑀦𑀸𑀫 𑀲𑀺𑀬𑀸, 𑀅𑀳𑀁 𑀧𑀦 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀁 𑀢𑀁 ‘‘𑀦𑀢𑁆𑀣𑀻’’𑀢𑀺 𑀯𑀤𑀸𑀫𑀺. 𑀬𑀣𑀸 𑀘 𑀮𑁄𑀓𑁄 𑀯𑁄𑀳𑀭𑀢𑀺, 𑀢𑀣𑁂𑀯 𑀢𑀁 𑀯𑁄𑀳𑀭𑀸𑀫𑀺, 𑀢𑀣𑀸𑀪𑀽𑀢𑀁 𑀫𑀁 𑀬𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀯𑁂𑀦𑀬𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀯𑀤𑀦𑁆𑀢𑀸 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀘𑀭𑀺𑀫𑀘𑀺𑀢𑁆𑀢𑀁 𑀦𑀺𑀭𑀼𑀧𑀸𑀤𑀸𑀦𑀢𑁄 𑀅𑀦𑀼𑀧𑀸𑀤𑀸𑀦𑁄 𑀯𑀺𑀬 𑀚𑀸𑀢𑀯𑁂𑀤𑁄 𑀧𑀭𑀺𑀦𑀺𑀩𑁆𑀩𑀼𑀢𑀁 𑀇𑀤𑀁 𑀦𑀸𑀫 𑀦𑀺𑀲𑁆𑀲𑀺𑀢𑀦𑁆𑀢𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀯𑀤𑀦𑁆𑀢𑁄 𑀓𑀺𑀫𑁂𑀢𑁆𑀢𑀸𑀯𑀢𑀸 𑀉𑀘𑁆𑀙𑁂𑀤𑀯𑀸𑀤𑀻 𑀪𑀯𑁂𑀬𑁆𑀬, 𑀦𑀸𑀳𑀁 𑀓𑀤𑀸𑀘𑀺𑀧𑀺 𑀅𑀢𑁆𑀣𑀺, 𑀦𑀸𑀧𑀺 𑀓𑁄𑀘𑀺 𑀅𑀢𑁆𑀣𑀻𑀢𑀺 𑀯𑀤𑀸𑀫𑀺. 𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀦𑀺𑀲𑁆𑀲𑀸𑀬 𑀢𑁂 𑀫𑁄𑀖𑀧𑀼𑀭𑀺𑀲𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀦𑀸𑀫 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀢𑀻𑀢𑀺 𑀯𑀤𑀦𑁆𑀢𑀸 𑀅𑀲𑀢𑀸…𑀧𑁂… 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀫𑀳𑀸𑀩𑁄𑀥𑀺𑀫𑀡𑁆𑀟𑀫𑁆𑀳𑀻𑀢𑀺 𑀩𑁄𑀥𑀺𑀫𑀡𑁆𑀟𑀕𑁆𑀕𑀳𑀡𑁂𑀦 𑀲𑀢𑁆𑀢𑀲𑀢𑁆𑀢𑀸𑀳𑀫𑀸𑀳. 𑀢𑁂𑀦 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀢𑁄 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩; 𑀧𑀝𑀺. 𑀫. 𑁨.𑁩𑁦) 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀢𑀦𑁆𑀢𑀺𑀤𑁂𑀲𑀦𑀁 𑀯𑀤𑀢𑀺. 𑀘𑀢𑀼𑀲𑀘𑁆𑀘𑀫𑁂𑀯 𑀧𑀜𑁆𑀜𑀧𑁂𑀫𑀻𑀢𑀺 𑀏𑀢𑁂𑀦 𑀲𑀘𑁆𑀘𑀯𑀺𑀫𑀼𑀢𑁆𑀢𑀸 𑀲𑀢𑁆𑀣𑀼𑀤𑁂𑀲𑀦𑀸 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑁋 ‘‘𑀧𑀼𑀩𑁆𑀩𑁂 𑀘𑁂𑀯 𑀏𑀢𑀭𑀳𑀺 𑀘 𑀤𑀼𑀓𑁆𑀔𑀜𑁆𑀘𑁂𑀯 𑀧𑀜𑁆𑀜𑀧𑁂𑀫𑀺 𑀤𑀼𑀓𑁆𑀔𑀲𑁆𑀲 𑀘 𑀦𑀺𑀭𑁄𑀥’’𑀦𑁆𑀢𑀺 𑀯𑀤𑀦𑁆𑀢𑁄 𑀪𑀕𑀯𑀸 𑀦𑀸𑀳𑀁 𑀓𑀤𑀸𑀘𑀺𑀧𑀺 ‘‘𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀺, 𑀯𑀺𑀦𑀲𑁆𑀲𑀢𑀻’’𑀢𑀺 𑀯𑀸, ‘‘𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀻’’𑀢𑀺 𑀯𑀸 𑀯𑀤𑀸𑀫𑀺. 𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀦𑀺𑀲𑁆𑀲𑀸𑀬 𑀢𑁂 𑀫𑁄𑀖𑀧𑀼𑀭𑀺𑀲𑀸 ‘‘𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀢𑀻’’𑀢𑀺 𑀅𑀲𑀢𑀸 𑀢𑀼𑀘𑁆𑀙𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀭𑁂𑀢𑀺 𑀅𑀫𑀸𑀫𑀓𑀸, 𑀫𑀫 𑀑𑀯𑀸𑀤𑀲𑁆𑀲 𑀅𑀪𑀸𑀚𑀦𑀪𑀽𑀢𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀲𑀘𑁆𑀘𑀸𑀦𑀺…𑀧𑁂… 𑀅𑀲𑀫𑀢𑁆𑀣𑀧𑀼𑀕𑁆𑀕𑀮𑀸’’𑀢𑀺. 𑀅𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑀁, 𑀭𑁄𑀲𑀦𑀯𑀺𑀳𑁂𑀲𑀦𑀸𑀦𑀺 𑀧𑀦 𑀢𑀣𑀸𑀕𑀢𑀲𑁆𑀲 𑀆𑀓𑀸𑀲𑀲𑁆𑀲 𑀯𑀺𑀮𑀺𑀔𑀦𑀁 𑀯𑀺𑀬 𑀦 𑀲𑀫𑁆𑀪𑀯𑀦𑁆𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀆𑀳𑀦𑀢𑀺 𑀘𑀺𑀢𑁆𑀢𑀦𑁆𑀢𑀺 𑀆𑀖𑀸𑀢𑁄. 𑀅𑀧𑁆𑀧𑀢𑀻𑀢𑀸 𑀳𑁄𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀧𑁆𑀧𑀘𑁆𑀘𑀬𑁄. 𑀘𑀺𑀢𑁆𑀢𑀁 𑀦 𑀅𑀪𑀺𑀭𑀸𑀥𑀬𑀢𑀻𑀢𑀺 𑀅𑀦𑀪𑀺𑀭𑀤𑁆𑀥𑀺. 𑀅𑀢𑀼𑀝𑁆𑀞𑀻𑀢𑀺 𑀢𑀼𑀝𑁆𑀞𑀺𑀧𑀝𑀺𑀧𑀓𑁆𑀔𑁄 𑀢𑀣𑀸𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀓𑁄𑀥𑁄 𑀏𑀯 𑀯𑀸.

𑀧𑀭𑁂𑀢𑀺 𑀅𑀜𑁆𑀜𑁂 𑀏𑀓𑀘𑁆𑀘𑁂. 𑀆𑀦𑀦𑁆𑀤𑀦𑁆𑀢𑀺 𑀧𑀫𑁄𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀦𑀦𑁆𑀤𑁄, 𑀧𑀻𑀢𑀺𑀬𑀸 𑀏𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁄𑀪𑀦𑀫𑀦𑀢𑀸 𑀲𑁄𑀫𑀦𑀲𑁆𑀲𑀁, 𑀘𑁂𑀢𑀲𑀺𑀓𑀲𑀼𑀔𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀉𑀧𑁆𑀧𑀺𑀮𑀢𑀺 𑀧𑀼𑀭𑀺𑀫𑀸𑀯𑀢𑁆𑀣𑀸𑀬 𑀪𑀺𑀚𑁆𑀚𑀢𑀺 𑀯𑀺𑀲𑁂𑀲𑀁 𑀆𑀧𑀚𑁆𑀚𑀢𑀻𑀢𑀺 𑀉𑀧𑁆𑀧𑀺𑀮𑀁, 𑀢𑀤𑁂𑀯 𑀉𑀧𑁆𑀧𑀺𑀮𑀸𑀯𑀺𑀢𑀁, 𑀢𑀲𑁆𑀲 𑀪𑀸𑀯𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁. 𑀬𑀸𑀬 𑀉𑀧𑁆𑀧𑀦𑁆𑀦𑀸𑀬 𑀓𑀸𑀬𑀘𑀺𑀢𑁆𑀢𑀁 𑀯𑀸𑀢𑀧𑀽𑀭𑀺𑀢𑀪𑀢𑁆𑀢𑀸 𑀯𑀺𑀬 𑀉𑀤𑁆𑀥𑀼𑀫𑀸𑀬𑀦𑀸𑀓𑀸𑀭𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲𑀸 𑀕𑁂𑀳𑀲𑁆𑀲𑀺𑀢𑀸𑀬 𑀑𑀤𑀕𑁆𑀕𑀺𑀬𑀧𑀻𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀫𑀢𑁆𑀣𑀸𑀢𑀺 𑀤𑀼𑀓𑁆𑀔𑀫𑁂𑀯 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺 𑀘, 𑀦 𑀅𑀜𑁆𑀜𑁄 𑀲𑀢𑁆𑀢𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀏𑀯𑀁 𑀚𑀸𑀦𑀺𑀢𑀼𑀁 𑀅𑀲𑀫𑀢𑁆𑀣𑀸 ‘‘𑀅𑀢𑁆𑀢𑀸 𑀦𑀸𑀫 𑀅𑀢𑁆𑀣𑀻’’𑀢𑀺 𑀏𑀯𑀁𑀤𑀺𑀝𑁆𑀞𑀺𑀦𑁄 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀸. 𑀉𑀢𑁆𑀢𑀫𑀁 𑀧𑀲𑀸𑀤𑀦𑀻𑀬𑀝𑁆𑀞𑀸𑀦𑀁 𑀢𑀣𑀸𑀕𑀢𑀫𑁆𑀧𑀺 𑀅𑀓𑁆𑀓𑁄𑀲𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀪𑀺𑀓𑁆𑀔𑀽𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁪𑁭. 𑀅𑀦𑀢𑁆𑀢𑀦𑀺𑀬𑁂𑀧𑀺 𑀔𑀦𑁆𑀥𑀧𑀜𑁆𑀘𑀓𑁂 𑀫𑀺𑀘𑁆𑀙𑀸𑀕𑀸𑀳𑀯𑀲𑁂𑀦 𑀅𑀢𑁆𑀢𑀦𑀺𑀬𑀲𑀜𑁆𑀜𑀸𑀬 𑀧𑀯𑀢𑁆𑀢𑀲𑁆𑀲 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀁. 𑀅𑀫𑁆𑀳𑀸𑀓𑀁 𑀦𑁂𑀯 𑀅𑀢𑁆𑀢𑀸𑀢𑀺 𑀬𑀲𑁆𑀫𑀸 𑀭𑀽𑀧𑀯𑁂𑀤𑀦𑀸𑀤𑀺𑀬𑁂𑀯 𑀅𑀢𑁆𑀢𑀕𑁆𑀕𑀸𑀳𑀯𑀢𑁆𑀣𑀼 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀮𑁄𑀪𑀦𑁂𑀬𑁆𑀬𑀲𑁆𑀲 𑀅𑀪𑀸𑀯𑀢𑁄. 𑀏𑀢𑀁 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 𑀦 𑀅𑀫𑁆𑀳𑀸𑀓𑀁 𑀭𑀽𑀧𑀁, 𑀦 𑀯𑀺𑀜𑁆𑀜𑀸𑀡𑀁, 𑀢𑀲𑁆𑀫𑀸 𑀅𑀫𑁆𑀳𑀸𑀓𑀁 𑀦𑁂𑀯 𑀅𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀯𑀢𑁆𑀣𑀼𑀦𑁄 𑀦𑁂𑀯 𑀅𑀢𑁆𑀢𑀸𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀩𑀸𑀳𑀺𑀭𑀯𑀢𑁆𑀣𑀼 𑀅𑀢𑁆𑀢𑀦𑀺𑀬𑀪𑀸𑀯𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀫𑁆𑀳𑀸𑀓𑀁 𑀘𑀻𑀯𑀭𑀸𑀤𑀺𑀧𑀭𑀺𑀓𑁆𑀔𑀸𑀭𑁄𑀧𑀺 𑀦 𑀳𑁄𑀢𑀻’’𑀢𑀺. 𑀔𑀦𑁆𑀥𑀧𑀜𑁆𑀘𑀓𑀁𑀬𑁂𑀯𑀸𑀢𑀺 𑀩𑀸𑀳𑀺𑀭𑀯𑀢𑁆𑀣𑀼𑀁 𑀦𑀺𑀤𑀲𑁆𑀲𑀦𑀁 𑀓𑀢𑁆𑀯𑀸 𑀔𑀦𑁆𑀥𑀧𑀜𑁆𑀘𑀓𑀁𑀬𑁂𑀯 𑀦 𑀢𑀼𑀫𑁆𑀳𑀸𑀓𑀦𑁆𑀢𑀺 𑀧𑀚𑀳𑀸𑀧𑁂𑀢𑀺. 𑀦 𑀉𑀧𑁆𑀧𑀸𑀝𑁂𑀢𑁆𑀯𑀸 𑀓𑀦𑁆𑀤𑀁 𑀯𑀺𑀬. 𑀦 𑀮𑀼𑀜𑁆𑀘𑀺𑀢𑁆𑀯𑀸 𑀯𑀸 𑀓𑁂𑀲𑁂 𑀯𑀺𑀬𑀸𑀢𑀺. 𑀇𑀫𑀺𑀦𑀸 𑀭𑀽𑀧𑀸𑀤𑀻𑀦𑀁 𑀦𑀸𑀫𑀫𑀼𑀔𑁂𑀦 𑀧𑀳𑀸𑀦𑀁 𑀇𑀘𑁆𑀙𑀦𑁆𑀢𑀺. 𑀉𑀮𑁆𑀮𑀺𑀗𑁆𑀕𑀺𑀢𑀫𑀢𑁆𑀣𑀁 𑀙𑀦𑁆𑀤𑀭𑀸𑀕𑀯𑀺𑀦𑀬𑁂𑀦 𑀧𑀚𑀳𑀸𑀧𑁂𑀢𑀻𑀢𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺.

𑁨𑁪𑁮. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸’’𑀢𑀺𑀆𑀤𑀺 𑀤𑁂𑀲𑀦𑀸 𑀢𑀺𑀧𑀭𑀺𑀯𑀝𑁆𑀝𑀁. 𑀬𑀸𑀯 𑀇𑀫𑀁 𑀞𑀸𑀦𑀦𑁆𑀢𑀺 ‘‘𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁄’’𑀢𑀺 𑀬𑀸𑀯𑀸𑀬𑀁 𑀧𑀸𑀴𑀺𑀧𑀤𑁂𑀲𑁄. 𑀲𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀦 𑀅𑀓𑁆𑀔𑀸𑀢𑀢𑁆𑀢𑀸𑀧𑀺 𑀲𑁆𑀯𑀸𑀓𑁆𑀔𑀸𑀢𑁄𑀢𑀺 𑀆𑀳 ‘‘𑀲𑀼𑀓𑀣𑀺𑀢𑀢𑁆𑀢𑀸 𑀏𑀯 𑀉𑀢𑁆𑀢𑀸𑀦𑁄 𑀯𑀺𑀯𑀝𑁄 𑀧𑀓𑀸𑀲𑀺𑀢𑁄’’𑀢𑀺. 𑀢𑀺𑀭𑀺𑀬𑀁 𑀯𑀺𑀤𑀸𑀭𑀡𑁂𑀦 𑀙𑀺𑀦𑁆𑀦𑀁, 𑀤𑀻𑀖𑀲𑁄 𑀨𑀸𑀮𑀦𑁂𑀦 𑀪𑀺𑀦𑁆𑀦𑀁, 𑀢𑀢𑁄 𑀏𑀯 𑀢𑀢𑁆𑀣 𑀢𑀢𑁆𑀣 𑀲𑀺𑀩𑁆𑀩𑀺𑀢𑀕𑀡𑁆𑀞𑀺𑀓𑀢𑀚𑀺𑀡𑁆𑀡𑀯𑀢𑁆𑀣𑀁 𑀧𑀺𑀮𑁄𑀢𑀺𑀓𑀸, 𑀢𑀤𑀪𑀸𑀯𑀢𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄, 𑀧𑀺𑀮𑁄𑀢𑀺𑀓𑀭𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀇𑀭𑀺𑀬𑀸𑀧𑀣-𑀲𑀡𑁆𑀞𑀧𑀦𑀅𑀯𑀺𑀚𑁆𑀚𑀫𑀸𑀦𑀛𑀸𑀦-𑀯𑀺𑀧𑀲𑁆𑀲𑀦𑀸𑀦𑀺 𑀙𑀺𑀦𑁆𑀦𑀸𑀬 𑀅𑀯𑀺𑀚𑁆𑀚𑀫𑀸𑀦𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀲𑀺𑀩𑁆𑀩𑀦𑀕𑀡𑁆𑀞𑀺𑀓𑀭𑀡𑀲𑀤𑀺𑀲𑀸𑀦𑀺, 𑀢𑀸𑀤𑀺𑀲𑀁 𑀇𑀥 𑀦𑀢𑁆𑀣𑀻𑀢𑀺 𑀆𑀳 ‘‘𑀦 𑀳𑁂𑀢𑁆𑀣…𑀧𑁂… 𑀅𑀢𑁆𑀣𑀻’’𑀢𑀺. 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀮𑀪𑀢𑀻𑀢𑀺 𑀧𑁂𑀲𑀮𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀯𑀲𑁂𑀦𑀧𑀺 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀮𑀪𑀢𑀺, 𑀯𑀺𑀲𑁂𑀲𑀸𑀥𑀺𑀕𑀫𑀯𑀲𑁂𑀦 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀓𑀸𑀭𑀡𑁆𑀟𑀯𑀁 𑀦𑀺𑀤𑁆𑀥𑀫𑀣𑀸𑀢𑀺 𑀯𑀺𑀧𑀦𑁆𑀦𑀲𑀻𑀮𑀢𑀸𑀬 𑀓𑀘𑀯𑀭𑀪𑀽𑀢𑀁 𑀧𑀼𑀕𑁆𑀕𑀮𑀁 𑀓𑀘𑀯𑀭𑀫𑀺𑀯 𑀦𑀺𑀭𑀧𑁂𑀓𑁆𑀔𑀸 𑀅𑀧𑀦𑁂𑀣. 𑀓𑀲𑀫𑁆𑀩𑀼𑀜𑁆𑀘𑀸𑀧𑀓𑀲𑁆𑀲𑀣𑀸𑀢𑀺 𑀓𑀲𑀝𑀪𑀽𑀢𑀜𑁆𑀘 𑀦𑀁 𑀔𑀢𑁆𑀢𑀺𑀬𑀸𑀤𑀻𑀦𑀁 𑀫𑀚𑁆𑀛𑀕𑀢𑀁 𑀲𑀫𑁆𑀪𑀺𑀦𑁆𑀦𑀁 𑀧𑀕𑁆𑀖𑀭𑀺𑀢𑀓𑀼𑀝𑁆𑀞𑀁 𑀘𑀡𑁆𑀟𑀸𑀮𑀁 𑀯𑀺𑀬 𑀅𑀧𑀓𑀲𑁆𑀲𑀣 𑀦𑀺𑀓𑁆𑀓𑀟𑁆𑀠𑀣. 𑀓𑀺𑀁 𑀓𑀸𑀭𑀡𑀁? 𑀲𑀗𑁆𑀖𑀸𑀭𑀸𑀫𑁄 𑀦𑀸𑀫 𑀲𑀻𑀮𑀯𑀦𑁆𑀢𑀸𑀦𑀁 𑀓𑀢𑁄, 𑀦 𑀤𑀼𑀲𑁆𑀲𑀻𑀮𑀸𑀦𑀁, 𑀬𑀢𑁄 𑀏𑀢𑀤𑁂𑀯. 𑀢𑀢𑁄 𑀧𑀮𑀸𑀧𑁂 𑀯𑀸𑀳𑁂𑀣, 𑀅𑀲𑁆𑀲𑀫𑀡𑁂 𑀲𑀫𑀡𑀫𑀸𑀦𑀺𑀦𑁂𑀢𑀺 𑀬𑀣𑀸 𑀧𑀮𑀸𑀧𑀸 𑀅𑀦𑁆𑀢𑁄𑀲𑀸𑀭𑀭𑀳𑀺𑀢𑀸 𑀅𑀢𑀡𑁆𑀟𑀼𑀮𑀸 𑀩𑀳𑀺 𑀣𑀼𑀲𑁂𑀦 𑀯𑀻𑀳𑀺 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀧𑀸𑀧𑀪𑀺𑀓𑁆𑀔𑀽 𑀅𑀦𑁆𑀢𑁄𑀲𑀻𑀮𑀭𑀳𑀺𑀢𑀸𑀧𑀺 𑀩𑀳𑀺 𑀓𑀸𑀲𑀸𑀯𑀸𑀤𑀺𑀧𑀭𑀺𑀓𑁆𑀔𑀸𑀭𑁂𑀦 𑀪𑀺𑀓𑁆𑀔𑀽 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀮𑀸𑀧𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀧𑀮𑀸𑀧𑁂 𑀯𑀸𑀳𑁂𑀣 𑀑𑀥𑀼𑀦𑀸𑀣 𑀯𑀺𑀥𑀫𑀣. 𑀧𑀭𑀫𑀢𑁆𑀣𑀢𑁄 𑀅𑀲𑁆𑀲𑀫𑀡𑁂 𑀯𑁂𑀲𑀫𑀢𑁆𑀢𑁂𑀦 𑀲𑀫𑀡𑀫𑀸𑀦𑀺𑀦𑁂 𑀏𑀯𑀁 𑀦𑀺𑀤𑁆𑀥𑀫𑀺𑀢𑁆𑀯𑀸𑀦…𑀧𑁂…𑀧𑀢𑀺𑀲𑁆𑀲𑀢𑀸𑀢𑀺. 𑀢𑀢𑁆𑀣 𑀓𑀧𑁆𑀧𑀬𑀯𑁆𑀳𑁄𑀢𑀺 𑀓𑀧𑁆𑀧𑁂𑀣, 𑀓𑀭𑁄𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀢𑀺𑀲𑁆𑀲𑀢𑀸𑀢𑀺 𑀧𑀢𑀺 𑀧𑀢𑀺 𑀲𑀢𑀸 𑀲𑀫𑁆𑀧𑀚𑀸𑀦𑀦𑁆𑀢𑀸 𑀲𑀼𑀝𑁆𑀞𑀼 𑀧𑀚𑀸𑀦𑀦𑁆𑀢𑀸. 𑀧𑀢𑀺𑀲𑁆𑀲𑀢𑀸 𑀯𑀸 𑀲𑀧𑁆𑀧𑀢𑀺𑀲𑁆𑀲𑀸 𑀅𑀜𑁆𑀜𑀫𑀜𑁆𑀜𑀁 𑀲𑀕𑀸𑀭𑀯𑀸. 𑀅𑀣𑁂𑀯𑀁 𑀲𑀼𑀤𑁆𑀥𑀸 𑀲𑀼𑀤𑁆𑀥𑁂𑀳𑀺 𑀲𑀁𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀸 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀫𑀕𑁆𑀕𑀸. 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀧𑀸𑀓𑀕𑀢𑀧𑀜𑁆𑀜𑀢𑀸𑀬 𑀦𑀺𑀧𑀓𑀸. 𑀲𑀩𑁆𑀩𑀲𑁆𑀲𑁂𑀯𑀺𑀫𑀲𑁆𑀲 𑀤𑀼𑀓𑁆𑀔𑀯𑀝𑁆𑀝𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀣, 𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀣𑀸𑀢𑀺 𑀅𑀢𑁆𑀣𑁄.

𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀯𑀝𑁆𑀝𑀫𑀽𑀮𑀓𑀢𑁆𑀢𑀸.

𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀯𑀸 𑀅𑀦𑀼𑀲𑁆𑀲𑀭𑀡𑀲𑀻𑀮𑀸𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑁄. 𑀏𑀯𑀁 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄𑀧𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀥𑀺𑀫𑀢𑁆𑀢𑀦𑁆𑀢𑀺 𑀩𑀮𑀯𑀁. 𑀧𑀜𑁆𑀜𑀸𑀯𑀸𑀳𑀻𑀢𑀺 𑀧𑀜𑁆𑀜𑀁 𑀯𑀸𑀳𑁂𑀢𑀺, 𑀧𑀜𑁆𑀜𑀸 𑀯𑀸 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀳𑀢𑀻𑀢𑀺 𑀧𑀜𑁆𑀜𑀸𑀯𑀸𑀳𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀧𑀜𑁆𑀜𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑁂𑀦 𑀲𑀭𑀢𑀺 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀲𑀤𑁆𑀥𑀸𑀯𑀸𑀳𑀻𑀢𑀺 𑀲𑀤𑁆𑀥𑀁 𑀯𑀸𑀳𑁂𑀢𑀺, 𑀲𑀤𑁆𑀥𑀸 𑀯𑀸 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀳𑀢𑀻𑀢𑀺 𑀲𑀤𑁆𑀥𑀸𑀯𑀸𑀳𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀲𑀤𑁆𑀥𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀬 𑀲𑀭𑀢𑀺 𑀅𑀦𑀼𑀲𑁆𑀲𑀭𑀢𑀻𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻. 𑀲𑀤𑁆𑀥𑀸𑀫𑀢𑁆𑀢𑀦𑁆𑀢𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬 𑀲𑀤𑁆𑀤𑀳𑀦𑀫𑀢𑁆𑀢𑀁. 𑀫𑀢𑁆𑀢-𑀲𑀤𑁆𑀤𑁂𑀦 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀁 𑀦𑀺𑀯𑀢𑁆𑀢𑁂𑀢𑀺. 𑀧𑁂𑀫𑀫𑀢𑁆𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑀤𑁆𑀥𑀸𑀦𑀼𑀲𑀸𑀭𑁂𑀦 𑀉𑀧𑁆𑀧𑀦𑁆𑀦𑀁 𑀢𑀼𑀝𑁆𑀞𑀺𑀫𑀢𑁆𑀢𑀁. 𑀲𑀺𑀦𑁂𑀳𑁄𑀢𑀺 𑀓𑁂𑀘𑀺. 𑀏𑀯𑀁 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀦𑁆𑀢𑀺 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀯𑀲𑁂𑀦 𑀆𑀭𑀤𑁆𑀥𑀯𑀺𑀧𑀲𑁆𑀲𑀦𑀸𑀦𑀁. 𑀏𑀓𑀸 𑀲𑀤𑁆𑀥𑀸𑀢𑀺 𑀯𑀺𑀧𑀲𑁆𑀲𑀦𑀸𑀦𑀼𑀲𑀸𑀭𑁂𑀦 𑀲𑁆𑀯𑀸𑀓𑁆𑀔𑀸𑀢𑀥𑀫𑁆𑀫𑀢𑀸 𑀲𑀺𑀤𑁆𑀥𑀸, 𑀢𑀢𑁄 𑀏𑀯 𑀏𑀓𑀸 𑀲𑁂𑀝𑁆𑀞𑀸 𑀉𑀴𑀸𑀭𑀸 𑀲𑀤𑁆𑀥𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀓𑀁 𑀧𑁂𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀕𑁆𑀕𑁂 𑀞𑀧𑀺𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀲𑀤𑁆𑀥𑀸𑀧𑁂𑀫𑀸𑀦𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀬𑀢𑀸𑀬 𑀅𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀫𑀸𑀳. 𑀘𑀽𑀴𑀲𑁄𑀢𑀸𑀧𑀦𑁆𑀦𑁄𑀢𑀺 𑀯𑀤𑀦𑁆𑀢𑀺 𑀏𑀓𑀤𑁂𑀲𑁂𑀦 𑀲𑀘𑁆𑀘𑀸𑀦𑀼𑀩𑁄𑀥𑁂 𑀞𑀺𑀢𑀢𑁆𑀢𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀮𑀕𑀤𑁆𑀤𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀯𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁯. 𑀧𑀺𑀬𑀯𑀘𑀦𑀦𑁆𑀢𑀺 𑀧𑀺𑀬𑀲𑀫𑀼𑀤𑀸𑀘𑀸𑀭𑁄. 𑀯𑀺𑀜𑁆𑀜𑀼𑀚𑀸𑀢𑀺𑀓𑀸 𑀳𑀺 𑀧𑀭𑀁 𑀧𑀺𑀬𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀸 ‘‘𑀪𑀯’’𑀦𑁆𑀢𑀺 𑀯𑀸, ‘‘𑀤𑁂𑀯𑀸𑀦𑀁 𑀧𑀺𑀬𑁄’’𑀢𑀺 𑀯𑀸, ‘‘𑀆𑀬𑀲𑁆𑀫𑀸’’𑀢𑀺 𑀯𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀼𑀔𑀸 𑀲𑀫𑁆𑀩𑁄𑀥𑀦𑀯𑀲𑁂𑀦 ‘‘𑀆𑀯𑀼𑀲𑁄’’𑀢𑀺, 𑀢𑀺𑀭𑁄𑀓𑁆𑀔𑀁 ‘‘𑀆𑀬𑀲𑁆𑀫𑀸’’𑀢𑀺 𑀅𑀬𑀫𑁆𑀧𑀺 𑀲𑀫𑀼𑀤𑀸𑀘𑀸𑀭𑁄. 𑀫𑀳𑀸𑀓𑀲𑁆𑀲𑀧𑀉𑀭𑀼𑀯𑁂𑀮𑀓𑀲𑁆𑀲𑀧𑀸𑀤𑀬𑁄 𑀅𑀜𑁆𑀜𑁂𑀧𑀺 𑀓𑀲𑁆𑀲𑀧𑀦𑀸𑀫𑀓𑀸 𑀅𑀢𑁆𑀣𑀻𑀢𑀺 ‘‘𑀓𑀢𑀭𑀲𑁆𑀲 𑀓𑀲𑁆𑀲𑀧𑀲𑁆𑀲𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀺. 𑀭𑀜𑁆𑀜𑀸𑀢𑀺 𑀓𑁄𑀲𑀮𑀭𑀜𑁆𑀜𑀸. ‘‘𑀲𑀜𑁆𑀚𑀸𑀦𑀺𑀁𑀲𑀽’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀲𑁆𑀲𑀸𑀢𑀺 𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲, ‘‘𑀲𑀜𑁆𑀚𑀸𑀦𑀺𑀁𑀲𑀽’’𑀢𑀺 𑀯𑀼𑀢𑁆𑀢𑀲𑀜𑁆𑀚𑀸𑀦𑀦𑀲𑁆𑀲 𑀯𑀸. 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄𑀢𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀪𑀸𑀯𑁂𑀦𑁆𑀢𑁄. 𑀑𑀲𑀓𑁆𑀓𑀦𑁆𑀢𑁂𑀢𑀺 𑀧𑀭𑀺𑀳𑀸𑀬𑀫𑀸𑀦𑁂. 𑀧𑀞𑀫𑀦𑁆𑀢𑀺 𑀓𑀼𑀫𑀸𑀭𑀺𑀓𑀸𑀓𑀸𑀮𑁂. 𑀲𑀢𑁆𑀣𑀸 𑀉𑀧𑀸𑀮𑀺𑀢𑁆𑀣𑁂𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀺 𑀢𑀁 𑀅𑀥𑀺𑀓𑀭𑀡𑀁 𑀯𑀺𑀦𑀬𑀓𑀫𑁆𑀫𑁂𑀦𑁂𑀯𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀧𑀩𑁆𑀩𑀚𑁆𑀚𑀸𑀬 𑀅𑀭𑁄𑀕𑀪𑀸𑀯𑀁.

𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀯𑀦𑀸𑀢𑀺 ‘‘𑀅𑀦𑁆𑀥𑀯𑀦’’𑀦𑁆𑀢𑁆𑀯𑁂𑀯 𑀧𑀜𑁆𑀜𑀸𑀬𑀫𑀸𑀦𑀲𑁆𑀲 𑀯𑀺𑀪𑀸𑀯𑀦𑀸. 𑀑𑀮𑀻𑀬𑀢𑀻𑀢𑀺 𑀲𑀗𑁆𑀓𑀼𑀘𑀢𑀺 𑀲𑀡𑀺𑀓𑀁 𑀯𑀢𑁆𑀢𑀢𑀺. 𑀪𑀸𑀡𑀓𑁄𑀢𑀺 𑀲𑀭𑀪𑀸𑀡𑀓𑁄. 𑀬𑀁 𑀅𑀢𑁆𑀣𑀺, 𑀢𑀁 𑀕𑀳𑁂𑀢𑁆𑀯𑀸𑀢𑀺 𑀇𑀤𑀸𑀦𑀺 𑀧𑀭𑀺𑀬𑁂𑀲𑀺𑀢𑀩𑁆𑀩𑀝𑁆𑀞𑀸𑀦𑀁 𑀦𑀢𑁆𑀣𑀺, 𑀬𑀣𑀸𑀕𑀢𑀁 𑀧𑀦 𑀬𑀁 𑀅𑀢𑁆𑀣𑀺, 𑀢𑀁 𑀕𑀳𑁂𑀢𑁆𑀯𑀸. 𑀩𑀮𑀯𑀕𑀼𑀡𑁂𑀢𑀺 𑀅𑀥𑀺𑀫𑀢𑁆𑀢𑀕𑀼𑀡𑁂. 𑀓𑀲𑁆𑀲𑀧𑀪𑀕𑀯𑀢𑁄 𑀓𑀸𑀮𑁂 𑀦𑀺𑀭𑀼𑀴𑁆𑀳𑀲𑀫𑀜𑁆𑀜𑀸𑀯𑀲𑁂𑀦 𑀯𑀘𑀦𑀲𑀦𑁆𑀢𑀢𑀺𑀬𑀸 𑀅𑀯𑀺𑀘𑁆𑀙𑁂𑀤𑁂𑀦 𑀘 𑀇𑀫𑀲𑁆𑀫𑀺𑀫𑁆𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀁 ‘‘𑀅𑀦𑁆𑀥𑀯𑀦’’𑀦𑁆𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣, 𑀉𑀧𑀭𑀽𑀧𑀭𑀺𑀯𑀟𑁆𑀠𑀫𑀸𑀦𑀸𑀬 𑀧𑀣𑀯𑀺𑀬𑀸 𑀉𑀧𑀭𑀺 𑀭𑀼𑀓𑁆𑀔𑀕𑀘𑁆𑀙𑀸𑀤𑀻𑀲𑀼 𑀲𑀜𑁆𑀚𑀸𑀬𑀦𑁆𑀢𑁂𑀲𑀼𑀧𑀻𑀢𑀺. 𑀲𑁂𑀓𑁆𑀔𑀧𑀝𑀺𑀧𑀤𑀦𑁆𑀢𑀺 𑀲𑁂𑀓𑁆𑀔𑀪𑀸𑀯𑀸𑀯𑀳𑀁 𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀢𑁆𑀢𑀺𑀁.

𑀅𑀜𑁆𑀜𑀢𑀭-𑀲𑀤𑁆𑀤𑁄 𑀅𑀧𑀸𑀓𑀝𑁂 𑀯𑀺𑀬 𑀧𑀸𑀓𑀝𑁂𑀧𑀺 𑀯𑀢𑁆𑀢𑀢𑀺 𑀏𑀓-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀚𑀸𑀦𑀸𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀬𑀪𑁂𑀭𑀯𑀤𑀲𑁆𑀲𑀺𑀢𑀫𑁆𑀧𑀺 𑀅𑀪𑀺𑀓𑁆𑀓𑀦𑁆𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀇𑀥 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁 𑀳𑁂𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀓𑀢𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀧𑀭𑀢𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀼𑀢𑁆𑀢𑀧𑀤𑁂𑀲𑁂 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀸𑀢𑀺 𑀦𑀬𑀤𑀲𑁆𑀲𑀦𑀁 𑀓𑀭𑁄𑀢𑀺. 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀙𑀯𑀺𑀬’’𑀦𑁆𑀢𑀺. 𑀙𑀯𑀺𑀕𑀢𑀸 𑀧𑀦 𑀯𑀡𑁆𑀡𑀥𑀸𑀢𑀼 𑀏𑀯 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄’’𑀢𑀺 𑀏𑀢𑁆𑀣 𑀯𑀡𑁆𑀡𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀅𑀧𑀭𑁂. 𑀯𑀡𑁆𑀡𑀻𑀬𑀢𑀺 𑀓𑀺𑀢𑁆𑀢𑀻𑀬𑀢𑀺 𑀉𑀕𑁆𑀖𑁄𑀲𑀦𑀦𑁆𑀢𑀺 𑀯𑀡𑁆𑀡𑁄, 𑀣𑀼𑀢𑀺. 𑀯𑀡𑁆𑀡𑀻𑀬𑀢𑀺 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀧𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀓𑀼𑀮𑀯𑀕𑁆𑀕𑁄. 𑀯𑀡𑁆𑀡𑀻𑀬𑀢𑀺 𑀨𑀮𑀁 𑀏𑀢𑁂𑀦 𑀬𑀣𑀸𑀲𑀪𑀸𑀯𑀢𑁄 𑀯𑀺𑀪𑀸𑀯𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀓𑀸𑀭𑀡𑀁. 𑀯𑀡𑁆𑀡𑀦𑀁 𑀤𑀻𑀖𑀭𑀲𑁆𑀲𑀸𑀤𑀺𑀯𑀲𑁂𑀦 𑀲𑀡𑁆𑀞𑀳𑀦𑀦𑁆𑀢𑀺 𑀯𑀡𑁆𑀡𑁄, 𑀲𑀡𑁆𑀞𑀸𑀦𑀁. 𑀯𑀡𑁆𑀡𑀻𑀬𑀢𑀺 𑀅𑀡𑀼𑀫𑀳𑀦𑁆𑀢𑀸𑀤𑀺𑀯𑀲𑁂𑀦 𑀧𑀫𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀧𑀫𑀸𑀡𑀁. 𑀯𑀡𑁆𑀡𑁂𑀢𑀺 𑀯𑀺𑀓𑀸𑀭𑀫𑀸𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀯𑀡𑁆𑀡𑁄, 𑀭𑀽𑀧𑀸𑀬𑀢𑀦𑀁. 𑀏𑀯𑀁 𑀢𑁂𑀦 𑀢𑁂𑀦 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀯𑀡𑁆𑀡-𑀲𑀤𑁆𑀤𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀯𑀲𑁂𑀲𑀢𑁆𑀢𑀁 𑀲𑀓𑀮𑀢𑀸 𑀓𑁂𑀯𑀮𑀢𑀸. 𑀓𑁂𑀯𑀮𑀓𑀧𑁆𑀧𑀸𑀢𑀺 𑀏𑀢𑁆𑀣 𑀓𑁂𑀘𑀺 𑀈𑀲𑀁 𑀅𑀲𑀫𑀢𑁆𑀢𑀸 𑀓𑁂𑀯𑀮𑀸 𑀓𑁂𑀯𑀮𑀓𑀧𑁆𑀧𑀸𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀲𑀢𑀺 𑀅𑀦𑀯𑀲𑁂𑀲𑀢𑁆𑀣𑁄 𑀏𑀯 𑀓𑁂𑀯𑀮-𑀲𑀤𑁆𑀤𑁄 𑀲𑀺𑀬𑀸. 𑀅𑀦𑀢𑁆𑀣𑀦𑁆𑀢𑀭𑁂𑀦 𑀧𑀦 𑀓𑀧𑁆𑀧-𑀲𑀤𑁆𑀤𑁂𑀦 𑀧𑀤𑀯𑀟𑁆𑀠𑀦𑀁 𑀓𑀢𑁆𑀯𑀸 𑀓𑁂𑀯𑀮𑀸 𑀏𑀯 𑀓𑁂𑀯𑀮𑀓𑀧𑁆𑀧𑀸. 𑀢𑀣𑀸 𑀯𑀸 𑀓𑀧𑁆𑀧𑀦𑀻𑀬𑀢𑁆𑀢𑀸 𑀧𑀜𑁆𑀜𑀧𑁂𑀢𑀩𑁆𑀩𑀢𑁆𑀢𑀸 𑀓𑁂𑀯𑀮𑀓𑀧𑁆𑀧𑀸. 𑀬𑁂𑀪𑀼𑀬𑁆𑀬𑀢𑀸 𑀩𑀳𑀼𑀮𑀪𑀸𑀯𑁄. 𑀅𑀩𑁆𑀬𑀸𑀫𑀺𑀲𑁆𑀲𑀢𑀸 𑀯𑀺𑀚𑀸𑀢𑀺𑀬𑁂𑀦 𑀅𑀲𑀗𑁆𑀓𑀭𑁄 𑀲𑀼𑀤𑁆𑀥𑀢𑀸. 𑀅𑀦𑀢𑀺𑀭𑁂𑀓𑀢𑀸 𑀢𑀁𑀫𑀢𑁆𑀢𑀢𑀸 𑀯𑀺𑀲𑁂𑀲𑀸𑀪𑀸𑀯𑁄. 𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀓𑁂𑀯𑀮𑀁 𑀤𑀴𑁆𑀳𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑁂𑀯𑀮𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀲𑀗𑁆𑀔𑀢𑀯𑀺𑀯𑀺𑀢𑁆𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀯𑀺𑀲𑀁𑀬𑁄𑀕𑀸𑀤𑀺𑀅𑀦𑁂𑀓𑀢𑁆𑀣𑁄’’𑀢𑀺. 𑀓𑁂𑀯𑀮𑀁 𑀏𑀢𑀲𑁆𑀲 𑀅𑀥𑀺𑀕𑀢𑀁 𑀅𑀢𑁆𑀣𑀻𑀢𑀺 𑀓𑁂𑀯𑀮𑀻, 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄 𑀔𑀻𑀡𑀸𑀲𑀯𑁄.

𑀓𑀧𑁆𑀧-𑀲𑀤𑁆𑀤𑁄 𑀧𑀦𑀸𑀬𑀁 𑀲𑀉𑀧𑀲𑀕𑁆𑀕𑁄 𑀅𑀦𑀼𑀧𑀲𑀕𑁆𑀕𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀑𑀓𑀧𑁆𑀧𑀦𑀻𑀬𑀧𑀤𑁂 𑀮𑀩𑁆𑀪𑀫𑀸𑀦𑀁 𑀑𑀓𑀧𑁆𑀧𑀲𑀤𑁆𑀤𑀫𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀺, 𑀅𑀜𑁆𑀜𑀣𑀸 𑀓𑀧𑁆𑀧-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀑𑀓𑀧𑁆𑀧𑀦𑀻𑀬𑀧𑀤𑀁 𑀅𑀦𑀺𑀤𑀲𑁆𑀲𑀦𑀫𑁂𑀯 𑀲𑀺𑀬𑀸. 𑀲𑀫𑀡𑀓𑀧𑁆𑀧𑁂𑀳𑀻𑀢𑀺 𑀯𑀺𑀦𑀬𑀲𑀺𑀤𑁆𑀥𑁂𑀳𑀺 𑀲𑀫𑀡𑀯𑁄𑀳𑀸𑀭𑁂𑀳𑀺. 𑀦𑀺𑀘𑁆𑀘𑀓𑀧𑁆𑀧𑀦𑁆𑀢𑀺 𑀦𑀺𑀘𑁆𑀘𑀓𑀸𑀮𑀁. 𑀧𑀜𑁆𑀜𑀢𑁆𑀢𑀻𑀢𑀺 𑀦𑀸𑀫𑀁. 𑀦𑀸𑀫𑀜𑁆𑀳𑁂𑀢𑀁 𑀢𑀲𑁆𑀲 𑀆𑀬𑀲𑁆𑀫𑀢𑁄, 𑀬𑀤𑀺𑀤𑀁 𑀓𑀧𑁆𑀧𑁄𑀢𑀺. 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽𑀢𑀺 𑀓𑀢𑁆𑀢𑀭𑀺𑀓𑀸𑀬 𑀙𑁂𑀤𑀺𑀢𑀓𑁂𑀲𑀫𑀲𑁆𑀲𑀼. 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄𑀢𑀺 𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬 𑀯𑀻𑀢𑀺𑀓𑁆𑀓𑀦𑁆𑀢𑀸𑀬 𑀤𑁆𑀯𑀗𑁆𑀕𑀼𑀮𑀢𑀸𑀯𑀺𑀓𑀧𑁆𑀧𑁄. 𑀮𑁂𑀲𑁄𑀢𑀺 𑀅𑀧𑀤𑁂𑀲𑁄. 𑀅𑀦𑀯𑀲𑁂𑀲𑀁 𑀨𑀭𑀺𑀢𑀼𑀁 𑀲𑀫𑀢𑁆𑀣𑀲𑁆𑀲𑀧𑀺 𑀑𑀪𑀸𑀲𑀲𑁆𑀲 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀏𑀓𑀤𑁂𑀲𑀨𑀭𑀡𑀫𑁆𑀧𑀺 𑀲𑀺𑀬𑀸, 𑀅𑀬𑀁 𑀧𑀦 𑀲𑀩𑁆𑀩𑀲𑁄𑀯 𑀨𑀭𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀫𑀦𑁆𑀢𑀢𑁆𑀣𑁄 𑀓𑀧𑁆𑀧-𑀲𑀤𑁆𑀤𑁄 𑀕𑀳𑀺𑀢𑁄𑀢𑀺 𑀆𑀳 ‘‘𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄’’𑀢𑀺.

𑀲𑀫𑀡𑀲𑀜𑁆𑀜𑀸𑀲𑀫𑀼𑀤𑀸𑀘𑀸𑀭𑁂𑀦𑀸𑀢𑀺 ‘‘𑀅𑀳𑀁 𑀲𑀫𑀡𑁄’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀲𑀜𑁆𑀜𑀸𑀲𑀫𑀼𑀝𑁆𑀞𑀺𑀢𑁂𑀦 𑀲𑀫𑀼𑀤𑀸𑀘𑀸𑀭𑁂𑀦, 𑀢𑀦𑁆𑀦𑀺𑀫𑀺𑀢𑁆𑀢𑁂𑀦 𑀯𑀸 𑀢𑀩𑁆𑀩𑁄𑀳𑀸𑀭𑁂𑀦. 𑀧𑀼𑀩𑁆𑀩𑀬𑁄𑀕𑁂𑀢𑀺 𑀧𑀼𑀩𑁆𑀩𑀬𑁄𑀕𑀓𑀣𑀸𑀬𑀁. 𑀧𑀧𑀜𑁆𑀘𑁄 𑀏𑀲𑀸𑀢𑀺 𑀏𑀲𑁄 𑀢𑀼𑀫𑁆𑀳𑁂𑀲𑀼 𑀆𑀕𑀢𑁂𑀲𑀼 𑀬𑀣𑀸𑀧𑀯𑀢𑁆𑀢𑁄 𑀧𑀝𑀺𑀲𑀦𑁆𑀣𑀸𑀭𑁄 𑀓𑀣𑀸𑀲𑀫𑀼𑀤𑀸𑀘𑀸𑀭𑁄 𑀘 𑀅𑀫𑁆𑀳𑀸𑀓𑀁 𑀧𑀧𑀜𑁆𑀘𑁄. 𑀏𑀢𑁆𑀢𑀓𑀫𑁆𑀧𑀺 𑀅𑀓𑀢𑁆𑀯𑀸 𑀲𑀫𑀡𑀥𑀫𑁆𑀫𑀫𑁂𑀯 𑀓𑀭𑁄𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀭𑀺𑀬𑀪𑀽𑀫𑀺𑀁 𑀧𑀢𑁆𑀢𑁄𑀢𑀺 𑀅𑀦𑀸𑀕𑀸𑀫𑀺𑀨𑀮𑀁 𑀅𑀥𑀺𑀕𑀢𑁄. 𑀧𑀓𑁆𑀓𑀼𑀲𑀸𑀢𑀺𑀓𑀼𑀮𑀧𑀼𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀯𑀺𑀪𑀚𑀺𑀢𑁆𑀯𑀸𑀢𑀺 𑀯𑀺𑀪𑀸𑀕𑀁 𑀓𑀢𑁆𑀯𑀸. 𑀢𑀼𑀭𑀺𑀢𑀸𑀮𑀧𑀦𑀯𑀲𑁂𑀦𑀸𑀢𑀺 𑀢𑀼𑀭𑀺𑀢𑀁 𑀆𑀮𑀧𑀦𑀯𑀲𑁂𑀦. 𑀢𑁂𑀦 𑀤𑀼𑀮𑁆𑀮𑀪𑁄 𑀅𑀬𑀁 𑀲𑀫𑀡𑁄, 𑀢𑀲𑁆𑀫𑀸 𑀲𑀻𑀖𑀫𑀲𑁆𑀲 𑀧𑀜𑁆𑀳𑁄 𑀓𑀣𑁂𑀢𑀩𑁆𑀩𑁄, 𑀇𑀫𑀺𑀦𑀸 𑀘 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀢𑀼𑀭𑀺𑀢𑀁 𑀆𑀮𑀧𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀬𑀣𑀸 𑀯𑀸’’𑀢𑀺𑀆𑀤𑀺𑀦𑀸 𑀧𑀦 𑀯𑀘𑀦𑀸𑀮𑀗𑁆𑀓𑀸𑀭𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀆𑀮𑀧𑀢𑀺. 𑀏𑀯𑀫𑀸𑀳𑀸𑀢𑀺 ‘‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀽’’𑀢𑀺 𑀏𑀯𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀅𑀯𑁄𑀘.

