𑁧𑁦. 𑀯𑀺𑀢𑀓𑁆𑀓𑀲𑀡𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁬. 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦𑀸𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀯𑀝𑁆𑀝𑀧𑀸𑀤𑀓𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲𑀧𑀺 𑀇𑀥 𑀅𑀥𑀺𑀘𑀺𑀢𑁆𑀢𑀪𑀸𑀯𑁂𑀦 𑀅𑀦𑀺𑀘𑁆𑀙𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢’’𑀦𑁆𑀢𑀺. 𑀅𑀣 𑀯𑀸 𑀅𑀦𑀼𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑀗𑁆𑀕𑀳𑀺𑀢𑀫𑁂𑀯 𑀓𑁂𑀯𑀮𑀁 ‘‘𑀧𑀓𑀢𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀬𑀤𑁂𑀢𑁆𑀣 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀢𑀤𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢’’𑀦𑁆𑀢𑀺 𑀆𑀳. 𑀇𑀢𑀭𑀲𑁆𑀲 𑀧𑀦𑁂𑀢𑁆𑀣 𑀯𑀺𑀥𑀺 𑀦 𑀧𑀝𑀺𑀲𑁂𑀥𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀧𑀲𑁆𑀲𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀓𑁂𑀘𑀺. 𑀅𑀦𑀼𑀬𑀼𑀢𑁆𑀢𑁂𑀦𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀉𑀧𑁆𑀧𑀸𑀤𑀦𑀯𑀲𑁂𑀦, 𑀉𑀧𑁆𑀧𑀦𑁆𑀦𑀲𑁆𑀲 𑀧𑀭𑀺𑀩𑁆𑀭𑀽𑀳𑀦𑀯𑀲𑁂𑀦 𑀅𑀦𑀼 𑀅𑀦𑀼 𑀬𑀼𑀢𑁆𑀢𑁂𑀦. 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦𑀁. 𑀕𑀳𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑁄𑀢𑀺 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄. 𑀪𑀸𑀯𑀦𑀸𑀬 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑁄𑀧𑀺 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄𑀬𑁂𑀯 𑀢𑀤𑀢𑁆𑀣𑁂𑀧𑀺 𑀢𑀁𑀲𑀤𑁆𑀤𑀯𑁄𑀳𑀸𑀭𑀢𑁄.

𑀬𑁂𑀳𑀺 𑀨𑀮𑀁 𑀦𑀸𑀫 𑀬𑀣𑀸 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂 𑀧𑀓𑀧𑁆𑀧𑀺𑀬𑀫𑀸𑀦𑀁 𑀯𑀺𑀬 𑀳𑁄𑀢𑀺, 𑀢𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺. 𑀢𑁂𑀦𑀸𑀳 ‘‘𑀓𑀸𑀭𑀡𑀸𑀦𑀻’’𑀢𑀺. 𑀓𑀸𑀮𑁂𑀦 𑀓𑀸𑀮𑀦𑁆𑀢𑀺 𑀏𑀢𑁆𑀣 𑀓𑀸𑀮𑁂𑀦𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀫𑀬𑁂 𑀲𑀫𑀬𑁂’’𑀢𑀺. 𑀦𑀦𑀼 𑀘…𑀧𑁂… 𑀦𑀺𑀭𑀦𑁆𑀢𑀭𑀁 𑀫𑀦𑀲𑀺 𑀓𑀸𑀢𑀩𑁆𑀩𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀘 𑀪𑀸𑀯𑀦𑀸𑀬 𑀯𑀻𑀣𑀺𑀧𑀝𑀺𑀧𑀦𑁆𑀦𑀢𑁆𑀢𑀸 𑀅𑀩𑁆𑀩𑀼𑀤𑀦𑀻𑀳𑀭𑀡𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀧𑀜𑁆𑀘 𑀦𑀺𑀫𑀺𑀢𑁆𑀢𑀸𑀦𑀺 𑀓𑀸𑀮𑁂𑀦 𑀓𑀸𑀮𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸𑀦𑀻’’𑀢𑀺 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸𑀢𑀺? ‘‘𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀪𑀸𑀯𑀦𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀦𑀸𑀫𑀸𑀢𑀺 𑀘𑁄𑀤𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀭𑁄 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀓𑀤𑀸𑀘𑀺 𑀪𑀸𑀯𑀦𑀼𑀧𑀓𑁆𑀓𑀺𑀮𑁂𑀲𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀢𑁄 𑀘𑀺𑀢𑁆𑀢𑀲𑁆𑀲 𑀯𑀺𑀲𑁄𑀥𑀦𑀢𑁆𑀣𑀸𑀬 𑀬𑀣𑀸𑀓𑀸𑀮𑀁 𑀇𑀫𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀫𑀦𑀲𑀺 𑀓𑀸𑀢𑀩𑁆𑀩𑀸𑀦𑀻𑀢𑀺 ‘‘𑀓𑀸𑀮𑁂𑀦 𑀓𑀸𑀮’’𑀦𑁆𑀢𑀺 𑀲𑀢𑁆𑀣𑀸 𑀅𑀯𑁄𑀘𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀸𑀴𑀺𑀬𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀫𑀸𑀦𑀻𑀢𑀺 𑀇𑀫𑀸𑀦𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 𑀧𑀜𑁆𑀘 𑀦𑀺𑀫𑀺𑀢𑁆𑀢𑀸𑀦𑀺. 𑀅𑀩𑁆𑀩𑀼𑀤𑀦𑁆𑀢𑀺 𑀉𑀧𑀤𑁆𑀤𑀯𑀁.

