𑁮. 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁦. 𑀚𑀗𑁆𑀕𑀮𑀸𑀦𑀦𑁆𑀢𑀺 𑀏𑀢𑁆𑀣 𑀬𑁄 𑀦𑀺𑀧𑀺𑀘𑁆𑀙𑀮𑁂𑀦 𑀅𑀫𑀼𑀤𑀼𑀓𑁄 𑀦𑀺𑀭𑀼𑀤𑀓𑀢𑀸𑀬 𑀣𑀤𑁆𑀥𑀮𑀽𑀔𑀪𑀽𑀫𑀺𑀧𑁆𑀧𑀤𑁂𑀲𑁄, 𑀲𑁄 ‘‘𑀚𑀗𑁆𑀕𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀩𑁆𑀩𑀳𑀼𑀮𑀢𑀸𑀬 𑀧𑀦 𑀇𑀥 𑀲𑀩𑁆𑀩𑁄 𑀪𑀽𑀫𑀺𑀧𑁆𑀧𑀤𑁂𑀲𑁄 𑀚𑀗𑁆𑀕𑀮𑁄, 𑀢𑀲𑁆𑀫𑀺𑀁 𑀚𑀗𑁆𑀕𑀮𑁂 𑀚𑀸𑀢𑀸, 𑀪𑀯𑀸𑀢𑀺 𑀯𑀸 𑀚𑀗𑁆𑀕𑀮𑀸, 𑀢𑁂𑀲𑀁 𑀚𑀗𑁆𑀕𑀮𑀸𑀦𑀁. 𑀏𑀯𑀜𑁆𑀳𑀺 𑀦𑀤𑀻𑀘𑀭𑀸𑀦𑀫𑁆𑀧𑀺 𑀳𑀢𑁆𑀣𑀻𑀦𑀁 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺. 𑀲𑀫𑁄𑀥𑀸𑀢𑀩𑁆𑀩𑀸𑀦𑀁 𑀯𑀺𑀬 𑀳𑀺 𑀲𑀫𑁄𑀥𑀸𑀬𑀓𑀸𑀦𑀫𑁆𑀧𑀺 𑀚𑀗𑁆𑀕𑀮𑀕𑁆𑀕𑀳𑀡𑁂𑀦 𑀕𑀳𑁂𑀢𑀩𑁆𑀩𑀢𑁄. 𑀧𑀣𑀯𑀻𑀢𑀮𑀘𑀸𑀭𑀻𑀦𑀦𑁆𑀢𑀺 𑀇𑀫𑀺𑀦𑀸 𑀚𑀮𑀘𑀸𑀭𑀺𑀦𑁄 𑀦 𑀦𑀺𑀯𑀢𑁆𑀢𑁂𑀢𑀺 𑀅𑀤𑀺𑀲𑁆𑀲𑀫𑀸𑀦𑀧𑀸𑀤𑀢𑁆𑀢𑀸. 𑀧𑀸𑀡𑀸𑀦𑀦𑁆𑀢𑀺 𑀲𑀸𑀥𑀸𑀭𑀡𑀯𑀘𑀦𑀫𑁆𑀧𑀺 ‘‘𑀧𑀤𑀚𑀸𑀢𑀸𑀦𑀻’’𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀯𑀺𑀲𑁂𑀲𑀦𑀺𑀯𑀺𑀝𑁆𑀞𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀧𑀸𑀤𑀓𑀧𑀸𑀡𑀸𑀦’’𑀦𑁆𑀢𑀺. ‘‘𑀫𑀼𑀢𑁆𑀢𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁧𑁯; 𑀅. 𑀦𑀺. 𑁯.𑁧𑁧) 𑀕𑀢-𑀲𑀤𑁆𑀤𑁄 𑀅𑀦𑀢𑁆𑀣𑀦𑁆𑀢𑀭𑁄 𑀯𑀺𑀬, 𑀚𑀸𑀢-𑀲𑀤𑁆𑀤𑁄 𑀅𑀦𑀢𑁆𑀣𑀦𑁆𑀢𑀭𑁄𑀢𑀺 𑀆𑀳 ‘‘𑀧𑀤𑀚𑀸𑀢𑀸𑀦𑀻𑀢𑀺 𑀧𑀤𑀸𑀦𑀻’’𑀢𑀺. 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀯𑀭𑁄𑀥𑀁, 𑀅𑀦𑁆𑀢𑁄𑀕𑀫𑀁 𑀯𑀸. 𑀫𑀳𑀦𑁆𑀢𑀢𑁆𑀢𑁂𑀦𑀸𑀢𑀺 𑀯𑀺𑀧𑀼𑀮𑀪𑀸𑀯𑁂𑀦.

𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸 𑀥𑀫𑁆𑀫𑀸, 𑀦 𑀅𑀦𑀯𑀚𑁆𑀚𑀫𑀢𑁆𑀢𑀥𑀫𑁆𑀫𑀸. 𑀓𑀼𑀲𑀮𑀢𑁆𑀢𑀺𑀓𑁂 𑀆𑀕𑀢𑀦𑀬𑁂𑀦 𑀳𑀺 𑀇𑀥 𑀓𑀼𑀲𑀮𑀸 𑀥𑀫𑁆𑀫𑀸 𑀕𑀳𑁂𑀢𑀩𑁆𑀩𑀸, 𑀦 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦. 𑀘𑀢𑀼𑀩𑁆𑀩𑀺𑀥𑁄 𑀲𑀗𑁆𑀕𑀳𑁄𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀏𑀓𑀯𑀺𑀥𑁄𑀯𑁂𑀢𑁆𑀣 𑀲𑀗𑁆𑀕𑀳𑁄 𑀅𑀥𑀺𑀧𑁆𑀧𑁂𑀢𑁄𑀢𑀺? 𑀦, 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀦𑀺𑀤𑁆𑀥𑀸𑀭𑀺𑀢𑀢𑁆𑀣𑀲𑁆𑀲 𑀲𑀤𑁆𑀤𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸. 𑀲𑀗𑁆𑀕𑀳-𑀲𑀤𑁆𑀤𑁄 𑀢𑀸𑀯 𑀅𑀢𑁆𑀢𑀦𑁄 𑀅𑀢𑁆𑀣𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀅𑀢𑁆𑀣𑁄𑀧𑀺 𑀯𑀸 𑀅𑀦𑀺𑀤𑁆𑀥𑀸𑀭𑀺𑀢𑀯𑀺𑀲𑁂𑀲𑁄 𑀲𑀸𑀫𑀜𑁆𑀜𑁂𑀦 𑀕𑀳𑁂𑀢𑀩𑁆𑀩𑀢𑀁 𑀧𑀢𑁆𑀢𑁄 ‘‘𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺 𑀏𑀢𑁆𑀣 𑀲𑀗𑁆𑀕𑀳-𑀲𑀤𑁆𑀤𑁂𑀦 𑀯𑀘𑀦𑀻𑀬𑀢𑀁 𑀕𑀢𑁄𑀢𑀺 𑀦 𑀓𑁄𑀘𑀺 𑀤𑁄𑀲𑁄, 𑀦𑀺𑀤𑁆𑀥𑀸𑀭𑀺𑀢𑁂 𑀯𑀺𑀲𑁂𑀲𑁂 𑀢𑀲𑁆𑀲 𑀏𑀓𑀯𑀺𑀥𑀢𑀸 𑀲𑀺𑀬𑀸, 𑀦 𑀢𑀢𑁄 𑀧𑀼𑀩𑁆𑀩𑁂𑀢𑀺. 𑀲𑀚𑀸𑀢𑀺𑀲𑀗𑁆𑀕𑀳𑁄𑀢𑀺 𑀲𑀫𑀸𑀦𑀚𑀸𑀢𑀺𑀬𑀸, 𑀲𑀫𑀸𑀦𑀚𑀸𑀢𑀺𑀓𑀸𑀦𑀁 𑀯𑀸 𑀲𑀗𑁆𑀕𑀳𑁄. 𑀥𑀸𑀢𑀼𑀓𑀣𑀸𑀯𑀡𑁆𑀡𑀦𑀸𑀬𑀁 𑀧𑀦 ‘‘𑀚𑀸𑀢𑀺𑀲𑀗𑁆𑀕𑀳𑁄’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀢𑀁 𑀚𑀸𑀢𑀺-𑀲𑀤𑁆𑀤𑀲𑁆𑀲 𑀲𑀸𑀧𑁂𑀓𑁆𑀔𑀲𑀤𑁆𑀤𑀢𑁆𑀢𑀸 𑀚𑀸𑀢𑀺𑀬𑀸 𑀲𑀗𑁆𑀕𑀳𑁄𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑁄 𑀚𑀸𑀢𑀺𑀬𑀸𑀢𑀺 𑀯𑀺𑀜𑁆𑀜𑀸𑀬𑀢𑀺 𑀲𑀫𑁆𑀩𑀦𑁆𑀥𑀸𑀭𑀳𑀲𑁆𑀲 𑀅𑀜𑁆𑀜𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀇𑀥 𑀧𑀦 𑀭𑀽𑀧𑀓𑀡𑁆𑀟𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑁫𑁯𑁪) 𑀯𑀺𑀬 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀚𑀸𑀢𑀺𑀲𑀗𑁆𑀕𑀳𑁄’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀲𑀜𑁆𑀚𑀸𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀜𑁆𑀚𑀸𑀢𑀺, 𑀲𑀜𑁆𑀚𑀸𑀢𑀺𑀬𑀸 𑀲𑀗𑁆𑀕𑀳𑁄 𑀲𑀜𑁆𑀚𑀸𑀢𑀺𑀲𑀗𑁆𑀕𑀳𑁄, 𑀲𑀜𑁆𑀚𑀸𑀢𑀺𑀤𑁂𑀲𑀯𑀲𑁂𑀦 𑀲𑀗𑁆𑀕𑀳𑁄𑀢𑀺 𑀅𑀢𑁆𑀣𑁄. ‘‘𑀲𑀩𑁆𑀩𑁂 𑀭𑀣𑀺𑀓𑀸’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑁂 𑀭𑀣𑀬𑁄𑀥𑀸 𑀭𑀣𑁂𑀦 𑀬𑀼𑀚𑁆𑀛𑀦𑀓𑀺𑀭𑀺𑀬𑀸𑀬 𑀏𑀓𑀲𑀗𑁆𑀕𑀳𑁄𑀢𑀺. ‘‘𑀲𑀩𑁆𑀩𑁂 𑀥𑀦𑀼𑀕𑁆𑀕𑀳𑀸’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑁂 𑀇𑀲𑁆𑀲𑀸𑀲𑀸 𑀥𑀦𑀼𑀦𑀸 𑀯𑀺𑀚𑁆𑀛𑀦𑀓𑀺𑀭𑀺𑀬𑀸𑀬 𑀏𑀓𑀲𑀗𑁆𑀕𑀳𑁄𑀢𑀺 𑀆𑀳 ‘‘𑀏𑀯𑀁 𑀓𑀺𑀭𑀺𑀬𑀯𑀲𑁂𑀦 𑀲𑀗𑁆𑀕𑀳𑁄’’𑀢𑀺. 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀭𑀽𑀧𑀓𑁆𑀔𑀦𑁆𑀥𑁂𑀦 𑀏𑀓𑀲𑀗𑁆𑀕𑀳𑀁 𑀭𑀽𑀧𑀓𑁆𑀔𑀦𑁆𑀥𑁄𑀢𑁂𑀯 𑀕𑀡𑀺𑀢𑀁, 𑀕𑀳𑀡𑀁 𑀕𑀢𑀦𑁆𑀢𑀺 𑀅𑀢𑁆𑀣𑁄.

