𑁭. 𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮𑁮. 𑀲𑁂𑀢𑀧𑀭𑀺𑀯𑀸𑀭𑁄𑀢𑀺 𑀲𑁂𑀢𑀧𑀝𑀺𑀘𑁆𑀙𑀤𑁄, 𑀲𑁂𑀢𑀯𑀡𑁆𑀡𑀸𑀮𑀗𑁆𑀓𑀸𑀭𑁄𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀧𑀦 ‘‘𑀲𑁂𑀢𑀸𑀮𑀗𑁆𑀓𑀸𑀭𑀸’’𑀢𑀺 𑀅𑀲𑁆𑀲𑀸𑀮𑀗𑁆𑀓𑀸𑀭𑁄 𑀕𑀳𑀺𑀢𑁄, 𑀇𑀥 𑀘𑀓𑁆𑀓𑀧𑀜𑁆𑀚𑀭𑀓𑀼𑀩𑁆𑀩𑀭𑀸𑀤𑀺𑀭𑀣𑀸𑀯𑀬𑀯𑁂𑀲𑀼 𑀓𑀸𑀢𑀩𑁆𑀩𑀸𑀮𑀗𑁆𑀓𑀸𑀭𑁄. 𑀏𑀯𑀁 𑀯𑀼𑀢𑁆𑀢𑁂𑀦𑀸𑀢𑀺 𑀏𑀯𑀁 ‘‘𑀲𑁂𑀢𑀸𑀬 𑀲𑀼𑀤’’𑀦𑁆𑀢𑀺𑀆𑀤𑀺𑀦𑀸 𑀧𑀓𑀸𑀭𑁂𑀦 𑀲𑀁𑀬𑀼𑀢𑁆𑀢𑀫𑀳𑀸𑀯𑀕𑁆𑀕𑁂 (𑀲𑀁. 𑀦𑀺. 𑁫.𑁪) 𑀯𑀼𑀢𑁆𑀢𑁂𑀦. 𑀦𑀸𑀢𑀺𑀫𑀳𑀸 𑀬𑀼𑀤𑁆𑀥𑀫𑀡𑁆𑀟𑀮𑁂 𑀲𑀜𑁆𑀘𑀸𑀭𑀲𑀼𑀔𑀢𑁆𑀣𑀁. 𑀬𑁄𑀥𑁄 𑀲𑀸𑀭𑀣𑀻𑀢𑀺 𑀤𑁆𑀯𑀺𑀦𑁆𑀦𑀁, 𑀧𑀳𑀭𑀡𑀤𑀸𑀬𑀓𑁂𑀦 𑀲𑀤𑁆𑀥𑀺𑀁 𑀢𑀺𑀡𑁆𑀡𑀁 𑀯𑀸.

𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺 𑀦𑀕𑀭𑀲𑁄𑀪𑀦𑀢𑁆𑀣𑀁. 𑀇𑀤𑀁 𑀓𑀺𑀭 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀚𑀸𑀡𑀼𑀲𑁆𑀲𑁄𑀡𑀺𑀝𑁆𑀞𑀸𑀦𑀦𑁆𑀢𑀭𑀁 𑀚𑀸𑀢𑀺𑀲𑀺𑀤𑁆𑀥𑀁 𑀧𑀭𑀫𑁆𑀧𑀭𑀸𑀕𑀢𑀁 𑀘𑀸𑀭𑀺𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀢𑁄 𑀏𑀢𑁆𑀢𑀓𑁂𑀳𑀺 𑀤𑀺𑀯𑀲𑁂𑀳𑀻’’𑀢𑀺𑀆𑀤𑀺. 𑀘𑀸𑀭𑀺𑀢𑁆𑀢𑀯𑀲𑁂𑀦 𑀦𑀕𑀭𑀯𑀸𑀲𑀺𑀦𑁄𑀧𑀺 𑀢𑀣𑀸 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀧𑀼𑀜𑁆𑀜𑀯𑀸𑀤𑀺𑀫𑀗𑁆𑀕𑀮𑀓𑀣𑀦𑁂 𑀦𑀺𑀬𑀼𑀢𑁆𑀢𑀸 𑀫𑀸𑀗𑁆𑀕𑀮𑀺𑀓𑀸. 𑀲𑀼𑀯𑀢𑁆𑀣𑀺𑀧𑀢𑁆𑀢𑀦𑀸𑀬 𑀲𑁄𑀯𑀢𑁆𑀣𑀺𑀓𑀸. 𑀆𑀤𑀺-𑀲𑀤𑁆𑀤𑁂𑀦 𑀯𑀦𑁆𑀤𑀻𑀆𑀤𑀻𑀦𑀁 𑀲𑀗𑁆𑀕𑀳𑁄. 𑀬𑀲𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀬𑀲𑀲𑀫𑁆𑀧𑀢𑁆𑀢𑀺𑀬𑀸 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸 𑀘, 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀯𑀺𑀪𑀯𑀲𑁄𑀪𑀸𑀲𑀫𑁆𑀧𑀢𑁆𑀢𑀺𑀬𑀸 𑀘𑀸𑀢𑀺 𑀅𑀢𑁆𑀣𑁄.

𑀦𑀕𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺 𑀅𑀢𑁆𑀢𑀦𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬. 𑀧𑀡𑁆𑀟𑀺𑀢𑁄 𑀫𑀜𑁆𑀜𑁂𑀢𑀺 𑀏𑀢𑁆𑀣 𑀫𑀜𑁆𑀜𑁂𑀢𑀺 𑀇𑀤𑀁 ‘‘𑀫𑀜𑁆𑀜𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀦𑀺𑀧𑀸𑀢𑀧𑀤𑀁. 𑀢𑀲𑁆𑀲 𑀇𑀢𑀺-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀡𑁆𑀟𑀺𑀢𑁄𑀢𑀺 𑀫𑀜𑁆𑀜𑀢𑀻’’𑀢𑀺 𑀆𑀳. 𑀅𑀦𑀼𑀫𑀢𑀺𑀧𑀼𑀘𑁆𑀙𑀸𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀉𑀤𑀸𑀳𑀼 𑀦𑁄’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀢𑀺 𑀪𑀯𑀁 𑀯𑀘𑁆𑀙𑀸𑀬𑀦𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀼𑀦 𑀕𑀡𑁆𑀳𑀦𑁆𑀢𑁄 ‘‘𑀧𑀡𑁆𑀟𑀺𑀢𑁄 𑀫𑀜𑁆𑀜𑁂’’𑀢𑀺 𑀆𑀳. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀯𑀁 𑀯𑀘𑁆𑀙𑀸𑀬𑀦𑁄, 𑀲𑀫𑀡𑀁 𑀕𑁄𑀢𑀫𑀁 𑀧𑀡𑁆𑀟𑀺𑀢𑁄𑀢𑀺 𑀫𑀜𑁆𑀜𑀢𑀺, 𑀉𑀤𑀸𑀳𑀼 𑀦𑁄’’𑀢𑀺, 𑀬𑀣𑀸 𑀢𑁂 𑀔𑀫𑁂𑀬𑁆𑀬, 𑀢𑀣𑀸 𑀦𑀁 𑀓𑀣𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀳𑀁 𑀓𑁄 𑀦𑀸𑀫, 𑀫𑀫 𑀅𑀯𑀺𑀲𑀬𑁄 𑀏𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀓𑁄 𑀘𑀸𑀢𑀺 𑀳𑁂𑀢𑀼𑀦𑀺𑀲𑁆𑀲𑀓𑁆𑀓𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀓𑀼𑀢𑁄 𑀘𑀸’’𑀢𑀺. 𑀢𑀣𑀸 𑀘𑀸𑀳 ‘‘𑀓𑁂𑀦 𑀓𑀸𑀭𑀡𑁂𑀦 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺, 𑀬𑁂𑀦 𑀓𑀸𑀭𑀡𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀚𑀸𑀦𑁂𑀬𑁆𑀬𑀁, 𑀢𑀁 𑀓𑀸𑀭𑀡𑀁 𑀫𑀬𑀺 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀼𑀤𑁆𑀥𑁄𑀬𑁂𑀯 𑀪𑀯𑁂𑀬𑁆𑀬, 𑀅𑀩𑀼𑀤𑁆𑀥𑀲𑁆𑀲 𑀲𑀩𑁆𑀩𑀣𑀸 𑀩𑀼𑀤𑁆𑀥𑀜𑀸𑀡𑀸𑀦𑀼𑀪𑀸𑀯𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀑𑀭𑀫𑀢𑁆𑀢𑀓𑀁 𑀲𑀻𑀮𑀫𑀢𑁆𑀢𑀓𑀁, 𑀬𑁂𑀦 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 (𑀤𑀻. 𑀦𑀺. 𑁧.𑁭), 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁂𑀯 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸 𑀤𑀼𑀤𑁆𑀤𑀲𑀸 𑀤𑀼𑀭𑀦𑀼𑀩𑁄𑀥𑀸 …𑀧𑁂… 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺 (𑀤𑀻. 𑀦𑀺. 𑁧.𑁨𑁮) 𑀘. 𑀏𑀢𑁆𑀣𑀸𑀢𑀺 ‘‘𑀲𑁄𑀧𑀺 𑀦𑀽𑀦𑀲𑁆𑀲 𑀢𑀸𑀤𑀺𑀲𑁄𑀯𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂. 𑀧𑀲𑀢𑁆𑀣 𑀧𑀲𑀢𑁆𑀣𑁄𑀢𑀺 𑀧𑀲𑀢𑁆𑀣𑁂𑀳𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑁂𑀯 𑀲𑁄 𑀧𑀲𑀢𑁆𑀣𑁄, 𑀦 𑀢𑀲𑁆𑀲 𑀓𑀺𑀢𑁆𑀢𑀺𑀦𑀸, 𑀧𑀲𑀁𑀲𑀸𑀲𑀪𑀸𑀯𑁂𑀦𑁂𑀯 𑀧𑀸𑀲𑀁𑀲𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑀕𑀼𑀡𑀸𑀦’’𑀦𑁆𑀢𑀺𑀆𑀤𑀺. 𑀫𑀡𑀺𑀭𑀢𑀦𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀦𑁄 𑀫𑀡𑀺𑀭𑀢𑀦𑀁. 𑀲𑀤𑁂𑀯𑀓𑁂 𑀮𑁄𑀓𑁂 𑀧𑀸𑀲𑀁𑀲𑀸𑀦𑀫𑁆𑀧𑀺 𑀧𑀸𑀲𑀁𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀲𑀢𑁆𑀣𑁂𑀳𑀺 𑀯𑀸’’𑀢𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑁄 𑀕𑀳𑀺𑀢𑁄.

𑀅𑀭𑀡𑀻𑀬𑀢𑁄 𑀅𑀢𑁆𑀣𑁄, 𑀲𑁄 𑀏𑀯 𑀯𑀲𑀢𑀻𑀢𑀺 𑀯𑀲𑁄𑀢𑀺 𑀅𑀢𑁆𑀣𑀯𑀲𑁄, 𑀢𑀲𑁆𑀲 𑀢𑀲𑁆𑀲 𑀧𑀬𑁄𑀕𑀲𑁆𑀲 𑀆𑀦𑀺𑀲𑀁𑀲𑀪𑀽𑀢𑀁 𑀨𑀮𑀦𑁆𑀢𑀺 𑀆𑀳 ‘‘𑀅𑀢𑁆𑀣𑀯𑀲𑀦𑁆𑀢𑀺 𑀅𑀢𑁆𑀣𑀸𑀦𑀺𑀲𑀁𑀲’’𑀦𑁆𑀢𑀺. 𑀅𑀢𑁆𑀣𑁄 𑀯𑀸 𑀯𑀼𑀢𑁆𑀢𑀮𑀓𑁆𑀔𑀡𑁄 𑀯𑀲𑁄 𑀏𑀢𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑁄, 𑀓𑀸𑀭𑀡𑀁. 𑀦𑀸𑀕𑀯𑀦𑀯𑀸𑀲𑀺𑀓𑁄𑀢𑀺 𑀳𑀢𑁆𑀣𑀺𑀦𑀸𑀕𑀸𑀦𑀁 𑀯𑀺𑀘𑀭𑀡𑀯𑀦𑁂 𑀢𑁂𑀲𑀁 𑀕𑀳𑀡𑀢𑁆𑀣𑀁 𑀯𑀲𑀦𑀓𑁄. 𑀅𑀦𑀼𑀕𑁆𑀕𑀳𑀺𑀢𑀲𑀺𑀧𑁆𑀧𑁄𑀢𑀺 𑀅𑀲𑀺𑀓𑁆𑀔𑀺𑀢𑀳𑀢𑁆𑀣𑀺𑀲𑀺𑀧𑁆𑀧𑁄 𑀆𑀬𑀢𑀯𑀺𑀢𑁆𑀣𑀢𑀲𑁆𑀲 𑀧𑀤𑀫𑀢𑁆𑀢𑀲𑁆𑀲 𑀤𑀲𑁆𑀲𑀦𑁂𑀦 ‘‘𑀫𑀳𑀸 𑀯𑀢, 𑀪𑁄 𑀦𑀸𑀕𑁄’’𑀢𑀺 𑀦𑀺𑀝𑁆𑀞𑀸𑀕𑀫𑀦𑀢𑁄. 𑀧𑀭𑀢𑁄 𑀧𑀦 𑀪𑀕𑀯𑀢𑀸 𑀯𑀼𑀢𑁆𑀢𑀝𑁆𑀞𑀸𑀦𑁂. 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀧𑀼𑀭𑀺𑀲𑁄 𑀦𑀸𑀕𑀯𑀦𑀺𑀓𑁄𑀢𑀺 𑀆𑀕𑀢𑁄 𑀆𑀬𑀢𑀯𑀺𑀢𑁆𑀣𑀢𑀲𑁆𑀲 𑀧𑀤𑀲𑁆𑀲 𑀉𑀘𑁆𑀘𑀲𑁆𑀲 𑀘 𑀦𑀺𑀲𑁂𑀯𑀺𑀢𑀲𑁆𑀲 𑀩𑁆𑀬𑀪𑀺𑀘𑀸𑀭𑀪𑀸𑀯𑀁 𑀜𑀢𑁆𑀯𑀸 𑀢𑀢𑁆𑀢𑀓𑁂𑀦 𑀦𑀺𑀝𑁆𑀞𑀁 𑀅𑀕𑀦𑁆𑀢𑁆𑀯𑀸 𑀫𑀳𑀸𑀳𑀢𑁆𑀣𑀺𑀁 𑀤𑀺𑀲𑁆𑀯𑀸𑀯 𑀦𑀺𑀝𑁆𑀞𑀸𑀕𑀫𑀦𑀢𑁄. 𑀜𑀸𑀡𑀁 𑀧𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀜𑀸𑀡𑀧𑀤𑀸𑀦𑀺, 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀤𑀻𑀦𑀁 𑀥𑀫𑁆𑀫𑀯𑀺𑀦𑀬𑁂 𑀯𑀺𑀦𑀻𑀢𑀢𑁆𑀢𑀸 𑀯𑀺𑀦𑀬𑁂𑀳𑀺 𑀅𑀥𑀺𑀕𑀢𑀚𑁆𑀛𑀸𑀦𑀸𑀤𑀻𑀦𑀺. 𑀢𑀸𑀦𑀺 𑀳𑀺 𑀢𑀣𑀸𑀕𑀢𑀕𑀦𑁆𑀥𑀳𑀢𑁆𑀣𑀺𑀦𑁄 𑀤𑁂𑀲𑀦𑀸𑀜𑀸𑀡𑁂𑀦 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀸𑀦𑀺. 𑀘𑀢𑁆𑀢𑀸𑀭𑀻𑀢𑀺 𑀧𑀦 𑀯𑀺𑀦𑁂𑀬𑁆𑀬𑀸𑀦𑀁 𑀇𑀥 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀦𑀁𑀬𑁂𑀯 𑀕𑀳𑀺𑀢𑀢𑁆𑀢𑀸.

𑁨𑁮𑁯. 𑀧𑀼𑀕𑁆𑀕𑀮𑁂𑀲𑀼 𑀧𑀜𑁆𑀜𑀸𑀬 𑀘 𑀦𑀺𑀧𑀼𑀡𑀢𑀸 𑀧𑀡𑁆𑀟𑀺𑀢𑀲𑀫𑀜𑁆𑀜𑀸 𑀦𑀺𑀧𑀼𑀡𑀢𑁆𑀣𑀲𑁆𑀲 𑀤𑀲𑁆𑀲𑀦𑀲𑀫𑀢𑁆𑀣𑀢𑀸𑀯𑀲𑁂𑀦𑁂𑀯𑀸𑀢𑀺 𑀆𑀳 ‘‘𑀲𑀼𑀔𑀼𑀫𑀅𑀢𑁆𑀣𑀦𑁆𑀢𑀭𑀧𑀝𑀺𑀯𑀺𑀚𑁆𑀛𑀦𑀲𑀫𑀢𑁆𑀣𑁂’’𑀢𑀺. 𑀓𑀢-𑀲𑀤𑁆𑀤𑁄 𑀇𑀥 𑀦𑀺𑀧𑁆𑀨𑀦𑁆𑀦𑀧𑀭𑀺𑀬𑀸𑀬𑁄. 𑀧𑀭𑁂 𑀧𑀯𑀤𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀧𑀭𑀧𑁆𑀧𑀯𑀸𑀤𑁄, 𑀧𑀭𑀲𑀫𑀬𑁄. 𑀧𑀭𑁂𑀳𑀺 𑀧𑀯𑀤𑀦𑀁 𑀧𑀭𑀧𑁆𑀧𑀯𑀸𑀤𑁄, 𑀯𑀺𑀕𑁆𑀕𑀸𑀳𑀺𑀓𑀓𑀣𑀸𑀬 𑀧𑀭𑀯𑀸𑀤𑀫𑀤𑁆𑀤𑀦𑀁. 𑀢𑀤𑀼𑀪𑀬𑀫𑁆𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀢𑀧𑀭𑀧𑁆𑀧𑀯𑀸𑀤𑁂 𑀘𑁂𑀯 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀓𑀢𑀯𑀸𑀤𑀧𑀭𑀺𑀘𑀬𑁂 𑀘𑀸’’𑀢𑀺, 𑀧𑀭𑀲𑀫𑀬𑁂𑀲𑀼 𑀧𑀭𑀯𑀸𑀤𑀫𑀤𑁆𑀤𑀦𑁂𑀲𑀼 𑀘 𑀦𑀺𑀧𑁆𑀨𑀦𑁆𑀦𑁂𑀢𑀺 𑀅𑀢𑁆𑀣𑁄. 𑀯𑀸𑀮𑀯𑁂𑀥𑀺𑀭𑀽𑀧𑁂𑀢𑀺 𑀯𑀸𑀮𑀯𑁂𑀥𑀺𑀧𑀢𑀺𑀭𑀽𑀧𑁂. 𑀢𑁂𑀦𑀸𑀳 ‘‘𑀯𑀸𑀮𑀯𑁂𑀥𑀺𑀥𑀦𑀼𑀕𑁆𑀕𑀳𑀲𑀤𑀺𑀲𑁂’’𑀢𑀺. 𑀯𑀸𑀮𑀦𑁆𑀢𑀺 𑀅𑀦𑁂𑀓𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀅𑀁𑀲𑀼𑀲𑀗𑁆𑀔𑀸𑀢𑀁 𑀯𑀸𑀮𑀁. 𑀪𑀺𑀦𑁆𑀤𑀦𑁆𑀢𑀸 𑀯𑀺𑀬𑀸𑀢𑀺 𑀖𑀝𑀸𑀤𑀺𑀁 𑀲𑀯𑀺𑀕𑁆𑀕𑀳𑀁 𑀫𑀼𑀕𑁆𑀕𑀭𑀸𑀤𑀺𑀦𑀸 𑀪𑀺𑀦𑁆𑀤𑀦𑁆𑀢𑀸 𑀯𑀺𑀬, 𑀤𑀺𑀝𑁆𑀞𑀺𑀕𑀢𑀸𑀦𑀺 𑀏𑀓𑀁𑀲𑀢𑁄 𑀪𑀺𑀦𑁆𑀤𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀢𑁆𑀣𑀁 𑀕𑀼𑀬𑁆𑀳𑀁 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀲𑀗𑁆𑀔𑀢𑀁 𑀧𑀤𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀧𑀤𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀤𑁄𑀲𑁄. 𑀧𑀼𑀘𑁆𑀙𑀻𑀬𑀢𑀻𑀢𑀺 𑀧𑀜𑁆𑀳𑁄, 𑀅𑀢𑁆𑀣𑁄. 𑀧𑀼𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀧𑀜𑁆𑀳𑁄, 𑀲𑀤𑁆𑀤𑁄. 𑀢𑀤𑀼𑀪𑀬𑀁 𑀏𑀓𑀢𑁄 𑀕𑀳𑁂𑀢𑁆𑀯𑀸 𑀆𑀳 ‘‘𑀏𑀯𑀭𑀽𑀧𑁂 𑀧𑀜𑁆𑀳𑁂’’𑀢𑀺𑀆𑀤𑀺. ‘‘𑀏𑀯𑀁 𑀧𑀼𑀘𑁆𑀙𑁂𑀬𑁆𑀬, 𑀏𑀯𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸’’𑀢𑀺 𑀘 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀲𑀺𑀔𑀸𑀯𑀕𑀫𑀦𑀁 𑀤𑀲𑁆𑀲𑁂𑀢𑀺. 𑀲𑁂𑀬𑁆𑀬𑁄𑀢𑀺 𑀉𑀢𑁆𑀢𑀫𑁄, 𑀧𑀭𑀫𑁄 𑀮𑀸𑀪𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀯𑀁 𑀅𑀢𑁆𑀢𑀦𑁄 𑀯𑀸𑀤𑀯𑀺𑀥𑀫𑀦𑀪𑀬𑁂𑀦𑀧𑀺 𑀧𑀭𑁂 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀦 𑀯𑀺𑀲𑀳𑀦𑁆𑀢𑀻𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀯𑀸𑀤𑀯𑀺𑀥𑀫𑀦𑁂𑀦 𑀯𑀺𑀦𑀸𑀧𑀺 𑀦 𑀯𑀺𑀲𑀳𑀦𑁆𑀢𑀺 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺 𑀧𑀭𑁂 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀫𑁆𑀧𑀺 𑀯𑀺𑀲𑁆𑀲𑀢𑁆𑀣𑀁 𑀦𑀺𑀬𑁆𑀬𑀸𑀤𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺 𑀑𑀥𑀺𑀲𑀓𑀫𑁂𑀢𑁆𑀢𑀸𑀨𑀭𑀡𑀲𑀤𑀺𑀲𑀢𑁆𑀢𑀸 𑀢𑀲𑁆𑀲 𑀫𑁂𑀢𑁆𑀢𑀸𑀬𑀦𑀲𑁆𑀲. 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸𑀢𑀺 𑀤𑀝𑁆𑀞𑀩𑁆𑀩𑀢𑀸𑀬 𑀲𑀫𑁆𑀧𑀦𑁆𑀦𑀸 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀪𑀸𑀯𑀢𑁄, 𑀅𑀢𑀺𑀯𑀺𑀬 𑀤𑀲𑁆𑀲𑀦𑀻𑀬𑀸𑀢𑀺 𑀅𑀢𑁆𑀣𑁄.