𑀙𑀦𑁆𑀤𑀲𑀳𑀕𑀢𑀸 𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀢𑀡𑁆𑀳𑀸𑀙𑀦𑁆𑀤𑀲𑀳𑀕𑀢𑀸 𑀓𑀸𑀫𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀸. 𑀇𑀝𑁆𑀞𑀸𑀦𑀺𑀝𑁆𑀞𑀅𑀲𑀫𑀧𑁂𑀓𑁆𑀔𑀺𑀢𑁂𑀲𑀽𑀢𑀺 𑀇𑀝𑁆𑀞𑁂𑀲𑀼 𑀧𑀺𑀬𑁂𑀲𑀼, 𑀅𑀦𑀺𑀝𑁆𑀞𑁂𑀲𑀼 𑀅𑀧𑁆𑀧𑀺𑀬𑁂𑀲𑀼, 𑀅𑀲𑀫𑀁 𑀅𑀲𑀫𑁆𑀫𑀸 𑀧𑁂𑀓𑁆𑀔𑀺𑀢𑁂𑀲𑀼. 𑀅𑀲𑀫𑀧𑁂𑀓𑁆𑀔𑀦𑀦𑁆𑀢𑀺 𑀕𑁂𑀳𑀲𑁆𑀲𑀺𑀢𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀅𑀬𑁄𑀦𑀺𑀲𑁄 𑀕𑀳𑀡𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁂𑀓𑁆𑀔𑀸 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺𑀆𑀤𑀺 (𑀫. 𑀦𑀺. 𑁩.𑁩𑁦𑁮). 𑀢𑁂 𑀧𑀭𑀺𑀯𑀺𑀢𑀓𑁆𑀓𑀸. 𑀢𑀢𑁄 𑀦𑀺𑀫𑀺𑀢𑁆𑀢𑀢𑁄 𑀅𑀜𑁆𑀜𑀦𑁆𑀢𑀺 𑀢𑀢𑁄 𑀙𑀦𑁆𑀤𑀽𑀧𑀲𑀁𑀳𑀺𑀢𑀸𑀤𑀺𑀅𑀓𑀼𑀲𑀮𑀯𑀺𑀢𑀓𑁆𑀓𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁄 𑀅𑀜𑁆𑀜𑀁 𑀦𑀯𑀁 𑀦𑀺𑀫𑀺𑀢𑁆𑀢𑀁. ‘‘𑀫𑀦𑀲𑀺𑀓𑀭𑁄𑀢𑁄’’𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀆𑀭𑀫𑁆𑀫𑀡𑀁, 𑀢𑀸𑀤𑀺𑀲𑁄 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑁄 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑁄 𑀯𑀸 𑀦𑀺𑀫𑀺𑀢𑁆𑀢𑀁. 𑀓𑀼𑀲𑀮𑀦𑀺𑀲𑁆𑀲𑀺𑀢𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀓𑀸𑀭𑀡𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁 𑀘𑀺𑀢𑁆𑀢𑁂 𑀞𑀧𑁂𑀢𑀩𑁆𑀩𑀁, 𑀪𑀸𑀯𑀦𑀸𑀯𑀲𑁂𑀦 𑀘𑀺𑀦𑁆𑀢𑁂𑀢𑀩𑁆𑀩𑀁, 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀯𑀸 𑀲𑀗𑁆𑀓𑀫𑀺𑀢𑀩𑁆𑀩𑀁. 𑀅𑀲𑀼𑀪𑀜𑁆𑀳𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺. 𑀲𑀗𑁆𑀔𑀸𑀭𑁂𑀲𑀼 𑀉𑀧𑁆𑀧𑀦𑁆𑀦𑁂 𑀙𑀦𑁆𑀤𑀽𑀧𑀲𑀁𑀳𑀺𑀢𑁂 𑀯𑀺𑀢𑀓𑁆𑀓𑁂𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀏𑀯𑀁 ‘‘𑀤𑁄𑀲𑀽𑀧𑀲𑀜𑁆𑀳𑀺𑀢𑁂’’𑀢𑀺𑀆𑀤𑀻𑀲𑀼 𑀬𑀣𑀸𑀭𑀳𑀁 𑀢𑀁 𑀢𑀁 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺 ‘‘𑀲𑀢𑁆𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀽’’𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺. 𑀧𑀜𑁆𑀘𑀥𑀫𑁆𑀫𑀽𑀧𑀦𑀺𑀲𑁆𑀲𑀬𑁄𑀢𑀺 𑀧𑀜𑁆𑀘𑀯𑀺𑀥𑁄 𑀥𑀫𑁆𑀫𑀽𑀧𑀲𑀁𑀳𑀺𑀢𑁄 𑀉𑀧𑀦𑀺𑀲𑁆𑀲𑀬𑁄.

𑀏𑀯𑀁 ‘‘𑀙𑀦𑁆𑀤𑀽𑀧𑀲𑀜𑁆𑀳𑀺𑀢𑁂’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀲𑁆𑀲 𑀳𑀢𑁆𑀣𑀸 𑀯𑀸 𑀲𑁄𑀪𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 ‘‘𑀅𑀲𑀼𑀪𑀢𑁄 𑀉𑀧𑀲𑀁𑀳𑀭𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀉𑀧𑀲𑀁𑀳𑀭𑀡𑀸𑀓𑀸𑀭𑀲𑁆𑀲 𑀤𑀲𑁆𑀲𑀦𑀁 ‘‘𑀓𑀺𑀫𑁆𑀳𑀺 𑀲𑀸𑀭𑀢𑁆𑀢𑁄𑀲𑀻’’𑀢𑀺. 𑀙𑀯𑀺𑀭𑀸𑀕𑁂𑀦𑀸𑀢𑀺 𑀙𑀯𑀺𑀭𑀸𑀕𑀢𑀸𑀬 𑀓𑀸𑀴𑀲𑀸𑀫𑀸𑀤𑀺𑀯𑀡𑁆𑀡𑀦𑀺𑀪𑀸𑀬. 𑀓𑀼𑀨𑀴𑀧𑀽𑀭𑀺𑀢𑁄𑀢𑀺 𑀧𑀓𑁆𑀓𑁂𑀳𑀺 𑀓𑀼𑀡𑀧𑀨𑀮𑁂𑀳𑀺 𑀧𑀼𑀡𑁆𑀡𑁄. ‘‘𑀓𑀮𑀺𑀨𑀮𑀧𑀽𑀭𑀺𑀢𑁄’’𑀢𑀺 𑀯𑀸 𑀧𑀸𑀞𑁄.