𑀤𑀺𑀬𑀟𑁆𑀠𑀫𑁂𑀯 𑀲𑀘𑁆𑀘𑀁 𑀪𑀚𑀢𑀺 𑀫𑀕𑁆𑀕𑀲𑀘𑁆𑀘𑀤𑀼𑀓𑁆𑀔𑀲𑀘𑁆𑀘𑁂𑀓𑀤𑁂𑀲𑀪𑀸𑀯𑀢𑁄. 𑀲𑀘𑁆𑀘𑁂𑀓𑀤𑁂𑀲𑀦𑁆𑀢𑁄𑀕𑀥𑀫𑁆𑀧𑀺 𑀲𑀘𑁆𑀘𑀦𑁆𑀢𑁄𑀕𑀥𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀘𑁆𑀘𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸’’𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀲𑀸𑀲𑀦𑀢𑁄 𑀘 𑀮𑁄𑀓𑀢𑁄 𑀘 𑀉𑀧𑀫𑀁 𑀆𑀳 𑀭𑀺𑀢𑁆𑀯𑀸 𑀤𑀻𑀧𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀥𑀺𑀓𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀤𑀺𑀬𑀟𑁆𑀠𑀲𑀺𑀓𑁆𑀔𑀸𑀧𑀤𑀲𑀢𑀦𑁆𑀢𑀺 𑀇𑀤𑀁 𑀬𑀲𑁆𑀫𑀺𑀁 𑀓𑀸𑀮𑁂 𑀢𑀁 𑀲𑀼𑀢𑁆𑀢𑀁 𑀤𑁂𑀲𑀺𑀢𑀁, 𑀢𑀤𑀸 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀢𑁄 𑀧𑀭𑀁 𑀧𑀦 𑀲𑀸𑀥𑀺𑀓𑀸𑀦𑀺 𑀤𑁆𑀯𑁂𑀲𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺. 𑀲𑀺𑀓𑁆𑀔𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬. 𑀏𑀢𑁆𑀣 𑀘 ‘‘𑀲𑀻𑀮𑀁 𑀲𑀺𑀓𑁆𑀔𑀦𑁆𑀢𑁄𑀧𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀢𑀻’’𑀢𑀺 𑀯𑀺𑀲𑀫𑁄𑀬𑀁 𑀉𑀧𑀜𑁆𑀜𑀸𑀲𑁄. 𑀢𑀢𑁆𑀣 𑀳𑀺 𑀬𑁄 𑀧𑀳𑀸𑀢𑀩𑁆𑀩𑀁 𑀧𑀚𑀳𑀢𑀺, 𑀲𑀁𑀯𑀭𑀺𑀢𑀩𑁆𑀩𑀢𑁄 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺, 𑀅𑀬𑀫𑀲𑁆𑀲 𑀅𑀥𑀺𑀲𑀻𑀮𑀲𑀺𑀓𑁆𑀔𑀸. 𑀬𑁄 𑀢𑀢𑁆𑀣 𑀘𑁂𑀢𑀲𑁄 𑀅𑀯𑀺𑀓𑁆𑀔𑁂𑀧𑁄, 𑀅𑀬𑀫𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸. 𑀬𑀸 𑀢𑀢𑁆𑀣 𑀯𑀻𑀫𑀁𑀲𑀸, 𑀅𑀬𑀫𑀲𑁆𑀲 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀇𑀢𑀺 𑀲𑁄 𑀓𑀼𑀮𑀧𑀼𑀢𑁆𑀢𑁄 𑀲𑀭𑀽𑀧𑀢𑁄 𑀮𑀩𑁆𑀪𑀫𑀸𑀦𑀸 𑀏𑀯 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀢𑀻𑀢𑀺 𑀤𑀻𑀧𑀺𑀢𑁄, 𑀦 𑀲𑀺𑀓𑁆𑀔𑀸𑀦𑀁 𑀅𑀦𑁆𑀢𑁄𑀕𑀥𑀢𑀸𑀫𑀢𑁆𑀢𑁂𑀦. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑁄 𑀢𑀣𑀸𑀪𑀽𑀢𑀲𑁆𑀲 𑀲𑀁𑀯𑀭𑁄, 𑀅𑀬𑀫𑁂𑀢𑁆𑀣 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀬𑁄 𑀢𑀣𑀸𑀪𑀽𑀢𑀲𑁆𑀲 𑀲𑀫𑀸𑀥𑀺, 𑀅𑀬𑀫𑁂𑀢𑁆𑀣 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀬𑀸 𑀢𑀣𑀸𑀪𑀽𑀢𑀲𑁆𑀲 𑀧𑀜𑁆𑀜𑀸, 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀫𑀦𑀲𑀺𑀓𑀸𑀭𑁂𑀦 𑀲𑀺𑀓𑁆𑀔𑀢𑀺 𑀆𑀲𑁂𑀯𑀢𑀺 𑀪𑀸𑀯𑁂𑀢𑀺 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺. 𑀇𑀥 𑀧𑀦 𑀲𑀘𑁆𑀘𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸 𑀲𑀘𑁆𑀘-𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑀸𑀫𑀢𑁆𑀢𑁂𑀦 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀕𑀡𑀦𑀦𑁆𑀢𑁄𑀕𑀥𑀸 𑀳𑁄𑀦𑁆𑀢𑀻𑀢𑀺? 𑀦, 𑀢𑀢𑁆𑀣𑀸𑀧𑀺 𑀳𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀮𑀩𑁆𑀪𑀢𑀺, 𑀇𑀢𑀭𑀸 𑀧𑀭𑀺𑀬𑀸𑀬𑀢𑁄𑀢𑀺 𑀓𑀢𑁆𑀯𑀸 ‘‘𑀲𑀺𑀓𑁆𑀔𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀘 𑀢𑀢𑁄 𑀅𑀫𑀼𑀘𑁆𑀘𑀺𑀢𑁆𑀯𑀸 𑀢𑀲𑁆𑀲𑁂𑀯 𑀅𑀦𑁆𑀢𑁄𑀕𑀥𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀬𑀣𑀸 𑀘 𑀏𑀓𑀲𑁆𑀲 𑀳𑀢𑁆𑀣𑀺𑀧𑀤𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑀸 𑀳𑀢𑁆𑀣𑀺𑀧𑀤𑁄𑀧𑀫𑀸 𑀲𑀫𑀢𑁆𑀣𑀺𑀢𑀸 𑀤𑀝𑁆𑀞𑀩𑁆𑀩𑀸. 𑀏𑀓𑀲𑁆𑀫𑀺𑀫𑁆𑀧𑀺 𑀤𑁆𑀯𑀻𑀲𑀼𑀧𑀺 𑀢𑀻𑀲𑀼𑀧𑀺 𑀲𑀘𑁆𑀘𑁂𑀲𑀼 𑀕𑀡𑀦𑀁 𑀕𑀢𑀸 𑀥𑀫𑁆𑀫𑀸𑀢𑀺 𑀇𑀤𑀁 𑀦 𑀓𑀼𑀲𑀮𑀢𑁆𑀢𑀺𑀓𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀅𑀣 𑀔𑁄 𑀢𑀺𑀓𑀤𑀼𑀓𑁂𑀲𑀼 𑀬𑀣𑀸𑀭𑀳𑀁 𑀮𑀩𑁆𑀪𑀫𑀸𑀦𑀧𑀤𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀲𑀘𑁆𑀘𑁂 𑀕𑀡𑀦𑀁 𑀕𑀢𑁄 𑀥𑀫𑁆𑀫𑁄 𑀅𑀲𑀗𑁆𑀔𑀢𑀥𑀫𑁆𑀫𑁄 𑀤𑀝𑁆𑀞𑀩𑁆𑀩𑁄, 𑀤𑁆𑀯𑀻𑀲𑀼 𑀲𑀘𑁆𑀘𑁂𑀲𑀼 𑀕𑀡𑀦𑀁 𑀕𑀢𑀸 𑀓𑀼𑀲𑀮𑀸 𑀥𑀫𑁆𑀫𑀸, 𑀢𑀣𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀩𑁆𑀬𑀸𑀓𑀢𑀸 𑀘 𑀥𑀫𑁆𑀫𑀸, 𑀢𑀻𑀲𑀼 𑀲𑀘𑁆𑀘𑁂𑀲𑀼 𑀕𑀡𑀦𑀁 𑀕𑀢𑀸 𑀲𑀗𑁆𑀔𑀢𑀸 𑀥𑀫𑁆𑀫𑀸, 𑀏𑀯𑀁 𑀅𑀜𑁆𑀜𑁂𑀲𑀫𑁆𑀧𑀺 𑀢𑀺𑀓𑀤𑀼𑀓𑀧𑀤𑀸𑀦𑀁 𑀯𑀲𑁂𑀦 𑀅𑀬𑀫𑀢𑁆𑀣𑁄 𑀬𑀣𑀸𑀭𑀳𑀁 𑀯𑀺𑀪𑀚𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀏𑀓𑀲𑁆𑀫𑀺𑀫𑁆𑀧𑀺…𑀧𑁂… 𑀕𑀢𑀸𑀯 𑀳𑁄𑀦𑁆𑀢𑀻’’𑀢𑀺. 𑀏𑀓𑀤𑁂𑀲𑁄 𑀳𑀺 𑀲𑀫𑀼𑀤𑀸𑀬𑀦𑁆𑀢𑁄𑀕𑀥𑀢𑁆𑀢𑀸 𑀯𑀺𑀲𑁂𑀲𑁄 𑀯𑀺𑀬 𑀲𑀸𑀫𑀜𑁆𑀜𑁂𑀦 𑀲𑀫𑀽𑀳𑁂𑀦 𑀲𑀗𑁆𑀕𑀳𑀁 𑀮𑀪𑀢𑀺. 𑀢𑁂𑀦𑀸𑀳 ‘‘𑀲𑀘𑁆𑀘𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸’’𑀢𑀺. 𑀤𑁂𑀲𑀦𑀸𑀦𑀼𑀓𑁆𑀓𑀫𑁄𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀲𑁂𑀦 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀯𑀺𑀪𑀚𑀦𑀁. 𑀢𑀢𑁆𑀣 𑀘 𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑀯𑀲𑁂𑀦𑀆𑀤𑀺𑀢𑁄 𑀅𑀚𑁆𑀛𑀢𑁆𑀢𑀺𑀓𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀯𑀺𑀪𑀚𑀦𑀦𑁆𑀢𑀺. 𑀅𑀬𑀁 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀅𑀦𑀼𑀓𑁆𑀓𑀫𑁄.

𑁩𑁦𑁧. 𑀢𑀁 𑀧𑀦𑁂𑀢𑀁 𑀉𑀧𑀫𑀸𑀳𑀺 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀚𑀸𑀢𑀦𑁆𑀢𑀺 𑀲𑀼𑀦𑁆𑀤𑀭𑀁, 𑀲𑀼𑀲𑀡𑁆𑀞𑀺𑀢𑀁 𑀲𑀼𑀧𑀭𑀺𑀡𑀢𑀜𑁆𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑁂𑀲𑀺𑀬𑁄𑀢𑀺 𑀯𑀺𑀮𑀻𑀯𑁂. 𑀫𑀼𑀤𑀼𑀪𑀸𑀯𑀢𑁄 𑀓𑀼𑀘𑁆𑀙𑀺𑀪𑀸𑀕𑀁 𑀆𑀤𑀸𑀬. 𑀇𑀢𑀭𑁂 𑀘 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂𑀢𑀺 𑀧𑀜𑁆𑀘𑀥𑀸 𑀪𑀺𑀦𑁆𑀦𑀓𑁄𑀝𑁆𑀞𑀸𑀲𑁂𑀲𑀼 𑀇𑀢𑀭𑁂 𑀘 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂. 𑀇𑀢𑀭𑁂 𑀘 𑀢𑀬𑁄 𑀓𑁄𑀝𑁆𑀞𑀸𑀲𑁂𑀢𑀺𑀆𑀤𑀺𑀢𑁄 𑀘𑀢𑀼𑀥𑀸 𑀪𑀺𑀦𑁆𑀦𑀓𑁄𑀝𑁆𑀞𑀸𑀲𑁂𑀲𑀼 𑀇𑀢𑀭𑁂 𑀘 𑀢𑀬𑁄 𑀓𑁄𑀝𑁆𑀞𑀸𑀲𑁂.

𑀭𑀸𑀚𑀧𑀼𑀢𑁆𑀢𑀽𑀧𑀫𑀸𑀬𑀸𑀢𑀺 𑀭𑀜𑁆𑀜𑁄 𑀚𑁂𑀝𑁆𑀞𑀧𑀼𑀢𑁆𑀢𑀉𑀧𑀫𑀸𑀬. 𑀦𑁆𑀢𑀺 𑀧𑀺𑀴𑀦𑁆𑀥𑀦𑀁. 𑀉𑀭𑁂 𑀯𑀸𑀬𑀸𑀫𑀚𑀦𑀺𑀢𑀅𑀭𑀺𑀬𑀚𑀸𑀢𑀺𑀬𑀸 𑀑𑀭𑀲𑁄. 𑀫𑀼𑀔𑀢𑁄 𑀚𑀸𑀢𑁄𑀢𑀺 𑀫𑀼𑀔𑀢𑁄 𑀦𑀺𑀕𑁆𑀕𑀢𑀥𑀫𑁆𑀫𑀤𑁂𑀲𑀦𑀸𑀬 𑀚𑀸𑀢𑁄, 𑀩𑀼𑀤𑁆𑀥𑀸𑀦𑀁 𑀯𑀸 𑀥𑀫𑁆𑀫𑀓𑀸𑀬𑀲𑁆𑀲 𑀫𑀼𑀔𑀪𑀽𑀢𑀅𑀭𑀺𑀬𑀥𑀫𑁆𑀫𑀢𑁄 𑀚𑀸𑀢𑁄. 𑀢𑀢𑁄 𑀏𑀯 𑀥𑀫𑁆𑀫𑀚𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄. 𑀲𑀢𑁆𑀣𑀼 𑀥𑀫𑁆𑀫𑀤𑀸𑀬𑀸𑀤𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸 𑀥𑀫𑁆𑀫𑀤𑀸𑀬𑀸𑀤𑁄. 𑀢𑁂𑀦𑀸𑀳 ‘‘𑀦𑁄 𑀆𑀫𑀺𑀲𑀤𑀸𑀬𑀸𑀤𑁄’’𑀢𑀺. 𑀦𑁆𑀢𑀺 ‘‘𑀪𑀕𑀯𑀢𑁄 𑀧𑀼𑀢𑁆𑀢𑁄’’𑀢𑀺𑀆𑀤𑀺𑀯𑀘𑀦𑀁. 𑀫𑀳𑀸𑀧𑀜𑁆𑀜𑀢𑀸𑀤𑀺𑀕𑀼𑀡𑁂𑀳𑀺 𑀲𑀸𑀢𑀺𑀲𑀬𑀁 𑀅𑀦𑀼𑀧𑀼𑀩𑁆𑀩𑀪𑀸𑀯𑁂 𑀞𑀺𑀢𑀢𑁆𑀢𑀸 𑀲𑀫𑁆𑀫𑀸 𑀬𑀣𑀸𑀪𑀽𑀢𑀁 𑀯𑀤𑀫𑀸𑀦𑁄 𑀯𑀢𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀯𑀤𑁂𑀬𑁆𑀬.

𑀅𑀓𑀼𑀢𑁄𑀪𑀬𑀁 𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀜𑁆𑀘. 𑀭𑀸𑀕𑀭𑀚𑀸𑀤𑀻𑀦𑀁 𑀯𑀺𑀕𑀫𑁂𑀦 𑀯𑀺𑀕𑀢𑀭𑀚𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀲𑀼𑀕𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀪𑀺𑀓𑁆𑀔𑀽𑀦𑀁 𑀧𑀭𑁄𑀲𑀳𑀲𑁆𑀲𑀁 𑀧𑀬𑀺𑀭𑀼𑀧𑀸𑀲𑀢𑀻𑀢𑀺 𑀬𑁄𑀚𑀦𑀸.

‘‘𑀲𑁂𑀯𑁂𑀣 𑀪𑀚𑀣𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀧𑀡𑁆𑀟𑀺𑀢𑀸 𑀪𑀺𑀓𑁆𑀔𑀽 𑀅𑀦𑀼𑀕𑁆𑀕𑀸𑀳𑀓𑀸’’𑀢𑀺. 𑀧𑀡𑁆𑀟𑀺𑀢𑀸𑀧𑀺 𑀲𑀫𑀸𑀦𑀸 𑀦 𑀅𑀧𑁆𑀧𑀲𑁆𑀲𑀼𑀢𑀸, 𑀅𑀣 𑀔𑁄 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀳𑀺 𑀅𑀦𑀼𑀕𑁆𑀕𑀸𑀳𑀓𑀸𑀢𑀺 𑀧𑀼𑀭𑀺𑀫𑀸 𑀉𑀧𑀫𑀸 𑀣𑁂𑀭𑀲𑁆𑀲𑁂𑀯 𑀯𑀲𑁂𑀦 𑀉𑀤𑀸𑀳𑀝𑀸, 𑀤𑀼𑀢𑀺𑀬𑀸 𑀧𑀦 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀧𑀺 𑀯𑀲𑁂𑀦 𑀉𑀤𑀸𑀳𑀝𑀸.

