𑁬. 𑀧𑀸𑀲𑀭𑀸𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁨. 𑀲𑀸𑀥𑀼𑀫𑀬𑀦𑁆𑀢𑀺 𑀏𑀢𑁆𑀣 𑀲𑀸𑀥𑀼-𑀲𑀤𑁆𑀤𑁄 𑀆𑀬𑀸𑀘𑀦𑀢𑁆𑀣𑁄, 𑀦 ‘‘𑀲𑀸𑀥𑀸𑀯𑀼𑀲𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁨) 𑀯𑀺𑀬 𑀅𑀪𑀺𑀦𑀦𑁆𑀤𑀦𑀸𑀤𑀺𑀅𑀢𑁆𑀣𑁄𑀢𑀺 𑀆𑀳 ‘‘𑀆𑀬𑀸𑀘𑀦𑁆𑀢𑀸’’𑀢𑀺. 𑀢𑁂𑀦𑀸𑀳 𑀧𑀸𑀴𑀺𑀬𑀁 ‘‘𑀮𑀪𑁂𑀬𑁆𑀬𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀲𑀓𑁆𑀓𑁄𑀦𑁆𑀢𑀺, 𑀓𑀲𑁆𑀫𑀸? 𑀩𑀼𑀤𑁆𑀥𑀸 𑀳𑀺 𑀕𑀭𑀽 𑀳𑁄𑀦𑁆𑀢𑀺, 𑀧𑀭𑀫𑀕𑀭𑀽 𑀉𑀢𑁆𑀢𑀫𑀁 𑀕𑀸𑀭𑀯𑀝𑁆𑀞𑀸𑀦𑀁, 𑀦 𑀬𑀣𑀸 𑀢𑀣𑀸 𑀉𑀧𑀲𑀗𑁆𑀓𑀫𑀦𑀻𑀬𑀸. 𑀢𑁂𑀦𑀸𑀳 ‘‘𑀏𑀓𑀘𑀸𑀭𑀺𑀓𑁄 𑀲𑀻𑀳𑁄’’𑀢𑀺𑀆𑀤𑀺.

‘‘𑀧𑀸𑀓𑀝𑀓𑀺𑀭𑀺𑀬𑀸𑀬𑀸’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀬𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀕𑀯𑀸 𑀲𑀩𑁆𑀩𑀓𑀸𑀮𑀁 𑀓𑀺𑀫𑁂𑀯𑀫𑀓𑀸𑀲𑀻𑀢𑀺? 𑀦 𑀲𑀩𑁆𑀩𑀓𑀸𑀮𑀫𑁂𑀯𑀫𑀓𑀸𑀲𑀺. 𑀬𑀤𑀸 𑀧𑀦 𑀅𑀓𑀸𑀲𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸 𑀧𑀞𑀫𑀩𑁄𑀥𑀺𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂𑀢𑀺 𑀇𑀫𑀺𑀦𑀸 𑀧𑀼𑀭𑀺𑀲𑀢𑁆𑀢𑀪𑀸𑀯𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. 𑀥𑀦𑀧𑀭𑀺𑀘𑁆𑀘𑀸𑀕𑁄 𑀓𑀢𑁄 𑀦𑀸𑀫 𑀦𑀢𑁆𑀣𑀺 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀸𑀮𑀸𑀓𑀘𑀯𑀭𑀦𑁆𑀢𑀺 𑀫𑀺𑀮𑀸𑀢𑀫𑀸𑀮𑀸𑀓𑀘𑀯𑀭𑀁. 𑀭𑀚𑁄𑀚𑀮𑁆𑀮𑀁 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀘𑁆𑀙𑀢𑀭𑀙𑀯𑀺𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀼𑀔𑀼𑀫𑀢𑁆𑀢𑀸 𑀙𑀯𑀺𑀬𑀸 𑀓𑀸𑀬𑁂 𑀭𑀚𑁄𑀚𑀮𑁆𑀮𑀁 𑀦 𑀮𑀺𑀫𑁆𑀧𑀢𑀻’’𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀪𑀕𑀯𑀸 𑀦𑀳𑀸𑀬𑀢𑀻𑀢𑀺 𑀆𑀳 ‘‘𑀉𑀢𑀼𑀕𑁆𑀕𑀳𑀡𑀢𑁆𑀣’’𑀦𑁆𑀢𑀺.

𑀯𑀺𑀳𑀸𑀭𑁄𑀢𑀺 𑀚𑁂𑀢𑀯𑀦𑀯𑀺𑀳𑀸𑀭𑁄. 𑀯𑀻𑀲𑀢𑀺𑀉𑀲𑀪𑀁 𑀕𑀸𑀯𑀼𑀢𑀲𑁆𑀲 𑀘𑀢𑀼𑀢𑁆𑀣𑁄 𑀪𑀸𑀕𑁄𑀢𑀺 𑀯𑀤𑀦𑁆𑀢𑀺. 𑀓𑀤𑀸𑀘𑀻𑀢𑀺 𑀓𑀲𑁆𑀫𑀺𑀜𑁆𑀘𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂. 𑀅𑀘𑀮𑀫𑁂𑀯𑀸𑀢𑀺 𑀅𑀧𑀭𑀺𑀯𑀢𑁆𑀢𑀫𑁂𑀯 𑀅𑀦𑀜𑁆𑀜𑀪𑀸𑀯𑀢𑁄, 𑀫𑀜𑁆𑀘𑀸𑀦𑀁 𑀧𑀦 𑀅𑀧𑁆𑀧𑀫𑀳𑀦𑁆𑀢𑀢𑀸𑀳𑀺 𑀧𑀸𑀤𑀸𑀦𑀁 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀲𑁆𑀲 𑀳𑀸𑀦𑀺𑀯𑀟𑁆𑀠𑀺𑀬𑁄 𑀳𑁄𑀦𑁆𑀢𑀺𑀬𑁂𑀯.

𑀬𑀦𑁆𑀢𑀦𑀸𑀴𑀺𑀓𑀸𑀳𑀺 𑀧𑀭𑀺𑀧𑀼𑀡𑁆𑀡𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀳𑀺. 𑀦𑁆𑀳𑀸𑀦𑀯𑀢𑁆𑀢𑀦𑁆𑀢𑀺 ‘‘𑀧𑀩𑁆𑀩𑀚𑀺𑀢𑁂𑀦 𑀦𑀸𑀫 𑀏𑀯𑀁 𑀦𑁆𑀳𑀸𑀬𑀺𑀢𑀩𑁆𑀩’’𑀦𑁆𑀢𑀺 𑀦𑀳𑀸𑀦𑀘𑀸𑀭𑀺𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸. 𑀬𑀲𑁆𑀫𑀸 𑀪𑀕𑀯𑀢𑁄 𑀲𑀭𑀻𑀭𑀁 𑀲𑀼𑀥𑀦𑁆𑀢𑀘𑀸𑀫𑀻𑀓𑀭𑀲𑀫𑀸𑀦𑀯𑀡𑁆𑀡𑀁 𑀲𑀼𑀧𑀭𑀺𑀲𑁄𑀥𑀺𑀢𑀧𑀯𑀸𑀴𑀭𑀼𑀘𑀺𑀭𑀓𑀭𑀘𑀭𑀡𑀸𑀯𑀭𑀁 𑀲𑀼𑀯𑀺𑀲𑀼𑀤𑁆𑀥𑀦𑀻𑀮𑀭𑀢𑀦𑀸𑀯𑀴𑀺𑀲𑀤𑀺𑀲𑀓𑁂𑀲𑀢𑀦𑀼𑀭𑀼𑀳𑀁, 𑀢𑀲𑁆𑀫𑀸 𑀢𑀳𑀁 𑀢𑀳𑀁 𑀯𑀺𑀦𑀺𑀲𑁆𑀲𑀢𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑀭𑀲𑀽𑀧𑀲𑁄𑀪𑀺𑀢𑀁 𑀉𑀧𑀭𑀺 𑀫𑀳𑀕𑁆𑀖𑀭𑀢𑀦𑀸𑀯𑀴𑀺𑀲𑀜𑁆𑀙𑀸𑀤𑀺𑀢𑀁 𑀚𑀗𑁆𑀕𑀫𑀫𑀺𑀯 𑀓𑀦𑀓𑀕𑀺𑀭𑀺𑀲𑀺𑀔𑀭𑀁 𑀯𑀺𑀭𑁄𑀘𑀺𑀢𑁆𑀣. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀤𑀲𑀩𑀮𑀲𑁆𑀲 𑀲𑀭𑀻𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀲𑀫𑀦𑁆𑀢𑀢𑁄 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀆𑀥𑀸𑀯𑀦𑁆𑀢𑀻 𑀯𑀺𑀥𑀸𑀯𑀦𑁆𑀢𑀻 𑀭𑀢𑀦𑀸𑀯𑀴𑀺𑀭𑀢𑀦𑀤𑀸𑀫-𑀭𑀢𑀦𑀘𑀼𑀡𑁆𑀡-𑀯𑀺𑀧𑁆𑀧𑀓𑀺𑀡𑁆𑀡𑀁 𑀯𑀺𑀬, 𑀧𑀲𑀸𑀭𑀺𑀢𑀭𑀢𑀦𑀘𑀺𑀢𑁆𑀢𑀓𑀜𑁆𑀘𑀦𑀧𑀝𑁆𑀝𑀫𑀺𑀯, 𑀆𑀲𑀺𑀜𑁆𑀘𑀫𑀸𑀦𑀮𑀸𑀔𑀸𑀭𑀲𑀥𑀸𑀭𑀸-𑀘𑀺𑀢𑀫𑀺𑀯, 𑀉𑀓𑁆𑀓𑀸𑀲𑀢𑀦𑀺𑀧𑀸𑀢𑀲𑀫𑀸𑀓𑀼𑀮𑀫𑀺𑀯, 𑀦𑀺𑀭𑀦𑁆𑀢𑀭𑀁 𑀯𑀺𑀧𑁆𑀧𑀓𑀺𑀡𑁆𑀡-𑀓𑀡𑀺𑀓𑀸𑀭-𑀓𑀺𑀗𑁆𑀓𑀺𑀡𑀺𑀓-𑀧𑀼𑀧𑁆𑀨𑀫𑀺𑀯, 𑀯𑀸𑀬𑀼𑀯𑁂𑀕𑀲𑀫𑀼𑀤𑁆𑀥𑀢-𑀘𑀺𑀦𑀧𑀺𑀝𑁆𑀞𑀘𑀼𑀡𑁆𑀡-𑀭𑀜𑁆𑀚𑀺𑀢𑀫𑀺𑀯, 𑀇𑀦𑁆𑀤𑀥𑀦𑀼-𑀯𑀺𑀚𑁆𑀚𑀼𑀮𑀢𑀸-𑀯𑀺𑀢𑀸𑀦𑀲𑀦𑁆𑀣𑀢𑀫𑀺𑀯, 𑀕𑀕𑀦𑀢𑀮𑀁 𑀢𑀁 𑀞𑀸𑀦𑀁 𑀧𑀯𑀦𑀜𑁆𑀘 𑀲𑀫𑁆𑀫𑀸 𑀨𑀭𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀡𑁆𑀡𑀪𑀽𑀫𑀺 𑀦𑀸𑀫𑁂𑀲𑀸’’𑀢𑀺𑀆𑀤𑀺. 𑀅𑀢𑁆𑀣𑀦𑁆𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑀁. 𑀉𑀧𑀫𑀸𑀬𑁄𑀢𑀺 ‘‘𑀈𑀤𑀺𑀲𑁄 𑀘 𑀳𑁄𑀢𑀻’’𑀢𑀺 𑀬𑀣𑀸𑀭𑀳𑀁 𑀢𑀤𑀦𑀼𑀘𑁆𑀙𑀯𑀺𑀓𑀸 𑀉𑀧𑀫𑀸. 𑀓𑀸𑀭𑀡𑀸𑀦𑀻𑀢𑀺 𑀉𑀧𑀫𑀼𑀧𑀫𑁂𑀬𑁆𑀬𑀲𑀫𑁆𑀩𑀦𑁆𑀥𑀯𑀺𑀪𑀸𑀯𑀦𑀸𑀦𑀺 𑀓𑀸𑀭𑀡𑀸𑀦𑀺. 𑀧𑀽𑀭𑁂𑀢𑁆𑀯𑀸𑀢𑀺 𑀯𑀡𑁆𑀡𑀦𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸. 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀅𑀢𑀺𑀢𑁆𑀣𑁂 𑀧𑀓𑁆𑀔𑀦𑁆𑀤𑁄’’𑀢𑀺 𑀅𑀯𑀢𑁆𑀢𑀩𑁆𑀩𑀢𑁆𑀢𑀸.

𑁨𑁭𑁩. 𑀓𑀡𑁆𑀡𑀺𑀓𑀸𑀢𑀺 𑀲𑀭𑀻𑀭𑀕𑀢𑀩𑀺𑀦𑁆𑀤𑀼𑀓𑀢𑀸𑀦𑀺 𑀫𑀡𑁆𑀟𑀮𑀸𑀦𑀺. 𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀦𑁆𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀁 𑀲𑀗𑁆𑀖𑀸𑀝𑀺𑀜𑁆𑀘 𑀲𑀦𑁆𑀥𑀸𑀬 𑀯𑀤𑀢𑀺. 𑀓𑀺𑀁 𑀧𑀦𑀸𑀬𑀁 𑀦𑀬𑁄 𑀩𑀼𑀤𑁆𑀥𑀸𑀦𑀫𑁆𑀧𑀺 𑀲𑀭𑀻𑀭𑁂 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀯𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀧𑀦𑁂𑀢𑀁 𑀓𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀸𑀦𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀫𑀦𑀯𑀲𑁂𑀦 𑀓𑀸𑀬𑀲𑁆𑀲𑀸𑀪𑀺𑀦𑀻𑀳𑀭𑀡𑀁 𑀕𑀫𑀦𑀸𑀪𑀺𑀳𑀸𑀭𑁄. 𑀬𑀣𑀸𑀥𑀺𑀧𑁆𑀧𑀸𑀬𑀸𑀯𑀢𑁆𑀢𑀦𑀁 𑀅𑀥𑀺𑀧𑁆𑀧𑀸𑀬𑀓𑁄𑀧𑀦𑀁.

𑀅𑀜𑁆𑀜𑀢𑀭𑀸𑀬 𑀧𑀸𑀭𑀫𑀺𑀬𑀸𑀢𑀺 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀸. 𑀯𑀻𑀭𑀺𑀬𑀧𑀸𑀭𑀫𑀺𑀬𑀸𑀢𑀺 𑀅𑀧𑀭𑁂. 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀲𑁆𑀲𑀸𑀢𑀺 𑀫𑀳𑀦𑁆𑀢𑀲𑁆𑀲 𑀘𑀭𑀺𑀫𑀪𑀯𑁂 𑀅𑀪𑀺𑀦𑀺𑀓𑁆𑀔𑀫𑀦𑀲𑁆𑀲. 𑀢𑀜𑁆𑀳𑀺 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀫𑀳𑀦𑁆𑀢𑀜𑁆𑀘 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀫𑀳𑀦𑁆𑀢𑀜𑁆𑀘 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀧𑀚𑀳𑀺𑀢𑁆𑀯𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀘 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀪𑁂𑀤𑀲𑁆𑀲 𑀫𑀳𑀢𑁄 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀧𑀯𑀢𑁆𑀢𑀢𑁆𑀢𑀸 𑀫𑀳𑀦𑀻𑀬𑀢𑀸𑀬 𑀘 𑀫𑀳𑀦𑁆𑀢𑀁 𑀅𑀪𑀺𑀦𑀺𑀓𑁆𑀔𑀫𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀧𑀼𑀭𑀺𑀫𑁄𑀢𑀺 ‘‘𑀓𑀢𑀫𑀸𑀬 𑀦𑀼 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀯𑀣𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀅𑀢𑁆𑀣𑁄. 𑀓𑀸 𑀘 𑀧𑀦 𑀯𑁄𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁂. 𑀢𑁂𑀦 𑀬𑀣𑀸𑀧𑀼𑀘𑁆𑀙𑀺𑀢𑀸𑀬 𑀓𑀣𑀸𑀬 𑀯𑀓𑁆𑀔𑀫𑀸𑀦𑀁 𑀯𑀺𑀧𑁆𑀧𑀓𑀢𑀪𑀸𑀯𑀁 𑀚𑁄𑀢𑁂𑀢𑀺. 𑀧𑀦-𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁂. 𑀬𑀸𑀬 𑀳𑀺 𑀓𑀣𑀸𑀬 𑀢𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀲𑀸 𑀏𑀯 𑀅𑀦𑁆𑀢𑀭𑀸𑀓𑀣𑀸𑀪𑀽𑀢𑀸 𑀯𑀺𑀧𑁆𑀧𑀓𑀢𑀸 𑀯𑀺𑀲𑁂𑀲𑁂𑀦 𑀧𑀼𑀦 𑀧𑀼𑀘𑁆𑀙𑀻𑀬𑀢𑀺. 𑀅𑀜𑁆𑀜𑀸𑀢𑀺 𑀅𑀦𑁆𑀢𑀭𑀸-𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳. 𑀅𑀜𑁆𑀜𑀢𑁆𑀣𑁄 𑀳𑀺 𑀅𑀬𑀁 𑀅𑀦𑁆𑀢𑀭𑀸-𑀲𑀤𑁆𑀤𑁄 ‘‘𑀪𑀽𑀫𑀦𑁆𑀢𑀭𑀁 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀲𑀫𑀬𑀦𑁆𑀢𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬, 𑀅𑀦𑁆𑀢𑀭𑀸𑀢𑀺 𑀯𑀸 𑀯𑁂𑀫𑀚𑁆𑀛𑁂𑀢𑀺 𑀅𑀢𑁆𑀣𑁄. 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸𑀢𑀺 ‘‘𑀓𑀺𑀁 𑀲𑀻𑀮𑀁 𑀦𑀸𑀫, 𑀓𑀣𑀜𑁆𑀘 𑀧𑀽𑀭𑁂𑀢𑀩𑁆𑀩𑀁, 𑀓𑀸𑀦𑀺 𑀘𑀲𑁆𑀲 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀸𑀦𑀻’’𑀢𑀺𑀆𑀤𑀺𑀦𑀸 𑀅𑀧𑁆𑀧𑀺𑀘𑁆𑀙𑀸𑀤𑀺𑀦𑀺𑀲𑁆𑀲𑀺𑀢𑀸 𑀲𑀻𑀮𑀸𑀤𑀺𑀦𑀺𑀲𑁆𑀲𑀺𑀢𑀸 𑀘 𑀓𑀣𑀸. 𑀅𑀭𑀺𑀬𑁄𑀢𑀺 𑀦𑀺𑀤𑁆𑀤𑁄𑀲𑁄. 𑀅𑀣 𑀯𑀸 𑀅𑀢𑁆𑀣𑀓𑀸𑀫𑁂𑀳𑀺 𑀅𑀭𑀡𑀻𑀬𑁄𑀢𑀺 𑀅𑀭𑀺𑀬𑁄, 𑀅𑀭𑀺𑀬𑀸𑀦𑀁 𑀅𑀬𑀦𑁆𑀢𑀺 𑀯𑀸 𑀅𑀭𑀺𑀬𑁄𑀢𑀺. 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀯𑀲𑁂𑀦 𑀢𑀼𑀡𑁆𑀳𑀻 𑀪𑀯𑀦𑁆𑀢𑀺, 𑀦 𑀏𑀓𑀘𑁆𑀘𑀩𑀸𑀳𑀺𑀭𑀓𑀧𑀩𑁆𑀩𑀚𑀺𑀢𑀸 𑀯𑀺𑀬 𑀫𑀽𑀕𑀩𑁆𑀩𑀢𑀲𑀫𑀸𑀤𑀸𑀦𑁂𑀦. 𑀤𑀼𑀢𑀺𑀬𑀚𑁆𑀛𑀸𑀦𑀫𑁆𑀧𑀺 𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄 𑀯𑀘𑀻𑀲𑀗𑁆𑀔𑀸𑀭𑀧𑀳𑀸𑀦𑀢𑁄. 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀧𑀸𑀭𑀺𑀳𑀸𑀭𑀺𑀬 𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺. 𑀛𑀸𑀦𑀦𑁆𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀁.