𑀅𑀲𑁆𑀲𑀸𑀫𑀺𑀓𑀢𑀸𑀯𑀓𑀸𑀮𑀺𑀓𑀪𑀸𑀯𑀯𑀲𑁂𑀦𑀸𑀢𑀺 𑀇𑀤𑀁 𑀧𑀢𑁆𑀢𑀁 𑀅𑀦𑀼𑀓𑁆𑀓𑀫𑁂𑀦 𑀯𑀡𑁆𑀡𑀯𑀺𑀓𑀸𑀭𑀜𑁆𑀘𑁂𑀯 𑀚𑀺𑀡𑁆𑀡𑀪𑀸𑀯𑀜𑁆𑀘 𑀧𑀢𑁆𑀯𑀸 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀪𑀺𑀦𑁆𑀦𑀁 𑀯𑀸 𑀳𑀼𑀢𑁆𑀯𑀸 𑀓𑀧𑀸𑀮𑀦𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀺. 𑀇𑀤𑀁 𑀘𑀻𑀯𑀭𑀁 𑀅𑀦𑀼𑀧𑀼𑀩𑁆𑀩𑁂𑀦 𑀯𑀡𑁆𑀡𑀯𑀺𑀓𑀸𑀭𑀁 𑀚𑀺𑀡𑁆𑀡𑀢𑀜𑁆𑀘 𑀉𑀧𑀕𑀦𑁆𑀢𑁆𑀯𑀸 𑀧𑀸𑀤𑀧𑀼𑀜𑁆𑀙𑀦𑀘𑁄𑀴𑀓𑀁 𑀳𑀼𑀢𑁆𑀯𑀸 𑀬𑀝𑁆𑀞𑀺𑀓𑁄𑀝𑀺𑀬𑀸 𑀙𑀟𑁆𑀟𑀦𑀻𑀬𑀁 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀧𑀦 𑀦𑁂𑀲𑀁 𑀲𑀸𑀫𑀺𑀓𑁄 𑀪𑀯𑁂𑀬𑁆𑀬, 𑀦 𑀦𑁂𑀲𑀁 𑀏𑀯𑀁 𑀯𑀺𑀦𑀲𑁆𑀲𑀺𑀢𑀼𑀁 𑀤𑀤𑁂𑀬𑁆𑀬𑀸𑀢𑀺 𑀏𑀯𑀁 𑀅𑀲𑁆𑀲𑀸𑀫𑀺𑀓𑀪𑀸𑀯𑀯𑀲𑁂𑀦, ‘‘𑀅𑀦𑀤𑁆𑀥𑀦𑀺𑀬𑀁 𑀇𑀤𑀁 𑀢𑀸𑀯𑀓𑀸𑀮𑀺𑀓’’𑀦𑁆𑀢𑀺 𑀏𑀯𑀁 𑀢𑀸𑀯𑀓𑀸𑀮𑀺𑀓𑀪𑀸𑀯𑀯𑀲𑁂𑀦 𑀘 𑀫𑀦𑀲𑀺𑀓𑀭𑁄𑀢𑁄.

𑀆𑀖𑀸𑀢𑀯𑀺𑀦𑀬…𑀧𑁂… 𑀪𑀸𑀯𑁂𑀢𑀩𑁆𑀩𑀸𑀢𑀺 𑁋 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀆𑀖𑀸𑀢𑀧𑀝𑀺𑀯𑀺𑀦𑀬𑀸. 𑀬𑀢𑁆𑀣 𑀳𑀺 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀦𑁆𑀦𑁄 𑀆𑀖𑀸𑀢𑁄 𑀲𑀩𑁆𑀩𑀲𑁄 𑀧𑀝𑀺𑀯𑀺𑀦𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀕𑀢𑀲𑁆𑀲 𑀆𑀖𑀸𑀢𑀯𑀺𑀦𑀬𑀲𑀼𑀢𑁆𑀢𑀲𑁆𑀲 (𑀅. 𑀦𑀺. 𑁫.𑁧𑁬𑁧) 𑀘𑁂𑀯 𑀓𑀓𑀘𑀽𑀧𑀫𑁄𑀯𑀸𑀤(𑀫. 𑀦𑀺. 𑁧.𑁨𑁨𑁨-𑁨𑁩𑁩) 𑀙𑀯𑀸𑀮𑀸𑀢𑀽𑀧𑀫𑀸𑀤𑀻𑀦𑀜𑁆𑀘 (𑀇𑀢𑀺𑀯𑀼. 𑁯𑁧) 𑀯𑀲𑁂𑀦 𑀆𑀖𑀸𑀢𑀁 𑀧𑀝𑀺𑀯𑀺𑀦𑁄𑀤𑁂𑀢𑁆𑀯𑀸 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸.

𑀕𑀭𑀼𑀲𑀁𑀯𑀸𑀲𑁄𑀢𑀺 𑀕𑀭𑀼𑀁 𑀉𑀧𑀦𑀺𑀲𑁆𑀲𑀸𑀬 𑀯𑀸𑀲𑁄. 𑀉𑀤𑁆𑀤𑁂𑀲𑁄𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀉𑀤𑁆𑀤𑀺𑀲𑀸𑀧𑀦𑀜𑁆𑀘𑁂𑀯 𑀉𑀤𑁆𑀤𑀺𑀲𑀦𑀜𑁆𑀘. 𑀉𑀤𑁆𑀤𑀺𑀝𑁆𑀞𑀧𑀭𑀺𑀧𑀼𑀘𑁆𑀙𑀦𑀦𑁆𑀢𑀺 𑀬𑀣𑀸𑀉𑀕𑁆𑀕𑀳𑀺𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀸. 𑀧𑀜𑁆𑀘 𑀥𑀫𑁆𑀫𑀽𑀧𑀦𑀺𑀲𑁆𑀲𑀸𑀬𑀸𑀢𑀺 𑀕𑀭𑀼𑀲𑀁𑀯𑀸𑀲𑀸𑀤𑀺𑀓𑁂 𑀧𑀜𑁆𑀘 𑀥𑀫𑁆𑀫𑁂 𑀧𑀝𑀺𑀘𑁆𑀘. 𑀫𑁄𑀳𑀥𑀸𑀢𑀽𑀢𑀺 𑀫𑁄𑀳𑁄.

