𑁫. 𑀦𑀺𑀯𑀸𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁧. 𑀦𑀺𑀯𑀧𑁆𑀧𑀢𑀻𑀢𑀺 𑀦𑀺𑀯𑀸𑀧𑁄, 𑀦𑀺𑀯𑀸𑀧𑀁 𑀯𑀢𑁆𑀢𑁂𑀢𑀺, 𑀦𑀺𑀯𑀸𑀧𑀪𑁄𑀚𑀦𑀁 𑀯𑀸 𑀏𑀢𑀲𑁆𑀲𑀸𑀢𑀺 𑀦𑁂𑀯𑀸𑀧𑀺𑀓𑁄, 𑀦𑀺𑀯𑀸𑀧𑁂𑀦 𑀫𑀺𑀕𑁂 𑀧𑀮𑁄𑀪𑁂𑀢𑁆𑀯𑀸 𑀕𑀡𑁆𑀳𑀦𑀓𑀫𑀸𑀕𑀯𑀺𑀓𑁄. 𑀢𑀺𑀡𑀩𑀻𑀚𑀸𑀦𑀻𑀢𑀺 𑀦𑀺𑀯𑀸𑀧𑀢𑀺𑀡𑀩𑀻𑀚𑀸𑀦𑀺. 𑀯𑀧𑁆𑀧𑀦𑁆𑀢𑀺 𑀲𑀲𑁆𑀲𑀁 𑀯𑀺𑀬 𑀯𑀧𑀺𑀢𑀩𑁆𑀩𑀝𑁆𑀞𑁂𑀦 𑀯𑀧𑁆𑀧𑀁. ‘‘𑀫𑀬𑀁 𑀯𑀺𑀬 𑀅𑀜𑁆𑀜𑁂 𑀓𑁂 𑀈𑀤𑀺𑀲𑀁 𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺 𑀫𑀸𑀦𑀫𑀤𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀯𑀺𑀲𑁆𑀲𑀝𑁆𑀞𑀲𑀢𑀺𑀪𑀸𑀯𑀦𑁆𑀢𑀺 𑀅𑀦𑀼𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑀪𑀸𑀯𑀁. 𑀢𑀺𑀭𑀘𑁆𑀙𑀸𑀦𑀸 𑀳𑀺 𑀯𑀺𑀚𑀸𑀢𑀺𑀬𑀩𑀮𑀯𑀢𑀺𑀭𑀘𑁆𑀙𑀸𑀦𑀯𑀲𑀦𑀝𑁆𑀞𑀸𑀦𑁂𑀲𑀼 𑀲𑀸𑀲𑀗𑁆𑀓𑀸 𑀉𑀩𑁆𑀩𑀺𑀕𑁆𑀕𑀳𑀤𑀬𑀸 𑀅𑀧𑁆𑀧𑀫𑀢𑁆𑀢𑀸 𑀳𑁄𑀦𑁆𑀢𑀺 𑀯𑀺𑀲𑁂𑀲𑀢𑁄 𑀫𑀸𑀕𑀯𑀺𑀓𑀸𑀤𑀺𑀫𑀦𑀼𑀲𑁆𑀲𑀽𑀧𑀘𑀸𑀭𑁂, 𑀭𑀲𑀢𑀡𑁆𑀳𑀸𑀬 𑀧𑀦 𑀩𑀤𑁆𑀥𑀸 𑀧𑀫𑀸𑀤𑀁 𑀆𑀧𑀚𑁆𑀚𑀲𑁆𑀲𑀦𑁆𑀢𑀺. 𑀦𑀺𑀯𑀧𑀢𑀺 𑀏𑀢𑁆𑀣𑀸𑀢𑀺 𑀦𑀺𑀯𑀸𑀧𑁄, 𑀦𑀺𑀯𑀸𑀧𑀪𑀽𑀫𑀺 𑀦𑀺𑀯𑀸𑀧𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀦𑀺𑀯𑀸𑀧𑀝𑁆𑀞𑀸𑀦𑁂’’𑀢𑀺. ‘‘𑀬𑀣𑀸𑀓𑀸𑀫𑀓𑀭𑀡𑀻𑀬𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀏𑀓𑀁 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀻𑀯𑀸𑀭𑀯𑀦𑀁 𑀯𑀺𑀬𑀸𑀢𑀺 𑀦𑀻𑀯𑀸𑀭𑀲𑁆𑀲 𑀲𑀫𑀽𑀳𑁄 𑀯𑀺𑀬. 𑀦𑀻𑀯𑀸𑀭𑁄 𑀦𑀸𑀫 𑀅𑀭𑀜𑁆𑀜𑁂 𑀲𑀬𑀁𑀚𑀸𑀢𑀯𑀻𑀳𑀺𑀚𑀸𑀢𑀺. 𑀫𑁂𑀖𑀫𑀸𑀮𑀸 𑀯𑀺𑀬𑀸𑀢𑀺 𑀫𑁂𑀖𑀖𑀝𑀸 𑀯𑀺𑀬. 𑀏𑀓𑀕𑁆𑀖𑀦𑀦𑁆𑀢𑀺 𑀏𑀓𑀚𑁆𑀛𑀁 𑀯𑀺𑀬 𑀅𑀯𑀺𑀭𑀝𑁆𑀞𑀁. 𑀧𑀓𑁆𑀓𑀫𑀦𑁆𑀢𑀻𑀢𑀺 𑀆𑀲𑀗𑁆𑀓𑀧𑀭𑀺𑀲𑀗𑁆𑀓𑀸 𑀳𑀼𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺. 𑀓𑀡𑁆𑀡𑁂 𑀘𑀸𑀮𑀬𑀫𑀸𑀦𑀸𑀢𑀺 𑀅𑀦𑀸𑀲𑀗𑁆𑀓𑀦𑁆𑀢𑀸𑀦𑀁 𑀧𑀳𑀝𑁆𑀞𑀸𑀓𑀸𑀭𑀤𑀲𑁆𑀲𑀦𑀁. 𑀫𑀡𑁆𑀟𑀮𑀕𑀼𑀫𑁆𑀩𑀦𑁆𑀢𑀺 𑀫𑀡𑁆𑀟𑀮𑀓𑀸𑀓𑀸𑀭𑁂𑀦 𑀞𑀺𑀢𑀁 𑀕𑀼𑀫𑁆𑀩𑀁.