𑁨𑁭𑁪. ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀬’’𑀦𑁆𑀢𑀺 (𑀫. 𑀦𑀺. 𑁧.𑁨𑁭𑁩; 𑀉𑀤𑀸. 𑁧𑁨, 𑁨𑁮, 𑁨𑁯) 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀢𑀲𑁆𑀲𑀸 𑀉𑀧𑀭𑀺𑀤𑁂𑀲𑀦𑀸𑀬 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑁂𑀲𑀦𑀸𑀢𑀺 𑀓𑁄 𑀅𑀦𑀼𑀲𑀦𑁆𑀥𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀁 𑀧𑀼𑀘𑁆𑀙𑀢𑀺. 𑀅𑀬𑀁 𑀢𑀼𑀫𑁆𑀳𑀸𑀓𑀁 𑀧𑀭𑀺𑀬𑁂𑀲𑀦𑀸𑀢𑀺 𑀬𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀧𑀝𑀺𑀩𑀤𑁆𑀥𑀸 𑀥𑀫𑁆𑀫𑀻 𑀓𑀣𑀸, 𑀲𑀸 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀧𑀭𑀺𑀬𑁂𑀲𑀦𑀸 𑀥𑀫𑁆𑀫𑀯𑀺𑀘𑀸𑀭𑀡𑀸 𑀅𑀭𑀺𑀬𑀧𑀭𑀺𑀬𑁂𑀲𑀦𑀸 𑀦𑀸𑀫. 𑀅𑀧𑀸𑀬𑀫𑀕𑁆𑀕𑀦𑁆𑀢𑀺 𑀅𑀦𑀢𑁆𑀣𑀸𑀯𑀳𑀁 𑀫𑀕𑁆𑀕𑀁. 𑀉𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑀁 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀉𑀤𑁆𑀤𑁂𑀲𑀸𑀦𑀼𑀧𑀼𑀩𑁆𑀩𑀺𑀁 𑀮𑀗𑁆𑀖𑀺𑀢𑁆𑀯𑀸. 𑀥𑀫𑁆𑀫-𑀲𑀤𑁆𑀤𑁄 ‘‘𑀅𑀫𑁄𑀲𑀥𑀫𑁆𑀫𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀧𑀓𑀢𑀺𑀧𑀭𑀺𑀬𑀸𑀬𑁄. 𑀚𑀸𑀬𑀦𑀲𑀪𑀸𑀯𑁄𑀢𑀺 𑀚𑀸𑀬𑀦𑀧𑀓𑀢𑀺𑀓𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀩𑁆𑀩𑀢𑁆𑀣𑀸𑀢𑀺 𑀬𑀣𑀸 ‘‘𑀧𑀼𑀢𑁆𑀢𑀪𑀭𑀺𑀬’’𑀦𑁆𑀢𑀺 𑀤𑁆𑀯𑀦𑁆𑀤𑀲𑀫𑀸𑀲𑀯𑀲𑁂𑀦 𑀏𑀓𑀢𑁆𑀢𑀁, 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣 ‘‘𑀤𑀸𑀲𑀺𑀤𑀸𑀲’’𑀦𑁆𑀢𑀺𑀆𑀤𑀻𑀲𑀼 𑀲𑀩𑁆𑀩𑀧𑀤𑁂𑀲𑀼. 𑀧𑀭𑀢𑁄 𑀯𑀺𑀓𑀸𑀭𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀤𑀸 𑀚𑀸𑀢𑀭𑀽𑀧𑀫𑁂𑀯 𑀳𑁄𑀢𑀻𑀢𑀺 𑀚𑀸𑀢𑀭𑀽𑀧𑀁, 𑀲𑀼𑀯𑀡𑁆𑀡𑀁. 𑀥𑀯𑀮𑀲𑀪𑀸𑀯𑀢𑀸𑀬 𑀭𑀜𑁆𑀚𑀻𑀬𑀢𑀻𑀢𑀺 𑀭𑀚𑀢𑀁, 𑀭𑀽𑀧𑀺𑀬𑀁. 𑀇𑀥 𑀧𑀦 𑀲𑀼𑀯𑀡𑁆𑀡𑀁 𑀞𑀧𑁂𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀭𑀳𑀁 𑀭𑀚𑀢𑀁𑀢𑁂𑀯 𑀕𑀳𑀺𑀢𑀁. 𑀉𑀧𑀥𑀻𑀬𑀢𑀺 𑀏𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀉𑀧𑀥𑀬𑁄. 𑀘𑀼𑀢𑀻𑀲𑀗𑁆𑀔𑀸𑀢𑀁 𑀫𑀭𑀡𑀦𑁆𑀢𑀺 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀔𑀦𑁆𑀥𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀫𑀭𑀡𑀫𑀸𑀳. 𑀔𑀡𑀺𑀓𑀦𑀺𑀭𑁄𑀥𑁄 𑀧𑀦 𑀔𑀡𑁂 𑀔𑀡𑁂. 𑀢𑁂𑀦𑀸𑀳 ‘‘𑀲𑀢𑁆𑀢𑀸𑀦𑀁 𑀯𑀺𑀬𑀸’’𑀢𑀺. 𑀲𑀁𑀓𑀺𑀮𑀺𑀲𑁆𑀲𑀢𑀻𑀢𑀺 𑀤𑀽𑀲𑀯𑀺𑀲𑁂𑀦 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀽𑀲𑀺𑀲𑁆𑀲𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀚𑀸𑀢𑀭𑀽𑀧𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸 𑀅𑀬𑁄 𑀮𑁄𑀳’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁫.𑁨𑁩). 𑀫𑀮𑀁 𑀕𑀳𑁂𑀢𑁆𑀯𑀸𑀢𑀺 𑀬𑁂𑀳𑀺 𑀲𑀳𑀬𑁄𑀕𑀢𑁄 𑀫𑀮𑀺𑀦𑀁 𑀳𑁄𑀢𑀺, 𑀢𑁂𑀲𑀁 𑀫𑀮𑀺𑀦𑀪𑀸𑀯𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀫𑀮𑀁 𑀕𑀳𑁂𑀢𑁆𑀯𑀸. 𑀚𑀻𑀭𑀡𑀢𑁄 𑀚𑀭𑀸𑀥𑀫𑁆𑀫𑀯𑀸𑀭𑁂 𑀚𑀸𑀢𑀭𑀽𑀧𑀁 𑀕𑀳𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀬𑁂 𑀧𑀦 𑀚𑀸𑀢𑀺𑀥𑀫𑁆𑀫𑀯𑀸𑀭𑁂𑀧𑀺 𑀚𑀸𑀢𑀭𑀽𑀧𑀁 𑀦 𑀧𑀞𑀦𑁆𑀢𑀺, 𑀢𑁂𑀲𑀁 𑀇𑀢𑀭𑁂𑀲𑀁 𑀯𑀺𑀬 𑀚𑀻𑀭𑀡𑀥𑀫𑁆𑀫𑀯𑀸𑀭𑁂 𑀲𑀭𑀽𑀧𑀢𑁄 𑀅𑀦𑀸𑀕𑀢𑀫𑁆𑀧𑀺 𑀉𑀧𑀥𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀕𑁆𑀕𑀳𑁂 𑀞𑀺𑀢𑀸𑀦𑀁 𑀧𑀦 𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑁂 𑀅𑀧𑀸𑀓𑀝𑀸𑀦𑀫𑁆𑀧𑀺 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀁 𑀯𑀲𑁂𑀦 𑀬𑁄𑀚𑀦𑀸 𑀮𑀩𑁆𑀪𑀢𑁂𑀯. 𑀚𑀸𑀢𑀭𑀽𑀧𑀲𑀻𑀲𑁂𑀦 𑀘𑁂𑀢𑁆𑀣 𑀲𑀩𑁆𑀩𑀲𑁆𑀲𑀧𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁, 𑀧𑀼𑀢𑁆𑀢𑀪𑀭𑀺𑀬𑀸𑀤𑀺𑀕𑁆𑀕𑀳𑀡𑁂𑀦 𑀯𑀺𑀬 𑀫𑀺𑀢𑁆𑀢𑀸𑀫𑀘𑁆𑀘𑀸𑀤𑀺𑀕𑁆𑀕𑀳𑀡𑀁.

𑁨𑁭𑁫. 𑀅𑀭𑀺𑀬𑁂𑀳𑀺 𑀧𑀭𑀺𑀬𑁂𑀲𑀦𑀸, 𑀅𑀭𑀺𑀬𑀸𑀦𑀁 𑀧𑀭𑀺𑀬𑁂𑀲𑀦𑀸𑀢𑀺 𑀯𑀸 𑀅𑀭𑀺𑀬𑀧𑀭𑀺𑀬𑁂𑀲𑀦𑀸𑀢𑀺 𑀲𑀫𑀸𑀲𑀤𑁆𑀯𑀬𑀁 𑀤𑀲𑁆𑀲𑁂𑀢𑀺 ‘‘𑀅𑀬𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸.

𑁨𑁭𑁬. 𑀫𑀽𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀁 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀲𑁆𑀲 𑀫𑀽𑀮𑀪𑀸𑀯𑁂𑀲𑀼𑀆𑀤𑀻𑀦𑀯𑀤𑀲𑁆𑀲𑀦𑀁, 𑀢𑀢𑁄 𑀧𑀝𑁆𑀞𑀸𑀬. 𑀬𑀲𑁆𑀫𑀸 𑀢𑁂 𑀪𑀺𑀓𑁆𑀔𑀽 𑀢𑀢𑁆𑀣 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀲𑀸 𑀘 𑀦𑁂𑀲𑀁 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀢𑀲𑁆𑀫𑀸 𑀪𑀕𑀯𑀸 𑀢𑁂𑀲𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀓𑀣𑀁 𑀓𑀣𑁂𑀢𑀼𑀁 𑀆𑀭𑀪𑀺. 𑀅𑀳𑀫𑁆𑀧𑀺 𑀧𑀼𑀩𑁆𑀩𑁂𑀢𑀺 𑀯𑀺𑀲𑁂𑀲𑀯𑀘𑀦𑀁 𑀅𑀧𑀭𑀺𑀧𑀓𑁆𑀓𑀜𑀸𑀡𑁂𑀦 𑀲𑀬𑀁 𑀘𑀭𑀺𑀫𑀪𑀯𑁂 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀢𑀺𑀯𑀺𑀥𑀦𑀸𑀝𑀓𑀧𑀭𑀺𑀯𑀸𑀭𑀲𑁆𑀲 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀸𑀬 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀼𑀪𑀯𑀦𑀁, 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀥𑀸𑀦𑀧𑀤𑀳𑀦𑀯𑀲𑁂𑀦 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀜𑁆𑀘 𑀲𑀦𑁆𑀥𑀸𑀬𑀸𑀳. 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀺𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀯𑀕𑁆𑀕𑀺𑀬𑀸𑀧𑀻𑀢𑀺 𑀬𑀣𑀸𑀲𑀓𑀁 𑀕𑀺𑀳𑀺𑀪𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀢𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁂 𑀞𑀺𑀢𑀸 𑀲𑀢𑁆𑀣𑀼 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀤𑁂𑀲𑀦𑀸𑀬 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩; 𑀧𑀝𑀺. 𑀫. 𑁨.𑁩𑁦) 𑀢𑀫𑁆𑀧𑀺 𑀧𑀳𑀸𑀬 𑀅𑀭𑀺𑀬𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀺𑀁𑀲𑀽𑀢𑀺.

𑁨𑁭𑁭. 𑀓𑀸𑀫𑀁 𑀤𑀳𑀭-𑀲𑀤𑁆𑀤𑁄 ‘‘𑀤𑀳𑀭𑀁 𑀓𑀼𑀫𑀸𑀭𑀁 𑀫𑀦𑁆𑀤𑀁 𑀉𑀢𑁆𑀢𑀸𑀦𑀲𑁂𑀬𑁆𑀬𑀓’’𑀦𑁆𑀢𑀺 (𑀫. 𑀦𑀺. 𑁧.𑁪𑁯𑁬) 𑀏𑀢𑁆𑀣 𑀩𑀸𑀮𑀤𑀸𑀭𑀓𑁂 𑀆𑀕𑀢𑁄, ‘‘𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀧𑀦 𑀯𑀓𑁆𑀔𑀫𑀸𑀦𑀢𑁆𑀢𑀸 𑀬𑀼𑀯𑀸𑀯𑀢𑁆𑀣𑀸 𑀇𑀥 𑀤𑀳𑀭-𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀢𑀭𑀼𑀡𑁄𑀯 𑀲𑀫𑀸𑀦𑁄’’𑀢𑀺. 𑀧𑀞𑀫𑀯𑀬𑁂𑀦 𑀏𑀓𑀽𑀦𑀢𑀺𑀁𑀲𑀯𑀬𑀢𑁆𑀢𑀸. 𑀚𑀸𑀢𑀺𑀬𑀸 𑀳𑀺 𑀬𑀸𑀯 𑀢𑁂𑀢𑁆𑀢𑀺𑀁𑀲𑀯𑀬𑀸 𑀧𑀞𑀫𑀯𑀬𑁄. 𑀅𑀦𑀸𑀤𑀭𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀬𑀣𑀸 ‘‘𑀤𑁂𑀯𑀤𑀢𑁆𑀢𑀲𑁆𑀲 𑀭𑀼𑀤𑀦𑁆𑀢𑀲𑁆𑀲 𑀧𑀩𑁆𑀩𑀚𑀻’’𑀢𑀺. 𑀓𑀸𑀫𑀁 𑀅𑀲𑁆𑀲𑀼𑀫𑀼𑀘𑁆𑀘𑀦𑀁 𑀭𑁄𑀤𑀦𑀁, 𑀢𑀁 𑀅𑀲𑁆𑀲𑀼𑀫𑀼𑀔𑀸𑀦𑀦𑁆𑀢𑀺 𑀇𑀫𑀺𑀦𑀸 𑀧𑀓𑀸𑀲𑀺𑀢𑀁, 𑀢𑀁 𑀧𑀦 𑀯𑀢𑁆𑀯𑀸 ‘‘𑀭𑀼𑀤𑀦𑁆𑀢𑀸𑀦’’𑀦𑁆𑀢𑀺 𑀯𑀘𑀦𑀁 𑀩𑀮𑀯𑀲𑁄𑀓𑀲𑀫𑀼𑀝𑁆𑀞𑀸𑀦𑀁 𑀆𑀭𑁄𑀤𑀦𑀯𑀢𑁆𑀣𑀼𑀁 𑀧𑀓𑀸𑀲𑁂𑀢𑀻𑀢𑀺 𑀆𑀳 ‘‘𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀫𑀸𑀦𑀸𑀦’’𑀦𑁆𑀢𑀺. 𑀓𑀺𑀁 𑀓𑀼𑀲𑀮𑀦𑁆𑀢𑀺 𑀕𑀯𑁂𑀲𑀫𑀸𑀦𑁄𑀢𑀺 𑀓𑀺𑀦𑁆𑀢𑀺 𑀲𑀩𑁆𑀩𑀲𑁄 𑀅𑀯𑀚𑁆𑀚𑀭𑀳𑀺𑀢𑀁 𑀏𑀓𑀦𑁆𑀢 𑀦𑀺𑀬𑁆𑀬𑀸𑀦𑀺𑀓𑀁 𑀧𑀭𑀺𑀬𑁂𑀲𑀫𑀸𑀦𑁄. 𑀯𑀭𑀧𑀤𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀺𑀓𑁂𑀳𑀺 𑀏𑀓𑀦𑁆𑀢𑁂𑀦 𑀯𑀭𑀡𑀻𑀬𑀝𑁆𑀞𑁂𑀦 𑀯𑀭𑀁, 𑀧𑀚𑁆𑀚𑀺𑀢𑀩𑁆𑀩𑀝𑁆𑀞𑁂𑀦 𑀧𑀤𑀁. 𑀢𑀼𑀗𑁆𑀕𑀲𑀭𑀻𑀭𑀢𑀸𑀬 𑀤𑀻𑀖𑁄, 𑀧𑀺𑀗𑁆𑀕𑀮𑀘𑀓𑁆𑀔𑀼𑀢𑀸𑀬 𑀧𑀺𑀗𑁆𑀕𑀮𑁄𑀢𑀺 𑀤𑀻𑀖𑀧𑀺𑀗𑁆𑀕𑀮𑁄. 𑀥𑀫𑁆𑀫𑁄𑀢𑀺 𑀯𑀺𑀦𑀬𑁄, 𑀲𑀫𑀬𑁄𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀯𑀸𑀯 𑀉𑀕𑁆𑀕𑀡𑁆𑀳𑀺𑀦𑁆𑀢𑀺 𑀢𑁂𑀦 𑀯𑀼𑀘𑁆𑀘𑀫𑀸𑀦𑀲𑁆𑀲 𑀲𑀯𑀦𑀫𑀢𑁆𑀢𑁂𑀦𑁂𑀯 𑀉𑀕𑁆𑀕𑀡𑁆𑀳𑀺𑀁 𑀯𑀸𑀘𑀼𑀕𑁆𑀕𑀢𑀁 𑀅𑀓𑀸𑀲𑀺𑀁.

𑀧𑀝𑀺𑀮𑀧𑀦𑀫𑀢𑁆𑀢𑀓𑁂𑀦𑀸𑀢𑀺 𑀧𑀼𑀦 𑀮𑀧𑀦𑀫𑀢𑁆𑀢𑀓𑁂𑀦. 𑀚𑀸𑀦𑀸𑀢𑀻𑀢𑀺 𑀜𑀸𑀡𑁄, 𑀜𑀸𑀡𑁄𑀢𑀺 𑀯𑀸𑀤𑁄 𑀜𑀸𑀡𑀯𑀸𑀤𑁄, 𑀢𑀁 𑀜𑀸𑀡𑀯𑀸𑀤𑀁. ‘‘𑀯𑀤𑀸𑀫𑀻’’𑀢𑀺 𑀆𑀕𑀢𑀢𑁆𑀢𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀚𑀸𑀦𑀸𑀫𑀻’’𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀜𑁆𑀜𑁂𑀧𑀺 𑀩𑀳𑀽𑀢𑀺 𑀅𑀜𑁆𑀜𑁂𑀧𑀺 𑀩𑀳𑀽 𑀫𑀫 𑀢𑀣𑀸𑀪𑀸𑀯𑀁 𑀚𑀸𑀦𑀦𑁆𑀢𑀸 ‘‘𑀅𑀬𑀁 𑀇𑀫𑀁 𑀥𑀫𑁆𑀫𑀁 𑀚𑀸𑀦𑀸𑀢𑀻’’𑀢𑀺, ‘‘𑀅𑀓𑀫𑁆𑀧𑀦𑀻𑀬𑀢𑀸𑀬 𑀣𑀺𑀭𑁄’’𑀢𑀺 𑀯𑀸 𑀏𑀯𑀁 𑀯𑀤𑀦𑁆𑀢𑀺. 𑀮𑀸𑀪𑀻𑀢𑀺 𑀅𑀜𑁆𑀜𑀸𑀲𑀻𑀢𑀺 𑀥𑀫𑁆𑀫𑀲𑁆𑀲 𑀉𑀤𑁆𑀤𑀺𑀲𑀦𑁂𑀦 𑀫𑀳𑀸𑀧𑀜𑁆𑀜𑀢𑀸𑀬 ‘‘𑀅𑀬𑀁 𑀅𑀢𑁆𑀢𑀦𑀸 𑀕𑀢𑀫𑀕𑁆𑀕𑀁 𑀧𑀯𑁂𑀤𑁂𑀢𑀺, 𑀦 𑀅𑀦𑀼𑀲𑁆𑀲𑀼𑀢𑀺𑀓𑁄’’𑀢𑀺 𑀅𑀜𑁆𑀜𑀸𑀲𑀺. 𑀅𑀲𑁆𑀲𑀸𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲. 𑀏𑀢𑀤𑀳𑁄𑀲𑀻𑀢𑀺 𑀏𑀢𑀁 ‘‘𑀦 𑀔𑁄 𑀆𑀴𑀸𑀭𑁄 𑀓𑀸𑀮𑀸𑀫𑁄’’𑀢𑀺𑀆𑀤𑀺 𑀫𑀦𑀲𑀺 𑀅𑀳𑁄𑀲𑀺, 𑀘𑀺𑀦𑁆𑀢𑁂𑀲𑀻𑀢𑀺 𑀅𑀢𑁆𑀣𑁄.

𑀳𑁂𑀝𑁆𑀞𑀺𑀫𑀲𑀫𑀸𑀧𑀢𑁆𑀢𑀻𑀳𑀺 𑀯𑀺𑀦𑀸 𑀉𑀧𑀭𑀺𑀫𑀲𑀫𑀸𑀧𑀢𑁆𑀢𑀻𑀦𑀁 𑀲𑀫𑁆𑀧𑀸𑀤𑀦𑀲𑁆𑀲 𑀅𑀲𑀫𑁆𑀪𑀯𑀢𑁄 ‘‘𑀲𑀢𑁆𑀢 𑀲𑀫𑀸𑀧𑀢𑁆𑀢𑀺𑀬𑁄 𑀫𑀁 𑀚𑀸𑀦𑀸𑀧𑁂𑀲𑀻’’𑀢𑀺 𑀆𑀳. 𑀧𑀬𑁄𑀕𑀁 𑀓𑀭𑁂𑀬𑁆𑀬𑀦𑁆𑀢𑀺 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀫𑀸𑀳𑀸𑀢𑀺 𑀏𑀯𑀁 ‘‘𑀅𑀳𑀁, 𑀆𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳, 𑀲𑀢𑁆𑀢𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀥𑀺𑀕𑀫𑀁 𑀧𑀘𑁆𑀘𑀜𑁆𑀜𑀸𑀲𑀻𑀢𑀺 𑀅𑀢𑁆𑀣𑁄.