𑀉𑀧𑀦𑀺𑀲𑁆𑀲𑀺𑀢𑀩𑁆𑀩𑀸𑀢𑀺 𑀉𑀧𑀦𑀺𑀲𑁆𑀲𑀬𑀺𑀢𑀩𑁆𑀩𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀬𑀢𑁆𑀢𑀧𑁆𑀧𑀝𑀺𑀬𑀢𑁆𑀢𑁄𑀢𑀺 𑀬𑀢𑁆𑀢𑁄 𑀘 𑀕𑀸𑀫𑀧𑁆𑀧𑀯𑁂𑀲𑀦𑀸𑀧𑀼𑀘𑁆𑀙𑀸𑀓𑀭𑀡𑁂𑀲𑀼 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄 𑀲𑀚𑁆𑀚𑀺𑀢𑁄 𑀘 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣𑀲𑁆𑀲 𑀫𑁄𑀳𑁄 𑀧𑀳𑀻𑀬𑀢𑀻𑀢𑀺 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀢𑀢𑁆𑀣 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲 𑀧𑀘𑁆𑀙𑀸 𑀲𑁄 𑀫𑁄𑀳𑁄 𑀯𑀺𑀕𑀘𑁆𑀙𑀢𑀺. 𑀏𑀯𑀫𑁆𑀧𑀻𑀢𑀺 𑀏𑀯𑀁 𑀉𑀤𑁆𑀤𑁂𑀲𑁂 𑀅𑀧𑁆𑀧𑀫𑀚𑁆𑀚𑀦𑁂𑀦𑀧𑀺. 𑀧𑀼𑀦 𑀏𑀯𑀫𑁆𑀧𑀻𑀢𑀺 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀸𑀬 𑀓𑀗𑁆𑀔𑀸𑀯𑀺𑀦𑁄𑀤𑀦𑁂𑀧𑀺. 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀅𑀢𑁆𑀣𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀲𑀼𑀬𑁆𑀬𑀫𑀸𑀦𑀲𑁆𑀲 𑀥𑀫𑁆𑀫𑀲𑁆𑀲 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑀼 ‘‘𑀇𑀥 𑀲𑀻𑀮𑀁 𑀓𑀣𑀺𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀧𑀜𑁆𑀜𑀸’’𑀢𑀺 𑀲𑁄 𑀲𑁄 𑀅𑀢𑁆𑀣𑁄 𑀯𑀺𑀪𑀽𑀢𑁄 𑀳𑁄𑀢𑀺. 𑀇𑀤𑀁 𑀘𑀓𑁆𑀔𑀼𑀭𑀽𑀧𑀸𑀮𑁄𑀓𑀸𑀤𑀺 𑀇𑀫𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀓𑀸𑀭𑀡𑀁, 𑀇𑀤𑀁 𑀲𑀸𑀮𑀺𑀩𑀻𑀚𑀪𑀽𑀫𑀺𑀲𑀮𑀺𑀮𑀸𑀤𑀺 𑀇𑀫𑀲𑁆𑀲 𑀲𑀸𑀮𑀺𑀅𑀗𑁆𑀓𑀼𑀭𑀲𑁆𑀲 𑀓𑀸𑀭𑀡𑀁. 𑀇𑀤𑀁 𑀦 𑀓𑀸𑀭𑀡𑀦𑁆𑀢𑀺 𑀢𑀤𑁂𑀯 𑀘𑀓𑁆𑀔𑀼𑀭𑀽𑀧𑀸𑀮𑁄𑀓𑀸𑀤𑀺 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲, 𑀢𑀤𑁂𑀯 𑀲𑀸𑀮𑀺𑀩𑀻𑀚𑀸𑀤𑀺 𑀓𑀼𑀤𑁆𑀭𑀼𑀲𑀓𑀗𑁆𑀓𑀼𑀭𑀲𑁆𑀲 𑀦 𑀓𑀸𑀭𑀡𑀦𑁆𑀢𑀺 𑀞𑀸𑀦𑀸𑀝𑁆𑀞𑀸𑀦𑀯𑀺𑀦𑀺𑀘𑁆𑀙𑀬𑁂 𑀙𑁂𑀓𑁄 𑀳𑁄𑀢𑀺.

𑀆𑀭𑀫𑁆𑀫𑀡𑁂𑀲𑀽𑀢𑀺 𑀓𑀫𑁆𑀫𑀝𑁆𑀞𑀸𑀦𑁂𑀲𑀼. 𑀇𑀫𑁂 𑀯𑀺𑀢𑀓𑁆𑀓𑀸𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄. 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀲𑀩𑁆𑀩𑀸𑀓𑀼𑀲𑀮𑀧𑀝𑀺𑀧𑀓𑁆𑀔𑀸𑀢𑀺 𑀓𑀢𑁆𑀯𑀸 ‘‘𑀧𑀳𑀻𑀬𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀦 𑀲𑀩𑁆𑀩𑁂 𑀲𑀩𑁆𑀩𑁂𑀲𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀽𑀢𑀸𑀢𑀺 ‘‘𑀧𑀳𑀻𑀬𑀦𑁆𑀢𑀺 𑀏𑀯𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀇𑀫𑀸𑀦𑀻’’𑀢𑀺𑀆𑀤𑀺.

𑀓𑀼𑀲𑀮𑀦𑀺𑀲𑁆𑀲𑀺𑀢𑀦𑁆𑀢𑀺 𑀓𑀼𑀲𑀮𑁂𑀦 𑀦𑀺𑀲𑁆𑀲𑀺𑀢𑀁 𑀦𑀺𑀲𑁆𑀲𑀬𑀺𑀢𑀩𑁆𑀩𑀁. 𑀓𑀼𑀲𑀮𑀲𑁆𑀲 𑀧𑀘𑁆𑀘𑀬𑀪𑀽𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀬𑀣𑀸𑀯𑀼𑀢𑁆𑀢𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀫𑁂𑀯 𑀯𑀤𑀢𑀺. 𑀲𑀸𑀭𑀨𑀮𑀓𑁂𑀢𑀺 𑀘𑀦𑁆𑀤𑀦𑀫𑀬𑁂 𑀲𑀸𑀭𑀨𑀮𑀓𑁂. 𑀯𑀺𑀲𑀫𑀸𑀡𑀺𑀦𑁆𑀢𑀺 𑀯𑀺𑀲𑀫𑀸𑀓𑀸𑀭𑁂𑀦 𑀢𑀢𑁆𑀣 𑀞𑀺𑀢𑀁 𑀆𑀡𑀺𑀁. 𑀳𑀦𑁂𑀬𑁆𑀬𑀸𑀢𑀺 𑀧𑀳𑀭𑁂𑀬𑁆𑀬 𑀦𑀺𑀓𑁆𑀔𑀸𑀫𑁂𑀬𑁆𑀬.

𑁨𑁧𑁭. 𑀅𑀝𑁆𑀝𑁄𑀢𑀺 𑀆𑀢𑀼𑀭𑁄, 𑀤𑀼𑀕𑁆𑀕𑀦𑁆𑀥𑀩𑀸𑀥𑀢𑀸𑀬 𑀧𑀻𑀴𑀺𑀢𑁄. 𑀤𑀼𑀓𑁆𑀔𑀺𑀢𑁄𑀢𑀺 𑀲𑀜𑁆𑀚𑀸𑀢𑀤𑀼𑀓𑁆𑀔𑁄. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦𑀸𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀢𑀸𑀬 𑀓𑀼𑀲𑀮𑀧𑀝𑀺𑀧𑀓𑁆𑀔𑀢𑀸𑀬 𑀕𑁂𑀳𑀲𑁆𑀲𑀺𑀢𑀭𑁄𑀕𑁂𑀦 𑀲𑀭𑁄𑀕𑀢𑀸𑀬 𑀘 𑀏𑀢𑁂 𑀅𑀓𑀼𑀲𑀮𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀩𑁆𑀩𑀢𑀸𑀬 𑀚𑀺𑀕𑀼𑀘𑁆𑀙𑀦𑀻𑀬𑀢𑀸𑀬 𑀘 𑀲𑀸𑀯𑀚𑁆𑀚𑀸 𑀅𑀦𑀺𑀝𑁆𑀞𑀨𑀮𑀢𑀸𑀬 𑀦𑀺𑀭𑀲𑁆𑀲𑀸𑀤𑀲𑀁𑀯𑀢𑁆𑀢𑀦𑀺𑀬𑀢𑀸𑀬 𑀘 𑀤𑀼𑀓𑁆𑀔𑀯𑀺𑀧𑀸𑀓𑀸𑀢𑀺 𑀏𑀯𑀁 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀅𑀓𑀼𑀲𑀮𑀸𑀤𑀺𑀪𑀸𑀯𑀁 𑀉𑀧𑀧𑀭𑀺𑀓𑁆𑀔𑀢𑁄.

‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁, 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢’’𑀦𑁆𑀢𑀺. (𑀅𑀧. 𑀣𑁂𑀭𑀻 𑁨.𑁪.𑁧𑁫𑁭) 𑁋

𑀏𑀯𑀫𑀸𑀤𑀺 𑀓𑀸𑀬𑀯𑀺𑀘𑁆𑀙𑀦𑁆𑀤𑀦𑀻𑀬𑀓𑀣𑀸𑀤𑀻𑀳𑀺 𑀯𑀸. 𑀆𑀤𑀺-𑀲𑀤𑁆𑀤𑁂𑀦 𑁋

‘‘𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁄, 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺;

𑀓𑀼𑀤𑁆𑀥𑀁 𑀅𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄, 𑀲𑀗𑁆𑀕𑀸𑀫𑀁 𑀚𑁂𑀢𑀺 𑀤𑀼𑀚𑁆𑀚𑀬’’𑀦𑁆𑀢𑀺. (𑀣𑁂𑀭𑀕𑀸. 𑁪𑁪𑁨) 𑁋

𑀏𑀯𑀫𑀸𑀤𑀺 𑀧𑀝𑀺𑀖𑀯𑀽𑀧𑀲𑀫𑀦𑀓𑀣𑀸𑀤𑀺𑀓𑀸𑀧𑀺 𑀲𑀗𑁆𑀕𑀡𑁆𑀳𑀸𑀢𑀺.

𑁨𑁧𑁮. 𑀦 𑀲𑀭𑀡𑀁 𑀅𑀲𑀢𑀺, 𑀅𑀦𑀦𑀼𑀲𑁆𑀲𑀭𑀡𑀁. 𑀅𑀫𑀦𑀲𑀺𑀓𑀭𑀡𑀁 𑀅𑀫𑀦𑀲𑀺𑀓𑀸𑀭𑁄. 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀉𑀕𑁆𑀕𑀳𑀺𑀢𑁄 𑀥𑀫𑁆𑀫𑀓𑀣𑀸𑀧𑀩𑀦𑁆𑀥𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀧𑀓𑀸𑀭𑁄 𑀥𑀫𑁆𑀫𑀓𑀣𑀸𑀧𑀩𑀦𑁆𑀥𑁄. 𑀫𑀼𑀝𑁆𑀞𑀺𑀧𑁄𑀢𑁆𑀣𑀓𑁄𑀢𑀺 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑁄 𑀧𑀸𑀭𑀺𑀳𑀸𑀭𑀺𑀬𑀧𑁄𑀢𑁆𑀣𑀓𑁄. 𑀲𑀫𑀦𑁆𑀦𑀸𑀦𑁂𑀦𑁆𑀢𑁂𑀦𑀸𑀢𑀺 𑀲𑀫𑀦𑁆𑀦𑀸𑀳𑀭𑀦𑁆𑀢𑁂𑀦. 𑀑𑀓𑀸𑀲𑁄 𑀦 𑀳𑁄𑀢𑀺 𑀆𑀭𑀤𑁆𑀥𑀲𑁆𑀲 𑀧𑀭𑀺𑀬𑁄𑀲𑀸𑀧𑁂𑀢𑀩𑁆𑀩𑀢𑁄. 𑀆𑀭𑀤𑁆𑀥𑀲𑁆𑀲 𑀅𑀦𑁆𑀢𑀕𑀫𑀦𑀁 𑀅𑀦𑀸𑀭𑀫𑁆𑀪𑁄𑀯𑀸𑀢𑀺 𑀣𑁂𑀭𑀯𑀸𑀤𑁄. 𑀢𑀲𑁆𑀲𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲. 𑀧𑀩𑁆𑀪𑀸𑀭𑀲𑁄𑀥𑀦𑀁 𑀓𑀸𑀬𑀓𑀫𑁆𑀫𑀁, 𑀆𑀭𑀪𑀦𑁆𑀢𑁄 𑀏𑀯 𑀯𑀺𑀢𑀓𑁆𑀓𑀦𑀺𑀕𑁆𑀕𑀡𑁆𑀳𑀦𑀢𑁆𑀣𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀲𑀚𑁆𑀛𑀸𑀬𑀦𑀁 𑀯𑀘𑀻𑀓𑀫𑁆𑀫𑀁, 𑀤𑀲𑁆𑀲𑀦𑀓𑀺𑀘𑁆𑀘𑀧𑀼𑀩𑁆𑀩𑀓𑀫𑁆𑀫𑀓𑀭𑀡𑀢𑁆𑀣𑀁 𑀢𑁂𑀚𑁄𑀓𑀲𑀺𑀡𑀧𑀭𑀺𑀓𑀫𑁆𑀫𑀦𑁆𑀢𑀺 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀆𑀘𑀺𑀦𑁄𑀢𑀺. 𑀣𑁂𑀭𑁄 𑀢𑀲𑁆𑀲 𑀆𑀲𑀬𑀁 𑀓𑀲𑀺𑀡𑀜𑁆𑀘 𑀲𑀯𑀺𑀲𑁂𑀲𑀁 𑀚𑀸𑀦𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂’’𑀢𑀺𑀆𑀤𑀺𑀫𑀯𑁄𑀘. 𑀢𑁂𑀦𑀲𑁆𑀲 𑀬𑀣𑀸𑀥𑀺𑀧𑁆𑀧𑀸𑀬𑀁 𑀲𑀩𑁆𑀩𑀁 𑀲𑀫𑁆𑀧𑀸𑀤𑀺𑀢𑀁. 𑀅𑀲𑀢𑀺𑀧𑀩𑁆𑀩𑀁 𑀦𑀸𑀫 𑀅𑀲𑀢𑀺𑀬𑀸 𑀯𑀺𑀢𑀓𑁆𑀓𑀦𑀺𑀕𑁆𑀕𑀳𑀡𑀯𑀺𑀪𑀸𑀯𑀦𑀢𑁄.