𑀲𑀭𑀡𑀕𑀫𑀦𑀯𑀲𑁂𑀦 𑀲𑀸𑀯𑀓𑀸𑀢𑀺 𑀮𑁄𑀓𑀺𑀬𑀲𑀭𑀡𑀕𑀫𑀦𑁂𑀦 𑀲𑀸𑀯𑀓𑀸, 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑁂𑀦 𑀧𑀦 𑀲𑀸𑀯𑀓𑀢𑁆𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺, 𑀢𑀜𑁆𑀘 𑀧𑀩𑁆𑀩𑀚𑀺𑀢𑀯𑀲𑁂𑀦 𑀯𑀼𑀘𑁆𑀘𑀢𑀺, 𑀇𑀥 𑀕𑀳𑀝𑁆𑀞𑀯𑀲𑁂𑀦, 𑀉𑀪𑀬𑀢𑁆𑀣𑀸𑀧𑀺 𑀲𑀭𑀡𑀕𑀫𑀦𑁂𑀦 𑀲𑀸𑀯𑀓𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂 𑀳𑀺 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀓𑀼𑀮𑀧𑀼𑀢𑁆𑀢𑀸, 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸𑀧𑀺 𑀢𑀸𑀤𑀺𑀲𑀸 𑀪𑀯𑀦𑁆𑀢𑀺. 𑀣𑁄𑀓𑁂𑀦𑀸𑀢𑀺 𑀇𑀫𑀺𑀦𑀸 ‘‘𑀫𑀦𑀁 𑀅𑀦𑀲𑁆𑀲𑀸𑀫𑀸’’𑀢𑀺 𑀧𑀤𑀲𑁆𑀲𑀢𑁆𑀣𑀁 𑀯𑀤𑀢𑀺.

𑁨𑁯𑁦. 𑀉𑀤𑀸𑀳𑀭𑀻𑀬𑀢𑀺 𑀉𑀩𑁆𑀩𑁂𑀕𑀧𑀻𑀢𑀺𑀯𑀲𑁂𑀦𑀸𑀢𑀺, 𑀢𑀣𑀸 𑀯𑀸 𑀉𑀤𑀸𑀳𑀭𑀡𑀁 𑀉𑀤𑀸𑀦𑀁. 𑀢𑁂𑀦𑀸𑀳 ‘‘𑀉𑀤𑀸𑀳𑀸𑀭𑀁 𑀉𑀤𑀸𑀳𑀭𑀻’’𑀢𑀺. 𑀅𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀅𑀲𑁆𑀲 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀧𑀼𑀩𑁆𑀩𑀓𑀲𑁆𑀲 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀲𑁆𑀲. 𑀲𑁄𑀢𑀺 𑀳𑀢𑁆𑀣𑀺𑀧𑀤𑁄𑀧𑀫𑁄 𑀳𑀢𑁆𑀣𑀺𑀧𑀤𑁄𑀧𑀫𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑁄 𑀥𑀫𑁆𑀫𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀯𑀼𑀢𑁆𑀢𑀓𑀣𑀸𑀫𑀕𑁆𑀕𑀫𑀢𑁆𑀢𑁂𑀦. 𑀓𑀸𑀫𑀁 𑀢𑁂𑀦 𑀯𑀼𑀢𑁆𑀢𑀓𑀣𑀸𑀫𑀕𑁆𑀕𑁂𑀦𑀧𑀺 𑀳𑀢𑁆𑀣𑀺𑀧𑀤𑁄𑀧𑀫𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑁄 𑀥𑀫𑁆𑀫𑁄 𑀧𑀭𑀺𑀧𑀼𑀡𑁆𑀡𑁄𑀯 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀧𑀯𑁂𑀤𑀺𑀢𑀢𑁆𑀢𑀸, 𑀲𑁄 𑀘 𑀔𑁄 𑀲𑀗𑁆𑀔𑁂𑀧𑀢𑁄, 𑀦 𑀯𑀺𑀢𑁆𑀣𑀸𑀭𑀢𑁄𑀢𑀺 𑀆𑀳 ‘‘𑀦 𑀏𑀢𑁆𑀢𑀸𑀯𑀢𑀸 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀻’’𑀢𑀺. 𑀬𑀤𑀺 𑀬𑀣𑀸 𑀯𑀺𑀢𑁆𑀣𑀸𑀭𑁂𑀦 𑀳𑀢𑁆𑀣𑀺𑀧𑀤𑁄𑀧𑀫𑁄 𑀧𑀭𑀺𑀧𑀽𑀭𑁄 𑀳𑁄𑀢𑀺, 𑀢𑀣𑀸 𑀤𑁂𑀲𑀦𑀸 𑀆𑀭𑀤𑁆𑀥𑀸, 𑀅𑀣 𑀓𑀲𑁆𑀫𑀸 𑀓𑀼𑀲𑀮𑁄𑀢𑀺 𑀦 𑀯𑀼𑀢𑁆𑀢𑁄𑀢𑀺 𑀘𑁄𑀤𑀦𑀸.

𑁨𑁯𑁧. 𑀆𑀬𑀸𑀫𑀢𑁄𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀉𑀩𑁆𑀩𑁂𑀥𑁂𑀦𑀧𑀺 𑀭𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀻𑀘𑀓𑀸𑀬𑀸 𑀳𑀺 𑀢𑀸 𑀳𑁄𑀦𑁆𑀢𑀺. 𑀉𑀘𑁆𑀘𑀸𑀢𑀺 𑀉𑀘𑁆𑀘𑀓𑀸. 𑀦𑀺𑀲𑁂𑀯𑀦𑀁, 𑀦𑀺𑀲𑁂𑀯𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀦𑀺𑀲𑁂𑀯𑀺𑀢𑀁. 𑀦𑀺𑀲𑁂𑀯𑀦𑀜𑁆𑀘𑁂𑀢𑁆𑀣 𑀓𑀡𑁆𑀟𑀼𑀬𑀺𑀢𑀯𑀺𑀦𑁄𑀤𑀦𑀢𑁆𑀣𑀁 𑀖𑀁𑀲𑀦𑀁. 𑀢𑁂𑀦𑀸𑀳 ‘‘𑀔𑀦𑁆𑀥𑀧𑁆𑀧𑀤𑁂𑀲𑁂 𑀖𑀁𑀲𑀺𑀢𑀝𑁆𑀞𑀸𑀦’’𑀦𑁆𑀢𑀺. 𑀉𑀘𑁆𑀘𑀸𑀢𑀺 𑀅𑀦𑀻𑀘𑀸, 𑀉𑀩𑁆𑀩𑁂𑀥𑀯𑀦𑁆𑀢𑀺𑀬𑁄𑀢𑀺 𑀅𑀢𑁆𑀣𑁄. 𑀓𑀸𑀴𑀸𑀭𑀺𑀓𑀸𑀢𑀺 𑀯𑀺𑀭𑀴𑀤𑀦𑁆𑀢𑀸, 𑀯𑀺𑀲𑀗𑁆𑀕𑀢𑀤𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀤𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺. 𑀓𑀴𑀸𑀭𑀢𑀸𑀬𑀸𑀢𑀺 𑀯𑀺𑀭𑀴𑀢𑀸𑀬. 𑀆𑀭𑀜𑁆𑀚𑀺𑀢𑀸𑀦𑀻𑀢𑀺 𑀭𑀜𑁆𑀚𑀺𑀢𑀸𑀦𑀺, 𑀯𑀺𑀮𑀺𑀔𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀓𑀡𑁂𑀭𑀼𑀢𑀸𑀬𑀸𑀢𑀺 𑀓𑀼𑀝𑀼𑀫𑀮𑀲𑀡𑁆𑀞𑀸𑀦𑀢𑀸𑀬. 𑀅𑀬𑀁 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀲𑀁𑀲𑀬𑀺𑀢𑀦𑀺𑀘𑁆𑀙𑀬𑀢𑁆𑀣𑁄 𑀬𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀅𑀬𑀁 𑀯𑀸 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀩𑁆𑀩𑀩𑀸𑀮𑁄 𑀲𑀩𑁆𑀩𑀫𑀽𑀴𑁆𑀳𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁮𑁧).

𑀦𑀸𑀕𑀯𑀦𑀁 𑀯𑀺𑀬𑀸𑀢𑀺 𑀫𑀳𑀸𑀳𑀢𑁆𑀣𑀺𑀦𑁄 𑀯𑀸𑀫𑀦𑀺𑀓𑀸𑀤𑀻𑀦𑀜𑁆𑀘 𑀧𑀤𑀤𑀲𑁆𑀲𑀦𑀝𑁆𑀞𑀸𑀦𑀪𑀽𑀢𑀁 𑀦𑀸𑀕𑀯𑀦𑀁 𑀯𑀺𑀬. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀻𑀯𑀭𑀡𑀧𑁆𑀧𑀳𑀸𑀦𑀸 𑀥𑀫𑁆𑀫𑀤𑁂𑀲𑀦𑀸 𑀢𑀣𑀸𑀕𑀢𑀲𑁆𑀲 𑀩𑀸𑀳𑀺𑀭𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀦𑀜𑁆𑀘 𑀧𑀤𑀤𑀲𑁆𑀲𑀦𑀪𑀸𑀯𑀢𑁄. 𑀆𑀤𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀘 ‘‘𑀢𑀁 𑀲𑀼𑀡𑀸𑀳𑀻’’𑀢𑀺 𑀧𑀤𑀢𑁄 𑀧𑀝𑁆𑀞𑀸𑀬. 𑀓𑀼𑀲𑀮𑁄 𑀦𑀸𑀕𑀯𑀦𑀺𑀓𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄 𑀧𑀭𑀺𑀬𑁂𑀲𑀦𑀯𑀲𑁂𑀦 𑀧𑀫𑀸𑀡𑀕𑁆𑀕𑀳𑀡𑀢𑁄. 𑀫𑀢𑁆𑀣𑀓𑁂 𑀞𑀢𑁆𑀯𑀸𑀢𑀺 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂 𑀞𑀢𑁆𑀯𑀸. 𑀇𑀫𑀲𑁆𑀫𑀺𑀫𑁆𑀧𑀺 𑀞𑀸𑀦𑁂𑀢𑀺 ‘‘𑀏𑀯𑀫𑁂𑀯 𑀔𑁄 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀦𑀸 𑀉𑀧𑀫𑁂𑀬𑁆𑀬𑀲𑁆𑀲 𑀅𑀢𑁆𑀣𑀲𑁆𑀲 𑀉𑀧𑀜𑁆𑀜𑀸𑀲𑀦𑀝𑁆𑀞𑀸𑀦𑁂𑀧𑀺.

𑀲𑁆𑀯𑀸𑀬𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁯𑁦) 𑀇𑀥-𑀲𑀤𑁆𑀤𑀫𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀦 𑀬𑀣𑀸𑀯𑀺𑀲𑁂𑀲𑀺𑀢𑀩𑁆𑀩𑀁 𑀇𑀥-𑀲𑀤𑁆𑀤𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀢𑁆𑀣𑀘𑀺 𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯𑀸’’𑀢𑀺. 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺 𑀮𑁄𑀓-𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀲𑁂𑀲𑀧𑀤𑀤𑁆𑀯𑀬𑁂 𑀧𑀦 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀫𑀢𑁆𑀢𑁂𑀦 𑀢𑀁 𑀢𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀢𑀸 𑀤𑀝𑁆𑀞𑀩𑁆𑀩𑀸. 𑀑𑀓𑀸𑀲𑀦𑁆𑀢𑀺 𑀓𑀜𑁆𑀘𑀺 𑀧𑀤𑁂𑀲𑀁 𑀇𑀦𑁆𑀤𑀲𑀸𑀮𑀕𑀼𑀳𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯 𑀑𑀓𑀸𑀲𑀸𑀧𑀤𑀺𑀲𑀦𑀲𑁆𑀲𑀧𑀺 𑀅𑀲𑀫𑁆𑀪𑀯𑀢𑁄.

𑀢𑀣𑀸𑀕𑀢-𑀲𑀤𑁆𑀤𑀸𑀤𑀻𑀦𑀁 𑀅𑀢𑁆𑀣𑀯𑀺𑀲𑁂𑀲𑁄 𑀫𑀽𑀮𑀧𑀭𑀺𑀬𑀸𑀬𑀝𑁆𑀞𑀓𑀣𑀸(𑀫. 𑀦𑀺. 𑀅𑀝𑁆𑀞. 𑁧.𑁧𑁨) 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀲𑀼 𑀯𑀼𑀢𑁆𑀢𑁄 𑀏𑀯. 𑀢𑀣𑀸𑀕𑀢𑀲𑁆𑀲 𑀲𑀢𑁆𑀢𑀦𑀺𑀓𑀸𑀬𑀦𑁆𑀢𑁄𑀕𑀥𑀢𑀸𑀬 ‘‘𑀇𑀥 𑀧𑀦 𑀲𑀢𑁆𑀢𑀮𑁄𑀓𑁄 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣𑀸𑀬𑀁 𑀬𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂, 𑀬𑀲𑁆𑀫𑀺𑀜𑁆𑀘 𑀑𑀓𑀸𑀲𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂𑀢𑀺 𑀇𑀫𑀺𑀲𑁆𑀲𑀸 𑀏𑀯 𑀮𑁄𑀓𑀥𑀸𑀢𑀼𑀬𑀸. ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁬𑁧; 𑀫. 𑀦𑀺. 𑁩.𑁧𑁨𑁯; 𑀅. 𑀦𑀺. 𑁧.𑁨𑁭𑁮; 𑀦𑁂𑀢𑁆𑀢𑀺. 𑁫𑁭; 𑀫𑀺. 𑀧. 𑁫.𑁧.𑁧) 𑀏𑀢𑁆𑀣 𑀚𑀸𑀢𑀺𑀔𑁂𑀢𑁆𑀢𑀪𑀽𑀢𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺 𑀯𑀼𑀢𑁆𑀢𑀸. 𑀇𑀥 𑀧𑀦 𑀇𑀫𑀁𑀬𑁂𑀯 𑀮𑁄𑀓𑀥𑀸𑀢𑀼𑀁 𑀲𑀦𑁆𑀥𑀸𑀬 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂’’𑀢𑀺 𑀯𑀼𑀢𑁆𑀢𑀁. 𑀢𑀺𑀲𑁆𑀲𑁄 𑀳𑀺 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀯𑀺𑀲𑀬𑀔𑁂𑀢𑁆𑀢𑀁 𑀆𑀡𑀸𑀔𑁂𑀢𑁆𑀢𑀁 𑀚𑀸𑀢𑀺𑀔𑁂𑀢𑁆𑀢𑀦𑁆𑀢𑀺 𑀢𑀺𑀯𑀺𑀥𑁂 𑀔𑁂𑀢𑁆𑀢𑁂 𑀞𑀧𑁂𑀢𑁆𑀯𑀸 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀺. 𑀓𑀣𑀁? ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺 (𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧; 𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫; 𑀫𑀺. 𑀧. 𑁪.𑁫.𑁧𑁧), 𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀫. 𑀦𑀺. 𑁧.𑁨𑁮𑁫; 𑁨.𑁩𑁪𑁧; 𑀓𑀣𑀸. 𑁪𑁦𑁫; 𑀫𑀳𑀸𑀯. 𑁧𑁧) 𑀏𑀯𑀫𑀸𑀤𑀻𑀦𑀺 𑀇𑀫𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀞𑀢𑁆𑀯𑀸 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 𑁋 ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀅𑀢𑁆𑀣𑁂𑀢𑀭𑀳𑀺 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀪𑀕𑀯𑀢𑀸 𑀲𑀫𑀲𑀫𑁄 𑀲𑀫𑁆𑀩𑁄𑀥𑀺𑀬𑀦𑁆𑀢𑀺 𑀏𑀯𑀁 𑀧𑀼𑀝𑁆𑀞𑀸𑀳𑀁, 𑀪𑀦𑁆𑀢𑁂, 𑀦𑁄𑀢𑀺 𑀯𑀤𑁂𑀬𑁆𑀬’’𑀦𑁆𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀇𑀫𑀁 𑀲𑀼𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀇𑀫𑀁 𑀮𑁄𑀓𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀦𑀼𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺.

