𑁯. 𑀤𑁆𑀯𑁂𑀥𑀸𑀯𑀺𑀢𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁬. 𑀤𑁆𑀯𑁂 𑀤𑁆𑀯𑁂 𑀪𑀸𑀕𑁂𑀢𑀺 𑀤𑁆𑀯𑁂 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀇𑀫𑀁 𑀏𑀓𑀁 𑀪𑀸𑀕𑀫𑀓𑀸𑀲𑀺𑀁, 𑀇𑀫𑀁 𑀤𑀼𑀢𑀺𑀬𑀪𑀸𑀕𑀫𑀓𑀸𑀲𑀺’’𑀦𑁆𑀢𑀺 𑀯𑀘𑀦𑀢𑁄 𑀲𑀩𑁆𑀩𑁂𑀧𑀺 𑀯𑀺𑀢𑀓𑁆𑀓𑀸 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀺𑀪𑀸𑀕𑁂𑀦 𑀤𑁆𑀯𑁂𑀯 𑀪𑀸𑀕𑀸 𑀓𑀢𑀸, 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀧𑀦𑁂𑀢𑁂𑀲𑀁 𑀅𑀪𑀺𑀡𑁆𑀳𑀸𑀘𑀸𑀭𑀁 𑀉𑀧𑀸𑀤𑀸𑀬 𑀧𑀸𑀴𑀺𑀬𑀁 ‘‘𑀤𑁆𑀯𑀺𑀥𑀸 𑀓𑀢𑁆𑀯𑀸’’𑀢𑀺 𑀆𑀫𑁂𑀟𑀺𑀢𑀯𑀘𑀦𑀦𑁆𑀢𑀺 ‘‘𑀤𑁆𑀯𑁂 𑀤𑁆𑀯𑁂 𑀪𑀸𑀕𑁂 𑀓𑀢𑁆𑀯𑀸’’𑀢𑀺 𑀆𑀫𑁂𑀟𑀺𑀢𑀯𑀘𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑁄. 𑀅𑀣 𑀯𑀸 𑀪𑀸𑀕𑀤𑁆𑀯𑀬𑀲𑁆𑀲 𑀲𑀧𑁆𑀧𑀝𑀺𑀪𑀸𑀕𑀢𑀸𑀬 𑀢𑀢𑁆𑀣 𑀬𑀁 𑀬𑀁 𑀤𑁆𑀯𑀬𑀫𑁆𑀧𑀺 𑀔𑁄 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀁, 𑀢𑀁 𑀢𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀳𑁂𑀢𑀼𑀓𑀸𑀫𑁄 𑀪𑀕𑀯𑀸 𑀆𑀳 ‘‘𑀤𑁆𑀯𑀺𑀥𑀸 𑀓𑀢𑁆𑀯𑀸 𑀯𑀺𑀢𑀓𑁆𑀓𑁂 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀁 𑀲𑀫𑁆𑀫𑀸𑀯𑀺𑀢𑀓𑁆𑀓𑀸𑀦𑀜𑁆𑀘 𑀅𑀦𑀯𑀲𑁂𑀲𑀁 𑀅𑀲𑀗𑁆𑀓𑀭𑀢𑁄 𑀘 𑀕𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀁 𑀏𑀓𑀁 𑀪𑀸𑀕𑀫𑀓𑀸𑀲𑀺𑀁, 𑀇𑀫𑀁 𑀤𑀼𑀢𑀺𑀬𑀪𑀸𑀕𑀫𑀓𑀸𑀲𑀺’’𑀦𑁆𑀢𑀺 𑀅𑀯𑁄𑀘. 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀓𑀸𑀫𑀭𑀸𑀕𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀲𑀫𑁆𑀧𑀬𑀼𑀢𑁆𑀢𑁄, 𑀓𑀸𑀫𑁂𑀦 𑀧𑀝𑀺𑀩𑀤𑁆𑀥𑁄 𑀯𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀩𑁆𑀬𑀸𑀧𑀚𑁆𑀚𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀩𑁆𑀬𑀸𑀧𑀸𑀤𑁄, 𑀤𑁄𑀲𑁄. 𑀯𑀺𑀳𑀺𑀁𑀲𑀢𑀺 𑀏𑀢𑀸𑀬 𑀲𑀢𑁆𑀢𑁂, 𑀯𑀺𑀳𑀺𑀁𑀲𑀦𑀁 𑀯𑀸 𑀢𑁂𑀲𑀁 𑀏𑀢𑀦𑁆𑀢𑀺 𑀯𑀺𑀳𑀺𑀁𑀲𑀸, 𑀧𑀭𑁂𑀲𑀁 𑀯𑀺𑀳𑁂𑀞𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀲𑁆𑀲 𑀓𑀭𑀼𑀡𑀸𑀧𑀝𑀺𑀧𑀓𑁆𑀔𑀲𑁆𑀲 𑀧𑀸𑀧𑀥𑀫𑁆𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀅𑀚𑁆𑀛𑀢𑁆𑀢𑀥𑀫𑁆𑀫𑀸𑀭𑀫𑁆𑀫𑀡𑀫𑀸𑀳. 𑀩𑀳𑀺𑀤𑁆𑀥𑀸𑀢𑀺 𑀩𑀸𑀳𑀺𑀭𑀥𑀫𑁆𑀫𑀸𑀭𑀫𑁆𑀫𑀡𑀁. 𑀑𑀴𑀸𑀭𑀺𑀓𑁄𑀢𑀺 𑀩𑀳𑀮𑀓𑀸𑀫𑀭𑀸𑀕𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑁄. 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀲𑀼𑀔𑀼𑀫𑁄. 𑀯𑀺𑀢𑀓𑁆𑀓𑁄𑀅𑀓𑀼𑀲𑀮𑀧𑀓𑁆𑀔𑀺𑀓𑁄𑀬𑁂𑀯𑀸𑀢𑀺 𑀇𑀫𑀺𑀦𑀸 𑀯𑀺𑀢𑀓𑁆𑀓𑀪𑀸𑀯𑀲𑀸𑀫𑀜𑁆𑀜𑁂𑀦 𑀢𑀢𑁆𑀣𑀸𑀧𑀺 𑀅𑀓𑀼𑀲𑀮𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀪𑀸𑀕𑀓𑀭𑀡𑀁, 𑀦 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀢𑀸𑀤𑀺𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀦𑁂𑀓𑁆𑀔𑀫𑁆𑀫𑀁 𑀯𑀼𑀘𑁆𑀘𑀢𑀺 𑀮𑁄𑀪𑀸𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀧𑀞𑀫𑀚𑁆𑀛𑀸𑀦𑀁, 𑀲𑀩𑁆𑀩𑀸𑀓𑀼𑀲𑀮𑁂𑀳𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀲𑀩𑁆𑀩𑀁 𑀓𑀼𑀲𑀮𑀁. 