𑁨𑁧𑁯. 𑀯𑀺𑀢𑀓𑁆𑀓𑀫𑀽𑀮𑀪𑁂𑀤𑀁 𑀧𑀩𑁆𑀩𑀦𑁆𑀢𑀺 𑀯𑀺𑀢𑀓𑁆𑀓𑀫𑀽𑀮𑀲𑁆𑀲 𑀢𑀫𑁆𑀫𑀽𑀮𑀲𑁆𑀲 𑀘 𑀪𑁂𑀤𑀯𑀺𑀪𑀸𑀯𑀦𑀁 𑀯𑀺𑀢𑀓𑁆𑀓𑀫𑀽𑀮𑀪𑁂𑀤𑀁 𑀧𑀩𑁆𑀩𑀁. 𑀯𑀺𑀢𑀓𑁆𑀓𑀁 𑀲𑀗𑁆𑀔𑀭𑁄𑀢𑀻𑀢𑀺 𑀯𑀺𑀢𑀓𑁆𑀓𑀲𑀗𑁆𑀔𑀸𑀭𑁄, 𑀯𑀺𑀢𑀓𑁆𑀓𑀧𑀘𑁆𑀘𑀬𑁄 𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀻𑀲𑀼𑀧𑀺 𑀲𑀼𑀪𑀸𑀤𑀺𑀦𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄. 𑀲𑁄 𑀧𑀦 𑀯𑀺𑀢𑀓𑁆𑀓𑀲𑀗𑁆𑀔𑀸𑀭𑁄 𑀲𑀁𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀯𑀺𑀢𑀓𑁆𑀓𑀲𑀗𑁆𑀔𑀸𑀭𑀲𑀡𑁆𑀞𑀸𑀦𑀁, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺𑀆𑀤𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄. 𑀢𑁂𑀦𑀸𑀳 ‘‘𑀯𑀺𑀢𑀓𑁆𑀓𑀸𑀦𑀁 𑀫𑀽𑀮𑀜𑁆𑀘 𑀫𑀽𑀮𑀫𑀽𑀮𑀜𑁆𑀘 𑀫𑀦𑀲𑀺 𑀓𑀸𑀢𑀩𑁆𑀩’’𑀦𑁆𑀢𑀺. 𑀯𑀺𑀢𑀓𑁆𑀓𑀸𑀦𑀁 𑀫𑀽𑀮𑀫𑀽𑀮𑀁 𑀕𑀘𑁆𑀙𑀦𑁆𑀢𑀲𑁆𑀲𑀸𑀢𑀺 𑀉𑀧𑀧𑀭𑀺𑀓𑁆𑀔𑀦𑀯𑀲𑁂𑀦 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀁 𑀫𑀽𑀮𑀁 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀜𑀸𑀡𑀕𑀢𑀺𑀬𑀸 𑀕𑀘𑁆𑀙𑀦𑁆𑀢𑀲𑁆𑀲. 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑀲𑁆𑀲 𑀧𑀼𑀩𑁆𑀩𑁂 𑀯𑀺𑀬 𑀯𑀺𑀢𑀓𑁆𑀓𑀸 𑀅𑀪𑀺𑀡𑁆𑀳𑀁 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀯𑀺𑀢𑀓𑁆𑀓𑀘𑀸𑀭𑁄 𑀲𑀺𑀣𑀺𑀮𑁄 𑀳𑁄𑀢𑀻’’𑀢𑀺. 𑀢𑀲𑁆𑀫𑀺𑀁 𑀲𑀺𑀣𑀺𑀮𑀻𑀪𑀽𑀢𑁂 𑀫𑀢𑁆𑀣𑀓𑀁 𑀕𑀘𑁆𑀙𑀦𑁆𑀢𑁂𑀢𑀺 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑀓𑁆𑀓𑀘𑀸𑀭𑁄 𑀲𑀺𑀣𑀺𑀮𑀪𑀽𑀢𑁄, 𑀢𑀲𑁆𑀫𑀺𑀁 𑀯𑀺𑀢𑀓𑁆𑀓𑀸𑀦𑀁 𑀫𑀽𑀮𑀕𑀫𑀦𑁂 𑀅𑀦𑀼𑀓𑁆𑀓𑀫𑁂𑀦 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀫𑀢𑁆𑀣𑀓𑀁 𑀕𑀘𑁆𑀙𑀦𑁆𑀢𑁂. 𑀯𑀺𑀢𑀓𑁆𑀓𑀸 𑀲𑀩𑁆𑀩𑀲𑁄 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀲𑀩𑁆𑀩𑁂𑀧𑀺 𑀕𑀘𑁆𑀙𑀦𑁆𑀢𑀺 𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀯𑀸 𑀅𑀦𑀯𑀲𑁂𑀲𑀸 𑀧𑀳𑀻𑀬𑀦𑁆𑀢𑀺.