𑀲𑀼𑀚𑀸𑀢𑀸𑀬𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼 𑀧𑀞𑀫𑁄 𑀯𑀺𑀓𑀧𑁆𑀧𑁄 𑀩𑀼𑀤𑁆𑀥𑀪𑀸𑀯𑀸𑀬 𑀆𑀲𑀦𑁆𑀦𑀢𑀭𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀆𑀲𑀦𑁆𑀦𑀢𑀭𑀸𑀬 𑀳𑀺 𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑁄 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀘𑁆𑀘𑀢𑀺 𑀉𑀧𑁆𑀧𑀸𑀤𑀲𑁆𑀲 𑀏𑀓𑀦𑁆𑀢𑀺𑀓𑀢𑁆𑀢𑀸, 𑀧𑀕𑁂𑀯 𑀧𑀝𑀺𑀧𑀢𑁆𑀢𑀺𑀬𑀸 𑀫𑀢𑁆𑀣𑀓𑁂 𑀞𑀺𑀢𑁄. 𑀤𑀼𑀢𑀺𑀬𑁄 𑀩𑀼𑀤𑁆𑀥𑀪𑀸𑀯𑀸𑀯𑀳𑀧𑀩𑁆𑀩𑀚𑁆𑀚𑀢𑁄 𑀧𑀝𑁆𑀞𑀸𑀬 𑀆𑀲𑀦𑁆𑀦𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦, 𑀢𑀢𑀺𑀬𑁄 𑀩𑀼𑀤𑁆𑀥𑀓𑀭𑀥𑀫𑁆𑀫𑀧𑀸𑀭𑀺𑀧𑀽𑀭𑀺𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀪𑀸𑀯𑀸𑀬 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦. 𑀦 𑀳𑀺 𑀫𑀳𑀸𑀲𑀢𑁆𑀢𑀸𑀦𑀁 𑀢𑀼𑀲𑀺𑀢𑀪𑀯𑀽𑀧𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁 𑀦𑀸𑀫 𑀅𑀢𑁆𑀣𑀺. 𑀘𑀢𑀼𑀢𑁆𑀣𑁄 𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀫𑀸𑀭𑀫𑁆𑀪𑀢𑁄 𑀧𑀝𑁆𑀞𑀸𑀬. 𑀩𑁄𑀥𑀺𑀬𑀸 𑀦𑀺𑀬𑀢𑀪𑀸𑀯𑀸𑀧𑀢𑁆𑀢𑀺𑀢𑁄 𑀧𑀪𑀼𑀢𑀺 𑀳𑀺 𑀯𑀺𑀜𑁆𑀜𑀽𑀳𑀺 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸 𑀉𑀧𑁆𑀧𑀸𑀤𑀲𑁆𑀲 𑀏𑀓𑀦𑁆𑀢𑀺𑀓𑀢𑁆𑀢𑀸, 𑀬𑀣𑀸 𑀧𑀦 ‘‘𑀢𑀺𑀝𑁆𑀞𑀦𑁆𑀢𑀺 𑀧𑀩𑁆𑀩𑀢𑀸, 𑀲𑀦𑁆𑀤𑀦𑁆𑀢𑀺 𑀦𑀤𑀺𑀬𑁄’’𑀢𑀺 𑀢𑀺𑀝𑁆𑀞𑀦𑀲𑀦𑁆𑀤𑀦𑀓𑀺𑀭𑀺𑀬𑀸𑀦𑀁 𑀅𑀯𑀺𑀘𑁆𑀙𑁂𑀤𑀫𑀼𑀧𑀸𑀤𑀸𑀬 𑀯𑀢𑁆𑀢𑀫𑀸𑀦𑀧𑀬𑁄𑀕𑁄, 𑀏𑀯𑀁 𑀉𑀧𑁆𑀧𑀸𑀤𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑀓𑀺𑀭𑀺𑀬𑀸𑀬 𑀅𑀯𑀺𑀘𑁆𑀙𑁂𑀤𑀫𑀼𑀧𑀸𑀤𑀸𑀬 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼 ‘‘𑀉𑀧𑁆𑀧𑀚𑁆𑀚𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀧𑀞𑀫𑀁 𑀉𑀧𑁆𑀧𑀦𑁆𑀦𑀪𑀸𑀯𑀦𑁆𑀢𑀺 𑀲𑀩𑁆𑀩𑁂𑀳𑀺 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑁂𑀳𑀺 𑀯𑀺𑀲𑁂𑀲𑁂𑀳𑀺 𑀧𑀞𑀫𑀁 𑀢𑀣𑀸𑀕𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀺𑀢𑀸𑀯𑀺𑀲𑁂𑀲𑀁.

𑀲𑁄 𑀪𑀕𑀯𑀸𑀢𑀺 (𑀅. 𑀦𑀺. 𑀝𑀻. 𑁨.𑁩.𑁬𑁪) 𑀬𑁄 ‘‘𑀢𑀣𑀸𑀕𑀢𑁄 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑀺𑀢𑀕𑀼𑀡𑁄, 𑀲𑁄 𑀪𑀕𑀯𑀸. 𑀇𑀫𑀁 𑀮𑁄𑀓𑀦𑁆𑀢𑀺 𑀦𑀬𑀺𑀤𑀁 𑀫𑀳𑀸𑀚𑀦𑀲𑁆𑀲 𑀲𑀫𑁆𑀫𑀼𑀔𑀸𑀫𑀢𑁆𑀢𑀁 𑀮𑁄𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀦𑀯𑀲𑁂𑀲𑀁 𑀧𑀭𑀺𑀬𑀸𑀤𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀤𑀲𑁆𑀲𑁂𑀢𑀻’’𑀢𑀺. 𑀧𑀚𑀸𑀢𑀢𑁆𑀢𑀸𑀢𑀺 𑀬𑀣𑀸𑀲𑀓𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑀢𑁆𑀢𑀸. 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀇𑀢𑀭𑁂𑀲𑀁 𑀧𑀤𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀲𑀤𑁂𑀯𑀓𑀦𑁆𑀢𑀺 𑀘 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄. 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦. 𑀢𑀢𑁆𑀣 𑀳𑀺 𑀲𑁄 𑀚𑀸𑀢𑁄 𑀢𑀦𑁆𑀦𑀺𑀯𑀸𑀲𑀻 𑀘. 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀢𑁆𑀣𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀅𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀅𑀲𑀫𑀺𑀢𑀸𑀩𑀸𑀳𑀺𑀢𑀧𑀸𑀧𑀸𑀦𑀜𑁆𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀯𑀘𑀦𑁂𑀦 𑀕𑀳𑀺𑀢𑀢𑁆𑀢𑀸. 𑀓𑀸𑀫𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 𑀲𑀢𑁆𑀢𑀯𑀺𑀲𑀬𑁄 𑀮𑁄𑀓-𑀲𑀤𑁆𑀤𑁄𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀼𑀮𑁆𑀬𑀬𑁄𑀕𑀯𑀺𑀲𑀬𑀢𑁆𑀢𑀸 𑀢𑁂𑀲𑀁, ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀧𑀦 𑀅𑀢𑀼𑀮𑁆𑀬𑀬𑁄𑀕𑁂𑀧𑀺 𑀅𑀬𑀁 𑀲𑀫𑀸𑀲𑁄 𑀮𑀩𑁆𑀪𑀢𑀻𑀢𑀺 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀦𑀢𑁄 𑀧𑀚𑀸𑀕𑀳𑀡𑀦𑁆𑀢𑀺 𑀆𑀳 ‘‘𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡’’𑀦𑁆𑀢𑀺.

𑀅𑀭𑀽𑀧𑀺𑀦𑁄 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀸 ‘‘𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸’’𑀢𑀺 𑀇𑀫𑀁 𑀦𑀺𑀩𑁆𑀩𑀘𑀦𑀁 𑀮𑀪𑀦𑁆𑀢𑀻𑀢𑀺 𑀆𑀳 ‘‘𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀅𑀭𑀽𑀧𑀸𑀯𑀘𑀭𑀤𑁂𑀯𑀮𑁄𑀓𑁄 𑀕𑀳𑀺𑀢𑁄’’𑀢𑀺. 𑀢𑁂𑀦𑁂𑀯𑀸𑀳 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢’’𑀦𑁆𑀢𑀺 (𑀅. 𑀦𑀺. 𑁩.𑁧𑁧𑁭). 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁄 𑀕𑀳𑀺𑀢𑁄 𑀢𑀲𑁆𑀲 𑀲𑀯𑀺𑀲𑁂𑀲𑀁 𑀫𑀸𑀭𑀲𑁆𑀲 𑀯𑀲𑁂 𑀯𑀢𑁆𑀢𑀦𑀢𑁄. 𑀭𑀽𑀧𑀻 𑀩𑁆𑀭𑀳𑁆𑀫𑀮𑁄𑀓𑁄 𑀕𑀳𑀺𑀢𑁄 𑀅𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸. 𑀘𑀢𑀼𑀧𑀭𑀺𑀲𑀯𑀲𑁂𑀦𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀘𑀢𑀼𑀧𑀭𑀺𑀲𑀯𑀲𑁂𑀦. 𑀇𑀢𑀭𑀸 𑀧𑀦 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀫𑀸𑀭𑀓𑀸𑀤𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀏𑀯𑀸𑀢𑀺. 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀦𑀸𑀕𑀕𑀭𑀼𑀴𑀸𑀤𑀺𑀪𑁂𑀤𑁄.

𑀏𑀢𑁆𑀢𑀸𑀯𑀢𑀸 𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀅𑀪𑀸𑀕𑀲𑁄𑀯 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀉𑀓𑁆𑀓𑀁𑀲𑀕𑀪𑀺𑀯𑀺𑀚𑀸𑀦𑀦𑁂𑀦. 𑀧𑀜𑁆𑀘𑀲𑀼 𑀳𑀺 𑀕𑀢𑀻𑀲𑀼 𑀤𑁂𑀯𑀮𑁄𑀓𑁄𑀯 𑀲𑁂𑀝𑁆𑀞𑁄. 𑀢𑀢𑁆𑀣𑀸𑀧𑀺 𑀅𑀭𑀽𑀧𑀺𑀦𑁄 ‘‘𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀓𑀺𑀮𑁂𑀲𑀤𑀼𑀓𑁆𑀔𑀢𑀸𑀬, 𑀲𑀦𑁆𑀢𑀧𑀡𑀻𑀢𑀆𑀦𑁂𑀜𑁆𑀚𑀯𑀺𑀳𑀸𑀭𑀲𑀫𑀗𑁆𑀕𑀺𑀢𑀸𑀬, 𑀅𑀢𑀺𑀯𑀺𑀬 𑀤𑀻𑀖𑀸𑀬𑀼𑀓𑀢𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀳𑀺 𑀯𑀺𑀲𑁂𑀲𑁂𑀳𑀺 𑀅𑀢𑀺𑀯𑀺𑀬 𑀇𑀢𑀭𑁂𑀳𑀺 𑀉𑀓𑁆𑀓𑀝𑁆𑀞𑀸. 𑀩𑁆𑀭𑀳𑁆𑀫𑀸 𑀫𑀳𑀸𑀦𑀼𑀪𑀸𑀯𑁄𑀢𑀺𑀆𑀤𑀺𑀁 𑀤𑀲𑀲𑀳𑀲𑁆𑀲𑀺𑀬𑀁 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀯𑀲𑁂𑀦 𑀯𑀤𑀢𑀺. ‘‘𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀲𑁂𑀝𑁆𑀞𑀁 𑀦𑀯𑀮𑁄𑀓𑀼𑀢𑁆𑀢𑀭𑀁. 𑀪𑀸𑀯𑀸𑀦𑀼𑀓𑁆𑀓𑀫𑁄 𑀪𑀸𑀯𑀯𑀲𑁂𑀦 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀦𑀼𑀓𑁆𑀓𑀫𑁄. 𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀲𑀳𑀺𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀧𑀓𑀸𑀭𑁂𑀳𑀺. 𑀢𑀻𑀲𑀼 𑀧𑀤𑁂𑀲𑀽𑀢𑀺 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀻𑀲𑀼 𑀢𑀻𑀲𑀼 𑀧𑀤𑁂𑀲𑀼. 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀲𑀤𑁂𑀯𑀓𑀢𑁆𑀢𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦. 𑀢𑁂𑀥𑀸𑀢𑀼𑀓𑀫𑁂𑀯 𑀧𑀭𑀺𑀬𑀸𑀤𑀺𑀦𑁆𑀦𑀦𑁆𑀢𑀺 𑀧𑁄𑀭𑀸𑀡𑀸 𑀧𑀦𑀸𑀳𑀽𑀢𑀺 𑀬𑁄𑀚𑀦𑀸.

𑀅𑀪𑀺𑀜𑁆𑀜𑀸𑀢𑀺 𑀬-𑀓𑀸𑀭𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄, 𑀅𑀪𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀪𑀺𑀜𑁆𑀜𑀸𑀬, 𑀅𑀥𑀺𑀓𑁂𑀦 𑀜𑀸𑀡𑁂𑀦 𑀜𑀢𑁆𑀯𑀸’’𑀢𑀺. 𑀅𑀦𑀼𑀫𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀦𑀼𑀫𑀸𑀦𑀉𑀧𑀫𑀸𑀦𑀅𑀢𑁆𑀣𑀸𑀧𑀢𑁆𑀢𑀺𑀆𑀤𑀺𑀧𑀝𑀺𑀓𑁆𑀔𑁂𑀧𑁄 𑀏𑀓𑀧𑁆𑀧𑀫𑀸𑀡𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀸𑀘𑀸𑀭𑀢𑀸𑀬 𑀳𑀺 𑀲𑀩𑁆𑀩𑀧𑀘𑁆𑀘𑀓𑁆𑀔𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄. 𑀅𑀦𑀼𑀢𑁆𑀢𑀭𑀁 𑀯𑀺𑀯𑁂𑀓𑀲𑀼𑀔𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁. 𑀢𑁂𑀦 𑀯𑀻𑀢𑀺𑀫𑀺𑀲𑁆𑀲𑀸𑀧𑀺 𑀓𑀤𑀸𑀘𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀻𑀢𑀺 𑀆𑀳 ‘‘𑀳𑀺𑀢𑁆𑀯𑀸𑀧𑀻’’𑀢𑀺. 𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀬𑀲𑁆𑀫𑀺𑀁 𑀔𑀡𑁂 𑀧𑀭𑀺𑀲𑀸 𑀲𑀸𑀥𑀼𑀓𑀸𑀭𑀁 𑀯𑀸 𑀤𑁂𑀢𑀺, 𑀬𑀣𑀸𑀲𑀼𑀢𑀁 𑀯𑀸 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀁 𑀔𑀡𑀁 𑀧𑀼𑀩𑁆𑀩𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀬𑀣𑀸𑀧𑀭𑀺𑀘𑁆𑀙𑁂𑀤𑀜𑁆𑀘 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀤𑁂𑀲𑀓𑀸𑀬𑀢𑁆𑀢𑁂𑀦 𑀆𑀡𑀸𑀤𑀺𑀯𑀺𑀥𑀺𑀦𑀸 𑀅𑀢𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸𑀢𑀺 𑀲𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀤𑁂𑀲𑀦𑀸𑀬 𑀢𑀸𑀯 𑀘𑀢𑀼𑀧𑁆𑀧𑀤𑀺𑀓𑀸𑀬𑀧𑀺 𑀕𑀸𑀣𑀸𑀬𑀸’’𑀢𑀺𑀆𑀤𑀺. 𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀕𑀢𑁂𑀦 𑀬𑀣𑀸𑀧𑀭𑀸𑀥𑀸𑀤𑀺𑀲𑀸𑀲𑀺𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀲𑀸𑀲𑀦𑀁 𑀢𑀤𑀗𑁆𑀕𑀯𑀺𑀦𑀬𑀸𑀤𑀺𑀯𑀲𑁂𑀦 𑀯𑀺𑀦𑀬𑀦𑀁 𑀲𑀸𑀲𑀦𑀦𑁆𑀢𑀺 𑀢𑀁 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸’’𑀢𑀺𑀆𑀤𑀺. 𑀓𑀼𑀲𑀮𑀸𑀦𑀦𑁆𑀢𑀺 𑀫𑀕𑁆𑀕𑀓𑀼𑀲𑀮𑀸𑀦𑀁, 𑀓𑀼𑀲𑀮𑀸𑀦𑀦𑁆𑀢𑀺 𑀯𑀸 𑀅𑀦𑀯𑀚𑁆𑀚𑀸𑀦𑀁. 𑀢𑁂𑀦 𑀨𑀮𑀥𑀫𑁆𑀫𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀆𑀤𑀺𑀪𑀸𑀯𑁄 𑀲𑀻𑀮𑀤𑀺𑀝𑁆𑀞𑀻𑀦𑀁 𑀢𑀫𑁆𑀫𑀽𑀮𑀓𑀢𑁆𑀢𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀓𑀣𑀸𑀯𑀥𑀺𑀲𑀤𑁆𑀤𑀧𑁆𑀧𑀩𑀦𑁆𑀥𑁄 𑀕𑀸𑀣𑀸𑀯𑀲𑁂𑀦 𑀲𑀼𑀢𑁆𑀢𑀯𑀲𑁂𑀦 𑀘 𑀯𑀯𑀢𑁆𑀣𑀺𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄, 𑀬𑁄 𑀇𑀥𑁂𑀯 ‘‘𑀤𑁂𑀲𑀦𑀸’’𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀲 𑀧𑀦 𑀅𑀢𑁆𑀣𑁄 𑀯𑀺𑀲𑁂𑀲𑁂𑀦 𑀲𑀻𑀮𑀸𑀤𑀺 𑀏𑀯𑀸𑀢𑀺 𑀆𑀳 ‘‘𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄…𑀧𑁂… 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀢𑀻’’𑀢𑀺. 𑀢𑀢𑁆𑀣 𑀲𑀻𑀮𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀻𑀮𑀕𑁆𑀕𑀳𑀡𑁂𑀦 𑀲𑀲𑀫𑁆𑀪𑀸𑀭𑀁 𑀲𑀻𑀮𑀁 𑀕𑀳𑀺𑀢𑀁. 𑀢𑀣𑀸 𑀫𑀕𑁆𑀕𑀕𑁆𑀕𑀳𑀡𑁂𑀦 𑀲𑀲𑀫𑁆𑀪𑀸𑀭𑁄 𑀫𑀕𑁆𑀕𑁄𑀢𑀺 𑀢𑀤𑀼𑀪𑀬𑁂𑀦 𑀅𑀦𑀯𑀲𑁂𑀲𑀢𑁄 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀢𑁂𑀦𑀸𑀢𑀺 𑀲𑀻𑀮𑀸𑀤𑀺𑀤𑀲𑁆𑀲𑀦𑁂𑀦. 𑀅𑀢𑁆𑀣𑀯𑀲𑁂𑀦 𑀳𑀺 𑀇𑀥 𑀤𑁂𑀲𑀦𑀸𑀬 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀣𑀺𑀓𑀲𑀡𑁆𑀞𑀺𑀢𑀻𑀢𑀺 𑀓𑀣𑀺𑀓𑀲𑁆𑀲 𑀲𑀡𑁆𑀞𑀸𑀦𑀁 𑀓𑀣𑀦𑀯𑀲𑁂𑀦 𑀲𑀫𑀯𑀝𑁆𑀞𑀸𑀦𑀁.

𑀦 𑀲𑁄 𑀲𑀸𑀢𑁆𑀣𑀁 𑀤𑁂𑀲𑁂𑀢𑀺 𑀦𑀺𑀬𑁆𑀬𑀸𑀦𑀢𑁆𑀣𑀯𑀺𑀭𑀳𑀢𑁄 𑀢𑀲𑁆𑀲𑀸 𑀤𑁂𑀲𑀦𑀸𑀬. 𑀏𑀓𑀩𑁆𑀬𑀜𑁆𑀚𑀦𑀸𑀤𑀺𑀬𑀼𑀢𑁆𑀢𑀸 𑀯𑀸𑀢𑀺 𑀲𑀺𑀣𑀺𑀮𑀸𑀤𑀺𑀪𑁂𑀤𑁂𑀲𑀼 𑀩𑁆𑀬𑀜𑁆𑀚𑀦𑁂𑀲𑀼 𑀏𑀓𑀧𑁆𑀧𑀓𑀸𑀭𑁂𑀦𑁂𑀯, 𑀤𑁆𑀯𑀺𑀧𑁆𑀧𑀓𑀸𑀭𑁂𑀦𑁂𑀯 𑀯𑀸 𑀩𑁆𑀬𑀜𑁆𑀚𑀦𑁂𑀦 𑀬𑀼𑀢𑁆𑀢𑀸 𑀯𑀸 𑀤𑀫𑀺𑀴𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀢𑁆𑀣 𑀦𑀺𑀭𑁄𑀝𑁆𑀞𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀢𑀸𑀬 𑀲𑀩𑁆𑀩𑀦𑀺𑀭𑁄𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀓𑀺𑀭𑀸𑀢𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀢𑁆𑀣𑁂𑀯 𑀯𑀺𑀲𑁆𑀲𑀚𑁆𑀚𑀦𑀻𑀬𑀬𑀼𑀢𑁆𑀢𑀢𑀸𑀬 𑀲𑀩𑁆𑀩𑀯𑀺𑀲𑁆𑀲𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀬𑀯𑀦𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀢𑁆𑀣𑁂𑀯 𑀲𑀸𑀦𑀼𑀲𑀸𑀭𑀢𑀸𑀬 𑀲𑀩𑁆𑀩𑀦𑀺𑀕𑁆𑀕𑀳𑀺𑀢𑀩𑁆𑀬𑀜𑁆𑀚𑀦𑀸 𑀯𑀸 𑀧𑀸𑀭𑀲𑀺𑀓𑀸𑀤𑀺𑀫𑀺𑀮𑀓𑁆𑀔𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀸𑀧𑁂𑀲𑀸 𑀏𑀓𑀤𑁂𑀲𑀩𑁆𑀬𑀜𑁆𑀚𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀺𑀬𑀸 𑀅𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀸𑀢𑀺 𑀓𑀢𑁆𑀯𑀸 ‘‘𑀅𑀩𑁆𑀬𑀜𑁆𑀚𑀦𑀸’’𑀢𑀺 𑀯𑀼𑀢𑁆𑀢𑀸. 𑀅𑀫𑀓𑁆𑀔𑁂𑀢𑁆𑀯𑀸𑀢𑀺 𑀅𑀧𑀮𑀺𑀘𑁆𑀙𑁂𑀢𑁆𑀯𑀸 𑀅𑀯𑀺𑀦𑀸𑀲𑁂𑀢𑁆𑀯𑀸, 𑀅𑀳𑀸𑀧𑁂𑀢𑁆𑀯𑀸𑀢𑀺 𑀯𑀸 𑀅𑀢𑁆𑀣𑁄.