𑁩𑁦𑁨. 𑀅𑀚𑁆𑀛𑀢𑁆𑀢𑀺𑀓𑀸𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸. 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀦𑁆𑀢𑀺 𑀧𑀤𑀤𑁆𑀯𑀬𑁂𑀦𑀧𑀺 𑀢𑀁𑀢𑀁𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀉𑀪𑀬𑀫𑁆𑀧𑁂𑀢𑀁 𑀦𑀺𑀬𑀓𑀸𑀥𑀺𑀯𑀘𑀦𑀫𑁂𑀯𑀸’’𑀢𑀺. 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀧𑀦 𑀅𑀢𑁆𑀢𑀸𑀢𑀺 𑀕𑀳𑁂𑀢𑀩𑁆𑀩𑀪𑀸𑀯𑀽𑀧𑀕𑀫𑀦𑀯𑀲𑁂𑀦 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀁 𑀅𑀚𑁆𑀛𑀢𑁆𑀢𑀁, 𑀢𑀁𑀢𑀁𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀧𑀘𑁆𑀘𑀢𑁆𑀢𑀁. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁭) ‘‘𑀅𑀢𑁆𑀢𑀦𑀺 𑀧𑀯𑀢𑁆𑀢𑀢𑁆𑀢𑀸 𑀅𑀚𑁆𑀛𑀢𑁆𑀢𑀁, 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀧𑀝𑀺𑀘𑁆𑀘 𑀧𑀯𑀢𑁆𑀢𑀢𑁆𑀢𑀸 𑀧𑀘𑁆𑀘𑀢𑁆𑀢’’𑀦𑁆𑀢𑀺. 𑀓𑀓𑁆𑀔𑀴𑀦𑁆𑀢𑀺 𑀓𑀣𑀺𑀦𑀁. 𑀬𑀲𑁆𑀫𑀸 𑀢𑀁 𑀣𑀤𑁆𑀥𑀪𑀸𑀯𑁂𑀦 𑀲𑀳𑀚𑀸𑀢𑀸𑀦𑀁 𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀣𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀔𑀭𑀺𑀕𑀢𑀦𑁆𑀢𑀺 𑀔𑀭𑀲𑀪𑀸𑀯𑁂𑀲𑀼 𑀕𑀢𑀁 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀁, 𑀔𑀭𑀲𑀪𑀸𑀯𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀔𑀭𑀲𑀪𑀸𑀯𑀁 𑀨𑀭𑀼𑀲𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀦𑀢𑁄 𑀨𑀭𑀼𑀲𑀸𑀓𑀸𑀭𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀨𑀭𑀼𑀲’’𑀦𑁆𑀢𑀺. 𑀉𑀧𑀸𑀤𑀺𑀦𑁆𑀦𑀁 𑀦𑀸𑀫 𑀲𑀭𑀻𑀭𑀝𑁆𑀞𑀓𑀁. 𑀢𑀢𑁆𑀣 𑀬𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁, 𑀢𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 ‘‘𑀉𑀧𑀸𑀤𑀺𑀦𑁆𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀢𑀭𑀁 𑀅𑀦𑀼𑀧𑀸𑀤𑀺𑀦𑁆𑀦𑀁. 𑀢𑀤𑀼𑀪𑀬𑀫𑁆𑀧𑀺 𑀇𑀥 𑀢𑀡𑁆𑀳𑀸𑀤𑀻𑀳𑀺 𑀆𑀤𑀺𑀦𑁆𑀦𑀕𑀳𑀺𑀢𑀧𑀭𑀸𑀫𑀝𑁆𑀞𑀯𑀲𑁂𑀦 𑀉𑀧𑀸𑀤𑀺𑀦𑁆𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀭𑀻𑀭𑀝𑁆𑀞𑀓𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀤𑀺𑀦𑁆𑀦𑀦𑁆𑀢𑀺 𑀅𑀪𑀺𑀦𑀺𑀯𑀺𑀝𑁆𑀞𑀁. 𑀫𑀫𑀦𑁆𑀢𑀺 𑀕𑀳𑀺𑀢𑀁. 𑀅𑀳𑀦𑁆𑀢𑀺 𑀧𑀭𑀸𑀫𑀝𑁆𑀞𑀁. 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲𑀸𑀢𑀺 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀳𑀭𑀦𑁆𑀢𑀲𑁆𑀲. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑁂. 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀢𑀺𑀧𑁆𑀧𑀓𑀸𑀭𑁂𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀦 𑀳𑀺 𑀢𑁂 𑀢𑀬𑁄 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑀸.

𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀢𑀺 ‘‘𑀓𑁂𑀲𑀸 𑀮𑁄𑀫𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸. 𑀦𑀸𑀦𑀸𑀲𑀪𑀸𑀯𑀢𑁄𑀢𑀺 𑀲𑀢𑀺𑀧𑀺 𑀓𑀓𑁆𑀔𑀴𑀪𑀸𑀯𑀲𑀸𑀫𑀜𑁆𑀜𑁂 𑀲𑀲𑀫𑁆𑀪𑀸𑀭𑀯𑀺𑀪𑀢𑁆𑀢𑀺𑀢𑁄 𑀧𑀦 𑀓𑁂𑀲𑀸𑀤𑀺𑀲𑀗𑁆𑀖𑀸𑀢𑀕𑀢𑀦𑀸𑀦𑀸𑀲𑀪𑀸𑀯𑀢𑁄. 𑀆𑀮𑀬𑁄𑀢𑀺 𑀅𑀧𑁂𑀓𑁆𑀔𑀸. 𑀦𑀺𑀓𑀦𑁆𑀢𑀻𑀢𑀺 𑀦𑀺𑀓𑀸𑀫𑀦𑀸. 𑀧𑀢𑁆𑀣𑀦𑀸𑀢𑀺 𑀢𑀡𑁆𑀳𑀸𑀧𑀢𑁆𑀣𑀦𑀸. 𑀧𑀭𑀺𑀬𑀼𑀝𑁆𑀞𑀸𑀦𑀦𑁆𑀢𑀺 𑀢𑀡𑁆𑀳𑀸𑀧𑀭𑀺𑀬𑀼𑀝𑁆𑀞𑀸𑀦𑀁. 𑀕𑀳𑀡𑀦𑁆𑀢𑀺 𑀓𑀸𑀫𑀼𑀧𑀸𑀤𑀸𑀦𑀁. 𑀧𑀭𑀸𑀫𑀸𑀲𑁄𑀢𑀺 𑀧𑀭𑀢𑁄 𑀆𑀫𑀲𑀦𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄. 𑀦 𑀩𑀮𑀯𑀸 𑀆𑀮𑀬𑀸𑀤𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑀺𑀪𑀗𑁆𑀕𑁂 𑀩𑀸𑀳𑀺𑀭𑀸𑀧𑀺 𑀧𑀣𑀯𑀻𑀥𑀸𑀢𑀼 𑀯𑀺𑀢𑁆𑀣𑀸𑀭𑁂𑀦𑁂𑀯 𑀯𑀺𑀪𑀢𑁆𑀢𑀸𑀢𑀺? 𑀬𑀣𑀸𑀥𑀫𑁆𑀫𑀤𑁂𑀲𑀦𑀢𑁆𑀢𑀸 𑀢𑀢𑁆𑀣 𑀯𑀺𑀢𑁆𑀣𑀸𑀭𑁂𑀦𑁂𑀯 𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀬𑀣𑀸𑀦𑀼𑀮𑁄𑀫𑀤𑁂𑀲𑀦𑀢𑁆𑀢𑀸 𑀧𑀦𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀤𑁂𑀲𑀦𑀸 𑀲𑀁𑀔𑀺𑀢𑁆𑀢𑀸.

𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀲𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼. 𑀲𑀼𑀔𑀧𑀭𑀺𑀕𑁆𑀕𑀳𑁄 𑀳𑁄𑀢𑀺 ‘‘𑀦 𑀫𑁂 𑀲𑁄 𑀅𑀢𑁆𑀢𑀸’’𑀢𑀺. 𑀲𑀺𑀤𑁆𑀥𑁂 𑀳𑀺 𑀅𑀦𑀢𑁆𑀢𑀮𑀓𑁆𑀔𑀡𑁂 𑀤𑀼𑀓𑁆𑀔𑀮𑀓𑁆𑀔𑀡𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀜𑁆𑀘 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 𑀢𑀤𑀯𑀺𑀦𑀸𑀪𑀸𑀯𑀢𑁄𑀢𑀺. 𑀯𑀺𑀲𑀽𑀓𑀸𑀬𑀢𑀻𑀢𑀺 𑀯𑀺𑀲𑀽𑀓𑀁 𑀯𑀺𑀭𑀽𑀧𑀓𑀺𑀭𑀺𑀬𑀁 𑀧𑀯𑀢𑁆𑀢𑁂𑀢𑀺. 𑀲𑀸 𑀧𑀦 𑀅𑀢𑁆𑀣𑀢𑁄 𑀯𑀺𑀧𑁆𑀨𑀦𑁆𑀤𑀦𑀫𑁂𑀯𑀸𑀢𑀺 𑀆𑀳 ‘‘𑀯𑀺𑀧𑁆𑀨𑀦𑁆𑀤𑀢𑀻’’𑀢𑀺. 𑀅𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀸𑀬 𑀧𑀣𑀯𑀻𑀥𑀸𑀢𑀼𑀬𑀸. 𑀅𑀘𑁂𑀢𑀦𑀸𑀪𑀸𑀯𑁄 𑀧𑀸𑀓𑀝𑁄 𑀳𑁄𑀢𑀺 𑀥𑀸𑀢𑀼𑀫𑀢𑁆𑀢𑀢𑀸𑀬 𑀤𑀲𑁆𑀲𑀦𑀢𑁄. 𑀢𑀁 𑀉𑀪𑀬𑀫𑁆𑀧𑀻𑀢𑀺 𑀢𑀁 𑀧𑀣𑀯𑀻𑀥𑀸𑀢𑀼𑀤𑁆𑀯𑀬𑀫𑁆𑀧𑀺.

𑀢𑀢𑁄 𑀯𑀺𑀲𑁂𑀲𑀢𑀭𑁂𑀦𑀸𑀢𑀺 𑀢𑀢𑁄 𑀩𑀸𑀳𑀺𑀭𑀫𑀳𑀸𑀧𑀣𑀯𑀺𑀢𑁄 𑀯𑀺𑀲𑁂𑀲𑀯𑀦𑁆𑀢𑀢𑀭𑁂𑀦, 𑀮𑀳𑀼𑀢𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀼𑀧𑁆𑀧𑀢𑀻𑀢𑀺 𑀮𑀼𑀧𑁆𑀧𑀢𑀺. 𑀯𑀺𑀮𑀻𑀬𑀫𑀸𑀦𑀸𑀢𑀺 𑀧𑀓𑀢𑀺𑀉𑀤𑀓𑁂 𑀮𑁄𑀡𑀁 𑀯𑀺𑀬 𑀯𑀺𑀮𑀬𑀁 𑀕𑀘𑁆𑀙𑀦𑁆𑀢𑀻. 𑀉𑀤𑀓𑀸𑀦𑀼𑀕𑀢𑀸𑀢𑀺 𑀉𑀤𑀓𑀁 𑀅𑀦𑀼𑀕𑀢𑀸 𑀉𑀤𑀓𑀕𑀢𑀺𑀓𑀸. 𑀢𑁂𑀦𑀸𑀳 ‘‘𑀉𑀤𑀓𑀫𑁂𑀯 𑀳𑁄𑀢𑀻’’𑀢𑀺. 𑀅𑀪𑀸𑀯𑁄 𑀏𑀯 𑀅𑀪𑀸𑀯𑀢𑀸, 𑀦 𑀪𑀯𑀢𑀻𑀢𑀺 𑀯𑀸 𑀅𑀪𑀸𑀯𑁄, 𑀢𑀣𑀸𑀲𑀪𑀸𑀯𑁄 𑀥𑀫𑁆𑀫𑁄. 𑀢𑀲𑁆𑀲 𑀪𑀸𑀯𑁄 𑀅𑀪𑀸𑀯𑀢𑀸. 𑀯𑀬𑁄 𑀯𑀺𑀦𑀸𑀲𑁄 𑀥𑀫𑁆𑀫𑁄 𑀲𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀯𑀬𑀥𑀫𑁆𑀫𑁄, 𑀢𑀲𑁆𑀲 𑀪𑀸𑀯𑁄 𑀯𑀬𑀥𑀫𑁆𑀫𑀢𑀸, 𑀅𑀢𑁆𑀣𑀢𑁄 𑀔𑀬𑁄 𑀏𑀯. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑁂𑀯 𑀯𑀼𑀢𑁆𑀢’’𑀦𑁆𑀢𑀺. 𑀯𑀺𑀤𑁆𑀥𑀁𑀲𑀦𑀪𑀸𑀯𑀲𑁆𑀲 𑀧𑀦 𑀧𑀯𑁂𑀤𑀺𑀢𑀩𑁆𑀩𑀢𑁆𑀢𑀸 𑀓𑀸𑀫𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑁂𑀯 𑀯𑀼𑀢𑁆𑀢𑀁 𑀲𑀭𑀽𑀧𑀢𑁄, 𑀇𑀢𑀭𑀸𑀦𑀺𑀧𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀸𑀦𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀁 𑀧𑀦𑀸’’𑀢𑀺𑀆𑀤𑀺.

𑀫𑀢𑁆𑀢𑀁 𑀔𑀡𑀫𑀢𑁆𑀢𑀁 𑀢𑀺𑀝𑁆𑀞𑀢𑀻𑀢𑀺 𑀫𑀢𑁆𑀢𑀝𑁆𑀞𑁄, 𑀅𑀧𑁆𑀧𑀫𑀢𑁆𑀢𑀝𑁆𑀞𑁄 𑀫𑀢𑁆𑀢𑀝𑁆𑀞𑀓𑁄, 𑀅𑀢𑀺𑀇𑀢𑁆𑀢𑀭𑀔𑀡𑀺𑀓𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀭𑀺𑀢𑁆𑀢𑀝𑁆𑀞𑀺𑀢𑀺𑀓𑀲𑁆𑀲𑀸’’𑀢𑀺. 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬𑀸𑀢𑀺 𑀏𑀓𑀘𑀺𑀢𑁆𑀢𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀞𑀸𑀦𑀮𑀓𑁆𑀔𑀡𑀲𑁆𑀲 𑀇𑀢𑀭𑀪𑀸𑀯𑁂𑀦. 𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀓𑁆𑀔𑀡𑀫𑀢𑁆𑀢𑁂𑀦𑁂𑀯 𑀳𑀺 𑀲𑀢𑁆𑀢𑀸𑀦𑀁 𑀧𑀭𑀫𑀢𑁆𑀣𑀢𑁄 𑀚𑀻𑀯𑀦𑀓𑁆𑀔𑀡𑁄 𑀧𑀭𑀺𑀘𑁆𑀙𑀺𑀦𑁆𑀦𑁄. 𑀢𑁂𑀦𑀸𑀳 ‘‘𑀅𑀬𑀁 𑀳𑀻’’𑀢𑀺𑀆𑀤𑀺.

𑀚𑀻𑀯𑀺𑀢𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀲𑀼𑀔𑀤𑀼𑀓𑁆𑀔𑀸𑀢𑀺 𑀲𑀼𑀔𑀤𑀼𑀓𑁆𑀔𑀸 𑀯𑁂𑀤𑀦𑀸. 𑀉𑀧𑁂𑀓𑁆𑀔𑀸𑀧𑀺 𑀳𑀺 𑀲𑀼𑀔𑀤𑀼𑀓𑁆𑀔𑀸𑀲𑁆𑀯𑁂𑀯 𑀅𑀦𑁆𑀢𑁄𑀕𑀥𑀸 𑀇𑀝𑁆𑀞𑀸𑀦𑀺𑀝𑁆𑀞𑀪𑀸𑀯𑀢𑁄. 𑀅𑀢𑁆𑀢𑀪𑀸𑀯𑁄𑀢𑀺 𑀚𑀻𑀯𑀺𑀢𑀯𑁂𑀤𑀦𑀸𑀯𑀺𑀜𑁆𑀜𑀸𑀡𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑀺𑀝𑁆𑀞𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀓𑁂𑀯𑀮𑀸𑀢𑀺 𑀅𑀢𑁆𑀢𑀦𑀺𑀘𑁆𑀘𑀪𑀸𑀯𑁂𑀦 𑀅𑀯𑁄𑀫𑀺𑀲𑁆𑀲𑀸. 𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸𑀢𑀺 𑀏𑀓𑁂𑀦 𑀘𑀺𑀢𑁆𑀢𑁂𑀦 𑀲𑀳𑀺𑀢𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸. 𑀮𑀳𑀼𑀲𑁄 𑀯𑀢𑁆𑀢𑀢𑁂 𑀔𑀡𑁄𑀢𑀺 𑀢𑀸𑀬 𑀏𑀯 𑀏𑀓𑀓𑁆𑀔𑀡𑀺𑀓𑀢𑀸𑀬 𑀮𑀳𑀼𑀓𑁄 𑀅𑀢𑀺𑀇𑀢𑁆𑀢𑀭𑁄 𑀚𑀻𑀯𑀺𑀢𑀸𑀤𑀻𑀦𑀁 𑀔𑀡𑁄 𑀯𑀢𑁆𑀢𑀢𑀺 𑀯𑀻𑀢𑀺𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀦𑁆𑀢𑀺 𑀕𑀸𑀣𑀸𑀯𑀘𑀦𑀁.