𑀓𑀡𑁆𑀡𑀫𑀽𑀮𑁂 𑀧𑀢𑀺𑀢𑀦𑁆𑀢𑀺 𑀲𑀲𑀓𑀲𑁆𑀲 𑀓𑀡𑁆𑀡𑀲𑀫𑀻𑀧𑁂 𑀓𑀡𑁆𑀡𑀲𑀓𑁆𑀔𑀮𑀺𑀁 𑀧𑀳𑀭𑀦𑁆𑀢𑀁 𑀯𑀺𑀬 𑀉𑀧𑀧𑀢𑀺𑀢𑀁. 𑀢𑀲𑁆𑀲 𑀓𑀺𑀭 𑀲𑀲𑀓𑀲𑁆𑀲 𑀳𑁂𑀝𑁆𑀞𑀸 𑀫𑀳𑀸𑀫𑀽𑀲𑀺𑀓𑀸𑀳𑀺 𑀔𑀢𑀫𑀳𑀸𑀯𑀸𑀝𑀁 𑀉𑀫𑀗𑁆𑀕𑀲𑀤𑀺𑀲𑀁 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀧𑀸𑀢𑁂𑀦 𑀫𑀳𑀸𑀲𑀤𑁆𑀤𑁄 𑀅𑀳𑁄𑀲𑀺. 𑀧𑀮𑀸𑀬𑀺𑀁𑀲𑀼 ‘‘𑀧𑀣𑀯𑀻 𑀉𑀤𑁆𑀭𑀻𑀬𑀢𑀻’’𑀢𑀺. 𑀫𑀽𑀮𑀫𑀽𑀮𑀁 𑀕𑀦𑁆𑀢𑁆𑀯𑀸 𑀅𑀦𑀼𑀯𑀺𑀚𑁆𑀚𑁂𑀬𑁆𑀬𑀦𑁆𑀢𑀺 ‘‘𑀧𑀣𑀯𑀻 𑀪𑀺𑀚𑁆𑀚𑀢𑀻’’𑀢𑀺 𑀬𑀢𑁆𑀣𑀸𑀬𑀁 𑀲𑀲𑁄 𑀉𑀝𑁆𑀞𑀺𑀢𑁄, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀫𑀽𑀮𑀓𑀸𑀭𑀡𑀁 𑀬𑀁𑀦𑀽𑀦 𑀯𑀻𑀫𑀁𑀲𑁂𑀬𑁆𑀬𑀁. 𑀧𑀣𑀯𑀺𑀬𑀸 𑀪𑀺𑀚𑁆𑀚𑀦𑀝𑁆𑀞𑀸𑀦𑀁 𑀕𑀢𑁂 ‘‘𑀓𑁄 𑀚𑀸𑀦𑀸𑀢𑀺, 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀲𑁄 ‘‘𑀦 𑀲𑀓𑁆𑀓𑁄𑀫𑀺 𑀲𑀸𑀫𑀻’’𑀢𑀺 𑀆𑀳. 𑀆𑀥𑀺𑀧𑀘𑁆𑀘𑀯𑀢𑁄 𑀳𑀺 𑀬𑀸𑀘𑀦𑀁 𑀲𑀡𑁆𑀳𑀫𑀼𑀤𑀼𑀓𑀁. 𑀤𑀼𑀤𑁆𑀤𑀼𑀪𑀸𑀬𑀢𑀻𑀢𑀺 𑀤𑀼𑀤𑁆𑀤𑀼𑀪𑀸𑀢𑀺 𑀲𑀤𑁆𑀤𑀁 𑀓𑀭𑁄𑀢𑀺. 𑀅𑀦𑀼𑀭𑀯𑀤𑀲𑁆𑀲𑀦𑀜𑁆𑀳𑁂𑀢𑀁. 𑀪𑀤𑁆𑀤𑀦𑁆𑀢𑁂𑀢𑀺 𑀫𑀺𑀕𑀭𑀸𑀚𑀲𑁆𑀲 𑀧𑀺𑀬𑀲𑀫𑀼𑀤𑀸𑀘𑀸𑀭𑁄, 𑀫𑀺𑀕𑀭𑀸𑀚, 𑀪𑀤𑁆𑀤𑀁 𑀢𑁂 𑀅𑀢𑁆𑀣𑀽𑀢𑀺 𑀅𑀢𑁆𑀣𑁄. 𑀓𑀺𑀫𑁂𑀢𑀦𑁆𑀢𑀺 𑀓𑀺𑀁 𑀏𑀢𑀁, 𑀓𑀺𑀁 𑀢𑀲𑁆𑀲 𑀫𑀽𑀮𑀓𑀸𑀭𑀡𑀁? 𑀤𑀼𑀤𑁆𑀤𑀼𑀪𑀦𑁆𑀢𑀺 𑀇𑀤𑀫𑁆𑀧𑀺 𑀢𑀲𑁆𑀲 𑀅𑀦𑀼𑀭𑀯𑀤𑀲𑁆𑀲𑀦𑀫𑁂𑀯. 𑀏𑀯𑀦𑁆𑀢𑀺 𑀬𑀣𑀸 𑀲𑀲𑀓𑀲𑁆𑀲 𑀫𑀳𑀸𑀧𑀣𑀯𑀻𑀪𑁂𑀤𑀦𑀁 𑀭𑀯𑀦𑀸𑀬 𑀫𑀺𑀘𑁆𑀙𑀸𑀕𑀸𑀳𑀲𑀫𑀼𑀝𑁆𑀞𑀸𑀦𑀁 𑀅𑀫𑀽𑀮𑀁, 𑀏𑀯𑀁 𑀯𑀺𑀢𑀓𑁆𑀓𑀘𑀸𑀭𑁄𑀧𑀺 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀲𑀫𑀼𑀝𑁆𑀞𑀸𑀦𑁄 𑀅𑀫𑀽𑀮𑁄. 𑀢𑁂𑀦𑀸𑀳 ‘‘𑀯𑀺𑀢𑀓𑁆𑀓𑀸𑀦’’𑀦𑁆𑀢𑀺𑀆𑀤𑀺.

𑁨𑁨𑁦. 𑀅𑀪𑀺𑀤𑀦𑁆𑀢𑀦𑁆𑀢𑀺 𑀅𑀪𑀺𑀪𑀯𑀦𑀤𑀦𑁆𑀢𑀁, 𑀉𑀧𑀭𑀺𑀤𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀉𑀧𑀭𑀺𑀤𑀦𑁆𑀢’’𑀦𑁆𑀢𑀺. 𑀲𑁄 𑀳𑀺 𑀇𑀢𑀭𑀁 𑀫𑀼𑀲𑀮𑀁 𑀯𑀺𑀬 𑀉𑀤𑀼𑀓𑁆𑀔𑀮𑀁 𑀯𑀺𑀲𑁂𑀲𑀢𑁄 𑀓𑀲𑁆𑀲𑀘𑀺 𑀔𑀸𑀤𑀦𑀓𑀸𑀮𑁂 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑀢𑀺. 𑀓𑀼𑀲𑀮𑀘𑀺𑀢𑁆𑀢𑁂𑀦𑀸𑀢𑀺 𑀩𑀮𑀯𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑀫𑁆𑀧𑀬𑀼𑀢𑁆𑀢𑁂𑀦. 𑀅𑀓𑀼𑀲𑀮𑀘𑀺𑀢𑁆𑀢𑀦𑁆𑀢𑀺 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀲𑀳𑀺𑀢𑀁 𑀅𑀓𑀼𑀲𑀮𑀘𑀺𑀢𑁆𑀢𑀁. 𑀅𑀪𑀺𑀦𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑀦𑁆𑀢𑀺 𑀬𑀣𑀸 𑀢𑀲𑁆𑀲 𑀆𑀬𑀢𑀺𑀁 𑀲𑀫𑀼𑀤𑀸𑀘𑀸𑀭𑁄 𑀦 𑀳𑁄𑀢𑀺, 𑀏𑀯𑀁 𑀅𑀪𑀺𑀪𑀯𑀺𑀢𑁆𑀯𑀸 𑀦𑀺𑀕𑁆𑀕𑀳𑁂𑀢𑀩𑁆𑀩𑀁, 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸 𑀆𑀧𑀸𑀤𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀓𑁂 𑀘 𑀢𑀼𑀫𑁆𑀳𑁂 𑀲𑀢𑀺𑀧𑀺 𑀘𑀺𑀭𑀓𑀸𑀮𑀪𑀸𑀯𑀦𑀸𑀬 𑀏𑀯𑀁 𑀅𑀤𑀼𑀩𑁆𑀩𑀮𑀸 𑀓𑁄 𑀘𑀸𑀳𑀁 𑀫𑀫 𑀲𑀦𑁆𑀢𑀺𑀓𑁂 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑁂 𑀯𑀺𑀬 𑀞𑀺𑀢𑁂𑀧𑀺 𑀇𑀤𑀸𑀦𑁂𑀯 𑀅𑀧𑁆𑀧𑀢𑀺𑀝𑁆𑀞𑁂 𑀓𑀭𑁄𑀦𑁆𑀢𑁄 𑀇𑀢𑀺 𑀏𑀯𑀁 𑀅𑀪𑀺𑀪𑀯𑀺𑀢𑁆𑀯𑀸. 𑀢𑀁 𑀧𑀦 𑀅𑀪𑀺𑀪𑀯𑀦𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀁 𑀢𑀘𑁄 𑀘𑀸’’𑀢𑀺𑀆𑀤𑀺𑀦𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀯𑀻𑀭𑀺𑀬𑀧𑀕𑁆𑀕𑀡𑁆𑀳𑀦𑀫𑀸𑀳. 𑀅𑀢𑁆𑀣𑀤𑀻𑀧𑀺𑀓𑀦𑁆𑀢𑀺 𑀏𑀓𑀦𑁆𑀢𑀢𑁄 𑀯𑀺𑀢𑀓𑁆𑀓𑀦𑀺𑀕𑁆𑀕𑀡𑁆𑀳𑀦𑀢𑁆𑀣𑀚𑁄𑀢𑀓𑀁. 𑀉𑀧𑀫𑀦𑁆𑀢𑀺 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀩𑀮𑀯𑀸 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀓𑀁 𑀉𑀧𑀫𑀁.