𑀯𑀫𑁆𑀫𑀺𑀓𑀧𑀭𑀺𑀬𑀸𑀬𑁂𑀦 𑀓𑀭𑀚𑀓𑀸𑀬𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀻 𑀤𑁂𑀯𑀢𑀸 ‘‘𑀅𑀬𑀁 𑀯𑀫𑁆𑀫𑀺𑀓𑁄’’𑀢𑀺 𑀆𑀳. 𑀢𑀸𑀬 𑀧𑀦 𑀪𑀸𑀯𑀢𑁆𑀣𑀲𑁆𑀲 𑀅𑀪𑀸𑀲𑀺𑀢𑀢𑁆𑀢𑀸 𑀲𑀤𑁆𑀤𑀢𑁆𑀣𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀼𑀭𑀢𑁄 𑀞𑀺𑀢𑀁…𑀧𑁂… 𑀅𑀬𑀦𑁆𑀢𑀺 𑀆𑀳𑀸’’𑀢𑀺 𑀅𑀯𑁄𑀘. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀡𑁆𑀟𑀽𑀓𑀦𑁆𑀢𑀺 𑀣𑀮𑀫𑀡𑁆𑀟𑀽𑀓𑀁. 𑀲𑁄 𑀳𑀺 𑀉𑀤𑁆𑀥𑀼𑀫𑀸𑀬𑀺𑀓𑀸𑀢𑀺 𑀯𑀼𑀘𑁆𑀘𑀢𑀺, 𑀦 𑀉𑀤𑀓𑀫𑀡𑁆𑀟𑀽𑀓𑁄. 𑀢𑀲𑁆𑀲 𑀦𑀺𑀯𑀸𑀲𑀢𑁄 𑀯𑀸𑀢𑁄 𑀫𑀸 𑀔𑁄 𑀩𑀸𑀥𑀬𑀺𑀢𑁆𑀣𑀸𑀢𑀺 ‘‘𑀉𑀧𑀭𑀺𑀯𑀸𑀢𑀢𑁄 𑀅𑀧𑀕𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀧𑀦𑀸𑀬𑀁 𑀤𑁂𑀯𑀢𑀸 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀇𑀫𑁂 𑀧𑀜𑁆𑀳𑁂 𑀣𑁂𑀭𑀲𑁆𑀲 𑀆𑀘𑀺𑀓𑁆𑀔𑀻𑀢𑀺? 𑀓𑁂𑀘𑀺 𑀢𑀸𑀯 𑀆𑀳𑀼 𑁋 𑀬𑀣𑀸𑀲𑀼𑀢𑀫𑀢𑁆𑀣𑀁 𑀉𑀧𑀫𑀸𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑁂𑀦 𑀉𑀧𑀫𑁂𑀬𑁆𑀬𑀢𑁆𑀣𑀁 𑀫𑀦𑀲𑀸 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀪𑀕𑀯𑀸𑀯 𑀇𑀫𑀲𑁆𑀲 𑀆𑀘𑀺𑀓𑁆𑀔𑀺𑀲𑁆𑀲𑀢𑀺. 𑀲𑀸 𑀘 𑀤𑁂𑀲𑀦𑀸 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀻𑀢𑀺 ‘‘𑀅𑀬𑀁 𑀯𑀫𑁆𑀫𑀺𑀓𑁄’’𑀢𑀺𑀆𑀤𑀺𑀦𑀸 𑀉𑀧𑀫𑀸𑀯𑀲𑁂𑀦𑁂𑀯 𑀧𑀦𑁆𑀦𑀭𑀲 𑀧𑀜𑁆𑀳𑁂 𑀣𑁂𑀭𑀲𑁆𑀲 𑀆𑀘𑀺𑀓𑁆𑀔𑀺. 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀏𑀓𑁄 𑀲𑁂𑀝𑁆𑀞𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀦𑁆𑀢𑀁 𑀦𑀺𑀥𑀸𑀦𑀁 𑀦𑀺𑀤𑀳𑀺𑀢𑁆𑀯𑀸 𑀧𑀮𑀺𑀖𑀸𑀤𑀺𑀆𑀓𑀸𑀭𑀸𑀦𑀺 𑀓𑀸𑀦𑀺𑀘𑀺𑀧𑀺 𑀮𑀗𑁆𑀕𑀸𑀦𑀺 𑀢𑀢𑁆𑀣 𑀞𑀧𑁂𑀲𑀺. 𑀲𑁄 𑀫𑀭𑀡𑀓𑀸𑀮𑁂 𑀅𑀢𑁆𑀢𑀦𑁄 𑀲𑀳𑀸𑀬𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀭𑁄𑀘𑁂𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀫𑀬𑀸 𑀦𑀺𑀥𑀸𑀦𑀁 𑀦𑀺𑀤𑀳𑀺𑀢𑀁, 𑀢𑀁 𑀫𑀫 𑀧𑀼𑀢𑁆𑀢𑀲𑁆𑀲 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀲𑁆𑀲 𑀤𑀲𑁆𑀲𑁂𑀢𑀻’’𑀢𑀺 𑀯𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀳𑀸𑀬𑀓𑀧𑀼𑀢𑁆𑀢𑀲𑁆𑀲 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀓𑀸𑀮𑁂 𑀢𑀁 𑀞𑀸𑀦𑀁 𑀤𑀲𑁆𑀲𑁂𑀲𑀺. 𑀲𑁄 𑀦𑀺𑀔𑀦𑀺𑀢𑁆𑀯𑀸 𑀲𑀩𑁆𑀩𑀧𑀘𑁆𑀙𑀸 𑀦𑀸𑀕𑀁 𑀧𑀲𑁆𑀲𑀺, 𑀦𑀸𑀕𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀲𑀼𑀔𑁂𑀦𑁂𑀯 𑀥𑀦𑀁 𑀕𑀡𑁆𑀳𑀢𑀽’’𑀢𑀺 𑀅𑀧𑀕𑀘𑁆𑀙𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀢𑀤𑀸 𑀮𑁄𑀓𑁂 𑀧𑀸𑀓𑀝𑁄 𑀚𑀸𑀢𑁄. 𑀅𑀬𑀁 𑀧𑀦 𑀤𑁂𑀯𑀢𑀸 𑀢𑀤𑀸 𑀩𑀸𑀭𑀸𑀡𑀲𑀺𑀬𑀁 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀉𑀭𑀁 𑀤𑀢𑁆𑀯𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀧𑀜𑁆𑀘𑀳𑀺 𑀲𑀳𑀸𑀬𑀓𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀫𑀡𑀥𑀫𑁆𑀫𑀫𑀓𑀸𑀲𑀺. 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀜𑁆𑀘 𑀪𑀺𑀓𑁆𑀔𑀽 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸’’𑀢𑀺𑀆𑀤𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀣𑀸𑀲𑀼𑀢𑀫𑀢𑁆𑀣𑀁 𑀉𑀧𑀫𑀸𑀪𑀸𑀯𑁂𑀦 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺. 𑀅𑀧𑀭𑁂 𑀧𑀦 ‘‘𑀤𑁂𑀯𑀢𑀸 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑁂𑀦 𑀇𑀫𑁂 𑀧𑀜𑁆𑀳𑁂 𑀏𑀯𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀆𑀘𑀺𑀓𑁆𑀔𑀻’’𑀢𑀺 𑀯𑀤𑀦𑁆𑀢𑀺. 𑀤𑁂𑀯𑀧𑀼𑀢𑁆𑀢𑁂 𑀦𑀺𑀲𑁆𑀲𑀓𑁆𑀓𑀁 𑀤𑁂𑀯𑀧𑀼𑀢𑁆𑀢𑀧𑀜𑁆𑀳𑀢𑁆𑀢𑀸 𑀢𑀲𑁆𑀲 𑀅𑀢𑁆𑀣𑀲𑁆𑀲.

𑁨𑁫𑁧. 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑁄𑀢𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄. 𑀢𑁂𑀦𑀸𑀳 ‘‘𑀘𑀢𑀼𑀫𑀳𑀸𑀪𑀽𑀢𑀫𑀬𑀲𑁆𑀲𑀸’’𑀢𑀺. 𑀯𑀫𑀢𑀺 𑀉𑀕𑁆𑀕𑀺𑀭𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑀦𑁆𑀢𑀓𑁄𑀢𑀺 𑀉𑀘𑁆𑀙𑀟𑁆𑀟𑀓𑁄. 𑀯𑀦𑁆𑀢𑀼𑀲𑁆𑀲𑀬𑁄𑀢𑀺 𑀉𑀧𑀘𑀺𑀓𑀸𑀳𑀺 𑀯𑀦𑁆𑀢𑀲𑁆𑀲 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀲𑁆𑀲 𑀉𑀲𑁆𑀲𑀬𑀪𑀽𑀢𑁄. 𑀯𑀦𑁆𑀢𑀲𑀺𑀦𑁂𑀳𑀲𑀫𑁆𑀩𑀤𑁆𑀥𑁄𑀢𑀺 𑀯𑀦𑁆𑀢𑁂𑀦 𑀔𑁂𑀴𑀲𑀺𑀦𑁂𑀳𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑁄. 𑀅𑀲𑀼𑀘𑀺𑀓𑀮𑀺𑀫𑀮𑀁 𑀯𑀫𑀢𑀻𑀢𑀺 𑀏𑀢𑁆𑀣 𑀫𑀼𑀔𑀸𑀤𑀻𑀳𑀺 𑀧𑀸𑀡𑀓𑀸𑀦𑀁 𑀦𑀺𑀕𑁆𑀕𑀫𑀦𑀢𑁄 𑀧𑀸𑀡𑀓𑁂 𑀯𑀫𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀮𑀩𑁆𑀪𑀢𑁂𑀯. 𑀅𑀭𑀺𑀬𑁂𑀳𑀺 𑀯𑀦𑁆𑀢𑀓𑁄𑀢𑀺 𑀓𑀸𑀬𑀪𑀸𑀯𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀜𑁆𑀜𑀸𑀬 𑀯𑀸 𑀲𑀩𑁆𑀩𑀲𑁆𑀲𑀧𑀺 𑀢𑁂𑀪𑀽𑀫𑀓𑀥𑀫𑁆𑀫𑀚𑀸𑀢𑀲𑁆𑀲 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀲𑀩𑁆𑀩𑁄𑀧𑀺 𑀓𑀸𑀬𑁄 𑀅𑀭𑀺𑀬𑁂𑀳𑀺 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀯𑀦𑁆𑀢𑁄 𑀏𑀯. 𑀢𑀁 𑀲𑀩𑁆𑀩𑀦𑁆𑀢𑀺 𑀬𑁂𑀳𑀺 𑀢𑀻𑀳𑀺 𑀅𑀝𑁆𑀞𑀺𑀲𑀢𑁂𑀳𑀺 𑀉𑀲𑁆𑀲𑀺𑀢𑁄, 𑀬𑁂𑀳𑀺 𑀦𑁆𑀳𑀸𑀭𑀽𑀳𑀺 𑀲𑀫𑁆𑀩𑀤𑁆𑀥𑁄, 𑀬𑁂𑀳𑀺 𑀫𑀁𑀲𑁂𑀳𑀺 𑀅𑀯𑀮𑀺𑀢𑁆𑀢𑁄, 𑀬𑁂𑀦 𑀅𑀮𑁆𑀮𑀘𑀫𑁆𑀫𑁂𑀦 𑀧𑀭𑀺𑀬𑁄𑀦𑀤𑁆𑀥𑁄, 𑀬𑀸𑀬 𑀙𑀯𑀺𑀬𑀸 𑀭𑀜𑁆𑀚𑀺𑀢𑁄, 𑀢𑀁 𑀅𑀝𑁆𑀞𑀺𑀆𑀤𑀺𑀲𑀩𑁆𑀩𑀁 𑀅𑀘𑁆𑀘𑀦𑁆𑀢𑀫𑁂𑀯 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀯𑀺𑀭𑀢𑁆𑀢𑀢𑀸𑀬𑀯𑀦𑁆𑀢𑀫𑁂𑀯. ‘‘𑀬𑀣𑀸 𑀘𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄𑀧𑀫𑀢𑁄𑀧𑀺 𑀯𑀫𑁆𑀫𑀺𑀓𑁄 𑀯𑀺𑀬 𑀯𑀫𑁆𑀫𑀺𑀓𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀲𑀫𑁆𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑁆𑀪𑀯𑁄, 𑀫𑀸𑀢𑀸𑀧𑁂𑀢𑁆𑀢𑀺𑀓𑁄 𑀲𑀫𑁆𑀪𑀯𑁄 𑀏𑀢𑀲𑁆𑀲𑀸𑀢𑀺 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄. 𑀢𑀲𑁆𑀲. 𑀉𑀧𑀘𑀺𑀬𑀢𑀺 𑀏𑀢𑁂𑀦𑀸𑀢𑀺 𑀉𑀧𑀘𑀬𑁄’ 𑀑𑀤𑀦𑀓𑀼𑀫𑁆𑀫𑀸𑀲𑀁 𑀉𑀧𑀘𑀬𑁄 𑀏𑀢𑀲𑁆𑀲𑀸𑀢𑀺 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑁄. 𑀢𑀲𑁆𑀲. 𑀅𑀥𑀼𑀯𑀲𑀪𑀸𑀯𑀢𑀸𑀬 𑀅𑀦𑀺𑀘𑁆𑀘𑀥𑀫𑁆𑀫𑀲𑁆𑀲, 𑀲𑁂𑀤𑀕𑀽𑀣-𑀧𑀺𑀢𑁆𑀢-𑀲𑁂𑀫𑁆𑀳𑀸𑀤𑀺-𑀥𑀸𑀢𑀼𑀓𑁆𑀔𑁄𑀪-𑀕𑀭𑀼𑀪𑀸𑀯𑀤𑀼𑀕𑁆𑀕𑀦𑁆𑀥𑀸𑀦𑀁 𑀯𑀺𑀦𑁄𑀤𑀦𑀸𑀬 𑀉𑀘𑁆𑀙𑀸𑀤𑁂𑀢𑀩𑁆𑀩𑀥𑀫𑁆𑀫𑀲𑁆𑀲, 𑀧𑀭𑀺𑀢𑁄 𑀲𑀫𑁆𑀩𑀸𑀳𑀦𑁂𑀦 𑀧𑀭𑀺𑀫𑀤𑁆𑀤𑀺𑀢𑀩𑁆𑀩𑀥𑀫𑁆𑀫𑀲𑁆𑀲, 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀲𑀪𑀸𑀯𑀢𑀸𑀬 𑀪𑁂𑀤𑀦𑀥𑀫𑁆𑀫𑀲𑁆𑀲, 𑀢𑀢𑁄 𑀏𑀯 𑀯𑀺𑀓𑀺𑀭𑀡𑀲𑀪𑀸𑀯𑀢𑀸𑀬 𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀲𑁆𑀲𑀸𑀢𑀺 𑀥𑀫𑁆𑀫-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀦𑀼𑀯𑀺𑀮𑁂𑀧𑀦𑁂𑀦𑀸𑀢𑀺 𑀓𑀸𑀬𑀸𑀯𑀮𑁂𑀧𑀦𑁂𑀦 𑀉𑀘𑁆𑀙𑀸𑀤𑀦𑀯𑀺𑀮𑁂𑀧𑀦𑁂𑀦. 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀩𑀸𑀥𑀯𑀺𑀦𑁄𑀤𑀦𑀢𑁆𑀣𑀸𑀬𑀸𑀢𑀺 𑀢𑀸𑀤𑀺𑀲𑀲𑀫𑀼𑀝𑁆𑀞𑀸𑀦-𑀲𑀭𑀻𑀭𑀯𑀺𑀓𑀸𑀭𑀯𑀺𑀕𑀫𑀸𑀬. 𑀬𑀲𑁆𑀫𑀸 𑀲𑀼𑀓𑁆𑀓𑀲𑁄𑀡𑀺𑀢𑀁 𑀆𑀳𑀸𑀭𑁄, 𑀉𑀘𑁆𑀙𑀸𑀤𑀦𑀁 𑀧𑀭𑀺𑀫𑀤𑁆𑀤𑀦𑀜𑁆𑀘 𑀬𑀣𑀸𑀭𑀳𑀁 𑀉𑀧𑁆𑀧𑀸𑀤𑀲𑁆𑀲, 𑀯𑀼𑀟𑁆𑀠𑀺𑀬𑀸 𑀘 𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀆𑀳 ‘‘𑀫𑀸𑀢𑀸𑀧𑁂𑀢𑁆𑀢𑀺𑀓…𑀧𑁂… 𑀓𑀣𑀺𑀢𑁄’’𑀢𑀺. 𑀉𑀘𑁆𑀘𑀸𑀯𑀘𑀪𑀸𑀯𑁄𑀢𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑁄 𑁋 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬-𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀕𑁆𑀕𑀳𑀡𑁂𑀳𑀺 𑀉𑀘𑁆𑀘𑀪𑀸𑀯𑁄, 𑀯𑀟𑁆𑀠𑀻. 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀕𑁆𑀕𑀳𑀡𑁂𑀦 𑀲𑀫𑀼𑀤𑀬𑁄. 𑀇𑀢𑀭𑁂𑀳𑀺 𑀅𑀯𑀘𑀪𑀸𑀯𑁄, 𑀧𑀭𑀺𑀳𑀸𑀦𑀺, 𑀅𑀢𑁆𑀣𑀗𑁆𑀕𑀫𑁄 𑀧𑀓𑀸𑀲𑀺𑀢𑁄. 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑀡𑁆𑀞𑀧𑀦𑀫𑁆𑀧𑀺 𑀳𑀺 𑀯𑀝𑁆𑀝𑀧𑀘𑁆𑀘𑀬𑀢𑁆𑀢𑀸 𑀯𑀝𑁆𑀝𑀦𑁆𑀢𑀺.

𑀓𑁄𑀥𑁄 𑀥𑀽𑀫𑁄𑀢𑀺 𑀏𑀢𑁆𑀣 𑀥𑀽𑀫𑀧𑀭𑀺𑀬𑀸𑀬𑁂𑀦 𑀓𑁄𑀥𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀥𑀽𑀫-𑀲𑀤𑁆𑀤𑁄 𑀓𑁄𑀥𑁂 𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀥𑀽𑀫𑁄 𑀯𑀺𑀬 𑀥𑀽𑀫𑁄’’𑀢𑀺. 𑀪𑀲𑁆𑀫𑀦𑀻𑀢𑀺 𑀪𑀲𑁆𑀫𑀁. 𑀫𑁄𑀲𑀯𑀚𑁆𑀚𑀦𑁆𑀢𑀺 𑀫𑀼𑀲𑀸𑀯𑀸𑀤𑁄. 𑀥𑀽𑀫𑁄 𑀏𑀯 𑀥𑀽𑀫𑀸𑀬𑀺𑀢𑀁. 𑀇𑀘𑁆𑀙𑀸 𑀥𑀽𑀫𑀸𑀬𑀺𑀢𑀁 𑀏𑀢𑀺𑀲𑁆𑀲𑀸𑀢𑀺 𑀇𑀘𑁆𑀙𑀸𑀥𑀽𑀫𑀸𑀬𑀺𑀢𑀸, 𑀧𑀚𑀸. 𑀇𑀘𑁆𑀙𑀸𑀥𑀽𑀫𑀸𑀬𑀺𑀢𑀲𑀤𑁆𑀤𑀲𑁆𑀲 𑀢𑀡𑁆𑀳𑀸𑀬 𑀯𑀼𑀢𑁆𑀢𑀺 𑀯𑀼𑀢𑁆𑀢𑀦𑀬𑁄 𑀏𑀯. 𑀥𑀽𑀫𑀸𑀬𑀦𑁆𑀢𑁄𑀢𑀺 𑀯𑀺𑀢𑀓𑁆𑀓𑀲𑀦𑁆𑀢𑀸𑀧𑁂𑀦 𑀲𑀁𑀢𑀧𑁆𑀧𑁂𑀦𑁆𑀢𑁄, 𑀯𑀺𑀢𑀓𑁆𑀓𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀧𑀮𑀺𑀧𑁄𑀢𑀺 𑀤𑀼𑀓𑁆𑀓𑀭𑀫𑀳𑀸𑀓𑀤𑁆𑀤𑀫𑀁. 𑀢𑀺𑀫𑀽𑀮𑀦𑁆𑀢𑀺 𑀢𑀻𑀳𑀺 𑀫𑀽𑀮𑁂𑀳𑀺 𑀧𑀢𑀺𑀝𑁆𑀞𑀺𑀢𑀁 𑀯𑀺𑀬 𑀅𑀘𑀮𑀁 𑀧𑀯𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀭𑀚𑁄 𑀘 𑀥𑀽𑀫𑁄 𑀘 𑀫𑀬𑀸 𑀧𑀓𑀸𑀲𑀺𑀢𑀸𑀢𑀺 𑀭𑀚𑀲𑀪𑀸𑀯𑀓𑀭𑀡𑀝𑁆𑀞𑁂𑀦 ‘‘𑀭𑀚𑁄’’𑀢𑀺 𑀘 𑀥𑀽𑀫𑀲𑀪𑀸𑀯𑀓𑀭𑀡𑀝𑁆𑀞𑁂𑀦 ‘‘𑀥𑀽𑀫𑁄’’𑀢𑀺 𑀘 𑀫𑀬𑀸 𑀧𑀓𑀸𑀲𑀺𑀢𑀸. 𑀧𑀓𑀢𑀺𑀥𑀽𑀫𑁄 𑀯𑀺𑀬 𑀅𑀕𑁆𑀕𑀺𑀲𑁆𑀲 𑀓𑀺𑀮𑁂𑀲𑀕𑁆𑀕𑀺𑀚𑀸𑀮𑀲𑁆𑀲 𑀧𑀜𑁆𑀜𑀸𑀡𑀪𑀸𑀯𑀢𑁄. 𑀥𑀫𑁆𑀫𑀤𑁂𑀲𑀦𑀸𑀥𑀽𑀫𑁄 𑀜𑀸𑀡𑀕𑁆𑀕𑀺𑀲𑀦𑁆𑀥𑀻𑀧𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑀢𑁄. 𑀅𑀬𑀁 𑀭𑀢𑁆𑀢𑀺𑀁 𑀥𑀽𑀫𑀸𑀬𑀦𑀸𑀢𑀺 𑀬𑀸 𑀤𑀺𑀯𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀦𑁆𑀢𑁂 𑀉𑀤𑁆𑀤𑀺𑀲𑁆𑀲 𑀭𑀢𑁆𑀢𑀺𑀬𑀁 𑀅𑀦𑀼𑀯𑀺𑀢𑀓𑁆𑀓𑀦𑀸, 𑀅𑀬𑀁 𑀭𑀢𑁆𑀢𑀺𑀁 𑀥𑀽𑀫𑀸𑀬𑀦𑀸.

𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀇𑀤𑀁 𑀲𑀼𑀢𑁆𑀢𑁂 (𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁮) 𑀆𑀕𑀢𑀦𑀬𑁂𑀦 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀜𑁆𑀘 𑀢𑀣𑀸 𑀆𑀭𑀸𑀥𑀦𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦. 𑀢𑀤𑁂𑀓𑀝𑁆𑀞𑀢𑀸𑀬 𑀯𑀸 𑀢𑀤𑀜𑁆𑀜𑀓𑀺𑀮𑁂𑀲𑀸𑀦𑀁. 𑀲𑀼𑀦𑁆𑀤𑀭𑀧𑀜𑁆𑀜𑁄𑀢𑀺 𑀜𑀸𑀢𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀧𑀜𑁆𑀜𑀸𑀬 𑀲𑀼𑀦𑁆𑀤𑀭𑀧𑀜𑁆𑀜𑁄.