𑀇𑀥 𑀧𑀦 𑀓𑀸𑀫𑀯𑀺𑀢𑀓𑁆𑀓𑀧𑀝𑀺𑀧𑀓𑁆𑀔𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀆𑀳 ‘‘𑀓𑀸𑀫𑁂𑀳𑀺 𑀦𑀺𑀲𑁆𑀲𑀝𑁄 𑀦𑁂𑀓𑁆𑀔𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄’’𑀢𑀺. 𑀲𑁄𑀢𑀺 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄. 𑀬𑀸𑀯 𑀧𑀞𑀫𑀚𑁆𑀛𑀸𑀦𑀸𑀢𑀺 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀞𑀫𑀚𑁆𑀛𑀸𑀦𑀁 𑀏𑀢𑁆𑀣𑀼𑀧𑁆𑀧𑀦𑁆𑀦𑁄 𑀯𑀺𑀢𑀓𑁆𑀓𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄𑀬𑁂𑀯. 𑀧𑀞𑀫𑀚𑁆𑀛𑀸𑀦𑀦𑁆𑀢𑀺 𑀘 𑀇𑀤𑀁 𑀢𑀢𑁄 𑀧𑀭𑀁 𑀯𑀺𑀢𑀓𑁆𑀓𑀸𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀦 𑀩𑁆𑀬𑀸𑀧𑀚𑁆𑀚𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦, 𑀩𑁆𑀬𑀸𑀧𑀸𑀤𑀲𑁆𑀲 𑀯𑀸 𑀧𑀝𑀺𑀧𑀓𑁆𑀔𑁄𑀢𑀺 𑀅𑀩𑁆𑀬𑀸𑀧𑀸𑀤𑁄, 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄 𑀫𑁂𑀢𑁆𑀢𑀸𑀪𑀸𑀯𑀦𑀸𑀭𑀫𑁆𑀪𑁄. 𑀦 𑀯𑀺𑀳𑀺𑀁𑀲𑀦𑁆𑀢𑀺 𑀏𑀢𑀸𑀬, 𑀯𑀺𑀳𑀺𑀁𑀲𑀸𑀬 𑀯𑀸 𑀧𑀝𑀺𑀧𑀓𑁆𑀔𑁄𑀢𑀺 𑀅𑀯𑀺𑀳𑀺𑀁𑀲𑀸, 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀓𑀭𑀼𑀡𑀸𑀪𑀸𑀯𑀦𑀸𑀭𑀫𑁆𑀪𑁄.

𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀮𑀤𑁆𑀥𑀸𑀯𑀲𑀭𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸 𑀉𑀧𑀭𑀽𑀧𑀭𑀺 𑀲𑀯𑀺𑀲𑁂𑀲𑀁 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀙𑀩𑁆𑀩𑀲𑁆𑀲𑀸𑀦𑀺…𑀧𑁂… 𑀧𑀯𑀢𑁆𑀢𑀺𑀁𑀲𑀽’’𑀢𑀺. 𑀜𑀸𑀡𑀲𑁆𑀲 𑀅𑀧𑀭𑀺𑀧𑀓𑁆𑀓𑀢𑁆𑀢𑀸 𑀧𑀼𑀩𑁆𑀩𑀯𑀸𑀲𑀦𑀸𑀯𑀲𑁂𑀦 𑀲𑀢𑀺𑀲𑀫𑁆𑀫𑁄𑀲𑀢𑁄 𑀓𑀤𑀸𑀘𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀮𑁂𑀲𑁄𑀧𑀺 𑀳𑁄𑀢𑀺𑀬𑁂𑀯𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑀺𑀲𑀫𑁆𑀫𑁄𑀲𑁂𑀦…𑀧𑁂… 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀆𑀳. 𑀬𑀣𑀸 𑀦𑀺𑀘𑁆𑀘𑀧𑀺𑀳𑀺𑀢𑁂𑀧𑀺 𑀕𑁂𑀳𑁂 𑀓𑀤𑀸𑀘𑀺 𑀯𑀸𑀢𑀧𑀸𑀦𑁂 𑀯𑀺𑀯𑀝𑀫𑀢𑁆𑀢𑁂 𑀮𑀤𑁆𑀥𑀸𑀯𑀲𑀭𑁄 𑀯𑀸𑀢𑁄 𑀅𑀦𑁆𑀢𑁄 𑀧𑀯𑀺𑀲𑁂𑀬𑁆𑀬, 𑀏𑀯𑀁 𑀕𑀼𑀢𑁆𑀢𑀺𑀦𑁆𑀤𑁆𑀭𑀺𑀬𑁂𑀧𑀺 𑀩𑁄𑀥𑀺𑀲𑀢𑁆𑀢𑀲𑀦𑁆𑀢𑀸𑀦𑁂 𑀲𑀢𑀺𑀲𑀫𑁆𑀫𑁄𑀲𑀯𑀲𑁂𑀦 𑀮𑀤𑁆𑀥𑀸𑀯𑀲𑀭𑁄 𑀅𑀓𑀼𑀲𑀮𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀺, 𑀉𑀧𑁆𑀧𑀦𑁆𑀦𑁄 𑀘 𑀓𑀼𑀲𑀮𑀯𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀅𑀣 𑀫𑀳𑀸𑀲𑀢𑁆𑀢𑁄 𑀢𑀁𑀫𑀼𑀳𑀼𑀢𑁆𑀢𑀼𑀧𑁆𑀧𑀦𑁆𑀦𑀫𑁂𑀯 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀢𑁂𑀲𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀸𑀬 ‘‘𑀇𑀫𑁂 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸, 𑀇𑀫𑁂 𑀲𑀫𑁆𑀫𑀸𑀯𑀺𑀢𑀓𑁆𑀓𑀸’’𑀢𑀺 𑀬𑀸𑀣𑀸𑀯𑀢𑁄 𑀢𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀁 𑀅𑀯𑀲𑀭𑀁 𑀅𑀤𑁂𑀦𑁆𑀢𑁄 𑀲𑀫𑁆𑀫𑀸𑀯𑀺𑀢𑀓𑁆𑀓𑁂 𑀧𑀭𑀺𑀯𑀟𑁆𑀠𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀬𑁆𑀳𑀁 𑀇𑀫𑁂’’𑀢𑀺𑀆𑀤𑀺.