𑁨𑁨𑁧. 𑀧𑀭𑀺𑀬𑀸𑀤𑀸𑀦𑀪𑀸𑀚𑀦𑀻𑀬𑀦𑁆𑀢𑀺 𑀬𑀁 𑀢𑀁 𑀆𑀤𑀺𑀢𑁄 ‘‘𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘 𑀦𑀺𑀫𑀺𑀢𑁆𑀢𑀸𑀦𑀺 𑀓𑀸𑀮𑁂𑀦 𑀓𑀸𑀮𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸𑀦𑀻’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀢𑁆𑀣 𑀢𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀫𑀦𑀲𑀺𑀓𑀭𑀡𑀓𑀸𑀮𑀧𑀭𑀺𑀬𑀸𑀤𑀸𑀦𑀲𑁆𑀲 𑀯𑀲𑁂𑀦 𑀯𑀺𑀪𑀚𑀦𑀁. 𑀦𑀺𑀕𑀫𑀦𑀁 𑀯𑀸 𑀏𑀢𑀁, 𑀬𑀤𑀺𑀤𑀁 ‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺. 𑀬𑀣𑀸𑀯𑀼𑀢𑁆𑀢𑀲𑁆𑀲 𑀳𑀺 𑀅𑀢𑁆𑀣𑀲𑁆𑀲 𑀧𑀼𑀦 𑀯𑀘𑀦𑀁 𑀦𑀺𑀕𑀫𑀦𑀦𑁆𑀢𑀺. 𑀢𑀣𑀸𑀧𑀝𑀺𑀧𑀦𑁆𑀦𑀲𑁆𑀲 𑀯𑀸 𑀯𑀲𑀻𑀪𑀸𑀯𑀯𑀺𑀲𑀼𑀤𑁆𑀥𑀺𑀤𑀲𑁆𑀲𑀦𑀢𑁆𑀣𑀁 ‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑁆𑀣𑀸𑀘𑀭𑀺𑀬𑁄𑀢𑀺 𑀥𑀦𑀼𑀩𑁆𑀩𑁂𑀤𑀸𑀘𑀭𑀺𑀬𑁄. 𑀬𑀣𑀸 𑀳𑀺 𑀲𑀲𑀦𑀢𑁄 𑀅𑀲𑀢𑁆𑀣𑀫𑁆𑀧𑀺 𑀲𑀢𑁆𑀣𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀕𑀬𑁆𑀳𑀢𑀺, 𑀏𑀯𑀁 𑀥𑀦𑀼𑀲𑀺𑀧𑁆𑀧𑀫𑁆𑀧𑀺 𑀥𑀦𑀼𑀩𑁆𑀩𑁂𑀤𑀧𑀭𑀺𑀬𑀸𑀧𑀦𑁆𑀦𑀫𑁂𑀯𑀸𑀢𑀺.

𑀧𑀭𑀺𑀬𑀸𑀬𑀢𑀺 𑀧𑀭𑀺𑀯𑀺𑀢𑀓𑁆𑀓𑁂𑀢𑀻𑀢𑀺 𑀧𑀭𑀺𑀬𑀸𑀬𑁄. 𑀯𑀸𑀭𑁄𑀢𑀺 𑀆𑀳 ‘‘𑀯𑀺𑀢𑀓𑁆𑀓𑀯𑀸𑀭𑀧𑀣𑁂𑀲𑀽’’𑀢𑀺, 𑀯𑀺𑀢𑀓𑁆𑀓𑀸𑀦𑀁 𑀯𑀸𑀭𑁂𑀦 𑀧𑀯𑀢𑁆𑀢𑀦𑀫𑀕𑁆𑀕𑁂𑀲𑀼. 𑀘𑀺𑀡𑁆𑀡𑀯𑀲𑀻𑀢𑀺 𑀆𑀲𑁂𑀯𑀺𑀢𑀯𑀲𑀻. 𑀧𑀕𑀼𑀡𑀯𑀲𑀻𑀢𑀺 𑀲𑀼𑀪𑀸𑀯𑀺𑀢𑀯𑀲𑀻. 𑀲𑀫𑁆𑀫𑀸𑀯𑀺𑀢𑀓𑁆𑀓𑀁𑀬𑁂𑀯 𑀬𑀣𑀺𑀘𑁆𑀙𑀺𑀢𑀁 𑀢𑀣𑀸𑀯𑀺𑀢𑀓𑁆𑀓𑀦𑀢𑁄, 𑀇𑀢𑀭𑀲𑁆𑀲 𑀧𑀦𑀲𑁆𑀲 𑀲𑁂𑀢𑀼𑀖𑀸𑀢𑁄𑀬𑁂𑀯𑀸𑀢𑀺.

𑀯𑀺𑀢𑀓𑁆𑀓𑀲𑀡𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀻𑀳𑀦𑀸𑀤𑀯𑀕𑁆𑀕𑀯𑀡𑁆𑀡𑀦𑀸.