𑀅𑀦𑀼𑀲𑀽𑀬𑀓𑁄𑀢𑀺 𑀅𑀦𑀺𑀲𑁆𑀲𑀼𑀓𑀻. 𑀢𑁂𑀦 𑀫𑀳𑀸𑀧𑀼𑀭𑀺𑀲𑁂 𑀧𑀲𑀸𑀤𑀁 𑀧𑀯𑁂𑀤𑁂𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀞𑀺𑀢𑀲𑁆𑀲 𑀧𑀼𑀭𑀺𑀫𑀚𑀸𑀢𑀺𑀧𑀭𑀺𑀘𑀬𑁂𑀦 𑀜𑀸𑀡𑀲𑁆𑀲 𑀘 𑀫𑀳𑀦𑁆𑀢𑀢𑀸𑀬 𑀢𑀸𑀲𑀁 𑀕𑀢𑀺 𑀘 𑀅𑀪𑀺𑀲𑀫𑁆𑀧𑀭𑀸𑀬𑁄 𑀘 𑀉𑀧𑀝𑁆𑀞𑀸𑀲𑀺. 𑀢𑁂𑀦 ‘‘𑀯𑀝𑁆𑀝𑀧𑀭𑀺𑀬𑀸𑀧𑀦𑁆𑀦𑀸 𑀏𑀯𑁂𑀢𑀸’’𑀢𑀺 𑀦𑀺𑀘𑁆𑀙𑀬𑁄 𑀉𑀤𑀧𑀸𑀤𑀺. 𑀢𑁂𑀦𑀸𑀳 ‘‘𑀦𑀸𑀬𑀁 𑀥𑀫𑁆𑀫𑁄 𑀦𑀺𑀩𑁆𑀩𑀺𑀤𑀸𑀬𑀸’’𑀢𑀺𑀆𑀤𑀺. 𑀏𑀓𑀘𑁆𑀘𑀸𑀦𑀁 𑀯𑀺𑀭𑀸𑀕𑀪𑀸𑀯𑀦𑀸𑀲𑀫𑀢𑀺𑀓𑁆𑀓𑀫𑀸𑀯𑀳𑁄𑀧𑀺 𑀦𑁂𑀯 𑀢𑁂𑀲𑀫𑁆𑀧𑀺 𑀅𑀘𑁆𑀘𑀦𑁆𑀢𑀸𑀬 𑀲𑀫𑀢𑀺𑀓𑁆𑀓𑀫𑀸𑀯𑀳𑁄, 𑀲𑀬𑀜𑁆𑀘 𑀯𑀝𑁆𑀝𑀧𑀭𑀺𑀬𑀸𑀧𑀦𑁆𑀦𑁄𑀬𑁂𑀯, 𑀢𑀲𑁆𑀫𑀸 𑀦𑁂𑀯 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬, 𑀬𑀤𑀕𑁆𑀕𑁂𑀦 𑀦 𑀦𑀺𑀩𑁆𑀩𑀺𑀤𑀸𑀬, 𑀢𑀤𑀕𑁆𑀕𑁂𑀦 𑀦 𑀯𑀺𑀭𑀚𑁆𑀚𑀦𑀢𑁆𑀣𑀸𑀬, 𑀭𑀸𑀕𑀸𑀤𑀻𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀦 𑀦𑀺𑀭𑀼𑀚𑁆𑀛𑀦𑀢𑁆𑀣𑀸𑀬, 𑀦 𑀉𑀧𑀲𑀫𑀢𑁆𑀣𑀸𑀬, 𑀢𑀲𑁆𑀫𑀸 𑀢𑀁 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀁 𑀦 𑀅𑀪𑀺𑀚𑀸𑀦𑀦𑀢𑁆𑀣𑀸𑀬…𑀧𑁂… 𑀲𑀁𑀯𑀢𑁆𑀢𑀢𑀻𑀢𑀺 𑀬𑁄𑀚𑀦𑀸.

𑀬𑀸𑀯𑀤𑁂𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀼𑀧𑀧𑀢𑁆𑀢𑀺𑀬𑀸𑀢𑀺 𑀲𑀢𑁆𑀢𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀉𑀓𑁆𑀓𑀝𑁆𑀞𑀁 𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀅𑀘𑀼𑀢𑀺𑀥𑀫𑁆𑀫𑀁 𑀧𑀭𑀺𑀬𑁂𑀲𑀺𑀢𑀼𑀁 𑀬𑀼𑀢𑁆𑀢𑀢𑁆𑀢𑀸 𑀢𑀜𑁆𑀘 𑀅𑀦𑀢𑀺𑀓𑁆𑀓𑀦𑁆𑀢𑀚𑀸𑀢𑀺𑀥𑀫𑁆𑀫𑀫𑁂𑀯𑀸𑀢𑀺 𑀫𑀳𑀸𑀲𑀢𑁆𑀢𑁄 𑀧𑀚𑀳𑀢𑀻𑀢𑀺 𑀆𑀳 ‘‘𑀬𑀜𑁆𑀘 𑀞𑀸𑀦𑀁 𑀧𑀸𑀧𑁂𑀢𑀻’’𑀢𑀺𑀆𑀤𑀺. 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀤𑀸 𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑀲𑁆𑀲 𑀕𑀢𑀺𑀜𑁆𑀘 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘 𑀅𑀩𑁆𑀪𑀜𑁆𑀜𑀸𑀲𑀺, 𑀢𑀢𑁄 𑀧𑀝𑁆𑀞𑀸𑀬. 𑀫𑀓𑁆𑀔𑀺𑀓𑀸𑀯𑀲𑁂𑀦𑀸𑀢𑀺 𑀪𑁄𑀚𑀦𑀲𑁆𑀲 𑀫𑀓𑁆𑀔𑀺𑀓𑀸𑀫𑀺𑀲𑁆𑀲𑀢𑀸𑀯𑀲𑁂𑀦. 𑀫𑀦𑀁 𑀦 𑀉𑀧𑁆𑀧𑀸𑀤𑁂𑀢𑀺 𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦𑀸𑀢𑀺 𑀇𑀤𑀁 𑀓𑀢𑀺𑀧𑀸𑀳𑀁 𑀢𑀢𑁆𑀣 𑀪𑀸𑀯𑀦𑀸𑀦𑀼𑀬𑁄𑀕𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀜𑁆𑀜𑁂𑀲𑀁 𑀯𑀺𑀬 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀺𑀓𑀭𑀡𑀁. 𑀦 𑀳𑀺 𑀅𑀦𑁆𑀢𑀺𑀫𑀪𑀯𑀺𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀫𑀸𑀧𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑁂 𑀪𑀸𑀭𑀺𑀬𑀁 𑀦𑀸𑀫. 𑀅𑀦𑀮𑀗𑁆𑀓𑀭𑀺𑀢𑁆𑀯𑀸𑀢𑀺 𑀅𑀦𑀼 𑀅𑀦𑀼 𑀅𑀮𑀁𑀓𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 ‘‘𑀇𑀫𑀺𑀦𑀸 𑀦 𑀓𑀺𑀜𑁆𑀘𑀺 𑀧𑀬𑁄𑀚𑀦’’𑀦𑁆𑀢𑀺 𑀓𑀢𑁆𑀯𑀸.

𑁨𑁭𑁮. 𑀯𑀸𑀘𑀸𑀬 𑀉𑀕𑁆𑀕𑀳𑀺𑀢𑀫𑀢𑁆𑀢𑁄𑀯𑀸𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁭𑁯. 𑀫𑀳𑀸𑀯𑁂𑀮𑀸 𑀯𑀺𑀬 𑀫𑀳𑀸𑀯𑁂𑀮𑀸, 𑀯𑀺𑀧𑀼𑀮𑀯𑀸𑀮𑀺𑀓𑀧𑀼𑀜𑁆𑀚𑀢𑀸𑀬 𑀫𑀳𑀦𑁆𑀢𑁄 𑀯𑁂𑀮𑀸𑀢𑀝𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀫𑀳𑀸𑀯𑀸𑀮𑀺𑀓𑀭𑀸𑀲𑀻𑀢𑀺 𑀅𑀢𑁆𑀣𑁄’’𑀢𑀺. 𑀉𑀭𑀼 𑀫𑀭𑀼 𑀲𑀺𑀓𑀢𑀸 𑀯𑀸𑀮𑀼𑀓𑀸 𑀯𑀡𑁆𑀡𑀼 𑀯𑀸𑀮𑀺𑀓𑀸𑀢𑀺 𑀇𑀫𑁂 𑀲𑀤𑁆𑀤𑀸 𑀲𑀫𑀸𑀦𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁.

𑀲𑁂𑀦𑀸 𑀦𑀺𑀕𑀘𑁆𑀙𑀺 𑀦𑀺𑀯𑀺𑀲𑀺 𑀏𑀢𑁆𑀣𑀸𑀢𑀺 𑀲𑁂𑀦𑀸𑀦𑀺𑀕𑀫𑁄, 𑀲𑁂𑀦𑀸𑀬 𑀦𑀺𑀯𑀺𑀝𑁆𑀞𑀝𑁆𑀞𑀸𑀦𑀁. 𑀲𑁂𑀦𑀸𑀦𑀺𑀕𑀸𑀫𑁄𑀢𑀺 𑀧𑀦 𑀅𑀬𑀁 𑀲𑀫𑀜𑁆𑀜𑀸 𑀅𑀧𑀭𑀓𑀸𑀮𑀺𑀓𑀸. 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀜𑁆𑀘𑁂𑀢𑀁. 𑀉𑀧𑀭𑀺𑀲𑀼𑀢𑁆𑀢𑀲𑁆𑀫𑀺𑀦𑁆𑀢𑀺 𑀫𑀳𑀸𑀲𑀘𑁆𑀘𑀓𑀲𑀼𑀢𑁆𑀢𑁂. 𑀇𑀥 𑀧𑀦 𑀩𑁄𑀥𑀺𑀧𑀮𑁆𑀮𑀗𑁆𑀓𑁄 𑀅𑀥𑀺𑀧𑁆𑀧𑁂𑀢𑁄 𑀅𑀭𑀺𑀬𑀧𑀭𑀺𑀬𑁂𑀲𑀦𑀸𑀬 𑀯𑀼𑀘𑁆𑀘𑀫𑀸𑀦𑀢𑁆𑀢𑀸.

𑁨𑁮𑁦. ‘‘𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺 𑀘 𑀏𑀓𑀚𑁆𑀛𑀁 𑀕𑀳𑀺𑀢𑀧𑀤𑀤𑁆𑀯𑀬𑀯𑀺𑀲𑀬𑀯𑀺𑀲𑁂𑀲𑀲𑁆𑀲 𑀅𑀦𑀸𑀫𑀝𑁆𑀞𑀢𑁆𑀢𑀸 ‘‘𑀫𑁂’’𑀢𑀺 𑀘 𑀕𑀳𑀺𑀢𑀢𑁆𑀢𑀸 𑀅𑀦𑀯𑀲𑁂𑀲𑀜𑁂𑀬𑁆𑀬𑀸𑀯𑀩𑁄𑀥𑀦𑀲𑀫𑀢𑁆𑀣𑀫𑁂𑀯 𑀜𑀸𑀡𑀯𑀺𑀲𑁂𑀲𑀁 𑀩𑁄𑀥𑁂𑀢𑀺, 𑀦 𑀜𑀸𑀡𑀫𑀢𑁆𑀢𑀁, 𑀦 𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀥𑀫𑁆𑀫𑀤𑀲𑁆𑀲𑀦𑀲𑀫𑀢𑁆𑀣𑀜𑁆𑀘 𑀫𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀉𑀤𑀧𑀸𑀤𑀻’’𑀢𑀺. 𑀅𑀓𑀼𑀧𑁆𑀧𑀢𑀸𑀬𑀸𑀢𑀺 𑀯𑀺𑀫𑁄𑀓𑁆𑀔𑀦𑁆𑀢𑀢𑀸𑀬 𑀲𑀩𑁆𑀩𑀲𑁄 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀳𑀺 𑀅𑀲𑀗𑁆𑀔𑁄𑀪𑀦𑀻𑀬𑀢𑀸𑀬. 𑀢𑁂𑀦𑀸𑀳 ‘‘𑀭𑀸𑀕𑀸𑀤𑀻𑀳𑀺 𑀦 𑀓𑀼𑀧𑁆𑀧𑀢𑀻’’𑀢𑀺. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀧𑀺 𑀢𑀤𑀸𑀭𑀫𑁆𑀫𑀡𑀸𑀦𑀁 𑀅𑀢𑁆𑀣𑀺 𑀯𑀺𑀲𑁂𑀲𑁄 𑀬𑀣𑀸 𑀢𑀁 ‘‘𑀆𑀦𑁂𑀜𑁆𑀚𑀯𑀺𑀳𑀸𑀭𑁂’’𑀢𑀺 𑀆𑀳 ‘‘𑀅𑀓𑀼𑀧𑁆𑀧𑀸𑀭𑀫𑁆𑀫𑀡𑀢𑀸𑀬 𑀘𑀸’’𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀧𑀻𑀢𑀺 𑀦 𑀓𑁂𑀯𑀮𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯, 𑀅𑀣 𑀔𑁄 𑀬𑀣𑀸𑀥𑀺𑀕𑀢𑁂 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁂 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀧𑀺.

𑁨𑁮𑁧. 𑀧𑀝𑀺𑀯𑀺𑀤𑁆𑀥𑁄𑀢𑀺 (𑀤𑀻. 𑀦𑀺. 𑀝𑀻. 𑁨.𑁬𑁪; 𑀲𑀁. 𑀦𑀺. 𑀝𑀻. 𑁧.𑁧.𑁧𑁭𑁨; 𑀲𑀸𑀭𑀢𑁆𑀣. 𑀝𑀻. 𑀫𑀳𑀸𑀯𑀕𑁆𑀕 𑁩.𑁭) 𑀲𑀬𑀫𑁆𑀪𑀼𑀜𑀸𑀡𑁂𑀦 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀧𑀝𑀺𑀫𑀼𑀔𑀁 𑀦𑀺𑀩𑁆𑀩𑀺𑀚𑁆𑀛𑀦𑀯𑀲𑁂𑀦 𑀧𑀢𑁆𑀢𑁄, 𑀬𑀣𑀸𑀪𑀽𑀢𑀁 𑀅𑀯𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀕𑀫𑁆𑀪𑀻𑀭𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀫𑀓𑀲𑀢𑀼𑀡𑁆𑀟𑀲𑀽𑀘𑀺𑀬𑀸 𑀅𑀜𑁆𑀜𑀢𑁆𑀭 𑀲𑀫𑀼𑀧𑀘𑀺𑀢𑀧𑀭𑀺𑀧𑀓𑁆𑀓𑀜𑀸𑀡𑀲𑀫𑁆𑀪𑀸𑀭𑁂𑀳𑀺 𑀅𑀜𑁆𑀜𑁂𑀲𑀁 𑀜𑀸𑀡𑁂𑀦 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑁄. 𑀢𑁂𑀦𑀸𑀳 ‘‘𑀉𑀢𑁆𑀢𑀸𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀘𑀦𑀫𑁂𑀢’’𑀦𑁆𑀢𑀺. 𑀬𑁄 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑁄, 𑀲𑁄 𑀑𑀕𑀸𑀳𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀲𑀭𑀽𑀧𑀢𑁄 𑀘 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀢𑁆𑀢𑀸𑀯 𑀤𑀼𑀤𑁆𑀤𑀲𑁄’’𑀢𑀺. 𑀤𑀼𑀓𑁆𑀔𑁂𑀦 𑀤𑀝𑁆𑀞𑀩𑁆𑀩𑁄𑀢𑀺 𑀓𑀺𑀘𑁆𑀙𑁂𑀦 𑀓𑁂𑀦𑀘𑀺𑀤𑁂𑀯 𑀤𑀝𑁆𑀞𑀩𑁆𑀩𑁄. 𑀬𑀁 𑀧𑀦 𑀤𑀝𑁆𑀞𑀼𑀫𑁂𑀯 𑀦 𑀲𑀓𑁆𑀓𑀸, 𑀢𑀲𑁆𑀲 𑀑𑀕𑀸𑀳𑁂𑀢𑁆𑀯𑀸 𑀅𑀦𑀼 𑀅𑀦𑀼 𑀩𑀼𑀚𑁆𑀛𑀦𑁂 𑀓𑀣𑀸 𑀏𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀤𑀼𑀤𑁆𑀤𑀲𑀢𑁆𑀢𑀸𑀯 𑀤𑀼𑀭𑀦𑀼𑀩𑁄𑀥𑁄’’𑀢𑀺. 𑀤𑀼𑀓𑁆𑀔𑁂𑀦 𑀅𑀯𑀩𑀼𑀚𑁆𑀛𑀺𑀢𑀩𑁆𑀩𑁄 𑀅𑀯𑀩𑁄𑀥𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀤𑀼𑀓𑁆𑀓𑀭𑀢𑀭𑀁 𑀯𑀸 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀁 𑀯𑀸’’𑀢𑀺 𑀲𑀼𑀢𑁆𑀢𑀧𑀤𑀁 (𑀲𑀁. 𑀦𑀺. 𑁫.𑁧𑁧𑁧𑁫) 𑀯𑀢𑁆𑀢𑀩𑁆𑀩𑀁. 𑀲𑀦𑁆𑀢𑀸𑀭𑀫𑁆𑀫𑀡𑀢𑀸𑀬 𑀯𑀸 𑀲𑀦𑁆𑀢𑁄. 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑀢𑀸𑀬 𑀦𑀺𑀩𑁆𑀩𑀼𑀢𑁄. 𑀧𑀥𑀸𑀦𑀪𑀸𑀯𑀁 𑀦𑀻𑀢𑁄𑀢𑀺 𑀯𑀸 𑀧𑀡𑀻𑀢𑁄. 𑀅𑀢𑀺𑀢𑁆𑀢𑀺𑀓𑀭𑀝𑁆𑀞𑁂𑀦 𑀅𑀢𑀧𑁆𑀧𑀓𑁄 𑀲𑀸𑀤𑀼𑀭𑀲𑀪𑁄𑀚𑀦𑀁 𑀯𑀺𑀬. 𑀏𑀢𑁆𑀣 𑀘 𑀦𑀺𑀭𑁄𑀥𑀲𑀘𑁆𑀘𑀁 𑀲𑀦𑁆𑀢𑀁 𑀆𑀭𑀫𑁆𑀫𑀡𑀦𑁆𑀢𑀺 𑀲𑀦𑁆𑀢𑀸𑀭𑀫𑁆𑀫𑀡𑀁, 𑀫𑀕𑁆𑀕𑀲𑀘𑁆𑀘𑀁 𑀲𑀦𑁆𑀢𑀁 𑀲𑀦𑁆𑀢𑀸𑀭𑀫𑁆𑀫𑀡𑀜𑁆𑀘𑀸𑀢𑀺 𑀲𑀦𑁆𑀢𑀸𑀭𑀫𑁆𑀫𑀡𑀁. 𑀅𑀦𑀼𑀧𑀲𑀦𑁆𑀢𑀲𑀪𑀸𑀯𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀗𑁆𑀔𑀸𑀭𑀸𑀦𑀜𑁆𑀘 𑀅𑀪𑀸𑀯𑀢𑁄 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑀢𑀸𑀬 𑀲𑀦𑁆𑀢𑀧𑀡𑀻𑀢𑀪𑀸𑀯𑁂𑀦𑁂𑀯 𑀘 𑀅𑀲𑁂𑀘𑀦𑀓𑀢𑀸𑀬 𑀅𑀢𑀧𑁆𑀧𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 ‘‘𑀇𑀤𑀁 𑀤𑁆𑀯𑀬𑀁 𑀮𑁄𑀓𑀼𑀢𑁆𑀢𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀉𑀢𑁆𑀢𑀫𑀜𑀸𑀡𑀯𑀺𑀲𑀬𑀢𑁆𑀢𑀸 𑀦 𑀢𑀓𑁆𑀓𑁂𑀦 𑀅𑀯𑀘𑀭𑀺𑀢𑀩𑁆𑀩𑁄, 𑀢𑀢𑁄 𑀏𑀯 𑀦𑀺𑀧𑀼𑀡𑀜𑀸𑀡𑀕𑁄𑀘𑀭𑀢𑀸𑀬 𑀘 𑀲𑀡𑁆𑀳𑁄. 𑀲𑀼𑀔𑀼𑀫𑀲𑀪𑀸𑀯𑀢𑁆𑀢𑀸 𑀘 𑀦𑀺𑀧𑀼𑀡𑁄, 𑀩𑀸𑀮𑀸𑀦𑀁 𑀅𑀯𑀺𑀲𑀬𑀢𑁆𑀢𑀸 𑀧𑀡𑁆𑀟𑀺𑀢𑁂𑀳𑀺 𑀏𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄. 𑀆𑀮𑀻𑀬𑀦𑁆𑀢𑀺 𑀅𑀪𑀺𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀲𑁂𑀯𑀻𑀬𑀦𑁆𑀢𑀻𑀢𑀺 𑀆𑀮𑀬𑀸, 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀆𑀮𑀬𑀦𑁆𑀢𑀺 𑀅𑀮𑁆𑀮𑀻𑀬𑀦𑁆𑀢𑀻 𑀅𑀪𑀺𑀭𑀫𑀡𑀯𑀲𑁂𑀦 𑀲𑁂𑀯𑀦𑁆𑀢𑀻𑀢𑀺 𑀆𑀮𑀬𑀸, 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀭𑀫𑀦𑁆𑀢𑀻𑀢𑀺 𑀭𑀢𑀺𑀁 𑀯𑀺𑀦𑁆𑀤𑀦𑁆𑀢𑀺 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀺. 𑀆𑀮𑀬𑀭𑀢𑀸𑀢𑀺 𑀆𑀮𑀬𑀦𑀺𑀭𑀢𑀸.