𑁨𑁬𑁨. 𑀓𑀧𑁆𑀧𑁂𑀢𑁆𑀯𑀸𑀢𑀺 𑀉𑀧𑀫𑀸𑀪𑀸𑀯𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸. 𑀫𑀺𑀕𑁂 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑀦𑀁 𑀯𑀲𑀻𑀪𑀸𑀯𑁄. 𑀲𑁄 𑀏𑀯 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺, 𑀧𑀪𑀸𑀯𑀦𑀝𑁆𑀞𑁂𑀦 𑀆𑀦𑀼𑀪𑀸𑀯𑁄.

𑁨𑁬𑁩. 𑀪𑀬𑁂𑀦 𑀪𑁄𑀕𑀢𑁄𑀢𑀺 𑀪𑀬𑁂𑀦 𑀲𑀳 𑀲𑀪𑀬𑀁 𑀦𑀺𑀯𑀸𑀧𑀧𑀭𑀺𑀪𑁄𑀕𑀢𑁄. 𑀩𑀮𑀯𑀻𑀭𑀺𑀬𑀦𑁆𑀢𑀺 𑀓𑀸𑀬𑀩𑀮𑀜𑁆𑀘 𑀉𑀝𑁆𑀞𑀸𑀦𑀯𑀻𑀭𑀺𑀬𑀜𑁆𑀘. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀩𑀮𑀫𑁂𑀯 𑀯𑀻𑀭𑀺𑀬𑀁. 𑀩𑀮𑀦𑁆𑀢𑀺 𑀘 𑀲𑀭𑀻𑀭𑀩𑀮𑀁, 𑀢𑀜𑁆𑀘 𑀅𑀢𑁆𑀣𑀢𑁄 𑀫𑀦𑀲𑀺𑀓𑀸𑀭𑀫𑀕𑁆𑀕𑁂𑀳𑀺 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀡𑀓𑀯𑀸𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀡𑀯𑀸𑀬𑁄𑀥𑀸𑀢𑀽’’𑀢𑀺.