𑁨𑁦𑁭. 𑀧𑀫𑀸𑀤𑁄 𑀦𑀸𑀫 𑀲𑀢𑀺𑀯𑀺𑀧𑁆𑀧𑀯𑀸𑀲𑁄𑀢𑀺 𑀆𑀳 ‘‘𑀅𑀧𑁆𑀧𑀫𑀢𑁆𑀢𑀲𑁆𑀲𑀸𑀢𑀺 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁂 𑀞𑀺𑀢𑀲𑁆𑀲𑀸’’𑀢𑀺. 𑀆𑀢𑀸𑀧𑀯𑀻𑀭𑀺𑀬𑀯𑀦𑁆𑀢𑀲𑁆𑀲𑀸𑀢𑀺 𑀓𑀺𑀮𑁂𑀲𑀸𑀦𑀁 𑀦𑀺𑀕𑁆𑀕𑀡𑁆𑀳𑀦𑀯𑀻𑀭𑀺𑀬𑀯𑀢𑁄. 𑀧𑁂𑀲𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀪𑀯𑀯𑀺𑀫𑁄𑀓𑁆𑀔𑀸𑀬 𑀯𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑀲𑁆𑀲 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑀲𑁆𑀲. ‘‘𑀏𑀯𑀁 𑀧𑀝𑀺𑀧𑀸𑀓𑀢𑀺𑀓𑁄 𑀚𑀸𑀢𑁄’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀁 𑀲𑁄𑀫𑀦𑀲𑁆𑀲𑀸𑀓𑀸𑀭𑀁 𑀕𑁂𑀳𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀧𑀓𑁆𑀔𑀺𑀓𑀁 𑀅𑀓𑀸𑀲𑀺, 𑀧𑀜𑁆𑀜𑀸𑀫𑀳𑀦𑁆𑀢𑀢𑀸𑀬 𑀲𑀼𑀔𑀼𑀫𑀤𑀲𑁆𑀲𑀺𑀢𑀸.

𑀅𑀧𑀭𑀺𑀜𑁆𑀜𑀸𑀬𑀁 𑀞𑀺𑀢𑀲𑁆𑀲𑀸𑀢𑀺 𑀦 𑀧𑀭𑀺𑀜𑁆𑀜𑀸𑀬𑀁 𑀞𑀺𑀢𑀲𑁆𑀲, 𑀅𑀧𑀭𑀺𑀕𑁆𑀕𑀳𑀺𑀢𑀧𑀭𑀺𑀜𑁆𑀜𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑀺𑀢𑀓𑁆𑀓𑁄…𑀧𑁂… 𑀏𑀢𑀸𑀦𑀺 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀻𑀢𑀺 𑀢𑀸𑀤𑀺𑀲𑀲𑁆𑀲 𑀉𑀧𑁆𑀧𑀦𑁆𑀦𑁄 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁄 𑀬𑀣𑀸𑀭𑀳𑀁 𑀅𑀢𑁆𑀢𑀩𑁆𑀬𑀸𑀩𑀸𑀥𑀓𑁄 𑀉𑀪𑀬𑀩𑁆𑀬𑀸𑀩𑀸𑀥𑀓𑁄 𑀘 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄 𑀢𑀁 𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀸𑀤𑀉𑀧𑁆𑀧𑀦𑁆𑀦𑀧𑀭𑀺𑀳𑀸𑀦𑀺𑀦𑀺𑀫𑀺𑀢𑁆𑀢𑀢𑀸𑀬 𑀧𑀜𑁆𑀜𑀁 𑀦𑀺𑀭𑁄𑀥𑁂𑀢𑀻𑀢𑀺 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑁄. 𑀢𑁂𑀦𑀸𑀳 ‘‘𑀅𑀦𑀼𑀧𑁆𑀧𑀦𑁆𑀦𑀸𑀬𑀸’’𑀢𑀺𑀆𑀤𑀺. 𑀦𑀢𑁆𑀣𑀺𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀫𑀸𑀳. 𑀦𑀺𑀭𑀼𑀚𑁆𑀛𑀢𑀻𑀢𑀺𑀆𑀤𑀻𑀳𑀺𑀧𑀺 𑀢𑀤𑁂𑀯 𑀯𑀤𑀢𑀺. 𑀯𑀺𑀕𑀢𑀦𑁆𑀢𑀦𑁆𑀢𑀺𑀆𑀤𑀻𑀳𑀺 𑀧𑀦 𑀲𑀫𑀽𑀮𑀁 𑀉𑀤𑁆𑀥𑀝𑀁 𑀯𑀺𑀬 𑀢𑀤𑀸 𑀅𑀧𑁆𑀧𑀯𑀢𑁆𑀢𑀦𑀓𑀁 𑀅𑀓𑀸𑀲𑀺𑀦𑁆𑀢𑀺 𑀯𑀤𑀢𑀺.