𑀏𑀢𑀦𑁆𑀢𑀺 ‘‘𑀲𑀢𑁆𑀣’’𑀦𑁆𑀢𑀺 𑀏𑀢𑀁 𑀅𑀥𑀺𑀯𑀘𑀦𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀲𑀲𑀦𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄. 𑀦𑁆𑀢𑀺 𑀯𑀻𑀭𑀺𑀬𑀁. 𑀧𑀜𑁆𑀜𑀸𑀕𑀢𑀺𑀓𑀫𑁂𑀯 𑀧𑀜𑁆𑀜𑀸𑀬 𑀳𑀺𑀢𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀮𑁄𑀓𑀺𑀬𑀸𑀬 𑀧𑀜𑁆𑀜𑀸𑀬 𑀆𑀭𑀫𑁆𑀪𑀓𑀸𑀮𑁂 𑀮𑁄𑀓𑀺𑀬𑀯𑀻𑀭𑀺𑀬𑀁 𑀕𑀳𑁂𑀢𑀩𑁆𑀩𑀁, 𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀧𑀯𑀢𑁆𑀢𑀺𑀓𑁆𑀔𑀡𑁂 𑀮𑁄𑀓𑀼𑀢𑁆𑀢𑀭𑀯𑀻𑀭𑀺𑀬𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸. 𑀅𑀢𑁆𑀣𑀤𑀻𑀧𑀦𑀸𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑀤𑀻𑀧𑀦𑀻 𑀉𑀧𑀫𑀸.

𑀕𑀸𑀫𑀢𑁄𑀢𑀺 𑀅𑀢𑁆𑀢𑀦𑁄 𑀯𑀲𑀦𑀕𑀸𑀫𑀢𑁄. 𑀫𑀦𑁆𑀢𑁂𑀢𑀺 𑀆𑀣𑀩𑁆𑀩𑀦𑀫𑀦𑁆𑀢𑁂. 𑀢𑁂 𑀳𑀺 𑀩𑁆𑀭𑀸𑀳𑁆𑀫𑀡𑀸 𑀅𑀭𑀜𑁆𑀜𑁂 𑀏𑀯 𑀯𑀸𑀘𑁂𑀦𑁆𑀢𑀺 ‘‘𑀫𑀸 𑀅𑀜𑁆𑀜𑁂 𑀅𑀲𑁆𑀲𑁄𑀲𑀼’’𑀦𑁆𑀢𑀺. 𑀢𑀣𑀸 𑀅𑀓𑀸𑀲𑀻𑀢𑀺 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. 𑀏𑀯𑀫𑁂𑀢𑁆𑀣 𑀯𑀫𑁆𑀫𑀺𑀓𑀧𑀜𑁆𑀳𑀲𑁆𑀲𑁂𑀯 𑀯𑀲𑁂𑀦 𑀉𑀧𑀫𑀸 𑀆𑀕𑀢𑀸, 𑀲𑁂𑀲𑀸𑀦𑀁 𑀯𑀲𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀮𑀗𑁆𑀕𑀦𑀝𑁆𑀞𑁂𑀦 𑀦𑀺𑀯𑀸𑀭𑀡𑀝𑁆𑀞𑁂𑀦 𑀮𑀗𑁆𑀕𑀻, 𑀧𑀮𑀺𑀖𑁄. 𑀜𑀸𑀡𑀫𑀼𑀔𑁂𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀯𑀻𑀣𑀺𑀬𑀁. 𑀧𑀢𑀢𑀻𑀢𑀺 𑀧𑀯𑀢𑁆𑀢𑀢𑀺. 𑀓𑀫𑁆𑀫𑀝𑁆𑀞𑀸𑀦𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦𑀸𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀕𑁆𑀕𑀡𑁆𑀳𑀦𑁂𑀦 𑀢𑀲𑁆𑀲 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀘𑁂𑀯 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢-𑀅𑀢𑁆𑀣𑀯𑀺𑀦𑀺𑀘𑁆𑀙𑀬-𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀘. 𑀲𑀩𑁆𑀩𑀲𑁄 𑀜𑀸𑀢𑀼𑀁 𑀇𑀘𑁆𑀙𑀸 𑀳𑀺 𑀧𑀭𑀺𑀧𑀼𑀘𑁆𑀙𑀸. 𑀯𑀺𑀧𑀲𑁆𑀲𑀦𑀸 𑀘 𑀅𑀦𑀺𑀘𑁆𑀘𑀸𑀤𑀺𑀢𑁄 𑀲𑀩𑁆𑀩𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀜𑀸𑀢𑀼𑀁 𑀇𑀘𑁆𑀙𑀢𑀺. 𑀏𑀯𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀯𑀺𑀚𑁆𑀚𑀸𑀧𑀳𑀸𑀦𑀫𑀸𑀳, 𑀉𑀧𑀭𑀺𑀓𑀢𑁆𑀢𑀩𑁆𑀩𑀲𑀩𑁆𑀪𑀸𑀯𑀢𑁄 𑀦 𑀢𑀸𑀯 𑀫𑀕𑁆𑀕𑀯𑀲𑁂𑀦.

𑀯𑀮𑁆𑀮𑀺𑀅𑀦𑁆𑀢𑀭𑁂 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀧𑀁𑀲𑀼𑀅𑀦𑁆𑀢𑀭𑁂 𑀯𑀸 𑀫𑀢𑁆𑀢𑀺𑀓𑀦𑁆𑀢𑀭𑁂 𑀯𑀸𑀢𑀺 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁄. 𑀘𑀺𑀢𑁆𑀢𑀸𑀯𑀺𑀮𑀫𑀢𑁆𑀢𑀓𑁄𑀯𑀸𑀢𑀺 𑀘𑀺𑀢𑁆𑀢𑀓𑁆𑀔𑁄𑀪𑀫𑀢𑁆𑀢𑀓𑁄𑀯. 𑀅𑀦𑀺𑀕𑁆𑀕𑀳𑀺𑀢𑁄𑀢𑀺 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀅𑀦𑀺𑀯𑀸𑀭𑀺𑀢𑁄. 𑀫𑀼𑀔𑀯𑀺𑀓𑀼𑀮𑀦𑀁 𑀫𑀼𑀔𑀲𑀗𑁆𑀓𑁄𑀘𑁄. 𑀳𑀦𑀼𑀲𑀜𑁆𑀘𑁄𑀧𑀦𑀁 𑀧𑀸𑀧𑁂𑀢𑀺 𑀅𑀦𑁆𑀢𑁄𑀚𑀧𑁆𑀧𑀦𑀸𑀯𑀢𑁆𑀣𑀸𑀬𑀁. 𑀤𑀺𑀲𑀸 𑀯𑀺𑀮𑁄𑀓𑀦𑀁 𑀧𑀸𑀧𑁂𑀢𑀺 𑀬𑀢𑁆𑀣 𑀩𑀸𑀥𑁂𑀢𑀩𑁆𑀩𑁄 𑀞𑀺𑀢𑁄, 𑀢𑀁𑀤𑀲𑁆𑀲𑀦𑀢𑁆𑀣𑀁 𑀦𑀺𑀯𑀸𑀭𑀓𑀧𑀭𑀺𑀯𑀸𑀭𑀡𑀢𑁆𑀣𑀁. 𑀤𑀡𑁆𑀟𑀲𑀢𑁆𑀣𑀸𑀪𑀺𑀦𑀺𑀧𑀸𑀢𑀦𑁆𑀢𑀺 𑀤𑀡𑁆𑀟𑀲𑀢𑁆𑀣𑀸𑀦𑀁 𑀧𑀭𑀲𑁆𑀲 𑀉𑀧𑀭𑀺 𑀦𑀺𑀧𑀸𑀢𑀦𑀸𑀯𑀢𑁆𑀣𑀁. 𑀬𑁂𑀦 𑀓𑁄𑀥𑁂𑀦 𑀅𑀦𑀺𑀕𑁆𑀕𑀳𑀺𑀢𑁂𑀦 𑀫𑀸𑀢𑀸𑀤𑀺𑀓𑀁 𑀅𑀖𑀸𑀢𑁂𑀢𑀩𑁆𑀩𑀁 𑀉𑀕𑁆𑀖𑀸𑀢𑁂𑀢𑁆𑀯𑀸 ‘‘𑀅𑀬𑀼𑀢𑁆𑀢𑀁 𑀯𑀢 𑀫𑀬𑀸 𑀓𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀫𑁆𑀧𑀺 𑀳𑀦𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀧𑀭𑀖𑀸𑀢𑀦𑀫𑁆𑀧𑀺 𑀅𑀢𑁆𑀢𑀖𑀸𑀢𑀦𑀫𑁆𑀧𑀺 𑀧𑀸𑀧𑁂𑀢𑀻’’𑀢𑀺. 𑀬𑁂𑀦 𑀯𑀸 𑀧𑀭𑀲𑁆𑀲 𑀳𑀜𑁆𑀜𑀫𑀸𑀦𑀲𑁆𑀲 𑀯𑀲𑁂𑀦 𑀖𑀸𑀢𑀓𑁄𑀧𑀺 𑀖𑀸𑀢𑀦𑀁 𑀧𑀸𑀧𑀼𑀡𑀸𑀢𑀺, 𑀢𑀸𑀤𑀺𑀲𑀲𑁆𑀲 𑀯𑀲𑁂𑀦𑀸𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁄𑀥𑀲𑀸𑀫𑀜𑁆𑀜𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁 ‘‘𑀧𑀭𑀁 𑀖𑀸𑀢𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀖𑀸𑀢𑁂𑀢𑀻’’𑀢𑀺. 𑀧𑀭𑀫𑀼𑀲𑁆𑀲𑀤𑀕𑀢𑁄𑀢𑀺 𑀧𑀭𑀫𑀼𑀓𑁆𑀓𑀁𑀲𑀕𑀢𑁄. 𑀤𑀴𑁆𑀳𑀁 𑀧𑀭𑀺𑀲𑁆𑀲𑀬𑀫𑀸𑀯𑀳𑀢𑀸𑀬 𑀓𑁄𑀥𑁄𑀯 𑀓𑁄𑀥𑀽𑀧𑀸𑀬𑀸𑀲𑁄. 𑀢𑁂𑀦𑀸𑀳 ‘‘𑀩𑀮𑀯𑀧𑁆𑀧𑀢𑁆𑀢𑁄’’𑀢𑀺𑀆𑀤𑀺.

𑀤𑁆𑀯𑁂𑀥𑀸𑀧𑀣𑀲𑀫𑀸 𑀳𑁄𑀢𑀺 𑀅𑀧𑁆𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄.

𑀓𑀼𑀲𑀮𑀥𑀫𑁆𑀫𑁄 𑀦 𑀢𑀺𑀝𑁆𑀞𑀢𑀺 𑀦𑀻𑀯𑀭𑀡𑁂𑀳𑀺 𑀦𑀺𑀯𑀸𑀭𑀺𑀢𑀧𑀭𑀫𑀢𑁆𑀢𑀸. 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑀁 𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀢𑁄 𑀧𑀞𑀫𑀁 𑀲𑀫𑀣𑁂𑀦 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀁 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸 𑀧𑀦 𑀢𑀤𑀗𑁆𑀕𑀯𑀲𑁂𑀦𑁂𑀯 𑀢𑀸𑀦𑀺 𑀦𑀻𑀳𑀭𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀯𑀲𑁂𑀦𑀸’’𑀢𑀺.

‘‘𑀓𑀼𑀫𑁆𑀫𑁄𑀯 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁭) 𑀓𑀼𑀫𑁆𑀫𑀲𑁆𑀲 𑀅𑀗𑁆𑀕𑀪𑀸𑀯𑁂𑀦 𑀯𑀺𑀲𑁂𑀲𑀢𑁄 𑀧𑀸𑀤𑀲𑀻𑀲𑀸𑀦𑀺 𑀏𑀯 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀧𑀜𑁆𑀘𑁂𑀯 𑀅𑀗𑁆𑀕𑀸𑀦𑀺 𑀳𑁄𑀦𑁆𑀢𑀻’’𑀢𑀺. 𑀯𑀺𑀧𑀲𑁆𑀲𑀦𑀸𑀘𑀸𑀭𑀲𑁆𑀲 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀅𑀥𑀺𑀓𑀸𑀭𑀢𑁄 𑀲𑀫𑁆𑀫𑀲𑀦𑀻𑀬𑀸𑀦𑀫𑁂𑀯 𑀥𑀫𑁆𑀫𑀸𑀦𑀁 𑀇𑀥 𑀕𑀳𑀡𑀦𑁆𑀢𑀺 ‘‘𑀲𑀩𑁆𑀩𑁂𑀧𑀺 𑀲𑀗𑁆𑀔𑀢𑀸 𑀥𑀫𑁆𑀫𑀸’’𑀢𑀺 𑀯𑀺𑀲𑁂𑀲𑀁 𑀓𑀢𑁆𑀯𑀸𑀯 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀲𑀼𑀦𑀦𑁆𑀢𑀺 𑀓𑁄𑀝𑁆𑀝𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀽𑀦𑀸, 𑀅𑀥𑀺𑀓𑀼𑀝𑁆𑀝𑀦𑀦𑁆𑀢𑀺 𑀆𑀳 ‘‘𑀲𑀽𑀦𑀸𑀬 𑀉𑀧𑀭𑀻’’𑀢𑀺. 𑀅𑀲𑀺𑀦𑀸𑀢𑀺 𑀫𑀁𑀲𑀓𑀦𑁆𑀢𑀦𑁂𑀦. 𑀖𑀸𑀢𑀺𑀬𑀫𑀸𑀦𑀸𑀢𑀺 𑀳𑀜𑁆𑀜𑀫𑀸𑀦𑀸 𑀯𑀺𑀩𑀸𑀥𑀺𑀬𑀫𑀸𑀦𑀸. 𑀯𑀢𑁆𑀣𑀼𑀓𑀸𑀫𑀸𑀦𑀁 𑀉𑀧𑀭𑀺 𑀓𑀢𑁆𑀯𑀸𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀞𑀧𑁂𑀢𑁆𑀯𑀸 𑀢𑁂 𑀅𑀘𑁆𑀘𑀸𑀥𑀸𑀦𑀁 𑀓𑀢𑁆𑀯𑀸. 𑀓𑀦𑁆𑀢𑀺𑀢𑀸𑀢𑀺 𑀙𑀺𑀦𑁆𑀤𑀺𑀢𑀸. 𑀓𑁄𑀝𑁆𑀝𑀺𑀢𑀸𑀢𑀺 𑀩𑀺𑀮𑀲𑁄 𑀯𑀺𑀪𑀚𑀺𑀢𑀸. 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀦𑁆𑀢𑀺 𑀙𑀦𑁆𑀤𑀭𑀸𑀕𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁.

𑀲𑀫𑁆𑀫𑀢𑁆𑀢𑀸𑀢𑀺 𑀫𑀼𑀘𑁆𑀙𑀺𑀢𑀸 𑀲𑀫𑁆𑀫𑀽𑀴𑁆𑀳𑀸. 𑀦𑀦𑁆𑀤𑀻𑀭𑀸𑀕𑀁 𑀉𑀧𑀕𑀫𑁆𑀫 𑀯𑀝𑁆𑀝𑀁 𑀯𑀟𑁆𑀠𑁂𑀦𑁆𑀢𑀻𑀢𑀺 𑀲𑀫𑁆𑀫𑀽𑀴𑁆𑀳𑀢𑁆𑀢𑀸 𑀏𑀯𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸 𑀦𑀦𑁆𑀤𑀻𑀭𑀸𑀕𑀲𑁆𑀲 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀢𑀁 𑀧𑀭𑀺𑀩𑁆𑀭𑀽𑀳𑁂𑀦𑁆𑀢𑀺. 𑀦𑀦𑁆𑀤𑀻𑀭𑀸𑀕𑀩𑀤𑁆𑀥𑀸𑀢𑀺 𑀦𑀦𑁆𑀤𑀻𑀭𑀸𑀕𑁂 𑀮𑀕𑁆𑀕𑀢𑁆𑀢𑀸 𑀢𑁂𑀦 𑀩𑀤𑁆𑀥𑀸. 𑀯𑀝𑁆𑀝𑁂 𑀮𑀕𑁆𑀕𑀦𑁆𑀢𑀻𑀢𑀺 𑀢𑁂𑀪𑀽𑀫𑀓𑁂 𑀯𑀝𑁆𑀝𑁂 𑀲𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀲𑀚𑁆𑀚𑀢𑁆𑀢𑀸 𑀏𑀯 𑀤𑀼𑀓𑁆𑀔𑀁 𑀧𑀢𑁆𑀯𑀸𑀧𑀺 𑀦 𑀉𑀓𑁆𑀓𑀡𑁆𑀞𑀦𑁆𑀢𑀺 𑀦 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑀺. 𑀇𑀥 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀦𑀦𑁆𑀤𑀻𑀭𑀸𑀕𑀧𑁆𑀧𑀳𑀸𑀦𑀁 𑀓𑀣𑀺𑀢’’𑀦𑁆𑀢𑀺.

𑀅𑀦𑀗𑁆𑀕𑀡𑀲𑀼𑀢𑁆𑀢𑁂 (𑀫. 𑀦𑀺. 𑀅𑀝𑁆𑀞. 𑁧.𑁬𑁩) 𑀧𑀓𑀸𑀲𑀺𑀢𑁄 𑀏𑀯 ‘‘𑀙𑀦𑁆𑀤𑀸𑀤𑀻𑀳𑀺 𑀦 𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺𑀦𑀸. ‘‘𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸’’𑀢𑀺𑀆𑀤𑀺 ‘‘𑀦𑀫𑁄 𑀓𑀭𑁄𑀳𑀻’’𑀢𑀺 (𑀫. 𑀦𑀺. 𑁧.𑁨𑁪𑁯, 𑁨𑁫𑁧) 𑀯𑀼𑀢𑁆𑀢𑀦𑀫𑀓𑁆𑀓𑀸𑀭𑀲𑁆𑀲 𑀓𑀭𑀡𑀸𑀓𑀸𑀭𑀤𑀲𑁆𑀲𑀦𑀁. 𑀩𑁄𑀥𑀸𑀬𑀸𑀢𑀺 𑀘𑀢𑀼𑀲𑀘𑁆𑀘𑀲𑀫𑁆𑀩𑁄𑀥𑀸𑀬. 𑀢𑀣𑀸 𑀤𑀫𑀣𑀲𑀫𑀣𑀢𑀭𑀡𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀺 𑀅𑀭𑀺𑀬𑀫𑀕𑁆𑀕𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀫𑀣𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀺 𑀧𑀦 𑀅𑀦𑀼𑀧𑀸𑀤𑀺𑀲𑁂𑀲𑀯𑀲𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀅𑀳𑁄𑀲𑀻𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀏𑀢𑀲𑁆𑀲 𑀧𑀜𑁆𑀳𑀲𑁆𑀲𑀸𑀢𑀺 𑀏𑀢𑀲𑁆𑀲 𑀧𑀦𑁆𑀦𑀭𑀲𑀫𑀲𑁆𑀲 𑀧𑀜𑁆𑀳𑀲𑁆𑀲 𑀅𑀢𑁆𑀣𑁄. 𑀏𑀯𑀁 𑀇𑀢𑀭𑁂𑀲𑀼𑀧𑀺 𑀯𑀢𑁆𑀢𑀩𑁆𑀩𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀔𑀻𑀡𑀸𑀲𑀯𑀕𑀼𑀡𑁂𑀳𑀺 𑀫𑀢𑁆𑀣𑀓𑀁 𑀧𑀸𑀧𑁂𑀦𑁆𑀢𑁄 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺, 𑀦 𑀧𑀼𑀘𑁆𑀙𑀺𑀢𑀸𑀦𑀼𑀲𑀦𑁆𑀥𑀺𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀘 𑀧𑀼𑀘𑁆𑀙𑀸𑀯𑀲𑁂𑀦𑀸𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸𑀢𑀺? 𑀲𑀘𑁆𑀘𑀁 𑀆𑀭𑀤𑁆𑀥𑀸, 𑀏𑀯𑀁 𑀧𑀦 ‘‘𑀧𑀼𑀘𑁆𑀙𑀸𑀯𑀲𑀺𑀓𑁄 𑀦𑀺𑀓𑁆𑀔𑁂𑀧𑁄’’𑀢𑀺 𑀯𑀢𑁆𑀢𑀩𑁆𑀩𑀁, 𑀦 ‘‘𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀦𑀺𑀝𑁆𑀞𑀧𑀺𑀢𑀸’’𑀢𑀺. 𑀅𑀦𑁆𑀢𑀭𑀧𑀼𑀘𑁆𑀙𑀸𑀯𑀲𑁂𑀦 𑀤𑁂𑀲𑀦𑀸𑀬 𑀅𑀧𑀭𑀺𑀯𑀢𑁆𑀢𑀺𑀢𑀢𑁆𑀢𑀸 𑀆𑀭𑀫𑁆𑀪𑀸𑀦𑀼𑀭𑀽𑀧𑀫𑁂𑀯 𑀧𑀦 𑀤𑁂𑀲𑀦𑀸 𑀦𑀺𑀝𑁆𑀞𑀧𑀺𑀢𑀸.

𑀯𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀭𑀣𑀯𑀺𑀦𑀻𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁨. 𑀫𑀳𑀸𑀕𑁄𑀯𑀺𑀦𑁆𑀤𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑀸𑀓𑀺𑀢𑁆𑀢𑀦𑀁 𑀢𑀤𑀸 𑀫𑀕𑀥𑀭𑀸𑀚𑁂𑀦 𑀧𑀭𑀺𑀕𑁆𑀕𑀳𑀺𑀢𑀽𑀧𑀮𑀓𑁆𑀔𑀡𑀁. 𑀢𑀲𑁆𑀲 𑀳𑀺 𑀲𑁄 𑀧𑀼𑀭𑁄𑀳𑀺𑀢𑁄. 𑀫𑀳𑀸𑀕𑁄𑀯𑀺𑀦𑁆𑀤𑁄𑀢𑀺 𑀧𑀼𑀭𑀸𑀢𑀦𑁄 𑀏𑀓𑁄 𑀫𑀕𑀥𑀭𑀸𑀚𑀸𑀢𑀺 𑀓𑁂𑀘𑀺. 𑀕𑀬𑁆𑀳𑀢𑀻𑀢𑀺 𑀕𑀳𑁄, 𑀭𑀸𑀚𑀽𑀦𑀁 𑀕𑀳𑁄 𑀭𑀸𑀚𑀕𑀳𑀁. 𑀦𑀕𑀭-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀅𑀜𑁆𑀜𑁂𑀧𑁂𑀢𑁆𑀣 𑀧𑀓𑀸𑀭𑁂𑀢𑀺 𑀭𑀸𑀚𑀽𑀳𑀺 𑀤𑀺𑀲𑁆𑀯𑀸 𑀲𑀫𑁆𑀫𑀸 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀢𑁂𑀲𑀁 𑀕𑀳𑀁 𑀕𑁂𑀳𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁. 𑀆𑀭𑀓𑁆𑀔𑀲𑀫𑁆𑀧𑀢𑁆𑀢𑀺𑀆𑀤𑀺𑀦𑀸 𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀉𑀧𑀕𑀢𑀸𑀦𑀁 𑀧𑀝𑀺𑀭𑀸𑀚𑀽𑀦𑀁 𑀕𑀳𑀁 𑀕𑀳𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀆𑀭𑀸𑀫𑀭𑀸𑀫𑀡𑀻𑀬𑀓𑀸𑀤𑀻𑀳𑀺 𑀭𑀸𑀚𑀢𑁂, 𑀦𑀺𑀯𑀸𑀲𑀲𑀼𑀔𑀢𑀸𑀤𑀺𑀦𑀸 𑀲𑀢𑁆𑀢𑁂𑀳𑀺 𑀫𑀫𑀢𑁆𑀢𑀯𑀲𑁂𑀦 𑀕𑀬𑁆𑀳𑀢𑀺, 𑀧𑀭𑀺𑀕𑁆𑀕𑀬𑁆𑀳𑀢𑀻𑀢𑀺 𑀯𑀸 𑀭𑀸𑀚𑀕𑀳𑀦𑁆𑀢𑀺 𑀏𑀯𑀫𑀸𑀤𑀺𑀓𑁂 𑀧𑀓𑀸𑀭𑁂. 𑀩𑀼𑀤𑁆𑀥𑀓𑀸𑀮𑁂 𑀘 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘𑀸𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀯𑁂𑀴𑀽𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀳𑁄𑀲𑀺, 𑀦 𑀧𑀦 𑀓𑁂𑀯𑀮𑀁 𑀓𑀝𑁆𑀞𑀓𑀧𑀯𑀦𑀫𑁂𑀯. 𑀭𑀜𑁆𑀜𑁄 𑀉𑀬𑁆𑀬𑀸𑀦𑀓𑀸𑀮𑁂 𑀧𑀢𑀺𑀝𑁆𑀞𑀸𑀧𑀺𑀢𑀅𑀝𑁆𑀝𑀸𑀮𑀓𑀯𑀲𑁂𑀦 𑀅𑀝𑁆𑀝𑀸𑀮𑀓𑀬𑀼𑀢𑁆𑀢𑀁.