𑁨𑁬𑁪. 𑀲𑀺𑀓𑁆𑀔𑀺𑀢𑀓𑁂𑀭𑀸𑀝𑀺𑀓𑀸𑀢𑀺 𑀧𑀭𑀺𑀘𑀺𑀢𑀲𑀸𑀞𑁂𑀬𑁆𑀬𑀸, 𑀯𑀜𑁆𑀘𑀓𑀸𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺𑀫𑀦𑁆𑀢𑁄 𑀯𑀺𑀬 𑀆𑀦𑀼𑀪𑀸𑀯𑀯𑀦𑁆𑀢𑁄 𑀯𑀺𑀬. 𑀧𑀘𑀼𑀭𑀚𑀦𑁂𑀳𑀺 𑀧𑀭𑀪𑀽𑀢𑀸 𑀚𑀸𑀢𑀸𑀢𑀺 𑀧𑀭𑀚𑀦𑀸, 𑀫𑀳𑀸𑀪𑀽𑀢𑀸. 𑀢𑁂𑀦𑀸𑀳 ‘‘𑀬𑀓𑁆𑀔𑀸’’𑀢𑀺. 𑀲𑀫𑀦𑁆𑀢𑀸 𑀲𑀧𑁆𑀧𑀤𑁂𑀲𑀦𑁆𑀢𑀺 𑀲𑀫𑀦𑁆𑀢𑀢𑁄 𑀧𑀤𑁂𑀲𑀯𑀦𑁆𑀢𑀁 𑀯𑀺𑀧𑀼𑀮𑁄𑀓𑀸𑀲𑀲𑀦𑁆𑀦𑀺𑀯𑀸𑀲𑀝𑁆𑀞𑀸𑀦𑀁. 𑀢𑀲𑁆𑀲 𑀧𑀦 𑀲𑀧𑁆𑀧𑀤𑁂𑀲𑀢𑀸 𑀫𑀳𑀸𑀑𑀓𑀸𑀲𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀳𑀦𑁆𑀢𑀁 𑀑𑀓𑀸𑀲’’𑀦𑁆𑀢𑀺.

𑁨𑁬𑁫. 𑀖𑀝𑁆𑀝𑁂𑀲𑁆𑀲𑀦𑁆𑀢𑀻𑀢𑀺 ‘‘𑀲𑀪𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀲𑀜𑁆𑀜𑀸𑀤𑀸𑀦𑀯𑀲𑁂𑀦 𑀘𑀺𑀢𑁆𑀢𑀁 𑀘𑁂𑀢𑁂𑀲𑁆𑀲𑀦𑁆𑀢𑀺, 𑀢𑀸𑀲𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀘𑁆𑀘𑀚𑀺𑀲𑁆𑀲𑀦𑁆𑀢𑀻𑀢𑀺 𑀦𑀺𑀩𑁆𑀩𑀺𑀲𑀺𑀲𑁆𑀲𑀦𑁆𑀢𑀺. 𑀫𑀳𑀮𑁆𑀮𑀓𑁄𑀢𑀺 𑀚𑀸𑀢𑀺𑀬𑀸 𑀫𑀳𑀮𑁆𑀮𑀓𑁄 𑀚𑀺𑀡𑁆𑀡𑁄. 𑀤𑀼𑀩𑁆𑀩𑀮𑁄𑀢𑀺 𑀩𑁆𑀬𑀸𑀥𑀺𑀯𑀲𑁂𑀦, 𑀧𑀓𑀢𑀺𑀬𑀸 𑀯𑀸 𑀩𑀮𑀯𑀺𑀭𑀳𑀺𑀢𑁄.

𑁨𑁬𑁭. 𑀦𑀺𑀯𑀸𑀧𑀲𑀤𑀺𑀲𑀢𑀸𑀬 𑀦𑀺𑀯𑀸𑀧𑁄𑀢𑀺 𑀯𑀸. 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀁 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂𑀳𑀺 𑀆𑀫𑀲𑀺𑀢𑀩𑁆𑀩𑀢𑀸𑀬 𑀮𑁄𑀓𑀸𑀫𑀺𑀲𑀸𑀦𑀻𑀢𑀺 𑀯𑀸. 𑀯𑀝𑁆𑀝𑁂 𑀆𑀫𑀺𑀲𑀪𑀽𑀢𑀢𑁆𑀢𑀸 𑀯𑀝𑁆𑀝𑀸𑀫𑀺𑀲𑀪𑀽𑀢𑀸𑀦𑀁. 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 𑀓𑀸𑀫𑀕𑀼𑀡𑁂𑀳𑀺 𑀓𑀸𑀫𑀕𑀼𑀡𑁂 𑀕𑀺𑀤𑁆𑀥𑁂 𑀲𑀢𑁆𑀢𑁂 𑀢𑀲𑁆𑀲𑁂𑀯 𑀕𑁂𑀥𑀲𑁆𑀲 𑀯𑀲𑁂𑀦 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀻𑀢𑀺. 𑀢𑁂𑀦𑀸𑀳 𑁋

‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄;

𑀢𑁂𑀦 𑀢𑀁 𑀩𑀸𑀥𑀬𑀺𑀲𑁆𑀲𑀸𑀫𑀺, 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺. (𑀲𑀁. 𑀦𑀺. 𑁧.𑁧𑁫𑁧; 𑀫𑀳𑀸𑀯. 𑁩𑁩);

𑀅𑀬𑀦𑁆𑀢𑀺 𑀧𑀞𑀫𑀫𑀺𑀕𑀚𑀸𑀢𑀽𑀧𑀫𑀸. 𑀯𑀸𑀦𑀧𑀢𑁆𑀣𑀲𑁆𑀲 𑀲𑀢𑁄𑀯 𑀧𑀧𑀜𑁆𑀘𑀧𑀭𑀤𑀢𑁆𑀢𑀺𑀓𑀸𑀤𑀺𑀲𑀧𑀼𑀢𑁆𑀢𑀤𑀸𑀭𑀦𑀺𑀓𑁆𑀔𑀫𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀧𑀼𑀢𑁆𑀢𑀪𑀭𑀺𑀬𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺.

𑁨𑁬𑁮. 𑀓𑀸𑀫𑀢𑁄 𑀘𑀺𑀢𑁆𑀢𑀲𑁆𑀲 𑀯𑀺𑀫𑀼𑀢𑁆𑀢𑀺 𑀇𑀥 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦𑀸𑀫…𑀧𑁂… 𑀉𑀧𑁆𑀧𑀦𑁆𑀦𑀅𑀚𑁆𑀛𑀸𑀲𑀬𑁄’’𑀢𑀺. 𑀓𑀸𑀫𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀦 𑀢𑀢𑁆𑀣 𑀦𑀺𑀫𑀼𑀕𑁆𑀕𑀢𑀸𑀬 𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀼𑀢𑀺𑀬𑀫𑀺𑀕𑀚𑀸𑀢𑀽𑀧𑀫𑀸 𑀯𑀼𑀢𑁆𑀢𑀸.

𑁨𑁬𑁯. 𑀢𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀬𑀣𑀸𑀧𑀭𑀺𑀘𑁆𑀘𑀢𑁆𑀢𑁂 𑀓𑀸𑀫𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀏𑀯𑀁 𑀞𑀺𑀢𑀸, 𑀦 𑀤𑀼𑀢𑀺𑀬𑀸 𑀯𑀺𑀬 𑀢𑀢𑁆𑀣 𑀦𑀺𑀫𑀼𑀕𑁆𑀕𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀺𑀁 𑀧𑀦 𑀢𑁂 𑀅𑀓𑀁𑀲𑀽’’𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁂 𑀓𑀸𑀫𑀁 𑀉𑀚𑀼𑀓𑀁 𑀓𑀸𑀫𑀕𑀼𑀡𑁂𑀲𑀼 𑀦 𑀦𑀺𑀫𑀼𑀕𑁆𑀕𑀸, 𑀧𑀭𑀺𑀬𑀸𑀬𑁂𑀦 𑀧𑀦 𑀦𑀺𑀫𑀼𑀕𑁆𑀕𑀸 𑀤𑀺𑀝𑁆𑀞𑀺𑀚𑀸𑀮𑁂𑀦 𑀘 𑀅𑀚𑁆𑀛𑁄𑀢𑁆𑀣𑀝𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀕𑀸𑀫𑀦𑀺𑀕𑀫𑀚𑀦𑀧𑀤𑀭𑀸𑀚𑀥𑀸𑀦𑀺𑀬𑁄’’𑀢𑀺𑀆𑀤𑀺𑀫𑀸𑀳. 𑀤𑀺𑀝𑁆𑀞𑀺𑀚𑀸𑀮𑀫𑁆𑀧𑀺 𑀢𑀡𑁆𑀳𑀸𑀚𑀸𑀮𑀸𑀦𑀼𑀕𑀢𑀫𑁂𑀯𑀸𑀢𑀺 𑀆𑀳 ‘‘𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀤𑀺𑀝𑁆𑀞𑀺𑀚𑀸𑀮𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺.