𑀞𑀸𑀦𑀁 𑀲𑀦𑁆𑀥𑀸𑀬𑀸𑀢𑀺 𑀞𑀸𑀦-𑀲𑀤𑁆𑀤𑀁 𑀲𑀦𑁆𑀥𑀸𑀬. 𑀅𑀢𑁆𑀣𑀢𑁄 𑀧𑀦 𑀞𑀸𑀦𑀦𑁆𑀢𑀺 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀏𑀯 𑀅𑀥𑀺𑀧𑁆𑀧𑁂𑀢𑁄. 𑀢𑀺𑀝𑁆𑀞𑀢𑀺 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀸𑀦𑀁, 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀪𑀽𑀢𑀸 𑀅𑀯𑀺𑀚𑁆𑀚𑀸𑀤𑀬𑁄. 𑀇𑀫𑁂𑀲𑀁 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀸𑀢𑀺 𑀇𑀤𑀧𑁆𑀧𑀘𑁆𑀘𑀬𑀸, 𑀅𑀯𑀺𑀚𑁆𑀚𑀸𑀤𑀬𑁄𑀯. 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸 𑀬𑀣𑀸 ‘‘𑀤𑁂𑀯𑁄 𑀏𑀯 𑀤𑁂𑀯𑀢𑀸’’𑀢𑀺, 𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀯𑀸 𑀅𑀯𑀺𑀚𑁆𑀚𑀸𑀤𑀻𑀦𑀁 𑀅𑀢𑁆𑀢𑀦𑁄 𑀨𑀮𑀁 𑀧𑀢𑀺 𑀧𑀘𑁆𑀘𑀬𑀪𑀸𑀯𑁄 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀢𑁂𑀦 𑀲𑀫𑀢𑁆𑀣𑀧𑀘𑁆𑀘𑀬𑀮𑀓𑁆𑀔𑀡𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀚𑁆𑀚𑀢𑀺 𑀨𑀮𑀁 𑀏𑀢𑀲𑁆𑀫𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀧𑀤𑀤𑁆𑀯𑀬𑁂𑀦𑀧𑀺 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀝𑁆𑀞𑁄 𑀏𑀯 𑀯𑀺𑀪𑀸𑀯𑀺𑀢𑁄. 𑀢𑁂𑀦𑀸𑀳 ‘‘𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁫𑁭𑁨-𑁫𑁭𑁩) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺𑀆𑀤𑀺 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑀸𑀤𑀺𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀁 𑀲𑀩𑁆𑀩𑀁 𑀅𑀢𑁆𑀣𑀢𑁄 𑀦𑀺𑀩𑁆𑀩𑀸𑀦𑀫𑁂𑀯. 𑀇𑀤𑀸𑀦𑀺 𑀢𑀲𑁆𑀲 𑀦𑀺𑀩𑁆𑀩𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀆𑀕𑀫𑁆𑀫𑀸𑀢𑀺 𑀧𑀝𑀺𑀘𑁆𑀘 𑀅𑀭𑀺𑀬𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀳𑁂𑀢𑀼. 𑀲𑀫𑁆𑀫𑀦𑁆𑀢𑀻𑀢𑀺 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀽𑀧𑀲𑀫𑀯𑀲𑁂𑀦 𑀲𑀫𑁆𑀫𑀦𑁆𑀢𑀺. 𑀢𑀣𑀸 𑀲𑀦𑁆𑀢𑀸 𑀲𑀯𑀺𑀲𑁂𑀲𑀁 𑀉𑀧𑀲𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀯𑀽𑀧𑀲𑀫𑁆𑀫𑀦𑁆𑀢𑀻’’𑀢𑀺. 𑀏𑀢𑁂𑀦 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀲𑀫𑁆𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄, 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀲𑀗𑁆𑀔𑀢𑀯𑀺𑀲𑀁𑀬𑀼𑀢𑁆𑀢𑁂 𑀘 𑀦𑀺𑀩𑁆𑀩𑀸𑀦𑁂 𑀲𑀩𑁆𑀩𑀲𑀗𑁆𑀔𑀸𑀭𑀯𑀽𑀧𑀲𑀫𑀧𑀭𑀺𑀬𑀸𑀬𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀭𑀺𑀘𑁆𑀘𑀢𑁆𑀢𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀸 𑀢𑀡𑁆𑀳𑀸𑀢𑀺 𑀅𑀝𑁆𑀞𑀲𑀢𑀧𑁆𑀧𑀪𑁂𑀤𑀸 𑀲𑀩𑁆𑀩𑀸𑀧𑀺 𑀢𑀡𑁆𑀳𑀸. 𑀲𑀩𑁆𑀩𑁂 𑀓𑀺𑀮𑁂𑀲𑀭𑀸𑀕𑀸𑀢𑀺 𑀓𑀸𑀫𑀭𑀸𑀕𑀭𑀽𑀧𑀭𑀸𑀕𑀸𑀤𑀺𑀪𑁂𑀤𑀸 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀪𑀽𑀢𑀸 𑀭𑀸𑀕𑀸, 𑀲𑀩𑁆𑀩𑁂𑀧𑀺 𑀯𑀸 𑀓𑀺𑀮𑁂𑀲𑀸 𑀇𑀥 ‘‘𑀓𑀺𑀮𑁂𑀲𑀭𑀸𑀕𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀦 𑀮𑁄𑀪𑀯𑀺𑀲𑁂𑀲𑀸 𑀏𑀯 𑀘𑀺𑀢𑁆𑀢𑀲𑁆𑀲 𑀯𑀺𑀧𑀭𑀺𑀡𑀢𑀪𑀸𑀯𑀸𑀧𑀸𑀤𑀦𑀢𑁄. 𑀬𑀣𑀸𑀳 ‘‘𑀭𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁, 𑀤𑀼𑀝𑁆𑀞𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁, 𑀫𑀽𑀴𑁆𑀳𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢’’𑀦𑁆𑀢𑀺 (𑀧𑀸𑀭𑀸. 𑁨𑁭𑁧). 𑀯𑀺𑀭𑀚𑁆𑀚𑀦𑁆𑀢𑀻𑀢𑀺 𑀧𑀮𑀼𑀚𑁆𑀚𑀦𑁆𑀢𑀺.

𑀘𑀺𑀭𑀦𑀺𑀲𑀚𑁆𑀚𑀸𑀘𑀺𑀭𑀪𑀸𑀲𑀦𑁂𑀳𑀺 𑀧𑀺𑀝𑁆𑀞𑀺𑀆𑀕𑀺𑀮𑀸𑀬𑀦𑀢𑀸𑀮𑀼𑀕𑀮𑀲𑁄𑀲𑀸𑀤𑀺𑀯𑀲𑁂𑀦 𑀓𑀸𑀬𑀓𑀺𑀮𑀫𑀣𑁄 𑀘𑁂𑀯 𑀓𑀸𑀬𑀯𑀺𑀳𑁂𑀲𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀘 𑀔𑁄 𑀤𑁂𑀲𑀦𑀸𑀬 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸, 𑀚𑀸𑀦𑀦𑁆𑀢𑀸𑀦𑀁 𑀧𑀦 𑀤𑁂𑀲𑀦𑀸𑀬 𑀓𑀸𑀬𑀧𑀭𑀺𑀲𑁆𑀲𑀫𑁄𑀧𑀺 𑀲𑀢𑁆𑀣𑀼 𑀅𑀧𑀭𑀺𑀲𑁆𑀲𑀫𑁄𑀯. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦 𑀘 𑀫𑀁 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀳𑁂𑀲𑁂𑀲𑀻’’𑀢𑀺 (𑀉𑀤𑀸. 𑁧𑁦). 𑀢𑁂𑀦𑁂𑀯𑀸𑀳 ‘‘𑀬𑀸 𑀅𑀚𑀸𑀦𑀦𑁆𑀢𑀸𑀦𑀁 𑀤𑁂𑀲𑀦𑀸 𑀦𑀸𑀫, 𑀲𑁄 𑀫𑀫 𑀓𑀺𑀮𑀫𑀣𑁄 𑀅𑀲𑁆𑀲𑀸’’𑀢𑀺. 𑀉𑀪𑀬𑀦𑁆𑀢𑀺 𑀘𑀺𑀢𑁆𑀢𑀓𑀺𑀮𑀫𑀣𑁄 𑀘𑁂𑀯 𑀘𑀺𑀢𑁆𑀢𑀯𑀺𑀳𑁂𑀲𑀸 𑀘𑀸𑀢𑀺 𑀉𑀪𑀬𑀫𑁆𑀧𑁂𑀢𑀁 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸.

𑀅𑀦𑀼𑀩𑁆𑀭𑀽𑀳𑀦𑀁 𑀲𑀫𑁆𑀧𑀺𑀡𑁆𑀟𑀦𑀁. 𑀲𑁄𑀢𑀺 ‘‘𑀅𑀧𑀺𑀲𑁆𑀲𑀽’’𑀢𑀺 𑀦𑀺𑀧𑀸𑀢𑁄. 𑀫𑀦𑁆𑀢𑀺 𑀧𑀝𑀺-𑀲𑀤𑁆𑀤𑀬𑁄𑀕𑁂𑀦 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀫𑀫𑀸’’𑀢𑀺. 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀯𑀸 𑀅𑀘𑁆𑀙𑀭𑀺𑀬𑀸 𑀅𑀦𑀘𑁆𑀙𑀭𑀺𑀬𑀸. 𑀯𑀼𑀤𑁆𑀥𑀺𑀅𑀢𑁆𑀣𑁄𑀧𑀺 𑀳𑀺 𑀅-𑀓𑀸𑀭𑁄 𑀳𑁄𑀢𑀺 𑀬𑀣𑀸 ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁧𑁧.𑀢𑀺𑀓𑀫𑀸𑀢𑀺𑀓𑀸). 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁 𑀘𑀢𑁆𑀢𑀸𑀭𑀺 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀥𑀫𑁆𑀫𑀲𑀁𑀯𑀺𑀪𑀸𑀕𑀓𑀭𑀡𑀢𑁆𑀣𑀫𑁂𑀯 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀇𑀤𑀸𑀦𑀺 𑀅𑀥𑀺𑀕𑀢𑀥𑀫𑁆𑀫𑀭𑀚𑁆𑀚𑀲𑁆𑀲 𑀢𑀢𑁆𑀣 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀧𑀢𑁆𑀢𑀺𑀤𑀻𑀧𑀦𑀢𑀸, 𑀕𑀸𑀣𑀸𑀢𑁆𑀣𑀲𑁆𑀲 𑀅𑀘𑁆𑀙𑀭𑀺𑀬𑀢𑀸, 𑀢𑀲𑁆𑀲 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀺 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀤𑁆𑀯𑀸𑀭𑁂𑀦 𑀳𑀺 𑀕𑀸𑀣𑀸𑀦𑀁 𑀅𑀦𑀘𑁆𑀙𑀭𑀺𑀬𑀢𑀸. 𑀕𑁄𑀘𑀭𑀸 𑀅𑀳𑁂𑀲𑀼𑀦𑁆𑀢𑀺 𑀉𑀧𑀝𑁆𑀞𑀳𑁂𑀲𑀼𑀁. 𑀉𑀧𑀝𑁆𑀞𑀸𑀦𑀜𑁆𑀘 𑀯𑀺𑀢𑀓𑁆𑀓𑁂𑀢𑀩𑁆𑀩𑀢𑀸𑀢𑀺 𑀆𑀳 ‘‘𑀧𑀭𑀺𑀯𑀺𑀢𑀓𑁆𑀓𑀬𑀺𑀢𑀩𑁆𑀩𑀢𑀁 𑀧𑀸𑀧𑀼𑀡𑀺𑀁𑀲𑀽’’𑀢𑀺.

𑀬𑀤𑀺 𑀲𑀼𑀔𑀸𑀧𑀝𑀺𑀧𑀤𑀸𑀯, 𑀓𑀣𑀁 𑀓𑀺𑀘𑁆𑀙𑀢𑀸𑀢𑀺 𑀆𑀳 ‘‘𑀧𑀸𑀭𑀫𑀻𑀧𑀽𑀭𑀡𑀓𑀸𑀮𑁂 𑀧𑀦𑀸’’𑀢𑀺𑀆𑀤𑀺. 𑀏𑀯𑀫𑀸𑀤𑀻𑀦𑀺 𑀤𑀼𑀧𑁆𑀧𑀭𑀺𑀘𑁆𑀘𑀚𑀸𑀦𑀺 𑀤𑁂𑀦𑁆𑀢𑀲𑁆𑀲. 𑀳-𑀇𑀢𑀺 𑀯𑀸 ‘‘𑀩𑁆𑀬𑀢𑁆𑀢’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀏𑀓𑀁𑀲𑀢𑁆𑀣𑁂𑀢𑀺 𑀓𑁂𑀘𑀺. 𑀳 𑀩𑁆𑀬𑀢𑁆𑀢𑀁, 𑀏𑀓𑀁𑀲𑁂𑀦 𑀯𑀸 𑀅𑀮𑀁 𑀦𑀺𑀧𑁆𑀧𑀬𑁄𑀚𑀦𑀁 𑀏𑀯𑀁 𑀓𑀺𑀘𑁆𑀙𑁂𑀦 𑀅𑀥𑀺𑀕𑀢𑀲𑁆𑀲 𑀥𑀫𑁆𑀫𑀲𑁆𑀲 𑀤𑁂𑀲𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀳𑀮𑀦𑁆𑀢𑀺 𑀯𑀸 ‘‘𑀅𑀮’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀧𑀤𑀁 ‘‘𑀳𑀮𑀦𑁆𑀢𑀺 𑀯𑀤𑀸𑀫𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀝𑀻. 𑁨.𑁬𑁫; 𑀲𑀁. 𑀦𑀺. 𑀝𑀻. 𑁧.𑁧.𑁧𑁭𑁨) 𑀯𑀺𑀬. 𑀭𑀸𑀕𑀤𑁄𑀲𑀧𑀭𑀺𑀨𑀼𑀝𑁆𑀞𑁂𑀳𑀻𑀢𑀺 𑀨𑀼𑀝𑁆𑀞𑀯𑀺𑀲𑁂𑀦 𑀯𑀺𑀬 𑀲𑀧𑁆𑀧𑁂𑀦 𑀭𑀸𑀕𑁂𑀦 𑀤𑁄𑀲𑁂𑀦 𑀘 𑀲𑀫𑁆𑀨𑀼𑀝𑁆𑀞𑁂𑀳𑀺 𑀅𑀪𑀺𑀪𑀽𑀢𑁂𑀳𑀺. 𑀭𑀸𑀕𑀤𑁄𑀲𑀸𑀦𑀼𑀕𑀢𑁂𑀳𑀻𑀢𑀺 𑀭𑀸𑀕𑁂𑀦 𑀘 𑀤𑁄𑀲𑁂𑀦 𑀘 𑀅𑀦𑀼𑀩𑀦𑁆𑀥𑁂𑀳𑀺.

𑀓𑀸𑀫𑀭𑀸𑀕𑀭𑀢𑁆𑀢𑀸 𑀪𑀯𑀭𑀸𑀕𑀭𑀢𑁆𑀢𑀸 𑀘 𑀦𑀻𑀯𑀭𑀡𑁂𑀳𑀺 𑀦𑀺𑀯𑀼𑀢𑀢𑀸𑀬, 𑀤𑀺𑀝𑁆𑀞𑀺𑀭𑀸𑀕𑀭𑀢𑁆𑀢𑀸 𑀯𑀺𑀧𑀭𑀻𑀢𑀸𑀪𑀺𑀦𑀺𑀯𑁂𑀲𑁂𑀦. 𑀦 𑀤𑀓𑁆𑀔𑀦𑁆𑀢𑀻𑀢𑀺 𑀬𑀸𑀣𑀸𑀯𑀢𑁄 𑀥𑀫𑁆𑀫𑀁 𑀦 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀕𑀸𑀳𑀸𑀧𑁂𑀢𑀼𑀦𑁆𑀢𑀺 ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀲𑀪𑀸𑀯𑁂𑀦 𑀬𑀸𑀣𑀸𑀯𑀢𑁄 𑀥𑀫𑁆𑀫𑀁 𑀚𑀸𑀦𑀸𑀧𑁂𑀢𑀼𑀁. 𑀭𑀸𑀕𑀤𑁄𑀲𑀧𑀭𑁂𑀢𑀢𑀸𑀧𑀺 𑀦𑁂𑀲𑀁 𑀲𑀫𑁆𑀫𑀽𑀴𑁆𑀳𑀪𑀸𑀯𑁂𑀦𑁂𑀯𑀸𑀢𑀺 𑀆𑀳 ‘‘𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸’’𑀢𑀺.

𑁨𑁮𑁨. 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀲𑀬𑀫𑁂𑀯 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀢𑁆𑀣 𑀅𑀜𑁆𑀜𑀸𑀢𑀯𑁂𑀲𑁂𑀦𑀸𑀢𑀺 𑀇𑀫𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀪𑀸𑀯𑀽𑀧𑀕𑀫𑀦𑁂𑀦 𑀅𑀜𑁆𑀜𑀸𑀢𑀭𑀽𑀧𑁂𑀦. 𑀢𑀸𑀧𑀲𑀯𑁂𑀲𑁂𑀦𑀸𑀢𑀺 𑀓𑁂𑀘𑀺. 𑀲𑁄 𑀧𑀦 𑀅𑀭𑀳𑀢𑁆𑀢𑀸𑀥𑀺𑀕𑀫𑁂𑀦𑁂𑀯 𑀯𑀺𑀕𑀘𑁆𑀙𑁂𑀬𑁆𑀬. 𑀢𑀺𑀯𑀺𑀥𑀁 𑀓𑀸𑀭𑀡𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀧𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀲𑁆𑀲 𑀩𑀮𑀯𑀪𑀸𑀯𑁄, 𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀢𑀸, 𑀢𑀢𑁆𑀣 𑀘 𑀲𑀸𑀢𑀺𑀲𑀬𑀁 𑀕𑀸𑀭𑀯𑀦𑁆𑀢𑀺, 𑀢 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. (𑀢𑀢𑁆𑀣 𑀧𑀝𑀺𑀧𑀓𑁆𑀔𑀸 𑀦𑀸𑀫 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑀢𑁆𑀢𑀸. 𑀢𑁂𑀲𑀁 𑀩𑀮𑀯𑀪𑀸𑀯𑀢𑁄 𑀘𑀺𑀭𑀧𑀭𑀺𑀪𑀸𑀯𑀦𑀸𑀬 𑀲𑀢𑁆𑀢𑀲𑀦𑁆𑀢𑀸𑀦𑀢𑁄 𑀤𑀼𑀩𑁆𑀩𑀺𑀲𑁄𑀥𑀺𑀬𑀢𑀸𑀬 𑀢𑁂 𑀲𑀢𑁆𑀢𑁂 𑀫𑀢𑁆𑀢𑀳𑀢𑁆𑀣𑀺𑀦𑁄 𑀯𑀺𑀬 𑀤𑀼𑀩𑁆𑀩𑀮𑀧𑀼𑀭𑀺𑀲𑀁 𑀅𑀥𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀦𑁆𑀢𑀸 𑀅𑀦𑁂𑀓𑀲𑀢𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀁 𑀲𑀼𑀦𑀺𑀘𑀺𑀢𑀁 𑀖𑀦𑀲𑀦𑁆𑀦𑀺𑀯𑁂𑀲𑀁 𑀓𑀡𑁆𑀝𑀓𑀤𑀼𑀕𑁆𑀕𑀫𑁆𑀧𑀺 𑀅𑀥𑀺𑀲𑁂𑀦𑁆𑀢𑀺. 𑀤𑀽𑀭𑀧𑁆𑀧𑀪𑁂𑀤𑀤𑀼𑀘𑁆𑀙𑁂𑀚𑁆𑀚𑀢𑀸𑀳𑀺 𑀤𑀼𑀩𑁆𑀩𑀺𑀲𑁄𑀥𑀺𑀬𑀢𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀣𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘 𑀅𑀦𑁆𑀢𑁄 𑀅𑀫𑀝𑁆𑀞𑀢𑀸𑀬 𑀓𑀜𑁆𑀚𑀺𑀬𑀧𑀼𑀡𑁆𑀡𑀸 𑀮𑀸𑀩𑀼. 𑀘𑀺𑀭𑀧𑀸𑀭𑀺𑀯𑀸𑀲𑀺𑀓𑀢𑀸𑀬 𑀢𑀓𑁆𑀓𑀪𑀭𑀺𑀢𑀸 𑀘𑀸𑀝𑀺. 𑀲𑁆𑀦𑁂𑀳𑀢𑀺𑀦𑁆𑀢𑀤𑀼𑀩𑁆𑀩𑀮𑀪𑀸𑀯𑁂𑀦 𑀯𑀲𑀸𑀧𑀻𑀢𑀧𑀺𑀮𑁄𑀢𑀺𑀓𑀸. 𑀢𑁂𑀮𑀫𑀺𑀲𑁆𑀲𑀺𑀢𑀢𑀸𑀬 𑀅𑀜𑁆𑀚𑀦𑀫𑀓𑁆𑀔𑀺𑀢𑀳𑀢𑁆𑀣𑁄 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑀸 𑀯𑀼𑀢𑁆𑀢𑀸, 𑀳𑀻𑀦𑀽𑀧𑀫𑀸 𑀘𑁂𑀢𑀸 𑀭𑀽𑀧𑀧𑀩𑀦𑁆𑀥𑀪𑀸𑀯𑀢𑁄 𑀅𑀘𑀺𑀭𑀓𑀸𑀮𑀺𑀓𑀢𑁆𑀢𑀸 𑀘 𑀫𑀮𑀻𑀦𑀢𑀸𑀬, 𑀓𑀺𑀮𑁂𑀲𑀲𑀁𑀓𑀺𑀮𑁂𑀲𑁄 𑀏𑀯 𑀧𑀦 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑀢𑀭𑁄 𑀅𑀦𑀸𑀤𑀺𑀓𑀸𑀮𑀺𑀓𑀢𑁆𑀢𑀸 𑀅𑀦𑀼𑀲𑀬𑀺𑀢𑀢𑁆𑀢𑀸 𑀘. 𑀢𑁂𑀦𑀸𑀳 ‘‘𑀅𑀢𑀺𑀲𑀁𑀓𑀺𑀮𑀺𑀝𑁆𑀞𑀸’’𑀢𑀺. 𑀬𑀣𑀸 𑀘 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑀢𑀭𑀢𑀸𑀬, 𑀏𑀯𑀁 𑀕𑀫𑁆𑀪𑀻𑀭𑀤𑀼𑀤𑁆𑀤𑀲𑀤𑀼𑀭𑀦𑀼𑀩𑁄𑀥𑀸𑀦𑀫𑁆𑀧𑀺 𑀯𑀼𑀢𑁆𑀢𑀉𑀧𑀫𑀸 𑀳𑀻𑀦𑀽𑀧𑀫𑀸𑀯).