𑀚𑀦𑀦𑀁 𑀚𑀸𑀢𑀺, 𑀚𑀸𑀢𑀺𑀬𑀸 𑀪𑀽𑀫𑀺 𑀚𑀸𑀢𑀺𑀪𑀽𑀫𑀁, 𑀚𑀸𑀬𑀺 𑀯𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑁄 𑀏𑀢𑁆𑀣𑀸𑀪𑀺 𑀚𑀸𑀢𑀺, 𑀲𑀸 𑀏𑀯 𑀪𑀽𑀫𑀻𑀢𑀺 𑀚𑀸𑀢𑀺𑀪𑀽𑀫𑀁, 𑀲𑀸 𑀇𑀫𑁂𑀲𑀁 𑀦𑀺𑀯𑀸𑀲𑁄𑀢𑀺 𑀚𑀸𑀢𑀺𑀪𑀽𑀫𑀓𑀸𑀢𑀺 𑀆𑀳 ‘‘𑀚𑀸𑀢𑀺𑀪𑀽𑀫𑀓𑀸𑀢𑀺 𑀚𑀸𑀢𑀺𑀪𑀽𑀫𑀺𑀯𑀸𑀲𑀺𑀦𑁄’’𑀢𑀺. 𑀓𑀲𑁆𑀲 𑀧𑀦𑀸𑀬𑀁 𑀚𑀸𑀢𑀺𑀪𑀽𑀫𑀻𑀢𑀺 𑀆𑀳 ‘‘𑀢𑀁 𑀔𑁄 𑀧𑀦𑀸’’𑀢𑀺𑀆𑀤𑀺. 𑀢𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀬 𑀚𑀸𑀢𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀼𑀧𑀸𑀓𑀝𑀪𑀸𑀯𑀢𑁄 𑀯𑀺𑀲𑁂𑀲𑀦𑁂𑀦 𑀯𑀺𑀦𑀸𑀧𑀺 𑀯𑀺𑀲𑀺𑀝𑁆𑀞𑀯𑀺𑀲𑀬𑁄𑀯 𑀇𑀥 𑀚𑀸𑀢𑀺-𑀲𑀤𑁆𑀤𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀲𑁆𑀲 𑀚𑀸𑀢𑀝𑁆𑀞𑀸𑀦𑀲𑀸𑀓𑀺𑀬𑀚𑀦𑀧𑀤𑁄’’𑀢𑀺. 𑀢𑀢𑁆𑀣𑀧𑀺 𑀓𑀧𑀺𑀮𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑁄 𑀧𑀤𑁂𑀲𑁄𑀢𑀺 𑀆𑀳 ‘‘𑀓𑀧𑀺𑀮𑀯𑀢𑁆𑀣𑀸𑀳𑀸𑀭𑁄’’𑀢𑀺.

𑀕𑀭𑀼𑀥𑀫𑁆𑀫𑀪𑀸𑀯𑀯𑀡𑁆𑀡𑀦𑀸

𑀲𑀸𑀓𑀺𑀬𑀫𑀡𑁆𑀟𑀮𑀲𑁆𑀲𑀸𑀢𑀺 𑀲𑀸𑀓𑀺𑀬𑀭𑀸𑀚𑀲𑀫𑀽𑀳𑀲𑁆𑀲. 𑀤𑀲𑀦𑁆𑀦𑀁 𑀅𑀧𑁆𑀧𑀺𑀘𑁆𑀙𑀓𑀣𑀸𑀤𑀻𑀦𑀁 𑀯𑀢𑁆𑀣𑀼 𑀤𑀲𑀓𑀣𑀸𑀯𑀢𑁆𑀣𑀼, 𑀅𑀧𑁆𑀧𑀺𑀘𑁆𑀙𑀢𑀸𑀤𑀺. 𑀢𑀢𑁆𑀣 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑀸𑀬 𑀢𑀲𑁆𑀲 𑀮𑀸𑀪𑀻 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀻. 𑀢𑀢𑁆𑀣𑀸𑀢𑀺 𑀤𑀲𑀓𑀣𑀸𑀯𑀢𑁆𑀣𑀼𑀲𑁆𑀫𑀺𑀁.

𑀕𑀭𑀼𑀓𑀭𑀡𑀻𑀬𑀢𑀸𑀬 𑀥𑀫𑁆𑀫𑁄 𑀕𑀭𑀼 𑀏𑀢𑀲𑁆𑀲𑀸𑀢𑀺 𑀥𑀫𑁆𑀫𑀕𑀭𑀼, 𑀢𑀲𑁆𑀲 𑀪𑀸𑀯𑁄 𑀥𑀫𑁆𑀫𑀕𑀭𑀼𑀢𑀸, 𑀢𑀸𑀬. ‘‘𑀅𑀚𑁆𑀛𑀸𑀲𑀬𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀦 𑀓𑁂𑀯𑀮𑀁 𑀅𑀚𑁆𑀛𑀸𑀲𑀬𑁂𑀦𑁂𑀯, 𑀅𑀣 𑀔𑁄 𑀓𑀸𑀬𑀯𑀘𑀻𑀧𑀬𑁄𑀕𑁂𑀳𑀺𑀧𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀥𑀫𑁆𑀫𑀕𑀭𑀼𑀢𑀸𑀬𑁂𑀯 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀺𑀬𑀸𑀫𑀭𑀢𑁆𑀢𑀺𑀁 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀓𑀼𑀫𑁆𑀪𑀓𑀸𑀭𑀲𑁆𑀲 𑀦𑀺𑀯𑁂𑀲𑀦𑁂 𑀢𑀺𑀬𑀸𑀫𑀭𑀢𑁆𑀢𑀺𑀁 𑀯𑀲𑀦𑁆𑀢𑁄 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸’’𑀢𑀺 𑀏𑀯𑀁 𑀯𑀘𑀦𑀲𑁂𑀲𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀣𑀸 𑀬𑀣𑀸𑀮𑀸𑀪𑀯𑀲𑁂𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀢𑀺𑀬𑀸𑀫𑀭𑀢𑁆𑀢𑀺𑀁 𑀥𑀫𑁆𑀫𑀓𑀣𑀸 𑀓𑀢𑀸𑀢𑀺 𑀆𑀧𑀚𑁆𑀚𑀢𑀺, 𑀦 𑀘 𑀢𑀁 𑀅𑀢𑁆𑀣𑀺. 𑀯𑀓𑁆𑀔𑀢𑀺 𑀳𑀺 ‘‘𑀩𑀳𑀼𑀤𑁂𑀯 𑀭𑀢𑁆𑀢𑀺𑀦𑁆𑀢𑀺 𑀤𑀺𑀬𑀟𑁆𑀠𑀬𑀸𑀫𑀫𑀢𑁆𑀢’’𑀦𑁆𑀢𑀺. 𑀤𑀲𑀩𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀸 𑀯𑀺𑀬 𑀥𑀫𑁆𑀫𑀕𑀸𑀭𑀯𑀳𑁂𑀢𑀼𑀓𑀸 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀧𑀺 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀲𑀤𑀺𑀲𑀸 𑀏𑀯𑀸𑀢𑀺 𑀇𑀫𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀕𑀸𑀭𑀯𑀓𑀺𑀢𑁆𑀢𑀦𑁂 ‘‘𑀓𑀲𑁆𑀲𑀧𑁄𑀧𑀺 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀓𑀲𑁆𑀲𑀧𑀪𑀕𑀯𑀢𑁄 𑀥𑀫𑁆𑀫𑀕𑀸𑀭𑀯𑀁 𑀤𑀲𑁆𑀲𑁂𑀢𑀺.

𑀘𑀸𑀭𑀺𑀓𑀁 𑀦𑀺𑀓𑁆𑀔𑀫𑀻𑀢𑀺 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀺𑀢𑀼𑀁 𑀦𑀺𑀓𑁆𑀔𑀫𑀺. 𑀚𑀦𑀧𑀤𑀘𑀸𑀭𑀺𑀓𑀸𑀬 𑀅𑀓𑀸𑀮𑁂 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀓𑁄𑀲𑀮𑀭𑀸𑀚𑀸𑀤𑀬𑁄 𑀯𑀸𑀭𑁂𑀢𑀼𑀁 𑀆𑀭𑀪𑀺𑀁𑀲𑀼. 𑀧𑀯𑀸𑀭𑁂𑀢𑁆𑀯𑀸 𑀳𑀺 𑀘𑀭𑀡𑀁 𑀩𑀼𑀤𑁆𑀥𑀸𑀘𑀺𑀡𑁆𑀡𑀁. 𑀧𑀼𑀡𑁆𑀡𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀪𑀕𑀯𑀸 ‘‘𑀓𑀺𑀁 𑀫𑁂 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳.

𑀅𑀦𑀳𑀸𑀢𑁄𑀯𑀸𑀢𑀺 𑀥𑀫𑁆𑀫𑀲𑀯𑀦𑀼𑀲𑁆𑀲𑀼𑀓𑁆𑀓𑁂𑀦 𑀲𑀸𑀬𑀦𑁆𑀳𑁂 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀦𑁆𑀳𑀸𑀦𑀁 𑀅𑀓𑀢𑁆𑀯𑀸𑀯. 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀻𑀲𑀼 𑀏𑀓𑀺𑀲𑁆𑀲𑀸 𑀤𑁆𑀯𑀺𑀦𑁆𑀦𑀜𑁆𑀘 𑀅𑀢𑁆𑀣𑀺𑀢𑀸𑀲𑀺𑀤𑁆𑀥𑀸 𑀘𑀢𑀼𑀩𑁆𑀩𑀺𑀥𑀢𑀸 𑀧𑀝𑀺𑀧𑀢𑁆𑀢𑀺𑀓𑀢𑀸 𑀏𑀯 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀧𑀦𑁆𑀦𑀓𑁄 𑀘 𑀦𑀸𑀫…𑀧𑁂… 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀻’’𑀢𑀺. 𑀧𑀝𑀺𑀓𑁆𑀔𑁂𑀧𑀧𑀼𑀩𑁆𑀩𑀓𑁄𑀧𑀺 𑀳𑀺 𑀧𑀝𑀺𑀧𑀦𑁆𑀦𑁄 𑀅𑀢𑁆𑀣𑀢𑁄 𑀧𑀝𑀺𑀧𑀦𑁆𑀦𑀢𑁆𑀣𑁄 𑀏𑀯𑀸𑀢𑀺. 𑀓𑀸𑀫𑀁 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀸𑀲𑀦𑀁 𑀲𑁄𑀪𑀢𑀺, 𑀦 𑀧𑀦 𑀲𑀸𑀲𑀦𑀁 𑀯𑀟𑁆𑀠𑁂𑀢𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀪𑀸𑀯𑀢𑁄, 𑀦 𑀘 𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀣𑀸 𑀫𑀦𑁄𑀭𑀣𑀁 𑀧𑀽𑀭𑁂𑀢𑀺. 𑀢𑀣𑀸 𑀳𑀺 𑀪𑀕𑀯𑀸 𑀧𑀞𑀫𑀩𑁄𑀥𑀺𑀬𑀁 𑀏𑀓𑀲𑀝𑁆𑀞𑀺𑀬𑀸 𑀘 𑀅𑀭𑀳𑀦𑁆𑀢𑁂𑀲𑀼 𑀚𑀸𑀢𑁂𑀲𑀼 𑁋 ‘‘𑀘𑀭𑀣, 𑀪𑀺𑀓𑁆𑀔𑀯𑁂, 𑀩𑀳𑀼𑀚𑀦𑀳𑀺𑀢𑀸𑀬𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁮𑁬-𑁮𑁮; 𑀫𑀳𑀸𑀯. 𑁩𑁨) 𑀪𑀺𑀓𑁆𑀔𑀽 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀭𑀽𑀧𑀁 𑀪𑀺𑀓𑁆𑀔𑀼𑀁 𑀪𑀕𑀯𑀸 𑀦 𑀧𑀼𑀘𑁆𑀙𑀢𑀺, 𑀓𑀲𑁆𑀫𑀸? 𑀦 𑀫𑀬𑁆𑀳𑀁 𑀲𑀸𑀲𑀦𑀲𑁆𑀲 𑀯𑀼𑀟𑁆𑀠𑀺𑀧𑀓𑁆𑀔𑁂 𑀞𑀺𑀢𑁄’’𑀢𑀺.

𑀲𑀫𑀼𑀤𑀸𑀬𑁄 𑀅𑀧𑁆𑀧𑀓𑁂𑀦 𑀊𑀦𑁄𑀧𑀺 𑀅𑀦𑀽𑀦𑁄 𑀯𑀺𑀬 𑀳𑁄𑀢𑀻𑀢𑀺 𑀩𑀸𑀓𑀼𑀮𑀢𑁆𑀣𑁂𑀭𑀁 𑀘𑀢𑀼𑀢𑁆𑀣𑀭𑀸𑀲𑀺𑀢𑁄 𑀩𑀳𑀺 𑀓𑀢𑁆𑀯𑀸𑀧𑀺 ‘‘𑀅𑀲𑀻𑀢𑀺𑀫𑀳𑀸𑀣𑁂𑀭𑀸 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀲𑀻𑀢𑀺𑀫𑀳𑀸𑀣𑁂𑀭𑀲𑀫𑀜𑁆𑀜𑀸 𑀯𑀸 𑀅𑀯𑀬𑀯𑁂𑀧𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀸𑀫𑀜𑁆𑀜𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀈𑀤𑀺𑀲𑁂 𑀞𑀸𑀦𑁂 𑀩𑀳𑀽𑀦𑀁 𑀏𑀓𑀢𑁄 𑀓𑀣𑀦𑀁 𑀫𑀳𑀢𑀸 𑀓𑀡𑁆𑀞𑁂𑀦 𑀘 𑀓𑀣𑀦𑀁 𑀲𑀢𑁆𑀣𑀼 𑀘𑀺𑀢𑁆𑀢𑀸𑀭𑀸𑀥𑀦𑀫𑁂𑀯𑀸𑀢𑀺 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀣𑀸 𑀧𑀝𑀺𑀧𑀦𑁆𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂 𑀪𑀺𑀓𑁆𑀔𑀽 𑀫𑁂𑀖𑀲𑀤𑁆𑀤𑀁 𑀲𑀼𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀕𑀼𑀡𑀲𑀫𑁆𑀪𑀸𑀯𑀦𑀸𑀬𑀸𑀢𑀺 𑀯𑀓𑁆𑀔𑀫𑀸𑀦𑀕𑀼𑀡𑀳𑁂𑀢𑀼𑀓𑀸𑀬 𑀲𑀫𑁆𑀪𑀸𑀯𑀦𑀸𑀬 𑀲𑀫𑁆𑀪𑀸𑀯𑀺𑀢𑁄, 𑀦 𑀬𑁂𑀦 𑀓𑁂𑀦𑀘𑀺 𑀓𑀺𑀘𑁆𑀘𑀲𑀫𑀢𑁆𑀣𑀢𑀸𑀤𑀺𑀦𑀸.

𑀕𑀭𑀼𑀥𑀫𑁆𑀫𑀪𑀸𑀯𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀯𑀡𑁆𑀡𑀦𑀸

𑀅𑀧𑁆𑀧-𑀲𑀤𑁆𑀤𑀲𑁆𑀲 𑀧𑀭𑀺𑀢𑁆𑀢𑀧𑀭𑀺𑀬𑀸𑀬𑀢𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀩𑁆𑀬𑀜𑁆𑀚𑀦𑀁 𑀲𑀸𑀯𑀲𑁂𑀲𑀁 𑀯𑀺𑀬𑀸’’𑀢𑀺. 𑀢𑁂𑀦𑀸𑀳 ‘‘𑀦 𑀳𑀺 𑀢𑀲𑁆𑀲𑀸’’𑀢𑀺𑀆𑀤𑀺. 𑀅𑀧𑁆𑀧-𑀲𑀤𑁆𑀤𑁄 𑀧𑀦𑁂𑀢𑁆𑀣 𑀅𑀪𑀸𑀯𑀢𑁆𑀣𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 ‘‘𑀅𑀧𑁆𑀧𑀸𑀩𑀸𑀥𑀢𑀜𑁆𑀘 𑀲𑀜𑁆𑀚𑀸𑀦𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨𑁫; 𑁨.𑁧𑁩𑁪) 𑀯𑀺𑀬.

𑀅𑀢𑁆𑀭𑀺𑀘𑁆𑀙𑀢𑀸 𑀦𑀸𑀫 (𑀅. 𑀦𑀺. 𑀝𑀻. 𑁧.𑁧.𑁬𑁩) 𑀅𑀢𑁆𑀭 𑀅𑀢𑁆𑀭 𑀇𑀘𑁆𑀙𑀸𑀢𑀺 𑀓𑀢𑁆𑀯𑀸. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸𑀢𑀺 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑀁 𑀕𑀼𑀡𑀸𑀦𑀁 𑀯𑀺𑀚𑁆𑀚𑀫𑀸𑀦𑀸𑀦𑀁 𑀯𑀺𑀬 𑀧𑀭𑁂𑀲𑀁 𑀧𑀓𑀸𑀲𑀦𑀸. 𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀓𑀸𑀭𑀓𑀯𑀺𑀲𑁂𑀲𑀮𑀸𑀪𑀻𑀢𑀺 𑀚𑀸𑀦𑀸𑀢𑀼 ‘‘𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀆𑀧𑀸𑀣𑀓𑀚𑁆𑀛𑀸𑀬𑀺𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀸. 𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀸𑀢𑀺 𑀇𑀘𑁆𑀙𑀸𑀘𑀸𑀭𑁂 𑀞𑀢𑁆𑀯𑀸 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀲𑀻𑀮𑀥𑀼𑀢𑀥𑀫𑁆𑀫𑀸𑀤𑀺𑀕𑀼𑀡𑀯𑀺𑀪𑀸𑀯𑀦𑀸. 𑀢𑀸𑀤𑀺𑀲𑀲𑁆𑀲 𑀳𑀺 𑀧𑀝𑀺𑀕𑁆𑀕𑀳𑀡𑁂 𑀅𑀫𑀢𑁆𑀢𑀜𑁆𑀜𑀼𑀢𑀸𑀧𑀺 𑀳𑁄𑀢𑀺.

𑀕𑀡𑁆𑀳𑀦𑁆𑀢𑁄𑀬𑁂𑀯 𑀉𑀫𑁆𑀫𑀼𑀚𑁆𑀚𑀺 𑀅𑀜𑁆𑀜𑁂𑀲𑀁 𑀅𑀚𑀸𑀦𑀦𑁆𑀢𑀸𑀦𑀁𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑁆𑀧𑀺𑀘𑁆𑀙𑀢𑀸𑀧𑀥𑀸𑀦𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀘𑀢𑀼𑀩𑁆𑀩𑀺𑀥𑀁 𑀇𑀘𑁆𑀙𑀸𑀧𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦𑀧𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀘𑀢𑀼𑀩𑁆𑀩𑀺𑀥𑀁 𑀇𑀘𑁆𑀙𑀸𑀧𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀭𑁄𑀧𑀺 𑀘𑀢𑀼𑀩𑁆𑀩𑀺𑀥𑁄 𑀅𑀧𑁆𑀧𑀺𑀘𑁆𑀙𑁄’’𑀢𑀺𑀆𑀤𑀺𑀫𑀸𑀳. 𑀤𑀸𑀬𑀓𑀲𑁆𑀲 𑀯𑀲𑀦𑁆𑀢𑀺 𑀤𑀸𑀬𑀓𑀲𑁆𑀲 𑀘𑀺𑀢𑁆𑀢𑀯𑀲𑀁. 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀧𑁆𑀧𑀩𑀳𑀼𑀪𑀸𑀯𑀁. 𑀅𑀢𑁆𑀢𑀦𑁄 𑀣𑀸𑀫𑀦𑁆𑀢𑀺 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀓𑀣𑀸𑀫𑀁.

𑀏𑀓𑀪𑀺𑀓𑁆𑀔𑀼𑀧𑀺 𑀦 𑀅𑀜𑁆𑀜𑀸𑀲𑀺 𑀲𑁄𑀲𑀸𑀦𑀺𑀓𑀯𑀢𑁆𑀢𑁂 𑀲𑀫𑁆𑀫𑀤𑁂𑀯 𑀯𑀼𑀢𑁆𑀢𑀺𑀢𑁆𑀢𑀸. 𑀅𑀩𑁆𑀩𑁄𑀓𑀺𑀡𑁆𑀡𑀦𑁆𑀢𑀺 𑀅𑀯𑀺𑀘𑁆𑀙𑁂𑀤𑀁. 𑀤𑀼𑀢𑀺𑀬𑁄 𑀫𑀁 𑀦 𑀚𑀸𑀦𑁂𑀬𑁆𑀬𑀸𑀢𑀺 𑀤𑀼𑀢𑀺𑀬𑁄 𑀲𑀳𑀸𑀬𑀪𑀽𑀢𑁄𑀧𑀺 𑀬𑀣𑀸 𑀫𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀢𑀣𑀸 𑀲𑀝𑁆𑀞𑀺 𑀯𑀲𑁆𑀲𑀸𑀦𑀺 𑀦𑀺𑀭𑀦𑁆𑀢𑀭𑀁 𑀲𑀼𑀲𑀸𑀦𑁂 𑀯𑀲𑀸𑀫𑀺, 𑀢𑀲𑁆𑀫𑀸 𑀅𑀳𑀁 𑀅𑀳𑁄 𑀲𑁄𑀲𑀸𑀦𑀺𑀓𑀼𑀢𑁆𑀢𑀫𑁄.

𑀥𑀫𑁆𑀫𑀓𑀣𑀸𑀬 𑀚𑀦𑀢𑀁 𑀔𑁄𑀪𑁂𑀢𑁆𑀯𑀸𑀢𑀺 𑀮𑁄𑀫𑀳𑀁𑀲𑀦𑀲𑀸𑀥𑀼𑀓𑀸𑀭𑀤𑀸𑀦𑀘𑁂𑀮𑀼𑀓𑁆𑀔𑁂𑀧𑀸𑀤𑀺𑀯𑀲𑁂𑀦 𑀲𑀦𑁆𑀦𑀺𑀧𑀢𑀺𑀢𑀁 𑀇𑀢𑀭𑀜𑁆𑀘 ‘‘𑀓𑀣𑀁 𑀦𑀼 𑀔𑁄 𑀅𑀬𑁆𑀬𑀲𑁆𑀲 𑀲𑀦𑁆𑀢𑀺𑀓𑁂𑀯 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸’’𑀢𑀺 𑀓𑁄𑀮𑀸𑀳𑀮𑀯𑀲𑁂𑀦 𑀫𑀳𑀸𑀚𑀦𑀁 𑀔𑁄𑀪𑁂𑀢𑁆𑀯𑀸. 𑀕𑀢𑁄𑀢𑀺 ‘‘𑀅𑀬𑀁 𑀲𑁄, 𑀢𑁂𑀦 𑀭𑀢𑁆𑀢𑀺𑀬𑀁 𑀥𑀫𑁆𑀫𑀓𑀣𑀸 𑀓𑀢𑀸’’𑀢𑀺 𑀚𑀸𑀦𑀦𑀪𑀬𑁂𑀦 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑀢𑀸𑀬 𑀧𑀭𑀺𑀯𑁂𑀡𑀁 𑀕𑀢𑁄.

𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀯𑀺𑀬𑀸𑀢𑀺 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀲𑀫𑀕𑁆𑀕𑀯𑀸𑀲𑀁 𑀯𑀼𑀢𑁆𑀣𑀸 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀯𑀺𑀬. 𑀧𑀳𑀸𑀬𑀸𑀢𑀺 𑀧𑀼𑀩𑁆𑀩𑀪𑀸𑀕𑁂 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀧𑀘𑁆𑀙𑀸 𑀅𑀕𑁆𑀕𑀫𑀕𑁆𑀕𑁂𑀦𑁂𑀯 𑀧𑀚𑀳𑀺𑀢𑁆𑀯𑀸.

𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁆𑀯𑀸𑀤𑀲𑀯𑀺𑀥𑀲𑀦𑁆𑀢𑁄𑀲𑀯𑀡𑁆𑀡𑀦𑀸

𑀧𑀓𑀢𑀺𑀤𑀼𑀩𑁆𑀩𑀮𑀸𑀤𑀻𑀦𑀁 𑀕𑀭𑀼𑀘𑀻𑀯𑀭𑀸𑀤𑀻𑀦𑀺 𑀦𑀨𑀸𑀲𑀼𑀪𑀸𑀯𑀸𑀯𑀳𑀸𑀦𑀺 𑀲𑀭𑀻𑀭𑀔𑁂𑀤𑀸𑀯𑀳𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀧𑀬𑁄𑀚𑀦𑀯𑀲𑁂𑀦 𑀦𑀅𑀢𑁆𑀭𑀺𑀘𑁆𑀙𑀢𑀸𑀤𑀺𑀯𑀲𑁂𑀦 𑀢𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑀘𑀻𑀯𑀭𑀧𑀭𑀺𑀪𑁄𑀕𑁄 𑀦 𑀲𑀦𑁆𑀢𑁄𑀲𑀯𑀺𑀭𑁄𑀥𑀻𑀢𑀺 𑀆𑀳 ‘‘𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀻’’𑀢𑀺. 𑀫𑀳𑀕𑁆𑀖𑀘𑀻𑀯𑀭𑀁, 𑀩𑀳𑀽𑀦𑀺 𑀯𑀸 𑀘𑀻𑀯𑀭𑀸𑀦𑀺 𑀮𑀪𑀺𑀢𑁆𑀯𑀸𑀧𑀺 𑀢𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀤𑀜𑁆𑀜𑀲𑁆𑀲 𑀕𑀳𑀡𑀁 𑀬𑀣𑀸𑀲𑀸𑀭𑀼𑀧𑁆𑀧𑀦𑀬𑁂 𑀞𑀺𑀢𑀢𑁆𑀢𑀸 𑀦 𑀲𑀦𑁆𑀢𑁄𑀲𑀯𑀺𑀭𑁄𑀥𑀻𑀢𑀺 𑀆𑀳 ‘‘𑀢𑁂𑀲𑀁…𑀧𑁂… 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀻’’𑀢𑀺. 𑀏𑀯𑀁 𑀲𑁂𑀲𑀧𑀘𑁆𑀘𑀬𑁂𑀲𑀼𑀧𑀺 𑀬𑀣𑀸𑀩𑀮𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑀦𑀺𑀤𑁆𑀤𑁂𑀲𑁂𑀲𑀼 𑀅𑀧𑀺𑀲𑀤𑁆𑀤𑀕𑁆𑀕𑀳𑀡𑁂 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀬𑁂𑀯 𑀅𑀕𑁆𑀕𑁄 𑀅𑀮𑁄𑀪𑀚𑁆𑀛𑀸𑀲𑀬𑀲𑁆𑀲 𑀉𑀓𑁆𑀓𑀁𑀲𑀦𑀢𑁄.

𑀤𑁆𑀯𑀸𑀤𑀲𑀯𑀺𑀥𑀲𑀦𑁆𑀢𑁄𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀯𑀺𑀥𑀧𑀯𑀺𑀯𑁂𑀓𑀯𑀡𑁆𑀡𑀦𑀸

𑀏𑀓𑁄𑀢𑀺 𑀏𑀓𑀸𑀓𑀻. 𑀕𑀘𑁆𑀙𑀢𑀻𑀢𑀺 𑀘𑀼𑀡𑁆𑀡𑀺𑀓𑀇𑀭𑀺𑀬𑀸𑀧𑀣𑀯𑀲𑁂𑀦 𑀯𑀼𑀢𑁆𑀢𑀁. 𑀘𑀭𑀢𑀻𑀢𑀺 𑀯𑀺𑀳𑀸𑀭𑀢𑁄 𑀩𑀳𑀺 𑀲𑀜𑁆𑀘𑀸𑀭𑀯𑀲𑁂𑀦, 𑀯𑀺𑀳𑀭𑀢𑀻𑀢𑀺 𑀤𑀺𑀯𑀸𑀯𑀺𑀳𑀸𑀭𑀸𑀤𑀺𑀯𑀲𑁂𑀦. 𑀓𑀸𑀬𑀯𑀺𑀯𑁂𑀓𑁄𑀢𑀺 𑀘 𑀦𑁂𑀓𑁆𑀔𑀫𑁆𑀫𑀸𑀥𑀺𑀫𑀼𑀢𑁆𑀢𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑀯𑀲𑁂𑀦 𑀯𑀺𑀯𑁂𑀓𑀝𑁆𑀞𑀓𑀸𑀬𑀢𑀸, 𑀦 𑀛𑀸𑀦𑀯𑀺𑀯𑁂𑀓𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦’’𑀦𑁆𑀢𑀺. 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀦𑁆𑀢𑀺 𑀦𑀻𑀯𑀭𑀡𑀸𑀤𑀺𑀲𑀁𑀓𑀺𑀮𑁂𑀲𑀢𑁄 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁. 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀦𑁆𑀢𑀺 𑀯𑀺𑀢𑀓𑁆𑀓𑀸𑀤𑀺𑀢𑀁𑀢𑀁𑀛𑀸𑀦𑀧𑀝𑀺𑀧𑀓𑁆𑀔𑀯𑀺𑀕𑀫𑁂𑀦 𑀧𑀭𑀫𑀁 𑀉𑀢𑁆𑀢𑀫𑀁 𑀯𑁄𑀤𑀸𑀦𑀁 𑀧𑀢𑁆𑀢𑀸𑀦𑀁. 𑀦𑀺𑀭𑀼𑀧𑀥𑀻𑀦𑀦𑁆𑀢𑀺 𑀓𑀺𑀮𑁂𑀲𑀼𑀧𑀥𑀺𑀆𑀤𑀻𑀦𑀁 𑀯𑀺𑀕𑀫𑁂𑀦 𑀦𑀺𑀭𑀼𑀧𑀥𑀻𑀦𑀁.

𑀢𑀺𑀯𑀺𑀥𑀧𑀯𑀺𑀯𑁂𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀯𑀺𑀥𑀲𑀁𑀲𑀕𑁆𑀕𑀯𑀡𑁆𑀡𑀦𑀸

𑀲𑀁𑀲𑀻𑀤𑀢𑀺 𑀏𑀢𑁂𑀦𑀸𑀢𑀺 𑀲𑀁𑀲𑀕𑁆𑀕𑁄, 𑀭𑀸𑀕𑁄. 𑀲𑀯𑀦𑀳𑁂𑀢𑀼𑀓𑁄, 𑀲𑀯𑀦𑀯𑀲𑁂𑀦 𑀯𑀸 𑀧𑀯𑀢𑁆𑀢𑁄 𑀲𑀁𑀲𑀕𑁆𑀕𑁄 𑀲𑀯𑀦𑀲𑀁𑀲𑀕𑁆𑀕𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀓𑀸𑀬𑀲𑀁𑀲𑀕𑁆𑀕𑁄 𑀧𑀦 𑀓𑀸𑀬𑀧𑀭𑀸𑀫𑀸𑀲𑁄. 𑀇𑀢𑁆𑀣𑀻 𑀯𑀸𑀢𑀺 𑀯𑀥𑀽, 𑀬𑀼𑀯𑀢𑀻 𑀯𑀸. 𑀲𑀦𑁆𑀥𑀸𑀦𑁂𑀢𑀼𑀦𑁆𑀢𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀖𑀝𑁂𑀢𑀼𑀁. 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦𑀸𑀢𑀺 𑀇𑀤𑀁 𑀫𑀽𑀮𑀪𑀽𑀢𑀁 𑀲𑀯𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀺𑀝𑁆𑀞𑀺𑀯𑀢𑁆𑀢𑀓𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀯𑀻𑀣𑀻𑀲𑀼 𑀉𑀧𑁆𑀧𑀦𑁆𑀦𑁄𑀧𑀺 𑀭𑀸𑀕𑁄 𑀲𑀯𑀦𑀲𑀁𑀲𑀕𑁆𑀕𑁄𑀬𑁂𑀯. 𑀤𑀲𑁆𑀲𑀦𑀲𑀁𑀲𑀕𑁆𑀕𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀺𑀢𑁆𑀣𑀺𑀕𑀦𑁆𑀥𑀩𑁄𑀥𑀺𑀲𑀢𑁆𑀢𑁄 𑀧𑀭𑁂𑀳𑀺 𑀓𑀣𑀺𑀬𑀫𑀸𑀦𑀯𑀲𑁂𑀦 𑀧𑀯𑀢𑁆𑀢𑀲𑀯𑀦𑀲𑀁𑀲𑀕𑁆𑀕𑀲𑁆𑀲 𑀦𑀺𑀤𑀲𑁆𑀲𑀦𑀁. 𑀢𑀺𑀲𑁆𑀲𑀤𑀳𑀭𑁄 𑀅𑀢𑁆𑀢𑀦𑀸 𑀲𑀼𑀬𑁆𑀬𑀫𑀸𑀦𑀯𑀲𑁂𑀦. 𑀢𑀢𑁆𑀣 𑀧𑀞𑀫𑀁 𑀚𑀸𑀢𑀓𑁂 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀇𑀢𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀳𑀭𑁄 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀭𑀸𑀕𑁂𑀦 𑀯𑀺𑀤𑁆𑀥𑁄𑀢𑀺 𑀭𑀸𑀕𑀲𑀮𑁆𑀮𑁂𑀦 𑀳𑀤𑀬𑁂 𑀅𑀧𑁆𑀧𑀺𑀢𑁄 𑀅𑀦𑁆𑀢𑁄 𑀅𑀦𑀼𑀯𑀺𑀤𑁆𑀥𑁄.

𑀲𑁄𑀢𑀺 𑀤𑀲𑁆𑀲𑀦𑀲𑀁𑀲𑀕𑁆𑀕𑁄. 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀢𑁆𑀣𑀼𑀯𑀲𑁂𑀦 𑀧𑀸𑀓𑀝𑀁 𑀓𑀭𑁄𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀕𑀸𑀫𑁂 𑀬𑁂𑀪𑀼𑀬𑁆𑀬𑁂𑀦 𑀇𑀢𑁆𑀣𑀺𑀬𑁄 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸, 𑀢𑀲𑁆𑀫𑀸 𑀣𑁂𑀭𑁄 ‘‘𑀲𑀘𑁂 𑀅𑀦𑁆𑀢𑁄𑀕𑀸𑀫𑁂 𑀦 𑀘𑀭𑀺𑀲𑁆𑀲𑀲𑀻’’𑀢𑀺 𑀆𑀳. 𑀓𑀸𑀮𑀲𑁆𑀲𑁂𑀯 𑀧𑀯𑀺𑀝𑁆𑀞𑀢𑁆𑀢𑀸 𑀬𑀸𑀕𑀼𑀁 𑀅𑀤𑀸𑀲𑀺, 𑀢𑀲𑁆𑀫𑀸 𑀬𑀸𑀕𑀼𑀫𑁂𑀯 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 ‘‘𑀦𑀺𑀯𑀢𑁆𑀢𑀣, 𑀪𑀦𑁆𑀢𑁂, 𑀪𑀺𑀓𑁆𑀔𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳𑀁𑀲𑀼. 𑀬𑀸𑀘𑀺𑀢𑁆𑀯𑀸𑀢𑀺 ‘‘𑀦 𑀫𑀬𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀁 𑀤𑀸𑀢𑀼𑀓𑀸𑀫𑀸 𑀦𑀺𑀯𑀢𑁆𑀢𑁂𑀫, 𑀅𑀧𑀺𑀘 𑀇𑀤𑀁 𑀪𑀦𑁆𑀢𑁂 𑀓𑀸𑀭𑀡’’𑀦𑁆𑀢𑀺 𑀬𑀸𑀘𑀺𑀢𑁆𑀯𑀸.

𑀆𑀤𑀺𑀢𑁄 𑀮𑀧𑀦𑀁 𑀆𑀮𑀸𑀧𑁄, 𑀯𑀘𑀦𑀧𑀝𑀺𑀯𑀘𑀦𑀯𑀲𑁂𑀦 𑀧𑀯𑀢𑁆𑀢𑁄 𑀮𑀸𑀧𑁄 𑀲𑀮𑁆𑀮𑀸𑀧𑁄. 𑀪𑀺𑀓𑁆𑀔𑀼𑀦𑀺𑀬𑀸𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀬𑀸𑀬 𑀓𑀸𑀬𑀘𑀺𑀧𑀺 𑀇𑀢𑁆𑀣𑀺𑀬𑀸 𑀲𑀦𑁆𑀢𑀓𑀧𑀭𑀺𑀪𑁄𑀕𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄𑀧𑀺 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄𑀯.

𑀧𑀜𑁆𑀘𑀯𑀺𑀥𑀲𑀁𑀲𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀸𑀳𑀕𑀸𑀳𑀓𑀸𑀤𑀺𑀯𑀡𑁆𑀡𑀦𑀸

𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀽𑀳𑀺 𑀓𑀸𑀬𑀧𑀭𑀸𑀫𑀸𑀲𑁄 𑀓𑀸𑀬𑀲𑀫𑁆𑀩𑀸𑀳𑀦𑀸𑀤𑀺𑀯𑀲𑁂𑀦. 𑀓𑀸𑀬𑀲𑀁𑀲𑀕𑁆𑀕𑀦𑁆𑀢𑀺 𑀓𑀸𑀬𑀧𑀭𑀸𑀫𑀸𑀲𑀲𑀁𑀲𑀕𑁆𑀕𑀁. 𑀕𑀸𑀳𑀕𑀸𑀳𑀓𑁄𑀢𑀺 𑀕𑀡𑁆𑀳𑀦𑀓𑀸𑀦𑀁 𑀕𑀡𑁆𑀳𑀦𑀓𑁄𑀢𑀺 𑀅𑀢𑁆𑀣𑁄. 𑀕𑀸𑀳𑀫𑀼𑀢𑁆𑀢𑀓𑁄𑀢𑀺 𑀅𑀬𑁄𑀦𑀺𑀲𑁄 𑀆𑀫𑀺𑀲𑁂𑀳𑀺 𑀲𑀗𑁆𑀕𑀡𑁆𑀳𑀦𑀓𑁂𑀳𑀺 𑀲𑀬𑀁 𑀫𑀼𑀘𑁆𑀘𑀦𑀓𑁄. 𑀫𑀼𑀢𑁆𑀢𑀕𑀸𑀳𑀓𑁄𑀢𑀺 𑀬𑀣𑀸𑀯𑀼𑀢𑁆𑀢𑀲𑀗𑁆𑀕𑀳𑀢𑁄 𑀫𑀼𑀢𑁆𑀢𑀸𑀦𑀁 𑀲𑀗𑁆𑀕𑀡𑁆𑀳𑀦𑀓𑁄. 𑀫𑀼𑀢𑁆𑀢𑀫𑀼𑀢𑁆𑀢𑀓𑁄𑀢𑀺 𑀫𑀼𑀘𑁆𑀘𑀦𑀓𑁂𑀳𑀺 𑀲𑀬𑀫𑁆𑀧𑀺 𑀫𑀼𑀘𑁆𑀘𑀦𑀓𑁄. 𑀕𑀳𑀡𑀯𑀲𑁂𑀦 𑀲𑀗𑁆𑀕𑀡𑁆𑀳𑀦𑀯𑀲𑁂𑀦. 𑀉𑀧𑀲𑀗𑁆𑀓𑀫𑀦𑁆𑀢𑀺 𑀢𑀢𑁄 𑀓𑀺𑀜𑁆𑀘𑀺 𑀮𑁄𑀓𑀸𑀫𑀺𑀲𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀸, 𑀦 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦. 𑀪𑀺𑀓𑁆𑀔𑀼𑀧𑀓𑁆𑀔𑁂 𑀕𑀳𑀡𑀯𑀲𑁂𑀦𑀸𑀢𑀺 𑀧𑀘𑁆𑀘𑀬𑀮𑀸𑀪𑀸𑀬 𑀲𑀗𑁆𑀕𑀡𑁆𑀳𑀦𑀯𑀲𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀆𑀫𑀺𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦.

𑀞𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀞𑀸𑀦𑀸𑀯𑀢𑁆𑀣𑀁. 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺 𑀉𑀧𑁆𑀧𑀦𑁆𑀦𑀫𑁂𑀯 𑀢𑀁 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀦𑀻𑀳𑀭𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀢𑁂𑀦𑀸𑀳 ‘‘𑀫𑀦𑁆𑀢𑁂𑀦𑀸’’𑀢𑀺𑀆𑀤𑀺. 𑀬𑀣𑀸 𑀚𑀻𑀯𑀺𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 𑀓𑀡𑁆𑀳𑀲𑀧𑁆𑀧𑁂𑀦, 𑀅𑀫𑀺𑀢𑁆𑀢𑁂𑀦 𑀯𑀸 𑀲𑀳 𑀦 𑀲𑀁𑀯𑀲𑀢𑀺, 𑀏𑀯𑀁 𑀔𑀡𑀫𑀢𑁆𑀢𑀫𑁆𑀧𑀺 𑀓𑀺𑀮𑁂𑀲𑁂𑀳𑀺 𑀲𑀳 𑀦 𑀲𑀁𑀯𑀲𑀢𑀻𑀢𑀺 𑀅𑀢𑁆𑀣𑁄.

𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀢𑀣𑀸 𑀲𑀫𑀸𑀥𑀺𑀧𑀺. 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀸 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀕𑁆𑀕𑀳𑀡𑁂𑀦 𑀬𑀣𑀸 𑀮𑁄𑀓𑀺𑀬𑀲𑀫𑀸𑀥𑀺 𑀕𑀳𑀺𑀢𑁄, 𑀏𑀯𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸 𑀏𑀢𑁂𑀲𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀕𑁆𑀕𑀳𑀡𑁂𑀦𑁂𑀯 𑀮𑁄𑀓𑀼𑀢𑁆𑀢𑀭𑁄 𑀲𑀫𑀸𑀥𑀺 𑀕𑀳𑀺𑀢𑁄. 𑀬𑀣𑀸 𑀳𑀺 𑀘𑀢𑁆𑀢𑀸𑀭𑀺 𑀭𑀽𑀧𑀚𑁆𑀛𑀸𑀦𑀸𑀦𑀺 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀫𑀕𑁆𑀕𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑁄, 𑀏𑀯𑀁 𑀘𑀢𑁆𑀢𑀸𑀭𑀺 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄𑀧𑀺. 𑀲𑀫𑀸𑀧𑀢𑁆𑀢𑀺𑀧𑀭𑀺𑀬𑀸𑀬𑁄 𑀧𑀦 𑀧𑀼𑀩𑁆𑀩𑀯𑁄𑀳𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀧𑀓𑁆𑀔𑀲𑀫𑀼𑀘𑁆𑀙𑁂𑀤𑀦𑁂𑀦 𑀲𑀫𑁆𑀫𑀸 𑀆𑀧𑀚𑁆𑀚𑀦𑀢𑁄 𑀯𑀸 𑀬𑀣𑀸 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄’’𑀢𑀺. 𑀏𑀯𑀫𑁂𑀢𑁆𑀣 𑀲𑀻𑀮𑀲𑀫𑀸𑀥𑀻𑀦𑀫𑁆𑀧𑀺 𑀫𑀺𑀲𑁆𑀲𑀓𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀧𑀜𑁆𑀜𑀸𑀬 𑀏𑀯. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀺𑀬𑀨𑀮𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑀜𑁆𑀳𑀺 𑀦𑀺𑀧𑁆𑀨𑀸𑀤𑀦𑀝𑁆𑀞𑁂𑀦 𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀩𑁆𑀩𑀸𑀦𑀦𑁆𑀢𑀺.

𑀏𑀢𑁆𑀣 𑀘 𑀅𑀧𑁆𑀧𑀺𑀘𑁆𑀙𑀢𑀸𑀬 𑀮𑀤𑁆𑀥𑀧𑀘𑁆𑀘𑀬𑁂𑀦 𑀧𑀭𑀺𑀢𑀼𑀲𑁆𑀲𑀢𑀺, 𑀲𑀦𑁆𑀢𑀼𑀝𑁆𑀞𑀢𑀸𑀬 𑀮𑀤𑁆𑀥𑀸 𑀢𑁂 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄𑀆𑀤𑀻𑀦𑀯𑀤𑀲𑁆𑀲𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀺, 𑀏𑀯𑀁𑀪𑀽𑀢𑁄 𑀘 𑀓𑀢𑁆𑀣𑀘𑀺 𑀅𑀮𑀕𑁆𑀕𑀫𑀸𑀦𑀲𑀢𑀸𑀬 𑀧𑀯𑀺𑀯𑁂𑀓𑀁 𑀧𑀭𑀺𑀩𑁆𑀭𑀽𑀳𑁂𑀦𑁆𑀢𑁄 𑀓𑁂𑀦𑀘𑀺 𑀅𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀕𑀳𑀝𑁆𑀞𑁂𑀦 𑀯𑀸 𑀧𑀩𑁆𑀩𑀚𑀺𑀢𑁂𑀦 𑀯𑀸. 𑀲𑁄 𑀏𑀯𑀁 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑁄 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸, 𑀅𑀦𑀥𑀺𑀕𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀆𑀭𑀪𑀦𑁆𑀢𑁄 𑀘 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀅𑀢𑁆𑀢𑀦𑁄 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀲𑁆𑀲 𑀲𑀻𑀮𑀲𑁆𑀲 𑀲𑀼𑀧𑀭𑀺𑀲𑀼𑀤𑁆𑀥𑀢𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑁄, 𑀅𑀬𑀫𑀲𑁆𑀲 𑀲𑀻𑀮𑀲𑀫𑁆𑀧𑀤𑀸. 𑀢𑀲𑁆𑀲 𑀅𑀯𑀺𑀧𑁆𑀧𑀝𑀺𑀲𑀸𑀭𑀫𑀽𑀮𑀓𑁂𑀳𑀺 𑀧𑀸𑀫𑁄𑀚𑁆𑀚𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀼𑀔𑁂𑀳𑀺 𑀲𑀫𑁆𑀫𑀸 𑀩𑁆𑀭𑀽𑀳𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀲𑀫𑀸𑀥𑀺𑀬𑀢𑀺, 𑀅𑀬𑀫𑀲𑁆𑀲 𑀲𑀫𑀸𑀥𑀺𑀲𑀫𑁆𑀧𑀤𑀸. 𑀢𑀢𑁄 𑀬𑀣𑀸𑀪𑀽𑀢𑀁 𑀚𑀸𑀦𑀁 𑀧𑀲𑁆𑀲𑀁 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀅𑀬𑀫𑀲𑁆𑀲 𑀧𑀜𑁆𑀜𑀸𑀲𑀫𑁆𑀧𑀤𑀸. 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑀸 𑀧𑀦𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸, 𑀢𑀢𑁄 𑀯𑀺𑀫𑀼𑀢𑁆𑀢𑀺𑀢𑁄 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀏𑀢𑁂𑀲𑀁 𑀤𑀲𑀦𑁆𑀦𑀁 𑀓𑀣𑀸𑀯𑀢𑁆𑀣𑀽𑀦𑀁 𑀅𑀦𑀼𑀧𑀼𑀩𑁆𑀩𑀻 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀲 𑀬𑁄 𑀤𑀲𑀳𑀺 𑀓𑀣𑀸𑀯𑀢𑁆𑀣𑀽𑀳𑀺 𑀲𑀫𑀦𑁆𑀦𑀸𑀕𑀫𑁄, 𑀅𑀬𑀁 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺. 𑀬𑀸 𑀦𑁂𑀲𑀁 𑀧𑀭𑁂𑀲𑀁 𑀲𑀁𑀓𑀺𑀢𑁆𑀢𑀦𑀁, 𑀅𑀬𑀁 𑀧𑀭𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺. 𑀢𑀸𑀲𑀼 𑀧𑀼𑀭𑀺𑀫𑀸 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀘, 𑀇𑀢𑀭𑀸 𑀓𑀭𑀼𑀡𑀸𑀧𑀼𑀩𑁆𑀩𑀗𑁆𑀕𑀫𑀸 𑀓𑀭𑀼𑀡𑀸𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺 𑀲𑀩𑁆𑀩𑀁 𑀜𑀸𑀡𑀓𑀭𑀼𑀡𑀸𑀓𑀡𑁆𑀟𑀁 𑀯𑀢𑁆𑀢𑀩𑁆𑀩𑀁.