𑁨𑁭𑁧. 𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸 𑀯𑀸 𑀇𑀥 𑀫𑀸𑀭𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀓𑁆𑀔𑀻𑀦𑀺 𑀪𑀺𑀦𑁆𑀤𑀺 𑀤𑀝𑁆𑀞𑀼𑀁 𑀅𑀲𑀫𑀢𑁆𑀣𑀪𑀸𑀯𑀸𑀧𑀸𑀤𑀦𑁂𑀦. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦’’𑀦𑁆𑀢𑀺𑀆𑀤𑀺. 𑀓𑀺𑀜𑁆𑀘𑀸𑀧𑀺 𑀫𑀸𑀭𑁄 𑀬𑀁 𑀓𑀺𑀜𑁆𑀘𑀺 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀘𑀺𑀢𑁆𑀢𑀁 𑀇𑀫𑀁 𑀦𑀸𑀫 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀸𑀬 𑀯𑀢𑁆𑀢𑀢𑀻𑀢𑀺 𑀦 𑀚𑀸𑀦𑀸𑀢𑀺, 𑀇𑀥𑀸𑀥𑀺𑀧𑁆𑀧𑁂𑀢𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀯𑀲𑁂𑀦 ‘‘𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀧𑀭𑀺𑀬𑀸𑀬𑁂𑀦𑀸𑀢𑀺 ‘‘𑀦 𑀫𑀸𑀭𑀲𑁆𑀲 𑀅𑀓𑁆𑀔𑀻𑀦𑀺 𑀪𑀺𑀦𑁆𑀤𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀧𑀭𑀺𑀬𑀸𑀬𑁂𑀦. 𑀅𑀤𑀲𑁆𑀲𑀦𑀁 𑀕𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀘𑀓𑁆𑀔𑀼𑀲𑁆𑀲 𑀧𑀤𑀁 𑀧𑀢𑀺𑀝𑁆𑀞𑀸𑀢𑀺 𑀘 𑀇𑀥 𑀆𑀭𑀫𑁆𑀫𑀡𑀁 𑀅𑀥𑀺𑀧𑁆𑀧𑁂𑀢𑀁 𑀢𑀁 𑀧𑀭𑀺𑀕𑁆𑀕𑀬𑁆𑀳 𑀧𑀯𑀢𑁆𑀢𑀦𑀢𑁄𑀢𑀺 𑀆𑀳 ‘‘𑀅𑀧𑁆𑀧𑀢𑀺𑀝𑁆𑀞𑀁 𑀦𑀺𑀭𑀸𑀭𑀫𑁆𑀫𑀡’’𑀦𑁆𑀢𑀺. 𑀲𑁄𑀢𑀺 𑀫𑀸𑀭𑁄. 𑀤𑀺𑀲𑁆𑀯𑀸𑀢𑀺 𑀤𑀲𑁆𑀲𑀦𑀳𑁂𑀢𑀼. 𑀬𑀲𑁆𑀫𑀸 𑀫𑀕𑁆𑀕𑁂𑀦 𑀘𑀢𑀼𑀲𑀘𑁆𑀘𑀤𑀲𑁆𑀲𑀦𑀳𑁂𑀢𑀼 𑀆𑀲𑀯𑀸 𑀦 𑀧𑀭𑀺𑀓𑁆𑀔𑀻𑀡𑀸. 𑀨𑀮𑀓𑁆𑀔𑀡𑁂 𑀳𑀺 𑀢𑁂 𑀔𑀻𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺.