𑁨𑁦𑁮. 𑀘𑀺𑀢𑁆𑀢𑀯𑀺𑀧𑀭𑀺𑀡𑀸𑀫𑀪𑀸𑀯𑁄 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀓𑀢𑀺𑀘𑀺𑀢𑁆𑀢𑀯𑀺𑀕𑀫𑁄. 𑀅𑀦𑁂𑀓𑀕𑁆𑀕𑀢𑀸𑀓𑀸𑀭𑁄 𑀯𑀺𑀓𑁆𑀔𑁂𑀧𑁄. 𑀢𑀢𑁆𑀣 𑀯𑀺𑀢𑀓𑁆𑀓𑁂𑀦 𑀘𑀺𑀢𑁆𑀢𑀁 𑀯𑀺𑀳𑀜𑁆𑀜𑀫𑀸𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀢𑀁 𑀕𑀳𑁂𑀢𑁆𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀅𑀓𑀸𑀲𑀻’’𑀢𑀺. 𑀓𑀸𑀭𑀼𑀜𑁆𑀜𑀦𑁆𑀢𑀺 𑀧𑀭𑀤𑀼𑀓𑁆𑀔𑀦𑀺𑀫𑀺𑀢𑁆𑀢𑀁 𑀘𑀺𑀢𑁆𑀢𑀔𑁂𑀤𑀁 𑀯𑀤𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀫𑀦𑀁 𑀓𑀫𑁆𑀧𑁂𑀢𑀻𑀢𑀺 𑀓𑀭𑀼𑀡𑀸’’𑀢𑀺 (𑀫. 𑀦𑀺. 𑀝𑀻. 𑁧.𑁧; 𑀲𑀁. 𑀦𑀺. 𑀝𑀻. 𑁧.𑁧.𑁧). 𑀦𑁆𑀢𑀺 𑀓𑀭𑀼𑀡𑀸𑀬𑀦𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀧𑀓𑀫𑁆𑀧𑀦𑀁 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀚𑁆𑀚𑀢𑀺 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄’’𑀢𑀺 𑀆𑀳, 𑀦 𑀲𑀢𑁆𑀢𑁂𑀲𑀼 𑀯𑀺𑀳𑀺𑀁𑀲𑀸 𑀧𑀯𑀢𑁆𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑁂𑀦 𑀢𑁂𑀦 𑀘𑀲𑁆𑀲𑀸𑀓𑀸𑀭𑁂𑀦𑀸𑀢𑀺 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀼𑀯𑀺𑀢𑀓𑁆𑀓𑀺𑀢𑀁 𑀅𑀦𑀼𑀯𑀺𑀘𑀸𑀭𑀺𑀢𑀁, 𑀢𑁂𑀦 𑀢𑁂𑀦 𑀆𑀓𑀸𑀭𑁂𑀦𑀲𑁆𑀲 𑀘𑁂𑀢𑀲𑁄 𑀦𑀢𑀺 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀲𑀽’’𑀢𑀺𑀆𑀤𑀺. 𑀧𑀳𑀸𑀲𑀻𑀢𑀺 𑀓𑀸𑀮𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀚𑀳𑀢𑀻’’𑀢𑀺. 𑀧𑀳𑀸𑀦𑀁 𑀧𑀦𑀲𑁆𑀲 𑀲𑀺𑀤𑁆𑀥𑀫𑁂𑀯 𑀧𑀝𑀺𑀧𑀓𑁆𑀔𑀲𑁆𑀲 𑀲𑀺𑀤𑁆𑀥𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀳𑀸𑀲𑀻’’𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀅𑀲𑀸𑀫𑀺𑀪𑁄𑀕𑁂 𑀕𑀸𑀫𑀺𑀓𑀸𑀆𑀤𑀻𑀬𑀺𑀁𑀲𑀽’’𑀢𑀺. 𑀩𑀳𑀼𑀮𑀫𑀓𑀸𑀲𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀯𑀁 𑀦𑀫𑀢𑀻𑀢𑀺 𑀓𑀸𑀫𑀯𑀺𑀢𑀓𑁆𑀓𑀲𑀫𑁆𑀧𑀬𑁄𑀕𑀸𑀓𑀸𑀭𑀫𑁂𑀯 𑀳𑁄𑀢𑀺, 𑀓𑀸𑀫𑀯𑀺𑀢𑀓𑁆𑀓𑀲𑀫𑁆𑀧𑀬𑀼𑀢𑁆𑀢𑀸𑀓𑀸𑀭𑁂𑀦 𑀯𑀸 𑀧𑀭𑀺𑀡𑀫𑀢𑀺. 𑀓𑀲𑀦𑀁 𑀓𑀺𑀝𑁆𑀞𑀁, 𑀓𑀲𑀻𑀢𑀺 𑀅𑀢𑁆𑀣𑁄, 𑀢𑀦𑁆𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀧𑀦 𑀓𑀸𑀭𑀡𑀽𑀧𑀘𑀸𑀭𑁂𑀦 𑀲𑀲𑁆𑀲𑀁 ‘‘𑀓𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀲𑁆𑀲𑀲𑀫𑁆𑀩𑀸𑀥𑁂’’𑀢𑀺. 𑀘𑀢𑁆𑀢𑀸𑀭𑀺 𑀪𑀬𑀸𑀦𑀻𑀢𑀺 𑀯𑀥𑀩𑀦𑁆𑀥𑀚𑀸𑀦𑀺𑀕𑀭𑀳𑀸𑀦𑀺. 𑀉𑀧𑀤𑁆𑀤𑀯𑀦𑁆𑀢𑀺 𑀅𑀦𑀢𑁆𑀣𑀼𑀧𑁆𑀧𑀸𑀤𑀪𑀸𑀯𑀁. 𑀮𑀸𑀫𑀓𑀦𑁆𑀢𑀺 𑀦𑀺𑀳𑀻𑀦𑀪𑀸𑀯𑀁. 𑀥𑀦𑁆𑀥𑁂𑀲𑀽𑀢𑀺 𑀅𑀢𑁆𑀢𑀦𑁄 𑀔𑀦𑁆𑀥𑁂𑀲𑀼. 𑀑𑀢𑀸𑀭𑀦𑁆𑀢𑀺 𑀅𑀦𑀼𑀧𑁆𑀧𑀯𑁂𑀲𑀁 𑀓𑀺𑀮𑁂𑀲𑀸𑀦𑀁. 𑀲𑀁𑀓𑀺𑀮𑁂𑀲𑀢𑁄 𑀯𑀺𑀲𑀼𑀚𑁆𑀛𑀦𑀁 𑀯𑀺𑀲𑀼𑀤𑁆𑀥𑀺, 𑀲𑀸 𑀏𑀯 𑀯𑁄𑀤𑀸𑀦𑀦𑁆𑀢𑀺 𑀆𑀳 ‘‘𑀯𑁄𑀤𑀸𑀦𑀧𑀓𑁆𑀔𑀦𑁆𑀢𑀺 𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺.