𑀬𑀲𑁆𑀫𑀸 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀧𑀭𑀸𑀧𑀭𑀲𑀜𑁆𑀘𑀭𑀡𑀁 𑀮𑀪𑀫𑀸𑀦𑀫𑁂𑀯 𑀧𑀯𑀢𑁆𑀢𑀢𑀺, 𑀦 𑀅𑀮𑀪𑀫𑀸𑀦𑀁, 𑀢𑀲𑁆𑀫𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀁. 𑀢𑀣𑀸 𑀫𑀳𑀸𑀪𑀽𑀢𑀸𑀦𑀁 𑀲𑀫𑀯𑀼𑀢𑁆𑀢𑀺𑀢𑀁 𑀮𑀪𑀫𑀸𑀦𑀫𑁂𑀯 𑀧𑀯𑀢𑁆𑀢𑀢𑀺. 𑀧𑀣𑀯𑀻𑀥𑀸𑀢𑀼𑀬𑀸 𑀳𑀺 𑀆𑀧𑁄𑀥𑀸𑀢𑀼𑀆𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀧𑀓𑁄𑀧𑁂𑀦 𑀩𑀮𑀲𑀫𑁆𑀧𑀦𑁆𑀦𑁄𑀧𑀺 𑀧𑀼𑀭𑀺𑀲𑁄 𑀧𑀢𑁆𑀣𑀤𑁆𑀥𑀓𑀸𑀬𑁄 𑀯𑀸, 𑀅𑀢𑀺𑀲𑀸𑀭𑀸𑀤𑀺𑀯𑀲𑁂𑀦 𑀓𑀺𑀮𑀺𑀦𑁆𑀦𑀧𑀽𑀢𑀺𑀓𑀸𑀬𑁄 𑀯𑀸, 𑀫𑀳𑀸𑀟𑀸𑀳𑀧𑀭𑁂𑀢𑁄 𑀯𑀸, 𑀲𑀜𑁆𑀙𑀺𑀚𑁆𑀚𑀫𑀸𑀦𑀲𑀦𑁆𑀥𑀺𑀩𑀦𑁆𑀥𑀦𑁄 𑀯𑀸 𑀳𑀼𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀸𑀢𑀺. 𑀓𑀩𑀴𑀻𑀓𑀸𑀭𑀸𑀳𑀸𑀭𑀸𑀦𑀁 𑀬𑀼𑀢𑁆𑀢𑀓𑀸𑀮𑁂 𑀮𑀪𑀦𑁆𑀢𑀲𑁆𑀲𑁂𑀯 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀅𑀮𑀪𑀦𑁆𑀢𑀲𑁆𑀲 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀯𑀺𑀜𑁆𑀜𑀸𑀡𑁂 𑀧𑀯𑀢𑁆𑀢𑀫𑀸𑀦𑁂𑀬𑁂𑀯 𑀘 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀦 𑀢𑀲𑁆𑀫𑀺𑀁 𑀅𑀧𑁆𑀧𑀯𑀢𑁆𑀢𑀫𑀸𑀦𑁂. 𑀚𑀻𑀯𑀺𑀢𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁂𑀦 𑀇𑀭𑀺𑀬𑀸𑀧𑀣𑀽𑀧𑀦𑀺𑀩𑀤𑁆𑀥𑀢𑀸𑀲𑀻𑀢𑀼𑀡𑁆𑀳𑀽𑀧𑀦𑀺𑀩𑀤𑁆𑀥𑀢𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀘𑀢𑀼𑀦𑁆𑀦𑀜𑁆𑀳𑀺 𑀇𑀭𑀺𑀬𑀸𑀧𑀣𑀸𑀦𑀁 𑀲𑀫𑀯𑀼𑀢𑁆𑀢𑀺𑀢𑀁 𑀮𑀪𑀫𑀸𑀦𑀫𑁂𑀯 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀅𑀜𑁆𑀜𑀢𑀭𑀲𑁆𑀲 𑀧𑀦 𑀅𑀥𑀺𑀫𑀢𑁆𑀢𑀢𑀸𑀬 𑀆𑀬𑀼𑀲𑀗𑁆𑀔𑀸𑀭𑀸 𑀉𑀧𑀘𑁆𑀙𑀺𑀚𑁆𑀚𑀦𑁆𑀢𑀺, 𑀲𑀻𑀢𑀼𑀡𑁆𑀳𑀸𑀦𑀫𑁆𑀧𑀺 𑀲𑀫𑀯𑀼𑀢𑁆𑀢𑀺𑀢𑀁 𑀮𑀪𑀫𑀸𑀦𑀫𑁂𑀯 𑀧𑀯𑀢𑁆𑀢𑀢𑀺, 𑀅𑀢𑀺𑀲𑀻𑀢𑁂𑀦 𑀧𑀦 𑀅𑀢𑀺𑀉𑀡𑁆𑀳𑁂𑀦 𑀯𑀸 𑀅𑀪𑀺𑀪𑀽𑀢𑀲𑁆𑀲 𑀯𑀺𑀧𑀚𑁆𑀚𑀢𑀻𑀢𑀺.

𑀢𑀡𑁆𑀳𑀼𑀧𑀸𑀤𑀺𑀦𑁆𑀦𑀲𑁆𑀲𑀸𑀢𑀺 𑀇𑀫𑀺𑀦𑀸 𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀓𑀺𑀢𑁆𑀢𑀦𑁂𑀦 𑀲𑀭𑀲𑀧𑀪𑀗𑁆𑀕𑀼𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀢𑀡𑁆𑀳𑀸𑀕𑁆𑀕𑀸𑀳𑀲𑁆𑀲 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀫𑀸𑀦𑀕𑁆𑀕𑀸𑀳𑀲𑁆𑀲 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀤𑀺𑀝𑁆𑀞𑀺𑀕𑁆𑀕𑀸𑀳𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄 𑀏𑀓𑀁𑀲𑁂𑀦𑁂𑀯 𑀢𑀻𑀳𑀺 𑀅𑀦𑀼𑀧𑀲𑁆𑀲𑀦𑀸𑀳𑀺 𑀕𑀸𑀳𑀸𑀧𑀺 𑀯𑀺𑀕𑀘𑁆𑀙𑀦𑁆𑀢𑀻𑀢𑀺 𑀆𑀳 ‘‘𑀦𑁄𑀢𑁂𑀯 𑀳𑁄𑀢𑀻’’𑀢𑀺. 𑀏𑀓𑀁𑀬𑁂𑀯 𑀆𑀕𑀢𑀁 𑀩𑀸𑀳𑀺𑀭𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀅𑀦𑁆𑀢𑀭𑀥𑀸𑀦𑀤𑀲𑁆𑀲𑀦𑀧𑀯𑀢𑁆𑀢𑀚𑁄𑀢𑀦𑀸𑀬.

𑀧𑀭𑀺𑀕𑁆𑀕𑀳𑀦𑁆𑀢𑀺 𑀥𑀸𑀢𑀼𑀧𑀭𑀺𑀕𑁆𑀕𑀳𑀡𑀁. 𑀧𑀝𑁆𑀞𑀧𑁂𑀦𑁆𑀢𑁄𑀢𑀺 𑀆𑀭𑀪𑀦𑁆𑀢𑁄 𑀤𑁂𑀲𑁂𑀦𑁆𑀢𑁄. 𑀲𑁄𑀢𑀤𑁆𑀯𑀸𑀭𑁂 𑀩𑀮𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸. 𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀩𑀮𑀤𑀲𑁆𑀲𑀦𑀸𑀧𑀤𑁂𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀸𑀘𑀸𑀬 𑀖𑀝𑁆𑀝𑀦𑀫𑁂𑀯 𑀯𑀼𑀢𑁆𑀢𑀁 𑀲𑁄𑀢𑀤𑁆𑀯𑀸𑀭𑁂 𑀩𑀮𑀤𑀲𑁆𑀲𑀦𑀪𑀸𑀯𑀢𑁄. 𑀩𑀮𑀦𑁆𑀢𑀺 𑀘 𑀩𑀸𑀳𑀺𑀭𑀸𑀬 𑀯𑀺𑀬 𑀅𑀚𑁆𑀛𑀢𑁆𑀢𑀺𑀓𑀸𑀬𑀧𑀺 𑀧𑀣𑀯𑀻𑀥𑀸𑀢𑀼𑀬𑀸 𑀅𑀘𑁂𑀢𑀦𑀸𑀪𑀸𑀯𑀤𑀲𑁆𑀲𑀦𑁂𑀦 𑀭𑀼𑀓𑁆𑀔𑀲𑁆𑀲 𑀯𑀺𑀬 𑀅𑀓𑁆𑀓𑁄𑀲𑀦𑁆𑀢𑁂𑀧𑀺 𑀧𑀳𑀭𑀦𑁆𑀢𑁂𑀧𑀺 𑀦𑀺𑀩𑁆𑀩𑀺𑀓𑀸𑀭𑀢𑀸. 𑀲𑀫𑁆𑀧𑀢𑀺𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀪𑀸𑀯𑁂𑀦𑀸𑀢𑀺 𑀢𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁂𑀦. 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀪𑀸𑀯𑁂𑀦𑀸𑀢𑀺 𑀆𑀧𑀸𑀣𑀕𑀢𑁂 𑀢𑀲𑁆𑀫𑀺𑀁 𑀅𑀦𑀺𑀝𑁆𑀞𑁂 𑀲𑀤𑁆𑀤𑀸𑀭𑀫𑁆𑀫𑀡𑁂 𑀆𑀭𑀫𑁆𑀫𑀡𑀓𑀭𑀡𑀲𑀗𑁆𑀔𑀸𑀢𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀲𑁄𑀢𑀤𑁆𑀯𑀸𑀭𑁂 𑀚𑀯𑀦𑀯𑁂𑀤𑀦𑀸 𑀤𑀼𑀓𑁆𑀔𑀸𑀢𑀺 𑀯𑀘𑀦𑀢𑁄. 𑀢𑀣𑀸 𑀳𑀺 ‘‘𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀯𑁂𑀤𑀦𑀸𑀤𑀬𑁄𑀧𑀻𑀢𑀺 ‘‘𑀯𑁂𑀤𑀦𑀸 𑀅𑀦𑀺𑀘𑁆𑀘𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑁂𑀤𑀦𑀸 𑀘𑁂𑀯 𑀲𑀜𑁆𑀜𑀸𑀤𑀬𑁄 𑀘. 𑀢𑁂 𑀳𑀺 𑀨𑀲𑁆𑀲𑁂𑀦 𑀲𑀫𑀸𑀦𑀪𑀽𑀫𑀺𑀓𑀸 𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀯𑁂𑀤𑀦𑀸. 𑀥𑀸𑀢𑀼𑀲𑀗𑁆𑀔𑀸𑀢𑀫𑁂𑀯 𑀆𑀭𑀫𑁆𑀫𑀡𑀦𑁆𑀢𑀺 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀁 𑀧𑀣𑀯𑀻𑀥𑀸𑀢𑀼𑀲𑀗𑁆𑀔𑀸𑀢𑀫𑁂𑀯 𑀯𑀺𑀲𑀬𑀁. 𑀧𑀓𑁆𑀔𑀦𑁆𑀤𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀅𑀦𑀺𑀘𑁆𑀘𑀦𑁆𑀢𑀺𑀧𑀺 𑀤𑀼𑀓𑁆𑀔𑀦𑁆𑀢𑀺𑀧𑀺 𑀅𑀦𑀢𑁆𑀢𑀸𑀢𑀺𑀧𑀺 𑀲𑀫𑁆𑀫𑀲𑀦𑀯𑀲𑁂𑀦 𑀅𑀦𑀼𑀧𑀯𑀺𑀲𑀢𑀺. 𑀏𑀢𑁂𑀦 𑀩𑀳𑀺𑀤𑁆𑀥𑀸𑀯𑀺𑀓𑁆𑀔𑁂𑀧𑀸𑀪𑀸𑀯𑀫𑀸𑀳, 𑀧𑀲𑀻𑀤𑀢𑀻𑀢𑀺 𑀧𑀦 𑀇𑀫𑀺𑀦𑀸 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀻𑀣𑀺𑀧𑀝𑀺𑀧𑀦𑁆𑀦𑀢𑀁. 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀇𑀫𑀺𑀦𑀸 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀸𑀯𑀳𑀪𑀸𑀯𑁂𑀦 𑀅𑀯𑀢𑁆𑀣𑀸𑀦𑀁 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑁂𑀦 𑀦𑀺𑀘𑁆𑀘𑀮𑀪𑀸𑀯𑀢𑁄. 𑀯𑀺𑀫𑀼𑀘𑁆𑀘𑀢𑀻𑀢𑀺 𑀇𑀫𑀺𑀦𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑀢𑁄 𑀯𑀺𑀲𑁂𑀲𑁂𑀦 𑀫𑀼𑀘𑁆𑀘𑀦𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄 ‘‘𑀅𑀥𑀺𑀫𑁄𑀓𑁆𑀔𑀁 𑀮𑀪𑀢𑀻’’𑀢𑀺. 𑀲𑁄𑀢𑀤𑁆𑀯𑀸𑀭𑀫𑁆𑀳𑀺 𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂𑀢𑀺 𑀇𑀤𑀁 𑀫𑀽𑀮𑀧𑀭𑀺𑀜𑁆𑀜𑀸𑀬 𑀫𑀽𑀮𑀤𑀲𑁆𑀲𑀦𑀁. 𑀲𑁄𑀢𑀤𑁆𑀯𑀸𑀭𑁂𑀳𑀺 𑀆𑀯𑀚𑁆𑀚𑀦𑀯𑁄𑀝𑁆𑀞𑀩𑁆𑀩𑀦𑀸𑀦𑀁 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀬𑀢𑁄 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀮𑁄𑀪𑁄, 𑀅𑀦𑀺𑀝𑁆𑀞𑁂 𑀘 𑀧𑀝𑀺𑀖𑁄 𑀉𑀧𑁆𑀧𑀚𑁆𑀚𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀧𑀦 ‘‘𑀇𑀢𑁆𑀣𑀻, 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀸𑀤𑀺 𑀳𑁄𑀢𑀺, 𑀢𑀲𑁆𑀲 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀁 𑀫𑀽𑀮𑀁, 𑀲𑀩𑁆𑀩𑀁 𑀯𑀸 𑀪𑀯𑀗𑁆𑀕𑀸𑀤𑀺. 𑀏𑀯𑀁 𑀫𑀦𑁄𑀤𑁆𑀯𑀸𑀭𑀚𑀯𑀦𑀲𑁆𑀲 𑀫𑀽𑀮𑀯𑀲𑁂𑀦 𑀧𑀭𑀺𑀜𑁆𑀜𑀸. 𑀆𑀕𑀦𑁆𑀢𑀼𑀓𑀢𑀸𑀯𑀓𑀸𑀮𑀺𑀓𑀧𑀭𑀺𑀜𑁆𑀜𑀸 𑀧𑀦 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀲𑁆𑀲𑁂𑀯 𑀅𑀧𑀼𑀩𑁆𑀩𑀪𑀸𑀯𑀯𑀲𑁂𑀦 𑀇𑀢𑀭𑀪𑀸𑀯𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀢𑀺𑀧𑀝𑁆𑀞𑀸𑀦𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄 𑀏𑀯.