𑀪𑀕𑀯𑀸 𑀬𑀫𑀢𑁆𑀣𑀁 𑀜𑀸𑀧𑁂𑀢𑀼𑀁 𑀏𑀓𑀕𑀸𑀣𑀫𑁆𑀧𑀺 𑀏𑀓𑀯𑀸𑀓𑁆𑀬𑀫𑁆𑀧𑀺 𑀤𑁂𑀲𑁂𑀢𑀺, 𑀢𑀫𑀢𑁆𑀣𑀁 𑀢𑀸𑀬 𑀤𑁂𑀲𑀦𑀸𑀬 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀫𑁂𑀯 𑀓𑀢𑁆𑀯𑀸 𑀤𑁂𑀲𑁂𑀢𑀺, 𑀏𑀯𑀁 𑀲𑀩𑁆𑀩𑀢𑁆𑀣𑀸𑀢𑀺 𑀆𑀳 ‘‘𑀏𑀓𑀤𑁂𑀲𑀦𑀸𑀧𑀺 𑀅𑀧𑀭𑀺𑀧𑀼𑀡𑁆𑀡𑀸 𑀦𑀢𑁆𑀣𑀻’’𑀢𑀺. 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁂𑀦𑀸𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀢𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀘 𑀉𑀤𑁆𑀥𑀭𑀡𑀲𑀪𑀸𑀯𑀸𑀯𑀝𑁆𑀞𑀺𑀢𑁂𑀦 𑀘𑀺𑀢𑁆𑀢𑁂𑀦. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀺𑀓𑁆𑀔𑀸𑀢𑁆𑀢𑀬𑀲𑀗𑁆𑀕𑀳𑀁 𑀲𑀓𑀮𑀁 𑀲𑀸𑀲𑀦𑀁 𑀇𑀥 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺 𑀲𑀩𑁆𑀩𑀧𑀤𑀸𑀦𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺…𑀧𑁂… 𑀧𑀓𑀸𑀲𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀆𑀳.

𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀫𑀸𑀦𑀲𑁆𑀲𑁂𑀯 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀲𑀫𑁆𑀪𑀯𑀢𑀺, 𑀦 𑀫𑀸𑀦 𑀚𑀸𑀢𑀺𑀓𑀲𑁆𑀲𑀸𑀢𑀺 𑀆𑀳 ‘‘𑀦𑀺𑀳𑀢𑀫𑀸𑀦𑀢𑁆𑀢𑀸’’𑀢𑀺. 𑀉𑀲𑁆𑀲𑀦𑁆𑀦𑀢𑁆𑀢𑀸𑀢𑀺 𑀩𑀳𑀼𑀮𑀪𑀸𑀯𑀢𑁄. 𑀪𑁄𑀕𑀸𑀭𑁄𑀕𑁆𑀬𑀸𑀤𑀺𑀯𑀢𑁆𑀣𑀼𑀓𑀸 𑀫𑀤𑀸 𑀲𑀼𑀧𑁆𑀧𑀳𑁂𑀬𑁆𑀬𑀸 𑀳𑁄𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑀯𑀝𑁆𑀞𑀸𑀦𑀢𑁄’ 𑀦 𑀢𑀣𑀸 𑀓𑀼𑀮𑀯𑀺𑀚𑁆𑀚𑀸𑀫𑀤𑀸𑀢𑀺 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀓𑀼𑀮𑀻𑀦𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀚𑀸𑀢𑀺𑀯𑀺𑀚𑁆𑀚𑀸 𑀦𑀺𑀲𑁆𑀲𑀸𑀬 𑀫𑀸𑀦𑀚𑀧𑁆𑀧𑀦𑀁 𑀤𑀼𑀧𑁆𑀧𑀚𑀳𑀦𑁆𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑁂𑀦 𑀳𑀺…𑀧𑁂… 𑀫𑀸𑀦𑀁 𑀓𑀭𑁄𑀦𑁆𑀢𑀻’’𑀢𑀺. 𑀯𑀺𑀚𑀸𑀢𑀺𑀢𑀸𑀬𑀸𑀢𑀺 𑀦𑀺𑀳𑀻𑀦𑀚𑀸𑀢𑀺𑀢𑀸𑀬. 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀼𑀯𑀺𑀲𑀼𑀤𑁆𑀥𑀺𑀁 𑀓𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀻𑀮𑀯𑀲𑁂𑀦 𑀳𑀺 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀢𑀺. 𑀧𑀢𑀺𑀝𑁆𑀞𑀸𑀢𑀼𑀦𑁆𑀢𑀺 𑀯𑀸 𑀲𑀘𑁆𑀘𑀧𑀝𑀺𑀯𑁂𑀥𑁂𑀦 𑀮𑁄𑀓𑀼𑀢𑁆𑀢𑀭𑀸𑀬 𑀧𑀢𑀺𑀝𑁆𑀞𑀸𑀬 𑀧𑀢𑀺𑀝𑁆𑀞𑀸𑀢𑀼𑀁. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀲𑀼𑀚𑀸𑀢𑀸 𑀏𑀯 𑀳𑁄𑀦𑁆𑀢𑀺, 𑀦 𑀤𑀼𑀚𑁆𑀚𑀸𑀢𑀸.

𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀭𑀸𑀕𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀫𑁂𑀯 𑀧𑀳𑀸𑀦𑀤𑀻𑀧𑀦𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀲𑀩𑁆𑀩𑀲𑁄 𑀯𑀺𑀲𑀼𑀤𑁆𑀥𑀁. 𑀲𑀤𑁆𑀥𑀁 𑀧𑀝𑀺𑀮𑀪𑀢𑀻𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀲𑀤𑁆𑀥𑀸𑀯𑀲𑁂𑀦 𑀲𑀤𑁆𑀤𑀳𑀢𑀺. 𑀯𑀺𑀜𑁆𑀜𑀼𑀚𑀸𑀢𑀺𑀓𑀸𑀦𑀜𑁆𑀳𑀺 𑀥𑀫𑁆𑀫𑀲𑀫𑁆𑀧𑀢𑁆𑀢𑀺𑀕𑀳𑀡𑀧𑀼𑀩𑁆𑀩𑀺𑀓𑀸 𑀲𑀤𑁆𑀥𑀸𑀲𑀺𑀤𑁆𑀥𑀺 𑀥𑀫𑁆𑀫𑀧𑀫𑀸𑀡𑀥𑀫𑁆𑀫𑀧𑁆𑀧𑀲𑀦𑁆𑀦𑀪𑀸𑀯𑀢𑁄. 𑀚𑀸𑀬𑀫𑁆𑀧𑀢𑀺𑀓𑀸 𑀯𑀲𑀦𑁆𑀢𑀻𑀢𑀺 𑀓𑀸𑀫𑀁 ‘‘𑀚𑀸𑀬𑀫𑁆𑀧𑀢𑀺𑀓𑀸’’𑀢𑀺 𑀯𑀼𑀢𑁆𑀢𑁂 𑀖𑀭𑀲𑀸𑀫𑀺𑀓𑀖𑀭𑀲𑀸𑀫𑀺𑀦𑀺𑀯𑀲𑁂𑀦 𑀤𑁆𑀯𑀺𑀦𑁆𑀦𑀁𑀬𑁂𑀯 𑀕𑀳𑀡𑀁 𑀯𑀺𑀜𑁆𑀜𑀸𑀬𑀢𑀺. 𑀬𑀲𑁆𑀲 𑀧𑀦 𑀧𑀼𑀭𑀺𑀲𑀲𑁆𑀲 𑀅𑀦𑁂𑀓𑀸 𑀧𑀚𑀸𑀧𑀢𑀺𑀬𑁄 𑀳𑁄𑀦𑁆𑀢𑀺, 𑀢𑀢𑁆𑀣 𑀓𑀺𑀁 𑀯𑀢𑁆𑀢𑀩𑁆𑀩𑀁? 𑀏𑀓𑀸𑀬𑀧𑀺 𑀢𑀸𑀬 𑀯𑀸𑀲𑁄 𑀲𑀫𑁆𑀩𑀸𑀥𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀤𑁆𑀯𑁂’’𑀢𑀺 𑀯𑀼𑀢𑁆𑀢𑀁. 𑀭𑀸𑀕𑀸𑀤𑀺𑀦𑀸 𑀲𑀓𑀺𑀜𑁆𑀘𑀦𑀝𑁆𑀞𑁂𑀦, 𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀺𑀦𑀸 𑀲𑀧𑀮𑀺𑀩𑁄𑀥𑀝𑁆𑀞𑁂𑀦. 𑀭𑀸𑀕𑀭𑀚𑀸𑀤𑀻𑀦𑀁 𑀆𑀕𑀫𑀦𑀧𑀣𑀢𑀸𑀧𑀺 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑀢𑀸 𑀏𑀯𑀸𑀢𑀺 𑀤𑁆𑀯𑁂𑀧𑀺 𑀯𑀡𑁆𑀡𑀦𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀅𑀮𑀕𑁆𑀕𑀦𑀝𑁆𑀞𑁂𑀦𑀸𑀢𑀺 𑀅𑀲𑀚𑁆𑀚𑀦𑀝𑁆𑀞𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀪𑀸𑀯𑁂𑀦. 𑀏𑀯𑀁 𑀅𑀓𑀼𑀲𑀮𑀓𑀼𑀲𑀮𑀧𑁆𑀧𑀯𑀢𑁆𑀢𑀻𑀦𑀁 𑀞𑀸𑀦𑀪𑀸𑀯𑁂𑀦 𑀖𑀭𑀸𑀯𑀸𑀲𑀧𑀩𑁆𑀩𑀚𑁆𑀚𑀸𑀦𑀁 𑀲𑀫𑁆𑀩𑀸𑀥𑀩𑁆𑀪𑁄𑀓𑀸𑀲𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀅𑀝𑁆𑀞𑀸𑀦𑀞𑀸𑀦𑀪𑀸𑀯𑁂𑀦 𑀢𑁂𑀲𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀗𑁆𑀔𑁂𑀧𑀓𑀣𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀤𑀼𑀤𑁆𑀥𑀸𑀭𑀁 𑀅𑀓𑀢𑁆𑀯𑀸 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀯𑀡𑁆𑀡𑀦𑀸. 𑀏𑀓𑀫𑁆𑀧𑀺 𑀤𑀺𑀯𑀲𑀦𑁆𑀢𑀺 𑀏𑀓𑀤𑀺𑀯𑀲𑀫𑀢𑁆𑀢𑀫𑁆𑀧𑀺. 𑀅𑀔𑀡𑁆𑀟𑀁 𑀓𑀢𑁆𑀯𑀸𑀢𑀺 𑀤𑀼𑀓𑁆𑀓𑀝𑀫𑀢𑁆𑀢𑀲𑁆𑀲𑀧𑀺 𑀅𑀦𑀸𑀧𑀚𑁆𑀚𑀦𑁂𑀦 𑀅𑀔𑀡𑁆𑀟𑀺𑀢𑀁 𑀓𑀢𑁆𑀯𑀸. 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀻𑀦𑀦𑁆𑀢𑀺 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀯𑀲𑁂𑀦 𑀅𑀲𑀁𑀓𑀺𑀮𑀺𑀝𑁆𑀞𑀁 𑀓𑀢𑁆𑀯𑀸. 𑀧𑀭𑀺𑀤𑀳𑀺𑀢𑁆𑀯𑀸𑀢𑀺 𑀦𑀺𑀯𑀸𑀲𑁂𑀢𑁆𑀯𑀸 𑀘𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 𑀘. 𑀅𑀕𑀸𑀭𑀯𑀸𑀲𑁄 𑀅𑀕𑀸𑀭𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀲𑁆𑀲 𑀯𑀟𑁆𑀠𑀺𑀆𑀯𑀳𑀁 𑀅𑀕𑀸𑀭𑀲𑁆𑀲 𑀳𑀺𑀢𑀁. 𑀪𑁄𑀕𑀓𑁆𑀔𑀦𑁆𑀥𑁄𑀢𑀺 𑀪𑁄𑀕𑀭𑀸𑀲𑀺 𑀪𑁄𑀕𑀲𑀫𑀼𑀤𑀸𑀬𑁄. 𑀆𑀩𑀦𑁆𑀥𑀦𑀝𑁆𑀞𑁂𑀦𑀸𑀢𑀺 ‘‘𑀧𑀼𑀢𑁆𑀢𑁄 𑀦𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑁂𑀫𑀯𑀲𑁂𑀦 𑀲𑀧𑀭𑀺𑀘𑁆𑀙𑁂𑀤𑀁 𑀲𑀫𑁆𑀩𑀦𑁆𑀥𑀦𑀝𑁆𑀞𑁂𑀦. ‘‘𑀅𑀫𑁆𑀳𑀸𑀓𑀫𑁂𑀢𑁂’’𑀢𑀺 𑀜𑀸𑀬𑀦𑁆𑀢𑀻𑀢𑀺 𑀜𑀸𑀢𑀻. 𑀧𑀺𑀢𑀸𑀫𑀳𑀧𑀺𑀢𑀼𑀧𑀼𑀢𑁆𑀢𑀸𑀤𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀝𑁆𑀞𑁂𑀦 𑀧𑀭𑀺𑀯𑀝𑁆𑀝𑁄.

𑁨𑁯𑁨. 𑀲𑀸𑀫𑀜𑁆𑀜𑀯𑀸𑀘𑀻𑀧𑀺 𑀲𑀺𑀓𑁆𑀔𑀸-𑀲𑀤𑁆𑀤𑁄 𑀲𑀸𑀚𑀻𑀯-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬 𑀘 𑀯𑀺𑀲𑁂𑀲𑀦𑀺𑀯𑀺𑀝𑁆𑀞𑁄𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀬𑀸 𑀪𑀺𑀓𑁆𑀔𑀽𑀦𑀁 𑀅𑀥𑀺𑀲𑀻𑀮𑀲𑀗𑁆𑀔𑀸𑀢𑀸 𑀲𑀺𑀓𑁆𑀔𑀸’’𑀢𑀺. 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 𑀲𑀺𑀓𑁆𑀔𑀸. 𑀲𑀳 𑀆𑀚𑀻𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀸𑀚𑀻𑀯𑁄. 𑀲𑀺𑀓𑁆𑀔𑀦𑀪𑀸𑀯𑁂𑀦𑀸𑀢𑀺 𑀲𑀺𑀓𑁆𑀔𑀸𑀬 𑀲𑀸𑀚𑀻𑀯𑁂 𑀘 𑀲𑀺𑀓𑁆𑀔𑀦𑀪𑀸𑀯𑁂𑀦. 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄𑀢𑀺 𑀲𑀻𑀮𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀦𑁆𑀢𑁄. 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄𑀢𑀺 𑁋 ‘‘𑀦𑀸𑀫𑀓𑀸𑀬𑁄 𑀧𑀤𑀓𑀸𑀬𑁄 𑀦𑀺𑀭𑀼𑀢𑁆𑀢𑀺𑀓𑀸𑀬𑁄 𑀩𑁆𑀬𑀜𑁆𑀚𑀦𑀓𑀸𑀬𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁩𑁯) 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀪𑀕𑀯𑀢𑁄 𑀯𑀘𑀦𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀫𑁂𑀯 𑀘 𑀤𑁆𑀯𑀬𑀁 ‘‘𑀲𑀺𑀓𑁆𑀔𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀚𑀻𑀯𑀸𑀦𑀢𑀺𑀓𑁆𑀓𑀫𑁄 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀘𑁆𑀘𑀬𑁄. 𑀢𑀢𑁄 𑀳𑀺 𑀬𑀸𑀯 𑀫𑀕𑁆𑀕𑀸 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀻𑀢𑀺.

𑀧𑀚𑀳𑀺𑀢𑁆𑀯𑀸𑀢𑀺 𑀲𑀫𑀸𑀤𑀸𑀦𑀯𑀲𑁂𑀦 𑀧𑀭𑀺𑀘𑁆𑀘𑀚𑀺𑀢𑁆𑀯𑀸. 𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬…𑀧𑁂… 𑀯𑀺𑀭𑀢𑁄𑀯𑀸𑀢𑀺 𑀏𑀢𑁂𑀦 𑀧𑀳𑀸𑀦𑀲𑁆𑀲 𑀯𑀺𑀭𑀢𑀺𑀬𑀸 𑀘 𑀲𑀫𑀸𑀦𑀓𑀸𑀮𑀢𑀁 𑀤𑀲𑁆𑀲𑁂𑀢𑀺. 𑀬𑀤𑀺 𑀏𑀯𑀁 ‘‘𑀧𑀳𑀸𑀬𑀸’’𑀢𑀺 𑀓𑀣𑀁 𑀧𑀼𑀭𑀺𑀫𑀓𑀸𑀮𑀦𑀺𑀤𑁆𑀤𑁂𑀲𑁄𑀢𑀺? 𑀢𑀣𑀸 𑀕𑀳𑁂𑀢𑀩𑁆𑀩𑀢𑀁 𑀉𑀧𑀸𑀤𑀸𑀬. 𑀥𑀫𑁆𑀫𑀸𑀦𑀜𑁆𑀳𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂 𑀅𑀧𑁂𑀓𑁆𑀔𑀺𑀢𑁂 𑀲𑀳𑀚𑀸𑀢𑀸𑀦𑀫𑁆𑀧𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀕𑀳𑀡𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀯𑁂𑀦𑁂𑀯 𑀳𑁄𑀢𑀻𑀢𑀺 𑀕𑀳𑀡𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀧𑀘𑁆𑀘𑀬𑀪𑀽𑀢𑁂𑀲𑀼 𑀳𑀺𑀭𑁄𑀢𑁆𑀢𑀧𑁆𑀧𑀜𑀸𑀡𑀸𑀤𑀻𑀲𑀼 𑀧𑀳𑀸𑀦𑀓𑀺𑀭𑀺𑀬𑀸𑀬 𑀧𑀼𑀭𑀺𑀫𑀓𑀸𑀮𑀯𑁄𑀳𑀸𑀭𑁄, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀲𑀼 𑀘 𑀯𑀺𑀭𑀢𑀻𑀲𑀼 𑀯𑀺𑀭𑀫𑀡𑀓𑀺𑀭𑀺𑀬𑀸𑀬 𑀅𑀧𑀭𑀓𑀸𑀮𑀯𑁄𑀳𑀸𑀭𑁄 𑀘 𑀳𑁄𑀢𑀻𑀢𑀺 ‘‘𑀧𑀳𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀳𑀸𑀬𑀸𑀢𑀺 𑀯𑀸 𑀲𑀫𑀸𑀤𑀸𑀦𑀓𑀸𑀮𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀘𑁆𑀙𑀸 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀲𑀫𑀸𑀬𑁄𑀕𑀯𑀲𑁂𑀦 𑀧𑀝𑀺𑀯𑀺𑀭𑀢𑁄𑀢𑀺. 𑀧𑀳𑀸𑀬𑀸𑀢𑀺 𑀯𑀸 𑁋

‘‘𑀦𑀺𑀳𑀦𑁆𑀢𑁆𑀯𑀸𑀦 𑀢𑀫𑁄𑀔𑀦𑁆𑀥𑀁, 𑀉𑀤𑀺𑀢𑁄𑀬𑀁 𑀤𑀺𑀯𑀸𑀓𑀭𑁄;

𑀯𑀡𑁆𑀡𑀧𑀪𑀸𑀬 𑀪𑀸𑀲𑁂𑀢𑀺, 𑀑𑀪𑀸𑀲𑁂𑀢𑁆𑀯𑀸 𑀲𑀫𑀼𑀕𑁆𑀕𑀢𑁄’’𑀢𑀺 𑀘. (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁫𑁭𑁮) 𑁋