𑁨𑁦𑁯. 𑀲𑀩𑁆𑀩𑀓𑀼𑀲𑀮𑀁 𑀦𑁂𑀓𑁆𑀔𑀫𑁆𑀫𑀁 𑀲𑀩𑁆𑀩𑀸𑀓𑀼𑀲𑀮𑀧𑀝𑀺𑀧𑀓𑁆𑀔𑀢𑀸𑀬 𑀢𑀢𑁄 𑀦𑀺𑀲𑁆𑀲𑀝𑀢𑁆𑀢𑀸. 𑀦𑀺𑀩𑁆𑀩𑀸𑀦𑀫𑁂𑀯 𑀦𑁂𑀓𑁆𑀔𑀫𑁆𑀫𑀁 𑀲𑀩𑁆𑀩𑀓𑀺𑀮𑁂𑀲𑀢𑁄 𑀲𑀩𑁆𑀩𑀲𑀗𑁆𑀔𑀢𑀢𑁄 𑀘 𑀦𑀺𑀲𑁆𑀲𑀝𑀢𑁆𑀢𑀸. 𑀓𑀺𑀝𑁆𑀞𑀲𑀫𑁆𑀩𑀸𑀥𑀁 𑀯𑀺𑀬 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀧𑀫𑀸𑀤𑁂 𑀲𑀢𑀺 𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄. 𑀓𑀽𑀝𑀕𑀸𑀯𑁄 𑀯𑀺𑀬 𑀓𑀽𑀝𑀘𑀺𑀢𑁆𑀢𑀁 𑀤𑀼𑀤𑁆𑀤𑀫𑀪𑀸𑀯𑀢𑁄. 𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑁄 𑀉𑀧𑀸𑀬𑀓𑁄𑀲𑀮𑁆𑀮𑀬𑁄𑀕𑀢𑁄. 𑀘𑀢𑀼𑀩𑁆𑀩𑀺𑀥𑀪𑀬𑀁 𑀯𑀺𑀬 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀲𑀧𑁆𑀧𑀝𑀺𑀪𑀬𑀪𑀸𑀯𑀢𑁄. 𑀧𑀜𑁆𑀜𑀸𑀬 𑀯𑀼𑀤𑁆𑀥𑀺 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀜𑁆𑀜𑀸𑀯𑀼𑀤𑁆𑀥𑀺𑀓𑁄. 𑀯𑀺𑀳𑀜𑁆𑀜𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀯𑀺𑀖𑀸𑀢𑁄, 𑀘𑁂𑀢𑁄𑀤𑀼𑀓𑁆𑀔𑀁, 𑀢𑀧𑁆𑀧𑀓𑁆𑀔𑀺𑀓𑁄 𑀯𑀺𑀖𑀸𑀢𑀧𑀓𑁆𑀔𑀺𑀓𑁄, 𑀦 𑀯𑀺𑀖𑀸𑀢𑀧𑀓𑁆𑀔𑀺𑀓𑁄𑀢𑀺 𑀅𑀯𑀺𑀖𑀸𑀢𑀧𑀓𑁆𑀔𑀺𑀓𑁄. 𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑁄 𑀦𑀺𑀩𑁆𑀩𑀸𑀦𑀯𑀳𑁄. 𑀉𑀕𑁆𑀖𑀸𑀢𑀻𑀬𑁂𑀬𑁆𑀬𑀸𑀢𑀺 𑀉𑀤𑁆𑀥𑀢𑀁 𑀲𑀺𑀬𑀸 𑀯𑀺𑀓𑁆𑀔𑀺𑀢𑁆𑀢𑀜𑁆𑀘 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀡𑁆𑀞𑀧𑁂𑀫𑀻𑀢𑀺 𑀲𑀫𑁆𑀫𑀤𑁂𑀯 𑀧𑀝𑁆𑀞𑀧𑁂𑀫𑀺. 𑀬𑀣𑀸 𑀧𑀦 𑀞𑀧𑀺𑀢𑀁 𑀲𑀡𑁆𑀞𑀧𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀦𑁆𑀦𑀺𑀲𑀻𑀤𑀸𑀧𑁂𑀫𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀦𑁆𑀦𑀺𑀲𑀻𑀤𑀸𑀧𑁂𑀫𑀻𑀢𑀺 𑀲𑀫𑀸𑀥𑀺𑀧𑀝𑀺𑀧𑀓𑁆𑀔𑁂 𑀓𑀺𑀮𑁂𑀲𑁂 𑀲𑀦𑁆𑀦𑀺𑀲𑀻𑀤𑀸𑀧𑁂𑀦𑁆𑀢𑁄 𑀘𑀺𑀢𑁆𑀢𑀁 𑀕𑁄𑀘𑀭𑀚𑁆𑀛𑀢𑁆𑀢𑁂 𑀲𑀦𑁆𑀦𑀺𑀲𑀻𑀤𑀸𑀧𑁂𑀫𑀺. 𑀅𑀩𑁆𑀬𑀕𑁆𑀕𑀪𑀸𑀯𑀸𑀧𑀸𑀤𑀓𑁂𑀦 𑀏𑀓𑀕𑁆𑀕𑀁 𑀓𑀭𑁄𑀫𑀺, 𑀬𑀣𑀸 𑀆𑀭𑀫𑁆𑀫𑀡𑁂 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀁 𑀳𑁄𑀢𑀺, 𑀏𑀯𑀁 𑀲𑀫𑁆𑀫𑀸 𑀲𑀫𑁆𑀫𑀤𑁂𑀯 𑀆𑀤𑀳𑀸𑀫𑀺 𑀲𑀫𑀸𑀳𑀺𑀢𑀁 𑀓𑀭𑁄𑀫𑀺, 𑀬𑀲𑁆𑀫𑀸 𑀢𑀣𑀸𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀲𑀼𑀝𑁆𑀞𑀼 𑀆𑀭𑀫𑁆𑀫𑀡𑁂 𑀆𑀭𑁄𑀧𑀺𑀢𑀁 𑀦𑀸𑀫 𑀳𑁄𑀢𑀺, 𑀦 𑀢𑀢𑁄 𑀧𑀭𑀺𑀧𑀢𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀼𑀝𑁆𑀞𑀼 𑀆𑀭𑁄𑀧𑁂𑀫𑀻𑀢𑀺 𑀅𑀢𑁆𑀣𑁄’’𑀢𑀺. 𑀫𑀸 𑀉𑀕𑁆𑀖𑀸𑀢𑀻𑀬𑀺𑀢𑁆𑀢𑀸𑀢𑀺 𑀫𑀸 𑀳𑀜𑁆𑀜𑀺𑀢𑁆𑀣, 𑀫𑀸 𑀊𑀳𑀢𑀁 𑀅𑀢𑁆𑀣𑀸𑀢𑀺 𑀅𑀢𑁆𑀣𑁄.