𑀬𑀸𑀣𑀸𑀯𑀢𑁄 𑀥𑀸𑀢𑀽𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀓𑀢𑀧𑀭𑀺𑀕𑁆𑀕𑀳𑀲𑁆𑀲𑀧𑀺 𑀅𑀦𑀸𑀤𑀺𑀓𑀸𑀮𑀪𑀸𑀯𑀦𑀸𑀯𑀲𑁂𑀦 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀦𑀁 𑀲𑀘𑁂𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀯𑁄𑀝𑁆𑀞𑀩𑁆𑀩𑀦𑀁 𑀧𑀢𑁆𑀯𑀸𑀢𑀺 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀢𑀁 𑀧𑀢𑁆𑀯𑀸. 𑀏𑀓𑀁 𑀤𑁆𑀯𑁂 𑀯𑀸𑀭𑁂 𑀆𑀲𑁂𑀯𑀦𑀁 𑀮𑀪𑀺𑀢𑁆𑀯𑀸, 𑀦 𑀆𑀲𑁂𑀯𑀦𑀧𑀘𑁆𑀘𑀬𑀁. 𑀦 𑀳𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀘𑀺𑀢𑁆𑀢𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀽𑀢𑀁 𑀅𑀢𑁆𑀣𑀺. 𑀬𑀤𑀺 𑀲𑀺𑀬𑀸, 𑀧𑀝𑁆𑀞𑀸𑀦𑁂 𑀓𑀼𑀲𑀮𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 ‘‘𑀦 𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀤𑁆𑀯𑁂, 𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 𑀫𑀕𑁆𑀕𑁂 𑀤𑁆𑀯𑁂’’𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, ‘‘𑀦 𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀏𑀓𑀁 (𑀧𑀝𑁆𑀞𑀸. 𑁧.𑁧.𑁨𑁨𑁧), 𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 𑀫𑀕𑁆𑀕𑁂 𑀏𑀓’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁧𑁫𑁨) 𑀘 𑀧𑀦 𑀯𑀼𑀢𑁆𑀢𑀁. 𑀏𑀓𑀁 𑀤𑁆𑀯𑁂 𑀯𑀸𑀭𑁂𑀢𑀺 𑀏𑀢𑁆𑀣 𑀘 𑀏𑀓𑀕𑁆𑀕𑀳𑀡𑀁 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀤𑀼𑀢𑀺𑀬𑁂 𑀫𑁄𑀖𑀯𑀸𑀭𑁂 𑀏𑀓𑀯𑀸𑀭𑀫𑁂𑀯 𑀯𑁄𑀝𑁆𑀞𑀩𑁆𑀩𑀦𑀁 𑀧𑀯𑀢𑁆𑀢𑀢𑀺. 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀲𑁆𑀲 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀏𑀓𑀯𑀸𑀭𑀕𑁆𑀕𑀳𑀡𑀁, 𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀤𑁆𑀯𑁂𑀯𑀸𑀭𑀕𑁆𑀕𑀳𑀡𑀁. 𑀢𑀢𑁆𑀣 𑀤𑀼𑀢𑀺𑀬𑀁 𑀢𑀢𑀺𑀬𑀜𑁆𑀘 𑀧𑀯𑀢𑁆𑀢𑀫𑀸𑀦𑀁 𑀮𑀤𑁆𑀥𑀸𑀲𑁂𑀯𑀦𑀁 𑀯𑀺𑀬 𑀳𑁄𑀢𑀺. 𑀬𑀲𑁆𑀫𑀸 𑀧𑀦 ‘‘𑀯𑁄𑀝𑁆𑀞𑀩𑁆𑀩𑀦𑀁 𑀧𑀢𑁆𑀯𑀸 𑀏𑀓𑀁 𑀤𑁆𑀯𑁂 𑀯𑀸𑀭𑁂𑀆𑀲𑁂𑀯𑀦𑀁 𑀮𑀪𑀺𑀢𑁆𑀯𑀸 𑀘𑀺𑀢𑁆𑀢𑀁 𑀪𑀯𑀗𑁆𑀕𑀫𑁂𑀯 𑀑𑀢𑀭𑀢𑀻’’𑀢𑀺 𑀇𑀤𑀁 𑀤𑀼𑀢𑀺𑀬𑀫𑁄𑀖𑀯𑀸𑀭𑀯𑀲𑁂𑀦 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬. 𑀲𑁄 𑀘 𑀆𑀭𑀫𑁆𑀫𑀡𑀤𑀼𑀩𑁆𑀩𑀮𑀢𑀸𑀬 𑀏𑀯 𑀳𑁄𑀢𑀻𑀢𑀺 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 𑀦𑀺𑀬𑀫𑀺𑀢𑁄. 𑀇𑀥 𑀧𑀦 𑀢𑀺𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀦𑀼𑀪𑀸𑀯𑁂𑀦 𑀅𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀯𑀲𑁂𑀦 𑀅𑀬𑁄𑀦𑀺𑀲𑁄𑀯 𑀆𑀯𑀚𑁆𑀚𑀢𑁄 𑀅𑀬𑁄𑀦𑀺𑀲𑁄 𑀯𑀯𑀢𑁆𑀣𑀸𑀦𑀁 𑀲𑀺𑀬𑀸, 𑀦 𑀬𑁄𑀦𑀺𑀲𑁄, 𑀢𑀲𑁆𑀫𑀺𑀜𑁆𑀘 𑀧𑀯𑀢𑁆𑀢𑁂 𑀫𑀳𑀢𑀺 𑀅𑀢𑀺𑀫𑀳𑀢𑀺 𑀯𑀸 𑀆𑀭𑀫𑁆𑀫𑀡𑁂 𑀚𑀯𑀦𑀁 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

𑀏𑀢𑀲𑁆𑀲𑁂𑀯 𑀯𑀸 𑀲𑀢𑀺𑀧𑀺 𑀤𑀼𑀯𑀺𑀥𑀢𑀸𑀧𑀭𑀺𑀓𑀧𑁆𑀧𑀦𑁂 𑀲𑁄 𑀘 𑀬𑀤𑀺 𑀅𑀦𑀼𑀮𑁄𑀫𑁂 𑀯𑁂𑀤𑀦𑀸𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 ‘‘𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 𑀫𑀕𑁆𑀕𑁂 𑀤𑁆𑀯𑁂, 𑀦 𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀤𑁆𑀯𑁂’’𑀢𑀺 𑀘 𑀯𑀼𑀢𑁆𑀢𑀁 𑀲𑀺𑀬𑀸, (𑀮𑀩𑁆𑀪𑁂𑀬𑁆𑀬), 𑀦 𑀘 𑀯𑀼𑀢𑁆𑀢𑀁. 𑀬𑀤𑀺 𑀧𑀦 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀆𑀲𑁂𑀯𑀦𑀧𑀘𑁆𑀘𑀬𑁄 𑀲𑀺𑀬𑀸, 𑀓𑀼𑀲𑀮𑀸𑀓𑀼𑀲𑀮𑀸𑀦𑀫𑁆𑀧𑀺 𑀲𑀺𑀬𑀸. 𑀦 𑀳𑀺 𑀆𑀲𑁂𑀯𑀦𑀧𑀘𑁆𑀘𑀬𑀁 𑀮𑀤𑁆𑀥𑀼𑀁 𑀬𑀼𑀢𑁆𑀢𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀢𑀸𑀧𑀺 𑀥𑀫𑁆𑀫𑁄 𑀆𑀲𑁂𑀯𑀦𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀯𑀼𑀢𑁆𑀢𑁄 𑀅𑀢𑁆𑀣𑀺, 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀧𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁄 𑀅𑀯𑀼𑀢𑁆𑀢𑁄 𑁋 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦𑀸𑀲𑁂𑀯𑀦𑀧𑀘𑁆𑀘𑀬𑀸. 𑀅𑀓𑀼𑀲𑀮𑀁…𑀧𑁂… 𑀦𑀸𑀲𑁂𑀯𑀦𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁯𑁩-𑁯𑁪) 𑀯𑀘𑀦𑀢𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀘. 𑀅𑀣𑀸𑀧𑀺 𑀲𑀺𑀬𑀸 𑀅𑀲𑀫𑀸𑀦𑀯𑁂𑀤𑀦𑀸𑀦𑀁 𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺 𑀘, 𑀏𑀯𑀫𑀧𑀺 𑀬𑀣𑀸 𑁋 ‘‘𑀆𑀯𑀚𑁆𑀚𑀦𑀸 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀯𑀼𑀢𑁆𑀢𑀁, 𑀏𑀯𑀁 ‘‘𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀢𑀁 𑀚𑀸𑀢𑀺𑀪𑁂𑀤𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀪𑀽𑀫𑀺𑀪𑀺𑀦𑁆𑀦𑀲𑁆𑀲 𑀓𑀸𑀫𑀸𑀯𑀘𑀭𑀲𑁆𑀲 𑀭𑀽𑀧𑀸𑀯𑀘𑀭𑀸𑀤𑀻𑀦𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁄 𑀯𑀺𑀬 𑀚𑀸𑀢𑀺𑀪𑀺𑀦𑁆𑀦𑀲𑁆𑀲𑀧𑀺 𑀪𑀯𑁂𑀬𑁆𑀬𑀸𑀢𑀺 𑀯𑀢𑁆𑀢𑀩𑁆𑀩𑁄 𑀏𑀯 𑀲𑀺𑀬𑀸, 𑀅𑀪𑀺𑀦𑁆𑀦𑀚𑀸𑀢𑀺𑀓𑀲𑁆𑀲 𑀘 𑀯𑀲𑁂𑀦 𑀬𑀣𑀸 𑁋 ‘‘𑀆𑀯𑀚𑁆𑀚𑀦𑀸 𑀲𑀳𑁂𑀢𑀼𑀓𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀯𑁂𑀤𑀦𑀸𑀢𑁆𑀢𑀺𑀓𑁂𑀧𑀺 ‘‘𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 𑀫𑀕𑁆𑀕𑁂 𑀏𑀓𑀁, 𑀦 𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀏𑀓’’𑀦𑁆𑀢𑀺 𑀏𑀯𑀁 𑀕𑀡𑀦𑀸𑀬 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑀸𑀬 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀢𑁆𑀢𑀲𑁆𑀲 𑀅𑀪𑀸𑀯𑀸 𑀅𑀬𑀁 𑀫𑁄𑀖𑀯𑀸𑀭𑁄 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

𑀯𑁄𑀝𑁆𑀞𑀩𑁆𑀩𑀦𑀁 𑀧𑀦 𑀯𑀻𑀣𑀺𑀯𑀺𑀧𑀸𑀓𑀲𑀦𑁆𑀢𑀢𑀺𑀬𑀸 𑀆𑀯𑀝𑁆𑀝𑀦𑀢𑁄 𑀆𑀯𑀚𑁆𑀚𑀦𑀸, 𑀢𑀢𑁄 𑀯𑀺𑀲𑀤𑀺𑀲𑀲𑁆𑀲 𑀚𑀯𑀦𑀲𑁆𑀲 𑀓𑀭𑀡𑀢𑁄 𑀫𑀦𑀲𑀺𑀓𑀸𑀭𑁄𑀢𑀺 𑀘 𑀯𑀢𑁆𑀢𑀩𑁆𑀩𑀢𑀁 𑀮𑀪𑁂𑀬𑁆𑀬, 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀝𑁆𑀞𑀸𑀦𑁂 ‘‘𑀯𑁄𑀝𑁆𑀞𑀩𑁆𑀩𑀦𑀁 𑀓𑀼𑀲𑀮𑀸𑀦𑀁 𑀔𑀦𑁆𑀥𑀸𑀦𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀁, ‘‘𑀆𑀯𑀚𑁆𑀚𑀦𑀸’’𑀇𑀘𑁆𑀘𑁂𑀯 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀯𑁄𑀝𑁆𑀞𑀩𑁆𑀩𑀦𑀢𑁄 𑀧𑀭𑀁 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀯𑀸 𑀚𑀯𑀦𑀸𑀦𑀁 𑀆𑀭𑀫𑁆𑀫𑀡𑀧𑀼𑀭𑁂𑀚𑀸𑀢𑀁 𑀪𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀭𑀽𑀧𑀸𑀤𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑀁 𑀯𑁄𑀝𑁆𑀞𑀩𑁆𑀩𑀦𑀁 𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸𑀢𑀺 𑀘 𑀚𑀯𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀦 𑀚𑀯𑀦𑀪𑀸𑀯𑁂𑀦𑀸𑀢𑀺. 𑀆𑀲𑁂𑀯𑀦𑀁 𑀮𑀪𑀺𑀢𑁆𑀯𑀸𑀢𑀺 𑀘𑁂𑀢𑁆𑀣 𑀆𑀲𑁂𑀯𑀦𑀁 𑀯𑀺𑀬 𑀆𑀲𑁂𑀯𑀦𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀯𑀺𑀧𑁆𑀨𑀸𑀭𑀺𑀓𑀢𑁆𑀢𑀸 𑀘𑀲𑁆𑀲 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀧𑀯𑀢𑁆𑀢𑀺𑀬𑁂𑀯 𑀘𑁂𑀢𑁆𑀣 𑀆𑀲𑁂𑀯𑀦𑀲𑀤𑀺𑀲𑀢𑀸. 𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀳𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑀸 𑀘𑀲𑁆𑀲 𑀯𑀼𑀘𑁆𑀘𑀢𑀺. 𑀯𑀺𑀧𑁆𑀨𑀸𑀭𑀺𑀓𑀫𑁆𑀧𑀺 𑀚𑀯𑀦𑀁 𑀯𑀺𑀬 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀅𑀧𑁆𑀧𑀯𑀢𑁆𑀢𑀺𑀬𑀸 𑀅𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑀸𑀬 𑀘 𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀆𑀲𑁂𑀯𑀦𑀪𑀸𑀯𑁂𑀦 𑀯𑀢𑁆𑀢𑀢𑀻𑀢𑀺 𑀦 𑀇𑀫𑀲𑁆𑀲 𑀆𑀲𑁂𑀯𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀨𑀮𑀘𑀺𑀢𑁆𑀢𑁂𑀲𑀼 𑀫𑀕𑁆𑀕𑀧𑀭𑀺𑀬𑀸𑀬𑁄 𑀯𑀺𑀬 𑀧𑀭𑀺𑀬𑀸𑀬𑀯𑀲𑁂𑀦 𑀯𑀼𑀢𑁆𑀢𑀁.