𑀏𑀯𑀫𑀸𑀤𑀻𑀲𑀼 𑀯𑀺𑀬 𑀲𑀫𑀸𑀦𑀓𑀸𑀮𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀧𑀸𑀡𑁄 𑀅𑀢𑀺𑀧𑀸𑀢𑀻𑀬𑀢𑀺 𑀏𑀢𑁂𑀦𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀖𑀸𑀢𑀳𑁂𑀢𑀼𑀪𑀽𑀢𑁄 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀤𑁄𑀲𑀫𑁄𑀳𑀯𑀺𑀳𑀺𑀁 𑀲𑀸𑀤𑀺𑀓𑁄 𑀘𑁂𑀢𑀦𑀸𑀧𑀥𑀸𑀦𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑁄, 𑀢𑀁 𑀲𑀫𑀸𑀤𑀸𑀦𑀯𑀲𑁂𑀦 𑀧𑀳𑀸𑀬. 𑀢𑀢𑁄…𑀧𑁂… 𑀯𑀺𑀭𑀢𑁄𑀯 𑀳𑁄𑀢𑀻𑀢𑀺 𑀅𑀯𑀥𑀸𑀭𑀡𑁂𑀦 𑀢𑀲𑁆𑀲𑀸 𑀯𑀺𑀭𑀢𑀺𑀬𑀸 𑀓𑀸𑀮𑀸𑀤𑀺𑀯𑀲𑁂𑀦 𑀅𑀧𑀭𑀺𑀬𑀦𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀳𑀺 𑀅𑀜𑁆𑀜𑁂 𑀲𑀫𑀸𑀤𑀺𑀦𑁆𑀦𑀯𑀺𑀭𑀢𑀺𑀓𑀸𑀧𑀺 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀢𑀸𑀬 𑀮𑀸𑀪𑀚𑀻𑀯𑀺𑀓𑀸𑀤𑀺𑀳𑁂𑀢𑀼 𑀲𑀫𑀸𑀤𑀸𑀦𑀁 𑀪𑀺𑀦𑁆𑀤𑀦𑁆𑀢𑁂𑀯, 𑀦 𑀏𑀯𑀫𑀬𑀁. 𑀅𑀬𑀁 𑀧𑀦 𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀑𑀭𑀢𑁄 𑀯𑀺𑀭𑀢𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀡𑁆𑀟𑀦𑀁 𑀤𑀡𑁆𑀟𑀦𑀺𑀧𑀸𑀢𑀦𑀁 𑀤𑀡𑁆𑀟𑁄. 𑀫𑀼𑀕𑁆𑀕𑀭𑀸𑀤𑀺𑀧𑀳𑀭𑀡𑀯𑀺𑀲𑁂𑀲𑁄𑀧𑀺 𑀇𑀥 𑀧𑀳𑀭𑀡𑀯𑀺𑀲𑁂𑀲𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀞𑀧𑁂𑀢𑁆𑀯𑀸 𑀤𑀡𑁆𑀟𑀁 𑀲𑀩𑁆𑀩𑀫𑁆𑀧𑀺 𑀅𑀯𑀲𑁂𑀲𑀁 𑀉𑀧𑀓𑀭𑀡’’𑀦𑁆𑀢𑀺. 𑀤𑀡𑁆𑀟𑀦𑀲𑀗𑁆𑀔𑀸𑀢𑀲𑁆𑀲 𑀧𑀭𑀯𑀺𑀳𑁂𑀞𑀦𑀲𑁆𑀲 𑀧𑀭𑀺𑀯𑀚𑁆𑀚𑀺𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀤𑀡𑁆𑀟𑀲𑀢𑁆𑀣𑀸𑀦𑀁 𑀦𑀺𑀓𑁆𑀔𑁂𑀧𑀯𑀘𑀦𑀦𑁆𑀢𑀺 𑀆𑀳 ‘‘𑀧𑀭𑀽𑀧𑀖𑀸𑀢𑀢𑁆𑀣𑀸𑀬𑀸’’𑀢𑀺𑀆𑀤𑀺. 𑀯𑀺𑀳𑀺𑀁𑀲𑀦𑀪𑀸𑀯𑀢𑁄𑀢𑀺 𑀯𑀺𑀩𑀸𑀥𑀦𑀪𑀸𑀯𑀢𑁄. 𑀮𑀚𑁆𑀚𑀻𑀢𑀺 𑀏𑀢𑁆𑀣 𑀯𑀼𑀢𑁆𑀢𑀮𑀚𑁆𑀚𑀸𑀬 𑀑𑀢𑁆𑀢𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀧𑀸𑀧𑀼𑀢𑁆𑀢𑀸𑀲𑀭𑀳𑀺𑀢𑀁, 𑀧𑀸𑀧𑀪𑀬𑀁 𑀯𑀸 𑀅𑀮𑀚𑁆𑀚𑀦𑀁 𑀅𑀢𑁆𑀣𑀺. 𑀬𑀲𑁆𑀲 𑀯𑀸 𑀥𑀫𑁆𑀫𑀕𑀭𑀼𑀢𑀸𑀬 𑀥𑀫𑁆𑀫𑀲𑁆𑀲 𑀘 𑀅𑀢𑁆𑀢𑀸𑀥𑀻𑀦𑀢𑁆𑀢𑀸 𑀅𑀢𑁆𑀢𑀸𑀥𑀺𑀧𑀢𑀺𑀪𑀽𑀢𑀸 𑀮𑀚𑁆𑀚𑀸𑀓𑀺𑀘𑁆𑀘𑀓𑀸𑀭𑀻, 𑀢𑀲𑁆𑀲 𑀮𑁄𑀓𑀸𑀥𑀺𑀧𑀢𑀺𑀪𑀽𑀢𑀁 𑀑𑀢𑁆𑀢𑀧𑁆𑀧𑀁 𑀓𑀺𑀘𑁆𑀘𑀓𑀭𑀦𑁆𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 ‘‘𑀮𑀚𑁆𑀚𑀻’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀤𑀬𑀁 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑁄𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀤𑀬𑀸-𑀲𑀤𑁆𑀤𑁄 ‘‘𑀅𑀤𑀬𑀸𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 𑀓𑀭𑀼𑀡𑀸𑀬 𑀯𑀢𑁆𑀢𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦 𑀤𑀬𑀸-𑀲𑀤𑁆𑀤𑁄 𑀅𑀦𑀼𑀭𑀓𑁆𑀔𑀡𑀢𑁆𑀣𑀁 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀫𑁂𑀢𑁆𑀢𑀸𑀬 𑀘 𑀓𑀭𑀼𑀡𑀸𑀬 𑀘 𑀧𑀯𑀢𑁆𑀢𑀢𑀻𑀢𑀺 𑀇𑀥 𑀫𑁂𑀢𑁆𑀢𑀸𑀬 𑀧𑀯𑀢𑁆𑀢𑀫𑀸𑀦𑁄 𑀯𑀼𑀢𑁆𑀢𑁄. 𑀫𑀺𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑁂𑀢𑁆𑀢𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀘𑀺𑀢𑁆𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀫𑁂𑀢𑁆𑀢𑀘𑀺𑀢𑁆𑀢𑀢𑀸, 𑀫𑁂𑀢𑁆𑀢𑀸𑀇𑀘𑁆𑀘𑁂𑀯 𑀅𑀢𑁆𑀣𑁄.

𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀏𑀢𑁂𑀦 𑀢𑀲𑁆𑀲𑀸 𑀯𑀺𑀭𑀢𑀺𑀬𑀸 𑀲𑀢𑁆𑀢𑀯𑀲𑁂𑀦 𑀅𑀧𑀭𑀺𑀬𑀦𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀧𑀸𑀡𑀪𑀽𑀢𑁂𑀢𑀺 𑀧𑀸𑀡𑀚𑀸𑀢𑁂. 𑀅𑀦𑀼𑀓𑀫𑁆𑀧𑀓𑁄𑀢𑀺 𑀓𑀭𑀼𑀡𑀸𑀬𑀦𑀓𑁄. 𑀬𑀲𑁆𑀫𑀸 𑀧𑀦 𑀫𑁂𑀢𑁆𑀢𑀸 𑀓𑀭𑀼𑀡𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀸𑀬 𑀏𑀯 𑀤𑀬𑀸𑀧𑀦𑁆𑀦𑀢𑀸𑀬𑀸’’𑀢𑀺. 𑀏𑀯𑀁 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀺 𑀲𑀫𑁆𑀧𑀚𑁆𑀚𑀢𑀺, 𑀢𑁂𑀳𑀺 𑀮𑀚𑁆𑀚𑀸𑀫𑁂𑀢𑁆𑀢𑀸𑀓𑀭𑀼𑀡𑀸𑀥𑀫𑁆𑀫𑁂𑀳𑀺 𑀲𑀫𑀗𑁆𑀕𑀺𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀲𑀤𑁆𑀥𑀺𑀁 𑀧𑀺𑀝𑁆𑀞𑀺𑀯𑀝𑁆𑀝𑀓𑀥𑀫𑁆𑀫𑁂𑀳𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀸𑀳 𑁋 𑀓𑀲𑁆𑀫𑀸 ‘‘𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬𑀸’’𑀢𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀦𑀦𑀼 𑀦𑀺𑀭𑀯𑀲𑁂𑀲𑀸𑀦𑀁 𑀧𑀸𑀡𑀸𑀦𑀁 𑀅𑀢𑀺𑀧𑀸𑀢𑀢𑁄 𑀯𑀺𑀭𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀸? 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀻’’𑀢𑀺. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀩𑁆𑀩𑁂 𑀧𑀸𑀡𑀪𑀽𑀢𑁂 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀓𑁄’’𑀢𑀺 𑀧𑀼𑀣𑀼𑀯𑀘𑀦𑀦𑀺𑀤𑁆𑀤𑁂𑀲𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀧𑀸𑀡𑀪𑀸𑀯𑀲𑀸𑀫𑀜𑁆𑀜𑀯𑀲𑁂𑀦 𑀧𑀦𑁂𑀢𑁆𑀣 𑀧𑀸𑀴𑀺𑀬𑀁 𑀆𑀤𑀺𑀢𑁄 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀲𑀩𑁆𑀩𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀧𑀼𑀣𑀼𑀢𑁆𑀢𑀁 𑀯𑀺𑀜𑁆𑀜𑀸𑀬𑀫𑀸𑀦𑀫𑁂𑀯𑀸𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑀁 𑀅𑀓𑀢𑁆𑀯𑀸 𑀪𑁂𑀤𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 𑀩𑀳𑀼𑀯𑀘𑀦𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑀸𑀫𑀜𑁆𑀜𑀢𑁄 𑀲𑀁𑀯𑀭𑀲𑀫𑀸𑀤𑀸𑀦𑀁, 𑀢𑀩𑁆𑀩𑀺𑀲𑁂𑀲𑀢𑁄 𑀲𑀁𑀯𑀭𑀪𑁂𑀤𑁄𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀯𑀘𑀦𑀪𑁂𑀤𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀳𑀭𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀳𑀼𑀢𑁆𑀯𑀸 𑀏𑀓𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀇𑀭𑀺𑀬𑀢𑀺 𑀧𑀸𑀮𑁂𑀢𑀻’’𑀢𑀺.

𑀦 𑀓𑁂𑀯𑀮𑀁 𑀓𑀸𑀬𑀯𑀘𑀻𑀧𑀬𑁄𑀕𑀯𑀲𑁂𑀦 𑀆𑀤𑀸𑀦𑀫𑁂𑀯, 𑀅𑀣 𑀔𑁄 𑀆𑀓𑀗𑁆𑀔𑀧𑀺𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑀯𑀢𑁆𑀣𑀼𑀯𑀺𑀲𑀬𑀸𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑁂𑀦𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀣𑁂𑀦𑁂𑀢𑀺 𑀣𑁂𑀬𑁆𑀬𑀁 𑀓𑀭𑁄𑀢𑀻𑀢𑀺 𑀣𑁂𑀦𑁄, 𑀘𑁄𑀭𑁄. 𑀲𑀼𑀘𑀺𑀪𑀽𑀢𑁂𑀦𑀸𑀢𑀺 𑀏𑀢𑁆𑀣 𑀲𑀼𑀘𑀺𑀪𑀸𑀯𑁄 𑀅𑀥𑀺𑀓𑀸𑀭𑀢𑁄 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀢𑁄 𑀘 𑀣𑁂𑀬𑁆𑀬𑀲𑀁𑀓𑀺𑀮𑁂𑀲𑀯𑀺𑀭𑀫𑀡𑀦𑁆𑀢𑀺 𑀆𑀳 ‘‘𑀅𑀣𑁂𑀦𑀢𑁆𑀢𑀸𑀬𑁂𑀯 𑀲𑀼𑀘𑀺𑀪𑀽𑀢𑁂𑀦𑀸’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀁, 𑀅𑀥𑀺𑀓𑀸𑀭𑀯𑀲𑁂𑀦 𑀧𑀦 𑀅𑀢𑁆𑀣𑀢𑁄 𑀯𑀸 𑀯𑀼𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀳𑀺 𑀮𑀚𑁆𑀚𑀸𑀤𑀬𑁄 𑀧𑀸𑀡𑀸𑀢𑀺𑀧𑀸𑀢𑀧𑀳𑀸𑀦𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀏𑀯𑀁 𑀅𑀤𑀺𑀦𑁆𑀦𑀸𑀤𑀸𑀦𑀧𑀳𑀸𑀦𑀲𑁆𑀲𑀧𑀻𑀢𑀺, 𑀢𑀲𑁆𑀫𑀸 𑀲𑀸𑀧𑀺 𑀧𑀸𑀴𑀺 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀅𑀣 𑀯𑀸 𑀲𑀼𑀘𑀺𑀪𑀽𑀢𑁂𑀦𑀸𑀢𑀺 𑀏𑀢𑁂𑀦 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀫𑁄, 𑀅𑀳𑀺𑀭𑀺𑀓𑀸𑀤𑀻𑀦𑀜𑁆𑀘 𑀧𑀳𑀸𑀦𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 ‘‘𑀮𑀚𑁆𑀚𑀻’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀲𑁂𑀝𑁆𑀞𑀘𑀭𑀺𑀬𑀦𑁆𑀢𑀺 𑀅𑀲𑁂𑀝𑁆𑀞𑀸𑀦𑀁 𑀘𑀭𑀺𑀬𑀁, 𑀅𑀲𑁂𑀝𑁆𑀞𑀁 𑀯𑀸 𑀘𑀭𑀺𑀬𑀁. 𑀫𑀺𑀣𑀼𑀦𑀸𑀦𑀁 𑀯𑀼𑀢𑁆𑀢𑀸𑀓𑀸𑀭𑁂𑀦 𑀲𑀤𑀺𑀲𑀪𑀽𑀢𑀸𑀦𑀁 𑀅𑀬𑀦𑁆𑀢𑀺 𑀫𑀺𑀣𑀼𑀦𑁄, 𑀬𑀣𑀸𑀯𑀼𑀢𑁆𑀢𑁄 𑀤𑀼𑀭𑀸𑀘𑀸𑀭𑁄. 𑀆𑀭𑀸𑀘𑀸𑀭𑀻 𑀫𑁂𑀣𑀼𑀦𑀸𑀢𑀺 𑀏𑀢𑁂𑀦 𑁋 ‘‘𑀇𑀥 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄…𑀧𑁂… 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀧𑀺𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑀁 𑀲𑀸𑀤𑀺𑀬𑀢𑀺, 𑀲𑁄 𑀢𑀤𑀲𑁆𑀲𑀸𑀤𑁂𑀢𑀺, 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁫𑁦) 𑀯𑀼𑀢𑁆𑀢𑀸 𑀲𑀢𑁆𑀢𑀯𑀺𑀥𑀫𑁂𑀣𑀼𑀦𑀲𑀁𑀬𑁄𑀕𑀸𑀧𑀺 𑀧𑀝𑀺𑀯𑀺𑀭𑀢𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀘𑁆𑀘𑁂𑀦 𑀲𑀘𑁆𑀘𑀦𑁆𑀢𑀺 𑀧𑀼𑀭𑀺𑀫𑁂𑀦 𑀯𑀘𑀻𑀲𑀘𑁆𑀘𑁂𑀦 𑀧𑀘𑁆𑀙𑀺𑀫𑀁 𑀯𑀘𑀻𑀲𑀘𑁆𑀘𑀁 𑀲𑀦𑁆𑀤𑀳𑀢𑀺 𑀅𑀲𑀘𑁆𑀘𑁂𑀦 𑀅𑀦𑀦𑁆𑀢𑀭𑀺𑀓𑀢𑁆𑀢𑀸. 𑀢𑁂𑀦𑀸𑀳 ‘‘𑀬𑁄 𑀳𑀻’’𑀢𑀺𑀆𑀤𑀺. 𑀳𑀮𑀺𑀤𑁆𑀤𑀺𑀭𑀸𑀕𑁄 𑀯𑀺𑀬 𑀦 𑀣𑀺𑀭𑀓𑀢𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀣𑀸𑀬 𑀅𑀦𑀯𑀝𑁆𑀞𑀺𑀢𑀪𑀸𑀯𑁂𑀦 𑀳𑀮𑀺𑀤𑁆𑀤𑀺𑀭𑀸𑀕𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀦 𑀧𑀼𑀕𑁆𑀕𑀮𑀲𑁆𑀲. 𑀧𑀸𑀲𑀸𑀡𑀮𑁂𑀔𑀸 𑀯𑀺𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀤𑁆𑀥𑀸 𑀅𑀬𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀲𑀤𑁆𑀥𑀸𑀬𑁄, 𑀲𑀤𑁆𑀥𑀸𑀬𑁄 𑀏𑀯 𑀲𑀤𑁆𑀥𑀸𑀬𑀺𑀓𑁄 𑀬𑀣𑀸 ‘‘𑀯𑁂𑀦𑀬𑀺𑀓𑁄’’𑀢𑀺 (𑀫. 𑀦𑀺. 𑁧.𑁨𑁪𑁬; 𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁮), 𑀲𑀤𑁆𑀥𑀸𑀬 𑀯𑀸 𑀅𑀬𑀺𑀢𑀩𑁆𑀩𑁄 𑀲𑀤𑁆𑀥𑀸𑀬𑀺𑀓𑁄, 𑀲𑀤𑁆𑀥𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺𑀯𑀺𑀲𑀁𑀯𑀸𑀤𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀦𑀼𑀧𑁆𑀧𑀤𑀸𑀢𑀸𑀢𑀺 (𑀤𑀻. 𑀦𑀺. 𑀝𑀻. 𑁧.𑁯; 𑀅. 𑀦𑀺. 𑀝𑀻. 𑁨.𑁪.𑁧𑁯𑁮) 𑀅𑀦𑀼𑀩𑀮𑀧𑁆𑀧𑀤𑀸𑀢𑀸, 𑀅𑀦𑀼𑀯𑀢𑁆𑀢𑀦𑀯𑀲𑁂𑀦 𑀯𑀸 𑀧𑀤𑀸𑀢𑀸. 𑀓𑀲𑁆𑀲 𑀧𑀦 𑀅𑀦𑀼𑀯𑀢𑁆𑀢𑀦𑀁 𑀧𑀤𑀸𑀦𑀜𑁆𑀘𑀸𑀢𑀺? ‘‘𑀲𑀳𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀦𑁆𑀥𑀸𑀦𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑁂𑀦𑀸𑀳 ‘‘𑀲𑀦𑁆𑀥𑀸𑀦𑀸𑀦𑀼𑀧𑁆𑀧𑀤𑀸𑀢𑀸’’𑀢𑀺. 𑀬𑀲𑁆𑀫𑀸 𑀧𑀦 𑀅𑀦𑀼𑀯𑀢𑁆𑀢𑀦𑀯𑀲𑁂𑀦 𑀲𑀦𑁆𑀥𑀸𑀦𑀲𑁆𑀲 𑀧𑀤𑀸𑀦𑀁 𑀆𑀥𑀸𑀦𑀁, 𑀭𑀓𑁆𑀔𑀡𑀁 𑀯𑀸 𑀤𑀴𑁆𑀳𑀻𑀓𑀭𑀡𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑁆𑀯𑁂 𑀚𑀦𑁂 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸’’𑀢𑀺𑀆𑀤𑀺. 𑀆𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀭𑀸𑀫𑁄, 𑀭𑀫𑀺𑀢𑀩𑁆𑀩𑀝𑁆𑀞𑀸𑀦𑀁. 𑀬𑀲𑁆𑀫𑀸 𑀧𑀦 𑀆-𑀓𑀸𑀭𑁂𑀦 𑀯𑀺𑀦𑀸𑀧𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑀕𑁆𑀕𑀭𑀸𑀫𑁄𑀢𑀺𑀧𑀺 𑀧𑀸𑀴𑀺, 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄’’𑀢𑀺.