𑀧𑀝𑀺𑀧𑀓𑁆𑀔𑀯𑀺𑀕𑀫𑀦𑁂𑀦 𑀕𑀫𑁆𑀪𑀻𑀭𑁄𑀧𑀺 𑀥𑀫𑁆𑀫𑁄 𑀲𑀼𑀧𑀸𑀓𑀝𑁄 𑀪𑀯𑁂𑀬𑁆𑀬. 𑀧𑀝𑀺𑀧𑀓𑁆𑀔𑀯𑀺𑀕𑀫𑀦𑀁 𑀧𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀝𑀺𑀩𑀤𑁆𑀥𑀁, 𑀲𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀥𑀻𑀦𑀸. 𑀢𑀁 𑀲𑀢𑁆𑀣𑀭𑀺 𑀥𑀫𑁆𑀫𑁂 𑀘 𑀧𑀲𑀸𑀤𑀸𑀬𑀢𑁆𑀢𑀁, 𑀲𑁄 𑀕𑀭𑀼𑀝𑁆𑀞𑀸𑀦𑀺𑀬𑀸𑀦𑀁 𑀅𑀚𑁆𑀛𑁂𑀲𑀦𑀳𑁂𑀢𑀼𑀓𑁄𑀢𑀺 𑀧𑀦𑀸𑀴𑀺𑀓𑀸𑀬 𑀲𑀢𑁆𑀢𑀸𑀦𑀁 𑀥𑀫𑁆𑀫𑀲𑀫𑁆𑀧𑀝𑀺𑀧𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀬𑀸𑀘𑀦𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳.

𑀉𑀧𑀓𑁆𑀓𑀺𑀮𑁂𑀲𑀪𑀽𑀢𑀁 𑀅𑀧𑁆𑀧𑀁 𑀭𑀸𑀕𑀸𑀤𑀺𑀭𑀚𑀁 𑀏𑀢𑀲𑁆𑀲𑀸𑀢𑀺 𑀅𑀧𑁆𑀧𑀭𑀚𑀁, 𑀅𑀧𑁆𑀧𑀭𑀚𑀁 𑀅𑀓𑁆𑀔𑀺 𑀧𑀜𑁆𑀜𑀸𑀘𑀓𑁆𑀔𑀼 𑀬𑁂𑀲𑀁 𑀢𑁂 𑀢𑀁𑀲𑀪𑀸𑀯𑀸𑀢𑀺 𑀓𑀢𑁆𑀯𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄 ‘‘𑀧𑀜𑁆𑀜𑀸𑀫𑀬𑁂’’𑀢𑀺𑀆𑀤𑀺𑀦𑀸. 𑀅𑀧𑁆𑀧𑀁 𑀭𑀸𑀕𑀸𑀤𑀺𑀭𑀚𑀁 𑀬𑁂𑀲𑀁 𑀢𑀁𑀲𑀪𑀸𑀯𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀏𑀯𑀫𑁆𑀧𑀺 𑀲𑀤𑁆𑀤𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀤𑀸𑀦𑀸𑀤𑀺𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀺 𑀲𑀭𑀡𑀕𑀫𑀦𑀧𑀭𑀳𑀺𑀢𑀧𑀭𑀺𑀡𑀸𑀫𑀦𑁂𑀳𑀺 𑀲𑀤𑁆𑀥𑀺𑀁 (𑀤𑁆𑀯𑀸𑀤𑀲 𑀳𑁄𑀦𑁆𑀢𑀻𑀢𑀺) ‘‘𑀤𑁆𑀯𑀸𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀭𑀸𑀕𑀸𑀤𑀺𑀫𑀮𑁂𑀦 𑀲𑀫𑀮𑁂𑀳𑀺 𑀧𑀽𑀭𑀡𑀸𑀤𑀻𑀳𑀺 𑀙𑀳𑀺 𑀲𑀢𑁆𑀣𑀸𑀭𑁂𑀳𑀺 𑀲𑀢𑁆𑀣𑀼𑀧𑀝𑀺𑀜𑁆𑀜𑁂𑀳𑀺 𑀓𑀩𑁆𑀩𑀭𑀘𑀦𑀸𑀯𑀲𑁂𑀦 𑀘𑀺𑀦𑁆𑀢𑀸𑀓𑀯𑀺𑀆𑀤𑀺𑀪𑀸𑀯𑁂 𑀞𑀢𑁆𑀯𑀸 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁𑀧𑀝𑀺𑀪𑀸𑀦𑀁 𑀘𑀺𑀦𑁆𑀢𑀺𑀢𑁄. 𑀢𑁂 𑀓𑀺𑀭 𑀩𑀼𑀤𑁆𑀥𑀓𑁄𑀮𑀸𑀳𑀮𑀸𑀦𑀼𑀲𑁆𑀲𑀯𑁂𑀦 𑀲𑀜𑁆𑀚𑀸𑀢𑀓𑀼𑀢𑀽𑀳𑀮𑀁 𑀮𑁄𑀓𑀁 𑀯𑀜𑁆𑀘𑁂𑀢𑁆𑀯𑀸 𑀓𑁄𑀳𑀜𑁆𑀜𑁂 𑀞𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀚𑀸𑀦𑀦𑁆𑀢𑀸 𑀬𑀁 𑀓𑀺𑀜𑁆𑀘𑀺 𑀅𑀥𑀫𑁆𑀫𑀁𑀬𑁂𑀯 𑀥𑀫𑁆𑀫𑁄𑀢𑀺 𑀤𑀻𑀧𑁂𑀲𑀼𑀁. 𑀢𑁂𑀦𑀸𑀳 ‘‘𑀢𑁂 𑀳𑀺 𑀧𑀼𑀭𑁂𑀢𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀺. 𑀅𑀧𑀸𑀧𑀼𑀭𑁂𑀢𑀦𑁆𑀢𑀺 𑀏𑀢𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀢𑁄 𑀧𑀪𑀼𑀢𑀺 𑀧𑀺𑀳𑀺𑀢𑀁 𑀦𑀺𑀩𑁆𑀩𑀸𑀦𑀦𑀕𑀭𑀲𑁆𑀲 𑀫𑀳𑀸𑀤𑁆𑀯𑀸𑀭𑀁 𑀅𑀭𑀺𑀬𑀫𑀕𑁆𑀕𑀁 𑀲𑀤𑁆𑀥𑀫𑁆𑀫𑀤𑁂𑀲𑀦𑀸𑀳𑀢𑁆𑀣𑁂𑀦 𑀅𑀧𑀸𑀧𑀼𑀭 𑀯𑀺𑀯𑀭.

𑀲𑁂𑀮𑀧𑀩𑁆𑀩𑀢𑁄 𑀉𑀘𑁆𑀘𑁄 𑀳𑁄𑀢𑀺 𑀣𑀺𑀭𑁄 𑀘, 𑀦 𑀧𑀁𑀲𑀼𑀧𑀩𑁆𑀩𑀢𑁄 𑀫𑀺𑀲𑁆𑀲𑀓𑀧𑀩𑁆𑀩𑀢𑁄 𑀘𑀸𑀢𑀺 𑀆𑀳 ‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀻’’𑀢𑀺. 𑀥𑀫𑁆𑀫𑀫𑀬𑀁 𑀧𑀸𑀲𑀸𑀤𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑀸𑀳. 𑀲𑁄 𑀳𑀺 𑀲𑀩𑁆𑀩𑀲𑁄 𑀧𑀲𑀸𑀤𑀸𑀯𑀳𑁄, 𑀲𑀩𑁆𑀩𑀥𑀫𑁆𑀫𑁂 𑀅𑀢𑀺𑀓𑁆𑀓𑀫𑁆𑀫 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀧𑀸𑀲𑀸𑀤𑀲𑀤𑀺𑀲𑁄 𑀘. 𑀧𑀜𑁆𑀜𑀸𑀧𑀭𑀺𑀬𑀸𑀬𑁄 𑀯𑀸 𑀇𑀥 𑀥𑀫𑁆𑀫-𑀲𑀤𑁆𑀤𑁄. 𑀲𑀸 𑀳𑀺 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 ‘‘𑀧𑀸𑀲𑀸𑀤𑁄’’𑀢𑀺 𑀅𑀪𑀺𑀥𑀫𑁆𑀫𑁂 (𑀥. 𑀲. 𑀅𑀝𑁆𑀞. 𑁧𑁬) 𑀦𑀺𑀤𑁆𑀤𑀺𑀝𑁆𑀞𑀸. 𑀢𑀣𑀸 𑀘𑀸𑀳 𑁋

‘‘𑀧𑀜𑁆𑀜𑀸𑀧𑀸𑀲𑀸𑀤𑀫𑀸𑀭𑀼𑀬𑁆𑀳, 𑀅𑀲𑁄𑀓𑁄 𑀲𑁄𑀓𑀺𑀦𑀺𑀁 𑀧𑀚𑀁;

𑀧𑀩𑁆𑀩𑀢𑀝𑁆𑀞𑁄𑀯 𑀪𑀽𑀫𑀝𑁆𑀞𑁂, 𑀥𑀻𑀭𑁄 𑀩𑀸𑀮𑁂 𑀅𑀯𑁂𑀓𑁆𑀔𑀢𑀻’’𑀢𑀺. (𑀥. 𑀧. 𑁨𑁮);

𑀉𑀝𑁆𑀞𑁂𑀳𑀻𑀢𑀺 𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀲𑀗𑁆𑀔𑀸𑀢𑀲𑀗𑁆𑀓𑁄𑀘𑀸𑀧𑀢𑁆𑀢𑀺𑀢𑁄 𑀓𑀺𑀮𑀸𑀲𑀼𑀪𑀸𑀯𑀢𑁄 𑀉𑀝𑁆𑀞𑀳.

𑁨𑁮𑁩. 𑀕𑀭𑀼𑀝𑁆𑀞𑀸𑀦𑀺𑀬𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀕𑀭𑀼𑀢𑀭𑀁 𑀧𑀬𑁄𑀚𑀦𑀁 𑀉𑀤𑁆𑀤𑀺𑀲𑁆𑀲 𑀅𑀪𑀺𑀧𑀢𑁆𑀣𑀦𑀸 𑀅𑀚𑁆𑀛𑁂𑀲𑀦𑀸, 𑀲𑀸𑀧𑀺 𑀅𑀢𑁆𑀣𑀢𑁄 𑀬𑀸𑀘𑀦𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀅𑀚𑁆𑀛𑁂𑀲𑀦𑀦𑁆𑀢𑀺 𑀬𑀸𑀘𑀦’’𑀦𑁆𑀢𑀺. 𑀧𑀤𑁂𑀲𑀯𑀺𑀲𑀬𑀁 𑀜𑀸𑀡𑀤𑀲𑁆𑀲𑀦𑀁 𑀅𑀳𑀼𑀢𑁆𑀯𑀸 𑀩𑀼𑀤𑁆𑀥𑀸𑀦𑀁𑀬𑁂𑀯 𑀆𑀯𑁂𑀡𑀺𑀓𑀪𑀸𑀯𑀢𑁄 𑀇𑀤𑀁 𑀜𑀸𑀡𑀤𑁆𑀯𑀬𑀁 ‘‘𑀩𑀼𑀤𑁆𑀥𑀘𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀇𑀫𑁂𑀲𑀜𑁆𑀳𑀺 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 𑀩𑀼𑀤𑁆𑀥𑀘𑀓𑁆𑀔𑀽𑀢𑀺 𑀦𑀸𑀫’’𑀦𑁆𑀢𑀺. 𑀢𑀺𑀡𑁆𑀡𑀁 𑀫𑀕𑁆𑀕𑀜𑀸𑀡𑀸𑀦𑀦𑁆𑀢𑀺 𑀳𑁂𑀝𑁆𑀞𑀺𑀫𑀸𑀦𑀁 𑀢𑀺𑀡𑁆𑀡𑀁 𑀫𑀕𑁆𑀕𑀜𑀸𑀡𑀸𑀦𑀁 ‘‘𑀥𑀫𑁆𑀫𑀘𑀓𑁆𑀔𑀽’’𑀢𑀺 𑀦𑀸𑀫𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑀲𑁆𑀲𑀦𑀫𑀢𑁆𑀢𑀪𑀸𑀯𑀢𑁄. 𑀬𑀢𑁄 𑀢𑀸𑀦𑀺 𑀜𑀸𑀡𑀸𑀦𑀺 𑀯𑀺𑀚𑁆𑀚𑀽𑀧𑀫𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺, 𑀅𑀕𑁆𑀕𑀫𑀕𑁆𑀕𑀜𑀸𑀡𑀁 𑀧𑀦 𑀜𑀸𑀡𑀓𑀺𑀘𑁆𑀘𑀲𑁆𑀲 𑀲𑀺𑀔𑀸𑀧𑁆𑀧𑀢𑁆𑀢𑀺𑀬𑀸 𑀦 𑀤𑀲𑁆𑀲𑀦𑀫𑀢𑁆𑀢𑀁 𑀳𑁄𑀢𑀻𑀢𑀺 ‘‘𑀥𑀫𑁆𑀫𑀘𑀓𑁆𑀔𑀽’’𑀢𑀺 𑀦 𑀯𑀼𑀘𑁆𑀘𑀢𑀺, 𑀢𑀢𑁄 𑀢𑀁 𑀯𑀚𑀺𑀭𑀽𑀧𑀫𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀅𑀧𑁆𑀧𑀭𑀚𑀓𑁆𑀔𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦. 𑀬𑀲𑁆𑀫𑀸 𑀫𑀦𑁆𑀤𑀓𑀺𑀮𑁂𑀲𑀸 ‘‘𑀅𑀧𑁆𑀧𑀭𑀚𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀩𑀳𑀮𑀓𑀺𑀮𑁂𑀲𑀸 ‘‘𑀫𑀳𑀸𑀭𑀚𑀓𑁆𑀔𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀲𑀫𑀢𑁆𑀣𑀢𑀸𑀬 𑀢𑀺𑀓𑁆𑀔𑀸𑀦𑀺 𑀲𑀽𑀭𑀸𑀦𑀺 𑀯𑀺𑀲𑀤𑀸𑀦𑀺, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀫𑀼𑀤𑀽𑀦𑀺. 𑀲𑀤𑁆𑀥𑀸𑀤𑀬𑁄 𑀆𑀓𑀸𑀭𑀸𑀢𑀺 𑀲𑀤𑁆𑀤𑀳𑀦𑀸𑀤𑀺𑀧𑁆𑀧𑀓𑀸𑀭𑁂 𑀯𑀤𑀢𑀺. 𑀲𑀼𑀦𑁆𑀤𑀭𑀸𑀢𑀺 𑀓𑀮𑁆𑀬𑀸𑀡𑀸. 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁮𑁧𑁪) 𑀧𑀦 ‘‘𑀬𑁂𑀲𑀁 𑀆𑀲𑀬𑀸𑀤𑀬𑁄 𑀓𑁄𑀝𑁆𑀞𑀸𑀲𑀸 𑀲𑀼𑀦𑁆𑀤𑀭𑀸, 𑀢𑁂 𑀲𑁆𑀯𑀸𑀓𑀸𑀭𑀸, 𑀯𑀺𑀧𑀭𑀻𑀢𑀸 𑀤𑁆𑀯𑀸𑀓𑀸𑀭𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀫𑀸𑀬 𑀅𑀢𑁆𑀣𑀯𑀡𑁆𑀡𑀦𑀸𑀬 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀭𑀡𑀁 𑀦𑀸𑀫 𑀧𑀘𑁆𑀘𑀬𑀸𑀓𑀸𑀭𑁄, 𑀲𑀘𑁆𑀘𑀸𑀦𑀺 𑀯𑀸.

𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀻𑀢𑀺 𑀏𑀢𑁆𑀣 𑀅𑀧𑁆𑀧𑀭𑀚𑀓𑁆𑀔𑀸𑀤𑀺𑀧𑀤𑀸𑀦𑀁 𑀅𑀢𑁆𑀣𑀯𑀺𑀪𑀸𑀯𑀦𑁂 𑀅𑀬𑀁 𑀢𑀲𑁆𑀲𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀻 𑀧𑀸𑀴𑀺. 𑀲𑀤𑁆𑀥𑀸𑀤𑀻𑀦𑀁 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑀥𑀫𑁆𑀫𑀸𑀦𑀁 𑀩𑀮𑀯𑀪𑀸𑀯𑁄 𑀢𑀧𑁆𑀧𑀝𑀺𑀧𑀓𑁆𑀔𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀤𑀼𑀩𑁆𑀩𑀮𑀪𑀸𑀯𑁂𑀦𑁂𑀯 𑀳𑁄𑀢𑀺, 𑀢𑁂𑀲𑀜𑁆𑀘 𑀩𑀮𑀯𑀪𑀸𑀯𑁄 𑀲𑀤𑁆𑀥𑀸𑀤𑀻𑀦𑀁 𑀤𑀼𑀩𑁆𑀩𑀮𑀪𑀸𑀯𑁂𑀦𑀸𑀢𑀺 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀢𑀸𑀦𑀢𑁆𑀣𑀺𑀢𑀸𑀯𑀲𑁂𑀦 𑀅𑀧𑁆𑀧𑀭𑀚𑀓𑁆𑀔𑀫𑀳𑀸𑀭𑀚𑀓𑁆𑀔𑀢𑀸𑀤𑀬𑁄 𑀧𑀸𑀴𑀺𑀬𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀔𑀦𑁆𑀥𑀸𑀤𑀬𑁄 𑀏𑀯 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄. 𑀲𑀫𑁆𑀧𑀢𑁆𑀢𑀺𑀪𑀯𑀪𑀽𑀢𑁄 𑀮𑁄𑀓𑁄 𑀲𑀫𑁆𑀧𑀢𑁆𑀢𑀺𑀪𑀯𑀮𑁄𑀓𑁄, 𑀲𑀼𑀕𑀢𑀺𑀲𑀗𑁆𑀔𑀸𑀢𑁄 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀫𑁆𑀧𑀢𑁆𑀢𑀺 𑀲𑀫𑁆𑀪𑀯𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄. 𑀲𑀼𑀕𑀢𑀺𑀲𑀁𑀯𑀢𑁆𑀢𑀦𑀺𑀬𑁄 𑀓𑀫𑁆𑀫𑀪𑀯𑁄. 𑀤𑀼𑀕𑁆𑀕𑀢𑀺 𑀲𑀗𑁆𑀔𑀸𑀢𑀉𑀧𑀧𑀢𑁆𑀢𑀺𑀪𑀯𑀤𑀼𑀕𑁆𑀕𑀢𑀺 𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀪𑀯𑀸 𑀯𑀺𑀧𑀢𑁆𑀢𑀺𑀪𑀯𑀮𑁄𑀓𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑀸.