𑀅𑀬𑀦𑁆𑀢𑀺 ‘‘𑀲𑀘𑁂𑀧𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄 𑀏𑀓𑀯𑀸𑀭𑀫𑁆𑀧𑀺 𑀭𑀸𑀕𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀦𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀬𑁄𑀕𑀸𑀯𑀘𑀭𑁄. 𑀓𑁄𑀝𑀺𑀧𑁆𑀧𑀢𑁆𑀢𑁄𑀢𑀺 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀧𑀝𑀺𑀧𑀓𑁆𑀔𑁂𑀳𑀺 𑀅𑀦𑀪𑀺𑀪𑀽𑀢𑀢𑁆𑀢𑀸 𑀯𑀺𑀲𑀤𑀯𑀺𑀧𑀲𑁆𑀲𑀦𑀸𑀜𑀸𑀡𑀢𑀸𑀬 𑀢𑀺𑀓𑁆𑀔𑀯𑀺𑀧𑀲𑁆𑀲𑀓𑁄. 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺 ‘‘𑀏𑀯𑀁 𑀫𑁂 𑀚𑀯𑀦𑀁 𑀚𑀯𑀺𑀢’’𑀦𑁆𑀢𑀺 𑀲𑀸𑀭𑀫𑁆𑀫𑀡𑀲𑁆𑀲 𑀚𑀯𑀦𑀲𑁆𑀲 𑀳𑀼𑀢𑁆𑀯𑀸 𑀅𑀪𑀸𑀯𑀯𑀯𑀢𑁆𑀣𑀸𑀧𑀦𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀢𑁄, 𑀢𑀣𑀸 𑀆𑀯𑀚𑁆𑀚𑀦𑀯𑀲𑁂𑀦 𑀯𑀸 𑀢𑀁 𑀆𑀭𑀫𑁆𑀫𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀸𑀯𑀤𑁂𑀯 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀪𑀽𑀢𑀁 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀤𑀼𑀢𑀺𑀬𑀲𑁆𑀲 𑀧𑀦 𑀯𑀲𑁂𑀦𑀸𑀢𑀺 ‘‘𑀅𑀧𑀭𑀲𑁆𑀲 𑀭𑀸𑀕𑀸𑀤𑀺𑀯𑀲𑁂𑀦 𑀏𑀓𑀯𑀸𑀭𑀁 𑀚𑀯𑀦𑀁 𑀚𑀯𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀦𑀸𑀢𑀺𑀢𑀺𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀯𑀲𑁂𑀦 ‘‘𑀢𑀲𑁆𑀲 𑀥𑀸𑀢𑀸𑀭𑀫𑁆𑀫𑀡𑀫𑁂𑀯 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻’’𑀢𑀺𑀆𑀤𑀺𑀦𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀢𑁆𑀢𑀸. ‘‘𑀢𑀫𑁂𑀦𑀁 𑀉𑀧𑀥𑀺𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑀁 𑀉𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀓𑀤𑀸𑀘𑀺 𑀓𑀭𑀳𑀘𑀺 𑀲𑀢𑀺𑀲𑀫𑁆𑀫𑁄𑀲𑀸 𑀉𑀧𑀥𑀺𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀤𑀦𑁆𑀥𑁄 𑀉𑀤𑀸𑀬𑀺 𑀲𑀢𑀼𑀧𑁆𑀧𑀸𑀤𑁄, 𑀅𑀣 𑀔𑁄 𑀦𑀁 𑀔𑀺𑀧𑁆𑀧𑀫𑁂𑀯 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻’’𑀢𑀺 𑀮𑀝𑀼𑀓𑀺𑀓𑁄𑀧𑀫𑁂. 𑀢𑀲𑁆𑀲 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀢𑀸𑀯 𑀧𑀚𑀳𑀦𑁆𑀢𑀼, 𑀧𑀼𑀣𑀼𑀚𑁆𑀚𑀦𑁄 𑀓𑀣𑀁 𑀧𑀚𑀳𑀢𑀻’’𑀢𑀺 𑀘𑁄𑀤𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 ‘‘𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀳𑀺 𑀲𑀢𑀺𑀲𑀫𑁆𑀫𑁄𑀲𑁂𑀦 𑀲𑀳𑀲𑀸 𑀓𑀺𑀮𑁂𑀲𑁂 𑀉𑀧𑁆𑀧𑀦𑁆𑀦𑁂 ‘𑀫𑀸𑀤𑀺𑀲𑀲𑁆𑀲 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀓𑀺𑀮𑁂𑀲𑁄 𑀉𑀧𑁆𑀧𑀦𑁆𑀦𑁄’𑀢𑀺 𑀲𑀁𑀯𑁂𑀕𑀁 𑀓𑀢𑁆𑀯𑀸 𑀯𑀻𑀭𑀺𑀬𑀁 𑀧𑀕𑁆𑀕𑀬𑁆𑀳 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑁂𑀦 𑀓𑀺𑀮𑁂𑀲𑁂 𑀲𑀫𑀼𑀕𑁆𑀖𑀸𑀢𑁂𑀢𑀺, 𑀇𑀢𑀺 𑀲𑁄 𑀧𑀚𑀳𑀢𑀺 𑀦𑀸𑀫𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀲𑁆𑀲 𑀥𑀸𑀢𑀸𑀭𑀫𑁆𑀫𑀡𑀫𑁂𑀯 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺𑀆𑀤𑀺𑀦𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀢𑁆𑀢𑀸’’𑀢𑀺𑀆𑀤𑀺. 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑁂 𑀘 𑀫𑀚𑁆𑀛𑀺𑀫𑀲𑁆𑀲 𑀯𑀲𑁂𑀦 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀭𑀺𑀕𑁆𑀕𑀳𑀯𑀲𑁂𑀦𑀸𑀢𑀺 𑀥𑀸𑀢𑀼𑀧𑀭𑀺𑀕𑁆𑀕𑀳𑀯𑀲𑁂𑀦. 𑀫𑀫𑁆𑀫𑀘𑁆𑀙𑁂𑀤𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀅𑀓𑁆𑀓𑁄𑀲𑀦𑀸𑀤𑀺𑀁 𑀅𑀦𑀺𑀝𑁆𑀞𑀁 𑀆𑀭𑀫𑁆𑀫𑀡𑀁 𑀧𑀢𑁆𑀯𑀸 𑀲𑁄𑀢𑀤𑁆𑀯𑀸𑀭𑁂 𑀓𑀺𑀮𑀫𑀢𑀺 𑀧𑀼𑀕𑁆𑀕𑀮𑁄, 𑀢𑀣𑀸 𑀧𑁄𑀣𑀦𑀧𑀳𑀭𑀡𑀸𑀤𑀺𑀓𑀁 𑀅𑀦𑀺𑀝𑁆𑀞𑀁 𑀆𑀭𑀫𑁆𑀫𑀡𑀁 𑀧𑀢𑁆𑀯𑀸 𑀓𑀸𑀬𑀤𑁆𑀯𑀸𑀭𑁂 𑀓𑀺𑀮𑀫𑀢𑀺.

𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀲𑀩𑁆𑀩𑀲𑁄 𑀉𑀤𑁆𑀥𑀁 𑀆𑀘𑀭𑀦𑁆𑀢𑀺. 𑀢𑀬𑀺𑀤𑀁 𑀅𑀫𑀦𑀸𑀧𑁂𑀳𑀺 𑀲𑀫𑀼𑀤𑀸𑀘𑀭𑀡𑀁 𑀦𑀸𑀫 𑀧𑁄𑀣𑀦𑀧𑀳𑀭𑀡𑀸𑀤𑀺𑀯𑀲𑁂𑀦 𑀉𑀧𑀓𑁆𑀓𑀫𑀦𑀫𑁂𑀯𑀸𑀢𑀺 𑀆𑀳 ‘‘𑀉𑀧𑀓𑁆𑀓𑀫𑀦𑁆𑀢𑀻’’𑀢𑀺, 𑀩𑀸𑀥𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀲𑀪𑀸𑀯𑁄𑀢𑀺 𑀬𑀣𑀸 𑀧𑀸𑀡𑀺𑀧𑁆𑀧𑀳𑀸𑀭𑀸𑀤𑀻𑀳𑀺 𑀖𑀝𑁆𑀝𑀺𑀢𑀫𑀢𑁆𑀢𑁄 𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑀺, 𑀢𑀣𑀸𑀲𑀪𑀸𑀯𑁄. ‘‘𑀉𑀪𑀢𑁄𑀤𑀡𑁆𑀟𑀓𑁂𑀦 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀓𑀓𑀘𑁂𑀦𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩𑁨) 𑀑𑀯𑀸𑀤𑀤𑀸𑀦𑀁 𑀦𑀸𑀫 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀆𑀯𑁂𑀡𑀺𑀓𑀦𑁆𑀢𑀺 𑀆𑀳 ‘‘𑀯𑀼𑀢𑁆𑀢𑀁 𑀔𑁄 𑀧𑀦𑁂𑀢𑀁 𑀪𑀕𑀯𑀢𑀸𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺…𑀧𑁂… 𑀓𑀓𑀘𑀽𑀧𑀫𑁄𑀯𑀸𑀤𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀧𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀪𑀸𑀯𑀢𑁄𑀢𑀺 𑀓𑁂𑀘𑀺. 𑀬𑀁 𑀧𑀦 𑀓𑀓𑀘𑁄𑀓𑀦𑁆𑀢𑀓𑁂𑀲𑀼𑀧𑀺 𑀫𑀦𑀼𑀲𑁆𑀲𑁂𑀲𑀼 𑀅𑀧𑁆𑀧𑀤𑀼𑀲𑁆𑀲𑀦𑀁 𑀦𑀺𑀩𑁆𑀩𑀺𑀓𑀸𑀭𑀁, 𑀢𑀁 𑀲𑀢𑁆𑀣𑀼𑀲𑀸𑀲𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀮𑀓𑁆𑀔𑀡𑀁 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀺𑀬𑁂𑀯𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀺𑀓𑁆𑀔𑀼𑀦𑁄 𑀕𑀼𑀡𑀦𑁆𑀢𑀺 𑀅𑀭𑀺𑀬𑀥𑀫𑁆𑀫𑀸𑀥𑀺𑀕𑀫𑀦𑀲𑀺𑀤𑁆𑀥𑀁 𑀕𑀼𑀡𑀫𑀸𑀳. 𑀲𑁄 𑀘 𑀲𑀩𑁆𑀩𑁂𑀲𑀫𑁆𑀧𑀺 𑀅𑀭𑀺𑀬𑀸𑀦𑀁 𑀕𑀼𑀡𑁄𑀢𑀺 𑀢𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑀢𑀺 𑀏𑀯𑀸𑀢𑀺 𑀯𑀼𑀢𑁆𑀢𑀁.

𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀉𑀧𑁂𑀓𑁆𑀔𑀸 𑀓𑀼𑀲𑀮𑀦𑀺𑀲𑁆𑀲𑀺𑀢𑀸 𑀦 𑀲𑀡𑁆𑀞𑀸𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀦 𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀯𑀺𑀬 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀦𑀺𑀩𑁆𑀩𑀺𑀓𑀸𑀭𑀢𑀸𑀲𑀸𑀫𑀜𑁆𑀜𑁂𑀦. 𑀢𑁂𑀦𑀸𑀳 ‘‘𑀲𑀸 𑀧𑀦𑁂𑀲𑀸’’𑀢𑀺𑀆𑀤𑀺. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀞𑀸𑀦𑁂 𑀞𑀧𑁂𑀢𑀺 ‘‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀫𑀦𑀢𑀁 𑀆𑀧𑀚𑁆𑀚𑀦𑁆𑀢𑁄.

𑁩𑁦𑁩. 𑀆𑀧𑁄𑀕𑀢𑀦𑁆𑀢𑀺 𑀆𑀩𑀦𑁆𑀥𑀦𑀯𑀲𑁂𑀦 𑀆𑀧𑁄, 𑀢𑀤𑁂𑀯 𑀆𑀧𑁄𑀲𑀪𑀸𑀯𑀁 𑀕𑀢𑀢𑁆𑀢𑀸 𑀆𑀧𑁄𑀕𑀢𑀁, 𑀲𑀪𑀸𑀯𑁂𑀦𑁂𑀯 𑀆𑀧𑁄𑀪𑀸𑀯𑀁 𑀯𑀸 𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀲𑁄 𑀆𑀧𑁄𑀪𑀸𑀯𑀲𑀗𑁆𑀔𑀸𑀢𑁄 𑀅𑀮𑁆𑀮𑀬𑀽𑀲𑀪𑀸𑀯𑁄 𑀲𑀲𑀫𑁆𑀪𑀸𑀭𑀧𑀣𑀯𑀻𑀲𑀲𑀫𑁆𑀪𑀸𑀭𑀉𑀤𑀓𑀸𑀤𑀺𑀕𑀢𑁂 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀆𑀧𑀲𑁆𑀫𑀺𑀁 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀆𑀧𑁂𑀲𑀼 𑀕𑀢𑀁 𑀅𑀮𑁆𑀮𑀬𑀽𑀲𑀪𑀸𑀯𑀮𑀓𑁆𑀔𑀡’’𑀦𑁆𑀢𑀺, 𑀤𑁆𑀭𑀯𑀪𑀸𑀯𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄. ‘‘𑀧𑀓𑀼𑀧𑁆𑀧𑀢𑀻’’𑀢𑀺 𑀧𑀸𑀓𑀢𑀺𑀓𑀧𑀓𑁄𑀧𑀁 𑀲𑀦𑁆𑀥𑀸𑀬𑀸𑀳 ‘‘𑀑𑀖𑀯𑀲𑁂𑀦 𑀯𑀟𑁆𑀠𑀢𑀻’’𑀢𑀺. 𑀢𑁂𑀦𑀸𑀳 ‘‘𑀅𑀬𑀫𑀲𑁆𑀲 𑀧𑀸𑀓𑀢𑀺𑀓𑁄 𑀧𑀓𑁄𑀧𑁄’’𑀢𑀺. 𑀇𑀢𑀭𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀆𑀧𑁄𑀲𑀁𑀯𑀝𑁆𑀝𑀓𑀸𑀮𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀑𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀑𑀕𑀫𑀦𑀦𑁆𑀢𑀺 𑀧𑀭𑀺𑀬𑀸𑀤𑀸𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀅𑀥𑁄𑀕𑀫𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀤𑁆𑀥𑀦𑁂…𑀧𑁂… 𑀧𑀸𑀧𑀼𑀡𑀦𑁆𑀢𑀻’’𑀢𑀺.