𑀏𑀢𑁆𑀣𑀸𑀢𑀺 𑁋

‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄, 𑀏𑀓𑀸𑀭𑁄 𑀯𑀢𑁆𑀢𑀢𑀻 𑀭𑀣𑁄;

𑀅𑀦𑀻𑀖𑀁 𑀧𑀲𑁆𑀲 𑀆𑀬𑀦𑁆𑀢𑀁, 𑀙𑀺𑀦𑁆𑀦𑀲𑁄𑀢𑀁 𑀅𑀩𑀦𑁆𑀥𑀦’’𑀦𑁆𑀢𑀺. (𑀲𑀁. 𑀦𑀺. 𑁪.𑁩𑁪𑁭; 𑀉𑀤𑀸. 𑁬𑁫; 𑀧𑁂𑀝𑀓𑁄. 𑁨𑁫;𑀤𑀻. 𑀦𑀺. 𑀝𑀻. 𑁧.𑁯) 𑁋

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬. 𑀲𑀻𑀮𑀜𑁆𑀳𑁂𑀢𑁆𑀣 ‘‘𑀦𑁂𑀮𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 𑀘𑀺𑀢𑁆𑀢𑁄 𑀕𑀳𑀧𑀢𑀺, ‘‘𑀦𑁂𑀮𑀗𑁆𑀕𑀦𑁆𑀢𑀺 𑀔𑁄, 𑀪𑀦𑁆𑀢𑁂, 𑀲𑀻𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁪𑁭; 𑀤𑀻. 𑀦𑀺. 𑀝𑀻. 𑁧.𑁯). 𑀲𑀼𑀓𑀼𑀫𑀸𑀭𑀸𑀢𑀺 𑀅𑀨𑀭𑀼𑀲𑀢𑀸𑀬 𑀫𑀼𑀤𑀼𑀓𑀸. 𑀧𑀼𑀭𑀲𑁆𑀲 𑀏𑀲𑀸𑀢𑀺 𑀏𑀢𑁆𑀣 𑀧𑀼𑀭-𑀲𑀤𑁆𑀤𑁄 𑀢𑀦𑁆𑀦𑀺𑀯𑀸𑀲𑀻𑀯𑀸𑀘𑀓𑁄 𑀤𑀝𑁆𑀞𑀩𑁆𑀩𑁄 ‘‘𑀕𑀸𑀫𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀝𑀻. 𑁧.𑁯) 𑀯𑀺𑀬. 𑀢𑁂𑀦𑁂𑀯𑀸𑀳 ‘‘𑀦𑀕𑀭𑀯𑀸𑀲𑀻𑀦’’𑀦𑁆𑀢𑀺. 𑀫𑀦𑀁 𑀅𑀧𑁆𑀧𑀸𑀬𑀢𑀺 𑀯𑀟𑁆𑀠𑁂𑀢𑀻𑀢𑀺 𑀫𑀦𑀸𑀧𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀯𑀼𑀤𑁆𑀥𑀺𑀓𑀭𑀸’’𑀢𑀺.

𑀓𑀸𑀮𑀯𑀸𑀤𑀻𑀢𑀺𑀆𑀤𑀺 𑀲𑀫𑁆𑀨𑀧𑁆𑀧𑀮𑀸𑀧𑀸𑀧𑀝𑀺𑀯𑀺𑀭𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀁. 𑀅𑀢𑁆𑀣𑀲𑀁𑀳𑀺𑀢𑀸𑀧𑀺 𑀳𑀺 𑀯𑀸𑀘𑀸 𑀅𑀬𑀼𑀢𑁆𑀢𑀓𑀸𑀮𑀧𑀬𑁄𑀕𑁂𑀦 𑀅𑀢𑁆𑀣𑀸𑀯𑀳𑀸 𑀦 𑀲𑀺𑀬𑀸𑀢𑀺 𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀦𑀯𑀸𑀘𑀁 𑀅𑀦𑀼𑀮𑁄𑀫𑁂𑀢𑀺, 𑀢𑀲𑁆𑀫𑀸 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀚𑀳𑀦𑁆𑀢𑁂𑀦 𑀅𑀓𑀸𑀮𑀯𑀸𑀤𑀺𑀢𑀸 𑀧𑀭𑀺𑀳𑀭𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀮𑀯𑀸𑀤𑀻’’𑀢𑀺. 𑀓𑀸𑀮𑁂 𑀯𑀤𑀦𑁆𑀢𑁂𑀦𑀧𑀺 𑀉𑀪𑀬𑀸𑀦𑀢𑁆𑀣𑀲𑀸𑀥𑀦𑀢𑁄 𑀅𑀪𑀽𑀢𑀁 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀪𑀽𑀢𑀯𑀸𑀤𑀻’’𑀢𑀺. 𑀪𑀽𑀢𑀜𑁆𑀘 𑀯𑀤𑀦𑁆𑀢𑁂𑀦 𑀬𑀁 𑀇𑀥𑀮𑁄𑀓-𑀧𑀭𑀮𑁄𑀓-𑀳𑀺𑀢𑀲𑀫𑁆𑀧𑀸𑀤𑀓𑀁, 𑀢𑀤𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦𑀧𑀺 𑀮𑁄𑀓𑀺𑀬𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀅𑀯𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀥𑀫𑁆𑀫𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀘 𑀅𑀢𑁆𑀣𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀺, 𑀢𑀁𑀤𑀲𑁆𑀲𑀦𑀢𑁆𑀣𑀁 ‘‘𑀯𑀺𑀦𑀬𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀦𑁆𑀦𑀜𑁆𑀳𑀺 𑀲𑀁𑀯𑀭𑀯𑀺𑀦𑀬𑀸𑀦𑀁, 𑀧𑀜𑁆𑀘𑀦𑁆𑀦𑀜𑁆𑀘 𑀧𑀳𑀸𑀦𑀯𑀺𑀦𑀬𑀸𑀦𑀁 𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑁄 𑀅𑀢𑁆𑀣𑁄 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀳𑁂𑀢𑀼𑀪𑀸𑀯𑀢𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀻𑀢𑀺. 𑀏𑀯𑀁 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄𑀯 𑀅𑀢𑁆𑀣𑁄 𑀯𑀼𑀘𑁆𑀘𑀫𑀸𑀦𑁄 𑀤𑁂𑀲𑀦𑀸𑀓𑁄𑀲𑀮𑁆𑀮𑁂 𑀲𑀢𑀺 𑀲𑁄𑀪𑀢𑀺, 𑀓𑀺𑀘𑁆𑀘𑀓𑀭𑁄 𑀘 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀁 𑀤𑁂𑀲𑀦𑀸𑀓𑁄𑀲𑀮𑁆𑀮𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀸𑀮𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀘𑁆𑀙𑀸𑀤𑀺𑀯𑀲𑁂𑀦 𑀳𑀺 𑀑𑀢𑀺𑀡𑁆𑀡𑀯𑀸𑀘𑀸𑀯𑀢𑁆𑀣𑀼𑀲𑁆𑀫𑀺𑀁 𑀏𑀓𑀁𑀲𑀸𑀤𑀺𑀩𑁆𑀬𑀸𑀓𑀭𑀡𑀯𑀺𑀪𑀸𑀕𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀞𑀧𑀦𑀸𑀳𑁂𑀢𑀼𑀉𑀤𑀸𑀳𑀭𑀡𑀁 𑀲𑀁𑀲𑀦𑁆𑀤𑀦𑀸𑀤𑀺𑀁 𑀢𑀁𑀢𑀁𑀓𑀸𑀮𑀸𑀦𑀼𑀭𑀽𑀧𑀁 𑀯𑀺𑀪𑀸𑀯𑁂𑀦𑁆𑀢𑀺𑀬𑀸 𑀧𑀭𑀺𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀸𑀬 𑀯𑀺𑀧𑀼𑀮𑀢𑀭-𑀕𑀫𑁆𑀪𑀻𑀭𑁄𑀤𑀸𑀭-𑀧𑀭𑀫𑀢𑁆𑀣-𑀯𑀺𑀢𑁆𑀣𑀸𑀭𑀲𑀗𑁆𑀕𑀸𑀳𑀺𑀓𑀸𑀬 𑀓𑀣𑀸𑀬 𑀜𑀸𑀡𑀩𑀮𑀸𑀦𑀼𑀭𑀽𑀧𑀁 𑀧𑀭𑁂 𑀬𑀸𑀣𑀸𑀯𑀢𑁄 𑀥𑀫𑁆𑀫𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 ‘‘𑀤𑁂𑀲𑀦𑀸𑀓𑀼𑀲𑀮𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁯𑁩. 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀫𑀽𑀮𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀺𑀪𑀸𑀯𑁂𑀢𑁆𑀯𑀸 𑀲𑀢𑀺𑀧𑀺 𑀅𑀪𑀺𑀚𑁆𑀛𑀸𑀤𑀺𑀧𑀳𑀸𑀦𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀢𑀺𑀲𑀫𑁆𑀧𑀚𑀜𑁆𑀜𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀸𑀤𑀺𑀓𑁂 𑀉𑀢𑁆𑀢𑀭𑀤𑁂𑀲𑀦𑀸𑀬𑀁 𑀯𑀺𑀪𑀸𑀯𑁂𑀢𑀼𑀁 𑀢𑀁 𑀧𑀭𑀺𑀳𑀭𑀺𑀢𑁆𑀯𑀸 𑀆𑀘𑀸𑀭𑀲𑀻𑀮𑀲𑁆𑀲𑁂𑀯 𑀯𑀺𑀪𑀚𑀦𑀯𑀲𑁂𑀦 𑀧𑀸𑀴𑀺 𑀧𑀯𑀢𑁆𑀢𑀸𑀢𑀺 𑀢𑀤𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑀻𑀚𑀸𑀦𑀁 𑀕𑀸𑀫𑁄 𑀲𑀫𑀽𑀳𑁄 𑀩𑀻𑀚𑀕𑀸𑀫𑁄. 𑀪𑀽𑀢𑀸𑀦𑀁 𑀚𑀸𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀸𑀦𑀁 𑀭𑀼𑀓𑁆𑀔𑀕𑀘𑁆𑀙𑀮𑀢𑀸𑀤𑀻𑀦𑀁 𑀲𑀫𑀽𑀳𑁄 𑀪𑀽𑀢𑀕𑀸𑀫𑁄. 𑀦𑀦𑀼 𑀘 𑀭𑀼𑀓𑁆𑀔𑀸𑀤𑀬𑁄 𑀘𑀺𑀢𑁆𑀢𑀭𑀳𑀺𑀢𑀢𑀸𑀬 𑀦 𑀚𑀻𑀯𑀸, 𑀘𑀺𑀢𑁆𑀢𑀭𑀳𑀺𑀢𑀢𑀸 𑀘 𑀧𑀭𑀺𑀧𑁆𑀨𑀦𑁆𑀤𑀸𑀪𑀸𑀯𑀢𑁄 𑀙𑀺𑀦𑁆𑀦𑁂 𑀯𑀺𑀭𑀼𑀳𑀦𑀢𑁄 𑀯𑀺𑀲𑀤𑀺𑀲𑀚𑀸𑀢𑀺𑀓𑀪𑀸𑀯𑀢𑁄 𑀘𑀢𑀼𑀬𑁄𑀦𑀺𑀅𑀧𑀭𑀺𑀬𑀸𑀧𑀦𑁆𑀦𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸, 𑀯𑀼𑀟𑁆𑀠𑀺 𑀧𑀦 𑀧𑀯𑀸𑀴𑀲𑀺𑀮𑀸𑀮𑀯𑀡𑀸𑀦𑀫𑁆𑀧𑀺 𑀯𑀺𑀚𑁆𑀚𑀢𑀻𑀢𑀺 𑀦 𑀢𑁂𑀲𑀁 𑀚𑀻𑀯𑀪𑀸𑀯𑁂 𑀓𑀸𑀭𑀡𑀁, 𑀯𑀺𑀲𑀬𑀕𑁆𑀕𑀳𑀡𑀜𑁆𑀘 𑀦𑁂𑀲𑀁 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀁 𑀲𑀼𑀧𑀦𑀁 𑀯𑀺𑀬 𑀘𑀺𑀜𑁆𑀘𑀸𑀤𑁂𑀦𑀁, 𑀢𑀣𑀸 𑀤𑁄𑀳𑀴𑀸𑀤𑀬𑁄, 𑀢𑀢𑁆𑀣 𑀓𑀲𑁆𑀫𑀸 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑀺 𑀇𑀘𑁆𑀙𑀺𑀢𑀸𑀢𑀺? 𑀲𑀫𑀡𑀲𑀸𑀭𑀼𑀧𑁆𑀧𑀢𑁄 𑀢𑀦𑁆𑀦𑀺𑀯𑀸𑀲𑀺𑀲𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁄 𑀘. 𑀢𑁂𑀦𑁂𑀯𑀸𑀳 𑁋 ‘‘𑀚𑀻𑀯𑀲𑀜𑁆𑀜𑀺𑀦𑁄 𑀳𑀺 𑀫𑁄𑀖𑀧𑀼𑀭𑀺𑀲 𑀫𑀦𑀼𑀲𑁆𑀲𑀸 𑀭𑀼𑀓𑁆𑀔𑀲𑁆𑀫𑀺’’𑀦𑁆𑀢𑀺𑀆𑀤𑀺 (𑀧𑀸𑀘𑀺. 𑁮𑁯).

𑀫𑀽𑀮𑀫𑁂𑀯 𑀩𑀻𑀚𑀁 𑀫𑀽𑀮𑀩𑀻𑀚𑀁, 𑀫𑀽𑀮𑀩𑀻𑀚𑀁 𑀏𑀢𑀲𑁆𑀲𑀸𑀢𑀺𑀧𑀺 𑀫𑀽𑀮𑀩𑀻𑀚𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀨𑀴𑀼𑀩𑀻𑀚𑀦𑁆𑀢𑀺 𑀧𑀩𑁆𑀩𑀩𑀻𑀚𑀁. 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀲𑀤𑀺𑀲𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀪𑀸𑀯𑀢𑁄 𑀯𑀺𑀭𑀼𑀳𑀡𑀲𑀫𑀢𑁆𑀣𑁂 𑀲𑀸𑀭𑀨𑀮𑁂 𑀦𑀺𑀭𑀼𑀴𑁆𑀳𑁄 𑀩𑀻𑀚𑀲𑀤𑁆𑀤𑁄 𑀢𑀤𑀢𑁆𑀣𑀲𑀁𑀲𑀺𑀤𑁆𑀥𑀺𑀬𑀸 𑀫𑀽𑀮𑀸𑀤𑀻𑀲𑀼𑀧𑀺 𑀓𑁂𑀲𑀼𑀘𑀺 𑀧𑀯𑀢𑁆𑀢𑀢𑀻𑀢𑀺 𑀫𑀽𑀮𑀸𑀤𑀺𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀓𑁂𑀦 𑀩𑀻𑀚-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀩𑀻𑀚𑀩𑀻𑀚’’𑀦𑁆𑀢𑀺 ‘‘𑀭𑀽𑀧𑀭𑀽𑀧𑀁 (𑀯𑀺𑀲𑀼𑀤𑁆𑀥𑀺. 𑁨.𑁪𑁪𑁯), 𑀤𑀼𑀓𑁆𑀔𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁨𑁭; 𑁫.𑁧𑁬𑁫; 𑀦𑁂𑀢𑁆𑀢𑀺. 𑁧𑁧) 𑀘 𑀬𑀣𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀁 𑀉𑀤𑁆𑀥𑀭𑀺𑀢𑁆𑀯𑀸 𑀩𑀻𑀚𑀕𑀸𑀫𑁄 𑀏𑀯 𑀦𑀺𑀤𑁆𑀤𑀺𑀝𑁆𑀞𑁄𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀦𑀦𑀼 𑀅𑀯𑁄𑀘𑀼𑀫𑁆𑀳 𑁋 ‘‘𑀫𑀽𑀮𑀫𑁂𑀯 𑀩𑀻𑀚𑀁 𑀫𑀽𑀮𑀩𑀻𑀚𑀁, 𑀫𑀽𑀮𑀩𑀻𑀚𑀁 𑀏𑀢𑀲𑁆𑀲𑀸𑀢𑀺𑀧𑀺 𑀫𑀽𑀮𑀩𑀻𑀚’’𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀩𑀻𑀚𑀕𑀸𑀫𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀤𑀼𑀢𑀺𑀬𑁂𑀦 𑀪𑀽𑀢𑀕𑀸𑀫𑁄, 𑀤𑀼𑀯𑀺𑀥𑁄𑀧𑁂𑀲 𑀫𑀽𑀮𑀩𑀻𑀚𑀜𑁆𑀘 𑀫𑀽𑀮𑀩𑀻𑀚𑀜𑁆𑀘 𑀫𑀽𑀮𑀩𑀻𑀚𑀦𑁆𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀉𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀧𑀜𑁆𑀘𑀯𑀺𑀥𑀲𑁆𑀲𑀸’’𑀢𑀺𑀆𑀤𑀺. 𑀦𑀻𑀮𑀢𑀺𑀡𑀭𑀼𑀓𑁆𑀔𑀸𑀤𑀺𑀓𑀲𑁆𑀲𑀸𑀢𑀺 𑀅𑀮𑁆𑀮𑀢𑀺𑀡𑀲𑁆𑀲 𑀘𑁂𑀯 𑀅𑀮𑁆𑀮𑀭𑀼𑀓𑁆𑀔𑀸𑀤𑀺𑀓𑀲𑁆𑀲 𑀘. 𑀆𑀤𑀺-𑀲𑀤𑁆𑀤𑁂𑀦 𑀑𑀲𑀥𑀺𑀕𑀘𑁆𑀙𑀮𑀢𑀸𑀤𑀻𑀦𑀁 𑀲𑀗𑁆𑀕𑀳𑁄.

𑀏𑀓𑀁 𑀪𑀢𑁆𑀢𑀁 𑀏𑀓𑀪𑀢𑁆𑀢𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀪𑀢𑁆𑀢𑀺𑀓𑁄. 𑀲𑁄 𑀧𑀦 𑀭𑀢𑁆𑀢𑀺𑀪𑁄𑀚𑀦𑁂𑀦𑀧𑀺 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 𑀆𑀳 ‘‘𑀭𑀢𑁆𑀢𑀽𑀧𑀭𑀢𑁄’’𑀢𑀺. 𑀏𑀯𑀫𑁆𑀧𑀺 𑀅𑀧𑀭𑀡𑁆𑀳𑀪𑁄𑀚𑀻𑀧𑀺 𑀲𑀺𑀬𑀸 𑀏𑀓𑀪𑀢𑁆𑀢𑀺𑀓𑁄𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀭𑀼𑀡𑀼𑀕𑁆𑀕𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸 𑀅𑀬𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄 𑀪𑁄𑀚𑀦𑀲𑁆𑀲 𑀓𑀸𑀮𑁄 𑀦𑀸𑀫, 𑀢𑀤𑀜𑁆𑀜𑁄 𑀯𑀺𑀓𑀸𑀮𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑀼𑀢𑀺𑀬𑀧𑀤𑁂𑀦 𑀭𑀢𑁆𑀢𑀺𑀪𑁄𑀚𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 ‘‘𑀅𑀢𑀺𑀓𑁆𑀓𑀦𑁆𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀸 𑀪𑁄𑀚𑀦𑀁 𑀯𑀺𑀓𑀸𑀮𑀪𑁄𑀚𑀦𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁.