𑀤𑀲𑀳𑀺 𑀓𑀣𑀸𑀯𑀢𑁆𑀣𑀽𑀳𑀺 𑀓𑀭𑀡𑀪𑀽𑀢𑁂𑀳𑀺 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑀁 𑀤𑁂𑀢𑀺, ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀅𑀢𑁆𑀭𑀺𑀘𑁆𑀙𑀢𑀸𑀤𑀺𑀓𑁂 𑀤𑀽𑀭𑀢𑁄 𑀯𑀚𑁆𑀚𑁂𑀢𑁆𑀯𑀸 𑀲𑀫𑁆𑀫𑀤𑁂𑀯 𑀅𑀧𑁆𑀧𑀺𑀘𑁆𑀙𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀢𑀁 𑀢𑀁 𑀓𑀣𑀸𑀯𑀢𑁆𑀣𑀼𑀁 𑀪𑀺𑀓𑁆𑀔𑀽𑀦𑀁 𑀉𑀧𑀤𑀺𑀲𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀤𑀺𑀲𑀦𑁆𑀢𑁄 𑀳𑀺 𑀢𑀸𑀦𑀺 ‘‘𑀢𑁂𑀳𑀺 𑀪𑀺𑀓𑁆𑀔𑀽 𑀑𑀯𑀤𑀢𑀻’’𑀢𑀺 𑀯𑀼𑀢𑁆𑀢𑁄. 𑀑𑀯𑀤𑀢𑀺𑀬𑁂𑀯 𑀲𑀭𑀽𑀧𑀤𑀲𑁆𑀲𑀦𑀫𑀢𑁆𑀢𑁂𑀦. 𑀲𑀼𑀔𑀼𑀫𑀁 𑀅𑀢𑁆𑀣𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀏𑀯𑀫𑁆𑀧𑀺 𑀅𑀧𑁆𑀧𑀺𑀘𑁆𑀙𑀢𑀸 𑀳𑁄𑀢𑀺 𑀏𑀯𑀫𑁆𑀧𑀻𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀯𑀲𑁂𑀦 𑀅𑀧𑀭𑀸𑀧𑀭𑀁 𑀅𑀧𑁆𑀧𑀺𑀘𑁆𑀙𑀢𑀸𑀯𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁆𑀣 𑀲𑀼𑀔𑀼𑀫𑀦𑀺𑀧𑀼𑀡𑀁 𑀅𑀧𑁆𑀧𑀺𑀘𑁆𑀙𑀢𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀯𑀺𑀲𑁂𑀲𑁂𑀳𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀓𑀸𑀭𑀡𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀅𑀧𑁆𑀧𑀺𑀘𑁆𑀙𑀢𑀸 𑀇𑀚𑁆𑀛𑀢𑀺, 𑀢𑀁 𑀧𑀦 ‘‘𑀫𑀳𑀺𑀘𑁆𑀙𑀢𑀸𑀤𑀻𑀲𑀼 𑀏𑀢𑁂 𑀤𑁄𑀲𑀸, 𑀅𑀧𑁆𑀧𑀺𑀘𑁆𑀙𑀢𑀸𑀬 𑀅𑀬𑀫𑀸𑀦𑀺𑀲𑀁𑀲𑁄’’𑀢𑀺𑀆𑀤𑀻𑀦𑀯𑀸𑀦𑀺𑀲𑀁𑀲𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀅𑀧𑁆𑀧𑀺𑀘𑁆𑀙𑀢𑀁 𑀤𑀲𑁆𑀲𑁂𑀢𑀻𑀢𑀺 𑀲𑀦𑁆𑀤𑀲𑁆𑀲𑀓𑁄. 𑀕𑀸𑀳𑁂𑀢𑀼𑀦𑁆𑀢𑀺 𑀬𑀣𑀸 𑀕𑀡𑁆𑀳𑀢𑀺, 𑀢𑀣𑀸 𑀓𑀸𑀢𑀼𑀁, 𑀢𑀢𑁆𑀣 𑀧𑀝𑁆𑀞𑀧𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀉𑀲𑁆𑀲𑀸𑀳𑀚𑀦𑀦𑀯𑀲𑁂𑀦𑀸𑀢𑀺 𑀬𑀣𑀸 𑀢𑀁 𑀲𑀫𑀸𑀤𑀸𑀦𑀁 𑀦𑀺𑀘𑁆𑀘𑀮𑀁 𑀳𑁄𑀢𑀺, 𑀏𑀯𑀁 𑀉𑀲𑁆𑀲𑁄𑀴𑁆𑀳𑀺𑀬𑀸 𑀉𑀧𑁆𑀧𑀸𑀤𑀦𑀯𑀲𑁂𑀦 𑀲𑀫𑁆𑀫𑀤𑁂𑀯 𑀉𑀢𑁆𑀢𑁂𑀚𑁂𑀢𑀻𑀢𑀺 𑀲𑀫𑀼𑀢𑁆𑀢𑁂𑀚𑀓𑁄. 𑀉𑀲𑁆𑀲𑀸𑀳𑀚𑀸𑀢𑁂𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀬 𑀚𑀸𑀢𑀼𑀲𑁆𑀲𑀸𑀳𑁂. 𑀯𑀡𑁆𑀡𑀁 𑀯𑀢𑁆𑀯𑀸 𑀢𑀢𑁆𑀣 𑀲𑀫𑁆𑀧𑀢𑁆𑀢𑀺𑀁 𑀆𑀬𑀢𑀺𑀜𑁆𑀘 𑀮𑀩𑁆𑀪𑀫𑀸𑀦𑀕𑀼𑀡𑀁 𑀓𑀺𑀢𑁆𑀢𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑀺 𑀲𑀫𑁆𑀫𑀤𑁂𑀯 𑀧𑀓𑀸𑀭𑁂𑀳𑀺 𑀢𑁄𑀲𑁂𑀢𑀻𑀢𑀺 𑀲𑀫𑁆𑀧𑀳𑀁𑀲𑀓𑁄. 𑀏𑀯𑀁 𑀲𑀦𑁆𑀢𑀼𑀝𑁆𑀞𑀺𑀆𑀤𑀻𑀲𑀼 𑀬𑀣𑀸𑀭𑀳𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀕𑀸𑀳𑀕𑀸𑀳𑀓𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀮𑀸𑀪𑀯𑀡𑁆𑀡𑀦𑀸

𑁨𑁫𑁩. 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀏𑀯𑀁 𑀯𑀡𑁆𑀡𑁄 𑀅𑀩𑁆𑀪𑀼𑀕𑁆𑀕𑀢𑁄𑀢𑀺. 𑀇𑀫𑀺𑀦𑀸 𑀢𑀲𑁆𑀲 𑀯𑀡𑁆𑀡𑀲𑁆𑀲 𑀬𑀣𑀸𑀪𑀽𑀢𑀕𑀼𑀡𑀲𑀫𑀼𑀝𑁆𑀞𑀺𑀢𑀢𑀁 𑀤𑀲𑁆𑀲𑁂𑀢𑀺. 𑀫𑀦𑁆𑀤𑀫𑀦𑁆𑀤𑁄 𑀯𑀺𑀬𑀸𑀢𑀺 𑀅𑀢𑀺 𑀯𑀺𑀬 𑀅𑀙𑁂𑀓𑁄 𑀯𑀺𑀬. 𑀅𑀩𑀮𑀩𑀮𑁄 𑀯𑀺𑀬𑀸𑀢𑀺 𑀅𑀢𑀺 𑀯𑀺𑀬 𑀅𑀩𑀮𑁄 𑀯𑀺𑀬. 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄 𑀯𑀺𑀬𑀸𑀢𑀺 𑀅𑀢𑀺 𑀯𑀺𑀬 𑀤𑀼𑀫𑁆𑀫𑀼𑀔𑁄 𑀯𑀺𑀬. 𑀅𑀦𑀼𑀫𑀲𑁆𑀲𑀸𑀢𑀺 𑀅𑀦𑀼𑀫𑀲𑀺𑀢𑁆𑀯𑀸, 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀲𑀭𑀽𑀧𑀢𑁄 𑀯𑀺𑀲𑁂𑀲𑀢𑁄 𑀘 𑀅𑀦𑀼𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀕𑁆𑀕𑀡𑁆𑀳𑀦𑀁 𑀧𑀦 𑀦𑁂𑀲𑀁 𑀅𑀦𑀼𑀧𑀯𑀺𑀲𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀼𑀧𑀯𑀺𑀲𑀺𑀢𑁆𑀯𑀸’’𑀢𑀺. 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀯𑀡𑁆𑀡𑀪𑀸𑀲𑀦𑀁 𑀏𑀓𑁄 𑀮𑀸𑀪𑁄𑀢𑀺 𑀬𑁄𑀚𑀦𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀧𑀢𑁆𑀣𑀬𑀫𑀸𑀦𑁄 𑀏𑀯𑀫𑀸𑀳 𑀥𑀫𑁆𑀫𑀕𑀭𑀼𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀜𑁆𑀘𑀮𑀸𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀸𑀭𑀺𑀓𑀸𑀤𑀺𑀯𑀡𑁆𑀡𑀦𑀸

𑁨𑁫𑁪. 𑀅𑀪𑀺𑀭𑀫𑀦𑀁 𑀅𑀪𑀺𑀭𑀢𑀁, 𑀢𑀤𑁂𑀯 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀅𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀪𑀺𑀭𑀦𑁆𑀢’’𑀦𑁆𑀢𑀺. 𑀪𑀸𑀯𑀦𑀧𑀼𑀁𑀲𑀓𑀜𑁆𑀘𑁂𑀢𑀁. 𑀅𑀦𑀪𑀺𑀭𑀢𑀺 𑀦𑀸𑀫 𑀦𑀢𑁆𑀣𑀺, 𑀅𑀪𑀺𑀭𑀫𑀺𑀢𑁆𑀯𑀸 𑀘𑀺𑀭𑀯𑀺𑀳𑀸𑀭𑁄𑀧𑀺 𑀦𑀢𑁆𑀣𑀺 𑀲𑀫𑁆𑀫𑀤𑁂𑀯 𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀢𑁆𑀢𑀸. 𑀲𑀩𑁆𑀩𑀲𑀳𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀅𑀲𑀬𑁆𑀳𑀮𑀸𑀪𑀺𑀦𑁄.

𑀧𑀼𑀩𑁆𑀩𑁂 𑀥𑀫𑁆𑀫𑀕𑀭𑀼𑀢𑀸𑀓𑀺𑀢𑁆𑀢𑀦𑀧𑀲𑀗𑁆𑀕𑁂𑀦 𑀕𑀳𑀺𑀢𑀁 𑀅𑀕𑁆𑀕𑀳𑀺𑀢𑀜𑁆𑀘 𑀫𑀳𑀸𑀓𑀲𑁆𑀲𑀧𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀺𑀁 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀯𑀦𑀯𑀸𑀲𑀺𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀯𑀢𑁆𑀣𑀼𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀓𑀣𑁂𑀢𑀼𑀁 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀆𑀓𑀸𑀲𑀕𑀸𑀫𑀻𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑁄 ‘‘𑀙𑀴𑀪𑀺𑀜𑁆𑀜𑀸𑀦𑀁 𑀆𑀭𑁄𑀘𑁂𑀳𑀻’’𑀢𑀺 𑀆𑀳. 𑀲𑀗𑁆𑀖𑀓𑀫𑁆𑀫𑁂𑀦 𑀲𑀺𑀚𑁆𑀛𑀫𑀸𑀦𑀸𑀧𑀺 𑀉𑀧𑀲𑀫𑁆𑀧𑀤𑀸 𑀲𑀢𑁆𑀣𑀼 𑀆𑀡𑀸𑀯𑀲𑁂𑀦𑁂𑀯 𑀲𑀺𑀚𑁆𑀛𑀦𑀢𑁄 ‘‘𑀩𑀼𑀤𑁆𑀥𑀤𑀸𑀬𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 ‘‘𑀅𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀲𑁆𑀲𑁂𑀯 𑀢𑀲𑁆𑀲 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀦𑁆𑀢𑁄 𑀲𑀢𑁆𑀣𑀸 ‘𑀩𑀼𑀤𑁆𑀥𑀤𑀸𑀬𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀻’𑀢𑀺 𑀅𑀯𑁄𑀘𑀸’’𑀢𑀺 𑀯𑀤𑀦𑁆𑀢𑀺. 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸.

𑀦𑀯𑀬𑁄𑀚𑀦𑀲𑀢𑀺𑀓𑀁 𑀫𑀚𑁆𑀛𑀺𑀫𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑀫𑁂𑀯, 𑀢𑀢𑁄 𑀧𑀭𑀁 𑀦𑀸𑀥𑀺𑀧𑁆𑀧𑁂𑀢𑀁 𑀤𑀦𑁆𑀥𑀢𑀸𑀯𑀲𑁂𑀦 𑀕𑀫𑀦𑀢𑁄. 𑀲𑀫𑀦𑁆𑀢𑀸𑀢𑀺 𑀕𑀢𑀕𑀢𑀝𑁆𑀞𑀸𑀦𑀲𑁆𑀲 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼. 𑀅𑀜𑁆𑀜𑁂𑀦𑀧𑀺 𑀓𑀸𑀭𑀡𑁂𑀦𑀸𑀢𑀺 𑀪𑀺𑀓𑁆𑀔𑀽𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀢𑀭𑀼𑀡𑀪𑀸𑀯𑀢𑁄 𑀅𑀜𑁆𑀜𑁂𑀦𑀧𑀺 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀯𑁂𑀦𑁂𑀬𑁆𑀬𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀸𑀤𑀺𑀓𑀸𑀭𑀡𑁂𑀦 𑀦𑀺𑀓𑁆𑀔𑀫𑀢𑀺, 𑀅𑀦𑁆𑀢𑁄𑀫𑀡𑁆𑀟𑀮𑀁 𑀑𑀢𑀭𑀢𑀺. 𑀲𑀢𑁆𑀢𑀳𑀺 𑀯𑀸𑀢𑀺𑀆𑀤𑀺 ‘‘𑀏𑀓𑀁 𑀫𑀸𑀲𑀁 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀸𑀬𑀸𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀦𑀺𑀩𑀤𑁆𑀥𑀯𑀸𑀲𑁂𑀦 𑀉𑀲𑁆𑀲𑀦𑁆𑀦𑀥𑀸𑀢𑀼𑀓𑀲𑁆𑀲 𑀲𑀭𑀻𑀭𑀲𑁆𑀲 𑀯𑀺𑀭𑁂𑀘𑀦𑁂𑀦 𑀨𑀸𑀲𑀼𑀪𑀸𑀯𑀢𑁆𑀣𑀸𑀬. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀮𑀸𑀪𑀺𑀓𑀗𑁆𑀔𑀦𑀢𑁆𑀣𑀸𑀬𑀸𑀢𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀲𑀼𑀢𑁆𑀢 (𑀅. 𑀦𑀺. 𑁭.𑁭𑁨) 𑀫𑀖𑀤𑁂𑀯𑀚𑀸𑀢𑀓𑀸𑀤𑀺𑀤𑁂𑀲𑀦𑀸𑀦𑀁 (𑀚𑀸. 𑁧.𑁧.𑁯) 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀮𑀲𑁆𑀲 𑀆𑀓𑀗𑁆𑀔𑀦𑁂𑀦. 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑁂 (𑀧𑀸𑀘𑀺. 𑁩𑁨𑁬) 𑀯𑀺𑀬 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀢𑁆𑀣𑀸𑀬. 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑁂 𑀅𑀗𑁆𑀕𑀼𑀮𑀺𑀫𑀸𑀮𑀸𑀤𑀺𑀓𑁂 𑀩𑁄𑀥𑀦𑀢𑁆𑀣𑀸𑀬. 𑀦𑀺𑀩𑀤𑁆𑀥𑀯𑀸𑀲𑀜𑁆𑀘 𑀧𑀼𑀕𑁆𑀕𑀮𑀁 𑀉𑀤𑁆𑀤𑀺𑀲𑁆𑀲 𑀘𑀸𑀭𑀺𑀓𑀸 𑀦𑀺𑀩𑀤𑁆𑀥𑀘𑀸𑀭𑀺𑀓𑀸.

𑁨𑁫𑁫. 𑀅𑀧𑀭𑀺𑀕𑁆𑀕𑀳𑀪𑀸𑀯𑀁 𑀓𑀢𑁆𑀣𑀘𑀺 𑀅𑀮𑀕𑁆𑀕𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀽𑀣𑀁 𑀧𑀳𑀸𑀬…𑀧𑁂… 𑀫𑀢𑁆𑀢𑀳𑀢𑁆𑀣𑀻 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀲𑀳𑀸𑀬𑀓𑀺𑀘𑁆𑀘𑁄𑀢𑀺 𑀲𑀳𑀸𑀬𑀓𑀺𑀘𑁆𑀘𑀭𑀳𑀺𑀢𑁄 𑀲𑀻𑀳𑁄 𑀯𑀺𑀬. 𑀢𑁂𑀦𑀲𑁆𑀲 𑀏𑀓𑀯𑀺𑀳𑀸𑀭𑀺𑀢𑀁 𑀢𑁂𑀚𑀯𑀦𑁆𑀢𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑀤𑀸 𑀧𑀦 𑀓𑀸𑀬𑀯𑀺𑀯𑁂𑀓𑁄 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺 𑀇𑀤𑀫𑁂𑀢𑁆𑀣 𑀓𑀸𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀩𑀳𑀽𑀳𑀻𑀢𑀺𑀆𑀤𑀺 𑀧𑀦 𑀲𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀣𑁂𑀭𑀲𑁆𑀲 𑀧𑀭𑀺𑀲𑀸 𑀲𑀼𑀯𑀺𑀦𑀻𑀢𑀸 𑀘𑀺𑀡𑁆𑀡𑀕𑀭𑀼𑀯𑀸𑀲𑀸 𑀕𑀭𑀼𑀦𑁄 𑀇𑀘𑁆𑀙𑀸𑀦𑀼𑀭𑀽𑀧𑀫𑁂𑀯 𑀯𑀢𑁆𑀢𑀢𑀺.

𑀯𑀼𑀢𑁆𑀢𑀓𑀸𑀭𑀡𑀬𑀼𑀢𑁆𑀢𑁂 𑀅𑀤𑁆𑀥𑀸𑀦𑀕𑀫𑀦𑁂 𑀘𑀸𑀭𑀺𑀓𑀸𑀦𑀁 𑀯𑁄𑀳𑀸𑀭𑁄 𑀲𑀸𑀲𑀦𑁂 𑀦𑀺𑀭𑀼𑀴𑁆𑀳𑁄𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀓𑁂𑀦𑀘𑀺𑀤𑁂𑀯 𑀦𑀺𑀫𑀺𑀢𑁆𑀢𑁂𑀦 𑀓𑀺𑀲𑁆𑀫𑀺𑀜𑁆𑀘𑀺 𑀅𑀢𑁆𑀣𑁂 𑀧𑀯𑀢𑁆𑀢𑀸𑀬 𑀲𑀜𑁆𑀜𑀸𑀬 𑀢𑀦𑁆𑀦𑀺𑀫𑀺𑀢𑁆𑀢𑀭𑀳𑀺𑀢𑁂𑀧𑀺 𑀅𑀜𑁆𑀜𑀲𑁆𑀫𑀺𑀁 𑀧𑀯𑀢𑁆𑀢𑀺 𑀭𑀼𑀴𑁆𑀳𑀻 𑀦𑀸𑀫. 𑀯𑀺𑀚𑀺𑀢𑀫𑀸𑀭𑀢𑁆𑀢𑀸 𑀲𑀗𑁆𑀕𑀸𑀫𑀯𑀺𑀚𑀬𑀫𑀳𑀸𑀬𑁄𑀥𑁄 𑀯𑀺𑀬. 𑀅𑀜𑁆𑀜𑀁 𑀲𑁂𑀯𑀺𑀢𑁆𑀯𑀸𑀢𑀺 ‘‘𑀫𑀫 𑀆𑀕𑀢𑀪𑀸𑀯𑀁 𑀲𑀢𑁆𑀣𑀼 𑀆𑀭𑁄𑀘𑁂𑀳𑀻’’𑀢𑀺 𑀆𑀭𑁄𑀘𑀦𑀢𑁆𑀣𑀁 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀲𑁂𑀯𑀺𑀢𑁆𑀯𑀸.

𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀢𑀁𑀢𑀁𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀢𑀤𑀦𑀼𑀘𑁆𑀙𑀯𑀺𑀓𑀫𑁂𑀯 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀽𑀴𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀫𑀕𑁆𑀕𑀺𑀭𑀲𑀸𑀦𑀺𑀲𑀁𑀲𑀦𑁆𑀢𑀺 ‘‘𑀓𑀘𑁆𑀘𑀺 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁨𑁬) 𑀲𑀸𑀫𑀕𑁆𑀕𑀺𑀭𑀲𑀸𑀦𑀺𑀲𑀁𑀲𑀁 𑀓𑀣𑁂𑀲𑀺. 𑀆𑀯𑀲𑀣𑀸𑀦𑀺𑀲𑀁𑀲𑀦𑁆𑀢𑀺 ‘‘𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑀢𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁨𑁯𑁫, 𑁩𑁧𑁫) 𑀆𑀯𑀲𑀣𑀧𑀝𑀺𑀲𑀁𑀬𑀼𑀢𑁆𑀢𑀁 𑀆𑀦𑀺𑀲𑀁𑀲𑀁. 𑀲𑀢𑀺𑀧𑀝𑀺𑀮𑀸𑀪𑀺𑀓𑀦𑁆𑀢𑀺 𑀚𑁄𑀢𑀺𑀧𑀸𑀮𑀢𑁆𑀣𑁂𑀭𑁂 𑀮𑀸𑀫𑀓𑀁 𑀞𑀸𑀦𑀁 𑀑𑀢𑀺𑀡𑁆𑀡𑀫𑀢𑁆𑀢𑁂 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀧𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀆𑀕𑀢𑁄. 𑀢𑀸𑀤𑀺𑀲𑀲𑁆𑀲 𑀦𑀸𑀫 𑀧𑀫𑀸𑀤𑀯𑀺𑀳𑀸𑀭𑁄 𑀦 𑀬𑀼𑀢𑁆𑀢𑁄𑀢𑀺 𑀬𑀣𑀸 𑀓𑀲𑁆𑀲𑀧𑁄 𑀪𑀕𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀢𑀺𑀁 𑀧𑀝𑀺𑀮𑀪𑀺𑀢𑀼𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀣𑁂𑀲𑀺, 𑀢𑀣𑀸 𑀅𑀬𑀁 𑀪𑀕𑀯𑀸 𑀢𑀫𑁂𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀁 𑀪𑀺𑀓𑁆𑀔𑀽𑀦𑀁 𑀖𑀝𑀺𑀓𑀸𑀭𑀲𑀼𑀢𑁆𑀢𑀁 (𑀫. 𑀦𑀺. 𑁨.𑁨𑁮𑁨) 𑀓𑀣𑁂𑀲𑀺. 𑀘𑀢𑁆𑀢𑀸𑀭𑁄 𑀥𑀫𑁆𑀫𑀼𑀤𑁆𑀤𑁂𑀲𑁂𑀢𑀺 𑁋 ‘‘𑀉𑀧𑀦𑀻𑀬𑀢𑀺 𑀮𑁄𑀓𑁄 𑀅𑀤𑁆𑀥𑀼𑀯𑁄, 𑀅𑀢𑀸𑀡𑁄 𑀮𑁄𑀓𑁄 𑀅𑀦𑀪𑀺𑀲𑁆𑀲𑀭𑁄, 𑀅𑀲𑁆𑀲𑀓𑁄 𑀮𑁄𑀓𑁄 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀁, 𑀊𑀦𑁄 𑀮𑁄𑀓𑁄 𑀅𑀢𑀺𑀢𑁆𑀢𑁄 𑀢𑀡𑁆𑀳𑀸𑀤𑀸𑀲𑁄 𑀘𑀸’’𑀢𑀺 (𑀫. 𑀦𑀺. 𑁨.𑁩𑁦𑁫) 𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀼𑀤𑁆𑀤𑁂𑀲𑁂 𑀓𑀣𑁂𑀲𑀺. 𑀓𑀸𑀫𑀜𑁆𑀘𑁂𑀢𑁂 𑀥𑀫𑁆𑀫𑀼𑀤𑁆𑀤𑁂𑀲𑀸 𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁩𑁦𑁪) 𑀆𑀬𑀲𑁆𑀫𑀢𑀸 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁂𑀦 𑀭𑀜𑁆𑀜𑁄 𑀓𑁄𑀭𑀩𑁆𑀬𑀲𑁆𑀲 𑀓𑀣𑀺𑀢𑀸, 𑀢𑁂 𑀧𑀦 𑀪𑀕𑀯𑀢𑁄 𑀏𑀯 𑀆𑀳𑀭𑀺𑀢𑁆𑀯𑀸 𑀣𑁂𑀭𑁂𑀦 𑀢𑀢𑁆𑀣 𑀓𑀣𑀺𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑁂’’𑀢𑀺𑀆𑀤𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀼𑀢𑁆𑀢𑁂 𑁋 ‘‘𑀅𑀢𑁆𑀣𑀺 𑀔𑁄, 𑀫𑀳𑀸𑀭𑀸𑀚, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘𑀢𑁆𑀢𑀸𑀭𑁄 𑀥𑀫𑁆𑀫𑀼𑀤𑁆𑀤𑁂𑀲𑀸 𑀉𑀤𑁆𑀤𑀺𑀝𑁆𑀞𑀸’’𑀢𑀺𑀆𑀤𑀺 (𑀫. 𑀦𑀺. 𑁨.𑁩𑁦𑁫) 𑀧𑀸𑀦𑀓𑀸𑀦𑀺𑀲𑀁𑀲𑀓𑀣𑀦𑁆𑀢𑀺 ‘‘𑀅𑀕𑁆𑀕𑀺𑀳𑀼𑀢𑁆𑀢𑀁 𑀫𑀼𑀔𑀁 𑀬𑀜𑁆𑀜𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁪𑁦𑁦; 𑀲𑀼. 𑀦𑀺. 𑁫𑁭𑁩) 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸 𑀧𑀼𑀦 𑀧𑀓𑀺𑀡𑁆𑀡𑀓𑀓𑀣𑀸𑀯𑀲𑁂𑀦 𑀧𑀸𑀦𑀓𑀧𑀝𑀺𑀲𑀁𑀬𑀼𑀢𑁆𑀢𑀁 𑀆𑀦𑀺𑀲𑀁𑀲𑀓𑀣𑀁 𑀓𑀣𑁂𑀲𑀺. 𑀏𑀓𑀻𑀪𑀸𑀯𑁂 𑀆𑀦𑀺𑀲𑀁𑀲𑀁 𑀓𑀣𑁂𑀲𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀪𑀕𑀼𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀻’’𑀢𑀺𑀆𑀤𑀺 (𑀫. 𑀦𑀺. 𑁩.𑁨𑁩𑁮). 𑀅𑀦𑀦𑁆𑀢𑀦𑀬𑀦𑁆𑀢𑀺 𑀅𑀧𑀭𑀺𑀫𑀸𑀡𑀤𑁂𑀲𑀦𑀸𑀦𑀬𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁. 𑀢𑁂𑀦𑀸𑀳 ‘‘𑀧𑀼𑀡𑁆𑀡, 𑀅𑀬𑀫𑁆𑀧𑀺 𑀅𑀧𑁆𑀧𑀺𑀘𑁆𑀙𑀓𑀣𑀸𑀬𑁂𑀯𑀸’’𑀢𑀺𑀆𑀤𑀺 𑀩𑀳𑀽𑀳𑀺 𑀧𑀭𑀺𑀬𑀸𑀬𑁂𑀳𑀺 𑀦𑀸𑀦𑀸𑀦𑀬𑀁 𑀤𑁂𑀲𑁂𑀢𑀺. 𑀓𑀣𑀁 𑀢𑀣𑀸 𑀤𑁂𑀲𑀺𑀢𑀁 𑀣𑁂𑀭𑁄 𑀅𑀜𑁆𑀜𑀸𑀲𑀻𑀢𑀺 𑀆𑀳 ‘‘𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀲𑁆𑀲…𑀧𑁂… 𑀅𑀳𑁄𑀲𑀻’’𑀢𑀺.