𑀮𑁄𑀓𑁂𑀢𑀺 𑀲𑀢𑁆𑀢𑀮𑁄𑀓𑁂 𑀲𑀗𑁆𑀔𑀸𑀭𑀮𑁄𑀓𑁂 𑀘. 𑀲𑀢𑁆𑀢𑀯𑀺𑀲𑀢𑁆𑀢𑀪𑀸𑀯𑁂𑀦𑀸𑀢𑀺 𑀮𑀕𑁆𑀕𑀪𑀸𑀯𑁂𑀦 𑀘𑁂𑀯 𑀲𑀯𑀺𑀲𑁂𑀲𑀁 𑀆𑀲𑀢𑁆𑀢𑀪𑀸𑀯𑁂𑀦 𑀘. 𑀅𑀣 𑀯𑀸𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑁂𑀲𑀦𑀬𑀯𑀲𑁂𑀦 (𑀫𑀳𑀸𑀦𑀺. 𑁩, 𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁨, 𑁨𑁩; 𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁪) 𑀯𑀺𑀲𑀢𑁆𑀢𑀺𑀓𑀸𑀧𑀤𑀁 𑀦𑀺𑀤𑁆𑀤𑀺𑀲𑀢𑀺. 𑀯𑀺𑀲𑀢𑀸𑀢𑀺 𑀯𑀺𑀢𑁆𑀣𑀝𑀸 𑀭𑀽𑀧𑀸𑀤𑀻𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀩𑁆𑀬𑀸𑀧𑀦𑀯𑀲𑁂𑀦 𑀯𑀺𑀲𑀝𑀸𑀢𑀺 𑀧𑀼𑀭𑀺𑀫𑀯𑀘𑀦𑀫𑁂𑀯 𑀢𑀓𑀸𑀭𑀲𑁆𑀲 𑀝𑀓𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀲𑀸𑀮𑀸𑀢𑀺 𑀯𑀺𑀧𑀼𑀮𑀸. 𑀯𑀺𑀲𑀓𑁆𑀓𑀢𑀻𑀢𑀺 𑀧𑀭𑀺𑀲𑀓𑁆𑀓𑀢𑀺 𑀲𑀳𑀢𑀺. 𑀭𑀢𑁆𑀢𑁄 𑀳𑀺 𑀭𑀸𑀕𑀯𑀢𑁆𑀣𑀼𑀦𑀸 𑀧𑀸𑀤𑁂𑀦 𑀢𑀸𑀮𑀺𑀬𑀫𑀸𑀦𑁄𑀧𑀺 𑀲𑀳𑀢𑀺. 𑀑𑀲𑀓𑁆𑀓𑀦𑀁, 𑀯𑀺𑀧𑁆𑀨𑀦𑁆𑀤𑀦𑀁 𑀯𑀸 𑀯𑀺𑀲𑀓𑁆𑀓𑀦𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀯𑀺𑀲𑀁𑀳𑀭𑀢𑀻𑀢𑀺 𑀬𑀣𑀸 𑀢𑀣𑀸 𑀓𑀸𑀫𑁂𑀲𑀼 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑀻 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑀧𑁆𑀧𑀯𑀢𑁆𑀢𑀺𑀢𑁄 𑀘𑀺𑀢𑁆𑀢𑀁 𑀲𑀁𑀳𑀭𑀢𑀺 𑀲𑀗𑁆𑀔𑀺𑀧𑀢𑀺, 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀁, 𑀢𑀁 𑀳𑀭𑀢𑀺 𑀉𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀁 𑀦𑀺𑀘𑁆𑀘𑀸𑀤𑀺𑀢𑁄 𑀕𑀡𑁆𑀳𑀸𑀧𑁂𑀦𑁆𑀢𑀻 𑀯𑀺𑀲𑀁𑀯𑀸𑀤𑀺𑀓𑀸 𑀳𑁄𑀢𑀺. 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀯𑀺𑀲𑀫𑀽𑀮𑀸, 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀤𑀼𑀓𑁆𑀔𑀸𑀤𑀺𑀪𑀽𑀢𑀸 𑀯𑁂𑀤𑀦𑀸 𑀫𑀽𑀮𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀲𑀫𑀽𑀮𑀸. 𑀤𑀼𑀓𑁆𑀔𑀲𑀫𑀼𑀤𑀬𑀢𑁆𑀢𑀸 𑀯𑀺𑀲𑀁 𑀨𑀮𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀲𑀨𑀮𑀸. 𑀢𑀡𑁆𑀳𑀸𑀬 𑀭𑀽𑀧𑀸𑀤𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲𑁂𑀯 𑀧𑀭𑀺𑀪𑁄𑀕𑁄 𑀳𑁄𑀢𑀺, 𑀦 𑀅𑀫𑀢𑀲𑁆𑀲𑀸𑀢𑀺 𑀲𑀸 ‘‘𑀯𑀺𑀲𑀧𑀭𑀺𑀪𑁄𑀕𑀸’’𑀢𑀺 𑀯𑀼𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁄 𑀧𑀦𑁂𑀢𑁆𑀣 𑀧𑀥𑀸𑀦𑁄 𑀅𑀢𑁆𑀣𑁄, 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀯𑀺𑀲𑀸𑀮𑀸 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀢𑁆𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄𑀢𑀺 𑀉𑀧𑀲𑀕𑁆𑀕𑀯𑀲𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀦𑀺𑀭𑀯𑀲𑁂𑀲𑀢𑁄 𑀯𑀸 𑀢𑀺𑀡𑁆𑀡𑁄 𑀦𑀺𑀢𑁆𑀢𑀺𑀡𑁆𑀡𑁄. 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀉𑀤𑁆𑀥𑀫𑀼𑀤𑁆𑀥𑀁 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀺𑀯𑀸𑀧𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.