𑁨𑁧𑁦. 𑀲𑁄𑀬𑁂𑀯…𑀧𑁂… 𑀯𑀼𑀢𑁆𑀢𑁄𑀢𑀺 𑀇𑀫𑀺𑀦𑀸 𑀓𑀺𑀜𑁆𑀘𑀸𑀧𑀺 𑀏𑀓𑀁𑀬𑁂𑀯 𑀓𑀼𑀲𑀮𑀯𑀺𑀢𑀓𑁆𑀓𑀁 𑀫𑀕𑁆𑀕𑀓𑁆𑀔𑀡𑁂 𑀯𑀺𑀬 𑀢𑀺𑀯𑀺𑀥𑀢𑁆𑀢𑀲𑀫𑁆𑀪𑀯𑀢𑁄 𑀢𑀺𑀯𑀺𑀥𑀦𑀸𑀫𑀺𑀓𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀁 𑀯𑀺𑀬 𑀳𑁄𑀢𑀺, 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀧𑀩𑀦𑁆𑀥𑀧𑀯𑀢𑁆𑀢𑀜𑁆𑀳𑀺 𑀉𑀧𑀸𑀤𑀸𑀬 𑀏𑀓𑀢𑁆𑀢𑀦𑀬𑁂𑀦 ‘‘𑀲𑁄𑀬𑁂𑀯 𑀩𑁆𑀬𑀸𑀧𑀸𑀤𑀧𑀘𑁆𑀘𑀦𑀻𑀓𑀝𑁆𑀞𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀚𑀸𑀢𑀺𑀬𑁂𑀲𑀼 𑀳𑀺 𑀓𑀼𑀲𑀮𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁄 𑀯𑀺𑀢𑀓𑁆𑀓𑁄 𑀲𑀫𑀸𑀦𑀸𑀓𑀸𑀭𑀢𑀸𑀬 𑀲𑁄 𑀏𑀯𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺 𑀬𑀣𑀸 ‘‘𑀲𑀸 𑀏𑀯 𑀢𑀺𑀢𑁆𑀢𑀺𑀭𑀻, 𑀢𑀸𑀦𑀺 𑀏𑀯 𑀑𑀲𑀥𑀸𑀦𑀻’’𑀢𑀺 (𑀲𑀁. 𑀦𑀺. 𑀝𑀻. 𑁨.𑁨.𑁧𑁯). 𑀦 𑀳𑀺 𑀢𑀤𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀅𑀲𑀼𑀪𑀫𑁂𑀢𑁆𑀢𑀸𑀓𑀭𑀼𑀡𑀸𑀲𑀦𑁆𑀦𑀺𑀲𑁆𑀲𑀬𑀸 𑀢𑁂 𑀯𑀺𑀢𑀓𑁆𑀓𑀸 𑀏𑀯𑀁 𑀯𑀼𑀢𑁆𑀢𑀸𑀢𑀺.

𑀲𑀫𑀸𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬𑀸𑀢𑀺 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸, 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀧𑀲𑁆𑀲𑀦𑀸𑀧𑀺 𑀢𑀭𑀼𑀡𑀸𑀢𑀺 𑀬𑁄𑀚𑀦𑀸. 𑀓𑀸𑀬𑁄 𑀓𑀺𑀮𑀫𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀢𑀭𑀼𑀡𑀢𑀸𑀬 𑀪𑀸𑀯𑀦𑀸𑀬 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀲𑁆𑀲 𑀅𑀮𑀩𑁆𑀪𑀫𑀸𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀁 𑀳𑀜𑁆𑀜𑀢𑀺 𑀯𑀺𑀳𑀜𑁆𑀜𑀢𑀻’’𑀢𑀺. 𑀯𑀺𑀧𑀲𑁆𑀲𑀦𑀸𑀬𑀩𑀳𑀽𑀧𑀓𑀸𑀭𑀸 𑀲𑀫𑀸𑀧𑀢𑁆𑀢𑀺, 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀲𑀫𑀸𑀥𑀺𑀁, 𑀪𑀺𑀓𑁆𑀔𑀯𑁂, 𑀪𑀸𑀯𑁂𑀣, 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁪.𑁯𑁯; 𑁫.𑁧𑁦𑁭𑁧).

𑀬𑀣𑀸 𑀯𑀺𑀲𑁆𑀲𑀫𑀝𑁆𑀞𑀸𑀦𑀁 𑀬𑁄𑀥𑀸𑀦𑀁 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑀺, 𑀢𑀣𑀸 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 𑀨𑀮𑀓𑁂𑀳𑀺 𑀓𑀸𑀢𑀩𑁆𑀩𑀁 𑀯𑀺𑀲𑁆𑀲𑀫𑀝𑁆𑀞𑀸𑀦𑀁 𑀨𑀮𑀓𑀓𑁄𑀝𑁆𑀞𑀓𑁄, 𑀲𑀫𑀸𑀧𑀢𑁆𑀢𑀺𑀬𑀸 𑀧𑀦 𑀯𑀺𑀧𑀲𑁆𑀲𑀦𑀸 𑀩𑀳𑀼𑀓𑀸𑀭𑀢𑀭𑀸 𑀲𑀫𑀸𑀥𑀺𑀧𑀭𑀺𑀧𑀦𑁆𑀣𑀓𑀸𑀦𑀁, 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸 𑀓𑀺𑀮𑁂𑀲𑀸𑀦𑀁 𑀯𑀺𑀫𑀣𑀦𑁂𑀦 𑀤𑀼𑀩𑁆𑀩𑀮𑀪𑀸𑀯𑀸𑀧𑀚𑁆𑀚𑀦𑀢𑁄. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸 𑀣𑀸𑀫𑀚𑀸𑀢𑀸 𑀲𑀫𑀸𑀧𑀢𑁆𑀢𑀺𑀫𑁆𑀧𑀺 𑀭𑀓𑁆𑀔𑀢𑀺,𑀣𑀸𑀫𑀚𑀸𑀢𑀁 𑀓𑀭𑁄𑀢𑀻’’𑀢𑀺. 𑀦𑀦𑀼 𑀘𑁂𑀯𑀁 𑀇𑀢𑀭𑀻𑀢𑀭𑀲𑀦𑁆𑀦𑀺𑀲𑁆𑀲𑀬𑀤𑁄𑀲𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀬𑀺𑀤𑀫𑁂𑀓𑀦𑁆𑀢𑀺𑀓𑀁, 𑀇𑀢𑀭𑀻𑀢𑀭𑀲𑀦𑁆𑀦𑀺𑀲𑁆𑀲𑀬𑀸𑀧𑀺 𑀓𑀺𑀘𑁆𑀘𑀲𑀺𑀤𑁆𑀥𑀺 𑀮𑁄𑀓𑁂 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀕𑀸𑀫𑀦𑁆𑀢𑀁 𑀆𑀳𑀝𑁂𑀲𑀽𑀢𑀺 𑀕𑀸𑀫𑀲𑀫𑀻𑀧𑀁 𑀉𑀧𑀦𑀻𑀢𑁂𑀲𑀼. 𑀏𑀢𑀸𑀕𑀸𑀯𑁄𑀢𑀺 𑀲𑀢𑀺 𑀉𑀧𑁆𑀧𑀸𑀤𑀦𑀫𑀢𑁆𑀢𑀫𑁂𑀯 𑀓𑀸𑀢𑀩𑁆𑀩𑀁 𑀬𑀣𑀸 𑀕𑀸𑀯𑁄 𑀭𑀓𑁆𑀔𑀺𑀢𑀩𑁆𑀩𑀸, 𑀢𑀤𑀪𑀸𑀯𑀢𑁄. 𑀢𑀤𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀣𑀸𑀫𑀚𑀸𑀢𑀓𑀸𑀮𑁂. 𑀅𑀦𑀼𑀧𑀲𑁆𑀲𑀦𑀸𑀦𑀁 𑀮𑀳𑀼𑀁 𑀮𑀳𑀼𑀁 𑀉𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀆𑀭𑀼𑀴𑁆𑀳𑁄𑀯 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀓𑀫𑁂𑀦𑁂𑀯 𑀧𑀦 𑀅𑀦𑀼𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀁 𑀆𑀭𑁄𑀳𑀢𑀺.