𑀘𑀸𑀭𑀺𑀓𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀜𑁆𑀳𑀯𑀡𑁆𑀡𑀦𑀸

𑁨𑁫𑁬. 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺. 𑀬𑀤𑀸 𑀚𑀸𑀢𑀺𑀪𑀽𑀫𑀓𑀸 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀣𑁂𑀭𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀁𑀲𑀼, 𑀢𑀢𑁄 𑀧𑀝𑁆𑀞𑀸𑀬. 𑀲𑀻𑀲𑀸𑀦𑀼𑀮𑁄𑀓𑀻 𑀳𑀼𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀦𑀁 𑀣𑁂𑀭𑁂𑀦 𑀲𑀫𑀸𑀕𑀫𑁂 𑀆𑀤𑀭𑀯𑀲𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀸𑀞𑁂 ‘‘𑀅𑀧𑁆𑀧𑁂𑀯 𑀦𑀸𑀫𑀸’’𑀢𑀺𑀆𑀤𑀺, ‘‘𑀢𑀭𑀫𑀸𑀦𑀭𑀽𑀧𑁄’’𑀢𑀺 𑀘. 𑀬𑀁 𑀧𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀮𑀻𑀦’’𑀦𑁆𑀢𑀺𑀆𑀤𑀺, 𑀢𑀁 𑀅𑀓𑀸𑀭𑀡𑀁. 𑀦 𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. ‘‘𑀓𑀘𑁆𑀘𑀺 𑀦𑀼 𑀔𑁄 𑀫𑀁 𑀅𑀤𑀺𑀲𑁆𑀯𑀸𑀯 𑀕𑀫𑀺𑀲𑁆𑀲𑀢𑀻’’𑀢𑀺 𑀅𑀬𑀫𑁆𑀧𑀺 𑀘𑀺𑀦𑁆𑀢𑀸 𑀆𑀤𑀭𑀯𑀲𑁂𑀦𑁂𑀯𑀸𑀢𑀺 𑀬𑀼𑀢𑁆𑀢𑀁. 𑀦 𑀳𑀺 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀆𑀕𑀢𑁄 𑀲𑀸𑀯𑀓𑁄 𑀅𑀧𑀺 𑀆𑀬𑀲𑁆𑀫𑀸 𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑁄 𑀲𑀢𑁆𑀣𑀼𑀓𑀧𑁆𑀧𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀢𑀢𑁆𑀣 𑀯𑀲𑀦𑁆𑀢𑀁 𑀅𑀤𑀺𑀲𑁆𑀯𑀸𑀯 𑀕𑀘𑁆𑀙𑀦𑀓𑁄 𑀦𑀸𑀫 𑀅𑀢𑁆𑀣𑀺. 𑀤𑀺𑀯𑀸𑀯𑀺𑀳𑀸𑀭𑀦𑁆𑀢𑀺 𑀲𑀫𑁆𑀧𑀤𑀸𑀦𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬𑀸’’𑀢𑀺.

𑁨𑁫𑁭. 𑀧𑀼𑀭𑀺𑀫𑀓𑀣𑀸𑀬𑀸𑀢𑀺 𑀧𑀞𑀫𑀸𑀮𑀸𑀧𑁂. 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀬𑀸𑀢𑀺 𑀦𑀧𑁆𑀧𑀯𑀢𑁆𑀢𑀺𑀢𑀸𑀬. 𑀧𑀘𑁆𑀙𑀺𑀫𑀓𑀣𑀸 𑀦 𑀚𑀸𑀬𑀢𑀻𑀢𑀺 𑀧𑀘𑁆𑀙𑀸 𑀯𑀢𑁆𑀢𑀩𑁆𑀩𑀓𑀣𑀸𑀬 𑀅𑀯𑀲𑀭𑁄 𑀦 𑀳𑁄𑀢𑀺. 𑀲𑀢𑁆𑀢 𑀯𑀺𑀲𑀼𑀤𑁆𑀥𑀺𑀬𑁄 𑀧𑀼𑀘𑁆𑀙𑀺 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀯𑀲𑁂𑀦. 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀦𑀸𑀫 𑀅𑀭𑀺𑀬𑀫𑀕𑁆𑀕𑁄. 𑀬𑀲𑁆𑀫𑀸 𑀢𑀢𑁄 𑀉𑀢𑁆𑀢𑀭𑀺𑀫𑁆𑀧𑀺 𑀧𑀢𑁆𑀢𑀩𑁆𑀩𑀁 𑀅𑀢𑁆𑀣𑁂𑀯, 𑀢𑀲𑁆𑀫𑀸 ‘‘𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀻𑀲𑀼 𑀞𑀺𑀢𑀲𑁆𑀲𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀫𑀢𑁆𑀣𑀓𑀁 𑀦 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀫𑀢𑁆𑀣𑀓𑀁 𑀅𑀧𑁆𑀧𑀢𑁆𑀢𑀢𑁆𑀢𑀸. 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀧𑀻𑀢𑀺 𑀲𑀢𑁆𑀢𑀫𑀫𑁆𑀧𑀺 𑀧𑀜𑁆𑀳𑀁 𑀧𑀝𑀺𑀓𑁆𑀔𑀺𑀧𑀺, 𑀇𑀢𑀭𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀅𑀧𑁆𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀫𑀸𑀳. 𑀇𑀤𑀸𑀦𑀺 𑀧𑀓𑀸𑀭𑀦𑁆𑀢𑀭𑁂𑀦𑀧𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑁂𑀥𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀕𑀳𑀡𑀽𑀧𑀸𑀤𑀸𑀦𑀦𑁆𑀢𑀺 𑀤𑀴𑁆𑀳𑀕𑁆𑀕𑀳𑀡𑀪𑀽𑀢𑀁 𑀉𑀧𑀸𑀤𑀸𑀦𑀁. 𑀢𑁂𑀦𑀸𑀳 ‘‘𑀓𑀸𑀫𑀼𑀧𑀸𑀤𑀸𑀦𑀸𑀤𑀺𑀓’’𑀦𑁆𑀢𑀺. 𑀧𑀘𑁆𑀘𑀬𑀽𑀧𑀸𑀤𑀸𑀦𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀫𑀸𑀳. 𑀲𑁄 𑀳𑀺 𑀅𑀢𑁆𑀢𑀦𑁄 𑀨𑀮𑀁 𑀉𑀧𑀸𑀤𑀺𑀬𑀢𑀺 𑀉𑀧𑀸𑀤𑀸𑀦𑀯𑀲𑁂𑀦 𑀕𑀡𑁆𑀳𑀢𑀻𑀢𑀺 𑀉𑀧𑀸𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀧𑀘𑁆𑀘𑀬𑀽𑀧𑀸𑀤𑀸𑀦𑀁 𑀦𑀸𑀫…𑀧𑁂… 𑀧𑀘𑁆𑀘𑀬𑀸’’𑀢𑀺. ‘‘𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻’’𑀢𑀺 𑀯𑀘𑀦𑀢𑁄 (𑀫𑀳𑀸𑀯. 𑁨𑁮, 𑁩𑁦) 𑀅𑀭𑀳𑀢𑁆𑀢𑀨𑀮𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀦 𑀘 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀉𑀧𑀸𑀤𑀸𑀦𑁂𑀳𑀺 𑀏𑀢𑀁 𑀦 𑀲𑀳𑀺𑀢𑀁 𑀦𑀸𑀧𑀺 𑀉𑀧𑀸𑀤𑀸𑀦𑁂𑀳𑀺 𑀲𑀳 𑀧𑀯𑀢𑁆𑀢𑀺 𑀳𑀼𑀢𑁆𑀯𑀸. 𑀦 𑀘 𑀓𑀜𑁆𑀘𑀺 𑀥𑀫𑁆𑀫𑀁 𑀉𑀧𑀸𑀤𑀺𑀬𑀢𑀻𑀢𑀺 𑀓𑀲𑁆𑀲𑀘𑀺 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀦 𑀉𑀧𑀸𑀤𑀺𑀬𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑀦𑁆𑀢𑁂𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀓𑀸𑀢𑀩𑁆𑀩𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀦𑁆𑀢𑁂 𑀚𑀸𑀢𑀢𑁆𑀢𑀸. 𑀅𑀫𑀢𑀥𑀸𑀢𑀼𑀫𑁂𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀓𑀣𑁂𑀦𑁆𑀢𑀺, 𑀓𑀣𑁂𑀦𑁆𑀢𑀸𑀦𑀜𑁆𑀘 𑀬𑀣𑀸 𑀢𑀲𑁆𑀲 𑀓𑁄𑀘𑀺 𑀧𑀘𑁆𑀘𑀬𑁄 𑀦𑀸𑀫 𑀦𑀢𑁆𑀣𑀺, 𑀏𑀯𑀁 𑀅𑀥𑀺𑀕𑀢𑁄𑀧𑀺 𑀬𑀣𑀸 𑀓𑁄𑀘𑀺 𑀧𑀘𑁆𑀘𑀬𑁄 𑀦𑀸𑀫 𑀦 𑀳𑁄𑀢𑀺, 𑀢𑀣𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀅𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀧𑀼𑀦 𑀧𑀼𑀘𑁆𑀙𑀁 𑀆𑀭𑀪𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀭𑀽𑀧𑀢𑁄 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁄.

𑁨𑁫𑁮. 𑀲𑀩𑁆𑀩𑀧𑀭𑀺𑀯𑀢𑁆𑀢𑁂𑀲𑀽𑀢𑀺 𑀲𑀩𑁆𑀩𑁂𑀲𑀼 𑀧𑀜𑁆𑀳𑀧𑀭𑀺𑀯𑀢𑁆𑀢𑀦𑁂𑀲𑀼, 𑀧𑀜𑁆𑀳𑀯𑀸𑀭𑁂𑀲𑀽𑀢𑀺 𑀅𑀢𑁆𑀣𑁄. 𑀲𑀕𑀳𑀡𑀥𑀫𑁆𑀫𑀫𑁂𑀯𑀸𑀢𑀺 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀕𑀡𑁆𑀳𑀢𑀻𑀢𑀺 𑀕𑀳𑀡𑀁, 𑀲𑀳 𑀕𑀳𑀡𑁂𑀦𑀸𑀢𑀺 𑀲𑀕𑀳𑀡𑀁, 𑀉𑀧𑀸𑀤𑀸𑀦𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀅𑀪𑀸𑀯𑀢𑁄 𑀯𑀝𑁆𑀝𑀫𑁂𑀯 𑀅𑀦𑀼𑀕𑀢𑁄𑀢𑀺 𑀯𑀝𑁆𑀝𑀸𑀦𑀼𑀕𑀢𑁄. 𑀢𑁂𑀦𑀸𑀳 ‘‘𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑀢𑁆𑀢𑀲𑁆𑀲𑀧𑀺 𑀅𑀪𑀸𑀯𑀢𑁄’’𑀢𑀺. 𑀬𑁄 𑀧𑀦 𑀘𑀢𑀼𑀩𑁆𑀩𑀺𑀥𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑁂 𑀲𑀻𑀮𑁂 𑀞𑀺𑀢𑁄, 𑀲𑁄𑀧𑀺 ‘‘𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺.

𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀜𑁆𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀭𑀣𑀯𑀺𑀦𑀻𑀢𑀯𑀡𑁆𑀡𑀦𑀸

𑁨𑁫𑁯. 𑀦𑀺𑀲𑁆𑀲𑀓𑁆𑀓𑀯𑀘𑀦𑀫𑁂𑀢𑀁 ‘‘𑀬𑀸𑀯 𑀳𑁂𑀝𑁆𑀞𑀺𑀫𑀲𑁄𑀧𑀸𑀦𑀓𑀴𑁂𑀯𑀭𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀢𑁆𑀣𑁄𑀢𑀺 𑀧𑀬𑁄𑀚𑀦𑀁. 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀳𑁂𑀢𑁆𑀣 𑀲𑀻𑀮𑀯𑀺𑀲𑀼𑀤𑁆𑀥𑀺𑀁 𑀧𑀬𑁄𑀚𑁂𑀢𑀺 𑀢𑀲𑁆𑀲 𑀢𑀤𑀢𑁆𑀣𑀢𑁆𑀢𑀸. 𑀲𑀻𑀮𑀯𑀺𑀲𑀼𑀤𑁆𑀥𑀺𑀓𑀺𑀘𑁆𑀘𑀁 𑀓𑀢𑀁 𑀦𑀸𑀫 𑀳𑁄𑀢𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀢𑁄. 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸 𑀳𑀺 𑀲𑀻𑀮𑀯𑀺𑀲𑀼𑀤𑁆𑀥𑀺 𑀦𑀸𑀫. 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀬𑀸𑀯𑀤𑁂𑀯 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀢𑁆𑀣𑀸’’𑀢𑀺𑀆𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼, 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑀁 𑀞𑀺𑀢𑀲𑁆𑀲 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀓𑀺𑀘𑁆𑀘𑀁 𑀓𑀢𑀁 𑀦𑀸𑀫 𑀳𑁄𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁.

𑀲𑀸𑀯𑀢𑁆𑀣𑀺𑀦𑀕𑀭𑀁 𑀯𑀺𑀬 𑀲𑀓𑁆𑀓𑀸𑀬𑀦𑀕𑀭𑀁 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁆𑀢𑀸. 𑀲𑀸𑀓𑁂𑀢𑀦𑀕𑀭𑀁 𑀯𑀺𑀬 𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑀸𑀧𑀼𑀡𑀺𑀢𑀩𑁆𑀩𑀢𑁆𑀢𑀸. 𑀅𑀘𑁆𑀘𑀸𑀬𑀺𑀓𑀲𑁆𑀲 𑀓𑀺𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀓𑀸𑀮𑁄 𑀯𑀺𑀬 𑀦𑀯𑀫𑁂𑀦𑁂𑀯 𑀔𑀡𑁂𑀦 𑀧𑀢𑁆𑀢𑀩𑁆𑀩𑀲𑁆𑀲 𑀅𑀪𑀺𑀲𑀫𑀬𑀓𑀺𑀘𑁆𑀘𑀲𑁆𑀲 𑀉𑀧𑀸𑀤𑀓𑀸𑀮𑁄. 𑀬𑀣𑀸 𑀭𑀜𑁆𑀜𑁄 𑀲𑀢𑁆𑀢𑀫𑁂𑀦 𑀭𑀣𑀯𑀺𑀦𑀻𑀢𑁂𑀦 𑀲𑀸𑀓𑁂𑀢𑁂 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑁂 𑀑𑀭𑀼𑀴𑁆𑀳𑀲𑁆𑀲 𑀦 𑀢𑀸𑀯 𑀓𑀺𑀘𑁆𑀘𑀁 𑀦𑀺𑀝𑁆𑀞𑀺𑀢𑀁 𑀦𑀸𑀫 𑀳𑁄𑀢𑀺, 𑀲𑀁𑀯𑀺𑀥𑀸𑀢𑀩𑁆𑀩𑀲𑀁𑀯𑀺𑀥𑀸𑀦𑀁 𑀜𑀸𑀢𑀺𑀫𑀺𑀢𑁆𑀢𑀕𑀡𑀧𑀭𑀺𑀯𑀼𑀢𑀲𑁆𑀲 𑀲𑀼𑀭𑀲𑀪𑁄𑀚𑀦𑀧𑀭𑀺𑀪𑁄𑀕𑁂 𑀦𑀺𑀝𑁆𑀞𑀺𑀢𑀁 𑀦𑀸𑀫 𑀲𑀺𑀬𑀸, 𑀏𑀯𑀫𑁂𑀢𑀁 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸 𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀢𑁂𑀲𑀁𑀬𑁂𑀯 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀲𑀸𑀥𑀓𑀅𑀭𑀺𑀬𑀨𑀮𑀲𑀫𑀗𑁆𑀕𑀺𑀓𑀸𑀮𑁂 𑀅𑀪𑀺𑀲𑀫𑀬𑀓𑀺𑀘𑁆𑀘𑀁 𑀦𑀺𑀝𑁆𑀞𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀬𑁄𑀕𑀺𑀦𑁄…𑀧𑁂… 𑀓𑀸𑀮𑁄 𑀤𑀝𑁆𑀞𑀩𑁆𑀩𑁄’’𑀢𑀺. 𑀢𑀢𑁆𑀣 𑀧𑀭𑁄𑀧𑀡𑁆𑀡𑀸𑀲 𑀓𑀼𑀲𑀮𑀥𑀫𑁆𑀫𑀸 𑀦𑀸𑀫 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸 𑀨𑀲𑁆𑀲𑀸𑀤𑀬𑁄 𑀧𑀭𑁄𑀧𑀡𑁆𑀡𑀸𑀲 𑀅𑀦𑀯𑀚𑁆𑀚𑀥𑀫𑁆𑀫𑀸. 𑀦𑀺𑀭𑁄𑀥𑀲𑀬𑀦𑁂𑀢𑀺 𑀦𑀺𑀩𑁆𑀩𑀸𑀦𑀲𑀬𑀦𑁂.

‘‘𑀯𑀺𑀲𑀼𑀤𑁆𑀥𑀺𑀬𑁄’’𑀢𑀺 𑀯𑀸 ‘‘𑀓𑀣𑀸𑀯𑀢𑁆𑀣𑀽𑀦𑀻’’𑀢𑀺 𑀯𑀸 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺 𑀢𑁂𑀲𑀁 𑀅𑀢𑁆𑀣𑀢𑁄 𑀅𑀦𑀜𑁆𑀜𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀻’’𑀢𑀺 𑀆𑀭𑀤𑁆𑀥𑀁. 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺 𑀲𑀢𑁆𑀢 𑀯𑀺𑀲𑀼𑀤𑁆𑀥𑀺𑀬𑁄 𑀦𑀸𑀫 𑀯𑀺𑀲𑁆𑀲𑀚𑁆𑀚𑀦𑁆𑀢𑁄𑀧𑀺 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀯𑀺𑀲𑁆𑀲𑀚𑁆𑀚𑁂𑀲𑀺 𑀢𑁂𑀲𑀁 𑀅𑀢𑁆𑀣𑀢𑁄 𑀅𑀦𑀜𑁆𑀜𑀢𑁆𑀢𑀸. 𑀏𑀢𑁂𑀦𑁂𑀯 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀲𑀢𑁆𑀢 𑀯𑀺𑀲𑀼𑀤𑁆𑀥𑀺𑀬𑁄 𑀧𑀼𑀘𑁆𑀙𑀦𑁆𑀢𑁄 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀧𑀼𑀘𑁆𑀙𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑁆𑀢𑀺 𑀧𑀜𑁆𑀳𑀁. 𑀓𑀺𑀁 𑀚𑀸𑀦𑀺𑀢𑁆𑀯𑀸 𑀧𑀼𑀘𑁆𑀙𑀻𑀢𑀺 𑀯𑀺𑀲𑀼𑀤𑁆𑀥𑀺𑀧𑀭𑀺𑀬𑀸𑀬𑁂𑀦 𑀓𑀣𑀸𑀯𑀢𑁆𑀣𑀽𑀦𑀺 𑀧𑀼𑀘𑁆𑀙𑀸𑀫𑀻𑀢𑀺 𑀓𑀺𑀁 𑀚𑀸𑀦𑀺𑀢𑁆𑀯𑀸 𑀧𑀼𑀘𑁆𑀙𑀺. 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀦𑀁 𑀣𑁂𑀭𑀁 𑀯𑀺𑀲𑀼𑀤𑁆𑀥𑀺𑀬𑁄 𑀧𑀼𑀘𑁆𑀙𑀦𑁆𑀢𑁄 𑀧𑀼𑀘𑁆𑀙𑀺𑀢𑀝𑁆𑀞𑀸𑀦𑁂𑀬𑁂𑀯 𑀧𑀼𑀘𑁆𑀙𑀦𑁂𑀦 𑀓𑀺𑀁 𑀢𑀺𑀢𑁆𑀣𑀓𑀼𑀲𑀮𑁄 𑀯𑀸 𑀧𑀦 𑀳𑀼𑀢𑁆𑀯𑀸 𑀯𑀺𑀲𑀬𑀲𑁆𑀫𑀺𑀁 𑀧𑀼𑀘𑁆𑀙𑀺, 𑀉𑀤𑀸𑀳𑀼 𑀧𑀸𑀦𑀻𑀬𑀢𑁆𑀣𑀺𑀓𑀫𑀢𑀺𑀢𑁆𑀣𑁂𑀳𑀺 𑀙𑀺𑀦𑁆𑀦𑀢𑀝𑁂𑀳𑀺 𑀧𑀸𑀢𑁂𑀦𑁆𑀢𑁄 𑀯𑀺𑀬 𑀅𑀢𑀺𑀢𑁆𑀣𑀓𑀼𑀲𑀮𑁄 𑀳𑀼𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑀩𑁆𑀩𑀝𑁆𑀞𑀸𑀦𑁂 𑀅𑀯𑀺𑀲𑀬𑀲𑁆𑀫𑀺𑀁 𑀧𑀼𑀘𑁆𑀙𑀻𑀢𑀺 𑀬𑁄𑀚𑀦𑀸. 𑀇𑀫𑀺𑀦𑀸 𑀦𑀬𑁂𑀦 𑀯𑀺𑀲𑁆𑀲𑀚𑁆𑀚𑀦𑀧𑀓𑁆𑀔𑁂𑀧𑀺 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀢𑁆𑀣𑀫𑀲𑁆𑀲 𑀯𑀺𑀘𑀸𑀭𑀡𑀸 𑀆𑀭𑀤𑁆𑀥𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀢𑀺𑀢𑁆𑀣𑀓𑀼𑀲𑀮𑁄 𑀳𑀼𑀢𑁆𑀯𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀓𑀣𑀸𑀯𑀢𑁆𑀣𑀽𑀦𑀁 𑀅𑀢𑁆𑀣𑀢𑁄 𑀅𑀦𑀜𑁆𑀜𑀢𑁆𑀢𑁂𑀧𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀤𑀫𑀺𑀦𑀸𑀢𑀺 𑀬𑀁 ‘‘𑀲𑀁𑀔𑀺𑀢𑁆𑀢𑀁, 𑀯𑀺𑀢𑁆𑀣𑀺𑀡𑁆𑀡’’𑀦𑁆𑀢𑀺 𑀘 𑀯𑀼𑀢𑁆𑀢𑀁, 𑀢𑀁 𑀇𑀫𑀺𑀦𑀸 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁂𑀦 𑀦𑀬𑁂𑀦 𑀯𑀺𑀥𑀺𑀦𑀸 𑀯𑁂𑀤𑀺𑀢𑀩𑁆𑀩𑀁.