𑀧𑀼𑀦 𑀏𑀓𑀓𑀤𑀼𑀓𑀸𑀤𑀺𑀯𑀲𑁂𑀦 𑀮𑁄𑀓𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀏𑀓𑁄 𑀮𑁄𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀳𑀸𑀭𑀸𑀤𑀬𑁄 𑀯𑀺𑀬 𑀳𑀺 𑀆𑀳𑀸𑀭𑀝𑁆𑀞𑀺𑀢𑀺𑀓𑀸 𑀲𑀗𑁆𑀔𑀸𑀭𑀸 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺. 𑀏𑀢𑁆𑀣 𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀬𑀸𑀬𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺, 𑀢𑀸𑀬 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀏𑀓𑁄𑀯 𑀮𑁄𑀓𑁄 𑀏𑀓𑀯𑀺𑀥𑁄 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄. 𑀤𑁆𑀯𑁂 𑀮𑁄𑀓𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀫𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀦𑀺𑀩𑁆𑀩𑀸𑀦𑀲𑁆𑀲 𑀅𑀕𑁆𑀕𑀳𑀡𑀁 𑀢𑀲𑁆𑀲 𑀅𑀮𑁄𑀓𑀲𑀪𑀸𑀯𑀢𑁆𑀢𑀸. 𑀦𑀦𑀼 𑀘 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀏𑀢𑁆𑀣 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀫𑀕𑁆𑀕𑀨𑀮𑀸𑀦𑀫𑁆𑀧𑀺 𑀮𑁄𑀓𑀢𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀥𑀫𑁆𑀫𑀸𑀦𑀁 𑀇𑀥 ‘‘𑀮𑁄𑀓𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀣 𑀯𑀸 𑀦 𑀮𑀼𑀚𑁆𑀚𑀢𑀺 𑀦 𑀧𑀮𑀼𑀚𑁆𑀚𑀢𑀻𑀢𑀺 𑀬𑁄 𑀕𑀳𑀺𑀢𑁄 𑀢𑀣𑀸 𑀦 𑀳𑁄𑀢𑀺, 𑀲𑁄 𑀮𑁄𑀓𑁄𑀢𑀺 𑀢𑀁-𑀕𑀳𑀡𑀭𑀳𑀺𑀢𑀸𑀦𑀁 𑀮𑁄𑀓𑀼𑀢𑁆𑀢𑀭𑀸𑀦𑀁 𑀦𑀢𑁆𑀣𑀺 𑀮𑁄𑀓𑀢𑀸. 𑀉𑀧𑀸𑀤𑀸𑀦𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀤𑀲𑀸𑀬𑀢𑀦𑀸𑀦𑀻𑀢𑀺 𑀤𑀲 𑀭𑀽𑀧𑀸𑀬𑀢𑀦𑀸𑀦𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑀺𑀯𑀝𑁆𑀝𑀚𑁆𑀛𑀸𑀲𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀲𑁆𑀲 𑀘 𑀲𑀩𑁆𑀩𑀁 𑀢𑁂𑀪𑀽𑀫𑀓𑀓𑀫𑁆𑀫𑀁 𑀕𑀭𑀳𑀺𑀢𑀩𑁆𑀩𑀁 𑀯𑀚𑁆𑀚𑀺𑀢𑀩𑁆𑀩𑀜𑁆𑀘 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑀸 𑀯𑀚𑁆𑀚𑀁, 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑀸 𑀯𑀚𑁆𑀚’’𑀦𑁆𑀢𑀺. 𑀅𑀧𑁆𑀧𑀭𑀚𑀓𑁆𑀔𑀫𑀳𑀸𑀭𑀚𑀓𑁆𑀔𑀸𑀤𑀻𑀲𑀼 𑀧𑀜𑁆𑀘𑀲𑀼 𑀤𑀼𑀓𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀤𑀲 𑀤𑀲 𑀓𑀢𑁆𑀯𑀸 ‘‘𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑁄𑀧𑀭𑀺𑀬𑀢𑁆𑀢𑀁 𑀚𑀸𑀦𑀸𑀢𑀻𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀅𑀧𑁆𑀧𑀭𑀚𑀓𑁆𑀔𑀸𑀤𑀺𑀪𑀩𑁆𑀩𑀸𑀤𑀺𑀯𑀲𑁂𑀦 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀪𑀕𑀯𑀢𑁄 𑀢𑁂 𑀲𑀢𑁆𑀢𑀸 𑀧𑀼𑀜𑁆𑀚𑀧𑀼𑀜𑁆𑀚𑀸𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀦 𑀏𑀓𑁂𑀓𑀸.

𑀉𑀧𑁆𑀧𑀮𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀉𑀧𑁆𑀧𑀮𑀺𑀦𑀻, 𑀕𑀘𑁆𑀙𑁄𑀧𑀺 𑀚𑀮𑀸𑀲𑀬𑁄𑀧𑀺, 𑀇𑀥 𑀧𑀦 𑀚𑀮𑀸𑀲𑀬𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀉𑀧𑁆𑀧𑀮𑀯𑀦𑁂’’𑀢𑀺. 𑀬𑀸𑀦𑀺 𑀉𑀤𑀓𑀲𑁆𑀲 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀸𑀦𑁂𑀯 𑀳𑀼𑀢𑁆𑀯𑀸 𑀧𑀼𑀲𑀦𑁆𑀢𑀺 𑀯𑀟𑁆𑀠𑀦𑁆𑀢𑀺, 𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺. 𑀤𑀻𑀧𑀺𑀢𑀸𑀦𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀧𑀓𑀸𑀲𑀺𑀢𑀸𑀦𑀺, 𑀇𑀥𑁂𑀯 𑀯𑀸 ‘‘𑀅𑀜𑁆𑀜𑀸𑀦𑀺𑀧𑀻’’𑀢𑀺𑀆𑀤𑀺𑀦𑀸 𑀪𑀸𑀲𑀺𑀢𑀸𑀦𑀺.

𑀉𑀕𑁆𑀖𑀝𑀺𑀢𑀜𑁆𑀜𑀽𑀢𑀺 𑀉𑀕𑁆𑀖𑀝𑀺𑀢𑀁 𑀦𑀸𑀫 𑀜𑀸𑀡𑀼𑀕𑁆𑀖𑀝𑀦𑀁, 𑀜𑀸𑀡𑁂 𑀉𑀕𑁆𑀖𑀝𑀺𑀢𑀫𑀢𑁆𑀢𑁂 𑀏𑀯 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀜𑁆𑀘𑀺𑀢𑀁 𑀯𑀺𑀢𑁆𑀣𑀸𑀭𑀺𑀢𑀫𑁂𑀯 𑀅𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀉𑀤𑁆𑀤𑁂𑀲𑀸𑀤𑀻𑀳𑀺 𑀦𑁂𑀢𑀩𑁆𑀩𑁄𑀢𑀺 𑀦𑁂𑀬𑁆𑀬𑁄. 𑀲𑀳 𑀉𑀤𑀸𑀳𑀝𑀯𑁂𑀮𑀸𑀬𑀸𑀢𑀺 𑀉𑀤𑀸𑀳𑀸𑀭𑁂 𑀉𑀤𑀸𑀳𑀝𑀫𑀢𑁆𑀢𑁂𑀬𑁂𑀯. 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀜𑀸𑀡𑁂𑀦 𑀲𑀤𑁆𑀥𑀺𑀁 𑀅𑀪𑀺𑀲𑀫𑀬𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀁𑀔𑀺𑀢𑁆𑀢𑁂𑀦 𑀫𑀸𑀢𑀺𑀓𑀸𑀬 𑀞𑀧𑀺𑀬𑀫𑀸𑀦𑀸𑀬 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄 𑀧𑀼𑀕𑁆𑀕𑀮𑁄 ‘‘𑀉𑀕𑁆𑀖𑀝𑀺𑀢𑀜𑁆𑀜𑀽’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀲𑀁𑀔𑀺𑀢𑁆𑀢𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀯𑀺𑀪𑀚𑀺𑀬𑀫𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑁄 𑀧𑀼𑀕𑁆𑀕𑀮𑁄 ‘‘𑀯𑀺𑀧𑀜𑁆𑀘𑀺𑀢𑀜𑁆𑀜𑀽’’𑀢𑀺 𑀯𑀼𑀘𑁆𑀘𑀢𑀺. 𑀉𑀤𑁆𑀤𑁂𑀲𑀢𑁄𑀢𑀺 𑀉𑀤𑁆𑀤𑁂𑀲𑀳𑁂𑀢𑀼, 𑀉𑀤𑁆𑀤𑀺𑀲𑀦𑁆𑀢𑀲𑁆𑀲, 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀧𑀼𑀘𑁆𑀙𑀢𑁄𑀢𑀺 𑀅𑀢𑁆𑀣𑀁 𑀧𑀭𑀺𑀧𑀼𑀘𑁆𑀙𑀦𑁆𑀢𑀲𑁆𑀲. 𑀅𑀦𑀼𑀧𑀼𑀩𑁆𑀩𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀻𑀢𑀺 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀅𑀦𑁆𑀢𑀫𑀲𑁄 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀧𑀤𑀧𑀭𑀫𑁄𑀢𑀺 𑀅𑀬𑀁 𑀧𑀼𑀕𑁆𑀕𑀮𑁄 𑀩𑁆𑀬𑀜𑁆𑀚𑀦𑀧𑀤𑀫𑁂𑀯 𑀧𑀭𑀫𑀁 𑀅𑀲𑁆𑀲𑀸𑀢𑀺 𑀧𑀤𑀧𑀭𑀫𑁄𑀢𑀺 𑀯𑀼𑀘𑁆𑀘𑀢𑀺.

𑀓𑀫𑁆𑀫𑀸𑀯𑀭𑀡𑁂𑀦𑀸𑀢𑀺 (𑀯𑀺𑀪. 𑀅𑀝𑁆𑀞. 𑁮𑁨𑁬) 𑀧𑀜𑁆𑀘𑀯𑀺𑀥𑁂𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀦. 𑀯𑀺𑀧𑀸𑀓𑀸𑀯𑀭𑀡𑁂𑀦𑀸𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸. 𑀬𑀲𑁆𑀫𑀸 𑀧𑀦 𑀤𑀼𑀳𑁂𑀢𑀼𑀓𑀸𑀦𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀤𑀼𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺𑀧𑀺 ‘‘𑀯𑀺𑀧𑀸𑀓𑀸𑀯𑀭𑀡𑀫𑁂𑀯𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀺𑀮𑁂𑀲𑀸𑀯𑀭𑀡𑁂𑀦𑀸𑀢𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸. 𑀅𑀲𑁆𑀲𑀤𑁆𑀥𑀸𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀲𑀤𑁆𑀥𑀸𑀭𑀳𑀺𑀢𑀸. 𑀅𑀘𑁆𑀙𑀦𑁆𑀤𑀺𑀓𑀸𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑀭𑀳𑀺𑀢𑀸. 𑀉𑀢𑁆𑀢𑀭𑀓𑀼𑀭𑀼𑀓𑀸 𑀫𑀦𑀼𑀲𑁆𑀲𑀸 𑀅𑀘𑁆𑀙𑀦𑁆𑀤𑀺𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸. 𑀤𑀼𑀧𑁆𑀧𑀜𑁆𑀜𑀸𑀢𑀺 𑀪𑀯𑀗𑁆𑀕𑀧𑀜𑁆𑀜𑀸𑀬 𑀧𑀭𑀺𑀳𑀻𑀦𑀸. 𑀪𑀯𑀗𑁆𑀕𑀧𑀜𑁆𑀜𑀸𑀬 𑀧𑀦 𑀧𑀭𑀺𑀧𑀼𑀡𑁆𑀡𑀸𑀬𑀧𑀺 𑀬𑀲𑁆𑀲 𑀪𑀯𑀗𑁆𑀕𑀁 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁄𑀧𑀺 𑀤𑀼𑀧𑁆𑀧𑀜𑁆𑀜𑁄 𑀏𑀯 𑀦𑀸𑀫. 𑀅𑀪𑀩𑁆𑀩𑀸 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑁆𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑀗𑁆𑀔𑀸𑀢𑀁 𑀫𑀕𑁆𑀕𑀁 𑀑𑀓𑁆𑀓𑀫𑀺𑀢𑀼𑀁 𑀅𑀥𑀺𑀕𑀦𑁆𑀢𑀼𑀁 𑀅𑀪𑀩𑁆𑀩𑀸. 𑀦 𑀓𑀫𑁆𑀫𑀸𑀯𑀭𑀡𑁂𑀦𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀦𑀺𑀩𑁆𑀩𑀸𑀦𑀲𑁆𑀲 𑀤𑁆𑀯𑀸𑀭𑀁 𑀧𑀯𑀺𑀲𑀦𑀫𑀕𑁆𑀕𑁄. 𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑁄 𑀫𑀳𑀸𑀓𑀭𑀼𑀡𑀽𑀧𑀦𑀺𑀲𑁆𑀲𑀬𑁂𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀅𑀥𑀺𑀕𑀢𑀢𑁆𑀢𑀸. 𑀲𑀤𑁆𑀥𑀁 𑀧𑀫𑀼𑀜𑁆𑀘𑀦𑁆𑀢𑀽𑀢𑀺 𑀅𑀢𑁆𑀢𑀦𑁄 𑀲𑀤𑁆𑀥𑀁 𑀧𑀯𑁂𑀲𑁂𑀦𑁆𑀢𑀼, 𑀲𑀤𑁆𑀤𑀳𑀦𑀸𑀓𑀸𑀭𑀁 𑀉𑀧𑀝𑁆𑀞𑀧𑁂𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀲𑀼𑀔𑁂𑀦 𑀅𑀓𑀺𑀘𑁆𑀙𑁂𑀦 𑀧𑀯𑀢𑁆𑀢𑀦𑀻𑀬𑀢𑀸𑀬 𑀲𑀼𑀧𑁆𑀧𑀯𑀢𑁆𑀢𑀺𑀢𑀁. 𑀦 𑀪𑀸𑀲𑀺𑀁 𑀦 𑀪𑀸𑀲𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀲𑀺𑀁.

𑁨𑁮𑁪. 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀯𑀢𑁆𑀢𑀺𑀢𑀥𑀫𑁆𑀫𑀤𑁂𑀲𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑀲𑁆𑀲 𑀯𑀺𑀢𑀓𑁆𑀓𑀲𑁆𑀲 𑀲𑀢𑁆𑀢𑀫𑀲𑀢𑁆𑀢𑀸𑀳𑀢𑁄 𑀧𑀭𑀁 𑀅𑀝𑁆𑀞𑀫𑀲𑀢𑁆𑀢𑀸𑀳𑁂𑀬𑁂𑀯 𑀉𑀧𑁆𑀧𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂’’𑀢𑀺. 𑀦 𑀇𑀢𑀭𑀲𑀢𑁆𑀢𑀸𑀳𑀸𑀦𑀺 𑀯𑀺𑀬 𑀧𑀝𑀺𑀦𑀺𑀬𑀢𑀓𑀺𑀘𑁆𑀘𑀮𑀓𑁆𑀔𑀺𑀢𑀲𑁆𑀲 𑀅𑀝𑁆𑀞𑀫𑀲𑀢𑁆𑀢𑀸𑀳𑀲𑁆𑀲 𑀦𑀸𑀫 𑀧𑀯𑀢𑁆𑀢𑀺𑀢𑀲𑁆𑀲 𑀲𑀩𑁆𑀪𑀸𑀯𑀸.

𑀯𑀺𑀯𑀝𑀦𑁆𑀢𑀺 𑀤𑁂𑀯𑀢𑀸𑀯𑀺𑀕𑁆𑀕𑀳𑁂𑀦 𑀯𑀺𑀯𑀝𑀅𑀗𑁆𑀕𑀧𑀘𑁆𑀘𑀗𑁆𑀕𑀦𑀺𑀤𑁆𑀤𑀸𑀬 𑀚𑀦𑀸𑀦𑀁 𑀧𑀸𑀓𑀝𑀁 𑀯𑀺𑀧𑁆𑀧𑀓𑀸𑀭𑀦𑁆𑀢𑀺 𑀅𑀢𑁆𑀣𑁄. ‘‘𑀩𑀼𑀤𑁆𑀥𑀢𑁆𑀢𑀁 𑀅𑀦𑀥𑀺𑀕𑀦𑁆𑀢𑁆𑀯𑀸 𑀦 𑀧𑀘𑁆𑀘𑀸𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑀸𑀢𑀺𑀲𑀬𑀳𑁂𑀢𑀼𑀓𑁂𑀦 𑀧𑀣𑀯𑀻𑀧𑀭𑀺𑀯𑀢𑁆𑀢𑀦𑀘𑁂𑀢𑀺𑀬𑀁 𑀦𑀸𑀫 𑀤𑀲𑁆𑀲𑁂𑀢𑁆𑀯𑀸. 𑀲𑀸𑀓𑀺𑀬𑀓𑁄𑀮𑀺𑀬𑀫𑀮𑁆𑀮𑀭𑀚𑁆𑀚𑀯𑀲𑁂𑀦 𑀢𑀻𑀡𑀺 𑀭𑀚𑁆𑀚𑀸𑀦𑀺. 𑀭𑀼𑀓𑁆𑀔𑀫𑀽𑀮𑁂𑀢𑀺 𑀦𑀺𑀕𑁆𑀭𑁄𑀥𑀫𑀽𑀮𑁂. 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀧𑀓𑁆𑀓𑀫𑀦𑁆𑀢𑀺𑀬𑀸 𑀘𑀲𑁆𑀲𑀸 𑀫𑀳𑀸𑀲𑀢𑁆𑀢𑁄 𑀆𑀓𑀸𑀭𑀁 𑀤𑀲𑁆𑀲𑁂𑀲𑀺 𑀲𑀼𑀯𑀡𑁆𑀡𑀣𑀸𑀮𑀕𑁆𑀕𑀳𑀡𑀸𑀬, 𑀲𑀸 ‘‘𑀢𑀼𑀫𑁆𑀳𑀸𑀓𑀁 𑀢𑀁 𑀧𑀭𑀺𑀘𑁆𑀘𑀢𑁆𑀢𑀫𑁂𑀯𑀸’’𑀢𑀺 𑀧𑀓𑁆𑀓𑀸𑀫𑀺.

𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸𑀢𑀺 𑀦𑀸𑀦𑀸𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀦𑁂𑀦 𑀤𑀺𑀯𑀸𑀯𑀺𑀳𑀸𑀭𑀁 𑀯𑀺𑀳𑀭𑀺𑀢𑁆𑀯𑀸. ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘, 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼, 𑀉𑀧𑀲𑀼𑀲𑁆𑀲𑀢𑀼 𑀲𑀭𑀻𑀭𑁂 𑀫𑀁𑀲𑀮𑁄𑀳𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁧𑁮𑁪; 𑀲𑀁. 𑀦𑀺. 𑁨.𑁨𑁩𑁭; 𑀅. 𑀦𑀺. 𑁨.𑁫; 𑁮.𑁧𑁩; 𑀫𑀳𑀸𑀦𑀺. 𑁧𑁭, 𑁧𑁯𑁬) 𑀆𑀕𑀢𑀦𑀬𑁂𑀦 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸.

𑀦𑀯𑀬𑁄𑀚𑀦𑀦𑁆𑀢𑀺 𑀉𑀩𑁆𑀩𑁂𑀥𑀢𑁄 𑀯𑀼𑀢𑁆𑀢𑀁, 𑀧𑀼𑀣𑀼𑀮𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀸, 𑀤𑀻𑀖𑀢𑁄 𑀬𑀸𑀯 𑀘𑀓𑁆𑀓𑀯𑀸𑀴𑀸 𑀆𑀬𑀢𑀸𑀢𑀺 𑀯𑀤𑀦𑁆𑀢𑀺. 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀉𑀝𑁆𑀞𑁂𑀳𑀺 𑀲𑁄, 𑀲𑀺𑀤𑁆𑀥𑀢𑁆𑀣, 𑀅𑀳𑀁 𑀇𑀫𑀲𑁆𑀲 𑀧𑀮𑁆𑀮𑀗𑁆𑀓𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀲𑀓𑁆𑀔𑀺𑀁 𑀑𑀢𑀸𑀭𑁂𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀦𑀺𑀤𑁆𑀤𑀺𑀲𑀺. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑁋 ‘‘𑀅𑀬𑀫𑁂𑀯 𑀅𑀦𑀼𑀘𑁆𑀙𑀯𑀺𑀓𑁄, 𑀅𑀬𑀫𑁂𑀯 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀓𑁄𑀮𑀸𑀳𑀮𑀫𑀓𑀸𑀲𑀺, 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄…𑀧𑁂… 𑀳𑀢𑁆𑀣𑀁 𑀧𑀲𑀸𑀭𑁂𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀅𑀘𑁂𑀢𑀦𑀸𑀬𑀁 𑀧𑀣𑀯𑀻, 𑀅𑀯𑀺𑀜𑁆𑀜𑀸𑀬 𑀲𑀼𑀔𑀁 𑀤𑀼𑀔𑀁;

𑀲𑀸𑀧𑀺 𑀤𑀸𑀦𑀩𑀮𑀸 𑀫𑀬𑁆𑀳𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀓𑀫𑁆𑀧𑀣𑀸’’𑀢𑀺. (𑀘𑀭𑀺𑀬𑀸. 𑁧.𑁧𑁨𑁪);

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀯𑀺𑀲𑁄𑀥𑁂𑀢𑁆𑀯𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄 𑀲𑀻𑀳𑀸𑀯𑀮𑁄𑀓𑀦𑀜𑀸𑀬𑁂𑀦. 𑀯𑀝𑁆𑀝𑀯𑀺𑀯𑀝𑁆𑀝𑀁 𑀲𑀫𑁆𑀫𑀲𑀺𑀢𑁆𑀯𑀸𑀢𑀺 𑀘𑀢𑀼𑀲𑀘𑁆𑀘𑀫𑀦𑀲𑀺𑀓𑀸𑀭𑀁 𑀲𑀦𑁆𑀥𑀸𑀬𑀸𑀳. 𑀇𑀫𑀲𑁆𑀲 𑀧𑀮𑁆𑀮𑀗𑁆𑀓𑀲𑁆𑀲 𑀅𑀢𑁆𑀣𑀸𑀬𑀸𑀢𑀺 𑀧𑀮𑁆𑀮𑀗𑁆𑀓𑀲𑀻𑀲𑁂𑀦 𑀅𑀥𑀺𑀕𑀢𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀺 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀅𑀯𑀺𑀚𑀳𑀦𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑀸 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀏𑀓𑀘𑁆𑀘𑀸𑀦𑀦𑁆𑀢𑀺 𑀬𑀸 𑀅𑀥𑀺𑀕𑀢𑀫𑀕𑁆𑀕𑀸 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑀸 𑀏𑀓𑀤𑁂𑀲𑁂𑀦 𑀘 𑀩𑀼𑀤𑁆𑀥𑀕𑀼𑀡𑁂 𑀚𑀸𑀦𑀦𑁆𑀢𑀺, 𑀢𑀸 𑀞𑀧𑁂𑀢𑁆𑀯𑀸 𑀢𑀤𑀜𑁆𑀜𑁂𑀲𑀁 𑀤𑁂𑀯𑀢𑀸𑀦𑀁. 𑀅𑀜𑁆𑀜𑁂𑀧𑀺 𑀩𑀼𑀤𑁆𑀥𑀢𑁆𑀢𑀓𑀭𑀸𑀢𑀺 𑀯𑀺𑀲𑀸𑀔𑀸𑀧𑀼𑀡𑁆𑀡𑀫𑀢𑁄 𑀧𑀝𑁆𑀞𑀸𑀬 𑀭𑀢𑁆𑀢𑀺𑀦𑁆𑀤𑀺𑀯𑀁 𑀏𑀯𑀁 𑀦𑀺𑀘𑁆𑀘𑀲𑀫𑀸𑀳𑀺𑀢𑀪𑀸𑀯𑀳𑁂𑀢𑀼𑀓𑀸𑀦𑀁 𑀩𑀼𑀤𑁆𑀥𑀕𑀼𑀡𑀸𑀦𑀁 𑀉𑀧𑀭𑀺 𑀅𑀜𑁆𑀜𑁂𑀧𑀺 𑀩𑀼𑀤𑁆𑀥𑀢𑁆𑀢𑀲𑀸𑀥𑀓𑀸, ‘‘𑀅𑀬𑀁 𑀩𑀼𑀤𑁆𑀥𑁄’’𑀢𑀺 𑀩𑀼𑀤𑁆𑀥𑀪𑀸𑀯𑀲𑁆𑀲 𑀧𑀭𑁂𑀲𑀁 𑀯𑀺𑀪𑀸𑀯𑀦𑀸 𑀥𑀫𑁆𑀫𑀸 𑀓𑀺𑀁 𑀦𑀼 𑀔𑁄 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸.