𑁨𑁧𑁫. 𑀏𑀯𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀧𑁆𑀧𑀫𑀸𑀤𑀧𑀝𑀺𑀧𑀤𑀁, 𑀢𑀸𑀬 𑀘 𑀮𑀤𑁆𑀥𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀨𑀮𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀢𑁆𑀢𑀽𑀧𑀓𑀸𑀭𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀬𑁆𑀬𑀣𑀸𑀧𑀻’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀏𑀯𑀁 𑀏𑀢𑁆𑀣 𑀅𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀜𑁆𑀜𑀮𑀓𑁆𑀔𑀡𑀬𑁄𑀕𑁆𑀕𑀫𑀢𑁆𑀢𑁂𑀦 𑀅𑀭𑀜𑁆𑀜𑀁. 𑀫𑀳𑀸𑀯𑀦𑀢𑀸𑀬 𑀧𑀯𑀦𑀁. 𑀧𑀯𑀤𑁆𑀥𑀜𑁆𑀳𑀺 𑀯𑀦𑀁 𑀧𑀯𑀦𑀁. 𑀘𑀢𑀽𑀳𑀺 𑀬𑁄𑀕𑁂𑀳𑀻𑀢𑀺 𑀚𑀺𑀖𑀘𑁆𑀙𑀸𑀧𑀺𑀧𑀸𑀲𑀸𑀪𑀬𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑀬𑁄𑀕𑁂𑀳𑀺. 𑀔𑁂𑀫𑀁 𑀅𑀦𑀼𑀧𑀤𑁆𑀤𑀯𑀢𑀁. 𑀲𑀼𑀯𑀢𑁆𑀣𑀺𑀁 𑀅𑀦𑀼𑀧𑀤𑁆𑀤𑀯𑀁 𑀆𑀯𑀳𑀢𑀻𑀢𑀺 𑀲𑁄𑀯𑀢𑁆𑀣𑀺𑀓𑁄. 𑀧𑀻𑀢𑀺𑀁 𑀓𑀼𑀝𑁆𑀞𑀺𑀁 𑀕𑀫𑁂𑀢𑀺 𑀉𑀧𑀦𑁂𑀢𑀻𑀢𑀺 𑀧𑀻𑀢𑀺𑀕𑀫𑀦𑀻𑀬𑁄. 𑀧𑀻𑀢𑀁 𑀧𑀸𑀦𑀢𑀺𑀢𑁆𑀣𑀁 𑀕𑀘𑁆𑀙𑀢𑀻𑀢𑀺 𑀧𑀻𑀢𑀕𑀫𑀦𑀻𑀬𑁄. 𑀲𑀸𑀔𑀸𑀤𑀻𑀳𑀻𑀢𑀺 𑀓𑀡𑁆𑀝𑀓𑀲𑀸𑀔𑀸𑀓𑀡𑁆𑀝𑀓𑀮𑀢𑀸𑀯𑀦𑁂𑀳𑀺. 𑀅𑀦𑀸𑀲𑀬𑀕𑀸𑀫𑀺𑀢𑀸𑀬 𑀉𑀤𑀓𑀲𑀦𑁆𑀦𑀺𑀭𑀼𑀤𑁆𑀥𑁄𑀧𑀺 𑀅𑀫𑀕𑁆𑀕𑁄 𑀯𑀼𑀢𑁆𑀢𑁄, 𑀇𑀢𑀭𑀸𑀦𑀺 𑀅𑀧𑀻𑀢𑀺𑀕𑀫𑀦𑀻𑀬𑀢𑀸𑀬𑀧𑀺. 𑀆𑀤𑀺-𑀲𑀤𑁆𑀤𑁂𑀦 𑀕𑀳𑀦𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀑𑀓𑁂𑀫𑀺𑀕𑀮𑀼𑀤𑁆𑀤𑀓𑀲𑁆𑀲 𑀕𑁄𑀘𑀭𑁂 𑀘𑀭𑀢𑀻𑀢𑀺 𑀑𑀓𑀘𑀭𑁄, 𑀤𑀻𑀧𑀓𑀫𑀺𑀕𑁄. 𑀅𑀭𑀜𑁆𑀜𑁂 𑀫𑀺𑀕𑁂 𑀤𑀺𑀲𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀮𑀸𑀬𑁂𑀬𑁆𑀬𑀸𑀢𑀺 𑀤𑀻𑀖𑀭𑀚𑁆𑀚𑀼𑀩𑀦𑁆𑀥𑀦𑀁.