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩; 𑀦𑁂𑀢𑁆𑀢𑀺. 𑁩𑁦, 𑁫𑁦, 𑁧𑁧𑁬, 𑁧𑁨𑁪) 𑀪𑀕𑀯𑀢𑁄 𑀲𑀸𑀲𑀦𑀁 𑀅𑀘𑁆𑀘𑀦𑁆𑀢𑀭𑀸𑀕𑀼𑀧𑁆𑀧𑀢𑁆𑀢𑀺𑀬𑀸 𑀦𑀘𑁆𑀘𑀸𑀤𑀺𑀤𑀲𑁆𑀲𑀦𑀁 𑀦 𑀅𑀦𑀼𑀮𑁄𑀫𑁂𑀢𑀻𑀢𑀺 𑀆𑀳 ‘‘𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀢𑁆𑀢𑀸’’𑀢𑀺. 𑀅𑀢𑁆𑀢𑀦𑀸 𑀧𑀬𑁄𑀚𑀺𑀬𑀫𑀸𑀦𑀁, 𑀧𑀭𑁂𑀳𑀺 𑀧𑀬𑁄𑀚𑀸𑀧𑀺𑀬𑀫𑀸𑀦𑀜𑁆𑀘 𑀦𑀘𑁆𑀘𑀁 𑀦𑀘𑁆𑀘𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀸𑀴𑀺𑀬𑀁 𑀏𑀓𑁂𑀦𑁂𑀯 𑀦𑀘𑁆𑀘-𑀲𑀤𑁆𑀤𑁂𑀦 𑀕𑀳𑀺𑀢𑀁, 𑀢𑀣𑀸 𑀕𑀻𑀢𑀯𑀸𑀤𑀺𑀢-𑀲𑀤𑁆𑀤𑁂𑀦 𑀘𑀸𑀢𑀺 𑀆𑀳 ‘‘𑀦𑀘𑁆𑀘𑀦𑀦𑀘𑁆𑀘𑀸𑀧𑀦𑀸𑀤𑀺𑀯𑀲𑁂𑀦𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀕𑀸𑀬𑀦𑀕𑀸𑀬𑀸𑀧𑀦𑀯𑀸𑀤𑀦𑀯𑀸𑀤𑀸𑀧𑀦𑀸𑀦𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀤𑀲𑁆𑀲𑀦𑁂𑀦 𑀘𑁂𑀢𑁆𑀣 𑀲𑀯𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀁 𑀯𑀺𑀭𑀽𑀧𑁂𑀓𑀲𑁂𑀲𑀦𑀬𑁂𑀦. 𑀬𑀣𑀸𑀲𑀓𑀁 𑀯𑀺𑀲𑀬𑀲𑁆𑀲 𑀆𑀮𑁄𑀘𑀦𑀲𑀪𑀸𑀯𑀢𑀸𑀬 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀯𑀦𑀓𑀺𑀭𑀺𑀬𑀸𑀬𑀧𑀺 𑀤𑀲𑁆𑀲𑀦𑀲𑀗𑁆𑀔𑁂𑀧𑀲𑀩𑁆𑀪𑀸𑀯𑀢𑁄 ‘‘𑀤𑀲𑁆𑀲𑀦𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀅𑀜𑁆𑀜𑀢𑁆𑀭 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀸’’𑀢𑀺. 𑀅𑀯𑀺𑀲𑀽𑀓𑀪𑀽𑀢𑀲𑁆𑀲 𑀕𑀻𑀢𑀲𑁆𑀲 𑀲𑀯𑀦𑀁 𑀓𑀤𑀸𑀘𑀺 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀯𑀺𑀲𑀽𑀓𑀪𑀽𑀢𑀸 𑀤𑀲𑁆𑀲𑀦𑀸’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬𑀁 𑀔𑀼𑀤𑁆𑀤𑀓𑀝𑁆𑀞𑀓𑀣𑀸𑀬𑀁 (𑀔𑀼. 𑀧𑀸. 𑀅𑀝𑁆𑀞. 𑁨.𑀧𑀘𑁆𑀙𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀕𑀻𑀢𑀁 𑀯𑀝𑁆𑀝𑀢𑀺, 𑀕𑀻𑀢𑀽𑀧𑀲𑀁𑀳𑀺𑀢𑁄 𑀥𑀫𑁆𑀫𑁄 𑀦 𑀯𑀝𑁆𑀝𑀢𑀻’’𑀢𑀺. 𑀬𑀁 𑀓𑀺𑀜𑁆𑀘𑀻𑀢𑀺 𑀕𑀦𑁆𑀣𑀺𑀢𑀁 𑀯𑀸 𑀅𑀕𑀦𑁆𑀣𑀺𑀢𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀧𑀼𑀧𑁆𑀨𑀁. 𑀕𑀦𑁆𑀥𑀚𑀸𑀢𑀦𑁆𑀢𑀺 𑀕𑀦𑁆𑀥𑀚𑀸𑀢𑀺𑀓𑀁. 𑀢𑀲𑁆𑀲𑀧𑀺 ‘‘𑀬𑀁 𑀓𑀺𑀜𑁆𑀘𑀻’’𑀢𑀺 𑀯𑀘𑀦𑀢𑁄 𑀧𑀺𑀲𑀺𑀢𑀲𑁆𑀲 𑀅𑀧𑀺𑀲𑀺𑀢𑀲𑁆𑀲𑀧𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀺𑀮𑁂𑀧𑀦𑀸𑀤𑀺 𑀦 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀉𑀘𑁆𑀘𑀸𑀢𑀺 𑀉𑀘𑁆𑀘-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁 𑀏𑀓𑀁 𑀲𑀤𑁆𑀤𑀦𑁆𑀢𑀭𑀁. 𑀲𑁂𑀢𑀺 𑀏𑀢𑁆𑀣𑀸𑀢𑀺 𑀲𑀬𑀦𑀁. 𑀉𑀘𑁆𑀘𑀸𑀲𑀬𑀦𑀁 𑀫𑀳𑀸𑀲𑀬𑀦𑀜𑁆𑀘 𑀲𑀫𑀡𑀲𑀸𑀭𑀼𑀧𑁆𑀧𑀭𑀳𑀺𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀅𑀓𑀧𑁆𑀧𑀺𑀬𑀢𑁆𑀣𑀭𑀡’’𑀦𑁆𑀢𑀺. 𑀆𑀲𑀦𑀜𑁆𑀘𑁂𑀢𑁆𑀣 𑀲𑀬𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀆𑀥𑀸𑀭𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑀤𑀸𑀥𑀸𑀭𑀸 𑀓𑀺𑀭𑀺𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀢𑀤𑀼𑀧𑀪𑁄𑀕𑀪𑀽𑀢𑀦𑀺𑀲𑀚𑁆𑀚𑀸𑀦𑀺𑀧𑀚𑁆𑀚𑀦𑁂𑀳𑀺 𑀯𑀺𑀭𑀢𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀜𑁆𑀘 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀜𑁆𑀘 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀦𑁆𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀏𑀓𑀲𑁂𑀲𑁂𑀦 𑀅𑀬𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀉𑀤𑀸. 𑁧), 𑀆𑀲𑀦𑀓𑀺𑀭𑀺𑀬𑀸𑀧𑀼𑀩𑁆𑀩𑀓𑀢𑁆𑀢𑀸 𑀯𑀸 𑀲𑀬𑀦𑀓𑀺𑀭𑀺𑀬𑀸𑀬 𑀲𑀬𑀦𑀕𑁆𑀕𑀳𑀡𑁂𑀦 𑀆𑀲𑀦𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀸𑀭𑀼𑀫𑀸𑀲𑀓𑁄𑀢𑀺 𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻𑀢𑀺 𑀇𑀢𑀺-𑀲𑀤𑁆𑀤𑁂𑀦 𑀏𑀯𑀁𑀧𑀓𑀸𑀭𑁂 𑀤𑀲𑁆𑀲𑁂𑀢𑀺. 𑀅𑀜𑁆𑀜𑁂𑀳𑀺 𑀕𑀸𑀳𑀸𑀧𑀦𑁂 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑁂 𑀘 𑀧𑀝𑀺𑀕𑁆𑀕𑀳𑀡𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀦𑁂𑀯 𑀦𑀁 𑀉𑀕𑁆𑀕𑀡𑁆𑀳𑀸𑀢𑀺, 𑀦 𑀉𑀕𑁆𑀕𑀡𑁆𑀳𑀸𑀧𑁂𑀢𑀺, 𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀸𑀤𑀺𑀬𑀢𑀻’’𑀢𑀺. 𑀅𑀣 𑀯𑀸 𑀢𑀺𑀯𑀺𑀥𑀁 𑀧𑀝𑀺𑀕𑁆𑀕𑀳𑀡𑀁 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸𑀢𑀺. 𑀢𑀢𑁆𑀣 𑀓𑀸𑀬𑁂𑀦 𑀧𑀝𑀺𑀕𑁆𑀕𑀳𑀡𑀁 𑀉𑀕𑁆𑀕𑀡𑁆𑀳𑀦𑀁, 𑀯𑀸𑀘𑀸𑀬 𑀧𑀝𑀺𑀕𑁆𑀕𑀳𑀡𑀁 𑀉𑀕𑁆𑀕𑀳𑀸𑀧𑀦𑀁, 𑀫𑀦𑀲𑀸 𑀧𑀝𑀺𑀕𑁆𑀕𑀳𑀡𑀁 𑀲𑀸𑀤𑀺𑀬𑀦𑀦𑁆𑀢𑀺 𑀢𑀺𑀯𑀺𑀥𑀫𑁆𑀧𑀺 𑀧𑀝𑀺𑀕𑁆𑀕𑀳𑀡𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 ‘‘𑀧𑀝𑀺𑀕𑁆𑀕𑀳𑀡𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦𑁂𑀯 𑀦𑀁 𑀉𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺. 𑀏𑀲 𑀦𑀬𑁄 𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸𑀢𑀺𑀆𑀤𑀻𑀲𑀼𑀧𑀺. 𑀦𑀻𑀯𑀸𑀭𑀸𑀤𑀺𑀉𑀧𑀥𑀜𑁆𑀜𑀲𑁆𑀲 𑀲𑀸𑀮𑀺𑀆𑀤𑀺𑀫𑀽𑀮𑀥𑀜𑁆𑀜𑀦𑁆𑀢𑁄𑀕𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀯𑀺𑀥𑀲𑁆𑀲𑀸’’𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀘𑁆𑀙𑀯𑀲𑀁 𑀫𑀘𑁆𑀙𑀯𑀲𑀁 𑀲𑀼𑀲𑀼𑀓𑀸𑀯𑀲𑀁 𑀲𑀼𑀓𑀭𑀯𑀲𑀁 𑀕𑀤𑁆𑀭𑀪𑀯𑀲’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀯𑀼𑀢𑁆𑀢𑀢𑁆𑀢𑀸 𑀇𑀤𑀁 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀦𑀸𑀫, 𑀢𑀲𑁆𑀲 𑀧𑀦 ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀡𑀁 𑀯𑀝𑁆𑀝𑀢𑀺. 𑀲𑀢𑀺 𑀧𑀘𑁆𑀘𑀬𑁂𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀸’’𑀢𑀺.

𑀲𑀭𑀽𑀧𑁂𑀦 𑀯𑀜𑁆𑀘𑀦𑀁 𑀭𑀽𑀧𑀓𑀽𑀝𑀁, 𑀧𑀢𑀺𑀭𑀽𑀧𑁂𑀦 𑀯𑀜𑁆𑀘𑀦𑀸𑀢𑀺 𑀅𑀢𑁆𑀣𑁄. 𑀅𑀗𑁆𑀕𑁂𑀦 𑀅𑀢𑁆𑀢𑀦𑁄 𑀲𑀭𑀻𑀭𑀸𑀯𑀬𑀯𑁂𑀦 𑀯𑀜𑁆𑀘𑀦𑀁 𑀅𑀗𑁆𑀕𑀓𑀽𑀝𑀁. 𑀕𑀳𑀡𑀯𑀲𑁂𑀦 𑀯𑀜𑁆𑀘𑀦𑀁 𑀕𑀳𑀡𑀓𑀽𑀝𑀁. 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀯𑀜𑁆𑀘𑀦𑀁 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀁. 𑀅𑀓𑁆𑀓𑀫𑀢𑀻𑀢𑀺 𑀦𑀺𑀧𑁆𑀧𑀻𑀴𑁂𑀢𑀺, 𑀧𑀼𑀩𑁆𑀩𑀪𑀸𑀕𑁂 𑀅𑀓𑁆𑀓𑀫𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀳𑀤𑀬𑀦𑁆𑀢𑀺 𑀦𑀸𑀴𑀺𑀆𑀤𑀻𑀦𑀁 𑀫𑀸𑀦𑀪𑀸𑀚𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑀁. 𑀢𑀺𑀮𑀸𑀤𑀻𑀦𑀁 𑀦𑀸𑀴𑀺𑀆𑀤𑀻𑀳𑀺 𑀫𑀺𑀦𑀦𑀓𑀸𑀮𑁂 𑀉𑀲𑁆𑀲𑀸𑀧𑀺𑀢𑀲𑀺𑀔𑀸𑀬𑁂𑀯 𑀲𑀺𑀔𑀸. 𑀲𑀺𑀔𑀸𑀪𑁂𑀤𑁄 𑀢𑀲𑁆𑀲𑀸𑀳𑀸𑀧𑀦𑀁.

𑀓𑁂𑀘𑀻𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸, 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄 𑀘. 𑀯𑀥𑁄𑀢𑀺 𑀫𑀼𑀝𑁆𑀞𑀺𑀧𑀳𑀸𑀭𑀓𑀲𑀸𑀢𑀸𑀴𑀦𑀸𑀤𑀻𑀳𑀺 𑀯𑀺𑀳𑁂𑀲𑀦𑀁, 𑀯𑀺𑀩𑀸𑀥𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀳𑁂𑀞𑀦𑀢𑁆𑀣𑁄𑀧𑀺 𑀳𑀺 𑀯𑀥-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 ‘‘𑀅𑀢𑁆𑀢𑀸𑀦𑀁𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀭𑁄𑀤𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁮𑁭𑁯, 𑁮𑁮𑁧). 𑀬𑀣𑀸 𑀳𑀺 𑀅𑀧𑀭𑀺𑀕𑁆𑀕𑀳𑀪𑀸𑀯𑀲𑀸𑀫𑀜𑁆𑀜𑁂 𑀲𑀢𑀺𑀧𑀺 𑀧𑀩𑁆𑀩𑀚𑀺𑀢𑁂𑀳𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀩𑁆𑀩𑀯𑀢𑁆𑀣𑀼𑀯𑀺𑀪𑀸𑀕𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀇𑀢𑁆𑀣𑀺𑀓𑀼𑀫𑀸𑀭𑀺𑀤𑀸𑀲𑀺𑀤𑀸𑀲𑀸𑀤𑀬𑁄 𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀸. 𑀏𑀯𑀁 𑀧𑀭𑀲𑁆𑀲 𑀳𑀭𑀡𑀪𑀸𑀯𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀪𑀸𑀯𑀲𑀸𑀫𑀜𑁆𑀜𑁂 𑀲𑀢𑀺𑀧𑀺 𑀢𑀼𑀮𑀸𑀓𑀽𑀝𑀸𑀤𑀬𑁄 𑀅𑀤𑀺𑀦𑁆𑀦𑀸𑀤𑀸𑀦𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀸, 𑀦 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀧𑀭𑀺𑀬𑀸𑀬𑀲𑁆𑀲 𑀯𑀥𑀲𑁆𑀲 𑀧𑀼𑀦 𑀕𑀳𑀡𑁂 𑀧𑀬𑁄𑀚𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀲𑀬𑀁𑀓𑀸𑀭𑁄, 𑀇𑀥 𑀧𑀭𑀁𑀓𑀸𑀭𑁄𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀙𑀧𑁆𑀧𑀬𑁄𑀕𑀸’’𑀢𑀺 𑀯𑀘𑀦𑀢𑁄. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄 𑀏𑀯𑁂𑀢𑁆𑀣 𑀅𑀢𑁆𑀣𑁄 𑀬𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀥𑁄𑀢𑀺 𑀫𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀧𑁄𑀣𑀦𑀫𑁂𑀯 𑀲𑀦𑁆𑀥𑀸𑀬𑀸𑀢𑀺 𑀘 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀫𑀸𑀭𑀡-𑀲𑀤𑁆𑀤𑀲𑁆𑀲𑀧𑀺 𑀯𑀺𑀳𑀺𑀁𑀲𑀦𑁂 𑀤𑀺𑀲𑁆𑀲𑀦𑀢𑁄.

𑁨𑁯𑁪. 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀸𑀦𑀁 𑀬𑀣𑀸𑀓𑁆𑀓𑀫𑀁 𑀓𑀸𑀬𑀓𑀼𑀘𑁆𑀙𑀺𑀧𑀭𑀺𑀳𑀭𑀡𑀫𑀢𑁆𑀢𑀚𑁄𑀢𑀦𑀸𑀬𑀁 𑀅𑀯𑀺𑀲𑁂𑀲𑀢𑁄 𑀅𑀝𑁆𑀞𑀦𑁆𑀦𑀁 𑀧𑀭𑀺𑀓𑁆𑀔𑀸𑀭𑀸𑀦𑀁 𑀅𑀦𑁆𑀢𑀭𑁂 𑀢𑀧𑁆𑀧𑀬𑁄𑀚𑀦𑀢𑀸 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂 𑀲𑀩𑁆𑀩𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁂𑀧𑀻𑀢𑀺 𑀦𑀯𑀧𑀭𑀺𑀓𑁆𑀔𑀸𑀭𑀺𑀓𑀸𑀤𑀬𑁄𑀧𑀺 𑀅𑀧𑁆𑀧𑀺𑀘𑁆𑀙𑀸𑀯 𑀲𑀦𑁆𑀢𑀼𑀝𑁆𑀞𑀸𑀯. 𑀦 𑀳𑀺 𑀢𑀢𑁆𑀣𑀓𑁂𑀦 𑀫𑀳𑀺𑀘𑁆𑀙𑀢𑀸, 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀯𑀸 𑀳𑁄𑀢𑀻𑀢𑀺.

𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀼𑀔𑀁 𑀯𑀺𑀳𑀭𑀢𑀺, 𑀢𑀢𑁄 𑀏𑀯 𑀲𑀼𑀔𑀯𑀺𑀳𑀸𑀭𑀝𑁆𑀞𑀸𑀦𑀪𑀽𑀢𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀯𑀸 𑀘𑀸𑀢𑀼𑀤𑁆𑀤𑀺𑀲𑁄. 𑀢𑀢𑁆𑀣 𑀘𑀸𑀬𑀁 𑀲𑀢𑁆𑀢𑁂 𑀯𑀸 𑀲𑀗𑁆𑀔𑀸𑀭𑁂 𑀯𑀸 𑀪𑀬𑁂𑀦 𑀦 𑀧𑀝𑀺𑀳𑀜𑁆𑀜𑀢𑀻𑀢𑀺 𑀅𑀧𑁆𑀧𑀝𑀺𑀖𑁄. 𑀤𑁆𑀯𑀸𑀤𑀲𑀯𑀺𑀥𑀲𑁆𑀲 𑀲𑀦𑁆𑀢𑁄𑀲𑀲𑁆𑀲 𑀯𑀲𑁂𑀦 𑀲𑀦𑁆𑀢𑀼𑀲𑁆𑀲𑀦𑀓𑁄 𑀲𑀦𑁆𑀢𑀼𑀲𑁆𑀲𑀫𑀸𑀦𑁄. 𑀇𑀢𑀭𑀻𑀢𑀭𑁂𑀦𑀸𑀢𑀺 𑀉𑀘𑁆𑀘𑀸𑀯𑀘𑁂𑀦. 𑀧𑀭𑀺𑀲𑁆𑀲𑀬𑀸𑀦𑀁 𑀩𑀸𑀳𑀺𑀭𑀸𑀦𑀁 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀁, 𑀅𑀩𑁆𑀪𑀦𑁆𑀢𑀭𑀸𑀦𑀜𑁆𑀘 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀓𑀸𑀬𑀘𑀺𑀢𑁆𑀢𑀼𑀧𑀤𑁆𑀤𑀯𑀸𑀦𑀁 𑀅𑀪𑀺𑀪𑀯𑀦𑀢𑁄 𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸. 𑀣𑀤𑁆𑀥𑀪𑀸𑀯𑀓𑀭𑀪𑀬𑀸𑀪𑀸𑀯𑁂𑀦 𑀅𑀘𑁆𑀙𑀫𑁆𑀪𑀻. 𑀏𑀓𑁄 𑀅𑀲𑀳𑀸𑀬𑁄. 𑀢𑀢𑁄 𑀏𑀯 𑀔𑀕𑁆𑀕𑀫𑀺𑀕𑀲𑀺𑀗𑁆𑀕𑀲𑀤𑀺𑀲𑀢𑀸𑀬 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄 𑀘𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀙𑀺𑀦𑁆𑀦𑀧𑀓𑁆𑀔𑁄, 𑀅𑀲𑀜𑁆𑀚𑀸𑀢𑀧𑀓𑁆𑀔𑁄 𑀯𑀸 𑀲𑀓𑀼𑀡𑁄 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 ‘‘𑀧𑀓𑁆𑀔𑀻 𑀲𑀓𑀼𑀡𑁄’’𑀢𑀺 𑀧𑀓𑁆𑀔𑀺-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀲𑀓𑀼𑀡𑁄 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀧𑀓𑁆𑀔𑀬𑀼𑀢𑁆𑀢𑁄 𑀲𑀓𑀼𑀡𑁄’’𑀢𑀺. 𑀬𑀲𑁆𑀲 𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕𑁄 𑀓𑀺𑀜𑁆𑀘𑀺 𑀞𑀧𑁂𑀢𑀩𑁆𑀩𑀁 𑀲𑀸𑀧𑁂𑀓𑁆𑀔𑀸𑀬 𑀞𑀧𑀦𑀜𑁆𑀘 𑀦𑀢𑁆𑀣𑀺, 𑀢𑀸𑀤𑀺𑀲𑁄 𑀅𑀬𑀁 𑀪𑀺𑀓𑁆𑀔𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄’’𑀢𑀺𑀆𑀤𑀺𑀫𑀸𑀳. 𑀅𑀭𑀺𑀬𑀦𑁆𑀢𑀺 𑀅𑀧𑁂𑀦𑁆𑀢𑀺 𑀢𑀢𑁄 𑀤𑁄𑀲𑀸, 𑀢𑁂𑀳𑀺 𑀯𑀸 𑀆𑀭𑀓𑀸𑀢𑀺 𑀅𑀭𑀺𑀬𑁄𑀢𑀺 𑀆𑀳 ‘‘𑀅𑀭𑀺𑀬𑁂𑀦𑀸𑀢𑀺 𑀦𑀺𑀤𑁆𑀤𑁄𑀲𑁂𑀦𑀸’’𑀢𑀺. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑀺. 𑀦𑀺𑀤𑁆𑀤𑁄𑀲𑀲𑀼𑀔𑀦𑁆𑀢𑀺 𑀦𑀺𑀭𑀸𑀫𑀺𑀲𑀲𑀼𑀔𑀁 𑀓𑀺𑀮𑁂𑀲𑀯𑀚𑁆𑀚𑀭𑀳𑀺𑀢𑀢𑁆𑀢𑀸.