𑀅𑀦𑀺𑀫𑀺𑀲𑁂𑀳𑀻𑀢𑀺 𑀥𑀫𑁆𑀫𑀧𑀻𑀢𑀺𑀯𑀺𑀧𑁆𑀨𑀸𑀭𑀯𑀲𑁂𑀦 𑀧𑀲𑀸𑀤𑀯𑀺𑀓𑀲𑀺𑀢𑀦𑀺𑀘𑁆𑀘𑀮𑀢𑀸𑀬 𑀦𑀺𑀫𑁂𑀲𑀭𑀳𑀺𑀢𑁂𑀳𑀺. 𑀭𑀢𑀦𑀘𑀗𑁆𑀓𑀫𑁂𑀢𑀺 𑀤𑁂𑀯𑀢𑀸𑀳𑀺 𑀫𑀸𑀧𑀺𑀢𑁂 𑀭𑀢𑀦𑀫𑀬𑀘𑀗𑁆𑀓𑀫𑁂. 𑀭𑀢𑀦𑀪𑀽𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀢𑀢𑁆𑀣 𑀘 𑀅𑀦𑀦𑁆𑀢𑀦𑀬𑀲𑁆𑀲 𑀥𑀫𑁆𑀫𑀭𑀢𑀦𑀲𑁆𑀲 𑀲𑀫𑁆𑀫𑀲𑀦𑁂𑀦 𑀢𑀁 𑀞𑀸𑀦𑀁 𑀭𑀢𑀦𑀖𑀭𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀯𑀦𑁆𑀢𑀺 𑀯𑀓𑁆𑀔𑀫𑀸𑀦𑀸𑀓𑀸𑀭𑁂𑀦. 𑀙𑀩𑁆𑀩𑀡𑁆𑀡𑀸𑀦𑀁 𑀭𑀲𑁆𑀫𑀻𑀦𑀁 𑀤𑀦𑁆𑀢𑁂𑀳𑀺 𑀦𑀺𑀓𑁆𑀔𑀫𑀦𑀢𑁄 𑀙𑀤𑁆𑀤𑀦𑁆𑀢𑀦𑀸𑀕𑀓𑀼𑀮𑀁 𑀯𑀺𑀬𑀸𑀢𑀺 𑀦𑀺𑀤𑀲𑁆𑀲𑀦𑀁 𑀯𑀼𑀢𑁆𑀢𑀁.

𑀳𑁂𑀝𑁆𑀞𑀸 𑀮𑁄𑀳𑀧𑀸𑀲𑀸𑀤𑀧𑁆𑀧𑀫𑀸𑀡𑁄𑀢𑀺 𑀦𑀯𑀪𑀽𑀫𑀓𑀲𑁆𑀲 𑀲𑀩𑁆𑀩𑀧𑀞𑀫𑀲𑁆𑀲 𑀮𑁄𑀳𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀸 𑀮𑁄𑀳𑀧𑀸𑀲𑀸𑀤𑀧𑁆𑀧𑀫𑀸𑀡𑁄. 𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁫) 𑀧𑀦 𑀢𑀢𑁆𑀣 ‘‘𑀪𑀡𑁆𑀟𑀸𑀕𑀸𑀭𑀕𑀩𑁆𑀪𑀧𑁆𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀘𑁆𑀘𑀕𑁆𑀖𑁂𑀢𑀺 𑀅𑀪𑀺𑀦𑀯𑁂. 𑀧𑀘𑁆𑀘𑁂𑀓𑀁 𑀫𑀳𑀕𑁆𑀖𑀢𑀸𑀬 𑀧𑀘𑁆𑀘𑀕𑁆𑀖𑁂𑀢𑀺 𑀓𑁂𑀘𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀦 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀫𑀳𑀕𑁆𑀖𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀯𑀸. 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀏𑀢𑁆𑀣 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀬𑀁 𑀯𑀺𑀢𑀓𑁆𑀓𑁄𑀢𑀺 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀅𑀬𑀁 𑀧𑀭𑀺𑀯𑀺𑀢𑀓𑁆𑀓𑁄.

𑀧𑀡𑁆𑀟𑀺𑀘𑁆𑀘𑁂𑀦𑀸𑀢𑀺 𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀲𑀁𑀲𑀺𑀤𑁆𑀥𑁂𑀦 𑀅𑀥𑀺𑀕𑀫𑀩𑀸𑀳𑀼𑀲𑀘𑁆𑀘𑀲𑀗𑁆𑀔𑀸𑀢𑁂𑀦 𑀧𑀡𑁆𑀟𑀺𑀢𑀪𑀸𑀯𑁂𑀦. 𑀯𑁂𑀬𑁆𑀬𑀢𑁆𑀢𑀺𑀬𑁂𑀦𑀸𑀢𑀺 𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀧𑀘𑁆𑀘𑀬𑁂𑀦 𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀩𑁆𑀬𑀢𑁆𑀢𑀪𑀸𑀯𑁂𑀦. 𑀫𑁂𑀥𑀸𑀯𑀻𑀢𑀺 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀢𑀁𑀢𑀁𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀘 𑀫𑁂𑀥𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑀳𑀸𑀚𑀸𑀦𑀺𑀬𑁄𑀢𑀺 𑀫𑀳𑀸𑀧𑀭𑀺𑀳𑀸𑀦𑀺𑀓𑁄. 𑀆𑀕𑀫𑀦𑀧𑀸𑀤𑀸𑀧𑀺 𑀦𑀢𑁆𑀣𑀻𑀢𑀺 𑀇𑀤𑀁 𑀧𑀞𑀫𑀁 𑀯𑀢𑁆𑀢𑀩𑁆𑀩𑀁, 𑀅𑀣𑀸𑀳𑀁 𑀢𑀢𑁆𑀣 𑀕𑀘𑁆𑀙𑁂𑀬𑁆𑀬𑀁, 𑀕𑀦𑁆𑀢𑁆𑀯𑀸 𑀤𑁂𑀲𑀺𑀬𑀫𑀸𑀦𑀁 𑀥𑀫𑁆𑀫𑀫𑁆𑀧𑀺𑀲𑁆𑀲 𑀲𑁄𑀢𑀼𑀁 𑀲𑁄𑀢𑀧𑀲𑀸𑀤𑁄𑀧𑀺 𑀦𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀓𑀺𑀁 𑀧𑀦 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀢𑁂 𑀥𑀫𑁆𑀫𑀁 𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺? 𑀆𑀫, 𑀦 𑀲𑀓𑁆𑀓𑀸. 𑀦 𑀳𑀺 𑀧𑀭𑀢𑁄 𑀖𑁄𑀲𑀁 𑀅𑀦𑁆𑀢𑀭𑁂𑀦 𑀲𑀸𑀯𑀓𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀲𑀫𑁆𑀪𑀯𑀢𑀺, 𑀅𑀜𑁆𑀜𑀣𑀸 𑀇𑀢𑀭𑀧𑀘𑁆𑀘𑀬𑀭𑀳𑀺𑀢𑀲𑁆𑀲𑀧𑀺 𑀥𑀫𑁆𑀫𑀸𑀪𑀺𑀲𑀫𑀬𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀘 𑀢𑀁 𑀅𑀢𑁆𑀣𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬 𑀧𑀭𑀢𑁄 𑀘 𑀖𑁄𑀲𑁄 𑀅𑀚𑁆𑀛𑀢𑁆𑀢𑀜𑁆𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄’’𑀢𑀺 (𑀅. 𑀦𑀺. 𑁨.𑁧𑁨𑁭). 𑀧𑀸𑀴𑀺𑀬𑀁 𑀭𑀸𑀫𑀲𑁆𑀲𑁂𑀯 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀢𑀸 𑀆𑀕𑀢𑀸, 𑀦 𑀉𑀤𑀓𑀲𑁆𑀲, 𑀢𑀁 𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑁂𑀦 𑀲𑀫𑀸𑀕𑀢𑀓𑀸𑀮𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁄 𑀳𑀺 𑀧𑀼𑀩𑁆𑀩𑁂𑀧𑀺 𑀢𑀢𑁆𑀣 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑁂𑀦 𑀔𑀺𑀧𑁆𑀧𑀜𑁆𑀜𑁂𑀯 𑀲𑀫𑀸𑀧𑀢𑁆𑀢𑀻𑀦𑀁 𑀦𑀺𑀩𑁆𑀩𑀢𑁆𑀢𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 𑀫𑀳𑀸𑀲𑀢𑁆𑀢𑁂 𑀢𑀢𑁄 𑀦𑀺𑀩𑁆𑀩𑀺𑀚𑁆𑀚 𑀧𑀓𑁆𑀓𑀦𑁆𑀢𑁂 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑀺𑀩𑁆𑀩𑀢𑁆𑀢𑁄𑀢𑀺 𑀅𑀤𑁆𑀤𑀲𑀸’’𑀢𑀺. 𑀏𑀢𑁂 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀴𑀗𑁆𑀕𑀯𑀸𑀢𑀺 𑀙𑀴𑀗𑁆𑀕𑀯𑀺𑀤𑀼𑀦𑁄. 𑀫𑀦𑁆𑀢𑀦𑁆𑀢𑀺 𑀫𑀦𑁆𑀢𑀧𑀤𑀁. ‘‘𑀦𑀺𑀚𑁆𑀛𑀸𑀬𑀺𑀢𑁆𑀯𑀸’’𑀢𑀺 𑀯𑀘𑀦𑀲𑁂𑀲𑁄, 𑀫𑀦𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀬𑀸𑀓𑀭𑀺𑀁𑀲𑀽𑀢𑀺 𑀓𑀣𑁂𑀲𑀼𑀁.

𑀬𑀣𑀸𑀫𑀦𑁆𑀢𑀧𑀤𑀦𑁆𑀢𑀺 𑀮𑀓𑁆𑀔𑀡𑀫𑀦𑁆𑀢𑀲𑀗𑁆𑀔𑀸𑀢𑀯𑁂𑀤𑀯𑀘𑀦𑀸𑀦𑀼𑀭𑀽𑀧𑀁. 𑀕𑀢𑀸𑀢𑀺 𑀧𑀝𑀺𑀧𑀦𑁆𑀦𑀸. ‘‘𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸’’𑀢𑀺 (𑀤𑀻. 𑀦𑀺. 𑁨.𑁩𑁩; 𑁩.𑁧𑁯𑁯-𑁨𑁦𑁦; 𑀫. 𑀦𑀺. 𑁨.𑁩𑁮𑁪, 𑁩𑁯𑁮) 𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀦𑀺𑀘𑁆𑀙𑀺𑀦𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀩𑁆𑀭𑀸𑀳𑁆𑀫𑀡𑀸 𑀯𑀼𑀢𑁆𑀢𑀫𑁂𑀯 𑀧𑀝𑀺𑀧𑀚𑁆𑀚𑀺𑀁𑀲𑀼, 𑀦 𑀫𑀳𑀸𑀧𑀼𑀭𑀺𑀲𑀲𑁆𑀲 𑀩𑀼𑀤𑁆𑀥𑀪𑀸𑀯𑀧𑁆𑀧𑀢𑁆𑀢𑀺𑀁 𑀧𑀘𑁆𑀘𑀸𑀲𑀻𑀲𑀺𑀁𑀲𑀼. 𑀇𑀫𑁂 𑀧𑀦 𑀓𑁄𑀡𑁆𑀟𑀜𑁆𑀜𑀸𑀤𑀬𑁄 𑀧𑀜𑁆𑀘 ‘‘𑀏𑀓𑀁𑀲𑀢𑁄 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀚𑀸𑀢𑀦𑀺𑀘𑁆𑀙𑀬𑀢𑁆𑀢𑀸 𑀫𑀦𑁆𑀢𑀧𑀤𑀁 𑀅𑀢𑀺𑀓𑁆𑀓𑀦𑁆𑀢𑀸. 𑀧𑀼𑀡𑁆𑀡𑀧𑀢𑁆𑀢𑀦𑁆𑀢𑀺 𑀢𑀼𑀝𑁆𑀞𑀺𑀤𑀸𑀦𑀁. 𑀦𑀺𑀩𑁆𑀩𑀺𑀢𑀓𑁆𑀓𑀸𑀢𑀺 𑀦𑀺𑀩𑁆𑀩𑀺𑀓𑀧𑁆𑀧𑀸, 𑀦 𑀤𑁆𑀯𑁂𑀥𑀸 𑀢𑀓𑁆𑀓𑀸.

𑀯𑀧𑁆𑀧𑀓𑀸𑀮𑁂𑀢𑀺 𑀯𑀧𑀦𑀓𑀸𑀮𑁂. 𑀯𑀧𑀦𑀢𑁆𑀣𑀁 𑀩𑀻𑀚𑀸𑀦𑀺 𑀦𑀻𑀳𑀭𑀡𑀦𑁆𑀢𑁂𑀦 𑀢𑀢𑁆𑀣 𑀅𑀕𑁆𑀕𑀁 𑀕𑀳𑁂𑀢𑁆𑀯𑀸 𑀤𑀸𑀦𑀁 𑀩𑀻𑀚𑀕𑁆𑀕𑀤𑀸𑀦𑀁 𑀦𑀸𑀫. 𑀮𑀸𑀬𑀦𑀕𑁆𑀕𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀥𑀜𑁆𑀜𑀨𑀮𑀲𑁆𑀲 𑀦𑀸𑀢𑀺𑀧𑀭𑀺𑀡𑀢𑀓𑀸𑀮𑁂 𑀧𑀼𑀣𑀼𑀓𑀓𑀸𑀮𑁂. 𑀮𑀸𑀬𑀦𑁂𑀢𑀺 𑀲𑀲𑁆𑀲𑀮𑀸𑀬𑀦𑁂. 𑀬𑀣𑀸 𑀮𑀽𑀦𑀁 𑀳𑀢𑁆𑀣𑀓𑀁 𑀓𑀢𑁆𑀯𑀸 𑀯𑁂𑀡𑀺𑀯𑀲𑁂𑀦 𑀩𑀦𑁆𑀥𑀦𑀁 𑀯𑁂𑀡𑀺𑀓𑀭𑀡𑀁. 𑀯𑁂𑀡𑀺𑀬𑁄 𑀧𑀦 𑀧𑀼𑀭𑀺𑀲𑀪𑀸𑀭𑀯𑀲𑁂𑀦 𑀩𑀦𑁆𑀥𑀦𑀁 𑀓𑀮𑀸𑀧𑁄. 𑀔𑀮𑁂 𑀓𑀮𑀸𑀧𑀸𑀦𑀁 𑀞𑀧𑀦𑀤𑀺𑀯𑀲𑁂 𑀅𑀕𑁆𑀕𑀁 𑀕𑀳𑁂𑀢𑁆𑀯𑀸 𑀤𑀸𑀦𑀁 𑀔𑀮𑀕𑁆𑀕𑀁. 𑀫𑀤𑁆𑀤𑀺𑀢𑁆𑀯𑀸 𑀯𑀻𑀳𑀻𑀦𑀁 𑀭𑀸𑀲𑀺𑀓𑀭𑀡𑀤𑀺𑀯𑀲𑁂 𑀅𑀕𑁆𑀕𑀁 𑀕𑀳𑁂𑀢𑁆𑀯𑀸 𑀤𑀸𑀦𑀁 𑀪𑀡𑁆𑀟𑀕𑁆𑀕𑀁. 𑀓𑁄𑀝𑁆𑀞𑀸𑀕𑀸𑀭𑁂 𑀥𑀜𑁆𑀜𑀲𑁆𑀲 𑀧𑀓𑁆𑀔𑀺𑀧𑀦𑀤𑀺𑀯𑀲𑁂 𑀤𑀸𑀦𑀁 𑀓𑁄𑀝𑁆𑀞𑀕𑁆𑀕𑀁. 𑀉𑀤𑁆𑀥𑀭𑀺𑀢𑁆𑀯𑀸𑀢𑀺 𑀔𑀮𑀢𑁄 𑀥𑀜𑁆𑀜𑀲𑁆𑀲 𑀉𑀤𑁆𑀥𑀭𑀺𑀢𑁆𑀯𑀸. 𑀦𑀯𑀦𑁆𑀦𑀁 𑀅𑀕𑁆𑀕𑀤𑀸𑀦𑀸𑀦𑀁 𑀤𑀺𑀦𑁆𑀦𑀢𑁆𑀢𑀸𑀢𑀺 𑀇𑀤𑀁 𑀢𑀲𑁆𑀲 𑀭𑀢𑁆𑀢𑀜𑁆𑀜𑀽𑀦𑀁 𑀅𑀕𑁆𑀕𑀪𑀸𑀯𑀢𑁆𑀣𑀸𑀬 𑀓𑀢𑀸𑀪𑀺𑀦𑀻𑀳𑀸𑀭𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀺𑀢𑀲𑀸𑀯𑀓𑀧𑀸𑀭𑀫𑀺𑀬𑀸 𑀘𑀺𑀡𑁆𑀡𑀦𑁆𑀢𑁂 𑀧𑀯𑀢𑁆𑀢𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀺𑀡𑁆𑀡𑀫𑁆𑀧𑀺 𑀳𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀢𑀁𑀢𑀁𑀧𑀸𑀭𑀫𑀺𑀬𑀸 𑀲𑀺𑀔𑀸𑀧𑁆𑀧𑀢𑁆𑀢𑀓𑀸𑀮𑁂 𑀧𑀯𑀢𑁆𑀢𑀺𑀢𑀁 𑀧𑀼𑀜𑁆𑀜𑀁 𑀅𑀧𑀼𑀜𑁆𑀜𑀁 𑀯𑀸 𑀕𑀭𑀼𑀢𑀭𑀯𑀺𑀧𑀸𑀓𑀫𑁂𑀯 𑀳𑁄𑀢𑀺, 𑀥𑀫𑁆𑀫𑀲𑁆𑀲 𑀘 𑀲𑀩𑁆𑀩𑀧𑀞𑀫𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀯𑀺𑀦𑀸 𑀓𑀣𑀁 𑀭𑀢𑁆𑀢𑀜𑁆𑀜𑀽𑀦𑀁 𑀅𑀕𑁆𑀕𑀪𑀸𑀯𑀲𑀺𑀤𑁆𑀥𑀻𑀢𑀺. 𑀩𑀳𑀼𑀓𑀸𑀭𑀸 𑀔𑁄 𑀇𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑀸𑀢𑀺 𑀇𑀤𑀁 𑀧𑀦 𑀉𑀧𑀓𑀸𑀭𑀸𑀦𑀼𑀲𑁆𑀲𑀭𑀡𑀫𑀢𑁆𑀢𑀓𑀫𑁂𑀯 𑀧𑀭𑀺𑀘𑀬𑀯𑀲𑁂𑀦 𑀆𑀴𑀸𑀭𑀼𑀤𑀓𑀸𑀦𑀼𑀲𑁆𑀲𑀭𑀡𑀁 𑀯𑀺𑀬.