𑀇𑀥 𑀯𑀲𑀦𑁆𑀢𑀻𑀢𑀺 𑀫𑀺𑀕𑀸𑀦𑀁 𑀆𑀲𑀬𑀁 𑀯𑀤𑀢𑀺, 𑀢𑀢𑁄 𑀆𑀲𑀬𑀢𑁄 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀦𑀺𑀓𑁆𑀔𑀫𑀦𑁆𑀢𑀺. 𑀏𑀢𑁆𑀣 𑀘𑀭𑀦𑁆𑀢𑀻𑀢𑀺 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀺. 𑀏𑀢𑁆𑀣𑀧𑀺𑀯𑀦𑁆𑀢𑀻𑀢𑀺 𑀏𑀢𑀲𑁆𑀫𑀺𑀁 𑀦𑀺𑀧𑀸𑀦𑀢𑀺𑀢𑁆𑀣𑁂 𑀉𑀤𑀓𑀁 𑀧𑀺𑀯𑀦𑁆𑀢𑀺. 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀧𑀯𑀺𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀦𑀺𑀧𑀸𑀦𑀢𑀺𑀢𑁆𑀣𑀁 𑀧𑀯𑀺𑀲𑀦𑁆𑀢𑀺. 𑀫𑀕𑁆𑀕𑀁 𑀧𑀺𑀥𑀸𑀬𑀸𑀢𑀺 𑀧𑀓𑀢𑀺𑀫𑀕𑁆𑀕𑀁 𑀧𑀺𑀤𑀳𑀺𑀢𑁆𑀯𑀸. 𑀦 𑀢𑀸𑀯 𑀓𑀺𑀜𑁆𑀘𑀺 𑀓𑀭𑁄𑀢𑀺 𑀅𑀦𑀯𑀲𑁂𑀲𑁂 𑀯𑀦𑀫𑀺𑀕𑁂 𑀖𑀸𑀢𑁂𑀢𑀼𑀓𑀸𑀫𑁄.

𑀅𑀯𑀺𑀚𑁆𑀚𑀸𑀬 𑀅𑀜𑁆𑀜𑀸𑀡𑀸 𑀳𑀼𑀢𑁆𑀯𑀸𑀢𑀺 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑀢𑁆𑀢𑀸 𑀜𑀸𑀡𑀭𑀳𑀺𑀢𑀸 𑀳𑀼𑀢𑁆𑀯𑀸, 𑀦𑀦𑁆𑀤𑀻𑀭𑀸𑀕𑁂𑀦 𑀉𑀧𑀦𑀻𑀢𑀸 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀆𑀩𑀦𑁆𑀥𑀺𑀢𑁆𑀯𑀸. 𑀧𑀮𑁄𑀪𑀦𑀢𑁄 𑀑𑀓𑀘𑀭𑀁 𑀦𑀦𑁆𑀤𑀻𑀭𑀸𑀕𑁄𑀢𑀺. 𑀩𑁆𑀬𑀸𑀫𑁄𑀳𑀦𑀢𑁄 𑀑𑀓𑀘𑀸𑀭𑀺𑀓𑀁 𑀅𑀯𑀺𑀚𑁆𑀚𑀸𑀢𑀺 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀢𑁂𑀲𑀦𑁆𑀢𑀺 𑀑𑀓𑀘𑀭𑁄𑀓𑀘𑀸𑀭𑀺𑀓𑀸𑀦𑀁. 𑀲𑀸𑀔𑀸𑀪𑀗𑁆𑀕𑁂𑀦𑀸𑀢𑀺 𑀢𑀸𑀤𑀺𑀲𑁂𑀦 𑀮𑀽𑀔𑀢𑀭𑀕𑀦𑁆𑀥𑁂𑀦 𑀲𑀸𑀔𑀸𑀪𑀗𑁆𑀕𑁂𑀦. 𑀫𑀦𑀼𑀲𑁆𑀲𑀕𑀦𑁆𑀥𑀁 𑀅𑀧𑀦𑁂𑀢𑁆𑀯𑀸 𑀢𑀲𑁆𑀲 𑀲𑀸𑀔𑀸𑀪𑀗𑁆𑀕𑀲𑁆𑀲 𑀕𑀦𑁆𑀥𑁂𑀦. 𑀲𑀫𑁆𑀫𑀢𑁆𑀢𑁄𑀢𑀺 𑀲𑀫𑁆𑀫𑀚𑁆𑀚𑀺𑀢𑁄 𑀩𑁆𑀬𑀸𑀫𑀼𑀜𑁆𑀙𑁄.

𑀩𑀼𑀤𑁆𑀥𑀸𑀦𑀁 𑀔𑁂𑀫𑀫𑀕𑁆𑀕𑀯𑀺𑀘𑀭𑀡𑀁 𑀓𑀼𑀫𑁆𑀫𑀕𑁆𑀕𑀧𑀺𑀥𑀸𑀦𑀜𑁆𑀘 𑀲𑀩𑁆𑀩𑀮𑁄𑀓𑀲𑀸𑀥𑀸𑀭𑀡𑀫𑁆𑀧𑀺 𑀅𑀢𑁆𑀣𑀢𑁄 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀸𑀧𑁂𑀓𑁆𑀔𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀜𑁆𑀜𑀸𑀢𑀓𑁄𑀡𑁆𑀟𑀜𑁆𑀜𑀸𑀤𑀻𑀦𑀁 𑀪𑀩𑁆𑀩𑀧𑀼𑀕𑁆𑀕𑀮𑀸𑀦’’𑀦𑁆𑀢𑀺 𑀆𑀳. 𑀊𑀳𑀢𑁄𑀢𑀺 𑀲𑀫𑀽𑀳𑀢𑁄 𑀦𑀻𑀳𑀢𑁄𑀢𑀺 𑀆𑀳 ‘‘𑀤𑁆𑀯𑁂𑀥𑀸 𑀙𑁂𑀢𑁆𑀯𑀸 𑀧𑀸𑀢𑀺𑀢𑁄’’𑀢𑀺. 𑀦𑀸𑀲𑀺𑀢𑀸𑀢𑀺 𑀅𑀤𑀲𑁆𑀲𑀦𑀁 𑀕𑀫𑀺𑀢𑀸𑀢𑀺 𑀆𑀳 ‘‘𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀫𑀼𑀕𑁆𑀖𑀸𑀝𑀺𑀢𑀸’’𑀢𑀺. 𑀳𑀺𑀢𑀽𑀧𑀘𑀸𑀭𑀦𑁆𑀢𑀺 𑀲𑀢𑁆𑀢𑀸𑀦𑀁 𑀳𑀺𑀢𑀘𑀭𑀺𑀬𑀁.

𑀤𑁆𑀯𑁂𑀥𑀸𑀯𑀺𑀢𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.