𑁨𑁯𑁫. 𑀬𑀣𑀸𑀯𑀼𑀢𑁆𑀢𑁂 𑀲𑀻𑀮𑀲𑀁𑀯𑀭𑁂 𑀧𑀢𑀺𑀝𑁆𑀞𑀺𑀢𑀲𑁆𑀲𑁂𑀯 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀇𑀘𑁆𑀙𑀺𑀢𑀩𑁆𑀩𑁄 𑀢𑀤𑀥𑀺𑀝𑁆𑀞𑀸𑀦𑀢𑁄, 𑀢𑀲𑁆𑀲 𑀘 𑀧𑀭𑀺𑀧𑀸𑀮𑀓𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀽’’𑀢𑀺. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀼. 𑀬𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁫) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀲𑁆𑀲 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀁 𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁫) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀸𑀤𑀻𑀲𑀼 𑀦𑀺𑀫𑀺𑀢𑁆𑀢𑀸𑀤𑀺𑀕𑁆𑀕𑀸𑀳𑀧𑀭𑀺𑀯𑀚𑁆𑀚𑀦𑀮𑀓𑁆𑀔𑀡𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲 𑀓𑀺𑀮𑁂𑀲𑁂𑀳𑀺 𑀅𑀦𑀯𑀲𑀺𑀢𑁆𑀢𑀲𑀼𑀔𑀢𑀸 𑀅𑀯𑀺𑀓𑀺𑀡𑁆𑀡𑀲𑀼𑀔𑀢𑀸 𑀘𑀲𑁆𑀲 𑀯𑀼𑀢𑁆𑀢𑀸.

𑁨𑁯𑁬. 𑀧𑀘𑁆𑀘𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀧𑀘𑁆𑀘𑀬𑀧𑀸𑀭𑀺𑀧𑀽𑀭𑀺𑀁. 𑀇𑀫𑁂 𑀘𑀢𑁆𑀢𑀸𑀭𑁄𑀢𑀺 𑀲𑀻𑀮𑀲𑀁𑀯𑀭𑁄 𑀲𑀦𑁆𑀢𑁄𑀲𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀭𑀜𑁆𑀜𑀯𑀸𑀲𑀲𑁆𑀲 𑀲𑀫𑁆𑀪𑀸𑀭𑀸. 𑀢𑀺𑀭𑀘𑁆𑀙𑀸𑀦𑀕𑀢𑁂𑀳𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺 𑀇𑀲𑀺𑀲𑀺𑀗𑁆𑀕𑀲𑁆𑀲 𑀧𑀺𑀢𑀼𑀆𑀤𑀬𑁄 𑀯𑀺𑀬. 𑀯𑀦𑀘𑀭𑀓𑁂𑀳𑀻𑀢𑀺 𑀯𑀦𑀘𑀭𑀓𑀫𑀸𑀢𑀼𑀕𑀸𑀫𑁂𑀳𑀺. 𑀪𑁂𑀭𑀯𑀲𑀤𑁆𑀤𑀁 𑀲𑀸𑀯𑁂𑀦𑁆𑀢𑀺, 𑀢𑀸𑀯𑀢𑀸 𑀅𑀧𑀮𑀸𑀬𑀦𑁆𑀢𑀸𑀦𑀁 𑀳𑀢𑁆𑀣𑁂𑀳𑀺 𑀲𑀻𑀲𑀁…𑀧𑁂… 𑀓𑀭𑁄𑀦𑁆𑀢𑀺. 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀓𑀸𑀴𑀓𑀁 𑀯𑀸. 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀲𑀗𑁆𑀔𑀸𑀢𑀁 𑀢𑀺𑀮𑀓𑀁 𑀯𑀸. 𑀢𑀦𑁆𑀢𑀺 𑀧𑀻𑀢𑀺𑀁 𑀯𑀺𑀪𑀽𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄 𑀔𑀬𑀢𑁄 𑀲𑀫𑁆𑀫𑀲𑀦𑁆𑀢𑁄.

𑀯𑀺𑀯𑀺𑀢𑁆𑀢𑀦𑁆𑀢𑀺 𑀚𑀦𑀯𑀺𑀯𑀺𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀼𑀜𑁆𑀜’’𑀦𑁆𑀢𑀺. 𑀲𑀸 𑀘 𑀯𑀺𑀯𑀺𑀢𑁆𑀢𑀢𑀸 𑀦𑀺𑀲𑁆𑀲𑀤𑁆𑀤𑀪𑀸𑀯𑁂𑀦 𑀮𑀓𑁆𑀔𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲’’𑀦𑁆𑀢𑀺. 𑀆𑀯𑀲𑀣𑀪𑀽𑀢𑀁 𑀲𑁂𑀦𑀸𑀲𑀦𑀁 𑀯𑀺𑀳𑀭𑀺𑀢𑀩𑁆𑀩𑀝𑁆𑀞𑁂𑀦 𑀯𑀺𑀳𑀸𑀭𑀲𑁂𑀦𑀸𑀲𑀦𑀁. 𑀫𑀲𑀸𑀭𑀓𑀸𑀤𑀺 𑀫𑀜𑁆𑀘𑀧𑀻𑀞𑀁 𑀢𑀢𑁆𑀣 𑀅𑀢𑁆𑀣𑀭𑀺𑀢𑀩𑁆𑀩𑀁 𑀪𑀺𑀲𑀺𑀉𑀧𑀥𑀸𑀦𑀜𑁆𑀘 𑀫𑀜𑁆𑀘𑀧𑀻𑀞𑀲𑀫𑁆𑀩𑀦𑁆𑀥𑀺𑀢𑁄 𑀫𑀜𑁆𑀘𑀧𑀻𑀞𑀲𑁂𑀦𑀸𑀲𑀦𑀁. 𑀘𑀺𑀫𑀺𑀮𑀺𑀓𑀸𑀤𑀺 𑀪𑀽𑀫𑀺𑀬𑀁 𑀲𑀦𑁆𑀣𑀭𑀺𑀢𑀩𑁆𑀩𑀢𑀸𑀬 𑀲𑀦𑁆𑀣𑀢𑀲𑁂𑀦𑀸𑀲𑀦𑀁. 𑀭𑀼𑀓𑁆𑀔𑀫𑀽𑀮𑀸𑀤𑀺 𑀧𑀝𑀺𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀁 𑀘𑀗𑁆𑀓𑀫𑀦𑀸𑀤𑀻𑀦𑀁 𑀑𑀓𑀸𑀲𑀪𑀸𑀯𑀢𑁄 𑀑𑀓𑀸𑀲𑀲𑁂𑀦𑀸𑀲𑀦𑀁.

‘‘𑀅𑀦𑀼𑀘𑁆𑀙𑀯𑀺𑀓𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀅𑀦𑀼𑀘𑁆𑀙𑀯𑀺𑀓𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀘𑁆𑀙𑀦𑁆𑀦𑀦𑁆𑀢𑀺 𑀇𑀝𑁆𑀞𑀓𑀙𑀤𑀦𑀸𑀤𑀺𑀦𑀸 𑀅𑀦𑁆𑀢𑀫𑀲𑁄 𑀭𑀼𑀓𑁆𑀔𑀲𑀸𑀔𑀸𑀳𑀺𑀧𑀺 𑀦 𑀙𑀦𑁆𑀦𑀁.

𑀪𑀢𑁆𑀢𑀲𑁆𑀲 𑀧𑀘𑁆𑀙𑀢𑁄𑀢𑀺 𑀪𑀢𑁆𑀢𑀪𑀼𑀜𑁆𑀚𑀦𑀲𑁆𑀲 𑀧𑀘𑁆𑀙𑀢𑁄. 𑀊𑀭𑀼𑀩𑀤𑁆𑀥𑀸𑀲𑀦𑀦𑁆𑀢𑀺 𑀊𑀭𑀽𑀦𑀁 𑀅𑀥𑁄𑀩𑀦𑁆𑀥𑀦𑀯𑀲𑁂𑀦 𑀦𑀺𑀲𑀚𑁆𑀚𑀁. 𑀳𑁂𑀝𑁆𑀞𑀺𑀫𑀓𑀸𑀬𑀲𑁆𑀲 𑀅𑀦𑀼𑀚𑀼𑀓𑀝𑁆𑀞𑀧𑀦𑀁 𑀦𑀺𑀲𑀚𑁆𑀚𑀸𑀯𑀘𑀦𑁂𑀦𑁂𑀯 𑀩𑁄𑀥𑀺𑀢𑀦𑁆𑀢𑀺. 𑀉𑀚𑀼𑀁 𑀓𑀸𑀬𑀦𑁆𑀢𑀺 𑀏𑀢𑁆𑀣 𑀓𑀸𑀬-𑀲𑀤𑁆𑀤𑁄 𑀉𑀧𑀭𑀺𑀫𑀓𑀸𑀬𑀯𑀺𑀲𑀬𑁄𑀢𑀺 𑀆𑀳 ‘‘𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸’’𑀢𑀺. 𑀢𑀁 𑀧𑀦 𑀉𑀚𑀼𑀓𑀝𑁆𑀞𑀧𑀦𑀁 𑀲𑀭𑀽𑀧𑀢𑁄 𑀧𑀬𑁄𑀚𑀦𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀸𑀭𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀧𑀡𑀫𑀦𑁆𑀢𑀻𑀢𑀺 𑀦 𑀑𑀡𑀫𑀦𑁆𑀢𑀺. 𑀦 𑀧𑀭𑀺𑀧𑀢𑀢𑀻𑀢𑀺 𑀦 𑀯𑀺𑀕𑀘𑁆𑀙𑀢𑀺, 𑀯𑀻𑀣𑀺𑀁 𑀦 𑀯𑀺𑀮𑀗𑁆𑀖𑁂𑀢𑀺. 𑀢𑀢𑁄 𑀏𑀯 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀧𑁆𑀧𑀢𑁆𑀢𑀺𑀬𑀸 𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀤𑁆𑀥𑀺𑀁 𑀨𑀸𑀢𑀺𑀁 𑀉𑀧𑀕𑀘𑁆𑀙𑀢𑀺. 𑀫𑀼𑀔𑀲𑀫𑀻𑀧𑁂𑀢𑀺 𑀫𑀼𑀔𑀲𑁆𑀲 𑀲𑀫𑀻𑀧𑁂 𑀦𑀸𑀲𑀺𑀓𑀕𑁆𑀕𑁂 𑀯𑀸 𑀉𑀢𑁆𑀢𑀭𑁄𑀝𑁆𑀞𑁂 𑀯𑀸. 𑀇𑀥 𑀧𑀭𑀺-𑀲𑀤𑁆𑀤𑁄 𑀅𑀪𑀺-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔’’𑀦𑁆𑀢𑀺, 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄 ‘‘𑀧𑀭𑀺𑀡𑀸𑀬𑀺𑀓𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁬) 𑀯𑀺𑀬. 𑀦𑀺𑀬𑁆𑀬𑀸𑀦𑀝𑁆𑀞𑁄 𑀧𑀝𑀺𑀧𑀓𑁆𑀔𑀢𑁄 𑀦𑀺𑀕𑁆𑀕𑀫𑀦𑀝𑁆𑀞𑁄, 𑀢𑀲𑁆𑀫𑀸 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀲𑀢𑀺𑀦𑁆𑀢𑀺 𑀲𑀩𑁆𑀩𑀣𑀸 𑀕𑀳𑀺𑀢𑀸𑀲𑀫𑁆𑀫𑁄𑀲𑀁 𑀧𑀭𑀺𑀘𑁆𑀘𑀢𑁆𑀢𑀲𑀫𑁆𑀫𑁄𑀲𑀁 𑀲𑀢𑀺𑀁 𑀓𑀢𑁆𑀯𑀸, 𑀧𑀭𑀫𑀁 𑀲𑀢𑀺𑀦𑁂𑀧𑀓𑁆𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑀸𑀢𑀺 𑀏𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀁 𑀅𑀦𑀼𑀧𑁆𑀧𑀸𑀤𑀦𑀁 𑀅𑀧𑁆𑀧𑀯𑀢𑁆𑀢𑀦𑀁 𑀦 𑀧𑀝𑀺𑀧𑀓𑁆𑀔𑁂𑀦 𑀲𑀼𑀧𑁆𑀧𑀳𑀻𑀦𑀢𑀸. 𑀧𑀳𑀻𑀦𑀢𑁆𑀢𑀸𑀢𑀺 𑀘 𑀧𑀳𑀻𑀦𑀲𑀤𑀺𑀲𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀛𑀸𑀦𑀲𑁆𑀲 𑀅𑀦𑀥𑀺𑀕𑀢𑀢𑀸. 𑀢𑀣𑀸𑀧𑀺 𑀦𑀬𑀺𑀤𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀬 𑀲𑀪𑀸𑀯𑀢𑁄 𑀯𑀺𑀕𑀢𑀸𑀪𑀺𑀚𑁆𑀛𑀁, 𑀅𑀣 𑀔𑁄 𑀪𑀸𑀯𑀦𑀸𑀯𑀲𑁂𑀦. 𑀢𑁂𑀦𑀸𑀳 ‘‘𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀤𑀺𑀲𑁂𑀦𑀸’’𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀬𑀣𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀪𑀸𑀯𑁂𑀦 𑀯𑀺𑀕𑀢𑀸𑀪𑀺𑀚𑁆𑀛𑀁 𑀅𑀩𑁆𑀬𑀸𑀧𑀦𑁆𑀦𑀜𑁆𑀘, 𑀦 𑀪𑀸𑀯𑀦𑀸𑀬 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸, 𑀦 𑀏𑀯𑀫𑀺𑀤𑀁. 𑀇𑀤𑀁 𑀧𑀦 𑀘𑀺𑀢𑁆𑀢𑀁 𑀪𑀸𑀯𑀦𑀸𑀬 𑀧𑀭𑀺𑀲𑁄𑀥𑀺𑀢𑀢𑁆𑀢𑀸 𑀅𑀩𑁆𑀬𑀸𑀧𑀦𑁆𑀦𑀁 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑀁 𑀅𑀦𑀼𑀤𑁆𑀥𑀢𑀁 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀉𑀪𑀬𑀦𑁆𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀫𑀸𑀳.

𑁨𑁯𑁭. 𑀉𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑀻𑀢𑀺 𑀏𑀢𑁆𑀣 𑀉𑀘𑁆𑀙𑀺𑀦𑁆𑀤𑀦𑀁 𑀧𑀸𑀢𑀦𑀜𑁆𑀘 𑀢𑀸𑀲𑀁 𑀧𑀜𑁆𑀜𑀸𑀦𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑀫𑁂𑀯. 𑀇𑀢𑀺 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀧𑀜𑁆𑀜𑀸𑀦𑀁 𑀏𑀓𑀘𑁆𑀘𑀸𑀬 𑀘 𑀧𑀭𑀺𑀢𑁆𑀢𑀧𑀜𑁆𑀜𑀸𑀬 𑀅𑀦𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀦𑀻𑀯𑀭𑀡𑀸 𑀥𑀫𑁆𑀫𑀸 𑀇𑀢𑀭𑀸𑀬 𑀘 𑀲𑀫𑀢𑁆𑀣𑀢𑀁 𑀯𑀺𑀳𑀦𑀦𑁆𑀢𑀺𑀬𑁂𑀯𑀸𑀢𑀺 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸 𑀯𑀼𑀢𑁆𑀢𑀸. 𑀇𑀤𑀫𑁆𑀧𑀺 𑀧𑀞𑀫𑀚𑁆𑀛𑀸𑀦𑀁 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀧𑀢𑀺𑀝𑁆𑀞𑀸𑀧𑀺𑀬𑀫𑀸𑀦𑀁 𑀜𑀸𑀡𑀁 𑀧𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀜𑀸𑀡𑀧𑀤𑀁. 𑀜𑀸𑀡𑀁 𑀯𑀴𑀜𑁆𑀚𑁂𑀢𑀺 𑀏𑀢𑁆𑀣𑀸𑀢𑀺 𑀜𑀸𑀡𑀯𑀴𑀜𑁆𑀚𑀁.

𑁨𑁯𑁯. 𑀦 𑀢𑀸𑀯 𑀦𑀺𑀝𑁆𑀞𑀁 𑀕𑀢𑁄 𑀩𑀸𑀳𑀺𑀭𑀓𑀸𑀦𑀁 𑀜𑀸𑀡𑁂𑀦 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀸𑀦𑀺𑀧𑀺 𑀲𑀺𑀬𑀼𑀦𑁆𑀢𑀺. 𑀬𑀤𑀺 𑀏𑀯𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀫𑀕𑁆𑀕𑀜𑀸𑀡𑀧𑀤𑁂 𑀓𑀣𑀁 𑀦 𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀆𑀳 ‘‘𑀫𑀕𑁆𑀕𑀓𑁆𑀔𑀡𑁂𑀧𑀻’’𑀢𑀺𑀆𑀤𑀺. 𑀢𑀻𑀲𑀼 𑀭𑀢𑀦𑁂𑀲𑀼 𑀦𑀺𑀝𑁆𑀞𑀁 𑀕𑀢𑁄 𑀳𑁄𑀢𑀻𑀢𑀺 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀢𑀜𑁆𑀘 𑀆𑀭𑀩𑁆𑀪 𑀜𑀸𑀡𑁂𑀦 𑀦𑀺𑀝𑁆𑀞𑀁 𑀦𑀺𑀘𑁆𑀙𑀬𑀁 𑀉𑀧𑀕𑀢𑁄 𑀳𑁄𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀧𑀞𑀫𑀫𑀕𑁆𑀕𑁂𑀦𑁂𑀯 𑀲𑀩𑁆𑀩𑀲𑁄 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀲𑁆𑀲𑀧𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀦𑀢𑁆𑀣𑀺, 𑀢𑀢𑁆𑀣 𑀧𑀦 𑀬𑀣𑀸 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀅𑀭𑀳𑀢𑁄 𑀲𑀯𑀺𑀲𑀬𑁂 𑀜𑀸𑀡𑀁 𑀲𑀯𑀺𑀲𑁂𑀲𑀁 𑀑𑀕𑀸𑀳𑀢𑀺, 𑀦 𑀢𑀣𑀸 𑀅𑀦𑀸𑀕𑀸𑀫𑀺𑀆𑀤𑀻𑀦𑀦𑁆𑀢𑀺 𑀭𑀢𑀦𑀢𑁆𑀢𑀬𑁂 𑀲𑀸𑀢𑀺𑀲𑀬𑀁 𑀜𑀸𑀡𑀦𑀺𑀘𑁆𑀙𑀬𑀕𑀫𑀦𑀁 𑀲𑀦𑁆𑀥𑀸𑀬 ‘‘𑀅𑀕𑁆𑀕𑀫𑀕𑁆𑀕𑀯𑀲𑁂𑀦 𑀢𑀢𑁆𑀣𑀦𑀺𑀝𑁆𑀞𑀸𑀕𑀫𑀦𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦𑁂𑀢𑁆𑀣 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺.

𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.