𑁨𑁮𑁫. 𑀯𑀺𑀯𑀭𑁂𑀢𑀺 𑀫𑀚𑁆𑀛𑁂. 𑀢𑁂𑀦𑀸𑀳 ‘‘𑀢𑀺𑀕𑀸𑀯𑀼𑀢𑀦𑁆𑀢𑀭𑁂 𑀞𑀸𑀦𑁂’’𑀢𑀺. 𑀅𑀬𑁄𑀚𑀺𑀬𑀫𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀦 𑀧𑀸𑀧𑀼𑀡𑀸𑀢𑀺 𑀲𑀸𑀫𑀺𑀯𑀘𑀦𑀲𑁆𑀲 𑀧𑀲𑀗𑁆𑀕𑁂 𑀅𑀦𑁆𑀢𑀭𑀸-𑀲𑀤𑁆𑀤𑀬𑁄𑀕𑁂𑀦 𑀉𑀧𑀬𑁄𑀕𑀯𑀘𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀧𑀦 𑀬𑀼𑀢𑁆𑀢𑀢𑁆𑀢𑀸 𑀉𑀧𑀬𑁄𑀕𑀯𑀘𑀦𑀁 𑀓𑀢’’𑀦𑁆𑀢𑀺.

𑀲𑀩𑁆𑀩𑀁 𑀢𑁂𑀪𑀽𑀫𑀓𑀥𑀫𑁆𑀫𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀘𑀢𑀼𑀪𑀽𑀫𑀓𑀥𑀫𑁆𑀫𑀁 𑀅𑀦𑀯𑀲𑁂𑀲𑀁 𑀜𑁂𑀬𑁆𑀬𑀁 𑀲𑀩𑁆𑀩𑀲𑁄 𑀜𑁂𑀬𑁆𑀬𑀸𑀯𑀭𑀡𑀲𑁆𑀲 𑀧𑀳𑀻𑀦𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀅𑀯𑁂𑀤𑀺𑀁. 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀸𑀤𑀺𑀦𑀸 𑀓𑀺𑀮𑁂𑀲𑁂𑀦. 𑀅𑀧𑁆𑀧𑀳𑀸𑀢𑀩𑁆𑀩𑀫𑁆𑀧𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀁 𑀢𑀧𑁆𑀧𑀝𑀺𑀩𑀤𑁆𑀥𑀓𑀺𑀮𑁂𑀲𑀫𑀣𑀦𑁂𑀦 𑀧𑀳𑀻𑀦𑀢𑁆𑀢𑀸 𑀦 𑀳𑁄𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀁 𑀢𑁂𑀪𑀽𑀫𑀓𑀥𑀫𑁆𑀫𑀁 𑀚𑀳𑀺𑀢𑁆𑀯𑀸 𑀞𑀺𑀢𑁄’’𑀢𑀺. 𑀆𑀭𑀫𑁆𑀫𑀡𑀢𑁄𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦.

𑀓𑀺𑀜𑁆𑀘𑀸𑀧𑀺 𑀮𑁄𑀓𑀺𑀬𑀥𑀫𑁆𑀫𑀸𑀦𑀫𑁆𑀧𑀺 𑀬𑀸𑀤𑀺𑀲𑁄 𑀮𑁄𑀓𑀦𑀸𑀣𑀲𑁆𑀲 𑀅𑀥𑀺𑀕𑀫𑁄, 𑀦 𑀢𑀸𑀤𑀺𑀲𑁄 𑀅𑀥𑀺𑀕𑀫𑁄 𑀧𑀭𑀽𑀧𑀤𑁂𑀲𑁄 𑀅𑀢𑁆𑀣𑀺, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀧𑀦𑀲𑁆𑀲 𑀮𑁂𑀲𑁄𑀧𑀺 𑀦𑀢𑁆𑀣𑀻𑀢𑀺 𑀆𑀳 ‘‘𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀫𑀬𑁆𑀳𑀁 𑀆𑀘𑀭𑀺𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀧𑀝𑀺𑀪𑀸𑀕𑀧𑀼𑀕𑁆𑀕𑀮𑁄𑀢𑀺 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀧𑀝𑀺𑀦𑀺𑀥𑀺𑀪𑀽𑀢𑁄 𑀧𑀼𑀕𑁆𑀕𑀮𑁄. 𑀲𑀳𑁂𑀢𑀼𑀦𑀸𑀢𑀺 𑀲𑀳𑀥𑀫𑁆𑀫𑁂𑀦 𑀲𑀧𑀸𑀝𑀺𑀳𑀻𑀭𑀓𑀢𑀸𑀬. 𑀦𑀬𑁂𑀦𑀸𑀢𑀺 𑀅𑀪𑀺𑀚𑀸𑀦𑀦𑀢𑀸𑀤𑀺𑀯𑀺𑀥𑀺𑀦𑀸. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀻𑀢𑀺 𑀇𑀤𑀁 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀜𑁂𑀬𑁆𑀬𑀲𑁆𑀲 𑀅𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀲𑀬𑀁 𑀩𑀼𑀤𑁆𑀥𑁄𑀢𑀺 𑀲𑀬𑀫𑁂𑀯 𑀲𑀬𑀫𑁆𑀪𑀼𑀜𑀸𑀡𑁂𑀦 𑀩𑀼𑀤𑁆𑀥𑁄. 𑀯𑀺𑀕𑀢𑀧𑀭𑀺𑀴𑀸𑀳𑀢𑀸𑀬 𑀲𑀻𑀢𑀺𑀪𑀽𑀢𑁄. 𑀢𑀢𑁄 𑀏𑀯 𑀦𑀺𑀩𑁆𑀩𑀼𑀢𑁄. 𑀆𑀳𑀜𑁆𑀙𑀦𑁆𑀢𑀺 𑀆𑀳𑀦𑀺𑀲𑁆𑀲𑀸𑀫𑀺. 𑀯𑁂𑀦𑁂𑀬𑁆𑀬𑀸𑀦𑀁 𑀅𑀫𑀢𑀸𑀥𑀺𑀕𑀫𑀸𑀬 𑀉𑀕𑁆𑀖𑁄𑀲𑀦𑀸𑀤𑀺𑀁 𑀓𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸 𑀅𑀫𑀢𑀤𑀼𑀦𑁆𑀤𑀼𑀪𑀻𑀢𑀺 𑀯𑀼𑀢𑁆𑀢𑀸.

𑀅𑀦𑀦𑁆𑀢𑀜𑀸𑀡𑁄 𑀚𑀺𑀢𑀓𑀺𑀮𑁂𑀲𑁄𑀢𑀺 𑀅𑀦𑀦𑁆𑀢𑀚𑀺𑀦𑁄. 𑀏𑀯𑀫𑁆𑀧𑀺 𑀦𑀸𑀫 𑀪𑀯𑁂𑀬𑁆𑀬𑀸𑀢𑀺 𑀏𑀯𑀁𑀯𑀺𑀥𑁂 𑀦𑀸𑀫 𑀭𑀽𑀧𑀭𑀢𑀦𑁂 𑀈𑀤𑀺𑀲𑁂𑀦 𑀜𑀸𑀡𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀳𑀺𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀧𑀘𑁆𑀘𑀬𑁄 𑀚𑀸𑀢𑁄, 𑀓𑀢𑀸𑀥𑀺𑀓𑀸𑀭𑁄 𑀘𑁂𑀲. 𑀢𑀣𑀸 𑀳𑀺 𑀪𑀕𑀯𑀸 𑀢𑁂𑀦 𑀲𑀫𑀸𑀕𑀫𑀢𑁆𑀣𑀁 𑀧𑀤𑀲𑀸𑀯 𑀢𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀓𑁄𑀝𑁆𑀞𑀸𑀲𑀲𑀫𑁆𑀧𑀦𑁆𑀦𑀸𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀗𑁆𑀔𑀸𑀢𑀅𑀯𑀬𑀯𑀲𑀫𑁆𑀧𑀦𑁆𑀦𑀸. 𑀅𑀝𑁆𑀝𑀻𑀬𑀢𑀻𑀢𑀺 𑀅𑀝𑁆𑀝𑁄 𑀳𑁄𑀢𑀺, 𑀤𑁄𑀫𑀦𑀲𑁆𑀲𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀅𑀯𑀺𑀳𑀁 𑀉𑀧𑀧𑀦𑁆𑀦𑀸𑀲𑁂𑀢𑀺 𑀅𑀯𑀺𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀸. 𑀯𑀺𑀫𑀼𑀢𑁆𑀢𑀸𑀢𑀺 𑀅𑀕𑁆𑀕𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀸. 𑀢𑁂 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑀺𑀩𑁆𑀩𑀬𑁄𑀕𑀁 𑀉𑀧𑀚𑁆𑀛𑀕𑀼𑀦𑁆𑀢𑀺 𑀢𑁂 𑀉𑀧𑀓𑀸 𑀤𑀬𑁄 𑀫𑀸𑀦𑀼𑀲𑀁 𑀅𑀢𑁆𑀢𑀪𑀸𑀯𑀁 𑀚𑀳𑀺𑀢𑁆𑀯𑀸 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑁂𑀦 𑀅𑀯𑀺𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀫𑀢𑁆𑀢𑀸𑀯 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀤𑀺𑀩𑁆𑀩𑀬𑁄𑀕𑀁 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀁 𑀲𑀫𑀢𑀺𑀓𑁆𑀓𑀫𑀺𑀁𑀲𑀼.

𑁨𑁮𑁬. 𑀲𑀡𑁆𑀞𑀧𑁂𑀲𑀼𑀦𑁆𑀢𑀺 ‘‘𑀦𑁂𑀯 𑀅𑀪𑀺𑀯𑀸𑀤𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁨) 𑀲𑀡𑁆𑀞𑀁 𑀓𑀺𑀭𑀺𑀬𑀸𑀓𑀸𑀭𑀁 𑀅𑀓𑀁𑀲𑀼. 𑀢𑁂𑀦𑀸𑀳 ‘‘𑀓𑀢𑀺𑀓𑀁 𑀅𑀓𑀁𑀲𑀽’’𑀢𑀺. 𑀧𑀥𑀸𑀦𑀢𑁄𑀢𑀺 𑀧𑀼𑀩𑁆𑀩𑁂 𑀅𑀦𑀼𑀝𑁆𑀞𑀺𑀢𑀤𑀼𑀓𑁆𑀓𑀭𑀘𑀭𑀡𑀢𑁄. 𑀧𑀪𑀸𑀯𑀺𑀢𑀦𑁆𑀢𑀺 𑀯𑀸𑀘𑀸𑀲𑀫𑀼𑀝𑁆𑀞𑀸𑀦𑀁, 𑀯𑀘𑀻𑀦𑀺𑀘𑁆𑀙𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀬𑀁 𑀦 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀅𑀥𑀺𑀕𑀫𑀺𑀲𑁆𑀲𑀢𑀻’’𑀢𑀺 𑀅𑀦𑀼𑀓𑁆𑀓𑀡𑁆𑀞𑀦𑀢𑁆𑀣𑀁. ‘‘𑀫𑀬𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀫𑀸 𑀯𑀺𑀢𑀓𑁆𑀓𑀬𑀺𑀢𑁆𑀣. 𑀑𑀪𑀸𑀲𑁄𑀢𑀺 𑀯𑀺𑀧𑀲𑁆𑀲𑀦𑁄𑀪𑀸𑀲𑁄. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀦𑀺𑀫𑀺𑀢𑁆𑀢𑀁. 𑀏𑀓𑀧𑀤𑁂𑀦𑁂𑀯𑀸𑀢𑀺 𑀏𑀓𑀯𑀘𑀦𑁂𑀦𑁂𑀯. ‘‘𑀅𑀦𑁂𑀦 𑀧𑀼𑀩𑁆𑀩𑁂𑀧𑀺 𑀦 𑀓𑀺𑀜𑁆𑀘𑀺 𑀫𑀺𑀘𑁆𑀙𑀸 𑀯𑀼𑀢𑁆𑀢𑀧𑀼𑀩𑁆𑀩’’𑀦𑁆𑀢𑀺 𑀲𑀢𑀺𑀁 𑀮𑀪𑀺𑀢𑁆𑀯𑀸. 𑀬𑀣𑀸𑀪𑀽𑀢𑀯𑀸𑀤𑀻𑀢𑀺 𑀉𑀧𑁆𑀧𑀦𑁆𑀦𑀕𑀸𑀭𑀯𑀸.

𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀅𑀳𑁄𑀲𑀺 𑀤𑀳𑀭𑀓𑀼𑀫𑀸𑀭𑁄 𑀯𑀺𑀬 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀭𑀺𑀳𑀭𑀺𑀢𑁄. 𑀫𑀮𑁂𑀢𑀺 𑀲𑀁𑀓𑀺𑀮𑁂𑀲𑁂. 𑀕𑀸𑀫𑀢𑁄 𑀪𑀺𑀓𑁆𑀔𑀽𑀳𑀺 𑀦𑀻𑀳𑀝𑀁 𑀉𑀧𑀦𑀻𑀢𑀁 𑀪𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀦𑀻𑀳𑀝𑀪𑀢𑁆𑀢𑁄, 𑀢𑁂𑀦 𑀦𑀻𑀳𑀝𑀪𑀢𑁆𑀢𑁂𑀦 𑀪𑀕𑀯𑀢𑀸. 𑀏𑀢𑁆𑀢𑀓𑀁 𑀓𑀣𑀸𑀫𑀕𑁆𑀕𑀦𑁆𑀢𑀺 𑁋 ‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑁂𑀲𑀦𑀸’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 𑁋 ‘‘𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 𑀧𑀤𑀁, 𑀏𑀢𑁆𑀢𑀓𑀁 𑀤𑁂𑀲𑀦𑀸𑀫𑀕𑁆𑀕𑀁. 𑀓𑀸𑀫𑀜𑁆𑀘𑁂𑀢𑁆𑀣 𑁋 ‘‘𑀢𑀼𑀫𑁆𑀳𑁂𑀧𑀺 𑀫𑀫𑀜𑁆𑀘𑁂𑀯 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀜𑁆𑀘 𑀫𑀕𑁆𑀕𑀁 𑀆𑀭𑀽𑀴𑁆𑀳𑀸, 𑀅𑀭𑀺𑀬𑀧𑀭𑀺𑀬𑁂𑀲𑀦𑀸 𑀢𑀼𑀫𑁆𑀳𑀸𑀓𑀁 𑀧𑀭𑀺𑀬𑁂𑀲𑀦𑀸’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁. 𑀢𑁂𑀦 𑀧𑀦 𑁋 ‘‘𑀲𑁄 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀦𑀸 𑀚𑀸𑀢𑀺𑀥𑀫𑁆𑀫𑁄 𑀲𑀫𑀸𑀦𑁄…𑀧𑁂… 𑀅𑀲𑀁𑀓𑀺𑀮𑀺𑀝𑁆𑀞𑀁 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀺𑀩𑁆𑀩𑀸𑀦𑀁 𑀅𑀚𑁆𑀛𑀕𑀫𑀦𑁆𑀢𑀺, 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀫𑀬𑀸 𑀏𑀯𑀁 𑀑𑀯𑀤𑀺𑀬𑀫𑀸𑀦𑀸…𑀧𑁂… 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀺𑀩𑁆𑀩𑀸𑀦𑀁 𑀅𑀚𑁆𑀛𑀕𑀫𑀁𑀲𑀼…𑀧𑁂… 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 𑀇𑀫𑀲𑁆𑀲𑁂𑀯 𑀲𑀼𑀢𑁆𑀢𑀧𑀤𑀲𑁆𑀲 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀪𑀕𑀯𑀸 𑀬𑀁 𑀧𑀼𑀩𑁆𑀩𑁂 𑀅𑀯𑀘 𑀢𑀼𑀫𑁆𑀳𑁂𑀧𑀺 𑀫𑀫𑀜𑁆𑀘𑁂𑀯 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀜𑁆𑀘 𑀫𑀕𑁆𑀕𑀁 𑀆𑀭𑀼𑀴𑁆𑀳𑀸, 𑀅𑀭𑀺𑀬𑀧𑀭𑀺𑀬𑁂𑀲𑀦𑀸 𑀢𑀼𑀫𑁆𑀳𑀸𑀓𑀁 𑀧𑀭𑀺𑀬𑁂𑀲𑀦𑀸𑀢𑀺. 𑀇𑀫𑀁 𑀏𑀓𑀫𑁂𑀯 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳𑀭𑀻’’𑀢𑀺.

𑁨𑁮𑁭. 𑀅𑀦𑀕𑀸𑀭𑀺𑀬𑀸𑀦𑀫𑁆𑀧𑀻𑀢𑀺 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺. 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸 𑀳𑁄𑀢𑀺 𑀕𑀥𑀺𑀢𑀸𑀤𑀺𑀪𑀸𑀯𑁂𑀦 𑀧𑀭𑀺𑀪𑀼𑀜𑁆𑀚𑀦𑀢𑁄. 𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦𑀧𑀺 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸 𑀳𑁄𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀇𑀤𑀸𑀦𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀓𑀸𑀫𑀕𑀼𑀡𑁂 𑀦𑀺𑀤𑁆𑀥𑀸𑀭𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀪𑁄𑀕𑀭𑀲𑁄𑀢𑀺 𑀧𑀭𑀺𑀪𑁄𑀕𑀧𑀘𑁆𑀘𑀬𑀧𑀻𑀢𑀺𑀲𑁄𑀫𑀦𑀲𑁆𑀲𑀁. 𑀅𑀬𑀁 𑀧𑀦 𑀭𑀲𑀲𑀫𑀸𑀦𑀢𑀸𑀯𑀲𑁂𑀦 𑀕𑀳𑀡𑀁 𑀉𑀧𑀸𑀤𑀸𑀬 ‘‘𑀭𑀲𑁄’’𑀢𑀺 𑀯𑀼𑀢𑁆𑀢𑁄, 𑀦 𑀲𑀪𑀸𑀯𑀢𑁄. 𑀲𑀪𑀸𑀯𑁂𑀦 𑀕𑀳𑀡𑀁 𑀉𑀧𑀸𑀤𑀸𑀬 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀲𑀺𑀬𑀸, 𑀦 𑀭𑀲𑀸𑀭𑀫𑁆𑀫𑀡𑀁. 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀪𑁄𑀕𑁄𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀭𑀳𑀺𑀢𑁄 𑀧𑀭𑀺𑀪𑁄𑀕𑁄, 𑀇𑀤𑀫𑀢𑁆𑀣𑀺𑀢𑀁 𑀅𑀦𑀺𑀲𑁆𑀲𑀸𑀬 𑀕𑀥𑀺𑀢𑀸𑀤𑀺𑀪𑀸𑀯𑁂𑀦 𑀧𑀭𑀺𑀪𑁄𑀕𑁄𑀢𑀺 𑀅𑀢𑁆𑀣𑁄. 𑀕𑀥𑀺𑀢𑀸𑀢𑀺 𑀢𑀡𑁆𑀳𑀸𑀬 𑀩𑀤𑁆𑀥𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀫𑀼𑀘𑁆𑀙𑀁 𑀫𑁄𑀳𑀁 𑀧𑀫𑀸𑀤𑀁 𑀆𑀧𑀦𑁆𑀦𑀸. 𑀅𑀚𑁆𑀛𑁄𑀕𑀸𑀴𑁆𑀳𑀸𑀢𑀺 𑀅𑀥𑀺𑀑𑀕𑀸𑀴𑁆𑀳𑀸, 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀸. 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸𑀢𑀺 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁂 𑀤𑁄𑀲𑀁 𑀅𑀚𑀸𑀦𑀦𑁆𑀢𑀸. 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑀳𑁂𑀢𑀼𑀆𑀤𑀻𑀦𑀯𑀁 𑀦𑀺𑀲𑁆𑀲𑀭𑀢𑀺 𑀅𑀢𑀺𑀓𑁆𑀓𑀫𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁, 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁.

𑀧𑀸𑀲𑀭𑀸𑀲𑀺𑀦𑁆𑀢𑀺 𑀧𑀸𑀲𑀲𑀫𑀼𑀤𑀸𑀬𑀁. 𑀮𑀼𑀤𑁆𑀤𑀓𑁄 𑀳𑀺 𑀧𑀸𑀲𑀁 𑀑𑀟𑁆𑀟𑁂𑀦𑁆𑀢𑁄 𑀦 𑀏𑀓𑀁𑀬𑁂𑀯, 𑀦 𑀘 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀑𑀟𑁆𑀟𑁂𑀢𑀺, 𑀅𑀣 𑀔𑁄 𑀢𑀁𑀢𑀁𑀫𑀺𑀕𑀸𑀦𑀁 𑀆𑀕𑀫𑀦𑀫𑀕𑁆𑀕𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀑𑀟𑁆𑀟𑁂𑀦𑁆𑀢𑁄 𑀩𑀳𑀽𑀬𑁂𑀯 𑀑𑀟𑁆𑀟𑁂𑀢𑀺, 𑀢𑀲𑁆𑀫𑀸 𑀢𑁂 𑀘𑀺𑀢𑁆𑀢𑁂𑀦 𑀏𑀓𑀢𑁄 𑀕𑀳𑁂𑀢𑁆𑀯𑀸 ‘‘𑀧𑀸𑀲𑀭𑀸𑀲𑀻’’𑀢𑀺 𑀯𑀼𑀢𑁆𑀢𑀁. 𑀯𑀸𑀕𑀼𑀭𑀲𑁆𑀲 𑀯𑀸 𑀧𑀸𑀲𑀧𑀤𑁂𑀲𑀸𑀦𑀁 𑀩𑀳𑀼𑀪𑀸𑀯𑀢𑁄 ‘‘𑀧𑀸𑀲𑀭𑀸𑀲𑀻’’𑀢𑀺 𑀯𑀼𑀢𑁆𑀢𑀁.

𑀧𑀸𑀲𑀭𑀸𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.