𑁩𑁦𑁪. 𑀲𑀩𑁆𑀩𑀢𑁂𑀚𑁂𑀲𑀼 𑀕𑀢𑀦𑁆𑀢𑀺 𑀇𑀦𑁆𑀥𑀦𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑁂𑀲𑀼 𑀲𑀩𑁆𑀩𑁂𑀲𑀼 𑀢𑁂𑀚𑁄𑀓𑁄𑀝𑁆𑀞𑀸𑀲𑁂𑀲𑀼 𑀕𑀢𑀁 𑀧𑀯𑀢𑁆𑀢𑀁. 𑀬𑀣𑀸 𑀧𑀻𑀢𑀺 𑀏𑀯 𑀧𑀻𑀢𑀺𑀕𑀢𑀁, 𑀏𑀯𑀁 𑀢𑁂𑀚𑁄 𑀏𑀯 𑀢𑁂𑀚𑁄𑀕𑀢𑀁, 𑀢𑁂𑀚𑀦𑀯𑀲𑁂𑀦 𑀧𑀯𑀢𑁆𑀢𑀺𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀆𑀧𑁄𑀕𑀢𑀁, 𑀯𑀸𑀬𑁄𑀕𑀢𑀜𑁆𑀘 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀼𑀭𑀺𑀫𑁂’’𑀢𑀺𑀆𑀤𑀺. 𑀏𑀓𑀸𑀳𑀺𑀓𑀚𑀭𑀸𑀤𑀺𑀪𑀸𑀯𑁂𑀦𑀸𑀢𑀺 𑀏𑀓𑀸𑀳𑀺𑀓𑀸𑀤𑀺𑀚𑀭𑀸𑀪𑁂𑀤𑁂𑀦. 𑀉𑀲𑀼𑀫𑀚𑀸𑀢𑁄𑀢𑀺 𑀉𑀲𑁆𑀫𑀸𑀪𑀺𑀪𑀽𑀢𑁄. 𑀚𑀻𑀭𑀢𑀻𑀢𑀺 𑀚𑀺𑀡𑁆𑀡𑁄 𑀳𑁄𑀢𑀺. 𑀢𑁂𑀚𑁄𑀥𑀸𑀢𑀼𑀯𑀲𑁂𑀦 𑀮𑀩𑁆𑀪𑀫𑀸𑀦𑀸 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀚𑀭𑀸𑀧𑀯𑀢𑁆𑀢𑀺 𑀧𑀸𑀓𑀝𑀚𑀭𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀮𑀺𑀧𑀮𑀺𑀢𑀸𑀤𑀺𑀪𑀸𑀯𑀦𑁆𑀢𑀺 𑀯𑀮𑀺𑀢𑀧𑀮𑀺𑀢𑀪𑀸𑀯𑀁, 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀲𑀺𑀣𑀺𑀮𑀪𑀸𑀯𑀜𑁆𑀘. 𑀓𑀼𑀧𑁆𑀧𑀺𑀢𑁂𑀦𑀸𑀢𑀺 𑀔𑀼𑀪𑀺𑀢𑁂𑀦. 𑀲𑀢𑀓𑁆𑀔𑀢𑁆𑀢𑀼𑀁 𑀢𑀸𑀧𑁂𑀢𑁆𑀯𑀸 𑀢𑀸𑀧𑁂𑀢𑁆𑀯𑀸 𑀲𑀻𑀢𑀽𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀝𑀲𑀧𑁆𑀧𑀺 𑀲𑀢𑀥𑁄𑀢𑀲𑀧𑁆𑀧𑀻𑀢𑀺 𑀯𑀤𑀦𑁆𑀢𑀺. 𑀲𑀭𑀻𑀭𑁂 𑀧𑀓𑀢𑀺𑀉𑀲𑀼𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀡𑁆𑀳𑀪𑀸𑀯𑁄 𑀲𑀦𑁆𑀢𑀸𑀧𑁄, 𑀲𑀭𑀻𑀭𑀲𑁆𑀲 𑀤𑀳𑀦𑀯𑀲𑁂𑀦 𑀧𑀯𑀢𑁆𑀢𑁄 𑀫𑀳𑀸𑀤𑀸𑀳𑁄 𑀧𑀭𑀺𑀤𑀸𑀳𑁄𑀢𑀺 𑀅𑀬𑀫𑁂𑀯 𑀢𑁂𑀲𑀁 𑀯𑀺𑀲𑁂𑀲𑁄. 𑀅𑀲𑀺𑀢𑀦𑁆𑀢𑀺 𑀲𑀼𑀢𑁆𑀢𑀁. 𑀔𑀸𑀬𑀺𑀢𑀦𑁆𑀢𑀺 𑀔𑀸𑀤𑀺𑀢𑀁. 𑀲𑀸𑀬𑀺𑀢𑀦𑁆𑀢𑀺 𑀅𑀲𑁆𑀲𑀸𑀤𑀺𑀢𑀁. 𑀲𑀫𑁆𑀫𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀻𑀢𑀺 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀲𑀫𑁆𑀫𑀸𑀧𑀭𑀺𑀧𑀸𑀓𑁄𑀧𑀺 𑀯𑀺𑀲𑀫𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀭𑀲𑀸𑀤𑀺𑀪𑀸𑀯𑁂𑀦𑀸𑀢𑀺 𑀭𑀲𑀭𑀼𑀥𑀺𑀭𑀫𑀁𑀲𑀫𑁂𑀤𑀦𑁆𑀳𑀸𑀭𑀼𑀅𑀝𑁆𑀞𑀺𑀅𑀝𑁆𑀞𑀺𑀫𑀺𑀜𑁆𑀚𑀲𑀼𑀓𑁆𑀓𑀪𑀸𑀯𑁂𑀦. 𑀯𑀺𑀯𑁂𑀓𑀦𑁆𑀢𑀺 𑀧𑀼𑀣𑀼𑀪𑀸𑀯𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑀤𑀺𑀲𑀪𑀸𑀯𑀁. 𑀅𑀲𑀺𑀢𑀸𑀤𑀺𑀪𑁂𑀤𑀲𑁆𑀲 𑀆𑀳𑀸𑀭𑀲𑁆𑀲 𑀧𑀭𑀺𑀡𑀸𑀫𑁂 𑀭𑀲𑁄 𑀳𑁄𑀢𑀺, 𑀢𑀁 𑀧𑀝𑀺𑀘𑁆𑀘 𑀭𑀲𑀥𑀸𑀢𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀭𑀲𑀲𑁆𑀲 𑀧𑀭𑀺𑀡𑀸𑀫𑁂 ‘‘𑀭𑀼𑀥𑀺𑀭’’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀦𑁂𑀢𑀩𑁆𑀩𑀁.

𑀳𑀭𑀺𑀢𑀦𑁆𑀢𑀦𑁆𑀢𑀺 𑀳𑀭𑀺𑀢𑀫𑁂𑀯, 𑀅𑀦𑁆𑀢-𑀲𑀤𑁆𑀤𑁂𑀦 𑀧𑀤𑀯𑀟𑁆𑀠𑀦𑀁 𑀓𑀢𑀁 𑀬𑀣𑀸 ‘‘𑀯𑀦𑀦𑁆𑀢𑀁 𑀲𑀼𑀢𑁆𑀢𑀦𑁆𑀢’’𑀦𑁆𑀢𑀺. 𑀘𑀫𑁆𑀫𑀦𑀺𑀮𑁆𑀮𑁂𑀔𑀦𑀁 𑀘𑀫𑁆𑀫𑀁 𑀮𑀺𑀔𑀺𑀢𑁆𑀯𑀸 𑀙𑀟𑁆𑀟𑀺𑀢𑀓𑀲𑀝𑀁.

𑁩𑁦𑁫. 𑀉𑀕𑁆𑀕𑀸𑀭𑀳𑀺𑀓𑁆𑀓𑀸𑀭𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀉𑀤𑁆𑀤𑁂𑀓𑀔𑀻𑀧𑀦𑀸𑀤𑀺𑀧𑀯𑀢𑁆𑀢𑀓𑀯𑀸𑀢𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀺𑀢𑁆𑀢𑀲𑁂𑀫𑁆𑀳𑀮𑀲𑀺𑀓𑀸𑀤𑀺𑀦𑀻𑀳𑀭𑀡𑀯𑀸𑀢𑀲𑁆𑀲 𑀘𑁂𑀯 𑀉𑀲𑀼𑀫𑀯𑀸𑀢𑀲𑁆𑀲 𑀘 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺𑀧𑀺 𑀓𑀼𑀘𑁆𑀙𑀺-𑀲𑀤𑁆𑀤𑁄 𑀉𑀤𑀭𑀧𑀭𑀺𑀬𑀸𑀬𑁄, 𑀓𑁄𑀝𑁆𑀞-𑀲𑀤𑁆𑀤𑁂𑀦 𑀧𑀦 𑀅𑀩𑁆𑀪𑀦𑁆𑀢𑀭𑀲𑁆𑀲 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀢𑀤𑀯𑀲𑀺𑀝𑁆𑀞𑁄 𑀉𑀤𑀭𑀧𑀤𑁂𑀲𑁄 𑀇𑀥 𑀓𑀼𑀘𑁆𑀙𑀺-𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀩𑀳𑀺𑀯𑀸𑀢𑀸’’𑀢𑀺. 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀮𑁄𑀓𑀦𑀯𑀺𑀮𑁄𑀓𑀦𑀉𑀤𑁆𑀥𑀭𑀡𑀸𑀤𑀺𑀓𑀸 𑀲𑀩𑁆𑀩𑀸 𑀓𑀸𑀬𑀺𑀓𑀓𑀺𑀭𑀺𑀬𑀸 𑀲𑀗𑁆𑀕𑀳𑀺𑀢𑀸. 𑀅𑀯𑀲𑀯𑀢𑀺 𑀉𑀤𑀓𑀁 𑀏𑀢𑀲𑁆𑀫𑀸𑀢𑀺 𑀑𑀲𑁆𑀲𑀯𑀦𑀁, 𑀙𑀤𑀦𑀦𑁆𑀢𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂.

𑁩𑁦𑁬. 𑀦𑀺𑀲𑁆𑀲𑀢𑁆𑀢𑀪𑀸𑀯𑀦𑁆𑀢𑀺 𑀅𑀦𑀢𑁆𑀢𑀓𑀢𑀁. 𑀬𑀣𑀸𑀤𑀲𑁆𑀲𑀺𑀢𑀸 𑀳𑀺 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀅𑀦𑀢𑁆𑀢𑀦𑀺𑀬𑀁 𑀓𑁂𑀯𑀮𑀁 𑀥𑀸𑀢𑀼𑀫𑀢𑁆𑀢𑀸 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀧𑀭𑀺𑀯𑀸𑀭𑀺𑀢𑁄𑀢𑀺 𑀧𑀭𑀺𑀯𑀸𑀭𑀺𑀢𑀪𑀸𑀯𑁂𑀦 𑀞𑀺𑀢𑁄 𑀧𑀭𑀺𑀯𑀼𑀢𑁄. 𑀢𑁂𑀦𑀸𑀳 ‘‘𑀏𑀢𑀸𑀦𑀻’’𑀢𑀺𑀆𑀤𑀺, 𑀓𑀝𑁆𑀞𑀸𑀤𑀻𑀦𑀺 𑀲𑀦𑁆𑀦𑀺𑀯𑁂𑀲𑀯𑀺𑀲𑁂𑀲𑀯𑀲𑁂𑀦 𑀞𑀧𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀣𑀸 𑀅𑀕𑀸𑀭𑀲𑀫𑀜𑁆𑀜𑀸𑀬 𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀓𑀝𑁆𑀞𑀸𑀤𑀻𑀲𑀼 𑀧𑀦𑀸’’𑀢𑀺𑀆𑀤𑀺. 𑀬𑀤𑀢𑁆𑀣𑀁 𑀧𑀸𑀴𑀺𑀬𑀁 ‘‘𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁, 𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀓𑀝𑁆𑀞𑀸𑀤𑀻𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀓𑀸𑀫𑀁 𑀳𑁂𑀝𑁆𑀞𑀸 ‘‘𑀫𑀢𑁆𑀢𑀝𑁆𑀞𑀓𑀲𑁆𑀲 𑀓𑀸𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁦𑁨) 𑀅𑀯𑀺𑀪𑀸𑀕𑁂𑀦 𑀏𑀓𑀤𑁂𑀲𑁂𑀦 𑀘 𑀉𑀧𑀸𑀤𑀸𑀭𑀽𑀧𑀫𑁆𑀧𑀺 𑀓𑀣𑀺𑀢𑀁, 𑀢𑀣𑀸 𑀯𑁂𑀤𑀦𑀸𑀤𑀬𑁄 𑀔𑀦𑁆𑀥𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀦 𑀓𑀣𑀺𑀢𑀸, 𑀢𑀣𑀸 𑀢𑀡𑁆𑀳𑀸𑀧𑀺 𑀲𑀫𑀼𑀤𑀬𑀲𑀘𑁆𑀘𑀪𑀸𑀯𑁂𑀦. 𑀇𑀢𑀭𑀸𑀦𑀺 𑀧𑀦 𑀲𑀘𑁆𑀘𑀸𑀦𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀓𑀣𑀺𑀢𑀸𑀦𑀺. 𑀢𑁂𑀦𑁂𑀯𑀸𑀳 ‘‘𑀳𑁂𑀝𑁆𑀞𑀸…𑀧𑁂… 𑀦 𑀓𑀣𑀺𑀢𑀸𑀦𑀻’’𑀢𑀺. 𑀘𑀓𑁆𑀔𑀼𑀧𑀲𑀸𑀤𑁂 𑀦𑀺𑀭𑀼𑀤𑁆𑀥𑁂𑀢𑀺 𑀘𑀓𑁆𑀔𑀼𑀧𑀲𑀸𑀤𑁂 𑀯𑀺𑀦𑀝𑁆𑀞𑁂. 𑀉𑀧𑀳𑀢𑁂𑀢𑀺 𑀧𑀼𑀩𑁆𑀩𑀓𑀺𑀫𑀺𑀆𑀤𑀻𑀳𑀺 𑀉𑀧𑀤𑁆𑀤𑀼𑀢𑁂. 𑀧𑀮𑀺𑀩𑀼𑀤𑁆𑀥𑁂𑀢𑀺 𑀧𑀼𑀩𑁆𑀩𑀸𑀤𑀺𑀉𑀧𑁆𑀧𑀢𑁆𑀢𑀺𑀬𑀸 𑀯𑀺𑀦𑀸 𑀧𑀝𑀺𑀘𑁆𑀙𑀸𑀤𑀺𑀢𑁂. 𑀢𑀚𑁆𑀚𑁄𑀢𑀺 𑀢𑀲𑁆𑀲𑀸𑀦𑀼𑀭𑀽𑀧𑁄, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑁄𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀲𑁆𑀲 𑀭𑀽𑀧𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀉𑀧𑁆𑀧𑀚𑁆𑀚𑀦𑀫𑀦𑀲𑀺𑀓𑀸𑀭𑁄 𑀳𑀤𑀬𑀲𑀦𑁆𑀦𑀺𑀲𑁆𑀲𑀬𑁄𑀧𑀺 𑀘𑀓𑁆𑀔𑀼𑀫𑁆𑀳𑀺 𑀲𑀢𑀺 𑀳𑁄𑀢𑀺, 𑀅𑀲𑀢𑀺 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀘𑀓𑁆𑀔𑀼𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀼𑀢𑁆𑀢𑁄. 𑀪𑀯𑀗𑁆𑀕𑀸𑀯𑀝𑁆𑀝𑀦𑀁 𑀢𑀲𑁆𑀲 𑀬𑀣𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑁂, 𑀏𑀯𑀁 𑀧𑀲𑀸𑀤𑀧𑀘𑁆𑀘𑀬𑁂𑀧𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀼𑀜𑁆𑀘 𑀭𑀽𑀧𑁂 𑀘 𑀧𑀝𑀺𑀘𑁆𑀘𑀸’’𑀢𑀺. 𑀦𑁆𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀘𑀺𑀢𑁆𑀢𑀁. 𑀅𑀜𑁆𑀜𑀯𑀺𑀳𑀺𑀢𑀲𑁆𑀲𑀸𑀢𑀺 𑀅𑀜𑁆𑀜𑀸𑀭𑀫𑁆𑀫𑀡𑀧𑀲𑀼𑀢𑀲𑁆𑀲. 𑀢𑀤𑀦𑀼𑀭𑀽𑀧𑀲𑁆𑀲𑀸𑀢𑀺 𑀢𑁂𑀲𑀁 𑀘𑀓𑁆𑀔𑀼𑀭𑀽𑀧𑀢𑀤𑀸𑀪𑁄𑀕𑀸𑀦𑀁 𑀅𑀦𑀼𑀭𑀽𑀧𑀲𑁆𑀲.

𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑀲𑁆𑀲𑁂𑀢𑀺 𑀲𑀭𑀽𑀧𑀢𑁄 𑀅𑀢𑁆𑀣𑀸𑀧𑀢𑁆𑀢𑀺𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀧𑁆𑀧𑀓𑀸𑀭𑁄 𑀪𑀽𑀢𑁄, 𑀢𑀧𑁆𑀧𑀓𑀸𑀭𑀁 𑀯𑀸 𑀧𑀢𑁆𑀢𑁄 𑀢𑀣𑀸𑀪𑀽𑀢𑁄, 𑀢𑀲𑁆𑀲, 𑀬𑀣𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀤𑀺𑀲𑀲𑁆𑀲 𑀧𑀘𑁆𑀘𑀬𑀸𑀓𑀸𑀭𑀲𑀫𑀯𑁂𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀺𑀲𑀫𑀼𑀝𑁆𑀞𑀸𑀦𑀭𑀽𑀧𑀦𑁆𑀢𑀺 𑀉𑀢𑀼𑀓𑀫𑁆𑀫𑀸𑀳𑀸𑀭𑀲𑀫𑀼𑀝𑁆𑀞𑀸𑀦𑀭𑀽𑀧𑀁. 𑀇𑀤𑀜𑁆𑀘 𑀲𑀢𑀺𑀧𑀺 𑀢𑀤𑀸 𑀪𑀯𑀗𑁆𑀕𑀸𑀯𑀝𑁆𑀝𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑁂 𑀓𑁂𑀯𑀮𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀼𑀝𑁆𑀞𑀺𑀢𑀭𑀽𑀧𑀲𑁆𑀲 𑀅𑀪𑀸𑀯𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀦𑀕𑀭𑀁 𑀯𑀺𑀬 𑀭𑀚𑁆𑀚𑁂 𑀭𑀽𑀧𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑁂𑀢𑀩𑁆𑀩𑀢𑀁 𑀕𑀳𑁂𑀢𑀩𑁆𑀩𑀢𑀁 𑀕𑀘𑁆𑀙𑀢𑀺. ‘‘𑀢𑀣𑀸𑀪𑀽𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑁂𑀤𑀦𑀸𑀤𑀬𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀯, 𑀯𑀺𑀜𑁆𑀜𑀸𑀡𑀫𑁆𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁂𑀯. 𑀲𑀗𑁆𑀔𑀸𑀭𑀸𑀢𑀺 𑀘𑁂𑀢𑀦𑀸𑀯 𑀯𑀼𑀢𑁆𑀢𑀸 𑀘𑁂𑀢𑀦𑀸𑀧𑀥𑀸𑀦𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀧𑀦 𑀨𑀲𑁆𑀲𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀫𑀦𑀲𑀺𑀓𑀸𑀭𑀘𑀺𑀢𑁆𑀢𑀝𑁆𑀞𑀺𑀢𑀺𑀬𑁄𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀯. 𑀏𑀓𑀢𑁄 𑀲𑀗𑁆𑀕𑀳𑁄 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 𑀏𑀓𑀢𑁄 𑀕𑀡𑀦𑀸. 𑀲𑀫𑀸𑀕𑀫𑁄𑀢𑀺 𑀬𑀣𑀸𑀲𑀓𑀁 𑀧𑀘𑁆𑀘𑀬𑀯𑀲𑁂𑀦 𑀲𑀫𑁄𑀥𑀸𑀦𑀁. 𑀲𑀫𑀯𑀸𑀬𑁄𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀲𑀫𑀯𑁂𑀢𑀢𑀸𑀬 𑀲𑀫𑀼𑀤𑀺𑀢𑀪𑀸𑀯𑁄.

𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁄 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀚𑁆𑀚𑀢𑀺 𑀏𑀢𑀲𑁆𑀫𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀧𑀘𑁆𑀘𑀬𑀸𑀓𑀸𑀭𑁄. 𑀧𑀘𑁆𑀘𑀬𑀥𑀫𑁆𑀫𑁂 𑀧𑀲𑁆𑀲𑀦𑁆𑀢𑁄𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂 𑀧𑀲𑁆𑀲𑀢𑀺, 𑀢𑁂 𑀧𑀲𑁆𑀲𑀦𑁆𑀢𑁄𑀧𑀺 𑀧𑀘𑁆𑀘𑀬𑀥𑀫𑁆𑀫𑁂 𑀧𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀬𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤’’𑀦𑁆𑀢𑀺𑀆𑀤𑀺. 𑀙𑀦𑁆𑀤𑀓𑀭𑀡𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀬𑀦𑀯𑀲𑁂𑀦. 𑀆𑀮𑀬𑀓𑀭𑀡𑀯𑀲𑁂𑀦𑀸𑀢𑀺 𑀅𑀧𑁂𑀓𑁆𑀔𑀸𑀓𑀭𑀡𑀯𑀲𑁂𑀦. 𑀅𑀦𑀼𑀦𑀬𑀓𑀭𑀡𑀯𑀲𑁂𑀦𑀸𑀢𑀺 𑀅𑀦𑀼𑀭𑀚𑁆𑀚𑀦𑀯𑀲𑁂𑀦. 𑀅𑀚𑁆𑀛𑁄𑀕𑀸𑀳𑀺𑀢𑁆𑀯𑀸𑀢𑀺 𑀆𑀭𑀫𑁆𑀫𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀕𑀺𑀮𑀺𑀢𑁆𑀯𑀸 𑀯𑀺𑀬 𑀦𑀺𑀝𑁆𑀞𑀧𑁂𑀢𑁆𑀯𑀸 𑀯𑀺𑀬 𑀤𑀴𑁆𑀳𑀕𑁆𑀕𑀳𑀡𑀯𑀲𑁂𑀦. 𑀙𑀦𑁆𑀤𑀭𑀸𑀕𑁄 𑀯𑀺𑀦𑀬𑀢𑀺 𑀧𑀳𑀻𑀬𑀢𑀺 𑀏𑀢𑁆𑀣𑀸𑀢𑀺 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑀳𑀸𑀦𑀜𑁆𑀘𑀸𑀢𑀺 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁. 𑀆𑀳𑀭𑀺𑀢𑁆𑀯𑀸𑀢𑀺 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀅𑀦𑀸𑀕𑀢𑀫𑁆𑀧𑀺 𑀅𑀢𑁆𑀣𑀢𑁄 𑀆𑀦𑁂𑀢𑁆𑀯𑀸 𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀆𑀳𑀭𑀡𑀯𑀺𑀥𑀺𑀁 𑀧𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸 𑀇𑀫𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀲𑀼𑀔𑀤𑀼𑀓𑁆𑀔𑀸𑀤𑀻𑀲𑀼 𑀢𑀻𑀲𑀼 𑀅𑀪𑀺𑀲𑀫𑀬𑀝𑁆𑀞𑀸𑀦𑁂𑀲𑀼. 𑀤𑀺𑀝𑁆𑀞𑀻𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀬𑀸𑀣𑀸𑀯𑀤𑀲𑁆𑀲𑀦𑀁. 𑀏𑀯𑀁 𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀺 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑀸. 𑀪𑀸𑀯𑀦𑀸𑀧𑀝𑀺𑀯𑁂𑀥𑁄𑀢𑀺 𑀪𑀸𑀯𑀦𑀸𑀯𑀲𑁂𑀦 𑀧𑀝𑀺𑀯𑁂𑀥𑁄, 𑀦 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑁂𑀦. 𑀅𑀬𑀁 𑀫𑀕𑁆𑀕𑁄𑀢𑀺 𑀅𑀬𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀝𑀺𑀯𑀺𑀚𑁆𑀛𑀦𑀯𑀲𑁂𑀦 𑀧𑀯𑀢𑁆𑀢𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀏𑀢𑁆𑀢𑀸𑀯𑀢𑀸𑀧𑀻𑀢𑀺 𑀏𑀯𑀁 𑀏𑀓𑀲𑁆𑀫𑀺𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑀢𑁆𑀣𑀼 𑀧𑀭𑀺𑀕𑁆𑀕𑀳𑀫𑀼𑀔𑁂𑀦𑀧𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀫𑀢𑁆𑀣𑀓𑀁 𑀧𑀸𑀧𑀦𑁂𑀦 𑀩𑀳𑀼𑀁 𑀯𑀺𑀧𑀼𑀮𑀁 𑀧𑀭𑀺𑀧𑀼𑀡𑁆𑀡𑀫𑁂𑀯 𑀪𑀕𑀯𑀢𑁄 𑀲𑀸𑀲𑀦𑀁 𑀓𑀢𑀁 𑀅𑀦𑀼𑀝𑁆𑀞𑀺𑀢𑀁 𑀳𑁄𑀢𑀺.

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀫𑁂𑀯 𑀪𑀯𑀗𑁆𑀕𑀘𑀺𑀢𑁆𑀢𑀁 𑀆𑀯𑀚𑁆𑀚𑀦𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑁄 𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀁 𑀦𑀺𑀭𑀼𑀤𑁆𑀥𑀫𑁆𑀧𑀻’’𑀢𑀺. 𑀫𑀦𑁆𑀤𑀣𑀸𑀫𑀕𑀢𑀫𑁂𑀯𑀸𑀢𑀺 𑀫𑀳𑀢𑀺𑀬𑀸 𑀦𑀺𑀤𑁆𑀤𑀸𑀬 𑀅𑀪𑀺𑀪𑀽𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑀲𑁆𑀲 𑀧𑀦 𑀪𑀯𑀗𑁆𑀕𑀘𑀺𑀢𑁆𑀢𑀁 𑀓𑀤𑀸𑀘𑀺 𑀆𑀯𑀚𑁆𑀚𑀦𑀲𑁆𑀲 𑀧𑀘𑁆𑀘𑀬𑁄 𑀪𑀯𑁂𑀬𑁆𑀬𑀸𑀢𑀺. 𑀪𑀯𑀗𑁆𑀕𑀲𑀫𑀬𑁂𑀦𑁂𑀯𑀸𑀢𑀺 𑀪𑀯𑀗𑁆𑀕𑀲𑁆𑀲𑁂𑀯 𑀧𑀯𑀢𑁆𑀢𑀦𑀲𑀫𑀬𑁂𑀦 𑀧𑀕𑀼𑀡𑀚𑁆𑀛𑀸𑀦𑀧𑀕𑀼𑀡𑀓𑀫𑁆𑀫𑀝𑁆𑀞𑀸𑀦𑀧𑀕𑀼𑀡𑀕𑀦𑁆𑀣𑁂𑀲𑀼 𑀢𑁂𑀲𑀁 𑀧𑀕𑀼𑀡𑀪𑀸𑀯𑁂𑀦𑁂𑀯 𑀆𑀪𑁄𑀕𑁂𑀦 𑀯𑀺𑀦𑀸𑀧𑀺 𑀫𑀦𑀲𑀺𑀓𑀸𑀭𑁄 𑀧𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀧𑀕𑀼𑀡𑀁 𑀕𑀦𑁆𑀣𑀁 𑀧𑀕𑀼𑀡𑀪𑀸𑀯𑁂𑀦𑁂𑀯 𑀦𑀺𑀭𑀦𑁆𑀢𑀭𑀁 𑀯𑀺𑀬 𑀅𑀚𑁆𑀛𑀬𑀫𑀸𑀦𑁂 𑀅𑀜𑁆𑀜𑀯𑀺𑀳𑀺𑀢𑀢𑀸𑀬 ‘‘𑀏𑀢𑁆𑀢𑀓𑁄 𑀕𑀦𑁆𑀣𑁄 𑀕𑀢𑁄, 𑀏𑀢𑁆𑀢𑀓𑁄 𑀅𑀯𑀲𑀺𑀝𑁆𑀞𑁄’’𑀢𑀺 𑀲𑀮𑁆𑀮𑀓𑁆𑀔𑀡𑀸 𑀦 𑀳𑁄𑀢𑀺. 𑀘𑀢𑀼𑀲𑀫𑀼𑀝𑁆𑀞𑀸𑀦𑀫𑁆𑀧𑀻𑀢𑀺 𑀲𑀩𑁆𑀩𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀁, 𑀦 𑀧𑀼𑀩𑁆𑀩𑁂 𑀯𑀺𑀬 𑀢𑀺𑀲𑀫𑀼𑀝𑁆𑀞𑀸𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸 𑀑𑀴𑀸𑀭𑀺𑀓𑀢𑁆𑀢𑀸 𑀘 𑀨𑀲𑁆𑀲𑀘𑁂𑀢𑀦𑀸𑀯 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀕𑀳𑀺𑀢𑀸, 𑀦 𑀅𑀜𑁆𑀜𑁂𑀲𑀁 𑀅𑀪𑀸𑀯𑀸. 𑀏𑀓𑀤𑁂𑀲𑀫𑁂𑀯 𑀲𑀫𑁆𑀫𑀲𑀦𑁆𑀢𑁄𑀢𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑀁 𑀅𑀢𑁆𑀣𑀁 𑀳𑁂𑀝𑁆𑀞𑀸 𑀅𑀦𑀯𑀲𑁂𑀲𑀢𑁄 𑀅𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀏𑀓𑀤𑁂𑀲𑀫𑁂𑀯 𑀦𑀺𑀤𑁆𑀤𑀺𑀲𑀦𑀯𑀲𑁂𑀦 𑀤𑁂𑀲𑀦𑀸𑀬 𑀆𑀫𑀲𑀦𑁆𑀢𑁄. 𑀇𑀫𑀲𑁆𑀫𑀺𑀁 𑀞𑀸𑀦𑁂𑀢𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀅𑀚𑁆𑀛𑀢𑁆𑀢𑀺𑀓𑀜𑁆𑀘𑁂𑀯, 𑀆𑀯𑀼𑀲𑁄, 𑀘𑀓𑁆𑀔𑀼’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁦𑁬) 𑀙𑀤𑁆𑀯𑀸𑀭𑀯𑀲𑁂𑀦 𑀦𑀺𑀤𑁆𑀤𑀺𑀲𑀦𑀝𑁆𑀞𑀸𑀦𑁂. 𑀳𑁂𑀝𑁆𑀞𑀸 𑀧𑀭𑀺𑀳𑀻𑀦𑀤𑁂𑀲𑀦𑀦𑁆𑀢𑀺 𑁋 ‘‘𑀬𑀁 𑀉𑀧𑀸𑀤𑀸𑀭𑀽𑀧𑀁 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀉𑀧𑀭𑀺 𑀢𑀻𑀡𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀦𑀺𑀤𑁆𑀤𑁂𑀲𑀯𑀲𑁂𑀦 𑀧𑀭𑀺𑀳𑀻𑀦𑀁 𑀅𑀢𑁆𑀣𑀚𑀸𑀢𑀁 𑀲𑀩𑁆𑀩𑀁. 𑀢𑀁𑀢𑀁𑀤𑁆𑀯𑀸𑀭𑀯𑀲𑁂𑀦𑀸𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀺𑀓𑀁 𑀢𑀁𑀢𑀁𑀤𑁆𑀯𑀸𑀭𑀯𑀲𑁂𑀦. 𑀘𑀢𑀼𑀲𑀘𑁆𑀘𑀯𑀲𑁂𑀦 𑀆𑀭𑀤𑁆𑀥𑀸 𑀤𑁂𑀲𑀦𑀸 𑀘𑀢𑀼𑀲𑀘𑁆𑀘𑁂𑀦𑁂𑀯 𑀧𑀭𑀺𑀬𑁄𑀲𑀸𑀧𑀺𑀢𑀸𑀢𑀺 𑀆𑀳 ‘‘𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀲𑀼𑀢𑁆𑀢𑀦𑁆𑀢𑀁 𑀦𑀺𑀝𑁆𑀞𑀧𑁂𑀲𑀻’’𑀢𑀺.

𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.